66. [சூளவ॰ 376 ஆத³யோ]‘‘ஸத்³தி⁴விஹாரிகேன, பி⁴க்க²வே, உபஜ்ஜா²யம்ஹி ஸம்மா வத்திதப்³ப³ங். தத்ராயங் ஸம்மாவத்தனா –

‘‘காலஸ்ஸேவ வுட்டா²ய உபாஹனா ஓமுஞ்சித்வா ஏகங்ஸங்
உத்தராஸங்க³ங் கரித்வா த³ந்தகட்ட²ங் தா³தப்³ப³ங், முகோ²த³கங் தா³தப்³ப³ங்,
ஆஸனங் பஞ்ஞபேதப்³ப³ங். ஸசே யாகு³ ஹோதி, பா⁴ஜனங் தோ⁴வித்வா யாகு³
உபனாமேதப்³பா³. யாகு³ங் பீதஸ்ஸ உத³கங் த³த்வா பா⁴ஜனங் படிக்³க³ஹெத்வா நீசங்
கத்வா ஸாது⁴கங் அப்படிக⁴ங்ஸந்தேன தோ⁴வித்வா படிஸாமேதப்³ப³ங். உபஜ்ஜா²யம்ஹி வுட்டி²தே ஆஸனங் உத்³த⁴ரிதப்³ப³ங். ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே உபஜ்ஜா²யோ கா³மங் பவிஸிதுகாமோ
ஹோதி, நிவாஸனங் தா³தப்³ப³ங், படினிவாஸனங் படிக்³க³ஹேதப்³ப³ங்,
காயப³ந்த⁴னங் தா³தப்³ப³ங், ஸகு³ணங் கத்வா ஸங்கா⁴டியோ தா³தப்³பா³, தோ⁴வித்வா
பத்தோ ஸோத³கோ [ஸஉத³கோ (க॰)] தா³தப்³போ³. ஸசே
உபஜ்ஜா²யோ பச்சா²ஸமணங் ஆகங்க²தி, திமண்ட³லங் படிச்சா²தெ³ந்தேன பரிமண்ட³லங்
நிவாஸெத்வா காயப³ந்த⁴னங் ப³ந்தி⁴த்வா ஸகு³ணங் கத்வா ஸங்கா⁴டியோ பாருபித்வா
க³ண்டி²கங் படிமுஞ்சித்வா தோ⁴வித்வா பத்தங் க³ஹெத்வா உபஜ்ஜா²யஸ்ஸ
பச்சா²ஸமணேன ஹோதப்³ப³ங். நாதிதூ³ரே க³ந்தப்³ப³ங், நாச்சாஸன்னே
க³ந்தப்³ப³ங், பத்தபரியாபன்னங் படிக்³க³ஹேதப்³ப³ங். ந உபஜ்ஜா²யஸ்ஸ
ப⁴ணமானஸ்ஸ அந்தரந்தரா கதா² ஓபாதேதப்³பா³. உபஜ்ஜா²யோ ஆபத்திஸாமந்தா ப⁴ணமானோ
நிவாரேதப்³போ³.

‘‘நிவத்தந்தேன பட²மதரங் ஆக³ந்த்வா ஆஸனங்
பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங்,
பச்சுக்³க³ந்த்வா பத்தசீவரங் படிக்³க³ஹேதப்³ப³ங், படினிவாஸனங் தா³தப்³ப³ங்,
நிவாஸனங் படிக்³க³ஹேதப்³ப³ங். ஸசே சீவரங் ஸின்னங் ஹோதி, முஹுத்தங் உண்ஹே
ஓதாபேதப்³ப³ங், ந ச உண்ஹே சீவரங் நித³ஹிதப்³ப³ங்; சீவரங் ஸங்க⁴ரிதப்³ப³ங்,
சீவரங் ஸங்க⁴ரந்தேன சதுரங்கு³லங் கண்ணங் உஸ்ஸாரெத்வா சீவரங்
ஸங்க⁴ரிதப்³ப³ங் – மா மஜ்ஜே² ப⁴ங்கோ³ அஹோஸீதி. ஓபோ⁴கே³ காயப³ந்த⁴னங்
காதப்³ப³ங்.

‘‘ஸசே பிண்ட³பாதோ ஹோதி, உபஜ்ஜா²யோ ச பு⁴ஞ்ஜிதுகாமோ ஹோதி, உத³கங் த³த்வா பிண்ட³பாதோ உபனாமேதப்³போ³. உபஜ்ஜா²யோ பானீயேன புச்சி²தப்³போ³ . பு⁴த்தாவிஸ்ஸ உத³கங் த³த்வா பத்தங் படிக்³க³ஹெத்வா நீசங் கத்வா ஸாது⁴கங்
அப்படிக⁴ங்ஸந்தேன தோ⁴வித்வா வோத³கங் கத்வா முஹுத்தங் உண்ஹே ஓதாபேதப்³போ³, ந
ச உண்ஹே பத்தோ நித³ஹிதப்³போ³. பத்தசீவரங் நிக்கி²பிதப்³ப³ங். பத்தங்
நிக்கி²பந்தேன ஏகேன ஹத்தே²ன பத்தங் க³ஹெத்வா ஏகேன ஹத்தே²ன ஹெட்டா²மஞ்சங் வா
ஹெட்டா²பீட²ங் வா பராமஸித்வா பத்தோ
நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரங்
நிக்கி²பந்தேன ஏகேன ஹத்தே²ன சீவரங் க³ஹெத்வா ஏகேன ஹத்தே²ன சீவரவங்ஸங் வா
சீவரரஜ்ஜுங் வா பமஜ்ஜித்வா பாரதோ அந்தங் ஓரதோ போ⁴க³ங் கத்வா சீவரங்
நிக்கி²பிதப்³ப³ங். உபஜ்ஜா²யம்ஹி வுட்டி²தே ஆஸனங் உத்³த⁴ரிதப்³ப³ங்,
பாதோ³த³கங் பாத³பீட²ங் பாத³கத²லிகங் படிஸாமேதப்³ப³ங். ஸசே ஸோ தே³ஸோ உக்லாபோ
ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே உபஜ்ஜா²யோ நஹாயிதுகாமோ ஹோதி, நஹானங்
படியாதே³தப்³ப³ங். ஸசே ஸீதேன அத்தோ² ஹோதி, ஸீதங் படியாதே³தப்³ப³ங். ஸசே
உண்ஹேன அத்தோ² ஹோதி, உண்ஹங் படியாதே³தப்³ப³ங்.

‘‘ஸசே உபஜ்ஜா²யோ ஜந்தாக⁴ரங்
பவிஸிதுகாமோ ஹோதி, சுண்ணங் ஸன்னேதப்³ப³ங், மத்திகா தேமேதப்³பா³,
ஜந்தாக⁴ரபீட²ங் ஆதா³ய உபஜ்ஜா²யஸ்ஸ பிட்டி²தோ பிட்டி²தோ க³ந்த்வா
ஜந்தாக⁴ரபீட²ங் த³த்வா சீவரங் படிக்³க³ஹெத்வா ஏகமந்தங் நிக்கி²பிதப்³ப³ங்,
சுண்ணங் தா³தப்³ப³ங், மத்திகா தா³தப்³பா³. ஸசே உஸ்ஸஹதி, ஜந்தாக⁴ரங்
பவிஸிதப்³ப³ங். ஜந்தாக⁴ரங் பவிஸந்தேன மத்திகாய முக²ங் மக்கெ²த்வா புரதோ ச
பச்ச²தோ ச படிச்சா²தெ³த்வா ஜந்தாக⁴ரங் பவிஸிதப்³ப³ங். ந தே²ரே பி⁴க்கூ²
அனுபக²ஜ்ஜ நிஸீதி³தப்³ப³ங். ந நவா பி⁴க்கூ² ஆஸனேன
படிபா³ஹிதப்³பா³. ஜந்தாக⁴ரே உபஜ்ஜா²யஸ்ஸ பரிகம்மங் காதப்³ப³ங். ஜந்தாக⁴ரா
நிக்க²மந்தேன ஜந்தாக⁴ரபீட²ங் ஆதா³ய புரதோ ச பச்ச²தோ ச படிச்சா²தெ³த்வா
ஜந்தாக⁴ரா நிக்க²மிதப்³ப³ங்.

‘‘உத³கேபி உபஜ்ஜா²யஸ்ஸ பரிகம்மங் காதப்³ப³ங். நஹாதேன
பட²மதரங் உத்தரித்வா அத்தனோ க³த்தங் வோத³கங் கத்வா நிவாஸெத்வா உபஜ்ஜா²யஸ்ஸ
க³த்ததோ உத³கங் பமஜ்ஜிதப்³ப³ங், நிவாஸனங் தா³தப்³ப³ங், ஸங்கா⁴டி
தா³தப்³பா³, ஜந்தாக⁴ரபீட²ங் ஆதா³ய பட²மதரங் ஆக³ந்த்வா ஆஸனங்
பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங்,
உபஜ்ஜா²யோ பானீயேன புச்சி²தப்³போ³. ஸசே உத்³தி³ஸாபேதுகாமோ ஹோதி,
உத்³தி³ஸிதப்³போ³. ஸசே பரிபுச்சி²துகாமோ ஹோதி, பரிபுச்சி²தப்³போ³.

‘‘யஸ்மிங் விஹாரே உபஜ்ஜா²யோ விஹரதி, ஸசே ஸோ விஹாரோ உக்லாபோ ஹோதி, ஸசே உஸ்ஸஹதி, ஸோதே⁴தப்³போ³. விஹாரங் ஸோதெ⁴ந்தேன பட²மங் பத்தசீவரங் நீஹரித்வா ஏகமந்தங் நிக்கி²பிதப்³ப³ங். நிஸீத³னபச்சத்த²ரணங் நீஹரித்வா ஏகமந்தங் நிக்கி²பிதப்³ப³ங். பி⁴ஸிபி³ப்³போ³ஹனங் [பி⁴ஸிபி³ம்போ³ஹனங் (ஸீ॰ ஸ்யா॰)]
நீஹரித்வா ஏகமந்தங் நிக்கி²பிதப்³ப³ங். மஞ்சோ நீசங் கத்வா ஸாது⁴கங்
அப்படிக⁴ங்ஸந்தேன, அஸங்க⁴ட்டெந்தேன கவாடபிட்ட²ங், நீஹரித்வா ஏகமந்தங்
நிக்கி²பிதப்³போ³. பீட²ங் நீசங் கத்வா ஸாது⁴கங் அப்படிக⁴ங்ஸந்தேன ,
அஸங்க⁴ட்டெந்தேன கவாடபிட்ட²ங், நீஹரித்வா ஏகமந்தங் நிக்கி²பிதப்³ப³ங்.
மஞ்சபடிபாத³கா நீஹரித்வா ஏகமந்தங் நிக்கி²பிதப்³பா³. கே²ளமல்லகோ நீஹரித்வா
ஏகமந்தங் நிக்கி²பிதப்³போ³. அபஸ்ஸேனப²லகங் நீஹரித்வா ஏகமந்தங்
நிக்கி²பிதப்³ப³ங். பூ⁴மத்த²ரணங் யதா²பஞ்ஞத்தங் ஸல்லக்கெ²த்வா
நீஹரித்வா ஏகமந்தங் நிக்கி²பிதப்³ப³ங். ஸசே விஹாரே ஸந்தானகங் ஹோதி,
உல்லோகா பட²மங் ஓஹாரேதப்³ப³ங், ஆலோகஸந்தி⁴கண்ணபா⁴கா³ பமஜ்ஜிதப்³பா³. ஸசே
கே³ருகபரிகம்மகதா பி⁴த்தி கண்ணகிதா ஹோதி, சோளகங் தேமெத்வா பீளெத்வா
பமஜ்ஜிதப்³பா³. ஸசே காளவண்ணகதா பூ⁴மி கண்ணகிதா ஹோதி, சோளகங் தேமெத்வா
பீளெத்வா பமஜ்ஜிதப்³பா³. ஸசே அகதா ஹோதி பூ⁴மி, உத³கேன பரிப்போ²ஸித்வா
ஸம்மஜ்ஜிதப்³பா³ – மா விஹாரோ ரஜேன உஹஞ்ஞீதி. ஸங்காரங் விசினித்வா ஏகமந்தங்
ச²ட்³டே³தப்³ப³ங்.

‘‘பூ⁴மத்த²ரணங் ஓதாபெத்வா ஸோதெ⁴த்வா பப்போ²டெத்வா அதிஹரித்வா யதா²பஞ்ஞத்தங் பஞ்ஞபேதப்³ப³ங். மஞ்சபடிபாத³கா
ஓதாபெத்வா பமஜ்ஜித்வா அதிஹரித்வா யதா²டா²னே ட²பேதப்³பா³. மஞ்சோ ஓதாபெத்வா
ஸோதெ⁴த்வா பப்போ²டெத்வா நீசங் கத்வா ஸாது⁴கங் அப்படிக⁴ங்ஸந்தேன,
அஸங்க⁴ட்டெந்தேன கவாடபிட்ட²ங், அதிஹரித்வா யதா²பஞ்ஞத்தங் பஞ்ஞபேதப்³போ³.
பீட²ங் ஓதாபெத்வா ஸோதெ⁴த்வா பப்போ²டெத்வா நீசங் கத்வா ஸாது⁴கங்
அப்படிக⁴ங்ஸந்தேன, அஸங்க⁴ட்டெந்தேன கவாடபிட்ட²ங், அதிஹரித்வா யதா²பஞ்ஞத்தங்
பஞ்ஞபேதப்³ப³ங். பி⁴ஸிபி³ப்³போ³ஹனங் ஓதாபெத்வா ஸோதெ⁴த்வா பப்போ²டெத்வா
அதிஹரித்வா யதா²பஞ்ஞத்தங் பஞ்ஞபேதப்³ப³ங். நிஸீத³னபச்சத்த²ரணங் ஓதாபெத்வா
ஸோதெ⁴த்வா பப்போ²டெத்வா அதிஹரித்வா யதா²பஞ்ஞத்தங் பஞ்ஞபேதப்³ப³ங்.
கே²ளமல்லகோ ஓதாபெத்வா பமஜ்ஜித்வா அதிஹரித்வா யதா²டா²னே ட²பேதப்³போ³.
அபஸ்ஸேனப²லகங் ஓதாபெத்வா பமஜ்ஜித்வா அதிஹரித்வா
யதா²டா²னே ட²பேதப்³ப³ங். பத்தசீவரங் நிக்கி²பிதப்³ப³ங். பத்தங்
நிக்கி²பந்தேன ஏகேன ஹத்தே²ன பத்தங் க³ஹெத்வா ஏகேன ஹத்தே²ன ஹெட்டா²மஞ்சங் வா
ஹெட்டா²பீட²ங் வா பராமஸித்வா பத்தோ நிக்கி²பிதப்³போ³. ந ச அனந்தரஹிதாய
பூ⁴மியா பத்தோ நிக்கி²பிதப்³போ³. சீவரங் நிக்கி²பந்தேன ஏகேன ஹத்தே²ன சீவரங்
க³ஹெத்வா ஏகேன ஹத்தே²ன சீவரவங்ஸங் வா சீவரரஜ்ஜுங் வா பமஜ்ஜித்வா பாரதோ அந்தங் ஓரதோ போ⁴க³ங் கத்வா சீவரங் நிக்கி²பிதப்³ப³ங்.

‘‘ஸசே புரத்தி²மா ஸரஜா வாதா வாயந்தி, புரத்தி²மா
வாதபானா த²கேதப்³பா³. ஸசே பச்சி²மா ஸரஜா வாதா வாயந்தி, பச்சி²மா வாதபானா
த²கேதப்³பா³. ஸசே உத்தரா ஸரஜா வாதா வாயந்தி, உத்தரா வாதபானா த²கேதப்³பா³.
ஸசே த³க்கி²ணா ஸரஜா வாதா வாயந்தி, த³க்கி²ணா வாதபானா
த²கேதப்³பா³. ஸசே ஸீதகாலோ ஹோதி, தி³வா வாதபானா விவரிதப்³பா³, ரத்திங்
த²கேதப்³பா³. ஸசே உண்ஹகாலோ ஹோதி, தி³வா வாதபானா த²கேதப்³பா³, ரத்திங்
விவரிதப்³பா³.

‘‘ஸசே பரிவேணங் உக்லாபங் ஹோதி, பரிவேணங்
ஸம்மஜ்ஜிதப்³ப³ங். ஸசே கொட்ட²கோ உக்லாபோ ஹோதி, கொட்ட²கோ ஸம்மஜ்ஜிதப்³போ³.
ஸசே உபட்டா²னஸாலா உக்லாபா ஹோதி, உபட்டா²னஸாலா ஸம்மஜ்ஜிதப்³பா³. ஸசே
அக்³கி³ஸாலா உக்லாபா ஹோதி, அக்³கி³ஸாலா ஸம்மஜ்ஜிதப்³பா³. ஸசே வச்சகுடி
உக்லாபா ஹோதி, வச்சகுடி ஸம்மஜ்ஜிதப்³பா³. ஸசே பானீயங் ந ஹோதி, பானீயங்
உபட்டா²பேதப்³ப³ங். ஸசே பரிபோ⁴ஜனீயங் ந ஹோதி, பரிபோ⁴ஜனீயங்
உபட்டா²பேதப்³ப³ங். ஸசே ஆசமனகும்பி⁴யா உத³கங் ந ஹோதி, ஆசமனகும்பி⁴யா உத³கங் ஆஸிஞ்சிதப்³ப³ங்.

‘‘ஸசே உபஜ்ஜா²யஸ்ஸ அனபி⁴ரதி உப்பன்னா ஹோதி,
ஸத்³தி⁴விஹாரிகேன வூபகாஸேதப்³போ³, வூபகாஸாபேதப்³போ³, த⁴ம்மகதா² வாஸ்ஸ
காதப்³பா³. ஸசே உபஜ்ஜா²யஸ்ஸ குக்குச்சங் உப்பன்னங் ஹோதி, ஸத்³தி⁴விஹாரிகேன
வினோதே³தப்³ப³ங், வினோதா³பேதப்³ப³ங், த⁴ம்மகதா² வாஸ்ஸ காதப்³பா³. ஸசே
உபஜ்ஜா²யஸ்ஸ தி³ட்டி²க³தங் உப்பன்னங் ஹோதி, ஸத்³தி⁴விஹாரிகேன
விவேசேதப்³ப³ங், விவேசாபேதப்³ப³ங், த⁴ம்மகதா² வாஸ்ஸ காதப்³பா³ .
ஸசே உபஜ்ஜா²யோ க³ருத⁴ம்மங் அஜ்ஜா²பன்னோ ஹோதி பரிவாஸாரஹோ, ஸத்³தி⁴விஹாரிகேன
உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ உபஜ்ஜா²யஸ்ஸ பரிவாஸங்
த³தெ³ய்யாதி. ஸசே உபஜ்ஜா²யோ மூலாய படிகஸ்ஸனாரஹோ ஹோதி, ஸத்³தி⁴விஹாரிகேன
உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ உபஜ்ஜா²யங் மூலாய
படிகஸ்ஸெய்யாதி. ஸசே உபஜ்ஜா²யோ மானத்தாரஹோ ஹோதி, ஸத்³தி⁴விஹாரிகேன
உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ உபஜ்ஜா²யஸ்ஸ மானத்தங்
த³தெ³ய்யாதி. ஸசே உபஜ்ஜா²யோ அப்³பா⁴னாரஹோ ஹோதி, ஸத்³தி⁴விஹாரிகேன
உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ உபஜ்ஜா²யங் அப்³பெ⁴ய்யாதி.
ஸசே ஸங்கோ⁴ உபஜ்ஜா²யஸ்ஸ கம்மங் கத்துகாமோ ஹோதி தஜ்ஜனீயங் வா நியஸ்ஸங் [நியஸங் (க॰)]
வா பப்³பா³ஜனீயங் வா படிஸாரணீயங் வா உக்கே²பனீயங் வா, ஸத்³தி⁴விஹாரிகேன
உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ உபஜ்ஜா²யஸ்ஸ கம்மங் ந கரெய்ய
லஹுகாய வா பரிணாமெய்யாதி. கதங் வா பனஸ்ஸ ஹோதி ஸங்கே⁴ன கம்மங் தஜ்ஜனீயங் வா
நியஸ்ஸங் வா பப்³பா³ஜனீயங் வா படிஸாரணீயங் வா உக்கே²பனீயங்
வா, ஸத்³தி⁴விஹாரிகேன உஸ்ஸுக்கங் காதப்³ப³ங் – கிந்தி நு கோ² உபஜ்ஜா²யோ
ஸம்மா வத்தெய்ய, லோமங் பாதெய்ய, நெத்தா²ரங் வத்தெய்ய, ஸங்கோ⁴ தங் கம்மங்
படிப்பஸ்ஸம்பெ⁴ய்யாதி.

‘‘ஸசே உபஜ்ஜா²யஸ்ஸ சீவரங் தோ⁴விதப்³ப³ங் ஹோதி, ஸத்³தி⁴விஹாரிகேன தோ⁴விதப்³ப³ங், உஸ்ஸுக்கங் வா காதப்³ப³ங்
– கிந்தி நு கோ² உபஜ்ஜா²யஸ்ஸ சீவரங் தோ⁴வியேதா²தி. ஸசே உபஜ்ஜா²யஸ்ஸ சீவரங்
காதப்³ப³ங் ஹோதி, ஸத்³தி⁴விஹாரிகேன காதப்³ப³ங், உஸ்ஸுக்கங் வா காதப்³ப³ங் –
கிந்தி நு கோ² உபஜ்ஜா²யஸ்ஸ சீவரங் கரியேதா²தி. ஸசே உபஜ்ஜா²யஸ்ஸ ரஜனங்
பசிதப்³ப³ங் ஹோதி, ஸத்³தி⁴விஹாரிகேன பசிதப்³ப³ங், உஸ்ஸுக்கங் வா காதப்³ப³ங்
– கிந்தி நு கோ² உபஜ்ஜா²யஸ்ஸ ரஜனங் பசியேதா²தி. ஸசே உபஜ்ஜா²யஸ்ஸ சீவரங்
ரஜிதப்³ப³ங் [ரஜேதப்³ப³ங் (ஸீ॰ ஸ்யா॰)] ஹோதி, ஸத்³தி⁴விஹாரிகேன ரஜிதப்³ப³ங், உஸ்ஸுக்கங் வா காதப்³ப³ங் – கிந்தி நு கோ² உபஜ்ஜா²யஸ்ஸ சீவரங் ரஜியேதா²தி. சீவரங் ரஜந்தேன [ரஜெந்தேன (ஸீ॰ ஸ்யா॰)] ஸாது⁴கங் ஸம்பரிவத்தகங் ஸம்பரிவத்தகங் ரஜிதப்³ப³ங், ந ச அச்சி²ன்னே தே²வே பக்கமிதப்³ப³ங்.

‘‘ந உபஜ்ஜா²யங் அனாபுச்சா² ஏகச்சஸ்ஸ பத்தோ தா³தப்³போ³,
ந ஏகச்சஸ்ஸ பத்தோ படிக்³க³ஹேதப்³போ³; ந ஏகச்சஸ்ஸ சீவரங் தா³தப்³ப³ங், ந
ஏகச்சஸ்ஸ சீவரங் படிக்³க³ஹேதப்³ப³ங்; ந ஏகச்சஸ்ஸ பரிக்கா²ரோ தா³தப்³போ³, ந
ஏகச்சஸ்ஸ பரிக்கா²ரோ படிக்³க³ஹேதப்³போ³; ந ஏகச்சஸ்ஸ கேஸா சே²தே³தப்³பா³ [செ²த்தப்³பா³ (ஸீ॰), சே²தி³தப்³பா³ (க॰)], ந ஏகச்சேன கேஸா சே²தா³பேதப்³பா³; ந ஏகச்சஸ்ஸ பரிகம்மங் காதப்³ப³ங், ந ஏகச்சேன பரிகம்மங் காராபேதப்³ப³ங்; ந ஏகச்சஸ்ஸ வெய்யாவச்சோ [வெய்யாவச்சங் (கத்த²சி)] காதப்³போ³ ,
ந ஏகச்சேன வெய்யாவச்சோ காராபேதப்³போ³; ந ஏகச்சஸ்ஸ பச்சா²ஸமணேன ஹோதப்³ப³ங்,
ந ஏகச்சோ பச்சா²ஸமணோ ஆதா³தப்³போ³; ந ஏகச்சஸ்ஸ பிண்ட³பாதோ நீஹரிதப்³போ³, ந
ஏகச்சேன பிண்ட³பாதோ நீஹராபேதப்³போ³; ந உபஜ்ஜா²யங் அனாபுச்சா²
கா³மோ பவிஸிதப்³போ³; ந ஸுஸானங் க³ந்தப்³ப³ங்; ந தி³ஸா பக்கமிதப்³பா³. ஸசே
உபஜ்ஜா²யோ கி³லானோ ஹோதி, யாவஜீவங் உபட்டா²தப்³போ³; வுட்டா²னமஸ்ஸ
ஆக³மேதப்³ப³’’ந்தி.

உபஜ்ஜா²யவத்தங் நிட்டி²தங்.

16. ஸத்³தி⁴விஹாரிகவத்தகதா²

67. [சூளவ॰ 378 ஆத³யோ] ‘‘உபஜ்ஜா²யேன, பி⁴க்க²வே, ஸத்³தி⁴விஹாரிகம்ஹி ஸம்மா வத்திதப்³ப³ங். தத்ராயங் ஸம்மாவத்தனா –

‘‘உபஜ்ஜா²யேன, பி⁴க்க²வே, ஸத்³தி⁴விஹாரிகோ
ஸங்க³ஹேதப்³போ³ அனுக்³க³ஹேதப்³போ³ உத்³தே³ஸேன பரிபுச்சா²ய ஓவாதே³ன
அனுஸாஸனியா. ஸசே உபஜ்ஜா²யஸ்ஸ பத்தோ ஹோதி, ஸத்³தி⁴விஹாரிகஸ்ஸ பத்தோ ந ஹோதி,
உபஜ்ஜா²யேன ஸத்³தி⁴விஹாரிகஸ்ஸ பத்தோ தா³தப்³போ³, உஸ்ஸுக்கங் வா காதப்³ப³ங் –
கிந்தி நு கோ² ஸத்³தி⁴விஹாரிகஸ்ஸ பத்தோ உப்பஜ்ஜியேதா²தி. ஸசே உபஜ்ஜா²யஸ்ஸ
சீவரங் ஹோதி, ஸத்³தி⁴விஹாரிகஸ்ஸ சீவரங் ந ஹோதி, உபஜ்ஜா²யேன
ஸத்³தி⁴விஹாரிகஸ்ஸ சீவரங் தா³தப்³ப³ங், உஸ்ஸுக்கங் வா காதப்³ப³ங் – கிந்தி
நு கோ² ஸத்³தி⁴விஹாரிகஸ்ஸ சீவரங் உப்பஜ்ஜியேதா²தி. ஸசே உபஜ்ஜா²யஸ்ஸ
பரிக்கா²ரோ ஹோதி, ஸத்³தி⁴விஹாரிகஸ்ஸ பரிக்கா²ரோ ந ஹோதி, உபஜ்ஜா²யேன
ஸத்³தி⁴விஹாரிகஸ்ஸ பரிக்கா²ரோ தா³தப்³போ³, உஸ்ஸுக்கங் வா காதப்³ப³ங் – கிந்தி நு கோ² ஸத்³தி⁴விஹாரிகஸ்ஸ பரிக்கா²ரோ உப்பஜ்ஜியேதா²தி.

‘‘ஸசே ஸத்³தி⁴விஹாரிகோ கி³லானோ
ஹோதி, காலஸ்ஸேவ உட்டா²ய த³ந்தகட்ட²ங் தா³தப்³ப³ங், முகோ²த³கங்
தா³தப்³ப³ங், ஆஸனங் பஞ்ஞபேதப்³ப³ங். ஸசே யாகு³ ஹோதி, பா⁴ஜனங் தோ⁴வித்வா
யாகு³ உபனாமேதப்³பா³. யாகு³ங் பீதஸ்ஸ உத³கங் த³த்வா பா⁴ஜனங் படிக்³க³ஹெத்வா
நீசங் கத்வா ஸாது⁴கங் அப்படிக⁴ங்ஸந்தேன தோ⁴வித்வா படிஸாமேதப்³ப³ங்.
ஸத்³தி⁴விஹாரிகம்ஹி வுட்டி²தே ஆஸனங் உத்³த⁴ரிதப்³ப³ங். ஸசே ஸோ தே³ஸோ
உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே ஸத்³தி⁴விஹாரிகோ கா³மங் பவிஸிதுகாமோ ஹோதி,
நிவாஸனங் தா³தப்³ப³ங், படினிவாஸனங் படிக்³க³ஹேதப்³ப³ங், காயப³ந்த⁴னங்
தா³தப்³ப³ங், ஸகு³ணங் கத்வா ஸங்கா⁴டியோ தா³தப்³பா³, தோ⁴வித்வா பத்தோ ஸோத³கோ
தா³தப்³போ³. எத்தாவதா நிவத்திஸ்ஸதீதி ஆஸனங் பஞ்ஞபேதப்³ப³ங், பாதோ³த³கங்
பாத³பீட²ங் பாத³கத²லிகங் உபனிக்கி²பிதப்³ப³ங், பச்சுக்³க³ந்த்வா பத்தசீவரங் படிக்³க³ஹேதப்³ப³ங், படினிவாஸனங் தா³தப்³ப³ங், நிவாஸனங் படிக்³க³ஹேதப்³ப³ங் .
ஸசே சீவரங் ஸின்னங் ஹோதி, முஹுத்தங் உண்ஹே ஓதாபேதப்³ப³ங், ந ச உண்ஹே
சீவரங் நித³ஹிதப்³ப³ங்; சீவரங் ஸங்க⁴ரிதப்³ப³ங், சீவரங் ஸங்க⁴ரந்தேன
சதுரங்கு³லங் கண்ணங் உஸ்ஸாரெத்வா சீவரங் ஸங்க⁴ரிதப்³ப³ங் – மா மஜ்ஜே²
ப⁴ங்கோ³ அஹோஸீதி. ஓபோ⁴கே³ காயப³ந்த⁴னங் காதப்³ப³ங்.

‘‘ஸசே பிண்ட³பாதோ ஹோதி, ஸத்³தி⁴விஹாரிகோ ச
பு⁴ஞ்ஜிதுகாமோ ஹோதி, உத³கங் த³த்வா பிண்ட³பாதோ உபனாமேதப்³போ³.
ஸத்³தி⁴விஹாரிகோ பானீயேன புச்சி²தப்³போ³. பு⁴த்தாவிஸ்ஸ உத³கங் த³த்வா
பத்தங் படிக்³க³ஹெத்வா நீசங் கத்வா ஸாது⁴கங் அப்படிக⁴ங்ஸந்தேன தோ⁴வித்வா
வோத³கங் கத்வா முஹுத்தங் உண்ஹே ஓதாபேதப்³போ³, ந ச உண்ஹே பத்தோ
நித³ஹிதப்³போ³. பத்தசீவரங் நிக்கி²பிதப்³ப³ங்.
பத்தங் நிக்கி²பந்தேன ஏகேன ஹத்தே²ன பத்தங் க³ஹெத்வா ஏகேன ஹத்தே²ன
ஹெட்டா²மஞ்சங் வா ஹெட்டா²பீட²ங் வா பராமஸித்வா பத்தோ நிக்கி²பிதப்³போ³. ந ச
அனந்தரஹிதாய பூ⁴மியா பத்தோ நிக்கி²பிதப்³போ³. சீவரங் நிக்கி²பந்தேன ஏகேன
ஹத்தே²ன சீவரங் க³ஹெத்வா ஏகேன ஹத்தே²ன சீவரவங்ஸங் வா சீவரரஜ்ஜுங் வா
பமஜ்ஜித்வா பாரதோ அந்தங் ஓரதோ போ⁴க³ங் கத்வா சீவரங் நிக்கி²பிதப்³ப³ங்.
ஸத்³தி⁴விஹாரிகம்ஹி வுட்டி²தே ஆஸனங் உத்³த⁴ரிதப்³ப³ங், பாதோ³த³கங்
பாத³பீட²ங் பாத³கத²லிகங் படிஸாமேதப்³ப³ங். ஸசே ஸோ தே³ஸோ உக்லாபோ ஹோதி, ஸோ
தே³ஸோ ஸம்மஜ்ஜிதப்³போ³.

‘‘ஸசே ஸத்³தி⁴விஹாரிகோ நஹாயிதுகாமோ ஹோதி, நஹானங்
படியாதே³தப்³ப³ங். ஸசே ஸீதேன அத்தோ² ஹோதி, ஸீதங் படியாதே³தப்³ப³ங். ஸசே
உண்ஹேன அத்தோ² ஹோதி, உண்ஹங் படியாதே³தப்³ப³ங் .

‘‘ஸசே ஸத்³தி⁴விஹாரிகோ ஜந்தாக⁴ரங் பவிஸிதுகாமோ ஹோதி,
சுண்ணங் ஸன்னேதப்³ப³ங், மத்திகா தேமேதப்³பா³, ஜந்தாக⁴ரபீட²ங் ஆதா³ய
க³ந்த்வா ஜந்தாக⁴ரபீட²ங் த³த்வா சீவரங் படிக்³க³ஹெத்வா ஏகமந்தங்
நிக்கி²பிதப்³ப³ங், சுண்ணங் தா³தப்³ப³ங், மத்திகா தா³தப்³பா³. ஸசே உஸ்ஸஹதி,
ஜந்தாக⁴ரங் பவிஸிதப்³ப³ங். ஜந்தாக⁴ரங் பவிஸந்தேன மத்திகாய முக²ங்
மக்கெ²த்வா புரதோ ச பச்ச²தோ ச படிச்சா²தெ³த்வா ஜந்தாக⁴ரங் பவிஸிதப்³ப³ங். ந
தே²ரே பி⁴க்கூ² அனுபக²ஜ்ஜ நிஸீதி³தப்³ப³ங். ந நவா பி⁴க்கூ² ஆஸனேன
படிபா³ஹிதப்³பா³. ஜந்தாக⁴ரே ஸத்³தி⁴விஹாரிகஸ்ஸ பரிகம்மங் காதப்³ப³ங்.
ஜந்தாக⁴ரா நிக்க²மந்தேன ஜந்தாக⁴ரபீட²ங் ஆதா³ய புரதோ ச பச்ச²தோ ச
படிச்சா²தெ³த்வா ஜந்தாக⁴ரா நிக்க²மிதப்³ப³ங்.

‘‘உத³கேபி ஸத்³தி⁴விஹாரிகஸ்ஸ
பரிகம்மங் காதப்³ப³ங். நஹாதேன பட²மதரங் உத்தரித்வா அத்தனோ க³த்தங் வோத³கங்
கத்வா நிவாஸெத்வா ஸத்³தி⁴விஹாரிகஸ்ஸ க³த்ததோ உத³கங் பமஜ்ஜிதப்³ப³ங்,
நிவாஸனங் தா³தப்³ப³ங், ஸங்கா⁴டி தா³தப்³பா³. ஜந்தாக⁴ரபீட²ங் ஆதா³ய பட²மதரங்
ஆக³ந்த்வா ஆஸனங் பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங்
உபனிக்கி²பிதப்³ப³ங். ஸத்³தி⁴விஹாரிகோ பானீயேன புச்சி²தப்³போ³.

‘‘யஸ்மிங் விஹாரே
ஸத்³தி⁴விஹாரிகோ விஹரதி, ஸசே ஸோ விஹாரோ உக்லாபோ ஹோதி, ஸசே உஸ்ஸஹதி,
ஸோதே⁴தப்³போ³. விஹாரங் ஸோதெ⁴ந்தேன பட²மங் பத்தசீவரங் நீஹரித்வா ஏகமந்தங்
நிக்கி²பிதப்³ப³ங்; நிஸீத³னபச்சத்த²ரணங் நீஹரித்வா ஏகமந்தங்
நிக்கி²பிதப்³ப³ங்; பி⁴ஸிபி³ப்³போ³ஹனங் நீஹரித்வா ஏகமந்தங்
நிக்கி²பிதப்³ப³ங்; மஞ்சோ நீசங் கத்வா ஸாது⁴கங் அப்படிக⁴ங்ஸந்தேன,
அஸங்க⁴ட்டெந்தேன கவாடபிட்ட²ங், நீஹரித்வா ஏகமந்தங் நிக்கி²பிதப்³போ³;
பீட²ங் நீசங் கத்வா ஸாது⁴கங் அப்படிக⁴ங்ஸந்தேன அஸங்க⁴ட்டெந்தேன
கவாடபிட்ட²ங் நீஹரித்வா ஏகமந்தங் நிக்கி²பிதப்³ப³ங்; மஞ்சபடிபாத³கா
நீஹரித்வா ஏகமந்தங் நிக்கி²பிதப்³பா³; கே²ளமல்லகோ நீஹரித்வா ஏகமந்தங்
நிக்கி²பிதப்³போ³; அபஸ்ஸேனப²லகங் நீஹரித்வா ஏகமந்தங் நிக்கி²பிதப்³ப³ங்;
பூ⁴மத்த²ரணங் யதா²பஞ்ஞத்தங் ஸல்லக்கெ²த்வா நீஹரித்வா ஏகமந்தங்
நிக்கி²பிதப்³ப³ங். ஸசே விஹாரே ஸந்தானகங் ஹோதி, உல்லோகா பட²மங்
ஓஹாரேதப்³ப³ங், ஆலோகஸந்தி⁴கண்ணபா⁴கா³ பமஜ்ஜிதப்³பா³. ஸசே கே³ருகபரிகம்மகதா
பி⁴த்தி கண்ணகிதா ஹோதி, சோளகங் தேமெத்வா பீளெத்வா பமஜ்ஜிதப்³பா³. ஸசே
காளவண்ணகதா பூ⁴மி கண்ணகிதா ஹோதி, சோளகங் தேமெத்வா
பீளெத்வா பமஜ்ஜிதப்³பா³. ஸசே அகதா ஹோதி பூ⁴மி, உத³கேன பரிப்போ²ஸித்வா
ஸம்மஜ்ஜிதப்³பா³ – மா விஹாரோ ரஜேன உஹஞ்ஞீதி. ஸங்காரங் விசினித்வா ஏகமந்தங்
ச²ட்³டே³தப்³ப³ங்.

‘‘பூ⁴மத்த²ரணங் ஓதாபெத்வா ஸோதெ⁴த்வா பப்போ²டெத்வா
அதிஹரித்வா யதா²பஞ்ஞத்தங் பஞ்ஞபேதப்³ப³ங். மஞ்சபடிபாத³கா ஓதாபெத்வா
பமஜ்ஜித்வா அதிஹரித்வா யதா²டா²னே ட²பேதப்³பா³. மஞ்சோ ஓதாபெத்வா ஸோதெ⁴த்வா
பப்போ²டெத்வா நீசங் கத்வா ஸாது⁴கங் அப்படிக⁴ங்ஸந்தேன, அஸங்க⁴ட்டெந்தேன
கவாடபிட்ட²ங், அதிஹரித்வா யதா²பஞ்ஞத்தங் பஞ்ஞபேதப்³போ³. பீட²ங் ஓதாபெத்வா
ஸோதெ⁴த்வா பப்போ²டெத்வா நீசங் கத்வா ஸாது⁴கங் அப்படிக⁴ங்ஸந்தேன,
அஸங்க⁴ட்டெந்தேன கவாடபிட்ட²ங், அதிஹரித்வா யதா²பஞ்ஞத்தங் பஞ்ஞபேதப்³ப³ங்.
பி⁴ஸிபி³ப்³போ³ஹனங் ஓதாபெத்வா ஸோதெ⁴த்வா பப்போ²டெத்வா அதிஹரித்வா
யதா²பஞ்ஞத்தங் பஞ்ஞபேதப்³ப³ங். நிஸீத³னபச்சத்த²ரணங்
ஓதாபெத்வா ஸோதெ⁴த்வா பப்போ²டெத்வா அதிஹரித்வா யதா²பஞ்ஞத்தங்
பஞ்ஞபேதப்³ப³ங். கே²ளமல்லகோ ஓதாபெத்வா பமஜ்ஜித்வா அதிஹரித்வா யதா²டா²னே
ட²பேதப்³போ³. அபஸ்ஸேனப²லகங் ஓதாபெத்வா பமஜ்ஜித்வா அதிஹரித்வா யதா²டா²னே
ட²பேதப்³ப³ங். பத்தசீவரங் நிக்கி²பிதப்³ப³ங். பத்தங் நிக்கி²பந்தேன ஏகேன
ஹத்தே²ன பத்தங் க³ஹெத்வா ஏகேன ஹத்தே²ன ஹெட்டா²மஞ்சங் வா ஹெட்டா²பீட²ங் வா
பராமஸித்வா பத்தோ நிக்கி²பிதப்³போ³. ந ச அனந்தரஹிதாய பூ⁴மியா பத்தோ
நிக்கி²பிதப்³போ³. சீவரங் நிக்கி²பந்தேன ஏகேன ஹத்தே²ன சீவரங் க³ஹெத்வா ஏகேன
ஹத்தே²ன சீவரவங்ஸங் வா சீவரரஜ்ஜுங் வா பமஜ்ஜித்வா பாரதோ அந்தங் ஓரதோ போ⁴க³ங் கத்வா சீவரங் நிக்கி²பிதப்³ப³ங்.

‘‘ஸசே புரத்தி²மா ஸரஜா வாதா வாயந்தி, புரத்தி²மா
வாதபானா த²கேதப்³பா³. ஸசே பச்சி²மா ஸரஜா வாதா வாயந்தி, பச்சி²மா வாதபானா
த²கேதப்³பா³. ஸசே உத்தரா ஸரஜா வாதா வாயந்தி, உத்தரா
வாதபானா த²கேதப்³பா³. ஸசே த³க்கி²ணா ஸரஜா வாதா வாயந்தி, த³க்கி²ணா வாதபானா
த²கேதப்³பா³. ஸசே ஸீதகாலோ ஹோதி, தி³வா வாதபானா விவரிதப்³பா³, ரத்திங்
த²கேதப்³பா³. ஸசே உண்ஹகாலோ ஹோதி, தி³வா வாதபானா த²கேதப்³பா³, ரத்திங்
விவரிதப்³பா³.

