Free Online JC PURE INSPIRATION for free birds 🐦 🦢 🦅 to grow fruits 🍍 🍊 🥑 🥭 🍇 🍌 🍎 🍉 🍒 🍑 🥝 vegetables 🥦 🥕 🥗 🥬 🥔 🍆 🥜 🪴 🌱 🎃 🫑 🍅🍜 🧅 🍄 🍝 🥗 🥒 🌽 🍏 🫑 🌳 🍓 🍊 🥥 🌵 🍈 🌰 🇧🇧 🫐 🍅 🍐 🫒 Youniversity
Kushinara NIBBĀNA Bhumi Pagoda White Home, Puniya Bhumi Bengaluru, Prabuddha Bharat International.
Categories:

Archives:
Meta:
May 2022
M T W T F S S
« Apr    
 1
2345678
9101112131415
16171819202122
23242526272829
3031  
07/29/07
ஸுத்தபிடக-Part-2-தமிழில் திரபிடக மூன்று தொகுப்புகள்TIPITAKA -2.ஸாமஞ்ஞபலஸுத்தங்-ராஜாமச்சகதா-from FREE ONLINE eNālāndā Research and Practice UNIVERSITY through http://sarvajan.ambedkar.org
Filed under: General
Posted by: site admin @ 9:10 pm

up a level
ஸுத்தபிடக-Part-2-மிழில் திபி  மூன்று தொகுப்புள்TIPITAKA-2.ஸாமஞ்ஞபலஸுத்தங்-ராஜாமச்சகதா-from FREE ONLINE  eNālāndā Research and
Practice UNIVERSITY through http://sarvajan.ambedkar.org

2. ஸாமஞ்ஞபலஸுத்தங்

ராஜாமச்சகதா

150. ஏவங்
மே ஸுதங் – ஏகங் ஸமயங் ப⁴க³வா ராஜக³ஹே விஹரதி ஜீவகஸ்ஸ கோமாரப⁴ச்சஸ்ஸ
அம்ப³வனே மஹதா பி⁴க்கு²ஸங்கே⁴ன ஸத்³தி⁴ங் அட்³ட⁴தேளஸேஹி பி⁴க்கு²ஸதேஹி. தேன
கோ² பன ஸமயேன ராஜா மாக³தோ⁴ அஜாதஸத்து வேதே³ஹிபுத்தோ தத³ஹுபோஸதே² பன்னரஸே
கோமுதி³யா சாதுமாஸினியா புண்ணாய புண்ணமாய ரத்தியா ராஜாமச்சபரிவுதோ
உபரிபாஸாத³வரக³தோ நிஸின்னோ ஹோதி. அத² கோ² ராஜா மாக³தோ⁴ அஜாதஸத்து
வேதே³ஹிபுத்தோ தத³ஹுபோஸதே² உதா³னங் உதா³னேஸி – ‘‘ரமணீயா வத போ⁴ தோ³ஸினா
ரத்தி, அபி⁴ரூபா வத போ⁴ தோ³ஸினா ரத்தி, த³ஸ்ஸனீயா வத போ⁴ தோ³ஸினா ரத்தி,
பாஸாதி³கா வத போ⁴ தோ³ஸினா ரத்தி, லக்க²ஞ்ஞா வத போ⁴ தோ³ஸினா ரத்தி. கங் நு
க்²வஜ்ஜ ஸமணங் வா ப்³ராஹ்மணங் வா பயிருபாஸெய்யாம, யங் நோ பயிருபாஸதோ
சித்தங் பஸீதெ³ய்யா’’தி?

151.
ஏவங் வுத்தே, அஞ்ஞதரோ ராஜாமச்சோ ராஜானங் மாக³த⁴ங் அஜாதஸத்துங்
வேதே³ஹிபுத்தங் ஏதத³வோச – ‘‘அயங், தே³வ, பூரணோ கஸ்ஸபோ ஸங்கீ⁴ சேவ க³ணீ ச
க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ ரத்தஞ்ஞூ
சிரபப்³ப³ஜிதோ அத்³த⁴க³தோ வயோஅனுப்பத்தோ. தங் தே³வோ பூரணங் கஸ்ஸபங்
பயிருபாஸது. அப்பேவ நாம தே³வஸ்ஸ பூரணங் கஸ்ஸபங் பயிருபாஸதோ சித்தங்
பஸீதெ³ய்யா’’தி. ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ துண்ஹீ
அஹோஸி.

152. அஞ்ஞதரோபி கோ² ராஜாமச்சோ ராஜானங் மாக³த⁴ங் அஜாதஸத்துங் வேதே³ஹிபுத்தங் ஏதத³வோச – ‘‘அயங், தே³வ, மக்க²லி
கோ³ஸாலோ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ
ப³ஹுஜனஸ்ஸ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ. தங் தே³வோ
மக்க²லிங் கோ³ஸாலங் பயிருபாஸது. அப்பேவ நாம தே³வஸ்ஸ மக்க²லிங் கோ³ஸாலங்
பயிருபாஸதோ சித்தங் பஸீதெ³ய்யா’’தி. ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ துண்ஹீ அஹோஸி.

153. அஞ்ஞதரோபி
கோ² ராஜாமச்சோ ராஜானங் மாக³த⁴ங் அஜாதஸத்துங் வேதே³ஹிபுத்தங் ஏதத³வோச –
‘‘அயங், தே³வ, அஜிதோ கேஸகம்ப³லோ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ
தித்த²கரோ ஸாது⁴ஸம்மதோ ப³ஹுஜனஸ்ஸ ரத்தஞ்ஞூ சிரபப்³ப³ஜிதோ அத்³த⁴க³தோ
வயோஅனுப்பத்தோ. தங் தே³வோ அஜிதங் கேஸகம்ப³லங் பயிருபாஸது. அப்பேவ நாம
தே³வஸ்ஸ அஜிதங் கேஸகம்ப³லங் பயிருபாஸதோ சித்தங் பஸீதெ³ய்யா’’தி. ஏவங்
வுத்தே, ராஜா மாக³தோ⁴ அஜாதஸத்து வேதே³ஹிபுத்தோ துண்ஹீ அஹோஸி.

154. அஞ்ஞதரோபி கோ² ராஜாமச்சோ ராஜானங் மாக³த⁴ங் அஜாதஸத்துங் வேதே³ஹிபுத்தங் ஏதத³வோச – ‘‘அயங், தே³வ, பகுதோ⁴ [பகுத்³தோ⁴ (ஸீ॰)]
கச்சாயனோ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ
ஸாது⁴ஸம்மதோ ப³ஹுஜனஸ்ஸ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ.
தங் தே³வோ பகுத⁴ங் கச்சாயனங் பயிருபாஸது. அப்பேவ நாம தே³வஸ்ஸ பகுத⁴ங்
கச்சாயனங் பயிருபாஸதோ சித்தங் பஸீதெ³ய்யா’’தி. ஏவங் வுத்தே, ராஜா மாக³தோ⁴
அஜாதஸத்து வேதே³ஹிபுத்தோ துண்ஹீ அஹோஸி.

155. அஞ்ஞதரோபி கோ² ராஜாமச்சோ ராஜானங் மாக³த⁴ங் அஜாதஸத்துங் வேதே³ஹிபுத்தங் ஏதத³வோச – ‘‘அயங், தே³வ, ஸஞ்சயோ [ஸஞ்ஜயோ (ஸீ॰ ஸ்யா॰)] பே³லட்ட²புத்தோ [பே³ல்லட்டி²புத்தோ (ஸீ॰), வேலட்ட²புத்தோ (ஸ்யா॰)]
ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ
ப³ஹுஜனஸ்ஸ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ. தங் தே³வோ
ஸஞ்சயங் பே³லட்ட²புத்தங் பயிருபாஸது. அப்பேவ நாம தே³வஸ்ஸ ஸஞ்சயங்
பே³லட்ட²புத்தங் பயிருபாஸதோ சித்தங் பஸீதெ³ய்யா’’தி. ஏவங் வுத்தே, ராஜா
மாக³தோ⁴ அஜாதஸத்து வேதே³ஹிபுத்தோ துண்ஹீ அஹோஸி.

156. அஞ்ஞதரோபி கோ² ராஜாமச்சோ ராஜானங் மாக³த⁴ங் அஜாதஸத்துங் வேதே³ஹிபுத்தங் ஏதத³வோச – ‘‘அயங், தே³வ, நிக³ண்டோ² நாடபுத்தோ [நாத²புத்தோ (ஸீ॰), நாதபுத்தோ (பீ॰)]
ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ
ப³ஹுஜனஸ்ஸ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ. தங் தே³வோ
நிக³ண்ட²ங் நாடபுத்தங் பயிருபாஸது. அப்பேவ நாம தே³வஸ்ஸ நிக³ண்ட²ங் நாடபுத்தங் பயிருபாஸதோ சித்தங் பஸீதெ³ய்யா’’தி. ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ துண்ஹீ அஹோஸி.

கோமாரப⁴ச்சஜீவககதா²

157. தேன
கோ² பன ஸமயேன ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ அஜாதஸத்துஸ்ஸ
வேதே³ஹிபுத்தஸ்ஸ அவிதூ³ரே துண்ஹீபூ⁴தோ நிஸின்னோ ஹோதி. அத² கோ² ராஜா மாக³தோ⁴
அஜாதஸத்து வேதே³ஹிபுத்தோ ஜீவகங் கோமாரப⁴ச்சங் ஏதத³வோச – ‘‘த்வங் பன, ஸம்ம
ஜீவக, கிங் துண்ஹீ’’தி? ‘‘அயங், தே³வ, ப⁴க³வா அரஹங் ஸம்மாஸம்பு³த்³தோ⁴
அம்ஹாகங் அம்ப³வனே விஹரதி மஹதா பி⁴க்கு²ஸங்கே⁴ன ஸத்³தி⁴ங் அட்³ட⁴தேளஸேஹி
பி⁴க்கு²ஸதேஹி. தங் கோ² பன ப⁴க³வந்தங் [ப⁴க³வந்தங் கோ³தமங் (ஸீ॰ க॰ பீ॰)] ஏவங் கல்யாணோ கித்திஸத்³தோ³
அப்³பு⁴க்³க³தோ – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴
விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா²
தே³வமனுஸ்ஸானங் பு³த்³தோ⁴ ப⁴க³வா’தி. தங் தே³வோ ப⁴க³வந்தங் பயிருபாஸது.
அப்பேவ நாம தே³வஸ்ஸ ப⁴க³வந்தங் பயிருபாஸதோ சித்தங் பஸீதெ³ய்யா’தி.

158.
‘‘தேன ஹி, ஸம்ம ஜீவக, ஹத்தி²யானானி கப்பாபேஹீ’’தி. ‘‘ஏவங், தே³வா’’தி கோ²
ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ அஜாதஸத்துஸ்ஸ வேதே³ஹிபுத்தஸ்ஸ
படிஸ்ஸுணித்வா பஞ்சமத்தானி ஹத்தி²னிகாஸதானி கப்பாபெத்வா ரஞ்ஞோ ச ஆரோஹணீயங்
நாக³ங், ரஞ்ஞோ மாக³த⁴ஸ்ஸ அஜாதஸத்துஸ்ஸ வேதே³ஹிபுத்தஸ்ஸ படிவேதே³ஸி –
‘‘கப்பிதானி கோ² தே, தே³வ, ஹத்தி²யானானி, யஸ்ஸதா³னி காலங் மஞ்ஞஸீ’’தி.

159.
அத² கோ² ராஜா மாக³தோ⁴ அஜாதஸத்து வேதே³ஹிபுத்தோ பஞ்சஸு ஹத்தி²னிகாஸதேஸு
பச்சேகா இத்தி²யோ ஆரோபெத்வா ஆரோஹணீயங் நாக³ங் அபி⁴ருஹித்வா உக்காஸு
தா⁴ரியமானாஸு ராஜக³ஹம்ஹா நிய்யாஸி மஹச்சராஜானுபா⁴வேன, யேன ஜீவகஸ்ஸ
கோமாரப⁴ச்சஸ்ஸ அம்ப³வனங் தேன பாயாஸி.

அத² கோ² ரஞ்ஞோ மாக³த⁴ஸ்ஸ அஜாதஸத்துஸ்ஸ வேதே³ஹிபுத்தஸ்ஸ
அவிதூ³ரே அம்ப³வனஸ்ஸ அஹுதே³வ ப⁴யங், அஹு ச²ம்பி⁴தத்தங், அஹு லோமஹங்ஸோ. அத²
கோ² ராஜா மாக³தோ⁴ அஜாதஸத்து வேதே³ஹிபுத்தோ பீ⁴தோ ஸங்விக்³கோ³ லோமஹட்ட²ஜாதோ
ஜீவகங் கோமாரப⁴ச்சங் ஏதத³வோச – ‘‘கச்சி மங், ஸம்ம ஜீவக, ந வஞ்சேஸி? கச்சி
மங், ஸம்ம ஜீவக, ந பலம்பே⁴ஸி? கச்சி மங், ஸம்ம ஜீவக, ந பச்சத்தி²கானங்
தே³ஸி ? கத²ஞ்ஹி நாம தாவ மஹதோ பி⁴க்கு²ஸங்க⁴ஸ்ஸ
அட்³ட⁴தேளஸானங் பி⁴க்கு²ஸதானங் நேவ கி²பிதஸத்³தோ³ ப⁴விஸ்ஸதி, ந
உக்காஸிதஸத்³தோ³ ந நிக்³கோ⁴ஸோ’’தி.

‘‘மா பா⁴யி, மஹாராஜ, மா பா⁴யி, மஹாராஜ. ந தங் தே³வ, வஞ்சேமி; ந தங், தே³வ, பலம்பா⁴மி ; ந தங், தே³வ, பச்சத்தி²கானங் தே³மி. அபி⁴க்கம, மஹாராஜ, அபி⁴க்கம, மஹாராஜ, ஏதே மண்ட³லமாளே தீ³பா [பதீ³பா (ஸீ॰ ஸ்யா॰)] ஜா²யந்தீ’’தி.

ஸாமஞ்ஞப²லபுச்சா²

160. அத² கோ² ராஜா மாக³தோ⁴ அஜாதஸத்து வேதே³ஹிபுத்தோ யாவதிகா நாக³ஸ்ஸ பூ⁴மி நாகே³ன க³ந்த்வா, நாகா³ பச்சோரோஹித்வா, பத்திகோவ [பதி³கோவ (ஸ்யா॰)]
யேன மண்ட³லமாளஸ்ஸ த்³வாரங் தேனுபஸங்கமி; உபஸங்கமித்வா ஜீவகங் கோமாரப⁴ச்சங்
ஏதத³வோச – ‘‘கஹங் பன, ஸம்ம ஜீவக, ப⁴க³வா’’தி? ‘‘ஏஸோ, மஹாராஜ, ப⁴க³வா; ஏஸோ,
மஹாராஜ, ப⁴க³வா மஜ்ஜி²மங் த²ம்ப⁴ங் நிஸ்ஸாய புரத்தா²பி⁴முகோ² நிஸின்னோ
புரக்க²தோ பி⁴க்கு²ஸங்க⁴ஸ்ஸா’’தி.

161.
அத² கோ² ராஜா மாக³தோ⁴ அஜாதஸத்து வேதே³ஹிபுத்தோ யேன ப⁴க³வா தேனுபஸங்கமி;
உபஸங்கமித்வா ஏகமந்தங் அட்டா²ஸி. ஏகமந்தங் டி²தோ கோ² ராஜா மாக³தோ⁴
அஜாதஸத்து வேதே³ஹிபுத்தோ துண்ஹீபூ⁴தங் துண்ஹீபூ⁴தங் பி⁴க்கு²ஸங்க⁴ங்
அனுவிலோகெத்வா ரஹத³மிவ விப்பஸன்னங் உதா³னங் உதா³னேஸி – ‘‘இமினா மே உபஸமேன
உத³யப⁴த்³தோ³ [உதா³யிப⁴த்³தோ³ (ஸீ॰ பீ॰)] குமாரோ
ஸமன்னாக³தோ ஹோது, யேனேதரஹி உபஸமேன பி⁴க்கு²ஸங்கோ⁴ ஸமன்னாக³தோ’’தி. ‘‘அக³மா
கோ² த்வங், மஹாராஜ, யதா²பேம’’ந்தி. ‘‘பியோ மே, ப⁴ந்தே, உத³யப⁴த்³தோ³
குமாரோ. இமினா மே, ப⁴ந்தே, உபஸமேன உத³யப⁴த்³தோ³ குமாரோ ஸமன்னாக³தோ ஹோது
யேனேதரஹி உபஸமேன பி⁴க்கு²ஸங்கோ⁴ ஸமன்னாக³தோ’’தி.

162. அத² கோ² ராஜா மாக³தோ⁴ அஜாதஸத்து வேதே³ஹிபுத்தோ ப⁴க³வந்தங் அபி⁴வாதெ³த்வா, பி⁴க்கு²ஸங்க⁴ஸ்ஸ அஞ்ஜலிங் பணாமெத்வா , ஏகமந்தங் நிஸீதி³. ஏகமந்தங் நிஸின்னோ கோ² ராஜா மாக³தோ⁴ அஜாதஸத்து வேதே³ஹிபுத்தோ ப⁴க³வந்தங் ஏதத³வோச – ‘‘புச்செ²ய்யாமஹங், ப⁴ந்தே, ப⁴க³வந்தங் கிஞ்சிதே³வ தே³ஸங் [கிஞ்சிதே³வ தே³ஸங் லேஸமத்தங் (ஸ்யா॰ கங்॰ க॰)]; ஸசே மே ப⁴க³வா ஓகாஸங் கரோதி பஞ்ஹஸ்ஸ வெய்யாகரணாயா’’தி. ‘‘புச்ச², மஹாராஜ, யதா³கங்க²ஸீ’’தி.

