நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

வினயபிடகே

மஹாவக்³க³பாளி

1. மஹாக²ந்த⁴கோ

1. போ³தி⁴கதா²

1. [உதா³॰ 1 ஆத³யோ] தேன
ஸமயேன பு³த்³தோ⁴ ப⁴க³வா உருவேலாயங் விஹரதி நஜ்ஜா நேரஞ்ஜராய தீரே
போ³தி⁴ருக்க²மூலே பட²மாபி⁴ஸம்பு³த்³தோ⁴. அத² கோ² ப⁴க³வா போ³தி⁴ருக்க²மூலே
ஸத்தாஹங் ஏகபல்லங்கேன நிஸீதி³ விமுத்திஸுக²படிஸங்வேதீ³ [விமுத்திஸுக²ங் படிஸங்வேதீ³ (க॰)].
அத² கோ² ப⁴க³வா ரத்தியா பட²மங் யாமங் படிச்சஸமுப்பாத³ங் அனுலோமபடிலோமங்
மனஸாகாஸி – ‘‘அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாணங்,
விஞ்ஞாணபச்சயா நாமரூபங், நாமரூபபச்சயா ஸளாயதனங், ஸளாயதனபச்சயா ப²ஸ்ஸோ,
ப²ஸ்ஸபச்சயா வேத³னா, வேத³னாபச்சயா தண்ஹா, தண்ஹாபச்சயா உபாதா³னங்,
உபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணங்
ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி – ஏவமேதஸ்ஸ
கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. ‘‘அவிஜ்ஜாயத்வேவ
அஸேஸவிராக³னிரோதா⁴ ஸங்கா²ரனிரோதோ⁴, ஸங்கா²ரனிரோதா⁴ விஞ்ஞாணனிரோதோ⁴,
விஞ்ஞாணனிரோதா⁴ நாமரூபனிரோதோ⁴, நாமரூபனிரோதா⁴ ஸளாயதனநிரோதோ⁴, ஸளாயதனநிரோதா⁴
ப²ஸ்ஸனிரோதோ⁴, ப²ஸ்ஸனிரோதா⁴ வேத³னானிரோதோ⁴, வேத³னானிரோதா⁴ தண்ஹானிரோதோ⁴,
தண்ஹானிரோதா⁴ உபாதா³னநிரோதோ⁴ , உபாதா³னநிரோதா⁴
ப⁴வனிரோதோ⁴, ப⁴வனிரோதா⁴ ஜாதினிரோதோ⁴, ஜாதினிரோதா⁴ ஜராமரணங்
ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி – ஏவமேதஸ்ஸ கேவலஸ்ஸ
து³க்க²க்க²ந்த⁴ஸ்ஸ நிரோதோ⁴ ஹோதீ’’தி.

அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமங் உதா³னங் உதா³னேஸி –

‘‘யதா³ ஹவே பாதுப⁴வந்தி த⁴ம்மா;

ஆதாபினோ ஜா²யதோ ப்³ராஹ்மணஸ்ஸ;

அத²ஸ்ஸ கங்கா² வபயந்தி ஸப்³பா³;

யதோ பஜானாதி ஸஹேதுத⁴ம்ம’’ந்தி.

2. [உதா³॰ 2]
அத² கோ² ப⁴க³வா ரத்தியா மஜ்ஜி²மங் யாமங் படிச்சஸமுப்பாத³ங் அனுலோமபடிலோமங்
மனஸாகாஸி – ‘‘அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாணங்,
விஞ்ஞாணபச்சயா நாமரூபங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ…பே॰… நிரோதோ⁴ ஹோதீ’’தி.

அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமங் உதா³னங் உதா³னேஸி –

‘‘யதா³ ஹவே பாதுப⁴வந்தி த⁴ம்மா;

ஆதாபினோ ஜா²யதோ ப்³ராஹ்மணஸ்ஸ;

அத²ஸ்ஸ கங்கா² வபயந்தி ஸப்³பா³;

யதோ க²யங் பச்சயானங் அவேதீ³’’தி.

3. [உதா³॰ 3]
அத² கோ² ப⁴க³வா ரத்தியா பச்சி²மங் யாமங் படிச்சஸமுப்பாத³ங் அனுலோமபடிலோமங்
மனஸாகாஸி – ‘‘அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாணங்,
விஞ்ஞாணபச்சயா நாமரூபங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி…பே॰… நிரோதோ⁴ ஹோதீ’’தி.

அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமங் உதா³னங் உதா³னேஸி –

‘‘யதா³ ஹவே பாதுப⁴வந்தி த⁴ம்மா;

ஆதாபினோ ஜா²யதோ ப்³ராஹ்மணஸ்ஸ;

விதூ⁴பயங் திட்ட²தி மாரஸேனங்;

ஸூரியோவ [ஸுரியோவ (ஸீ॰ ஸ்யா॰ கங்॰)] ஓபா⁴ஸயமந்தலிக்க²’’ந்தி.

போ³தி⁴கதா² நிட்டி²தா.

2. அஜபாலகதா²

4. [உதா³॰ 4] அத²
கோ² ப⁴க³வா ஸத்தாஹஸ்ஸ அச்சயேன தம்ஹா ஸமாதி⁴ம்ஹா வுட்ட²ஹித்வா
போ³தி⁴ருக்க²மூலா யேன அஜபாலனிக்³ரோதோ⁴ தேனுபஸங்கமி, உபஸங்கமித்வா
அஜபாலனிக்³ரோத⁴மூலே ஸத்தாஹங் ஏகபல்லங்கேன நிஸீதி³ விமுத்திஸுக²படிஸங்வேதீ³.
அத² கோ² அஞ்ஞதரோ ஹுங்ஹுங்கஜாதிகோ ப்³ராஹ்மணோ யேன ப⁴க³வா தேனுபஸங்கமி.
உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் அட்டா²ஸி. ஏகமந்தங் டி²தோ கோ² ஸோ ப்³ராஹ்மணோ ப⁴க³வந்தங் ஏதத³வோச – ‘‘கித்தாவதா நு கோ², போ⁴ கோ³தம, ப்³ராஹ்மணோ ஹோதி, கதமே ச பன ப்³ராஹ்மணகரணா [ப்³ராஹ்மணகாரகா (க॰) ப்³ராஹ்மணகராணா (?)] த⁴ம்மா’’தி? அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமங் உதா³னங் உதா³னேஸி –

[நெத்தி॰ 103] யோ ப்³ராஹ்மணோ பா³ஹிதபாபத⁴ம்மோ;

நிஹுங்ஹுங்கோ நிக்கஸாவோ யதத்தோ;

வேத³ந்தகூ³ வுஸிதப்³ரஹ்மசரியோ;

த⁴ம்மேன ஸோ ப்³ரஹ்மவாத³ங் வதெ³ய்ய;

யஸ்ஸுஸ்ஸதா³ நத்தி² குஹிஞ்சி லோகே’’தி.

அஜபாலகதா² நிட்டி²தா.

3. முசலிந்த³கதா²

5. [உதா³॰ 11] அத² கோ² ப⁴க³வா ஸத்தாஹஸ்ஸ அச்சயேன தம்ஹா ஸமாதி⁴ம்ஹா வுட்ட²ஹித்வா அஜபாலனிக்³ரோத⁴மூலா
யேன முசலிந்தோ³ தேனுபஸங்கமி, உபஸங்கமித்வா முசலிந்த³மூலே ஸத்தாஹங்
ஏகபல்லங்கேன நிஸீதி³ விமுத்திஸுக²படிஸங்வேதீ³. தேன கோ² பன ஸமயேன மஹா
அகாலமேகோ⁴ உத³பாதி³, ஸத்தாஹவத்³த³லிகா ஸீதவாதது³த்³தி³னீ. அத² கோ²
முசலிந்தோ³ நாக³ராஜா ஸகப⁴வனா நிக்க²மித்வா ப⁴க³வதோ காயங் ஸத்தக்க²த்துங்
போ⁴கே³ஹி பரிக்கி²பித்வா உபரிமுத்³த⁴னி மஹந்தங் ப²ணங் கரித்வா அட்டா²ஸி – ‘‘மா ப⁴க³வந்தங் ஸீதங், மா ப⁴க³வந்தங் உண்ஹங், மா ப⁴க³வந்தங் ட³ங்ஸமகஸவாதாதபஸரீஸபஸம்ப²ஸ்ஸோ’’தி […ஸிரிங் ஸப… (ஸீ॰ ஸ்யா॰ கங்॰)]. அத²
கோ² முசலிந்தோ³ நாக³ராஜா ஸத்தாஹஸ்ஸ அச்சயேன வித்³த⁴ங் விக³தவலாஹகங் தே³வங்
விதி³த்வா ப⁴க³வதோ காயா போ⁴கே³ வினிவேடெ²த்வா ஸகவண்ணங் படிஸங்ஹரித்வா
மாணவகவண்ணங் அபி⁴னிம்மினித்வா ப⁴க³வதோ புரதோ அட்டா²ஸி பஞ்ஜலிகோ ப⁴க³வந்தங்
நமஸ்ஸமானோ. அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமங் உதா³னங்
உதா³னேஸி –

[கதா²॰ 338 கதா²வத்து²பாளியம்பி]‘‘ஸுகோ² விவேகோ துட்ட²ஸ்ஸ, ஸுதத⁴ம்மஸ்ஸ பஸ்ஸதோ;

அப்³யாபஜ்ஜங் ஸுக²ங் லோகே, பாணபூ⁴தேஸு ஸங்யமோ.

[கதா²॰ 338 கதா²வத்து²பாளியம்பி]‘‘ஸுகா² விராக³தா லோகே, காமானங் ஸமதிக்கமோ;

அஸ்மிமானஸ்ஸ யோ வினயோ, ஏதங் வே பரமங் ஸுக²’’ந்தி.

முசலிந்த³கதா² நிட்டி²தா.

4. ராஜாயதனகதா²

6.
அத² கோ² ப⁴க³வா ஸத்தாஹஸ்ஸ அச்சயேன தம்ஹா ஸமாதி⁴ம்ஹா வுட்ட²ஹித்வா
முசலிந்த³மூலா யேன ராஜாயதனங் தேனுபஸங்கமி, உபஸங்கமித்வா ராஜாயதனமூலே
ஸத்தாஹங் ஏகபல்லங்கேன நிஸீதி³ விமுத்திஸுக²படிஸங்வேதீ³. தேன கோ² பன ஸமயேன தபுஸ்ஸ [தபஸ்ஸு (ஸீ॰)] ப⁴ல்லிகா வாணிஜா உக்கலா தங் தே³ஸங் அத்³தா⁴னமக்³க³ப்படிபன்னா ஹொந்தி. அத² கோ² தபுஸ்ஸப⁴ல்லிகானங் வாணிஜானங்
ஞாதிஸாலோஹிதா தே³வதா தபுஸ்ஸப⁴ல்லிகே வாணிஜே ஏதத³வோச – ‘‘அயங், மாரிஸா,
ப⁴க³வா ராஜாயதனமூலே விஹரதி பட²மாபி⁴ஸம்பு³த்³தோ⁴; க³ச்ச²த² தங் ப⁴க³வந்தங்
மந்தே²ன ச மது⁴பிண்டி³காய ச பதிமானேத²; தங் வோ ப⁴விஸ்ஸதி தீ³க⁴ரத்தங் ஹிதாய
ஸுகா²யா’’தி. அத² கோ² தபுஸ்ஸப⁴ல்லிகா வாணிஜா மந்த²ஞ்ச மது⁴பிண்டி³கஞ்ச
ஆதா³ய யேன ப⁴க³வா தேனுபஸங்கமிங்ஸு, உபஸங்கமித்வா ப⁴க³வந்தங் அபி⁴வாதெ³த்வா
ஏகமந்தங் அட்ட²ங்ஸு. ஏகமந்தங் டி²தா கோ² தபுஸ்ஸப⁴ல்லிகா வாணிஜா ப⁴க³வந்தங்
ஏதத³வோசுங் – ‘‘படிக்³க³ண்ஹாது நோ, ப⁴ந்தே, ப⁴க³வா மந்த²ஞ்ச
மது⁴பிண்டி³கஞ்ச, யங் அம்ஹாகங் அஸ்ஸ தீ³க⁴ரத்தங் ஹிதாய
ஸுகா²யா’’தி. அத² கோ² ப⁴க³வதோ ஏதத³ஹோஸி – ‘‘ந கோ² ததா²க³தா ஹத்தே²ஸு
படிக்³க³ண்ஹந்தி. கிம்ஹி நு கோ² அஹங் படிக்³க³ண்ஹெய்யங் மந்த²ஞ்ச
மது⁴பிண்டி³கஞ்சா’’தி? அத² கோ² சத்தாரோ மஹாராஜானோ
ப⁴க³வதோ சேதஸா சேதோபரிவிதக்கமஞ்ஞாய சதுத்³தி³ஸா சத்தாரோ ஸேலமயே பத்தே
ப⁴க³வதோ உபனாமேஸுங் – ‘‘இத⁴, ப⁴ந்தே, ப⁴க³வா படிக்³க³ண்ஹாது மந்த²ஞ்ச
மது⁴பிண்டி³கஞ்சா’’தி. படிக்³க³ஹேஸி ப⁴க³வா பச்சக்³கே⁴ ஸேலமயே பத்தே
மந்த²ஞ்ச மது⁴பிண்டி³கஞ்ச, படிக்³க³ஹெத்வா பரிபு⁴ஞ்ஜி. அத² கோ²
தபுஸ்ஸப⁴ல்லிகா வாணிஜா ப⁴க³வந்தங் ஓனீதபத்தபாணிங் விதி³த்வா ப⁴க³வதோ
பாதே³ஸு ஸிரஸா நிபதித்வா ப⁴க³வந்தங் (ஓனீதபத்தபாணிங் விதி³த்வா ப⁴க³வதோ
பாதே³ஸு ஸிரஸா நிபதித்வா ப⁴க³வந்தங்) [( ) ஸீ॰ ஸ்யா॰ பொத்த²கேஸு நத்தி²] ஏதத³வோசுங் – ‘‘ஏதே மயங், ப⁴ந்தே, ப⁴க³வந்தங் ஸரணங் க³ச்சா²ம த⁴ம்மஞ்ச, உபாஸகே நோ ப⁴க³வா தா⁴ரேது அஜ்ஜதக்³கே³ பாணுபேதே ஸரணங் க³தே’’தி. தே ச லோகே பட²மங் உபாஸகா அஹேஸுங் த்³வேவாசிகா.

ராஜாயதனகதா² நிட்டி²தா.

5. ப்³ரஹ்மயாசனகதா²

7. [அயங் ப்³ரஹ்மயாசனகதா² தீ³॰ நி॰ 2.64 ஆத³யோ; ம॰ நி॰ 1.281 ஆத³யோ; ம॰ நி॰ 2.336 ஆத³யோ; ஸங்॰ நி॰ 1.172 ஆத³யோ]
அத² கோ² ப⁴க³வா ஸத்தாஹஸ்ஸ அச்சயேன தம்ஹா ஸமாதி⁴ம்ஹா வுட்ட²ஹித்வா
ராஜாயதனமூலா யேன அஜபாலனிக்³ரோதோ⁴ தேனுபஸங்கமி. தத்ர ஸுத³ங் ப⁴க³வா
அஜபாலனிக்³ரோத⁴மூலே விஹரதி. அத² கோ² ப⁴க³வதோ ரஹோக³தஸ்ஸ படிஸல்லீனஸ்ஸ ஏவங்
சேதஸோ பரிவிதக்கோ உத³பாதி³ – ‘‘அதி⁴க³தோ கோ² ம்யாயங் த⁴ம்மோ க³ம்பீ⁴ரோ
து³த்³த³ஸோ து³ரனுபோ³தோ⁴ ஸந்தோ பணீதோ அதக்காவசரோ நிபுணோ பண்டி³தவேத³னீயோ.
ஆலயராமா கோ² பனாயங் பஜா ஆலயரதா ஆலயஸம்முதி³தா. ஆலயராமாய கோ² பன பஜாய
ஆலயரதாய ஆலயஸம்முதி³தாய து³த்³த³ஸங் இத³ங் டா²னங்
யதி³த³ங் இத³ப்பச்சயதாபஅச்சஸமுப்பாதோ³; இத³ம்பி கோ² டா²னங் ஸுது³த்³த³ஸங்
யதி³த³ங் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ
விராகோ³ நிரோதோ⁴ நிப்³பா³னங். அஹஞ்சேவ கோ² பன த⁴ம்மங் தே³ஸெய்யங், பரே ச மே
ந ஆஜானெய்யுங், ஸோ மமஸ்ஸ கிலமதோ², ஸா மமஸ்ஸ விஹேஸா’’தி. அபிஸ்ஸு
ப⁴க³வந்தங் இமா அனச்ச²ரியா கா³தா²யோ படிப⁴ங்ஸு புப்³பே³ அஸ்ஸுதபுப்³பா³ –

‘‘கிச்சே²ன மே அதி⁴க³தங், ஹலங் தா³னி பகாஸிதுங்;

ராக³தோ³ஸபரேதேஹி, நாயங் த⁴ம்மோ ஸுஸம்பு³தோ⁴.

‘‘படிஸோதகா³மிங் நிபுணங், க³ம்பீ⁴ரங் து³த்³த³ஸங் அணுங்;

ராக³ரத்தா ந த³க்க²ந்தி, தமோக²ந்தே⁴ன ஆவுடா [ஆவடா (ஸீ॰)]’’தி.

இதிஹ ப⁴க³வதோ படிஸஞ்சிக்க²தோ அப்பொஸ்ஸுக்கதாய சித்தங் நமதி, நோ த⁴ம்மதே³ஸனாய.

8.
அத² கோ² ப்³ரஹ்முனோ ஸஹம்பதிஸ்ஸ ப⁴க³வதோ சேதஸா சேதோபரிவிதக்கமஞ்ஞாய ஏதத³ஹோஸி
– ‘‘நஸ்ஸதி வத போ⁴ லோகோ, வினஸ்ஸதி வத போ⁴ லோகோ, யத்ர ஹி நாம ததா²க³தஸ்ஸ
அரஹதோ ஸம்மாஸம்பு³த்³த⁴ஸ்ஸ அப்பொஸ்ஸுக்கதாய சித்தங் நமதி [நமிஸ்ஸதி (?)],
நோ த⁴ம்மதே³ஸனாயா’’தி. அத² கோ² ப்³ரஹ்மா ஸஹம்பதி – ஸெய்யதா²பி நாம ப³லவா
புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய
ஏவமேவ – ப்³ரஹ்மலோகே அந்தரஹிதோ ப⁴க³வதோ புரதோ பாதுரஹோஸி. அத² கோ² ப்³ரஹ்மா
ஸஹம்பதி ஏகங்ஸங் உத்தராஸங்க³ங் கரித்வா த³க்கி²ணஜாணுமண்ட³லங் பத²வியங்
நிஹந்த்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச –
‘‘தே³ஸேது, ப⁴ந்தே, ப⁴க³வா த⁴ம்மங், தே³ஸேது ஸுக³தோ த⁴ம்மங். ஸந்தி ஸத்தா
அப்பரஜக்க²ஜாதிகா, அஸ்ஸவனதா த⁴ம்மஸ்ஸ பரிஹாயந்தி , ப⁴விஸ்ஸந்தி த⁴ம்மஸ்ஸ அஞ்ஞாதாரோ’’தி. இத³மவோச ப்³ரஹ்மா ஸஹம்பதி, இத³ங் வத்வான அதா²பரங் ஏதத³வோச –

‘‘பாதுரஹோஸி மக³தே⁴ஸு புப்³பே³;

த⁴ம்மோ அஸுத்³தோ⁴ ஸமலேஹி சிந்திதோ;

அபாபுரேதங் [அவாபுரேதங் (ஸீ॰)] அமதஸ்ஸ த்³வாரங்;

ஸுணந்து த⁴ம்மங் விமலேனானுபு³த்³த⁴ங்.

‘‘ஸேலே யதா² பப்³ப³தமுத்³த⁴னிட்டி²தோ;

யதா²பி பஸ்ஸே ஜனதங் ஸமந்ததோ;

ததூ²பமங் த⁴ம்மமயங் ஸுமேத⁴;

பாஸாத³மாருய்ஹ ஸமந்தசக்கு²;

ஸோகாவதிண்ணங் ஜனதமபேதஸோகோ;

அவெக்க²ஸ்ஸு ஜாதிஜராபி⁴பூ⁴தங்.

‘‘உட்டே²ஹி வீர விஜிதஸங்கா³ம;

ஸத்த²வாஹ அணண [அனண (க॰)] விசர லோகே;

தே³ஸஸ்ஸு [தே³ஸேது (க॰)] ப⁴க³வா த⁴ம்மங்;

அஞ்ஞாதாரோ ப⁴விஸ்ஸந்தீ’’தி.

[[ ] ஸீ॰ ஸ்யா॰ பொத்த²கேஸு நத்தி², மூலபண்ணாஸகேஸு பாஸராஸிஸுத்தே² ப்³ரஹ்மயாசனா ஸகிங் யேவ ஆக³தா] [ ஏவங்
வுத்தே ப⁴க³வா ப்³ரஹ்மானங் ஸஹம்பதிங் ஏதத³வோச – ‘‘மய்ஹம்பி கோ², ப்³ரஹ்மே,
ஏதத³ஹோஸி – ‘அதி⁴க³தோ கோ² ம்யாயங் த⁴ம்மோ க³ம்பீ⁴ரோ து³த்³த³ஸோ
து³ரனுபோ³தோ⁴ ஸந்தோ பணீதோ அதக்காவசரோ நிபுணோ பண்டி³தவேத³னீயோ. ஆலயராமா கோ²
பனாயங் பஜா ஆலயரதா ஆலயஸம்முதி³தா. ஆலயராமாய கோ² பன பஜாய ஆலயரதாய
ஆலயஸம்முதி³தாய து³த்³த³ஸங் இத³ங் டா²னங் யதி³த³ங்
இத³ப்பச்சயதாபடிச்சஸமுப்பாதோ³; இத³ம்பி கோ² டா²னங் ஸுது³த்³த³ஸங் யதி³த³ங்
ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴
நிப்³பா³னங். அஹஞ்சேவ கோ² பன த⁴ம்மங் தே³ஸெய்யங், பரே ச மே ந ஆஜானெய்யுங்,
ஸோ மமஸ்ஸ கிலமதோ², ஸா மமஸ்ஸ விஹேஸா’தி. அபிஸ்ஸு மங், ப்³ரஹ்மே, இமா
அனச்ச²ரியா கா³தா²யோ படிப⁴ங்ஸு புப்³பே³ அஸ்ஸுதபுப்³பா³ –

‘கிச்சே²ன மே அதி⁴க³தங், ஹலங் தா³னி பகாஸிதுங்;

ராக³தோ³ஸபரேதேஹி, நாயங் த⁴ம்மோ ஸுஸம்பு³தோ⁴.

‘படிஸோதகா³மிங் நிபுணங், க³ம்பீ⁴ரங் து³த்³த³ஸங் அணுங்;

ராக³ரத்தா ந த³க்க²ந்தி, தமோக²ந்தே⁴ன ஆவுடா’தி.

இதிஹ மே, ப்³ரஹ்மே, படிஸஞ்சிக்க²தோ அப்பொஸ்ஸுக்கதாய சித்தங் நமதி நோ த⁴ம்மதே³ஸனாயா’’தி.

து³தியம்பி கோ² ப்³ரஹ்மா ஸஹம்பதி ப⁴க³வந்தங் ஏதத³வோச –
‘‘தே³ஸேது, ப⁴ந்தே, ப⁴க³வா த⁴ம்மங், தே³ஸேது ஸுக³தோ த⁴ம்மங்; ஸந்தி ஸத்தா
அப்பரஜக்க²ஜாதிகா, அஸ்ஸவனதா த⁴ம்மஸ்ஸ பரிஹாயந்தி, ப⁴விஸ்ஸந்தி த⁴ம்மஸ்ஸ
அஞ்ஞாதாரோ’’தி. இத³மவோச ப்³ரஹ்மா ஸஹம்பதி, இத³ங் வத்வான அதா²பரங் ஏதத³வோச –

‘‘பாதுரஹோஸி மக³தே⁴ஸு புப்³பே³;

த⁴ம்மோ அஸுத்³தோ⁴ ஸமலேஹி சிந்திதோ;

அபாபுரேதங் அமதஸ்ஸ த்³வாரங்;

ஸுணந்து த⁴ம்மங் விமலேனானுபு³த்³த⁴ங்.

‘‘ஸேலே யதா² பப்³ப³தமுத்³த⁴னிட்டி²தோ;

யதா²பி பஸ்ஸே ஜனதங் ஸமந்ததோ;

ததூ²பமங் த⁴ம்மமயங் ஸுமேத⁴;

பாஸாத³மாருய்ஹ ஸமந்தசக்கு²;

ஸோகாவதிண்ணங் ஜனதமபேதஸோகோ;

அவெக்க²ஸ்ஸு ஜாதிஜராபி⁴பூ⁴தங்.

‘‘உட்டே²ஹி வீர விஜிதஸங்கா³ம;

ஸத்த²வாஹ அணண விசர லோகே;

தே³ஸஸ்ஸு ப⁴க³வா த⁴ம்மங்;

அஞ்ஞாதாரோ ப⁴விஸ்ஸந்தீ’’தி.

து³தியம்பி கோ² ப⁴க³வா ப்³ரஹ்மானங் ஸஹம்பதிங் ஏதத³வோச –
‘‘மய்ஹம்பி கோ², ப்³ரஹ்மே, ஏதத³ஹோஸி – ‘அதி⁴க³தோ கோ² ம்யாயங் த⁴ம்மோ
க³ம்பீ⁴ரோ து³த்³த³ஸோ து³ரனுபோ³தோ⁴ ஸந்தோ பணீதோ அதக்காவசரோ நிபுணோ
பண்டி³தவேத³னீயோ. ஆலயராமா கோ² பனாயங் பஜா ஆலயரதா ஆலயஸம்முதி³தா. ஆலயராமாய
கோ² பன பஜாய ஆலயரதாய ஆலயஸம்முதி³தாய து³த்³த³ஸங் இத³ங் டா²னங் யதி³த³ங்
இத³ப்பச்சயதாபடிச்சஸமுப்பாதோ³; இத³ம்பி கோ² டா²னங் ஸுது³த்³த³ஸங் யதி³த³ங்
ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴
நிப்³பா³னங். அஹஞ்சேவ கோ² பன த⁴ம்மங் தே³ஸெய்யங், பரே ச மே ந ஆஜானெய்யுங்,
ஸோ மமஸ்ஸ கிலமதோ², ஸா மமஸ்ஸ விஹேஸா’தி. அபிஸ்ஸு மங், ப்³ரஹ்மே, இமா
அனச்ச²ரியா கா³தா²யோ படிப⁴ங்ஸு புப்³பே³ அஸ்ஸுதபுப்³பா³ –

‘கிச்சே²ன மே அதி⁴க³தங், ஹலங் தா³னி பகாஸிதுங்;

ராக³தோ³ஸபரேதேஹி, நாயங் த⁴ம்மோ ஸுஸம்பு³தோ⁴.

‘படிஸோதகா³மிங் நிபுணங், க³ம்பீ⁴ரங் து³த்³த³ஸங் அணுங்;

ராக³ரத்தா ந த³க்க²ந்தி, தமோக²ந்தே⁴ன ஆவுடா’தி.

இதிஹ மே, ப்³ரஹ்மே, படிஸஞ்சிக்க²தோ அப்பொஸ்ஸுக்கதாய சித்தங் நமதி, நோ த⁴ம்மதே³ஸனாயா’’தி.

ததியம்பி கோ² ப்³ரஹ்மா ஸஹம்பதி ப⁴க³வந்தங் ஏதத³வோச –
‘‘தே³ஸேது, ப⁴ந்தே, ப⁴க³வா த⁴ம்மங், தே³ஸேது ஸுக³தோ த⁴ம்மங். ஸந்தி ஸத்தா
அப்பரஜக்க²ஜாதிகா, அஸ்ஸவனதா த⁴ம்மஸ்ஸ பரிஹாயந்தி, ப⁴விஸ்ஸந்தி த⁴ம்மஸ்ஸ அஞ்ஞாதாரோ’’தி. இத³மவோச ப்³ரஹ்மா ஸஹம்பதி, இத³ங் வத்வான அதா²பரங் ஏதத³வோச –

‘‘பாதுரஹோஸி மக³தே⁴ஸு புப்³பே³;

த⁴ம்மோ அஸுத்³தோ⁴ ஸமலேஹி சிந்திதோ;

அபாபுரேதங் அமதஸ்ஸ த்³வாரங்;

ஸுணந்து த⁴ம்மங் விமலேனானுபு³த்³த⁴ங்.

‘‘ஸேலே யதா² பப்³ப³தமுத்³த⁴னிட்டி²தோ;

யதா²பி பஸ்ஸே ஜனதங் ஸமந்ததோ;

ததூ²பமங் த⁴ம்மமயங் ஸுமேத⁴;

பாஸாத³மாருய்ஹ ஸமந்தசக்கு²;

ஸோகாவதிண்ணங் ஜனதமபேதஸோகோ;

அவெக்க²ஸ்ஸு ஜாதிஜராபி⁴பூ⁴தங்.

‘‘உட்டே²ஹி வீர விஜிதஸங்கா³ம;

ஸத்த²வாஹ அணண விசர லோகே;

தே³ஸஸ்ஸு ப⁴க³வா த⁴ம்மங்;

அஞ்ஞாதாரோ ப⁴விஸ்ஸந்தீ’’தி.

