ஸுத்தபிடக-Part-48-தமிழில் திரபிடக மூன்று தொகுப்புகள்TIPITAKA--48.4. விபங்கவக்கோ-1. பத்தேகரத்தஸுத்தங்-from FREE ONLINE eNālāndā Research and
Practice UNIVERSITY through http://sarvajan.ambedkar.org
4. விபங்கவக்கோ
1. பத்தேகரத்தஸுத்தங்
272. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘ப⁴த்³தே³கரத்தஸ்ஸ வோ, பி⁴க்க²வே, உத்³தே³ஸஞ்ச விப⁴ங்க³ஞ்ச தே³ஸெஸ்ஸாமி.
தங் ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ²
தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘அதீதங் நான்வாக³மெய்ய, நப்படிகங்கே² அனாக³தங்;
யத³தீதங் பஹீனங் தங், அப்பத்தஞ்ச அனாக³தங்.
‘‘பச்சுப்பன்னஞ்ச யோ [யங் (நெத்திபாளி)] த⁴ம்மங், தத்த² தத்த² விபஸ்ஸதி;
அஸங்ஹீரங் [அஸங்ஹிரங் (ஸ்யா॰ கங்॰ க॰)] அஸங்குப்பங், தங் வித்³வா மனுப்³ரூஹயே.
‘‘அஜ்ஜேவ கிச்சமாதப்பங் [கிச்சங் ஆதப்பங் (ஸீ॰ க॰)], கோ ஜஞ்ஞா மரணங் ஸுவே;
ந ஹி நோ ஸங்க³ரங் தேன, மஹாஸேனேன மச்சுனா.
‘‘ஏவங் விஹாரிங் ஆதாபிங், அஹோரத்தமதந்தி³தங்;
தங் வே ப⁴த்³தே³கரத்தோதி, ஸந்தோ ஆசிக்க²தே முனி’’ [முனீதி (ஸீ॰ ஸ்யா॰ கங்॰ பீ॰)].
273. ‘‘கத²ஞ்ச , பி⁴க்க²வே, அதீதங் அன்வாக³மேதி? ‘ஏவங்ரூபோ அஹோஸிங் அதீதமத்³தா⁴ன’ந்தி
தத்த² நந்தி³ங் ஸமன்வானேதி, ‘ஏவங்வேத³னோ அஹோஸிங் அதீதமத்³தா⁴ன’ந்தி தத்த²
நந்தி³ங் ஸமன்வானேதி, ‘ஏவங்ஸஞ்ஞோ அஹோஸிங் அதீதமத்³தா⁴ன’ந்தி தத்த² நந்தி³ங்
ஸமன்வானேதி, ‘ஏவங்ஸங்கா²ரோ அஹோஸிங் அதீதமத்³தா⁴ன’ந்தி தத்த² நந்தி³ங்
ஸமன்வானேதி, ‘ஏவங்விஞ்ஞாணோ அஹோஸிங் அதீதமத்³தா⁴ன’ந்தி தத்த² நந்தி³ங்
ஸமன்வானேதி – ஏவங் கோ², பி⁴க்க²வே, அதீதங் அன்வாக³மேதி.
‘‘கத²ஞ்ச, பி⁴க்க²வே, அதீதங் நான்வாக³மேதி? ‘ஏவங்ரூபோ
அஹோஸிங் அதீதமத்³தா⁴ன’ந்தி தத்த² நந்தி³ங் ந ஸமன்வானேதி, ‘ஏவங்வேத³னோ
அஹோஸிங் அதீதமத்³தா⁴ன’ந்தி தத்த² நந்தி³ங் ந ஸமன்வானேதி, ‘ஏவங்ஸஞ்ஞோ
அஹோஸிங் அதீதமத்³தா⁴ன’ந்தி தத்த² நந்தி³ங் ந
ஸமன்வானேதி, ‘ஏவங்ஸங்கா²ரோ அஹோஸிங் அதீதமத்³தா⁴ன’ந்தி தத்த² நந்தி³ங் ந
ஸமன்வானேதி, ‘ஏவங்விஞ்ஞாணோ அஹோஸிங் அதீதமத்³தா⁴ன’ந்தி தத்த² நந்தி³ங் ந
ஸமன்வானேதி – ஏவங் கோ², பி⁴க்க²வே, அதீதங் நான்வாக³மேதி.
274.
‘‘கத²ஞ்ச, பி⁴க்க²வே, அனாக³தங் படிகங்க²தி? ‘ஏவங்ரூபோ ஸியங்
அனாக³தமத்³தா⁴ன’ந்தி தத்த² நந்தி³ங் ஸமன்வானேதி, ஏவங்வேத³னோ ஸியங்…பே॰…
ஏவங்ஸஞ்ஞோ ஸியங்… ஏவங்ஸங்கா²ரோ ஸியங்… ஏவங்விஞ்ஞாணோ ஸியங்
அனாக³தமத்³தா⁴னந்தி தத்த² நந்தி³ங் ஸமன்வானேதி – ஏவங் கோ², பி⁴க்க²வே,
அனாக³தங் படிகங்க²தி.
‘‘கத²ஞ்ச, பி⁴க்க²வே, அனாக³தங் நப்படிகங்க²தி? ‘ஏவங்ரூபோ ஸியங் அனாக³தமத்³தா⁴ன’ந்தி தத்த² நந்தி³ங் ந ஸமன்வானேதி, ஏவங்வேத³னோ ஸியங் …
ஏவங்ஸஞ்ஞோ ஸியங்… ஏவங்ஸங்கா²ரோ ஸியங்… ‘ஏவங்விஞ்ஞாணோ ஸியங்
அனாக³தமத்³தா⁴ன’ந்தி தத்த² நந்தி³ங் ந ஸமன்வானேதி – ஏவங் கோ², பி⁴க்க²வே,
அனாக³தங் நப்படிகங்க²தி.
275.
‘‘கத²ஞ்ச, பி⁴க்க²வே, பச்சுப்பன்னேஸு த⁴ம்மேஸு ஸங்ஹீரதி? இத⁴, பி⁴க்க²வே,
அஸ்ஸுதவா புது²ஜ்ஜனோ அரியானங் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே
அவினீதோ ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே
அவினீதோ ரூபங் அத்ததோ ஸமனுபஸ்ஸதி, ரூபவந்தங் வா அத்தானங், அத்தனி வா ரூபங்,
ரூபஸ்மிங் வா அத்தானங்; வேத³னங்…பே॰… ஸஞ்ஞங்… ஸங்கா²ரே… விஞ்ஞாணங்
அத்ததோ ஸமனுபஸ்ஸதி, விஞ்ஞாணவந்தங் வா அத்தானங் அத்தனி வா விஞ்ஞாணங்,
விஞ்ஞாணஸ்மிங் வா அத்தானங் – ஏவங் கோ², பி⁴க்க²வே, பச்சுப்பன்னேஸு த⁴ம்மேஸு
ஸங்ஹீரதி.
‘‘கத²ஞ்ச , பி⁴க்க²வே,
பச்சுப்பன்னேஸு த⁴ம்மேஸு ந ஸங்ஹீரதி? இத⁴, பி⁴க்க²வே, ஸுதவா அரியஸாவகோ
அரியானங் த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ ஸப்புரிஸானங்
த³ஸ்ஸாவீ ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே ஸுவினீதோ ந ரூபங் அத்ததோ
ஸமனுபஸ்ஸதி, ந ரூபவந்தங் வா அத்தானங், ந அத்தனி வா ரூபங், ந ரூபஸ்மிங் வா
அத்தானங்; ந வேத³னங்… ந ஸஞ்ஞங்… ந ஸங்கா²ரே… ந விஞ்ஞாணங் அத்ததோ
ஸமனுபஸ்ஸதி, ந விஞ்ஞாணவந்தங் வா அத்தானங், ந அத்தனி வா விஞ்ஞாணங், ந
விஞ்ஞாணஸ்மிங் வா அத்தானங் – ஏவங் கோ², பி⁴க்க²வே, பச்சுப்பன்னேஸு த⁴ம்மேஸு
ந ஸங்ஹீரதி.
‘‘அதீதங் நான்வாக³மெய்ய, நப்படிகங்கே² அனாக³தங்;
யத³தீதங் பஹீனங் தங், அப்பத்தஞ்ச அனாக³தங்.
‘‘பச்சுப்பன்னஞ்ச யோ த⁴ம்மங், தத்த² தத்த² விபஸ்ஸதி;
அஸங்ஹீரங் அஸங்குப்பங், தங் வித்³வா மனுப்³ரூஹயே.
‘‘அஜ்ஜேவ கிச்சமாதப்பங், கோ ஜஞ்ஞா மரணங் ஸுவே;
ந ஹி நோ ஸங்க³ரங் தேன, மஹாஸேனேன மச்சுனா.
‘‘ஏவங் விஹாரிங் ஆதாபிங், அஹோரத்தமதந்தி³தங்;
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
‘‘‘ப⁴த்³தே³கரத்தஸ்ஸ வோ, பி⁴க்க²வே, உத்³தே³ஸஞ்ச விப⁴ங்க³ஞ்ச தே³ஸெஸ்ஸாமீ’தி – இதி யங் தங் வுத்தங் இத³மேதங் படிச்ச வுத்த’’ந்தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
ப⁴த்³தே³கரத்தஸுத்தங் நிட்டி²தங் பட²மங்.
2. ஆனந்த³ப⁴த்³தே³கரத்தஸுத்தங்
276. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தேன கோ² பன ஸமயேன ஆயஸ்மா ஆனந்தோ³ உபட்டா²னஸாலாயங் பி⁴க்கூ²னங்
த⁴ம்மியா கதா²ய ஸந்த³ஸ்ஸேதி ஸமாத³பேதி ஸமுத்தேஜேதி ஸம்பஹங்ஸேதி, ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச பா⁴ஸதி.
அத² கோ² ப⁴க³வா ஸாயன்ஹஸமயங் படிஸல்லானா வுட்டி²தோ
யேனுபட்டா²னஸாலா தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ
கோ² ப⁴க³வா பி⁴க்கூ² ஆமந்தேஸி – ‘‘கோ நு கோ², பி⁴க்க²வே, உபட்டா²னஸாலாயங்
பி⁴க்கூ²னங் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி
ஸம்பஹங்ஸேஸி, ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச அபா⁴ஸீ’’தி?
‘‘ஆயஸ்மா, ப⁴ந்தே, ஆனந்தோ³ உபட்டா²னஸாலாயங் பி⁴க்கூ²னங் த⁴ம்மியா கதா²ய
ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி, ப⁴த்³தே³கரத்தஸ்ஸ
உத்³தே³ஸஞ்ச விப⁴ங்க³ஞ்ச அபா⁴ஸீ’’தி.
அத² கோ² ப⁴க³வா ஆயஸ்மந்தங் ஆனந்த³ங் ஆமந்தேஸி – ‘‘யதா²
கத²ங் பன த்வங், ஆனந்த³, பி⁴க்கூ²னங் த⁴ம்மியா கதா²ய ஸந்த³ஸ்ஸேஸி
ஸமாத³பேஸி ஸமுத்தேஜேஸி ஸம்பஹங்ஸேஸி ,
ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச அபா⁴ஸீ’’தி? ‘‘ஏவங் கோ² அஹங்,
ப⁴ந்தே, பி⁴க்கூ²னங் த⁴ம்மியா கதா²ய ஸந்த³ஸ்ஸேஸிங் ஸமாத³பேஸிங்
ஸமுத்தேஜேஸிங் ஸம்பஹங்ஸேஸிங், ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச
அபா⁴ஸிங் –
‘‘அதீதங் நான்வாக³மெய்ய, நப்படிகங்கே² அனாக³தங்;
யத³தீதங் பஹீனங் தங், அப்பத்தஞ்ச அனாக³தங்.
‘‘பச்சுப்பன்னஞ்ச யோ த⁴ம்மங், தத்த² தத்த² விபஸ்ஸதி;
அஸங்ஹீரங் அஸங்குப்பங், தங் வித்³வா மனுப்³ரூஹயே.
‘‘அஜ்ஜேவ கிச்சமாதப்பங், கோ ஜஞ்ஞா மரணங் ஸுவே;
ந ஹி நோ ஸங்க³ரங் தேன, மஹாஸேனேன மச்சுனா.
‘‘ஏவங் விஹாரிங் ஆதாபிங், அஹோரத்தமதந்தி³தங்;
தங் வே ப⁴த்³தே³கரத்தோதி, ஸந்தோ ஆசிக்க²தே முனி’’.
277.
‘‘கத²ஞ்ச, ஆவுஸோ, அதீதங் அன்வாக³மேதி? ஏவங்ரூபோ அஹோஸிங் அதீதமத்³தா⁴னந்தி
தத்த² நந்தி³ங் ஸமன்வானேதி, ஏவங்வேத³னோ அஹோஸிங் அதீதமத்³தா⁴னந்தி தத்த²
நந்தி³ங் ஸமன்வானேதி, ஏவங்ஸஞ்ஞோ அஹோஸிங் அதீதமத்³தா⁴னந்தி தத்த² நந்தி³ங்
ஸமன்வானேதி, ஏவங்ஸங்கா²ரோ அஹோஸிங் அதீதமத்³தா⁴னந்தி தத்த² நந்தி³ங்
ஸமன்வானேதி, ஏவங்விஞ்ஞாணோ அஹோஸிங் அதீதமத்³தா⁴னந்தி தத்த² நந்தி³ங்
ஸமன்வானேதி – ஏவங் கோ², ஆவுஸோ, அதீதங் அன்வாக³மேதி.
‘‘கத²ஞ்ச, ஆவுஸோ, அதீதங் நான்வாக³மேதி? ஏவங்ரூபோ
அஹோஸிங் அதீதமத்³தா⁴னந்தி தத்த² நந்தி³ங் ந ஸமன்வானேதி, ஏவங்வேத³னோ அஹோஸிங்
அதீதமத்³தா⁴னந்தி தத்த² நந்தி³ங் ந ஸமன்வானேதி, ஏவங்ஸஞ்ஞோ அஹோஸிங்
அதீதமத்³தா⁴னந்தி தத்த² நந்தி³ங் ந ஸமன்வானேதி, ஏவங்ஸங்கா²ரோ அஹோஸிங்
அதீதமத்³தா⁴னந்தி தத்த² நந்தி³ங் ந ஸமன்வானேதி, ஏவங்விஞ்ஞாணோ அஹோஸிங் அதீதமத்³தா⁴னந்தி தத்த² நந்தி³ங் ந ஸமன்வானேதி – ஏவங் கோ², ஆவுஸோ, அதீதங் நான்வாக³மேதி.
‘‘கத²ஞ்ச, ஆவுஸோ, அனாக³தங் படிகங்க²தி? ஏவங்ரூபோ ஸியங்
அனாக³தமத்³தா⁴னந்தி தத்த² நந்தி³ங் ஸமன்வானேதி, ஏவங்வேத³னோ ஸியங்…பே॰…
ஏவங்ஸஞ்ஞோ ஸியங்… ஏவங்ஸங்கா²ரோ ஸியங்… ஏவங்விஞ்ஞாணோ ஸியங் அனாக³தமத்³தா⁴னந்தி தத்த² நந்தி³ங் ஸமன்வானேதி – ஏவங் கோ², ஆவுஸோ, அனாக³தங் படிகங்க²தி.
‘‘கத²ஞ்ச, ஆவுஸோ, அனாக³தங் நப்படிகங்க²தி? ஏவங்ரூபோ
ஸியங் அனாக³தமத்³தா⁴னந்தி தத்த² நந்தி³ங் ந ஸமன்வானேதி, ஏவங்வேத³னோ
ஸியங்…பே॰… ஏவங்ஸஞ்ஞோ ஸியங்… ஏவங்ஸங்கா²ரோ ஸியங்… ஏவங்விஞ்ஞாணோ ஸியங்
அனாக³தமத்³தா⁴னந்தி தத்த² நந்தி³ங் ந ஸமன்வானேதி – ஏவங் கோ², ஆவுஸோ,
அனாக³தங் நப்படிகங்க²தி.
‘‘கத²ஞ்ச, ஆவுஸோ, பச்சுப்பன்னேஸு த⁴ம்மேஸு ஸங்ஹீரதி?
இத⁴, ஆவுஸோ, அஸ்ஸுதவா புது²ஜ்ஜனோ அரியானங் அத³ஸ்ஸாவீ அரியத⁴ம்மஸ்ஸ அகோவிதோ³
அரியத⁴ம்மே அவினீதோ ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ
அகோவிதோ³ ஸப்புரிஸத⁴ம்மே அவினீதோ ரூபங் அத்ததோ ஸமனுபஸ்ஸதி, ரூபவந்தங் வா
அத்தானங், அத்தனி வா ரூபங், ரூபஸ்மிங் வா அத்தானங்; வேத³னங்… ஸஞ்ஞங்…
ஸங்கா²ரே… விஞ்ஞாணங் அத்ததோ ஸமனுபஸ்ஸதி, விஞ்ஞாணவந்தங் வா அத்தானங், அத்தனி
வா விஞ்ஞாணங், விஞ்ஞாணஸ்மிங் வா அத்தானங் – ஏவங் கோ², ஆவுஸோ,
பச்சுப்பன்னேஸு த⁴ம்மேஸு ஸங்ஹீரதி.
‘‘கத²ஞ்ச , ஆவுஸோ,
பச்சுப்பன்னேஸு த⁴ம்மேஸு ந ஸங்ஹீரதி? இத⁴, ஆவுஸோ, ஸுதவா அரியஸாவகோ அரியானங்
த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ ஸப்புரிஸானங் த³ஸ்ஸாவீ
ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே ஸுவினீதோ ந ரூபங் அத்ததோ
ஸமனுபஸ்ஸதி, ந ரூபவந்தங் வா அத்தானங், ந அத்தனி வா ரூபங், ந ரூபஸ்மிங் வா
அத்தானங்; ந வேத³னங்… ந ஸஞ்ஞங்… ந ஸங்கா²ரே… ந விஞ்ஞாணங் அத்ததோ
ஸமனுபஸ்ஸதி, ந விஞ்ஞாணவந்தங் வா அத்தானங், ந அத்தனி வா விஞ்ஞாணங், ந
விஞ்ஞாணஸ்மிங் வா அத்தானங் – ஏவங் கோ², ஆவுஸோ, பச்சுப்பன்னேஸு த⁴ம்மேஸு ந
ஸங்ஹீரதி.
‘‘அதீதங் நான்வாக³மெய்ய, நப்படிகங்கே² அனாக³தங்;
யத³தீதங் பஹீனங் தங், அப்பத்தஞ்ச அனாக³தங்.
‘‘பச்சுப்பன்னஞ்ச யோ த⁴ம்மங், தத்த² தத்த² விபஸ்ஸதி;
அஸங்ஹீரங் அஸங்குப்பங், தங் வித்³வா மனுப்³ரூஹயே.
‘‘அஜ்ஜேவ கிச்சமாதப்பங், கோ ஜஞ்ஞா மரணங் ஸுவே;
ந ஹி நோ ஸங்க³ரங் தேன, மஹாஸேனேன மச்சுனா.
‘‘ஏவங் விஹாரிங் ஆதாபிங், அஹோரத்தமதந்தி³தங்;
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
‘‘ஏவங் கோ² அஹங், ப⁴ந்தே,
பி⁴க்கூ²னங் த⁴ம்மியா கதா²ய ஸந்த³ஸ்ஸேஸிங் ஸமாத³பேஸிங் ஸமுத்தேஜேஸிங்
ஸம்பஹங்ஸேஸிங், ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச அபா⁴ஸி’’ந்தி.
278. ‘‘ஸாது⁴ ,
ஸாது⁴, ஆனந்த³! ஸாது⁴ கோ² த்வங், ஆனந்த³, பி⁴க்கூ²னங் த⁴ம்மியா கதா²ய
ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி, ப⁴த்³தே³கரத்தஸ்ஸ
உத்³தே³ஸஞ்ச விப⁴ங்க³ஞ்ச அபா⁴ஸி –
‘‘அதீதங் நான்வாக³மெய்ய…பே॰…
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
‘‘கத²ஞ்ச, ஆனந்த³, அதீதங் அன்வாக³மேதி…பே॰… ஏவங் கோ²,
ஆனந்த³, அதீதங் அன்வாக³மேதி. கத²ஞ்ச, ஆனந்த³, அதீதங் நான்வாக³மேதி…பே॰…
ஏவங் கோ², ஆனந்த³, அதீதங் நான்வாக³மேதி. கத²ஞ்ச, ஆனந்த³, அனாக³தங்
படிகங்க²தி…பே॰… ஏவங் கோ², ஆனந்த³, அனாக³தங் படிகங்க²தி. கத²ஞ்ச, ஆனந்த³,
அனாக³தங் நப்படிகங்க²தி…பே॰… ஏவங் கோ², ஆனந்த³, அனாக³தங் நப்படிகங்க²தி.
கத²ஞ்ச, ஆனந்த³, பச்சுப்பன்னேஸு த⁴ம்மேஸு ஸங்ஹீரதி…பே॰… ஏவங் கோ², ஆனந்த³,
பச்சுப்பன்னேஸு த⁴ம்மேஸு ஸங்ஹீரதி. கத²ஞ்ச, ஆனந்த³, பச்சுப்பன்னேஸு
த⁴ம்மேஸு ந ஸங்ஹீரதி…பே॰… ஏவங் கோ², ஆனந்த³, பச்சுப்பன்னேஸு த⁴ம்மேஸு ந
ஸங்ஹீரதி.
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதங் அபி⁴னந்தீ³தி.
ஆனந்த³ப⁴த்³தே³கரத்தஸுத்தங் நிட்டி²தங் து³தியங்.
3. மஹாகச்சானப⁴த்³தே³கரத்தஸுத்தங்
279. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி தபோதா³ராமே. அத² கோ² ஆயஸ்மா ஸமித்³தி⁴ ரத்தியா பச்சூஸஸமயங் பச்சுட்டா²ய யேன தபோதோ³ [தபோதா³ (ஸீ॰)] தேனுபஸங்கமி க³த்தானி பரிஸிஞ்சிதுங். தபோதே³ க³த்தானி பரிஸிஞ்சித்வா பச்சுத்தரித்வா ஏகசீவரோ அட்டா²ஸி க³த்தானி புப்³பா³பயமானோ [ஸுக்கா²பயமானோ (க॰)].
அத² கோ² அஞ்ஞதரா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங்
தபோத³ங் ஓபா⁴ஸெத்வா யேனாயஸ்மா ஸமித்³தி⁴ தேனுபஸங்கமி; உபஸங்கமித்வா
ஏகமந்தங் அட்டா²ஸி. ஏகமந்தங் டி²தா கோ² ஸா தே³வதா ஆயஸ்மந்தங் ஸமித்³தி⁴ங்
ஏதத³வோச – ‘‘தா⁴ரேஸி த்வங், பி⁴க்கு², ப⁴த்³தே³கரத்தஸ்ஸ உத்³தே³ஸஞ்ச
விப⁴ங்க³ஞ்சா’’தி? ‘‘ந கோ² அஹங், ஆவுஸோ, தா⁴ரேமி ப⁴த்³தே³கரத்தஸ்ஸ
உத்³தே³ஸஞ்ச விப⁴ங்க³ஞ்ச. த்வங் பனாவுஸோ, தா⁴ரேஸி ப⁴த்³தே³கரத்தஸ்ஸ
உத்³தே³ஸஞ்ச விப⁴ங்க³ஞ்சா’’தி? ‘‘அஹம்பி கோ², பி⁴க்கு², ந தா⁴ரேமி
ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச. தா⁴ரேஸி பன த்வங், பி⁴க்கு²,
ப⁴த்³தே³கரத்தியோ கா³தா²’’தி? ‘‘ந கோ² அஹங், ஆவுஸோ, தா⁴ரேமி
ப⁴த்³தே³கரத்தியோ கா³தா²தி. த்வங் பனாவுஸோ, தா⁴ரேஸி ப⁴த்³தே³கரத்தியோ
கா³தா²’’தி? ‘‘அஹம்பி கோ², பி⁴க்கு² ந தா⁴ரேமி ப⁴த்³தே³கரத்தியோ கா³தா²தி.
உக்³க³ண்ஹாஹி த்வங், பி⁴க்கு², ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச;
பரியாபுணாஹி த்வங், பி⁴க்கு², ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச;
தா⁴ரேஹி த்வங், பி⁴க்கு², ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச.
அத்த²ஸங்ஹிதோ, பி⁴க்கு², ப⁴த்³தே³கரத்தஸ்ஸ உத்³தே³ஸோ ச விப⁴ங்கோ³ ச ஆதி³ப்³ரஹ்மசரியகோ’’தி. இத³மவோச ஸா தே³வதா; இத³ங் வத்வா தத்தே²வந்தரதா⁴யி.
280.
அத² கோ² ஆயஸ்மா ஸமித்³தி⁴ தஸ்ஸா ரத்தியா அச்சயேன யேன ப⁴க³வா தேனுபஸங்கமி;
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங்
நிஸின்னோ கோ² ஆயஸ்மா ஸமித்³தி⁴ ப⁴க³வந்தங் ஏதத³வோச –
‘‘இதா⁴ஹங், ப⁴ந்தே, ரத்தியா பச்சூஸஸமயங் பச்சுட்டா²ய யேன தபோதோ³ தேனுபஸங்கமிங் க³த்தானி பரிஸிஞ்சிதுங். தபோதே³
க³த்தானி பரிஸிஞ்சித்வா பச்சுத்தரித்வா ஏகசீவரோ அட்டா²ஸிங் க³த்தானி
புப்³பா³பயமானோ. அத² கோ² ப⁴ந்தே, அஞ்ஞதரா தே³வதா அபி⁴க்கந்தாய ரத்தியா
அபி⁴க்கந்தவண்ணா கேவலகப்பங் தபோத³ங் ஓபா⁴ஸெத்வா யேனாஹங் தேனுபஸங்கமி;
உபஸங்கமித்வா ஏகமந்தங் அட்டா²ஸி. ஏகமந்தங் டி²தா கோ² ஸா தே³வதா மங் ஏதத³வோச – ‘தா⁴ரேஸி த்வங், பி⁴க்கு², ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்சா’’’தி?
‘‘ஏவங் வுத்தே அஹங், ப⁴ந்தே, தங் தே³வதங் ஏதத³வோசங் –
‘ந கோ² அஹங், ஆவுஸோ, தா⁴ரேமி ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச.
த்வங் பனாவுஸோ, தா⁴ரேஸி ப⁴த்³தே³கரத்தஸ்ஸ
உத்³தே³ஸஞ்ச விப⁴ங்க³ஞ்சா’தி? ‘அஹம்பி கோ², பி⁴க்கு², ந தா⁴ரேமி
ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச. தா⁴ரேஸி பன த்வங், பி⁴க்கு²,
ப⁴த்³தே³கரத்தியோ கா³தா²’தி? ‘ந கோ² அஹங், ஆவுஸோ, தா⁴ரேமி ப⁴த்³தே³கரத்தியோ
கா³தா²தி. த்வங் பனாவுஸோ, தா⁴ரேஸி ப⁴த்³தே³கரத்தியோ கா³தா²’தி? ‘அஹம்பி
கோ², பி⁴க்கு², ந தா⁴ரேமி ப⁴த்³தே³கரத்தியோ கா³தா²தி. உக்³க³ண்ஹாஹி த்வங்,
பி⁴க்கு², ப⁴த்³தே³கரத்தஸ்ஸ உத்³தே³ஸஞ்ச
விப⁴ங்க³ஞ்ச; பரியாபுணாஹி த்வங், பி⁴க்கு², ப⁴த்³தே³கரத்தஸ்ஸ உத்³தே³ஸஞ்ச
விப⁴ங்க³ஞ்ச; தா⁴ரேஹி த்வங், பி⁴க்கு², ப⁴த்³தே³கரத்தஸ்ஸ உத்³தே³ஸஞ்ச
விப⁴ங்க³ஞ்ச. அத்த²ஸங்ஹிதோ, பி⁴க்கு², ப⁴த்³தே³கரத்தஸ்ஸ உத்³தே³ஸோ ச
விப⁴ங்கோ³ ச ஆதி³ப்³ரஹ்மசரியகோ’தி. இத³மவோச, ப⁴ந்தே, ஸா தே³வதா; இத³ங்
வத்வா தத்தே²வந்தரதா⁴யி. ஸாது⁴ மே, ப⁴ந்தே, ப⁴க³வா ப⁴த்³தே³கரத்தஸ்ஸ
உத்³தே³ஸஞ்ச விப⁴ங்க³ஞ்ச தே³ஸேதூ’’தி. ‘‘தேன ஹி, பி⁴க்கு², ஸுணாஹி,
ஸாது⁴கங் மனஸி கரோஹி; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² ஆயஸ்மா
ஸமித்³தி⁴ ப⁴க³வதோ பச்சஸ்ஸோஸி. ப⁴க³வா ஏதத³வோச –
‘‘அதீதங் நான்வாக³மெய்ய, நப்படிகங்கே² அனாக³தங்;
யத³தீதங் பஹீனங் தங், அப்பத்தஞ்ச அனாக³தங்.
‘‘பச்சுப்பன்னஞ்ச யோ த⁴ம்மங், தத்த² தத்த² விபஸ்ஸதி;
அஸங்ஹீரங் அஸங்குப்பங், தங் வித்³வா மனுப்³ரூஹயே.
‘‘அஜ்ஜேவ கிச்சமாதப்பங், கோ ஜஞ்ஞா மரணங் ஸுவே;
ந ஹி நோ ஸங்க³ரங் தேன, மஹாஸேனேன மச்சுனா.
‘‘ஏவங் விஹாரிங் ஆதாபிங், அஹோரத்தமதந்தி³தங்;
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
இத³மவோச ப⁴க³வா; இத³ங் வத்வான ஸுக³தோ உட்டா²யாஸனா விஹாரங் பாவிஸி. அத² கோ² தேஸங் பி⁴க்கூ²னங் , அசிரபக்கந்தஸ்ஸ ப⁴க³வதோ, ஏதத³ஹோஸி – ‘‘இத³ங் கோ² நோ, ஆவுஸோ, ப⁴க³வா ஸங்கி²த்தேன உத்³தே³ஸங் உத்³தி³ஸித்வா வித்தா²ரேன அத்த²ங் அவிப⁴ஜித்வா உட்டா²யாஸனா விஹாரங் பவிட்டோ² –
‘‘அதீதங் நான்வாக³மெய்ய, நப்படிகங்கே² அனாக³தங்;
யத³தீதங் பஹீனங் தங், அப்பத்தஞ்ச அனாக³தங்.
‘‘பச்சுப்பன்னஞ்ச யோ த⁴ம்மங், தத்த² தத்த² விபஸ்ஸதி;
அஸங்ஹீரங் அஸங்குப்பங், தங் வித்³வா மனுப்³ரூஹயே.
‘‘அஜ்ஜேவ கிச்சமாதப்பங், கோ ஜஞ்ஞா மரணங் ஸுவே;
ந ஹி நோ ஸங்க³ரங் தேன, மஹாஸேனேன மச்சுனா.
‘‘ஏவங் விஹாரிங் ஆதாபிங், அஹோரத்தமதந்தி³தங்;
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
‘‘கோ நு கோ² இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ
உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ வித்தா²ரேன அத்த²ங்
விப⁴ஜெய்யா’’தி?
அத² கோ² தேஸங் பி⁴க்கூ²னங்
ஏதத³ஹோஸி – ‘‘அயங் கோ² ஆயஸ்மா மஹாகச்சானோ ஸத்து² சேவ ஸங்வண்ணிதோ ஸம்பா⁴விதோ
ச விஞ்ஞூனங் ஸப்³ரஹ்மசாரீனங்; பஹோதி சாயஸ்மா மஹாகச்சானோ இமஸ்ஸ ப⁴க³வதா
ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ
வித்தா²ரேன அத்த²ங் விப⁴ஜிதுங். யங்னூன மயங் யேனாயஸ்மா மஹாகச்சானோ
தேனுபஸங்கமெய்யாம; உபஸங்கமித்வா ஆயஸ்மந்தங் மஹாகச்சானங் ஏதமத்த²ங்
படிபுச்செ²ய்யாமா’’தி.
281.
அத² கோ² தே பி⁴க்கூ² யேனாயஸ்மா மஹாகச்சானோ தேனுபஸங்கமிங்ஸு; உபஸங்கமித்வா
ஆயஸ்மதா மஹாகச்சானேன ஸத்³தி⁴ங் ஸம்மோதி³ங்ஸு. ஸம்மோத³னீயங் கத²ங் ஸாரணீயங்
வீதிஸாரெத்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ஆயஸ்மந்தங் மஹாகச்சானங் ஏதத³வோசுங்
– ‘‘இத³ங் கோ² நோ, ஆவுஸோ கச்சான, ப⁴க³வா ஸங்கி²த்தேன உத்³தே³ஸங்
உத்³தி³ஸித்வா வித்தா²ரேன அத்த²ங் அவிப⁴ஜித்வா உட்டா²யாஸனா விஹாரங்
பவிட்டோ² –
‘‘அதீதங் நான்வாக³மெய்ய…பே॰…
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
‘‘தேஸங் நோ, ஆவுஸோ கச்சான, அம்ஹாகங், அசிரபக்கந்தஸ்ஸ
ப⁴க³வதோ, ஏதத³ஹோஸி – இத³ங் கோ² நோ, ஆவுஸோ, ப⁴க³வா ஸங்கி²த்தேன உத்³தே³ஸங்
உத்³தி³ஸித்வா வித்தா²ரேன அத்த²ங் அவிப⁴ஜித்வா உட்டா²யாஸனா விஹாரங்
பவிட்டோ² –
‘‘அதீதங் நான்வாக³மெய்ய…பே॰…
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
‘‘கோ நு கோ² இமஸ்ஸ ப⁴க³வதா
ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ
வித்தா²ரேன அத்த²ங் விப⁴ஜெய்யாதி? தேஸங் நோ , ஆவுஸோ
கச்சான, அம்ஹாகங் ஏதத³ஹோஸி – ‘அயங் கோ² ஆயஸ்மா மஹாகச்சானோ ஸத்து² சேவ
ஸங்வண்ணிதோ ஸம்பா⁴விதோ ச விஞ்ஞூனங் ஸப்³ரஹ்மசாரீனங். பஹோதி சாயஸ்மா
மஹாகச்சானோ இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ
வித்தா²ரேன அத்த²ங் அவிப⁴த்தஸ்ஸ வித்தா²ரேன அத்த²ங் விப⁴ஜிதுங். யங்னூன
மயங் யேனாயஸ்மா மஹாகச்சானோ தேனுபஸங்கமெய்யாம; உபஸங்கமித்வா ஆயஸ்மந்தங்
மஹாகச்சானங் ஏதமத்த²ங் படிபுச்செ²ய்யாமா’தி. விப⁴ஜதாயஸ்மா மஹாகச்சானோ’’தி.
‘‘ஸெய்யதா²பி, ஆவுஸோ, புரிஸோ ஸாரத்தி²கோ ஸாரக³வேஸீ ஸாரபரியேஸனங் சரமானோ மஹதோ ருக்க²ஸ்ஸ திட்ட²தோ ஸாரவதோ அதிக்கம்மேவ
மூலங் அதிக்கம்ம க²ந்த⁴ங் ஸாகா²பலாஸே ஸாரங் பரியேஸிதப்³ப³ங் மஞ்ஞெய்ய;
ஏவங் ஸம்பத³மித³ங் ஆயஸ்மந்தானங் ஸத்த²ரி ஸம்முகீ²பூ⁴தே தங் ப⁴க³வந்தங்
அதிஸித்வா அம்ஹே ஏதமத்த²ங் படிபுச்சி²தப்³ப³ங் மஞ்ஞத² [மஞ்ஞேத² (பீ॰)].
ஸோ ஹாவுஸோ, ப⁴க³வா ஜானங் ஜானாதி, பஸ்ஸங் பஸ்ஸதி, சக்கு²பூ⁴தோ ஞாணபூ⁴தோ
த⁴ம்மபூ⁴தோ ப்³ரஹ்மபூ⁴தோ வத்தா பவத்தா அத்த²ஸ்ஸ நின்னேதா அமதஸ்ஸ தா³தா
த⁴ம்மஸ்ஸாமீ ததா²க³தோ. ஸோ சேவ பனேதஸ்ஸ காலோ அஹோஸி யங் ப⁴க³வந்தங்யேவ
ஏதமத்த²ங் படிபுச்செ²ய்யாத², யதா² வோ ப⁴க³வா ப்³யாகரெய்ய ததா² நங்
தா⁴ரெய்யாதா²’’தி.
‘‘அத்³தா⁴வுஸோ கச்சான, ப⁴க³வா ஜானங் ஜானாதி, பஸ்ஸங்
பஸ்ஸதி, சக்கு²பூ⁴தோ ஞாணபூ⁴தோ த⁴ம்மபூ⁴தோ ப்³ரஹ்மபூ⁴தோ வத்தா பவத்தா
அத்த²ஸ்ஸ நின்னேதா அமதஸ்ஸ தா³தா த⁴ம்மஸ்ஸாமீ ததா²க³தோ. ஸோ சேவ பனேதஸ்ஸ காலோ
அஹோஸி யங் ப⁴க³வந்தங்யேவ ஏதமத்த²ங் படிபுச்செ²ய்யாம; யதா² நோ ப⁴க³வா
ப்³யாகரெய்ய ததா² நங் தா⁴ரெய்யாம. அபி சாயஸ்மா மஹாகச்சானோ ஸத்து²சேவ
ஸங்வண்ணிதோ ஸம்பா⁴விதோ ச விஞ்ஞூனங் ஸப்³ரஹ்மசாரீனங்; பஹோதி சாயஸ்மா
மஹாகச்சானோ இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ
வித்தா²ரேன அத்த²ங் அவிப⁴த்தஸ்ஸ வித்தா²ரேன அத்த²ங் விப⁴ஜிதுங்.
விப⁴ஜதாயஸ்மா மஹாகச்சானோ அக³ருங் கரித்வா’’தி [அக³ருகரித்வா (ஸீ॰ ஸ்யா॰ கங்॰ பீ॰)].
‘‘தேன ஹாவுஸோ, ஸுணாத², ஸாது⁴கங் மனஸி கரோத²;
பா⁴ஸிஸ்ஸாமீ’’தி. ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ மஹாகச்சானஸ்ஸ
பச்சஸ்ஸோஸுங். ஆயஸ்மா மஹாகச்சானோ ஏதத³வோச –
‘‘யங் கோ² நோ, ஆவுஸோ, ப⁴க³வா ஸங்கி²த்தேன உத்³தே³ஸங் உத்³தி³ஸித்வா வித்தா²ரேன அத்த²ங் அவிப⁴ஜித்வா உட்டா²யாஸனா விஹாரங் பவிட்டோ² –
‘‘அதீதங் நான்வாக³மெய்ய…பே॰…
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
இமஸ்ஸ கோ² அஹங், ஆவுஸோ, ப⁴க³வதா ஸங்கி²த்தேன
உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ ஏவங்
வித்தா²ரேன அத்த²ங் ஆஜானாமி –
282. ‘‘கத²ஞ்ச, ஆவுஸோ, அதீதங் அன்வாக³மேதி? இதி மே சக்கு² அஹோஸி அதீதமத்³தா⁴னங் இதி ரூபாதி – தத்த² ச²ந்த³ராக³ப்படிப³த்³த⁴ங் [ச²ந்த³ராக³ப்படிப³ந்த⁴ங் (க॰)]
ஹோதி விஞ்ஞாணங், ச²ந்த³ராக³ப்படிப³த்³த⁴த்தா விஞ்ஞாணஸ்ஸ தத³பி⁴னந்த³தி,
தத³பி⁴னந்த³ந்தோ அதீதங் அன்வாக³மேதி. இதி மே ஸோதங் அஹோஸி அதீதமத்³தா⁴னங்
இதி ஸத்³தா³தி…பே॰… இதி மே கா⁴னங் அஹோஸி அதீதமத்³தா⁴னங் இதி க³ந்தா⁴தி… இதி
மே ஜிவ்ஹா அஹோஸி அதீதமத்³தா⁴னங் இதி ரஸாதி… இதி மே காயோ அஹோஸி
அதீதமத்³தா⁴னங் இதி பொ²ட்ட²ப்³பா³தி… இதி மே மனோ அஹோஸி அதீதமத்³தா⁴னங் இதி
த⁴ம்மாதி – தத்த² ச²ந்த³ராக³ப்படிப³த்³த⁴ங் ஹோதி விஞ்ஞாணங்,
ச²ந்த³ராக³ப்படிப³த்³த⁴த்தா விஞ்ஞாணஸ்ஸ தத³பி⁴னந்த³தி, தத³பி⁴னந்த³ந்தோ
அதீதங் அன்வாக³மேதி – ஏவங் கோ², ஆவுஸோ, அதீதங் அன்வாக³மேதி.