163.
‘‘யதா² நு கோ² இமானி, ப⁴ந்தே, புது²ஸிப்பாயதனானி, ஸெய்யதி²த³ங் –
ஹத்தா²ரோஹா அஸ்ஸாரோஹா ரதி²கா த⁴னுக்³க³ஹா சேலகா சலகா பிண்ட³தா³யகா உக்³கா³
ராஜபுத்தா பக்க²ந்தி³னோ மஹானாகா³ ஸூரா சம்மயோதி⁴னோ தா³ஸிகபுத்தா ஆளாரிகா
கப்பகா ந்ஹாபகா [நஹாபிகா (ஸீ॰), ந்ஹாபிகா (ஸ்யா॰)]
ஸூதா³ மாலாகாரா ரஜகா பேஸகாரா நளகாரா கும்ப⁴காரா க³ணகா முத்³தி³கா, யானி வா
பனஞ்ஞானிபி ஏவங்க³தானி புது²ஸிப்பாயதனானி, தே தி³ட்டே²வ த⁴ம்மே
ஸந்தி³ட்டி²கங் ஸிப்பப²லங் உபஜீவந்தி; தே தேன அத்தானங் ஸுகெ²ந்தி பீணெந்தி [பீனெந்தி (கத்த²சி)], மாதாபிதரோ ஸுகெ²ந்தி பீணெந்தி, புத்ததா³ரங் ஸுகெ²ந்தி பீணெந்தி, மித்தாமச்சே ஸுகெ²ந்தி பீணெந்தி, ஸமணப்³ராஹ்மணேஸு [ஸமணேஸு ப்³ராஹ்மணேஸு (க॰)]
உத்³த⁴க்³கி³கங் த³க்கி²ணங் பதிட்ட²பெந்தி ஸோவக்³கி³கங் ஸுக²விபாகங்
ஸக்³க³ஸங்வத்தனிகங். ஸக்கா நு கோ², ப⁴ந்தே, ஏவமேவ தி³ட்டே²வ த⁴ம்மே
ஸந்தி³ட்டி²கங் ஸாமஞ்ஞப²லங் பஞ்ஞபேது’’ந்தி?

164. ‘‘அபி⁴ஜானாஸி நோ த்வங், மஹாராஜ, இமங் பஞ்ஹங் அஞ்ஞே ஸமணப்³ராஹ்மணே புச்சி²தா’’தி ?
‘‘அபி⁴ஜானாமஹங், ப⁴ந்தே, இமங் பஞ்ஹங் அஞ்ஞே ஸமணப்³ராஹ்மணே புச்சி²தா’’தி.
‘‘யதா² கத²ங் பன தே, மஹாராஜ, ப்³யாகரிங்ஸு, ஸசே தே அக³ரு பா⁴ஸஸ்ஸூ’’தி. ‘‘ந
கோ² மே, ப⁴ந்தே, க³ரு, யத்த²ஸ்ஸ ப⁴க³வா நிஸின்னோ, ப⁴க³வந்தரூபோ வா’’தி [சாதி (ஸீ॰ க॰)]. ‘‘தேன ஹி, மஹாராஜ, பா⁴ஸஸ்ஸூ’’தி.

பூரணகஸ்ஸபவாதோ³

165.
‘‘ஏகமிதா³ஹங், ப⁴ந்தே, ஸமயங் யேன பூரணோ கஸ்ஸபோ தேனுபஸங்கமி; உபஸங்கமித்வா
பூரணேன கஸ்ஸபேன ஸத்³தி⁴ங் ஸம்மோதி³ங். ஸம்மோத³னீயங் கத²ங் ஸாரணீயங்
வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ² அஹங், ப⁴ந்தே,
பூரணங் கஸ்ஸபங் ஏதத³வோசங் – ‘யதா² நு கோ² இமானி, போ⁴ கஸ்ஸப,
புது²ஸிப்பாயதனானி, ஸெய்யதி²த³ங் – ஹத்தா²ரோஹா அஸ்ஸாரோஹா ரதி²கா
த⁴னுக்³க³ஹா சேலகா சலகா பிண்ட³தா³யகா உக்³கா³
ராஜபுத்தா பக்க²ந்தி³னோ மஹானாகா³ ஸூரா சம்மயோதி⁴னோ தா³ஸிகபுத்தா ஆளாரிகா
கப்பகா ந்ஹாபகா ஸூதா³ மாலாகாரா ரஜகா பேஸகாரா நளகாரா கும்ப⁴காரா க³ணகா
முத்³தி³கா, யானி வா பனஞ்ஞானிபி ஏவங்க³தானி புது²ஸிப்பாயதனானி- தே
தி³ட்டே²வ த⁴ம்மே ஸந்தி³ட்டி²கங் ஸிப்பப²லங் உபஜீவந்தி; தே தேன அத்தானங்
ஸுகெ²ந்தி பீணெந்தி, மாதாபிதரோ ஸுகெ²ந்தி பீணெந்தி, புத்ததா³ரங் ஸுகெ²ந்தி
பீணெந்தி, மித்தாமச்சே ஸுகெ²ந்தி பீணெந்தி, ஸமணப்³ராஹ்மணேஸு
உத்³த⁴க்³கி³கங் த³க்கி²ணங் பதிட்ட²பெந்தி ஸோவக்³கி³கங் ஸுக²விபாகங்
ஸக்³க³ஸங்வத்தனிகங். ஸக்கா நு கோ², போ⁴ கஸ்ஸப, ஏவமேவ தி³ட்டே²வ த⁴ம்மே
ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

166.
‘‘ஏவங் வுத்தே, ப⁴ந்தே, பூரணோ கஸ்ஸபோ மங் ஏதத³வோச – ‘கரோதோ கோ², மஹாராஜ,
காரயதோ, சி²ந்த³தோ சே²தா³பயதோ, பசதோ பாசாபயதோ ஸோசயதோ, ஸோசாபயதோ, கிலமதோ
கிலமாபயதோ, ப²ந்த³தோ ப²ந்தா³பயதோ, பாணமதிபாதாபயதோ, அதி³ன்னங் ஆதி³யதோ,
ஸந்தி⁴ங் சி²ந்த³தோ, நில்லோபங் ஹரதோ, ஏகாகா³ரிகங் கரோதோ, பரிபந்தே²
திட்ட²தோ, பரதா³ரங் க³ச்ச²தோ, முஸா ப⁴ணதோ, கரோதோ ந கரீயதி பாபங்.
கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகங் மங்ஸக²லங் ஏகங்
மங்ஸபுஞ்ஜங் கரெய்ய, நத்தி² ததோனிதா³னங் பாபங், நத்தி² பாபஸ்ஸ ஆக³மோ.
த³க்கி²ணங் சேபி க³ங்கா³ய தீரங் க³ச்செ²ய்ய ஹனந்தோ
கா⁴தெந்தோ சி²ந்த³ந்தோ சே²தா³பெந்தோ பசந்தோ பாசாபெந்தோ, நத்தி² ததோனிதா³னங்
பாபங், நத்தி² பாபஸ்ஸ ஆக³மோ. உத்தரஞ்சேபி க³ங்கா³ய தீரங் க³ச்செ²ய்ய
த³த³ந்தோ தா³பெந்தோ யஜந்தோ யஜாபெந்தோ, நத்தி² ததோனிதா³னங் புஞ்ஞங், நத்தி²
புஞ்ஞஸ்ஸ ஆக³மோ. தா³னேன த³மேன ஸங்யமேன ஸச்சவஜ்ஜேன
நத்தி² புஞ்ஞங், நத்தி² புஞ்ஞஸ்ஸ ஆக³மோ’தி. இத்த²ங் கோ² மே, ப⁴ந்தே, பூரணோ
கஸ்ஸபோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ அகிரியங் ப்³யாகாஸி.

‘‘ஸெய்யதா²பி, ப⁴ந்தே, அம்ப³ங் வா புட்டோ² லபு³ஜங் ப்³யாகரெய்ய ,
லபு³ஜங் வா புட்டோ² அம்ப³ங் ப்³யாகரெய்ய; ஏவமேவ கோ² மே, ப⁴ந்தே, பூரணோ
கஸ்ஸபோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ அகிரியங் ப்³யாகாஸி. தஸ்ஸ
மய்ஹங், ப⁴ந்தே, ஏதத³ஹோஸி – ‘கத²ஞ்ஹி நாம மாதி³ஸோ ஸமணங் வா ப்³ராஹ்மணங் வா
விஜிதே வஸந்தங் அபஸாதே³தப்³ப³ங் மஞ்ஞெய்யா’தி. ஸோ கோ² அஹங், ப⁴ந்தே,
பூரணஸ்ஸ கஸ்ஸபஸ்ஸ பா⁴ஸிதங் நேவ அபி⁴னந்தி³ங் நப்படிக்கோஸிங்.
அனபி⁴னந்தி³த்வா அப்படிகோஸித்வா அனத்தமனோ, அனத்தமனவாசங் அனிச்சா²ரெத்வா, தமேவ வாசங் அனுக்³க³ண்ஹந்தோ அனிக்குஜ்ஜந்தோ [அனிக்குஜ்ஜெந்தோ (ஸ்யா॰ கங்॰ க॰)] உட்டா²யாஸனா பக்கமிங் [பக்காமிங் (ஸீ॰ ஸ்யா॰ கங்॰ பீ॰)].

மக்க²லிகோ³ஸாலவாதோ³

167.
‘‘ஏகமிதா³ஹங், ப⁴ந்தே, ஸமயங் யேன மக்க²லி கோ³ஸாலோ தேனுபஸங்கமிங்;
உபஸங்கமித்வா மக்க²லினா கோ³ஸாலேன ஸத்³தி⁴ங் ஸம்மோதி³ங். ஸம்மோத³னீயங் கத²ங்
ஸாரணீயங் வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ² அஹங்,
ப⁴ந்தே, மக்க²லிங் கோ³ஸாலங் ஏதத³வோசங் – ‘யதா² நு கோ² இமானி, போ⁴ கோ³ஸால,
புது²ஸிப்பாயதனானி…பே॰… ஸக்கா நு கோ², போ⁴ கோ³ஸால, ஏவமேவ தி³ட்டே²வ த⁴ம்மே
ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

168. ‘‘ஏவங் வுத்தே, ப⁴ந்தே, மக்க²லி கோ³ஸாலோ மங் ஏதத³வோச – ‘நத்தி² மஹாராஜ ஹேது நத்தி² பச்சயோ ஸத்தானங் ஸங்கிலேஸாய, அஹேதூ [அஹேது (கத்த²சி)]
அபச்சயா ஸத்தா ஸங்கிலிஸ்ஸந்தி. நத்தி² ஹேது, நத்தி² பச்சயோ ஸத்தானங்
விஸுத்³தி⁴யா, அஹேதூ அபச்சயா ஸத்தா விஸுஜ்ஜ²ந்தி. நத்தி² அத்தகாரே, நத்தி²
பரகாரே, நத்தி² புரிஸகாரே, நத்தி² ப³லங், நத்தி² வீரியங், நத்தி²
புரிஸதா²மோ, நத்தி² புரிஸபரக்கமோ . ஸப்³பே³ ஸத்தா
ஸப்³பே³ பாணா ஸப்³பே³ பூ⁴தா ஸப்³பே³ ஜீவா அவஸா அப³லா அவீரியா
நியதிஸங்க³திபா⁴வபரிணதா ச²ஸ்வேவாபி⁴ஜாதீஸு ஸுக²து³க்க²ங் [ஸுக²ஞ்ச து³க்க²ஞ்ச (ஸ்யா॰)] படிஸங்வேதெ³ந்தி. சுத்³த³ஸ
கோ² பனிமானி யோனிபமுக²ஸதஸஹஸ்ஸானி ஸட்டி² ச ஸதானி ச² ச ஸதானி பஞ்ச ச
கம்முனோ ஸதானி பஞ்ச ச கம்மானி தீணி ச கம்மானி கம்மே ச அட்³ட⁴கம்மே ச
த்³வட்டி²படிபதா³ த்³வட்ட²ந்தரகப்பா ச²ளாபி⁴ஜாதியோ
அட்ட² புரிஸபூ⁴மியோ ஏகூனபஞ்ஞாஸ ஆஜீவகஸதே ஏகூனபஞ்ஞாஸ பரிப்³பா³ஜகஸதே
ஏகூனபஞ்ஞாஸ நாகா³வாஸஸதே வீஸே இந்த்³ரியஸதே திங்ஸே நிரயஸதே ச²த்திங்ஸ
ரஜோதா⁴துயோ ஸத்த ஸஞ்ஞீக³ப்³பா⁴ ஸத்த அஸஞ்ஞீக³ப்³பா⁴ ஸத்த நிக³ண்டி²க³ப்³பா⁴
ஸத்த தே³வா ஸத்த மானுஸா ஸத்த பிஸாசா ஸத்த ஸரா ஸத்த பவுடா [ஸபுடா (க॰), பபு³டா (ஸீ॰)] ஸத்த பவுடஸதானி ஸத்த பபாதா ஸத்த பபாதஸதானி ஸத்த ஸுபினா ஸத்த ஸுபினஸதானி சுல்லாஸீதி மஹாகப்பினோ [மஹாகப்புனோ (க॰ ஸீ॰ பீ॰)] ஸதஸஹஸ்ஸானி, யானி பா³லே ச பண்டி³தே ச ஸந்தா⁴வித்வா ஸங்ஸரித்வா து³க்க²ஸ்ஸந்தங் கரிஸ்ஸந்தி. தத்த² நத்தி²
‘‘இமினாஹங் ஸீலேன வா வதேன வா தபேன வா ப்³ரஹ்மசரியேன வா அபரிபக்கங் வா
கம்மங் பரிபாசெஸ்ஸாமி, பரிபக்கங் வா கம்மங் பு²ஸ்ஸ பு²ஸ்ஸ ப்³யந்திங்
கரிஸ்ஸாமீ’தி ஹேவங் நத்தி². தோ³ணமிதே ஸுக²து³க்கே² பரியந்தகதே ஸங்ஸாரே ,
நத்தி² ஹாயனவட்³ட⁴னே, நத்தி² உக்கங்ஸாவகங்ஸே. ஸெய்யதா²பி நாம ஸுத்தகு³ளே
கி²த்தே நிப்³பே³டி²யமானமேவ பலேதி, ஏவமேவ பா³லே ச பண்டி³தே ச ஸந்தா⁴வித்வா
ஸங்ஸரித்வா து³க்க²ஸ்ஸந்தங் கரிஸ்ஸந்தீ’தி.

169.
‘‘இத்த²ங் கோ² மே, ப⁴ந்தே, மக்க²லி கோ³ஸாலோ ஸந்தி³ட்டி²கங் ஸாமஞ்ஞப²லங்
புட்டோ² ஸமானோ ஸங்ஸாரஸுத்³தி⁴ங் ப்³யாகாஸி. ஸெய்யதா²பி, ப⁴ந்தே, அம்ப³ங் வா
புட்டோ² லபு³ஜங் ப்³யாகரெய்ய, லபு³ஜங் வா புட்டோ² அம்ப³ங் ப்³யாகரெய்ய;
ஏவமேவ கோ² மே, ப⁴ந்தே, மக்க²லி கோ³ஸாலோ ஸந்தி³ட்டி²கங் ஸாமஞ்ஞப²லங் புட்டோ²
ஸமானோ ஸங்ஸாரஸுத்³தி⁴ங் ப்³யாகாஸி. தஸ்ஸ மய்ஹங், ப⁴ந்தே, ஏதத³ஹோஸி –
‘கத²ஞ்ஹி நாம மாதி³ஸோ ஸமணங் வா ப்³ராஹ்மணங் வா விஜிதே வஸந்தங்
அபஸாதே³தப்³ப³ங் மஞ்ஞெய்யா’தி. ஸோ கோ² அஹங், ப⁴ந்தே, மக்க²லிஸ்ஸ கோ³ஸாலஸ்ஸ
பா⁴ஸிதங் நேவ அபி⁴னந்தி³ங் நப்படிக்கோஸிங். அனபி⁴னந்தி³த்வா
அப்படிக்கோஸித்வா அனத்தமனோ, அனத்தமனவாசங் அனிச்சா²ரெத்வா, தமேவ வாசங்
அனுக்³க³ண்ஹந்தோ அனிக்குஜ்ஜந்தோ உட்டா²யாஸனா பக்கமிங்.

அஜிதகேஸகம்ப³லவாதோ³

170.
‘‘ஏகமிதா³ஹங், ப⁴ந்தே, ஸமயங் யேன அஜிதோ கேஸகம்ப³லோ தேனுபஸங்கமிங்;
உபஸங்கமித்வா அஜிதேன கேஸகம்ப³லேன ஸத்³தி⁴ங் ஸம்மோதி³ங். ஸம்மோத³னீயங் கத²ங்
ஸாரணீயங் வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ² அஹங்,
ப⁴ந்தே, அஜிதங் கேஸகம்ப³லங் ஏதத³வோசங் – ‘யதா² நு கோ² இமானி, போ⁴ அஜித,
புது²ஸிப்பாயதனானி…பே॰… ஸக்கா நு கோ², போ⁴ அஜித, ஏவமேவ தி³ட்டே²வ த⁴ம்மே
ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

171. ‘‘ஏவங் வுத்தே, ப⁴ந்தே, அஜிதோ கேஸகம்ப³லோ மங் ஏதத³வோச – ‘நத்தி², மஹாராஜ, தி³ன்னங் , நத்தி² யிட்ட²ங், நத்தி² ஹுதங், நத்தி² ஸுகதது³க்கடானங் கம்மானங் ப²லங் விபாகோ, நத்தி² அயங் லோகோ [பரலோகோ (ஸ்யா॰)], நத்தி² பரோ லோகோ, நத்தி² மாதா, நத்தி² பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா ஸம்மக்³க³தா [ஸமக்³க³தா (க॰), ஸமக்³க³தா (ஸ்யா॰)] ஸம்மாபடிபன்னா, யே இமஞ்ச லோகங் பரஞ்ச லோகங் ஸயங்
அபி⁴ஞ்ஞா ஸச்சி²கத்வா பவேதெ³ந்தி. சாதுமஹாபூ⁴திகோ அயங் புரிஸோ, யதா³
காலங்கரோதி, பத²வீ பத²விகாயங் அனுபேதி அனுபக³ச்ச²தி, ஆபோ ஆபோகாயங் அனுபேதி
அனுபக³ச்ச²தி, தேஜோ தேஜோகாயங் அனுபேதி அனுபக³ச்ச²தி, வாயோ வாயோகாயங்
அனுபேதி அனுபக³ச்ச²தி, ஆகாஸங் இந்த்³ரியானி ஸங்கமந்தி. ஆஸந்தி³பஞ்சமா
புரிஸா மதங் ஆதா³ய க³ச்ச²ந்தி. யாவாளாஹனா பதா³னி பஞ்ஞாயந்தி. காபோதகானி
அட்டீ²னி ப⁴வந்தி, ப⁴ஸ்ஸந்தா ஆஹுதியோ. த³த்துபஞ்ஞத்தங் யதி³த³ங் தா³னங்.
தேஸங் துச்ச²ங் முஸா விலாபோ யே கேசி அத்தி²கவாத³ங் வத³ந்தி. பா³லே ச
பண்டி³தே ச காயஸ்ஸ பே⁴தா³ உச்சி²ஜ்ஜந்தி வினஸ்ஸந்தி, ந ஹொந்தி பரங்
மரணா’தி.

