ஸுத்தபிடக-Part-26-தமிழில் திரபிடக மூன்று தொகுப்புகள்TIPITAKA--26.3. சக்கவத்திஸுத்தங்-அத்ததீபஸரணதா-from FREE ONLINE eNālāndā Research and
Practice UNIVERSITY through http://sarvajan.ambedkar.org
3. சக்கவத்திஸுத்தங்
அத்ததீபஸரணதா
80. ஏவங்
மே ஸுதங் – ஏகங் ஸமயங் ப⁴க³வா மக³தே⁴ஸு விஹரதி மாதுலாயங். தத்ர கோ² ப⁴க³வா
பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த்³த³ந்தே’’தி தே பி⁴க்கூ²
ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘அத்ததீ³பா, பி⁴க்க²வே, விஹரத²
அத்தஸரணா அனஞ்ஞஸரணா, த⁴ம்மதீ³பா த⁴ம்மஸரணா அனஞ்ஞஸரணா. கத²ஞ்ச பன,
பி⁴க்க²வே, பி⁴க்கு² அத்ததீ³போ விஹரதி அத்தஸரணோ அனஞ்ஞஸரணோ, த⁴ம்மதீ³போ
த⁴ம்மஸரணோ அனஞ்ஞஸரணோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி
ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங். வேத³னாஸு
வேத³னானுபஸ்ஸீ…பே॰… சித்தே சித்தானுபஸ்ஸீ…பே॰… த⁴ம்மேஸு த⁴ம்மானுபஸ்ஸீ
விஹரதி ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங். ஏவங் கோ²,
பி⁴க்க²வே, பி⁴க்கு² அத்ததீ³போ விஹரதி அத்தஸரணோ அனஞ்ஞஸரணோ, த⁴ம்மதீ³போ
த⁴ம்மஸரணோ அனஞ்ஞஸரணோ.
‘‘கோ³சரே, பி⁴க்க²வே, சரத² ஸகே பெத்திகே விஸயே.
கோ³சரே, பி⁴க்க²வே, சரதங் ஸகே பெத்திகே விஸயே ந லச்ச²தி மாரோ ஓதாரங், ந
லச்ச²தி மாரோ ஆரம்மணங் [ஆரமணங் (?)]. குஸலானங், பி⁴க்க²வே, த⁴ம்மானங் ஸமாதா³னஹேது ஏவமித³ங் புஞ்ஞங் பவட்³ட⁴தி.
த³ள்ஹனேமிசக்கவத்திராஜா
81. ‘‘பூ⁴தபுப்³ப³ங் , பி⁴க்க²வே, ராஜா த³ள்ஹனேமி நாம அஹோஸி சக்கவத்தீ [சக்கவத்தி (ஸ்யா॰ பீ॰)] த⁴ம்மிகோ த⁴ம்மராஜா சாதுரந்தோ விஜிதாவீ ஜனபத³த்தா²வரியப்பத்தோ ஸத்தரதனஸமன்னாக³தோ. தஸ்ஸிமானி ஸத்த ரதனானி அஹேஸுங் ஸெய்யதி²த³ங் – சக்கரதனங்உ
ஹத்தி²ரதனங் அஸ்ஸரதனங் மணிரதனங் இத்தி²ரதனங் க³ஹபதிரதனங் பரிணாயகரதனமேவ
ஸத்தமங். பரோஸஹஸ்ஸங் கோ² பனஸ்ஸ புத்தா அஹேஸுங் ஸூரா வீரங்க³ரூபா
பரஸேனப்பமத்³த³னா. ஸோ இமங் பத²விங் ஸாக³ரபரியந்தங் அத³ண்டே³ன அஸத்தே²ன
த⁴ம்மேன [த⁴ம்மேன ஸமேன (ஸ்யா॰ க॰)] அபி⁴விஜிய அஜ்ஜா²வஸி.
82. ‘‘அத²
கோ², பி⁴க்க²வே, ராஜா த³ள்ஹனேமி ப³ஹுன்னங் வஸ்ஸானங் ப³ஹுன்னங் வஸ்ஸஸதானங்
ப³ஹுன்னங் வஸ்ஸஸஹஸ்ஸானங் அச்சயேன அஞ்ஞதரங் புரிஸங் ஆமந்தேஸி – ‘யதா³ த்வங்,
அம்போ⁴ புரிஸ, பஸ்ஸெய்யாஸி தி³ப்³ப³ங் சக்கரதனங் ஓஸக்கிதங் டா²னா சுதங்,
அத² மே ஆரோசெய்யாஸீ’தி. ‘ஏவங், தே³வா’தி கோ², பி⁴க்க²வே, ஸோ புரிஸோ ரஞ்ஞோ
த³ள்ஹனேமிஸ்ஸ பச்சஸ்ஸோஸி. அத்³த³ஸா கோ², பி⁴க்க²வே, ஸோ புரிஸோ ப³ஹுன்னங்
வஸ்ஸானங் ப³ஹுன்னங் வஸ்ஸஸதானங் ப³ஹுன்னங் வஸ்ஸஸஹஸ்ஸானங் அச்சயேன தி³ப்³ப³ங்
சக்கரதனங் ஓஸக்கிதங் டா²னா சுதங், தி³ஸ்வான யேன ராஜா த³ள்ஹனேமி
தேனுபஸங்கமி; உபஸங்கமித்வா ராஜானங் த³ள்ஹனேமிங் ஏதத³வோச – ‘யக்³கே⁴, தே³வ,
ஜானெய்யாஸி, தி³ப்³ப³ங் தே சக்கரதனங் ஓஸக்கிதங் டா²னா சுத’ந்தி. அத² கோ²,
பி⁴க்க²வே, ராஜா த³ள்ஹனேமி ஜெட்ட²புத்தங் குமாரங் ஆமந்தாபெத்வா [ஆமந்தெத்வா (ஸ்யா॰ க॰)]
ஏதத³வோச – ‘தி³ப்³ப³ங் கிர மே, தாத குமார, சக்கரதனங் ஓஸக்கிதங் டா²னா
சுதங். ஸுதங் கோ² பன மேதங் – யஸ்ஸ ரஞ்ஞோ சக்கவத்திஸ்ஸ தி³ப்³ப³ங் சக்கரதனங்
ஓஸக்கதி டா²னா சவதி, ந தா³னி தேன ரஞ்ஞா சிரங் ஜீவிதப்³ப³ங் ஹோதீதி.
பு⁴த்தா கோ² பன மே மானுஸகா காமா, ஸமயோ தா³னி மே
தி³ப்³பே³ காமே பரியேஸிதுங். ஏஹி த்வங், தாத குமார, இமங் ஸமுத்³த³பரியந்தங்
பத²விங் படிபஜ்ஜ. அஹங் பன கேஸமஸ்ஸுங் ஓஹாரெத்வா காஸாயானி வத்தா²னி
அச்சா²தெ³த்வா அகா³ரஸ்மா அனகா³ரியங் பப்³ப³ஜிஸ்ஸாமீ’தி.
83.
‘‘அத² கோ², பி⁴க்க²வே, ராஜா த³ள்ஹனேமி ஜெட்ட²புத்தங் குமாரங் ஸாது⁴கங்
ரஜ்ஜே ஸமனுஸாஸித்வா கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜி. ஸத்தாஹபப்³ப³ஜிதே கோ² பன, பி⁴க்க²வே,
ராஜிஸிம்ஹி தி³ப்³ப³ங் சக்கரதனங் அந்தரதா⁴யி.
‘‘அத² கோ², பி⁴க்க²வே, அஞ்ஞதரோ புரிஸோ யேன ராஜா க²த்தியோ முத்³தா⁴பி⁴ஸித்தோ [முத்³தா⁴வஸித்தோ (ஸீ॰ ஸ்யா॰ பீ॰) ஏவமுபரிபி]
தேனுபஸங்கமி; உபஸங்கமித்வா ராஜானங் க²த்தியங் முத்³தா⁴பி⁴ஸித்தங் ஏதத³வோச –
‘யக்³கே⁴, தே³வ, ஜானெய்யாஸி, தி³ப்³ப³ங் சக்கரதனங் அந்தரஹித’ந்தி. அத²
கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ தி³ப்³பே³ சக்கரதனே
அந்தரஹிதே அனத்தமனோ அஹோஸி, அனத்தமனதஞ்ச படிஸங்வேதே³ஸி. ஸோ யேன ராஜிஸி
தேனுபஸங்கமி; உபஸங்கமித்வா ராஜிஸிங் ஏதத³வோச – ‘யக்³கே⁴, தே³வ, ஜானெய்யாஸி,
தி³ப்³ப³ங் சக்கரதனங் அந்தரஹித’ந்தி. ஏவங் வுத்தே, பி⁴க்க²வே, ராஜிஸி
ராஜானங் க²த்தியங் முத்³தா⁴பி⁴ஸித்தங் ஏதத³வோச – ‘மா கோ² த்வங், தாத, தி³ப்³பே³
சக்கரதனே அந்தரஹிதே அனத்தமனோ அஹோஸி, மா அனத்தமனதஞ்ச படிஸங்வேதே³ஸி, ந ஹி
தே, தாத, தி³ப்³ப³ங் சக்கரதனங் பெத்திகங் தா³யஜ்ஜங். இங்க⁴ த்வங், தாத,
அரியே சக்கவத்திவத்தே வத்தாஹி. டா²னங் கோ² பனேதங் விஜ்ஜதி, யங் தே அரியே
சக்கவத்திவத்தே வத்தமானஸ்ஸ தத³ஹுபோஸதே² பன்னரஸே ஸீஸங்ன்ஹாதஸ்ஸ [ஸீஸங் நஹாதஸ்ஸ (ஸீ॰ பீ॰), ஸீஸன்ஹாதஸ்ஸ (ஸ்யா॰)] உபோஸதி²கஸ்ஸ உபரிபாஸாத³வரக³தஸ்ஸ தி³ப்³ப³ங் சக்கரதனங் பாதுப⁴விஸ்ஸதி ஸஹஸ்ஸாரங் ஸனேமிகங் ஸனாபி⁴கங் ஸப்³பா³காரபரிபூர’ந்தி.