‘‘கத²ஞ்ச , ஆவுஸோ, அதீதங்
நான்வாக³மேதி? இதி மே சக்கு² அஹோஸி அதீதமத்³தா⁴னங் இதி ரூபாதி – தத்த² ந
ச²ந்த³ராக³ப்படிப³த்³த⁴ங் ஹோதி விஞ்ஞாணங், ந ச²ந்த³ராக³ப்படிப³த்³த⁴த்தா
விஞ்ஞாணஸ்ஸ ந தத³பி⁴னந்த³தி, ந தத³பி⁴னந்த³ந்தோ
அதீதங் நான்வாக³மேதி. இதி மே ஸோதங் அஹோஸி அதீதமத்³தா⁴னங் இதி
ஸத்³தா³தி…பே॰… இதி மே கா⁴னங் அஹோஸி அதீதமத்³தா⁴னங் இதி க³ந்தா⁴தி… இதி மே
ஜிவ்ஹா அஹோஸி அதீதமத்³தா⁴னங் இதி ரஸாதி… இதி மே காயோ அஹோஸி அதீதமத்³தா⁴னங்
இதி பொ²ட்ட²ப்³பா³தி… இதி மே மனோ அஹோஸி அதீதமத்³தா⁴னங் இதி த⁴ம்மாதி –
தத்த² ந ச²ந்த³ராக³ப்படிப³த்³த⁴ங் ஹோதி விஞ்ஞாணங், ந
ச²ந்த³ராக³ப்படிப³த்³த⁴த்தா விஞ்ஞாணஸ்ஸ, ந தத³பி⁴னந்த³தி, ந
தத³பி⁴னந்த³ந்தோ அதீதங் நான்வாக³மேதி – ஏவங் கோ², ஆவுஸோ, அதீதங்
நான்வாக³மேதி.
283. ‘‘கத²ஞ்ச ,
ஆவுஸோ, அனாக³தங் படிகங்க²தி? இதி மே சக்கு² ஸியா அனாக³தமத்³தா⁴னங் இதி
ரூபாதி – அப்படிலத்³த⁴ஸ்ஸ படிலாபா⁴ய சித்தங் பணித³ஹதி, சேதஸோ பணிதா⁴னபச்சயா
தத³பி⁴னந்த³தி, தத³பி⁴னந்த³ந்தோ அனாக³தங் படிகங்க²தி. இதி மே ஸோதங் ஸியா
அனாக³தமத்³தா⁴னங் இதி ஸத்³தா³தி…பே॰… இதி மே கா⁴னங் ஸியா அனாக³தமத்³தா⁴னங்
இதி க³ந்தா⁴தி… இதி மே ஜிவ்ஹா ஸியா அனாக³தமத்³தா⁴னங் இதி ரஸாதி… இதி மே
காயோ ஸியா அனாக³தமத்³தா⁴னங் இதி பொ²ட்ட²ப்³பா³தி… இதி மே மனோ ஸியா
அனாக³தமத்³தா⁴னங் இதி த⁴ம்மாதி – அப்படிலத்³த⁴ஸ்ஸ
படிலாபா⁴ய சித்தங் பணித³ஹதி, சேதஸோ பணிதா⁴னபச்சயா தத³பி⁴னந்த³தி,
தத³பி⁴னந்த³ந்தோ அனாக³தங் படிகங்க²தி – ஏவங் கோ², ஆவுஸோ, அனாக³தங்
படிகங்க²தி.
‘‘கத²ஞ்ச, ஆவுஸோ, அனாக³தங் நப்படிகங்க²தி? இதி மே
சக்கு² ஸியா அனாக³தமத்³தா⁴னங் இதி ரூபாதி – அப்படிலத்³த⁴ஸ்ஸ படிலாபா⁴ய
சித்தங் நப்பணித³ஹதி , சேதஸோ அப்பணிதா⁴னபச்சயா ந
தத³பி⁴னந்த³தி, ந தத³பி⁴னந்த³ந்தோ அனாக³தங் நப்படிகங்க²தி. இதி மே ஸோதங்
ஸியா அனாக³தமத்³தா⁴னங் இதி ஸத்³தா³தி…பே॰… இதி மே கா⁴னங் ஸியா
அனாக³தமத்³தா⁴னங் இதி க³ந்தா⁴தி… இதி மே ஜிவ்ஹா ஸியா அனாக³தமத்³தா⁴னங் இதி
ரஸாதி… இதி மே காயோ ஸியா அனாக³தமத்³தா⁴னங் இதி பொ²ட்ட²ப்³பா³தி… இதி மே மனோ
ஸியா அனாக³தமத்³தா⁴னங் இதி த⁴ம்மாதி – அப்படிலத்³த⁴ஸ்ஸ படிலாபா⁴ய சித்தங்
நப்பணித³ஹதி, சேதஸோ அப்பணிதா⁴னபச்சயா ந தத³பி⁴னந்த³தி, ந தத³பி⁴னந்த³ந்தோ
அனாக³தங் நப்படிகங்க²தி – ஏவங் கோ², ஆவுஸோ, அனாக³தங் நப்படிகங்க²தி.
284. ‘‘கத²ஞ்ச, ஆவுஸோ, பச்சுப்பன்னேஸு த⁴ம்மேஸு ஸங்ஹீரதி? யஞ்சாவுஸோ, சக்கு² யே ச ரூபா
– உப⁴யமேதங் பச்சுப்பன்னங். தஸ்மிங் சே பச்சுப்பன்னே
ச²ந்த³ராக³ப்படிப³த்³த⁴ங் ஹோதி விஞ்ஞாணங், ச²ந்த³ராக³ப்படிப³த்³த⁴த்தா
விஞ்ஞாணஸ்ஸ தத³பி⁴னந்த³தி, தத³பி⁴னந்த³ந்தோ பச்சுப்பன்னேஸு த⁴ம்மேஸு
ஸங்ஹீரதி. யஞ்சாவுஸோ, ஸோதங் யே ச ஸத்³தா³…பே॰… யஞ்சாவுஸோ, கா⁴னங் யே ச
க³ந்தா⁴… யா சாவுஸோ, ஜிவ்ஹா யே ச ரஸா… யோ சாவுஸோ, காயோ யே ச பொ²ட்ட²ப்³பா³…
யோ சாவுஸோ, மனோ யே ச த⁴ம்மா – உப⁴யமேதங் பச்சுப்பன்னங். தஸ்மிங் சே
பச்சுப்பன்னே ச²ந்த³ராக³ப்படிப³த்³த⁴ங் ஹோதி விஞ்ஞாணங்,
ச²ந்த³ராக³ப்படிப³த்³த⁴த்தா விஞ்ஞாணஸ்ஸ தத³பி⁴னந்த³தி, தத³பி⁴னந்த³ந்தோ
பச்சுப்பன்னேஸு த⁴ம்மேஸு ஸங்ஹீரதி – ஏவங் கோ², ஆவுஸோ, பச்சுப்பன்னேஸு
த⁴ம்மேஸு ஸங்ஹீரதி.
‘‘கத²ஞ்ச ,
ஆவுஸோ, பச்சுப்பன்னேஸு த⁴ம்மேஸு ந ஸங்ஹீரதி? யஞ்சாவுஸோ, சக்கு² யே ச ரூபா –
உப⁴யமேதங் பச்சுப்பன்னங். தஸ்மிங் சே பச்சுப்பன்னே ந
ச²ந்த³ராக³ப்படிப³த்³த⁴ங் ஹோதி விஞ்ஞாணங், ந ச²ந்த³ராக³ப்படிப³த்³த⁴த்தா
விஞ்ஞாணஸ்ஸ ந தத³பி⁴னந்த³தி, ந தத³பி⁴னந்த³ந்தோ பச்சுப்பன்னேஸு த⁴ம்மேஸு ந
ஸங்ஹீரதி. யஞ்சாவுஸோ, ஸோதங் யே ச ஸத்³தா³…பே॰… யஞ்சாவுஸோ, கா⁴னங் யே ச
க³ந்தா⁴… யா சாவுஸோ, ஜிவ்ஹா யே ச ரஸா… யோ சாவுஸோ, காயோ யே ச பொ²ட்ட²ப்³பா³…
யோ சாவுஸோ, மனோ யே ச த⁴ம்மா – உப⁴யமேதங் பச்சுப்பன்னங். தஸ்மிங் சே
பச்சுப்பன்னே ந ச²ந்த³ராக³ப்படிப³த்³த⁴ங் ஹோதி
விஞ்ஞாணங், ந ச²ந்த³ராக³ப்படிப³த்³த⁴த்தா விஞ்ஞாணஸ்ஸ ந தத³பி⁴னந்த³தி, ந
தத³பி⁴னந்த³ந்தோ பச்சுப்பன்னேஸு த⁴ம்மேஸு ந ஸங்ஹீரதி – ஏவங் கோ², ஆவுஸோ,
பச்சுப்பன்னேஸு த⁴ம்மேஸு ந ஸங்ஹீரதி.
285. ‘‘யங் கோ² நோ, ஆவுஸோ, ப⁴க³வா ஸங்கி²த்தேன உத்³தே³ஸங் உத்³தி³ஸித்வா வித்தா²ரேன அத்த²ங் அவிப⁴ஜித்வா உட்டா²யாஸனா விஹாரங் பவிட்டோ² –
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
‘‘இமஸ்ஸ கோ² அஹங், ஆவுஸோ, ப⁴க³வதா ஸங்கி²த்தேன
உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ ஏவங்
வித்தா²ரேன அத்த²ங் ஆஜானாமி. ஆகங்க²மானா ச பன தும்ஹே ஆயஸ்மந்தோ
ப⁴க³வந்தங்யேவ உபஸங்கமித்வா ஏதமத்த²ங் படிபுச்செ²ய்யாத², யதா² வோ ப⁴க³வா
ப்³யாகரோதி ததா² நங் தா⁴ரெய்யாதா²’’தி.
அத² கோ² தே பி⁴க்கூ² ஆயஸ்மதோ
மஹாகச்சானஸ்ஸ பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா யேன ப⁴க³வா
தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் –
‘‘யங் கோ² நோ, ப⁴ந்தே, ப⁴க³வா ஸங்கி²த்தேன உத்³தே³ஸங் உத்³தி³ஸித்வா
வித்தா²ரேன அத்த²ங் அவிப⁴ஜித்வா உட்டா²யாஸனா விஹாரங் பவிட்டோ² –
‘‘அதீதங் நான்வாக³மெய்ய…பே॰…
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
தேஸங் நோ, ப⁴ந்தே, அம்ஹாகங், அசிரபக்கந்தஸ்ஸ ப⁴க³வதோ,
ஏதத³ஹோஸி – ‘‘இத³ங் கோ² நோ, ஆவுஸோ, ப⁴க³வா ஸங்கி²த்தேன உத்³தே³ஸங்
உத்³தி³ஸித்வா வித்தா²ரேன அத்த²ங் அவிப⁴ஜித்வா உட்டா²யாஸனா விஹாரங்
பவிட்டோ² –
‘‘அதீதங் நான்வாக³மெய்ய, நப்படிகங்கே² அனாக³தங்;
யத³தீதங் பஹீனங் தங், அப்பத்தஞ்ச அனாக³தங்.
‘‘பச்சுப்பன்னஞ்ச யோ த⁴ம்மங், தத்த² தத்த² விபஸ்ஸதி;
அஸங்ஹீரங் அஸங்குப்பங், தங் வித்³வா மனுப்³ரூஹயே.
‘‘அஜ்ஜேவ கிச்சமாதப்பங், கோ ஜஞ்ஞா மரணங் ஸுவே;
ந ஹி நோ ஸங்க³ரங் தேன, மஹாஸேனேன மச்சுனா.
‘‘ஏவங் விஹாரிங் ஆதாபிங், அஹோரத்தமதந்தி³தங்;
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
‘‘‘கோ நு கோ² இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன
அத்த²ங் அவிப⁴த்தஸ்ஸ வித்தா²ரேன அத்த²ங் விப⁴ஜெய்யா’தி? தேஸங் நோ, ப⁴ந்தே,
அம்ஹாகங் ஏதத³ஹோஸி – ‘அயங் கோ² ஆயஸ்மா மஹாகச்சானோ ஸத்து² சேவ ஸங்வண்ணிதோ
ஸம்பா⁴விதோ ச விஞ்ஞூனங் ஸப்³ரஹ்மசாரீனங். பஹோதி சாயஸ்மா மஹாகச்சானோ இமஸ்ஸ
ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங்
அவிப⁴த்தஸ்ஸ வித்தா²ரேன அத்த²ங் விப⁴ஜிதுங். யங்னூன மயங் யேனாயஸ்மா
மஹாகச்சானோ தேனுபஸங்கமெய்யாம; உபஸங்கமித்வா ஆயஸ்மந்தங் மஹாகச்சானங்
ஏதமத்த²ங் படிபுச்செ²ய்யாமா’தி. அத² கோ² மயங், ப⁴ந்தே, யேனாயஸ்மா
மஹாகச்சானோ தேனுபஸங்கமிம்ஹ; உபஸங்கமித்வா ஆயஸ்மந்தங் மஹாகச்சானங் ஏதமத்த²ங்
படிபுச்சி²ம்ஹ. தேஸங் நோ, ப⁴ந்தே, ஆயஸ்மதா மஹாகச்சானேன இமேஹி ஆகாரேஹி
இமேஹி பதே³ஹி இமேஹி ப்³யஞ்ஜனேஹி அத்தோ² விப⁴த்தோ’’தி.
‘‘பண்டி³தோ, பி⁴க்க²வே, மஹாகச்சானோ; மஹாபஞ்ஞோ,
பி⁴க்க²வே மஹாகச்சானோ. மங் சேபி தும்ஹே, பி⁴க்க²வே, ஏதமத்த²ங்
படிபுச்செ²ய்யாத², அஹம்பி தங் ஏவமேவங் ப்³யாகரெய்யங் யதா² தங் மஹாகச்சானேன
ப்³யாகதங். ஏஸோ, சேவேதஸ்ஸ அத்தோ². ஏவஞ்ச நங் தா⁴ரேதா²’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
மஹாகச்சானப⁴த்³தே³கரத்தஸுத்தங் நிட்டி²தங் ததியங்.
4. லோமஸகங்கி³யப⁴த்³தே³கரத்தஸுத்தங்
286. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா லோமஸகங்கி³யோ [லோமஸககங்கி³யோ (டீகா)]
ஸக்கேஸு விஹரதி கபிலவத்து²ஸ்மிங் நிக்³ரோதா⁴ராமே. அத² கோ² சந்த³னோ
தே³வபுத்தோ அபி⁴க்கந்தாய ரத்தியா அபி⁴க்கந்தவண்ணோ கேவலகப்பங்
நிக்³ரோதா⁴ராமங் ஓபா⁴ஸெத்வா யேனாயஸ்மா லோமஸகங்கி³யோ தேனுபஸங்கமி;
உபஸங்கமித்வா ஏகமந்தங் அட்டா²ஸி. ஏகமந்தங் டி²தோ கோ² சந்த³னோ தே³வபுத்தோ
ஆயஸ்மந்தங் லோமஸகங்கி³யங் ஏதத³வோச – ‘‘தா⁴ரேஸி த்வங், பி⁴க்கு²,
ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்சா’’தி? ‘‘ந
கோ² அஹங், ஆவுஸோ, தா⁴ரேமி ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச.
த்வங் பனாவுஸோ, தா⁴ரேஸி ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்சா’’தி?
‘‘அஹம்பி கோ², பி⁴க்கு², ந தா⁴ரேமி ப⁴த்³தே³கரத்தஸ்ஸ உத்³தே³ஸஞ்ச
விப⁴ங்க³ஞ்ச. தா⁴ரேஸி பன த்வங், பி⁴க்கு², ப⁴த்³தே³கரத்தியோ கா³தா²’’தி?
‘‘ந கோ² அஹங், ஆவுஸோ, தா⁴ரேமி ப⁴த்³தே³கரத்தியோ கா³தா². த்வங் பனாவுஸோ,
தா⁴ரேஸி ப⁴த்³தே³கரத்தியோ கா³தா²’’தி? ‘‘தா⁴ரேமி கோ² அஹங், பி⁴க்கு²,
ப⁴த்³தே³கரத்தியோ கா³தா²’’தி. ‘‘யதா² கத²ங் பன த்வங், ஆவுஸோ, தா⁴ரேஸி
ப⁴த்³தே³கரத்தியோ கா³தா²’’தி? ‘‘ஏகமித³ங், பி⁴க்கு², ஸமயங் ப⁴க³வா தே³வேஸு
தாவதிங்ஸேஸு விஹரதி பாரிச்ச²த்தகமூலே பண்டு³கம்ப³லஸிலாயங். தத்ர ப⁴க³வா
தே³வானங் தாவதிங்ஸானங் ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச அபா⁴ஸி –
‘‘அதீதங் நான்வாக³மெய்ய, நப்படிகங்கே² அனாக³தங்;
யத³தீதங் பஹீனங் தங், அப்பத்தஞ்ச அனாக³தங்.
‘‘பச்சுப்பன்னஞ்ச யோ த⁴ம்மங், தத்த² தத்த² விபஸ்ஸதி;
அஸங்ஹீரங் அஸங்குப்பங், தங் வித்³வா மனுப்³ரூஹயே.
‘‘அஜ்ஜேவ கிச்சமாதப்பங், கோ ஜஞ்ஞா மரணங் ஸுவே;
ந ஹி நோ ஸங்க³ரங் தேன, மஹாஸேனேன மச்சுனா.
‘‘ஏவங் விஹாரிங் ஆதாபிங், அஹோரத்தமதந்தி³தங்;
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
‘‘ஏவங் கோ² அஹங், பி⁴க்கு², தா⁴ரேமி ப⁴த்³தே³கரத்தியோ
கா³தா². உக்³க³ண்ஹாஹி த்வங், பி⁴க்கு², ப⁴த்³தே³கரத்தஸ்ஸ உத்³தே³ஸஞ்ச
விப⁴ங்க³ஞ்ச; பரியாபுணாஹி த்வங் , பி⁴க்கு²,
ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச; தா⁴ரேஹி த்வங், பி⁴க்கு²,
ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச. அத்த²ஸங்ஹிதோ, பி⁴க்கு²,
ப⁴த்³தே³கரத்தஸ்ஸ உத்³தே³ஸோ ச விப⁴ங்கோ³ ச ஆதி³ப்³ரஹ்மசரியகோ’’தி. இத³மவோச
சந்த³னோ தே³வபுத்தோ. இத³ங் வத்வா தத்தே²வந்தரதா⁴யி.
287. அத² கோ² ஆயஸ்மா லோமஸகங்கி³யோ தஸ்ஸா ரத்தியா அச்சயேன ஸேனாஸனங் ஸங்ஸாமெத்வா பத்தசீவரமாதா³ய யேன ஸாவத்தி² தேன
சாரிகங் பக்காமி. அனுபுப்³பே³ன சாரிகங் சரமானோ யேன ஸாவத்தி² ஜேதவனங்
அனாத²பிண்டி³கஸ்ஸ ஆராமோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா லோமஸகங்கி³யோ ப⁴க³வந்தங் ஏதத³வோச –
‘‘ஏகமிதா³ஹங், ப⁴ந்தே, ஸமயங் ஸக்கேஸு விஹராமி
கபிலவத்து²ஸ்மிங் நிக்³ரோதா⁴ராமே. அத² கோ², ப⁴ந்தே, அஞ்ஞதரோ தே³வபுத்தோ
அபி⁴க்கந்தாய ரத்தியா அபி⁴க்கந்தவண்ணோ கேவலகப்பங் நிக்³ரோதா⁴ராமங்
ஓபா⁴ஸெத்வா யேனாஹங் தேனுபஸங்கமி; உபஸங்கமித்வா ஏகமந்தங் அட்டா²ஸி. ஏகமந்தங்
டி²தோ கோ², ப⁴ந்தே, ஸோ தே³வபுத்தோ மங் ஏதத³வோச – ‘தா⁴ரேஸி த்வங்,
பி⁴க்கு², ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்சா’தி? ஏவங் வுத்தே
அஹங், ப⁴ந்தே, தங் தே³வபுத்தங் ஏதத³வோசங் – ‘ந கோ² அஹங், ஆவுஸோ, தா⁴ரேமி
ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச. த்வங் பனாவுஸோ, தா⁴ரேஸி
ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்சா’தி? ‘அஹம்பி கோ², பி⁴க்கு², ந
தா⁴ரேமி ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச. தா⁴ரேஸி பன த்வங்,
பி⁴க்கு², ப⁴த்³தே³கரத்தியோ கா³தா²’தி? ‘ந கோ² அஹங், ஆவுஸோ, தா⁴ரேமி
ப⁴த்³தே³கரத்தியோ கா³தா². த்வங் பனாவுஸோ, தா⁴ரேஸி ப⁴த்³தே³கரத்தியோ
கா³தா²’தி? ‘தா⁴ரேமி கோ² அஹங், பி⁴க்கு², ப⁴த்³தே³கரத்தியோ கா³தா²’தி.
‘யதா² கத²ங் பன த்வங், ஆவுஸோ, தா⁴ரேஸி ப⁴த்³தே³கரத்தியோ கா³தா²’தி?
ஏகமித³ங், பி⁴க்கு², ஸமயங் ப⁴க³வா தே³வேஸு தாவதிங்ஸேஸு விஹரதி
பாரிச்ச²த்தகமூலே பண்டு³கம்ப³லஸிலாயங் . தத்ர கோ² ப⁴க³வா தே³வானங் தாவதிங்ஸானங் ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச அபா⁴ஸி –
‘‘அதீதங் நான்வாக³மெய்ய…பே॰…
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
‘‘ஏவங் கோ² அஹங், பி⁴க்கு²,
தா⁴ரேமி ப⁴த்³தே³கரத்தியோ கா³தா². உக்³க³ண்ஹாஹி த்வங், பி⁴க்கு²,
ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச; பரியாபுணாஹி த்வங், பி⁴க்கு²,
ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச; தா⁴ரேஹி
த்வங், பி⁴க்கு², ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச.
அத்த²ஸங்ஹிதோ, பி⁴க்கு², ப⁴த்³தே³கரத்தஸ்ஸ உத்³தே³ஸோ ச விப⁴ங்கோ³ ச
ஆதி³ப்³ரஹ்மசரியகோ’தி. இத³மவோச, ப⁴ந்தே, ஸோ தே³வபுத்தோ; இத³ங் வத்வா
தத்தே²வந்தரதா⁴யி. ஸாது⁴ மே, ப⁴ந்தே, ப⁴க³வா ப⁴த்³தே³கரத்தஸ்ஸ உத்³தே³ஸஞ்ச
விப⁴ங்க³ஞ்ச தே³ஸேதூ’’தி.
288.
‘‘ஜானாஸி பன த்வங், பி⁴க்கு², தங் தே³வபுத்த’’ந்தி? ‘‘ந கோ² அஹங், ப⁴ந்தே,
ஜானாமி தங் தே³வபுத்த’’ந்தி. ‘‘சந்த³னோ நாம ஸோ, பி⁴க்கு², தே³வபுத்தோ.
சந்த³னோ, பி⁴க்கு², தே³வபுத்தோ அட்டி²ங் கத்வா [அட்டி²கத்வா (ஸீ॰ ஸ்யா॰ கங்॰ பீ॰)] மனஸிகத்வா ஸப்³ப³சேதஸா [ஸப்³ப³ங் சேதஸோ (ஸீ॰ ஸ்யா॰ கங்॰ பீ॰), ஸப்³ப³ங் சேதஸா (க॰)]
ஸமன்னாஹரித்வா ஓஹிதஸோதோ த⁴ம்மங் ஸுணாதி. தேன ஹி, பி⁴க்கு², ஸுணாஹி,
ஸாது⁴கங் மனஸி கரோஹி; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² ஆயஸ்மா
லோமஸகங்கி³யோ ப⁴க³வதோ பச்சஸ்ஸோஸி. ப⁴க³வா ஏதத³வோச –
‘‘அதீதங் நான்வாக³மெய்ய, நப்படிகங்கே² அனாக³தங்;
யத³தீதங் பஹீனங் தங், அப்பத்தஞ்ச அனாக³தங்.
‘‘பச்சுப்பன்னஞ்ச யோ த⁴ம்மங், தத்த² தத்த² விபஸ்ஸதி;
அஸங்ஹீரங் அஸங்குப்பங், தங் வித்³வா மனுப்³ரூஹயே.
‘‘அஜ்ஜேவ கிச்சமாதப்பங், கோ ஜஞ்ஞா மரணங் ஸுவே;
ந ஹி நோ ஸங்க³ரங் தேன, மஹாஸேனேன மச்சுனா;
‘‘ஏவங் விஹாரிங் ஆதாபிங், அஹோரத்தமதந்தி³தங்;
தங் வே ப⁴த்³தே³கரத்தோதி, ஸந்தோ ஆசிக்க²தே முனி’’.
‘‘கத²ஞ்ச, பி⁴க்கு², அதீதங் அன்வாக³மேதி…பே॰… ஏவங் கோ², பி⁴க்கு², அதீதங் அன்வாக³மேதி. கத²ஞ்ச ,
பி⁴க்கு², அதீதங் நான்வாக³மேதி…பே॰… ஏவங் கோ², பி⁴க்கு², அதீதங்
நான்வாக³மேதி. கத²ஞ்ச, பி⁴க்கு², அனாக³தங் படிகங்க²தி…பே॰… ஏவங் கோ²,
பி⁴க்கு², அனாக³தங் படிகங்க²தி. கத²ஞ்ச, பி⁴க்கு², அனாக³தங்
நப்படிகங்க²தி…பே॰… ஏவங் கோ², பி⁴க்கு², அனாக³தங்
நப்படிகங்க²தி. கத²ஞ்ச, பி⁴க்கு², பச்சுப்பன்னேஸு த⁴ம்மேஸு ஸங்ஹீரதி…பே॰…
ஏவங் கோ², பி⁴க்கு², பச்சுப்பன்னேஸு த⁴ம்மேஸு ஸங்ஹீரதி. கத²ஞ்ச, பி⁴க்கு²,
பச்சுப்பன்னேஸு த⁴ம்மேஸு ந ஸங்ஹீரதி…பே॰… ஏவங் கோ², பி⁴க்கு²,
பச்சுப்பன்னேஸு த⁴ம்மேஸு ந ஸங்ஹீரதி.
‘‘அதீதங் நான்வாக³மெய்ய, நப்படிகங்கே² அனாக³தங்;
யத³தீதங் பஹீனங் தங், அப்பத்தஞ்ச அனாக³தங்.
‘‘பச்சுப்பன்னஞ்ச யோ த⁴ம்மங், தத்த² தத்த² விபஸ்ஸதி;
அஸங்ஹீரங் அஸங்குப்பங், தங் வித்³வா மனுப்³ரூஹயே.
‘‘அஜ்ஜேவ கிச்சமாதப்பங், கோ ஜஞ்ஞா மரணங் ஸுவே;
ந ஹி நோ ஸங்க³ரங் தேன, மஹாஸேனேன மச்சுனா.
‘‘ஏவங் விஹாரிங் ஆதாபிங், அஹோரத்தமதந்தி³தங்;
தங் வே ப⁴த்³தே³கரத்தோதி, ஸந்தோ ஆசிக்க²தே முனீ’’தி.
இத³மவோச ப⁴க³வா. அத்தமனோ ஆயஸ்மா லோமஸகங்கி³யோ ப⁴க³வதோ பா⁴ஸிதங் அபி⁴னந்தீ³தி.
லோமஸகங்கி³யப⁴த்³தே³கரத்தஸுத்தங் நிட்டி²தங் சதுத்த²ங்.
5. சூளகம்மவிப⁴ங்க³ஸுத்தங் [ஸுப⁴ஸுத்தந்திபி வுச்சதி]
289. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே,
அனாத²பிண்டி³கஸ்ஸ ஆராமே. அத² கோ² ஸுபோ⁴ மாணவோ தோதெ³ய்யபுத்தோ யேன ப⁴க³வா
தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங்
ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஸுபோ⁴
மாணவோ தோதெ³ய்யபுத்தோ ப⁴க³வந்தங் ஏதத³வோச –
‘‘கோ நு கோ², போ⁴ கோ³தம, ஹேது கோ பச்சயோ யேன
மனுஸ்ஸானங்யேவ ஸதங் மனுஸ்ஸபூ⁴தானங் தி³ஸ்ஸந்தி ஹீனப்பணீததா? தி³ஸ்ஸந்தி ஹி,
போ⁴ கோ³தம, மனுஸ்ஸா அப்பாயுகா, தி³ஸ்ஸந்தி தீ³கா⁴யுகா; தி³ஸ்ஸந்தி
ப³வ்ஹாபா³தா⁴ [ப³ஹ்வாபா³தா⁴ (ஸ்யா॰ கங்॰ க॰)],
தி³ஸ்ஸந்தி அப்பாபா³தா⁴; தி³ஸ்ஸந்தி து³ப்³ப³ண்ணா, தி³ஸ்ஸந்தி வண்ணவந்தோ;
தி³ஸ்ஸந்தி அப்பேஸக்கா², தி³ஸ்ஸந்தி மஹேஸக்கா²; தி³ஸ்ஸந்தி அப்பபோ⁴கா³,
தி³ஸ்ஸந்தி மஹாபோ⁴கா³; தி³ஸ்ஸந்தி நீசகுலீனா, தி³ஸ்ஸந்தி உச்சாகுலீனா;
தி³ஸ்ஸந்தி து³ப்பஞ்ஞா, தி³ஸ்ஸந்தி பஞ்ஞவந்தோ [பஞ்ஞாவந்தோ (ஸீ॰ பீ॰)] . கோ நு கோ², போ⁴ கோ³தம, ஹேது கோ பச்சயோ யேன மனுஸ்ஸானங்யேவ ஸதங் மனுஸ்ஸபூ⁴தானங் தி³ஸ்ஸந்தி ஹீனப்பணீததா’’தி?
‘‘கம்மஸ்ஸகா , மாணவ, ஸத்தா கம்மதா³யாதா³ கம்மயோனீ கம்மப³ந்தூ⁴ [கம்மயோனி கம்மப³ந்து⁴ (ஸீ॰)]
கம்மப்படிஸரணா. கம்மங் ஸத்தே விப⁴ஜதி யதி³த³ங் – ஹீனப்பணீததாயாதி. ந கோ²
அஹங் இமஸ்ஸ போ⁴தோ கோ³தமஸ்ஸ ஸங்கி²த்தேன பா⁴ஸிதஸ்ஸ வித்தா²ரேன அத்த²ங்
அவிப⁴த்தஸ்ஸ வித்தா²ரேன அத்த²ங் ஆஜானாமி. ஸாது⁴ மே
ப⁴வங் கோ³தமோ ததா² த⁴ம்மங் தே³ஸேது யதா² அஹங் இமஸ்ஸ போ⁴தோ கோ³தமஸ்ஸ
ஸங்கி²த்தேன பா⁴ஸிதஸ்ஸ வித்தா²ரேன அத்த²ங் அவிப⁴த்தஸ்ஸ வித்தா²ரேன அத்த²ங்
ஆஜானெய்ய’’ந்தி.
290.
‘‘தேன ஹி, மாணவ, ஸுணாஹி, ஸாது⁴கங் மனஸி கரோஹி; பா⁴ஸிஸ்ஸாமீ’’தி. ‘‘ஏவங்,
போ⁴’’தி கோ² ஸுபோ⁴ மாணவோ தோதெ³ய்யபுத்தோ ப⁴க³வதோ பச்சஸ்ஸோஸி. ப⁴க³வா
ஏதத³வோச –
‘‘இத⁴, மாணவ, ஏகச்சோ இத்தீ² வா புரிஸோ வா பாணாதிபாதீ ஹோதி லுத்³தோ³ லோஹிதபாணி ஹதபஹதே நிவிட்டோ² அத³யாபன்னோ பாணபூ⁴தேஸு [ஸப்³ப³பாணபூ⁴தேஸு (ஸீ॰ க॰)]. ஸோ தேன கம்மேன ஏவங் ஸமத்தேன ஏவங் ஸமாதி³ன்னேன [ஸமாதி³ண்ணேன (பீ॰ க॰)] காயஸ்ஸ
பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி. நோ சே
காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி,
ஸசே மனுஸ்ஸத்தங் ஆக³ச்ச²தி யத்த² யத்த² பச்சாஜாயதி அப்பாயுகோ ஹோதி.
அப்பாயுகஸங்வத்தனிகா ஏஸா, மாணவ, படிபதா³ யதி³த³ங் – பாணாதிபாதீ ஹோதி
லுத்³தோ³ லோஹிதபாணி ஹதபஹதே நிவிட்டோ² அத³யாபன்னோ பாணபூ⁴தேஸு.
‘‘இத⁴ பன, மாணவ, ஏகச்சோ இத்தீ² வா புரிஸோ வா
பாணாதிபாதங் பஹாய பாணாதிபாதா படிவிரதோ ஹோதி நிஹிதத³ண்டோ³ நிஹிதஸத்தோ²,
லஜ்ஜீ த³யாபன்னோ ஸப்³ப³பாணபூ⁴தஹிதானுகம்பீ விஹரதி. ஸோ தேன கம்மேன ஏவங்
ஸமத்தேன ஏவங் ஸமாதி³ன்னேன காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங்
உபபஜ்ஜதி. நோ சே காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங்
உபபஜ்ஜதி, ஸசே மனுஸ்ஸத்தங் ஆக³ச்ச²தி யத்த² யத்த²
பச்சாஜாயதி தீ³கா⁴யுகோ ஹோதி. தீ³கா⁴யுகஸங்வத்தனிகா ஏஸா, மாணவ, படிபதா³
யதி³த³ங் – பாணாதிபாதங் பஹாய பாணாதிபாதா படிவிரதோ ஹோதி நிஹிதத³ண்டோ³ நிஹிதஸத்தோ², லஜ்ஜீ த³யாபன்னோ ஸப்³ப³பாணபூ⁴தஹிதானுகம்பீ விஹரதி.
291. ‘‘இத⁴ ,
மாணவ, ஏகச்சோ இத்தீ² வா புரிஸோ வா ஸத்தானங் விஹேட²கஜாதிகோ ஹோதி, பாணினா வா
லெட்³டு³னா வா த³ண்டே³ன வா ஸத்தே²ன வா. ஸோ தேன கம்மேன ஏவங் ஸமத்தேன ஏவங்
ஸமாதி³ன்னேன காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங்
உபபஜ்ஜதி. நோ சே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜதி, ஸசே மனுஸ்ஸத்தங் ஆக³ச்ச²தி யத்த² யத்த² பச்சாஜாயதி
ப³வ்ஹாபா³தோ⁴ ஹோதி. ப³வ்ஹாபா³த⁴ஸங்வத்தனிகா ஏஸா, மாணவ, படிபதா³ யதி³த³ங் –
ஸத்தானங் விஹேட²கஜாதிகோ ஹோதி பாணினா வா லெட்³டு³னா வா த³ண்டே³ன வா ஸத்தே²ன
வா.
‘‘இத⁴ பன, மாணவ, ஏகச்சோ இத்தீ² வா புரிஸோ வா ஸத்தானங்
அவிஹேட²கஜாதிகோ ஹோதி பாணினா வா லெட்³டு³னா வா த³ண்டே³ன வா ஸத்தே²ன வா. ஸோ
தேன கம்மேன ஏவங் ஸமத்தேன ஏவங் ஸமாதி³ன்னேன காயஸ்ஸ பே⁴தா³ பரங் மரணா
ஸுக³திங் ஸக்³க³ங் லோகங் உபபஜ்ஜதி. நோ சே காயஸ்ஸ பே⁴தா³ பரங் மரணா ஸுக³திங்
ஸக்³க³ங் லோகங் உபபஜ்ஜதி, ஸசே மனுஸ்ஸத்தங் ஆக³ச்ச²தி யத்த² யத்த²
பச்சாஜாயதி அப்பாபா³தோ⁴ ஹோதி. அப்பாபா³த⁴ஸங்வத்தனிகா ஏஸா, மாணவ, படிபதா³
யதி³த³ங் – ஸத்தானங் அவிஹேட²கஜாதிகோ ஹோதி பாணினா வா லெட்³டு³னா வா த³ண்டே³ன வா ஸத்தே²ன வா.
292. ‘‘இத⁴, மாணவ, ஏகச்சோ இத்தீ² வா புரிஸோ வா கோத⁴னோ ஹோதி உபாயாஸப³ஹுலோ. அப்பம்பி
வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதிட்டீ²யதி கோபஞ்ச தோ³ஸஞ்ச
அப்பச்சயஞ்ச பாதுகரோதி. ஸோ தேன கம்மேன ஏவங் ஸமத்தேன ஏவங் ஸமாதி³ன்னேன
காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி.
நோ சே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங்
உபபஜ்ஜதி, ஸசே மனுஸ்ஸத்தங் ஆக³ச்ச²தி யத்த² யத்த² பச்சாஜாயதி து³ப்³ப³ண்ணோ
ஹோதி. து³ப்³ப³ண்ணஸங்வத்தனிகா ஏஸா, மாணவ, படிபதா³ யதி³த³ங் – கோத⁴னோ ஹோதி
உபாயாஸப³ஹுலோ; அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி
பதிட்டீ²யதி கோபஞ்ச தோ³ஸஞ்ச அப்பச்சயஞ்ச பாதுகரோதி.
‘‘இத⁴ பன, மாணவ, ஏகச்சோ இத்தீ² வா புரிஸோ வா அக்கோத⁴னோ
ஹோதி அனுபாயாஸப³ஹுலோ; ப³ஹும்பி வுத்தோ ஸமானோ நாபி⁴ஸஜ்ஜதி ந குப்பதி ந
ப்³யாபஜ்ஜதி ந பதிட்டீ²யதி ந கோபஞ்ச தோ³ஸஞ்ச அப்பச்சயஞ்ச பாதுகரோதி. ஸோ தேன
கம்மேன ஏவங் ஸமத்தேன ஏவங் ஸமாதி³ன்னேன காயஸ்ஸ பே⁴தா³ பரங் மரணா ஸுக³திங்
ஸக்³க³ங் லோகங் உபபஜ்ஜதி. நோ சே காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜதி, ஸசே மனுஸ்ஸத்தங் ஆக³ச்ச²தி யத்த² யத்த² பச்சாஜாயதி
பாஸாதி³கோ ஹோதி. பாஸாதி³கஸங்வத்தனிகா ஏஸா, மாணவ, படிபதா³ யதி³த³ங் –
அக்கோத⁴னோ ஹோதி அனுபாயாஸப³ஹுலோ; ப³ஹும்பி வுத்தோ ஸமானோ நாபி⁴ஸஜ்ஜதி ந
குப்பதி ந ப்³யாபஜ்ஜதி ந பதிட்டீ²யதி ந கோபஞ்ச தோ³ஸஞ்ச அப்பச்சயஞ்ச
பாதுகரோதி.
293.
‘‘இத⁴, மாணவ, ஏகச்சோ இத்தீ² வா புரிஸோ வா இஸ்ஸாமனகோ ஹோதி;
பரலாப⁴ஸக்காரக³ருகாரமானநவந்த³னபூஜனாஸு இஸ்ஸதி உபது³ஸ்ஸதி இஸ்ஸங் ப³ந்த⁴தி.
ஸோ தேன கம்மேன ஏவங் ஸமத்தேன ஏவங் ஸமாதி³ன்னேன காயஸ்ஸ பே⁴தா³ பரங் மரணா
அபாயங் து³க்³க³திங் வினிபாதங் நிரயங் உபபஜ்ஜதி. நோ சே காயஸ்ஸ பே⁴தா³ பரங்
மரணா அபாயங் து³க்³க³திங் வினிபாதங் நிரயங் உபபஜ்ஜதி, ஸசே மனுஸ்ஸத்தங்
ஆக³ச்ச²தி யத்த² யத்த² பச்சாஜாயதி அப்பேஸக்கோ² ஹோதி. அப்பேஸக்க²ஸங்வத்தனிகா
ஏஸா, மாணவ, படிபதா³ யதி³த³ங் – இஸ்ஸாமனகோ ஹோதி;
பரலாப⁴ஸக்காரக³ருகாரமானநவந்த³னபூஜனாஸு இஸ்ஸதி உபது³ஸ்ஸதி இஸ்ஸங் ப³ந்த⁴தி.
‘‘இத⁴ பன, மாணவ, ஏகச்சோ இத்தீ²
வா புரிஸோ வா அனிஸ்ஸாமனகோ ஹோதி; பரலாப⁴ஸக்காரக³ருகாரமானநவந்த³னபூஜனாஸு ந
இஸ்ஸதி ந உபது³ஸ்ஸதி ந இஸ்ஸங் ப³ந்த⁴தி. ஸோ தேன கம்மேன ஏவங் ஸமத்தேன ஏவங்
ஸமாதி³ன்னேன காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜதி. நோ
சே காயஸ்ஸ பே⁴தா³ பரங் மரணா ஸுக³திங் ஸக்³க³ங்
லோகங் உபபஜ்ஜதி, ஸசே மனுஸ்ஸத்தங் ஆக³ச்ச²தி யத்த² யத்த² பச்சாஜாயதி
மஹேஸக்கோ² ஹோதி. மஹேஸக்க²ஸங்வத்தனிகா ஏஸா, மாணவ , படிபதா³ யதி³த³ங் – அனிஸ்ஸாமனகோ ஹோதி; பரலாப⁴ஸக்காரக³ருகாரமானநவந்த³னபூஜனாஸு ந இஸ்ஸதி ந உபது³ஸ்ஸதி ந இஸ்ஸங் ப³ந்த⁴தி.
294.
‘‘இத⁴, மாணவ, ஏகச்சோ இத்தீ² வா புரிஸோ வா ந தா³தா ஹோதி ஸமணஸ்ஸ வா
ப்³ராஹ்மணஸ்ஸ வா அன்னங் பானங் வத்த²ங் யானங் மாலாக³ந்த⁴விலேபனங்
ஸெய்யாவஸத²பதீ³பெய்யங். ஸோ தேன கம்மேன ஏவங் ஸமத்தேன ஏவங் ஸமாதி³ன்னேன
காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி.
