ஸுத்தபிடக-Part-43-தமிழில் திரபிடக மூன்று தொகுப்புகள்TIPITAKA--43.4. ராஜவக்கோ-1. கடிகாரஸுத்தங்-from FREE ONLINE eNālāndā Research and
Practice UNIVERSITY through http://sarvajan.ambedkar.org
4. ராஜவக்கோ
1. கடிகாரஸுத்தங்
282. ஏவங்
மே ஸுதங் – ஏகங் ஸமயங் ப⁴க³வா கோஸலேஸு சாரிகங் சரதி மஹதா பி⁴க்கு²ஸங்கே⁴ன
ஸத்³தி⁴ங். அத² கோ² ப⁴க³வா மக்³கா³ ஓக்கம்ம அஞ்ஞதரஸ்மிங் பதே³ஸே ஸிதங்
பாத்வாகாஸி. அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘கோ நு கோ² ஹேது, கோ
பச்சயோ ப⁴க³வதோ ஸிதஸ்ஸ பாதுகம்மாய? ந அகாரணேன [ந அகாரணே (ஸீ॰)] ததா²க³தா ஸிதங் பாதுகரொந்தீ’’தி. அத² கோ² ஆயஸ்மா ஆனந்தோ³ ஏகங்ஸங் சீவரங் [உத்தராஸங்க³ (ஸ்யா॰ கங்॰)]
கத்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச – ‘‘கோ நு கோ²,
ப⁴ந்தே, ஹேது, கோ பச்சயோ ப⁴க³வதோ ஸிதஸ்ஸ பாதுகம்மாய? ந அகாரணேன ததா²க³தா
ஸிதங் பாதுகரொந்தீ’’தி. ‘‘பூ⁴தபுப்³ப³ங், ஆனந்த³, இமஸ்மிங் பதே³ஸே
வேக³ளிங்க³ங் [வேஹலிங்க³ங் (ஸீ॰), வேப⁴லிக³ங் (ஸ்யா॰ கங்॰), வேப⁴லிங்க³ங் (பீ॰)]
நாம கா³மனிக³மோ அஹோஸி இத்³தோ⁴ சேவ பீ²தோ ச ப³ஹுஜனோ ஆகிண்ணமனுஸ்ஸோ.
வேக³ளிங்க³ங் கோ², ஆனந்த³, கா³மனிக³மங் கஸ்ஸபோ ப⁴க³வா அரஹங்
ஸம்மாஸம்பு³த்³தோ⁴ உபனிஸ்ஸாய விஹாஸி. இத⁴ ஸுத³ங், ஆனந்த³, கஸ்ஸபஸ்ஸ ப⁴க³வதோ
அரஹதோ ஸம்மாஸம்பு³த்³த⁴ஸ்ஸ ஆராமோ அஹோஸி. இத⁴ ஸுத³ங், ஆனந்த³, கஸ்ஸபோ
ப⁴க³வா அரஹங் ஸம்மாஸம்பு³த்³தோ⁴ நிஸின்னகோ பி⁴க்கு²ஸங்க⁴ங் ஓவத³தீ’’தி. அத²
கோ² ஆயஸ்மா ஆனந்தோ³ சதுக்³கு³ணங் ஸங்கா⁴டிங்
பஞ்ஞபெத்வா ப⁴க³வந்தங் ஏதத³வோச – ‘‘தேன ஹி, ப⁴ந்தே, ப⁴க³வா நிஸீத³து எத்த².
அயங் பூ⁴மிபதே³ஸோ த்³வீஹி அரஹந்தேஹி ஸம்மாஸம்பு³த்³தே⁴ஹி பரிபு⁴த்தோ
ப⁴விஸ்ஸதீ’’தி. நிஸீதி³ ப⁴க³வா பஞ்ஞத்தே ஆஸனே. நிஸஜ்ஜ கோ² ப⁴க³வா
ஆயஸ்மந்தங் ஆனந்த³ங் ஆமந்தேஸி –
‘‘பூ⁴தபுப்³ப³ங், ஆனந்த³, இமஸ்மிங் பதே³ஸே
வேக³ளிங்க³ங் நாம கா³மனிக³மோ அஹோஸி இத்³தோ⁴ சேவ பீ²தோ ச ப³ஹுஜனோ
ஆகிண்ணமனுஸ்ஸோ. வேக³ளிங்க³ங் கோ², ஆனந்த³, கா³மனிக³மங் கஸ்ஸபோ ப⁴க³வா அரஹங்
ஸம்மாஸம்பு³த்³தோ⁴ உபனிஸ்ஸாய விஹாஸி. இத⁴ ஸுத³ங், ஆனந்த³, கஸ்ஸபஸ்ஸ
ப⁴க³வதோ அரஹதோ ஸம்மாஸம்பு³த்³த⁴ஸ்ஸ ஆராமோ அஹோஸி. இத⁴ ஸுத³ங், ஆனந்த³, கஸ்ஸபோ ப⁴க³வா அரஹங் ஸம்மாஸம்பு³த்³தோ⁴ நிஸின்னகோ பி⁴க்கு²ஸங்க⁴ங் ஓவத³தி.
283. ‘‘வேக³ளிங்கே³ கோ², ஆனந்த³, கா³மனிக³மே க⁴டிகாரோ [க⁴டீகாரோ (ஸீ॰ பீ॰)] நாம கும்ப⁴காரோ கஸ்ஸபஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ உபட்டா²கோ அஹோஸி
அக்³கு³பட்டா²கோ. க⁴டிகாரஸ்ஸ கோ², ஆனந்த³, கும்ப⁴காரஸ்ஸ ஜோதிபாலோ நாம
மாணவோ ஸஹாயோ அஹோஸி பியஸஹாயோ. அத² கோ², ஆனந்த³, க⁴டிகாரோ கும்ப⁴காரோ
ஜோதிபாலங் மாணவங் ஆமந்தேஸி – ‘ஆயாம, ஸம்ம ஜோதிபால, கஸ்ஸபங் ப⁴க³வந்தங்
அரஹந்தங் ஸம்மாஸம்பு³த்³த⁴ங் த³ஸ்ஸனாய உபஸங்கமிஸ்ஸாம. ஸாது⁴ஸம்மதஞ்ஹி மே
தஸ்ஸ ப⁴க³வதோ த³ஸ்ஸனங் அரஹதோ ஸம்மாஸம்பு³த்³த⁴ஸ்ஸா’தி. ஏவங் வுத்தே,
ஆனந்த³, ஜோதிபாலோ மாணவோ க⁴டிகாரங் கும்ப⁴காரங் ஏதத³வோச – ‘அலங், ஸம்ம
க⁴டிகார. கிங் பன தேன முண்ட³கேன ஸமணகேன
தி³ட்டே²னா’தி? து³தியம்பி கோ², ஆனந்த³…பே॰… ததியம்பி கோ², ஆனந்த³,
க⁴டிகாரோ கும்ப⁴காரோ ஜோதிபாலங் மாணவங் ஏதத³வோச – ‘ஆயாம, ஸம்ம ஜோதிபால,
கஸ்ஸபங் ப⁴க³வந்தங் அரஹந்தங் ஸம்மாஸம்பு³த்³த⁴ங் த³ஸ்ஸனாய உபஸங்கமிஸ்ஸாம.
ஸாது⁴ஸம்மதஞ்ஹி மே தஸ்ஸ ப⁴க³வதோ த³ஸ்ஸனங் அரஹதோ ஸம்மாஸம்பு³த்³த⁴ஸ்ஸா’தி.
ததியம்பி கோ², ஆனந்த³, ஜோதிபாலோ மாணவோ க⁴டிகாரங் கும்ப⁴காரங் ஏதத³வோச –
‘அலங், ஸம்ம க⁴டிகார. கிங் பன தேன முண்ட³கேன ஸமணகேன தி³ட்டே²னா’தி? ‘தேன
ஹி, ஸம்ம ஜோதிபால, ஸொத்திஸினானிங் [ஸொத்திங் ஸினானிங் (ஸீ॰ பீ॰), ஸொத்திஸினானங் (ஸ்யா॰ கங்॰ க॰)] ஆதா³ய [ஆஹர (க॰)]
நதி³ங் க³மிஸ்ஸாம ஸினாயிது’ந்தி. ‘ஏவங் ஸம்மா’தி கோ², ஆனந்த³, ஜோதிபாலோ
மாணவோ க⁴டிகாரஸ்ஸ கும்ப⁴காரஸ்ஸ பச்சஸ்ஸோஸி. அத² கோ², ஆனந்த³, க⁴டிகாரோ ச
கும்ப⁴காரோ ஜோதிபாலோ ச மாணவோ ஸொத்திஸினானிங் ஆதா³ய நதி³ங் அக³மங்ஸு
ஸினாயிதுங்’.
284.
‘‘அத² கோ², ஆனந்த³, க⁴டிகாரோ கும்ப⁴காரோ ஜோதிபாலங் மாணவங் ஆமந்தேஸி –
‘அயங், ஸம்ம ஜோதிபால, கஸ்ஸபஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ அவிதூ³ரே
ஆராமோ. ஆயாம, ஸம்ம ஜோதிபால, கஸ்ஸபங் ப⁴க³வந்தங் அரஹந்தங்
ஸம்மாஸம்பு³த்³த⁴ங் த³ஸ்ஸனாய உபஸங்கமிஸ்ஸாம. ஸாது⁴ஸம்மதஞ்ஹி மே தஸ்ஸ
ப⁴க³வதோ த³ஸ்ஸனங் அரஹதோ ஸம்மாஸம்பு³த்³த⁴ஸ்ஸா’தி. ஏவங் வுத்தே, ஆனந்த³,
ஜோதிபாலோ மாணவோ க⁴டிகாரங் கும்ப⁴காரங் ஏதத³வோச – ‘அலங், ஸம்ம க⁴டிகார. கிங்
பன தேன முண்ட³கேன ஸமணகேன
தி³ட்டே²னா’தி? து³தியம்பி கோ², ஆனந்த³…பே॰… ததியம்பி கோ², ஆனந்த³,
க⁴டிகாரோ கும்ப⁴காரோ ஜோதிபாலங் மாணவங் ஏதத³வோச – ‘அயங், ஸம்ம ஜோதிபால,
கஸ்ஸபஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ அவிதூ³ரே ஆராமோ. ஆயாம, ஸம்ம ஜோதிபால, கஸ்ஸபங் ப⁴க³வந்தங் அரஹந்தங் ஸம்மாஸம்பு³த்³த⁴ங் த³ஸ்ஸனாய
உபஸங்கமிஸ்ஸாம. ஸாது⁴ஸம்மதஞ்ஹி மே தஸ்ஸ ப⁴க³வதோ த³ஸ்ஸனங் அரஹதோ
ஸம்மாஸம்பு³த்³த⁴ஸ்ஸா’தி. ததியம்பி கோ², ஆனந்த³, ஜோதிபாலோ மாணவோ க⁴டிகாரங்
கும்ப⁴காரங் ஏதத³வோச – ‘அலங், ஸம்ம க⁴டிகார. கிங் பன தேன முண்ட³கேன ஸமணகேன
தி³ட்டே²னா’தி? அத² கோ², ஆனந்த³, க⁴டிகாரோ கும்ப⁴காரோ ஜோதிபாலங் மாணவங்
ஓவட்டிகாயங் பராமஸித்வா ஏதத³வோச – ‘அயங், ஸம்ம ஜோதிபால, கஸ்ஸபஸ்ஸ ப⁴க³வதோ
அரஹதோ ஸம்மாஸம்பு³த்³த⁴ஸ்ஸ அவிதூ³ரே ஆராமோ. ஆயாம, ஸம்ம ஜோதிபால, கஸ்ஸபங்
ப⁴க³வந்தங் அரஹந்தங் ஸம்மாஸம்பு³த்³த⁴ங் த³ஸ்ஸனாய உபஸங்கமிஸ்ஸாம.
ஸாது⁴ஸம்மதஞ்ஹி மே தஸ்ஸ ப⁴க³வதோ த³ஸ்ஸனங் அரஹதோ ஸம்மாஸம்பு³த்³த⁴ஸ்ஸா’தி.
அத² கோ², ஆனந்த³, ஜோதிபாலோ மாணவோ ஓவட்டிகங் வினிவட்டெத்வா [வினிவேடெ²த்வா (ஸீ॰ ஸ்யா॰ கங்॰ பீ॰)]
க⁴டிகாரங் கும்ப⁴காரங் ஏதத³வோச – ‘அலங், ஸம்ம க⁴டிகார. கிங் பன தேன
முண்ட³கேன ஸமணகேன தி³ட்டே²னா’தி? அத² கோ², ஆனந்த³, க⁴டிகாரோ கும்ப⁴காரோ
ஜோதிபாலங் மாணவங் ஸீஸங்ன்ஹாதங் [ஸஸீஸங் நஹாதங் (ஸீ॰), ஸீஸன்ஹாதங் (ஸ்யா॰ கங்॰)]
கேஸேஸு பராமஸித்வா ஏதத³வோச – ‘அயங், ஸம்ம ஜோதிபால, கஸ்ஸபஸ்ஸ ப⁴க³வதோ அரஹதோ
ஸம்மாஸம்பு³த்³த⁴ஸ்ஸ அவிதூ³ரே ஆராமோ. ஆயாம, ஸம்ம ஜோதிபால, கஸ்ஸபங்
ப⁴க³வந்தங் அரஹந்தங் ஸம்மாஸம்பு³த்³த⁴ங் த³ஸ்ஸனாய உபஸங்கமிஸ்ஸாம .
ஸாது⁴ஸம்மதஞ்ஹி மே தஸ்ஸ ப⁴க³வதோ த³ஸ்ஸனங் அரஹதோ ஸம்மாஸம்பு³த்³த⁴ஸ்ஸா’தி.
அத² கோ², ஆனந்த³, ஜோதிபாலஸ்ஸ மாணவஸ்ஸ ஏதத³ஹோஸி – ‘அச்ச²ரியங் வத, போ⁴,
அப்³பு⁴தங் வத, போ⁴! யத்ர ஹி நாமாயங் க⁴டிகாரோ கும்ப⁴காரோ இத்தரஜச்சோ ஸமானோ
அம்ஹாகங் ஸீஸங்ன்ஹாதானங் கேஸேஸு பராமஸிதப்³ப³ங் மஞ்ஞிஸ்ஸதி; ந வதித³ங் கிர
ஓரகங் மஞ்ஞே ப⁴விஸ்ஸதீ’தி; க⁴டிகாரங் கும்ப⁴காரங் ஏதத³வோச – ‘யாவதாதோ³ஹிபி
[யாவேததோ³ஹிபி (ஸீ॰ ஸ்யா॰ கங்॰ பீ॰)], ஸம்ம க⁴டிகாரா’தி? ‘யாவதாதோ³ஹிபி, ஸம்ம ஜோதிபால. ததா² ஹி பன மே ஸாது⁴ஸம்மதங் தஸ்ஸ ப⁴க³வதோ த³ஸ்ஸனங் அரஹதோ ஸம்மாஸம்பு³த்³த⁴ஸ்ஸா’தி. ‘தேன ஹி, ஸம்ம க⁴டிகார, முஞ்ச; க³மிஸ்ஸாமா’தி.
285.
‘‘அத² கோ², ஆனந்த³, க⁴டிகாரோ ச கும்ப⁴காரோ ஜோதிபாலோ ச மாணவோ யேன கஸ்ஸபோ
ப⁴க³வா அரஹங் ஸம்மாஸம்பு³த்³தோ⁴ தேனுபஸங்கமிங்ஸு; உபஸங்கமித்வா க⁴டிகாரோ
கும்ப⁴காரோ கஸ்ஸபங் ப⁴க³வந்தங் அரஹந்தங் ஸம்மாஸம்பு³த்³த⁴ங் அபி⁴வாதெ³த்வா
ஏகமந்தங் நிஸீதி³. ஜோதிபாலோ பன மாணவோ கஸ்ஸபேன
ப⁴க³வதா அரஹதா ஸம்மாஸம்பு³த்³தே⁴ன ஸத்³தி⁴ங் ஸம்மோதி³. ஸம்மோத³னீயங் கத²ங்
ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ², ஆனந்த³,
க⁴டிகாரோ கும்ப⁴காரோ கஸ்ஸபங் ப⁴க³வந்தங் அரஹந்தங் ஸம்மாஸம்பு³த்³த⁴ங்
ஏதத³வோச – ‘அயங் மே, ப⁴ந்தே, ஜோதிபாலோ மாணவோ ஸஹாயோ பியஸஹாயோ. இமஸ்ஸ ப⁴க³வா
த⁴ம்மங் தே³ஸேதூ’தி. அத² கோ², ஆனந்த³, கஸ்ஸபோ ப⁴க³வா அரஹங் ஸம்மாஸம்பு³த்³தோ⁴ க⁴டிகாரஞ்ச
கும்ப⁴காரங் ஜோதிபாலஞ்ச மாணவங் த⁴ம்மியா கதா²ய ஸந்த³ஸ்ஸேஸி ஸமாத³பேஸி
ஸமுத்தேஜேஸி ஸம்பஹங்ஸேஸி. அத² கோ², ஆனந்த³, க⁴டிகாரோ ச கும்ப⁴காரோ ஜோதிபாலோ
ச மாணவோ கஸ்ஸபேன ப⁴க³வதா அரஹதா ஸம்மாஸம்பு³த்³தே⁴ன த⁴ம்மியா கதா²ய
ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹங்ஸிதா கஸ்ஸபஸ்ஸ ப⁴க³வதோ அரஹதோ
ஸம்மாஸம்பு³த்³த⁴ஸ்ஸ பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா
கஸ்ஸபங் ப⁴க³வந்தங் அரஹந்தங் ஸம்மாஸம்பு³த்³த⁴ங் அபி⁴வாதெ³த்வா பத³க்கி²ணங்
கத்வா பக்கமிங்ஸு.
286.
‘‘அத² கோ², ஆனந்த³, ஜோதிபாலோ மாணவோ க⁴டிகாரங் கும்ப⁴காரங் ஏதத³வோச – ‘இமங்
நு த்வங், ஸம்ம க⁴டிகார, த⁴ம்மங் ஸுணந்தோ அத² ச பன அகா³ரஸ்மா அனகா³ரியங் ந
பப்³ப³ஜிஸ்ஸஸீ’தி? ‘நனு மங், ஸம்ம ஜோதிபால, ஜானாஸி, அந்தே⁴ ஜிண்ணே
மாதாபிதரோ போஸேமீ’தி? ‘தேன ஹி, ஸம்ம க⁴டிகார, அஹங் அகா³ரஸ்மா அனகா³ரியங்
பப்³ப³ஜிஸ்ஸாமீ’தி. அத² கோ², ஆனந்த³, க⁴டிகாரோ ச கும்ப⁴காரோ ஜோதிபாலோ ச
மாணவோ யேன கஸ்ஸபோ ப⁴க³வா அரஹங் ஸம்மாஸம்பு³த்³தோ⁴ தேனுபஸங்கமிங்ஸு ;
உபஸங்கமித்வா கஸ்ஸபங் ப⁴க³வந்தங் அரஹந்தங் ஸம்மாஸம்பு³த்³த⁴ங்
அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னோ கோ², ஆனந்த³,
க⁴டிகாரோ கும்ப⁴காரோ கஸ்ஸபங் ப⁴க³வந்தங் அரஹந்தங் ஸம்மாஸம்பு³த்³த⁴ங்
ஏதத³வோச – ‘அயங் மே, ப⁴ந்தே, ஜோதிபாலோ மாணவோ ஸஹாயோ பியஸஹாயோ. இமங் ப⁴க³வா
பப்³பா³ஜேதூ’தி. அலத்த² கோ², ஆனந்த³, ஜோதிபாலோ மாணவோ கஸ்ஸபஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ ஸந்திகே பப்³ப³ஜ்ஜங், அலத்த² உபஸம்பத³ங்.
287.
‘‘அத² கோ², ஆனந்த³, கஸ்ஸபோ ப⁴க³வா அரஹங் ஸம்மாஸம்பு³த்³தோ⁴ அசிரூபஸம்பன்னே
ஜோதிபாலே மாணவே அட்³ட⁴மாஸுபஸம்பன்னே வேக³ளிங்கே³ யதா²பி⁴ரந்தங் விஹரித்வா
யேன பா³ராணஸீ தேன சாரிகங் பக்காமி. அனுபுப்³பே³ன சாரிகங் சரமானோ யேன
பா³ராணஸீ தத³வஸரி. தத்ர ஸுத³ங், ஆனந்த³, கஸ்ஸபோ ப⁴க³வா அரஹங்
ஸம்மாஸம்பு³த்³தோ⁴ பா³ராணஸியங் விஹரதி இஸிபதனே மிக³தா³யே .
அஸ்ஸோஸி கோ², ஆனந்த³, கிகீ காஸிராஜா – ‘கஸ்ஸபோ கிர ப⁴க³வா அரஹங்
ஸம்மாஸம்பு³த்³தோ⁴ பா³ராணஸிங் அனுப்பத்தோ பா³ராணஸியங் விஹரதி இஸிபதனே
மிக³தா³யே’தி. அத² கோ², ஆனந்த³, கிகீ காஸிராஜா ப⁴த்³ரானி ப⁴த்³ரானி யானானி
யோஜாபெத்வா ப⁴த்³ரங் [ப⁴த்³ரங் ப⁴த்³ரங் (க॰)] யானங் அபி⁴ருஹித்வா ப⁴த்³ரேஹி ப⁴த்³ரேஹி யானேஹி பா³ராணஸியா நிய்யாஸி மஹச்சராஜானுபா⁴வேன [மஹச்சா ராஜானுபா⁴வேன (ஸீ॰), மஹதா ராஜானுபா⁴வேன (பீ॰)] கஸ்ஸபங் ப⁴க³வந்தங் அரஹந்தங் ஸம்மாஸம்பு³த்³த⁴ங் த³ஸ்ஸனாய. யாவதிகா யானஸ்ஸ பூ⁴மி யானேன க³ந்த்வா யானா பச்சோரோஹித்வா பத்திகோவ
யேன கஸ்ஸபோ ப⁴க³வா அரஹங் ஸம்மாஸம்பு³த்³தோ⁴ தேனுபஸங்கமி; உபஸங்கமித்வா
கஸ்ஸபங் ப⁴க³வந்தங் அரஹந்தங் ஸம்மாஸம்பு³த்³த⁴ங் அபி⁴வாதெ³த்வா ஏகமந்தங்
நிஸீதி³. ஏகமந்தங் நிஸின்னங் கோ², ஆனந்த³, கிகிங் காஸிராஜானங் கஸ்ஸபோ
ப⁴க³வா அரஹங் ஸம்மாஸம்பு³த்³தோ⁴ த⁴ம்மியா கதா²ய ஸந்த³ஸ்ஸேஸி ஸமாத³பேஸி
ஸமுத்தேஜேஸி ஸம்பஹங்ஸேஸி. அத² கோ², ஆனந்த³, கிகீ காஸிராஜா
கஸ்ஸபேன ப⁴க³வதா அரஹதா ஸம்மாஸம்பு³த்³தே⁴ன த⁴ம்மியா கதா²ய ஸந்த³ஸ்ஸிதோ
ஸமாத³பிதோ ஸமுத்தேஜிதோ ஸம்பஹங்ஸிதோ கஸ்ஸபங் ப⁴க³வந்தங் அரஹந்தங்
ஸம்மாஸம்பு³த்³த⁴ங் ஏதத³வோச – ‘அதி⁴வாஸேது மே,
ப⁴ந்தே, ப⁴க³வா ஸ்வாதனாய ப⁴த்தங் ஸத்³தி⁴ங் பி⁴க்கு²ஸங்கே⁴னா’தி.
அதி⁴வாஸேஸி கோ², ஆனந்த³, கஸ்ஸபோ ப⁴க³வா அரஹங் ஸம்மாஸம்பு³த்³தோ⁴
துண்ஹீபா⁴வேன. அத² கோ², ஆனந்த³, கிகீ காஸிராஜா கஸ்ஸபஸ்ஸ ப⁴க³வதோ
ஸம்மாஸம்பு³த்³த⁴ஸ்ஸ அதி⁴வாஸனங் விதி³த்வா உட்டா²யாஸனா கஸ்ஸபங் ப⁴க³வந்தங்
அரஹந்தங் ஸம்மாஸம்பு³த்³த⁴ங் அபி⁴வாதெ³த்வா பத³க்கி²ணங் கத்வா பக்காமி. அத²
கோ², ஆனந்த³, கிகீ காஸிராஜா தஸ்ஸா ரத்தியா அச்சயேன ஸகே நிவேஸனே பணீதங்
கா²த³னீயங் போ⁴ஜனீயங் படியாதா³பெத்வா பண்டு³புடகஸ்ஸ [பண்டு³முடீகஸ்ஸ (ஸீ॰ பீ॰), பண்டு³முதி³கஸ்ஸ (ஸ்யா॰ கங்॰)]
ஸாலினோ விக³தகாளகங் அனேகஸூபங் அனேகப்³யஞ்ஜனங், கஸ்ஸபஸ்ஸ ப⁴க³வதோ அரஹதோ
ஸம்மாஸம்பு³த்³த⁴ஸ்ஸ காலங் ஆரோசாபேஸி – ‘காலோ, ப⁴ந்தே, நிட்டி²தங்
ப⁴த்த’ந்தி.
288.
‘‘அத² கோ², ஆனந்த³, கஸ்ஸபோ ப⁴க³வா அரஹங் ஸம்மாஸம்பு³த்³தோ⁴
புப்³ப³ண்ஹஸமயங் நிவாஸெத்வா பத்தசீவரமாதா³ய யேன கிகிஸ்ஸ காஸிரஞ்ஞோ நிவேஸனங்
தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³ ஸத்³தி⁴ங்
பி⁴க்கு²ஸங்கே⁴ன. அத² கோ², ஆனந்த³, கிகீ காஸிராஜா பு³த்³த⁴ப்பமுக²ங்
பி⁴க்கு²ஸங்க⁴ங் பணீதேன கா²த³னீயேன போ⁴ஜனீயேன ஸஹத்தா² ஸந்தப்பேஸி
ஸம்பவாரேஸி. அத² கோ², ஆனந்த³, கிகீ காஸிராஜா கஸ்ஸபங் ப⁴க³வந்தங்
அரஹந்தங் ஸம்மாஸம்பு³த்³த⁴ங் பு⁴த்தாவிங் ஓனீதபத்தபாணிங் அஞ்ஞதரங் நீசங்
ஆஸனங் க³ஹெத்வா ஏகமந்தங் நிஸீதி³. ஏகமந்தங் நிஸின்னோ கோ², ஆனந்த³, கிகீ
காஸிராஜா கஸ்ஸபங் ப⁴க³வந்தங் அரஹந்தங் ஸம்மாஸம்பு³த்³த⁴ங் ஏதத³வோச –
‘அதி⁴வாஸேது மே, ப⁴ந்தே, ப⁴க³வா பா³ராணஸியங் வஸ்ஸாவாஸங்; ஏவரூபங் ஸங்க⁴ஸ்ஸ
உபட்டா²னங் ப⁴விஸ்ஸதீ’தி. ‘அலங், மஹாராஜ. அதி⁴வுத்தோ² மே வஸ்ஸாவாஸோ’தி.
து³தியம்பி கோ², ஆனந்த³… ததியம்பி கோ², ஆனந்த³, கிகீ காஸிராஜா கஸ்ஸபங்
ப⁴க³வந்தங் அரஹந்தங் ஸம்மாஸம்பு³த்³த⁴ங் ஏதத³வோச – ‘அதி⁴வாஸேது மே, ப⁴ந்தே,
ப⁴க³வா பா³ராணஸியங் வஸ்ஸாவாஸங்; ஏவரூபங் ஸங்க⁴ஸ்ஸ உபட்டா²னங்
ப⁴விஸ்ஸதீ’தி. ‘அலங், மஹாராஜ. அதி⁴வுத்தோ² மே வஸ்ஸாவாஸோ’தி. அத² கோ²,
ஆனந்த³, கிகிஸ்ஸ காஸிரஞ்ஞோ ‘ந மே கஸ்ஸபோ ப⁴க³வா அரஹங் ஸம்மாஸம்பு³த்³தோ⁴ அதி⁴வாஸேதி பா³ராணஸியங் வஸ்ஸாவாஸ’ந்தி அஹுதே³வ அஞ்ஞத²த்தங் ,
அஹு தோ³மனஸ்ஸங். அத² கோ², ஆனந்த³, கிகீ காஸிராஜா கஸ்ஸபங் ப⁴க³வந்தங்
அரஹந்தங் ஸம்மாஸம்பு³த்³த⁴ங் ஏதத³வோச – ‘அத்தி² நு கோ², ப⁴ந்தே, அஞ்ஞோ கோசி
மயா உபட்டா²கதரோ’தி?
‘‘‘அத்தி², மஹாராஜ, வேக³ளிங்க³ங் நாம கா³மனிக³மோ.
தத்த² க⁴டிகாரோ நாம கும்ப⁴காரோ; ஸோ மே உபட்டா²கோ அக்³கு³பட்டா²கோ. துய்ஹங்
கோ² பன, மஹாராஜ, ந மே கஸ்ஸபோ ப⁴க³வா அரஹங் ஸம்மாஸம்பு³த்³தோ⁴ அதி⁴வாஸேதி
பா³ராணஸியங் வஸ்ஸாவாஸந்தி அத்தே²வ [அத்தி² (ஸீ॰ பீ॰)] அஞ்ஞத²த்தங், அத்தி² தோ³மனஸ்ஸங். தயித³ங் க⁴டிகாரஸ்ஸ கும்ப⁴காரஸ்ஸ [க⁴டிகாரே கும்ப⁴காரே (ஸீ॰ ஸ்யா॰ கங்॰ பீ॰)] நத்தி² ச ந ச ப⁴விஸ்ஸதி. க⁴டிகாரோ கோ², மஹாராஜ, கும்ப⁴காரோ பு³த்³த⁴ங் ஸரணங் க³தோ, த⁴ம்மங் ஸரணங்
க³தோ, ஸங்க⁴ங் ஸரணங் க³தோ. க⁴டிகாரோ கோ², மஹாராஜ, கும்ப⁴காரோ பாணாதிபாதா
படிவிரதோ, அதி³ன்னாதா³னா படிவிரதோ, காமேஸுமிச்சா²சாரா படிவிரதோ, முஸாவாதா³
படிவிரதோ, ஸுராமேரயமஜ்ஜபமாத³ட்டா²னா படிவிரதோ. க⁴டிகாரோ கோ², மஹாராஜ,
கும்ப⁴காரோ பு³த்³தே⁴ அவேச்சப்பஸாதே³ன ஸமன்னாக³தோ, த⁴ம்மே அவேச்சப்பஸாதே³ன
ஸமன்னாக³தோ, ஸங்கே⁴ அவேச்சப்பஸாதே³ன ஸமன்னாக³தோ, அரியகந்தேஹி ஸீலேஹி
ஸமன்னாக³தோ. க⁴டிகாரோ கோ², மஹாராஜ, கும்ப⁴காரோ து³க்கே² நிக்கங்கோ²,
து³க்க²ஸமுத³யே நிக்கங்கோ², து³க்க²னிரோதே⁴ நிக்கங்கோ²,
து³க்க²னிரோத⁴கா³மினியா படிபதா³ய நிக்கங்கோ². க⁴டிகாரோ கோ², மஹாராஜ,
கும்ப⁴காரோ ஏகப⁴த்திகோ ப்³ரஹ்மசாரீ ஸீலவா கல்யாணத⁴ம்மோ. க⁴டிகாரோ கோ²,
மஹாராஜ, கும்ப⁴காரோ நிக்கி²த்தமணிஸுவண்ணோ அபேதஜாதரூபரஜதோ . க⁴டிகாரோ கோ², மஹாராஜ, கும்ப⁴காரோ பன்னமுஸலோ ந ஸஹத்தா² பத²விங் க²ணதி [கும்ப⁴காரோ ந முஸலேன ந ஸஹத்தா² பட²விங் க²ணதி (ஸ்யா॰ கங்॰ பீ॰), கும்ப⁴காரோ ந முஸலேன ஸஹத்தா² பத²விஞ்ச க²ணதி (க॰)]. யங் ஹோதி கூலபலுக்³க³ங் வா மூஸிகுக்கரோ [மூஸிகுக்குரோ (ஸீ॰ ஸ்யா॰ கங்॰ பீ॰)] வா தங் காஜேன ஆஹரித்வா பா⁴ஜனங் கரித்வா ஏவமாஹ – ‘‘எத்த² யோ இச்ச²தி தண்டு³லபடிப⁴ஸ்தானி [தண்டு³ல பபி⁴வத்தானி (ஸீ॰ பீ॰)]
வா முக்³க³படிப⁴ஸ்தானி வா களாயபடிப⁴ஸ்தானி வா நிக்கி²பித்வா யங் இச்ச²தி
தங் ஹரதூ’’தி. க⁴டிகாரோ கோ², மஹாராஜ, கும்ப⁴காரோ அந்தே⁴ ஜிண்ணே
மாதாபிதரோ போஸேதி. க⁴டிகாரோ கோ², மஹாராஜ, கும்ப⁴காரோ பஞ்சன்னங்
ஓரம்பா⁴கி³யானங் ஸங்யோஜனானங் பரிக்க²யா ஓபபாதிகோ தத்த² பரினிப்³பா³யீ
அனாவத்தித⁴ம்மோ தஸ்மா லோகா.
