Analytic Insight Net - FREE Online Tipiṭaka Research & Practice Universitu 
in
 112 CLASSICAL LANGUAGES
Paṭisambhidā Jāla-Abaddha Paripanti Tipiṭaka Anvesanā ca Paricaya Nikhilavijjālaya ca ñātibhūta Pavatti Nissāya 
http://sarvajan.ambedkar.org anto 105 Seṭṭhaganthāyatta Bhāsā
Categories:

Archives:
Meta:
November 2012
M T W T F S S
« Oct   Dec »
 1234
567891011
12131415161718
19202122232425
2627282930  
11/18/12
191112 MONDAY LESSON 755 வினயபிடகே-Part-22 தமிழில் திரபிடக மூன்று தொகுப்புகள்TIPITAKA from FREE ONLINE eNālāndā Research and Practice UNIVERSITY through http://sarvajan.ambedkar.org
Filed under: General
Posted by: @ 5:43 pm

up a level
191112 MONDAY LESSON 755 வினயபிடகே-Part-22 மிழில் திபி  மூன்று தொகுப்புள்TIPITAKA
from FREE ONLINE  eNālāndā Research and
Practice UNIVERSITY through http://sarvajan.ambedkar.org


நமோ தஸ்ஸ பகவதோ அரஹதோ ஸம்மாஸம்புத்தஸ்ஸ

வினயபிடகே

மஹாவக்கபாளி

8. சீவரக்கந்தகோ

202. ஜீவகவத்து

326. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன வேஸாலீ இத்³தா⁴ சேவ ஹோதி பி²தா [பீ²தா (ப³ஹூஸு)]
ச ப³ஹுஜனா ச ஆகிண்ணமனுஸ்ஸா ச ஸுபி⁴க்கா² ச; ஸத்த ச பாஸாத³ஸஹஸ்ஸானி ஸத்த ச
பாஸாத³ஸதானி ஸத்த ச பாஸாதா³; ஸத்த ச கூடாகா³ரஸஹஸ்ஸானி ஸத்த ச கூடாகா³ரஸதானி
ஸத்த ச கூடாகா³ரானி; ஸத்த ச ஆராமஸஹஸ்ஸானி ஸத்த ச ஆராமஸதானி ஸத்த ச ஆராமா;
ஸத்த ச பொக்க²ரணீஸஹஸ்ஸானி ஸத்த ச பொக்க²ரணீஸதானி ஸத்த ச பொக்க²ரணியோ;
அம்ப³பாலீ ச க³ணிகா அபி⁴ரூபா ஹோதி த³ஸ்ஸனீயா பாஸாதி³கா பரமாய
வண்ணபொக்க²ரதாய ஸமன்னாக³தா, பத³க்கி²ணா [பத³க்கா² (ஸ்யா॰)]
நச்சே ச கீ³தே ச வாதி³தே ச, அபி⁴ஸடா அத்தி²கானங் அத்தி²கானங் மனுஸ்ஸானங்
பஞ்ஞாஸாய ச ரத்திங் க³ச்ச²தி; தாய ச வேஸாலீ பி⁴ய்யோஸோமத்தாய உபஸோப⁴தி. அத²
கோ² ராஜக³ஹகோ நேக³மோ வேஸாலிங் அக³மாஸி கேனசிதே³வ கரணீயேன. அத்³த³ஸா கோ²
ராஜக³ஹகோ நேக³மோ வேஸாலிங் இத்³த⁴ஞ்சேவ பி²தஞ்ச ப³ஹுஜனஞ்ச ஆகிண்ணமனுஸ்ஸஞ்ச
ஸுபி⁴க்க²ஞ்ச; ஸத்த ச பாஸாத³ஸஹஸ்ஸானி ஸத்த ச பாஸாத³ஸதானி ஸத்த ச பாஸாதே³;
ஸத்த ச கூடாகா³ரஸஹஸ்ஸானி ஸத்த ச கூடாகா³ரஸதானி ஸத்த ச கூடாகா³ரானி; ஸத்த ச
ஆராமஸஹஸ்ஸானி ஸத்த ச ஆராமஸதானி ஸத்த ச ஆராமே; ஸத்த ச பொக்க²ரணீஸஹஸ்ஸானி
ஸத்த ச பொக்க²ரணீஸதானி ஸத்த ச பொக்க²ரணியோ ; அம்ப³பாலிஞ்ச க³ணிகங் அபி⁴ரூபங் த³ஸ்ஸனீயங் பாஸாதி³கங் பரமாய வண்ணபொக்க²ரதாய ஸமன்னாக³தங், பத³க்கி²ணங் [பத³க்க²ங் (ஸ்யா॰)]
நச்சே ச கீ³தே ச வாதி³தே ச, அபி⁴ஸடங் அத்தி²கானங் அத்தி²கானங் மனுஸ்ஸானங்
பஞ்ஞாஸாய ச ரத்திங் க³ச்ச²ந்திங், தாய ச வேஸாலிங் பி⁴ய்யோஸோமத்தாய
உபஸோப⁴ந்திங்.

327.
அத² கோ² ராஜக³ஹகோ நேக³மோ வேஸாலியங் தங் கரணீயங் தீரெத்வா புனதே³வ ராஜக³ஹங்
பச்சாக³ஞ்சி². யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி,
உபஸங்கமித்வா ராஜானங் மாக³த⁴ங் ஸேனியங் பி³ம்பி³ஸாரங்
ஏதத³வோச – ‘‘வேஸாலீ, தே³வ, இத்³தா⁴ சேவ பி²தா ச ப³ஹுஜனா ச ஆகிண்ணமனுஸ்ஸா ச
ஸுபி⁴க்கா² ச; ஸத்த ச பாஸாத³ஸஹஸ்ஸானி…பே॰… தாய ச வேஸாலீ பி⁴ய்யோஸோமத்தாய
உபஸோப⁴தி. ஸாது⁴, தே³வ, மயம்பி க³ணிகங் வுட்டா²பெஸ்ஸாமா’’தி [வுட்டா²பெய்யாம (க॰)]. ‘‘தேன ஹி, ப⁴ணே, தாதி³ஸிங் குமாரிங் ஜானாத² யங் தும்ஹே க³ணிகங் வுட்டா²பெய்யாதா²’’தி. தேன கோ² பன ஸமயேன ராஜக³ஹே ஸாலவதீ நாம குமாரீ அபி⁴ரூபா ஹோதி த³ஸ்ஸனீயா பாஸாதி³கா பரமாய வண்ணபொக்க²ரதாய ஸமன்னாக³தா. அத² கோ² ராஜக³ஹகோ நேக³மோ ஸாலவதிங் குமாரிங் க³ணிகங்
வுட்டா²பேஸி. அத² கோ² ஸாலவதீ க³ணிகா நசிரஸ்ஸேவ பத³க்கி²ணா அஹோஸி நச்சே ச
கீ³தே ச வாதி³தே ச, அபி⁴ஸடா அத்தி²கானங் அத்தி²கானங் மனுஸ்ஸானங் படிஸதேன ச
ரத்திங் க³ச்ச²தி. அத² கோ² ஸாலவதீ க³ணிகா நசிரஸ்ஸேவ க³ப்³பி⁴னீ அஹோஸி. அத²
கோ² ஸாலவதியா க³ணிகாய ஏதத³ஹோஸி – ‘‘இத்தீ² கோ² க³ப்³பி⁴னீ புரிஸானங்
அமனாபா. ஸசே மங் கோசி ஜானிஸ்ஸதி ஸாலவதீ க³ணிகா க³ப்³பி⁴னீதி, ஸப்³போ³ மே
ஸக்காரோ ப⁴ஞ்ஜிஸ்ஸதி [ பரிஹாயிஸ்ஸதி (ஸீ॰ ஸ்யா॰)].
யங்னூனாஹங் கி³லானங் படிவேதெ³ய்ய’’ந்தி. அத² கோ² ஸாலவதீ க³ணிகா தோ³வாரிகங்
ஆணாபேஸி – ‘‘மா, ப⁴ணே தோ³வாரிக, கோசி புரிஸோ பாவிஸி. யோ ச மங் புச்ச²தி,
‘கி³லானா’தி படிவேதே³ஹீ’’தி. ‘‘ஏவங், அய்யே’’தி கோ² ஸோ தோ³வாரிகோ ஸாலவதியா
க³ணிகாய பச்சஸ்ஸோஸி. அத² கோ² ஸாலவதீ க³ணிகா தஸ்ஸ க³ப்³ப⁴ஸ்ஸ பரிபாகமன்வாய
புத்தங் விஜாயி. அத² கோ² ஸாலவதீ க³ணிகா தா³ஸிங் ஆணாபேஸி – ‘‘ஹந்த³, ஜே,
இமங் தா³ரகங் கத்தரஸுப்பே பக்கி²பித்வா நீஹரித்வா ஸங்காரகூடே
ச²ட்³டே³ஹீ’’தி. ‘‘ஏவங், அய்யே’’தி கோ² ஸா தா³ஸீ ஸாலவதியா க³ணிகாய
படிஸ்ஸுத்வா தங் தா³ரகங் கத்தரஸுப்பே பக்கி²பித்வா நீஹரித்வா ஸங்காரகூடே
ச²ட்³டே³ஸி.

328. தேன கோ² பன ஸமயேன அப⁴யோ நாம ராஜகுமாரோ காலஸ்ஸேவ ராஜுபட்டா²னங் க³ச்ச²ந்தோ அத்³த³ஸ தங் தா³ரகங் காகேஹி ஸம்பரிகிண்ணங் ,
தி³ஸ்வான மனுஸ்ஸே புச்சி² – ‘‘கிங் ஏதங், ப⁴ணே, காகேஹி ஸம்பரிகிண்ண’’ந்தி?
‘‘தா³ரகோ, தே³வா’’தி. ‘‘ஜீவதி, ப⁴ணே’’தி? ‘‘ஜீவதி, தே³வா’’தி. ‘‘தேன ஹி,
ப⁴ணே, தங் தா³ரகங் அம்ஹாகங் அந்தேபுரங் நெத்வா தா⁴தீனங் தே³த²
போஸேது’’ந்தி. ‘‘ஏவங், தே³வா’’தி கோ² தே மனுஸ்ஸா அப⁴யஸ்ஸ ராஜகுமாரஸ்ஸ
படிஸ்ஸுத்வா தங் தா³ரகங் அப⁴யஸ்ஸ ராஜகுமாரஸ்ஸ
அந்தேபுரங் நெத்வா தா⁴தீனங் அத³ங்ஸு – ‘‘போஸேதா²’’தி. தஸ்ஸ ஜீவதீதி
‘ஜீவகோ’தி நாமங் அகங்ஸு. குமாரேன போஸாபிதோதி ‘கோமாரப⁴ச்சோ’தி நாமங் அகங்ஸு.
அத² கோ² ஜீவகோ கோமாரப⁴ச்சோ நசிரஸ்ஸேவ விஞ்ஞுதங் பாபுணி. அத² கோ² ஜீவகோ
கோமாரப⁴ச்சோ யேன அப⁴யோ ராஜகுமாரோ தேனுபஸங்கமி; உபஸங்கமித்வா அப⁴யங்
ராஜகுமாரங் ஏதத³வோச – ‘‘கா மே, தே³வ, மாதா, கோ பிதா’’தி? ‘‘அஹம்பி கோ² தே,
ப⁴ணே ஜீவக, மாதரங் ந ஜானாமி; அபி சாஹங் தே பிதா; மயாஸி [மயாபி (க॰)] போஸாபிதோ’’தி. அத² கோ² ஜீவகஸ்ஸ கோமாரப⁴ச்சஸ்ஸ ஏதத³ஹோஸி – ‘‘இமானி கோ² ராஜகுலானி ந ஸுகரானி அஸிப்பேன உபஜீவிதுங். யங்னூனாஹங் ஸிப்பங் ஸிக்கெ²ய்ய’’ந்தி.

329. தேன கோ² பன ஸமயேன தக்கஸிலாயங் [தக்கஸீலாயங் (க॰)] தி³ஸாபாமொக்கோ² வேஜ்ஜோ படிவஸதி. அத² கோ² ஜீவகோ கோமாரப⁴ச்சோ அப⁴யங் ராஜகுமாரங் அனாபுச்சா² யேன தக்கஸிலா தேன
பக்காமி. அனுபுப்³பே³ன யேன தக்கஸிலா, யேன வேஜ்ஜோ தேனுபஸங்கமி;
உபஸங்கமித்வா தங் வேஜ்ஜங் ஏதத³வோச – ‘‘இச்சா²மஹங், ஆசரிய, ஸிப்பங்
ஸிக்கி²து’’ந்தி. ‘‘தேன ஹி, ப⁴ணே ஜீவக, ஸிக்க²ஸ்ஸூ’’தி. அத² கோ² ஜீவகோ கோமாரப⁴ச்சோ ப³ஹுஞ்ச க³ண்ஹாதி லஹுஞ்ச க³ண்ஹாதி ஸுட்டு² ச உபதா⁴ரேதி, க³ஹிதஞ்சஸ்ஸ ந ஸம்முஸ்ஸதி [ந பமுஸ்ஸதி (ஸீ॰ ஸ்யா॰)].
அத² கோ² ஜீவகஸ்ஸ கோமாரப⁴ச்சஸ்ஸ ஸத்தன்னங் வஸ்ஸானங் அச்சயேன ஏதத³ஹோஸி –
‘‘அஹங், கோ² ப³ஹுஞ்ச க³ண்ஹாமி லஹுஞ்ச க³ண்ஹாமி ஸுட்டு² ச உபதா⁴ரேமி,
க³ஹிதஞ்ச மே ந ஸம்முஸ்ஸதி, ஸத்த ச மே வஸ்ஸானி அதீ⁴யந்தஸ்ஸ, நயிமஸ்ஸ
ஸிப்பஸ்ஸ அந்தோ பஞ்ஞாயதி. கதா³ இமஸ்ஸ ஸிப்பஸ்ஸ அந்தோ பஞ்ஞாயிஸ்ஸதீ’’தி. அத²
கோ² ஜீவகோ கோமாரப⁴ச்சோ யேன ஸோ வேஜ்ஜோ தேனுபஸங்கமி, உபஸங்கமித்வா தங்
வேஜ்ஜங் ஏதத³வோச – ‘‘அஹங் கோ², ஆசரிய, ப³ஹுஞ்ச க³ண்ஹாமி லஹுஞ்ச க³ண்ஹாமி
ஸுட்டு² ச உபதா⁴ரேமி, க³ஹிதஞ்ச மே ந ஸம்முஸ்ஸதி, ஸத்த ச மே வஸ்ஸானி
அதீ⁴யந்தஸ்ஸ, நயிமஸ்ஸ ஸிப்பஸ்ஸ அந்தோ பஞ்ஞாயதி. கதா³ இமஸ்ஸ ஸிப்பஸ்ஸ அந்தோ
பஞ்ஞாயிஸ்ஸதீ’’தி? ‘‘தேன ஹி, ப⁴ணே ஜீவக, க²ணித்திங் ஆதா³ய தக்கஸிலாய ஸமந்தா
யோஜனங் ஆஹிண்டி³த்வா யங் கிஞ்சி அபே⁴ஸஜ்ஜங் பஸ்ஸெய்யாஸி தங் ஆஹரா’’தி.
‘‘ஏவங், ஆசரியா’’தி கோ² ஜீவகோ கோமாரப⁴ச்சோ தஸ்ஸ வேஜ்ஜஸ்ஸ படிஸ்ஸுத்வா
க²ணித்திங் ஆதா³ய தக்கஸிலாய ஸமந்தா யோஜனங்
ஆஹிண்ட³ந்தோ ந கிஞ்சி அபே⁴ஸஜ்ஜங் அத்³த³ஸ. அத² கோ² ஜீவகோ கோமாரப⁴ச்சோ யேன
ஸோ வேஜ்ஜோ தேனுபஸங்கமி, உபஸங்கமித்வா தங் வேஜ்ஜங் ஏதத³வோச –
‘‘ஆஹிண்ட³ந்தொம்ஹி, ஆசரிய, தக்கஸிலாய ஸமந்தா யோஜனங், ந கிஞ்சி [ஆஹிண்டந்தோ ந கிஞ்சி (க॰)] அபே⁴ஸஜ்ஜங் அத்³த³ஸ’’ந்தி. ‘‘ஸுஸிக்கி²தோஸி ,
ப⁴ணே ஜீவக. அலங் தே எத்தகங் ஜீவிகாயா’’தி ஜீவகஸ்ஸ கோமாரப⁴ச்சஸ்ஸ பரித்தங்
பாதெ²ய்யங் பாதா³ஸி. அத² கோ² ஜீவகோ கோமாரப⁴ச்சோ தங் பரித்தங் பாதெ²ய்யங்
ஆதா³ய யேன ராஜக³ஹங் தேன பக்காமி. அத² கோ² ஜீவகஸ்ஸ கோமாரப⁴ச்சஸ்ஸ தங்
பரித்தங் பாதெ²ய்யங் அந்தராமக்³கே³ ஸாகேதே பரிக்க²யங் அக³மாஸி. அத² கோ²
ஜீவகஸ்ஸ கோமாரப⁴ச்சஸ்ஸ ஏதத³ஹோஸி – ‘‘இமே கோ² மக்³கா³ கந்தாரா அப்போத³கா
அப்பப⁴க்கா², ந ஸுகரா அபாதெ²ய்யேன க³ந்துங். யங்னூனாஹங் பாதெ²ய்யங்
பரியேஸெய்ய’’ந்தி.

ஜீவகவத்து² நிட்டி²தங்.

203. ஸெட்டி²ப⁴ரியாவத்து²

330. தேன
கோ² பன ஸமயேன ஸாகேதே ஸெட்டி²ப⁴ரியாய ஸத்தவஸ்ஸிகோ ஸீஸாபா³தோ⁴ ஹோதி. ப³ஹூ
மஹந்தா மஹந்தா தி³ஸாபாமொக்கா² வேஜ்ஜா ஆக³ந்த்வா நாஸக்கி²ங்ஸு அரோக³ங்
காதுங். ப³ஹுங் ஹிரஞ்ஞங் ஆதா³ய அக³மங்ஸு. அத² கோ² ஜீவகோ கோமாரப⁴ச்சோ
ஸாகேதங் பவிஸித்வா மனுஸ்ஸே புச்சி² – ‘‘கோ, ப⁴ணே, கி³லானோ, கங்
திகிச்சா²மீ’’தி? ‘‘ஏதிஸ்ஸா, ஆசரிய, ஸெட்டி²ப⁴ரியாய ஸத்தவஸ்ஸிகோ
ஸீஸாபா³தோ⁴; க³ச்ச², ஆசரிய, ஸெட்டி²ப⁴ரியங் திகிச்சா²ஹீ’’தி. அத² கோ²
ஜீவகோ கோமாரப⁴ச்சோ யேன ஸெட்டி²ஸ்ஸ க³ஹபதிஸ்ஸ நிவேஸனங் தேனுபஸங்கமி;
உபஸங்கமித்வா தோ³வாரிகங் ஆணாபேஸி – ‘‘க³ச்ச², ப⁴ணே தோ³வாரிக,
ஸெட்டி²ப⁴ரியாய பாவத³ – ‘வேஜ்ஜோ, அய்யே, ஆக³தோ, ஸோ தங் த³ட்டு²காமோ’’’தி.
‘‘ஏவங், ஆசரியா’’தி கோ² ஸோ தோ³வாரிகோ ஜீவகஸ்ஸ கோமாரப⁴ச்சஸ்ஸ படிஸ்ஸுத்வா
யேன ஸெட்டி²ப⁴ரியா தேனுபஸங்கமி, உபஸங்கமித்வா ஸெட்டி²ப⁴ரியங் ஏதத³வோச –
‘‘வேஜ்ஜோ , அய்யே, ஆக³தோ; ஸோ தங் த³ட்டு²காமோ’’தி.
‘‘கீதி³ஸோ, ப⁴ணே தோ³வாரிக, வேஜ்ஜோ’’தி? ‘‘த³ஹரகோ, அய்யே’’தி. ‘‘அலங், ப⁴ணே
தோ³வாரிக, கிங் மே த³ஹரகோ வேஜ்ஜோ கரிஸ்ஸதி? ப³ஹூ மஹந்தா மஹந்தா
தி³ஸாபாமொக்கா² வேஜ்ஜா ஆக³ந்த்வா நாஸக்கி²ங்ஸு
அரோக³ங் காதுங். ப³ஹுங் ஹிரஞ்ஞங் ஆதா³ய அக³மங்ஸூ’’தி. அத² கோ² ஸோ தோ³வாரிகோ
யேன ஜீவகோ கோமாரப⁴ச்சோ தேனுபஸங்கமி; உபஸங்கமித்வா ஜீவகங் கோமாரப⁴ச்சங்
ஏதத³வோச – ‘‘ஸெட்டி²ப⁴ரியா, ஆசரிய, ஏவமாஹ – ‘அலங், ப⁴ணே தோ³வாரிக, கிங் மே
த³ஹரகோ வேஜ்ஜோ கரிஸ்ஸதி? ப³ஹூ மஹந்தா மஹந்தா தி³ஸாபாமொக்கா² வேஜ்ஜா
ஆக³ந்த்வா நாஸக்கி²ங்ஸு அரோக³ங் காதுங். ப³ஹுங் ஹிரஞ்ஞங் ஆதா³ய
அக³மங்ஸூ’’’தி. ‘‘க³ச்ச², ப⁴ணே தோ³வாரிக, ஸெட்டி²ப⁴ரியாய பாவத³ – ‘வேஜ்ஜோ,
அய்யே, ஏவமாஹ – மா கிர, அய்யே, புரே கிஞ்சி அதா³ஸி. யதா³ அரோகா³ அஹோஸி ததா³
யங் இச்செ²ய்யாஸி தங் த³ஜ்ஜெய்யாஸீ’’’தி. ‘‘ஏவங், ஆசரியா’’தி கோ² ஸோ
தோ³வாரிகோ ஜீவகஸ்ஸ கோமாரப⁴ச்சஸ்ஸ படிஸ்ஸுத்வா யேன ஸெட்டி²ப⁴ரியா
தேனுபஸங்கமி; உபஸங்கமித்வா ஸெட்டி²ப⁴ரியங் ஏதத³வோச – ‘‘வேஜ்ஜோ, அய்யே,
ஏவமாஹ – ‘மா கிர, அய்யே, புரே கிஞ்சி அதா³ஸி. யதா³ அரோகா³ அஹோஸி ததா³ யங்
இச்செ²ய்யாஸி தங் த³ஜ்ஜெய்யாஸீ’’’தி. ‘‘தேன ஹி, ப⁴ணே தோ³வாரிக, வேஜ்ஜோ
ஆக³ச்ச²தூ’’தி. ‘‘ஏவங், அய்யே’’தி கோ² ஸோ தோ³வாரிகோ ஸெட்டி²ப⁴ரியாய
படிஸ்ஸுத்வா யேன ஜீவகோ கோமாரப⁴ச்சோ தேனுபஸங்கமி, உபஸங்கமித்வா ஜீவகங்
கோமாரப⁴ச்சங் ஏதத³வோச – ‘‘ஸெட்டி²ப⁴ரியா தங், ஆசரிய, பக்கோஸதீ’’தி .

அத² கோ² ஜீவகோ கோமாரப⁴ச்சோ யேன ஸெட்டி²ப⁴ரியா
தேனுபஸங்கமி, உபஸங்கமித்வா ஸெட்டி²ப⁴ரியாய விகாரங் ஸல்லக்கெ²த்வா
ஸெட்டி²ப⁴ரியங் ஏதத³வோச – ‘‘பஸதேன, அய்யே, ஸப்பினா அத்தோ²’’தி .
அத² கோ² ஸெட்டி²ப⁴ரியா ஜீவகஸ்ஸ கோமாரப⁴ச்சஸ்ஸ பஸதங் ஸப்பிங் தா³பேஸி. அத²
கோ² ஜீவகோ கோமாரப⁴ச்சோ தங் பஸதங் ஸப்பிங் நானாபே⁴ஸஜ்ஜேஹி நிப்பசித்வா
ஸெட்டி²ப⁴ரியங் மஞ்சகே உத்தானங் நிபாதெத்வா [நிபஜ்ஜாபெத்வா (ஸீ॰ ஸ்யா॰)]
நத்து²தோ அதா³ஸி. அத² கோ² தங் ஸப்பிங் நத்து²தோ தி³ன்னங் முக²தோ
உக்³க³ஞ்சி². அத² கோ² ஸெட்டி²ப⁴ரியா படிக்³க³ஹே நிட்டு²பி⁴த்வா தா³ஸிங்
ஆணாபேஸி – ‘‘ஹந்த³, ஜே, இமங் ஸப்பிங் பிசுனா க³ண்ஹாஹீ’’தி. அத² கோ² ஜீவகஸ்ஸ
கோமாரப⁴ச்சஸ்ஸ ஏதத³ஹோஸி – ‘‘அச்ச²ரியங் [அச்ச²ரியங் வத போ⁴ (ஸ்யா॰)] யாவ லூகா²யங் க⁴ரணீ, யத்ர ஹி நாம இமங் ச²ட்³ட³னீயத⁴ம்மங் ஸப்பிங் பிசுனா கா³ஹாபெஸ்ஸதி. ப³ஹுகானி ச மே மஹக்³கா⁴னி [மஹக்³கா⁴னி மஹக்³கா⁴னி (ஸீ॰ ஸ்யா॰)] பே⁴ஸஜ்ஜானி உபக³தானி. கிம்பி மாயங் கிஞ்சி [கஞ்சி (ஸ்யா॰)] தெ³ய்யத⁴ம்மங் த³ஸ்ஸதீ’’தி. அத² கோ² ஸெட்டி²ப⁴ரியா ஜீவகஸ்ஸ
கோமாரப⁴ச்சஸ்ஸ விகாரங் ஸல்லக்கெ²த்வா ஜீவகங் கோமாரப⁴ச்சங் ஏதத³வோச –
‘‘கிஸ்ஸ த்வங், ஆசரிய, விமனோஸீ’’தி? இத⁴ மே ஏதத³ஹோஸி – ‘‘அச்ச²ரியங் யாவ
லூகா²யங் த⁴ரணீ, யத்ர ஹி நாம இமங் ச²ட்³ட³னீயத⁴ம்மங் ஸப்பிங் பிசுனா
கா³ஹாபெஸ்ஸதி. ப³ஹுகானி ச மே மஹக்³கா⁴னி ஸஜ்ஜானி உபக³தானி. கிம்பி மாயங்
கிஞ்சி தெ³ய்யத⁴ம்மங் த³ஸ்ஸதீ’’தி. ‘‘மயங் கோ²,
ஆசரிய, ஆகா³ரிகா நாம உபஜானாமேதஸ்ஸ ஸங்யமஸ்ஸ. வரமேதங் ஸப்பி தா³ஸானங் வா
கம்மகரானங் வா பாத³ப்³ப⁴ஞ்ஜனங் வா பதீ³பகரணே வா ஆஸித்தங். மா கோ² த்வங்,
ஆசரிய, விமனோ அஹோஸி. ந தே தெ³ய்யத⁴ம்மோ ஹாயிஸ்ஸதீ’’தி. அத² கோ² ஜீவகோ
கோமாரப⁴ச்சோ ஸெட்டி²ப⁴ரியாய ஸத்தவஸ்ஸிகங் ஸீஸாபா³த⁴ங் ஏகேனேவ நத்து²கம்மேன
அபகட்³டி⁴. அத² கோ² ஸெட்டி²ப⁴ரியா அரோகா³ ஸமானா ஜீவகஸ்ஸ கோமாரப⁴ச்சஸ்ஸ
சத்தாரி ஸஹஸ்ஸானி பாதா³ஸி. புத்தோ – மாதா மே அரோகா³ டி²தாதி சத்தாரி
ஸஹஸ்ஸானி பாதா³ஸி. ஸுணிஸா – ஸஸ்ஸு மே அரோகா³ டி²தாதி சத்தாரி ஸஹஸ்ஸானி
பாதா³ஸி. ஸெட்டி² க³ஹபதி – ப⁴ரியா மே அரோகா³ டி²தாதி சத்தாரி ஸஹஸ்ஸானி
பாதா³ஸி தா³ஸஞ்ச தா³ஸிஞ்ச அஸ்ஸரத²ஞ்ச.

அத² கோ² ஜீவகோ கோமாரப⁴ச்சோ தானி ஸோளஸஸஹஸ்ஸானி ஆதா³ய
தா³ஸஞ்ச தா³ஸிஞ்ச அஸ்ஸரத²ஞ்ச யேன ராஜக³ஹங் தேன பக்காமி. அனுபுப்³பே³ன யேன
ராஜக³ஹங் யேன அப⁴யோ ராஜகுமாரோ தேனுபஸங்கமி, உபஸங்கமித்வா அப⁴யங் ராஜகுமாரங்
ஏதத³வோச – ‘‘இத³ங் மே, தே³வ, பட²மகம்மங் ஸோளஸஸஹஸ்ஸானி தா³ஸோ ச தா³ஸீ ச
அஸ்ஸரதோ² ச. படிக்³க³ண்ஹாது மே தே³வோ போஸாவனிக’’ந்தி. ‘‘அலங், ப⁴ணே ஜீவக;
துய்ஹமேவ ஹோது. அம்ஹாகஞ்ஞேவ அந்தேபுரே நிவேஸனங் மாபேஹீ’’தி. ‘‘ஏவங்,
தே³வா’’தி கோ² ஜீவகோ கோமாரப⁴ச்சோ அப⁴யஸ்ஸ ராஜகுமாரஸ்ஸ படிஸ்ஸுத்வா அப⁴யஸ்ஸ
ராஜகுமாரஸ்ஸ அந்தேபுரே நிவேஸனங் மாபேஸி.

ஸெட்டி²ப⁴ரியாவத்து² நிட்டி²தங்.