‘‘ஸசே பரிவேணங் உக்லாபங் ஹோதி, பரிவேணங்
ஸம்மஜ்ஜிதப்³ப³ங். ஸசே கொட்ட²கோ உக்லாபோ ஹோதி, கொட்ட²கோ ஸம்மஜ்ஜிதப்³போ³.
ஸசே உபட்டா²னஸாலா உக்லாபா ஹோதி, உபட்டா²னஸாலா ஸம்மஜ்ஜிதப்³பா³. ஸசே
அக்³கி³ஸாலா உக்லாபா ஹோதி, அக்³கி³ஸாலா ஸம்மஜ்ஜிதப்³பா³. ஸசே வச்சகுடி
உக்லாபா ஹோதி, வச்சகுடி ஸம்மஜ்ஜிதப்³பா³. ஸசே பானீயங் ந ஹோதி, பானீயங்
உபட்டா²பேதப்³ப³ங். ஸசே பரிபோ⁴ஜனீயங் ந ஹோதி, பரிபோ⁴ஜனீயங்
உபட்டா²பேதப்³ப³ங். ஸசே ஆசமனகும்பி⁴யா உத³கங் ந ஹோதி, ஆசமனகும்பி⁴யா உத³கங்
ஆஸிஞ்சிதப்³ப³ங்.

‘‘ஸசே ஸத்³தி⁴விஹாரிகஸ்ஸ அனபி⁴ரதி உப்பன்னா ஹோதி,
உபஜ்ஜா²யேன வூபகாஸேதப்³போ³, வூபகாஸாபேதப்³போ³, த⁴ம்மகதா² வாஸ்ஸ காதப்³பா³.
ஸசே ஸத்³தி⁴விஹாரிகஸ்ஸ குக்குச்சங் உப்பன்னங் ஹோதி, உபஜ்ஜா²யேன
வினோதே³தப்³ப³ங், வினோதா³பேதப்³ப³ங், த⁴ம்மகதா² வாஸ்ஸ காதப்³பா³ .
ஸசே ஸத்³தி⁴விஹாரிகஸ்ஸ தி³ட்டி²க³தங் உப்பன்னங் ஹோதி, உபஜ்ஜா²யேன
விவேசேதப்³ப³ங், விவேசாபேதப்³ப³ங், த⁴ம்மகதா² வாஸ்ஸ காதப்³பா³. ஸசே
ஸத்³தி⁴விஹாரிகோ க³ருத⁴ம்மங் அஜ்ஜா²பன்னோ ஹோதி பரிவாஸாரஹோ, உபஜ்ஜா²யேன
உஸ்ஸுக்கங் காதப்³ப³ங் – கிந்தி நு கோ² ஸங்கோ⁴
ஸத்³தி⁴விஹாரிகஸ்ஸ பரிவாஸங் த³தெ³ய்யாதி. ஸசே ஸத்³தி⁴விஹாரிகோ மூலாய
படிகஸ்ஸனாரஹோ ஹோதி, உபஜ்ஜா²யேன உஸ்ஸுக்கங் காதப்³ப³ங் – கிந்தி நு கோ²
ஸங்கோ⁴ ஸத்³தி⁴விஹாரிகங் மூலாய படிகஸ்ஸெய்யாதி. ஸசே ஸத்³தி⁴விஹாரிகோ
மானத்தாரஹோ ஹோதி, உபஜ்ஜா²யேன உஸ்ஸுக்கங் காதப்³ப³ங் – கிந்தி நு கோ² ஸங்கோ⁴
ஸத்³தி⁴விஹாரிகஸ்ஸ மானத்தங் த³தெ³ய்யாதி. ஸசே ஸத்³தி⁴விஹாரிகோ
அப்³பா⁴னாரஹோ ஹோதி, உபஜ்ஜா²யேன உஸ்ஸுக்கங் காதப்³ப³ங் – கிந்தி நு கோ²
ஸங்கோ⁴ ஸத்³தி⁴விஹாரிகங் அப்³பெ⁴ய்யாதி. ஸசே ஸங்கோ⁴ ஸத்³தி⁴விஹாரிகஸ்ஸ
கம்மங் கத்துகாமோ ஹோதி, தஜ்ஜனீயங் வா நியஸ்ஸங் வா பப்³பா³ஜனீயங் வா
படிஸாரணீயங் வா உக்கே²பனீயங் வா, உபஜ்ஜா²யேன உஸ்ஸுக்கங் காதப்³ப³ங் –
கிந்தி நு கோ² ஸங்கோ⁴ ஸத்³தி⁴விஹாரிகஸ்ஸ கம்மங் ந கரெய்ய, லஹுகாய வா
பரிணாமெய்யாதி. கதங் வா பனஸ்ஸ ஹோதி ஸங்கே⁴ன கம்மங், தஜ்ஜனீயங் வா நியஸ்ஸங்
வா பப்³பா³ஜனீயங் வா படிஸாரணீயங் வா உக்கே²பனீயங் வா, உபஜ்ஜா²யேன
உஸ்ஸுக்கங் காதப்³ப³ங் – கிந்தி நு கோ² ஸத்³தி⁴விஹாரிகோ ஸம்மா வத்தெய்ய,
லோமங் பாதெய்ய, நெத்தா²ரங் வத்தெய்ய, ஸங்கோ⁴ தங் கம்மங்
படிப்பஸ்ஸம்பெ⁴ய்யாதி.

‘‘ஸசே ஸத்³தி⁴விஹாரிகஸ்ஸ சீவரங் தோ⁴விதப்³ப³ங் ஹோதி, உபஜ்ஜா²யேன ஆசிக்கி²தப்³ப³ங் ஏவங் தோ⁴வெய்யாஸீதி , உஸ்ஸுக்கங் வா காதப்³ப³ங் – கிந்தி நு கோ² ஸத்³தி⁴விஹாரிகஸ்ஸ சீவரங் தோ⁴வியேதா²தி. ஸசே ஸத்³தி⁴விஹாரிகஸ்ஸ சீவரங் காதப்³ப³ங்
ஹோதி, உபஜ்ஜா²யேன ஆசிக்கி²தப்³ப³ங் ஏவங் கரெய்யாஸீதி, உஸ்ஸுக்கங் வா
காதப்³ப³ங் – கிந்தி நு கோ² ஸத்³தி⁴விஹாரிகஸ்ஸ சீவரங் கரியேதா²தி. ஸசே
ஸத்³தி⁴விஹாரிகஸ்ஸ ரஜனங் பசிதப்³ப³ங் ஹோதி, உபஜ்ஜா²யேன ஆசிக்கி²தப்³ப³ங்
ஏவங் பசெய்யாஸீதி, உஸ்ஸுக்கங் வா காதப்³ப³ங் – கிந்தி நு கோ²
ஸத்³தி⁴விஹாரிகஸ்ஸ ரஜனங் பசியேதா²தி. ஸசே ஸத்³தி⁴விஹாரிகஸ்ஸ சீவரங்
ரஜிதப்³ப³ங் ஹோதி, உபஜ்ஜா²யேன ஆசிக்கி²தப்³ப³ங், ஏவங் ரஜெய்யாஸீதி,
உஸ்ஸுக்கங் வா காதப்³ப³ங் – கிந்தி நு கோ² ஸத்³தி⁴விஹாரிகஸ்ஸ சீவரங்
ரஜியேதா²தி. சீவரங் ரஜந்தேன ஸாது⁴கங் ஸம்பரிவத்தகங் ஸம்பரிவத்தகங்
ரஜிதப்³ப³ங். ந ச அச்சி²ன்னே தே²வே பக்கமிதப்³ப³ங். ஸசே ஸத்³தி⁴விஹாரிகோ
கி³லானோ ஹோதி, யாவஜீவங் உபட்டா²தப்³போ³, வுட்டா²னமஸ்ஸ ஆக³மேதப்³ப³’’ந்தி.

ஸத்³தி⁴விஹாரிகவத்தங் நிட்டி²தங்.

17. பணாமிதகதா²

68. தேன
கோ² பன ஸமயேன ஸத்³தி⁴விஹாரிகா உபஜ்ஜா²யேஸு ந ஸம்மா வத்தந்தி. யே தே
பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி –
‘‘கத²ஞ்ஹி நாம ஸத்³தி⁴விஹாரிகா உபஜ்ஜா²யேஸு ந ஸம்மா வத்திஸ்ஸந்தீ’’தி. அத²
கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ஸச்சங் கிர, பி⁴க்க²வே,
ஸத்³தி⁴விஹாரிகா உபஜ்ஜா²யேஸு ந ஸம்மா வத்தந்தீதி? ஸச்சங் ப⁴க³வாதி. விக³ரஹி
பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, ஸத்³தி⁴விஹாரிகா
உபஜ்ஜா²யேஸு ந ஸம்மா வத்திஸ்ஸந்தீதி…பே॰… விக³ரஹித்வா…பே॰… த⁴ம்மிங் கத²ங்
கத்வா பி⁴க்கூ² ஆமந்தேஸி – ‘‘ந, பி⁴க்க²வே, ஸத்³தி⁴விஹாரிகேன உபஜ்ஜா²யம்ஹி ந ஸம்மா வத்திதப்³ப³ங். யோ ந ஸம்மா வத்தெய்ய, ஆபத்தி து³க்கடஸ்ஸா’’தி .
நேவ ஸம்மா வத்தந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
அஸம்மாவத்தந்தங் பணாமேதுங். ஏவஞ்ச பன, பி⁴க்க²வே, பணாமேதப்³போ³ – ‘‘பணாமேமி
த’’ந்தி வா, ‘‘மாயித⁴ படிக்கமீ’’தி வா, ‘‘நீஹர தே பத்தசீவர’’ந்தி வா,
‘‘நாஹங் தயா உபட்டா²தப்³போ³’’தி வா, காயேன விஞ்ஞாபேதி, வாசாய விஞ்ஞாபேதி,
காயேன வாசாய விஞ்ஞாபேதி, பணாமிதோ ஹோதி ஸத்³தி⁴விஹாரிகோ; ந காயேன
விஞ்ஞாபேதி, ந வாசாய விஞ்ஞாபேதி, ந காயேன வாசாய விஞ்ஞாபேதி, ந பணாமிதோ ஹோதி
ஸத்³தி⁴விஹாரிகோதி.

தேன கோ² பன ஸமயேன ஸத்³தி⁴விஹாரிகா பணாமிதா ந
க²மாபெந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
க²மாபேதுந்தி. நேவ க²மாபெந்தி. ப⁴க³வதோ ஏதமத்த²ங் ஆரோசேஸுங் . ந, பி⁴க்க²வே, பணாமிதேன ந க²மாபேதப்³போ³. யோ ந க²மாபெய்ய, ஆபத்தி து³க்கடஸ்ஸாதி.

தேன கோ² பன ஸமயேன உபஜ்ஜா²யா க²மாபியமானா ந க²மந்தி.
ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, க²மிதுந்தி. நேவ
க²மந்தி. ஸத்³தி⁴விஹாரிகா பக்கமந்திபி விப்³ப⁴மந்திபி தித்தி²யேஸுபி
ஸங்கமந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, க²மாபியமானேன ந
க²மிதப்³ப³ங். யோ ந க²மெய்ய, ஆபத்தி து³க்கடஸ்ஸாதி.

தேன கோ² பன ஸமயேன உபஜ்ஜா²யா ஸம்மாவத்தந்தங் பணாமெந்தி,
அஸம்மாவத்தந்தங் ந பணாமெந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே,
ஸம்மாவத்தந்தோ பணாமேதப்³போ³. யோ பணாமெய்ய , ஆபத்தி து³க்கடஸ்ஸ . ந ச, பி⁴க்க²வே, அஸம்மாவத்தந்தோ ந பணாமேதப்³போ³. யோ ந பணாமெய்ய, ஆபத்தி து³க்கடஸ்ஸாதி.

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ
ஸத்³தி⁴விஹாரிகோ பணாமேதப்³போ³. உபஜ்ஜா²யம்ஹி நாதி⁴மத்தங் பேமங் ஹோதி,
நாதி⁴மத்தோ பஸாதோ³ ஹோதி, நாதி⁴மத்தா ஹிரீ ஹோதி, நாதி⁴மத்தோ கா³ரவோ ஹோதி,
நாதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ
ஸத்³தி⁴விஹாரிகோ பணாமேதப்³போ³.

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ
ஸத்³தி⁴விஹாரிகோ ந பணாமேதப்³போ³. உபஜ்ஜா²யம்ஹி அதி⁴மத்தங் பேமங் ஹோதி,
அதி⁴மத்தோ பஸாதோ³ ஹோதி, அதி⁴மத்தா ஹிரீ ஹோதி, அதி⁴மத்தோ கா³ரவோ ஹோதி,
அதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ
ஸத்³தி⁴விஹாரிகோ ந பணாமேதப்³போ³.

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ ஸத்³தி⁴விஹாரிகோ அலங் பணாமேதுங். உபஜ்ஜா²யம்ஹி
நாதி⁴மத்தங் பேமங் ஹோதி, நாதி⁴மத்தோ பஸாதோ³ ஹோதி, நாதி⁴மத்தா ஹிரீ ஹோதி,
நாதி⁴மத்தா கா³ரவோ ஹோதி, நாதி⁴மத்தா பா⁴வனா ஹோதி – இமேஹி கோ², பி⁴க்க²வே,
பஞ்சஹங்கே³ஹி ஸமன்னாக³தோ ஸத்³தி⁴விஹாரிகோ அலங் பணாமேதுங்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ ஸத்³தி⁴விஹாரிகோ நாலங் பணாமேதுங். உபஜ்ஜா²யம்ஹி அதி⁴மத்தங்
பேமங் ஹோதி, அதி⁴மத்தோ பஸாதோ³ ஹோதி, அதி⁴மத்தா ஹிரீ ஹோதி, அதி⁴மத்தோ
கா³ரவோ ஹோதி, அதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி
ஸமன்னாக³தோ ஸத்³தி⁴விஹாரிகோ நாலங் பணாமேதுங்.

‘‘பஞ்சஹி , பி⁴க்க²வே, அங்கே³ஹி
ஸமன்னாக³தங் ஸத்³தி⁴விஹாரிகங் அப்பணாமெந்தோ உபஜ்ஜா²யோ ஸாதிஸாரோ ஹோதி,
பணாமெந்தோ அனதிஸாரோ ஹோதி. உபஜ்ஜா²யம்ஹி நாதி⁴மத்தங் பேமங் ஹோதி, நாதி⁴மத்தோ
பஸாதோ³ ஹோதி, நாதி⁴மத்தா ஹிரீ ஹோதி, நாதி⁴மத்தோ கா³ரவோ ஹோதி, நாதி⁴மத்தா
பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தங் ஸத்³தி⁴விஹாரிகங் அப்பணாமெந்தோ உபஜ்ஜா²யோ ஸாதிஸாரோ ஹோதி, பணாமெந்தோ அனதிஸாரோ ஹோதி.

‘‘பஞ்சஹி, பி⁴க்க²வே, அங்கே³ஹி ஸமன்னாக³தங்
ஸத்³தி⁴விஹாரிகங் பணாமெந்தோ உபஜ்ஜா²யோ ஸாதிஸாரோ ஹோதி, அப்பணாமெந்தோ
அனதிஸாரோ ஹோதி. உபஜ்ஜா²யம்ஹி அதி⁴மத்தங் பேமங் ஹோதி, அதி⁴மத்தோ பஸாதோ³
ஹோதி, அதி⁴மத்தா ஹிரீ ஹோதி, அதி⁴மத்தோ கா³ரவோ ஹோதி, அதி⁴மத்தா பா⁴வனா ஹோதி –
இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தங் ஸத்³தி⁴விஹாரிகங்
பணாமெந்தோ உபஜ்ஜா²யோ ஸாதிஸாரோ ஹோதி, அப்பணாமெந்தோ அனதிஸாரோ ஹோதீ’’தி.

69.
தேன கோ² பன ஸமயேன அஞ்ஞதரோ ப்³ராஹ்மணோ பி⁴க்கூ² உபஸங்கமித்வா பப்³ப³ஜ்ஜங்
யாசி. தங் பி⁴க்கூ² ந இச்சி²ங்ஸு பப்³பா³ஜேதுங். ஸோ பி⁴க்கூ²ஸு பப்³ப³ஜ்ஜங்
அலப⁴மானோ கிஸோ அஹோஸி லூகோ² து³ப்³ப³ண்ணோ உப்பண்டு³ப்பண்டு³கஜாதோ
த⁴மனிஸந்த²தக³த்தோ. அத்³த³ஸா கோ² ப⁴க³வா தங் ப்³ராஹ்மணங் கிஸங் லூக²ங்
து³ப்³ப³ண்ணங் உப்பண்டு³ப்பண்டு³கஜாதங் த⁴மனிஸந்த²தக³த்தங், தி³ஸ்வான
பி⁴க்கூ² ஆமந்தேஸி – ‘‘கிங் நு கோ² ஸோ, பி⁴க்க²வே, ப்³ராஹ்மணோ கிஸோ லூகோ²
து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ’’தி? ஏஸோ, ப⁴ந்தே,
ப்³ராஹ்மணோ பி⁴க்கூ² உபஸங்கமித்வா பப்³ப³ஜ்ஜங் யாசி. தங் பி⁴க்கூ² ந
இச்சி²ங்ஸு பப்³பா³ஜேதுங். ஸோ பி⁴க்கூ²ஸு பப்³ப³ஜ்ஜங் அலப⁴மானோ கிஸோ லூகோ²
து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோதி. அத² கோ² ப⁴க³வா
பி⁴க்கூ² ஆமந்தேஸி – ‘‘கோ நு கோ², பி⁴க்க²வே, தஸ்ஸ ப்³ராஹ்மணஸ்ஸ அதி⁴காரங்
ஸரஸீ’’தி? ஏவங் வுத்தே ஆயஸ்மா ஸாரிபுத்தோ ப⁴க³வந்தங் ஏதத³வோச – ‘‘அஹங் கோ²,
ப⁴ந்தே, தஸ்ஸ ப்³ராஹ்மணஸ்ஸ அதி⁴காரங் ஸராமீ’’தி. ‘‘கிங் பன த்வங்,
ஸாரிபுத்த, தஸ்ஸ ப்³ராஹ்மணஸ்ஸ அதி⁴காரங் ஸரஸீ’’தி? ‘‘இத⁴ மே, ப⁴ந்தே, ஸோ
ப்³ராஹ்மணோ ராஜக³ஹே பிண்டா³ய சரந்தஸ்ஸ கடச்சு²பி⁴க்க²ங் தா³பேஸி. இமங் கோ²
அஹங், ப⁴ந்தே, தஸ்ஸ ப்³ராஹ்மணஸ்ஸ அதி⁴காரங்
ஸராமீ’’தி. ‘‘ஸாது⁴ ஸாது⁴, ஸாரிபுத்த, கதஞ்ஞுனோ ஹி, ஸாரிபுத்த, ஸப்புரிஸா
கதவேதி³னோ. தேன ஹி த்வங், ஸாரிபுத்த, தங் ப்³ராஹ்மணங் பப்³பா³ஜேஹி
உபஸம்பாதே³ஹீ’’தி . ‘‘கதா²ஹங், ப⁴ந்தே ,
தங் ப்³ராஹ்மணங் பப்³பா³ஜேமி உபஸம்பாதே³மீ’’தி? அத² கோ² ப⁴க³வா ஏதஸ்மிங்
நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – யா ஸா,
பி⁴க்க²வே, மயா தீஹி ஸரணக³மனேஹி உபஸம்பதா³ அனுஞ்ஞாதா, தங் அஜ்ஜதக்³கே³
படிக்கி²பாமி. அனுஜானாமி, பி⁴க்க²வே, ஞத்திசதுத்தே²ன கம்மேன உபஸம்பாதே³துங்
[உபஸம்பத³ங் (ஸீ॰ ஸ்யா॰)]. ஏவஞ்ச பன, பி⁴க்க²வே, உபஸம்பாதே³தப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

70.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ
உபஸம்பதா³பெக்கோ². யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங்
உபஸம்பாதெ³ய்ய இத்த²ன்னாமேன உபஜ்ஜா²யேன. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ
இத்த²ன்னாமஸ்ஸ ஆயஸ்மதோ உபஸம்பதா³பெக்கோ². ஸங்கோ⁴ இத்த²ன்னாமங் உபஸம்பாதே³தி
இத்த²ன்னாமேன உபஜ்ஜா²யேன. யஸ்ஸாயஸ்மதோ க²மதி இத்த²ன்னாமஸ்ஸ உபஸம்பதா³
இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.

‘‘து³தியம்பி ஏதமத்த²ங் வதா³மி – ஸுணாது மே, ப⁴ந்தே,
ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ². ஸங்கோ⁴
இத்த²ன்னாமங் உபஸம்பாதே³தி இத்த²ன்னாமேன உபஜ்ஜா²யேன. யஸ்ஸாயஸ்மதோ க²மதி
இத்த²ன்னாமஸ்ஸ உபஸம்பதா³ இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ
நக்க²மதி, ஸோ பா⁴ஸெய்ய .

‘‘ததியம்பி ஏதமத்த²ங் வதா³மி – ஸுணாது மே, ப⁴ந்தே,
ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ². ஸங்கோ⁴
இத்த²ன்னாமங் உபஸம்பாதே³தி இத்த²ன்னாமேன உபஜ்ஜா²யேன. யஸ்ஸாயஸ்மதோ க²மதி
இத்த²ன்னாமஸ்ஸ உபஸம்பதா³ இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ
நக்க²மதி, ஸோ பா⁴ஸெய்ய.

‘‘உபஸம்பன்னோ ஸங்கே⁴ன இத்த²ன்னாமோ இத்த²ன்னாமேன உபஜ்ஜா²யேன. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.

71.
தேன கோ² பன ஸமயேன அஞ்ஞதரோ பி⁴க்கு² உபஸம்பன்னஸமனந்தரா அனாசாரங் ஆசரதி.
பி⁴க்கூ² ஏவமாஹங்ஸு – ‘‘மாவுஸோ, ஏவரூபங் அகாஸி, நேதங் கப்பதீ’’தி. ஸோ ஏவமாஹ
– ‘‘நேவாஹங் ஆயஸ்மந்தே யாசிங் உபஸம்பாதே³த² மந்தி. கிஸ்ஸ மங் தும்ஹே
அயாசிதா உபஸம்பாதி³த்தா²’’தி? ப⁴க³வதோ ஏதமத்த²ங் ஆரோசேஸுங் . ந, பி⁴க்க²வே, அயாசிதேன உபஸம்பாதே³தப்³போ³ .
யோ உபஸம்பாதெ³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, யாசிதேன
உபஸம்பாதே³துங். ஏவஞ்ச பன, பி⁴க்க²வே, யாசிதப்³போ³. தேன உபஸம்பதா³பெக்கே²ன
ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா பி⁴க்கூ²னங் பாதே³
வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ –
‘‘ஸங்க⁴ங், ப⁴ந்தே, உபஸம்பத³ங் யாசாமி, உல்லும்பது மங், ப⁴ந்தே, ஸங்கோ⁴
அனுகம்பங் உபாதா³யா’’தி. து³தியம்பி யாசிதப்³போ³. ததியம்பி யாசிதப்³போ³.
ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

72. ‘‘ஸுணாது மே, ப⁴ந்தே ,
ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ².
இத்த²ன்னாமோ ஸங்க⁴ங் உபஸம்பத³ங் யாசதி இத்த²ன்னாமேன உபஜ்ஜா²யேன. யதி³
ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் உபஸம்பாதெ³ய்ய இத்த²ன்னாமேன
உபஜ்ஜா²யேன. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ
இத்த²ன்னாமஸ்ஸ ஆயஸ்மதோ உபஸம்பதா³பெக்கோ². இத்த²ன்னாமோ ஸங்க⁴ங் உபஸம்பத³ங்
யாசதி இத்த²ன்னாமேன உபஜ்ஜா²யேன. ஸங்கோ⁴ இத்த²ன்னாமங் உபஸம்பாதே³தி
இத்த²ன்னாமேன உபஜ்ஜா²யேன. யஸ்ஸாயஸ்மதோ க²மதி இத்த²ன்னாமஸ்ஸ உபஸம்பதா³
இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.

‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி…பே॰….

‘‘உபஸம்பன்னோ ஸங்கே⁴ன இத்த²ன்னாமோ இத்த²ன்னாமேன உபஜ்ஜா²யேன. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.

73. தேன கோ² பன ஸமயேன ராஜக³ஹே பணீதானங் ப⁴த்தானங் ப⁴த்தபடிபாடி அட்டி²தா [அதி⁴ட்டி²தா (க॰)]
ஹோதி. அத² கோ² அஞ்ஞதரஸ்ஸ ப்³ராஹ்மணஸ்ஸ ஏதத³ஹோஸி – ‘‘இமே கோ² ஸமணா
ஸக்யபுத்தியா ஸுக²ஸீலா ஸுக²ஸமாசாரா, ஸுபோ⁴ஜனானி பு⁴ஞ்ஜித்வா நிவாதேஸு
ஸயனேஸு ஸயந்தி. யங்னூனாஹங் ஸமணேஸு ஸக்யபுத்தியேஸு பப்³ப³ஜெய்ய’’ந்தி. அத²
கோ² ஸோ ப்³ராஹ்மணோ பி⁴க்கூ² உபஸங்கமித்வா பப்³ப³ஜ்ஜங் யாசி. தங் பி⁴க்கூ²
பப்³பா³ஜேஸுங் உபஸம்பாதே³ஸுங். தஸ்மிங் பப்³ப³ஜிதே
ப⁴த்தபடிபாடி கீ²யித்த². பி⁴க்கூ² ஏவமாஹங்ஸு – ‘‘ஏஹி தா³னி, ஆவுஸோ,
பிண்டா³ய சரிஸ்ஸாமா’’தி. ஸோ ஏவமாஹ – ‘‘நாஹங், ஆவுஸோ, ஏதங்காரணா பப்³ப³ஜிதோ
பிண்டா³ய சரிஸ்ஸாமீதி. ஸசே மே த³ஸ்ஸத² பு⁴ஞ்ஜிஸ்ஸாமி , நோ சே மே த³ஸ்ஸத² விப்³ப⁴மிஸ்ஸாமீ’’தி. ‘‘கிங் பன த்வங், ஆவுஸோ, உத³ரஸ்ஸ காரணா பப்³ப³ஜிதோ’’தி ?
‘‘ஏவமாவுஸோ’’தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி
கி²ய்யந்தி விபாசெந்தி – கத²ஞ்ஹி நாம பி⁴க்கு² ஏவங் ஸ்வாக்கா²தே த⁴ம்மவினயே
உத³ரஸ்ஸ காரணா பப்³ப³ஜிஸ்ஸதீதி. தே பி⁴க்கூ² ப⁴க³வதோ ஏதமத்த²ங்
ஆரோசேஸுங்…பே॰… ஸச்சங் கிர த்வங், பி⁴க்கு², உத³ரஸ்ஸ காரணா பப்³ப³ஜிதோதி?
ஸச்சங் ப⁴க³வாதி. விக³ரஹி பு³த்³தோ⁴ ப⁴க³வா…பே॰… ‘‘கத²ஞ்ஹி நாம த்வங்,
மோக⁴புரிஸ, ஏவங் ஸ்வாக்கா²தே த⁴ம்மவினயே உத³ரஸ்ஸ காரணா பப்³ப³ஜிஸ்ஸஸி.
நேதங், மோக⁴புரிஸ, அப்பஸன்னானங் வா பஸாதா³ய பஸன்னானங் வா
பி⁴ய்யோபா⁴வாய’’…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ²
ஆமந்தேஸி – ‘‘அனுஜானாமி, பி⁴க்க²வே, உபஸம்பாதெ³ந்தேன சத்தாரோ நிஸ்ஸயே
ஆசிக்கி²துங் – பிண்டி³யாலோபபோ⁴ஜனங் நிஸ்ஸாய பப்³ப³ஜ்ஜா, தத்த² தே யாவஜீவங்
உஸ்ஸாஹோ கரணீயோ; அதிரேகலாபோ⁴ – ஸங்க⁴ப⁴த்தங், உத்³தே³ஸப⁴த்தங், நிமந்தனங்,
ஸலாகப⁴த்தங், பக்கி²கங், உபோஸதி²கங், பாடிபதி³கங். பங்ஸுகூலசீவரங் நிஸ்ஸாய
பப்³ப³ஜ்ஜா, தத்த² தே யாவஜீவங் உஸ்ஸாஹோ கரணீயோ; அதிரேகலாபோ⁴ – கோ²மங்,
கப்பாஸிகங், கோஸெய்யங், கம்ப³லங், ஸாணங், ப⁴ங்க³ங். ருக்க²மூலஸேனாஸனங்
நிஸ்ஸாய பப்³ப³ஜ்ஜா, தத்த² தே யாவஜீவங் உஸ்ஸாஹோ கரணீயோ; அதிரேகலாபோ⁴ –
விஹாரோ , அட்³ட⁴யோகோ³, பாஸாதோ³, ஹம்மியங், கு³ஹா.
பூதிமுத்தபே⁴ஸஜ்ஜங் நிஸ்ஸாய பப்³ப³ஜ்ஜா, தத்த² தே யாவஜீவங் உஸ்ஸாஹோ கரணீயோ;
அதிரேகலாபோ⁴ – ஸப்பி, நவனீதங், தேலங், மது⁴, பா²ணித’’ந்தி.

பணாமிதகதா² நிட்டி²தா.

உபஜ்ஜா²யவத்தபா⁴ணவாரோ நிட்டி²தோ பஞ்சமோ.

பஞ்சமபா⁴ணவாரோ

18. ஆசரியவத்தகதா²

74.
தேன கோ² பன ஸமயேன அஞ்ஞதரோ மாணவகோ பி⁴க்கூ² உபஸங்கமித்வா பப்³ப³ஜ்ஜங் யாசி.
தஸ்ஸ பி⁴க்கூ² படிகச்சேவ நிஸ்ஸயே ஆசிக்கி²ங்ஸு. ஸோ ஏவமாஹ – ‘‘ஸசே மே,
ப⁴ந்தே, பப்³ப³ஜிதே நிஸ்ஸயே ஆசிக்கெ²ய்யாத², அபி⁴ரமெய்யாமஹங் [அபி⁴ரமெய்யஞ்சாஹங் (ஸீ॰), அபி⁴ரமெய்யங் ஸ்வாஹங் (க॰)]. ந தா³னாஹங், ப⁴ந்தே, பப்³ப³ஜிஸ்ஸாமி; ஜேகு³ச்சா² மே நிஸ்ஸயா
படிகூலா’’தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, படிகச்சேவ
நிஸ்ஸயா ஆசிக்கி²தப்³பா³. யோ ஆசிக்கெ²ய்ய, ஆபத்தி து³க்கடஸ்ஸ. அனுஜானாமி,
பி⁴க்க²வே, உபஸம்பன்னஸமனந்தரா நிஸ்ஸயே ஆசிக்கி²துந்தி.

தேன கோ² பன ஸமயேன பி⁴க்கூ² து³வக்³கே³னபி திவக்³கே³னபி க³ணேன உபஸம்பாதெ³ந்தி. ப⁴க³வதோ ஏதமத்த²ங்
ஆரோசேஸுங். ந, பி⁴க்க²வே, ஊனத³ஸவக்³கே³ன க³ணேன உபஸம்பாதே³தப்³போ³. யோ
உபஸம்பாதெ³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, த³ஸவக்³கே³ன வா
அதிரேகத³ஸவக்³கே³ன வா க³ணேன உபஸம்பாதே³துந்தி .

75. தேன
கோ² பன ஸமயேன பி⁴க்கூ² ஏகவஸ்ஸாபி து³வஸ்ஸாபி ஸத்³தி⁴விஹாரிகங்
உபஸம்பாதெ³ந்தி. ஆயஸ்மாபி உபஸேனோ வங்க³ந்தபுத்தோ ஏகவஸ்ஸோ ஸத்³தி⁴விஹாரிகங்
உபஸம்பாதே³ஸி. ஸோ வஸ்ஸங்வுட்டோ² து³வஸ்ஸோ ஏகவஸ்ஸங் ஸத்³தி⁴விஹாரிகங் ஆதா³ய
யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³. ஆசிண்ணங் கோ² பனேதங் பு³த்³தா⁴னங் ப⁴க³வந்தானங் ஆக³ந்துகேஹி
பி⁴க்கூ²ஹி ஸத்³தி⁴ங் படிஸம்மோதி³துங். அத² கோ² ப⁴க³வா ஆயஸ்மந்தங் உபஸேனங்
வங்க³ந்தபுத்தங் ஏதத³வோச – ‘‘கச்சி, பி⁴க்கு², க²மனீயங், கச்சி யாபனீயங்,
கச்சி த்வங் அப்பகிலமதே²ன அத்³தா⁴னங் ஆக³தோ’’தி? ‘‘க²மனீயங், ப⁴க³வா,
யாபனீயங், ப⁴க³வா. அப்பகிலமதே²ன மயங், ப⁴ந்தே, அத்³தா⁴னங் ஆக³தா’’தி.
ஜானந்தாபி ததா²க³தா புச்ச²ந்தி, ஜானந்தாபி ந புச்ச²ந்தி, காலங் விதி³த்வா
புச்ச²ந்தி, காலங் விதி³த்வா ந புச்ச²ந்தி; அத்த²ஸங்ஹிதங் ததா²க³தா
புச்ச²ந்தி; நோ அனத்த²ஸங்ஹிதங். அனத்த²ஸங்ஹிதே ஸேதுகா⁴தோ ததா²க³தானங்.
த்³வீஹி ஆகாரேஹி பு³த்³தா⁴ ப⁴க³வந்தோ பி⁴க்கூ² படிபுச்ச²ந்தி – த⁴ம்மங் வா
தே³ஸெஸ்ஸாம, ஸாவகானங் வா ஸிக்கா²பத³ங் பஞ்ஞபெஸ்ஸாமாதி. அத² கோ² ப⁴க³வா
ஆயஸ்மந்தங் உபஸேனங் வங்க³ந்தபுத்தங் ஏதத³வோச – ‘‘கதிவஸ்ஸோஸி த்வங்,
பி⁴க்கூ²’’தி? ‘‘து³வஸ்ஸோஹங், ப⁴க³வா’’தி. ‘‘அயங் பன பி⁴க்கு²
கதிவஸ்ஸோ’’தி? ‘‘ஏகவஸ்ஸோ, ப⁴க³வா’’தி. ‘‘கிங் தாயங் பி⁴க்கு² ஹோதீ’’தி?
‘‘ஸத்³தி⁴விஹாரிகோ மே, ப⁴க³வா’’தி. விக³ரஹி பு³த்³தோ⁴ ப⁴க³வா –
‘‘அனநுச்ச²விகங், மோக⁴புரிஸ, அனநுலோமிகங் அப்பதிரூபங் அஸ்ஸாமணகங் அகப்பியங்
அகரணீயங். கத²ஞ்ஹி நாம த்வங், மோக⁴புரிஸ, அஞ்ஞேஹி
ஓவதி³யோ அனுஸாஸியோ அஞ்ஞங் ஓவதி³துங் அனுஸாஸிதுங் மஞ்ஞிஸ்ஸஸி. அதிலஹுங் கோ²
த்வங், மோக⁴புரிஸ, பா³ஹுல்லாய ஆவத்தோ, யதி³த³ங் க³ணப³ந்தி⁴கங். நேதங்,
மோக⁴புரிஸ, அப்பஸன்னானங் வா பஸாதா³ய பஸன்னானங் வா
பி⁴ய்யோபா⁴வாய’’…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ²
ஆமந்தேஸி – ‘‘ந, பி⁴க்க²வே, ஊனத³ஸவஸ்ஸேன உபஸம்பாதே³தப்³போ³. யோ
உபஸம்பாதெ³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, த³ஸவஸ்ஸேன வா
அதிரேகத³ஸவஸ்ஸேன வா உபஸம்பாதே³து’’ந்தி.

76.
தேன கோ² பன ஸமயேன பி⁴க்கூ² – த³ஸவஸ்ஸம்ஹா த³ஸவஸ்ஸம்ஹாதி – பா³லா அப்³யத்தா
உபஸம்பாதெ³ந்தி. தி³ஸ்ஸந்தி உபஜ்ஜா²யா பா³லா, ஸத்³தி⁴விஹாரிகா பண்டி³தா.
தி³ஸ்ஸந்தி உபஜ்ஜா²யா அப்³யத்தா, ஸத்³தி⁴விஹாரிகா ப்³யத்தா. தி³ஸ்ஸந்தி
உபஜ்ஜா²யா அப்பஸ்ஸுதா, ஸத்³தி⁴விஹாரிகா ப³ஹுஸ்ஸுதா. தி³ஸ்ஸந்தி உபஜ்ஜா²யா
து³ப்பஞ்ஞா, ஸத்³தி⁴விஹாரிகா பஞ்ஞவந்தோ. அஞ்ஞதரோபி அஞ்ஞதித்தி²யபுப்³போ³
உபஜ்ஜா²யேன ஸஹத⁴ம்மிகங் வுச்சமானோ உபஜ்ஜா²யஸ்ஸ வாத³ங் ஆரோபெத்வா தங்யேவ
தித்தா²யதனங் ஸங்கமி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி
கி²ய்யந்தி விபாசெந்தி – கத²ஞ்ஹி நாம பி⁴க்கூ² – த³ஸவஸ்ஸம்ஹா த³ஸவஸ்ஸம்ஹாதி
– பா³லா அப்³யத்தா உபஸம்பாதெ³ஸ்ஸந்தி. தி³ஸ்ஸந்தி உபஜ்ஜா²யா பா³லா
ஸத்³தி⁴விஹாரிகா பண்டி³தா, தி³ஸ்ஸந்தி உபஜ்ஜா²யா அப்³யத்தா
ஸத்³தி⁴விஹாரிகா ப்³யத்தா, தி³ஸ்ஸந்தி உபஜ்ஜா²யா அப்பஸ்ஸுதா
ஸத்³தி⁴விஹாரிகா ப³ஹுஸ்ஸுதா, தி³ஸ்ஸந்தி உபஜ்ஜா²யா து³ப்பஞ்ஞா,
ஸத்³தி⁴விஹாரிகா பஞ்ஞவந்தோதி. அத² கோ² தே பி⁴க்கூ² ப⁴க³வதோ ஏதமத்த²ங்
ஆரோசேஸுங். ‘‘ஸச்சங் கிர, பி⁴க்க²வே, பி⁴க்கூ² – த³ஸவஸ்ஸம்ஹா த³ஸவஸ்ஸம்ஹாதி
– பா³லா அப்³யத்தா உபஸம்பாதெ³ந்தி. தி³ஸ்ஸந்தி உபஜ்ஜா²யா பா³லா,
ஸத்³தி⁴விஹாரிகா பண்டி³தா, தி³ஸ்ஸந்தி உபஜ்ஜா²யா அப்³யத்தா ஸத்³தி⁴விஹாரிகா
ப்³யத்தா, தி³ஸ்ஸந்தி உபஜ்ஜா²யா அப்பஸ்ஸுதா, ஸத்³தி⁴விஹாரிகா ப³ஹுஸ்ஸுதா,
தி³ஸ்ஸந்தி உபஜ்ஜா²யா து³ப்பஞ்ஞா, ஸத்³தி⁴விஹாரிகா பஞ்ஞவந்தோ’’தி?
‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தே,
பி⁴க்க²வே, மோக⁴புரிஸா – த³ஸவஸ்ஸம்ஹா த³ஸவஸ்ஸம்ஹாதி – பா³லா அப்³யத்தா
உபஸம்பாதெ³ஸ்ஸந்தி. தி³ஸ்ஸந்தி உபஜ்ஜா²யா பா³லா, ஸத்³தி⁴விஹாரிகா பண்டி³தா,
தி³ஸ்ஸந்தி உபஜ்ஜா²யா அப்³யத்தா ஸத்³தி⁴விஹாரிகா ப்³யத்தா, தி³ஸ்ஸந்தி
உபஜ்ஜா²யா அப்பஸ்ஸுதா, ஸத்³தி⁴விஹாரிகா ப³ஹுஸ்ஸுதா, தி³ஸ்ஸந்தி உபஜ்ஜா²யா
து³ப்பஞ்ஞா, ஸத்³தி⁴விஹாரிகா பஞ்ஞவந்தோ. நேதங், பி⁴க்க²வே, அப்பஸன்னானங் வா
பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி –
‘‘ந, பி⁴க்க²வே, பா³லேன அப்³யத்தேன உபஸம்பாதே³தப்³போ³. யோ உபஸம்பாதெ³ய்ய,
ஆபத்தி து³க்கடஸ்ஸ. அனுஜானாமி, பி⁴க்க²வே, ப்³யத்தேன பி⁴க்கு²னா படிப³லேன
த³ஸவஸ்ஸேன வா அதிரேகத³ஸவஸ்ஸேன வா உபஸம்பாதே³து’’ந்தி.