289. ‘‘‘ஏகமிதா³ஹங் ,
மஹாராஜ, ஸமயங் வேக³ளிங்கே³ நாம கா³மனிக³மே விஹராமி. அத² க்²வாஹங், மஹாராஜ,
புப்³ப³ண்ஹஸமயங் நிவாஸெத்வா பத்தசீவரமாதா³ய யேன க⁴டிகாரஸ்ஸ கும்ப⁴காரஸ்ஸ
மாதாபிதரோ தேனுபஸங்கமிங்; உபஸங்கமித்வா க⁴டிகாரஸ்ஸ கும்ப⁴காரஸ்ஸ மாதாபிதரோ
ஏதத³வோசங் – ‘‘ஹந்த³, கோ நு கோ² அயங் ப⁴க்³க³வோ க³தோ’’தி? ‘‘நிக்க²ந்தோ கோ²
தே, ப⁴ந்தே, உபட்டா²கோ அந்தோகும்பி⁴யா ஓத³னங் க³ஹெத்வா பரியோகா³ ஸூபங்
க³ஹெத்வா பரிபு⁴ஞ்ஜா’’தி. அத² க்²வாஹங், மஹாராஜ, கும்பி⁴யா ஓத³னங் க³ஹெத்வா பரியோகா³ ஸூபங் க³ஹெத்வா பரிபு⁴ஞ்ஜித்வா உட்டா²யாஸனா பக்கமிங் [பக்காமிங் (ஸ்யா॰ கங்॰ பீ॰)].
அத² கோ², மஹாராஜ, க⁴டிகாரோ கும்ப⁴காரோ யேன மாதாபிதரோ தேனுபஸங்கமி;
உபஸங்கமித்வா மாதாபிதரோ ஏதத³வோச – ‘‘கோ கும்பி⁴யா ஓத³னங் க³ஹெத்வா பரியோகா³
ஸூபங் க³ஹெத்வா பரிபு⁴ஞ்ஜித்வா உட்டா²யாஸனா பக்கந்தோ’’தி? ‘‘கஸ்ஸபோ, தாத,
ப⁴க³வா அரஹங் ஸம்மாஸம்பு³த்³தோ⁴ கும்பி⁴யா ஓத³னங் க³ஹெத்வா பரியோகா³ ஸூபங்
க³ஹெத்வா பரிபு⁴ஞ்ஜித்வா உட்டா²யாஸனா பக்கந்தோ’’தி? அத² கோ², மஹாராஜ,
க⁴டிகாரஸ்ஸ கும்ப⁴காரஸ்ஸ ஏதத³ஹோஸி – ‘‘லாபா⁴ வத மே, ஸுலத்³த⁴ங் வத மே, யஸ்ஸ
மே கஸ்ஸபோ ப⁴க³வா அரஹங் ஸம்மாஸம்பு³த்³தோ⁴ ஏவங் அபி⁴விஸ்ஸத்தோ²’’தி. அத²
கோ², மஹாராஜ, க⁴டிகாரங் கும்ப⁴காரங் அட்³ட⁴மாஸங் பீதிஸுக²ங் ந விஜஹதி [ந விஜஹி (ஸீ॰ ஸ்யா॰ கங்॰ பீ॰)], ஸத்தாஹங் மாதாபிதூனங்.
290.
‘‘‘ஏகமிதா³ஹங், மஹாராஜ, ஸமயங் தத்தே²வ வேக³ளிங்கே³ நாம கா³மனிக³மே
விஹராமி. அத² க்²வாஹங், மஹாராஜ, புப்³ப³ண்ஹஸமயங் நிவாஸெத்வா பத்தசீவரமாதா³ய
யேன க⁴டிகாரஸ்ஸ
கும்ப⁴காரஸ்ஸ மாதாபிதரோ தேனுபஸங்கமிங்; உபஸங்கமித்வா க⁴டிகாரஸ்ஸ
கும்ப⁴காரஸ்ஸ மாதாபிதரோ ஏதத³வோசங் – ‘‘ஹந்த³, கோ நு கோ² அயங் ப⁴க்³க³வோ
க³தோ’’தி? ‘‘நிக்க²ந்தோ கோ² தே, ப⁴ந்தே, உபட்டா²கோ அந்தோ களோபியா கும்மாஸங்
க³ஹெத்வா பரியோகா³ ஸூபங் க³ஹெத்வா பரிபு⁴ஞ்ஜா’’தி. அத² க்²வாஹங், மஹாராஜ,
களோபியா கும்மாஸங் க³ஹெத்வா பரியோகா³ ஸூபங்
க³ஹெத்வா பரிபு⁴ஞ்ஜித்வா உட்டா²யாஸனா பக்கமிங். அத² கோ², மஹாராஜ, க⁴டிகாரோ
கும்ப⁴காரோ யேன மாதாபிதரோ தேனுபஸங்கமி; உபஸங்கமித்வா மாதாபிதரோ ஏதத³வோச –
‘‘கோ களோபியா கும்மாஸங் க³ஹெத்வா பரியோகா³ ஸூபங் க³ஹெத்வா பரிபு⁴ஞ்ஜித்வா
உட்டா²யாஸனா பக்கந்தோ’’தி? ‘‘கஸ்ஸபோ, தாத, ப⁴க³வா அரஹங் ஸம்மாஸம்பு³த்³தோ⁴
களோபியா கும்மாஸங் க³ஹெத்வா பரியோகா³ ஸூபங் க³ஹெத்வா பரிபு⁴ஞ்ஜித்வா
உட்டா²யாஸனா பக்கந்தோ’’தி. அத² கோ², மஹாராஜ, க⁴டிகாரஸ்ஸ கும்ப⁴காரஸ்ஸ
ஏதத³ஹோஸி – ‘‘லாபா⁴ வத மே, ஸுலத்³த⁴ங் வத மே, யஸ்ஸ மே கஸ்ஸபோ ப⁴க³வா அரஹங்
ஸம்மாஸம்பு³த்³தோ⁴ ஏவங் அபி⁴விஸ்ஸத்தோ²’’தி. அத² கோ², மஹாராஜ, க⁴டிகாரங்
கும்ப⁴காரங் அட்³ட⁴மாஸங் பீதிஸுக²ங் ந விஜஹதி, ஸத்தாஹங் மாதாபிதூனங்.
291. ‘‘‘ஏகமிதா³ஹங், மஹாராஜ, ஸமயங் தத்தே²வ வேக³ளிங்கே³ நாம கா³மனிக³மே விஹராமி. தேன கோ² பன ஸமயேன குடி [க³ந்த⁴குடி (ஸீ॰)]
ஓவஸ்ஸதி. அத² க்²வாஹங், மஹாராஜ, பி⁴க்கூ² ஆமந்தேஸிங் – ‘‘க³ச்ச²த²,
பி⁴க்க²வே, க⁴டிகாரஸ்ஸ கும்ப⁴காரஸ்ஸ நிவேஸனே திணங் ஜானாதா²’’தி. ஏவங்
வுத்தே, மஹாராஜ, தே பி⁴க்கூ² மங் ஏதத³வோசுங் – ‘‘நத்தி² கோ², ப⁴ந்தே, க⁴டிகாரஸ்ஸ கும்ப⁴காரஸ்ஸ நிவேஸனே திணங், அத்தி² ச க்²வாஸ்ஸ ஆவேஸனே [ஆவேஸனங் (ஸீ॰ ஸ்யா॰ கங்॰ பீ॰)] திணச்ச²த³ன’’ [நவச்ச²த³னங் (ஸீ॰)]
ந்தி. ‘‘க³ச்ச²த², பி⁴க்க²வே, க⁴டிகாரஸ்ஸ கும்ப⁴காரஸ்ஸ ஆவேஸனங் உத்திணங்
கரோதா²’’தி. அத² கோ² தே, மஹாராஜ, பி⁴க்கூ² க⁴டிகாரஸ்ஸ கும்ப⁴காரஸ்ஸ ஆவேஸனங்
உத்திணமகங்ஸு. அத² கோ², மஹாராஜ, க⁴டிகாரஸ்ஸ கும்ப⁴காரஸ்ஸ மாதாபிதரோ தே
பி⁴க்கூ² ஏதத³வோசுங் – ‘‘கே ஆவேஸனங் உத்திணங் கரொந்தீ’’தி? ‘‘பி⁴க்கூ²,
ப⁴கி³னி, கஸ்ஸபஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ குடி ஓவஸ்ஸதீ’’தி.
‘‘ஹரத², ப⁴ந்தே, ஹரத², ப⁴த்³ரமுகா²’’தி. அத² கோ², மஹாராஜ, க⁴டிகாரோ
கும்ப⁴காரோ யேன மாதாபிதரோ தேனுபஸங்கமி; உபஸங்கமித்வா மாதாபிதரோ ஏதத³வோச –
‘‘கே ஆவேஸனங் உத்திணமகங்ஸூ’’தி? ‘‘பி⁴க்கூ², தாத, கஸ்ஸபஸ்ஸ கிர ப⁴க³வதோ
அரஹதோ ஸம்மாஸம்பு³த்³த⁴ஸ்ஸ குடி ஓவஸ்ஸதீ’’தி. அத² கோ², மஹாராஜ, க⁴டிகாரஸ்ஸ
கும்ப⁴காரஸ்ஸ ஏதத³ஹோஸி – ‘‘லாபா⁴ வத மே, ஸுலத்³த⁴ங் வத மே, யஸ்ஸ மே கஸ்ஸபோ
ப⁴க³வா அரஹங் ஸம்மாஸம்பு³த்³தோ⁴ ஏவங் அபி⁴விஸ்ஸத்தோ²’’தி. அத² கோ², மஹாராஜ
க⁴டிகாரங் கும்ப⁴காரங் அட்³ட⁴மாஸங் பீதிஸுக²ங் ந
விஜஹதி, ஸத்தாஹங் மாதாபிதூனங். அத² கோ², மஹாராஜ, ஆவேஸனங் ஸப்³ப³ந்தங்
தேமாஸங் ஆகாஸச்ச²த³னங் அட்டா²ஸி, ந தே³வோதிவஸ்ஸி [ந சாதிவஸ்ஸி (ஸீ॰ ஸ்யா॰ கங்॰ பீ॰)].
ஏவரூபோ ச, மஹாராஜ, க⁴டிகாரோ கும்ப⁴காரோ’தி. ‘லாபா⁴, ப⁴ந்தே, க⁴டிகாரஸ்ஸ
கும்ப⁴காரஸ்ஸ, ஸுலத்³தா⁴, ப⁴ந்தே, க⁴டிகாரஸ்ஸ கும்ப⁴காரஸ்ஸ யஸ்ஸ ப⁴க³வா
ஏவங் அபி⁴விஸ்ஸத்தோ²’’’தி.
292. ‘‘அத²
கோ², ஆனந்த³, கிகீ காஸிராஜா க⁴டிகாரஸ்ஸ கும்ப⁴காரஸ்ஸ பஞ்சமத்தானி
தண்டு³லவாஹஸதானி பாஹேஸி பண்டு³புடகஸ்ஸ ஸாலினோ தது³பியஞ்ச ஸூபெய்யங். அத²
கோ² தே, ஆனந்த³, ராஜபுரிஸா க⁴டிகாரங் கும்ப⁴காரங் உபஸங்கமித்வா ஏதத³வோசுங் –
‘இமானி கோ², ப⁴ந்தே, பஞ்சமத்தானி தண்டு³லவாஹஸதானி கிகினா காஸிராஜேன
பஹிதானி பண்டு³புடகஸ்ஸ ஸாலினோ தது³பியஞ்ச ஸூபெய்யங். தானி, ப⁴ந்தே,
படிக்³க³ண்ஹதா²’தி [பதிக்³க³ண்ஹாதூதி (ஸீ॰ பீ॰), படிக்³க³ண்ஹாதூதி (ஸ்யா॰ கங்॰)].
‘ராஜா கோ² ப³ஹுகிச்சோ ப³ஹுகரணீயோ. அலங் மே! ரஞ்ஞோவ ஹோதூ’தி. ஸியா கோ² பன
தே, ஆனந்த³, ஏவமஸ்ஸ – ‘அஞ்ஞோ நூன தேன ஸமயேன ஜோதிபாலோ மாணவோ அஹோஸீ’தி. ந கோ²
பனேதங், ஆனந்த³, ஏவங் த³ட்ட²ப்³ப³ங். அஹங் தேன ஸமயேன ஜோதிபாலோ மாணவோ
அஹோஸி’’ந்தி.
இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதங் அபி⁴னந்தீ³தி.
க⁴டிகாரஸுத்தங் நிட்டி²தங் பட²மங்.
2. ரட்ட²பாலஸுத்தங்
293. ஏவங் மே ஸுதங் – ஏகங் ஸமயங் ப⁴க³வா குரூஸு சாரிகங் சரமானோ மஹதா பி⁴க்கு²ஸங்கே⁴ன ஸத்³தி⁴ங் யேன து²ல்லகொட்டி²கங் [தூ²லகொட்டி²கங் (ஸீ॰ ஸ்யா॰ கங்॰ பீ॰)] நாம குரூனங் நிக³மோ தத³வஸரி. அஸ்ஸோஸுங் கோ² து²ல்லகொட்டி²கா [தூ²லகொட்டி²தகா (ஸீ॰ ஸ்யா॰ கங்॰ பீ॰)] ப்³ராஹ்மணக³ஹபதிகா – ‘‘ஸமணோ க²லு, போ⁴, கோ³தமோ ஸக்யபுத்தோ ஸக்யகுலா பப்³ப³ஜிதோ குரூஸு சாரிகங்
சரமானோ மஹதா பி⁴க்கு²ஸங்கே⁴ன ஸத்³தி⁴ங் து²ல்லகொட்டி²கங் அனுப்பத்தோ. தங்
கோ² பன ப⁴வந்தங் கோ³தமங் ஏவங் கல்யாணோ கித்திஸத்³தோ³ அப்³பு⁴க்³க³தோ –
‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ
லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴
ப⁴க³வா’தி. ஸோ இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங்
பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங்
தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங்
ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. ஸாது⁴
கோ² பன ததா²ரூபானங் அரஹதங் த³ஸ்ஸனங் ஹோதீ’’தி. அத² கோ² து²ல்லகொட்டி²கா
ப்³ராஹ்மணக³ஹபதிகா யேன ப⁴க³வா தேனுபஸங்கமிங்ஸு; உபஸங்கமித்வா அப்பேகச்சே
ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு; அப்பேகச்சே ப⁴க³வதா
ஸத்³தி⁴ங் ஸம்மோதி³ங்ஸு, ஸம்மோத³னீயங் கத²ங் ஸாரணீயங் வீதிஸாரெத்வா
ஏகமந்தங் நிஸீதி³ங்ஸு; அப்பேகச்சே யேன ப⁴க³வா தேனஞ்ஜலிங் பணாமெத்வா
ஏகமந்தங் நிஸீதி³ங்ஸு; அப்பேகச்சே ப⁴க³வதோ ஸந்திகே
நாமகொ³த்தங் ஸாவெத்வா ஏகமந்தங் நிஸீதி³ங்ஸு; அப்பேகச்சே துண்ஹீபூ⁴தா
ஏகமந்தங் நிஸீதி³ங்ஸு. ஏகமந்தங் நிஸின்னே கோ² து²ல்லகொட்டி²கே
ப்³ராஹ்மணக³ஹபதிகே ப⁴க³வா த⁴ம்மியா கதா²ய ஸந்த³ஸ்ஸேஸி ஸமாத³பேஸி
ஸமுத்தேஜேஸி ஸம்பஹங்ஸேஸி.
294. தேன கோ² பன ஸமயேன ரட்ட²பாலோ நாம குலபுத்தோ தஸ்மிங்யேவ து²ல்லகொட்டி²கே அக்³க³குலஸ்ஸ [அக்³க³குலிகஸ்ஸ (ஸீ॰ ஸ்யா॰ கங்॰ பீ॰)]
புத்தோ திஸ்ஸங் பரிஸாயங் நிஸின்னோ ஹோதி. அத² கோ² ரட்ட²பாலஸ்ஸ குலபுத்தஸ்ஸ
ஏதத³ஹோஸி – ‘‘யதா² யதா² க்²வாஹங் ப⁴க³வதா த⁴ம்மங் தே³ஸிதங் ஆஜானாமி [யதா² யதா² கோ² ப⁴க³வா த⁴ம்மங் தே³ஸேதி (ஸீ॰)],
நயித³ங் ஸுகரங் அகா³ரங் அஜ்ஜா²வஸதா ஏகந்தபரிபுண்ணங் ஏகந்தபரிஸுத்³த⁴ங்
ஸங்க²லிகி²தங் ப்³ரஹ்மசரியங் சரிதுங். யங்னூனாஹங் கேஸமஸ்ஸுங் ஓஹாரெத்வா
காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்ய’’ந்தி.
அத² கோ² து²ல்லகொட்டி²கா ப்³ராஹ்மணக³ஹபதிகா ப⁴க³வதா த⁴ம்மியா கதா²ய
ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹங்ஸிதா ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்கமிங்ஸு. அத² கோ² ரட்ட²பாலோ குலபுத்தோ அசிரபக்கந்தேஸு து²ல்லகொட்டி²கேஸு
ப்³ராஹ்மணக³ஹபதிகேஸு யேன ப⁴க³வா தேனுபஸங்கமி; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ரட்ட²பாலோ
குலபுத்தோ ப⁴க³வந்தங் ஏதத³வோச – ‘‘யதா² யதா²ஹங், ப⁴ந்தே, ப⁴க³வதா த⁴ம்மங்
தே³ஸிதங் ஆஜானாமி, நயித³ங் ஸுகரங் அகா³ரங் அஜ்ஜா²வஸதா ஏகந்தபரிபுண்ணங்
ஏகந்தபரிஸுத்³த⁴ங் ஸங்க²லிகி²தங் ப்³ரஹ்மசரியங்
சரிதுங். இச்சா²மஹங், ப⁴ந்தே, கேஸமஸ்ஸுங் ஓஹாரெத்வா காஸாயானி வத்தா²னி
அச்சா²தெ³த்வா அகா³ரஸ்மா அனகா³ரியங் பப்³ப³ஜிதுங். லபெ⁴ய்யாஹங், ப⁴ந்தே,
ப⁴க³வதோ ஸந்திகே பப்³ப³ஜ்ஜங், லபெ⁴ய்யங் உபஸம்பத³ங். பப்³பா³ஜேது மங்
ப⁴க³வா’’தி [எத்த² ‘‘லபெ⁴ய்யாஹங்…பே॰… உபஸம்பத³ங்’’தி
வாக்யத்³வயங் ஸப்³பே³ஸுபி மூலபொத்த²கேஸு தி³ஸ்ஸதி, பாராஜிகபாளியங் பன
ஸுதி³ன்னபா⁴ணவாரே ஏதங் நத்தி². ‘‘பப்³பா³ஜேது மங் ப⁴க³வா’’தி இத³ங் பன
வாக்யங் மரம்மபொத்த²கே யேவ தி³ஸ்ஸதி, பாராஜிகபாளியஞ்ச ததே³வ அத்தி²].
‘‘அனுஞ்ஞாதோஸி பன த்வங், ரட்ட²பால, மாதாபிதூஹி அகா³ரஸ்மா அனகா³ரியங்
பப்³ப³ஜ்ஜாயா’’தி? ‘‘ந கோ²ஹங், ப⁴ந்தே, அனுஞ்ஞாதோ மாதாபிதூஹி அகா³ரஸ்மா
அனகா³ரியங் பப்³ப³ஜ்ஜாயா’’தி. ‘‘ந கோ², ரட்ட²பால, ததா²க³தா அனநுஞ்ஞாதங்
மாதாபிதூஹி புத்தங் பப்³பா³ஜெந்தீ’’தி. ‘‘ஸ்வாஹங், ப⁴ந்தே, ததா² கரிஸ்ஸாமி
யதா² மங் மாதாபிதரோ அனுஜானிஸ்ஸந்தி அகா³ரஸ்மா அனகா³ரியங் பப்³ப³ஜ்ஜாயா’’தி.
295.
அத² கோ² ரட்ட²பாலோ குலபுத்தோ உட்டா²யாஸனா ப⁴க³வந்தங் அபி⁴வாதெ³த்வா
பத³க்கி²ணங் கத்வா யேன மாதாபிதரோ தேனுபஸங்கமி; உபஸங்கமித்வா மாதாபிதரோ
ஏதத³வோச – ‘‘அம்மதாதா, யதா² யதா²ஹங் ப⁴க³வதா த⁴ம்மங் தே³ஸிதங் ஆஜானாமி,
நயித³ங் ஸுகரங் அகா³ரங் அஜ்ஜா²வஸதா ஏகந்தபரிபுண்ணங் ஏகந்தபரிஸுத்³த⁴ங்
ஸங்க²லிகி²தங் ப்³ரஹ்மசரியங் சரிதுங். இச்சா²மஹங் கேஸமஸ்ஸுங் ஓஹாரெத்வா
காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதுங்.
அனுஜானாத² மங் அகா³ரஸ்மா அனகா³ரியங் பப்³ப³ஜ்ஜாயா’’தி. ஏவங் வுத்தே,
ரட்ட²பாலஸ்ஸ குலபுத்தஸ்ஸ மாதாபிதரோ ரட்ட²பாலங் குலபுத்தங் ஏதத³வோசுங் –
‘‘த்வங் கோ²ஸி, தாத ரட்ட²பால, அம்ஹாகங் ஏகபுத்தகோ பியோ மனாபோ ஸுகே²தி⁴தோ
ஸுக²பரிப⁴தோ [ஸுக²பரிஹதோ (ஸ்யா॰ கங்॰ க॰) (ஏஹி த்வங்
தாத ரட்ட²பால பு⁴ஞ்ஜ ச பிவ ச பரிசாரே ஹி ச, பு⁴ஞ்ஜந்தோ பிவந்தோ பரிசாரெந்தோ
காமே பரிபு⁴ஞ்ஜந்தோ புஞ்ஞானி கரொந்தோ அபி⁴ரமஸ்ஸு, ந தங் மயங் அனுஜானாம
அகா³ரஸ்மா அனகா³ரியங் பப்³ப³ஜ்ஜாய,) ஸப்³ப³த்த² தி³ஸ்ஸதி, ஸுதி³ன்னகண்டே³
பன நத்தி², அட்ட²கதா²ஸுபி ந த³ஸ்ஸிதங்]. ந த்வங், தாத ரட்ட²பால , கஸ்ஸசி து³க்க²ஸ்ஸ ஜானாஸி. மரணேனபி தே மயங் அகாமகா வினா ப⁴விஸ்ஸாம. கிங் பன மயங்
தங் ஜீவந்தங் அனுஜானிஸ்ஸாம அகா³ரஸ்மா அனகா³ரியங் பப்³ப³ஜ்ஜாயா’’தி?
து³தியம்பி கோ² ரட்ட²பாலோ குலபுத்தோ…பே॰… ததியம்பி கோ² ரட்ட²பாலோ குலபுத்தோ
மாதாபிதரோ ஏதத³வோச – ‘‘அம்மதாதா, யதா² யதா²ஹங் ப⁴க³வதா த⁴ம்மங் தே³ஸிதங்
ஆஜானாமி, நயித³ங் ஸுகரங் அகா³ரங் அஜ்ஜா²வஸதா ஏகந்தபரிபுண்ணங்
ஏகந்தபரிஸுத்³த⁴ங் ஸங்க²லிகி²தங் ப்³ரஹ்மசரியங் சரிதுங். இச்சா²மஹங்
கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா
அனகா³ரியங் பப்³ப³ஜிதுங். அனுஜானாத² மங் அகா³ரஸ்மா அனகா³ரியங்
பப்³ப³ஜ்ஜாயா’’தி. ததியம்பி கோ² ரட்ட²பாலஸ்ஸ
குலபுத்தஸ்ஸ மாதாபிதரோ ரட்ட²பாலங் குலபுத்தங் ஏதத³வோசுங் – ‘‘த்வங் கோ²ஸி,
தாத ரட்ட²பால, அம்ஹாகங் ஏகபுத்தகோ பியோ மனாபோ ஸுகே²தி⁴தோ ஸுக²பரிப⁴தோ. ந
த்வங், தாத ரட்ட²பால, கஸ்ஸசி து³க்க²ஸ்ஸ ஜானாஸி. மரணேனபி தே மயங் அகாமகா
வினா ப⁴விஸ்ஸாம. கிங் பன மயங் தங் ஜீவந்தங் அனுஜானிஸ்ஸாம அகா³ரஸ்மா அனகா³ரியங் பப்³ப³ஜ்ஜாயா’’தி?
296.
அத² கோ² ரட்ட²பாலோ குலபுத்தோ – ‘‘ந மங் மாதாபிதரோ அனுஜானந்தி அகா³ரஸ்மா
அனகா³ரியங் பப்³ப³ஜ்ஜாயா’’தி தத்தே²வ அனந்தரஹிதாய பூ⁴மியா நிபஜ்ஜி –
‘‘இதே⁴வ மே மரணங் ப⁴விஸ்ஸதி பப்³ப³ஜ்ஜா வா’’தி. அத² கோ² ரட்ட²பாலோ
குலபுத்தோ ஏகம்பி ப⁴த்தங் ந பு⁴ஞ்ஜி, த்³வேபி ப⁴த்தானி ந பு⁴ஞ்ஜி, தீணிபி
ப⁴த்தானி ந பு⁴ஞ்ஜி, சத்தாரிபி ப⁴த்தானி ந பு⁴ஞ்ஜி, பஞ்சபி ப⁴த்தானி ந
பு⁴ஞ்ஜி, ச²பி ப⁴த்தானி ந பு⁴ஞ்ஜி, ஸத்தபி ப⁴த்தானி ந பு⁴ஞ்ஜி. அத²
கோ² ரட்ட²பாலஸ்ஸ குலபுத்தஸ்ஸ மாதாபிதரோ ரட்ட²பாலங் குலபுத்தங் ஏதத³வோசுங் –
‘‘த்வங் கோ²ஸி, தாத ரட்ட²பால, அம்ஹாகங் ஏகபுத்தகோ பியோ மனாபோ ஸுகே²தி⁴தோ
ஸுக²பரிப⁴தோ. ந த்வங், தாத ரட்ட²பால, கஸ்ஸசி, து³க்க²ஸ்ஸ ஜானாஸி [‘‘மரணேனபி
தே…பே॰… பப்³ப³ஜ்ஜாயா’’தி வாக்யத்³வயங் ஸீ॰ ஸ்யா॰ கங்॰ பீ॰ பொத்த²கேஸு
து³தியட்டா²னே யேவ தி³ஸ்ஸதி, பாராஜிகபாளியங் பன பட²மட்டா²னே யேவ தி³ஸ்ஸதி.
தஸ்மா இத⁴ து³தியட்டா²னே புனாக³தங் அதி⁴கங் விய தி³ஸ்ஸதி]. மரணேனபி
தே மயங் அகாமகா வினா ப⁴விஸ்ஸாம. கிங் பன மயங் தங் ஜீவந்தங் அனுஜானிஸ்ஸாம
அகா³ரஸ்மா அனகா³ரியங் பப்³ப³ஜ்ஜாய. உட்டே²ஹி, தாத ரட்ட²பால, பு⁴ஞ்ஜ ச பிவ ச
பரிசாரேஹி ச; பு⁴ஞ்ஜந்தோ பிவந்தோ பரிசாரெந்தோ காமே பரிபு⁴ஞ்ஜந்தோ புஞ்ஞானி
கரொந்தோ அபி⁴ரமஸ்ஸு. ந தங் மயங் அனுஜானாம அகா³ரஸ்மா அனகா³ரியங்
பப்³ப³ஜ்ஜாய [‘‘மரணேனபி தே…பே॰… பப்³ப³ஜாயா’’தி
வாக்யத்³வயங் ஸீ॰ ஸ்யா॰ கங்॰ பீ॰ பொத்த²கேஸு து³தியட்டா²னே யேவ தி³ஸ்ஸதி,
பாராஜிகபாளியங் பன பட²மட்டா²னே யேவ தி³ஸ்ஸதி. தஸ்மா இத⁴ து³தியட்டா²னே
புனாக³தங் அதி⁴கங் விய தி³ஸ்ஸதி]. மரணேனபி தே மயங் அகாமகா வினா
ப⁴விஸ்ஸாம. கிங் பன மயங் தங் ஜீவந்தங் அனுஜானிஸ்ஸாம அகா³ரஸ்மா அனகா³ரியங்
பப்³ப³ஜ்ஜாயா’’தி? ஏவங் வுத்தே, ரட்ட²பாலோ குலபுத்தோ துண்ஹீ அஹோஸி.
து³தியம்பி கோ² ரட்ட²பாலஸ்ஸ குலபுத்தஸ்ஸ மாதாபிதரோ ரட்ட²பாலங்
குலபுத்தங் ஏதத³வோசுங்…பே॰… து³தியம்பி கோ² ரட்ட²பாலோ குலபுத்தோ துண்ஹீ
அஹோஸி. ததியம்பி கோ² ரட்ட²பாலஸ்ஸ குலபுத்தஸ்ஸ மாதாபிதரோ ரட்ட²பாலங்
குலபுத்தங் ஏதத³வோசுங் – ‘‘த்வங் கோ²ஸி, தாத ரட்ட²பால, அம்ஹாகங் ஏகபுத்தகோ
பியோ மனாபோ ஸுகே²தி⁴தோ ஸுக²பரிப⁴தோ. ந த்வங், தாத ரட்ட²பால, கஸ்ஸசி
து³க்க²ஸ்ஸ ஜானாஸி. மரணேனபி தே மயங் அகாமகா வினா ப⁴விஸ்ஸாம, கிங் பன மயங்
தங் ஜீவந்தங் அனுஜானிஸ்ஸாம அகா³ரஸ்மா அனகா³ரியங் பப்³ப³ஜ்ஜாய. உட்டே²ஹி,
தாத ரட்ட²பால, பு⁴ஞ்ஜ ச பிவ ச பரிசாரேஹி ச; பு⁴ஞ்ஜந்தோ பிவந்தோ பரிசாரெந்தோ
காமே பரிபு⁴ஞ்ஜந்தோ புஞ்ஞானி கரொந்தோ அபி⁴ரமஸ்ஸு. ந தங் மயங் அனுஜானாம
அகா³ரஸ்மா அனகா³ரியங் பப்³ப³ஜ்ஜாய. மரணேனபி தே மயங் அகாமகா வினா ப⁴விஸ்ஸாம . கிங் பன மயங் தங் ஜீவந்தங் அனுஜானிஸ்ஸாம அகா³ரஸ்மா அனகா³ரியங் பப்³ப³ஜ்ஜாயா’’தி? ததியம்பி கோ² ரட்ட²பாலோ குலபுத்தோ துண்ஹீ அஹோஸி.