172.
‘‘இத்த²ங் கோ² மே, ப⁴ந்தே, அஜிதோ கேஸகம்ப³லோ ஸந்தி³ட்டி²கங் ஸாமஞ்ஞப²லங்
புட்டோ² ஸமானோ உச்சே²த³ங் ப்³யாகாஸி. ஸெய்யதா²பி, ப⁴ந்தே, அம்ப³ங் வா
புட்டோ² லபு³ஜங் ப்³யாகரெய்ய , லபு³ஜங் வா புட்டோ²
அம்ப³ங் ப்³யாகரெய்ய; ஏவமேவ கோ² மே, ப⁴ந்தே, அஜிதோ கேஸகம்ப³லோ
ஸந்தி³ட்டி²கங் ஸாமஞ்ஞப²லங் புட்டோ² ஸமானோ உச்சே²த³ங் ப்³யாகாஸி. தஸ்ஸ
மய்ஹங், ப⁴ந்தே, ஏதத³ஹோஸி – ‘கத²ஞ்ஹி நாம மாதி³ஸோ ஸமணங் வா ப்³ராஹ்மணங் வா
விஜிதே வஸந்தங் அபஸாதே³தப்³ப³ங் மஞ்ஞெய்யா’தி. ஸோ கோ² அஹங், ப⁴ந்தே,
அஜிதஸ்ஸ கேஸகம்ப³லஸ்ஸ பா⁴ஸிதங் நேவ அபி⁴னந்தி³ங் நப்படிக்கோஸிங்.
அனபி⁴னந்தி³த்வா அப்படிக்கோஸித்வா அனத்தமனோ அனத்தமனவாசங் அனிச்சா²ரெத்வா
தமேவ வாசங் அனுக்³க³ண்ஹந்தோ அனிக்குஜ்ஜந்தோ உட்டா²யாஸனா பக்கமிங்.

பகுத⁴கச்சாயனவாதோ³

173.
‘‘ஏகமிதா³ஹங், ப⁴ந்தே, ஸமயங் யேன பகுதோ⁴ கச்சாயனோ தேனுபஸங்கமிங்;
உபஸங்கமித்வா பகுதே⁴ன கச்சாயனேன ஸத்³தி⁴ங் ஸம்மோதி³ங். ஸம்மோத³னீயங் கத²ங்
ஸாரணீயங் வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ² அஹங்,
ப⁴ந்தே, பகுத⁴ங் கச்சாயனங் ஏதத³வோசங் – ‘யதா² நு கோ² இமானி, போ⁴ கச்சாயன,
புது²ஸிப்பாயதனானி…பே॰… ஸக்கா நு கோ², போ⁴ கச்சாயன, ஏவமேவ தி³ட்டே²வ த⁴ம்மே
ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

174. ‘‘ஏவங் வுத்தே, ப⁴ந்தே, பகுதோ⁴ கச்சாயனோ மங் ஏதத³வோச – ‘ஸத்திமே, மஹாராஜ, காயா அகடா அகடவிதா⁴ அனிம்மிதா அனிம்மாதா வஞ்ஜா² கூடட்டா² ஏஸிகட்டா²யிட்டி²தா. தே ந இஞ்ஜந்தி ,
ந விபரிணமந்தி, ந அஞ்ஞமஞ்ஞங் ப்³யாபா³தெ⁴ந்தி, நாலங் அஞ்ஞமஞ்ஞஸ்ஸ ஸுகா²ய
வா து³க்கா²ய வா ஸுக²து³க்கா²ய வா. கதமே ஸத்த? பத²விகாயோ, ஆபோகாயோ,
தேஜோகாயோ, வாயோகாயோ, ஸுகே², து³க்கே², ஜீவே ஸத்தமே
இமே ஸத்த காயா அகடா அகடவிதா⁴ அனிம்மிதா அனிம்மாதா வஞ்ஜா² கூடட்டா²
ஏஸிகட்டா²யிட்டி²தா. தே ந இஞ்ஜந்தி, ந விபரிணமந்தி, ந அஞ்ஞமஞ்ஞங்
ப்³யாபா³தெ⁴ந்தி, நாலங் அஞ்ஞமஞ்ஞஸ்ஸ ஸுகா²ய வா து³க்கா²ய வா ஸுக²து³க்கா²ய
வா. தத்த² நத்தி² ஹந்தா வா கா⁴தேதா வா, ஸோதா வா ஸாவேதா வா, விஞ்ஞாதா வா
விஞ்ஞாபேதா வா. யோபி திண்ஹேன ஸத்தே²ன ஸீஸங் சி²ந்த³தி, ந கோசி கிஞ்சி [கஞ்சி (கங்॰)] ஜீவிதா வோரோபேதி; ஸத்தன்னங் த்வேவ [ஸத்தன்னங் யேவ (ஸீ॰ ஸ்யா॰ கங்॰ பீ॰)] காயானமந்தரேன ஸத்த²ங் விவரமனுபததீ’தி.

175. ‘‘இத்த²ங்
கோ² மே, ப⁴ந்தே, பகுதோ⁴ கச்சாயனோ ஸந்தி³ட்டி²கங் ஸாமஞ்ஞப²லங் புட்டோ²
ஸமானோ அஞ்ஞேன அஞ்ஞங் ப்³யாகாஸி. ஸெய்யதா²பி, ப⁴ந்தே, அம்ப³ங் வா புட்டோ²
லபு³ஜங் ப்³யாகரெய்ய, லபு³ஜங் வா புட்டோ² அம்ப³ங் ப்³யாகரெய்ய; ஏவமேவ கோ²
மே, ப⁴ந்தே, பகுதோ⁴ கச்சாயனோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ
அஞ்ஞேன அஞ்ஞங் ப்³யாகாஸி. தஸ்ஸ மய்ஹங், ப⁴ந்தே, ஏதத³ஹோஸி – ‘கத²ஞ்ஹி நாம
மாதி³ஸோ ஸமணங் வா ப்³ராஹ்மணங் வா விஜிதே வஸந்தங் அபஸாதே³தப்³ப³ங்
மஞ்ஞெய்யா’தி. ஸோ கோ² அஹங், ப⁴ந்தே, பகுத⁴ஸ்ஸ கச்சாயனஸ்ஸ பா⁴ஸிதங் நேவ
அபி⁴னந்தி³ங் நப்படிக்கோஸிங், அனபி⁴னந்தி³த்வா அப்படிக்கோஸித்வா அனத்தமனோ,
அனத்தமனவாசங் அனிச்சா²ரெத்வா தமேவ வாசங் அனுக்³க³ண்ஹந்தோ அனிக்குஜ்ஜந்தோ
உட்டா²யாஸனா பக்கமிங்.

நிக³ண்ட²னாடபுத்தவாதோ³

176. ‘‘ஏகமிதா³ஹங், ப⁴ந்தே, ஸமயங் யேன நிக³ண்டோ² நாடபுத்தோ தேனுபஸங்கமிங் ;
உபஸங்கமித்வா நிக³ண்டே²ன நாடபுத்தேன ஸத்³தி⁴ங் ஸம்மோதி³ங். ஸம்மோத³னீயங்
கத²ங் ஸாரணீயங் வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ²
அஹங், ப⁴ந்தே, நிக³ண்ட²ங் நாடபுத்தங் ஏதத³வோசங் – ‘யதா² நு கோ² இமானி, போ⁴
அக்³கி³வெஸ்ஸன, புது²ஸிப்பாயதனானி…பே॰… ஸக்கா நு கோ², போ⁴ அக்³கி³வெஸ்ஸன,
ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

177. ‘‘ஏவங்
வுத்தே, ப⁴ந்தே, நிக³ண்டோ² நாடபுத்தோ மங் ஏதத³வோச – ‘இத⁴, மஹாராஜ,
நிக³ண்டோ² சாதுயாமஸங்வரஸங்வுதோ ஹோதி. கத²ஞ்ச, மஹாராஜ, நிக³ண்டோ²
சாதுயாமஸங்வரஸங்வுதோ ஹோதி? இத⁴, மஹாராஜ, நிக³ண்டோ² ஸப்³ப³வாரிவாரிதோ ச
ஹோதி, ஸப்³ப³வாரியுத்தோ ச, ஸப்³ப³வாரிது⁴தோ ச, ஸப்³ப³வாரிபு²டோ ச. ஏவங்
கோ², மஹாராஜ, நிக³ண்டோ² சாதுயாமஸங்வரஸங்வுதோ ஹோதி . யதோ கோ², மஹாராஜ, நிக³ண்டோ² ஏவங் சாதுயாமஸங்வரஸங்வுதோ ஹோதி; அயங் வுச்சதி, மஹாராஜ, நிக³ண்டோ² [நிக³ண்டோ² நாடபுத்தோ (ஸ்யா॰ க॰)] க³தத்தோ ச யதத்தோ ச டி²தத்தோ சா’தி.

178. ‘‘இத்த²ங்
கோ² மே, ப⁴ந்தே, நிக³ண்டோ² நாடபுத்தோ ஸந்தி³ட்டி²கங் ஸாமஞ்ஞப²லங் புட்டோ²
ஸமானோ சாதுயாமஸங்வரங் ப்³யாகாஸி. ஸெய்யதா²பி, ப⁴ந்தே, அம்ப³ங் வா புட்டோ²
லபு³ஜங் ப்³யாகரெய்ய, லபு³ஜங் வா புட்டோ² அம்ப³ங் ப்³யாகரெய்ய; ஏவமேவ கோ²
மே, ப⁴ந்தே, நிக³ண்டோ² நாடபுத்தோ ஸந்தி³ட்டி²கங் ஸாமஞ்ஞப²லங் புட்டோ² ஸமானோ
சாதுயாமஸங்வரங் ப்³யாகாஸி. தஸ்ஸ மய்ஹங், ப⁴ந்தே, ஏதத³ஹோஸி – ‘கத²ஞ்ஹி நாம
மாதி³ஸோ ஸமணங் வா ப்³ராஹ்மணங் வா விஜிதே வஸந்தங் அபஸாதே³தப்³ப³ங்
மஞ்ஞெய்யா’தி . ஸோ கோ² அஹங், ப⁴ந்தே, நிக³ண்ட²ஸ்ஸ
நாடபுத்தஸ்ஸ பா⁴ஸிதங் நேவ அபி⁴னந்தி³ங் நப்படிக்கோஸிங். அனபி⁴னந்தி³த்வா
அப்படிக்கோஸித்வா அனத்தமனோ அனத்தமனவாசங் அனிச்சா²ரெத்வா தமேவ வாசங்
அனுக்³க³ண்ஹந்தோ அனிக்குஜ்ஜந்தோ உட்டா²யாஸனா பக்கமிங்.

ஸஞ்சயபே³லட்ட²புத்தவாதோ³

179.
‘‘ஏகமிதா³ஹங், ப⁴ந்தே, ஸமயங் யேன ஸஞ்சயோ பே³லட்ட²புத்தோ தேனுபஸங்கமிங்;
உபஸங்கமித்வா ஸஞ்சயேன பே³லட்ட²புத்தேன ஸத்³தி⁴ங் ஸம்மோதி³ங். ஸம்மோத³னீயங்
கத²ங் ஸாரணீயங் வீதிஸாரெத்வா ஏகமந்தங் நிஸீதி³ங். ஏகமந்தங் நிஸின்னோ கோ²
அஹங் ப⁴ந்தே, ஸஞ்சயங் பே³லட்ட²புத்தங் ஏதத³வோசங் – ‘யதா² நு கோ² இமானி, போ⁴
ஸஞ்சய, புது²ஸிப்பாயதனானி…பே॰… ஸக்கா நு கோ², போ⁴ ஸஞ்சய, ஏவமேவ தி³ட்டே²வ
த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

180.
‘‘ஏவங் வுத்தே, ப⁴ந்தே, ஸஞ்சயோ பே³லட்ட²புத்தோ மங் ஏதத³வோச – ‘அத்தி² பரோ
லோகோதி இதி சே மங் புச்ச²ஸி, அத்தி² பரோ லோகோதி இதி சே மே அஸ்ஸ, அத்தி² பரோ
லோகோதி இதி தே நங் ப்³யாகரெய்யங். ஏவந்திபி மே நோ, ததா²திபி மே நோ,
அஞ்ஞதா²திபி மே நோ, நோதிபி மே நோ, நோ நோதிபி மே நோ.
நத்தி² பரோ லோகோ…பே॰… அத்தி² ச நத்தி² ச பரோ லோகோ…பே॰… நேவத்தி² ந நத்தி²
பரோ லோகோ…பே॰… அத்தி² ஸத்தா ஓபபாதிகா…பே॰… நத்தி² ஸத்தா ஓபபாதிகா…பே॰…
அத்தி² ச நத்தி² ச ஸத்தா ஓபபாதிகா…பே॰… நேவத்தி² ந நத்தி² ஸத்தா
ஓபபாதிகா…பே॰… அத்தி² ஸுகதது³க்கடானங் கம்மானங் ப²லங் விபாகோ…பே॰…
நத்தி² ஸுகதது³க்கடானங் கம்மானங் ப²லங் விபாகோ…பே॰…அத்தி² ச நத்தி² ச
ஸுகதது³க்கடானங் கம்மானங் ப²லங் விபாகோ…பே॰… நேவத்தி² ந நத்தி²
ஸுகதது³க்கடானங் கம்மானங் ப²லங் விபாகோ…பே॰… ஹோதி ததா²க³தோ பரங் மரணா…பே॰… ந ஹோதி ததா²க³தோ பரங் மரணா…பே॰… ஹோதி
ச ந ச ஹோதி ததா²க³தோ பரங் மரணா…பே॰… நேவ ஹோதி ந ந ஹோதி ததா²க³தோ பரங்
மரணாதி இதி சே மங் புச்ச²ஸி, நேவ ஹோதி ந ந ஹோதி ததா²க³தோ பரங் மரணாதி இதி
சே மே அஸ்ஸ, நேவ ஹோதி ந ந ஹோதி ததா²க³தோ பரங் மரணாதி இதி தே நங்
ப்³யாகரெய்யங். ஏவந்திபி மே நோ, ததா²திபி மே நோ, அஞ்ஞதா²திபி மே நோ, நோதிபி
மே நோ, நோ நோதிபி மே நோ’தி.

181.
‘‘இத்த²ங் கோ² மே, ப⁴ந்தே, ஸஞ்சயோ பே³லட்ட²புத்தோ ஸந்தி³ட்டி²கங்
ஸாமஞ்ஞப²லங் புட்டோ² ஸமானோ விக்கே²பங் ப்³யாகாஸி. ஸெய்யதா²பி, ப⁴ந்தே,
அம்ப³ங் வா புட்டோ² லபு³ஜங் ப்³யாகரெய்ய, லபு³ஜங் வா புட்டோ² அம்ப³ங்
ப்³யாகரெய்ய; ஏவமேவ கோ² மே, ப⁴ந்தே, ஸஞ்சயோ பே³லட்ட²புத்தோ ஸந்தி³ட்டி²கங்
ஸாமஞ்ஞப²லங் புட்டோ² ஸமானோ விக்கே²பங் ப்³யாகாஸி. தஸ்ஸ மய்ஹங், ப⁴ந்தே,
ஏதத³ஹோஸி – ‘அயஞ்ச இமேஸங் ஸமணப்³ராஹ்மணானங் ஸப்³ப³பா³லோ ஸப்³ப³மூள்ஹோ.
கத²ஞ்ஹி நாம ஸந்தி³ட்டி²கங் ஸாமஞ்ஞப²லங் புட்டோ² ஸமானோ விக்கே²பங்
ப்³யாகரிஸ்ஸதீ’தி. தஸ்ஸ மய்ஹங், ப⁴ந்தே, ஏதத³ஹோஸி – ‘கத²ஞ்ஹி நாம மாதி³ஸோ
ஸமணங் வா ப்³ராஹ்மணங் வா விஜிதே வஸந்தங் அபஸாதே³தப்³ப³ங் மஞ்ஞெய்யா’தி. ஸோ
கோ² அஹங், ப⁴ந்தே, ஸஞ்சயஸ்ஸ பே³லட்ட²புத்தஸ்ஸ பா⁴ஸிதங் நேவ அபி⁴னந்தி³ங்
நப்படிக்கோஸிங். அனபி⁴னந்தி³த்வா அப்படிக்கோஸித்வா அனத்தமனோ அனத்தமனவாசங் அனிச்சா²ரெத்வா தமேவ வாசங் அனுக்³க³ண்ஹந்தோ அனிக்குஜ்ஜந்தோ உட்டா²யாஸனா பக்கமிங்.

பட²மஸந்தி³ட்டி²கஸாமஞ்ஞப²லங்

182.
‘‘ஸோஹங், ப⁴ந்தே, ப⁴க³வந்தம்பி புச்சா²மி – ‘யதா² நு கோ² இமானி, ப⁴ந்தே,
புது²ஸிப்பாயதனானி ஸெய்யதி²த³ங் – ஹத்தா²ரோஹா அஸ்ஸாரோஹா ரதி²கா த⁴னுக்³க³ஹா
சேலகா சலகா பிண்ட³தா³யகா உக்³கா³ ராஜபுத்தா
பக்க²ந்தி³னோ மஹானாகா³ ஸூரா சம்மயோதி⁴னோ தா³ஸிகபுத்தா ஆளாரிகா கப்பகா
ந்ஹாபகா ஸூதா³ மாலாகாரா ரஜகா பேஸகாரா நளகாரா கும்ப⁴காரா க³ணகா முத்³தி³கா,
யானி வா பனஞ்ஞானிபி ஏவங்க³தானி புது²ஸிப்பாயதனானி, தே தி³ட்டே²வ த⁴ம்மே
ஸந்தி³ட்டி²கங் ஸிப்பப²லங் உபஜீவந்தி, தே தேன அத்தானங் ஸுகெ²ந்தி பீணெந்தி,
மாதாபிதரோ ஸுகெ²ந்தி பீணெந்தி, புத்ததா³ரங் ஸுகெ²ந்தி பீணெந்தி,
மித்தாமச்சே ஸுகெ²ந்தி பீணெந்தி, ஸமணப்³ராஹ்மணேஸு உத்³த⁴க்³கி³கங்
த³க்கி²ணங் பதிட்ட²பெந்தி ஸோவக்³கி³கங் ஸுக²விபாகங் ஸக்³க³ஸங்வத்தனிகங்.
ஸக்கா நு கோ² மே , ப⁴ந்தே, ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞபேது’ந்தி?