77. தேன கோ² பன ஸமயேன பி⁴க்கூ² உபஜ்ஜா²யேஸு பக்கந்தேஸுபி விப்³ப⁴ந்தேஸுபி
காலங்கதேஸுபி பக்க²ஸங்கந்தேஸுபி அனாசரியகா அனோவதி³யமானா அனநுஸாஸியமானா
து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரந்தி, மனுஸ்ஸானங்
பு⁴ஞ்ஜமானானங் உபரிபோ⁴ஜனேபி உத்திட்ட²பத்தங் உபனாமெந்தி, உபரிகா²த³னீயேபி –
உபரிஸாயனீயேபி – உபரிபானீயேபி உத்திட்ட²பத்தங் உபனாமெந்தி; ஸாமங் ஸூபம்பி
ஓத³னம்பி விஞ்ஞாபெத்வா பு⁴ஞ்ஜந்தி; ப⁴த்தக்³கே³பி உச்சாஸத்³தா³ மஹாஸத்³தா³
விஹரந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா
ஸக்யபுத்தியா து³ன்னிவத்தா² து³ப்பாருதா அனாகப்பஸம்பன்னா பிண்டா³ய
சரிஸ்ஸந்தி; மனுஸ்ஸானங் பு⁴ஞ்ஜமானானங் உபரிபோ⁴ஜனேபி உத்திட்ட²பத்தங்
உபனாமெஸ்ஸந்தி, உபரிகா²த³னீயேபி – உபரிஸாயனீயேபி – உபரிபானீயேபி
உத்திட்ட²பத்தங் உபனாமெஸ்ஸந்தி; ஸாமங் ஸூபம்பி ஓத³னம்பி விஞ்ஞாபெத்வா
பு⁴ஞ்ஜிஸ்ஸந்தி; ப⁴த்தக்³கே³பி உச்சாஸத்³தா³ மஹாஸத்³தா³ விஹரிஸ்ஸந்தி,
ஸெய்யதா²பி ப்³ராஹ்மணா ப்³ராஹ்மணபோ⁴ஜனே’’தி. அஸ்ஸோஸுங் கோ² பி⁴க்கூ² தேஸங்
மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங் …பே॰… அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ஸச்சங் கிர, பி⁴க்க²வே…பே॰… ஸச்சங், ப⁴க³வாதி…பே॰… விக³ரஹித்வா த⁴ம்மிங் கத²ங் கத்வா பி⁴க்கூ² ஆமந்தேஸி –

‘‘அனுஜானாமி, பி⁴க்க²வே, ஆசரியங். ஆசரியோ, பி⁴க்க²வே,
அந்தேவாஸிகம்ஹி புத்தசித்தங் உபட்டா²பெஸ்ஸதி, அந்தேவாஸிகோ ஆசரியம்ஹி
பிதுசித்தங் உபட்டா²பெஸ்ஸதி. ஏவங் தே அஞ்ஞமஞ்ஞங் ஸகா³ரவா ஸப்பதிஸ்ஸா
ஸபா⁴க³வுத்தினோ விஹரந்தா இமஸ்மிங் த⁴ம்மவினயே வுத்³தி⁴ங் விருள்ஹிங்
வேபுல்லங் ஆபஜ்ஜிஸ்ஸந்தி. அனுஜானாமி, பி⁴க்க²வே, த³ஸவஸ்ஸங் நிஸ்ஸாய
வத்து²ங், த³ஸவஸ்ஸேன நிஸ்ஸயங் தா³துங். ஏவஞ்ச பன, பி⁴க்க²வே, ஆசரியோ
க³ஹேதப்³போ³. ஏகங்ஸங் உத்தராஸங்க³ங் கரித்வா பாதே³ வந்தி³த்வா உக்குடிகங்
நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘ஆசரியோ மே, ப⁴ந்தே,
ஹோஹி, ஆயஸ்மதோ நிஸ்ஸாய வச்சா²மி; ஆசரியோ மே, ப⁴ந்தே, ஹோஹி, ஆயஸ்மதோ நிஸ்ஸாய
வச்சா²மி; ஆசரியோ மே, ப⁴ந்தே, ஹோஹி, ஆயஸ்மதோ
நிஸ்ஸாய வச்சா²மீ’தி. ‘ஸாஹூதி’ வா ‘லஹூதி’ வா ‘ஓபாயிக’ந்தி வா ‘பதிரூப’ந்தி
வா ‘பாஸாதி³கேன ஸம்பாதே³ஹீ’தி வா காயேன விஞ்ஞாபேதி, வாசாய விஞ்ஞாபேதி,
காயேன வாசாய விஞ்ஞாபேதி, க³ஹிதோ ஹோதி ஆசரியோ; ந காயேன விஞ்ஞாபேதி, ந வாசாய
விஞ்ஞாபேதி, ந காயேன வாசாய விஞ்ஞாபேதி, ந க³ஹிதோ ஹோதி ஆசரியோ.

78. [சூளவ॰ 380 ஆத³யோ] ‘‘அந்தேவாஸிகேன , பி⁴க்க²வே, ஆசரியம்ஹி ஸம்மா வத்திதப்³ப³ங். தத்ராயங் ஸம்மாவத்தனா –

‘‘காலஸ்ஸேவ உட்டா²ய உபாஹனங் ஓமுஞ்சித்வா ஏகங்ஸங்
உத்தராஸங்க³ங் கரித்வா த³ந்தகட்ட²ங் தா³தப்³ப³ங், முகோ²த³கங் தா³தப்³ப³ங்,
ஆஸனங் பஞ்ஞபேதப்³ப³ங். ஸசே யாகு³ ஹோதி, பா⁴ஜனங் தோ⁴வித்வா யாகு³
உபனாமேதப்³பா³ . யாகு³ங் பீதஸ்ஸ உத³கங் த³த்வா
பா⁴ஜனங் படிக்³க³ஹெத்வா நீசங் கத்வா ஸாது⁴கங் அப்படிக⁴ங்ஸந்தேன தோ⁴வித்வா
படிஸாமேதப்³ப³ங். ஆசரியம்ஹி வுட்டி²தே ஆஸனங் உத்³த⁴ரிதப்³ப³ங். ஸசே ஸோ
தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே ஆசரியோ கா³மங் பவிஸிதுகாமோ ஹோதி, நிவாஸனங்
தா³தப்³ப³ங், படினிவாஸனங் படிக்³க³ஹேதப்³ப³ங், காயப³ந்த⁴னங் தா³தப்³ப³ங்,
ஸகு³ணங் கத்வா ஸங்கா⁴டியோ தா³தப்³பா³, தோ⁴வித்வா பத்தோ ஸோத³கோ தா³தப்³போ³.
ஸசே ஆசரியோ பச்சா²ஸமணங் ஆகங்க²தி, திமண்ட³லங் படிச்சா²தெ³ந்தேன பரிமண்ட³லங்
நிவாஸெத்வா காயப³ந்த⁴னங் ப³ந்தி⁴த்வா ஸகு³ணங் கத்வா ஸங்கா⁴டியோ பாருபித்வா
க³ண்டி²கங் படிமுஞ்சித்வா தோ⁴வித்வா பத்தங்
க³ஹெத்வா ஆசரியஸ்ஸ பச்சா²ஸமணேன ஹோதப்³ப³ங். நாதிதூ³ரே க³ந்தப்³ப³ங்,
நாச்சாஸன்னே க³ந்தப்³ப³ங், பத்தபரியாபன்னங் படிக்³க³ஹேதப்³ப³ங். ந ஆசரியஸ்ஸ
ப⁴ணமானஸ்ஸ அந்தரந்தரா கதா² ஓபாதேதப்³பா³. ஆசரியோ ஆபத்திஸாமந்தா ப⁴ணமானோ
நிவாரேதப்³போ³.

‘‘நிவத்தந்தேன பட²மதரங் ஆக³ந்த்வா ஆஸனங்
பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங்,
பச்சுக்³க³ந்த்வா பத்தசீவரங் படிக்³க³ஹேதப்³ப³ங், படினிவாஸனங் தா³தப்³ப³ங்,
நிவாஸனங் படிக்³க³ஹேதப்³ப³ங். ஸசே சீவரங் ஸின்னங் ஹோதி, முஹுத்தங் உண்ஹே
ஓதாபேதப்³ப³ங், ந ச உண்ஹே சீவரங் நித³ஹிதப்³ப³ங். சீவரங் ஸங்க⁴ரிதப்³ப³ங்.
சீவரங் ஸங்க⁴ரந்தேன சதுரங்கு³லங் கண்ணங் உஸ்ஸாரெத்வா சீவரங்
ஸங்க⁴ரிதப்³ப³ங் – மா மஜ்ஜே² ப⁴ங்கோ³ அஹோஸீதி. ஓபோ⁴கே³ காயப³ந்த⁴னங்
காதப்³ப³ங்.

‘‘ஸசே பிண்ட³பாதோ ஹோதி , ஆசரியோ
ச பு⁴ஞ்ஜிதுகாமோ ஹோதி, உத³கங் த³த்வா பிண்ட³பாதோ உபனாமேதப்³போ³. ஆசரியோ
பானீயேன புச்சி²தப்³போ³. பு⁴த்தாவிஸ்ஸ உத³கங் த³த்வா பத்தங் படிக்³க³ஹெத்வா
நீசங் கத்வா ஸாது⁴கங் அப்படிக⁴ங்ஸந்தேன தோ⁴வித்வா வோத³கங் கத்வா முஹுத்தங்
உண்ஹே ஓதாபேதப்³போ³, ந ச உண்ஹே பத்தோ நித³ஹிதப்³போ³. பத்தசீவரங்
நிக்கி²பிதப்³ப³ங். பத்தங் நிக்கி²பந்தேன ஏகேன ஹத்தே²ன பத்தங் க³ஹெத்வா
ஏகேன ஹத்தே²ன ஹெட்டா²மஞ்சங் வா ஹெட்டா²பீட²ங் வா பராமஸித்வா பத்தோ
நிக்கி²பிதப்³போ³. ந ச அனந்தரஹிதாய பூ⁴மியா பத்தோ
நிக்கி²பிதப்³போ³. சீவரங் நிக்கி²பந்தேன ஏகேன ஹத்தே²ன சீவரங் க³ஹெத்வா ஏகேன
ஹத்தே²ன சீவரவங்ஸங் வா சீவரரஜ்ஜுங் வா பமஜ்ஜித்வா பாரதோ அந்தங் ஓரதோ
போ⁴க³ங் கத்வா சீவரங் நிக்கி²பிதப்³ப³ங். ஆசரியம்ஹி வுட்டி²தே ஆஸனங்
உத்³த⁴ரிதப்³ப³ங், பாதோ³த³கங் பாத³பீட²ங் பாத³கத²லிகங் படிஸாமேதப்³ப³ங்.
ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே ஆசரியோ நஹாயிதுகாமோ ஹோதி, நஹானங்
படியாதே³தப்³ப³ங். ஸசே ஸீதேன அத்தோ² ஹோதி, ஸீதங் படியாதே³தப்³ப³ங். ஸசே
உண்ஹேன அத்தோ² ஹோதி, உண்ஹங் படியாதே³தப்³ப³ங்.

‘‘ஸசே ஆசரியோ ஜந்தாக⁴ரங் பவிஸிதுகாமோ ஹோதி, சுண்ணங்
ஸன்னேதப்³ப³ங், மத்திகா தேமேதப்³பா³, ஜந்தாக⁴ரபீட²ங் ஆதா³ய ஆசரியஸ்ஸ
பிட்டி²தோ பிட்டி²தோ க³ந்த்வா ஜந்தாக⁴ரபீட²ங் த³த்வா சீவரங் படிக்³க³ஹெத்வா
ஏகமந்தங் நிக்கி²பிதப்³ப³ங், சுண்ணங் தா³தப்³ப³ங், மத்திகா தா³தப்³பா³.
ஸசே உஸ்ஸஹதி, ஜந்தாக⁴ரங் பவிஸிதப்³ப³ங். ஜந்தாக⁴ரங் பவிஸந்தேன
மத்திகாய முக²ங் மக்கெ²த்வா புரதோ ச பச்ச²தோ ச படிச்சா²தெ³த்வா ஜந்தாக⁴ரங்
பவிஸிதப்³ப³ங். ந தே²ரே பி⁴க்கூ² அனுபக²ஜ்ஜ நிஸீதி³தப்³ப³ங். ந நவா
பி⁴க்கூ² ஆஸனேன படிபா³ஹிதப்³பா³. ஜந்தாக⁴ரே ஆசரியஸ்ஸ பரிகம்மங் காதப்³ப³ங்.
ஜந்தாக⁴ரா நிக்க²மந்தேன ஜந்தாக⁴ரபீட²ங் ஆதா³ய புரதோ ச பச்ச²தோ ச படிச்சா²தெ³த்வா ஜந்தாக⁴ரா நிக்க²மிதப்³ப³ங்.

‘‘உத³கேபி ஆசரியஸ்ஸ பரிகம்மங் காதப்³ப³ங். நஹாதேன
பட²மதரங் உத்தரித்வா அத்தனோ க³த்தங் வோத³கங் கத்வா நிவாஸெத்வா ஆசரியஸ்ஸ
க³த்ததோ உத³கங் பமஜ்ஜிதப்³ப³ங், நிவாஸனங் தா³தப்³ப³ங், ஸங்கா⁴டி
தா³தப்³பா³, ஜந்தாக⁴ரபீட²ங் ஆதா³ய பட²மதரங் ஆக³ந்த்வா ஆஸனங்
பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங்.
ஆசரியோ பானீயேன புச்சி²தப்³போ³. ஸசே உத்³தி³ஸாபேதுகாமோ ஹோதி,
உத்³தி³ஸாபேதப்³போ³. ஸசே பரிபுச்சி²துகாமோ ஹோதி, பரிபுச்சி²தப்³போ³.

‘‘யஸ்மிங் விஹாரே ஆசரியோ விஹரதி, ஸசே ஸோ விஹாரோ
உக்லாபோ ஹோதி, ஸசே உஸ்ஸஹதி, ஸோதே⁴தப்³போ³. விஹாரங் ஸோதெ⁴ந்தேன பட²மங்
பத்தசீவரங் நீஹரித்வா ஏகமந்தங் நிக்கி²பிதப்³ப³ங்; நிஸீத³னபச்சத்த²ரணங்
நீஹரித்வா ஏகமந்தங் நிக்கி²பிதப்³ப³ங்; பி⁴ஸிபி³ப்³போ³ஹனங் நீஹரித்வா
ஏகமந்தங் நிக்கி²பிதப்³ப³ங்; மஞ்சோ நீசங் கத்வா ஸாது⁴கங் அப்படிக⁴ங்ஸந்தேன,
அஸங்க⁴ட்டெந்தேன கவாடபிட்ட²ங், நீஹரித்வா ஏகமந்தங் நிக்கி²பிதப்³போ³;
பீட²ங் நீசங் கத்வா ஸாது⁴கங் அப்படிக⁴ங்ஸந்தேன, அஸங்க⁴ட்டெந்தேன
கவாடபிட்ட²ங், நீஹரித்வா ஏகமந்தங் நிக்கி²பிதப்³ப³ங்; மஞ்சபடிபாத³கா
நீஹரித்வா ஏகமந்தங் நிக்கி²பிதப்³பா³; கே²ளமல்லகோ நீஹரித்வா ஏகமந்தங்
நிக்கி²பிதப்³போ³ ; அபஸ்ஸேனப²லகங் நீஹரித்வா
ஏகமந்தங் நிக்கி²பிதப்³ப³ங்; பூ⁴மத்த²ரணங் யதா²பஞ்ஞத்தங் ஸல்லக்கெ²த்வா
நீஹரித்வா ஏகமந்தங் நிக்கி²பிதப்³ப³ங். ஸசே விஹாரே ஸந்தானகங் ஹோதி, உல்லோகா
பட²மங் ஓஹாரேதப்³ப³ங், ஆலோகஸந்தி⁴கண்ணபா⁴கா³ பமஜ்ஜிதப்³பா³. ஸசே
கே³ருகபரிகம்மகதா பி⁴த்தி கண்ணகிதா ஹோதி, சோளகங் தேமெத்வா பீளெத்வா
பமஜ்ஜிதப்³பா³. ஸசே காளவண்ணகதா பூ⁴மி கண்ணகிதா ஹோதி, சோளகங் தேமெத்வா
பீளெத்வா பமஜ்ஜிதப்³பா³. ஸசே அகதா ஹோதி பூ⁴மி, உத³கேன பரிப்போ²ஸித்வா
ஸம்மஜ்ஜிதப்³பா³ – மா விஹாரோ ரஜேன உஹஞ்ஞீதி. ஸங்காரங் விசினித்வா ஏகமந்தங்
ச²ட்³டே³தப்³ப³ங்.

‘‘பூ⁴மத்த²ரணங் ஓதாபெத்வா ஸோதெ⁴த்வா பப்போ²டெத்வா
அதிஹரித்வா யதா²பஞ்ஞத்தங் பஞ்ஞபேதப்³ப³ங். மஞ்சபடிபாத³கா ஓதாபெத்வா
பமஜ்ஜித்வா அதிஹரித்வா யதா²டா²னே ட²பேதப்³பா³. மஞ்சோ ஓதாபெத்வா ஸோதெ⁴த்வா
பப்போ²டெத்வா நீசங் கத்வா ஸாது⁴கங் அப்படிக⁴ங்ஸந்தேன, அஸங்க⁴ட்டெந்தேன
கவாடபிட்ட²ங், அதிஹரித்வா யதா²பஞ்ஞத்தங் பஞ்ஞபேதப்³போ³. பீட²ங் ஓதாபெத்வா
ஸோதெ⁴த்வா பப்போ²டெத்வா நீசங் கத்வா ஸாது⁴கங் அப்படிக⁴ங்ஸந்தேன,
அஸங்க⁴ட்டெந்தேன கவாடபிட்ட²ங், அதிஹரித்வா யதா²பஞ்ஞத்தங் பஞ்ஞபேதப்³ப³ங்.
பி⁴ஸிபி³ப்³போ³ஹனங் ஓதாபெத்வா ஸோதெ⁴த்வா பப்போ²டெத்வா அதிஹரித்வா
யதா²பஞ்ஞத்தங் பஞ்ஞபேதப்³ப³ங். நிஸீத³னபச்சத்த²ரணங் ஓதாபெத்வா ஸோதெ⁴த்வா
பப்போ²டெத்வா அதிஹரித்வா யதா²பஞ்ஞத்தங் பஞ்ஞபேதப்³ப³ங். கே²ளமல்லகோ ஓதாபெத்வா பமஜ்ஜித்வா அதிஹரித்வா யதா²டா²னே ட²பேதப்³போ³ .
அபஸ்ஸேனப²லகங் ஓதாபெத்வா பமஜ்ஜித்வா அதிஹரித்வா யதா²டா²னே ட²பேதப்³ப³ங்.
பத்தசீவரங் நிக்கி²பிதப்³ப³ங். பத்தங் நிக்கி²பந்தேன ஏகேன ஹத்தே²ன பத்தங்
க³ஹெத்வா ஏகேன ஹத்தே²ன ஹெட்டா²மஞ்சங் வா ஹெட்டா²பீட²ங் வா பராமஸித்வா பத்தோ
நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³.
சீவரங் நிக்கி²பந்தேன ஏகேன ஹத்தே²ன சீவரங் க³ஹெத்வா ஏகேன ஹத்தே²ன
சீவரவங்ஸங் வா சீவரரஜ்ஜுங் வா பமஜ்ஜித்வா பாரதோ அந்தங் ஓரதோ போ⁴க³ங் கத்வா
சீவரங் நிக்கி²பிதப்³ப³ங்.

‘‘ஸசே புரத்தி²மா ஸரஜா வாதா வாயந்தி, புரத்தி²மா
வாதபானா த²கேதப்³பா³. ஸசே பச்சி²மா ஸரஜா வாதா வாயந்தி, பச்சி²மா வாதபானா
த²கேதப்³பா³. ஸசே உத்தரா ஸரஜா வாதா வாயந்தி, உத்தரா வாதபானா த²கேதப்³பா³ .
ஸசே த³க்கி²ணா ஸரஜா வாதா வாயந்தி, த³க்கி²ணா வாதபானா த²கேதப்³பா³. ஸசே
ஸீதகாலோ ஹோதி, தி³வா வாதபானா விவரிதப்³பா³, ரத்திங் த²கேதப்³பா³. ஸசே
உண்ஹகாலோ ஹோதி, தி³வா வாதபானா த²கேதப்³பா³, ரத்திங் விவரிதப்³பா³.

‘‘ஸசே பரிவேணங் உக்லாபங் ஹோதி, பரிவேணங்
ஸம்மஜ்ஜிதப்³ப³ங். ஸசே கொட்ட²கோ உக்லாபோ ஹோதி, கொட்ட²கோ ஸம்மஜ்ஜிதப்³போ³.
ஸசே உபட்டா²னஸாலா உக்லாபா ஹோதி, உபட்டா²னஸாலா ஸம்மஜ்ஜிதப்³பா³. ஸசே
அக்³கி³ஸாலா உக்லாபா ஹோதி, அக்³கி³ஸாலா ஸம்மஜ்ஜிதப்³பா³. ஸசே வச்சகுடி
உக்லாபா ஹோதி, வச்சகுடி ஸம்மஜ்ஜிதப்³பா³. ஸசே பானீயங் ந ஹோதி, பானீயங்
உபட்டா²பேதப்³ப³ங். ஸசே பரிபோ⁴ஜனீயங் ந ஹோதி, பரிபோ⁴ஜனீயங்
உபட்டா²பேதப்³ப³ங் . ஸசே ஆசமனகும்பி⁴யங் உத³கங் ந ஹோதி, ஆசமனகும்பி⁴யா உத³கங் ஆஸிஞ்சிதப்³ப³ங்.

‘‘ஸசே ஆசரியஸ்ஸ அனபி⁴ரதி உப்பன்னா ஹோதி, அந்தேவாஸிகேன
வூபகாஸேதப்³போ³, வூபகாஸாபேதப்³போ³, த⁴ம்மகதா² வாஸ்ஸ காதப்³பா³. ஸசே
ஆசரியஸ்ஸ குக்குச்சங் உப்பன்னங் ஹோதி, அந்தேவாஸிகேன வினோதே³தப்³ப³ங்,
வினோதா³பேதப்³ப³ங், த⁴ம்மகதா² வாஸ்ஸ காதப்³பா³. ஸசே ஆசரியஸ்ஸ தி³ட்டி²க³தங்
உப்பன்னங் ஹோதி, அந்தேவாஸிகேன விவேசேதப்³ப³ங், விவேசாபேதப்³ப³ங்,
த⁴ம்மகதா² வாஸ்ஸ காதப்³பா³. ஸசே ஆசரியோ க³ருத⁴ம்மங் அஜ்ஜா²பன்னோ ஹோதி
பரிவாஸாரஹோ, அந்தேவாஸிகேன உஸ்ஸுக்கங் காதப்³ப³ங் – கிந்தி நு கோ² ஸங்கோ⁴
ஆசரியஸ்ஸ பரிவாஸங் த³தெ³ய்யாதி. ஸசே ஆசரியோ மூலாய படிகஸ்ஸனாரஹோ ஹோதி,
அந்தேவாஸிகேன உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ ஆசரியங் மூலாய
படிகஸ்ஸெய்யாதி. ஸசே ஆசரியோ மானத்தாரஹோ ஹோதி, அந்தேவாஸிகேன உஸ்ஸுக்கங்
காதப்³ப³ங் – கிந்தி நு கோ² ஸங்கோ⁴ ஆசரியஸ்ஸ மானத்தங் த³தெ³ய்யாதி. ஸசே
ஆசரியோ அப்³பா⁴னாரஹோ ஹோதி, அந்தேவாஸிகேன உஸ்ஸுக்கங் காதப்³ப³ங் – கிந்தி நு
கோ² ஸங்கோ⁴ ஆசரியங் அப்³பெ⁴ய்யாதி . ஸசே ஸங்கோ⁴
ஆசரியஸ்ஸ கம்மங் கத்துகாமோ ஹோதி, தஜ்ஜனீயங் வா நியஸ்ஸங் வா பப்³பா³ஜனீயங்
வா படிஸாரணீயங் வா உக்கே²பனீயங் வா, அந்தேவாஸிகேன உஸ்ஸுக்கங் காதப்³ப³ங் –
கிந்தி நு கோ² ஸங்கோ⁴ ஆசரியஸ்ஸ கம்மங் ந கரெய்ய, லஹுகாய வா பரிணாமெய்யாதி.
கதங் வா பனஸ்ஸ ஹோதி ஸங்கே⁴ன கம்மங், தஜ்ஜனீயங் வா நியஸ்ஸங் வா
பப்³பா³ஜனீயங் வா படிஸாரணீயங்
வா உக்கே²பனீயங் வா, அந்தேவாஸிகேன உஸ்ஸுக்கங் காதப்³ப³ங் – கிந்தி நு கோ²
ஆசரியோ ஸம்மா வத்தெய்ய, லோமங் பாதெய்ய, நெத்தா²ரங் வத்தெய்ய, ஸங்கோ⁴ தங்
கம்மங் படிப்பஸ்ஸம்பெ⁴ய்யாதி.

‘‘ஸசே ஆசரியஸ்ஸ சீவரங் தோ⁴விதப்³ப³ங் ஹோதி,
அந்தேவாஸிகேன தோ⁴விதப்³ப³ங், உஸ்ஸுக்கங் வா காதப்³ப³ங் – கிந்தி நு கோ²
ஆசரியஸ்ஸ சீவரங் தோ⁴வியேதா²தி. ஸசே ஆசரியஸ்ஸ சீவரங் காதப்³ப³ங் ஹோதி,
அந்தேவாஸிகேன காதப்³ப³ங், உஸ்ஸுக்கங் வா காதப்³ப³ங் – கிந்தி நு கோ²
ஆசரியஸ்ஸ சீவரங் கரியேதா²தி. ஸசே ஆசரியஸ்ஸ ரஜனங் பசிதப்³ப³ங் ஹோதி,
அந்தேவாஸிகேன பசிதப்³ப³ங், உஸ்ஸுக்கங் வா காதப்³ப³ங் – கிந்தி நு கோ²
ஆசரியஸ்ஸ ரஜனங் பசியேதா²தி. ஸசே ஆசரியஸ்ஸ சீவரங் ரஜிதப்³ப³ங் ஹோதி,
அந்தேவாஸிகேன ரஜிதப்³ப³ங், உஸ்ஸுக்கங் வா காதப்³ப³ங் – கிந்தி நு கோ²
ஆசரியஸ்ஸ சீவரங் ரஜியேதா²தி. சீவரங் ரஜந்தேன ஸாது⁴கங் ஸம்பரிவத்தகங்
ஸம்பரிவத்தகங் ரஜிதப்³ப³ங், ந ச அச்சி²ன்னே தே²வே பக்கமிதப்³ப³ங்.

‘‘ந ஆசரியங் அனாபுச்சா² ஏகச்சஸ்ஸ பத்தோ தா³தப்³போ³, ந
ஏகச்சஸ்ஸ பத்தோ படிக்³க³ஹேதப்³போ³; ந ஏகச்சஸ்ஸ சீவரங் தா³தப்³ப³ங்; ந
ஏகச்சஸ்ஸ சீவரங் படிக்³க³ஹேதப்³ப³ங்; ந ஏகச்சஸ்ஸ பரிக்கா²ரோ தா³தப்³போ³; ந
ஏகச்சஸ்ஸ பரிக்கா²ரோ படிக்³க³ஹேதப்³போ³; ந ஏகச்சஸ்ஸ கேஸா சே²தே³தப்³பா³; ந
ஏகச்சேன கேஸா சே²தா³பேதப்³பா³; ந ஏகச்சஸ்ஸ பரிகம்மங் காதப்³ப³ங்; ந ஏகச்சேன
பரிகம்மங் காராபேதப்³ப³ங்; ந ஏகச்சஸ்ஸ வெய்யாவச்சோ காதப்³போ³; ந ஏகச்சேன
வெய்யாவச்சோ காராபேதப்³போ³; ந ஏகச்சஸ்ஸ பச்சா²ஸமணேன
ஹோதப்³ப³ங்; ந ஏகச்சோ பச்சா²ஸமணோ ஆதா³தப்³போ³; ந ஏகச்சஸ்ஸ பிண்ட³பாதோ
நீஹரிதப்³போ³; ந ஏகச்சேன பிண்ட³பாதோ நீஹராபேதப்³போ³. ந ஆசரியங் அனாபுச்சா²
கா³மோ பவிஸிதப்³போ³, ந ஸுஸானங் க³ந்தப்³ப³ங், ந தி³ஸா பக்கமிதப்³பா³. ஸசே
ஆசரியோ கி³லானோ ஹோதி, யாவஜீவங் உபட்டா²தப்³போ³, வுட்டா²னமஸ்ஸ
ஆக³மேதப்³ப³’’ந்தி.

ஆசரியவத்தங் நிட்டி²தங்.

19. அந்தேவாஸிகவத்தகதா²

79. [சூளவ॰ 381-382] ‘‘ஆசரியேன , பி⁴க்க²வே, அந்தேவாஸிகம்ஹி ஸம்மா வத்திதப்³ப³ங். தத்ராயங் ஸம்மாவத்தனா –

‘‘ஆசரியேன , பி⁴க்க²வே,
அந்தேவாஸிகோ ஸங்க³ஹேதப்³போ³ அனுக்³க³ஹேதப்³போ³ உத்³தே³ஸேன பரிபுச்சா²ய
ஓவாதே³ன அனுஸாஸனியா. ஸசே ஆசரியஸ்ஸ பத்தோ ஹோதி, அந்தேவாஸிகஸ்ஸ பத்தோ ந ஹோதி,
ஆசரியேன அந்தேவாஸிகஸ்ஸ பத்தோ தா³தப்³போ³, உஸ்ஸுக்கங் வா காதப்³ப³ங் –
கிந்தி நு கோ² அந்தேவாஸிகஸ்ஸ பத்தோ உப்பஜ்ஜியேதா²தி. ஸசே ஆசரியஸ்ஸ சீவரங்
ஹோதி, அந்தேவாஸிகஸ்ஸ சீவரங் ந ஹோதி, ஆசரியேன அந்தேவாஸிகஸ்ஸ சீவரங்
தா³தப்³ப³ங், உஸ்ஸுக்கங் வா காதப்³ப³ங் – கிந்தி நு கோ² அந்தேவாஸிகஸ்ஸ
சீவரங் உப்பஜ்ஜியேதா²தி. ஸசே ஆசரியஸ்ஸ பரிக்கா²ரோ ஹோதி, அந்தேவாஸிகஸ்ஸ
பரிக்கா²ரோ ந ஹோதி, ஆசரியேன அந்தேவாஸிகஸ்ஸ பரிக்கா²ரோ தா³தப்³போ³,
உஸ்ஸுக்கங் வா காதப்³ப³ங் – கிந்தி நு கோ² அந்தேவாஸிகஸ்ஸ பரிக்கா²ரோ
உப்பஜ்ஜியேதா²தி.

‘‘ஸசே அந்தேவாஸிகோ கி³லானோ ஹோதி, காலஸ்ஸேவ உட்டா²ய
த³ந்தகட்ட²ங் தா³தப்³ப³ங், முகோ²த³கங் தா³தப்³ப³ங், ஆஸனங் பஞ்ஞபேதப்³ப³ங்.
ஸசே யாகு³ ஹோதி, பா⁴ஜனங் தோ⁴வித்வா யாகு³
உபனாமேதப்³பா³. யாகு³ங் பீதஸ்ஸ உத³கங் த³த்வா பா⁴ஜனங் படிக்³க³ஹெத்வா நீசங்
கத்வா ஸாது⁴கங் அப்படிக⁴ங்ஸந்தேன தோ⁴வித்வா படிஸாமேதப்³ப³ங்.
அந்தேவாஸிகம்ஹி வுட்டி²தே ஆஸனங் உத்³த⁴ரிதப்³ப³ங். ஸசே ஸோ தே³ஸோ உக்லாபோ
ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே அந்தேவாஸிகோ கா³மங் பவிஸிதுகாமோ ஹோதி, நிவாஸனங்
தா³தப்³ப³ங், படினிவாஸனங் படிக்³க³ஹேதப்³ப³ங், காயப³ந்த⁴னங் தா³தப்³ப³ங்,
ஸகு³ணங் கத்வா ஸங்கா⁴டியோ தா³தப்³பா³, தோ⁴வித்வா பத்தோ ஸோத³கோ தா³தப்³போ³.

‘‘எத்தாவதா நிவத்திஸ்ஸதீதி ஆஸனங் பஞ்ஞபேதப்³ப³ங்,
பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங், பச்சுக்³க³ந்த்வா
பத்தசீவரங் படிக்³க³ஹேதப்³ப³ங், படினிவாஸனங் தா³தப்³ப³ங், நிவாஸனங்
படிக்³க³ஹேதப்³ப³ங். ஸசே சீவரங் ஸின்னங் ஹோதி, முஹுத்தங் உண்ஹே
ஓதாபேதப்³ப³ங், ந ச உண்ஹே சீவரங் நித³ஹிதப்³ப³ங். சீவரங் ஸங்க⁴ரிதப்³ப³ங்.
சீவரங் ஸங்க⁴ரந்தேன சதுரங்கு³லங் கண்ணங் உஸ்ஸாரெத்வா சீவரங்
ஸங்க⁴ரிதப்³ப³ங் – மா மஜ்ஜே² ப⁴ங்கோ³ அஹோஸீதி. ஓபோ⁴கே³ காயப³ந்த⁴னங்
காதப்³ப³ங்.

‘‘ஸசே பிண்ட³பாதோ ஹோதி,
அந்தேவாஸிகோ ச பு⁴ஞ்ஜிதுகாமோ ஹோதி, உத³கங் த³த்வா பிண்ட³பாதோ
உபனாமேதப்³போ³. அந்தேவாஸிகோ பானீயேன புச்சி²தப்³போ³. பு⁴த்தாவிஸ்ஸ உத³கங்
த³த்வா பத்தங் படிக்³க³ஹெத்வா நீசங் கத்வா ஸாது⁴கங் அப்படிக⁴ங்ஸந்தேன
தோ⁴வித்வா வோத³கங் கத்வா முஹுத்தங் உண்ஹே
ஓதாபேதப்³போ³, ந ச உண்ஹே பத்தோ நித³ஹிதப்³போ³. பத்தசீவரங்
நிக்கி²பிதப்³ப³ங். பத்தங் நிக்கி²பந்தேன ஏகேன ஹத்தே²ன பத்தங் க³ஹெத்வா
ஏகேன ஹத்தே²ன ஹெட்டா²மஞ்சங் வா ஹெட்டா²பீட²ங் வா பராமஸித்வா
பத்தோ நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³.
சீவரங் நிக்கி²பந்தேன ஏகேன ஹத்தே²ன சீவரங் க³ஹெத்வா ஏகேன ஹத்தே²ன
சீவரவங்ஸங் வா சீவரரஜ்ஜுங் வா பமஜ்ஜித்வா பாரதோ அந்தங் ஓரதோ போ⁴க³ங் கத்வா
சீவரங் நிக்கி²பிதப்³ப³ங். அந்தேவாஸிகம்ஹி வுட்டி²தே ஆஸனங்
உத்³த⁴ரிதப்³ப³ங், பாதோ³த³கங் பாத³பீட²ங் பாத³கத²லிகங் படிஸாமேதப்³ப³ங்.
ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே அந்தேவாஸிகோ நஹாயிதுகாமோ ஹோதி, நஹானங்
படியாதே³தப்³ப³ங். ஸசே ஸீதேன அத்தோ² ஹோதி, ஸீதங் படியாதே³தப்³ப³ங். ஸசே
உண்ஹேன அத்தோ² ஹோதி, உண்ஹங் படியாதே³தப்³ப³ங்.

‘‘ஸசே அந்தேவாஸிகோ ஜந்தாக⁴ரங் பவிஸிதுகாமோ ஹோதி,
சுண்ணங் ஸன்னேதப்³ப³ங், மத்திகா தேமேதப்³பா³, ஜந்தாக⁴ரபீட²ங் ஆதா³ய
க³ந்த்வா ஜந்தாக⁴ரபீட²ங் த³த்வா சீவரங் படிக்³க³ஹெத்வா ஏகமந்தங்
நிக்கி²பிதப்³ப³ங், சுண்ணங் தா³தப்³ப³ங், மத்திகா தா³தப்³பா³. ஸசே உஸ்ஸஹதி,
ஜந்தாக⁴ரங் பவிஸிதப்³ப³ங். ஜந்தாக⁴ரங் பவிஸந்தேன மத்திகாய முக²ங்
மக்கெ²த்வா புரதோ ச பச்ச²தோ ச படிச்சா²தெ³த்வா ஜந்தாக⁴ரங் பவிஸிதப்³ப³ங். ந
ச தே²ரே பி⁴க்கூ² அனுபக²ஜ்ஜ நிஸீதி³தப்³ப³ங், ந நவா பி⁴க்கூ² ஆஸனேன
படிபா³ஹிதப்³பா³. ஜந்தாக⁴ரே அந்தேவாஸிகஸ்ஸ பரிகம்மங் காதப்³ப³ங். ஜந்தாக⁴ரா
நிக்க²மந்தேன ஜந்தாக⁴ரபீட²ங் ஆதா³ய புரதோ ச பச்ச²தோ ச படிச்சா²தெ³த்வா
ஜந்தாக⁴ரா நிக்க²மிதப்³ப³ங்.

‘‘உத³கேபி அந்தேவாஸிகஸ்ஸ பரிகம்மங் காதப்³ப³ங். நஹாதேன பட²மதரங் உத்தரித்வா அத்தனோ க³த்தங் வோத³கங் கத்வா நிவாஸெத்வா அந்தேவாஸிகஸ்ஸ
க³த்ததோ உத³கங் பமஜ்ஜிதப்³ப³ங், நிவாஸனங் தா³தப்³ப³ங், ஸங்கா⁴டி
தா³தப்³பா³, ஜந்தாக⁴ரபீட²ங் ஆதா³ய பட²மதரங் ஆக³ந்த்வா ஆஸனங்
பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங்.
அந்தேவாஸிகோ பானீயேன புச்சி²தப்³போ³.

‘‘யஸ்மிங் விஹாரே அந்தேவாஸிகோ விஹரதி, ஸசே ஸோ விஹாரோ
உக்லாபோ ஹோதி, ஸசே உஸ்ஸஹதி, ஸோதே⁴தப்³போ³. விஹாரங் ஸோதெ⁴ந்தேன பட²மங்
பத்தசீவரங் நீஹரித்வா ஏகமந்தங் நிக்கி²பிதப்³ப³ங்; நிஸீத³னபச்சத்த²ரணங்
நீஹரித்வா ஏகமந்தங் நிக்கி²பிதப்³ப³ங்; பி⁴ஸிபி³ப்³போ³ஹனங் நீஹரித்வா
ஏகமந்தங் நிக்கி²பிதப்³ப³ங் ;
மஞ்சோ நீசங் கத்வா ஸாது⁴கங் அப்படிக⁴ங்ஸந்தேன, அஸங்க⁴ட்டெந்தேன
கவாடபிட்ட²ங், நீஹரித்வா ஏகமந்தங் நிக்கி²பிதப்³போ³; பீட²ங் நீசங் கத்வா
ஸாது⁴கங் அப்படிக⁴ங்ஸந்தேன, அஸங்க⁴ட்டெந்தேன கவாடபிட்ட²ங், நீஹரித்வா
ஏகமந்தங் நிக்கி²பிதப்³ப³ங்; மஞ்சபடிபாத³கா நீஹரித்வா ஏகமந்தங்
நிக்கி²பிதப்³பா³; கே²ளமல்லகோ நீஹரித்வா ஏகமந்தங் நிக்கி²பிதப்³போ³;
அபஸ்ஸேனப²லகங் நீஹரித்வா ஏகமந்தங் நிக்கி²பிதப்³ப³ங்; பூ⁴மத்த²ரணங்
யதா²பஞ்ஞத்தங் ஸல்லக்கெ²த்வா நீஹரித்வா ஏகமந்தங் நிக்கி²பிதப்³ப³ங். ஸசே
விஹாரே ஸந்தானகங் ஹோதி, உல்லோகா பட²மங் ஓதாரேதப்³ப³ங்,
ஆலோகஸந்தி⁴கண்ணபா⁴கா³ பமஜ்ஜிதப்³பா³. ஸசே கே³ருகபரிகம்மகதா பி⁴த்தி
கண்ணகிதா ஹோதி, சோளகங் தேமெத்வா பீளெத்வா பமஜ்ஜிதப்³பா³. ஸசே காளவண்ணகதா
பூ⁴மி கண்ணகிதா ஹோதி, சோளகங் தேமெத்வா பீளெத்வா பமஜ்ஜிதப்³பா³. ஸசே அகதா
ஹோதி பூ⁴மி, உத³கேன பரிப்போ²ஸித்வா ஸம்மஜ்ஜிதப்³பா³ – மா விஹாரோ ரஜேன உஹஞ்ஞீதி. ஸங்காரங் விசினித்வா ஏகமந்தங் ச²ட்³டே³தப்³ப³ங்.

‘‘பூ⁴மத்த²ரணங் ஓதாபெத்வா ஸோதெ⁴த்வா பப்போ²டெத்வா
அதிஹரித்வா யதா²பஞ்ஞத்தங் பஞ்ஞபேதப்³ப³ங். மஞ்சபடிபாத³கா ஓதாபெத்வா
பமஜ்ஜித்வா அதிஹரித்வா யதா²டா²னே ட²பேதப்³பா³. மஞ்சோ ஓதாபெத்வா ஸோதெ⁴த்வா
பப்போ²டெத்வா நீசங் கத்வா ஸாது⁴கங் அப்படிக⁴ங்ஸந்தேன, அஸங்க⁴ட்டெந்தேன
கவாடபிட்ட²ங், அதிஹரித்வா யதா²பஞ்ஞத்தங் பஞ்ஞபேதப்³போ³. பீட²ங் ஓதாபெத்வா
ஸோதெ⁴த்வா பப்போ²டெத்வா நீசங் கத்வா ஸாது⁴கங் அப்படிக⁴ங்ஸந்தேன,
அஸங்க⁴ட்டெந்தேன கவாடபிட்ட²ங், அதிஹரித்வா யதா²பஞ்ஞத்தங் பஞ்ஞபேதப்³ப³ங்.
பி⁴ஸிபி³ப்³போ³ஹனங் ஓதாபெத்வா ஸோதெ⁴த்வா பப்போ²டெத்வா அதிஹரித்வா
யதா²பஞ்ஞத்தங் பஞ்ஞபேதப்³ப³ங். நிஸீத³னபச்சத்த²ரணங் ஓதாபெத்வா ஸோதெ⁴த்வா
பப்போ²டெத்வா அதிஹரித்வா யதா²பஞ்ஞத்தங் பஞ்ஞபேதப்³ப³ங். கே²ளமல்லகோ
ஓதாபெத்வா பமஜ்ஜித்வா அதிஹரித்வா யதா²டா²னே ட²பேதப்³போ³. அபஸ்ஸேனப²லகங்
ஓதாபெத்வா பமஜ்ஜித்வா அதிஹரித்வா யதா²டா²னே ட²பேதப்³ப³ங். பத்தசீவரங்
நிக்கி²பிதப்³ப³ங். பத்தங் நிக்கி²பந்தேன ஏகேன ஹத்தே²ன பத்தங் க³ஹெத்வா
ஏகேன ஹத்தே²ன ஹெட்டா²மஞ்சங் வா ஹெட்டா²பீட²ங் வா பராமஸித்வா பத்தோ
நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரங்
நிக்கி²பந்தேன ஏகேன ஹத்தே²ன சீவரங் க³ஹெத்வா ஏகேன ஹத்தே²ன சீவரவங்ஸங் வா
சீவரரஜ்ஜுங் வா பமஜ்ஜித்வா பாரதோ அந்தங் ஓரதோ போ⁴க³ங் கத்வா சீவரங்
நிக்கி²பிதப்³ப³ங்.

‘‘ஸசே புரத்தி²மா ஸரஜா வாதா வாயந்தி, புரத்தி²மா வாதபானா
த²கேதப்³பா³. ஸசே பச்சி²மா ஸரஜா வாதா வாயந்தி, பச்சி²மா வாதபானா
த²கேதப்³பா³. ஸசே உத்தரா ஸரஜா வாதா வாயந்தி, உத்தரா வாதபானா த²கேதப்³பா³.
ஸசே த³க்கி²ணா ஸரஜா வாதா வாயந்தி, த³க்கி²ணா வாதபானா த²கேதப்³பா³. ஸசே
ஸீதகாலோ ஹோதி, தி³வா வாதபானா விவரிதப்³பா³, ரத்திங் த²கேதப்³பா³. ஸசே
உண்ஹகாலோ ஹோதி, தி³வா வாதபானா த²கேதப்³பா³, ரத்திங் விவரிதப்³பா³.