297. அத²
கோ² ரட்ட²பாலஸ்ஸ குலபுத்தஸ்ஸ ஸஹாயகா யேன ரட்ட²பாலோ குலபுத்தோ
தேனுபஸங்கமிங்ஸு; உபஸங்கமித்வா ரட்ட²பாலங் குலபுத்தங் ஏதத³வோசுங் – ‘‘த்வங்
கோ²ஸி [த்வங் கோ² (ஸீ॰ பீ॰)], ஸம்ம ரட்ட²பால,
மாதாபிதூனங் ஏகபுத்தகோ பியோ மனாபோ ஸுகே²தி⁴தோ ஸுக²பரிப⁴தோ. ந த்வங், ஸம்ம
ரட்ட²பால, கஸ்ஸசி து³க்க²ஸ்ஸ ஜானாஸி. மரணேனபி தே மாதாபிதரோ அகாமகா வினா
ப⁴விஸ்ஸந்தி. கிங் பன தே தங் ஜீவந்தங் அனுஜானிஸ்ஸந்தி அகா³ரஸ்மா அனகா³ரியங்
பப்³ப³ஜ்ஜாய. உட்டே²ஹி, ஸம்ம ரட்ட²பால, பு⁴ஞ்ஜ ச பிவ ச பரிசாரேஹி ச;
பு⁴ஞ்ஜந்தோ பிவந்தோ பரிசாரெந்தோ காமே பரிபு⁴ஞ்ஜந்தோ புஞ்ஞானி கரொந்தோ
அபி⁴ரமஸ்ஸு. ந தங் மாதாபிதரோ அனுஜானிஸ்ஸந்தி [அனுஜானந்தி (ஸீ॰ ஸ்யா॰ கங்॰ பீ॰)] அகா³ரஸ்மா அனகா³ரியங் பப்³ப³ஜ்ஜாய. மரணேனபி தே மாதாபிதரோ அகாமகா வினா ப⁴விஸ்ஸந்தி. கிங் பன தே தங் ஜீவந்தங் அனுஜானிஸ்ஸந்தி
அகா³ரஸ்மா அனகா³ரியங் பப்³ப³ஜ்ஜாயா’’தி? ஏவங் வுத்தே, ரட்ட²பாலோ குலபுத்தோ
துண்ஹீ அஹோஸி. து³தியம்பி கோ²… ததியம்பி கோ² ரட்ட²பாலஸ்ஸ குலபுத்தஸ்ஸ
ஸஹாயகா ரட்ட²பாலங் குலபுத்தங் ஏதத³வோசுங் – ‘‘த்வங் கோ²ஸி, ஸம்ம ரட்ட²பால,
மாதாபிதூனங் ஏகபுத்தகோ பியோ மனாபோ ஸுகே²தி⁴தோ ஸுக²பரிப⁴தோ, ந த்வங், ஸம்ம
ரட்ட²பால, கஸ்ஸசி து³க்க²ஸ்ஸ ஜானாஸி, மரணேனபி தே மாதாபிதரோ அகாமகா வினா
ப⁴விஸ்ஸந்தி. கிங் பன தே தங் ஜீவந்தங் அனுஜானிஸ்ஸந்தி அகா³ரஸ்மா அனகா³ரியங்
பப்³ப³ஜ்ஜாய? உட்டே²ஹி, ஸம்ம ரட்ட²பால, பு⁴ஞ்ஜ ச பிவ ச பரிசாரேஹி ச,
பு⁴ஞ்ஜந்தோ பிவந்தோ பரிசாரெந்தோ காமே பரிபு⁴ஞ்ஜந்தோ புஞ்ஞானி
கரொந்தோ அபி⁴ரமஸ்ஸு. ந தங் மாதாபிதரோ அனுஜானிஸ்ஸந்தி அகா³ரஸ்மா அனகா³ரியங்
பப்³ப³ஜ்ஜாய, மரணேனபி தே மாதாபிதரோ அகாமகா வினா ப⁴விஸ்ஸந்தி. கிங் பன தே
தங் ஜீவந்தங் அனுஜானிஸ்ஸந்தி அகா³ரஸ்மா அனகா³ரியங் பப்³ப³ஜ்ஜாயா’’தி?
ததியம்பி கோ² ரட்ட²பாலோ குலபுத்தோ துண்ஹீ அஹோஸி.
298.
அத² கோ² ரட்ட²பாலஸ்ஸ குலபுத்தஸ்ஸ ஸஹாயகா யேன ரட்ட²பாலஸ்ஸ குலபுத்தஸ்ஸ
மாதாபிதரோ தேனுபஸங்கமிங்ஸு; உபஸங்கமித்வா ரட்ட²பாலஸ்ஸ குலபுத்தஸ்ஸ
மாதாபிதரோ ஏதத³வோசுங் – ‘‘அம்மதாதா, ஏஸோ ரட்ட²பாலோ குலபுத்தோ தத்தே²வ
அனந்தரஹிதாய பூ⁴மியா நிபன்னோ – ‘இதே⁴வ மே மரணங் ப⁴விஸ்ஸதி பப்³ப³ஜ்ஜா வா’தி. ஸசே தும்ஹே ரட்ட²பாலங் குலபுத்தங் நானுஜானிஸ்ஸத² அகா³ரஸ்மா அனகா³ரியங் பப்³ப³ஜ்ஜாய, தத்தே²வ [தத்தே²வஸ்ஸ (ஸீ॰)]
மரணங் ஆக³மிஸ்ஸதி. ஸசே பன தும்ஹே ரட்ட²பாலங் குலபுத்தங் அனுஜானிஸ்ஸத²
அகா³ரஸ்மா அனகா³ரியங் பப்³ப³ஜ்ஜாய, பப்³ப³ஜிதம்பி நங் த³க்கி²ஸ்ஸத². ஸசே
ரட்ட²பாலோ குலபுத்தோ நாபி⁴ரமிஸ்ஸதி அகா³ரஸ்மா அனகா³ரியங் பப்³ப³ஜ்ஜாய, கா
தஸ்ஸ [கா சஸ்ஸ (ஸீ॰)] அஞ்ஞா க³தி ப⁴விஸ்ஸதி? இதே⁴வ
பச்சாக³மிஸ்ஸதி. அனுஜானாத² ரட்ட²பாலங் குலபுத்தங் அகா³ரஸ்மா அனகா³ரியங்
பப்³ப³ஜ்ஜாயா’’தி. ‘‘அனுஜானாம, தாதா, ரட்ட²பாலங் குலபுத்தங் அகா³ரஸ்மா
அனகா³ரியங் பப்³ப³ஜ்ஜாய. பப்³ப³ஜிதேன ச பன [பன தே (ஸ்யா॰ கங்॰ க॰)]
மாதாபிதரோ உத்³த³ஸ்ஸேதப்³பா³’’தி. அத² கோ² ரட்ட²பாலஸ்ஸ குலபுத்தஸ்ஸ ஸஹாயகா
யேன ரட்ட²பாலோ குலபுத்தோ தேனுபஸங்கமிங்ஸு; உபஸங்கமித்வா ரட்ட²பாலங்
குலபுத்தங் ஏதத³வோசுங் – ‘‘உட்டே²ஹி, ஸம்ம ரட்ட²பால [‘‘த்வங்
கோ²ஸி ஸம்ம ரட்ட²பால மாதாபிதூனங் ஏகபுத்தகோ பியோ மனாபோ ஸுகே²தி⁴தோ
ஸுக²பரிஹதோ, ந த்வங் ஸம்ம ரட்ட²பால கஸ்ஸசி து³க்க²ஸ்ஸ ஜானாஸி, உட்டே²ஹி
ஸம்ம ரட்ட²பால பு⁴ஞ்ஜ ச பிவ ச பரிசாரேஹி ச, பு⁴ஞ்ஜந்தோ பிவந்தோ பரிசாரெந்தோ
காமே பரிபு⁴ஞ்ஜந்தோ புஞ்ஞானி கரொந்தோ அபி⁴ரமஸ்ஸு, (ஸீ॰ பீ॰ க॰)], அனுஞ்ஞாதோஸி மாதாபிதூஹி அகா³ரஸ்மா அனகா³ரியங் பப்³ப³ஜ்ஜாய. பப்³ப³ஜிதேன ச பன தே மாதாபிதரோ உத்³த³ஸ்ஸேதப்³பா³’’தி.
299.
அத² கோ² ரட்ட²பாலோ குலபுத்தோ உட்ட²ஹித்வா ப³லங் கா³ஹெத்வா யேன ப⁴க³வா
தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³.
ஏகமந்தங் நிஸின்னோ கோ² ரட்ட²பாலோ குலபுத்தோ ப⁴க³வந்தங் ஏதத³வோச –
‘‘அனுஞ்ஞாதோ அஹங், ப⁴ந்தே, மாதாபிதூஹி அகா³ரஸ்மா அனகா³ரியங் பப்³ப³ஜ்ஜாய.
பப்³பா³ஜேது மங் ப⁴க³வா’’தி. அலத்த² கோ² ரட்ட²பாலோ குலபுத்தோ ப⁴க³வதோ
ஸந்திகே பப்³ப³ஜ்ஜங், அலத்த² உபஸம்பத³ங். அத² கோ² ப⁴க³வா அசிரூபஸம்பன்னே
ஆயஸ்மந்தே ரட்ட²பாலே அட்³ட⁴மாஸூபஸம்பன்னே து²ல்லகொட்டி²கே யதா²பி⁴ரந்தங்
விஹரித்வா யேன ஸாவத்தி² தேன சாரிகங் பக்காமி. அனுபுப்³பே³ன சாரிகங் சரமானோ
யேன ஸாவத்தி² தத³வஸரி. தத்ர ஸுத³ங் ப⁴க³வா
ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மா
ரட்ட²பாலோ ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ –
யஸ்ஸத்தா²ய குலபுத்தா ஸம்மதே³வ அகா³ரஸ்மா
அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘கீ²ணா ஜாதி, வுஸிதங்
ப்³ரஹ்மசரியங், கதங் கரணீயங், நாபரங் இத்த²த்தாயா’தி அப்³ப⁴ஞ்ஞாஸி. அஞ்ஞதரோ
கோ² பனாயஸ்மா ரட்ட²பாலோ அரஹதங் அஹோஸி.
அத² கோ² ஆயஸ்மா ரட்ட²பாலோ யேன ப⁴க³வா தேனுபஸங்கமி;
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங்
நிஸின்னோ கோ² ஆயஸ்மா ரட்ட²பாலோ ப⁴க³வந்தங் ஏதத³வோச – ‘‘இச்சா²மஹங், ப⁴ந்தே,
மாதாபிதரோ உத்³த³ஸ்ஸேதுங், ஸசே மங் ப⁴க³வா அனுஜானாதீ’’தி. அத² கோ² ப⁴க³வா
ஆயஸ்மதோ ரட்ட²பாலஸ்ஸ சேதஸா சேதோ பரிச்ச [சேதோபரிவிதக்கங் (ஸீ॰ பீ॰)] மனஸாகாஸி. யதா² [யதா³ (ஸீ॰ பீ॰)] ப⁴க³வா அஞ்ஞாஸி
– ‘‘அப⁴ப்³போ³ கோ² ரட்ட²பாலோ குலபுத்தோ ஸிக்க²ங் பச்சக்கா²ய
ஹீனாயாவத்திது’’ந்தி, அத² கோ² ப⁴க³வா ஆயஸ்மந்தங் ரட்ட²பாலங் ஏதத³வோச –
‘‘யஸ்ஸதா³னி த்வங், ரட்ட²பால, காலங் மஞ்ஞஸீ’’தி. அத² கோ² ஆயஸ்மா ரட்ட²பாலோ
உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா ஸேனாஸனங்
ஸங்ஸாமெத்வா பத்தசீவரமாதா³ய யேன து²ல்லகொட்டி²கங் தேன சாரிகங் பக்காமி.
அனுபுப்³பே³ன சாரிகங் சரமானோ யேன து²ல்லகொட்டி²கோ தத³வஸரி. தத்ர ஸுத³ங்
ஆயஸ்மா ரட்ட²பாலோ து²ல்லகொட்டி²கே விஹரதி ரஞ்ஞோ கோரப்³யஸ்ஸ மிக³சீரே. அத²
கோ² ஆயஸ்மா ரட்ட²பாலோ புப்³ப³ண்ஹஸமயங் நிவாஸெத்வா பத்தசீவரமாதா³ய
து²ல்லகொட்டி²கங் பிண்டா³ய பாவிஸி. து²ல்லகொட்டி²கே ஸபதா³னங் பிண்டா³ய
சரமானோ யேன ஸகபிது நிவேஸனங் தேனுபஸங்கமி. தேன கோ²
பன ஸமயேன ஆயஸ்மதோ ரட்ட²பாலஸ்ஸ பிதா மஜ்ஜி²மாய த்³வாரஸாலாய உல்லிகா²பேதி.
அத்³த³ஸா கோ² ஆயஸ்மதோ ரட்ட²பாலஸ்ஸ பிதா ஆயஸ்மந்தங் ரட்ட²பாலங் தூ³ரதோவ
ஆக³ச்ச²ந்தங். தி³ஸ்வான ஏதத³வோச – ‘‘இமேஹி முண்ட³கேஹி ஸமணகேஹி அம்ஹாகங்
ஏகபுத்தகோ பியோ மனாபோ பப்³பா³ஜிதோ’’தி . அத² கோ² ஆயஸ்மா ரட்ட²பாலோ
ஸகபிது நிவேஸனே நேவ தா³னங் அலத்த² ந பச்சக்கா²னங்; அஞ்ஞத³த்து² அக்கோஸமேவ
அலத்த². தேன கோ² பன ஸமயேன ஆயஸ்மதோ ரட்ட²பாலஸ்ஸ ஞாதிதா³ஸீ ஆபி⁴தோ³ஸிகங்
கும்மாஸங் ச²ட்³டே³துகாமா ஹோதி. அத² கோ² ஆயஸ்மா ரட்ட²பாலோ தங் ஞாதிதா³ஸிங்
ஏதத³வோச – ‘‘ஸசேதங், ப⁴கி³னி, ச²ட்³ட³னீயத⁴ம்மங், இத⁴ மே பத்தே ஆகிரா’’தி.
அத² கோ² ஆயஸ்மதோ ரட்ட²பாலஸ்ஸ ஞாதிதா³ஸீ தங் ஆபி⁴தோ³ஸிகங் கும்மாஸங் ஆயஸ்மதோ
ரட்ட²பாலஸ்ஸ பத்தே ஆகிரந்தீ ஹத்தா²னஞ்ச பாதா³னஞ்ச ஸரஸ்ஸ ச நிமித்தங்
அக்³க³ஹேஸி.
300.
அத² கோ² ஆயஸ்மதோ ரட்ட²பாலஸ்ஸ ஞாதிதா³ஸீ யேனாயஸ்மதோ ரட்ட²பாலஸ்ஸ மாதா
தேனுபஸங்கமி; உபஸங்கமித்வா ஆயஸ்மதோ ரட்ட²பாலஸ்ஸ மாதரங் ஏதத³வோச –
‘‘யக்³கெ⁴ய்யே, ஜானெய்யாஸி – ‘அய்யபுத்தோ ரட்ட²பாலோ அனுப்பத்தோ’’’தி.
‘‘ஸசே, ஜே, ஸச்சங் ப⁴ணஸி, அதா³ஸிங் தங் கரோமீ’’தி [ஸச்சங் வத³ஸி, அதா³ஸீ ப⁴வஸீதி (ஸீ॰ பீ॰), ஸச்சங் வத³ஸி, அதா³ஸீ ப⁴விஸ்ஸஸி (க॰)]. அத² கோ² ஆயஸ்மதோ ரட்ட²பாலஸ்ஸ மாதா யேனாயஸ்மதோ ரட்ட²பாலஸ்ஸ பிதா தேனுபஸங்கமி; உபஸங்கமித்வா ஆயஸ்மதோ
ரட்ட²பாலஸ்ஸ பிதரங் ஏதத³வோச – ‘‘யக்³கே⁴, க³ஹபதி, ஜானெய்யாஸி – ‘ரட்ட²பாலோ
கிர குலபுத்தோ அனுப்பத்தோ’’’தி? தேன கோ² பன ஸமயேன ஆயஸ்மா ரட்ட²பாலோ தங்
ஆபி⁴தோ³ஸிகங் கும்மாஸங் அஞ்ஞதரங் குட்டமூலங் [குட்³ட³ங் (ஸீ॰ ஸ்யா॰ கங்॰ பீ॰)]
நிஸ்ஸாய பரிபு⁴ஞ்ஜதி. அத² கோ² ஆயஸ்மதோ ரட்ட²பாலஸ்ஸ பிதா யேனாயஸ்மா
ரட்ட²பாலோ தேனுபஸங்கமி; உபஸங்கமித்வா ஆயஸ்மந்தங் ரட்ட²பாலங் ஏதத³வோச –
‘‘அத்தி² நாம, தாத ரட்ட²பால, ஆபி⁴தோ³ஸிகங் கும்மாஸங் பரிபு⁴ஞ்ஜிஸ்ஸஸி? நனு,
தாத ரட்ட²பால, ஸகங் கே³ஹங் க³ந்தப்³ப³’’ந்தி? ‘‘குதோ நோ, க³ஹபதி, அம்ஹாகங்
கே³ஹங் அகா³ரஸ்மா அனகா³ரியங் பப்³ப³ஜிதானங்? அனகா³ரா மயங், க³ஹபதி. அக³மம்ஹ கோ²
தே, க³ஹபதி, கே³ஹங், தத்த² நேவ தா³னங் அலத்த²ம்ஹ ந பச்சக்கா²னங்;
அஞ்ஞத³த்து² அக்கோஸமேவ அலத்த²ம்ஹா’’தி. ‘‘ஏஹி, தாத ரட்ட²பால, க⁴ரங்
க³மிஸ்ஸாமா’’தி. ‘‘அலங், க³ஹபதி, கதங் மே அஜ்ஜ ப⁴த்தகிச்சங்’’. ‘‘தேன ஹி,
தாத ரட்ட²பால, அதி⁴வாஸேஹி ஸ்வாதனாய ப⁴த்த’’ந்தி. அதி⁴வாஸேஸி கோ² ஆயஸ்மா
ரட்ட²பாலோ துண்ஹீபா⁴வேன. அத² கோ² ஆயஸ்மதோ ரட்ட²பாலஸ்ஸ பிதா ஆயஸ்மதோ
ரட்ட²பாலஸ்ஸ அதி⁴வாஸனங் விதி³த்வா யேன ஸகங் நிவேஸனங் தேனுபஸங்கமி;
உபஸங்கமித்வா மஹந்தங் ஹிரஞ்ஞஸுவண்ணஸ்ஸ புஞ்ஜங் காராபெத்வா கிலஞ்ஜேஹி
படிச்சா²தெ³த்வா ஆயஸ்மதோ ரட்ட²பாலஸ்ஸ புராணது³தியிகா ஆமந்தேஸி – ‘‘ஏத²
தும்ஹே, வது⁴யோ, யேன அலங்காரேன அலங்கதா புப்³பே³ ரட்ட²பாலஸ்ஸ குலபுத்தஸ்ஸ
பியா ஹோத² மனாபா தேன அலங்காரேன அலங்கரோதா²’’தி.
301.
அத² கோ² ஆயஸ்மதோ ரட்ட²பாலஸ்ஸ பிதா தஸ்ஸா ரத்தியா அச்சயேன ஸகே நிவேஸனே
பணீதங் கா²த³னீயங் போ⁴ஜனீயங் படியாதா³பெத்வா ஆயஸ்மதோ ரட்ட²பாலஸ்ஸ காலங்
ஆரோசேஸி – ‘‘காலோ, தாத ரட்ட²பால, நிட்டி²தங் ப⁴த்த’’ந்தி. அத² கோ² ஆயஸ்மா
ரட்ட²பாலோ புப்³ப³ண்ஹஸமயங் நிவாஸெத்வா பத்தசீவரமாதா³ய யேன ஸகபிது நிவேஸனங்
தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ஆயஸ்மதோ
ரட்ட²பாலஸ்ஸ பிதா தங் ஹிரஞ்ஞஸுவண்ணஸ்ஸ புஞ்ஜங் விவராபெத்வா ஆயஸ்மந்தங்
ரட்ட²பாலங் ஏதத³வோச – ‘‘இத³ங் தே, தாத ரட்ட²பால, மாது மத்திகங் த⁴னங்,
அஞ்ஞங் பெத்திகங், அஞ்ஞங் பிதாமஹங். ஸக்கா, தாத ரட்ட²பால, போ⁴கே³ ச
பு⁴ஞ்ஜிதுங் புஞ்ஞானி ச காதுங். ஏஹி த்வங், தாத ரட்ட²பால [ரட்ட²பால ஸிக்க²ங் பச்சக்கா²ய (ஸப்³ப³த்த²)] ,
ஹீனாயாவத்தித்வா போ⁴கே³ ச பு⁴ஞ்ஜஸ்ஸு புஞ்ஞானி ச கரோஹீ’’தி. ‘‘ஸசே மே
த்வங், க³ஹபதி, வசனங் கரெய்யாஸி, இமங் ஹிரஞ்ஞஸுவண்ணஸ்ஸ புஞ்ஜங் ஸகடே
ஆரோபெத்வா நிப்³பா³ஹாபெத்வா மஜ்ஜே²க³ங்கா³ய நதி³யா
ஸோதே ஓபிலாபெய்யாஸி. தங் கிஸ்ஸ ஹேது? யே உப்பஜ்ஜிஸ்ஸந்தி ஹி தே, க³ஹபதி,
ததோனிதா³னங் ஸோகபரிதே³வது³க்க²தோ³மனஸ்ஸுபாயாஸா’’தி. அத² கோ² ஆயஸ்மதோ
ரட்ட²பாலஸ்ஸ புராணது³தியிகா பச்சேகங் பாதே³ஸு க³ஹெத்வா ஆயஸ்மந்தங்
ரட்ட²பாலங் ஏதத³வோசுங் – ‘‘கீதி³ஸா நாம தா, அய்யபுத்த, அச்ச²ராயோ யாஸங்
த்வங் ஹேது ப்³ரஹ்மசரியங் சரஸீ’’தி? ‘‘ந கோ² மயங், ப⁴கி³னீ, அச்ச²ரானங்
ஹேது ப்³ரஹ்மசரியங் சராமா’’தி. ‘‘ப⁴கி³னிவாதே³ன நோ அய்யபுத்தோ ரட்ட²பாலோ
ஸமுதா³சரதீ’’தி தா தத்தே²வ முச்சி²தா பபதிங்ஸு. அத² கோ² ஆயஸ்மா ரட்ட²பாலோ
பிதரங் ஏதத³வோச – ‘‘ஸசே, க³ஹபதி, போ⁴ஜனங் தா³தப்³ப³ங், தே³த²; மா நோ
விஹேடே²தா²’’தி. ‘‘பு⁴ஞ்ஜ, தாத ரட்ட²பால, நிட்டி²தங் ப⁴த்த’’ந்தி. அத² கோ²
ஆயஸ்மதோ ரட்ட²பாலஸ்ஸ பிதா ஆயஸ்மந்தங் ரட்ட²பாலங் பணீதேன கா²த³னீயேன போ⁴ஜனீயேன ஸஹத்தா² ஸந்தப்பேஸி ஸம்பவாரேஸி.
302. அத² கோ² ஆயஸ்மா ரட்ட²பாலோ பு⁴த்தாவீ ஓனீதபத்தபாணீ டி²தகோவ இமா கா³தா² அபா⁴ஸி –
‘‘பஸ்ஸ சித்தீகதங் பி³ம்ப³ங், அருகாயங் ஸமுஸ்ஸிதங்;
ஆதுரங் ப³ஹுஸங்கப்பங், யஸ்ஸ நத்தி² து⁴வங் டி²தி.
‘‘பஸ்ஸ சித்தீகதங் ரூபங், மணினா குண்ட³லேன ச;
அட்டி² தசேன ஓனத்³த⁴ங், ஸஹ வத்தே²பி⁴ ஸோப⁴தி.
‘‘அலத்தககதா பாதா³, முக²ங் சுண்ணகமக்கி²தங்;
அலங் பா³லஸ்ஸ மோஹாய, நோ ச பாரக³வேஸினோ.
‘‘அட்டா²பத³கதா கேஸா, நெத்தா அஞ்ஜனமக்கி²தா;
அலங் பா³லஸ்ஸ மோஹாய, நோ ச பாரக³வேஸினோ.
‘‘அஞ்ஜனீவ நவா [அஞ்ஜனீவண்ணவா (க॰)] சித்தா, பூதிகாயோ அலங்கதோ;
அலங் பா³லஸ்ஸ மோஹாய, நோ ச பாரக³வேஸினோ.
‘‘ஓத³ஹி மிக³வோ பாஸங், நாஸதா³ வாகரங் மிகோ³;
பு⁴த்வா நிவாபங் க³ச்சா²ம [க³ச்சா²மி (ஸ்யா॰ க॰)], கந்த³ந்தே மிக³ப³ந்த⁴கே’’தி.
அத² கோ² ஆயஸ்மா ரட்ட²பாலோ டி²தகோவ இமா கா³தா²
பா⁴ஸித்வா யேன ரஞ்ஞோ கோரப்³யஸ்ஸ மிக³சீரங் தேனுபஸங்கமி; உபஸங்கமித்வா
அஞ்ஞதரஸ்மிங் ருக்க²மூலே தி³வாவிஹாரங் நிஸீதி³.
303. அத²
கோ² ராஜா கோரப்³யோ மிக³வங் ஆமந்தேஸி – ‘‘ஸோதே⁴ஹி, ஸம்ம மிக³வ, மிக³சீரங்
உய்யானபூ⁴மிங்; க³ச்சா²ம ஸுபூ⁴மிங் த³ஸ்ஸனாயா’’தி. ‘‘ஏவங், தே³வா’’தி கோ²
மிக³வோ ரஞ்ஞோ கோரப்³யஸ்ஸ படிஸ்ஸுத்வா மிக³சீரங் ஸோதெ⁴ந்தோ அத்³த³ஸ
ஆயஸ்மந்தங் ரட்ட²பாலங் அஞ்ஞதரஸ்மிங் ருக்க²மூலே தி³வாவிஹாரங் நிஸின்னங்.
தி³ஸ்வான யேன ராஜா கோரப்³யோ தேனுபஸங்கமி; உபஸங்கமித்வா ராஜானங் கோரப்³யங்
ஏதத³வோச – ‘‘ஸுத்³த⁴ங் கோ² தே, தே³வ, மிக³சீரங். அத்தி² செத்த² ரட்ட²பாலோ
நாம குலபுத்தோ இமஸ்மிங்யேவ து²ல்லகொட்டி²கே அக்³க³குலஸ்ஸ புத்தோ யஸ்ஸ த்வங்
அபி⁴ண்ஹங் கித்தயமானோ அஹோஸி, ஸோ அஞ்ஞதரஸ்மிங் ருக்க²மூலே தி³வாவிஹாரங்
நிஸின்னோ’’தி. ‘‘தேன ஹி, ஸம்ம மிக³வ, அலங் தா³னஜ்ஜ உய்யானபூ⁴மியா. தமேவ
தா³னி மயங் ப⁴வந்தங் ரட்ட²பாலங் பயிருபாஸிஸ்ஸாமா’’தி. அத²
கோ² ராஜா கோரப்³யோ ‘‘யங் தத்த² கா²த³னீயங் போ⁴ஜனீயங் படியத்தங் தங்
ஸப்³ப³ங் விஸ்ஸஜ்ஜேதா²’’தி வத்வா ப⁴த்³ரானி ப⁴த்³ரானி யானானி யோஜாபெத்வா
ப⁴த்³ரங் யானங் அபி⁴ருஹித்வா ப⁴த்³ரேஹி ப⁴த்³ரேஹி யானேஹி
து²ல்லகொட்டி²கம்ஹா நிய்யாஸி மஹச்சராஜானுபா⁴வேன [மஹச்சா ராஜானுபா⁴வேன (ஸீ॰)]
ஆயஸ்மந்தங் ரட்ட²பாலங் த³ஸ்ஸனாய. யாவதிகா யானஸ்ஸ பூ⁴மி யானேன க³ந்த்வா
யானா பச்சோரோஹித்வா பத்திகோவ உஸ்ஸடாய உஸ்ஸடாய பரிஸாய யேனாயஸ்மா ரட்ட²பாலோ
தேனுபஸங்கமி; உபஸங்கமித்வா ஆயஸ்மதா ரட்ட²பாலேன
ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங்
அட்டா²ஸி. ஏகமந்தங் டி²தோ கோ² ராஜா கோரப்³யோ ஆயஸ்மந்தங் ரட்ட²பாலங் ஏதத³வோச
– ‘‘இத⁴ ப⁴வங் ரட்ட²பால ஹத்த²த்த²ரே [கட்ட²த்த²ரே (ஸ்யா॰ கங்॰)]
நிஸீத³தூ’’தி. ‘‘அலங், மஹாராஜ, நிஸீத³ த்வங்; நிஸின்னோ அஹங் ஸகே ஆஸனே’’தி.
நிஸீதி³ ராஜா கோரப்³யோ பஞ்ஞத்தே ஆஸனே. நிஸஜ்ஜ கோ² ராஜா கோரப்³யோ
ஆயஸ்மந்தங் ரட்ட²பாலங் ஏதத³வோச –
304.
‘‘சத்தாரிமானி, போ⁴ ரட்ட²பால, பாரிஜுஞ்ஞானி யேஹி பாரிஜுஞ்ஞேஹி ஸமன்னாக³தா
இதே⁴கச்சே கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா
அனகா³ரியங் பப்³ப³ஜந்தி. கதமானி சத்தாரி? ஜராபாரிஜுஞ்ஞங்,
ப்³யாதி⁴பாரிஜுஞ்ஞங், போ⁴க³பாரிஜுஞ்ஞங், ஞாதிபாரிஜுஞ்ஞங். கதமஞ்ச, போ⁴
ரட்ட²பால, ஜராபாரிஜுஞ்ஞங்? இத⁴, போ⁴ ரட்ட²பால ,
ஏகச்சோ ஜிண்ணோ ஹோதி வுட்³டோ⁴ மஹல்லகோ அத்³த⁴க³தோ வயோஅனுப்பத்தோ. ஸோ இதி
படிஸஞ்சிக்க²தி – ‘அஹங் கொ²ம்ஹி ஏதரஹி ஜிண்ணோ வுட்³டோ⁴ மஹல்லகோ அத்³த⁴க³தோ
வயோஅனுப்பத்தோ. ந கோ² பன மயா ஸுகரங் அனதி⁴க³தங் வா போ⁴க³ங் அதி⁴க³ந்துங்
அதி⁴க³தங் வா போ⁴க³ங் பா²திங் காதுங் [பா²திகத்துங் (ஸீ॰)].
யங்னூனாஹங் கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜெய்ய’ந்தி. ஸோ தேன ஜராபாரிஜுஞ்ஞேன ஸமன்னாக³தோ
கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா
அனகா³ரியங் பப்³ப³ஜதி. இத³ங் வுச்சதி, போ⁴
ரட்ட²பால, ஜராபாரிஜுஞ்ஞங். ப⁴வங் கோ² பன ரட்ட²பாலோ ஏதரஹி த³ஹரோ யுவா
ஸுஸுகாளகேஸோ ப⁴த்³ரேன யொப்³ப³னேன ஸமன்னாக³தோ பட²மேன வயஸா. தங் போ⁴தோ
ரட்ட²பாலஸ்ஸ ஜராபாரிஜுஞ்ஞங் நத்தி². கிங் ப⁴வங் ரட்ட²பாலோ ஞத்வா வா தி³ஸ்வா
வா ஸுத்வா வா அகா³ரஸ்மா அனகா³ரியங் பப்³ப³ஜிதோ?
‘‘கதமஞ்ச, போ⁴ ரட்ட²பால, ப்³யாதி⁴பாரிஜுஞ்ஞங்? இத⁴,
போ⁴ ரட்ட²பால, ஏகச்சோ ஆபா³தி⁴கோ ஹோதி து³க்கி²தோ பா³ள்ஹகி³லானோ. ஸோ இதி
படிஸஞ்சிக்க²தி – ‘அஹங் கொ²ம்ஹி ஏதரஹி ஆபா³தி⁴கோ
து³க்கி²தோ பா³ள்ஹகி³லானோ. ந கோ² பன மயா ஸுகரங் அனதி⁴க³தங் வா போ⁴க³ங்
அதி⁴க³ந்துங் அதி⁴க³தங் வா போ⁴க³ங் பா²திங் காதுங் . யங்னூனாஹங் கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்ய’ந்தி. ஸோ
தேன ப்³யாதி⁴பாரிஜுஞ்ஞேன ஸமன்னாக³தோ கேஸமஸ்ஸுங் ஓஹாரெத்வா காஸாயானி
வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜதி. இத³ங் வுச்சதி,
போ⁴ ரட்ட²பால, ப்³யாதி⁴பாரிஜுஞ்ஞங். ப⁴வங் கோ² பன ரட்ட²பாலோ ஏதரஹி
அப்பாபா³தோ⁴ அப்பாதங்கோ ஸமவேபாகினியா க³ஹணியா ஸமன்னாக³தோ நாதிஸீதாய
நாச்சுண்ஹாய. தங் போ⁴தோ ரட்ட²பாலஸ்ஸ ப்³யாதி⁴பாரிஜுஞ்ஞங் நத்தி². கிங்
ப⁴வங் ரட்ட²பாலோ ஞத்வா வா தி³ஸ்வா வா ஸுத்வா வா அகா³ரஸ்மா அனகா³ரியங்
பப்³ப³ஜிதோ?
