Free Online FOOD for MIND & HUNGER - DO GOOD 😊 PURIFY MIND.To live like free birds 🐦 🦢 🦅 grow fruits 🍍 🍊 🥑 🥭 🍇 🍌 🍎 🍉 🍒 🍑 🥝 vegetables 🥦 🥕 🥗 🥬 🥔 🍆 🥜 🎃 🫑 🍅🍜 🧅 🍄 🍝 🥗 🥒 🌽 🍏 🫑 🌳 🍓 🍊 🥥 🌵 🍈 🌰 🇧🇧 🫐 🍅 🍐 🫒Plants 🌱in pots 🪴 along with Meditative Mindful Swimming 🏊‍♂️ to Attain NIBBĀNA the Eternal Bliss.

Kushinara NIBBĀNA Bhumi Pagoda White Home, Puniya Bhumi Bengaluru, Prabuddha Bharat International.

Categories:

Search:

Archives:

Meta:

April 2024

M	T	W	T	F	S	S
« Jan
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30

08/09/07

ஸுத்தபிடக-Part-36-தமிழில் திரபிடக மூன்று தொகுப்புகள்TIPITAKA–36.2. ஸீஹனாதவக்கோ-1. சூளஸீஹனாதஸுத்தங்-from FREE ONLINE eNālāndā Research and Practice UNIVERSITY through http://sarvajan.ambedkar.org

Filed under: General
Posted by: site admin @ 8:33 am

ஸுத்தபிடக-Part-36-தமிழில் திரபிடக மூன்று தொகுப்புகள்TIPITAKA--36.2. ஸீஹனாதவக்கோ-1. சூளஸீஹனாதஸுத்தங்-from FREE ONLINE eNālāndā Research and
Practice UNIVERSITY through http://sarvajan.ambedkar.org

2. ஸீஹனாதவக்கோ

1. சூளஸீஹனாதஸுத்தங்

139. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –

‘‘இதே⁴வ, பி⁴க்க²வே, ஸமணோ, இத⁴ து³தியோ ஸமணோ, இத⁴ ததியோ ஸமணோ, இத⁴ சதுத்தோ² ஸமணோ; ஸுஞ்ஞா பரப்பவாதா³ ஸமணேபி⁴ அஞ்ஞேஹீதி [ஸமணேஹி அஞ்ஞேதி (ஸீ॰ பீ॰ க॰) எத்த² அஞ்ஞேஹீதி ஸகாய படிஞ்ஞாய ஸச்சாபி⁴ஞ்ஞேஹீதி அத்தோ² வேதி³தப்³போ³]. ஏவமேதங் [ஏவமேவ (ஸ்யா॰ க॰)], பி⁴க்க²வே, ஸம்மா ஸீஹனாத³ங் நத³த².

140.
‘‘டா²னங் கோ² பனேதங், பி⁴க்க²வே, விஜ்ஜதி யங் அஞ்ஞதித்தி²யா பரிப்³பா³ஜகா
ஏவங் வதெ³ய்யுங் – ‘கோ பனாயஸ்மந்தானங் அஸ்ஸாஸோ, கிங் ப³லங், யேன தும்ஹே
ஆயஸ்மந்தோ ஏவங் வதே³த² – இதே⁴வ ஸமணோ, இத⁴ து³தியோ ஸமணோ, இத⁴ ததியோ ஸமணோ,
இத⁴ சதுத்தோ² ஸமணோ; ஸுஞ்ஞா பரப்பவாதா³ ஸமணேபி⁴ அஞ்ஞேஹீ’தி? ஏவங்வாதி³னோ,
பி⁴க்க²வே, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘அத்தி² கோ² நோ,
ஆவுஸோ, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரோ த⁴ம்மா
அக்கா²தா யே மயங் அத்தனி ஸம்பஸ்ஸமானா ஏவங் வதே³ம – இதே⁴வ ஸமணோ, இத⁴ து³தியோ
ஸமணோ, இத⁴ ததியோ ஸமணோ, இத⁴ சதுத்தோ² ஸமணோ; ஸுஞ்ஞா
பரப்பவாதா³ ஸமணேபி⁴ அஞ்ஞேஹீதி. கதமே சத்தாரோ? அத்தி² கோ² நோ, ஆவுஸோ,
ஸத்த²ரி பஸாதோ³, அத்தி² த⁴ம்மே பஸாதோ³, அத்தி² ஸீலேஸு பரிபூரகாரிதா;
ஸஹத⁴ம்மிகா கோ² பன பியா மனாபா – க³ஹட்டா² சேவ பப்³ப³ஜிதா ச. இமே கோ² நோ,
ஆவுஸோ, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரோ த⁴ம்மா
அக்கா²தா யே மயங் அத்தனி ஸம்பஸ்ஸமானா ஏவங் வதே³ம – இதே⁴வ ஸமணோ, இத⁴ து³தியோ
ஸமணோ, இத⁴ ததியோ ஸமணோ, இத⁴ சதுத்தோ² ஸமணோ; ஸுஞ்ஞா பரப்பவாதா³ ஸமணேபி⁴
அஞ்ஞேஹீ’தி.

141. ‘‘டா²னங்
கோ² பனேதங், பி⁴க்க²வே, விஜ்ஜதி யங் அஞ்ஞதித்தி²யா பரிப்³பா³ஜகா ஏவங்
வதெ³ய்யுங் – ‘அம்ஹாகம்பி கோ², ஆவுஸோ, அத்தி² ஸத்த²ரி பஸாதோ³ யோ அம்ஹாகங்
ஸத்தா², அம்ஹாகம்பி அத்தி² த⁴ம்மே பஸாதோ³ யோ அம்ஹாகங் த⁴ம்மோ, மயம்பி
ஸீலேஸு பரிபூரகாரினோ யானி அம்ஹாகங் ஸீலானி, அம்ஹாகம்பி ஸஹத⁴ம்மிகா பியா
மனாபா – க³ஹட்டா² சேவ பப்³ப³ஜிதா ச. இத⁴ நோ, ஆவுஸோ, கோ விஸேஸோ கோ
அதி⁴ப்பயாஸோ [அதி⁴ப்பாயோ (க॰ ஸீ॰ ஸ்யா॰ பீ॰), அதி⁴ப்பயோகோ³ (க॰)] கிங் நானாகரணங் யதி³த³ங் தும்ஹாகஞ்சேவ அம்ஹாகஞ்சா’தி?

‘‘ஏவங்வாதி³னோ, பி⁴க்க²வே, அஞ்ஞதித்தி²யா பரிப்³பா³ஜகா
ஏவமஸ்ஸு வசனீயா – ‘கிங் பனாவுஸோ, ஏகா நிட்டா², உதா³ஹு புது² நிட்டா²’தி?
ஸம்மா ப்³யாகரமானா, பி⁴க்க²வே, அஞ்ஞதித்தி²யா பரிப்³பா³ஜகா ஏவங்
ப்³யாகரெய்யுங் – ‘ஏகாவுஸோ, நிட்டா², ந புது² நிட்டா²’தி.

‘‘‘ஸா பனாவுஸோ, நிட்டா² ஸராக³ஸ்ஸ உதா³ஹு வீதராக³ஸ்ஸா’தி? ஸம்மா ப்³யாகரமானா, பி⁴க்க²வே, அஞ்ஞதித்தி²யா பரிப்³பா³ஜகா ஏவங் ப்³யாகரெய்யுங் – ‘வீதராக³ஸ்ஸாவுஸோ, ஸா நிட்டா², ந ஸா நிட்டா² ஸராக³ஸ்ஸா’தி.

‘‘‘ஸா பனாவுஸோ, நிட்டா² ஸதோ³ஸஸ்ஸ உதா³ஹு
வீததோ³ஸஸ்ஸா’தி? ஸம்மா ப்³யாகரமானா, பி⁴க்க²வே, அஞ்ஞதித்தி²யா பரிப்³பா³ஜகா
ஏவங் ப்³யாகரெய்யுங் – ‘வீததோ³ஸஸ்ஸாவுஸோ, ஸா நிட்டா², ந ஸா நிட்டா²
ஸதோ³ஸஸ்ஸா’தி.

‘‘‘ஸா பனாவுஸோ, நிட்டா² ஸமோஹஸ்ஸ உதா³ஹு வீதமோஹஸ்ஸா’தி?
ஸம்மா ப்³யாகரமானா, பி⁴க்க²வே, அஞ்ஞதித்தி²யா பரிப்³பா³ஜகா ஏவங்
ப்³யாகரெய்யுங் – ‘வீதமோஹஸ்ஸாவுஸோ, ஸா நிட்டா², ந ஸா நிட்டா² ஸமோஹஸ்ஸா’தி.

‘‘‘ஸா பனாவுஸோ, நிட்டா² ஸதண்ஹஸ்ஸ உதா³ஹு வீததண்ஹஸ்ஸா’தி? ஸம்மா
ப்³யாகரமானா, பி⁴க்க²வே, அஞ்ஞதித்தி²யா பரிப்³பா³ஜகா ஏவங் ப்³யாகரெய்யுங் –
‘வீததண்ஹஸ்ஸாவுஸோ, ஸா நிட்டா², ந ஸா நிட்டா² ஸதண்ஹஸ்ஸா’தி.

‘‘‘ஸா பனாவுஸோ, நிட்டா² ஸஉபாதா³னஸ்ஸ உதா³ஹு அனுபாதா³னஸ்ஸா’தி? ஸம்மா ப்³யாகரமானா, பி⁴க்க²வே , அஞ்ஞதித்தி²யா பரிப்³பா³ஜகா ஏவங் ப்³யாகரெய்யுங் – ‘அனுபாதா³னஸ்ஸாவுஸோ, ஸா நிட்டா², ந ஸா நிட்டா² ஸஉபாதா³னஸ்ஸா’தி.

‘‘‘ஸா பனாவுஸோ, நிட்டா²
வித்³த³ஸுனோ உதா³ஹு அவித்³த³ஸுனோ’தி? ஸம்மா ப்³யாகரமானா, பி⁴க்க²வே,
அஞ்ஞதித்தி²யா பரிப்³பா³ஜகா ஏவங் ப்³யாகரெய்யுங் – ‘வித்³த³ஸுனோ, ஆவுஸோ, ஸா
நிட்டா², ந ஸா நிட்டா² அவித்³த³ஸுனோ’தி.

‘‘‘ஸா பனாவுஸோ, நிட்டா² அனுருத்³த⁴ப்படிவிருத்³த⁴ஸ்ஸ
உதா³ஹு அனநுருத்³த⁴அப்படிவிருத்³த⁴ஸ்ஸா’தி? ஸம்மா ப்³யாகரமானா, பி⁴க்க²வே,
அஞ்ஞதித்தி²யா பரிப்³பா³ஜகா ஏவங் ப்³யாகரெய்யுங் –
‘அனநுருத்³த⁴அப்படிவிருத்³த⁴ஸ்ஸாவுஸோ, ஸா நிட்டா², ந ஸா நிட்டா²
அனுருத்³த⁴ப்படிவிருத்³த⁴ஸ்ஸா’தி.

‘‘‘ஸா பனாவுஸோ, நிட்டா²
பபஞ்சாராமஸ்ஸ பபஞ்சரதினோ உதா³ஹு நிப்பபஞ்சாராமஸ்ஸ நிப்பபஞ்சரதினோ’தி? ஸம்மா
ப்³யாகரமானா, பி⁴க்க²வே, அஞ்ஞதித்தி²யா பரிப்³பா³ஜகா ஏவங் ப்³யாகரெய்யுங் –
‘நிப்பபஞ்சாராமஸ்ஸாவுஸோ, ஸா நிட்டா² நிப்பபஞ்சரதினோ, ந ஸா நிட்டா²
பபஞ்சாராமஸ்ஸ பபஞ்சரதினோ’தி.

142.
‘‘த்³வேமா, பி⁴க்க²வே, தி³ட்டி²யோ – ப⁴வதி³ட்டி² ச விப⁴வதி³ட்டி² ச. யே ஹி
கேசி, பி⁴க்க²வே, ஸமணா வா ப்³ராஹ்மணா வா ப⁴வதி³ட்டி²ங் அல்லீனா
ப⁴வதி³ட்டி²ங் உபக³தா ப⁴வதி³ட்டி²ங் அஜ்ஜோ²ஸிதா, விப⁴வதி³ட்டி²யா தே
படிவிருத்³தா⁴. யே ஹி கேசி, பி⁴க்க²வே, ஸமணா வா ப்³ராஹ்மணா வா
விப⁴வதி³ட்டி²ங் அல்லீனா விப⁴வதி³ட்டி²ங் உபக³தா விப⁴வதி³ட்டி²ங்
அஜ்ஜோ²ஸிதா, ப⁴வதி³ட்டி²யா தே படிவிருத்³தா⁴. யே ஹி கேசி, பி⁴க்க²வே, ஸமணா
வா ப்³ராஹ்மணா வா இமாஸங் த்³வின்னங் தி³ட்டீ²னங் ஸமுத³யஞ்ச அத்த²ங்க³மஞ்ச
அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் நப்பஜானந்தி, ‘தே ஸராகா³ தே
ஸதோ³ஸா தே ஸமோஹா தே ஸதண்ஹா தே ஸஉபாதா³னா தே அவித்³த³ஸுனோ தே
அனுருத்³த⁴ப்படிவிருத்³தா⁴ தே பபஞ்சாராமா பபஞ்சரதினோ; தே ந பரிமுச்சந்தி
ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி; ந
பரிமுச்சந்தி து³க்க²ஸ்மா’தி வதா³மி. யே ச கோ² கேசி, பி⁴க்க²வே, ஸமணா வா
ப்³ராஹ்மணா வா இமாஸங் த்³வின்னங் தி³ட்டீ²னங் ஸமுத³யஞ்ச அத்த²ங்க³மஞ்ச
அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் பஜானந்தி, ‘தே வீதராகா³ தே
வீததோ³ஸா தே வீதமோஹா தே வீததண்ஹா தே அனுபாதா³னா தே வித்³த³ஸுனோ தே அனநுருத்³த⁴அப்படிவிருத்³தா⁴ தே நிப்பபஞ்சாராமா நிப்பபஞ்சரதினோ; தே பரிமுச்சந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி; பரிமுச்சந்தி து³க்க²ஸ்மா’தி வதா³மி.

143. ‘‘சத்தாரிமானி ,
பி⁴க்க²வே, உபாதா³னானி. கதமானி சத்தாரி? காமுபாதா³னங், தி³ட்டு²பாதா³னங்,
ஸீலப்³ப³துபாதா³னங், அத்தவாது³பாதா³னங். ஸந்தி, பி⁴க்க²வே, ஏகே
ஸமணப்³ராஹ்மணா ஸப்³பு³பாதா³னபரிஞ்ஞாவாதா³ படிஜானமானா. தே ந ஸம்மா
ஸப்³பு³பாதா³னபரிஞ்ஞங் பஞ்ஞபெந்தி – காமுபாதா³னஸ்ஸ பரிஞ்ஞங் பஞ்ஞபெந்தி, ந
தி³ட்டு²பாதா³னஸ்ஸ பரிஞ்ஞங் பஞ்ஞபெந்தி, ந ஸீலப்³ப³துபாதா³னஸ்ஸ பரிஞ்ஞங்
பஞ்ஞபெந்தி, ந அத்தவாது³பாதா³னஸ்ஸ பரிஞ்ஞங் பஞ்ஞபெந்தி. தங் கிஸ்ஸ ஹேது?
இமானி ஹி தே பொ⁴ந்தோ ஸமணப்³ராஹ்மணா தீணி டா²னானி யதா²பூ⁴தங் நப்பஜானந்தி.
தஸ்மா தே பொ⁴ந்தோ ஸமணப்³ராஹ்மணா ஸப்³பு³பாதா³னபரிஞ்ஞாவாதா³ படிஜானமானா; தே ந
ஸம்மா ஸப்³பு³பாதா³னபரிஞ்ஞங் பஞ்ஞபெந்தி – காமுபாதா³னஸ்ஸ பரிஞ்ஞங்
பஞ்ஞபெந்தி, ந தி³ட்டு²பாதா³னஸ்ஸ பரிஞ்ஞங் பஞ்ஞபெந்தி, ந
ஸீலப்³ப³துபாதா³னஸ்ஸ பரிஞ்ஞங் பஞ்ஞபெந்தி, ந அத்தவாது³பாதா³னஸ்ஸ பரிஞ்ஞங்
பஞ்ஞபெந்தி.

‘‘ஸந்தி, பி⁴க்க²வே, ஏகே ஸமணப்³ராஹ்மணா
ஸப்³பு³பாதா³னபரிஞ்ஞாவாதா³ படிஜானமானா. தே ந ஸம்மா ஸப்³பு³பாதா³னபரிஞ்ஞங்
பஞ்ஞபெந்தி – காமுபாதா³னஸ்ஸ பரிஞ்ஞங் பஞ்ஞபெந்தி, தி³ட்டு²பாதா³னஸ்ஸ
பரிஞ்ஞங் பஞ்ஞபெந்தி, ந ஸீலப்³ப³துபாதா³னஸ்ஸ
பரிஞ்ஞங் பஞ்ஞபெந்தி, ந அத்தவாது³பாதா³னஸ்ஸ பரிஞ்ஞங் பஞ்ஞபெந்தி. தங் கிஸ்ஸ
ஹேது? இமானி ஹி தே பொ⁴ந்தோ ஸமணப்³ராஹ்மணா த்³வே டா²னானி யதா²பூ⁴தங்
நப்பஜானந்தி. தஸ்மா தே பொ⁴ந்தோ ஸமணப்³ராஹ்மணா ஸப்³பு³பாதா³னபரிஞ்ஞாவாதா³
படிஜானமானா; தே ந ஸம்மா [படிஜானமானா ந ஸம்மா (?)]
ஸப்³பு³பாதா³னபரிஞ்ஞங் பஞ்ஞபெந்தி – காமுபாதா³னஸ்ஸ பரிஞ்ஞங் பஞ்ஞபெந்தி,
தி³ட்டு²பாதா³னஸ்ஸ பரிஞ்ஞங் பஞ்ஞபெந்தி, ந ஸீலப்³ப³துபாதா³னஸ்ஸ பரிஞ்ஞங்
பஞ்ஞபெந்தி, ந அத்தவாது³பாதா³னஸ்ஸ பரிஞ்ஞங் பஞ்ஞபெந்தி.

‘‘ஸந்தி, பி⁴க்க²வே, ஏகே ஸமணப்³ராஹ்மணா
ஸப்³பு³பாதா³னபரிஞ்ஞாவாதா³ படிஜானமானா. தே ந ஸம்மா ஸப்³பு³பாதா³னபரிஞ்ஞங்
பஞ்ஞபெந்தி – காமுபாதா³னஸ்ஸ பரிஞ்ஞங் பஞ்ஞபெந்தி, தி³ட்டு²பாதா³னஸ்ஸ
பரிஞ்ஞங் பஞ்ஞபெந்தி, ஸீலப்³ப³துபாதா³னஸ்ஸ பரிஞ்ஞங் பஞ்ஞபெந்தி, ந
அத்தவாது³பாதா³னஸ்ஸ பரிஞ்ஞங் பஞ்ஞபெந்தி. தங் கிஸ்ஸ ஹேது? இமஞ்ஹி தே
பொ⁴ந்தோ ஸமணப்³ராஹ்மணா ஏகங் டா²னங் யதா²பூ⁴தங் நப்பஜானந்தி. தஸ்மா தே
பொ⁴ந்தோ ஸமணப்³ராஹ்மணா ஸப்³பு³பாதா³னபரிஞ்ஞாவாதா³ படிஜானமானா; தே ந ஸம்மா [படிஜானமானா ந ஸம்மா (?)] ஸப்³பு³பாதா³னபரிஞ்ஞங் பஞ்ஞபெந்தி – காமுபாதா³னஸ்ஸ பரிஞ்ஞங் பஞ்ஞபெந்தி, தி³ட்டு²பாதா³னஸ்ஸ பரிஞ்ஞங் பஞ்ஞபெந்தி, ஸீலப்³ப³துபாதா³னஸ்ஸ பரிஞ்ஞங் பஞ்ஞபெந்தி, ந அத்தவாது³பாதா³னஸ்ஸ பரிஞ்ஞங் பஞ்ஞபெந்தி.

‘‘ஏவரூபே கோ², பி⁴க்க²வே, த⁴ம்மவினயே யோ ஸத்த²ரி பஸாதோ³ ஸோ ந ஸம்மக்³க³தோ அக்கா²யதி; யோ
த⁴ம்மே பஸாதோ³ ஸோ ந ஸம்மக்³க³தோ அக்கா²யதி; யா ஸீலேஸு பரிபூரகாரிதா ஸா ந
ஸம்மக்³க³தா அக்கா²யதி; யா ஸஹத⁴ம்மிகேஸு பியமனாபதா ஸா ந ஸம்மக்³க³தா
அக்கா²யதி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி யதா² தங்
து³ரக்கா²தே த⁴ம்மவினயே து³ப்பவேதி³தே அனிய்யானிகே அனுபஸமஸங்வத்தனிகே அஸம்மாஸம்பு³த்³த⁴ப்பவேதி³தே.

144.
‘‘ததா²க³தோ ச கோ², பி⁴க்க²வே, அரஹங் ஸம்மாஸம்பு³த்³தோ⁴
ஸப்³பு³பாதா³னபரிஞ்ஞாவாதோ³ படிஜானமானோ ஸம்மா ஸப்³பு³பாதா³னபரிஞ்ஞங்
பஞ்ஞபேதி – காமுபாதா³னஸ்ஸ பரிஞ்ஞங் பஞ்ஞபேதி, தி³ட்டு²பாதா³னஸ்ஸ பரிஞ்ஞங்
பஞ்ஞபேதி, ஸீலப்³ப³துபாதா³னஸ்ஸ பரிஞ்ஞங் பஞ்ஞபேதி, அத்தவாது³பாதா³னஸ்ஸ
பரிஞ்ஞங் பஞ்ஞபேதி. ஏவரூபே கோ², பி⁴க்க²வே, த⁴ம்மவினயே யோ ஸத்த²ரி பஸாதோ³
ஸோ ஸம்மக்³க³தோ அக்கா²யதி; யோ த⁴ம்மே பஸாதோ³ ஸோ ஸம்மக்³க³தோ அக்கா²யதி; யா
ஸீலேஸு பரிபூரகாரிதா ஸா ஸம்மக்³க³தா அக்கா²யதி; யா ஸஹத⁴ம்மிகேஸு பியமனாபதா
ஸா ஸம்மக்³க³தா அக்கா²யதி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி
யதா² தங் ஸ்வாக்கா²தே த⁴ம்மவினயே ஸுப்பவேதி³தே நிய்யானிகே உபஸமஸங்வத்தனிகே
ஸம்மாஸம்பு³த்³த⁴ப்பவேதி³தே.

145.
‘‘இமே ச, பி⁴க்க²வே, சத்தாரோ உபாதா³னா. கிங்னிதா³னா கிங்ஸமுத³யா
கிங்ஜாதிகா கிங்பப⁴வா? இமே சத்தாரோ உபாதா³னா தண்ஹானிதா³னா தண்ஹாஸமுத³யா
தண்ஹாஜாதிகா தண்ஹாபப⁴வா. தண்ஹா சாயங், பி⁴க்க²வே, கிங்னிதா³னா கிங்ஸமுத³யா
கிங்ஜாதிகா கிங்பப⁴வா? தண்ஹா வேத³னானிதா³னா வேத³னாஸமுத³யா வேத³னாஜாதிகா
வேத³னாபப⁴வா. வேத³னா சாயங், பி⁴க்க²வே, கிங்னிதா³னா கிங்ஸமுத³யா கிங்ஜாதிகா
கிங்பப⁴வா? வேத³னா ப²ஸ்ஸனிதா³னா ப²ஸ்ஸஸமுத³யா ப²ஸ்ஸஜாதிகா ப²ஸ்ஸபப⁴வா.
ப²ஸ்ஸோ சாயங், பி⁴க்க²வே, கிங்னிதா³னோ கிங்ஸமுத³யோ கிங்ஜாதிகோ கிங்பப⁴வோ?
ப²ஸ்ஸோ ஸளாயதனநிதா³னோ ஸளாயதனஸமுத³யோ ஸளாயதனஜாதிகோ ஸளாயதனபப⁴வோ.
ஸளாயதனஞ்சித³ங், பி⁴க்க²வே, கிங்னிதா³னங் கிங்ஸமுத³யங் கிங்ஜாதிகங்
கிங்பப⁴வங்? ஸளாயதனங் நாமரூபனிதா³னங் நாமரூபஸமுத³யங் நாமரூபஜாதிகங்
நாமரூபபப⁴வங். நாமரூபஞ்சித³ங், பி⁴க்க²வே, கிங்னிதா³னங் கிங்ஸமுத³யங்
கிங்ஜாதிகங் கிங்பப⁴வங்? நாமரூபங் விஞ்ஞாணனிதா³னங் விஞ்ஞாணஸமுத³யங்
விஞ்ஞாணஜாதிகங் விஞ்ஞாணபப⁴வங். விஞ்ஞாணஞ்சித³ங், பி⁴க்க²வே , கிங்னிதா³னங் கிங்ஸமுத³யங் கிங்ஜாதிகங்
கிங்பப⁴வங்? விஞ்ஞாணங் ஸங்கா²ரனிதா³னங் ஸங்கா²ரஸமுத³யங் ஸங்கா²ரஜாதிகங்
ஸங்கா²ரபப⁴வங். ஸங்கா²ரா சிமே, பி⁴க்க²வே, கிங்னிதா³னா கிங்ஸமுத³யா
கிங்ஜாதிகா கிங்பப⁴வா? ஸங்கா²ரா அவிஜ்ஜானிதா³னா அவிஜ்ஜாஸமுத³யா
அவிஜ்ஜாஜாதிகா அவிஜ்ஜாபப⁴வா.

‘‘யதோ ச கோ², பி⁴க்க²வே, பி⁴க்கு²னோ அவிஜ்ஜா பஹீனா
ஹோதி விஜ்ஜா உப்பன்னா, ஸோ அவிஜ்ஜாவிராகா³ விஜ்ஜுப்பாதா³ நேவ காமுபாதா³னங்
உபாதி³யதி, ந தி³ட்டு²பாதா³னங் உபாதி³யதி, ந ஸீலப்³ப³துபாதா³னங் உபாதி³யதி,
ந அத்தவாது³பாதா³னங் உபாதி³யதி. அனுபாதி³யங் ந பரிதஸ்ஸதி, அபரிதஸ்ஸங்
பச்சத்தஞ்ஞேவ பரினிப்³பா³யதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதீ’’தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.

சூளஸீஹனாத³ஸுத்தங் நிட்டி²தங் பட²மங்.

2. மஹாஸீஹனாத³ஸுத்தங்

146. ஏவங்
மே ஸுதங் – ஏகங் ஸமயங் ப⁴க³வா வேஸாலியங் விஹரதி ப³ஹினக³ரே அபரபுரே
வனஸண்டே³. தேன கோ² பன ஸமயேன ஸுனக்க²த்தோ லிச்ச²விபுத்தோ அசிரபக்கந்தோ ஹோதி
இமஸ்மா த⁴ம்மவினயா. ஸோ வேஸாலியங் பரிஸதி [பரிஸதிங் (ஸீ॰ பீ॰)] ஏவங் [ஏதங் (பீ॰ க॰)] வாசங் பா⁴ஸதி – ‘‘நத்தி² ஸமணஸ்ஸ கோ³தமஸ்ஸ உத்தரி [உத்தரிங் (பீ॰)]
மனுஸ்ஸத⁴ம்மா அலமரியஞாணத³ஸ்ஸனவிஸேஸோ. தக்கபரியாஹதங் ஸமணோ கோ³தமோ த⁴ம்மங்
தே³ஸேதி வீமங்ஸானுசரிதங் ஸயங்படிபா⁴னங். யஸ்ஸ ச க்²வாஸ்ஸ அத்தா²ய த⁴ம்மோ
தே³ஸிதோ ஸோ நிய்யாதி தக்கரஸ்ஸ ஸம்மா து³க்க²க்க²யாயா’’தி.

அத² கோ² ஆயஸ்மா ஸாரிபுத்தோ புப்³ப³ண்ஹஸமயங் நிவாஸெத்வா
பத்தசீவரமாதா³ய வேஸாலிங் பிண்டா³ய பாவிஸி. அஸ்ஸோஸி கோ² ஆயஸ்மா ஸாரிபுத்தோ
ஸுனக்க²த்தஸ்ஸ லிச்ச²விபுத்தஸ்ஸ வேஸாலியங் பரிஸதி ஏவங் வாசங் பா⁴ஸமானஸ்ஸ –
‘‘நத்தி² ஸமணஸ்ஸ கோ³தமஸ்ஸ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ.
தக்கபரியாஹதங் ஸமணோ கோ³தமோ த⁴ம்மங் தே³ஸேதி வீமங்ஸானுசரிதங் ஸயங்படிபா⁴னங். யஸ்ஸ ச க்²வாஸ்ஸ அத்தா²ய த⁴ம்மோ தே³ஸிதோ ஸோ நிய்யாதி தக்கரஸ்ஸ ஸம்மா து³க்க²க்க²யாயா’’தி.

அத² கோ² ஆயஸ்மா ஸாரிபுத்தோ வேஸாலியங் பிண்டா³ய சரித்வா
பச்சா²ப⁴த்தங் பிண்ட³பாதபடிக்கந்தோ யேன ப⁴க³வா தேனுபஸங்கமி; உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா
ஸாரிபுத்தோ ப⁴க³வந்தங் ஏதத³வோச – ‘‘ஸுனக்க²த்தோ, ப⁴ந்தே, லிச்ச²விபுத்தோ
அசிரபக்கந்தோ இமஸ்மா த⁴ம்மவினயா. ஸோ வேஸாலியங் பரிஸதி ஏவங் வாசங் பா⁴ஸதி –
‘நத்தி² ஸமணஸ்ஸ கோ³தமஸ்ஸ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ.
தக்கபரியாஹதங் ஸமணோ கோ³தமோ த⁴ம்மங் தே³ஸேதி வீமங்ஸானுசரிதங் ஸயங்படிபா⁴னங்.
யஸ்ஸ ச க்²வாஸ்ஸ அத்தா²ய த⁴ம்மோ தே³ஸிதோ ஸோ நிய்யாதி தக்கரஸ்ஸ ஸம்மா
து³க்க²க்க²யாயா’’’தி.

147.
‘‘கோத⁴னோ ஹேஸோ, ஸாரிபுத்த, ஸுனக்க²த்தோ மோக⁴புரிஸோ. கோதா⁴ ச பனஸ்ஸ ஏஸா
வாசா பா⁴ஸிதா. ‘அவண்ணங் பா⁴ஸிஸ்ஸாமீ’தி கோ², ஸாரிபுத்த, ஸுனக்க²த்தோ
மோக⁴புரிஸோ வண்ணங்யேவ ததா²க³தஸ்ஸ பா⁴ஸதி .
வண்ணோ ஹேஸோ, ஸாரிபுத்த, ததா²க³தஸ்ஸ யோ ஏவங் வதெ³ய்ய – ‘யஸ்ஸ ச க்²வாஸ்ஸ
அத்தா²ய த⁴ம்மோ தே³ஸிதோ ஸோ நிய்யாதி தக்கரஸ்ஸ ஸம்மா து³க்க²க்க²யாயா’தி.

‘‘அயம்பி ஹி நாம, ஸாரிபுத்த, ஸுனக்க²த்தஸ்ஸ
மோக⁴புரிஸஸ்ஸ மயி த⁴ம்மன்வயோ ந ப⁴விஸ்ஸதி – ‘இதிபி ஸோ ப⁴க³வா அரஹங்
ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ
புரிஸத³ம்மஸாரதி², ஸத்தா² தே³வமனுஸ்ஸானங், பு³த்³தோ⁴ ப⁴க³வா’தி.

‘‘அயம்பி ஹி நாம, ஸாரிபுத்த, ஸுனக்க²த்தஸ்ஸ மோக⁴புரிஸஸ்ஸ மயி
த⁴ம்மன்வயோ ந ப⁴விஸ்ஸதி – ‘இதிபி ஸோ ப⁴க³வா அனேகவிஹிதங் இத்³தி⁴வித⁴ங்
பச்சனுபோ⁴தி – ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி;
ஆவிபா⁴வங், திரோபா⁴வங்; திரோகுட்டங் திரோபாகாரங் திரோபப்³ப³தங் அஸஜ்ஜமானோ
க³ச்ச²தி, ஸெய்யதா²பி ஆகாஸே; பத²வியாபி உம்முஜ்ஜனிமுஜ்ஜங் கரோதி,
ஸெய்யதா²பி உத³கே; உத³கேபி அபி⁴ஜ்ஜமானோ க³ச்ச²தி, ஸெய்யதா²பி பத²வியங்;
ஆகாஸேபி பல்லங்கேன கமதி, ஸெய்யதா²பி பக்கீ² ஸகுணோ; இமேபி சந்தி³மஸூரியே
ஏவங்மஹித்³தி⁴கே ஏவங்மஹானுபா⁴வே பாணினா பரிமஸதி பரிமஜ்ஜதி; யாவ
ப்³ரஹ்மலோகாபி காயேன வஸங் வத்தேதீ’தி.

‘‘அயம்பி ஹி நாம, ஸாரிபுத்த,
ஸுனக்க²த்தஸ்ஸ மோக⁴புரிஸஸ்ஸ மயி த⁴ம்மன்வயோ ந ப⁴விஸ்ஸதி – ‘இதிபி ஸோ ப⁴க³வா
தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³
ஸுணாதி – தி³ப்³பே³ ச மானுஸே ச, யே தூ³ரே ஸந்திகே சா’தி.

‘‘அயம்பி ஹி நாம, ஸாரிபுத்த, ஸுனக்க²த்தஸ்ஸ
மோக⁴புரிஸஸ்ஸ மயி த⁴ம்மன்வயோ ந ப⁴விஸ்ஸதி – ‘இதிபி ஸோ ப⁴க³வா பரஸத்தானங்
பரபுக்³க³லானங் சேதஸா சேதோ பரிச்ச பஜானாதி – ஸராக³ங் வா சித்தங் ஸராக³ங்
சித்தந்தி பஜானாதி, வீதராக³ங் வா சித்தங் வீதராக³ங் சித்தந்தி பஜானாதி;
ஸதோ³ஸங் வா சித்தங் ஸதோ³ஸங் சித்தந்தி பஜானாதி, வீததோ³ஸங் வா சித்தங்
வீததோ³ஸங் சித்தந்தி பஜானாதி; ஸமோஹங் வா சித்தங் ஸமோஹங் சித்தந்தி பஜானாதி,
வீதமோஹங் வா சித்தங் வீதமோஹங் சித்தந்தி பஜானாதி; ஸங்கி²த்தங் வா சித்தங்
ஸங்கி²த்தங் சித்தந்தி பஜானாதி , விக்கி²த்தங் வா
சித்தங் விக்கி²த்தங் சித்தந்தி பஜானாதி; மஹக்³க³தங் வா சித்தங் மஹக்³க³தங்
சித்தந்தி பஜானாதி, அமஹக்³க³தங் வா சித்தங் அமஹக்³க³தங் சித்தந்தி
பஜானாதி; ஸஉத்தரங் வா சித்தங் ஸஉத்தரங் சித்தந்தி பஜானாதி, அனுத்தரங் வா
சித்தங் அனுத்தரங் சித்தந்தி பஜானாதி; ஸமாஹிதங் வா சித்தங் ஸமாஹிதங்
சித்தந்தி பஜானாதி, அஸமாஹிதங் வா சித்தங் அஸமாஹிதங்
சித்தந்தி பஜானாதி; விமுத்தங் வா சித்தங் விமுத்தங் சித்தந்தி பஜானாதி,
அவிமுத்தங் வா சித்தங் அவிமுத்தங் சித்தந்தி பஜானாதீ’தி.

148.
‘‘த³ஸ கோ² பனிமானி, ஸாரிபுத்த, ததா²க³தஸ்ஸ ததா²க³தப³லானி யேஹி ப³லேஹி
ஸமன்னாக³தோ ததா²க³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தி,
ப்³ரஹ்மசக்கங் பவத்தேதி. கதமானி த³ஸ?

‘‘இத⁴, ஸாரிபுத்த, ததா²க³தோ டா²னஞ்ச டா²னதோ அட்டா²னஞ்ச
அட்டா²னதோ யதா²பூ⁴தங் பஜானாதி. யம்பி, ஸாரிபுத்த, ததா²க³தோ டா²னஞ்ச டா²னதோ
அட்டா²னஞ்ச அட்டா²னதோ யதா²பூ⁴தங் பஜானாதி, இத³ம்பி, ஸாரிபுத்த, ததா²க³தஸ்ஸ
ததா²க³தப³லங் ஹோதி யங் ப³லங் ஆக³ம்ம ததா²க³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தி, ப்³ரஹ்மசக்கங் பவத்தேதி.

‘‘புன சபரங், ஸாரிபுத்த, ததா²க³தோ
அதீதானாக³தபச்சுப்பன்னானங் கம்மஸமாதா³னானங் டா²னஸோ ஹேதுஸோ விபாகங்
யதா²பூ⁴தங் பஜானாதி. யம்பி, ஸாரிபுத்த, ததா²க³தோ அதீதானாக³தபச்சுப்பன்னானங்
கம்மஸமாதா³னானங் டா²னஸோ ஹேதுஸோ விபாகங் யதா²பூ⁴தங் பஜானாதி, இத³ம்பி,
ஸாரிபுத்த, ததா²க³தஸ்ஸ ததா²க³தப³லங் ஹோதி யங் ப³லங் ஆக³ம்ம ததா²க³தோ ஆஸப⁴ங்
டா²னங் படிஜானாதி, பரிஸாஸு ஸீஹனாத³ங் நத³தி, ப்³ரஹ்மசக்கங் பவத்தேதி.

‘‘புன சபரங், ஸாரிபுத்த, ததா²க³தோ ஸப்³ப³த்த²கா³மினிங் படிபத³ங் யதா²பூ⁴தங் பஜானாதி. யம்பி ,
ஸாரிபுத்த, ததா²க³தோ ஸப்³ப³த்த²கா³மினிங் படிபத³ங் யதா²பூ⁴தங் பஜானாதி,
இத³ம்பி, ஸாரிபுத்த, ததா²க³தஸ்ஸ ததா²க³தப³லங் ஹோதி யங் ப³லங் ஆக³ம்ம
ததா²க³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தி, ப்³ரஹ்மசக்கங்
பவத்தேதி.

‘‘புன சபரங், ஸாரிபுத்த, ததா²க³தோ
அனேகதா⁴துனானாதா⁴துலோகங் யதா²பூ⁴தங் பஜானாதி. யம்பி, ஸாரிபுத்த, ததா²க³தோ
அனேகதா⁴துனானாதா⁴துலோகங் யதா²பூ⁴தங் பஜானாதி, இத³ம்பி, ஸாரிபுத்த,
ததா²க³தஸ்ஸ ததா²க³தப³லங் ஹோதி யங் ப³லங் ஆக³ம்ம ததா²க³தோ ஆஸப⁴ங் டா²னங்
படிஜானாதி, பரிஸாஸு ஸீஹனாத³ங் நத³தி, ப்³ரஹ்மசக்கங் பவத்தேதி.

‘‘புன சபரங், ஸாரிபுத்த,
ததா²க³தோ ஸத்தானங் நானாதி⁴முத்திகதங் யதா²பூ⁴தங் பஜானாதி. யம்பி,
ஸாரிபுத்த, ததா²க³தோ ஸத்தானங் நானாதி⁴முத்திகதங் யதா²பூ⁴தங் பஜானாதி,
இத³ம்பி, ஸாரிபுத்த, ததா²க³தஸ்ஸ ததா²க³தப³லங் ஹோதி யங் ப³லங் ஆக³ம்ம
ததா²க³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தி, ப்³ரஹ்மசக்கங்
பவத்தேதி.

‘‘புன சபரங், ஸாரிபுத்த, ததா²க³தோ பரஸத்தானங்
பரபுக்³க³லானங் இந்த்³ரியபரோபரியத்தங் யதா²பூ⁴தங் பஜானாதி. யம்பி,
ஸாரிபுத்த, ததா²க³தோ பரஸத்தானங் பரபுக்³க³லானங் இந்த்³ரியபரோபரியத்தங்
யதா²பூ⁴தங் பஜானாதி, இத³ம்பி, ஸாரிபுத்த, ததா²க³தஸ்ஸ ததா²க³தப³லங் ஹோதி யங்
ப³லங் ஆக³ம்ம ததா²க³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தி,
ப்³ரஹ்மசக்கங் பவத்தேதி.

‘‘புன சபரங், ஸாரிபுத்த, ததா²க³தோ
ஜா²னவிமொக்க²ஸமாதி⁴ஸமாபத்தீனங் ஸங்கிலேஸங் வோதா³னங் வுட்டா²னங் யதா²பூ⁴தங்
பஜானாதி. யம்பி, ஸாரிபுத்த, ததா²க³தோ ஜா²னவிமொக்க²ஸமாதி⁴ஸமாபத்தீனங்
ஸங்கிலேஸங் வோதா³னங் வுட்டா²னங் யதா²பூ⁴தங் பஜானாதி, இத³ம்பி, ஸாரிபுத்த,
ததா²க³தஸ்ஸ ததா²க³தப³லங் ஹோதி யங் ப³லங் ஆக³ம்ம ததா²க³தோ ஆஸப⁴ங் டா²னங்
படிஜானாதி, பரிஸாஸு ஸீஹனாத³ங் நத³தி, ப்³ரஹ்மசக்கங் பவத்தேதி.

‘‘புன சபரங், ஸாரிபுத்த,
ததா²க³தோ அனேகவிஹிதங் புப்³பே³னிவாஸங் அனுஸ்ஸரதி, ஸெய்யதி²த³ங் – ஏகம்பி
ஜாதிங் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ
த³ஸபி ஜாதியோ வீஸம்பி ஜாதியோ திங்ஸம்பி ஜாதியோ சத்தாலீஸம்பி ஜாதியோ
பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி அனேகேபி
ஸங்வட்டகப்பே அனேகேபி விவட்டகப்பே அனேகேபி ஸங்வட்டவிவட்டகப்பே –
‘அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ
ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ அமுத்ர
உத³பாதி³ங்; தத்ராபாஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ
ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோ’தி.
இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி. யம்பி,
ஸாரிபுத்த, ததா²க³தோ அனேகவிஹிதங் புப்³பே³னிவாஸங் அனுஸ்ஸரதி, ஸெய்யதி²த³ங் –
ஏகம்பி ஜாதிங் த்³வேபி ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங்
புப்³பே³னிவாஸங் அனுஸ்ஸரதி, இத³ம்பி, ஸாரிபுத்த, ததா²க³தஸ்ஸ ததா²க³தப³லங்
ஹோதி யங் ப³லங் ஆக³ம்ம ததா²க³தோ ஆஸப⁴ங் டா²னங் படிஜானாதி, பரிஸாஸு
ஸீஹனாத³ங் நத³தி, ப்³ரஹ்மசக்கங் பவத்தேதி.

