31-LESSON-
வினயபிடகே
சூளவக்கபாளி
7. ஸங்கபேதகக்கந்தகங்
1. படமபாணவாரோ
சஸக்யபப்பஜ்ஜாகதா-PALI-
தமிழில் திரபிடக மூன்று தொகுப்புகள்TIPITAKA-வினயபிடகே-Part-31-
from FREE ONLINE eNālāndā Research and
Practice UNIVERSITY through http://sarvajan.ambedkar.org
நமோ தஸ்ஸ பகவதோ அரஹதோ ஸம்மாஸம்புத்தஸ்ஸ
வினயபிடகே
சூளவக்கபாளி
7. ஸங்கபேதகக்கந்தகங்
1. படமபாணவாரோ
சஸக்யபப்பஜ்ஜாகதா
330. தேன
ஸமயேன பு³த்³தோ⁴ ப⁴க³வா அனுபியாயங் விஹரதி, அனுபியங் நாம மல்லானங் நிக³மோ.
தேன கோ² பன ஸமயேன அபி⁴ஞ்ஞாதா அபி⁴ஞ்ஞாதா ஸக்யகுமாரா ப⁴க³வந்தங்
பப்³ப³ஜிதங் அனுபப்³ப³ஜந்தி. தேன கோ² பன ஸமயேன மஹானாமோ ச ஸக்கோ அனுருத்³தோ⁴
ச ஸக்கோ த்³வேபா⁴திகா ஹொந்தி. அனுருத்³தோ⁴ ஸக்கோ ஸுகு²மாலோ ஹோதி. தஸ்ஸ தயோ
பாஸாதா³ ஹொந்தி – ஏகோ ஹேமந்திகோ, ஏகோ கி³ம்ஹிகோ, ஏகோ வஸ்ஸிகோ. ஸோ வஸ்ஸிகே
பாஸாதே³ சத்தாரோ மாஸே [வஸ்ஸிகே பாஸாதே³ வஸ்ஸிகே சத்தாரோ மாஸே (ஸீ॰)] நிப்புரிஸேஹி தூரியேஹி பரிசாரயமானோ [பரிசாரியமானோ (க॰)]
ந ஹெட்டா²பாஸாத³ங் ஓரோஹதி. அத² கோ² மஹானாமஸ்ஸ ஸக்கஸ்ஸ ஏதத³ஹோஸி – ‘‘ஏதரஹி
கோ² அபி⁴ஞ்ஞாதா அபி⁴ஞ்ஞாதா ஸக்யகுமாரா ப⁴க³வந்தங் பப்³ப³ஜிதங்
அனுபப்³ப³ஜந்தி. அம்ஹாகஞ்ச பன குலா நத்தி² கோசி அகா³ரஸ்மா அனகா³ரியங்
பப்³ப³ஜிதோ. யங்னூனாஹங் வா பப்³ப³ஜெய்யங், அனுருத்³தோ⁴ வா’’தி. அத² கோ²
மஹானாமோ ஸக்கோ யேன அனுருத்³தோ⁴ ஸக்கோ தேனுபஸங்கமி, உபஸங்கமித்வா
அனுருத்³த⁴ங் ஸக்கங் ஏதத³வோச – ‘‘ஏதரஹி, தாத அனுருத்³த⁴, அபி⁴ஞ்ஞாதா
அபி⁴ஞ்ஞாதா ஸக்யகுமாரா ப⁴க³வந்தங் பப்³ப³ஜிதங் அனுபப்³ப³ஜந்தி. அம்ஹாகஞ்ச
பன குலா நத்தி² கோசி அகா³ரஸ்மா அனகா³ரியங் பப்³ப³ஜிதோ. தேன
ஹி த்வங் வா பப்³ப³ஜ, அஹங் வா பப்³ப³ஜிஸ்ஸாமீ’’தி. ‘‘அஹங் கோ² ஸுகு²மாலோ,
நாஹங் ஸக்கோமி அகா³ரஸ்மா அனகா³ரியங் பப்³ப³ஜிதுங். த்வங் பப்³ப³ஜாஹீ’’தி.
‘‘ஏஹி கோ² தே, தாத அனுருத்³த⁴, க⁴ராவாஸத்த²ங் அனுஸாஸிஸ்ஸாமி. பட²மங்
கெ²த்தங் கஸாபேதப்³ப³ங். கஸாபெத்வா வபாபேதப்³ப³ங். வபாபெத்வா உத³கங்
அபி⁴னேதப்³ப³ங். உத³கங் அபி⁴னெத்வா உத³கங் நின்னேதப்³ப³ங். உத³கங்
நின்னெத்வா நித்³தா⁴பேதப்³ப³ங். நித்³தா⁴பெத்வா [நிட்³ட³ஹேதப்³ப³ங், நிட்³ட³ஹெத்வா (ஸீ॰)]
லவாபேதப்³ப³ங். லவாபெத்வா உப்³பா³ஹாபேதப்³ப³ங். உப்³பா³ஹாபெத்வா புஞ்ஜங்
காராபேதப்³ப³ங். புஞ்ஜங் காராபெத்வா மத்³தா³பேதப்³ப³ங். மத்³தா³பெத்வா
பலாலானி உத்³த⁴ராபேதப்³பா³னி. பலாலானி உத்³த⁴ராபெத்வா பு⁴ஸிகா உத்³த⁴ராபேதப்³பா³. பு⁴ஸிகங் உத்³த⁴ராபெத்வா ஓபுனாபேதப்³ப³ங் [ஓபு²னாபேதப்³ப³ங் (ஸ்யா॰ க॰), ஓபு²ணாபேதப்³ப³ங் (யோஜனா)]. ஓபுனாபெத்வா அதிஹராபேதப்³ப³ங். அதிஹராபெத்வா
ஆயதிம்பி வஸ்ஸங் ஏவமேவ காதப்³ப³ங், ஆயதிம்பி வஸ்ஸங் ஏவமேவ காதப்³ப³’’ந்தி.
‘‘ந கம்மா கீ²யந்தி? ந கம்மானங் அந்தோ பஞ்ஞாயதி? கதா³ கம்மா கீ²யிஸ்ஸந்தி?
கதா³ கம்மானங் அந்தோ பஞ்ஞாயிஸ்ஸதி? கதா³ மயங் அப்பொஸ்ஸுக்கா பஞ்சஹி
காமகு³ணேஹி ஸமப்பிதா ஸமங்கீ³பூ⁴தா பரிசாரெஸ்ஸாமா’’தி? ‘‘ந ஹி, தாத
அனுருத்³த⁴, கம்மா கீ²யந்தி. ந கம்மானங் அந்தோ பஞ்ஞாயதி. அகீ²ணேவ கம்மே
பிதரோ ச பிதாமஹா ச காலங்கதா’’தி. ‘‘தேன ஹி த்வஞ்ஞேவ க⁴ராவாஸத்தே²ன உபஜானாஹி. அஹங் அகா³ரஸ்மா அனகா³ரியங் பப்³ப³ஜிஸ்ஸாமீ’’தி.
அத² கோ² அனுருத்³தோ⁴ ஸக்கோ யேன மாதா தேனுபஸங்கமி,
உபஸங்கமித்வா மாதரங் ஏதத³வோச – ‘‘இச்சா²மஹங், அம்ம, அகா³ரஸ்மா அனகா³ரியங்
பப்³ப³ஜிதுங். அனுஜானாஹி மங் அகா³ரஸ்மா அனகா³ரியங் பப்³ப³ஜ்ஜாயா’’தி. ஏவங்
வுத்தே அனுருத்³த⁴ஸ்ஸ ஸக்கஸ்ஸ மாதா அனுருத்³த⁴ங் ஸக்கங் ஏதத³வோச – ‘‘தும்ஹே
கோ² மே, தாத அனுருத்³த⁴, த்³வே புத்தா பியா மனாபா அப்படிகூலா. மரணேனபி வோ
அகாமகா வினா ப⁴விஸ்ஸாமி. கிங் பனாஹங் தும்ஹே ஜீவந்தே அனுஜானிஸ்ஸாமி
அகா³ரஸ்மா அனகா³ரியங் பப்³ப³ஜ்ஜாயா’’தி? து³தியம்பி கோ²…பே॰… ததியம்பி கோ²
அனுருத்³தோ⁴ ஸக்கோ மாதரங் ஏதத³வோச – ‘‘இச்சா²மஹங், அம்ம, அகா³ரஸ்மா
அனகா³ரியங் பப்³ப³ஜிதுங். அனுஜானாஹி மங் அகா³ரஸ்மா அனகா³ரியங்
பப்³ப³ஜ்ஜாயா’’தி [இமஸ்ஸ அனந்தரங் கேஸுசி பொத்த²கேஸு
ஏவம்பி பாடோ² தி³ஸ்ஸதி –- ‘‘ஏவங் வுத்தே அனுருத்³த⁴ஸ்ஸ ஸக்கஸ்ஸ மாதா ஏவமாஹ
‘ஸசே தாத அனுருத்³த⁴ ப⁴த்³தி³யோ ஸக்யராஜா ஸக்யானங் ரஜ்ஜங் காரேதி அகா³ரஸ்மா
அனகா³ரியங் பப்³ப³ஜதி, ஏவங் த்வம்பி பப்³ப³ஜாஹீ’’’தி]. தேன கோ² பன
ஸமயேன ப⁴த்³தி³யோ ஸக்யராஜா ஸக்யானங் ரஜ்ஜங் காரேதி. ஸோ ச அனுருத்³த⁴ஸ்ஸ
ஸக்கஸ்ஸ ஸஹாயோ ஹோதி. அத² கோ² அனுருத்³த⁴ஸ்ஸ ஸக்கஸ்ஸ மாதா – ‘அயங் கோ²
ப⁴த்³தி³யோ ஸக்யராஜா ஸக்யானங் ரஜ்ஜங் காரேதி; அனுருத்³த⁴ஸ்ஸ ஸக்கஸ்ஸ ஸஹாயோ;
ஸோ ந உஸ்ஸஹதி அகா³ரஸ்மா அனகா³ரியங் பப்³ப³ஜிது’ந்தி – அனுருத்³த⁴ங் ஸக்கங்
ஏதத³வோச – ‘‘ஸசே, தாத அனுருத்³த⁴, ப⁴த்³தி³யோ ஸக்யராஜா அகா³ரஸ்மா
அனகா³ரியங் பப்³ப³ஜதி, ஏவங் த்வம்பி பப்³ப³ஜாஹீ’’தி. அத² கோ² அனுருத்³தோ⁴
ஸக்கோ யேன ப⁴த்³தி³யோ ஸக்யராஜா தேனுபஸங்கமி,
உபஸங்கமித்வா ப⁴த்³தி³யங் ஸக்யராஜானங் ஏதத³வோச – ‘‘மம கோ², ஸம்ம,
பப்³ப³ஜ்ஜா தவ படிப³த்³தா⁴’’தி. ‘‘ஸசே தே, ஸம்ம, பப்³ப³ஜ்ஜா மம படிப³த்³தா⁴
வா அப்படிப³த்³தா⁴ வா ஸா ஹோது, அஹங் தயா; யதா² ஸுக²ங் பப்³ப³ஜாஹீ’’தி.
‘‘ஏஹி, ஸம்ம, உபோ⁴ அகா³ரஸ்மா அனகா³ரியங் பப்³ப³ஜிஸ்ஸாமா’’தி. ‘‘நாஹங்,
ஸம்ம, ஸக்கோமி அகா³ரஸ்மா அனகா³ரியங் பப்³ப³ஜிதுந்தி . யங் தே ஸக்கா அஞ்ஞங் மயா காதுங், க்யாஹங் [த்யாஹங் (ஸீ॰ ஸ்யா॰)]
கரிஸ்ஸாமி. த்வங் பப்³ப³ஜாஹீ’’தி. ‘‘மாதா கோ² மங், ஸம்ம, ஏவமாஹ – ‘ஸசே,
தாத அனுருத்³த⁴, ப⁴த்³தி³யோ ஸக்யராஜா அகா³ரஸ்மா அனகா³ரியங் பப்³ப³ஜதி, ஏவங்
த்வம்பி பப்³ப³ஜாஹீ’’’தி. ‘‘பா⁴ஸிதா கோ² பன தே, ஸம்ம, ஏஸா வாசா. ஸசே தே,
ஸம்ம, பப்³ப³ஜ்ஜா மம படிப³த்³தா⁴ வா, அப்படிப³த்³தா⁴ வா ஸா ஹோது, அஹங் தயா;
யதா² ஸுக²ங் பப்³ப³ஜாஹீ’’தி. ‘‘ஏஹி, ஸம்ம, உபோ⁴ அகா³ரஸ்மா அனகா³ரியங்
பப்³ப³ஜிஸ்ஸாமா’’தி.
தேன கோ² பன ஸமயேன மனுஸ்ஸா
ஸச்சவாதி³னோ ஹொந்தி, ஸச்சபடிஞ்ஞா. அத² கோ² ப⁴த்³தி³யோ ஸக்யராஜா
அனுருத்³த⁴ங் ஸக்கங் ஏதத³வோச – ‘‘ஆக³மேஹி, ஸம்ம, ஸத்தவஸ்ஸானி. ஸத்தன்னங்
வஸ்ஸானங் அச்சயேன உபோ⁴ அகா³ரஸ்மா அனகா³ரியங் பப்³ப³ஜிஸ்ஸாமா’’தி.
‘‘அதிசிரங், ஸம்ம, ஸத்தவஸ்ஸானி. நாஹங் ஸக்கோமி ஸத்தவஸ்ஸானி ஆக³மேது’’ந்தி.
‘‘ஆக³மேஹி, ஸம்ம, ச²வஸ்ஸானி…பே॰… பஞ்சவஸ்ஸானி… சத்தாரி வஸ்ஸானி… தீணி
வஸ்ஸானி… த்³வே வஸ்ஸானி… ஏகங் வஸ்ஸங். ஏகஸ்ஸ வஸ்ஸஸ்ஸ
அச்சயேன உபோ⁴ அகா³ரஸ்மா அனகா³ரியங் பப்³ப³ஜிஸ்ஸாமா’’தி. ‘‘அதிசிரங், ஸம்ம,
ஏகவஸ்ஸங். நாஹங் ஸக்கோமி ஏகங் வஸ்ஸங் ஆக³மேது’’ந்தி. ‘‘ஆக³மேஹி, ஸம்ம,
ஸத்தமாஸே. ஸத்தன்னங் மாஸானங் அச்சயேன உபோ⁴பி அகா³ரஸ்மா அனகா³ரியங்
பப்³ப³ஜிஸ்ஸாமா’’தி. ‘‘அதிசிரங், ஸம்ம, ஸத்தமாஸா. நாஹங் ஸக்கோமி ஸத்தமாஸே
ஆக³மேது’’ந்தி. ‘‘ஆக³மேஹி, ஸம்ம, ச² மாஸே…பே॰… பஞ்ச மாஸே… சத்தாரோ மாஸே…
தயோ மாஸே… த்³வே மாஸே… ஏகங் மாஸங்… அட்³ட⁴மாஸங். அட்³ட⁴மாஸஸ்ஸ அச்சயேன
உபோ⁴பி அகா³ரஸ்மா அனகா³ரியங் பப்³ப³ஜிஸ்ஸாமா’’தி. ‘‘அதிசிரங், ஸம்ம,
அட்³ட⁴மாஸோ. நாஹங் ஸக்கோமி அட்³ட⁴மாஸங் ஆக³மேது’’ந்தி. ‘‘ஆக³மேஹி, ஸம்ம,
ஸத்தாஹங் யாவாஹங் புத்தே ச பா⁴தரோ ச ரஜ்ஜங் நிய்யாதே³மீ’’தி. ‘‘ந சிரங்,
ஸம்ம, ஸத்தாஹோ, ஆக³மெஸ்ஸாமீ’’தி.
331.
அத² கோ² ப⁴த்³தி³யோ ச ஸக்யராஜா அனுருத்³தோ⁴ ச ஆனந்தோ³ ச ப⁴கு³ ச கிமிலோ ச
தே³வத³த்தோ ச, உபாலிகப்பகேன ஸத்தமா, யதா² புரே சதுரங்கி³னியா ஸேனாய
உய்யானபூ⁴மிங் நிய்யந்தி, ஏவமேவ சதுரங்கி³னியா ஸேனாய நிய்யிங்ஸு. தே தூ³ரங்
க³ந்த்வா ஸேனங் நிவத்தாபெத்வா பரவிஸயங் ஓக்கமித்வா ஆப⁴ரணங் ஓமுஞ்சித்வா
உத்தராஸங்கே³ன ப⁴ண்டி³கங் ப³ந்தி⁴த்வா உபாலிங் கப்பகங் ஏதத³வோசுங் –
‘‘ஹந்த³, ப⁴ணே உபாலி, நிவத்தஸ்ஸு; அலங் தே எத்தகங் ஜீவிகாயா’’தி. அத² கோ²
உபாலிஸ்ஸ கப்பகஸ்ஸ நிவத்தந்தஸ்ஸ ஏதத³ஹோஸி – ‘‘சண்டா³ கோ² ஸாகியா; இமினா குமாரா நிப்பாதிதாதி கா⁴தாபெய்யும்பி மங். இமே ஹி நாம ஸக்யகுமாரா அகா³ரஸ்மா அனகா³ரியங் பப்³ப³ஜிஸ்ஸந்தி. கிமங்க³ [கிமங்க³ (ஸீ॰)] பனாஹ’’ந்தி. ப⁴ண்டி³கங் முஞ்சித்வா தங் ப⁴ண்ட³ங் ருக்கே² ஆலக்³கெ³த்வா ‘யோ பஸ்ஸதி, தி³ன்னங்யேவ ஹரதூ’தி
வத்வா யேன தே ஸக்யகுமாரா தேனுபஸங்கமி. அத்³த³ஸாஸுங் கோ² தே ஸக்யகுமாரா
உபாலிங் கப்பகங் தூ³ரதோவ ஆக³ச்ச²ந்தங். தி³ஸ்வான உபாலிங் கப்பகங்
ஏதத³வோசுங் – ‘‘கிஸ்ஸ, ப⁴ணே உபாலி, நிவத்தேஸீ’’தி? ‘‘இத⁴ மே, அய்யபுத்தா,
நிவத்தந்தஸ்ஸ ஏதத³ஹோஸி – ‘சண்டா³ கோ² ஸாகியா; இமினா குமாரா நிப்பாதிதாதி
கா⁴தாபெய்யும்பி மங். இமே ஹி நாம ஸக்யகுமாரா அகா³ரஸ்மா அனகா³ரியங்
பப்³ப³ஜிஸ்ஸந்தி. கிமங்க³ பனாஹ’ந்தி. ஸோ கோ² அஹங், அய்யபுத்தா, ப⁴ண்டி³கங்
முஞ்சித்வா தங் ப⁴ண்ட³ங் ருக்கே² ஆலக்³கெ³த்வா ‘யோ பஸ்ஸதி, தி³ன்னஞ்ஞேவ
ஹரதூ’தி வத்வா ததொம்ஹி படினிவத்தோ’’தி. ‘‘ஸுட்டு², ப⁴ணே உபாலி, அகாஸி யம்பி
ந நிவத்தோ [யங் நிவத்தோ (ஸீ॰), யங் பன நிவத்தோ (ஸ்யா॰)]. சண்டா³ கோ² ஸாகியா; இமினா குமாரா நிப்பாதிதாதி கா⁴தாபெய்யும்பி த’’ந்தி.
அத² கோ² ஸக்யகுமாரா உபாலிங்
கப்பகங் ஆதா³ய யேன ப⁴க³வா தேனுபஸங்கமிங்ஸு, உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே ஸக்யகுமாரா
ப⁴க³வந்தங் ஏதத³வோசுங் – ‘‘மயங், ப⁴ந்தே, ஸாகியா நாம மானஸ்ஸினோ. அயங் ,
ப⁴ந்தே, உபாலி கப்பகோ அம்ஹாகங் தீ³க⁴ரத்தங் பரிசாரகோ. இமங் ப⁴க³வா பட²மங்
பப்³பா³ஜேது. இமஸ்ஸ மயங் அபி⁴வாத³னபச்சுட்டா²னஅஞ்ஜலிகம்மஸாமீசிகம்மங்
கரிஸ்ஸாம. ஏவங் அம்ஹாகங் ஸாகியானங் ஸாகியமானோ நிம்மானாயிஸ்ஸதீ’’தி [நிம்மாத³யிஸ்ஸதீதி (ஸீ॰), நிம்மானியிஸ்ஸதீதி (ஸ்யா॰)].
அத² கோ² ப⁴க³வா உபாலிங் கப்பகங் பட²மங் பப்³பா³ஜேஸி,
பச்சா² தே ஸக்யகுமாரே. அத² கோ² ஆயஸ்மா ப⁴த்³தி³யோ தேனேவ அந்தரவஸ்ஸேன திஸ்ஸோ
விஜ்ஜா ஸச்சா²காஸி. ஆயஸ்மா அனுருத்³தோ⁴ தி³ப்³ப³சக்கு²ங் உப்பாதே³ஸி.
ஆயஸ்மா ஆனந்தோ³ ஸோதாபத்திப²லங் ஸச்சா²காஸி. தே³வத³த்தோ போது²ஜ்ஜனிகங்
இத்³தி⁴ங் அபி⁴னிப்பா²தே³ஸி.
332.