204. பி³ம்பி³ஸாரராஜவத்து²

331. தேன
கோ² பன ஸமயேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ப⁴க³ந்த³லாபா³தோ⁴
ஹோதி. ஸாடகா லோஹிதேன மக்கி²யந்தி. தே³வியோ தி³ஸ்வா உப்பண்டெ³ந்தி – ‘‘உதுனீ
தா³னி தே³வோ, புப்ப²ங் தே³வஸ்ஸ உப்பன்னங், ந சிரங் [நசிரஸ்ஸேவ (ஸ்யா॰)] தே³வோ விஜாயிஸ்ஸதீ’’தி. தேன ராஜா மங்கு ஹோதி .
அத² கோ² ராஜா மாக³தோ⁴ ஸேனியோ பி³ம்பி³ஸாரோ அப⁴யங் ராஜகுமாரங் ஏதத³வோச –
‘‘மய்ஹங் கோ², ப⁴ணே அப⁴ய, தாதி³ஸோ ஆபா³தோ⁴, ஸாடகா லோஹிதேன மக்கி²யந்தி,
தே³வியோ மங் தி³ஸ்வா உப்பண்டெ³ந்தி – ‘உதுனீ தா³னி தே³வோ, புப்ப²ங் தே³வஸ்ஸ
உப்பன்னங், ந சிரங் தே³வோ விஜாயிஸ்ஸதீ’தி. இங்க⁴, ப⁴ணே அப⁴ய, தாதி³ஸங்
வேஜ்ஜங் ஜானாஹி யோ மங் திகிச்செ²ய்யா’’தி. ‘‘அயங், தே³வ, அம்ஹாகங் ஜீவகோ
வேஜ்ஜோ தருணோ ப⁴த்³ரகோ. ஸோ தே³வங் திகிச்சி²ஸ்ஸதீ’’தி. ‘‘தேன ஹி, ப⁴ணே
அப⁴ய, ஜீவகங் வேஜ்ஜங் ஆணாபேஹி; ஸோ மங்
திகிச்சி²ஸ்ஸதீ’’தி. அத² கோ² அப⁴யோ ராஜகுமாரோ ஜீவகங் கோமாரப⁴ச்சங் ஆணாபேஸி –
‘‘க³ச்ச², ப⁴ணே ஜீவக, ராஜானங் திகிச்சா²ஹீ’’தி. ‘‘ஏவங், தே³வா’’தி கோ²
ஜீவகோ கோமாரப⁴ச்சோ அப⁴யஸ்ஸ ராஜகுமாரஸ்ஸ படிஸ்ஸுத்வா நகே²ன பே⁴ஸஜ்ஜங் ஆதா³ய
யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி, உபஸங்கமித்வா ராஜானங்
மாக³த⁴ங் ஸேனியங் பி³ம்பி³ஸாரங் ஏதத³வோச – ‘‘ஆபா³த⁴ங் தே, தே³வ,
பஸ்ஸாமா’’தி [பஸ்ஸாமீதி (ஸ்யா॰)]. அத² கோ² ஜீவகோ
கோமாரப⁴ச்சோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ப⁴க³ந்த³லாபா³த⁴ங்
ஏகேனேவ ஆலேபேன அபகட்³டி⁴. அத² கோ² ராஜா மாக³தோ⁴
ஸேனியோ பி³ம்பி³ஸாரோ அரோகோ³ ஸமானோ பஞ்ச இத்தி²ஸதானி ஸப்³பா³லங்காரங்
பூ⁴ஸாபெத்வா ஓமுஞ்சாபெத்வா புஞ்ஜங் காராபெத்வா ஜீவகங் கோமாரப⁴ச்சங் ஏதத³வோச
– ‘‘ஏதங், ப⁴ணே ஜீவக, பஞ்சன்னங் இத்தி²ஸதானங் ஸப்³பா³லங்காரங் துய்ஹங்
ஹோதூ’’தி. ‘‘அலங், தே³வ, அதி⁴காரங் மே தே³வோ ஸரதூ’’தி. ‘‘தேன ஹி, ப⁴ணே
ஜீவக, மங் உபட்ட²ஹ, இத்தா²கா³ரஞ்ச, பு³த்³த⁴ப்பமுக²ஞ்ச
பி⁴க்கு²ஸங்க⁴’’ந்தி. ‘‘ஏவங், தே³வா’’தி கோ² ஜீவகோ கோமாரப⁴ச்சோ ரஞ்ஞோ
மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பச்சஸ்ஸோஸி.

பி³ம்பி³ஸாரராஜவத்து² நிட்டி²தங்.

205. ராஜக³ஹஸெட்டி²வத்து²

332.
தேன கோ² பன ஸமயேன ராஜக³ஹகஸ்ஸ ஸெட்டி²ஸ்ஸ ஸத்தவஸ்ஸிகோ ஸீஸாபா³தோ⁴ ஹோதி.
ப³ஹூ மஹந்தா மஹந்தா தி³ஸாபாமொக்கா² வேஜ்ஜா ஆக³ந்த்வா நாஸக்கி²ங்ஸு அரோக³ங்
காதுங். ப³ஹுங் ஹிரஞ்ஞங் ஆதா³ய அக³மங்ஸு. அபி ச, வேஜ்ஜேஹி பச்சக்கா²தோ
ஹோதி. ஏகச்சே வேஜ்ஜா ஏவமாஹங்ஸு – ‘‘பஞ்சமங் தி³வஸங் ஸெட்டி² க³ஹபதி காலங்
கரிஸ்ஸதீ’’தி. ஏகச்சே வேஜ்ஜா ஏவமாஹங்ஸு – ‘‘ஸத்தமங் தி³வஸங் ஸெட்டி² க³ஹபதி காலங் கரிஸ்ஸதீ’’தி. அத²
கோ² ராஜக³ஹகஸ்ஸ நேக³மஸ்ஸ ஏதத³ஹோஸி – ‘‘அயங் கோ² ஸெட்டி² க³ஹபதி ப³ஹூபகாரோ
ரஞ்ஞோ சேவ நேக³மஸ்ஸ ச. அபி ச, வேஜ்ஜேஹி பச்சக்கா²தோ. ஏகச்சே வேஜ்ஜா
ஏவமாஹங்ஸு – ‘பஞ்சமங் தி³வஸங் ஸெட்டி² க³ஹபதி காலங் கரிஸ்ஸதீ’தி. ஏகச்சே
வேஜ்ஜா ஏவமாஹங்ஸு – ‘ஸத்தமங் தி³வஸங் ஸெட்டி² க³ஹபதி காலங் கரிஸ்ஸதீ’தி.
அயஞ்ச ரஞ்ஞோ ஜீவகோ வேஜ்ஜோ தருணோ ப⁴த்³ரகோ. யங்னூன மயங் ராஜானங் ஜீவகங்
வேஜ்ஜங் யாசெய்யாம ஸெட்டி²ங் க³ஹபதிங்
திகிச்சி²து’’ந்தி. அத² கோ² ராஜக³ஹகோ நேக³மோ யேன ராஜா மாக³தோ⁴ ஸேனியோ
பி³ம்பி³ஸாரோ தேனுபஸங்கமி; உபஸங்கமித்வா ராஜானங் மாக³த⁴ங் ஸேனியங்
பி³ம்பி³ஸாரங் ஏதத³வோச – ‘‘அயங், தே³வ, ஸெட்டி² க³ஹபதி ப³ஹூபகாரோ தே³வஸ்ஸ
சேவ நேக³மஸ்ஸ ச; அபி ச, வேஜ்ஜேஹி பச்சக்கா²தோ. ஏகச்சே வேஜ்ஜா ஏவமாஹங்ஸு –
பஞ்சமங் தி³வஸங் ஸெட்டி² க³ஹபதி காலங் கரிஸ்ஸதீதி. ஏகச்சே வேஜ்ஜா ஏவமாஹங்ஸு
– ஸத்தமங் தி³வஸங் ஸெட்டி² க³ஹபதி காலங் கரிஸ்ஸதீதி. ஸாது⁴ தே³வோ ஜீவகங்
வேஜ்ஜங் ஆணாபேது ஸெட்டி²ங் க³ஹபதிங் திகிச்சி²து’’ந்தி .

அத² கோ² ராஜா மாக³தோ⁴ ஸேனியோ பி³ம்பி³ஸாரோ ஜீவகங்
கோமாரப⁴ச்சங் ஆணாபேஸி – ‘‘க³ச்ச², ப⁴ணே ஜீவக, ஸெட்டி²ங் க³ஹபதிங்
திகிச்சா²ஹீ’’தி. ‘‘ஏவங், தே³வா’’தி கோ² ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ
ஸேனியஸ்ஸ பி³ம்பி³ஸாரஸ்ஸ படிஸ்ஸுத்வா யேன ஸெட்டி² க³ஹபதி தேனுபஸங்கமி;
உபஸங்கமித்வா ஸெட்டி²ஸ்ஸ க³ஹபதிஸ்ஸ விகாரங் ஸல்லக்கெ²த்வா ஸெட்டி²ங்
க³ஹபதிங் ஏதத³வோச – ‘‘ஸசே த்வங், க³ஹபதி, அரோகோ³ ப⁴வெய்யாஸி [ஸசாஹங் தங் க³ஹபதி அரோகா³பெய்யங் (ஸீ॰), ஸசாஹங் தங் க³ஹபதி அரோக³ங் கரெய்யங் (ஸ்யா॰)]
கிங் மே அஸ்ஸ தெ³ய்யத⁴ம்மோ’’தி? ‘‘ஸப்³ப³ங் ஸாபதெய்யஞ்ச தே, ஆசரிய, ஹோது,
அஹஞ்ச தே தா³ஸோ’’தி. ‘‘ஸக்கி²ஸ்ஸஸி பன த்வங், க³ஹபதி, ஏகேன பஸ்ஸேன ஸத்தமாஸே
நிபஜ்ஜிது’’ந்தி? ‘‘ஸக்கோமஹங், ஆசரிய, ஏகேன பஸ்ஸேன ஸத்தமாஸே
நிபஜ்ஜிது’’ந்தி. ‘‘ஸக்கி²ஸ்ஸஸி பன த்வங், க³ஹபதி, து³தியேன பஸ்ஸேன
ஸத்தமாஸே நிபஜ்ஜிது’’ந்தி? ‘‘ஸக்கோமஹங், ஆசரிய, து³தியேன பஸ்ஸேன ஸத்தமாஸே
நிபஜ்ஜிது’’ந்தி . ‘‘ஸக்கி²ஸ்ஸஸி பன த்வங், க³ஹபதி, உத்தானோ ஸத்தமாஸே நிபஜ்ஜிது’’ந்தி? ‘‘ஸக்கோமஹங், ஆசரிய, உத்தானோ ஸத்தமாஸே நிபஜ்ஜிது’’ந்தி.

அத² கோ² ஜீவகோ கோமாரப⁴ச்சோ ஸெட்டி²ங் க³ஹபதிங் மஞ்சகே நிபாதெத்வா [நிபஜ்ஜாபெத்வா (ஸீ॰ ஸ்யா॰)] மஞ்சகே [மஞ்சகேன (ஸீ॰)] ஸம்ப³ந்தி⁴த்வா ஸீஸச்ச²விங் உப்பாடெத்வா [பா²லெத்வா (ஸீ॰)] ஸிப்³பி³னிங் வினாமெத்வா த்³வே பாணகே நீஹரித்வா மஹாஜனஸ்ஸ த³ஸ்ஸேஸி – ‘‘பஸ்ஸத²ய்யே [பஸ்ஸெஸ்யாத² (ஸீ॰), பஸ்ஸத² (ஸ்யா॰), பஸ்ஸத²ய்யோ (க॰)],
இமே த்³வே பாணகே, ஏகங் கு²த்³த³கங் ஏகங் மஹல்லகங். யே தே ஆசரியா ஏவமாஹங்ஸு
– பஞ்சமங் தி³வஸங் ஸெட்டி² க³ஹபதி காலங் கரிஸ்ஸதீதி – தேஹாயங் மஹல்லகோ
பாணகோ தி³ட்டோ². பஞ்சமங் தி³வஸங் ஸெட்டி²ஸ்ஸ க³ஹபதிஸ்ஸ மத்த²லுங்க³ங்
பரியாதி³யிஸ்ஸதி. மத்த²லுங்க³ஸ்ஸ பரியாதா³னா ஸெட்டி² க³ஹபதி காலங்
கரிஸ்ஸதி. ஸுதி³ட்டோ² தேஹி ஆசரியேஹி. யே தே ஆசரியா ஏவமாஹங்ஸு – ஸத்தமங்
தி³வஸங் ஸெட்டி² க³ஹபதி காலங் கரிஸ்ஸதீதி – தேஹாயங்
கு²த்³த³கோ பாணகோ தி³ட்டோ². ஸத்தமங் தி³வஸங் ஸெட்டி²ஸ்ஸ க³ஹபதிஸ்ஸ
மத்த²லுங்க³ங் பரியாதி³யிஸ்ஸதி. மத்த²லுங்க³ஸ்ஸ பரியாதா³னா ஸெட்டி² க³ஹபதி
காலங் கரிஸ்ஸதி. ஸுதி³ட்டோ² தேஹி ஆசரியேஹீ’’தி. ஸிப்³பி³னிங்
ஸம்படிபாடெத்வா ஸீஸச்ச²விங் ஸிப்³பி³த்வா ஆலேபங் அதா³ஸி. அத² கோ² ஸெட்டி²
க³ஹபதி ஸத்தாஹஸ்ஸ அச்சயேன ஜீவகங் கோமாரப⁴ச்சங் ஏதத³வோச – ‘‘நாஹங், ஆசரிய,
ஸக்கோமி ஏகேன பஸ்ஸேன ஸத்தமாஸே நிபஜ்ஜிது’’ந்தி. ‘‘நனு மே த்வங், க³ஹபதி,
படிஸ்ஸுணி – ஸக்கோமஹங், ஆசரிய, ஏகேன பஸ்ஸேன ஸத்தமாஸே
நிபஜ்ஜிது’’ந்தி? ‘‘ஸச்சாஹங், ஆசரிய, படிஸ்ஸுணிங், அபாஹங் மரிஸ்ஸாமி,
நாஹங் ஸக்கோமி ஏகேன பஸ்ஸேன ஸத்தமாஸே நிபஜ்ஜிது’’ந்தி. ‘‘தேன ஹி த்வங்,
க³ஹபதி, து³தியேன பஸ்ஸேன ஸத்தமாஸே நிபஜ்ஜாஹீ’’தி. அத² கோ² ஸெட்டி² க³ஹபதி
ஸத்தாஹஸ்ஸ அச்சயேன ஜீவகங் கோமாரப⁴ச்சங் ஏதத³வோச
‘‘நாஹங், ஆசரிய, ஸக்கோமி து³தியேன பஸ்ஸேன ஸத்தமாஸே நிபஜ்ஜிது’’ந்தி. ‘‘நனு
மே த்வங், க³ஹபதி, படிஸ்ஸுணி – ஸக்கோமஹங், ஆசரிய, து³தியேன பஸ்ஸேன ஸத்தமாஸே
நிபஜ்ஜிது’’ந்தி? ‘‘ஸச்சாஹங், ஆசரிய, படிஸ்ஸுணிங், அபாஹங் மரிஸ்ஸாமி,
நாஹங், ஆசரிய, ஸக்கோமி து³தியேன பஸ்ஸேன ஸத்தமாஸே நிபஜ்ஜிது’’ந்தி. ‘‘தேன ஹி
த்வங், க³ஹபதி, உத்தானோ ஸத்தமாஸே நிபஜ்ஜாஹீ’’தி. அத² கோ² ஸெட்டி² க³ஹபதி
ஸத்தாஹஸ்ஸ அச்சயேன ஜீவகங் கோமாரப⁴ச்சங் ஏதத³வோச – ‘‘நாஹங், ஆசரிய, ஸக்கோமி
உத்தானோ ஸத்தமாஸே நிபஜ்ஜிது’’ந்தி. ‘‘நனு மே த்வங், க³ஹபதி, படிஸ்ஸுணி –
ஸக்கோமஹங், ஆசரிய, உத்தானோ ஸத்தமாஸே நிபஜ்ஜிது’’ந்தி? ‘‘ஸச்சாஹங், ஆசரிய,
படிஸ்ஸுணிங், அபாஹங் மரிஸ்ஸாமி, நாஹங் ஸக்கோமி உத்தானோ ஸத்தமாஸே
நிபஜ்ஜிது’’ந்தி. ‘‘அஹங் சே தங், க³ஹபதி, ந வதெ³ய்யங், எத்தகம்பி த்வங் ந
நிபஜ்ஜெய்யாஸி, அபி ச படிகச்சேவ மயா ஞாதோ – தீஹி ஸத்தாஹேஹி ஸெட்டி² க³ஹபதி
அரோகோ³ ப⁴விஸ்ஸதீதி. உட்டே²ஹி , க³ஹபதி, அரோகோ³ஸி.
ஜானாஸி கிங் மே தெ³ய்யத⁴ம்மோ’’தி? ‘‘ஸப்³ப³ங் ஸாபதெய்யஞ்ச தே, ஆசரிய, ஹோது,
அஹஞ்ச தே தா³ஸோ’’தி. ‘‘அலங், க³ஹபதி, மா மே த்வங்
ஸப்³ப³ங் ஸாபதெய்யங் அதா³ஸி, மா ச மே தா³ஸோ. ரஞ்ஞோ ஸதஸஹஸ்ஸங் தே³ஹி, மய்ஹங்
ஸதஸஹஸ்ஸ’’ந்தி. அத² கோ² ஸெட்டி² க³ஹபதி அரோகோ³ ஸமானோ ரஞ்ஞோ ஸதஸஹஸ்ஸங்
அதா³ஸி, ஜீவகஸ்ஸ கோமாரப⁴ச்சஸ்ஸ ஸதஸஹஸ்ஸங்.

ராஜக³ஹஸெட்டி²வத்து² நிட்டி²தங்.

206. ஸெட்டி²புத்தவத்து²

333.
தேன கோ² பன ஸமயேன பா³ராணஸெய்யகஸ்ஸ ஸெட்டி²புத்தஸ்ஸ மொக்க²சிகாய கீளந்தஸ்ஸ
அந்தக³ண்டா²பா³தோ⁴ ஹோதி, யேன யாகு³பி பீதா ந ஸம்மா பரிணாமங் க³ச்ச²தி,
ப⁴த்தம்பி பு⁴த்தங் ந ஸம்மா பரிணாமங் க³ச்ச²தி,
உச்சாரோபி பஸ்ஸாவோபி ந பகு³ணோ. ஸோ தேன கிஸோ ஹோதி லூகோ² து³ப்³ப³ண்ணோ
உப்பண்டு³ப்பண்டு³கஜாதோ த⁴மனிஸந்த²தக³த்தோ. அத² கோ² பா³ராணஸெய்யகஸ்ஸ
ஸெட்டி²ஸ்ஸ ஏதத³ஹோஸி – ‘‘மய்ஹங் கோ² புத்தஸ்ஸ தாதி³ஸோ ஆபா³தோ⁴, யேன யாகு³பி
பீதா ந ஸம்மா பரிணாமங் க³ச்ச²தி, ப⁴த்தம்பி பு⁴த்தங் ந ஸம்மா பரிணாமங்
க³ச்ச²தி, உச்சாரோபி பஸ்ஸாவோபி ந பகு³ணோ. ஸோ தேன கிஸோ லூகோ² து³ப்³ப³ண்ணோ
உப்பண்டு³ப்பண்டு³கஜாதோ த⁴மனிஸந்த²தக³த்தோ. யங்னூனாஹங் ராஜக³ஹங் க³ந்த்வா
ராஜானங் ஜீவகங் வேஜ்ஜங் யாசெய்யங் புத்தங் மே திகிச்சி²து’’ந்தி. அத² கோ²
பா³ராணஸெய்யகோ ஸெட்டி² ராஜக³ஹங் க³ந்த்வா யேன ராஜா மாக³தோ⁴ ஸேனியோ
பி³ம்பி³ஸாரோ தேனுபஸங்கமி, உபஸங்கமித்வா ராஜானங் மாக³த⁴ங் ஸேனியங்
பி³ம்பி³ஸாரங் ஏதத³வோச – ‘‘மய்ஹங் கோ², தே³வ, புத்தஸ்ஸ தாதி³ஸோ ஆபா³தோ⁴,
யேன யாகு³பி பீதா ந ஸம்மா பரிணாமங் க³ச்ச²தி, ப⁴த்தம்பி பு⁴த்தங் ந ஸம்மா
பரிணாமங் க³ச்ச²தி, உச்சாரோபி பஸ்ஸாவோபி ந பகு³ணோ. ஸோ தேன கிஸோ லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ. ஸாது⁴ தே³வோ ஜீவகங் வேஜ்ஜங் ஆணாபேது புத்தங் மே திகிச்சி²து’’ந்தி.

அத² கோ² ராஜா மாக³தோ⁴ ஸேனியோ பி³ம்பி³ஸாரோ ஜீவகங்
கோமாரப⁴ச்சங் ஆணாபேஸி – ‘‘க³ச்ச², ப⁴ணே ஜீவக, பா³ராணஸிங் க³ந்த்வா
பா³ராணஸெய்யகங் ஸெட்டி²புத்தங் திகிச்சா²ஹீ’’தி. ‘‘ஏவங், தே³வா’’தி கோ²
ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ படிஸ்ஸுத்வா
பா³ராணஸிங் க³ந்த்வா யேன பா³ராணஸெய்யகோ ஸெட்டி²புத்தோ தேனுபஸங்கமி,
உபஸங்கமித்வா பா³ராணஸெய்யகஸ்ஸ ஸெட்டி²புத்தஸ்ஸ விகாரங் ஸல்லக்கெ²த்வா ஜனங்
உஸ்ஸாரெத்வா திரோகரணியங் பரிக்கி²பித்வா த²ம்பே⁴ உப்³ப³ந்தி⁴த்வா [உபனிப³ந்தி⁴த்வா (ஸீ॰ ஸ்யா॰)]
ப⁴ரியங் புரதோ ட²பெத்வா உத³ரச்ச²விங் உப்பாடெத்வா அந்தக³ண்டி²ங் நீஹரித்வா
ப⁴ரியாய த³ஸ்ஸேஸி – ‘‘பஸ்ஸ தே ஸாமிகஸ்ஸ ஆபா³த⁴ங், இமினா யாகு³பி பீதா ந
ஸம்மா பரிணாமங் க³ச்ச²தி, ப⁴த்தம்பி பு⁴த்தங் ந ஸம்மா பரிணாமங் க³ச்ச²தி,
உச்சாரோபி பஸ்ஸாவோபி ந பகு³ணோ; இமினாயங் கிஸோ லூகோ² து³ப்³ப³ண்ணோ
உப்பண்டு³ப்பண்டு³கஜாதோ த⁴மனிஸந்த²தக³த்தோ’’தி. அந்தக³ண்டி²ங்
வினிவேடெ²த்வா அந்தானி படிபவேஸெத்வா உத³ரச்ச²விங் ஸிப்³பி³த்வா ஆலேபங்
அதா³ஸி. அத² கோ² பா³ராணஸெய்யகோ ஸெட்டி²புத்தோ நசிரஸ்ஸேவ அரோகோ³ அஹோஸி. அத²
கோ² பா³ராணஸெய்யகோ ஸெட்டி² ‘புத்தோ மே அரோகோ³ டி²தோ’தி [அரோகா³பிதோதி (ஸீ॰)] ஜீவகஸ்ஸ கோமாரப⁴ச்சஸ்ஸ ஸோளஸஸஹஸ்ஸானி பாதா³ஸி. அத² கோ² ஜீவகோ கோமாரப⁴ச்சோ தானி ஸோளஸஸஹஸ்ஸானி ஆதா³ய புனதே³வ ராஜக³ஹங் பச்சாக³ஞ்சி² .

ஸெட்டி²புத்தவத்து² நிட்டி²தங்.

207. பஜ்ஜோதராஜவத்து²

334. தேன கோ² பன ஸமயேன ரஞ்ஞோ [உஜ்ஜேனியங் ரஞ்ஞோ (ஸ்யா॰)]
பஜ்ஜோதஸ்ஸ பண்டு³ரோகா³பா³தோ⁴ ஹோதி. ப³ஹூ மஹந்தா மஹந்தா தி³ஸாபாமொக்கா²
வேஜ்ஜா ஆக³ந்த்வா நாஸக்கி²ங்ஸு அரோக³ங் காதுங். ப³ஹுங் ஹிரஞ்ஞங் ஆதா³ய
அக³மங்ஸு. அத² கோ² ராஜா பஜ்ஜோதோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ
ஸந்திகே தூ³தங் பாஹேஸி – ‘‘மய்ஹங் கோ² தாதி³ஸோ ஆபா³தோ⁴, ஸாது⁴ தே³வோ ஜீவகங்
வேஜ்ஜங் ஆணாபேது, ஸோ மங் திகிச்சி²ஸ்ஸதீ’’தி. அத² கோ² ராஜா மாக³தோ⁴ ஸேனியோ
பி³ம்பி³ஸாரோ ஜீவகங் கோமாரப⁴ச்சங் ஆணாபேஸி – ‘‘க³ச்ச², ப⁴ணே ஜீவக;
உஜ்ஜேனிங் க³ந்த்வா ராஜானங் பஜ்ஜோதங் திகிச்சா²ஹீ’’தி. ‘‘ஏவங், தே³வா’’தி
கோ² ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ
படிஸ்ஸுத்வா உஜ்ஜேனிங் க³ந்த்வா யேன ராஜா பஜ்ஜோதோ தேனுபஸங்கமி;
உபஸங்கமித்வா ரஞ்ஞோ பஜ்ஜோதஸ்ஸ விகாரங் ஸல்லக்கெ²த்வா ராஜானங் பஜ்ஜோதங்
ஏதத³வோச – ‘‘ஸப்பிங் தே³ஹி [இத³ங் பத³த்³வயங் ஸீ॰ ஸ்யா॰ பொத்த²கேஸு நத்தி²],
ஸப்பிங் தே³வ, நிப்பசிஸ்ஸாமி. தங் தே³வோ பிவிஸ்ஸதீ’’தி. ‘‘அலங், ப⁴ணே
ஜீவக, யங் தே ஸக்கா வினா ஸப்பினா அரோக³ங் காதுங் தங் கரோஹி. ஜேகு³ச்ச²ங் மே
ஸப்பி, படிகூல’’ந்தி. அத² கோ² ஜீவகஸ்ஸ கோமாரப⁴ச்சஸ்ஸ ஏதத³ஹோஸி – ‘‘இமஸ்ஸ கோ² ரஞ்ஞோ தாதி³ஸோ ஆபா³தோ⁴ , ந ஸக்கா வினா ஸப்பினா அரோக³ங் காதுங். யங்னூனாஹங் ஸப்பிங் நிப்பசெய்யங்
கஸாவவண்ணங் கஸாவக³ந்த⁴ங் கஸாவரஸ’’ந்தி. அத² கோ² ஜீவகோ கோமாரப⁴ச்சோ
நானாபே⁴ஸஜ்ஜேஹி ஸப்பிங் நிப்பசி கஸாவவண்ணங் கஸாவக³ந்த⁴ங் கஸாவரஸங். அத² கோ²
ஜீவகஸ்ஸ கோமாரப⁴ச்சஸ்ஸ ஏதத³ஹோஸி – ‘‘இமஸ்ஸ கோ² ரஞ்ஞோ ஸப்பி பீதங்
பரிணாமெந்தங் உத்³தே³கங் த³ஸ்ஸதி. சண்டோ³யங் ராஜா கா⁴தாபெய்யாபி மங்.
யங்னூனாஹங் படிகச்சேவ ஆபுச்செ²ய்ய’’ந்தி. அத² கோ² ஜீவகோ கோமாரப⁴ச்சோ யேன
ராஜா பஜ்ஜோதோ தேனுபஸங்கமி, உபஸங்கமித்வா ராஜானங் பஜ்ஜோதங் ஏதத³வோச – ‘‘மயங்
கோ², தே³வ, வேஜ்ஜா நாம தாதி³ஸேன முஹுத்தேன மூலானி உத்³த⁴ராம பே⁴ஸஜ்ஜானி
ஸங்ஹராம. ஸாது⁴ தே³வோ வாஹனாகா³ரேஸு ச த்³வாரேஸு ச ஆணாபேது – யேன வாஹனேன
ஜீவகோ இச்ச²தி தேன வாஹனேன க³ச்ச²து, யேன த்³வாரேன இச்ச²தி தேன த்³வாரேன
க³ச்ச²து, யங் காலங் இச்ச²தி தங் காலங் க³ச்ச²து, யங் காலங் இச்ச²தி தங்
காலங் பவிஸதூ’’தி. அத² கோ² ராஜா பஜ்ஜோதோ வாஹனாகா³ரேஸு ச த்³வாரேஸு ச
ஆணாபேஸி – ‘‘யேன வாஹனேன ஜீவகோ இச்ச²தி தேன வாஹனேன க³ச்ச²து, யேன த்³வாரேன
இச்ச²தி தேன த்³வாரேன க³ச்ச²து, யங் காலங் இச்ச²தி தங் காலங் க³ச்ச²து, யங்
காலங் இச்ச²தி தங் காலங் பவிஸதூ’’தி.

தேன கோ² பன ஸமயேன ரஞ்ஞோ பஜ்ஜோதஸ்ஸ ப⁴த்³த³வதிகா நாம
ஹத்தி²னிகா பஞ்ஞாஸயோஜனிகா ஹோதி. அத² கோ² ஜீவகோ கோமாரப⁴ச்சோ ரஞ்ஞோ பஜ்ஜோதஸ்ஸ
ஸப்பிங் [தங் ஸப்பிங் (ஸ்யா॰)] உபனாமேஸி
– ‘‘கஸாவங் தே³வோ பிவதூ’’தி. அத² கோ² ஜீவகோ கோமாரப⁴ச்சோ ராஜானங் பஜ்ஜோதங்
ஸப்பிங் பாயெத்வா ஹத்தி²ஸாலங் க³ந்த்வா ப⁴த்³த³வதிகாய ஹத்தி²னிகாய நக³ரம்ஹா
நிப்பதி .