‘‘புன சபரங், ஸாரிபுத்த, ததா²க³தோ தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³
ஸத்தே பஜானாதி – ‘இமே வத பொ⁴ந்தோ ஸத்தா காயது³ச்சரிதேன ஸமன்னாக³தா
வசீது³ச்சரிதேன ஸமன்னாக³தா மனோது³ச்சரிதேன ஸமன்னாக³தா அரியானங் உபவாத³கா
மிச்சா²தி³ட்டி²கா மிச்சா²தி³ட்டி²கம்மஸமாதா³னா, தே காயஸ்ஸ பே⁴தா³
பரங் மரணா அபாயங் து³க்³க³திங் வினிபாதங் நிரயங் உபபன்னா. இமே வா பன
பொ⁴ந்தோ ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன
ஸமன்னாக³தா அரியானங் அனுபவாத³கா ஸம்மாதி³ட்டி²கா
ஸம்மாதி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா ஸுக³திங் ஸக்³க³ங்
லோகங் உபபன்னா’தி. இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன
ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே
து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானாதி. யம்பி,
ஸாரிபுத்த, ததா²க³தோ தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன
ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே
து³க்³க³தே யதா²கம்மூபகே³ ஸத்தே பஜானாதி – ‘இமே வத பொ⁴ந்தோ ஸத்தா
காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன
ஸமன்னாக³தா அரியானங் உபவாத³கா மிச்சா²தி³ட்டி²கா
மிச்சா²தி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா அபாயங்
து³க்³க³திங் வினிபாதங் நிரயங் உபபன்னா. இமே வா பன பொ⁴ந்தோ ஸத்தா
காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா
அரியானங் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா, தே காயஸ்ஸ
பே⁴தா³ பரங் மரணா ஸுக³திங் ஸக்³க³ங் லோகங் உபபன்னா’தி. இதி தி³ப்³பே³ன
சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே
ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே
பஜானாதி. இத³ம்பி, ஸாரிபுத்த, ததா²க³தஸ்ஸ ததா²க³தப³லங் ஹோதி யங் ப³லங்
ஆக³ம்ம ததா²க³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தி,
ப்³ரஹ்மசக்கங் பவத்தேதி.

‘‘புன சபரங், ஸாரிபுத்த, ததா²க³தோ ஆஸவானங் க²யா
அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரதி. யம்பி, ஸாரிபுத்த, ததா²க³தோ ஆஸவானங் க²யா
அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரதி, இத³ம்பி, ஸாரிபுத்த, ததா²க³தஸ்ஸ
ததா²க³தப³லங் ஹோதி யங் ப³லங் ஆக³ம்ம ததா²க³தோ ஆஸப⁴ங் டா²னங் படிஜானாதி,
பரிஸாஸு ஸீஹனாத³ங் நத³தி, ப்³ரஹ்மசக்கங் பவத்தேதி.

‘‘இமானி கோ², ஸாரிபுத்த, த³ஸ ததா²க³தஸ்ஸ ததா²க³தப³லானி
யேஹி ப³லேஹி ஸமன்னாக³தோ ததா²க³தோ ஆஸப⁴ங் டா²னங் படிஜானாதி, பரிஸாஸு
ஸீஹனாத³ங் நத³தி, ப்³ரஹ்மசக்கங் பவத்தேதி.

149. ‘‘யோ
கோ² மங், ஸாரிபுத்த, ஏவங் ஜானந்தங் ஏவங் பஸ்ஸந்தங் ஏவங் வதெ³ய்ய – ‘நத்தி²
ஸமணஸ்ஸ கோ³தமஸ்ஸ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ; தக்கபரியாஹதங்
ஸமணோ கோ³தமோ த⁴ம்மங் தே³ஸேதி வீமங்ஸானுசரிதங்
ஸயங்படிபா⁴ன’ந்தி, தங், ஸாரிபுத்த, வாசங் அப்பஹாய தங் சித்தங் அப்பஹாய தங்
தி³ட்டி²ங் அப்படினிஸ்ஸஜ்ஜித்வா யதா²ப⁴தங் நிக்கி²த்தோ ஏவங் நிரயே.
ஸெய்யதா²பி, ஸாரிபுத்த, பி⁴க்கு² ஸீலஸம்பன்னோ ஸமாதி⁴ஸம்பன்னோ பஞ்ஞாஸம்பன்னோ
தி³ட்டே²வ த⁴ம்மே அஞ்ஞங் ஆராதெ⁴ய்ய, ஏவங்
ஸம்பத³மித³ங், ஸாரிபுத்த, வதா³மி. தங் வாசங் அப்பஹாய, தங் சித்தங் அப்பஹாய
தங் தி³ட்டி²ங் அப்படினிஸ்ஸஜ்ஜித்வா யதா²ப⁴தங் நிக்கி²த்தோ ஏவங் நிரயே.

150.
‘‘சத்தாரிமானி, ஸாரிபுத்த, ததா²க³தஸ்ஸ வேஸாரஜ்ஜானி யேஹி வேஸாரஜ்ஜேஹி
ஸமன்னாக³தோ ததா²க³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தி,
ப்³ரஹ்மசக்கங் பவத்தேதி. கதமானி சத்தாரி?

‘‘‘ஸம்மாஸம்பு³த்³த⁴ஸ்ஸ தே படிஜானதோ இமே த⁴ம்மா
அனபி⁴ஸம்பு³த்³தா⁴’தி. தத்ர வத மங் ஸமணோ வா ப்³ராஹ்மணோ வா தே³வோ வா மாரோ வா
ப்³ரஹ்மா வா கோசி வா லோகஸ்மிங் ஸஹத⁴ம்மேன படிசோதெ³ஸ்ஸதீதி நிமித்தமேதங், ஸாரிபுத்த, ந ஸமனுபஸ்ஸாமி. ஏதமஹங் [ஏதம்பஹங் (ஸீ॰ பீ॰)], ஸாரிபுத்த, நிமித்தங் அஸமனுபஸ்ஸந்தோ கே²மப்பத்தோ அப⁴யப்பத்தோ வேஸாரஜ்ஜப்பத்தோ விஹராமி.

‘‘‘கீ²ணாஸவஸ்ஸ தே படிஜானதோ இமே ஆஸவா அபரிக்கீ²ணா’தி.
தத்ர வத மங் ஸமணோ வா ப்³ராஹ்மணோ வா தே³வோ வா மாரோ வா ப்³ரஹ்மா வா கோசி வா
லோகஸ்மிங் ஸஹத⁴ம்மேன படிசோதெ³ஸ்ஸதீதி நிமித்தமேதங், ஸாரிபுத்த, ந
ஸமனுபஸ்ஸாமி. ஏதமஹங், ஸாரிபுத்த, நிமித்தங் அஸமனுபஸ்ஸந்தோ கே²மப்பத்தோ
அப⁴யப்பத்தோ வேஸாரஜ்ஜப்பத்தோ விஹராமி.

‘‘‘யே கோ² பன தே அந்தராயிகா த⁴ம்மா வுத்தா, தே
படிஸேவதோ நாலங் அந்தராயாயா’தி. தத்ர வத மங் ஸமணோ வா ப்³ராஹ்மணோ வா தே³வோ வா
மாரோ வா ப்³ரஹ்மா வா கோசி வா லோகஸ்மிங் ஸஹத⁴ம்மேன படிசோதெ³ஸ்ஸதீதி
நிமித்தமேதங், ஸாரிபுத்த, ந ஸமனுபஸ்ஸாமி. ஏதமஹங், ஸாரிபுத்த, நிமித்தங்
அஸமனுபஸ்ஸந்தோ கே²மப்பத்தோ அப⁴யப்பத்தோ வேஸாரஜ்ஜப்பத்தோ விஹராமி.

‘‘‘யஸ்ஸ கோ² பன தே அத்தா²ய த⁴ம்மோ தே³ஸிதோ, ஸோ ந நிய்யாதி தக்கரஸ்ஸ ஸம்மா து³க்க²க்க²யாயா’தி .
தத்ர வத மங் ஸமணோ வா ப்³ராஹ்மணோ வா தே³வோ வா மாரோ வா ப்³ரஹ்மா வா கோசி வா
லோகஸ்மிங் ஸஹத⁴ம்மேன படிசோதெ³ஸ்ஸதீ’தி நிமித்தமேதங், ஸாரிபுத்த, ந
ஸமனுபஸ்ஸாமி. ஏதமஹங், ஸாரிபுத்த, நிமித்தங் அஸமனுபஸ்ஸந்தோ கே²மப்பத்தோ
அப⁴யப்பத்தோ வேஸாரஜ்ஜப்பத்தோ விஹராமி.

‘‘இமானி கோ², ஸாரிபுத்த,
சத்தாரி ததா²க³தஸ்ஸ வேஸாரஜ்ஜானி யேஹி வேஸாரஜ்ஜேஹி ஸமன்னாக³தோ ததா²க³தோ
ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தி, ப்³ரஹ்மசக்கங்
பவத்தேதி.

‘‘யோ கோ² மங், ஸாரிபுத்த, ஏவங் ஜானந்தங் ஏவங்
பஸ்ஸந்தங் ஏவங் வதெ³ய்ய – ‘நத்தி² ஸமணஸ்ஸ கோ³தமஸ்ஸ உத்தரிமனுஸ்ஸத⁴ம்மா
அலமரியஞாணத³ஸ்ஸனவிஸேஸோ, தக்கபரியாஹதங் ஸமணோ கோ³தமோ த⁴ம்மங் தே³ஸேதி
வீமங்ஸானுசரிதங் ஸயங்படிபா⁴ன’ந்தி, தங், ஸாரிபுத்த, வாசங் அப்பஹாய தங்
சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா யதா²ப⁴தங் நிக்கி²த்தோ
ஏவங் நிரயே. ஸெய்யதா²பி, ஸாரிபுத்த, பி⁴க்கு² ஸீலஸம்பன்னோ ஸமாதி⁴ஸம்பன்னோ
பஞ்ஞாஸம்பன்னோ தி³ட்டே²வ த⁴ம்மே அஞ்ஞங் ஆராதெ⁴ய்ய,
ஏவங் ஸம்பத³மித³ங், ஸாரிபுத்த, வதா³மி. தங் வாசங் அப்பஹாய தங் சித்தங்
அப்பஹாய தங் தி³ட்டி²ங் அப்படினிஸ்ஸஜ்ஜித்வா யதா²ப⁴தங் நிக்கி²த்தோ ஏவங்
நிரயே.

151. ‘‘அட்ட² கோ² இமா, ஸாரிபுத்த, பரிஸா. கதமா அட்ட²? க²த்தியபரிஸா, ப்³ராஹ்மணபரிஸா, க³ஹபதிபரிஸா, ஸமணபரிஸா, சாதுமஹாராஜிகபரிஸா [சாதும்மஹாராஜிகா (ஸீ॰ ஸ்யா॰ பீ॰)],
தாவதிங்ஸபரிஸா, மாரபரிஸா, ப்³ரஹ்மபரிஸா – இமா கோ², ஸாரிபுத்த, அட்ட²
பரிஸா. இமேஹி கோ², ஸாரிபுத்த, சதூஹி வேஸாரஜ்ஜேஹி ஸமன்னாக³தோ ததா²க³தோ இமா
அட்ட² பரிஸா உபஸங்கமதி அஜ்ஜோ²கா³ஹதி. அபி⁴ஜானாமி கோ² பனாஹங், ஸாரிபுத்த,
அனேகஸதங் க²த்தியபரிஸங் உபஸங்கமிதா. தத்ரபி மயா ஸன்னிஸின்னபுப்³ப³ஞ்சேவ,
ஸல்லபிதபுப்³ப³ஞ்ச, ஸாகச்சா² ச ஸமாபஜ்ஜிதபுப்³பா³. தத்ர வத மங் ப⁴யங் வா
ஸாரஜ்ஜங் வா ஓக்கமிஸ்ஸதீதி நிமித்தமேதங், ஸாரிபுத்த, ந ஸமனுபஸ்ஸாமி.
ஏதமஹங், ஸாரிபுத்த, நிமித்தங் அஸமனுபஸ்ஸந்தோ கே²மப்பத்தோ அப⁴யப்பத்தோ
வேஸாரஜ்ஜப்பத்தோ விஹராமி.

‘‘அபி⁴ஜானாமி கோ² பனாஹங், ஸாரிபுத்த, அனேகஸதங்
ப்³ராஹ்மணபரிஸங்…பே॰… க³ஹபதிபரிஸங்… ஸமணபரிஸங்… சாதுமஹாராஜிகபரிஸங்…
தாவதிங்ஸபரிஸங்… மாரபரிஸங்… ப்³ரஹ்மபரிஸங் உபஸங்கமிதா. தத்ரபி மயா
ஸன்னிஸின்னபுப்³ப³ஞ்சேவ, ஸல்லபிதபுப்³ப³ஞ்ச, ஸாகச்சா² ச ஸமாபஜ்ஜிதபுப்³பா³.
தத்ர வத மங் ப⁴யங் வா ஸாரஜ்ஜங் வா ஓக்கமிஸ்ஸதீதி நிமித்தமேதங், ஸாரிபுத்த , ந ஸமனுபஸ்ஸாமி. ஏதமஹங், ஸாரிபுத்த, நிமித்தங் அஸமனுபஸ்ஸந்தோ கே²மப்பத்தோ அப⁴யப்பத்தோ வேஸாரஜ்ஜப்பத்தோ விஹராமி.

‘‘யோ கோ² மங், ஸாரிபுத்த, ஏவங் ஜானந்தங் ஏவங் பஸ்ஸந்தங் ஏவங் வதெ³ய்ய – ‘நத்தி² ஸமணஸ்ஸ கோ³தமஸ்ஸ உத்தரிமனுஸ்ஸத⁴ம்மா
அலமரியஞாணத³ஸ்ஸனவிஸேஸோ, தக்கபரியாஹதங் ஸமணோ கோ³தமோ த⁴ம்மங் தே³ஸேதி
வீமங்ஸானுசரிதங் ஸயங்படிபா⁴ன’ந்தி, தங், ஸாரிபுத்த, வாசங் அப்பஹாய தங்
சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா யதா²ப⁴தங் நிக்கி²த்தோ
ஏவங் நிரயே. ஸெய்யதா²பி, ஸாரிபுத்த, பி⁴க்கு² ஸீலஸம்பன்னோ ஸமாதி⁴ஸம்பன்னோ
பஞ்ஞாஸம்பன்னோ தி³ட்டே²வ த⁴ம்மே அஞ்ஞங் ஆராதெ⁴ய்ய, ஏவங் ஸம்பத³மித³ங்,
ஸாரிபுத்த, வதா³மி. தங் வாசங் அப்பஹாய தங் சித்தங் அப்பஹாய தங் தி³ட்டி²ங்
அப்படினிஸ்ஸஜ்ஜித்வா யதா²ப⁴தங் நிக்கி²த்தோ ஏவங் நிரயே.

152.
‘‘சதஸ்ஸோ கோ² இமா, ஸாரிபுத்த, யோனியோ. கதமா சதஸ்ஸோ? அண்ட³ஜா யோனி,
ஜலாபு³ஜா யோனி, ஸங்ஸேத³ஜா யோனி, ஓபபாதிகா யோனி. கதமா ச, ஸாரிபுத்த, அண்ட³ஜா
யோனி? யே கோ² தே, ஸாரிபுத்த, ஸத்தா அண்ட³கோஸங் அபி⁴னிப்³பி⁴ஜ்ஜ ஜாயந்தி –
அயங் வுச்சதி, ஸாரிபுத்த, அண்ட³ஜா யோனி. கதமா ச, ஸாரிபுத்த, ஜலாபு³ஜா யோனி?
யே கோ² தே, ஸாரிபுத்த, ஸத்தா வத்தி²கோஸங் அபி⁴னிப்³பி⁴ஜ்ஜ ஜாயந்தி – அயங்
வுச்சதி, ஸாரிபுத்த, ஜலாபு³ஜா யோனி. கதமா ச, ஸாரிபுத்த, ஸங்ஸேத³ஜா யோனி? யே
கோ² தே, ஸாரிபுத்த, ஸத்தா பூதிமச்சே² வா ஜாயந்தி பூதிகுணபே வா
பூதிகும்மாஸே வா சந்த³னிகாயே வா ஓளிக³ல்லே வா ஜாயந்தி – அயங் வுச்சதி,
ஸாரிபுத்த, ஸங்ஸேத³ஜா யோனி. கதமா ச, ஸாரிபுத்த, ஓபபாதிகா யோனி? தே³வா,
நேரயிகா, ஏகச்சே ச மனுஸ்ஸா, ஏகச்சே ச வினிபாதிகா – அயங் வுச்சதி,
ஸாரிபுத்த, ஓபபாதிகா யோனி. இமா கோ², ஸாரிபுத்த, சதஸ்ஸோ யோனியோ.

‘‘யோ கோ² மங், ஸாரிபுத்த, ஏவங்
ஜானந்தங் ஏவங் பஸ்ஸந்தங் ஏவங் வதெ³ய்ய – ‘நத்தி² ஸமணஸ்ஸ கோ³தமஸ்ஸ
உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ, தக்கபரியாஹதங் ஸமணோ கோ³தமோ
த⁴ம்மங் தே³ஸேதி வீமங்ஸானுசரிதங் ஸயங்படிபா⁴ன’ந்தி, தங், ஸாரிபுத்த, வாசங்
அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா யதா²ப⁴தங்
நிக்கி²த்தோ ஏவங் நிரயே. ஸெய்யதா²பி, ஸாரிபுத்த, பி⁴க்கு² ஸீலஸம்பன்னோ
ஸமாதி⁴ஸம்பன்னோ பஞ்ஞாஸம்பன்னோ தி³ட்டே²வ த⁴ம்மே அஞ்ஞங் ஆராதெ⁴ய்ய, ஏவங்
ஸம்பத³மித³ங், ஸாரிபுத்த, வதா³மி. தங் வாசங் அப்பஹாய தங் சித்தங் அப்பஹாய
தங் தி³ட்டி²ங் அப்படினிஸ்ஸஜ்ஜித்வா யதா²ப⁴தங் நிக்கி²த்தோ ஏவங் நிரயே.

153. ‘‘பஞ்ச
கோ² இமா, ஸாரிபுத்த, க³தியோ. கதமா பஞ்ச? நிரயோ, திரச்சா²னயோனி,
பெத்திவிஸயோ, மனுஸ்ஸா, தே³வா. நிரயஞ்சாஹங், ஸாரிபுத்த, பஜானாமி,
நிரயகா³மிஞ்ச மக்³க³ங், நிரயகா³மினிஞ்ச படிபத³ங்; யதா² படிபன்னோ ச காயஸ்ஸ
பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி தஞ்ச
பஜானாமி. திரச்சா²னயோனிஞ்சாஹங், ஸாரிபுத்த, பஜானாமி, திரச்சா²னயோனிகா³மிஞ்ச
மக்³க³ங், திரச்சா²னயோனிகா³மினிஞ்ச படிபத³ங்; யதா² படிபன்னோ ச காயஸ்ஸ
பே⁴தா³ பரங் மரணா திரச்சா²னயோனிங் உபபஜ்ஜதி தஞ்ச பஜானாமி. பெத்திவிஸயங்
சாஹங், ஸாரிபுத்த, பஜானாமி, பெத்திவிஸயகா³மிஞ்ச மக்³க³ங்,
பெத்திவிஸயகா³மினிஞ்ச படிபத³ங்; யதா² படிபன்னோ ச காயஸ்ஸ பே⁴தா³ பரங் மரணா
பெத்திவிஸயங் உபபஜ்ஜதி தஞ்ச பஜானாமி. மனுஸ்ஸே சாஹங், ஸாரிபுத்த, பஜானாமி,
மனுஸ்ஸலோககா³மிஞ்ச மக்³க³ங் , மனுஸ்ஸலோககா³மினிஞ்ச
படிபத³ங்; யதா² படிபன்னோ ச காயஸ்ஸ பே⁴தா³ பரங் மரணா மனுஸ்ஸேஸு உபபஜ்ஜதி
தஞ்ச பஜானாமி. தே³வே சாஹங், ஸாரிபுத்த, பஜானாமி, தே³வலோககா³மிஞ்ச மக்³க³ங்,
தே³வலோககா³மினிஞ்ச படிபத³ங்; யதா² படிபன்னோ ச காயஸ்ஸ பே⁴தா³ பரங் மரணா
ஸுக³திங் ஸக்³க³ங் லோகங் உபபஜ்ஜதி தஞ்ச பஜானாமி. நிப்³பா³னஞ்சாஹங்,
ஸாரிபுத்த, பஜானாமி, நிப்³பா³னகா³மிஞ்ச மக்³க³ங், நிப்³பா³னகா³மினிஞ்ச
படிபத³ங்; யதா² படிபன்னோ ச ஆஸவானங் க²யா அனாஸவங் சேதோவிமுத்திங்
பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹரதி தஞ்ச பஜானாமி.

154.
‘‘இதா⁴ஹங், ஸாரிபுத்த, ஏகச்சங் புக்³க³லங் ஏவங் சேதஸா சேதோ பரிச்ச பஜானாமி
– ததா²யங் புக்³க³லோ படிபன்னோ ததா² ச இரியதி தஞ்ச மக்³க³ங் ஸமாரூள்ஹோ,
யதா² காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங்
உபபஜ்ஜிஸ்ஸதீதி. தமேனங் பஸ்ஸாமி அபரேன ஸமயேன தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன காயஸ்ஸ பே⁴தா³ பரங் மரணா அபாயங்
து³க்³க³திங் வினிபாதங் நிரயங் உபபன்னங், ஏகந்தது³க்கா² திப்³பா³ கடுகா
வேத³னா வேத³யமானங். ஸெய்யதா²பி, ஸாரிபுத்த, அங்கா³ரகாஸு ஸாதி⁴கபோரிஸா பூரா
அங்கா³ரானங் வீதச்சிகானங் வீததூ⁴மானங். அத² புரிஸோ ஆக³ச்செ²ய்ய
க⁴ம்மாபி⁴தத்தோ க⁴ம்மபரேதோ கிலந்தோ தஸிதோ பிபாஸிதோ ஏகாயனேன மக்³கே³ன தமேவ
அங்கா³ரகாஸுங் பணிதா⁴ய. தமேனங் சக்கு²மா புரிஸோ தி³ஸ்வா ஏவங் வதெ³ய்ய –
‘ததா²யங் ப⁴வங் புரிஸோ படிபன்னோ ததா² ச இரியதி தஞ்ச மக்³க³ங் ஸமாரூள்ஹோ, யதா² இமங்யேவ அங்கா³ரகாஸுங் ஆக³மிஸ்ஸதீ’தி . தமேனங் பஸ்ஸெய்ய அபரேன ஸமயேன தஸ்ஸா அங்கா³ரகாஸுயா
பதிதங், ஏகந்தது³க்கா² திப்³பா³ கடுகா வேத³னா வேத³யமானங். ஏவமேவ கோ² அஹங்,
ஸாரிபுத்த, இதே⁴கச்சங் புக்³க³லங் ஏவங் சேதஸா சேதோ பரிச்ச பஜானாமி –
ததா²யங் புக்³க³லோ படிபன்னோ ததா² ச இரியதி தஞ்ச மக்³க³ங் ஸமாரூள்ஹோ யதா²
காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங்
உபபஜ்ஜிஸ்ஸதீதி. தமேனங் பஸ்ஸாமி அபரேன ஸமயேன தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன காயஸ்ஸ பே⁴தா³ பரங் மரணா அபாயங்
து³க்³க³திங் வினிபாதங் நிரயங் உபபன்னங், ஏகந்தது³க்கா² திப்³பா³ கடுகா
வேத³னா வேத³யமானங்.

‘‘இத⁴ பனாஹங், ஸாரிபுத்த, ஏகச்சங் புக்³க³லங் ஏவங்
சேதஸா சேதோ பரிச்ச பஜானாமி – ததா²யங் புக்³க³லோ படிபன்னோ ததா² ச இரியதி
தஞ்ச மக்³க³ங் ஸமாரூள்ஹோ, யதா² காயஸ்ஸ பே⁴தா³ பரங் மரணா திரச்சா²னயோனிங்
உபபஜ்ஜிஸ்ஸதீதி. தமேனங் பஸ்ஸாமி அபரேன ஸமயேன தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன காயஸ்ஸ பே⁴தா³ பரங் மரணா திரச்சா²னயோனிங்
உபபன்னங், து³க்கா² திப்³பா³ கடுகா வேத³னா வேத³யமானங். ஸெய்யதா²பி,
ஸாரிபுத்த, கூ³த²கூபோ ஸாதி⁴கபோரிஸோ, பூரோ கூ³த²ஸ்ஸ. அத² புரிஸோ ஆக³ச்செ²ய்ய
க⁴ம்மாபி⁴தத்தோ க⁴ம்மபரேதோ கிலந்தோ தஸிதோ பிபாஸிதோ
ஏகாயனேன மக்³கே³ன தமேவ கூ³த²கூபங் பணிதா⁴ய. தமேனங் சக்கு²மா புரிஸோ
தி³ஸ்வா ஏவங் வதெ³ய்ய – ‘ததா²யங் ப⁴வங் புரிஸோ படிபன்னோ ததா²
ச இரியதி தஞ்ச மக்³க³ங் ஸமாரூள்ஹோ யதா² இமங்யேவ கூ³த²கூபங் ஆக³மிஸ்ஸதீ’தி.
தமேனங் பஸ்ஸெய்ய அபரேன ஸமயேன தஸ்மிங் கூ³த²கூபே பதிதங், து³க்கா² திப்³பா³
கடுகா வேத³னா வேத³யமானங். ஏவமேவ கோ² அஹங், ஸாரிபுத்த, இதே⁴கச்சங்
புக்³க³லங் ஏவங் சேதஸா சேதோ பரிச்ச பஜானாமி – ததா²யங் புக்³க³லோ படிபன்னோ
ததா² ச இரியதி தஞ்ச மக்³க³ங் ஸமாரூள்ஹோ, யதா² காயஸ்ஸ பே⁴தா³ பரங் மரணா
திரச்சா²னயோனிங் உபபஜ்ஜிஸ்ஸதீதி. தமேனங் பஸ்ஸாமி அபரேன ஸமயேன தி³ப்³பே³ன
சக்கு²னா விஸுத்³தே⁴ன அதிக்கந்தமானுஸகேன காயஸ்ஸ பே⁴தா³ பரங் மரணா
திரச்சா²னயோனிங் உபபன்னங், து³க்கா² திப்³பா³ கடுகா வேத³னா வேத³யமானங்.

‘‘இத⁴ பனாஹங், ஸாரிபுத்த, ஏகச்சங் புக்³க³லங் ஏவங்
சேதஸா சேதோ பரிச்ச பஜானாமி – ததா²யங் புக்³க³லோ படிபன்னோ ததா² ச இரியதி
தஞ்ச மக்³க³ங் ஸமாரூள்ஹோ, யதா² காயஸ்ஸ பே⁴தா³ பரங் மரணா பெத்திவிஸயங்
உபபஜ்ஜிஸ்ஸதீதி. தமேனங் பஸ்ஸாமி அபரேன ஸமயேன
தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன காயஸ்ஸ பே⁴தா³ பரங்
மரணா பெத்திவிஸயங் உபபன்னங், து³க்க²ப³ஹுலா வேத³னா வேத³யமானங். ஸெய்யதா²பி,
ஸாரிபுத்த, ருக்கோ² விஸமே பூ⁴மிபா⁴கே³ ஜாதோ தனுபத்தபலாஸோ கப³ரச்சா²யோ .
அத² புரிஸோ ஆக³ச்செ²ய்ய க⁴ம்மாபி⁴தத்தோ க⁴ம்மபரேதோ கிலந்தோ தஸிதோ பிபாஸிதோ
ஏகாயனேன மக்³கே³ன தமேவ ருக்க²ங் பணிதா⁴ய. தமேனங் சக்கு²மா புரிஸோ தி³ஸ்வா
ஏவங் வதெ³ய்ய – ‘ததா²யங் ப⁴வங் புரிஸோ படிபன்னோ ததா² ச இரியதி தஞ்ச
மக்³க³ங் ஸமாரூள்ஹோ, யதா² இமங்யேவ ருக்க²ங் ஆக³மிஸ்ஸதீ’தி. தமேனங் பஸ்ஸெய்ய,
அபரேன ஸமயேன தஸ்ஸ ருக்க²ஸ்ஸ சா²யாய நிஸின்னங் வா நிபன்னங் வா
து³க்க²ப³ஹுலா வேத³னா வேத³யமானங். ஏவமேவ கோ² அஹங், ஸாரிபுத்த, இதே⁴கச்சங்
புக்³க³லங் ஏவங் சேதஸா சேதோ பரிச்ச பஜானாமி – ததா²யங் புக்³க³லோ படிபன்னோ
ததா² ச இரியதி தஞ்ச மக்³க³ங் ஸமாரூள்ஹோ, யதா² காயஸ்ஸ பே⁴தா³ பரங் மரணா
பெத்திவிஸயங் உபபஜ்ஜிஸ்ஸதீதி. தமேனங் பஸ்ஸாமி அபரேன ஸமயேன தி³ப்³பே³ன
சக்கு²னா விஸுத்³தே⁴ன அதிக்கந்தமானுஸகேன காயஸ்ஸ பே⁴தா³ பரங் மரணா
பெத்திவிஸயங் உபபன்னங், து³க்க²ப³ஹுலா வேத³னா வேத³யமானங்.

‘‘இத⁴ பனாஹங், ஸாரிபுத்த, ஏகச்சங் புக்³க³லங் ஏவங்
சேதஸா சேதோ பரிச்ச பஜானாமி – ததா²யங் புக்³க³லோ படிபன்னோ ததா² ச இரியதி
தஞ்ச மக்³க³ங் ஸமாரூள்ஹோ யதா² காயஸ்ஸ பே⁴தா³ பரங் மரணா மனுஸ்ஸேஸு
உபபஜ்ஜிஸ்ஸதீதி. தமேனங் பஸ்ஸாமி அபரேன ஸமயேன தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன காயஸ்ஸ பே⁴தா³ பரங் மரணா மனுஸ்ஸேஸு
உபபன்னங், ஸுக²ப³ஹுலா வேத³னா வேத³யமானங். ஸெய்யதா²பி, ஸாரிபுத்த, ருக்கோ²
ஸமே பூ⁴மிபா⁴கே³ ஜாதோ ப³ஹலபத்தபலாஸோ ஸந்த³ச்சா²யோ [ஸண்ட³ச்சா²யோ (ஸ்யா॰), ஸந்தச்சா²யோ (க॰)].
அத² புரிஸோ ஆக³ச்செ²ய்ய க⁴ம்மாபி⁴தத்தோ க⁴ம்மபரேதோ கிலந்தோ தஸிதோ பிபாஸிதோ
ஏகாயனேன மக்³கே³ன தமேவ ருக்க²ங் பணிதா⁴ய. தமேனங் சக்கு²மா புரிஸோ தி³ஸ்வா
ஏவங் வதெ³ய்ய – ‘ததா²யங் ப⁴வங் புரிஸோ படிபன்னோ ததா² ச இரியதி தஞ்ச
மக்³க³ங் ஸமாரூள்ஹோ, யதா² இமமேவ ருக்க²ங் ஆக³மிஸ்ஸதீ’தி. தமேனங் பஸ்ஸெய்ய
அபரேன ஸமயேன தஸ்ஸ ருக்க²ஸ்ஸ சா²யாய நிஸின்னங் வா நிபன்னங் வா ஸுக²ப³ஹுலா
வேத³னா வேத³யமானங். ஏவமேவ கோ² அஹங், ஸாரிபுத்த, இதே⁴கச்சங்
புக்³க³லங் ஏவங் சேதஸா சேதோ பரிச்ச பஜானாமி – ததா²யங் புக்³க³லோ படிபன்னோ
ததா² ச இரியதி தஞ்ச மக்³க³ங் ஸமாரூள்ஹோ யதா² காயஸ்ஸ பே⁴தா³ பரங் மரணா
மனுஸ்ஸேஸு உபபஜ்ஜிஸ்ஸதீதி. தமேனங் பஸ்ஸாமி அபரேன ஸமயேன தி³ப்³பே³ன
சக்கு²னா விஸுத்³தே⁴ன அதிக்கந்தமானுஸகேன காயஸ்ஸ பே⁴தா³ பரங் மரணா மனுஸ்ஸேஸு
உபபன்னங், ஸுக²ப³ஹுலா வேத³னா வேத³யமானங்.

‘‘இத⁴ பனாஹங், ஸாரிபுத்த,
ஏகச்சங் புக்³க³லங் ஏவங் சேதஸா சேதோ பரிச்ச பஜானாமி – ததா²யங் புக்³க³லோ
படிபன்னோ ததா² ச இரியதி தஞ்ச மக்³க³ங் ஸமாரூள்ஹோ, யதா² காயஸ்ஸ பே⁴தா³ பரங்
மரணா ஸுக³திங் ஸக்³க³ங் லோகங் உபபஜ்ஜிஸ்ஸதீ’தி. தமேனங் பஸ்ஸாமி அபரேன ஸமயேன
தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங்
உபபன்னங், ஏகந்தஸுகா² வேத³னா வேத³யமானங். ஸெய்யதா²பி, ஸாரிபுத்த, பாஸாதோ³,
தத்ராஸ்ஸ கூடாகா³ரங் உல்லித்தாவலித்தங் நிவாதங் பு²ஸிதக்³க³ளங்
பிஹிதவாதபானங். தத்ராஸ்ஸ பல்லங்கோ கோ³னகத்த²தோ படிகத்த²தோ படலிகத்த²தோ
கத³லிமிக³பவரபச்சத்த²ரணோ ஸஉத்தரச்ச²தோ³ உப⁴தோலோஹிதகூபதா⁴னோ. அத² புரிஸோ
ஆக³ச்செ²ய்ய க⁴ம்மாபி⁴தத்தோ க⁴ம்மபரேதோ கிலந்தோ தஸிதோ பிபாஸிதோ ஏகாயனேன
மக்³கே³ன தமேவ பாஸாத³ங் பணிதா⁴ய. தமேனங் சக்கு²மா புரிஸோ தி³ஸ்வா ஏவங்
வதெ³ய்ய – ‘ததா²யங் ப⁴வங் புரிஸோ படிபன்னோ ததா² ச இரியதி தஞ்ச மக்³க³ங்
ஸமாரூள்ஹோ, யதா² இமங்யேவ பாஸாத³ங் ஆக³மிஸ்ஸதீ’தி. தமேனங் பஸ்ஸெய்ய அபரேன
ஸமயேன தஸ்மிங் பாஸாதே³ தஸ்மிங் கூடாகா³ரே தஸ்மிங் பல்லங்கே நிஸின்னங் வா
நிபன்னங் வா ஏகந்தஸுகா² வேத³னா வேத³யமானங். ஏவமேவ கோ² அஹங், ஸாரிபுத்த,
இதே⁴கச்சங் புக்³க³லங் ஏவங் சேதஸா சேதோ பரிச்ச பஜானாமி – ததா²யங்
புக்³க³லோ படிபன்னோ ததா² ச இரியதி தஞ்ச மக்³க³ங் ஸமாரூள்ஹோ யதா² காயஸ்ஸ
பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜிஸ்ஸதீதி. தமேனங் பஸ்ஸாமி
அபரேன ஸமயேன தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன காயஸ்ஸ
பே⁴தா³ பரங் மரணா ஸுக³திங் ஸக்³க³ங் லோகங் உபபன்னங், ஏகந்தஸுகா² வேத³னா
வேத³யமானங்.

‘‘இத⁴ பனாஹங், ஸாரிபுத்த, ஏகச்சங் புக்³க³லங் சேதஸா
சேதோ பரிச்ச பஜானாமி – ததா²யங் புக்³க³லோ படிபன்னோ ததா² ச இரியதி தஞ்ச
மக்³க³ங் ஸமாரூள்ஹோ, யதா² ஆஸவானங் க²யா அனாஸங் சேதோவிமுத்திங்
பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹரிஸ்ஸதீதி. தமேனங் பஸ்ஸாமி அபரேன ஸமயேன ஆஸவானங் க²யா அனாஸவங்
சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரந்தங், ஏகந்தஸுகா² வேத³னா வேத³யமானங்.
ஸெய்யதா²பி, ஸாரிபுத்த, பொக்க²ரணீ அச்சோ²த³கா
ஸாதோத³கா ஸீதோத³கா ஸேதகா ஸுபதித்தா² ரமணீயா. அவிதூ³ரே சஸ்ஸா திப்³போ³
வனஸண்டோ³. அத² புரிஸோ ஆக³ச்செ²ய்ய க⁴ம்மாபி⁴தத்தோ க⁴ம்மபரேதோ கிலந்தோ தஸிதோ
பிபாஸிதோ ஏகாயனேன மக்³கே³ன தமேவ பொக்க²ரணிங் பணிதா⁴ய. தமேனங் சக்கு²மா
புரிஸோ தி³ஸ்வா ஏவங் வதெ³ய்ய – ‘ததா² ப⁴வங் புரிஸோ படிபன்னோ ததா² ச இரியதி
தஞ்ச மக்³க³ங் ஸமாரூள்ஹோ, யதா² இமங்யேவ பொக்க²ரணிங் ஆக³மிஸ்ஸதீ’தி. தமேனங்
பஸ்ஸெய்ய அபரேன ஸமயேன தங் பொக்க²ரணிங் ஓகா³ஹெத்வா ந்ஹாயித்வா ச பிவித்வா ச
ஸப்³ப³த³ரத²கிலமத²பரிளாஹங் படிப்பஸ்ஸம்பெ⁴த்வா பச்சுத்தரித்வா தஸ்மிங் வனஸண்டே³ நிஸின்னங் வா நிபன்னங்
வா, ஏகந்தஸுகா² வேத³னா வேத³யமானங். ஏவமேவ கோ² அஹங், ஸாரிபுத்த, இதே⁴கச்சங்
புக்³க³லங் ஏவங் சேதஸா சேதோ பரிச்ச பஜானாமி – ததா²யங் புக்³க³லோ படிபன்னோ
ததா² ச இரியதி தஞ்ச மக்³க³ங் ஸமாரூள்ஹோ, யதா² ஆஸவானங் க²யா அனாஸவங்
சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங்
அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதீ’தி. தமேனங் பஸ்ஸாமி அபரேன
ஸமயேன ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தங், ஏகந்தஸுகா² வேத³னா
வேத³யமானங். இமா கோ², ஸாரிபுத்த, பஞ்ச க³தியோ.

‘‘யோ கோ² மங், ஸாரிபுத்த, ஏவங் ஜானந்தங் ஏவங்
பஸ்ஸந்தங் ஏவங் வதெ³ய்ய – ‘நத்தி² ஸமணஸ்ஸ கோ³தமஸ்ஸ உத்தரிமனுஸ்ஸத⁴ம்மா
அலமரியஞாணத³ஸ்ஸனவிஸேஸோ; தக்கபரியாஹதங் ஸமணோ கோ³தமோ த⁴ம்மங் தே³ஸேதி
வீமங்ஸானுசரிதங் ஸயங்படிபா⁴ன’ந்தி தங், ஸாரிபுத்த, வாசங் அப்பஹாய தங்
சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா யதா²ப⁴தங் நிக்கி²த்தோ
ஏவங் நிரயே. ஸெய்யதா²பி, ஸாரிபுத்த, பி⁴க்கு² ஸீலஸம்பன்னோ ஸமாதி⁴ஸம்பன்னோ
பஞ்ஞாஸம்பன்னோ தி³ட்டே²வ த⁴ம்மே அஞ்ஞங் ஆராதெ⁴ய்ய, ஏவங் ஸம்பத³மித³ங்,
ஸாரிபுத்த, வதா³மி ‘தங் வாசங் அப்பஹாய தங் சித்தங் அப்பஹாய தங் தி³ட்டி²ங்
அப்படினிஸ்ஸஜ்ஜித்வா யதா²ப⁴தங் நிக்கி²த்தோ ஏவங் நிரயே’.

155. ‘‘அபி⁴ஜானாமி கோ² பனாஹங், ஸாரிபுத்த, சதுரங்க³ஸமன்னாக³தங் ப்³ரஹ்மசரியங் சரிதா [சரித்வா (க॰)] – தபஸ்ஸீ ஸுத³ங் ஹோமி பரமதபஸ்ஸீ, லூகோ² ஸுத³ங் [லூக²ஸ்ஸுத³ங் (ஸீ॰ பீ॰)] ஹோமி பரமலூகோ², ஜேகு³ச்சீ² ஸுத³ங் ஹோமி பரமஜேகு³ச்சீ², பவிவித்தோ ஸுத³ங் [பவிவித்தஸ்ஸுத³ங் (ஸீ॰ பீ॰)] ஹோமி பரமபவிவித்தோ . தத்ராஸ்ஸு மே இத³ங், ஸாரிபுத்த, தபஸ்ஸிதாய ஹோதி – அசேலகோ ஹோமி முத்தாசாரோ ஹத்தா²பலேக²னோ [ஹத்தா²வலேக²னோ (ஸ்யா॰)],
ந ஏஹிப⁴த்³த³ந்திகோ ந திட்ட²ப⁴த்³த³ந்திகோ; நாபி⁴ஹடங் ந உத்³தி³ஸ்ஸகதங் ந
நிமந்தனங் ஸாதி³யாமி. ஸோ ந கும்பி⁴முகா² படிக்³க³ண்ஹாமி, ந களோபிமுகா²
படிக்³க³ண்ஹாமி, ந ஏளகமந்தரங், ந த³ண்ட³மந்தரங், ந முஸலமந்தரங், ந
த்³வின்னங் பு⁴ஞ்ஜமானானங், ந க³ப்³பி⁴னியா, ந பாயமானாய [பாயந்தியா (க॰)],
ந புரிஸந்தரக³தாய, ந ஸங்கித்தீஸு, ந யத்த² ஸா உபட்டி²தோ ஹோதி, ந யத்த²
மக்கி²கா ஸண்ட³ஸண்ட³சாரினீ; ந மச்ச²ங் ந மங்ஸங் ந ஸுரங் ந மேரயங் ந
து²ஸோத³கங் பிவாமி; ஸோ ஏகாகா³ரிகோ வா ஹோமி ஏகாலோபிகோ, த்³வாகா³ரிகோ
வா ஹோமி த்³வாலோபிகோ…பே॰… ஸத்தாகா³ரிகோ வா ஹோமி ஸத்தாலோபிகோ; ஏகிஸ்ஸாபி
த³த்தியா யாபேமி, த்³வீஹிபி த³த்தீஹி யாபேமி…பே॰… ஸத்தஹிபி த³த்தீஹி
யாபேமி; ஏகாஹிகம்பி ஆஹாரங் ஆஹாரேமி, த்³வீஹிகம்பி ஆஹாரங் ஆஹாரேமி…பே॰…
ஸத்தாஹிகம்பி ஆஹாரங் ஆஹாரேமி; இதி ஏவரூபங் அத்³த⁴மாஸிகம்பி
பரியாயப⁴த்தபோ⁴ஜனானுயோக³மனுயுத்தோ விஹராமி.

‘‘ஸோ ஸாகப⁴க்கோ² வா ஹோமி, ஸாமாகப⁴க்கோ² வா ஹோமி, நீவாரப⁴க்கோ² வா ஹோமி, த³த்³து³லப⁴க்கோ² வா ஹோமி, ஹடப⁴க்கோ² வா ஹோமி, கணப⁴க்கோ² வா ஹோமி, ஆசாமப⁴க்கோ² வா ஹோமி , பிஞ்ஞாகப⁴க்கோ² வா ஹோமி, திணப⁴க்கோ² வா ஹோமி, கோ³மயப⁴க்கோ² வா ஹோமி, வனமூலப²லாஹாரோ யாபேமி பவத்தப²லபோ⁴ஜீ.