தேன கோ² பன ஸமயேன ஆயஸ்மா ப⁴த்³தி³யோ அரஞ்ஞக³தோபி ருக்க²மூலக³தோபி
ஸுஞ்ஞாகா³ரக³தோபி அபி⁴க்க²ணங் உதா³னங் உதா³னேஸி – ‘‘அஹோ ஸுக²ங், அஹோ
ஸுக²’’ந்தி. அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிங்ஸு,
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங்
நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘ஆயஸ்மா, ப⁴ந்தே,
ப⁴த்³தி³யோ அரஞ்ஞக³தோபி ருக்க²மூலக³தோபி ஸுஞ்ஞாகா³ரக³தோபி அபி⁴க்க²ணங்
உதா³னங் உதா³னேஸி – ‘அஹோ ஸுக²ங், அஹோ ஸுக²’ந்தி. நிஸ்ஸங்ஸயங் கோ², ப⁴ந்தே,
ஆயஸ்மா ப⁴த்³தி³யோ அனபி⁴ரதோவ ப்³ரஹ்மசரியங் சரதி. தங்யேவ வா புரிமங்
ரஜ்ஜஸுக²ங் ஸமனுஸ்ஸரந்தோ அரஞ்ஞக³தோபி ருக்க²மூலக³தோபி ஸுஞ்ஞாகா³ரக³தோபி
அபி⁴க்க²ணங் உதா³னங் உதா³னேஸி – ‘அஹோ ஸுக²ங், அஹோ ஸுக²’’’ந்தி.
அத² கோ² ப⁴க³வா அஞ்ஞதரங் பி⁴க்கு²ங் ஆமந்தேஸி – ‘‘ஏஹி
த்வங், பி⁴க்கு², மம வசனேன ப⁴த்³தி³யங் பி⁴க்கு²ங் ஆமந்தேஹி – ‘ஸத்தா² தங்,
ஆவுஸோ ப⁴த்³தி³ய, ஆமந்தேதீ’’’தி . ‘‘ஏவங்
ப⁴ந்தே’’தி கோ² ஸோ பி⁴க்கு² ப⁴க³வதோ படிஸ்ஸுத்வா யேனாயஸ்மா ப⁴த்³தி³யோ
தேனுபஸங்கமி, உபஸங்கமித்வா ஆயஸ்மந்தங் ப⁴த்³தி³யங் ஏதத³வோச – ‘‘ஸத்தா² தங்,
ஆவுஸோ ப⁴த்³தி³ய, ஆமந்தேதீ’’தி. ‘‘ஏவமாவுஸோ’’தி கோ² ஆயஸ்மா ப⁴த்³தி³யோ
தஸ்ஸ பி⁴க்கு²னோ படிஸ்ஸுத்வா யேன ப⁴க³வா தேனுபஸங்கமி, உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ²
ஆயஸ்மந்தங் ப⁴த்³தி³யங் ப⁴க³வா ஏதத³வோச – ‘‘ஸச்சங் கிர த்வங், ப⁴த்³தி³ய,
அரஞ்ஞக³தோபி ருக்க²மூலக³தோபி ஸுஞ்ஞாகா³ரக³தோபி அபி⁴க்க²ணங் உதா³னங்
உதா³னேஸி – ‘அஹோ ஸுக²ங், அஹோ ஸுக²’’’ந்தி? ‘‘ஏவங் ப⁴ந்தே’’தி. ‘‘கிங் பன
த்வங், ப⁴த்³தி³ய, அத்த²வஸங் ஸம்பஸ்ஸமானோ அரஞ்ஞக³தோபி
ருக்க²மூலக³தோபி ஸுஞ்ஞாகா³ரக³தோபி அபி⁴க்க²ணங் உதா³னங் உதா³னேஸி – ‘அஹோ
ஸுக²ங் அஹோ ஸுக²’’’ந்தி? ‘‘புப்³பே³ மே, ப⁴ந்தே, ரஞ்ஞோ ஸதோபி அந்தோபி
அந்தேபுரே ரக்கா² ஸுஸங்விஹிதா ஹோதி, ப³ஹிபி அந்தேபுரே ரக்கா² ஸுஸங்விஹிதா
ஹோதி, அந்தோபி நக³ரே ரக்கா² ஸுஸங்விஹிதா ஹோதி, ப³ஹிபி நக³ரே ரக்கா²
ஸுஸங்விஹிதா ஹோதி, அந்தோபி ஜனபதே³ ரக்கா² ஸுஸங்விஹிதா ஹோதி, ப³ஹிபி ஜனபதே³
ரக்கா² ஸுஸங்விஹிதா ஹோதி. ஸோ கோ² அஹங், ப⁴ந்தே, ஏவங்
ரக்கி²தோபி கோ³பிதோபி ஸந்தோ பீ⁴தோ உப்³பி³க்³கோ³ உஸ்ஸங்கீ உத்ரஸ்தோ
விஹராமி. ஏதரஹி கோ² பன அஹங் ஏகோ, ப⁴ந்தே, அரஞ்ஞக³தோபி ருக்க²மூலக³தோபி
ஸுஞ்ஞாகா³ரக³தோபி அபீ⁴தோ அனுப்³பி³க்³கோ³ அனுஸ்ஸங்கீ அனுத்ரஸ்தோ
அப்பொஸ்ஸுக்கோ பன்னலோமோ பரத³த்தவுத்தோ மிக³பூ⁴தேன சேதஸா விஹராமீதி. இமங்
கோ² அஹங், ப⁴ந்தே, அத்த²வஸங் ஸம்பஸ்ஸமானோ அரஞ்ஞக³தோபி ருக்க²மூலக³தோபி
ஸுஞ்ஞாகா³ரக³தோபி அபி⁴க்க²ணங் உதா³னங் உதா³னேமி – ‘அஹோ ஸுக²ங், அஹோ
ஸுக²’’’ந்தி. அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமங்
உதா³னங் உதா³னேஸி –
[உதா³॰ 20] ‘‘யஸ்ஸந்தரதோ ந ஸந்தி கோபா, இதி ப⁴வாப⁴வதஞ்ச வீதிவத்தோ;
தங் விக³தப⁴யங் ஸுகி²ங் அஸோகங், தே³வா நானுப⁴வந்தி த³ஸ்ஸனாயா’’தி.
தே³வத³த்தவத்து²
333.
அத² கோ² ப⁴க³வா அனுபியாயங் யதா²பி⁴ரந்தங் விஹரித்வா யேன கோஸம்பீ³ தேன
சாரிகங் பக்காமி. அனுபுப்³பே³ன சாரிகங் சரமானோ யேன கோஸம்பீ³ தத³வஸரி. தத்ர
ஸுத³ங் ப⁴க³வா கோஸம்பி³யங் விஹரதி கோ⁴ஸிதாராமே. அத² கோ² தே³வத³த்தஸ்ஸ
ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘‘கங் நு கோ²
அஹங் பஸாதெ³ய்யங், யஸ்மிங் மே பஸன்னே ப³ஹுலாப⁴ஸக்காரோ உப்பஜ்ஜெய்யா’’தி? அத² கோ² தே³வத³த்தஸ்ஸ ஏதத³ஹோஸி – ‘‘அயங் கோ² அஜாதஸத்து குமாரோ தருணோ சேவ ஆயதிங் ப⁴த்³தோ³ ச. யங்னூனாஹங் அஜாதஸத்துங் குமாரங் பஸாதெ³ய்யங். தஸ்மிங் மே பஸன்னே ப³ஹுலாப⁴ஸக்காரோ உப்பஜ்ஜிஸ்ஸதீ’’தி.
அத² கோ² தே³வத³த்தோ ஸேனாஸனங் ஸங்ஸாமெத்வா
பத்தசீவரமாதா³ய யேன ராஜக³ஹங் தேன பக்காமி. அனுபுப்³பே³ன யேன ராஜக³ஹங்
தத³வஸரி. அத² கோ² தே³வத³த்தோ ஸகவண்ணங் படிஸங்ஹரித்வா குமாரகவண்ணங்
அபி⁴னிம்மினித்வா அஹிமேக²லிகாய அஜாதஸத்துஸ்ஸ குமாரஸ்ஸ உச்ச²ங்கே³ [உச்சங்கே (ஸ்யா॰)]
பாதுரஹோஸி. அத² கோ² அஜாதஸத்து குமாரோ பீ⁴தோ அஹோஸி, உப்³பி³க்³கோ³ உஸ்ஸங்கீ
உத்ரஸ்தோ. அத² கோ² தே³வத³த்தோ அஜாதஸத்துங் குமாரங் ஏதத³வோச – ‘‘பா⁴யஸி மங்
த்வங் குமாரா’’தி? ‘‘ஆம, பா⁴யாமி. கோஸி த்வ’’ந்தி? ‘‘அஹங் தே³வத³த்தோ’’தி.
‘‘ஸசே கோ² த்வங், ப⁴ந்தே, அய்யோ தே³வத³த்தோ, இங்க⁴
ஸகேனேவ வண்ணேன பாதுப⁴வஸ்ஸூ’’தி. அத² கோ² தே³வத³த்தோ குமாரகவண்ணங்
படிஸங்ஹரித்வா ஸங்கா⁴டிபத்தசீவரத⁴ரோ அஜாதஸத்துஸ்ஸ குமாரஸ்ஸ புரதோ அட்டா²ஸி.
அத² கோ² அஜாதஸத்து குமாரோ தே³வத³த்தஸ்ஸ இமினா இத்³தி⁴பாடிஹாரியேன
அபி⁴ப்பஸன்னோ பஞ்சஹி ரத²ஸதேஹி ஸாயங் பாதங் உபட்டா²னங் க³ச்ச²தி, பஞ்ச ச
தா²லிபாகஸதானி ப⁴த்தாபி⁴ஹாரோ அபி⁴ஹரீயதி. அத² கோ² தே³வத³த்தஸ்ஸ
லாப⁴ஸக்காரஸிலோகேன அபி⁴பூ⁴தஸ்ஸ பரியாதி³ன்னசித்தஸ்ஸ ஏவரூபங் இச்சா²க³தங் உப்பஜ்ஜி – ‘‘அஹங் பி⁴க்கு²ஸங்க⁴ங் பரிஹரிஸ்ஸாமீ’’தி . ஸஹ சித்துப்பாதா³வ தே³வத³த்தோ தஸ்ஸா இத்³தி⁴யா பரிஹாயி.
[அ॰ நி॰ 5.100] தேன கோ² பன
ஸமயேன ககுதோ⁴ நாம கோளியபுத்தோ, ஆயஸ்மதோ மஹாமொக்³க³ல்லானஸ்ஸ உபட்டா²கோ,
அது⁴னா காலங்கதோ அஞ்ஞதரங் மனோமயங் காயங் உபபன்னோ. தஸ்ஸ ஏவரூபோ
அத்தபா⁴வப்படிலாபோ⁴ ஹோதி – ஸெய்யதா²பி நாம த்³வே வா தீணி வா மாக³த⁴கானி [மாக³தி⁴கானி (ஸ்யா॰)]
கா³மக்கெ²த்தானி. ஸோ தேன அத்தபா⁴வப்படிலாபே⁴ன நேவ அத்தானங் ந பரங்
ப்³யாபா³தே⁴தி. அத² கோ² ககுதோ⁴ தே³வபுத்தோ யேனாயஸ்மா மஹாமொக்³க³ல்லானோ
தேனுபஸங்கமி, உபஸங்கமித்வா ஆயஸ்மந்தங் மஹாமொக்³க³ல்லானங் அபி⁴வாதெ³த்வா
ஏகமந்தங் அட்டா²ஸி. ஏகமந்தங் டி²தோ கோ² ககுதோ⁴ தே³வபுத்தோ ஆயஸ்மந்தங்
மஹாமொக்³க³ல்லானங் ஏதத³வோச – ‘‘தே³வத³த்தஸ்ஸ, ப⁴ந்தே, லாப⁴ஸக்காரஸிலோகேன
அபி⁴பூ⁴தஸ்ஸ பரியாதி³ன்னசித்தஸ்ஸ [பரியாதி³ண்ணசித்தஸ்ஸ (க॰)]
ஏவரூபங் இச்சா²க³தங் உப்பஜ்ஜி – ‘அஹங் பி⁴க்கு²ஸங்க⁴ங் பரிஹரிஸ்ஸாமீ’தி.
ஸஹ சித்துப்பாதா³வ ப⁴ந்தே, தே³வத³த்தோ தஸ்ஸா இத்³தி⁴யா பரிஹீனோ’’தி.
இத³மவோச ககுதோ⁴ தே³வபுத்தோ. இத³ங் வத்வா ஆயஸ்மந்தங் மஹாமொக்³க³ல்லானங்
அபி⁴வாதெ³த்வா பத³க்கி²ணங் கத்வா தத்தே²வ அந்தரதா⁴யி.
அத² கோ² ஆயஸ்மா மஹாமொக்³க³ல்லானோ யேன ப⁴க³வா தேனுபஸங்கமி , உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ .
ஏகமந்தங் நிஸின்னோ கோ² ஆயஸ்மா மஹாமொக்³க³ல்லானோ ப⁴க³வந்தங் ஏதத³வோச –
‘‘ககுதோ⁴ நாம, ப⁴ந்தே, கோளியபுத்தோ மம உபட்டா²கோ அது⁴னா காலங்கதோ அஞ்ஞதரங்
மனோமயங் காயங் உபபன்னோ. தஸ்ஸ ஏவரூபோ அத்தபா⁴வப்படிலாபோ⁴ – ஸெய்யதா²பி நாம
த்³வே வா தீணி வா மாக³த⁴கானி கா³மக்கெ²த்தானி. ஸோ தேன அத்தபா⁴வப்படிலாபே⁴ன
நேவ அத்தானங் ந பரங் ப்³யாபா³தே⁴தி. அத² கோ², ப⁴ந்தே, ககுதோ⁴ தே³வபுத்தோ
யேனாஹங் தேனுபஸங்கமி, உபஸங்கமித்வா மங் அபி⁴வாதெ³த்வா ஏகமந்தங் அட்டா²ஸி.
ஏகமந்தங் டி²தோ கோ², ப⁴ந்தே, ககுதோ⁴ தே³வபுத்தோ மங் ஏதத³வோச –
‘தே³வத³த்தஸ்ஸ, ப⁴ந்தே, லாப⁴ஸக்காரஸிலோகேன அபி⁴பூ⁴தஸ்ஸ பரியாதி³ன்னசித்தஸ்ஸ
ஏவரூபங் இச்சா²க³தங் உப்பஜ்ஜி – அஹங் பி⁴க்கு²ஸங்க⁴ங் பரிஹரிஸ்ஸாமீதி. ஸஹ
சித்துப்பாதா³வ ப⁴ந்தே, தே³வத³த்தோ தஸ்ஸா இத்³தி⁴யா பரிஹீனோ’தி. இத³மவோச,
ப⁴ந்தே, ககுதோ⁴ தே³வபுத்தோ. இத³ங் வத்வா மங் அபி⁴வாதெ³த்வா பத³க்கி²ணங்
கத்வா தத்தே²வ அந்தரதா⁴யீ’’தி.
‘‘கிங்
பன தே, மொக்³க³ல்லான, ககுதோ⁴ தே³வபுத்தோ சேதஸா சேதோ பரிச்ச விதி³தோ? யங்
கிஞ்சி ககுதோ⁴ தே³வபுத்தோ பா⁴ஸதி ஸப்³ப³ங் தங் ததே²வ ஹோதி, நோ அஞ்ஞதா²’’தி?
‘‘சேதஸா சேதோ பரிச்ச விதி³தோ ச மே, ப⁴ந்தே, ககுதோ⁴ தே³வபுத்தோ. யங் கிஞ்சி
ககுதோ⁴ தே³வபுத்தோ பா⁴ஸதி ஸப்³ப³ங் தங் ததே²வ ஹோதி, நோ அஞ்ஞதா²’’தி.
‘‘ரக்க²ஸ்ஸேதங், மொக்³க³ல்லான, வாசங். ரக்க²ஸ்ஸேதங், மொக்³க³ல்லான, வாசங்.
இதா³னி ஸோ மோக⁴புரிஸோ அத்தனாவ அத்தானங் பாதுகரிஸ்ஸதி.
பஞ்சஸத்து²கதா²
334. [அ॰ நி॰ 5.100] ‘‘பஞ்சிமே ,
மொக்³க³ல்லான, ஸத்தா²ரோ ஸந்தோ ஸங்விஜ்ஜமானா லோகஸ்மிங். கதமே பஞ்ச? ‘‘இத⁴,
மொக்³க³ல்லான, ஏகச்சோ ஸத்தா² அபரிஸுத்³த⁴ஸீலோ ஸமானோ ‘பரிஸுத்³த⁴ஸீலொம்ஹீ’தி
படிஜானாதி ‘பரிஸுத்³த⁴ங் மே ஸீலங் பரியோதா³தங் அஸங்கிலிட்ட²’ந்தி. தமேனங்
ஸாவகா ஏவங் ஜானந்தி – ‘அயங் கோ² ப⁴வங் ஸத்தா² அபரிஸுத்³த⁴ஸீலோ ஸமானோ
‘பரிஸுத்³த⁴ஸீலொம்ஹீ’தி படிஜானாதி ‘பரிஸுத்³த⁴ங் மே ஸீலங் பரியோதா³தங்
அஸங்கிலிட்ட²’ந்தி ச. மயஞ்சேவ கோ² பன கி³ஹீனங் ஆரோசெய்யாம, நாஸ்ஸஸ்ஸ
மனாபங். யங் கோ² பனஸ்ஸ அமனாபங், கத²ங் நங் மயங் தேன ஸமுதா³சரெய்யாம?
ஸம்மன்னதி கோ² பன சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன –
யங் துமோ கரிஸ்ஸதி, துமோவ தேன பஞ்ஞாயிஸ்ஸதீ’தி. ஏவரூபங் கோ², மொக்³க³ல்லான,
ஸத்தா²ரங் ஸாவகா ஸீலதோ ரக்க²ந்தி; ஏவரூபோ ச பன ஸத்தா² ஸாவகேஹி ஸீலதோ
ரக்க²ங் பச்சாஸீஸதி [பச்சாஸிங்ஸதி (ஸீ॰ ஸ்யா॰)].
‘‘புன சபரங், மொக்³க³ல்லான, இதே⁴கச்சோ ஸத்தா²
அபரிஸுத்³தா⁴ஜீவோ ஸமானோ ‘பரிஸுத்³தா⁴ஜீவொம்ஹீ’தி படிஜானாதி ‘பரிஸுத்³தோ⁴ மே
ஆஜீவோ பரியோதா³தோ அஸங்கிலிட்டோ²’தி ச. தமேனங் ஸாவகா ஏவங் ஜானந்தி – ‘அயங்
கோ² ப⁴வங் ஸத்தா² அபரிஸுத்³தா⁴ஜீவோ ஸமானோ ‘பரிஸுத்³தா⁴ஜீவொம்ஹீ’தி
படிஜானாதி ‘பரிஸுத்³தோ⁴ மே ஆஜீவோ பரியோதா³தோ அஸங்கிலிட்டோ²’தி ச. மயஞ்சேவ கோ² பன கி³ஹீனங் ஆரோசெய்யாம, நாஸ்ஸஸ்ஸ மனாபங். யங் கோ² பனஸ்ஸ அமனாபங், கத²ங் ந மயங் தேன ஸமுதா³சரெய்யாம? ஸம்மன்னதி கோ² பன சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன – யங் துமோ
கரிஸ்ஸதி, துமோவ தேன பஞ்ஞாயிஸ்ஸதீ’தி. ஏவரூபங் கோ², மொக்³க³ல்லான,
ஸத்தா²ரங் ஸாவகா ஆஜீவதோ ரக்க²ந்தி; ஏவரூபோ ச பன ஸத்தா² ஸாவகேஹி ஆஜீவதோ
ரக்க²ங் பச்சாஸீஸதி.
‘‘புன சபரங், மொக்³க³ல்லான, இதே⁴கச்சோ ஸத்தா²
அபரிஸுத்³த⁴த⁴ம்மதே³ஸனோ ஸமானோ ‘பரிஸுத்³த⁴த⁴ம்மதே³ஸனொம்ஹீ’தி படிஜானாதி
‘பரிஸுத்³தா⁴ மே த⁴ம்மதே³ஸனா பரியோதா³தா அஸங்கிலிட்டா²’தி ச .
தமேனங் ஸாவகா ஏவங் ஜானந்தி – ‘அயங் கோ² ப⁴வங் ஸத்தா²
அபரிஸுத்³த⁴த⁴ம்மதே³ஸனோ ஸமானோ ‘பரிஸுத்³த⁴த⁴ம்மதே³ஸனொம்ஹீ’தி படிஜானாதி
‘பரிஸுத்³தா⁴ மே த⁴ம்மதே³ஸனா பரியோதா³தா அஸங்கிலிட்டா²’தி ச. மயஞ்சேவ கோ²
பன கி³ஹீனங் ஆரோசெய்யாம, நாஸ்ஸஸ்ஸ மனாபங். யங் கோ² பனஸ்ஸ அமனாபங், கத²ங்
நங் மயங் தேன ஸமுதா³சரெய்யாம? ஸம்மன்னதி கோ² பன
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன – யங் துமோ கரிஸ்ஸதி,
துமோவ தேன பஞ்ஞாயிஸ்ஸதீ’தி. ஏவரூபங் கோ², மொக்³க³ல்லான, ஸத்தா²ரங் ஸாவகா
த⁴ம்மதே³ஸனதோ ரக்க²ந்தி; ஏவரூபோ ச பன ஸத்தா² ஸாவகேஹி த⁴ம்மதே³ஸனதோ ரக்க²ங்
பச்சாஸீஸதி.
‘‘புன சபரங், மொக்³க³ல்லான, இதே⁴கச்சோ ஸத்தா²
அபரிஸுத்³த⁴வெய்யாகரணோ ஸமானோ ‘பரிஸுத்³த⁴வெய்யாகரணொம்ஹீ’தி படிஜானாதி
‘பரிஸுத்³த⁴ங் மே வெய்யாகரணங் பரியோதா³தங் அஸங்கிலிட்ட²’ந்தி ச. தமேனங்
ஸாவகா ஏவங் ஜானந்தி – ‘அயங் கோ² ப⁴வங் ஸத்தா² அபரிஸுத்³த⁴வெய்யாகரணோ ஸமானோ
‘பரிஸுத்³த⁴வெய்யாகரணொம்ஹீ’தி படிஜானாதி ‘பரிஸுத்³த⁴ங் மே வெய்யாகரணங்
பரியோதா³தங் அஸங்கிலிட்ட²’ந்தி ச. மயஞ்சேவ கோ² பன கி³ஹீனங் ஆரோசெய்யாம,
நாஸ்ஸஸ்ஸ மனாபங். யங் கோ² பனஸ்ஸ அமனாபங், கத²ங் நங் மயங் தேன
ஸமுதா³சரெய்யாம? ஸம்மன்னதி கோ² பன
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன – யங் துமோ கரிஸ்ஸதி,
துமோவ தேன பஞ்ஞாயிஸ்ஸதீ’தி. ஏவரூபங் கோ², மொக்³க³ல்லான, ஸத்தா²ரங் ஸாவகா
வெய்யாகரணதோ ரக்க²ந்தி; ஏவரூபோ ச பன ஸத்தா² ஸாவகேஹி வெய்யாகரணதோ ரக்க²ங்
பச்சாஸீஸதி.