சக்கவத்திஅரியவத்தங்
84. ‘‘‘கதமங் பன தங், தே³வ, அரியங் சக்கவத்திவத்த’ந்தி ? ‘தேன ஹி த்வங், தாத, த⁴ம்மங்யேவ நிஸ்ஸாய த⁴ம்மங் ஸக்கரொந்தோ த⁴ம்மங் க³ருங் கரொந்தோ [க³ருகரொந்தோ (ஸீ॰ ஸ்யா॰ பீ॰)]
த⁴ம்மங் மானெந்தோ த⁴ம்மங் பூஜெந்தோ த⁴ம்மங் அபசாயமானோ த⁴ம்மத்³த⁴ஜோ
த⁴ம்மகேது த⁴ம்மாதி⁴பதெய்யோ த⁴ம்மிகங் ரக்கா²வரணகு³த்திங் ஸங்வித³ஹஸ்ஸு
அந்தோஜனஸ்மிங் ப³லகாயஸ்மிங் க²த்தியேஸு அனுயந்தேஸு [அனுயுத்தேஸு (ஸீ॰ பீ॰)]
ப்³ராஹ்மணக³ஹபதிகேஸு நேக³மஜானபதே³ஸு ஸமணப்³ராஹ்மணேஸு மிக³பக்கீ²ஸு. மா ச
தே, தாத, விஜிதே அத⁴ம்மகாரோ பவத்தித்த². யே ச தே, தாத, விஜிதே அத⁴னா அஸ்ஸு,
தேஸஞ்ச த⁴னமனுப்பதெ³ய்யாஸி [த⁴னமனுப்பத³ஜ்ஜெய்யாஸி (ஸீ॰ ஸ்யா॰ பீ॰)].
யே ச தே, தாத, விஜிதே ஸமணப்³ராஹ்மணா மத³ப்பமாதா³ படிவிரதா க²ந்திஸோரச்சே
நிவிட்டா² ஏகமத்தானங் த³மெந்தி, ஏகமத்தானங் ஸமெந்தி, ஏகமத்தானங்
பரினிப்³பா³பெந்தி, தே காலேன காலங் உபஸங்கமித்வா பரிபுச்செ²ய்யாஸி
பரிக்³க³ண்ஹெய்யாஸி – ‘‘கிங், ப⁴ந்தே, குஸலங், கிங் அகுஸலங், கிங்
ஸாவஜ்ஜங், கிங் அனவஜ்ஜங், கிங் ஸேவிதப்³ப³ங், கிங் ந ஸேவிதப்³ப³ங், கிங் மே
கரீயமானங் தீ³க⁴ரத்தங் அஹிதாய து³க்கா²ய அஸ்ஸ, கிங் வா பன மே கரீயமானங்
தீ³க⁴ரத்தங் ஹிதாய ஸுகா²ய அஸ்ஸா’’தி? தேஸங் ஸுத்வா யங் அகுஸலங் தங்
அபி⁴னிவஜ்ஜெய்யாஸி, யங் குஸலங் தங் ஸமாதா³ய வத்தெய்யாஸி. இத³ங் கோ², தாத,
தங் அரியங் சக்கவத்திவத்த’ந்தி.
சக்கரதனபாதுபா⁴வோ
85. ‘‘‘ஏவங், தே³வா’தி கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ ராஜிஸிஸ்ஸ படிஸ்ஸுத்வா அரியே சக்கவத்திவத்தே [அரியங் சக்கவத்திவத்தங் (க॰)] வத்தி. தஸ்ஸ அரியே சக்கவத்திவத்தே வத்தமானஸ்ஸ தத³ஹுபோஸதே² பன்னரஸே ஸீஸங்ன்ஹாதஸ்ஸ உபோஸதி²கஸ்ஸ உபரிபாஸாத³வரக³தஸ்ஸ தி³ப்³ப³ங் சக்கரதனங் பாதுரஹோஸி ஸஹஸ்ஸாரங் ஸனேமிகங் ஸனாபி⁴கங் ஸப்³பா³காரபரிபூரங். தி³ஸ்வான ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ ஏதத³ஹோஸி – ‘ஸுதங் கோ² பன மேதங் – யஸ்ஸ ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ தத³ஹுபோஸதே²
பன்னரஸே ஸீஸங்ன்ஹாதஸ்ஸ உபோஸதி²கஸ்ஸ உபரிபாஸாத³வரக³தஸ்ஸ தி³ப்³ப³ங்
சக்கரதனங் பாதுப⁴வதி ஸஹஸ்ஸாரங் ஸனேமிகங் ஸனாபி⁴கங் ஸப்³பா³காரபரிபூரங் , ஸோ ஹோதி ராஜா சக்கவத்தீ’தி. அஸ்ஸங் நு கோ² அஹங் ராஜா சக்கவத்தீதி.
‘‘அத² கோ², பி⁴க்க²வே, ராஜா க²த்தியோ
முத்³தா⁴பி⁴ஸித்தோ உட்டா²யாஸனா ஏகங்ஸங் உதராஸங்க³ங் கரித்வா வாமேன ஹத்தே²ன
பி⁴ங்காரங் க³ஹெத்வா த³க்கி²ணேன ஹத்தே²ன சக்கரதனங் அப்³பு⁴க்கிரி –
‘பவத்தது ப⁴வங் சக்கரதனங், அபி⁴விஜினாது ப⁴வங் சக்கரதன’ந்தி.
‘‘அத² கோ² தங், பி⁴க்க²வே, சக்கரதனங் புரத்தி²மங்
தி³ஸங் பவத்தி, அன்வதே³வ ராஜா சக்கவத்தீ ஸத்³தி⁴ங் சதுரங்கி³னியா ஸேனாய.
யஸ்மிங் கோ² பன, பி⁴க்க²வே, பதே³ஸே சக்கரதனங் பதிட்டா²ஸி, தத்த² ராஜா
சக்கவத்தீ வாஸங் உபக³ச்சி² ஸத்³தி⁴ங் சதுரங்கி³னியா ஸேனாய. யே கோ² பன,
பி⁴க்க²வே, புரத்தி²மாய தி³ஸாய படிராஜானோ, தே ராஜானங் சக்கவத்திங்
உபஸங்கமித்வா ஏவமாஹங்ஸு – ‘ஏஹி கோ², மஹாராஜ, ஸ்வாக³தங் தே [ஸாக³தங் (ஸீ॰ பீ॰)]
மஹாராஜ, ஸகங் தே, மஹாராஜ, அனுஸாஸ, மஹாராஜா’தி. ராஜா சக்கவத்தீ ஏவமாஹ –
‘பாணோ ந ஹந்தப்³போ³, அதி³ன்னங் நாதா³தப்³ப³ங், காமேஸுமிச்சா² ந சரிதப்³பா³,
முஸா ந பா⁴ஸிதப்³பா³, மஜ்ஜங் ந பாதப்³ப³ங், யதா²பு⁴த்தஞ்ச பு⁴ஞ்ஜதா²’தி.
யே கோ² பன, பி⁴க்க²வே, புரத்தி²மாய தி³ஸாய படிராஜானோ, தே ரஞ்ஞோ சக்கவத்திஸ்ஸ அனுயந்தா [அனுயுத்தா (ஸீ॰ பீ॰)] அஹேஸுங்.
86. ‘‘அத² கோ² தங், பி⁴க்க²வே, சக்கரதனங் புரத்தி²மங் ஸமுத்³த³ங் அஜ்ஜோ²கா³ஹெத்வா [அஜ்ஜோ²க³ஹெத்வா (ஸீ॰ ஸ்யா॰ பீ॰)]
பச்சுத்தரித்வா த³க்கி²ணங் தி³ஸங் பவத்தி…பே॰… த³க்கி²ணங் ஸமுத்³த³ங்
அஜ்ஜோ²கா³ஹெத்வா பச்சுத்தரித்வா பச்சி²மங் தி³ஸங் பவத்தி, அன்வதே³வ ராஜா
சக்கவத்தீ ஸத்³தி⁴ங் சதுரங்கி³னியா ஸேனாய. யஸ்மிங் கோ² பன, பி⁴க்க²வே,
பதே³ஸே சக்கரதனங் பதிட்டா²ஸி, தத்த² ராஜா சக்கவத்தீ வாஸங் உபக³ச்சி²
ஸத்³தி⁴ங் சதுரங்கி³னியா ஸேனாய. யே கோ² பன, பி⁴க்க²வே, பச்சி²மாய தி³ஸாய
படிராஜானோ, தே ராஜானங் சக்கவத்திங் உபஸங்கமித்வா ஏவமாஹங்ஸு – ‘ஏஹி கோ²,
மஹாராஜ, ஸ்வாக³தங் தே, மஹாராஜ, ஸகங் தே, மஹாராஜ, அனுஸாஸ, மஹாராஜா’தி. ராஜா
சக்கவத்தீ ஏவமாஹ – ‘பாணோ ந ஹந்தப்³போ³, அதி³ன்னங்
நாதா³தப்³ப³ங், காமேஸுமிச்சா² ந சரிதப்³பா³, முஸா ந பா⁴ஸிதப்³பா³, மஜ்ஜங் ந
பாதப்³ப³ங், யதா²பு⁴த்தஞ்ச பு⁴ஞ்ஜதா²’தி. யே கோ² பன, பி⁴க்க²வே, பச்சி²மாய
தி³ஸாய படிராஜானோ, தே ரஞ்ஞோ சக்கவத்திஸ்ஸ அனுயந்தா அஹேஸுங்.
87.