‘‘கதமஞ்ச , போ⁴ ரட்ட²பால,
போ⁴க³பாரிஜுஞ்ஞங்? இத⁴, போ⁴ ரட்ட²பால, ஏகச்சோ அட்³டோ⁴ ஹோதி மஹத்³த⁴னோ
மஹாபோ⁴கோ³. தஸ்ஸ தே போ⁴கா³ அனுபுப்³பே³ன பரிக்க²யங் க³ச்ச²ந்தி. ஸோ இதி
படிஸஞ்சிக்க²தி – ‘அஹங் கோ² புப்³பே³ அட்³டோ⁴ அஹோஸிங் மஹத்³த⁴னோ மஹாபோ⁴கோ³.
தஸ்ஸ மே தே போ⁴கா³ அனுபுப்³பே³ன பரிக்க²யங் க³தா. ந கோ² பன மயா ஸுகரங்
அனதி⁴க³தங் வா போ⁴க³ங் அதி⁴க³ந்துங் அதி⁴க³தங் வா போ⁴க³ங் பா²திங் காதுங்.
யங்னூனாஹங் கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜெய்ய’ந்தி. ஸோ தேன போ⁴க³பாரிஜுஞ்ஞேன
ஸமன்னாக³தோ கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜதி. இத³ங் வுச்சதி, போ⁴ ரட்ட²பால,
போ⁴க³பாரிஜுஞ்ஞங். ப⁴வங் கோ² பன ரட்ட²பாலோ இமஸ்மிங்யேவ து²ல்லகொட்டி²கே
அக்³க³குலஸ்ஸ புத்தோ. தங் போ⁴தோ ரட்ட²பாலஸ்ஸ போ⁴க³பாரிஜுஞ்ஞங் நத்தி². கிங்
ப⁴வங் ரட்ட²பாலோ ஞத்வா வா தி³ஸ்வா வா ஸுத்வா வா அகா³ரஸ்மா அனகா³ரியங்
பப்³ப³ஜிதோ?
‘‘கதமஞ்ச , போ⁴ ரட்ட²பால,
ஞாதிபாரிஜுஞ்ஞங்? இத⁴, போ⁴ ரட்ட²பால, ஏகச்சஸ்ஸ ப³ஹூ ஹொந்தி மித்தாமச்சா
ஞாதிஸாலோஹிதா. தஸ்ஸ தே ஞாதகா அனுபுப்³பே³ன பரிக்க²யங் க³ச்ச²ந்தி. ஸோ இதி
படிஸஞ்சிக்க²தி – ‘மமங் கோ² புப்³பே³ ப³ஹூ அஹேஸுங் மித்தாமச்சா
ஞாதிஸாலோஹிதா. தஸ்ஸ மே தே அனுபுப்³பே³ன பரிக்க²யங் க³தா. ந கோ² பன மயா
ஸுகரங் அனதி⁴க³தங் வா போ⁴க³ங் அதி⁴க³ந்துங் அதி⁴க³தங் வா போ⁴க³ங் பா²திங்
காதுங். யங்னூனாஹங் கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்ய’ந்தி. ஸோ
தேன ஞாதிபாரிஜுஞ்ஞேன ஸமன்னாக³தோ கேஸமஸ்ஸுங் ஓஹாரெத்வா காஸாயானி வத்தா²னி
அச்சா²தெ³த்வா அகா³ரஸ்மா அனகா³ரியங் பப்³ப³ஜதி. இத³ங் வுச்சதி, போ⁴
ரட்ட²பால, ஞாதிபாரிஜுஞ்ஞங். போ⁴தோ கோ² பன ரட்ட²பாலஸ்ஸ இமஸ்மிங்யேவ
து²ல்லகொட்டி²கே ப³ஹூ மித்தாமச்சா ஞாதிஸாலோஹிதா. தங் போ⁴தோ ரட்ட²பாலஸ்ஸ
ஞாதிபாரிஜுஞ்ஞங் நத்தி². கிங் ப⁴வங் ரட்ட²பாலோ ஞத்வா வா தி³ஸ்வா வா ஸுத்வா
வா அகா³ரஸ்மா அனகா³ரியங் பப்³ப³ஜிதோ?
‘‘இமானி கோ², போ⁴ ரட்ட²பால, சத்தாரி பாரிஜுஞ்ஞானி,
யேஹி பாரிஜுஞ்ஞேஹி ஸமன்னாக³தா இதே⁴கச்சே கேஸமஸ்ஸுங் ஓஹாரெத்வா காஸாயானி
வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜந்தி. தானி போ⁴தோ
ரட்ட²பாலஸ்ஸ நத்தி². கிங் ப⁴வங் ரட்ட²பாலோ ஞத்வா வா தி³ஸ்வா வா ஸுத்வா வா
அகா³ரஸ்மா அனகா³ரியங் பப்³ப³ஜிதோ’’தி?
305. ‘‘அத்தி² கோ², மஹாராஜ, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரோ த⁴ம்முத்³தே³ஸா உத்³தி³ட்டா², யே அஹங் [யமஹங் (ஸ்யா॰ கங்॰ க॰)]
ஞத்வா ச தி³ஸ்வா ச ஸுத்வா ச அகா³ரஸ்மா அனகா³ரியங் பப்³ப³ஜிதோ. கதமே
சத்தாரோ? ‘உபனிய்யதி லோகோ அத்³து⁴வோ’தி கோ², மஹாராஜ, தேன ப⁴க³வதா ஜானதா
பஸ்ஸதா அரஹதா ஸம்மாஸம்பு³த்³தே⁴ன பட²மோ த⁴ம்முத்³தே³ஸோ உத்³தி³ட்டோ², யமஹங்
ஞத்வா ச தி³ஸ்வா ஸுத்வா ச அகா³ரஸ்மா அனகா³ரியங் பப்³ப³ஜிதோ. ‘அதாணோ லோகோ
அனபி⁴ஸ்ஸரோ’தி கோ², மஹாராஜ, தேன ப⁴க³வதா ஜானதா பஸ்ஸதா அரஹதா
ஸம்மாஸம்பு³த்³தே⁴ன து³தியோ த⁴ம்முத்³தே³ஸோ உத்³தி³ட்டோ², யமஹங் ஞத்வா ச
தி³ஸ்வா ஸுத்வா ச அகா³ரஸ்மா அனகா³ரியங் பப்³ப³ஜிதோ. ‘அஸ்ஸகோ லோகோ, ஸப்³ப³ங்
பஹாய க³மனீய’ந்தி கோ², மஹாராஜ, தேன ப⁴க³வதா ஜானதா பஸ்ஸதா அரஹதா
ஸம்மாஸம்பு³த்³தே⁴ன ததியோ த⁴ம்முத்³தே³ஸோ உத்³தி³ட்டோ², யமஹங் ஞத்வா ச
தி³ஸ்வா ஸுத்வா ச அகா³ரஸ்மா அனகா³ரியங் பப்³ப³ஜிதோ. ‘ஊனோ லோகோ அதித்தோ
தண்ஹாதா³ஸோ’தி கோ², மஹாராஜ, தேன ப⁴க³வதா ஜானதா பஸ்ஸதா அரஹதா
ஸம்மாஸம்பு³த்³தே⁴ன சதுத்தோ² த⁴ம்முத்³தே³ஸோ உத்³தி³ட்டோ², யமஹங் ஞத்வா ச
தி³ஸ்வா ஸுத்வா ச அகா³ரஸ்மா அனகா³ரியங் பப்³ப³ஜிதோ. இமே கோ², மஹாராஜ, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரோ த⁴ம்முத்³தே³ஸா உத்³தி³ட்டா², யே அஹங் ஞத்வா ச தி³ஸ்வா ஸுத்வா ச அகா³ரஸ்மா அனகா³ரியங் பப்³ப³ஜிதோ’’தி.
306. ‘‘‘உபனிய்யதி லோகோ அத்³து⁴வோ’தி – ப⁴வங் ரட்ட²பாலோ ஆஹ. இமஸ்ஸ ,
போ⁴ ரட்ட²பால, பா⁴ஸிதஸ்ஸ கத²ங் அத்தோ² த³ட்ட²ப்³போ³’’தி? ‘‘தங் கிங்
மஞ்ஞஸி, மஹாராஜ, த்வங் வீஸதிவஸ்ஸுத்³தே³ஸிகோபி பண்ணவீஸதிவஸ்ஸுத்³தே³ஸிகோபி
ஹத்தி²ஸ்மிம்பி கதாவீ அஸ்ஸஸ்மிம்பி கதாவீ ரத²ஸ்மிம்பி கதாவீ த⁴னுஸ்மிம்பி
கதாவீ த²ருஸ்மிம்பி கதாவீ ஊருப³லீ பா³ஹுப³லீ அலமத்தோ ஸங்கா³மாவசரோ’’தி?
‘‘அஹோஸிங் அஹங், போ⁴ ரட்ட²பால, வீஸதிவஸ்ஸுத்³தே³ஸிகோபி
பண்ணவீஸதிவஸ்ஸுத்³தே³ஸிகோபி ஹத்தி²ஸ்மிம்பி கதாவீ அஸ்ஸஸ்மிம்பி கதாவீ
ரத²ஸ்மிம்பி கதாவீ த⁴னுஸ்மிம்பி கதாவீ த²ருஸ்மிம்பி கதாவீ ஊருப³லீ
பா³ஹுப³லீ அலமத்தோ ஸங்கா³மாவசரோ. அப்பேகதா³ஹங், போ⁴ ரட்ட²பால, இத்³தி⁴மாவ
மஞ்ஞே ந [இத்³தி⁴மா மஞ்ஞே ந (ஸ்யா॰ கங்॰), இத்³தி⁴மா ச மஞ்ஞே (ஸீ॰), ந விய மஞ்ஞே (க॰)]
அத்தனோ ப³லேன ஸமஸமங் ஸமனுபஸ்ஸாமீ’’தி. ‘‘தங் கிங் மஞ்ஞஸி, மஹாராஜ, ஏவமேவ
த்வங் ஏதரஹி ஊருப³லீ பா³ஹுப³லீ அலமத்தோ ஸங்கா³மாவசரோ’’தி? ‘‘நோ ஹித³ங், போ⁴
ரட்ட²பால. ஏதரஹி ஜிண்ணோ வுட்³டோ⁴ மஹல்லகோ அத்³த⁴க³தோ வயோஅனுப்பத்தோ
ஆஸீதிகோ மே வயோ வத்ததி. அப்பேகதா³ஹங், போ⁴ ரட்ட²பால, ‘இத⁴ பாத³ங்
கரிஸ்ஸாமீ’தி அஞ்ஞேனேவ பாத³ங் கரோமீ’’தி. ‘‘இத³ங் கோ² தங், மஹாராஜ, தேன
ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸந்தா⁴ய பா⁴ஸிதங் –
‘உபனிய்யதி லோகோ அத்³து⁴வோ’தி, யமஹங் ஞத்வா ச தி³ஸ்வா ஸுத்வா ச அகா³ரஸ்மா
அனகா³ரியங் பப்³ப³ஜிதோ’’தி. ‘‘அச்ச²ரியங், போ⁴ ரட்ட²பால, அப்³பு⁴தங், போ⁴
ரட்ட²பால! யாவ ஸுபா⁴ஸிதங் சித³ங் தேன ப⁴க³வதா ஜானதா பஸ்ஸதா அரஹதா
ஸம்மாஸம்பு³த்³தே⁴ன – ‘உபனிய்யதி லோகோ அத்³து⁴வோ’தி. உபனிய்யதி ஹி , போ⁴ ரட்ட²பால, லோகோ அத்³து⁴வோ.
‘‘ஸங்விஜ்ஜந்தே கோ², போ⁴ ரட்ட²பால, இமஸ்மிங் ராஜகுலே ஹத்தி²காயாபி அஸ்ஸகாயாபி ரத²காயாபி பத்திகாயாபி, அம்ஹாகங் ஆபதா³ஸு பரியோதா⁴ய
வத்திஸ்ஸந்தி. ‘அதாணோ லோகோ அனபி⁴ஸ்ஸரோ’தி – ப⁴வங் ரட்ட²பாலோ ஆஹ. இமஸ்ஸ பன,
போ⁴ ரட்ட²பால, பா⁴ஸிதஸ்ஸ கத²ங் அத்தோ² த³ட்ட²ப்³போ³’’தி? ‘‘தங் கிங்
மஞ்ஞஸி, மஹாராஜ, அத்தி² தே கோசி அனுஸாயிகோ ஆபா³தோ⁴’’தி? ‘‘அத்தி² மே, போ⁴
ரட்ட²பால, அனுஸாயிகோ ஆபா³தோ⁴. அப்பேகதா³ மங், போ⁴ ரட்ட²பால, மித்தாமச்சா
ஞாதிஸாலோஹிதா பரிவாரெத்வா டி²தா ஹொந்தி – ‘இதா³னி
ராஜா கோரப்³யோ காலங் கரிஸ்ஸதி, இதா³னி ராஜா கோரப்³யோ காலங் கரிஸ்ஸதீ’’’தி.
‘‘தங் கிங் மஞ்ஞஸி, மஹாராஜ, லப⁴ஸி த்வங் தே
மித்தாமச்சே ஞாதிஸாலோஹிதே – ‘ஆயந்து மே பொ⁴ந்தோ மித்தாமச்சா ஞாதிஸாலோஹிதா,
ஸப்³பே³வ ஸந்தா இமங் வேத³னங் ஸங்விப⁴ஜத², யதா²ஹங் லஹுகதரிகங் வேத³னங்
வேதி³யெய்ய’ந்தி – உதா³ஹு த்வங்யேவ தங் வேத³னங் வேதி³யஸீ’’தி? ‘‘நாஹங், போ⁴
ரட்ட²பால, லபா⁴மி தே மித்தாமச்சே ஞாதிஸாலோஹிதே – ‘ஆயந்து மே பொ⁴ந்தோ
மித்தாமச்சா ஞாதிஸாலோஹிதா, ஸப்³பே³வ ஸந்தா இமங் வேத³னங் ஸங்விப⁴ஜத²,
யதா²ஹங் லஹுகதரிகங் வேத³னங் வேதி³யெய்ய’ந்தி. அத² கோ² அஹமேவ தங் வேத³னங்
வேதி³யாமீ’’தி. ‘‘இத³ங் கோ² தங், மஹாராஜ, தேன ப⁴க³வதா ஜானதா பஸ்ஸதா அரஹதா
ஸம்மாஸம்பு³த்³தே⁴ன ஸந்தா⁴ய பா⁴ஸிதங் – ‘அதாணோ லோகோ அனபி⁴ஸ்ஸரோ’தி, யமஹங்
ஞத்வா ச தி³ஸ்வா ஸுத்வா ச அகா³ரஸ்மா அனகா³ரியங் பப்³ப³ஜிதோ’’தி.
‘‘அச்ச²ரியங், போ⁴ ரட்ட²பால, அப்³பு⁴தங், போ⁴ ரட்ட²பால! யாவ ஸுபா⁴ஸிதங்
சித³ங் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன – ‘அதாணோ லோகோ அனபி⁴ஸ்ஸரோ’தி. அதாணோ ஹி, போ⁴ ரட்ட²பால, லோகோ அனபி⁴ஸ்ஸரோ.
‘‘ஸங்விஜ்ஜதி கோ², போ⁴ ரட்ட²பால, இமஸ்மிங் ராஜகுலே
பஹூதங் ஹிரஞ்ஞஸுவண்ணங் பூ⁴மிக³தஞ்ச வேஹாஸக³தஞ்ச. ‘அஸ்ஸகோ லோகோ, ஸப்³ப³ங்
பஹாய க³மனீய’ந்தி – ப⁴வங் ரட்ட²பாலோ ஆஹ. இமஸ்ஸ பன, போ⁴ ரட்ட²பால, பா⁴ஸிதஸ்ஸ
கத²ங் அத்தோ² த³ட்ட²ப்³போ³’’தி? ‘‘தங் கிங் மஞ்ஞஸி, மஹாராஜ, யதா² த்வங்
ஏதரஹி பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ
பரிசாரேஸி, லச்ச²ஸி த்வங் பரத்தா²பி – ‘ஏவமேவாஹங் இமேஹேவ பஞ்சஹி காமகு³ணேஹி
ஸமப்பிதோ ஸமங்கீ³பூ⁴தோ பரிசாரேமீ’தி, உதா³ஹு அஞ்ஞே இமங் போ⁴க³ங்
படிபஜ்ஜிஸ்ஸந்தி, த்வங் பன யதா²கம்மங் க³மிஸ்ஸஸீ’’தி? ‘‘யதா²ஹங், போ⁴
ரட்ட²பால, ஏதரஹி பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேமி, நாஹங்
லச்சா²மி பரத்தா²பி – ‘ஏவமேவ இமேஹேவ பஞ்சஹி காமகு³ணேஹி ஸமப்பிதோ
ஸமங்கீ³பூ⁴தோ பரிசாரேமீ’தி. அத² கோ² அஞ்ஞே இமங் போ⁴க³ங் படிபஜ்ஜிஸ்ஸந்தி;
அஹங் பன யதா²கம்மங் க³மிஸ்ஸாமீ’’தி. ‘‘இத³ங் கோ² தங், மஹாராஜ, தேன ப⁴க³வதா
ஜானதா பஸ்ஸதா அரஹதா ஸம்மாஸம்பு³த்³தே⁴ன ஸந்தா⁴ய பா⁴ஸிதங் – ‘அஸ்ஸகோ லோகோ,
ஸப்³ப³ங் பஹாய க³மனீய’ந்தி, யமஹங் ஞத்வா ச தி³ஸ்வா ச ஸுத்வா ச அகா³ரஸ்மா
அனகா³ரியங் பப்³ப³ஜிதோ’’தி. ‘‘அச்ச²ரியங், போ⁴ ரட்ட²பால, அப்³பு⁴தங், போ⁴
ரட்ட²பால! யாவ ஸுபா⁴ஸிதங் சித³ங் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன – ‘அஸ்ஸகோ லோகோ , ஸப்³ப³ங் பஹாய க³மனீய’ந்தி . அஸ்ஸகோ ஹி, போ⁴ ரட்ட²பால, லோகோ ஸப்³ப³ங் பஹாய க³மனீயங்.
‘‘‘ஊனோ லோகோ அதித்தோ தண்ஹாதா³ஸோ’தி – ப⁴வங் ரட்ட²பாலோ
ஆஹ. இமஸ்ஸ, போ⁴ ரட்ட²பால, பா⁴ஸிதஸ்ஸ கத²ங் அத்தோ² த³ட்ட²ப்³போ³’’தி? ‘‘தங்
கிங் மஞ்ஞஸி, மஹாராஜ, பீ²தங் குருங் அஜ்ஜா²வஸஸீ’’தி? ‘‘ஏவங், போ⁴ ரட்ட²பால,
பீ²தங் குருங் அஜ்ஜா²வஸாமீ’’தி. ‘‘தங் கிங் மஞ்ஞஸி, மஹாராஜ, இத⁴ புரிஸோ
ஆக³ச்செ²ய்ய புரத்தி²மாய தி³ஸாய ஸத்³தா⁴யிகோ பச்சயிகோ. ஸோ தங் உபஸங்கமித்வா
ஏவங் வதெ³ய்ய – ‘யக்³கே⁴, மஹாராஜ, ஜானெய்யாஸி, அஹங் ஆக³ச்சா²மி
புரத்தி²மாய தி³ஸாய? தத்த²த்³த³ஸங் மஹந்தங் ஜனபத³ங் இத்³த⁴ஞ்சேவ பீ²தஞ்ச
ப³ஹுஜனங் ஆகிண்ணமனுஸ்ஸங். ப³ஹூ தத்த² ஹத்தி²காயா அஸ்ஸகாயா ரத²காயா
பத்திகாயா; ப³ஹு தத்த² த⁴னத⁴ஞ்ஞங் [த³ந்தாஜினங் (ஸீ॰ ஸ்யா॰ கங்॰ பீ॰)]; ப³ஹு தத்த² ஹிரஞ்ஞஸுவண்ணங் அகதஞ்சேவ கதஞ்ச; ப³ஹு தத்த² இத்தி²பரிக்³க³ஹோ. ஸக்கா ச தாவதகேனேவ ப³லமத்தேன [ப³லத்தே²ன (ஸீ॰ ஸ்யா॰ கங்॰ பீ॰), ப³ஹலத்தே²ன (க॰)] அபி⁴விஜினிதுங். அபி⁴விஜின, மஹாராஜா’தி, கிந்தி நங் கரெய்யாஸீ’’தி? ‘‘தம்பி
மயங், போ⁴ ரட்ட²பால, அபி⁴விஜிய அஜ்ஜா²வஸெய்யாமா’’தி. ‘‘தங் கிங் மஞ்ஞஸி,
மஹாராஜ, இத⁴ புரிஸோ ஆக³ச்செ²ய்ய பச்சி²மாய தி³ஸாய… உத்தராய தி³ஸாய…
த³க்கி²ணாய தி³ஸாய… பரஸமுத்³த³தோ ஸத்³தா⁴யிகோ பச்சயிகோ. ஸோ தங்
உபஸங்கமித்வா ஏவங் வதெ³ய்ய – ‘யக்³கே⁴, மஹாராஜ, ஜானெய்யாஸி, அஹங்
ஆக³ச்சா²மி பரஸமுத்³த³தோ? தத்த²த்³த³ஸங் மஹந்தங் ஜனபத³ங் இத்³த⁴ஞ்சேவ
பீ²தஞ்ச ப³ஹுஜனங் ஆகிண்ணமனுஸ்ஸங். ப³ஹூ தத்த² ஹத்தி²காயா அஸ்ஸகாயா ரத²காயா
பத்திகாயா; ப³ஹு தத்த² த⁴னத⁴ஞ்ஞங்; ப³ஹு தத்த² ஹிரஞ்ஞஸுவண்ணங் அகதஞ்சேவ
கதஞ்ச; ப³ஹு தத்த² இத்தி²பரிக்³க³ஹோ. ஸக்கா ச தாவதகேனேவ ப³லமத்தேன
அபி⁴விஜினிதுங். அபி⁴விஜின, மஹாராஜா’தி, கிந்தி நங் கரெய்யாஸீ’’தி? ‘‘தம்பி
மயங், போ⁴ ரட்ட²பால, அபி⁴விஜிய அஜ்ஜா²வஸெய்யாமா’’தி. ‘‘இத³ங் கோ² தங்,
மஹாராஜ, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸந்தா⁴ய
பா⁴ஸிதங் – ‘ஊனோ லோகோ அதித்தோ தண்ஹாதா³ஸோ’தி, யமஹங் ஞத்வா ச தி³ஸ்வா ஸுத்வா
ச அகா³ரஸ்மா அனகா³ரியங் பப்³ப³ஜிதோ’’தி. ‘‘அச்ச²ரியங், போ⁴ ரட்ட²பால,
அப்³பு⁴தங், போ⁴ ரட்ட²பால! யாவ ஸுபா⁴ஸிதங் சித³ங் தேன ப⁴க³வதா ஜானதா பஸ்ஸதா
அரஹதா ஸம்மாஸம்பு³த்³தே⁴ன – ‘ஊனோ லோகோ அதித்தோ தண்ஹாதா³ஸோ’தி. ஊனோ ஹி, போ⁴
ரட்ட²பால, லோகோ அதித்தோ தண்ஹாதா³ஸோ’’தி.
இத³மவோச ஆயஸ்மா ரட்ட²பாலோ. இத³ங் வத்வா அதா²பரங் ஏதத³வோச –
307. ‘‘பஸ்ஸாமி லோகே ஸத⁴னே மனுஸ்ஸே,
லத்³தா⁴ன வித்தங் ந த³த³ந்தி மோஹா;
லுத்³தா⁴ த⁴னங் [லத்³தா⁴ த⁴னங் (க॰)] ஸன்னிசயங் கரொந்தி,
பி⁴ய்யோவ காமே அபி⁴பத்த²யந்தி.
‘‘ராஜா பஸய்ஹா பத²விங் விஜித்வா,
ஸஸாக³ரந்தங் மஹிமாவஸந்தோ [மஹியா வஸந்தோ (ஸீ॰ க॰)];
ஓரங் ஸமுத்³த³ஸ்ஸ அதித்தரூபோ,
பாரங் ஸமுத்³த³ஸ்ஸபி பத்த²யேத².
‘‘ராஜா ச அஞ்ஞே ச ப³ஹூ மனுஸ்ஸா,
அவீததண்ஹா [அதித்ததண்ஹா (க॰)] மரணங் உபெந்தி;
ஊனாவ ஹுத்வான ஜஹந்தி தே³ஹங்,
காமேஹி லோகம்ஹி ந ஹத்தி² தித்தி.
‘‘கந்த³ந்தி நங் ஞாதீ பகிரிய கேஸே,
அஹோவதா நோ அமராதி சாஹு;
வத்தே²ன நங் பாருதங் நீஹரித்வா,
சிதங் ஸமாதா³ய [ஸமாதா⁴ய (ஸீ॰)] ததோட³ஹந்தி.
‘‘ஸோ ட³ய்ஹதி ஸூலேஹி துஜ்ஜமானோ,
ஏகேன வத்தே²ன பஹாய போ⁴கே³;
ந மீயமானஸ்ஸ ப⁴வந்தி தாணா,
ஞாதீத⁴ மித்தா அத² வா ஸஹாயா.
‘‘தா³யாத³கா தஸ்ஸ த⁴னங் ஹரந்தி,
ஸத்தோ பன க³ச்ச²தி யேன கம்மங்;
ந மீயமானங் த⁴னமன்வேதி கிஞ்சி,
புத்தா ச தா³ரா ச த⁴னஞ்ச ரட்ட²ங்.
‘‘ந தீ³க⁴மாயுங் லப⁴தே த⁴னேன, ந சாபி வித்தேன ஜரங் விஹந்தி;
அப்பங் ஹித³ங் ஜீவிதமாஹு தீ⁴ரா, அஸஸ்ஸதங் விப்பரிணாமத⁴ம்மங்.
‘‘அட்³டா⁴ த³லித்³தா³ ச பு²ஸந்தி ப²ஸ்ஸங்,
பா³லோ ச தீ⁴ரோ ச ததே²வ பு²ட்டோ²;
பா³லோ ச பா³ல்யா வதி⁴தோவ ஸேதி,
தீ⁴ரோ ச [தீ⁴ரோவ (க॰)] ந வேத⁴தி ப²ஸ்ஸபு²ட்டோ².
‘‘தஸ்மா ஹி பஞ்ஞாவ த⁴னேன ஸெய்யோ,
யாய வோஸானமிதா⁴தி⁴க³ச்ச²தி;
அப்³யோஸிதத்தா [அஸோஸிதத்தா (ஸீ॰ பீ॰)] ஹி ப⁴வாப⁴வேஸு,
பாபானி கம்மானி கரொந்தி மோஹா.
‘‘உபேதி க³ப்³ப⁴ஞ்ச பரஞ்ச லோகங்,
ஸங்ஸாரமாபஜ்ஜ பரம்பராய;
தஸ்ஸப்பபஞ்ஞோ அபி⁴ஸத்³த³ஹந்தோ,
உபேதி க³ப்³ப⁴ஞ்ச பரஞ்ச லோகங்.
‘‘சோரோ யதா² ஸந்தி⁴முகே² க³ஹிதோ,
ஸகம்முனா ஹஞ்ஞதி பாபத⁴ம்மோ;
ஏவங் பஜா பேச்ச பரம்ஹி லோகே,
ஸகம்முனா ஹஞ்ஞதி பாபத⁴ம்மோ.
‘‘காமாஹி சித்ரா மது⁴ரா மனோரமா,
விரூபரூபேன மதெ²ந்தி சித்தங்;
ஆதீ³னவங் காமகு³ணேஸு தி³ஸ்வா,
தஸ்மா அஹங் பப்³ப³ஜிதொம்ஹி ராஜ.
‘‘து³மப்ப²லானேவ பதந்தி மாணவா,
த³ஹரா ச வுட்³டா⁴ ச ஸரீரபே⁴தா³;
ஏதம்பி தி³ஸ்வா [ஏவம்பி தி³ஸ்வா (ஸீ॰), ஏதங் விதி³த்வா (ஸ்யா॰ கங்॰)] பப்³ப³ஜிதொம்ஹி ராஜ,
அபண்ணகங் ஸாமஞ்ஞமேவ ஸெய்யோ’’தி.
ரட்ட²பாலஸுத்தங் நிட்டி²தங் து³தியங்.
3. மக⁴தே³வஸுத்தங்
308. ஏவங் மே ஸுதங் – ஏகங் ஸமயங் ப⁴க³வா மிதி²லாயங் விஹரதி மக⁴தே³வஅம்ப³வனே [மகா²தே³வஅம்ப³வனே (ஸீ॰ பீ॰), மக்³க⁴தே³வஅம்ப³வனே (க॰)].
அத² கோ² ப⁴க³வா அஞ்ஞதரஸ்மிங் பதே³ஸே ஸிதங் பாத்வாகாஸி. அத² கோ² ஆயஸ்மதோ
ஆனந்த³ஸ்ஸ ஏதத³ஹோஸி – ‘‘கோ நு கோ² ஹேது, கோ பச்சயோ ப⁴க³வதோ ஸிதஸ்ஸ
பாதுகம்மாய? ந அகாரணேன ததா²க³தா ஸிதங் பாதுகரொந்தீ’’தி. அத² கோ² ஆயஸ்மா
ஆனந்தோ³ ஏகங்ஸங் சீவரங் கத்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங்
ஏதத³வோச – ‘‘கோ நு கோ², ப⁴ந்தே, ஹேது, கோ பச்சயோ ப⁴க³வதோ ஸிதஸ்ஸ
பாதுகம்மாய? ந அகாரணேன ததா²க³தா ஸிதங் பாதுகரொந்தீ’’தி. ‘‘பூ⁴தபுப்³ப³ங்,
ஆனந்த³, இமிஸ்ஸாயேவ மிதி²லாயங் ராஜா அஹோஸி மக⁴தே³வோ நாம த⁴ம்மிகோ த⁴ம்மராஜா
த⁴ம்மே டி²தோ மஹாராஜா; த⁴ம்மங் சரதி ப்³ராஹ்மணக³ஹபதிகேஸு நேக³மேஸு சேவ
ஜானபதே³ஸு ச; உபோஸத²ஞ்ச உபவஸதி சாதுத்³த³ஸிங் பஞ்சத³ஸிங்
அட்ட²மிஞ்ச பக்க²ஸ்ஸ. அத² கோ², ஆனந்த³, ராஜா மக⁴தே³வோ ப³ஹூனங் வஸ்ஸானங்
ப³ஹூனங் வஸ்ஸஸதானங் ப³ஹூனங் வஸ்ஸஸஹஸ்ஸானங் அச்சயேன கப்பகங் ஆமந்தேஸி –
‘யதா³ மே, ஸம்ம கப்பக, பஸ்ஸெய்யாஸி ஸிரஸ்மிங் பலிதானி ஜாதானி, அத² மே
ஆரோசெய்யாஸீ’தி. ‘ஏவங், தே³வா’தி கோ², ஆனந்த³, கப்பகோ ரஞ்ஞோ மக⁴தே³வஸ்ஸ
பச்சஸ்ஸோஸி. அத்³த³ஸா கோ², ஆனந்த³, கப்பகோ ப³ஹூனங் வஸ்ஸானங்
ப³ஹூனங் வஸ்ஸஸதானங் ப³ஹூனங் வஸ்ஸஸஹஸ்ஸானங் அச்சயேன ரஞ்ஞோ மக⁴தே³வஸ்ஸ
ஸிரஸ்மிங் பலிதானி ஜாதானி. தி³ஸ்வான ராஜானங் மக⁴தே³வங் ஏதத³வோச –
‘பாதுபூ⁴தா கோ² தே³வஸ்ஸ தே³வதூ³தா, தி³ஸ்ஸந்தி ஸிரஸ்மிங் பலிதானி
ஜாதானீ’தி. ‘தேன ஹி, ஸம்ம கப்பக, தானி பலிதானி ஸாது⁴கங் ஸண்டா³ஸேன
உத்³த⁴ரித்வா மம அஞ்ஜலிஸ்மிங் பதிட்டா²பேஹீ’தி. ‘ஏவங், தே³வா’தி கோ²,
ஆனந்த³, கப்பகோ ரஞ்ஞோ மக⁴தே³வஸ்ஸ படிஸ்ஸுத்வா தானி பலிதானி ஸாது⁴கங்
ஸண்டா³ஸேன உத்³த⁴ரித்வா ரஞ்ஞோ மக⁴தே³வஸ்ஸ அஞ்ஜலிஸ்மிங் பதிட்டா²பேஸி.