9. அத²
கோ² ப⁴க³வா ப்³ரஹ்முனோ ச அஜ்ஜே²ஸனங் விதி³த்வா ஸத்தேஸு ச காருஞ்ஞதங்
படிச்ச பு³த்³த⁴சக்கு²னா லோகங் வோலோகேஸி. அத்³த³ஸா கோ² ப⁴க³வா
பு³த்³த⁴சக்கு²னா லோகங் வோலோகெந்தோ ஸத்தே அப்பரஜக்கே² மஹாரஜக்கே²
திக்கி²ந்த்³ரியே முதி³ந்த்³ரியே ஸ்வாகாரே த்³வாகாரே ஸுவிஞ்ஞாபயே
து³விஞ்ஞாபயே, அப்பேகச்சே பரலோகவஜ்ஜப⁴யத³ஸ்ஸாவினே [த³ஸ்ஸாவினோ (ஸீ॰ ஸ்யா॰ கங்॰)]
விஹரந்தே, அப்பேகச்சே ந பரலோகவஜ்ஜப⁴யத³ஸ்ஸாவினே விஹரந்தே. ஸெய்யதா²பி நாம
உப்பலினியங் வா பது³மினியங் வா புண்ட³ரீகினியங் வா அப்பேகச்சானி உப்பலானி
வா பது³மானி வா புண்ட³ரீகானி வா உத³கே ஜாதானி உத³கே ஸங்வட்³டா⁴னி
உத³கானுக்³க³தானி அந்தோ நிமுக்³க³போஸீனி ,
அப்பேகச்சானி உப்பலானி வா பது³மானி வா புண்ட³ரீகானி வா உத³கே ஜாதானி உத³கே
ஸங்வட்³டா⁴னி ஸமோத³கங் டி²தானி, அப்பேகச்சானி உப்பலானி வா பது³மானி வா
புண்ட³ரீகானி வா உத³கே ஜாதானி உத³கே ஸங்வட்³டா⁴னி உத³கங் அச்சுக்³க³ம்ம
டி²தானி [திட்ட²ந்தி (ஸீ॰ ஸ்யா॰)] அனுபலித்தானி உத³கேன, ஏவமேவங் ப⁴க³வா பு³த்³த⁴சக்கு²னா லோகங் வோலோகெந்தோ அத்³த³ஸ ஸத்தே அப்பரஜக்கே² மஹாரஜக்கே² திக்கி²ந்த்³ரியே
முதி³ந்த்³ரியே ஸ்வாகாரே த்³வாகாரே ஸுவிஞ்ஞாபயே து³விஞ்ஞாபயே, அப்பேகச்சே
பரலோகவஜ்ஜப⁴யத³ஸ்ஸாவினே விஹரந்தே, அப்பேகச்சே ந பரலோகவஜ்ஜப⁴யத³ஸ்ஸாவினே
விஹரந்தே; தி³ஸ்வான ப்³ரஹ்மானங் ஸஹம்பதிங் கா³தா²ய பச்சபா⁴ஸி –

‘‘அபாருதா தேஸங் அமதஸ்ஸ த்³வாரா;

யே ஸோதவந்தோ பமுஞ்சந்து ஸத்³த⁴ங்;

விஹிங்ஸஸஞ்ஞீ பகு³ணங் ந பா⁴ஸிங்;

த⁴ம்மங் பணீதங் மனுஜேஸு ப்³ரஹ்மே’’தி.

அத² கோ² ப்³ரஹ்மா ஸஹம்பதி ‘‘கதாவகாஸோ கொ²ம்ஹி ப⁴க³வதா
த⁴ம்மதே³ஸனாயா’’தி ப⁴க³வந்தங் அபி⁴வாதெ³த்வா பத³க்கி²ணங் கத்வா
தத்தே²வந்தரதா⁴யி.

ப்³ரஹ்மயாசனகதா² நிட்டி²தா.

6. பஞ்சவக்³கி³யகதா²

10. [ம॰ நி॰ 1.284 ஆத³யோ; ம॰ நி॰ 2.339 ஆத³யோ]
அத² கோ² ப⁴க³வதோ ஏதத³ஹோஸி – ‘‘கஸ்ஸ நு கோ² அஹங் பட²மங் த⁴ம்மங்
தே³ஸெய்யங்? கோ இமங் த⁴ம்மங் கி²ப்பமேவ ஆஜானிஸ்ஸதீ’’தி? அத² கோ² ப⁴க³வதோ
ஏதத³ஹோஸி – ‘‘அயங் கோ² ஆளாரோ காலாமோ பண்டி³தோ ப்³யத்தோ மேதா⁴வீ தீ³க⁴ரத்தங்
அப்பரஜக்க²ஜாதிகோ; யங்னூனாஹங் ஆளாரஸ்ஸ காலாமஸ்ஸ பட²மங் த⁴ம்மங்
தே³ஸெய்யங், ஸோ இமங் த⁴ம்மங் கி²ப்பமேவ ஆஜானிஸ்ஸதீ’’தி. அத² கோ² அந்தரஹிதா
தே³வதா ப⁴க³வதோ ஆரோசேஸி – ‘‘ஸத்தாஹகாலங்கதோ, ப⁴ந்தே, ஆளாரோ காலாமோ’’தி.
ப⁴க³வதோபி கோ² ஞாணங் உத³பாதி³ – ‘‘ஸத்தாஹகாலங்கதோ ஆளாரோ காலாமோ’’தி. அத² கோ² ப⁴க³வதோ
ஏதத³ஹோஸி – ‘‘மஹாஜானியோ கோ² ஆளாரோ காலாமோ; ஸசே ஹி ஸோ இமங் த⁴ம்மங்
ஸுணெய்ய, கி²ப்பமேவ ஆஜானெய்யா’’தி. அத² கோ² ப⁴க³வதோ ஏதத³ஹோஸி – ‘‘கஸ்ஸ நு
கோ² அஹங் பட²மங் த⁴ம்மங் தே³ஸெய்யங்? கோ இமங் த⁴ம்மங் கி²ப்பமேவ
ஆஜானிஸ்ஸதீ’’தி? அத² கோ² ப⁴க³வதோ ஏதத³ஹோஸி – ‘‘அயங் கோ² உத³கோ [உத்³த³கோ (ஸீ॰ ஸ்யா॰)]
ராமபுத்தோ பண்டி³தோ ப்³யத்தோ மேதா⁴வீ தீ³க⁴ரத்தங் அப்பரஜக்க²ஜாதிகோ;
யங்னூனாஹங் உத³கஸ்ஸ ராமபுத்தஸ்ஸ பட²மங் த⁴ம்மங் தே³ஸெய்யங், ஸோ இமங்
த⁴ம்மங் கி²ப்பமேவ ஆஜானிஸ்ஸதீ’’தி. அத² கோ² அந்தரஹிதா தே³வதா ப⁴க³வதோ
ஆரோசேஸி – ‘‘அபி⁴தோ³ஸகாலங்கதோ, ப⁴ந்தே, உத³கோ ராமபுத்தோ’’தி. ப⁴க³வதோபி கோ²
ஞாணங் உத³பாதி³ – ‘‘அபி⁴தோ³ஸகாலங்கதோ உத³கோ
ராமபுத்தோ’’தி. அத² கோ² ப⁴க³வதோ ஏதத³ஹோஸி – ‘‘மஹாஜானியோ கோ² உத³கோ
ராமபுத்தோ; ஸசே ஹி ஸோ இமங் த⁴ம்மங் ஸுணெய்ய, கி²ப்பமேவ ஆஜானெய்யா’’தி

அத² கோ² ப⁴க³வதோ ஏதத³ஹோஸி – ‘‘கஸ்ஸ நு கோ² அஹங் பட²மங் த⁴ம்மங் தே³ஸெய்யங்? கோ இமங் த⁴ம்மங்
கி²ப்பமேவ ஆஜானிஸ்ஸதீ’’தி? அத² கோ² ப⁴க³வதோ ஏதத³ஹோஸி – ‘‘ப³ஹுகாரா கோ² மே
பஞ்சவக்³கி³யா பி⁴க்கூ², யே மங் பதா⁴னபஹிதத்தங் உபட்ட²ஹிங்ஸு; யங்னூனாஹங்
பஞ்சவக்³கி³யானங் பி⁴க்கூ²னங் பட²மங் த⁴ம்மங் தே³ஸெய்ய’’ந்தி. அத² கோ²
ப⁴க³வதோ ஏதத³ஹோஸி – ‘‘கஹங் நு கோ² ஏதரஹி பஞ்சவக்³கி³யா பி⁴க்கூ²
விஹரந்தீ’’தி? அத்³த³ஸா கோ² ப⁴க³வா தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன பஞ்சவக்³கி³யே பி⁴க்கூ² பா³ராணஸியங் விஹரந்தே இஸிபதனே மிக³தா³யே. அத² கோ² ப⁴க³வா உருவேலாயங் யதா²பி⁴ரந்தங் விஹரித்வா யேன பா³ராணஸீ தேன சாரிகங் பக்காமி.

11.
அத்³த³ஸா கோ² உபகோ ஆஜீவகோ ப⁴க³வந்தங் அந்தரா ச க³யங் அந்தரா ச போ³தி⁴ங்
அத்³தா⁴னமக்³க³ப்படிபன்னங், தி³ஸ்வான ப⁴க³வந்தங் ஏதத³வோச – ‘‘விப்பஸன்னானி
கோ² தே, ஆவுஸோ, இந்த்³ரியானி, பரிஸுத்³தோ⁴ ச²விவண்ணோ பரியோதா³தோ. கங்ஸி
த்வங், ஆவுஸோ, உத்³தி³ஸ்ஸ பப்³ப³ஜிதோ? கோ வா தே ஸத்தா²? கஸ்ஸ வா த்வங்
த⁴ம்மங் ரோசேஸீ’’தி? ஏவங் வுத்தே ப⁴க³வா உபகங் ஆஜீவகங் கா³தா²ஹி அஜ்ஜ²பா⁴ஸி
–

[த⁴॰ ப॰ 353; கதா²॰ 405] ‘‘ஸப்³பா³பி⁴பூ⁴ ஸப்³ப³விதூ³ஹமஸ்மி,

ஸப்³பே³ஸு த⁴ம்மேஸு அனூபலித்தோ;

ஸப்³ப³ஞ்ஜஹோ தண்ஹாக்க²யே விமுத்தோ,

ஸயங் அபி⁴ஞ்ஞாய கமுத்³தி³ஸெய்யங்.

[மி॰ ப॰ 4.5.11 மிலிந்த³பஞ்ஹேபி; கதா²॰ 405] ‘‘ந மே ஆசரியோ அத்தி², ஸதி³ஸோ மே ந விஜ்ஜதி;

ஸதே³வகஸ்மிங் லோகஸ்மிங், நத்தி² மே படிபுக்³க³லோ.

[கதா²॰ 405 கதா²வத்து²பாளியம்பி] ‘‘அஹஞ்ஹி அரஹா லோகே, அஹங் ஸத்தா² அனுத்தரோ;

ஏகொம்ஹி ஸம்மாஸம்பு³த்³தோ⁴, ஸீதிபூ⁴தொஸ்மி நிப்³பு³தோ.

[கதா²॰ 405 கதா²வத்து²பாளியம்பி]‘‘த⁴ம்மசக்கங் பவத்தேதுங், க³ச்சா²மி காஸினங் புரங்;

அந்தீ⁴பூ⁴தஸ்மிங் லோகஸ்மிங், ஆஹஞ்ச²ங் [ஆஹஞ்ஞிங் (க॰)] அமதது³ந்து³பி⁴’’ந்தி.

யதா² கோ² த்வங், ஆவுஸோ, படிஜானாஸி, அரஹஸி அனந்தஜினோதி.

[கதா²॰ 405 கதா²வத்து²பாளியம்பி] ‘‘மாதி³ஸா வே ஜினா ஹொந்தி, யே பத்தா ஆஸவக்க²யங்;

ஜிதா மே பாபகா த⁴ம்மா, தஸ்மாஹமுபக [தஸ்மாஹமுபகா (ஸீ॰)] ஜினோ’’தி.

ஏவங் வுத்தே உபகோ ஆஜீவகோ ஹுபெய்யபாவுஸோதி [ஹுவெய்யபாவுஸோ (ஸீ॰) ஹுவெய்யாவுஸோ (ஸ்யா॰)] வத்வா ஸீஸங் ஓகம்பெத்வா உம்மக்³க³ங் க³ஹெத்வா பக்காமி.

12.
அத² கோ² ப⁴க³வா அனுபுப்³பே³ன சாரிகங் சரமானோ யேன பா³ராணஸீ இஸிபதனங்
மிக³தா³யோ, யேன பஞ்சவக்³கி³யா பி⁴க்கூ² தேனுபஸங்கமி. அத்³த³ஸங்ஸு கோ²
பஞ்சவக்³கி³யா பி⁴க்கூ² ப⁴க³வந்தங் தூ³ரதோவ ஆக³ச்ச²ந்தங்; தி³ஸ்வான
அஞ்ஞமஞ்ஞங் கதிகங் [இத³ங் பத³ங் கேஸுசி நத்தி²] ஸண்ட²பேஸுங் – ‘‘அயங், ஆவுஸோ, ஸமணோ கோ³தமோ ஆக³ச்ச²தி, பா³ஹுல்லிகோ பதா⁴னவிப்³ப⁴ந்தோ
ஆவத்தோ பா³ஹுல்லாய. ஸோ நேவ அபி⁴வாதே³தப்³போ³, ந பச்சுட்டா²தப்³போ³, நாஸ்ஸ
பத்தசீவரங் படிக்³க³ஹேதப்³ப³ங்; அபி ச கோ² ஆஸனங் ட²பேதப்³ப³ங், ஸசே ஸோ
ஆகங்கி²ஸ்ஸதி நிஸீதி³ஸ்ஸதீ’’தி. யதா² யதா² கோ² ப⁴க³வா பஞ்சவக்³கி³யே
பி⁴க்கூ² உபஸங்கமதி, ததா² ததா² [ததா² ததா² தே (ஸீ॰ ஸ்யா॰)] பஞ்சவக்³கி³யா பி⁴க்கூ² நாஸக்கி²ங்ஸு ஸகாய கதிகாய ஸண்டா²துங் .
அஸண்ட²ஹந்தா ப⁴க³வந்தங் பச்சுக்³க³ந்த்வா ஏகோ ப⁴க³வதோ பத்தசீவரங்
படிக்³க³ஹேஸி, ஏகோ ஆஸனங் பஞ்ஞபேஸி, ஏகோ பாதோ³த³கங், ஏகோ பாத³பீட²ங், ஏகோ
பாத³கட²லிகங் உபனிக்கி²பி. நிஸீதி³ ப⁴க³வா பஞ்ஞத்தே ஆஸனே; நிஸஜ்ஜ கோ²
ப⁴க³வா பாதே³ பக்கா²லேஸி. அபிஸ்ஸு [அபி ச கோ² (பாஸராஸிஸுத்த²)]
ப⁴க³வந்தங் நாமேன ச ஆவுஸோவாதே³ன ச ஸமுதா³சரந்தி. ஏவங் வுத்தே ப⁴க³வா
பஞ்சவக்³கி³யே பி⁴க்கூ² ஏதத³வோச – ‘‘மா, பி⁴க்க²வே, ததா²க³தங் நாமேன ச
ஆவுஸோவாதே³ன ச ஸமுதா³சரத² [ஸமுதா³சரித்த² (ஸீ॰ ஸ்யா॰)].
அரஹங், பி⁴க்க²வே, ததா²க³தோ ஸம்மாஸம்பு³த்³தோ⁴, ஓத³ஹத², பி⁴க்க²வே, ஸோதங்,
அமதமதி⁴க³தங், அஹமனுஸாஸாமி, அஹங் த⁴ம்மங் தே³ஸேமி. யதா²னுஸிட்ட²ங் ததா²
படிபஜ்ஜமானா [யதா²னுஸிட்ட²ங் படிபஜ்ஜமானா (ஸ்யா॰)]
நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங்
பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங்
அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதா²’’தி. ஏவங் வுத்தே
பஞ்சவக்³கி³யா பி⁴க்கூ² ப⁴க³வந்தங் ஏதத³வோசுங் – ‘‘தாயபி கோ² த்வங், ஆவுஸோ
கோ³தம, இரியாய [சரியாய (ஸ்யா॰)], தாய படிபதா³ய, தாய து³க்கரகாரிகாய நேவஜ்ஜ²கா³ உத்தரி மனுஸ்ஸத⁴ம்மா [உத்தரிமனுஸ்ஸத⁴ம்மங் (ஸ்யா॰ க॰)]
அலமரியஞாணத³ஸ்ஸனவிஸேஸங், கிங் பன த்வங் ஏதரஹி, பா³ஹுல்லிகோ
பதா⁴னவிப்³ப⁴ந்தோ ஆவத்தோ பா³ஹுல்லாய, அதி⁴க³மிஸ்ஸஸி உத்தரி மனுஸ்ஸத⁴ம்மா
அலமரியஞாணத³ஸ்ஸனவிஸேஸ’’ந்தி? ஏவங் வுத்தே ப⁴க³வா பஞ்சவக்³கி³யே பி⁴க்கூ²
ஏதத³வோச – ‘‘ந, பி⁴க்க²வே, ததா²க³தோ பா³ஹுல்லிகோ, ந பதா⁴னவிப்³ப⁴ந்தோ, ந
ஆவத்தோ பா³ஹுல்லாய; அரஹங், பி⁴க்க²வே, ததா²க³தோ ஸம்மாஸம்பு³த்³தோ⁴. ஓத³ஹத²,
பி⁴க்க²வே, ஸோதங், அமதமதி⁴க³தங், அஹமனுஸாஸாமி ,
அஹங் த⁴ம்மங் தே³ஸேமி. யதா²னுஸிட்ட²ங் ததா² படிபஜ்ஜமானா நசிரஸ்ஸேவ –
யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி
தத³னுத்தரங் – ப்³ரஹ்மசரியபரியோஸானங்
தி³ட்டே²வத⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதா²’’தி.
து³தியம்பி கோ² பஞ்சவக்³கி³யா பி⁴க்கூ² ப⁴க³வந்தங் ஏதத³வோசுங்…பே॰….
து³தியம்பி கோ² ப⁴க³வா பஞ்சவக்³கி³யே பி⁴க்கூ² ஏதத³வோச…பே॰…. ததியம்பி கோ²
பஞ்சவக்³கி³யா பி⁴க்கூ² ப⁴க³வந்தங் ஏதத³வோசுங் – ‘‘தாயபி
கோ² த்வங், ஆவுஸோ கோ³தம, இரியாய, தாய படிபதா³ய, தாய து³க்கரகாரிகாய
நேவஜ்ஜ²கா³ உத்தரி மனுஸ்ஸத⁴ம்மா அலமரியஞாணத³ஸ்ஸனவிஸேஸங், கிங் பன த்வங்
ஏதரஹி, பா³ஹுல்லிகோ பதா⁴னவிப்³ப⁴ந்தோ ஆவத்தோ
பா³ஹுல்லாய, அதி⁴க³மிஸ்ஸஸி உத்தரி மனுஸ்ஸத⁴ம்மா
அலமரியஞாணத³ஸ்ஸனவிஸேஸ’’ந்தி? ஏவங் வுத்தே ப⁴க³வா பஞ்சவக்³கி³யே பி⁴க்கூ²
ஏதத³வோச – ‘‘அபி⁴ஜானாத² மே நோ தும்ஹே, பி⁴க்க²வே, இதோ புப்³பே³ ஏவரூபங்
பபா⁴விதமேத’’ந்தி [பா⁴ஸிதமேதந்தி (ஸீ॰ ஸ்யா॰ க॰) டீகாயோ ஓலோகேதப்³பா³]?
‘‘நோஹேதங், ப⁴ந்தே’’. அரஹங், பி⁴க்க²வே, ததா²க³தோ ஸம்மாஸம்பு³த்³தோ⁴,
ஓத³ஹத², பி⁴க்க²வே, ஸோதங், அமதமதி⁴க³தங், அஹமனுஸாஸாமி, அஹங் த⁴ம்மங்
தே³ஸேமி. யதா²னுஸிட்ட²ங் ததா² படிபஜ்ஜமானா நசிரஸ்ஸேவ – யஸ்ஸத்தா²ய
குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி
தத³னுத்தரங்ப்³ரஹ்மசரியபரியோஸானங் தி³ட்டே²வத⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரிஸ்ஸதா²தி. அஸக்கி² கோ² ப⁴க³வா பஞ்சவக்³கி³யே
பி⁴க்கூ² ஸஞ்ஞாபேதுங். அத² கோ² பஞ்சவக்³கி³யா பி⁴க்கூ² ப⁴க³வந்தங்
ஸுஸ்ஸூஸிங்ஸு, ஸோதங் ஓத³ஹிங்ஸு, அஞ்ஞா சித்தங் உபட்டா²பேஸுங்.

13. அத² கோ² ப⁴க³வா பஞ்சவக்³கி³யே பி⁴க்கூ² ஆமந்தேஸி –

‘‘[ஸங்॰ நி॰ 5.1081 ஆத³யோ] த்³வேமே, பி⁴க்க²வே , அந்தா பப்³ப³ஜிதேன ந ஸேவிதப்³பா³. கதமே த்³வே [இத³ங் பத³த்³வயங் ஸீ॰ ஸ்யா॰ பொத்த²கேஸு நத்தி²]?
யோ சாயங் காமேஸு காமஸுக²ல்லிகானுயோகோ³ ஹீனோ க³ம்மோ போது²ஜ்ஜனிகோ அனரியோ
அனத்த²ஸங்ஹிதோ, யோ சாயங் அத்தகிலமதா²னுயோகோ³ து³க்கோ² அனரியோ
அனத்த²ஸங்ஹிதோ. ஏதே கோ², பி⁴க்க²வே, உபோ⁴ அந்தே அனுபக³ம்ம, மஜ்ஜி²மா
படிபதா³ ததா²க³தேன அபி⁴ஸம்பு³த்³தா⁴, சக்கு²கரணீ ஞாணகரணீ உபஸமாய அபி⁴ஞ்ஞாய
ஸம்போ³தா⁴ய நிப்³பா³னாய ஸங்வத்ததி. கதமா ச ஸா, பி⁴க்க²வே, மஜ்ஜி²மா படிபதா³
ததா²க³தேன அபி⁴ஸம்பு³த்³தா⁴, சக்கு²கரணீ ஞாணகரணீ உபஸமாய அபி⁴ஞ்ஞாய
ஸம்போ³தா⁴ய நிப்³பா³னாய ஸங்வத்ததி? அயமேவ அரியோ அட்ட²ங்கி³கோ மக்³கோ³,
ஸெய்யதி²த³ங் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ,
ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴. அயங் கோ² ஸா, பி⁴க்க²வே,
மஜ்ஜி²மா படிபதா³ ததா²க³தேன அபி⁴ஸம்பு³த்³தா⁴, சக்கு²கரணீ ஞாணகரணீ உபஸமாய
அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி.

14. ‘‘இத³ங்
கோ² பன, பி⁴க்க²வே, து³க்க²ங் அரியஸச்சங். ஜாதிபி து³க்கா², ஜராபி
து³க்கா², ப்³யாதி⁴பி து³க்கோ², மரணம்பி து³க்க²ங், அப்பியேஹி ஸம்பயோகோ³ து³க்கோ², பியேஹி விப்பயோகோ³ து³க்கோ², யம்பிச்ச²ங் ந லப⁴தி தம்பி து³க்க²ங். ஸங்கி²த்தேன, பஞ்சுபாதா³னக்க²ந்தா⁴ [பஞ்சுபாதா³னக²ந்தா⁴பி (க)] து³க்கா². ‘‘இத³ங் கோ² பன, பி⁴க்க²வே, து³க்க²ஸமுத³யங் [எத்த²
‘‘இத³ங் து³க்க²ங் அரியஸச்சந்தி ஆதீ³ஸு து³க்க²ஸமுத³யோ து³க்க²னிரோதோ⁴தி
வத்தப்³பே³ து³க்க²ஸமுத³யங் து³க்க²னிரோத⁴ந்தி லிங்க³விபல்லாஸோ ததோ’’தி
படிஸம்பி⁴தா³மக்³க³ட்ட²கதா²யங் வுத்தங். விஸுத்³தி⁴மக்³க³டீகாயங் பன
உப்பாதோ³ ப⁴யந்திபாட²வண்ணனாயங் ‘‘ஸதிபி த்³வின்னங் பதா³னங்
ஸமானாதி⁴கரணபா⁴வே லிங்க³பே⁴தோ³ க³ஹிதோ, யதா² து³க்க²ஸமுத³யோ அரியஸச்ச’’ந்தி
வுத்தங். தேஸு து³க்க²ஸமுத³யோ அரியஸச்ச’’ந்தி ஸகலிங்கி³கபாடோ²
‘‘து³க்க²னிரோத⁴கா³மினீ படிபதா³ அரியஸச்ச’’ந்தி பாளியா ஸமேதி.] அரியஸச்சங் – யாயங் தண்ஹா போனொப்³ப⁴விகா [போனோப⁴விகா (க॰)] நந்தீ³ராக³ஸஹக³தா [நந்தி³ராக³ஸஹக³தா (ஸீ॰ ஸ்யா॰)] தத்ரதத்ராபி⁴னந்தி³னீ, ஸெய்யதி²த³ங் – காமதண்ஹா, ப⁴வதண்ஹா, விப⁴வதண்ஹா.

‘‘இத³ங் கோ² பன, பி⁴க்க²வே, து³க்க²னிரோத⁴ங்
அரியஸச்சங் – யோ தஸ்ஸா யேவ தண்ஹாய அஸேஸவிராக³னிரோதோ⁴, சாகோ³,
படினிஸ்ஸக்³கோ³, முத்தி, அனாலயோ. ‘‘இத³ங் கோ² பன, பி⁴க்க²வே,
து³க்க²னிரோத⁴கா³மினீ படிபதா³ அரியஸச்சங் – அயமேவ அரியோ அட்ட²ங்கி³கோ
மக்³கோ³, ஸெய்யதி²த³ங் – ஸம்மாதி³ட்டி², ஸம்மாஸங்கப்போ, ஸம்மாவாசா,
ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴.

15. ‘‘இத³ங்
து³க்க²ங் அரியஸச்சந்தி மே, பி⁴க்க²வே, புப்³பே³ அனநுஸ்ஸுதேஸு த⁴ம்மேஸு
சக்கு²ங் உத³பாதி³, ஞாணங் உத³பாதி³, பஞ்ஞா உத³பாதி³, விஜ்ஜா உத³பாதி³ ,
ஆலோகோ உத³பாதி³. தங் கோ² பனித³ங் து³க்க²ங் அரியஸச்சங் பரிஞ்ஞெய்யந்தி மே,
பி⁴க்க²வே, புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³, ஞாணங்
உத³பாதி³, பஞ்ஞா உத³பாதி³, விஜ்ஜா உத³பாதி³, ஆலோகோ உத³பாதி³. தங் கோ²
பனித³ங் து³க்க²ங் அரியஸச்சங் பரிஞ்ஞாதந்தி மே, பி⁴க்க²வே, புப்³பே³
அனநுஸ்ஸுதேஸு த⁴ம்மேஸு சக்கு²ங் உத³பாதி³, ஞாணங் உத³பாதி³, பஞ்ஞா உத³பாதி³,
விஜ்ஜா உத³பாதி³, ஆலோகோ உத³பாதி³.

‘‘இத³ங் து³க்க²ஸமுத³யங் அரியஸச்சந்தி மே, பி⁴க்க²வே,
புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³, ஞாணங் உத³பாதி³, பஞ்ஞா
உத³பாதி³, விஜ்ஜா உத³பாதி³, ஆலோகோ உத³பாதி³. தங் கோ² பனித³ங்
து³க்க²ஸமுத³யங் அரியஸச்சங் பஹாதப்³ப³ந்தி மே, பி⁴க்க²வே, புப்³பே³
அனநுஸ்ஸுதேஸு த⁴ம்மேஸு சக்கு²ங் உத³பாதி³, ஞாணங் உத³பாதி³, பஞ்ஞா உத³பாதி³,
விஜ்ஜா உத³பாதி³, ஆலோகோ உத³பாதி³. தங் கோ² பனித³ங் து³க்க²ஸமுத³யங்
அரியஸச்சங் பஹீனந்தி மே, பி⁴க்க²வே, புப்³பே³ அனநுஸ்ஸுதேஸு த⁴ம்மேஸு
சக்கு²ங் உத³பாதி³, ஞாணங் உத³பாதி³, பஞ்ஞா உத³பாதி³, விஜ்ஜா உத³பாதி³,
ஆலோகோ உத³பாதி³.

‘‘இத³ங் து³க்க²னிரோத⁴ங் அரியஸச்சந்தி மே, பி⁴க்க²வே,
புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³, ஞாணங் உத³பாதி³, பஞ்ஞா
உத³பாதி³, விஜ்ஜா உத³பாதி³, ஆலோகோ உத³பாதி³. தங்
கோ² பனித³ங் து³க்க²னிரோத⁴ங் அரியஸச்சங் ஸச்சி²காதப்³ப³ந்தி மே, பி⁴க்க²வே,
புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³, ஞாணங் உத³பாதி³, பஞ்ஞா
உத³பாதி³, விஜ்ஜா உத³பாதி³, ஆலோகோ உத³பாதி³. தங்
கோ² பனித³ங் து³க்க²னிரோத⁴ங் அரியஸச்சங் ஸச்சி²கதந்தி மே, பி⁴க்க²வே,
புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³, ஞாணங் உத³பாதி³, பஞ்ஞா
உத³பாதி³, விஜ்ஜா உத³பாதி³, ஆலோகோ உத³பாதி³.

‘‘இத³ங் து³க்க²னிரோத⁴கா³மினீ படிபதா³ அரியஸச்சந்தி
மே, பி⁴க்க²வே, புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³, ஞாணங்
உத³பாதி³, பஞ்ஞா உத³பாதி³, விஜ்ஜா உத³பாதி³, ஆலோகோ உத³பாதி³. தங் கோ²
பனித³ங் து³க்க²னிரோத⁴கா³மினீ படிபதா³ அரியஸச்சங் பா⁴வேதப்³ப³ந்தி மே,
பி⁴க்க²வே, புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³, ஞாணங்
உத³பாதி³, பஞ்ஞா உத³பாதி³, விஜ்ஜா உத³பாதி³, ஆலோகோ உத³பாதி³. தங் கோ²
பனித³ங் து³க்க²னிரோத⁴கா³மினீ படிபதா³ அரியஸச்சங் பா⁴விதந்தி மே,
பி⁴க்க²வே, புப்³பே³ அனநுஸ்ஸுதேஸு த⁴ம்மேஸு சக்கு²ங் உத³பாதி³, ஞாணங் உத³பாதி³, பஞ்ஞா உத³பாதி³, விஜ்ஜா உத³பாதி³, ஆலோகோ உத³பாதி³.

16.
‘‘யாவகீவஞ்ச மே, பி⁴க்க²வே, இமேஸு சதூஸு அரியஸச்சேஸு ஏவங் திபரிவட்டங்
த்³வாத³ஸாகாரங் யதா²பூ⁴தங் ஞாணத³ஸ்ஸனங் ந ஸுவிஸுத்³த⁴ங் அஹோஸி, நேவ
தாவாஹங், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா
பஜாய ஸதே³வமனுஸ்ஸாய அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴தி
பச்சஞ்ஞாஸிங். யதோ ச கோ² மே, பி⁴க்க²வே, இமேஸு சதூஸு அரியஸச்சேஸு ஏவங்
திபரிவட்டங் த்³வாத³ஸாகாரங் யதா²பூ⁴தங் ஞாணத³ஸ்ஸனங் ஸுவிஸுத்³த⁴ங் அஹோஸி,
அதா²ஹங், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா
பஜாய ஸதே³வமனுஸ்ஸாய அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴தி [அபி⁴ஸம்பு³த்³தோ⁴ (ஸீ॰ ஸ்யா॰)]
பச்சஞ்ஞாஸிங். ஞாணஞ்ச பன மே த³ஸ்ஸனங் உத³பாதி³ – அகுப்பா மே விமுத்தி,
அயமந்திமா ஜாதி, நத்தி² தா³னி புனப்³ப⁴வோ’’தி. இத³மவோச ப⁴க³வா அத்தமனா
பஞ்சவக்³கி³யா பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி [இத³மவோச…பே॰… அபி⁴னந்து³ந்திவாக்யங் ஸீ॰ ஸ்யா॰ பொத்த²கேஸு நத்தி²].