183. ‘‘ஸக்கா, மஹாராஜ. தேன ஹி, மஹாராஜ, தஞ்ஞேவெத்த² படிபுச்சி²ஸ்ஸாமி. யதா² தே க²மெய்ய, ததா² நங் ப்³யாகரெய்யாஸி. தங் கிங் மஞ்ஞஸி, மஹாராஜ, இத⁴ தே அஸ்ஸ புரிஸோ தா³ஸோ கம்மகாரோ [கம்மகரோ (ஸீ॰ ஸ்யா॰ கங்॰ பீ॰)] புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³ முகு²ல்லோககோ [முகு²ல்லோகிகோ (ஸ்யா॰ கங்॰ க॰)].
தஸ்ஸ ஏவமஸ்ஸ – ‘அச்ச²ரியங், வத போ⁴, அப்³பு⁴தங், வத போ⁴, புஞ்ஞானங் க³தி,
புஞ்ஞானங் விபாகோ. அயஞ்ஹி ராஜா மாக³தோ⁴ அஜாதஸத்து வேதே³ஹிபுத்தோ மனுஸ்ஸோ ;
அஹம்பி மனுஸ்ஸோ. அயஞ்ஹி ராஜா மாக³தோ⁴ அஜாதஸத்து வேதே³ஹிபுத்தோ பஞ்சஹி
காமகு³ணேஹி ஸமப்பிதோ ஸமங்கீ³பூ⁴தோ பரிசாரேதி, தே³வோ மஞ்ஞே. அஹங் பனம்ஹிஸ்ஸ
தா³ஸோ கம்மகாரோ புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ
பியவாதீ³ முகு²ல்லோககோ. ஸோ வதஸ்ஸாஹங் புஞ்ஞானி கரெய்யங். யங்னூனாஹங்
கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா
அனகா³ரியங் பப்³ப³ஜெய்ய’ந்தி. ஸோ அபரேன ஸமயேன கேஸமஸ்ஸுங் ஓஹாரெத்வா
காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்ய. ஸோ
ஏவங் பப்³ப³ஜிதோ ஸமானோ காயேன ஸங்வுதோ விஹரெய்ய, வாசாய ஸங்வுதோ விஹரெய்ய,
மனஸா ஸங்வுதோ விஹரெய்ய, கா⁴ஸச்சா²த³னபரமதாய ஸந்துட்டோ², அபி⁴ரதோ பவிவேகே.
தங் சே தே புரிஸா ஏவமாரோசெய்யுங் – ‘யக்³கே⁴ தே³வ ஜானெய்யாஸி, யோ தே ஸோ
புரிஸோ [யோ தே புரிஸோ (ஸீ॰ க॰)] தா³ஸோ கம்மகாரோ
புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³
முகு²ல்லோககோ; ஸோ, தே³வ, கேஸமஸ்ஸுங் ஓஹாரெத்வா காஸாயானி வத்தா²னி
அச்சா²தெ³த்வா அகா³ரஸ்மா அனகா³ரியங் பப்³ப³ஜிதோ. ஸோ ஏவங் பப்³ப³ஜிதோ
ஸமானோ காயேன ஸங்வுதோ விஹரதி, வாசாய ஸங்வுதோ விஹரதி, மனஸா ஸங்வுதோ விஹரதி,
கா⁴ஸச்சா²த³னபரமதாய ஸந்துட்டோ², அபி⁴ரதோ பவிவேகே’தி. அபி நு த்வங் ஏவங்
வதெ³ய்யாஸி – ‘ஏது மே, போ⁴, ஸோ புரிஸோ, புனதே³வ ஹோது தா³ஸோ கம்மகாரோ
புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³
முகு²ல்லோககோ’தி?

184. ‘‘நோ ஹேதங், ப⁴ந்தே. அத² கோ² நங் மயமேவ அபி⁴வாதெ³ய்யாமபி ,
பச்சுட்டெ²ய்யாமபி, ஆஸனேனபி நிமந்தெய்யாம, அபி⁴னிமந்தெய்யாமபி நங்
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி, த⁴ம்மிகம்பிஸ்ஸ
ரக்கா²வரணகு³த்திங் ஸங்வித³ஹெய்யாமா’’தி.

185.
‘‘தங் கிங் மஞ்ஞஸி, மஹாராஜ, யதி³ ஏவங் ஸந்தே ஹோதி வா ஸந்தி³ட்டி²கங்
ஸாமஞ்ஞப²லங் நோ வா’’தி? ‘‘அத்³தா⁴ கோ², ப⁴ந்தே, ஏவங் ஸந்தே ஹோதி
ஸந்தி³ட்டி²கங் ஸாமஞ்ஞப²ல’’ந்தி. ‘‘இத³ங் கோ² தே, மஹாராஜ, மயா பட²மங்
தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞத்த’’ந்தி.

து³தியஸந்தி³ட்டி²கஸாமஞ்ஞப²லங்

186. ‘‘ஸக்கா
பன, ப⁴ந்தே, அஞ்ஞம்பி ஏவமேவ தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங்
பஞ்ஞபேது’’ந்தி? ‘‘ஸக்கா, மஹாராஜ. தேன ஹி, மஹாராஜ, தஞ்ஞேவெத்த²
படிபுச்சி²ஸ்ஸாமி. யதா² தே க²மெய்ய, ததா² நங் ப்³யாகரெய்யாஸி. தங் கிங்
மஞ்ஞஸி, மஹாராஜ, இத⁴ தே அஸ்ஸ புரிஸோ கஸ்ஸகோ க³ஹபதிகோ கரகாரகோ ராஸிவட்³ட⁴கோ.
தஸ்ஸ ஏவமஸ்ஸ – ‘அச்ச²ரியங் வத போ⁴, அப்³பு⁴தங் வத போ⁴, புஞ்ஞானங் க³தி,
புஞ்ஞானங் விபாகோ. அயஞ்ஹி ராஜா மாக³தோ⁴ அஜாதஸத்து வேதே³ஹிபுத்தோ மனுஸ்ஸோ,
அஹம்பி மனுஸ்ஸோ. அயஞ்ஹி ராஜா மாக³தோ⁴ அஜாதஸத்து வேதே³ஹிபுத்தோ பஞ்சஹி
காமகு³ணேஹி ஸமப்பிதோ ஸமங்கீ³பூ⁴தோ பரிசாரேதி, தே³வோ மஞ்ஞே. அஹங் பனம்ஹிஸ்ஸ
கஸ்ஸகோ க³ஹபதிகோ கரகாரகோ ராஸிவட்³ட⁴கோ. ஸோ வதஸ்ஸாஹங் புஞ்ஞானி கரெய்யங்.
யங்னூனாஹங் கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜெய்ய’ந்தி.

‘‘ஸோ அபரேன ஸமயேன அப்பங் வா போ⁴க³க்க²ந்த⁴ங் பஹாய மஹந்தங்
வா போ⁴க³க்க²ந்த⁴ங் பஹாய, அப்பங் வா ஞாதிபரிவட்டங் பஹாய மஹந்தங் வா
ஞாதிபரிவட்டங் பஹாய கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜெய்ய. ஸோ ஏவங்
பப்³ப³ஜிதோ ஸமானோ காயேன ஸங்வுதோ விஹரெய்ய, வாசாய ஸங்வுதோ விஹரெய்ய, மனஸா
ஸங்வுதோ விஹரெய்ய, கா⁴ஸச்சா²த³னபரமதாய ஸந்துட்டோ², அபி⁴ரதோ பவிவேகே. தங் சே
தே புரிஸா ஏவமாரோசெய்யுங் – ‘யக்³கே⁴, தே³வ ஜானெய்யாஸி, யோ தே ஸோ புரிஸோ [யோ தே புரிஸோ (ஸீ॰)]
கஸ்ஸகோ க³ஹபதிகோ கரகாரகோ ராஸிவட்³ட⁴கோ; ஸோ தே³வ கேஸமஸ்ஸுங் ஓஹாரெத்வா
காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதோ. ஸோ ஏவங்
பப்³ப³ஜிதோ ஸமானோ காயேன ஸங்வுதோ விஹரதி, வாசாய ஸங்வுதோ விஹரதி, மனஸா
ஸங்வுதோ விஹரதி, கா⁴ஸச்சா²த³னபரமதாய ஸந்துட்டோ²,
அபி⁴ரதோ பவிவேகே’’தி. அபி நு த்வங் ஏவங் வதெ³ய்யாஸி – ‘ஏது மே, போ⁴, ஸோ
புரிஸோ, புனதே³வ ஹோது கஸ்ஸகோ க³ஹபதிகோ கரகாரகோ ராஸிவட்³ட⁴கோ’தி?

187.
‘‘நோ ஹேதங், ப⁴ந்தே. அத² கோ² நங் மயமேவ அபி⁴வாதெ³ய்யாமபி,
பச்சுட்டெ²ய்யாமபி, ஆஸனேனபி நிமந்தெய்யாம, அபி⁴னிமந்தெய்யாமபி நங்
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி, த⁴ம்மிகம்பிஸ்ஸ
ரக்கா²வரணகு³த்திங் ஸங்வித³ஹெய்யாமா’’தி.

188.
‘‘தங் கிங் மஞ்ஞஸி, மஹாராஜ? யதி³ ஏவங் ஸந்தே ஹோதி வா ஸந்தி³ட்டி²கங்
ஸாமஞ்ஞப²லங் நோ வா’’தி? ‘‘அத்³தா⁴ கோ², ப⁴ந்தே, ஏவங் ஸந்தே ஹோதி
ஸந்தி³ட்டி²கங் ஸாமஞ்ஞப²ல’’ந்தி . ‘‘இத³ங் கோ² தே, மஹாராஜ, மயா து³தியங் தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங் பஞ்ஞத்த’’ந்தி.

பணீததரஸாமஞ்ஞப²லங்

189. ‘‘ஸக்கா
பன, ப⁴ந்தே, அஞ்ஞம்பி தி³ட்டே²வ த⁴ம்மே ஸந்தி³ட்டி²கங் ஸாமஞ்ஞப²லங்
பஞ்ஞபேதுங் இமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச
பணீததரஞ்சா’’தி? ‘‘ஸக்கா, மஹாராஜ. தேன ஹி, மஹாராஜ, ஸுணோஹி, ஸாது⁴கங் மனஸி
கரோஹி, பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² ராஜா மாக³தோ⁴ அஜாதஸத்து
வேதே³ஹிபுத்தோ ப⁴க³வதோ பச்சஸ்ஸோஸி.

190.
ப⁴க³வா ஏதத³வோச – ‘‘இத⁴, மஹாராஜ, ததா²க³தோ லோகே உப்பஜ்ஜதி அரஹங்
ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ
புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா. ஸோ இமங்
லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங்
ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங் தே³ஸேதி
ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங்,
கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி.

191. ‘‘தங் த⁴ம்மங் ஸுணாதி க³ஹபதி வா க³ஹபதிபுத்தோ வா அஞ்ஞதரஸ்மிங் வா குலே பச்சாஜாதோ. ஸோ தங் த⁴ம்மங் ஸுத்வா
ததா²க³தே ஸத்³த⁴ங் படிலப⁴தி. ஸோ தேன ஸத்³தா⁴படிலாபே⁴ன ஸமன்னாக³தோ இதி
படிஸஞ்சிக்க²தி – ‘ஸம்பா³தோ⁴ க⁴ராவாஸோ ரஜோபதோ², அப்³போ⁴காஸோ பப்³ப³ஜ்ஜா.
நயித³ங் ஸுகரங் அகா³ரங் அஜ்ஜா²வஸதா ஏகந்தபரிபுண்ணங் ஏகந்தபரிஸுத்³த⁴ங்
ஸங்க²லிகி²தங் ப்³ரஹ்மசரியங் சரிதுங். யங்னூனாஹங் கேஸமஸ்ஸுங் ஓஹாரெத்வா
காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்ய’ந்தி.

192.
‘‘ஸோ அபரேன ஸமயேன அப்பங் வா போ⁴க³க்க²ந்த⁴ங் பஹாய மஹந்தங் வா
போ⁴க³க்க²ந்த⁴ங் பஹாய அப்பங் வா ஞாதிபரிவட்டங் பஹாய மஹந்தங் வா
ஞாதிபரிவட்டங் பஹாய கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜதி.

193.
‘‘ஸோ ஏவங் பப்³ப³ஜிதோ ஸமானோ பாதிமொக்க²ஸங்வரஸங்வுதோ விஹரதி
ஆசாரகோ³சரஸம்பன்னோ, அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி
ஸிக்கா²பதே³ஸு, காயகம்மவசீகம்மேன ஸமன்னாக³தோ குஸலேன, பரிஸுத்³தா⁴ஜீவோ ஸீலஸம்பன்னோ, இந்த்³ரியேஸு கு³த்தத்³வாரோ [கு³த்தத்³வாரோ, போ⁴ஜனே மத்தஞ்ஞூ (க॰)], ஸதிஸம்பஜஞ்ஞேன ஸமன்னாக³தோ, ஸந்துட்டோ².

சூளஸீலங்

194.
‘‘கத²ஞ்ச, மஹாராஜ, பி⁴க்கு² ஸீலஸம்பன்னோ ஹோதி? இத⁴, மஹாராஜ, பி⁴க்கு²
பாணாதிபாதங் பஹாய பாணாதிபாதா படிவிரதோ ஹோதி. நிஹிதத³ண்டோ³ நிஹிதஸத்தோ²
லஜ்ஜீ த³யாபன்னோ ஸப்³ப³பாணபூ⁴தஹிதானுகம்பீ விஹரதி. இத³ம்பிஸ்ஸ ஹோதி
ஸீலஸ்மிங்.

‘‘அதி³ன்னாதா³னங் பஹாய அதி³ன்னாதா³னா படிவிரதோ ஹோதி தி³ன்னாதா³யீ தி³ன்னபாடிகங்கீ², அதே²னேன ஸுசிபூ⁴தேன அத்தனா விஹரதி. இத³ம்பிஸ்ஸ ஹோதி ஸீலஸ்மிங்.

‘‘அப்³ரஹ்மசரியங் பஹாய ப்³ரஹ்மசாரீ ஹோதி ஆராசாரீ விரதோ மேது²னா கா³மத⁴ம்மா. இத³ம்பிஸ்ஸ ஹோதி ஸீலஸ்மிங்.

‘‘முஸாவாத³ங் பஹாய முஸாவாதா³ படிவிரதோ ஹோதி ஸச்சவாதீ³ ஸச்சஸந்தோ⁴ தே²தோ பச்சயிகோ அவிஸங்வாத³கோ லோகஸ்ஸ. இத³ம்பிஸ்ஸ ஹோதி ஸீலஸ்மிங்.

‘‘பிஸுணங் வாசங் பஹாய பிஸுணாய வாசாய படிவிரதோ ஹோதி; இதோ ஸுத்வா ந அமுத்ர அக்கா²தா இமேஸங் பே⁴தா³ய; அமுத்ர
வா ஸுத்வா ந இமேஸங் அக்கா²தா, அமூஸங் பே⁴தா³ய. இதி பி⁴ன்னானங் வா
ஸந்தா⁴தா, ஸஹிதானங் வா அனுப்பதா³தா, ஸமக்³கா³ராமோ ஸமக்³க³ரதோ ஸமக்³க³னந்தீ³
ஸமக்³க³கரணிங் வாசங் பா⁴ஸிதா ஹோதி. இத³ம்பிஸ்ஸ ஹோதி ஸீலஸ்மிங்.

‘‘ப²ருஸங் வாசங் பஹாய ப²ருஸாய வாசாய படிவிரதோ ஹோதி; யா
ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா
ததா²ரூபிங் வாசங் பா⁴ஸிதா ஹோதி. இத³ம்பிஸ்ஸ ஹோதி ஸீலஸ்மிங்.

‘‘ஸம்ப²ப்பலாபங் பஹாய ஸம்ப²ப்பலாபா படிவிரதோ ஹோதி
காலவாதீ³ பூ⁴தவாதீ³ அத்த²வாதீ³ த⁴ம்மவாதீ³ வினயவாதீ³, நிதா⁴னவதிங் வாசங்
பா⁴ஸிதா ஹோதி காலேன ஸாபதே³ஸங் பரியந்தவதிங் அத்த²ஸங்ஹிதங். இத³ம்பிஸ்ஸ ஹோதி
ஸீலஸ்மிங்.

‘‘பீ³ஜகா³மபூ⁴தகா³மஸமாரம்பா⁴
படிவிரதோ ஹோதி…பே॰… ஏகப⁴த்திகோ ஹோதி ரத்தூபரதோ விரதோ விகாலபோ⁴ஜனா.
நச்சகீ³தவாதி³தவிஸூகத³ஸ்ஸனா படிவிரதோ ஹோதி.
மாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னா படிவிரதோ ஹோதி. உச்சாஸயனமஹாஸயனா
படிவிரதோ ஹோதி. ஜாதரூபரஜதபடிக்³க³ஹணா படிவிரதோ
ஹோதி. ஆமகத⁴ஞ்ஞபடிக்³க³ஹணா படிவிரதோ ஹோதி. ஆமகமங்ஸபடிக்³க³ஹணா படிவிரதோ
ஹோதி. இத்தி²குமாரிகபடிக்³க³ஹணா படிவிரதோ ஹோதி. தா³ஸிதா³ஸபடிக்³க³ஹணா
படிவிரதோ ஹோதி. அஜேளகபடிக்³க³ஹணா படிவிரதோ ஹோதி. குக்குடஸூகரபடிக்³க³ஹணா
படிவிரதோ ஹோதி. ஹத்தி²க³வஸ்ஸவளவபடிக்³க³ஹணா படிவிரதோ ஹோதி.
கெ²த்தவத்து²படிக்³க³ஹணா படிவிரதோ ஹோதி .
தூ³தெய்யபஹிணக³மனானுயோகா³ படிவிரதோ ஹோதி. கயவிக்கயா படிவிரதோ ஹோதி.
துலாகூடகங்ஸகூடமானகூடா படிவிரதோ ஹோதி. உக்கோடனவஞ்சனநிகதிஸாசியோகா³ படிவிரதோ
ஹோதி. சே²த³னவத⁴ப³ந்த⁴னவிபராமோஸஆலோபஸஹஸாகாரா படிவிரதோ ஹோதி. இத³ம்பிஸ்ஸ
ஹோதி ஸீலஸ்மிங்.

சூளஸீலங் நிட்டி²தங்.