அத² கோ² ரஞ்ஞோ பஜ்ஜோதஸ்ஸ தங் ஸப்பி பீதங் பரிணாமெந்தங்
உத்³தே³கங் அதா³ஸி. அத² கோ² ராஜா பஜ்ஜோதோ மனுஸ்ஸே ஏதத³வோச – ‘‘து³ட்டே²ன,
ப⁴ணே, ஜீவகேன ஸப்பிங் பாயிதொம்ஹி. தேன ஹி, ப⁴ணே, ஜீவகங் வேஜ்ஜங்
விசினதா²’’தி. ‘‘ப⁴த்³த³வதிகாய, தே³வ, ஹத்தி²னிகாய நக³ரம்ஹா நிப்பதிதோ’’தி.
தேன கோ² பன ஸமயேன ரஞ்ஞோ பஜ்ஜோதஸ்ஸ காகோ நாம தா³ஸோ ஸட்டி²யோஜனிகோ ஹோதி,
அமனுஸ்ஸேன படிச்ச ஜாதோ. அத² கோ² ராஜா பஜ்ஜோதோ காகங் தா³ஸங் ஆணாபேஸி –
‘‘க³ச்ச², ப⁴ணே காக, ஜீவகங் வேஜ்ஜங் நிவத்தேஹி – ராஜா தங், ஆசரிய, நிவத்தாபேதீதி. ஏதே கோ², ப⁴ணே காக, வேஜ்ஜா நாம ப³ஹுமாயா. மா சஸ்ஸ கிஞ்சி படிக்³க³ஹேஸீ’’தி.

அத² கோ² காகோ தா³ஸோ ஜீவகங் கோமாரப⁴ச்சங் அந்தராமக்³கே³ கோஸம்பி³யங் ஸம்பா⁴வேஸி

பாதராஸங் கரொந்தங். அத² கோ² காகோ தா³ஸோ ஜீவகங் கோமாரப⁴ச்சங் ஏதத³வோச – ‘‘ராஜா தங், ஆசரிய, நிவத்தாபேதீ’’தி. ‘‘ஆக³மேஹி, ப⁴ணே காக, யாவ பு⁴ஞ்ஜாம [பு⁴ஞ்ஜாமி (ஸீ॰ ஸ்யா॰)].
ஹந்த³, ப⁴ணே காக, பு⁴ஞ்ஜஸ்ஸூ’’தி. ‘‘அலங், ஆசரிய, ரஞ்ஞாம்ஹி ஆணத்தோ – ஏதே
கோ², ப⁴ணே காக, வேஜ்ஜா நாம ப³ஹுமாயா, மா சஸ்ஸ கிஞ்சி படிக்³க³ஹேஸீ’’தி. தேன
கோ² பன ஸமயேன ஜீவகோ கோமாரப⁴ச்சோ நகே²ன பே⁴ஸஜ்ஜங் ஓலும்பெத்வா ஆமலகஞ்ச
கா²த³தி பானீயஞ்ச பிவதி. அத² கோ² ஜீவகோ கோமாரப⁴ச்சோ காகங் தா³ஸங் ஏதத³வோச –
‘‘ஹந்த³, ப⁴ணே காக, ஆமலகஞ்ச கா²த³ பானீயஞ்ச பிவஸ்ஸூ’’தி. அத² கோ² காகோ
தா³ஸோ – அயங் கோ² வேஜ்ஜோ ஆமலகஞ்ச கா²த³தி பானீயஞ்ச
பிவதி, ந அரஹதி கிஞ்சி பாபகங் ஹோதுந்தி – உபட்³டா⁴மலகஞ்ச கா²தி³ பானீயஞ்ச
அபாயி. தஸ்ஸ தங் உபட்³டா⁴மலகங் கா²தி³தங் தத்தே²வ நிச்சா²ரேஸி. அத² கோ²
காகோ தா³ஸோ ஜீவகங் கோமாரப⁴ச்சங் ஏதத³வோச – ‘‘அத்தி² மே, ஆசரிய,
ஜீவித’’ந்தி? ‘‘மா, ப⁴ணே காக, பா⁴யி, த்வங் சேவ அரோகோ³ ப⁴விஸ்ஸஸி ராஜா ச.
சண்டோ³ ஸோ ராஜா கா⁴தாபெய்யாபி மங், தேனாஹங் ந நிவத்தாமீ’’தி ப⁴த்³த³வதிகங்
ஹத்தி²னிகங் காகஸ்ஸ நிய்யாதெ³த்வா யேன ராஜக³ஹங் தேன பக்காமி. அனுபுப்³பே³ன
யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி; உபஸங்கமித்வா ரஞ்ஞோ
மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஏதமத்த²ங் ஆரோசேஸி. ‘‘ஸுட்டு², ப⁴ணே
ஜீவக, அகாஸி யம்பி ந நிவத்தோ, சண்டோ³ ஸோ ராஜா கா⁴தாபெய்யாபி த’’ந்தி. அத²
கோ² ராஜா பஜ்ஜோதோ அரோகோ³ ஸமானோ ஜீவகஸ்ஸ கோமாரப⁴ச்சஸ்ஸ ஸந்திகே தூ³தங்
பாஹேஸி – ‘‘ஆக³ச்ச²து ஜீவகோ, வரங் த³ஸ்ஸாமீ’’தி. ‘‘அலங், அய்யோ [தே³வ (ஸ்யா॰)], அதி⁴காரங் மே தே³வோ ஸரதூ’’தி.

பஜ்ஜோதராஜவத்து² நிட்டி²தங்.

208. ஸிவெய்யகது³ஸ்ஸயுக³கதா²

335. தேன கோ² பன ஸமயேன ரஞ்ஞோ பஜ்ஜோதஸ்ஸ ஸிவெய்யகங் து³ஸ்ஸயுக³ங் உப்பன்னங் ஹோதி – ப³ஹூனங் [ப³ஹுன்னங் (ஸீ॰ ஸ்யா॰)] து³ஸ்ஸானங் ப³ஹூனங் து³ஸ்ஸயுகா³னங் ப³ஹூனங் து³ஸ்ஸயுக³ஸதானங் ப³ஹூனங் து³ஸ்ஸயுக³ஸஹஸ்ஸானங் ப³ஹூனங் து³ஸ்ஸயுக³ஸதஸஹஸ்ஸானங்
அக்³க³ஞ்ச ஸெட்ட²ஞ்ச மொக்க²ஞ்ச உத்தமஞ்ச பவரஞ்ச. அத² கோ² ராஜா பஜ்ஜோதோ தங்
ஸிவெய்யகங் து³ஸ்ஸயுக³ங் ஜீவகஸ்ஸ கோமாரப⁴ச்சஸ்ஸ பாஹேஸி. அத² கோ² ஜீவகஸ்ஸ
கோமாரப⁴ச்சஸ்ஸ ஏதத³ஹோஸி – ‘‘இத³ங் கோ² மே ஸிவெய்யகங் து³ஸ்ஸயுக³ங் ரஞ்ஞா
பஜ்ஜோதேன பஹிதங் – ப³ஹூனங் து³ஸ்ஸானங் ப³ஹூனங் து³ஸ்ஸயுகா³னங் ப³ஹூனங்
து³ஸ்ஸயுக³ஸதானங் ப³ஹூனங் து³ஸ்ஸயுக³ஸஹஸ்ஸானங் ப³ஹூனங்
து³ஸ்ஸயுக³ஸதஸஹஸ்ஸானங் அக்³க³ஞ்ச ஸெட்ட²ஞ்ச மொக்க²ஞ்ச உத்தமஞ்ச பவரஞ்ச.
நயித³ங் அஞ்ஞோ கோசி பச்சாரஹதி அஞ்ஞத்ர தேன ப⁴க³வதா அரஹதா
ஸம்மாஸம்பு³த்³தே⁴ன, ரஞ்ஞா வா மாக³தே⁴ன ஸேனியேன பி³ம்பி³ஸாரேனா’’தி.

ஸிவெய்யகது³ஸ்ஸயுக³கதா² நிட்டி²தா.

209. ஸமத்திங்ஸவிரேசனகதா²

336. தேன கோ² பன ஸமயேன ப⁴க³வதோ காயோ தோ³ஸாபி⁴ஸன்னோ ஹோதி. அத² கோ² ப⁴க³வா ஆயஸ்மந்தங் ஆனந்த³ங் ஆமந்தேஸி – ‘‘தோ³ஸாபி⁴ஸன்னோ
கோ², ஆனந்த³, ததா²க³தஸ்ஸ காயோ. இச்ச²தி ததா²க³தோ விரேசனங் பாது’’ந்தி. அத²
கோ² ஆயஸ்மா ஆனந்தோ³ யேன ஜீவகோ கோமாரப⁴ச்சோ தேனுபஸங்கமி; உபஸங்கமித்வா
ஜீவகங் கோமாரப⁴ச்சங் ஏதத³வோச – ‘‘தோ³ஸாபி⁴ஸன்னோ கோ², ஆவுஸோ ஜீவக,
ததா²க³தஸ்ஸ காயோ. இச்ச²தி ததா²க³தோ விரேசனங் பாது’’ந்தி. ‘‘தேன ஹி, ப⁴ந்தே
ஆனந்த³, ப⁴க³வதோ காயங் கதிபாஹங் ஸினேஹேதா²’’தி. அத² கோ² ஆயஸ்மா ஆனந்தோ³
ப⁴க³வதோ காயங் கதிபாஹங் ஸினேஹெத்வா யேன ஜீவகோ கோமாரப⁴ச்சோ தேனுபஸங்கமி;
உபஸங்கமித்வா ஜீவகங் கோமாரப⁴ச்சங் ஏதத³வோச – ‘‘ஸினித்³தோ⁴ கோ², ஆவுஸோ ஜீவக,
ததா²க³தஸ்ஸ காயோ. யஸ்ஸ தா³னி காலங் மஞ்ஞஸீ’’தி. அத² கோ² ஜீவகஸ்ஸ
கோமாரப⁴ச்சஸ்ஸ ஏதத³ஹோஸி – ‘‘ந கோ² மேதங் பதிரூபங் யோஹங் ப⁴க³வதோ ஓளாரிகங்
விரேசனங் த³தெ³ய்ய’’ந்தி. தீணி உப்பலஹத்தா²னி நானாபே⁴ஸஜ்ஜேஹி பரிபா⁴வெத்வா
யேன ப⁴க³வா தேனுபஸங்கமி, உபஸங்கமித்வா ஏகங்
உப்பலஹத்த²ங் ப⁴க³வதோ உபனாமேஸி – ‘‘இமங், ப⁴ந்தே, ப⁴க³வா பட²மங்
உப்பலஹத்த²ங் உபஸிங்க⁴து. இத³ங் ப⁴க³வந்தங் த³ஸக்க²த்துங் விரேசெஸ்ஸதீ’’தி.
து³தியங் உப்பலஹத்த²ங் ப⁴க³வதோ உபனாமேஸி – ‘‘இமங், ப⁴ந்தே, ப⁴க³வா
து³தியங் உப்பலஹத்த²ங் உபஸிங்க⁴து. இத³ங் ப⁴க³வந்தங் த³ஸக்க²த்துங்
விரேசெஸ்ஸதீ’’தி. ததியங் உப்பலஹத்த²ங் ப⁴க³வதோ உபனாமேஸி – ‘‘இமங், ப⁴ந்தே , ப⁴க³வா ததியங் உப்பலஹத்த²ங் உபஸிங்க⁴து. இத³ங் ப⁴க³வந்தங் த³ஸக்க²த்துங் விரேசெஸ்ஸதீ’’தி .
ஏவங் ப⁴க³வதோ ஸமத்திங்ஸாய விரேசனங் ப⁴விஸ்ஸதீதி. அத² கோ² ஜீவகோ
கோமாரப⁴ச்சோ ப⁴க³வதோ ஸமத்திங்ஸாய விரேசனங் த³த்வா ப⁴க³வந்தங் அபி⁴வாதெ³த்வா
பத³க்கி²ணங் கத்வா பக்காமி. அத² கோ² ஜீவகஸ்ஸ கோமாரப⁴ச்சஸ்ஸ ப³ஹி
த்³வாரகொட்ட²கா நிக்க²ந்தஸ்ஸ ஏதத³ஹோஸி – ‘‘மயா கோ² ப⁴க³வதோ ஸமத்திங்ஸாய
விரேசனங் தி³ன்னங். தோ³ஸாபி⁴ஸன்னோ ததா²க³தஸ்ஸ காயோ .
ந ப⁴க³வந்தங் ஸமத்திங்ஸக்க²த்துங் விரேசெஸ்ஸதி, ஏகூனத்திங்ஸக்க²த்துங்
ப⁴க³வந்தங் விரேசெஸ்ஸதி. அபி ச, ப⁴க³வா விரித்தோ நஹாயிஸ்ஸதி. நஹாதங்
ப⁴க³வந்தங் ஸகிங் விரேசெஸ்ஸதி. ஏவங் ப⁴க³வதோ ஸமத்திங்ஸாய விரேசனங்
ப⁴விஸ்ஸதீ’’தி.

அத² கோ² ப⁴க³வா ஜீவகஸ்ஸ கோமாரப⁴ச்சஸ்ஸ சேதஸா
சேதோபரிவிதக்கமஞ்ஞாய ஆயஸ்மந்தங் ஆனந்த³ங் ஆமந்தேஸி – ‘‘இதா⁴னந்த³, ஜீவகஸ்ஸ
கோமாரப⁴ச்சஸ்ஸ ப³ஹி த்³வாரகொட்ட²கா நிக்க²ந்தஸ்ஸ ஏதத³ஹோஸி – ‘மயா கோ²
ப⁴க³வதோ ஸமத்திங்ஸாய விரேசனங் தி³ன்னங். தோ³ஸாபி⁴ஸன்னோ ததா²க³தஸ்ஸ காயோ. ந
ப⁴க³வந்தங் ஸமதிங்ஸக்க²த்துங் விரேசெஸ்ஸதி, ஏகூனதிங்ஸக்க²த்துங் ப⁴க³வந்தங்
விரேசெஸ்ஸதி. அபி ச, ப⁴க³வா விரித்தோ நஹாயிஸ்ஸதி. நஹாதங் ப⁴க³வந்தங் ஸகிங்
விரேசெஸ்ஸதி. ஏவங் ப⁴க³வதோ ஸமத்திங்ஸாய விரேசனங் ப⁴விஸ்ஸதீ’தி. தேன
ஹானந்த³, உண்ஹோத³கங் படியாதே³ஹீ’’தி. ‘‘ஏவங், ப⁴ந்தே’’தி கோ² ஆயஸ்மா
ஆனந்தோ³ ப⁴க³வதோ படிஸ்ஸுணித்வா உண்ஹோத³கங் படியாதே³ஸி.

அத² கோ² ஜீவகோ கோமாரப⁴ச்சோ யேன ப⁴க³வா தேனுபஸங்கமி,
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங்
நிஸின்னோ கோ² ஜீவகோ கோமாரப⁴ச்சோ ப⁴க³வந்தங் ஏதத³வோச – ‘‘விரித்தோ, ப⁴ந்தே,
ப⁴க³வா’’தி? ‘‘விரித்தொம்ஹி, ஜீவகா’’தி. இத⁴ மய்ஹங், ப⁴ந்தே, ப³ஹி
த்³வாரகொட்ட²கா நிக்க²ந்தஸ்ஸ ஏதத³ஹோஸி – ‘‘மயா கோ² ப⁴க³வதோ ஸமத்திங்ஸாய
விரேசனங் தி³ன்னங். தோ³ஸாபி⁴ஸன்னோ ததா²க³தஸ்ஸ காயோ. ந ப⁴க³வந்தங்
ஸமத்திங்ஸக்க²த்துங் விரேசெஸ்ஸதி, ஏகூனத்திங்ஸக்க²த்துங் ப⁴க³வந்தங்
விரேசெஸ்ஸதி. அபி ச, ப⁴க³வா விரித்தோ நஹாயிஸ்ஸதி. நஹாதங் ப⁴க³வந்தங் ஸகிங்
விரேசெஸ்ஸதி. ஏவங் ப⁴க³வதோ ஸமத்திங்ஸாய விரேசனங் ப⁴விஸ்ஸதீ’’தி. நஹாயது,
ப⁴ந்தே, ப⁴க³வா, நஹாயது ஸுக³தோதி. அத² கோ² ப⁴க³வா உண்ஹோத³கங் நஹாயி. நஹாதங்
ப⁴க³வந்தங் ஸகிங் விரேசேஸி. ஏவங் ப⁴க³வதோ ஸமத்திங்ஸாய விரேசனங் அஹோஸி. அத²
கோ² ஜீவகோ கோமாரப⁴ச்சோ ப⁴க³வந்தங் ஏதத³வோச – ‘‘யாவ, ப⁴ந்தே, ப⁴க³வதோ காயோ பகதத்தோ ஹோதி, அலங் [அஹங் தாவ யூஸபிண்டபாதேனாதி (ஸீ॰), அலங் யூஸபிண்டகேனாதி (ஸ்யா॰)] யூஸபிண்ட³பாதேனா’’தி.

ஸமத்திங்ஸவிரேசனகதா² நிட்டி²தா.

210. வரயாசனாகதா²

337. அத² கோ² ப⁴க³வதோ காயோ நசிரஸ்ஸேவ பகதத்தோ அஹோஸி. அத² கோ² ஜீவகோ கோமாரப⁴ச்சோ தங் ஸிவெய்யகங் து³ஸ்ஸயுக³ங் ஆதா³ய யேன ப⁴க³வா தேனுபஸங்கமி ,
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங்
நிஸின்னோ கோ² ஜீவகோ கோமாரப⁴ச்சோ ப⁴க³வந்தங் ஏதத³வோச – ‘‘ஏகாஹங், ப⁴ந்தே,
ப⁴க³வந்தங் வரங் யாசாமீ’’தி. ‘‘அதிக்கந்தவரா கோ², ஜீவக, ததா²க³தா’’தி.
‘‘யஞ்ச, ப⁴ந்தே, கப்பதி யஞ்ச அனவஜ்ஜ’’ந்தி. ‘‘வதே³ஹி, ஜீவகா’’தி. ‘‘ப⁴க³வா,
ப⁴ந்தே, பங்ஸுகூலிகோ, பி⁴க்கு²ஸங்கோ⁴ ச. இத³ங் மே, ப⁴ந்தே, ஸிவெய்யகங்
து³ஸ்ஸயுக³ங் ரஞ்ஞா பஜ்ஜோதேன பஹிதங் – ப³ஹூனங் து³ஸ்ஸானங் ப³ஹூனங்
து³ஸ்ஸயுகா³னங் ப³ஹூனங் து³ஸ்ஸயுக³ஸதானங் ப³ஹூனங் து³ஸ்ஸயுக³ஸஹஸ்ஸானங்
ப³ஹூனங் து³ஸ்ஸயுக³ஸதஸஹஸ்ஸானங் அக்³க³ஞ்ச ஸெட்ட²ஞ்ச மொக்க²ஞ்ச உத்தமஞ்ச
பவரஞ்ச. படிக்³க³ண்ஹாது மே, ப⁴ந்தே, ப⁴க³வா ஸிவெய்யகங் து³ஸ்ஸயுக³ங்;
பி⁴க்கு²ஸங்க⁴ஸ்ஸ ச க³ஹபதிசீவரங் அனுஜானாதூ’’தி. படிக்³க³ஹேஸி ப⁴க³வா
ஸிவெய்யகங் து³ஸ்ஸயுக³ங். அத² கோ² ப⁴க³வா ஜீவகங் கோமாரப⁴ச்சங் த⁴ம்மியா
கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² ஜீவகோ
கோமாரப⁴ச்சோ ப⁴க³வதா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ
ஸம்பஹங்ஸிதோ உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா
பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங்
கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, க³ஹபதிசீவரங். யோ
இச்ச²தி, பங்ஸுகூலிகோ ஹோது. யோ இச்ச²தி, க³ஹபதிசீவரங் ஸாதி³யது.
இதரீதரேனபாஹங் [பஹங் (ஸீ॰), சாஹங் (ஸ்யா॰)], பி⁴க்க²வே, ஸந்துட்டி²ங் வண்ணேமீ’’தி.

அஸ்ஸோஸுங் கோ² ராஜக³ஹே மனுஸ்ஸா – ‘‘ப⁴க³வதா கிர பி⁴க்கூ²னங் க³ஹபதிசீவரங்
அனுஞ்ஞாத’’ந்தி. தே ச மனுஸ்ஸா ஹட்டா² அஹேஸுங் உத³க்³கா³ ‘‘இதா³னி கோ² மயங்
தா³னானி த³ஸ்ஸாம புஞ்ஞானி கரிஸ்ஸாம, யதோ ப⁴க³வதா பி⁴க்கூ²னங் க³ஹபதிசீவரங்
அனுஞ்ஞாத’’ந்தி. ஏகாஹேனேவ ராஜக³ஹே ப³ஹூனி சீவரஸஹஸ்ஸானி உப்பஜ்ஜிங்ஸு.

அஸ்ஸோஸுங் கோ² ஜானபதா³ மனுஸ்ஸா
– ‘‘ப⁴க³வதா கிர பி⁴க்கூ²னங் க³ஹபதிசீவரங் அனுஞ்ஞாத’’ந்தி. தே ச மனுஸ்ஸா
ஹட்டா² அஹேஸுங் உத³க்³கா³ – ‘‘இதா³னி கோ² மயங் தா³னானி த³ஸ்ஸாம புஞ்ஞானி
கரிஸ்ஸாம, யதோ ப⁴க³வதா பி⁴க்கூ²னங் க³ஹபதிசீவரங் அனுஞ்ஞாத’’ந்தி. ஜனபதே³பி
ஏகாஹேனேவ ப³ஹூனி சீவரஸஹஸ்ஸானி உப்பஜ்ஜிங்ஸு.

தேன கோ² பன ஸமயேன ஸங்க⁴ஸ்ஸ பாவாரோ உப்பன்னோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, பாவாரந்தி.

கோஸெய்யபாவாரோ உப்பன்னோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, கோஸெய்யபாவாரந்தி.

கோஜவங் உப்பன்னங் ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, கோஜவந்தி.

வரயாசனாகதா² நிட்டி²தா.

பட²மபா⁴ணவாரோ நிட்டி²தோ.

211. கம்ப³லானுஜானநாதி³கதா²

338.
தேன கோ² பன ஸமயேன காஸிராஜா ஜீவகஸ்ஸ கோமாரப⁴ச்சஸ்ஸ அட்³ட⁴காஸிகங் கம்ப³லங்
பாஹேஸி உபட்³ட⁴காஸினங் க²மமானங். அத² கோ² ஜீவகோ கோமாரப⁴ச்சோ தங்
அட்³ட⁴காஸிகங் கம்ப³லங் ஆதா³ய யேன ப⁴க³வா தேனுபஸங்கமி, உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஜீவகோ
கோமாரப⁴ச்சோ ப⁴க³வந்தங் ஏதத³வோச – ‘‘அயங் மே,
ப⁴ந்தே, அட்³ட⁴காஸிகோ கம்ப³லோ காஸிரஞ்ஞா பஹிதோ உபட்³ட⁴காஸினங் க²மமானோ.
படிக்³க³ண்ஹாது மே, ப⁴ந்தே, ப⁴க³வா கம்ப³லங், யங் மமஸ்ஸ தீ³க⁴ரத்தங் ஹிதாய
ஸுகா²யா’’தி. படிக்³க³ஹேஸி ப⁴க³வா கம்ப³லங். அத² கோ² ப⁴க³வா ஜீவகங்
கோமாரப⁴ச்சங் த⁴ம்மியா கதா²ய ஸந்த³ஸ்ஸேஸி…பே॰… பத³க்கி²ணங் கத்வா பக்காமி.
அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா
பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, கம்ப³ல’’ந்தி.

339.
தேன கோ² பன ஸமயேன ஸங்க⁴ஸ்ஸ உச்சாவசானி சீவரானி உப்பன்னானி ஹொந்தி. அத² கோ²
பி⁴க்கூ²னங் ஏதத³ஹோஸி – ‘‘கிங் நு கோ² ப⁴க³வதா சீவரங் அனுஞ்ஞாதங் ,
கிங் அனநுஞ்ஞாத’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி,
பி⁴க்க²வே, ச² சீவரானி – கோ²மங் கப்பாஸிகங் கோஸெய்யங் கம்ப³லங் ஸாணங்
ப⁴ங்க³ந்தி.

340. தேன கோ² பன ஸமயேன யே தே பி⁴க்கூ² க³ஹபதிசீவரங் ஸாதி³யந்தி தே குக்குச்சாயந்தா
பங்ஸுகூலங் ந ஸாதி³யந்தி – ஏகங்யேவ ப⁴க³வதா சீவரங் அனுஞ்ஞாதங், ந த்³வேதி.
ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, க³ஹபதிசீவரங்
ஸாதி³யந்தேன பங்ஸுகூலம்பி ஸாதி³யிதுங்; தது³ப⁴யேனபாஹங், பி⁴க்க²வே,
ஸந்துட்டி²ங் வண்ணேமீதி.

கம்ப³லானுஜானநாதி³கதா² நிட்டி²தா.

212. பங்ஸுகூலபரியேஸனகதா²

341. தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³
அத்³தா⁴னமக்³க³ப்படிபன்னா ஹொந்தி. ஏகச்சே பி⁴க்கூ² ஸுஸானங் ஓக்கமிங்ஸு
பங்ஸுகூலாய, ஏகச்சே பி⁴க்கூ² நாக³மேஸுங். யே தே பி⁴க்கூ² ஸுஸானங்
ஓக்கமிங்ஸு பங்ஸுகூலாய தே பங்ஸுகூலானி லபி⁴ங்ஸு. யே தே பி⁴க்கூ² நாக³மேஸுங்
தே ஏவமாஹங்ஸு – ‘‘அம்ஹாகம்பி, ஆவுஸோ, பா⁴க³ங் தே³தா²’’தி. தே ஏவமாஹங்ஸு –
‘‘ந மயங், ஆவுஸோ, தும்ஹாகங் பா⁴க³ங் த³ஸ்ஸாம. கிஸ்ஸ தும்ஹே
நாக³மித்தா²’’தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
நாக³மெந்தானங் நாகாமா பா⁴க³ங் தா³துந்தி.

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³
அத்³தா⁴னமக்³க³ப்படிபன்னா ஹொந்தி. ஏகச்சே பி⁴க்கூ² ஸுஸானங் ஓக்கமிங்ஸு
பங்ஸுகூலாய, ஏகச்சே பி⁴க்கூ² ஆக³மேஸுங். யே தே பி⁴க்கூ² ஸுஸானங் ஓக்கமிங்ஸு
பங்ஸுகூலாய தே பங்ஸுகூலானி லபி⁴ங்ஸு. யே தே பி⁴க்கூ² ஆக³மேஸுங் தே
ஏவமாஹங்ஸு – ‘‘அம்ஹாகம்பி, ஆவுஸோ, பா⁴க³ங் தே³தா²’’தி. தே ஏவமாஹங்ஸு – ‘‘ந
மயங், ஆவுஸோ, தும்ஹாகங் பா⁴க³ங் த³ஸ்ஸாம. கிஸ்ஸ தும்ஹே ந ஓக்கமித்தா²’’தி?
ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஆக³மெந்தானங் அகாமா
பா⁴க³ங் தா³துந்தி.

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³
அத்³தா⁴னமக்³க³ப்படிபன்னா ஹொந்தி. ஏகச்சே பி⁴க்கூ² பட²மங் ஸுஸானங்
ஓக்கமிங்ஸு பங்ஸுகூலாய, ஏகச்சே பி⁴க்கூ² பச்சா² ஓக்கமிங்ஸு. யே தே பி⁴க்கூ²
பட²மங் ஸுஸானங் ஓக்கமிங்ஸு பங்ஸுகூலாய தே பங்ஸுகூலானி லபி⁴ங்ஸு. யே தே
பி⁴க்கூ² பச்சா² ஓக்கமிங்ஸு தே ந லபி⁴ங்ஸு. தே ஏவமாஹங்ஸு – ‘‘அம்ஹாகம்பி, ஆவுஸோ ,
பா⁴க³ங் தே³தா²’’தி. தே ஏவமாஹங்ஸு – ‘‘ந மயங், ஆவுஸோ, தும்ஹாகங் பா⁴க³ங்
த³ஸ்ஸாம. கிஸ்ஸ தும்ஹே பச்சா² ஓக்கமித்தா²’’தி? ப⁴க³வதோ ஏதமத்த²ங்
ஆரோசேஸுங். அனுஜானாமி, பி⁴க்க²வே, பச்சா² ஓக்கந்தானங் நாகாமா பா⁴க³ங்
தா³துந்தி.

தேன கோ² பன ஸமயேன ஸம்ப³ஹுலா
பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹொந்தி. தே ஸதி³ஸா
ஸுஸானங் ஓக்கமிங்ஸு பங்ஸுகூலாய. ஏகச்சே பி⁴க்கூ² பங்ஸுகூலானி லபி⁴ங்ஸு,
ஏகச்சே பி⁴க்கூ² ந லபி⁴ங்ஸு . யே தே பி⁴க்கூ² ந
லபி⁴ங்ஸு, தே ஏவமாஹங்ஸு – ‘‘அம்ஹாகம்பி, ஆவுஸோ, பா⁴க³ங் தே³தா²’’தி. தே
ஏவமாஹங்ஸு – ‘‘ந மயங், ஆவுஸோ, தும்ஹாகங் பா⁴க³ங் த³ஸ்ஸாம. கிஸ்ஸ தும்ஹே ந
லபி⁴த்தா²’’தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
ஸதி³ஸானங் ஓக்கந்தானங் அகாமா பா⁴க³ங் தா³துந்தி.