‘‘அத² கோ² தங், பி⁴க்க²வே, சக்கரதனங் பச்சி²மங் ஸமுத்³த³ங்
அஜ்ஜோ²கா³ஹெத்வா பச்சுத்தரித்வா உத்தரங் தி³ஸங் பவத்தி, அன்வதே³வ ராஜா
சக்கவத்தீ ஸத்³தி⁴ங் சதுரங்கி³னியா ஸேனாய. யஸ்மிங்
கோ² பன, பி⁴க்க²வே, பதே³ஸே சக்கரதனங் பதிட்டா²ஸி, தத்த² ராஜா சக்கவத்தீ
வாஸங் உபக³ச்சி² ஸத்³தி⁴ங் சதுரங்கி³னியா ஸேனாய. யே கோ² பன, பி⁴க்க²வே,
உத்தராய தி³ஸாய படிராஜானோ, தே ராஜானங் சக்கவத்திங் உபஸங்கமித்வா ஏவமாஹங்ஸு –
‘ஏஹி கோ², மஹாராஜ, ஸ்வாக³தங் தே, மஹாராஜ , ஸகங் தே,
மஹாராஜ, அனுஸாஸ, மஹாராஜா’தி. ராஜா சக்கவத்தீ ஏவமாஹ – ‘பாணோ ந ஹந்தப்³போ³,
அதி³ன்னங் நாதா³தப்³ப³ங், காமேஸுமிச்சா² ந சரிதப்³பா³, முஸா ந
பா⁴ஸிதப்³பா³, மஜ்ஜங் ந பாதப்³ப³ங், யதா²பு⁴த்தஞ்ச பு⁴ஞ்ஜதா²’தி. யே கோ²
பன, பி⁴க்க²வே, உத்தராய தி³ஸாய படிராஜானோ, தே ரஞ்ஞோ சக்கவத்திஸ்ஸ அனுயந்தா
அஹேஸுங்.
‘‘அத² கோ² தங், பி⁴க்க²வே, சக்கரதனங்
ஸமுத்³த³பரியந்தங் பத²விங் அபி⁴விஜினித்வா தமேவ ராஜதா⁴னிங் பச்சாக³ந்த்வா
ரஞ்ஞோ சக்கவத்திஸ்ஸ அந்தேபுரத்³வாரே அத்த²கரணபமுகே² [அட்³ட³கரணபமுகே² (க॰)] அக்கா²ஹதங் மஞ்ஞே அட்டா²ஸி ரஞ்ஞோ சக்கவத்திஸ்ஸ அந்தேபுரங் உபஸோப⁴யமானங்.
து³தியாதி³சக்கவத்திகதா²
88.
‘‘து³தியோபி கோ², பி⁴க்க²வே, ராஜா சக்கவத்தீ…பே॰… ததியோபி கோ², பி⁴க்க²வே,
ராஜா சக்கவத்தீ… சதுத்தோ²பி கோ², பி⁴க்க²வே, ராஜா சக்கவத்தீ… பஞ்சமோபி
கோ², பி⁴க்க²வே, ராஜா சக்கவத்தீ… ச²ட்டோ²பி கோ², பி⁴க்க²வே, ராஜா
சக்கவத்தீ… ஸத்தமோபி கோ², பி⁴க்க²வே, ராஜா சக்கவத்தீ ப³ஹுன்னங் வஸ்ஸானங்
ப³ஹுன்னங் வஸ்ஸஸதானங் ப³ஹுன்னங் வஸ்ஸஸஹஸ்ஸானங் அச்சயேன அஞ்ஞதரங் புரிஸங்
ஆமந்தேஸி – ‘யதா³ த்வங், அம்போ⁴ புரிஸ, பஸ்ஸெய்யாஸி தி³ப்³ப³ங் சக்கரதனங்
ஓஸக்கிதங் டா²னா சுதங், அத² மே ஆரோசெய்யாஸீ’தி. ‘ஏவங், தே³வா’தி கோ²,
பி⁴க்க²வே, ஸோ புரிஸோ ரஞ்ஞோ சக்கவத்திஸ்ஸ பச்சஸ்ஸோஸி. அத்³த³ஸா கோ² , பி⁴க்க²வே, ஸோ புரிஸோ ப³ஹுன்னங் வஸ்ஸானங் ப³ஹுன்னங் வஸ்ஸஸதானங் ப³ஹுன்னங் வஸ்ஸஸஹஸ்ஸானங் அச்சயேன தி³ப்³ப³ங் சக்கரதனங் ஓஸக்கிதங் டா²னா சுதங். தி³ஸ்வான யேன ராஜா சக்கவத்தீ தேனுபஸங்கமி; உபஸங்கமித்வா ராஜானங் சக்கவத்திங் ஏதத³வோச – ‘யக்³கே⁴ , தே³வ, ஜானெய்யாஸி, தி³ப்³ப³ங் தே சக்கரதனங் ஓஸக்கிதங் டா²னா சுத’ந்தி?
89.
‘‘அத² கோ², பி⁴க்க²வே, ராஜா சக்கவத்தீ ஜெட்ட²புத்தங் குமாரங் ஆமந்தாபெத்வா
ஏதத³வோச – ‘தி³ப்³ப³ங் கிர மே, தாத குமார, சக்கரதனங் ஓஸக்கிதங், டா²னா
சுதங், ஸுதங் கோ² பன மேதங் – யஸ்ஸ ரஞ்ஞோ சக்கவத்திஸ்ஸ தி³ப்³ப³ங் சக்கரதனங்
ஓஸக்கதி, டா²னா சவதி, ந தா³னி தேன ரஞ்ஞா சிரங் ஜீவிதப்³ப³ங் ஹோதீதி.
பு⁴த்தா கோ² பன மே மானுஸகா காமா, ஸமயோ தா³னி மே தி³ப்³பே³ காமே
பரியேஸிதுங், ஏஹி த்வங், தாத குமார, இமங் ஸமுத்³த³பரியந்தங் பத²விங்
படிபஜ்ஜ . அஹங் பன கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிஸ்ஸாமீ’தி.
‘‘அத² கோ², பி⁴க்க²வே, ராஜா சக்கவத்தீ ஜெட்ட²புத்தங்
குமாரங் ஸாது⁴கங் ரஜ்ஜே ஸமனுஸாஸித்வா கேஸமஸ்ஸுங் ஓஹாரெத்வா காஸாயானி
வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜி. ஸத்தாஹபப்³ப³ஜிதே
கோ² பன, பி⁴க்க²வே, ராஜிஸிம்ஹி தி³ப்³ப³ங் சக்கரதனங் அந்தரதா⁴யி.
90.
‘‘அத² கோ², பி⁴க்க²வே, அஞ்ஞதரோ புரிஸோ யேன ராஜா க²த்தியோ
முத்³தா⁴பி⁴ஸித்தோ தேனுபஸங்கமி; உபஸங்கமித்வா ராஜானங் க²த்தியங்
முத்³தா⁴பி⁴ஸித்தங் ஏதத³வோச – ‘யக்³கே⁴, தே³வ, ஜானெய்யாஸி, தி³ப்³ப³ங்
சக்கரதனங் அந்தரஹித’ந்தி? அத² கோ², பி⁴க்க²வே, ராஜா க²த்தியோ
முத்³தா⁴பி⁴ஸித்தோ தி³ப்³பே³ சக்கரதனே அந்தரஹிதே அனத்தமனோ அஹோஸி.
அனத்தமனதஞ்ச படிஸங்வேதே³ஸி; நோ ச கோ² ராஜிஸிங் உபஸங்கமித்வா அரியங்
சக்கவத்திவத்தங் புச்சி². ஸோ ஸமதேனேவ ஸுத³ங் ஜனபத³ங் பஸாஸதி. தஸ்ஸ ஸமதேன
ஜனபத³ங் பஸாஸதோ புப்³பே³னாபரங் ஜனபதா³ ந பப்³ப³ந்தி, யதா² தங் புப்³ப³கானங் ராஜூனங் அரியே சக்கவத்திவத்தே வத்தமானானங்.
‘‘அத² கோ², பி⁴க்க²வே, அமச்சா பாரிஸஜ்ஜா க³ணகமஹாமத்தா
அனீகட்டா² தோ³வாரிகா மந்தஸ்ஸாஜீவினோ ஸன்னிபதித்வா ராஜானங் க²த்தியங்
முத்³தா⁴பி⁴ஸித்தங் ஏதத³வோசுங் – ‘ந கோ² தே, தே³வ, ஸமதேன (ஸுத³ங்) ஜனபத³ங் பஸாஸதோ புப்³பே³னாபரங்
ஜனபதா³ பப்³ப³ந்தி, யதா² தங் புப்³ப³கானங் ராஜூனங் அரியே சக்கவத்திவத்தே
வத்தமானானங். ஸங்விஜ்ஜந்தி கோ² தே, தே³வ, விஜிதே அமச்சா பாரிஸஜ்ஜா
க³ணகமஹாமத்தா அனீகட்டா² தோ³வாரிகா மந்தஸ்ஸாஜீவினோ மயஞ்சேவ அஞ்ஞே ச [அஞ்ஞே ச பண்டி³தே ஸமணப்³ராஹ்மணே புச்செ²ய்யாஸி (க॰)]
யே மயங் அரியங் சக்கவத்திவத்தங் தா⁴ரேம. இங்க⁴ த்வங், தே³வ, அம்ஹே அரியங்
சக்கவத்திவத்தங் புச்ச². தஸ்ஸ தே மயங் அரியங் சக்கவத்திவத்தங் புட்டா²
ப்³யாகரிஸ்ஸாமா’தி.
ஆயுவண்ணாதி³பரியானிகதா²
91.
‘‘அத² கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ அமச்சே பாரிஸஜ்ஜே
க³ணகமஹாமத்தே அனீகட்டே² தோ³வாரிகே மந்தஸ்ஸாஜீவினோ ஸன்னிபாதெத்வா அரியங்
சக்கவத்திவத்தங் புச்சி². தஸ்ஸ தே அரியங் சக்கவத்திவத்தங் புட்டா²
ப்³யாகரிங்ஸு. தேஸங் ஸுத்வா த⁴ம்மிகஞ்ஹி கோ² ரக்கா²வரணகு³த்திங் ஸங்வித³ஹி,
நோ ச கோ² அத⁴னானங் த⁴னமனுப்பதா³ஸி. அத⁴னானங் த⁴னே அனநுப்பதி³யமானே
தா³லித்³தி³யங் வேபுல்லமக³மாஸி. தா³லித்³தி³யே வேபுல்லங் க³தே அஞ்ஞதரோ
புரிஸோ பரேஸங் அதி³ன்னங் தெ²ய்யஸங்கா²தங் ஆதி³யி.