‘‘ஸசே பரிவேணங் உக்லாபங் ஹோதி,
பரிவேணங் ஸம்மஜ்ஜிதப்³ப³ங். ஸசே கொட்ட²கோ உக்லாபோ ஹோதி, கொட்ட²கோ
ஸம்மஜ்ஜிதப்³போ³. ஸசே உபட்டா²னஸாலா உக்லாபா ஹோதி, உபட்டா²னஸாலா
ஸம்மஜ்ஜிதப்³பா³. ஸசே அக்³கி³ஸாலா உக்லாபா ஹோதி, அக்³கி³ஸாலா
ஸம்மஜ்ஜிதப்³பா³. ஸசே வச்சகுடி உக்லாபா ஹோதி, வச்சகுடி ஸம்மஜ்ஜிதப்³பா³.
ஸசே பானீயங் ந ஹோதி, பானீயங் உபட்டா²பேதப்³ப³ங். ஸசே பரிபோ⁴ஜனீயங் ந ஹோதி,
பரிபோ⁴ஜனீயங் உபட்டா²பேதப்³ப³ங். ஸசே ஆசமனகும்பி⁴யா உத³கங் ந ஹோதி,
ஆசமனகும்பி⁴யா உத³கங் ஆஸிஞ்சிதப்³ப³ங்.

‘‘ஸசே அந்தேவாஸிகஸ்ஸ அனபி⁴ரதி உப்பன்னா ஹோதி, ஆசரியேன
வூபகாஸேதப்³போ³, வூபகாஸாபேதப்³போ³, த⁴ம்மகதா² வாஸ்ஸ காதப்³பா³. ஸசே
அந்தேவாஸிகஸ்ஸ குக்குச்சங் உப்பன்னங் ஹோதி, ஆசரியேன வினோதே³தப்³ப³ங்,
வினோதா³பேதப்³ப³ங், த⁴ம்மகதா² வாஸ்ஸ காதப்³பா³. ஸசே அந்தேவாஸிகஸ்ஸ
தி³ட்டி²க³தங் உப்பன்னங் ஹோதி, ஆசரியேன விவேசேதப்³ப³ங், விவேசாபேதப்³ப³ங்,
த⁴ம்மகதா² வாஸ்ஸ காதப்³பா³. ஸசே அந்தேவாஸிகோ க³ருத⁴ம்மங் அஜ்ஜா²பன்னோ ஹோதி
பரிவாஸாரஹோ, ஆசரியேன உஸ்ஸுக்கங் காதப்³ப³ங் –
கிந்தி நு கோ² ஸங்கோ⁴, அந்தேவாஸிகஸ்ஸ பரிவாஸங் த³தெ³ய்யாதி. ஸசே
அந்தேவாஸிகோ மூலாய படிகஸ்ஸனாரஹோ ஹோதி, ஆசரியேன உஸ்ஸுக்கங் காதப்³ப³ங் –
கிந்தி நு கோ² ஸங்கோ⁴ அந்தேவாஸிகங் மூலாய படிகஸ்ஸெய்யாதி. ஸசே அந்தேவாஸிகோ
மானத்தாரஹோ ஹோதி, ஆசரியேன உஸ்ஸுக்கங் காதப்³ப³ங் – கிந்தி நு கோ² ஸங்கோ⁴
அந்தேவாஸிகஸ்ஸ மானத்தங் த³தெ³ய்யாதி. ஸசே அந்தேவாஸிகோ அப்³பா⁴னாரஹோ ஹோதி,
ஆசரியேன உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ அந்தேவாஸிகங்
அப்³பெ⁴ய்யாதி. ஸசே ஸங்கோ⁴ அந்தேவாஸிகஸ்ஸ கம்மங் கத்துகாமோ ஹோதி, தஜ்ஜனீயங்
வா நியஸ்ஸங் வா பப்³பா³ஜனீயங் வா படிஸாரணீயங் வா உக்கே²பனீயங்
வா, ஆசரியேன உஸ்ஸுக்கங் காதப்³ப³ங் – கிந்தி நு கோ² ஸங்கோ⁴ அந்தேவாஸிகஸ்ஸ
கம்மங் ந கரெய்ய, லஹுகாய வா பரிணாமெய்யாதி. கதங் வா பனஸ்ஸ ஹோதி ஸங்கே⁴ன
கம்மங், தஜ்ஜனீயங் வா நியஸ்ஸங் வா பப்³பா³ஜனீயங் வா படிஸாரணீயங் வா
உக்கே²பனீயங் வா, ஆசரியேன உஸ்ஸுக்கங் காதப்³ப³ங் – கிந்தி நு கோ²
அந்தேவாஸிகோ ஸம்மா வத்தெய்ய, லோமங் பாதெய்ய, நெத்தா²ரங் வத்தெய்ய, ஸங்கோ⁴
தங் கம்மங் படிப்பஸ்ஸம்பெ⁴ய்யாதி.

‘‘ஸசே அந்தேவாஸிகஸ்ஸ சீவரங் தோ⁴விதப்³ப³ங் ஹோதி,
ஆசரியேன ஆசிக்கி²தப்³ப³ங் – ‘ஏவங் தோ⁴வெய்யாஸீ’தி, உஸ்ஸுக்கங் வா
காதப்³ப³ங் – கிந்தி நு கோ² அந்தேவாஸிகஸ்ஸ சீவரங் தோ⁴வியேதா²தி. ஸசே
அந்தேவாஸிகஸ்ஸ சீவரங் காதப்³ப³ங் ஹோதி, ஆசரியேன ஆசிக்கி²தப்³ப³ங் – ‘ஏவங்
கரெய்யாஸீ’தி, உஸ்ஸுக்கங் வா காதப்³ப³ங் – கிந்தி நு கோ² அந்தேவாஸிகஸ்ஸ
சீவரங் கரியேதா²தி. ஸசே அந்தேவாஸிகஸ்ஸ ரஜனங்
பசிதப்³ப³ங் ஹோதி, ஆசரியேன ஆசிக்கி²தப்³ப³ங் – ‘ஏவங் பசெய்யாஸீ’தி,
உஸ்ஸுக்கங் வா காதப்³ப³ங் – கிந்தி நு கோ² அந்தேவாஸிகஸ்ஸ ரஜனங் பசியேதா²தி.
ஸசே அந்தேவாஸிகஸ்ஸ சீவரங் ரஜிதப்³ப³ங் ஹோதி,
ஆசரியேன ஆசிக்கி²தப்³ப³ங் – ‘ஏவங் ரஜெய்யாஸீ’தி, உஸ்ஸுக்கங் வா காதப்³ப³ங் –
கிந்தி நு கோ² அந்தேவாஸிகஸ்ஸ சீவரங் ரஜியேதா²தி. சீவரங் ரஜந்தேன ஸாது⁴கங்
ஸம்பரிவத்தகங் ஸம்பரிவத்தகங் ரஜிதப்³ப³ங், ந ச அச்சி²ன்னே தே²வே
பக்கமிதப்³ப³ங். ஸசே அந்தேவாஸிகோ கி³லானோ ஹோதி, யாவஜீவங் உபட்டா²தப்³போ³,
வுட்டா²னமஸ்ஸ ஆக³மேதப்³ப³’’ந்தி.

அந்தேவாஸிகவத்தங் நிட்டி²தங்.

ச²ட்ட²பா⁴ணவாரோ.

20. பணாமனா க²மாபனா

80.
தேன கோ² பன ஸமயேன அந்தேவாஸிகா ஆசரியேஸு ந ஸம்மா வத்தந்தி…பே॰… ப⁴க³வதோ
ஏதமத்த²ங் ஆரோசேஸுங்…பே॰… ந, பி⁴க்க²வே, அந்தேவாஸிகேன ஆசரியம்ஹி ந ஸம்மா
வத்திதப்³ப³ங். யோ ந ஸம்மா வத்தெய்ய, ஆபத்தி து³க்கடஸ்ஸாதி. நேவ ஸம்மா
வத்தந்தி. ப⁴க³வதோ ஏதமத்த²ங் ஆரோசேஸுங்…பே॰… அனுஜானாமி, பி⁴க்க²வே,
அஸம்மாவத்தந்தங் பணாமேதுங். ஏவஞ்ச பன, பி⁴க்க²வே, பணாமேதப்³போ³ – பணாமேமி
தந்தி வா, மாயித⁴ படிக்கமீதி வா, நீஹர தே
பத்தசீவரந்தி வா, நாஹங் தயா உபட்டா²தப்³போ³தி வா. காயேன விஞ்ஞாபேதி, வாசாய
விஞ்ஞாபேதி, காயேன வாசாய விஞ்ஞாபேதி, பணாமிதோ ஹோதி அந்தேவாஸிகோ; ந காயேன
விஞ்ஞாபேதி, ந வாசாய விஞ்ஞாபேதி, ந காயேன வாசாய விஞ்ஞாபேதி, ந பணாமிதோ ஹோதி
அந்தேவாஸிகோதி.

தேன கோ² பன ஸமயேன அந்தேவாஸிகா
பணாமிதா ந க²மாபெந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
க²மாபேதுந்தி. நேவ க²மாபெந்தி. ப⁴க³வதோ ஏதமத்த²ங் ஆரோசேஸுங். ந,
பி⁴க்க²வே, பணாமிதேன ந க²மாபேதப்³போ³. யோ ந க²மாபெய்ய, ஆபத்தி
து³க்கடஸ்ஸாதி.

தேன கோ² பன ஸமயேன ஆசரியா க²மாபியமானா ந க²மந்தி.
ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, க²மிதுந்தி. நேவ
க²மந்தி. அந்தேவாஸிகா பக்கமந்திபி விப்³ப⁴மந்திபி தித்தி²யேஸுபி ஸங்கமந்தி.
ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, க²மாபியமானேன ந க²மிதப்³ப³ங்.
யோ ந க²மெய்ய, ஆபத்தி து³க்கடஸ்ஸாதி.

தேன கோ² பன ஸமயேன ஆசரியா
ஸம்மாவத்தந்தங் பணாமெந்தி, அஸம்மாவத்தந்தங் ந பணாமெந்தி. ப⁴க³வதோ ஏதமத்த²ங்
ஆரோசேஸுங். ந, பி⁴க்க²வே, ஸம்மாவத்தந்தோ பணாமேதப்³போ³. யோ பணாமெய்ய,
ஆபத்தி து³க்கடஸ்ஸ. ந ச, பி⁴க்க²வே, அஸம்மாவத்தந்தோ ந பணாமேதப்³போ³. யோ ந
பணாமெய்ய, ஆபத்தி து³க்கடஸ்ஸ.

81.
‘‘பஞ்சஹி, பி⁴க்க²வே, அங்கே³ஹி ஸமன்னாக³தோ அந்தேவாஸிகோ பணாமேதப்³போ³.
ஆசரியம்ஹி நாதி⁴மத்தங் பேமங் ஹோதி, நாதி⁴மத்தோ பஸாதோ³ ஹோதி, நாதி⁴மத்தா
ஹிரீ ஹோதி, நாதி⁴மத்தோ கா³ரவோ ஹோதி, நாதி⁴மத்தா பா⁴வனா ஹோதி – இமேஹி கோ²,
பி⁴க்க²வே, பஞ்சஹங்கே³ஹி ஸமன்னாக³தோ அந்தேவாஸிகோ பணாமேதப்³போ³.

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ அந்தேவாஸிகோ
ந பணாமேதப்³போ³. ஆசரியம்ஹி அதி⁴மத்தங் பேமங் ஹோதி, அதி⁴மத்தோ பஸாதோ³ ஹோதி,
அதி⁴மத்தா ஹிரீ ஹோதி, அதி⁴மத்தோ கா³ரவோ ஹோதி,
அதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ
அந்தேவாஸிகோ ந பணாமேதப்³போ³.

‘‘பஞ்சஹி , பி⁴க்க²வே, அங்கே³ஹி
ஸமன்னாக³தோ அந்தேவாஸிகோ அலங் பணாமேதுங். ஆசரியம்ஹி நாதி⁴மத்தங் பேமங்
ஹோதி, நாதி⁴மத்தோ பஸாதோ³ ஹோதி, நாதி⁴மத்தா ஹிரீ ஹோதி, நாதி⁴மத்தோ கா³ரவோ
ஹோதி, நாதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி
ஸமன்னாக³தோ அந்தேவாஸிகோ அலங் பணாமேதுங்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ அந்தேவாஸிகோ
நாலங் பணாமேதுங். ஆசரியம்ஹி அதி⁴மத்தங் பேமங் ஹோதி, அதி⁴மத்தோ பஸாதோ³
ஹோதி, அதி⁴மத்தா ஹிரீ ஹோதி, அதி⁴மத்தோ கா³ரவோ ஹோதி, அதி⁴மத்தா பா⁴வனா ஹோதி –
இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ அந்தேவாஸிகோ நாலங்
பணாமேதுங்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தங்
அந்தேவாஸிகங் அப்பணாமெந்தோ ஆசரியோ ஸாதிஸாரோ ஹோதி, பணாமெந்தோ அனதிஸாரோ ஹோதி.
ஆசரியம்ஹி நாதி⁴மத்தங் பேமங் ஹோதி, நாதி⁴மத்தோ பஸாதோ³ ஹோதி, நாதி⁴மத்தா
ஹிரீ ஹோதி, நாதி⁴மத்தோ கா³ரவோ ஹோதி, நாதி⁴மத்தா பா⁴வனா ஹோதி – இமேஹி கோ²,
பி⁴க்க²வே, பஞ்சஹங்கே³ஹி ஸமன்னாக³தங் அந்தேவாஸிகங் அப்பணாமெந்தோ ஆசரியோ
ஸாதிஸாரோ ஹோதி, பணாமெந்தோ அனதிஸாரோ ஹோதி.

‘‘பஞ்சஹி , பி⁴க்க²வே, அங்கே³ஹி
ஸமன்னாக³தங் அந்தேவாஸிகங் பணாமெந்தோ ஆசரியோ ஸாதிஸாரோ ஹோதி, அப்பணாமெந்தோ
அனதிஸாரோ ஹோதி. ஆசரியம்ஹி அதி⁴மத்தங் பேமங் ஹோதி, அதி⁴மத்தோ பஸாதோ³ ஹோதி,
அதி⁴மத்தா ஹிரீ ஹோதி, அதி⁴மத்தோ கா³ரவோ ஹோதி,
அதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தங்
அந்தேவாஸிகங் பணாமெந்தோ ஆசரியோ ஸாதிஸாரோ ஹோதி, அப்பணாமெந்தோ அனதிஸாரோ
ஹோதீ’’தி.

பணாமனா க²மாபனா நிட்டி²தா.

21. பா³லஅப்³யத்தவத்து²

82.
தேன கோ² பன ஸமயேன பி⁴க்கூ², த³ஸவஸ்ஸம்ஹா த³ஸவஸ்ஸம்ஹாதி, பா³லா அப்³யத்தா
நிஸ்ஸயங் தெ³ந்தி. தி³ஸ்ஸந்தி ஆசரியா பா³லா, அந்தேவாஸிகா பண்டி³தா .
தி³ஸ்ஸந்தி ஆசரியா அப்³யத்தா, அந்தேவாஸிகா ப்³யத்தா. தி³ஸ்ஸந்தி ஆசரியா
அப்பஸ்ஸுதா, அந்தேவாஸிகா ப³ஹுஸ்ஸுதா. தி³ஸ்ஸந்தி ஆசரியா து³ப்பஞ்ஞா,
அந்தேவாஸிகா பஞ்ஞவந்தோ. யே தே பி⁴க்கூ² அப்பிச்சா²…பே॰…
தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கூ²,
த³ஸவஸ்ஸம்ஹா த³ஸவஸ்ஸம்ஹாதி, பா³லா அப்³யத்தா நிஸ்ஸயங் த³ஸ்ஸந்தி.
தி³ஸ்ஸந்தி ஆசரியா பா³லா அந்தேவாஸிகா பண்டி³தா, தி³ஸ்ஸந்தி ஆசரியா
அப்³யத்தா அந்தேவாஸிகா ப்³யத்தா, தி³ஸ்ஸந்தி ஆசரியா அப்பஸ்ஸுதா அந்தேவாஸிகா
ப³ஹுஸ்ஸுதா, தி³ஸ்ஸந்தி ஆசரியா து³ப்பஞ்ஞா அந்தேவாஸிகா பஞ்ஞவந்தோ’’தி. அத²
கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ஸச்சங் கிர, பி⁴க்க²வே,
பி⁴க்கூ², த³ஸவஸ்ஸம்ஹா த³ஸவஸ்ஸம்ஹாதி, பா³லா அப்³யத்தா நிஸ்ஸயங்
தெ³ந்தி…பே॰… ஸச்சங், ப⁴க³வாதி. விக³ரஹி பு³த்³தோ⁴ ப⁴க³வா…பே॰…
விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந,
பி⁴க்க²வே, பா³லேன அப்³யத்தேன நிஸ்ஸயோ தா³தப்³போ³. யோ த³தெ³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ப்³யத்தேன பி⁴க்கு²னா படிப³லேன த³ஸவஸ்ஸேன வா அதிரேகத³ஸவஸ்ஸேன வா நிஸ்ஸயங் தா³து’’ந்தி.

பா³லஅப்³யத்தவத்து² நிட்டி²தங்.

22. நிஸ்ஸயபடிப்பஸ்ஸத்³தி⁴கதா²

83. தேன கோ² பன ஸமயேன பி⁴க்கூ² ஆசரியுபஜ்ஜா²யேஸு பக்கந்தேஸுபி விப்³ப⁴ந்தேஸுபி காலங்கதேஸுபி பக்க²ஸங்கந்தேஸுபி நிஸ்ஸயபடிப்பஸ்ஸத்³தி⁴யோ ந ஜானந்தி. ப⁴க³வதோ ஏதமத்த²ங் ஆரோசேஸுங்.

‘‘பஞ்சிமா, பி⁴க்க²வே, நிஸ்ஸயபடிப்பஸ்ஸத்³தி⁴யோ
உபஜ்ஜா²யம்ஹா – உபஜ்ஜா²யோ பக்கந்தோ வா ஹோதி, விப்³ப⁴ந்தோ வா, காலங்கதோ வா,
பக்க²ஸங்கந்தோ வா, ஆணத்தியேவ பஞ்சமீ. இமா கோ², பி⁴க்க²வே, பஞ்ச
நிஸ்ஸயபடிப்பஸ்ஸத்³தி⁴யோ உபஜ்ஜா²யம்ஹா.

‘‘ச²யிமா, பி⁴க்க²வே, நிஸ்ஸயபடிப்பஸ்ஸத்³தி⁴யோ
ஆசரியம்ஹா – ஆசரியோ பக்கந்தோ வா ஹோதி, விப்³ப⁴ந்தோ வா, காலங்கதோ வா,
பக்க²ஸங்கந்தோ வா, ஆணத்தியேவ பஞ்சமீ, உபஜ்ஜா²யேன வா ஸமோதா⁴னக³தோ ஹோதி. இமா
கோ², பி⁴க்க²வே, ச² நிஸ்ஸயபடிப்பஸ்ஸத்³தி⁴யோ ஆசரியம்ஹா’’.

நிஸ்ஸபடிப்பஸ்ஸத்³தி⁴கதா² நிட்டி²தா.

23. உபஸம்பாதே³தப்³ப³பஞ்சகங்

84. ‘‘பஞ்சஹி ,
பி⁴க்க²வே, அங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந
நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³. ந அஸெக்கே²ன [ந அஸேகே²ன (க॰)]
ஸீலக்க²ந்தே⁴ன ஸமன்னாக³தோ ஹோதி, ந அஸெக்கே²ன ஸமாதி⁴க்க²ந்தே⁴ன ஸமன்னாக³தோ
ஹோதி, ந அஸெக்கே²ன பஞ்ஞாக்க²ந்தே⁴ன ஸமன்னாக³தோ ஹோதி, ந அஸெக்கே²ன
விமுத்திக்க²ந்தே⁴ன ஸமன்னாக³தோ ஹோதி, ந அஸெக்கே²ன
விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி – இமேஹி கோ², பி⁴க்க²வே,
பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.
அஸெக்கே²ன ஸீலக்க²ந்தே⁴ன ஸமன்னாக³தோ ஹோதி, அஸெக்கே²ன ஸமாதி⁴க்க²ந்தே⁴ன
ஸமன்னாக³தோ ஹோதி, அஸெக்கே²ன பஞ்ஞாக்க²ந்தே⁴ன ஸமன்னாக³தோ ஹோதி, அஸெக்கே²ன
விமுத்திக்க²ந்தே⁴ன ஸமன்னாக³தோ ஹோதி, அஸெக்கே²ன
விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி – இமேஹி கோ², பி⁴க்க²வே,
பஞ்சஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந நிஸ்ஸயோ
தா³தப்³போ³, ந ஸாமணேரோ உபட்டா²பேதப்³போ³. அத்தனா ந அஸெக்கே²ன
ஸீலக்க²ந்தே⁴ன ஸமன்னாக³தோ ஹோதி, ந பரங் அஸெக்கே² ஸீலக்க²ந்தே⁴ ஸமாத³பேதா;
அத்தனா ந அஸெக்கே²ன ஸமாதி⁴க்க²ந்தே⁴ன ஸமன்னாக³தோ ஹோதி, ந பரங் அஸெக்கே²
ஸமாதி⁴க்க²ந்தே⁴ ஸமாத³பேதா; அத்தனா ந அஸெக்கே²ன பஞ்ஞாக்க²ந்தே⁴ன ஸமன்னாக³தோ
ஹோதி, ந பரங் அஸெக்கே² பஞ்ஞாக்க²ந்தே⁴ ஸமாத³பேதா; அத்தனா ந அஸெக்கே²ன
விமுத்திக்க²ந்தே⁴ன ஸமன்னாக³தோ ஹோதி, ந பரங் அஸெக்கே² விமுத்திக்க²ந்தே⁴
ஸமாத³பேதா; அத்தனா ந அஸெக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ
ஹோதி, ந பரங் அஸெக்கே² விமுத்திஞாணத³ஸ்ஸனக்க²ந்தே⁴ ஸமாத³பேதா – இமேஹி கோ²,
பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘பஞ்சஹி , பி⁴க்க²வே, அங்கே³ஹி
ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ
உபட்டா²பேதப்³போ³. அத்தனா அஸெக்கே²ன ஸீலக்க²ந்தே⁴ன ஸமன்னாக³தோ ஹோதி, பரங்
அஸெக்கே² ஸீலக்க²ந்தே⁴ ஸமாத³பேதா; அத்தனா அஸெக்கே²ன ஸமாதி⁴க்க²ந்தே⁴ன
ஸமன்னாக³தோ ஹோதி, பரங் அஸெக்கே² ஸமாதி⁴க்க²ந்தே⁴ ஸமாத³பேதா; அத்தனா
அஸெக்கே²ன பஞ்ஞாக்க²ந்தே⁴ன ஸமன்னாக³தோ ஹோதி, பரங் அஸெக்கே² பஞ்ஞாக்க²ந்தே⁴
ஸமாத³பேதா; அத்தனா அஸெக்கே²ன விமுத்திக்க²ந்தே⁴ன ஸமன்னாக³தோ ஹோதி, பரங்
அஸெக்கே² விமுத்திக்க²ந்தே⁴ ஸமாத³பேதா; அத்தனா அஸெக்கே²ன
விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி, பரங் அஸெக்கே²
விமுத்திஞாணத³ஸ்ஸனக்க²ந்தே⁴ ஸமாத³பேதா – இமேஹி கோ², பி⁴க்க²வே,
பஞ்சஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ
தா³தப்³போ³, ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³. அஸ்ஸத்³தோ⁴ ஹோதி, அஹிரிகோ ஹோதி, அனொத்தப்பீ ஹோதி, குஸீதோ
ஹோதி, முட்ட²ஸ்ஸதி ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³ ,
ஸாமணேரோ உபட்டா²பேதப்³போ³. ஸத்³தோ⁴ ஹோதி, ஹிரிமா ஹோதி, ஒத்தப்பீ ஹோதி,
ஆரத்³த⁴வீரியோ ஹோதி, உபட்டி²தஸ்ஸதி ஹோதி – இமேஹி கோ², பி⁴க்க²வே,
பஞ்சஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ
தா³தப்³போ³, ஸாமணேரோ உபட்டா²பேதப்³போ³.

‘‘அபரேஹிபி , பி⁴க்க²வே,
பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந நிஸ்ஸயோ
தா³தப்³போ³, ந ஸாமணேரோ உபட்டா²பேதப்³போ³. அதி⁴ஸீலே ஸீலவிபன்னோ ஹோதி,
அஜ்ஜா²சாரே ஆசாரவிபன்னோ ஹோதி, அதிதி³ட்டி²யா தி³ட்டி²விபன்னோ ஹோதி,
அப்பஸ்ஸுதோ ஹோதி, து³ப்பஞ்ஞோ ஹோதி – இமேஹி கோ², பி⁴க்க²வே, பஞ்சஹங்கே³ஹி
ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந
ஸாமணேரோ உபட்டா²பேதப்³போ³.

‘‘பஞ்சஹி , பி⁴க்க²வே, அங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ங் ,
நிஸ்ஸயோ தா³தப்³போ³, ஸாமணேரோ உபட்டா²பேதப்³போ³. ந அதி⁴ஸீலே ஸீலவிபன்னோ
ஹோதி, ந அஜ்ஜா²சாரே ஆசாரவிபன்னோ ஹோதி, ந அதிதி³ட்டி²யா தி³ட்டி²விபன்னோ
ஹோதி, ப³ஹுஸ்ஸுதோ ஹோதி, பஞ்ஞவா ஹோதி – இமேஹி கோ², பி⁴க்க²வே, பஞ்சஹங்கே³ஹி
ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ
உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³. ந படிப³லோ ஹோதி அந்தேவாஸிங் வா ஸத்³தி⁴விஹாரிங் வா கி³லானங் உபட்டா²துங் வா உபட்டா²பேதுங் வா, அனபி⁴ரதங் [அனபி⁴ரதிங் (ஸ்யா॰), உப்பன்னங் அனபி⁴ரதிங் (க॰)] வூபகாஸேதுங் வா வூபகாஸாபேதுங் வா, உப்பன்னங் குக்குச்சங் த⁴ம்மதோ வினோதே³துங் [வினோதே³துங் வா வினோதா³பேதுங் வா (ஸப்³ப³த்த², விமதிவினோத³னீ டீகா ஓலோகேதப்³பா³)]
ஆபத்திங் ந ஜானாதி, ஆபத்தியா வுட்டா²னங் ந ஜானாதி – இமேஹி கோ², பி⁴க்க²வே,
பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந நிஸ்ஸயோ
தா³தப்³போ³, ந ஸாமணேரோ உபட்டா²பேதப்³போ³.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.
படிப³லோ ஹோதி அந்தேவாஸிங் வா ஸத்³தி⁴விஹாரிங் வா கி³லானங் உபட்டா²துங் வா
உபட்டா²பேதுங் வா, அனபி⁴ரதங் வூபகாஸேதுங் வா வூபகாஸாபேதுங் வா, உப்பன்னங்
குக்குச்சங் த⁴ம்மதோ வினோதே³துங் ஆபத்திங் ஜானாதி, ஆபத்தியா வுட்டா²னங்
ஜானாதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா
உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³. ந படிப³லோ ஹோதி அந்தேவாஸிங் வா ஸத்³தி⁴விஹாரிங் வா
அபி⁴ஸமாசாரிகாய ஸிக்கா²ய ஸிக்கா²பேதுங், ஆதி³ப்³ரஹ்மசரியகாய ஸிக்கா²ய
வினேதுங், அபி⁴த⁴ம்மே வினேதுங், அபி⁴வினயே வினேதுங், உப்பன்னங்
தி³ட்டி²க³தங் த⁴ம்மதோ விவேசேதுங் – இமேஹி கோ² , பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘பஞ்சஹி , பி⁴க்க²வே, அங்கே³ஹி
ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ
உபட்டா²பேதப்³போ³. படிப³லோ ஹோதி அந்தேவாஸிங் வா ஸத்³தி⁴விஹாரிங் வா
அபி⁴ஸமாசாரிகாய ஸிக்கா²ய ஸிக்கா²பேதுங், ஆதி³ப்³ரஹ்மசரியகாய ஸிக்கா²ய
வினேதுங், அபி⁴த⁴ம்மே வினேதுங், அபி⁴வினயே வினேதுங், உப்பன்னங்
தி³ட்டி²க³தங் த⁴ம்மதோ விவேசேதுங் – இமேஹி கோ²,
பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ங்,
நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³. ஆபத்திங் ந ஜானாதி, அனாபத்திங் ந ஜானாதி, லஹுகங்
ஆபத்திங் ந ஜானாதி, க³ருகங் ஆபத்திங் ந ஜானாதி, உப⁴யானி கோ² பனஸ்ஸ
பாதிமொக்கா²னி வித்தா²ரேன ந ஸ்வாக³தானி ஹொந்தி ந ஸுவிப⁴த்தானி ந
ஸுப்பவத்தீனி ந ஸுவினிச்சி²தானி ஸுத்தஸோ அனுப்³யஞ்ஜனஸோ – இமேஹி கோ²,
பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந
நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.
ஆபத்திங் ஜானாதி, அனாபத்திங் ஜானாதி, லஹுகங் ஆபத்திங் ஜானாதி, க³ருகங்
ஆபத்திங் ஜானாதி, உப⁴யானி கோ² பனஸ்ஸ பாதிமொக்கா²னி வித்தா²ரேன ஸ்வாக³தானி
ஹொந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³. ஆபத்திங் ந ஜானாதி, அனாபத்திங் ந ஜானாதி, லஹுகங்
ஆபத்திங் ந ஜானாதி, க³ருகங் ஆபத்திங் ந ஜானாதி, ஊனத³ஸவஸ்ஸோ ஹோதி – இமேஹி
கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந
உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘பஞ்சஹி , பி⁴க்க²வே, அங்கே³ஹி
ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ
உபட்டா²பேதப்³போ³. ஆபத்திங் ஜானாதி, அனாபத்திங்
ஜானாதி, லஹுகங் ஆபத்திங் ஜானாதி, க³ருகங் ஆபத்திங் ஜானாதி, த³ஸவஸ்ஸோ வா
ஹோதி அதிரேகத³ஸவஸ்ஸோ வா – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ
உபட்டா²பேதப்³போ³’’தி.

உபஸம்பாதே³தப்³ப³பஞ்சகங் நிட்டி²தங்.

24. உபஸம்பாதே³தப்³ப³ச²க்கங்

85. ‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³ .
ந அஸெக்கே²ன ஸீலக்க²ந்தே⁴ன ஸமன்னாக³தோ ஹோதி, ந அஸெக்கே²ன ஸமாதி⁴க்க²ந்தே⁴ன
ஸமன்னாக³தோ ஹோதி, ந அஸெக்கே²ன பஞ்ஞாக்க²ந்தே⁴ன ஸமன்னாக³தோ ஹோதி, ந
அஸெக்கே²ன விமுத்திக்க²ந்தே⁴ன ஸமன்னாக³தோ ஹோதி, ந அஸெக்கே²ன
விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி,
ஊனத³ஸவஸ்ஸோ ஹோதி – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.
அஸெக்கே²ன ஸீலக்க²ந்தே⁴ன ஸமன்னாக³தோ ஹோதி, அஸெக்கே²ன ஸமாதி⁴க்க²ந்தே⁴ன
ஸமன்னாக³தோ ஹோதி, அஸெக்கே²ன பஞ்ஞாக்க²ந்தே⁴ன ஸமன்னாக³தோ ஹோதி, அஸெக்கே²ன
விமுத்திக்க²ந்தே⁴ன ஸமன்னாக³தோ ஹோதி, அஸெக்கே²ன
விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி, த³ஸவஸ்ஸோ வா ஹோதி
அதிரேகத³ஸவஸ்ஸோ வா – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன
பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ
உபட்டா²பேதப்³போ³.

‘‘அபரேஹிபி, பி⁴க்க²வே, ச²ஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³. அத்தனா ந அஸெக்கே²ன ஸீலக்க²ந்தே⁴ன ஸமன்னாக³தோ ஹோதி, ந
பரங் அஸெக்கே² ஸீலக்க²ந்தே⁴ ஸமாத³பேதா; அத்தனா ந அஸெக்கே²ன
ஸமாதி⁴க்க²ந்தே⁴ன ஸமன்னாக³தோ ஹோதி, ந பரங் அஸெக்கே² ஸமாதி⁴க்க²ந்தே⁴ ஸமாத³பேதா; அத்தனா
ந அஸெக்கே²ன பஞ்ஞாக்க²ந்தே⁴ன ஸமன்னாக³தோ ஹோதி, ந பரங் அஸெக்கே²
பஞ்ஞாக்க²ந்தே⁴ ஸமாத³பேதா; அத்தனா ந அஸெக்கே²ன விமுத்திக்க²ந்தே⁴ன
ஸமன்னாக³தோ ஹோதி, ந பரங் அஸெக்கே² விமுத்திக்க²ந்தே⁴ ஸமாத³பேதா; அத்தனா ந
அஸெக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி, ந பரங் அஸெக்கே²
விமுத்திஞாணத³ஸ்ஸனக்க²ந்தே⁴ ஸமாத³பேதா; ஊனத³ஸவஸ்ஸோ
ஹோதி – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந
உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³. அத்தனா
அஸெக்கே²ன ஸீலக்க²ந்தே⁴ன ஸமன்னாக³தோ ஹோதி, பரங் அஸெக்கே² ஸீலக்க²ந்தே⁴
ஸமாத³பேதா அத்தனா அஸெக்கே²ன ஸமாதி⁴க்க²ந்தே⁴ன ஸமன்னாக³தோ ஹோதி, பரங்
அஸெக்கே² ஸமாதி⁴க்க²ந்தே⁴ ஸமாத³பேதா. அத்தனா அஸெக்கே²ன பஞ்ஞாக்க²ந்தே⁴ன
ஸமன்னாக³தோ ஹோதி, பரங் அஸெக்கே² பஞ்ஞாக்க²ந்தே⁴ ஸமாத³பேதா. அத்தனா
அஸெக்கே²ன விமுத்திக்க²ந்தே⁴ன ஸமன்னாக³தோ ஹோதி, பரங் அஸெக்கே²
விமுத்திக்க²ந்தே⁴ ஸமாத³பேதா. அத்தனா அஸெக்கே²ன
விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி, பரங் அஸெக்கே²
விமுத்திஞாணத³ஸ்ஸனக்க²ந்தே⁴ ஸமாத³பேதா; த³ஸவஸ்ஸோ வா ஹோதி அதிரேகத³ஸவஸ்ஸோ வா
– இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா
உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, ச²ஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³. அஸ்ஸத்³தோ⁴ ஹோதி, அஹிரிகோ ஹோதி, அனொத்தப்பீ ஹோதி, குஸீதோ
ஹோதி, முட்ட²ஸ்ஸதி ஹோதி, ஊனத³ஸவஸ்ஸோ ஹோதி – இமேஹி கோ², பி⁴க்க²வே,
ச²ஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந நிஸ்ஸயோ
தா³தப்³போ³, ந ஸாமணேரோ உபட்டா²பேதப்³போ³.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ங் ,
நிஸ்ஸயோ தா³தப்³போ³, ஸாமணேரோ உபட்டா²பேதப்³போ³. ஸத்³தோ⁴ ஹோதி, ஹிரிமா
ஹோதி, ஒத்தப்பீ ஹோதி, ஆரத்³த⁴வீரியோ ஹோதி, உபட்டி²தஸ்ஸதி ஹோதி, த³ஸவஸ்ஸோ வா
ஹோதி அதிரேகத³ஸவஸ்ஸோ வா – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, ச²ஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³. அதி⁴ஸீலே ஸீலவிபன்னோ ஹோதி, அஜ்ஜா²சாரே ஆசாரவிபன்னோ ஹோதி,
அதிதி³ட்டி²யா தி³ட்டி²விபன்னோ ஹோதி, அப்பஸ்ஸுதோ ஹோதி, து³ப்பஞ்ஞோ ஹோதி,
ஊனத³ஸவஸ்ஸோ ஹோதி – இமேஹி கோ², பி⁴க்க²வே,
ச²ஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந நிஸ்ஸயோ
தா³தப்³போ³, ந ஸாமணேரோ உபட்டா²பேதப்³போ³.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³. ந
அதி⁴ஸீலே ஸீலவிபன்னோ ஹோதி, ந அஜ்ஜா²சாரே ஆசாரவிபன்னோ ஹோதி, ந அதிதி³ட்டி²யா
தி³ட்டி²விபன்னோ ஹோதி, ப³ஹுஸ்ஸுதோ ஹோதி, பஞ்ஞவா ஹோதி, த³ஸவஸ்ஸோ வா ஹோதி
அதிரேகத³ஸவஸ்ஸோ வா – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன
பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ
உபட்டா²பேதப்³போ³.

‘‘அபரேஹிபி, பி⁴க்க²வே, ச²ஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³. ந படிப³லோ ஹோதி அந்தேவாஸிங் வா ஸத்³தி⁴விஹாரிங் வா
கி³லானங் உபட்டா²துங் வா உபட்டா²பேதுங் வா, அனபி⁴ரதங் வூபகாஸேதுங் வா
வூபகாஸாபேதுங் வா, உப்பன்னங் குக்குச்சங் த⁴ம்மதோ வினோதே³துங், ஆபத்திங் ந
ஜானாதி, ஆபத்தியா வுட்டா²னங் ந ஜானாதி, ஊனத³ஸவஸ்ஸோ ஹோதி – இமேஹி கோ²,
பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந
நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.
படிப³லோ ஹோதி அந்தேவாஸிங் வா ஸத்³தி⁴விஹாரிங் வா கி³லானங் உபட்டா²துங் வா
உபட்டா²பேதுங் வா, அனபி⁴ரதங் வூபகாஸேதுங் வா வூபகாஸாபேதுங் வா, உப்பன்னங்
குக்குச்சங் த⁴ம்மதோ வினோதே³துங், ஆபத்திங் ஜானாதி, ஆபத்தியா வுட்டா²னங்
ஜானாதி, த³ஸவஸ்ஸோ வா ஹோதி அதிரேகத³ஸவஸ்ஸோ வா –
இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா
உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.

‘‘அபரேஹிபி , பி⁴க்க²வே,
ச²ஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ங், ந நிஸ்ஸயோ
தா³தப்³போ³, ந ஸாமணேரோ உபட்டா²பேதப்³போ³. ந படிப³லோ ஹோதி அந்தேவாஸிங் வா
ஸத்³தி⁴விஹாரிங் வா அபி⁴ஸமாசாரிகாய ஸிக்கா²ய ஸிக்கா²பேதுங்,
ஆதி³ப்³ரஹ்மசரியகாய ஸிக்கா²ய வினேதுங், அபி⁴த⁴ம்மே வினேதுங் ,
அபி⁴வினயே வினேதுங், உப்பன்னங் தி³ட்டி²க³தங் த⁴ம்மதோ விவேசேதுங்,
ஊனத³ஸவஸ்ஸோ ஹோதி – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³.

‘‘ச²ஹி , பி⁴க்க²வே, அங்கே³ஹி
ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ
உபட்டா²பேதப்³போ³. படிப³லோ ஹோதி அந்தேவாஸிங் வா ஸத்³தி⁴விஹாரிங் வா
அபி⁴ஸமாசாரிகாய ஸிக்கா²ய ஸிக்கா²பேதுங் ஆதி³ப்³ரஹ்மசரியகாய ஸிக்கா²ய
வினேதுங், அபி⁴த⁴ம்மே வினேதுங், அபி⁴வினயே வினேதுங், உப்பன்னங்
தி³ட்டி²க³தங் த⁴ம்மதோ விவேசேதுங், த³ஸவஸ்ஸோ வா ஹோதி அதிரேகத³ஸவஸ்ஸோ வா –
இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா
உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, ச²ஹங்கே³ஹி ஸமன்னாக³தேன
பி⁴க்கு²னா ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ
உபட்டா²பேதப்³போ³. ஆபத்திங் ந ஜானாதி, அனாபத்திங் ந ஜானாதி, லஹுகங்
ஆபத்திங் ந ஜானாதி, க³ருகங் ஆபத்திங் ந ஜானாதி, உப⁴யானி கோ² பனஸ்ஸ
பாதிமொக்கா²னி வித்தா²ரேன ந ஸ்வாக³தானி ஹொந்தி ந ஸுவிப⁴த்தானி ந
ஸுப்பவத்தீனி ந ஸுவினிச்சி²தானி ஸுத்தஸோ அனுப்³யஞ்ஜனஸோ, ஊனத³ஸவஸ்ஸோ ஹோதி –
இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந
உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³ , ஸாமணேரோ உபட்டா²பேதப்³போ³. ஆபத்திங் ஜானாதி ,
அனாபத்திங் ஜானாதி, லஹுகங் ஆபத்திங் ஜானாதி, க³ருகங் ஆபத்திங் ஜானாதி,
உப⁴யானி கோ² பனஸ்ஸ பாதிமொக்கா²னி வித்தா²ரேன ஸ்வாக³தானி ஹொந்தி
ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ,
த³ஸவஸ்ஸோ வா ஹோதி அதிரேகத³ஸவஸ்ஸோ வா – இமேஹி கோ², பி⁴க்க²வே, ச²ஹங்கே³ஹி
ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ
உபட்டா²பேதப்³போ³’’தி.

உபஸம்பாதே³தப்³ப³ச²க்கங் நிட்டி²தங்.