‘‘புன சபரங், மொக்³க³ல்லான, இதே⁴கச்சோ ஸத்தா²
அபரிஸுத்³த⁴ஞாணத³ஸ்ஸனோ ஸமானோ ‘பரிஸுத்³த⁴ஞாணத³ஸ்ஸனொம்ஹீ’தி படிஜானாதி
‘பரிஸுத்³த⁴ங் மே ஞாணத³ஸ்ஸனங் பரியோதா³தங் அஸங்கிலிட்ட²’ந்தி ச. தமேனங்
ஸாவகா ஏவங் ஜானந்தி – ‘அயங் கோ² ப⁴வங் ஸத்தா² அபரிஸுத்³த⁴ஞாணத³ஸ்ஸனோ ஸமானோ
‘பரிஸுத்³த⁴ஞாணத³ஸ்ஸனொம்ஹீ’தி படிஜானாதி
‘பரிஸுத்³த⁴ங் மே ஞாணத³ஸ்ஸனங் பரியோதா³தங் அஸங்கிலிட்ட²’ந்தி ச. மயஞ்சேவ
கோ² பன கி³ஹீனங் ஆரோசெய்யாம, நாஸ்ஸஸ்ஸ மனாபங். யங் கோ² பனஸ்ஸ அமனாபங்,
கத²ங் நங் மயங் தேன ஸமுதா³சரெய்யாம? ஸம்மன்னதி கோ² பன
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன – யங் துமோ கரிஸ்ஸதி,
துமோவ தேன பஞ்ஞாயிஸ்ஸதீ’தி. ஏவரூபங் கோ², மொக்³க³ல்லான, ஸத்தா²ரங் ஸாவகா
ஞாணத³ஸ்ஸனதோ ரக்க²ந்தி; ஏவரூபோ ச பன ஸத்தா² ஸாவகேஹி ஞாணத³ஸ்ஸனதோ ரக்க²ங்
பச்சாஸீஸதீதி. இமே கோ², மொக்³க³ல்லான, பஞ்ச ஸத்தா²ரோ ஸந்தோ ஸங்விஜ்ஜமானா லோகஸ்மிங்.
‘‘அஹங் கோ² பன, மொக்³க³ல்லான, பரிஸுத்³த⁴ஸீலோ ஸமானோ ‘பரிஸுத்³த⁴ஸீலொம்ஹீ’தி படிஜானாமி
‘பரிஸுத்³த⁴ங் மே ஸீலங் பரியோதா³தங் அஸங்கிலிட்ட²’ந்தி ச. ந ச மங் ஸாவகா
ஸீலதோ ரக்க²ந்தி; ந சாஹங் ஸாவகேஹி ஸீலதோ ரக்க²ங் பச்சாஸீஸாமி.
பரிஸுத்³தா⁴ஜீவோ ஸமானோ…பே॰… பரிஸுத்³த⁴த⁴ம்மதே³ஸனோ ஸமானோ…பே॰…
பரிஸுத்³த⁴வெய்யாகரணோ ஸமானோ…பே॰… பரிஸுத்³த⁴ஞாணத³ஸ்ஸனோ ஸமானோ
‘பரிஸுத்³த⁴ஞாணத³ஸ்ஸனொம்ஹீ’தி படிஜானாமி ‘பரிஸுத்³த⁴ங் மே ஞாணத³ஸ்ஸனங்
பரியோதா³தங் அஸங்கிலிட்ட²’ந்தி ச. ந ச மங் ஸாவகா ஞாணத³ஸ்ஸனதோ ரக்க²ந்தி; ந
சாஹங் ஸாவகேஹி ஞாணத³ஸ்ஸனதோ ரக்க²ங் பச்சாஸீஸாமீ’’தி.
335.
அத² கோ² ப⁴க³வா கோஸம்பி³யங் யதா²பி⁴ரந்தங் விஹரித்வா யேன ராஜக³ஹங் தேன
சாரிகங் பக்காமி. அனுபுப்³பே³ன சாரிகங் சரமானோ யேன ராஜக³ஹங் தத³வஸரி. தத்ர
ஸுத³ங் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² ஸம்ப³ஹுலா
பி⁴க்கூ² யேன ப⁴க³வா தேனுபஸங்கமிங்ஸு, உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ²
ப⁴க³வந்தங் ஏதத³வோசுங் – ‘‘தே³வத³த்தஸ்ஸ, ப⁴ந்தே, அஜாதஸத்து குமாரோ பஞ்சஹி
ரத²ஸதேஹி ஸாயங் பாதங் உபட்டா²னங் க³ச்ச²தி; பஞ்ச ச தா²லிபாகஸதானி
ப⁴த்தாபி⁴ஹாரோ அபி⁴ஹரீயதீ’’தி. ‘‘மா, பி⁴க்க²வே, தே³வத³த்தஸ்ஸ
லாப⁴ஸக்காரஸிலோகங் பிஹயித்த². யாவகீவஞ்ச, பி⁴க்க²வே , தே³வத³த்தஸ்ஸ அஜாதஸத்து குமாரோ பஞ்சஹி ரத²ஸதேஹி ஸாயங் பாதங் உபட்டா²னங் க³மிஸ்ஸதி , பஞ்ச ச தா²லிபாகஸதானி ப⁴த்தாபி⁴ஹாரோ அபி⁴ஹரீயிஸ்ஸதி, ஹானியேவ, பி⁴க்க²வே, தே³வத³த்தஸ்ஸ பாடிகங்கா² குஸலேஸு த⁴ம்மேஸு, நோ வுட்³டி⁴.
‘‘ஸெய்யதா²பி , பி⁴க்க²வே,
சண்ட³ஸ்ஸ குக்குரஸ்ஸ நாஸாய பித்தங் பி⁴ந்தெ³ய்யுங், ஏவஞ்ஹி ஸோ, பி⁴க்க²வே,
குக்குரோ பி⁴ய்யோஸோமத்தாய சண்ட³தரோ அஸ்ஸ, ஏவமேவ கோ², பி⁴க்க²வே, யாவகீவஞ்ச
தே³வத³த்தஸ்ஸ அஜாதஸத்து குமாரோ பஞ்சஹி ரத²ஸதேஹி ஸாயங் பாதங் உபட்டா²னங்
க³மிஸ்ஸதி, பஞ்ச ச தா²லிபாகஸதானி ப⁴த்தாபி⁴ஹாரோ அபி⁴ஹரீயிஸ்ஸதி, ஹானியேவ,
பி⁴க்க²வே, தே³வத³த்தஸ்ஸ பாடிகங்கா² குஸலேஸு த⁴ம்மேஸு, நோ வுட்³டி⁴.
[ஸங்॰ நி॰ 2.184; அ॰ நி॰ 4.68] ‘‘அத்தவதா⁴ய, பி⁴க்க²வே, தே³வத³த்தஸ்ஸ லாப⁴ஸக்காரஸிலோகோ உத³பாதி³, பராப⁴வாய தே³வத³த்தஸ்ஸ லாப⁴ஸக்காரஸிலோகோ உத³பாதி³.
‘‘ஸெய்யதா²பி, பி⁴க்க²வே, கத³லீ அத்தவதா⁴ய ப²லங்
தே³தி, பராப⁴வாய ப²லங் தே³தி, ஏவமேவ கோ², பி⁴க்க²வே, அத்தவதா⁴ய
தே³வத³த்தஸ்ஸ லாப⁴ஸக்காரஸிலோகோ உத³பாதி³, பராப⁴வாய தே³வத³த்தஸ்ஸ
லாப⁴ஸக்காரஸிலோகோ உத³பாதி³.
‘‘ஸெய்யதா²பி , பி⁴க்க²வே, வேளு
அத்தவதா⁴ய ப²லங் தே³தி, பராப⁴வாய ப²லங் தே³தி, ஏவமேவ கோ², பி⁴க்க²வே,
அத்தவதா⁴ய தே³வத³த்தஸ்ஸ லாப⁴ஸக்காரஸிலோகோ உத³பாதி³, பராப⁴வாய தே³வத³த்தஸ்ஸ
லாப⁴ஸக்காரஸிலோகோ உத³பாதி³.
‘‘ஸெய்யதா²பி, பி⁴க்க²வே, நளோ அத்தவதா⁴ய ப²லங் தே³தி,
பராப⁴வாய ப²லங் தே³தி, ஏவமேவ கோ², பி⁴க்க²வே, அத்தவதா⁴ய தே³வத³த்தஸ்ஸ
லாப⁴ஸக்காரஸிலோகோ உத³பாதி³, பராப⁴வாய தே³வத³த்தஸ்ஸ லாப⁴ஸக்காரஸிலோகோ
உத³பாதி³ .
‘‘ஸெய்யதா²பி, பி⁴க்க²வே, அஸ்ஸதரீ அத்தவதா⁴ய க³ப்³ப⁴ங்
க³ண்ஹாதி, பராப⁴வாய க³ப்³ப⁴ங் க³ண்ஹாதி, ஏவமேவ கோ², பி⁴க்க²வே, அத்தவதா⁴ய
தே³வத³த்தஸ்ஸ லாப⁴ஸக்காரஸிலோகோ உத³பாதி³, பராப⁴வாய தே³வத³த்தஸ்ஸ
லாப⁴ஸக்காரஸிலோகோ உத³பாதீ³’’தி.
[ஸங்॰ நி॰ 1.183, 1.2.184, நெத்தி॰ 90] ‘‘ப²லங் வே கத³லிங் ஹந்தி, ப²லங் வேளுங் ப²லங் நளங்;
ஸக்காரோ காபுரிஸங் ஹந்தி, க³ப்³போ⁴ அஸ்ஸதரிங் யதா²’’தி.
பட²மபா⁴ணவாரோ நிட்டி²தோ.
2. து³தியபா⁴ணவாரோ
பகாஸனீயகம்மங்
336. தேன
கோ² பன ஸமயேன ப⁴க³வா மஹதியா பரிஸாய பரிவுதோ த⁴ம்மங் தே³ஸெந்தோ நிஸின்னோ
ஹோதி ஸராஜிகாய பரிஸாய. அத² கோ² தே³வத³த்தோ உட்டா²யாஸனா ஏகங்ஸங்
உத்தராஸங்க³ங் கரித்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச
– ‘‘ஜிண்ணோ தா³னி, ப⁴ந்தே, ப⁴க³வா வுட்³டோ⁴ மஹல்லகோ அத்³த⁴க³தோ
வயோஅனுப்பத்தோ. அப்பொஸ்ஸுக்கோ தா³னி, ப⁴ந்தே, ப⁴க³வா
தி³ட்ட²த⁴ம்மஸுக²விஹாரங் அனுயுத்தோ விஹரது, மமங் பி⁴க்கு²ஸங்க⁴ங்
நிஸ்ஸஜ்ஜது. அஹங் பி⁴க்கு²ஸங்க⁴ங் பரிஹரிஸ்ஸாமீ’’தி. ‘‘அலங், தே³வத³த்த, மா
தே ருச்சி பி⁴க்கு²ஸங்க⁴ங் பரிஹரிது’’ந்தி. து³தியம்பி கோ²
தே³வத³த்தோ…பே॰… ததியம்பி கோ² தே³வத³த்தோ ப⁴க³வந்தங் ஏதத³வோச – ‘‘ஜிண்ணோ
தா³னி, ப⁴ந்தே, ப⁴க³வா வுட்³டோ⁴ மஹல்லகோ அத்³த⁴க³தோ வயோஅனுப்பத்தோ.
அப்பொஸ்ஸுக்கோ தா³னி, ப⁴ந்தே, ப⁴க³வா தி³ட்ட²த⁴ம்மஸுக²விஹாரங் அனுயுத்தோ
விஹரது, மமங் பி⁴க்கு²ஸங்க⁴ங் நிஸ்ஸஜ்ஜது. அஹங் பி⁴க்கு²ஸங்க⁴ங்
பரிஹரிஸ்ஸாமீ’’தி. ‘‘ஸாரிபுத்தமொக்³க³ல்லானானம்பி கோ² அஹங், தே³வத³த்த, பி⁴க்கு²ஸங்க⁴ங் ந நிஸ்ஸஜ்ஜெய்யங் , கிங் பன துய்ஹங் ச²வஸ்ஸ கே²ளாஸகஸ்ஸா’’தி! அத² கோ² தே³வத³த்தோ – ஸராஜிகாய
மங் ப⁴க³வா பரிஸாய கே²ளாஸகவாதே³ன அபஸாதே³தி, ஸாரிபுத்தமொக்³க³ல்லானேவ
உக்கங்ஸதீதி – குபிதோ அனத்தமனோ ப⁴க³வந்தங் அபி⁴வாதெ³த்வா பத³க்கி²ணங் கத்வா
பக்காமி. அயஞ்சரஹி தே³வத³த்தஸ்ஸ ப⁴க³வதி பட²மோ ஆகா⁴தோ அஹோஸி.
அத² கோ² ப⁴க³வா பி⁴க்கூ² ஆமந்தேஸி – ‘‘தேன ஹி,
பி⁴க்க²வே, ஸங்கோ⁴ தே³வத³த்தஸ்ஸ ராஜக³ஹே பகாஸனீயங் கம்மங் கரோது –
‘புப்³பே³ தே³வத³த்தஸ்ஸ அஞ்ஞா பகதி அஹோஸி, இதா³னி அஞ்ஞா பகதி. யங்
தே³வத³த்தோ கரெய்ய காயேன வாசாய, ந தேன பு³த்³தோ⁴ வா த⁴ம்மோ வா ஸங்கோ⁴ வா
த³ட்ட²ப்³போ³, தே³வத³த்தோவ தேன த³ட்ட²ப்³போ³’தி. ஏவஞ்ச பன, பி⁴க்க²வே,
காதப்³ப³ங். ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
337.
‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங் ஸங்கோ⁴
தே³வத³த்தஸ்ஸ ராஜக³ஹே பகாஸனீயங் கம்மங் கரெய்ய – ‘‘புப்³பே³ தே³வத³த்தஸ்ஸ
அஞ்ஞா பகதி அஹோஸி, இதா³னி அஞ்ஞா பகதி. யங் தே³வத³த்தோ கரெய்ய காயேன வாசாய, ந தேன பு³த்³தோ⁴ வா த⁴ம்மோ வா ஸங்கோ⁴ வா த³ட்ட²ப்³போ³, தே³வத³த்தோவ தேன த³ட்ட²ப்³போ³’தி. ஏஸா ஞத்தி.
‘‘ஸுணாது மே, ப⁴ந்தே, ஸங்கோ⁴. ஸங்கோ⁴ தே³வத³த்தஸ்ஸ ராஜக³ஹே
பகாஸனீயங் கம்மங் கரோதி – ‘புப்³பே³ தே³வத³த்தஸ்ஸ அஞ்ஞா பகதி அஹோஸி,
இதா³னி அஞ்ஞா பகதி. யங் தே³வத³த்தோ கரெய்ய காயேன வாசாய, ந தேன பு³த்³தோ⁴ வா
த⁴ம்மோ வா ஸங்கோ⁴ வா த³ட்ட²ப்³போ³, தே³வத³த்தோவ தேன த³ட்ட²ப்³போ³’தி.
யஸ்ஸாயஸ்மதோ க²மதி தே³வத³த்தஸ்ஸ ராஜக³ஹே பகாஸனீயங் கம்மஸ்ஸ கரணங் –
‘புப்³பே³ தே³வத³த்தஸ்ஸ அஞ்ஞா பகதி அஹோஸி, இதா³னி அஞ்ஞா பகதி, யங்
தே³வத³த்தோ கரெய்ய காயேன வாசாய, ந தேன பு³த்³தோ⁴ வா த⁴ம்மோ வா ஸங்கோ⁴ வா
த³ட்ட²ப்³போ³, தே³வத³த்தோவ தேன த³ட்ட²ப்³போ³’தி – ஸோ துண்ஹஸ்ஸ; யஸ்ஸ
நக்க²மதி, ஸோ பா⁴ஸெய்ய.
‘‘கதங் ஸங்கே⁴ன தே³வத³த்தஸ்ஸ ராஜக³ஹே பகாஸனீயங் கம்மங்
– ‘புப்³பே³ தே³வத³த்தஸ்ஸ அஞ்ஞா பகதி அஹோஸி, இதா³னி அஞ்ஞா பகதி. யங்
தே³வத³த்தோ கரெய்ய காயேன வாசாய, ந தேன பு³த்³தோ⁴ வா த⁴ம்மோ வா ஸங்கோ⁴ வா
த³ட்ட²ப்³போ³, தே³வத³த்தோவ தேன த³ட்ட²ப்³போ³’தி. க²மதி ஸங்க⁴ஸ்ஸ, தஸ்மா
துண்ஹீ, ஏவமேதங் தா⁴ரயாமீ’’தி.
338. அத² கோ² ப⁴க³வா ஆயஸ்மந்தங் ஸாரிபுத்தங் ஆமந்தேஸி – ‘‘தேன ஹி த்வங், ஸாரிபுத்த, தே³வத³த்தங்
ராஜக³ஹே பகாஸேஹீ’’தி. ‘‘புப்³பே³ மயா, ப⁴ந்தே, தே³வத³த்தஸ்ஸ ராஜக³ஹே வண்ணோ
பா⁴ஸிதோ – ‘மஹித்³தி⁴கோ கோ³தி⁴புத்தோ, மஹானுபா⁴வோ கோ³தி⁴புத்தோ’தி.
கதா²ஹங், ப⁴ந்தே, தே³வத³த்தங் ராஜக³ஹே பகாஸேமீ’’தி? ‘‘நனு தயா, ஸாரிபுத்த,
பூ⁴தோயேவ தே³வத³த்தஸ்ஸ ராஜக³ஹே வண்ணோ பா⁴ஸிதோ – ‘மஹித்³தி⁴கோ கோ³தி⁴புத்தோ,
மஹானுபா⁴வோ கோ³தி⁴புத்தோ’’’ தி? ‘‘ஏவங்
ப⁴ந்தே’’தி. ‘‘ஏவமேவ கோ² த்வங், ஸாரிபுத்த, பூ⁴தங்யேவ தே³வத³த்தங் ராஜக³ஹே
பகாஸேஹீ’’தி. ‘‘ஏவங் ப⁴ந்தே’’தி கோ² ஆயஸ்மா ஸாரிபுத்தோ ப⁴க³வதோ பச்சஸ்ஸோஸி.
அத² கோ² ப⁴க³வா பி⁴க்கூ² ஆமந்தேஸி – ‘‘தேன ஹி,
பி⁴க்க²வே, ஸங்கோ⁴ ஸாரிபுத்தங் ஸம்மன்னது தே³வத³த்தங் ராஜக³ஹே பகாஸேதுங் –
‘புப்³பே³ தே³வத³த்தஸ்ஸ அஞ்ஞா பகதி அஹோஸி, இதா³னி அஞ்ஞா பகதி. யங்
தே³வத³த்தோ கரெய்ய காயேன வாசாய, ந தேன பு³த்³தோ⁴ வா த⁴ம்மோ வா ஸங்கோ⁴ வா
த³ட்ட²ப்³போ³, தே³வத³த்தோவ தேன த³ட்ட²ப்³போ³’தி. ஏவஞ்ச பன, பி⁴க்க²வே,
ஸம்மன்னிதப்³போ³. பட²மங் ஸாரிபுத்தோ யாசிதப்³போ³. யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங், ஸங்கோ⁴ ஆயஸ்மந்தங் ஸாரிபுத்தங் ஸம்மன்னெய்ய
தே³வத³த்தங் ராஜக³ஹே பகாஸேதுங் – ‘புப்³பே³ தே³வத³த்தஸ்ஸ அஞ்ஞா பகதி
அஹோஸி, இதா³னி அஞ்ஞா பகதி. யங் தே³வத³த்தோ கரெய்ய காயேன வாசாய, ந தேன
பு³த்³தோ⁴ வா த⁴ம்மோ வா ஸங்கோ⁴ வா த³ட்ட²ப்³போ³, தே³வத³த்தோவ தேன
த³ட்ட²ப்³போ³’தி. ஏஸா ஞத்தி.
‘‘ஸுணாது மே, ப⁴ந்தே, ஸங்கோ⁴. ஸங்கோ⁴ ஆயஸ்மந்தங்
ஸாரிபுத்தங் ஸம்மன்னதி தே³வத³த்தங் ராஜக³ஹே பகாஸேதுங் – ‘புப்³பே³
தே³வத³த்தஸ்ஸ அஞ்ஞா பகதி அஹோஸி, இதா³னி அஞ்ஞா பகதி, யங் தே³வத³த்தோ கரெய்ய
காயேன வாசாய, ந தேன பு³த்³தோ⁴ வா த⁴ம்மோ வா ஸங்கோ⁴ வா த³ட்ட²ப்³போ³,
தே³வத³த்தோவ தேன த³ட்ட²ப்³போ³’தி. யஸ்ஸாயஸ்மதோ க²மதி, ஆயஸ்மதோ ஸாரிபுத்தஸ்ஸ
ஸம்முதி தே³வத³த்தங் ராஜக³ஹே பகாஸேதுங் –
‘புப்³பே³ தே³வத³த்தஸ்ஸ அஞ்ஞா பகதி அஹோஸி, இதா³னி அஞ்ஞா பகதி, யங்
தே³வத³த்தோ கரெய்ய காயேன வாசாய, ந தேன பு³த்³தோ⁴ வா த⁴ம்மோ வா ஸங்கோ⁴ வா
த³ட்ட²ப்³போ³, தே³வத³த்தோவ தேன த³ட்ட²ப்³போ³’தி – ஸோ துண்ஹஸ்ஸ; யஸ்ஸ
நக்க²மதி, ஸோ பா⁴ஸெய்ய.