தமேனங் அக்³க³ஹேஸுங். க³ஹெத்வா ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ
த³ஸ்ஸேஸுங் – ‘அயங், தே³வ, புரிஸோ பரேஸங் அதி³ன்னங் தெ²ய்யஸங்கா²தங்
ஆதி³யீ’தி. ஏவங் வுத்தே, பி⁴க்க²வே, ராஜா க²த்தியோ முத்³தா⁴பி⁴ஸித்தோ தங் புரிஸங் ஏதத³வோச – ‘ஸச்சங் கிர த்வங், அம்போ⁴ புரிஸ, பரேஸங் அதி³ன்னங் தெ²ய்யஸங்கா²தங் ஆதி³யீ’தி [ஆதி³யஸீதி (ஸ்யா॰)]? ‘ஸச்சங், தே³வா’தி. ‘கிங் காரணா’தி? ‘ந ஹி, தே³வ, ஜீவாமீ’தி. அத²
கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ தஸ்ஸ புரிஸஸ்ஸ
த⁴னமனுப்பதா³ஸி – ‘இமினா த்வங், அம்போ⁴ புரிஸ, த⁴னேன அத்தனா ச ஜீவாஹி,
மாதாபிதரோ ச போஸேஹி, புத்ததா³ரஞ்ச போஸேஹி, கம்மந்தே ச பயோஜேஹி,
ஸமணப்³ராஹ்மணேஸு [ஸமணேஸு ப்³ராஹ்மணேஸு (ப³ஹூஸு)]
உத்³த⁴க்³கி³கங் த³க்கி²ணங் பதிட்டா²பேஹி ஸோவக்³கி³கங் ஸுக²விபாகங்
ஸக்³க³ஸங்வத்தனிக’ந்தி. ‘ஏவங், தே³வா’தி கோ², பி⁴க்க²வே, ஸோ புரிஸோ ரஞ்ஞோ
க²த்தியஸ்ஸ முத்³தா⁴பி⁴ஸித்தஸ்ஸ பச்சஸ்ஸோஸி.
‘‘அஞ்ஞதரோபி கோ², பி⁴க்க²வே, புரிஸோ பரேஸங் அதி³ன்னங்
தெ²ய்யஸங்கா²தங் ஆதி³யி. தமேனங் அக்³க³ஹேஸுங். க³ஹெத்வா ரஞ்ஞோ க²த்தியஸ்ஸ
முத்³தா⁴பி⁴ஸித்தஸ்ஸ த³ஸ்ஸேஸுங் – ‘அயங், தே³வ, புரிஸோ பரேஸங் அதி³ன்னங்
தெ²ய்யஸங்கா²தங் ஆதி³யீ’தி. ஏவங் வுத்தே, பி⁴க்க²வே, ராஜா க²த்தியோ
முத்³தா⁴பி⁴ஸித்தோ தங் புரிஸங் ஏதத³வோச – ‘ஸச்சங்
கிர த்வங், அம்போ⁴ புரிஸ, பரேஸங் அதி³ன்னங் தெ²ய்யஸங்கா²தங் ஆதி³யீ’தி?
‘ஸச்சங், தே³வா’தி. ‘கிங் காரணா’தி? ‘ந ஹி, தே³வ, ஜீவாமீ’தி. அத² கோ²,
பி⁴க்க²வே, ராஜா க²த்தியோ முத்³தா⁴பி⁴ஸித்தோ தஸ்ஸ புரிஸஸ்ஸ த⁴னமனுப்பதா³ஸி –
‘இமினா த்வங், அம்போ⁴ புரிஸ, த⁴னேன அத்தனா ச ஜீவாஹி, மாதாபிதரோ ச போஸேஹி,
புத்ததா³ரஞ்ச போஸேஹி, கம்மந்தே ச பயோஜேஹி, ஸமணப்³ராஹ்மணேஸு உத்³த⁴க்³கி³கங்
த³க்கி²ணங் பதிட்டா²பேஹி ஸோவக்³கி³கங் ஸுக²விபாகங் ஸக்³க³ஸங்வத்தனிக’ந்தி.
‘ஏவங், தே³வா’தி கோ², பி⁴க்க²வே, ஸோ புரிஸோ ரஞ்ஞோ க²த்தியஸ்ஸ
முத்³தா⁴பி⁴ஸித்தஸ்ஸ பச்சஸ்ஸோஸி .
92.
‘‘அஸ்ஸோஸுங் கோ², பி⁴க்க²வே, மனுஸ்ஸா – ‘யே கிர, போ⁴, பரேஸங் அதி³ன்னங்
தெ²ய்யஸங்கா²தங் ஆதி³யந்தி, தேஸங் ராஜா த⁴னமனுப்பதே³தீ’தி. ஸுத்வான தேஸங்
ஏதத³ஹோஸி – ‘யங்னூன மயம்பி பரேஸங் அதி³ன்னங் தெ²ய்யஸங்கா²தங்
ஆதி³யெய்யாமா’தி. அத² கோ², பி⁴க்க²வே, அஞ்ஞதரோ புரிஸோ பரேஸங் அதி³ன்னங்
தெ²ய்யஸங்கா²தங் ஆதி³யி. தமேனங் அக்³க³ஹேஸுங். க³ஹெத்வா ரஞ்ஞோ க²த்தியஸ்ஸ
முத்³தா⁴பி⁴ஸித்தஸ்ஸ த³ஸ்ஸேஸுங் – ‘அயங், தே³வ, புரிஸோ பரேஸங் அதி³ன்னங்
தெ²ய்யஸங்கா²தங் ஆதி³யீ’தி. ஏவங் வுத்தே,
பி⁴க்க²வே, ராஜா க²த்தியோ முத்³தா⁴பி⁴ஸித்தோ தங் புரிஸங் ஏதத³வோச – ‘ஸச்சங்
கிர த்வங், அம்போ⁴ புரிஸ, பரேஸங் அதி³ன்னங் தெ²ய்யஸங்கா²தங் ஆதி³யீ’தி?
‘ஸச்சங், தே³வா’தி. ‘கிங் காரணா’தி? ‘ந ஹி, தே³வ, ஜீவாமீ’தி. அத² கோ²,
பி⁴க்க²வே, ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ ஏதத³ஹோஸி – ‘ஸசே கோ² அஹங்
யோ யோ பரேஸங் அதி³ன்னங் தெ²ய்யஸங்கா²தங் ஆதி³யிஸ்ஸதி, தஸ்ஸ தஸ்ஸ
த⁴னமனுப்பத³ஸ்ஸாமி, ஏவமித³ங் அதி³ன்னாதா³னங் பவட்³டி⁴ஸ்ஸதி. யங்னூனாஹங் இமங் புரிஸங் ஸுனிஸேத⁴ங் நிஸேதெ⁴ய்யங், மூலக⁴ச்சங் [மூலக⁴ச்ச²ங் (ஸ்யா॰), மூலசே²ஜ்ஜ (க॰)]
கரெய்யங், ஸீஸமஸ்ஸ சி²ந்தெ³ய்ய’ந்தி. அத² கோ², பி⁴க்க²வே, ராஜா க²த்தியோ
முத்³தா⁴பி⁴ஸித்தோ புரிஸே ஆணாபேஸி – ‘தேன ஹி, ப⁴ணே, இமங் புரிஸங் த³ள்ஹாய
ரஜ்ஜுயா பச்சா²பா³ஹங் [பச்சா²பா³ஹுங் (ஸ்யா॰)]
கா³ள்ஹப³ந்த⁴னங் ப³ந்தி⁴த்வா கு²ரமுண்ட³ங் கரித்வா க²ரஸ்ஸரேன பணவேன ரதி²காய
ரதி²கங் ஸிங்கா⁴டகேன ஸிங்கா⁴டகங் பரினெத்வா த³க்கி²ணேன த்³வாரேன
நிக்க²மித்வா த³க்கி²ணதோ நக³ரஸ்ஸ ஸுனிஸேத⁴ங் நிஸேதே⁴த², மூலக⁴ச்சங் கரோத²,
ஸீஸமஸ்ஸ சி²ந்த³தா²’தி. ‘ஏவங், தே³வா’தி கோ²,
பி⁴க்க²வே, தே புரிஸா ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ படிஸ்ஸுத்வா
தங் புரிஸங் த³ள்ஹாய ரஜ்ஜுயா பச்சா²பா³ஹங் கா³ள்ஹப³ந்த⁴னங் ப³ந்தி⁴த்வா
கு²ரமுண்ட³ங் கரித்வா க²ரஸ்ஸரேன பணவேன ரதி²காய ரதி²கங் ஸிங்கா⁴டகேன
ஸிங்கா⁴டகங் பரினெத்வா த³க்கி²ணேன த்³வாரேன நிக்க²மித்வா த³க்கி²ணதோ நக³ரஸ்ஸ ஸுனிஸேத⁴ங் நிஸேதே⁴ஸுங், மூலக⁴ச்சங் அகங்ஸு, ஸீஸமஸ்ஸ சி²ந்தி³ங்ஸு.
93.
‘‘அஸ்ஸோஸுங் கோ², பி⁴க்க²வே, மனுஸ்ஸா – ‘யே கிர, போ⁴, பரேஸங் அதி³ன்னங்
தெ²ய்யஸங்கா²தங் ஆதி³யந்தி, தே ராஜா ஸுனிஸேத⁴ங் நிஸேதே⁴தி, மூலக⁴ச்சங்
கரோதி, ஸீஸானி தேஸங் சி²ந்த³தீ’தி. ஸுத்வான தேஸங் ஏதத³ஹோஸி – ‘யங்னூன
மயம்பி திண்ஹானி ஸத்தா²னி காராபெஸ்ஸாம [காராபெய்யாம (ஸ்யா॰ பீ॰) காராபெய்யாமாதி (க॰ ஸீ॰)], திண்ஹானி ஸத்தா²னி காராபெத்வா யேஸங் அதி³ன்னங் தெ²ய்யஸங்கா²தங் ஆதி³யிஸ்ஸாம, தே ஸுனிஸேத⁴ங்
நிஸேதெ⁴ஸ்ஸாம, மூலக⁴ச்சங் கரிஸ்ஸாம, ஸீஸானி தேஸங் சி²ந்தி³ஸ்ஸாமா’தி. தே
திண்ஹானி ஸத்தா²னி காராபேஸுங், திண்ஹானி ஸத்தா²னி காராபெத்வா கா³மகா⁴தம்பி
உபக்கமிங்ஸு காதுங், நிக³மகா⁴தம்பி உபக்கமிங்ஸு காதுங், நக³ரகா⁴தம்பி
உபக்கமிங்ஸு காதுங், பந்த²து³ஹனம்பி [பந்த²தூ³ஹனங்பி (ஸீ॰ ஸ்யா॰ பீ॰)]
உபக்கமிங்ஸு காதுங். யேஸங் தே அதி³ன்னங் தெ²ய்யஸங்கா²தங் ஆதி³யந்தி, தே
ஸுனிஸேத⁴ங் நிஸேதெ⁴ந்தி, மூலக⁴ச்சங் கரொந்தி, ஸீஸானி தேஸங் சி²ந்த³ந்தி.