25. அஞ்ஞதித்தி²யபுப்³ப³கதா²

86. தேன கோ² பன ஸமயேன யோ ஸோ அஞ்ஞதித்தி²யபுப்³போ³ [யோ ஸோ பஸுரபரிப்³பா³ஜகோ அஞ்ஞதித்தி²யபுப்³போ³ (க॰)]
பஜ்ஜா²யேன ஸஹத⁴ம்மிகங் வுச்சமானோ உபஜ்ஜா²யஸ்ஸ வாத³ங் ஆரோபெத்வா தங்யேவ
தித்தா²யதனங் ஸங்கமி. ஸோ புன பச்சாக³ந்த்வா பி⁴க்கூ² உபஸம்பத³ங் யாசி.
பி⁴க்கூ² ப⁴க³வதோ ஏதமத்த²ங் ஆரோசேஸுங். யோ ஸோ, பி⁴க்க²வே,
அஞ்ஞதித்தி²யபுப்³போ³ உபஜ்ஜா²யேன ஸஹத⁴ம்மிகங் வுச்சமானோ உபஜ்ஜா²யஸ்ஸ வாத³ங்
ஆரோபெத்வா தங்யேவ தித்தா²யதனங் ஸங்கந்தோ, ஸோ ஆக³தோ
ந உபஸம்பாதே³தப்³போ³. யோ ஸோ, பி⁴க்க²வே, அஞ்ஞோபி அஞ்ஞதித்தி²யபுப்³போ³
இமஸ்மிங் த⁴ம்மவினயே ஆகங்க²தி பப்³ப³ஜ்ஜங், ஆகங்க²தி உபஸம்பத³ங், தஸ்ஸ
சத்தாரோ மாஸே பரிவாஸோ தா³தப்³போ³. ஏவஞ்ச பன, பி⁴க்க²வே, தா³தப்³போ³ –
பட²மங் கேஸமஸ்ஸுங் ஓஹாராபெத்வா காஸாயானி வத்தா²னி அச்சா²தா³பெத்வா ஏகங்ஸங்
உத்தராஸங்க³ங் காராபெத்வா பி⁴க்கூ²னங் பாதே³ வந்தா³பெத்வா
உக்குடிகங் நிஸீதா³பெத்வா அஞ்ஜலிங் பக்³க³ண்ஹாபெத்வா ஏவங் வதே³ஹீதி
வத்தப்³போ³ – ‘‘பு³த்³த⁴ங் ஸரணங் க³ச்சா²மி, த⁴ம்மங் ஸரணங் க³ச்சா²மி,
ஸங்க⁴ங் ஸரணங் க³ச்சா²மி; து³தியம்பி பு³த்³த⁴ங் ஸரணங் க³ச்சா²மி,
து³தியம்பி த⁴ம்மங் ஸரணங் க³ச்சா²மி, து³தியம்பி ஸங்க⁴ங் ஸரணங் க³ச்சா²மி;
ததியம்பி பு³த்³த⁴ங் ஸரணங் க³ச்சா²மி, ததியம்பி த⁴ம்மங் ஸரணங் க³ச்சா²மி,
ததியம்பி ஸங்க⁴ங் ஸரணங் க³ச்சா²மீ’’தி.

தேன, பி⁴க்க²வே, அஞ்ஞதித்தி²யபுப்³பே³ன ஸங்க⁴ங்
உபஸங்கமித்வா ஏகங்ஸங் உத்தராஸங்க³ங் கரித்வா பி⁴க்கூ²னங் பாதே³ வந்தி³த்வா
உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘அஹங்,
ப⁴ந்தே, அஞ்ஞதித்தி²யபுப்³போ³ இமஸ்மிங் த⁴ம்மவினயே
ஆகங்கா²மி உபஸம்பத³ங். ஸோஹங், ப⁴ந்தே, ஸங்க⁴ங் சத்தாரோ மாஸே பரிவாஸங்
யாசாமீ’’தி. து³தியம்பி யாசிதப்³போ³. ததியம்பி யாசிதப்³போ³. ப்³யத்தேன
பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ
அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்க²தி உபஸம்பத³ங். ஸோ ஸங்க⁴ங்
சத்தாரோ மாஸே பரிவாஸங் யாசதி. யதி³ ஸங்க⁴ஸ்ஸ பத்தகல்லங் ஸங்கோ⁴
இத்த²ன்னாமஸ்ஸ அஞ்ஞதித்தி²யபுப்³ப³ஸ்ஸ சத்தாரோ மாஸே பரிவாஸங் த³தெ³ய்ய. ஏஸா
ஞத்தி.

‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ
அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்க²தி உபஸம்பத³ங். ஸோ ஸங்க⁴ங்
சத்தாரோ மாஸே பரிவாஸங் யாசதி. ஸங்கோ⁴ இத்த²ன்னாமஸ்ஸ
அஞ்ஞதித்தி²யபுப்³ப³ஸ்ஸ சத்தாரோ மாஸே பரிவாஸங் தே³தி. யஸ்ஸாயஸ்மதோ க²மதி
இத்த²ன்னாமஸ்ஸ அஞ்ஞதித்தி²யபுப்³ப³ஸ்ஸ சத்தாரோ மாஸே பரிவாஸஸ்ஸ தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.

‘‘தி³ன்னோ ஸங்கே⁴ன இத்த²ன்னாமஸ்ஸ அஞ்ஞதித்தி²யபுப்³ப³ஸ்ஸ சத்தாரோ மாஸே பரிவாஸோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.

87.
‘‘ஏவங் கோ², பி⁴க்க²வே, அஞ்ஞதித்தி²யபுப்³போ³ ஆராத⁴கோ ஹோதி, ஏவங்
அனாராத⁴கோ. கத²ஞ்ச, பி⁴க்க²வே, அஞ்ஞதித்தி²யபுப்³போ³ அனாராத⁴கோ ஹோதி? இத⁴,
பி⁴க்க²வே, அஞ்ஞதித்தி²யபுப்³போ³ அதிகாலேன கா³மங் பவிஸதி, அதிதி³வா படிக்கமதி. ஏவம்பி, பி⁴க்க²வே, அஞ்ஞதித்தி²யபுப்³போ³ அனாராத⁴கோ ஹோதி.

‘‘புன சபரங், பி⁴க்க²வே, அஞ்ஞதித்தி²யபுப்³போ³
வேஸியாகோ³சரோ வா ஹோதி, வித⁴வாகோ³சரோ வா ஹோதி, து²ல்லகுமாரிகாகோ³சரோ வா
ஹோதி, பண்ட³ககோ³சரோ வா ஹோதி, பி⁴க்கு²னிகோ³சரோ வா ஹோதி. ஏவம்பி, பி⁴க்க²வே,
அஞ்ஞதித்தி²யபுப்³போ³ அனாராத⁴கோ ஹோதி.

‘‘புன சபரங், பி⁴க்க²வே, அஞ்ஞதித்தி²யபுப்³போ³ யானி
தானி ஸப்³ரஹ்மசாரீனங் உச்சாவசானி கரணீயானி, தத்த² ந த³க்கோ² ஹோதி, ந அனலஸோ,
ந தத்ருபாயாய வீமங்ஸாய ஸமன்னாக³தோ, ந அலங் காதுங், ந அலங் ஸங்விதா⁴துங்.
ஏவம்பி, பி⁴க்க²வே, அஞ்ஞதித்தி²யபுப்³போ³ அனாராத⁴கோ ஹோதி.

‘‘புன சபரங், பி⁴க்க²வே,
அஞ்ஞதித்தி²யபுப்³போ³ ந திப்³ப³ச்ச²ந்தோ³ ஹோதி உத்³தே³ஸே, பரிபுச்சா²ய,
அதி⁴ஸீலே, அதி⁴சித்தே, அதி⁴பஞ்ஞாய. ஏவம்பி, பி⁴க்க²வே,
அஞ்ஞதித்தி²யபுப்³போ³ அனாராத⁴கோ ஹோதி.

‘‘புன சபரங், பி⁴க்க²வே, அஞ்ஞதித்தி²யபுப்³போ³ யஸ்ஸ
தித்தா²யதனா ஸங்கந்தோ ஹோதி, தஸ்ஸ ஸத்து²னோ தஸ்ஸ தி³ட்டி²யா தஸ்ஸ க²ந்தியா
தஸ்ஸ ருசியா தஸ்ஸ ஆதா³யஸ்ஸ அவண்ணே ப⁴ஞ்ஞமானே குபிதோ
ஹோதி அனத்தமனோ அனபி⁴ரத்³தோ⁴, பு³த்³த⁴ஸ்ஸ வா த⁴ம்மஸ்ஸ வா ஸங்க⁴ஸ்ஸ வா
அவண்ணே ப⁴ஞ்ஞமானே அத்தமனோ ஹோதி உத³க்³கோ³ அபி⁴ரத்³தோ⁴. யஸ்ஸ வா பன
தித்தா²யதனா ஸங்கந்தோ ஹோதி, தஸ்ஸ ஸத்து²னோ தஸ்ஸ தி³ட்டி²யா தஸ்ஸ க²ந்தியா
தஸ்ஸ ருசியா தஸ்ஸ ஆதா³யஸ்ஸ வண்ணே ப⁴ஞ்ஞமானே அத்தமனோ ஹோதி உத³க்³கோ³
அபி⁴ரத்³தோ⁴, பு³த்³த⁴ஸ்ஸ வா த⁴ம்மஸ்ஸ வா ஸங்க⁴ஸ்ஸ வா வண்ணே ப⁴ஞ்ஞமானே
குபிதோ ஹோதி அனத்தமனோ அனபி⁴ரத்³தோ⁴. இத³ங், பி⁴க்க²வே, ஸங்கா⁴தனிகங்
அஞ்ஞதித்தி²யபுப்³ப³ஸ்ஸ அனாராத⁴னீயஸ்மிங். ஏவம்பி கோ², பி⁴க்க²வே,
அஞ்ஞதித்தி²யபுப்³போ³ அனாராத⁴கோ ஹோதி. ஏவங் அனாராத⁴கோ கோ², பி⁴க்க²வே,
அஞ்ஞதித்தி²யபுப்³போ³ ஆக³தோ ந உபஸம்பாதே³தப்³போ³.

‘‘கத²ஞ்ச, பி⁴க்க²வே, அஞ்ஞதித்தி²யபுப்³போ³ ஆராத⁴கோ
ஹோதி? இத⁴, பி⁴க்க²வே, அஞ்ஞதித்தி²யபுப்³போ³ நாதிகாலேன கா³மங் பவிஸதி
நாதிதி³வா படிக்கமதி. ஏவம்பி, பி⁴க்க²வே, அஞ்ஞதித்தி²யபுப்³போ³ ஆராத⁴கோ
ஹோதி.

‘‘புன சபரங், பி⁴க்க²வே, அஞ்ஞதித்தி²யபுப்³போ³ ந
வேஸியாகோ³சரோ ஹோதி, ந வித⁴வாகோ³சரோ ஹோதி, ந து²ல்லகுமாரிகாகோ³சரோ ஹோதி, ந
பண்ட³ககோ³சரோ ஹோதி, ந பி⁴க்கு²னிகோ³சரோ ஹோதி. ஏவம்பி, பி⁴க்க²வே,
அஞ்ஞதித்தி²யபுப்³போ³ ஆராத⁴கோ ஹோதி.

‘‘புன சபரங், பி⁴க்க²வே, அஞ்ஞதித்தி²யபுப்³போ³ யானி
தானி ஸப்³ரஹ்மசாரீனங் உச்சாவசானி கரணீயானி, தத்த² த³க்கோ² ஹோதி, அனலஸோ,
தத்ருபாயாய வீமங்ஸாய ஸமன்னாக³தோ, அலங் காதுங், அலங் ஸங்விதா⁴துங். ஏவம்பி,
பி⁴க்க²வே, அஞ்ஞதித்தி²யபுப்³போ³ ஆராத⁴கோ ஹோதி.

‘‘புன சபரங், பி⁴க்க²வே ,
அஞ்ஞதித்தி²யபுப்³போ³ திப்³ப³ச்ச²ந்தோ³ ஹோதி உத்³தே³ஸே, பரிபுச்சா²ய,
அதி⁴ஸீலே, அதி⁴சித்தே, அதி⁴பஞ்ஞாய. ஏவம்பி, பி⁴க்க²வே,
அஞ்ஞதித்தி²யபுப்³போ³ ஆராத⁴கோ ஹோதி.

‘‘புன சபரங், பி⁴க்க²வே,
அஞ்ஞதித்தி²யபுப்³போ³ யஸ்ஸ தித்தா²யதனா ஸங்கந்தோ ஹோதி, தஸ்ஸ ஸத்து²னோ தஸ்ஸ
தி³ட்டி²யா தஸ்ஸ க²ந்தியா தஸ்ஸ ருசியா தஸ்ஸ ஆதா³யஸ்ஸ அவண்ணே ப⁴ஞ்ஞமானே
அத்தமனோ ஹோதி உத³க்³கோ³ அபி⁴ரத்³தோ⁴, பு³த்³த⁴ஸ்ஸ வா த⁴ம்மஸ்ஸ வா ஸங்க⁴ஸ்ஸ
வா அவண்ணே ப⁴ஞ்ஞமானே குபிதோ ஹோதி அனத்தமனோ அனபி⁴ரத்³தோ⁴. யஸ்ஸ வா பன
தித்தா²யதனா ஸங்கந்தோ ஹோதி, தஸ்ஸ ஸத்து²னோ தஸ்ஸ தி³ட்டி²யா தஸ்ஸ க²ந்தியா
தஸ்ஸ ருசியா தஸ்ஸ ஆதா³யஸ்ஸ வண்ணே ப⁴ஞ்ஞமானே குபிதோ ஹோதி அனத்தமனோ
அனபி⁴ரத்³தோ⁴, பு³த்³த⁴ஸ்ஸ வா த⁴ம்மஸ்ஸ வா ஸங்க⁴ஸ்ஸ வா வண்ணே ப⁴ஞ்ஞமானே
அத்தமனோ ஹோதி உத³க்³கோ³ அபி⁴ரத்³தோ⁴. இத³ங், பி⁴க்க²வே, ஸங்கா⁴தனிகங்
அஞ்ஞதித்தி²யபுப்³ப³ஸ்ஸ ஆராத⁴னீயஸ்மிங். ஏவம்பி கோ², பி⁴க்க²வே,
அஞ்ஞதித்தி²யபுப்³போ³ ஆராத⁴கோ ஹோதி. ஏவங் ஆராத⁴கோ கோ², பி⁴க்க²வே,
அஞ்ஞதித்தி²யபுப்³போ³ ஆக³தோ உபஸம்பாதே³தப்³போ³.

‘‘ஸசே, பி⁴க்க²வே, அஞ்ஞதித்தி²யபுப்³போ³ நக்³கோ³
ஆக³ச்ச²தி, உபஜ்ஜா²யமூலகங் சீவரங் பரியேஸிதப்³ப³ங். ஸசே அச்சி²ன்னகேஸோ
ஆக³ச்ச²தி, ஸங்கோ⁴ அபலோகேதப்³போ³ ப⁴ண்டு³கம்மாய. யே தே, பி⁴க்க²வே,
அக்³கி³கா ஜடிலகா, தே ஆக³தா உபஸம்பாதே³தப்³பா³, ந தேஸங் பரிவாஸோ
தா³தப்³போ³. தங் கிஸ்ஸ ஹேது? கம்மவாதி³னோ ஏதே, பி⁴க்க²வே, கிரியவாதி³னோ.
ஸசே, பி⁴க்க²வே, ஜாதியா ஸாகியோ அஞ்ஞதித்தி²யபுப்³போ³ ஆக³ச்ச²தி , ஸோ ஆக³தோ உபஸம்பாதே³தப்³போ³, ந தஸ்ஸ பரிவாஸோ தா³தப்³போ³. இமாஹங், பி⁴க்க²வே, ஞாதீனங் ஆவேணிகங் பரிஹாரங் த³ம்மீ’’தி.

அஞ்ஞதித்தி²யபுப்³ப³கதா² நிட்டி²தா.

ஸத்தமபா⁴ணவாரோ.

26. பஞ்சாபா³த⁴வத்து²

88. தேன
கோ² பன ஸமயேன மக³தே⁴ஸு பஞ்ச ஆபா³தா⁴ உஸ்ஸன்னா ஹொந்தி – குட்ட²ங், க³ண்டோ³,
கிலாஸோ, ஸோஸோ, அபமாரோ. மனுஸ்ஸா பஞ்சஹி ஆபா³தே⁴ஹி பு²ட்டா² ஜீவகங்
கோமாரப⁴ச்சங் உபஸங்கமித்வா ஏவங் வத³ந்தி – ‘‘ஸாது⁴ நோ, ஆசரிய,
திகிச்சா²ஹீ’’தி. ‘‘அஹங் க்²வய்யோ, ப³ஹுகிச்சோ ப³ஹுகரணீயோ; ராஜா ச மே
மாக³தோ⁴ ஸேனியோ பி³ம்பி³ஸாரோ உபட்டா²தப்³போ³
இத்தா²கா³ரஞ்ச பு³த்³த⁴ப்பமுகோ² ச பி⁴க்கு²ஸங்கோ⁴; நாஹங் ஸக்கோமி
திகிச்சி²து’’ந்தி. ‘‘ஸப்³ப³ங் ஸாபதெய்யஞ்ச தே, ஆசரிய, ஹோது; மயஞ்ச தே
தா³ஸா; ஸாது⁴, நோ, ஆசரிய, திகிச்சா²ஹீ’’தி. ‘‘அஹங் க்²வய்யோ, ப³ஹுகிச்சோ
ப³ஹுகரணீயோ ராஜா ச மே மாக³தோ⁴ ஸேனியோ பி³ம்பி³ஸாரோ உபட்டா²தப்³போ³
இத்தா²கா³ரஞ்ச பு³த்³த⁴ப்பமுகோ² ச பி⁴க்கு²ஸங்கோ⁴; நாஹங் ஸக்கோமி
திகிச்சி²து’’ந்தி. அத² கோ² தேஸங் மனுஸ்ஸானங் ஏதத³ஹோஸி – ‘‘இமே கோ² ஸமணா
ஸக்யபுத்தியா ஸுக²ஸீலா ஸுக²ஸமாசாரா, ஸுபோ⁴ஜனானி பு⁴ஞ்ஜித்வா நிவாதேஸு
ஸயனேஸு ஸயந்தி. யங்னூன மயங் ஸமணேஸு ஸக்யபுத்தியேஸு பப்³ப³ஜெய்யாம. தத்த²
பி⁴க்கூ² சேவ உபட்ட²ஹிஸ்ஸந்தி, ஜீவகோ ச கோமாரப⁴ச்சோ திகிச்சி²ஸ்ஸதீ’’தி .
அத² கோ² தே மனுஸ்ஸா பி⁴க்கூ² உபஸங்கமித்வா பப்³ப³ஜ்ஜங் யாசிங்ஸு. தே
பி⁴க்கூ² பப்³பா³ஜேஸுங், உபஸம்பாதே³ஸுங். தே பி⁴க்கூ² சேவ உபட்ட²ஹிங்ஸு
ஜீவகோ ச கோமாரப⁴ச்சோ திகிச்சி². தேன கோ² பன ஸமயேன பி⁴க்கூ² ப³ஹூ கி³லானே
பி⁴க்கூ² உபட்ட²ஹந்தா யாசனப³ஹுலா விஞ்ஞத்திப³ஹுலா விஹரந்தி – கி³லானப⁴த்தங்
தே³த², கி³லானுபட்டா²கப⁴த்தங் தே³த², கி³லானபே⁴ஸஜ்ஜங் தே³தா²தி. ஜீவகோபி
கோமாரப⁴ச்சோ ப³ஹூ கி³லானே பி⁴க்கூ² திகிச்ச²ந்தோ அஞ்ஞதரங் ராஜகிச்சங்
பரிஹாபேஸி.

89.
அஞ்ஞதரோபி புரிஸோ பஞ்சஹி ஆபா³தே⁴ஹி பு²ட்டோ² ஜீவகங் கோமாரப⁴ச்சங்
உபஸங்கமித்வா ஏதத³வோச – ‘‘ஸாது⁴ மங், ஆசரிய, திகிச்சா²ஹீ’’தி. ‘‘அஹங்
க்²வய்யோ, ப³ஹுகிச்சோ, ப³ஹுகரணீயோ, ராஜா ச மே மாக³தோ⁴ ஸேனியோ பி³ம்பி³ஸாரோ
உபட்டா²தப்³போ³ இத்தா²கா³ரஞ்ச பு³த்³த⁴ப்பமுகோ² ச பி⁴க்கு²ஸங்கோ⁴; நாஹங்
ஸக்கோமி திகிச்சி²து’’ந்தி. ‘‘ஸப்³ப³ங் ஸாபதெய்யஞ்ச தே, ஆசரிய, ஹோது, அஹஞ்ச
தே தா³ஸோ; ஸாது⁴ மங், ஆசரிய, திகிச்சா²ஹீ’’தி. ‘‘அஹங் க்²வய்யோ,
ப³ஹுகிச்சோ ப³ஹுகரணீயோ, ராஜா ச மே மாக³தோ⁴ ஸேனியோ பி³ம்பி³ஸாரோ
உபட்டா²தப்³போ³ இத்தா²கா³ரஞ்ச பு³த்³த⁴ப்பமுகோ² ச பி⁴க்கு²ஸங்கோ⁴, நாஹங்
ஸக்கோமி திகிச்சி²து’’ந்தி. அத² கோ² தஸ்ஸ புரிஸஸ்ஸ ஏதத³ஹோஸி – ‘‘இமே கோ²
ஸமணா ஸக்யபுத்தியா ஸுக²ஸீலா ஸுக²ஸமாசாரா, ஸுபோ⁴ஜனானி பு⁴ஞ்ஜித்வா நிவாதேஸு
ஸயனேஸு ஸயந்தி. யங்னூனாஹங் ஸமணேஸு ஸக்யபுத்தியேஸு பப்³ப³ஜெய்யங். தத்த²
பி⁴க்கூ² சேவ உபட்ட²ஹிஸ்ஸந்தி, ஜீவகோ ச கோமாரப⁴ச்சோ திகிச்சி²ஸ்ஸதி. ஸொம்ஹி
[ஸோஹங் (ப³ஹூஸு, விமதிவினோத³னீடீகா ஓலோகேதப்³பா³)] அரோகோ³ விப்³ப⁴மிஸ்ஸாமீ’’தி . அத² கோ² ஸோ புரிஸோ பி⁴க்கு² உபஸங்கமித்வா
பப்³ப³ஜ்ஜங் யாசி. தங் பி⁴க்கூ² பப்³பா³ஜேஸுங், உபஸம்பாதே³ஸுங். தங்
பி⁴க்கூ² சேவ உபட்ட²ஹிங்ஸு, ஜீவகோ ச கோமாரப⁴ச்சோ திகிச்சி². ஸோ அரோகோ³
விப்³ப⁴மி. அத்³த³ஸா கோ² ஜீவகோ கோமாரப⁴ச்சோ தங்
புரிஸங் விப்³ப⁴ந்தங், தி³ஸ்வான தங் புரிஸங் ஏதத³வோச – ‘‘நனு த்வங், அய்யோ,
பி⁴க்கூ²ஸு பப்³ப³ஜிதோ அஹோஸீ’’தி? ‘‘ஏவங், ஆசரியா’’தி. ‘‘கிஸ்ஸ பன த்வங்,
அய்யோ, ஏவரூபமகாஸீ’’தி? அத² கோ² ஸோ புரிஸோ ஜீவகஸ்ஸ கோமாரப⁴ச்சஸ்ஸ ஏதமத்த²ங்
ஆரோசேஸி. ஜீவகோ கோமாரப⁴ச்சோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம
ப⁴த³ந்தா [ப⁴த்³த³ந்தா (க॰)] பஞ்சஹி ஆபா³தே⁴ஹி
பு²ட்ட²ங் பப்³பா³ஜெஸ்ஸந்தீ’’தி. அத² கோ² ஜீவகோ கோமாரப⁴ச்சோ யேன ப⁴க³வா
தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³.
ஏகமந்தங் நிஸின்னோ கோ² ஜீவகோ கோமாரப⁴ச்சோ ப⁴க³வந்தங் ஏதத³வோச – ‘‘ஸாது⁴,
ப⁴ந்தே, அய்யா பஞ்சஹி ஆபா³தே⁴ஹி பு²ட்ட²ங் ந பப்³பா³ஜெய்யு’’ந்தி. அத² கோ²
ப⁴க³வா ஜீவகங் கோமாரப⁴ச்சங் த⁴ம்மியா கதா²ய ஸந்த³ஸ்ஸேஸி ஸமாத³பேஸி
ஸமுத்தேஜேஸி ஸம்பஹங்ஸேஸி. அத² கோ² ஜீவகோ கோமாரப⁴ச்சோ ப⁴க³வதா த⁴ம்மியா
கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹங்ஸிதோ உட்டா²யாஸனா
ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி. அத² கோ² ப⁴க³வா
ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி –
‘‘ந, பி⁴க்க²வே, பஞ்சஹி ஆபா³தே⁴ஹி பு²ட்டோ² பப்³பா³ஜேதப்³போ³. யோ
பப்³பா³ஜெய்ய, ஆபத்தி து³க்கடஸ்ஸா’’தி.

பஞ்சாபா³த⁴வத்து² நிட்டி²தங்.

27. ராஜப⁴டவத்து²

90.
தேன கோ² பன ஸமயேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பச்சந்தோ
குபிதோ ஹோதி. அத² கோ² ராஜா மாக³தோ⁴ ஸேனியோ பி³ம்பி³ஸாரோ ஸேனானாயகே மஹாமத்தே
ஆணாபேஸி – ‘‘க³ச்ச²த², ப⁴ணே, பச்சந்தங் உச்சினதா²’’தி. ‘‘ஏவங், தே³வா’’தி
கோ² ஸேனானாயகா மஹாமத்தா ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ
பச்சஸ்ஸோஸுங். அத² கோ² அபி⁴ஞ்ஞாதானங் அபி⁴ஞ்ஞாதானங் யோதா⁴னங் ஏதத³ஹோஸி –
‘‘மயங் கோ² யுத்³தா⁴பி⁴னந்தி³னோ க³ச்ச²ந்தா பாபஞ்ச கரோம, ப³ஹுஞ்ச அபுஞ்ஞங்
பஸவாம. கேன நு கோ² மயங் உபாயேன பாபா ச விரமெய்யாம கல்யாணஞ்ச கரெய்யாமா’’தி?
அத² கோ² தேஸங் யோதா⁴னங் ஏதத³ஹோஸி – ‘‘இமே கோ² ஸமணா
ஸக்யபுத்தியா த⁴ம்மசாரினோ ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ
கல்யாணத⁴ம்மா. ஸசே கோ² மயங் ஸமணேஸு ஸக்யபுத்தியேஸு பப்³ப³ஜெய்யாம, ஏவங்
மயங் பாபா ச விரமெய்யாம கல்யாணஞ்ச கரெய்யாமா’’தி. அத² கோ² தே யோதா⁴
பி⁴க்கூ² உபஸங்கமித்வா பப்³ப³ஜ்ஜங் யாசிங்ஸு. தே பி⁴க்கூ² பப்³பா³ஜேஸுங்,
உபஸம்பாதே³ஸுங். ஸேனானாயகா மஹாமத்தா ராஜப⁴டே புச்சி²ங்ஸு – ‘‘கிங் நு
கோ², ப⁴ணே, இத்த²ன்னாமோ ச இத்த²ன்னாமோ ச யோதா⁴ ந தி³ஸ்ஸந்தீ’’தி?
‘‘இத்த²ன்னாமோ ச இத்த²ன்னாமோ ச, ஸாமி, யோதா⁴ பி⁴க்கூ²ஸு பப்³ப³ஜிதா’’தி.
ஸேனானாயகா மஹாமத்தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம
ஸமணா ஸக்யபுத்தியா ராஜப⁴டங் பப்³பா³ஜெஸ்ஸந்தீ’’தி. ஸேனானாயகா மஹாமத்தா
ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஏதமத்த²ங்
ஆரோசேஸுங். அத² கோ² ராஜா மாக³தோ⁴ ஸேனியோ பி³ம்பி³ஸாரோ வோஹாரிகே மஹாமத்தே
புச்சி² – ‘‘யோ, ப⁴ணே, ராஜப⁴டங் பப்³பா³ஜேதி, கிங் ஸோ பஸவதீ’’தி?
‘‘உபஜ்ஜா²யஸ்ஸ, தே³வ, ஸீஸங் சே²தப்³ப³ங், அனுஸ்ஸாவகஸ்ஸ [அனுஸாவகஸ்ஸ (க॰)]
ஜிவ்ஹா உத்³த⁴ரிதப்³பா³, க³ணஸ்ஸ உபட்³ட⁴பா²ஸுகா ப⁴ஞ்ஜிதப்³பா³’’தி. அத²
கோ² ராஜா மாக³தோ⁴ ஸேனியோ பி³ம்பி³ஸாரோ யேன ப⁴க³வா தேனுபஸங்கமி,
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங்
நிஸின்னோ கோ² ராஜா மாக³தோ⁴ ஸேனியோ பி³ம்பி³ஸாரோ ப⁴க³வந்தங் ஏதத³வோச –
‘‘ஸந்தி, ப⁴ந்தே, ராஜானோ அஸ்ஸத்³தா⁴ அப்பஸன்னா. தே அப்பமத்தகேனபி பி⁴க்கூ²
விஹேடெ²ய்யுங். ஸாது⁴, ப⁴ந்தே, அய்யா ராஜப⁴டங் ந பப்³பா³ஜெய்யு’’ந்தி. அத²
கோ² ப⁴க³வா ராஜானங் மாக³த⁴ங் ஸேனியங் பி³ம்பி³ஸாரங் த⁴ம்மியா கதா²ய
ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² ராஜா மாக³தோ⁴
ஸேனியோ பி³ம்பி³ஸாரோ ப⁴க³வதா த⁴ம்மியா கதா²ய ஸந்த³ஸ்ஸிதோ ஸமாத³பிதோ
ஸமுத்தேஜிதோ ஸம்பஹங்ஸிதோ உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங்
கத்வா பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங்
கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, ராஜப⁴டோ
பப்³பா³ஜேதப்³போ³. யோ பப்³பா³ஜெய்ய, ஆபத்தி து³க்கடஸ்ஸா’’தி.

ராஜப⁴டவத்து² நிட்டி²தங்.

28. அங்கு³லிமாலசோரவத்து²

91. தேன கோ² பன ஸமயேன சோரோ அங்கு³லிமாலோ பி⁴க்கூ²ஸு பப்³ப³ஜிதோ ஹோதி. மனுஸ்ஸா பஸ்ஸித்வா உப்³பி³ஜ்ஜந்திபி, உத்தஸந்திபி, பலாயந்திபி , அஞ்ஞேனபி க³ச்ச²ந்தி, அஞ்ஞேனபி முக²ங் கரொந்தி, த்³வாரம்பி த²கெந்தி. மனுஸ்ஸா உஜ்ஜா²யந்தி
கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா த⁴ஜப³ந்த⁴ங்
சோரங் பப்³பா³ஜெஸ்ஸந்தீ’’தி. அஸ்ஸோஸுங் கோ² பி⁴க்கூ² தேஸங் மனுஸ்ஸானங்
உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ
ஏதமத்த²ங் ஆரோசேஸுங்…பே॰… ந, பி⁴க்க²வே, த⁴ஜப³ந்தோ⁴ சோரோ பப்³பா³ஜேதப்³போ³.
யோ பப்³பா³ஜெய்ய, ஆபத்தி து³க்கடஸ்ஸாதி.

அங்கு³லிமாலசோரவத்து² நிட்டி²தங்.

29. காரபே⁴த³கசோரவத்து²

92. தேன கோ² பன ஸமயேன ரஞ்ஞா மாக³தே⁴ன ஸேனியேன பி³ம்பி³ஸாரேன
அனுஞ்ஞாதங் ஹோதி – ‘‘யே ஸமணேஸு ஸக்யபுத்தியேஸு பப்³ப³ஜந்தி, ந தே லப்³பா⁴
கிஞ்சி காதுங்; ஸ்வாக்கா²தோ த⁴ம்மோ, சரந்து ப்³ரஹ்மசரியங் ஸம்மா து³க்க²ஸ்ஸ
அந்தகிரியாயா’’தி. தேன கோ² பன ஸமயேன அஞ்ஞதரோ புரிஸோ சோரிகங் கத்வா காராய
ப³த்³தோ⁴ ஹோதி. ஸோ காரங் பி⁴ந்தி³த்வா பலாயித்வா பி⁴க்கூ²ஸு பப்³ப³ஜிதோ
ஹோதி. மனுஸ்ஸா பஸ்ஸித்வா ஏவமாஹங்ஸு – ‘‘அயங் ஸோ காரபே⁴த³கோ சோரோ. ஹந்த³,
நங் நேமா’’தி. ஏகச்சே ஏவமாஹங்ஸு – ‘‘மாய்யோ, ஏவங் அவசுத்த². அனுஞ்ஞாதங்
ரஞ்ஞா மாக³தே⁴ன ஸேனியேன பி³ம்பி³ஸாரேன – ‘‘யே ஸமணேஸு ஸக்யபுத்தியேஸு
பப்³ப³ஜந்தி, ந தே லப்³பா⁴ கிஞ்சி காதுங்; ஸ்வாக்கா²தோ த⁴ம்மோ, சரந்து
ப்³ரஹ்மசரியங் ஸம்மா து³க்க²ஸ்ஸ அந்தகிரியாயா’’தி. மனுஸ்ஸா உஜ்ஜா²யந்தி
கி²ய்யந்தி விபாசெந்தி – ‘‘அப⁴யூவரா இமே ஸமணா ஸக்யபுத்தியா, நயிமே
லப்³பா⁴ கிஞ்சி காதுங். கத²ஞ்ஹி நாம ஸமணா ஸக்யபுத்தியா காரபே⁴த³கங் சோரங்
பப்³பா³ஜெஸ்ஸந்தீ’’தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே,
காரபே⁴த³கோ சோரோ பப்³பா³ஜேதப்³போ³. யோ பப்³பா³ஜெய்ய, ஆபத்தி து³க்கடஸ்ஸாதி.

காரபே⁴த³கசோரவத்து² நிட்டி²தங்.

30. லிகி²தகசோரவத்து²

93.
தேன கோ² பன ஸமயேன அஞ்ஞதரோ புரிஸோ சோரிகங் கத்வா பலாயித்வா பி⁴க்கூ²ஸு
பப்³ப³ஜிதோ ஹோதி. ஸோ ச ரஞ்ஞோ அந்தேபுரே லிகி²தோ ஹோதி – யத்த² பஸ்ஸதி, தத்த²
ஹந்தப்³போ³தி. மனுஸ்ஸா பஸ்ஸித்வா ஏவமாஹங்ஸு – ‘‘அயங் ஸோ லிகி²தகோ சோரோ.
ஹந்த³, நங் ஹனாமா’’தி. ஏகச்சே ஏவமாஹங்ஸு – ‘‘மாய்யோ, ஏவங் அவசுத்த².
அனுஞ்ஞாதங் ரஞ்ஞா மாக³தே⁴ன ஸேனியேன பி³ம்பி³ஸாரேன ‘‘யே ஸமணேஸு
ஸக்யபுத்தியேஸு பப்³ப³ஜந்தி, ந தே லப்³பா⁴ கிஞ்சி காதுங், ஸ்வாக்கா²தோ
த⁴ம்மோ, சரந்து ப்³ரஹ்மசரியங் ஸம்மா து³க்க²ஸ்ஸ அந்தகிரியாயா’’தி. மனுஸ்ஸா
உஜ்ஜா²யந்தி கி²ய்யந்தி விபாசெந்தி – ‘‘அப⁴யூவரா
இமே ஸமணா ஸக்யபுத்தியா, நயிமே லப்³பா⁴ கிஞ்சி காதுங். கத²ஞ்ஹி நாம ஸமணா
ஸக்யபுத்தியா லிகி²தகங் சோரங் பப்³பா³ஜெஸ்ஸந்தீ’’தி. ப⁴க³வதோ ஏதமத்த²ங்
ஆரோசேஸுங். ந, பி⁴க்க²வே, லிகி²தகோ சோரோ பப்³பா³ஜேதப்³போ³. யோ
பப்³பா³ஜெய்ய, ஆபத்தி து³க்கடஸ்ஸாதி.

லிகி²தகசோரவத்து² நிட்டி²தங்.

31. கஸாஹதவத்து²

94. தேன
கோ² பன ஸமயேன அஞ்ஞதரோ புரிஸோ கஸாஹதோ கதத³ண்ட³கம்மோ பி⁴க்கூ²ஸு பப்³ப³ஜிதோ
ஹோதி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா
ஸக்யபுத்தியா கஸாஹதங் கதத³ண்ட³கம்மங் பப்³பா³ஜெஸ்ஸந்தீ’’தி. ப⁴க³வதோ
ஏதமத்த²ங் ஆரோசேஸுங். ந , பி⁴க்க²வே, கஸாஹதோ கதத³ண்ட³கம்மோ பப்³பா³ஜேதப்³போ³. யோ பப்³பா³ஜெய்ய, ஆபத்தி து³க்கடஸ்ஸாதி.

கஸாஹதவத்து² நிட்டி²தங்.

32. லக்க²ணாஹதவத்து²

95. தேன
கோ² பன ஸமயேன அஞ்ஞதரோ புரிஸோ லக்க²ணாஹதோ கதத³ண்ட³கம்மோ பி⁴க்கூ²ஸு
பப்³ப³ஜிதோ ஹோதி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி
நாம ஸமணா ஸக்யபுத்தியா லக்க²ணாஹதங் கதத³ண்ட³கம்மங் பப்³பா³ஜெஸ்ஸந்தீ’’தி.
ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, லக்க²ணாஹதோ கதத³ண்ட³கம்மோ
பப்³பா³ஜேதப்³போ³. யோ பப்³பா³ஜெய்ய, ஆபத்தி து³க்கடஸ்ஸாதி.

லக்க²ணாஹதவத்து² நிட்டி²தங்.

33. இணாயிகவத்து²

96.
தேன கோ² பன ஸமயேன அஞ்ஞதரோ புரிஸோ இணாயிகோ பலாயித்வா பி⁴க்கூ²ஸு பப்³ப³ஜிதோ
ஹோதி. த⁴னியா பஸ்ஸித்வா ஏவமாஹங்ஸு – ‘‘அயங் ஸோ அம்ஹாகங் இணாயிகோ. ஹந்த³,
நங் நேமா’’தி. ஏகச்சே ஏவமாஹங்ஸு – ‘‘மாய்யோ, ஏவங் அவசுத்த². அனுஞ்ஞாதங்
ரஞ்ஞா மாக³தே⁴ன ஸேனியேன பி³ம்பி³ஸாரேன – ‘‘யே ஸமணேஸு ஸக்யபுத்தியேஸு
பப்³ப³ஜந்தி, ந தே லப்³பா⁴ கிஞ்சி காதுங்; ஸ்வாக்கா²தோ த⁴ம்மோ, சரந்து
ப்³ரஹ்மசரியங் ஸம்மா து³க்க²ஸ்ஸ அந்தகிரியாயா’’தி. மனுஸ்ஸா உஜ்ஜா²யந்தி
கி²ய்யந்தி விபாசெந்தி – ‘‘அப⁴யூவரா இமே ஸமணா ஸக்யபுத்தியா. நயிமே லப்³பா⁴
கிஞ்சி காதுங். கத²ஞ்ஹி நாம ஸமணா ஸக்யபுத்தியா இணாயிகங்
பப்³பா³ஜெஸ்ஸந்தீ’’தி. ப⁴க³வதோ ஏதமத்த²ங் ஆரோசேஸுங் . ந, பி⁴க்க²வே, இணாயிகோ பப்³பா³ஜேதப்³போ³. யோ பப்³பா³ஜெய்ய, ஆபத்தி து³க்கடஸ்ஸாதி.

இணாயிகவத்து² நிட்டி²தங்.

34. தா³ஸவத்து²

97. தேன கோ² பன ஸமயேன அஞ்ஞதரோ தா³ஸோ பலாயித்வா பி⁴க்கூ²ஸு பப்³ப³ஜிதோ ஹோதி. அய்யகா [அய்யிகா (க॰), அயிரகா (ஸீ॰)]
பஸ்ஸித்வா ஏவமாஹங்ஸு – ‘‘அயங் ஸோ அம்ஹாகங் தா³ஸோ. ஹந்த³, நங் நேமா’’தி.
ஏகச்சே ஏவமாஹங்ஸு – ‘‘மாய்யோ, ஏவங் அவசுத்த², அனுஞ்ஞாதங் ரஞ்ஞா மாக³தே⁴ன
ஸேனியேன பி³ம்பி³ஸாரேன ‘‘யே ஸமணேஸு ஸக்யபுத்தியேஸு பப்³ப³ஜந்தி, ந தே
லப்³பா⁴ கிஞ்சி காதுங், ஸ்வாக்கா²தோ த⁴ம்மோ, சரந்து ப்³ரஹ்மசரியங் ஸம்மா
து³க்க²ஸ்ஸ அந்தகிரியாயா’’தி. மனுஸ்ஸா உஜ்ஜா²யந்தி கி²ய்யந்தி விபாசெந்தி –
‘‘அப⁴யூவரா இமே ஸமணா ஸக்யபுத்தியா, நயிமே லப்³பா⁴ கிஞ்சி காதுங். கத²ஞ்ஹி
நாம ஸமணா ஸக்யபுத்தியா தா³ஸங் பப்³பா³ஜெஸ்ஸந்தீ’’தி. ப⁴க³வதோ ஏதமத்த²ங்
ஆரோசேஸுங். ந, பி⁴க்க²வே, தா³ஸோ பப்³பா³ஜேதப்³போ³. யோ பப்³பா³ஜெய்ய, ஆபத்தி
து³க்கடஸ்ஸாதி.

தா³ஸவத்து² நிட்டி²தங்.

35. கம்மாரப⁴ண்டு³வத்து²

98.
தேன கோ² பன ஸமயேன அஞ்ஞதரோ கம்மாரப⁴ண்டு³ மாதாபிதூஹி ஸத்³தி⁴ங் ப⁴ண்டி³த்வா
ஆராமங் க³ந்த்வா பி⁴க்கூ²ஸு பப்³ப³ஜிதோ ஹோதி. அத² கோ² தஸ்ஸ
கம்மாரப⁴ண்டு³ஸ்ஸ மாதாபிதரோ தங் கம்மாரப⁴ண்டு³ங் விசினந்தா ஆராமங் க³ந்த்வா
பி⁴க்கூ² புச்சி²ங்ஸு – ‘‘அபி, ப⁴ந்தே, ஏவரூபங் தா³ரகங் பஸ்ஸெய்யாதா²’’தி?
பி⁴க்கூ² அஜானங்யேவ ஆஹங்ஸு – ‘‘ந ஜானாமா’’தி, அபஸ்ஸங்யேவ ஆஹங்ஸு – ‘‘ந
பஸ்ஸாமா’’தி. அத² கோ² தஸ்ஸ கம்மாரப⁴ண்டு³ஸ்ஸ மாதாபிதரோ தங் கம்மாரப⁴ண்டு³ங்
விசினந்தா பி⁴க்கூ²ஸு பப்³ப³ஜிதங் தி³ஸ்வா
உஜ்ஜா²யந்தி கி²ய்யந்தி விபாசெந்தி – ‘‘அலஜ்ஜினோ இமே ஸமணா ஸக்யபுத்தியா,
து³ஸ்ஸீலா முஸாவாதி³னோ. ஜானங்யேவ ஆஹங்ஸு – ‘ந ஜானாமா’தி, பஸ்ஸங்யேவ ஆஹங்ஸு –
‘ந பஸ்ஸாமா’தி. அயங் தா³ரகோ பி⁴க்கூ²ஸு
பப்³ப³ஜிதோ’’தி. அஸ்ஸோஸுங் கோ² பி⁴க்கூ² தஸ்ஸ கம்மாரப⁴ண்டு³ஸ்ஸ மாதாபிதூனங்
உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸங்க⁴ங் அபலோகேதுங் ப⁴ண்டு³கம்மாயாதி.