‘‘ஸோ ஸாணானிபி தா⁴ரேமி, மஸாணானிபி தா⁴ரேமி,
ச²வது³ஸ்ஸானிபி தா⁴ரேமி, பங்ஸுகூலானிபி தா⁴ரேமி, திரீடானிபி தா⁴ரேமி,
அஜினம்பி தா⁴ரேமி, அஜினக்கி²பம்பி தா⁴ரேமி, குஸசீரம்பி தா⁴ரேமி, வாகசீரம்பி
தா⁴ரேமி, ப²லகசீரம்பி தா⁴ரேமி, கேஸகம்ப³லம்பி தா⁴ரேமி, வாளகம்ப³லம்பி
தா⁴ரேமி, உலூகபக்க²ம்பி தா⁴ரேமி; கேஸமஸ்ஸுலோசகோபி ஹோமி
கேஸமஸ்ஸுலோசனானுயோக³மனுயுத்தோ; உப்³ப⁴ட்ட²கோபி ஹோமி ஆஸனபடிக்கி²த்தோ;
உக்குடிகோபி ஹோமி உக்குடிகப்பதா⁴னமனுயுத்தோ; கண்டகாபஸ்ஸயிகோபி ஹோமி
கண்டகாபஸ்ஸயே ஸெய்யங் கப்பேமி [இமஸ்ஸானந்தரே அஞ்ஞோபி கோசி பாட²பதே³ஸோ அஞ்ஞேஸு ஆஜீவகவததீ³பகஸுத்தேஸு தி³ஸ்ஸதி]; ஸாயததியகம்பி உத³கோரோஹனானுயோக³மனுயுத்தோ விஹராமி – இதி ஏவரூபங் அனேகவிஹிதங் காயஸ்ஸ ஆதாபனபரிதாபனானுயோக³மனுயுத்தோ விஹராமி. இத³ங்ஸு மே, ஸாரிபுத்த, தபஸ்ஸிதாய ஹோதி.

156.
‘‘தத்ராஸ்ஸு மே இத³ங், ஸாரிபுத்த, லூக²ஸ்மிங் ஹோதி – நேகவஸ்ஸக³ணிகங்
ரஜோஜல்லங் காயே ஸன்னிசிதங் ஹோதி பபடிகஜாதங். ஸெய்யதா²பி, ஸாரிபுத்த,
திந்து³ககா²ணு நேகவஸ்ஸக³ணிகோ ஸன்னிசிதோ ஹோதி பபடிகஜாதோ, ஏவமேவாஸ்ஸு மே,
ஸாரிபுத்த, நேகவஸ்ஸக³ணிகங் ரஜோஜல்லங் காயே ஸன்னிசிதங் ஹோதி பபடிகஜாதங்.
தஸ்ஸ மய்ஹங், ஸாரிபுத்த, ந ஏவங் ஹோதி – ‘அஹோ வதாஹங் இமங் ரஜோஜல்லங் பாணினா
பரிமஜ்ஜெய்யங், அஞ்ஞே வா பன மே இமங் ரஜோஜல்லங் பாணினா பரிமஜ்ஜெய்யு’ந்தி.
ஏவம்பி மே, ஸாரிபுத்த , ந ஹோதி. இத³ங்ஸு மே, ஸாரிபுத்த, லூக²ஸ்மிங் ஹோதி.

‘‘தத்ராஸ்ஸு மே இத³ங், ஸாரிபுத்த, ஜேகு³ச்சி²ஸ்மிங்
ஹோதி – ஸோ கோ² அஹங், ஸாரிபுத்த, ஸதோவ அபி⁴க்கமாமி, ஸதோவ படிக்கமாமி, யாவ
உத³கபி³ந்து³ம்ஹிபி மே த³யா பச்சுபட்டி²தா ஹோதி – ‘மாஹங் கு²த்³த³கே பாணே
விஸமக³தே ஸங்கா⁴தங் ஆபாதே³ஸி’ந்தி. இத³ங்ஸு மே, ஸாரிபுத்த,
ஜேகு³ச்சி²ஸ்மிங் ஹோதி.

‘‘தத்ராஸ்ஸு மே இத³ங், ஸாரிபுத்த, பவிவித்தஸ்மிங் ஹோதி – ஸோ கோ²
அஹங், ஸாரிபுத்த, அஞ்ஞதரங் அரஞ்ஞாயதனங் அஜ்ஜோ²கா³ஹெத்வா விஹராமி. யதா³
பஸ்ஸாமி கோ³பாலகங் வா பஸுபாலகங் வா திணஹாரகங் வா கட்ட²ஹாரகங் வா வனகம்மிகங்
வா, வனேன வனங் க³ஹனேன க³ஹனங் நின்னேன நின்னங் த²லேன த²லங் ஸங்பதாமி [பபதாமி (ஸீ॰ ஸ்யா॰ பீ॰)].
தங் கிஸ்ஸ ஹேது? மா மங் தே அத்³த³ஸங்ஸு அஹஞ்ச மா தே அத்³த³ஸந்தி.
ஸெய்யதா²பி, ஸாரிபுத்த, ஆரஞ்ஞகோ மகோ³ மனுஸ்ஸே தி³ஸ்வா வனேன வனங் க³ஹனேன
க³ஹனங் நின்னேன நின்னங் த²லேன த²லங் ஸங்பததி, ஏவமேவ
கோ² அஹங், ஸாரிபுத்த, யதா³ பஸ்ஸாமி கோ³பாலகங் வா பஸுபாலகங் வா திணஹாரகங்
வா கட்ட²ஹாரகங் வா வனகம்மிகங் வா வனேன வனங் க³ஹனேன க³ஹனங் நின்னேன நின்னங்
த²லேன த²லங் ஸங்பதாமி. தங் கிஸ்ஸ ஹேது? மா மங் தே அத்³த³ஸங்ஸு அஹஞ்ச மா தே
அத்³த³ஸந்தி. இத³ங்ஸு மே, ஸாரிபுத்த, பவிவித்தஸ்மிங் ஹோதி.

‘‘ஸோ கோ² அஹங், ஸாரிபுத்த, யே தே கொ³ட்டா² பட்டி²தகா³வோ அபக³தகோ³பாலகா, தத்த² சதுக்குண்டி³கோ உபஸங்கமித்வா யானி தானி வச்ச²கானங் தருணகானங் தே⁴னுபகானங் கோ³மயானி தானி ஸுத³ங் ஆஹாரேமி. யாவகீவஞ்ச மே ,
ஸாரிபுத்த, ஸகங் முத்தகரீஸங் அபரியாதி³ன்னங் ஹோதி, ஸகங்யேவ ஸுத³ங்
முத்தகரீஸங் ஆஹாரேமி. இத³ங்ஸு மே, ஸாரிபுத்த, மஹாவிகடபோ⁴ஜனஸ்மிங் ஹோதி.

157.
‘‘ஸோ கோ² அஹங், ஸாரிபுத்த, அஞ்ஞதரங் பி⁴ங்ஸனகங் வனஸண்ட³ங் அஜ்ஜோ²கா³ஹெத்வா
விஹராமி. தத்ராஸ்ஸுத³ங், ஸாரிபுத்த, பி⁴ங்ஸனகஸ்ஸ வனஸண்ட³ஸ்ஸ
பி⁴ங்ஸனகதஸ்மிங் ஹோதி – யோ கோசி அவீதராகோ³ தங் வனஸண்ட³ங் பவிஸதி,
யேபு⁴ய்யேன லோமானி ஹங்ஸந்தி. ஸோ கோ² அஹங், ஸாரிபுத்த, யா தா ரத்தியோ ஸீதா
ஹேமந்திகா அந்தரட்ட²கா ஹிமபாதஸமயா [அந்தரட்ட²கே ஹிமபாதஸமயே (ஸீ॰ பீ॰)]
ததா²ரூபாஸு ரத்தீஸு ரத்திங் அப்³போ⁴காஸே விஹராமி, தி³வா வனஸண்டே³;
கி³ம்ஹானங் பச்சி²மே மாஸே தி³வா அப்³போ⁴காஸே விஹராமி, ரத்திங் வனஸண்டே³.
அபிஸ்ஸு மங், ஸாரிபுத்த, அயங் அனச்ச²ரியகா³தா² படிபா⁴ஸி புப்³பே³
அஸ்ஸுதபுப்³பா³ –

‘‘ஸோதத்தோ ஸோஸின்னோ [ஸோஸீனோ (ஸீ॰ பீ॰ க॰), ஸோஸினோ (ஸ்யா॰), ஸோஸிந்தோ³ (ஸத்³த³னீதி)] சேவ, ஏகோ பி⁴ங்ஸனகே வனே;

நக்³கோ³ ந சக்³கி³மாஸீனோ, ஏஸனாபஸுதோ முனீ’’தி.

‘‘ஸோ கோ² அஹங், ஸாரிபுத்த, ஸுஸானே ஸெய்யங் கப்பேமி ச²வட்டி²கானி உபதா⁴ய. அபிஸ்ஸு மங், ஸாரிபுத்த, கா³மண்ட³லா [கோ³மண்ட³லா (ப³ஹூஸு) சரியாபிடகஅட்ட²கதா² ஓலோகேதப்³பா³]
உபஸங்கமித்வா ஒட்டு²ப⁴ந்திபி, ஓமுத்தெந்திபி, பங்ஸுகேனபி ஓகிரந்தி,
கண்ணஸோதேஸுபி ஸலாகங் பவேஸெந்தி. ந கோ² பனாஹங், ஸாரிபுத்த, அபி⁴ஜானாமி தேஸு
பாபகங் சித்தங் உப்பாதே³தா. இத³ங்ஸு மே, ஸாரிபுத்த, உபெக்கா²விஹாரஸ்மிங்
ஹோதி.

158. ‘‘ஸந்தி கோ² பன, ஸாரிபுத்த, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ஆஹாரேன
ஸுத்³தீ⁴’தி. தே ஏவமாஹங்ஸு – ‘கோலேஹி யாபேமா’தி. தே கோலம்பி கா²த³ந்தி,
கோலசுண்ணம்பி கா²த³ந்தி, கோலோத³கம்பி பிவந்தி – அனேகவிஹிதம்பி கோலவிகதிங்
பரிபு⁴ஞ்ஜந்தி. அபி⁴ஜானாமி கோ² பனாஹங், ஸாரிபுத்த, ஏகங்யேவ கோலங் ஆஹாரங்
ஆஹாரிதா. ஸியா கோ² பன தே, ஸாரிபுத்த, ஏவமஸ்ஸ – ‘மஹா நூன தேன ஸமயேன கோலோ
அஹோஸீ’தி. ந கோ² பனேதங், ஸாரிபுத்த, ஏவங் த³ட்ட²ப்³ப³ங். ததா³பி ஏதபரமோயேவ
கோலோ அஹோஸி ஸெய்யதா²பி ஏதரஹி. தஸ்ஸ மய்ஹங், ஸாரிபுத்த, ஏகங்யேவ
கோலங் ஆஹாரங் ஆஹாரயதோ அதி⁴மத்தகஸிமானங் பத்தோ காயோ ஹோதி. ஸெய்யதா²பி நாம
ஆஸீதிகபப்³பா³னி வா காளபப்³பா³னி வா, ஏவமேவஸ்ஸு மே அங்க³பச்சங்கா³னி
ப⁴வந்தி தாயேவப்பாஹாரதாய. ஸெய்யதா²பி நாம ஒட்ட²பத³ங், ஏவமேவஸ்ஸு மே
ஆனிஸத³ங் ஹோதி தாயேவப்பாஹாரதாய. ஸெய்யதா²பி நாம வட்டனாவளீ, ஏவமேவஸ்ஸு மே
பிட்டி²கண்டகோ உன்னதாவனதோ ஹோதி தாயேவப்பாஹாரதாய. ஸெய்யதா²பி நாம ஜரஸாலாய
கோ³பானஸியோ ஓலுக்³க³விலுக்³கா³ ப⁴வந்தி, ஏவமேவஸ்ஸு மே பா²ஸுளியோ
ஓலுக்³க³விலுக்³கா³ ப⁴வந்தி தாயேவப்பாஹாரதாய. ஸெய்யதா²பி நாம க³ம்பீ⁴ரே
உத³பானே உத³கதாரகா க³ம்பீ⁴ரக³தா ஒக்கா²யிகா தி³ஸ்ஸந்தி, ஏவமேவஸ்ஸு மே
அக்கி²கூபேஸு அக்கி²தாரகா க³ம்பீ⁴ரக³தா ஒக்கா²யிகா தி³ஸ்ஸந்தி
தாயேவப்பாஹாரதாய. ஸெய்யதா²பி நாம தித்தகாலாபு³ஆமகச்சி²ன்னோ வாதாதபேன
ஸங்பு²டிதோ [ஸம்பு²ஸிதோ (ஸ்யா॰), ஸங்புடிதோ (பீ॰ க॰) எத்த² ஸங்பு²டிதோதி ஸங்குசிதோதி அத்தோ²] ஹோதி ஸம்மிலாதோ, ஏவமேவஸ்ஸு
மே ஸீஸச்ச²வி ஸங்பு²டிதா ஹோதி ஸம்மிலாதா தாயேவப்பாஹாரதாய. ஸோ கோ² அஹங்,
ஸாரிபுத்த, ‘உத³ரச்ச²விங் பரிமஸிஸ்ஸாமீ’தி பிட்டி²கண்டகங்யேவ
பரிக்³க³ண்ஹாமி, ‘பிட்டி²கண்டகங் பரிமஸிஸ்ஸாமீ’தி உத³ரச்ச²விங்யேவ
பரிக்³க³ண்ஹாமி, யாவஸ்ஸு மே, ஸாரிபுத்த, உத³ரச்ச²வி பிட்டி²கண்டகங் அல்லீனா
ஹோதி தாயேவப்பாஹாரதாய. ஸோ கோ² அஹங், ஸாரிபுத்த, ‘வச்சங் வா முத்தங் வா
கரிஸ்ஸாமீ’தி தத்தே²வ அவகுஜ்ஜோ பபதாமி தாயேவப்பாஹாரதாய. ஸோ கோ² அஹங்,
ஸாரிபுத்த, தமேவ காயங் அஸ்ஸாஸெந்தோ பாணினா க³த்தானி அனோமஜ்ஜாமி. தஸ்ஸ
மய்ஹங், ஸாரிபுத்த, பாணினா க³த்தானி அனோமஜ்ஜதோ பூதிமூலானி லோமானி காயஸ்மா
பதந்தி தாயேவப்பாஹாரதாய.

159.
‘‘ஸந்தி கோ² பன, ஸாரிபுத்த, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ
– ‘ஆஹாரேன ஸுத்³தீ⁴’தி. தே ஏவமாஹங்ஸு – ‘முக்³கே³ஹி யாபேம…பே॰… திலேஹி
யாபேம…பே॰… தண்டு³லேஹி யாபேமா’தி. தே தண்டு³லம்பி கா²த³ந்தி,
தண்டு³லசுண்ணம்பி கா²த³ந்தி, தண்டு³லோத³கம்பி
பிவந்தி – அனேகவிஹிதம்பி தண்டு³லவிகதிங் பரிபு⁴ஞ்ஜந்தி. அபி⁴ஜானாமி கோ²
பனாஹங், ஸாரிபுத்த, ஏகங்யேவ தண்டு³லங் ஆஹாரங் ஆஹாரிதா. ஸியா கோ² பன தே,
ஸாரிபுத்த, ஏவமஸ்ஸ – ‘மஹா நூன தேன ஸமயேன தண்டு³லோ அஹோஸீ’தி. ந கோ² பனேதங்,
ஸாரிபுத்த, ஏவங் த³ட்ட²ப்³ப³ங். ததா³பி ஏதபரமோயேவ தண்டு³லோ அஹோஸி , ஸெய்யதா²பி ஏதரஹி. தஸ்ஸ மய்ஹங், ஸாரிபுத்த, ஏகங்யேவ தண்டு³லங் ஆஹாரங் ஆஹாரயதோ அதி⁴மத்தகஸிமானங்
பத்தோ காயோ ஹோதி. ஸெய்யதா²பி நாம ஆஸீதிகபப்³பா³னி வா காளபப்³பா³னி வா,
ஏவமேவஸ்ஸு மே அங்க³பச்சங்கா³னி ப⁴வந்தி தாயேவப்பாஹாரதாய. ஸெய்யதா²பி நாம
ஒட்ட²பத³ங், ஏவமேவஸ்ஸு மே ஆனிஸத³ங் ஹோதி தாயேவப்பாஹாரதாய. ஸெய்யதா²பி நாம
வட்டனாவளீ, ஏவமேவஸ்ஸு மே பிட்டி²கண்டகோ உன்னதாவனதோ ஹோதி தாயேவப்பாஹாரதாய.
ஸெய்யதா²பி நாம ஜரஸாலாய கோ³பானஸியோ ஓலுக்³க³விலுக்³கா³ ப⁴வந்தி, ஏவமேவஸ்ஸு
மே பா²ஸுளியோ ஓலுக்³க³விலுக்³கா³ ப⁴வந்தி தாயேவப்பாஹாரதாய. ஸெய்யதா²பி நாம
க³ம்பீ⁴ரே உத³பானே உத³கதாரகா க³ம்பீ⁴ரக³தா ஒக்கா²யிகா தி³ஸ்ஸந்தி,
ஏவமேவஸ்ஸு மே அக்கி²கூபேஸு அக்கி²தாரகா க³ம்பீ⁴ரக³தா ஒக்கா²யிகா தி³ஸ்ஸந்தி
தாயேவப்பாஹாரதாய. ஸெய்யதா²பி நாம தித்தகாலாபு³ ஆமகச்சி²ன்னோ வாதாதபேன
ஸங்பு²டிதோ ஹோதி ஸம்மிலாதோ, ஏவமேவஸ்ஸு மே ஸீஸச்ச²வி ஸங்பு²டிதா ஹோதி
ஸம்மிலாதா தாயேவப்பாஹாரதாய. ஸோ கோ² அஹங், ஸாரிபுத்த, ‘உத³ரச்ச²விங்
பரிமஸிஸ்ஸாமீ’தி பிட்டி²கண்டகங்யேவ பரிக்³க³ண்ஹாமி, ‘பிட்டி²கண்டகங்
பரிமஸிஸ்ஸாமீ’தி உத³ரச்ச²விங்யேவ பரிக்³க³ண்ஹாமி. யாவஸ்ஸு மே, ஸாரிபுத்த,
உத³ரச்ச²வி பிட்டி²கண்டகங் அல்லீனா ஹோதி தாயேவப்பாஹாரதாய. ஸோ கோ² அஹங்,
ஸாரிபுத்த, ‘வச்சங் வா முத்தங் வா கரிஸ்ஸாமீ’தி தத்தே²வ அவகுஜ்ஜோ பபதாமி
தாயேவப்பாஹாரதாய. ஸோ கோ² அஹங், ஸாரிபுத்த, தமேவ காயங் அஸ்ஸாஸெந்தோ பாணினா
க³த்தானி அனோமஜ்ஜாமி. தஸ்ஸ மய்ஹங், ஸாரிபுத்த, பாணினா க³த்தானி அனோமஜ்ஜதோ
பூதிமூலானி லோமானி காயஸ்மா பதந்தி தாயேவப்பாஹாரதாய.

‘‘தாயபி கோ² அஹங், ஸாரிபுத்த, இரியாய தாய படிபதா³ய தாய
து³க்கரகாரிகாய நாஜ்ஜ²க³மங் உத்தரிங் மனுஸ்ஸத⁴ம்மா
அலமரியஞாணத³ஸ்ஸனவிஸேஸங். தங் கிஸ்ஸ ஹேது? இமிஸ்ஸாயேவ அரியாய பஞ்ஞாய
அனதி⁴க³மா, யாயங் அரியா பஞ்ஞா அதி⁴க³தா அரியா நிய்யானிகா, நிய்யாதி
தக்கரஸ்ஸ ஸம்மா து³க்க²க்க²யாய.

160. ‘‘ஸந்தி கோ² பன, ஸாரிபுத்த, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ஸங்ஸாரேன ஸுத்³தீ⁴’தி. ந கோ² பன ஸோ [ந கோ² பனேஸோ (ஸீ॰ ஸ்யா॰)], ஸாரிபுத்த, ஸங்ஸாரோ ஸுலப⁴ரூபோ யோ மயா அஸங்ஸரிதபுப்³போ³
இமினா தீ³கே⁴ன அத்³து⁴னா, அஞ்ஞத்ர ஸுத்³தா⁴வாஸேஹி தே³வேஹி. ஸுத்³தா⁴வாஸே
சாஹங், ஸாரிபுத்த, தே³வே ஸங்ஸரெய்யங், நயிமங் லோகங் புனராக³ச்செ²ய்யங்.

‘‘ஸந்தி கோ² பன, ஸாரிபுத்த, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘உபபத்தியா ஸுத்³தீ⁴’தி. ந கோ² பன ஸா, ஸாரிபுத்த ,
உபபத்தி ஸுலப⁴ரூபா யா மயா அனுபபன்னபுப்³பா³ இமினா தீ³கே⁴ன அத்³து⁴னா,
அஞ்ஞத்ர ஸுத்³தா⁴வாஸேஹி தே³வேஹி. ஸுத்³தா⁴வாஸே சாஹங், ஸாரிபுத்த, தே³வே
உபபஜ்ஜெய்யங், நயிமங் லோகங் புனராக³ச்செ²ய்யங்.

‘‘ஸந்தி கோ² பன, ஸாரிபுத்த, ஏகே ஸமணப்³ராஹ்மணா
ஏவங்வாதி³னோ ஏவங்தி³ட்டி²னோ – ‘ஆவாஸேன ஸுத்³தீ⁴’தி. ந கோ² பன ஸோ,
ஸாரிபுத்த, ஆவாஸோ ஸுலப⁴ரூபோ யோ மயா அனாவுட்ட²புப்³போ³ [அனாவுத்த²புப்³போ³ (ஸீ॰ பீ॰)]
இமினா தீ³கே⁴ன அத்³து⁴னா, அஞ்ஞத்ர ஸுத்³தா⁴வாஸேஹி தே³வேஹி. ஸுத்³தா⁴வாஸே
சாஹங், ஸாரிபுத்த, தே³வே ஆவஸெய்யங், நயிமங் லோகங் புனராக³ச்செ²ய்யங்.

‘‘ஸந்தி கோ² பன, ஸாரிபுத்த, ஏகே ஸமணப்³ராஹ்மணா
ஏவங்வாதி³னோ ஏவங்தி³ட்டி²னோ – ‘யஞ்ஞேன ஸுத்³தீ⁴’தி. ந கோ² பன ஸோ,
ஸாரிபுத்த, யஞ்ஞோ ஸுலப⁴ரூபோ யோ மயா அயிட்ட²புப்³போ³ இமினா தீ³கே⁴ன
அத்³து⁴னா, தஞ்ச கோ² ரஞ்ஞா வா ஸதா க²த்தியேன முத்³தா⁴வஸித்தேன ப்³ராஹ்மணேன
வா மஹாஸாலேன.

‘‘ஸந்தி கோ² பன, ஸாரிபுத்த, ஏகே ஸமணப்³ராஹ்மணா
ஏவங்வாதி³னோ ஏவங்தி³ட்டி²னோ – ‘அக்³கி³பரிசரியாய ஸுத்³தீ⁴’தி. ந கோ² பன ஸோ,
ஸாரிபுத்த, அக்³கி³ ஸுலப⁴ரூபோ யோ மயா அபரிசிண்ணபுப்³போ³ இமினா தீ³கே⁴ன
அத்³து⁴னா, தஞ்ச கோ² ரஞ்ஞா வா ஸதா க²த்தியேன முத்³தா⁴வஸித்தேன ப்³ராஹ்மணேன
வா மஹாஸாலேன.

161. ‘‘ஸந்தி கோ² பன, ஸாரிபுத்த, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘யாவதே³வாயங் ப⁴வங் புரிஸோ த³ஹரோ ஹோதி யுவா
ஸுஸுகாளகேஸோ ப⁴த்³ரேன யொப்³ப³னேன ஸமன்னாக³தோ பட²மேன வயஸா தாவதே³வ பரமேன
பஞ்ஞாவெய்யத்தியேன ஸமன்னாக³தோ ஹோதி. யதோ ச கோ² அயங் ப⁴வங் புரிஸோ ஜிண்ணோ
ஹோதி வுத்³தோ⁴ மஹல்லகோ அத்³த⁴க³தோ வயோஅனுப்பத்தோ, ஆஸீதிகோ வா நாவுதிகோ வா
வஸ்ஸஸதிகோ வா ஜாதியா, அத² தம்ஹா பஞ்ஞாவெய்யத்தியா, பரிஹாயதீ’தி. ந கோ²
பனேதங், ஸாரிபுத்த , ஏவங் த³ட்ட²ப்³ப³ங். அஹங் கோ²
பன, ஸாரிபுத்த, ஏதரஹி ஜிண்ணோ வுத்³தோ⁴ மஹல்லகோ அத்³த⁴க³தோ வயோஅனுப்பத்தோ,
ஆஸீதிகோ மே வயோ வத்ததி. இத⁴ மே அஸ்ஸு, ஸாரிபுத்த, சத்தாரோ ஸாவகா
வஸ்ஸஸதாயுகா வஸ்ஸஸதஜீவினோ, பரமாய ஸதியா ச க³தியா ச தி⁴தியா ச ஸமன்னாக³தா
பரமேன ச பஞ்ஞாவெய்யத்தியேன. ஸெய்யதா²பி, ஸாரிபுத்த, த³ள்ஹத⁴ம்மா [த³ள்ஹத⁴ம்மோ (ப³ஹூஸு) டீகா ச மொக்³க³ல்லானப்³யாகரணங் ச ஓலோகேதப்³ப³ங்] த⁴னுக்³க³ஹோ ஸிக்கி²தோ கதஹத்தோ² கதூபாஸனோ லஹுகேன அஸனேன அப்பகஸிரேனேவ திரியங் தாலச்சா²யங் அதிபாதெய்ய, ஏவங் அதி⁴மத்தஸதிமந்தோ ஏவங் அதி⁴மத்தக³திமந்தோ ஏவங்
அதி⁴மத்ததி⁴திமந்தோ ஏவங் பரமேன பஞ்ஞாவெய்யத்தியேன ஸமன்னாக³தா. தே மங்
சதுன்னங் ஸதிபட்டா²னானங் உபாதா³யுபாதா³ய பஞ்ஹங் புச்செ²ய்யுங், புட்டோ²
புட்டோ² சாஹங் தேஸங் ப்³யாகரெய்யங், ப்³யாகதஞ்ச மே ப்³யாகததோ தா⁴ரெய்யுங், ந
ச மங் து³தியகங் உத்தரி படிபுச்செ²ய்யுங். அஞ்ஞத்ர அஸிதபீதகா²யிதஸாயிதா
அஞ்ஞத்ர உச்சாரபஸ்ஸாவகம்மா, அஞ்ஞத்ர நித்³தா³கிலமத²படிவினோத³னா
அபரியாதி³ன்னாயேவஸ்ஸ, ஸாரிபுத்த, ததா²க³தஸ்ஸ த⁴ம்மதே³ஸனா,
அபரியாதி³ன்னங்யேவஸ்ஸ ததா²க³தஸ்ஸ த⁴ம்மபத³ப்³யஞ்ஜனங், அபரியாதி³ன்னங்யேவஸ்ஸ
ததா²க³தஸ்ஸ பஞ்ஹபடிபா⁴னங் . அத² மே தே சத்தாரோ
ஸாவகா வஸ்ஸஸதாயுகா வஸ்ஸஸதஜீவினோ வஸ்ஸஸதஸ்ஸ அச்சயேன காலங் கரெய்யுங்.
மஞ்சகேன சேபி மங், ஸாரிபுத்த, பரிஹரிஸ்ஸத², நேவத்தி² ததா²க³தஸ்ஸ
பஞ்ஞாவெய்யத்தியஸ்ஸ அஞ்ஞத²த்தங். யங் கோ² தங் [யங் கோ² பனேதங் (ஸீ॰)],
ஸாரிபுத்த, ஸம்மா வத³மானோ வதெ³ய்ய – ‘அஸம்மோஹத⁴ம்மோ ஸத்தோ லோகே உப்பன்னோ
ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய
தே³வமனுஸ்ஸான’ந்தி, மமேவ தங் ஸம்மா வத³மானோ வதெ³ய்ய ‘அஸம்மோஹத⁴ம்மோ ஸத்தோ
லோகே உப்பன்னோ ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய
தே³வமனுஸ்ஸான’’’ந்தி.

162.
தேன கோ² பன ஸமயேன ஆயஸ்மா நாக³ஸமாலோ ப⁴க³வதோ பிட்டி²தோ டி²தோ ஹோதி
ப⁴க³வந்தங் பீ³ஜயமானோ. அத² கோ² ஆயஸ்மா நாக³ஸமாலோ ப⁴க³வந்தங் ஏதத³வோச –
‘‘அச்ச²ரியங், ப⁴ந்தே, அப்³பு⁴தங், ப⁴ந்தே! அபி ஹி மே, ப⁴ந்தே, இமங்
த⁴ம்மபரியாயங் ஸுத்வா லோமானி ஹட்டா²னி. கோனாமோ அயங், ப⁴ந்தே,
த⁴ம்மபரியாயோ’’தி? ‘‘தஸ்மாதிஹ த்வங், நாக³ஸமால, இமங் த⁴ம்மபரியாயங்
லோமஹங்ஸனபரியாயோ த்வேவ நங் தா⁴ரேஹீ’’தி.

இத³மவோச ப⁴க³வா. அத்தமனோ ஆயஸ்மா நாக³ஸமாலோ ப⁴க³வதோ பா⁴ஸிதங் அபி⁴னந்தீ³தி.

மஹாஸீஹனாத³ஸுத்தங் நிட்டி²தங் து³தியங்.

3. மஹாது³க்க²க்க²ந்த⁴ஸுத்தங்

163. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. அத² கோ² ஸம்ப³ஹுலா பி⁴க்கூ² புப்³ப³ண்ஹஸமயங் நிவாஸெத்வா
பத்தசீவரமாதா³ய ஸாவத்தி²ங் பிண்டா³ய பாவிஸிங்ஸு.
அத² கோ² தேஸங் பி⁴க்கூ²னங் ஏதத³ஹோஸி – ‘‘அதிப்பகோ³ கோ² தாவ ஸாவத்தி²யங்
பிண்டா³ய சரிதுங், யங் நூன மயங் யேன அஞ்ஞதித்தி²யானங் பரிப்³பா³ஜகானங்
ஆராமோ தேனுபஸங்கமெய்யாமா’’தி. அத² கோ² தே பி⁴க்கூ² யேன அஞ்ஞதித்தி²யானங்
பரிப்³பா³ஜகானங் ஆராமோ தேனுபஸங்கமிங்ஸு; உபஸங்கமித்வா தேஹி அஞ்ஞதித்தி²யேஹி
பரிப்³பா³ஜகேஹி ஸத்³தி⁴ங் ஸம்மோதி³ங்ஸு; ஸம்மோத³னீயங் கத²ங் ஸாரணீயங்
வீதிஸாரெத்வா ஏகமந்தங் நிஸீதி³ங்ஸு. ஏகமந்தங் நிஸின்னே கோ² தே பி⁴க்கூ² தே
அஞ்ஞதித்தி²யா பரிப்³பா³ஜகா ஏதத³வோசுங் – ‘‘ஸமணோ, ஆவுஸோ, கோ³தமோ காமானங்
பரிஞ்ஞங் பஞ்ஞபேதி, மயம்பி காமானங் பரிஞ்ஞங் பஞ்ஞபேம; ஸமணோ, ஆவுஸோ, கோ³தமோ
ரூபானங் பரிஞ்ஞங் பஞ்ஞபேதி, மயம்பி ரூபானங் பரிஞ்ஞங் பஞ்ஞபேம; ஸமணோ, ஆவுஸோ,
கோ³தமோ வேத³னானங் பரிஞ்ஞங் பஞ்ஞபேதி, மயம்பி வேத³னானங் பரிஞ்ஞங் பஞ்ஞபேம;
இத⁴ நோ, ஆவுஸோ, கோ விஸேஸோ, கோ அதி⁴ப்பயாஸோ, கிங் நானாகரணங் ஸமணஸ்ஸ வா
கோ³தமஸ்ஸ அம்ஹாகங் வா – யதி³த³ங் த⁴ம்மதே³ஸனாய வா த⁴ம்மதே³ஸனங், அனுஸாஸனியா
வா அனுஸாஸனி’’ந்தி? அத² கோ² தே பி⁴க்கூ² தேஸங் அஞ்ஞதித்தி²யானங்
பரிப்³பா³ஜகானங் பா⁴ஸிதங் நேவ அபி⁴னந்தி³ங்ஸு,
நப்படிக்கோஸிங்ஸு; அனபி⁴னந்தி³த்வா அப்படிக்கோஸித்வா உட்டா²யாஸனா
பக்கமிங்ஸு – ‘‘ப⁴க³வதோ ஸந்திகே ஏதஸ்ஸ பா⁴ஸிதஸ்ஸ அத்த²ங் ஆஜானிஸ்ஸாமா’’தி.

164.
அத² கோ² தே பி⁴க்கூ² ஸாவத்தி²யங் பிண்டா³ய சரித்வா பச்சா²ப⁴த்தங்
பிண்ட³பாதபடிக்கந்தா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ²
ப⁴க³வந்தங் ஏதத³வோசுங் – ‘‘இத⁴ மயங், ப⁴ந்தே, புப்³ப³ண்ஹஸமயங் நிவாஸெத்வா
பத்தசீவரமாதா³ய ஸாவத்தி²ங் பிண்டா³ய பாவிஸிம்ஹ.
தேஸங் நோ, ப⁴ந்தே, அம்ஹாகங் ஏதத³ஹோஸி – ‘அதிப்பகோ³ கோ² தாவ ஸாவத்தி²யங்
பிண்டா³ய சரிதுங், யங் நூன மயங் யேன அஞ்ஞதித்தி²யானங் பரிப்³பா³ஜகானங்
ஆராமோ தேனுபஸங்கமெய்யாமா’தி. அத² கோ² மயங், ப⁴ந்தே, யேன அஞ்ஞதித்தி²யானங்
பரிப்³பா³ஜகானங் ஆராமோ தேனுபஸங்கமிம்ஹ; உபஸங்கமித்வா தேஹி அஞ்ஞதித்தி²யேஹி
பரிப்³பா³ஜகேஹி ஸத்³தி⁴ங் ஸம்மோதி³ம்ஹ; ஸம்மோத³னீயங் கத²ங் ஸாரணீயங்
வீதிஸாரெத்வா ஏகமந்தங் நிஸீதி³ம்ஹ. ஏகமந்தங் நிஸின்னே கோ² அம்ஹே, ப⁴ந்தே,
தே அஞ்ஞதித்தி²யா பரிப்³பா³ஜகா ஏதத³வோசுங் – ‘ஸமணோ, ஆவுஸோ, கோ³தமோ காமானங்
பரிஞ்ஞங் பஞ்ஞபேதி, மயம்பி காமானங் பரிஞ்ஞங் பஞ்ஞபேம .
ஸமணோ, ஆவுஸோ, கோ³தமோ ரூபானங் பரிஞ்ஞங் பஞ்ஞபேதி, மயம்பி ரூபானங் பரிஞ்ஞங்
பஞ்ஞபேம. ஸமணோ, ஆவுஸோ, கோ³தமோ வேத³னானங் பரிஞ்ஞங் பஞ்ஞபேதி, மயம்பி
வேத³னானங் பரிஞ்ஞங் பஞ்ஞபேம. இத⁴ நோ, ஆவுஸோ, கோ விஸேஸோ, கோ அதி⁴ப்பயாஸோ,
கிங் நானாகரணங் ஸமணஸ்ஸ வா கோ³தமஸ்ஸ அம்ஹாகங் வா,
யதி³த³ங் த⁴ம்மதே³ஸனாய வா த⁴ம்மதே³ஸனங் அனுஸாஸனியா வா அனுஸாஸனி’ந்தி. அத²
கோ² மயங், ப⁴ந்தே, தேஸங் அஞ்ஞதித்தி²யானங் பரிப்³பா³ஜகானங் பா⁴ஸிதங் நேவ
அபி⁴னந்தி³ம்ஹ, நப்படிக்கோஸிம்ஹ; அனபி⁴னந்தி³த்வா அப்படிக்கோஸித்வா
உட்டா²யாஸனா பக்கமிம்ஹ – ‘ப⁴க³வதோ ஸந்திகே ஏதஸ்ஸ பா⁴ஸிதஸ்ஸ அத்த²ங்
ஆஜானிஸ்ஸாமா’’’தி.

165.
‘‘ஏவங்வாதி³னோ, பி⁴க்க²வே, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா –
‘கோ பனாவுஸோ, காமானங் அஸ்ஸாதோ³, கோ ஆதீ³னவோ, கிங் நிஸ்ஸரணங்? கோ ரூபானங்
அஸ்ஸாதோ³, கோ ஆதீ³னவோ, கிங் நிஸ்ஸரணங்? கோ வேத³னானங் அஸ்ஸாதோ³, கோ ஆதீ³னவோ,
கிங் நிஸ்ஸரண’ந்தி? ஏவங் புட்டா², பி⁴க்க²வே, அஞ்ஞதித்தி²யா பரிப்³பா³ஜகா ந
சேவ ஸம்பாயிஸ்ஸந்தி, உத்தரிஞ்ச விகா⁴தங் ஆபஜ்ஜிஸ்ஸந்தி. தங் கிஸ்ஸ ஹேது?
யதா² தங், பி⁴க்க²வே, அவிஸயஸ்மிங். நாஹங் தங், பி⁴க்க²வே, பஸ்ஸாமி ஸதே³வகே
லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய யோ இமேஸங்
பஞ்ஹானங் வெய்யாகரணேன சித்தங் ஆராதெ⁴ய்ய, அஞ்ஞத்ர ததா²க³தேன வா
ததா²க³தஸாவகேன வா, இதோ வா பன ஸுத்வா.

166.
‘‘கோ ச, பி⁴க்க²வே, காமானங் அஸ்ஸாதோ³? பஞ்சிமே, பி⁴க்க²வே, காமகு³ணா. கதமே
பஞ்ச? சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா
ரஜனீயா, ஸோதவிஞ்ஞெய்யா ஸத்³தா³…பே॰… கா⁴னவிஞ்ஞெய்யா க³ந்தா⁴ … ஜிவ்ஹாவிஞ்ஞெய்யா ரஸா… காயவிஞ்ஞெய்யா பொ²ட்ட²ப்³பா³ இட்டா² கந்தா மனாபா பியரூபா காமூபஸங்ஹிதா ரஜனீயா – இமே கோ², பி⁴க்க²வே, பஞ்ச காமகு³ணா. யங் கோ², பி⁴க்க²வே, இமே பஞ்ச காமகு³ணே படிச்ச உப்பஜ்ஜதி ஸுக²ங் ஸோமனஸ்ஸங் – அயங் காமானங் அஸ்ஸாதோ³.

167. ‘‘கோ ச, பி⁴க்க²வே, காமானங் ஆதீ³னவோ? இத⁴, பி⁴க்க²வே, குலபுத்தோ யேன ஸிப்பட்டா²னேன ஜீவிகங் கப்பேதி – யதி³ முத்³தா³ய யதி³ க³ணனாய யதி³ ஸங்கா²னேன [ஸங்கா²ய (க॰)]
யதி³ கஸியா யதி³ வணிஜ்ஜாய யதி³ கோ³ரக்கே²ன யதி³ இஸ்ஸத்தே²ன யதி³
ராஜபோரிஸேன யதி³ ஸிப்பஞ்ஞதரேன – ஸீதஸ்ஸ புரக்க²தோ உண்ஹஸ்ஸ புரக்க²தோ
ட³ங்ஸமகஸவாதாதபஸரீங்ஸபஸம்ப²ஸ்ஸேஹி ரிஸ்ஸமானோ [ஈரயமானோ (க॰), ஸம்ப²ஸ்ஸமானோ (சூளனி॰ க²க்³க³விஸாணஸுத்த 136)] கு²ப்பிபாஸாய மீயமானோ; அயம்பி, பி⁴க்க²வே, காமானங் ஆதீ³னவோ ஸந்தி³ட்டி²கோ, து³க்க²க்க²ந்தோ⁴ காமஹேது காமனிதா³னங் காமாதி⁴கரணங் காமானமேவ ஹேது.

‘‘தஸ்ஸ சே, பி⁴க்க²வே, குலபுத்தஸ்ஸ ஏவங் உட்ட²ஹதோ
க⁴டதோ வாயமதோ தே போ⁴கா³ நாபி⁴னிப்ப²ஜ்ஜந்தி. ஸோ ஸோசதி கிலமதி பரிதே³வதி
உரத்தாளிங் கந்த³தி, ஸம்மோஹங் ஆபஜ்ஜதி – ‘மோக⁴ங் வத மே உட்டா²னங், அப²லோ வத
மே வாயாமோ’தி. அயம்பி, பி⁴க்க²வே, காமானங் ஆதீ³னவோ ஸந்தி³ட்டி²கோ
து³க்க²க்க²ந்தோ⁴ காமஹேது காமனிதா³னங் காமாதி⁴கரணங் காமானமேவ ஹேது.

‘‘தஸ்ஸ சே, பி⁴க்க²வே, குலபுத்தஸ்ஸ ஏவங் உட்ட²ஹதோ
க⁴டதோ வாயமதோ தே போ⁴கா³ அபி⁴னிப்ப²ஜ்ஜந்தி. ஸோ தேஸங் போ⁴கா³னங்
ஆரக்கா²தி⁴கரணங் து³க்க²ங் தோ³மனஸ்ஸங் படிஸங்வேதே³தி – ‘கிந்தி மே போ⁴கே³
நேவ ராஜானோ ஹரெய்யுங், ந சோரா ஹரெய்யுங், ந அக்³கி³ த³ஹெய்ய, ந உத³கங்
வஹெய்ய [வாஹெய்ய (க॰)], ந அப்பியா தா³யாதா³ ஹரெய்யு’ந்தி. தஸ்ஸ
ஏவங் ஆரக்க²தோ கோ³பயதோ தே போ⁴கே³ ராஜானோ வா ஹரந்தி, சோரா வா ஹரந்தி,
அக்³கி³ வா த³ஹதி, உத³கங் வா வஹதி, அப்பியா வா தா³யாதா³ ஹரந்தி. ஸோ ஸோசதி
கிலமதி பரிதே³வதி உரத்தாளிங் கந்த³தி, ஸம்மோஹங் ஆபஜ்ஜதி – ‘யம்பி மே அஹோஸி
தம்பி நோ நத்தீ²’தி. அயம்பி, பி⁴க்க²வே, காமானங் ஆதீ³னவோ ஸந்தி³ட்டி²கோ,
து³க்க²க்க²ந்தோ⁴ காமஹேது காமனிதா³னங் காமாதி⁴கரணங் காமானமேவ ஹேது.

168.
‘‘புன சபரங், பி⁴க்க²வே, காமஹேது காமனிதா³னங் காமாதி⁴கரணங் காமானமேவ ஹேது
ராஜானோபி ராஜூஹி விவத³ந்தி, க²த்தியாபி க²த்தியேஹி விவத³ந்தி ,
ப்³ராஹ்மணாபி ப்³ராஹ்மணேஹி விவத³ந்தி, க³ஹபதீபி க³ஹபதீஹி விவத³ந்தி,
மாதாபி புத்தேன விவத³தி, புத்தோபி மாதரா விவத³தி, பிதாபி புத்தேன விவத³தி,
புத்தோபி பிதரா விவத³தி, பா⁴தாபி பா⁴தரா விவத³தி, பா⁴தாபி ப⁴கி³னியா
விவத³தி, ப⁴கி³னீபி பா⁴தரா விவத³தி, ஸஹாயோபி ஸஹாயேன விவத³தி. தே தத்த²
கலஹவிக்³க³ஹவிவாதா³பன்னா அஞ்ஞமஞ்ஞங் பாணீஹிபி உபக்கமந்தி, லெட்³டூ³ஹிபி
உபக்கமந்தி, த³ண்டே³ஹிபி உபக்கமந்தி, ஸத்தே²ஹிபி உபக்கமந்தி. தே தத்த²
மரணம்பி நிக³ச்ச²ந்தி, மரணமத்தம்பி து³க்க²ங் . அயம்பி, பி⁴க்க²வே, காமானங் ஆதீ³னவோ ஸந்தி³ட்டி²கோ, து³க்க²க்க²ந்தோ⁴ காமஹேது காமனிதா³னங் காமாதி⁴கரணங் காமானமேவ ஹேது.