94.
‘‘இதி கோ², பி⁴க்க²வே, அத⁴னானங் த⁴னே அனநுப்பதி³யமானே தா³லித்³தி³யங்
வேபுல்லமக³மாஸி, தா³லித்³தி³யே வேபுல்லங் க³தே அதி³ன்னாதா³னங்
வேபுல்லமக³மாஸி, அதி³ன்னாதா³னே வேபுல்லங் க³தே ஸத்த²ங் வேபுல்லமக³மாஸி,
ஸத்தே² வேபுல்லங் க³தே பாணாதிபாதோ வேபுல்லமக³மாஸி,
பாணாதிபாதே வேபுல்லங் க³தே தேஸங் ஸத்தானங் ஆயுபி பரிஹாயி, வண்ணோபி பரிஹாயி.
தேஸங் ஆயுனாபி பரிஹாயமானானங் வண்ணேனபி பரிஹாயமானானங்
அஸீதிவஸ்ஸஸஹஸ்ஸாயுகானங் மனுஸ்ஸானங் சத்தாரீஸவஸ்ஸஸஹஸ்ஸாயுகா புத்தா அஹேஸுங்.
‘‘சத்தாரீஸவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு
அஞ்ஞதரோ புரிஸோ பரேஸங் அதி³ன்னங் தெ²ய்யஸங்கா²தங் ஆதி³யி. தமேனங்
அக்³க³ஹேஸுங். க³ஹெத்வா ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ த³ஸ்ஸேஸுங் –
‘அயங், தே³வ, புரிஸோ பரேஸங் அதி³ன்னங் தெ²ய்யஸங்கா²தங் ஆதி³யீ’தி. ஏவங்
வுத்தே, பி⁴க்க²வே, ராஜா க²த்தியோ
முத்³தா⁴பி⁴ஸித்தோ தங் புரிஸங் ஏதத³வோச – ‘ஸச்சங் கிர த்வங், அம்போ⁴ புரிஸ,
பரேஸங் அதி³ன்னங் தெ²ய்யஸங்கா²தங் ஆதி³யீ’தி? ‘ந ஹி, தே³வா’தி ஸம்பஜானமுஸா
அபா⁴ஸி.
95. ‘‘இதி
கோ², பி⁴க்க²வே, அத⁴னானங் த⁴னே அனநுப்பதி³யமானே தா³லித்³தி³யங்
வேபுல்லமக³மாஸி. தா³லித்³தி³யே வேபுல்லங் க³தே அதி³ன்னாதா³னங்
வேபுல்லமக³மாஸி, அதி³ன்னாதா³னே வேபுல்லங் க³தே ஸத்த²ங் வேபுல்லமக³மாஸி.
ஸத்தே² வேபுல்லங் க³தே பாணாதிபாதோ வேபுல்லமக³மாஸி, பாணாதிபாதே வேபுல்லங்
க³தே முஸாவாதோ³ வேபுல்லமக³மாஸி , முஸாவாதே³
வேபுல்லங் க³தே தேஸங் ஸத்தானங் ஆயுபி பரிஹாயி, வண்ணோபி பரிஹாயி. தேஸங்
ஆயுனாபி பரிஹாயமானானங் வண்ணேனபி பரிஹாயமானானங் சத்தாரீஸவஸ்ஸஸஹஸ்ஸாயுகானங்
மனுஸ்ஸானங் வீஸதிவஸ்ஸஸஹஸ்ஸாயுகா புத்தா அஹேஸுங்.
‘‘வீஸதிவஸ்ஸஸஹஸ்ஸாயுகேஸு ,
பி⁴க்க²வே, மனுஸ்ஸேஸு அஞ்ஞதரோ புரிஸோ பரேஸங் அதி³ன்னங் தெ²ய்யஸங்கா²தங்
ஆதி³யி. தமேனங் அஞ்ஞதரோ புரிஸோ ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ
ஆரோசேஸி – ‘இத்த²ன்னாமோ, தே³வ, புரிஸோ பரேஸங் அதி³ன்னங் தெ²ய்யஸங்கா²தங்
ஆதி³யீ’தி பேஸுஞ்ஞமகாஸி.
96.
‘‘இதி கோ², பி⁴க்க²வே, அத⁴னானங் த⁴னே அனநுப்பதி³யமானே தா³லித்³தி³யங்
வேபுல்லமக³மாஸி. தா³லித்³தி³யே வேபுல்லங் க³தே அதி³ன்னாதா³னங்
வேபுல்லமக³மாஸி, அதி³ன்னாதா³னே வேபுல்லங் க³தே ஸத்த²ங் வேபுல்லமக³மாஸி,
ஸத்தே² வேபுல்லங் க³தே பாணாதிபாதோ வேபுல்லமக³மாஸி, பாணாதிபாதே வேபுல்லங்
க³தே முஸாவாதோ³ வேபுல்லமக³மாஸி, முஸாவாதே³ வேபுல்லங் க³தே பிஸுணா வாசா
வேபுல்லமக³மாஸி, பிஸுணாய வாசாய வேபுல்லங் க³தாய தேஸங் ஸத்தானங் ஆயுபி
பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி
பரிஹாயமானானங் வீஸதிவஸ்ஸஸஹஸ்ஸாயுகானங் மனுஸ்ஸானங் த³ஸவஸ்ஸஸஹஸ்ஸாயுகா புத்தா
அஹேஸுங்.
‘‘த³ஸவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு ஏகித³ங்
ஸத்தா வண்ணவந்தோ ஹொந்தி, ஏகித³ங் ஸத்தா து³ப்³ப³ண்ணா. தத்த² யே தே ஸத்தா
து³ப்³ப³ண்ணா, தே வண்ணவந்தே ஸத்தே அபி⁴ஜ்ஜா²யந்தா பரேஸங் தா³ரேஸு சாரித்தங்
ஆபஜ்ஜிங்ஸு.
97.
‘‘இதி கோ², பி⁴க்க²வே, அத⁴னானங் த⁴னே அனநுப்பதி³யமானே தா³லித்³தி³யங்
வேபுல்லமக³மாஸி. தா³லித்³தி³யே வேபுல்லங் க³தே…பே॰… காமேஸுமிச்சா²சாரோ
வேபுல்லமக³மாஸி, காமேஸுமிச்சா²சாரே வேபுல்லங் க³தே தேஸங் ஸத்தானங் ஆயுபி
பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி பரிஹாயமானானங் த³ஸவஸ்ஸஸஹஸ்ஸாயுகானங் மனுஸ்ஸானங் பஞ்சவஸ்ஸஸஹஸ்ஸாயுகா புத்தா அஹேஸுங்.
98. ‘‘பஞ்சவஸ்ஸஸஹஸ்ஸாயுகேஸு, பி⁴க்க²வே ,
மனுஸ்ஸேஸு த்³வே த⁴ம்மா வேபுல்லமக³மங்ஸு – ப²ருஸாவாசா ஸம்ப²ப்பலாபோ ச.
த்³வீஸு த⁴ம்மேஸு வேபுல்லங் க³தேஸு தேஸங் ஸத்தானங் ஆயுபி பரிஹாயி, வண்ணோபி
பரிஹாயி. தேஸங் ஆயுனாபி பரிஹாயமானானங் வண்ணேனபி பரிஹாயமானானங்
பஞ்சவஸ்ஸஸஹஸ்ஸாயுகானங் மனுஸ்ஸானங் அப்பேகச்சே அட்³ட⁴தெய்யவஸ்ஸஸஹஸ்ஸாயுகா, அப்பேகச்சே த்³வேவஸ்ஸஸஹஸ்ஸாயுகா புத்தா அஹேஸுங்.
99.
‘‘அட்³ட⁴தெய்யவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு அபி⁴ஜ்ஜா²ப்³யாபாதா³
வேபுல்லமக³மங்ஸு. அபி⁴ஜ்ஜா²ப்³யாபாதே³ஸு வேபுல்லங் க³தேஸு தேஸங் ஸத்தானங்
ஆயுபி பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி
பரிஹாயமானானங் அட்³ட⁴தெய்யவஸ்ஸஸஹஸ்ஸாயுகானங் மனுஸ்ஸானங் வஸ்ஸஸஹஸ்ஸாயுகா
புத்தா அஹேஸுங்.
100.
‘‘வஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு மிச்சா²தி³ட்டி²
வேபுல்லமக³மாஸி. மிச்சா²தி³ட்டி²யா வேபுல்லங் க³தாய தேஸங் ஸத்தானங் ஆயுபி
பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி
பரிஹாயமானானங் வஸ்ஸஸஹஸ்ஸாயுகானங் மனுஸ்ஸானங் பஞ்சவஸ்ஸஸதாயுகா புத்தா
அஹேஸுங்.
101.
‘‘பஞ்சவஸ்ஸஸதாயுகேஸு, பி⁴க்க²வே, மனுஸ்ஸேஸு தயோ த⁴ம்மா வேபுல்லமக³மங்ஸு.
அத⁴ம்மராகோ³ விஸமலோபோ⁴ மிச்சா²த⁴ம்மோ. தீஸு த⁴ம்மேஸு வேபுல்லங் க³தேஸு
தேஸங் ஸத்தானங் ஆயுபி பரிஹாயி, வண்ணோபி பரிஹாயி. தேஸங் ஆயுனாபி
பரிஹாயமானானங் வண்ணேனபி பரிஹாயமானானங் பஞ்சவஸ்ஸஸதாயுகானங் மனுஸ்ஸானங்
அப்பேகச்சே அட்³ட⁴தெய்யவஸ்ஸஸதாயுகா, அப்பேகச்சே த்³வேவஸ்ஸஸதாயுகா புத்தா
அஹேஸுங்.