309.
‘‘அத² கோ², ஆனந்த³, ராஜா மக⁴தே³வோ கப்பகஸ்ஸ கா³மவரங் த³த்வா ஜெட்ட²புத்தங்
குமாரங் ஆமந்தாபெத்வா ஏதத³வோச – ‘பாதுபூ⁴தா கோ² மே, தாத குமார, தே³வதூ³தா;
தி³ஸ்ஸந்தி ஸிரஸ்மிங் பலிதானி ஜாதானி; பு⁴த்தா கோ² பன மே மானுஸகா காமா;
ஸமயோ தி³ப்³பே³ காமே பரியேஸிதுங். ஏஹி
த்வங், தாத குமார, இமங் ரஜ்ஜங் படிபஜ்ஜ. அஹங் பன கேஸமஸ்ஸுங் ஓஹாரெத்வா
காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிஸ்ஸாமி. தேன
ஹி, தாத குமார, யதா³ த்வம்பி பஸ்ஸெய்யாஸி ஸிரஸ்மிங் பலிதானி ஜாதானி, அத²
கப்பகஸ்ஸ கா³மவரங் த³த்வா ஜெட்ட²புத்தங் குமாரங் ஸாது⁴கங் ரஜ்ஜே
ஸமனுஸாஸித்வா கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜெய்யாஸி. யேன மே இத³ங் கல்யாணங் வத்தங்
நிஹிதங் அனுப்பவத்தெய்யாஸி, மா கோ² மே த்வங் அந்திமபுரிஸோ அஹோஸி. யஸ்மிங்
கோ², தாத குமார, புரிஸயுகே³ வத்தமானே ஏவரூபஸ்ஸ கல்யாணஸ்ஸ வத்தஸ்ஸ ஸமுச்சே²தோ³ ஹோதி ஸோ தேஸங் அந்திமபுரிஸோ ஹோதி. தங் தாஹங், தாத குமார, ஏவங் வதா³மி – யேன மே இத³ங் கல்யாணங் வத்தங்
நிஹிதங் அனுப்பவத்தெய்யாஸி, மா கோ² மே த்வங் அந்திமபுரிஸோ அஹோஸீ’தி. அத²
கோ², ஆனந்த³, ராஜா மக⁴தே³வோ கப்பகஸ்ஸ கா³மவரங் த³த்வா ஜெட்ட²புத்தங்
குமாரங் ஸாது⁴கங் ரஜ்ஜே ஸமனுஸாஸித்வா இமஸ்மிங்யேவ மக⁴தே³வஅம்ப³வனே
கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா
அனகா³ரியங் பப்³ப³ஜி. ஸோ மெத்தாஸஹக³தேன சேதஸா ஏகங் தி³ஸங் ப²ரித்வா விஹாஸி,
ததா² து³தியங், ததா² ததியங், ததா² சதுத்த²ங்; இதி உத்³த⁴மதோ⁴ திரியங்
ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் மெத்தாஸஹக³தேன சேதஸா விபுலேன
மஹக்³க³தேன அப்பமாணேன அவேரேன அப்³யாப³ஜ்ஜே²ன [அப்³யாபஜ்ஜே²ன (ஸீ॰ ஸ்யா॰ கங்॰ பீ॰), அப்³யாபஜ்ஜேன (க॰)]
ப²ரித்வா விஹாஸி. கருணாஸஹக³தேன சேதஸா… முதி³தாஸஹக³தேன சேதஸா…
உபெக்கா²ஸஹக³தேன சேதஸா ஏகங் தி³ஸங் ப²ரித்வா விஹாஸி, ததா² து³தியங், ததா²
ததியங், ததா² சதுத்த²ங்; இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய
ஸப்³பா³வந்தங் லோகங் உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன
அவேரேன அப்³யாப³ஜ்ஜே²ன ப²ரித்வா விஹாஸி.
‘‘ராஜா கோ² பனானந்த³, மக⁴தே³வோ சதுராஸீதிவஸ்ஸஸஹஸ்ஸானி
குமாரகீளிதங் கீளி, சதுராஸீதிவஸ்ஸஸஹஸ்ஸானி ஓபரஜ்ஜங் காரேஸி,
சதுராஸீதிவஸ்ஸஸஹஸ்ஸானி ரஜ்ஜங் காரேஸி, சதுராஸீதிவஸ்ஸஸஹஸ்ஸானி இமஸ்மிங்யேவ
மக⁴தே³வஅம்ப³வனே அகா³ரஸ்மா அனகா³ரியங் பப்³ப³ஜிதோ ப்³ரஹ்மசரியமசரி. ஸோ
சத்தாரோ ப்³ரஹ்மவிஹாரே பா⁴வெத்வா காயஸ்ஸ பே⁴தா³ பரங் மரணா ப்³ரஹ்மலோகூபகோ³ அஹோஸி.
310. ‘‘அத²
கோ² ரஞ்ஞோ, ஆனந்த³, மக⁴தே³வஸ்ஸ புத்தோ ப³ஹூனங் வஸ்ஸானங் ப³ஹூனங்
வஸ்ஸஸதானங் ப³ஹூனங் வஸ்ஸஸஹஸ்ஸானங் அச்சயேன கப்பகங் ஆமந்தேஸி – ‘யதா³ மே,
ஸம்ம கப்பக, பஸ்ஸெய்யாஸி ஸிரஸ்மிங் பலிதானி ஜாதானி,
அத² கோ² ஆரோசெய்யாஸீ’தி. ‘ஏவங், தே³வா’தி கோ², ஆனந்த³, கப்பகோ ரஞ்ஞோ
மக⁴தே³வஸ்ஸ புத்தஸ்ஸ பச்சஸ்ஸோஸி. அத்³த³ஸா கோ², ஆனந்த³, கப்பகோ ப³ஹூனங்
வஸ்ஸானங் ப³ஹூனங் வஸ்ஸஸதானங் ப³ஹூனங் வஸ்ஸஸஹஸ்ஸானங் அச்சயேன ரஞ்ஞோ
மக⁴தே³வஸ்ஸ புத்தஸ்ஸ ஸிரஸ்மிங் பலிதானி ஜாதானி. தி³ஸ்வான ரஞ்ஞோ மக⁴தே³வஸ்ஸ
புத்தங் ஏதத³வோச – ‘பாதுபூ⁴தா கோ² தே³வஸ்ஸ தே³வதூ³தா; தி³ஸ்ஸந்தி ஸிரஸ்மிங்
பலிதானி ஜாதானீ’தி. ‘தேன ஹி, ஸம்ம கப்பக, தானி
பலிதானி ஸாது⁴கங் ஸண்டா³ஸேன உத்³த⁴ரித்வா மம அஞ்ஜலிஸ்மிங் பதிட்டா²பேஹீ’தி.
‘ஏவங், தே³வா’தி கோ², ஆனந்த³, கப்பகோ ரஞ்ஞோ மக⁴தே³வஸ்ஸ புத்தஸ்ஸ
படிஸ்ஸுத்வா தானி பலிதானி ஸாது⁴கங் ஸண்டா³ஸேன உத்³த⁴ரித்வா ரஞ்ஞோ
மக⁴தே³வஸ்ஸ புத்தஸ்ஸ அஞ்ஜலிஸ்மிங் பதிட்டா²பேஸி.
‘‘அத² கோ², ஆனந்த³, ரஞ்ஞோ மக⁴தே³வஸ்ஸ புத்தோ கப்பகஸ்ஸ
கா³மவரங் த³த்வா ஜெட்ட²புத்தங் குமாரங் ஆமந்தாபெத்வா ஏதத³வோச – ‘பாதுபூ⁴தா
கோ², மே, தாத குமார, தே³வதூ³தா; தி³ஸ்ஸந்தி ஸிரஸ்மிங் பலிதானி ஜாதானி;
பு⁴த்தா கோ² பன மே மானுஸகா காமா; ஸமயோ தி³ப்³பே³ காமே பரியேஸிதுங். ஏஹி
த்வங், தாத குமார, இமங் ரஜ்ஜங் படிபஜ்ஜ. அஹங் பன கேஸமஸ்ஸுங் ஓஹாரெத்வா
காஸாயானி வத்தா²னி அச்சா²தெ³த்வா அகா³ரஸ்மா
அனகா³ரியங் பப்³ப³ஜிஸ்ஸாமி. தேன ஹி, தாத குமார, யதா³ த்வம்பி பஸ்ஸெய்யாஸி
ஸிரஸ்மிங் பலிதானி ஜாதானி, அத² கப்பகஸ்ஸ கா³மவரங் த³த்வா ஜெட்ட²புத்தங்
குமாரங் ஸாது⁴கங் ரஜ்ஜே ஸமனுஸாஸித்வா கேஸமஸ்ஸுங் ஓஹாரெத்வா காஸாயானி
வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்யாஸி. யேன மே இத³ங்
கல்யாணங் வத்தங் நிஹிதங் அனுப்பவத்தெய்யாஸி, மா கோ² மே த்வங் அந்திமபுரிஸோ
அஹோஸி. யஸ்மிங் கோ², தாத குமார, புரிஸயுகே³ வத்தமானே ஏவரூபஸ்ஸ கல்யாணஸ்ஸ
வத்தஸ்ஸ ஸமுச்சே²தோ³ ஹோதி ஸோ தேஸங் அந்திமபுரிஸோ ஹோதி. தங் தாஹங், தாத
குமார, ஏவங் வதா³மி – யேன மே இத³ங் கல்யாணங் வத்தங் நிஹிதங்
அனுப்பவத்தெய்யாஸி, மா கோ² மே த்வங் அந்திமபுரிஸோ அஹோஸீ’தி. அத² கோ²,
ஆனந்த³, ரஞ்ஞோ மக⁴தே³வஸ்ஸ புத்தோ கப்பகஸ்ஸ கா³மவரங் த³த்வா ஜெட்ட²புத்தங்
குமாரங் ஸாது⁴கங் ரஜ்ஜே ஸமனுஸாஸித்வா இமஸ்மிங்யேவ மக⁴தே³வஅம்ப³வனே
கேஸமஸ்ஸுங் ஓஹாரெத்வா காஸாயானி வத்தா²னி
அச்சா²தெ³த்வா அகா³ரஸ்மா அனகா³ரியங் பப்³ப³ஜி. ஸோ மெத்தாஸஹக³தேன சேதஸா ஏகங்
தி³ஸங் ப²ரித்வா விஹாஸி, ததா² து³தியங், ததா² ததியங், ததா² சதுத்த²ங்; இதி
உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங்
மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாப³ஜ்ஜே²ன
ப²ரித்வா விஹாஸி. கருணாஸஹக³தேன சேதஸா… முதி³தாஸஹக³தேன சேதஸா…
உபெக்கா²ஸஹக³தேன சேதஸா ஏகங்
தி³ஸங் ப²ரித்வா விஹாஸி, ததா² து³தியங், ததா² ததியங், ததா² சதுத்த²ங்; இதி
உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங்
உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாப³ஜ்ஜே²ன
ப²ரித்வா விஹாஸி. ரஞ்ஞோ கோ² பனானந்த³, மக⁴தே³வஸ்ஸ
புத்தோ சதுராஸீதிவஸ்ஸஸஹஸ்ஸானி குமாரகீளிதங் கீளி, சதுராஸீதிவஸ்ஸஸஹஸ்ஸானி
ஓபரஜ்ஜங் காரேஸி, சதுராஸீதிவஸ்ஸஸஹஸ்ஸானி ரஜ்ஜங் காரேஸி,
சதுராஸீதிவஸ்ஸஸஹஸ்ஸானி இமஸ்மிங்யேவ மக⁴தே³வஅம்ப³வனே அகா³ரஸ்மா அனகா³ரியங்
பப்³ப³ஜிதோ ப்³ரஹ்மசரியமசரி. ஸோ சத்தாரோ ப்³ரஹ்மவிஹாரே பா⁴வெத்வா காயஸ்ஸ
பே⁴தா³ பரங் மரணா ப்³ரஹ்மலோகூபகோ³ அஹோஸி.
311. ‘‘ரஞ்ஞோ கோ² பனானந்த³, மக⁴தே³வஸ்ஸ புத்தபபுத்தகா தஸ்ஸ பரம்பரா சதுராஸீதிராஜஸஹஸ்ஸானி [சதுராஸீதிக²த்தியஸஹஸ்ஸானி (ஸீ॰ பீ॰), சதுராஸீதிஸஹஸ்ஸானி (ஸ்யா॰ கங்॰)]
இமஸ்மிங்யேவ மக⁴தே³வஅம்ப³வனே கேஸமஸ்ஸுங் ஓஹாரெத்வா காஸாயானி வத்தா²னி
அச்சா²தெ³த்வா அகா³ரஸ்மா அனகா³ரியங் பப்³ப³ஜிங்ஸு. தே மெத்தாஸஹக³தேன சேதஸா
ஏகங் தி³ஸங் ப²ரித்வா விஹரிங்ஸு, ததா² து³தியங், ததா² ததியங், ததா²
சதுத்த²ங்; இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங்
லோகங் மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன
அப்³யாப³ஜ்ஜே²ன ப²ரித்வா விஹரிங்ஸு. கருணாஸஹக³தேன சேதஸா… முதி³தாஸஹக³தேன
சேதஸா… உபெக்கா²ஸஹக³தேன சேதஸா ஏகங் தி³ஸங் ப²ரித்வா விஹரிங்ஸு, ததா²
து³தியங், ததா² ததியங், ததா² சதுத்த²ங்; இதி உத்³த⁴மதோ⁴ திரியங் ஸப்³ப³தி⁴
ஸப்³ப³த்ததாய ஸப்³பா³வந்தங் லோகங் உபெக்கா²ஸஹக³தேன சேதஸா விபுலேன
மஹக்³க³தேன அப்பமாணேன அவேரேன அப்³யாப³ஜ்ஜே²ன ப²ரித்வா விஹரிங்ஸு.
சதுராஸீதிவஸ்ஸஸஹஸ்ஸானி குமாரகீளிதங் கீளிங்ஸு, சதுராஸீதிவஸ்ஸஸஹஸ்ஸானி
ஓபரஜ்ஜங் காரேஸுங், சதுராஸீதிவஸ்ஸஸஹஸ்ஸானி ரஜ்ஜங் காரேஸுங்,
சதுராஸீதிவஸ்ஸஸஹஸ்ஸானி இமஸ்மிங்யேவ மக⁴தே³வஅம்ப³வனே அகா³ரஸ்மா
அனகா³ரியங் பப்³ப³ஜிதா ப்³ரஹ்மசரியமசரிங்ஸு. தே சத்தாரோ ப்³ரஹ்மவிஹாரே
பா⁴வெத்வா காயஸ்ஸ பே⁴தா³ பரங் மரணா ப்³ரஹ்மலோகூபகா³ அஹேஸுங். நிமி தேஸங்
ராஜா [ராஜானங் (ஸீ॰ பீ॰)] பச்சி²மகோ அஹோஸி
த⁴ம்மிகோ த⁴ம்மராஜா த⁴ம்மே டி²தோ மஹாராஜா; த⁴ம்மங் சரதி
ப்³ராஹ்மணக³ஹபதிகேஸு நேக³மேஸு சேவ ஜானபதே³ஸு ச; உபோஸத²ஞ்ச உபவஸதி
சாதுத்³த³ஸிங் பஞ்சத³ஸிங் அட்ட²மிஞ்ச பக்க²ஸ்ஸ.
312. ‘‘பூ⁴தபுப்³ப³ங், ஆனந்த³, தே³வானங் தாவதிங்ஸானங் ஸுத⁴ம்மாயங்
ஸபா⁴யங் ஸன்னிஸின்னானங் ஸன்னிபதிதானங் அயமந்தராகதா² உத³பாதி³ – ‘லாபா⁴ வத,
போ⁴, விதே³ஹானங், ஸுலத்³த⁴ங் வத, போ⁴, விதே³ஹானங், யேஸங் நிமி ராஜா
த⁴ம்மிகோ த⁴ம்மராஜா த⁴ம்மே டி²தோ மஹாராஜா; த⁴ம்மங் சரதி
ப்³ராஹ்மணக³ஹபதிகேஸு நேக³மேஸு சேவ ஜானபதே³ஸு ச;
உபோஸத²ஞ்ச உபவஸதி சாதுத்³த³ஸிங் பஞ்சத³ஸிங் அட்ட²மிஞ்ச பக்க²ஸ்ஸா’தி. அத²
கோ², ஆனந்த³, ஸக்கோ தே³வானமிந்தோ³ தே³வே தாவதிங்ஸே ஆமந்தேஸி –
‘இச்செ²ய்யாத² நோ தும்ஹே, மாரிஸா, நிமிங் ராஜானங் த³ட்டு²’ந்தி? ‘இச்சா²ம
மயங், மாரிஸ, நிமிங் ராஜானங் த³ட்டு²’ந்தி. தேன கோ² பன, ஆனந்த³, ஸமயேன நிமி
ராஜா தத³ஹுபோஸதே² பன்னரஸே ஸீஸங்ன்ஹாதோ [ஸஸீஸங் நஹாதோ (ஸீ॰), ஸீஸன்ஹாதோ (ஸ்யா॰ கங்॰)] உபோஸதி²கோ உபரிபாஸாத³வரக³தோ
நிஸின்னோ ஹோதி. அத² கோ², ஆனந்த³, ஸக்கோ தே³வானமிந்தோ³ – ஸெய்யதா²பி நாம
ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங்
ஸமிஞ்ஜெய்ய, ஏவமேவ – தே³வேஸு தாவதிங்ஸேஸு அந்தரஹிதோ நிமிஸ்ஸ ரஞ்ஞோ பமுகே²
பாதுரஹோஸி. அத² கோ², ஆனந்த³, ஸக்கோ தே³வானமிந்தோ³ நிமிங் ராஜானங் ஏதத³வோச –
‘லாபா⁴ தே, மஹாராஜ, ஸுலத்³த⁴ங் தே, மஹாராஜ. தே³வா, மஹாராஜ, தாவதிங்ஸா
ஸுத⁴ம்மாயங் ஸபா⁴யங் கித்தயமானரூபா ஸன்னிஸின்னா – ‘‘லாபா⁴ வத, போ⁴,
விதே³ஹானங், ஸுலத்³த⁴ங் வத, போ⁴, விதே³ஹானங், யேஸங் நிமி ராஜா த⁴ம்மிகோ
த⁴ம்மராஜா த⁴ம்மே டி²தோ மஹாராஜா; த⁴ம்மங் சரதி ப்³ராஹ்மணக³ஹபதிகேஸு
நேக³மேஸு சேவ ஜானபதே³ஸு ச; உபோஸத²ஞ்ச உபவஸதி சாதுத்³த³ஸிங் பஞ்சத³ஸிங்
அட்ட²மிஞ்ச பக்க²ஸ்ஸா’’தி. தே³வா தே, மஹாராஜ, தாவதிங்ஸா த³ஸ்ஸனகாமா. தஸ்ஸ
தே அஹங், மஹாராஜ, ஸஹஸ்ஸயுத்தங் ஆஜஞ்ஞரத²ங் பஹிணிஸ்ஸாமி; அபி⁴ருஹெய்யாஸி,
மஹாராஜ, தி³ப்³ப³ங் யானங் அவிகம்பமானோ’தி. அதி⁴வாஸேஸி கோ², ஆனந்த³, நிமி
ராஜா துண்ஹீபா⁴வேன.
313. ‘‘அத²
கோ², ஆனந்த³, ஸக்கோ தே³வானமிந்தோ³ நிமிஸ்ஸ ரஞ்ஞோ அதி⁴வாஸனங் விதி³த்வா –
ஸெய்யதா²பி நாம ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா
பா³ஹங் ஸமிஞ்ஜெய்ய, ஏவமேவ – நிமிஸ்ஸ ரஞ்ஞோ பமுகே² அந்தரஹிதோ தே³வேஸு
தாவதிங்ஸேஸு பாதுரஹோஸி. அத² கோ², ஆனந்த³, ஸக்கோ தே³வானமிந்தோ³ மாதலிங்
ஸங்கா³ஹகங் ஆமந்தேஸி – ‘ஏஹி த்வங், ஸம்ம மாதலி, ஸஹஸ்ஸயுத்தங் ஆஜஞ்ஞரத²ங்
யோஜெத்வா நிமிங் ராஜானங் உபஸங்கமித்வா ஏவங் வதே³ஹி –
அயங் தே, மஹாராஜ, ஸஹஸ்ஸயுத்தோ ஆஜஞ்ஞரதோ² ஸக்கேன தே³வானமிந்தே³ன பேஸிதோ;
அபி⁴ருஹெய்யாஸி, மஹாராஜ, தி³ப்³ப³ங் யானங்
அவிகம்பமானோ’தி. ‘ஏவங், ப⁴த்³த³ந்தவா’தி கோ², ஆனந்த³, மாதலி ஸங்கா³ஹகோ
ஸக்கஸ்ஸ தே³வானமிந்த³ஸ்ஸ படிஸ்ஸுத்வா ஸஹஸ்ஸயுத்தங் ஆஜஞ்ஞரத²ங் யோஜெத்வா
நிமிங் ராஜானங் உபஸங்கமித்வா ஏதத³வோச – ‘அயங் தே, மஹாராஜ, ஸஹஸ்ஸயுத்தோ
ஆஜஞ்ஞரதோ² ஸக்கேன தே³வானமிந்தே³ன பேஸிதோ; அபி⁴ருஹ, மஹாராஜ, தி³ப்³ப³ங்
யானங் அவிகம்பமானோ. அபி ச, மஹாராஜ, கதமேன தங் நேமி, யேன வா பாபகம்மா
பாபகானங் கம்மானங் விபாகங் படிஸங்வேதெ³ந்தி, யேன வா
கல்யாணகம்மா கல்யாணகம்மானங் விபாகங் படிஸங்வேதெ³ந்தீ’தி? ‘உப⁴யேனேவ மங்,
மாதலி, நேஹீ’தி. ஸம்பவேஸேஸி [ஸம்பாபேஸி (ஸீ॰ பீ॰)]
கோ², ஆனந்த³, மாதலி, ஸங்கா³ஹகோ நிமிங் ராஜானங் ஸுத⁴ம்மங் ஸப⁴ங். அத்³த³ஸா
கோ², ஆனந்த³, ஸக்கோ தே³வானமிந்தோ³ நிமிங் ராஜானங் தூ³ரதோவ ஆக³ச்ச²ந்தங்.
தி³ஸ்வான நிமிங் ராஜானங் ஏதத³வோச – ‘ஏஹி கோ², மஹாராஜ. ஸ்வாக³தங், மஹாராஜ.
தே³வா தே த³ஸ்ஸனகாமா, மஹாராஜ, தாவதிங்ஸா ஸுத⁴ம்மாயங் ஸபா⁴யங் கித்தயமானரூபா
ஸன்னிஸின்னா – ‘‘லாபா⁴ வத, போ⁴, விதே³ஹானங், ஸுலத்³த⁴ங் வத, போ⁴,
விதே³ஹானங், யேஸங் நிமி ராஜா த⁴ம்மிகோ த⁴ம்மராஜா த⁴ம்மே டி²தோ மஹாராஜா;
த⁴ம்மங் சரதி ப்³ராஹ்மணக³ஹபதிகேஸு நேக³மேஸு சேவ ஜானபதே³ஸு ச; உபோஸத²ஞ்ச
உபவஸதி சாதுத்³த³ஸிங் பஞ்சத³ஸிங் அட்ட²மிஞ்ச பக்க²ஸ்ஸா’’தி. தே³வா தே,
மஹாராஜ, தாவதிங்ஸா த³ஸ்ஸனகாமா . அபி⁴ரம, மஹாராஜ,
தே³வேஸு தே³வானுபா⁴வேனா’தி. ‘அலங், மாரிஸ, தத்தே²வ மங் மிதி²லங் படினேது.
ததா²ஹங் த⁴ம்மங் சரிஸ்ஸாமி ப்³ராஹ்மணக³ஹபதிகேஸு நேக³மேஸு சேவ ஜானபதே³ஸு ச;
உபோஸத²ஞ்ச உபவஸாமி சாதுத்³த³ஸிங் பஞ்சத³ஸிங் அட்ட²மிஞ்ச பக்க²ஸ்ஸா’தி.
314.
‘‘அத² கோ², ஆனந்த³, ஸக்கோ தே³வானமிந்தோ³ மாதலிங் ஸங்கா³ஹகங் ஆமந்தேஸி –
‘ஏஹி த்வங், ஸம்ம மாதலி, ஸஹஸ்ஸயுத்தங் ஆஜஞ்ஞரத²ங் யோஜெத்வா நிமிங்
ராஜானங் தத்தே²வ மிதி²லங் படினேஹீ’தி. ‘ஏவங், ப⁴த்³த³ந்தவா’தி கோ²,
ஆனந்த³, மாதலி ஸங்கா³ஹகோ ஸக்கஸ்ஸ தே³வானமிந்த³ஸ்ஸ படிஸ்ஸுத்வா ஸஹஸ்ஸயுத்தங்
ஆஜஞ்ஞரத²ங் யோஜெத்வா நிமிங் ராஜானங் தத்தே²வ மிதி²லங் படினேஸி. தத்ர
ஸுத³ங், ஆனந்த³, நிமி ராஜா த⁴ம்மங் சரதி ப்³ராஹ்மணக³ஹபதிகேஸு நேக³மேஸு சேவ
ஜானபதே³ஸு ச, உபோஸத²ஞ்ச உபவஸதி சாதுத்³த³ஸிங்
பஞ்சத³ஸிங் அட்ட²மிஞ்ச பக்க²ஸ்ஸாதி. அத² கோ², ஆனந்த³, நிமி ராஜா ப³ஹூனங்
வஸ்ஸானங் ப³ஹூனங் வஸ்ஸஸதானங் ப³ஹூனங் வஸ்ஸஸஹஸ்ஸானங் அச்சயேன கப்பகங்
ஆமந்தேஸி – ‘யதா³ மே, ஸம்ம கப்பக, பஸ்ஸெய்யாஸி ஸிரஸ்மிங் பலிதானி ஜாதானி,
அத² மே ஆரோசெய்யாஸீ’தி. ‘ஏவங், தே³வா’தி கோ², ஆனந்த³, கப்பகோ நிமிஸ்ஸ ரஞ்ஞோ
பச்சஸ்ஸோஸி. அத்³த³ஸா கோ², ஆனந்த³, கப்பகோ ப³ஹூனங் வஸ்ஸானங் ப³ஹூனங்
வஸ்ஸஸதானங் ப³ஹூனங் வஸ்ஸஸஹஸ்ஸானங் அச்சயேன நிமிஸ்ஸ ரஞ்ஞோ ஸிரஸ்மிங் பலிதானி
ஜாதானி. தி³ஸ்வான நிமிங் ராஜானங் ஏதத³வோச – ‘பாதுபூ⁴தா கோ² தே³வஸ்ஸ
தே³வதூ³தா; தி³ஸ்ஸந்தி ஸிரஸ்மிங் பலிதானி ஜாதானீ’தி. ‘தேன ஹி, ஸம்ம கப்பக,
தானி பலிதானி ஸாது⁴கங் ஸண்டா³ஸேன உத்³த⁴ரித்வா மம
அஞ்ஜலிஸ்மிங் பதிட்டா²பேஹீ’தி. ‘ஏவங், தே³வா’தி கோ², ஆனந்த³, கப்பகோ
நிமிஸ்ஸ ரஞ்ஞோ படிஸ்ஸுத்வா தானி பலிதானி ஸாது⁴கங் ஸண்டா³ஸேன
உத்³த⁴ரித்வா நிமிஸ்ஸ ரஞ்ஞோ அஞ்ஜலிஸ்மிங் பதிட்டா²பேஸி. அத² கோ², ஆனந்த³,
நிமி ராஜா கப்பகஸ்ஸ கா³மவரங் த³த்வா ஜெட்ட²புத்தங் குமாரங் ஆமந்தாபெத்வா
ஏதத³வோச – ‘பாதுபூ⁴தா கோ² மே, தாத குமார, தே³வதூ³தா; தி³ஸ்ஸந்தி ஸிரஸ்மிங்
பலிதானி ஜாதானி; பு⁴த்தா கோ² பன மே மானுஸகா காமா; ஸமயோ தி³ப்³பே³ காமே
பரியேஸிதுங். ஏஹி த்வங், தாத குமார, இமங் ரஜ்ஜங் படிபஜ்ஜ. அஹங் பன
கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா
அனகா³ரியங் பப்³ப³ஜிஸ்ஸாமி. தேன ஹி, தாத குமார, யதா³ த்வம்பி பஸ்ஸெய்யாஸி
ஸிரஸ்மிங் பலிதானி ஜாதானி, அத² கப்பகஸ்ஸ கா³மவரங் த³த்வா ஜெட்ட²புத்தங்
குமாரங் ஸாது⁴கங் ரஜ்ஜே ஸமனுஸாஸித்வா கேஸமஸ்ஸுங் ஓஹாரெத்வா காஸாயானி
வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜெய்யாஸி. யேன மே இத³ங்
கல்யாணங் வத்தங் நிஹிதங் அனுப்பவத்தெய்யாஸி, மா கோ² மே த்வங் அந்திமபுரிஸோ
அஹோஸி. யஸ்மிங் கோ², தாத குமார, புரிஸயுகே³ வத்தமானே ஏவரூபஸ்ஸ கல்யாணஸ்ஸ
வத்தஸ்ஸ ஸமுச்சே²தோ³ ஹோதி ஸோ தேஸங் அந்திமபுரிஸோ ஹோதி. தங் தாஹங், தாத
குமார, ஏவங் வதா³மி – ‘யேன மே இத³ங் கல்யாணங் வத்தங் நிஹிதங்
அனுப்பவத்தெய்யாஸி, மா கோ² மே த்வங் அந்திமபுரிஸோ அஹோஸீ’தி.
315. ‘‘அத² கோ², ஆனந்த³, நிமி ராஜா கப்பகஸ்ஸ கா³மவரங் த³த்வா
ஜெட்ட²புத்தங் குமாரங் ஸாது⁴கங் ரஜ்ஜே ஸமனுஸாஸித்வா இமஸ்மிங்யேவ
மக⁴தே³வஅம்ப³வனே கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜி. ஸோ மெத்தாஸஹக³தேன சேதஸா ஏகங் தி³ஸங்
ப²ரித்வா விஹாஸி, ததா² து³தியங் , ததா² ததியங், ததா²
சதுத்த²ங்; இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங்
லோகங் மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன
அப்³யாப³ஜ்ஜே²ன ப²ரித்வா விஹாஸி. கருணாஸஹக³தேன சேதஸா… முதி³தாஸஹக³தேன
சேதஸா… உபெக்கா²ஸஹக³தேன சேதஸா ஏகங் தி³ஸங் ப²ரித்வா விஹாஸி, ததா² து³தியங்,
ததா² ததியங், ததா² சதுத்த²ங்; இதி உத்³த⁴மதோ⁴ திரியங் ஸப்³ப³தி⁴
ஸப்³ப³த்ததாய ஸப்³பா³வந்தங் லோகங் உபெக்கா²ஸஹக³தேன சேதஸா விபுலேன
மஹக்³க³தேன அப்பமாணேன அவேரேன அப்³யாப³ஜ்ஜே²ன ப²ரித்வா விஹாஸி. நிமி கோ²,
பனானந்த³, ராஜா சதுராஸீதிவஸ்ஸஸஹஸ்ஸானி குமாரகீளிதங் கீளி,
சதுராஸீதிவஸ்ஸஸஹஸ்ஸானி ஓபரஜ்ஜங் காரேஸி, சதுராஸீதிவஸ்ஸஸஹஸ்ஸானி ரஜ்ஜங்
காரேஸி, சதுராஸீதிவஸ்ஸஸஹஸ்ஸானி இமஸ்மிங்யேவ மக⁴தே³வஅம்ப³வனே அகா³ரஸ்மா
அனகா³ரியங் பப்³ப³ஜிதோ ப்³ரஹ்மசரியமசரி. ஸோ சத்தாரோ ப்³ரஹ்மவிஹாரே
பா⁴வெத்வா காயஸ்ஸ பே⁴தா³ பரங் மரணா ப்³ரஹ்மலோகூபகோ³ அஹோஸி. நிமிஸ்ஸ கோ²
பனானநந்த³ , ரஞ்ஞோ களாரஜனகோ நாம புத்தோ அஹோஸி. ந ஸோ
அகா³ரஸ்மா அனகா³ரியங் பப்³ப³ஜி. ஸோ தங் கல்யாணங் வத்தங் ஸமுச்சி²ந்தி³. ஸோ
தேஸங் அந்திமபுரிஸோ அஹோஸி.