‘‘புன சபரங், பி⁴க்க²வே, காமஹேது காமனிதா³னங்
காமாதி⁴கரணங் காமானமேவ ஹேது அஸிசம்மங் க³ஹெத்வா, த⁴னுகலாபங் ஸன்னய்ஹித்வா,
உப⁴தொப்³யூள்ஹங் ஸங்கா³மங் பக்க²ந்த³ந்தி உஸூஸுபி கி²ப்பமானேஸு ,
ஸத்தீஸுபி கி²ப்பமானாஸு, அஸீஸுபி விஜ்ஜோதலந்தேஸு. தே தத்த² உஸூஹிபி
விஜ்ஜ²ந்தி, ஸத்தியாபி விஜ்ஜ²ந்தி, அஸினாபி ஸீஸங் சி²ந்த³ந்தி. தே தத்த²
மரணம்பி நிக³ச்ச²ந்தி, மரணமத்தம்பி து³க்க²ங். அயம்பி, பி⁴க்க²வே, காமானங்
ஆதீ³னவோ ஸந்தி³ட்டி²கோ, து³க்க²க்க²ந்தோ⁴ காமஹேது காமனிதா³னங் காமாதி⁴கரணங்
காமானமேவ ஹேது.

‘‘புன சபரங், பி⁴க்க²வே, காமஹேது காமனிதா³னங்
காமாதி⁴கரணங் காமானமேவ ஹேது அஸிசம்மங் க³ஹெத்வா, த⁴னுகலாபங் ஸன்னய்ஹித்வா,
அத்³தா³வலேபனா [அட்டாவலேபனா (ஸ்யா॰ க॰)] உபகாரியோ பக்க²ந்த³ந்தி உஸூஸுபி கி²ப்பமானேஸு, ஸத்தீஸுபி கி²ப்பமானாஸு , அஸீஸுபி விஜ்ஜோதலந்தேஸு. தே தத்த² உஸூஹிபி விஜ்ஜ²ந்தி, ஸத்தியாபி விஜ்ஜ²ந்தி, ச²கணகாயபி [பகட்டி²யாபி (ஸீ॰)]
ஓஸிஞ்சந்தி, அபி⁴வக்³கே³னபி ஓமத்³த³ந்தி, அஸினாபி ஸீஸங் சி²ந்த³ந்தி. தே
தத்த² மரணம்பி நிக³ச்ச²ந்தி, மரணமத்தம்பி து³க்க²ங். அயம்பி, பி⁴க்க²வே,
காமானங் ஆதீ³னவோ ஸந்தி³ட்டி²கோ, து³க்க²க்க²ந்தோ⁴ காமஹேது காமனிதா³னங்
காமாதி⁴கரணங் காமானமேவ ஹேது.

169.
‘‘புன சபரங், பி⁴க்க²வே, காமஹேது காமனிதா³னங் காமாதி⁴கரணங் காமானமேவ ஹேது
ஸந்தி⁴ம்பி சி²ந்த³ந்தி, நில்லோபம்பி ஹரந்தி, ஏகாகா³ரிகம்பி கரொந்தி,
பரிபந்தே²பி திட்ட²ந்தி, பரதா³ரம்பி க³ச்ச²ந்தி. தமேனங் ராஜானோ க³ஹெத்வா
விவிதா⁴ கம்மகாரணா காரெந்தி – கஸாஹிபி தாளெந்தி, வெத்தேஹிபி தாளெந்தி,
அட்³ட⁴த³ண்ட³கேஹிபி தாளெந்தி; ஹத்த²ம்பி சி²ந்த³ந்தி, பாத³ம்பி
சி²ந்த³ந்தி, ஹத்த²பாத³ம்பி சி²ந்த³ந்தி, கண்ணம்பி சி²ந்த³ந்தி, நாஸம்பி சி²ந்த³ந்தி, கண்ணனாஸம்பி சி²ந்த³ந்தி; பி³லங்க³தா²லிகம்பி கரொந்தி ,
ஸங்க²முண்டி³கம்பி கரொந்தி, ராஹுமுக²ம்பி கரொந்தி, ஜோதிமாலிகம்பி கரொந்தி,
ஹத்த²பஜ்ஜோதிகம்பி கரொந்தி, ஏரகவத்திகம்பி கரொந்தி, சீரகவாஸிகம்பி
கரொந்தி, ஏணெய்யகம்பி கரொந்தி, ப³ளிஸமங்ஸிகம்பி கரொந்தி, கஹாபணிகம்பி
கரொந்தி, கா²ராபதச்சி²கம்பி கரொந்தி, பலிக⁴பரிவத்திகம்பி கரொந்தி,
பலாலபீட²கம்பி கரொந்தி, தத்தேனபி தேலேன ஓஸிஞ்சந்தி, ஸுனகே²ஹிபி
கா²தா³பெந்தி, ஜீவந்தம்பி ஸூலே உத்தாஸெந்தி, அஸினாபி ஸீஸங் சி²ந்த³ந்தி .
தே தத்த² மரணம்பி நிக³ச்ச²ந்தி, மரணமத்தம்பி து³க்க²ங். அயம்பி,
பி⁴க்க²வே, காமானங் ஆதீ³னவோ ஸந்தி³ட்டி²கோ, து³க்க²க்க²ந்தோ⁴ காமஹேது
காமனிதா³னங் காமாதி⁴கரணங் காமானமேவ ஹேது.

‘‘புன சபரங், பி⁴க்க²வே, காமஹேது காமனிதா³னங்
காமாதி⁴கரணங் காமானமேவ ஹேது காயேன து³ச்சரிதங் சரந்தி, வாசாய து³ச்சரிதங்
சரந்தி, மனஸா து³ச்சரிதங் சரந்தி. தே காயேன து³ச்சரிதங் சரித்வா, வாசாய
து³ச்சரிதங் சரித்வா, மனஸா து³ச்சரிதங் சரித்வா, காயஸ்ஸ பே⁴தா³ பரங் மரணா
அபாயங் து³க்³க³திங் வினிபாதங் நிரயங் உபபஜ்ஜந்தி. அயம்பி, பி⁴க்க²வே,
காமானங் ஆதீ³னவோ ஸம்பராயிகோ, து³க்க²க்க²ந்தோ⁴ காமஹேது காமனிதா³னங்
காமாதி⁴கரணங் காமானமேவ ஹேது.

170. ‘‘கிஞ்ச, பி⁴க்க²வே, காமானங் நிஸ்ஸரணங்? யோ கோ², பி⁴க்க²வே, காமேஸு ச²ந்த³ராக³வினயோ ச²ந்த³ராக³ப்பஹானங் – இத³ங் காமானங் நிஸ்ஸரணங்.

‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா ஏவங்
காமானங் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ
யதா²பூ⁴தங் நப்பஜானந்தி தே வத ஸாமங் வா காமே பரிஜானிஸ்ஸந்தி, பரங் வா
தத²த்தாய ஸமாத³பெஸ்ஸந்தி யதா² படிபன்னோ காமே பரிஜானிஸ்ஸதீதி – நேதங் டா²னங்
விஜ்ஜதி. யே ச கோ² கேசி, பி⁴க்க²வே, ஸமணா வா ப்³ராஹ்மணா வா
ஏவங் காமானங் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச
நிஸ்ஸரணதோ யதா²பூ⁴தங் பஜானந்தி, தே வத ஸாமங் வா காமே பரிஜானிஸ்ஸந்தி பரங்
வா தத²த்தாய ஸமாத³பெஸ்ஸந்த்ந்த்தி யதா² படிபன்னோ காமே பரிஜானிஸ்ஸதீதி –
டா²னமேதங் விஜ்ஜதி.

171.
‘‘கோ ச, பி⁴க்க²வே, ரூபானங் அஸ்ஸாதோ³? ஸெய்யதா²பி, பி⁴க்க²வே,
க²த்தியகஞ்ஞா வா ப்³ராஹ்மணகஞ்ஞா வா க³ஹபதிகஞ்ஞா வா பன்னரஸவஸ்ஸுத்³தே³ஸிகா
வா ஸோளஸவஸ்ஸுத்³தே³ஸிகா வா, நாதிதீ³கா⁴ நாதிரஸ்ஸா நாதிகிஸா நாதிதூ²லா
நாதிகாளீ நாச்சோதா³தா பரமா ஸா, பி⁴க்க²வே, தஸ்மிங் ஸமயே ஸுபா⁴ வண்ணனிபா⁴தி? ‘ஏவங், ப⁴ந்தே’. யங் கோ², பி⁴க்க²வே, ஸுப⁴ங் வண்ணனிப⁴ங் படிச்ச உப்பஜ்ஜதி ஸுக²ங் ஸோமனஸ்ஸங் – அயங் ரூபானங் அஸ்ஸாதோ³.

‘‘கோ ச, பி⁴க்க²வே, ரூபானங் ஆதீ³னவோ? இத⁴, பி⁴க்க²வே,
தமேவ ப⁴கி³னிங் பஸ்ஸெய்ய அபரேன ஸமயேன ஆஸீதிகங் வா நாவுதிகங் வா வஸ்ஸஸதிகங்
வா ஜாதியா, ஜிண்ணங் கோ³பானஸிவங்கங் பொ⁴க்³க³ங் த³ண்ட³பராயனங் பவேத⁴மானங் க³ச்ச²ந்திங் ஆதுரங் க³தயொப்³ப³னங் க²ண்ட³த³ந்தங் [க²ண்ட³த³ந்திங் (ஸீ॰ பீ॰)] பலிதகேஸங் [பலிதகேஸிங்], விலூனங் க²லிதஸிரங் வலினங் திலகாஹதக³த்தங் [திலகாஹதக³த்திங் (ப³ஹூஸு) அட்ட²கதா² டீகா ஓலோகேதப்³பா³]. தங் கிங் மஞ்ஞத², பி⁴க்க²வே, யா புரிமா ஸுபா⁴ வண்ணனிபா⁴ ஸா அந்தரஹிதா, ஆதீ³னவோ பாதுபூ⁴தோதி? ‘ஏவங், ப⁴ந்தே’. அயம்பி, பி⁴க்க²வே, ரூபானங் ஆதீ³னவோ.

‘‘புன சபரங், பி⁴க்க²வே, தமேவ ப⁴கி³னிங் பஸ்ஸெய்ய ஆபா³தி⁴கங் து³க்கி²தங் பா³ள்ஹகி³லானங், ஸகே முத்தகரீஸே பலிபன்னங் ஸேமானங் [ஸெய்யமானங் (க॰)],
அஞ்ஞேஹி வுட்டா²பியமானங், அஞ்ஞேஹி ஸங்வேஸியமானங். தங் கிங் மஞ்ஞத²,
பி⁴க்க²வே, யா புரிமா ஸுபா⁴ வண்ணனிபா⁴ ஸா அந்தரஹிதா, ஆதீ³னவோ பாதுபூ⁴தோதி?
‘ஏவங், ப⁴ந்தே’. அயம்பி, பி⁴க்க²வே, ரூபானங் ஆதீ³னவோ.

172.
‘‘புன சபரங், பி⁴க்க²வே, தமேவ ப⁴கி³னிங் பஸ்ஸெய்ய ஸரீரங் ஸிவதி²காய
ச²ட்³டி³தங் – ஏகாஹமதங் வா த்³வீஹமதங் வா தீஹமதங் வா, உத்³து⁴மாதகங்
வினீலகங் விபுப்³ப³கஜாதங். தங் கிங் மஞ்ஞத², பி⁴க்க²வே, யா புரிமா ஸுபா⁴
வண்ணனிபா⁴ ஸா அந்தரஹிதா, ஆதீ³னவோ பாதுபூ⁴தோதி? ‘ஏவங், ப⁴ந்தே’. அயம்பி,
பி⁴க்க²வே, ரூபானங் ஆதீ³னவோ.

‘‘புன சபரங், பி⁴க்க²வே, தமேவ ப⁴கி³னிங் பஸ்ஸெய்ய
ஸரீரங் ஸிவதி²காய ச²ட்³டி³தங் – காகேஹி வா க²ஜ்ஜமானங், குலலேஹி வா
க²ஜ்ஜமானங், கி³ஜ்ஜே²ஹி வா க²ஜ்ஜமானங், கங்கேஹி வா க²ஜ்ஜமானங், ஸுனகே²ஹி வா
க²ஜ்ஜமானங், ப்³யக்³கே⁴ஹி வா க²ஜ்ஜமானங், தீ³பீஹி வா க²ஜ்ஜமானங்,
ஸிங்கா³லேஹி வா க²ஜ்ஜமானங், விவிதே⁴ஹி வா பாணகஜாதேஹி க²ஜ்ஜமானங். தங் கிங்
மஞ்ஞத², பி⁴க்க²வே , யா புரிமா ஸுபா⁴ வண்ணனிபா⁴ ஸா அந்தரஹிதா, ஆதீ³னவோ பாதுபூ⁴தோதி? ‘ஏவங், ப⁴ந்தே’. அயம்பி, பி⁴க்க²வே, ரூபானங் ஆதீ³னவோ.

‘‘புன சபரங், பி⁴க்க²வே, தமேவ ப⁴கி³னிங் பஸ்ஸெய்ய
ஸரீரங் ஸிவதி²காய ச²ட்³டி³தங் – அட்டி²கஸங்க²லிகங் ஸமங்ஸலோஹிதங்
ந்ஹாருஸம்ப³ந்த⁴ங், அட்டி²கஸங்க²லிகங் நிமங்ஸலோஹிதமக்கி²தங்
ந்ஹாருஸம்ப³ந்த⁴ங், அட்டி²கஸங்க²லிகங் அபக³தமங்ஸலோஹிதங்
ந்ஹாருஸம்ப³ந்த⁴ங், அட்டி²கானி அபக³தஸம்ப³ந்தா⁴னி
தி³ஸாவிதி³ஸாவிக்கி²த்தானி – அஞ்ஞேன ஹத்த²ட்டி²கங், அஞ்ஞேன பாத³ட்டி²கங்,
அஞ்ஞேன கொ³ப்ப²கட்டி²கங், அஞ்ஞேன ஜங்க⁴ட்டி²கங், அஞ்ஞேன ஊருட்டி²கங்,
அஞ்ஞேன கடிட்டி²கங், அஞ்ஞேன பா²ஸுகட்டி²கங், அஞ்ஞேன பிட்டி²ட்டி²கங்,
அஞ்ஞேன க²ந்த⁴ட்டி²கங், அஞ்ஞேன கீ³வட்டி²கங், அஞ்ஞேன ஹனுகட்டி²கங், அஞ்ஞேன
த³ந்தட்டி²கங், அஞ்ஞேன ஸீஸகடாஹங். தங் கிங் மஞ்ஞத²,
பி⁴க்க²வே, யா புரிமா ஸுபா⁴ வண்ணனிபா⁴ ஸா அந்தரஹிதா, ஆதீ³னவோ பாதுபூ⁴தோதி?
‘ஏவங், ப⁴ந்தே’. அயம்பி, பி⁴க்க²வே, ரூபானங் ஆதீ³னவோ.

‘‘புன சபரங், பி⁴க்க²வே, தமேவ ப⁴கி³னிங் பஸ்ஸெய்ய
ஸரீரங் ஸிவதி²காய ச²ட்³டி³தங் – அட்டி²கானி ஸேதானி ஸங்க²வண்ணபடிபா⁴கா³னி,
அட்டி²கானி புஞ்ஜகிதானி தேரோவஸ்ஸிகானி, அட்டி²கானி பூதீனி சுண்ணகஜாதானி.
தங் கிங் மஞ்ஞத², பி⁴க்க²வே, யா புரிமா ஸுபா⁴ வண்ணனிபா⁴ ஸா அந்தரஹிதா,
ஆதீ³னவோ பாதுபூ⁴தோதி? ‘ஏவங், ப⁴ந்தே’. அயம்பி, பி⁴க்க²வே, ரூபானங் ஆதீ³னவோ.

‘‘கிஞ்ச, பி⁴க்க²வே, ரூபானங் நிஸ்ஸரணங்? யோ, பி⁴க்க²வே, ரூபேஸு ச²ந்த³ராக³வினயோ ச²ந்த³ராக³ப்பஹானங் – இத³ங் ரூபானங் நிஸ்ஸரணங்.

‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா ஏவங்
ரூபானங் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ
யதா²பூ⁴தங் நப்பஜானந்தி தே வத ஸாமங் வா ரூபே பரிஜானிஸ்ஸந்தி, பரங் வா
தத²த்தாய ஸமாத³பெஸ்ஸந்தி யதா² படிபன்னோ ரூபே பரிஜானிஸ்ஸதீதி – நேதங் டா²னங்
விஜ்ஜதி. யே ச கோ² கேசி, பி⁴க்க²வே, ஸமணா வா ப்³ராஹ்மணா வா ஏவங் ரூபானங்
அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தங்
பஜானந்தி தே வத ஸாமங் வா ரூபே பரிஜானிஸ்ஸந்தி பரங் வா தத²த்தாய
ஸமாத³பெஸ்ஸந்தி யதா² படிபன்னோ ரூபே பரிஜானிஸ்ஸதீதி – டா²னமேதங் விஜ்ஜதி.

173.
‘‘கோ ச, பி⁴க்க²வே, வேத³னானங் அஸ்ஸாதோ³? இத⁴, பி⁴க்க²வே, பி⁴க்கு²
விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங்
பீதிஸுக²ங் பட²மங் ஜா²னங் உபஸம்பஜ்ஜ விஹரதி. யஸ்மிங் ஸமயே, பி⁴க்க²வே,
பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங்
விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி, நேவ தஸ்மிங் ஸமயே
அத்தப்³யாபா³தா⁴யபி சேதேதி, ந பரப்³யாபா³தா⁴யபி சேதேதி, ந
உப⁴யப்³யாபா³தா⁴யபி சேதேதி ; அப்³யாப³ஜ்ஜ²ங்யேவ தஸ்மிங் ஸமயே வேத³னங் வேதே³தி. அப்³யாப³ஜ்ஜ²பரமாஹங், பி⁴க்க²வே, வேத³னானங் அஸ்ஸாத³ங் வதா³மி.

‘‘புன சபரங், பி⁴க்க²வே, பி⁴க்கு² விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங்
அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங் உபஸம்பஜ்ஜ
விஹரதி…பே॰… யஸ்மிங் ஸமயே, பி⁴க்க²வே, பி⁴க்கு² பீதியா ச விராகா³,
உபெக்க²கோ ச விஹரதி, ஸதோ ச ஸம்பஜானோ ஸுக²ஞ்ச காயேன படிஸங்வேதே³தி யங் தங்
அரியா ஆசிக்க²ந்தி – ‘உபெக்க²கோ ஸதிமா
ஸுக²விஹாரீ’தி ததியங் ஜா²னங் உபஸம்பஜ்ஜ விஹரதி…பே॰… யஸ்மிங் ஸமயே,
பி⁴க்க²வே, பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ
ஸோமனஸ்ஸதோ³மனஸ்ஸானங் அத்த²ங்க³மா அது³க்க²மஸுக²ங்
உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹரதி, நேவ தஸ்மிங்
ஸமயே அத்தப்³யாபா³தா⁴யபி சேதேதி, ந பரப்³யாபா³தா⁴யபி சேதேதி, ந
உப⁴யப்³யாபா³தா⁴யபி சேதேதி; அப்³யாப³ஜ்ஜ²ங்யேவ தஸ்மிங் ஸமயே வேத³னங்
வேதே³தி. அப்³யாப³ஜ்ஜ²பரமாஹங், பி⁴க்க²வே, வேத³னானங் அஸ்ஸாத³ங் வதா³மி.

174. ‘‘கோ ச, பி⁴க்க²வே, வேத³னானங் ஆதீ³னவோ? யங், பி⁴க்க²வே, வேத³னா அனிச்சா து³க்கா² விபரிணாமத⁴ம்மா – அயங் வேத³னானங் ஆதீ³னவோ.

‘‘கிஞ்ச, பி⁴க்க²வே, வேத³னானங் நிஸ்ஸரணங்? யோ,
பி⁴க்க²வே, வேத³னாஸு ச²ந்த³ராக³வினயோ, ச²ந்த³ராக³ப்பஹானங் – இத³ங்
வேத³னானங் நிஸ்ஸரணங்.

‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா ஏவங்
வேத³னானங் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ
யதா²பூ⁴தங் நப்பஜானந்தி, தே வத ஸாமங் வா வேத³னங் பரிஜானிஸ்ஸந்தி, பரங் வா
தத²த்தாய ஸமாத³பெஸ்ஸந்தி யதா² படிபன்னோ வேத³னங் பரிஜானிஸ்ஸதீதி – நேதங்
டா²னங் விஜ்ஜதி. யே ச கோ² கேசி, பி⁴க்க²வே, ஸமணா வா
ப்³ராஹ்மணா வா ஏவங் வேத³னானங் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ
நிஸ்ஸரணஞ்ச நிஸ்ஸரணதோ யதா²பூ⁴தங் பஜானந்தி தே வத ஸாமங் வா வேத³னங்
பரிஜானிஸ்ஸந்தி, பரங் வா தத²த்தாய ஸமாத³பெஸ்ஸந்தி யதா² படிபன்னோ வேத³னங்
பரிஜானிஸ்ஸதீதி – டா²னமேதங் விஜ்ஜதீ’’தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.

மஹாது³க்க²க்க²ந்த⁴ஸுத்தங் நிட்டி²தங் ததியங்.

4. சூளது³க்க²க்க²ந்த⁴ஸுத்தங்

175. ஏவங்
மே ஸுதங் – ஏகங் ஸமயங் ப⁴க³வா ஸக்கேஸு விஹரதி கபிலவத்து²ஸ்மிங்
நிக்³ரோதா⁴ராமே. அத² கோ² மஹானாமோ ஸக்கோ யேன ப⁴க³வா தேனுபஸங்கமி;
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங்
நிஸின்னோ கோ² மஹானாமோ ஸக்கோ ப⁴க³வந்தங் ஏதத³வோச – ‘‘தீ³க⁴ரத்தாஹங், ப⁴ந்தே,
ப⁴க³வதா ஏவங் த⁴ம்மங் தே³ஸிதங் ஆஜானாமி – ‘லோபோ⁴ சித்தஸ்ஸ உபக்கிலேஸோ,
தோ³ஸோ சித்தஸ்ஸ உபக்கிலேஸோ, மோஹோ சித்தஸ்ஸ உபக்கிலேஸோ’தி. ஏவஞ்சாஹங் [ஏவங்பாஹங் (க॰)],
ப⁴ந்தே, ப⁴க³வதா த⁴ம்மங் தே³ஸிதங் ஆஜானாமி – ‘லோபோ⁴ சித்தஸ்ஸ உபக்கிலேஸோ,
தோ³ஸோ சித்தஸ்ஸ உபக்கிலேஸோ, மோஹோ சித்தஸ்ஸ உபக்கிலேஸோ’தி. அத² ச பன மே
ஏகதா³ லோப⁴த⁴ம்மாபி சித்தங் பரியாதா³ய திட்ட²ந்தி, தோ³ஸத⁴ம்மாபி சித்தங்
பரியாதா³ய திட்ட²ந்தி, மோஹத⁴ம்மாபி சித்தங் பரியாதா³ய திட்ட²ந்தி. தஸ்ஸ
மய்ஹங், ப⁴ந்தே, ஏவங் ஹோதி – ‘கோஸு நாம மே த⁴ம்மோ அஜ்ஜ²த்தங் அப்பஹீனோ யேன
மே ஏகதா³ லோப⁴த⁴ம்மாபி சித்தங் பரியாதா³ய திட்ட²ந்தி, தோ³ஸத⁴ம்மாபி சித்தங்
பரியாதா³ய திட்ட²ந்தி, மோஹத⁴ம்மாபி சித்தங் பரியாதா³ய திட்ட²ந்தீ’’’தி.

176.
‘‘ஸோ ஏவ கோ² தே, மஹானாம, த⁴ம்மோ அஜ்ஜ²த்தங் அப்பஹீனோ யேன தே ஏகதா³
லோப⁴த⁴ம்மாபி சித்தங் பரியாதா³ய திட்ட²ந்தி, தோ³ஸத⁴ம்மாபி சித்தங்
பரியாதா³ய திட்ட²ந்தி, மோஹத⁴ம்மாபி சித்தங் பரியாதா³ய திட்ட²ந்தி. ஸோ ச ஹி
தே, மஹானாம, த⁴ம்மோ அஜ்ஜ²த்தங் பஹீனோ அப⁴விஸ்ஸ, ந த்வங் அகா³ரங்
அஜ்ஜா²வஸெய்யாஸி, ந காமே பரிபு⁴ஞ்ஜெய்யாஸி. யஸ்மா ச கோ² தே, மஹானாம, ஸோ ஏவ
த⁴ம்மோ அஜ்ஜ²த்தங் அப்பஹீனோ தஸ்மா த்வங் அகா³ரங் அஜ்ஜா²வஸஸி, காமே
பரிபு⁴ஞ்ஜஸி.

177. ‘‘‘அப்பஸ்ஸாதா³ காமா ப³ஹுது³க்கா² ப³ஹுபாயாஸா, ஆதீ³னவோ [ப³ஹூபாயாஸா (ஸீ॰ ஸ்யா॰ பீ॰)] எத்த² பி⁴ய்யோ’தி – இதி சேபி, மஹானாம, அரியஸாவகஸ்ஸ யதா²பூ⁴தங் ஸம்மப்பஞ்ஞாய ஸுதி³ட்ட²ங் ஹோதி, ஸோ ச [ஸோவ (க॰)]
அஞ்ஞத்ரேவ காமேஹி அஞ்ஞத்ர அகுஸலேஹி த⁴ம்மேஹி பீதிஸுக²ங் நாதி⁴க³ச்ச²தி,
அஞ்ஞங் வா ததோ ஸந்ததரங்; அத² கோ² ஸோ நேவ தாவ அனாவட்டீ காமேஸு ஹோதி. யதோ ச
கோ², மஹானாம, அரியஸாவகஸ்ஸ ‘அப்பஸ்ஸாதா³ காமா ப³ஹுது³க்கா² ப³ஹுபாயாஸா,
ஆதீ³னவோ எத்த² பி⁴ய்யோ’தி – ஏவமேதங் யதா²பூ⁴தங் ஸம்மப்பஞ்ஞாய
ஸுதி³ட்ட²ங் ஹோதி, ஸோ ச அஞ்ஞத்ரேவ காமேஹி அஞ்ஞத்ர அகுஸலேஹி த⁴ம்மேஹி
பீதிஸுக²ங் அதி⁴க³ச்ச²தி அஞ்ஞங் வா ததோ ஸந்ததரங்; அத² கோ² ஸோ அனாவட்டீ
காமேஸு ஹோதி.

‘‘மய்ஹம்பி கோ², மஹானாம ,
புப்³பே³வ ஸம்போ³தா⁴, அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ,
‘அப்பஸ்ஸாதா³ காமா ப³ஹுது³க்கா² ப³ஹுபாயாஸா, ஆதீ³னவோ எத்த² பி⁴ய்யோ’தி –
ஏவமேதங் யதா²பூ⁴தங் ஸம்மப்பஞ்ஞாய ஸுதி³ட்ட²ங் ஹோதி, ஸோ ச அஞ்ஞத்ரேவ காமேஹி
அஞ்ஞத்ர அகுஸலேஹி த⁴ம்மேஹி பீதிஸுக²ங் நாஜ்ஜ²க³மங், அஞ்ஞங் வா ததோ
ஸந்ததரங்; அத² க்²வாஹங் நேவ தாவ அனாவட்டீ காமேஸு பச்சஞ்ஞாஸிங். யதோ ச கோ²
மே, மஹானாம, ‘அப்பஸ்ஸாதா³ காமா ப³ஹுது³க்கா² ப³ஹுபாயாஸா, ஆதீ³னவோ எத்த²
பி⁴ய்யோ’தி – ஏவமேதங் யதா²பூ⁴தங் ஸம்மப்பஞ்ஞாய ஸுதி³ட்ட²ங் அஹோஸி, ஸோ ச [ஸோவ (க॰)] அஞ்ஞத்ரேவ காமேஹி அஞ்ஞத்ர அகுஸலேஹி த⁴ம்மேஹி பீதிஸுக²ங் அஜ்ஜ²க³மங், அஞ்ஞங் வா ததோ ஸந்ததரங்; அதா²ஹங் அனாவட்டீ காமேஸு பச்சஞ்ஞாஸிங்.

178.
‘‘கோ ச, மஹானாம, காமானங் அஸ்ஸாதோ³? பஞ்சிமே, மஹானாம, காமகு³ணா. கதமே பஞ்ச?
சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா ரஜனீயா;
ஸோதவிஞ்ஞெய்யா ஸத்³தா³…பே॰… கா⁴னவிஞ்ஞெய்யா க³ந்தா⁴… ஜிவ்ஹாவிஞ்ஞெய்யா ரஸா…
காயவிஞ்ஞெய்யா பொ²ட்ட²ப்³பா³ இட்டா² கந்தா மனாபா பியரூபா காமூபஸங்ஹிதா
ரஜனீயா – இமே கோ², மஹானாம, பஞ்ச காமகு³ணா. யங் கோ², மஹானாம, இமே பஞ்ச
காமகு³ணே படிச்ச உப்பஜ்ஜதி ஸுக²ங் ஸோமனஸ்ஸங் – அயங் காமானங் அஸ்ஸாதோ³.

‘‘கோ ச, மஹானாம, காமானங் ஆதீ³னவோ? இத⁴, மஹானாம,
குலபுத்தோ யேன ஸிப்பட்டா²னேன ஜீவிகங் கப்பேதி – யதி³ முத்³தா³ய யதி³ க³ணனாய
யதி³ ஸங்கா²னேன யதி³ கஸியா யதி³ வணிஜ்ஜாய யதி³ கோ³ரக்கே²ன யதி³ இஸ்ஸத்தே²ன
யதி³ ராஜபோரிஸேன யதி³ ஸிப்பஞ்ஞதரேன, ஸீதஸ்ஸ புரக்க²தோ உண்ஹஸ்ஸ புரக்க²தோ
ட³ங்ஸமகஸவாதாதபஸரீங்ஸபஸம்ப²ஸ்ஸேஹி ரிஸ்ஸமானோ கு²ப்பிபாஸாய மீயமானோ; அயம்பி,
மஹானாம, காமானங் ஆதீ³னவோ ஸந்தி³ட்டி²கோ து³க்க²க்க²ந்தோ⁴ காமஹேது
காமனிதா³னங் காமாதி⁴கரணங் காமானமேவ ஹேது.

‘‘தஸ்ஸ சே மஹானாம குலபுத்தஸ்ஸ
ஏவங் உட்ட²ஹதோ க⁴டதோ வாயமதோ தே போ⁴கா³ நாபி⁴னிப்ப²ஜ்ஜந்தி, ஸோ ஸோசதி கிலமதி
பரிதே³வதி உரத்தாளிங் கந்த³தி ஸம்மோஹங் ஆபஜ்ஜதி ‘மோக⁴ங்
வத மே உட்டா²னங், அப²லோ வத மே வாயாமோ’தி. அயம்பி, மஹானாம, காமானங் ஆதீ³னவோ
ஸந்தி³ட்டி²கோ து³க்க²க்க²ந்தோ⁴ காமஹேது காமனிதா³னங் காமாதி⁴கரணங்
காமானமேவ ஹேது.

‘‘தஸ்ஸ சே, மஹானாம, குலபுத்தஸ்ஸ ஏவங் உட்ட²ஹதோ க⁴டதோ
வாயமதோ தே போ⁴கா³ அபி⁴னிப்ப²ஜ்ஜந்தி. ஸோ தேஸங் போ⁴கா³னங் ஆரக்கா²தி⁴கரணங்
து³க்க²ங் தோ³மனஸ்ஸங் படிஸங்வேதே³தி – ‘கிந்தி மே போ⁴கே³ நேவ ராஜானோ
ஹரெய்யுங், ந சோரா ஹரெய்யுங், ந அக்³கி³ த³ஹெய்ய, ந உத³கங் வஹெய்ய, ந
அப்பியா வா தா³யாதா³ ஹரெய்யு’ந்தி. தஸ்ஸ ஏவங் ஆரக்க²தோ கோ³பயதோ தே போ⁴கே³
ராஜானோ வா ஹரந்தி, சோரா வா ஹரந்தி, அக்³கி³ வா த³ஹதி, உத³கங் வா வஹதி,
அப்பியா வா தா³யாதா³ ஹரந்தி. ஸோ ஸோசதி கிலமதி பரிதே³வதி உரத்தாளிங் கந்த³தி
ஸம்மோஹங் ஆபஜ்ஜதி – ‘யம்பி மே அஹோஸி தம்பி நோ நத்தீ²’தி. அயம்பி, மஹானாம,
காமானங் ஆதீ³னவோ ஸந்தி³ட்டி²கோ து³க்க²க்க²ந்தோ⁴ காமஹேது காமனிதா³னங்
காமாதி⁴கரணங் காமானமேவ ஹேது.

‘‘புன சபரங், மஹானாம, காமஹேது காமனிதா³னங்
காமாதி⁴கரணங் காமானமேவ ஹேது ராஜானோபி ராஜூஹி விவத³ந்தி, க²த்தியாபி
க²த்தியேஹி விவத³ந்தி, ப்³ராஹ்மணாபி ப்³ராஹ்மணேஹி விவத³ந்தி, க³ஹபதீபி
க³ஹபதீஹி விவத³ந்தி, மாதாபி புத்தேன விவத³தி, புத்தோபி மாதரா விவத³தி,
பிதாபி புத்தேன விவத³தி, புத்தோபி பிதரா விவத³தி, பா⁴தாபி பா⁴தரா விவத³தி,
பா⁴தாபி ப⁴கி³னியா விவத³தி, ப⁴கி³னீபி பா⁴தரா விவத³தி, ஸஹாயோபி ஸஹாயேன
விவத³தி. தே தத்த² கலஹவிக்³க³ஹவிவாதா³பன்னா அஞ்ஞமஞ்ஞங் பாணீஹிபி
உபக்கமந்தி, லெட்³டூ³ஹிபி உபக்கமந்தி, த³ண்டே³ஹிபி உபக்கமந்தி, ஸத்தே²ஹிபி
உபக்கமந்தி. தே தத்த² மரணம்பி நிக³ச்ச²ந்தி, மரணமத்தம்பி து³க்க²ங் . அயம்பி, மஹானாம, காமானங் ஆதீ³னவோ ஸந்தி³ட்டி²கோ து³க்க²க்க²ந்தோ⁴ காமஹேது காமனிதா³னங் காமாதி⁴கரணங் காமானமேவ ஹேது.

‘‘புன சபரங், மஹானாம, காமஹேது காமனிதா³னங்
காமாதி⁴கரணங் காமானமேவ ஹேது அஸிசம்மங் க³ஹெத்வா, த⁴னுகலாபங் ஸன்னய்ஹித்வா,
உப⁴தொப்³யூள்ஹங் ஸங்கா³மங் பக்க²ந்த³ந்தி உஸூஸுபி கி²ப்பமானேஸு, ஸத்தீஸுபி
கி²ப்பமானாஸு, அஸீஸுபி விஜ்ஜோதலந்தேஸு. தே தத்த² உஸூஹிபி விஜ்ஜ²ந்தி,
ஸத்தியாபி விஜ்ஜ²ந்தி, அஸினாபி ஸீஸங் சி²ந்த³ந்தி.
தே தத்த² மரணம்பி நிக³ச்ச²ந்தி, மரணமத்தம்பி து³க்க²ங். அயம்பி, மஹானாம,
காமானங் ஆதீ³னவோ ஸந்தி³ட்டி²கோ து³க்க²க்க²ந்தோ⁴ காமஹேது காமனிதா³னங்
காமாதி⁴கரணங் காமானமேவ ஹேது.

‘‘புன சபரங், மஹானாம, காமஹேது காமனிதா³னங் காமாதி⁴கரணங் காமானமேவ ஹேது அஸிசம்மங்
க³ஹெத்வா, த⁴னுகலாபங் ஸன்னய்ஹித்வா, அத்³தா³வலேபனா உபகாரியோ பக்க²ந்த³ந்தி
உஸூஸுபி கி²ப்பமானேஸு, ஸத்தீஸுபி கி²ப்பமானாஸு, அஸீஸுபி விஜ்ஜோதலந்தேஸு.
தே தத்த² உஸூஹிபி விஜ்ஜ²ந்தி, ஸத்தியாபி விஜ்ஜ²ந்தி, ச²கணகாயபி ஓஸிஞ்சந்தி,
அபி⁴வக்³கே³னபி ஓமத்³த³ந்தி, அஸினாபி ஸீஸங் சி²ந்த³ந்தி. தே தத்த² மரணம்பி
நிக³ச்ச²ந்தி, மரணமத்தம்பி து³க்க²ங். அயம்பி, மஹானாம, காமானங் ஆதீ³னவோ
ஸந்தி³ட்டி²கோ து³க்க²க்க²ந்தோ⁴ காமஹேது காமனிதா³னங் காமாதி⁴கரணங் காமானமேவ
ஹேது.

‘‘புன சபரங், மஹானாம, காமஹேது காமனிதா³னங் காமாதி⁴கரணங் காமானமேவ ஹேது ஸந்தி⁴ம்பி சி²ந்த³ந்தி, நில்லோபம்பி ஹரந்தி, ஏகாகா³ரிகம்பி
கரொந்தி, பரிபந்தே²பி திட்ட²ந்தி, பரதா³ரம்பி க³ச்ச²ந்தி. தமேனங் ராஜானோ
க³ஹெத்வா விவிதா⁴ கம்மகாரணா காரெந்தி – கஸாஹிபி தாளெந்தி, வெத்தேஹிபி
தாளெந்தி, அட்³ட⁴த³ண்ட³கேஹிபி தாளெந்தி; ஹத்த²ம்பி சி²ந்த³ந்தி, பாத³ம்பி
சி²ந்த³ந்தி, ஹத்த²பாத³ம்பி சி²ந்த³ந்தி, கண்ணம்பி சி²ந்த³ந்தி, நாஸம்பி
சி²ந்த³ந்தி, கண்ணனாஸம்பி சி²ந்த³ந்தி; பி³லங்க³தா²லிகம்பி கரொந்தி,
ஸங்க²முண்டி³கம்பி கரொந்தி, ராஹுமுக²ம்பி கரொந்தி, ஜோதிமாலிகம்பி கரொந்தி,
ஹத்த²பஜ்ஜோதிகம்பி கரொந்தி, ஏரகவத்திகம்பி கரொந்தி, சீரகவாஸிகம்பி கரொந்தி,
ஏணெய்யகம்பி கரொந்தி, ப³ளிஸமங்ஸிகம்பி கரொந்தி, கஹாபணிகம்பி கரொந்தி,
கா²ராபதச்சி²கம்பி கரொந்தி, பலிக⁴பரிவத்திகம்பி கரொந்தி, பலாலபீட²கம்பி
கரொந்தி, தத்தேனபி தேலேன ஓஸிஞ்சந்தி, ஸுனகே²ஹிபி கா²தா³பெந்தி, ஜீவந்தம்பி
ஸூலே உத்தாஸெந்தி, அஸினாபி ஸீஸங் சி²ந்த³ந்தி. தே தத்த² மரணம்பி
நிக³ச்ச²ந்தி, மரணமத்தம்பி து³க்க²ங். அயம்பி, மஹானாம, காமானங் ஆதீ³னவோ
ஸந்தி³ட்டி²கோ து³க்க²க்க²ந்தோ⁴ காமஹேது காமனிதா³னங் காமாதி⁴கரணங் காமானமேவ
ஹேது.

‘‘புன சபரங், மஹானாம, காமஹேது காமனிதா³னங்
காமாதி⁴கரணங் காமானமேவ ஹேது காயேன து³ச்சரிதங் சரந்தி, வாசாய து³ச்சரிதங்
சரந்தி, மனஸா து³ச்சரிதங் சரந்தி. தே காயேன து³ச்சரிதங் சரித்வா, வாசாய
து³ச்சரிதங் சரித்வா, மனஸா து³ச்சரிதங் சரித்வா, காயஸ்ஸ பே⁴தா³ பரங் மரணா,
அபாயங் து³க்³க³திங் வினிபாதங் நிரயங் உபபஜ்ஜந்தி. அயம்பி, மஹானாம, காமானங்
ஆதீ³னவோ ஸம்பராயிகோ , து³க்க²க்க²ந்தோ⁴ காமஹேது காமனிதா³னங் காமாதி⁴கரணங் காமானமேவ ஹேது.

179. ‘‘ஏகமிதா³ஹங், மஹானாம, ஸமயங் ராஜக³ஹே விஹராமி கி³ஜ்ஜ²கூடே பப்³ப³தே. தேன கோ² பன ஸமயேன ஸம்ப³ஹுலா நிக³ண்டா² [நிக³ந்தா² (ஸ்யா॰ க॰)] இஸிகி³லிபஸ்ஸே காளஸிலாயங்
உப்³ப⁴ட்ட²கா ஹொந்தி ஆஸனபடிக்கி²த்தா, ஓபக்கமிகா து³க்கா² திப்³பா³ க²ரா
கடுகா வேத³னா வேத³யந்தி. அத² க்²வாஹங், மஹானாம, ஸாயன்ஹஸமயங் படிஸல்லானா
வுட்டி²தோ யேன இஸிகி³லிபஸ்ஸே காளஸிலா யேன தே நிக³ண்டா²
தேனுபஸங்கமிங்; உபஸங்கமித்வா தே நிக³ண்டே² ஏதத³வோசங் – ‘கின்னு தும்ஹே,
ஆவுஸோ, நிக³ண்டா² உப்³ப⁴ட்ட²கா ஆஸனபடிக்கி²த்தா, ஓபக்கமிகா து³க்கா²
திப்³பா³ க²ரா கடுகா வேத³னா வேத³யதா²’தி? ஏவங் வுத்தே, மஹானாம, தே
நிக³ண்டா² மங் ஏதத³வோசுங் – ‘நிக³ண்டோ², ஆவுஸோ, நாடபுத்தோ [நாத²புத்தோ (ஸீ॰ பீ॰)] ஸப்³ப³ஞ்ஞூ ஸப்³ப³த³ஸ்ஸாவீ அபரிஸேஸங் ஞாணத³ஸ்ஸனங் படிஜானாதி – ‘‘சரதோ ச மே திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததங் ஸமிதங் ஞாணத³ஸ்ஸனங் பச்சுபட்டி²த’’ந்தி. ஸோ ஏவமாஹ – ‘‘அத்தி² கோ² வோ [அத்தி² கோ² போ⁴ (ஸ்யா॰ க॰)], நிக³ண்டா², புப்³பே³ பாபகம்மங் கதங், தங் இமாய கடுகாய து³க்கரகாரிகாய நிஜ்ஜீரேத² [நிஜ்ஜரேத² (ஸீ॰ ஸ்யா॰ பீ॰)]; யங் பனெத்த² [மயங் பனெத்த² (க॰)]
ஏதரஹி காயேன ஸங்வுதா வாசாய ஸங்வுதா மனஸா ஸங்வுதா தங் ஆயதிங் பாபஸ்ஸ
கம்மஸ்ஸ அகரணங்; இதி புராணானங் கம்மானங் தபஸா ப்³யந்திபா⁴வா, நவானங்
கம்மானங் அகரணா, ஆயதிங் அனவஸ்ஸவோ; ஆயதிங் அனவஸ்ஸவா கம்மக்க²யோ, கம்மக்க²யா
து³க்க²க்க²யோ, து³க்க²க்க²யா வேத³னாக்க²யோ, வேத³னாக்க²யா ஸப்³ப³ங்
து³க்க²ங் நிஜ்ஜிண்ணங் ப⁴விஸ்ஸதீ’’தி. தஞ்ச பனம்ஹாகங் ருச்சதி சேவ க²மதி ச,
தேன சம்ஹ அத்தமனா’தி.