கம்மாரப⁴ண்டு³வத்து² நிட்டி²தங்.

36. உபாலிதா³ரகவத்து²

99. [இத³ங் வத்து² பாசி॰ 402 ஆத³யோ] தேன
கோ² பன ஸமயேன ராஜக³ஹே ஸத்தரஸவக்³கி³யா தா³ரகா ஸஹாயகா ஹொந்தி. உபாலிதா³ரகோ
தேஸங் பாமொக்கோ² ஹோதி. அத² கோ² உபாலிஸ்ஸ மாதாபிதூனங் ஏதத³ஹோஸி – ‘‘கேன நு
கோ² உபாயேன உபாலி அம்ஹாகங் அச்சயேன ஸுக²ஞ்ச ஜீவெய்ய, ந ச கிலமெய்யா’’தி?
அத² கோ² உபாலிஸ்ஸ மாதாபிதூனங் ஏதத³ஹோஸி – ‘‘ஸசே கோ² உபாலி லேக²ங்
ஸிக்கெ²ய்ய, ஏவங் கோ² உபாலி அம்ஹாகங் அச்சயேன ஸுக²ஞ்ச ஜீவெய்ய, ந ச
கிலமெய்யா’’தி. அத² கோ² உபாலிஸ்ஸ மாதாபிதூனங் ஏதத³ஹோஸி – ‘‘ஸசே கோ² உபாலி
லேக²ங் ஸிக்கி²ஸ்ஸதி, அங்கு³லியோ து³க்கா² ப⁴விஸ்ஸந்தி. ஸசே கோ² உபாலி
க³ணனங் ஸிக்கெ²ய்ய, ஏவங் கோ² உபாலி அம்ஹாகங் அச்சயேன ஸுக²ஞ்ச ஜீவெய்ய, ந ச
கிலமெய்யா’’தி. அத² கோ² உபாலிஸ்ஸ மாதாபிதூனங் ஏதத³ஹோஸி – ‘‘ஸசே கோ² உபாலி
க³ணனங் ஸிக்கி²ஸ்ஸதி, உரஸ்ஸ து³க்கோ² ப⁴விஸ்ஸதி. ஸசே கோ² உபாலி ரூபங்
ஸிக்கெ²ய்ய, ஏவங் கோ² உபாலி அம்ஹாகங் அச்சயேன ஸுக²ஞ்ச ஜீவெய்ய, ந ச
கிலமெய்யா’’தி. அத² கோ² உபாலிஸ்ஸ மாதாபிதூனங் ஏதத³ஹோஸி – ‘‘ஸசே கோ² உபாலி
ரூபங் ஸிக்கி²ஸ்ஸதி, அக்கீ²னி து³க்கா² ப⁴விஸ்ஸந்தி. இமே கோ² ஸமணா
ஸக்யபுத்தியா ஸுக²ஸீலா ஸுக²ஸமாசாரா, ஸுபோ⁴ஜனானி பு⁴ஞ்ஜித்வா நிவாதேஸு
ஸயனேஸு ஸயந்தி . ஸசே கோ² உபாலி ஸமணேஸு ஸக்யபுத்தியேஸு பப்³ப³ஜெய்ய, ஏவங் கோ² உபாலி அம்ஹாகங் அச்சயேன ஸுக²ஞ்ச ஜீவெய்ய, ந ச கிலமெய்யா’’தி.

அஸ்ஸோஸி கோ² உபாலிதா³ரகோ மாதாபிதூனங் இமங்
கதா²ஸல்லாபங். அத² கோ² உபாலிதா³ரகோ யேன தே தா³ரகா தேனுபஸங்கமி,
உபஸங்கமித்வா தே தா³ரகே ஏதத³வோச – ‘‘ஏத² மயங், அய்யா, ஸமணேஸு
ஸக்யபுத்தியேஸு பப்³ப³ஜிஸ்ஸாமா’’தி. ‘‘ஸசே கோ² த்வங், அய்ய, பப்³ப³ஜிஸ்ஸஸி,
ஏவங் மயம்பி பப்³ப³ஜிஸ்ஸாமா’’தி. அத² கோ² தே தா³ரகா ஏகமேகஸ்ஸ மாதாபிதரோ
உபஸங்கமித்வா ஏதத³வோசுங் – ‘‘அனுஜானாத² மங் அகா³ரஸ்மா அனாகா³ரியங்
பப்³ப³ஜ்ஜாயா’’தி. அத² கோ² தேஸங் தா³ரகானங்
மாதாபிதரோ – ‘‘ஸப்³பே³பிமே தா³ரகா ஸமானச்ச²ந்தா³ கல்யாணாதி⁴ப்பாயா’’தி –
அனுஜானிங்ஸு. தே பி⁴க்கூ² உபஸங்கமித்வா பப்³ப³ஜ்ஜங் யாசிங்ஸு. தே பி⁴க்கூ²
பப்³பா³ஜேஸுங் உபஸம்பாதே³ஸுங் . தே ரத்தியா
பச்சூஸஸமயங் பச்சுட்டா²ய ரோத³ந்தி – ‘‘யாகு³ங் தே³த², ப⁴த்தங் தே³த²,
கா²த³னீயங் தே³தா²’’தி. பி⁴க்கூ² ஏவமாஹங்ஸு – ‘‘ஆக³மேத², ஆவுஸோ, யாவ ரத்தி
விபா⁴யதி. ஸசே யாகு³ ப⁴விஸ்ஸதி பிவிஸ்ஸத², ஸசே
ப⁴த்தங் ப⁴விஸ்ஸதி பு⁴ஞ்ஜிஸ்ஸத², ஸசே கா²த³னீயங் ப⁴விஸ்ஸதி கா²தி³ஸ்ஸத²; நோ
சே ப⁴விஸ்ஸதி யாகு³ வா ப⁴த்தங் வா கா²த³னீயங் வா, பிண்டா³ய சரித்வா
பு⁴ஞ்ஜிஸ்ஸதா²’’தி. ஏவம்பி கோ² தே பி⁴க்கூ² பி⁴க்கூ²ஹி வுச்சமானா
ரோத³ந்தியேவ ‘‘யாகு³ங் தே³த², ப⁴த்தங் தே³த², கா²த³னீயங் தே³தா²’’தி;
ஸேனாஸனங் உஹத³ந்திபி உம்மிஹந்திபி.

அஸ்ஸோஸி கோ² ப⁴க³வா ரத்தியா பச்சூஸஸமயங்
பச்சுட்டா²ய தா³ரகஸத்³த³ங். ஸுத்வான ஆயஸ்மந்தங் ஆனந்த³ங் ஆமந்தேஸி –
‘‘கிங் நு கோ² ஸோ, ஆனந்த³, தா³ரகஸத்³தோ³’’தி? அத² கோ² ஆயஸ்மா ஆனந்தோ³
ப⁴க³வதோ ஏதமத்த²ங் ஆரோசேஸி…பே॰… ‘‘ஸச்சங் கிர, பி⁴க்க²வே, பி⁴க்கூ² ஜானங்
ஊனவீஸதிவஸ்ஸங் புக்³க³லங் உபஸம்பாதெ³ந்தீ’’தி? ‘‘ஸச்சங், ப⁴க³வா’’தி.
விக³ரஹி பு³த்³தோ⁴ ப⁴க³வா…பே॰… ‘‘கத²ஞ்ஹி நாம தே, பி⁴க்க²வே, மோக⁴புரிஸா
ஜானங் ஊனவீஸதிவஸ்ஸங் புக்³க³லங் உபஸம்பாதெ³ஸ்ஸந்தி. ஊனவீஸதிவஸ்ஸோ,
பி⁴க்க²வே, புக்³க³லோ அக்க²மோ ஹோதி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய
ட³ங்ஸமகஸவாதாதபஸரீஸபஸம்ப²ஸ்ஸானங் து³ருத்தானங் து³ராக³தானங் வசனபதா²னங்
உப்பன்னானங் ஸாரீரிகானங் வேத³னானங் து³க்கா²னங் திப்³பா³னங் க²ரானங்
கடுகானங் அஸாதானங் அமனாபானங் பாணஹரானங் அனதி⁴வாஸகஜாதிகோ ஹோதி. வீஸதிவஸ்ஸோவ
கோ², பி⁴க்க²வே, புக்³க³லோ க²மோ ஹோதி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய
ட³ங்ஸமகஸவாதாதபஸரீஸபஸம்ப²ஸ்ஸானங் து³ருத்தானங் து³ராக³தானங் வசனபதா²னங்,
உப்பன்னானங் ஸாரீரிகானங் வேத³னானங் து³க்கா²னங் திப்³பா³னங் க²ரானங்
கடுகானங் அஸாதானங் அமனாபானங் பாணஹரானங் அதி⁴வாஸகஜாதிகோ ஹோதி. நேதங்,
பி⁴க்க²வே, அப்பஸன்னானங் வா பஸாதா³ய, பஸன்னானங் வா பி⁴ய்யோபா⁴வாய…பே॰…
விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந,
பி⁴க்க²வே, ஜானங் ஊனவீஸதிவஸ்ஸோ புக்³க³லோ உபஸம்பாதே³தப்³போ³. யோ
உபஸம்பாதெ³ய்ய, யதா²த⁴ம்மோ காரேதப்³போ³’’தி.

உபாலிதா³ரகவத்து² நிட்டி²தங்.

37. அஹிவாதகரோக³வத்து²

100. தேன கோ² பன ஸமயேன அஞ்ஞதரங் குலங் அஹிவாதகரோகே³ன காலங்கதங் ஹோதி. தஸ்ஸ பிதாபுத்தகா ஸேஸா ஹொந்தி. தே பி⁴க்கூ²ஸு பப்³ப³ஜித்வா ஏகதோவ பிண்டா³ய சரந்தி. அத² கோ² ஸோ தா³ரகோ பிதுனோ பி⁴க்கா²ய தி³ன்னாய உபதா⁴வித்வா ஏதத³வோச – ‘‘மய்ஹம்பி, தாத, தே³ஹி; மய்ஹம்பி , தாத, தே³ஹீ’’தி. மனுஸ்ஸா உஜ்ஜா²யந்தி
கி²ய்யந்தி விபாசெந்தி – ‘‘அப்³ரஹ்மசாரினோ இமே ஸமணா ஸக்யபுத்தியா. அயம்பி
தா³ரகோ பி⁴க்கு²னியா ஜாதோ’’தி. அஸ்ஸோஸுங் கோ² பி⁴க்கூ² தேஸங் மனுஸ்ஸானங்
உஜ்ஜா²யந்தானங் கி²ய்யந்தானங் விபாசெந்தானங். அத²
கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, ஊனபன்னரஸவஸ்ஸோ
தா³ரகோ பப்³பா³ஜேதப்³போ³. யோ பப்³பா³ஜெய்ய, ஆபத்தி து³க்கடஸ்ஸாதி.

தேன கோ² பன ஸமயேன ஆயஸ்மதோ ஆனந்த³ஸ்ஸ உபட்டா²ககுலங்
ஸத்³த⁴ங் பஸன்னங் அஹிவாதகரோகே³ன காலங்கதங் ஹோதி, த்³வே ச தா³ரகா ஸேஸா
ஹொந்தி. தே போராணகேன ஆசிண்ணகப்பேன பி⁴க்கூ² பஸ்ஸித்வா உபதா⁴வந்தி. பி⁴க்கூ²
அபஸாதெ³ந்தி. தே பி⁴க்கூ²ஹி அபஸாதி³யமானா ரோத³ந்தி. அத² கோ² ஆயஸ்மதோ
ஆனந்த³ஸ்ஸ ஏதத³ஹோஸி – ‘‘ப⁴க³வதா பஞ்ஞத்தங் ‘ந ஊனபன்னரஸவஸ்ஸோ தா³ரகோ
பப்³பா³ஜேதப்³போ³’தி. இமே ச தா³ரகா ஊனபன்னரஸவஸ்ஸா. கேன நு கோ² உபாயேன இமே
தா³ரகா ந வினஸ்ஸெய்யு’’ந்தி? அத² கோ² ஆயஸ்மா ஆனந்தோ³ ப⁴க³வதோ ஏதமத்த²ங்
ஆரோசேஸி. உஸ்ஸஹந்தி பன தே, ஆனந்த³, தா³ரகா காகே உட்³டா³பேதுந்தி?
உஸ்ஸஹந்தி, ப⁴க³வாதி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே
த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே,
ஊனபன்னரஸவஸ்ஸங் தா³ரகங் காகுட்³டே³பகங் பப்³பா³ஜேது’’ந்தி.

அஹிவாதகரோக³வத்து² நிட்டி²தங்.

38. கண்டகவத்து²

101. தேன
கோ² பன ஸமயேன ஆயஸ்மதோ உபனந்த³ஸ்ஸ ஸக்யபுத்தஸ்ஸ த்³வே ஸாமணேரா ஹொந்தி –
கண்டகோ ச மஹகோ ச. தே அஞ்ஞமஞ்ஞங் தூ³ஸேஸுங். பி⁴க்கூ² உஜ்ஜா²யந்தி
கி²ய்யந்தி விபாசெந்தி – ‘‘கத²ஞ்ஹி நாம ஸாமணேரா ஏவரூபங் அனாசாரங்
ஆசரிஸ்ஸந்தீ’’தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, ஏகேன த்³வே
ஸாமணேரா உபட்டா²பேதப்³பா³. யோ உபட்டா²பெய்ய, ஆபத்தி து³க்கடஸ்ஸாதி.

கண்டகவத்து² நிட்டி²தங்.

39. ஆஹுந்த³ரிகவத்து²

102. தேன
கோ² பன ஸமயேன ப⁴க³வா தத்தே²வ ராஜக³ஹே வஸ்ஸங் வஸி, தத்த² ஹேமந்தங், தத்த²
கி³ம்ஹங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘ஆஹுந்த³ரிகா
ஸமணானங் ஸக்யபுத்தியானங் தி³ஸா அந்த⁴காரா, ந இமேஸங் தி³ஸா பக்கா²யந்தீ’’தி.
அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங்
விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ²
ப⁴க³வா ஆயஸ்மந்தங் ஆனந்த³ங் ஆமந்தேஸி – ‘‘க³ச்சா²னந்த³, அவாபுரணங் [அபாபுரணங் (க॰)] ஆதா³ய
அனுபரிவேணியங் பி⁴க்கூ²னங் ஆரோசேஹி – ‘‘இச்ச²தாவுஸோ ப⁴க³வா
த³க்கி²ணாகி³ரிங் சாரிகங் பக்கமிதுங். யஸ்ஸாயஸ்மதோ அத்தோ², ஸோ
ஆக³ச்ச²தூ’’தி. ஏவங், ப⁴ந்தே, தி கோ² ஆயஸ்மா ஆனந்தோ³ ப⁴க³வதோ படிஸ்ஸுணித்வா
அவாபுரணங் ஆதா³ய அனுபரிவேணியங் பி⁴க்கூ²னங் ஆரோசேஸி – ‘இச்ச²தாவுஸோ ப⁴க³வா
த³க்கி²ணாகி³ரிங் சாரிகங் பக்கமிதுங். யஸ்ஸாயஸ்மதோ அத்தோ², ஸோ
ஆக³ச்ச²தூ’’’தி. பி⁴க்கூ² ஏவமாஹங்ஸு – ‘‘ப⁴க³வதா, ஆவுஸோ ஆனந்த³, பஞ்ஞத்தங்
த³ஸவஸ்ஸானி நிஸ்ஸாய வத்து²ங், த³ஸவஸ்ஸேன நிஸ்ஸயங்
தா³துங். தத்த² ச நோ க³ந்தப்³ப³ங் ப⁴விஸ்ஸதி, நிஸ்ஸயோ ச க³ஹேதப்³போ³
ப⁴விஸ்ஸதி, இத்தரோ ச வாஸோ ப⁴விஸ்ஸதி, புன ச பச்சாக³ந்தப்³ப³ங் ப⁴விஸ்ஸதி,
புன ச நிஸ்ஸயோ க³ஹேதப்³போ³ ப⁴விஸ்ஸதி. ஸசே அம்ஹாகங் ஆசரியுபஜ்ஜா²யா
க³மிஸ்ஸந்தி, மயம்பி க³மிஸ்ஸாம; நோ சே அம்ஹாகங் ஆசரியுபஜ்ஜா²யா
க³மிஸ்ஸந்தி, மயம்பி ந க³மிஸ்ஸாம. லஹுசித்தகதா நோ, ஆவுஸோ ஆனந்த³,
பஞ்ஞாயிஸ்ஸதீ’’தி. அத² கோ² ப⁴க³வா ஓக³ணேன பி⁴க்கு²ஸங்கே⁴ன த³க்கி²ணாகி³ரிங்
சாரிகங் பக்காமி.

ஆஹுந்த³ரிகவத்து² நிட்டி²தங்.

40. நிஸ்ஸயமுச்சனககதா²

103.
அத² கோ² ப⁴க³வா த³க்கி²ணாகி³ரிஸ்மிங் யதா²பி⁴ரந்தங் விஹரித்வா புனதே³வ
ராஜக³ஹங் பச்சாக³ச்சி². அத² கோ² ப⁴க³வா ஆயஸ்மந்தங் ஆனந்த³ங் ஆமந்தேஸி –
‘‘கிங் நு கோ², ஆனந்த³, ததா²க³தோ ஓக³ணேன பி⁴க்கு²ஸங்கே⁴ன த³க்கி²ணாகி³ரிங்
சாரிகங் பக்கந்தோ’’தி? அத² கோ² ஆயஸ்மா ஆனந்தோ³ ப⁴க³வதோ ஏதமத்த²ங் ஆரோசேஸி.
அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா
பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ப்³யத்தேன பி⁴க்கு²னா
படிப³லேன பஞ்சவஸ்ஸானி நிஸ்ஸாய வத்து²ங், அப்³யத்தேன யாவஜீவங்.

‘‘பஞ்சஹி , பி⁴க்க²வே, அங்கே³ஹி
ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ங். ந அஸெக்கே²ன
ஸீலக்க²ந்தே⁴ன ஸமன்னாக³தோ ஹோதி ந அஸெக்கே²ன ஸமாதி⁴க்க²ந்தே⁴ன, ந அஸெக்கே²ன
பஞ்ஞாக்க²ந்தே⁴ன ந அஸெக்கே²ன விமுத்திக்க²ந்தே⁴ன ந அஸெக்கே²ன
விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ங்.

‘‘பஞ்சஹி , பி⁴க்க²வே, அங்கே³ஹி
ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ங். அஸெக்கே²ன ஸீலக்க²ந்தே⁴ன
ஸமன்னாக³தோ ஹோதி அஸெக்கே²ன ஸமாதி⁴க்க²ந்தே⁴ன. அஸெக்கே²ன பஞ்ஞாக்க²ந்தே⁴ன…
அஸெக்கே²ன விமுத்திக்க²ந்தே⁴ன… அஸெக்கே²ன விமுத்திஞாணத³ஸ்ஸனக்க²ந்தே⁴ன
ஸமன்னாக³தோ ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா அனிஸ்ஸிதேன வத்த²ப்³ப³ங்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா ந அனிஸ்ஸிதேன வத்த²ப்³ப³ங். அஸ்ஸத்³தோ⁴ ஹோதி, அஹிரிகோ ஹோதி,
அனொத்தப்பீ ஹோதி, குஸீதோ ஹோதி, முட்ட²ஸ்ஸதி ஹோதி – இமேஹி கோ², பி⁴க்க²வே,
பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ங்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ங். ஸத்³தோ⁴ ஹோதி ,
ஹிரிமா ஹோதி, ஒத்தப்பீ ஹோதி, ஆரத்³த⁴வீரியோ ஹோதி, உபட்டி²தஸ்ஸதி ஹோதி –
இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன
வத்த²ப்³ப³ங்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா ந அனிஸ்ஸிதேன வத்த²ப்³ப³ங். அதி⁴ஸீலே ஸீலவிபன்னோ ஹோதி,
அஜ்ஜா²சாரே ஆசாரவிபன்னோ ஹோதி, அதிதி³ட்டி²யா தி³ட்டி²விபன்னோ ஹோதி,
அப்பஸ்ஸுதோ ஹோதி, து³ப்பஞ்ஞோ ஹோதி – இமேஹி கோ², பி⁴க்க²வே, பஞ்சஹங்கே³ஹி
ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ங்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
அனிஸ்ஸிதேன வத்த²ப்³ப³ங். ந அதி⁴ஸீலே ஸீலவிபன்னோ ஹோதி, ந அஜ்ஜா²சாரே
ஆசாரவிபன்னோ ஹோதி, ந அதிதி³ட்டி²யா தி³ட்டி²விபன்னோ ஹோதி, ப³ஹுஸ்ஸுதோ ஹோதி,
பஞ்ஞவா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா
அனிஸ்ஸிதேன வத்த²ப்³ப³ங்.

‘‘அபரேஹிபி , பி⁴க்க²வே,
பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ங். ஆபத்திங் ந
ஜானாதி, அனாபத்திங் ந ஜானாதி, லஹுகங் ஆபத்திங் ந ஜானாதி, க³ருகங் ஆபத்திங்
ந ஜானாதி, உப⁴யானி கோ² பனஸ்ஸ பாதிமொக்கா²னி வித்தா²ரேன ந ஸ்வாக³தானி
ஹொந்தி ந ஸுவிப⁴த்தானி ந ஸுப்பவத்தீனி ந ஸுவினிச்சி²தானி ஸுத்தஸோ
அனுப்³யஞ்ஜனஸோ – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா ந அனிஸ்ஸிதேன வத்த²ப்³ப³ங்.

‘‘பஞ்சஹி , பி⁴க்க²வே, அங்கே³ஹி
ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ங். ஆபத்திங் ஜானாதி,
அனாபத்திங் ஜானாதி, லஹுகங் ஆபத்திங் ஜானாதி, க³ருகங் ஆபத்திங் ஜானாதி,
உப⁴யானி கோ² பனஸ்ஸ பாதிமொக்கா²னி வித்தா²ரேன ஸ்வாக³தானி ஹொந்தி
ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ – இமேஹி
கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன
வத்த²ப்³ப³ங்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன
பி⁴க்கு²னா ந அனிஸ்ஸிதேன வத்த²ப்³ப³ங். ஆபத்திங் ந ஜானாதி, அனாபத்திங் ந
ஜானாதி, லஹுகங் ஆபத்திங் ந ஜானாதி, க³ருகங் ஆபத்திங் ந ஜானாதி, ஊனபஞ்சவஸ்ஸோ
ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந
அனிஸ்ஸிதேன வத்த²ப்³ப³ங்.

‘‘பஞ்சஹி , பி⁴க்க²வே, அங்கே³ஹி
ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ங். ஆபத்திங் ஜானாதி,
அனாபத்திங் ஜானாதி, லஹுகங் ஆபத்திங் ஜானாதி, க³ருகங் ஆபத்திங் ஜானாதி,
பஞ்சவஸ்ஸோ வா ஹோதி அதிரேக பஞ்சவஸ்ஸோ வா – இமேஹி கோ², பி⁴க்க²வே,
பஞ்சஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ங்.

நிஸ்ஸயமுச்சனககதா² நிட்டி²தா.

பஞ்சகத³ஸவாரோ நிட்டி²தோ.

104.
‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன
வத்த²ப்³ப³ங். ந அஸெக்கே²ன ஸீலக்க²ந்தே⁴ன ஸமன்னாக³தோ ஹோதி, ந அஸெக்கே²ன
ஸமாதி⁴க்க²ந்தே⁴ன, ந அஸெக்கே²ன பஞ்ஞாக்க²ந்தே⁴ன, ந அஸெக்கே²ன
விமுத்திக்க²ந்தே⁴ன, ந அஸெக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி, ஊனபஞ்சவஸ்ஸோ ஹோதி – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ங்.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
அனிஸ்ஸிதேன வத்த²ப்³ப³ங். அஸெக்கே²ன ஸீலக்க²ந்தே⁴ன ஸமன்னாக³தோ ஹோதி,
அஸெக்கே²ன ஸமாதி⁴க்க²ந்தே⁴ன, அஸெக்கே²ன பஞ்ஞாக்க²ந்தே⁴ன, அஸெக்கே²ன
விமுத்திக்க²ந்தே⁴ன, அஸெக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ
ஹோதி, பஞ்சவஸ்ஸோ வா ஹோதி அதிரேகபஞ்சவஸ்ஸோ வா – இமேஹி கோ², பி⁴க்க²வே,
ச²ஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ங்.

‘‘அபரேஹிபி , பி⁴க்க²வே,
ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ங். அஸ்ஸத்³தோ⁴
ஹோதி, அஹிரிகோ ஹோதி, அனொத்தப்பீ ஹோதி, குஸீதோ ஹோதி, முட்ட²ஸ்ஸதி ஹோதி, ஊனபஞ்சவஸ்ஸோ ஹோதி – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ங்.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
அனிஸ்ஸிதேன வத்த²ப்³ப³ங். ஸத்³தோ⁴ ஹோதி, ஹிரிமா ஹோதி, ஒத்தப்பீ ஹோதி,
ஆரத்³த⁴வீரியோ ஹோதி, உபட்டி²தஸ்ஸதி ஹோதி, பஞ்சவஸ்ஸோ வா ஹோதி
அதிரேகபஞ்சவஸ்ஸோ வா – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன
பி⁴க்கு²னா அனிஸ்ஸிதேன வத்த²ப்³ப³ங்.

‘‘அபரேஹிபி, பி⁴க்க²வே, ச²ஹங்கே³ஹி ஸமன்னாக³தேன
பி⁴க்கு²னா ந அனிஸ்ஸிதேன வத்த²ப்³ப³ங். அதி⁴ஸீலே ஸீலவிபன்னோ ஹோதி,
அஜ்ஜா²சாரே ஆசாரவிபன்னோ ஹோதி, அதிதி³ட்டி²யா தி³ட்டி²விபன்னோ ஹோதி,
அப்பஸ்ஸுதோ ஹோதி, து³ப்பஞ்ஞோ ஹோதி, ஊனபஞ்சவஸ்ஸோ ஹோதி – இமேஹி கோ²,
பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ங்.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
அனிஸ்ஸிதேன வத்த²ப்³ப³ங். ந அதி⁴ஸீலே ஸீலவிபன்னோ ஹோதி, ந அஜ்ஜா²சாரே
ஆசாரவிபன்னோ ஹோதி, ந அதிதி³ட்டி²யா தி³ட்டி²விபன்னோ ஹோதி, ப³ஹுஸ்ஸுதோ ஹோதி,
பஞ்ஞவா ஹோதி, பஞ்சவஸ்ஸோ வா ஹோதி அதிரேகபஞ்சவஸ்ஸோ வா – இமேஹி கோ²,
பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ங்.

‘‘அபரேஹிபி, பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ங். ஆபத்திங்
ந ஜானாதி, அனாபத்திங் ந ஜானாதி, லஹுகங் ஆபத்திங் ந ஜானாதி, க³ருகங்
ஆபத்திங் ந ஜானாதி, உப⁴யானி கோ² பனஸ்ஸ பாதிமொக்கா²னி வித்தா²ரேன ந
ஸ்வாக³தானி ஹொந்தி ந ஸுவிப⁴த்தானி ந ஸுப்பவத்தீனி ந
ஸுவினிச்சி²தானி ஸுத்தஸோ அனுப்³யஞ்ஜனஸோ, ஊனபஞ்சவஸ்ஸோ ஹோதி – இமேஹி கோ²,
பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ங்.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா
அனிஸ்ஸிதேன வத்த²ப்³ப³ங். ஆபத்திங் ஜானாதி, அனாபத்திங் ஜானாதி, லஹுகங்
ஆபத்திங் ஜானாதி, க³ருகங் ஆபத்திங் ஜானாதி, உப⁴யானி கோ² பனஸ்ஸ
பாதிமொக்கா²னி வித்தா²ரேன ஸ்வாக³தானி ஹொந்தி ஸுவிப⁴த்தானி ஸுப்பவத்தீனி
ஸுவினிச்சி²தானி ஸுத்தஸோ அனுப்³யஞ்ஜனஸோ, பஞ்சவஸ்ஸோ
வா ஹோதி அதிரேகபஞ்சவஸ்ஸோ வா – இமேஹி கோ², பி⁴க்க²வே, ச²ஹங்கே³ஹி
ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³’’ந்தி.

அப⁴யூவரபா⁴ணவாரோ நிட்டி²தோ அட்ட²மோ.

அட்ட²மபா⁴ணவாரோ.

41. ராஹுலவத்து²

105. அத²
கோ² ப⁴க³வா ராஜக³ஹே யதா²பி⁴ரந்தங் விஹரித்வா யேன கபிலவத்து² தேன சாரிகங்
பக்காமி. அனுபுப்³பே³ன சாரிகங் சரமானோ யேன கபிலவத்து² தத³வஸரி. தத்ர ஸுத³ங்
ப⁴க³வா ஸக்கேஸு விஹரதி கபிலவத்து²ஸ்மிங் நிக்³ரோதா⁴ராமே. அத² கோ² ப⁴க³வா
புப்³ப³ண்ஹஸமயங் நிவாஸெத்வா பத்தசீவரமாதா³ய யேன ஸுத்³தோ⁴த³னஸ்ஸ ஸக்கஸ்ஸ
நிவேஸனங் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³. அத² கோ²
ராஹுலமாதா தே³வீ ராஹுலங் குமாரங் ஏதத³வோச – ‘‘ஏஸோ தே, ராஹுல, பிதா.
க³ச்ச²ஸ்ஸு [க³ச்ச²ஸ்ஸ (ஸ்யா॰)], தா³யஜ்ஜங் யாசாஹீ’’தி. அத² கோ² ராஹுலோ குமாரோ யேன
ப⁴க³வா தேனுபஸங்கமி, உபஸங்கமித்வா ப⁴க³வதோ புரதோ, அட்டா²ஸி – ‘‘ஸுகா² தே,
ஸமண, சா²யா’’தி. அத² கோ² ப⁴க³வா உட்டா²யாஸனா பக்காமி. அத² கோ² ராஹுலோ
குமாரோ ப⁴க³வந்தங் பிட்டி²தோ பிட்டி²தோ அனுப³ந்தி⁴ – ‘‘தா³யஜ்ஜங் மே, ஸமண,
தே³ஹி; தா³யஜ்ஜங் மே, ஸமண, தே³ஹீ’’தி. அத² கோ² ப⁴க³வா ஆயஸ்மந்தங்
ஸாரிபுத்தங் ஆமந்தேஸி – ‘‘தேன ஹி த்வங், ஸாரிபுத்த, ராஹுலங் குமாரங்
பப்³பா³ஜேஹீ’’தி. ‘‘கதா²ஹங், ப⁴ந்தே, ராஹுலங் குமாரங் பப்³பா³ஜேமீ’’தி? அத²
கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா
பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, தீஹி ஸரணக³மனேஹி
ஸாமணேரபப்³ப³ஜ்ஜங். ஏவஞ்ச பன, பி⁴க்க²வே, பப்³பா³ஜேதப்³போ³ – பட²மங்
கேஸமஸ்ஸுங் ஓஹாராபெத்வா காஸாயானி வத்தா²னி அச்சா²தா³பெத்வா ஏகங்ஸங்
உத்தராஸங்க³ங் காராபெத்வா பி⁴க்கூ²னங் பாதே³ வந்தா³பெத்வா
உக்குடிகங் நிஸீதா³பெத்வா அஞ்ஜலிங் பக்³க³ண்ஹாபெத்வா ஏவங் வதே³ஹீதி
வத்தப்³போ³ – பு³த்³த⁴ங் ஸரணங் க³ச்சா²மி, த⁴ம்மங் ஸரணங் க³ச்சா²மி,
ஸங்க⁴ங் ஸரணங் க³ச்சா²மி; து³தியம்பி பு³த்³த⁴ங் ஸரணங் க³ச்சா²மி,
து³தியம்பி த⁴ம்மங் ஸரணங் க³ச்சா²மி, து³தியம்பி ஸங்க⁴ங் ஸரணங் க³ச்சா²மி;
ததியம்பி பு³த்³த⁴ங் ஸரணங் க³ச்சா²மி, ததியம்பி
த⁴ம்மங் ஸரணங் க³ச்சா²மி, ததியம்பி ஸங்க⁴ங் ஸரணங் க³ச்சா²மீதி. அனுஜானாமி,
பி⁴க்க²வே, இமேஹி தீஹி ஸரணக³மனேஹி ஸாமணேரபப்³ப³ஜ்ஜ’’ந்தி. அத² கோ² ஆயஸ்மா
ஸாரிபுத்தோ ராஹுலங் குமாரங் பப்³பா³ஜேஸி.

அத² கோ² ஸுத்³தோ⁴த³னோ ஸக்கோ யேன ப⁴க³வா தேனுபஸங்கமி, உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸுத்³தோ⁴த³னோ
ஸக்கோ ப⁴க³வந்தங் ஏதத³வோச – ‘‘ஏகாஹங், ப⁴ந்தே, ப⁴க³வந்தங் வரங் யாசாமீ’’தி.
‘‘அதிக்கந்தவரா கோ², கோ³தம, ததா²க³தா’’தி. ‘‘யஞ்ச, ப⁴ந்தே, கப்பதி, யஞ்ச
அனவஜ்ஜ’’ந்தி. ‘‘வதே³ஹி, கோ³தமா’’தி. ‘‘ப⁴க³வதி மே, ப⁴ந்தே, பப்³ப³ஜிதே
அனப்பகங் து³க்க²ங் அஹோஸி, ததா² நந்தே³, அதி⁴மத்தங் ராஹுலே. புத்தபேமங் ,
ப⁴ந்தே, ச²விங் சி²ந்த³தி, ச²விங் செ²த்வா சம்மங் சி²ந்த³தி, சம்மங்
செ²த்வா மங்ஸங் சி²ந்த³தி, மங்ஸங் செ²த்வா ந்ஹாருங் சி²ந்த³தி, ந்ஹாருங்
செ²த்வா அட்டி²ங் சி²ந்த³தி, அட்டி²ங் செ²த்வா அட்டி²மிஞ்ஜங் ஆஹச்ச
திட்ட²தி. ஸாது⁴, ப⁴ந்தே, அய்யா அனநுஞ்ஞாதங் மாதாபிதூஹி புத்தங் ந
பப்³பா³ஜெய்யு’’ந்தி. அத² கோ² ப⁴க³வா ஸுத்³தோ⁴த³னங் ஸக்கங் த⁴ம்மியா கதா²ய
ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² ஸுத்³தோ⁴த³னோ
ஸக்கோ ப⁴க³வதா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ
ஸம்பஹங்ஸிதோ உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா
பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங்
கத்வா பி⁴க்கூ² ஆமந்தேஸி – ‘‘ந, பி⁴க்க²வே, அனநுஞ்ஞாதோ மாதாபிதூஹி புத்தோ
பப்³பா³ஜேதப்³போ³. யோ பப்³பா³ஜெய்ய, ஆபத்தி து³க்கடஸ்ஸா’’தி.

அத² கோ² ப⁴க³வா கபிலவத்து²ஸ்மிங் யதா²பி⁴ரந்தங்
விஹரித்வா யேன ஸாவத்தி² தேன சாரிகங் பக்காமி. அனுபுப்³பே³ன சாரிகங் சரமானோ
யேன ஸாவத்தி² தத³வஸரி. தத்ர ஸுத³ங் ப⁴க³வா ஸாவத்தி²யங் விஹரதி ஜேதவனே
அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மதோ
ஸாரிபுத்தஸ்ஸ உபட்டா²ககுலங் ஆயஸ்மதோ ஸாரிபுத்தஸ்ஸ ஸந்திகே தா³ரகங் பாஹேஸி –
‘‘இமங் தா³ரகங் தே²ரோ பப்³பா³ஜேதூ’’தி. அத² கோ² ஆயஸ்மதோ ஸாரிபுத்தஸ்ஸ
ஏதத³ஹோஸி – ‘‘ப⁴க³வதா பஞ்ஞத்தங் ‘ந ஏகேன த்³வே ஸாமணேரா
உபட்டா²பேதப்³பா³’தி. அயஞ்ச மே ராஹுலோ ஸாமணேரோ. கத²ங் நு கோ² மயா
படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸி. அனுஜானாமி, பி⁴க்க²வே,
ப்³யத்தேன பி⁴க்கு²னா படிப³லேன ஏகேன த்³வே ஸாமணேரே உபட்டா²பேதுங், யாவதகே வா பன உஸ்ஸஹதி ஓவதி³துங் அனுஸாஸிதுங் தாவதகே உபட்டா²பேதுந்தி.

ராஹுலவத்து² நிட்டி²தங்.

42. ஸிக்கா²பத³கதா²

106.
அத² கோ² ஸாமணேரானங் ஏதத³ஹோஸி – ‘‘கதி நு கோ² அம்ஹாகங் ஸிக்கா²பதா³னி,
கத்த² ச அம்ஹேஹி ஸிக்கி²தப்³ப³’’ந்தி? ப⁴க³வதோ ஏதமத்த²ங் ஆரோசேஸுங்…பே॰…
அனுஜானாமி, பி⁴க்க²வே, ஸாமணேரானங் த³ஸ ஸிக்கா²பதா³னி, தேஸு ச ஸாமணேரேஹி
ஸிக்கி²துங் – பாணாதிபாதா வேரமணீ [வேரமணி, வேரமணிங் (க॰)],
அதி³ன்னாதா³னா வேரமணீ, அப்³ரஹ்மசரியா வேரமணீ, முஸாவாதா³ வேரமணீ,
ஸுராமேரயமஜ்ஜபமாத³ட்டா²னா வேரமணீ, விகாலபோ⁴ஜனா வேரமணீ,
நச்சகீ³தவாதி³தவிஸூகத³ஸ்ஸனா வேரமணீ,
மாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னா வேரமணீ ,
உச்சாஸயனமஹாஸயனா வேரமணீ, ஜாதரூபரஜதபடிக்³க³ஹணா வேரமணீ. அனுஜானாமி,
பி⁴க்க²வே, ஸாமணேரானங் இமானி த³ஸ ஸிக்கா²பதா³னி, இமேஸு ச ஸாமணேரேஹி
ஸிக்கி²துந்தி.

ஸிக்கா²பத³கதா² நிட்டி²தா.

43. த³ண்ட³கம்மவத்து²

107. தேன கோ² பன ஸமயேன ஸாமணேரா பி⁴க்கூ²ஸு அகா³ரவா அப்பதிஸ்ஸா
அஸபா⁴க³வுத்திகா விஹரந்தி. பி⁴க்கூ² உஜ்ஜா²யந்தி கி²ய்யந்தி விபாசெந்தி –
‘‘கத²ஞ்ஹி நாம ஸாமணேரா பி⁴க்கூ²ஸு அகா³ரவா அப்பதிஸ்ஸா அஸபா⁴க³வுத்திகா
விஹரிஸ்ஸந்தீ’’தி. ப⁴க³வதோ ஏதமத்த²ங் ஆரோசேஸுங்…பே॰… அனுஜானாமி, பி⁴க்க²வே,
பஞ்சஹங்கே³ஹி ஸமன்னாக³தஸ்ஸ ஸாமணேரஸ்ஸ த³ண்ட³கம்மங் காதுங். பி⁴க்கூ²னங்
அலாபா⁴ய பரிஸக்கதி, பி⁴க்கூ²னங் அனத்தா²ய பரிஸக்கதி, பி⁴க்கூ²னங் அவாஸாய
பரிஸக்கதி, பி⁴க்கூ² அக்கோஸதி பரிபா⁴ஸதி, பி⁴க்கூ² பி⁴க்கூ²ஹி பே⁴தே³தி –
அனுஜானாமி, பி⁴க்க²வே, இமேஹி பஞ்சஹங்கே³ஹி ஸமன்னாக³தஸ்ஸ ஸாமணேரஸ்ஸ
த³ண்ட³கம்மங் காதுந்தி.

அத² கோ² பி⁴க்கூ²னங் ஏதத³ஹோஸி –
‘‘கிங் நு கோ² த³ண்ட³கம்மங் காதப்³ப³’’ந்தி? ப⁴க³வதோ ஏதமத்த²ங் ஆரோசேஸுங்.
அனுஜானாமி, பி⁴க்க²வே, ஆவரணங் காதுந்தி.

தேன கோ² பன ஸமயேன பி⁴க்கூ² ஸாமணேரானங் ஸப்³ப³ங் ஸங்கா⁴ராமங் ஆவரணங் கரொந்தி. ஸாமணேரா ஆராமங் பவிஸிதுங் அலப⁴மானா பக்கமந்திபி ,
விப்³ப⁴மந்திபி, தித்தி²யேஸுபி ஸங்கமந்தி. ப⁴க³வதோ ஏதமத்த²ங் ஆரோசேஸுங்.
ந, பி⁴க்க²வே, ஸப்³போ³ ஸங்கா⁴ராமோ ஆவரணங் காதப்³போ³. யோ கரெய்ய, ஆபத்தி
து³க்கடஸ்ஸ. அனுஜானாமி, பி⁴க்க²வே, யத்த² வா வஸதி, யத்த² வா படிக்கமதி,
தத்த² ஆவரணங் காதுந்தி.

தேன கோ² பன ஸமயேன பி⁴க்கூ² ஸாமணேரானங் முக²த்³வாரிகங்
ஆஹாரங் ஆவரணங் கரொந்தி. மனுஸ்ஸா யாகு³பானம்பி ஸங்க⁴ப⁴த்தம்பி கரொந்தா
ஸாமணேரே ஏவங் வதெ³ந்தி – ‘‘ஏத², ப⁴ந்தே, யாகு³ங் பிவத²; ஏத², ப⁴ந்தே,
ப⁴த்தங் பு⁴ஞ்ஜதா²’’தி. ஸாமணேரா ஏவங் வதெ³ந்தி –
‘‘நாவுஸோ, லப்³பா⁴. பி⁴க்கூ²ஹி ஆவரணங் கத’’ந்தி. மனுஸ்ஸா உஜ்ஜா²யந்தி
கி²ய்யந்தி விபாசெந்தி – ‘‘கத²ஞ்ஹி நாம ப⁴த³ந்தா ஸாமணேரானங் முக²த்³வாரிகங்
ஆஹாரங் ஆவரணங் கரிஸ்ஸந்தீ’’தி. ப⁴க³வதோ ஏதமத்த²ங் ஆரோசேஸுங். ந,
பி⁴க்க²வே, முக²த்³வாரிகோ ஆஹாரோ ஆவரணங் காதப்³போ³. யோ கரெய்ய, ஆபத்தி
து³க்கடஸ்ஸாதி.