316. ‘‘ஸியா கோ² பன தே, ஆனந்த³, ஏவமஸ்ஸ – ‘அஞ்ஞோ நூன தேன ஸமயேன ராஜா மக⁴தே³வோ அஹோஸி, யேன தங் கல்யாணங் வத்தங் நிஹித’ந்தி [யோ தங் கல்யாணங் வத்தங் நிஹினீதி (ஸீ॰)]. ந கோ² பனேதங், ஆனந்த³, ஏவங் த³ட்ட²ப்³ப³ங். அஹங் தேன ஸமயேன ராஜா மக⁴தே³வோ அஹோஸிங். (அஹங் தங் கல்யாணங் வத்தங் நிஹினிங்,) [( ) நத்தி² (க॰)]
மயா தங் கல்யாணங் வத்தங் நிஹிதங்; பச்சி²மா ஜனதா அனுப்பவத்தேஸி. தங் கோ²
பனானந்த³, கல்யாணங் வத்தங் ந நிப்³பி³தா³ய ந விராகா³ய ந நிரோதா⁴ய ந உபஸமாய ந
அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி, யாவதே³வ
ப்³ரஹ்மலோகூபபத்தியா. இத³ங் கோ² பனானந்த³, ஏதரஹி மயா கல்யாணங் வத்தங்
நிஹிதங் ஏகந்தனிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய
நிப்³பா³னாய ஸங்வத்ததி. கதமஞ்சானந்த³, ஏதரஹி மயா கல்யாணங் வத்தங் நிஹிதங்
ஏகந்தனிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய
நிப்³பா³னாய ஸங்வத்ததி? அயமேவ அரியோ அட்ட²ங்கி³கோ மக்³கோ³, ஸெய்யதி²த³ங் –
ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ,
ஸம்மாவாயாமோ , ஸம்மாஸதி, ஸம்மாஸமாதி⁴. இத³ங் கோ²,
ஆனந்த³, ஏதரஹி மயா கல்யாணங் வத்தங் நிஹிதங் ஏகந்தனிப்³பி³தா³ய விராகா³ய
நிரோதா⁴ய உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. தங் வோ அஹங்,
ஆனந்த³, ஏவங் வதா³மி – ‘யேன மே இத³ங் கல்யாணங் வத்தங் நிஹிதங்
அனுப்பவத்தெய்யாத², மா கோ² மே தும்ஹே அந்திமபுரிஸா அஹுவத்த²’. யஸ்மிங் கோ²,
ஆனந்த³, புரிஸயுகே³ வத்தமானே ஏவரூபஸ்ஸ கல்யாணஸ்ஸ வத்தஸ்ஸ
ஸமுச்சே²தோ³ ஹோதி ஸோ தேஸங் அந்திமபுரிஸோ ஹோதி. தங் வோ அஹங், ஆனந்த³, ஏவங்
வதா³மி – ‘யேன மே இத³ங் கல்யாணங் வத்தங் நிஹிதங் அனுப்பவத்தெய்யாத², மா கோ²
மே தும்ஹே அந்திமபுரிஸா அஹுவத்தா²’’’தி.
இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதங் அபி⁴னந்தீ³தி.
மக⁴தே³வஸுத்தங் நிட்டி²தங் ததியங்.
4. மது⁴ரஸுத்தங்
317. ஏவங்
மே ஸுதங் – ஏகங் ஸமயங் ஆயஸ்மா மஹாகச்சானோ மது⁴ராயங் விஹரதி கு³ந்தா³வனே.
அஸ்ஸோஸி கோ² ராஜா மாது⁴ரோ அவந்திபுத்தோ – ‘‘ஸமணோ க²லு, போ⁴, கச்சானோ
மது⁴ராயங் [மது²ராயங் (டீகா)] விஹரதி
கு³ந்தா³வனே. தங் கோ² பன ப⁴வந்தங் கச்சானங் ஏவங் கல்யாணோ கித்திஸத்³தோ³
அப்³பு⁴க்³க³தோ – ‘பண்டி³தோ வியத்தோ மேதா⁴வீ ப³ஹுஸ்ஸுதோ சித்தகதீ²
கல்யாணபடிபா⁴னோ வுத்³தோ⁴ சேவ அரஹா ச’. ஸாது⁴ கோ² பன ததா²ரூபானங் அரஹதங்
த³ஸ்ஸனங் ஹோதீ’’தி. அத² கோ² ராஜா மாது⁴ரோ அவந்திபுத்தோ ப⁴த்³ரானி ப⁴த்³ரானி
யானானி யோஜாபெத்வா ப⁴த்³ரங் யானங் அபி⁴ருஹித்வா ப⁴த்³ரேஹி ப⁴த்³ரேஹி
யானேஹி மது⁴ராய நிய்யாஸி மஹச்சராஜானுபா⁴வேன ஆயஸ்மந்தங் மஹாகச்சானங்
த³ஸ்ஸனாய. யாவதிகா யானஸ்ஸ பூ⁴மி யானேன க³ந்த்வா யானா பச்சோரோஹித்வா
பத்திகோவ யேனாயஸ்மா மஹாகச்சானோ தேனுபஸங்கமி; உபஸங்கமித்வா ஆயஸ்மதா
மஹாகச்சானேன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங்
வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ராஜா மாது⁴ரோ
அவந்திபுத்தோ ஆயஸ்மந்தங் மஹாகச்சானங் ஏதத³வோச – ‘‘ப்³ராஹ்மணா, போ⁴ கச்சான,
ஏவமாஹங்ஸு – ‘ப்³ராஹ்மணோவ ஸெட்டோ² வண்ணோ, ஹீனோ அஞ்ஞோ வண்ணோ; ப்³ராஹ்மணோவ
ஸுக்கோ வண்ணோ, கண்ஹோ அஞ்ஞோ வண்ணோ; ப்³ராஹ்மணாவ ஸுஜ்ஜ²ந்தி, நோ அப்³ராஹ்மணா;
ப்³ராஹ்மணாவ ப்³ரஹ்முனோ புத்தா ஓரஸா முக²தோ ஜாதா ப்³ரஹ்மஜா
ப்³ரஹ்மனிம்மிதா ப்³ரஹ்மதா³யாதா³’தி. இத⁴ ப⁴வங் கச்சானோ கிமக்கா²யீ’’தி?
‘‘கோ⁴ஸோயேவ கோ² ஏஸோ, மஹாராஜ, லோகஸ்மிங் – ‘ப்³ராஹ்மணோவ ஸெட்டோ² வண்ணோ, ஹீனோ
அஞ்ஞோ வண்ணோ; ப்³ராஹ்மணோவ ஸுக்கோ வண்ணோ, கண்ஹோ அஞ்ஞோ வண்ணோ; ப்³ராஹ்மணாவ
ஸுஜ்ஜ²ந்தி, நோ அப்³ராஹ்மணா; ப்³ராஹ்மணாவ ப்³ரஹ்முனோ புத்தா ஓரஸா முக²தோ
ஜாதா ப்³ரஹ்மஜா ப்³ரஹ்மனிம்மிதா
ப்³ரஹ்மதா³யாதா³’தி. தத³மினாபேதங், மஹாராஜ, பரியாயேன வேதி³தப்³ப³ங் யதா²
கோ⁴ஸோயேவேஸோ லோகஸ்மிங் – ‘ப்³ராஹ்மணோவ ஸெட்டோ² வண்ணோ, ஹீனோ அஞ்ஞோ
வண்ணோ…பே॰… ப்³ரஹ்மதா³யாதா³’’’தி.
318.
‘‘தங் கிங் மஞ்ஞஸி, மஹாராஜ, க²த்தியஸ்ஸ சேபி இஜ்ஜெ²ய்ய த⁴னேன வா த⁴ஞ்ஞேன
வா ரஜதேன வா ஜாதரூபேன வா க²த்தியோபிஸ்ஸாஸ்ஸ புப்³பு³ட்டா²யீ பச்சா²னிபாதீ
கிங்காரபடிஸ்ஸாவீ மனாபசாரீ பியவாதீ³… ப்³ராஹ்மணோபிஸ்ஸாஸ்ஸ…
வெஸ்ஸோபிஸ்ஸாஸ்ஸ… ஸுத்³தோ³பிஸ்ஸாஸ்ஸ புப்³பு³ட்டா²யீ பச்சா²னிபாதீ
கிங்காரபடிஸ்ஸாவீ மனாபசாரீ பியவாதீ³’’தி? ‘‘க²த்தியஸ்ஸ சேபி, போ⁴ கச்சான,
இஜ்ஜெ²ய்ய த⁴னேன வா த⁴ஞ்ஞேன வா ரஜதேன வா ஜாதரூபேன வா க²த்தியோபிஸ்ஸாஸ்ஸ
புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³…
ப்³ராஹ்மணோபிஸ்ஸாஸ்ஸ… வெஸ்ஸோபிஸ்ஸாஸ்ஸ… ஸுத்³தோ³பிஸ்ஸாஸ்ஸ புப்³பு³ட்டா²யீ
பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³’’தி.
‘‘தங் கிங் மஞ்ஞஸி, மஹாராஜ,
ப்³ராஹ்மணஸ்ஸ சேபி இஜ்ஜெ²ய்ய த⁴னேன வா த⁴ஞ்ஞேன வா ரஜதேன வா ஜாதரூபேன வா
ப்³ராஹ்மணோபிஸ்ஸாஸ்ஸ புப்³பு³ட்டா²யீ பச்சா²னிபாதீ கிங்காரபடிஸ்ஸாவீ
மனாபசாரீ பியவாதீ³… வெஸ்ஸோபிஸ்ஸாஸ்ஸ… ஸுத்³தோ³பிஸ்ஸாஸ்ஸ …
க²த்தியோபிஸ்ஸாஸ்ஸ புப்³பு³ட்டா²யீ பச்சா²னிபாதீ கிங்காரபடிஸ்ஸாவீ
மனாபசாரீ பியவாதீ³’’தி? ‘‘ப்³ராஹ்மணஸ்ஸ சேபி, போ⁴ கச்சான, இஜ்ஜெ²ய்ய த⁴னேன
வா த⁴ஞ்ஞேன வா ரஜதேன வா ஜாதரூபேன வா ப்³ராஹ்மணோபிஸ்ஸாஸ்ஸ புப்³பு³ட்டா²யீ
பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³… வெஸ்ஸோபிஸ்ஸாஸ்ஸ…
ஸுத்³தோ³பிஸ்ஸாஸ்ஸ … க²த்தியோபிஸ்ஸாஸ்ஸ புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³’’தி.
‘‘தங் கிங் மஞ்ஞஸி, மஹாராஜ, வெஸ்ஸஸ்ஸ சேபி இஜ்ஜெ²ய்ய
த⁴னேன வா த⁴ஞ்ஞேன வா ரஜதேன வா ஜாதரூபேன வா வெஸ்ஸோபிஸ்ஸாஸ்ஸ புப்³பு³ட்டா²யீ
பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³… ஸுத்³தோ³பிஸ்ஸாஸ்ஸ…
க²த்தியோபிஸ்ஸாஸ்ஸ… ப்³ராஹ்மணோபிஸ்ஸாஸ்ஸ புப்³பு³ட்டா²யீ பச்சா²னிபாதீ
கிங்காரபடிஸ்ஸாவீ மனாபசாரீ பியவாதீ³’’தி? ‘‘வெஸ்ஸஸ்ஸ சேபி, போ⁴ கச்சான,
இஜ்ஜெ²ய்ய த⁴னேன வா த⁴ஞ்ஞேன வா ரஜதேன வா ஜாதரூபேன வா வெஸ்ஸோபிஸ்ஸாஸ்ஸ
புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³…
ஸுத்³தோ³பிஸ்ஸாஸ்ஸ… க²த்தியோபிஸ்ஸாஸ்ஸ… ப்³ராஹ்மணோபிஸ்ஸாஸ்ஸ
புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³’’தி.
‘‘தங் கிங் மஞ்ஞஸி, மஹாராஜ,
ஸுத்³த³ஸ்ஸ சேபி இஜ்ஜெ²ய்ய த⁴னேன வா த⁴ஞ்ஞேன வா ரஜதேன வா ஜாதரூபேன வா
ஸுத்³தோ³பிஸ்ஸாஸ்ஸ புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ
பியவாதீ³… க²த்தியோபிஸ்ஸாஸ்ஸ… ப்³ராஹ்மணோபிஸ்ஸாஸ்ஸ… வெஸ்ஸோபிஸ்ஸாஸ்ஸ
புப்³பு³ட்டா²யீ பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³’’தி?
‘‘ஸுத்³த³ஸ்ஸ சேபி, போ⁴ கச்சான, இஜ்ஜெ²ய்ய த⁴னேன வா த⁴ஞ்ஞேன வா ரஜதேன வா
ஜாதரூபேன வா ஸுத்³தோ³பிஸ்ஸாஸ்ஸ புப்³பு³ட்டா²யீ பச்சா²னிபாதீ
கிங்காரபடிஸ்ஸாவீ மனாபசாரீ பியவாதீ³தி…
க²த்தியோபிஸ்ஸாஸ்ஸ… ப்³ராஹ்மணோபிஸ்ஸாஸ்ஸ… வெஸ்ஸோபிஸ்ஸாஸ்ஸ புப்³பு³ட்டா²யீ
பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³’’தி.
‘‘தங் கிங் மஞ்ஞஸி, மஹாராஜ, யதி³ ஏவங் ஸந்தே, இமே சத்தாரோ வண்ணா ஸமஸமா ஹொந்தி நோ வா? கத²ங் வா தே எத்த² ஹோதீ’’தி? ‘‘அத்³தா⁴ கோ², போ⁴ கச்சான, ஏவங் ஸந்தே, இமே சத்தாரோ வண்ணா ஸமஸமா ஹொந்தி. நேஸங் [நாஸங் (ஸீ॰), நாஹங் (ஸ்யா॰ கங்॰)]
எத்த² கிஞ்சி நானாகரணங் ஸமனுபஸ்ஸாமீ’’தி. ‘‘இமினாபி கோ² ஏதங், மஹாராஜ,
பரியாயேன வேதி³தப்³ப³ங் யதா² கோ⁴ஸோ யேவேஸோ லோகஸ்மிங் – ‘ப்³ராஹ்மணோவ
ஸெட்டோ² வண்ணோ, ஹீனோ அஞ்ஞோ வண்ணோ…பே॰… ப்³ரஹ்மதா³யாதா³’’’தி.
319. ‘‘தங்
கிங் மஞ்ஞஸி, மஹாராஜ, இத⁴ஸ்ஸ க²த்தியோ பாணாதிபாதீ அதி³ன்னாதா³யீ
காமேஸுமிச்சா²சாரீ முஸாவாதீ³ பிஸுணவாசோ ப²ருஸவாசோ ஸம்ப²ப்பலாபீ அபி⁴ஜ்ஜா²லு
ப்³யாபன்னசித்தோ மிச்சா²தி³ட்டி² [மிச்சா²தி³ட்டீ² (ஸப்³ப³த்த²)] காயஸ்ஸ பே⁴தா³ பரங் மரணா அபாயங் து³க்³க³திங்
வினிபாதங் நிரயங் உபபஜ்ஜெய்ய நோ வா? கத²ங் வா தே எத்த² ஹோதீ’’தி?
‘‘க²த்தியோபி ஹி, போ⁴ கச்சான, பாணாதிபாதீ அதி³ன்னாதா³யீ காமேஸுமிச்சா²சாரீ
முஸாவாதீ³ பிஸுணவாசோ ப²ருஸவாசோ ஸம்ப²ப்பலாபீ அபி⁴ஜ்ஜா²லு ப்³யாபன்னசித்தோ
மிச்சா²தி³ட்டி² காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜெய்ய. ஏவங் மே எத்த² ஹோதி, ஏவஞ்ச பன மே ஏதங் அரஹதங்
ஸுத’’ந்தி.
‘‘ஸாது⁴ ஸாது⁴, மஹாராஜ! ஸாது⁴ கோ² தே ஏதங், மஹாராஜ,
ஏவங் ஹோதி, ஸாது⁴ ச பன தே ஏதங் அரஹதங் ஸுதங். தங் கிங் மஞ்ஞஸி, மஹாராஜ,
இத⁴ஸ்ஸ ப்³ராஹ்மணோ…பே॰… இத⁴ஸ்ஸ வெஸ்ஸோ…பே॰… இத⁴ஸ்ஸ ஸுத்³தோ³ பாணாதிபாதீ
அதி³ன்னாதா³யீ…பே॰… மிச்சா²தி³ட்டி² காயஸ்ஸ பே⁴தா³ பரங் மரணா அபாயங்
து³க்³க³திங் வினிபாதங் நிரயங் உபபஜ்ஜெய்ய நோ வா? கத²ங் வா தே எத்த²
ஹோதீ’’தி? ‘‘ஸுத்³தோ³பி ஹி, போ⁴ கச்சான, பாணாதிபாதீ அதி³ன்னாதா³யீ…பே॰…
மிச்சா²தி³ட்டி² காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜெய்ய. ஏவங் மே எத்த² ஹோதி, ஏவஞ்ச பன மே ஏதங் அரஹதங்
ஸுத’’ந்தி.
‘‘ஸாது⁴ ஸாது⁴, மஹாராஜ! ஸாது⁴ கோ² தே ஏதங், மஹாராஜ,
ஏவங் ஹோதி, ஸாது⁴ ச பன தே ஏதங் அரஹதங் ஸுதங். தங் கிங் மஞ்ஞஸி, மஹாராஜ,
யதி³ ஏவங் ஸந்தே, இமே சத்தாரோ வண்ணா ஸமஸமா ஹொந்தி நோ வா? கத²ங் வா தே எத்த² ஹோதீ’’தி? ‘‘அத்³தா⁴ கோ², போ⁴ கச்சான, ஏவங் ஸந்தே, இமே சத்தாரோ வண்ணா ஸமஸமா ஹொந்தி. நேஸங் எத்த²
கிஞ்சி நானாகரணங் ஸமனுபஸ்ஸாமீ’’தி. ‘‘இமினாபி கோ² ஏதங், மஹாராஜ, பரியாயேன
வேதி³தப்³ப³ங் யதா² கோ⁴ஸோ யேவேஸோ லோகஸ்மிங் – ‘ப்³ராஹ்மணோவ ஸெட்டோ² வண்ணோ,
ஹீனோ அஞ்ஞோ வண்ணோ…பே॰… ப்³ரஹ்மதா³யாதா³’’’தி.
320.
‘‘தங் கிங் மஞ்ஞஸி, மஹாராஜ, இத⁴ஸ்ஸ க²த்தியோ பாணாதிபாதா படிவிரதோ,
அதி³ன்னாதா³னா படிவிரதோ, காமேஸுமிச்சா²சாரா படிவிரதோ, முஸாவாதா³ படிவிரதோ,
பிஸுணாய வாசாய படிவிரதோ, ப²ருஸாய வாசாய படிவிரதோ, ஸம்ப²ப்பலாபா படிவிரதோ,
அனபி⁴ஜ்ஜா²லு அப்³யாபன்னசித்தோ ஸம்மாதி³ட்டி² [ஸம்மாதி³ட்டீ² (ஸ்யா॰ கங்॰ பீ॰ க॰)]
காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜெய்ய நோ வா? கத²ங்
வா தே எத்த² ஹோதீ’’தி? ‘‘க²த்தியோபி ஹி, போ⁴ கச்சான, பாணாதிபாதா படிவிரதோ,
அதி³ன்னாதா³னா படிவிரதோ, காமேஸுமிச்சா²சாரா படிவிரதோ, முஸாவாதா³ படிவிரதோ,
பிஸுணாய வாசாய படிவிரதோ, ப²ருஸாய வாசாய படிவிரதோ, ஸம்ப²ப்பலாபா படிவிரதோ,
அனபி⁴ஜ்ஜா²லு அப்³யாபன்னசித்தோ ஸம்மாதி³ட்டி² காயஸ்ஸ பே⁴தா³ பரங் மரணா
ஸுக³திங் ஸக்³க³ங் லோகங் உபபஜ்ஜெய்ய. ஏவங் மே எத்த² ஹோதி, ஏவஞ்ச பன மே ஏதங்
அரஹதங் ஸுத’’ந்தி.
‘‘ஸாது⁴ ஸாது⁴, மஹாராஜ! ஸாது⁴ கோ² தே ஏதங், மஹாராஜ,
ஏவங் ஹோதி, ஸாது⁴ ச பன தே ஏதங் அரஹதங் ஸுதங். தங் கிங் மஞ்ஞஸி, மஹாராஜ,
இத⁴ஸ்ஸ ப்³ராஹ்மணோ, இத⁴ஸ்ஸ வெஸ்ஸோ, இத⁴ஸ்ஸ ஸுத்³தோ³ பாணாதிபாதா படிவிரதோ
அதி³ன்னாதா³னா படிவிரதோ…பே॰… ஸம்மாதி³ட்டி² காயஸ்ஸ பே⁴தா³ பரங் மரணா
ஸுக³திங் ஸக்³க³ங் லோகங் உபபஜ்ஜெய்ய நோ வா? கத²ங் வா
தே எத்த² ஹோதீ’’தி? ‘‘ஸுத்³தோ³பி ஹி, போ⁴ கச்சான, பாணாதிபாதா படிவிரதோ,
அதி³ன்னாதா³னா படிவிரதோ…பே॰… ஸம்மாதி³ட்டி² காயஸ்ஸ பே⁴தா³ பரங் மரணா
ஸுக³திங் ஸக்³க³ங் லோகங் உபபஜ்ஜெய்ய. ஏவங் மே எத்த² ஹோதி, ஏவஞ்ச பன மே ஏதங்
அரஹதங் ஸுத’’ந்தி.
‘‘ஸாது⁴ ஸாது⁴, மஹாராஜ! ஸாது⁴ கோ² தே ஏதங், மஹாராஜ,
ஏவங் ஹோதி, ஸாது⁴ ச பன தே ஏதங் அரஹதங் ஸுதங். தங் கிங் மஞ்ஞஸி, மஹாராஜ,
யதி³ ஏவங் ஸந்தே, இமே சத்தாரோ வண்ணா ஸமஸமா ஹொந்தி நோ வா? கத²ங் வா தே எத்த²
ஹோதீ’’தி? ‘‘அத்³தா⁴ கோ², போ⁴ கச்சான, ஏவங் ஸந்தே, இமே சத்தாரோ வண்ணா ஸமஸமா ஹொந்தி. நேஸங் எத்த² கிஞ்சி நானாகரணங் ஸமனுபஸ்ஸாமீ’’தி .
‘‘இமினாபி கோ² ஏதங், மஹாராஜ, பரியாயேன வேதி³தப்³ப³ங் யதா² கோ⁴ஸோ யேவேஸோ
லோகஸ்மிங் – ‘ப்³ராஹ்மணோவ ஸெட்டோ² வண்ணோ, ஹீனோ அஞ்ஞோ வண்ணோ…பே॰…
ப்³ரஹ்மதா³யாதா³’’’தி.
321.
‘‘தங் கிங் மஞ்ஞஸி, மஹாராஜ, இத⁴ க²த்தியோ ஸந்தி⁴ங் வா சி²ந்தெ³ய்ய,
நில்லோபங் வா ஹரெய்ய, ஏகாகா³ரிகங் வா கரெய்ய, பரிபந்தே² வா திட்டெ²ய்ய,
பரதா³ரங் வா க³ச்செ²ய்ய, தஞ்சே தே புரிஸா க³ஹெத்வா த³ஸ்ஸெய்யுங் – ‘அயங்
தே, தே³வ, சோரோ ஆகு³சாரீ. இமஸ்ஸ யங் இச்ச²ஸி தங் த³ண்ட³ங் பணேஹீ’தி. கிந்தி
நங் கரெய்யாஸீ’’தி? ‘‘கா⁴தெய்யாம வா, போ⁴ கச்சான,
ஜாபெய்யாம வா பப்³பா³ஜெய்யாம வா யதா²பச்சயங் வா கரெய்யாம. தங் கிஸ்ஸ ஹேது?
யா ஹிஸ்ஸ , போ⁴ கச்சான, புப்³பே³ ‘க²த்தியோ’தி ஸமஞ்ஞா ஸாஸ்ஸ அந்தரஹிதா; சோரொத்வேவ ஸங்க்²யங் [ஸங்க²ங் (ஸீ॰ ஸ்யா॰ கங்॰ பீ॰)] க³ச்ச²தீ’’தி.
‘‘தங் கிங் மஞ்ஞஸி, மஹாராஜ, இத⁴ ப்³ராஹ்மணோ, இத⁴
வெஸ்ஸோ, இத⁴ ஸுத்³தோ³ ஸந்தி⁴ங் வா சி²ந்தெ³ய்ய, நில்லோபங் வா ஹரெய்ய,
ஏகாகா³ரிகங் வா கரெய்ய, பரிபந்தே² வா திட்டெ²ய்ய, பரதா³ரங் வா க³ச்செ²ய்ய,
தஞ்சே தே புரிஸா க³ஹெத்வா த³ஸ்ஸெய்யுங் – ‘அயங் தே, தே³வ, சோரோ ஆகு³சாரீ.
இமஸ்ஸ யங் இச்ச²ஸி தங் த³ண்ட³ங் பணேஹீ’தி. கிந்தி நங் கரெய்யாஸீ’’தி?
‘‘கா⁴தெய்யாம வா, போ⁴ கச்சான, ஜாபெய்யாம வா பப்³பா³ஜெய்யாம வா யதா²பச்சயங்
வா கரெய்யாம. தங் கிஸ்ஸ ஹேது? யா ஹிஸ்ஸ, போ⁴ கச்சான, புப்³பே³ ‘ஸுத்³தோ³’தி
ஸமஞ்ஞா ஸாஸ்ஸ அந்தரஹிதா; சோரொத்வேவ ஸங்க்²யங் க³ச்ச²தீ’’தி.
‘‘தங் கிங் மஞ்ஞஸி, மஹாராஜ, யதி³ ஏவங் ஸந்தே, இமே
சத்தாரோ வண்ணா ஸமஸமா ஹொந்தி நோ வா? கத²ங் வா தே எத்த² ஹோதீ’’தி? ‘‘அத்³தா⁴
கோ², போ⁴ கச்சான, ஏவங் ஸந்தே, இமே சத்தாரோ வண்ணா ஸமஸமா ஹொந்தி. நேஸங் எத்த²
கிஞ்சி நானாகரணங் ஸமனுபஸ்ஸாமீ’’தி. ‘‘இமினாபி கோ² ஏதங், மஹாராஜ, பரியாயேன
வேதி³தப்³ப³ங் யதா² கோ⁴ஸோ யேவேஸோ லோகஸ்மிங் – ‘ப்³ராஹ்மணோவ ஸெட்டோ² வண்ணோ,
ஹீனோ அஞ்ஞோ வண்ணோ…பே॰… ப்³ரஹ்மதா³யாதா³’’’தி.
322. ‘‘தங் கிங் மஞ்ஞஸி, மஹாராஜ, இத⁴ க²த்தியோ கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜிதோ அஸ்ஸ விரதோ பாணாதிபாதா, விரதோ
அதி³ன்னாதா³னா, விரதோ முஸாவாதா³, ரத்தூபரதோ, ஏகப⁴த்திகோ, ப்³ரஹ்மசாரீ,
ஸீலவா, கல்யாணத⁴ம்மோ? கிந்தி நங் கரெய்யாஸீ’’தி? ‘‘அபி⁴வாதெ³ய்யாம வா [பி (தீ³॰ நி॰ 1.184, 187 ஸாமஞ்ஞப²லே)], போ⁴ கச்சான, பச்சுட்டெ²ய்யாம வா ஆஸனேன வா
நிமந்தெய்யாம அபி⁴னிமந்தெய்யாம வா நங்
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி த⁴ம்மிகங் வா அஸ்ஸ
ரக்கா²வரணகு³த்திங் ஸங்வித³ஹெய்யாம. தங் கிஸ்ஸ ஹேது? யா ஹிஸ்ஸ, போ⁴ கச்சான,
புப்³பே³ ‘க²த்தியோ’தி ஸமஞ்ஞா ஸாஸ்ஸ அந்தரஹிதா; ஸமணொத்வேவ ஸங்க்²யங்
க³ச்ச²தீ’’தி.
‘‘தங் கிங் மஞ்ஞஸி, மஹாராஜ,
இத⁴ ப்³ராஹ்மணோ, இத⁴ வெஸ்ஸோ, இத⁴ ஸுத்³தோ³ கேஸமஸ்ஸுங் ஓஹாரெத்வா காஸாயானி
வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதோ அஸ்ஸ விரதோ
பாணாதிபாதா, விரதோ அதி³ன்னாதா³னா விரதோ முஸாவாதா³, ரத்தூபரதோ, ஏகப⁴த்திகோ,
ப்³ரஹ்மசாரீ, ஸீலவா, கல்யாணத⁴ம்மோ? கிந்தி நங் கரெய்யாஸீ’’தி?
‘‘அபி⁴வாதெ³ய்யாம வா, போ⁴ கச்சான, பச்சுட்டெ²ய்யாம வா ஆஸனேன வா
நிமந்தெய்யாம அபி⁴னிமந்தெய்யாம வா நங்
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி த⁴ம்மிகங் வா அஸ்ஸ
ரக்கா²வரணகு³த்திங் ஸங்வித³ஹெய்யாம. தங் கிஸ்ஸ ஹேது? யா ஹிஸ்ஸ, போ⁴ கச்சான,
புப்³பே³ ‘ஸுத்³தோ³’தி ஸமஞ்ஞா ஸாஸ்ஸ அந்தரஹிதா; ஸமணொத்வேவ ஸங்க்²யங்
க³ச்ச²தீ’’தி.
‘‘தங் கிங் மஞ்ஞஸி, மஹாராஜ,
யதி³ ஏவங் ஸந்தே, இமே சத்தாரோ வண்ணா ஸமஸமா ஹொந்தி நோ வா? கத²ங் வா தே எத்த²
ஹோதீ’’தி? ‘‘அத்³தா⁴ கோ², போ⁴ கச்சான, ஏவங் ஸந்தே, இமே சத்தாரோ வண்ணா
ஸமஸமா ஹொந்தி. நேஸங் எத்த² கிஞ்சி நானாகரணங் ஸமனுபஸ்ஸாமீ’’தி. ‘‘இமினாபி
கோ² ஏதங், மஹாராஜ, பரியாயேன வேதி³தப்³ப³ங் யதா² கோ⁴ஸோ யேவேஸோ லோகஸ்மிங் –
‘ப்³ராஹ்மணோவ ஸெட்டோ² வண்ணோ, ஹீனோ அஞ்ஞோ வண்ணோ; ப்³ராஹ்மணோவ ஸுக்கோ வண்ணோ,
கண்ஹோ அஞ்ஞோ வண்ணோ; ப்³ராஹ்மணாவ ஸுஜ்ஜ²ந்தி, நோ அப்³ராஹ்மணா; ப்³ராஹ்மணாவ
ப்³ரஹ்முனோ புத்தா ஓரஸா முக²தோ ஜாதா ப்³ரஹ்மஜா ப்³ரஹ்மனிம்மிதா
ப்³ரஹ்மதா³யாதா³’’’தி.