180. ‘‘ஏவங்
வுத்தே, அஹங், மஹானாம, தே நிக³ண்டே² ஏதத³வோசங் – ‘கிங் பன தும்ஹே, ஆவுஸோ
நிக³ண்டா², ஜானாத² – அஹுவம்ஹேவ மயங் புப்³பே³ ந நாஹுவம்ஹா’தி? ‘நோ ஹித³ங்,
ஆவுஸோ’. ‘கிங் பன தும்ஹே, ஆவுஸோ நிக³ண்டா², ஜானாத² – அகரம்ஹேவ மயங்
புப்³பே³ பாபகம்மங் ந நாகரம்ஹா’தி? ‘நோ ஹித³ங், ஆவுஸோ’. ‘கிங் பன தும்ஹே,
ஆவுஸோ நிக³ண்டா², ஜானாத² – ஏவரூபங் வா ஏவரூபங் வா பாபகம்மங் அகரம்ஹா’தி?
‘நோ ஹித³ங், ஆவுஸோ’. ‘கிங் பன தும்ஹே, ஆவுஸோ நிக³ண்டா², ஜானாத² – எத்தகங்
வா து³க்க²ங் நிஜ்ஜிண்ணங், எத்தகங் வா து³க்க²ங் நிஜ்ஜீரேதப்³ப³ங் ,
எத்தகம்ஹி வா து³க்கே² நிஜ்ஜிண்ணே ஸப்³ப³ங் து³க்க²ங் நிஜ்ஜிண்ணங்
ப⁴விஸ்ஸதீ’தி? ‘நோ ஹித³ங், ஆவுஸோ’. ‘கிங் பன தும்ஹே, ஆவுஸோ நிக³ண்டா²,
ஜானாத² – தி³ட்டே²வ த⁴ம்மே அகுஸலானங் த⁴ம்மானங் பஹானங், குஸலானங் த⁴ம்மானங்
உபஸம்பத³’ந்தி? ‘நோ ஹித³ங், ஆவுஸோ’.

‘‘‘இதி கிர தும்ஹே, ஆவுஸோ நிக³ண்டா², ந ஜானாத² –
அஹுவம்ஹேவ மயங் புப்³பே³ ந நாஹுவம்ஹாதி, ந ஜானாத² – அகரம்ஹேவ மயங் புப்³பே³
பாபகம்மங் ந நாகரம்ஹாதி, ந ஜானாத² – ஏவரூபங் வா ஏவரூபங் வா பாபகம்மங்
அகரம்ஹாதி, ந ஜானாத² – எத்தகங் வா து³க்க²ங் நிஜ்ஜிண்ணங், எத்தகங் வா
து³க்க²ங் நிஜ்ஜீரேதப்³ப³ங், எத்தகம்ஹி வா து³க்கே² நிஜ்ஜிண்ணே ஸப்³ப³ங்
து³க்க²ங் நிஜ்ஜிண்ணங் ப⁴விஸ்ஸதீதி. ந ஜானாத² – தி³ட்டே²வ த⁴ம்மே அகுஸலானங்
த⁴ம்மானங் பஹானங், குஸலானங் த⁴ம்மானங் உபஸம்பத³ங். ஏவங் ஸந்தே, ஆவுஸோ
நிக³ண்டா², யே லோகே லுத்³தா³ லோஹிதபாணினோ குரூரகம்மந்தா மனுஸ்ஸேஸு பச்சாஜாதா தே நிக³ண்டே²ஸு பப்³ப³ஜந்தீ’தி? ‘ந கோ², ஆவுஸோ கோ³தம, ஸுகே²ன ஸுக²ங் அதி⁴க³ந்தப்³ப³ங், து³க்கே²ன கோ² ஸுக²ங் அதி⁴க³ந்தப்³ப³ங்; ஸுகே²ன சாவுஸோ
கோ³தம, ஸுக²ங் அதி⁴க³ந்தப்³ப³ங் அப⁴விஸ்ஸ, ராஜா மாக³தோ⁴ ஸேனியோ
பி³ம்பி³ஸாரோ ஸுக²ங் அதி⁴க³ச்செ²ய்ய, ராஜா மாக³தோ⁴ ஸேனியோ பி³ம்பி³ஸாரோ
ஸுக²விஹாரிதரோ ஆயஸ்மதா கோ³தமேனா’தி.

‘‘‘அத்³தா⁴யஸ்மந்தேஹி நிக³ண்டே²ஹி ஸஹஸா அப்படிஸங்கா²
வாசா பா⁴ஸிதா – ந கோ², ஆவுஸோ கோ³தம, ஸுகே²ன ஸுக²ங் அதி⁴க³ந்தப்³ப³ங்,
து³க்கே²ன கோ² ஸுக²ங் அதி⁴க³ந்தப்³ப³ங்; ஸுகே²ன சாவுஸோ கோ³தம, ஸுக²ங்
அதி⁴க³ந்தப்³ப³ங் அப⁴விஸ்ஸ, ராஜா மாக³தோ⁴ ஸேனியோ பி³ம்பி³ஸாரோ ஸுக²ங்
அதி⁴க³ச்செ²ய்ய, ராஜா மாக³தோ⁴ ஸேனியோ பி³ம்பி³ஸாரோ ஸுக²விஹாரிதரோ ஆயஸ்மதா
கோ³தமேனா’’தி. அபி ச அஹமேவ தத்த² படிபுச்சி²தப்³போ³ – கோ நு கோ²
ஆயஸ்மந்தானங் ஸுக²விஹாரிதரோ ராஜா வா மாக³தோ⁴ ஸேனியோ பி³ம்பி³ஸாரோ ஆயஸ்மா வா
கோ³தமோ’தி? அத்³தா⁴வுஸோ கோ³தம, அம்ஹேஹி ஸஹஸா அப்படிஸங்கா² வாசா பா⁴ஸிதா, ந
கோ², ஆவுஸோ கோ³தம, ஸுகே²ன ஸுக²ங் அதி⁴க³ந்தப்³ப³ங், து³க்கே²ன கோ² ஸுக²ங்
அதி⁴க³ந்தப்³ப³ங்; ஸுகே²ன சாவுஸோ கோ³தம, ஸுக²ங் அதி⁴க³ந்தப்³ப³ங் அப⁴விஸ்ஸ,
ராஜா மாக³தோ⁴ ஸேனியோ பி³ம்பி³ஸாரோ ஸுக²ங் அதி⁴க³ச்செ²ய்ய, ராஜா மாக³தோ⁴
ஸேனியோ பி³ம்பி³ஸாரோ ஸுக²விஹாரிதரோ ஆயஸ்மதா கோ³தமேனாதி. அபி ச திட்ட²தேதங்,
இதா³னிபி மயங் ஆயஸ்மந்தங் கோ³தமங் புச்சா²ம – கோ நு கோ² ஆயஸ்மந்தானங்
ஸுக²விஹாரிதரோ ராஜா வா மாக³தோ⁴ ஸேனியோ பி³ம்பி³ஸாரோ ஆயஸ்மா வா கோ³தமோ’தி?

‘‘‘தேன ஹாவுஸோ நிக³ண்டா²,
தும்ஹேவ தத்த² படிபுச்சி²ஸ்ஸாமி, யதா² வோ க²மெய்ய ததா² நங் ப்³யாகரெய்யாத².
தங் கிங் மஞ்ஞதா²வுஸோ நிக³ண்டா², பஹோதி ராஜா மாக³தோ⁴ ஸேனியோ பி³ம்பி³ஸாரோ,
அனிஞ்ஜமானோ காயேன, அபா⁴ஸமானோ வாசங், ஸத்த ரத்திந்தி³வானி ஏகந்தஸுக²ங் படிஸங்வேதீ³ விஹரிது’ந்தி? ‘நோ ஹித³ங், ஆவுஸோ’.

‘‘‘தங் கிங் மஞ்ஞதா²வுஸோ நிக³ண்டா², பஹோதி ராஜா
மாக³தோ⁴ ஸேனியோ பி³ம்பி³ஸாரோ, அனிஞ்ஜமானோ காயேன, அபா⁴ஸமானோ வாசங், ச²
ரத்திந்தி³வானி…பே॰… பஞ்ச ரத்திந்தி³வானி… சத்தாரி ரத்திந்தி³வானி… தீணி
ரத்திந்தி³வானி… த்³வே ரத்திந்தி³வானி… ஏகங் ரத்திந்தி³வங் ஏகந்தஸுக²ங்
படிஸங்வேதீ³ விஹரிது’ந்தி? ‘நோ ஹித³ங், ஆவுஸோ’.

‘‘‘அஹங் கோ², ஆவுஸோ நிக³ண்டா²,
பஹோமி அனிஞ்ஜமானோ காயேன, அபா⁴ஸமானோ வாசங், ஏகங் ரத்திந்தி³வங் ஏகந்தஸுக²ங்
படிஸங்வேதீ³ விஹரிதுங். அஹங் கோ², ஆவுஸோ நிக³ண்டா², பஹோமி அனிஞ்ஜமானோ
காயேன, அபா⁴ஸமானோ வாசங், த்³வே ரத்திந்தி³வானி… தீணி ரத்திந்தி³வானி…
சத்தாரி ரத்திந்தி³வானி… பஞ்ச ரத்திந்தி³வானி… ச² ரத்திந்தி³வானி… ஸத்த
ரத்திந்தி³வானி ஏகந்தஸுக²ங் படிஸங்வேதீ³ விஹரிதுங். தங் கிங் மஞ்ஞதா²வுஸோ
நிக³ண்டா², ஏவங் ஸந்தே கோ ஸுக²விஹாரிதரோ ராஜா வா மாக³தோ⁴ ஸேனியோ
பி³ம்பி³ஸாரோ அஹங் வா’தி? ‘ஏவங் ஸந்தே ஆயஸ்மாவ கோ³தமோ ஸுக²விஹாரிதரோ ரஞ்ஞா மாக³தே⁴ன ஸேனியேன பி³ம்பி³ஸாரேனா’’’தி.

இத³மவோச ப⁴க³வா. அத்தமனோ மஹானாமோ ஸக்கோ ப⁴க³வதோ பா⁴ஸிதங் அபி⁴னந்தீ³தி.

சூளது³க்க²க்க²ந்த⁴ஸுத்தங் நிட்டி²தங் சதுத்த²ங்.

5. அனுமானஸுத்தங்

181. ஏவங் மே ஸுதங் – ஏகங் ஸமயங் ஆயஸ்மா மஹாமொக்³க³ல்லானோ ப⁴க்³கே³ஸு விஹரதி ஸுஸுமாரகி³ரே [ஸுங்ஸுமாரகி³ரே (ஸீ॰ ஸ்யா॰ பீ॰)]
பே⁴ஸகளாவனே மிக³தா³யே. தத்ர கோ² ஆயஸ்மா மஹாமொக்³க³ல்லானோ பி⁴க்கூ²
ஆமந்தேஸி – ‘‘ஆவுஸோ, பி⁴க்க²வோ’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ
மஹாமொக்³க³ல்லானஸ்ஸ பச்சஸ்ஸோஸுங். ஆயஸ்மா மஹாமொக்³க³ல்லானோ ஏதத³வோச –

‘‘பவாரேதி சேபி, ஆவுஸோ,
பி⁴க்கு² – ‘வத³ந்து மங் ஆயஸ்மந்தோ, வசனீயொம்ஹி ஆயஸ்மந்தேஹீ’தி, ஸோ ச ஹோதி
து³ப்³ப³சோ, தோ³வசஸ்ஸகரணேஹி த⁴ம்மேஹி ஸமன்னாக³தோ, அக்க²மோ
அப்பத³க்கி²ணக்³கா³ஹீ அனுஸாஸனிங், அத² கோ² நங் ஸப்³ரஹ்மசாரீ ந சேவ
வத்தப்³ப³ங் மஞ்ஞந்தி, ந ச அனுஸாஸிதப்³ப³ங் மஞ்ஞந்தி, ந ச தஸ்மிங்
புக்³க³லே விஸ்ஸாஸங் ஆபஜ்ஜிதப்³ப³ங் மஞ்ஞந்தி.

‘‘கதமே சாவுஸோ, தோ³வசஸ்ஸகரணா த⁴ம்மா? இதா⁴வுஸோ,
பி⁴க்கு² பாபிச்சோ² ஹோதி, பாபிகானங் இச்சா²னங் வஸங் க³தோ. யம்பாவுஸோ,
பி⁴க்கு² பாபிச்சோ² ஹோதி, பாபிகானங் இச்சா²னங் வஸங் க³தோ – அயம்பி த⁴ம்மோ
தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² அத்துக்கங்ஸகோ ஹோதி
பரவம்பீ⁴. யம்பாவுஸோ, பி⁴க்கு² அத்துக்கங்ஸகோ ஹோதி பரவம்பீ⁴ – அயம்பி
த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² கோத⁴னோ ஹோதி
கோதா⁴பி⁴பூ⁴தோ. யம்பாவுஸோ, பி⁴க்கு² கோத⁴னோ ஹோதி கோதா⁴பி⁴பூ⁴தோ – அயம்பி
த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ , பி⁴க்கு² கோத⁴னோ ஹோதி கோத⁴ஹேது உபனாஹீ. யம்பாவுஸோ, பி⁴க்கு² கோத⁴னோ ஹோதி கோத⁴ஹேது உபனாஹீ – அயம்பி த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² கோத⁴னோ ஹோதி கோத⁴ஹேது
அபி⁴ஸங்கீ³. யம்பாவுஸோ, பி⁴க்கு² கோத⁴னோ ஹோதி கோத⁴ஹேது அபி⁴ஸங்கீ³ – அயம்பி
த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² கோத⁴னோ ஹோதி கோத⁴ஸாமந்தா [கோத⁴ஸாமந்தங் (ஸ்யா॰ பீ॰ க॰)] வாசங் நிச்சா²ரேதா. யம்பாவுஸோ, பி⁴க்கு² கோத⁴னோ ஹோதி கோத⁴ஸாமந்தா வாசங் நிச்சா²ரேதா – அயம்பி த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² சோதி³தோ [சுதி³தோ (ஸீ॰ ஸ்யா॰ பீ॰)] சோத³கேன சோத³கங் படிப்ப²ரதி. யம்பாவுஸோ, பி⁴க்கு² சோதி³தோ சோத³கேன சோத³கங் படிப்ப²ரதி – அயம்பி த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு²
சோதி³தோ சோத³கேன சோத³கங் அபஸாதே³தி. யம்பாவுஸோ, பி⁴க்கு² சோதி³தோ சோத³கேன
சோத³கங் அபஸாதே³தி – அயம்பி த⁴ம்மோ தோ³வசஸ்ஸகரணோ.

‘‘புன சபரங் , ஆவுஸோ, பி⁴க்கு²
சோதி³தோ சோத³கேன சோத³கஸ்ஸ பச்சாரோபேதி. யம்பாவுஸோ, பி⁴க்கு² சோதி³தோ
சோத³கேன சோத³கஸ்ஸ பச்சாரோபேதி – அயம்பி த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² சோதி³தோ சோத³கேன
அஞ்ஞேனஞ்ஞங் படிசரதி, ப³ஹித்³தா⁴ கத²ங் அபனாமேதி, கோபஞ்ச தோ³ஸஞ்ச
அப்பச்சயஞ்ச பாதுகரோதி. யம்பாவுஸோ, பி⁴க்கு² சோதி³தோ சோத³கேன அஞ்ஞேனஞ்ஞங்
படிசரதி, ப³ஹித்³தா⁴ கத²ங் அபனாமேதி, கோபஞ்ச தோ³ஸஞ்ச அப்பச்சயஞ்ச பாதுகரோதி
– அயம்பி த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² சோதி³தோ சோத³கேன அபதா³னே ந ஸம்பாயதி. யம்பாவுஸோ, பி⁴க்கு² சோதி³தோ சோத³கேன அபதா³னே ந ஸம்பாயதி – அயம்பி த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² மக்கீ² ஹோதி பளாஸீ. யம்பாவுஸோ, பி⁴க்கு² மக்கீ² ஹோதி பளாஸீ – அயம்பி த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² இஸ்ஸுகீ ஹோதி மச்ச²ரீ. யம்பாவுஸோ, பி⁴க்கு² இஸ்ஸுகீ ஹோதி மச்ச²ரீ – அயம்பி த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² ஸடோ² ஹோதி மாயாவீ. யம்பாவுஸோ, பி⁴க்கு² ஸடோ² ஹோதி மாயாவீ – அயம்பி த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² த²த்³தோ⁴ ஹோதி அதிமானீ. யம்பாவுஸோ, பி⁴க்கு² த²த்³தோ⁴ ஹோதி அதிமானீ – அயம்பி த⁴ம்மோ தோ³வசஸ்ஸகரணோ.

‘‘புன சபரங், ஆவுஸோ, பி⁴க்கு² ஸந்தி³ட்டி²பராமாஸீ ஹோதி
ஆதா⁴னக்³கா³ஹீ து³ப்படினிஸ்ஸக்³கீ³. யம்பாவுஸோ, பி⁴க்கு²
ஸந்தி³ட்டி²பராமாஸீ ஹோதி ஆதா⁴னக்³கா³ஹீ து³ப்படினிஸ்ஸக்³கீ³ – அயம்பி
த⁴ம்மோ தோ³வசஸ்ஸகரணோ. இமே வுச்சந்தாவுஸோ, தோ³வசஸ்ஸகரணா த⁴ம்மா.

182. ‘‘நோ
சேபி, ஆவுஸோ, பி⁴க்கு² பவாரேதி – ‘வத³ந்து மங் ஆயஸ்மந்தோ, வசனீயொம்ஹி
ஆயஸ்மந்தேஹீ’தி, ஸோ ச ஹோதி ஸுவசோ, ஸோவசஸ்ஸகரணேஹி த⁴ம்மேஹி ஸமன்னாக³தோ, க²மோ
பத³க்கி²ணக்³கா³ஹீ அனுஸாஸனிங், அத² கோ² நங் ஸப்³ரஹ்மசாரீ வத்தப்³ப³ஞ்சேவ
மஞ்ஞந்தி, அனுஸாஸிதப்³ப³ஞ்ச மஞ்ஞந்தி, தஸ்மிஞ்ச புக்³க³லே விஸ்ஸாஸங்
ஆபஜ்ஜிதப்³ப³ங் மஞ்ஞந்தி.

‘‘கதமே சாவுஸோ, ஸோவசஸ்ஸகரணா த⁴ம்மா? இதா⁴வுஸோ,
பி⁴க்கு² ந பாபிச்சோ² ஹோதி, ந பாபிகானங் இச்சா²னங் வஸங் க³தோ. யம்பாவுஸோ,
பி⁴க்கு² ந பாபிச்சோ² ஹோதி ந பாபிகானங் இச்சா²னங் வஸங் க³தோ – அயம்பி த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² அனத்துக்கங்ஸகோ ஹோதி
அபரவம்பீ⁴. யம்பாவுஸோ, பி⁴க்கு² அனத்துக்கங்ஸகோ ஹோதி அபரவம்பீ⁴ – அயம்பி
த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² ந கோத⁴னோ ஹோதி ந
கோதா⁴பி⁴பூ⁴தோ. யம்பாவுஸோ, பி⁴க்கு² ந கோத⁴னோ ஹோதி ந கோதா⁴பி⁴பூ⁴தோ –
அயம்பி த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² ந கோத⁴னோ ஹோதி ந
கோத⁴ஹேது உபனாஹீ. யம்பாவுஸோ, பி⁴க்கு² ந கோத⁴னோ ஹோதி ந கோத⁴ஹேது உபனாஹீ –
அயம்பி த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² ந கோத⁴னோ ஹோதி ந
கோத⁴ஹேது அபி⁴ஸங்கீ³. யம்பாவுஸோ, பி⁴க்கு² ந கோத⁴னோ ஹோதி ந கோத⁴ஹேது
அபி⁴ஸங்கீ³ – அயம்பி த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² ந கோத⁴னோ ஹோதி ந கோத⁴ஸாமந்தா வாசங் நிச்சா²ரேதா. யம்பாவுஸோ , பி⁴க்கு² ந கோத⁴னோ ஹோதி ந கோத⁴ஸாமந்தா வாசங் நிச்சா²ரேதா – அயம்பி த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² சோதி³தோ சோத³கேன சோத³கங்
நப்படிப்ப²ரதி. யம்பாவுஸோ, பி⁴க்கு² சோதி³தோ சோத³கேன சோத³கங்
நப்படிப்ப²ரதி – அயம்பி த⁴ம்மோ ஸோவசஸ்ஸகரணோ .

‘‘புன சபரங், ஆவுஸோ, பி⁴க்கு²
சோதி³தோ சோத³கேன சோத³கங் ந அபஸாதே³தி. யம்பாவுஸோ, பி⁴க்கு² சோதி³தோ சோத³கேன
சோத³கங் ந அபஸாதே³தி – அயம்பி த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² சோதி³தோ சோத³கேன
சோத³கஸ்ஸ ந பச்சாரோபேதி. யம்பாவுஸோ, பி⁴க்கு² சோதி³தோ சோத³கேன சோத³கஸ்ஸ ந
பச்சாரோபேதி – அயம்பி த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² சோதி³தோ சோத³கேன ந
அஞ்ஞேனஞ்ஞங் படிசரதி, ந ப³ஹித்³தா⁴ கத²ங் அபனாமேதி, ந கோபஞ்ச தோ³ஸஞ்ச
அப்பச்சயஞ்ச பாதுகரோதி. யம்பாவுஸோ, பி⁴க்கு² சோதி³தோ சோத³கேன ந அஞ்ஞேனஞ்ஞங்
படிசரதி, ந ப³ஹித்³தா⁴ கத²ங் அபனாமேதி, ந கோபஞ்ச தோ³ஸஞ்ச அப்பச்சயஞ்ச
பாதுகரோதி – அயம்பி த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² சோதி³தோ சோத³கேன அபதா³னே
ஸம்பாயதி. யம்பாவுஸோ, பி⁴க்கு² சோதி³தோ சோத³கேன அபதா³னே ஸம்பாயதி – அயம்பி
த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² அமக்கீ² ஹோதி அபளாஸீ. யம்பாவுஸோ, பி⁴க்கு² அமக்கீ² ஹோதி அபளாஸீ – அயம்பி த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² அனிஸ்ஸுகீ ஹோதி அமச்ச²ரீ. யம்பாவுஸோ, பி⁴க்கு² அனிஸ்ஸுகீ ஹோதி அமச்ச²ரீ – அயம்பி த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² அஸடோ² ஹோதி அமாயாவீ. யம்பாவுஸோ, பி⁴க்கு² அஸடோ² ஹோதி அமாயாவீ – அயம்பி த⁴ம்மோ ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² அத்த²த்³தோ⁴ ஹோதி
அனதிமானீ. யம்பாவுஸோ, பி⁴க்கு² அத்த²த்³தோ⁴ ஹோதி அனதிமானீ – அயம்பி த⁴ம்மோ
ஸோவசஸ்ஸகரணோ.

‘‘புன சபரங், ஆவுஸோ, பி⁴க்கு² அஸந்தி³ட்டி²பராமாஸீ
ஹோதி அனாதா⁴னக்³கா³ஹீ ஸுப்படினிஸ்ஸக்³கீ³. யம்பாவுஸோ, பி⁴க்கு²
அஸந்தி³ட்டி²பராமாஸீ ஹோதி, அனாதா⁴னக்³கா³ஹீ ஸுப்படினிஸ்ஸக்³கீ³ – அயம்பி த⁴ம்மோ ஸோவசஸ்ஸகரணோ. இமே வுச்சந்தாவுஸோ, ஸோவசஸ்ஸகரணா த⁴ம்மா.

183. ‘‘தத்ராவுஸோ , பி⁴க்கு²னா அத்தனாவ அத்தானங் ஏவங் அனுமினிதப்³ப³ங் [அனுமானிதப்³ப³ங் (ஸீ॰)]
– ‘யோ க்²வாயங் புக்³க³லோ பாபிச்சோ², பாபிகானங் இச்சா²னங் வஸங் க³தோ, அயங்
மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸங் பாபிச்சோ² பாபிகானங்
இச்சா²னங் வஸங் க³தோ, அஹங்பாஸ்ஸங் பரேஸங் அப்பியோ அமனாபோ’தி. ஏவங்
ஜானந்தேனாவுஸோ, பி⁴க்கு²னா ‘ந பாபிச்சோ² ப⁴விஸ்ஸாமி, ந பாபிகானங் இச்சா²னங்
வஸங் க³தோ’தி சித்தங் உப்பாதே³தப்³ப³ங்.

‘‘‘யோ க்²வாயங் புக்³க³லோ அத்துக்கங்ஸகோ பரவம்பீ⁴,
அயங் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸங் அத்துக்கங்ஸகோ
பரவம்பீ⁴, அஹங்பாஸ்ஸங் பரேஸங் அப்பியோ அமனாபோ’தி. ஏவங் ஜானந்தேனாவுஸோ,
பி⁴க்கு²னா ‘அனத்துக்கங்ஸகோ ப⁴விஸ்ஸாமி அபரவம்பீ⁴’தி சித்தங்
உப்பாதே³தப்³ப³ங்.

‘‘‘யோ க்²வாயங் புக்³க³லோ கோத⁴னோ கோதா⁴பி⁴பூ⁴தோ, அயங்
மே புக்³க³லோ அப்பியோ அமனாபோ. அஹஞ்சேவ கோ² பனஸ்ஸங் கோத⁴னோ கோதா⁴பி⁴பூ⁴தோ,
அஹங்பாஸ்ஸங் பரேஸங் அப்பியோ அமனாபோ’தி. ஏவங் ஜானந்தேனாவுஸோ, பி⁴க்கு²னா ‘ந
கோத⁴னோ ப⁴விஸ்ஸாமி ந கோதா⁴பி⁴பூ⁴தோ’தி சித்தங் உப்பாதே³தப்³ப³ங்.

‘‘‘யோ க்²வாயங் புக்³க³லோ கோத⁴னோ கோத⁴ஹேது உபனாஹீ,
அயங் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸங் கோத⁴னோ கோத⁴ஹேது
உபனாஹீ, அஹங்பாஸ்ஸங் பரேஸங் அப்பியோ அமனாபோ’தி. ஏவங் ஜானந்தேனாவுஸோ,
பி⁴க்கு²னா ‘ந கோத⁴னோ ப⁴விஸ்ஸாமி ந கோத⁴ஹேது உபனாஹீ’தி சித்தங்
உப்பாதே³தப்³ப³ங்.

‘‘‘யோ க்²வாயங் புக்³க³லோ கோத⁴னோ கோத⁴ஹேது அபி⁴ஸங்கீ³, அயங் மே புக்³க³லோ அப்பியோ அமனாபோ; அஹஞ்சேவ
கோ² பனஸ்ஸங் கோத⁴னோ கோத⁴ஹேது அபி⁴ஸங்கீ³, அஹங்பாஸ்ஸங் பரேஸங் அப்பியோ
அமனாபோ’தி. ஏவங் ஜானந்தேனாவுஸோ, பி⁴க்கு²னா ‘ந கோத⁴னோ ப⁴விஸ்ஸாமி ந
கோத⁴ஹேது அபி⁴ஸங்கீ³’தி சித்தங் உப்பாதே³தப்³ப³ங்.

‘‘‘யோ க்²வாயங் புக்³க³லோ
கோத⁴னோ கோத⁴ஸாமந்தா வாசங் நிச்சா²ரேதா, அயங் மே புக்³க³லோ அப்பியோ அமனாபோ;
அஹஞ்சேவ கோ² பனஸ்ஸங் கோத⁴னோ கோத⁴ஸாமந்தா வாசங் நிச்சா²ரேதா, அஹங்பாஸ்ஸங்
பரேஸங் அப்பியோ அமனாபோ’தி. ஏவங் ஜானந்தேனாவுஸோ, பி⁴க்கு²னா ‘ந கோத⁴னோ
ப⁴விஸ்ஸாமி ந கோத⁴ஸாமந்தா வாசங் நிச்சா²ரெஸ்ஸாமீ’தி சித்தங்
உப்பாதே³தப்³ப³ங்.

‘‘‘யோ க்²வாயங் புக்³க³லோ சோதி³தோ சோத³கேன சோத³கங்
படிப்ப²ரதி, அயங் மே புக்³க³லோ அப்பியோ அமனாபோ; அஹஞ்சேவ கோ² பன சோதி³தோ
சோத³கேன சோத³கங் படிப்ப²ரெய்யங் , அஹங்பாஸ்ஸங்
பரேஸங் அப்பியோ அமனாபோ’தி. ஏவங் ஜானந்தேனாவுஸோ, பி⁴க்கு²னா ‘சோதி³தோ
சோத³கேன சோத³கங் நப்படிப்ப²ரிஸ்ஸாமீ’தி சித்தங் உப்பாதே³தப்³ப³ங்.

‘‘‘யோ க்²வாயங் புக்³க³லோ சோதி³தோ சோத³கேன சோத³கங்
அபஸாதே³தி, அயங் மே புக்³க³லோ அப்பியோ அமனாபோ; அஹஞ்சேவ கோ² பன சோதி³தோ
சோத³கேன சோத³கங் அபஸாதெ³ய்யங், அஹங்பாஸ்ஸங் பரேஸங் அப்பியோ அமனாபோ’தி. ஏவங்
ஜானந்தேனாவுஸோ, பி⁴க்கு²னா ‘சோதி³தோ சோத³கேன சோத³கங் ந அபஸாதெ³ஸ்ஸாமீ’தி
சித்தங் உப்பாதே³தப்³ப³ங்.

‘‘‘யோ க்²வாயங் புக்³க³லோ சோதி³தோ சோத³கேன சோத³கஸ்ஸ
பச்சாரோபேதி, அயங் மே புக்³க³லோ அப்பியோ அமனாபோ; அஹஞ்சேவ கோ² பன சோதி³தோ
சோத³கேன சோத³கஸ்ஸ பச்சாரோபெய்யங், அஹங்பாஸ்ஸங் பரேஸங் அப்பியோ அமனாபோ’தி.
ஏவங் ஜானந்தேனாவுஸோ, பி⁴க்கு²னா ‘சோதி³தோ சோத³கேன சோத³கஸ்ஸ ந பச்சாரோபெஸ்ஸாமீ’தி சித்தங் உப்பாதே³தப்³ப³ங்.

‘‘‘யோ க்²வாயங் புக்³க³லோ சோதி³தோ சோத³கேன அஞ்ஞேனஞ்ஞங்
படிசரதி, ப³ஹித்³தா⁴ கத²ங் அபனாமேதி, கோபஞ்ச தோ³ஸஞ்ச அப்பச்சயஞ்ச
பாதுகரோதி, அயங் மே புக்³க³லோ அப்பியோ அமனாபோ; அஹஞ்சேவ கோ² பன சோதி³தோ
சோத³கேன அஞ்ஞேனஞ்ஞங் படிசரெய்யங், ப³ஹித்³தா⁴ கத²ங் அபனாமெய்யங் ,
கோபஞ்ச தோ³ஸஞ்ச அப்பச்சயஞ்ச பாதுகரெய்யங், அஹங்பாஸ்ஸங் பரேஸங் அப்பியோ
அமனாபோ’தி. ஏவங் ஜானந்தேனாவுஸோ, பி⁴க்கு²னா ‘சோதி³தோ சோத³கேன ந அஞ்ஞேனஞ்ஞங்
படிசரிஸ்ஸாமி, ந ப³ஹித்³தா⁴ கத²ங் அபனாமெஸ்ஸாமி, ந கோபஞ்ச தோ³ஸஞ்ச
அப்பச்சயஞ்ச பாதுகரிஸ்ஸாமீ’தி சித்தங் உப்பாதே³தப்³ப³ங்.

‘‘‘யோ க்²வாயங் புக்³க³லோ
சோதி³தோ சோத³கேன அபதா³னே ந ஸம்பாயதி, அயங் மே புக்³க³லோ அப்பியோ அமனாபோ;
அஹஞ்சேவ கோ² பன சோதி³தோ சோத³கேன அபதா³னே ந ஸம்பாயெய்யங், அஹங்பாஸ்ஸங்
பரேஸங் அப்பியோ அமனாபோ’தி. ஏவங் ஜானந்தேனாவுஸோ, பி⁴க்கு²னா ‘சோதி³தோ
சோத³கேன அபதா³னே ஸம்பாயிஸ்ஸாமீ’தி சித்தங் உப்பாதே³தப்³ப³ங்.

‘‘‘யோ க்²வாயங் புக்³க³லோ மக்கீ² பளாஸீ, அயங் மே
புக்³க³லோ அப்பியோ அமனாபோ; அஹஞ்சேவ கோ² பனஸ்ஸங் மக்கீ² பளாஸீ, அஹங்பாஸ்ஸங்
பரேஸங் அப்பியோ அமனாபோ’தி. ஏவங் ஜானந்தேனாவுஸோ, பி⁴க்கு²னா ‘அமக்கீ²
ப⁴விஸ்ஸாமி அபளாஸீ’தி சித்தங் உப்பாதே³தப்³ப³ங்.

‘‘‘யோ க்²வாயங் புக்³க³லோ இஸ்ஸுகீ மச்ச²ரீ, அயங் மே புக்³க³லோ அப்பியோ அமனாபோ; அஹஞ்சேவ கோ² பனஸ்ஸங்
இஸ்ஸுகீ மச்ச²ரீ, அஹங்பாஸ்ஸங் பரேஸங் அப்பியோ அமனாபோ’தி. ஏவங்
ஜானந்தேனாவுஸோ, பி⁴க்கு²னா ‘அனிஸ்ஸுகீ ப⁴விஸ்ஸாமி அமச்ச²ரீ’தி சித்தங்
உப்பாதே³தப்³ப³ங்.

‘‘‘யோ க்²வாயங் புக்³க³லோ ஸடோ² மாயாவீ, அயங் மே
புக்³க³லோ அப்பியோ அமனாபோ; அஹஞ்சேவ கோ² பனஸ்ஸங் ஸடோ² மாயாவீ, அஹங்பாஸ்ஸங்
பரேஸங் அப்பியோ அமனாபோ’தி. ஏவங் ஜானந்தேனாவுஸோ, பி⁴க்கு²னா ‘அஸடோ²
ப⁴விஸ்ஸாமி அமாயாவீ’தி சித்தங் உப்பாதே³தப்³ப³ங்.

‘‘‘யோ க்²வாயங் புக்³க³லோ த²த்³தோ⁴ அதிமானீ, அயங் மே
புக்³க³லோ அப்பியோ அமனாபோ; அஹஞ்சேவ கோ² பனஸ்ஸங் த²த்³தோ⁴ அதிமானீ,
அஹங்பாஸ்ஸங் பரேஸங் அப்பியோ அமனாபோ’தி. ஏவங் ஜானந்தேனாவுஸோ, பி⁴க்கு²னா
‘அத்த²த்³தோ⁴ ப⁴விஸ்ஸாமி அனதிமானீ’தி சித்தங் உப்பாதே³தப்³ப³ங்.

‘‘‘யோ க்²வாயங் புக்³க³லோ ஸந்தி³ட்டி²பராமாஸீ
ஆதா⁴னக்³கா³ஹீ து³ப்படினிஸ்ஸக்³கீ³, அயங் மே புக்³க³லோ அப்பியோ அமனாபோ;
அஹஞ்சேவ கோ² பனஸ்ஸங் ஸந்தி³ட்டி²பராமாஸீ ஆதா⁴னக்³கா³ஹீ
து³ப்படினிஸ்ஸக்³கீ³, அஹங்பாஸ்ஸங் பரேஸங் அப்பியோ அமனாபோ’தி. ஏவங்
ஜானந்தேனாவுஸோ, பி⁴க்கு²னா ‘அஸந்தி³ட்டி²பராமாஸீ ப⁴விஸ்ஸாமி
அனாதா⁴னக்³கா³ஹீ ஸுப்படினிஸ்ஸக்³கீ³’தி சித்தங் உப்பாதே³தப்³ப³ங்.

184. ‘‘தத்ராவுஸோ ,
பி⁴க்கு²னா அத்தனாவ அத்தானங் ஏவங் பச்சவெக்கி²தப்³ப³ங் – ‘கிங் நு கொ²ம்ஹி
பாபிச்சோ², பாபிகானங் இச்சா²னங் வஸங் க³தோ’தி? ஸசே, ஆவுஸோ ,
பி⁴க்கு² பச்சவெக்க²மானோ ஏவங் ஜானாதி – ‘பாபிச்சோ² கொ²ம்ஹி, பாபிகானங்
இச்சா²னங் வஸங் க³தோ’தி, தேனாவுஸோ, பி⁴க்கு²னா தேஸங்யேவ பாபகானங் அகுஸலானங்
த⁴ம்மானங் பஹானாய வாயமிதப்³ப³ங். ஸசே பனாவுஸோ, பி⁴க்கு² பச்சவெக்க²மானோ
ஏவங் ஜானாதி – ‘ந கொ²ம்ஹி பாபிச்சோ², ந பாபிகானங் இச்சா²னங் வஸங் க³தோ’தி,
தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ங்
அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங்
பச்சவெக்கி²தப்³ப³ங் – ‘கிங் நு கொ²ம்ஹி அத்துக்கங்ஸகோ பரவம்பீ⁴’தி? ஸசே,
ஆவுஸோ, பி⁴க்கு² பச்சவெக்க²மானோ ஏவங் ஜானாதி – ‘அத்துக்கங்ஸகோ கொ²ம்ஹி
பரவம்பீ⁴’தி, தேனாவுஸோ, பி⁴க்கு²னா தேஸங்யேவ பாபகானங் அகுஸலானங் த⁴ம்மானங்
பஹானாய வாயமிதப்³ப³ங். ஸசே பனாவுஸோ, பி⁴க்கு² பச்சவெக்க²மானோ ஏவங் ஜானாதி –
‘அனத்துக்கங்ஸகோ கொ²ம்ஹி அபரவம்பீ⁴’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங்
பச்சவெக்கி²தப்³ப³ங் – ‘கிங் நு கொ²ம்ஹி கோத⁴னோ கோதா⁴பி⁴பூ⁴தோ’தி? ஸசே,
ஆவுஸோ, பி⁴க்கு² பச்சவெக்க²மானோ ஏவங் ஜானாதி – ‘கோத⁴னோ கொ²ம்ஹி
கோதா⁴பி⁴பூ⁴தோ’தி, தேனாவுஸோ, பி⁴க்கு²னா தேஸங்யேவ பாபகானங் அகுஸலானங்
த⁴ம்மானங் பஹானாய வாயமிதப்³ப³ங். ஸசே பனாவுஸோ, பி⁴க்கு² பச்சவெக்க²மானோ
ஏவங் ஜானாதி – ‘ந கொ²ம்ஹி கோத⁴னோ கோதா⁴பி⁴பூ⁴தோ’தி, தேனாவுஸோ, பி⁴க்கு²னா
தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங்
பச்சவெக்கி²தப்³ப³ங் – ‘கிங் நு கொ²ம்ஹி கோத⁴னோ கோத⁴ஹேது உபனாஹீ’தி? ஸசே,
ஆவுஸோ, பி⁴க்கு² பச்சவெக்க²மானோ ஏவங் ஜானாதி ‘கோத⁴னோ கொ²ம்ஹி கோத⁴ஹேது
உபனாஹீ’தி, தேனாவுஸோ, பி⁴க்கு²னா தேஸங்யேவ பாபகானங்
அகுஸலானங் த⁴ம்மானங் பஹானாய வாயமிதப்³ப³ங். ஸசே பனாவுஸோ, பி⁴க்கு²
பச்சவெக்க²மானோ ஏவங் ஜானாதி ‘ந கொ²ம்ஹி கோத⁴னோ கோத⁴ஹேது உபனாஹீ’தி,
தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ங்
அஹோரத்தானுஸிக்கி²னா குஸலேஸு த⁴ம்மேஸு.