நோ சே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங்
உபபஜ்ஜதி, ஸசே மனுஸ்ஸத்தங் ஆக³ச்ச²தி யத்த² யத்த² பச்சாஜாயதி அப்பபோ⁴கோ³
ஹோதி. அப்பபோ⁴க³ஸங்வத்தனிகா ஏஸா, மாணவ, படிபதா³ யதி³த³ங் – ந தா³தா ஹோதி ஸமணஸ்ஸ வா ப்³ராஹ்மணஸ்ஸ வா அன்னங் பானங் வத்த²ங் யானங் மாலாக³ந்த⁴விலேபனங் ஸெய்யாவஸத²பதீ³பெய்யங்.
‘‘இத⁴ பன, மாணவ, ஏகச்சோ இத்தீ² வா புரிஸோ வா தா³தா
ஹோதி ஸமணஸ்ஸ வா ப்³ராஹ்மணஸ்ஸ வா அன்னங் பானங் வத்த²ங் யானங்
மாலாக³ந்த⁴விலேபனங் ஸெய்யாவஸத²பதீ³பெய்யங். ஸோ தேன கம்மேன ஏவங் ஸமத்தேன
ஏவங் ஸமாதி³ன்னேன காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங்
உபபஜ்ஜதி. நோ சே காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங்
உபபஜ்ஜதி, ஸசே மனுஸ்ஸத்தங் ஆக³ச்ச²தி யத்த² யத்த² பச்சாஜாயதி மஹாபோ⁴கோ³
ஹோதி. மஹாபோ⁴க³ஸங்வத்தனிகா ஏஸா, மாணவ, படிபதா³ யதி³த³ங் – தா³தா ஹோதி
ஸமணஸ்ஸ வா ப்³ராஹ்மணஸ்ஸ வா அன்னங் பானங் வத்த²ங் யானங் மாலாக³ந்த⁴விலேபனங் ஸெய்யாவஸத²பதீ³பெய்யங்.
295.
‘‘இத⁴, மாணவ, ஏகச்சோ இத்தீ² வா புரிஸோ வா த²த்³தோ⁴ ஹோதி அதிமானீ –
அபி⁴வாதே³தப்³ப³ங் ந அபி⁴வாதே³தி, பச்சுட்டா²தப்³ப³ங் ந பச்சுட்டே²தி,
ஆஸனாரஹஸ்ஸ ந ஆஸனங் தே³தி, மக்³கா³ரஹஸ்ஸ ந மக்³க³ங் தே³தி, ஸக்காதப்³ப³ங் ந
ஸக்கரோதி, க³ருகாதப்³ப³ங் ந க³ருகரோதி, மானேதப்³ப³ங் ந மானேதி,
பூஜேதப்³ப³ங் ந பூஜேதி. ஸோ தேன கம்மேன ஏவங் ஸமத்தேன ஏவங் ஸமாதி³ன்னேன
காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி.
நோ சே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங்
உபபஜ்ஜதி, ஸசே மனுஸ்ஸத்தங் ஆக³ச்ச²தி யத்த² யத்த² பச்சாஜாயதி நீசகுலீனோ
ஹோதி. நீசகுலீனஸங்வத்தனிகா ஏஸா, மாணவ, படிபதா³ யதி³த³ங் – த²த்³தோ⁴ ஹோதி
அதிமானீ; அபி⁴வாதே³தப்³ப³ங் ந அபி⁴வாதே³தி, பச்சுட்டா²தப்³ப³ங் ந
பச்சுட்டே²தி, ஆஸனாரஹஸ்ஸ ந ஆஸனங் தே³தி, மக்³கா³ரஹஸ்ஸ ந மக்³க³ங் தே³தி,
ஸக்காதப்³ப³ங் ந ஸக்கரோதி, க³ருகாதப்³ப³ங் ந க³ருகரோதி, மானேதப்³ப³ங் ந
மானேதி, பூஜேதப்³ப³ங் ந பூஜேதி.
‘‘இத⁴ பன, மாணவ, ஏகச்சோ இத்தீ²
வா புரிஸோ வா அத்த²த்³தோ⁴ ஹோதி அனதிமானீ; அபி⁴வாதே³தப்³ப³ங் அபி⁴வாதே³தி,
பச்சுட்டா²தப்³ப³ங் பச்சுட்டே²தி, ஆஸனாரஹஸ்ஸ ஆஸனங் தே³தி, மக்³கா³ரஹஸ்ஸ
மக்³க³ங் தே³தி, ஸக்காதப்³ப³ங் ஸக்கரோதி, க³ருகாதப்³ப³ங் க³ருகரோதி,
மானேதப்³ப³ங் மானேதி, பூஜேதப்³ப³ங் பூஜேதி. ஸோ தேன கம்மேன ஏவங் ஸமத்தேன
ஏவங் ஸமாதி³ன்னேன காயஸ்ஸ பே⁴தா³ பரங் மரணா ஸுக³திங்
ஸக்³க³ங் லோகங் உபபஜ்ஜதி. நோ சே காயஸ்ஸ பே⁴தா³ பரங் மரணா ஸுக³திங்
ஸக்³க³ங் லோகங் உபபஜ்ஜதி, ஸசே மனுஸ்ஸத்தங்
ஆக³ச்ச²தி யத்த² யத்த² பச்சாஜாயதி உச்சாகுலீனோ ஹோதி. உச்சாகுலீனஸங்வத்தனிகா
ஏஸா, மாணவ, படிபதா³ யதி³த³ங் – அத்த²த்³தோ⁴ ஹோதி அனதிமானீ;
அபி⁴வாதே³தப்³ப³ங் அபி⁴வாதே³தி, பச்சுட்டா²தப்³ப³ங் பச்சுட்டே²தி,
ஆஸனாரஹஸ்ஸ ஆஸனங் தே³தி, மக்³கா³ரஹஸ்ஸ மக்³க³ங் தே³தி, ஸக்காதப்³ப³ங்
ஸக்கரோதி, க³ருகாதப்³ப³ங் க³ருகரோதி, மானேதப்³ப³ங் மானேதி, பூஜேதப்³ப³ங்
பூஜேதி.
296.
‘‘இத⁴, மாணவ, ஏகச்சோ இத்தீ² வா புரிஸோ வா ஸமணங் வா ப்³ராஹ்மணங் வா
உபஸங்கமித்வா ந பரிபுச்சி²தா ஹோதி – ‘கிங், ப⁴ந்தே, குஸலங், கிங் அகுஸலங்;
கிங் ஸாவஜ்ஜங், கிங் அனவஜ்ஜங்; கிங் ஸேவிதப்³ப³ங், கிங் ந ஸேவிதப்³ப³ங்;
கிங் மே கரீயமானங் தீ³க⁴ரத்தங் அஹிதாய து³க்கா²ய ஹோதி, கிங் வா பன மே
கரீயமானங் தீ³க⁴ரத்தங் ஹிதாய ஸுகா²ய ஹோதீ’தி? ஸோ தேன கம்மேன ஏவங் ஸமத்தேன
ஏவங் ஸமாதி³ன்னேன காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜதி. நோ சே காயஸ்ஸ பே⁴தா³ பரங் மரணா அபாயங் து³க்³க³திங்
வினிபாதங் நிரயங் உபபஜ்ஜதி, ஸசே மனுஸ்ஸத்தங் ஆக³ச்ச²தி யத்த² யத்த²
பச்சாஜாயதி து³ப்பஞ்ஞோ ஹோதி. து³ப்பஞ்ஞஸங்வத்தனிகா ஏஸா, மாணவ, படிபதா³
யதி³த³ங் – ஸமணங் வா ப்³ராஹ்மணங் வா உபஸங்கமித்வா ந பரிபுச்சி²தா ஹோதி –
‘கிங், ப⁴ந்தே, குஸலங், கிங் அகுஸலங்; கிங் ஸாவஜ்ஜங், கிங் அனவஜ்ஜங்; கிங்
ஸேவிதப்³ப³ங், கிங் ந ஸேவிதப்³ப³ங் ; கிங் மே கரீயமானங் தீ³க⁴ரத்தங் அஹிதாய து³க்கா²ய ஹோதி, கிங் வா பன மே கரீயமானங் தீ³க⁴ரத்தங் ஹிதாய ஸுகா²ய ஹோதீ’’’தி?
‘‘இத⁴ பன, மாணவ, ஏகச்சோ இத்தீ²
வா புரிஸோ வா ஸமணங் வா ப்³ராஹ்மணங் வா உபஸங்கமித்வா பரிபுச்சி²தா ஹோதி –
‘கிங், ப⁴ந்தே, குஸலங், கிங் அகுஸலங்; கிங் ஸாவஜ்ஜங், கிங் அனவஜ்ஜங்; கிங்
ஸேவிதப்³ப³ங், கிங் ந ஸேவிதப்³ப³ங்; கிங் மே கரீயமானங் தீ³க⁴ரத்தங் அஹிதாய
து³க்கா²ய ஹோதி, கிங் வா பன மே கரீயமானங் தீ³க⁴ரத்தங் ஹிதாய ஸுகா²ய
ஹோதீ’தி? ஸோ தேன கம்மேன ஏவங் ஸமத்தேன ஏவங் ஸமாதி³ன்னேன காயஸ்ஸ பே⁴தா³ பரங்
மரணா ஸுக³திங் ஸக்³க³ங் லோகங் உபபஜ்ஜதி. நோ சே
காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜதி, ஸசே
மனுஸ்ஸத்தங் ஆக³ச்ச²தி யத்த² யத்த² பச்சாஜாயதி மஹாபஞ்ஞோ ஹோதி.
மஹாபஞ்ஞஸங்வத்தனிகா ஏஸா, மாணவ, படிபதா³ யதி³த³ங் – ஸமணங் வா ப்³ராஹ்மணங் வா
உபஸங்கமித்வா பரிபுச்சி²தா ஹோதி – ‘கிங், ப⁴ந்தே, குஸலங், கிங் அகுஸலங்;
கிங் ஸாவஜ்ஜங், கிங் அனவஜ்ஜங்; கிங் ஸேவிதப்³ப³ங் ,
கிங் ந ஸேவிதப்³ப³ங்; கிங் மே கரீயமானங் தீ³க⁴ரத்தங் அஹிதாய து³க்கா²ய
ஹோதி, கிங் வா பன மே கரீயமானங் தீ³க⁴ரத்தங் ஹிதாய ஸுகா²ய ஹோதீ’’’தி?
297.
‘‘இதி கோ², மாணவ, அப்பாயுகஸங்வத்தனிகா படிபதா³ அப்பாயுகத்தங் உபனேதி,
தீ³கா⁴யுகஸங்வத்தனிகா படிபதா³ தீ³கா⁴யுகத்தங் உபனேதி;
ப³வ்ஹாபா³த⁴ஸங்வத்தனிகா படிபதா³ ப³வ்ஹாபா³த⁴த்தங் உபனேதி,
அப்பாபா³த⁴ஸங்வத்தனிகா படிபதா³ அப்பாபா³த⁴த்தங் உபனேதி;
து³ப்³ப³ண்ணஸங்வத்தனிகா படிபதா³ து³ப்³ப³ண்ணத்தங்
உபனேதி, பாஸாதி³கஸங்வத்தனிகா படிபதா³ பாஸாதி³கத்தங் உபனேதி;
அப்பேஸக்க²ஸங்வத்தனிகா படிபதா³ அப்பேஸக்க²த்தங் உபனேதி,
மஹேஸக்க²ஸங்வத்தனிகா படிபதா³ மஹேஸக்க²த்தங் உபனேதி; அப்பபோ⁴க³ஸங்வத்தனிகா
படிபதா³ அப்பபோ⁴க³த்தங் உபனேதி, மஹாபோ⁴க³ஸங்வத்தனிகா படிபதா³ மஹாபோ⁴க³த்தங்
உபனேதி; நீசகுலீனஸங்வத்தனிகா படிபதா³ நீசகுலீனத்தங் உபனேதி,
உச்சாகுலீனஸங்வத்தனிகா படிபதா³ உச்சாகுலீனத்தங் உபனேதி;
து³ப்பஞ்ஞஸங்வத்தனிகா படிபதா³ து³ப்பஞ்ஞத்தங் உபனேதி, மஹாபஞ்ஞஸங்வத்தனிகா
படிபதா³ மஹாபஞ்ஞத்தங் உபனேதி. கம்மஸ்ஸகா, மாணவ, ஸத்தா கம்மதா³யாதா³
கம்மயோனீ கம்மப³ந்தூ⁴ கம்மப்படிஸரணா. கம்மங் ஸத்தே விப⁴ஜதி யதி³த³ங் –
ஹீனப்பணீததாயா’’தி.
ஏவங் வுத்தே, ஸுபோ⁴ மாணவோ தோதெ³ய்யபுத்தோ ப⁴க³வந்தங்
ஏதத³வோச – ‘‘அபி⁴க்கந்தங், போ⁴ கோ³தம, அபி⁴க்கந்தங், போ⁴ கோ³தம!
ஸெய்யதா²பி, போ⁴ கோ³தம, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா
விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங்
தா⁴ரெய்ய – ‘சக்கு²மந்தோ ரூபானி த³க்க²ந்தீ’தி; ஏவமேவங் போ⁴தா கோ³தமேன
அனேகபரியாயேன த⁴ம்மோ பகாஸிதோ. ஏஸாஹங் ப⁴வந்தங் கோ³தமங் ஸரணங் க³ச்சா²மி
த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³
பாணுபேதங் ஸரணங் க³த’’ந்தி.
சூளகம்மவிப⁴ங்க³ஸுத்தங் நிட்டி²தங் பஞ்சமங்.
6. மஹாகம்மவிப⁴ங்க³ஸுத்தங்
298. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மா ஸமித்³தி⁴ அரஞ்ஞகுடிகாயங்
விஹரதி. அத² கோ² போதலிபுத்தோ பரிப்³பா³ஜகோ ஜங்கா⁴விஹாரங் அனுசங்கமமானோ
அனுவிசரமானோ யேனாயஸ்மா ஸமித்³தி⁴ தேனுபஸங்கமி; உபஸங்கமித்வா ஆயஸ்மதா
ஸமித்³தி⁴னா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா
ஏகமந்தங் நிஸீதி³. ஏகமந்தங் நிஸின்னோ கோ² போதலிபுத்தோ பரிப்³பா³ஜகோ
ஆயஸ்மந்தங் ஸமித்³தி⁴ங் ஏதத³வோச – ‘‘ஸம்முகா² மேதங், ஆவுஸோ ஸமித்³தி⁴,
ஸமணஸ்ஸ கோ³தமஸ்ஸ ஸுதங், ஸம்முகா² படிக்³க³ஹிதங் – ‘மோக⁴ங் காயகம்மங் மோக⁴ங்
வசீகம்மங், மனோகம்மமேவ ஸச்ச’ந்தி. அத்தி² ச ஸா [அத்தி² சேஸா (ஸீ॰ க॰)] ஸமாபத்தி யங் ஸமாபத்திங் ஸமாபன்னோ ந கிஞ்சி வேதி³யதீ’’தி? ‘‘மா ஹேவங், ஆவுஸோ போதலிபுத்த, அவச; (மா ஹேவங், ஆவுஸோ போதலிபுத்த, அவச;) [( ) ஸ்யா॰ கங்॰ பொத்த²கேஸு நத்தி²]
மா ப⁴க³வந்தங் அப்³பா⁴சிக்கி². ந ஹி ஸாது⁴ ப⁴க³வதோ அப்³ப⁴க்கா²னங். ந ஹி
ப⁴க³வா ஏவங் வதெ³ய்ய – ‘மோக⁴ங் காயகம்மங் மோக⁴ங் வசீகம்மங், மனோகம்மமேவ
ஸச்ச’ந்தி. அத்தி² ச கோ² [அத்தி² சேவ கோ² (ஸீ॰ க॰)]
ஸா, ஆவுஸோ, ஸமாபத்தி யங் ஸமாபத்திங் ஸமாபன்னோ ந கிஞ்சி வேதி³யதீ’’தி.
‘‘கீவசிரங் பப்³ப³ஜிதோஸி, ஆவுஸோ ஸமித்³தீ⁴’’தி? ‘‘ந சிரங், ஆவுஸோ! தீணி
வஸ்ஸானீ’’தி. ‘‘எத்த² தா³னி மயங் தே²ரே பி⁴க்கூ² கிங் வக்கா²ம, யத்ர ஹி நாம
ஏவங்னவோ பி⁴க்கு² [நவகேன பி⁴க்கு²னா (க॰)] ஸத்தா²ரங் பரிரக்கி²தப்³ப³ங் மஞ்ஞிஸ்ஸதி. ஸஞ்சேதனிகங், ஆவுஸோ ஸமித்³தி⁴, கம்மங்
கத்வா காயேன வாசாய மனஸா கிங் ஸோ வேதி³யதீ’’தி? ‘‘ஸஞ்சேதனிகங், ஆவுஸோ
போதலிபுத்த, கம்மங் கத்வா காயேன வாசாய மனஸா து³க்க²ங் ஸோ வேதி³யதீ’’தி. அத²
கோ² போதலிபுத்தோ பரிப்³பா³ஜகோ ஆயஸ்மதோ ஸமித்³தி⁴ஸ்ஸ பா⁴ஸிதங் நேவ
அபி⁴னந்தி³ நப்படிக்கோஸி; அனபி⁴னந்தி³த்வா அப்படிக்கோஸித்வா உட்டா²யாஸனா
பக்காமி.
299. அத² கோ² ஆயஸ்மா ஸமித்³தி⁴ அசிரபக்கந்தே போதலிபுத்தே பரிப்³பா³ஜகே யேனாயஸ்மா ஆனந்தோ³ தேனுபஸங்கமி; உபஸங்கமித்வா
ஆயஸ்மதா ஆனந்தே³ன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங்
வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஸமித்³தி⁴
யாவதகோ அஹோஸி போதலிபுத்தேன பரிப்³பா³ஜகேன ஸத்³தி⁴ங் கதா²ஸல்லாபோ தங்
ஸப்³ப³ங் ஆயஸ்மதோ ஆனந்த³ஸ்ஸ ஆரோசேஸி.
ஏவங் வுத்தே, ஆயஸ்மா ஆனந்தோ³
ஆயஸ்மந்தங் ஸமித்³தி⁴ங் ஏதத³வோச – ‘‘அத்தி² கோ² இத³ங், ஆவுஸோ ஸமித்³தி⁴,
கதா²பாப⁴தங் ப⁴க³வந்தங் த³ஸ்ஸனாய. ஆயாமாவுஸோ
ஸமித்³தி⁴, யேன ப⁴க³வா தேனுபஸங்கமிஸ்ஸாம; உபஸங்கமித்வா ஏதமத்த²ங் ப⁴க³வதோ
ஆரோசெஸ்ஸாம. யதா² நோ ப⁴க³வா ப்³யாகரிஸ்ஸதி ததா² நங் தா⁴ரெஸ்ஸாமா’’தி.
‘‘ஏவமாவுஸோ’’தி கோ² ஆயஸ்மா ஸமித்³தி⁴ ஆயஸ்மதோ ஆனந்த³ஸ்ஸ பச்சஸ்ஸோஸி.
அத² கோ² ஆயஸ்மா ச ஆனந்தோ³ ஆயஸ்மா ச ஸமித்³தி⁴ யேன
ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³ங்ஸு. ஏகமந்தங் நிஸின்னோ கோ² ஆயஸ்மா ஆனந்தோ³ யாவதகோ அஹோஸி ஆயஸ்மதோ
ஸமித்³தி⁴ஸ்ஸ போதலிபுத்தேன பரிப்³பா³ஜகேன ஸத்³தி⁴ங்
கதா²ஸல்லாபோ தங் ஸப்³ப³ங் ப⁴க³வதோ ஆரோசேஸி. ஏவங் வுத்தே, ப⁴க³வா
ஆயஸ்மந்தங் ஆனந்த³ங் ஏதத³வோச – ‘‘த³ஸ்ஸனம்பி கோ² அஹங், ஆனந்த³,
போதலிபுத்தஸ்ஸ பரிப்³பா³ஜகஸ்ஸ நாபி⁴ஜானாமி, குதோ பனேவரூபங் கதா²ஸல்லாபங்?
இமினா ச, ஆனந்த³, ஸமித்³தி⁴னா மோக⁴புரிஸேன போதலிபுத்தஸ்ஸ பரிப்³பா³ஜகஸ்ஸ
விப⁴ஜ்ஜப்³யாகரணீயோ பஞ்ஹோ ஏகங்ஸேன ப்³யாகதோ’’தி. ஏவங் வுத்தே, ஆயஸ்மா
உதா³யீ ப⁴க³வந்தங் ஏதத³வோச – ‘‘ஸசே பன [கிங் பன (க॰)], ப⁴ந்தே, ஆயஸ்மதா ஸமித்³தி⁴னா இத³ங் ஸந்தா⁴ய பா⁴ஸிதங் – யங் கிஞ்சி வேத³யிதங் தங் து³க்க²ஸ்மி’’ந்தி.
300. அத² கோ² [ஏவங் வுத்தே (ஸ்யா॰ கங்॰)] ப⁴க³வா ஆயஸ்மந்தங் ஆனந்த³ங் ஆமந்தேஸி – ‘‘பஸ்ஸஸி நோ த்வங், ஆனந்த³, இமஸ்ஸ உதா³யிஸ்ஸ மோக⁴புரிஸஸ்ஸ உம்மங்க³ங் [உம்மக்³க³ங் (ஸீ॰ ஸ்யா॰ கங்॰ பீ॰), உமங்க³ங் (க॰)]? அஞ்ஞாஸிங் கோ² அஹங், ஆனந்த³ – ‘இதா³னேவாயங் உதா³யீ மோக⁴புரிஸோ உம்முஜ்ஜமானோ அயோனிஸோ உம்முஜ்ஜிஸ்ஸதீ’தி. ஆதி³ங்யேவ [ஆதி³ஸோவ (ஸீ॰ பீ॰), ஆதி³யேவ (க॰)], ஆனந்த³, போதலிபுத்தேன பரிப்³பா³ஜகேன திஸ்ஸோ வேத³னா புச்சி²தா. ஸசாயங், ஆனந்த³, ஸமித்³தி⁴ மோக⁴புரிஸோ போதலிபுத்தஸ்ஸ
பரிப்³பா³ஜகஸ்ஸ ஏவங் புட்டோ² ஏவங் ப்³யாகரெய்ய – ‘ஸஞ்சேதனிகங், ஆவுஸோ
போதலிபுத்த, கம்மங் கத்வா காயேன வாசாய மனஸா ஸுக²வேத³னீயங் ஸுக²ங் ஸோ
வேத³யதி; ஸஞ்சேதனிகங், ஆவுஸோ போதலிபுத்த, கம்மங் கத்வா காயேன வாசாய மனஸா
து³க்க²வேத³னீயங் து³க்க²ங் ஸோ வேத³யதி; ஸஞ்சேதனிகங், ஆவுஸோ போதலிபுத்த,
கம்மங் கத்வா காயேன வாசாய மனஸா அது³க்க²மஸுக²வேத³னீயங் அது³க்க²மஸுக²ங் ஸோ
வேத³யதீ’தி. ஏவங் ப்³யாகரமானோ கோ², ஆனந்த³, ஸமித்³தி⁴ மோக⁴புரிஸோ போதலிபுத்தஸ்ஸ பரிப்³பா³ஜகஸ்ஸ ஸம்மா (ப்³யாகரமானோ) [( ) நத்தி² (ஸீ॰ ஸ்யா॰ கங்॰ பீ॰)] ப்³யாகரெய்ய. அபி ச, ஆனந்த³, கே ச [கேசி (க॰)]
அஞ்ஞதித்தி²யா பரிப்³பா³ஜகா பா³லா அப்³யத்தா கே ச ததா²க³தஸ்ஸ
மஹாகம்மவிப⁴ங்க³ங் ஜானிஸ்ஸந்தி? ஸசே தும்ஹே, ஆனந்த³, ஸுணெய்யாத² ததா²க³தஸ்ஸ
மஹாகம்மவிப⁴ங்க³ங் விப⁴ஜந்தஸ்ஸா’’தி.
‘‘ஏதஸ்ஸ, ப⁴க³வா, காலோ, ஏதஸ்ஸ, ஸுக³த, காலோ யங் ப⁴க³வா மஹாகம்மவிப⁴ங்க³ங் விப⁴ஜெய்ய .
ப⁴க³வதோ ஸுத்வா பி⁴க்கூ² தா⁴ரெஸ்ஸந்தீ’’தி. ‘‘தேன ஹானந்த³, ஸுணாஹி,
ஸாது⁴கங் மனஸி கரோஹி; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² ஆயஸ்மா
ஆனந்தோ³ ப⁴க³வதோ பச்சஸ்ஸோஸி. ப⁴க³வா ஏதத³வோச –
‘‘சத்தாரோமே, ஆனந்த³, புக்³க³லா ஸந்தோ ஸங்விஜ்ஜமானா
லோகஸ்மிங். கதமே சத்தாரோ? இதா⁴னந்த³, ஏகச்சோ புக்³க³லோ இத⁴ பாணாதிபாதீ
ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி,
பிஸுணவாசோ ஹோதி, ப²ருஸவாசோ ஹோதி, ஸம்ப²ப்பலாபீ ஹோதி, அபி⁴ஜ்ஜா²லு ஹோதி,
ப்³யாபன்னசித்தோ ஹோதி, மிச்சா²தி³ட்டி² ஹோதி. ஸோ காயஸ்ஸ பே⁴தா³ பரங் மரணா
அபாயங் து³க்³க³திங் வினிபாதங் நிரயங் உபபஜ்ஜதி.
‘‘இத⁴ பனானந்த³, ஏகச்சோ புக்³க³லோ இத⁴ பாணாதிபாதீ
ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி,
பிஸுணவாசோ ஹோதி, ப²ருஸவாசோ ஹோதி, ஸம்ப²ப்பலாபீ ஹோதி, அபி⁴ஜ்ஜா²லு ஹோதி,
ப்³யாபன்னசித்தோ ஹோதி, மிச்சா²தி³ட்டி² ஹோதி. ஸோ காயஸ்ஸ பே⁴தா³ பரங் மரணா
ஸுக³திங் ஸக்³க³ங் லோகங் உபபஜ்ஜதி.
‘‘இதா⁴னந்த³, ஏகச்சோ புக்³க³லோ
இத⁴ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி,
காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, பிஸுணாய வாசாய
படிவிரதோ ஹோதி, ப²ருஸாய வாசாய படிவிரதோ ஹோதி,
ஸம்ப²ப்பலாபா படிவிரதோ ஹோதி, அனபி⁴ஜ்ஜா²லு ஹோதி, அப்³யாபன்னசித்தோ ஹோதி,
ஸம்மாதி³ட்டி² ஹோதி. ஸோ காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங்
உபபஜ்ஜதி.
‘‘இத⁴ பனானந்த³, ஏகச்சோ புக்³க³லோ இத⁴ பாணாதிபாதா
படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ
ஹோதி, முஸாவாதா³ படிவிரதோ ஹோதி, பிஸுணாய வாசாய
படிவிரதோ ஹோதி, ப²ருஸாய வாசாய படிவிரதோ ஹோதி, ஸம்ப²ப்பலாபா படிவிரதோ ஹோதி,
அனபி⁴ஜ்ஜா²லு ஹோதி, அப்³யாபன்னசித்தோ ஹோதி, ஸம்மாதி³ட்டி² ஹோதி. ஸோ காயஸ்ஸ
பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி.
301. ‘‘இதா⁴னந்த³, ஏகச்சோ ஸமணோ வா ப்³ராஹ்மணோ வா ஆதப்பமன்வாய பதா⁴னமன்வாய அனுயோக³மன்வாய
அப்பமாத³மன்வாய ஸம்மாமனஸிகாரமன்வாய ததா²ரூபங் சேதோஸமாதி⁴ங் பு²ஸதி
யதா²ஸமாஹிதே சித்தே தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன
அமுங் புக்³க³லங் பஸ்ஸதி – இத⁴ பாணாதிபாதிங் அதி³ன்னாதா³யிங்
காமேஸுமிச்சா²சாரிங் முஸாவாதி³ங் பிஸுணவாசங் ப²ருஸவாசங் ஸம்ப²ப்பலாபிங்
அபி⁴ஜ்ஜா²லுங் ப்³யாபன்னசித்தங் மிச்சா²தி³ட்டி²ங் காயஸ்ஸ பே⁴தா³ பரங் மரணா
பஸ்ஸதி அபாயங் து³க்³க³திங் வினிபாதங் நிரயங் உபபன்னங். ஸோ ஏவமாஹ –
‘அத்தி² கிர, போ⁴, பாபகானி கம்மானி, அத்தி² து³ச்சரிதஸ்ஸ விபாகோ. அமாஹங் [அபாஹங் (ஸீ॰ பீ॰ க॰) அமுங் + அஹங் = அமாஹங்-இதி பத³விபா⁴கோ³]
புக்³க³லங் அத்³த³ஸங் இத⁴ பாணாதிபாதிங் அதி³ன்னாதா³யிங்…பே॰…
மிச்சா²தி³ட்டி²ங் காயஸ்ஸ பே⁴தா³ பரங் மரணா பஸ்ஸாமி அபாயங் து³க்³க³திங்
வினிபாதங் நிரயங் உபபன்ன’ந்தி. ஸோ ஏவமாஹ – ‘யோ கிர, போ⁴, பாணாதிபாதீ
அதி³ன்னாதா³யீ…பே॰… மிச்சா²தி³ட்டி², ஸப்³போ³ ஸோ காயஸ்ஸ பே⁴தா³ பரங் மரணா
அபாயங் து³க்³க³திங் வினிபாதங் நிரயங் உபபஜ்ஜதி. யே ஏவங் ஜானந்தி, தே ஸம்மா
ஜானந்தி; யே அஞ்ஞதா² ஜானந்தி, மிச்சா² தேஸங் ஞாண’ந்தி [மிச்சா² தே ஸஞ்ஜானந்தி (க॰)]. இதி ஸோ யதே³வ தஸ்ஸ ஸாமங் ஞாதங் ஸாமங் தி³ட்ட²ங் ஸாமங் விதி³தங் ததே³வ தத்த² தா²மஸா பராமாஸா [பராமஸ்ஸ (ஸீ॰ பீ॰)] அபி⁴னிவிஸ்ஸ வோஹரதி – ‘இத³மேவ ஸச்சங், மோக⁴மஞ்ஞ’’’ந்தி.
‘‘இத⁴ பனானந்த³, ஏகச்சோ ஸமணோ வா ப்³ராஹ்மணோ வா ஆதப்பமன்வாய
பதா⁴னமன்வாய அனுயோக³மன்வாய அப்பமாத³மன்வாய ஸம்மாமனஸிகாரமன்வாய ததா²ரூபங்
சேதோஸமாதி⁴ங் பு²ஸதி யதா²ஸமாஹிதே சித்தே தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன அமுங் புக்³க³லங் பஸ்ஸதி – இத⁴ பாணாதிபாதிங்
அதி³ன்னாதா³யிங்…பே॰… மிச்சா²தி³ட்டி²ங், காயஸ்ஸ பே⁴தா³ பரங் மரணா பஸ்ஸதி
ஸுக³திங் ஸக்³க³ங் லோகங் உபபன்னங். ஸோ ஏவமாஹ – ‘நத்தி² கிர, போ⁴, பாபகானி
கம்மானி, நத்தி² து³ச்சரிதஸ்ஸ விபாகோ. அமாஹங் புக்³க³லங் அத்³த³ஸங் – இத⁴
பாணாதிபாதிங் அதி³ன்னாதா³யிங்…பே॰… மிச்சா²தி³ட்டி²ங், காயஸ்ஸ பே⁴தா³ பரங்
மரணா பஸ்ஸாமி ஸுக³திங் ஸக்³க³ங் லோகங் உபபன்ன’ந்தி. ஸோ ஏவமாஹ – ‘யோ
கிர, போ⁴, பாணாதிபாதீ அதி³ன்னாதா³யீ…பே॰… மிச்சா²தி³ட்டி², ஸப்³போ³ ஸோ
காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜதி. யே ஏவங்
ஜானந்தி தே ஸம்மா ஜானந்தி; யே அஞ்ஞதா² ஜானந்தி, மிச்சா² தேஸங் ஞாண’ந்தி.
இதி ஸோ யதே³வ தஸ்ஸ ஸாமங் ஞாதங் ஸாமங் தி³ட்ட²ங் ஸாமங் விதி³தங் ததே³வ தத்த²
தா²மஸா பராமாஸா அபி⁴னிவிஸ்ஸ வோஹரதி – ‘இத³மேவ ஸச்சங், மோக⁴மஞ்ஞ’’’ந்தி.
‘‘இதா⁴னந்த³, ஏகச்சோ ஸமணோ வா ப்³ராஹ்மணோ வா
ஆதப்பமன்வாய பதா⁴னமன்வாய அனுயோக³மன்வாய அப்பமாத³மன்வாய ஸம்மாமனஸிகாரமன்வாய
ததா²ரூபங் சேதோஸமாதி⁴ங் பு²ஸதி யதா²ஸமாஹிதே சித்தே தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன அமுங் புக்³க³லங் பஸ்ஸதி – இத⁴
பாணாதிபாதா படிவிரதங் அதி³ன்னாதா³னா படிவிரதங் காமேஸுமிச்சா²சாரா
படிவிரதங் முஸாவாதா³ படிவிரதங் பிஸுணாய வாசாய படிவிரதங் ப²ருஸாய வாசாய
படிவிரதங் ஸம்ப²ப்பலாபா படிவிரதங் அனபி⁴ஜ்ஜா²லுங் அப்³யாபன்னசித்தங்
ஸம்மாதி³ட்டி²ங், காயஸ்ஸ பே⁴தா³ பரங் மரணா பஸ்ஸதி ஸுக³திங் ஸக்³க³ங் லோகங்
உபபன்னங். ஸோ ஏவமாஹ – ‘அத்தி² கிர, போ⁴, கல்யாணானி கம்மானி, அத்தி²
ஸுசரிதஸ்ஸ விபாகோ. அமாஹங் புக்³க³லங் அத்³த³ஸங் – இத⁴ பாணாதிபாதா படிவிரதங்
அதி³ன்னாதா³னா படிவிரதங்…பே॰… ஸம்மாதி³ட்டி²ங், காயஸ்ஸ பே⁴தா³ பரங் மரணா
பஸ்ஸாமி ஸுக³திங் ஸக்³க³ங் லோகங் உபபன்ன’ந்தி. ஸோ ஏவமாஹ – ‘யோ கிர, போ⁴,
பாணாதிபாதா படிவிரதோ அதி³ன்னாதா³னா படிவிரதோ…பே॰…
ஸம்மாதி³ட்டி² ஸப்³போ³ ஸோ காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங்
உபபஜ்ஜதி. யே ஏவங் ஜானந்தி தே ஸம்மா ஜானந்தி; யே அஞ்ஞதா² ஜானந்தி, மிச்சா²
தேஸங் ஞாண’ந்தி. இதி ஸோ யதே³வ தஸ்ஸ ஸாமங் ஞாதங் ஸாமங் தி³ட்ட²ங் ஸாமங்
விதி³தங் ததே³வ தத்த² தா²மஸா பராமாஸா அபி⁴னிவிஸ்ஸ வோஹரதி – ‘இத³மேவ ஸச்சங்,
மோக⁴மஞ்ஞ’’’ந்தி.
‘‘இத⁴ பனானந்த³, ஏகச்சோ ஸமணோ வா ப்³ராஹ்மணோ வா
ஆதப்பமன்வாய பதா⁴னமன்வாய அனுயோக³மன்வாய அப்பமாத³மன்வாய ஸம்மாமனஸிகாரமன்வாய
ததா²ரூபங் சேதோஸமாதி⁴ங் பு²ஸதி யதா²ஸமாஹிதே சித்தே தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன அமுங் புக்³க³லங்
பஸ்ஸதி – இத⁴ பாணாதிபாதா படிவிரதங்…பே॰… ஸம்மாதி³ட்டி²ங், காயஸ்ஸ பே⁴தா³
பரங் மரணா பஸ்ஸதி அபாயங் து³க்³க³திங் வினிபாதங் நிரயங் உபபன்னங். ஸோ ஏவமாஹ
– ‘நத்தி² கிர, போ⁴ கல்யாணானி கம்மானி, நத்தி² ஸுசரிதஸ்ஸ விபாகோ. அமாஹங்
புக்³க³லங் அத்³த³ஸங் – இத⁴ பாணாதிபாதா படிவிரதங் அதி³ன்னாதா³னா
படிவிரதங்…பே॰… ஸம்மாதி³ட்டி²ங், காயஸ்ஸ பே⁴தா³ பரங் மரணா பஸ்ஸாமி அபாயங்
து³க்³க³திங் வினிபாதங் நிரயங் உபபன்ன’ந்தி. ஸோ ஏவமாஹ – ‘யோ கிர, போ⁴,
பாணாதிபாதா படிவிரதோ அதி³ன்னாதா³னா படிவிரதோ…பே॰… ஸம்மாதி³ட்டி², ஸப்³போ³
ஸோ காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங்
உபபஜ்ஜதி. யே ஏவங் ஜானந்தி தே ஸம்மா ஜானந்தி; யே அஞ்ஞதா² ஜானந்தி, மிச்சா²
தேஸங் ஞாண’ந்தி. இதி ஸோ யதே³வ தஸ்ஸ ஸாமங் ஞாதங் ஸாமங் தி³ட்ட²ங் ஸாமங்
விதி³தங் ததே³வ தத்த² தா²மஸா பராமாஸா அபி⁴னிவிஸ்ஸ வோஹரதி – ‘இத³மேவ ஸச்சங்,
மோக⁴மஞ்ஞ’’’ந்தி.
302.
‘‘தத்ரானந்த³, ய்வாயங் ஸமணோ வா ப்³ராஹ்மணோ வா ஏவமாஹ – ‘அத்தி² கிர, போ⁴,
பாபகானி கம்மானி, அத்தி² து³ச்சரிதஸ்ஸ விபாகோ’தி இத³மஸ்ஸ அனுஜானாமி; யம்பி
ஸோ ஏவமாஹ – ‘அமாஹங் புக்³க³லங் அத்³த³ஸங் – இத⁴ பாணாதிபாதிங்
அதி³ன்னாதா³யிங்…பே॰… மிச்சா²தி³ட்டி²ங், காயஸ்ஸ
பே⁴தா³ பரங் மரணா பஸ்ஸாமி அபாயங் து³க்³க³திங் வினிபாதங் நிரயங்
உபபன்ன’ந்தி இத³ம்பிஸ்ஸ அனுஜானாமி; யஞ்ச கோ² ஸோ ஏவமாஹ – ‘யோ கிர, போ⁴,
பாணாதிபாதீ அதி³ன்னாதா³யீ…பே॰… மிச்சா²தி³ட்டி², ஸப்³போ³ ஸோ காயஸ்ஸ பே⁴தா³
பரங் மரணா அபாயங் து³க்³க³திங் வினிபாதங் நிரயங் உபபஜ்ஜதீ’தி இத³மஸ்ஸ
நானுஜானாமி; யம்பி ஸோ ஏவமாஹ – ‘யே ஏவங் ஜானந்தி தே ஸம்மா ஜானந்தி; யே
அஞ்ஞதா² ஜானந்தி, மிச்சா² தேஸங் ஞாண’ந்தி இத³ம்பிஸ்ஸ நானுஜானாமி; யம்பி ஸோ
யதே³வ தஸ்ஸ ஸாமங் ஞாதங் ஸாமங் தி³ட்ட²ங் ஸாமங் விதி³தங் ததே³வ தத்த² தா²மஸா
பராமாஸா அபி⁴னிவிஸ்ஸ வோஹரதி – ‘இத³மேவ ஸச்சங், மோக⁴மஞ்ஞ’ந்தி இத³ம்பிஸ்ஸ
நானுஜானாமி. தங் கிஸ்ஸ ஹேது? அஞ்ஞதா² ஹி, ஆனந்த³, ததா²க³தஸ்ஸ
மஹாகம்மவிப⁴ங்கே³ ஞாணங் ஹோதி.