323. ஏவங்
வுத்தே, ராஜா மாது⁴ரோ அவந்திபுத்தோ ஆயஸ்மந்தங் மஹாகச்சானங் ஏதத³வோச –
‘‘அபி⁴க்கந்தங், போ⁴ கச்சான, அபி⁴க்கந்தங், போ⁴ கச்சான! ஸெய்யதா²பி, போ⁴
கச்சான, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய,
மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய –
‘சக்கு²மந்தோ ரூபானி த³க்க²ந்தீ’தி; ஏவமேவங் போ⁴தா கச்சானேன அனேகபரியாயேன
த⁴ம்மோ பகாஸிதோ. ஏஸாஹங் ப⁴வந்தங் கச்சானங் ஸரணங் க³ச்சா²மி த⁴ம்மஞ்ச
பி⁴க்கு²ஸங்க⁴ஞ்ச . உபாஸகங் மங் ப⁴வங் கச்சானோ
தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி. ‘‘மா கோ² மங் த்வங்,
மஹாராஜ, ஸரணங் அக³மாஸி. தமேவ த்வங் [தமேதங் த்வங் (ஸ்யா॰ கங்॰), தமேதங் (க॰)] ப⁴க³வந்தங் ஸரணங் க³ச்ச² யமஹங் ஸரணங் க³தோ’’தி. ‘‘கஹங் பன, போ⁴ கச்சான, ஏதரஹி ஸோ
ப⁴க³வா விஹரதி அரஹங் ஸம்மாஸம்பு³த்³தோ⁴’’தி? ‘‘பரினிப்³பு³தோ கோ², மஹாராஜ,
ஏதரஹி ஸோ ப⁴க³வா அரஹங் ஸம்மாஸம்பு³த்³தோ⁴’’தி. ‘‘ஸசேபி மயங், போ⁴ கச்சான,
ஸுணெய்யாம தங் ப⁴க³வந்தங் த³ஸஸு யோஜனேஸு, த³ஸபி மயங் யோஜனானி க³ச்செ²ய்யாம
தங் ப⁴க³வந்தங் த³ஸ்ஸனாய அரஹந்தங் ஸம்மாஸம்பு³த்³த⁴ங். ஸசேபி மயங், போ⁴
கச்சான, ஸுணெய்யாம தங் ப⁴க³வந்தங் வீஸதியா யோஜனேஸு, திங்ஸாய யோஜனேஸு,
சத்தாரீஸாய யோஜனேஸு, பஞ்ஞாஸாய யோஜனேஸு, பஞ்ஞாஸம்பி மயங் யோஜனானி
க³ச்செ²ய்யாம தங் ப⁴க³வந்தங் த³ஸ்ஸனாய அரஹந்தங் ஸம்மாஸம்பு³த்³த⁴ங்.
யோஜனஸதே சேபி மயங் போ⁴ கச்சான, ஸுணெய்யாம தங் ப⁴க³வந்தங், யோஜனஸதம்பி மயங்
க³ச்செ²ய்யாம தங் ப⁴க³வந்தங் த³ஸ்ஸனாய அரஹந்தங் ஸம்மாஸம்பு³த்³த⁴ங். யதோ ச,
போ⁴ கச்சான, பரினிப்³பு³தோ ஸோ ப⁴க³வா, பரினிப்³பு³தம்பி மயங் ப⁴க³வந்தங்
ஸரணங் க³ச்சா²ம த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴வங் கச்சானோ
தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி.
மது⁴ரஸுத்தங் நிட்டி²தங் சதுத்த²ங்.
5. போ³தி⁴ராஜகுமாரஸுத்தங்
324. ஏவங்
மே ஸுதங் – ஏகங் ஸமயங் ப⁴க³வா ப⁴க்³கே³ஸு விஹரதி ஸுஸுமாரகி³ரே பே⁴ஸகளாவனே
மிக³தா³யே. தேன கோ² பன ஸமயேன போ³தி⁴ஸ்ஸ ராஜகுமாரஸ்ஸ கோகனதோ³ [கோகனுதோ³ (ஸ்யா॰ கங்॰ க॰)]
நாம பாஸாதோ³ அசிரகாரிதோ ஹோதி அனஜ்ஜா²வுட்டோ² ஸமணேன வா ப்³ராஹ்மணேன வா
கேனசி வா மனுஸ்ஸபூ⁴தேன. அத² கோ² போ³தி⁴ ராஜகுமாரோ ஸஞ்ஜிகாபுத்தங் மாணவங்
ஆமந்தேஸி – ‘‘ஏஹி த்வங், ஸம்ம ஸஞ்ஜிகாபுத்த, யேன ப⁴க³வா தேனுபஸங்கம;
உபஸங்கமித்வா மம வசனேன ப⁴க³வதோ பாதே³ ஸிரஸா வந்த³, அப்பாபா³த⁴ங்
அப்பாதங்கங் லஹுட்டா²னங் ப³லங் பா²ஸுவிஹாரங் புச்ச² – ‘போ³தி⁴, ப⁴ந்தே,
ராஜகுமாரோ ப⁴க³வதோ பாதே³ ஸிரஸா வந்த³தி, அப்பாபா³த⁴ங் அப்பாதங்கங்
லஹுட்டா²னங் ப³லங் பா²ஸுவிஹாரங் புச்ச²தீ’தி. ஏவஞ்ச வதே³ஹி – ‘அதி⁴வாஸேது
கிர, ப⁴ந்தே, ப⁴க³வா போ³தி⁴ஸ்ஸ ராஜகுமாரஸ்ஸ ஸ்வாதனாய ப⁴த்தங் ஸத்³தி⁴ங்
பி⁴க்கு²ஸங்கே⁴னா’’’தி. ‘‘ஏவங், போ⁴’’தி கோ² ஸஞ்ஜிகாபுத்தோ மாணவோ போ³தி⁴ஸ்ஸ
ராஜகுமாரஸ்ஸ படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா ப⁴க³வதா
ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங்
நிஸீதி³. ஏகமந்தங் நிஸின்னோ கோ² ஸஞ்ஜிகாபுத்தோ மாணவோ ப⁴க³வந்தங் ஏதத³வோச – ‘‘போ³தி⁴ கோ² [போ³தி⁴ போ⁴ கோ³தம (ஸீ॰ ஸ்யா॰ கங்॰ பீ॰)] ராஜகுமாரோ போ⁴தோ கோ³தமஸ்ஸ பாதே³ ஸிரஸா
வந்த³தி, அப்பாபா³த⁴ங் அப்பாதங்கங் லஹுட்டா²னங் ப³லங் பா²ஸுவிஹாரங்
புச்ச²தி. ஏவஞ்ச வதே³தி – ‘அதி⁴வாஸேது கிர ப⁴வங் கோ³தமோ போ³தி⁴ஸ்ஸ
ராஜகுமாரஸ்ஸ ஸ்வாதனாய ப⁴த்தங் ஸத்³தி⁴ங் பி⁴க்கு²ஸங்கே⁴னா’’’தி. அதி⁴வாஸேஸி
ப⁴க³வா துண்ஹீபா⁴வேன. அத² கோ² ஸஞ்ஜிகாபுத்தோ மாணவோ ப⁴க³வதோ அதி⁴வாஸனங்
விதி³த்வா உட்டா²யாஸனா யேன போ³தி⁴ ராஜகுமாரோ தேனுபஸங்கமி; உபஸங்கமித்வா
போ³தி⁴ங் ராஜகுமாரங் ஏதத³வோச – ‘‘அவோசும்ஹ போ⁴தோ வசனேன தங் ப⁴வந்தங்
கோ³தமங் – ‘போ³தி⁴ கோ² ராஜகுமாரோ போ⁴தோ கோ³தமஸ்ஸ
பாதே³ ஸிரஸா வந்த³தி, அப்பாபா³த⁴ங் அப்பாதங்கங் லஹுட்டா²னங் ப³லங்
பா²ஸுவிஹாரங் புச்ச²தி. ஏவஞ்ச வதே³தி – அதி⁴வாஸேது கிர ப⁴வங் கோ³தமோ
போ³தி⁴ஸ்ஸ ராஜகுமாரஸ்ஸ ஸ்வாதனாய ப⁴த்தங் ஸத்³தி⁴ங் பி⁴க்கு²ஸங்கே⁴னா’தி.
அதி⁴வுட்ட²ஞ்ச பன ஸமணேன கோ³தமேனா’’தி.
325.
அத² கோ² போ³தி⁴ ராஜகுமாரோ தஸ்ஸா ரத்தியா அச்சயேன ஸகே நிவேஸனே பணீதங்
கா²த³னீயங் போ⁴ஜனீயங் படியாதா³பெத்வா, கோகனத³ஞ்ச பாஸாத³ங் ஓதா³தேஹி
து³ஸ்ஸேஹி ஸந்த²ராபெத்வா யாவ பச்சி²மஸோபானகளேவரா [களேப³ரா (ஸீ॰)],
ஸஞ்ஜிகாபுத்தங் மாணவங் ஆமந்தேஸி – ‘‘ஏஹி த்வங், ஸம்ம ஸஞ்ஜிகாபுத்த, யேன
ப⁴க³வா தேனுபஸங்கம; உபஸங்கமித்வா ப⁴க³வதோ காலங் ஆரோசேஹி – ‘காலோ, ப⁴ந்தே,
நிட்டி²தங் ப⁴த்த’’’ந்தி. ‘‘ஏவங், போ⁴’’தி கோ² ஸஞ்ஜிகாபுத்தோ மாணவோ
போ³தி⁴ஸ்ஸ ராஜகுமாரஸ்ஸ படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா
ப⁴க³வதோ காலங் ஆரோசேஸி – ‘‘காலோ, போ⁴ கோ³தம, நிட்டி²தங் ப⁴த்த’’ந்தி. அத²
கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய யேன போ³தி⁴ஸ்ஸ
ராஜகுமாரஸ்ஸ நிவேஸனங் தேனுபஸங்கமி. தேன கோ² பன ஸமயேன போ³தி⁴ ராஜகுமாரோ
ப³ஹித்³வாரகொட்ட²கே டி²தோ ஹோதி ப⁴க³வந்தங் ஆக³மயமானோ. அத்³த³ஸா கோ² போ³தி⁴
ராஜகுமாரோ ப⁴க³வந்தங் தூ³ரதோவ ஆக³ச்ச²ந்தங். தி³ஸ்வான பச்சுக்³க³ந்த்வா
ப⁴க³வந்தங் அபி⁴வாதெ³த்வா புரக்க²த்வா யேன கோகனதோ³ பாஸாதோ³ தேனுபஸங்கமி.
அத² கோ² ப⁴க³வா பச்சி²மங் ஸோபானகளேவரங் நிஸ்ஸாய அட்டா²ஸி. அத² கோ² போ³தி⁴
ராஜகுமாரோ ப⁴க³வந்தங் ஏதத³வோச – ‘‘அபி⁴ருஹது [அபி⁴ரூஹது (ஸ்யா॰ கங்॰ பீ॰) அக்கமது (சூளவ॰ 268)], ப⁴ந்தே, ப⁴க³வா து³ஸ்ஸானி, அபி⁴ருஹது ஸுக³தோ து³ஸ்ஸானி; யங் மம அஸ்ஸ தீ³க⁴ரத்தங் ஹிதாய
ஸுகா²யா’’தி. ஏவங் வுத்தே, ப⁴க³வா துண்ஹீ அஹோஸி. து³தியம்பி கோ²…பே॰…
ததியம்பி கோ² போ³தி⁴ ராஜகுமாரோ ப⁴க³வந்தங் ஏதத³வோச – ‘‘அபி⁴ருஹது, ப⁴ந்தே,
ப⁴க³வா. து³ஸ்ஸானி, அபி⁴ருஹது ஸுக³தோ து³ஸ்ஸானி; யங் மம அஸ்ஸ தீ³க⁴ரத்தங்
ஹிதாய ஸுகா²யா’’தி.
326. அத² கோ² ப⁴க³வா ஆயஸ்மந்தங் ஆனந்த³ங் அபலோகேஸி. அத² கோ² ஆயஸ்மா ஆனந்தோ³ போ³தி⁴ங் ராஜகுமாரங் ஏதத³வோச – ‘‘ஸங்ஹரது, ராஜகுமார, து³ஸ்ஸானி; ந ப⁴க³வா சேலபடிகங் [சேலபத்திகங் (ஸீ॰ பீ॰)] அக்கமிஸ்ஸதி. பச்சி²மங் ஜனதங் ததா²க³தோ அனுகம்பதீ’’தி [அபலோகேதீதி (ஸப்³ப³த்த²)]. அத² கோ² போ³தி⁴ ராஜகுமாரோ து³ஸ்ஸானி ஸங்ஹராபெத்வா உபரிகோகனத³பாஸாதே³ [உபரிகோகனதே³ பாஸாதே³ (ஸீ॰ பீ॰ வினயேச), உபரிகோகனதே³ (ஸ்யா॰ கங்॰)] ஆஸனானி பஞ்ஞபேஸி. அத² கோ² ப⁴க³வா கோகனத³ங் பாஸாத³ங்
அபி⁴ருஹித்வா பஞ்ஞத்தே ஆஸனே நிஸீதி³ ஸத்³தி⁴ங் பி⁴க்கு²ஸங்கே⁴ன. அத² கோ²
போ³தி⁴ ராஜகுமாரோ பு³த்³த⁴ப்பமுக²ங் பி⁴க்கு²ஸங்க⁴ங் பணீதேன கா²த³னீயேன
போ⁴ஜனீயேன ஸஹத்தா² ஸந்தப்பேஸி ஸம்பவாரேஸி. அத² கோ² போ³தி⁴ ராஜகுமாரோ
ப⁴க³வந்தங் பு⁴த்தாவிங் ஓனீதபத்தபாணிங் அஞ்ஞதரங் நீசங் ஆஸனங் க³ஹெத்வா
ஏகமந்தங் நிஸீதி³. ஏகமந்தங் நிஸின்னோ கோ² போ³தி⁴ ராஜகுமாரோ ப⁴க³வந்தங்
ஏதத³வோச – ‘‘மய்ஹங் கோ², ப⁴ந்தே, ஏவங் ஹோதி – ‘ந கோ² ஸுகே²ன ஸுக²ங்
அதி⁴க³ந்தப்³ப³ங், து³க்கே²ன கோ² ஸுக²ங் அதி⁴க³ந்தப்³ப³’’’ந்தி.
327. ‘‘மய்ஹம்பி கோ², ராஜகுமார, புப்³பே³வ ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ
ஏதத³ஹோஸி – ‘ந கோ² ஸுகே²ன ஸுக²ங் அதி⁴க³ந்தப்³ப³ங், து³க்கே²ன கோ² ஸுக²ங்
அதி⁴க³ந்தப்³ப³’ந்தி. ஸோ கோ² அஹங், ராஜகுமார, அபரேன ஸமயேன த³ஹரோவ ஸமானோ
ஸுஸுகாளகேஸோ ப⁴த்³ரேன யொப்³ப³னேன ஸமன்னாக³தோ பட²மேன வயஸா அகாமகானங்
மாதாபிதூனங் அஸ்ஸுமுகா²னங் ருத³ந்தானங் கேஸமஸ்ஸுங் ஓஹாரெத்வா காஸாயானி
வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிங். ஸோ ஏவங்
பப்³ப³ஜிதோ ஸமானோ கிங்குஸலக³வேஸீ [கிங்குஸலங்க³வேஸீ (க॰)]
அனுத்தரங் ஸந்திவரபத³ங் பரியேஸமானோ யேன ஆளாரோ காலாமோ தேனுபஸங்கமிங்;
உபஸங்கமித்வா ஆளாரங் காலாமங் ஏதத³வோசங் – ‘இச்சா²மஹங், ஆவுஸோ காலாம,
இமஸ்மிங் த⁴ம்மவினயே ப்³ரஹ்மசரியங் சரிது’ந்தி. ஏவங் வுத்தே, ராஜகுமார,
ஆளாரோ காலாமோ மங் ஏதத³வோச – ‘விஹரதாயஸ்மா, தாதி³ஸோ அயங் த⁴ம்மோ யத்த² விஞ்ஞூ புரிஸோ நசிரஸ்ஸேவ ஸகங் ஆசரியகங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்யா’தி. ஸோ
கோ² அஹங், ராஜகுமார, நசிரஸ்ஸேவ கி²ப்பமேவ தங் த⁴ம்மங் பரியாபுணிங். ஸோ கோ²
அஹங், ராஜகுமார, தாவதகேனேவ ஒட்ட²பஹதமத்தேன லபிதலாபனமத்தேன ஞாணவாத³ஞ்ச
வதா³மி, தே²ரவாத³ஞ்ச ஜானாமி பஸ்ஸாமீதி ச படிஜானாமி, அஹஞ்சேவ அஞ்ஞே ச. தஸ்ஸ
மய்ஹங், ராஜகுமார, ஏதத³ஹோஸி – ‘ந கோ² ஆளாரோ காலாமோ இமங் த⁴ம்மங் கேவலங்
ஸத்³தா⁴மத்தகேன ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³தி;
அத்³தா⁴ ஆளாரோ காலாமோ இமங் த⁴ம்மங் ஜானங் பஸ்ஸங் விஹரதீ’தி.
‘‘அத² க்²வாஹங், ராஜகுமார, யேன ஆளாரோ காலாமோ
தேனுபஸங்கமிங்; உபஸங்கமித்வா ஆளாரங் காலாமங் ஏதத³வோசங் – ‘கித்தாவதா நோ,
ஆவுஸோ காலாம, இமங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி
பவேதே³ஸீ’தி [உபஸம்பஜ்ஜ பவேதே³ஸீதி (ஸீ॰ ஸ்யா॰ கங்॰ பீ॰)]?
ஏவங் வுத்தே, ராஜகுமார, ஆளாரோ காலாமோ ஆகிஞ்சஞ்ஞாயதனங் பவேதே³ஸி. தஸ்ஸ
மய்ஹங், ராஜகுமார, ஏதத³ஹோஸி – ‘ந கோ² ஆளாரஸ்ஸேவ காலாமஸ்ஸ அத்தி² ஸத்³தா⁴,
மய்ஹங்பத்தி² ஸத்³தா⁴; ந கோ² ஆளாரஸ்ஸேவ காலாமஸ்ஸ அத்தி² வீரியங்…பே॰… ஸதி…
ஸமாதி⁴… பஞ்ஞா, மய்ஹங்பத்தி² பஞ்ஞா. யங்னூனாஹங் யங் த⁴ம்மங் ஆளாரோ காலாமோ
ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³தி தஸ்ஸ த⁴ம்மஸ்ஸ
ஸச்சி²கிரியாய பத³ஹெய்ய’ந்தி. ஸோ கோ² அஹங், ராஜகுமார, நசிரஸ்ஸேவ கி²ப்பமேவ
தங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸிங். அத²
க்²வாஹங், ராஜகுமார, யேன ஆளாரோ காலாமோ தேனுபஸங்கமிங்; உபஸங்கமித்வா ஆளாரங்
காலாமங் ஏதத³வோசங் – ‘எத்தாவதா நோ, ஆவுஸோ காலாம, இமங் த⁴ம்மங் ஸயங்
அபி⁴ஞ்ஞா ஸச்சி²கத்வா உபஸம்பஜ்ஜ பவேதே³ஸீ’தி? ‘எத்தாவதா கோ² அஹங், ஆவுஸோ,
இமங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³மீ’தி. ‘அஹம்பி
கோ², ஆவுஸோ, எத்தாவதா இமங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹராமீ’தி. ‘லாபா⁴ நோ, ஆவுஸோ, ஸுலத்³த⁴ங் நோ, ஆவுஸோ, யே மயங் ஆயஸ்மந்தங்
தாதி³ஸங் ஸப்³ரஹ்மசாரிங் பஸ்ஸாம . இதி யாஹங் த⁴ம்மங்
ஸயங் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³மி, தங் த்வங் த⁴ம்மங் ஸயங்
அபி⁴ஞ்ஞா ஸச்சி²கத்வா உபஸம்பஜ்ஜ விஹரஸி. யங் த்வங் த⁴ம்மங் ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரஸி, தமஹங் த⁴ம்மங் ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ பவேதே³மி. இதி யாஹங் த⁴ம்மங் ஜானாமி தங் த்வங் த⁴ம்மங் ஜானாஸி;
யங் த்வங் த⁴ம்மங் ஜானாஸி தமஹங் த⁴ம்மங் ஜானாமி. இதி யாதி³ஸோ அஹங், தாதி³ஸோ
துவங்; யாதி³ஸோ துவங் தாதி³ஸோ அஹங். ஏஹி தா³னி, ஆவுஸோ, உபோ⁴வ ஸந்தா இமங்
க³ணங் பரிஹராமா’தி. இதி கோ², ராஜகுமார, ஆளாரோ காலாமோ ஆசரியோ மே ஸமானோ
(அத்தனோ) [( ) நத்தி² (ஸீ॰ ஸ்யா॰ கங்॰ பீ॰)] அந்தேவாஸிங் மங் ஸமானங் அத்தனா [அத்தனோ (ஸீ॰ பீ॰)]
ஸமஸமங் ட²பேஸி, உளாராய ச மங் பூஜாய பூஜேஸி. தஸ்ஸ மய்ஹங், ராஜகுமார,
ஏதத³ஹோஸி – ‘நாயங் த⁴ம்மோ நிப்³பி³தா³ய ந விராகா³ய ந நிரோதா⁴ய ந உபஸமாய ந
அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி, யாவதே³வ
ஆகிஞ்சஞ்ஞாயதனூபபத்தியா’தி . ஸோ கோ² அஹங், ராஜகுமார, தங் த⁴ம்மங் அனலங்கரித்வா தஸ்மா த⁴ம்மா நிப்³பி³ஜ்ஜ அபக்கமிங்.
328. ‘‘ஸோ கோ² அஹங், ராஜகுமார, கிங்குஸலக³வேஸீ அனுத்தரங் ஸந்திவரபத³ங் பரியேஸமானோ யேன உத³கோ [உத்³த³கோ (ஸீ॰ ஸ்யா॰ கங்॰ பீ॰)] ராமபுத்தோ தேனுபஸங்கமிங்; உபஸங்கமித்வா உத³கங் ராமபுத்தங் ஏதத³வோசங் – ‘இச்சா²மஹங், ஆவுஸோ [ஆவுஸோ ராம (ஸீ॰ ஸ்யா॰ கங்॰ க॰) பஸ்ஸ ம॰ நி॰ 1.278 பாஸராஸிஸுத்தே],
இமஸ்மிங் த⁴ம்மவினயே ப்³ரஹ்மசரியங் சரிது’ந்தி. ஏவங் வுத்தே, ராஜகுமார,
உத³கோ ராமபுத்தோ மங் ஏதத³வோச – ‘விஹரதாயஸ்மா, தாதி³ஸோ அயங் த⁴ம்மோ யத்த²
விஞ்ஞூ புரிஸோ நசிரஸ்ஸேவ ஸகங் ஆசரியகங் ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ விஹரெய்யா’தி. ஸோ கோ² அஹங், ராஜகுமார, நசிரஸ்ஸேவ கி²ப்பமேவ தங்
த⁴ம்மங் பரியாபுணிங். ஸோ கோ² அஹங், ராஜகுமார, தாவதகேனேவ ஒட்ட²பஹதமத்தேன
லபிதலாபனமத்தேன ஞாணவாத³ஞ்ச வதா³மி, தே²ரவாத³ஞ்ச ஜானாமி பஸ்ஸாமீதி ச
படிஜானாமி, அஹஞ்சேவ அஞ்ஞே ச. தஸ்ஸ மய்ஹங், ராஜகுமார, ஏதத³ஹோஸி – ‘ந கோ²
ராமோ இமங் த⁴ம்மங் கேவலங் ஸத்³தா⁴மத்தகேன ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ விஹராமீதி பவேதே³ஸி; அத்³தா⁴ ராமோ இமங் த⁴ம்மங் ஜானங் பஸ்ஸங்
விஹாஸீ’தி. அத² க்²வாஹங், ராஜகுமார, யேன உத³கோ ராமபுத்தோ தேனுபஸங்கமிங்;
உபஸங்கமித்வா உத³கங் ராமபுத்தங் ஏதத³வோசங் – ‘கித்தாவதா நோ, ஆவுஸோ, ராமோ
இமங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³ஸீ’தி?
ஏவங் வுத்தே, ராஜகுமார, உத³கோ ராமபுத்தோ நேவஸஞ்ஞானாஸஞ்ஞாயதனங் பவேதே³ஸி.
தஸ்ஸ மய்ஹங், ராஜகுமார, ஏதத³ஹோஸி – ‘ந கோ² ராமஸ்ஸேவ
அஹோஸி ஸத்³தா⁴, மய்ஹங்பத்தி² ஸத்³தா⁴; ந கோ² ராமஸ்ஸேவ அஹோஸி வீரியங்…பே॰…
ஸதி… ஸமாதி⁴… பஞ்ஞா, மய்ஹங்பத்தி² பஞ்ஞா.
யங்னூனாஹங் யங் த⁴ம்மங் ராமோ ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹராமீதி பவேதே³தி தஸ்ஸ த⁴ம்மஸ்ஸ ஸச்சி²கிரியாய பத³ஹெய்ய’ந்தி. ஸோ கோ²
அஹங், ராஜகுமார, நசிரஸ்ஸேவ கி²ப்பமேவ தங் த⁴ம்மங் ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹாஸிங்.
‘‘அத² க்²வாஹங், ராஜகுமார, யேன
உத³கோ ராமபுத்தோ தேனுபஸங்கமிங்; உபஸங்கமித்வா உத³கங் ராமபுத்தங் ஏதத³வோசங்
– ‘எத்தாவதா நோ, ஆவுஸோ, ராமோ இமங் த⁴ம்மங் ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ பவேதே³ஸீ’தி? ‘எத்தாவதா கோ², ஆவுஸோ, ராமோ இமங் த⁴ம்மங் ஸயங்
அபி⁴ஞ்ஞா ஸச்சி²கத்வா உபஸம்பஜ்ஜ பவேதே³ஸீ’தி. ‘அஹம்பி கோ², ஆவுஸோ, எத்தாவதா
இமங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீ’தி. ‘லாபா⁴ நோ,
ஆவுஸோ, ஸுலத்³த⁴ங் நோ, ஆவுஸோ, யே மயங் ஆயஸ்மந்தங் தாதி³ஸங் ஸப்³ரஹ்மசாரிங்
பஸ்ஸாம. இதி யங் த⁴ம்மங் ராமோ ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
பவேதே³ஸி தங் த்வங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரஸி.
யங் த்வங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரஸி தங் த⁴ம்மங்
ராமோ ஸயங் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³ஸி. இதி யங் த⁴ம்மங் ராமோ
அபி⁴ஞ்ஞாஸி தங் த்வங் த⁴ம்மங் ஜானாஸி; யங் த்வங் த⁴ம்மங் ஜானாஸி தங்
த⁴ம்மங் ராமோ அபி⁴ஞ்ஞாஸி. இதி யாதி³ஸோ ராமோ அஹோஸி
தாதி³ஸோ துவங், யாதி³ஸோ துவங் தாதி³ஸோ ராமோ அஹோஸி. ஏஹி தா³னி, ஆவுஸோ, துவங்
இமங் க³ணங் பரிஹரா’தி. இதி கோ², ராஜகுமார, உத³கோ ராமபுத்தோ ஸப்³ரஹ்மசாரீ
மே ஸமானோ ஆசரியட்டா²னே மங் ட²பேஸி, உளாராய ச மங் பூஜாய பூஜேஸி. தஸ்ஸ
மய்ஹங், ராஜகுமார, ஏதத³ஹோஸி – ‘நாயங் த⁴ம்மோ நிப்³பி³தா³ய ந விராகா³ய ந
நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி,
யாவதே³வ நேவஸஞ்ஞானாஸஞ்ஞாயதனூபபத்தியா’தி. ஸோ கோ² அஹங், ராஜகுமார, தங்
த⁴ம்மங் அனலங்கரித்வா தஸ்மா த⁴ம்மா நிப்³பி³ஜ்ஜ அபக்கமிங்.
329.
‘‘ஸோ கோ² அஹங், ராஜகுமார, கிங்குஸலக³வேஸீ அனுத்தரங் ஸந்திவரபத³ங்
பரியேஸமானோ, மக³தே⁴ஸு அனுபுப்³பே³ன சாரிகங் சரமானோ, யேன உருவேலா ஸேனானிக³மோ
தத³வஸரிங். தத்த²த்³த³ஸங் ரமணீயங் பூ⁴மிபா⁴க³ங், பாஸாதி³கஞ்ச வனஸண்ட³ங்,
நதீ³ஞ்ச ஸந்த³ந்திங் ஸேதகங் ஸுபதித்த²ங், ரமணீயங் ஸமந்தா ச கோ³சரகா³மங்.
தஸ்ஸ மய்ஹங், ராஜகுமார, ஏதத³ஹோஸி – ‘ரமணீயோ வத, போ⁴, பூ⁴மிபா⁴கோ³,
பாஸாதி³கோ ச வனஸண்டோ³, நதி³ஞ்ச ஸந்த³ந்திங் ஸேதகா ஸுபதித்தா² , ரமணீயா ஸமந்தா [ஸாமந்தா (?) புரிமபிட்டே²பி]
ச கோ³சரகா³மோ. அலங் வதித³ங் குலபுத்தஸ்ஸ பதா⁴னத்தி²கஸ்ஸ பதா⁴னாயா’தி. ஸோ
கோ² அஹங், ராஜகுமார, தத்தே²வ நிஸீதி³ங் – ‘அலமித³ங் பதா⁴னாயா’தி. அபிஸ்ஸு
மங், ராஜகுமார, திஸ்ஸோ உபமா படிப⁴ங்ஸு அனச்ச²ரியா புப்³பே³ அஸ்ஸுதபுப்³பா³.
‘‘ஸெய்யதா²பி, ராஜகுமார, அல்லங் கட்ட²ங் ஸஸ்னேஹங்
உத³கே நிக்கி²த்தங். அத² புரிஸோ ஆக³ச்செ²ய்ய உத்தராரணிங் ஆதா³ய –
‘அக்³கி³ங் அபி⁴னிப்³ப³த்தெஸ்ஸாமி, தேஜோ பாதுகரிஸ்ஸாமீ’தி. தங் கிங்
மஞ்ஞஸி, ராஜகுமார, அபி நு ஸோ புரிஸோ அமுங் அல்லங் கட்ட²ங் ஸஸ்னேஹங் உத³கே
நிக்கி²த்தங் உத்தராரணிங் ஆதா³ய அபி⁴மந்தெ²ந்தோ [அபி⁴மத்த²ந்தோ (ஸ்யா॰ கங்॰ க॰)]
அக்³கி³ங் அபி⁴னிப்³ப³த்தெய்ய, தேஜோ பாதுகரெய்யா’’தி? ‘‘நோ ஹித³ங்,
ப⁴ந்தே. தங் கிஸ்ஸ ஹேது? அது³ஞ்ஹி, ப⁴ந்தே, அல்லங் கட்ட²ங் ஸஸ்னேஹங் தஞ்ச
பன உத³கே நிக்கி²த்தங், யாவதே³வ ச பன ஸோ புரிஸோ கிலமத²ஸ்ஸ விகா⁴தஸ்ஸ பா⁴கீ³
அஸ்ஸா’’தி. ‘‘ஏவமேவ கோ², ராஜகுமார, யே ஹி கேசி ஸமணா வா ப்³ராஹ்மணா வா
காயேன சேவ சித்தேன ச காமேஹி அவூபகட்டா² விஹரந்தி, யோ ச நேஸங் காமேஸு
காமச்ச²ந்தோ³ காமஸ்னேஹோ காமமுச்சா² காமபிபாஸா காமபரிளாஹோ ஸோ ச அஜ்ஜ²த்தங் ந
ஸுப்பஹீனோ ஹோதி, ந ஸுப்படிப்பஸ்ஸத்³தோ⁴. ஓபக்கமிகா சேபி தே பொ⁴ந்தோ
ஸமணப்³ராஹ்மணா து³க்கா² திப்³பா³ க²ரா கடுகா வேத³னா வேத³யந்தி, அப⁴ப்³பா³வ
தே ஞாணாய த³ஸ்ஸனாய அனுத்தராய ஸம்போ³தா⁴ய. நோ சேபி தே பொ⁴ந்தோ ஸமணப்³ராஹ்மணா
ஓபக்கமிகா து³க்கா² திப்³பா³ க²ரா கடுகா வேத³னா வேத³யந்தி, அப⁴ப்³பா³வ தே
ஞாணாய த³ஸ்ஸனாய அனுத்தராய ஸம்போ³தா⁴ய. அயங் கோ² மங், ராஜகுமார, பட²மா உபமா
படிபா⁴ஸி அனச்ச²ரியா புப்³பே³ அஸ்ஸுதபுப்³பா³.