மஜ்ஜி²மஸீலங்

195.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே ஏவரூபங் பீ³ஜகா³மபூ⁴தகா³மஸமாரம்ப⁴ங் அனுயுத்தா விஹரந்தி.
ஸெய்யதி²த³ங் – மூலபீ³ஜங் க²ந்த⁴பீ³ஜங் ப²ளுபீ³ஜங் அக்³க³பீ³ஜங்
பீ³ஜபீ³ஜமேவ பஞ்சமங், இதி ஏவரூபா பீ³ஜகா³மபூ⁴தகா³மஸமாரம்பா⁴ படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

196.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே ஏவரூபங் ஸன்னிதி⁴காரபரிபோ⁴க³ங் அனுயுத்தா விஹரந்தி.
ஸெய்யதி²த³ங் – அன்னஸன்னிதி⁴ங் பானஸன்னிதி⁴ங் வத்த²ஸன்னிதி⁴ங்
யானஸன்னிதி⁴ங் ஸயனஸன்னிதி⁴ங் க³ந்த⁴ஸன்னிதி⁴ங் ஆமிஸஸன்னிதி⁴ங், இதி வா இதி
ஏவரூபா ஸன்னிதி⁴காரபரிபோ⁴கா³ படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

197.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே ஏவரூபங் விஸூகத³ஸ்ஸனங் அனுயுத்தா விஹரந்தி. ஸெய்யதி²த³ங் – நச்சங் கீ³தங் வாதி³தங் பெக்க²ங் அக்கா²னங்
பாணிஸ்ஸரங் வேதாளங் கும்ப⁴தூ²ணங் ஸோப⁴னகங் சண்டா³லங் வங்ஸங் தோ⁴வனங்
ஹத்தி²யுத்³த⁴ங் அஸ்ஸயுத்³த⁴ங் மஹிங்ஸயுத்³த⁴ங் உஸப⁴யுத்³த⁴ங் அஜயுத்³த⁴ங்
மெண்ட³யுத்³த⁴ங் குக்குடயுத்³த⁴ங் வட்டகயுத்³த⁴ங் த³ண்ட³யுத்³த⁴ங்
முட்டி²யுத்³த⁴ங் நிப்³பு³த்³த⁴ங் உய்யோதி⁴கங் ப³லக்³க³ங் ஸேனாப்³யூஹங்
அனீகத³ஸ்ஸனங் இதி வா இதி ஏவரூபா விஸூகத³ஸ்ஸனா படிவிரதோ ஹோதி. இத³ம்பிஸ்ஸ
ஹோதி ஸீலஸ்மிங்.

198. ‘‘யதா²
வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே
ஏவரூபங் ஜூதப்பமாத³ட்டா²னானுயோக³ங் அனுயுத்தா விஹரந்தி. ஸெய்யதி²த³ங் –
அட்ட²பத³ங் த³ஸபத³ங் ஆகாஸங் பரிஹாரபத²ங் ஸந்திகங் க²லிகங் க⁴டிகங்
ஸலாகஹத்த²ங் அக்க²ங் பங்க³சீரங் வங்ககங் மொக்க²சிகங் சிங்கு³லிகங்
பத்தாள்ஹகங் ரத²கங் த⁴னுகங் அக்க²ரிகங் மனேஸிகங் யதா²வஜ்ஜங் இதி வா இதி
ஏவரூபா ஜூதப்பமாத³ட்டா²னானுயோகா³ படிவிரதோ ஹோதி. இத³ம்பிஸ்ஸ ஹோதி
ஸீலஸ்மிங்.

199.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே ஏவரூபங் உச்சாஸயனமஹாஸயனங் அனுயுத்தா விஹரந்தி. ஸெய்யதி²த³ங்
– ஆஸந்தி³ங் பல்லங்கங் கோ³னகங் சித்தகங் படிகங் படலிகங் தூலிகங் விகதிகங்
உத்³த³லோமிங் ஏகந்தலோமிங் கட்டிஸ்ஸங் கோஸெய்யங் குத்தகங் ஹத்த²த்த²ரங்
அஸ்ஸத்த²ரங் ரத²த்த²ரங் அஜினப்பவேணிங் கத³லிமிக³பவரபச்சத்த²ரணங்
ஸஉத்தரச்ச²த³ங் உப⁴தோலோஹிதகூபதா⁴னங் இதி வா இதி ஏவரூபா உச்சாஸயனமஹாஸயனா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

200.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே ஏவரூபங் மண்ட³னவிபூ⁴ஸனட்டா²னானுயோக³ங் அனுயுத்தா விஹரந்தி.
ஸெய்யதி²த³ங் – உச்சா²த³னங் பரிமத்³த³னங் ந்ஹாபனங் ஸம்பா³ஹனங் ஆதா³ஸங்
அஞ்ஜனங் மாலாக³ந்த⁴விலேபனங் முக²சுண்ணங் முக²லேபனங் ஹத்த²ப³ந்த⁴ங்
ஸிகா²ப³ந்த⁴ங் த³ண்ட³ங் நாளிகங் அஸிங் [க²க்³க³ங் (ஸீ॰ பீ॰), அஸிங் க²க்³க³ங் (ஸ்யா॰ கங்॰), க²க்³க³ங் அஸிங் (க॰)]
ச²த்தங் சித்ருபாஹனங் உண்ஹீஸங் மணிங் வாலபீ³ஜனிங் ஓதா³தானி வத்தா²னி
தீ³க⁴த³ஸானி இதி வா இதி ஏவரூபா மண்ட³னவிபூ⁴ஸனட்டா²னானுயோகா³ படிவிரதோ ஹோதி.
இத³ம்பிஸ்ஸ ஹோதி ஸீலஸ்மிங்.

201.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே ஏவரூபங் திரச்சா²னகத²ங் அனுயுத்தா விஹரந்தி. ஸெய்யதி²த³ங் –
ராஜகத²ங் சோரகத²ங் மஹாமத்தகத²ங் ஸேனாகத²ங் ப⁴யகத²ங் யுத்³த⁴கத²ங்
அன்னகத²ங் பானகத²ங் வத்த²கத²ங் ஸயனகத²ங் மாலாகத²ங் க³ந்த⁴கத²ங் ஞாதிகத²ங்
யானகத²ங் கா³மகத²ங் நிக³மகத²ங் நக³ரகத²ங் ஜனபத³கத²ங் இத்தி²கத²ங் [இத்தி²கத²ங் புரிஸகத²ங் குமாரகத²ங் குமாரிகத²ங் (க॰)] ஸூரகத²ங் விஸிகா²கத²ங் கும்ப⁴ட்டா²னகத²ங் புப்³ப³பேதகத²ங் நானத்தகத²ங் லோகக்கா²யிகங் ஸமுத்³த³க்கா²யிகங் இதிப⁴வாப⁴வகத²ங் இதி வா இதி ஏவரூபாய திரச்சா²னகதா²ய படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

202.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே ஏவரூபங் விக்³கா³ஹிககத²ங் அனுயுத்தா விஹரந்தி. ஸெய்யதி²த³ங்
– ந த்வங் இமங் த⁴ம்மவினயங் ஆஜானாஸி, அஹங் இமங்
த⁴ம்மவினயங் ஆஜானாமி, கிங் த்வங் இமங் த⁴ம்மவினயங் ஆஜானிஸ்ஸஸி, மிச்சா²
படிபன்னோ த்வமஸி, அஹமஸ்மி ஸம்மா படிபன்னோ, ஸஹிதங் மே, அஸஹிதங் தே, புரே
வசனீயங் பச்சா² அவச, பச்சா² வசனீயங் புரே அவச, அதி⁴சிண்ணங் தே விபராவத்தங்,
ஆரோபிதோ தே வாதோ³, நிக்³க³ஹிதோ த்வமஸி, சர வாத³ப்பமொக்கா²ய, நிப்³பே³டே²ஹி
வா ஸசே பஹோஸீதி இதி வா இதி ஏவரூபாய விக்³கா³ஹிககதா²ய படிவிரதோ ஹோதி.
இத³ம்பிஸ்ஸ ஹோதி ஸீலஸ்மிங்.

203. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபங் தூ³தெய்யபஹிணக³மனானுயோக³ங்
அனுயுத்தா விஹரந்தி. ஸெய்யதி²த³ங் – ரஞ்ஞங், ராஜமஹாமத்தானங், க²த்தியானங்,
ப்³ராஹ்மணானங், க³ஹபதிகானங், குமாரானங் – ‘இத⁴ க³ச்ச², அமுத்ராக³ச்ச²,
இத³ங் ஹர, அமுத்ர இத³ங் ஆஹரா’தி இதி வா இதி ஏவரூபா
தூ³தெய்யபஹிணக³மனானுயோகா³ படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

204.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே குஹகா ச ஹொந்தி லபகா ச நேமித்திகா ச நிப்பேஸிகா ச லாபே⁴ன
லாப⁴ங் நிஜிகீ³ங்ஸிதாரோ ச. இதி ஏவரூபா குஹனலபனா படிவிரதோ ஹோதி. இத³ம்பிஸ்ஸ
ஹோதி ஸீலஸ்மிங்’’.

மஜ்ஜி²மஸீலங் நிட்டி²தங்.

மஹாஸீலங்

205. ‘‘யதா²
வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே
ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி. ஸெய்யதி²த³ங் –
அங்க³ங் நிமித்தங் உப்பாதங் ஸுபினங் லக்க²ணங் மூஸிகச்சி²ன்னங்
அக்³கி³ஹோமங் த³ப்³பி³ஹோமங் து²ஸஹோமங் கணஹோமங் தண்டு³லஹோமங் ஸப்பிஹோமங் தேலஹோமங்
முக²ஹோமங் லோஹிதஹோமங் அங்க³விஜ்ஜா வத்து²விஜ்ஜா க²த்தவிஜ்ஜா ஸிவவிஜ்ஜா
பூ⁴தவிஜ்ஜா பூ⁴ரிவிஜ்ஜா அஹிவிஜ்ஜா விஸவிஜ்ஜா விச்சி²கவிஜ்ஜா மூஸிகவிஜ்ஜா
ஸகுணவிஜ்ஜா வாயஸவிஜ்ஜா பக்கஜ்ஜா²னங் ஸரபரித்தாணங் மிக³சக்கங் இதி வா இதி
ஏவரூபாய திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி
ஸீலஸ்மிங்.

206.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி.
ஸெய்யதி²த³ங் – மணிலக்க²ணங் வத்த²லக்க²ணங் த³ண்ட³லக்க²ணங் ஸத்த²லக்க²ணங்
அஸிலக்க²ணங் உஸுலக்க²ணங் த⁴னுலக்க²ணங் ஆவுத⁴லக்க²ணங் இத்தி²லக்க²ணங்
புரிஸலக்க²ணங் குமாரலக்க²ணங் குமாரிலக்க²ணங் தா³ஸலக்க²ணங் தா³ஸிலக்க²ணங்
ஹத்தி²லக்க²ணங் அஸ்ஸலக்க²ணங் மஹிங்ஸலக்க²ணங் உஸப⁴லக்க²ணங் கோ³லக்க²ணங்
அஜலக்க²ணங் மெண்ட³லக்க²ணங் குக்குடலக்க²ணங் வட்டகலக்க²ணங் கோ³தா⁴லக்க²ணங்
கண்ணிகலக்க²ணங் கச்ச²பலக்க²ணங் மிக³லக்க²ணங் இதி வா இதி ஏவரூபாய
திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

207. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபாய திரச்சா²னவிஜ்ஜாய
மிச்சா²ஜீவேன ஜீவிதங் கப்பெந்தி. ஸெய்யதி²த³ங் – ரஞ்ஞங் நிய்யானங்
ப⁴விஸ்ஸதி, ரஞ்ஞங் அனிய்யானங் ப⁴விஸ்ஸதி, அப்³ப⁴ந்தரானங் ரஞ்ஞங் உபயானங்
ப⁴விஸ்ஸதி, பா³ஹிரானங் ரஞ்ஞங் அபயானங் ப⁴விஸ்ஸதி, பா³ஹிரானங் ரஞ்ஞங்
உபயானங் ப⁴விஸ்ஸதி, அப்³ப⁴ந்தரானங் ரஞ்ஞங் அபயானங் ப⁴விஸ்ஸதி,
அப்³ப⁴ந்தரானங் ரஞ்ஞங் ஜயோ ப⁴விஸ்ஸதி, பா³ஹிரானங் ரஞ்ஞங் பராஜயோ ப⁴விஸ்ஸதி,
பா³ஹிரானங் ரஞ்ஞங் ஜயோ ப⁴விஸ்ஸதி, அப்³ப⁴ந்தரானங் ரஞ்ஞங் பராஜயோ
ப⁴விஸ்ஸதி, இதி இமஸ்ஸ ஜயோ ப⁴விஸ்ஸதி, இமஸ்ஸ பராஜயோ ப⁴விஸ்ஸதி இதி வா இதி
ஏவரூபாய திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி
ஸீலஸ்மிங்.

208.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி.
ஸெய்யதி²த³ங் – சந்த³க்³கா³ஹோ ப⁴விஸ்ஸதி, ஸூரியக்³கா³ஹோ ப⁴விஸ்ஸதி,
நக்க²த்தக்³கா³ஹோ ப⁴விஸ்ஸதி, சந்தி³மஸூரியானங் பத²க³மனங் ப⁴விஸ்ஸதி,
சந்தி³மஸூரியானங் உப்பத²க³மனங் ப⁴விஸ்ஸதி, நக்க²த்தானங் பத²க³மனங்
ப⁴விஸ்ஸதி, நக்க²த்தானங் உப்பத²க³மனங் ப⁴விஸ்ஸதி ,
உக்காபாதோ ப⁴விஸ்ஸதி, தி³ஸாடா³ஹோ ப⁴விஸ்ஸதி, பூ⁴மிசாலோ ப⁴விஸ்ஸதி,
தே³வது³த்³ரபி⁴ ப⁴விஸ்ஸதி, சந்தி³மஸூரியனக்க²த்தானங் உக்³க³மனங் ஓக³மனங்
ஸங்கிலேஸங் வோதா³னங் ப⁴விஸ்ஸதி, ஏவங்விபாகோ சந்த³க்³கா³ஹோ ப⁴விஸ்ஸதி, ஏவங்விபாகோ ஸூரியக்³கா³ஹோ ப⁴விஸ்ஸதி, ஏவங்விபாகோ
நக்க²த்தக்³கா³ஹோ ப⁴விஸ்ஸதி, ஏவங்விபாகங் சந்தி³மஸூரியானங் பத²க³மனங்
ப⁴விஸ்ஸதி, ஏவங்விபாகங் சந்தி³மஸூரியானங் உப்பத²க³மனங் ப⁴விஸ்ஸதி,
ஏவங்விபாகங் நக்க²த்தானங் பத²க³மனங் ப⁴விஸ்ஸதி, ஏவங்விபாகங் நக்க²த்தானங்
உப்பத²க³மனங் ப⁴விஸ்ஸதி, ஏவங்விபாகோ உக்காபாதோ ப⁴விஸ்ஸதி, ஏவங்விபாகோ
தி³ஸாடா³ஹோ ப⁴விஸ்ஸதி, ஏவங்விபாகோ பூ⁴மிசாலோ ப⁴விஸ்ஸதி, ஏவங்விபாகோ
தே³வது³த்³ரபி⁴ ப⁴விஸ்ஸதி, ஏவங்விபாகங் சந்தி³மஸூரியனக்க²த்தானங்
உக்³க³மனங் ஓக³மனங் ஸங்கிலேஸங் வோதா³னங் ப⁴விஸ்ஸதி இதி வா இதி ஏவரூபாய
திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

209. ‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி பு⁴ஞ்ஜித்வா தே ஏவரூபாய திரச்சா²னவிஜ்ஜாய
மிச்சா²ஜீவேன ஜீவிதங் கப்பெந்தி. ஸெய்யதி²த³ங் – ஸுவுட்டி²கா ப⁴விஸ்ஸதி,
து³ப்³பு³ட்டி²கா ப⁴விஸ்ஸதி, ஸுபி⁴க்க²ங் ப⁴விஸ்ஸதி, து³ப்³பி⁴க்க²ங்
ப⁴விஸ்ஸதி, கே²மங் ப⁴விஸ்ஸதி, ப⁴யங் ப⁴விஸ்ஸதி, ரோகோ³ ப⁴விஸ்ஸதி, ஆரொக்³யங்
ப⁴விஸ்ஸதி, முத்³தா³, க³ணனா, ஸங்கா²னங், காவெய்யங், லோகாயதங் இதி வா இதி
ஏவரூபாய திரச்சா²னவிஜ்ஜாய மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி
ஸீலஸ்மிங்.

210.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி.
ஸெய்யதி²த³ங் – ஆவாஹனங் விவாஹனங் ஸங்வரணங் விவரணங் ஸங்கிரணங்
விகிரணங் ஸுப⁴க³கரணங் து³ப்³ப⁴க³கரணங் விருத்³த⁴க³ப்³ப⁴கரணங்
ஜிவ்ஹானிப³ந்த⁴னங் ஹனுஸங்ஹனநங் ஹத்தா²பி⁴ஜப்பனங் ஹனுஜப்பனங் கண்ணஜப்பனங்
ஆதா³ஸபஞ்ஹங் குமாரிகபஞ்ஹங் தே³வபஞ்ஹங் ஆதி³ச்சுபட்டா²னங் மஹதுபட்டா²னங்
அப்³பு⁴ஜ்ஜலனங் ஸிரிவ்ஹாயனங் இதி வா இதி ஏவரூபாய திரச்சா²னவிஜ்ஜாய
மிச்சா²ஜீவா படிவிரதோ ஹோதி. இத³ம்பிஸ்ஸ ஹோதி ஸீலஸ்மிங்.

211.
‘‘யதா² வா பனேகே பொ⁴ந்தோ ஸமணப்³ராஹ்மணா ஸத்³தா⁴தெ³ய்யானி போ⁴ஜனானி
பு⁴ஞ்ஜித்வா தே ஏவரூபாய திரச்சா²னவிஜ்ஜாய மிச்சா²ஜீவேன ஜீவிதங் கப்பெந்தி .
ஸெய்யதி²த³ங் – ஸந்திகம்மங் பணிதி⁴கம்மங் பூ⁴தகம்மங் பூ⁴ரிகம்மங்
வஸ்ஸகம்மங் வொஸ்ஸகம்மங் வத்து²கம்மங் வத்து²பரிகம்மங் ஆசமனங் ந்ஹாபனங்
ஜுஹனங் வமனங் விரேசனங் உத்³த⁴ங்விரேசனங் அதோ⁴விரேசனங் ஸீஸவிரேசனங்
கண்ணதேலங் நெத்ததப்பனங் நத்து²கம்மங் அஞ்ஜனங் பச்சஞ்ஜனங் ஸாலாகியங்
ஸல்லகத்தியங் தா³ரகதிகிச்சா², மூலபே⁴ஸஜ்ஜானங் அனுப்பதா³னங், ஓஸதீ⁴னங்
படிமொக்கோ² இதி வா இதி ஏவரூபாய திரச்சா²னவிஜ்ஜாய மிச்சா²ஜீவா படிவிரதோ
ஹோதி. இத³ம்பிஸ்ஸ ஹோதி ஸீலஸ்மிங்.