‘‘தத்ரானந்த³, ய்வாயங் ஸமணோ வா ப்³ராஹ்மணோ வா ஏவமாஹ – ‘நத்தி² கிர, போ⁴, பாபகானி கம்மானி, நத்தி² து³ச்சரிதஸ்ஸ விபாகோ’தி இத³மஸ்ஸ
நானுஜானாமி; யஞ்ச கோ² ஸோ ஏவமாஹ – ‘அமாஹங் புக்³க³லங் அத்³த³ஸங் – இத⁴
பாணாதிபாதிங் அதி³ன்னாதா³யிங்…பே॰… மிச்சா²தி³ட்டி²ங் காயஸ்ஸ பே⁴தா³ பரங்
மரணா பஸ்ஸாமி ஸுக³திங் ஸக்³க³ங் லோகங் உபபன்ன’ந்தி இத³மஸ்ஸ அனுஜானாமி; யஞ்ச
கோ² ஸோ ஏவமாஹ – ‘யோ கிர, போ⁴, பாணாதிபாதீ அதி³ன்னாதா³யீ…பே॰…
மிச்சா²தி³ட்டி², ஸப்³போ³ ஸோ காயஸ்ஸ பே⁴தா³ பரங் மரணா ஸுக³திங் ஸக்³க³ங்
லோகங் உபபஜ்ஜதீ’தி இத³மஸ்ஸ நானுஜானாமி; யம்பி ஸோ ஏவமாஹ – ‘யே ஏவங்
ஜானந்தி தே ஸம்மா ஜானந்தி; யே அஞ்ஞதா² ஜானந்தி, மிச்சா² தேஸங் ஞாண’ந்தி
இத³ம்பிஸ்ஸ நானுஜானாமி; யம்பி ஸோ யதே³வ தஸ்ஸ ஸாமங் ஞாதங் ஸாமங் தி³ட்ட²ங்
ஸாமங் விதி³தங் ததே³வ தத்த² தா²மஸா பராமாஸா அபி⁴னிவிஸ்ஸ வோஹரதி – ‘இத³மேவ
ஸச்சங், மோக⁴மஞ்ஞ’ந்தி இத³ம்பிஸ்ஸ நானுஜானாமி. தங் கிஸ்ஸ ஹேது? அஞ்ஞதா² ஹி,
ஆனந்த³, ததா²க³தஸ்ஸ மஹாகம்மவிப⁴ங்கே³ ஞாணங் ஹோதி.
‘‘தத்ரானந்த³, ய்வாயங் ஸமணோ வா ப்³ராஹ்மணோ வா ஏவமாஹ –
‘அத்தி² கிர, போ⁴, கல்யாணானி கம்மானி, அத்தி² ஸுசரிதஸ்ஸ விபாகோ’தி இத³மஸ்ஸ
அனுஜானாமி; யம்பி ஸோ ஏவமாஹ – ‘அமாஹங் புக்³க³லங் அத்³த³ஸங் – இத⁴
பாணாதிபாதா படிவிரதங் அதி³ன்னாதா³னா படிவிரதங்…பே॰… ஸம்மாதி³ட்டி²ங்,
காயஸ்ஸ பே⁴தா³ பரங் மரணா பஸ்ஸாமி ஸுக³திங் ஸக்³க³ங் லோகங் உபபன்ன’ந்தி
இத³ம்பிஸ்ஸ அனுஜானாமி; யஞ்ச கோ² ஸோ ஏவமாஹ – ‘யோ கிர, போ⁴, பாணாதிபாதா
படிவிரதோ அதி³ன்னாதா³னா படிவிரதோ…பே॰… ஸம்மாதி³ட்டி², ஸப்³போ³ ஸோ காயஸ்ஸ
பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜதீ’தி இத³மஸ்ஸ நானுஜானாமி; யம்பி ஸோ ஏவமாஹ – ‘யே ஏவங் ஜானந்தி தே
ஸம்மா ஜானந்தி; யே அஞ்ஞதா² ஜானந்தி, மிச்சா² தேஸங் ஞாண’ந்தி இத³ம்பிஸ்ஸ
நானுஜானாமி; யம்பி ஸோ யதே³வ தஸ்ஸ ஸாமங் ஞாதங் ஸாமங் தி³ட்ட²ங் ஸாமங்
விதி³தங் ததே³வ தத்த² தா²மஸா பராமாஸா அபி⁴னிவிஸ்ஸ வோஹரதி – ‘இத³மேவ ஸச்சங்,
மோக⁴மஞ்ஞ’ந்தி இத³ம்பிஸ்ஸ நானுஜானாமி. தங் கிஸ்ஸ ஹேது? அஞ்ஞதா² ஹி,
ஆனந்த³, ததா²க³தஸ்ஸ மஹாகம்மவிப⁴ங்கே³ ஞாணங் ஹோதி.
‘‘தத்ரானந்த³, ய்வாயங் ஸமணோ வா ப்³ராஹ்மணோ வா ஏவமாஹ –
‘நத்தி² கிர, போ⁴, கல்யாணானி கம்மானி, நத்தி² ஸுசரிதஸ்ஸ விபாகோ’தி இத³மஸ்ஸ
நானுஜானாமி; யஞ்ச கோ² ஸோ ஏவமாஹ – ‘அமாஹங் புக்³க³லங் அத்³த³ஸங் – இத⁴
பாணாதிபாதா படிவிரதங் அதி³ன்னாதா³னா படிவிரதங்…பே॰… ஸம்மாதி³ட்டி²ங்,
காயஸ்ஸ பே⁴தா³ பரங் மரணா பஸ்ஸாமி அபாயங் து³க்³க³திங் வினிபாதங் நிரயங்
உபபன்ன’ந்தி இத³மஸ்ஸ அனுஜானாமி; யஞ்ச கோ² ஸோ ஏவமாஹ – ‘யோ கிர, போ⁴,
பாணாதிபாதா படிவிரதோ அதி³ன்னாதா³னா படிவிரதோ…பே॰… ஸம்மாதி³ட்டி², ஸப்³போ³
ஸோ காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங்
உபபஜ்ஜதீ’தி இத³மஸ்ஸ நானுஜானாமி; யஞ்ச கோ² ஸோ ஏவமாஹ – ‘யே
ஏவங் ஜானந்தி தே ஸம்மா ஜானந்தி; யே அஞ்ஞதா² ஜானந்தி, மிச்சா² தேஸங்
ஞாண’ந்தி இத³ம்பிஸ்ஸ நானுஜானாமி; யம்பி ஸோ யதே³வ தஸ்ஸ ஸாமங் ஞாதங் ஸாமங் தி³ட்ட²ங் ஸாமங் விதி³தங் ததே³வ தத்த² தா²மஸா பராமாஸா அபி⁴னிவிஸ்ஸ வோஹரதி – ‘இத³மேவ ஸச்சங், மோக⁴மஞ்ஞ’ந்தி இத³ம்பிஸ்ஸ நானுஜானாமி. தங் கிஸ்ஸ ஹேது? அஞ்ஞதா² ஹி, ஆனந்த³, ததா²க³தஸ்ஸ மஹாகம்மவிப⁴ங்கே³ ஞாணங் ஹோதி.
303.
‘‘தத்ரானந்த³, ய்வாயங் புக்³க³லோ இத⁴ பாணாதிபாதீ அதி³ன்னாதா³யீ…பே॰…
மிச்சா²தி³ட்டி², காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜதி, புப்³பே³ வாஸ்ஸ தங் கதங் ஹோதி பாபகம்மங்
து³க்க²வேத³னீயங், பச்சா² வாஸ்ஸ தங் கதங் ஹோதி பாபகம்மங் து³க்க²வேத³னீயங்,
மரணகாலே வாஸ்ஸ ஹோதி மிச்சா²தி³ட்டி² ஸமத்தா ஸமாதி³ன்னா. தேன ஸோ காயஸ்ஸ
பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி. யஞ்ச கோ²
ஸோ இத⁴ பாணாதிபாதீ ஹோதி அதி³ன்னாதா³யீ ஹோதி…பே॰… மிச்சா²தி³ட்டி² ஹோதி
தஸ்ஸ தி³ட்டே²வ த⁴ம்மே விபாகங் படிஸங்வேதே³தி உபபஜ்ஜ வா [உபபஜ்ஜங் வா (ஸீ॰ பீ॰), உபபஜ்ஜ வா (ஸ்யா॰ கங்॰ க॰) உபபஜ்ஜித்வாதி ஸங்வண்ணனாய ஸங்ஸந்தே³தப்³பா³] அபரே வா பரியாயே.
‘‘தத்ரானந்த³, ய்வாயங் புக்³க³லோ இத⁴ பாணாதிபாதீ
அதி³ன்னாதா³யீ…பே॰… மிச்சா²தி³ட்டி² காயஸ்ஸ பே⁴தா³ பரங் மரணா ஸுக³திங்
ஸக்³க³ங் லோகங் உபபஜ்ஜதி, புப்³பே³ வாஸ்ஸ தங் கதங் ஹோதி கல்யாணகம்மங்
ஸுக²வேத³னீயங், பச்சா² வாஸ்ஸ தங் கதங் ஹோதி கல்யாணகம்மங் ஸுக²வேத³னீயங்,
மரணகாலே வாஸ்ஸ ஹோதி ஸம்மாதி³ட்டி² ஸமத்தா
ஸமாதி³ன்னா. தேன ஸோ காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங்
உபபஜ்ஜதி. யஞ்ச கோ² ஸோ இத⁴ பாணாதிபாதீ ஹோதி அதி³ன்னாதா³யீ ஹோதி…பே॰…
மிச்சா²தி³ட்டி² ஹோதி தஸ்ஸ தி³ட்டே²வ த⁴ம்மே விபாகங் படிஸங்வேதே³தி உபபஜ்ஜ
வா அபரே வா பரியாயே.
‘‘தத்ரானந்த³ , ய்வாயங்
புக்³க³லோ இத⁴ பாணாதிபாதா படிவிரதோ அதி³ன்னாதா³னா படிவிரதோ…பே॰…
ஸம்மாதி³ட்டி², காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜதி,
புப்³பே³ வாஸ்ஸ தங் கதங் ஹோதி கல்யாணகம்மங் ஸுக²வேத³னீயங், பச்சா² வாஸ்ஸ
தங் கதங் ஹோதி கல்யாணகம்மங் ஸுக²வேத³னீயங், மரணகாலே வாஸ்ஸ ஹோதி
ஸம்மாதி³ட்டி² ஸமத்தா ஸமாதி³ன்னா. தேன ஸோ காயஸ்ஸ பே⁴தா³ பரங் மரணா ஸுக³திங்
ஸக்³க³ங் லோகங் உபபஜ்ஜதி. யஞ்ச கோ² ஸோ இத⁴ பாணாதிபாதா படிவிரதோ ஹோதி அதி³ன்னாதா³னா படிவிரதோ ஹோதி…பே॰… ஸம்மாதி³ட்டி² ஹோதி, தஸ்ஸ தி³ட்டே²வ த⁴ம்மே விபாகங் படிஸங்வேதே³தி உபபஜ்ஜ வா அபரே வா பரியாயே.
‘‘தத்ரானந்த³ , ய்வாயங்
புக்³க³லோ இத⁴ பாணாதிபாதா படிவிரதோ அதி³ன்னாதா³னா படிவிரதோ…பே॰…
ஸம்மாதி³ட்டி², காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜதி, புப்³பே³ வாஸ்ஸ தங் கதங் ஹோதி பாபகம்மங்
து³க்க²வேத³னீயங், பச்சா² வாஸ்ஸ தங் கதங் ஹோதி பாபகம்மங் து³க்க²வேத³னீயங்,
மரணகாலே வாஸ்ஸ ஹோதி மிச்சா²தி³ட்டி² ஸமத்தா ஸமாதி³ன்னா. தேன ஸோ காயஸ்ஸ
பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜதி. யஞ்ச கோ²
ஸோ இத⁴ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி…பே॰…
ஸம்மாதி³ட்டி² ஹோதி, தஸ்ஸ தி³ட்டே²வ த⁴ம்மே விபாகங் படிஸங்வேதே³தி உபபஜ்ஜ
வா அபரே வா பரியாயே.
‘‘இதி கோ², ஆனந்த³, அத்தி²
கம்மங் அப⁴ப்³ப³ங் அப⁴ப்³பா³பா⁴ஸங், அத்தி² கம்மங் அப⁴ப்³ப³ங்
ப⁴ப்³பா³பா⁴ஸங், அத்தி² கம்மங் ப⁴ப்³ப³ஞ்சேவ ப⁴ப்³பா³பா⁴ஸஞ்ச, அத்தி²
கம்மங் ப⁴ப்³ப³ங் அப⁴ப்³பா³பா⁴ஸ’’ந்தி.
இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதங் அபி⁴னந்தீ³தி.
மஹாகம்மவிப⁴ங்க³ஸுத்தங் நிட்டி²தங் ச²ட்ட²ங்.
7. ஸளாயதனவிப⁴ங்க³ஸுத்தங்
304. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘ஸளாயதனவிப⁴ங்க³ங் வோ, பி⁴க்க²வே, தே³ஸெஸ்ஸாமி. தங் ஸுணாத², ஸாது⁴கங் மனஸி
கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ
பச்சஸ்ஸோஸுங். ப⁴க³வா ஏதத³வோச –
‘‘‘ச² அஜ்ஜ²த்திகானி ஆயதனானி
வேதி³தப்³பா³னி, ச² பா³ஹிரானி ஆயதனானி வேதி³தப்³பா³னி, ச² விஞ்ஞாணகாயா
வேதி³தப்³பா³, ச² ப²ஸ்ஸகாயா வேதி³தப்³பா³, அட்டா²ரஸ மனோபவிசாரா
வேதி³தப்³பா³, ச²த்திங்ஸ ஸத்தபதா³ வேதி³தப்³பா³, தத்ர இத³ங் நிஸ்ஸாய இத³ங்
பஜஹத², தயோ ஸதிபட்டா²னா யத³ரியோ ஸேவதி யத³ரியோ ஸேவமானோ ஸத்தா² க³ணமனுஸாஸிதுமரஹதி, ஸோ வுச்சதி யொக்³கா³சரியானங் [யோகா³சரியானங் (க॰)] அனுத்தரோ புரிஸத³ம்மஸாரதீ²’தி – அயமுத்³தே³ஸோ ஸளாயதனவிப⁴ங்க³ஸ்ஸ.
305.
‘‘‘ச² அஜ்ஜ²த்திகானி ஆயதனானி வேதி³தப்³பா³னீ’தி – இதி கோ² பனேதங் வுத்தங்.
கிஞ்சேதங் படிச்ச வுத்தங்? ‘சக்கா²யதனங் ஸோதாயதனங் கா⁴னாயதனங் ஜிவ்ஹாயதனங்
காயாயதனங் மனாயதனங் – ச² அஜ்ஜ²த்திகானி ஆயதனானி வேதி³தப்³பா³னீ’தி – இதி
யங் தங் வுத்தங் இத³மேதங் படிச்ச வுத்தங்.
‘‘‘ச² பா³ஹிரானி ஆயதனானி வேதி³தப்³பா³னீ’தி – இதி கோ² பனேதங் வுத்தங் .
கிஞ்சேதங் படிச்ச வுத்தங்? ‘ரூபாயதனங் ஸத்³தா³யதனங் க³ந்தா⁴யதனங் ரஸாயதனங்
பொ²ட்ட²ப்³பா³யதனங் த⁴ம்மாயதனங் – ச² பா³ஹிரானி ஆயதனானி வேதி³தப்³பா³னீ’தி
– இதி யங் தங் வுத்தங் இத³மேதங் படிச்ச வுத்தங்.
‘‘‘ச² விஞ்ஞாணகாயா வேதி³தப்³பா³’தி – இதி கோ² பனேதங்
வுத்தங். கிஞ்சேதங் படிச்ச வுத்தங்? ‘சக்கு²விஞ்ஞாணங் ஸோதவிஞ்ஞாணங்
கா⁴னவிஞ்ஞாணங் ஜிவ்ஹாவிஞ்ஞாணங் காயவிஞ்ஞாணங் மனோவிஞ்ஞாணங் – ச² விஞ்ஞாணகாயா
வேதி³தப்³பா³’தி – இதி யங் தங் வுத்தங் இத³மேதங் படிச்ச வுத்தங்.
‘‘‘ச² ப²ஸ்ஸகாயா
வேதி³தப்³பா³’தி – இதி கோ² பனேதங் வுத்தங். கிஞ்சேதங் படிச்ச வுத்தங்?
‘சக்கு²ஸம்ப²ஸ்ஸோ ஸோதஸம்ப²ஸ்ஸோ கா⁴னஸம்ப²ஸ்ஸோ ஜிவ்ஹாஸம்ப²ஸ்ஸோ காயஸம்ப²ஸ்ஸோ
மனோஸம்ப²ஸ்ஸோ – ச² ப²ஸ்ஸகாயா வேதி³தப்³பா³’தி – இதி யங் தங் வுத்தங்
இத³மேதங் படிச்ச வுத்தங்.
‘‘‘அட்டா²ரஸ மனோபவிசாரா வேதி³தப்³பா³’தி – இதி கோ²
பனேதங் வுத்தங். கிஞ்சேதங் படிச்ச வுத்தங்? ‘சக்கு²னா ரூபங் தி³ஸ்வா
ஸோமனஸ்ஸட்டா²னீயங் ரூபங் உபவிசரதி, தோ³மனஸ்ஸட்டா²னீயங் ரூபங் உபவிசரதி,
உபெக்கா²ட்டா²னீயங் ரூபங் உபவிசரதி. ஸோதேன ஸத்³த³ங் ஸுத்வா…பே॰… கா⁴னேன
க³ந்த⁴ங் கா⁴யித்வா… ஜிவ்ஹாய ரஸங் ஸாயித்வா… காயேன பொ²ட்ட²ப்³ப³ங்
பு²ஸித்வா… மனஸா த⁴ம்மங் விஞ்ஞாய ஸோமனஸ்ஸட்டா²னீயங் த⁴ம்மங் உபவிசரதி,
தோ³மனஸ்ஸட்டா²னீயங் த⁴ம்மங் உபவிசரதி, உபெக்கா²ட்டா²னீயங் த⁴ம்மங்
உபவிசரதி. இதி ச² ஸோமனஸ்ஸூபவிசாரா, ச² தோ³மனஸ்ஸூபவிசாரா, ச²
உபெக்கூ²பவிசாரா, அட்டா²ரஸ மனோபவிசாரா வேதி³தப்³பா³’தி – இதி யங் தங்
வுத்தங் இத³மேதங் படிச்ச வுத்தங்.
306. ‘‘‘ச²த்திங்ஸ ஸத்தபதா³ வேதி³தப்³பா³’தி – இதி கோ² பனேதங் வுத்தங். கிஞ்சேதங் படிச்ச வுத்தங்? ச² கே³ஹஸிதானி [கே³ஹஸ்ஸிதானி (?)] ஸோமனஸ்ஸானி, ச² நெக்க²ம்மஸிதானி [நெக்க²ம்மஸ்ஸிதானி (டீகா)]
ஸோமனஸ்ஸானி, ச² கே³ஹஸிதானி தோ³மனஸ்ஸானி, ச² நெக்க²ம்மஸிதானி தோ³மனஸ்ஸானி,
ச² கே³ஹஸிதா உபெக்கா², ச² நெக்க²ம்மஸிதா உபெக்கா². தத்த² கதமானி ச²
கே³ஹஸிதானி ஸோமனஸ்ஸானி? சக்கு²விஞ்ஞெய்யானங் ரூபானங் இட்டா²னங் கந்தானங்
மனாபானங் மனோரமானங் லோகாமிஸபடிஸங்யுத்தானங் படிலாப⁴ங் வா படிலாப⁴தோ
ஸமனுபஸ்ஸதோ புப்³பே³ வா படிலத்³த⁴புப்³ப³ங் அதீதங் நிருத்³த⁴ங் விபரிணதங்
ஸமனுஸ்ஸரதோ உப்பஜ்ஜதி ஸோமனஸ்ஸங். யங் ஏவரூபங் ஸோமனஸ்ஸங் இத³ங் வுச்சதி
கே³ஹஸிதங் ஸோமனஸ்ஸங். ஸோதவிஞ்ஞெய்யானங் ஸத்³தா³னங்… கா⁴னவிஞ்ஞெய்யானங்
க³ந்தா⁴னங்… ஜிவ்ஹாவிஞ்ஞெய்யானங் ரஸானங்… காயவிஞ்ஞெய்யானங்
பொ²ட்ட²ப்³பா³னங்… மனோவிஞ்ஞெய்யானங் த⁴ம்மானங் இட்டா²னங் கந்தானங்
மனாபானங்…பே॰… ஸோமனஸ்ஸங். யங் ஏவரூபங் ஸோமனஸ்ஸங் இத³ங் வுச்சதி கே³ஹஸிதங்
ஸோமனஸ்ஸங். இமானி ச² கே³ஹஸிதானி ஸோமனஸ்ஸானி.
‘‘தத்த² கதமானி ச² நெக்க²ம்மஸிதானி ஸோமனஸ்ஸானி? ரூபானங்த்வேவ அனிச்சதங் விதி³த்வா விபரிணாமவிராக³னிரோத⁴ங் [விபரிணாமங் விராக³ங் நிரோத⁴ங் (க॰)],
‘புப்³பே³ சேவ ரூபா ஏதரஹி ச ஸப்³பே³ தே ரூபா அனிச்சா து³க்கா²
விபரிணாமத⁴ம்மா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதோ உப்பஜ்ஜதி
ஸோமனஸ்ஸங். யங் ஏவரூபங் ஸோமனஸ்ஸங் இத³ங் வுச்சதி
நெக்க²ம்மஸிதங் ஸோமனஸ்ஸங். ஸத்³தா³னங்த்வேவ… க³ந்தா⁴னங்த்வேவ… ரஸானங்த்வேவ…
பொ²ட்ட²ப்³பா³னங்த்வேவ… த⁴ம்மானங்த்வே அனிச்சதங் விதி³த்வா விபரிணாமவிராக³னிரோத⁴ங், ‘புப்³பே³ சேவ த⁴ம்மா ஏதரஹி
ச ஸப்³பே³ தே த⁴ம்மா அனிச்சா து³க்கா² விபரிணாமத⁴ம்மா’தி ஏவமேதங்
யதா²பூ⁴தங் ஸம்மப்பஞ்ஞாய பஸ்ஸதோ உப்பஜ்ஜதி ஸோமனஸ்ஸங். யங் ஏவரூபங்
ஸோமனஸ்ஸங் இத³ங் வுச்சதி நெக்க²ம்மஸிதங் ஸோமனஸ்ஸங். இமானி ச²
நெக்க²ம்மஸிதானி ஸோமனஸ்ஸானி.
307.
‘‘தத்த² கதமானி ச² கே³ஹஸிதானி தோ³மனஸ்ஸானி? சக்கு²விஞ்ஞெய்யானங்
ரூபானங்…பே॰… ஸோதவிஞ்ஞெய்யானங் ஸத்³தா³னங்… கா⁴னவிஞ்ஞெய்யானங் க³ந்தா⁴னங்…
ஜிவ்ஹாவிஞ்ஞெய்யானங் ரஸானங்… காயவிஞ்ஞெய்யானங் பொ²ட்ட²ப்³பா³னங்…
மனோவிஞ்ஞெய்யானங் த⁴ம்மானங் இட்டா²னங் கந்தானங் மனாபானங் மனோரமானங்
லோகாமிஸபடிஸங்யுத்தானங் அப்படிலாப⁴ங் வா அப்படிலாப⁴தோ ஸமனுபஸ்ஸதோ புப்³பே³
வா அப்படிலத்³த⁴புப்³ப³ங் அதீதங் நிருத்³த⁴ங் விபரிணதங் ஸமனுஸ்ஸரதோ
உப்பஜ்ஜதி தோ³மனஸ்ஸங். யங் ஏவரூபங் தோ³மனஸ்ஸங் இத³ங் வுச்சதி கே³ஹஸிதங் தோ³மனஸ்ஸங். இமானி ச² கே³ஹஸிதானி தோ³மனஸ்ஸானி.
‘‘தத்த² கதமானி ச² நெக்க²ம்மஸிதானி தோ³மனஸ்ஸானி? ரூபானங்த்வேவ
அனிச்சதங் விதி³த்வா விபரிணாமவிராக³னிரோத⁴ங், ‘புப்³பே³ சேவ ரூபா ஏதரஹி ச
ஸப்³பே³ தே ரூபா அனிச்சா து³க்கா² விபரிணாமத⁴ம்மா’தி ஏவமேதங் யதா²பூ⁴தங்
ஸம்மப்பஞ்ஞாய தி³ஸ்வா அனுத்தரேஸு விமொக்கே²ஸு பிஹங் உபட்டா²பேதி –
‘குதா³ஸ்ஸு [கதா³ஸ்ஸு (ஸ்யா॰ கங்॰ பீ॰)] நாமாஹங்
ததா³யதனங் உபஸம்பஜ்ஜ விஹரிஸ்ஸாமி யத³ரியா ஏதரஹி ஆயதனங் உபஸம்பஜ்ஜ
விஹரந்தீ’தி இதி அனுத்தரேஸு விமொக்கே²ஸு பிஹங் உபட்டா²பயதோ உப்பஜ்ஜதி
பிஹபச்சயா தோ³மனஸ்ஸங். யங் ஏவரூபங் தோ³மனஸ்ஸங் இத³ங் வுச்சதி
நெக்க²ம்மஸிதங் தோ³மனஸ்ஸங். ஸத்³தா³னங்த்வேவ…பே॰… க³ந்தா⁴னங்த்வேவ…
ரஸானங்த்வேவ… பொ²ட்ட²ப்³பா³னங்த்வேவ… த⁴ம்மானங்த்வேவ அனிச்சதங் விதி³த்வா
விபரிணாமவிராக³னிரோத⁴ங், ‘புப்³பே³ சேவ த⁴ம்மா ஏதரஹி ச ஸப்³பே³ தே த⁴ம்மா
அனிச்சா து³க்கா² விபரிணாமத⁴ம்மா’தி ஏவமேதங்
யதா²பூ⁴தங் ஸம்மப்பஞ்ஞாய தி³ஸ்வா அனுத்தரேஸு விமொக்கே²ஸு பிஹங் உபட்டா²பேதி
– ‘குதா³ஸ்ஸு நாமாஹங் ததா³யதனங் உபஸம்பஜ்ஜ விஹரிஸ்ஸாமி யத³ரியா ஏதரஹி
ஆயதனங் உபஸம்பஜ்ஜ விஹரந்தீ’தி இதி அனுத்தரேஸு விமொக்கே²ஸு பிஹங்
உபட்டா²பயதோ உப்பஜ்ஜதி பிஹபச்சயா தோ³மனஸ்ஸங். யங் ஏவரூபங் தோ³மனஸ்ஸங் இத³ங்
வுச்சதி நெக்க²ம்மஸிதங் தோ³மனஸ்ஸங். இமானி ச² நெக்க²ம்மஸிதானி
தோ³மனஸ்ஸானி.
308. ‘‘தத்த² கதமா ச² கே³ஹஸிதா உபெக்கா²? சக்கு²னா ரூபங் தி³ஸ்வா உப்பஜ்ஜதி உபெக்கா² பா³லஸ்ஸ மூள்ஹஸ்ஸ ( ) [(மந்த³ஸ்ஸ) (க॰)]
புது²ஜ்ஜனஸ்ஸ அனோதி⁴ஜினஸ்ஸ அவிபாகஜினஸ்ஸ அனாதீ³னவத³ஸ்ஸாவினோ அஸ்ஸுதவதோ
புது²ஜ்ஜனஸ்ஸ. யா ஏவரூபா உபெக்கா², ரூபங் ஸா நாதிவத்ததி. தஸ்மா ஸா [ஸாயங் (க॰)] உபெக்கா² ‘கே³ஹஸிதா’தி
வுச்சதி. ஸோதேன ஸத்³த³ங் ஸுத்வா… கா⁴னேன க³ந்த⁴ங் கா⁴யித்வா… ஜிவ்ஹாய ரஸங்
ஸாயித்வா… காயேன பொ²ட்ட²ப்³ப³ங் பு²ஸித்வா… மனஸா த⁴ம்மங் விஞ்ஞாய
உப்பஜ்ஜதி உபெக்கா² பா³லஸ்ஸ மூள்ஹஸ்ஸ புது²ஜ்ஜனஸ்ஸ அனோதி⁴ஜினஸ்ஸ
அவிபாகஜினஸ்ஸ அனாதீ³னவத³ஸ்ஸாவினோ அஸ்ஸுதவதோ புது²ஜ்ஜனஸ்ஸ. யா ஏவரூபா
உபெக்கா², த⁴ம்மங் ஸா நாதிவத்ததி. தஸ்மா ஸா உபெக்கா² ‘கே³ஹஸிதா’தி வுச்சதி.
இமா ச² கே³ஹஸிதா உபெக்கா².
‘‘தத்த² கதமா ச² நெக்க²ம்மஸிதா உபெக்கா²? ரூபானங்த்வேவ
அனிச்சதங் விதி³த்வா விபரிணாமவிராக³னிரோத⁴ங், ‘புப்³பே³ சேவ ரூபா ஏதரஹி ச
ஸப்³பே³ தே ரூபா அனிச்சா து³க்கா²
விபரிணாமத⁴ம்மா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதோ உப்பஜ்ஜதி
உபெக்கா². யா ஏவரூபா உபெக்கா², ரூபங் ஸா அதிவத்ததி. தஸ்மா ஸா உபெக்கா²
‘நெக்க²ம்மஸிதா’தி வுச்சதி. ஸத்³தா³னங்த்வேவ… க³ந்தா⁴னங்த்வேவ…
ரஸானங்த்வேவ… பொ²ட்ட²ப்³பா³னங்த்வேவ… த⁴ம்மானங்த்வேவ அனிச்சதங் விதி³த்வா
விபரிணாமவிராக³னிரோத⁴ங், ‘புப்³பே³ சேவ த⁴ம்மா ஏதரஹி ச ஸப்³பே³ தே த⁴ம்மா
அனிச்சா து³க்கா² விபரிணாமத⁴ம்மா’தி ஏவமேதங் யதா²பூ⁴தங் ஸம்மப்பஞ்ஞாய
பஸ்ஸதோ உப்பஜ்ஜதி உபெக்கா². யா ஏவரூபா உபெக்கா², த⁴ம்மங் ஸா அதிவத்ததி.
தஸ்மா ஸா உபெக்கா² ‘நெக்க²ம்மஸிதா’தி வுச்சதி. இமா ச² நெக்க²ம்மஸிதா
உபெக்கா². ‘ச²த்திங்ஸ ஸத்தபதா³ வேதி³தப்³பா³’தி – இதி யங் தங் வுத்தங்
இத³மேதங் படிச்ச வுத்தங்.
309. ‘‘தத்ர
இத³ங் நிஸ்ஸாய இத³ங் பஜஹதா²’’தி – இதி கோ² பனேதங் வுத்தங்; கிஞ்சேதங்
படிச்ச வுத்தங்? தத்ர, பி⁴க்க²வே, யானி ச² நெக்க²ம்மஸிதானி ஸோமனஸ்ஸானி தானி
நிஸ்ஸாய தானி ஆக³ம்ம யானி ச² கே³ஹஸிதானி ஸோமனஸ்ஸானி தானி பஜஹத², தானி
ஸமதிக்கமத². ஏவமேதேஸங் பஹானங் ஹோதி, ஏவமேதேஸங் ஸமதிக்கமோ ஹோதி.
‘‘தத்ர, பி⁴க்க²வே, யானி ச² நெக்க²ம்மஸிதானி
தோ³மனஸ்ஸானி தானி நிஸ்ஸாய தானி ஆக³ம்ம யானி ச² கே³ஹஸிதானி தோ³மனஸ்ஸானி தானி
பஜஹத², தானி ஸமதிக்கமத². ஏவமேதேஸங் பஹானங் ஹோதி, ஏவமேதேஸங் ஸமதிக்கமோ
ஹோதி.
‘‘தத்ர, பி⁴க்க²வே, யா ச² நெக்க²ம்மஸிதா உபெக்கா² தா நிஸ்ஸாய தா ஆக³ம்ம யா ச² கே³ஹஸிதா உபெக்கா² தா பஜஹத², தா ஸமதிக்கமத². ஏவமேதாஸங் பஹானங் ஹோதி, ஏவமேதாஸங் ஸமதிக்கமோ ஹோதி.
‘‘தத்ர, பி⁴க்க²வே, யானி ச² நெக்க²ம்மஸிதானி
ஸோமனஸ்ஸானி தானி நிஸ்ஸாய தானி ஆக³ம்ம யானி ச² நெக்க²ம்மஸிதானி தோ³மனஸ்ஸானி
தானி பஜஹத², தானி ஸமதிக்கமத². ஏவமேதேஸங் பஹானங் ஹோதி, ஏவமேதேஸங் ஸமதிக்கமோ
ஹோதி.
‘‘தத்ர, பி⁴க்க²வே, யா ச² நெக்க²ம்மஸிதா உபெக்கா² தா
நிஸ்ஸாய தா ஆக³ம்ம யானி ச² நெக்க²ம்மஸிதானி ஸோமனஸ்ஸானி தானி பஜஹத², தானி
ஸமதிக்கமத². ஏவமேதேஸங் பஹானங் ஹோதி, ஏவமேதேஸங் ஸமதிக்கமோ ஹோதி.
310. ‘‘அத்தி² ,
பி⁴க்க²வே, உபெக்கா² நானத்தா நானத்தஸிதா, அத்தி² உபெக்கா² ஏகத்தா
ஏகத்தஸிதா. கதமா ச, பி⁴க்க²வே, உபெக்கா² நானத்தா நானத்தஸிதா? அத்தி²,
பி⁴க்க²வே, உபெக்கா² ரூபேஸு, அத்தி² ஸத்³தே³ஸு ,
அத்தி² க³ந்தே⁴ஸு, அத்தி² ரஸேஸு, அத்தி² பொ²ட்ட²ப்³பே³ஸு – அயங்,
பி⁴க்க²வே, உபெக்கா² நானத்தா நானத்தஸிதா. கதமா ச, பி⁴க்க²வே, உபெக்கா²
ஏகத்தா ஏகத்தஸிதா? அத்தி², பி⁴க்க²வே, உபெக்கா² ஆகாஸானஞ்சாயதனநிஸ்ஸிதா,
அத்தி² விஞ்ஞாணஞ்சாயதனநிஸ்ஸிதா, அத்தி² ஆகிஞ்சஞ்ஞாயதனநிஸ்ஸிதா, அத்தி²
நேவஸஞ்ஞானாஸஞ்ஞாயதனநிஸ்ஸிதா – அயங், பி⁴க்க²வே, உபெக்கா² ஏகத்தா ஏகத்தஸிதா.
‘‘தத்ர, பி⁴க்க²வே, யாயங் உபெக்கா² ஏகத்தா ஏகத்தஸிதா
தங் நிஸ்ஸாய தங் ஆக³ம்ம யாயங் உபெக்கா² நானத்தா நானத்தஸிதா தங் பஜஹத², தங்
ஸமதிக்கமத². ஏவமேதிஸ்ஸா பஹானங் ஹோதி, ஏவமேதிஸ்ஸா ஸமதிக்கமோ ஹோதி.
‘‘அதம்மயதங், பி⁴க்க²வே, நிஸ்ஸாய அதம்மயதங் ஆக³ம்ம
யாயங் உபெக்கா² ஏகத்தா ஏகத்தஸிதா தங் பஜஹத², தங் ஸமதிக்கமத². ஏவமேதிஸ்ஸா
பஹானங் ஹோதி, ஏவமேதிஸ்ஸா ஸமதிக்கமோ ஹோதி. ‘தத்ர இத³ங் நிஸ்ஸாய இத³ங் பஜஹதா²’தி – இதி யங் தங் வுத்தங் இத³மேதங் படிச்ச வுத்தங்.
311. ‘‘‘தயோ
ஸதிபட்டா²னா யத³ரியோ ஸேவதி, யத³ரியோ ஸேவமானோ ஸத்தா² க³ணமனுஸாஸிதுமரஹதீ’தி –
இதி கோ² பனேதங் வுத்தங்; கிஞ்சேதங் படிச்ச வுத்தங்? இத⁴, பி⁴க்க²வே,
ஸத்தா² ஸாவகானங் த⁴ம்மங் தே³ஸேதி அனுகம்பகோ ஹிதேஸீ அனுகம்பங் உபாதா³ய –
‘இத³ங் வோ ஹிதாய, இத³ங் வோ ஸுகா²யா’தி. தஸ்ஸ ஸாவகா ந ஸுஸ்ஸூஸந்தி, ந ஸோதங்
ஓத³ஹந்தி, ந அஞ்ஞா சித்தங் உபட்ட²பெந்தி , வோக்கம்ம ச
ஸத்து²ஸாஸனா வத்தந்தி. தத்ர, பி⁴க்க²வே, ததா²க³தோ ந சேவ அனத்தமனோ ஹோதி, ந ச
அனத்தமனதங் படிஸங்வேதே³தி, அனவஸ்ஸுதோ ச விஹரதி ஸதோ ஸம்பஜானோ. இத³ங்,
பி⁴க்க²வே, பட²மங் ஸதிபட்டா²னங் யத³ரியோ ஸேவதி, யத³ரியோ ஸேவமானோ ஸத்தா²
க³ணமனுஸாஸிதுமரஹதி.
‘‘புன சபரங், பி⁴க்க²வே, ஸத்தா² ஸாவகானங் த⁴ம்மங்
தே³ஸேதி அனுகம்பகோ ஹிதேஸீ அனுகம்பங் உபாதா³ய – ‘இத³ங் வோ ஹிதாய, இத³ங் வோ
ஸுகா²யா’தி. தஸ்ஸ ஏகச்சே ஸாவகா ந ஸுஸ்ஸூஸந்தி, ந ஸோதங் ஓத³ஹந்தி, ந அஞ்ஞா
சித்தங் உபட்ட²பெந்தி, வோக்கம்ம ச ஸத்து²ஸாஸனா வத்தந்தி; ஏகச்சே ஸாவகா
ஸுஸ்ஸூஸந்தி, ஸோதங் ஓத³ஹந்தி, அஞ்ஞா சித்தங் உபட்ட²பெந்தி, ந ச வோக்கம்ம
ஸத்து²ஸாஸனா வத்தந்தி . தத்ர, பி⁴க்க²வே, ததா²க³தோ ந
சேவ அனத்தமனோ ஹோதி, ந ச அனத்தமனதங் படிஸங்வேதே³தி; ந ச அத்தமனோ ஹோதி, ந ச
அத்தமனதங் படிஸங்வேதே³தி. அனத்தமனதா ச அத்தமனதா ச – தது³ப⁴யங்
அபி⁴னிவஜ்ஜெத்வா உபெக்க²கோ விஹரதி ஸதோ ஸம்பஜானோ. இத³ங் வுச்சதி, பி⁴க்க²வே,
து³தியங் ஸதிபட்டா²னங் யத³ரியோ ஸேவதி, யத³ரியோ ஸேவமானோ ஸத்தா²
க³ணமனுஸாஸிதுமரஹதி.
‘‘புன சபரங், பி⁴க்க²வே, ஸத்தா² ஸாவகானங் த⁴ம்மங்
தே³ஸேதி அனுகம்பகோ ஹிதேஸீ அனுகம்பங் உபாதா³ய – ‘இத³ங் வோ ஹிதாய, இத³ங் வோ
ஸுகா²யா’தி. தஸ்ஸ ஸாவகா ஸுஸ்ஸூஸந்தி, ஸோதங் ஓத³ஹந்தி, அஞ்ஞாசித்தங்
உபட்ட²பெந்தி, ந ச வோக்கம்ம ஸத்து²ஸாஸனா வத்தந்தி. தத்ர, பி⁴க்க²வே,
ததா²க³தோ அத்தமனோ சேவ ஹோதி, அத்தமனதஞ்ச படிஸங்வேதே³தி, அனவஸ்ஸுதோ ச விஹரதி
ஸதோ ஸம்பஜானோ. இத³ங் வுச்சதி, பி⁴க்க²வே, ததியங் ஸதிபட்டா²னங் யத³ரியோ
ஸேவதி, யத³ரியோ ஸேவமானோ ஸத்தா² க³ணமனுஸாஸிதுமரஹதி. ‘தயோ ஸதிபட்டா²னா யத³ரியோ ஸேவதி, யத³ரியோ ஸேவமானோ ஸத்தா² க³ணமனுஸாஸிதுமரஹதீ’தி – இதி யங் தங் வுத்தங் இத³மேதங் படிச்ச வுத்தங்.
312. ‘‘‘ஸோ வுச்சதி யொக்³கா³சரியானங் அனுத்தரோ புரிஸத³ம்மஸாரதீ²’தி – இதி கோ² பனேதங்
வுத்தங். கிஞ்சேதங் படிச்ச வுத்தங்? ஹத்தி²த³மகேன, பி⁴க்க²வே,
ஹத்தி²த³ம்மோ ஸாரிதோ ஏகங்யேவ தி³ஸங் தா⁴வதி – புரத்தி²மங் வா பச்சி²மங் வா
உத்தரங் வா த³க்கி²ணங் வா. அஸ்ஸத³மகேன, பி⁴க்க²வே, அஸ்ஸத³ம்மோ ஸாரிதோ
ஏகஞ்ஞேவ தி³ஸங் தா⁴வதி – புரத்தி²மங் வா பச்சி²மங் வா உத்தரங் வா
த³க்கி²ணங் வா. கோ³த³மகேன, பி⁴க்க²வே, கோ³த³ம்மோ ஸாரிதோ ஏகங்யேவ தி³ஸங்
தா⁴வதி – புரத்தி²மங் வா பச்சி²மங் வா உத்தரங் வா த³க்கி²ணங் வா. ததா²க³தேன
ஹி, பி⁴க்க²வே, அரஹதா ஸம்மாஸம்பு³த்³தே⁴ன புரிஸத³ம்மோ ஸாரிதோ அட்ட² தி³ஸா
விதா⁴வதி. ரூபீ ரூபானி பஸ்ஸதி – அயங் ஏகா தி³ஸா; அஜ்ஜ²த்தங் அரூபஸஞ்ஞீ
ப³ஹித்³தா⁴ ரூபானி பஸ்ஸதி – அயங் து³தியா தி³ஸா; ஸுப⁴ந்த்வேவ அதி⁴முத்தோ
ஹோதி – அயங் ததியா தி³ஸா; ஸப்³ப³ஸோ ரூபஸஞ்ஞானங் ஸமதிக்கமா படிக⁴ஸஞ்ஞானங்
அத்த²ங்க³மா நானத்தஸஞ்ஞானங் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனங்
உபஸம்பஜ்ஜ விஹரதி – அயங் சதுத்தீ² தி³ஸா; ஸப்³ப³ஸோ ஆகாஸானஞ்சாயதனங்
ஸமதிக்கம்ம ‘அனந்தங் விஞ்ஞாண’ந்தி விஞ்ஞாணஞ்சாயதனங் உபஸம்பஜ்ஜ விஹரதி –
அயங் பஞ்சமீ தி³ஸா; ஸப்³ப³ஸோ விஞ்ஞாணஞ்சாயதனங் ஸமதிக்கம்ம ‘நத்தி²
கிஞ்சீ’தி ஆகிஞ்சஞ்ஞாயதனங் உபஸம்பஜ்ஜ விஹரதி – அயங்
ச²ட்டீ² தி³ஸா; ஸப்³ப³ஸோ ஆகிஞ்சஞ்ஞாயதனங் ஸமதிக்கம்ம நேவஸஞ்ஞானாஸஞ்ஞாயதனங்
உபஸம்பஜ்ஜ விஹரதி – அயங் ஸத்தமீ தி³ஸா; ஸப்³ப³ஸோ நேவஸஞ்ஞானாஸஞ்ஞாயதனங்
ஸமதிக்கம்ம ஸஞ்ஞாவேத³யிதனிரோத⁴ங் உபஸம்பஜ்ஜ விஹரதி – அயங் அட்ட²மீ தி³ஸா.