‘‘ஸம்மதோ ஸங்கே⁴ன ஆயஸ்மா ஸாரிபுத்தோ தே³வத³த்தங்
ராஜக³ஹே பகாஸேதுங் – ‘புப்³பே³ தே³வத³த்தஸ்ஸ அஞ்ஞா பகதி அஹோஸி, இதா³னி
அஞ்ஞா பகதி. யங் தே³வத³த்தோ கரெய்ய காயேன வாசாய, ந தேன பு³த்³தோ⁴ வா த⁴ம்மோ
வா ஸங்கோ⁴ வா த³ட்ட²ப்³போ³, தே³வத³த்தோவ தேன த³ட்ட²ப்³போ³’தி. க²மதி
ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
ஸம்மதோ ச ஆயஸ்மா ஸாரிபுத்தோ
ஸம்ப³ஹுலேஹி பி⁴க்கூ²ஹி ஸத்³தி⁴ங் ராஜக³ஹங் பவிஸித்வா தே³வத³த்தங் ராஜக³ஹே
பகாஸேஸி – ‘‘புப்³பே³ தே³வத³த்தஸ்ஸ அஞ்ஞா பகதி அஹோஸி, இதா³னி அஞ்ஞா பகதி.
யங் தே³வத³த்தோ கரெய்ய காயேன வாசாய, ந தேன பு³த்³தோ⁴ வா த⁴ம்மோ வா ஸங்கோ⁴
வா த³ட்ட²ப்³போ³, தே³வத³த்தோவ தேன த³ட்ட²ப்³போ³’’தி. தத்த² யே தே மனுஸ்ஸா
அஸ்ஸத்³தா⁴ அப்பஸன்னா து³ப்³பு³த்³தி⁴னோ, தே ஏவமாஹங்ஸு – ‘‘உஸூயகா இமே ஸமணா
ஸக்யபுத்தியா தே³வத³த்தஸ்ஸ லாப⁴ஸக்காரங் உஸூயந்தீ’’தி. யே பன தே மனுஸ்ஸா
ஸத்³தா⁴ பஸன்னா பண்டி³தா ப்³யத்தா பு³த்³தி⁴மந்தோ, தே ஏவமாஹங்ஸு – ‘‘ந கோ²
இத³ங் ஓரகங் ப⁴விஸ்ஸதி யதா² ப⁴க³வா தே³வத³த்தங் ராஜக³ஹே பகாஸாபேதீ’’தி.
அஜாதஸத்துகுமாரவத்து²
339. அத²
கோ² தே³வத³த்தோ யேன அஜாதஸத்து குமாரோ தேனுபஸங்கமி, உபஸங்கமித்வா
அஜாதஸத்துங் குமாரங் ஏதத³வோச – ‘‘புப்³பே³ கோ², குமார, மனுஸ்ஸா தீ³கா⁴யுகா,
ஏதரஹி அப்பாயுகா. டா²னங் கோ² பனேதங் விஜ்ஜதி யங் த்வங் குமாரோவ ஸமானோ
காலங் கரெய்யாஸி. தேன ஹி த்வங், குமார, பிதரங் ஹந்த்வா ராஜா ஹோஹி. அஹங்
ப⁴க³வந்தங் ஹந்த்வா பு³த்³தோ⁴ ப⁴விஸ்ஸாமீ’’தி.
அத² கோ² அஜாதஸத்து குமாரோ – அய்யோ கோ² தே³வத³த்தோ
மஹித்³தி⁴கோ மஹானுபா⁴வோ, ஜானெய்யாஸி அய்யோ தே³வத³த்தோதி – ஊருயா
பொத்த²னிகங் ப³ந்தி⁴த்வா தி³வா தி³வஸ்ஸ [தி³வா தி³வஸஸ்ஸ (க॰)]
பீ⁴தோ உப்³பி³க்³கோ³ உஸ்ஸங்கீ உத்ரஸ்தோ ஸஹஸா அந்தேபுரங் பாவிஸி.
அத்³த³ஸாஸுங் கோ² அந்தேபுரே உபசாரகா மஹாமத்தா அஜாதஸத்துங் குமாரங் தி³வா
தி³வஸ்ஸ பீ⁴தங் உப்³பி³க்³க³ங் உஸ்ஸங்கிங் உத்ரஸ்தங் ஸஹஸா அந்தேபுரங்
பவிஸந்தங்; தி³ஸ்வான அக்³க³ஹேஸுங். தே விசினந்தா ஊருயா பொத்த²னிகங்
ப³த்³த⁴ங் [ப³ந்த⁴ங் (க॰)] தி³ஸ்வான அஜாதஸத்துங்
குமாரங் ஏதத³வோசுங் – ‘‘கிங் த்வங், குமார, கத்துகாமோஸீ’’தி? ‘‘பிதரம்ஹி
ஹந்துகாமோ’’தி. ‘‘கேனாஸி உஸ்ஸாஹிதோ’’தி? ‘‘அய்யேன தே³வத³த்தேனா’’தி. ஏகச்சே
மஹாமத்தா ஏவங் மதிங் அகங்ஸு – ‘‘குமாரோ ச ஹந்தப்³போ³, தே³வத³த்தோ ச,
ஸப்³பே³ ச பி⁴க்கூ² ஹந்தப்³பா³’’தி. ஏகச்சே மஹாமத்தா ஏவங் மதிங் அகங்ஸு –
‘‘ந பி⁴க்கூ² ஹந்தப்³பா³. ந பி⁴க்கூ² கிஞ்சி அபரஜ்ஜ²ந்தி. குமாரோ ச
ஹந்தப்³போ³, தே³வத³த்தோ சா’’தி. ஏகச்சே மஹாமத்தா ஏவங் மதிங் அகங்ஸு – ‘‘ந
குமாரோ ச ஹந்தப்³போ³, ந தே³வத³த்தோ. ந பி⁴க்கூ² ஹந்தப்³பா³. ரஞ்ஞோ ஆரோசேதப்³ப³ங். யதா² ராஜா வக்க²தி ததா² கரிஸ்ஸாமா’’தி.
அத² கோ² தே மஹாமத்தா அஜாதஸத்துங் குமாரங் ஆதா³ய யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமிங்ஸு , உபஸங்கமித்வா ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஏதமத்த²ங் ஆரோசேஸுங் .
‘‘கத²ங், ப⁴ணே, மஹாமத்தேஹி மதி கதா’’தி? ‘‘ஏகச்சே, தே³வ, மஹாமத்தா ஏவங்
மதிங் அகங்ஸு – ‘குமாரோ ச ஹந்தப்³போ³, தே³வத³த்தோ ச, ஸப்³பே³ ச பி⁴க்கூ²
ஹந்தப்³பா³’தி. ஏகச்சே மஹாமத்தா ஏவங் மதிங் அகங்ஸு – ‘ந பி⁴க்கூ²
ஹந்தப்³பா³. ந பி⁴க்கூ² கிஞ்சி அபரஜ்ஜ²ந்தி. குமாரோ ச ஹந்தப்³போ³,
தே³வத³த்தோ சா’தி. ஏகச்சே மஹாமத்தா ஏவங் மதிங் அகங்ஸு – ‘ந குமாரோ ச
ஹந்தப்³போ³, ந தே³வத³த்தோ. ந பி⁴க்கூ² ஹந்தப்³பா³. ரஞ்ஞோ
ஆரோசேதப்³ப³ங். யதா² ராஜா வக்க²தி ததா² கரிஸ்ஸாமா’’’தி. ‘‘கிங், ப⁴ணே,
கரிஸ்ஸதி பு³த்³தோ⁴ வா த⁴ம்மோ வா ஸங்கோ⁴ வா? நனு ப⁴க³வதா படிகச்சேவ
தே³வத³த்தோ ராஜக³ஹே பகாஸாபிதோ – ‘புப்³பே³ தே³வத³த்தஸ்ஸ அஞ்ஞா பகதி அஹோஸி,
இதா³னி அஞ்ஞா பகதி. யங் தே³வத³த்தோ கரெய்ய காயேன வாசாய, ந தேன பு³த்³தோ⁴ வா
த⁴ம்மோ வா ஸங்கோ⁴ வா த³ட்ட²ப்³போ³, தே³வத³த்தோவ தேன த³ட்ட²ப்³போ³’’தி?
தத்த² யே தே மஹாமத்தா ஏவங் மதிங் அகங்ஸு – ‘குமாரோ ச ஹந்தப்³போ³ தே³வத³த்தோ
ச; ஸப்³பே³ ச பி⁴க்கூ² ஹந்தப்³பா³’தி; தே அட்டா²னே அகாஸி. யே தே மஹாமத்தா
ஏவங் மதிங் அகங்ஸு – ‘ந பி⁴க்கூ² ஹந்தப்³பா³; ந பி⁴க்கூ² கிஞ்சி
அபரஜ்ஜ²ந்தி; குமாரோ ச ஹந்தப்³போ³ தே³வத³த்தோ சா’தி; தே நீசே டா²னே ட²பேஸி.
யே தே மஹாமத்தா ஏவங் மதிங் அகங்ஸு – ‘ந குமாரோ ச
ஹந்தப்³போ³, ந தே³வத³த்தோ; ந பி⁴க்கூ² ஹந்தப்³பா³; ரஞ்ஞோ ஆரோசேதப்³ப³ங்;
யதா² ராஜா வக்க²தி ததா² கரிஸ்ஸாமா’தி; தே உச்சே டா²னே ட²பேஸி. அத² கோ² ராஜா
மாக³தோ⁴ ஸேனியோ பி³ம்பி³ஸாரோ அஜாதஸத்துங் குமாரங் ஏதத³வோச – ‘‘கிஸ்ஸ மங்
த்வங், குமார, ஹந்துகாமோஸீ’’தி? ‘‘ரஜ்ஜேனாம்ஹி, தே³வ, அத்தி²கோ’’தி. ‘‘ஸசே
கோ² த்வங், குமார, ரஜ்ஜேன அத்தி²கோ, ஏதங் தே ரஜ்ஜ’’ந்தி அஜாதஸத்துஸ்ஸ
குமாரஸ்ஸ ரஜ்ஜங் நிய்யாதே³ஸி.
அபி⁴மாரபேஸனங்
340.
அத² கோ² தே³வத³த்தோ யேன அஜாதஸத்து குமாரோ தேனுபஸங்கமி, உபஸங்கமித்வா
அஜாதஸத்துங் குமாரங் ஏதத³வோச – ‘‘புரிஸே, மஹாராஜ, ஆணாபேஹி, யே ஸமணங்
கோ³தமங் ஜீவிதா வோரோபெஸ்ஸந்தீ’’தி. அத² கோ² அஜாதஸத்து குமாரோ மனுஸ்ஸே
ஆணாபேஸி – ‘‘யதா², ப⁴ணே, அய்யோ தே³வத³த்தோ ஆஹ ததா² கரெய்யாதா²’’தி. அத² கோ²
தே³வத³த்தோ ஏகங் புரிஸங் ஆணாபேஸி – ‘‘க³ச்சா²வுஸோ, அமுகஸ்மிங் ஓகாஸே ஸமணோ
கோ³தமோ விஹரதி. தங் ஜீவிதா வோரோபெத்வா இமினா மக்³கே³ன ஆக³ச்சா²’’தி.
தஸ்மிங் மக்³கே³ த்³வே புரிஸே ட²பேஸி – ‘‘யோ இமினா மக்³கே³ன ஏகோ புரிஸோ
ஆக³ச்ச²தி, தங் ஜீவிதா வோரோபெத்வா இமினா மக்³கே³ன ஆக³ச்ச²தா²’’தி. தஸ்மிங்
மக்³கே³ சத்தாரோ புரிஸே ட²பேஸி – ‘‘யே இமினா மக்³கே³ன
த்³வே புரிஸா ஆக³ச்ச²ந்தி, தே ஜீவிதா வோரோபெத்வா இமினா மக்³கே³ன
ஆக³ச்ச²தா²’’தி. தஸ்மிங் மக்³கே³ அட்ட² புரிஸே ட²பேஸி – ‘‘யே இமினா
மக்³கே³ன சத்தாரோ புரிஸா ஆக³ச்ச²ந்தி, தே ஜீவிதா வோரோபெத்வா இமினா மக்³கே³ன ஆக³ச்ச²தா²’’தி. தஸ்மிங் மக்³கே³ ஸோளஸ புரிஸே ட²பேஸி – ‘‘யே இமினா மக்³கே³ன அட்ட² புரிஸா ஆக³ச்ச²ந்தி, தே ஜீவிதா வோரோபெத்வா ஆக³ச்ச²தா²’’தி.
அத² கோ² ஸோ ஏகோ புரிஸோ அஸிசம்மங் க³ஹெத்வா த⁴னுகலாபங்
ஸன்னய்ஹித்வா யேன ப⁴க³வா தேனுபஸங்கமி, உபஸங்கமித்வா ப⁴க³வதோ அவிதூ³ரே பீ⁴தோ
உப்³பி³க்³கோ³ உஸ்ஸங்கீ உத்ரஸ்தோ பத்த²த்³தே⁴ன காயேன அட்டா²ஸி. அத்³த³ஸா
கோ² ப⁴க³வா தங் புரிஸங் பீ⁴தங் உப்³பி³க்³க³ங் உஸ்ஸங்கிங் உத்ரஸ்தங்
பத்த²த்³தே⁴ன காயேன டி²தங். தி³ஸ்வான தங் புரிஸங் ஏதத³வோச – ‘‘ஏஹாவுஸோ, மா
பா⁴யீ’’தி. அத² கோ² ஸோ புரிஸோ அஸிசம்மங் ஏகமந்தங் கரித்வா த⁴னுகலாபங்
நிக்கி²பித்வா யேன ப⁴க³வா தேனுபஸங்கமி, உபஸங்கமித்வா ப⁴க³வதோ பாதே³ஸு ஸிரஸா
நிபதித்வா ப⁴க³வந்தங் ஏதத³வோச – ‘‘அச்சயோ மங், ப⁴ந்தே, அச்சக³மா
யதா²பா³லங் யதா²மூள்ஹங் யதா²அகுஸலங், யோஹங் து³ட்ட²சித்தோ வத⁴கசித்தோ
இதூ⁴பஸங்கந்தோ. தஸ்ஸ மே, ப⁴ந்தே, ப⁴க³வா அச்சயங் அச்சயதோ படிக்³க³ண்ஹாது
ஆயதிங் ஸங்வராயா’’தி. ‘‘தக்³க⁴ த்வங், ஆவுஸோ, அச்சயோ அச்சக³மா யதா²பா³லங்
யதா²மூள்ஹங் யதா²அகுஸலங், யங் த்வங் து³ட்ட²சித்தோ வத⁴கசித்தோ
இதூ⁴பஸங்கந்தோ. யதோ ச கோ² த்வங், ஆவுஸோ , அச்சயங்
அச்சயதோ தி³ஸ்வா யதா²த⁴ம்மங் படிகரோஸி, தங் தே மயங் படிக்³க³ண்ஹாம.
வுட்³டி⁴ ஹேஸா, ஆவுஸோ, அரியஸ்ஸ வினயே – யோ அச்சயங் அச்சயதோ தி³ஸ்வா
யதா²த⁴ம்மங் படிகரோதி, ஆயதிங் ஸங்வரங் ஆபஜ்ஜதீ’’தி.
அத² கோ² ப⁴க³வா தஸ்ஸ புரிஸஸ்ஸ அனுபுப்³பி³ங் கத²ங்
கதே²ஸி, ஸெய்யதி²த³ங் – தா³னகத²ங் ஸீலகத²ங் ஸக்³க³கத²ங், காமானங் ஆதீ³னவங்
ஓகாரங் ஸங்கிலேஸங், நெக்க²ம்மே ஆனிஸங்ஸங் பகாஸேஸி. யதா³ தங் ப⁴க³வா அஞ்ஞாஸி
கல்லசித்தங், முது³சித்தங், வினீவரணசித்தங், உத³க்³க³சித்தங்,
பஸன்னசித்தங், அத² யா பு³த்³தா⁴னங் ஸாமுக்கங்ஸிகா த⁴ம்மதே³ஸனா தங் பகாஸேஸி –
து³க்க²ங், ஸமுத³யங், நிரோத⁴ங், மக்³க³ங். ஸெய்யதா²பி நாம ஸுத்³த⁴ங்
வத்த²ங் அபக³தகாளகங் ஸம்மதே³வ ரஜனங் படிக்³க³ஹெய்ய, ஏவமேவ தஸ்ஸ புரிஸஸ்ஸ
தஸ்மிங்யேவ ஆஸனே விரஜங் வீதமலங் த⁴ம்மசக்கு²ங் உத³பாதி³ – யங் கிஞ்சி
ஸமுத³யத⁴ம்மங், ஸப்³ப³ங் தங் நிரோத⁴த⁴ம்மந்தி. அத² கோ² ஸோ புரிஸோ
தி³ட்ட²த⁴ம்மோ பத்தத⁴ம்மோ விதி³தத⁴ம்மோ பரியோகா³ள்ஹத⁴ம்மோ திண்ணவிசிகிச்சோ²
விக³தகத²ங்கதோ² வேஸாரஜ்ஜப்பத்தோ அபரப்பச்சயோ ஸத்து²ஸாஸனே ப⁴க³வந்தங்
ஏதத³வோச – ‘‘அபி⁴க்கந்தங், ப⁴ந்தே, அபி⁴க்கந்தங், ப⁴ந்தே. ஸெய்யதா²பி,
ப⁴ந்தே, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய,
மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா
தேலபஜ்ஜோதங் தா⁴ரெய்ய – சக்கு²மந்தோ ரூபானி த³க்க²ந்தீதி – ஏவமேவங் ப⁴க³வதா
அனேகபரியாயேன த⁴ம்மோ பகாஸிதோ. ஏஸாஹங், ப⁴ந்தே, ப⁴க³வந்தங் ஸரணங் க³ச்சா²மி, த⁴ம்மஞ்ச, பி⁴க்கு²ஸங்க⁴ஞ்ச. உபாஸகங் மங் ப⁴க³வா தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி. அத² கோ² ப⁴க³வா தங் புரிஸங் ஏதத³வோச – ‘‘மா கோ² த்வங், ஆவுஸோ, இமினா மக்³கே³ன க³ச்ச², இமினா மக்³கே³ன க³ச்சா²ஹீ’’தி அஞ்ஞேன மக்³கே³ன உய்யோஜேஸி.
அத² கோ² தே த்³வே புரிஸா – கிங் நு கோ² ஸோ ஏகோ புரிஸோ
சிரேன ஆக³ச்ச²தீதி – படிபத²ங் க³ச்ச²ந்தா அத்³த³ஸங்ஸு ப⁴க³வந்தங்
அஞ்ஞதரஸ்மிங் ருக்க²மூலே நிஸின்னங். தி³ஸ்வான யேன ப⁴க³வா தேனுபஸங்கமிங்ஸு,
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. தேஸங் ப⁴க³வா
அனுபுப்³பி³ங் கத²ங் கதே²ஸி…பே॰… அபரப்பச்சயா ஸத்து²ஸாஸனே ப⁴க³வந்தங்
ஏதத³வோசுங் – ‘‘அபி⁴க்கந்தங், ப⁴ந்தே…பே॰… உபாஸகே நோ ப⁴க³வா தா⁴ரேது
அஜ்ஜதக்³கே³ பாணுபேதங் ஸரணங் க³தே’’தி. அத² கோ² ப⁴க³வா தே புரிஸே ஏதத³வோச –
‘‘மா கோ² தும்ஹே, ஆவுஸோ, இமினா மக்³கே³ன க³ச்சி²த்த², இமினா மக்³கே³ன
க³ச்ச²தா²’’தி அஞ்ஞேன மக்³கே³ன உய்யோஜேஸி.
அத² கோ² தே சத்தாரோ புரிஸா…பே॰… அத² கோ² தே அட்ட²
புரிஸா…பே॰… அத² கோ² தே ஸோளஸ புரிஸா – கிங் நு கோ² தே அட்ட² புரிஸா சிரேன
ஆக³ச்ச²ந்தீதி – படிபத²ங் க³ச்ச²ந்தா அத்³த³ஸாஸுங் ப⁴க³வந்தங் அஞ்ஞதரஸ்மிங்
ருக்க²மூலே நிஸின்னங். தி³ஸ்வான யேன ப⁴க³வா தேனுபஸங்கமிங்ஸு, உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. தேஸங் ப⁴க³வா
அனுபுப்³பி³ங் கத²ங் கதே²ஸி, ஸெய்யதி²த³ங் – தா³னகத²ங்…பே॰… அபரப்பச்சயா
ஸத்து²ஸாஸனே ப⁴க³வந்தங் ஏதத³வோசுங் – ‘‘அபி⁴க்கந்தங், ப⁴ந்தே…பே॰…
உபாஸகே நோ ப⁴க³வா தா⁴ரேது அஜ்ஜதக்³கே³ பாணுபேதங் ஸரணங் க³தே’’தி. அத² கோ²
ப⁴க³வா தே புரிஸே ஏதத³வோச – ‘‘மா கோ² தும்ஹே, ஆவுஸோ, இமினா மக்³கே³ன
க³ச்சி²த்த², இமினா மக்³கே³ன க³ச்ச²தா²’’தி அஞ்ஞேன மக்³கே³ன உய்யோஜேஸி.
அத² கோ² ஸோ ஏகோ புரிஸோ யேன தே³வத³த்தோ தேனுபஸங்கமி,
உபஸங்கமித்வா தே³வத³த்தங் ஏதத³வோச – ‘‘நாஹங், ப⁴ந்தே, ஸக்கோமி தங்
ப⁴க³வந்தங் ஜீவிதா வோரோபேதுங்; மஹித்³தி⁴கோ ஸோ ப⁴க³வா, மஹானுபா⁴வோ’’தி.