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³
அத்³தா⁴னமக்³க³ப்படிபன்னா ஹொந்தி. தே கதிகங் கத்வா ஸுஸானங் ஓக்கமிங்ஸு
பங்ஸுகூலாய. ஏகச்சே பி⁴க்கூ² பங்ஸுகூலானி லபி⁴ங்ஸு, ஏகச்சே பி⁴க்கூ² ந
லபி⁴ங்ஸு. யே தே பி⁴க்கூ² ந லபி⁴ங்ஸு தே ஏவமாஹங்ஸு – ‘‘அம்ஹாகம்பி, ஆவுஸோ,
பா⁴க³ங் தே³தா²’’தி. தே ஏவமாஹங்ஸு – ‘‘ந மயங், ஆவுஸோ, தும்ஹாகங் பா⁴க³ங்
த³ஸ்ஸாம. கிஸ்ஸ தும்ஹே ந லபி⁴த்தா²’’தி? ப⁴க³வதோ ஏதமத்த²ங் ஆரோசேஸுங்.
அனுஜானாமி, பி⁴க்க²வே, கதிகங் கத்வா ஓக்கந்தானங் அகாமா பா⁴க³ங் தா³துந்தி.

பங்ஸுகூலபரியேஸனகதா² நிட்டி²தா.

213. சீவரபடிக்³கா³ஹகஸம்முதிகதா²

342. தேன கோ² பன ஸமயேன மனுஸ்ஸா சீவரங் ஆதா³ய ஆராமங் ஆக³ச்ச²ந்தி. தே படிக்³கா³ஹகங் அலப⁴மானா படிஹரந்தி. சீவரங் பரித்தங்
உப்பஜ்ஜதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
பஞ்சஹங்கே³ஹி ஸமன்னாக³தங் பி⁴க்கு²ங் சீவரபடிக்³கா³ஹகங் ஸம்மன்னிதுங் – யோ ந
ச²ந்தா³க³திங் க³ச்செ²ய்ய, ந தோ³ஸாக³திங் க³ச்செ²ய்ய, ந மோஹாக³திங்
க³ச்செ²ய்ய, ந ப⁴யாக³திங் க³ச்செ²ய்ய, க³ஹிதாக³ஹிதஞ்ச ஜானெய்ய. ஏவஞ்ச பன,
பி⁴க்க²வே, ஸம்மன்னிதப்³போ³. பட²மங் பி⁴க்கு² யாசிதப்³போ³; யாசித்வா
ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங் ஸங்கோ⁴ இத்த²ன்னாமங் பி⁴க்கு²ங் சீவரபடிக்³கா³ஹகங் ஸம்மன்னெய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமங் பி⁴க்கு²ங் சீவரபடிக்³கா³ஹகங் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ சீவரபடிக்³கா³ஹகஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.

‘‘ஸம்மதோ ஸங்கே⁴ன இத்த²ன்னாமோ பி⁴க்கு² சீவரபடிக்³கா³ஹகோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.

தேன கோ² பன ஸமயேன சீவரபடிக்³கா³ஹகா பி⁴க்கூ² சீவரங்
படிக்³க³ஹெத்வா தத்தே²வ உஜ்ஜி²த்வா பக்கமந்தி. சீவரங் நஸ்ஸதி. ப⁴க³வதோ
ஏதமத்த²ங் ஆரோசேஸுங். அனுஜானாமி, பி⁴க்க²வே ,
பஞ்சஹங்கே³ஹி ஸமன்னாக³தங் பி⁴க்கு²ங் சீவரனித³ஹகங் ஸம்மன்னிதுங் – யோ ந
ச²ந்தா³க³திங் க³ச்செ²ய்ய, ந தோ³ஸாக³திங் க³ச்செ²ய்ய, ந மோஹாக³திங்
க³ச்செ²ய்ய, ந ப⁴யாக³திங் க³ச்செ²ய்ய, நிஹிதானிஹிதஞ்ச ஜானெய்ய. ஏவஞ்ச பன,
பி⁴க்க²வே, ஸம்மன்னிதப்³போ³. பட²மங் பி⁴க்கு² யாசிதப்³போ³; யாசித்வா
ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ
பத்தகல்லங், ஸங்கோ⁴ இத்த²ன்னாமங் பி⁴க்கு²ங் சீவரனித³ஹகங் ஸம்மன்னெய்ய. ஏஸா
ஞத்தி. ‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமங் பி⁴க்கு²ங்
சீவரனித³ஹகங் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ
சீவரனித³ஹகஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.

‘‘ஸம்மதோ ஸங்கே⁴ன இத்த²ன்னாமோ பி⁴க்கு² சீவரனித³ஹகோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.

சீவரபடிக்³கா³ஹகஸம்முதிகதா² நிட்டி²தா.

214. ப⁴ண்டா³கா³ரஸம்முதிஆதி³கதா²

343.
தேன கோ² பன ஸமயேன சீவரனித³ஹகோ பி⁴க்கு² மண்ட³பேபி ருக்க²மூலேபி
நிப்³ப³கோஸேபி சீவரங் நித³ஹதி, உந்தூ³ரேஹிபி உபசிகாஹிபி க²ஜ்ஜந்தி. ப⁴க³வதோ
ஏதமத்த²ங் ஆரோசேஸுங். அனுஜானாமி, பி⁴க்க²வே, ப⁴ண்டா³கா³ரங் ஸம்மன்னிதுங்,
யங் ஸங்கோ⁴ ஆகங்க²தி விஹாரங் வா அட்³ட⁴யோக³ங் வா பாஸாத³ங் வா ஹம்மியங் வா
கு³ஹங் வா. ஏவஞ்ச பன, பி⁴க்க²வே, ஸம்மன்னிதப்³போ³. ப்³யத்தேன பி⁴க்கு²னா
படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் விஹாரங் ப⁴ண்டா³கா³ரங் ஸம்மன்னெய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமங்
விஹாரங் ப⁴ண்டா³கா³ரங் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ
விஹாரஸ்ஸ ப⁴ண்டா³கா³ரஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.

‘‘ஸம்மதோ ஸங்கே⁴ன இத்த²ன்னாமோ விஹாரோ ப⁴ண்டா³கா³ரங். க²மதி ஸங்க⁴ஸ்ஸ , தஸ்மா துண்ஹீ, ஏவமேதங் தா⁴ரயாமீ’’தி.

தேன கோ² பன ஸமயேன ஸங்க⁴ஸ்ஸ ப⁴ண்டா³கா³ரே சீவரங்
அகு³த்தங் ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
பஞ்சஹங்கே³ஹி ஸமன்னாக³தங் பி⁴க்கு²ங் ப⁴ண்டா³கா³ரிகங் ஸம்மன்னிதுங் – யோ ந
ச²ந்தா³க³திங் க³ச்செ²ய்ய, ந தோ³ஸாக³திங் க³ச்செ²ய்ய, ந மோஹாக³திங்
க³ச்செ²ய்ய, ந ப⁴யாக³திங் க³ச்செ²ய்ய, கு³த்தாகு³த்தஞ்ச ஜானெய்ய. ஏவஞ்ச பன,
பி⁴க்க²வே, ஸம்மன்னிதப்³போ³. பட²மங் பி⁴க்கு² யாசிதப்³போ³; யாசித்வா
ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் பி⁴க்கு²ங் ப⁴ண்டா³கா³ரிகங் ஸம்மன்னெய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமங்
பி⁴க்கு²ங் ப⁴ண்டா³கா³ரிகங் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ
பி⁴க்கு²னோ ப⁴ண்டா³கா³ரிகஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ
பா⁴ஸெய்ய.

‘‘ஸம்மதோ ஸங்கே⁴ன இத்த²ன்னாமோ பி⁴க்கு² ப⁴ண்டா³கா³ரிகோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.

தேன கோ² பன ஸமயேன ச²ப்³ப³க்³கி³யா பி⁴க்கூ²
ப⁴ண்டா³கா³ரிகங் வுட்டா²பெந்தி. ப⁴க³வதோ ஏதமத்த²ங் ஆரோசேஸுங். ந,
பி⁴க்க²வே, ப⁴ண்டா³கா³ரிகோ வுட்டா²பேதப்³போ³. யோ வுட்டா²பெய்ய, ஆபத்தி
து³க்கடஸ்ஸாதி.

தேன கோ² பன ஸமயேன ஸங்க⁴ஸ்ஸ ப⁴ண்டா³கா³ரே சீவரங் உஸ்ஸன்னங் ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே , ஸம்முகீ²பூ⁴தேன ஸங்கே⁴ன பா⁴ஜேதுந்தி.

தேன கோ² பன ஸமயேன ஸங்கோ⁴ சீவரங் பா⁴ஜெந்தோ கோலாஹலங்
அகாஸி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, பஞ்சஹங்கே³ஹி
ஸமன்னாக³தங் பி⁴க்கு²ங் சீவரபா⁴ஜகங் ஸம்மன்னிதுங் – யோ ந ச²ந்தா³க³திங்
க³ச்செ²ய்ய, ந தோ³ஸாக³திங் க³ச்செ²ய்ய, ந மோஹாக³திங் க³ச்செ²ய்ய, ந
ப⁴யாக³திங் க³ச்செ²ய்ய, பா⁴ஜிதாபா⁴ஜிதஞ்ச ஜானெய்ய. ஏவஞ்ச பன, பி⁴க்க²வே,
ஸம்மன்னிதப்³போ³. பட²மங் பி⁴க்கு² யாசிதப்³போ³; யாசித்வா ப்³யத்தேன
பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் பி⁴க்கு²ங் சீவரபா⁴ஜகங் ஸம்மன்னெய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமங்
பி⁴க்கு²ங் சீவரபா⁴ஜகங் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ
பி⁴க்கு²னோ சீவரபா⁴ஜகஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ
பா⁴ஸெய்ய.

‘‘ஸம்மதோ ஸங்கே⁴ன இத்த²ன்னாமோ பி⁴க்கு² சீவரபா⁴ஜகோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.

அத² கோ² சீவரபா⁴ஜகானங் பி⁴க்கூ²னங் ஏதத³ஹோஸி – ‘‘கத²ங்
நு கோ² சீவரங் பா⁴ஜேதப்³ப³’’ந்தி? ப⁴க³வதோ ஏதமத்த²ங் ஆரோசேஸுங்.
அனுஜானாமி, பி⁴க்க²வே, பட²மங் உச்சினித்வா துலயித்வா வண்ணாவண்ணங் கத்வா
பி⁴க்கூ² க³ணெத்வா வக்³க³ங் ப³ந்தி⁴த்வா சீவரபடிவீஸங் ட²பேதுந்தி.

அத² கோ² சீவரபா⁴ஜகானங் பி⁴க்கூ²னங் ஏதத³ஹோஸி – ‘‘கத²ங்
நு கோ² ஸாமணேரானங் சீவரபடிவீஸோ தா³தப்³போ³’’தி? ப⁴க³வதோ ஏதமத்த²ங்
ஆரோசேஸுங். அனுஜானாமி, பி⁴க்க²வே, ஸாமணேரானங் உபட்³ட⁴படிவீஸங் தா³துந்தி.

தேன கோ² பன ஸமயேன அஞ்ஞதரோ பி⁴க்கு² ஸகேன பா⁴கே³ன
உத்தரிதுகாமோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
உத்தரந்தஸ்ஸ ஸகங் பா⁴க³ங் தா³துந்தி.

தேன கோ² பன ஸமயேன அஞ்ஞதரோ
பி⁴க்கு² அதிரேகபா⁴கே³ன உத்தரிதுகாமோ ஹோதி. ப⁴க³வதோ ஏதமத்த²ங் ஆரோசேஸுங்.
அனுஜானாமி, பி⁴க்க²வே, அனுக்கே²பே தி³ன்னே அதிரேகபா⁴க³ங் தா³துந்தி.

அத² கோ² சீவரபா⁴ஜகானங் பி⁴க்கூ²னங் ஏதத³ஹோஸி – ‘‘கத²ங் நு கோ² சீவரபடிவீஸோ தா³தப்³போ³, ஆக³தபடிபாடியா [ஆக³தாக³தபடிபாடியா (க॰)] நு கோ² உதா³ஹு யதா²வுட்³ட⁴’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, விகலகே தோஸெத்வா குஸபாதங் காதுந்தி.

ப⁴ண்டா³கா³ரஸம்முதிஆதி³கதா² நிட்டி²தா.

215. சீவரரஜனகதா²

344. தேன கோ² பன ஸமயேன பி⁴க்கூ² ச²கணேனபி பண்டு³மத்திகாயபி சீவரங் ரஜந்தி. சீவரங் து³ப்³ப³ண்ணங் ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி , பி⁴க்க²வே, ச² ரஜனானி – மூலரஜனங், க²ந்த⁴ரஜனங், தசரஜனங், பத்தரஜனங், புப்ப²ரஜனங், ப²லரஜனந்தி.

தேன கோ² பன ஸமயேன பி⁴க்கூ² ஸீதுத³காய [ஸீதுந்தி³காய (ஸீ॰), ஸீதூத³காய (ஸ்யா॰)]
சீவரங் ரஜந்தி. சீவரங் து³க்³க³ந்த⁴ங் ஹோதி. ப⁴க³வதோ ஏதமத்த²ங் ஆரோசேஸுங்.
அனுஜானாமி, பி⁴க்க²வே, ரஜனங் பசிதுங் சுல்லங் ரஜனகும்பி⁴ந்தி. ரஜனங்
உத்தரியதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
உத்தராளும்பங் [உத்தராளுபங் (யோஜனா), உத்தராளுபங் (ஸ்யா॰)] ப³ந்தி⁴துந்தி.

தேன கோ² பன ஸமயேன பி⁴க்கூ² ந ஜானந்தி ரஜனங் பக்கங் வா
அபக்கங் வா. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, உத³கே வா
நக²பிட்டி²காய வா தே²வகங் தா³துந்தி.

தேன கோ² பன ஸமயேன பி⁴க்கூ² ரஜனங் ஓரோபெந்தா கும்பி⁴ங் ஆவிஞ்ச²ந்தி [ஆவிஞ்ஜந்தி (ஸீ॰), ஆவட்டந்தி (ஸ்யா॰)]. கும்பீ⁴ பி⁴ஜ்ஜதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ரஜனுளுங்கங் [ரஜனாளுங்கங் (யோஜனா)] த³ண்ட³கதா²லகந்தி.

தேன கோ² பன ஸமயேன பி⁴க்கூ²னங் ரஜனபா⁴ஜனங் ந
ஸங்விஜ்ஜதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
ரஜனகோலம்ப³ங் ரஜனக⁴டந்தி.

தேன கோ² பன ஸமயேன பி⁴க்கூ²
பாதியாபி பத்தேபி சீவரங் ஓமத்³த³ந்தி. சீவரங் பரிபி⁴ஜ்ஜதி. ப⁴க³வதோ
ஏதமத்த²ங் ஆரோசேஸுங். அனுஜானாமி, பி⁴க்க²வே, ரஜனதோ³ணிகந்தி.

தேன கோ² பன ஸமயேன பி⁴க்கூ² ச²மாய சீவரங் பத்த²ரந்தி.
சீவரங் பங்ஸுகிதங் ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி,
பி⁴க்க²வே, திணஸந்தா²ரகந்தி.

திணஸந்தா²ரகோ உபசிகாஹி க²ஜ்ஜதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, சீவரவங்ஸங் சீவரரஜ்ஜுந்தி.

மஜ்ஜே²ன லக்³கெ³ந்தி. ரஜனங் உப⁴தோ க³லதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, கண்ணே ப³ந்தி⁴துந்தி.

கண்ணோ ஜீரதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, கண்ணஸுத்தகந்தி.

ரஜனங் ஏகதோ க³லதி. ப⁴க³வதோ ஏதமத்த²ங் ஆரோசேஸுங்.
அனுஜானாமி, பி⁴க்க²வே, ஸம்பரிவத்தகங் ஸம்பரிவத்தகங் ரஜேதுங், ந ச
அச்சி²ன்னே தே²வே பக்கமிதுந்தி.

தேன கோ² பன ஸமயேன சீவரங் பத்தி²ன்னங் ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, உத³கே ஓஸாரேதுந்தி.

தேன கோ² பன ஸமயேன சீவரங் ப²ருஸங் ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி , பி⁴க்க²வே, பாணினா ஆகோடேதுந்தி .

தேன கோ² பன ஸமயேன பி⁴க்கூ² அச்சி²ன்னகானி சீவரானி
தா⁴ரெந்தி த³ந்தகாஸாவானி. மனுஸ்ஸா உஜ்ஜா²யந்தி கி²ய்யந்தி விபாசெந்தி –
ஸெய்யதா²பி நாம [ஸெய்யதா²பி (?)] கி³ஹீ
காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, அச்சி²ன்னகானி
சீவரானி தா⁴ரேதப்³பா³னி. யோ தா⁴ரெய்ய, ஆபத்தி து³க்கடஸ்ஸாதி.

சீவரரஜனகதா² நிட்டி²தா.

216. சி²ன்னகசீவரானுஜானநா

345. அத²
கோ² ப⁴க³வா ராஜக³ஹே யதா²பி⁴ரந்தங் விஹரித்வா யேன த³க்கி²ணாகி³ரி தேன
சாரிகங் பக்காமி. அத்³த³ஸா கோ² ப⁴க³வா மக³த⁴கெ²த்தங் அச்சி²ப³த்³த⁴ங் [அச்சிப³த்³த⁴ங் (ஸீ॰ ஸ்யா॰), அச்சி²ப³ந்த⁴ங் (க॰)]
பாளிப³த்³த⁴ங் மரியாத³ப³த்³த⁴ங் ஸிங்கா⁴டகப³த்³த⁴ங், தி³ஸ்வான ஆயஸ்மந்தங்
ஆனந்த³ங் ஆமந்தேஸி – ‘‘பஸ்ஸஸி நோ த்வங், ஆனந்த³, மக³த⁴கெ²த்தங்
அச்சி²ப³த்³த⁴ங் பாளிப³த்³த⁴ங் மரியாத³ப³த்³த⁴ங் ஸிங்கா⁴டகப³த்³த⁴’’ந்தி?
‘‘ஏவங், ப⁴ந்தே’’தி. ‘‘உஸ்ஸஹஸி த்வங், ஆனந்த³, பி⁴க்கூ²னங் ஏவரூபானி
சீவரானி ஸங்வித³ஹிது’’ந்தி? ‘‘உஸ்ஸஹாமி, ப⁴க³வா’’தி. அத² கோ² ப⁴க³வா
த³க்கி²ணாகி³ரிஸ்மிங் யதா²பி⁴ரந்தங் விஹரித்வா புனதே³வ ராஜக³ஹங்
பச்சாக³ஞ்சி². அத² கோ² ஆயஸ்மா ஆனந்தோ³ ஸம்ப³ஹுலானங் பி⁴க்கூ²னங் சீவரானி
ஸங்வித³ஹித்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் ஏதத³வோச –
‘‘பஸ்ஸது மே [பஸ்ஸத² தும்ஹே (க॰)], ப⁴ந்தே, ப⁴க³வா சீவரானி ஸங்வித³ஹிதானீ’’தி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே
த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘பண்டி³தோ, பி⁴க்க²வே,
ஆனந்தோ³; மஹாபஞ்ஞோ, பி⁴க்க²வே, ஆனந்தோ³; யத்ர ஹி நாம மயா ஸங்கி²த்தேன
பா⁴ஸிதஸ்ஸ வித்தா²ரேன அத்த²ங் ஆஜானிஸ்ஸதி, குஸிம்பி நாம கரிஸ்ஸதி,
அட்³ட⁴குஸிம்பி நாம கரிஸ்ஸதி, மண்ட³லம்பி நாம கரிஸ்ஸதி ,
அட்³ட⁴மண்ட³லம்பி நாம கரிஸ்ஸதி, விவட்டம்பி நாம கரிஸ்ஸதி, அனுவிவட்டம்பி
நாம கரிஸ்ஸதி, கீ³வெய்யகம்பி நாம கரிஸ்ஸதி, ஜங்கெ⁴ய்யகம்பி நாம கரிஸ்ஸதி,
பா³ஹந்தம்பி நாம கரிஸ்ஸதி, சி²ன்னகங் ப⁴விஸ்ஸதி, ஸத்த²லூக²ங் ஸமணஸாருப்பங்
பச்சத்தி²கானஞ்ச அனபி⁴ச்சி²தங். அனுஜானாமி, பி⁴க்க²வே, சி²ன்னகங்
ஸங்கா⁴டிங் சி²ன்னகங் உத்தராஸங்க³ங் சி²ன்னகங் அந்தரவாஸக’’ந்தி.

சி²ன்னகசீவரானுஜானநா நிட்டி²தா.

217. திசீவரானுஜானநா

346.
அத² கோ² ப⁴க³வா ராஜக³ஹே யதா²பி⁴ரந்தங் விஹரித்வா யேன வேஸாலீ தேன சாரிகங்
பக்காமி. அத்³த³ஸ கோ² ப⁴க³வா அந்தரா ச ராஜக³ஹங் அந்தரா ச வேஸாலிங்
அத்³தா⁴னமக்³க³ப்படிபன்னோ ஸம்ப³ஹுலே பி⁴க்கூ² சீவரேஹி உப்³ப⁴ண்டி³தே [உப்³ப⁴ண்டீ³கதே (ஸ்யா॰)]
ஸீஸேபி சீவரபி⁴ஸிங் கரித்வா க²ந்தே⁴பி சீவரபி⁴ஸிங் கரித்வா கடியாபி
சீவரபி⁴ஸிங் கரித்வா ஆக³ச்ச²ந்தே, தி³ஸ்வான ப⁴க³வதோ ஏதத³ஹோஸி – ‘‘அதிலஹுங்
கோ² இமே மோக⁴புரிஸா சீவரே பா³ஹுல்லாய ஆவத்தா .
யங்னூனாஹங் பி⁴க்கூ²னங் சீவரே ஸீமங் ப³ந்தெ⁴ய்யங், மரியாத³ங்
ட²பெய்ய’’ந்தி. அத² கோ² ப⁴க³வா அனுபுப்³பே³ன சாரிகங் சரமானோ யேன வேஸாலீ
தத³வஸரி. தத்ர ஸுத³ங் ப⁴க³வா வேஸாலியங் விஹரதி கோ³தமகே சேதியே. தேன கோ² பன
ஸமயேன ப⁴க³வா ஸீதாஸு ஹேமந்திகாஸு ரத்தீஸு அந்தரட்ட²காஸு ஹிமபாதஸமயே ரத்திங் அஜ்ஜோ²காஸே ஏகசீவரோ நிஸீதி³. ந ப⁴க³வந்தங்
ஸீதங் அஹோஸி. நிக்க²ந்தே பட²மே யாமே ஸீதங் ப⁴க³வந்தங் அஹோஸி. து³தியங்
ப⁴க³வா சீவரங் பாருபி. ந ப⁴க³வந்தங் ஸீதங் அஹோஸி. நிக்க²ந்தே மஜ்ஜி²மே யாமே
ஸீதங் ப⁴க³வந்தங் அஹோஸி. ததியங் ப⁴க³வா சீவரங் பாருபி. ந ப⁴க³வந்தங் ஸீதங்
அஹோஸி. நிக்க²ந்தே பச்சி²மே யாமே உத்³த⁴ஸ்தே அருணே நந்தி³முகி²யா ரத்தியா
ஸீதங் ப⁴க³வந்தங் அஹோஸி. சதுத்த²ங் ப⁴க³வா சீவரங் பாருபி. ந ப⁴க³வந்தங்
ஸீதங் அஹோஸி. அத² கோ² ப⁴க³வதோ ஏதத³ஹோஸி – ‘‘யேபி கோ² தே குலபுத்தா இமஸ்மிங்
த⁴ம்மவினயே ஸீதாலுகா ஸீதபீ⁴ருகா தேபி ஸக்கொந்தி திசீவரேன யாபேதுங்.
யங்னூனாஹங் பி⁴க்கூ²னங் சீவரே ஸீமங் ப³ந்தெ⁴ய்யங், மரியாத³ங் ட²பெய்யங்,
திசீவரங் அனுஜானெய்ய’’ந்தி. அத² கோ² ப⁴க³வா ஏதஸ்மிங் நிதா³னே ஏதஸ்மிங்
பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘இதா⁴ஹங், பி⁴க்க²வே,
அந்தரா ச ராஜக³ஹங் அந்தரா ச வேஸாலிங் அத்³தா⁴னமக்³க³ப்படிபன்னோ அத்³த³ஸங்
ஸம்ப³ஹுலே பி⁴க்கூ² சீவரேஹி உப்³ப⁴ண்டி³தே ஸீஸேபி
சீவரபி⁴ஸிங் கரித்வா க²ந்தே⁴பி சீவரபி⁴ஸிங் கரித்வா கடியாபி சீவரபி⁴ஸிங்
கரித்வா ஆக³ச்ச²ந்தே, தி³ஸ்வான மே ஏதத³ஹோஸி – ‘அதிலஹுங் கோ² இமே மோக⁴புரிஸா
சீவரே பா³ஹுல்லாய ஆவத்தா. யங்னூனாஹங் பி⁴க்கூ²னங் சீவரே ஸீமங்
ப³ந்தெ⁴ய்யங், மரியாத³ங் ட²பெய்ய’ந்தி. இதா⁴ஹங், பி⁴க்க²வே, ஸீதாஸு
ஹேமந்திகாஸு ரத்தீஸு அந்தரட்ட²காஸு ஹிமபாதஸமயே ரத்திங் அஜ்ஜோ²காஸே ஏகசீவரோ
நிஸீதி³ங். ந மங் ஸீதங் அஹோஸி. நிக்க²ந்தே பட²மே யாமே ஸீதங் மங் அஹோஸி.
து³தியாஹங் சீவரங் பாருபிங். ந மங் ஸீதங் அஹோஸி.
நிக்க²ந்தே மஜ்ஜி²மே யாமே ஸீதங் மங் அஹோஸி. ததியாஹங் சீவரங் பாருபிங். ந
மங் ஸீதங் அஹோஸி. நிக்க²ந்தே பச்சி²மே யாமே உத்³த⁴ஸ்தே அருணே நந்தி³முகி²யா
ரத்தியா ஸீதங் மங் அஹோஸி. சதுத்தா²ஹங் சீவரங் பாருபிங். ந மங் ஸீதங்
அஹோஸி. தஸ்ஸ மய்ஹங், பி⁴க்க²வே, ஏதத³ஹோஸி – ‘‘யேபி கோ² தே குலபுத்தா
இமஸ்மிங் த⁴ம்மவினயே ஸீதாலுகா ஸீதபீ⁴ருகா தேபி ஸக்கொந்தி திசீவரேன
யாபேதுங். யங்னூனாஹங் பி⁴க்கூ²னங் சீவரே ஸீமங் ப³ந்தெ⁴ய்யங், மரியாத³ங்
ட²பெய்யங் , திசீவரங் அனுஜானெய்ய’ந்தி. அனுஜானாமி,
பி⁴க்க²வே, திசீவரங் – தி³கு³ணங் ஸங்கா⁴டிங், ஏகச்சியங் உத்தராஸங்க³ங்,
ஏகச்சியங் அந்தரவாஸக’’ந்தி.

திசீவரானுஜானநா நிட்டி²தா.

218. அதிரேகசீவரகதா²

347. [பாரா॰ 461]
தேன கோ² பன ஸமயேன ச²ப்³ப³க்³கி³யா பி⁴க்கூ² ப⁴க³வதா திசீவரங் அனுஞ்ஞாதந்தி
அஞ்ஞேனேவ திசீவரேன கா³மங் பவிஸந்தி, அஞ்ஞேன திசீவரேன ஆராமே அச்ச²ந்தி,
அஞ்ஞேன திசீவரேன நஹானங் ஓதரந்தி. யே தே பி⁴க்கூ²
அப்பிச்சா² தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம
ச²ப்³ப³க்³கி³யா பி⁴க்கூ² அதிரேகசீவரங் தா⁴ரெஸ்ஸந்தீ’’தி. அத² கோ² தே
பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே
ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே,
அதிரேகசீவரங் தா⁴ரேதப்³ப³ங். யோ தா⁴ரெய்ய, யதா²த⁴ம்மோ காரேதப்³போ³’’தி.

[பாரா॰ 461] தேன கோ² பன
ஸமயேன ஆயஸ்மதோ ஆனந்த³ஸ்ஸ அதிரேகசீவரங் உப்பன்னங் ஹோதி. ஆயஸ்மா ச ஆனந்தோ³
தங் சீவரங் ஆயஸ்மதோ ஸாரிபுத்தஸ்ஸ தா³துகாமோ ஹோதி. ஆயஸ்மா ச
ஸாரிபுத்தோ ஸாகேதே விஹரதி. அத² கோ² ஆயஸ்மதோ ஆனந்த³ஸ்ஸ ஏதத³ஹோஸி –
‘‘ப⁴க³வதா ஸிக்கா²பத³ங் பஞ்ஞத்தங் ‘ந அதிரேகசீவரங் தா⁴ரேதப்³ப³’ந்தி.
இத³ஞ்ச மே அதிரேகசீவரங் உப்பன்னங் . அஹஞ்சிமங்
சீவரங் ஆயஸ்மதோ ஸாரிபுத்தஸ்ஸ தா³துகாமோ. ஆயஸ்மா ச ஸாரிபுத்தோ ஸாகேதே
விஹரதி. கத²ங் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ங்
ஆரோசேஸி. ‘‘கீவசிரங் பனானந்த³, ஸாரிபுத்தோ ஆக³ச்சி²ஸ்ஸதீ’’தி? ‘‘நவமங் வா,
ப⁴க³வா, தி³வஸங், த³ஸமங் வா’’தி. அத² கோ² ப⁴க³வா ஏதஸ்மிங் நிதா³னே ஏதஸ்மிங்
பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே,
த³ஸாஹபரமங் அதிரேகசீவரங் தா⁴ரேது’’ந்தி.