212. ‘‘ஸ
கோ² ஸோ, மஹாராஜ, பி⁴க்கு² ஏவங் ஸீலஸம்பன்னோ ந குதோசி ப⁴யங் ஸமனுபஸ்ஸதி,
யதி³த³ங் ஸீலஸங்வரதோ. ஸெய்யதா²பி – மஹாராஜ, ராஜா க²த்தியோ
முத்³தா⁴பி⁴ஸித்தோ நிஹதபச்சாமித்தோ
குதோசி ப⁴யங் ஸமனுபஸ்ஸதி, யதி³த³ங் பச்சத்தி²கதோ; ஏவமேவ கோ², மஹாராஜ,
பி⁴க்கு² ஏவங் ஸீலஸம்பன்னோ ந குதோசி ப⁴யங் ஸமனுபஸ்ஸதி, யதி³த³ங்
ஸீலஸங்வரதோ. ஸோ இமினா அரியேன ஸீலக்க²ந்தே⁴ன ஸமன்னாக³தோ அஜ்ஜ²த்தங்
அனவஜ்ஜஸுக²ங் படிஸங்வேதே³தி. ஏவங் கோ², மஹாராஜ, பி⁴க்கு² ஸீலஸம்பன்னோ ஹோதி.

மஹாஸீலங் நிட்டி²தங்.

இந்த்³ரியஸங்வரோ

213.
‘‘கத²ஞ்ச, மஹாராஜ, பி⁴க்கு² இந்த்³ரியேஸு கு³த்தத்³வாரோ ஹோதி? இத⁴,
மஹாராஜ, பி⁴க்கு² சக்கு²னா ரூபங் தி³ஸ்வா ந நிமித்தக்³கா³ஹீ ஹோதி
நானுப்³யஞ்ஜனக்³கா³ஹீ. யத்வாதி⁴கரணமேனங் சக்கு²ந்த்³ரியங் அஸங்வுதங்
விஹரந்தங் அபி⁴ஜ்ஜா² தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ
ஸங்வராய படிபஜ்ஜதி, ரக்க²தி சக்கு²ந்த்³ரியங், சக்கு²ந்த்³ரியே ஸங்வரங்
ஆபஜ்ஜதி. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…பே॰…
ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங் பு²ஸித்வா…பே॰… மனஸா
த⁴ம்மங் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ.
யத்வாதி⁴கரணமேனங் மனிந்த்³ரியங் அஸங்வுதங் விஹரந்தங் அபி⁴ஜ்ஜா² தோ³மனஸ்ஸா
பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய படிபஜ்ஜதி, ரக்க²தி
மனிந்த்³ரியங், மனிந்த்³ரியே ஸங்வரங் ஆபஜ்ஜதி. ஸோ
இமினா அரியேன இந்த்³ரியஸங்வரேன ஸமன்னாக³தோ அஜ்ஜ²த்தங் அப்³யாஸேகஸுக²ங்
படிஸங்வேதே³தி. ஏவங் கோ², மஹாராஜ, பி⁴க்கு² இந்த்³ரியேஸு கு³த்தத்³வாரோ
ஹோதி.

ஸதிஸம்பஜஞ்ஞங்

214. ‘‘கத²ஞ்ச ,
மஹாராஜ, பி⁴க்கு² ஸதிஸம்பஜஞ்ஞேன ஸமன்னாக³தோ ஹோதி? இத⁴, மஹாராஜ, பி⁴க்கு²
அபி⁴க்கந்தே படிக்கந்தே ஸம்பஜானகாரீ ஹோதி, ஆலோகிதே விலோகிதே ஸம்பஜானகாரீ
ஹோதி, ஸமிஞ்ஜிதே பஸாரிதே ஸம்பஜானகாரீ ஹோதி, ஸங்கா⁴டிபத்தசீவரதா⁴ரணே
ஸம்பஜானகாரீ ஹோதி, அஸிதே பீதே கா²யிதே ஸாயிதே ஸம்பஜானகாரீ ஹோதி,
உச்சாரபஸ்ஸாவகம்மே ஸம்பஜானகாரீ ஹோதி, க³தே டி²தே நிஸின்னே ஸுத்தே ஜாக³ரிதே பா⁴ஸிதே துண்ஹீபா⁴வே ஸம்பஜானகாரீ ஹோதி. ஏவங் கோ², மஹாராஜ , பி⁴க்கு² ஸதிஸம்பஜஞ்ஞேன ஸமன்னாக³தோ ஹோதி.

ஸந்தோஸோ

215.
‘‘கத²ஞ்ச, மஹாராஜ, பி⁴க்கு² ஸந்துட்டோ² ஹோதி? இத⁴, மஹாராஜ, பி⁴க்கு²
ஸந்துட்டோ² ஹோதி காயபரிஹாரிகேன சீவரேன, குச்சி²பரிஹாரிகேன பிண்ட³பாதேன .
ஸோ யேன யேனேவ பக்கமதி, ஸமாதா³யேவ பக்கமதி. ஸெய்யதா²பி, மஹாராஜ, பக்கீ²
ஸகுணோ யேன யேனேவ டே³தி, ஸபத்தபா⁴ரோவ டே³தி. ஏவமேவ கோ², மஹாராஜ, பி⁴க்கு²
ஸந்துட்டோ² ஹோதி காயபரிஹாரிகேன சீவரேன குச்சி²பரிஹாரிகேன பிண்ட³பாதேன. ஸோ
யேன யேனேவ பக்கமதி, ஸமாதா³யேவ பக்கமதி. ஏவங் கோ², மஹாராஜ, பி⁴க்கு²
ஸந்துட்டோ² ஹோதி.

நீவரணப்பஹானங்

216.
‘‘ஸோ இமினா ச அரியேன ஸீலக்க²ந்தே⁴ன ஸமன்னாக³தோ, இமினா ச அரியேன
இந்த்³ரியஸங்வரேன ஸமன்னாக³தோ, இமினா ச அரியேன ஸதிஸம்பஜஞ்ஞேன ஸமன்னாக³தோ,
இமாய ச அரியாய ஸந்துட்டி²யா ஸமன்னாக³தோ, விவித்தங் ஸேனாஸனங் ப⁴ஜதி அரஞ்ஞங்
ருக்க²மூலங் பப்³ப³தங் கந்த³ரங் கி³ரிகு³ஹங் ஸுஸானங் வனபத்த²ங்
அப்³போ⁴காஸங் பலாலபுஞ்ஜங். ஸோ பச்சா²ப⁴த்தங் பிண்ட³பாதப்படிக்கந்தோ
நிஸீத³தி பல்லங்கங் ஆபு⁴ஜித்வா உஜுங் காயங் பணிதா⁴ய பரிமுக²ங் ஸதிங்
உபட்ட²பெத்வா.

217. ‘‘ஸோ அபி⁴ஜ்ஜ²ங் லோகே பஹாய விக³தாபி⁴ஜ்ஜே²ன சேதஸா விஹரதி, அபி⁴ஜ்ஜா²ய சித்தங் பரிஸோதே⁴தி. ப்³யாபாத³பதோ³ஸங் பஹாய அப்³யாபன்னசித்தோ
விஹரதி ஸப்³ப³பாணபூ⁴தஹிதானுகம்பீ, ப்³யாபாத³பதோ³ஸா சித்தங் பரிஸோதே⁴தி.
தி²னமித்³த⁴ங் பஹாய விக³ததி²னமித்³தோ⁴ விஹரதி ஆலோகஸஞ்ஞீ, ஸதோ ஸம்பஜானோ,
தி²னமித்³தா⁴ சித்தங் பரிஸோதே⁴தி. உத்³த⁴ச்சகுக்குச்சங் பஹாய அனுத்³த⁴தோ
விஹரதி, அஜ்ஜ²த்தங் வூபஸந்தசித்தோ, உத்³த⁴ச்சகுக்குச்சா சித்தங்
பரிஸோதே⁴தி. விசிகிச்ச²ங் பஹாய திண்ணவிசிகிச்சோ² விஹரதி, அகத²ங்கதீ²
குஸலேஸு த⁴ம்மேஸு, விசிகிச்சா²ய சித்தங் பரிஸோதே⁴தி.

218. ‘‘ஸெய்யதா²பி ,
மஹாராஜ, புரிஸோ இணங் ஆதா³ய கம்மந்தே பயோஜெய்ய. தஸ்ஸ தே கம்மந்தா
ஸமிஜ்ஜெ²ய்யுங். ஸோ யானி ச போராணானி இணமூலானி, தானி ச ப்³யந்திங் கரெய்ய [ப்³யந்தீகரெய்ய (ஸீ॰ ஸ்யா॰ கங்॰)], ஸியா சஸ்ஸ உத்தரிங் அவஸிட்ட²ங் தா³ரப⁴ரணாய. தஸ்ஸ ஏவமஸ்ஸ – ‘அஹங் கோ² புப்³பே³ இணங் ஆதா³ய கம்மந்தே பயோஜேஸிங். தஸ்ஸ
மே தே கம்மந்தா ஸமிஜ்ஜி²ங்ஸு. ஸோஹங் யானி ச போராணானி இணமூலானி, தானி ச
ப்³யந்திங் அகாஸிங், அத்தி² ச மே உத்தரிங் அவஸிட்ட²ங் தா³ரப⁴ரணாயா’தி. ஸோ
ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸங்.

219.
‘‘ஸெய்யதா²பி, மஹாராஜ, புரிஸோ ஆபா³தி⁴கோ அஸ்ஸ து³க்கி²தோ பா³ள்ஹகி³லானோ;
ப⁴த்தஞ்சஸ்ஸ நச்சா²தெ³ய்ய, ந சஸ்ஸ காயே ப³லமத்தா. ஸோ அபரேன ஸமயேன தம்ஹா
ஆபா³தா⁴ முச்செய்ய; ப⁴த்தங் சஸ்ஸ சா²தெ³ய்ய, ஸியா சஸ்ஸ காயே ப³லமத்தா. தஸ்ஸ
ஏவமஸ்ஸ – ‘அஹங் கோ² புப்³பே³ ஆபா³தி⁴கோ அஹோஸிங் து³க்கி²தோ பா³ள்ஹகி³லானோ;
ப⁴த்தஞ்ச மே நச்சா²தே³ஸி, ந ச மே ஆஸி [ந சஸ்ஸ மே (க॰)]
காயே ப³லமத்தா. ஸொம்ஹி ஏதரஹி தம்ஹா ஆபா³தா⁴ முத்தோ; ப⁴த்தஞ்ச மே சா²தே³தி,
அத்தி² ச மே காயே ப³லமத்தா’தி. ஸோ ததோனிதா³னங் லபே⁴த² பாமோஜ்ஜங்,
அதி⁴க³ச்செ²ய்ய ஸோமனஸ்ஸங்.

220. ‘‘ஸெய்யதா²பி, மஹாராஜ, புரிஸோ ப³ந்த⁴னாகா³ரே ப³த்³தோ⁴ அஸ்ஸ. ஸோ அபரேன ஸமயேன தம்ஹா ப³ந்த⁴னாகா³ரா முச்செய்ய ஸொத்தி²னா அப்³ப⁴யேன [உப்³ப³யேன (ஸீ॰ க॰)],
ந சஸ்ஸ கிஞ்சி போ⁴கா³னங் வயோ. தஸ்ஸ ஏவமஸ்ஸ – ‘அஹங் கோ² புப்³பே³
ப³ந்த⁴னாகா³ரே ப³த்³தோ⁴ அஹோஸிங், ஸொம்ஹி ஏதரஹி தம்ஹா ப³ந்த⁴னாகா³ரா முத்தோ ஸொத்தி²னா அப்³ப⁴யேன. நத்தி² ச மே கிஞ்சி போ⁴கா³னங் வயோ’தி. ஸோ ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸங்.

221.
‘‘ஸெய்யதா²பி, மஹாராஜ, புரிஸோ தா³ஸோ அஸ்ஸ அனத்தாதீ⁴னோ பராதீ⁴னோ ந
யேனகாமங்க³மோ. ஸோ அபரேன ஸமயேன தம்ஹா தா³ஸப்³யா முச்செய்ய அத்தாதீ⁴னோ
அபராதீ⁴னோ பு⁴ஜிஸ்ஸோ யேனகாமங்க³மோ. தஸ்ஸ ஏவமஸ்ஸ – ‘அஹங் கோ² புப்³பே³ தா³ஸோ
அஹோஸிங் அனத்தாதீ⁴னோ பராதீ⁴னோ ந யேனகாமங்க³மோ. ஸொம்ஹி ஏதரஹி தம்ஹா
தா³ஸப்³யா முத்தோ அத்தாதீ⁴னோ அபராதீ⁴னோ பு⁴ஜிஸ்ஸோ யேனகாமங்க³மோ’தி. ஸோ
ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸங்.

222.
‘‘ஸெய்யதா²பி, மஹாராஜ, புரிஸோ ஸத⁴னோ ஸபோ⁴கோ³ கந்தாரத்³தா⁴னமக்³க³ங்
படிபஜ்ஜெய்ய து³ப்³பி⁴க்க²ங் ஸப்படிப⁴யங். ஸோ அபரேன ஸமயேன தங் கந்தாரங்
நித்த²ரெய்ய ஸொத்தி²னா, கா³மந்தங் அனுபாபுணெய்ய கே²மங் அப்படிப⁴யங். தஸ்ஸ
ஏவமஸ்ஸ – ‘அஹங் கோ² புப்³பே³ ஸத⁴னோ ஸபோ⁴கோ³ கந்தாரத்³தா⁴னமக்³க³ங்
படிபஜ்ஜிங் து³ப்³பி⁴க்க²ங் ஸப்படிப⁴யங். ஸொம்ஹி ஏதரஹி தங் கந்தாரங்
நித்தி²ண்ணோ ஸொத்தி²னா, கா³மந்தங் அனுப்பத்தோ கே²மங் அப்படிப⁴ய’ந்தி. ஸோ
ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸங்.

223. ‘‘ஏவமேவ
கோ², மஹாராஜ, பி⁴க்கு² யதா² இணங் யதா² ரோக³ங் யதா² ப³ந்த⁴னாகா³ரங் யதா²
தா³ஸப்³யங் யதா² கந்தாரத்³தா⁴னமக்³க³ங், ஏவங் இமே பஞ்ச நீவரணே அப்பஹீனே
அத்தனி ஸமனுபஸ்ஸதி.

224.
‘‘ஸெய்யதா²பி, மஹாராஜ, யதா² ஆணண்யங் யதா² ஆரொக்³யங் யதா² ப³ந்த⁴னாமொக்க²ங்
யதா² பு⁴ஜிஸ்ஸங் யதா² கே²மந்தபூ⁴மிங்; ஏவமேவ கோ², மஹாராஜ, பி⁴க்கு² இமே
பஞ்ச நீவரணே பஹீனே அத்தனி ஸமனுபஸ்ஸதி.

225. ‘‘தஸ்ஸிமே
பஞ்ச நீவரணே பஹீனே அத்தனி ஸமனுபஸ்ஸதோ பாமோஜ்ஜங் ஜாயதி, பமுதி³தஸ்ஸ பீதி
ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ
சித்தங் ஸமாதி⁴யதி.

பட²மஜ்ஜா²னங்

226.
‘‘ஸோ விவிச்சேவ காமேஹி, விவிச்ச அகுஸலேஹி த⁴ம்மேஹி ஸவிதக்கங் ஸவிசாரங்
விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி. ஸோ இமமேவ
காயங் விவேகஜேன பீதிஸுகே²ன அபி⁴ஸந்தே³தி பரிஸந்தே³தி பரிபூரேதி
பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ விவேகஜேன பீதிஸுகே²ன அப்பு²டங்
ஹோதி.

227. ‘‘ஸெய்யதா²பி ,
மஹாராஜ, த³க்கோ² ந்ஹாபகோ வா ந்ஹாபகந்தேவாஸீ வா கங்ஸதா²லே ந்ஹானீயசுண்ணானி
ஆகிரித்வா உத³கேன பரிப்போ²ஸகங் பரிப்போ²ஸகங் ஸன்னெய்ய, ஸாயங்
ந்ஹானீயபிண்டி³ ஸ்னேஹானுக³தா ஸ்னேஹபரேதா ஸந்தரபா³ஹிரா பு²டா ஸ்னேஹேன, ந ச
பக்³க⁴ரணீ; ஏவமேவ கோ², மஹாராஜ, பி⁴க்கு² இமமேவ காயங் விவேகஜேன பீதிஸுகே²ன
அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ
காயஸ்ஸ விவேகஜேன பீதிஸுகே²ன அப்பு²டங் ஹோதி. இத³ம்பி கோ², மஹாராஜ,
ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி
அபி⁴க்கந்ததரஞ்ச பணீததரஞ்ச.

து³தியஜ்ஜா²னங்

228.
‘‘புன சபரங், மஹாராஜ, பி⁴க்கு² விதக்கவிசாரானங் வூபஸமா அஜ்ஜ²த்தங்
ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங்
து³தியங் ஜா²னங் உபஸம்பஜ்ஜ விஹரதி. ஸோ இமமேவ காயங் ஸமாதி⁴ஜேன பீதிஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ ஸமாதி⁴ஜேன பீதிஸுகே²ன அப்பு²டங் ஹோதி.

229. ‘‘ஸெய்யதா²பி, மஹாராஜ, உத³கரஹதோ³ க³ம்பீ⁴ரோ உப்³பி⁴தோ³த³கோ [உப்³பி⁴தோத³கோ (ஸ்யா॰ கங்॰ க॰)]
தஸ்ஸ நேவஸ்ஸ புரத்தி²மாய தி³ஸாய உத³கஸ்ஸ ஆயமுக²ங், ந த³க்கி²ணாய தி³ஸாய
உத³கஸ்ஸ ஆயமுக²ங், ந பச்சி²மாய தி³ஸாய உத³கஸ்ஸ ஆயமுக²ங், ந உத்தராய தி³ஸாய
உத³கஸ்ஸ ஆயமுக²ங், தே³வோ ச ந காலேனகாலங் ஸம்மாதா⁴ரங் அனுப்பவெச்செ²ய்ய. அத²
கோ² தம்ஹாவ உத³கரஹதா³ ஸீதா வாரிதா⁴ரா உப்³பி⁴ஜ்ஜித்வா தமேவ உத³கரஹத³ங்
ஸீதேன வாரினா அபி⁴ஸந்தெ³ய்ய பரிஸந்தெ³ய்ய பரிபூரெய்ய பரிப்ப²ரெய்ய, நாஸ்ஸ
கிஞ்சி ஸப்³பா³வதோ உத³கரஹத³ஸ்ஸ ஸீதேன வாரினா அப்பு²டங் அஸ்ஸ. ஏவமேவ கோ²,
மஹாராஜ, பி⁴க்கு² இமமேவ காயங் ஸமாதி⁴ஜேன பீதிஸுகே²ன அபி⁴ஸந்தே³தி
பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ ஸமாதி⁴ஜேன பீதிஸுகே²ன அப்பு²டங் ஹோதி. இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

ததியஜ்ஜா²னங்

230.
‘‘புன சபரங், மஹாராஜ, பி⁴க்கு² பீதியா ச விராகா³ உபெக்க²கோ ச விஹரதி ஸதோ
ஸம்பஜானோ, ஸுக²ஞ்ச காயேன படிஸங்வேதே³தி, யங் தங் அரியா ஆசிக்க²ந்தி –
‘உபெக்க²கோ ஸதிமா ஸுக²விஹாரீ’தி, ததியங் ஜா²னங் உபஸம்பஜ்ஜ விஹரதி. ஸோ இமமேவ
காயங் நிப்பீதிகேன ஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி,
நாஸ்ஸ கிஞ்சி ஸப்³பா³வதோ காயஸ்ஸ நிப்பீதிகேன ஸுகே²ன அப்பு²டங் ஹோதி.