‘‘அட்³ட⁴தெய்யவஸ்ஸஸதாயுகேஸு, பி⁴க்க²வே , மனுஸ்ஸேஸு இமே த⁴ம்மா வேபுல்லமக³மங்ஸு. அமத்தெய்யதா அபெத்தெய்யதா அஸாமஞ்ஞதா அப்³ரஹ்மஞ்ஞதா ந குலே ஜெட்டா²பசாயிதா.
102. ‘‘இதி
கோ², பி⁴க்க²வே, அத⁴னானங் த⁴னே அனநுப்பதி³யமானே தா³லித்³தி³யங்
வேபுல்லமக³மாஸி. தா³லித்³தி³யே வேபுல்லங் க³தே அதி³ன்னாதா³னங்
வேபுல்லமக³மாஸி. அதி³ன்னாதா³னே வேபுல்லங் க³தே
ஸத்த²ங் வேபுல்லமக³மாஸி. ஸத்தே² வேபுல்லங் க³தே பாணாதிபாதோ வேபுல்லமக³மாஸி.
பாணாதிபாதே வேபுல்லங் க³தே முஸாவாதோ³ வேபுல்லமக³மாஸி. முஸாவாதே³ வேபுல்லங்
க³தே பிஸுணா வாசா வேபுல்லமக³மாஸி. பிஸுணாய வாசாய வேபுல்லங் க³தாய
காமேஸுமிச்சா²சாரோ வேபுல்லமக³மாஸி. காமேஸுமிச்சா²சாரே வேபுல்லங் க³தே
த்³வே த⁴ம்மா வேபுல்லமக³மங்ஸு, ப²ருஸா வாசா ஸம்ப²ப்பலாபோ ச. த்³வீஸு
த⁴ம்மேஸு வேபுல்லங் க³தேஸு அபி⁴ஜ்ஜா²ப்³யாபாதா³ வேபுல்லமக³மங்ஸு.
அபி⁴ஜ்ஜா²ப்³யாபாதே³ஸு வேபுல்லங் க³தேஸு மிச்சா²தி³ட்டி² வேபுல்லமக³மாஸி.
மிச்சா²தி³ட்டி²யா வேபுல்லங் க³தாய தயோ த⁴ம்மா வேபுல்லமக³மங்ஸு,
அத⁴ம்மராகோ³ விஸமலோபோ⁴ மிச்சா²த⁴ம்மோ. தீஸு த⁴ம்மேஸு வேபுல்லங் க³தேஸு இமே
த⁴ம்மா வேபுல்லமக³மங்ஸு, அமத்தெய்யதா அபெத்தெய்யதா அஸாமஞ்ஞதா அப்³ரஹ்மஞ்ஞதா
ந குலே ஜெட்டா²பசாயிதா. இமேஸு த⁴ம்மேஸு வேபுல்லங் க³தேஸு தேஸங் ஸத்தானங்
ஆயுபி பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி
பரிஹாயமானானங் அட்³ட⁴தெய்யவஸ்ஸஸதாயுகானங் மனுஸ்ஸானங் வஸ்ஸஸதாயுகா புத்தா
அஹேஸுங்.
த³ஸவஸ்ஸாயுகஸமயோ
103. ‘‘ப⁴விஸ்ஸதி , பி⁴க்க²வே, ஸோ ஸமயோ, யங் இமேஸங் மனுஸ்ஸானங் த³ஸவஸ்ஸாயுகா புத்தா ப⁴விஸ்ஸந்தி. த³ஸவஸ்ஸாயுகேஸு, பி⁴க்க²வே, மனுஸ்ஸேஸு பஞ்சவஸ்ஸிகா [பஞ்சமாஸிகா (க॰ ஸீ॰)]
குமாரிகா அலங்பதெய்யா ப⁴விஸ்ஸந்தி. த³ஸவஸ்ஸாயுகேஸு, பி⁴க்க²வே, மனுஸ்ஸேஸு
இமானி ரஸானி அந்தரதா⁴யிஸ்ஸந்தி, ஸெய்யதி²த³ங், ஸப்பி நவனீதங் தேலங் மது⁴
பா²ணிதங் லோணங். த³ஸவஸ்ஸாயுகேஸு, பி⁴க்க²வே, மனுஸ்ஸேஸு குத்³ரூஸகோ அக்³க³ங்
போ⁴ஜனானங் [அக்³க³போ⁴ஜனங் (ஸ்யா॰)] ப⁴விஸ்ஸதி.
ஸெய்யதா²பி, பி⁴க்க²வே, ஏதரஹி ஸாலிமங்ஸோத³னோ அக்³க³ங் போ⁴ஜனானங்; ஏவமேவ
கோ², பி⁴க்க²வே, த³ஸவஸ்ஸாயுகேஸு மனுஸ்ஸேஸு குத்³ரூஸகோ அக்³க³ங் போ⁴ஜனானங்
ப⁴விஸ்ஸதி.
‘‘த³ஸவஸ்ஸாயுகேஸு, பி⁴க்க²வே, மனுஸ்ஸேஸு த³ஸ
குஸலகம்மபதா² ஸப்³பே³ன ஸப்³ப³ங் அந்தரதா⁴யிஸ்ஸந்தி, த³ஸ அகுஸலகம்மபதா²
அதிப்³யாதி³ப்பிஸ்ஸந்தி [அதிவிய தி³ப்பிஸ்ஸந்தி (ஸ்யா॰ பீ॰), அதிவ்யாதி³ப்பிஸ்ஸந்தி (ஸீ॰)]. த³ஸவஸ்ஸாயுகேஸு ,
பி⁴க்க²வே, மனுஸ்ஸேஸு குஸலந்திபி ந ப⁴விஸ்ஸதி, குதோ பன குஸலஸ்ஸ காரகோ.
த³ஸவஸ்ஸாயுகேஸு, பி⁴க்க²வே, மனுஸ்ஸேஸு யே தே ப⁴விஸ்ஸந்தி அமத்தெய்யா
அபெத்தெய்யா அஸாமஞ்ஞா அப்³ரஹ்மஞ்ஞா ந குலே ஜெட்டா²பசாயினோ, தே புஜ்ஜா ச
ப⁴விஸ்ஸந்தி பாஸங்ஸா ச. ஸெய்யதா²பி, பி⁴க்க²வே, ஏதரஹி மத்தெய்யா பெத்தெய்யா
ஸாமஞ்ஞா ப்³ரஹ்மஞ்ஞா குலே ஜெட்டா²பசாயினோ புஜ்ஜா ச பாஸங்ஸா ச; ஏவமேவ கோ²,
பி⁴க்க²வே, த³ஸவஸ்ஸாயுகேஸு மனுஸ்ஸேஸு யே தே ப⁴விஸ்ஸந்தி அமத்தெய்யா
அபெத்தெய்யா அஸாமஞ்ஞா அப்³ரஹ்மஞ்ஞா ந குலே ஜெட்டா²பசாயினோ, தே புஜ்ஜா ச
ப⁴விஸ்ஸந்தி பாஸங்ஸா ச.
‘‘த³ஸவஸ்ஸாயுகேஸு , பி⁴க்க²வே, மனுஸ்ஸேஸு ந ப⁴விஸ்ஸதி மாதாதி
வா மாதுச்சா²தி வா மாதுலானீதி வா ஆசரியப⁴ரியாதி வா க³ரூனங் தா³ராதி வா.
ஸம்பே⁴த³ங் லோகோ க³மிஸ்ஸதி யதா² அஜேளகா குக்குடஸூகரா ஸோணஸிங்கா³லா [ஸோணஸிகா³லா (ஸீ॰ பீ॰)].
‘‘த³ஸவஸ்ஸாயுகேஸு, பி⁴க்க²வே, மனுஸ்ஸேஸு தேஸங்
ஸத்தானங் அஞ்ஞமஞ்ஞம்ஹி திப்³போ³ ஆகா⁴தோ பச்சுபட்டி²தோ ப⁴விஸ்ஸதி திப்³போ³
ப்³யாபாதோ³ திப்³போ³ மனோபதோ³ஸோ திப்³ப³ங் வத⁴கசித்தங். மாதுபி புத்தம்ஹி
புத்தஸ்ஸபி மாதரி; பிதுபி புத்தம்ஹி புத்தஸ்ஸபி பிதரி; பா⁴துபி ப⁴கி³னியா
ப⁴கி³னியாபி பா⁴தரி திப்³போ³ ஆகா⁴தோ பச்சுபட்டி²தோ ப⁴விஸ்ஸதி திப்³போ³
ப்³யாபாதோ³ திப்³போ³ மனோபதோ³ஸோ திப்³ப³ங் வத⁴கசித்தங். ஸெய்யதா²பி,
பி⁴க்க²வே, மாக³விகஸ்ஸ மிக³ங் தி³ஸ்வா திப்³போ³ ஆகா⁴தோ பச்சுபட்டி²தோ ஹோதி
திப்³போ³ ப்³யாபாதோ³ திப்³போ³ மனோபதோ³ஸோ திப்³ப³ங் வத⁴கசித்தங்; ஏவமேவ கோ²,
பி⁴க்க²வே, த³ஸவஸ்ஸாயுகேஸு மனுஸ்ஸேஸு தேஸங் ஸத்தானங் அஞ்ஞமஞ்ஞம்ஹி
திப்³போ³ ஆகா⁴தோ பச்சுபட்டி²தோ ப⁴விஸ்ஸதி திப்³போ³ ப்³யாபாதோ³ திப்³போ³
மனோபதோ³ஸோ திப்³ப³ங் வத⁴கசித்தங். மாதுபி புத்தம்ஹி புத்தஸ்ஸபி மாதரி;
பிதுபி புத்தம்ஹி புத்தஸ்ஸபி பிதரி; பா⁴துபி ப⁴கி³னியா ப⁴கி³னியாபி பா⁴தரி
திப்³போ³ ஆகா⁴தோ பச்சுபட்டி²தோ ப⁴விஸ்ஸதி திப்³போ³ ப்³யாபாதோ³ திப்³போ³ மனோபதோ³ஸோ திப்³ப³ங் வத⁴கசித்தங்.