‘‘புன
சபரங், ஆவுஸோ, பி⁴க்கு²னா அத்தனாவ அத்தானங் ஏவங் பச்சவெக்கி²தப்³ப³ங் –
‘கிங் நு கொ²ம்ஹி கோத⁴னோ கோத⁴ஹேது அபி⁴ஸங்கீ³’தி? ஸசே, ஆவுஸோ, பி⁴க்கு²
பச்சவெக்க²மானோ ஏவங் ஜானாதி – ‘கோத⁴னோ கொ²ம்ஹி கோத⁴ஹேது அபி⁴ஸங்கீ³’தி,
தேனாவுஸோ, பி⁴க்கு²னா தேஸங்யேவ பாபகானங் அகுஸலானங் த⁴ம்மானங் பஹானாய
வாயமிதப்³ப³ங். ஸசே பனாவுஸோ, பி⁴க்கு² பச்சவெக்க²மானோ ஏவங் ஜானாதி – ‘ந
கொ²ம்ஹி கோத⁴னோ கோத⁴ஹேது அபி⁴ஸங்கீ³’தி, தேனாவுஸோ, பி⁴க்கு²னா தேனேவ
பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங்
பச்சவெக்கி²தப்³ப³ங் – ‘கிங் நு கொ²ம்ஹி கோத⁴னோ கோத⁴ஸாமந்தா வாசங்
நிச்சா²ரேதா’தி? ஸசே, ஆவுஸோ, பி⁴க்கு² பச்சவெக்க²மானோ ஏவங் ஜானாதி –
‘கோத⁴னோ கொ²ம்ஹி கோத⁴ஸாமந்தா வாசங் நிச்சா²ரேதா’தி, தேனாவுஸோ, பி⁴க்கு²னா
தேஸங்யேவ பாபகானங் அகுஸலானங் த⁴ம்மானங் பஹானாய வாயமிதப்³ப³ங். ஸசே பனாவுஸோ,
பி⁴க்கு² பச்சவெக்க²மானோ ஏவங் ஜானாதி – ‘ந கொ²ம்ஹி கோத⁴னோ கோத⁴ஸாமந்தா
வாசங் நிச்சா²ரேதா’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன
விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங் பச்சவெக்கி²தப்³ப³ங் – ‘கிங் நு கொ²ம்ஹி சோதி³தோ சோத³கேன சோத³கங்
படிப்ப²ராமீ’தி? ஸசே, ஆவுஸோ, பி⁴க்கு² பச்சவெக்க²மானோ ஏவங் ஜானாதி
‘சோதி³தோ கொ²ம்ஹி சோத³கேன சோத³கங் படிப்ப²ராமீ’தி, தேனாவுஸோ, பி⁴க்கு²னா
தேஸங்யேவ பாபகானங் அகுஸலானங் த⁴ம்மானங் பஹானாய வாயமிதப்³ப³ங். ஸசே பனாவுஸோ,
பி⁴க்கு² பச்சவெக்க²மானோ ஏவங் ஜானாதி – ‘சோதி³தோ கொ²ம்ஹி சோத³கேன சோத³கங்
நப்படிப்ப²ராமீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ங்
அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங்
பச்சவெக்கி²தப்³ப³ங் – ‘கிங் நு கொ²ம்ஹி சோதி³தோ சோத³கேன சோத³கங்
அபஸாதே³மீ’தி? ஸசே, ஆவுஸோ, பி⁴க்கு² பச்சவெக்க²மானோ ஏவங் ஜானாதி ‘சோதி³தோ
கொ²ம்ஹி சோத³கேன சோத³கங் அபஸாதே³மீ’தி, தேனாவுஸோ, பி⁴க்கு²னா தேஸங்யேவ
பாபகானங் அகுஸலானங் த⁴ம்மானங் பஹானாய வாயமிதப்³ப³ங். ஸசே பனாவுஸோ, பி⁴க்கு²
பச்சவெக்க²மானோ ஏவங் ஜானாதி – ‘சோதி³தோ கொ²ம்ஹி சோத³கேன சோத³கங் ந அபஸாதே³மீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங்
பச்சவெக்கி²தப்³ப³ங் – ‘கிங் நு கொ²ம்ஹி சோதி³தோ சோத³கேன சோத³கஸ்ஸ
பச்சாரோபேமீ’தி? ஸசே, ஆவுஸோ, பி⁴க்கு² பச்சவெக்க²மானோ
ஏவங் ஜானாதி – ‘சோதி³தோ கொ²ம்ஹி சோத³கேன சோத³கஸ்ஸ பச்சாரோபேமீ’தி,
தேனாவுஸோ, பி⁴க்கு²னா தேஸங்யேவ பாபகானங் அகுஸலானங் த⁴ம்மானங் பஹானாய
வாயமிதப்³ப³ங். ஸசே பனாவுஸோ, பி⁴க்கு² பச்சவெக்க²மானோ ஏவங் ஜானாதி –
‘சோதி³தோ கொ²ம்ஹி சோத³கேன சோத³கஸ்ஸ ந பச்சாரோபேமீ’தி, தேனாவுஸோ, பி⁴க்கு²னா
தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங்
பச்சவெக்கி²தப்³ப³ங் – ‘கிங் நு கொ²ம்ஹி சோதி³தோ சோத³கேன அஞ்ஞேனஞ்ஞங்
படிசராமி, ப³ஹித்³தா⁴ கத²ங் அபனாமேமி, கோபஞ்ச தோ³ஸஞ்ச அப்பச்சயஞ்ச
பாதுகரோமீ’தி? ஸசே, ஆவுஸோ, பி⁴க்கு² பச்சவெக்க²மானோ ஏவங் ஜானாதி – ‘சோதி³தோ
கொ²ம்ஹி சோத³கேன அஞ்ஞேனஞ்ஞங் படிசராமி, ப³ஹித்³தா⁴ கத²ங் அபனாமேமி, கோபஞ்ச
தோ³ஸஞ்ச அப்பச்சயஞ்ச பாதுகரோமீ’தி, தேனாவுஸோ, பி⁴க்கு²னா தேஸங்யேவ
பாபகானங் அகுஸலானங் த⁴ம்மானங் பஹானாய வாயமிதப்³ப³ங். ஸசே பனாவுஸோ, பி⁴க்கு²
பச்சவெக்க²மானோ ஏவங் ஜானாதி – ‘சோதி³தோ கொ²ம்ஹி சோத³கேன ந அஞ்ஞேனஞ்ஞங்
படிசராமி, ந ப³ஹித்³தா⁴ கத²ங் அபனாமேமி, ந கோபஞ்ச தோ³ஸஞ்ச அப்பச்சயஞ்ச
பாதுகரோமீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ங்
அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங்
பச்சவெக்கி²தப்³ப³ங் – ‘கிங் நு கொ²ம்ஹி சோதி³தோ சோத³கேன அபதா³னே ந
ஸம்பாயாமீ’தி? ஸசே, ஆவுஸோ, பி⁴க்கு² பச்சவெக்க²மானோ ஏவங் ஜானாதி – ‘சோதி³தோ
கொ²ம்ஹி சோத³கேன அபதா³னே ந ஸம்பாயாமீ’தி, தேனாவுஸோ, பி⁴க்கு²னா தேஸங்யேவ
பாபகானங் அகுஸலானங் த⁴ம்மானங் பஹானாய வாயமிதப்³ப³ங். ஸசே பனாவுஸோ, பி⁴க்கு²
பச்சவெக்க²மானோ ஏவங் ஜானாதி – ‘சோதி³தோ கொ²ம்ஹி சோத³கேன அபதா³னே
ஸம்பாயாமீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ங்
அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங் ,
ஆவுஸோ, பி⁴க்கு²னா அத்தனாவ அத்தானங் ஏவங் பச்சவெக்கி²தப்³ப³ங் – ‘கிங் நு
கொ²ம்ஹி மக்கீ² பளாஸீ’தி? ஸசே, ஆவுஸோ, பி⁴க்கு² பச்சவெக்க²மானோ ஏவங் ஜானாதி
– ‘மக்கீ² கொ²ம்ஹி பளாஸீ’தி, தேனாவுஸோ, பி⁴க்கு²னா தேஸங்யேவ பாபகானங்
அகுஸலானங் த⁴ம்மானங் பஹானாய வாயமிதப்³ப³ங். ஸசே பனாவுஸோ, பி⁴க்கு²
பச்சவெக்க²மானோ ஏவங் ஜானாதி – ‘அமக்கீ² கொ²ம்ஹி அபளாஸீ’தி, தேனாவுஸோ,
பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு
த⁴ம்மேஸு.

‘‘புன சபரங், ஆவுஸோ,
பி⁴க்கு²னா அத்தனாவ அத்தானங் ஏவங் பச்சவெக்கி²தப்³ப³ங் – ‘கிங் நு கொ²ம்ஹி
இஸ்ஸுகீ மச்ச²ரீ’தி? ஸசே, ஆவுஸோ, பி⁴க்கு² பச்சவெக்க²மானோ ஏவங் ஜானாதி –
‘இஸ்ஸுகீ கொ²ம்ஹி மச்ச²ரீ’தி, தேனாவுஸோ, பி⁴க்கு²னா தேஸங்யேவ பாபகானங்
அகுஸலானங் த⁴ம்மானங் பஹானாய வாயமிதப்³ப³ங். ஸசே பனாவுஸோ, பி⁴க்கு²
பச்சவெக்க²மானோ ஏவங் ஜானாதி – ‘அனிஸ்ஸுகீ கொ²ம்ஹி அமச்ச²ரீ’தி, தேனாவுஸோ,
பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு
த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங்
பச்சவெக்கி²தப்³ப³ங் – ‘கிங் நு கொ²ம்ஹி ஸடோ² மாயாவீ’தி? ஸசே, ஆவுஸோ,
பி⁴க்கு² பச்சவெக்க²மானோ ஏவங் ஜானாதி – ‘ஸடோ² கொ²ம்ஹி மாயாவீ’தி, தேனாவுஸோ,
பி⁴க்கு²னா தேஸங்யேவ பாபகானங் அகுஸலானங் த⁴ம்மானங் பஹானாய வாயமிதப்³ப³ங்.
ஸசே பனாவுஸோ, பி⁴க்கு² பச்சவெக்க²மானோ ஏவங் ஜானாதி – ‘அஸடோ² கொ²ம்ஹி
அமாயாவீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ங்
அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங் பச்சவெக்கி²தப்³ப³ங்
– ‘கிங் நு கொ²ம்ஹி த²த்³தோ⁴ அதிமானீ’தி? ஸசே, ஆவுஸோ, பி⁴க்கு²
பச்சவெக்க²மானோ ஏவங் ஜானாதி – ‘த²த்³தோ⁴ கொ²ம்ஹி அதிமானீ’தி, தேனாவுஸோ,
பி⁴க்கு²னா தேஸங்யேவ பாபகானங் அகுஸலானங் த⁴ம்மானங் பஹானாய வாயமிதப்³ப³ங்.
ஸசே பனாவுஸோ, பி⁴க்கு² பச்சவெக்க²மானோ ஏவங் ஜானாதி – ‘அத்த²த்³தோ⁴ கொ²ம்ஹி
அனதிமானீ’தி, தேனாவுஸோ, பி⁴க்கு²னா தேனேவ பீதிபாமோஜ்ஜேன விஹாதப்³ப³ங்
அஹோரத்தானுஸிக்கி²னா குஸலேஸு த⁴ம்மேஸு.

‘‘புன சபரங், ஆவுஸோ, பி⁴க்கு²னா அத்தனாவ அத்தானங் ஏவங்
பச்சவெக்கி²தப்³ப³ங் – ‘கிங் நு கொ²ம்ஹி ஸந்தி³ட்டி²பராமாஸீ ஆதா⁴னக்³கா³ஹீ
து³ப்படினிஸ்ஸக்³கீ³’தி? ஸசே, ஆவுஸோ , பி⁴க்கு² பச்சவெக்க²மானோ ஏவங் ஜானாதி – ‘ஸந்தி³ட்டி²பராமாஸீ கொ²ம்ஹி ஆதா⁴னக்³கா³ஹீ து³ப்படினிஸ்ஸக்³கீ³’தி, தேனாவுஸோ, பி⁴க்கு²னா
தேஸங்யேவ பாபகானங் அகுஸலானங் த⁴ம்மானங் பஹானாய வாயமிதப்³ப³ங். ஸசே
பனாவுஸோ, பி⁴க்கு² பச்சவெக்க²மானோ ஏவங் ஜானாதி – ‘அஸந்தி³ட்டி²பராமாஸீ
கொ²ம்ஹி அனாதா⁴னக்³கா³ஹீ ஸுப்படினிஸ்ஸக்³கீ³’தி, தேனாவுஸோ, பி⁴க்கு²னா
தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.

‘‘ஸசே , ஆவுஸோ, பி⁴க்கு²
பச்சவெக்க²மானோ ஸப்³பே³பிமே பாபகே அகுஸலே த⁴ம்மே அப்பஹீனே அத்தனி
ஸமனுபஸ்ஸதி, தேனாவுஸோ, பி⁴க்கு²னா ஸப்³பே³ஸங்யேவ இமேஸங் பாபகானங் அகுஸலானங்
த⁴ம்மானங் பஹானாய வாயமிதப்³ப³ங். ஸசே பனாவுஸோ, பி⁴க்கு² பச்சவெக்க²மானோ
ஸப்³பே³பிமே பாபகே அகுஸலே த⁴ம்மே பஹீனே அத்தனி ஸமனுபஸ்ஸதி, தேனாவுஸோ,
பி⁴க்கு²னா தேனேவ பீதிபாமோஜ்ஜேன விஹாதப்³ப³ங், அஹோரத்தானுஸிக்கி²னா குஸலேஸு
த⁴ம்மேஸு.

‘‘ஸெய்யதா²பி, ஆவுஸோ, இத்தீ²
வா புரிஸோ வா, த³ஹரோ யுவா மண்ட³னஜாதிகோ, ஆதா³ஸே வா பரிஸுத்³தே⁴ பரியோதா³தே,
அச்சே² வா உத³கபத்தே, ஸகங் முக²னிமித்தங் பச்சவெக்க²மானோ, ஸசே தத்த²
பஸ்ஸதி ரஜங் வா அங்க³ணங் வா, தஸ்ஸேவ ரஜஸ்ஸ வா அங்க³ணஸ்ஸ வா பஹானாய வாயமதி;
நோ சே தத்த² பஸ்ஸதி ரஜங் வா அங்க³ணங் வா, தேனேவ அத்தமனோ ஹோதி – ‘லாபா⁴ வத
மே, பரிஸுத்³த⁴ங் வத மே’தி. ஏவமேவ கோ², ஆவுஸோ, ஸசே பி⁴க்கு² பச்சவெக்க²மானோ
ஸப்³பே³பிமே பாபகே அகுஸலே த⁴ம்மே அப்பஹீனே அத்தனி ஸமனுபஸ்ஸதி, தேனாவுஸோ,
பி⁴க்கு²னா ஸப்³பே³ஸங்யேவ இமேஸங் பாபகானங் அகுஸலானங் த⁴ம்மானங் பஹானாய
வாயமிதப்³ப³ங். ஸசே பனாவுஸோ, பி⁴க்கு² பச்சவெக்க²மானோ ஸப்³பே³பிமே பாபகே
அகுஸலே த⁴ம்மே பஹீனே அத்தனி ஸமனுபஸ்ஸதி, தேனாவுஸோ, பி⁴க்கு²னா தேனேவ
பீதிபாமோஜ்ஜேன விஹாதப்³ப³ங், அஹோரத்தானுஸிக்கி²னா குஸலேஸு த⁴ம்மேஸூ’’தி.

இத³மவோசாயஸ்மா மஹாமொக்³க³ல்லானோ. அத்தமனா தே பி⁴க்கூ² ஆயஸ்மதோ மஹாமொக்³க³ல்லானஸ்ஸ பா⁴ஸிதங் அபி⁴னந்து³ந்தி.

அனுமானஸுத்தங் நிட்டி²தங் பஞ்சமங்.

6. சேதோகி²லஸுத்தங்

185. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –

‘‘யஸ்ஸ கஸ்ஸசி, பி⁴க்க²வே, பி⁴க்கு²னோ பஞ்ச சேதோகி²லா அப்பஹீனா, பஞ்ச சேதஸோவினிப³ந்தா⁴ [சேதஸோவினிப³த்³தா⁴ (ஸீ॰), சேதோவினிப³த்³தா⁴ (ஸாரத்த²தீ³பனீடீகா)] அஸமுச்சி²ன்னா, ஸோ வதிமஸ்மிங் த⁴ம்மவினயே வுத்³தி⁴ங் விரூள்ஹிங் வேபுல்லங் ஆபஜ்ஜிஸ்ஸதீதி – நேதங் டா²னங் விஜ்ஜதி.

‘‘கதமாஸ்ஸ பஞ்ச சேதோகி²லா அப்பஹீனா ஹொந்தி? இத⁴,
பி⁴க்க²வே, பி⁴க்கு² ஸத்த²ரி கங்க²தி விசிகிச்ச²தி நாதி⁴முச்சதி ந
ஸம்பஸீத³தி. யோ ஸோ, பி⁴க்க²வே, பி⁴க்கு² ஸத்த²ரி கங்க²தி விசிகிச்ச²தி
நாதி⁴முச்சதி ந ஸம்பஸீத³தி தஸ்ஸ சித்தங் ந நமதி ஆதப்பாய அனுயோகா³ய ஸாதச்சாய
பதா⁴னாய. யஸ்ஸ சித்தங் ந நமதி ஆதப்பாய அனுயோகா³ய ஸாதச்சாய பதா⁴னாய,
ஏவமஸ்ஸாயங் பட²மோ சேதோகி²லோ அப்பஹீனோ ஹோதி.

‘‘புன சபரங், பி⁴க்க²வே, பி⁴க்கு² த⁴ம்மே கங்க²தி
விசிகிச்ச²தி நாதி⁴முச்சதி ந ஸம்பஸீத³தி…பே॰… ஏவமஸ்ஸாயங் து³தியோ சேதோகி²லோ
அப்பஹீனோ ஹோதி.

‘‘புன சபரங், பி⁴க்க²வே, பி⁴க்கு² ஸங்கே⁴ கங்க²தி
விசிகிச்ச²தி நாதி⁴முச்சதி ந ஸம்பஸீத³தி…பே॰… ஏவமஸ்ஸாயங் ததியோ சேதோகி²லோ
அப்பஹீனோ ஹோதி.

‘‘புன சபரங், பி⁴க்க²வே, பி⁴க்கு² ஸிக்கா²ய கங்க²தி
விசிகிச்ச²தி நாதி⁴முச்சதி ந ஸம்பஸீத³தி. யோ ஸோ, பி⁴க்க²வே, பி⁴க்கு²
ஸிக்கா²ய கங்க²தி விசிகிச்ச²தி நாதி⁴முச்சதி ந ஸம்பஸீத³தி, தஸ்ஸ சித்தங் ந
நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தங் ந நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயங் சதுத்தோ² சேதோகி²லோ அப்பஹீனோ ஹோதி.

‘‘புன சபரங், பி⁴க்க²வே, பி⁴க்கு² ஸப்³ரஹ்மசாரீஸு
குபிதோ ஹோதி அனத்தமனோ ஆஹதசித்தோ கி²லஜாதோ. யோ ஸோ, பி⁴க்க²வே, பி⁴க்கு²
ஸப்³ரஹ்மசாரீஸு குபிதோ ஹோதி அனத்தமனோ ஆஹதசித்தோ கி²லஜாதோ, தஸ்ஸ சித்தங் ந
நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தங் ந நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயங் பஞ்சமோ சேதோகி²லோ அப்பஹீனோ ஹோதி. இமாஸ்ஸ பஞ்ச சேதோகி²லா அப்பஹீனா ஹொந்தி.

186. ‘‘கதமாஸ்ஸ பஞ்ச சேதஸோவினிப³ந்தா⁴ அஸமுச்சி²ன்னா ஹொந்தி? இத⁴, பி⁴க்க²வே, பி⁴க்கு² காமே அவீதராகோ³ [அவிக³தராகோ³ (கத்த²சி)]
ஹோதி அவிக³தச்ச²ந்தோ³ அவிக³தபேமோ அவிக³தபிபாஸோ அவிக³தபரிளாஹோ அவிக³ததண்ஹோ.
யோ ஸோ, பி⁴க்க²வே, பி⁴க்கு² காமே அவீதராகோ³ ஹோதி அவிக³தச்ச²ந்தோ³
அவிக³தபேமோ அவிக³தபிபாஸோ அவிக³தபரிளாஹோ அவிக³ததண்ஹோ, தஸ்ஸ சித்தங் ந நமதி
ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தங் ந நமதி ஆதப்பாய
அனுயோகா³ய ஸாதச்சாய பதா⁴னாய, ஏவமஸ்ஸாயங் பட²மோ சேதஸோவினிப³ந்தோ⁴
அஸமுச்சி²ன்னோ ஹோதி.

‘‘புன சபரங், பி⁴க்க²வே, பி⁴க்கு² காயே அவீதராகோ³ ஹோதி…பே॰… ஏவமஸ்ஸாயங் து³தியோ சேதஸோவினிப³ந்தோ⁴ அஸமுச்சி²ன்னோ ஹோதி.

‘‘புன சபரங், பி⁴க்க²வே, பி⁴க்கு² ரூபே அவீதராகோ³ ஹோதி…பே॰… ஏவமஸ்ஸாயங் ததியோ சேதஸோவினிப³ந்தோ⁴ அஸமுச்சி²ன்னோ ஹோதி.

‘‘புன சபரங், பி⁴க்க²வே, பி⁴க்கு² யாவத³த்த²ங்
உத³ராவதே³ஹகங் பு⁴ஞ்ஜித்வா ஸெய்யஸுக²ங் பஸ்ஸஸுக²ங் மித்³த⁴ஸுக²ங் அனுயுத்தோ
விஹரதி. யோ ஸோ, பி⁴க்க²வே, பி⁴க்கு² யாவத³த்த²ங் உத³ராவதே³ஹகங்
பு⁴ஞ்ஜித்வா ஸெய்யஸுக²ங் பஸ்ஸஸுக²ங் மித்³த⁴ஸுக²ங் அனுயுத்தோ விஹரதி, தஸ்ஸ
சித்தங் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தங் ந நமதி
ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயங் சதுத்தோ² சேதஸோவினிப³ந்தோ⁴
அஸமுச்சி²ன்னோ ஹோதி.

‘‘புன சபரங், பி⁴க்க²வே,
பி⁴க்கு² அஞ்ஞதரங் தே³வனிகாயங் பணிதா⁴ய ப்³ரஹ்மசரியங் சரதி – ‘இமினாஹங்
ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ
வா’தி. யோ ஸோ, பி⁴க்க²வே, பி⁴க்கு² அஞ்ஞதரங் தே³வனிகாயங் பணிதா⁴ய
ப்³ரஹ்மசரியங் சரதி – ‘இமினாஹங் ஸீலேன வா வதேன வா தபேன வா ப்³ரஹ்மசரியேன வா
தே³வோ வா ப⁴விஸ்ஸாமி தே³வஞ்ஞதரோ வா’தி, தஸ்ஸ சித்தங் ந நமதி ஆதப்பாய
அனுயோகா³ய ஸாதச்சாய பதா⁴னாய . யஸ்ஸ சித்தங் ந நமதி
ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயங் பஞ்சமோ சேதஸோவினிப³ந்தோ⁴
அஸமுச்சி²ன்னோ ஹோதி. இமாஸ்ஸ பஞ்ச சேதஸோவினிப³ந்தா⁴ அஸமுச்சி²ன்னா ஹொந்தி.

‘‘யஸ்ஸ கஸ்ஸசி, பி⁴க்க²வே, பி⁴க்கு²னோ இமே பஞ்ச
சேதோகி²லா அப்பஹீனா, இமே பஞ்ச சேதஸோவினிப³ந்தா⁴ அஸமுச்சி²ன்னா, ஸோ
வதிமஸ்மிங் த⁴ம்மவினயே வுத்³தி⁴ங் விரூள்ஹிங் வேபுல்லங் ஆபஜ்ஜிஸ்ஸதீதி –
நேதங் டா²னங் விஜ்ஜதி.

187. ‘‘யஸ்ஸ
கஸ்ஸசி, பி⁴க்க²வே, பி⁴க்கு²னோ பஞ்ச சேதோகி²லா பஹீனா, பஞ்ச
சேதஸோவினிப³ந்தா⁴ ஸுஸமுச்சி²ன்னா, ஸோ வதிமஸ்மிங் த⁴ம்மவினயே வுத்³தி⁴ங்
விரூள்ஹிங் வேபுல்லங் ஆபஜ்ஜிஸ்ஸதீதி – டா²னமேதங் விஜ்ஜதி.

‘‘கதமாஸ்ஸ பஞ்ச சேதோகி²லா பஹீனா ஹொந்தி? இத⁴,
பி⁴க்க²வே, பி⁴க்கு² ஸத்த²ரி ந கங்க²தி ந விசிகிச்ச²தி அதி⁴முச்சதி
ஸம்பஸீத³தி. யோ ஸோ, பி⁴க்க²வே, பி⁴க்கு² ஸத்த²ரி ந கங்க²தி ந விசிகிச்ச²தி
அதி⁴முச்சதி ஸம்பஸீத³தி, தஸ்ஸ சித்தங் நமதி ஆதப்பாய அனுயோகா³ய ஸாதச்சாய
பதா⁴னாய. யஸ்ஸ சித்தங் நமதி ஆதப்பாய அனுயோகா³ய ஸாதச்சாய பதா⁴னாய,
ஏவமஸ்ஸாயங் பட²மோ சேதோகி²லோ பஹீனோ ஹோதி.

‘‘புன சபரங், பி⁴க்க²வே, பி⁴க்கு² த⁴ம்மே ந கங்க²தி ந
விசிகிச்ச²தி அதி⁴முச்சதி ஸம்பஸீத³தி…பே॰… ஏவமஸ்ஸாயங் து³தியோ சேதோகி²லோ
பஹீனோ ஹோதி.

‘‘புன சபரங், பி⁴க்க²வே, பி⁴க்கு² ஸங்கே⁴ ந கங்க²தி ந
விசிகிச்ச²தி அதி⁴முச்சதி ஸம்பஸீத³தி…பே॰… ஏவமஸ்ஸாயங் ததியோ சேதோகி²லோ
பஹீனோ ஹோதி.

‘‘புன சபரங், பி⁴க்க²வே, பி⁴க்கு² ஸிக்கா²ய ந கங்க²தி ந
விசிகிச்ச²தி அதி⁴முச்சதி ஸம்பஸீத³தி…பே॰… ஏவமஸ்ஸாயங் சதுத்தோ² சேதோகி²லோ
பஹீனோ ஹோதி.

‘‘புன சபரங், பி⁴க்க²வே, பி⁴க்கு² ஸப்³ரஹ்மசாரீஸு ந குபிதோ ஹோதி ந அனத்தமனோ [அத்தமனோ (ஸீ॰ பீ॰)]
அனாஹதசித்தோ அகி²லஜாதோ. யோ ஸோ, பி⁴க்க²வே, பி⁴க்கு² ஸப்³ரஹ்மசாரீஸு ந
குபிதோ ஹோதி ந அனத்தமனோ அனாஹதசித்தோ அகி²லஜாதோ, தஸ்ஸ சித்தங் நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தங் நமதி ஆதப்பாய அனுயோகா³ய ஸாதச்சாய பதா⁴னாய, ஏவமஸ்ஸாயங் பஞ்சமோ சேதோகி²லோ பஹீனோ ஹோதி. இமாஸ்ஸ பஞ்ச சேதோகி²லா பஹீனா ஹொந்தி.

188. ‘‘கதமாஸ்ஸ
பஞ்ச சேதஸோவினிப³ந்தா⁴ ஸுஸமுச்சி²ன்னா ஹொந்தி? இத⁴, பி⁴க்க²வே, பி⁴க்கு²
காமே வீதராகோ³ ஹோதி விக³தச்ச²ந்தோ³ விக³தபேமோ விக³தபிபாஸோ விக³தபரிளாஹோ
விக³ததண்ஹோ. யோ ஸோ, பி⁴க்க²வே, பி⁴க்கு² காமே வீதராகோ³ ஹோதி விக³தச்ச²ந்தோ³
விக³தபேமோ விக³தபிபாஸோ விக³தபரிளாஹோ விக³ததண்ஹோ, தஸ்ஸ சித்தங் நமதி
ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தங் நமதி ஆதப்பாய அனுயோகா³ய
ஸாதச்சாய பதா⁴னாய, ஏவமஸ்ஸாயங் பட²மோ சேதஸோவினிப³ந்தோ⁴ ஸுஸமுச்சி²ன்னோ ஹோதி.

‘‘புன சபரங், பி⁴க்க²வே, பி⁴க்கு² காயே வீதராகோ³
ஹோதி…பே॰… ரூபே வீதராகோ³ ஹோதி…பே॰… ந யாவத³த்த²ங் உத³ராவதே³ஹகங்
பு⁴ஞ்ஜித்வா ஸெய்யஸுக²ங் பஸ்ஸஸுக²ங் மித்³த⁴ஸுக²ங் அனுயுத்தோ விஹரதி. யோ
ஸோ, பி⁴க்க²வே, பி⁴க்கு² ந யாவத³த்த²ங் உத³ராவதே³ஹகங் பு⁴ஞ்ஜித்வா
ஸெய்யஸுக²ங் பஸ்ஸஸுக²ங் மித்³த⁴ஸுக²ங் அனுயுத்தோ விஹரதி, தஸ்ஸ சித்தங் நமதி
ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தங் நமதி ஆதப்பாய அனுயோகா³ய
ஸாதச்சாய பதா⁴னாய, ஏவமஸ்ஸாயங் சதுத்தோ² சேதஸோவினிப³ந்தோ⁴ ஸுஸமுச்சி²ன்னோ
ஹோதி.

‘‘புன சபரங், பி⁴க்க²வே, பி⁴க்கு² ந அஞ்ஞதரங்
தே³வனிகாயங் பணிதா⁴ய ப்³ரஹ்மசரியங் சரதி – ‘இமினாஹங் ஸீலேன வா வதேன வா தபேன
வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ
வா’தி. யோ ஸோ, பி⁴க்க²வே, பி⁴க்கு² ந அஞ்ஞதரங் தே³வனிகாயங் பணிதா⁴ய
ப்³ரஹ்மசரியங் சரதி – ‘இமினாஹங் ஸீலேன வா வதேன வா தபேன வா ப்³ரஹ்மசரியேன வா
தே³வோ வா ப⁴விஸ்ஸாமி தே³வஞ்ஞதரோ வா’தி, தஸ்ஸ சித்தங் நமதி ஆதப்பாய
அனுயோகா³ய ஸாதச்சாய பதா⁴னாய. யஸ்ஸ சித்தங் நமதி ஆதப்பாய அனுயோகா³ய ஸாதச்சாய
பதா⁴னாய, ஏவமஸ்ஸாயங் பஞ்சமோ சேதஸோவினிப³ந்தோ⁴ ஸுஸமுச்சி²ன்னோ ஹோதி. இமாஸ்ஸ
பஞ்ச சேதஸோவினிப³ந்தா⁴ ஸுஸமுச்சி²ன்னா ஹொந்தி.

‘‘யஸ்ஸ கஸ்ஸசி, பி⁴க்க²வே,
பி⁴க்கு²னோ இமே பஞ்ச சேதோகி²லா பஹீனா, இமே பஞ்ச சேதஸோவினிப³ந்தா⁴
ஸுஸமுச்சி²ன்னா, ஸோ வதிமஸ்மிங் த⁴ம்மவினயே வுத்³தி⁴ங் விரூள்ஹிங் வேபுல்லங்
ஆபஜ்ஜிஸ்ஸதீதி – டா²னமேதங் விஜ்ஜதி.

189.
‘‘ஸோ ச²ந்த³ஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி,
வீரியஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி,
சித்தஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங்
பா⁴வேதி, வீமங்ஸாஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி,
உஸ்ஸொள்ஹீயேவ பஞ்சமீ. ஸ கோ² ஸோ, பி⁴க்க²வே, ஏவங்
உஸ்ஸொள்ஹீபன்னரஸங்க³ஸமன்னாக³தோ பி⁴க்கு² ப⁴ப்³போ³
அபி⁴னிப்³பி³தா³ய, ப⁴ப்³போ³ ஸம்போ³தா⁴ய, ப⁴ப்³போ³ அனுத்தரஸ்ஸ யோக³க்கே²மஸ்ஸ
அதி⁴க³மாய. ஸெய்யதா²பி, பி⁴க்க²வே, குக்குடியா அண்டா³னி அட்ட² வா த³ஸ வா
த்³வாத³ஸ வா. தானஸ்ஸு குக்குடியா ஸம்மா அதி⁴ஸயிதானி ஸம்மா பரிஸேதி³தானி
ஸம்மா பரிபா⁴விதானி. கிஞ்சாபி தஸ்ஸா குக்குடியா ந ஏவங் இச்சா² உப்பஜ்ஜெய்ய –
‘அஹோ வதிமே குக்குடபோதகா பாத³னக²ஸிகா²ய வா முக²துண்ட³கேன வா அண்ட³கோஸங்
பதா³லெத்வா ஸொத்தி²னா அபி⁴னிப்³பி⁴ஜ்ஜெய்யு’ந்தி. அத² கோ² ப⁴ப்³பா³வ தே
குக்குடபோதகா பாத³னக²ஸிகா²ய வா முக²துண்ட³கேன வா அண்ட³கோஸங் பதா³லெத்வா
ஸொத்தி²னா அபி⁴னிப்³பி⁴ஜ்ஜிதுங். ஏவமேவ கோ², பி⁴க்க²வே, ஏவங்
உஸ்ஸொள்ஹிபன்னரஸங்க³ஸமன்னாக³தோ பி⁴க்கு² ப⁴ப்³போ³ அபி⁴னிப்³பி³தா³ய,
ப⁴ப்³போ³ ஸம்போ³தா⁴ய, ப⁴ப்³போ³ அனுத்தரஸ்ஸ யோக³க்கே²மஸ்ஸ அதி⁴க³மாயா’’தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.

சேதோகி²லஸுத்தங் நிட்டி²தங் ச²ட்ட²ங்.

7. வனபத்த²ஸுத்தங்

190. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘வனபத்த²பரியாயங் வோ, பி⁴க்க²வே, தே³ஸெஸ்ஸாமி, தங் ஸுணாத², ஸாது⁴கங்
மனஸிகரோத², பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ
பச்சஸ்ஸோஸுங். ப⁴க³வா ஏதத³வோச –

191.
‘‘இத⁴, பி⁴க்க²வே, பி⁴க்கு² அஞ்ஞதரங் வனபத்த²ங் உபனிஸ்ஸாய விஹரதி. தஸ்ஸ
தங் வனபத்த²ங் உபனிஸ்ஸாய விஹரதோ அனுபட்டி²தா சேவ ஸதி ந உபட்டா²தி,
அஸமாஹிதஞ்ச சித்தங் ந ஸமாதி⁴யதி, அபரிக்கீ²ணா ச
ஆஸவா ந பரிக்க²யங் க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங்
நானுபாபுணாதி. யே ச கோ² இமே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே கஸிரேன
ஸமுதா³க³ச்ச²ந்தி. தேன, பி⁴க்க²வே, பி⁴க்கு²னா இதி படிஸஞ்சிக்கி²தப்³ப³ங்
– ‘அஹங் கோ² இமங் வனபத்த²ங் உபனிஸ்ஸாய விஹராமி, தஸ்ஸ மே இமங் வனபத்த²ங்
உபனிஸ்ஸாய விஹரதோ அனுபட்டி²தா சேவ ஸதி ந உபட்டா²தி, அஸமாஹிதஞ்ச சித்தங் ந
ஸமாதி⁴யதி, அபரிக்கீ²ணா ச ஆஸவா ந பரிக்க²யங் க³ச்ச²ந்தி, அனநுப்பத்தஞ்ச
அனுத்தரங் யோக³க்கே²மங் நானுபாபுணாமி. யே ச கோ² இமே பப்³ப³ஜிதேன
ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே கஸிரேன
ஸமுதா³க³ச்ச²ந்தீ’தி. தேன, பி⁴க்க²வே, பி⁴க்கு²னா ரத்திபா⁴க³ங் வா
தி³வஸபா⁴க³ங் வா தம்ஹா வனபத்தா² பக்கமிதப்³ப³ங், ந வத்த²ப்³ப³ங்.

192.
‘‘இத⁴ பன, பி⁴க்க²வே, பி⁴க்கு² அஞ்ஞதரங் வனபத்த²ங் உபனிஸ்ஸாய விஹரதி. தஸ்ஸ
தங் வனபத்த²ங் உபனிஸ்ஸாய விஹரதோ அனுபட்டி²தா சேவ ஸதி ந உபட்டா²தி,
அஸமாஹிதஞ்ச சித்தங் ந ஸமாதி⁴யதி, அபரிக்கீ²ணா ச ஆஸவா ந பரிக்க²யங்
க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங் நானுபாபுணாதி. யே ச கோ²
இமே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே அப்பகஸிரேன
ஸமுதா³க³ச்ச²ந்தி. தேன , பி⁴க்க²வே, பி⁴க்கு²னா இதி
படிஸஞ்சிக்கி²தப்³ப³ங் – ‘அஹங் கோ² இமங் வனபத்த²ங் உபனிஸ்ஸாய விஹராமி. தஸ்ஸ
மே இமங் வனபத்த²ங் உபனிஸ்ஸாய விஹரதோ அனுபட்டி²தா சேவ ஸதி ந உபட்டா²தி
அஸமாஹிதஞ்ச சித்தங் ந ஸமாதி⁴யதி, அபரிக்கீ²ணா ச ஆஸவா ந பரிக்க²யங்
க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங் நானுபாபுணாமி. யே ச கோ²
இமே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே அப்பகஸிரேன
ஸமுதா³க³ச்ச²ந்தி. ந கோ² பனாஹங் சீவரஹேது அகா³ரஸ்மா அனகா³ரியங் பப்³ப³ஜிதோ ந
பிண்ட³பாதஹேது…பே॰… ந ஸேனாஸனஹேது…பே॰… ந
கி³லானப்பச்சயபே⁴ஸஜ்ஜபரிக்கா²ரஹேது அகா³ரஸ்மா அனகா³ரியங் பப்³ப³ஜிதோ. அத² ச
பன மே இமங் வனபத்த²ங் உபனிஸ்ஸாய விஹரதோ
அனுபட்டி²தா சேவ ஸதி ந உபட்டா²தி, அஸமாஹிதஞ்ச சித்தங் ந ஸமாதி⁴யதி,
அபரிக்கீ²ணா ச ஆஸவா ந பரிக்க²யங் க³ச்ச²ந்தி, அனநுப்பத்தஞ்ச அனுத்தரங்
யோக³க்கே²மங் நானுபாபுணாமீ’தி. தேன, பி⁴க்க²வே, பி⁴க்கு²னா ஸங்கா²பி தம்ஹா
வனபத்தா² பக்கமிதப்³ப³ங், ந வத்த²ப்³ப³ங்.

193. ‘‘இத⁴
பன, பி⁴க்க²வே, பி⁴க்கு² அஞ்ஞதரங் வனபத்த²ங் உபனிஸ்ஸாய விஹரதி. தஸ்ஸ தங்
வனபத்த²ங் உபனிஸ்ஸாய விஹரதோ அனுபட்டி²தா சேவ ஸதி உபட்டா²தி, அஸமாஹிதஞ்ச
சித்தங் ஸமாதி⁴யதி, அபரிக்கீ²ணா ச ஆஸவா பரிக்க²யங் க³ச்ச²ந்தி,
அனநுப்பத்தஞ்ச அனுத்தரங் யோக³க்கே²மங் அனுபாபுணாதி. யே ச கோ² இமே
பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா, தே கஸிரேன
ஸமுதா³க³ச்ச²ந்தி. தேன, பி⁴க்க²வே, பி⁴க்கு²னா இதி படிஸஞ்சிக்கி²தப்³ப³ங்
– ‘அஹங் கோ² இமங் வனபத்த²ங் உபனிஸ்ஸாய விஹராமி. தஸ்ஸ மே இமங் வனபத்த²ங்
உபனிஸ்ஸாய விஹரதோ அனுபட்டி²தா சேவ ஸதி உபட்டா²தி அஸமாஹிதஞ்ச சித்தங்
ஸமாதி⁴யதி, அபரிக்கீ²ணா ச ஆஸவா பரிக்க²யங் க³ச்ச²ந்தி, அனநுப்பத்தஞ்ச
அனுத்தரங் யோக³க்கே²மங் அனுபாபுணாமி. யே ச கோ² இமே பப்³ப³ஜிதேன
ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே கஸிரேன
ஸமுதா³க³ச்ச²ந்தி. ந கோ² பனாஹங் சீவரஹேது அகா³ரஸ்மா அனகா³ரியங் பப்³ப³ஜிதோ,
ந பிண்ட³பாதஹேது…பே॰… ந ஸேனாஸனஹேது…பே॰… ந
கி³லானப்பச்சயபே⁴ஸஜ்ஜபரிக்கா²ரஹேது அகா³ரஸ்மா அனகா³ரியங் பப்³ப³ஜிதோ .
அத² ச பன மே இமங் வனபத்த²ங் உபனிஸ்ஸாய விஹரதோ அனுபட்டி²தா சேவ ஸதி
உபட்டா²தி, அஸமாஹிதஞ்ச சித்தங் ஸமாதி⁴யதி, அபரிக்கீ²ணா ச ஆஸவா பரிக்க²யங்
க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங் அனுபாபுணாமீ’தி. தேன,
பி⁴க்க²வே, பி⁴க்கு²னா ஸங்கா²பி தஸ்மிங் வனபத்தே² வத்த²ப்³ப³ங், ந
பக்கமிதப்³ப³ங்.

194. ‘‘இத⁴
பன, பி⁴க்க²வே, பி⁴க்கு² அஞ்ஞதரங் வனபத்த²ங் உபனிஸ்ஸாய விஹரதி. தஸ்ஸ தங்
வனபத்த²ங் உபனிஸ்ஸாய விஹரதோ அனுபட்டி²தா சேவ ஸதி உபட்டா²தி, அஸமாஹிதஞ்ச
சித்தங் ஸமாதி⁴யதி, அபரிக்கீ²ணா ச ஆஸவா பரிக்க²யங் க³ச்ச²ந்தி,
அனநுப்பத்தஞ்ச அனுத்தரங் யோக³க்கே²மங் அனுபாபுணாதி. யே ச கோ² இமே
பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே அப்பகஸிரேன
ஸமுதா³க³ச்ச²ந்தி. தேன, பி⁴க்க²வே, பி⁴க்கு²னா இதி படிஸஞ்சிக்கி²தப்³ப³ங் –
‘அஹங் கோ² இமங் வனபத்த²ங் உபனிஸ்ஸாய விஹராமி. தஸ்ஸ மே இமங் வனபத்த²ங்
உபனிஸ்ஸாய விஹரதோ அனுபட்டி²தா சேவ ஸதி உபட்டா²தி அஸமாஹிதஞ்ச சித்தங்
ஸமாதி⁴யதி, அபரிக்கீ²ணா ச ஆஸவா பரிக்க²யங் க³ச்ச²ந்தி, அனநுப்பத்தஞ்ச
அனுத்தரங் யோக³க்கே²மங் அனுபாபுணாமி. யே ச கோ² இமே பப்³ப³ஜிதேன
ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே அப்பகஸிரேன
ஸமுதா³க³ச்ச²ந்தீ’தி . தேன, பி⁴க்க²வே, பி⁴க்கு²னா யாவஜீவம்பி தஸ்மிங் வனபத்தே² வத்த²ப்³ப³ங், ந பக்கமிதப்³ப³ங்.

195. ‘‘இத⁴, பி⁴க்க²வே, பி⁴க்கு² அஞ்ஞதரங் கா³மங் உபனிஸ்ஸாய விஹரதி
…பே॰… அஞ்ஞதரங் நிக³மங் உபனிஸ்ஸாய விஹரதி…பே॰… அஞ்ஞதரங் நக³ரங் உபனிஸ்ஸாய
விஹரதி…பே॰… அஞ்ஞதரங் ஜனபத³ங் உபனிஸ்ஸாய விஹரதி…பே॰… அஞ்ஞதரங் புக்³க³லங்
உபனிஸ்ஸாய விஹரதி. தஸ்ஸ தங் புக்³க³லங் உபனிஸ்ஸாய விஹரதோ அனுபட்டி²தா சேவ
ஸதி ந உபட்டா²தி, அஸமாஹிதஞ்ச சித்தங் ந ஸமாதி⁴யதி, அபரிக்கீ²ணா ச ஆஸவா ந
பரிக்க²யங் க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங்
நானுபாபுணாதி. யே ச கோ² இமே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே கஸிரேன
ஸமுதா³க³ச்ச²ந்தி. தேன, பி⁴க்க²வே, பி⁴க்கு²னா இதி படிஸஞ்சிக்கி²தப்³ப³ங் –
‘அஹங் கோ² இமங் புக்³க³லங் உபனிஸ்ஸாய விஹராமி. தஸ்ஸ மே இமங் புக்³க³லங்
உபனிஸ்ஸாய விஹரதோ அனுபட்டி²தா சேவ ஸதி ந உபட்டா²தி, அஸமாஹிதஞ்ச சித்தங் ந
ஸமாதி⁴யதி, அபரிக்கீ²ணா ச ஆஸவா ந பரிக்க²யங் க³ச்ச²ந்தி, அனநுப்பத்தஞ்ச
அனுத்தரங் யோக³க்கே²மங் நானுபாபுணாமி. யே ச கோ² இமே பப்³ப³ஜிதேன
ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே கஸிரேன
ஸமுதா³க³ச்ச²ந்தீ’தி. தேன, பி⁴க்க²வே, பி⁴க்கு²னா ரத்திபா⁴க³ங் வா
தி³வஸபா⁴க³ங் வா ஸோ புக்³க³லோ அனாபுச்சா² பக்கமிதப்³ப³ங்,
நானுப³ந்தி⁴தப்³போ³.