ததா²க³தேன, பி⁴க்க²வே, அரஹதா ஸம்மாஸம்பு³த்³தே⁴ன புரிஸத³ம்மோ ஸாரிதோ இமா
அட்ட² தி³ஸா விதா⁴வதி. ‘ஸோ வுச்சதி யொக்³கா³சரியானங் அனுத்தரோ
புரிஸத³ம்மஸாரதீ²’தி – இதி யங் தங் வுத்தங் இத³மேதங் படிச்ச வுத்த’’ந்தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
ஸளாயதனவிப⁴ங்க³ஸுத்தங் நிட்டி²தங் ஸத்தமங்.
8. உத்³தே³ஸவிப⁴ங்க³ஸுத்தங்
313. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘உத்³தே³ஸவிப⁴ங்க³ங் வோ, பி⁴க்க²வே, தே³ஸெஸ்ஸாமி. தங் ஸுணாத², ஸாது⁴கங்
மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ
பச்சஸ்ஸோஸுங். ப⁴க³வா ஏதத³வோச –
‘‘ததா² ததா², பி⁴க்க²வே, பி⁴க்கு² உபபரிக்கெ²ய்ய யதா² யதா² [யதா² யதா²ஸ்ஸ (ஸீ॰ ஸ்யா॰ கங்॰ பீ॰)]
உபபரிக்க²தோ ப³ஹித்³தா⁴ சஸ்ஸ விஞ்ஞாணங் அவிக்கி²த்தங் அவிஸடங், அஜ்ஜ²த்தங்
அஸண்டி²தங் அனுபாதா³ய ந பரிதஸ்ஸெய்ய. ப³ஹித்³தா⁴, பி⁴க்க²வே, விஞ்ஞாணே
அவிக்கி²த்தே அவிஸடே ஸதி அஜ்ஜ²த்தங் அஸண்டி²தே அனுபாதா³ய அபரிதஸ்ஸதோ ஆயதிங்
ஜாதிஜராமரணது³க்க²ஸமுத³யஸம்ப⁴வோ ந ஹோதீ’’தி. இத³மவோச ப⁴க³வா. இத³ங் வத்வான
ஸுக³தோ உட்டா²யாஸனா விஹாரங் பாவிஸி.
314.
அத² கோ² தேஸங் பி⁴க்கூ²னங், அசிரபக்கந்தஸ்ஸ ப⁴க³வதோ, ஏதத³ஹோஸி – ‘‘இத³ங்
கோ² நோ, ஆவுஸோ, ப⁴க³வா ஸங்கி²த்தேன உத்³தே³ஸங் உத்³தி³ஸித்வா வித்தா²ரேன
அத்த²ங் அவிப⁴ஜித்வா உட்டா²யாஸனா விஹாரங் பவிட்டோ² – ‘ததா² ததா², பி⁴க்க²வே
, பி⁴க்கு² உபபரிக்கெ²ய்ய யதா² யதா² உபபரிக்க²தோ
ப³ஹித்³தா⁴ சஸ்ஸ விஞ்ஞாணங் அவிக்கி²த்தங் அவிஸடங், அஜ்ஜ²த்தங் அஸண்டி²தங்
அனுபாதா³ய ந பரிதஸ்ஸெய்ய. ப³ஹித்³தா⁴ , பி⁴க்க²வே,
விஞ்ஞாணே அவிக்கி²த்தே அவிஸடே ஸதி அஜ்ஜ²த்தங் அஸண்டி²தே அனுபாதா³ய
அபரிதஸ்ஸதோ ஆயதிங் ஜாதிஜராமரணது³க்க²ஸமுத³யஸம்ப⁴வோ ந ஹோதீ’தி. கோ நு கோ²
இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங்
அவிப⁴த்தஸ்ஸ வித்தா²ரேன அத்த²ங் விப⁴ஜெய்யா’’தி? அத² கோ² தேஸங் பி⁴க்கூ²னங்
ஏதத³ஹோஸி – ‘‘அயங் கோ² ஆயஸ்மா மஹாகச்சானோ ஸத்து² சேவ ஸங்வண்ணிதோ
ஸம்பா⁴விதோ ச விஞ்ஞூனங் ஸப்³ரஹ்மசாரீனங்; பஹோதி சாயஸ்மா மஹாகச்சானோ இமஸ்ஸ
ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங்
அவிப⁴த்தஸ்ஸ வித்தா²ரேன அத்த²ங் விப⁴ஜிதுங். யங்னூன மயங் யேனாயஸ்மா
மஹாகச்சானோ தேனுபஸங்கமெய்யாம; உபஸங்கமித்வா ஆயஸ்மந்தங் மஹாகச்சானங் ஏதமத்த²ங் படிபுச்செ²ய்யாமா’’தி.
அத² கோ² தே பி⁴க்கூ² யேனாயஸ்மா
மஹாகச்சானோ தேனுபஸங்கமிங்ஸு; உபஸங்கமித்வா ஆயஸ்மதா மஹாகச்சானேன ஸத்³தி⁴ங்
ஸம்மோதி³ங்ஸு. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங்
நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ஆயஸ்மந்தங் மஹாகச்சானங்
ஏதத³வோசுங் –
‘‘இத³ங் கோ² நோ, ஆவுஸோ கச்சான, ப⁴க³வா ஸங்கி²த்தேன
உத்³தே³ஸங் உத்³தி³ஸித்வா வித்தா²ரேன அத்த²ங் அவிப⁴ஜித்வா உட்டா²யாஸனா
விஹாரங் பவிட்டோ² – ‘ததா² ததா², பி⁴க்க²வே, பி⁴க்கு² உபபரிக்கெ²ய்ய யதா²
யதா² உபபரிக்க²தோ ப³ஹித்³தா⁴ சஸ்ஸ விஞ்ஞாணங் அவிக்கி²த்தங் அவிஸடங்,
அஜ்ஜ²த்தங் அஸண்டி²தங் அனுபாதா³ய ந பரிதஸ்ஸெய்ய. ப³ஹித்³தா⁴, பி⁴க்க²வே,
விஞ்ஞாணே அவிக்கி²த்தே அவிஸடே ஸதி அஜ்ஜ²த்தங் அஸண்டி²தே அனுபாதா³ய
அபரிதஸ்ஸதோ ஆயதிங் ஜாதிஜராமரணது³க்க²ஸமுத³யஸம்ப⁴வோ ந ஹோதீ’தி. தேஸங் நோ,
ஆவுஸோ கச்சான, அம்ஹாகங், அசிரபக்கந்தஸ்ஸ ப⁴க³வதோ, ஏதத³ஹோஸி – ‘இத³ங் கோ²
நோ, ஆவுஸோ, ப⁴க³வா ஸங்கி²த்தேன உத்³தே³ஸங் உத்³தி³ஸித்வா வித்தா²ரேன
அத்த²ங் அவிப⁴ஜித்வா உட்டா²யாஸனா விஹாரங் பவிட்டோ² – ததா² ததா², பி⁴க்க²வே,
பி⁴க்கு² உபபரிக்கெ²ய்ய, யதா² யதா² உபபரிக்க²தோ ப³ஹித்³தா⁴ சஸ்ஸ விஞ்ஞாணங்
அவிக்கி²த்தங் அவிஸடங் அஜ்ஜ²த்தங் அஸண்டி²தங் அனுபாதா³ய ந பரிதஸ்ஸெய்ய.
ப³ஹித்³தா⁴, பி⁴க்க²வே, விஞ்ஞாணே அவிக்கி²த்தே
அவிஸடே ஸதி அஜ்ஜ²த்தங் அஸண்டி²தே அனுபாதா³ய அபரிதஸ்ஸதோ ஆயதிங்
ஜாதிஜராமரணது³க்க²ஸமுத³யஸம்ப⁴வோ ந ஹோதீ’தி. கோ நு கோ² இமஸ்ஸ ப⁴க³வதா
ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங்
அவிப⁴த்தஸ்ஸ வித்தா²ரேன அத்த²ங் விப⁴ஜெய்யா’’தி. ‘‘தேஸங் நோ, ஆவுஸோ
கச்சான, அம்ஹாகங் ஏதத³ஹோஸி – ‘அயங் கோ² ஆயஸ்மா மஹாகச்சானோ ஸத்து² சேவ
ஸங்வண்ணிதோ, ஸம்பா⁴விதோ ச விஞ்ஞூனங் ஸப்³ரஹ்மசாரீனங். பஹோதி சாயஸ்மா
மஹாகச்சானோ இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ
வித்தா²ரேன அத்த²ங் அவிப⁴த்தஸ்ஸ வித்தா²ரேன அத்த²ங் விப⁴ஜிதுங். யங்னூன
மயங் யேனாயஸ்மா மஹாகச்சானோ தேனுபஸங்கமெய்யாம; உபஸங்கமித்வா ஆயஸ்மந்தங்
மஹாகச்சானங் ஏதமத்த²ங் படிபுச்செ²ய்யாமா’தி – விப⁴ஜதாயஸ்மா மஹாகச்சானோ’’தி.
315. ‘‘‘ஸெய்யதா²பி, ஆவுஸோ, புரிஸோ ஸாரத்தி²கோ ஸாரக³வேஸீ ஸாரபரியேஸனங் சரமானோ மஹதோ ருக்க²ஸ்ஸ திட்ட²தோ ஸாரவதோ அதிக்கம்மேவ மூலங்
அதிக்கம்ம க²ந்த⁴ங் ஸாகா²பலாஸே ஸாரங் பரியேஸிதப்³ப³ங் மஞ்ஞெய்ய, ஏவங்
ஸம்பத³மித³ங் ஆயஸ்மந்தானங் ஸத்த²ரி ஸம்முகீ²பூ⁴தே தங் ப⁴க³வந்தங் அதிஸித்வா
அம்ஹே ஏதமத்த²ங் படிபுச்சி²தப்³ப³ங் மஞ்ஞத². ஸோ ஹாவுஸோ, ப⁴க³வா ஜானங்
ஜானாதி, பஸ்ஸங் பஸ்ஸதி, சக்கு²பூ⁴தோ ஞாணபூ⁴தோ த⁴ம்மபூ⁴தோ ப்³ரஹ்மபூ⁴தோ
வத்தா பவத்தா அத்த²ஸ்ஸ நின்னேதா அமதஸ்ஸ தா³தா த⁴ம்மஸ்ஸாமீ ததா²க³தோ. ஸோ சேவ
பனேதஸ்ஸ காலோ அஹோஸி யங் ப⁴க³வந்தங்யேவ ஏதமத்த²ங் படிபுச்செ²ய்யாத²; யதா²
வோ ப⁴க³வா ப்³யாகரெய்ய ததா² நங் தா⁴ரெய்யாதா²’’’தி. ‘அத்³தா⁴வுஸோ கச்சான,
ப⁴க³வா ஜானங் ஜானாதி, பஸ்ஸங் பஸ்ஸதி, சக்கு²பூ⁴தோ
ஞாணபூ⁴தோ த⁴ம்மபூ⁴தோ ப்³ரஹ்மபூ⁴தோ வத்தா பவத்தா அத்த²ஸ்ஸ நின்னேதா அமதஸ்ஸ
தா³தா த⁴ம்மஸ்ஸாமீ ததா²க³தோ. ஸோ சேவ பனேதஸ்ஸ காலோ அஹோஸி யங் ப⁴க³வந்தங்யேவ
ஏதமத்த²ங் படிபுச்செ²ய்யாம; யதா² நோ ப⁴க³வா ப்³யாகரெய்ய
ததா² நங் தா⁴ரெய்யாம. அபி சாயஸ்மா மஹாகச்சானோ ஸத்து² சேவ ஸங்வண்ணிதோ
ஸம்பா⁴விதோ ச விஞ்ஞூனங் ஸப்³ரஹ்மசாரீனங். பஹோதி சாயஸ்மா மஹாகச்சானோ இமஸ்ஸ
ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங்
அவிப⁴த்தஸ்ஸ வித்தா²ரேன அத்த²ங் விப⁴ஜிதுங். விப⁴ஜதாயஸ்மா மஹாகச்சானோ
அக³ருங் கரித்வா’தி. ‘தேன ஹாவுஸோ, ஸுணாத², ஸாது⁴கங் மனஸி கரோத²;
பா⁴ஸிஸ்ஸாமீ’தி. ‘ஏவமாவுஸோ’தி கோ² தே பி⁴க்கூ² ஆயஸ்மதோ மஹாகச்சானஸ்ஸ
பச்சஸ்ஸோஸுங். ஆயஸ்மா மஹாகச்சானோ ஏதத³வோச –
‘யங் கோ² நோ, ஆவுஸோ, ப⁴க³வா
ஸங்கி²த்தேன உத்³தே³ஸங் உத்³தி³ஸித்வா வித்தா²ரேன அத்த²ங் அவிப⁴ஜித்வா
உட்டா²யாஸனா விஹாரங் பவிட்டோ² – ததா² ததா², பி⁴க்க²வே, பி⁴க்கு²
உபபரிக்கெ²ய்ய, யதா² யதா² உபபரிக்க²தோ ப³ஹித்³தா⁴ சஸ்ஸ விஞ்ஞாணங்
அவிக்கி²த்தங் அவிஸடங் அஜ்ஜ²த்தங் அஸண்டி²தங் அனுபாதா³ய ந பரிதஸ்ஸெய்ய,
ப³ஹித்³தா⁴, பி⁴க்க²வே, விஞ்ஞாணே அவிக்கி²த்தே அவிஸடே ஸதி அஜ்ஜ²த்தங்
அஸண்டி²தே அனுபாதா³ய அபரிதஸ்ஸதோ ஆயதிங் ஜாதிஜராமரணது³க்க²ஸமுத³யஸம்ப⁴வோ ந
ஹோதீ’தி. இமஸ்ஸ கோ² அஹங், ஆவுஸோ, ப⁴க³வதா ஸங்கி²த்தேன உத்³தே³ஸஸ்ஸ
உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ ஏவங் வித்தா²ரேன அத்த²ங்
ஆஜானாமி.
316.
‘‘கத²ஞ்சாவுஸோ, ப³ஹித்³தா⁴ விஞ்ஞாணங் விக்கி²த்தங் விஸடந்தி வுச்சதி?
இதா⁴வுஸோ, பி⁴க்கு²னோ சக்கு²னா ரூபங் தி³ஸ்வா ரூபனிமித்தானுஸாரி விஞ்ஞாணங்
ஹோதி ரூபனிமித்தஸ்ஸாத³க³தி⁴தங் […க³தி²தங் (ஸீ॰ பீ॰)] ரூபனிமித்தஸ்ஸாத³வினிப³ந்த⁴ங் […வினிப³ந்த⁴ங் (ஸீ॰ பீ॰)]
ரூபனிமித்தஸ்ஸாத³ஸங்யோஜனஸங்யுத்தங் ப³ஹித்³தா⁴ விஞ்ஞாணங் விக்கி²த்தங்
விஸடந்தி வுச்சதி. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…
ஜிவ்ஹாய ரஸங் ஸாயித்வா… காயேன பொ²ட்ட²ப்³ப³ங் பு²ஸித்வா… மனஸா த⁴ம்மங்
விஞ்ஞாய த⁴ம்மனிமித்தானுஸாரீ விஞ்ஞாணங் ஹோதி; த⁴ம்மனிமித்தஸ்ஸாத³க³தி⁴தங்
த⁴ம்மனிமித்தஸ்ஸாத³வினிப³ந்த⁴ங் த⁴ம்மனிமித்தஸ்ஸாத³ஸங்யோஜனஸங்யுத்தங்
ப³ஹித்³தா⁴ விஞ்ஞாணங் விக்கி²த்தங் விஸடந்தி வுச்சதி. ஏவங் கோ² ஆவுஸோ,
ப³ஹித்³தா⁴ விஞ்ஞாணங் விக்கி²த்தங் விஸடந்தி வுச்சதி.
317. ‘‘கத²ஞ்சாவுஸோ, ப³ஹித்³தா⁴ விஞ்ஞாணங் அவிக்கி²த்தங் அவிஸடந்தி வுச்சதி ? இதா⁴வுஸோ, பி⁴க்கு²னோ சக்கு²னா ரூபங் தி³ஸ்வா ந ரூபனிமித்தானுஸாரி விஞ்ஞாணங் ஹோதி ரூபனிமித்தஸ்ஸாத³க³தி⁴தங் ந ரூபனிமித்தஸ்ஸாத³வினிப³ந்த⁴ங் ந ரூபனிமித்தஸ்ஸாத³ஸங்யோஜனஸங்யுத்தங் ப³ஹித்³தா⁴ விஞ்ஞாணங் அவிக்கி²த்தங் அவிஸடந்தி வுச்சதி .
ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா… ஜிவ்ஹாய ரஸங்
ஸாயித்வா… காயேன பொ²ட்ட²ப்³ப³ங் பு²ஸித்வா… மனஸா த⁴ம்மங் விஞ்ஞாய ந
த⁴ம்மனிமித்தானுஸாரீ விஞ்ஞாணங் ஹோதி ந த⁴ம்மனிமித்தஸ்ஸாத³க³தி⁴தங் ந
த⁴ம்மனிமித்தஸ்ஸாத³வினிப³ந்த⁴ங் ந த⁴ம்மனிமித்தஸ்ஸாத³ஸங்யோஜனஸங்யுத்தங்
ப³ஹித்³தா⁴ விஞ்ஞாணங் அவிக்கி²த்தங் அவிஸடந்தி வுச்சதி. ஏவங் கோ², ஆவுஸோ,
ப³ஹித்³தா⁴ விஞ்ஞாணங் அவிக்கி²த்தங் அவிஸடந்தி வுச்சதி.
318. ‘‘கத²ஞ்சாவுஸோ, அஜ்ஜ²த்தங் [அஜ்ஜ²த்தங் சித்தங் (ஸீ॰ ஸ்யா॰ கங்॰ பீ॰)]
ஸண்டி²தந்தி வுச்சதி? இதா⁴வுஸோ, பி⁴க்கு² விவிச்சேவ காமேஹி விவிச்ச
அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங்
உபஸம்பஜ்ஜ விஹரதி. தஸ்ஸ விவேகஜபீதிஸுகா²னுஸாரி விஞ்ஞாணங் ஹோதி
விவேகஜபீதிஸுக²ஸ்ஸாத³க³தி⁴தங் விவேகஜபீதிஸுக²ஸ்ஸாத³வினிப³ந்த⁴ங் விவேகஜபீதிஸுக²ஸ்ஸாத³ஸங்யோஜனஸங்யுத்தங் அஜ்ஜ²த்தங் சித்தங் ஸண்டி²தந்தி வுச்சதி.
‘‘புன சபரங், ஆவுஸோ, பி⁴க்கு² விதக்கவிசாரானங் வூபஸமா
அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங்
பீதிஸுக²ங் து³தியங் ஜா²னங் உபஸம்பஜ்ஜ விஹரதி. தஸ்ஸ ஸமாதி⁴ஜபீதிஸுகா²னுஸாரி
விஞ்ஞாணங் ஹோதி ஸமாதி⁴ஜபீதிஸுக²ஸ்ஸாத³க³தி⁴தங்
ஸமாதி⁴ஜபீதிஸுக²ஸ்ஸாத³வினிப³ந்த⁴ங் ஸமாதி⁴ஜபீதிஸுக²ஸ்ஸாத³ஸங்யோஜனஸங்யுத்தங்
அஜ்ஜ²த்தங் சித்தங் ஸண்டி²தந்தி வுச்சதி.
‘‘புன சபரங், ஆவுஸோ, பி⁴க்கு² பீதியா ச விராகா³ உபெக்க²கோ
ச விஹரதி ஸதோ ச ஸம்பஜானோ ஸுக²ஞ்ச காயேன படிஸங்வேதே³தி, யங் தங் அரியா
ஆசிக்க²ந்தி – ‘உபெக்க²கோ ஸதிமா ஸுக²விஹாரீ’தி ததியங் ஜா²னங் உபஸம்பஜ்ஜ
விஹரதி. தஸ்ஸ உபெக்கா²னுஸாரி விஞ்ஞாணங் ஹோதி உபெக்கா²ஸுக²ஸ்ஸாத³க³தி⁴தங்
உபெக்கா²ஸுக²ஸ்ஸாத³வினிப³ந்த⁴ங் உபெக்கா²ஸுக²ஸ்ஸாத³ஸங்யோஜனஸங்யுத்தங்
அஜ்ஜ²த்தங் சித்தங் ஸண்டி²தந்தி வுச்சதி.
‘‘புன சபரங், ஆவுஸோ, பி⁴க்கு² ஸுக²ஸ்ஸ ச பஹானா
து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா
அது³க்க²மஸுக²ங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ
விஹரதி. தஸ்ஸ அது³க்க²மஸுகா²னுஸாரி விஞ்ஞாணங் ஹோதி
அது³க்க²மஸுக²ஸ்ஸாத³க³தி⁴தங் அது³க்க²மஸுக²ஸ்ஸாத³வினிப³ந்த⁴ங் அது³க்க²மஸுக²ஸ்ஸாத³ஸங்யோஜனஸங்யுத்தங் அஜ்ஜ²த்தங் சித்தங் ஸண்டி²தந்தி வுச்சதி. ஏவங் கோ², ஆவுஸோ, அஜ்ஜ²த்தங் [அஜ்ஜ²த்தங் சித்தங் (ஸீ॰ ஸ்யா॰ கங்॰ பீ॰)] ஸண்டி²தந்தி வுச்சதி.
319. ‘‘கத²ஞ்சாவுஸோ , அஜ்ஜ²த்தங் [அஜ்ஜ²த்தங் சித்தங் (ஸீ॰ ஸ்யா॰ கங்॰ பீ॰)]
அஸண்டி²தந்தி வுச்சதி? இதா⁴வுஸோ, பி⁴க்கு² விவிச்சேவ காமேஹி விவிச்ச
அகுஸலேஹி த⁴ம்மேஹி…பே॰… பட²மங் ஜா²னங் உபஸம்பஜ்ஜ விஹரதி. தஸ்ஸ ந
விவேகஜபீதிஸுகா²னுஸாரி விஞ்ஞாணங் ஹோதி ந விவேகஜபீதிஸுக²ஸ்ஸாத³க³தி⁴தங் ந
விவேகஜபீதிஸுக²ஸ்ஸாத³வினிப³ந்த⁴ங் ந விவேகஜபீதிஸுக²ஸ்ஸாத³ஸங்யோஜனஸங்யுத்தங்
அஜ்ஜ²த்தங் சித்தங் அஸண்டி²தந்தி வுச்சதி.
‘‘புன சபரங், ஆவுஸோ, பி⁴க்கு² விதக்கவிசாரானங்
வூபஸமா…பே॰… து³தியங் ஜா²னங் உபஸம்பஜ்ஜ விஹரதி. தஸ்ஸ ந
ஸமாதி⁴ஜபீதிஸுகா²னுஸாரி விஞ்ஞாணங் ஹோதி ந ஸமாதி⁴ஜபீதிஸுக²ஸ்ஸாத³க³தி⁴தங் ந
ஸமாதி⁴ஜபீதிஸுக²ஸ்ஸாத³வினிப³ந்த⁴ங் ந
ஸமாதி⁴ஜபீதிஸுக²ஸ்ஸாத³ஸங்யோஜனஸங்யுத்தங் அஜ்ஜ²த்தங் சித்தங் அஸண்டி²தந்தி
வுச்சதி .
‘‘புன சபரங், ஆவுஸோ, பி⁴க்கு²
பீதியா ச விராகா³…பே॰… ததியங் ஜா²னங் உபஸம்பஜ்ஜ விஹரதி. தஸ்ஸ ந
உபெக்கா²னுஸாரி விஞ்ஞாணங் ஹோதி ந உபெக்கா²ஸுக²ஸ்ஸாத³க³தி⁴தங் ந
உபெக்கா²ஸுக²ஸ்ஸாத³வினிப³ந்த⁴ங் ந உபெக்கா²ஸுக²ஸ்ஸாத³ஸங்யோஜனஸங்யுத்தங்
அஜ்ஜ²த்தங் சித்தங் அஸண்டி²தந்தி வுச்சதி.
‘‘புன சபரங், ஆவுஸோ, பி⁴க்கு² ஸுக²ஸ்ஸ ச பஹானா
து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா
அது³க்க²மஸுக²ங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ
விஹரதி. தஸ்ஸ ந அது³க்க²மஸுகா²னுஸாரி விஞ்ஞாணங் ஹோதி ந
அது³க்க²மஸுக²ஸ்ஸாத³க³தி⁴தங் ந அது³க்க²மஸுக²ஸ்ஸாத³வினிப³ந்த⁴ங் ந
அது³க்க²மஸுக²ஸ்ஸாத³ஸங்யோஜனஸங்யுத்தங் அஜ்ஜ²த்தங் சித்தங் அஸண்டி²தந்தி
வுச்சதி. ஏவங் கோ², ஆவுஸோ, அஜ்ஜ²த்தங் [அஜ்ஜ²த்தங் சித்தங் (ஸீ॰ ஸ்யா॰ கங்॰ பீ॰)] அஸண்டி²தந்தி வுச்சதி.
320.
‘‘கத²ஞ்சாவுஸோ, அனுபாதா³ பரிதஸ்ஸனா ஹோதி? இதா⁴வுஸோ, அஸ்ஸுதவா புது²ஜ்ஜனோ
அரியானங் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ ஸப்புரிஸானங்
அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³
ஸப்புரிஸத⁴ம்மே அவினீதோ ரூபங் அத்ததோ ஸமனுபஸ்ஸதி ரூபவந்தங் வா அத்தானங்
அத்தனி வா ரூபங் ரூபஸ்மிங் வா அத்தானங். தஸ்ஸ தங் ரூபங் விபரிணமதி, அஞ்ஞதா²
ஹோதி. தஸ்ஸ ரூபவிபரிணாமஞ்ஞதா²பா⁴வா ரூபவிபரிணாமானுபரிவத்தி விஞ்ஞாணங்
ஹோதி. தஸ்ஸ ரூபவிபரிணாமானுபரிவத்தஜா பரிதஸ்ஸனா த⁴ம்மஸமுப்பாதா³ சித்தங்
பரியாதா³ய திட்ட²ந்தி. சேதஸோ பரியாதா³னா உத்தாஸவா ச ஹோதி விகா⁴தவா ச
அபெக்க²வா ச அனுபாதா³ய ச பரிதஸ்ஸதி. வேத³னங் …பே॰… ஸஞ்ஞங்… ஸங்கா²ரே… விஞ்ஞாணங்
அத்ததோ ஸமனுபஸ்ஸதி விஞ்ஞாணவந்தங் வா அத்தானங் அத்தனி வா விஞ்ஞாணங்
விஞ்ஞாணஸ்மிங் வா அத்தானங். தஸ்ஸ தங் விஞ்ஞாணங் விபரிணமதி, அஞ்ஞதா² ஹோதி.
தஸ்ஸ விஞ்ஞாணவிபரிணாமஞ்ஞதா²பா⁴வா விஞ்ஞாணவிபரிணாமானுபரிவத்தி விஞ்ஞாணங்
ஹோதி. தஸ்ஸ விஞ்ஞாணவிபரிணாமானுபரிவத்தஜா பரிதஸ்ஸனா த⁴ம்மஸமுப்பாதா³ சித்தங்
பரியாதா³ய திட்ட²ந்தி. சேதஸோ பரியாதா³னா உத்தாஸவா ச ஹோதி விகா⁴தவா ச
அபெக்க²வா ச அனுபாதா³ய ச பரிதஸ்ஸதி. ஏவங் கோ², ஆவுஸோ, அனுபாதா³ பரிதஸ்ஸனா
ஹோதி.
321. ‘‘கத²ஞ்சாவுஸோ, அனுபாதா³னா அபரிதஸ்ஸனா ஹோதி? இதா⁴வுஸோ, ஸுதவா அரியஸாவகோ அரியானங் த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே
ஸுவினீதோ ஸப்புரிஸானங் த³ஸ்ஸாவீ ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே
ஸுவினீதோ ந ரூபங் அத்ததோ ஸமனுபஸ்ஸதி ந ரூபவந்தங் வா அத்தானங் ந அத்தனி வா
ரூபங் ந ரூபஸ்மிங் வா அத்தானங். தஸ்ஸ தங் ரூபங் விபரிணமதி, அஞ்ஞதா² ஹோதி.
தஸ்ஸ ரூபவிபரிணாமஞ்ஞதா²பா⁴வா ந ச ரூபவிபரிணாமானுபரிவத்தி விஞ்ஞாணங் ஹோதி.
தஸ்ஸ ந ரூபவிபரிணாமானுபரிவத்தஜா பரிதஸ்ஸனா த⁴ம்மஸமுப்பாதா³ சித்தங்
பரியாதா³ய திட்ட²ந்தி. சேதஸோ பரியாதா³னா ந சேவுத்தாஸவா [ந ச உத்தாஸவா (ஸீ॰)]
ஹோதி ந ச விகா⁴தவா ந ச அபெக்க²வா அனுபாதா³ய ச ந பரிதஸ்ஸதி. ந வேத³னங்… ந
ஸஞ்ஞங்… ந ஸங்கா²ரே… ந விஞ்ஞாணங் அத்ததோ ஸமனுபஸ்ஸதி ந விஞ்ஞாணவந்தங் வா
அத்தானங் ந அத்தனி வா விஞ்ஞாணங் ந விஞ்ஞாணஸ்மிங் வா
அத்தானங். தஸ்ஸ தங் விஞ்ஞாணங் விபரிணமதி, அஞ்ஞதா² ஹோதி. தஸ்ஸ
விஞ்ஞாணவிபரிணாமஞ்ஞதா²பா⁴வா ந ச விஞ்ஞாணவிபரிணாமானுபரிவத்தி விஞ்ஞாணங்
ஹோதி. தஸ்ஸ ந விஞ்ஞாணவிபரிணாமானுபரிவத்தஜா பரிதஸ்ஸனா த⁴ம்மஸமுப்பாதா³
சித்தங் பரியாதா³ய திட்ட²ந்தி. சேதஸோ பரியாதா³னா ந சேவுத்தாஸவா ஹோதி ந ச
விகா⁴தவா ந ச அபெக்க²வா, அனுபாதா³ய ச ந பரிதஸ்ஸதி. ஏவங் கோ², ஆவுஸோ,
அனுபாதா³ அபரிதஸ்ஸனா ஹோதி.
‘‘யங் கோ² நோ, ஆவுஸோ, ப⁴க³வா ஸங்கி²த்தேன உத்³தே³ஸங் உத்³தி³ஸித்வா வித்தா²ரேன அத்த²ங் அவிப⁴ஜித்வா
உட்டா²யாஸனா விஹாரங் பவிட்டோ² – ‘ததா² ததா², பி⁴க்க²வே, பி⁴க்கு²
உபபரிக்கெ²ய்ய யதா² யதா² உபபரிக்க²தோ ப³ஹித்³தா⁴ சஸ்ஸ விஞ்ஞாணங்
அவிக்கி²த்தங் அவிஸடங், அஜ்ஜ²த்தங் அஸண்டி²தங் அனுபாதா³ய ந பரிதஸ்ஸெய்ய.
ப³ஹித்³தா⁴, பி⁴க்க²வே, விஞ்ஞாணே அவிக்கி²த்தே அவிஸடே ஸதி அஜ்ஜ²த்தங்
அஸண்டி²தே அனுபாதா³ய அபரிதஸ்ஸதோ ஆயதிங் ஜாதிஜராமரணது³க்க²ஸமுத³யஸம்ப⁴வோ ந
ஹோதீ’தி. இமஸ்ஸ கோ² அஹங், ஆவுஸோ, ப⁴க³வதா ஸங்கி²த்தேன உத்³தே³ஸஸ்ஸ
உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ ஏவங் வித்தா²ரேன அத்த²ங்
ஆஜானாமி. ஆகங்க²மானா ச பன தும்ஹே ஆயஸ்மந்தோ ப⁴க³வந்தங்யேவ உபஸங்கமித்வா
ஏதமத்த²ங் படிபுச்செ²ய்யாத²; யதா² வோ ப⁴க³வா ப்³யாகரோதி ததா² நங்
தா⁴ரெய்யாதா²’’தி.
322.
அத² கோ² தே பி⁴க்கூ² ஆயஸ்மதோ மஹாகச்சானஸ்ஸ பா⁴ஸிதங் அபி⁴னந்தி³த்வா
அனுமோதி³த்வா உட்டா²யாஸனா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் –
‘‘யங் கோ² நோ, ப⁴ந்தே, ப⁴க³வா
ஸங்கி²த்தேன உத்³தே³ஸங் உத்³தி³ஸித்வா வித்தா²ரேன அத்த²ங் அவிப⁴ஜித்வா
உட்டா²யாஸனா விஹாரங் பவிட்டோ² – ‘ததா² ததா², பி⁴க்க²வே, பி⁴க்கு²
உபபரிக்கெ²ய்ய யதா² யதா² உபபரிக்க²தோ ப³ஹித்³தா⁴ சஸ்ஸ விஞ்ஞாணங்
அவிக்கி²த்தங் அவிஸடங், அஜ்ஜ²த்தங் அஸண்டி²தங் அனுபாதா³ய ந பரிதஸ்ஸெய்ய.
ப³ஹித்³தா⁴, பி⁴க்க²வே, விஞ்ஞாணே அவிக்கி²த்தே அவிஸடே ஸதி அஜ்ஜ²த்தங்
அஸண்டி²தே அனுபாதா³ய அபரிதஸ்ஸதோ ஆயதிங் ஜாதிஜராமரணது³க்க²ஸமுத³யஸம்ப⁴வோ ந
ஹோதீ’’’தி.
‘‘தேஸங் நோ, ப⁴ந்தே, அம்ஹாகங், அசிரபக்கந்தஸ்ஸ
ப⁴க³வதோ, ஏதத³ஹோஸி – ‘இத³ங் கோ² நோ, ஆவுஸோ, ப⁴க³வா ஸங்கி²த்தேன உத்³தே³ஸங்
உத்³தி³ஸித்வா வித்தா²ரேன அத்த²ங் அவிப⁴ஜித்வா உட்டா²யாஸனா விஹாரங்
பவிட்டோ² – ததா² ததா², பி⁴க்க²வே, பி⁴க்கு² உபபரிக்கெ²ய்ய, யதா² யதா²
உபபரிக்க²தோ ப³ஹித்³தா⁴ சஸ்ஸ விஞ்ஞாணங் அவிக்கி²த்தங் அவிஸடங், அஜ்ஜ²த்தங்
அஸண்டி²தங் அனுபாதா³ய ந பரிதஸ்ஸெய்ய. ப³ஹித்³தா⁴, பி⁴க்க²வே, விஞ்ஞாணே
அவிக்கி²த்தே அவிஸடே ஸதி அஜ்ஜ²த்தங் அஸண்டி²தே அனுபாதா³ய அபரிதஸ்ஸதோ ஆயதிங்
ஜாதிஜராமரணது³க்க²ஸமுத³யஸம்ப⁴வோ ந ஹோதீதி. கோ நு கோ² இமஸ்ஸ ப⁴க³வதா
ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங் அவிப⁴த்தஸ்ஸ
வித்தா²ரேன அத்த²ங் விப⁴ஜெய்யா’தி? தேஸங் நோ, ப⁴ந்தே, அம்ஹாகங் ஏதத³ஹோஸி –
‘அயங் கோ² ஆயஸ்மா மஹாகச்சானோ ஸத்து² சேவ ஸங்வண்ணிதோ ஸம்பா⁴விதோ ச விஞ்ஞூனங் ஸப்³ரஹ்மசாரீனங். பஹோதி சாயஸ்மா மஹாகச்சானோ
இமஸ்ஸ ப⁴க³வதா ஸங்கி²த்தேன உத்³தே³ஸஸ்ஸ உத்³தி³ட்ட²ஸ்ஸ வித்தா²ரேன அத்த²ங்
அவிப⁴த்தஸ்ஸ வித்தா²ரேன அத்த²ங் விப⁴ஜிதுங். யங்னூன மயங் யேனாயஸ்மா
மஹாகச்சானோ தேனுபஸங்கமெய்யாம; உபஸங்கமித்வா ஆயஸ்மந்தங் மஹாகச்சானங்
ஏதமத்த²ங் படிபுச்செ²ய்யாமா’தி.
‘‘அத² கோ² மயங், ப⁴ந்தே, யேனாயஸ்மா மஹாகச்சானோ
தேனுபஸங்கமிம்ஹ; உபஸங்கமித்வா ஆயஸ்மந்தங் மஹாகச்சானங் ஏதமத்த²ங்
படிபுச்சி²ம்ஹ. தேஸங் நோ, ப⁴ந்தே, ஆயஸ்மதா மஹாகச்சானேன இமேஹி ஆகாரேஹி இமேஹி
பதே³ஹி இமேஹி ப்³யஞ்ஜனேஹி அத்தோ² விப⁴த்தோ’’தி.
‘‘பண்டி³தோ, பி⁴க்க²வே, மஹாகச்சானோ; மஹாபஞ்ஞோ,
பி⁴க்க²வே, மஹாகச்சானோ. மங் சேபி தும்ஹே, பி⁴க்க²வே, ஏதமத்த²ங்
படிபுச்செ²ய்யாத², அஹம்பி ஏவமேவங் ப்³யாகரெய்யங் யதா² தங் மஹாகச்சானேன ப்³யாகதங். ஏஸோ சேவேதஸ்ஸ [ஏஸோ சேதஸ்ஸ (ஸீ॰ பீ॰), ஏஸோ சேவ தஸ்ஸ (ஸ்யா॰ கங்॰), ஏஸோயேவ தஸ்ஸ (க॰)] அத்தோ². ஏவஞ்ச நங் தா⁴ரெய்யாதா²’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
உத்³தே³ஸவிப⁴ங்க³ஸுத்தங் நிட்டி²தங் அட்ட²மங்.
9. அரணவிப⁴ங்க³ஸுத்தங்
323. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘அரணவிப⁴ங்க³ங் வோ, பி⁴க்க²வே, தே³ஸெஸ்ஸாமி. தங் ஸுணாத², ஸாது⁴கங் மனஸி
கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ
பச்சஸ்ஸோஸுங். ப⁴க³வா ஏதத³வோச –
‘‘ந காமஸுக²மனுயுஞ்ஜெய்ய ஹீனங் க³ம்மங் போது²ஜ்ஜனிகங்
அனரியங் அனத்த²ஸங்ஹிதங், ந ச அத்தகிலமதா²னுயோக³மனுயுஞ்ஜெய்ய து³க்க²ங்
அனரியங் அனத்த²ஸங்ஹிதங். ஏதே கோ², பி⁴க்க²வே [ஏதே கோ² (ஸீ॰), ஏதே தே (ஸ்யா॰ கங்॰ பீ॰)],
உபோ⁴ அந்தே அனுபக³ம்ம மஜ்ஜி²மா படிபதா³ ததா²க³தேன அபி⁴ஸம்பு³த்³தா⁴,
சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி.
உஸ்ஸாத³னஞ்ச ஜஞ்ஞா, அபஸாத³னஞ்ச ஜஞ்ஞா; உஸ்ஸாத³னஞ்ச ஞத்வா அபஸாத³னஞ்ச ஞத்வா
நேவுஸ்ஸாதெ³ய்ய, ந அபஸாதெ³ய்ய [நாபஸாதெ³ய்ய (ஸீ॰)],
த⁴ம்மமேவ தே³ஸெய்ய. ஸுக²வினிச்ச²யங் ஜஞ்ஞா; ஸுக²வினிச்ச²யங் ஞத்வா
அஜ்ஜ²த்தங் ஸுக²மனுயுஞ்ஜெய்ய. ரஹோவாத³ங் ந பா⁴ஸெய்ய, ஸம்முகா² ந கீ²ணங் [நாதிகீ²ணங் (ஸ்யா॰ கங்॰ க॰)] ப⁴ணே. அதரமானோவ பா⁴ஸெய்ய, நோ தரமானோ. ஜனபத³னிருத்திங் நாபி⁴னிவேஸெய்ய, ஸமஞ்ஞங் நாதிதா⁴வெய்யாதி – அயமுத்³தே³ஸோ அரணவிப⁴ங்க³ஸ்ஸ.