231. ‘‘ஸெய்யதா²பி, மஹாராஜ, உப்பலினியங் வா பது³மினியங் வா புண்ட³ரீகினியங் வா அப்பேகச்சானி உப்பலானி வா பது³மானி வா புண்ட³ரீகானி வா
உத³கே ஜாதானி உத³கே ஸங்வட்³டா⁴னி உத³கானுக்³க³தானி அந்தோனிமுக்³க³போஸீனி,
தானி யாவ சக்³கா³ யாவ ச மூலா ஸீதேன வாரினா அபி⁴ஸன்னானி பரிஸன்னானி [அபி⁴ஸந்தா³னி பரிஸந்தா³னி (க॰)] பரிபூரானி பரிப்பு²டானி [பரிப்பு²ட்டா²னி (பீ॰)],
நாஸ்ஸ கிஞ்சி ஸப்³பா³வதங் உப்பலானங் வா பது³மானங் வா புண்ட³ரீகானங் வா
ஸீதேன வாரினா அப்பு²டங் அஸ்ஸ; ஏவமேவ கோ², மஹாராஜ, பி⁴க்கு² இமமேவ காயங்
நிப்பீதிகேன ஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ
கிஞ்சி ஸப்³பா³வதோ காயஸ்ஸ நிப்பீதிகேன ஸுகே²ன அப்பு²டங் ஹோதி. இத³ம்பி கோ²,
மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

சதுத்த²ஜ்ஜா²னங்

232.
‘‘புன சபரங், மஹாராஜ, பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா,
புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா அது³க்க²மஸுக²ங்
உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹரதி, ஸோ இமமேவ
காயங் பரிஸுத்³தே⁴ன சேதஸா பரியோதா³தேன ப²ரித்வா நிஸின்னோ ஹோதி, நாஸ்ஸ கிஞ்சி ஸப்³பா³வதோ காயஸ்ஸ பரிஸுத்³தே⁴ன சேதஸா பரியோதா³தேன அப்பு²டங் ஹோதி.

233. ‘‘ஸெய்யதா²பி ,
மஹாராஜ, புரிஸோ ஓதா³தேன வத்தே²ன ஸஸீஸங் பாருபித்வா நிஸின்னோ அஸ்ஸ, நாஸ்ஸ
கிஞ்சி ஸப்³பா³வதோ காயஸ்ஸ ஓதா³தேன வத்தே²ன அப்பு²டங் அஸ்ஸ; ஏவமேவ கோ²,
மஹாராஜ, பி⁴க்கு² இமமேவ காயங் பரிஸுத்³தே⁴ன சேதஸா பரியோதா³தேன ப²ரித்வா
நிஸின்னோ ஹோதி, நாஸ்ஸ கிஞ்சி ஸப்³பா³வதோ காயஸ்ஸ பரிஸுத்³தே⁴ன சேதஸா
பரியோதா³தேன அப்பு²டங் ஹோதி. இத³ம்பி கோ², மஹாராஜ, ஸந்தி³ட்டி²கங்
ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

விபஸ்ஸனாஞாணங்

234. ‘‘ஸோ [புன சபரங் மஹாராஜ பி⁴க்கு² ஸோ (க॰)]
ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே
முது³பூ⁴தே கம்மனியே டி²தே ஆனேஞ்ஜப்பத்தே ஞாணத³ஸ்ஸனாய சித்தங் அபி⁴னீஹரதி
அபி⁴னின்னாமேதி. ஸோ ஏவங் பஜானாதி – ‘அயங் கோ² மே காயோ ரூபீ சாதுமஹாபூ⁴திகோ
மாதாபெத்திகஸம்ப⁴வோ ஓத³னகும்மாஸூபசயோ
அனிச்சுச்சா²த³ன-பரிமத்³த³ன-பே⁴த³ன-வித்³த⁴ங்ஸன-த⁴ம்மோ; இத³ஞ்ச பன மே
விஞ்ஞாணங் எத்த² ஸிதங் எத்த² படிப³த்³த⁴’ந்தி.

235.
‘‘ஸெய்யதா²பி, மஹாராஜ, மணி வேளுரியோ ஸுபோ⁴ ஜாதிமா அட்ட²ங்ஸோ ஸுபரிகம்மகதோ
அச்சோ² விப்பஸன்னோ அனாவிலோ ஸப்³பா³காரஸம்பன்னோ. தத்ராஸ்ஸ ஸுத்தங் ஆவுதங்
நீலங் வா பீதங் வா லோஹிதங் வா [பீதகங் வா லோஹிதகங் வா (க॰)]
ஓதா³தங் வா பண்டு³ஸுத்தங் வா. தமேனங் சக்கு²மா புரிஸோ ஹத்தே² கரித்வா
பச்சவெக்கெ²ய்ய – ‘அயங் கோ² மணி வேளுரியோ ஸுபோ⁴ ஜாதிமா அட்ட²ங்ஸோ
ஸுபரிகம்மகதோ அச்சோ² விப்பஸன்னோ அனாவிலோ ஸப்³பா³காரஸம்பன்னோ; தத்ரித³ங்
ஸுத்தங் ஆவுதங் நீலங் வா பீதங் வா லோஹிதங் வா ஓதா³தங்
வா பண்டு³ஸுத்தங் வா’தி. ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே
பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே
டி²தே ஆனேஞ்ஜப்பத்தே ஞாணத³ஸ்ஸனாய சித்தங் அபி⁴னீஹரதி அபி⁴னின்னாமேதி. ஸோ
ஏவங் பஜானாதி – ‘அயங் கோ² மே காயோ ரூபீ சாதுமஹாபூ⁴திகோ மாதாபெத்திகஸம்ப⁴வோ
ஓத³னகும்மாஸூபசயோ அனிச்சுச்சா²த³னபரிமத்³த³னபே⁴த³னவித்³த⁴ங்ஸனத⁴ம்மோ;
இத³ஞ்ச பன மே விஞ்ஞாணங் எத்த² ஸிதங் எத்த² படிப³த்³த⁴’ந்தி. இத³ம்பி கோ², மஹாராஜ , ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

மனோமயித்³தி⁴ஞாணங்

236. ‘‘ஸோ
ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே
முது³பூ⁴தே கம்மனியே டி²தே ஆனேஞ்ஜப்பத்தே மனோமயங் காயங் அபி⁴னிம்மானாய
சித்தங் அபி⁴னீஹரதி அபி⁴னின்னாமேதி. ஸோ இமம்ஹா காயா அஞ்ஞங் காயங்
அபி⁴னிம்மினாதி ரூபிங் மனோமயங் ஸப்³ப³ங்க³பச்சங்கி³ங் அஹீனிந்த்³ரியங்.

237. ‘‘ஸெய்யதா²பி, மஹாராஜ, புரிஸோ முஞ்ஜம்ஹா ஈஸிகங் பவாஹெய்ய [பப்³பா³ஹெய்ய (ஸ்யா॰ க॰)]. தஸ்ஸ ஏவமஸ்ஸ – ‘அயங் முஞ்ஜோ, அயங் ஈஸிகா, அஞ்ஞோ முஞ்ஜோ, அஞ்ஞா ஈஸிகா, முஞ்ஜம்ஹா த்வேவ ஈஸிகா பவாள்ஹா’தி [பப்³பா³ள்ஹாதி (ஸ்யா॰ க॰)].
ஸெய்யதா² வா பன, மஹாராஜ, புரிஸோ அஸிங் கோஸியா பவாஹெய்ய. தஸ்ஸ ஏவமஸ்ஸ –
‘அயங் அஸி, அயங் கோஸி, அஞ்ஞோ அஸி, அஞ்ஞா கோஸி, கோஸியா த்வேவ அஸி
பவாள்ஹோ’’தி. ஸெய்யதா² வா பன, மஹாராஜ, புரிஸோ அஹிங் கரண்டா³ உத்³த⁴ரெய்ய.
தஸ்ஸ ஏவமஸ்ஸ – ‘அயங் அஹி, அயங் கரண்டோ³. அஞ்ஞோ அஹி, அஞ்ஞோ கரண்டோ³, கரண்டா³
த்வேவ அஹி உப்³ப⁴தோ’தி [உத்³த⁴ரிதோ (ஸ்யா॰ கங்॰)].
ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே பரிஸுத்³தே⁴ பரியோதா³தே
அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே மனோமயங்
காயங் அபி⁴னிம்மானாய சித்தங் அபி⁴னீஹரதி அபி⁴னின்னாமேதி. ஸோ இமம்ஹா காயா
அஞ்ஞங் காயங் அபி⁴னிம்மினாதி ரூபிங் மனோமயங் ஸப்³ப³ங்க³பச்சங்கி³ங்
அஹீனிந்த்³ரியங். இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங்
புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

இத்³தி⁴வித⁴ஞாணங்

238. ‘‘ஸோ
ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே
முது³பூ⁴தே கம்மனியே டி²தே ஆனேஞ்ஜப்பத்தே இத்³தி⁴விதா⁴ய சித்தங் அபி⁴னீஹரதி
அபி⁴னின்னாமேதி . ஸோ அனேகவிஹிதங் இத்³தி⁴வித⁴ங்
பச்சனுபோ⁴தி – ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி;
ஆவிபா⁴வங் திரோபா⁴வங் திரோகுட்டங் திரோபாகாரங் திரோபப்³ப³தங் அஸஜ்ஜமானோ
க³ச்ச²தி ஸெய்யதா²பி ஆகாஸே. பத²வியாபி உம்முஜ்ஜனிமுஜ்ஜங் கரோதி ஸெய்யதா²பி
உத³கே. உத³கேபி அபி⁴ஜ்ஜமானே க³ச்ச²தி [அபி⁴ஜ்ஜமானோ (ஸீ॰ க॰)] ஸெய்யதா²பி பத²வியா .
ஆகாஸேபி பல்லங்கேன கமதி ஸெய்யதா²பி பக்கீ² ஸகுணோ. இமேபி சந்தி³மஸூரியே
ஏவங்மஹித்³தி⁴கே ஏவங்மஹானுபா⁴வே பாணினா பராமஸதி பரிமஜ்ஜதி. யாவ
ப்³ரஹ்மலோகாபி காயேன வஸங் வத்தேதி.

239.
‘‘ஸெய்யதா²பி, மஹாராஜ, த³க்கோ² கும்ப⁴காரோ வா கும்ப⁴காரந்தேவாஸீ வா
ஸுபரிகம்மகதாய மத்திகாய யங் யதே³வ பா⁴ஜனவிகதிங் ஆகங்கெ²ய்ய, தங் ததே³வ
கரெய்ய அபி⁴னிப்பா²தெ³ய்ய. ஸெய்யதா² வா பன, மஹாராஜ, த³க்கோ² த³ந்தகாரோ வா
த³ந்தகாரந்தேவாஸீ வா ஸுபரிகம்மகதஸ்மிங் த³ந்தஸ்மிங் யங் யதே³வ த³ந்தவிகதிங்
ஆகங்கெ²ய்ய, தங் ததே³வ கரெய்ய அபி⁴னிப்பா²தெ³ய்ய. ஸெய்யதா² வா பன, மஹாராஜ,
த³க்கோ² ஸுவண்ணகாரோ வா ஸுவண்ணகாரந்தேவாஸீ வா ஸுபரிகம்மகதஸ்மிங்
ஸுவண்ணஸ்மிங் யங் யதே³வ ஸுவண்ணவிகதிங் ஆகங்கெ²ய்ய, தங் ததே³வ கரெய்ய
அபி⁴னிப்பா²தெ³ய்ய. ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே
பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே
டி²தே ஆனேஞ்ஜப்பத்தே இத்³தி⁴விதா⁴ய சித்தங்
அபி⁴னீஹரதி அபி⁴னின்னாமேதி. ஸோ அனேகவிஹிதங் இத்³தி⁴வித⁴ங் பச்சனுபோ⁴தி –
ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி; ஆவிபா⁴வங்
திரோபா⁴வங் திரோகுட்டங் திரோபாகாரங் திரோபப்³ப³தங் அஸஜ்ஜமானோ க³ச்ச²தி
ஸெய்யதா²பி ஆகாஸே. பத²வியாபி உம்முஜ்ஜனிமுஜ்ஜங் கரோதி ஸெய்யதா²பி உத³கே.
உத³கேபி அபி⁴ஜ்ஜமானே க³ச்ச²தி ஸெய்யதா²பி பத²வியா. ஆகாஸேபி பல்லங்கேன கமதி
ஸெய்யதா²பி பக்கீ² ஸகுணோ. இமேபி சந்தி³மஸூரியே ஏவங்மஹித்³தி⁴கே
ஏவங்மஹானுபா⁴வே பாணினா பராமஸதி பரிமஜ்ஜதி. யாவ
ப்³ரஹ்மலோகாபி காயேன வஸங் வத்தேதி. இத³ம்பி கோ², மஹாராஜ, ஸந்தி³ட்டி²கங்
ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச
பணீததரஞ்ச.

தி³ப்³ப³ஸோதஞாணங்

240. ‘‘ஸோ
ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே
முது³பூ⁴தே கம்மனியே டி²தே ஆனேஞ்ஜப்பத்தே தி³ப்³பா³ய ஸோததா⁴துயா சித்தங்
அபி⁴னீஹரதி அபி⁴னின்னாமேதி. ஸோ தி³ப்³பா³ய ஸோததா⁴துயா விஸுத்³தா⁴ய
அதிக்கந்தமானுஸிகாய உபோ⁴ ஸத்³தே³ ஸுணாதி தி³ப்³பே³ ச மானுஸே ச யே தூ³ரே
ஸந்திகே ச.

241. ‘‘ஸெய்யதா²பி , மஹாராஜ, புரிஸோ அத்³தா⁴னமக்³க³ப்படிபன்னோ. ஸோ ஸுணெய்ய பே⁴ரிஸத்³த³ம்பி முதி³ங்க³ஸத்³த³ம்பி [முதிங்க³ஸத்³த³ம்பி (ஸீ॰ பீ॰)] ஸங்க²பணவதி³ந்தி³மஸத்³த³ம்பி [ஸங்க²பணவதெ³ண்டி³மஸத்³த³ம்பி (ஸீ॰ பீ॰), ஸங்க²ஸத்³த³ங்பி பணவஸத்³த³ங்பி தெ³ந்தி³மஸத்³த³ங்பி (ஸ்யா॰ கங்॰)]. தஸ்ஸ ஏவமஸ்ஸ – ‘பே⁴ரிஸத்³தோ³’ இதிபி, ‘முதி³ங்க³ஸத்³தோ³’ இதிபி, ‘ஸங்க²பணவதி³ந்தி³மஸத்³தோ³’ இதிபி [ஸங்க²ஸத்³தோ³ இதிபி பணவஸத்³தோ³ இதிபி தெ³ந்தி³மஸத்³தோ³ இதிபி (ஸ்யா॰ கங்॰)].
ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே பரிஸுத்³தே⁴ பரியோதா³தே
அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
தி³ப்³பா³ய ஸோததா⁴துயா சித்தங் அபி⁴னீஹரதி
அபி⁴னின்னாமேதி. ஸோ தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய
உபோ⁴ ஸத்³தே³ ஸுணாதி தி³ப்³பே³ ச மானுஸே ச யே தூ³ரே ஸந்திகே ச. இத³ம்பி
கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி
ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

சேதோபரியஞாணங்

242.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே சேதோபரியஞாணாய
சித்தங் அபி⁴னீஹரதி அபி⁴னின்னாமேதி. ஸோ பரஸத்தானங் பரபுக்³க³லானங் சேதஸா
சேதோ பரிச்ச பஜானாதி – ஸராக³ங் வா சித்தங் ‘ஸராக³ங் சித்த’ந்தி பஜானாதி,
வீதராக³ங் வா சித்தங் ‘வீதராக³ங் சித்த’ந்தி பஜானாதி, ஸதோ³ஸங்
வா சித்தங் ‘ஸதோ³ஸங் சித்த’ந்தி பஜானாதி, வீததோ³ஸங் வா சித்தங் ‘வீததோ³ஸங்
சித்த’ந்தி பஜானாதி, ஸமோஹங் வா சித்தங் ‘ஸமோஹங் சித்த’ந்தி பஜானாதி,
வீதமோஹங் வா சித்தங் ‘வீதமோஹங் சித்த’ந்தி பஜானாதி, ஸங்கி²த்தங் வா சித்தங்
‘ஸங்கி²த்தங் சித்த’ந்தி பஜானாதி, விக்கி²த்தங் வா சித்தங் ‘விக்கி²த்தங்
சித்த’ந்தி பஜானாதி, மஹக்³க³தங் வா சித்தங் ‘மஹக்³க³தங் சித்த’ந்தி
பஜானாதி, அமஹக்³க³தங் வா சித்தங் ‘அமஹக்³க³தங் சித்த’ந்தி பஜானாதி,
ஸஉத்தரங் வா சித்தங் ‘ஸஉத்தரங் சித்த’ந்தி பஜானாதி, அனுத்தரங் வா சித்தங்
‘அனுத்தரங் சித்த’ந்தி பஜானாதி, ஸமாஹிதங் வா சித்தங் ‘ஸமாஹிதங் சித்த’ந்தி
பஜானாதி, அஸமாஹிதங் வா சித்தங் ‘அஸமாஹிதங் சித்த’ந்தி பஜானாதி , விமுத்தங் வா சித்தங் ‘விமுத்தங் சித்த’ந்தி பஜானாதி, அவிமுத்தங் வா சித்தங் ‘அவிமுத்தங் சித்த’ந்தி பஜானாதி.