196. ‘‘இத⁴ பன, பி⁴க்க²வே, பி⁴க்கு² அஞ்ஞதரங் புக்³க³லங் உபனிஸ்ஸாய விஹரதி. தஸ்ஸ தங் புக்³க³லங் உபனிஸ்ஸாய விஹரதோ அனுபட்டி²தா சேவ ஸதி ந உபட்டா²தி, அஸமாஹிதஞ்ச சித்தங் ந ஸமாதி⁴யதி, அபரிக்கீ²ணா ச
ஆஸவா ந பரிக்க²யங் க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங்
நானுபாபுணாதி. யே ச கோ² இமே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா, தே அப்பகஸிரேன
ஸமுதா³க³ச்ச²ந்தி. தேன, பி⁴க்க²வே, பி⁴க்கு²னா இதி படிஸஞ்சிக்கி²தப்³ப³ங் –
‘அஹங் கோ² இமங் புக்³க³லங் உபனிஸ்ஸாய விஹராமி. தஸ்ஸ மே இமங் புக்³க³லங்
உபனிஸ்ஸாய விஹரதோ அனுபட்டி²தா சேவ ஸதி ந உபட்டா²தி, அஸமாஹிதஞ்ச சித்தங் ந
ஸமாதி⁴யதி, அபரிக்கீ²ணா ச ஆஸவா ந பரிக்க²யங் க³ச்ச²ந்தி, அனநுப்பத்தஞ்ச
அனுத்தரங் யோக³க்கே²மங் நானுபாபுணாமி. யே ச கோ² இமே பப்³ப³ஜிதேன
ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா
– தே அப்பகஸிரேன ஸமுதா³க³ச்ச²ந்தி. ந கோ² பனாஹங் சீவரஹேது அகா³ரஸ்மா
அனகா³ரியங் பப்³ப³ஜிதோ, ந பிண்ட³பாதஹேது…பே॰… ந ஸேனாஸனஹேது…பே॰… ந
கி³லானப்பச்சயபே⁴ஸஜ்ஜபரிக்கா²ரஹேது அகா³ரஸ்மா அனகா³ரியங் பப்³ப³ஜிதோ. அத² ச
பன மே இமங் புக்³க³லங் உபனிஸ்ஸாய விஹரதோ அனுபட்டி²தா சேவ ஸதி ந உபட்டா²தி,
அஸமாஹிதஞ்ச சித்தங் ந ஸமாதி⁴யதி, அபரிக்கீ²ணா ச ஆஸவா ந பரிக்க²யங்
க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங் நானுபாபுணாமீ’தி. தேன,
பி⁴க்க²வே, பி⁴க்கு²னா ஸங்கா²பி ஸோ புக்³க³லோ ஆபுச்சா² பக்கமிதப்³ப³ங்,
நானுப³ந்தி⁴தப்³போ³.

197.
‘‘இத⁴ பன, பி⁴க்க²வே, பி⁴க்கு² அஞ்ஞதரங் புக்³க³லங் உபனிஸ்ஸாய விஹரதி.
தஸ்ஸ தங் புக்³க³லங் உபனிஸ்ஸாய விஹரதோ அனுபட்டி²தா சேவ ஸதி உபட்டா²தி,
அஸமாஹிதஞ்ச சித்தங் ஸமாதி⁴யதி, அபரிக்கீ²ணா ச ஆஸவா
பரிக்க²யங் க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங் அனுபாபுணாதி.
யே ச கோ² இமே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே கஸிரேன
ஸமுதா³க³ச்ச²ந்தி. தேன, பி⁴க்க²வே, பி⁴க்கு²னா இதி படிஸஞ்சிக்கி²தப்³ப³ங் –
‘அஹங் கோ² இமங் புக்³க³லங் உபனிஸ்ஸாய விஹராமி. தஸ்ஸ மே இமங் புக்³க³லங்
உபனிஸ்ஸாய விஹரதோ அனுபட்டி²தா சேவ ஸதி உபட்டா²தி, அஸமாஹிதஞ்ச சித்தங்
ஸமாதி⁴யதி, அபரிக்கீ²ணா ச ஆஸவா பரிக்க²யங் க³ச்ச²ந்தி, அனநுப்பத்தஞ்ச
அனுத்தரங் யோக³க்கே²மங் அனுபாபுணாமி. யே ச கோ² இமே பப்³ப³ஜிதேன
ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே கஸிரேன
ஸமுதா³க³ச்ச²ந்தி. ந கோ² பனாஹங் சீவரஹேது அகா³ரஸ்மா அனகா³ரியங் பப்³ப³ஜிதோ,
ந பிண்ட³பாதஹேது…பே॰… ந ஸேனாஸனஹேது…பே॰… ந
கி³லானப்பச்சயபே⁴ஸஜ்ஜபரிக்கா²ரஹேது அகா³ரஸ்மா
அனகா³ரியங் பப்³ப³ஜிதோ. அத² ச பன மே இமங் புக்³க³லங் உபனிஸ்ஸாய விஹரதோ
அனுபட்டி²தா சேவ ஸதி உபட்டா²தி, அஸமாஹிதஞ்ச சித்தங் ஸமாதி⁴யதி, அபரிக்கீ²ணா
ச ஆஸவா பரிக்க²யங் க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங்
அனுபாபுணாமீ’தி. தேன, பி⁴க்க²வே, பி⁴க்கு²னா ஸங்கா²பி ஸோ புக்³க³லோ
அனுப³ந்தி⁴தப்³போ³, ந பக்கமிதப்³ப³ங்.

198. ‘‘இத⁴ பன, பி⁴க்க²வே, பி⁴க்கு² அஞ்ஞதரங் புக்³க³லங் உபனிஸ்ஸாய விஹரதி. தஸ்ஸ தங் புக்³க³லங் உபனிஸ்ஸாய விஹரதோ அனுபட்டி²தா சேவ ஸதி உபட்டா²தி, அஸமாஹிதஞ்ச சித்தங் ஸமாதி⁴யதி, அபரிக்கீ²ணா ச ஆஸவா பரிக்க²யங் க³ச்ச²ந்தி ,
அனநுப்பத்தஞ்ச அனுத்தரங் யோக³க்கே²மங் அனுபாபுணாதி. யே ச கோ² இமே
பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே அப்பகஸிரேன
ஸமுதா³க³ச்ச²ந்தி. தேன, பி⁴க்க²வே, பி⁴க்கு²னா இதி படிஸஞ்சிக்கி²தப்³ப³ங் –
‘அஹங் கோ² இமங் புக்³க³லங் உபனிஸ்ஸாய விஹராமி .
தஸ்ஸ மே இமங் புக்³க³லங் உபனிஸ்ஸாய விஹரதோ அனுபட்டி²தா சேவ ஸதி உபட்டா²தி,
அஸமாஹிதஞ்ச சித்தங் ஸமாதி⁴யதி, அபரிக்கீ²ணா ச ஆஸவா பரிக்க²யங் க³ச்ச²ந்தி,
அனநுப்பத்தஞ்ச அனுத்தரங் யோக³க்கே²மங் அனுபாபுணாமி. யே ச கோ² இமே
பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ –
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரா – தே அப்பகஸிரேன
ஸமுதா³க³ச்ச²ந்தீ’தி. தேன, பி⁴க்க²வே, பி⁴க்கு²னா யாவஜீவம்பி ஸோ புக்³க³லோ
அனுப³ந்தி⁴தப்³போ³, ந பக்கமிதப்³ப³ங், அபி பனுஜ்ஜமானேனபீ’’தி [அபி பணுஜ்ஜமானேனாதி (?)].

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.

வனபத்த²ஸுத்தங் நிட்டி²தங் ஸத்தமங்.

8. மது⁴பிண்டி³கஸுத்தங்

199. ஏவங்
மே ஸுதங் – ஏகங் ஸமயங் ப⁴க³வா ஸக்கேஸு விஹரதி கபிலவத்து²ஸ்மிங்
நிக்³ரோதா⁴ராமே. அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய
கபிலவத்து²ங் பிண்டா³ய பாவிஸி. கபிலவத்து²ஸ்மிங் பிண்டா³ய சரித்வா
பச்சா²ப⁴த்தங் பிண்ட³பாதபடிக்கந்தோ யேன மஹாவனங் தேனுபஸங்கமி தி³வாவிஹாராய.
மஹாவனங் அஜ்ஜோ²கா³ஹெத்வா பே³லுவலட்டி²காய மூலே தி³வாவிஹாரங் நிஸீதி³.
த³ண்ட³பாணிபி கோ² ஸக்கோ ஜங்கா⁴விஹாரங் [ஜங்க⁴விஹாரங் (க॰)]
அனுசங்கமமானோ அனுவிசரமானோ யேன மஹாவனங் தேனுபஸங்கமி. மஹாவனங்
அஜ்ஜோ²கா³ஹெத்வா யேன பே³லுவலட்டி²கா யேன ப⁴க³வா தேனுபஸங்கமி; உபஸங்கமித்வா
ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா
த³ண்ட³மோலுப்³ப⁴ ஏகமந்தங் அட்டா²ஸி. ஏகமந்தங் டி²தோ கோ² த³ண்ட³பாணி ஸக்கோ
ப⁴க³வந்தங் ஏதத³வோச – ‘‘கிங்வாதீ³ ஸமணோ கிமக்கா²யீ’’தி? ‘‘யதா²வாதீ³ கோ²,
ஆவுஸோ, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய
ஸதே³வமனுஸ்ஸாய ந கேனசி லோகே விக்³க³ய்ஹ திட்ட²தி, யதா² ச பன காமேஹி
விஸங்யுத்தங் விஹரந்தங் தங் ப்³ராஹ்மணங் அகத²ங்கதி²ங் சி²ன்னகுக்குச்சங்
ப⁴வாப⁴வே வீததண்ஹங் ஸஞ்ஞா நானுஸெந்தி – ஏவங்வாதீ³ கோ² அஹங், ஆவுஸோ,
ஏவமக்கா²யீ’’தி.

‘‘ஏவங் வுத்தே த³ண்ட³பாணி ஸக்கோ ஸீஸங் ஓகம்பெத்வா , ஜிவ்ஹங் நில்லாளெத்வா, திவிஸாக²ங் நலாடிகங் நலாடே வுட்டா²பெத்வா த³ண்ட³மோலுப்³ப⁴ பக்காமி.

200.
அத² கோ² ப⁴க³வா ஸாயன்ஹஸமயங் படிஸல்லானா வுட்டி²தோ யேன நிக்³ரோதா⁴ராமோ
தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா
பி⁴க்கூ² ஆமந்தேஸி – ‘‘இதா⁴ஹங், பி⁴க்க²வே, புப்³ப³ண்ஹஸமயங் நிவாஸெத்வா
பத்தசீவரமாதா³ய கபிலவத்து²ங் பிண்டா³ய பாவிஸிங். கபிலவத்து²ஸ்மிங் பிண்டா³ய
சரித்வா பச்சா²ப⁴த்தங் பிண்ட³பாதபடிக்கந்தோ யேன மஹாவனங் தேனுபஸங்கமிங்
தி³வாவிஹாராய. மஹாவனங் அஜ்ஜோ²கா³ஹெத்வா பே³லுவலட்டி²காய மூலே தி³வாவிஹாரங்
நிஸீதி³ங். த³ண்ட³பாணிபி கோ², பி⁴க்க²வே, ஸக்கோ ஜங்கா⁴விஹாரங் அனுசங்கமமானோ
அனுவிசரமானோ யேன மஹாவனங் தேனுபஸங்கமி. மஹாவனங் அஜ்ஜோ²கா³ஹெத்வா யேன
பே³லுவலட்டி²கா யேனாஹங் தேனுபஸங்கமி; உபஸங்கமித்வா மயா ஸத்³தி⁴ங் ஸம்மோதி³.
ஸம்மோத³னீயங் கத²ங் ஸாரணீயங் வீதிஸாரெத்வா த³ண்ட³மோலுப்³ப⁴ ஏகமந்தங் அட்டா²ஸி. ஏகமந்தங் டி²தோ கோ², பி⁴க்க²வே, த³ண்ட³பாணி ஸக்கோ மங் ஏதத³வோச – ‘கிங்வாதீ³ ஸமணோ கிமக்கா²யீ’தி?

‘‘ஏவங் வுத்தே அஹங், பி⁴க்க²வே, த³ண்ட³பாணிங் ஸக்கங்
ஏதத³வோசங் – யதா²வாதீ³ கோ², ஆவுஸோ, ஸதே³வகே லோகே ஸமாரகே ஸப்³ரஹ்மகே
ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ந கேனசி லோகே விக்³க³ய்ஹ திட்ட²தி,
யதா² ச பன காமேஹி விஸங்யுத்தங் விஹரந்தங் தங் ப்³ராஹ்மணங் அகத²ங்கதி²ங்
சி²ன்னகுக்குச்சங் ப⁴வாப⁴வே வீததண்ஹங் ஸஞ்ஞா நானுஸெந்தி – ஏவங்வாதீ³ கோ²
அஹங், ஆவுஸோ, ஏவமக்கா²யீ’’தி. ‘‘ஏவங் வுத்தே பி⁴க்க²வே, த³ண்ட³பாணி ஸக்கோ
ஸீஸங் ஓகம்பெத்வா, ஜிவ்ஹங் நில்லாளெத்வா, திவிஸாக²ங் நலாடிகங் நலாடே வுட்டா²பெத்வா த³ண்ட³மோலுப்³ப⁴ பக்காமீ’’தி.

201.
ஏவங் வுத்தே அஞ்ஞதரோ பி⁴க்கு² ப⁴க³வந்தங் ஏதத³வோச – ‘‘கிங்வாதீ³ பன,
ப⁴ந்தே, ப⁴க³வா ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய
ஸதே³வமனுஸ்ஸாய ந கேனசி லோகே விக்³க³ய்ஹ திட்ட²தி? கத²ஞ்ச பன, ப⁴ந்தே,
ப⁴க³வந்தங் காமேஹி விஸங்யுத்தங் விஹரந்தங் தங்
ப்³ராஹ்மணங் அகத²ங்கதி²ங் சி²ன்னகுக்குச்சங் ப⁴வாப⁴வே வீததண்ஹங் ஸஞ்ஞா
நானுஸெந்தீ’’தி? ‘‘யதோனிதா³னங், பி⁴க்கு², புரிஸங் பபஞ்சஸஞ்ஞாஸங்கா²
ஸமுதா³சரந்தி. எத்த² சே நத்தி² அபி⁴னந்தி³தப்³ப³ங் அபி⁴வதி³தப்³ப³ங்
அஜ்ஜோ²ஸிதப்³ப³ங். ஏஸேவந்தோ ராகா³னுஸயானங், ஏஸேவந்தோ படிகா⁴னுஸயானங்,
ஏஸேவந்தோ தி³ட்டா²னுஸயானங் , ஏஸேவந்தோ
விசிகிச்சா²னுஸயானங், ஏஸேவந்தோ மானானுஸயானங், ஏஸேவந்தோ ப⁴வராகா³னுஸயானங்,
ஏஸேவந்தோ அவிஜ்ஜானுஸயானங், ஏஸேவந்தோ
த³ண்டா³தா³ன-ஸத்தா²தா³ன-கலஹ-விக்³க³ஹ-விவாத³-துவங்துவங்-பேஸுஞ்ஞ-முஸாவாதா³னங்.
எத்தே²தே பாபகா அகுஸலா த⁴ம்மா அபரிஸேஸா நிருஜ்ஜ²ந்தீ’தி. இத³மவோச ப⁴க³வா.
இத³ங் வத்வான ஸுக³தோ உட்டா²யாஸனா விஹாரங் பாவிஸி.

202.
அத² கோ² தேஸங் பி⁴க்கூ²னங் அசிரபக்கந்தஸ்ஸ ப⁴க³வதோ ஏதத³ஹோஸி – ‘‘இத³ங் கோ²
நோ, ஆவுஸோ, ப⁴க³வா ஸங்கி²த்தேன உத்³தே³ஸங் உத்³தி³ஸித்வா, வித்தா²ரேன
அத்த²ங் அவிப⁴ஜித்வா, உட்டா²யாஸனா விஹாரங் பவிட்டோ² – ‘யதோனிதா³னங்,
பி⁴க்கு², புரிஸங் பபஞ்சஸஞ்ஞாஸங்கா² ஸமுதா³சரந்தி. எத்த² சே நத்த்²த்த்²தி²
அபி⁴னந்தி³தப்³ப³ங் அபி⁴வதி³தப்³ப³ங் அஜ்ஜோ²ஸிதப்³ப³ங். ஏஸேவந்தோ ராகா³னுஸயானங்…பே॰… எத்தே²தே பாபகா அகுஸலா த⁴ம்மா அபரிஸேஸா நிருஜ்ஜ²ந்தீ’தி .
கோ நு கோ² இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ
வித்தா²ரேன அத்த²ங் அவிப⁴த்தஸ்ஸ வித்தா²ரேன அத்த²ங் விப⁴ஜெய்யா’’தி? அத²
கோ² தேஸங் பி⁴க்கூ²னங் ஏதத³ஹோஸி – ‘‘அயங் கோ² ஆயஸ்மா மஹாகச்சானோ ஸத்து² சேவ
ஸங்வண்ணிதோ ஸம்பா⁴விதோ ச விஞ்ஞூனங் ஸப்³ரஹ்மசாரீனங். பஹோதி சாயஸ்மா
மஹாகச்சானோ இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ
வித்தா²ரேன அத்த²ங் அவிப⁴த்தஸ்ஸ வித்தா²ரேன அத்த²ங் விப⁴ஜிதுங். யங்னூன
மயங் யேனாயஸ்மா மஹாகச்சானோ தேனுபஸங்கமெய்யாம; உபஸங்கமித்வா ஆயஸ்மந்தங்
மஹாகச்சானங் ஏதமத்த²ங் படிபுச்செ²ய்யாமா’’தி.

அத² கோ² தே பி⁴க்கூ² யேனாயஸ்மா மஹாகச்சானோ
தேனுபஸங்கமிங்ஸு; உபஸங்கமித்வா ஆயஸ்மதா மஹாகச்சானேன ஸத்³தி⁴ங்
ஸம்மோதி³ங்ஸு. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங்
நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ஆயஸ்மந்தங் மஹாகச்சானங்
ஏதத³வோசுங் – ‘‘இத³ங் கோ² நோ, ஆவுஸோ கச்சான, ப⁴க³வா ஸங்கி²த்தேன உத்³தே³ஸங்
உத்³தி³ஸித்வா வித்தா²ரேன அத்த²ங் அவிப⁴ஜித்வா உட்டா²யாஸனா விஹாரங்
பவிட்டோ² – ‘யதோனிதா³னங், பி⁴க்கு², புரிஸங் பபஞ்சஸஞ்ஞாஸங்கா²
ஸமுதா³சரந்தி. எத்த² சே நத்தி² அபி⁴னந்தி³தப்³ப³ங் அபி⁴வதி³தப்³ப³ங்
அஜ்ஜோ²ஸிதப்³ப³ங். ஏஸேவந்தோ ராகா³னுஸயானங்…பே॰…
எத்தே²தே பாபகா அகுஸலா த⁴ம்மா அபரிஸேஸா நிருஜ்ஜ²ந்தீ’தி. தேஸங் நோ, ஆவுஸோ
கச்சான, அம்ஹாகங் அசிரபக்கந்தஸ்ஸ ப⁴க³வதோ ஏதத³ஹோஸி – ‘இத³ங் கோ² நோ, ஆவுஸோ,
ப⁴க³வா ஸங்கி²த்தேன உத்³தே³ஸங் உத்³தி³ஸித்வா வித்தா²ரேன அத்த²ங்
அவிப⁴ஜித்வா உட்டா²யாஸனா விஹாரங் பவிட்டோ² – ‘‘யதோனிதா³னங், பி⁴க்கு²,
புரிஸங் பபஞ்சஸஞ்ஞாஸங்கா² ஸமுதா³சரந்தி. எத்த² சே
நத்தி² அபி⁴னந்தி³தப்³ப³ங் அபி⁴வதி³தப்³ப³ங் அஜ்ஜோ²ஸிதப்³ப³ங். ஏஸேவந்தோ
ராகா³னுஸயானங்…பே॰… எத்தே²தே பாபகா அகுஸலா த⁴ம்மா அபரிஸேஸா
நிருஜ்ஜ²ந்தீ’’தி. கோ நு கோ² இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ
உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ வித்தா²ரேன அத்த²ங்
விப⁴ஜெய்யாதி? தேஸங் நோ, ஆவுஸோ கச்சான, அம்ஹாகங் ஏதத³ஹோஸி – ‘அயங் கோ²
ஆயஸ்மா மஹாகச்சானோ ஸத்து² சேவ ஸங்வண்ணிதோ ஸம்பா⁴விதோ ச விஞ்ஞூனங்
ஸப்³ரஹ்மசாரீனங், பஹோதி சாயஸ்மா மஹாகச்சானோ இமஸ்ஸ ப⁴க³வதா ஸங்கி²த்தேன
உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ வித்தா²ரேன
அத்த²ங் விப⁴ஜிதுங். யங்னூன மயங் யேனாயஸ்மா மஹாகச்சானோ தேனுபஸங்கமெய்யாம;
உபஸங்கமித்வா ஆயஸ்மந்தங் மஹாகச்சானங் ஏதமத்த²ங் படிபுச்செ²ய்யாமா’தி.
விப⁴ஜதாயஸ்மா மஹாகச்சானோ’’தி.

203.
‘‘ஸெய்யதா²பி, ஆவுஸோ, புரிஸோ ஸாரத்தி²கோ ஸாரக³வேஸீ ஸாரபரியேஸனங் சரமானோ
மஹதோ ருக்க²ஸ்ஸ திட்ட²தோ ஸாரவதோ அதிக்கம்மேவ மூலங், அதிக்கம்ம க²ந்த⁴ங்,
ஸாகா²பலாஸே ஸாரங் பரியேஸிதப்³ப³ங் மஞ்ஞெய்ய; ஏவங்ஸம்பத³மித³ங் ஆயஸ்மந்தானங்
ஸத்த²ரி ஸம்முகீ²பூ⁴தே, தங் ப⁴க³வந்தங் அதிஸித்வா ,
அம்ஹே ஏதமத்த²ங் படிபுச்சி²தப்³ப³ங் மஞ்ஞத². ஸோ ஹாவுஸோ, ப⁴க³வா ஜானங்
ஜானாதி, பஸ்ஸங் பஸ்ஸதி, சக்கு²பூ⁴தோ ஞாணபூ⁴தோ த⁴ம்மபூ⁴தோ ப்³ரஹ்மபூ⁴தோ,
வத்தா பவத்தா, அத்த²ஸ்ஸ நின்னேதா, அமதஸ்ஸ தா³தா, த⁴ம்மஸ்ஸாமீ ததா²க³தோ. ஸோ
சேவ பனேதஸ்ஸ காலோ அஹோஸி, யங் ப⁴க³வந்தங்யேவ ஏதமத்த²ங் படிபுச்செ²ய்யாத².
யதா² வோ ப⁴க³வா ப்³யாகரெய்ய ததா² நங் தா⁴ரெய்யாதா²’’தி. ‘‘அத்³தா⁴வுஸோ
கச்சான, ப⁴க³வா ஜானங் ஜானாதி, பஸ்ஸங் பஸ்ஸதி, சக்கு²பூ⁴தோ ஞாணபூ⁴தோ
த⁴ம்மபூ⁴தோ ப்³ரஹ்மபூ⁴தோ, வத்தா பவத்தா, அத்த²ஸ்ஸ நின்னேதா, அமதஸ்ஸ தா³தா,
த⁴ம்மஸ்ஸாமீ ததா²க³தோ. ஸோ சேவ பனேதஸ்ஸ காலோ அஹோஸி, யங் ப⁴க³வந்தங்யேவ
ஏதமத்த²ங் படிபுச்செ²ய்யாம. யதா² நோ ப⁴க³வா ப்³யாகரெய்ய ததா² நங்
தா⁴ரெய்யாம. அபி சாயஸ்மா மஹாகச்சானோ ஸத்து² சேவ ஸங்வண்ணிதோ ஸம்பா⁴விதோ ச
விஞ்ஞூனங் ஸப்³ரஹ்மசாரீனங், பஹோதி சாயஸ்மா
மஹாகச்சானோ இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ
வித்தா²ரேன அத்த²ங் அவிப⁴த்தஸ்ஸ வித்தா²ரேன அத்த²ங் விப⁴ஜிதுங்.
விப⁴ஜதாயஸ்மா மஹாகச்சானோ அக³ருங் கத்வா’’தி [அக³ருகத்வா (ஸீ॰), அக³ருகரித்வா (ஸ்யா॰ பீ॰)].
‘‘தேன ஹாவுஸோ, ஸுணாத², ஸாது⁴கங் மனஸிகரோத², பா⁴ஸிஸ்ஸாமீ’’தி.
‘‘ஏவமாவுஸோ’’தி கோ² தே பி⁴க்கூ² ஆயஸ்மதோ மஹாகச்சானஸ்ஸ பச்சஸ்ஸோஸுங். ஆயஸ்மா
மஹாகச்சானோ ஏதத³வோச –

204.
‘‘யங் கோ² நோ, ஆவுஸோ, ப⁴க³வா ஸங்கி²த்தேன உத்³தே³ஸங் உத்³தி³ஸித்வா
வித்தா²ரேன அத்த²ங் அவிப⁴ஜித்வா உட்டா²யாஸனா விஹாரங் பவிட்டோ² –
‘யதோனிதா³னங், பி⁴க்கு², புரிஸங் பபஞ்சஸஞ்ஞாஸங்கா² ஸமுதா³சரந்தி .
எத்த² சே நத்தி² அபி⁴னந்தி³தப்³ப³ங் அபி⁴வதி³தப்³ப³ங் அஜ்ஜோ²ஸிதப்³ப³ங்,
ஏஸேவந்தோ ராகா³னுஸயானங்…பே॰… எத்தே²தே பாபகா அகுஸலா த⁴ம்மா அபரிஸேஸா
நிருஜ்ஜ²ந்தீ’தி, இமஸ்ஸ கோ² அஹங், ஆவுஸோ, ப⁴க³வதா ஸங்கி²த்தேன உத்³தே³ஸஸ்ஸ
உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ ஏவங் வித்தா²ரேன அத்த²ங்
ஆஜானாமி –

‘‘சக்கு²ஞ்சாவுஸோ, படிச்ச ரூபே ச உப்பஜ்ஜதி சக்கு²விஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா, யங் வேதே³தி தங் ஸஞ்ஜானாதி ,
யங் ஸஞ்ஜானாதி தங் விதக்கேதி, யங் விதக்கேதி தங் பபஞ்சேதி, யங் பபஞ்சேதி
ததோனிதா³னங் புரிஸங் பபஞ்சஸஞ்ஞாஸங்கா² ஸமுதா³சரந்தி
அதீதானாக³தபச்சுப்பன்னேஸு சக்கு²விஞ்ஞெய்யேஸு ரூபேஸு. ஸோதஞ்சாவுஸோ, படிச்ச
ஸத்³தே³ ச உப்பஜ்ஜதி ஸோதவிஞ்ஞாணங்…பே॰… கா⁴னஞ்சாவுஸோ, படிச்ச க³ந்தே⁴ ச
உப்பஜ்ஜதி கா⁴னவிஞ்ஞாணங்…பே॰… ஜிவ்ஹஞ்சாவுஸோ, படிச்ச ரஸே ச உப்பஜ்ஜதி
ஜிவ்ஹாவிஞ்ஞாணங்…பே॰… காயஞ்சாவுஸோ, படிச்ச பொ²ட்ட²ப்³பே³ ச உப்பஜ்ஜதி
காயவிஞ்ஞாணங்…பே॰… மனஞ்சாவுஸோ, படிச்ச த⁴ம்மே ச உப்பஜ்ஜதி மனோவிஞ்ஞாணங்,
திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா, யங் வேதே³தி தங் ஸஞ்ஜானாதி,
யங் ஸஞ்ஜானாதி தங் விதக்கேதி, யங் விதக்கேதி தங் பபஞ்சேதி, யங் பபஞ்சேதி
ததோனிதா³னங் புரிஸங் பபஞ்சஸஞ்ஞாஸங்கா² ஸமுதா³சரந்தி
அதீதானாக³தபச்சுப்பன்னேஸு மனோவிஞ்ஞெய்யேஸு த⁴ம்மேஸு.

‘‘ஸோ வதாவுஸோ, சக்கு²ஸ்மிங் ஸதி ரூபே ஸதி
சக்கு²விஞ்ஞாணே ஸதி ப²ஸ்ஸபஞ்ஞத்திங் பஞ்ஞாபெஸ்ஸதீதி – டா²னமேதங் விஜ்ஜதி.
ப²ஸ்ஸபஞ்ஞத்தியா ஸதி வேத³னாபஞ்ஞத்திங் பஞ்ஞாபெஸ்ஸதீதி – டா²னமேதங் விஜ்ஜதி.
வேத³னாபஞ்ஞத்தியா ஸதி ஸஞ்ஞாபஞ்ஞத்திங் பஞ்ஞாபெஸ்ஸதீதி – டா²னமேதங்
விஜ்ஜதி. ஸஞ்ஞாபஞ்ஞத்தியா ஸதி விதக்கபஞ்ஞத்திங்
பஞ்ஞாபெஸ்ஸதீதி – டா²னமேதங் விஜ்ஜதி. விதக்கபஞ்ஞத்தியா ஸதி
பபஞ்சஸஞ்ஞாஸங்கா²ஸமுதா³சரணபஞ்ஞத்திங் பஞ்ஞாபெஸ்ஸதீதி – டா²னமேதங் விஜ்ஜதி.
ஸோ வதாவுஸோ, ஸோதஸ்மிங் ஸதி ஸத்³தே³ ஸதி…பே॰…
கா⁴னஸ்மிங் ஸதி க³ந்தே⁴ ஸதி…பே॰… ஜிவ்ஹாய ஸதி ரஸே ஸதி…பே॰… காயஸ்மிங் ஸதி
பொ²ட்ட²ப்³பே³ ஸதி…பே॰… மனஸ்மிங் ஸதி த⁴ம்மே ஸதி மனோவிஞ்ஞாணே ஸதி
ப²ஸ்ஸபஞ்ஞத்திங் பஞ்ஞாபெஸ்ஸதீதி – டா²னமேதங் விஜ்ஜதி. ப²ஸ்ஸபஞ்ஞத்தியா ஸதி
வேத³னாபஞ்ஞத்திங் பஞ்ஞாபெஸ்ஸதீதி – டா²னமேதங் விஜ்ஜதி. வேத³னாபஞ்ஞத்தியா
ஸதி ஸஞ்ஞாபஞ்ஞத்திங் பஞ்ஞாபெஸ்ஸதீதி – டா²னமேதங் விஜ்ஜதி. ஸஞ்ஞாபஞ்ஞத்தியா
ஸதி விதக்கபஞ்ஞத்திங் பஞ்ஞாபெஸ்ஸதீதி – டா²னமேதங் விஜ்ஜதி.
விதக்கபஞ்ஞத்தியா ஸதி பபஞ்சஸஞ்ஞாஸங்கா²ஸமுதா³சரணபஞ்ஞத்திங் பஞ்ஞாபெஸ்ஸதீதி –
டா²னமேதங் விஜ்ஜதி.

‘‘ஸோ வதாவுஸோ, சக்கு²ஸ்மிங் அஸதி ரூபே அஸதி
சக்கு²விஞ்ஞாணே அஸதி ப²ஸ்ஸபஞ்ஞத்திங் பஞ்ஞாபெஸ்ஸதீதி – நேதங் டா²னங்
விஜ்ஜதி. ப²ஸ்ஸபஞ்ஞத்தியா அஸதி வேத³னாபஞ்ஞத்திங் பஞ்ஞாபெஸ்ஸதீதி – நேதங்
டா²னங் விஜ்ஜதி. வேத³னாபஞ்ஞத்தியா அஸதி ஸஞ்ஞாபஞ்ஞத்திங் பஞ்ஞாபெஸ்ஸதீதி –
நேதங் டா²னங் விஜ்ஜதி. ஸஞ்ஞாபஞ்ஞத்தியா அஸதி விதக்கபஞ்ஞத்திங்
பஞ்ஞாபெஸ்ஸதீதி – நேதங் டா²னங் விஜ்ஜதி. விதக்கபஞ்ஞத்தியா அஸதி
பபஞ்சஸஞ்ஞாஸங்கா²ஸமுதா³சரணபஞ்ஞத்திங் பஞ்ஞாபெஸ்ஸதீதி – நேதங் டா²னங்
விஜ்ஜதி. ஸோ வதாவுஸோ, ஸோதஸ்மிங் அஸதி ஸத்³தே³
அஸதி…பே॰… கா⁴னஸ்மிங் அஸதி க³ந்தே⁴ அஸதி…பே॰… ஜிவ்ஹாய அஸதி ரஸே அஸதி…பே॰…
காயஸ்மிங் அஸதி பொ²ட்ட²ப்³பே³ அஸதி…பே॰… மனஸ்மிங் அஸதி த⁴ம்மே அஸதி
மனோவிஞ்ஞாணே அஸதி ப²ஸ்ஸபஞ்ஞத்திங் பஞ்ஞாபெஸ்ஸதீதி –
நேதங் டா²னங் விஜ்ஜதி. ப²ஸ்ஸபஞ்ஞத்தியா அஸதி வேத³னாபஞ்ஞத்திங்
பஞ்ஞாபெஸ்ஸதீதி – நேதங் டா²னங் விஜ்ஜதி. வேத³னாபஞ்ஞத்தியா அஸதி
ஸஞ்ஞாபஞ்ஞத்திங் பஞ்ஞாபெஸ்ஸதீதி – நேதங் டா²னங் விஜ்ஜதி. ஸஞ்ஞாபஞ்ஞத்தியா
அஸதி விதக்கபஞ்ஞத்திங் பஞ்ஞாபெஸ்ஸதீதி – நேதங் டா²னங் விஜ்ஜதி.
விதக்கபஞ்ஞத்தியா அஸதி பபஞ்சஸஞ்ஞாஸங்கா²ஸமுதா³சரணபஞ்ஞத்திங் பஞ்ஞாபெஸ்ஸதீதி
– நேதங் டா²னங் விஜ்ஜதி.

‘‘யங் கோ² நோ, ஆவுஸோ, ப⁴க³வா ஸங்கி²த்தேன
உத்³தே³ஸங் உத்³தி³ஸித்வா வித்தா²ரேன அத்த²ங் அவிப⁴ஜித்வா உட்டா²யாஸனா
விஹாரங் பவிட்டோ² – ‘யதோனிதா³னங், பி⁴க்கு², புரிஸங் பபஞ்சஸஞ்ஞாஸங்கா²
ஸமுதா³சரந்தி எத்த² சே நத்தி² அபி⁴னந்தி³தப்³ப³ங் அபி⁴வதி³தப்³ப³ங்
அஜ்ஜோ²ஸிதப்³ப³ங் ஏஸேவந்தோ ராகா³னுஸயானங்…பே॰… எத்தே²தே பாபகா அகுஸலா
த⁴ம்மா அபரிஸேஸா நிருஜ்ஜ²ந்தீ’தி, இமஸ்ஸ கோ² அஹங், ஆவுஸோ, ப⁴க³வதா
ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ
ஏவங் வித்தா²ரேன அத்த²ங் ஆஜானாமி. ஆகங்க²மானா ச பன தும்ஹே ஆயஸ்மந்தோ
ப⁴க³வந்தங்யேவ உபஸங்கமித்வா ஏதமத்த²ங் படிபுச்செ²ய்யாத². யதா² நோ ப⁴க³வா
ப்³யாகரோதி ததா² நங் தா⁴ரெய்யாதா²’’தி.

205.
அத² கோ² தே பி⁴க்கூ² ஆயஸ்மதோ மஹாகச்சானஸ்ஸ பா⁴ஸிதங் அபி⁴னந்தி³த்வா
அனுமோதி³த்வா உட்டா²யாஸனா யேன ப⁴க³வா தேனுபஸங்கமிங்ஸு; உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே
பி⁴க்கூ² ப⁴க³வந்தங் ஏதத³வோசுங் – ‘‘யங் கோ² நோ, ப⁴ந்தே, ப⁴க³வா
ஸங்கி²த்தேன உத்³தே³ஸங் உத்³தி³ஸித்வா வித்தா²ரேன அத்த²ங் அவிப⁴ஜித்வா
உட்டா²யாஸனா விஹாரங் பவிட்டோ² – ‘யதோனிதா³னங், பி⁴க்கு², புரிஸங்
பபஞ்சஸஞ்ஞாஸங்கா² ஸமுதா³சரந்தி. எத்த² சே நத்தி² அபி⁴னந்தி³தப்³ப³ங்
அபி⁴வதி³தப்³ப³ங் அஜ்ஜோ²ஸிதப்³ப³ங். ஏஸேவந்தோ ராகா³னுஸயானங்…பே॰… எத்தே²தே
பாபகா அகுஸலா த⁴ம்மா அபரிஸேஸா நிருஜ்ஜ²ந்தீ’தி. தேஸங் நோ, ப⁴ந்தே, அம்ஹாகங்
அசிரபக்கந்தஸ்ஸ ப⁴க³வதோ ஏதத³ஹோஸி – ‘இத³ங் கோ² நோ, ஆவுஸோ, ப⁴க³வா
ஸங்கி²த்தேன உத்³தே³ஸங் உத்³தி³ஸித்வா வித்தா²ரேன அத்த²ங் அவிப⁴ஜித்வா
உட்டா²யாஸனா விஹாரங் பவிட்டோ² – ‘‘யதோனிதா³னங், பி⁴க்கு², புரிஸங்
பபஞ்சஸஞ்ஞாஸங்கா² ஸமுதா³சரந்தி. எத்த² சே நத்தி² அபி⁴னந்தி³தப்³ப³ங்
அபி⁴வதி³தப்³ப³ங் அஜ்ஜோ²ஸிதப்³ப³ங். ஏஸேவந்தோ ராகா³னுஸயானங், ஏஸேவந்தோ
படிகா⁴னுஸயானங், ஏஸேவந்தோ தி³ட்டா²னுஸயானங், ஏஸேவந்தோ விசிகிச்சா²னுஸயானங்,
ஏஸேவந்தோ மானானுஸயானங், ஏஸேவந்தோ ப⁴வராகா³னுஸயானங் ,
ஏஸேவந்தோ அவிஜ்ஜானுஸயானங், ஏஸேவந்தோ
த³ண்டா³தா³ன-ஸத்தா²தா³ன-கலஹ-விக்³க³ஹ-விவாத³துவங்துவங்-பேஸுஞ்ஞ-முஸாவாதா³னங்.
எத்தே²தே பாபகா அகுஸலா த⁴ம்மா அபரிஸேஸா நிருஜ்ஜ²ந்தீ’’தி. கோ நு கோ² இமஸ்ஸ
ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங்
அவிப⁴த்தஸ்ஸ வித்தா²ரேன அத்த²ங் விப⁴ஜெய்யா’தி? தேஸங் நோ, ப⁴ந்தே, அம்ஹாகங்
ஏதத³ஹோஸி – ‘அயங் கோ² ஆயஸ்மா மஹாகச்சானோ ஸத்து² சேவ ஸங்வண்ணிதோ ஸம்பா⁴விதோ
ச விஞ்ஞூனங் ஸப்³ரஹ்மசாரீனங், பஹோதி சாயஸ்மா மஹாகச்சானோ
இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங்
அவிப⁴த்தஸ்ஸ வித்தா²ரேன அத்த²ங் விப⁴ஜிதுங், யங்னூன மயங் யேனாயஸ்மா
மஹாகச்சானோ தேனுபஸங்கமெய்யாம; உபஸங்கமித்வா ஆயஸ்மந்தங் மஹாகச்சானங்
ஏதமத்த²ங் படிபுச்செ²ய்யாமா’தி. அத² கோ² மயங், ப⁴ந்தே, யேனாயஸ்மா
மஹாகச்சானோ தேனுபஸங்கமிம்ஹ; உபஸங்கமித்வா ஆயஸ்மந்தங் மஹாகச்சானங்
ஏதமத்த²ங் படிபுச்சி²ம்ஹ. தேஸங் நோ, ப⁴ந்தே, ஆயஸ்மதா மஹாகச்சானேன இமேஹி
ஆகாரேஹி இமேஹி பதே³ஹி இமேஹி ப்³யஞ்ஜனேஹி அத்தோ² விப⁴த்தோ’’தி. ‘‘பண்டி³தோ,
பி⁴க்க²வே, மஹாகச்சானோ; மஹாபஞ்ஞோ, பி⁴க்க²வே, மஹாகச்சானோ. மங் சேபி தும்ஹே,
பி⁴க்க²வே, ஏதமத்த²ங் படிபுச்செ²ய்யாத², அஹம்பி தங் ஏவமேவங் ப்³யாகரெய்யங்
யதா² தங் மஹாகச்சானேன ப்³யாகதங். ஏஸோ சேவேதஸ்ஸ அத்தோ². ஏவஞ்ச [ஏவேமேவ ச (க॰)] நங் தா⁴ரேதா²’’தி.

ஏவங் வுத்தே ஆயஸ்மா ஆனந்தோ³ ப⁴க³வந்தங் ஏதத³வோச –
‘‘ஸெய்யதா²பி, ப⁴ந்தே, புரிஸோ ஜிக⁴ச்சா²து³ப்³ப³ல்யபரேதோ மது⁴பிண்டி³கங்
அதி⁴க³ச்செ²ய்ய, ஸோ யதோ யதோ ஸாயெய்ய, லபே⁴தே²வ ஸாது³ரஸங் அஸேசனகங். ஏவமேவ
கோ², ப⁴ந்தே, சேதஸோ பி⁴க்கு² த³ப்³ப³ஜாதிகோ, யதோ யதோ இமஸ்ஸ த⁴ம்மபரியாயஸ்ஸ
பஞ்ஞாய அத்த²ங் உபபரிக்கெ²ய்ய, லபே⁴தே²வ அத்தமனதங், லபே⁴தே²வ சேதஸோ
பஸாத³ங். கோ நாமோ அயங் [கோ நாமாயங் (ஸ்யா॰)], ப⁴ந்தே, த⁴ம்மபரியாயோ’’தி? ‘‘தஸ்மாதிஹ த்வங், ஆனந்த³, இமங் த⁴ம்மபரியாயங் மது⁴பிண்டி³கபரியாயோ த்வேவ நங் தா⁴ரேஹீ’’தி.

இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதங் அபி⁴னந்தீ³தி.

மது⁴பிண்டி³கஸுத்தங் நிட்டி²தங் அட்ட²மங்.

9. த்³வேதா⁴விதக்கஸுத்தங்

206. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –

‘‘புப்³பே³வ மே, பி⁴க்க²வே, ஸம்போ³தா⁴
அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ ஏதத³ஹோஸி – ‘யங்னூனாஹங் த்³விதா⁴
கத்வா த்³விதா⁴ கத்வா விதக்கே விஹரெய்ய’ந்தி. ஸோ கோ² அஹங், பி⁴க்க²வே, யோ
சாயங் காமவிதக்கோ யோ ச ப்³யாபாத³விதக்கோ யோ ச விஹிங்ஸாவிதக்கோ – இமங் ஏகங்
பா⁴க³மகாஸிங் ; யோ சாயங் நெக்க²ம்மவிதக்கோ யோ ச அப்³யாபாத³விதக்கோ யோ ச அவிஹிங்ஸாவிதக்கோ – இமங் து³தியங் பா⁴க³மகாஸிங்.