இமஸ்மிஞ்ச பன வெய்யாகரணஸ்மிங்
ப⁴ஞ்ஞமானே ஆயஸ்மதோ கொண்ட³ஞ்ஞஸ்ஸ விரஜங் வீதமலங் த⁴ம்மசக்கு²ங் உத³பாதி³ –
‘‘யங் கிஞ்சி ஸமுத³யத⁴ம்மங் ஸப்³ப³ங் தங் நிரோத⁴த⁴ம்ம’’ந்தி.

17. பவத்திதே ச பன ப⁴க³வதா த⁴ம்மசக்கே, பு⁴ம்மா தே³வா ஸத்³த³மனுஸ்ஸாவேஸுங் – ‘‘ஏதங் ப⁴க³வதா பா³ராணஸியங் இஸிபதனே மிக³தா³யே
அனுத்தரங் த⁴ம்மசக்கங் பவத்திதங், அப்படிவத்தியங் ஸமணேன வா ப்³ராஹ்மணேன வா
தே³வேன வா மாரேன வா ப்³ரஹ்முனா வா கேனசி வா லோகஸ்மி’’ந்தி. பு⁴ம்மானங்
தே³வானங் ஸத்³த³ங் ஸுத்வா சாதுமஹாராஜிகா தே³வா ஸத்³த³மனுஸ்ஸாவேஸுங்…பே॰…
சாதுமஹாராஜிகானங் தே³வானங் ஸத்³த³ங் ஸுத்வா தாவதிங்ஸா தே³வா…பே॰… யாமா
தே³வா…பே॰… துஸிதா தே³வா…பே॰… நிம்மானரதீ
தே³வா…பே॰… பரனிம்மிதவஸவத்தீ தே³வா…பே॰… ப்³ரஹ்மகாயிகா தே³வா
ஸத்³த³மனுஸ்ஸாவேஸுங் – ‘‘ஏதங் ப⁴க³வதா பா³ராணஸியங் இஸிபதனே மிக³தா³யே
அனுத்தரங் த⁴ம்மசக்கங் பவத்திதங் அப்படிவத்தியங் ஸமணேன வா ப்³ராஹ்மணேன வா
தே³வேன வா மாரேன வா ப்³ரஹ்முனா வா கேனசி வா லோகஸ்மி’’ந்தி. இதிஹ, தேன
க²ணேன, தேன லயேன [தேன லயேனாதி பத³த்³வயங் ஸீ॰ ஸ்யா॰ பொத்த²கேஸு நத்தி²] தேன முஹுத்தேன யாவ ப்³ரஹ்மலோகா ஸத்³தோ³ அப்³பு⁴க்³க³ச்சி². அயஞ்ச த³ஸஸஹஸ்ஸிலோகதா⁴து ஸங்கம்பி ஸம்பகம்பி ஸம்பவேதி⁴ ;
அப்பமாணோ ச உளாரோ ஓபா⁴ஸோ லோகே பாதுரஹோஸி, அதிக்கம்ம தே³வானங்
தே³வானுபா⁴வங். அத² கோ² ப⁴க³வா இமங் உதா³னங் உதா³னேஸி – ‘‘அஞ்ஞாஸி வத, போ⁴
கொண்ட³ஞ்ஞோ, அஞ்ஞாஸி வத போ⁴ கொண்ட³ஞ்ஞோ’’தி. இதி ஹித³ங் ஆயஸ்மதோ
கொண்ட³ஞ்ஞஸ்ஸ ‘அஞ்ஞாஸிகொண்ட³ஞ்ஞோ’ த்வேவ நாமங் அஹோஸி.

18.
அத² கோ² ஆயஸ்மா அஞ்ஞாஸிகொண்ட³ஞ்ஞோ தி³ட்ட²த⁴ம்மோ பத்தத⁴ம்மோ விதி³தத⁴ம்மோ
பரியோகா³ள்ஹத⁴ம்மோ திண்ணவிசிகிச்சோ² விக³தகத²ங்கதோ² வேஸாரஜ்ஜப்பத்தோ
அபரப்பச்சயோ ஸத்து²ஸாஸனே ப⁴க³வந்தங் ஏதத³வோச – ‘‘லபெ⁴ய்யாஹங், ப⁴ந்தே,
ப⁴க³வதோ ஸந்திகே பப்³ப³ஜ்ஜங், லபெ⁴ய்யங் உபஸம்பத³’’ந்தி. ‘‘ஏஹி
பி⁴க்கூ²’’தி ப⁴க³வா அவோச – ‘‘ஸ்வாக்கா²தோ த⁴ம்மோ, சர ப்³ரஹ்மசரியங் ஸம்மா
து³க்க²ஸ்ஸ அந்தகிரியாயா’’தி. ஸாவ தஸ்ஸ ஆயஸ்மதோ உபஸம்பதா³ அஹோஸி.

19.
அத² கோ² ப⁴க³வா தத³வஸேஸே பி⁴க்கூ² த⁴ம்மியா கதா²ய ஓவதி³ அனுஸாஸி. அத² கோ²
ஆயஸ்மதோ ச வப்பஸ்ஸ ஆயஸ்மதோ ச ப⁴த்³தி³யஸ்ஸ ப⁴க³வதா த⁴ம்மியா கதா²ய
ஓவதி³யமானானங் அனுஸாஸியமானானங் விரஜங் வீதமலங் த⁴ம்மசக்கு²ங் உத³பாதி³ –
யங் கிஞ்சி ஸமுத³யத⁴ம்மங், ஸப்³ப³ங் தங் நிரோத⁴த⁴ம்மந்தி.

தே தி³ட்ட²த⁴ம்மா பத்தத⁴ம்மா
விதி³தத⁴ம்மா பரியோகா³ள்ஹத⁴ம்மா திண்ணவிசிகிச்சா² விக³தகத²ங்கதா²
வேஸாரஜ்ஜப்பத்தா அபரப்பச்சயா ஸத்து²ஸாஸனே
ப⁴க³வந்தங் ஏதத³வோசுங் – ‘‘லபெ⁴ய்யாம மயங், ப⁴ந்தே, ப⁴க³வதோ ஸந்திகே
பப்³ப³ஜ்ஜங், லபெ⁴ய்யாம உபஸம்பத³’’ந்தி. ‘‘ஏத² பி⁴க்க²வோ’’தி ப⁴க³வா அவோச –
‘‘ஸ்வாக்கா²தோ த⁴ம்மோ, சரத² ப்³ரஹ்மசரியங் ஸம்மா து³க்க²ஸ்ஸ அந்தகிரியாயா’’தி. ஸாவ தேஸங் ஆயஸ்மந்தானங் உபஸம்பதா³ அஹோஸி.

அத² கோ² ப⁴க³வா தத³வஸேஸே பி⁴க்கூ² நீஹாரப⁴த்தோ
த⁴ம்மியா கதா²ய ஓவதி³ அனுஸாஸி. யங் தயோ பி⁴க்கூ² பிண்டா³ய சரித்வா ஆஹரந்தி,
தேன ச²ப்³ப³க்³கோ³ யாபேதி. அத² கோ² ஆயஸ்மதோ ச மஹானாமஸ்ஸ ஆயஸ்மதோ ச
அஸ்ஸஜிஸ்ஸ ப⁴க³வதா த⁴ம்மியா கதா²ய ஓவதி³யமானானங் அனுஸாஸியமானானங் விரஜங்
வீதமலங் த⁴ம்மசக்கு²ங் உத³பாதி³ – யங் கிஞ்சி ஸமுத³யத⁴ம்மங், ஸப்³ப³ங் தங்
நிரோத⁴த⁴ம்மந்தி . தே தி³ட்ட²த⁴ம்மா பத்தத⁴ம்மா
விதி³தத⁴ம்மா பரியோகா³ள்ஹத⁴ம்மா திண்ணவிசிகிச்சா² விக³தகத²ங்கதா²
வேஸாரஜ்ஜப்பத்தா அபரப்பச்சயா ஸத்து²ஸாஸனே ப⁴க³வந்தங் ஏதத³வோசுங் –
‘‘லபெ⁴ய்யாம மயங், ப⁴ந்தே, ப⁴க³வதோ ஸந்திகே பப்³ப³ஜ்ஜங், லபெ⁴ய்யாம
உபஸம்பத³’’ந்தி. ‘‘ஏத² பி⁴க்க²வோ’’தி ப⁴க³வா அவோச – ‘‘ஸ்வாக்கா²தோ த⁴ம்மோ,
சரத² ப்³ரஹ்மசரியங் ஸம்மா து³க்க²ஸ்ஸ அந்தகிரியாயா’’தி. ஸாவ தேஸங்
ஆயஸ்மந்தானங் உபஸம்பதா³ அஹோஸி.

20. அத² கோ² ப⁴க³வா பஞ்சவக்³கி³யே பி⁴க்கூ² ஆமந்தேஸி –

[ஸங்॰ நி॰ 3.59 ஆத³யோ]
‘‘ரூபங், பி⁴க்க²வே, அனத்தா. ரூபஞ்ச ஹித³ங், பி⁴க்க²வே, அத்தா அப⁴விஸ்ஸ,
நயித³ங் ரூபங் ஆபா³தா⁴ய ஸங்வத்தெய்ய, லப்³பே⁴த² ச ரூபே – ‘ஏவங் மே ரூபங்
ஹோது, ஏவங் மே ரூபங் மா அஹோஸீ’தி. யஸ்மா ச கோ², பி⁴க்க²வே, ரூபங் அனத்தா,
தஸ்மா ரூபங் ஆபா³தா⁴ய ஸங்வத்ததி, ந ச லப்³ப⁴தி ரூபே – ‘ஏவங் மே ரூபங் ஹோது,
ஏவங் மே ரூபங் மா அஹோஸீ’தி. வேத³னா, அனத்தா. வேத³னா ச ஹித³ங், பி⁴க்க²வே,
அத்தா அப⁴விஸ்ஸ, நயித³ங் வேத³னா ஆபா³தா⁴ய ஸங்வத்தெய்ய, லப்³பே⁴த² ச வேத³னாய
– ‘ஏவங் மே வேத³னா ஹோது, ஏவங் மே வேத³னா மா அஹோஸீ’தி. யஸ்மா ச கோ²,
பி⁴க்க²வே, வேத³னா அனத்தா, தஸ்மா வேத³னா ஆபா³தா⁴ய ஸங்வத்ததி, ந ச லப்³ப⁴தி
வேத³னாய – ‘ஏவங் மே வேத³னா ஹோது, ஏவங் மே வேத³னா மா அஹோஸீ’தி. ஸஞ்ஞா,
அனத்தா. ஸஞ்ஞா ச ஹித³ங், பி⁴க்க²வே, அத்தா அப⁴விஸ்ஸ, நயித³ங் ஸஞ்ஞா
ஆபா³தா⁴ய ஸங்வத்தெய்ய, லப்³பே⁴த² ச ஸஞ்ஞாய – ‘ஏவங்
மே ஸஞ்ஞா ஹோது, ஏவங் மே ஸஞ்ஞா மா அஹோஸீ’தி. யஸ்மா ச கோ², பி⁴க்க²வே, ஸஞ்ஞா
அனத்தா, தஸ்மா ஸஞ்ஞா ஆபா³தா⁴ய ஸங்வத்ததி, ந ச லப்³ப⁴தி ஸஞ்ஞாய – ‘ஏவங் மே
ஸஞ்ஞா ஹோது, ஏவங் மே ஸஞ்ஞா மா அஹோஸீ’தி. ஸங்கா²ரா, அனத்தா. ஸங்கா²ரா ச
ஹித³ங், பி⁴க்க²வே, அத்தா அப⁴விஸ்ஸங்ஸு, நயித³ங் [நயிமே (க॰)]
ஸங்கா²ரா ஆபா³தா⁴ய ஸங்வத்தெய்யுங், லப்³பே⁴த² ச ஸங்கா²ரேஸு – ‘ஏவங் மே
ஸங்கா²ரா ஹொந்து, ஏவங் மே ஸங்கா²ரா மா அஹேஸு’ந்தி. யஸ்மா ச கோ², பி⁴க்க²வே,
ஸங்கா²ரா அனத்தா, தஸ்மா ஸங்கா²ரா ஆபா³தா⁴ய ஸங்வத்தந்தி, ந ச லப்³ப⁴தி
ஸங்கா²ரேஸு – ‘ஏவங் மே ஸங்கா²ரா ஹொந்து, ஏவங் மே ஸங்கா²ரா மா அஹேஸு’ந்தி.
விஞ்ஞாணங், அனத்தா. விஞ்ஞாணஞ்ச ஹித³ங் , பி⁴க்க²வே, அத்தா அப⁴விஸ்ஸ, நயித³ங் விஞ்ஞாணங் ஆபா³தா⁴ய ஸங்வத்தெய்ய ,
லப்³பே⁴த² ச விஞ்ஞாணே – ‘ஏவங் மே விஞ்ஞாணங் ஹோது, ஏவங் மே விஞ்ஞாணங் மா
அஹோஸீ’தி. யஸ்மா ச கோ², பி⁴க்க²வே, விஞ்ஞாணங் அனத்தா, தஸ்மா விஞ்ஞாணங்
ஆபா³தா⁴ய ஸங்வத்ததி, ந ச லப்³ப⁴தி விஞ்ஞாணே – ‘ஏவங் மே விஞ்ஞாணங் ஹோது,
ஏவங் மே விஞ்ஞாணங் மா அஹோஸீ’தி.

21. ‘‘தங் கிங் மஞ்ஞத², பி⁴க்க²வே, ரூபங் நிச்சங் வா அனிச்சங் வாதி? அனிச்சங், ப⁴ந்தே .
யங் பனானிச்சங் து³க்க²ங் வா தங் ஸுக²ங் வாதி? து³க்க²ங், ப⁴ந்தே. யங்
பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ஏதங்
மம, ஏஸோஹமஸ்மி, ஏஸோ மே அத்தாதி? நோ ஹேதங், ப⁴ந்தே. வேத³னா நிச்சா வா
அனிச்சா வாதி? அனிச்சா, ப⁴ந்தே. யங் பனானிச்சங் து³க்க²ங் வா தங் ஸுக²ங்
வாதி? து³க்க²ங், ப⁴ந்தே. யங் பனானிச்சங் து³க்க²ங் விபரிணாமத⁴ம்மங்,
கல்லங் நு தங் ஸமனுபஸ்ஸிதுங் – ஏதங் மம, ஏஸோஹமஸ்மி, ஏஸோ மே அத்தாதி? நோ
ஹேதங், ப⁴ந்தே. ஸஞ்ஞா நிச்சா வா அனிச்சா வாதி? அனிச்சா, ப⁴ந்தே. யங்
பனானிச்சங் து³க்க²ங் வா தங் ஸுக²ங் வாதி? து³க்க²ங், ப⁴ந்தே. யங்
பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ஏதங்
மம, ஏஸோஹமஸ்மி, ஏஸோ மே அத்தாதி? நோ ஹேதங், ப⁴ந்தே. ஸங்கா²ரா நிச்சா வா
அனிச்சா வாதி? அனிச்சா, ப⁴ந்தே. யங் பனானிச்சங், து³க்க²ங் வா தங் ஸுக²ங்
வாதி? து³க்க²ங், ப⁴ந்தே. யங் பனானிச்சங் து³க்க²ங்
விபரிணாமத⁴ம்மங், கல்லங் நு தங் ஸமனுபஸ்ஸிதுங் – ஏதங் மம, ஏஸோஹமஸ்மி, ஏஸோ
மே அத்தாதி? நோ ஹேதங், ப⁴ந்தே. விஞ்ஞாணங் நிச்சங் வா அனிச்சங் வாதி?
அனிச்சங், ப⁴ந்தே. யங் பனானிச்சங், து³க்க²ங் வா தங் ஸுக²ங் வாதி?
து³க்க²ங், ப⁴ந்தே. யங் பனானிச்சங் து³க்க²ங் விபரிணாமத⁴ம்மங், கல்லங் நு
தங் ஸமனுபஸ்ஸிதுங் – ஏதங் மம, ஏஸோஹமஸ்மி, ஏஸோ மே அத்தாதி? நோ ஹேதங்,
ப⁴ந்தே.

22. ‘‘தஸ்மாதிஹ ,
பி⁴க்க²வே, யங் கிஞ்சி ரூபங் அதீதானாக³தபச்சுப்பன்னங் அஜ்ஜ²த்தங் வா
ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே [யங் தூ³ரே வா (ஸ்யா॰)]
ஸந்திகே வா, ஸப்³ப³ங் ரூபங் – நேதங் மம, நேஸோஹமஸ்மி, ந மேஸோ அத்தாதி –
ஏவமேதங் யதா²பூ⁴தங் ஸம்மப்பஞ்ஞாய த³ட்ட²ப்³ப³ங். யா காசி வேத³னா
அதீதானாக³தபச்சுப்பன்னா அஜ்ஜ²த்தங் வா ப³ஹித்³தா⁴ வா ஓளாரிகா வா ஸுகு²மா வா
ஹீனா வா பணீதா வா யா தூ³ரே ஸந்திகே வா, ஸப்³பா³ வேத³னா – நேதங் மம,
நேஸோஹமஸ்மி, ந மேஸோ அத்தாதி – ஏவமேதங் யதா²பூ⁴தங் ஸம்மப்பஞ்ஞாய
த³ட்ட²ப்³ப³ங். யா காசி ஸஞ்ஞா அதீதானாக³தபச்சுப்பன்னா அஜ்ஜ²த்தங் வா
ப³ஹித்³தா⁴ வா ஓளாரிகா வா ஸுகு²மா வா ஹீனா வா பணீதா வா யா தூ³ரே ஸந்திகே
வா, ஸப்³பா³ ஸஞ்ஞா – நேதங் மம, நேஸோஹமஸ்மி, ந மேஸோ அத்தாதி – ஏவமேதங்
யதா²பூ⁴தங் ஸம்மப்பஞ்ஞாய த³ட்ட²ப்³ப³ங். யே கேசி ஸங்கா²ரா
அதீதானாக³தபச்சுப்பன்னா அஜ்ஜ²த்தங் வா ப³ஹித்³தா⁴ வா ஓளாரிகா வா ஸுகு²மா வா
ஹீனா வா பணீதா வா யே தூ³ரே ஸந்திகே வா, ஸப்³பே³
ஸங்கா²ரா – நேதங் மம, நேஸோஹமஸ்மி, ந மேஸோ அத்தாதி – ஏவமேதங் யதா²பூ⁴தங்
ஸம்மப்பஞ்ஞாய த³ட்ட²ப்³ப³ங். யங் கிஞ்சி விஞ்ஞாணங் அதீதானாக³தபச்சுப்பன்னங்
அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா
யங் தூ³ரே ஸந்திகே வா, ஸப்³ப³ங் விஞ்ஞாணங் – நேதங் மம, நேஸோஹமஸ்மி, ந மேஸோ
அத்தாதி – ஏவமேதங் யதா²பூ⁴தங் ஸம்மப்பஞ்ஞாய த³ட்ட²ப்³ப³ங்.

23. ‘‘ஏவங்
பஸ்ஸங், பி⁴க்க²வே, ஸுதவா அரியஸாவகோ ரூபஸ்மிம்பி நிப்³பி³ந்த³தி,
வேத³னாயபி நிப்³பி³ந்த³தி, ஸஞ்ஞாயபி நிப்³பி³ந்த³தி, ஸங்கா²ரேஸுபி
நிப்³பி³ந்த³தி, விஞ்ஞாணஸ்மிம்பி நிப்³பி³ந்த³தி; நிப்³பி³ந்த³ங் விரஜ்ஜதி;
விராகா³ விமுச்சதி; விமுத்தஸ்மிங் விமுத்தமிதி ஞாணங் ஹோதி, ‘கீ²ணா ஜாதி,
வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதீ’’தி.

24. இத³மவோச ப⁴க³வா. அத்தமனா பஞ்சவக்³கி³யா பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி [அபி⁴னந்து³ங் (ஸ்யா॰)].
இமஸ்மிஞ்ச பன வெய்யாகரணஸ்மிங் ப⁴ஞ்ஞமானே பஞ்சவக்³கி³யானங் பி⁴க்கூ²னங்
அனுபாதா³ய ஆஸவேஹி சித்தானி விமுச்சிங்ஸு. தேன கோ² பன ஸமயேன ச² லோகே அரஹந்தோ
ஹொந்தி.

பஞ்சவக்³கி³யகதா² நிட்டி²தா.

பட²மபா⁴ணவாரோ.

7. பப்³ப³ஜ்ஜாகதா²

25. தேன கோ² பன ஸமயேன பா³ராணஸியங் யஸோ நாம குலபுத்தோ ஸெட்டி²புத்தோ ஸுகு²மாலோ ஹோதி. தஸ்ஸ தயோ பாஸாதா³ ஹொந்தி – ஏகோ ஹேமந்திகோ, ஏகோ கி³ம்ஹிகோ, ஏகோ வஸ்ஸிகோ. ஸோ வஸ்ஸிகே பாஸாதே³ சத்தாரோ மாஸே [வஸ்ஸிகே பாஸாதே³ வஸ்ஸிகே சத்தாரோ மாஸே (ஸீ॰)]
நிப்புரிஸேஹி தூரியேஹி பரிசாரயமானோ ந ஹெட்டா²பாஸாத³ங் ஓரோஹதி. அத² கோ²
யஸஸ்ஸ குலபுத்தஸ்ஸ பஞ்சஹி காமகு³ணேஹி ஸமப்பிதஸ்ஸ ஸமங்கீ³பூ⁴தஸ்ஸ
பரிசாரயமானஸ்ஸ படிகச்சேவ [படிக³ச்சேவ (ஸீ॰)]
நித்³தா³ ஓக்கமி, பரிஜனஸ்ஸபி நித்³தா³ ஓக்கமி, ஸப்³ப³ரத்தியோ ச தேலபதீ³போ
ஜா²யதி. அத² கோ² யஸோ குலபுத்தோ படிகச்சேவ பபு³ஜ்ஜி²த்வா அத்³த³ஸ ஸகங்
பரிஜனங் ஸுபந்தங் – அஞ்ஞிஸ்ஸா கச்சே² வீணங், அஞ்ஞிஸ்ஸா கண்டே² முதி³ங்க³ங்,
அஞ்ஞிஸ்ஸா கச்சே² ஆளம்ப³ரங், அஞ்ஞங் விகேஸிகங், அஞ்ஞங் விக்கே²ளிகங்,
அஞ்ஞா விப்பலபந்தியோ, ஹத்த²ப்பத்தங் ஸுஸானங் மஞ்ஞே. தி³ஸ்வானஸ்ஸ ஆதீ³னவோ
பாதுரஹோஸி, நிப்³பி³தா³ய சித்தங் ஸண்டா²ஸி. அத² கோ² யஸோ குலபுத்தோ உதா³னங்
உதா³னேஸி – ‘‘உபத்³து³தங் வத போ⁴, உபஸ்ஸட்ட²ங் வத போ⁴’’தி.

அத² கோ² யஸோ குலபுத்தோ ஸுவண்ணபாது³காயோ ஆரோஹித்வா யேன
நிவேஸனத்³வாரங் தேனுபஸங்கமி. அமனுஸ்ஸா த்³வாரங் விவரிங்ஸு – மா யஸஸ்ஸ
குலபுத்தஸ்ஸ கோசி அந்தராயமகாஸி அகா³ரஸ்மா அனகா³ரியங் பப்³ப³ஜ்ஜாயாதி . அத² கோ² யஸோ குலபுத்தோ யேன நக³ரத்³வாரங் தேனுபஸங்கமி. அமனுஸ்ஸா த்³வாரங்
விவரிங்ஸு – மா யஸஸ்ஸ குலபுத்தஸ்ஸ கோசி அந்தராயமகாஸி அகா³ரஸ்மா அனகா³ரியங்
பப்³ப³ஜ்ஜாயாதி. அத² கோ² யஸோ குலபுத்தோ யேன இஸிபதனங் மிக³தா³யோ
தேனுபஸங்கமி.

26.
தேன கோ² பன ஸமயேன ப⁴க³வா ரத்தியா பச்சூஸஸமயங் பச்சுட்டா²ய அஜ்ஜோ²காஸே
சங்கமதி. அத்³த³ஸா கோ² ப⁴க³வா யஸங் குலபுத்தங் தூ³ரதோவ ஆக³ச்ச²ந்தங்,
தி³ஸ்வான சங்கமா ஓரோஹித்வா பஞ்ஞத்தே ஆஸனே நிஸீதி³. அத² கோ² யஸோ குலபுத்தோ
ப⁴க³வதோ அவிதூ³ரே உதா³னங் உதா³னேஸி – ‘‘உபத்³து³தங் வத போ⁴, உபஸ்ஸட்ட²ங் வத
போ⁴’’தி. அத² கோ² ப⁴க³வா யஸங் குலபுத்தங் ஏதத³வோச – ‘‘இத³ங் கோ², யஸ,
அனுபத்³து³தங், இத³ங் அனுபஸ்ஸட்ட²ங். ஏஹி யஸ, நிஸீத³, த⁴ம்மங் தே
தே³ஸெஸ்ஸாமீ’’தி. அத² கோ² யஸோ குலபுத்தோ – இத³ங் கிர அனுபத்³து³தங் ,
இத³ங் அனுபஸ்ஸட்ட²ந்தி ஹட்டோ² உத³க்³கோ³ ஸுவண்ணபாது³காஹி ஓரோஹித்வா யேன
ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³. ஏகமந்தங் நிஸின்னஸ்ஸ கோ² யஸஸ்ஸ குலபுத்தஸ்ஸ ப⁴க³வா அனுபுப்³பி³ங்
கத²ங் கதே²ஸி, ஸெய்யதி²த³ங் – தா³னகத²ங் ஸீலகத²ங் ஸக்³க³கத²ங், காமானங்
ஆதீ³னவங் ஓகாரங் ஸங்கிலேஸங், நெக்க²ம்மே ஆனிஸங்ஸங் பகாஸேஸி. யதா³ ப⁴க³வா
அஞ்ஞாஸி யஸங் குலபுத்தங் கல்லசித்தங்,
முது³சித்தங், வினீவரணசித்தங், உத³க்³க³சித்தங், பஸன்னசித்தங், அத² யா
பு³த்³தா⁴னங் ஸாமுக்கங்ஸிகா த⁴ம்மதே³ஸனா தங் பகாஸேஸி – து³க்க²ங்,
ஸமுத³யங், நிரோத⁴ங், மக்³க³ங். ஸெய்யதா²பி நாம
ஸுத்³த⁴ங் வத்த²ங் அபக³தகாளகங் ஸம்மதே³வ ரஜனங் படிக்³க³ண்ஹெய்ய, ஏவமேவ
யஸஸ்ஸ குலபுத்தஸ்ஸ தஸ்மிங்யேவ ஆஸனே விரஜங் வீதமலங் த⁴ம்மசக்கு²ங் உத³பாதி³ –
யங் கிஞ்சி ஸமுத³யத⁴ம்மங், ஸப்³ப³ங் தங் நிரோத⁴த⁴ம்மந்தி.

27.
அத² கோ² யஸஸ்ஸ குலபுத்தஸ்ஸ மாதா பாஸாத³ங் அபி⁴ருஹித்வா யஸங் குலபுத்தங்
அபஸ்ஸந்தீ யேன ஸெட்டி² க³ஹபதி தேனுபஸங்கமி, உபஸங்கமித்வா ஸெட்டி²ங்
க³ஹபதிங் ஏதத³வோச – ‘‘புத்தோ தே, க³ஹபதி, யஸோ ந தி³ஸ்ஸதீ’’தி. அத² கோ²
ஸெட்டி² க³ஹபதி சதுத்³தி³ஸா அஸ்ஸதூ³தே உய்யோஜெத்வா ஸாமங்யேவ யேன இஸிபதனங்
மிக³தா³யோ தேனுபஸங்கமி. அத்³த³ஸா கோ² ஸெட்டி² க³ஹபதி ஸுவண்ணபாது³கானங்
நிக்கே²பங், தி³ஸ்வான தங்யேவ அனுக³மாஸி [அனுக³மா (ஸீ॰ ஸ்யா॰)].
அத்³த³ஸா கோ² ப⁴க³வா ஸெட்டி²ங் க³ஹபதிங் தூ³ரதோவ ஆக³ச்ச²ந்தங், தி³ஸ்வான
ப⁴க³வதோ ஏதத³ஹோஸி – ‘‘யங்னூனாஹங் ததா²ரூபங் இத்³தா⁴பி⁴ஸங்கா²ரங்
அபி⁴ஸங்க²ரெய்யங் யதா² ஸெட்டி² க³ஹபதி இத⁴ நிஸின்னோ இத⁴ நிஸின்னங் யஸங்
குலபுத்தங் ந பஸ்ஸெய்யா’’தி. அத² கோ² ப⁴க³வா ததா²ரூபங் இத்³தா⁴பி⁴ஸங்கா²ரங்
அபி⁴ஸங்க²ரேஸி. அத² கோ² ஸெட்டி² க³ஹபதி யேன ப⁴க³வா தேனுபஸங்கமி,
உபஸங்கமித்வா ப⁴க³வந்தங் ஏதத³வோச – ‘‘அபி, ப⁴ந்தே, ப⁴க³வா யஸங் குலபுத்தங்
பஸ்ஸெய்யா’’தி? தேன ஹி, க³ஹபதி, நிஸீத³, அப்பேவ நாம இத⁴ நிஸின்னோ இத⁴
நிஸின்னங் யஸங் குலபுத்தங் பஸ்ஸெய்யாஸீதி. அத² கோ² ஸெட்டி² க³ஹபதி – இதே⁴வ
கிராஹங் நிஸின்னோ இத⁴ நிஸின்னங் யஸங் குலபுத்தங்
பஸ்ஸிஸ்ஸாமீதி ஹட்டோ² உத³க்³கோ³ ப⁴க³வந்தங் அபி⁴வாதெ³த்வா ஏகமந்தங்
நிஸீதி³. ஏகமந்தங் நிஸின்னஸ்ஸ கோ² ஸெட்டி²ஸ்ஸ க³ஹபதிஸ்ஸ ப⁴க³வா
அனுபுப்³பி³ங் கத²ங் கதே²ஸி, ஸெய்யதி²த³ங் – தா³னகத²ங் ஸீலகத²ங்
ஸக்³க³கத²ங், காமானங் ஆதீ³னவங் ஓகாரங் ஸங்கிலேஸங், நெக்க²ம்மே ஆனிஸங்ஸங்
பகாஸேஸி. யதா³ ப⁴க³வா அஞ்ஞாஸி ஸெட்டி²ங் க³ஹபதிங் கல்லசித்தங்,
முது³சித்தங், வினீவரணசித்தங், உத³க்³க³சித்தங், பஸன்னசித்தங், அத² யா
பு³த்³தா⁴னங் ஸாமுக்கங்ஸிகா த⁴ம்மதே³ஸனா, தங் பகாஸேஸி – து³க்க²ங்,
ஸமுத³யங், நிரோத⁴ங், மக்³க³ங். ஸெய்யதா²பி நாம ஸுத்³த⁴ங் வத்த²ங்
அபக³தகாளகங் ஸம்மதே³வ ரஜனங் படிக்³க³ண்ஹெய்ய ஏவமேவ ஸெட்டி²ஸ்ஸ க³ஹபதிஸ்ஸ
தஸ்மிங்யேவ ஆஸனே விரஜங் வீதமலங் த⁴ம்மசக்கு²ங் உத³பாதி³ – யங் கிஞ்சி
ஸமுத³யத⁴ம்மங், ஸப்³ப³ங் தங் நிரோத⁴த⁴ம்மந்தி. அத² கோ² ஸெட்டி² க³ஹபதி
தி³ட்ட²த⁴ம்மோ பத்தத⁴ம்மோ விதி³தத⁴ம்மோ பரியோகா³ள்ஹத⁴ம்மோ திண்ணவிசிகிச்சோ²
விக³தகத²ங்கதோ² வேஸாரஜ்ஜப்பத்தோ அபரப்பச்சயோ ஸத்து²ஸாஸனே ப⁴க³வந்தங்
ஏதத³வோச – ‘‘அபி⁴க்கந்தங், ப⁴ந்தே, அபி⁴க்கந்தங், ப⁴ந்தே, ஸெய்யதா²பி,
ப⁴ந்தே, நிக்குஜ்ஜிதங் [நிகுஜ்ஜிதங் (க॰)] வா
உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங்
ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய – சக்கு²மந்தோ ரூபானி
த³க்க²ந்தீதி – ஏவமேவங் ப⁴க³வதா அனேகபரியாயேன த⁴ம்மோ பகாஸிதோ. ஏஸாஹங்,
ப⁴ந்தே, ப⁴க³வந்தங் ஸரணங் க³ச்சா²மி, த⁴ம்மஞ்ச, பி⁴க்கு²ஸங்க⁴ஞ்ச. உபாஸகங்
மங் ப⁴க³வா தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி . ஸோவ லோகே பட²மங் உபாஸகோ அஹோஸி தேவாசிகோ .