‘‘அலங், ஆவுஸோ; மா த்வங் ஸமணங் கோ³தமங் ஜீவிதா வோரோபேஸி. அஹமேவ ஸமணங்
கோ³தமங் ஜீவிதா வோரோபெஸ்ஸாமீ’’தி.
லோஹிதுப்பாத³ககம்மங்
341. தேன
கோ² பன ஸமயேன ப⁴க³வா கி³ஜ்ஜ²கூடஸ்ஸ பப்³ப³தஸ்ஸ சா²யாயங் சங்கமதி. அத² கோ²
தே³வத³த்தோ கி³ஜ்ஜ²கூடங் பப்³ப³தங் ஆருஹித்வா மஹதிங் ஸிலங் பவிஜ்ஜி² – இமாய
ஸமணங் கோ³தமங் ஜீவிதா வோரோபெஸ்ஸாமீதி. த்³வே பப்³ப³தகூடா ஸமாக³ந்த்வா தங்
ஸிலங் ஸம்படிச்சி²ங்ஸு. ததோ பபதிகா உப்பதித்வா ப⁴க³வதோ பாதே³ ருஹிரங்
உப்பாதே³ஸி. அத² கோ² ப⁴க³வா உத்³த⁴ங் உல்லோகெத்வா தே³வத³த்தங்
ஏதத³வோச – ‘‘ப³ஹுங் தயா, மோக⁴புரிஸ, அபுஞ்ஞங் பஸுதங், யங் த்வங்
து³ட்ட²சித்தோ வத⁴கசித்தோ ததா²க³தஸ்ஸ ருஹிரங் உப்பாதே³ஸீ’’தி. அத² கோ²
ப⁴க³வா பி⁴க்கூ² ஆமந்தேஸி – ‘‘இத³ங், பி⁴க்க²வே, தே³வத³த்தேன பட²மங்
ஆனந்தரியங் கம்மங் உபசிதங், யங் து³ட்ட²சித்தேன வத⁴கசித்தேன ததா²க³தஸ்ஸ
ருஹிரங் உப்பாதி³த’’ந்தி.
அஸ்ஸோஸுங் கோ² பி⁴க்கூ² –
‘‘தே³வத³த்தேன கிர ப⁴க³வதோ வதோ⁴ பயுத்தோ’’தி. தே ச பி⁴க்கூ² ப⁴க³வதோ
விஹாரஸ்ஸ பரிதோ பரிதோ சங்கமந்தி உச்சாஸத்³தா³ மஹாஸத்³தா³ ஸஜ்ஜா²யங்
கரொந்தா, ப⁴க³வதோ ரக்கா²வரணகு³த்தியா. அஸ்ஸோஸி கோ² ப⁴க³வா உச்சாஸத்³த³ங்
மஹாஸத்³த³ங் ஸஜ்ஜா²யஸத்³த³ங். ஸுத்வான ஆயஸ்மந்தங் ஆனந்த³ங் ஆமந்தேஸி –
‘‘கிங் நு கோ² ஸோ, ஆனந்த³, உச்சாஸத்³தோ³ மஹாஸத்³தோ³ ஸஜ்ஜா²யஸத்³தோ³’’தி?
‘‘அஸ்ஸோஸுங் கோ², ப⁴ந்தே, பி⁴க்கூ² – ‘தே³வத³த்தேன கிர ப⁴க³வதோ வதோ⁴
பயுத்தோ’தி. தே ச [தேத⁴ (ஸீ॰)], ப⁴ந்தே,
பி⁴க்கூ² ப⁴க³வதோ விஹாரஸ்ஸ பரிதோ பரிதோ சங்கமந்தி உச்சாஸத்³தா³ மஹாஸத்³தா³
ஸஜ்ஜா²யங் கரொந்தா, ப⁴க³வதோ ரக்கா²வரணகு³த்தியா. ஸோ ஏஸோ, ப⁴க³வா,
உச்சாஸத்³தோ³ மஹாஸத்³தோ³ ஸஜ்ஜா²யஸத்³தோ³’’தி. ‘‘தேன ஹானந்த³, மம வசனேன தே
பி⁴க்கூ² ஆமந்தேஹி – ஸத்தா² ஆயஸ்மந்தே ஆமந்தேதீ’’தி. ‘‘ஏவங் ப⁴ந்தே’’தி கோ²
ஆயஸ்மா ஆனந்தோ³ ப⁴க³வதோ படிஸ்ஸுத்வா யேன தே பி⁴க்கூ² தேனுபஸங்கமி,
உபஸங்கமித்வா தே பி⁴க்கூ² ஏதத³வோச – ‘‘ஸத்தா² ஆயஸ்மந்தே ஆமந்தேதீ’’தி.
‘‘ஏவமாவுஸோ’’தி கோ² தே பி⁴க்கூ² ஆயஸ்மதோ ஆனந்த³ஸ்ஸ படிஸ்ஸுத்வா யேன ப⁴க³வா
தேனுபஸங்கமிங்ஸு, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³ங்ஸு. ஏகமந்தங் நிஸின்னே கோ² தே பி⁴க்கூ² ப⁴க³வா ஏதத³வோச –
‘‘அட்டா²னமேதங் , பி⁴க்க²வே, அனவகாஸோ, யங் பரூபக்கமேன ததா²க³தங் ஜீவிதா வோரோபெய்ய. அனுபக்கமேன, பி⁴க்க²வே, ததா²க³தா பரினிப்³பா³யந்தி.
[சூளவ॰ 334; அ॰ நி॰ 5.100]
‘‘பஞ்சிமே, பி⁴க்க²வே, ஸத்தா²ரோ ஸந்தோ ஸங்விஜ்ஜமானா லோகஸ்மிங். கதமே பஞ்ச?
‘‘இத⁴, பி⁴க்க²வே, ஏகச்சோ ஸத்தா² அபரிஸுத்³த⁴ஸீலோ ஸமானோ
‘பரிஸுத்³த⁴ஸீலொம்ஹீ’தி படிஜானாதி ‘பரிஸுத்³த⁴ங் மே
ஸீலங் பரியோதா³தங் அஸங்கிலிட்ட²’ந்தி ச. தமேனங் ஸாவகா ஏவங் ஜானந்தி –
‘அயங் கோ² ப⁴வங் ஸத்தா² அபரிஸுத்³த⁴ஸீலோ ஸமானோ ‘பரிஸுத்³த⁴ஸீலொம்ஹீ’தி
படிஜானாதி ‘பரிஸுத்³த⁴ங் மே ஸீலங் பரியோதா³தங் அஸங்கிலிட்ட²’ந்தி ச.
மயஞ்சேவ கோ² பன கி³ஹீனங் ஆரோசெய்யாம, நாஸ்ஸஸ்ஸ மனாபங். யங் கோ² பனஸ்ஸ
அமனாபங், கத²ங் நங் மயங் தேன ஸமுதா³சரெய்யாம? ஸம்மன்னதி கோ² பன
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன – யங் துமோ கரிஸ்ஸதி,
துமோவ தேன பஞ்ஞாயிஸ்ஸதீ’தி . ஏவரூபங் கோ², பி⁴க்க²வே, ஸத்தா²ரங் ஸாவகா ஸீலதோ ரக்க²ந்தி; ஏவரூபோ ச பன ஸத்தா² ஸாவகேஹி ஸீலதோ ரக்க²ங் பச்சாஸீஸதி.
‘‘புன சபரங், பி⁴க்க²வே, இதே⁴கச்சோ ஸத்தா²
அபரிஸுத்³த⁴ஆஜீவோ ஸமானோ…பே॰… அபரிஸுத்³த⁴த⁴ம்மதே³ஸனோ ஸமானோ…பே॰…
அபரிஸுத்³த⁴வெய்யாகரணோ ஸமானோ…பே॰…
அபரிஸுத்³த⁴ஞாணத³ஸ்ஸனோ ஸமானோ ‘பரிஸுத்³த⁴ஞாணத³ஸ்ஸனொம்ஹீ’தி படிஜானாதி
‘பரிஸுத்³த⁴ங் மே ஞாணத³ஸ்ஸனங் பரியோதா³தங் அஸங்கிலிட்ட²’ந்தி ச. தமேனங்
ஸாவகா ஏவங் ஜானந்தி – ‘அயங் கோ² ப⁴வங் ஸத்தா² அபரிஸுத்³த⁴ஞாணத³ஸ்ஸனோ ஸமானோ
‘பரிஸுத்³த⁴ஞாணத³ஸ்ஸனொம்ஹீ’தி படிஜானாதி ‘பரிஸுத்³த⁴ங் மே ஞாணத³ஸ்ஸனங்
பரியோதா³தங் அஸங்கிலிட்ட²’ந்தி ச. மயஞ்சேவ கோ² பன கி³ஹீனங் ஆரோசெய்யாம,
நாஸ்ஸஸ்ஸ மனாபங். யங் கோ² பனஸ்ஸ அமனாபங், கத²ங் ந மயங் தேன ஸமுதா³சரெய்யாம?
ஸம்மன்னதி கோ² பன சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன –
யங் துமோ கரிஸ்ஸதி, துமோவ தேன பஞ்ஞாயிஸ்ஸதீ’தி. ஏவரூபங் கோ², பி⁴க்க²வே,
ஸத்தா²ரங் ஸாவகா ஞாணத³ஸ்ஸனதோ ரக்க²ந்தி; ஏவரூபோ ச பன ஸத்தா² ஸாவகேஹி
ஞாணத³ஸ்ஸனதோ ரக்க²ங் பச்சாஸீஸதி. இமே கோ², பி⁴க்க²வே, பஞ்ச ஸத்தா²ரோ ஸந்தோ
ஸங்விஜ்ஜமானா லோகஸ்மிங். ‘‘அஹங் கோ² பன, பி⁴க்க²வே, பரிஸுத்³த⁴ஸீலோ ஸமானோ
‘பரிஸுத்³த⁴ஸீலொம்ஹீ’தி படிஜானாமி ‘பரிஸுத்³த⁴ங் மே ஸீலங் பரியோதா³தங்
அஸங்கிலிட்ட²’ந்தி ச. ந ச மங் ஸாவகா ஸீலதோ ரக்க²ந்தி; ந சாஹங் ஸாவகேஹி
ஸீலதோ ரக்க²ங் பச்சாஸீஸாமி. அஹங் கோ² பன பி⁴க்க²வே பரிஸுத்³தா⁴ஜீவோ ஸமானோ…பே॰…
பரிஸுத்³த⁴த⁴ம்மதே³ஸனோ ஸமானோ…பே॰… பரிஸுத்³த⁴வெய்யாகரணோ ஸமானோ…பே॰…
பரிஸுத்³த⁴ஞாணத³ஸ்ஸனோ ஸமானோ ‘‘பரிஸுத்³த⁴ஞாணத³ஸ்ஸனொம்ஹீ’’தி படிஜானாமி
‘‘பரிஸுத்³த⁴ங் மே ஞாணத³ஸ்ஸனங் பரியோதா³தங் அஸங்கிலிட்ட²’’ந்தி ச, ந ச மங்
ஸாவகா ஞாணத³ஸ்ஸனதோ ரக்க²ந்தி, ந சாஹங் ஸாவகேஹி ஞாணத³ஸ்ஸனதோ ரக்க²ங்
பச்சாஸீஸாமி. ‘‘அட்டா²னமேதங், பி⁴க்க²வே, அனவகாஸோ, யங் பரூபக்கமேன
ததா²க³தங் ஜீவிதா வோரோபெய்ய. அனுபக்கமேன, பி⁴க்க²வே, ததா²க³தா
பரினிப்³பா³யந்தி. க³ச்ச²த² தும்ஹே, பி⁴க்க²வே, யதா²விஹாரங். அரக்கி²யா,
பி⁴க்க²வே, ததா²க³தா’’தி.
நாளாகி³ரிபேஸனங்
342.
தேன கோ² பன ஸமயேன ராஜக³ஹே நாளாகி³ரி நாம ஹத்தீ² சண்டோ³ ஹோதி,
மனுஸ்ஸகா⁴தகோ. அத² கோ² தே³வத³த்தோ ராஜக³ஹங் பவிஸித்வா ஹத்தி²ஸாலங் க³ந்த்வா
ஹத்தி²ப⁴ண்டே³ ஏதத³வோச – ‘‘மயங் கோ², ப⁴ணே, ராஜஞாதகா நாம படிப³லா
நீசட்டா²னியங் உச்சட்டா²னே ட²பேதுங், ப⁴த்தம்பி வேதனம்பி வட்³டா⁴பேதுங்.
தேன ஹி, ப⁴ணே, யதா³ ஸமணோ கோ³தமோ இமங் ரச்ச²ங் படிபன்னோ ஹோதி, ததா³ இமங்
நாளாகி³ரிங் ஹத்தி²ங் முஞ்செத்வா இமங் ரச்ச²ங் படிபாதே³தா²’’தி. ‘‘ஏவங்
ப⁴ந்தே’’தி கோ² தே ஹத்தி²ப⁴ண்டா³ தே³வத³த்தஸ்ஸ பச்சஸ்ஸோஸுங். அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய ஸம்ப³ஹுலேஹி
பி⁴க்கூ²ஹி ஸத்³தி⁴ங் ராஜக³ஹங் பிண்டா³ய பாவிஸி. அத² கோ² ப⁴க³வா தங்
ரச்ச²ங் படிபஜ்ஜி. அத்³த³ஸாஸுங் கோ² தே ஹத்தி²ப⁴ண்டா³ ப⁴க³வந்தங் தங்
ரச்ச²ங் படிபன்னங். தி³ஸ்வான நாளாகி³ரிங் ஹத்தி²ங் முஞ்சித்வா தங் ரச்ச²ங்
படிபாதே³ஸுங். அத்³த³ஸா கோ² நாளாகி³ரி ஹத்தீ² ப⁴க³வந்தங் தூ³ரதோவ
ஆக³ச்ச²ந்தங். தி³ஸ்வான ஸொண்ட³ங் உஸ்ஸாபெத்வா பஹட்ட²கண்ணவாலோ யேன ப⁴க³வா
தேன அபி⁴தா⁴வி. அத்³த³ஸாஸுங் கோ² தே பி⁴க்கூ² நாளாகி³ரிங் ஹத்தி²ங் தூ³ரதோவ
ஆக³ச்ச²ந்தங். தி³ஸ்வான ப⁴க³வந்தங் ஏதத³வோசுங் – ‘‘அயங், ப⁴ந்தே,
நாளாகி³ரி ஹத்தீ² சண்டோ³ மனுஸ்ஸகா⁴தகோ இமங் ரச்ச²ங் படிபன்னோ. படிக்கமது,
ப⁴ந்தே, ப⁴க³வா; படிக்கமது ஸுக³தோ’’தி. ‘‘ஆக³ச்ச²த², பி⁴க்க²வே, மா
பா⁴யித்த². அட்டா²னமேதங், பி⁴க்க²வே, அனவகாஸோ, யங் பரூபக்கமேன ததா²க³தங்
ஜீவிதா வோரோபெய்ய. அனுபக்கமேன, பி⁴க்க²வே, ததா²க³தா பரினிப்³பா³யந்தீ’’தி.
து³தியம்பி கோ² தே பி⁴க்கூ²…பே॰… ததியம்பி கோ² தே பி⁴க்கூ² ப⁴க³வந்தங்
ஏதத³வோசுங் – ‘‘அயங், ப⁴ந்தே, நாளாகி³ரி ஹத்தீ² சண்டோ³ மனுஸ்ஸகா⁴தகோ இமங்
ரச்ச²ங் படிபன்னோ. படிக்கமது, ப⁴ந்தே, ப⁴க³வா; படிக்கமது ஸுக³தோ’’தி.
‘‘ஆக³ச்ச²த², பி⁴க்க²வே, மா பா⁴யித்த². அட்டா²னமேதங் , பி⁴க்க²வே, அனவகாஸோ, யங் பரூபக்கமேன ததா²க³தங் ஜீவிதா வோரோபெய்ய. அனுபக்கமேன, பி⁴க்க²வே, ததா²க³தா பரினிப்³பா³யந்தீ’’தி.
தேன கோ² பன ஸமயேன மனுஸ்ஸா பாஸாதே³ஸுபி ஹம்மியேஸுபி
ச²த³னேஸுபி ஆருள்ஹா அச்ச²ந்தி. தத்த² யே தே மனுஸ்ஸா அஸ்ஸத்³தா⁴ அப்பஸன்னா
து³ப்³பு³த்³தி⁴னோ, தே ஏவமாஹங்ஸு – ‘‘அபி⁴ரூபோ வத, போ⁴ [அபி⁴ரூபோ வத போ⁴ கோ³தமோ (ஸ்யா॰ கங்॰)], மஹாஸமணோ நாகே³ன விஹேடீ²யிஸ்ஸதீ’’தி. யே பன தே மனுஸ்ஸா
ஸத்³தா⁴ பஸன்னா பண்டி³தா ப்³யத்தா பு³த்³தி⁴மந்தோ, தே ஏவமாஹங்ஸு –
‘‘நசிரஸ்ஸங் வத, போ⁴, நாகோ³ நாகே³ன ஸங்கா³மெஸ்ஸதீ’’தி. அத² கோ² ப⁴க³வா
நாளாகி³ரிங் ஹத்தி²ங் மெத்தேன சித்தேன ப²ரி. அத² கோ² நாளாகி³ரி ஹத்தீ²
ப⁴க³வதோ [ப⁴க³வதா (ஸீ॰)] மெத்தேன சித்தேன பு²ட்டோ² [பு²டோ (க॰)]
ஸொண்ட³ங் ஓரோபெத்வா யேன ப⁴க³வா தேனுபஸங்கமி, உபஸங்கமித்வா ப⁴க³வதோ புரதோ
அட்டா²ஸி. அத² கோ² ப⁴க³வா த³க்கி²ணேன ஹத்தே²ன நாளாகி³ரிஸ்ஸ ஹத்தி²ஸ்ஸ
கும்ப⁴ங் பராமஸந்தோ நாளாகி³ரிங் ஹத்தி²ங் இமாஹி கா³தா²ஹி அஜ்ஜ²பா⁴ஸி –
‘‘மா குஞ்ஜர நாக³மாஸதோ³, து³க்க²ஞ்ஹி குஞ்ஜர நாக³மாஸதோ³;
ந ஹி நாக³ஹதஸ்ஸ குஞ்ஜர ஸுக³தி, ஹோதி இதோ பரங் யதோ.
‘‘மா ச மதோ³ மா ச பமாதோ³, ந ஹி பமத்தா ஸுக³திங் வஜந்தி தே;
த்வஞ்ஞேவ ததா² கரிஸ்ஸஸி, யேன த்வங் ஸுக³திங் க³மிஸ்ஸஸீ’’தி.
அத² கோ² நாளாகி³ரி ஹத்தீ² ஸொண்டா³ய ப⁴க³வதோ பாத³பங்ஸூனி க³ஹெத்வா உபரிமுத்³த⁴னி ஆகிரித்வா படிகுடியோவ [படிகுடிதோ படிஸக்கி (ஸீ॰ ஸ்யா॰)]
ஓஸக்கி, யாவ ப⁴க³வந்தங் அத்³த³க்கி². அத² கோ² நாளாகி³ரி ஹத்தீ²
ஹத்தி²ஸாலங் க³ந்த்வா ஸகே டா²னே அட்டா²ஸி. ததா² த³ந்தோ ச பன நாளாகி³ரி ஹத்தீ² அஹோஸி. தேன கோ² பன ஸமயேன மனுஸ்ஸா இமங் கா³த²ங் கா³யந்தி –
[ம॰ நி॰ 2.352; தே²ரகா³॰ 878] ‘‘த³ண்டே³னேகே த³மயந்தி, அங்குஸேஹி கஸாஹி ச;
அத³ண்டே³ன அஸத்தே²ன, நாகோ³ த³ந்தோ மஹேஸினா’’தி.
மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘யாவ
பாபோ அயங் தே³வத³த்தோ, அலக்கி²கோ, யத்ர ஹி நாம ஸமணஸ்ஸ கோ³தமஸ்ஸ
ஏவங்மஹித்³தி⁴கஸ்ஸ ஏவங் மஹானுபா⁴வஸ்ஸ வதா⁴ய பரக்கமிஸ்ஸதீ’’தி. தே³வத³த்தஸ்ஸ
லாப⁴ஸக்காரோ பரிஹாயி. ப⁴க³வதோ ச லாப⁴ஸக்காரோ அபி⁴வட்³டி⁴.
பஞ்சவத்து²யாசனகதா²
343. [பாசி॰ 209] தேன
கோ² பன ஸமயேன தே³வத³த்தோ பரிஹீனலாப⁴ஸக்காரோ ஸபரிஸோ குலேஸு விஞ்ஞாபெத்வா
விஞ்ஞாபெத்வா பு⁴ஞ்ஜதி. மனுஸ்ஸா உஜ்ஜா²யந்தி கி²ய்யந்தி விபாசெந்தி –
‘‘கத²ஞ்ஹி நாம ஸமணா ஸக்யபுத்தியா குலேஸு விஞ்ஞாபெத்வா விஞ்ஞாபெத்வா
பு⁴ஞ்ஜிஸ்ஸந்தி! கஸ்ஸ ஸம்பன்னங் ந மனாபங், கஸ்ஸ ஸாது³ங் ந ருச்சதீ’’தி!
அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங்
விபாசெந்தானங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி
விபாசெந்தி – கத²ஞ்ஹி நாம தே³வத³த்தோ ஸபரிஸோ குலேஸு விஞ்ஞாபெத்வா
விஞ்ஞாபெத்வா பு⁴ஞ்ஜிஸ்ஸதீ’’தி! ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங்
கிர த்வங், தே³வத³த்த, ஸபரிஸோ குலேஸு விஞ்ஞாபெத்வா விஞ்ஞாபெத்வா
பு⁴ஞ்ஜஸீ’’தி? ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங்
கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, பி⁴க்கூ²னங் குலேஸு
திகபோ⁴ஜனங் பஞ்ஞபெஸ்ஸாமி தயோ அத்த²வஸே படிச்ச – து³ம்மங்கூனங் புக்³க³லான
நிக்³க³ஹாய ; பேஸலானங் பி⁴க்கூ²னங் பா²ஸுவிஹாராய, மா பாபிச்சா² பக்க²ங் நிஸ்ஸாய ஸங்க⁴ங் பி⁴ந்தெ³ய்யுந்தி; குலானுத்³த³யாய [குலானுத³யதாய (ஸீ॰ ஸ்யா॰)] ச. க³ணபோ⁴ஜனே யதா²த⁴ம்மோ காரேதப்³போ³’’தி.
[பாரா॰ 409] அத² கோ² தே³வத³த்தோ யேன கோகாலிகோ கடமோத³கதிஸ்ஸகோ [கடமோரகதிஸ்ஸகோ (ஸீ॰ ஸ்யா॰)]
க²ண்ட³தே³வியா புத்தோ ஸமுத்³த³த³த்தோ தேனுபஸங்கமி, உபஸங்கமித்வா கோகாலிகங்
கடமோத³கதிஸ்ஸகங் க²ண்ட³தே³வியா புத்தங் ஸமுத்³த³த³த்தங் ஏதத³வோச – ‘‘ஏத²,
மயங், ஆவுஸோ, ஸமணஸ்ஸ கோ³தமஸ்ஸ ஸங்க⁴பே⁴த³ங் கரிஸ்ஸாம சக்கபே⁴த³’’ந்தி. ஏவங்
வுத்தே கோகாலிகோ தே³வத³த்தங் ஏதத³வோச – ‘‘ஸமணோ
கோ², ஆவுஸோ, கோ³தமோ மஹித்³தி⁴கோ மஹானுபா⁴வோ. கத²ங் மயங் ஸமணஸ்ஸ கோ³தமஸ்ஸ
ஸங்க⁴பே⁴த³ங் கரிஸ்ஸாம சக்கபே⁴த³’’ந்தி? ‘‘ஏத², மயங், ஆவுஸோ, ஸமணங் கோ³தமங்
உபஸங்கமித்வா பஞ்ச வத்தூ²னி யாசிஸ்ஸாம – ‘ப⁴க³வா, ப⁴ந்தே, அனேகபரியாயேன
அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ து⁴தஸ்ஸ
பாஸாதி³கஸ்ஸ அபசயஸ்ஸ வீரியாரம்ப⁴ஸ்ஸ வண்ணவாதீ³. இமானி, ப⁴ந்தே, பஞ்ச
வத்தூ²னி அனேகபரியாயேன அப்பிச்ச²தாய ஸந்துட்டி²யா ஸல்லேகா²ய து⁴ததாய
பாஸாதி³கதாய அபசயாய வீரியாரம்பா⁴ய ஸங்வத்தந்தி. ஸாது⁴, ப⁴ந்தே, பி⁴க்கூ²
யாவஜீவங் ஆரஞ்ஞிகா அஸ்ஸு; யோ கா³மந்தங் ஓஸரெய்ய, வஜ்ஜங் நங் பு²ஸெய்ய. யாவஜீவங் பிண்ட³பாதிகா அஸ்ஸு; யோ நிமந்தனங் ஸாதி³யெய்ய, வஜ்ஜங் நங் பு²ஸெய்ய. யாவஜீவங் பங்ஸுகூலிகா
அஸ்ஸு; யோ க³ஹபதிசீவரங் ஸாதி³யெய்ய, வஜ்ஜங் நங் பு²ஸெய்ய. யாவஜீவங்
ருக்க²மூலிகா அஸ்ஸு; யோ ச²ன்னங் உபக³ச்செ²ய்ய, வஜ்ஜங் நங் பு²ஸெய்ய.
யாவஜீவங் மச்ச²மங்ஸங் ந கா²தெ³ய்யுங்; யோ மச்ச²மங்ஸங் கா²தெ³ய்ய, வஜ்ஜங்
நங் பு²ஸெய்யா’தி. இமானி பஞ்ச வத்தூ²னி ஸமணோ கோ³தமோ நானுஜானிஸ்ஸதி. தே மயங்
இமேஹி பஞ்சஹி வத்தூ²ஹி ஜனங் ஸஞ்ஞாபெஸ்ஸாமா’’தி. ‘‘ஸக்கா கோ², ஆவுஸோ, இமேஹி
பஞ்சஹி வத்தூ²ஹி ஸமணஸ்ஸ கோ³தமஸ்ஸ ஸங்க⁴பே⁴தோ³ காதுங் சக்கபே⁴தோ³.
லூக²ப்பஸன்னா ஹி, ஆவுஸோ, மனுஸ்ஸா’’தி.
அத² கோ² தே³வத³த்தோ ஸபரிஸோ யேன ப⁴க³வா தேனுபஸங்கமி,
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங்
நிஸின்னோ கோ² தே³வத³த்தோ ப⁴க³வந்தங் ஏதத³வோச – ‘‘ப⁴க³வா, ப⁴ந்தே,
அனேகபரியாயேன அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ து⁴தஸ்ஸ பாஸாதி³கஸ்ஸ
அபசயஸ்ஸ வீரியாரம்ப⁴ஸ்ஸ வண்ணவாதீ³. இமானி, ப⁴ந்தே, பஞ்ச வத்தூ²னி
அனேகபரியாயேன அப்பிச்ச²தாய ஸந்துட்டி²யா ஸல்லேகா²ய து⁴ததாய பாஸாதி³கதாய
அபசயாய வீரியாரம்பா⁴ய ஸங்வத்தந்தி. ஸாது⁴, ப⁴ந்தே, பி⁴க்கூ² யாவஜீவங்
ஆரஞ்ஞிகா அஸ்ஸு; யோ கா³மந்தங் ஓஸரெய்ய, வஜ்ஜங் நங் பு²ஸெய்ய. யாவஜீவங்
பிண்ட³பாதிகா அஸ்ஸு; யோ நிமந்தனங் ஸாதி³யெய்ய, வஜ்ஜங் நங் பு²ஸெய்ய.
யாவஜீவங் பங்ஸுகூலிகா அஸ்ஸு; யோ க³ஹபதிசீவரங்
ஸாதி³யெய்ய, வஜ்ஜங் நங் பு²ஸெய்ய. யாவஜீவங் ருக்க²மூலிகா அஸ்ஸு; யோ ச²ன்னங்
உபக³ச்செ²ய்ய, வஜ்ஜங் நங் பு²ஸெய்ய. யாவஜீவங் மச்ச²மங்ஸங் ந கா²தெ³ய்யுங்;
யோ மச்ச²மங்ஸங் கா²தெ³ய்ய, வஜ்ஜங் நங் பு²ஸெய்யா’’தி. ‘‘அலங், தே³வத³த்த.
யோ இச்ச²தி, ஆரஞ்ஞிகோ ஹோது; யோ இச்ச²தி, கா³மந்தே விஹரது. யோ இச்ச²தி,
பிண்ட³பாதிகோ ஹோது; யோ இச்ச²தி, நிமந்தனங் ஸாதி³யது. யோ இச்ச²தி,
பங்ஸுகூலிகோ ஹோது; யோ இச்ச²தி, க³ஹபதிசீவரங் ஸாதி³யது. அட்ட²மாஸே கோ² மயா,
தே³வத³த்த, ருக்க²மூலஸேனாஸனங் அனுஞ்ஞாதங்; திகோடிபரிஸுத்³த⁴ங் மச்ச²மங்ஸங் –
அதி³ட்ட²ங், அஸ்ஸுதங், அபரிஸங்கித’’ந்தி. அத² கோ² தே³வத³த்தோ – ந ப⁴க³வா இமானி பஞ்ச வத்தூ²னி அனுஜானாதீதி – ஹட்டோ² உத³க்³கோ³ ஸபரிஸோ உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி.
அத² கோ² தே³வத³த்தோ ஸபரிஸோ ராஜக³ஹங் பவிஸித்வா பஞ்சஹி
வத்தூ²ஹி ஜனங் ஸஞ்ஞாபேஸி – ‘‘மயங், ஆவுஸோ, ஸமணங் கோ³தமங் உபஸங்கமித்வா பஞ்ச
வத்தூ²னி யாசிம்ஹா – ‘ப⁴க³வா, ப⁴ந்தே,
அனேகபரியாயேன அப்பிச்ச²ஸ்ஸ…பே॰… வீரியாரம்ப⁴ஸ்ஸ வண்ணவாதீ³. இமானி, ப⁴ந்தே,
பஞ்ச வத்தூ²னி அனேகபரியாயேன அப்பிச்ச²தாய…பே॰… வீரியாரம்பா⁴ய ஸங்வத்தந்தி.
ஸாது⁴, ப⁴ந்தே, பி⁴க்கூ² யாவஜீவங் ஆரஞ்ஞிகா அஸ்ஸு; யோ கா³மந்தங் ஓஸரெய்ய,
வஜ்ஜங் நங் பு²ஸெய்ய…பே॰… யாவஜீவங் மச்ச²மங்ஸங் ந கா²தெ³ய்யுங்; யோ
மச்ச²மங்ஸங் கா²தெ³ய்ய, வஜ்ஜங் நங் பு²ஸெய்யா’தி. இமானி பஞ்ச வத்தூ²னி ஸமணோ
கோ³தமோ நானுஜானாதி. தே மயங் இமேஹி பஞ்சஹி வத்தூ²ஹி ஸமாதா³ய வத்தாமா’’தி.
தத்த² யே தே மனுஸ்ஸா அஸ்ஸத்³தா⁴ அப்பஸன்னா
து³ப்³பு³த்³தி⁴னோ, தே ஏவமாஹங்ஸு – ‘‘இமே கோ² ஸமணா ஸக்யபுத்தியா து⁴தா
ஸல்லேக²வுத்தினோ. ஸமணோ பன கோ³தமோ பா³ஹுல்லிகோ பா³ஹுல்லாய சேதேதீ’’தி. யே பன
தே மனுஸ்ஸா ஸத்³தா⁴ பஸன்னா பண்டி³தா ப்³யத்தா
பு³த்³தி⁴மந்தோ, தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம
தே³வத³த்தோ ப⁴க³வதோ ஸங்க⁴பே⁴தா³ய பரக்கமிஸ்ஸதி சக்கபே⁴தா³யா’’தி! அஸ்ஸோஸுங்
கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங்
விபாசெந்தானங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி
விபாசெந்தி – ‘‘கத²ஞ்ஹி நாம தே³வத³த்தோ ஸங்க⁴பே⁴தா³ய பரக்கமிஸ்ஸதி
சக்கபே⁴தா³யா’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰…
‘‘ஸச்சங் கிர த்வங், தே³வத³த்த, ஸங்க⁴பே⁴தா³ய பரக்கமஸி சக்கபே⁴தா³யா’’தி?
‘‘ஸச்சங் ப⁴க³வா’’தி. ‘‘அலங், தே³வத³த்த. மா தே ருச்சி ஸங்க⁴பே⁴தோ³. க³ருகோ
கோ², தே³வத³த்த, ஸங்க⁴பே⁴தோ³. யோ கோ², தே³வத³த்த, ஸமக்³க³ங் ஸங்க⁴ங்
பி⁴ந்த³தி, கப்பட்டி²கங் [கப்பட்டி²திகங் (ஸ்யா॰)]
கிப்³பி³ஸங் பஸவதி, கப்பங் நிரயம்ஹி பச்சதி. யோ ச கோ², தே³வத³த்த,
பி⁴ன்னங் ஸங்க⁴ங் ஸமக்³க³ங் கரோதி, ப்³ரஹ்மங் புஞ்ஞங் பஸவதி, கப்பங்
ஸக்³க³ம்ஹி மோத³தி. அலங், தே³வத³த்த. மா தே ருச்சி ஸங்க⁴பே⁴தோ³. க³ருகோ
கோ², தே³வத³த்த, ஸங்க⁴பே⁴தோ³’’தி.
[உதா³॰ 48] அத² கோ² ஆயஸ்மா ஆனந்தோ³ புப்³ப³ண்ஹஸமயங் நிவாஸெத்வா பத்தசீவரமாதா³ய ராஜக³ஹங் பிண்டா³ய பாவிஸி. அத்³த³ஸா கோ² தே³வத³த்தோ ஆயஸ்மந்தங்
ஆனந்த³ங் ராஜக³ஹே பிண்டா³ய சரந்தங். தி³ஸ்வான யேனாயஸ்மா ஆனந்தோ³
தேனுபஸங்கமி, உபஸங்கமித்வா ஆயஸ்மந்தங் ஆனந்த³ங் ஏதத³வோச –
‘‘அஜ்ஜதக்³கே³தா³னாஹங் , ஆவுஸோ ஆனந்த³, அஞ்ஞத்ரேவ ப⁴க³வதா, அஞ்ஞத்ரேவ பி⁴க்கு²ஸங்கா⁴, உபோஸத²ங் கரிஸ்ஸாமி ஸங்க⁴கம்மங் கரிஸ்ஸாமீ’’தி.
அத² கோ² ஆயஸ்மா ஆனந்தோ³
ராஜக³ஹே பிண்டா³ய சரித்வா பச்சா²ப⁴த்தங் பிண்ட³பாதப்படிக்கந்தோ யேன ப⁴க³வா
தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³.
ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச – ‘‘இதா⁴ஹங்,
ப⁴ந்தே, புப்³ப³ண்ஹஸமயங் நிவாஸெத்வா பத்தசீவரமாதா³ய ராஜக³ஹங் பிண்டா³ய
பாவிஸிங். அத்³த³ஸா கோ² மங், ப⁴ந்தே, தே³வத³த்தோ ராஜக³ஹே பிண்டா³ய சரந்தங்.
தி³ஸ்வான யேனாஹங் தேனுபஸங்கமி, உபஸங்கமித்வா மங் ஏதத³வோச –
‘அஜ்ஜதக்³கே³தா³னாஹங், ஆவுஸோ ஆனந்த³, அஞ்ஞத்ரேவ ப⁴க³வதா, அஞ்ஞத்ரேவ
பி⁴க்கு²ஸங்கா⁴, உபோஸத²ங் கரிஸ்ஸாமி ஸங்க⁴கம்மங் கரிஸ்ஸாமீ’தி.
அஜ்ஜதக்³கே³, ப⁴ந்தே, தே³வத³த்தோ ஸங்க⁴ங் பி⁴ந்தி³ஸ்ஸதீ’’தி. அத² கோ²
ப⁴க³வா ஏதமத்த²ங் விதி³த்வா தாயங் வேலாயங் இமங் உதா³னங் உதா³னேஸி –
[உதா³॰ 48] ‘‘ஸுகரங் ஸாது⁴னா ஸாது⁴ங், ஸாது⁴ங் பாபேன து³க்கரங்;
பாபங் பாபேன ஸுகரங், பாபமரியேஹி து³க்கர’’ந்தி.
து³தியபா⁴ணவாரோ நிட்டி²தோ.
3. ததியபா⁴ணவாரோ
ஸங்க⁴பே⁴த³கதா²
344. அத² கோ² தே³வத³த்தோ தத³ஹுபோஸதே² உட்டா²யாஸனா ஸலாகங் கா³ஹேஸி – ‘‘மயங், ஆவுஸோ, ஸமணங் கோ³தமங் உபஸங்கமித்வா பஞ்ச வத்தூ²னி யாசிம்ஹா
– ‘ப⁴க³வா, ப⁴ந்தே, அனேகபரியாயேன அப்பிச்ச²ஸ்ஸ…பே॰… வீரியாரம்ப⁴ஸ்ஸ
வண்ணவாதீ³. இமானி, ப⁴ந்தே, பஞ்ச வத்தூ²னி அனேகபரியாயேன அப்பிச்ச²தாய…பே॰…
வீரியாரம்பா⁴ய ஸங்வத்தந்தி. ஸாது⁴, ப⁴ந்தே, பி⁴க்கூ² யாவஜீவங் ஆரஞ்ஞிகா
அஸ்ஸு; யோ கா³மந்தங் ஓஸரெய்ய, வஜ்ஜங் நங் பு²ஸெய்ய…பே॰… யாவஜீவங்
மச்ச²மங்ஸங் ந கா²தெ³ய்யுங்; யோ மச்ச²மங்ஸங் கா²தெ³ய்ய, வஜ்ஜங் நங்
பு²ஸெய்யா’தி. இமானி பஞ்ச வத்தூ²னி ஸமணோ கோ³தமோ நானுஜானாதி. தே மயங் இமேஹி
பஞ்சஹி வத்தூ²ஹி ஸமாதா³ய வத்தாம. யஸ்ஸாயஸ்மதோ இமானி பஞ்ச வத்தூ²னி க²மந்தி,
ஸோ ஸலாகங் க³ண்ஹாதூ’’தி.
தேன கோ² பன ஸமயேன வேஸாலிகா வஜ்ஜிபுத்தகா பஞ்சமத்தானி பி⁴க்கு²ஸதானி நவகா சேவ ஹொந்தி அப்பகதஞ்ஞுனோ ச. தே – ‘அயங் த⁴ம்மோ ,
அயங் வினயோ, இத³ங் ஸத்து²ஸாஸன’ந்தி – ஸலாகங் க³ண்ஹிங்ஸு. அத² கோ²
தே³வத³த்தோ ஸங்க⁴ங் பி⁴ந்தி³த்வா பஞ்சமத்தானி பி⁴க்கு²ஸதானி ஆதா³ய யேன
க³யாஸீஸங் தேன பக்காமி. அத² கோ² ஸாரிபுத்தமொக்³க³ல்லானா யேன ப⁴க³வா
தேனுபஸங்கமிங்ஸு, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³ங்ஸு. ஏகமந்தங் நிஸின்னோ கோ² ஆயஸ்மா ஸாரிபுத்தோ ப⁴க³வந்தங் ஏதத³வோச –
‘‘தே³வத³த்தோ, ப⁴ந்தே, ஸங்க⁴ங் பி⁴ந்தி³த்வா பஞ்சமத்தானி பி⁴க்கு²ஸதானி
ஆதா³ய யேன க³யாஸீஸங் தேன பக்கந்தோ’’தி. ‘‘ந ஹி நாம தும்ஹாகங், ஸாரிபுத்தா,
தேஸு நவகேஸு பி⁴க்கூ²ஸு காருஞ்ஞம்பி ப⁴விஸ்ஸதி?
க³ச்ச²த² தும்ஹே, ஸாரிபுத்தா, புரா தே பி⁴க்கூ² அனயப்³யஸனங் ஆபஜ்ஜந்தீ’’தி.
‘‘ஏவங் ப⁴ந்தே’’தி கோ² ஸாரிபுத்தமொக்³க³ல்லானா ப⁴க³வதோ படிஸ்ஸுத்வா
உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா யேன க³யாஸீஸங்
தேனுபஸங்கமிங்ஸு.
தேன கோ² பன ஸமயேன அஞ்ஞதரோ பி⁴க்கு² ப⁴க³வதோ அவிதூ³ரே
ரோத³மானோ டி²தோ ஹோதி. அத² கோ² ப⁴க³வா தங் பி⁴க்கு²ங் ஏதத³வோச – ‘‘கிஸ்ஸ
த்வங், பி⁴க்கு², ரோத³ஸீ’’தி? ‘‘யேபி தே, ப⁴ந்தே, ப⁴க³வதோ அக்³க³ஸாவகா
ஸாரிபுத்தமொக்³க³ல்லானா தேபி தே³வத³த்தஸ்ஸ ஸந்திகே க³ச்ச²ந்தி தே³வத³த்தஸ்ஸ
த⁴ம்மங் ரோசெந்தா’’தி. ‘‘அட்டா²னமேதங், பி⁴க்கு², அனவகாஸோ, யங்
ஸாரிபுத்தமொக்³க³ல்லானா தே³வத³த்தஸ்ஸ த⁴ம்மங் ரோசெய்யுங், அபி ச தே க³தா
பி⁴க்கூ²னங் ஸஞ்ஞத்தியா’’தி [பி⁴க்கு²ஸஞ்ஞத்தியாதி (ஸீ॰ ஸ்யா॰), பி⁴க்கூ² ஸஞ்ஞத்தியா (க॰)].
345.
தேன கோ² பன ஸமயேன தே³வத³த்தோ மஹதியா பரிஸாய பரிவுத்தோ த⁴ம்மங் தே³ஸெந்தோ
நிஸின்னோ ஹோதி. அத்³த³ஸா கோ² தே³வத³த்தோ ஸாரிபுத்தமொக்³க³ல்லானே தூ³ரதோவ
ஆக³ச்ச²ந்தே. தி³ஸ்வான பி⁴க்கூ² ஆமந்தேஸி – ‘‘பஸ்ஸத², பி⁴க்க²வே, யாவ
ஸ்வாக்கா²தோ மயா த⁴ம்மோ, யேபி தே ஸமணஸ்ஸ கோ³தமஸ்ஸ அக்³க³ஸாவகா
ஸாரிபுத்தமொக்³க³ல்லானா தேபி மம ஸந்திகே ஆக³ச்ச²ந்தி. மம த⁴ம்மங்
ரோசெந்தா’’தி. ஏவங் வுத்தே கோகாலிகோ தே³வத³த்தங் ஏதத³வோச – ‘‘மா, ஆவுஸோ
தே³வத³த்த, ஸாரிபுத்தமொக்³க³ல்லானே விஸ்ஸஸி . பாபிச்சா² ஸாரிபுத்தமொக்³க³ல்லானா , பாபிகானங் இச்சா²னங் வஸங் க³தா’’தி. ‘‘அலங், ஆவுஸோ. ஸ்வாக³தங் தேஸங் யதோ மே த⁴ம்மங் ரோசெந்தீ’’தி.