207. ‘‘தஸ்ஸ மய்ஹங், பி⁴க்க²வே, ஏவங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி
காமவிதக்கோ. ஸோ ஏவங் பஜானாமி – ‘உப்பன்னோ கோ² மே அயங் காமவிதக்கோ. ஸோ ச
கோ² அத்தப்³யாபா³தா⁴யபி ஸங்வத்ததி, பரப்³யாபா³தா⁴யபி ஸங்வத்ததி,
உப⁴யப்³யாபா³தா⁴யபி ஸங்வத்ததி, பஞ்ஞானிரோதி⁴கோ விகா⁴தபக்கி²கோ
அனிப்³பா³னஸங்வத்தனிகோ’ [அனிப்³பா³னஸங்வத்தனிகோ’’தி (?)].
‘அத்தப்³யாபா³தா⁴ய ஸங்வத்ததீ’திபி மே, பி⁴க்க²வே, படிஸஞ்சிக்க²தோ
அப்³ப⁴த்த²ங் க³ச்ச²தி; ‘பரப்³யாபா³தா⁴ய ஸங்வத்ததீ’திபி மே, பி⁴க்க²வே,
படிஸஞ்சிக்க²தோ அப்³ப⁴த்த²ங் க³ச்ச²தி; ‘உப⁴யப்³யாபா³தா⁴ய ஸங்வத்ததீ’திபி
மே, பி⁴க்க²வே, படிஸஞ்சிக்க²தோ அப்³ப⁴த்த²ங் க³ச்ச²தி;
‘பஞ்ஞானிரோதி⁴கோ விகா⁴தபக்கி²கோ அனிப்³பா³னஸங்வத்தனிகோ’திபி மே,
பி⁴க்க²வே, படிஸஞ்சிக்க²தோ அப்³ப⁴த்த²ங் க³ச்ச²தி. ஸோ கோ² அஹங், பி⁴க்க²வே,
உப்பன்னுப்பன்னங் காமவிதக்கங் பஜஹமேவ [அதீதகாலிககிரியாபதா³னியேவ] வினோத³மேவ [அதீதகாலிககிரியாபதா³னியேவ] ப்³யந்தமேவ [ப்³யந்தேவ (ஸீ॰ ஸ்யா॰ பீ॰)] நங் அகாஸிங்.

208.
‘‘தஸ்ஸ மய்ஹங், பி⁴க்க²வே, ஏவங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ
உப்பஜ்ஜதி ப்³யாபாத³விதக்கோ…பே॰… உப்பஜ்ஜதி விஹிங்ஸாவிதக்கோ. ஸோ ஏவங்
பஜானாமி – ‘உப்பன்னோ கோ² மே அயங் விஹிங்ஸாவிதக்கோ. ஸோ ச கோ²
அத்தப்³யாபா³தா⁴யபி ஸங்வத்ததி, பரப்³யாபா³தா⁴யபி
ஸங்வத்ததி, உப⁴யப்³யாபா³தா⁴யபி ஸங்வத்ததி, பஞ்ஞானிரோதி⁴கோ விகா⁴தபக்கி²கோ
அனிப்³பா³னஸங்வத்தனிகோ’. ‘அத்தப்³யாபா³தா⁴ய ஸங்வத்ததீ’திபி மே, பி⁴க்க²வே,
படிஸஞ்சிக்க²தோ அப்³ப⁴த்த²ங் க³ச்ச²தி; ‘பரப்³யாபா³தா⁴ய ஸங்வத்ததீ’திபி மே,
பி⁴க்க²வே, படிஸஞ்சிக்க²தோ அப்³ப⁴த்த²ங் க³ச்ச²தி; ‘உப⁴யப்³யாபா³தா⁴ய
ஸங்வத்ததீ’திபி மே, பி⁴க்க²வே, படிஸஞ்சிக்க²தோ அப்³ப⁴த்த²ங் க³ச்ச²தி;
‘பஞ்ஞானிரோதி⁴கோ விகா⁴தபக்கி²கோ அனிப்³பா³னஸங்வத்தனிகோ’திபி மே, பி⁴க்க²வே,
படிஸஞ்சிக்க²தோ அப்³ப⁴த்த²ங் க³ச்ச²தி. ஸோ கோ² அஹங், பி⁴க்க²வே,
உப்பன்னுப்பன்னங் விஹிங்ஸாவிதக்கங் பஜஹமேவ வினோத³மேவ ப்³யந்தமேவ நங்
அகாஸிங்.

‘‘யஞ்ஞதே³வ, பி⁴க்க²வே, பி⁴க்கு² ப³ஹுலமனுவிதக்கேதி
அனுவிசாரேதி, ததா² ததா² நதி ஹோதி சேதஸோ. காமவிதக்கங் சே, பி⁴க்க²வே,
பி⁴க்கு² ப³ஹுலமனுவிதக்கேதி அனுவிசாரேதி, பஹாஸி நெக்க²ம்மவிதக்கங், காமவிதக்கங் ப³ஹுலமகாஸி, தஸ்ஸ தங்
காமவிதக்காய சித்தங் நமதி. ப்³யாபாத³விதக்கங் சே, பி⁴க்க²வே…பே॰…
விஹிங்ஸாவிதக்கங் சே, பி⁴க்க²வே, பி⁴க்கு² ப³ஹுலமனுவிதக்கேதி அனுவிசாரேதி,
பஹாஸி அவிஹிங்ஸாவிதக்கங், விஹிங்ஸாவிதக்கங் ப³ஹுலமகாஸி, தஸ்ஸ தங்
விஹிங்ஸாவிதக்காய சித்தங் நமதி. ஸெய்யதா²பி, பி⁴க்க²வே, வஸ்ஸானங் பச்சி²மே
மாஸே ஸரத³ஸமயே கிட்ட²ஸம்பா³தே⁴ கோ³பாலகோ கா³வோ ரக்கெ²ய்ய. ஸோ தா கா³வோ ததோ
ததோ த³ண்டே³ன ஆகோடெய்ய படிகோடெய்ய ஸன்னிருந்தெ⁴ய்ய ஸன்னிவாரெய்ய. தங் கிஸ்ஸ
ஹேது? பஸ்ஸதி ஹி ஸோ, பி⁴க்க²வே, கோ³பாலகோ ததோனிதா³னங் வத⁴ங் வா ப³ந்த⁴னங்
வா ஜானிங் வா க³ரஹங் வா. ஏவமேவ கோ² அஹங், பி⁴க்க²வே, அத்³த³ஸங் அகுஸலானங்
த⁴ம்மானங் ஆதீ³னவங் ஓகாரங் ஸங்கிலேஸங், குஸலானங் த⁴ம்மானங் நெக்க²ம்மே
ஆனிஸங்ஸங் வோதா³னபக்க²ங்.

209. ‘‘தஸ்ஸ
மய்ஹங், பி⁴க்க²வே, ஏவங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி
நெக்க²ம்மவிதக்கோ. ஸோ ஏவங் பஜானாமி – ‘உப்பன்னோ கோ² மே அயங்
நெக்க²ம்மவிதக்கோ. ஸோ ச கோ² நேவத்தப்³யாபா³தா⁴ய ஸங்வத்ததி, ந
பரப்³யாபா³தா⁴ய ஸங்வத்ததி, ந உப⁴யப்³யாபா³தா⁴ய ஸங்வத்ததி, பஞ்ஞாவுத்³தி⁴கோ
அவிகா⁴தபக்கி²கோ நிப்³பா³னஸங்வத்தனிகோ’. ரத்திங் சேபி நங், பி⁴க்க²வே,
அனுவிதக்கெய்யங் அனுவிசாரெய்யங், நேவ ததோனிதா³னங் ப⁴யங் ஸமனுபஸ்ஸாமி.
தி³வஸங் சேபி நங், பி⁴க்க²வே, அனுவிதக்கெய்யங் அனுவிசாரெய்யங், நேவ
ததோனிதா³னங் ப⁴யங் ஸமனுபஸ்ஸாமி. ரத்திந்தி³வங் சேபி நங், பி⁴க்க²வே,
அனுவிதக்கெய்யங் அனுவிசாரெய்யங், நேவ ததோனிதா³னங் ப⁴யங் ஸமனுபஸ்ஸாமி. அபி ச
கோ² மே அதிசிரங் அனுவிதக்கயதோ அனுவிசாரயதோ காயோ கிலமெய்ய . காயே கிலந்தே [கிலமந்தே (க॰)] சித்தங்
ஊஹஞ்ஞெய்ய. ஊஹதே சித்தே ஆரா சித்தங் ஸமாதி⁴ம்ஹாதி. ஸோ கோ² அஹங்,
பி⁴க்க²வே, அஜ்ஜ²த்தமேவ சித்தங் ஸண்ட²பேமி ஸன்னிஸாதே³மி ஏகோதி³ங் கரோமி [ஏகோதி³ கரோமி (பீ॰)] ஸமாத³ஹாமி. தங் கிஸ்ஸ ஹேது? ‘மா மே சித்தங் ஊஹஞ்ஞீ’தி [உக்³கா⁴டீதி (ஸ்யா॰ க॰), ஊஹனீதி (பீ॰)].

210.
‘‘தஸ்ஸ மய்ஹங், பி⁴க்க²வே, ஏவங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ
உப்பஜ்ஜதி அப்³யாபாத³விதக்கோ…பே॰… உப்பஜ்ஜதி அவிஹிங்ஸாவிதக்கோ. ஸோ ஏவங்
பஜானாமி – ‘உப்பன்னோ கோ² மே அயங் அவிஹிங்ஸாவிதக்கோ. ஸோ ச கோ²
நேவத்தப்³யாபா³தா⁴ய ஸங்வத்ததி, ந பரப்³யாபா³தா⁴ய ஸங்வத்ததி, ந
உப⁴யப்³யாபா³தா⁴ய ஸங்வத்ததி, பஞ்ஞாவுத்³தி⁴கோ
அவிகா⁴தபக்கி²கோ நிப்³பா³னஸங்வத்தனிகோ’. ரத்திங் சேபி நங், பி⁴க்க²வே,
அனுவிதக்கெய்யங் அனுவிசாரெய்யங், நேவ ததோனிதா³னங் ப⁴யங் ஸமனுபஸ்ஸாமி.
தி³வஸங் சேபி நங், பி⁴க்க²வே, அனுவிதக்கெய்யங் அனுவிசாரெய்யங், நேவ
ததோனிதா³னங் ப⁴யங் ஸமனுபஸ்ஸாமி. ரத்திந்தி³வங் சேபி நங், பி⁴க்க²வே,
அனுவிதக்கெய்யங் அனுவிசாரெய்யங், நேவ ததோனிதா³னங் ப⁴யங் ஸமனுபஸ்ஸாமி. அபி ச
கோ² மே அதிசிரங் அனுவிதக்கயதோ அனுவிசாரயதோ காயோ கிலமெய்ய. காயே கிலந்தே
சித்தங் ஊஹஞ்ஞெய்ய. ஊஹதே சித்தே ஆரா சித்தங் ஸமாதி⁴ம்ஹாதி. ஸோ கோ² அஹங்,
பி⁴க்க²வே, அஜ்ஜ²த்தமேவ சித்தங் ஸண்ட²பேமி, ஸன்னிஸாதே³மி, ஏகோதி³ங் கரோமி
ஸமாத³ஹாமி. தங் கிஸ்ஸ ஹேது? ‘மா மே சித்தங் ஊஹஞ்ஞீ’தி.

‘‘யஞ்ஞதே³வ, பி⁴க்க²வே, பி⁴க்கு² ப³ஹுலமனுவிதக்கேதி
அனுவிசாரேதி, ததா² ததா² நதி ஹோதி சேதஸோ. நெக்க²ம்மவிதக்கஞ்சே, பி⁴க்க²வே,
பி⁴க்கு² ப³ஹுலமனுவிதக்கேதி அனுவிசாரேதி, பஹாஸி
காமவிதக்கங், நெக்க²ம்மவிதக்கங் ப³ஹுலமகாஸி, தஸ்ஸங் தங் நெக்க²ம்மவிதக்காய
சித்தங் நமதி. அப்³யாபாத³விதக்கஞ்சே, பி⁴க்க²வே…பே॰… அவிஹிங்ஸாவிதக்கஞ்சே,
பி⁴க்க²வே, பி⁴க்கு² ப³ஹுலமனுவிதக்கேதி அனுவிசாரேதி, பஹாஸி
விஹிங்ஸாவிதக்கங், அவிஹிங்ஸாவிதக்கங் ப³ஹுலமகாஸி, தஸ்ஸ தங்
அவிஹிங்ஸாவிதக்காய சித்தங் நமதி. ஸெய்யதா²பி, பி⁴க்க²வே, கி³ம்ஹானங்
பச்சி²மே மாஸே ஸப்³ப³ஸஸ்ஸேஸு கா³மந்தஸம்ப⁴தேஸு கோ³பாலகோ கா³வோ ரக்கெ²ய்ய , தஸ்ஸ ருக்க²மூலக³தஸ்ஸ வா அப்³போ⁴காஸக³தஸ்ஸ வா ஸதிகரணீயமேவ ஹோதி – ‘ஏதா [ஏதே (க॰)] கா³வோ’தி. ஏவமேவங் கோ², பி⁴க்க²வே, ஸதிகரணீயமேவ அஹோஸி – ‘ஏதே த⁴ம்மா’தி.

211. ‘‘ஆரத்³த⁴ங் கோ² பன மே, பி⁴க்க²வே, வீரியங் அஹோஸி அஸல்லீனங், உபட்டி²தா ஸதி அஸம்முட்டா² ,
பஸ்ஸத்³தோ⁴ காயோ அஸாரத்³தோ⁴, ஸமாஹிதங் சித்தங் ஏகக்³க³ங். ஸோ கோ² அஹங்,
பி⁴க்க²வே, விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங்
விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹாஸிங். விதக்கவிசாரானங்
வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங்
ஸமாதி⁴ஜங் பீதிஸுக²ங் து³தியங் ஜா²னங் உபஸம்பஜ்ஜ விஹாஸிங். பீதியா ச
விராகா³ உபெக்க²கோ ச விஹாஸிங் ஸதோ ச ஸம்பஜானோ, ஸுக²ஞ்ச காயேன
படிஸங்வேதே³ஸிங், யங் தங் அரியா ஆசிக்க²ந்தி ‘உபெக்க²கோ ஸதிமா
ஸுக²விஹாரீ’தி, ததியங் ஜா²னங் உபஸம்பஜ்ஜ விஹாஸிங். ஸுக²ஸ்ஸ ச பஹானா
து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா
அது³க்க²மஸுக²ங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ
விஹாஸிங்.

212.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
புப்³பே³னிவாஸானுஸ்ஸதிஞாணாய சித்தங் அபி⁴னின்னாமேஸிங். ஸோ அனேகவிஹிதங்
புப்³பே³னிவாஸங் அனுஸ்ஸராமி. ஸெய்யதி²த³ங், ஏகம்பி ஜாதிங்…பே॰… இதி ஸாகாரங்
ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸராமி. அயங் கோ²
மே, பி⁴க்க²வே, ரத்தியா பட²மே யாமே பட²மா விஜ்ஜா அதி⁴க³தா; அவிஜ்ஜா விஹதா
விஜ்ஜா உப்பன்னா; தமோ விஹதோ ஆலோகோ உப்பன்னோ; யதா² தங் அப்பமத்தஸ்ஸ ஆதாபினோ
பஹிதத்தஸ்ஸ விஹரதோ.

213.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஸத்தானங்
சுதூபபாதஞாணாய சித்தங் அபி⁴னின்னாமேஸிங். ஸோ தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன ஸத்தே பஸ்ஸாமி சவமானே உபபஜ்ஜமானே…பே॰… இமே
வத பொ⁴ந்தோ ஸத்தா காயது³ச்சரிதேன ஸமன்னாக³தா…பே॰… இதி தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன ஸத்தே பஸ்ஸாமி சவமானே உபபஜ்ஜமானே ஹீனே பணீதே
ஸுவண்ணே து³ப்³ப³ண்ணே ஸுக³தே து³க்³க³தே, யதா²கம்மூபகே³ ஸத்தே பஜானாமி.
அயங் கோ² மே, பி⁴க்க²வே, ரத்தியா மஜ்ஜி²மே யாமே து³தியா விஜ்ஜா அதி⁴க³தா;
அவிஜ்ஜா விஹதா விஜ்ஜா உப்பன்னா; தமோ விஹதோ ஆலோகோ உப்பன்னோ; யதா² தங்
அப்பமத்தஸ்ஸ ஆதாபினோ பஹிதத்தஸ்ஸ விஹரதோ.

214.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானங் க²யஞாணாய
சித்தங் அபி⁴னின்னாமேஸிங். ஸோ ‘இத³ங் து³க்க²’ந்தி யதா²பூ⁴தங்
அப்³ப⁴ஞ்ஞாஸிங், ‘அயங் து³க்க²ஸமுத³யோ’தி யதா²பூ⁴தங் அப்³ப⁴ஞ்ஞாஸிங், ‘அயங்
து³க்க²னிரோதோ⁴’தி யதா²பூ⁴தங் அப்³ப⁴ஞ்ஞாஸிங், ‘அயங் து³க்க²னிரோத⁴கா³மினீ
படிபதா³’தி யதா²பூ⁴தங் அப்³ப⁴ஞ்ஞாஸிங் . ‘இமே ஆஸவா’தி யதா²பூ⁴தங் அப்³ப⁴ஞ்ஞாஸிங், ‘அயங் ஆஸவஸமுத³யோ’தி யதா²பூ⁴தங் அப்³ப⁴ஞ்ஞாஸிங், ‘அயங் ஆஸவனிரோதோ⁴’தி யதா²பூ⁴தங் அப்³ப⁴ஞ்ஞாஸிங், ‘அயங்
ஆஸவனிரோத⁴கா³மினீ படிபதா³’தி யதா²பூ⁴தங் அப்³ப⁴ஞ்ஞாஸிங். தஸ்ஸ மே ஏவங்
ஜானதோ ஏவங் பஸ்ஸதோ காமாஸவாபி சித்தங் விமுச்சித்த², ப⁴வாஸவாபி சித்தங்
விமுச்சித்த², அவிஜ்ஜாஸவாபி சித்தங் விமுச்சித்த², விமுத்தஸ்மிங்
விமுத்தமிதி ஞாணங் அஹோஸி – ‘கீ²ணா ஜாதி, வுஸிதங் ப்³ரஹ்மசரியங், கதங்
கரணீயங், நாபரங் இத்த²த்தாயா’தி அப்³ப⁴ஞ்ஞாஸிங். அயங் கோ² மே, பி⁴க்க²வே,
ரத்தியா பச்சி²மே யாமே ததியா விஜ்ஜா அதி⁴க³தா; அவிஜ்ஜா விஹதா விஜ்ஜா
உப்பன்னா; தமோ விஹதோ ஆலோகோ உப்பன்னோ; யதா² தங் அப்பமத்தஸ்ஸ ஆதாபினோ
பஹிதத்தஸ்ஸ விஹரதோ.

215.
‘‘ஸெய்யதா²பி, பி⁴க்க²வே, அரஞ்ஞே பவனே மஹந்தங் நின்னங் பல்லலங். தமேனங்
மஹாமிக³ஸங்கோ⁴ உபனிஸ்ஸாய விஹரெய்ய. தஸ்ஸ கோசிதே³வ புரிஸோ உப்பஜ்ஜெய்ய
அனத்த²காமோ அஹிதகாமோ அயோக³க்கே²மகாமோ. ஸோ ய்வாஸ்ஸ மக்³கோ³ கே²மோ ஸோவத்தி²கோ
பீதிக³மனீயோ தங் மக்³க³ங் பித³ஹெய்ய, விவரெய்ய கும்மக்³க³ங், ஓத³ஹெய்ய
ஓகசரங், ட²பெய்ய ஓகசாரிகங். ஏவஞ்ஹி ஸோ, பி⁴க்க²வே, மஹாமிக³ஸங்கோ⁴ அபரேன
ஸமயேன அனயப்³யஸனங் [அனயப்³யஸனங் தனுத்தங் (ஸீ॰ ஸ்யா॰ பீ॰)]
ஆபஜ்ஜெய்ய. தஸ்ஸேவ கோ² பன, பி⁴க்க²வே, மஹதோ மிக³ஸங்க⁴ஸ்ஸ கோசிதே³வ புரிஸோ
உப்பஜ்ஜெய்ய அத்த²காமோ ஹிதகாமோ யோக³க்கே²மகாமோ. ஸோ ய்வாஸ்ஸ மக்³கோ³ கே²மோ
ஸோவத்தி²கோ பீதிக³மனீயோ தங் மக்³க³ங் விவரெய்ய, பித³ஹெய்ய கும்மக்³க³ங்,
ஊஹனெய்ய ஓகசரங், நாஸெய்ய ஓகசாரிகங். ஏவஞ்ஹி ஸோ, பி⁴க்க²வே, மஹாமிக³ஸங்கோ⁴
அபரேன ஸமயேன வுத்³தி⁴ங் விரூள்ஹிங் வேபுல்லங் ஆபஜ்ஜெய்ய.

‘‘உபமா கோ² மே அயங், பி⁴க்க²வே, கதா அத்த²ஸ்ஸ விஞ்ஞாபனாய .
அயங் சேவெத்த² அத்தோ² – மஹந்தங் நின்னங் பல்லலந்தி கோ², பி⁴க்க²வே,
காமானமேதங் அதி⁴வசனங். மஹாமிக³ஸங்கோ⁴தி கோ², பி⁴க்க²வே, ஸத்தானமேதங்
அதி⁴வசனங். புரிஸோ அனத்த²காமோ அஹிதகாமோ அயோக³க்கே²மகாமோதி கோ², பி⁴க்க²வே,
மாரஸ்ஸேதங் பாபிமதோ அதி⁴வசனங். கும்மக்³கோ³தி கோ², பி⁴க்க²வே,
அட்ட²ங்கி³கஸ்ஸேதங் மிச்சா²மக்³க³ஸ்ஸ அதி⁴வசனங், ஸெய்யதி²த³ங் –
மிச்சா²தி³ட்டி²யா மிச்சா²ஸங்கப்பஸ்ஸ மிச்சா²வாசாய மிச்சா²கம்மந்தஸ்ஸ
மிச்சா²ஆஜீவஸ்ஸ மிச்சா²வாயாமஸ்ஸ மிச்சா²ஸதியா மிச்சா²ஸமாதி⁴ஸ்ஸ. ஓகசரோதி
கோ², பி⁴க்க²வே, நந்தீ³ராக³ஸ்ஸேதங் அதி⁴வசனங். ஓகசாரிகாதி
கோ², பி⁴க்க²வே, அவிஜ்ஜாயேதங் அதி⁴வசனங். புரிஸோ அத்த²காமோ ஹிதகாமோ
யோக³க்கே²மகாமோதி கோ², பி⁴க்க²வே, ததா²க³தஸ்ஸேதங் அதி⁴வசனங் அரஹதோ
ஸம்மாஸம்பு³த்³த⁴ஸ்ஸ. கே²மோ மக்³கோ³ ஸோவத்தி²கோ பீதிக³மனீயோதி கோ² ,
பி⁴க்க²வே, அரியஸ்ஸேதங் அட்ட²ங்கி³கஸ்ஸ மக்³க³ஸ்ஸ அதி⁴வசனங், ஸெய்யதி²த³ங்
– ஸம்மாதி³ட்டி²யா ஸம்மாஸங்கப்பஸ்ஸ ஸம்மாவாசாய ஸம்மாகம்மந்தஸ்ஸ
ஸம்மாஆஜீவஸ்ஸ ஸம்மாவாயாமஸ்ஸ ஸம்மாஸதியா ஸம்மாஸமாதி⁴ஸ்ஸ.

‘‘இதி கோ², பி⁴க்க²வே, விவடோ மயா கே²மோ மக்³கோ³
ஸோவத்தி²கோ பீதிக³மனீயோ, பிஹிதோ கும்மக்³கோ³, ஊஹதோ ஓகசரோ, நாஸிதா ஓகசாரிகா.
யங், பி⁴க்க²வே, ஸத்தா²ரா கரணீயங் ஸாவகானங் ஹிதேஸினா அனுகம்பகேன அனுகம்பங்
உபாதா³ய, கதங் வோ தங் மயா. ஏதானி, பி⁴க்க²வே ,
ருக்க²மூலானி, ஏதானி ஸுஞ்ஞாகா³ரானி; ஜா²யத², பி⁴க்க²வே, மா பமாத³த்த²; மா
பச்சா² விப்படிஸாரினோ அஹுவத்த². அயங் வோ அம்ஹாகங் அனுஸாஸனீ’’தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.

த்³வேதா⁴விதக்கஸுத்தங் நிட்டி²தங் நவமங்.

10. விதக்கஸண்டா²னஸுத்தங்

216. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –

‘‘அதி⁴சித்தமனுயுத்தேன, பி⁴க்க²வே, பி⁴க்கு²னா பஞ்ச
நிமித்தானி காலேன காலங் மனஸி காதப்³பா³னி. கதமானி பஞ்ச? இத⁴, பி⁴க்க²வே,
பி⁴க்கு²னோ யங் நிமித்தங் ஆக³ம்ம யங் நிமித்தங் மனஸிகரோதோ உப்பஜ்ஜந்தி
பாபகா அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி மோஹூபஸங்ஹிதாபி,
தேன, பி⁴க்க²வே, பி⁴க்கு²னா தம்ஹா நிமித்தா அஞ்ஞங் நிமித்தங் மனஸி
காதப்³ப³ங் குஸலூபஸங்ஹிதங். தஸ்ஸ தம்ஹா நிமித்தா அஞ்ஞங் நிமித்தங்
மனஸிகரோதோ குஸலூபஸங்ஹிதங் யே பாபகா அகுஸலா விதக்கா
ச²ந்தூ³பஸங்ஹிதாபி தோ³ஸூபஸங்ஹிதாபி மோஹூபஸங்ஹிதாபி தே பஹீயந்தி தே
அப்³ப⁴த்த²ங் க³ச்ச²ந்தி. தேஸங் பஹானா அஜ்ஜ²த்தமேவ சித்தங் ஸந்திட்ட²தி
ஸன்னிஸீத³தி ஏகோதி³ ஹோதி [ஏகோதி³போ⁴தி (ஸ்யா॰ க॰)]
ஸமாதி⁴யதி. ஸெய்யதா²பி, பி⁴க்க²வே, த³க்கோ² பலக³ண்டோ³ வா பலக³ண்ட³ந்தேவாஸீ
வா ஸுகு²மாய ஆணியா ஓளாரிகங் ஆணிங் அபி⁴னிஹனெய்ய அபி⁴னீஹரெய்ய
அபி⁴னிவத்தெய்ய [அபி⁴னிவஜ்ஜெய்ய (ஸீ॰ பீ॰)];
ஏவமேவ கோ², பி⁴க்க²வே, பி⁴க்கு²னோ யங் நிமித்தங் ஆக³ம்ம யங் நிமித்தங்
மனஸிகரோதோ உப்பஜ்ஜந்தி பாபகா அகுஸலா விதக்கா ச²ந்தூ³பஸங்ஹிதாபி
தோ³ஸூபஸங்ஹிதாபி மோஹூபஸங்ஹிதாபி, தேன, பி⁴க்க²வே,
பி⁴க்கு²னா தம்ஹா நிமித்தா அஞ்ஞங் நிமித்தங் மனஸி காதப்³ப³ங்
குஸலூபஸங்ஹிதங். தஸ்ஸ தம்ஹா நிமித்தா அஞ்ஞங் நிமித்தங் மனஸிகரோதோ
குஸலூபஸங்ஹிதங் யே பாபகா அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி
மோஹூபஸங்ஹிதாபி தே பஹீயந்தி தே அப்³ப⁴த்த²ங் க³ச்ச²ந்தி. தேஸங் பஹானா
அஜ்ஜ²த்தமேவ சித்தங் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி.

217.
‘‘தஸ்ஸ சே, பி⁴க்க²வே, பி⁴க்கு²னோ தம்ஹா நிமித்தா அஞ்ஞங் நிமித்தங்
மனஸிகரோதோ குஸலூபஸங்ஹிதங் உப்பஜ்ஜந்தேவ பாபகா அகுஸலா விதக்கா
ச²ந்தூ³பஸங்ஹிதாபி தோ³ஸூபஸங்ஹிதாபி மோஹூபஸங்ஹிதாபி, தேன, பி⁴க்க²வே,
பி⁴க்கு²னா தேஸங் விதக்கானங் ஆதீ³னவோ உபபரிக்கி²தப்³போ³ – ‘இதிபிமே விதக்கா
அகுஸலா, இதிபிமே விதக்கா ஸாவஜ்ஜா, இதிபிமே விதக்கா
து³க்க²விபாகா’தி. தஸ்ஸ தேஸங் விதக்கானங் ஆதீ³னவங் உபபரிக்க²தோ யே பாபகா
அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி மோஹூபஸங்ஹிதாபி தே
பஹீயந்தி தே அப்³ப⁴த்த²ங் க³ச்ச²ந்தி. தேஸங் பஹானா அஜ்ஜ²த்தமேவ சித்தங்
ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. ஸெய்யதா²பி, பி⁴க்க²வே,
இத்தீ² வா புரிஸோ வா த³ஹரோ யுவா மண்ட³னகஜாதிகோ அஹிகுணபேன வா குக்குரகுணபேன
வா மனுஸ்ஸகுணபேன வா கண்டே² ஆஸத்தேன அட்டியெய்ய
ஹராயெய்ய ஜிகு³ச்செ²ய்ய; ஏவமேவ கோ², பி⁴க்க²வே, தஸ்ஸ சே பி⁴க்கு²னோ தம்ஹாபி
நிமித்தா அஞ்ஞங் நிமித்தங் மனஸிகரோதோ
குஸலூபஸங்ஹிதங் உப்பஜ்ஜந்தேவ பாபகா அகுஸலா விதக்கா ச²ந்தூ³பஸங்ஹிதாபி
தோ³ஸூபஸங்ஹிதாபி மோஹூபஸங்ஹிதாபி, தேன, பி⁴க்க²வே, பி⁴க்கு²னா தேஸங்
விதக்கானங் ஆதீ³னவோ உபபரிக்கி²தப்³போ³ – ‘இதிபிமே விதக்கா அகுஸலா, இதிபிமே
விதக்கா ஸாவஜ்ஜா, இதிபிமே விதக்கா து³க்க²விபாகா’தி. தஸ்ஸ தேஸங்
விதக்கானங் ஆதீ³னவங் உபபரிக்க²தோ யே பாபகா அகுஸலா விதக்கா
ச²ந்தூ³பஸங்ஹிதாபி தோ³ஸூபஸங்ஹிதாபி மோஹூபஸங்ஹிதாபி தே பஹீயந்தி தே
அப்³ப⁴த்த²ங் க³ச்ச²ந்தி. தேஸங் பஹானா அஜ்ஜ²த்தமேவ சித்தங் ஸந்திட்ட²தி
ஸன்னிஸீத³தி ஏகோதி³ ஹோதி ஸமாதி⁴யதி.

218.
‘‘தஸ்ஸ சே, பி⁴க்க²வே, பி⁴க்கு²னோ தேஸம்பி விதக்கானங் ஆதீ³னவங்
உபபரிக்க²தோ உப்பஜ்ஜந்தேவ பாபகா அகுஸலா விதக்கா ச²ந்தூ³பஸங்ஹிதாபி
தோ³ஸூபஸங்ஹிதாபி மோஹூபஸங்ஹிதாபி, தேன, பி⁴க்க²வே, பி⁴க்கு²னா தேஸங்
விதக்கானங் அஸதிஅமனஸிகாரோ ஆபஜ்ஜிதப்³போ³. தஸ்ஸ தேஸங் விதக்கானங்
அஸதிஅமனஸிகாரங் ஆபஜ்ஜதோ யே பாபகா அகுஸலா விதக்கா ச²ந்தூ³பஸங்ஹிதாபி
தோ³ஸூபஸங்ஹிதாபி மோஹூபஸங்ஹிதாபி தே பஹீயந்தி தே அப்³ப⁴த்த²ங் க³ச்ச²ந்தி.
தேஸங் பஹானா அஜ்ஜ²த்தமேவ சித்தங் ஸந்திட்ட²தி ஸன்னிஸீத³தி ஏகோதி³ ஹோதி
ஸமாதி⁴யதி. ஸெய்யதா²பி, பி⁴க்க²வே, சக்கு²மா புரிஸோ ஆபாத²க³தானங் ரூபானங்
அத³ஸ்ஸனகாமோ அஸ்ஸ; ஸோ நிமீலெய்ய வா அஞ்ஞேன வா அபலோகெய்ய. ஏவமேவ கோ²,
பி⁴க்க²வே, தஸ்ஸ சே பி⁴க்கு²னோ தேஸம்பி விதக்கானங் ஆதீ³னவங் உபபரிக்க²தோ
உப்பஜ்ஜந்தேவ பாபகா அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி
மோஹூபஸங்ஹிதாபி, தே பஹீயந்தி தே அப்³ப⁴த்த²ங் க³ச்ச²ந்தி. தேஸங் பஹானா
அஜ்ஜ²த்தமேவ சித்தங் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி.

219. ‘‘தஸ்ஸ சே, பி⁴க்க²வே, பி⁴க்கு²னோ தேஸம்பி விதக்கானங் அஸதிஅமனஸிகாரங் ஆபஜ்ஜதோ
உப்பஜ்ஜந்தேவ பாபகா அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி
மோஹூபஸங்ஹிதாபி, தேன, பி⁴க்க²வே, பி⁴க்கு²னா தேஸங் விதக்கானங்
விதக்கஸங்கா²ரஸண்டா²னங் மனஸிகாதப்³ப³ங். தஸ்ஸ தேஸங் விதக்கானங்
விதக்கஸங்கா²ரஸண்டா²னங் மனஸிகரோதோ யே பாபகா அகுஸலா விதக்கா
ச²ந்தூ³பஸங்ஹிதாபி தோ³ஸூபஸங்ஹிதாபி மோஹூபஸங்ஹிதாபி தே பஹீயந்தி தே
அப்³ப⁴த்த²ங் க³ச்ச²ந்தி. தேஸங் பஹானா அஜ்ஜ²த்தமேவ சித்தங் ஸந்திட்ட²தி
ஸன்னிஸீத³தி ஏகோதி³ ஹோதி ஸமாதி⁴யதி. ஸெய்யதா²பி, பி⁴க்க²வே, புரிஸோ ஸீக⁴ங்
க³ச்செ²ய்ய. தஸ்ஸ ஏவமஸ்ஸ – ‘கிங் நு கோ² அஹங் ஸீக⁴ங் க³ச்சா²மி? யங்னூனாஹங்
ஸணிகங் க³ச்செ²ய்ய’ந்தி. ஸோ ஸணிகங் க³ச்செ²ய்ய. தஸ்ஸ ஏவமஸ்ஸ – ‘கிங் நு
கோ² அஹங் ஸணிகங் க³ச்சா²மி? யங்னூனாஹங் திட்டெ²ய்ய’ந்தி. ஸோ திட்டெ²ய்ய .
தஸ்ஸ ஏவமஸ்ஸ – ‘கிங் நு கோ² அஹங் டி²தோ? யங்னூனாஹங் நிஸீதெ³ய்ய’ந்தி. ஸோ
நிஸீதெ³ய்ய. தஸ்ஸ ஏவமஸ்ஸ – ‘கிங் நு கோ² அஹங் நிஸின்னோ? யங்னூனாஹங்
நிபஜ்ஜெய்ய’ந்தி. ஸோ நிபஜ்ஜெய்ய. ஏவஞ்ஹி ஸோ, பி⁴க்க²வே, புரிஸோ ஓளாரிகங்
ஓளாரிகங் இரியாபத²ங் அபி⁴னிவஜ்ஜெத்வா [அபி⁴னிஸ்ஸஜ்ஜெத்வா (ஸ்யா॰)]
ஸுகு²மங் ஸுகு²மங் இரியாபத²ங் கப்பெய்ய. ஏவமேவ கோ², பி⁴க்க²வே, தஸ்ஸ சே
பி⁴க்கு²னோ தேஸம்பி விதக்கானங் அஸதிஅமனஸிகாரங் ஆபஜ்ஜதோ உப்பஜ்ஜந்தேவ பாபகா
அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி மோஹூபஸங்ஹிதாபி தே
பஹீயந்தி தே அப்³ப⁴த்த²ங் க³ச்ச²ந்தி. தேஸங் பஹானா அஜ்ஜ²த்தமேவ சித்தங்
ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி.

220. ‘‘தஸ்ஸ
சே, பி⁴க்க²வே, பி⁴க்கு²னோ தேஸம்பி விதக்கானங் விதக்கஸங்கா²ரஸண்டா²னங்
மனஸிகரோதோ உப்பஜ்ஜந்தேவ பாபகா அகுஸலா விதக்கா ச²ந்தூ³பஸங்ஹிதாபி
தோ³ஸூபஸங்ஹிதாபி மோஹூபஸங்ஹிதாபி. தேன, பி⁴க்க²வே, பி⁴க்கு²னா
த³ந்தேபி⁴த³ந்தமாதா⁴ய [த³ந்தே + அபி⁴த³ந்தங் + ஆதா⁴யாதி டீகாயங் பத³ச்சே²தோ³, த³ந்தேபீ⁴தி பனெத்த² கரணத்தோ² யுத்தோ விய தி³ஸ்ஸதி] ஜிவ்ஹாய தாலுங் ஆஹச்ச சேதஸா சித்தங் அபி⁴னிக்³க³ண்ஹிதப்³ப³ங் அபி⁴னிப்பீளேதப்³ப³ங் அபி⁴ஸந்தாபேதப்³ப³ங் .
தஸ்ஸ த³ந்தேபி⁴த³ந்தமாதா⁴ய ஜிவ்ஹாய தாலுங் ஆஹச்ச சேதஸா சித்தங்
அபி⁴னிக்³க³ண்ஹதோ அபி⁴னிப்பீளயதோ அபி⁴ஸந்தாபயதோ யே பாபகா அகுஸலா விதக்கா
ச²ந்தூ³பஸங்ஹிதாபி தோ³ஸூபஸங்ஹிதாபி மோஹூபஸங்ஹிதாபி தே பஹீயந்தி தே
அப்³ப⁴த்த²ங் க³ச்ச²ந்தி. தேஸங் பஹானா அஜ்ஜ²த்தமேவ சித்தங் ஸந்திட்ட²தி
ஸன்னிஸீத³தி ஏகோதி³ ஹோதி ஸமாதி⁴யதி. ஸெய்யதா²பி, பி⁴க்க²வே, ப³லவா புரிஸோ
து³ப்³ப³லதரங் புரிஸங் ஸீஸே வா க³லே வா க²ந்தே⁴ வா க³ஹெத்வா
அபி⁴னிக்³க³ண்ஹெய்ய அபி⁴னிப்பீளெய்ய அபி⁴ஸந்தாபெய்ய; ஏவமேவ கோ², பி⁴க்க²வே,
தஸ்ஸ சே பி⁴க்கு²னோ தேஸம்பி விதக்கானங் விதக்கஸங்கா²ரஸண்டா²னங் மனஸிகரோதோ
உப்பஜ்ஜந்தேவ பாபகா அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி
மோஹூபஸங்ஹிதாபி. தேன, பி⁴க்க²வே, பி⁴க்கு²னா த³ந்தேபி⁴த³ந்தமாதா⁴ய
ஜிவ்ஹாய தாலுங் ஆஹச்ச சேதஸா சித்தங் அபி⁴னிக்³க³ண்ஹிதப்³ப³ங்
அபி⁴னிப்பீளேதப்³ப³ங் அபி⁴ஸந்தாபேதப்³ப³ங். தஸ்ஸ த³ந்தேபி⁴த³ந்தமாதா⁴ய
ஜிவ்ஹாய தாலுங் ஆஹச்ச சேதஸா சித்தங் அபி⁴னிக்³க³ண்ஹதோ அபி⁴னிப்பீளயதோ
அபி⁴ஸந்தாபயதோ யே பாபகா அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி மோஹூபஸங்ஹிதாபி தே பஹீயந்தி தே அப்³ப⁴த்த²ங் க³ச்ச²ந்தி. தேஸங் பஹானா அஜ்ஜ²த்தமேவ சித்தங் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி.

221. ‘‘யதோ கோ² [யதோ ச கோ² (ஸ்யா॰ க॰)],
பி⁴க்க²வே, பி⁴க்கு²னோ யங் நிமித்தங் ஆக³ம்ம யங் நிமித்தங் மனஸிகரோதோ
உப்பஜ்ஜந்தி பாபகா அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி
மோஹூபஸங்ஹிதாபி, தஸ்ஸ தம்ஹா நிமித்தா அஞ்ஞங் நிமித்தங் மனஸிகரோதோ
குஸலூபஸங்ஹிதங் யே பாபகா அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி
மோஹூபஸங்ஹிதாபி தே பஹீயந்தி தே அப்³ப⁴த்த²ங் க³ச்ச²ந்தி. தேஸங் பஹானா
அஜ்ஜ²த்தமேவ சித்தங் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி.
தேஸம்பி விதக்கானங் ஆதீ³னவங் உபபரிக்க²தோ யே பாபகா அகுஸலா விதக்கா
ச²ந்தூ³பஸங்ஹிதாபி தோ³ஸூபஸங்ஹிதாபி மோஹூபஸங்ஹிதாபி தே பஹீயந்தி தே
அப்³ப⁴த்த²ங் க³ச்ச²ந்தி. தேஸங் பஹானா அஜ்ஜ²த்தமேவ சித்தங் ஸந்திட்ட²தி
ஸன்னிஸீத³தி ஏகோதி³ ஹோதி ஸமாதி⁴யதி. தேஸம்பி விதக்கானங் அஸதிஅமனஸிகாரங்
ஆபஜ்ஜதோ யே பாபகா அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி
மோஹூபஸங்ஹிதாபி தே பஹீயந்தி தே அப்³ப⁴த்த²ங் க³ச்ச²ந்தி. தேஸங் பஹானா
அஜ்ஜ²த்தமேவ சித்தங் ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி.
தேஸம்பி விதக்கானங் விதக்கஸங்கா²ரஸண்டா²னங் மனஸிகரோதோ யே பாபகா அகுஸலா
விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி மோஹூபஸங்ஹிதாபி
தே பஹீயந்தி தே அப்³ப⁴த்த²ங் க³ச்ச²ந்தி. தேஸங் பஹானா அஜ்ஜ²த்தமேவ சித்தங்
ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. த³ந்தேபி⁴த³ந்தமாதா⁴ய
ஜிவ்ஹாய தாலுங் ஆஹச்ச சேதஸா சித்தங் அபி⁴னிக்³க³ண்ஹதோ அபி⁴னிப்பீளயதோ
அபி⁴ஸந்தாபயதோ யே பாபகா அகுஸலா விதக்கா ச²ந்தூ³பஸங்ஹிதாபி தோ³ஸூபஸங்ஹிதாபி
மோஹூபஸங்ஹிதாபி தே பஹீயந்தி தே அப்³ப⁴த்த²ங் க³ச்ச²ந்தி. தேஸங் பஹானா
அஜ்ஜ²த்தமேவ சித்தங் ஸந்திட்ட²தி ஸன்னிஸீத³தி ஏகோதி³ ஹோதி
ஸமாதி⁴யதி. அயங் வுச்சதி, பி⁴க்க²வே, பி⁴க்கு² வஸீ விதக்கபரியாயபதே²ஸு.
யங் விதக்கங் ஆகங்கி²ஸ்ஸதி தங் விதக்கங் விதக்கெஸ்ஸதி, யங் விதக்கங்
நாகங்கி²ஸ்ஸதி ந தங் விதக்கங் விதக்கெஸ்ஸதி. அச்செ²ச்சி² தண்ஹங், விவத்தயி [வாவத்தயி (ஸீ॰ பீ॰)] ஸங்யோஜனங், ஸம்மா மானாபி⁴ஸமயா அந்தமகாஸி து³க்க²ஸ்ஸா’’தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.

விதக்கஸண்டா²னஸுத்தங் நிட்டி²தங் த³ஸமங்.

ஸீஹனாத³வக்³கோ³ நிட்டி²தோ து³தியோ.

தஸ்ஸுத்³தா³னங் –

சூளஸீஹனாத³லோமஹங்ஸவரோ, மஹாசூளது³க்க²க்க²ந்த⁴அனுமானிகஸுத்தங்;

கி²லபத்த²மது⁴பிண்டி³கத்³விதா⁴விதக்க, பஞ்சனிமித்தகதா² புன வக்³கோ³.

Leave a Reply