த³ண்ட³கம்மவத்து² நிட்டி²தங்.

44. அனாபுச்சா²வரணவத்து²

108. தேன கோ² பன ஸமயேன ச²ப்³ப³க்³கி³யா பி⁴க்கூ² உபஜ்ஜா²யே அனாபுச்சா² ஸாமணேரானங் ஆவரணங் கரொந்தி. உபஜ்ஜா²யா க³வேஸந்தி – கத²ங் [கஹங் (க॰)]
நு கோ² அம்ஹாகங் ஸாமணேரா ந தி³ஸ்ஸந்தீதி. பி⁴க்கூ² ஏவமாஹங்ஸு –
‘‘ச²ப்³ப³க்³கி³யேஹி, ஆவுஸோ, பி⁴க்கூ²ஹி ஆவரணங் கத’’ந்தி. உபஜ்ஜா²யா
உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா
பி⁴க்கூ² அம்ஹே அனாபுச்சா² அம்ஹாகங் ஸாமணேரானங் ஆவரணங் கரிஸ்ஸந்தீ’’தி.
ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, உபஜ்ஜா²யே அனாபுச்சா² ஆவரணங்
காதப்³ப³ங். யோ கரெய்ய, ஆபத்தி து³க்கடஸ்ஸாதி.

அனாபுச்சா²வரணவத்து² நிட்டி²தங்.

45. அபலாளனவத்து²

தேன கோ² பன ஸமயேன ச²ப்³ப³க்³கி³யா பி⁴க்கூ² தே²ரானங்
பி⁴க்கூ²னங் ஸாமணேரே அபலாளெந்தி. தே²ரா ஸாமங் த³ந்தகட்ட²ம்பி முகோ²த³கம்பி
க³ண்ஹந்தா கிலமந்தி . ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, அஞ்ஞஸ்ஸ பரிஸா அபலாளேதப்³பா³. யோ அபலாளெய்ய, ஆபத்தி து³க்கடஸ்ஸா தி.

அபலாளனவத்து² நிட்டி²தங்.

46. கண்டகஸாமணேரவத்து²

தேன கோ² பன ஸமயேன ஆயஸ்மதோ உபனந்த³ஸ்ஸ ஸக்யபுத்தஸ்ஸ கண்டகோ
நாம ஸாமணேரோ கண்டகிங் நாம பி⁴க்கு²னிங் தூ³ஸேஸி. பி⁴க்கூ² உஜ்ஜா²யந்தி
கி²ய்யந்தி விபாசெந்தி – ‘‘கத²ஞ்ஹி நாம ஸாமணேரோ ஏவரூபங் அனாசாரங்
ஆசரிஸ்ஸதீ’’தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
த³ஸஹங்கே³ஹி ஸமன்னாக³தங் ஸாமணேரங் நாஸேதுங். பாணாதிபாதீ ஹோதி,
அதி³ன்னாதா³யீ ஹோதி, அப்³ரஹ்மசாரீ ஹோதி, முஸாவாதீ³ ஹோதி, மஜ்ஜபாயீ ஹோதி,
பு³த்³த⁴ஸ்ஸ அவண்ணங் பா⁴ஸதி, த⁴ம்மஸ்ஸ அவண்ணங் பா⁴ஸதி, ஸங்க⁴ஸ்ஸ அவண்ணங்
பா⁴ஸதி, மிச்சா²தி³ட்டி²கோ ஹோதி, பி⁴க்கு²னிதூ³ஸகோ ஹோதி – அனுஜானாமி,
பி⁴க்க²வே, இமேஹி த³ஸஹங்கே³ஹி ஸமன்னாக³தங் ஸாமணேரங் நாஸேதுந்தி.

47. பண்ட³கவத்து²

109.
தேன கோ² பன ஸமயேன அஞ்ஞதரோ பண்ட³கோ பி⁴க்கூ²ஸு பப்³ப³ஜிதோ ஹோதி. ஸோ த³ஹரே
த³ஹரே பி⁴க்கூ² உபஸங்கமித்வா ஏவங் வதே³தி – ‘‘ஏத², மங் ஆயஸ்மந்தோ
தூ³ஸேதா²’’தி. பி⁴க்கூ² அபஸாதெ³ந்தி – ‘‘நஸ்ஸ, பண்ட³க, வினஸ்ஸ, பண்ட³க, கோ
தயா அத்தோ²’’தி. ஸோ பி⁴க்கூ²ஹி அபஸாதி³தோ மஹந்தே மஹந்தே மோளிக³ல்லே ஸாமணேரே
உபஸங்கமித்வா ஏவங் வதே³தி – ‘‘ஏத², மங் ஆவுஸோ தூ³ஸேதா²’’தி. ஸாமணேரா
அபஸாதெ³ந்தி – ‘‘நஸ்ஸ, பண்ட³க, வினஸ்ஸ, பண்ட³க, கோ தயா அத்தோ²’’தி. ஸோ
ஸாமணேரேஹி அபஸாதி³தோ ஹத்தி²ப⁴ண்டே³ அஸ்ஸப⁴ண்டே³ உபஸங்கமித்வா ஏவங் வதே³தி –
‘‘ஏத², மங், ஆவுஸோ , தூ³ஸேதா²’’தி. ஹத்தி²ப⁴ண்டா³ அஸ்ஸப⁴ண்டா³ தூ³ஸேஸுங். தே உஜ்ஜா²யந்தி கி²ய்யந்தி விபாசெந்தி – ‘‘பண்ட³கா
இமே ஸமணா ஸக்யபுத்தியா. யேபி இமேஸங் ந பண்ட³கா, தேபி இமே பண்ட³கே
தூ³ஸெந்தி. ஏவங் இமே ஸப்³பே³வ அப்³ரஹ்மசாரினோ’’தி. அஸ்ஸோஸுங் கோ² பி⁴க்கூ²
தேஸங் ஹத்தி²ப⁴ண்டா³னங் அஸ்ஸப⁴ண்டா³னங்
உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ
ஏதமத்த²ங் ஆரோசேஸுங். பண்ட³கோ, பி⁴க்க²வே, அனுபஸம்பன்னோ ந
உபஸம்பாதே³தப்³போ³, உபஸம்பன்னோ நாஸேதப்³போ³தி.

48. தெ²ய்யஸங்வாஸகவத்து²

110. தேன
கோ² பன ஸமயேன அஞ்ஞதரோ புராணகுலபுத்தோ கீ²ணகோலஞ்ஞோ ஸுகு²மாலோ ஹோதி. அத² கோ²
தஸ்ஸ புராணகுலபுத்தஸ்ஸ கீ²ணகோலஞ்ஞஸ்ஸ ஏதத³ஹோஸி – ‘‘அஹங் கோ² ஸுகு²மாலோ, ந
படிப³லோ அனதி⁴க³தங் வா போ⁴க³ங் அதி⁴க³ந்துங், அதி⁴க³தங் வா போ⁴க³ங் பா²திங்
காதுங். கேன நு கோ² அஹங் உபாயேன ஸுக²ஞ்ச ஜீவெய்யங், ந ச கிலமெய்ய’’ந்தி?
அத² கோ² தஸ்ஸ புராணகுலபுத்தஸ்ஸ கீ²ணகோலஞ்ஞஸ்ஸ ஏதத³ஹோஸி – ‘‘இமே கோ² ஸமணா
ஸக்யபுத்தியா ஸுக²ஸீலா ஸுக²ஸமாசாரா, ஸுபோ⁴ஜனானி பு⁴ஞ்ஜித்வா நிவாதேஸு
ஸயனேஸு ஸயந்தி. யங்னூனாஹங் ஸாமங் பத்தசீவரங் படியாதெ³த்வா கேஸமஸ்ஸுங்
ஓஹாரெத்வா காஸாயானி வத்தா²னி அச்சா²தெ³த்வா ஆராமங் க³ந்த்வா பி⁴க்கூ²ஹி
ஸத்³தி⁴ங் ஸங்வஸெய்ய’’ந்தி. அத² கோ² ஸோ புராணகுலபுத்தோ கீ²ணகோலஞ்ஞோ ஸாமங்
பத்தசீவரங் படியாதெ³த்வா கேஸமஸ்ஸுங் ஓஹாரெத்வா காஸாயானி வத்தா²னி
அச்சா²தெ³த்வா ஆராமங் க³ந்த்வா பி⁴க்கூ² அபி⁴வாதே³தி. பி⁴க்கூ² ஏவமாஹங்ஸு –
‘‘கதிவஸ்ஸோஸி த்வங், ஆவுஸோ’’தி? கிங் ஏதங், ஆவுஸோ, கதிவஸ்ஸோ நாமாதி? கோ பன
தே, ஆவுஸோ, உபஜ்ஜா²யோதி? கிங் ஏதங் , ஆவுஸோ,
உபஜ்ஜா²யோ நாமாதி? பி⁴க்கூ² ஆயஸ்மந்தங் உபாலிங் ஏதத³வோசுங் – ‘‘இங்கா⁴வுஸோ
உபாலி, இமங் பப்³ப³ஜிதங் அனுயுஞ்ஜாஹீ’’தி. அத² கோ² ஸோ புராணகுலபுத்தோ
கீ²ணகோலஞ்ஞோ ஆயஸ்மதா உபாலினா அனுயுஞ்ஜியமானோ ஏதமத்த²ங் ஆரோசேஸி. ஆயஸ்மா
உபாலி பி⁴க்கூ²னங் ஏதமத்த²ங் ஆரோசேஸி. பி⁴க்கூ² ப⁴க³வதோ ஏதமத்த²ங்
ஆரோசேஸுங். தெ²ய்யஸங்வாஸகோ, பி⁴க்க²வே, அனுபஸம்பன்னோ ந உபஸம்பாதே³தப்³போ³,
உபஸம்பன்னோ நாஸேதப்³போ³தி. தித்தி²யபக்கந்தகோ, பி⁴க்க²வே, அனுபஸம்பன்னோ ந
உபஸம்பாதே³தப்³போ³, உபஸம்பன்னோ நாஸேதப்³போ³தி.

49. திரச்சா²னக³தவத்து²

111. தேன கோ² பன ஸமயேன அஞ்ஞதரோ நாகோ³ நாக³யோனியா அட்டீயதி
ஹராயதி ஜிகு³ச்ச²தி. அத² கோ² தஸ்ஸ நாக³ஸ்ஸ ஏதத³ஹோஸி – ‘‘கேன நு கோ² அஹங்
உபாயேன நாக³யோனியா ச பரிமுச்செய்யங் கி²ப்பஞ்ச மனுஸ்ஸத்தங்
படிலபெ⁴ய்ய’’ந்தி. அத² கோ² தஸ்ஸ நாக³ஸ்ஸ ஏதத³ஹோஸி – ‘‘இமே கோ² ஸமணா
ஸக்யபுத்தியா த⁴ம்மசாரினோ ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ
கல்யாணத⁴ம்மா. ஸசே கோ² அஹங் ஸமணேஸு ஸக்யபுத்தியேஸு பப்³ப³ஜெய்யங், ஏவாஹங்
நாக³யோனியா ச பரிமுச்செய்யங், கி²ப்பஞ்ச மனுஸ்ஸத்தங் படிலபெ⁴ய்ய’’ந்தி. அத²
கோ² ஸோ நாகோ³ மாணவகவண்ணேன பி⁴க்கூ² உபஸங்கமித்வா பப்³ப³ஜ்ஜங் யாசி. தங்
பி⁴க்கூ² பப்³பா³ஜேஸுங், உபஸம்பாதே³ஸுங். தேன கோ² பன ஸமயேன ஸோ நாகோ³
அஞ்ஞதரேன பி⁴க்கு²னா ஸத்³தி⁴ங் பச்சந்திமே விஹாரே படிவஸதி. அத² கோ² ஸோ
பி⁴க்கு² ரத்தியா பச்சூஸஸமயங் பச்சுட்டா²ய அஜ்ஜோ²காஸே சங்கமதி. அத² கோ² ஸோ
நாகோ³ தஸ்ஸ பி⁴க்கு²னோ நிக்க²ந்தே விஸ்ஸட்டோ² நித்³த³ங் ஓக்கமி. ஸப்³போ³
விஹாரோ அஹினா புண்ணோ, வாதபானேஹி போ⁴கா³ நிக்க²ந்தா ஹொந்தி. அத² கோ² ஸோ
பி⁴க்கு² விஹாரங் பவிஸிஸ்ஸாமீதி கவாடங் பணாமெந்தோ அத்³த³ஸ ஸப்³ப³ங் விஹாரங்
அஹினா புண்ணங், வாதபானேஹி போ⁴கே³ நிக்க²ந்தே, தி³ஸ்வான பீ⁴தோ விஸ்ஸரமகாஸி.
பி⁴க்கூ² உபதா⁴வித்வா தங் பி⁴க்கு²ங் ஏதத³வோசுங் – ‘‘கிஸ்ஸ த்வங், ஆவுஸோ,
விஸ்ஸரமகாஸீ’’தி? ‘‘அயங், ஆவுஸோ, ஸப்³போ³ விஹாரோ அஹினா புண்ணோ, வாதபானேஹி
போ⁴கா³ நிக்க²ந்தா’’தி. அத² கோ² ஸோ நாகோ³ தேன ஸத்³தே³ன படிபு³ஜ்ஜி²த்வா ஸகே
ஆஸனே நிஸீதி³. பி⁴க்கூ² ஏவமாஹங்ஸு – ‘‘கோஸி த்வங், ஆவுஸோ’’தி? ‘‘அஹங்,
ப⁴ந்தே, நாகோ³’’தி. ‘‘கிஸ்ஸ பன த்வங், ஆவுஸோ, ஏவரூபங் அகாஸீ’’தி? அத² கோ²
ஸோ நாகோ³ பி⁴க்கூ²னங் ஏதமத்த²ங் ஆரோசேஸி. பி⁴க்கூ² ப⁴க³வதோ ஏதமத்த²ங்
ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே
பி⁴க்கு²ஸங்க⁴ங் ஸன்னிபாதாபெத்வா தங் நாக³ங் ஏதத³வோச – ‘‘தும்ஹே கொ²த்த²
நாகா³ அவிருள்ஹித⁴ம்மா இமஸ்மிங் த⁴ம்மவினயே. க³ச்ச² த்வங், நாக³, தத்தே²வ
சாதுத்³த³ஸே பன்னரஸே அட்ட²மியா ச பக்க²ஸ்ஸ உபோஸத²ங் உபவஸ, ஏவங் த்வங்
நாக³யோனியா ச பரிமுச்சிஸ்ஸஸி, கி²ப்பஞ்ச மனுஸ்ஸத்தங் படிலபி⁴ஸ்ஸஸீ’’தி. அத²
கோ² ஸோ நாகோ³ அவிருள்ஹித⁴ம்மோ கிராஹங் இமஸ்மிங் த⁴ம்மவினயேதி து³க்கீ²
து³ம்மனோ அஸ்ஸூனி பவத்தயமானோ விஸ்ஸரங் கத்வா பக்காமி. அத² கோ² ப⁴க³வா
பி⁴க்கூ² ஆமந்தேஸி – ‘‘த்³வேமே, பி⁴க்க²வே, பச்சயா நாக³ஸ்ஸ
ஸபா⁴வபாதுகம்மாய. யதா³ ச ஸஜாதியா மேது²னங் த⁴ம்மங் படிஸேவதி, யதா³ ச விஸ்ஸட்டோ² நித்³த³ங் ஓக்கமதி – இமே கோ², பி⁴க்க²வே, த்³வே பச்சயா நாக³ஸ்ஸ ஸபா⁴வபாதுகம்மாய . திரச்சா²னக³தோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’’தி.

50. மாதுகா⁴தகவத்து²

112. தேன கோ² பன ஸமயேன அஞ்ஞதரோ மாணவகோ மாதரங் ஜீவிதா வோரோபேஸி. ஸோ தேன பாபகேன கம்மேன அட்டீயதி ஹராயதி ஜிகு³ச்ச²தி .
அத² கோ² தஸ்ஸ மாணவகஸ்ஸ ஏதத³ஹோஸி – ‘‘கேன நு கோ² அஹங் உபாயேன இமஸ்ஸ பாபகஸ்ஸ
கம்மஸ்ஸ நிக்க²ந்திங் கரெய்ய’’ந்தி? அத² கோ² தஸ்ஸ மாணவகஸ்ஸ ஏதத³ஹோஸி –
‘‘இமே கோ² ஸமணா ஸக்யபுத்தியா த⁴ம்மசாரினோ ஸமசாரினோ
ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா. ஸசே கோ² அஹங் ஸமணேஸு
ஸக்யபுத்தியேஸு பப்³ப³ஜெய்யங், ஏவாஹங் இமஸ்ஸ பாபகஸ்ஸ கம்மஸ்ஸ நிக்க²ந்திங்
கரெய்ய’’ந்தி. அத² கோ² ஸோ மாணவகோ பி⁴க்கூ² உபஸங்கமித்வா பப்³ப³ஜ்ஜங் யாசி.
பி⁴க்கூ² ஆயஸ்மந்தங் உபாலிங் ஏதத³வோசுங் – ‘‘புப்³பே³பி கோ², ஆவுஸோ உபாலி,
நாகோ³ மாணவகவண்ணேன பி⁴க்கூ²ஸு பப்³ப³ஜிதோ. இங்கா⁴வுஸோ உபாலி, இமங் மாணவகங்
அனுயுஞ்ஜாஹீ’’தி. அத² கோ² ஸோ மாணவகோ ஆயஸ்மதா உபாலினா அனுயுஞ்ஜீயமானோ
ஏதமத்த²ங் ஆரோசேஸி. ஆயஸ்மா உபாலி பி⁴க்கூ²னங் ஏதமத்த²ங் ஆரோசேஸி. பி⁴க்கூ²
ப⁴க³வதோ ஏதமத்த²ங் ஆரோசேஸுங்…பே॰… மாதுகா⁴தகோ, பி⁴க்க²வே, அனுபஸம்பன்னோ ந
உபஸம்பாதே³தப்³போ³, உபஸம்பன்னோ நாஸேதப்³போ³தி.

51. பிதுகா⁴தகவத்து²

113. தேன
கோ² பன ஸமயேன அஞ்ஞதரோ மாணவகோ பிதரங் ஜீவிதா வோரோபேஸி. ஸோ தேன பாபகேன
கம்மேன அட்டீயதி ஹராயதி ஜிகு³ச்ச²தி. அத² கோ² தஸ்ஸ மாணவகஸ்ஸ ஏதத³ஹோஸி ‘‘கேன
நு கோ² அஹங் உபாயேன இமஸ்ஸ பாபகஸ்ஸ கம்மஸ்ஸ நிக்க²ந்திங் கரெய்ய’’ந்தி. அத²
கோ² தஸ்ஸ மாணவகஸ்ஸ ஏதத³ஹோஸி ‘‘இமே கோ² ஸமணா ஸக்யபுத்தியா த⁴ம்மசாரினோ
ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா, ஸசே கோ² அஹங்
ஸமணேஸு ஸக்யபுத்தியேஸு பப்³ப³ஜெய்யங், ஏவாஹங் இமஸ்ஸ பாபகஸ்ஸ கம்மஸ்ஸ
நிக்க²ந்திங் கரெய்ய’’ந்தி. அத² கோ² ஸோ மாணவகோ பி⁴க்கூ² உபஸங்கமித்வா
பப்³ப³ஜ்ஜங் யாசி. பி⁴க்கூ² ஆயஸ்மந்தங் உபாலிங் ஏதத³வோசுங் – ‘‘புப்³பே³பி
கோ², ஆவுஸோ உபாலி, நாகோ³ மாணவகவண்ணேன பி⁴க்கூ²ஸு பப்³ப³ஜிதோ, இங்கா⁴வுஸோ,
உபாலி, இமங் மாணவகங் அனுயுஞ்ஜாஹீ’’தி. அத² கோ² ஸோ மாணவகோ ஆயஸ்மதா உபாலினா
அனுயுஞ்ஜீயமானோ ஏதமத்த²ங் ஆரோசேஸி. ஆயஸ்மா உபாலி பி⁴க்கூ²னங் ஏதமத்த²ங்
ஆரோசேஸி. பி⁴க்கூ² ப⁴க³வதோ ஏதமத்த²ங் ஆரோசேஸுங். பிதுகா⁴தகோ, பி⁴க்க²வே,
அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³தி.

52. அரஹந்தகா⁴தகவத்து²

114. தேன
கோ² பன ஸமயேன ஸம்ப³ஹுலா பி⁴க்கூ² ஸாகேதா ஸாவத்தி²ங்
அத்³தா⁴னமக்³க³ப்படிபன்னா ஹொந்தி. அந்தராமக்³கே³ சோரா நிக்க²மித்வா ஏகச்சே
பி⁴க்கூ² அச்சி²ந்தி³ங்ஸு, ஏகச்சே பி⁴க்கூ² ஹனிங்ஸு. ஸாவத்தி²யா ராஜப⁴டா
நிக்க²மித்வா ஏகச்சே சோரே அக்³க³ஹேஸுங், ஏகச்சே சோரா பலாயிங்ஸு. யே தே பலாயிங்ஸு தே பி⁴க்கூ²ஸு பப்³ப³ஜிங்ஸு, யே தே க³ஹிதா தே வதா⁴ய ஓனிய்யந்தி . அத்³த³ஸங்ஸு கோ² தே பலாயித்வா பப்³ப³ஜிதா தே சோரே வதா⁴ய ஓனிய்யமானே, தி³ஸ்வான ஏவமாஹங்ஸு – ‘‘ஸாது⁴ கோ² மயங் பலாயிம்ஹா, ஸசா ச [ஸசே ச, ஸசஜ்ஜ (அட்ட²கதா²யங் பாட²ந்தரா)] மயங் க³ய்ஹெய்யாம [க³ண்ஹெய்யாம (க॰)], மயம்பி ஏவமேவ ஹஞ்ஞெய்யாமா’’தி .
பி⁴க்கூ² ஏவமாஹங்ஸு – ‘‘கிங் பன தும்ஹே, ஆவுஸோ, அகத்தா²’’தி? அத² கோ² தே
பப்³ப³ஜிதா பி⁴க்கூ²னங் ஏதமத்த²ங் ஆரோசேஸுங். பி⁴க்கூ² ப⁴க³வதோ ஏதமத்த²ங்
ஆரோசேஸுங். அரஹந்தோ ஏதே, பி⁴க்க²வே, பி⁴க்கூ². அரஹந்தகா⁴தகோ, பி⁴க்க²வே,
அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³தி.

53. பி⁴க்கு²னீதூ³ஸகவத்து²

115.
தேன கோ² பன ஸமயேன ஸம்ப³ஹுலா பி⁴க்கு²னியோ ஸாகேதா ஸாவத்தி²ங்
அத்³தா⁴னமக்³க³ப்படிபன்னா ஹொந்தி. அந்தராமக்³கே³ சோரா நிக்க²மித்வா ஏகச்சா
பி⁴க்கு²னியோ அச்சி²ந்தி³ங்ஸு, ஏகச்சா பி⁴க்கு²னியோ தூ³ஸேஸுங். ஸாவத்தி²யா
ராஜப⁴டா நிக்க²மித்வா ஏகச்சே சோரே அக்³க³ஹேஸுங், ஏகச்சே சோரா பலாயிங்ஸு. யே
தே பலாயிங்ஸு, தே பி⁴க்கூ²ஸு பப்³ப³ஜிங்ஸு. யே தே க³ஹிதா, தே வதா⁴ய
ஓனிய்யந்தி. அத்³த³ஸங்ஸு கோ² தே பலாயித்வா பப்³ப³ஜிதா தே சோரே வதா⁴ய
ஓனிய்யமானே, தி³ஸ்வான ஏவமாஹங்ஸு ‘‘ஸாது⁴ கோ² மயங் பலாயிம்ஹா, ஸசா ச மயங்
க³ய்ஹெய்யாம, மயம்பி ஏவமேவ ஹஞ்ஞெய்யாமா’’தி. பி⁴க்கூ² ஏவமாஹங்ஸு ‘‘கிங் பன
தும்ஹே, ஆவுஸோ, அகத்தா²’’தி. அத² கோ² தே பப்³ப³ஜிதா பி⁴க்கூ²னங் ஏதமத்த²ங்
ஆரோசேஸுங். பி⁴க்கூ² ப⁴க³வதோ ஏதமத்த²ங் ஆரோசேஸுங். பி⁴க்கு²னிதூ³ஸகோ,
பி⁴க்க²வே , அனுபஸம்பன்னோ ந உபஸம்பாதே³தப்³போ³,
உபஸம்பன்னோ நாஸேதப்³போ³தி. ஸங்க⁴பே⁴த³கோ, பி⁴க்க²வே, அனுபஸம்பன்னோ ந
உபஸம்பாதே³தப்³போ³, உபஸம்பன்னோ நாஸேதப்³போ³தி. லோஹிதுப்பாத³கோ, பி⁴க்க²வே,
அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³தி.

54. உப⁴தொப்³யஞ்ஜனகவத்து²

116. தேன
கோ² பன ஸமயேன அஞ்ஞதரோ உப⁴தொப்³யஞ்ஜனகோ பி⁴க்கூ²ஸு பப்³ப³ஜிதோ ஹோதி. ஸோ
கரோதிபி காராபேதிபி. ப⁴க³வதோ ஏதமத்த²ங் ஆரோசேஸுங். உப⁴தொப்³யஞ்ஜனகோ,
பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³தி.

55. அனுபஜ்ஜா²யகாதி³வத்தூ²னி

117. தேன
கோ² பன ஸமயேன பி⁴க்கூ² அனுபஜ்ஜா²யகங் உபஸம்பாதெ³ந்தி. ப⁴க³வதோ ஏதமத்த²ங்
ஆரோசேஸுங். ந, பி⁴க்க²வே, அனுபஜ்ஜா²யகோ உபஸம்பாதே³தப்³போ³. யோ
உபஸம்பாதெ³ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² ஸங்கே⁴ன உபஜ்ஜா²யேன
உபஸம்பாதெ³ந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, ஸங்கே⁴ன
உபஜ்ஜா²யேன உபஸம்பாதே³தப்³போ³. யோ உபஸம்பாதெ³ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² க³ணேன உபஜ்ஜா²யேன
உபஸம்பாதெ³ந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, க³ணேன
உபஜ்ஜா²யேன உபஸம்பாதே³தப்³போ³. யோ உபஸம்பாதெ³ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² பண்ட³குபஜ்ஜா²யேன
உபஸம்பாதெ³ந்தி…பே॰… தெ²ய்யஸங்வாஸகுபஜ்ஜா²யேன உபஸம்பாதெ³ந்தி…பே॰…
தித்தி²யபக்கந்தகுபஜ்ஜா²யேன உபஸம்பாதெ³ந்தி …பே॰… திரச்சா²னக³துபஜ்ஜா²யேன
உபஸம்பாதெ³ந்தி…பே॰… மாதுகா⁴தகுபஜ்ஜா²யேன உபஸம்பாதெ³ந்தி…பே॰…
பிதுகா⁴தகுபஜ்ஜா²யேன உபஸம்பாதெ³ந்தி…பே॰… அரஹந்தகா⁴தகுபஜ்ஜா²யேன
உபஸம்பாதெ³ந்தி…பே॰… பி⁴க்கு²னிதூ³ஸகுபஜ்ஜா²யேன உபஸம்பாதெ³ந்தி…பே॰…
ஸங்க⁴பே⁴த³குபஜ்ஜா²யேன உபஸம்பாதெ³ந்தி…பே॰… லோஹிதுப்பாத³குபஜ்ஜா²யேன
உபஸம்பாதெ³ந்தி…பே॰… உப⁴தொப்³யஞ்ஜனகுபஜ்ஜா²யேன உபஸம்பாதெ³ந்தி ப⁴க³வதோ
ஏதமத்த²ங் ஆரோசேஸுங். ந, பி⁴க்க²வே, பண்ட³குபஜ்ஜா²யேன
உபஸம்பாதே³தப்³போ³…பே॰… ந, பி⁴க்க²வே, தெ²ய்யஸங்வாஸகுபஜ்ஜா²யேன
உபஸம்பாதே³தப்³போ³…பே॰… ந, பி⁴க்க²வே, தித்தி²யபக்கந்தகுபஜ்ஜா²யேன
உபஸம்பாதே³தப்³போ³…பே॰… ந, பி⁴க்க²வே, திரச்சா²னக³துபஜ்ஜா²யேன
உபஸம்பாதே³தப்³போ³…பே॰… ந, பி⁴க்க²வே, மாதுகா⁴தகுபஜ்ஜா²யேன
உபஸம்பாதே³தப்³போ³ …பே॰… ந, பி⁴க்க²வே, பிதுகா⁴தகுபஜ்ஜா²யேன
உபஸம்பாதே³தப்³போ³…பே॰… ந, பி⁴க்க²வே, அரஹந்தகா⁴தகுபஜ்ஜா²யேன
உபஸம்பாதே³தப்³போ³…பே॰… ந, பி⁴க்க²வே, பி⁴க்கு²னிதூ³ஸகுபஜ்ஜா²யேன
உபஸம்பாதே³தப்³போ³ …பே॰… ந, பி⁴க்க²வே,
ஸங்க⁴பே⁴த³குபஜ்ஜா²யேன உபஸம்பாதே³தப்³போ³…பே॰… ந, பி⁴க்க²வே,
லோஹிதுப்பாத³குபஜ்ஜா²யேன உபஸம்பாதே³தப்³போ³…பே॰… ந, பி⁴க்க²வே,
உப⁴தொப்³யஞ்ஜனகுபஜ்ஜா²யேன உபஸம்பாதே³தப்³போ³. யோ உபஸம்பாதெ³ய்ய, ஆபத்தி
து³க்கடஸ்ஸாதி.

56. அபத்தகாதி³வத்து²

118. தேன
கோ² பன ஸமயேன பி⁴க்கூ² அபத்தகங் உபஸம்பாதெ³ந்தி. ஹத்தே²ஸு பிண்டா³ய
சரந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி
தித்தி²யாதி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, அபத்தகோ
உபஸம்பாதே³தப்³போ³. யோ உபஸம்பாதெ³ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² அசீவரகங் உபஸம்பாதெ³ந்தி .
நக்³கா³ பிண்டா³ய சரந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி –
ஸெய்யதா²பி தித்தி²யாதி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே,
அசீவரகோ உபஸம்பாதே³தப்³போ³. யோ உபஸம்பாதெ³ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² அபத்தசீவரகங்
உபஸம்பாதெ³ந்தி. நக்³கா³ ஹத்தே²ஸு பிண்டா³ய சரந்தி. மனுஸ்ஸா உஜ்ஜா²யந்தி
கி²ய்யந்தி விபாசெந்தி – ஸெய்யதா²பி தித்தி²யாதி. ப⁴க³வதோ ஏதமத்த²ங்
ஆரோசேஸுங். ந, பி⁴க்க²வே, அபத்தசீவரகோ உபஸம்பாதே³தப்³போ³. யோ
உபஸம்பாதெ³ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² யாசிதகேன பத்தேன
உபஸம்பாதெ³ந்தி. உபஸம்பன்னே பத்தங் படிஹரந்தி. ஹத்தே²ஸு பிண்டா³ய சரந்தி.
மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி தித்தி²யாதி.
ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, யாசிதகேன பத்தேன
உபஸம்பாதே³தப்³போ³. யோ உபஸம்பாதெ³ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² யாசிதகேன சீவரேன
உபஸம்பாதெ³ந்தி. உபஸம்பன்னே சீவரங் படிஹரந்தி. நக்³கா³ பிண்டா³ய சரந்தி.
மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி தித்தி²யாதி.
ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, யாசிதகேன சீவரேன
உபஸம்பாதே³தப்³போ³. யோ உபஸம்பாதெ³ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² யாசிதகேன பத்தசீவரேன உபஸம்பாதெ³ந்தி. உபஸம்பன்னே பத்தசீவரங் படிஹரந்தி. நக்³கா³ ஹத்தே²ஸு பிண்டா³ய சரந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி
– ஸெய்யதா²பி தித்தி²யாதி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே,
யாசிதகேன பத்தசீவரேன உபஸம்பாதே³தப்³போ³. யோ உபஸம்பாதெ³ய்ய, ஆபத்தி
து³க்கடஸ்ஸாதி.

நஉபஸம்பாதே³தப்³பே³கவீஸதிவாரோ நிட்டி²தோ.

57. நபப்³பா³ஜேதப்³ப³த்³வத்திங்ஸவாரோ

119.
தேன கோ² பன ஸமயேன பி⁴க்கூ² ஹத்த²ச்சி²ன்னங் பப்³பா³ஜெந்தி…பே॰…
பாத³ச்சி²ன்னங் பப்³பா³ஜெந்தி…பே॰… ஹத்த²பாத³ச்சி²ன்னங் பப்³பா³ஜெந்தி…பே॰…
கண்ணச்சி²ன்னங் பப்³பா³ஜெந்தி…பே॰… நாஸச்சி²ன்னங் பப்³பா³ஜெந்தி…பே॰…
கண்ணனாஸச்சி²ன்னங் பப்³பா³ஜெந்தி…பே॰… அங்கு³லிச்சி²ன்னங்
பப்³பா³ஜெந்தி…பே॰… அளச்சி²ன்னங் பப்³பா³ஜெந்தி…பே॰… கண்ட³ரச்சி²ன்னங்
பப்³பா³ஜெந்தி…பே॰… ப²ணஹத்த²கங் பப்³பா³ஜெந்தி…பே॰… கு²ஜ்ஜங்
பப்³பா³ஜெந்தி…பே॰… வாமனங் பப்³பா³ஜெந்தி…பே॰… க³லக³ண்டி³ங்
பப்³பா³ஜெந்தி…பே॰… லக்க²ணாஹதங் பப்³பா³ஜெந்தி…பே॰… கஸாஹதங்
பப்³பா³ஜெந்தி…பே॰… லிகி²தகங் பப்³பா³ஜெந்தி…பே॰… ஸீபதி³ங்
பப்³பா³ஜெந்தி…பே॰… பாபரோகி³ங் பப்³பா³ஜெந்தி…பே॰… பரிஸதூ³ஸகங்
பப்³பா³ஜெந்தி…பே॰… காணங் பப்³பா³ஜெந்தி…பே॰… குணிங் பப்³பா³ஜெந்தி…பே॰…
க²ஞ்ஜங் பப்³பா³ஜெந்தி…பே॰… பக்க²ஹதங் பப்³பா³ஜெந்தி…பே॰… சி²ன்னிரியாபத²ங்
பப்³பா³ஜெந்தி…பே॰… ஜராது³ப்³ப³லங் பப்³பா³ஜெந்தி…பே॰… அந்த⁴ங்
பப்³பா³ஜெந்தி…பே॰… மூக³ங் பப்³பா³ஜெந்தி…பே॰… ப³தி⁴ரங் பப்³பா³ஜெந்தி…பே॰…
அந்த⁴மூக³ங் பப்³பா³ஜெந்தி…பே॰… அந்த⁴ப³தி⁴ரங் பப்³பா³ஜெந்தி…பே॰…
மூக³ப³தி⁴ரங் பப்³பா³ஜெந்தி…பே॰… அந்த⁴மூக³ப³தி⁴ரங் பப்³பா³ஜெந்தி. ப⁴க³வதோ
ஏதமத்த²ங் ஆரோசேஸுங்…பே॰… ந, பி⁴க்க²வே, ஹத்த²ச்சி²ன்னோ
பப்³பா³ஜேதப்³போ³…பே॰… ந, பி⁴க்க²வே, பாத³ச்சி²ன்னோ பப்³பா³ஜேதப்³போ³…பே॰…
ந, பி⁴க்க²வே, ஹத்த²பாத³ச்சி²ன்னோ பப்³பா³ஜேதப்³போ³…பே॰… ந, பி⁴க்க²வே,
கண்ணச்சி²ன்னோ பப்³பா³ஜேதப்³போ³…பே॰… ந, பி⁴க்க²வே, நாஸச்சி²ன்னோ
பப்³பா³ஜேதப்³போ³…பே॰… ந, பி⁴க்க²வே, கண்ணனாஸச்சி²ன்னோ
பப்³பா³ஜேதப்³போ³…பே॰… ந, பி⁴க்க²வே, அங்கு³லிச்சி²ன்னோ
பப்³பா³ஜேதப்³போ³…பே॰… ந, பி⁴க்க²வே, அளச்சி²ன்னோ பப்³பா³ஜேதப்³போ³…பே॰… ந,
பி⁴க்க²வே, கண்ட³ரச்சி²ன்னோ பப்³பா³ஜேதப்³போ³…பே॰… ந, பி⁴க்க²வே,
ப²ணஹத்த²கோ பப்³பா³ஜேதப்³போ³…பே॰… ந, பி⁴க்க²வே, கு²ஜ்ஜோ
பப்³பா³ஜேதப்³போ³…பே॰… ந, பி⁴க்க²வே, வாமனோ பப்³பா³ஜேதப்³போ³…பே॰… ந,
பி⁴க்க²வே, க³லக³ண்டீ³ பப்³பா³ஜேதப்³போ³…பே॰… ந, பி⁴க்க²வே, லக்க²ணாஹதோ
பப்³பா³ஜேதப்³போ³…பே॰… ந, பி⁴க்க²வே, கஸாஹதோ பப்³பா³ஜேதப்³போ³…பே॰… ந,
பி⁴க்க²வே, லிகி²தகோ பப்³பா³ஜேதப்³போ³…பே॰… ந, பி⁴க்க²வே, ஸீபதீ³
பப்³பா³ஜேதப்³போ³…பே॰… ந, பி⁴க்க²வே, பாபரோகீ³ பப்³பா³ஜேதப்³போ³…பே॰… ந,
பி⁴க்க²வே, பரிஸதூ³ஸகோ பப்³பா³ஜேதப்³போ³…பே॰… ந, பி⁴க்க²வே, காணோ
பப்³பா³ஜேதப்³போ³…பே॰… ந , பி⁴க்க²வே, குணீ
பப்³பா³ஜேதப்³போ³…பே॰… ந, பி⁴க்க²வே, க²ஞ்ஜோ பப்³பா³ஜேதப்³போ³…பே॰… ந,
பி⁴க்க²வே, பக்க²ஹதோ பப்³பா³ஜேதப்³போ³…பே॰… ந, பி⁴க்க²வே, சி²ன்னிரியாபதோ²
பப்³பா³ஜேதப்³போ³…பே॰… ந, பி⁴க்க²வே, ஜராது³ப்³ப³லோ பப்³பா³ஜேதப்³போ³…பே॰…
ந, பி⁴க்க²வே, அந்தோ⁴ பப்³பா³ஜேதப்³போ³…பே॰… ந, பி⁴க்க²வே, மூகோ³
பப்³பா³ஜேதப்³போ³…பே॰… ந, பி⁴க்க²வே, ப³தி⁴ரோ பப்³பா³ஜேதப்³போ³…பே॰… ந,
பி⁴க்க²வே, அந்த⁴மூகோ³ பப்³பா³ஜேதப்³போ³…பே॰… ந, பி⁴க்க²வே, அந்த⁴ப³தி⁴ரோ
பப்³பா³ஜேதப்³போ³…பே॰… ந, பி⁴க்க²வே, மூக³ப³தி⁴ரோ பப்³பா³ஜேதப்³போ³…பே॰… ந,
பி⁴க்க²வே, அந்த⁴மூக³ப³தி⁴ரோ பப்³பா³ஜேதப்³போ³. யோ பப்³பா³ஜெய்ய, ஆபத்தி
து³க்கடஸ்ஸாதி.

நபப்³பா³ஜேதப்³ப³த்³வத்திங்ஸவாரோ நிட்டி²தோ.

தா³யஜ்ஜபா⁴ணவாரோ நிட்டி²தோ நவமோ.

58. அலஜ்ஜீனிஸ்ஸயவத்தூ²னி

120. தேன கோ² பன ஸமயேன ச²ப்³ப³க்³கி³யா பி⁴க்கூ² அலஜ்ஜீனங் நிஸ்ஸயங் தெ³ந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, அலஜ்ஜீனங் நிஸ்ஸயோ தா³தப்³போ³. யோ த³தெ³ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² அலஜ்ஜீனங் நிஸ்ஸாய வஸந்தி.
தேபி நசிரஸ்ஸேவ அலஜ்ஜினோ ஹொந்தி பாபகாபி⁴க்கூ². ப⁴க³வதோ ஏதமத்த²ங்
ஆரோசேஸுங். ந, பி⁴க்க²வே, அலஜ்ஜீனங் நிஸ்ஸாய வத்த²ப்³ப³ங். யோ வஸெய்ய,
ஆபத்தி து³க்கடஸ்ஸாதி.

அத² கோ² பி⁴க்கூ²னங் ஏதத³ஹோஸி – ‘‘ப⁴க³வதா பஞ்ஞத்தங்
‘ந அலஜ்ஜீனங் நிஸ்ஸயோ தா³தப்³போ³, ந அலஜ்ஜீனங் நிஸ்ஸாய வத்த²ப்³ப³’ந்தி.
கத²ங் நு கோ² மயங் ஜானெய்யாம லஜ்ஜிங் வா அலஜ்ஜிங் வா’’தி? ப⁴க³வதோ
ஏதமத்த²ங் ஆரோசேஸுங். அனுஜானாமி, பி⁴க்க²வே, சதூஹபஞ்சாஹங் ஆக³மேதுங் யாவ
பி⁴க்கு²ஸபா⁴க³தங் ஜானாமீதி.

59. க³மிகாதி³னிஸ்ஸயவத்தூ²னி

121. தேன
கோ² பன ஸமயேன அஞ்ஞதரோ பி⁴க்கு² கோஸலேஸு ஜனபதே³ அத்³தா⁴னமக்³க³ப்படிபன்னோ
ஹோதி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தங் ‘ந
அனிஸ்ஸிதேன வத்த²ப்³ப³’ந்தி. அஹஞ்சம்ஹி
நிஸ்ஸயகரணீயோ அத்³தா⁴னமக்³க³ப்படிபன்னோ, கத²ங் நு கோ² மயா
படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
அத்³தா⁴னமக்³க³ப்படிபன்னேன பி⁴க்கு²னா நிஸ்ஸயங் அலப⁴மானேன அனிஸ்ஸிதேன
வத்து²ந்தி.