தேன கோ² பன ஸமயேன பி⁴க்கூ²னங் அதிரேகசீவரங் உப்பன்னங்
ஹோதி. அத² கோ² பி⁴க்கூ²னங் ஏதத³ஹோஸி – ‘‘கத²ங் நு கோ² அம்ஹேஹி அதிரேகசீவரே
படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
அதிரேகசீவரங் விகப்பேதுந்தி.

348.
அத² கோ² ப⁴க³வா வேஸாலியங் யதா²பி⁴ரந்தங் விஹரித்வா யேன பா³ராணஸீ தேன
சாரிகங் பக்காமி. அனுபுப்³பே³ன சாரிகங் சரமானோ யேன பா³ராணஸீ தத³வஸரி. தத்ர
ஸுத³ங் ப⁴க³வா பா³ராணஸியங் விஹரதி இஸிபதனே மிக³தா³யே. தேன கோ² பன ஸமயேன
அஞ்ஞதரஸ்ஸ பி⁴க்கு²னோ அந்தரவாஸகோ சி²த்³தோ³ ஹோதி. அத² கோ² தஸ்ஸ பி⁴க்கு²னோ
ஏதத³ஹோஸி – ‘‘ப⁴க³வதா திசீவரங் அனுஞ்ஞாதங் – தி³கு³ணா ஸங்கா⁴டி, ஏகச்சியோ
உத்தராஸங்கோ³ , ஏகச்சியோ
அந்தரவாஸகோ. அயஞ்ச மே அந்தரவாஸகோ சி²த்³தோ³. யங்னூனாஹங் அக்³க³ளங்
அச்சு²பெய்யங், ஸமந்ததோ து³பட்டங் ப⁴விஸ்ஸதி, மஜ்ஜே² ஏகச்சிய’’ந்தி. அத²
கோ² ஸோ பி⁴க்கு² அக்³க³ளங் அச்சு²பேஸி. அத்³த³ஸா கோ² ப⁴க³வா ஸேனாஸனசாரிகங்
ஆஹிண்ட³ந்தோ தங் பி⁴க்கு²ங் அக்³க³ளங் அச்சு²பெந்தங் [அச்சு²பந்தங் (க॰)],
தி³ஸ்வான யேன ஸோ பி⁴க்கு² தேனுபஸங்கமி, உபஸங்கமித்வா தங் பி⁴க்கு²ங்
ஏதத³வோச – ‘‘கிங் த்வங், பி⁴க்கு², கரோஸீ’’தி? ‘‘அக்³க³ளங், ப⁴க³வா,
அச்சு²பேமீ’’தி. ‘‘ஸாது⁴ ஸாது⁴, பி⁴க்கு²; ஸாது⁴ கோ² த்வங், பி⁴க்கு²,
அக்³க³ளங் அச்சு²பேஸீ’’தி . அத² கோ² ப⁴க³வா ஏதஸ்மிங்
நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி –
‘‘அனுஜானாமி, பி⁴க்க²வே, அஹதானங் து³ஸ்ஸானங் அஹதகப்பானங் தி³கு³ணங்
ஸங்கா⁴டிங், ஏகச்சியங் உத்தராஸங்க³ங், ஏகச்சியங் அந்தரவாஸகங்;
உதுத்³த⁴டானங் து³ஸ்ஸானங் சதுக்³கு³ணங் ஸங்கா⁴டிங், தி³கு³ணங்
உத்தராஸங்க³ங், தி³கு³ணங் அந்தரவாஸகங்; பங்ஸுகூலே
யாவத³த்த²ங்; பாபணிகே உஸ்ஸாஹோ கரணீயோ. அனுஜானாமி, பி⁴க்க²வே, அக்³க³ளங்
துன்னங் ஓவட்டிகங் கண்டு³ஸகங் த³ள்ஹீகம்ம’’ந்தி.

அதிரேகசீவரகதா² நிட்டி²தா.

219. விஸாகா²வத்து²

349.
அத² கோ² ப⁴க³வா பா³ராணஸியங் யதா²பி⁴ரந்தங் விஹரித்வா யேன ஸாவத்தி² தேன
சாரிகங் பக்காமி. அனுபுப்³பே³ன சாரிகங் சரமானோ யேன ஸாவத்தி² தத³வஸரி. தத்ர
ஸுத³ங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ²
விஸாகா² மிகா³ரமாதா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² விஸாக²ங்
மிகா³ரமாதரங் ப⁴க³வா த⁴ம்மியா கதா²ய ஸந்த³ஸ்ஸேஸி
ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² விஸாகா² மிகா³ரமாதா, ப⁴க³வதா
த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹங்ஸிதா, ப⁴க³வந்தங்
ஏதத³வோச – ‘‘அதி⁴வாஸேது மே, ப⁴ந்தே, ப⁴க³வா ஸ்வாதனாய ப⁴த்தங் ஸத்³தி⁴ங்
பி⁴க்கு²ஸங்கே⁴னா’’தி. அதி⁴வாஸேஸி ப⁴க³வா துண்ஹீபா⁴வேன. அத² கோ² விஸாகா²
மிகா³ரமாதா ப⁴க³வதோ அதி⁴வாஸனங் விதி³த்வா உட்டா²யாஸனா ப⁴க³வந்தங்
அபி⁴வாதெ³த்வா பத³க்கி²ணங் கத்வா பக்காமி.

தேன கோ² பன ஸமயேன தஸ்ஸா ரத்தியா அச்சயேன
சாதுத்³தீ³பிகோ மஹாமேகோ⁴ பாவஸ்ஸி. அத² கோ² ப⁴க³வா பி⁴க்கூ² ஆமந்தேஸி –
‘‘யதா², பி⁴க்க²வே, ஜேதவனே வஸ்ஸதி ஏவங் சதூஸு தீ³பேஸு வஸ்ஸதி. ஓவஸ்ஸாபேத²,
பி⁴க்க²வே, காயங். அயங் பச்சி²மகோ சாதுத்³தீ³பிகோ மஹாமேகோ⁴’’தி. ‘‘ஏவங்,
ப⁴ந்தே’’தி கோ² தே பி⁴க்கூ² ப⁴க³வதோ படிஸ்ஸுணித்வா
நிக்கி²த்தசீவரா காயங் ஓவஸ்ஸாபெந்தி. அத² கோ² விஸாகா² மிகா³ரமாதா பணீதங்
கா²த³னீயங் போ⁴ஜனீயங் படியாதா³பெத்வா தா³ஸிங் ஆணாபேஸி – ‘‘க³ச்ச², ஜே.
ஆராமங் க³ந்த்வா காலங் ஆரோசேஹி – காலோ, ப⁴ந்தே, நிட்டி²தங் ப⁴த்த’’ந்தி.
‘‘ஏவங், அய்யே’’தி கோ² ஸா தா³ஸீ விஸாகா²ய மிகா³ரமாதுயா படிஸ்ஸுணித்வா
ஆராமங் க³ந்த்வா அத்³த³ஸ பி⁴க்கூ² நிக்கி²த்தசீவரே காயங் ஓவஸ்ஸாபெந்தே,
தி³ஸ்வான ‘நத்தி² ஆராமே பி⁴க்கூ², ஆஜீவகா காயங் ஓவஸ்ஸாபெந்தீ’தி யேன
விஸாகா² மிகா³ரமாதா தேனுபஸங்கமி ; உபஸங்கமித்வா
விஸாக²ங் மிகா³ரமாதரங் ஏதத³வோச – ‘‘நத்த²ய்யே, ஆராமே பி⁴க்கூ², ஆஜீவகா
காயங் ஓவஸ்ஸாபெந்தீ’’தி. அத² கோ² விஸாகா²ய மிகா³ரமாதுயா பண்டி³தாய வியத்தாய மேதா⁴வினியா ஏதத³ஹோஸி – ‘‘நிஸ்ஸங்ஸயங் கோ² அய்யா நிக்கி²த்தசீவரா காயங் ஓவஸ்ஸாபெந்தி. ஸாயங்
பா³லா மஞ்ஞித்த² – நத்தி² ஆராமே பி⁴க்கூ², ஆஜீவகா காயங் ஓவஸ்ஸாபெந்தீ’’தி,
புன தா³ஸிங் ஆணாபேஸி – ‘‘க³ச்ச², ஜே. ஆராமங் க³ந்த்வா காலங் ஆரோசேஹி –
காலோ, ப⁴ந்தே, நிட்டி²தங் ப⁴த்த’’ந்தி. அத² கோ² தே பி⁴க்கூ² க³த்தானி
ஸீதிங் கரித்வா [ஸீதீகரித்வா (ஸ்யா॰)] கல்லகாயா
சீவரானி க³ஹெத்வா யதா²விஹாரங் பவிஸிங்ஸு. அத² கோ² ஸா தா³ஸீ ஆராமங் க³ந்த்வா
பி⁴க்கூ² அபஸ்ஸந்தீ ‘நத்தி² ஆராமே பி⁴க்கூ², ஸுஞ்ஞோ ஆராமோ’தி யேன விஸாகா²
மிகா³ரமாதா தேனுபஸங்கமி; உபஸங்கமித்வா விஸாக²ங் மிகா³ரமாதரங் ஏதத³வோச –
‘‘நத்த²ய்யே, ஆராமே பி⁴க்கூ², ஸுஞ்ஞோ ஆராமோ’’தி. அத² கோ² விஸாகா²ய
மிகா³ரமாதுயா பண்டி³தாய வியத்தாய மேதா⁴வினியா ஏதத³ஹோஸி – ‘‘நிஸ்ஸங்ஸயங் கோ²
அய்யா க³த்தானி ஸீதிங் கரித்வா கல்லகாயா சீவரானி க³ஹெத்வா யதா²விஹாரங்
பவிட்டா². ஸாயங் பா³லா மஞ்ஞித்த² – நத்தி² ஆராமே பி⁴க்கூ², ஸுஞ்ஞோ
ஆராமோ’’தி, புன தா³ஸிங் ஆணாபேஸி – ‘‘க³ச்ச², ஜே. ஆராமங் க³ந்த்வா காலங்
ஆரோசேஹி – காலோ, ப⁴ந்தே, நிட்டி²தங் ப⁴த்த’’ந்தி.

350. அத² கோ² ப⁴க³வா பி⁴க்கூ² ஆமந்தேஸி – ‘‘ஸந்த³ஹத² [ஸன்னஹத² (ஸீ॰ ஸ்யா॰)],
பி⁴க்க²வே, பத்தசீவரங்; காலோ ப⁴த்தஸ்ஸா’’தி. ‘‘ஏவங், ப⁴ந்தே’’தி கோ² தே
பி⁴க்கூ² ப⁴க³வதோ பச்சஸ்ஸோஸுங். அத² கோ² ப⁴க³வா புப்³ப³ண்ஹஸமயங் நிவாஸெத்வா
பத்தசீவரமாதா³ய – ஸெய்யதா²பி நாம ப³லவா புரிஸோ ஸம்மிஞ்ஜிதங் வா பா³ஹங்
பஸாரெய்ய, பஸாரிதங் வா பா³ஹங் ஸமிஞ்ஜெய்ய, ஏவமேவ – ஜேதவனே அந்தரஹிதோ
விஸாகா²ய மிகா³ரமாதுயா கொட்ட²கே பாதுரஹோஸி. நிஸீதி³
ப⁴க³வா பஞ்ஞத்தே ஆஸனே ஸத்³தி⁴ங் பி⁴க்கு²ஸங்கே⁴ன. அத² கோ² விஸாகா²
மிகா³ரமாதா – ‘‘அச்ச²ரியங் வத போ⁴! அப்³பு⁴தங் வத போ⁴! ததா²க³தஸ்ஸ
மஹித்³தி⁴கதா மஹானுபா⁴வதா, யத்ர ஹி நாம ஜண்ணுகமத்தேஸுபி ஓகே⁴ஸு
பவத்தமானேஸு, கடிமத்தேஸுபி ஓகே⁴ஸு பவத்தமானேஸு, ந ஹி நாம ஏகபி⁴க்கு²ஸ்ஸபி [பவத்தமானேஸு ந ஏகபி⁴க்கு²ஸ்ஸபி (?)]
பாதா³ வா சீவரானி வா அல்லானி ப⁴விஸ்ஸந்தீ’’தி – ஹட்டா² உத³க்³கா³
பு³த்³த⁴ப்பமுக²ங் பி⁴க்கு²ஸங்க⁴ங் பணீதேன கா²த³னீயேன போ⁴ஜனீயேன ஸஹத்தா²
ஸந்தப்பெத்வா ஸம்பவாரெத்வா ப⁴க³வந்தங் பு⁴த்தாவிங் ஓனீதபத்தபாணிங் ஏகமந்தங்
நிஸீதி³. ஏகமந்தங் நிஸின்னா கோ² விஸாகா² மிகா³ரமாதா ப⁴க³வந்தங் ஏதத³வோச –
‘‘அட்டா²ஹங், ப⁴ந்தே, ப⁴க³வந்தங் வரானி யாசாமீ’’தி. ‘‘அதிக்கந்தவரா கோ²,
விஸாகே², ததா²க³தா’’தி. ‘‘யானி ச, ப⁴ந்தே, கப்பியானி
யானி ச அனவஜ்ஜானீ’’தி. ‘‘வதே³ஹி, விஸாகே²’’தி. ‘‘இச்சா²மஹங், ப⁴ந்தே,
ஸங்க⁴ஸ்ஸ யாவஜீவங் வஸ்ஸிகஸாடிகங் தா³துங், ஆக³ந்துகப⁴த்தங் தா³துங்,
க³மிகப⁴த்தங் தா³துங், கி³லானப⁴த்தங் தா³துங், கி³லானுபட்டா²கப⁴த்தங்
தா³துங், கி³லானபே⁴ஸஜ்ஜங் தா³துங், து⁴வயாகு³ங் தா³துங்,
பி⁴க்கு²னிஸங்க⁴ஸ்ஸ உத³கஸாடிகங் தா³து’’ந்தி. ‘‘கிங் பன த்வங், விஸாகே², அத்த²வஸங் ஸம்பஸ்ஸமானா ததா²க³தங் அட்ட² வரானி யாசஸீ’’தி?

‘‘இதா⁴ஹங், ப⁴ந்தே, தா³ஸிங் ஆணாபேஸிங் – ‘க³ச்ச², ஜே.
ஆராமங் க³ந்த்வா காலங் ஆரோசேஹி – காலோ, ப⁴ந்தே, நிட்டி²தங் ப⁴த்த’’’ந்தி.
அத² கோ² ஸா, ப⁴ந்தே, தா³ஸீ ஆராமங் க³ந்த்வா அத்³த³ஸ பி⁴க்கூ²
நிக்கி²த்தசீவரே காயங் ஓவஸ்ஸாபெந்தே, தி³ஸ்வான
‘‘நத்தி² ஆராமே பி⁴க்கூ², ஆஜீவகா காயங் ஓவஸ்ஸாபெந்தீ’’தி யேனாஹங்
தேனுபஸங்கமி; உபஸங்கமித்வா மங் ஏதத³வோச – ‘‘நத்த²ய்யே, ஆராமே பி⁴க்கூ²,
ஆஜீவகா காயங் ஓவஸ்ஸாபெந்தீ’’தி. அஸுசி, ப⁴ந்தே, நக்³கி³யங் ஜேகு³ச்ச²ங்
படிகூலங். இமாஹங், ப⁴ந்தே, அத்த²வஸங் ஸம்பஸ்ஸமானா இச்சா²மி ஸங்க⁴ஸ்ஸ
யாவஜீவங் வஸ்ஸிகஸாடிகங் தா³துங்.

‘‘புன சபரங், ப⁴ந்தே, ஆக³ந்துகோ பி⁴க்கு² ந வீதி²குஸலோ
ந கோ³சரகுஸலோ கிலந்தோ பிண்டா³ய சரதி. ஸோ மே ஆக³ந்துகப⁴த்தங் பு⁴ஞ்ஜித்வா
வீதி²குஸலோ கோ³சரகுஸலோ அகிலந்தோ பிண்டா³ய சரிஸ்ஸதி. இமாஹங், ப⁴ந்தே,
அத்த²வஸங் ஸம்பஸ்ஸமானா இச்சா²மி ஸங்க⁴ஸ்ஸ யாவஜீவங் ஆக³ந்துகப⁴த்தங்
தா³துங்.

‘‘புன சபரங், ப⁴ந்தே, க³மிகோ பி⁴க்கு² அத்தனோ ப⁴த்தங்
பரியேஸமானோ ஸத்தா² வா விஹாயிஸ்ஸதி, யத்த² வா வாஸங் க³ந்துகாமோ ப⁴விஸ்ஸதி
தத்த² விகாலே உபக³ச்சி²ஸ்ஸதி, கிலந்தோ அத்³தா⁴னங் க³மிஸ்ஸதி. ஸோ மே
க³மிகப⁴த்தங் பு⁴ஞ்ஜித்வா ஸத்தா² ந விஹாயிஸ்ஸதி, யத்த² வாஸங் க³ந்துகாமோ
ப⁴விஸ்ஸதி தத்த² காலே உபக³ச்சி²ஸ்ஸதி, அகிலந்தோ அத்³தா⁴னங் க³மிஸ்ஸதி.
இமாஹங், ப⁴ந்தே, அத்த²வஸங் ஸம்பஸ்ஸமானா இச்சா²மி ஸங்க⁴ஸ்ஸ யாவஜீவங்
க³மிகப⁴த்தங் தா³துங்.

‘‘புன சபரங், ப⁴ந்தே, கி³லானஸ்ஸ பி⁴க்கு²னோ ஸப்பாயானி
போ⁴ஜனானி அலப⁴ந்தஸ்ஸ ஆபா³தோ⁴ வா அபி⁴வட்³டி⁴ஸ்ஸதி, காலங்கிரியா வா
ப⁴விஸ்ஸதி. தஸ்ஸ மே கி³லானப⁴த்தங் பு⁴த்தஸ்ஸ ஆபா³தோ⁴
ந அபி⁴வட்³டி⁴ஸ்ஸதி, காலங்கிரியா ந ப⁴விஸ்ஸதி. இமாஹங், ப⁴ந்தே, அத்த²வஸங்
ஸம்பஸ்ஸமானா இச்சா²மி ஸங்க⁴ஸ்ஸ யாவஜீவங் கி³லானப⁴த்தங் தா³துங் . ‘‘புன
சபரங், ப⁴ந்தே, கி³லானுபட்டா²கோ பி⁴க்கு² அத்தனோ ப⁴த்தங் பரியேஸமானோ
கி³லானஸ்ஸ உஸ்ஸூரே ப⁴த்தங் நீஹரிஸ்ஸதி, ப⁴த்தச்சே²த³ங் கரிஸ்ஸதி. ஸோ மே
கி³லானுபட்டா²கப⁴த்தங் பு⁴ஞ்ஜித்வா கி³லானஸ்ஸ காலேன
ப⁴த்தங் நீஹரிஸ்ஸதி, ப⁴த்தச்சே²த³ங் ந கரிஸ்ஸதி. இமாஹங், ப⁴ந்தே,
அத்த²வஸங் ஸம்பஸ்ஸமானா இச்சா²மி ஸங்க⁴ஸ்ஸ யாவஜீவங் கி³லானுபட்டா²கப⁴த்தங்
தா³துங்.

‘‘புன சபரங், ப⁴ந்தே, கி³லானஸ்ஸ பி⁴க்கு²னோ ஸப்பாயானி
பே⁴ஸஜ்ஜானி அலப⁴ந்தஸ்ஸ ஆபா³தோ⁴ வா அபி⁴வட்³டி⁴ஸ்ஸதி, காலங்கிரியா வா
ப⁴விஸ்ஸதி. தஸ்ஸ மே கி³லானபே⁴ஸஜ்ஜங் பரிபு⁴த்தஸ்ஸ ஆபா³தோ⁴ ந
அபி⁴வட்³டி⁴ஸ்ஸதி, காலங்கிரியா ந ப⁴விஸ்ஸதி. இமாஹங், ப⁴ந்தே, அத்த²வஸங்
ஸம்பஸ்ஸமானா இச்சா²மி ஸங்க⁴ஸ்ஸ யாவஜீவங் கி³லானபே⁴ஸஜ்ஜங் தா³துங்.

‘‘புன சபரங், ப⁴ந்தே, ப⁴க³வதா அந்த⁴கவிந்தே³
த³ஸானிஸங்ஸே ஸம்பஸ்ஸமானேன யாகு³ அனுஞ்ஞாதா. த்யாஹங், ப⁴ந்தே, ஆனிஸங்ஸே
ஸம்பஸ்ஸமானா இச்சா²மி ஸங்க⁴ஸ்ஸ யாவஜீவங் து⁴வயாகு³ங் தா³துங்.

‘‘இத⁴, ப⁴ந்தே, பி⁴க்கு²னியோ அசிரவதியா நதி³யா
வேஸியாஹி ஸத்³தி⁴ங் நக்³கா³ ஏகதித்தே² நஹாயந்தி. தா, ப⁴ந்தே, வேஸியா
பி⁴க்கு²னியோ உப்பண்டே³ஸுங் – ‘கிங் நு கோ² நாம தும்ஹாகங், அய்யே, த³ஹரானங்
[த³ஹரானங் த³ஹரானங் (ஸீ॰)] ப்³ரஹ்மசரியங்
சிண்ணேன, நனு நாம காமா பரிபு⁴ஞ்ஜிதப்³பா³; யதா³ ஜிண்ணா ப⁴விஸ்ஸத² ததா³
ப்³ரஹ்மசரியங் சரிஸ்ஸத². ஏவங் தும்ஹாகங் உபோ⁴ அத்தா² பரிக்³க³ஹிதா
ப⁴விஸ்ஸந்தீ’தி. தா, ப⁴ந்தே, பி⁴க்கு²னியோ வேஸியாஹி உப்பண்டி³யமானா மங்கூ
அஹேஸுங். அஸுசி, ப⁴ந்தே, மாதுகா³மஸ்ஸ நக்³கி³யங் ஜேகு³ச்ச²ங் படிகூலங்.
இமாஹங், ப⁴ந்தே, அத்த²வஸங் ஸம்பஸ்ஸமானா இச்சா²மி பி⁴க்கு²னிஸங்க⁴ஸ்ஸ யாவஜீவங் உத³கஸாடிகங் தா³து’’ந்தி.

351.
‘‘கிங் பன த்வங், விஸாகே², ஆனிஸங்ஸங் ஸம்பஸ்ஸமானா ததா²க³தங் அட்ட² வரானி
யாசஸீ’’தி? ‘‘இத⁴, ப⁴ந்தே, தி³ஸாஸு வஸ்ஸங்வுட்டா² பி⁴க்கூ² ஸாவத்தி²ங்
ஆக³ச்சி²ஸ்ஸந்தி ப⁴க³வந்தங் த³ஸ்ஸனாய. தே ப⁴க³வந்தங் உபஸங்கமித்வா
புச்சி²ஸ்ஸந்தி – ‘இத்த²ன்னாமோ, ப⁴ந்தே, பி⁴க்கு² காலங்கதோ, தஸ்ஸ கா க³தி
கோ அபி⁴ஸம்பராயோ’தி? தங் ப⁴க³வா ப்³யாகரிஸ்ஸதி ஸோதாபத்திப²லே வா
ஸகதா³கா³மிப²லே வா அனாகா³மிப²லே வா அரஹத்தே வா. த்யாஹங் உபஸங்கமித்வா
புச்சி²ஸ்ஸாமி – ‘ஆக³தபுப்³பா³ நு கோ², ப⁴ந்தே, தேன அய்யேன ஸாவத்தீ²’தி?
ஸசே மே வக்க²ந்தி – ‘ஆக³தபுப்³பா³ தேன பி⁴க்கு²னா ஸாவத்தீ²’தி நிட்ட²மெத்த²
க³ச்சி²ஸ்ஸாமி – நிஸ்ஸங்ஸயங் மே பரிபு⁴த்தங் தேன அய்யேன வஸ்ஸிகஸாடிகா வா
ஆக³ந்துகப⁴த்தங் வா க³மிகப⁴த்தங் வா கி³லானப⁴த்தங் வா
கி³லானுபட்டா²கப⁴த்தங் வா கி³லானபே⁴ஸஜ்ஜங் வா து⁴வயாகு³ வாதி. தஸ்ஸா மே
தத³னுஸ்ஸரந்தியா பாமுஜ்ஜங் ஜாயிஸ்ஸதி, பமுதி³தாய பீதி ஜாயிஸ்ஸதி, பீதிமனாய
காயோ பஸ்ஸம்பி⁴ஸ்ஸதி, பஸ்ஸத்³த⁴காயா ஸுக²ங்
வேதி³யிஸ்ஸாமி, ஸுகி²னியா சித்தங் ஸமாதி⁴யிஸ்ஸதி. ஸா மே ப⁴விஸ்ஸதி
இந்த்³ரியபா⁴வனா ப³லபா⁴வனா பொ³ஜ்ஜ²ங்க³பா⁴வனா. இமாஹங், ப⁴ந்தே, ஆனிஸங்ஸங்
ஸம்பஸ்ஸமானா ததா²க³தங் அட்ட² வரானி யாசாமீ’’தி. ‘‘ஸாது⁴ ஸாது⁴, விஸாகே²;
ஸாது⁴ கோ² த்வங், விஸாகே², இமங் ஆனிஸங்ஸங் ஸம்பஸ்ஸமானா ததா²க³தங் அட்ட²
வரானி யாசஸி. அனுஜானாமி தே, விஸாகே², அட்ட² வரானீ’’தி. அத² கோ² ப⁴க³வா
விஸாக²ங் மிகா³ரமாதரங் இமாஹி கா³தா²ஹி அனுமோதி³ –

‘‘யா அன்னபானங் த³த³திப்பமோதி³தா;

ஸீலூபபன்னா ஸுக³தஸ்ஸ ஸாவிகா;

த³தா³தி தா³னங் அபி⁴பு⁴ய்ய மச்ச²ரங்;

ஸோவக்³கி³கங் ஸோகனுத³ங் ஸுகா²வஹங்.

‘‘தி³ப்³ப³ங் ஸா லப⁴தே ஆயுங் [தி³ப்³ப³ங் ப³லங் ஸா லப⁴தே ச ஆயுங் (ஸீ॰ ஸ்யா॰)];

ஆக³ம்ம மக்³க³ங் விரஜங் அனங்க³ணங்;

ஸா புஞ்ஞகாமா ஸுகி²னீ அனாமயா;

ஸக்³க³ம்ஹி காயம்ஹி சிரங் பமோத³தீ’’தி.

352.
அத² கோ² ப⁴க³வா விஸாக²ங் மிகா³ரமாதரங் இமாஹி கா³தா²ஹி அனுமோதி³த்வா
உட்டா²யாஸனா பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே
த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே,
வஸ்ஸிகஸாடிகங், ஆக³ந்துகப⁴த்தங், க³மிகப⁴த்தங், கி³லானப⁴த்தங்,
கி³லானுபட்டா²கப⁴த்தங், கி³லானபே⁴ஸஜ்ஜங், து⁴வயாகு³ங், பி⁴க்கு²னிஸங்க⁴ஸ்ஸ
உத³கஸாடிக’’ந்தி.

விஸாகா²வத்து² நிட்டி²தங்.

விஸாகா²பா⁴ணவாரோ நிட்டி²தோ.

220. நிஸீத³னாதி³அனுஜானநா

353. தேன
கோ² பன ஸமயேன பி⁴க்கூ² பணீதானி போ⁴ஜனானி பு⁴ஞ்ஜித்வா முட்ட²ஸ்ஸதீ
அஸம்பஜானா நித்³த³ங் ஓக்கமந்தி. தேஸங் முட்ட²ஸ்ஸதீனங் அஸம்பஜானானங்
நித்³த³ங் ஓக்கமந்தானங் ஸுபினந்தேன அஸுசி முச்சதி, ஸேனாஸனங் அஸுசினா
மக்கி²யதி. அத² கோ² ப⁴க³வா ஆயஸ்மதா ஆனந்தே³ன பச்சா²ஸமணேன ஸேனாஸனசாரிகங்
ஆஹிண்ட³ந்தோ அத்³த³ஸ ஸேனாஸனங் அஸுசினா மக்கி²தங், தி³ஸ்வான ஆயஸ்மந்தங் ஆனந்த³ங் ஆமந்தேஸி – ‘‘கிங் ஏதங், ஆனந்த³, ஸேனாஸனங் மக்கி²த’’ந்தி? ‘‘ஏதரஹி, ப⁴ந்தே, பி⁴க்கூ² பணீதானி போ⁴ஜனானி
பு⁴ஞ்ஜித்வா முட்ட²ஸ்ஸதீ அஸம்பஜானா நித்³த³ங் ஓக்கமந்தி. தேஸங்
முட்ட²ஸ்ஸதீனங் அஸம்பஜானானங் நித்³த³ங் ஓக்கமந்தானங் ஸுபினந்தேன அஸுசி
முச்சதி; தயித³ங், ப⁴க³வா, ஸேனாஸனங் அஸுசினா மக்கி²த’’ந்தி. ‘‘ஏவமேதங்,
ஆனந்த³, ஏவமேதங், ஆனந்த³. முச்சதி ஹி, ஆனந்த³, முட்ட²ஸ்ஸதீனங் அஸம்பஜானானங்
நித்³த³ங் ஓக்கமந்தானங் ஸுபினந்தேன அஸுசி. யே தே, ஆனந்த³, பி⁴க்கூ²
உபட்டி²தஸ்ஸதீ ஸம்பஜானா நித்³த³ங் ஓக்கமந்தி, தேஸங் அஸுசி ந முச்சதி. யேபி
தே, ஆனந்த³, புது²ஜ்ஜனா காமேஸு வீதராகா³, தேஸம்பி அஸுசி ந முச்சதி.
அட்டா²னமேதங், ஆனந்த³, அனவகாஸோ யங் அரஹதோ அஸுசி முச்செய்யா’’தி. அத² கோ²
ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ²
ஆமந்தேஸி – ‘‘இதா⁴ஹங், பி⁴க்க²வே, ஆனந்தே³ன பச்சா²ஸமணேன ஸேனாஸனசாரிகங்
ஆஹிண்ட³ந்தோ அத்³த³ஸங் ஸேனாஸனங் அஸுசினா மக்கி²தங், தி³ஸ்வான ஆனந்த³ங்
ஆமந்தேஸிங் ‘கிங் ஏதங், ஆனந்த³, ஸேனாஸனங் மக்கி²த’ந்தி? ‘ஏதரஹி, ப⁴ந்தே,
பி⁴க்கூ² பணீதானி போ⁴ஜனானி பு⁴ஞ்ஜித்வா முட்ட²ஸ்ஸதீ அஸம்பஜானா நித்³த³ங்
ஓக்கமந்தி. தேஸங் முட்ட²ஸ்ஸதீனங் அஸம்பஜானானங் நித்³த³ங் ஓக்கமந்தானங்
ஸுபினந்தேன அஸுசி முச்சதி; தயித³ங், ப⁴க³வா, ஸேனாஸனங் அஸுசினா
மக்கி²த’ந்தி. ‘ஏவமேதங், ஆனந்த³, ஏவமேதங், ஆனந்த³, முச்சதி ஹி, ஆனந்த³,
முட்ட²ஸ்ஸதீனங் அஸம்பஜானானங் நித்³த³ங் ஓக்கமந்தானங் ஸுபினந்தேன
அஸுசி. யே தே, ஆனந்த³, பி⁴க்கூ² உபட்டி²தஸ்ஸதீ ஸம்பஜானா நித்³த³ங்
ஓக்கமந்தி, தேஸங் அஸுசி ந முச்சதி. யேபி தே, ஆனந்த³, புது²ஜ்ஜனா காமேஸு
வீதராகா³ தேஸம்பி அஸுசி ந முச்சதி. அட்டா²னமேதங், ஆனந்த³, அனவகாஸோ யங்
அரஹதோ அஸுசி முச்செய்யா’’’தி.