28.
அத² கோ² யஸஸ்ஸ குலபுத்தஸ்ஸ பிதுனோ த⁴ம்மே தே³ஸியமானே யதா²தி³ட்ட²ங்
யதா²விதி³தங் பூ⁴மிங் பச்சவெக்க²ந்தஸ்ஸ அனுபாதா³ய ஆஸவேஹி சித்தங் விமுச்சி.
அத² கோ² ப⁴க³வதோ ஏதத³ஹோஸி – ‘‘யஸஸ்ஸ கோ² குலபுத்தஸ்ஸ பிதுனோ த⁴ம்மே
தே³ஸியமானே யதா²தி³ட்ட²ங் யதா²விதி³தங் பூ⁴மிங் பச்சவெக்க²ந்தஸ்ஸ அனுபாதா³ய
ஆஸவேஹி சித்தங் விமுத்தங். அப⁴ப்³போ³ கோ² யஸோ குலபுத்தோ ஹீனாயாவத்தித்வா
காமே பரிபு⁴ஞ்ஜிதுங், ஸெய்யதா²பி புப்³பே³ அகா³ரிகபூ⁴தோ; யங்னூனாஹங் தங்
இத்³தா⁴பி⁴ஸங்கா²ரங் படிப்பஸ்ஸம்பெ⁴ய்ய’’ந்தி. அத² கோ² ப⁴க³வா தங்
இத்³தா⁴பி⁴ஸங்கா²ரங் படிப்பஸ்ஸம்பே⁴ஸி. அத்³த³ஸா கோ² ஸெட்டி² க³ஹபதி யஸங்
குலபுத்தங் நிஸின்னங், தி³ஸ்வான யஸங் குலபுத்தங் ஏதத³வோச – ‘‘மாதா தே தாத,
யஸ, பரிதே³வ [பரிதே³வீ (க॰)] ஸோகஸமாபன்னா, தே³ஹி
மாதுயா ஜீவித’’ந்தி. அத² கோ² யஸோ குலபுத்தோ ப⁴க³வந்தங் உல்லோகேஸி. அத² கோ²
ப⁴க³வா ஸெட்டி²ங் க³ஹபதிங் ஏதத³வோச – ‘‘தங் கிங் மஞ்ஞஸி, க³ஹபதி, யஸ்ஸ
ஸெக்கே²ன ஞாணேன ஸெக்கே²ன த³ஸ்ஸனேன த⁴ம்மோ தி³ட்டோ² விதி³தோ ஸெய்யதா²பி தயா?
தஸ்ஸ யதா²தி³ட்ட²ங் யதா²விதி³தங் பூ⁴மிங் பச்சவெக்க²ந்தஸ்ஸ அனுபாதா³ய
ஆஸவேஹி சித்தங் விமுத்தங். ப⁴ப்³போ³ நு கோ² ஸோ, க³ஹபதி, ஹீனாயாவத்தித்வா
காமே பரிபு⁴ஞ்ஜிதுங் ஸெய்யதா²பி புப்³பே³ அகா³ரிகபூ⁴தோ’’தி? ‘‘நோ ஹேதங்,
ப⁴ந்தே’’. ‘‘யஸஸ்ஸ கோ², க³ஹபதி, குலபுத்தஸ்ஸ ஸெக்கே²ன ஞாணேன ஸெக்கே²ன
த³ஸ்ஸனேன த⁴ம்மோ தி³ட்டோ² விதி³தோ ஸெய்யதா²பி தயா. தஸ்ஸ யதா²தி³ட்ட²ங் யதா²விதி³தங் பூ⁴மிங் பச்சவெக்க²ந்தஸ்ஸ அனுபாதா³ய ஆஸவேஹி
சித்தங் விமுத்தங். அப⁴ப்³போ³ கோ², க³ஹபதி, யஸோ குலபுத்தோ ஹீனாயாவத்தித்வா
காமே பரிபு⁴ஞ்ஜிதுங் ஸெய்யதா²பி புப்³பே³ அகா³ரிகபூ⁴தோ’’தி. ‘‘லாபா⁴,
ப⁴ந்தே, யஸஸ்ஸ குலபுத்தஸ்ஸ, ஸுலத்³த⁴ங், ப⁴ந்தே, யஸஸ்ஸ குலபுத்தஸ்ஸ, யதா²
யஸஸ்ஸ குலபுத்தஸ்ஸ அனுபாதா³ய ஆஸவேஹி சித்தங் விமுத்தங். அதி⁴வாஸேது மே,
ப⁴ந்தே, ப⁴க³வா அஜ்ஜதனாய ப⁴த்தங் யஸேன குலபுத்தேன பச்சா²ஸமணேனா’’தி.
அதி⁴வாஸேஸி ப⁴க³வா துண்ஹீபா⁴வேன. அத² கோ² ஸெட்டி² க³ஹபதி ப⁴க³வதோ
அதி⁴வாஸனங் விதி³த்வா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங்
கத்வா பக்காமி. அத² கோ² யஸோ குலபுத்தோ அசிரபக்கந்தே ஸெட்டி²ம்ஹி க³ஹபதிம்ஹி
ப⁴க³வந்தங் ஏதத³வோச – ‘‘லபெ⁴ய்யாஹங், ப⁴ந்தே, ப⁴க³வதோ ஸந்திகே
பப்³ப³ஜ்ஜங், லபெ⁴ய்யங் உபஸம்பத³’’ந்தி. ‘‘ஏஹி பி⁴க்கூ²’’தி ப⁴க³வா அவோச –
‘‘ஸ்வாக்கா²தோ த⁴ம்மோ, சர ப்³ரஹ்மசரியங் ஸம்மா து³க்க²ஸ்ஸ
அந்தகிரியாயா’’தி. ஸாவ தஸ்ஸ ஆயஸ்மதோ உபஸம்பதா³ அஹோஸி. தேன கோ² பன ஸமயேன ஸத்த லோகே அரஹந்தோ ஹொந்தி.

யஸஸ்ஸ பப்³ப³ஜ்ஜா நிட்டி²தா.

29. அத²
கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய ஆயஸ்மதா யஸேன
பச்சா²ஸமணேன யேன ஸெட்டி²ஸ்ஸ க³ஹபதிஸ்ஸ நிவேஸனங் தேனுபஸங்கமி, உபஸங்கமித்வா
பஞ்ஞத்தே ஆஸனே நிஸீதி³. அத² கோ² ஆயஸ்மதோ யஸஸ்ஸ மாதா ச புராணது³தியிகா ச யேன
ப⁴க³வா தேனுபஸங்கமிங்ஸு, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³ங்ஸு. தாஸங் ப⁴க³வா அனுபுப்³பி³ங் கத²ங் கதே²ஸி, ஸெய்யதி²த³ங் –
தா³னகத²ங் ஸீலகத²ங் ஸக்³க³கத²ங், காமானங் ஆதீ³னவங் ஓகாரங் ஸங்கிலேஸங்,
நெக்க²ம்மே ஆனிஸங்ஸங் பகாஸேஸி. யதா³ தா ப⁴க³வா அஞ்ஞாஸி கல்லசித்தா,
முது³சித்தா, வினீவரணசித்தா, உத³க்³க³சித்தா, பஸன்னசித்தா, அத² யா
பு³த்³தா⁴னங் ஸாமுக்கங்ஸிகா த⁴ம்மதே³ஸனா தங் பகாஸேஸி – து³க்க²ங்,
ஸமுத³யங், நிரோத⁴ங், மக்³க³ங் . ஸெய்யதா²பி நாம
ஸுத்³த⁴ங் வத்த²ங் அபக³தகாளகங் ஸம்மதே³வ ரஜனங் படிக்³க³ண்ஹெய்ய, ஏவமேவ
தாஸங் தஸ்மிங்யேவ ஆஸனே விரஜங் வீதமலங் த⁴ம்மசக்கு²ங் உத³பாதி³ – யங் கிஞ்சி
ஸமுத³யத⁴ம்மங், ஸப்³ப³ங் தங் நிரோத⁴த⁴ம்மந்தி. தா தி³ட்ட²த⁴ம்மா
பத்தத⁴ம்மா விதி³தத⁴ம்மா பரியோகா³ள்ஹத⁴ம்மா திண்ணவிசிகிச்சா²
விக³தகத²ங்கதா² வேஸாரஜ்ஜப்பத்தா அபரப்பச்சயா ஸத்து²ஸாஸனே ப⁴க³வந்தங்
ஏதத³வோசுங் – ‘‘அபி⁴க்கந்தங், ப⁴ந்தே, அபி⁴க்கந்தங், ப⁴ந்தே…பே॰… ஏதா மயங்,
ப⁴ந்தே, ப⁴க³வந்தங் ஸரணங் க³ச்சா²ம, த⁴ம்மஞ்ச,
பி⁴க்கு²ஸங்க⁴ஞ்ச. உபாஸிகாயோ நோ ப⁴க³வா தா⁴ரேது அஜ்ஜதக்³கே³ பாணுபேதா ஸரணங்
க³தா’’தி. தா ச லோகே பட²மங் உபாஸிகா அஹேஸுங் தேவாசிகா.

அத² கோ² ஆயஸ்மதோ யஸஸ்ஸ மாதா ச பிதா ச புராணது³தியிகா ச
ப⁴க³வந்தஞ்ச ஆயஸ்மந்தஞ்ச யஸங் பணீதேன கா²த³னீயேன போ⁴ஜனீயேன ஸஹத்தா²
ஸந்தப்பெத்வா ஸம்பவாரெத்வா, ப⁴க³வந்தங் பு⁴த்தாவிங்
ஓனீதபத்தபாணிங், ஏகமந்தங் நிஸீதி³ங்ஸு. அத² கோ² ப⁴க³வா ஆயஸ்மதோ யஸஸ்ஸ
மாதரஞ்ச பிதரஞ்ச புராணது³தியிகஞ்ச த⁴ம்மியா கதா²ய ஸந்த³ஸ்ஸெத்வா
ஸமாத³பெத்வா ஸமுத்தேஜெத்வா ஸம்பஹங்ஸெத்வா உட்டா²யாஸனா பக்காமி.

30. அஸ்ஸோஸுங் கோ² ஆயஸ்மதோ யஸஸ்ஸ சத்தாரோ கி³ஹிஸஹாயகா பா³ராணஸியங் ஸெட்டா²னுஸெட்டீ²னங் குலானங் புத்தா – விமலோ, ஸுபா³ஹு ,
புண்ணஜி, க³வம்பதி – யஸோ கிர குலபுத்தோ கேஸமஸ்ஸுங் ஓஹாரெத்வா காஸாயானி
வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதோதி. ஸுத்வான நேஸங்
ஏதத³ஹோஸி – ‘‘ந ஹி நூன ஸோ ஓரகோ த⁴ம்மவினயோ, ந ஸா ஓரகா பப்³ப³ஜ்ஜா, யத்த²
யஸோ குலபுத்தோ கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜிதோ’’தி. தே [தே சத்தாரோ ஜனா (க॰)]
யேனாயஸ்மா யஸோ தேனுபஸங்கமிங்ஸு, உபஸங்கமித்வா ஆயஸ்மந்தங் யஸங்
அபி⁴வாதெ³த்வா ஏகமந்தங் அட்ட²ங்ஸு. அத² கோ² ஆயஸ்மா யஸோ தே சத்தாரோ
கி³ஹிஸஹாயகே ஆதா³ய யேன ப⁴க³வா தேனுபஸங்கமி, உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா
யஸோ ப⁴க³வந்தங் ஏதத³வோச – ‘‘இமே மே, ப⁴ந்தே, சத்தாரோ கி³ஹிஸஹாயகா
பா³ராணஸியங் ஸெட்டா²னுஸெட்டீ²னங் குலானங் புத்தா – விமலோ, ஸுபா³ஹு,
புண்ணஜி, க³வம்பதி. இமே [இமே சத்தாரோ (க॰)] ப⁴க³வா ஓவத³து அனுஸாஸதூ’’தி .
தேஸங் ப⁴க³வா அனுபுப்³பி³ங் கத²ங் கதே²ஸி, ஸெய்யதி²த³ங் – தா³னகத²ங்
ஸீலகத²ங் ஸக்³க³கத²ங் காமானங் ஆதீ³னவங் ஓகாரங் ஸங்கிலேஸங் நெக்க²ம்மே
ஆனிஸங்ஸங் பகாஸேஸி, யதா³ தே ப⁴க³வா அஞ்ஞாஸி கல்லசித்தே முது³சித்தே
வினீவரணசித்தே உத³க்³க³சித்தே பஸன்னசித்தே, அத² யா பு³த்³தா⁴னங்
ஸாமுக்கங்ஸிகா த⁴ம்மதே³ஸனா, தங் பகாஸேஸி து³க்க²ங் ஸமுத³யங் நிரோத⁴ங்
மக்³க³ங், ஸெய்யதா²பி நாம ஸுத்³த⁴ங் வத்த²ங் அபக³தகாளகங் ஸம்மதே³வ ரஜனங்
படிக்³க³ண்ஹெய்ய, ஏவமேவ தேஸங் தஸ்மிங்யேவ ஆஸனே விரஜங் வீதமலங்
த⁴ம்மசக்கு²ங் உத³பாதி³ ‘‘யங் கிஞ்சி ஸமுத³யத⁴ம்மங், ஸப்³ப³ங் தங்
நிரோத⁴த⁴ம்ம’’ந்தி. தே தி³ட்ட²த⁴ம்மா பத்தத⁴ம்மா விதி³தத⁴ம்மா
பரியோகா³ள்ஹத⁴ம்மா திண்ணவிசிகிச்சா² விக³தகத²ங்கதா² வேஸாரஜ்ஜப்பத்தா
அபரப்பச்சயா ஸத்து²ஸாஸனே ப⁴க³வந்தங் ஏதத³வோசுங் – ‘‘லபெ⁴ய்யாம மயங்,
ப⁴ந்தே, ப⁴க³வதோ ஸந்திகே பப்³ப³ஜ்ஜங், லபெ⁴ய்யாம உபஸம்பத³’’ந்தி. ‘‘ஏத²
பி⁴க்க²வோ’’தி ப⁴க³வா அவோச – ‘‘ஸ்வாக்கா²தோ த⁴ம்மோ, சரத² ப்³ரஹ்மசரியங்
ஸம்மா து³க்க²ஸ்ஸ அந்தகிரியாயா’’தி. ஸாவ தேஸங் ஆயஸ்மந்தானங் உபஸம்பதா³
அஹோஸி. அத² கோ² ப⁴க³வா தே பி⁴க்கூ² த⁴ம்மியா கதா²ய ஓவதி³ அனுஸாஸி. தேஸங்
ப⁴க³வதா த⁴ம்மியா கதா²ய ஓவதி³யமானானங் அனுஸாஸியமானானங் அனுபாதா³ய ஆஸவேஹி சித்தானி விமுச்சிங்ஸு. தேன கோ² பன ஸமயேன ஏகாத³ஸ லோகே அரஹந்தோ ஹொந்தி.

சதுகி³ஹிஸஹாயகபப்³ப³ஜ்ஜா நிட்டி²தா.

31. அஸ்ஸோஸுங்
கோ² ஆயஸ்மதோ யஸஸ்ஸ பஞ்ஞாஸமத்தா கி³ஹிஸஹாயகா ஜானபதா³
புப்³பா³னுபுப்³ப³கானங் குலானங் புத்தா – யஸோ கிர குலபுத்தோ கேஸமஸ்ஸுங்
ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங்
பப்³ப³ஜிதோதி. ஸுத்வான நேஸங் ஏதத³ஹோஸி – ‘‘ந ஹி நூன ஸோ ஓரகோ த⁴ம்மவினயோ, ந
ஸா ஓரகா பப்³ப³ஜ்ஜா, யத்த² யஸோ குலபுத்தோ கேஸமஸ்ஸுங் ஓஹாரெத்வா காஸாயானி
வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதோ’’தி. தே யேனாயஸ்மா
யஸோ தேனுபஸங்கமிங்ஸு, உபஸங்கமித்வா ஆயஸ்மந்தங் யஸங் அபி⁴வாதெ³த்வா
ஏகமந்தங் அட்ட²ங்ஸு. அத² கோ² ஆயஸ்மா யஸோ தே பஞ்ஞாஸமத்தே கி³ஹிஸஹாயகே ஆதா³ய
யேன ப⁴க³வா தேனுபஸங்கமி, உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா யஸோ
ப⁴க³வந்தங் ஏதத³வோச – ‘‘இமே மே, ப⁴ந்தே, பஞ்ஞாஸமத்தா கி³ஹிஸஹாயகா ஜானபதா³
புப்³பா³னுபுப்³ப³கானங் குலானங் புத்தா. இமே ப⁴க³வா ஓவத³து அனுஸாஸதூ’’தி.
தேஸங் ப⁴க³வா அனுபுப்³பி³ங் கத²ங் கதே²ஸி, ஸெய்யதி²த³ங் – தா³னகத²ங்
ஸீலகத²ங் ஸக்³க³கத²ங் காமானங் ஆதீ³னவங் ஓகாரங் ஸங்கிலேஸங் நெக்க²ம்மே
ஆனிஸங்ஸங் பகாஸேஸி. யதா³ தே ப⁴க³வா அஞ்ஞாஸி கல்லசித்தே முது³சித்தே
வினீவரணசித்தே உத³க்³க³சித்தே பஸன்னசித்தே, அத² யா பு³த்³தா⁴னங்
ஸாமுக்கங்ஸிகா த⁴ம்மதே³ஸனா, தங் பகாஸேஸி து³க்க²ங்
ஸமுத³யங் நிரோத⁴ங் மக்³க³ங், ஸெய்யதா²பி நாம ஸுத்³த⁴ங் வத்த²ங் அபக³தகாளகங்
ஸம்மதே³வ ரஜனங் படிக்³க³ண்ஹெய்ய, ஏவமேவ தேஸங் தஸ்மிங்யேவ ஆஸனே விரஜங்
வீதமலங் த⁴ம்மசக்கு²ங் உத³பாதி³ யங் கிஞ்சி ஸமுத³யத⁴ம்மங், ஸப்³ப³ங் தங்
நிரோத⁴த⁴ம்மந்தி. தே தி³ட்ட²த⁴ம்மா பத்தத⁴ம்மா விதி³தத⁴ம்மா
பரியோகா³ள்ஹத⁴ம்மா திண்ணவிசிகிச்சா² விக³தகத²ங்கதா² வேஸாரஜ்ஜப்பத்தா
அபரப்பச்சயா ஸத்து²ஸாஸனே ப⁴க³வந்தங் ஏதத³வோசுங் – ‘‘லபெ⁴ய்யாம மயங்,
ப⁴ந்தே, ப⁴க³வதோ ஸந்திகே பப்³ப³ஜ்ஜங், லபெ⁴ய்யாம உபஸம்பத³’’ந்தி. ‘‘ஏத²
பி⁴க்க²வோ’’தி ப⁴க³வா அவோச – ‘‘ஸ்வாக்கா²தோ த⁴ம்மோ, சரத² ப்³ரஹ்மசரியங்
ஸம்மா து³க்க²ஸ்ஸ அந்தகிரியாயா’’தி. ஸாவ தேஸங் ஆயஸ்மந்தானங் உபஸம்பதா³
அஹோஸி. அத² கோ² ப⁴க³வா தே பி⁴க்கூ² த⁴ம்மியா கதா²ய ஓவதி³ அனுஸாஸி. தேஸங்
ப⁴க³வதா த⁴ம்மியா கதா²ய ஓவதி³யமானானங் அனுஸாஸியமானானங் அனுபாதா³ய ஆஸவேஹி
சித்தானி விமுச்சிங்ஸு. தேன கோ² பன ஸமயேன ஏகஸட்டி² லோகே அரஹந்தோ ஹொந்தி.

பஞ்ஞாஸகி³ஹிஸஹாயகபப்³ப³ஜ்ஜா நிட்டி²தா.

நிட்டி²தா ச பப்³ப³ஜ்ஜாகதா².

8. மாரகதா²

32. அத² கோ² ப⁴க³வா தே பி⁴க்கூ² ஆமந்தேஸி [ஸங்॰ நி॰ 1.141 மாரஸங்யுத்தேபி] – ‘‘முத்தாஹங், பி⁴க்க²வே, ஸப்³ப³பாஸேஹி, யே தி³ப்³பா³ யே ச மானுஸா. தும்ஹேபி, பி⁴க்க²வே ,
முத்தா ஸப்³ப³பாஸேஹி, யே தி³ப்³பா³ யே ச மானுஸா. சரத², பி⁴க்க²வே, சாரிகங்
ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய
தே³வமனுஸ்ஸானங். மா ஏகேன த்³வே அக³மித்த². தே³ஸேத², பி⁴க்க²வே, த⁴ம்மங்
ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேத². ஸந்தி ஸத்தா அப்பரஜக்க²ஜாதிகா ,
அஸ்ஸவனதா த⁴ம்மஸ்ஸ பரிஹாயந்தி, ப⁴விஸ்ஸந்தி த⁴ம்மஸ்ஸ அஞ்ஞாதாரோ. அஹம்பி,
பி⁴க்க²வே, யேன உருவேலா ஸேனானிக³மோ தேனுபஸங்கமிஸ்ஸாமி த⁴ம்மதே³ஸனாயா’’தி.

33. அத² கோ² மாரோ பாபிமா யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் கா³தா²ய அஜ்ஜ²பா⁴ஸி –

‘‘ப³த்³தோ⁴ஸி ஸப்³ப³பாஸேஹி, யே தி³ப்³பா³ யே ச மானுஸா;

மஹாப³ந்த⁴னப³த்³தோ⁴ஸி, ந மே ஸமண மொக்க²ஸீ’’தி.

‘‘முத்தாஹங் [முத்தோஹங் (ஸீ॰ ஸ்யா॰)] ஸப்³ப³பாஸேஹி, யே தி³ப்³பா³ யே ச மானுஸா;

மஹாப³ந்த⁴னமுத்தொம்ஹி, நிஹதோ த்வமஸி அந்தகாதி.

[ஸங்॰ நி॰ 1.151 மாரஸங்யுத்தேபி] ‘‘அந்தலிக்க²சரோ பாஸோ, ய்வாயங் சரதி மானஸோ;

தேன தங் பா³த⁴யிஸ்ஸாமி, ந மே ஸமண மொக்க²ஸீதி.

[ஸங்॰ நி॰ 1.1151 மாரஸங்யுத்தேபி] ‘‘ரூபா ஸத்³தா³ ரஸா க³ந்தா⁴, பொ²ட்ட²ப்³பா³ ச மனோரமா;

எத்த² மே விக³தோ ச²ந்தோ³, நிஹதோ த்வமஸி அந்தகா’’தி.

அத² கோ² மாரோ பாபிமா – ஜானாதி மங் ப⁴க³வா, ஜானாதி மங் ஸுக³தோதி து³க்கீ² து³ம்மனோ

தத்தே²வந்தரதா⁴யீதி.

மாரகதா² நிட்டி²தா.

9. பப்³ப³ஜ்ஜூபஸம்பதா³கதா²

34. தேன கோ² பன ஸமயேன பி⁴க்கூ² நானாதி³ஸா நானாஜனபதா³ பப்³ப³ஜ்ஜாபெக்கே² ச உபஸம்பதா³பெக்கே² ச ஆனெந்தி – ப⁴க³வா நே பப்³பா³ஜெஸ்ஸதி
உபஸம்பாதெ³ஸ்ஸதீதி. தத்த² பி⁴க்கூ² சேவ கிலமந்தி பப்³ப³ஜ்ஜாபெக்கா² ச
உபஸம்பதா³பெக்கா² ச. அத² கோ² ப⁴க³வதோ ரஹோக³தஸ்ஸ படிஸல்லீனஸ்ஸ ஏவங் சேதஸோ
பரிவிதக்கோ உத³பாதி³ – ‘‘ஏதரஹி கோ² பி⁴க்கூ² நானாதி³ஸா நானாஜனபதா³
பப்³ப³ஜ்ஜாபெக்கே² ச உபஸம்பதா³பெக்கே² ச ஆனெந்தி – ப⁴க³வா நே
பப்³பா³ஜெஸ்ஸதி உபஸம்பாதெ³ஸ்ஸதீதி. தத்த² பி⁴க்கூ²
சேவ கிலமந்தி பப்³ப³ஜ்ஜாபெக்கா² ச உபஸம்பதா³பெக்கா² ச. யங்னூனாஹங்
பி⁴க்கூ²னங் அனுஜானெய்யங் – தும்ஹேவ தா³னி, பி⁴க்க²வே, தாஸு தாஸு தி³ஸாஸு
தேஸு தேஸு ஜனபதே³ஸு பப்³பா³ஜேத² உபஸம்பாதே³தா²’’தி. அத² கோ² ப⁴க³வா
ஸாயன்ஹஸமயங் படிஸல்லானா வுட்டி²தோ ஏதஸ்மிங் நிதா³னே ஏதஸ்மிங் பகரணே
த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘இத⁴
மய்ஹங், பி⁴க்க²வே, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³
– ‘ஏதரஹி கோ² பி⁴க்கூ² நானாதி³ஸா நானாஜனபதா³ பப்³ப³ஜ்ஜாபெக்கே² ச
உபஸம்பதா³பெக்கே² ச ஆனெந்தி ப⁴க³வா நே பப்³பா³ஜெஸ்ஸதி உபஸம்பாதெ³ஸ்ஸதீதி,
தத்த² பி⁴க்கூ² சேவ கிலமந்தி பப்³ப³ஜ்ஜாபெக்கா² ச உபஸம்பதா³பெக்கா² ச,
யங்னூனாஹங் பி⁴க்கூ²னங் அனுஜானெய்யங் தும்ஹேவ தா³னி, பி⁴க்க²வே, தாஸு தாஸு
தி³ஸாஸு தேஸு தேஸு ஜனபதே³ஸு பப்³பா³ஜேத² உபஸம்பாதே³தா²’’’தி, அனுஜானாமி,
பி⁴க்க²வே, தும்ஹேவ தா³னி தாஸு தாஸு தி³ஸாஸு தேஸு தேஸு ஜனபதே³ஸு
பப்³பா³ஜேத² உபஸம்பாதே³த². ஏவஞ்ச பன, பி⁴க்க²வே, பப்³பா³ஜேதப்³போ³
உபஸம்பாதே³தப்³போ³ –

பட²மங் கேஸமஸ்ஸுங் ஓஹாராபெத்வா [ஓஹாரெத்வா (க॰)],
காஸாயானி வத்தா²னி அச்சா²தா³பெத்வா, ஏகங்ஸங் உத்தராஸங்க³ங் காராபெத்வா,
பி⁴க்கூ²னங் பாதே³ வந்தா³பெத்வா, உக்குடிகங் நிஸீதா³பெத்வா, அஞ்ஜலிங்
பக்³க³ண்ஹாபெத்வா, ஏவங் வதே³ஹீதி வத்தப்³போ³ – பு³த்³த⁴ங் ஸரணங் க³ச்சா²மி,
த⁴ம்மங் ஸரணங் க³ச்சா²மி, ஸங்க⁴ங் ஸரணங் க³ச்சா²மி; து³தியம்பி பு³த்³த⁴ங்
ஸரணங் க³ச்சா²மி, து³தியம்பி த⁴ம்மங் ஸரணங் க³ச்சா²மி, து³தியம்பி ஸங்க⁴ங்
ஸரணங் க³ச்சா²மி; ததியம்பி பு³த்³த⁴ங் ஸரணங் க³ச்சா²மி, ததியம்பி த⁴ம்மங்
ஸரணங் க³ச்சா²மி, ததியம்பி ஸங்க⁴ங் ஸரணங் க³ச்சா²மீ’’தி. ‘‘அனுஜானாமி,
பி⁴க்க²வே, இமேஹி தீஹி ஸரணக³மனேஹி பப்³ப³ஜ்ஜங் உபஸம்பத³’’ந்தி.

தீஹி ஸரணக³மனேஹி உபஸம்பதா³கதா² நிட்டி²தா.

10. து³தியமாரகதா²

35. அத² கோ² ப⁴க³வா வஸ்ஸங்வுட்டோ² [வஸ்ஸங்வுத்தோ² (ஸீ॰)] பி⁴க்கூ² ஆமந்தேஸி [ஸங்॰ நி॰ 1.155] – ‘‘மய்ஹங் கோ², பி⁴க்க²வே, யோனிஸோ மனஸிகாரா யோனிஸோ ஸம்மப்பதா⁴னா அனுத்தரா விமுத்தி அனுப்பத்தா, அனுத்தரா விமுத்தி ஸச்சி²கதா . தும்ஹேபி, பி⁴க்க²வே, யோனிஸோ மனஸிகாரா
யோனிஸோ ஸம்மப்பதா⁴னா அனுத்தரங் விமுத்திங் அனுபாபுணாத², அனுத்தரங்
விமுத்திங் ஸச்சி²கரோதா²’’தி. அத² கோ² மாரோ பாபிமா யேன ப⁴க³வா தேனுபஸங்கமி,
உபஸங்கமித்வா ப⁴க³வந்தங் கா³தா²ய அஜ்ஜ²பா⁴ஸி –

‘‘ப³த்³தோ⁴ஸி மாரபாஸேஹி, யே தி³ப்³பா³ யே ச மானுஸா;

மஹாப³ந்த⁴னப³த்³தோ⁴ஸி [மாரப³ந்த⁴னப³த்³தோ⁴ஸி (ஸீ॰ ஸ்யா॰)], ந மே ஸமண மொக்க²ஸீ’’தி.