324. ‘‘‘ந
காமஸுக²மனுயுஞ்ஜெய்ய ஹீனங் க³ம்மங் போது²ஜ்ஜனிகங் அனரியங் அனத்த²ஸங்ஹிதங்,
ந ச அத்தகிலமதா²னுயோக³மனுயுஞ்ஜெய்ய து³க்க²ங் அனரியங் அனத்த²ஸங்ஹித’ந்தி
– இதி கோ² பனேதங் வுத்தங்; கிஞ்சேதங் படிச்ச வுத்தங்? யோ
காமபடிஸந்தி⁴ஸுகி²னோ ஸோமனஸ்ஸானுயோகோ³ ஹீனோ க³ம்மோ போது²ஜ்ஜனிகோ அனரியோ
அனத்த²ஸங்ஹிதோ, ஸது³க்கோ² ஏஸோ த⁴ம்மோ ஸஉபகா⁴தோ ஸஉபாயாஸோ ஸபரிளாஹோ;
மிச்சா²படிபதா³. யோ காமபடிஸந்தி⁴ஸுகி²னோ ஸோமனஸ்ஸானுயோக³ங் அனநுயோகோ³
ஹீனங் க³ம்மங் போது²ஜ்ஜனிகங் அனரியங் அனத்த²ஸங்ஹிதங், அது³க்கோ² ஏஸோ
த⁴ம்மோ அனுபகா⁴தோ அனுபாயாஸோ அபரிளாஹோ; ஸம்மாபடிபதா³. யோ அத்தகிலமதா²னுயோகோ³
து³க்கோ² அனரியோ அனத்த²ஸங்ஹிதோ, ஸது³க்கோ² ஏஸோ த⁴ம்மோ ஸஉபகா⁴தோ ஸஉபாயாஸோ
ஸபரிளாஹோ; மிச்சா²படிபதா³. யோ அத்தகிலமதா²னுயோக³ங் அனநுயோகோ³ து³க்க²ங்
அனரியங் அனத்த²ஸங்ஹிதங், அது³க்கோ² ஏஸோ த⁴ம்மோ அனுபகா⁴தோ
அனுபாயாஸோ அபரிளாஹோ; ஸம்மாபடிபதா³. ‘ந காமஸுக²மனுயுஞ்ஜெய்ய ஹீனங் க³ம்மங்
போது²ஜ்ஜனிகங் அனரியங் அனத்த²ஸங்ஹிதங், ந ச அத்தகிலமதா²னுயோக³ங்
அனுயுஞ்ஜெய்ய து³க்க²ங் அனரியங் அனத்த²ஸங்ஹித’ந்தி – இதி யங் தங் வுத்தங்
இத³மேதங் படிச்ச வுத்தங்.
325.
‘‘‘ஏதே கோ² உபோ⁴ அந்தே அனுபக³ம்ம மஜ்ஜி²மா படிபதா³ ததா²க³தேன
அபி⁴ஸம்பு³த்³தா⁴, சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய
நிப்³பா³னாய ஸங்வத்ததீ’தி – இதி கோ² பனேதங் வுத்தங். கிஞ்சேதங் படிச்ச
வுத்தங்? அயமேவ அரியோ அட்ட²ங்கி³கோ மக்³கோ³, ஸெய்யதி²த³ங் – ஸம்மாதி³ட்டி² ,
ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ,
ஸம்மாஸதி, ஸம்மாஸமாதி⁴. ‘ஏதே கோ² உபோ⁴ அந்தே அனுபக³ம்ம மஜ்ஜி²மா படிபதா³
ததா²க³தேன அபி⁴ஸம்பு³த்³தா⁴, சக்கு²கரணீ ஞாணகரணீ உபஸமாய அபி⁴ஞ்ஞாய
ஸம்போ³தா⁴ய நிப்³பா³னாய ஸங்வத்ததீ’தி – இதி யங் தங் வுத்தங், இத³மேதங்
படிச்ச வுத்தங்.
326.
‘‘‘உஸ்ஸாத³னஞ்ச ஜஞ்ஞா, அபஸாத³னஞ்ச ஜஞ்ஞா; உஸ்ஸாத³னஞ்ச ஞத்வா அபஸாத³னஞ்ச
ஞத்வா நேவுஸ்ஸாதெ³ய்ய, ந அபஸாதெ³ய்ய, த⁴ம்மமேவ தே³ஸெய்யா’தி – இதி கோ²
பனேதங் வுத்தங். கிஞ்சேதங் படிச்ச வுத்தங்? கத²ஞ்ச, பி⁴க்க²வே, உஸ்ஸாத³னா ச
ஹோதி அபஸாத³னா ச, நோ ச த⁴ம்மதே³ஸனா? ‘யே காமபடிஸந்தி⁴ஸுகி²னோ
ஸோமனஸ்ஸானுயோக³ங் அனுயுத்தா ஹீனங் க³ம்மங் போது²ஜ்ஜனிகங் அனரியங்
அனத்த²ஸங்ஹிதங், ஸப்³பே³ தே ஸது³க்கா² ஸஉபகா⁴தா ஸஉபாயாஸா ஸபரிளாஹா
மிச்சா²படிபன்னா’தி – இதி வத³ங் [இதி பரங் (க॰)] இத்தே²கே அபஸாதே³தி.
‘‘‘யே காமபடிஸந்தி⁴ஸுகி²னோ
ஸோமனஸ்ஸானுயோக³ங் அனநுயுத்தா ஹீனங் க³ம்மங் போது²ஜ்ஜனிகங் அனரியங்
அனத்த²ஸங்ஹிதங், ஸப்³பே³ தே அது³க்கா² அனுபகா⁴தா அனுபாயாஸா அபரிளாஹா
ஸம்மாபடிபன்னா’தி – இதி வத³ங் இத்தே²கே உஸ்ஸாதே³தி.
‘‘‘யே அத்தகிலமதா²னுயோக³ங் அனுயுத்தா து³க்க²ங் அனரியங் அனத்த²ஸங்ஹிதங், ஸப்³பே³ தே ஸது³க்கா² ஸஉபகா⁴தா ஸஉபாயாஸா ஸபரிளாஹா மிச்சா²படிபன்னா’தி – இதி வத³ங் இத்தே²கே அபஸாதே³தி.
‘‘‘யே அத்தகிலமதா²னுயோக³ங் அனநுயுத்தா து³க்க²ங் அனரியங் அனத்த²ஸங்ஹிதங், ஸப்³பே³ தே அது³க்கா² அனுபகா⁴தா அனுபாயாஸா அபரிளாஹா ஸம்மாபடிபன்னா’தி – இதி வத³ங் இத்தே²கே உஸ்ஸாதே³தி.
‘‘‘யேஸங் கேஸஞ்சி ப⁴வஸங்யோஜனங் அப்பஹீனங், ஸப்³பே³ தே
ஸது³க்கா² ஸஉபகா⁴தா ஸஉபாயாஸா ஸபரிளாஹா மிச்சா²படிபன்னா’தி – இதி வத³ங்
இத்தே²கே அபஸாதே³தி.
‘‘‘யேஸங் கேஸஞ்சி ப⁴வஸங்யோஜனங் பஹீனங், ஸப்³பே³ தே
அது³க்கா² அனுபகா⁴தா அனுபாயாஸா அபரிளாஹா ஸம்மாபடிபன்னா’தி – இதி வத³ங்
இத்தே²கே உஸ்ஸாதே³தி. ஏவங் கோ², பி⁴க்க²வே, உஸ்ஸாத³னா ச ஹோதி அபஸாத³னா ச,
நோ ச த⁴ம்மதே³ஸனா.
327. ‘‘கத²ஞ்ச, பி⁴க்க²வே, நேவுஸ்ஸாத³னா ஹோதி ந அபஸாத³னா, த⁴ம்மதே³ஸனா ச [த⁴ம்மதே³ஸனாவ (ஸ்யா॰ கங்॰)]?
‘யே காமபடிஸந்தி⁴ஸுகி²னோ ஸோமனஸ்ஸானுயோக³ங் அனுயுத்தா ஹீனங் க³ம்மங்
போது²ஜ்ஜனிகங் அனரியங் அனத்த²ஸங்ஹிதங், ஸப்³பே³ தே ஸது³க்கா² ஸஉபகா⁴தா
ஸஉபாயாஸா ஸபரிளாஹா மிச்சா²படிபன்னா’தி – ந ஏவமாஹ. ‘அனுயோகோ³ ச கோ²,
ஸது³க்கோ² ஏஸோ த⁴ம்மோ ஸஉபகா⁴தோ ஸஉபாயாஸோ ஸபரிளாஹோ; மிச்சா²படிபதா³’தி – இதி
வத³ங் த⁴ம்மமேவ தே³ஸேதி.
‘‘‘யே காமபடிஸந்தி⁴ஸுகி²னோ ஸோமனஸ்ஸானுயோக³ங்
அனநுயுத்தா ஹீனங் க³ம்மங் போது²ஜ்ஜனிகங் அனரியங் அனத்த²ஸங்ஹிதங், ஸப்³பே³
தே அது³க்கா² அனுபகா⁴தா அனுபாயாஸா அபரிளாஹா ஸம்மாபடிபன்னா’தி – ந ஏவமாஹ.
‘அனநுயோகோ³ ச கோ², அது³க்கோ² ஏஸோ த⁴ம்மோ அனுபகா⁴தோ அனுபாயாஸோ அபரிளாஹோ;
ஸம்மாபடிபதா³’தி – இதி வத³ங் த⁴ம்மமேவ தே³ஸேதி.
‘‘‘யே அத்தகிலமதா²னுயோக³ங்
அனுயுத்தா து³க்க²ங் அனரியங் அனத்த²ஸங்ஹிதங், ஸப்³பே³ தே ஸது³க்கா²
ஸஉபகா⁴தா ஸஉபாயாஸா ஸபரிளாஹா மிச்சா²படிபன்னா’தி – ந ஏவமாஹ. ‘அனுயோகோ³ ச கோ²
, ஸது³க்கோ² ஏஸோ த⁴ம்மோ ஸஉபகா⁴தோ ஸஉபாயாஸோ ஸபரிளாஹோ; மிச்சா²படிபதா³’தி – இதி வத³ங் த⁴ம்மமேவ தே³ஸேதி.
‘‘‘யே அத்தகிலமதா²னுயோக³ங் அனநுயுத்தா து³க்க²ங்
அனரியங் அனத்த²ஸங்ஹிதங், ஸப்³பே³ தே அது³க்கா² அனுபகா⁴தா அனுபாயாஸா
அபரிளாஹா ஸம்மாபடிபன்னா’தி – ந ஏவமாஹ. ‘அனநுயோகோ³ ச கோ², அது³க்கோ² ஏஸோ
த⁴ம்மோ அனுபகா⁴தோ அனுபாயாஸோ அபரிளாஹோ; ஸம்மாபடிபதா³’தி – இதி வத³ங்
த⁴ம்மமேவ தே³ஸேதி.
‘‘‘யேஸங் கேஸஞ்சி ப⁴வஸங்யோஜனங் அப்பஹீனங், ஸப்³பே³ தே ஸது³க்கா² ஸஉபகா⁴தா ஸஉபாயாஸா ஸபரிளாஹா மிச்சா²படிபன்னா’தி – ந ஏவமாஹ . ‘ப⁴வஸங்யோஜனே ச கோ² அப்பஹீனே ப⁴வோபி அப்பஹீனோ ஹோதீ’தி – இதி வத³ங் த⁴ம்மமேவ தே³ஸேதி.
‘‘‘யேஸங் கேஸஞ்சி ப⁴வஸங்யோஜனங் பஹீனங், ஸப்³பே³ தே
அது³க்கா² அனுபகா⁴தா அனுபாயாஸா அபரிளாஹா ஸம்மாபடிபன்னா’தி – ந ஏவமாஹ.
‘ப⁴வஸங்யோஜனே ச கோ² பஹீனே ப⁴வோபி பஹீனோ ஹோதீ’தி – இதி வத³ங் த⁴ம்மமேவ
தே³ஸேதி. ஏவங் கோ², பி⁴க்க²வே, நேவுஸ்ஸாத³னா ஹோதி ந அபஸாத³னா, த⁴ம்மதே³ஸனா
ச. ‘உஸ்ஸாத³னஞ்ச ஜஞ்ஞா, அபஸாத³னஞ்ச ஜஞ்ஞா; உஸ்ஸாத³னஞ்ச ஞத்வா அபஸாத³னஞ்ச
ஞத்வா நேவுஸ்ஸாதெ³ய்ய, ந அபஸாதெ³ய்ய, த⁴ம்மமேவ தே³ஸெய்யா’தி – இதி யங் தங்
வுத்தங் இத³மேதங் படிச்ச வுத்தங்.
328.
‘‘‘ஸுக²வினிச்ச²யங் ஜஞ்ஞா; ஸுக²வினிச்ச²யங் ஞத்வா அஜ்ஜ²த்தங்
ஸுக²மனுயுஞ்ஜெய்யா’தி – இதி கோ² பனேதங் வுத்தங். கிஞ்சேதங் படிச்ச வுத்தங்?
பஞ்சிமே, பி⁴க்க²வே, காமகு³ணா. கதமே பஞ்ச? சக்கு²விஞ்ஞெய்யா ரூபா இட்டா²
கந்தா மனாபா பியரூபா காமூபஸங்ஹிதா ரஜனீயா, ஸோதவிஞ்ஞெய்யா
ஸத்³தா³… கா⁴னவிஞ்ஞெய்யா க³ந்தா⁴… ஜிவ்ஹாவிஞ்ஞெய்யா ரஸா… காயவிஞ்ஞெய்யா
பொ²ட்ட²ப்³பா³ இட்டா² கந்தா மனாபா பியரூபா காமூபஸங்ஹிதா ரஜனீயா – இமே கோ²,
பி⁴க்க²வே, பஞ்ச காமகு³ணா. யங் கோ², பி⁴க்க²வே, இமே பஞ்ச காமகு³ணே படிச்ச
உப்பஜ்ஜதி ஸுக²ங் ஸோமனஸ்ஸங் இத³ங் வுச்சதி காமஸுக²ங் மீள்ஹஸுக²ங்
புது²ஜ்ஜனஸுக²ங் அனரியஸுக²ங். ‘ந ஆஸேவிதப்³ப³ங், ந பா⁴வேதப்³ப³ங், ந
ப³ஹுலீகாதப்³ப³ங், பா⁴யிதப்³ப³ங் ஏதஸ்ஸ ஸுக²ஸ்ஸா’தி – வதா³மி. இத⁴ ,
பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி
ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி.
விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங்
அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங் உபஸம்பஜ்ஜ
விஹரதி. பீதியா ச விராகா³ உபெக்க²கோ ச விஹரதி…பே॰… ததியங் ஜா²னங்…
சதுத்த²ங் ஜா²னங் உபஸம்பஜ்ஜ விஹரதி. இத³ங் வுச்சதி நெக்க²ம்மஸுக²ங்
பவிவேகஸுக²ங் உபஸமஸுக²ங் ஸம்போ³தி⁴ஸுக²ங். ‘ஆஸேவிதப்³ப³ங், பா⁴வேதப்³ப³ங்,
ப³ஹுலீகாதப்³ப³ங், ந பா⁴யிதப்³ப³ங் ஏதஸ்ஸ ஸுக²ஸ்ஸா’தி – வதா³மி . ‘ஸுக²வினிச்ச²யங் ஜஞ்ஞா ; ஸுக²வினிச்ச²யங் ஞத்வா அஜ்ஜ²த்தங் ஸுக²மனுயுஞ்ஜெய்யா’தி – இதி யங் தங் வுத்தங் இத³மேதங் படிச்ச வுத்தங்.
329.
‘‘‘ரஹோவாத³ங் ந பா⁴ஸெய்ய, ஸம்முகா² ந கீ²ணங் ப⁴ணே’தி – இதி கோ² பனேதங்
வுத்தங். கிஞ்சேதங் படிச்ச வுத்தங்? தத்ர, பி⁴க்க²வே, யங் ஜஞ்ஞா ரஹோவாத³ங்
அபூ⁴தங் அதச்ச²ங் அனத்த²ஸங்ஹிதங் ஸஸக்கங் [ஸம்பத்தங் (க॰)]
தங் ரஹோவாத³ங் ந பா⁴ஸெய்ய. யம்பி ஜஞ்ஞா ரஹோவாத³ங் பூ⁴தங் தச்ச²ங்
அனத்த²ஸங்ஹிதங் தஸ்ஸபி ஸிக்கெ²ய்ய அவசனாய. யஞ்ச கோ² ஜஞ்ஞா ரஹோவாத³ங்
பூ⁴தங் தச்ச²ங் அத்த²ஸங்ஹிதங் தத்ர காலஞ்ஞூ அஸ்ஸ தஸ்ஸ ரஹோவாத³ஸ்ஸ வசனாய.
தத்ர, பி⁴க்க²வே, யங் ஜஞ்ஞா ஸம்முகா² கீ²ணவாத³ங் அபூ⁴தங் அதச்ச²ங்
அனத்த²ஸங்ஹிதங் ஸஸக்கங் தங் ஸம்முகா² கீ²ணவாத³ங் ந பா⁴ஸெய்ய. யம்பி ஜஞ்ஞா
ஸம்முகா² கீ²ணவாத³ங் பூ⁴தங் தச்ச²ங் அனத்த²ஸங்ஹிதங் தஸ்ஸபி ஸிக்கெ²ய்ய
அவசனாய. யஞ்ச கோ² ஜஞ்ஞா ஸம்முகா² கீ²ணவாத³ங் பூ⁴தங் தச்ச²ங் அத்த²ஸங்ஹிதங்
தத்ர காலஞ்ஞூ அஸ்ஸ தஸ்ஸ ஸம்முகா² கீ²ணவாத³ஸ்ஸ வசனாய. ‘ரஹோவாத³ங் ந
பா⁴ஸெய்ய, ஸம்முகா² ந கீ²ணங் ப⁴ணே’தி – இதி யங் தங் வுத்தங், இத³மேதங்
படிச்ச வுத்தங்.
330.
‘‘‘அதரமானோவ பா⁴ஸெய்ய நோ தரமானோ’தி – இதி கோ² பனேதங் வுத்தங். கிஞ்சேதங்
படிச்ச வுத்தங்? தத்ர, பி⁴க்க²வே, தரமானஸ்ஸ பா⁴ஸதோ காயோபி கிலமதி,
சித்தம்பி உபஹஞ்ஞதி [ஊஹஞ்ஞதி (ஸீ॰)], ஸரோபி உபஹஞ்ஞதி [ஊஹஞ்ஞதி (ஸீ॰)],
கண்டோ²பி ஆதுரீயதி, அவிஸட்ட²ம்பி ஹோதி அவிஞ்ஞெய்யங் தரமானஸ்ஸ பா⁴ஸிதங்.
தத்ர, பி⁴க்க²வே, அதரமானஸ்ஸ பா⁴ஸதோ காயோபி ந கிலமதி, சித்தம்பி ந உபஹஞ்ஞதி,
ஸரோபி ந உபஹஞ்ஞதி, கண்டோ²பி ந ஆதுரீயதி, விஸட்ட²ம்பி ஹோதி விஞ்ஞெய்யங்
அதரமானஸ்ஸ பா⁴ஸிதங். ‘அதரமானோவ பா⁴ஸெய்ய, நோ தரமானோ’தி – இதி யங் தங்
வுத்தங், இத³மேதங் படிச்ச வுத்தங்.
331. ‘‘‘ஜனபத³னிருத்திங்
நாபி⁴னிவேஸெய்ய, ஸமஞ்ஞங் நாதிதா⁴வெய்யா’தி – இதி கோ² பனேதங் வுத்தங்.
கிஞ்சேதங் படிச்ச வுத்தங்? கத²ஞ்ச, பி⁴க்க²வே, ஜனபத³னிருத்தியா ச
அபி⁴னிவேஸோ ஹோதி ஸமஞ்ஞாய ச அதிஸாரோ? இத⁴, பி⁴க்க²வே, ததே³வேகச்சேஸு
ஜனபதே³ஸு ‘பாதீ’தி ஸஞ்ஜானந்தி, ‘பத்த’ந்தி ஸஞ்ஜானந்தி , ‘வித்த’ந்தி [விட்ட²ந்தி (ஸ்யா॰ கங்॰)] ஸஞ்ஜானந்தி, ‘ஸராவ’ந்தி ஸஞ்ஜானந்தி ‘தா⁴ரோப’ந்தி [ஹரோஸந்தி (ஸ்யா॰ கங்॰)] ஸஞ்ஜானந்தி, ‘போண’ந்தி ஸஞ்ஜானந்தி, ‘பிஸீலவ’ந்தி [பிஸீலந்தி (ஸீ॰ பீ॰), பிபிலந்தி (ஸ்யா॰ கங்॰)] ஸஞ்ஜானந்தி. இதி யதா² யதா² நங் தேஸு தேஸு ஜனபதே³ஸு ஸஞ்ஜானந்தி ததா² ததா² தா²மஸா பராமாஸா [பராமஸ்ஸ (ஸீ॰)] அபி⁴னிவிஸ்ஸ வோஹரதி – ‘இத³மேவ ஸச்சங் , மோக⁴மஞ்ஞ’ந்தி. ஏவங் கோ², பி⁴க்க²வே, ஜனபத³னிருத்தியா ச அபி⁴னிவேஸோ ஹோதி ஸமஞ்ஞாய ச அதிஸாரோ.
332.
‘‘கத²ஞ்ச, பி⁴க்க²வே, ஜனபத³னிருத்தியா ச அனபி⁴னிவேஸோ ஹோதி ஸமஞ்ஞாய ச
அனதிஸாரோ? இத⁴, பி⁴க்க²வே, ததே³வேகச்சேஸு ஜனபதே³ஸு ‘பாதீ’தி ஸஞ்ஜானந்தி,
‘பத்த’ந்தி ஸஞ்ஜானந்தி, ‘வித்த’ந்தி ஸஞ்ஜானந்தி, ‘ஸராவ’ந்தி ஸஞ்ஜானந்தி,
‘தா⁴ரோப’ந்தி ஸஞ்ஜானந்தி, ‘போண’ந்தி ஸஞ்ஜானந்தி, ‘பிஸீலவ’ந்தி ஸஞ்ஜானந்தி.
இதி யதா² யதா² நங் தேஸு தேஸு ஜனபதே³ஸு ஸஞ்ஜானந்தி ‘இத³ங் கிர மே [இத³ங் கிர தே ச (க॰)]
ஆயஸ்மந்தோ ஸந்தா⁴ய வோஹரந்தீ’தி ததா² ததா² வோஹரதி அபராமஸங். ஏவங் கோ²,
பி⁴க்க²வே, ஜனபத³னிருத்தியா ச அனபி⁴னிவேஸோ ஹோதி, ஸமஞ்ஞாய ச அனதிஸாரோ.
‘ஜனபத³னிருத்திங் நாபி⁴னிவேஸெய்ய ஸமஞ்ஞங் நாதிதா⁴வெய்யா’தி – இதி யங் தங்
வுத்தங், இத³மேதங் படிச்ச வுத்தங்.
333.
‘‘தத்ர, பி⁴க்க²வே, யோ காமபடிஸந்தி⁴ஸுகி²னோ ஸோமனஸ்ஸானுயோகோ³ ஹீனோ க³ம்மோ
போது²ஜ்ஜனிகோ அனரியோ அனத்த²ஸங்ஹிதோ, ஸது³க்கோ² ஏஸோ த⁴ம்மோ ஸஉபகா⁴தோ
ஸஉபாயாஸோ ஸபரிளாஹோ; மிச்சா²படிபதா³. தஸ்மா ஏஸோ
த⁴ம்மோ ஸரணோ. தத்ர, பி⁴க்க²வே, யோ காமபடிஸந்தி⁴ஸுகி²னோ ஸோமனஸ்ஸானுயோக³ங்
அனநுயோகோ³ ஹீனங் க³ம்மங் போது²ஜ்ஜனிகங் அனரியங் அனத்த²ஸங்ஹிதங், அது³க்கோ²
ஏஸோ த⁴ம்மோ அனுபகா⁴தோ அனுபாயாஸோ அபரிளாஹோ; ஸம்மாபடிபதா³. தஸ்மா ஏஸோ த⁴ம்மோ
அரணோ.
334. ‘‘தத்ர, பி⁴க்க²வே, யோ அத்தகிலமதா²னுயோகோ³ து³க்கோ² அனரியோ அனத்த²ஸங்ஹிதோ, ஸது³க்கோ² ஏஸோ த⁴ம்மோ ஸஉபகா⁴தோ ஸஉபாயாஸோ
ஸபரிளாஹோ; மிச்சா²படிபதா³. தஸ்மா ஏஸோ த⁴ம்மோ ஸரணோ. தத்ர, பி⁴க்க²வே, யோ
அத்தகிலமதா²னுயோக³ங் அனநுயோகோ³ து³க்க²ங் அனரியங் அனத்த²ஸங்ஹிதங்,
அது³க்கோ² ஏஸோ த⁴ம்மோ அனுபகா⁴தோ அனுபாயாஸோ அபரிளாஹோ; ஸம்மாபடிபதா³. தஸ்மா
ஏஸோ த⁴ம்மோ அரணோ.
335.
‘‘தத்ர, பி⁴க்க²வே, யாயங் மஜ்ஜி²மா படிபதா³ ததா²க³தேன அபி⁴ஸம்பு³த்³தா⁴,
சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி,
அது³க்கோ² ஏஸோ த⁴ம்மோ அனுபகா⁴தோ அனுபாயாஸோ அபரிளாஹோ; ஸம்மாபடிபதா³ . தஸ்மா ஏஸோ த⁴ம்மோ அரணோ.
336. ‘‘தத்ர ,
பி⁴க்க²வே, யாயங் உஸ்ஸாத³னா ச அபஸாத³னா ச நோ ச த⁴ம்மதே³ஸனா, ஸது³க்கோ² ஏஸோ
த⁴ம்மோ ஸஉபகா⁴தோ ஸஉபாயாஸோ ஸபரிளாஹோ; மிச்சா²படிபதா³. தஸ்மா ஏஸோ த⁴ம்மோ
ஸரணோ. தத்ர, பி⁴க்க²வே, யாயங் நேவுஸ்ஸாத³னா ச ந அபஸாத³னா ச த⁴ம்மதே³ஸனா ச,
அது³க்கோ² ஏஸோ த⁴ம்மோ அனுபகா⁴தோ அனுபாயாஸோ அபரிளாஹோ; ஸம்மாபடிபதா³. தஸ்மா
ஏஸோ த⁴ம்மோ அரணோ.
337. ‘‘தத்ர, பி⁴க்க²வே, யமித³ங் காமஸுக²ங் மீள்ஹஸுக²ங் போது²ஜ்ஜனஸுக²ங் அனரியஸுக²ங் ,
ஸது³க்கோ² ஏஸோ த⁴ம்மோ ஸஉபகா⁴தோ ஸஉபாயாஸோ ஸபரிளாஹோ; மிச்சா²படிபதா³. தஸ்மா
ஏஸோ த⁴ம்மோ ஸரணோ. தத்ர, பி⁴க்க²வே, யமித³ங் நெக்க²ம்மஸுக²ங் பவிவேகஸுக²ங்
உபஸமஸுக²ங் ஸம்போ³தி⁴ஸுக²ங், அது³க்கோ² ஏஸோ த⁴ம்மோ அனுபகா⁴தோ அனுபாயாஸோ
அபரிளாஹோ; ஸம்மாபடிபதா³. தஸ்மா ஏஸோ த⁴ம்மோ அரணோ.
338.
‘‘தத்ர, பி⁴க்க²வே, ய்வாயங் ரஹோவாதோ³ அபூ⁴தோ அதச்சோ² அனத்த²ஸங்ஹிதோ,
ஸது³க்கோ² ஏஸோ த⁴ம்மோ ஸஉபகா⁴தோ ஸஉபாயாஸோ ஸபரிளாஹோ; மிச்சா²படிபதா³. தஸ்மா
ஏஸோ த⁴ம்மோ ஸரணோ. தத்ர, பி⁴க்க²வே, ய்வாயங் ரஹோவாதோ³ பூ⁴தோ தச்சோ²
அனத்த²ஸங்ஹிதோ, ஸது³க்கோ² ஏஸோ த⁴ம்மோ ஸஉபகா⁴தோ ஸஉபாயாஸோ ஸபரிளாஹோ;
மிச்சா²படிபதா³. தஸ்மா ஏஸோ த⁴ம்மோ ஸரணோ. தத்ர, பி⁴க்க²வே, ய்வாயங் ரஹோவாதோ³
பூ⁴தோ தச்சோ² அத்த²ஸங்ஹிதோ, அது³க்கோ² ஏஸோ த⁴ம்மோ அனுபகா⁴தோ அனுபாயாஸோ
அபரிளாஹோ; ஸம்மாபடிபதா³. தஸ்மா ஏஸோ த⁴ம்மோ அரணோ.
339. ‘‘தத்ர ,
பி⁴க்க²வே, ய்வாயங் ஸம்முகா² கீ²ணவாதோ³ அபூ⁴தோ அதச்சோ² அனத்த²ஸங்ஹிதோ,
ஸது³க்கோ² ஏஸோ த⁴ம்மோ ஸஉபகா⁴தோ ஸஉபாயாஸோ ஸபரிளாஹோ; மிச்சா²படிபதா³. தஸ்மா
ஏஸோ த⁴ம்மோ ஸரணோ. தத்ர, பி⁴க்க²வே, ய்வாயங் ஸம்முகா² கீ²ணவாதோ³ பூ⁴தோ
தச்சோ² அனத்த²ஸங்ஹிதோ, ஸது³க்கோ² ஏஸோ த⁴ம்மோ ஸஉபகா⁴தோ ஸஉபாயாஸோ ஸபரிளாஹோ;
மிச்சா²படிபதா³. தஸ்மா ஏஸோ த⁴ம்மோ ஸரணோ. தத்ர, பி⁴க்க²வே, ய்வாயங் ஸம்முகா²
கீ²ணவாதோ³ பூ⁴தோ தச்சோ² அத்த²ஸங்ஹிதோ, அது³க்கோ² ஏஸோ த⁴ம்மோ அனுபகா⁴தோ அனுபாயாஸோ அபரிளாஹோ; ஸம்மாபடிபதா³. தஸ்மா ஏஸோ த⁴ம்மோ அரணோ.
340.
‘‘தத்ர, பி⁴க்க²வே, யமித³ங் தரமானஸ்ஸ பா⁴ஸிதங், ஸது³க்கோ² ஏஸோ த⁴ம்மோ
ஸஉபகா⁴தோ ஸஉபாயாஸோ ஸபரிளாஹோ; மிச்சா²படிபதா³. தஸ்மா ஏஸோ த⁴ம்மோ ஸரணோ. தத்ர,
பி⁴க்க²வே , யமித³ங் அதரமானஸ்ஸ பா⁴ஸிதங், அது³க்கோ² ஏஸோ த⁴ம்மோ அனுபகா⁴தோ அனுபாயாஸோ அபரிளாஹோ; ஸம்மாபடிபதா³. தஸ்மா ஏஸோ த⁴ம்மோ அரணோ.
341.
‘‘தத்ர, பி⁴க்க²வே, ய்வாயங் ஜனபத³னிருத்தியா ச அபி⁴னிவேஸோ ஸமஞ்ஞாய ச
அதிஸாரோ, ஸது³க்கோ² ஏஸோ த⁴ம்மோ ஸஉபகா⁴தோ ஸஉபாயாஸோ ஸபரிளாஹோ;
மிச்சா²படிபதா³. தஸ்மா ஏஸோ த⁴ம்மோ ஸரணோ. தத்ர பி⁴க்க²வே, ய்வாயங்
ஜனபத³னிருத்தியா ச அனபி⁴னிவேஸோ ஸமஞ்ஞாய ச அனதிஸாரோ, அது³க்கோ² ஏஸோ த⁴ம்மோ
அனுபகா⁴தோ அனுபாயாஸோ அபரிளாஹோ; ஸம்மாபடிபதா³. தஸ்மா ஏஸோ த⁴ம்மோ அரணோ.
‘‘தஸ்மாதிஹ, பி⁴க்க²வே, ‘ஸரணஞ்ச த⁴ம்மங் ஜானிஸ்ஸாம,
அரணஞ்ச த⁴ம்மங் ஜானிஸ்ஸாம; ஸரணஞ்ச த⁴ம்மங் ஞத்வா அரணஞ்ச த⁴ம்மங் ஞத்வா
அரணபடிபத³ங் படிபஜ்ஜிஸ்ஸாமா’தி ஏவஞ்ஹி வோ, பி⁴க்க²வே, ஸிக்கி²தப்³ப³ங்.
ஸுபூ⁴தி ச பன, பி⁴க்க²வே, குலபுத்தோ அரணபடிபத³ங் படிபன்னோ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
அரணவிப⁴ங்க³ஸுத்தங் நிட்டி²தங் நவமங்.
10. தா⁴துவிப⁴ங்க³ஸுத்தங்
342. ஏவங்
மே ஸுதங் – ஏகங் ஸமயங் ப⁴க³வா மக³தே⁴ஸு சாரிகங் சரமானோ யேன ராஜக³ஹங்
தத³வஸரி; யேன ப⁴க்³க³வோ கும்ப⁴காரோ தேனுபஸங்கமி; உபஸங்கமித்வா ப⁴க்³க³வங்
கும்ப⁴காரங் ஏதத³வோச – ‘‘ஸசே தே, ப⁴க்³க³வ, அக³ரு விஹரேமு ஆவேஸனே [விஹராமாவேஸனே (ஸீ॰ பீ॰), விஹராம நிவேஸனே (ஸ்யா॰ கங்॰), விஹரேமு நிவேஸனே (க॰)] ஏகரத்த’’ந்தி. ‘‘ந கோ² மே, ப⁴ந்தே, க³ரு. அத்தி² செத்த² பப்³ப³ஜிதோ பட²மங் வாஸூபக³தோ. ஸசே ஸோ அனுஜானாதி, விஹரத² [விஹர (ஸீ॰ பீ॰)], ப⁴ந்தே, யதா²ஸுக²’’ந்தி.
தேன கோ² பன ஸமயேன புக்குஸாதி
நாம குலபுத்தோ ப⁴க³வந்தங் உத்³தி³ஸ்ஸ ஸத்³தா⁴ய அகா³ரஸ்மா அனகா³ரியங்
பப்³ப³ஜிதோ. ஸோ தஸ்மிங் கும்ப⁴காராவேஸனே [கும்ப⁴காரனிவேஸனே (ஸ்யா॰ கங்॰ க॰)]
பட²மங் வாஸூபக³தோ ஹோதி. அத² கோ² ப⁴க³வா யேனாயஸ்மா புக்குஸாதி தேனுபஸங்கமி;
உபஸங்கமித்வா ஆயஸ்மந்தங் புக்குஸாதிங் ஏதத³வோச – ‘‘ஸசே தே, பி⁴க்கு²,
அக³ரு விஹரேமு ஆவேஸனே ஏகரத்த’’ந்தி. ‘‘உருந்த³ங், ஆவுஸோ [ஊரூந்த³ங் (ஸீ॰ ஸ்யா॰ கங்॰ பீ॰), உரூத்³த⁴ங் (க॰) தீ³॰ நி॰ 2 ஸக்கபஞ்ஹஸுத்தடீகா ஓலோகேதப்³பா³], கும்ப⁴காராவேஸனங். விஹரதாயஸ்மா யதா²ஸுக²’’ந்தி.
அத² கோ² ப⁴க³வா கும்ப⁴காராவேஸனங் பவிஸித்வா ஏகமந்தங் திணஸந்தா²ரகங் [திணஸந்த²ரிகங் (ஸீ॰), திணஸந்த²ரகங் (ஸ்யா॰ கங்॰)] பஞ்ஞாபெத்வா நிஸீதி³ பல்லங்கங் ஆபு⁴ஜித்வா உஜுங் காயங் பணிதா⁴ய பரிமுக²ங் ஸதிங் உபட்ட²பெத்வா. அத² கோ² ப⁴க³வா ப³ஹுதே³வ ரத்திங் நிஸஜ்ஜாய வீதினாமேஸி. ஆயஸ்மாபி கோ² புக்குஸாதி ப³ஹுதே³வ ரத்திங் நிஸஜ்ஜாய வீதினாமேஸி.
அத² கோ² ப⁴க³வதோ ஏதத³ஹோஸி – ‘‘பாஸாதி³கங் கோ² அயங்
குலபுத்தோ இரியதி. யங்னூனாஹங் புச்செ²ய்ய’’ந்தி. அத² கோ² ப⁴க³வா ஆயஸ்மந்தங்
புக்குஸாதிங் ஏதத³வோச – ‘‘கங்ஸி த்வங், பி⁴க்கு², உத்³தி³ஸ்ஸ பப்³ப³ஜிதோ?
கோ வா தே ஸத்தா²? கஸ்ஸ வா த்வங் த⁴ம்மங் ரோசேஸீ’’தி? ‘‘அத்தா²வுஸோ, ஸமணோ
கோ³தமோ ஸக்யபுத்தோ ஸக்யகுலா பப்³ப³ஜிதோ. தங் கோ² பன ப⁴க³வந்தங் கோ³தமங்
ஏவங் கல்யாணோ கித்திஸத்³தோ³ அப்³பு⁴க்³க³தோ – ‘இதிபி ஸோ ப⁴க³வா அரஹங்
ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ
புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி . தாஹங் ப⁴க³வந்தங் உத்³தி³ஸ்ஸ பப்³ப³ஜிதோ. ஸோ ச மே ப⁴க³வா ஸத்தா². தஸ்ஸ சாஹங் ப⁴க³வதோ
த⁴ம்மங் ரோசேமீ’’தி. ‘‘கஹங் பன, பி⁴க்கு², ஏதரஹி ஸோ ப⁴க³வா விஹரதி அரஹங்
ஸம்மாஸம்பு³த்³தோ⁴’’தி. ‘‘அத்தா²வுஸோ, உத்தரேஸு ஜனபதே³ஸு ஸாவத்தி² நாம
நக³ரங். தத்த² ஸோ ப⁴க³வா ஏதரஹி விஹரதி அரஹங் ஸம்மாஸம்பு³த்³தோ⁴’’தி.
‘‘தி³ட்ட²புப்³போ³ பன தே, பி⁴க்கு², ஸோ ப⁴க³வா; தி³ஸ்வா ச பன
ஜானெய்யாஸீ’’தி? ‘‘ந கோ² மே, ஆவுஸோ, தி³ட்ட²புப்³போ³ ஸோ ப⁴க³வா; தி³ஸ்வா சாஹங் ந ஜானெய்ய’’ந்தி.
அத² கோ² ப⁴க³வதோ ஏதத³ஹோஸி – ‘‘மமஞ்ச க்²வாயங் [மங் த்வாயங் (ஸீ॰), மமங் க்²வாயங் (ஸ்யா॰ கங்॰), மங் க்²வாயங் (பீ॰)]
குலபுத்தோ உத்³தி³ஸ்ஸ பப்³ப³ஜிதோ. யங்னூனஸ்ஸாஹங் த⁴ம்மங் தே³ஸெய்ய’’ந்தி.
அத² கோ² ப⁴க³வா ஆயஸ்மந்தங் புக்குஸாதிங் ஆமந்தேஸி – ‘‘த⁴ம்மங் தே,
பி⁴க்கு², தே³ஸெஸ்ஸாமி. தங் ஸுணாஹி, ஸாது⁴கங் மனஸி கரோஹி; பா⁴ஸிஸ்ஸாமீ’’தி.
‘‘ஏவமாவுஸோ’’தி கோ² ஆயஸ்மா புக்குஸாதி ப⁴க³வதோ பச்சஸ்ஸோஸி. ப⁴க³வா ஏதத³வோச –
343. ‘‘‘ச²தா⁴துரோ [ச²த்³தா⁴துரோ (ஸீ॰)]
அயங், பி⁴க்கு², புரிஸோ ச²ப²ஸ்ஸாயதனோ அட்டா²ரஸமனோபவிசாரோ சதுராதி⁴ட்டா²னோ;
யத்த² டி²தங் மஞ்ஞஸ்ஸவா நப்பவத்தந்தி, மஞ்ஞஸ்ஸவே கோ² பன நப்பவத்தமானே முனி
ஸந்தோதி வுச்சதி. பஞ்ஞங் நப்பமஜ்ஜெய்ய, ஸச்சமனுரக்கெ²ய்ய,
சாக³மனுப்³ரூஹெய்ய, ஸந்திமேவ ஸோ ஸிக்கெ²ய்யா’தி – அயமுத்³தே³ஸோ
தா⁴துவிப⁴ங்க³ஸ்ஸ [ச²தா⁴துவிப⁴ங்க³ஸ்ஸ (ஸீ॰ ஸ்யா॰ கங்॰ பீ॰)].
344. ‘‘‘ச²தா⁴துரோ அயங், பி⁴க்கு², புரிஸோ’தி – இதி கோ² பனேதங் வுத்தங். கிஞ்சேதங் படிச்ச வுத்தங்? (ச²யிமா, பி⁴க்கு², தா⁴துயோ) [( ) நத்தி² ஸீ॰ பீ॰ பொத்த²கேஸு]
– பத²வீதா⁴து, ஆபோதா⁴து, தேஜோதா⁴து, வாயோதா⁴து, ஆகாஸதா⁴து, விஞ்ஞாணதா⁴து.