‘‘பஞ்சிமே, பி⁴க்க²வே, ஆதீ³னவா முட்ட²ஸ்ஸதிஸ்ஸ
அஸம்பஜானஸ்ஸ நித்³த³ங் ஓக்கமதோ – து³க்க²ங் ஸுபதி, து³க்க²ங் படிபு³ஜ்ஜ²தி,
பாபகங் ஸுபினங் பஸ்ஸதி, தே³வதா ந ரக்க²ந்தி, அஸுசி முச்சதி. இமே கோ²,
பி⁴க்க²வே, பஞ்ச ஆதீ³னவா முட்ட²ஸ்ஸதிஸ்ஸ அஸம்பஜானஸ்ஸ நித்³த³ங் ஓக்கமதோ.

‘‘பஞ்சிமே , பி⁴க்க²வே,
ஆனிஸங்ஸா உபட்டி²தஸ்ஸதிஸ்ஸ ஸம்பஜானஸ்ஸ நித்³த³ங் ஓக்கமதோ – ஸுக²ங் ஸுபதி,
ஸுக²ங் படிபு³ஜ்ஜ²தி, ந பாபகங் ஸுபினங் பஸ்ஸதி, தே³வதா ரக்க²ந்தி, அஸுசி ந
முச்சதி. இமே கோ², பி⁴க்க²வே, பஞ்ச ஆனிஸங்ஸா உபட்டி²தஸ்ஸதிஸ்ஸ ஸம்பஜானஸ்ஸ
நித்³த³ங் ஓக்கமதோ.

‘‘அனுஜானாமி, பி⁴க்க²வே, காயகு³த்தியா சீவரகு³த்தியா ஸேனாஸனகு³த்தியா நிஸீத³ன’’ந்தி.

தேன கோ² பன ஸமயேன
அதிகு²த்³த³கங் நிஸீத³னங் ந ஸப்³ப³ங் ஸேனாஸனங் ஸங்கோ³பேதி. ப⁴க³வதோ
ஏதமத்த²ங் ஆரோசேஸுங். அனுஜானாமி, பி⁴க்க²வே, யாவமஹந்தங் பச்சத்த²ரணங்
ஆகங்க²தி தாவமஹந்தங் பச்சத்த²ரணங் காதுந்தி.

354.
தேன கோ² பன ஸமயேன ஆயஸ்மதோ ஆனந்த³ஸ்ஸ உபஜ்ஜா²யஸ்ஸ ஆயஸ்மதோ பே³லட்ட²ஸீஸஸ்ஸ
து²ல்லகச்சா²பா³தோ⁴ ஹோதி. தஸ்ஸ லஸிகாய சீவரானி காயே லக்³க³ந்தி. தானி
பி⁴க்கூ² உத³கேன தேமெத்வா தேமெத்வா அபகட்³ட⁴ந்தி. அத்³த³ஸா கோ² ப⁴க³வா
ஸேனாஸனசாரிகங் ஆஹிண்ட³ந்தோ தே பி⁴க்கூ² தானி
சீவரானி உத³கேன தேமெத்வா தேமெத்வா அபகட்³ட⁴ந்தே, தி³ஸ்வான யேன தே பி⁴க்கூ²
தேனுபஸங்கமி, உபங்கமித்வா தே பி⁴க்கூ² ஏதத³வோச – ‘‘கிங் இமஸ்ஸ, பி⁴க்க²வே,
பி⁴க்கு²னோ ஆபா³தோ⁴’’தி? ‘‘இமஸ்ஸ, ப⁴ந்தே, ஆயஸ்மதோ
து²ல்லகச்சா²பா³தோ⁴. லஸிகாய சீவரானி காயே லக்³க³ந்தி. தானி மயங் உத³கேன
தேமெத்வா தேமெத்வா அபகட்³டா⁴மா’’தி. அத² கோ² ப⁴க³வா ஏதஸ்மிங் நிதா³னே
ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி,
பி⁴க்க²வே, யஸ்ஸ கண்டு³ வா பிளகா வா அஸ்ஸாவோ வா து²ல்லகச்சு² வா ஆபா³தோ⁴
கண்டு³ப்படிச்சா²தி³’’ந்தி.

355. அத² கோ² விஸாகா² மிகா³ரமாதா முக²புஞ்ச²னசோளங் [முக²புஞ்ஜனசோளங் (க॰)]
ஆதா³ய யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா
ஏகமந்தங் நிஸீதி³. ஏகமந்தங் நிஸின்னா கோ² விஸாகா² மிகா³ரமாதா ப⁴க³வந்தங்
ஏதத³வோச – ‘‘படிக்³க³ண்ஹாது மே, ப⁴ந்தே, ப⁴க³வா முக²புஞ்ச²னசோளங், யங்
மமஸ்ஸ தீ³க⁴ரத்தங் ஹிதாய ஸுகா²யா’’தி. படிக்³க³ஹேஸி ப⁴க³வா
முக²புஞ்ச²னசோளங். அத² கோ² ப⁴க³வா விஸாக²ங் மிகா³ரமாதரங் த⁴ம்மியா கதா²ய
ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² விஸாகா²
மிகா³ரமாதா ப⁴க³வதா த⁴ம்மியா கதா²ய ஸந்த³ஸ்ஸிதா
ஸமாத³பிதா ஸமுத்தேஜிதா ஸம்பஹங்ஸிதா உட்டா²யாஸனா ப⁴க³வந்தங் அபி⁴வாதெ³த்வா
பத³க்கி²ணங் கத்வா பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங்
பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே,
முக²புஞ்ச²னசோளக’’ந்தி [முக²புஞ்ச²னசோலந்தி (ஸ்யா॰)].

356. தேன
கோ² பன ஸமயேன ரோஜோ மல்லோ ஆயஸ்மதோ ஆனந்த³ஸ்ஸ ஸஹாயோ ஹோதி. ரோஜஸ்ஸ மல்லஸ்ஸ
கோ²மபிலோதிகா ஆயஸ்மதோ ஆனந்த³ஸ்ஸ ஹத்தே² நிக்கி²த்தா ஹோதி. ஆயஸ்மதோ ச
ஆனந்த³ஸ்ஸ கோ²மபிலோதிகாய அத்தோ² ஹோதி. ப⁴க³வதோ ஏதமத்த²ங் ஆரோசேஸுங்.
அனுஜானாமி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ விஸ்ஸாஸங் க³ஹேதுங் –
ஸந்தி³ட்டோ² ச ஹோதி, ஸம்ப⁴த்தோ ச, ஆலபிதோ ச, ஜீவதி
ச, ஜானாதி ச, க³ஹிதே மே அத்தமனோ ப⁴விஸ்ஸதீதி. அனுஜானாமி, பி⁴க்க²வே, இமேஹி
பஞ்சஹங்கே³ஹி ஸமன்னாக³தஸ்ஸ விஸ்ஸாஸங் க³ஹேதுந்தி.

357.
தேன கோ² பன ஸமயேன பி⁴க்கூ²னங் பரிபுண்ணங் ஹோதி திசீவரங். அத்தோ² ச ஹோதி
பரிஸ்ஸாவனேஹிபி த²விகாஹிபி. ப⁴க³வதோ ஏதமத்த²ங் ஆரோசேஸுங். அனுஜானாமி,
பி⁴க்க²வே, பரிக்கா²ரசோளகந்தி.

நிஸீத³னாதி³அனுஜானநா நிட்டி²தா.

221. பச்சி²மவிகப்பனுபக³சீவராதி³கதா²

358.
அத² கோ² பி⁴க்கூ²னங் ஏதத³ஹோஸி – ‘‘யானி தானி ப⁴க³வதா அனுஞ்ஞாதானி
திசீவரந்தி வா வஸ்ஸிகஸாடிகாதி வா நிஸீத³னந்தி வா பச்சத்த²ரணந்தி வா
கண்டு³ப்படிச்சா²தீ³தி வா முக²புஞ்ச²னசோளந்தி வா
பரிக்கா²ரசோளந்தி வா, ஸப்³பா³னி தானி அதி⁴ட்டா²தப்³பா³னி நு கோ², உதா³ஹு,
விகப்பேதப்³பா³னீ’’தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
திசீவரங் அதி⁴ட்டா²துங் ந விகப்பேதுங்; வஸ்ஸிகஸாடிகங் வஸ்ஸானங் சாதுமாஸங்
அதி⁴ட்டா²துங், ததோ பரங் விகப்பேதுங்; நிஸீத³னங் அதி⁴ட்டா²துங் ந
விகப்பேதுங்; பச்சத்த²ரணங் அதி⁴ட்டா²துங்
விகப்பேதுங்; கண்டு³ப்படிச்சா²தி³ங் யாவஆபா³தா⁴ அதி⁴ட்டா²துங் ததோ பரங்
விகப்பேதுங்; முக²புஞ்ச²னசோளங் அதி⁴ட்டா²துங் ந விகப்பேதுங்;
பரிக்கா²ரசோளங் அதி⁴ட்டா²துங் ந விகப்பேதுந்தி.

அத² கோ² பி⁴க்கூ²னங் ஏதத³ஹோஸி –
‘‘கித்தகங் பச்சி²மங் நு கோ² சீவரங் விகப்பேதப்³ப³’’ந்தி? ப⁴க³வதோ
ஏதமத்த²ங் ஆரோசேஸுங். அனுஜானாமி, பி⁴க்க²வே, ஆயாமேன அட்ட²ங்கு³லங்
ஸுக³தங்கு³லேன சதுரங்கு³லவித்த²தங் பச்சி²மங் சீவரங் விகப்பேதுந்தி.

359.
தேன கோ² பன ஸமயேன ஆயஸ்மதோ மஹாகஸ்ஸபஸ்ஸ பங்ஸுகூலகதோ க³ருகோ ஹோதி. ப⁴க³வதோ
ஏதமத்த²ங் ஆரோசேஸுங். அனுஜானாமி, பி⁴க்க²வே, ஸுத்தலூக²ங் காதுந்தி. விகண்ணோ
ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, விகண்ணங்
உத்³த⁴ரிதுந்தி. ஸுத்தா ஓகிரியந்தி. ப⁴க³வதோ ஏதமத்த²ங் ஆரோசேஸுங்.
அனுஜானாமி, பி⁴க்க²வே, அனுவாதங் பரிப⁴ண்ட³ங் ஆரோபேதுந்தி.

தேன கோ² பன ஸமயேன ஸங்கா⁴டியா பத்தா லுஜ்ஜந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அட்ட²பத³கங் காதுந்தி.

360.
தேன கோ² பன ஸமயேன அஞ்ஞதரஸ்ஸ பி⁴க்கு²னோ திசீவரே கயிரமானே ஸப்³ப³ங்
சி²ன்னகங் நப்பஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
த்³வே சி²ன்னகானி ஏகங் அச்சி²ன்னகந்தி.

த்³வே சி²ன்னகானி ஏகங் அச்சி²ன்னகங் நப்பஹோதி. ப⁴க³வதோ
ஏதமத்த²ங் ஆரோசேஸுங். அனுஜானாமி, பி⁴க்க²வே, த்³வே அச்சி²ன்னகானி ஏகங்
சி²ன்னகந்தி.

த்³வே அச்சி²ன்னகானி ஏகங்
சி²ன்னகங் நப்பஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
அன்வாதி⁴கம்பி ஆரோபேதுங், ந ச, பி⁴க்க²வே, ஸப்³ப³ங் அச்சி²ன்னகங்
தா⁴ரேதப்³ப³ங். யோ தா⁴ரெய்ய, ஆபத்தி து³க்கடஸ்ஸாதி.

361.
தேன கோ² பன ஸமயேன அஞ்ஞதரஸ்ஸ பி⁴க்கு²னோ ப³ஹுங் சீவரங் உப்பன்னங் ஹோதி. ஸோ ச
தங் சீவரங் மாதாபிதூனங் தா³துகாமோ ஹோதி. ப⁴க³வதோ ஏதமத்த²ங் ஆரோசேஸுங்.
மாதாபிதரோதி [மாதாபிதூனங் கோ² (ஸீ॰)] கோ², பி⁴க்க²வே, த³த³மானே [வத³மானோ (க॰), வத³மானே (?)] கிங் வதெ³ய்யாம? அனுஜானாமி , பி⁴க்க²வே, மாதாபிதூனங் தா³துங். ந ச, பி⁴க்க²வே, ஸத்³தா⁴தெ³ய்யங் வினிபாதேதப்³ப³ங். யோ வினிபாதெய்ய, ஆபத்தி து³க்கடஸ்ஸாதி.

362. தேன
கோ² பன ஸமயேன அஞ்ஞதரோ பி⁴க்கு² அந்த⁴வனே சீவரங் நிக்கி²பித்வா
ஸந்தருத்தரேன கா³மங் பிண்டா³ய பாவிஸி. சோரா தங் சீவரங் அவஹரிங்ஸு. ஸோ
பி⁴க்கு² து³ச்சோளோ ஹோதி லூக²சீவரோ. பி⁴க்கூ² ஏவமாஹங்ஸு – ‘‘கிஸ்ஸ த்வங்,
ஆவுஸோ, து³ச்சோளோ லூக²சீவரோஸீ’’தி? ‘‘இதா⁴ஹங் [ஸோ அஹங் (கத்த²சி)],
ஆவுஸோ, அந்த⁴வனே சீவரங் நிக்கி²பித்வா ஸந்தருத்தரேன கா³மங் பிண்டா³ய
பாவிஸிங். சோரா தங் சீவரங் அவஹரிங்ஸு. தேனாஹங் து³ச்சோளோ லூக²சீவரோ’’தி.
ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, ஸந்தருத்தரேன கா³மோ
பவிஸிதப்³போ³. யோ பவிஸெய்ய, ஆபத்தி து³க்கடஸ்ஸாதி.

தேன கோ² பன ஸமயேன ஆயஸ்மா ஆனந்தோ³ அஸ்ஸதியா ஸந்தருத்தரேன கா³மங் பிண்டா³ய பாவிஸி. பி⁴க்கூ² ஆயஸ்மந்தங் ஆனந்த³ங் ஏதத³வோசுங் – ‘‘நனு , ஆவுஸோ ஆனந்த³, ப⁴க³வதா பஞ்ஞத்தங் – ‘ந ஸந்தருத்தரேன கா³மோ பவிஸிதப்³போ³’தி? கிஸ்ஸ த்வங், ஆவுஸோ ஆனந்த³, ஸந்தருத்தரேன
கா³மங் பவிட்டோ²’’தி? ‘‘ஸச்சங், ஆவுஸோ, ப⁴க³வதா பஞ்ஞத்தங் – ‘ந
ஸந்தருத்தரேன கா³மோ பவிஸிதப்³போ³’தி. அபி சாஹங் அஸ்ஸதியா பவிட்டோ²’’தி.
ப⁴க³வதோ ஏதமத்த²ங் ஆரோசேஸுங்.

பஞ்சிமே, பி⁴க்க²வே, பச்சயா ஸங்கா⁴டியா நிக்கே²பாய –
கி³லானோ வா ஹோதி, வஸ்ஸிகஸங்கேதங் வா ஹோதி, நதீ³பாரங் க³ந்துங் வா ஹோதி,
அக்³க³ளகு³த்திவிஹாரோ வா ஹோதி, அத்த²தகதி²னங் வா ஹோதி. இமே கோ², பி⁴க்க²வே,
பஞ்ச பச்சயா ஸங்கா⁴டியா நிக்கே²பாய.

பஞ்சிமே, பி⁴க்க²வே, பச்சயா உத்தராஸங்க³ஸ்ஸ
நிக்கே²பாய…பே॰… அந்தரவாஸகஸ்ஸ நிக்கே²பாய – கி³லானோ வா ஹோதி,
வஸ்ஸிகஸங்கேதங் வா ஹோதி, நதீ³பாரங் க³ந்துங் வா ஹோதி, அக்³க³ளகு³த்திவிஹாரோ
வா ஹோதி, அத்த²தகதி²னங் வா ஹோதி. இமே கோ², பி⁴க்க²வே, பஞ்ச பச்சயா
உத்தராஸங்க³ஸ்ஸ அந்தரவாஸகஸ்ஸ நிக்கே²பாய.

பஞ்சிமே, பி⁴க்க²வே, பச்சயா வஸ்ஸிகஸாடிகாய நிக்கே²பாய –
கி³லானோ வா ஹோதி, நிஸ்ஸீமங் க³ந்துங் வா ஹோதி, நதீ³பாரங் க³ந்துங் வா
ஹோதி, அக்³க³ளகு³த்திவிஹாரோ வா ஹோதி, வஸ்ஸிகஸாடிகா அகதா வா ஹோதி விப்பகதா வா. இமே கோ², பி⁴க்க²வே, பஞ்ச பச்சயா வஸ்ஸிகஸாடிகாய நிக்கே²பாயாதி.

பச்சி²மவிகப்பனுபக³சீவராதி³கதா² நிட்டி²தா.

222. ஸங்கி⁴கசீவருப்பாத³கதா²

363. தேன
கோ² பன ஸமயேன அஞ்ஞதரோ பி⁴க்கு² ஏகோ வஸ்ஸங் வஸி. தத்த² மனுஸ்ஸா ஸங்க⁴ஸ்ஸ
தே³மாதி சீவரானி அத³ங்ஸு. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா
பஞ்ஞத்தங் ‘சதுவக்³கோ³ பச்சி²மோ ஸங்கோ⁴’தி. அஹஞ்சம்ஹி ஏககோ. இமே ச மனுஸ்ஸா
ஸங்க⁴ஸ்ஸ தே³மாதி சீவரானி அத³ங்ஸு. யங்னூனாஹங் இமானி ஸங்கி⁴கானி சீவரானி
ஸாவத்தி²ங் ஹரெய்ய’’ந்தி. அத² கோ² ஸோ பி⁴க்கு² தானி சீவரானி ஆதா³ய
ஸாவத்தி²ங் க³ந்த்வா ப⁴க³வதோ ஏதமத்த²ங் ஆரோசேஸி. ‘‘துய்ஹேவ, பி⁴க்கு², தானி
சீவரானி யாவ கதி²னஸ்ஸ உப்³பா⁴ராயா’’தி. இத⁴ பன, பி⁴க்க²வே, பி⁴க்கு² ஏகோ
வஸ்ஸங் வஸதி. தத்த² மனுஸ்ஸா ஸங்க⁴ஸ்ஸ தே³மாதி சீவரானி தெ³ந்தி. அனுஜானாமி,
பி⁴க்க²வே, தஸ்ஸேவ தானி சீவரானி யாவ கதி²னஸ்ஸ உப்³பா⁴ராயாதி.

தேன கோ² பன ஸமயேன அஞ்ஞதரோ
பி⁴க்கு² உதுகாலங் ஏகோ வஸி. தத்த² மனுஸ்ஸா ஸங்க⁴ஸ்ஸ தே³மாதி சீவரானி
அத³ங்ஸு. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தங்
‘சதுவக்³கோ³ பச்சி²மோ ஸங்கோ⁴’தி. அஹஞ்சம்ஹி ஏககோ. இமே ச மனுஸ்ஸா ஸங்க⁴ஸ்ஸ
தே³மாதி சீவரானி அத³ங்ஸு. யங்னூனாஹங் இமானி ஸங்கி⁴கானி சீவரானி ஸாவத்தி²ங்
ஹரெய்ய’’ந்தி. அத² கோ² ஸோ பி⁴க்கு² தானி சீவரானி ஆதா³ய ஸாவத்தி²ங் க³ந்த்வா
பி⁴க்கூ²னங் ஏதமத்த²ங் ஆரோசேஸி. பி⁴க்கூ² ப⁴க³வதோ ஏதமத்த²ங் ஆரோசேஸுங்.
அனுஜானாமி, பி⁴க்க²வே , ஸம்முகீ²பூ⁴தேன ஸங்கே⁴ன
பா⁴ஜேதுங். இத⁴ பன, பி⁴க்க²வே, பி⁴க்கு² உதுகாலங் ஏகோ வஸதி. தத்த² மனுஸ்ஸா
ஸங்க⁴ஸ்ஸ தே³மாதி சீவரானி தெ³ந்தி. அனுஜானாமி, பி⁴க்க²வே, தேன பி⁴க்கு²னா
தானி சீவரானி அதி⁴ட்டா²துங் – ‘‘மய்ஹிமானி சீவரானீ’’தி. தஸ்ஸ சே,
பி⁴க்க²வே, பி⁴க்கு²னோ தங் சீவரங் அனதி⁴ட்டி²தே அஞ்ஞோ பி⁴க்கு² ஆக³ச்ச²தி,
ஸமகோ தா³தப்³போ³ பா⁴கோ³. தேஹி சே, பி⁴க்க²வே, பி⁴க்கூ²ஹி தங் சீவரங்
பா⁴ஜியமானே, அபாதிதே குஸே, அஞ்ஞோ பி⁴க்கு² ஆக³ச்ச²தி, ஸமகோ தா³தப்³போ³
பா⁴கோ³. தேஹி சே, பி⁴க்க²வே, பி⁴க்கூ²ஹி தங் சீவரங் பா⁴ஜியமானே, பாதிதே
குஸே, அஞ்ஞோ பி⁴க்கு² ஆக³ச்ச²தி, நாகாமா தா³தப்³போ³ பா⁴கோ³தி.

தேன கோ² பன ஸமயேன த்³வே பா⁴திகா தே²ரா, ஆயஸ்மா ச
இஸிதா³ஸோ ஆயஸ்மா ச இஸிப⁴டோ, ஸாவத்தி²யங் வஸ்ஸங்வுட்டா² அஞ்ஞதரங்
கா³மகாவாஸங் அக³மங்ஸு. மனுஸ்ஸா சிரஸ்ஸாபி தே²ரா ஆக³தாதி ஸசீவரானி ப⁴த்தானி
அத³ங்ஸு. ஆவாஸிகா பி⁴க்கூ² தே²ரே புச்சி²ங்ஸு – ‘‘இமானி, ப⁴ந்தே,
ஸங்கி⁴கானி சீவரானி தே²ரே ஆக³ம்ம உப்பன்னானி, ஸாதி³யிஸ்ஸந்தி தே²ரா
பா⁴க³’’ந்தி. தே²ரா ஏவமாஹங்ஸு – ‘‘யதா² கோ² மயங், ஆவுஸோ, ப⁴க³வதா த⁴ம்மங்
தே³ஸிதங் ஆஜானாம, தும்ஹாகங்யேவ தானி சீவரானி யாவ கதி²னஸ்ஸ உப்³பா⁴ராயா’’தி.

தேன கோ² பன ஸமயேன தயோ பி⁴க்கூ² ராஜக³ஹே வஸ்ஸங் வஸந்தி. தத்த² மனுஸ்ஸா ஸங்க⁴ஸ்ஸ

தே³மாதி சீவரானி தெ³ந்தி. அத² கோ² தேஸங் பி⁴க்கூ²னங் ஏதத³ஹோஸி – ‘‘ப⁴க³வதா பஞ்ஞத்தங் ‘சதுவக்³கோ³ பச்சி²மோ ஸங்கோ⁴’தி. மயஞ்சம்ஹா தயோ ஜனா. இமே ச மனுஸ்ஸா ஸங்க⁴ஸ்ஸ தே³மாதி சீவரானி
தெ³ந்தி. கத²ங் நு கோ² அம்ஹேஹி படிபஜ்ஜிதப்³ப³’’ந்தி? தேன கோ² பன ஸமயேன
ஸம்ப³ஹுலா தே²ரா, ஆயஸ்மா ச நிலவாஸீ ஆயஸ்மா ச ஸாணவாஸீ ஆயஸ்மா ச கோ³தகோ
ஆயஸ்மா ச ப⁴கு³ ஆயஸ்மா ச ப²ளிகஸந்தானோ, பாடலிபுத்தே விஹரந்தி குக்குடாராமே.
அத² கோ² தே பி⁴க்கூ² பாடலிபுத்தங் க³ந்த்வா தே²ரே புச்சி²ங்ஸு. தே²ரா
ஏவமாஹங்ஸு – ‘‘யதா² கோ² மயங் ஆவுஸோ ப⁴க³வதா த⁴ம்மங் தே³ஸிதங் ஆஜானாம,
தும்ஹாகங்யேவ தானி சீவரானி யாவ கதி²னஸ்ஸ உப்³பா⁴ராயா’’தி.

ஸங்கி⁴கசீவருப்பாத³கதா² நிட்டி²தா.

223. உபனந்த³ஸக்யபுத்தவத்து²

364. தேன
கோ² பன ஸமயேன ஆயஸ்மா உபனந்தோ³ ஸக்யபுத்தோ ஸாவத்தி²யங் வஸ்ஸங்வுட்டோ²
அஞ்ஞதரங் கா³மகாவாஸங் அக³மாஸி. தத்த² ச பி⁴க்கூ² சீவரங் பா⁴ஜேதுகாமா
ஸன்னிபதிங்ஸு. தே ஏவமாஹங்ஸு – ‘‘இமானி கோ², ஆவுஸோ, ஸங்கி⁴கானி சீவரானி
பா⁴ஜியிஸ்ஸந்தி, ஸாதி³யிஸ்ஸஸி பா⁴க³’’ந்தி? ‘‘ஆமாவுஸோ, ஸாதி³யிஸ்ஸாமீ’’தி.
ததோ சீவரபா⁴க³ங் க³ஹெத்வா அஞ்ஞங் ஆவாஸங் அக³மாஸி. தத்த²பி பி⁴க்கூ² சீவரங்
பா⁴ஜேதுகாமா ஸன்னிபதிங்ஸு. தேபி ஏவமாஹங்ஸு – ‘‘இமானி கோ², ஆவுஸோ,
ஸங்கி⁴கானி சீவரானி பா⁴ஜியிஸ்ஸந்தி, ஸாதி³யிஸ்ஸஸி பா⁴க³’’ந்தி? ‘‘ஆமாவுஸோ,
ஸாதி³யிஸ்ஸாமீ’’தி. ததோபி சீவரபா⁴க³ங் க³ஹெத்வா அஞ்ஞங் ஆவாஸங் அக³மாஸி.
தத்த²பி பி⁴க்கூ² சீவரங் பா⁴ஜேதுகாமா ஸன்னிபதிங்ஸு. தேபி ஏவமாஹங்ஸு –
‘‘இமானி கோ², ஆவுஸோ, ஸங்கி⁴கானி சீவரானி பா⁴ஜியிஸ்ஸந்தி, ஸாதி³யிஸ்ஸஸி
பா⁴க³’’ந்தி? ‘‘ஆமாவுஸோ, ஸாதி³யிஸ்ஸாமீ’’தி. ததோபி சீவரபா⁴க³ங் க³ஹெத்வா
மஹந்தங் சீவரப⁴ண்டி³கங் ஆதா³ய புனதே³வ ஸாவத்தி²ங் பச்சாக³ஞ்சி². பி⁴க்கூ²
ஏவமாஹங்ஸு – ‘‘மஹாபுஞ்ஞோஸி த்வங் , ஆவுஸோ உபனந்த³, ப³ஹுங் தே சீவரங் உப்பன்ன’’ந்தி. ‘‘குதோ மே ,
ஆவுஸோ, புஞ்ஞங்? இதா⁴ஹங், ஆவுஸோ, ஸாவத்தி²யங் வஸ்ஸங்வுட்டோ² அஞ்ஞதரங்
கா³மகாவாஸங் அக³மாஸிங். தத்த² பி⁴க்கூ² சீவரங் பா⁴ஜேதுகாமா ஸன்னிபதிங்ஸு.
தே மங் ஏவமாஹங்ஸு – ‘இமானி கோ², ஆவுஸோ, ஸங்கி⁴கானி சீவரானி பா⁴ஜியிஸ்ஸந்தி,
ஸாதி³யிஸ்ஸஸி பா⁴க³’ந்தி? ‘ஆமாவுஸோ, ஸாதி³யிஸ்ஸாமீ’தி. ததோ சீவரபா⁴க³ங்
க³ஹெத்வா அஞ்ஞங் ஆவாஸங் அக³மாஸிங். தத்த²பி பி⁴க்கூ² சீவரங் பா⁴ஜேதுகாமா
ஸன்னிபதிங்ஸு. தேபி மங் ஏவமாஹங்ஸு – ‘இமானி கோ², ஆவுஸோ, ஸங்கி⁴கானி சீவரானி
பா⁴ஜியிஸ்ஸந்தி, ஸாதி³யிஸ்ஸஸி பா⁴க³’’’ந்தி? ‘ஆமாவுஸோ, ஸாதி³யிஸ்ஸாமீ’தி.
ததோபி சீவரபா⁴க³ங் க³ஹெத்வா அஞ்ஞங் ஆவாஸங்
அக³மாஸிங். தத்த²பி பி⁴க்கூ² சீவரங் பா⁴ஜேதுகாமா ஸன்னிபதிங்ஸு. தேபி மங்
ஏவமாஹங்ஸு – ‘இமானி கோ², ஆவுஸோ, ஸங்கி⁴கானி சீவரானி பா⁴ஜியிஸ்ஸந்தி,
ஸாதி³யிஸ்ஸஸி பா⁴க³’ந்தி? ‘ஆமாவுஸோ, ஸாதி³யிஸ்ஸாமீ’தி. ததோபி சீவரபா⁴க³ங்
அக்³க³ஹேஸிங். ஏவங் மே ப³ஹுங் சீவரங் உப்பன்னந்தி. ‘‘கிங் பன த்வங், ஆவுஸோ
உபனந்த³, அஞ்ஞத்ர வஸ்ஸங்வுட்டோ² அஞ்ஞத்ர சீவரபா⁴க³ங் ஸாதி³யீ’’தி?
‘‘ஏவமாவுஸோ’’தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி
விபாசெந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ அஞ்ஞத்ர
வஸ்ஸங்வுட்டோ² அஞ்ஞத்ர சீவரபா⁴க³ங் ஸாதி³யிஸ்ஸதீ’’தி. ப⁴க³வதோ ஏதமத்த²ங்
ஆரோசேஸுங்…பே॰… ‘‘ஸச்சங் கிர த்வங், உபனந்த³, அஞ்ஞத்ர வஸ்ஸங்வுட்டோ²
அஞ்ஞத்ர சீவரபா⁴க³ங் ஸாதி³யீ’’தி? ‘‘ஸச்சங் ப⁴க³வா’’தி. விக³ரஹி பு³த்³தோ⁴
ப⁴க³வா…பே॰… கத²ஞ்ஹி நாம த்வங், மோக⁴புரிஸ, அஞ்ஞத்ர வஸ்ஸங்வுட்டோ² அஞ்ஞத்ர சீவரபா⁴க³ங் ஸாதி³யிஸ்ஸஸி. நேதங், மோக⁴புரிஸ, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங்
கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, அஞ்ஞத்ர வஸ்ஸங்வுட்டே²ன
அஞ்ஞத்ர சீவரபா⁴கோ³ ஸாதி³தப்³போ³. யோ ஸாதி³யெய்ய, ஆபத்தி து³க்கடஸ்ஸா’’தி.