104.
‘‘த³ஸவஸ்ஸாயுகேஸு, பி⁴க்க²வே, மனுஸ்ஸேஸு ஸத்தாஹங் ஸத்த²ந்தரகப்போ
ப⁴விஸ்ஸதி. தே அஞ்ஞமஞ்ஞம்ஹி மிக³ஸஞ்ஞங் படிலபி⁴ஸ்ஸந்தி. தேஸங் திண்ஹானி ஸத்தா²னி ஹத்தே²ஸு பாதுப⁴விஸ்ஸந்தி. தே திண்ஹேன ஸத்தே²ன ‘ஏஸ மிகோ³ ஏஸ மிகோ³’தி அஞ்ஞமஞ்ஞங் ஜீவிதா வோரோபெஸ்ஸந்தி.
‘‘அத² கோ² தேஸங், பி⁴க்க²வே, ஸத்தானங் ஏகச்சானங் ஏவங் ப⁴விஸ்ஸதி – ‘மா ச மயங் கஞ்சி [கிஞ்சி (க॰)],
மா ச அம்ஹே கோசி, யங்னூன மயங் திணக³ஹனங் வா வனக³ஹனங் வா ருக்க²க³ஹனங் வா
நதீ³விது³க்³க³ங் வா பப்³ப³தவிஸமங் வா பவிஸித்வா வனமூலப²லாஹாரா
யாபெய்யாமா’தி. தே திணக³ஹனங் வா வனக³ஹனங் வா ருக்க²க³ஹனங் வா
நதீ³விது³க்³க³ங் வா பப்³ப³தவிஸமங் வா [தே திணக³ஹனங் வனக³ஹனங் ருக்க²க³ஹனங் நதீ³விது³க்³க³ங் பப்³ப³தவிஸமங் (ஸீ॰ பீ॰)]
பவிஸித்வா ஸத்தாஹங் வனமூலப²லாஹாரா யாபெஸ்ஸந்தி. தே தஸ்ஸ ஸத்தாஹஸ்ஸ அச்சயேன
திணக³ஹனா வனக³ஹனா ருக்க²க³ஹனா நதீ³விது³க்³கா³ பப்³ப³தவிஸமா நிக்க²மித்வா
அஞ்ஞமஞ்ஞங் ஆலிங்கி³த்வா ஸபா⁴கா³யிஸ்ஸந்தி ஸமஸ்ஸாஸிஸ்ஸந்தி – ‘தி³ட்டா²,
போ⁴, ஸத்தா ஜீவஸி, தி³ட்டா², போ⁴, ஸத்தா ஜீவஸீ’தி.
ஆயுவண்ணாதி³வட்³ட⁴னகதா²
105. ‘‘அத²
கோ² தேஸங், பி⁴க்க²வே, ஸத்தானங் ஏவங் ப⁴விஸ்ஸதி – ‘மயங் கோ² அகுஸலானங்
த⁴ம்மானங் ஸமாதா³னஹேது ஏவரூபங் ஆயதங் ஞாதிக்க²யங் பத்தா. யங்னூன மயங்
குஸலங் கரெய்யாம. கிங் குஸலங் கரெய்யாம? யங்னூன மயங் பாணாதிபாதா
விரமெய்யாம, இத³ங் குஸலங் த⁴ம்மங் ஸமாதா³ய வத்தெய்யாமா’தி. தே பாணாதிபாதா
விரமிஸ்ஸந்தி, இத³ங் குஸலங் த⁴ம்மங் ஸமாதா³ய வத்திஸ்ஸந்தி. தே குஸலானங்
த⁴ம்மானங் ஸமாதா³னஹேது ஆயுனாபி வட்³டி⁴ஸ்ஸந்தி, வண்ணேனபி வட்³டி⁴ஸ்ஸந்தி . தேஸங் ஆயுனாபி வட்³ட⁴மானானங் வண்ணேனபி வட்³ட⁴மானானங் த³ஸவஸ்ஸாயுகானங் மனுஸ்ஸானங் வீஸதிவஸ்ஸாயுகா புத்தா ப⁴விஸ்ஸந்தி.
‘‘அத² கோ² தேஸங், பி⁴க்க²வே, ஸத்தானங் ஏவங் ப⁴விஸ்ஸதி – ‘மயங் கோ² குஸலானங் த⁴ம்மானங்
ஸமாதா³னஹேது ஆயுனாபி வட்³டா⁴ம, வண்ணேனபி வட்³டா⁴ம. யங்னூன மயங்
பி⁴ய்யோஸோமத்தாய குஸலங் கரெய்யாம. கிங் குஸலங் கரெய்யாம? யங்னூன மயங்
அதி³ன்னாதா³னா விரமெய்யாம… காமேஸுமிச்சா²சாரா விரமெய்யாம… முஸாவாதா³
விரமெய்யாம… பிஸுணாய வாசாய விரமெய்யாம… ப²ருஸாய வாசாய விரமெய்யாம…
ஸம்ப²ப்பலாபா விரமெய்யாம… அபி⁴ஜ்ஜ²ங் பஜஹெய்யாம… ப்³யாபாத³ங் பஜஹெய்யாம…
மிச்சா²தி³ட்டி²ங் பஜஹெய்யாம… தயோ த⁴ம்மே பஜஹெய்யாம – அத⁴ம்மராக³ங்
விஸமலோப⁴ங் மிச்சா²த⁴ம்மங்… யங்னூன மயங் மத்தெய்யா அஸ்ஸாம பெத்தெய்யா
ஸாமஞ்ஞா ப்³ரஹ்மஞ்ஞா குலே ஜெட்டா²பசாயினோ, இத³ங் குஸலங் த⁴ம்மங் ஸமாதா³ய
வத்தெய்யாமா’தி. தே மத்தெய்யா ப⁴விஸ்ஸந்தி பெத்தெய்யா ஸாமஞ்ஞா ப்³ரஹ்மஞ்ஞா குலே ஜெட்டா²பசாயினோ, இத³ங் குஸலங் த⁴ம்மங் ஸமாதா³ய வத்திஸ்ஸந்தி.
‘‘தே குஸலானங் த⁴ம்மானங் ஸமாதா³னஹேது ஆயுனாபி
வட்³டி⁴ஸ்ஸந்தி, வண்ணேனபி வட்³டி⁴ஸ்ஸந்தி. தேஸங் ஆயுனாபி வட்³ட⁴மானானங்
வண்ணேனபி வட்³ட⁴மானானங் வீஸதிவஸ்ஸாயுகானங் மனுஸ்ஸானங் சத்தாரீஸவஸ்ஸாயுகா
புத்தா ப⁴விஸ்ஸந்தி… சத்தாரீஸவஸ்ஸாயுகானங் மனுஸ்ஸானங் அஸீதிவஸ்ஸாயுகா
புத்தா ப⁴விஸ்ஸந்தி… அஸீதிவஸ்ஸாயுகானங் மனுஸ்ஸானங் ஸட்டி²வஸ்ஸஸதாயுகா
புத்தா ப⁴விஸ்ஸந்தி… ஸட்டி²வஸ்ஸஸதாயுகானங் மனுஸ்ஸானங் வீஸதிதிவஸ்ஸஸதாயுகா
புத்தா ப⁴விஸ்ஸந்தி… வீஸதிதிவஸ்ஸஸதாயுகானங் மனுஸ்ஸானங்
சத்தாரீஸச²ப்³ப³ஸ்ஸஸதாயுகா புத்தா ப⁴விஸ்ஸந்தி.
சத்தாரீஸச²ப்³ப³ஸ்ஸஸதாயுகானங் மனுஸ்ஸானங் த்³வேவஸ்ஸஸஹஸ்ஸாயுகா புத்தா
ப⁴விஸ்ஸந்தி… த்³வேவஸ்ஸஸஹஸ்ஸாயுகானங் மனுஸ்ஸானங் சத்தாரிவஸ்ஸஸஹஸ்ஸாயுகா
புத்தா ப⁴விஸ்ஸந்தி… சத்தாரிவஸ்ஸஸஹஸ்ஸாயுகானங் மனுஸ்ஸானங்
அட்ட²வஸ்ஸஸஹஸ்ஸாயுகா புத்தா ப⁴விஸ்ஸந்தி… அட்ட²வஸ்ஸஸஹஸ்ஸாயுகானங்
மனுஸ்ஸானங் வீஸதிவஸ்ஸஸஹஸ்ஸாயுகா புத்தா ப⁴விஸ்ஸந்தி…
வீஸதிவஸ்ஸஸஹஸ்ஸாயுகானங் மனுஸ்ஸானங் சத்தாரீஸவஸ்ஸஸஹஸ்ஸாயுகா
புத்தா ப⁴விஸ்ஸந்தி… சத்தாரீஸவஸ்ஸஸஹஸ்ஸாயுகானங் மனுஸ்ஸானங்
அஸீதிவஸ்ஸஸஹஸ்ஸாயுகா புத்தா ப⁴விஸ்ஸந்தி… அஸீதிவஸ்ஸஸஹஸ்ஸாயுகேஸு,
பி⁴க்க²வே, மனுஸ்ஸேஸு பஞ்சவஸ்ஸஸதிகா குமாரிகா அலங்பதெய்யா ப⁴விஸ்ஸந்தி.
ஸங்க²ராஜஉப்பத்தி
106.
‘‘அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு தயோ ஆபா³தா⁴ ப⁴விஸ்ஸந்தி,
இச்சா², அனஸனங், ஜரா. அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு அயங்
ஜம்பு³தீ³போ இத்³தோ⁴ சேவ ப⁴விஸ்ஸதி பீ²தோ ச, குக்குடஸம்பாதிகா
கா³மனிக³மராஜதா⁴னியோ [கா³மனிக³மஜனபதா³ ராஜதா⁴னியோ (க॰)].
அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு அயங் ஜம்பு³தீ³போ அவீசி
மஞ்ஞே பு²டோ ப⁴விஸ்ஸதி மனுஸ்ஸேஹி, ஸெய்யதா²பி நளவனங் வா ஸரவனங் [ஸாரவனங் (ஸ்யா॰)]
வா. அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு அயங் பா³ராணஸீ கேதுமதீ
நாம ராஜதா⁴னீ ப⁴விஸ்ஸதி இத்³தா⁴ சேவ பீ²தா ச ப³ஹுஜனா ச ஆகிண்ணமனுஸ்ஸா ச
ஸுபி⁴க்கா² ச. அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு
இமஸ்மிங் ஜம்பு³தீ³பே சதுராஸீதினக³ரஸஹஸ்ஸானி ப⁴விஸ்ஸந்தி
கேதுமதீராஜதா⁴னீபமுகா²னி. அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு
கேதுமதியா ராஜதா⁴னியா ஸங்கோ² நாம ராஜா உப்பஜ்ஜிஸ்ஸதி சக்கவத்தீ த⁴ம்மிகோ
த⁴ம்மராஜா சாதுரந்தோ விஜிதாவீ
ஜனபத³த்தா²வரியப்பத்தோ ஸத்தரதனஸமன்னாக³தோ. தஸ்ஸிமானி ஸத்த ரதனானி
ப⁴விஸ்ஸந்தி, ஸெய்யதி²த³ங், சக்கரதனங் ஹத்தி²ரதனங் அஸ்ஸரதனங் மணிரதனங்
இத்தி²ரதனங் க³ஹபதிரதனங் பரிணாயகரதனமேவ ஸத்தமங். பரோஸஹஸ்ஸங் கோ² பனஸ்ஸ
புத்தா ப⁴விஸ்ஸந்தி ஸூரா வீரங்க³ரூபா பரஸேனப்பமத்³த³னா. ஸோ இமங் பத²விங்
ஸாக³ரபரியந்தங் அத³ண்டே³ன அஸத்தே²ன த⁴ம்மேன அபி⁴விஜிய அஜ்ஜா²வஸிஸ்ஸதி.
மெத்தெய்யபு³த்³து⁴ப்பாதோ³
107. ‘‘அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு மெத்தெய்யோ
நாம ப⁴க³வா லோகே உப்பஜ்ஜிஸ்ஸதி அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ
ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங்
பு³த்³தோ⁴ ப⁴க³வா. ஸெய்யதா²பாஹமேதரஹி லோகே உப்பன்னோ அரஹங்
ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ
புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா. ஸோ இமங் லோகங்
ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங்
பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதெ³ஸ்ஸதி,
ஸெய்யதா²பாஹமேதரஹி இமங் லோகங் ஸதே³வகங் ஸமாரகங் ஸப்³ரஹ்மகங்
ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா
பவேதே³மி. ஸோ த⁴ம்மங் தே³ஸெஸ்ஸதி ஆதி³கல்யாணங் மஜ்ஜே²கல்யாணங்
பரியோஸானகல்யாணங் ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங்
ப்³ரஹ்மசரியங் பகாஸெஸ்ஸதி; ஸெய்யதா²பாஹமேதரஹி த⁴ம்மங் தே³ஸேமி ஆதி³கல்யாணங்
மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங் கேவலபரிபுண்ணங்
பரிஸுத்³த⁴ங் ப்³ரஹ்மசரியங் பகாஸேமி. ஸோ அனேகஸஹஸ்ஸங் [அனேகஸதஸஹஸ்ஸங் (க॰)] பி⁴க்கு²ஸங்க⁴ங் பரிஹரிஸ்ஸதி, ஸெய்யதா²பாஹமேதரஹி அனேகஸதங் பி⁴க்கு²ஸங்க⁴ங் பரிஹராமி.
108. ‘‘அத² கோ², பி⁴க்க²வே, ஸங்கோ² நாம ராஜா யோ ஸோ யூபோ ரஞ்ஞா மஹாபனாதே³ன காராபிதோ. தங் யூபங் உஸ்ஸாபெத்வா அஜ்ஜா²வஸித்வா தங் த³த்வா
விஸ்ஸஜ்ஜித்வா ஸமணப்³ராஹ்மணகபணத்³தி⁴கவணிப்³ப³கயாசகானங் தா³னங் த³த்வா
மெத்தெய்யஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ ஸந்திகே கேஸமஸ்ஸுங்
ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங்
பப்³ப³ஜிஸ்ஸதி. ஸோ ஏவங் பப்³ப³ஜிதோ ஸமானோ ஏகோ வூபகட்டோ² அப்பமத்தோ ஆதாபீ
பஹிதத்தோ விஹரந்தோ நசிரஸ்ஸேவ யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி, தத³னுத்தரங் ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதி.
109.
‘‘அத்ததீ³பா, பி⁴க்க²வே, விஹரத² அத்தஸரணா அனஞ்ஞஸரணா, த⁴ம்மதீ³பா த⁴ம்மஸரணா
அனஞ்ஞஸரணா. கத²ஞ்ச, பி⁴க்க²வே, பி⁴க்கு² அத்ததீ³போ விஹரதி அத்தஸரணோ
அனஞ்ஞஸரணோ த⁴ம்மதீ³போ த⁴ம்மஸரணோ அனஞ்ஞஸரணோ? இத⁴, பி⁴க்க²வே, பி⁴க்கு² காயே
காயானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே
அபி⁴ஜ்ஜா²தோ³மனஸ்ஸங். வேத³னாஸு வேத³னானுபஸ்ஸீ…பே॰… சித்தே
சித்தானுபஸ்ஸீ…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா
வினெய்ய லோகே அபி⁴ஜ்ஜா²தோ³மனஸ்ஸங். ஏவங் கோ², பி⁴க்க²வே, பி⁴க்கு² அத்ததீ³போ விஹரதி அத்தஸரணோ அனஞ்ஞஸரணோ த⁴ம்மதீ³போ த⁴ம்மஸரணோ அனஞ்ஞஸரணோ.
பி⁴க்கு²னோஆயுவண்ணாதி³வட்³ட⁴னகதா²
110.
‘‘கோ³சரே, பி⁴க்க²வே, சரத² ஸகே பெத்திகே விஸயே. கோ³சரே, பி⁴க்க²வே, சரந்தா
ஸகே பெத்திகே விஸயே ஆயுனாபி வட்³டி⁴ஸ்ஸத², வண்ணேனபி வட்³டி⁴ஸ்ஸத²,
ஸுகே²னபி வட்³டி⁴ஸ்ஸத², போ⁴கே³னபி வட்³டி⁴ஸ்ஸத², ப³லேனபி வட்³டி⁴ஸ்ஸத².
‘‘கிஞ்ச , பி⁴க்க²வே,
பி⁴க்கு²னோ ஆயுஸ்மிங்? இத⁴, பி⁴க்க²வே, பி⁴க்கு²
ச²ந்த³ஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி,
வீரியஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி,
சித்தஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி,
வீமங்ஸாஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி. ஸோ இமேஸங்
சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா ஆகங்க²மானோ கப்பங் வா
திட்டெ²ய்ய கப்பாவஸேஸங் வா. இத³ங் கோ², பி⁴க்க²வே, பி⁴க்கு²னோ ஆயுஸ்மிங்.
‘‘கிஞ்ச, பி⁴க்க²வே, பி⁴க்கு²னோ வண்ணஸ்மிங்? இத⁴, பி⁴க்க²வே, பி⁴க்கு² ஸீலவா ஹோதி, பாதிமொக்க²ஸங்வரஸங்வுதோ விஹரதி ஆசாரகோ³சரஸம்பன்னோ, அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு. இத³ங் கோ², பி⁴க்க²வே, பி⁴க்கு²னோ வண்ணஸ்மிங்.
‘‘கிஞ்ச, பி⁴க்க²வே, பி⁴க்கு²னோ ஸுக²ஸ்மிங்? இத⁴,
பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங்
ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி.
விதக்கவிசாரானங் வூபஸமா…பே॰… து³தியங் ஜா²னங்…பே॰… ததியங் ஜா²னங்…பே॰…
சதுத்த²ங் ஜா²னங் உபஸம்பஜ்ஜ விஹரதி. இத³ங் கோ², பி⁴க்க²வே, பி⁴க்கு²னோ,
ஸுக²ஸ்மிங்.
‘‘கிஞ்ச, பி⁴க்க²வே, பி⁴க்கு²னோ போ⁴க³ஸ்மிங்? இத⁴, பி⁴க்க²வே, பி⁴க்கு² மெத்தாஸஹக³தேன சேதஸா ஏகங் தி³ஸங் ப²ரித்வா
விஹரதி ததா² து³தியங். ததா² ததியங். ததா² சதுத்த²ங். இதி உத்³த⁴மதோ⁴
திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் மெத்தாஸஹக³தேன சேதஸா
விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி.
கருணாஸஹக³தேன சேதஸா…பே॰… முதி³தாஸஹக³தேன சேதஸா…பே॰… உபெக்கா²ஸஹக³தேன சேதஸா
ஏகங் தி³ஸங் ப²ரித்வா விஹரதி. ததா² து³தியங். ததா² ததியங். ததா² சதுத்த²ங்.
இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங்
உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன
ப²ரித்வா விஹரதி. இத³ங் கோ², பி⁴க்க²வே, பி⁴க்கு²னோ போ⁴க³ஸ்மிங்.
‘‘கிஞ்ச , பி⁴க்க²வே,
பி⁴க்கு²னோ ப³லஸ்மிங்? இத⁴, பி⁴க்க²வே, பி⁴க்கு² ஆஸவானங் க²யா அனாஸவங்
சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரதி. இத³ங் கோ², பி⁴க்க²வே, பி⁴க்கு²னோ
ப³லஸ்மிங்.
‘‘நாஹங், பி⁴க்க²வே, அஞ்ஞங் ஏகப³லம்பி ஸமனுபஸ்ஸாமி யங் ஏவங் து³ப்பஸஹங், யத²யித³ங், பி⁴க்க²வே, மாரப³லங். குஸலானங் ,
பி⁴க்க²வே, த⁴ம்மானங் ஸமாதா³னஹேது ஏவமித³ங் புஞ்ஞங் பவட்³ட⁴தீ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
சக்கவத்திஸுத்தங் நிட்டி²தங் ததியங்.