‘‘முத்தாஹங் மாரபாஸேஹி, யே தி³ப்³பா³ யே ச மானுஸா;

மஹாப³ந்த⁴னமுத்தொம்ஹி [மாரப³ந்த⁴னமுத்தொம்ஹி (ஸீ॰ ஸ்யா॰)], நிஹதோ த்வமஸி அந்தகா’’தி.

அத² கோ² மாரோ பாபிமா – ஜானாதி மங் ப⁴க³வா, ஜானாதி மங் ஸுக³தோதி து³க்கீ² து³ம்மனோ

தத்தே²வந்தரதா⁴யி.

து³தியமாரகதா² நிட்டி²தா.

11. ப⁴த்³த³வக்³கி³யவத்து²

36. அத²
கோ² ப⁴க³வா பா³ராணஸியங் யதா²பி⁴ரந்தங் விஹரித்வா யேன உருவேலா தேன சாரிகங்
பக்காமி. அத² கோ² ப⁴க³வா மக்³கா³ ஓக்கம்ம யேன அஞ்ஞதரோ வனஸண்டோ³
தேனுபஸங்கமி, உபஸங்கமித்வா தங் வனஸண்ட³ங் அஜ்ஜோ²கா³ஹெத்வா அஞ்ஞதரஸ்மிங்
ருக்க²மூலே நிஸீதி³. தேன கோ² பன ஸமயேன திங்ஸமத்தா ப⁴த்³த³வக்³கி³யா ஸஹாயகா
ஸபஜாபதிகா தஸ்மிங் வனஸண்டே³ பரிசாரெந்தி. ஏகஸ்ஸ பஜாபதி நாஹோஸி; தஸ்ஸ
அத்தா²ய வேஸீ ஆனீதா அஹோஸி. அத² கோ² ஸா வேஸீ தேஸு பமத்தேஸு பரிசாரெந்தேஸு
ப⁴ண்ட³ங் ஆதா³ய பலாயித்த². அத² கோ² தே ஸஹாயகா ஸஹாயகஸ்ஸ வெய்யாவச்சங்
கரொந்தா, தங் இத்தி²ங் க³வேஸந்தா, தங் வனஸண்ட³ங் ஆஹிண்ட³ந்தா அத்³த³ஸங்ஸு
ப⁴க³வந்தங் அஞ்ஞதரஸ்மிங் ருக்க²மூலே நிஸின்னங். தி³ஸ்வான யேன ப⁴க³வா
தேனுபஸங்கமிங்ஸு, உபஸங்கமித்வா ப⁴க³வந்தங் ஏதத³வோசுங் – ‘‘அபி, ப⁴ந்தே,
ப⁴க³வா ஏகங் இத்தி²ங் பஸ்ஸெய்யா’’தி? ‘‘கிங் பன வோ, குமாரா, இத்தி²யா’’தி?
‘‘இத⁴ மயங், ப⁴ந்தே, திங்ஸமத்தா ப⁴த்³த³வக்³கி³யா ஸஹாயகா ஸபஜாபதிகா
இமஸ்மிங் வனஸண்டே³ பரிசாரிம்ஹா. ஏகஸ்ஸ பஜாபதி நாஹோஸி; தஸ்ஸ அத்தா²ய வேஸீ
ஆனீதா அஹோஸி. அத² கோ² ஸா, ப⁴ந்தே , வேஸீ அம்ஹேஸு பமத்தேஸு பரிசாரெந்தேஸு ப⁴ண்ட³ங் ஆதா³ய
பலாயித்த². தே மயங், ப⁴ந்தே, ஸஹாயகா ஸஹாயகஸ்ஸ வெய்யாவச்சங் கரொந்தா, தங்
இத்தி²ங் க³வேஸந்தா, இமங் வனஸண்ட³ங் ஆஹிண்டா³மா’’தி. ‘‘தங் கிங் மஞ்ஞத² வோ,
குமாரா, கதமங் நு கோ² தும்ஹாகங் வரங் – யங் வா
தும்ஹே இத்தி²ங் க³வேஸெய்யாத², யங் வா அத்தானங் க³வேஸெய்யாதா²’’தி?
‘‘ஏததே³வ, ப⁴ந்தே, அம்ஹாகங் வரங் யங் மயங் அத்தானங் க³வேஸெய்யாமா’’தி.
‘‘தேன ஹி வோ, குமாரா, நிஸீத³த², த⁴ம்மங் வோ தே³ஸெஸ்ஸாமீ’’தி. ‘‘ஏவங்,
ப⁴ந்தே’’தி கோ² தே ப⁴த்³த³வக்³கி³யா ஸஹாயகா ப⁴க³வந்தங் அபி⁴வாதெ³த்வா
ஏகமந்தங் நிஸீதி³ங்ஸு. தேஸங் ப⁴க³வா அனுபுப்³பி³ங் கத²ங் கதே²ஸி,
ஸெய்யதி²த³ங் – தா³னகத²ங் ஸீலகத²ங் ஸக்³க³கத²ங் காமானங் ஆதீ³னவங் ஓகாரங்
ஸங்கிலேஸங் நெக்க²ம்மே ஆனிஸங்ஸங் பகாஸேஸி, யதா³ தே ப⁴க³வா அஞ்ஞாஸி
கல்லசித்தே முது³சித்தே வினீவரணசித்தே உத³க்³க³சித்தே பஸன்னசித்தே, அத² யா
பு³த்³தா⁴னங் ஸாமுக்கங்ஸிகா த⁴ம்மதே³ஸனா, தங் பகாஸேஸி து³க்க²ங் ஸமுத³யங்
நிரோத⁴ங் மக்³க³ங், ஸெய்யதா²பி நாம ஸுத்³த⁴ங் வத்த²ங் அபக³தகாளகங் ஸம்மதே³வ
ரஜனங் படிக்³க³ண்ஹெய்ய, ஏவமேவ தேஸங் தஸ்மிங்யேவ ஆஸனே விரஜங் வீதமலங்
த⁴ம்மசக்கு²ங் உத³பாதி³ ‘‘யங் கிஞ்சி ஸமுத³யத⁴ம்மங், ஸப்³ப³ங் தங்
நிரோத⁴த⁴ம்ம’’ந்தி. தே தி³ட்ட²த⁴ம்மா பத்தத⁴ம்மா விதி³தத⁴ம்மா
பரியோகா³ள்ஹத⁴ம்மா திண்ணவிசிகிச்சா² விக³தகத²ங்கதா²
வேஸாரஜ்ஜப்பத்தா அபரப்பச்சயா ஸத்து²ஸாஸனே ப⁴க³வந்தங் ஏதத³வோசுங் –
‘‘லபெ⁴ய்யாம மயங், ப⁴ந்தே, ப⁴க³வதோ ஸந்திகே பப்³ப³ஜ்ஜங், லபெ⁴ய்யாம
உபஸம்பத³’’ந்தி. ‘‘ஏத² பி⁴க்க²வோ’’தி ப⁴க³வா அவோச – ‘‘ஸ்வாக்கா²தோ த⁴ம்மோ,
சரத² ப்³ரஹ்மசரியங் ஸம்மா து³க்க²ஸ்ஸ அந்தகிரியாயா’’தி. ஸாவ தேஸங் ஆயஸ்மந்தானங் உபஸம்பதா³ அஹோஸி.

ப⁴த்³த³வக்³கி³யஸஹாயகானங் வத்து² நிட்டி²தங்.

து³தியபா⁴ணவாரோ.

12. உருவேலபாடிஹாரியகதா²

37.
அத² கோ² ப⁴க³வா அனுபுப்³பே³ன சாரிகங் சரமானோ யேன உருவேலா தத³வஸரி. தேன கோ²
பன ஸமயேன உருவேலாயங் தயோ ஜடிலா படிவஸந்தி – உருவேலகஸ்ஸபோ, நதீ³கஸ்ஸபோ,
க³யாகஸ்ஸபோதி. தேஸு உருவேலகஸ்ஸபோ ஜடிலோ பஞ்சன்னங்
ஜடிலஸதானங் நாயகோ ஹோதி, வினாயகோ அக்³கோ³ பமுகோ² பாமொக்கோ². நதீ³கஸ்ஸபோ
ஜடிலோ திண்ணங் ஜடிலஸதானங் நாயகோ ஹோதி, வினாயகோ அக்³கோ³ பமுகோ² பாமொக்கோ².
க³யாகஸ்ஸபோ ஜடிலோ த்³வின்னங் ஜடிலஸதானங் நாயகோ ஹோதி, வினாயகோ அக்³கோ³
பமுகோ² பாமொக்கோ². அத² கோ² ப⁴க³வா யேன உருவேலகஸ்ஸபஸ்ஸ ஜடிலஸ்ஸ அஸ்ஸமோ
தேனுபஸங்கமி, உபஸங்கமித்வா உருவேலகஸ்ஸபங் ஜடிலங் ஏதத³வோச – ‘‘ஸசே தே, கஸ்ஸப
, அக³ரு, வஸெய்யாம ஏகரத்தங் அக்³யாகா³ரே’’தி? ‘‘ந கோ² மே, மஹாஸமண, க³ரு, சண்டெ³த்த² நாக³ராஜா இத்³தி⁴மா ஆஸிவிஸோ
கோ⁴ரவிஸோ, ஸோ தங் மா விஹேடே²ஸீ’’தி. து³தியம்பி கோ² ப⁴க³வா உருவேலகஸ்ஸபங்
ஜடிலங் ஏதத³வோச – ‘‘ஸசே தே, கஸ்ஸப, அக³ரு, வஸெய்யாம ஏகரத்தங்
அக்³யாகா³ரே’’தி? ‘‘ந கோ² மே, மஹாஸமண, க³ரு, சண்டெ³த்த² நாக³ராஜா இத்³தி⁴மா
ஆஸிவிஸோ கோ⁴ரவிஸோ, ஸோ தங் மா விஹேடே²ஸீ’’தி. ததியம்பி கோ² ப⁴க³வா
உருவேலகஸ்ஸபங் ஜடிலங் ஏதத³வோச – ‘‘ஸசே தே, கஸ்ஸப, அக³ரு, வஸெய்யாம ஏகரத்தங்
அக்³யாகா³ரே’’தி? ‘‘ந கோ² மே, மஹாஸமண, க³ரு, சண்டெ³த்த² நாக³ராஜா
இத்³தி⁴மா ஆஸிவிஸோ கோ⁴ரவிஸோ, ஸோ தங் மா விஹேடே²ஸீ’’தி. ‘‘அப்பேவ மங் ந
விஹேடெ²ய்ய, இங்க⁴ த்வங், கஸ்ஸப, அனுஜானாஹி அக்³யாகா³ர’’ந்தி. ‘‘விஹர,
மஹாஸமண, யதா²ஸுக²’’ந்தி. அத² கோ² ப⁴க³வா அக்³யாகா³ரங் பவிஸித்வா
திணஸந்தா²ரகங் பஞ்ஞபெத்வா நிஸீதி³ பல்லங்கங் ஆபு⁴ஜித்வா உஜுங் காயங்
பணிதா⁴ய பரிமுக²ங் ஸதிங் உபட்ட²பெத்வா.

38. அத்³த³ஸா கோ² ஸோ நாகோ³ ப⁴க³வந்தங் பவிட்ட²ங், தி³ஸ்வான து³ம்மனோ [து³க்கீ² து³ம்மனோ (ஸீ॰ ஸ்யா॰)] பதூ⁴பாயி [பகூ²பாஸி (க॰)]. அத² கோ² ப⁴க³வதோ ஏதத³ஹோஸி – ‘‘யங்னூனாஹங் இமஸ்ஸ நாக³ஸ்ஸ அனுபஹச்ச ச²விஞ்ச
சம்மஞ்ச மங்ஸஞ்ச ந்ஹாருஞ்ச அட்டி²ஞ்ச அட்டி²மிஞ்ஜஞ்ச தேஜஸா தேஜங்
பரியாதி³யெய்ய’’ந்தி. அத² கோ² ப⁴க³வா ததா²ரூபங் இத்³தா⁴பி⁴ஸங்கா²ரங்
அபி⁴ஸங்க²ரித்வா பதூ⁴பாயி. அத² கோ² ஸோ நாகோ³ மக்க²ங் அஸஹமானோ பஜ்ஜலி.
ப⁴க³வாபி தேஜோதா⁴துங் ஸமாபஜ்ஜித்வா பஜ்ஜலி. உபி⁴ன்னங் ஸஜோதிபூ⁴தானங்
அக்³யாகா³ரங் ஆதி³த்தங் விய ஹோதி ஸம்பஜ்ஜலிதங் ஸஜோதிபூ⁴தங். அத² கோ² தே
ஜடிலா அக்³யாகா³ரங் பரிவாரெத்வா ஏவமாஹங்ஸு – ‘‘அபி⁴ரூபோ வத போ⁴ மஹாஸமணோ
நாகே³ன விஹேடி²யதீ’’தி. அத² கோ² ப⁴க³வா தஸ்ஸா ரத்தியா அச்சயேன தஸ்ஸ நாக³ஸ்ஸ
அனுபஹச்ச ச²விஞ்ச சம்மஞ்ச மங்ஸஞ்ச ந்ஹாருஞ்ச அட்டி²ஞ்ச அட்டி²மிஞ்ஜஞ்ச
தேஜஸா தேஜங் பரியாதி³யித்வா பத்தே பக்கி²பித்வா உருவேலகஸ்ஸபஸ்ஸ ஜடிலஸ்ஸ
த³ஸ்ஸேஸி – ‘‘அயங் தே, கஸ்ஸப, நாகோ³ பரியாதி³ன்னோ [பரியாதி³ண்ணோ (க॰)]
அஸ்ஸ தேஜஸா தேஜோ’’தி. அத² கோ² உருவேலகஸ்ஸபஸ்ஸ ஜடிலஸ்ஸ ஏதத³ஹோஸி –
‘‘மஹித்³தி⁴கோ கோ² மஹாஸமணோ மஹானுபா⁴வோ, யத்ர ஹி நாம சண்ட³ஸ்ஸ நாக³ராஜஸ்ஸ
இத்³தி⁴மதோ ஆஸிவிஸஸ்ஸ கோ⁴ரவிஸஸ்ஸ தேஜஸா தேஜங் பரியாதி³யிஸ்ஸதி, நத்வேவ ச
கோ² அரஹா யதா² அஹ’’ந்தி.

39.

நேரஞ்ஜராயங் ப⁴க³வா, உருவேலகஸ்ஸபங் ஜடிலங் அவோச;

‘‘ஸசே தே கஸ்ஸப அக³ரு, விஹரேமு அஜ்ஜண்ஹோ அக்³கி³ஸாலம்ஹீ’’தி [அக்³கி³ஸரணம்ஹீதி (ஸீ॰ ஸ்யா॰)].

‘‘ந கோ² மே மஹாஸமண க³ரு;

பா²ஸுகாமோவ தங் நிவாரேமி;

சண்டெ³த்த² நாக³ராஜா;

இத்³தி⁴மா ஆஸிவிஸோ கோ⁴ரவிஸோ;

ஸோ தங் மா விஹேடே²ஸீ’’தி.

‘‘அப்பேவ மங் ந விஹேடெ²ய்ய;

இங்க⁴ த்வங் கஸ்ஸப அனுஜானாஹி அக்³யாகா³ர’’ந்தி;

தி³ன்னந்தி நங் விதி³த்வா;

அபீ⁴தோ [அஸம்பீ⁴தோ (ஸீ॰)] பாவிஸி ப⁴யமதீதோ.

தி³ஸ்வா இஸிங் பவிட்ட²ங், அஹினாகோ³ து³ம்மனோ பதூ⁴பாயி;

ஸுமனமனஸோ அதி⁴மனோ [அவிமனோ (கத்த²சி), நவிமனோ (ஸ்யா॰)], மனுஸ்ஸனாகோ³பி தத்த² பதூ⁴பாயி.

மக்க²ஞ்ச அஸஹமானோ, அஹினாகோ³ பாவகோவ பஜ்ஜலி;

தேஜோதா⁴துஸு குஸலோ, மனுஸ்ஸனாகோ³பி தத்த² பஜ்ஜலி.

உபி⁴ன்னங் ஸஜோதிபூ⁴தானங்;

அக்³யாகா³ரங் ஆதி³த்தங் ஹோதி ஸம்பஜ்ஜலிதங் ஸஜோதிபூ⁴தங்;

உதி³ச்ச²ரே ஜடிலா;

‘‘அபி⁴ரூபோ வத போ⁴ மஹாஸமணோ;

நாகே³ன விஹேடி²யதீ’’தி ப⁴ணந்தி.

அத² தஸ்ஸா ரத்தியா [அத² ரத்தியா (ஸீ॰ ஸ்யா॰)] அச்சயேன;

ஹதா நாக³ஸ்ஸ அச்சியோ ஹொந்தி [அஹினாக³ஸ்ஸ அச்சியோ ந ஹொந்தி (ஸீ॰ ஸ்யா॰)];

இத்³தி⁴மதோ பன டி²தா [இத்³தி⁴மதோ பனுட்டி²தா (ஸீ॰)];

அனேகவண்ணா அச்சியோ ஹொந்தி.

நீலா அத² லோஹிதிகா;

மஞ்ஜிட்டா² பீதகா ப²லிகவண்ணாயோ;

அங்கீ³ரஸஸ்ஸ காயே;

அனேகவண்ணா அச்சியோ ஹொந்தி.

பத்தம்ஹி ஓத³ஹித்வா;

அஹினாக³ங் ப்³ராஹ்மணஸ்ஸ த³ஸ்ஸேஸி;

‘‘அயங் தே கஸ்ஸப நாகோ³;

பரியாதி³ன்னோ அஸ்ஸ தேஜஸா தேஜோ’’தி.

அத² கோ² உருவேலகஸ்ஸபோ ஜடிலோ ப⁴க³வதோ இமினா இத்³தி⁴பாடிஹாரியேன அபி⁴ப்பஸன்னோ ப⁴க³வந்தங் ஏதத³வோச – ‘‘இதே⁴வ, மஹாஸமண, விஹர, அஹங் தே [தே உபட்டா²மி (இதிபி)] து⁴வப⁴த்தேனா’’தி.

பட²மங் பாடிஹாரியங்.

40. அத² கோ² ப⁴க³வா உருவேலகஸ்ஸபஸ்ஸ ஜடிலஸ்ஸ அஸ்ஸமஸ்ஸ அவிதூ³ரே
அஞ்ஞதரஸ்மிங் வனஸண்டே³ விஹாஸி. அத² கோ² சத்தாரோ மஹாராஜானோ அபி⁴க்கந்தாய
ரத்தியா அபி⁴க்கந்தவண்ணா கேவலகப்பங் வனஸண்ட³ங் ஓபா⁴ஸெத்வா யேன ப⁴க³வா
தேனுபஸங்கமிங்ஸு, உபஸங்கமித்வா ப⁴க³வந்தங் அபி⁴வாதெ³த்வா சதுத்³தி³ஸா
அட்ட²ங்ஸு ஸெய்யதா²பி மஹந்தா அக்³கி³க்க²ந்தா⁴. அத² கோ² உருவேலகஸ்ஸபோ ஜடிலோ
தஸ்ஸா ரத்தியா அச்சயேன யேன ப⁴க³வா தேனுபஸங்கமி, உபஸங்கமித்வா ப⁴க³வந்தங்
ஏதத³வோச – ‘‘காலோ, மஹாஸமண, நிட்டி²தங் ப⁴த்தங். கே நு கோ² தே, மஹாஸமண,
அபி⁴க்கந்தாய ரத்தியா அபி⁴க்கந்தவண்ணா கேவலகப்பங் வனஸண்ட³ங் ஓபா⁴ஸெத்வா யேன
த்வங் தேனுபஸங்கமிங்ஸு , உபஸங்கமித்வா தங்
அபி⁴வாதெ³த்வா சதுத்³தி³ஸா அட்ட²ங்ஸு ‘‘ஸெய்யதா²பி மஹந்தா
அக்³கி³க்க²ந்தா⁴’’தி. ‘‘ஏதே கோ², கஸ்ஸப, சத்தாரோ மஹாராஜானோ யேனாஹங்
தேனுபஸங்கமிங்ஸு த⁴ம்மஸ்ஸவனாயா’’தி. அத² கோ² உருவேலகஸ்ஸபஸ்ஸ ஜடிலஸ்ஸ
ஏதத³ஹோஸி – ‘‘மஹித்³தி⁴கோ கோ² மஹாஸமணோ மஹானுபா⁴வோ, யத்ர ஹி நாம சத்தாரோபி
மஹாராஜானோ உபஸங்கமிஸ்ஸந்தி த⁴ம்மஸ்ஸவனாய, ந த்வேவ ச கோ² அரஹா யதா²
அஹ’’ந்தி. அத² கோ² ப⁴க³வா உருவேலகஸ்ஸபஸ்ஸ ஜடிலஸ்ஸ ப⁴த்தங் பு⁴ஞ்ஜித்வா
தஸ்மிங்யேவ வனஸண்டே³ விஹாஸி.

து³தியங் பாடிஹாரியங்.

41. அத² கோ² ஸக்கோ தே³வானமிந்தோ³ அபி⁴க்கந்தாய ரத்தியா அபி⁴க்கந்தவண்ணோ கேவலகப்பங் வனஸண்ட³ங் ஓபா⁴ஸெத்வா யேன ப⁴க³வா தேனுபஸங்கமி ,
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்டா²ஸி ஸெய்யதா²பி
மஹாஅக்³கி³க்க²ந்தோ⁴, புரிமாஹி வண்ணனிபா⁴ஹி அபி⁴க்கந்ததரோ ச பணீததரோ ச. அத²
கோ² உருவேலகஸ்ஸபோ ஜடிலோ தஸ்ஸா ரத்தியா அச்சயேன யேன
ப⁴க³வா தேனுபஸங்கமி, உபஸங்கமித்வா ப⁴க³வந்தங் ஏதத³வோச – ‘‘காலோ, மஹாஸமண,
நிட்டி²தங் ப⁴த்தங். கோ நு கோ² ஸோ, மஹாஸமண, அபி⁴க்கந்தாய ரத்தியா
அபி⁴க்கந்தவண்ணோ கேவலகப்பங் வனஸண்ட³ங் ஓபா⁴ஸெத்வா யேன த்வங் தேனுபஸங்கமி,
உபஸங்கமித்வா தங் அபி⁴வாதெ³த்வா ஏகமந்தங் அட்டா²ஸி ஸெய்யதா²பி
மஹாஅக்³கி³க்க²ந்தோ⁴, புரிமாஹி வண்ணனிபா⁴ஹி அபி⁴க்கந்ததரோ ச பணீததரோ
சா’’தி? ‘‘ஏஸோ கோ², கஸ்ஸப, ஸக்கோ தே³வானமிந்தோ³ யேனாஹங் தேனுபஸங்கமி
த⁴ம்மஸ்ஸவனாயா’’தி. அத² கோ² உருவேலகஸ்ஸபஸ்ஸ ஜடிலஸ்ஸ ஏதத³ஹோஸி –
‘‘மஹித்³தி⁴கோ கோ² மஹாஸமணோ மஹானுபா⁴வோ, யத்ர ஹி நாம ஸக்கோபி
தே³வானமிந்தோ³ உபஸங்கமிஸ்ஸதி த⁴ம்மஸ்ஸவனாய, ந த்வேவ ச கோ² அரஹா யதா²
அஹ’’ந்தி. அத² கோ² ப⁴க³வா உருவேலகஸ்ஸபஸ்ஸ ஜடிலஸ்ஸ ப⁴த்தங் பு⁴ஞ்ஜித்வா
தஸ்மிங்யேவ வனஸண்டே³ விஹாஸி.

ததியங் பாடிஹாரியங்.

42. அத²
கோ² ப்³ரஹ்மா ஸஹம்பதி அபி⁴க்கந்தாய ரத்தியா அபி⁴க்கந்தவண்ணோ கேவலகப்பங்
வனஸண்ட³ங் ஓபா⁴ஸெத்வா யேன ப⁴க³வா தேனுபஸங்கமி, உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் அட்டா²ஸி ஸெய்யதா²பி மஹாஅக்³கி³க்க²ந்தோ⁴, புரிமாஹி
வண்ணனிபா⁴ஹி அபி⁴க்கந்ததரோ ச பணீததரோ ச. அத² கோ²
உருவேலகஸ்ஸபோ ஜடிலோ தஸ்ஸா ரத்தியா அச்சயேன யேன ப⁴க³வா தேனுபஸங்கமி,
உபஸங்கமித்வா ப⁴க³வந்தங் ஏதத³வோச – ‘‘காலோ, மஹாஸமண, நிட்டி²தங் ப⁴த்தங். கோ
நு கோ² ஸோ, மஹாஸமண, அபி⁴க்கந்தாய ரத்தியா அபி⁴க்கந்தவண்ணோ கேவலகப்பங்
வனஸண்ட³ங் ஓபா⁴ஸெத்வா யேன த்வங் தேனுபஸங்கமி, உபஸங்கமித்வா தங்
அபி⁴வாதெ³த்வா ஏகமந்தங் அட்டா²ஸி ஸெய்யதா²பி மஹாஅக்³கி³க்க²ந்தோ⁴, புரிமாஹி
வண்ணனிபா⁴ஹி அபி⁴க்கந்ததரோ ச பணீததரோ சா’’தி? ‘‘ஏஸோ கோ², கஸ்ஸப, ப்³ரஹ்மா
ஸஹம்பதி யேனாஹங் தேனுபஸங்கமி த⁴ம்மஸ்ஸவனாயா’’தி. அத² கோ² உருவேலகஸ்ஸபஸ்ஸ
ஜடிலஸ்ஸ ஏதத³ஹோஸி – ‘‘மஹித்³தி⁴கோ கோ² மஹாஸமணோ மஹானுபா⁴வோ, யத்ர ஹி நாம
ப்³ரஹ்மாபி ஸஹம்பதி உபஸங்கமிஸ்ஸதி த⁴ம்மஸ்ஸவனாய, ந த்வேவ ச கோ² அரஹா யதா²
அஹ’’ந்தி. அத² கோ² ப⁴க³வா உருவேலகஸ்ஸபஸ்ஸ ஜடிலஸ்ஸ ப⁴த்தங் பு⁴ஞ்ஜித்வா
தஸ்மிங்யேவ வனஸண்டே³ விஹாஸி.

சதுத்த²ங் பாடிஹாரியங்.

43.
தேன கோ² பன ஸமயேன உருவேலகஸ்ஸபஸ்ஸ ஜடிலஸ்ஸ மஹாயஞ்ஞோ பச்சுபட்டி²தோ ஹோதி,
கேவலகப்பா ச அங்க³மக³தா⁴ பஹூதங் கா²த³னீயங் போ⁴ஜனீயங் ஆதா³ய
அபி⁴க்கமிதுகாமா ஹொந்தி . அத² கோ² உருவேலகஸ்ஸபஸ்ஸ
ஜடிலஸ்ஸ ஏதத³ஹோஸி – ‘‘ஏதரஹி கோ² மே மஹாயஞ்ஞோ பச்சுபட்டி²தோ, கேவலகப்பா ச
அங்க³மக³தா⁴ பஹூதங் கா²த³னீயங் போ⁴ஜனீயங் ஆதா³ய அபி⁴க்கமிஸ்ஸந்தி. ஸசே
மஹாஸமணோ மஹாஜனகாயே இத்³தி⁴பாடிஹாரியங் கரிஸ்ஸதி ,
மஹாஸமணஸ்ஸ லாப⁴ஸக்காரோ அபி⁴வட்³டி⁴ஸ்ஸதி, மம லாப⁴ஸக்காரோ பரிஹாயிஸ்ஸதி. அஹோ
நூன மஹாஸமணோ ஸ்வாதனாய நாக³ச்செ²ய்யா’’தி. அத² கோ² ப⁴க³வா உருவேலகஸ்ஸபஸ்ஸ
ஜடிலஸ்ஸ சேதஸா சேதோபரிவிதக்கமஞ்ஞாய உத்தரகுருங் க³ந்த்வா ததோ பிண்ட³பாதங்
ஆஹரித்வா அனோதத்தத³ஹே பரிபு⁴ஞ்ஜித்வா தத்தே²வ தி³வாவிஹாரங் அகாஸி. அத² கோ²
உருவேலகஸ்ஸபோ ஜடிலோ தஸ்ஸா ரத்தியா அச்சயேன யேன
ப⁴க³வா தேனுபஸங்கமி, உபஸங்கமித்வா ப⁴க³வந்தங் ஏதத³வோச – ‘‘காலோ, மஹாஸமண,
நிட்டி²தங் ப⁴த்தங். கிங் நு கோ², மஹாஸமண, ஹிய்யோ நாக³மாஸி? அபி ச மயங் தங்
ஸராம – கிங் நு கோ² மஹாஸமணோ நாக³ச்ச²தீதி? கா²த³னீயஸ்ஸ ச போ⁴ஜனீயஸ்ஸ ச தே
படிவீஸோ [படிவிங்ஸோ (ஸீ॰), படிவிஸோ (ஸ்யா॰)]
ட²பிதோ’’தி. நனு தே, கஸ்ஸப, ஏதத³ஹோஸி – ‘‘‘ஏதரஹி கோ² மே மஹாயஞ்ஞோ
பச்சுபட்டி²தோ, கேவலகப்பா ச அங்க³மக³தா⁴ பஹூதங் கா²த³னீயங் போ⁴ஜனீயங் ஆதா³ய
அபி⁴க்கமிஸ்ஸந்தி, ஸசே மஹாஸமணோ மஹாஜனகாயே இத்³தி⁴பாடிஹாரியங் கரிஸ்ஸதி,
மஹாஸமணஸ்ஸ லாப⁴ஸக்காரோ அபி⁴வட்³டி⁴ஸ்ஸதி, மம லாப⁴ஸக்காரோ பரிஹாயிஸ்ஸதி, அஹோ
நூன மஹாஸமணோ ஸ்வாதனாய நாக³ச்செ²ய்யா’தி. ஸோ கோ² அஹங், கஸ்ஸப, தவ சேதஸா
சேதோபரிவிதக்கங் அஞ்ஞாய உத்தரகுருங் க³ந்த்வா ததோ பிண்ட³பாதங் ஆஹரித்வா
அனோதத்தத³ஹே பரிபு⁴ஞ்ஜித்வா தத்தே²வ தி³வாவிஹாரங் அகாஸி’’ந்தி. அத² கோ²
உருவேலகஸ்ஸபஸ்ஸ ஜடிலஸ்ஸ ஏதத³ஹோஸி – ‘‘மஹித்³தி⁴கோ கோ² மஹாஸமணோ மஹானுபா⁴வோ,
யத்ர ஹி நாம சேதஸாபி சித்தங் பஜானிஸ்ஸதி , ந த்வேவ ச கோ² அரஹா யதா² அஹ’’ந்தி. அத² கோ² ப⁴க³வா உருவேலகஸ்ஸபஸ்ஸ ஜடிலஸ்ஸ ப⁴த்தங் பு⁴ஞ்ஜித்வா தஸ்மிங்யேவ வனஸண்டே³ விஹாஸி.

பஞ்சமங் பாடிஹாரியங்.