தேன கோ² பன ஸமயேன ஆயஸ்மா உபனந்தோ³ ஸக்யபுத்தோ ஏகோ
த்³வீஸு ஆவாஸேஸு வஸ்ஸங் வஸி – ‘‘ஏவங் மே ப³ஹுங் சீவரங் உப்பஜ்ஜிஸ்ஸதீ’’தி.
அத² கோ² தேஸங் பி⁴க்கூ²னங் ஏதத³ஹோஸி – ‘‘கத²ங் நு கோ² ஆயஸ்மதோ உபனந்த³ஸ்ஸ
ஸக்யபுத்தஸ்ஸ சீவரபடிவீஸோ தா³தப்³போ³’’தி? ப⁴க³வதோ ஏதமத்த²ங் ஆரோசேஸுங்.
தே³த², பி⁴க்க²வே, மோக⁴புரிஸஸ்ஸ ஏகாதி⁴ப்பாயங். இத⁴ பன, பி⁴க்க²வே,
பி⁴க்கு² ஏகோ த்³வீஸு ஆவாஸேஸு வஸ்ஸங் வஸதி – ‘‘ஏவங் மே ப³ஹுங் சீவரங்
உப்பஜ்ஜிஸ்ஸதீ’’தி. ஸசே அமுத்ர உபட்³ட⁴ங் அமுத்ர உபட்³ட⁴ங் வஸதி, அமுத்ர
உபட்³டோ⁴ அமுத்ர உபட்³டோ⁴ சீவரபடிவீஸோ தா³தப்³போ³. யத்த² வா பன ப³ஹுதரங்
வஸதி, ததோ சீவரபடிவீஸோ தா³தப்³போ³தி.

உபனந்த³ஸக்யபுத்தவத்து² நிட்டி²தங்.

224. கி³லானவத்து²கதா²

365. தேன
கோ² பன ஸமயேன அஞ்ஞதரஸ்ஸ பி⁴க்கு²னோ குச்சி²விகாராபா³தோ⁴ ஹோதி. ஸோ ஸகே
முத்தகரீஸே பலிபன்னோ ஸேதி. அத² கோ² ப⁴க³வா ஆயஸ்மதா ஆனந்தே³ன பச்சா²ஸமணேன
ஸேனாஸனசாரிகங் ஆஹிண்ட³ந்தோ யேன தஸ்ஸ பி⁴க்கு²னோ விஹாரோ தேனுபஸங்கமி.
அத்³த³ஸா கோ² ப⁴க³வா தங் பி⁴க்கு²ங் ஸகே முத்தகரீஸே பலிபன்னங் ஸயமானங்,
தி³ஸ்வான யேன ஸோ பி⁴க்கு² தேனுபஸங்கமி, உபஸங்கமித்வா தங் பி⁴க்கு²ங்
ஏதத³வோச – ‘‘கிங் தே, பி⁴க்கு², ஆபா³தோ⁴’’தி? ‘‘குச்சி²விகாரோ மே,
ப⁴க³வா’’தி. ‘‘அத்தி² பன தே, பி⁴க்கு², உபட்டா²கோ’’தி? ‘‘நத்தி², ப⁴க³வா’’தி .
‘‘கிஸ்ஸ தங் பி⁴க்கூ² ந உபட்டெ²ந்தீ’’தி? ‘‘அஹங் கோ², ப⁴ந்தே, பி⁴க்கூ²னங்
அகாரகோ; தேன மங் பி⁴க்கூ² ந உபட்டெ²ந்தீ’’தி. அத² கோ² ப⁴க³வா ஆயஸ்மந்தங்
ஆனந்த³ங் ஆமந்தேஸி – ‘‘க³ச்சா²னந்த³, உத³கங் ஆஹர, இமங் பி⁴க்கு²ங்
நஹாபெஸ்ஸாமா’’தி. ‘‘ஏவங், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ
படிஸ்ஸுணித்வா உத³கங் ஆஹரி. ப⁴க³வா உத³கங் ஆஸிஞ்சி. ஆயஸ்மா ஆனந்தோ³
பரிதோ⁴வி. ப⁴க³வா ஸீஸதோ அக்³க³ஹேஸி. ஆயஸ்மா ஆனந்தோ³ பாத³தோ உச்சாரெத்வா
மஞ்சகே நிபாதேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே
பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘அத்தி²,
பி⁴க்க²வே, அமுகஸ்மிங் விஹாரே பி⁴க்கு² கி³லானோ’’தி? ‘‘அத்தி², ப⁴க³வா’’தி.
‘‘கிங் தஸ்ஸ, பி⁴க்க²வே, பி⁴க்கு²னோ ஆபா³தோ⁴’’தி? ‘‘தஸ்ஸ, ப⁴ந்தே, ஆயஸ்மதோ
குச்சி²விகாராபா³தோ⁴’’தி. ‘‘அத்தி² பன, பி⁴க்க²வே, தஸ்ஸ பி⁴க்கு²னோ
உபட்டா²கோ’’தி? ‘‘நத்தி², ப⁴க³வா’’தி . ‘‘கிஸ்ஸ தங்
பி⁴க்கூ² ந உபட்டெ²ந்தீ’’தி? ‘‘ஏஸோ, ப⁴ந்தே, பி⁴க்கு² பி⁴க்கூ²னங் அகாரகோ;
தேன தங் பி⁴க்கூ² ந உபட்டெ²ந்தீ’’தி. ‘‘நத்தி² வோ, பி⁴க்க²வே, மாதா, நத்தி²
பிதா, யே வோ உபட்ட²ஹெய்யுங். தும்ஹே சே, பி⁴க்க²வே, அஞ்ஞமஞ்ஞங் ந
உபட்ட²ஹிஸ்ஸத², அத² கோ சரஹி உபட்ட²ஹிஸ்ஸதி? யோ, பி⁴க்க²வே, மங் உபட்ட²ஹெய்ய
ஸோ கி³லானங் உபட்ட²ஹெய்ய. ஸசே உபஜ்ஜா²யோ ஹோதி, உபஜ்ஜா²யேன யாவஜீவங்
உபட்டா²தப்³போ³; வுட்டா²னமஸ்ஸ ஆக³மேதப்³ப³ங். ஸசே ஆசரியோ ஹோதி, ஆசரியேன
யாவஜீவங் உபட்டா²தப்³போ³; வுட்டா²னமஸ்ஸ ஆக³மேதப்³ப³ங். ஸசே ஸத்³தி⁴விஹாரிகோ
ஹோதி , ஸத்³தி⁴விஹாரிகேன யாவஜீவங் உபட்டா²தப்³போ³;
வுட்டா²னமஸ்ஸ ஆக³மேதப்³ப³ங். ஸசே அந்தேவாஸிகோ ஹோதி, அந்தேவாஸிகேன யாவஜீவங்
உபட்டா²தப்³போ³; வுட்டா²னமஸ்ஸ ஆக³மேதப்³ப³ங். ஸசே ஸமானுபஜ்ஜா²யகோ ஹோதி,
ஸமானுபஜ்ஜா²யகேன யாவஜீவங் உபட்டா²தப்³போ³ ;
வுட்டா²னமஸ்ஸ ஆக³மேதப்³ப³ங். ஸசே ஸமானாசரியகோ ஹோதி, ஸமானாசரியகேன யாவஜீவங்
உபட்டா²தப்³போ³; வுட்டா²னமஸ்ஸ ஆக³மேதப்³ப³ங். ஸசே ந ஹோதி உபஜ்ஜா²யோ வா
ஆசரியோ வா ஸத்³தி⁴விஹாரிகோ வா அந்தேவாஸிகோ வா ஸமானுபஜ்ஜா²யகோ வா
ஸமானாசரியகோ வா ஸங்கே⁴ன உபட்டா²தப்³போ³. நோ சே உபட்ட²ஹெய்ய, ஆபத்தி
து³க்கடஸ்ஸ’’.

366.
பஞ்சஹி, பி⁴க்க²வே, அங்கே³ஹி ஸமன்னாக³தோ கி³லானோ தூ³பட்டோ² ஹோதி –
அஸப்பாயகாரீ ஹோதி, ஸப்பாயே மத்தங் ந ஜானாதி, பே⁴ஸஜ்ஜங் ந படிஸேவிதா ஹோதி,
அத்த²காமஸ்ஸ கி³லானுபட்டா²கஸ்ஸ யதா²பூ⁴தங் ஆபா³த⁴ங் நாவிகத்தா ஹோதி
‘அபி⁴க்கமந்தங் வா அபி⁴க்கமதீதி, படிக்கமந்தங் வா படிக்கமதீதி, டி²தங் வா
டி²தோ’தி, உப்பன்னானங் ஸாரீரிகானங் வேத³னானங் து³க்கா²னங் திப்³பா³னங்
க²ரானங் கடுகானங் அஸாதானங் அமனாபானங் பாணஹரானங் அனதி⁴வாஸகஜாதிகோ ஹோதி.
இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ கி³லானோ தூ³பட்டோ² ஹோதி.

பஞ்சஹி, பி⁴க்க²வே , அங்கே³ஹி
ஸமன்னாக³தோ கி³லானோ ஸூபட்டோ² ஹோதி – ஸப்பாயகாரீ ஹோதி, ஸப்பாயே மத்தங்
ஜானாதி, பே⁴ஸஜ்ஜங் படிஸேவிதா ஹோதி, அத்த²காமஸ்ஸ கி³லானுபட்டா²கஸ்ஸ
யதா²பூ⁴தங் ஆபா³த⁴ங் ஆவிகத்தா ஹோதி ‘அபி⁴க்கமந்தங் வா அபி⁴க்கமதீதி,
படிக்கமந்தங் வா படிக்கமதீதி, டி²தங் வா டி²தோ’தி,
உப்பன்னானங் ஸாரீரிகானங் வேத³னானங் து³க்கா²னங் திப்³பா³னங் க²ரானங்
கடுகானங் அஸாதானங் அமனாபானங் பாணஹரானங் அதி⁴வாஸகஜாதிகோ ஹோதி. இமேஹி கோ²,
பி⁴க்க²வே, பஞ்சஹங்கே³ஹி ஸமன்னாக³தோ கி³லானோ ஸூபட்டோ² ஹோதி.

பஞ்சஹி, பி⁴க்க²வே, அங்கே³ஹி ஸமன்னாக³தோ
கி³லானுபட்டா²கோ நாலங் கி³லானங் உபட்டா²துங் – ந படிப³லோ ஹோதி பே⁴ஸஜ்ஜங்
ஸங்விதா⁴துங், ஸப்பாயாஸப்பாயங் ந ஜானாதி, அஸப்பாயங் உபனாமேதி ஸப்பாயங்
அபனாமேதி, ஆமிஸந்தரோ கி³லானங் உபட்டா²தி நோ மெத்தசித்தோ, ஜேகு³ச்சீ² ஹோதி
உச்சாரங் வா பஸ்ஸாவங் வா கே²ளங் வா வந்தங் வா
நீஹாதுங், ந படிப³லோ ஹோதி கி³லானங் காலேன காலங் த⁴ம்மியா கதா²ய
ஸந்த³ஸ்ஸேதுங் ஸமாத³பேதுங் ஸமுத்தேஜேதுங் ஸம்பஹங்ஸேதுங். இமேஹி கோ²,
பி⁴க்க²வே, பஞ்சஹங்கே³ஹி ஸமன்னாக³தோ கி³லானுபட்டா²கோ நாலங் கி³லானங்
உபட்டா²துங்.

பஞ்சஹி , பி⁴க்க²வே, அங்கே³ஹி
ஸமன்னாக³தோ கி³லானுபட்டா²கோ அலங் கி³லானங் உபட்டா²துங் – படிப³லோ ஹோதி
பே⁴ஸஜ்ஜங் ஸங்விதா⁴துங், ஸப்பாயாஸப்பாயங் ஜானாதி, அஸப்பாயங் அபனாமேதி
ஸப்பாயங் உபனாமேதி, மெத்தசித்தோ கி³லானங் உபட்டா²தி நோ ஆமிஸந்தரோ,
அஜேகு³ச்சீ² ஹோதி உச்சாரங் வா பஸ்ஸாவங் வா கே²ளங் வா வந்தங் வா நீஹாதுங்,
படிப³லோ ஹோதி கி³லானங் காலேன காலங் த⁴ம்மியா கதா²ய ஸந்த³ஸ்ஸேதுங்
ஸமாத³பேதுங் ஸமுத்தேஜேதுங் ஸம்பஹங்ஸேதுங். இமேஹி கோ², பி⁴க்க²வே,
பஞ்சஹங்கே³ஹி ஸமன்னாக³தோ கி³லானுபட்டா²கோ அலங் கி³லானங் உபட்டா²துந்தி.

கி³லானவத்து²கதா² நிட்டி²தா.

225. மதஸந்தககதா²

367. தேன கோ² பன ஸமயேன த்³வே பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹொந்தி. தே அஞ்ஞதரங் ஆவாஸங் உபக³ச்சி²ங்ஸு. தத்த²
அஞ்ஞதரோ பி⁴க்கு² கி³லானோ ஹோதி. அத² கோ² தேஸங் பி⁴க்கூ²னங் ஏதத³ஹோஸி –
‘‘ப⁴க³வதா கோ², ஆவுஸோ, கி³லானுபட்டா²னங் வண்ணிதங். ஹந்த³, மயங், ஆவுஸோ,
இமங் பி⁴க்கு²ங் உபட்ட²ஹேமா’’தி. தே தங் உபட்ட²ஹிங்ஸு. ஸோ தேஹி
உபட்ட²ஹியமானோ காலமகாஸி. அத² கோ² தே பி⁴க்கூ² தஸ்ஸ பி⁴க்கு²னோ
பத்தசீவரமாதா³ய ஸாவத்தி²ங் க³ந்த்வா ப⁴க³வதோ ஏதமத்த²ங் ஆரோசேஸுங்.
‘‘பி⁴க்கு²ஸ்ஸ, பி⁴க்க²வே, காலங்கதே ஸங்கோ⁴ ஸாமீ பத்தசீவரே, அபிச
கி³லானுபட்டா²கா ப³ஹூபகாரா. அனுஜானாமி, பி⁴க்க²வே, ஸங்கே⁴ன திசீவரஞ்ச
பத்தஞ்ச கி³லானுபட்டா²கானங் தா³துங். ஏவஞ்ச பன, பி⁴க்க²வே, தா³தப்³ப³ங்.
தேன கி³லானுபட்டா²கேன பி⁴க்கு²னா ஸங்க⁴ங் உபஸங்கமித்வா ஏவமஸ்ஸ வசனீயோ –
‘இத்த²ன்னாமோ, ப⁴ந்தே, பி⁴க்கு² காலங்கதோ. இத³ங் தஸ்ஸ திசீவரஞ்ச பத்தோ
சா’’’தி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ பி⁴க்கு²
காலங்கதோ. இத³ங் தஸ்ஸ திசீவரஞ்ச பத்தோ ச. யதி³ ஸங்க⁴ஸ்ஸ பத்தகல்லங், ஸங்கோ⁴
இமங் திசீவரஞ்ச பத்தஞ்ச கி³லானுபட்டா²கானங் த³தெ³ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴.
இத்த²ன்னாமோ பி⁴க்கு² காலங்கதோ. இத³ங் தஸ்ஸ திசீவரஞ்ச பத்தோ ச. ஸங்கோ⁴ இமங்
திசீவரஞ்ச பத்தஞ்ச கி³லானுபட்டா²கானங் தே³தி. யஸ்ஸாயஸ்மதோ க²மதி இமஸ்ஸ
திசீவரஸ்ஸ ச பத்தஸ்ஸ ச கி³லானுபட்டா²கானங் தா³னங், ஸோ துண்ஹஸ்ஸ; யஸ்ஸ
நக்க²மதி, ஸோ பா⁴ஸெய்ய.

‘‘தி³ன்னங் இத³ங் ஸங்கே⁴ன திசீவரஞ்ச பத்தோ ச கி³லானுபட்டா²கானங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி .

368.
தேன கோ² பன ஸமயேன அஞ்ஞதரோ ஸாமணேரோ காலங்கதோ ஹோதி. ப⁴க³வதோ ஏதமத்த²ங்
ஆரோசேஸுங். ஸாமணேரஸ்ஸ, பி⁴க்க²வே, காலங்கதே ஸங்கோ⁴ ஸாமீ பத்தசீவரே, அபி ச
கி³லானுபட்டா²கா ப³ஹூபகாரா. அனுஜானாமி, பி⁴க்க²வே, ஸங்கே⁴ன சீவரஞ்ச பத்தஞ்ச
கி³லானுபட்டா²கானங் தா³துங். ஏவஞ்ச பன, பி⁴க்க²வே, தா³தப்³ப³ங். தேன
கி³லானுபட்டா²கேன பி⁴க்கு²னா ஸங்க⁴ங் உபஸங்கமித்வா ஏவமஸ்ஸ வசனீயோ –
‘‘இத்த²ன்னாமோ, ப⁴ந்தே, ஸாமணேரோ காலங்கதோ, இத³ங் தஸ்ஸ சீவரஞ்ச பத்தோ
சா’’தி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ ஸாமணேரோ
காலங்கதோ. இத³ங் தஸ்ஸ சீவரஞ்ச பத்தோ ச. யதி³ ஸங்க⁴ஸ்ஸ பத்தகல்லங், ஸங்கோ⁴
இமங் சீவரஞ்ச பத்தஞ்ச கி³லானுபட்டா²கானங் த³தெ³ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ ஸாமணேரோ
காலங்கதோ. இத³ங் தஸ்ஸ சீவரஞ்ச பத்தோ ச. ஸங்கோ⁴ இமங் சீவரஞ்ச பத்தஞ்ச
கி³லானுபட்டா²கானங் தே³தி. யஸ்ஸாயஸ்மதோ க²மதி இமஸ்ஸ சீவரஸ்ஸ ச பத்தஸ்ஸ ச
கி³லானுபட்டா²கானங் தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.

‘‘தி³ன்னங் இத³ங் ஸங்கே⁴ன சீவரஞ்ச பத்தோ ச கி³லானுபட்டா²கானங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.

369.
தேன கோ² பன ஸமயேன அஞ்ஞதரோ பி⁴க்கு² ச ஸாமணேரோ ச கி³லானங் உபட்ட²ஹிங்ஸு. ஸோ
தேஹி உபட்ட²ஹியமானோ காலமகாஸி. அத² கோ² தஸ்ஸ கி³லானுபட்டா²கஸ்ஸ பி⁴க்கு²னோ
ஏதத³ஹோஸி – ‘‘கத²ங் நு கோ² கி³லானுபட்டா²கஸ்ஸ ஸாமணேரஸ்ஸ சீவரபடிவீஸோ தா³தப்³போ³’’தி ? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, கி³லானுபட்டா²கஸ்ஸ ஸாமணேரஸ்ஸ ஸமகங் படிவீஸங் தா³துந்தி.

தேன கோ² பன ஸமயேன அஞ்ஞதரோ பி⁴க்கு² ப³ஹுப⁴ண்டோ³
ப³ஹுபரிக்கா²ரோ காலங்கதோ ஹோதி. ப⁴க³வதோ ஏதமத்த²ங் ஆரோசேஸுங். பி⁴க்கு²ஸ்ஸ,
பி⁴க்க²வே, காலங்கதே ஸங்கோ⁴ ஸாமீ பத்தசீவரே, அபி ச கி³லானுபட்டா²கா
ப³ஹூபகாரா. அனுஜானாமி, பி⁴க்க²வே, ஸங்கே⁴ன திசீவரஞ்ச பத்தஞ்ச
கி³லானுபட்டா²கானங் தா³துங். யங் தத்த² லஹுப⁴ண்ட³ங் லஹுபரிக்கா²ரங் தங்
ஸம்முகீ²பூ⁴தேன ஸங்கே⁴ன பா⁴ஜேதுங். யங் தத்த² க³ருப⁴ண்ட³ங் க³ருபரிக்கா²ரங்
தங் ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸ அவிஸ்ஸஜ்ஜிகங்
அவேப⁴ங்கி³கந்தி.

மதஸந்தககதா² நிட்டி²தா.

226. நக்³கி³யபடிக்கே²பகதா²

370.
தேன கோ² பன ஸமயேன அஞ்ஞதரோ பி⁴க்கு² நக்³கோ³ ஹுத்வா யேன ப⁴க³வா
தேனுபஸங்கமி, உபஸங்கமித்வா ப⁴க³வந்தங் ஏதத³வோச – ‘‘ப⁴க³வா, ப⁴ந்தே,
அனேகபரியாயேன அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ து⁴தஸ்ஸ பாஸாதி³கஸ்ஸ
அபசயஸ்ஸ வீரியாரம்ப⁴ஸ்ஸ வண்ணவாதீ³. இத³ங், ப⁴ந்தே, நக்³கி³யங் அனேகபரியாயேன
அப்பிச்ச²தாய ஸந்துட்டி²தாய ஸல்லேகா²ய து⁴ததாய [து⁴தத்தாய (க॰)]
பாஸாதி³கதாய அபசயாய வீரியாரம்பா⁴ய ஸங்வத்ததி. ஸாது⁴, ப⁴ந்தே, ப⁴க³வா
பி⁴க்கூ²னங் நக்³கி³யங் அனுஜானாதூ’’தி. விக³ரஹி பு³த்³தோ⁴ ப⁴க³வா –
‘‘அனநுச்ச²விகங், மோக⁴புரிஸ, அனநுலோமிகங் அப்பதிரூபங் அஸ்ஸாமணகங் அகப்பியங்
அகரணீயங். கத²ஞ்ஹி நாம த்வங், மோக⁴புரிஸ, நக்³கி³யங் தித்தி²யஸமாதா³னங்
ஸமாதி³யிஸ்ஸஸி. நேதங், மோக⁴புரிஸ, அப்பஸன்னானங் வா பஸாதா³ய…பே॰…’’
விக³ரஹித்வா த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே,
நக்³கி³யங் தித்தி²யஸமாதா³னங் ஸமாதி³யிதப்³ப³ங். யோ ஸமாதி³யெய்ய, ஆபத்தி து²ல்லச்சயஸ்ஸா’’தி.

நக்³கி³யபடிக்கே²பகதா² நிட்டி²தா.

227. குஸசீராதி³படிக்கே²பகதா²

371. தேன கோ² பன ஸமயேன அஞ்ஞதரோ பி⁴க்கு² குஸசீரங் நிவாஸெத்வா…பே॰… வாகசீரங்
நிவாஸெத்வா…பே॰… ப²லகசீரங் நிவாஸெத்வா…பே॰… கேஸகம்ப³லங் நிவாஸெத்வா…பே॰…
வாளகம்ப³லங் நிவாஸெத்வா…பே॰… உலூகபக்க²ங் நிவாஸெத்வா…பே॰… அஜினக்கி²பங்
நிவாஸெத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் ஏதத³வோச –
‘‘ப⁴க³வா, ப⁴ந்தே, அனேகபரியாயேன அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ
து⁴தஸ்ஸ பாஸாதி³கஸ்ஸ அபசயஸ்ஸ வீரியாரம்ப⁴ஸ்ஸ வண்ணவாதீ³. இத³ங், ப⁴ந்தே,
அஜினக்கி²பங் அனேகபரியாயேன அப்பிச்ச²தாய ஸந்துட்டி²தாய ஸல்லேகா²ய து⁴ததாய
பாஸாதி³கதாய அபசயாய வீரியாரம்பா⁴ய ஸங்வத்ததி. ஸாது⁴, ப⁴ந்தே ,
ப⁴க³வா பி⁴க்கூ²னங் அஜினக்கி²பங் அனுஜானாதூ’’தி. விக³ரஹி பு³த்³தோ⁴ ப⁴க³வா
– ‘‘அனநுச்ச²விகங், மோக⁴புரிஸ, அனநுலோமிகங் அப்பதிரூபங் அஸ்ஸாமணகங்
அகப்பியங் அகரணீயங். கத²ஞ்ஹி நாம த்வங், மோக⁴புரிஸ, அஜினக்கி²பங்
தித்தி²யத⁴ஜங் தா⁴ரெஸ்ஸஸி. நேதங், மோக⁴புரிஸ, அப்பஸன்னானங் வா பஸாதா³ய…பே॰…
விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந,
பி⁴க்க²வே, அஜினக்கி²பங் தித்தி²யத⁴ஜங் தா⁴ரேதப்³ப³ங். யோ தா⁴ரெய்ய, ஆபத்தி
து²ல்லச்சயஸ்ஸா’’தி.

தேன கோ² பன ஸமயேன அஞ்ஞதரோ பி⁴க்கு² அக்கனாளங்
நிவாஸெத்வா…பே॰… பொத்த²கங் நிவாஸெத்வா யேன ப⁴க³வா தேனுபஸங்கமி,
உபஸங்கமித்வா ப⁴க³வந்தங் ஏதத³வோச – ‘‘ப⁴க³வா, ப⁴ந்தே, அனேகபரியாயேன
அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ து⁴தஸ்ஸ பாஸாதி³கஸ்ஸ அபசயஸ்ஸ
வீரியாரம்ப⁴ஸ்ஸ, வண்ணவாதீ³. அயங், ப⁴ந்தே, பொத்த²கோ அனேகபரியாயேன
அப்பிச்ச²தாய ஸந்துட்டி²தாய ஸல்லேகா²ய து⁴ததாய
பாஸாதி³கதாய அபசயாய வீரியாரம்பா⁴ய ஸங்வத்ததி. ஸாது⁴, ப⁴ந்தே, ப⁴க³வா
பி⁴க்கூ²னங் பொத்த²கங் அனுஜானாதூ’’தி. விக³ரஹி பு³த்³தோ⁴ ப⁴க³வா –
‘‘அனநுச்ச²விகங், மோக⁴புரிஸ, அனநுலோமிகங் அப்பதிரூபங் அஸ்ஸாமணகங் அகப்பியங்
அகரணீயங். கத²ஞ்ஹி நாம த்வங், மோக⁴புரிஸ, பொத்த²கங் நிவாஸெஸ்ஸஸி. நேதங்,
மோக⁴புரிஸ, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங்
கத்வா பி⁴க்கூ² ஆமந்தேஸி – ‘‘ந, பி⁴க்க²வே, பொத்த²கோ நிவாஸேதப்³போ³. யோ
நிவாஸெய்ய, ஆபத்தி து³க்கடஸ்ஸா’’தி.

குஸசீராதி³படிக்கே²பகதா² நிட்டி²தா.