அத² கோ² தே³வத³த்தோ ஆயஸ்மந்தங் ஸாரிபுத்தங்
உபட்³டா⁴ஸனேன நிமந்தேஸி – ‘‘ஏஹாவுஸோ ஸாரிபுத்த, இத⁴ நிஸீதா³ஹீ’’தி. ‘‘அலங்
ஆவுஸோ’’தி கோ² ஆயஸ்மா ஸாரிபுத்தோ அஞ்ஞதரங் ஆஸனங்
க³ஹெத்வா ஏகமந்தங் நிஸீதி³. ஆயஸ்மாபி கோ² மஹாமொக்³க³ல்லானோ அஞ்ஞதரங் ஆஸனங்
க³ஹெத்வா ஏகமந்தங் நிஸீதி³. அத² கோ² தே³வத³த்தோ ப³ஹுதே³வ ரத்திங் பி⁴க்கூ²
த⁴ம்மியா கதா²ய ஸந்த³ஸ்ஸெத்வா ஸமாத³பெத்வா ஸமுத்தேஜெத்வா ஸம்பஹங்ஸெத்வா
ஆயஸ்மந்தங் ஸாரிபுத்தங் அஜ்ஜே²ஸி – ‘‘விக³ததி²னமித்³தோ⁴
கோ², ஆவுஸோ ஸாரிபுத்த, பி⁴க்கு²ஸங்கோ⁴. படிபா⁴து தங், ஆவுஸோ ஸாரிபுத்த,
பி⁴க்கூ²னங் த⁴ம்மீ கதா², பிட்டி² மே ஆகி³லாயதி, தமஹங் ஆயமிஸ்ஸாமீ’’தி.
‘‘ஏவமாவுஸோ’’தி கோ² ஆயஸ்மா ஸாரிபுத்தோ தே³வத³த்தஸ்ஸ பச்சஸ்ஸோஸி. அத² கோ²
தே³வத³த்தோ சதுக்³கு³ணங் ஸங்கா⁴டிங் பஞ்ஞாபெத்வா த³க்கி²ணேன பஸ்ஸேன ஸெய்யங்
கப்பேஸி. தஸ்ஸ கிலமந்தஸ்ஸ முட்ட²ஸ்ஸதிஸ்ஸ அஸம்பஜானஸ்ஸ முஹுத்தகேனேவ
நித்³தா³ ஓக்கமி.
அத² கோ² ஆயஸ்மா ஸாரிபுத்தோ ஆதே³ஸனாபாடிஹாரியானுஸாஸனியா
பி⁴க்கூ² த⁴ம்மியா கதா²ய ஓவதி³ அனுஸாஸி. ஆயஸ்மா மஹாமொக்³க³ல்லானோ
இத்³தி⁴பாடிஹாரியானுஸாஸனியா பி⁴க்கூ² த⁴ம்மியா கதா²ய ஓவதி³ அனுஸாஸி. அத²
கோ² தேஸங் பி⁴க்கூ²னங் ஆயஸ்மதா ஸாரிபுத்தேன ஆதே³ஸனாபாடிஹாரியானுஸாஸனியா
ஆயஸ்மதா ச மஹாமொக்³க³ல்லானேன இத்³தி⁴பாடிஹாரியானுஸாஸனியா ஓவதி³யமானானங் அனுஸாஸியமானானங் விரஜங் வீதமலங் த⁴ம்மசக்கு²ங் உத³பாதி³ – யங் கிஞ்சி ஸமுத³யத⁴ம்மங், ஸப்³ப³ங் தங் நிரோத⁴த⁴ம்மந்தி.
அத² கோ² ஆயஸ்மா ஸாரிபுத்தோ பி⁴க்கூ² ஆமந்தேஸி –
‘‘க³ச்சா²ம மயங், ஆவுஸோ, ப⁴க³வதோ ஸந்திகே. யோ தஸ்ஸ ப⁴க³வதோ த⁴ம்மங் ரோசேஸி
ஸோ ஆக³ச்ச²தூ’’தி. அத² கோ² ஸாரிபுத்தமொக்³க³ல்லானா தானி பஞ்சபி⁴க்கு²ஸதானி
ஆதா³ய யேன வேளுவனங் தேனுபஸங்கமிங்ஸு. அத² கோ² கோகாலிகோ தே³வத³த்தங்
உட்டா²பேஸி – ‘‘உட்டே²ஹி, ஆவுஸோ தே³வத³த்த, நீதா தே பி⁴க்கூ²
ஸாரிபுத்தமொக்³க³ல்லானேஹி. நனு த்வங், ஆவுஸோ தே³வத³த்த, மயா வுத்தோ – ‘மா,
ஆவுஸோ தே³வத³த்த, ஸாரிபுத்தமொக்³க³ல்லானே விஸ்ஸாஸி. பாபிச்சா²
ஸாரிபுத்தமொக்³க³ல்லானா, பாபிகானங் இச்சா²னங் வஸங் க³தா’’’தி? அத² கோ²
தே³வத³த்தஸ்ஸ தத்தே²வ உண்ஹங் லோஹிதங் முக²தோ உக்³க³ஞ்சி².
அத² கோ² ஸாரிபுத்தமொக்³க³ல்லானா யேன ப⁴க³வா
தேனுபஸங்கமிங்ஸு, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³ஸுங். ஏகமந்தங் நிஸின்னோ கோ² ஆயஸ்மா ஸாரிபுத்தோ ப⁴க³வந்தங் ஏதத³வோச – ‘‘ஸாது⁴, ப⁴ந்தே ,
பே⁴த³கானுவத்தகா பி⁴க்கூ² புன உபஸம்பஜ்ஜெய்யு’’ந்தி. ‘‘அலங், ஸாரிபுத்த.
மா தே ருச்சி பே⁴த³கானுவத்தகானங் பி⁴க்கூ²னங் புன உபஸம்பதா³. தேன ஹி த்வங்,
ஸாரிபுத்த, பே⁴த³கானுவத்தகே பி⁴க்கூ² து²ல்லச்சயங் தே³ஸாபேஹி. கத²ங் பன
தே, ஸாரிபுத்த, தே³வத³த்தோ படிபஜ்ஜீ’’தி? ‘‘யதே²வ, ப⁴ந்தே, ப⁴க³வா ப³ஹுதே³வ
ரத்திங் பி⁴க்கூ² த⁴ம்மியா கதா²ய ஸந்த³ஸ்ஸெத்வா ஸமாத³பெத்வா ஸமுத்தேஜெத்வா
ஸம்பஹங்ஸெத்வா மங் அஜ்ஜே²ஸதி – ‘விக³ததி²னமித்³தோ⁴ கோ² ,
ஸாரிபுத்த, பி⁴க்கு²ஸங்கோ⁴; படிபா⁴து தங், ஸாரிபுத்த, பி⁴க்கூ²னங் த⁴ம்மீ
கதா², பிட்டி² மே ஆகி³லாயதி, தமஹங் ஆயமிஸ்ஸாமீ’தி, ஏவமேவ கோ², ப⁴ந்தே,
தே³வத³த்தோ படிபஜ்ஜீ’’தி.
346. அத²
கோ² ப⁴க³வா பி⁴க்கூ² ஆமந்தேஸி – ‘‘பூ⁴தபுப்³ப³ங், பி⁴க்க²வே, அரஞ்ஞாயதனே
மஹாஸரஸீ. தங் நாகா³ உபனிஸ்ஸாய விஹரிங்ஸு. தே தங் ஸரஸிங் ஓகா³ஹெத்வா,
ஸொண்டா³ய பி⁴ஸமுளாலங் அப்³பு³ஹித்வா, ஸுவிக்கா²லிதங் விக்கா²லெத்வா,
அகத்³த³மங் ஸங்கா²தி³த்வா, அஜ்ஜோ²ஹரந்தி. தேஸங் தங் வண்ணாய சேவ ஹோதி, ப³லாய
ச. ந ச ததோனிதா³னங் மரணங் வா நிக³ச்ச²ந்தி, மரணமத்தங் வா து³க்க²ங்.
தேஸங்யேவ கோ² பன, பி⁴க்க²வே, மஹானாகா³னங் அனுஸிக்க²மானா தருணா
பி⁴ங்கச்சா²பா. தே தங் ஸரஸிங் ஓகா³ஹெத்வா, ஸொண்டா³ய பி⁴ஸமுளாலங்
அப்³பு³ஹித்வா, ந ஸுவிக்கா²லிதங் விக்கா²லெத்வா, ஸகத்³த³மங் ஸங்கா²தி³த்வா,
அஜ்ஜோ²ஹரந்தி. தேஸங் தங் நேவ வண்ணாய ஹோதி, ந ப³லாய. ததோனிதா³னஞ்ச மரணங் வா
நிக³ச்ச²ந்தி, மரணமத்தங் வா து³க்க²ங். ஏவமேவ கோ², பி⁴க்க²வே, தே³வத³த்தோ
மமானுக்ருப்³ப³ங் [மமானுகுப்³ப³ங் (ஸீ॰ ஸ்யா॰)] கபணோ மரிஸ்ஸதீதி.
‘‘மஹாவராஹஸ்ஸ மஹிங் விக்ருப்³ப³தோ [விகுப்³ப³தோ (ஸீ॰ ஸ்யா॰)], பி⁴ஸங் க⁴ஸானஸ்ஸ [க⁴ஸமானஸ்ஸ (க॰)] நதீ³ஸு ஜக்³க³தோ;
பி⁴ங்கோவ பங்கங் அபி⁴ப⁴க்க²யித்வா, மமானுக்ருப்³ப³ங் கபணோ மரிஸ்ஸதீ’’தி.
347. [அ॰ நி॰ 8.16]
‘‘அட்ட²ஹி, பி⁴க்க²வே, அங்கே³ஹி ஸமன்னாக³தோ பி⁴க்கு² தூ³தெய்யங்
க³ந்துமரஹதி. கதமேஹி அட்ட²ஹி? இத⁴, பி⁴க்க²வே, பி⁴க்கு² ஸோதா ச ஹோதி,
ஸாவேதா ச, உக்³க³ஹேதா ச, தா⁴ரேதா ச, விஞ்ஞாதா ச, விஞ்ஞாபேதா ச, குஸலோ ச
ஸஹிதாஸஹிதஸ்ஸ, நோ ச கலஹகாரகோ – இமேஹி கோ², பி⁴க்க²வே, அட்ட²ஹங்கே³ஹி
ஸமன்னாக³தோ பி⁴க்கு² தூ³தெய்யங் க³ந்துமரஹதி.
[அ॰ நி॰ 8.16] ‘‘அட்ட²ஹி ,
பி⁴க்க²வே, அங்கே³ஹி ஸமன்னாக³தோ ஸாரிபுத்தோ தூ³தெய்யங் க³ந்துமரஹதி.
கதமேஹி அட்ட²ஹி? இத⁴, பி⁴க்க²வே, ஸாரிபுத்தோ ஸோதா ச ஹோதி, ஸாவேதா ச,
உக்³க³ஹேதா ச, தா⁴ரேதா ச, விஞ்ஞாதா ச, விஞ்ஞாபேதா ச, குஸலோ ச ஸஹிதாஸஹிதஸ்ஸ,
நோ ச கலஹகாரகோ – இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தோ ஸாரிபுத்தோ தூ³தெய்யங் க³ந்துமரஹதீதி.
[அ॰ நி॰ 8.16] ‘‘யோ வே ந ப்³யத²தி [ப்³யாத⁴தி (ஸீ॰ ஸ்யா॰)] பத்வா, பரிஸங் உக்³க³வாதி³னிங்;
ந ச ஹாபேதி வசனங், ந ச சா²தே³தி ஸாஸனங்.
‘‘அஸந்தி³த்³தோ⁴ ச அக்கா²தி [அக்கா²தா (க॰)], புச்சி²தோ ச ந குப்பதி;
ஸ வே தாதி³ஸகோ பி⁴க்கு², தூ³தெய்யங் க³ந்துமரஹதீ’’தி.
348. [அ॰ நி॰ 8.7] ‘‘அட்ட²ஹி, பி⁴க்க²வே, அஸத்³த⁴ம்மேஹி அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ². கதமேஹி அட்ட²ஹி ?
லாபே⁴ன, பி⁴க்க²வே, அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ
நேரயிகோ கப்பட்டோ² அதேகிச்சோ²; அலாபே⁴ன, பி⁴க்க²வே…பே॰… யஸேன,
பி⁴க்க²வே…பே॰… அயஸேன, பி⁴க்க²வே…பே॰… ஸக்காரேன, பி⁴க்க²வே…பே॰… அஸக்காரேன,
பி⁴க்க²வே…பே॰… பாபிச்ச²தாய, பி⁴க்க²வே…பே॰… பாபமித்ததாய பி⁴க்க²வே,
அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ²
அதேகிச்சோ² – இமேஹி கோ², பி⁴க்க²வே, அட்ட²ஹி அஸத்³த⁴ம்மேஹி அபி⁴பூ⁴தோ
பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ².
349.
‘‘ஸாது⁴, பி⁴க்க²வே, பி⁴க்கு² உப்பன்னங் லாப⁴ங் அபி⁴பு⁴ய்ய அபி⁴பு⁴ய்ய
விஹரெய்ய, உப்பன்னங் அலாப⁴ங்…பே॰… உப்பன்னங் யஸங்… உப்பன்னங் அயஸங்…
உப்பன்னங் ஸக்காரங்… உப்பன்னங் அஸக்காரங்… உப்பன்னங் பாபிச்ச²தங்…
உப்பன்னங் பாபமித்ததங் அபி⁴பு⁴ய்ய அபி⁴பு⁴ய்ய விஹரெய்ய. கத²ஞ்ச, பி⁴க்க²வே,
பி⁴க்கு² அத்த²வஸங் படிச்ச உப்பன்னங் லாப⁴ங் அபி⁴பு⁴ய்ய அபி⁴பு⁴ய்ய
விஹரெய்ய, உப்பன்னங் அலாப⁴ங்…பே॰… உப்பன்னங் யஸங்… உப்பன்னங் அயஸங்…
உப்பன்னங் ஸக்காரங்… உப்பன்னங் அஸக்காரங்… உப்பன்னங் பாபிச்ச²தங்…
உப்பன்னங் பாபமித்ததங் அபி⁴பு⁴ய்ய அபி⁴பு⁴ய்ய விஹரெய்ய? யங் ஹிஸ்ஸ,
பி⁴க்க²வே, உப்பன்னங் லாப⁴ங் அனபி⁴பு⁴ய்ய விஹரதோ உப்பஜ்ஜெய்யுங் ஆஸவா
விகா⁴தபரிளாஹா, உப்பன்னங் லாப⁴ங் அபி⁴பு⁴ய்ய அபி⁴பு⁴ய்ய
விஹரதோ ஏவங்ஸதே ஆஸவா விகா⁴தபரிளாஹா ந ஹொந்தி. யங் ஹிஸ்ஸ, பி⁴க்க²வே,
உப்பன்னங் அலாப⁴ங்…பே॰… உப்பன்னங் யஸங்… உப்பன்னங் அயஸங்… உப்பன்னங்
ஸக்காரங்… உப்பன்னங் அஸக்காரங்… உப்பன்னங் பாபிச்ச²தங்… உப்பன்னங்
பாபமித்ததங் அனபி⁴பு⁴ய்ய விஹரதோ உப்பஜ்ஜெய்யுங் ஆஸவா விகா⁴தபரிளாஹா,
உப்பன்னங் பாபமித்ததங் அபி⁴பு⁴ய்ய அபி⁴பு⁴ய்ய விஹரதோ ஏவங்ஸதே ஆஸவா
விகா⁴தபரிளாஹா ந ஹொந்தி. இத³ங் கோ², பி⁴க்க²வே, அத்த²வஸங் படிச்ச உப்பன்னங்
லாப⁴ங் அபி⁴பு⁴ய்ய அபி⁴பு⁴ய்ய விஹரெய்ய, உப்பன்னங் அலாப⁴ங்…பே॰… உப்பன்னங்
யஸங்… உப்பன்னங் அயஸங்… உப்பன்னங் ஸக்காரங்… உப்பன்னங் அஸக்காரங்…
உப்பன்னங் பாபிச்ச²தங்… உப்பன்னங் பாபமித்ததங் அபி⁴பு⁴ய்ய அபி⁴பு⁴ய்ய
விஹரெய்ய. தஸ்மாதிஹ, பி⁴க்க²வே, உப்பன்னங் லாப⁴ங் அபி⁴பு⁴ய்ய அபி⁴பு⁴ய்ய
விஹரிஸ்ஸாம, உப்பன்னங் அலாப⁴ங்…பே॰… உப்பன்னங் யஸங்… உப்பன்னங் அயஸங்…
உப்பன்னங் ஸக்காரங்… உப்பன்னங் அஸக்காரங்… உப்பன்னங் பாபிச்ச²தங்…
உப்பன்னங் பாபமித்ததங் அபி⁴பு⁴ய்ய அபி⁴பு⁴ய்ய விஹரிஸ்ஸாமாதி; ஏவஞ்ஹி வோ,
பி⁴க்க²வே, ஸிக்கி²தப்³ப³ந்தி.
350. ‘‘தீஹி, பி⁴க்க²வே, அஸத்³த⁴ம்மேஹி
அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ²
அதேகிச்சோ². கதமேஹி தீஹி? பாபிச்ச²தா, பாபமித்ததா, ஓரமத்தகேன
விஸேஸாதி⁴க³மேன அந்தரா வோஸானங் ஆபாதி³ – இமேஹி கோ², பி⁴க்க²வே, தீஹி
அஸத்³த⁴ம்மேஹி அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ²தி.
‘‘மா ஜாது கோசி லோகஸ்மிங், பாபிச்சோ² உத³பஜ்ஜத²;
தத³மினாபி ஜானாத², பாபிச்சா²னங் யதா²க³தி.
‘‘பண்டி³தோதி ஸமஞ்ஞாதோ, பா⁴விதத்தோதி ஸம்மதோ;
ஜலங்வ யஸஸா அட்டா², தே³வத³த்தோதி மே ஸுதங்.
‘‘ஸோ பமாத³ங் அனுசிண்ணோ, ஆஸஜ்ஜ நங் ததா²க³தங்;
அவீசினிரயங் பத்தோ, சதுத்³வாரங் ப⁴யானகங்.
‘‘அது³ட்ட²ஸ்ஸ ஹி யோ து³ப்³பே⁴, பாபகம்மங் அக்ருப்³ப³தோ;
தமேவ பாபங் பு²ஸதி, து³ட்ட²சித்தங் அனாத³ரங்.
‘‘ஸமுத்³த³ங் விஸகும்பே⁴ன, யோ மஞ்ஞெய்ய பதூ³ஸிதுங் [பது³ஸ்ஸிதுங் (க॰)];
ந ஸோ தேன பதூ³ஸெய்ய, பெ⁴ஸ்மா ஹி உத³தீ⁴ மஹா.
‘‘ஏவமேவ ததா²க³தங், யோ வாதே³னுபஹிங்ஸதி;
ஸமக்³க³தங் [ஸம்மாக³தங் (ஸீ॰), ஸமக³தங் (ஸ்யா॰)] ஸந்தசித்தங், வாதோ³ தம்ஹி ந ரூஹதி.
‘‘தாதி³ஸங் மித்தங் க்ருப்³பே³த² [குப்³பே³த² (ஸீ॰ ஸ்யா॰)], தஞ்ச ஸேவேத² பண்டி³தோ;
யஸ்ஸ மக்³கா³னுகோ³ பி⁴க்கு², க²யங் து³க்க²ஸ்ஸ பாபுணே’’தி.
உபாலிபஞ்ஹா
351.
அத² கோ² ஆயஸ்மா உபாலி யேன ப⁴க³வா தேனுபஸங்கமி, உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா உபாலி
ப⁴க³வந்தங் ஏதத³வோச – ‘‘ஸங்க⁴ராஜி ஸங்க⁴ராஜீதி, ப⁴ந்தே, வுச்சதி. கித்தாவதா
நு கோ², ப⁴ந்தே, ஸங்க⁴ராஜி ஹோதி, நோ ச ஸங்க⁴பே⁴தோ³? கித்தாவதா ச பன
ஸங்க⁴ராஜி சேவ ஹோதி ஸங்க⁴பே⁴தோ³ சா’’தி?