44.
தேன கோ² பன ஸமயேன ப⁴க³வதோ பங்ஸுகூலங் உப்பன்னங் ஹோதி. அத² கோ² ப⁴க³வதோ
ஏதத³ஹோஸி – ‘‘கத்த² நு கோ² அஹங் பங்ஸுகூலங் தோ⁴வெய்ய’’ந்தி? அத² கோ² ஸக்கோ
தே³வானமிந்தோ³ ப⁴க³வதோ சேதஸா சேதோபரிவிதக்கமஞ்ஞாய பாணினா பொக்க²ரணிங்
க²ணித்வா ப⁴க³வந்தங் ஏதத³வோச – ‘‘இத⁴, ப⁴ந்தே, ப⁴க³வா பங்ஸுகூலங்
தோ⁴வதூ’’தி. அத² கோ² ப⁴க³வதோ ஏதத³ஹோஸி – ‘‘கிம்ஹி நு கோ² அஹங் பங்ஸுகூலங்
பரிமத்³தெ³ய்ய’’ந்தி? அத² கோ² ஸக்கோ தே³வானமிந்தோ³ ப⁴க³வதோ சேதஸா
சேதோபரிவிதக்கமஞ்ஞாய மஹதிங் ஸிலங் உபனிக்கி²பி – இத⁴, ப⁴ந்தே, ப⁴க³வா
பங்ஸுகூலங் பரிமத்³த³தூதி. அத² கோ² ப⁴க³வதோ ஏதத³ஹோஸி – ‘‘கிம்ஹி நு கோ²
அஹங் [அஹங் பங்ஸுகூலங் (க॰)] ஆலம்பி³த்வா உத்தரெய்ய’’ந்தி? அத² கோ² ககுதே⁴ அதி⁴வத்தா² தே³வதா ப⁴க³வதோ சேதஸா சேதோபரிவிதக்கமஞ்ஞாய ஸாக²ங் ஓனாமேஸி – இத⁴, ப⁴ந்தே, ப⁴க³வா ஆலம்பி³த்வா
உத்தரதூதி. அத² கோ² ப⁴க³வதோ ஏதத³ஹோஸி – ‘‘கிம்ஹி நு கோ² அஹங் பங்ஸுகூலங்
விஸ்ஸஜ்ஜெய்ய’’ந்தி? அத² கோ² ஸக்கோ தே³வானமிந்தோ³ ப⁴க³வதோ சேதஸா
சேதோபரிவிதக்கமஞ்ஞாய மஹதிங் ஸிலங் உபனிக்கி²பி – இத⁴, ப⁴ந்தே, ப⁴க³வா
பங்ஸுகூலங் விஸ்ஸஜ்ஜேதூதி. அத² கோ² உருவேலகஸ்ஸபோ ஜடிலோ தஸ்ஸா ரத்தியா
அச்சயேன யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் ஏதத³வோச – ‘‘காலோ
, மஹாஸமண, நிட்டி²தங் ப⁴த்தங். கிங் நு கோ²,
மஹாஸமண, நாயங் புப்³பே³ இத⁴ பொக்க²ரணீ, ஸாயங் இத⁴ பொக்க²ரணீ. நயிமா ஸிலா
புப்³பே³ உபனிக்கி²த்தா. கேனிமா ஸிலா உபனிக்கி²த்தா? நயிமஸ்ஸ ககுத⁴ஸ்ஸ
புப்³பே³ ஸாகா² ஓனதா, ஸாயங் ஸாகா² ஓனதா’’தி. இத⁴ மே, கஸ்ஸப, பங்ஸுகூலங்
உப்பன்னங் அஹோஸி. தஸ்ஸ மய்ஹங், கஸ்ஸப, ஏதத³ஹோஸி – ‘‘கத்த² நு கோ² அஹங்
பங்ஸுகூலங் தோ⁴வெய்ய’’ந்தி? அத² கோ², கஸ்ஸப, ஸக்கோ தே³வானமிந்தோ³ மம சேதஸா
சேதோபரிவிதக்கமஞ்ஞாய பாணினா பொக்க²ரணிங் க²ணித்வா மங் ஏதத³வோச – ‘‘இத⁴,
ப⁴ந்தே, ப⁴க³வா பங்ஸுகூலங் தோ⁴வதூ’’தி. ஸாயங் கஸ்ஸப அமனுஸ்ஸேன பாணினா
க²ணிதா பொக்க²ரணீ. தஸ்ஸ மய்ஹங், கஸ்ஸப, ஏதத³ஹோஸி – ‘‘கிம்ஹி நு கோ² அஹங்
பங்ஸுகூலங் பரிமத்³தெ³ய்ய’’ந்தி? அத² கோ², கஸ்ஸப, ஸக்கோ தே³வானமிந்தோ³ மம
சேதஸா சேதோபரிவிதக்கமஞ்ஞாய மஹதிங் ஸிலங் உபனிக்கி²பி – ‘‘இத⁴, ப⁴ந்தே,
ப⁴க³வா பங்ஸுகூலங் பரிமத்³த³தூ’’தி. ஸாயங் கஸ்ஸப அமனுஸ்ஸேன உபனிக்கி²த்தா
ஸிலா. தஸ்ஸ மய்ஹங், கஸ்ஸப, ஏதத³ஹோஸி – ‘‘கிம்ஹி நு கோ² அஹங் ஆலம்பி³த்வா
உத்தரெய்ய’’ந்தி? அத² கோ², கஸ்ஸப, ககுதே⁴ அதி⁴வத்தா² தே³வதா ஜ மம சேதஸா
சேதோபரிவிதக்கமஞ்ஞாய ஸாக²ங் ஓனாமேஸி – ‘‘இத⁴, ப⁴ந்தே, ப⁴க³வா ஆலம்பி³த்வா
உத்தரஜ்தூ’’தி. ஸ்வாயங் ஆஹரஹத்தோ² ககுதோ⁴. தஸ்ஸ மய்ஹங், கஸ்ஸப, ஏதத³ஹோஸி –
‘‘கிம்ஹி நு கோ² அஹங் பங்ஸுகூலங் விஸ்ஸஜ்ஜெய்ய’’ந்தி? அத² கோ², கஸ்ஸப,
ஸக்கோ தே³வானமிந்தோ³ மம சேதஸா சேதோபரிவிதக்கமஞ்ஞாய மஹதிங் ஸிலங்
உபனிக்கி²பி – ‘‘இத⁴, ப⁴ந்தே, ப⁴க³வா பங்ஸுகூலங் விஸ்ஸஜ்ஜேதூ’’தி .
ஸாயங் கஸ்ஸப அமனுஸ்ஸேன உபனிக்கி²த்தா ஸிலாதி. அத² கோ² உருவேலகஸ்ஸபஸ்ஸ
ஜடிலஸ்ஸ ஏதத³ஹோஸி – ‘‘மஹித்³தி⁴கோ கோ² மஹாஸமணோ மஹானுபா⁴வோ, யத்ர ஹி நாம
ஸக்கோபி தே³வானமிந்தோ³ வெய்யாவச்சங் கரிஸ்ஸதி, ந த்வேவ ச கோ² அரஹா யதா²
அஹ’’ந்தி. அத² கோ² ப⁴க³வா உருவேலகஸ்ஸபஸ்ஸ ஜடிலஸ்ஸ ப⁴த்தங் பு⁴ஞ்ஜித்வா
தஸ்மிங்யேவ வனஸண்டே³ விஹாஸி.

அத² கோ² உருவேலகஸ்ஸபோ ஜடிலோ தஸ்ஸா ரத்தியா அச்சயேன யேன ப⁴க³வா தேனுபஸங்கமி, உபஸங்கமித்வா ப⁴க³வதோ
காலங் ஆரோசேஸி – ‘‘காலோ, மஹாஸமண, நிட்டி²தங் ப⁴த்த’’ந்தி. ‘‘க³ச்ச² த்வங்,
கஸ்ஸப, ஆயாமஹ’’ந்தி உருவேலகஸ்ஸபங் ஜடிலங் உய்யோஜெத்வா யாய ஜம்பு³யா
‘ஜம்பு³தீ³போ’ பஞ்ஞாயதி, ததோ ப²லங் க³ஹெத்வா பட²மதரங் ஆக³ந்த்வா
அக்³யாகா³ரே நிஸீதி³. அத்³த³ஸா கோ² உருவேலகஸ்ஸபோ ஜடிலோ ப⁴க³வந்தங்
அக்³யாகா³ரே நிஸின்னங், தி³ஸ்வான ப⁴க³வந்தங் ஏதத³வோச – ‘‘கதமேன த்வங்,
மஹாஸமண, மக்³கே³ன ஆக³தோ? அஹங் தயா பட²மதரங் பக்கந்தோ, ஸோ த்வங் பட²மதரங்
ஆக³ந்த்வா அக்³யாகா³ரே நிஸின்னோ’’தி. ‘‘இதா⁴ஹங், கஸ்ஸப, தங் உய்யோஜெத்வா
யாய ஜம்பு³யா ‘ஜம்பு³தீ³போ’ பஞ்ஞாயதி, ததோ ப²லங் க³ஹெத்வா பட²மதரங்
ஆக³ந்த்வா அக்³யாகா³ரே நிஸின்னோ. இத³ங் கோ², கஸ்ஸப, ஜம்பு³ப²லங்
வண்ணஸம்பன்னங் க³ந்த⁴ஸம்பன்னங் ரஸஸம்பன்னங். ஸசே ஆகங்க²ஸி பரிபு⁴ஞ்ஜா’’தி.
‘‘அலங், மஹாஸமண, த்வங்யேவ தங் அரஹஸி , த்வங்யேவ தங் [த்வங்யேவேதங் ஆஹரஸி, த்வங்யேவேதங் (ஸீ॰ ஸ்யா॰)]
பரிபு⁴ஞ்ஜாஹீ’’தி. அத² கோ² உருவேலகஸ்ஸபஸ்ஸ ஜடிலஸ்ஸ ஏதத³ஹோஸி –
‘‘மஹித்³தி⁴கோ கோ² மஹாஸமணோ மஹானுபா⁴வோ, யத்ர ஹி நாம மங் பட²மதரங்
உய்யோஜெத்வா யாய ஜம்பு³யா ‘ஜம்பு³தீ³போ’ பஞ்ஞாயதி, ததோ ப²லங் க³ஹெத்வா
பட²மதரங் ஆக³ந்த்வா அக்³யாகா³ரே நிஸீதி³ஸ்ஸதி, ந த்வேவ ச கோ² அரஹா யதா²
அஹ’’ந்தி. அத² கோ² ப⁴க³வா உருவேலகஸ்ஸபஸ்ஸ ஜடிலஸ்ஸ ப⁴த்தங் பு⁴ஞ்ஜித்வா
தஸ்மிங்யேவ வனஸண்டே³ விஹாஸி.

45.
அத² கோ² உருவேலகஸ்ஸபோ ஜடிலோ தஸ்ஸா ரத்தியா அச்சயேன யேன ப⁴க³வா
தேனுபஸங்கமி, உபஸங்கமித்வா ப⁴க³வதோ காலங் ஆரோசேஸி – ‘‘காலோ, மஹாஸமண,
நிட்டி²தங் ப⁴த்த’’ந்தி. க³ச்ச² த்வங், கஸ்ஸப, ஆயாமஹந்தி உருவேலகஸ்ஸபங்
ஜடிலங் உய்யோஜெத்வா யாய ஜம்பு³யா ‘ஜம்பு³தீ³போ’ பஞ்ஞாயதி, தஸ்ஸா அவிதூ³ரே
அம்போ³…பே॰… தஸ்ஸா அவிதூ³ரே ஆமலகீ…பே॰… தஸ்ஸா அவிதூ³ரே ஹரீதகீ…பே॰…
தாவதிங்ஸங் க³ந்த்வா பாரிச்ச²த்தகபுப்ப²ங் க³ஹெத்வா பட²மதரங் ஆக³ந்த்வா
அக்³யாகா³ரே நிஸீதி³. அத்³த³ஸா கோ² உருவேலகஸ்ஸபோ ஜடிலோ ப⁴க³வந்தங்
அக்³யாகா³ரே நிஸின்னங், தி³ஸ்வான ப⁴க³வந்தங் ஏதத³வோச – ‘‘கதமேன த்வங்,
மஹாஸமண, மக்³கே³ன ஆக³தோ? அஹங் தயா பட²மதரங் பக்கந்தோ, ஸோ த்வங் பட²மதரங்
ஆக³ந்த்வா அக்³யாகா³ரே நிஸின்னோ’’தி. ‘‘இதா⁴ஹங் ,
கஸ்ஸப, தங் உய்யோஜெத்வா தாவதிங்ஸங் க³ந்த்வா பாரிச்ச²த்தகபுப்ப²ங் க³ஹெத்வா
பட²மதரங் ஆக³ந்த்வா அக்³யாகா³ரே நிஸின்னோ. இத³ங் கோ², கஸ்ஸப,
பாரிச்ச²த்தகபுப்ப²ங் வண்ணஸம்பன்னங் க³ந்த⁴ஸம்பன்னங் [ஸுக³ந்தி⁴கங் (க॰)]. (ஸசே ஆகங்க²ஸி க³ண்ஹா’’தி. ‘‘அலங், மஹாஸமண, த்வங்யேவ தங் அரஹஸி, த்வங்யேவ தங் க³ண்ஹா’’தி) [( ) ஸீ॰ ஸ்யா॰ பொத்த²கேஸு நத்தி²].
அத² கோ² உருவேலகஸ்ஸபஸ்ஸ ஜடிலஸ்ஸ ஏதத³ஹோஸி – ‘‘மஹித்³தி⁴கோ கோ² மஹாஸமணோ
மஹானுபா⁴வோ, யத்ர ஹி நாம மங் பட²மதரங் உய்யோஜெத்வா தாவதிங்ஸங் க³ந்த்வா
பாரிச்ச²த்தகபுப்ப²ங் க³ஹெத்வா பட²மதரங் ஆக³ந்த்வா அக்³யாகா³ரே
நிஸீதி³ஸ்ஸதி, ந த்வேவ ச கோ² அரஹா யதா² அஹ’’ந்தி.

46. தேன கோ² பன ஸமயேன தே ஜடிலா அக்³கி³ங் பரிசரிதுகாமா ந ஸக்கொந்தி கட்டா²னி பா²லேதுங் .
அத² கோ² தேஸங் ஜடிலானங் ஏதத³ஹோஸி – ‘‘நிஸ்ஸங்ஸயங் கோ² மஹாஸமணஸ்ஸ
இத்³தா⁴னுபா⁴வோ, யதா² மயங் ந ஸக்கோம கட்டா²னி பா²லேது’’ந்தி. அத² கோ²
ப⁴க³வா உருவேலகஸ்ஸபங் ஜடிலங் ஏதத³வோச – ‘‘பா²லியந்து, கஸ்ஸப, கட்டா²னீ’’தி.
‘‘பா²லியந்து, மஹாஸமணா’’தி. ஸகிதே³வ பஞ்ச கட்ட²ஸதானி பா²லியிங்ஸு. அத² கோ²
உருவேலகஸ்ஸபஸ்ஸ ஜடிலஸ்ஸ ஏதத³ஹோஸி – ‘‘மஹித்³தி⁴கோ கோ² மஹாஸமணோ மஹானுபா⁴வோ,
யத்ர ஹி நாம கட்டா²னிபி பா²லியிஸ்ஸந்தி, ந த்வேவ ச கோ² அரஹா யதா²
அஹ’’ந்தி.

47. தேன கோ² பன ஸமயேன தே ஜடிலா அக்³கி³ங் பரிசரிதுகாமா ந ஸக்கொந்தி அக்³கி³ங் உஜ்ஜலேதுங் [ஜாலேதுங் (ஸீ॰), உஜ்ஜலிதுங் (க॰)]. அத² கோ² தேஸங் ஜடிலானங் ஏதத³ஹோஸி – ‘‘நிஸ்ஸங்ஸயங் கோ² மஹாஸமணஸ்ஸ இத்³தா⁴னுபா⁴வோ, யதா² மயங் ந ஸக்கோம அக்³கி³ங்
உஜ்ஜலேது’’ந்தி. அத² கோ² ப⁴க³வா உருவேலகஸ்ஸபங் ஜடிலங் ஏதத³வோச –
‘‘உஜ்ஜலியந்து, கஸ்ஸப, அக்³கீ³’’தி. ‘‘உஜ்ஜலியந்து, மஹாஸமணா’’தி. ஸகிதே³வ
பஞ்ச அக்³கி³ஸதானி உஜ்ஜலியிங்ஸு. அத² கோ² உருவேலகஸ்ஸபஸ்ஸ ஜடிலஸ்ஸ ஏதத³ஹோஸி –
‘‘மஹித்³தி⁴கோ கோ² மஹாஸமணோ மஹானுபா⁴வோ, யத்ர ஹி நாம அக்³கீ³பி
உஜ்ஜலியிஸ்ஸந்தி, ந த்வேவ ச கோ² அரஹா யதா² அஹ’’ந்தி.

48.
தேன கோ² பன ஸமயேன தே ஜடிலா அக்³கி³ங் பரிசரித்வா ந ஸக்கொந்தி அக்³கி³ங்
விஜ்ஜா²பேதுங். அத² கோ² தேஸங் ஜடிலானங் ஏதத³ஹோஸி – ‘‘நிஸ்ஸங்ஸயங் கோ²
மஹாஸமணஸ்ஸ இத்³தா⁴னுபா⁴வோ, யதா² மயங் ந ஸக்கோம அக்³கி³ங்
விஜ்ஜா²பேது’’ந்தி. அத² கோ² ப⁴க³வா உருவேலகஸ்ஸபங் ஜடிலங் ஏதத³வோச
– ‘‘விஜ்ஜா²யந்து, கஸ்ஸப, அக்³கீ³’’தி. ‘‘விஜ்ஜா²யந்து, மஹாஸமணா’’தி.
ஸகிதே³வ பஞ்ச அக்³கி³ஸதானி விஜ்ஜா²யிங்ஸு. அத² கோ² உருவேலகஸ்ஸபஸ்ஸ ஜடிலஸ்ஸ
ஏதத³ஹோஸி – ‘‘மஹித்³தி⁴கோ கோ² மஹாஸமணோ மஹானுபா⁴வோ, யத்ர ஹி நாம அக்³கீ³பி
விஜ்ஜா²யிஸ்ஸந்தி, ந த்வேவ ச கோ² அரஹா யதா² அஹ’’ந்தி.

49.
தேன கோ² பன ஸமயேன தே ஜடிலா ஸீதாஸு ஹேமந்திகாஸு ரத்தீஸு அந்தரட்ட²காஸு
ஹிமபாதஸமயே நஜ்ஜா நேரஞ்ஜராய உம்முஜ்ஜந்திபி, நிமுஜ்ஜந்திபி,
உம்முஜ்ஜனநிமுஜ்ஜனம்பி கரொந்தி. அத² கோ² ப⁴க³வா பஞ்சமத்தானி
மந்தா³முகி²ஸதானி அபி⁴னிம்மினி, யத்த² தே ஜடிலா உத்தரித்வா விஸிப்³பே³ஸுங் . அத² கோ² தேஸங் ஜடிலானங் ஏதத³ஹோஸி – ‘‘நிஸ்ஸங்ஸயங் கோ²
மஹாஸமணஸ்ஸ இத்³தா⁴னுபா⁴வோ, யத²யிமா மந்தா³முகி²யோ நிம்மிதா’’தி. அத² கோ²
உருவேலகஸ்ஸபஸ்ஸ ஜடிலஸ்ஸ ஏதத³ஹோஸி – ‘‘மஹித்³தி⁴கோ கோ² மஹாஸமணோ மஹானுபா⁴வோ,
யத்ர ஹி நாம தாவ ப³ஹூ மந்தா³முகி²யோபி அபி⁴னிம்மினிஸ்ஸதி, ந த்வேவ ச கோ²
அரஹா யதா² அஹ’’ந்தி.

50. தேன கோ² பன ஸமயேன மஹா அகாலமேகோ⁴ பாவஸ்ஸி, மஹா உத³கவாஹகோ ஸஞ்ஜாயி. யஸ்மிங் பதே³ஸே ப⁴க³வா விஹரதி, ஸோ பதே³ஸோ உத³கேன ந ஒத்த²டோ [உத³கேன ஒத்த²டோ (ஸீ॰ ஸ்யா॰)]
ஹோதி. அத² கோ² ப⁴க³வதோ ஏதத³ஹோஸி – ‘‘யங்னூனாஹங் ஸமந்தா உத³கங் உஸ்ஸாரெத்வா
மஜ்ஜே² ரேணுஹதாய பூ⁴மியா சங்கமெய்ய’’ந்தி. அத² கோ² ப⁴க³வா ஸமந்தா உத³கங்
உஸ்ஸாரெத்வா மஜ்ஜே² ரேணுஹதாய பூ⁴மியா சங்கமி. அத² கோ² உருவேலகஸ்ஸபோ ஜடிலோ –
மாஹேவ கோ² மஹாஸமணோ உத³கேன வூள்ஹோ அஹோஸீதி நாவாய ஸம்ப³ஹுலேஹி ஜடிலேஹி
ஸத்³தி⁴ங் யஸ்மிங் பதே³ஸே ப⁴க³வா விஹரதி தங் பதே³ஸங் அக³மாஸி. அத்³த³ஸா கோ²
உருவேலகஸ்ஸபோ ஜடிலோ ப⁴க³வந்தங் ஸமந்தா உத³கங் உஸ்ஸாரெத்வா மஜ்ஜே² ரேணுஹதாய
பூ⁴மியா சங்கமந்தங், தி³ஸ்வான ப⁴க³வந்தங் ஏதத³வோச – ‘‘இத³ங் நு த்வங்,
மஹாஸமணா’’தி? ‘‘அயமஹமஸ்மி [ஆம அஹமஸ்மி (ஸ்யா॰)],
கஸ்ஸபா’’தி ப⁴க³வா வேஹாஸங் அப்³பு⁴க்³க³ந்த்வா நாவாய பச்சுட்டா²ஸி. அத²
கோ² உருவேலகஸ்ஸபஸ்ஸ ஜடிலஸ்ஸ ஏதத³ஹோஸி – ‘‘மஹித்³தி⁴கோ கோ² மஹாஸமணோ
மஹானுபா⁴வோ, யத்ர ஹி நாம உத³கம்பி ந பவாஹிஸ்ஸதி [நப்பஸஹிஸ்ஸதி (ஸீ॰)], ந த்வேவ ச கோ² அரஹா யதா² அஹ’’ந்தி.

51. அத²
கோ² ப⁴க³வதோ ஏதத³ஹோஸி – ‘‘சிரம்பி கோ² இமஸ்ஸ மோக⁴புரிஸஸ்ஸ ஏவங் ப⁴விஸ்ஸதி –
‘மஹித்³தி⁴கோ கோ² மஹாஸமணோ மஹானுபா⁴வோ, ந த்வேவ ச கோ² அரஹா யதா² அஹ’ந்தி;
யங்னூனாஹங் இமங் ஜடிலங் ஸங்வேஜெய்ய’’ந்தி. அத² கோ² ப⁴க³வா உருவேலகஸ்ஸபங்
ஜடிலங் ஏதத³வோச – ‘‘நேவ ச கோ² த்வங், கஸ்ஸப, அரஹா, நாபி
அரஹத்தமக்³க³ஸமாபன்னோ. ஸாபி தே படிபதா³ நத்தி², யாய த்வங் அரஹா வா அஸ்ஸஸி,
அரஹத்தமக்³க³ங் வா ஸமாபன்னோ’’தி. அத² கோ² உருவேலகஸ்ஸபோ ஜடிலோ ப⁴க³வதோ
பாதே³ஸு ஸிரஸா நிபதித்வா ப⁴க³வந்தங் ஏதத³வோச – ‘‘லபெ⁴ய்யாஹங், ப⁴ந்தே,
ப⁴க³வதோ ஸந்திகே பப்³ப³ஜ்ஜங், லபெ⁴ய்யங் உபஸம்பத³’’ந்தி. த்வங் கோ²ஸி,
கஸ்ஸப, பஞ்சன்னங் ஜடிலஸதானங் நாயகோ வினாயகோ அக்³கோ³ பமுகோ² பாமொக்கோ². தேபி
தாவ அபலோகேஹி, யதா² தே மஞ்ஞிஸ்ஸந்தி ததா² தே கரிஸ்ஸந்தீதி. அத² கோ²
உருவேலகஸ்ஸபோ ஜடிலோ யேன தே ஜடிலா தேனுபஸங்கமி, உபஸங்கமித்வா தே ஜடிலே
ஏதத³வோச – ‘‘இச்சா²மஹங் , போ⁴, மஹாஸமணே
ப்³ரஹ்மசரியங் சரிதுங், யதா² ப⁴வந்தோ மஞ்ஞந்தி ததா² கரொந்தூ’’தி.
‘‘சிரபடிகா மயங், போ⁴, மஹாஸமணே அபி⁴ப்பஸன்னா, ஸசே ப⁴வங், மஹாஸமணே
ப்³ரஹ்மசரியங் சரிஸ்ஸதி, ஸப்³பே³வ மயங் மஹாஸமணே ப்³ரஹ்மசரியங்
சரிஸ்ஸாமா’’தி. அத² கோ² தே ஜடிலா கேஸமிஸ்ஸங் ஜடாமிஸ்ஸங் கா²ரிகாஜமிஸ்ஸங்
அக்³கி³ஹுதமிஸ்ஸங் உத³கே பவாஹெத்வா யேன ப⁴க³வா தேனுபஸங்கமிங்ஸு,
உபஸங்கமித்வா ப⁴க³வதோ பாதே³ஸு ஸிரஸா நிபதித்வா ப⁴க³வந்தங் ஏதத³வோசுங் –
‘‘லபெ⁴ய்யாம மயங், ப⁴ந்தே, ப⁴க³வதோ ஸந்திகே
பப்³ப³ஜ்ஜங், லபெ⁴ய்யாம உபஸம்பத³’’ந்தி. ‘‘ஏத² பி⁴க்க²வோ’’தி ப⁴க³வா அவோச –
‘‘ஸ்வாக்கா²தோ த⁴ம்மோ, சரத² ப்³ரஹ்மசரியங் ஸம்மா து³க்க²ஸ்ஸ
அந்தகிரியாயா’’தி. ஸாவ தேஸங் ஆயஸ்மந்தானங் உபஸம்பதா³ அஹோஸி.

52. அத்³த³ஸா
கோ² நதீ³கஸ்ஸபோ ஜடிலோ கேஸமிஸ்ஸங் ஜடாமிஸ்ஸங் கா²ரிகாஜமிஸ்ஸங்
அக்³கி³ஹுதமிஸ்ஸங் உத³கே வுய்ஹமானே, தி³ஸ்வானஸ்ஸ ஏதத³ஹோஸி – ‘‘மாஹேவ மே
பா⁴துனோ உபஸக்³கோ³ அஹோஸீ’’தி. ஜடிலே பாஹேஸி – க³ச்ச²த² மே பா⁴தரங்
ஜானாதா²தி. ஸாமஞ்ச தீஹி ஜடிலஸதேஹி ஸத்³தி⁴ங் யேனாயஸ்மா உருவேலகஸ்ஸபோ
தேனுபஸங்கமி, உபஸங்கமித்வா ஆயஸ்மந்தங் உருவேலகஸ்ஸபங் ஏதத³வோச – ‘‘இத³ங் நு
கோ², கஸ்ஸப, ஸெய்யோ’’தி? ‘‘ஆமாவுஸோ, இத³ங் ஸெய்யோ’’தி. அத² கோ² தே ஜடிலா
கேஸமிஸ்ஸங் ஜடாமிஸ்ஸங் கா²ரிகாஜமிஸ்ஸங் அக்³கி³ஹுதமிஸ்ஸங் உத³கே பவாஹெத்வா
யேன ப⁴க³வா தேனுபஸங்கமிங்ஸு, உபஸங்கமித்வா ப⁴க³வதோ
பாதே³ஸு ஸிரஸா நிபதித்வா ப⁴க³வந்தங் ஏதத³வோசுங் – ‘‘லபெ⁴ய்யாம மயங்,
ப⁴ந்தே, ப⁴க³வதோ ஸந்திகே பப்³ப³ஜ்ஜங், லபெ⁴ய்யாம உபஸம்பத³’’ந்தி. ‘‘ஏத²
பி⁴க்க²வோ’’தி ப⁴க³வா அவோச – ‘‘ஸ்வாக்கா²தோ த⁴ம்மோ, சரத² ப்³ரஹ்மசரியங்
ஸம்மா து³க்க²ஸ்ஸ அந்தகிரியாயா’’தி. ஸாவ தேஸங் ஆயஸ்மந்தானங் உபஸம்பதா³
அஹோஸி.

53.
அத்³த³ஸா கோ² க³யாகஸ்ஸபோ ஜடிலோ கேஸமிஸ்ஸங் ஜடாமிஸ்ஸங் கா²ரிகாஜமிஸ்ஸங்
அக்³கி³ஹுதமிஸ்ஸங் உத³கே வுய்ஹமானே, தி³ஸ்வானஸ்ஸ ஏதத³ஹோஸி – ‘‘மாஹேவ மே
பா⁴தூனங் உபஸக்³கோ³ அஹோஸீ’’தி. ஜடிலே பாஹேஸி –
க³ச்ச²த² மே பா⁴தரோ ஜானாதா²தி. ஸாமஞ்ச த்³வீஹி ஜடிலஸதேஹி ஸத்³தி⁴ங்
யேனாயஸ்மா உருவேலகஸ்ஸபோ தேனுபஸங்கமி, உபஸங்கமித்வா ஆயஸ்மந்தங்
உருவேலகஸ்ஸபங் ஏதத³வோச – ‘‘இத³ங் நு கோ², கஸ்ஸப, ஸெய்யோ’’தி? ‘‘ஆமாவுஸோ,
இத³ங் ஸெய்யோ’’தி. அத² கோ² தே ஜடிலா கேஸமிஸ்ஸங் ஜடாமிஸ்ஸங் கா²ரிகாஜமிஸ்ஸங்
அக்³கி³ஹுதமிஸ்ஸங் உத³கே பவாஹெத்வா யேன ப⁴க³வா தேனுபஸங்கமிங்ஸு,
உபஸங்கமித்வா ப⁴க³வதோ பாதே³ஸு ஸிரஸா நிபதித்வா
ப⁴க³வந்தங் ஏதத³வோசுங் – ‘‘லபெ⁴ய்யாம மயங், ப⁴ந்தே, ப⁴க³வதோ ஸந்திகே
பப்³ப³ஜ்ஜங், லபெ⁴ய்யாம உபஸம்பத³’’ந்தி. ‘‘ஏத² பி⁴க்க²வோ’’தி ப⁴க³வா அவோச –
‘‘ஸ்வாக்கா²தோ த⁴ம்மோ, சரத² ப்³ரஹ்மசரியங் ஸம்மா து³க்க²ஸ்ஸ
அந்தகிரியாயா’’தி. ஸாவ தேஸங் ஆயஸ்மந்தானங் உபஸம்பதா³ அஹோஸி.