228. ஸப்³ப³னீலகாதி³படிக்கே²பகதா²

372.
தேன கோ² பன ஸமயேன ச²ப்³ப³க்³கி³யா பி⁴க்கூ² ஸப்³ப³னீலகானி சீவரானி
தா⁴ரெந்தி…பே॰… ஸப்³ப³பீதகானி சீவரானி தா⁴ரெந்தி…பே॰… ஸப்³ப³லோஹிதகானி
சீவரானி தா⁴ரெந்தி…பே॰… ஸப்³ப³மஞ்ஜிட்ட²கானி [ஸப்³ப³மஞ்ஜெட்ட²கானி (ஸீ॰ ஸ்யா॰)] சீவரானி தா⁴ரெந்தி…பே॰… ஸப்³ப³கண்ஹானி சீவரானி தா⁴ரெந்தி
…பே॰… ஸப்³ப³மஹாரங்க³ரத்தானி சீவரானி தா⁴ரெந்தி…பே॰… ஸப்³ப³மஹானாமரத்தானி
சீவரானி தா⁴ரெந்தி…பே॰… அச்சி²ன்னத³ஸானி சீவரானி தா⁴ரெந்தி…பே॰…
தீ³க⁴த³ஸானி சீவரானி தா⁴ரெந்தி…பே॰… புப்ப²த³ஸானி சீவரானி தா⁴ரெந்தி…பே॰…
ப²ணத³ஸானி [ப²லத³ஸானி (க॰)] சீவரானி
தா⁴ரெந்தி…பே॰… கஞ்சுகங் தா⁴ரெந்தி…பே॰… திரீடகங் தா⁴ரெந்தி…பே॰… வேட²னங்
தா⁴ரெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம
ஸமணா ஸக்யபுத்தியா வேட²னங் தா⁴ரெஸ்ஸந்தி, ஸெய்யதா²பி கி³ஹீ
காமபோ⁴கி³னோ’’தி. ப⁴க³வதோ ஏதமத்த²ங் ஆரோசேஸுங் . ந,
பி⁴க்க²வே, ஸப்³ப³னீலகானி சீவரானி தா⁴ரேதப்³பா³னி, ந ஸப்³ப³பீதகானி சீவரானி
தா⁴ரேதப்³பா³னி, ந ஸப்³ப³லோஹிதகானி சீவரானி தா⁴ரேதப்³பா³னி, ந
ஸப்³ப³மஞ்ஜிட்ட²கானி சீவரானி தா⁴ரேதப்³பா³னி, ந ஸப்³ப³கண்ஹானி சீவரானி
தா⁴ரேதப்³பா³னி, ந ஸப்³ப³மஹாரங்க³ரத்தானி சீவரானி தா⁴ரேதப்³பா³னி, ந
ஸப்³ப³மஹானாமரத்தானி சீவரானி தா⁴ரேதப்³பா³னி, ந அச்சி²ன்னத³ஸானி சீவரானி
தா⁴ரேதப்³பா³னி, ந தீ³க⁴த³ஸானி சீவரானி தா⁴ரேதப்³பா³னி, ந புப்ப²த³ஸானி
சீவரானி தா⁴ரேதப்³பா³னி, ந ப²ணத³ஸானி சீவரானி தா⁴ரேதப்³பா³னி, ந கஞ்சுகங்
தா⁴ரேதப்³ப³ங், ந திரீடகங் தா⁴ரேதப்³ப³ங், ந வேட²னங் தா⁴ரேதப்³ப³ங். யோ
தா⁴ரெய்ய, ஆபத்தி து³க்கடஸ்ஸாதி.

ஸப்³ப³னீலகாதி³படிக்கே²பகதா² நிட்டி²தா.

229. வஸ்ஸங்வுட்டா²னங் அனுப்பன்னசீவரகதா²

373. தேன கோ² பன ஸமயேன வஸ்ஸங்வுட்டா² பி⁴க்கூ² அனுப்பன்னே சீவரே
பக்கமந்திபி, விப்³ப⁴மந்திபி, காலம்பி கரொந்தி, ஸாமணேராபி படிஜானந்தி,
ஸிக்க²ங் பச்சக்கா²தகாபி படிஜானந்தி, அந்திமவத்து²ங் அஜ்ஜா²பன்னகாபி
படிஜானந்தி, உம்மத்தகாபி படிஜானந்தி, கி²த்தசித்தாபி படிஜானந்தி,
வேத³னாட்டாபி படிஜானந்தி, ஆபத்தியா அத³ஸ்ஸனே உக்கி²த்தகாபி படிஜானந்தி,
ஆபத்தியா அப்படிகம்மே உக்கி²த்தகாபி படிஜானந்தி, பாபிகாய தி³ட்டி²யா
அப்படினிஸ்ஸக்³கே³ உக்கி²த்தகாபி படிஜானந்தி, பண்ட³காபி படிஜானந்தி,
தெ²ய்யஸங்வாஸகாபி படிஜானந்தி, தித்தி²யபக்கந்தகாபி படிஜானந்தி,
திரச்சா²னக³தாபி படிஜானந்தி, மாதுகா⁴தகாபி படிஜானந்தி, பிதுகா⁴தகாபி
படிஜானந்தி, அரஹந்தகா⁴தகாபி படிஜானந்தி, பி⁴க்கு²னிதூ³ஸகாபி படிஜானந்தி,
ஸங்க⁴பே⁴த³காபி படிஜானந்தி, லோஹிதுப்பாத³காபி படிஜானந்தி,
உப⁴தொப்³யஞ்ஜனகாபி படிஜானந்தி. ப⁴க³வதோ ஏதமத்த²ங் ஆரோசேஸுங்.

374. இத⁴ பன, பி⁴க்க²வே, வஸ்ஸங்வுட்டோ² பி⁴க்கு² அனுப்பன்னே சீவரே பக்கமதி, ஸந்தே பதிரூபே கா³ஹகே தா³தப்³ப³ங்.

இத⁴ பன, பி⁴க்க²வே, வஸ்ஸங்வுட்டோ² பி⁴க்கு² அனுப்பன்னே
சீவரே விப்³ப⁴மதி, காலங் கரோதி, ஸாமணேரோ படிஜானாதி, ஸிக்க²ங் பச்சக்கா²தகோ
படிஜானாதி , அந்திமவத்து²ங் அஜ்ஜா²பன்னகோ படிஜானாதி, ஸங்கோ⁴ ஸாமீ.

இத⁴ பன, பி⁴க்க²வே, வஸ்ஸங்வுட்டோ² பி⁴க்கு² அனுப்பன்னே
சீவரே உம்மத்தகோ படிஜானாதி, கி²த்தசித்தோ படிஜானாதி, வேத³னாட்டோ
படிஜானாதி, ஆபத்தியா அத³ஸ்ஸனே உக்கி²த்தகோ
படிஜானாதி, ஆபத்தியா அப்படிகம்மே உக்கி²த்தகோ படிஜானாதி, பாபிகாய
தி³ட்டி²யா அப்படினிஸ்ஸக்³கே³ உக்கி²த்தகோ படிஜானாதி, ஸந்தே பதிரூபே கா³ஹகே
தா³தப்³ப³ங்.

இத⁴ பன, பி⁴க்க²வே, வஸ்ஸங்வுட்டோ² பி⁴க்கு² அனுப்பன்னே
சீவரே பண்ட³கோ படிஜானாதி, தெ²ய்யஸங்வாஸகோ படிஜானாதி, தித்தி²யபக்கந்தகோ
படிஜானாதி, திரச்சா²னக³தோ படிஜானாதி, மாதுகா⁴தகோ படிஜானாதி, பிதுகா⁴தகோ
படிஜானாதி, அரஹந்தகா⁴தகோ படிஜானாதி, பி⁴க்கு²னிதூ³ஸகோ படிஜானாதி,
ஸங்க⁴பே⁴த³கோ படிஜானாதி, லோஹிதுப்பாத³கோ படிஜானாதி, உப⁴தொப்³யஞ்ஜனகோ
படிஜானாதி, ஸங்கோ⁴ ஸாமீ.

375. இத⁴ பன, பி⁴க்க²வே, வஸ்ஸங்வுட்டோ² பி⁴க்கு² உப்பன்னே சீவரே அபா⁴ஜிதே பக்கமதி, ஸந்தே பதிரூபே கா³ஹகே தா³தப்³ப³ங்.

இத⁴ பன, பி⁴க்க²வே, வஸ்ஸங்வுட்டோ² பி⁴க்கு² உப்பன்னே
சீவரே அபா⁴ஜிதே விப்³ப⁴மதி, காலங் கரோதி, ஸாமணேரோ படிஜானாதி, ஸிக்க²ங்
பச்சக்கா²தகோ படிஜானாதி, அந்திமவத்து²ங் அஜ்ஜா²பன்னகோ படிஜானாதி, ஸங்கோ⁴
ஸாமீ.

இத⁴ பன, பி⁴க்க²வே, வஸ்ஸங்வுட்டோ² பி⁴க்கு² உப்பன்னே
சீவரே அபா⁴ஜிதே உம்மத்தகோ படிஜானாதி. கி²த்தசித்தோ படிஜானாதி, வேத³னாட்டோ
படிஜானாதி, ஆபத்தியா அத³ஸ்ஸனே உக்கி²த்தகோ படிஜானாதி, ஆபத்தியா அப்படிகம்மே
உக்கி²த்தகோ படிஜானாதி, பாபிகாய தி³ட்டி²யா அப்படினிஸ்ஸக்³கே³ உக்கி²த்தகோ
படிஜானாதி, ஸந்தே பதிரூபே கா³ஹகே தா³தப்³ப³ங்.

இத⁴ பன, பி⁴க்க²வே,
வஸ்ஸங்வுட்டோ² பி⁴க்கு² உப்பன்னே சீவரே அபா⁴ஜிதே பண்ட³கோ படிஜானாதி,
தெ²ய்யஸங்வாஸகோ படிஜானாதி, தித்தி²யபக்கந்தகோ படிஜானாதி, திரச்சா²னக³தோ
படிஜானாதி, மாதுகா⁴தகோ படிஜானாதி, பிதுகா⁴தகோ படிஜானாதி, அரஹந்தகா⁴தகோ
படிஜானாதி, பி⁴க்கு²னிதூ³ஸகோ படிஜானாதி, ஸங்க⁴பே⁴த³கோ படிஜானாதி,
லோஹிதுப்பாத³கோ படிஜானாதி, உப⁴தொப்³யஞ்ஜனகோ படிஜானாதி, ஸங்கோ⁴ ஸாமீ.

வஸ்ஸங் வுட்டா²னங் அனுப்பன்னசீவரகதா² நிட்டி²தா.

230. ஸங்கே⁴ பி⁴ன்னே சீவருப்பாத³கதா²

376. இத⁴ பன, பி⁴க்க²வே, வஸ்ஸங்வுட்டா²னங்
பி⁴க்கூ²னங் அனுப்பன்னே சீவரே ஸங்கோ⁴ பி⁴ஜ்ஜதி. தத்த² மனுஸ்ஸா ஏகஸ்மிங்
பக்கே² உத³கங் தெ³ந்தி, ஏகஸ்மிங் பக்கே² சீவரங் தெ³ந்தி – ஸங்க⁴ஸ்ஸ
தே³மாதி. ஸங்க⁴ஸ்ஸேவேதங்.

இத⁴ பன, பி⁴க்க²வே, வஸ்ஸங்வுட்டா²னங் பி⁴க்கூ²னங்
அனுப்பன்னே சீவரே ஸங்கோ⁴ பி⁴ஜ்ஜதி. தத்த² மனுஸ்ஸா ஏகஸ்மிங் பக்கே² உத³கங்
தெ³ந்தி, தஸ்மிங்யேவ பக்கே² சீவரங் தெ³ந்தி – ஸங்க⁴ஸ்ஸ தே³மாதி. ஸங்க⁴ஸ்ஸேவேதங்.

இத⁴ பன, பி⁴க்க²வே, வஸ்ஸங்வுட்டா²னங் பி⁴க்கூ²னங்
அனுப்பன்னே சீவரே ஸங்கோ⁴ பி⁴ஜ்ஜதி. தத்த² மனுஸ்ஸா ஏகஸ்மிங் பக்கே² உத³கங்
தெ³ந்தி, ஏகஸ்மிங் பக்கே² சீவரங் தெ³ந்தி – பக்க²ஸ்ஸ தே³மாதி.
பக்க²ஸ்ஸேவேதங்.

இத⁴ பன, பி⁴க்க²வே, வஸ்ஸங்வுட்டா²னங் பி⁴க்கூ²னங்
அனுப்பன்னே சீவரே ஸங்கோ⁴ பி⁴ஜ்ஜதி. தத்த² மனுஸ்ஸா ஏகஸ்மிங் பக்கே² உத³கங்
தெ³ந்தி, தஸ்மிங்யேவ பக்கே² சீவரங் தெ³ந்தி – பக்க²ஸ்ஸ தே³மாதி.
பக்க²ஸ்ஸேவேதங்.

இத⁴ பன, பி⁴க்க²வே, வஸ்ஸங்வுட்டா²னங் பி⁴க்கூ²னங் உப்பன்னே சீவரே அபா⁴ஜிதே ஸங்கோ⁴ பி⁴ஜ்ஜதி. ஸப்³பே³ஸங் ஸமகங் பா⁴ஜேதப்³ப³ந்தி.

ஸங்கே⁴ பி⁴ன்னே சீவருப்பாத³கதா² நிட்டி²தா.

231. து³க்³க³ஹிதஸுக்³க³ஹிதாதி³கதா²

377. தேன
கோ² பன ஸமயேன ஆயஸ்மா ரேவதோ அஞ்ஞதரஸ்ஸ பி⁴க்கு²னோ ஹத்தே² ஆயஸ்மதோ
ஸாரிபுத்தஸ்ஸ சீவரங் பாஹேஸி – ‘‘இமங் சீவரங் தே²ரஸ்ஸ தே³ஹீ’’தி. அத² கோ² ஸோ
பி⁴க்கு² அந்தராமக்³கே³ ஆயஸ்மதோ ரேவதஸ்ஸ விஸ்ஸாஸா தங் சீவரங் அக்³க³ஹேஸி.
அத² கோ² ஆயஸ்மா ரேவதோ ஆயஸ்மதா ஸாரிபுத்தேன ஸமாக³ந்த்வா புச்சி² – ‘‘அஹங்,
ப⁴ந்தே, தே²ரஸ்ஸ சீவரங் பாஹேஸிங். ஸம்பத்தங் தங் சீவர’’ந்தி? ‘‘நாஹங் தங்,
ஆவுஸோ, சீவரங் பஸ்ஸாமீ’’தி. அத² கோ² ஆயஸ்மா ரேவதோ தங் பி⁴க்கு²ங் ஏதத³வோச –
‘‘அஹங், ஆவுஸோ , ஆயஸ்மதோ ஹத்தே² தே²ரஸ்ஸ சீவரங்
பாஹேஸிங். கஹங் தங் சீவர’’ந்தி? ‘‘அஹங், ப⁴ந்தே, ஆயஸ்மதோ விஸ்ஸாஸா தங்
சீவரங் அக்³க³ஹேஸி’’ந்தி. ப⁴க³வதோ ஏதமத்த²ங் ஆரோசேஸுங்.

378. இத⁴
பன, பி⁴க்க²வே, பி⁴க்கு² பி⁴க்கு²ஸ்ஸ ஹத்தே² சீவரங் பஹிணதி – ‘‘இமங்
சீவரங் இத்த²ன்னாமஸ்ஸ தே³ஹீ’’தி. ஸோ அந்தராமக்³கே³ யோ பஹிணதி தஸ்ஸ விஸ்ஸாஸா
க³ண்ஹாதி. ஸுக்³க³ஹிதங். யஸ்ஸ பஹிய்யதி தஸ்ஸ விஸ்ஸாஸா க³ண்ஹாதி.
து³க்³க³ஹிதங்.

இத⁴ பன, பி⁴க்க²வே, பி⁴க்கு² பி⁴க்கு²ஸ்ஸ ஹத்தே²
சீவரங் பஹிணதி – ‘‘இமங் சீவரங் இத்த²ன்னாமஸ்ஸ தே³ஹீ’’தி. ஸோ அந்தராமக்³கே³
யஸ்ஸ பஹிய்யதி தஸ்ஸ விஸ்ஸாஸா க³ண்ஹாதி. து³க்³க³ஹிதங். யோ பஹிணதி தஸ்ஸ
விஸ்ஸாஸா க³ண்ஹாதி. ஸுக்³க³ஹிதங்.

இத⁴ பன, பி⁴க்க²வே, பி⁴க்கு² பி⁴க்கு²ஸ்ஸ ஹத்தே²
சீவரங் பஹிணதி – ‘‘இமங் சீவரங் இத்த²ன்னாமஸ்ஸ தே³ஹீ’’தி. ஸோ அந்தராமக்³கே³
ஸுணாதி – யோ பஹிணதி ஸோ காலங்கதோதி. தஸ்ஸ மதகசீவரங் அதி⁴ட்டா²தி.
ஸ்வாதி⁴ட்டி²தங். யஸ்ஸ பஹிய்யதி தஸ்ஸ விஸ்ஸாஸா க³ண்ஹாதி. து³க்³க³ஹிதங்.

இத⁴ பன, பி⁴க்க²வே, பி⁴க்கு² பி⁴க்கு²ஸ்ஸ ஹத்தே²
சீவரங் பஹிணதி – ‘‘இமங் சீவரங் இத்த²ன்னாமஸ்ஸ தே³ஹீ’’தி. ஸோ அந்தராமக்³கே³
ஸுணாதி – யஸ்ஸ பஹிய்யதி ஸோ காலங்கதோதி. தஸ்ஸ மதகசீவரங் அதி⁴ட்டா²தி.
த்³வாதி⁴ட்டி²தங். யோ பஹிணதி தஸ்ஸ விஸ்ஸாஸா க³ண்ஹாதி. ஸுக்³க³ஹிதங்.

இத⁴ பன, பி⁴க்க²வே, பி⁴க்கு² பி⁴க்கு²ஸ்ஸ ஹத்தே² சீவரங் பஹிணதி – ‘‘இமங் சீவரங் இத்த²ன்னாமஸ்ஸ தே³ஹீ’’தி. ஸோ அந்தராமக்³கே³ ஸுணாதி – உபோ⁴ காலங்கதாதி. யோ பஹிணதி தஸ்ஸ மதகசீவரங் அதி⁴ட்டா²தி. ஸ்வாதி⁴ட்டி²தங். யஸ்ஸ பஹிய்யதி தஸ்ஸ மதகசீவரங் அதி⁴ட்டா²தி. த்³வாதி⁴ட்டி²தங்.

இத⁴ பன, பி⁴க்க²வே, பி⁴க்கு² பி⁴க்கு²ஸ்ஸ ஹத்தே²
சீவரங் பஹிணதி – ‘‘இமங் சீவரங் இத்த²ன்னாமஸ்ஸ த³ம்மீ’’தி. ஸோ அந்தராமக்³கே³
யோ பஹிணதி தஸ்ஸ விஸ்ஸாஸா க³ண்ஹாதி. து³க்³க³ஹிதங். யஸ்ஸ பஹிய்யதி தஸ்ஸ
விஸ்ஸாஸா க³ண்ஹாதி. ஸுக்³க³ஹிதங்.

இத⁴ பன, பி⁴க்க²வே, பி⁴க்கு² பி⁴க்கு²ஸ்ஸ ஹத்தே²
சீவரங் பஹிணதி – ‘‘இமங் சீவரங் இத்த²ன்னாமஸ்ஸ த³ம்மீ’’தி. ஸோ அந்தராமக்³கே³
யஸ்ஸ பஹிய்யதி தஸ்ஸ விஸ்ஸாஸா க³ண்ஹாதி. ஸுக்³க³ஹிதங். யோ பஹிணதி தஸ்ஸ
விஸ்ஸாஸா க³ண்ஹாதி. து³க்³க³ஹிதங்.

இத⁴ பன, பி⁴க்க²வே, பி⁴க்கு² பி⁴க்கு²ஸ்ஸ ஹத்தே²
சீவரங் பஹிணதி – ‘‘இமங் சீவரங் இத்த²ன்னாமஸ்ஸ த³ம்மீ’’தி. ஸோ அந்தராமக்³கே³
ஸுணாதி – ‘‘யோ பஹிணதி ஸோ காலங்கதோ’’தி. தஸ்ஸ மதகசீவரங் அதி⁴ட்டா²தி. த்³வாதி⁴ட்டி²தங். யஸ்ஸ பஹிய்யதி தஸ்ஸ விஸ்ஸாஸா க³ண்ஹாதி. ஸுக்³க³ஹிதங்.

இத⁴ பன, பி⁴க்க²வே, பி⁴க்கு² பி⁴க்கு²ஸ்ஸ ஹத்தே²
சீவரங் பஹிணதி – ‘‘இமங் சீவரங் இத்த²ன்னாமஸ்ஸ த³ம்மீ’’தி. ஸோ அந்தராமக்³கே³
ஸுணாதி – ‘‘யஸ்ஸ பஹிய்யதி ஸோ காலங்கதோ’’தி. தஸ்ஸ மதகசீவரங் அதி⁴ட்டா²தி.
ஸ்வாதி⁴ட்டி²தங். யோ பஹிணதி தஸ்ஸ விஸ்ஸாஸா க³ண்ஹாதி. து³க்³க³ஹிதங்.

இத⁴ பன, பி⁴க்க²வே, பி⁴க்கு² பி⁴க்கு²ஸ்ஸ ஹத்தே²
சீவரங் பஹிணதி – ‘‘இமங் சீவரங் இத்த²ன்னாமஸ்ஸ த³ம்மீ’’தி. ஸோ அந்தராமக்³கே³
ஸுணாதி ‘‘உபோ⁴ காலங்கதா’’தி. யோ பஹிணதி தஸ்ஸ மதகசீவரங் அதி⁴ட்டா²தி.
த்³வாதி⁴ட்டி²தங். யஸ்ஸ பஹிய்யதி தஸ்ஸ மதகசீவரங் அதி⁴ட்டா²தி.
ஸ்வாதி⁴ட்டி²தங்.

து³க்³க³ஹிதஸுக்³க³ஹிதாதி³கதா² நிட்டி²தா.

232. அட்ட²சீவரமாதிகா

379. அட்டி²மா , பி⁴க்க²வே, மாதிகா சீவரஸ்ஸ உப்பாதா³ய – ஸீமாய தே³தி ,
கதிகாய தே³தி, பி⁴க்கா²பஞ்ஞத்தியா தே³தி, ஸங்க⁴ஸ்ஸ தே³தி, உப⁴தோஸங்க⁴ஸ்ஸ
தே³தி, வஸ்ஸங்வுட்ட²ஸங்க⁴ஸ்ஸ தே³தி, ஆதி³ஸ்ஸ தே³தி, புக்³க³லஸ்ஸ தே³தி.

ஸீமாய தே³தி – யாவதிகா பி⁴க்கூ² அந்தோஸீமக³தா தேஹி
பா⁴ஜேதப்³ப³ங். கதிகாய தே³தி – ஸம்ப³ஹுலா ஆவாஸா ஸமானலாபா⁴ ஹொந்தி ஏகஸ்மிங்
ஆவாஸே தி³ன்னே ஸப்³ப³த்த² தி³ன்னங் ஹோதி. பி⁴க்கா²பஞ்ஞத்தியா தே³தி, யத்த²
ஸங்க⁴ஸ்ஸ து⁴வகாரா கரிய்யந்தி, தத்த² தே³தி. ஸங்க⁴ஸ்ஸ தே³தி,
ஸம்முகீ²பூ⁴தேன ஸங்கே⁴ன பா⁴ஜேதப்³ப³ங். உப⁴தோஸங்க⁴ஸ்ஸ தே³தி, ப³ஹுகாபி
பி⁴க்கூ² ஹொந்தி, ஏகா பி⁴க்கு²னீ ஹோதி, உபட்³ட⁴ங் தா³தப்³ப³ங், ப³ஹுகாபி
பி⁴க்கு²னியோ ஹொந்தி, ஏகோ பி⁴க்கு² ஹோதி, உபட்³ட⁴ங் தா³தப்³ப³ங்.
வஸ்ஸங்வுட்ட²ஸங்க⁴ஸ்ஸ தே³தி, யாவதிகா பி⁴க்கூ² தஸ்மிங் ஆவாஸே
வஸ்ஸங்வுட்டா², தேஹி பா⁴ஜேதப்³ப³ங். ஆதி³ஸ்ஸ தே³தி, யாகு³யா வா ப⁴த்தே வா
கா²த³னீயே வா சீவரே வா ஸேனாஸனே வா பே⁴ஸஜ்ஜே வா . புக்³க³லஸ்ஸ தே³தி, ‘‘இமங் சீவரங் இத்த²ன்னாமஸ்ஸ த³ம்மீ’’தி.

அட்ட²சீவரமாதிகா நிட்டி²தா.

சீவரக்க²ந்த⁴கோ அட்ட²மோ.

233. தஸ்ஸுத்³தா³னங்

ராஜக³ஹகோ நேக³மோ, தி³ஸ்வா வேஸாலியங் க³ணிங்;

புன ராஜக³ஹங் க³ந்த்வா, ரஞ்ஞோ தங் படிவேத³யி.

புத்தோ ஸாலவதிகாய, அப⁴யஸ்ஸ ஹி அத்ரஜோ;

ஜீவதீதி குமாரேன, ஸங்கா²தோ ஜீவகோ இதி.

ஸோ ஹி தக்கஸீலங் க³ந்த்வா, உக்³க³ஹெத்வா மஹாபி⁴ஸோ;

ஸத்தவஸ்ஸிகஆபா³த⁴ங், நத்து²கம்மேன நாஸயி.

ரஞ்ஞோ ப⁴க³ந்த³லாபா³த⁴ங், ஆலேபேன அபாகட்³டி⁴;

மமஞ்ச இத்தா²கா³ரஞ்ச, பு³த்³த⁴ஸங்க⁴ங் சுபட்ட²ஹி.

ராஜக³ஹகோ ச ஸெட்டி², அந்தக³ண்டி² திகிச்சி²தங்;

பஜ்ஜோதஸ்ஸ மஹாரோக³ங், க⁴தபானேன நாஸயி.

அதி⁴காரஞ்ச ஸிவெய்யங், அபி⁴ஸன்னங் ஸினேஹதி;

தீஹி உப்பலஹத்தே²ஹி, ஸமத்திங்ஸவிரேசனங்.

பகதத்தங் வரங் யாசி, ஸிவெய்யஞ்ச படிக்³க³ஹி;

சீவரஞ்ச கி³ஹிதா³னங், அனுஞ்ஞாஸி ததா²க³தோ.

ராஜக³ஹே ஜனபதே³ ப³ஹுங், உப்பஜ்ஜி சீவரங்;

பாவாரோ கோஸியஞ்சேவ, கோஜவோ அட்³ட⁴காஸிகங்.

உச்சாவசா ச ஸந்துட்டி², நாக³மேஸாக³மேஸுங் ச;

பட²மங் பச்சா² ஸதி³ஸா, கதிகா ச படிஹருங்.

ப⁴ண்டா³கா³ரங் அகு³த்தஞ்ச, வுட்டா²பெந்தி ததே²வ ச;

உஸ்ஸன்னங் கோலாஹலஞ்ச, கத²ங் பா⁴ஜே கத²ங் த³தே³.

ஸகாதிரேகபா⁴கே³ன, படிவீஸோ கத²ங் த³தே³;

ச²கணேன ஸீதுத³கா [ஸீதுந்தீ³ ச (ஸீ॰), ஸீதுண்ஹி ச (கத்த²சி)], உத்தரிது ந ஜானரே.

ஆரோபெந்தா பா⁴ஜனஞ்ச, பாதியா ச ச²மாய ச;

உபசிகாமஜ்ஜே² ஜீரந்தி, ஏகதோ பத்தி²ன்னேன ச.

ப²ருஸாச்சி²ன்னச்சி²ப³ந்தா⁴ , அத்³த³ஸாஸி உப்³ப⁴ண்டி³தே;

வீமங்ஸித்வா ஸக்யமுனி, அனுஞ்ஞாஸி திசீவரங்.

அஞ்ஞேன அதிரேகேன, உப்பஜ்ஜி சி²த்³த³மேவ ச;

சாதுத்³தீ³போ வரங் யாசி, தா³துங் வஸ்ஸிகஸாடிகங்.

ஆக³ந்துக³மிகி³லானங், உபட்டா²கஞ்ச பே⁴ஸஜ்ஜங்;

து⁴வங் உத³கஸாடிஞ்ச, பணீதங் அதிகு²த்³த³கங்.

து²ல்லகச்சு²முக²ங் கோ²மங், பரிபுண்ணங் அதி⁴ட்டா²னங்;

பச்சி²மங் கதோ க³ருகோ, விகண்ணோ ஸுத்தமோகிரி.

லுஜ்ஜந்தி நப்பஹொந்தி, ச அன்வாதி⁴கங் ப³ஹூனி ச;

அந்த⁴வனே அஸ்ஸதியா, ஏகோ வஸ்ஸங் உதும்ஹி ச.

த்³வே பா⁴துகா ராஜக³ஹே, உபனந்தோ³ புன த்³விஸு;

குச்சி²விகாரோ கி³லானோ, உபோ⁴ சேவ கி³லானகா [கி³லாயனா (க॰)].

நக்³கா³ குஸா வாகசீரங், ப²லகோ கேஸகம்ப³லங்;

வாளஉலூகபக்க²ஞ்ச, அஜினங் அக்கனாளகங்.

பொத்த²கங் நீலபீதஞ்ச, லோஹிதங் மஞ்ஜிட்டே²ன ச;

கண்ஹா மஹாரங்க³னாம, அச்சி²ன்னத³ஸிகா ததா².

தீ³க⁴புப்ப²ப²ணத³ஸா , கஞ்சுதிரீடவேட²னங்;

அனுப்பன்னே பக்கமதி, ஸங்கோ⁴ பி⁴ஜ்ஜதி தாவதே³.

பக்கே² த³த³ந்தி ஸங்க⁴ஸ்ஸ, ஆயஸ்மா ரேவதோ பஹி;

விஸ்ஸாஸகா³ஹாதி⁴ட்டா²தி, அட்ட² சீவரமாதிகாதி.

இமம்ஹி க²ந்த⁴கே வத்தூ² ச²ன்னவுதி.

சீவரக்க²ந்த⁴கோ நிட்டி²தோ.

comments (0)