‘ச²தா⁴துரோ அயங், பி⁴க்கு², புரிஸோ’தி – இதி யங் தங் வுத்தங், இத³மேதங்
படிச்ச வுத்தங்.
345.
‘‘‘ச²ப²ஸ்ஸாயதனோ அயங், பி⁴க்கு², புரிஸோ’தி – இதி கோ² பனேதங் வுத்தங்.
கிஞ்சேதங் படிச்ச வுத்தங்? சக்கு²ஸம்ப²ஸ்ஸாயதனங், ஸோதஸம்ப²ஸ்ஸாயதனங்,
கா⁴னஸம்ப²ஸ்ஸாயதனங், ஜிவ்ஹாஸம்ப²ஸ்ஸாயதனங், காயஸம்ப²ஸ்ஸாயதனங்,
மனோஸம்ப²ஸ்ஸாயதனங். ‘ச²ப²ஸ்ஸாயதனோ அயங், பி⁴க்கு², புரிஸோ’தி – இதி யங் தங்
வுத்தங், இத³மேதங் படிச்ச வுத்தங்.
346. ‘‘‘அட்டா²ரஸமனோபவிசாரோ
அயங், பி⁴க்கு², புரிஸோ’தி – இதி கோ² பனேதங் வுத்தங். கிஞ்சேதங் படிச்ச
வுத்தங்? சக்கு²னா ரூபங் தி³ஸ்வா ஸோமனஸ்ஸட்டா²னீயங் ரூபங் உபவிசரதி,
தோ³மனஸ்ஸட்டா²னீயங் ரூபங் உபவிசரதி, உபெக்கா²ட்டா²னீயங் ரூபங் உபவிசரதி; ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங்
கா⁴யித்வா… ஜிவ்ஹாய ரஸங் ஸாயித்வா… காயேன பொ²ட்ட²ப்³ப³ங் பு²ஸித்வா… மனஸா
த⁴ம்மங் விஞ்ஞாய ஸோமனஸ்ஸட்டா²னீயங் த⁴ம்மங் உபவிசரதி, தோ³மனஸ்ஸட்டா²னீயங்
த⁴ம்மங் உபவிசரதி , உபெக்கா²ட்டா²னீயங் த⁴ம்மங்
உபவிசரதி – இதி ச² ஸோமனஸ்ஸுபவிசாரா, ச² தோ³மனஸ்ஸுபவிசாரா, ச²
உபெக்கு²பவிசாரா. ‘அட்டா²ரஸமனோபவிசாரோ அயங், பி⁴க்கு², புரிஸோ’தி – இதி யங்
தங் வுத்தங், இத³மேதங் படிச்ச வுத்தங்.
347.
‘‘‘சதுராதி⁴ட்டா²னோ அயங், பி⁴க்கு², புரிஸோ’தி – இதி கோ² பனேதங் வுத்தங்.
கிஞ்சேதங் படிச்ச வுத்தங்? பஞ்ஞாதி⁴ட்டா²னோ, ஸச்சாதி⁴ட்டா²னோ,
சாகா³தி⁴ட்டா²னோ, உபஸமாதி⁴ட்டா²னோ. ‘சதுராதி⁴ட்டா²னோ அயங், பி⁴க்கு²,
புரிஸோ’தி – இதி யங் தங் வுத்தங் இத³மேதங் படிச்ச வுத்தங்.
348.
‘‘‘பஞ்ஞங் நப்பமஜ்ஜெய்ய, ஸச்சமனுரக்கெ²ய்ய, சாக³மனுப்³ரூஹெய்ய, ஸந்திமேவ
ஸோ ஸிக்கெ²ய்யா’தி – இதி கோ² பனேதங் வுத்தங். கிஞ்சேதங் படிச்ச வுத்தங்?
கத²ஞ்ச, பி⁴க்கு², பஞ்ஞங் நப்பமஜ்ஜதி? ச²யிமா, பி⁴க்கு², தா⁴துயோ –
பத²வீதா⁴து, ஆபோதா⁴து, தேஜோதா⁴து, வாயோதா⁴து, ஆகாஸதா⁴து, விஞ்ஞாணதா⁴து.
349.
‘‘கதமா ச, பி⁴க்கு², பத²வீதா⁴து? பத²வீதா⁴து ஸியா அஜ்ஜ²த்திகா ஸியா
பா³ஹிரா. கதமா ச, பி⁴க்கு², அஜ்ஜ²த்திகா பத²வீதா⁴து? யங் அஜ்ஜ²த்தங்
பச்சத்தங் கக்க²ளங் க²ரிக³தங் உபாதி³ன்னங் [உபாதி³ண்ணங் (பீ॰ க॰)], ஸெய்யதி²த³ங் – கேஸா லோமா நகா² த³ந்தா தசோ மங்ஸங் ந்ஹாரு அட்டி² அட்டி²மிஞ்ஜங் [அட்டி²மிஞ்ஜா (ஸீ॰ பீ॰)]
வக்கங் ஹத³யங் யகனங் கிலோமகங் பிஹகங் பப்பா²ஸங் அந்தங் அந்தகு³ணங்
உத³ரியங் கரீஸங், யங் வா பனஞ்ஞம்பி கிஞ்சி அஜ்ஜ²த்தங் பச்சத்தங் கக்க²ளங்
க²ரிக³தங் உபாதி³ன்னங் – அயங் வுச்சதி, பி⁴க்கு², அஜ்ஜ²த்திகா பத²வீதா⁴து.
யா சேவ கோ² பன அஜ்ஜ²த்திகா பத²வீதா⁴து யா ச பா³ஹிரா பத²வீதா⁴து
பத²வீதா⁴துரேவேஸா . ‘தங் நேதங் மம நேஸோஹமஸ்மி ந மேஸோ அத்தா’தி – ஏவமேதங் யதா²பூ⁴தங் ஸம்மப்பஞ்ஞாய த³ட்ட²ப்³ப³ங். ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா பத²வீதா⁴துயா நிப்³பி³ந்த³தி, பத²வீதா⁴துயா சித்தங் விராஜேதி.
350. ‘‘கதமா ச, பி⁴க்கு², ஆபோதா⁴து? ஆபோதா⁴து ஸியா அஜ்ஜ²த்திகா
ஸியா பா³ஹிரா. கதமா ச, பி⁴க்கு², அஜ்ஜ²த்திகா ஆபோதா⁴து? யங் அஜ்ஜ²த்தங்
பச்சத்தங் ஆபோ ஆபோக³தங் உபாதி³ன்னங் ஸெய்யதி²த³ங் – பித்தங் ஸெம்ஹங்
புப்³போ³ லோஹிதங் ஸேதோ³ மேதோ³ அஸ்ஸு வஸா கே²ளோ ஸிங்கா⁴ணிகா லஸிகா முத்தங்,
யங் வா பனஞ்ஞம்பி கிஞ்சி அஜ்ஜ²த்தங் பச்சத்தங் ஆபோ ஆபோக³தங் உபாதி³ன்னங் –
அயங் வுச்சதி, பி⁴க்கு², அஜ்ஜ²த்திகா ஆபோதா⁴து. யா சேவ கோ² பன அஜ்ஜ²த்திகா
ஆபோதா⁴து யா ச பா³ஹிரா ஆபோதா⁴து ஆபோதா⁴துரேவேஸா. ‘தங் நேதங் மம,
நேஸோஹமஸ்மி, ந மேஸோ அத்தா’தி – ஏவமேதங் யதா²பூ⁴தங் ஸம்மப்பஞ்ஞாய
த³ட்ட²ப்³ப³ங். ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா ஆபோதா⁴துயா
நிப்³பி³ந்த³தி, ஆபோதா⁴துயா சித்தங் விராஜேதி.
351.
‘‘கதமா ச, பி⁴க்கு², தேஜோதா⁴து? தேஜோதா⁴து ஸியா அஜ்ஜ²த்திகா ஸியா பா³ஹிரா.
கதமா ச, பி⁴க்கு², அஜ்ஜ²த்திகா தேஜோதா⁴து? யங் அஜ்ஜ²த்தங் பச்சத்தங் தேஜோ
தேஜோக³தங் உபாதி³ன்னங், ஸெய்யதி²த³ங் – யேன ச ஸந்தப்பதி, யேன ச ஜீரீயதி,
யேன ச பரிட³ய்ஹதி, யேன ச அஸிதபீதகா²யிதஸாயிதங் ஸம்மா பரிணாமங் க³ச்ச²தி,
யங் வா பனஞ்ஞம்பி கிஞ்சி அஜ்ஜ²த்தங் பச்சத்தங் தேஜோ
தேஜோக³தங் உபாதி³ன்னங் – அயங் வுச்சதி, பி⁴க்கு², அஜ்ஜ²த்திகா தேஜோதா⁴து.
யா சேவ கோ² பன அஜ்ஜ²த்திகா தேஜோதா⁴து யா ச பா³ஹிரா தேஜோதா⁴து
தேஜோதா⁴துரேவேஸா. ‘தங் நேதங் மம, நேஸோஹமஸ்மி, ந மேஸோ அத்தா’தி – ஏவமேதங்
யதா²பூ⁴தங் ஸம்மப்பஞ்ஞாய த³ட்ட²ப்³ப³ங். ஏவமேதங் யதா²பூ⁴தங் ஸம்மப்பஞ்ஞாய
தி³ஸ்வா தேஜோதா⁴துயா நிப்³பி³ந்த³தி, தேஜோதா⁴துயா சித்தங் விராஜேதி.
352.
‘‘கதமா ச, பி⁴க்கு², வாயோதா⁴து? வாயோதா⁴து ஸியா அஜ்ஜ²த்திகா ஸியா பா³ஹிரா.
கதமா ச, பி⁴க்கு², அஜ்ஜ²த்திகா வாயோதா⁴து? யங் அஜ்ஜ²த்தங் பச்சத்தங் வாயோ
வாயோக³தங் உபாதி³ன்னங், ஸெய்யதி²த³ங் – உத்³த⁴ங்க³மா வாதா அதோ⁴க³மா வாதா
குச்சி²ஸயா வாதா கொட்டா²ஸயா [கொட்ட²ஸயா (ஸீ॰ ஸ்யா॰ கங்॰ பீ॰)]
வாதா அங்க³மங்கா³னுஸாரினோ வாதா அஸ்ஸாஸோ பஸ்ஸாஸோ இதி, யங் வா பனஞ்ஞம்பி
கிஞ்சி அஜ்ஜ²த்தங் பச்சத்தங் வாயோ வாயோக³தங் உபாதி³ன்னங் – அயங் வுச்சதி,
பி⁴க்கு², அஜ்ஜ²த்திகா வாயோதா⁴து. யா சேவ கோ² பன அஜ்ஜ²த்திகா வாயோதா⁴து யா ச
பா³ஹிரா வாயோதா⁴து வாயோதா⁴துரேவேஸா. ‘தங் நேதங் மம , நேஸோஹமஸ்மி ,
ந மேஸோ அத்தா’தி – ஏவமேதங் யதா²பூ⁴தங் ஸம்மப்பஞ்ஞாய த³ட்ட²ப்³ப³ங்.
ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா வாயோதா⁴துயா நிப்³பி³ந்த³தி,
வாயோதா⁴துயா சித்தங் விராஜேதி.
353. ‘‘கதமா ச, பி⁴க்கு², ஆகாஸதா⁴து? ஆகாஸதா⁴து ஸியா அஜ்ஜ²த்திகா ஸியா பா³ஹிரா. கதமா ச, பி⁴க்கு², அஜ்ஜ²த்திகா ஆகாஸதா⁴து ? யங் அஜ்ஜ²த்தங் பச்சத்தங் ஆகாஸங் ஆகாஸக³தங் உபாதி³ன்னங், ஸெய்யதி²த³ங்
– கண்ணச்சி²த்³த³ங் நாஸச்சி²த்³த³ங் முக²த்³வாரங் யேன ச
அஸிதபீதகா²யிதஸாயிதங் அஜ்ஜோ²ஹரதி, யத்த² ச அஸிதபீதகா²யிதஸாயிதங்
ஸந்திட்ட²தி, யேன ச அஸிதபீதகா²யிதஸாயிதங் அதோ⁴பா⁴க³ங் [அதோ⁴பா⁴கா³ (ஸீ॰ ஸ்யா॰ கங்॰ பீ॰) தே³வதூ³தஸுத்தேன ஸமேதி]
நிக்க²மதி, யங் வா பனஞ்ஞம்பி கிஞ்சி அஜ்ஜ²த்தங் பச்சத்தங் ஆகாஸங்
ஆகாஸக³தங் அக⁴ங் அக⁴க³தங் விவரங் விவரக³தங் அஸம்பு²ட்ட²ங் மங்ஸலோஹிதேஹி
உபாதி³ன்னங் – அயங் வுச்சதி பி⁴க்கு² அஜ்ஜ²த்திகா ஆகாஸதா⁴து. யா சேவ கோ² பன
அஜ்ஜ²த்திகா ஆகாஸதா⁴து யா ச பா³ஹிரா ஆகாஸதா⁴து ஆகாஸதா⁴துரேவேஸா. ‘தங்
நேதங் மம, நேஸோஹமஸ்மி, ந மேஸோ அத்தா’தி – ஏவமேதங் யதா²பூ⁴தங் ஸம்மப்பஞ்ஞாய
த³ட்ட²ப்³ப³ங். ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா ஆகாஸதா⁴துயா
நிப்³பி³ந்த³தி, ஆகாஸதா⁴துயா சித்தங் விராஜேதி.
354. ‘‘அதா²பரங் விஞ்ஞாணங்யேவ அவஸிஸ்ஸதி பரிஸுத்³த⁴ங் பரியோதா³தங். தேன ச விஞ்ஞாணேன கிங் [தேன விஞ்ஞாணேன கிஞ்ச (ஸீ॰)]
விஜானாதி? ‘ஸுக²’ந்திபி விஜானாதி, ‘து³க்க²’ந்திபி விஜானாதி,
‘அது³க்க²மஸுக²’ந்திபி விஜானாதி. ஸுக²வேத³னியங், பி⁴க்கு², ப²ஸ்ஸங் படிச்ச
உப்பஜ்ஜதி ஸுகா² வேத³னா. ஸோ ஸுக²ங் வேத³னங் வேத³யமானோ ‘ஸுக²ங் வேத³னங்
வேத³யாமீ’தி பஜானாதி. ‘தஸ்ஸேவ ஸுக²வேத³னியஸ்ஸ ப²ஸ்ஸஸ்ஸ நிரோதா⁴ யங் தஜ்ஜங்
வேத³யிதங் ஸுக²வேத³னியங் ப²ஸ்ஸங் படிச்ச உப்பன்னா ஸுகா² வேத³னா ஸா
நிருஜ்ஜ²தி, ஸா வூபஸம்மதீ’தி பஜானாதி.
355.
‘‘து³க்க²வேத³னியங், பி⁴க்கு², ப²ஸ்ஸங் படிச்ச உப்பஜ்ஜதி து³க்கா² வேத³னா.
ஸோ து³க்க²ங் வேத³னங் வேத³யமானோ ‘து³க்க²ங் வேத³னங் வேத³யாமீ’தி பஜானாதி.
‘தஸ்ஸேவ து³க்க²வேத³னியஸ்ஸ ப²ஸ்ஸஸ்ஸ நிரோதா⁴ யங் தஜ்ஜங் வேத³யிதங்
து³க்க²வேத³னியங் ப²ஸ்ஸங் படிச்ச உப்பன்னா து³க்கா² வேத³னா ஸா நிருஜ்ஜ²தி, ஸா வூபஸம்மதீ’தி பஜானாதி.
356.
‘‘அது³க்க²மஸுக²வேத³னியங், பி⁴க்கு², ப²ஸ்ஸங் படிச்ச உப்பஜ்ஜதி
அது³க்க²மஸுகா² வேத³னா. ஸோ அது³க்க²மஸுக²ங் வேத³னங் வேத³யமானோ
‘அது³க்க²மஸுக²ங் வேத³னங் வேத³யாமீ’தி பஜானாதி. ‘தஸ்ஸேவ அது³க்க²மஸுக²வேத³னியஸ்ஸ
ப²ஸ்ஸஸ்ஸ நிரோதா⁴ யங் தஜ்ஜங் வேத³யிதங் அது³க்க²மஸுக²வேத³னியங் ப²ஸ்ஸங்
படிச்ச உப்பன்னா அது³க்க²மஸுகா² வேத³னா ஸா நிருஜ்ஜ²தி, ஸா வூபஸம்மதீ’தி
பஜானாதி.
357. ‘‘ஸெய்யதா²பி, பி⁴க்கு², த்³வின்னங் கட்டா²னங் ஸங்க⁴ட்டா [ஸம்ப²ஸ்ஸ (ஸீ॰ பீ॰), ஸங்க⁴டா (ஸ்யா॰ கங்॰)]
ஸமோதா⁴னா உஸ்மா ஜாயதி, தேஜோ அபி⁴னிப்³ப³த்ததி, தேஸங்யேவ த்³வின்னங்
கட்டா²னங் நானாபா⁴வா விக்கே²பா யா தஜ்ஜா உஸ்மா ஸா நிருஜ்ஜ²தி, ஸா
வூபஸம்மதி; ஏவமேவ கோ², பி⁴க்கு², ஸுக²வேத³னியங்
ப²ஸ்ஸங் படிச்ச உப்பஜ்ஜதி ஸுகா² வேத³னா. ஸோ ஸுக²ங் வேத³னங் வேத³யமானோ
‘ஸுக²ங் வேத³னங் வேத³யாமீ’தி பஜானாதி. ‘தஸ்ஸேவ ஸுக²வேத³னியஸ்ஸ ப²ஸ்ஸஸ்ஸ
நிரோதா⁴ யங் தஜ்ஜங் வேத³யிதங் ஸுக²வேத³னியங் ப²ஸ்ஸங் படிச்ச உப்பன்னா ஸுகா²
வேத³னா ஸா நிருஜ்ஜ²தி, ஸா வூபஸம்மதீ’தி பஜானாதி.
358.
‘‘து³க்க²வேத³னியங், பி⁴க்கு², ப²ஸ்ஸங் படிச்ச உப்பஜ்ஜதி து³க்கா² வேத³னா.
ஸோ து³க்க²ங் வேத³னங் வேத³யமானோ ‘து³க்க²ங் வேத³னங் வேத³யாமீ’தி பஜானாதி.
‘தஸ்ஸேவ து³க்க²வேத³னியஸ்ஸ ப²ஸ்ஸஸ்ஸ நிரோதா⁴ யங் தஜ்ஜங் வேத³யிதங்
து³க்க²வேத³னியங் ப²ஸ்ஸங் படிச்ச உப்பன்னா து³க்கா² வேத³னா ஸா நிருஜ்ஜ²தி,
ஸா வூபஸம்மதீ’தி பஜானாதி.
359. ‘‘அது³க்க²மஸுக²வேத³னியங் ,
பி⁴க்கு², ப²ஸ்ஸங் படிச்ச உப்பஜ்ஜதி அது³க்க²மஸுகா² வேத³னா. ஸோ
அது³க்க²மஸுக²ங் வேத³னங் வேத³யமானோ ‘அது³க்க²மஸுக²ங் வேத³னங் வேத³யாமீ’தி
பஜானாதி. ‘தஸ்ஸேவ அது³க்க²மஸுக²வேத³னியஸ்ஸ ப²ஸ்ஸஸ்ஸ நிரோதா⁴ யங் தஜ்ஜங்
வேத³யிதங் அது³க்க²மஸுக²வேத³னியங் ப²ஸ்ஸங் படிச்ச உப்பன்னா அது³க்க²மஸுகா²
வேத³னா ஸா நிருஜ்ஜ²தி, ஸா வூபஸம்மதீ’தி பஜானாதி.
360.
‘‘அதா²பரங் உபெக்கா²யேவ அவஸிஸ்ஸதி பரிஸுத்³தா⁴ பரியோதா³தா முது³ ச
கம்மஞ்ஞா ச பப⁴ஸ்ஸரா ச. ஸெய்யதா²பி, பி⁴க்கு², த³க்கோ² ஸுவண்ணகாரோ வா
ஸுவண்ணகாரந்தேவாஸீ வா உக்கங் ப³ந்தெ⁴ய்ய, உக்கங் ப³ந்தி⁴த்வா உக்காமுக²ங்
ஆலிம்பெய்ய, உக்காமுக²ங் ஆலிம்பெத்வா ஸண்டா³ஸேன ஜாதரூபங் க³ஹெத்வா
உக்காமுகே² பக்கி²பெய்ய, தமேனங் காலேன காலங் அபி⁴த⁴மெய்ய, காலேன காலங்
உத³கேன பரிப்போ²ஸெய்ய, காலேன காலங் அஜ்ஜு²பெக்கெ²ய்ய, தங் ஹோதி ஜாதரூபங் [ஜாதரூபங் த⁴ந்தங் (ஸீ॰ பீ॰)] ஸுத⁴ந்தங் நித்³த⁴ந்தங் நீஹடங் [நிஹதங் (ஸ்யா॰ கங்॰ க॰)] நின்னீதகஸாவங் [நிஹதகஸாவங் (க॰)] முது³ ச கம்மஞ்ஞஞ்ச பப⁴ஸ்ஸரஞ்ச, யஸ்ஸா யஸ்ஸா ச பிளந்த⁴னவிகதியா ஆகங்க²தி – யதி³ பட்டிகாய [பவட்டிகாய (ஸீ॰ ஸ்யா॰)] யதி³ குண்ட³லாய யதி³ கீ³வெய்யகாய யதி³ ஸுவண்ணமாலாய தஞ்சஸ்ஸ அத்த²ங் அனுபோ⁴தி; ஏவமேவ கோ², பி⁴க்கு², அதா²பரங் உபெக்கா²யேவ அவஸிஸ்ஸதி பரிஸுத்³தா⁴ பரியோதா³தா முது³ ச கம்மஞ்ஞா ச பப⁴ஸ்ஸரா ச.
361.
‘‘ஸோ ஏவங் பஜானாதி – ‘இமஞ்சே அஹங் உபெக்க²ங் ஏவங் பரிஸுத்³த⁴ங் ஏவங்
பரியோதா³தங் ஆகாஸானஞ்சாயதனங் உபஸங்ஹரெய்யங், தத³னுத⁴ம்மஞ்ச சித்தங்
பா⁴வெய்யங். ஏவங் மே அயங் உபெக்கா² தங்னிஸ்ஸிதா
தது³பாதா³னா சிரங் தீ³க⁴மத்³தா⁴னங் திட்டெ²ய்ய. இமஞ்சே அஹங் உபெக்க²ங் ஏவங்
பரிஸுத்³த⁴ங் ஏவங் பரியோதா³தங் விஞ்ஞாணஞ்சாயதனங் உபஸங்ஹரெய்யங்,
தத³னுத⁴ம்மஞ்ச சித்தங் பா⁴வெய்யங். ஏவங் மே அயங் உபெக்கா² தங்னிஸ்ஸிதா
தது³பாதா³னா சிரங் தீ³க⁴மத்³தா⁴னங் திட்டெ²ய்ய. இமஞ்சே அஹங்
உபெக்க²ங் ஏவங் பரிஸுத்³த⁴ங் ஏவங் பரியோதா³தங் ஆகிஞ்சஞ்ஞாயதனங்
உபஸங்ஹரெய்யங், தத³னுத⁴ம்மஞ்ச சித்தங் பா⁴வெய்யங். ஏவங் மே அயங் உபெக்கா²
தங்னிஸ்ஸிதா தது³பாதா³னா சிரங் தீ³க⁴மத்³தா⁴னங் திட்டெ²ய்ய. இமஞ்சே அஹங்
உபெக்க²ங் ஏவங் பரிஸுத்³த⁴ங் ஏவங் பரியோதா³தங் நேவஸஞ்ஞானாஸஞ்ஞாயதனங்
உபஸங்ஹரெய்யங், தத³னுத⁴ம்மஞ்ச சித்தங் பா⁴வெய்யங். ஏவங் மே அயங் உபெக்கா²
தங்னிஸ்ஸிதா தது³பாதா³னா சிரங் தீ³க⁴மத்³தா⁴னங் திட்டெ²ய்யா’’’தி.
362.
‘‘ஸோ ஏவங் பஜானாதி – ‘இமஞ்சே அஹங் உபெக்க²ங் ஏவங் பரிஸுத்³த⁴ங் ஏவங்
பரியோதா³தங் ஆகாஸானஞ்சாயதனங் உபஸங்ஹரெய்யங், தத³னுத⁴ம்மஞ்ச சித்தங்
பா⁴வெய்யங்; ஸங்க²தமேதங். இமஞ்சே அஹங் உபெக்க²ங் ஏவங் பரிஸுத்³த⁴ங் ஏவங்
பரியோதா³தங் விஞ்ஞாணஞ்சாயதனங் உபஸங்ஹரெய்யங், தத³னுத⁴ம்மஞ்ச சித்தங்
பா⁴வெய்யங்; ஸங்க²தமேதங். இமஞ்சே அஹங் உபெக்க²ங் ஏவங் பரிஸுத்³த⁴ங் ஏவங்
பரியோதா³தங் ஆகிஞ்சஞ்ஞாயதனங் உபஸங்ஹரெய்யங், தத³னுத⁴ம்மஞ்ச சித்தங்
பா⁴வெய்யங்; ஸங்க²தமேதங். இமஞ்சே அஹங் உபெக்க²ங் ஏவங் பரிஸுத்³த⁴ங் ஏவங்
பரியோதா³தங் நேவஸஞ்ஞானாஸஞ்ஞாயதனங் உபஸங்ஹரெய்யங், தத³னுத⁴ம்மஞ்ச சித்தங்
பா⁴வெய்யங்; ஸங்க²தமேத’’’ந்தி.
‘‘ஸோ நேவ தங் அபி⁴ஸங்க²ரோதி, ந அபி⁴ஸஞ்சேதயதி ப⁴வாய வா
விப⁴வாய வா. ஸோ அனபி⁴ஸங்க²ரொந்தோ அனபி⁴ஸஞ்சேதயந்தோ ப⁴வாய வா விப⁴வாய வா ந
கிஞ்சி லோகே உபாதி³யதி, அனுபாதி³யங் ந பரிதஸ்ஸதி,
அபரிதஸ்ஸங் பச்சத்தங்யேவ பரினிப்³பா³யதி. ‘கீ²ணா ஜாதி, வுஸிதங்
ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி.
363.
‘‘ஸோ ஸுக²ஞ்சே வேத³னங் வேதே³தி, ‘ஸா அனிச்சா’தி பஜானாதி, ‘அனஜ்ஜோ²ஸிதா’தி
பஜானாதி, ‘அனபி⁴னந்தி³தா’தி பஜானாதி. து³க்க²ஞ்சே வேத³னங் வேதே³தி , ‘ஸா அனிச்சா’தி பஜானாதி, ‘அனஜ்ஜோ²ஸிதா’தி
பஜானாதி, ‘அனபி⁴னந்தி³தா’தி பஜானாதி. அது³க்க²மஸுக²ஞ்சே வேத³னங் வேதே³தி,
‘ஸா அனிச்சா’தி பஜானாதி, ‘அனஜ்ஜோ²ஸிதா’தி பஜானாதி, ‘அனபி⁴னந்தி³தா’தி
பஜானாதி.
364.
‘‘ஸோ ஸுக²ஞ்சே வேத³னங் வேதே³தி, விஸங்யுத்தோ நங் வேதே³தி; து³க்க²ஞ்சே
வேத³னங் வேதே³தி, விஸங்யுத்தோ நங் வேதே³தி; அது³க்க²மஸுக²ஞ்சே வேத³னங்
வேதே³தி, விஸங்யுத்தோ நங் வேதே³தி. ஸோ காயபரியந்திகங் வேத³னங் வேத³யமானோ
‘காயபரியந்திகங் வேத³னங் வேத³யாமீ’தி பஜானாதி, ஜீவிதபரியந்திகங்
வேத³னங் வேத³யமானோ ‘ஜீவிதபரியந்திகங் வேத³னங் வேத³யாமீ’தி பஜானாதி,
‘காயஸ்ஸ பே⁴தா³ பரங் மரணா உத்³த⁴ங் ஜீவிதபரியாதா³னா இதே⁴வ ஸப்³ப³வேத³யிதானி
அனபி⁴னந்தி³தானி ஸீதீப⁴விஸ்ஸந்தீ’தி பஜானாதி.
365.
‘‘ஸெய்யதா²பி, பி⁴க்கு², தேலஞ்ச படிச்ச வட்டிஞ்ச படிச்ச தேலப்பதீ³போ
ஜா²யதி; தஸ்ஸேவ தேலஸ்ஸ ச வட்டியா ச பரியாதா³னா அஞ்ஞஸ்ஸ ச அனுபஹாரா [அனுபாஹாரா (ஸீ॰ பீ॰), அனுபாதா³னா (க॰)]
அனாஹாரோ நிப்³பா³யதி; ஏவமேவ கோ², பி⁴க்கு², காயபரியந்திகங் வேத³னங்
வேத³யமானோ ‘காயபரியந்திகங் வேத³னங் வேத³யாமீ’தி பஜானாதி, ஜீவிதபரியந்திகங்
வேத³னங் வேத³யமானோ ‘ஜீவிதபரியந்திகங் வேத³னங் வேத³யாமீ’தி பஜானாதி, ‘காயஸ்ஸ
பே⁴தா³ பரங் மரணா உத்³த⁴ங் ஜீவிதபரியாதா³னா இதே⁴வ ஸப்³ப³வேத³யிதானி
அனபி⁴னந்தி³தானி ஸீதீப⁴விஸ்ஸந்தீ’தி பஜானாதி. தஸ்மா ஏவங் ஸமன்னாக³தோ
பி⁴க்கு² இமினா பரமேன பஞ்ஞாதி⁴ட்டா²னேன ஸமன்னாக³தோ ஹோதி. ஏஸா ஹி, பி⁴க்கு²,
பரமா அரியா பஞ்ஞா யதி³த³ங் – ஸப்³ப³து³க்க²க்க²யே ஞாணங்.
366.
‘‘தஸ்ஸ ஸா விமுத்தி ஸச்சே டி²தா அகுப்பா ஹோதி. தஞ்ஹி, பி⁴க்கு², முஸா யங்
மோஸத⁴ம்மங், தங் ஸச்சங் யங் அமோஸத⁴ம்மங் நிப்³பா³னங். தஸ்மா ஏவங்
ஸமன்னாக³தோ பி⁴க்கு² இமினா பரமேன ஸச்சாதி⁴ட்டா²னேன ஸமன்னாக³தோ ஹோதி.
ஏதஞ்ஹி, பி⁴க்கு², பரமங் அரியஸச்சங் யதி³த³ங் – அமோஸத⁴ம்மங் நிப்³பா³னங்.
367.
‘‘தஸ்ஸேவ கோ² பன புப்³பே³ அவித்³த³ஸுனோ உபதீ⁴ ஹொந்தி ஸமத்தா ஸமாதி³ன்னா.
த்யாஸ்ஸ பஹீனா ஹொந்தி உச்சி²ன்னமூலா தாலாவத்து²கதா அனபா⁴வங்கதா ஆயதிங்
அனுப்பாத³த⁴ம்மா. தஸ்மா ஏவங் ஸமன்னாக³தோ பி⁴க்கு² இமினா பரமேன சாகா³தி⁴ட்டா²னேன ஸமன்னாக³தோ ஹோதி. ஏஸோ ஹி, பி⁴க்கு², பரமோ அரியோ சாகோ³ யதி³த³ங் – ஸப்³பூ³பதி⁴படினிஸ்ஸக்³கோ³.
368. ‘‘தஸ்ஸேவ கோ² பன புப்³பே³ அவித்³த³ஸுனோ அபி⁴ஜ்ஜா² ஹோதி ச²ந்தோ³ ஸாராகோ³. ஸ்வாஸ்ஸ
பஹீனோ ஹோதி உச்சி²ன்னமூலோ தாலாவத்து²கதோ அனபா⁴வங்கதோ ஆயதிங்
அனுப்பாத³த⁴ம்மோ. தஸ்ஸேவ கோ² பன புப்³பே³ அவித்³த³ஸுனோ ஆகா⁴தோ ஹோதி
ப்³யாபாதோ³ ஸம்பதோ³ஸோ. ஸ்வாஸ்ஸ பஹீனோ ஹோதி உச்சி²ன்னமூலோ
தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ. தஸ்ஸேவ கோ² பன
புப்³பே³ அவித்³த³ஸுனோ அவிஜ்ஜா ஹோதி ஸம்மோஹோ. ஸ்வாஸ்ஸ பஹீனோ ஹோதி
உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ. தஸ்மா
ஏவங் ஸமன்னாக³தோ பி⁴க்கு² இமினா பரமேன
உபஸமாதி⁴ட்டா²னேன ஸமன்னாக³தோ ஹோதி. ஏஸோ ஹி, பி⁴க்கு², பரமோ அரியோ உபஸமோ
யதி³த³ங் – ராக³தோ³ஸமோஹானங் உபஸமோ. ‘பஞ்ஞங் நப்பமஜ்ஜெய்ய,
ஸச்சமனுரக்கெ²ய்ய, சாக³மனுப்³ரூஹெய்ய, ஸந்திமேவ ஸோ ஸிக்கெ²ய்யா’தி – இதி
யங் தங் வுத்தங், இத³மேதங் படிச்ச வுத்தங்.
369.
‘‘‘யத்த² டி²தங் மஞ்ஞஸ்ஸவா நப்பவத்தந்தி, மஞ்ஞஸ்ஸவே கோ² பன நப்பவத்தமானே
முனி ஸந்தோதி வுச்சதீ’தி – இதி கோ² பனேதங் வுத்தங். கிஞ்சேதங் படிச்ச
வுத்தங்? ‘அஸ்மீ’தி, பி⁴க்கு², மஞ்ஞிதமேதங், ‘அயமஹமஸ்மீ’தி மஞ்ஞிதமேதங்,
‘ப⁴விஸ்ஸ’ந்தி மஞ்ஞிதமேதங், ‘ந ப⁴விஸ்ஸ’ந்தி மஞ்ஞிதமேதங், ‘ரூபீ
ப⁴விஸ்ஸ’ந்தி மஞ்ஞிதமேதங், ‘அரூபீ ப⁴விஸ்ஸ’ந்தி மஞ்ஞிதமேதங், ‘ஸஞ்ஞீ
ப⁴விஸ்ஸ’ந்தி மஞ்ஞிதமேதங், ‘அஸஞ்ஞீ ப⁴விஸ்ஸ’ந்தி மஞ்ஞிதமேதங்,
‘நேவஸஞ்ஞீனாஸஞ்ஞீ ப⁴விஸ்ஸ’ந்தி மஞ்ஞிதமேதங். மஞ்ஞிதங், பி⁴க்கு², ரோகோ³
மஞ்ஞிதங் க³ண்டோ³ மஞ்ஞிதங் ஸல்லங். ஸப்³ப³மஞ்ஞிதானங் த்வேவ, பி⁴க்கு²,
ஸமதிக்கமா முனி ஸந்தோதி வுச்சதி. முனி கோ² பன, பி⁴க்கு², ஸந்தோ ந ஜாயதி, ந
ஜீயதி, ந மீயதி, ந குப்பதி, ந பிஹேதி. தஞ்ஹிஸ்ஸ, பி⁴க்கு², நத்தி² யேன
ஜாயேத², அஜாயமானோ கிங் ஜீயிஸ்ஸதி, அஜீயமானோ கிங் மீயிஸ்ஸதி, அமீயமானோ கிங்
குப்பிஸ்ஸதி, அகுப்பமானோ கிஸ்ஸ [கிங் (க॰)]
பிஹெஸ்ஸதி? ‘யத்த² டி²தங் மஞ்ஞஸ்ஸவா நப்பவத்தந்தி, மஞ்ஞஸ்ஸவே கோ² பன
நப்பவத்தமானே முனி ஸந்தோதி வுச்சதீ’தி – இதி யங் தங் வுத்தங், இத³மேதங்
படிச்ச வுத்தங். இமங் கோ² மே த்வங், பி⁴க்கு², ஸங்கி²த்தேன
ச²தா⁴துவிப⁴ங்க³ங் தா⁴ரேஹீ’’தி.
370. அத²
கோ² ஆயஸ்மா புக்குஸாதி – ‘‘ஸத்தா² கிர மே அனுப்பத்தோ, ஸுக³தோ கிர மே
அனுப்பத்தோ ஸம்மாஸம்பு³த்³தோ⁴ கிர மே அனுப்பத்தோ’’தி உட்டா²யாஸனா ஏகங்ஸங்
சீவரங் கத்வா ப⁴க³வதோ பாதே³ஸு ஸிரஸா நிபதித்வா ப⁴க³வந்தங் ஏதத³வோச –
‘‘அச்சயோ மங், ப⁴ந்தே, அச்சக³மா யதா²பா³லங் யதா²மூள்ஹங் யதா²அகுஸலங், யோஹங்
ப⁴க³வந்தங் ஆவுஸோவாதே³ன ஸமுதா³சரிதப்³ப³ங் அமஞ்ஞிஸ்ஸங். தஸ்ஸ மே, ப⁴ந்தே,
ப⁴க³வா அச்சயங் அச்சயதோ படிக்³க³ண்ஹாது ஆயதிங் ஸங்வராயா’’தி. ‘‘தக்³க⁴
த்வங், பி⁴க்கு², அச்சயோ அச்சக³மா யதா²பா³லங் யதா²மூள்ஹங் யதா²அகுஸலங் , யங் மங் த்வங் ஆவுஸோவாதே³ன
ஸமுதா³சரிதப்³ப³ங் அமஞ்ஞித்த². யதோ ச கோ² த்வங், பி⁴க்கு², அச்சயங்
அச்சயதோ தி³ஸ்வா யதா²த⁴ம்மங் படிகரோஸி, தங் தே மயங் படிக்³க³ண்ஹாம.
வுத்³தி⁴ஹேஸா, பி⁴க்கு², அரியஸ்ஸ வினயே யோ அச்சயங் அச்சயதோ தி³ஸ்வா
யதா²த⁴ம்மங் படிகரோதி, ஆயதிங் ஸங்வரங் ஆபஜ்ஜதீ’’தி. ‘‘லபெ⁴ய்யாஹங், ப⁴ந்தே,
ப⁴க³வதோ ஸந்திகே உபஸம்பத³’’ந்தி. ‘‘பரிபுண்ணங் பன தே, பி⁴க்கு²,
பத்தசீவர’’ந்தி? ‘‘ந கோ² மே, ப⁴ந்தே, பரிபுண்ணங் பத்தசீவர’’ந்தி. ‘‘ந கோ²,
பி⁴க்கு², ததா²க³தா அபரிபுண்ணபத்தசீவரங் உபஸம்பாதெ³ந்தீ’’தி.
அத² கோ² ஆயஸ்மா புக்குஸாதி ப⁴க³வதோ பா⁴ஸிதங்
அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தங் அபி⁴வாதெ³த்வா
பத³க்கி²ணங் கத்வா பத்தசீவரபரியேஸனங் பக்காமி. அத² கோ² ஆயஸ்மந்தங்
புக்குஸாதிங் பத்தசீவரபரியேஸனங் சரந்தங் விப்³ப⁴ந்தா கா³வீ [ப⁴ந்தகா³வீ (ஸீ॰ பீ॰), கா³வீ (ஸ்யா॰ கங்॰)] ஜீவிதா வோரோபேஸி. அத² கோ² ஸம்ப³ஹுலா
பி⁴க்கூ² யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ²
ப⁴க³வந்தங் ஏதத³வோசுங் – ‘‘யோ ஸோ, ப⁴ந்தே, புக்குஸாதி நாம குலபுத்தோ
ப⁴க³வதா ஸங்கி²த்தேன ஓவாதே³ன ஓவதி³தோ ஸோ காலங்கதோ. தஸ்ஸ கா க³தி, கோ
அபி⁴ஸம்பராயோ’’தி? ‘‘பண்டி³தோ, பி⁴க்க²வே, புக்குஸாதி குலபுத்தோ பச்சபாதி³
த⁴ம்மஸ்ஸானுத⁴ம்மங், ந ச மங் த⁴ம்மாதி⁴கரணங் விஹேஸேஸி [விஹேடே²ஸி (ஸீ॰ ஸ்யா॰ கங்॰) விஹேஸேதி (க॰)].
புக்குஸாதி, பி⁴க்க²வே, குலபுத்தோ பஞ்சன்னங் ஓரம்பா⁴கி³யானங் ஸங்யோஜனானங்
பரிக்க²யா ஓபபாதிகோ தத்த² பரினிப்³பா³யீ அனாவத்தித⁴ம்மோ தஸ்மா லோகா’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
தா⁴துவிப⁴ங்க³ஸுத்தங் நிட்டி²தங் த³ஸமங்.
11. ஸச்சவிப⁴ங்க³ஸுத்தங்
371. ஏவங்
மே ஸுதங் – ஏகங் ஸமயங் ப⁴க³வா பா³ராணஸியங் விஹரதி இஸிபதனே மிக³தா³யே. தத்ர
கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே
பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘ததா²க³தேன, பி⁴க்க²வே, அரஹதா ஸம்மாஸம்பு³த்³தே⁴ன
பா³ராணஸியங் இஸிபதனே மிக³தா³யே அனுத்தரங் த⁴ம்மசக்கங் பவத்திதங்
அப்படிவத்தியங் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா
கேனசி வா லோகஸ்மிங், யதி³த³ங் – சதுன்னங் அரியஸச்சானங் ஆசிக்க²னா தே³ஸனா
பஞ்ஞாபனா பட்ட²பனா விவரணா விப⁴ஜனா உத்தானீகம்மங். கதமேஸங் சதுன்னங்?