‘‘ஏகதோ , உபாலி, ஏகோ ஹோதி, ஏகதோ
த்³வே, சதுத்தோ² அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ, அயங் வினயோ,
இத³ங் ஸத்து²ஸாஸனங், இமங் க³ண்ஹத², இமங் ரோசேதா²’தி. ஏவம்பி கோ², உபாலி,
ஸங்க⁴ராஜி ஹோதி, நோ ச ஸங்க⁴பே⁴தோ³. ஏகதோ, உபாலி, த்³வே ஹொந்தி, ஏகதோ த்³வே,
பஞ்சமோ அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ, அயங் வினயோ, இத³ங்
ஸத்து²ஸாஸனங், இமங் க³ண்ஹத², இமங் ரோசேதா²’தி. ஏவம்பி கோ², உபாலி,
ஸங்க⁴ராஜி ஹோதி, நோ ச ஸங்க⁴பே⁴தோ³. ஏகதோ, உபாலி, த்³வே ஹொந்தி, ஏகதோ தயோ,
ச²ட்டோ² அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ, அயங் வினயோ, இத³ங்
ஸத்து²ஸாஸனங், இமங் க³ண்ஹத², இமங் ரோசேதா²’தி. ஏவம்பி கோ², உபாலி,
ஸங்க⁴ராஜி ஹோதி, நோ ச ஸங்க⁴பே⁴தோ³ . ஏகதோ, உபாலி,
தயோ ஹொந்தி, ஏகதோ தயோ, ஸத்தமோ அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ,
அயங் வினயோ, இத³ங் ஸத்து²ஸாஸனங், இமங் க³ண்ஹத², இமங் ரோசேதா²’தி. ஏவம்பி
கோ², உபாலி, ஸங்க⁴ராஜி ஹோதி, நோ ச ஸங்க⁴பே⁴தோ³. ஏகதோ, உபாலி, தயோ ஹொந்தி,
ஏகதோ சத்தாரோ, அட்ட²மோ அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ, அயங்
வினயோ, இத³ங் ஸத்து²ஸாஸனங், இமங் க³ண்ஹத², இமங் ரோசேதா²’தி. ஏவம்பி கோ²,
உபாலி, ஸங்க⁴ராஜி ஹோதி, நோ ச ஸங்க⁴பே⁴தோ³. ஏகதோ, உபாலி, சத்தாரோ ஹொந்தி,
ஏகதோ சத்தாரோ, நவமோ அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ, அயங்
வினயோ, இத³ங் ஸத்து²ஸாஸனங், இமங் க³ண்ஹத², இமங் ரோசேதா²’தி . ஏவங்
கோ², உபாலி, ஸங்க⁴ராஜி சேவ ஹோதி ஸங்க⁴பே⁴தோ³ ச. நவன்னங் வா, உபாலி,
அதிரேகனவன்னங் வா ஸங்க⁴ராஜி சேவ ஹோதி ஸங்க⁴பே⁴தோ³ ச. ந கோ², உபாலி,
பி⁴க்கு²னீ ஸங்க⁴ங் பி⁴ந்த³தி, அபி ச பே⁴தா³ய பரக்கமதி, ந ஸிக்க²மானா
ஸங்க⁴ங் பி⁴ந்த³தி…பே॰… ந ஸாமணேரோ ஸங்க⁴ங் பி⁴ந்த³தி, ந ஸாமணேரீ ஸங்க⁴ங்
பி⁴ந்த³தி, ந உபாஸகோ ஸங்க⁴ங் பி⁴ந்த³தி, ந உபாஸிகா ஸங்க⁴ங் பி⁴ந்த³தி, அபி ச
பே⁴தா³ய பரக்கமதி. பி⁴க்கு² கோ², உபாலி, பகதத்தோ, ஸமானஸங்வாஸகோ,
ஸமானஸீமாயங் டி²தோ, ஸங்க⁴ங் பி⁴ந்த³தீ’’தி.
352. [அ॰ நி॰ 10.37] ‘‘ஸங்க⁴பே⁴தோ³ ஸங்க⁴பே⁴தோ³தி, ப⁴ந்தே, வுச்சதி. கித்தாவதா நு கோ², ப⁴ந்தே, ஸங்கோ⁴ பி⁴ன்னோ ஹோதீ’’தி?
‘‘இது⁴பாலி, பி⁴க்கூ² அத⁴ம்மங் த⁴ம்மோதி தீ³பெந்தி,
த⁴ம்மங் அத⁴ம்மோதி தீ³பெந்தி, அவினயங் வினயோதி தீ³பெந்தி, வினயங் அவினயோதி
தீ³பெந்தி, அபா⁴ஸிதங் அலபிதங் ததா²க³தேன பா⁴ஸிதங் லபிதங் ததா²க³தேனாதி
தீ³பெந்தி, பா⁴ஸிதங் லபிதங் ததா²க³தேன அபா⁴ஸிதங் அலபிதங் ததா²க³தேனாதி
தீ³பெந்தி, அனாசிண்ணங் ததா²க³தேன ஆசிண்ணங் ததா²க³தேனாதி தீ³பெந்தி,
ஆசிண்ணங் ததா²க³தேன அனாசிண்ணங் ததா²க³தேனாதி தீ³பெந்தி, அபஞ்ஞத்தங்
ததா²க³தேன பஞ்ஞத்தங் ததா²க³தேனாதி தீ³பெந்தி, பஞ்ஞத்தங் ததா²க³தேன
அபஞ்ஞத்தங் ததா²க³தேனாதி தீ³பெந்தி, அனாபத்திங் ஆபத்தீதி தீ³பெந்தி,
ஆபத்திங் அனாபத்தீதி தீ³பெந்தி, லஹுகங் ஆபத்திங் க³ருகா ஆபத்தீதி தீ³பெந்தி, க³ருகங் ஆபத்திங் லஹுகா ஆபத்தீதி தீ³பெந்தி, ஸாவஸேஸங் ஆபத்திங் அனவஸேஸா
ஆபத்தீதி தீ³பெந்தி, அனவஸேஸங் ஆபத்திங் ஸாவஸேஸா ஆபத்தீதி தீ³பெந்தி,
து³ட்டு²ல்லங் ஆபத்திங் அது³ட்டு²லா ஆபத்தீதி தீ³பெந்தி, அது³ட்டு²ல்லங்
ஆபத்திங் து³ட்டு²ல்லா ஆபத்தீதி தீ³பெந்தி. தே இமேஹி அட்டா²ரஸஹி வத்தூ²ஹி
அபகஸ்ஸந்தி, அவபகஸ்ஸந்தி, ஆவேனிங் [ஆவேணி (ஸீ॰), ஆவேணிகங் (ஸ்யா॰)] உபோஸத²ங் கரொந்தி, ஆவேனிங் பவாரணங் கரொந்தி, ஆவேனிங் ஸங்க⁴கம்மங் கரொந்தி. எத்தாவதா கோ², உபாலி, ஸங்கோ⁴ பி⁴ன்னோ ஹோதீ’’தி.
353. [ அ॰ நி॰ 10.37]
‘‘ஸங்க⁴ஸாமக்³கீ³ ஸங்க⁴ஸாமக்³கீ³தி, ப⁴ந்தே, வுச்சதி. கித்தாவதா நு கோ²,
ப⁴ந்தே, ஸங்கோ⁴ ஸமக்³கோ³ ஹோதீ’’தி? ‘‘இது⁴பாலி, பி⁴க்கூ² அத⁴ம்மங்
அத⁴ம்மோதி தீ³பெந்தி, த⁴ம்மங் த⁴ம்மோதி தீ³பெந்தி, அவினயங் அவினயோதி
தீ³பெந்தி, வினயங் வினயோதி தீ³பெந்தி, அபா⁴ஸிதங்
அலபிதங் ததா²க³தேன அபா⁴ஸிதங் அலபிதங் ததா²க³தேனாதி தீ³பெந்தி, பா⁴ஸிதங்
லபிதங் ததா²க³தேன பா⁴ஸிதங் லபிதங் ததா²க³தேனாதி தீ³பெந்தி, அனாசிண்ணங்
ததா²க³தேன அனாசிண்ணங் ததா²க³தேனாதி தீ³பெந்தி, ஆசிண்ணங் ததா²க³தேன ஆசிண்ணங்
ததா²க³தேனாதி தீ³பெந்தி, அபஞ்ஞத்தங் ததா²க³தேன அபஞ்ஞத்தங் ததா²க³தேனாதி
தீ³பெந்தி, பஞ்ஞத்தங் ததா²க³தேன பஞ்ஞத்தங் ததா²க³தேனாதி தீ³பெந்தி,
அனாபத்திங் அனாபத்தீதி தீ³பெந்தி, ஆபத்திங் ஆபத்தீதி தீ³பெந்தி, லஹுகங்
ஆபத்திங் லஹுகா ஆபத்தீதி தீ³பெந்தி, க³ருகங் ஆபத்திங் க³ருகா ஆபத்தீதி
தீ³பெந்தி, ஸாவஸேஸங் ஆபத்திங் ஸாவஸேஸா ஆபத்தீதி தீ³பெந்தி, அனவஸேஸங்
ஆபத்திங் அனவஸேஸா ஆபத்தீதி தீ³பெந்தி ,
து³ட்டு²ல்லங் ஆபத்திங் து³ட்டு²ல்லா ஆபத்தீதி தீ³பெந்தி, அது³ட்டு²ல்லங்
ஆபத்திங் அது³ட்டு²ல்லா ஆபத்தீதி தீ³பெந்தி. தே இமேஹி அட்டா²ரஸஹி வத்தூ²ஹி ந
அபகஸ்ஸந்தி, ந அவபகஸ்ஸந்தி, ந ஆவேனிங் உபோஸத²ங் கரொந்தி, ந ஆவேனிங்
பவாரணங் கரொந்தி, ந ஆவேனிங் ஸங்க⁴கம்மங் கரொந்தி. எத்தாவதா கோ², உபாலி,
ஸங்கோ⁴ ஸமக்³கோ³ ஹோதீ’’தி.
354.
‘‘ஸமக்³க³ங் பன, ப⁴ந்தே, ஸங்க⁴ங் பி⁴ந்தி³த்வா கிங் ஸோ பஸவதீ’’தி?
‘‘ஸமக்³க³ங் கோ², உபாலி, ஸங்க⁴ங் பி⁴ந்தி³த்வா கப்பட்டி²கங் கிப்³பி³ஸங்
பஸவதி, கப்பங் நிரயம்ஹி பச்சதீ’’தி.
[இதிவு॰ 18; அ॰ நி॰ 10.39] ‘‘ஆபாயிகோ நேரயிகோ, கப்பட்டோ² ஸங்க⁴பே⁴த³கோ;
வக்³க³ரதோ அத⁴ம்மட்டோ², யோக³க்கே²மா பத⁴ங்ஸதி;
ஸங்க⁴ங் ஸமக்³க³ங் பி⁴ந்தி³த்வா, கப்பங் நிரயம்ஹி பச்சதீ’’தி.
‘‘பி⁴ன்னங் பன, ப⁴ந்தே,
ஸங்க⁴ங் ஸமக்³க³ங் கத்வா கிங் ஸோ பஸவதீ’’தி? ‘‘பி⁴ன்னங் கோ², உபாலி,
ஸங்க⁴ங் ஸமக்³க³ங் கத்வா ப்³ரஹ்மங் புஞ்ஞங் பஸவதி, கப்பங் ஸக்³க³ம்ஹி
மோத³தீ’’தி.
[இத்திவு॰ 18; அ॰ நி॰ 10.40] ‘‘ஸுகா² ஸங்க⁴ஸ்ஸ ஸாமக்³கீ³, ஸமக்³கா³னஞ்ச அனுக்³க³ஹோ;
ஸமக்³க³ரதோ த⁴ம்மட்டோ², யோக³க்கே²மா ந த⁴ங்ஸதி;
ஸங்க⁴ங் ஸமக்³க³ங் கத்வான, கப்பங் ஸக்³க³ம்ஹி மோத³தீ’’தி.
355. [பரி॰ 459]
‘‘ஸியா நு கோ², ப⁴ந்தே, ஸங்க⁴பே⁴த³கோ ஆபாயிகோ, நேரயிகோ, கப்பட்டோ²,
அதேகிச்சோ²’’தி? ‘‘ஸியா, உபாலி, ஸங்க⁴பே⁴த³கோ ஆபாயிகோ, நேரயிகோ, கப்பட்டோ²,
அதேகிச்சோ²’’தி.
[பரி॰ 459] ‘‘ஸியா [ஸியா நு கோ² (ஸ்யா॰ கங்॰)] பன, ப⁴ந்தே, ஸங்க⁴பே⁴த³கோ
ந ஆபாயிகோ, ந நேரயிகோ, ந கப்பட்டோ², ந அதேகிச்சோ²’’தி? ‘‘ஸியா, உபாலி,
ஸங்க⁴பே⁴த³கோ ந ஆபாயிகோ, ந நேரயிகோ, ந கப்பட்டோ², ந அதேகிச்சோ²’’தி.
‘‘கதமோ பன, ப⁴ந்தே, ஸங்க⁴பே⁴த³கோ ஆபாயிகோ, நேரயிகோ,
கப்பட்டோ², அதேகிச்சோ²’’தி? ‘‘இது⁴பாலி, பி⁴க்கு² அத⁴ம்மங் த⁴ம்மோதி
தீ³பேதி. தஸ்மிங் அத⁴ம்மதி³ட்டி², பே⁴தே³ அத⁴ம்மதி³ட்டி², வினிதா⁴ய
தி³ட்டி²ங், வினிதா⁴ய க²ந்திங், வினிதா⁴ய ருசிங், வினிதா⁴ய பா⁴வங்,
அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ, அயங் வினயோ, இத³ங்
ஸத்து²ஸாஸனங், இமங் க³ண்ஹத², இமங் ரோசேதா²’தி. அயம்பி கோ², உபாலி,
ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ².
‘‘புன சபரங், உபாலி, பி⁴க்கு² அத⁴ம்மங் த⁴ம்மோதி
தீ³பேதி. தஸ்மிங் அத⁴ம்மதி³ட்டி², பே⁴தே³ த⁴ம்மதி³ட்டி², வினிதா⁴ய
தி³ட்டி²ங், வினிதா⁴ய க²ந்திங், வினிதா⁴ய ருசிங், வினிதா⁴ய பா⁴வங்,
அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ, அயங் வினயோ, இத³ங்
ஸத்து²ஸாஸனங், இமங் க³ண்ஹத², இமங் ரோசேதா²’தி. அயம்பி கோ², உபாலி,
ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ².
‘‘புன சபரங், உபாலி, பி⁴க்கு² அத⁴ம்மங் த⁴ம்மோதி
தீ³பேதி. தஸ்மிங் அத⁴ம்மதி³ட்டி², பே⁴தே³ வேமதிகோ, வினிதா⁴ய தி³ட்டி²ங்,
வினிதா⁴ய க²ந்திங், வினிதா⁴ய ருசிங், வினிதா⁴ய பா⁴வங், அனுஸ்ஸாவேதி, ஸலாகங்
கா³ஹேதி – ‘அயங் த⁴ம்மோ, அயங் வினயோ, இத³ங் ஸத்து²ஸாஸனங், இமங் க³ண்ஹத²,
இமங் ரோசேதா²’தி. அயம்பி கோ², உபாலி, ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ².
‘‘புன சபரங், உபாலி, பி⁴க்கு² அத⁴ம்மங் த⁴ம்மோதி தீ³பேதி. தஸ்மிங் த⁴ம்மதி³ட்டி², பே⁴தே³ அத⁴ம்மதி³ட்டி²…பே॰… (தஸ்மிங் த⁴ம்மதி³ட்டி² பே⁴தே³ த⁴ம்மதி³ட்டி²) [( ) ஸ்யாமபொத்த²கே நத்தி², விமதிவினோத³னீடீகாய ஸமேதி].
தஸ்மிங் த⁴ம்மதி³ட்டி² பே⁴தே³ வேமதிகோ. தஸ்மிங் வேமதிகோ பே⁴தே³
அத⁴ம்மதி³ட்டி². தஸ்மிங் வேமதிகோ பே⁴தே³ த⁴ம்மதி³ட்டி². தஸ்மிங் வேமதிகோ
பே⁴தே³ வேமதிகோ வினிதா⁴ய தி³ட்டி²ங், வினிதா⁴ய க²ந்திங், வினிதா⁴ய ருசிங்,
வினிதா⁴ய பா⁴வங், அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ, அயங் வினயோ,
இத³ங் ஸத்து²ஸாஸனங், இமங் க³ண்ஹத², இமங் ரோசேதா²’தி. அயம்பி கோ², உபாலி,
ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ².
‘‘புன சபரங், உபாலி, பி⁴க்கு²
த⁴ம்மங் அத⁴ம்மோதி தீ³பேதி…பே॰… அவினயங் வினயோதி தீ³பேதி… வினயங் அவினயோதி
தீ³பேதி… அபா⁴ஸிதங் அலபிதங் ததா²க³தேன பா⁴ஸிதங் லபிதங் ததா²க³தேனாதி
தீ³பேதி… பா⁴ஸிதங் லபிதங் ததா²க³தேன அபா⁴ஸிதங் அலபிதங் ததா²க³தேனாதி
தீ³பேதி… அனாசிண்ணங் ததா²க³தேன ஆசிண்ணங் ததா²க³தேனாதி தீ³பேதி… ஆசிண்ணங்
ததா²க³தேன அனாசிண்ணங் ததா²க³தேனாதி தீ³பேதி… அபஞ்ஞத்தங் ததா²க³தேன
பஞ்ஞத்தங் ததா²க³தேனாதி தீ³பேதி… பஞ்ஞத்தங் ததா²க³தேன அபஞ்ஞத்தங்
ததா²க³தேனாதி தீ³பேதி… அனாபத்திங் ஆபத்தீதி தீ³பேதி… ஆபத்திங் அனாபத்தீதி
தீ³பேதி… லஹுகங் ஆபத்திங் க³ருகா ஆபத்தீதி தீ³பேதி… க³ருகங் ஆபத்திங் லஹுகா
ஆபத்தீதி தீ³பேதி… ஸாவஸேஸங் ஆபத்திங் அனவஸேஸா ஆபத்தீதி தீ³பேதி… அனவஸேஸங்
ஆபத்திங் ஸாவஸேஸா ஆபத்தீதி தீ³பேதி… து³ட்டு²ல்லங் ஆபத்திங் அது³ட்டு²ல்லா
ஆபத்தீதி தீ³பேதி… அது³ட்டு²ல்லங் ஆபத்திங் து³ட்டு²ல்லா ஆபத்தீதி தீ³பேதி…
தஸ்மிங் அத⁴ம்மதி³ட்டி², பே⁴தே³ அத⁴ம்மதி³ட்டி²…பே॰… தஸ்மிங்
அத⁴ம்மதி³ட்டி², பே⁴தே³ த⁴ம்மதி³ட்டி² … தஸ்மிங்
அத⁴ம்மதி³ட்டி², பே⁴தே³ வேமதிகோ… தஸ்மிங் த⁴ம்மதி³ட்டி², பே⁴தே³
அத⁴ம்மதி³ட்டி²… (தஸ்மிங் த⁴ம்மதி³ட்டி², பே⁴தே³ த⁴ம்மதி³ட்டி²) [( ) ஸ்யாமபொத்த²கே நத்தி²]
… தஸ்மிங் த⁴ம்மதி³ட்டி², பே⁴தே³ வேமதிகோ… தஸ்மிங் வேமதிகோ, பே⁴தே³
அத⁴ம்மதி³ட்டி²… தஸ்மிங் வேமதிகோ, பே⁴தே³ த⁴ம்மதி³ட்டி²… தஸ்மிங் வேமதிகோ,
பே⁴தே³ வேமதிகோ, வினிதா⁴ய தி³ட்டி²ங், வினிதா⁴ய க²ந்திங், வினிதா⁴ய ருசிங்,
வினிதா⁴ய பா⁴வங், அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ, அயங்
வினயோ, இத³ங் ஸத்து²ஸாஸனங், இமங் க³ண்ஹத², இமங் ரோசேதா²’தி. அயம்பி கோ²,
உபாலி, ஸங்க⁴பே⁴த³கோ ஆபாயிகோ, நேரயிகோ, கப்பட்டோ², அதேகிச்சோ²’’தி.
‘‘கதமோ பன, ப⁴ந்தே, ஸங்க⁴பே⁴த³கோ ந ஆபாயிகோ, ந நேரயிகோ, ந கப்பட்டோ² , ந அதேகிச்சோ²’’தி? ‘‘இது⁴பாலி, பி⁴க்கு² அத⁴ம்மங் த⁴ம்மோதி தீ³பேதி. தஸ்மிங் த⁴ம்மதி³ட்டி², பே⁴தே³ த⁴ம்மதி³ட்டி² ,
அவினிதா⁴ய தி³ட்டி²ங், அவினிதா⁴ய க²ந்திங், அவினிதா⁴ய ருசிங், அவினிதா⁴ய
பா⁴வங், அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ, அயங் வினயோ, இத³ங்
ஸத்து²ஸாஸனங், இமங் க³ண்ஹத², இமங் ரோசேதா²’தி. அயம்பி கோ², உபாலி,
ஸங்க⁴பே⁴த³கோ ந ஆபாயிகோ, ந நேரயிகோ, ந கப்பட்டோ², ந அதேகிச்சோ².
‘‘புன சபரங், உபாலி, பி⁴க்கு²
த⁴ம்மங் அத⁴ம்மோதி தீ³பேதி…பே॰… து³ட்டு²ல்லங் ஆபத்திங் அது³ட்டு²ல்லா
ஆபத்தீதி தீ³பேதி. தஸ்மிங் த⁴ம்மதி³ட்டி², பே⁴தே³ த⁴ம்மதி³ட்டி², அவினிதா⁴ய
தி³ட்டி²ங், அவினிதா⁴ய க²ந்திங், அவினிதா⁴ய ருசிங், அவினிதா⁴ய பா⁴வங்,
அனுஸ்ஸாவேதி, ஸலாகங் கா³ஹேதி – ‘அயங் த⁴ம்மோ, அயங் வினயோ, இத³ங்
ஸத்து²ஸாஸனங், இமங் க³ண்ஹத², இமங் ரோசேதா²’தி. அயம்பி கோ² , உபாலி, ஸங்க⁴பே⁴த³கோ ந ஆபாயிகோ, ந நேரயிகோ, ந கப்பட்டோ², ந அதேகிச்சோ²’’தி.
ததியபா⁴ணவாரோ நிட்டி²தோ.
ஸங்க⁴பே⁴த³கக்க²ந்த⁴கோ ஸத்தமோ.
தஸ்ஸுத்³தா³னங் –
அனுபியே அபி⁴ஞ்ஞாதா, ஸுகு²மாலோ ந இச்ச²தி;
கஸா வபா அபி⁴ நின்னே, நித்³தா⁴ லாவே ச உப்³ப³ஹே.
புஞ்ஜமத்³த³பலாலஞ்ச, பு⁴ஸஓபு²ணனீஹரே;
ஆயதிம்பி ந கீ²யந்தி, பிதரோ ச பிதாமஹா.
ப⁴த்³தி³யோ அனுருத்³தோ⁴ ச, ஆனந்தோ³ ப⁴கு³ கிமிலோ;
ஸக்யமானோ ச கோஸம்பி³ங், பரிஹாயி ககுதே⁴ன ச.
பகாஸேஸி பிதுனோ ச, புரிஸே ஸிலங் நாளாகி³ரிங்;
திகபஞ்சக³ருகோ கோ², பி⁴ந்தி³ து²ல்லச்சயேன ச;
தயோ அட்ட² புன தீணி, ராஜி பே⁴தா³ ஸியா நு கோ²தி.
ஸங்க⁴பே⁴த³கக்க²ந்த⁴கங் நிட்டி²தங்.