தேன கோ² பன ஸமயேன த்³வே பி⁴க்கூ² கோஸலேஸு ஜனபதே³
அத்³தா⁴னமக்³க³ப்படிபன்னா ஹொந்தி. தே அஞ்ஞதரங் ஆவாஸங் உபக³ச்சி²ங்ஸு. தத்த²
ஏகோ பி⁴க்கு² கி³லானோ ஹோதி. அத² கோ² தஸ்ஸ கி³லானஸ்ஸ பி⁴க்கு²னோ ஏதத³ஹோஸி
– ‘‘ப⁴க³வதா பஞ்ஞத்தங் ‘ந அனிஸ்ஸிதேன வத்த²ப்³ப³’ந்தி. அஹஞ்சம்ஹி
நிஸ்ஸயகரணீயோ கி³லானோ, கத²ங் நு கோ² மயா படிபஜ்ஜிதப்³ப³’’ந்தி? ப⁴க³வதோ
ஏதமத்த²ங் ஆரோசேஸுங். அனுஜானாமி, பி⁴க்க²வே, கி³லானேன பி⁴க்கு²னா நிஸ்ஸயங்
அலப⁴மானேன அனிஸ்ஸிதேன வத்து²ந்தி.

அத² கோ² தஸ்ஸ கி³லானுபட்டா²கஸ்ஸ பி⁴க்கு²னோ ஏதத³ஹோஸி –
‘‘ப⁴க³வதா பஞ்ஞத்தங் ‘ந அனிஸ்ஸிதேன வத்த²ப்³ப³’ந்தி. அஹஞ்சம்ஹி
நிஸ்ஸயகரணீயோ, அயஞ்ச பி⁴க்கு² கி³லானோ, கத²ங் நு கோ² மயா
படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
கி³லானுபட்டா²கேன பி⁴க்கு²னா நிஸ்ஸயங் அலப⁴மானேன யாசியமானேன அனிஸ்ஸிதேன
வத்து²ந்தி.

தேன கோ² பன ஸமயேன அஞ்ஞதரோ பி⁴க்கு² அரஞ்ஞே விஹரதி.
தஸ்ஸ ச தஸ்மிங் ஸேனாஸனே பா²ஸு ஹோதி. அத² கோ² தஸ்ஸ பி⁴க்கு²னோ ஏதத³ஹோஸி –
‘‘ப⁴க³வதா பஞ்ஞத்தங் ‘ந அனிஸ்ஸிதேன வத்த²ப்³ப³’ந்தி. அஹஞ்சம்ஹி
நிஸ்ஸயகரணீயோ அரஞ்ஞே விஹராமி, மய்ஹஞ்ச இமஸ்மிங் ஸேனாஸனே பா²ஸு ஹோதி, கத²ங்
நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி,
பி⁴க்க²வே, ஆரஞ்ஞிகேன பி⁴க்கு²னா பா²ஸுவிஹாரங் ஸல்லக்கெ²ந்தேன நிஸ்ஸயங்
அலப⁴மானேன அனிஸ்ஸிதேன வத்து²ங் – யதா³ பதிரூபோ நிஸ்ஸயதா³யகோ ஆக³ச்சி²ஸ்ஸதி,
ததா³ தஸ்ஸ நிஸ்ஸாய வஸிஸ்ஸாமீதி.

60. கொ³த்தேன அனுஸ்ஸாவனானுஜானநா

122. தேன
கோ² பன ஸமயேன ஆயஸ்மதோ மஹாகஸ்ஸபஸ்ஸ உபஸம்பதா³பெக்கோ² ஹோதி. அத² கோ² ஆயஸ்மா
மஹாகஸ்ஸபோ ஆயஸ்மதோ ஆனந்த³ஸ்ஸ ஸந்திகே தூ³தங் பாஹேஸி – ஆக³ச்ச²து ஆனந்தோ³
இமங் அனுஸ்ஸாவெஸ்ஸதூதி [அனுஸ்ஸாவெஸ்ஸதீதி (ஸ்யா॰)]. ஆயஸ்மா ஆனந்தோ³ ஏவமாஹ – ‘‘நாஹங் உஸ்ஸஹாமி தே²ரஸ்ஸ நாமங் க³ஹேதுங், க³ரு மே தே²ரோ’’தி . ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, கொ³த்தேனபி அனுஸ்ஸாவேதுந்தி.

61. த்³வேஉபஸம்பதா³பெக்கா²தி³வத்து²

123.
தேன கோ² பன ஸமயேன ஆயஸ்மதோ மஹாகஸ்ஸபஸ்ஸ த்³வே உபஸம்பதா³பெக்கா² ஹொந்தி. தே
விவத³ந்தி – அஹங் பட²மங் உபஸம்பஜ்ஜிஸ்ஸாமி, அஹங் பட²மங்
உபஸம்பஜ்ஜிஸ்ஸாமீதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
த்³வே ஏகானுஸ்ஸாவனே காதுந்தி.

தேன கோ² பன ஸமயேன ஸம்ப³ஹுலானங் தே²ரானங்
உபஸம்பதா³பெக்கா² ஹொந்தி. தே விவத³ந்தி – அஹங் பட²மங் உபஸம்பஜ்ஜிஸ்ஸாமி,
அஹங் பட²மங் உபஸம்பஜ்ஜிஸ்ஸாமீதி. தே²ரா ஏவமாஹங்ஸு – ‘‘ஹந்த³, மயங், ஆவுஸோ,
ஸப்³பே³வ ஏகானுஸ்ஸாவனே கரோமா’’தி. ப⁴க³வதோ ஏதமத்த²ங் ஆரோசேஸுங். அனுஜானாமி,
பி⁴க்க²வே, த்³வே தயோ ஏகானுஸ்ஸாவனே காதுங், தஞ்ச கோ² ஏகேன உபஜ்ஜா²யேன, ந
த்வேவ நானுபஜ்ஜா²யேனாதி.

62. க³ப்³ப⁴வீஸூபஸம்பதா³னுஜானநா

124.
தேன கோ² பன ஸமயேன ஆயஸ்மா குமாரகஸ்ஸபோ க³ப்³ப⁴வீஸோ உபஸம்பன்னோ அஹோஸி. அத²
கோ² ஆயஸ்மதோ குமாரகஸ்ஸபஸ்ஸ ஏதத³ஹோஸி – ‘‘ப⁴க³வதா பஞ்ஞத்தங் ‘ந ஊனவீஸதிவஸ்ஸோ
புக்³க³லோ உபஸம்பாதே³தப்³போ³’தி. அஹஞ்சம்ஹி க³ப்³ப⁴வீஸோ உபஸம்பன்னோ.
உபஸம்பன்னோ நு கொ²ம்ஹி, நனு கோ² உபஸம்பன்னோ’’தி? ப⁴க³வதோ ஏதமத்த²ங்
ஆரோசேஸுங். யங், பி⁴க்க²வே, மாதுகுச்சி²ஸ்மிங் பட²மங் சித்தங் உப்பன்னங்,
பட²மங் விஞ்ஞாணங் பாதுபூ⁴தங் , தது³பாதா³ய ஸாவஸ்ஸ ஜாதி. அனுஜானாமி, பி⁴க்க²வே, க³ப்³ப⁴வீஸங் உபஸம்பாதே³துந்தி.

63. உபஸம்பதா³விதி⁴

125. தேன
கோ² பன ஸமயேன உபஸம்பன்னா தி³ஸ்ஸந்தி குட்டி²காபி க³ண்டி³காபி கிலாஸிகாபி
ஸோஸிகாபி அபமாரிகாபி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே,
உபஸம்பாதெ³ந்தேன தேரஸ [தஸ்ஸ (க॰)] அந்தராயிகே
த⁴ம்மே புச்சி²துங். ஏவஞ்ச பன, பி⁴க்க²வே, புச்சி²தப்³போ³ – ‘‘ஸந்தி தே
ஏவரூபா ஆபா³தா⁴ – குட்ட²ங், க³ண்டோ³, கிலாஸோ, ஸோஸோ, அபமாரோ? மனுஸ்ஸோஸி ?
புரிஸோஸி? பு⁴ஜிஸ்ஸோஸி? அணணோஸி? நஸி ராஜப⁴டோ? அனுஞ்ஞாதோஸி மாதாபிதூஹி?
பரிபுண்ணவீஸதிவஸ்ஸோஸி? பரிபுண்ணங் தே பத்தசீவரங்? கிங்னாமோஸி? கோனாமோ தே
உபஜ்ஜா²யோ’’தி?

தேன கோ² பன ஸமயேன பி⁴க்கூ² அனநுஸிட்டே²
உபஸம்பதா³பெக்கே² அந்தராயிகே த⁴ம்மே புச்ச²ந்தி. உபஸம்பதா³பெக்கா²
வித்தா²யந்தி, மங்கூ ஹொந்தி, ந ஸக்கொந்தி விஸ்ஸஜ்ஜேதுங். ப⁴க³வதோ ஏதமத்த²ங்
ஆரோசேஸுங். அனுஜானாமி, பி⁴க்க²வே, பட²மங் அனுஸாஸித்வா பச்சா² அந்தராயிகே த⁴ம்மே புச்சி²துந்தி.

தத்தே²வ ஸங்க⁴மஜ்ஜே² அனுஸாஸந்தி. உபஸம்பதா³பெக்கா²
ததே²வ வித்தா²யந்தி, மங்கூ ஹொந்தி, ந ஸக்கொந்தி விஸ்ஸஜ்ஜேதுங். ப⁴க³வதோ
ஏதமத்த²ங் ஆரோசேஸுங். அனுஜானாமி, பி⁴க்க²வே, ஏகமந்தங் அனுஸாஸித்வா
ஸங்க⁴மஜ்ஜே² அந்தராயிகே த⁴ம்மே புச்சி²துங். ஏவஞ்ச பன, பி⁴க்க²வே,
அனுஸாஸிதப்³போ³ –

126. பட²மங் உபஜ்ஜ²ங் கா³ஹாபேதப்³போ³. உபஜ்ஜ²ங் கா³ஹாபெத்வா
பத்தசீவரங் ஆசிக்கி²தப்³ப³ங் – அயங் தே பத்தோ, அயங் ஸங்கா⁴டி, அயங்
உத்தராஸங்கோ³, அயங் அந்தரவாஸகோ. க³ச்ச², அமும்ஹி ஓகாஸே திட்டா²ஹீதி.

பா³லா அப்³யத்தா அனுஸாஸந்தி. து³ரனுஸிட்டா²
உபஸம்பதா³பெக்கா² வித்தா²யந்தி, மங்கூ ஹொந்தி, ந ஸக்கொந்தி விஸ்ஸஜ்ஜேதுங்.
ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, பா³லேன அப்³யத்தேன
அனுஸாஸிதப்³போ³. யோ அனுஸாஸெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே,
ப்³யத்தேன பி⁴க்கு²னா படிப³லேன அனுஸாஸிதுந்தி.

அஸம்மதா அனுஸாஸந்தி. ப⁴க³வதோ ஏதமத்த²ங் ஆரோசேஸுங். ந,
பி⁴க்க²வே, அஸம்மதேன அனுஸாஸிதப்³போ³. யோ அனுஸாஸெய்ய, ஆபத்தி து³க்கடஸ்ஸ.
அனுஜானாமி , பி⁴க்க²வே, ஸம்மதேன அனுஸாஸிதுங். ஏவஞ்ச பன, பி⁴க்க²வே, ஸம்மன்னிதப்³போ³ [ஸம்மனிதப்³போ³ (க॰)] – அத்தனா வா [அத்தனாவ (ஸ்யா॰)] அத்தானங் ஸம்மன்னிதப்³ப³ங், பரேன வா பரோ ஸம்மன்னிதப்³போ³.

கத²ஞ்ச அத்தனாவ அத்தானங்
ஸம்மன்னிதப்³ப³ங்? ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ இத்த²ன்னாமஸ்ஸ ஆயஸ்மதோ
உபஸம்பதா³பெக்கோ². யதி³ ஸங்க⁴ஸ்ஸ பத்தகல்லங், அஹங் இத்த²ன்னாமங்
அனுஸாஸெய்ய’’ந்தி. ஏவங் அத்தனாவ அத்தானங் ஸம்மன்னிதப்³ப³ங்.

கத²ஞ்ச பன பரேன பரோ ஸம்மன்னிதப்³போ³? ப்³யத்தேன
பி⁴க்கு²னா படிப³லேன ஸங்கோ⁴ ஞாபேதப்³போ³ – ‘‘ஸுணாது மே, ப⁴ந்தே, ஸங்கோ⁴.
இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ². யதி³ ஸங்க⁴ஸ்ஸ
பத்தகல்லங், இத்த²ன்னாமோ இத்த²ன்னாமங் அனுஸாஸெய்யா’’தி . ஏவங் பரேன பரோ ஸம்மன்னிதப்³போ³.

தேன ஸம்மதேன பி⁴க்கு²னா உபஸம்பதா³பெக்கோ² உபஸங்கமித்வா
ஏவமஸ்ஸ வசனீயோ – ‘‘ஸுணஸி, இத்த²ன்னாம, அயங் தே ஸச்சகாலோ பூ⁴தகாலோ. யங்
ஜாதங் தங் ஸங்க⁴மஜ்ஜே² புச்ச²ந்தே ஸந்தங் அத்தீ²தி வத்தப்³ப³ங், அஸந்தங்
நத்தீ²’’தி வத்தப்³ப³ங். மா கோ² வித்தா²யி, மா கோ² மங்கு அஹோஸி. ஏவங் தங்
புச்சி²ஸ்ஸந்தி – ‘‘ஸந்தி தே ஏவரூபா ஆபா³தா⁴ – குட்ட²ங், க³ண்டோ³, கிலாஸோ,
ஸோஸோ, அபமாரோ? மனுஸ்ஸோஸி? புரிஸோஸி? பு⁴ஜிஸ்ஸோஸி? அணணோஸி? நஸி ராஜப⁴டோ?
அனுஞ்ஞாதோஸி மாதாபிதூஹி? பரிபுண்ணவீஸதிவஸ்ஸோஸி? பரிபுண்ணங் தே பத்தசீவரங்?
கிங்னாமோஸி? கோனாமோ தே உபஜ்ஜா²யோ’’தி?

ஏகதோ ஆக³ச்ச²ந்தி. ந, பி⁴க்க²வே, ஏகதோ ஆக³ந்தப்³ப³ங்.
அனுஸாஸகேன பட²மதரங் ஆக³ந்த்வா ஸங்கோ⁴ ஞாபேதப்³போ³ – ‘‘ஸுணாது மே, ப⁴ந்தே,
ஸங்கோ⁴. இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ² . அனுஸிட்டோ² ஸோ மயா. யதி³ ஸங்க⁴ஸ்ஸ பத்தகல்லங், இத்த²ன்னாமோ ஆக³ச்செ²ய்யா’’தி. ஆக³ச்சா²ஹீதி வத்தப்³போ³.

ஏகங்ஸங் உத்தராஸங்க³ங் காராபெத்வா பி⁴க்கூ²னங் பாதே³
வந்தா³பெத்வா உக்குடிகங் நிஸீதா³பெத்வா அஞ்ஜலிங் பக்³க³ண்ஹாபெத்வா
உபஸம்பத³ங் யாசாபேதப்³போ³ – ‘‘ஸங்க⁴ங், ப⁴ந்தே, உபஸம்பத³ங் யாசாமி.
உல்லும்பது மங், ப⁴ந்தே, ஸங்கோ⁴ அனுகம்பங் உபாதா³ய. து³தியம்பி, ப⁴ந்தே,
ஸங்க⁴ங் உபஸம்பத³ங் யாசாமி. உல்லும்பது மங், ப⁴ந்தே, ஸங்கோ⁴ அனுகம்பங் உபாதா³ய. ததியம்பி, ப⁴ந்தே, ஸங்க⁴ங் உபஸம்பத³ங் யாசாமி. உல்லும்பது மங் , ப⁴ந்தே, ஸங்கோ⁴ அனுகம்பங் உபாதா³யா’’தி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ². யதி³
ஸங்க⁴ஸ்ஸ பத்தகல்லங், அஹங் இத்த²ன்னாமங் அந்தராயிகே த⁴ம்மே
புச்செ²ய்ய’’ந்தி? ஸுணஸி, இத்த²ன்னாம, அயங் தே ஸச்சகாலோ பூ⁴தகாலோ. யங்
ஜாதங் தங் புச்சா²மி. ஸந்தங் அத்தீ²தி வத்தப்³ப³ங், அஸந்தங் நத்தீ²தி
வத்தப்³ப³ங். ஸந்தி தே ஏவரூபா ஆபா³தா⁴ – குட்ட²ங் க³ண்டோ³ கிலேஸோ ஸோஸோ
அபமாரோ, மனுஸ்ஸோஸி, புரிஸோஸி, பு⁴ஜிஸ்ஸோஸி, அணணோஸி, நஸி ராஜப⁴டோ,
அனுஞ்ஞாதோஸி மாதாபிதூஹி, பரிபுண்ணவீஸதிவஸ்ஸோஸி, பரிபுண்ணங் தே பத்தசீவரங்,
கிங்னாமோஸி, கோனாமோ தே உபஜ்ஜா²யோதி? ப்³யத்தேன பி⁴க்கு²னா படிப³லேன ஸங்கோ⁴
ஞாபேதப்³போ³ –

127.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ
உபஸம்பதா³பெக்கோ², பரிஸுத்³தோ⁴ அந்தராயிகேஹி த⁴ம்மேஹி, பரிபுண்ணஸ்ஸ
பத்தசீவரங். இத்த²ன்னாமோ ஸங்க⁴ங் உபஸம்பத³ங் யாசதி இத்த²ன்னாமேன
உபஜ்ஜா²யேன. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் உபஸம்பாதெ³ய்ய
இத்த²ன்னாமேன உபஜ்ஜா²யேன. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ
இத்த²ன்னாமஸ்ஸ ஆயஸ்மதோ உபஸம்பதா³பெக்கோ², பரிஸுத்³தோ⁴ அந்தராயிகேஹி
த⁴ம்மேஹி, பரிபுண்ணஸ்ஸ பத்தசீவரங். இத்த²ன்னாமோ ஸங்க⁴ங் உபஸம்பத³ங் யாசதி
இத்த²ன்னாமேன உபஜ்ஜா²யேன. ஸங்கோ⁴ இத்த²ன்னாமங் உபஸம்பாதே³தி இத்த²ன்னாமேன
உபஜ்ஜா²யேன . யஸ்ஸாயஸ்மதோ க²மதி இத்த²ன்னாமஸ்ஸ உபஸம்பதா³ இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.

‘‘து³தியம்பி ஏதமத்த²ங் வதா³மி – ஸுணாது மே, ப⁴ந்தே,
ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ²,
பரிஸுத்³தோ⁴ அந்தராயிகேஹி த⁴ம்மேஹி, பரிபுண்ணஸ்ஸ பத்தசீவரங். இத்த²ன்னாமோ
ஸங்க⁴ங் உபஸம்பத³ங் யாசதி இத்த²ன்னாமேன உபஜ்ஜா²யேன. ஸங்கோ⁴ இத்த²ன்னாமங்
உபஸம்பாதே³தி இத்த²ன்னாமேன உபஜ்ஜா²யேன. யஸ்ஸாயஸ்மதோ க²மதி இத்த²ன்னாமஸ்ஸ
உபஸம்பதா³ இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ நக்க²மதி, ஸோ
பா⁴ஸெய்ய.

‘‘ததியம்பி ஏதமத்த²ங் வதா³மி –
ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ
உபஸம்பதா³பெக்கோ², பரிஸுத்³தோ⁴ அந்தராயிகேஹி த⁴ம்மேஹி, பரிபுண்ணஸ்ஸ
பத்தசீவரங். இத்த²ன்னாமோ ஸங்க⁴ங் உபஸம்பத³ங் யாசதி இத்த²ன்னாமேன
உபஜ்ஜா²யேன. ஸங்கோ⁴ இத்த²ன்னாமங் உபஸம்பாதே³தி இத்த²ன்னாமேன உபஜ்ஜா²யேன.
யஸ்ஸாயஸ்மதோ க²மதி இத்த²ன்னாமஸ்ஸ உபஸம்பதா³ இத்த²ன்னாமேன உபஜ்ஜா²யேன, ஸோ
துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.

‘‘உபஸம்பன்னோ ஸங்கே⁴ன இத்த²ன்னாமோ இத்த²ன்னாமேன உபஜ்ஜா²யேன. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.

உபஸம்பதா³கம்மங் நிட்டி²தங்.

64. சத்தாரோ நிஸ்ஸயா

128. தாவதே³வ சா²யா மேதப்³பா³, உதுப்பமாணங் ஆசிக்கி²தப்³ப³ங், தி³வஸபா⁴கோ³ ஆசிக்கி²தப்³போ³, ஸங்கீ³தி ஆசிக்கி²தப்³பா³ , சத்தாரோ நிஸ்ஸயா ஆசிக்கி²தப்³பா³ [ஆசிக்கி²தப்³பா³, சத்தாரி அகரணீயானி ஆசிக்கி²தப்³பா³னி. (க॰)] –

‘‘பிண்டி³யாலோபபோ⁴ஜனங் நிஸ்ஸாய பப்³ப³ஜ்ஜா. தத்த² தே
யாவஜீவங் உஸ்ஸாஹோ கரணீயோ. அதிரேகலாபோ⁴ – ஸங்க⁴ப⁴த்தங், உத்³தே³ஸப⁴த்தங்,
நிமந்தனங், ஸலாகப⁴த்தங், பக்கி²கங், உபோஸதி²கங், பாடிபதி³கங்.

‘‘பங்ஸுகூலசீவரங் நிஸ்ஸாய பப்³ப³ஜ்ஜா. தத்த² தே
யாவஜீவங் உஸ்ஸாஹோ கரணீயோ. அதிரேகலாபோ⁴ – கோ²மங், கப்பாஸிகங், கோஸெய்யங்,
கம்ப³லங், ஸாணங், ப⁴ங்க³ங்.

‘‘ருக்க²மூலஸேனாஸனங் நிஸ்ஸாய பப்³ப³ஜ்ஜா. தத்த² தே
யாவஜீவங் உஸ்ஸாஹோ கரணீயோ. அதிரேகலாபோ⁴ – விஹாரோ, அட்³ட⁴யோகோ³, பாஸாதோ³,
ஹம்மியங், கு³ஹா.

‘‘பூதிமுத்தபே⁴ஸஜ்ஜங் நிஸ்ஸாய பப்³ப³ஜ்ஜா. தத்த² தே
யாவஜீவங் உஸ்ஸாஹோ கரணீயோ. அதிரேகலாபோ⁴ – ஸப்பி, நவனீதங், தேலங், மது⁴,
பா²ணித’’ந்தி.

சத்தாரோ நிஸ்ஸயா நிட்டி²தா.

65. சத்தாரி அகரணீயானி

129. தேன
கோ² பன ஸமயேன பி⁴க்கூ² அஞ்ஞதரங் பி⁴க்கு²ங் உபஸம்பாதெ³த்வா ஏககங் ஓஹாய
பக்கமிங்ஸு. ஸோ பச்சா² ஏககோவ ஆக³ச்ச²ந்தோ அந்தராமக்³கே³ புராணது³தியிகாய
ஸமாக³ஞ்சி². ஸா ஏவமாஹ – ‘‘கிங்தா³னி பப்³ப³ஜிதோஸீ’’தி? ‘‘ஆம,
பப்³ப³ஜிதொம்ஹீ’’தி. ‘‘து³ல்லபோ⁴ கோ² பப்³ப³ஜிதானங் மேது²னோ த⁴ம்மோ; ஏஹி,
மேது²னங் த⁴ம்மங் படிஸேவா’’தி. ஸோ தஸ்ஸா மேது²னங் த⁴ம்மங்
படிஸேவித்வா சிரேன அக³மாஸி. பி⁴க்கூ² ஏவமாஹங்ஸு – ‘‘கிஸ்ஸ த்வங், ஆவுஸோ,
ஏவங் சிரங் அகாஸீ’’தி? அத² கோ² ஸோ பி⁴க்கு² பி⁴க்கூ²னங் ஏதமத்த²ங் ஆரோசேஸி.
பி⁴க்கூ² ப⁴க³வதோ ஏதமத்த²ங் ஆரோசேஸுங் . அனுஜானாமி, பி⁴க்க²வே, உபஸம்பாதெ³த்வா து³தியங் தா³துங், சத்தாரி ச அகரணீயானி ஆசிக்கி²துங் –

‘‘உபஸம்பன்னேன பி⁴க்கு²னா மேது²னோ த⁴ம்மோ ந
படிஸேவிதப்³போ³, அந்தமஸோ திரச்சா²னக³தாயபி. யோ பி⁴க்கு² மேது²னங் த⁴ம்மங்
படிஸேவதி, அஸ்ஸமணோ ஹோதி அஸக்யபுத்தியோ. ஸெய்யதா²பி நாம புரிஸோ ஸீஸச்சி²ன்னோ
அப⁴ப்³போ³ தேன ஸரீரப³ந்த⁴னேன ஜீவிதுங், ஏவமேவ பி⁴க்கு² மேது²னங் த⁴ம்மங்
படிஸேவித்வா அஸ்ஸமணோ ஹோதி அஸக்யபுத்தியோ. தங் தே யாவஜீவங் அகரணீயங்.

‘‘உபஸம்பன்னேன பி⁴க்கு²னா அதி³ன்னங் தெ²ய்யஸங்கா²தங் ந
ஆதா³தப்³ப³ங், அந்தமஸோ திணஸலாகங் உபாதா³ய. யோ பி⁴க்கு² பாத³ங் வா
பாதா³ரஹங் வா அதிரேகபாத³ங் வா அதி³ன்னங் தெ²ய்யஸங்கா²தங் ஆதி³யதி, அஸ்ஸமணோ
ஹோதி அஸக்யபுத்தியோ. ஸெய்யதா²பி நாம பண்டு³பலாஸோ ப³ந்த⁴னா பமுத்தோ
அப⁴ப்³போ³ ஹரிதத்தா²ய, ஏவமேவ பி⁴க்கு² பாத³ங் வா பாதா³ரஹங் வா அதிரேகபாத³ங்
வா அதி³ன்னங் தெ²ய்யஸங்கா²தங் ஆதி³யித்வா அஸ்ஸமணோ ஹோதி அஸக்யபுத்தியோ. தங்
தே யாவஜீவங் அகரணீயங்.

‘‘உபஸம்பன்னேன பி⁴க்கு²னா ஸஞ்சிச்ச பாணோ ஜீவிதா ந
வோரோபேதப்³போ³, அந்தமஸோ குந்த²கிபில்லிகங் உபாதா³ய. யோ பி⁴க்கு² ஸஞ்சிச்ச
மனுஸ்ஸவிக்³க³ஹங் ஜீவிதா வோரோபேதி, அந்தமஸோ க³ப்³ப⁴பாதனங் உபாதா³ய, அஸ்ஸமணோ
ஹோதி அஸக்யபுத்தியோ. ஸெய்யதா²பி நாம புது²ஸிலா த்³வேதா⁴ பி⁴ன்னா
அப்படிஸந்தி⁴கா ஹோதி, ஏவமேவ பி⁴க்கு² ஸஞ்சிச்ச மனுஸ்ஸவிக்³க³ஹங் ஜீவிதா
வோரோபெத்வா அஸ்ஸமணோ ஹோதி அஸக்யபுத்தியோ . தங் தே யாவஜீவங் அகரணீயங்.

‘‘உபஸம்பன்னேன பி⁴க்கு²னா
உத்தரிமனுஸ்ஸத⁴ம்மோ ந உல்லபிதப்³போ³, அந்தமஸோ ‘ஸுஞ்ஞாகா³ரே அபி⁴ரமாமீ’தி.
யோ பி⁴க்கு² பாபிச்சோ² இச்சா²பகதோ அஸந்தங் அபூ⁴தங் உத்தரிமனுஸ்ஸத⁴ம்மங்
உல்லபதி ஜா²னங் வா விமொக்க²ங் வா ஸமாதி⁴ங் வா ஸமாபத்திங் வா மக்³க³ங் வா
ப²லங் வா, அஸ்ஸமணோ ஹோதி அஸக்யபுத்தியோ. ஸெய்யதா²பி நாம தாலோ
மத்த²கச்சி²ன்னோ அப⁴ப்³போ³ புன விருள்ஹியா, ஏவமேவ பி⁴க்கு² பாபிச்சோ²
இச்சா²பகதோ அஸந்தங் அபூ⁴தங் உத்தரிமனுஸ்ஸத⁴ம்மங் உல்லபித்வா அஸ்ஸமணோ ஹோதி
அஸக்யபுத்தியோ. தங் தே யாவஜீவங் அகரணீய’’ந்தி.

சத்தாரி அகரணீயானி நிட்டி²தானி.

66. ஆபத்தியா அத³ஸ்ஸனே உக்கி²த்தகவத்தூ²னி

130. தேன
கோ² பன ஸமயேன அஞ்ஞதரோ பி⁴க்கு² ஆபத்தியா அத³ஸ்ஸனே உக்கி²த்தகோ விப்³ப⁴மி.
ஸோ புன பச்சாக³ந்த்வா பி⁴க்கூ² உபஸம்பத³ங் யாசி. ப⁴க³வதோ ஏதமத்த²ங்
ஆரோசேஸுங்.

இத⁴ பன, பி⁴க்க²வே, பி⁴க்கு² ஆபத்தியா அத³ஸ்ஸனே
உக்கி²த்தகோ விப்³ப⁴மதி. ஸோ புன பச்சாக³ந்த்வா பி⁴க்கூ² உபஸம்பத³ங் யாசதி.
ஸோ ஏவமஸ்ஸ வசனீயோ – ‘‘பஸ்ஸிஸ்ஸஸி தங் ஆபத்தி’’ந்தி? ஸசாஹங் பஸ்ஸிஸ்ஸாமீதி,
பப்³பா³ஜேதப்³போ³. ஸசாஹங் ந பஸ்ஸிஸ்ஸாமீதி, ந பப்³பா³ஜேதப்³போ³.
பப்³பா³ஜெத்வா வத்தப்³போ³ – ‘‘பஸ்ஸிஸ்ஸஸி தங் ஆபத்தி’’ந்தி? ஸசாஹங்
பஸ்ஸிஸ்ஸாமீதி, உபஸம்பாதே³தப்³போ³. ஸசாஹங் ந பஸ்ஸிஸ்ஸாமீதி, ந
உபஸம்பாதே³தப்³போ³. உபஸம்பாதெ³த்வா வத்தப்³போ³ – ‘‘பஸ்ஸிஸ்ஸஸி தங்
ஆபத்தி’’ந்தி? ஸசாஹங் பஸ்ஸிஸ்ஸாமீதி , ஓஸாரேதப்³போ³. ஸசாஹங் ந பஸ்ஸிஸ்ஸாமீதி, ந ஓஸாரேதப்³போ³. ஓஸாரெத்வா வத்தப்³போ³ – ‘‘பஸ்ஸஸி [பஸ்ஸாஹி (ஸீ॰)]
தங் ஆபத்தி’’ந்தி? ஸசே பஸ்ஸதி, இச்சேதங் குஸலங். நோ சே பஸ்ஸதி,
லப்³ப⁴மானாய ஸாமக்³கி³யா புன உக்கி²பிதப்³போ³. அலப்³ப⁴மானாய ஸாமக்³கி³யா
அனாபத்தி ஸம்போ⁴கே³ ஸங்வாஸே.

இத⁴ பன, பி⁴க்க²வே, பி⁴க்கு² ஆபத்தியா அப்படிகம்மே
உக்கி²த்தகோ விப்³ப⁴மதி. ஸோ புன பச்சாக³ந்த்வா பி⁴க்கூ² உபஸம்பத³ங் யாசதி.
ஸோ ஏவமஸ்ஸ வசனீயோ – ‘‘படிகரிஸ்ஸஸி தங் ஆபத்தி’’ந்தி? ஸசாஹங்
படிகரிஸ்ஸாமீதி, பப்³பா³ஜேதப்³போ³ . ஸசாஹங் ந படிகரிஸ்ஸாமீதி, ந பப்³பா³ஜேதப்³போ³. பப்³பா³ஜெத்வா வத்தப்³போ³ – ‘‘படிகரிஸ்ஸஸி
தங் ஆபத்தி’’ந்தி? ஸசாஹங் படிகரிஸ்ஸாமீதி, உபஸம்பாதே³தப்³போ³. ஸசாஹங் ந
படிகரிஸ்ஸாமீதி, ந உபஸம்பாதே³தப்³போ³. உபஸம்பாதெ³த்வா வத்தப்³போ³ –
‘‘படிகரிஸ்ஸஸி தங் ஆபத்தி’’ந்தி? ஸசாஹங் படிகரிஸ்ஸாமீதி, ஓஸாரேதப்³போ³.
ஸசாஹங் ந படிகரிஸ்ஸாமீதி, ந ஓஸாரேதப்³போ³. ஓஸாரெத்வா வத்தப்³போ³ –
‘‘படிகரோஹி தங் ஆபத்தி’’ந்தி. ஸசே படிகரோதி, இச்சேதங் குஸலங். நோ சே
படிகரோதி லப்³ப⁴மானாய ஸாமக்³கி³யா புன உக்கி²பிதப்³போ³. அலப்³ப⁴மானாய
ஸாமக்³கி³யா அனாபத்தி ஸம்போ⁴கே³ ஸங்வாஸே.

இத⁴ பன, பி⁴க்க²வே, பி⁴க்கு² பாபிகாய தி³ட்டி²யா
அப்படினிஸ்ஸக்³கே³ உக்கி²த்தகோ விப்³ப⁴மதி. ஸோ புன பச்சாக³ந்த்வா பி⁴க்கூ²
உபஸம்பத³ங் யாசதி. ஸோ ஏவமஸ்ஸ வசனீயோ – ‘‘படினிஸ்ஸஜ்ஜிஸ்ஸஸி தங் பாபிகங்
தி³ட்டி²’’ந்தி? ஸசாஹங் படினிஸ்ஸஜ்ஜிஸ்ஸாமீதி, பப்³பா³ஜேதப்³போ³. ஸசாஹங் ந
படினிஸ்ஸஜ்ஜிஸ்ஸாமீதி, ந பப்³பா³ஜேதப்³போ³. பப்³பா³ஜெத்வா வத்தப்³போ³ –
‘‘படினிஸ்ஸஜ்ஜிஸ்ஸஸி தங்
பாபிகங் தி³ட்டி²’’ந்தி? ஸசாஹங் படினிஸ்ஸஜ்ஜிஸ்ஸாமீதி, உபஸம்பாதே³தப்³போ³.
ஸசாஹங் ந படினிஸ்ஸஜ்ஜிஸ்ஸாமீதி, ந உபஸம்பாதே³தப்³போ³. உபஸம்பாதெ³த்வா
வத்தப்³போ³ – ‘‘படினிஸ்ஸஜ்ஜிஸ்ஸஸி தங் பாபிகங் தி³ட்டி²’’ந்தி? ஸசாஹங்
படினிஸ்ஸஜ்ஜிஸ்ஸாமீதி, ஓஸாரேதப்³போ³. ஸசாஹங் ந படினிஸ்ஸஜ்ஜிஸ்ஸாமீதி, ந
ஓஸாரேதப்³போ³. ஓஸாரெத்வா வத்தப்³போ³ – ‘‘படினிஸ்ஸஜ்ஜேஹி தங் பாபிகங்
தி³ட்டி²’’ந்தி. ஸசே படினிஸ்ஸஜ்ஜதி, இச்சேதங் குஸலங். நோ சே படினிஸ்ஸஜ்ஜதி,
லப்³ப⁴மானாய ஸாமக்³கி³யா புன உக்கி²பிதப்³போ³. அலப்³ப⁴மானாய ஸாமக்³கி³யா
அனாபத்தி ஸம்போ⁴கே³ ஸங்வாஸேதி.

மஹாக²ந்த⁴கோ பட²மோ.

67. தஸ்ஸுத்³தா³னங்

131.

வினயம்ஹி மஹத்தே²ஸு, பேஸலானங் ஸுகா²வஹே;

நிக்³க³ஹானஞ்ச பாபிச்சே², லஜ்ஜீனங் பக்³க³ஹேஸு ச.

ஸாஸனாதா⁴ரணே சேவ, ஸப்³ப³ஞ்ஞுஜினகோ³சரே;

அனஞ்ஞவிஸயே கே²மே, ஸுபஞ்ஞத்தே அஸங்ஸயே.

க²ந்த⁴கே வினயே சேவ, பரிவாரே ச மாதிகே;

யதா²த்த²காரீ குஸலோ, படிபஜ்ஜதி யோனிஸோ.

யோ க³வங் ந விஜானாதி, ந ஸோ ரக்க²தி கோ³க³ணங்;

ஏவங் ஸீலங் அஜானந்தோ, கிங் ஸோ ரக்கெ²ய்ய ஸங்வரங்.

பமுட்ட²ம்ஹி ச ஸுத்தந்தே, அபி⁴த⁴ம்மே ச தாவதே³;

வினயே அவினட்ட²ம்ஹி, புன திட்ட²தி ஸாஸனங்.

தஸ்மா ஸங்கா³ஹணாஹேதுங் [ஸங்கா³ஹனாஹேதுங் (க॰)], உத்³தா³னங் அனுபுப்³ப³ஸோ;

பவக்கா²மி யதா²ஞாயங், ஸுணாத² மம பா⁴ஸதோ.

வத்து² நிதா³னங் ஆபத்தி, நயா பெய்யாலமேவ ச;

து³க்கரங் தங் அஸேஸேதுங், நயதோ தங் விஜானதா²தி.

போ³தி⁴ ராஜாயதனஞ்ச, அஜபாலோ ஸஹம்பதி;

ப்³ரஹ்மா ஆளாரோ உத³கோ, பி⁴க்கு² ச உபகோ இஸி.

கொண்ட³ஞ்ஞோ வப்போ ப⁴த்³தி³யோ, மஹானாமோ ச அஸ்ஸஜி;

யஸோ சத்தாரோ பஞ்ஞாஸ, ஸப்³பே³ பேஸேஸி ஸோ தி³ஸா.

வத்து² மாரேஹி திங்ஸா ச, உருவேலங் தயோ ஜடீ;

அக்³யாகா³ரங் மஹாராஜா, ஸக்கோ ப்³ரஹ்மா ச கேவலா.

பங்ஸுகூலங் பொக்க²ரணீ, ஸிலா ச ககுதோ⁴ ஸிலா;

ஜம்பு³ அம்போ³ ச ஆமலோ, பாரிபுப்ப²ஞ்ச ஆஹரி.

பா²லியந்து உஜ்ஜலந்து, விஜ்ஜா²யந்து ச கஸ்ஸப;

நிமுஜ்ஜந்தி முகீ² மேகோ⁴, க³யா லட்டி² ச மாக³தோ⁴.

உபதிஸ்ஸோ கோலிதோ ச, அபி⁴ஞ்ஞாதா ச பப்³ப³ஜுங்;

து³ன்னிவத்தா² பணாமனா, கிஸோ லூகோ² ச ப்³ராஹ்மணோ.

அனாசாரங் ஆசரதி, உத³ரங் மாணவோ க³ணோ;

வஸ்ஸங் பா³லேஹி பக்கந்தோ, த³ஸ வஸ்ஸானி நிஸ்ஸயோ.

ந வத்தந்தி பணாமேதுங், பா³லா பஸ்ஸத்³தி⁴ பஞ்ச ச²;

யோ ஸோ அஞ்ஞோ ச நக்³கோ³ ச, அச்சி²ன்னஜடிலஸாகியோ.

மக³தே⁴ஸு பஞ்சாபா³தா⁴, ஏகோ ராஜா [ப⁴டோ சோரோ (ஸ்யா॰)] ச அங்கு³லி;

மாக³தோ⁴ ச அனுஞ்ஞாஸி, காரா லிகி² கஸாஹதோ.

லக்க²ணா இணா தா³ஸோ ச, ப⁴ண்டு³கோ உபாலி அஹி;

ஸத்³த⁴ங் குலங் கண்டகோ ச, ஆஹுந்த³ரிகமேவ ச.

வத்து²ம்ஹி தா³ரகோ ஸிக்கா², விஹரந்தி ச கிங் நு கோ²;

ஸப்³ப³ங் முக²ங் உபஜ்ஜா²யே, அபலாளன கண்டகோ.

பண்ட³கோ தெ²ய்யபக்கந்தோ, அஹி ச மாதரீ பிதா;

அரஹந்தபி⁴க்கு²னீபே⁴தா³, ருஹிரேன ச ப்³யஞ்ஜனங்.

அனுபஜ்ஜா²யஸங்கே⁴ன, க³ணபண்ட³கபத்தகோ;

அசீவரங் தது³ப⁴யங், யாசிதேனபி யே தயோ.

ஹத்தா² பாதா³ ஹத்த²பாதா³, கண்ணா நாஸா ததூ³ப⁴யங்;

அங்கு³லிஅளகண்ட³ரங், ப²ணங் கு²ஜ்ஜஞ்ச வாமனங்.

க³லக³ண்டீ³ லக்க²ணா சேவ, கஸா லிகி²தஸீபதீ³;

பாபபரிஸதூ³ஸீ ச, காணங் குணி ததே²வ ச.

க²ஞ்ஜங் பக்க²ஹதஞ்சேவ, ஸச்சி²ன்னஇரியாபத²ங்;

ஜராந்த⁴மூக³ப³தி⁴ரங், அந்த⁴மூக³ஞ்ச யங் தஹிங்.

அந்த⁴ப³தி⁴ரங் யங் வுத்தங், மூக³ப³தி⁴ரமேவ ச;

அந்த⁴மூக³ப³தி⁴ரஞ்ச, அலஜ்ஜீனஞ்ச நிஸ்ஸயங்.

வத்த²ப்³ப³ஞ்ச ததா²த்³தா⁴னங், யாசமானேன லக்க²ணா [பெக்க²னா (ஸப்³ப³த்த²)];

ஆக³ச்ச²து விவத³ந்தி, ஏகுபஜ்ஜா²யேன கஸ்ஸபோ.

தி³ஸ்ஸந்தி உபஸம்பன்னா, ஆபா³தே⁴ஹி ச பீளிதா;

அனநுஸிட்டா² வித்தெ²ந்தி, தத்தே²வ அனுஸாஸனா.

ஸங்கே⁴பி ச அதோ² பா³லா, அஸம்மதா ச ஏகதோ;

உல்லும்பதுபஸம்பதா³, நிஸ்ஸயோ ஏககோ தயோதி.

இமம்ஹி க²ந்த⁴கே வத்தூ²னி ஏகஸதஞ்ச த்³வாஸத்ததி.

மஹாக²ந்த⁴கோ நிட்டி²தோ.