88.
அத² கோ² ஆயஸ்மா த⁴னியோ கும்ப⁴காரபுத்தோ யேன ரஞ்ஞோ மாக³த⁴ஸ்ஸ ஸேனியஸ்ஸ
பி³ம்பி³ஸாரஸ்ஸ நிவேஸனங் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³.
அத² கோ² ராஜா மாக³தோ⁴ ஸேனியோ பி³ம்பி³ஸாரோ யேனாயஸ்மா த⁴னியோ கும்ப⁴காரபுத்தோ தேனுபஸங்கமி; உபஸங்கமித்வா ஆயஸ்மந்தங்
த⁴னியங் கும்ப⁴காரபுத்தங் அபி⁴வாதெ³த்வா ஏகமந்தங் நிஸீதி³. ஏகமந்தங்
நிஸின்னோ கோ² ராஜா மாக³தோ⁴ ஸேனியோ பி³ம்பி³ஸாரோ ஆயஸ்மந்தங் த⁴னியங்
கும்ப⁴காரபுத்தங் ஏதத³வோச – ‘‘ஸச்சங் கிர மயா,
ப⁴ந்தே, தே³வக³ஹதா³ரூனி நக³ரபடிஸங்கா²ரிகானி ஆபத³த்தா²ய நிக்கி²த்தானி
அய்யஸ்ஸ தி³ன்னானீ’’தி? ‘‘ஏவங், மஹாராஜா’’தி. ‘‘மயங் கோ², ப⁴ந்தே, ராஜானோ
நாம ப³ஹுகிச்சா ப³ஹுகரணீயா, த³த்வாபி ந ஸரெய்யாம; இங்க⁴, ப⁴ந்தே,
ஸராபேஹீ’’தி. ‘‘ஸரஸி த்வங், மஹாராஜ, பட²மாபி⁴ஸித்தோ ஏவரூபிங் வாசங் பா⁴ஸிதா
– ‘‘தி³ன்னஞ்ஞேவ ஸமணப்³ராஹ்மணானங் திணகட்டோ²த³கங் பரிபு⁴ஞ்ஜந்தூ’’தி.
‘‘ஸராமஹங், ப⁴ந்தே. ஸந்தி, ப⁴ந்தே, ஸமணப்³ராஹ்மணா லஜ்ஜினோ குக்குச்சகா
ஸிக்கா²காமா. தேஸங் அப்பமத்தகேபி குக்குச்சங் உப்பஜ்ஜதி. தேஸங் மயா ஸந்தா⁴ய
பா⁴ஸிதங், தஞ்ச கோ² அரஞ்ஞே அபரிக்³க³ஹிதங். ஸோ த்வங், ப⁴ந்தே, தேன லேஸேன
தா³ரூனி அதி³ன்னங் ஹரிதுங் மஞ்ஞஸி! கத²ஞ்ஹி நாம மாதி³ஸோ ஸமணங் வா
ப்³ராஹ்மணங் வா விஜிதே வஸந்தங் ஹனெய்ய வா ப³ந்தெ⁴ய்ய வா பப்³பா³ஜெய்ய வா!
க³ச்ச², ப⁴ந்தே, லோமேன த்வங் முத்தோஸி. மாஸ்ஸு புனபி ஏவரூபங் அகாஸீ’’தி.
மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘அலஜ்ஜினோ இமே ஸமணா
ஸக்யபுத்தியா து³ஸ்ஸீலா முஸாவாதி³னோ. இமே ஹி நாம த⁴ம்மசாரினோ
ஸமசாரினோ ப்³ராஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா
படிஜானிஸ்ஸந்தி! நத்தி² இமேஸங் ஸாமஞ்ஞங், நத்தி² இமேஸங் ப்³ரஹ்மஞ்ஞங்.
நட்ட²ங் இமேஸங் ஸாமஞ்ஞங், நட்ட²ங் இமேஸங் ப்³ரஹ்மஞ்ஞங். குதோ இமேஸங்
ஸாமஞ்ஞங், குதோ இமேஸங் ப்³ரஹ்மஞ்ஞங்! அபக³தா இமே ஸாமஞ்ஞா, அபக³தா இமே
ப்³ரஹ்மஞ்ஞா. ராஜானம்பி இமே வஞ்செந்தி, கிங் பனஞ்ஞே மனுஸ்ஸே’’தி! அஸ்ஸோஸுங்
கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங்
விபாசெந்தானங். யே தே பி⁴க்கூ² அப்பிச்சா² ஸந்துட்டா² லஜ்ஜினோ குக்குச்சகா
ஸிக்கா²காமா தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா
த⁴னியோ கும்ப⁴காரபுத்தோ ரஞ்ஞோ தா³ரூனி அதி³ன்னங் ஆதி³யிஸ்ஸதீ’’தி! அத² கோ²
தே பி⁴க்கூ² ஆயஸ்மந்தங் த⁴னியங் கும்ப⁴காரபுத்தங் அனேகபரியாயேன விக³ரஹித்வா
ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங்
பகரணே பி⁴க்கு²ஸங்க⁴ங் ஸன்னிபாதாபெத்வா ஆயஸ்மந்தங் த⁴னியங்
கும்ப⁴காரபுத்தங் படிபுச்சி² – ‘‘ஸச்சங் கிர த்வங், த⁴னிய, ரஞ்ஞோ தா³ரூனி
அதி³ன்னங் ஆதி³யீ’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா –
‘‘அனநுச்ச²விகங், மோக⁴புரிஸ, அனநுலோமிகங் அப்பதிரூபங் அஸ்ஸாமணகங் அகப்பியங்
அகரணீயங். கத²ஞ்ஹி நாம த்வங், மோக⁴புரிஸ , ரஞ்ஞோ
தா³ரூனி அதி³ன்னங் ஆதி³யிஸ்ஸஸி! நேதங், மோக⁴புரிஸ, அப்பஸன்னானங் வா பஸாதா³ய
பஸன்னானங் வா பி⁴ய்யோபா⁴வாய; அத²க்²வேதங், மோக⁴புரிஸ, அப்பஸன்னானஞ்சேவ
அப்பஸாதா³ய பஸன்னானஞ்ச ஏகச்சானங் அஞ்ஞத²த்தாயா’’தி.