243. ‘‘ஸெய்யதா²பி , மஹாராஜ, இத்தீ² வா புரிஸோ வா த³ஹரோ யுவா
மண்ட³னஜாதிகோ ஆதா³ஸே வா பரிஸுத்³தே⁴ பரியோதா³தே அச்சே² வா உத³கபத்தே ஸகங்
முக²னிமித்தங் பச்சவெக்க²மானோ ஸகணிகங் வா ‘ஸகணிக’ந்தி ஜானெய்ய, அகணிகங் வா
‘அகணிக’ந்தி ஜானெய்ய; ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே
பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே
டி²தே ஆனேஞ்ஜப்பத்தே சேதோபரியஞாணாய சித்தங் அபி⁴னீஹரதி அபி⁴னின்னாமேதி. ஸோ
பரஸத்தானங் பரபுக்³க³லானங் சேதஸா சேதோ பரிச்ச பஜானாதி – ஸராக³ங் வா சித்தங்
‘ஸராக³ங் சித்த’ந்தி பஜானாதி, வீதராக³ங் வா சித்தங் ‘வீதராக³ங் சித்த’ந்தி
பஜானாதி, ஸதோ³ஸங் வா சித்தங் ‘ஸதோ³ஸங் சித்த’ந்தி பஜானாதி, வீததோ³ஸங் வா
சித்தங் ‘வீததோ³ஸங் சித்த’ந்தி பஜானாதி, ஸமோஹங் வா சித்தங் ‘ஸமோஹங்
சித்த’ந்தி பஜானாதி, வீதமோஹங் வா சித்தங் ‘வீதமோஹங் சித்த’ந்தி பஜானாதி,
ஸங்கி²த்தங் வா சித்தங் ‘ஸங்கி²த்தங் சித்த’ந்தி பஜானாதி, விக்கி²த்தங் வா
சித்தங் ‘விக்கி²த்தங் சித்த’ந்தி பஜானாதி, மஹக்³க³தங் வா சித்தங்
‘மஹக்³க³தங் சித்த’ந்தி பஜானாதி, அமஹக்³க³தங் வா சித்தங் ‘அமஹக்³க³தங்
சித்த’ந்தி பஜானாதி, ஸஉத்தரங் வா சித்தங் ‘ஸஉத்தரங் சித்த’ந்தி பஜானாதி,
அனுத்தரங் வா சித்தங் ‘அனுத்தரங் சித்த’ந்தி
பஜானாதி, ஸமாஹிதங் வா சித்தங் ‘ஸமாஹிதங் சித்த’ந்தி பஜானாதி, அஸமாஹிதங் வா
சித்தங் ‘அஸமாஹிதங் சித்த’ந்தி பஜானாதி, விமுத்தங் வா சித்தங் ‘விமுத்தங்
சித்த’’ந்தி பஜானாதி, அவிமுத்தங் வா சித்தங் ‘அவிமுத்தங் சித்த’ந்தி
பஜானாதி. இத³ம்பி கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி
ஸந்தி³ட்டி²கேஹி ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

புப்³பே³னிவாஸானுஸ்ஸதிஞாணங்

244. ‘‘ஸோ
ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே
முது³பூ⁴தே கம்மனியே டி²தே ஆனேஞ்ஜப்பத்தே புப்³பே³னிவாஸானுஸ்ஸதிஞாணாய
சித்தங் அபி⁴னீஹரதி அபி⁴னின்னாமேதி. ஸோ அனேகவிஹிதங் புப்³பே³னிவாஸங்
அனுஸ்ஸரதி, ஸெய்யதி²த³ங் – ஏகம்பி ஜாதிங் த்³வேபி ஜாதியோ திஸ்ஸோபி ஜாதியோ
சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி ஜாதியோ திங்ஸம்பி
ஜாதியோ சத்தாலீஸம்பி ஜாதியோ பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி
ஜாதிஸதஸஹஸ்ஸம்பி அனேகேபி ஸங்வட்டகப்பே அனேகேபி விவட்டகப்பே அனேகேபி
ஸங்வட்டவிவட்டகப்பே, ‘அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³
ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ
ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³
ஏவமாயுபரியந்தோ, ஸோ ததோ சுதோ இதூ⁴பபன்னோ’தி. இதி ஸாகாரங் ஸஉத்³தே³ஸங்
அனேகவிஹிதங் புப்³பே³னிவாஸங் அனுஸ்ஸரதி.

245.
‘‘ஸெய்யதா²பி, மஹாராஜ, புரிஸோ ஸகம்ஹா கா³மா அஞ்ஞங் கா³மங் க³ச்செ²ய்ய,
தம்ஹாபி கா³மா அஞ்ஞங் கா³மங் க³ச்செ²ய்ய. ஸோ தம்ஹா கா³மா ஸகங்யேவ கா³மங்
பச்சாக³ச்செ²ய்ய. தஸ்ஸ ஏவமஸ்ஸ – ‘அஹங் கோ² ஸகம்ஹா கா³மா அமுங் கா³மங்
அக³ச்சி²ங் [அக³ஞ்சி²ங் (ஸ்யா॰ கங்॰)], தத்ராபி ஏவங் அட்டா²ஸிங், ஏவங் நிஸீதி³ங், ஏவங்
அபா⁴ஸிங், ஏவங் துண்ஹீ அஹோஸிங், தம்ஹாபி கா³மா அமுங் கா³மங் அக³ச்சி²ங்,
தத்ராபி ஏவங் அட்டா²ஸிங், ஏவங் நிஸீதி³ங், ஏவங் அபா⁴ஸிங், ஏவங் துண்ஹீ
அஹோஸிங், ஸொம்ஹி தம்ஹா கா³மா ஸகங்யேவ கா³மங்
பச்சாக³தோ’தி. ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே
பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே
டி²தே ஆனேஞ்ஜப்பத்தே புப்³பே³னிவாஸானுஸ்ஸதிஞாணாய சித்தங் அபி⁴னீஹரதி
அபி⁴னின்னாமேதி. ஸோ அனேகவிஹிதங் புப்³பே³னிவாஸங் அனுஸ்ஸரதி, ஸெய்யதி²த³ங் –
ஏகம்பி ஜாதிங் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி
ஜாதியோ த³ஸபி ஜாதியோ வீஸம்பி ஜாதியோ திங்ஸம்பி ஜாதியோ சத்தாலீஸம்பி ஜாதியோ
பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி அனேகேபி
ஸங்வட்டகப்பே அனேகேபி விவட்டகப்பே அனேகேபி ஸங்வட்டவிவட்டகப்பே,
‘அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ
ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ அமுத்ர
உத³பாதி³ங்; தத்ராபாஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ
ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோ’தி,
இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி. இத³ம்பி
கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி
ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச.

தி³ப்³ப³சக்கு²ஞாணங்

246. ‘‘ஸோ
ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே
முது³பூ⁴தே கம்மனியே டி²தே ஆனேஞ்ஜப்பத்தே ஸத்தானங் சுதூபபாதஞாணாய சித்தங்
அபி⁴னீஹரதி அபி⁴னின்னாமேதி. ஸோ தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே
ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே, யதா²கம்மூபகே³ ஸத்தே
பஜானாதி – ‘இமே வத பொ⁴ந்தோ ஸத்தா காயது³ச்சரிதேன ஸமன்னாக³தா வசீது³ச்சரிதேன
ஸமன்னாக³தா மனோது³ச்சரிதேன ஸமன்னாக³தா அரியானங் உபவாத³கா
மிச்சா²தி³ட்டி²கா மிச்சா²தி³ட்டி²கம்மஸமாதா³னா. தே காயஸ்ஸ
பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபன்னா. இமே வா
பன பொ⁴ந்தோ ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா
மனோஸுசரிதேன ஸமன்னாக³தா அரியானங் அனுபவாத³கா ஸம்மாதி³ட்டி²கா
ஸம்மாதி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா ஸுக³திங் ஸக்³க³ங்
லோகங் உபபன்னா’தி. இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே, யதா²கம்மூபகே³ ஸத்தே பஜானாதி.

247.
‘‘ஸெய்யதா²பி, மஹாராஜ, மஜ்ஜே² ஸிங்கா⁴டகே பாஸாதோ³. தத்த² சக்கு²மா புரிஸோ
டி²தோ பஸ்ஸெய்ய மனுஸ்ஸே கே³ஹங் பவிஸந்தேபி நிக்க²மந்தேபி ரதி²காயபி வீதி²ங்
ஸஞ்சரந்தே [ரதி²யாபீ ரதி²ங் ஸஞ்சரந்தே (ஸீ॰), ரதி²யாய விதி²ங் ஸஞ்சரந்தேபி (ஸ்யா॰)]
மஜ்ஜே² ஸிங்கா⁴டகே நிஸின்னேபி. தஸ்ஸ ஏவமஸ்ஸ – ‘ஏதே மனுஸ்ஸா கே³ஹங்
பவிஸந்தி, ஏதே நிக்க²மந்தி, ஏதே ரதி²காய வீதி²ங் ஸஞ்சரந்தி, ஏதே மஜ்ஜே²
ஸிங்கா⁴டகே நிஸின்னா’தி. ஏவமேவ கோ², மஹாராஜ, பி⁴க்கு² ஏவங் ஸமாஹிதே சித்தே
பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே
டி²தே ஆனேஞ்ஜப்பத்தே ஸத்தானங் சுதூபபாதஞாணாய சித்தங் அபி⁴னீஹரதி
அபி⁴னின்னாமேதி. ஸோ தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன
ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே
து³ப்³ப³ண்ணே ஸுக³தே து³க்³க³தே, யதா²கம்மூபகே³ ஸத்தே பஜானாதி – ‘இமே வத
பொ⁴ந்தோ ஸத்தா காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா
மனோது³ச்சரிதேன ஸமன்னாக³தா அரியானங் உபவாத³கா மிச்சா²தி³ட்டி²கா
மிச்சா²தி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா அபாயங்
து³க்³க³திங் வினிபாதங் நிரயங் உபபன்னா. இமே வா பன
பொ⁴ந்தோ ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன
ஸமன்னாக³தா அரியானங் அனுபவாத³கா ஸம்மாதி³ட்டி²கா
ஸம்மாதி³ட்டி²கம்மஸமாதா³னா. தே காயஸ்ஸ பே⁴தா³ பரங் மரணா ஸுக³திங் ஸக்³க³ங்
லோகங் உபபன்னா’தி. இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன
ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே
து³க்³க³தே; யதா²கம்மூபகே³ ஸத்தே பஜானாதி. ‘இத³ம்பி கோ², மஹாராஜ,
ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி ஸாமஞ்ஞப²லேஹி
அபி⁴க்கந்ததரஞ்ச பணீததரஞ்ச.

ஆஸவக்க²யஞாணங்

248.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானங் க²யஞாணாய
சித்தங் அபி⁴னீஹரதி அபி⁴னின்னாமேதி. ஸோ இத³ங் து³க்க²ந்தி யதா²பூ⁴தங்
பஜானாதி , அயங் து³க்க²ஸமுத³யோதி யதா²பூ⁴தங் பஜானாதி, அயங் து³க்க²னிரோதோ⁴தி யதா²பூ⁴தங் பஜானாதி, அயங் து³க்க²னிரோத⁴கா³மினீ படிபதா³தி யதா²பூ⁴தங் பஜானாதி. இமே ஆஸவாதி யதா²பூ⁴தங் பஜானாதி, அயங் ஆஸவஸமுத³யோதி
யதா²பூ⁴தங் பஜானாதி, அயங் ஆஸவனிரோதோ⁴தி யதா²பூ⁴தங் பஜானாதி, அயங்
ஆஸவனிரோத⁴கா³மினீ படிபதா³தி யதா²பூ⁴தங் பஜானாதி. தஸ்ஸ ஏவங் ஜானதோ ஏவங்
பஸ்ஸதோ காமாஸவாபி சித்தங் விமுச்சதி, ப⁴வாஸவாபி சித்தங் விமுச்சதி,
அவிஜ்ஜாஸவாபி சித்தங் விமுச்சதி, ‘விமுத்தஸ்மிங் விமுத்தமி’தி ஞாணங் ஹோதி,
‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி
பஜானாதி.

249.
‘‘ஸெய்யதா²பி, மஹாராஜ, பப்³ப³தஸங்கே²பே உத³கரஹதோ³ அச்சோ² விப்பஸன்னோ
அனாவிலோ. தத்த² சக்கு²மா புரிஸோ தீரே டி²தோ பஸ்ஸெய்ய ஸிப்பிஸம்பு³கம்பி
ஸக்க²ரகத²லம்பி மச்ச²கு³ம்ப³ம்பி சரந்தம்பி திட்ட²ந்தம்பி. தஸ்ஸ ஏவமஸ்ஸ –
‘அயங் கோ² உத³கரஹதோ³ அச்சோ² விப்பஸன்னோ அனாவிலோ. தத்ரிமே ஸிப்பிஸம்பு³காபி
ஸக்க²ரகத²லாபி மச்ச²கு³ம்பா³பி சரந்திபி திட்ட²ந்திபீ’தி. ஏவமேவ கோ²,
மஹாராஜ, பி⁴க்கு² ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானங் க²யஞாணாய
சித்தங் அபி⁴னீஹரதி அபி⁴னின்னாமேதி. ‘ஸோ இத³ங் து³க்க²’ந்தி யதா²பூ⁴தங்
பஜானாதி, ‘அயங் து³க்க²ஸமுத³யோ’தி யதா²பூ⁴தங் பஜானாதி ,
‘அயங் து³க்க²னிரோதோ⁴’தி யதா²பூ⁴தங் பஜானாதி, ‘அயங் து³க்க²னிரோத⁴கா³மினீ
படிபதா³’தி யதா²பூ⁴தங் பஜானாதி. ‘இமே ஆஸவாதி யதா²பூ⁴தங் பஜானாதி, ‘அயங்
ஆஸவஸமுத³யோ’தி யதா²பூ⁴தங் பஜானாதி, ‘அயங் ஆஸவனிரோதோ⁴’தி யதா²பூ⁴தங்
பஜானாதி, ‘அயங் ஆஸவனிரோத⁴கா³மினீ படிபதா³தி யதா²பூ⁴தங் பஜானாதி. தஸ்ஸ ஏவங்
ஜானதோ ஏவங் பஸ்ஸதோ காமாஸவாபி சித்தங் விமுச்சதி,
ப⁴வாஸவாபி சித்தங் விமுச்சதி, அவிஜ்ஜாஸவாபி சித்தங் விமுச்சதி,
‘விமுத்தஸ்மிங் விமுத்தமிதி ஞாணங் ஹோதி, ‘கீ²ணா ஜாதி, வுஸிதங்
ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி. இத³ங்
கோ², மஹாராஜ, ஸந்தி³ட்டி²கங் ஸாமஞ்ஞப²லங் புரிமேஹி ஸந்தி³ட்டி²கேஹி
ஸாமஞ்ஞப²லேஹி அபி⁴க்கந்ததரஞ்ச பணீததரஞ்ச. இமஸ்மா ச பன, மஹாராஜ,
ஸந்தி³ட்டி²கா ஸாமஞ்ஞப²லா அஞ்ஞங் ஸந்தி³ட்டி²கங் ஸாமஞ்ஞப²லங் உத்தரிதரங் வா
பணீததரங் வா நத்தீ²’’தி.

அஜாதஸத்துஉபாஸகத்தபடிவேத³னா

250.
ஏவங் வுத்தே, ராஜா மாக³தோ⁴ அஜாதஸத்து வேதே³ஹிபுத்தோ ப⁴க³வந்தங் ஏதத³வோச –
‘‘அபி⁴க்கந்தங், ப⁴ந்தே, அபி⁴க்கந்தங், ப⁴ந்தே. ஸெய்யதா²பி, ப⁴ந்தே,
நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா
மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய ‘சக்கு²மந்தோ
ரூபானி த³க்க²ந்தீ’தி; ஏவமேவங், ப⁴ந்தே, ப⁴க³வதா அனேகபரியாயேன த⁴ம்மோ
பகாஸிதோ . ஏஸாஹங், ப⁴ந்தே, ப⁴க³வந்தங் ஸரணங்
க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴க³வா தா⁴ரேது
அஜ்ஜதக்³கே³ பாணுபேதங் ஸரணங் க³தங். அச்சயோ மங், ப⁴ந்தே, அச்சக³மா
யதா²பா³லங் யதா²மூள்ஹங் யதா²அகுஸலங், யோஹங் பிதரங் த⁴ம்மிகங் த⁴ம்மராஜானங்
இஸ்ஸரியகாரணா ஜீவிதா வோரோபேஸிங். தஸ்ஸ மே, ப⁴ந்தே ப⁴க³வா அச்சயங் அச்சயதோ
படிக்³க³ண்ஹாது ஆயதிங் ஸங்வராயா’’தி.

251. ‘‘தக்³க⁴ த்வங், மஹாராஜ, அச்சயோ அச்சக³மா யதா²பா³லங் யதா²மூள்ஹங்
யதா²அகுஸலங், யங் த்வங் பிதரங் த⁴ம்மிகங் த⁴ம்மராஜானங் ஜீவிதா வோரோபேஸி.
யதோ ச கோ² த்வங், மஹாராஜ, அச்சயங் அச்சயதோ தி³ஸ்வா யதா²த⁴ம்மங் படிகரோஸி,
தங் தே மயங் படிக்³க³ண்ஹாம. வுத்³தி⁴ஹேஸா, மஹாராஜ, அரியஸ்ஸ வினயே, யோ
அச்சயங் அச்சயதோ தி³ஸ்வா யதா²த⁴ம்மங் படிகரோதி, ஆயதிங் ஸங்வரங்
ஆபஜ்ஜதீ’’தி.

252. ஏவங்
வுத்தே, ராஜா மாக³தோ⁴ அஜாதஸத்து வேதே³ஹிபுத்தோ ப⁴க³வந்தங் ஏதத³வோச –
‘‘ஹந்த³ ச தா³னி மயங், ப⁴ந்தே, க³ச்சா²ம ப³ஹுகிச்சா மயங் ப³ஹுகரணீயா’’தி.
‘‘யஸ்ஸதா³னி த்வங், மஹாராஜ, காலங் மஞ்ஞஸீ’’தி. அத² கோ² ராஜா மாக³தோ⁴
அஜாதஸத்து வேதே³ஹிபுத்தோ ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா
உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி.

253. அத² கோ² ப⁴க³வா அசிரபக்கந்தஸ்ஸ ரஞ்ஞோ மாக³த⁴ஸ்ஸ
அஜாதஸத்துஸ்ஸ வேதே³ஹிபுத்தஸ்ஸ பி⁴க்கூ² ஆமந்தேஸி – ‘‘க²தாயங், பி⁴க்க²வே,
ராஜா. உபஹதாயங், பி⁴க்க²வே, ராஜா. ஸசாயங், பி⁴க்க²வே, ராஜா பிதரங்
த⁴ம்மிகங் த⁴ம்மராஜானங் ஜீவிதா ந வோரோபெஸ்ஸத², இமஸ்மிஞ்ஞேவ ஆஸனே விரஜங்
வீதமலங் த⁴ம்மசக்கு²ங் உப்பஜ்ஜிஸ்ஸதா²’’தி. இத³மவோச ப⁴க³வா. அத்தமனா தே
பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.

ஸாமஞ்ஞப²லஸுத்தங் நிட்டி²தங் து³தியங்.


Leave a Reply