ப⁴க³வதோ அதி⁴ட்டா²னேன பஞ்ச கட்ட²ஸதானி ந பா²லியிங்ஸு,
பா²லியிங்ஸு; அக்³கீ³ ந உஜ்ஜலியிங்ஸு, உஜ்ஜலியிங்ஸு; ந விஜ்ஜா²யிங்ஸு,
விஜ்ஜா²யிங்ஸு; பஞ்சமந்தா³முகி²ஸதானி அபி⁴னிம்மினி. ஏதேன நயேன
அட்³டு⁴ட்³ட⁴பாடிஹாரியஸஹஸ்ஸானி ஹொந்தி.

54.
அத² கோ² ப⁴க³வா உருவேலாயங் யதா²பி⁴ரந்தங் விஹரித்வா யேன க³யாஸீஸங் தேன
பக்காமி மஹதா பி⁴க்கு²ஸங்கே⁴ன ஸத்³தி⁴ங் பி⁴க்கு²ஸஹஸ்ஸேன ஸப்³பே³ஹேவ
புராணஜடிலேஹி. தத்ர ஸுத³ங் ப⁴க³வா க³யாயங் விஹரதி க³யாஸீஸே ஸத்³தி⁴ங்
பி⁴க்கு²ஸஹஸ்ஸேன. தத்ர கோ² ப⁴க³வா பி⁴க்கூ² ஆமந்தேஸி –

[ஸங்॰ நி॰ 4.29] ‘‘ஸப்³ப³ங் , பி⁴க்க²வே, ஆதி³த்தங். கிஞ்ச, பி⁴க்க²வே, ஸப்³ப³ங் ஆதி³த்தங்? சக்கு²
ஆதி³த்தங், ரூபா ஆதி³த்தா, சக்கு²விஞ்ஞாணங் ஆதி³த்தங், சக்கு²ஸம்ப²ஸ்ஸோ
ஆதி³த்தோ, யமித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா
து³க்க²ங் வா அது³க்க²மஸுக²ங் வா தம்பி ஆதி³த்தங். கேன ஆதி³த்தங்?
ராக³க்³கி³னா தோ³ஸக்³கி³னா மோஹக்³கி³னா ஆதி³த்தங், ஜாதியா ஜராய மரணேன
ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி ஆதி³த்தந்தி வதா³மி.
ஸோதங் ஆதி³த்தங், ஸத்³தா³ ஆதி³த்தா, ஸோதவிஞ்ஞாணங் ஆதி³த்தங், ஸோதஸம்ப²ஸ்ஸோ
ஆதி³த்தோ, யமித³ங் ஸோதஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா
து³க்க²ங் வா அது³க்க²மஸுக²ங் வா தம்பி ஆதி³த்தங். கேன ஆதி³த்தங்?
ராக³க்³கி³னா தோ³ஸக்³கி³னா மோஹக்³கி³னா ஆதி³த்தங், ஜாதியா ஜராய மரணேன
ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி ஆதி³த்தந்தி வதா³மி.
கா⁴னங் ஆதி³த்தங், க³ந்தா⁴ ஆதி³த்தா, கா⁴னவிஞ்ஞாணங் ஆதி³த்தங்,
கா⁴னஸம்ப²ஸ்ஸோ ஆதி³த்தோ, யமித³ங் கா⁴னஸம்ப²ஸ்ஸபச்சயா உப்பஜ்ஜதி வேத³யிதங்
ஸுக²ங் வா து³க்க²ங் வா அது³க்க²மஸுக²ங் வா தம்பி ஆதி³த்தங். கேன
ஆதி³த்தங்? ராக³க்³கி³னா தோ³ஸக்³கி³னா மோஹக்³கி³னா ஆதி³த்தங், ஜாதியா ஜராய
மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி ஆதி³த்தந்தி
வதா³மி. ஜிவ்ஹா ஆதி³த்தா, ரஸா ஆதி³த்தா, ஜிவ்ஹாவிஞ்ஞாணங் ஆதி³த்தங்
ஜிவ்ஹாஸம்ப²ஸ்ஸோ ஆதி³த்தோ, யமித³ங் ஜிவ்ஹாஸம்ப²ஸ்ஸபச்சயா உப்பஜ்ஜதி
வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ஆதி³த்தங். கேன
ஆதி³த்தங்? ராக³க்³கி³னா தோ³ஸக்³கி³னா மோஹக்³கி³னா ஆதி³த்தங், ஜாதியா ஜராய
மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி ஆதி³த்தந்தி
வதா³மி. காயோ ஆதி³த்தோ, பொ²ட்ட²ப்³பா³ ஆதி³த்தா, காயவிஞ்ஞாணங் ஆதி³த்தங்
காயஸம்ப²ஸ்ஸோ ஆதி³த்தோ, யமித³ங் காயஸம்ப²ஸ்ஸபச்சயா உப்பஜ்ஜதி வேத³யிதங்
ஸுக²ங் வா து³க்க²ங் வா அது³க்க²மஸுக²ங் வா தம்பி ஆதி³த்தங். கேன
ஆதி³த்தங்? ராக³க்³கி³னா தோ³ஸக்³கி³னா மோஹக்³கி³னா ஆதி³த்தங், ஜாதியா ஜராய
மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி ஆதி³த்தந்தி
வதா³மி. மனோ ஆதி³த்தோ, த⁴ம்மா ஆதி³த்தா, மனோவிஞ்ஞாணங் ஆதி³த்தங்
மனோஸம்ப²ஸ்ஸோ ஆதி³த்தோ, யமித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங்
ஸுக²ங் வா து³க்க²ங் வா அது³க்க²மஸுக²ங் வா தம்பி ஆதி³த்தங். கேன
ஆதி³த்தங்? ராக³க்³கி³னா தோ³ஸக்³கி³னா மோஹக்³கி³னா ஆதி³த்தங், ஜாதியா ஜராய
மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி ஆதி³த்தந்தி
வதா³மி.

‘‘ஏவங் பஸ்ஸங், பி⁴க்க²வே,
ஸுதவா அரியஸாவகோ சக்கு²ஸ்மிம்பி நிப்³பி³ந்த³தி, ரூபேஸுபி நிப்³பி³ந்த³தி,
சக்கு²விஞ்ஞாணேபி நிப்³பி³ந்த³தி, சக்கு²ஸம்ப²ஸ்ஸேபி நிப்³பி³ந்த³தி,
யமித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா
அது³க்க²மஸுக²ங் வா, தஸ்மிம்பி நிப்³பி³ந்த³தி. ஸோதஸ்மிம்பி நிப்³பி³ந்த³தி, ஸத்³தே³ஸுபி நிப்³பி³ந்த³தி…பே॰… கா⁴னஸ்மிம்பி நிப்³பி³ந்த³தி ,
க³ந்தே⁴ஸுபி நிப்³பி³ந்த³தி…பே॰… ஜிவ்ஹாயபி நிப்³பி³ந்த³தி, ரஸேஸுபி
நிப்³பி³ந்த³தி…பே॰… காயஸ்மிம்பி நிப்³பி³ந்த³தி, பொ²ட்ட²ப்³பே³ஸுபி
நிப்³பி³ந்த³தி…பே॰… மனஸ்மிம்பி நிப்³பி³ந்த³தி, த⁴ம்மேஸுபி
நிப்³பி³ந்த³தி, மனோவிஞ்ஞாணேபி நிப்³பி³ந்த³தி, மனோஸம்ப²ஸ்ஸேபி
நிப்³பி³ந்த³தி, யமித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா
து³க்க²ங் வா அது³க்க²மஸுக²ங் வா தஸ்மிம்பி நிப்³பி³ந்த³தி, நிப்³பி³ந்த³ங்
விரஜ்ஜதி, விராகா³ விமுச்சதி, விமுத்தஸ்மிங் விமுத்தமிதி ஞாணங் ஹோதி.
கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயாதி
பஜானாதீ’’தி.

இமஸ்மிஞ்ச பன வெய்யாகரணஸ்மிங் ப⁴ஞ்ஞமானே தஸ்ஸ பி⁴க்கு²ஸஹஸ்ஸஸ்ஸ அனுபாதா³ய ஆஸவேஹி சித்தானி விமுச்சிங்ஸு.

ஆதி³த்தபரியாயஸுத்தங் நிட்டி²தங்.

உருவேலபாடிஹாரியங் ததியபா⁴ணவாரோ நிட்டி²தோ.

13. பி³ம்பி³ஸாரஸமாக³மகதா²

55.
அத² கோ² ப⁴க³வா க³யாஸீஸே யதா²பி⁴ரந்தங் விஹரித்வா யேன ராஜக³ஹங் தேன
சாரிகங் பக்காமி, மஹதா பி⁴க்கு²ஸங்கே⁴ன ஸத்³தி⁴ங் பி⁴க்கு²ஸஹஸ்ஸேன
ஸப்³பே³ஹேவ புராணஜடிலேஹி. அத² கோ² ப⁴க³வா அனுபுப்³பே³ன சாரிகங் சரமானோ யேன
ராஜக³ஹங் தத³வஸரி. தத்ர ஸுத³ங் ப⁴க³வா ராஜக³ஹே விஹரதி லட்டி²வனே [லட்டி²வனுய்யானே (ஸ்யா॰)] ஸுப்பதிட்டே² சேதியே. அஸ்ஸோஸி கோ² ராஜா மாக³தோ⁴ ஸேனியோ பி³ம்பி³ஸாரோ – ஸமணோ க²லு
போ⁴ கோ³தமோ ஸக்யபுத்தோ ஸக்யகுலா பப்³ப³ஜிதோ ராஜக³ஹங் அனுப்பத்தோ ராஜக³ஹே
விஹரதி லட்டி²வனே ஸுப்பதிட்டே² சேதியே. தங் கோ² பன ப⁴க³வந்தங் [ப⁴வந்தங் (க॰)]
கோ³தமங் ஏவங் கல்யாணோ கித்திஸத்³தோ³ அப்³பு⁴க்³க³தோ – இதிபி ஸோ ப⁴க³வா
அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ
புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா [ப⁴க³வாதி (க॰)]. ஸோ இமங் லோகங் ஸதே³வகங் ஸமாரகங்
ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா
ஸச்சி²கத்வா பவேதே³தி. ஸோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங்
பரியோஸானகல்யாணங் ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங்
ப்³ரஹ்மசரியங் பகாஸேதி. ஸாது⁴ கோ² பன ததா²ரூபானங் அரஹதங் த³ஸ்ஸனங் ஹோதீதி.

அத² கோ² ராஜா மாக³தோ⁴ ஸேனியோ பி³ம்பி³ஸாரோ த்³வாத³ஸனஹுதேஹி [த்³வாத³ஸனியுதேஹி (யோஜனா)] மாக³தி⁴கேஹி ப்³ராஹ்மணக³ஹபதிகேஹி
பரிவுதோ யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா
ஏகமந்தங் நிஸீதி³. தேபி கோ² த்³வாத³ஸனஹுதா மாக³தி⁴கா ப்³ராஹ்மணக³ஹபதிகா
அப்பேகச்சே ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு, அப்பேகச்சே
ப⁴க³வதா ஸத்³தி⁴ங் ஸம்மோதி³ங்ஸு, ஸம்மோத³னீயங் கத²ங் ஸாரணீயங் வீதிஸாரெத்வா
ஏகமந்தங் நிஸீதி³ங்ஸு, அப்பேகச்சே யேன ப⁴க³வா தேனஞ்ஜலிங் பணாமெத்வா
ஏகமந்தங் நிஸீதி³ங்ஸு, அப்பேகச்சே ப⁴க³வதோ ஸந்திகே நாமகொ³த்தங் ஸாவெத்வா
ஏகமந்தங் நிஸீதி³ங்ஸு, அப்பேகச்சே துண்ஹீபூ⁴தா ஏகமந்தங் நிஸீதி³ங்ஸு. அத²
கோ² தேஸங் த்³வாத³ஸனஹுதானங் [த்³வாத³ஸனியுதானங் (யோஜனா)] மாக³தி⁴கானங்
ப்³ராஹ்மணக³ஹபதிகானங் ஏதத³ஹோஸி – ‘‘கிங் நு கோ² மஹாஸமணோ உருவேலகஸ்ஸபே
ப்³ரஹ்மசரியங் சரதி, உதா³ஹு உருவேலகஸ்ஸபோ மஹாஸமணே ப்³ரஹ்மசரியங் சரதீ’’தி?
அத² கோ² ப⁴க³வா தேஸங் த்³வாத³ஸனஹுதானங் மாக³தி⁴கானங் ப்³ராஹ்மணக³ஹபதிகானங்
சேதஸா சேதோபரிவிதக்கமஞ்ஞாய ஆயஸ்மந்தங் உருவேலகஸ்ஸபங் கா³தா²ய அஜ்ஜ²பா⁴ஸி –

‘‘கிமேவ தி³ஸ்வா உருவேலவாஸி, பஹாஸி அக்³கி³ங் கிஸகோவதா³னோ;

புச்சா²மி தங் கஸ்ஸப, ஏதமத்த²ங் கத²ங் பஹீனங் தவ அக்³கி³ஹுத்தந்தி.

‘‘ரூபே ச ஸத்³தே³ ச அதோ² ரஸே ச;

காமித்தி²யோ சாபி⁴வத³ந்தி யஞ்ஞா;

ஏதங் மலந்தி உபதீ⁴ஸு ஞத்வா;

தஸ்மா ந யிட்டே² ந ஹுதே அரஞ்ஜிந்தி.

‘‘எத்தே²வ தே மனோ ந ரமித்த² (கஸ்ஸபாதி ப⁴க³வா);

ரூபேஸு ஸத்³தே³ஸு அதோ² ரஸேஸு;

அத² கோ சரஹி தே³வமனுஸ்ஸலோகே;

ரதோ மனோ கஸ்ஸப, ப்³ரூஹி மேதந்தி.

‘‘தி³ஸ்வா பத³ங் ஸந்தமனூபதீ⁴கங்;

அகிஞ்சனங் காமப⁴வே அஸத்தங்;

அனஞ்ஞதா²பா⁴விமனஞ்ஞனெய்யங்;

தஸ்மா ந யிட்டே² ந ஹுதே அரஞ்ஜி’’ந்தி.

56. அத² கோ² ஆயஸ்மா உருவேலகஸ்ஸபோ உட்டா²யாஸனா ஏகங்ஸங் உத்தராஸங்க³ங் கரித்வா ப⁴க³வதோ
பாதே³ஸு ஸிரஸா நிபதித்வா ப⁴க³வந்தங் ஏதத³வோச – ‘‘ஸத்தா² மே, ப⁴ந்தே,
ப⁴க³வா, ஸாவகோஹமஸ்மி; ஸத்தா² மே, ப⁴ந்தே, ப⁴க³வா, ஸாவகோஹமஸ்மீ’’தி. அத² கோ²
தேஸங் த்³வாத³ஸனஹுதானங் மாக³தி⁴கானங் ப்³ராஹ்மணக³ஹபதிகானங் ஏதத³ஹோஸி –
‘‘உருவேலகஸ்ஸபோ மஹாஸமணே ப்³ரஹ்மசரியங் சரதீ’’தி. அத² கோ² ப⁴க³வா தேஸங்
த்³வாத³ஸனஹுதானங் மாக³தி⁴கானங் ப்³ராஹ்மணக³ஹபதிகானங் சேதஸா
சேதோபரிவிதக்கமஞ்ஞாய அனுபுப்³பி³ங் கத²ங் கதே²ஸி, ஸெய்யதி²த³ங் –
தா³னகத²ங் ஸீலகத²ங் ஸக்³க³கத²ங் காமானங் ஆதீ³னவங் ஓகாரங் ஸங்கிலேஸங்
நெக்க²ம்மே ஆனிஸங்ஸங் பகாஸேஸி. யதா³ தே ப⁴க³வா அஞ்ஞாஸி கல்லசித்தே
முது³சித்தே வினீவரணசித்தே உத³க்³க³சித்தே பஸன்னசித்தே, அத² யா
பு³த்³தா⁴னங் ஸாமுக்கங்ஸிகா த⁴ம்மதே³ஸனா, தங் பகாஸேஸி – து³க்க²ங்,
ஸமுத³யங், நிரோத⁴ங், மக்³க³ங். ஸெய்யதா²பி நாம ஸுத்³த⁴ங் வத்த²ங்
அபக³தகாளகங் ஸம்மதே³வ ரஜனங் படிக்³க³ண்ஹெய்ய, ஏவமேவ ஏகாத³ஸனஹுதானங்
மாக³தி⁴கானங் ப்³ராஹ்மணக³ஹபதிகானங் பி³ம்பி³ஸாரப்பமுகா²னங் தஸ்மிங் யேவ
ஆஸனே விரஜங் வீதமலங் த⁴ம்மசக்கு²ங் உத³பாதி³ – யங் கிஞ்சி ஸமுத³யத⁴ம்மங்,
ஸப்³ப³ங் தங் நிரோத⁴த⁴ம்மந்தி. ஏகனஹுதங் உபாஸகத்தங் படிவேதே³ஸி.

57.
அத² கோ² ராஜா மாக³தோ⁴ ஸேனியோ பி³ம்பி³ஸாரோ தி³ட்ட²த⁴ம்மோ பத்தத⁴ம்மோ
விதி³தத⁴ம்மோ பரியோகா³ள்ஹத⁴ம்மோ திண்ணவிசிகிச்சோ² விக³தகத²ங்கதோ²
வேஸாரஜ்ஜப்பத்தோ அபரப்பச்சயோ ஸத்து²ஸாஸனே ப⁴க³வந்தங் ஏதத³வோச – ‘‘புப்³பே³
மே, ப⁴ந்தே, குமாரஸ்ஸ ஸதோ பஞ்ச அஸ்ஸாஸகா அஹேஸுங், தே மே ஏதரஹி ஸமித்³தா⁴.
புப்³பே³ மே, ப⁴ந்தே, குமாரஸ்ஸ ஸதோ ஏதத³ஹோஸி – ‘அஹோ வத மங் ரஜ்ஜே
அபி⁴ஸிஞ்செய்யு’ந்தி, அயங் கோ² மே, ப⁴ந்தே, பட²மோ அஸ்ஸாஸகோ அஹோஸி, ஸோ மே
ஏதரஹி ஸமித்³தோ⁴. ‘தஸ்ஸ ச மே விஜிதங் அரஹங் ஸம்மாஸம்பு³த்³தோ⁴
ஓக்கமெய்யா’தி, அயங் கோ² மே, ப⁴ந்தே, து³தியோ அஸ்ஸாஸகோ அஹோஸி, ஸோ மே ஏதரஹி
ஸமித்³தோ⁴. ‘தஞ்சாஹங் ப⁴க³வந்தங் பயிருபாஸெய்ய’ந்தி, அயங் கோ² மே, ப⁴ந்தே,
ததியோ அஸ்ஸாஸகோ அஹோஸி, ஸோ மே ஏதரஹி ஸமித்³தோ⁴. ‘ஸோ ச
மே ப⁴க³வா த⁴ம்மங் தே³ஸெய்யா’தி, அயங் கோ² மே, ப⁴ந்தே, சதுத்தோ² அஸ்ஸாஸகோ
அஹோஸி, ஸோ மே ஏதரஹி ஸமித்³தோ⁴. ‘தஸ்ஸ சாஹங் ப⁴க³வதோ த⁴ம்மங் ஆஜானெய்ய’ந்தி,
அயங் கோ² மே, ப⁴ந்தே, பஞ்சமோ அஸ்ஸாஸகோ அஹோஸி, ஸோ மே ஏதரஹி ஸமித்³தோ⁴.
புப்³பே³ மே, ப⁴ந்தே, குமாரஸ்ஸ ஸதோ இமே பஞ்ச அஸ்ஸாஸகா அஹேஸுங், தே மே ஏதரஹி
ஸமித்³தா⁴. அபி⁴க்கந்தங், ப⁴ந்தே, அபி⁴க்கந்தங், ப⁴ந்தே, ஸெய்யதா²பி,
ப⁴ந்தே, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய,
மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய
சக்கு²மந்தோ ரூபானி த³க்க²ந்தீதி – ஏவமேவங் ப⁴க³வதா
அனேகபரியாயேன த⁴ம்மோ பகாஸிதோ. ஏஸாஹங், ப⁴ந்தே, ப⁴க³வந்தங் ஸரணங்
க³ச்சா²மி, த⁴ம்மஞ்ச, பி⁴க்கு²ஸங்க⁴ஞ்ச. உபாஸகங் மங் [மங் ப⁴ந்தே (க॰)], ப⁴க³வா தா⁴ரேது அஜ்ஜதக்³கே³ பாணுபேதங் ஸரணங் க³தங், அதி⁴வாஸேது ச மே, ப⁴ந்தே, ப⁴க³வா , ஸ்வாதனாய ப⁴த்தங் ஸத்³தி⁴ங் பி⁴க்கு²ஸங்கே⁴னா’’தி .
அதி⁴வாஸேஸி ப⁴க³வா துண்ஹீபா⁴வேன. அத² கோ² ராஜா மாக³தோ⁴ ஸேனியோ
பி³ம்பி³ஸாரோ ப⁴க³வதோ அதி⁴வாஸனங் விதி³த்வா உட்டா²யாஸனா ப⁴க³வந்தங்
அபி⁴வாதெ³த்வா பத³க்கி²ணங் கத்வா பக்காமி. அத² கோ² ராஜா மாக³தோ⁴ ஸேனியோ
பி³ம்பி³ஸாரோ தஸ்ஸா ரத்தியா அச்சயேன பணீதங் கா²த³னீயங் போ⁴ஜனீயங்
படியாதா³பெத்வா ப⁴க³வதோ காலங் ஆரோசாபேஸி – ‘‘காலோ, ப⁴ந்தே, நிட்டி²தங்
ப⁴த்த’’ந்தி.

58.
அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய ராஜக³ஹங்
பாவிஸி மஹதா பி⁴க்கு²ஸங்கே⁴ன ஸத்³தி⁴ங் பி⁴க்கு²ஸஹஸ்ஸேன ஸப்³பே³ஹேவ
புராணஜடிலேஹி. தேன கோ² பன ஸமயேன ஸக்கோ தே³வானமிந்தோ³ மாணவகவண்ணங்
அபி⁴னிம்மினித்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ புரதோ புரதோ
க³ச்ச²தி இமா கா³தா²யோ கா³யமானோ –

‘‘த³ந்தோ த³ந்தேஹி ஸஹ புராணஜடிலேஹி, விப்பமுத்தோ விப்பமுத்தேஹி;

ஸிங்கீ³னிக்க²ஸவண்ணோ, ராஜக³ஹங் பாவிஸி ப⁴க³வா.

‘‘முத்தோ முத்தேஹி ஸஹ புராணஜடிலேஹி, விப்பமுத்தோ விப்பமுத்தேஹி;

ஸிங்கீ³னிக்க²ஸவண்ணோ, ராஜக³ஹங் பாவிஸி ப⁴க³வா.

‘‘திண்ணோ திண்ணேஹி ஸஹ புராணஜடிலேஹி;

விப்பமுத்தோ விப்பமுத்தேஹி;

ஸிங்கீ³னிக்க²ஸுவண்ணோ;

ராஜக³ஹங் பாவிஸி ப⁴க³வா.

‘‘ஸந்தோ ஸந்தேஹி ஸஹ புராணஜடிலேஹி;

விப்பமுத்தோ விப்பமுத்தேஹி;

ஸிங்கீ³னிக்க²ஸவண்ணோ;

ராஜக³ஹங் பாவிஸி ப⁴க³வா.

‘‘த³ஸவாஸோ த³ஸப³லோ, த³ஸத⁴ம்மவிதூ³ த³ஸபி⁴ சுபேதோ;

ஸோ த³ஸஸதபரிவாரோ [பரிவாரகோ (க॰)] ராஜக³ஹங், பாவிஸி ப⁴க³வா’’தி.

மனுஸ்ஸா ஸக்கங் தே³வானமிந்த³ங்
பஸ்ஸித்வா ஏவமாஹங்ஸு – ‘‘அபி⁴ரூபோ வதாயங் மாணவகோ, த³ஸ்ஸனீயோ வதாயங்
மாணவகோ, பாஸாதி³கோ வதாயங் மாணவகோ. கஸ்ஸ நு கோ² அயங் மாணவகோ’’தி? ஏவங்
வுத்தே ஸக்கோ தே³வானமிந்தோ³ தே மனுஸ்ஸே கா³தா²ய அஜ்ஜ²பா⁴ஸி –

‘‘யோ தீ⁴ரோ ஸப்³ப³தி⁴ த³ந்தோ, ஸுத்³தோ⁴ அப்படிபுக்³க³லோ;

அரஹங் ஸுக³தோ லோகே, தஸ்ஸாஹங் பரிசாரகோ’’தி.

59. அத² கோ² ப⁴க³வா யேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ நிவேஸனங் தேனுபஸங்கமி, உபஸங்கமித்வா பஞ்ஞத்தே ஆஸனே
நிஸீதி³ ஸத்³தி⁴ங் பி⁴க்கு²ஸங்கே⁴ன. அத² கோ² ராஜா மாக³தோ⁴ ஸேனியோ
பி³ம்பி³ஸாரோ பு³த்³த⁴ப்பமுக²ங் பி⁴க்கு²ஸங்க⁴ங் பணீதேன கா²த³னீயேன
போ⁴ஜனீயேன ஸஹத்தா² ஸந்தப்பெத்வா ஸம்பவாரெத்வா ப⁴க³வந்தங் பு⁴த்தாவிங்
ஓனீதபத்தபாணிங் ஏகமந்தங் நிஸீதி³. ஏகமந்தங் நிஸின்னஸ்ஸ கோ² ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஏதத³ஹோஸி [சூளவ॰ 307]
– ‘‘கத்த² நு கோ² ப⁴க³வா விஹரெய்ய? யங் அஸ்ஸ கா³மதோ நேவ அவிதூ³ரே ந
அச்சாஸன்னே, க³மனாக³மனஸம்பன்னங், அத்தி²கானங் அத்தி²கானங் மனுஸ்ஸானங்
அபி⁴க்கமனீயங், தி³வா அப்பாகிண்ணங் [அப்பகிண்ணங் (ஸீ॰ ஸ்யா॰), அப்³போ⁴கிண்ணங் (க॰)],
ரத்திங் அப்பஸத்³த³ங் அப்பனிக்³கோ⁴ஸங் விஜனவாதங், மனுஸ்ஸராஹஸ்ஸெய்யகங்,
படிஸல்லானஸாருப்ப’’ந்தி. அத² கோ² ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ
ஏதத³ஹோஸி – ‘‘இத³ங் கோ² அம்ஹாகங் வேளுவனங் உய்யானங் கா³மதோ நேவ அவிதூ³ரே ந
அச்சாஸன்னே க³மனாக³மனஸம்பன்னங் அத்தி²கானங்
அத்தி²கானங் மனுஸ்ஸானங் அபி⁴க்கமனீயங் தி³வா அப்பாகிண்ணங் ரத்திங்
அப்பஸத்³த³ங் அப்பனிக்³கோ⁴ஸங் விஜனவாதங் மனுஸ்ஸராஹஸ்ஸெய்யகங்
படிஸல்லானஸாருப்பங். யங்னூனாஹங் வேளுவனங் உய்யானங் பு³த்³த⁴ப்பமுக²ஸ்ஸ
பி⁴க்கு²ஸங்க⁴ஸ்ஸ த³தெ³ய்ய’’ந்தி. அத² கோ² ராஜா மாக³தோ⁴ ஸேனியோ
பி³ம்பி³ஸாரோ ஸோவண்ணமயங் பி⁴ங்காரங் க³ஹெத்வா ப⁴க³வதோ ஓணோஜேஸி – ‘‘ஏதாஹங்,
ப⁴ந்தே, வேளுவனங் உய்யானங் பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ
த³ம்மீ’’தி. படிக்³க³ஹேஸி ப⁴க³வா ஆராமங். அத² கோ²
ப⁴க³வா ராஜானங் மாக³த⁴ங் ஸேனியங் பி³ம்பி³ஸாரங் த⁴ம்மியா கதா²ய
ஸந்த³ஸ்ஸெத்வா ஸமாத³பெத்வா ஸமுத்தேஜெத்வா ஸம்பஹங்ஸெத்வா உட்டா²யாஸனா
பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங்
கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஆராம’’ந்தி.

பி³ம்பி³ஸாரஸமாக³மகதா² நிட்டி²தா.

14. ஸாரிபுத்தமொக்³க³ல்லானபப்³ப³ஜ்ஜாகதா²

60. தேன கோ² பன ஸமயேன ஸஞ்சயோ [ஸஞ்ஜயோ (ஸீ॰ ஸ்யா॰)]
பரிப்³பா³ஜகோ ராஜக³ஹே படிவஸதி மஹதியா பரிப்³பா³ஜகபரிஸாய ஸத்³தி⁴ங்
அட்³ட⁴தெய்யேஹி பரிப்³பா³ஜகஸதேஹி. தேன கோ² பன ஸமயேன ஸாரிபுத்தமொக்³க³ல்லானா
ஸஞ்சயே பரிப்³பா³ஜகே ப்³ரஹ்மசரியங் சரந்தி. தேஹி கதிகா கதா ஹோதி – யோ
பட²மங் அமதங் அதி⁴க³ச்ச²தி, ஸோ இதரஸ்ஸ ஆரோசேதூதி. அத² கோ² ஆயஸ்மா அஸ்ஸஜி
புப்³ப³ண்ஹஸமயங் நிவாஸெத்வா பத்தசீவரமாதா³ய ராஜக³ஹங் பிண்டா³ய பாவிஸி
பாஸாதி³கேன அபி⁴க்கந்தேன படிக்கந்தேன ஆலோகிதேன விலோகிதேன ஸமிஞ்ஜிதேன
பஸாரிதேன, ஒக்கி²த்தசக்கு² இரியாபத²ஸம்பன்னோ. அத்³த³ஸா கோ² ஸாரிபுத்தோ
பரிப்³பா³ஜகோ ஆயஸ்மந்தங் அஸ்ஸஜிங் ராஜக³ஹே பிண்டா³ய சரந்தங் பாஸாதி³கேன
அபி⁴க்கந்தேன படிக்கந்தேன ஆலோகிதேன விலோகிதேன ஸமிஞ்ஜிதேன பஸாரிதேன
ஒக்கி²த்தசக்கு²ங் இரியாபத²ஸம்பன்னங். தி³ஸ்வானஸ்ஸ ஏதத³ஹோஸி – ‘‘யே வத லோகே
அரஹந்தோ வா அரஹத்தமக்³க³ங் வா ஸமாபன்னா, அயங் தேஸங் பி⁴க்கு² அஞ்ஞதரோ.
யங்னூனாஹங் இமங் பி⁴க்கு²ங் உபஸங்கமித்வா புச்செ²ய்யங் – ‘கங்ஸி த்வங், ஆவுஸோ, உத்³தி³ஸ்ஸ பப்³ப³ஜிதோ, கோ வா தே ஸத்தா², கஸ்ஸ வா த்வங் த⁴ம்மங் ரோசேஸீ’’’தி? அத²
கோ² ஸாரிபுத்தஸ்ஸ பரிப்³பா³ஜகஸ்ஸ ஏதத³ஹோஸி – ‘‘அகாலோ கோ² இமங் பி⁴க்கு²ங்
புச்சி²துங், அந்தரக⁴ரங் பவிட்டோ² பிண்டா³ய சரதி. யங்னூனாஹங் இமங்
பி⁴க்கு²ங் பிட்டி²தோ பிட்டி²தோ அனுப³ந்தெ⁴ய்யங், அத்தி²கேஹி உபஞ்ஞாதங்
மக்³க³’’ந்தி. அத² கோ² ஆயஸ்மா அஸ்ஸஜி ராஜக³ஹே பிண்டா³ய சரித்வா பிண்ட³பாதங்
ஆதா³ய படிக்கமி. அத² கோ² ஸாரிபுத்தோபி பரிப்³பா³ஜகோ யேனாயஸ்மா அஸ்ஸஜி
தேனுபஸங்கமி, உபஸங்கமித்வா ஆயஸ்மதா அஸ்ஸஜினா ஸத்³தி⁴ங் ஸம்மோதி³,
ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் அட்டா²ஸி. ஏகமந்தங்
டி²தோ கோ² ஸாரிபுத்தோ பரிப்³பா³ஜகோ ஆயஸ்மந்தங் அஸ்ஸஜிங் ஏதத³வோச –
‘‘விப்பஸன்னானி கோ² தே, ஆவுஸோ, இந்த்³ரியானி, பரிஸுத்³தோ⁴ ச²விவண்ணோ
பரியோதா³தோ. கங்ஸி த்வங், ஆவுஸோ, உத்³தி³ஸ்ஸ பப்³ப³ஜிதோ, கோ வா தே ஸத்தா²,
கஸ்ஸ வா த்வங் த⁴ம்மங் ரோசேஸீ’’தி? ‘‘அத்தா²வுஸோ, மஹாஸமணோ ஸக்யபுத்தோ
ஸக்யகுலா பப்³ப³ஜிதோ, தாஹங் ப⁴க³வந்தங் உத்³தி³ஸ்ஸ பப்³ப³ஜிதோ, ஸோ ச மே
ப⁴க³வா ஸத்தா², தஸ்ஸ சாஹங் ப⁴க³வதோ த⁴ம்மங் ரோசேமீ’’தி. ‘‘கிங்வாதீ³
பனாயஸ்மதோ ஸத்தா², கிமக்கா²யீ’’தி? ‘‘அஹங் கோ², ஆவுஸோ, நவோ அசிரபப்³ப³ஜிதோ,
அது⁴னாக³தோ இமங் த⁴ம்மவினயங், ந தாஹங் ஸக்கோமி வித்தா²ரேன த⁴ம்மங்
தே³ஸேதுங், அபி ச தே ஸங்கி²த்தேன அத்த²ங் வக்கா²மீ’’தி. அத² கோ² ஸாரிபுத்தோ
பரிப்³பா³ஜகோ ஆயஸ்மந்தங் அஸ்ஸஜிங் ஏதத³வோச – ‘‘ஹோது, ஆவுஸோ –

‘‘அப்பங் வா ப³ஹுங் வா பா⁴ஸஸ்ஸு, அத்த²ங்யேவ மே ப்³ரூஹி;

அத்தே²னேவ மே அத்தோ², கிங் காஹஸி ப்³யஞ்ஜனங் ப³ஹு’’ந்தி.