து³க்க²ஸ்ஸ அரியஸச்சஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா
உத்தானீகம்மங், து³க்க²ஸமுத³யஸ்ஸ அரியஸச்சஸ்ஸ ஆசிக்க²னா தே³ஸனா பஞ்ஞாபனா
பட்ட²பனா விவரணா விப⁴ஜனா உத்தானீகம்மங், து³க்க²னிரோத⁴ஸ்ஸ அரியஸச்சஸ்ஸ
ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மங்,
து³க்க²னிரோத⁴கா³மினியா படிபதா³ய அரியஸச்சஸ்ஸ ஆசிக்க²னா தே³ஸனா பஞ்ஞாபனா
பட்ட²பனா விவரணா விப⁴ஜனா உத்தானீகம்மங். ததா²க³தேன, பி⁴க்க²வே, அரஹதா
ஸம்மாஸம்பு³த்³தே⁴ன பா³ராணஸியங் இஸிபதனே மிக³தா³யே அனுத்தரங் த⁴ம்மசக்கங்
பவத்திதங் அப்படிவத்தியங் ஸமணேன வா ப்³ராஹ்மணேன வா தே³வேன வா மாரேன வா
ப்³ரஹ்முனா வா கேனசி வா லோகஸ்மிங் , யதி³த³ங் – இமேஸங் சதுன்னங் அரியஸச்சானங் ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மங்.
‘‘ஸேவத², பி⁴க்க²வே, ஸாரிபுத்தமொக்³க³ல்லானே; ப⁴ஜத²,
பி⁴க்க²வே, ஸாரிபுத்தமொக்³க³ல்லானே. பண்டி³தா பி⁴க்கூ² அனுக்³கா³ஹகா
ஸப்³ரஹ்மசாரீனங். ஸெய்யதா²பி, பி⁴க்க²வே, ஜனேதா [ஜனெத்தி (ஸீ॰ பீ॰)],
ஏவங் ஸாரிபுத்தோ; ஸெய்யதா²பி ஜாதஸ்ஸ ஆபாதே³தா, ஏவங் மொக்³க³ல்லானோ.
ஸாரிபுத்தோ, பி⁴க்க²வே, ஸோதாபத்திப²லே வினேதி, மொக்³க³ல்லானோ உத்தமத்தே².
ஸாரிபுத்தோ, பி⁴க்க²வே, பஹோதி சத்தாரி அரியஸச்சானி வித்தா²ரேன ஆசிக்கி²துங்
தே³ஸேதுங் பஞ்ஞாபேதுங் பட்ட²பேதுங் விவரிதுங் விப⁴ஜிதுங்
உத்தானீகாது’’ந்தி. இத³மவோச ப⁴க³வா. இத³ங் வத்வான ஸுக³தோ உட்டா²யாஸனா
விஹாரங் பாவிஸி.
372. தத்ர கோ² ஆயஸ்மா ஸாரிபுத்தோ அசிரபக்கந்தஸ்ஸ ப⁴க³வதோ பி⁴க்கூ² ஆமந்தேஸி – ‘‘ஆவுஸோ, பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸுங். ஆயஸ்மா ஸாரிபுத்தோ ஏதத³வோச –
‘‘ததா²க³தேன, ஆவுஸோ, அரஹதா ஸம்மாஸம்பு³த்³தே⁴ன
பா³ராணஸியங் இஸிபதனே மிக³தா³யே அனுத்தரங் த⁴ம்மசக்கங் பவத்திதங்
அப்படிவத்தியங் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா
கேனசி வா லோகஸ்மிங், யதி³த³ங் – சதுன்னங் அரியஸச்சானங் ஆசிக்க²னா தே³ஸனா
பஞ்ஞாபனா பட்ட²பனா விவரணா விப⁴ஜனா உத்தானீகம்மங். கதமேஸங் சதுன்னங்?
து³க்க²ஸ்ஸ அரியஸச்சஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா
உத்தானீகம்மங், து³க்க²ஸமுத³யஸ்ஸ அரியஸச்சஸ்ஸ
ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மங்,
து³க்க²னிரோத⁴ஸ்ஸ அரியஸச்சஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா
விப⁴ஜனா உத்தானீகம்மங், து³க்க²னிரோத⁴கா³மினியா படிபதா³ய அரியஸச்சஸ்ஸ
ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மங்.
373.
‘‘கதமஞ்சாவுஸோ, து³க்க²ங் அரியஸச்சங்? ஜாதிபி து³க்கா², ஜராபி து³க்கா²,
மரணம்பி து³க்க²ங், ஸோகபரிதே³வது³க்க²தோ³மனஸ்ஸுபாயாஸாபி து³க்கா²,
யம்பிச்ச²ங் ந லப⁴தி தம்பி து³க்க²ங்; ஸங்கி²த்தேன பஞ்சுபாதா³னக்க²ந்தா⁴
து³க்கா².
‘‘கதமா சாவுஸோ, ஜாதி? யா தேஸங் தேஸங் ஸத்தானங் தம்ஹி
தம்ஹி ஸத்தனிகாயே ஜாதி ஸஞ்ஜாதி ஓக்கந்தி அபி⁴னிப்³ப³த்தி க²ந்தா⁴னங்
பாதுபா⁴வோ ஆயதனானங் படிலாபோ⁴, அயங் வுச்சதாவுஸோ – ‘ஜாதி’’’.
‘‘கதமா சாவுஸோ, ஜரா? யா தேஸங் தேஸங் ஸத்தானங் தம்ஹி
தம்ஹி ஸத்தனிகாயே ஜரா ஜீரணதா க²ண்டி³ச்சங் பாலிச்சங் வலித்தசதா ஆயுனோ
ஸங்ஹானி இந்த்³ரியானங் பரிபாகோ, அயங் வுச்சதாவுஸோ – ‘ஜரா’’’.
‘‘கதமஞ்சாவுஸோ, மரணங்? யா தேஸங் தேஸங் ஸத்தானங் தம்ஹா தம்ஹா ஸத்தனிகாயா சுதி சவனதா
பே⁴தோ³ அந்தரதா⁴னங் மச்சு மரணங் காலங்கிரியா க²ந்தா⁴னங் பே⁴தோ³ களேவரஸ்ஸ
நிக்கே²போ ஜீவிதிந்த்³ரியஸ்ஸுபச்சே²தோ³, இத³ங் வுச்சதாவுஸோ – ‘மரணங்’’’.
‘‘கதமோ சாவுஸோ, ஸோகோ? யோ கோ², ஆவுஸோ, அஞ்ஞதரஞ்ஞதரேன
ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன து³க்க²த⁴ம்மேன பு²ட்ட²ஸ்ஸ ஸோகோ ஸோசனா
ஸோசிதத்தங் அந்தோஸோகோ அந்தோபரிஸோகோ, அயங் வுச்சதாவுஸோ – ‘ஸோகோ’’’.
‘‘கதமோ சாவுஸோ, பரிதே³வோ? யோ
கோ², ஆவுஸோ, அஞ்ஞதரஞ்ஞதரேன ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன
து³க்க²த⁴ம்மேன பு²ட்ட²ஸ்ஸ ஆதே³வோ பரிதே³வோ ஆதே³வனா பரிதே³வனா ஆதே³விதத்தங் பரிதே³விதத்தங், அயங் வுச்சதாவுஸோ – ‘பரிதே³வோ’’’.
‘‘கதமஞ்சாவுஸோ, து³க்க²ங்? யங் கோ², ஆவுஸோ, காயிகங்
து³க்க²ங் காயிகங் அஸாதங் காயஸம்ப²ஸ்ஸஜங் து³க்க²ங் அஸாதங் வேத³யிதங்,
இத³ங் வுச்சதாவுஸோ – ‘து³க்க²ங்’’’.
‘‘கதமஞ்சாவுஸோ, தோ³மனஸ்ஸங்? யங் கோ², ஆவுஸோ, சேதஸிகங்
து³க்க²ங் சேதஸிகங் அஸாதங் மனோஸம்ப²ஸ்ஸஜங் து³க்க²ங் அஸாதங் வேத³யிதங்,
இத³ங் வுச்சதாவுஸோ – ‘தோ³மனஸ்ஸங்’’’.
‘‘கதமோ சாவுஸோ, உபாயாஸோ? யோ கோ², ஆவுஸோ, அஞ்ஞதரஞ்ஞதரேன
ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன து³க்க²த⁴ம்மேன பு²ட்ட²ஸ்ஸ ஆயாஸோ
உபாயாஸோ ஆயாஸிதத்தங் உபாயாஸிதத்தங், அயங் வுச்சதாவுஸோ – ‘உபாயாஸோ’’’.
‘‘கதமஞ்சாவுஸோ, யம்பிச்ச²ங் ந லப⁴தி தம்பி து³க்க²ங்?
ஜாதித⁴ம்மானங், ஆவுஸோ, ஸத்தானங் ஏவங் இச்சா² உப்பஜ்ஜதி – ‘அஹோ வத, மயங் ந
ஜாதித⁴ம்மா அஸ்ஸாம; ந ச, வத, நோ ஜாதி ஆக³ச்செ²ய்யா’தி. ந கோ² பனேதங்
இச்சா²ய பத்தப்³ப³ங். இத³ம்பி – ‘யம்பிச்ச²ங் ந லப⁴தி தம்பி து³க்க²ங்’.
ஜராத⁴ம்மானங், ஆவுஸோ, ஸத்தானங்…பே॰… ப்³யாதி⁴த⁴ம்மானங், ஆவுஸோ, ஸத்தானங்…
மரணத⁴ம்மானங், ஆவுஸோ, ஸத்தானங்… ஸோகபரிதே³வது³க்க²தோ³மனஸ்ஸுபாயாஸத⁴ம்மானங்,
ஆவுஸோ, ஸத்தானங் ஏவங் இச்சா² உப்பஜ்ஜதி – ‘அஹோ வத, மயங் ந
ஸோகபரிதே³வது³க்க²தோ³மனஸ்ஸுபாயாஸத⁴ம்மா அஸ்ஸாம ; ந ச, வத, நோ ஸோகபரிதே³வது³க்க²தோ³மனஸ்ஸுபாயாஸா ஆக³ச்செ²ய்யு’ந்தி . ந கோ² பனேதங் இச்சா²ய பத்தப்³ப³ங். இத³ம்பி – ‘யம்பிச்ச²ங் ந லப⁴தி தம்பி து³க்க²ங்’’’.
‘‘கதமே சாவுஸோ, ஸங்கி²த்தேன பஞ்சுபாதா³னக்க²ந்தா⁴
து³க்கா²? ஸெய்யதி²த³ங் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴,
ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴.
இமே வுச்சந்தாவுஸோ – ‘ஸங்கி²த்தேன பஞ்சுபாதா³னக்க²ந்தா⁴ து³க்கா²’. இத³ங்
வுச்சதாவுஸோ – ‘து³க்க²ங் அரியஸச்சங்’’’.
374. ‘‘கதமஞ்சாவுஸோ, து³க்க²ஸமுத³யங் [து³க்க²ஸமுத³யோ (ஸ்யா॰ கங்॰)] அரியஸச்சங்? யாயங் தண்ஹா போனொப்³ப⁴விகா [போனோப⁴விகா (ஸீ॰ பீ॰)] நந்தீ³ராக³ஸஹக³தா [நந்தி³ராக³ஸஹக³தா (ஸீ॰ ஸ்யா॰ கங்॰ பீ॰)] தத்ரதத்ராபி⁴னந்தி³னீ, ஸெய்யதி²த³ங் – காமதண்ஹா ப⁴வதண்ஹா விப⁴வதண்ஹா , இத³ங் வுச்சதாவுஸோ – ‘து³க்க²ஸமுத³யங் [து³க்க²ஸமுத³யோ (ஸ்யா॰ கங்॰)] அரியஸச்சங்’’’.
‘‘கதமஞ்சாவுஸோ, து³க்க²னிரோத⁴ங் [து³க்க²னிரோதோ⁴ (ஸ்யா॰ கங்॰)] அரியஸச்சங்? யோ தஸ்ஸாயேவ தண்ஹாய அஸேஸவிராக³னிரோதோ⁴ சாகோ³ படினிஸ்ஸக்³கோ³ முத்தி அனாலயோ, இத³ங் வுச்சதாவுஸோ – ‘து³க்க²னிரோத⁴ங் [து³க்க²னிரோதோ⁴ (ஸ்யா॰ கங்॰)] அரியஸச்சங்’’’.
375.
‘‘கதமஞ்சாவுஸோ, து³க்க²னிரோத⁴கா³மினீ படிபதா³ அரியஸச்சங்? அயமேவ அரியோ
அட்ட²ங்கி³கோ மக்³கோ³, ஸெய்யதி²த³ங் – ஸம்மாதி³ட்டி², ஸம்மாஸங்கப்போ,
ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி,
ஸம்மாஸமாதி⁴.
‘‘கதமாசாவுஸோ, ஸம்மாதி³ட்டி²? யங் கோ², ஆவுஸோ,
து³க்கே² ஞாணங், து³க்க²ஸமுத³யே ஞாணங், து³க்க²னிரோதே⁴ ஞாணங்,
து³க்க²னிரோத⁴கா³மினியா படிபதா³ய ஞாணங், அயங் வுச்சதாவுஸோ –
‘ஸம்மாதி³ட்டி²’’’.
‘‘கதமோ சாவுஸோ, ஸம்மாஸங்கப்போ? நெக்க²ம்மஸங்கப்போ, அப்³யாபாத³ஸங்கப்போ , அவிஹிங்ஸாஸங்கப்போ, அயங் வுச்சதாவுஸோ – ‘ஸம்மாஸங்கப்போ’’’.
‘‘கதமா சாவுஸோ, ஸம்மாவாசா? முஸாவாதா³ வேரமணீ, பிஸுணாய
வாசாய வேரமணீ, ப²ருஸாய வாசாய வேரமணீ, ஸம்ப²ப்பலாபா வேரமணீ, அயங்
வுச்சதாவுஸோ – ‘ஸம்மாவாசா’’’.
‘‘கதமோ சாவுஸோ, ஸம்மாகம்மந்தீ? பாணாதிபாதா வேரமணீ, அதி³ன்னாதா³னா வேரமணீ, காமேஸுமிச்சா²சாரா வேரமணீ, அயங் வுச்சதாவுஸோ – ‘ஸம்மாகம்மந்தோ’’’.
‘‘கதமோ சாவுஸோ, ஸம்மாஆஜீவோ? இதா⁴வுஸோ, அரியஸாவகோ
மிச்சா²ஆஜீவங் பஹாய ஸம்மாஆஜீவேன ஜீவிகங் கப்பேதி, அயங் வுச்சதாவுஸோ –
‘ஸம்மாஆஜீவோ’’’.
‘‘கதமோ சாவுஸோ, ஸம்மாவாயாமோ? இதா⁴வுஸோ, பி⁴க்கு²
அனுப்பன்னானங் பாபகானங் அகுஸலானங் த⁴ம்மானங் அனுப்பாதா³ய ச²ந்த³ங் ஜனேதி
வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி, உப்பன்னானங் பாபகானங்
அகுஸலானங் த⁴ம்மானங் பஹானாய ச²ந்த³ங் ஜனேதி வாயமதி வீரியங் ஆரப⁴தி சித்தங்
பக்³க³ண்ஹாதி பத³ஹதி, அனுப்பன்னானங் குஸலானங் த⁴ம்மானங் உப்பாதா³ய ச²ந்த³ங் ஜனேதி வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி, உப்பன்னானங் குஸலானங் த⁴ம்மானங் டி²தியா
அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ங் ஜனேதி
வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி, அயங் வுச்சதாவுஸோ –
‘ஸம்மாவாயாமோ’’’.
‘‘கதமா சாவுஸோ, ஸம்மாஸதி? இதா⁴வுஸோ, பி⁴க்கு² காயே
காயானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே
அபி⁴ஜ்ஜா²தோ³மனஸ்ஸங். வேத³னாஸு வேத³னானுபஸ்ஸீ விஹரதி…பே॰… சித்தே
சித்தானுபஸ்ஸீ விஹரதி… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங், அயங் வுச்சதாவுஸோ – ‘ஸம்மாஸதி’’’.
‘‘கதமோ சாவுஸோ, ஸம்மாஸமாதி⁴? இதா⁴வுஸோ, பி⁴க்கு²
விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங்
பீதிஸுக²ங் பட²மங் ஜா²னங் உபஸம்பஜ்ஜ விஹரதி, விதக்கவிசாரானங் வூபஸமா
அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங்
பீதிஸுக²ங் து³தியங் ஜா²னங் உபஸம்பஜ்ஜ விஹரதி, பீதியா ச விராகா³ உபெக்க²கோ ச
விஹரதி…பே॰… ததியங் ஜா²னங்… விஹரதி, அயங் வுச்சதாவுஸோ – ‘ஸம்மாஸமாதி⁴’. இத³ங் வுச்சதாவுஸோ – ‘து³க்க²னிரோத⁴கா³மினீ படிபதா³ அரியஸச்சங்’’’.
‘‘ததா²க³தேனாவுஸோ, அரஹதா ஸம்மாஸம்பு³த்³தே⁴ன
பா³ராணஸியங் இஸிபதனே மிக³தா³யே அனுத்தரங் த⁴ம்மசக்கங் பவத்திதங்
அப்படிவத்தியங் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா
கேனசி வா லோகஸ்மிங், யதி³த³ங் – இமேஸங் சதுன்னங் அரியஸச்சானங் ஆசிக்க²னா
தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்ம’’ந்தி.
இத³மவோச ஆயஸ்மா ஸாரிபுத்தோ. அத்தமனா தே பி⁴க்கூ² ஆயஸ்மதோ ஸாரிபுத்தஸ்ஸ பா⁴ஸிதங் அபி⁴னந்து³ந்தி.
ஸச்சவிப⁴ங்க³ஸுத்தங் நிட்டி²தங் ஏகாத³ஸமங்.
12. த³க்கி²ணாவிப⁴ங்க³ஸுத்தங்
376. ஏவங் மே ஸுதங் – ஏகங் ஸமயங் ப⁴க³வா ஸக்கேஸு விஹரதி கபிலவத்து²ஸ்மிங் நிக்³ரோதா⁴ராமே. அத² கோ² மஹாபஜாபதி [மஹாபஜாபதீ (ஸீ॰ ஸ்யா॰ கங்॰ பீ॰)] கோ³தமீ நவங் து³ஸ்ஸயுக³ங் ஆதா³ய யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா
ஏகமந்தங் நிஸீதி³. ஏகமந்தங் நிஸின்னா கோ² மஹாபஜாபதி கோ³தமீ ப⁴க³வந்தங்
ஏதத³வோச – ‘‘இத³ங் மே, ப⁴ந்தே, நவங் து³ஸ்ஸயுக³ங் ப⁴க³வந்தங் உத்³தி³ஸ்ஸ
ஸாமங் கந்தங் ஸாமங் வாயிதங். தங் மே, ப⁴ந்தே, ப⁴க³வா படிக்³க³ண்ஹாது
அனுகம்பங் உபாதா³யா’’தி. ஏவங் வுத்தே, ப⁴க³வா மஹாபஜாபதிங் கோ³தமிங் ஏதத³வோச
– ‘‘ஸங்கே⁴, கோ³தமி, தே³ஹி. ஸங்கே⁴ தே தி³ன்னே அஹஞ்சேவ பூஜிதோ ப⁴விஸ்ஸாமி
ஸங்கோ⁴ சா’’தி. து³தியம்பி கோ² மஹாபஜாபதி கோ³தமீ ப⁴க³வந்தங் ஏதத³வோச –
‘‘இத³ங் மே, ப⁴ந்தே, நவங் து³ஸ்ஸயுக³ங் ப⁴க³வந்தங் உத்³தி³ஸ்ஸ ஸாமங் கந்தங்
ஸாமங் வாயிதங். தங் மே, ப⁴ந்தே, ப⁴க³வா படிக்³க³ண்ஹாது அனுகம்பங்
உபாதா³யா’’தி. து³தியம்பி கோ² ப⁴க³வா மஹாபஜாபதிங் கோ³தமிங் ஏதத³வோச –
‘‘ஸங்கே⁴, கோ³தமி, தே³ஹி. ஸங்கே⁴ தே தி³ன்னே அஹஞ்சேவ பூஜிதோ ப⁴விஸ்ஸாமி
ஸங்கோ⁴ சா’’தி. ததியம்பி கோ² மஹாபஜாபதி கோ³தமீ ப⁴க³வந்தங் ஏதத³வோச –
‘‘இத³ங் மே, ப⁴ந்தே, நவங் து³ஸ்ஸயுக³ங் ப⁴க³வந்தங் உத்³தி³ஸ்ஸ ஸாமங் கந்தங்
ஸாமங் வாயிதங். தங் மே, ப⁴ந்தே, ப⁴க³வா படிக்³க³ண்ஹாது அனுகம்பங்
உபாதா³யா’’தி. ததியம்பி கோ² ப⁴க³வா மஹாபஜாபதிங் கோ³தமிங் ஏதத³வோச –
‘‘ஸங்கே⁴, கோ³தமி, தே³ஹி . ஸங்கே⁴ தே தி³ன்னே அஹஞ்சேவ பூஜிதோ ப⁴விஸ்ஸாமி ஸங்கோ⁴ சா’’தி.
377.
ஏவங் வுத்தே, ஆயஸ்மா ஆனந்தோ³ ப⁴க³வந்தங் ஏதத³வோச – ‘‘படிக்³க³ண்ஹாது,
ப⁴ந்தே, ப⁴க³வா மஹாபஜாபதியா கோ³தமியா நவங் து³ஸ்ஸயுக³ங். ப³ஹூபகாரா [ப³ஹுகாரா (ஸ்யா॰ கங்॰)],
ப⁴ந்தே, மஹாபஜாபதி கோ³தமீ ப⁴க³வதோ மாதுச்சா² ஆபாதி³கா போஸிகா கீ²ரஸ்ஸ
தா³யிகா; ப⁴க³வந்தங் ஜனெத்தியா காலங்கதாய த²ஞ்ஞங் பாயேஸி. ப⁴க³வாபி,
ப⁴ந்தே, ப³ஹூபகாரோ மஹாபஜாபதியா கோ³தமியா. ப⁴க³வந்தங், ப⁴ந்தே, ஆக³ம்ம
மஹாபஜாபதி கோ³தமீ பு³த்³த⁴ங் ஸரணங் க³தா, த⁴ம்மங் ஸரணங் க³தா, ஸங்க⁴ங்
ஸரணங் க³தா. ப⁴க³வந்தங், ப⁴ந்தே, ஆக³ம்ம மஹாபஜாபதி கோ³தமீ பாணாதிபாதா
படிவிரதா அதி³ன்னாதா³னா படிவிரதா காமேஸுமிச்சா²சாரா படிவிரதா முஸாவாதா³
படிவிரதா ஸுராமேரயமஜ்ஜபமாத³ட்டா²னா படிவிரதா. ப⁴க³வந்தங், ப⁴ந்தே, ஆக³ம்ம
மஹாபஜாபதி கோ³தமீ பு³த்³தே⁴ அவேச்சப்பஸாதே³ன ஸமன்னாக³தா , த⁴ம்மே அவேச்சப்பஸாதே³ன ஸமன்னாக³தா, ஸங்கே⁴ அவேச்சப்பஸாதே³ன ஸமன்னாக³தா அரியகந்தேஹி
ஸீலேஹி ஸமன்னாக³தா. ப⁴க³வந்தங், ப⁴ந்தே, ஆக³ம்ம மஹாபஜாபதி கோ³தமீ து³க்கே²
நிக்கங்கா², து³க்க²ஸமுத³யே நிக்கங்கா², து³க்க²னிரோதே⁴ நிக்கங்கா²,
து³க்க²னிரோத⁴கா³மினியா படிபதா³ய நிக்கங்கா². ப⁴க³வாபி, ப⁴ந்தே, ப³ஹூபகாரோ
மஹாபஜாபதியா கோ³தமியா’’தி.
378. ‘‘ஏவமேதங் ,
ஆனந்த³. யங் ஹானந்த³, புக்³க³லோ புக்³க³லங் ஆக³ம்ம பு³த்³த⁴ங் ஸரணங் க³தோ
ஹோதி, த⁴ம்மங் ஸரணங் க³தோ ஹோதி, ஸங்க⁴ங் ஸரணங் க³தோ ஹோதி, இமஸ்ஸானந்த³,
புக்³க³லஸ்ஸ இமினா புக்³க³லேன ந ஸுப்பதிகாரங் வதா³மி, யதி³த³ங் –
அபி⁴வாத³ன-பச்சுட்டா²ன-அஞ்ஜலிகம்ம ஸாமீசிகம்மசீவரபிண்ட³பாதஸேனாஸனகி³லா- நப்பச்சயபே⁴ஸஜ்ஜபரிக்கா²ரானுப்பதா³னேன.
‘‘யங் ஹானந்த³, புக்³க³லோ புக்³க³லங் ஆக³ம்ம
பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா
படிவிரதோ ஹோதி, முஸாவாதா³ படிவிரதோ ஹோதி, ஸுராமேரயமஜ்ஜபமாத³ட்டா²னா
படிவிரதோ ஹோதி, இமஸ்ஸானந்த³, புக்³க³லஸ்ஸ இமினா புக்³க³லேன ந ஸுப்பதிகாரங்
வதா³மி, யதி³த³ங் –
அபி⁴வாத³ன-பச்சுட்டா²ன-அஞ்ஜலிகம்ம-ஸாமீசிகம்மசீவரபிண்ட³பாதஸேனாஸனகி³லா-
நப்பச்சயபே⁴ஸஜ்ஜபரிக்கா²ரானுப்பதா³னேன.
‘‘யங் ஹானந்த³, புக்³க³லோ புக்³க³லங் ஆக³ம்ம பு³த்³தே⁴
அவேச்சப்பஸாதே³ன ஸமன்னாக³தோ ஹோதி, த⁴ம்மே… ஸங்கே⁴… அரியகந்தேஹி ஸீலேஹி
ஸமன்னாக³தோ ஹோதி, இமஸ்ஸானந்த³, புக்³க³லஸ்ஸ இமினா புக்³க³லேன ந
ஸுப்பதிகாரங் வதா³மி, யதி³த³ங் –
அபி⁴வாத³ன-பச்சுட்டா²ன-அஞ்ஜலிகம்ம-ஸாமீசிகம்மசீவரபிண்ட³பாதஸேனாஸனகி³லா-
நப்பச்சயபே⁴ஸஜ்ஜபரிக்கா²ரானுப்பதா³னேன.
‘‘யங் ஹானந்த³, புக்³க³லோ புக்³க³லங் ஆக³ம்ம து³க்கே²
நிக்கங்கோ² ஹோதி, து³க்க²ஸமுத³யே நிக்கங்கோ² ஹோதி, து³க்க²னிரோதே⁴
நிக்கங்கோ² ஹோதி, து³க்க²னிரோத⁴கா³மினியா படிபதா³ய நிக்கங்கோ² ஹோதி,
இமஸ்ஸானந்த³, புக்³க³லஸ்ஸ இமினா புக்³க³லேன ந ஸுப்பதிகாரங் வதா³மி,
யதி³த³ங் –
அபி⁴வாத³ன-பச்சுட்டா²னஅஞ்ஜலிகம்ம-ஸாமீசிகம்ம-சீவரபிண்ட³பாதஸேனாஸனகி³லா-
நப்பச்சயபே⁴ஸஜ்ஜபரிக்கா²ரானுப்பதா³னேன.
379. ‘‘சுத்³த³ஸ கோ² பனிமானந்த³, பாடிபுக்³க³லிகா த³க்கி²ணா. கதமா சுத்³த³ஸ? ததா²க³தே அரஹந்தே ஸம்மாஸம்பு³த்³தே⁴ தா³னங் தே³தி – அயங் பட²மா பாடிபுக்³க³லிகா த³க்கி²ணா. பச்சேகஸம்பு³த்³தே⁴ [பச்சேகபு³த்³தே⁴ (ஸீ॰ பீ॰)] தா³னங்
தே³தி – அயங் து³தியா பாடிபுக்³க³லிகா த³க்கி²ணா. ததா²க³தஸாவகே அரஹந்தே
தா³னங் தே³தி – அயங் ததியா பாடிபுக்³க³லிகா த³க்கி²ணா.
அரஹத்தப²லஸச்சி²கிரியாய படிபன்னே தா³னங் தே³தி – அயங் சதுத்தீ²
பாடிபுக்³க³லிகா த³க்கி²ணா. அனாகா³மிஸ்ஸ தா³னங் தே³தி – அயங் பஞ்சமீ
பாடிபுக்³க³லிகா த³க்கி²ணா. அனாகா³மிப²லஸச்சி²கிரியாய படிபன்னே தா³னங் தே³தி – அயங் ச²ட்டீ² பாடிபுக்³க³லிகா த³க்கி²ணா. ஸகதா³கா³மிஸ்ஸ தா³னங் தே³தி – அயங் ஸத்தமீ பாடிபுக்³க³லிகா
த³க்கி²ணா. ஸகதா³கா³மிப²லஸச்சி²கிரியாய படிபன்னே தா³னங் தே³தி – அயங்
அட்ட²மீ பாடிபுக்³க³லிகா த³க்கி²ணா. ஸோதாபன்னே தா³னங் தே³தி – அயங் நவமீ
பாடிபுக்³க³லிகா த³க்கி²ணா. ஸோதாபத்திப²லஸச்சி²கிரியாய படிபன்னே தா³னங்
தே³தி – அயங் த³ஸமீ பாடிபுக்³க³லிகா த³க்கி²ணா. பா³ஹிரகே காமேஸு வீதராகே³
தா³னங் தே³தி – அயங் ஏகாத³ஸமீ பாடிபுக்³க³லிகா த³க்கி²ணா.
புது²ஜ்ஜனஸீலவந்தே தா³னங் தே³தி – அயங் த்³வாத³ஸமீ பாடிபுக்³க³லிகா
த³க்கி²ணா. புது²ஜ்ஜனது³ஸ்ஸீலே தா³னங் தே³தி – அயங் தேரஸமீ பாடிபுக்³க³லிகா
த³க்கி²ணா. திரச்சா²னக³தே தா³னங் தே³தி – அயங் சுத்³த³ஸமீ பாடிபுக்³க³லிகா
த³க்கி²ணாதி.
‘‘தத்ரானந்த³, திரச்சா²னக³தே தா³னங் த³த்வா ஸதகு³ணா
த³க்கி²ணா பாடிகங்கி²தப்³பா³, புது²ஜ்ஜனது³ஸ்ஸீலே தா³னங் த³த்வா ஸஹஸ்ஸகு³ணா
த³க்கி²ணா பாடிகங்கி²தப்³பா³, புது²ஜ்ஜனஸீலவந்தே தா³னங் த³த்வா
ஸதஸஹஸ்ஸகு³ணா த³க்கி²ணா பாடிகங்கி²தப்³பா³,
பா³ஹிரகே காமேஸு வீதராகே³ தா³னங் த³த்வா கோடிஸதஸஹஸ்ஸகு³ணா த³க்கி²ணா
பாடிகங்கி²தப்³பா³, ஸோதாபத்திப²லஸச்சி²கிரியாய படிபன்னே தா³னங் த³த்வா
அஸங்கெ²ய்யா அப்பமெய்யா த³க்கி²ணா பாடிகங்கி²தப்³பா³, கோ பன வாதோ³
ஸோதாபன்னே, கோ பன வாதோ³ ஸகதா³கா³மிப²லஸச்சி²கிரியாய படிபன்னே, கோ பன வாதோ³
ஸகதா³கா³மிஸ்ஸ, கோ பன வாதோ³ அனாகா³மிப²லஸச்சி²கிரியாய படிபன்னே, கோ பன
வாதோ³ அனாகா³மிஸ்ஸ, கோ பன வாதோ³ அரஹத்தப²லஸச்சி²கிரியாய படிபன்னே, கோ பன
வாதோ³ அரஹந்தே, கோ பன வாதோ³ பச்சேகஸம்பு³த்³தே⁴, கோ பன வாதோ³ ததா²க³தே
அரஹந்தே ஸம்மாஸம்பு³த்³தே⁴!
380.
‘‘ஸத்த கோ² பனிமானந்த³, ஸங்க⁴க³தா த³க்கி²ணா. கதமா ஸத்த? பு³த்³த⁴ப்பமுகே²
உப⁴தோஸங்கே⁴ தா³னங் தே³தி – அயங் பட²மா ஸங்க⁴க³தா த³க்கி²ணா. ததா²க³தே
பரினிப்³பு³தே உப⁴தோஸங்கே⁴ தா³னங் தே³தி – அயங் து³தியா ஸங்க⁴க³தா
த³க்கி²ணா. பி⁴க்கு²ஸங்கே⁴ தா³னங் தே³தி – அயங் ததியா ஸங்க⁴க³தா த³க்கி²ணா.
பி⁴க்கு²னிஸங்கே⁴ தா³னங் தே³தி – அயங் சதுத்தீ² ஸங்க⁴க³தா த³க்கி²ணா.
‘எத்தகா மே பி⁴க்கூ² ச பி⁴க்கு²னியோ ச ஸங்க⁴தோ உத்³தி³ஸ்ஸதா²’தி தா³னங் தே³தி – அயங் பஞ்சமீ ஸங்க⁴க³தா த³க்கி²ணா. ‘எத்தகா
மே பி⁴க்கூ² ஸங்க⁴தோ உத்³தி³ஸ்ஸதா²’தி தா³னங் தே³தி – அயங் ச²ட்டீ²
ஸங்க⁴க³தா த³க்கி²ணா. ‘எத்தகா மே பி⁴க்கு²னியோ ஸங்க⁴தோ உத்³தி³ஸ்ஸதா²’தி
தா³னங் தே³தி – அயங் ஸத்தமீ ஸங்க⁴க³தா த³க்கி²ணா.
‘‘ப⁴விஸ்ஸந்தி கோ² பனானந்த³, அனாக³தமத்³தா⁴னங் கொ³த்ரபு⁴னோ காஸாவகண்டா²
து³ஸ்ஸீலா பாபத⁴ம்மா. தேஸு து³ஸ்ஸீலேஸு ஸங்க⁴ங் உத்³தி³ஸ்ஸ தா³னங்
த³ஸ்ஸந்தி. ததா³பாஹங், ஆனந்த³, ஸங்க⁴க³தங் த³க்கி²ணங் அஸங்கெ²ய்யங்
அப்பமெய்யங் வதா³மி. ந த்வேவாஹங், ஆனந்த³, கேனசி பரியாயேன ஸங்க⁴க³தாய
த³க்கி²ணாய பாடிபுக்³க³லிகங் தா³னங் மஹப்ப²லதரங் வதா³மி.
381.
‘‘சதஸ்ஸோ கோ² இமா, ஆனந்த³, த³க்கி²ணா விஸுத்³தி⁴யோ. கதமா சதஸ்ஸோ?
அத்தா²னந்த³, த³க்கி²ணா தா³யகதோ விஸுஜ்ஜ²தி நோ படிக்³கா³ஹகதோ. அத்தா²னந்த³,
த³க்கி²ணா படிக்³கா³ஹகதோ விஸுஜ்ஜ²தி நோ தா³யகதோ. அத்தா²னந்த³, த³க்கி²ணா
நேவ தா³யகதோ விஸுஜ்ஜ²தி நோ படிக்³கா³ஹகதோ. அத்தா²னந்த³, த³க்கி²ணா தா³யகதோ
சேவ விஸுஜ்ஜ²தி படிக்³கா³ஹகதோ ச.
‘‘கத²ஞ்சானந்த³, த³க்கி²ணா தா³யகதோ விஸுஜ்ஜ²தி நோ
படிக்³கா³ஹகதோ? இதா⁴னந்த³, தா³யகோ ஹோதி ஸீலவா கல்யாணத⁴ம்மோ, படிக்³கா³ஹகா
ஹொந்தி து³ஸ்ஸீலா பாபத⁴ம்மா – ஏவங் கோ², ஆனந்த³, த³க்கி²ணா தா³யகதோ
விஸுஜ்ஜ²தி நோ படிக்³கா³ஹகதோ.
‘‘கத²ஞ்சானந்த³, த³க்கி²ணா படிக்³கா³ஹகதோ விஸுஜ்ஜ²தி
நோ தா³யகதோ? இதா⁴னந்த³, தா³யகோ ஹோதி து³ஸ்ஸீலோ பாபத⁴ம்மோ, படிக்³கா³ஹகா
ஹொந்தி ஸீலவந்தோ [ஸீலவந்தா (ஸீ॰)] கல்யாணத⁴ம்மா – ஏவங் கோ², ஆனந்த³, த³க்கி²ணா படிக்³கா³ஹகதோ விஸுஜ்ஜ²தி நோ தா³யகதோ.
‘‘கத²ஞ்சானந்த³, த³க்கி²ணா நேவ தா³யகதோ விஸுஜ்ஜ²தி நோ படிக்³கா³ஹகதோ? இதா⁴னந்த³, தா³யகோ ச ஹோதி து³ஸ்ஸீலோ பாபத⁴ம்மோ, படிக்³கா³ஹகா ச ஹொந்தி து³ஸ்ஸீலா பாபத⁴ம்மா – ஏவங் கோ², ஆனந்த³, த³க்கி²ணா நேவ தா³யகதோ விஸுஜ்ஜ²தி நோ படிக்³கா³ஹகதோ.
‘‘கத²ஞ்சானந்த³, த³க்கி²ணா தா³யகதோ சேவ விஸுஜ்ஜ²தி
படிக்³கா³ஹகதோ ச? இதா⁴னந்த³, தா³யகோ ச ஹோதி ஸீலவா கல்யாணத⁴ம்மோ,
படிக்³கா³ஹகா ச ஹொந்தி ஸீலவந்தோ கல்யாணத⁴ம்மா – ஏவங் கோ², ஆனந்த³, த³க்கி²ணா தா³யகதோ சேவ விஸுஜ்ஜ²தி படிக்³கா³ஹகதோ ச. இமா கோ², ஆனந்த³, சதஸ்ஸோ த³க்கி²ணா விஸுத்³தி⁴யோ’’தி.
இத³மவோச ப⁴க³வா. இத³ங் வத்வான ஸுக³தோ அதா²பரங் ஏதத³வோச ஸத்தா² –
‘‘யோ ஸீலவா து³ஸ்ஸீலேஸு த³தா³தி தா³னங்,
த⁴ம்மேன லத்³த⁴ங் [லத்³தா⁴ (ஸீ॰ பீ॰)] ஸுபஸன்னசித்தோ;
அபி⁴ஸத்³த³ஹங் கம்மப²லங் உளாரங்,
ஸா த³க்கி²ணா தா³யகதோ விஸுஜ்ஜ²தி.
‘‘யோ து³ஸ்ஸீலோ ஸீலவந்தேஸு த³தா³தி தா³னங்,
அத⁴ம்மேன லத்³த⁴ங் அப்பஸன்னசித்தோ;
அனபி⁴ஸத்³த³ஹங் கம்மப²லங் உளாரங்,
ஸா த³க்கி²ணா படிக்³கா³ஹகதோ விஸுஜ்ஜ²தி.
‘‘யோ து³ஸ்ஸீலோ து³ஸ்ஸீலேஸு த³தா³தி தா³னங்,
அத⁴ம்மேன லத்³த⁴ங் அப்பஸன்னசித்தோ;
அனபி⁴ஸத்³த³ஹங் கம்மப²லங் உளாரங்,
ந தங் தா³னங் விபுலப்ப²லந்தி ப்³ரூமி.
‘‘யோ ஸீலவா ஸீலவந்தேஸு த³தா³தி தா³னங்,
த⁴ம்மேன லத்³த⁴ங் ஸுபஸன்னசித்தோ;
அபி⁴ஸத்³த³ஹங் கம்மப²லங் உளாரங்,
தங் வே தா³னங் விபுலப்ப²லந்தி ப்³ரூமி [ஸா த³க்கி²ணா நேவுப⁴தோ விஸுஜ்ஜ²தி (ஸீ॰ பீ॰)].
‘‘யோ வீதராகோ³ வீதராகே³ஸு த³தா³தி தா³னங்,
த⁴ம்மேன லத்³த⁴ங் ஸுபஸன்னசித்தோ;
அபி⁴ஸத்³த³ஹங் கம்மப²லங் உளாரங்,
தங் வே தா³னங் ஆமிஸதா³னானமக்³க³’’ [தங் வே தா³னங் விபுலந்தி ப்³ரூமி (ஸீ॰)] ந்தி.
த³க்கி²ணாவிப⁴ங்க³ஸுத்தங் நிட்டி²தங் த்³வாத³ஸமங்.
விப⁴ங்க³வக்³கோ³ நிட்டி²தோ சதுத்தோ².
தஸ்ஸுத்³தா³னங் –
ப⁴த்³தே³கானந்த³கச்சான, லோமஸகங்கி³யாஸுபோ⁴;
மஹாகம்மஸளாயதனவிப⁴ங்கா³, உத்³தே³ஸஅரணா தா⁴து ஸச்சங்.
த³க்கி²ணாவிப⁴ங்க³ஸுத்தந்தி.