அத² கோ² ஆயஸ்மா அஸ்ஸஜி ஸாரிபுத்தஸ்ஸ பரிப்³பா³ஜகஸ்ஸ இமங் த⁴ம்மபரியாயங் அபா⁴ஸி –

[அப॰ 1.1.286 தே²ராபதா³னேபி] ‘‘யே த⁴ம்மா ஹேதுப்பப⁴வா, தேஸங் ஹேதுங் ததா²க³தோ ஆஹ;

தேஸஞ்ச யோ நிரோதோ⁴, ஏவங்வாதீ³ மஹாஸமணோ’’தி.

அத² கோ² ஸாரிபுத்தஸ்ஸ பரிப்³பா³ஜகஸ்ஸ இமங்
த⁴ம்மபரியாயங் ஸுத்வா விரஜங் வீதமலங் த⁴ம்மசக்கு²ங் உத³பாதி³ – ‘‘யங்
கிஞ்சி ஸமுத³யத⁴ம்மங், ஸப்³ப³ங் தங் நிரோத⁴த⁴ம்ம’’ந்தி.

[அப॰ 1.1.289 தே²ராபதா³னேபி] ஏஸேவ த⁴ம்மோ யதி³ தாவதே³வ, பச்சப்³யத்த² பத³மஸோகங்;

அதி³ட்ட²ங் அப்³ப⁴தீதங், ப³ஹுகேஹி கப்பனஹுதேஹீதி.

61.
அத² கோ² ஸாரிபுத்தோ பரிப்³பா³ஜகோ யேன மொக்³க³ல்லானோ பரிப்³பா³ஜகோ
தேனுபஸங்கமி. அத்³த³ஸா கோ² மொக்³க³ல்லானோ பரிப்³பா³ஜகோ ஸாரிபுத்தங்
பரிப்³பா³ஜகங் தூ³ரதோவ ஆக³ச்ச²ந்தங், தி³ஸ்வான ஸாரிபுத்தங்
பரிப்³பா³ஜகங் ஏதத³வோச – ‘‘விப்பஸன்னானி கோ² தே, ஆவுஸோ, இந்த்³ரியானி,
பரிஸுத்³தோ⁴ ச²விவண்ணோ பரியோதா³தோ. கச்சி நு த்வங், ஆவுஸோ, அமதங்
அதி⁴க³தோ’’தி? ‘‘ஆமாவுஸோ, அமதங் அதி⁴க³தோ’’தி. ‘‘யதா²கத²ங் பன த்வங்,
ஆவுஸோ, அமதங் அதி⁴க³தோ’’தி? ‘‘இதா⁴ஹங், ஆவுஸோ, அத்³த³ஸங் அஸ்ஸஜிங்
பி⁴க்கு²ங் ராஜக³ஹே பிண்டா³ய சரந்தங் பாஸாதி³கேன அபி⁴க்கந்தேன படிக்கந்தேன
ஆலோகிதேன விலோகிதேன ஸமிஞ்ஜிதேன பஸாரிதேன ஒக்கி²த்தசக்கு²ங்
இரியாபத²ஸம்பன்னங். தி³ஸ்வான மே ஏதத³ஹோஸி – ‘யே வத லோகே அரஹந்தோ வா
அரஹத்தமக்³க³ங் வா ஸமாபன்னா, அயங் தேஸங் பி⁴க்கு² அஞ்ஞதரோ. யங்னூனாஹங் இமங்
பி⁴க்கு²ங் உபஸங்கமித்வா புச்செ²ய்யங் – கங்ஸி த்வங், ஆவுஸோ உத்³தி³ஸ்ஸ
பப்³ப³ஜிதோ, கோ வா தே ஸத்தா², கஸ்ஸ வா த்வங் த⁴ம்மங் ரோசேஸீ’’’தி. தஸ்ஸ
மய்ஹங், ஆவுஸோ, ஏதத³ஹோஸி – ‘‘அகாலோ கோ² இமங் பி⁴க்கு²ங் புச்சி²துங்
அந்தரக⁴ரங் பவிட்டோ² பிண்டா³ய சரதி, யங்னூனாஹங் இமங் பி⁴க்கு²ங் பிட்டி²தோ
பிட்டி²தோ அனுப³ந்தெ⁴ய்யங் அத்தி²கேஹி உபஞ்ஞாதங் மக்³க³’’ந்தி. அத² கோ²,
ஆவுஸோ, அஸ்ஸஜி பி⁴க்கு² ராஜக³ஹே பிண்டா³ய சரித்வா பிண்ட³பாதங் ஆதா³ய
படிக்கமி. அத² க்²வாஹங், ஆவுஸோ, யேன அஸ்ஸஜி பி⁴க்கு² தேனுபஸங்கமிங்,
உபஸங்கமித்வா அஸ்ஸஜினா பி⁴க்கு²னா ஸத்³தி⁴ங் ஸம்மோதி³ங், ஸம்மோத³னீயங்
கத²ங் ஸாரணீயங் வீதிஸாரெத்வா ஏகமந்தங் அட்டா²ஸிங். ஏகமந்தங் டி²தோ கோ²
அஹங், ஆவுஸோ, அஸ்ஸஜிங் பி⁴க்கு²ங் ஏதத³வோசங் – ‘‘விப்பஸன்னானி கோ² தே,
ஆவுஸோ, இந்த்³ரியானி, பரிஸுத்³தோ⁴ ச²விவண்ணோ பரியோதா³தோ. ‘கங்ஸி த்வங்,
ஆவுஸோ, உத்³தி³ஸ்ஸ பப்³ப³ஜிதோ, கோ வா தே ஸத்தா², கஸ்ஸ வா த்வங் த⁴ம்மங்
ரோசேஸீ’’’தி? ‘அத்தா²வுஸோ, மஹாஸமணோ ஸக்யபுத்தோ ஸக்யகுலா பப்³ப³ஜிதோ, தாஹங்
ப⁴க³வந்தங் உத்³தி³ஸ்ஸ பப்³ப³ஜிதோ, ஸோ ச மே ப⁴க³வா ஸத்தா², தஸ்ஸ சாஹங் ப⁴க³வதோ த⁴ம்மங் ரோசேமீ’தி. ‘கிங்வாதீ³ பனாயஸ்மதோ ஸத்தா² கிமக்கா²யீ’தி .
‘அஹங் கோ², ஆவுஸோ, நவோ அசிரபப்³ப³ஜிதோ அது⁴னாக³தோ இமங் த⁴ம்மவினயங், ந
தாஹங் ஸக்கோமி வித்தா²ரேன த⁴ம்மங் தே³ஸேதுங், அபி ச தே ஸங்கி²த்தேன அத்த²ங்
வக்கா²மீ’’’தி . அத² க்²வாஹங், ஆவுஸோ, அஸ்ஸஜிங் பி⁴க்கு²ங் ஏதத³வோசங் – ‘‘ஹோது, ஆவுஸோ,

அப்பங் வா ப³ஹுங் வா பா⁴ஸஸ்ஸு, அத்த²ங்யேவ மே ப்³ரூஹி;

அத்தே²னேவ மே அத்தோ², கிங் காஹஸி ப்³யஞ்ஜனங் ப³ஹு’’ந்தி.

அத² கோ², ஆவுஸோ, அஸ்ஸஜி பி⁴க்கு² இமங் த⁴ம்மபரியாயங் அபா⁴ஸி –

‘‘யே த⁴ம்மா ஹேதுப்பப⁴வா, தேஸங் ஹேதுங் ததா²க³தோ ஆஹ;

தேஸஞ்ச யோ நிரோதோ⁴, ஏவங்வாதீ³ மஹாஸமணோ’’தி.

அத² கோ² மொக்³க³ல்லானஸ்ஸ பரிப்³பா³ஜகஸ்ஸ இமங் த⁴ம்மபரியாயங் ஸுத்வா விரஜங் வீதமலங் த⁴ம்மசக்கு²ங் உத³பாதி³ – யங் கிஞ்சி ஸமுத³யத⁴ம்மங், ஸப்³ப³ங் தங் நிரோத⁴த⁴ம்மந்தி.

ஏஸேவ த⁴ம்மோ யதி³ தாவதே³வ, பச்சப்³யத்த² பத³மஸோகங்;

அதி³ட்ட²ங் அப்³ப⁴தீதங், ப³ஹுகேஹி கப்பனஹுதேஹீதி.

62.
அத² கோ² மொக்³க³ல்லானோ பரிப்³பா³ஜகோ ஸாரிபுத்தங் பரிப்³பா³ஜகங் ஏதத³வோச
‘‘க³ச்சா²ம மயங், ஆவுஸோ, ப⁴க³வதோ ஸந்திகே, ஸோ நோ ப⁴க³வா ஸத்தா²’’தி.
‘‘இமானி கோ², ஆவுஸோ, அட்³ட⁴தெய்யானி பரிப்³பா³ஜகஸதானி அம்ஹே நிஸ்ஸாய அம்ஹே
ஸம்பஸ்ஸந்தா இத⁴ விஹரந்தி, தேபி தாவ அபலோகேம [அபலோகாம (க)].
யதா² தே மஞ்ஞிஸ்ஸந்தி, ததா² தே கரிஸ்ஸந்தீ’’தி. அத² கோ²
ஸாரிபுத்தமொக்³க³ல்லானா யேன தே பரிப்³பா³ஜகா தேனுபஸங்கமிங்ஸு, உபஸங்கமித்வா
தே பரிப்³பா³ஜகே ஏதத³வோசுங் – ‘‘க³ச்சா²ம மயங்,
ஆவுஸோ, ப⁴க³வதோ ஸந்திகே, ஸோ நோ ப⁴க³வா ஸத்தா²’’தி. ‘‘மயங் ஆயஸ்மந்தே
நிஸ்ஸாய ஆயஸ்மந்தே ஸம்பஸ்ஸந்தா இத⁴ விஹராம, ஸசே ஆயஸ்மந்தா மஹாஸமணே
ப்³ரஹ்மசரியங் சரிஸ்ஸந்தி, ஸப்³பே³வ மயங் மஹாஸமணே ப்³ரஹ்மசரியங்
சரிஸ்ஸாமா’’தி. அத² கோ² ஸாரிபுத்தமொக்³க³ல்லானா யேன ஸஞ்சயோ பரிப்³பா³ஜகோ
தேனுபஸங்கமிங்ஸு, உபஸங்கமித்வா ஸஞ்சயங் பரிப்³பா³ஜகங் ஏதத³வோசுங் –
‘‘க³ச்சா²ம மயங், ஆவுஸோ, ப⁴க³வதோ ஸந்திகே, ஸோ நோ ப⁴க³வா ஸத்தா²’’தி.
‘‘அலங், ஆவுஸோ, மா அக³மித்த², ஸப்³பே³வ தயோ இமங் க³ணங் பரிஹரிஸ்ஸாமா’’தி. து³தியம்பி கோ²…பே॰… ததியம்பி கோ² ஸாரிபுத்தமொக்³க³ல்லானா
ஸஞ்சயங் பரிப்³பா³ஜகங் ஏதத³வோசுங் – ‘‘க³ச்சா²ம மயங், ஆவுஸோ, ப⁴க³வதோ
ஸந்திகே, ஸோ நோ ப⁴க³வா ஸத்தா²’’தி. ‘‘அலங், ஆவுஸோ, மா அக³மித்த², ஸப்³பே³வ
தயோ இமங் க³ணங் பரிஹரிஸ்ஸாமா’’தி. அத² கோ² ஸாரிபுத்தமொக்³க³ல்லானா தானி
அட்³ட⁴தெய்யானி பரிப்³பா³ஜகஸதானி ஆதா³ய யேன வேளுவனங் தேனுபஸங்கமிங்ஸு.
ஸஞ்சயஸ்ஸ பன பரிப்³பா³ஜகஸ்ஸ தத்தே²வ உண்ஹங் லோஹிதங் முக²தோ உக்³க³ஞ்சி².

அத்³த³ஸா கோ² ப⁴க³வா [ப⁴க³வாதே (க)]
ஸாரிபுத்தமொக்³க³ல்லானே தூ³ரதோவ ஆக³ச்ச²ந்தே, தி³ஸ்வான பி⁴க்கூ² ஆமந்தேஸி –
‘‘ஏதே, பி⁴க்க²வே, த்³வே ஸஹாயகா ஆக³ச்ச²ந்தி, கோலிதோ உபதிஸ்ஸோ ச. ஏதங் மே
ஸாவகயுக³ங் ப⁴விஸ்ஸதி அக்³க³ங் ப⁴த்³த³யுக³’’ந்தி.

க³ம்பீ⁴ரே ஞாணவிஸயே, அனுத்தரே உபதி⁴ஸங்க²யே;

விமுத்தே அப்பத்தே வேளுவனங், அத² நே ஸத்தா² ப்³யாகாஸி.

ஏதே த்³வே ஸஹாயகா, ஆக³ச்ச²ந்தி கோலிதோ உபதிஸ்ஸோ ச;

ஏதங் மே ஸாவகயுக³ங், ப⁴விஸ்ஸதி அக்³க³ங் ப⁴த்³த³யுக³ந்தி.

அத² கோ² ஸாரிபுத்தமொக்³க³ல்லானா யேன ப⁴க³வா தேனுபஸங்கமிங்ஸு , உபஸங்கமித்வா

ப⁴க³வதோ பாதே³ஸு ஸிரஸா நிபதித்வா ப⁴க³வந்தங்
ஏதத³வோசுங் – ‘‘லபெ⁴ய்யாம மயங், ப⁴ந்தே, ப⁴க³வதோ ஸந்திகே பப்³ப³ஜ்ஜங்,
லபெ⁴ய்யாம உபஸம்பத³’’ந்தி. ‘‘ஏத² பி⁴க்க²வோ’’தி ப⁴க³வா அவோச –
‘‘ஸ்வாக்கா²தோ த⁴ம்மோ, சரத² ப்³ரஹ்மசரியங் ஸம்மா து³க்க²ஸ்ஸ
அந்தகிரியாயா’’தி. ஸாவ தேஸங் ஆயஸ்மந்தானங் உபஸம்பதா³ அஹோஸி.

அபி⁴ஞ்ஞாதானங் பப்³ப³ஜ்ஜா

63.
தேன கோ² பன ஸமயேன அபி⁴ஞ்ஞாதா அபி⁴ஞ்ஞாதா மாக³தி⁴கா குலபுத்தா ப⁴க³வதி
ப்³ரஹ்மசரியங் சரந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி –
அபுத்தகதாய படிபன்னோ ஸமணோ கோ³தமோ, வேத⁴ப்³யாய படிபன்னோ ஸமணோ கோ³தமோ,
குலுபச்சே²தா³ய படிபன்னோ ஸமணோ கோ³தமோ, இதா³னி அனேன ஜடிலஸஹஸ்ஸங்
பப்³பா³ஜிதங், இமானி ச அட்³ட⁴தெய்யானி பரிப்³பா³ஜகஸதானி ஸஞ்சயானி [ஸஞ்ஜெய்யானி (ஸீ॰), ஸஞ்ஜயானி (ஸ்யா॰)] பப்³பா³ஜிதானி. இமே ச அபி⁴ஞ்ஞாதா அபி⁴ஞ்ஞாதா மாக³தி⁴கா குலபுத்தா ஸமணே கோ³தமே ப்³ரஹ்மசரியங் சரந்தீதி. அபிஸ்ஸு பி⁴க்கூ² தி³ஸ்வா இமாய கா³தா²ய சோதெ³ந்தி –

‘‘ஆக³தோ கோ² மஹாஸமணோ, மாக³தா⁴னங் கி³ரிப்³ப³ஜங்;

ஸப்³பே³ ஸஞ்சயே நெத்வான [ஸஞ்ஜெய்யகே நெத்வா (ஸீ॰)], கங்ஸு தா³னி நயிஸ்ஸதீ’’தி.

அஸ்ஸோஸுங் கோ² பி⁴க்கூ² தேஸங் மனுஸ்ஸானங்
உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ
ஏதமத்த²ங் ஆரோசேஸுங்…பே॰… ந, பி⁴க்க²வே, ஸோ ஸத்³தோ³ சிரங் ப⁴விஸ்ஸதி,
ஸத்தாஹமேவ ப⁴விஸ்ஸதி, ஸத்தாஹஸ்ஸ அச்சயேன அந்தரதா⁴யிஸ்ஸதி. தேன ஹி,
பி⁴க்க²வே, யே தும்ஹே இமாய கா³தா²ய சோதெ³ந்தி –

‘‘ஆக³தோ கோ² மஹாஸமணோ, மாக³தா⁴னங் கி³ரிப்³ப³ஜங்;

ஸப்³பே³ ஸஞ்சயே நெத்வான, கங்ஸு தா³னி நயிஸ்ஸதீ’’தி.

தே தும்ஹே இமாய கா³தா²ய படிசோதே³த² –

‘‘நயந்தி வே மஹாவீரா, ஸத்³த⁴ம்மேன ததா²க³தா;

த⁴ம்மேன நயமானானங் [நீயமானானங் (க॰)], கா உஸூயா [உஸ்ஸுயா (க॰)] விஜானத’’ந்தி.

தேன கோ² பன ஸமயேன மனுஸ்ஸா பி⁴க்கூ² தி³ஸ்வா இமாய கா³தா²ய சோதெ³ந்தி –

‘‘ஆக³தோ கோ² மஹாஸமணோ, மாக³தா⁴னங் கி³ரிப்³ப³ஜங்;

ஸப்³பே³ ஸஞ்சயே நெத்வான, கங்ஸு தா³னி நயிஸ்ஸதீ’’தி.

பி⁴க்கூ² தே மனுஸ்ஸே இமாய கா³தா²ய படிசோதெ³ந்தி –

‘‘நயந்தி வே மஹாவீரா, ஸத்³த⁴ம்மேன ததா²க³தா;

த⁴ம்மேன நயமானானங், கா உஸூயா விஜானத’’ந்தி.

மனுஸ்ஸா த⁴ம்மேன கிர ஸமணா ஸக்யபுத்தியா நெந்தி நோ அத⁴ம்மேனாதி ஸத்தாஹமேவ ஸோ ஸத்³தோ³ அஹோஸி, ஸத்தாஹஸ்ஸ அச்சயேன அந்தரதா⁴யி.

ஸாரிபுத்தமொக்³க³ல்லானபப்³ப³ஜ்ஜாகதா² நிட்டி²தா.

சதுத்த²பா⁴ணவாரோ நிட்டி²தோ.

15. உபஜ்ஜா²யவத்தகதா²

64. தேன கோ² பன ஸமயேன பி⁴க்கூ² அனுபஜ்ஜா²யகா அனாசரியகா [இத³ங் பத³ங் ஸீ॰ ஸ்யா॰ பொத்த²கேஸு நத்தி²] அனோவதி³யமானா அனநுஸாஸியமானா து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரந்தி; மனுஸ்ஸானங் [தே மனுஸ்ஸானங் (க॰)]
பு⁴ஞ்ஜமானானங் உபரிபோ⁴ஜனேபி உத்திட்ட²பத்தங் உபனாமெந்தி, உபரிகா²த³னீயேபி
உத்திட்ட²பத்தங் உபனாமெந்தி, உபரிஸாயனீயேபி உத்திட்ட²பத்தங் உபனாமெந்தி,
உபரிபானீயேபி உத்திட்ட²பத்தங் உபனாமெந்தி; ஸாமங் ஸூபம்பி ஓத³னம்பி
விஞ்ஞாபெத்வா பு⁴ஞ்ஜந்தி; ப⁴த்தக்³கே³பி உச்சாஸத்³தா³ மஹாஸத்³தா³ விஹரந்தி.
மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா
ஸக்யபுத்தியா து³ன்னிவத்தா² து³ப்பாருதா அனாகப்பஸம்பன்னா பிண்டா³ய
சரிஸ்ஸந்தி; மனுஸ்ஸானங் பு⁴ஞ்ஜமானானங், உபரிபோ⁴ஜனேபி உத்திட்ட²பத்தங்
உபனாமெஸ்ஸந்தி, உபரிகா²த³னீயேபி உத்திட்ட²பத்தங் உபனாமெஸ்ஸந்தி,
உபரிஸாயனீயேபி உத்திட்ட²பத்தங் உபனாமெஸ்ஸந்தி, உபரிபானீயேபி
உத்திட்ட²பத்தங் உபனாமெஸ்ஸந்தி; ஸாமங் ஸூபம்பி ஓத³னம்பி விஞ்ஞாபெத்வா
பு⁴ஞ்ஜிஸ்ஸந்தி; ப⁴த்தக்³கே³பி உச்சாஸத்³தா³ மஹாஸத்³தா³ விஹரிஸ்ஸந்தி
ஸெய்யதா²பி ப்³ராஹ்மணா ப்³ராஹ்மணபோ⁴ஜனே’’தி.

அஸ்ஸோஸுங் கோ² பி⁴க்கூ² தேஸங்
மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ²
அப்பிச்சா² ஸந்துட்டா² லஜ்ஜினோ குக்குச்சகா ஸிக்கா²காமா, தே உஜ்ஜா²யந்தி
கி²ய்யந்தி விபாசெந்தி – ‘‘கத²ஞ்ஹி நாம பி⁴க்கூ² து³ன்னிவத்தா² து³ப்பாருதா
அனாகப்பஸம்பன்னா பிண்டா³ய சரிஸ்ஸந்தி; மனுஸ்ஸானங் பு⁴ஞ்ஜமானானங்,
உபரிபோ⁴ஜனேபி உத்திட்ட²பத்தங் உபனாமெஸ்ஸந்தி, உபரிகா²த³னீயேபி
உத்திட்ட²பத்தங் உபனாமெஸ்ஸந்தி, உபரிஸாயனீயேபி உத்திட்ட²பத்தங்
உபனாமெஸ்ஸந்தி, உபரிபானீயேபி உத்திட்ட²பத்தங் உபனாமெஸ்ஸந்தி; ஸாமங் ஸூபம்பி
ஓத³னம்பி விஞ்ஞாபெத்வா பு⁴ஞ்ஜிஸ்ஸந்தி; ப⁴த்தக்³கே³பி உச்சாஸத்³தா³
மஹாஸத்³தா³ விஹரிஸ்ஸந்தீ’’தி. அத² கோ² தே பி⁴க்கூ²…பே॰… ப⁴க³வதோ ஏதமத்த²ங்
ஆரோசேஸுங்.

அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே
பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘ஸச்சங் கிர,
பி⁴க்க²வே, பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா பிண்டா³ய
சரந்தி, மனுஸ்ஸானங் பு⁴ஞ்ஜமானானங் உபரி போ⁴ஜனேபி
உத்திட்ட²பத்தங் உபனாமெந்தி, உபரிகா²த³னீயேபி உத்திட்ட²பத்தங் உபனாமெந்தி,
உபரிஸாயனீயேபி உத்திட்ட²பத்தங் உபனாமெந்தி, உபரிபானீயேபி உத்திட்ட²பத்தங்
உபனாமெந்தி, ஸாமங் ஸூபம்பி ஓத³னம்பி விஞ்ஞாபெத்வா பு⁴ஞ்ஜந்தி,
ப⁴த்தக்³கே³பி உச்சாஸத்³தா³ மஹாஸத்³தா³ விஹரந்தீ’’தி? ‘‘ஸச்சங் ப⁴க³வா’’தி.
விக³ரஹி பு³த்³தோ⁴ ப⁴க³வா – ‘‘அனநுச்ச²விகங், பி⁴க்க²வே, தேஸங் மோக⁴புரிஸானங் அனநுலோமிகங் அப்பதிரூபங் அஸ்ஸாமணகங் அகப்பியங் அகரணீயங். கத²ஞ்ஹி நாம
தே, பி⁴க்க²வே, மோக⁴புரிஸா து³ன்னிவத்தா² து³ப்பாருதா அனாகப்பஸம்பன்னா
பிண்டா³ய சரிஸ்ஸந்தி, மனுஸ்ஸானங் பு⁴ஞ்ஜமானானங் உபரிபோ⁴ஜனேபி
உத்திட்ட²பத்தங் உபனாமெஸ்ஸந்தி, உபரிகா²த³னீயேபி உத்திட்ட²பத்தங்
உபனாமெஸ்ஸந்தி, உபரிஸாயனீயேபி உத்திட்ட²பத்தங் உபனாமெஸ்ஸந்தி, உபரிபானீயேபி
உத்திட்ட²பத்தங் உபனாமெஸ்ஸந்தி, ஸாமங் ஸூபம்பி ஓத³னம்பி விஞ்ஞாபெத்வா
பு⁴ஞ்ஜிஸ்ஸந்தி, ப⁴த்தக்³கே³பி உச்சாஸத்³தா³ மஹாஸத்³தா³ விஹரிஸ்ஸந்தி.
நேதங், பி⁴க்க²வே, அப்பஸன்னானங் வா பஸாதா³ய, பஸன்னானங் வா பி⁴ய்யோபா⁴வாய.
அத² க்²வேதங், பி⁴க்க²வே, அப்பஸன்னானஞ்சேவ அப்பஸாதா³ய, பஸன்னானஞ்ச
ஏகச்சானங் அஞ்ஞத²த்தாயா’’தி. அத² கோ² ப⁴க³வா தே பி⁴க்கூ² அனேகபரியாயேன
விக³ரஹித்வா து³ப்³ப⁴ரதாய து³ப்போஸதாய மஹிச்ச²தாய அஸந்துட்டி²தாய [அஸந்துட்டி²யா (ஸீ॰), அஸந்துட்ட²தாய (ஸ்யா)]
ஸங்க³ணிகாய கோஸஜ்ஜஸ்ஸ அவண்ணங் பா⁴ஸித்வா அனேகபரியாயேன ஸுப⁴ரதாய ஸுபோஸதாய
அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ து⁴தஸ்ஸ பாஸாதி³கஸ்ஸ அபசயஸ்ஸ
வீரியாரம்ப⁴ஸ்ஸ [விரியாரம்ப⁴ஸ்ஸ (ஸீ॰ ஸ்யா॰)] வண்ணங் பா⁴ஸித்வா பி⁴க்கூ²னங் தத³னுச்ச²விகங் தத³னுலோமிகங் த⁴ம்மிங் கத²ங் கத்வா பி⁴க்கூ² ஆமந்தேஸி –

65. ‘‘அனுஜானாமி, பி⁴க்க²வே, உபஜ்ஜா²யங். உபஜ்ஜா²யோ, பி⁴க்க²வே, ஸத்³தி⁴விஹாரிகம்ஹி புத்தசித்தங் உபட்ட²பெஸ்ஸதி ,
ஸத்³தி⁴விஹாரிகோ உபஜ்ஜா²யம்ஹி பிதுசித்தங் உபட்ட²பெஸ்ஸதி. ஏவங் தே
அஞ்ஞமஞ்ஞங் ஸகா³ரவா ஸப்பதிஸ்ஸா ஸபா⁴க³வுத்தினோ விஹரந்தா இமஸ்மிங்
த⁴ம்மவினயே வுட்³டி⁴ங் விருள்ஹிங் வேபுல்லங் ஆபஜ்ஜிஸ்ஸந்தி. ஏவஞ்ச பன,
பி⁴க்க²வே, உபஜ்ஜா²யோ க³ஹேதப்³போ³ – ஏகங்ஸங் உத்தராஸங்க³ங் கரித்வா பாதே³
வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ –
‘உபஜ்ஜா²யோ மே, ப⁴ந்தே, ஹோஹி; உபஜ்ஜா²யோ மே, ப⁴ந்தே, ஹோஹி; உபஜ்ஜா²யோ மே,
ப⁴ந்தே, ஹோஹீ’தி. ஸாஹூதி வா லஹூதி வா ஓபாயிகந்தி வா பதிரூபந்தி வா
பாஸாதி³கேன ஸம்பாதே³ஹீதி வா காயேன விஞ்ஞாபேதி, வாசாய விஞ்ஞாபேதி, காயேன
வாசாய [ந வாசாய (க॰)] விஞ்ஞாபேதி, க³ஹிதோ ஹோதி உபஜ்ஜா²யோ; ந காயேன விஞ்ஞாபேதி, ந வாசாய விஞ்ஞாபேதி , ந காயேன வாசாய விஞ்ஞாபேதி, ந க³ஹிதோ ஹோதி உபஜ்ஜா²யோ.