330. ‘‘அபராபி கோ² மங், ராஜகுமார, து³தியா உபமா படிபா⁴ஸி அனச்ச²ரியா
புப்³பே³ அஸ்ஸுதபுப்³பா³. ஸெய்யதா²பி, ராஜகுமார, அல்லங் கட்ட²ங் ஸஸ்னேஹங்
ஆரகா உத³கா த²லே நிக்கி²த்தங். அத² புரிஸோ ஆக³ச்செ²ய்ய உத்தராரணிங் ஆதா³ய –
‘அக்³கி³ங் அபி⁴னிப்³ப³த்தெஸ்ஸாமி, தேஜோ பாதுகரிஸ்ஸாமீ’தி. தங் கிங்
மஞ்ஞஸி, ராஜகுமார, அபி நு ஸோ புரிஸோ அமுங் அல்லங் கட்ட²ங் ஸஸ்னேஹங் ஆரகா
உத³கா த²லே நிக்கி²த்தங் உத்தராரணிங் ஆதா³ய அபி⁴மந்தெ²ந்தோ அக்³கி³ங்
அபி⁴னிப்³ப³த்தெய்ய , தேஜோ பாதுகரெய்யா’’தி? ‘‘நோ
ஹித³ங், ப⁴ந்தே. தங் கிஸ்ஸ ஹேது? அது³ஞ்ஹி, ப⁴ந்தே, அல்லங் கட்ட²ங்
ஸஸ்னேஹங் கிஞ்சாபி ஆரகா உத³கா த²லே நிக்கி²த்தங், யாவதே³வ ச பன ஸோ புரிஸோ
கிலமத²ஸ்ஸ விகா⁴தஸ்ஸ பா⁴கீ³ அஸ்ஸா’’தி. ‘‘ஏவமேவ கோ², ராஜகுமார, யே ஹி கேசி
ஸமணா வா ப்³ராஹ்மணா வா காயேன சேவ சித்தேன ச காமேஹி வூபகட்டா² விஹரந்தி, யோ ச
நேஸங் காமேஸு காமச்ச²ந்தோ³ காமஸ்னேஹோ காமமுச்சா² காமபிபாஸா காமபரிளாஹோ ஸோ ச
அஜ்ஜ²த்தங் ந ஸுப்பஹீனோ ஹோதி, ந ஸுப்படிப்பஸ்ஸத்³தோ⁴. ஓபக்கமிகா சேபி தே
பொ⁴ந்தோ ஸமணப்³ராஹ்மணா து³க்கா² திப்³பா³ க²ரா கடுகா வேத³னா வேத³யந்தி,
அப⁴ப்³பா³வ தே ஞாணாய த³ஸ்ஸனாய அனுத்தராய ஸம்போ³தா⁴ய. நோ சேபி தே பொ⁴ந்தோ
ஸமணப்³ராஹ்மணா ஓபக்கமிகா து³க்கா² திப்³பா³ க²ரா கடுகா வேத³னா வேத³யந்தி,
அப⁴ப்³பா³வ தே ஞாணாய த³ஸ்ஸனாய அனுத்தராய ஸம்போ³தா⁴ய. அயங் கோ² மங்,
ராஜகுமார, து³தியா உபமா படிபா⁴ஸி அனச்ச²ரியா புப்³பே³ அஸ்ஸுதபுப்³பா³.
331. ‘‘அபராபி கோ² மங், ராஜகுமார, ததியா உபமா படிபா⁴ஸி அனச்ச²ரியா
புப்³பே³ அஸ்ஸுதபுப்³பா³. ஸெய்யதா²பி, ராஜகுமார, ஸுக்க²ங் கட்ட²ங் கோளாபங்
ஆரகா உத³கா த²லே நிக்கி²த்தங். அத² புரிஸோ ஆக³ச்செ²ய்ய உத்தராரணிங் ஆதா³ய –
‘அக்³கி³ங் அபி⁴னிப்³ப³த்தெஸ்ஸாமி, தேஜோ பாதுகரிஸ்ஸாமீ’தி. தங் கிங்
மஞ்ஞஸி, ராஜகுமார, அபி நு ஸோ புரிஸோ அமுங் ஸுக்க²ங் கட்ட²ங் கோளாபங் ஆரகா
உத³கா த²லே நிக்கி²த்தங் உத்தராரணிங் ஆதா³ய அபி⁴மந்தெ²ந்தோ அக்³கி³ங்
அபி⁴னிப்³ப³த்தெய்ய, தேஜோ பாதுகரெய்யா’’தி? ‘‘ஏவங், ப⁴ந்தே’’. தங் கிஸ்ஸ
ஹேது? அது³ஞ்ஹி, ப⁴ந்தே, ஸுக்க²ங் கட்ட²ங் கோளாபங், தஞ்ச பன ஆரகா உத³கா
த²லே நிக்கி²த்த’’ந்தி. ‘‘ஏவமேவ கோ², ராஜகுமார, யே ஹி கேசி ஸமணா வா
ப்³ராஹ்மணா வா காயேன சேவ சித்தேன ச காமேஹி வூபகட்டா² விஹரந்தி, யோ ச நேஸங்
காமேஸு காமச்ச²ந்தோ³ காமஸ்னேஹோ காமமுச்சா² காமபிபாஸா காமபரிளாஹோ ஸோ ச
அஜ்ஜ²த்தங் ஸுப்பஹீனோ ஹோதி ஸுப்படிப்பஸ்ஸத்³தோ⁴. ஓபக்கமிகா சேபி தே பொ⁴ந்தோ
ஸமணப்³ராஹ்மணா து³க்கா² திப்³பா³ க²ரா கடுகா வேத³னா வேத³யந்தி, ப⁴ப்³பா³வ
தே ஞாணாய த³ஸ்ஸனாய அனுத்தராய ஸம்போ³தா⁴ய. நோ சேபி தே பொ⁴ந்தோ ஸமணப்³ராஹ்மணா
ஓபக்கமிகா து³க்கா² திப்³பா³ க²ரா கடுகா வேத³னா
வேத³யந்தி, ப⁴ப்³பா³வ தே ஞாணாய த³ஸ்ஸனாய அனுத்தராய ஸம்போ³தா⁴ய. அயங் கோ²
மங், ராஜகுமார, ததியா உபமா படிபா⁴ஸி அனச்ச²ரியா புப்³பே³ அஸ்ஸுதபுப்³பா³.
இமா கோ² மங், ராஜகுமார, திஸ்ஸோ உபமா படிப⁴ங்ஸு அனச்ச²ரியா புப்³பே³
அஸ்ஸுதபுப்³பா³.
332. ‘‘தஸ்ஸ மய்ஹங், ராஜகுமார, ஏதத³ஹோஸி – ‘யங்னூனாஹங் த³ந்தேபி⁴த³ந்தமாதா⁴ய [பஸ்ஸ ம॰ நி॰ 1.220 விதக்கஸண்டா²னஸுத்தே],
ஜிவ்ஹாய தாலுங் ஆஹச்ச, சேதஸா சித்தங் அபி⁴னிக்³க³ண்ஹெய்யங்
அபி⁴னிப்பீளெய்யங் அபி⁴ஸந்தாபெய்ய’ந்தி. ஸோ கோ² அஹங், ராஜகுமார,
த³ந்தேபி⁴த³ந்தமாதா⁴ய, ஜிவ்ஹாய தாலுங் ஆஹச்ச, சேதஸா சித்தங்
அபி⁴னிக்³க³ண்ஹாமி அபி⁴னிப்பீளேமி அபி⁴ஸந்தாபேமி. தஸ்ஸ மய்ஹங், ராஜகுமார,
த³ந்தேபி⁴த³ந்தமாதா⁴ய, ஜிவ்ஹாய தாலுங் ஆஹச்ச, சேதஸா சித்தங்
அபி⁴னிக்³க³ண்ஹதோ அபி⁴னிப்பீளயதோ அபி⁴ஸந்தாபயதோ கச்சே²ஹி ஸேதா³ முச்சந்தி.
ஸெய்யதா²பி, ராஜகுமார, ப³லவா புரிஸோ து³ப்³ப³லதரங் புரிஸங் ஸீஸே வா
க³ஹெத்வா க²ந்தே⁴ வா க³ஹெத்வா அபி⁴னிக்³க³ண்ஹெய்ய அபி⁴னிப்பீளெய்ய
அபி⁴ஸந்தாபெய்ய; ஏவமேவ கோ² மே, ராஜகுமார, த³ந்தேபி⁴த³ந்தமாதா⁴ய, ஜிவ்ஹாய
தாலுங் ஆஹச்ச, சேதஸா சித்தங் அபி⁴னிக்³க³ண்ஹதோ அபி⁴னிப்பீளயதோ
அபி⁴ஸந்தாபயதோ கச்சே²ஹி ஸேதா³ முச்சந்தி. ஆரத்³த⁴ங் கோ² பன மே, ராஜகுமார,
வீரியங் ஹோதி அஸல்லீனங், உபட்டி²தா ஸதி அஸம்முட்டா², ஸாரத்³தோ⁴ ச பன மே
காயோ ஹோதி அப்படிப்பஸ்ஸத்³தோ⁴, தேனேவ து³க்க²ப்பதா⁴னேன பதா⁴னாபி⁴துன்னஸ்ஸ
ஸதோ.
333. ‘‘தஸ்ஸ
மய்ஹங், ராஜகுமார, ஏதத³ஹோஸி – ‘யங்னூனாஹங் அப்பாணகங்யேவ ஜா²னங்
ஜா²யெய்ய’ந்தி. ஸோ கோ² அஹங், ராஜகுமார, முக²தோ ச நாஸதோ ச அஸ்ஸாஸபஸ்ஸாஸே
உபருந்தி⁴ங். தஸ்ஸ மய்ஹங், ராஜகுமார, முக²தோ ச நாஸதோ ச அஸ்ஸாஸபஸ்ஸாஸேஸு
உபருத்³தே⁴ஸு கண்ணஸோதேஹி வாதானங் நிக்க²மந்தானங்
அதி⁴மத்தோ ஸத்³தோ³ ஹோதி. ஸெய்யதா²பி நாம கம்மாரக³க்³க³ரியா த⁴மமானாய
அதி⁴மத்தோ ஸத்³தோ³ ஹோதி, ஏவமேவ கோ² மே, ராஜகுமார, முக²தோ ச நாஸதோ ச
அஸ்ஸாஸபஸ்ஸாஸேஸு உபருத்³தே⁴ஸு கண்ணஸோதேஹி வாதானங் நிக்க²மந்தானங் அதி⁴மத்தோ
ஸத்³தோ³ ஹோதி. ஆரத்³த⁴ங் கோ² பன மே, ராஜகுமார, வீரியங் ஹோதி அஸல்லீனங்,
உபட்டி²தா ஸதி அஸம்முட்டா², ஸாரத்³தோ⁴ ச பன மே காயோ ஹோதி அப்படிப்பஸ்ஸத்³தோ⁴, தேனேவ து³க்க²ப்பதா⁴னேன பதா⁴னாபி⁴துன்னஸ்ஸ ஸதோ.
‘‘தஸ்ஸ மய்ஹங், ராஜகுமார, ஏதத³ஹோஸி – ‘யங்னூனாஹங்
அப்பாணகங்யேவ ஜா²னங் ஜா²யெய்ய’ந்தி. ஸோ கோ² அஹங், ராஜகுமார, முக²தோ ச நாஸதோ
ச கண்ணதோ ச அஸ்ஸாஸபஸ்ஸாஸே உபருந்தி⁴ங். தஸ்ஸ மய்ஹங், ராஜகுமார, முக²தோ ச
நாஸதோ ச கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு அதி⁴மத்தா வாதா முத்³த⁴னி
ஊஹனந்தி [ஊஹந்தி (ஸீ॰), ஓஹனந்தி (ஸ்யா॰ கங்॰), உஹனந்தி (க॰)]. ஸெய்யதா²பி, ராஜகுமார, ப³லவா புரிஸோ திண்ஹேன ஸிக²ரேன முத்³த⁴னி அபி⁴மத்தெ²ய்ய [முத்³தா⁴னங் அபி⁴மந்தெ²ய்ய (ஸீ॰ பீ॰), முத்³தா⁴னங் அபி⁴மத்தெ²ய்ய (ஸ்யா॰ கங்॰)],
ஏவமேவ கோ² மே, ராஜகுமார, முக²தோ ச நாஸதோ ச கண்ணதோ ச அஸ்ஸாஸபஸ்ஸாஸேஸு
உபருத்³தே⁴ஸு அதி⁴மத்தா வாதா முத்³த⁴னி ஊஹனந்தி. ஆரத்³த⁴ங் கோ² பன மே,
ராஜகுமார, வீரியங் ஹோதி அஸல்லீனங், உபட்டி²தா ஸதி அஸம்முட்டா², ஸாரத்³தோ⁴ ச
பன மே காயோ ஹோதி அப்படிப்பஸ்ஸத்³தோ⁴, தேனேவ து³க்க²ப்பதா⁴னேன
பதா⁴னாபி⁴துன்னஸ்ஸ ஸதோ.
‘‘தஸ்ஸ மய்ஹங், ராஜகுமார,
ஏதத³ஹோஸி – ‘யங்னூனாஹங் அப்பாணகங்யேவ ஜா²னங் ஜா²யெய்ய’ந்தி. ஸோ கோ² அஹங்,
ராஜகுமார, முக²தோ ச நாஸதோ ச கண்ணதோ ச அஸ்ஸாஸபஸ்ஸாஸே உபருந்தி⁴ங். தஸ்ஸ
மய்ஹங், ராஜகுமார, முக²தோ ச நாஸதோ ச கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு
அதி⁴மத்தா ஸீஸே ஸீஸவேத³னா ஹொந்தி. ஸெய்யதா²பி, ராஜகுமார, ப³லவா புரிஸோ
த³ள்ஹேன வரத்தக்க²ண்டே³ன [வரத்தகப³ந்த⁴னேன (ஸீ॰)]
ஸீஸே ஸீஸவேட²ங் த³தெ³ய்ய; ஏவமேவ கோ² மே, ராஜகுமார, முக²தோ ச நாஸதோ ச
கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு அதி⁴மத்தா ஸீஸே ஸீஸவேத³னா ஹொந்தி.
ஆரத்³த⁴ங் கோ² பன மே, ராஜகுமார, வீரியங் ஹோதி அஸல்லீனங், உபட்டி²தா ஸதி
அஸம்முட்டா², ஸாரத்³தோ⁴ ச பன மே காயோ ஹோதி அப்படிப்பஸ்ஸத்³தோ⁴, தேனேவ
து³க்க²ப்பதா⁴னேன பதா⁴னாபி⁴துன்னஸ்ஸ ஸதோ.
‘‘தஸ்ஸ மய்ஹங், ராஜகுமார, ஏதத³ஹோஸி – ‘யங்னூனாஹங்
அப்பாணகங்யேவ ஜா²னங் ஜா²யெய்ய’ந்தி. ஸோ கோ² அஹங், ராஜகுமார, முக²தோ ச நாஸதோ
ச கண்ணதோ ச அஸ்ஸாஸபஸ்ஸாஸே உபருந்தி⁴ங். தஸ்ஸ மய்ஹங், ராஜகுமார, முக²தோ ச
நாஸதோ ச கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு அதி⁴மத்தா
வாதா குச்சி²ங் பரிகந்தந்தி. ஸெய்யதா²பி, ராஜகுமார, த³க்கோ² கோ³கா⁴தகோ வா
கோ³கா⁴தகந்தேவாஸீ வா திண்ஹேன கோ³விகந்தனேன குச்சி²ங் பரிகந்தெய்ய, ஏவமேவ
கோ² மே, ராஜகுமார, முக²தோ ச நாஸதோ ச கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு
அதி⁴மத்தா , வாதா குச்சி²ங் பரிகந்தந்தி. ஆரத்³த⁴ங்
கோ² பன மே, ராஜகுமார, வீரியங் ஹோதி அஸல்லீனங், உபட்டி²தா ஸதி அஸம்முட்டா²,
ஸாரத்³தோ⁴ ச பன மே காயோ ஹோதி அப்படிப்பஸ்ஸத்³தோ⁴, தேனேவ து³க்க²ப்பதா⁴னேன
பதா⁴னாபி⁴துன்னஸ்ஸ ஸதோ.
‘‘தஸ்ஸ மய்ஹங், ராஜகுமார, ஏதத³ஹோஸி – ‘யங்னூனாஹங்
அப்பாணகங்யேவ ஜா²னங் ஜா²யெய்ய’ந்தி. ஸோ கோ² அஹங், ராஜகுமார, முக²தோ ச நாஸதோ
ச கண்ணதோ ச அஸ்ஸாஸபஸ்ஸாஸே உபருந்தி⁴ங். தஸ்ஸ மய்ஹங், ராஜகுமார, முக²தோ ச
நாஸதோ ச கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு
அதி⁴மத்தோ காயஸ்மிங் டா³ஹோ ஹோதி. ஸெய்யதா²பி, ராஜகுமார, த்³வே ப³லவந்தோ
புரிஸா து³ப்³ப³லதரங் புரிஸங் நானாபா³ஹாஸு க³ஹெத்வா அங்கா³ரகாஸுயா
ஸந்தாபெய்யுங் ஸம்பரிதாபெய்யுங், ஏவமேவ கோ² மே, ராஜகுமார, முக²தோ ச நாஸதோ ச
கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு அதி⁴மத்தோ காயஸ்மிங் டா³ஹோ ஹோதி.
ஆரத்³த⁴ங் கோ² பன மே, ராஜகுமார, வீரியங் ஹோதி அஸல்லீனங், உபட்டி²தா ஸதி
அஸம்முட்டா², ஸாரத்³தோ⁴ ச பன மே காயோ ஹோதி அப்படிப்பஸ்ஸத்³தோ⁴, தேனேவ
து³க்க²ப்பதா⁴னேன பதா⁴னாபி⁴துன்னஸ்ஸ ஸதோ.
‘‘அபிஸ்ஸு மங், ராஜகுமார, தே³வதா தி³ஸ்வா ஏவமாஹங்ஸு –
‘காலங்கதோ ஸமணோ கோ³தமோ’தி. ஏகச்சா தே³வதா ஏவமாஹங்ஸு – ‘ந காலங்கதோ ஸமணோ
கோ³தமோ, அபி ச காலங்கரோதீ’தி. ஏகச்சா தே³வதா ஏவமாஹங்ஸு – ‘ந காலங்கதோ ஸமணோ
கோ³தமோ, நாபி காலங்கரோதி . அரஹங் ஸமணோ கோ³தமோ. விஹாரொத்வேவ ஸோ [விஹாரொத்வேவேஸோ (ஸீ॰)] அரஹதோ ஏவரூபோ ஹோதீ’தி [விஹாரொத்வேவேஸோ அரஹதோ’’தி (?)].
334.
‘‘தஸ்ஸ மய்ஹங், ராஜகுமார, ஏதத³ஹோஸி – ‘யங்னூனாஹங் ஸப்³ப³ஸோ
ஆஹாருபச்சே²தா³ய படிபஜ்ஜெய்ய’ந்தி. அத² கோ² மங், ராஜகுமார, தே³வதா
உபஸங்கமித்வா ஏதத³வோசுங் – ‘மா கோ² த்வங், மாரிஸ,
ஸப்³ப³ஸோ ஆஹாருபச்சே²தா³ய படிபஜ்ஜி. ஸசே கோ² த்வங், மாரிஸ, ஸப்³ப³ஸோ
ஆஹாருபச்சே²தா³ய படிபஜ்ஜிஸ்ஸஸி, தஸ்ஸ தே மயங் தி³ப்³ப³ங் ஓஜங் லோமகூபேஹி
அஜ்ஜோ²ஹாரெஸ்ஸாம [அஜ்ஜோ²ஹரிஸ்ஸாம (ஸ்யா॰ கங்॰ பீ॰ க॰)], தாய த்வங் யாபெஸ்ஸஸீ’தி. தஸ்ஸ மய்ஹங், ராஜகுமார, ஏதத³ஹோஸி – ‘அஹஞ்சேவ கோ² பன ஸப்³ப³ஸோ அஜஜ்ஜிதங் [அஜத்³து⁴கங் (ஸீ॰ பீ॰), ஜத்³து⁴கங் (ஸ்யா॰ கங்॰)] படிஜானெய்யங். இமா ச மே தே³வதா தி³ப்³ப³ங் ஓஜங் லோமகூபேஹி அஜ்ஜோ²ஹாரெய்யுங் [அஜ்ஜோ²ஹரெய்யுங் (ஸ்யா॰ கங்॰ பீ॰ க॰)], தாய சாஹங் யாபெய்யங், தங் மமஸ்ஸ முஸா’தி. ஸோ கோ² அஹங், ராஜகுமார, தா தே³வதா பச்சாசிக்கா²மி. ‘ஹல’ந்தி வதா³மி.
‘‘தஸ்ஸ மய்ஹங், ராஜகுமார,
ஏதத³ஹோஸி – ‘யங்னூனாஹங் தோ²கங் தோ²கங் ஆஹாரங் ஆஹாரெய்யங் பஸதங் பஸதங், யதி³
வா முக்³க³யூஸங் யதி³ வா குலத்த²யூஸங் யதி³ வா களாயயூஸங் யதி³ வா
ஹரேணுகயூஸ’ந்தி. ஸோ கோ² அஹங், ராஜகுமார, தோ²கங் தோ²கங் ஆஹாரங் ஆஹாரேஸிங்
பஸதங் பஸதங், யதி³ வா முக்³க³யூஸங் யதி³ வா குலத்த²யூஸங் யதி³ வா களாயயூஸங்
யதி³ வா ஹரேணுகயூஸங். தஸ்ஸ மய்ஹங், ராஜகுமார, தோ²கங் தோ²கங் ஆஹாரங்
ஆஹாரயதோ பஸதங் பஸதங், யதி³ வா முக்³க³யூஸங் யதி³ வா குலத்த²யூஸங்
யதி³ வா களாயயூஸங் யதி³ வா ஹரேணுகயூஸங், அதி⁴மத்தகஸிமானங் பத்தோ காயோ
ஹோதி. ஸெய்யதா²பி நாம ஆஸீதிகபப்³பா³னி வா காளபப்³பா³னி வா, ஏவமேவஸ்ஸு மே
அங்க³பச்சங்கா³னி ப⁴வந்தி தாயேவப்பாஹாரதாய. ஸெய்யதா²பி நாம ஒட்ட²பத³ங்,
ஏவமேவஸ்ஸு மே ஆனிஸத³ங் ஹோதி தாயேவப்பாஹாரதாய. ஸெய்யதா²பி நாம வட்டனாவளீ,
ஏவமேவஸ்ஸு மே பிட்டி²கண்டகோ உண்ணதாவனதோ ஹோதி தாயேவப்பாஹாரதாய. ஸெய்யதா²பி
நாம ஜரஸாலாய கோ³பானஸியோ ஓலுக்³க³விலுக்³கா³ ப⁴வந்தி, ஏவமேவஸ்ஸு மே
பா²ஸுளியோ ஓலுக்³க³விலுக்³கா³ ப⁴வந்தி தாயேவப்பாஹாரதாய. ஸெய்யதா²பி நாம
க³ம்பீ⁴ரே உத³பானே உத³கதாரகா க³ம்பீ⁴ரக³தா ஒக்கா²யிகா தி³ஸ்ஸந்தி,
ஏவமேவஸ்ஸு மே அக்கி²கூபேஸு அக்கி²தாரகா க³ம்பீ⁴ரக³தா ஒக்கா²யிகா தி³ஸ்ஸந்தி
தாயேவப்பாஹாரதாய. ஸெய்யதா²பி நாம தித்தகாலாபு³ ஆமகச்சி²ன்னோ வாதாதபேன
ஸங்பு²டிதோ [ஸம்பு²ஸிதோ (ஸ்யா॰ கங்॰), ஸங்புடீதோ (க॰) ஸங்பு²டிதோதி எத்த² ஸங்குசிதோதி அத்தோ²] ஹோதி ஸம்மிலாதோ, ஏவமேவஸ்ஸு மே ஸீஸச்ச²வி ஸங்பு²டிதா ஹோதி ஸம்மிலாதா தாயேவப்பாஹாரதாய. ஸோ கோ²
அஹங், ராஜகுமார, ‘உத³ரச்ச²விங் பரிமஸிஸ்ஸாமீ’தி பிட்டி²கண்டகங்யேவ
பரிக்³க³ண்ஹாமி, ‘பிட்டி²கண்டகங் பரிமஸிஸ்ஸாமீ’தி உத³ரச்ச²விங்யேவ
பரிக்³க³ண்ஹாமி. யாவஸ்ஸு மே, ராஜகுமார, உத³ரச்ச²வி பிட்டி²கண்டகங் அல்லீனா
ஹோதி தாயேவப்பாஹாரதாய. ஸோ கோ² அஹங், ராஜகுமார, ‘வச்சங் வா முத்தங் வா
கரிஸ்ஸாமீ’தி தத்தே²வ அவகுஜ்ஜோ பபதாமி தாயேவப்பாஹாரதாய. ஸோ கோ²
அஹங், ராஜகுமார, இமமேவ காயங் அஸ்ஸாஸெந்தோ பாணினா க³த்தானி அனுமஜ்ஜாமி.
தஸ்ஸ மய்ஹங், ராஜகுமார, பாணினா க³த்தானி அனுமஜ்ஜதோ பூதிமூலானி லோமானி
காயஸ்மா பபதந்தி தாயேவப்பாஹாரதாய. அபிஸ்ஸு மங், ராஜகுமார, மனுஸ்ஸா தி³ஸ்வா
ஏவமாஹங்ஸு – ‘காளோ ஸமணோ கோ³தமோ’தி, ஏகச்சே மனுஸ்ஸா ஏவமாஹங்ஸு – ‘ந காளோ
ஸமணோ கோ³தமோ, ஸாமோ ஸமணோ கோ³தமோ’தி. ஏகச்சே மனுஸ்ஸா ஏவமாஹங்ஸு – ‘ந காளோ
ஸமணோ கோ³தமோ, நபி ஸாமோ, மங்கு³ரச்ச²வி ஸமணோ கோ³தமோ’தி. யாவஸ்ஸு மே,
ராஜகுமார, தாவ பரிஸுத்³தோ⁴ ச²விவண்ணோ பரியோதா³தோ உபஹதோ ஹோதி
தாயேவப்பாஹாரதாய.
335. ‘‘தஸ்ஸ மய்ஹங், ராஜகுமார, ஏதத³ஹோஸி – ‘யே கோ² கேசி அதீதமத்³தா⁴னங் ஸமணா வா ப்³ராஹ்மணா வா ஓபக்கமிகா து³க்கா² திப்³பா³ [திப்பா (ஸீ॰ பீ॰)] க²ரா கடுகா வேத³னா வேத³யிங்ஸு, ஏதாவபரமங் நயிதோ பி⁴ய்யோ. யேபி ஹி கேசி அனாக³தமத்³தா⁴னங் ஸமணா வா ப்³ராஹ்மணா வா ஓபக்கமிகா து³க்கா²
திப்³பா³ க²ரா கடுகா வேத³னா வேத³யிஸ்ஸந்தி, ஏதாவபரமங் நயிதோ பி⁴ய்யோ. யேபி
ஹி கேசி ஏதரஹி ஸமணா வா ப்³ராஹ்மணா வா ஓபக்கமிகா து³க்கா² திப்³பா³ க²ரா
கடுகா வேத³னா வேத³யந்தி, ஏதாவபரமங் நயிதோ பி⁴ய்யோ. ந கோ² பனாஹங் இமாய
கடுகாய து³க்கரகாரிகாய அதி⁴க³ச்சா²மி உத்தரிமனுஸ்ஸத⁴ம்மா
அலமரியஞாணத³ஸ்ஸனவிஸேஸங்; ஸியா நு கோ² அஞ்ஞோ மக்³கோ³ போ³தா⁴யா’தி. தஸ்ஸ
மய்ஹங், ராஜகுமார, ஏதத³ஹோஸி – ‘அபி⁴ஜானாமி கோ² பனாஹங்
பிது ஸக்கஸ்ஸ கம்மந்தே ஸீதாய ஜம்பு³ச்சா²யாய நிஸின்னோ விவிச்சேவ காமேஹி
விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங்
ஜா²னங் உபஸம்பஜ்ஜ விஹரிதா; ஸியா நு கோ² ஏஸோ மக்³கோ³ போ³தா⁴யா’தி. தஸ்ஸ
மய்ஹங், ராஜகுமார, ஸதானுஸாரி விஞ்ஞாணங் அஹோஸி – ‘ஏஸேவ மக்³கோ³ போ³தா⁴யா’தி.
தஸ்ஸ மய்ஹங், ராஜகுமார, ஏதத³ஹோஸி – ‘கிங் நு கோ² அஹங் தஸ்ஸ ஸுக²ஸ்ஸ
பா⁴யாமி யங் தங் ஸுக²ங் அஞ்ஞத்ரேவ காமேஹி அஞ்ஞத்ர அகுஸலேஹி
த⁴ம்மேஹீ’தி? தஸ்ஸ மய்ஹங், ராஜகுமார, ஏதத³ஹோஸி – ‘ந கோ² அஹங் தஸ்ஸ ஸுக²ஸ்ஸ
பா⁴யாமி யங் தங் ஸுக²ங் அஞ்ஞத்ரேவ காமேஹி அஞ்ஞத்ர அகுஸலேஹி த⁴ம்மேஹீ’தி.
‘‘தஸ்ஸ மய்ஹங், ராஜகுமார, ஏதத³ஹோஸி – ‘ந கோ² தங்
ஸுகரங் ஸுக²ங் அதி⁴க³ந்துங் ஏவங் அதி⁴மத்தகஸிமானங் பத்தகாயேன. யங்னூனாஹங்
ஓளாரிகங் ஆஹாரங் ஆஹாரெய்யங் ஓத³னகும்மாஸ’ந்தி. ஸோ கோ² அஹங், ராஜகுமார,
ஓளாரிகங் ஆஹாரங் ஆஹாரேஸிங் ஓத³னகும்மாஸங். தேன கோ² பன மங், ராஜகுமார, ஸமயேன
பஞ்சவக்³கி³யா பி⁴க்கூ² பச்சுபட்டி²தா ஹொந்தி – ‘யங் கோ² ஸமணோ கோ³தமோ
த⁴ம்மங் அதி⁴க³மிஸ்ஸதி தங் நோ ஆரோசெஸ்ஸதீ’தி. யதோ கோ² அஹங், ராஜகுமார,
ஓளாரிகங் ஆஹாரங் ஆஹாரேஸிங் ஓத³னகும்மாஸங், அத² மே தே பஞ்சவக்³கி³யா
பி⁴க்கூ² நிப்³பி³ஜ்ஜ பக்கமிங்ஸு – ‘பா³ஹுல்லிகோ [பா³ஹுலிகோ (ஸீ॰ பீ॰) ஸாரத்த²டீகாய ஸங்க⁴பே⁴த³ஸிக்கா²பத³வண்ணனாய ஸமேதி] ஸமணோ கோ³தமோ பதா⁴னவிப்³ப⁴ந்தோ, ஆவத்தோ பா³ஹுல்லாயா’தி.
336. ‘‘ஸோ கோ² அஹங், ராஜகுமார, ஓளாரிகங் ஆஹாரங் ஆஹாரெத்வா
ப³லங் க³ஹெத்வா விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹாஸிங்.
விதக்கவிசாரானங் வூபஸமா… து³தியங் ஜா²னங்… ததியங் ஜா²னங்… சதுத்த²ங் ஜா²னங்
உபஸம்பஜ்ஜ விஹாஸிங். ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே
அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
புப்³பே³னிவாஸானுஸ்ஸதிஞாணாய சித்தங்
அபி⁴னின்னாமேஸிங். ஸோ அனேகவிஹிதங் புப்³பே³னிவாஸங் அனுஸ்ஸராமி,
ஸெய்யதி²த³ங் – ஏகம்பி ஜாதிங் த்³வேபி ஜாதியோ…பே॰… இதி ஸாகாரங் ஸஉத்³தே³ஸங்
அனேகவிஹிதங் புப்³பே³னிவாஸங் அனுஸ்ஸராமி. அயங் கோ² மே, ராஜகுமார, ரத்தியா
பட²மே யாமே பட²மா விஜ்ஜா அதி⁴க³தா, அவிஜ்ஜா விஹதா, விஜ்ஜா உப்பன்னா; தமோ
விஹதோ, ஆலோகோ உப்பன்னோ – யதா² தங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே
அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
ஸத்தானங் சுதூபபாதஞாணாய சித்தங் அபி⁴னின்னாமேஸிங். ஸோ தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன ஸத்தே பஸ்ஸாமி சவமானே உபபஜ்ஜமானே ஹீனே பணீதே
ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானாமி
…பே॰… அயங் கோ² மே, ராஜகுமார, ரத்தியா மஜ்ஜி²மே யாமே து³தியா விஜ்ஜா
அதி⁴க³தா, அவிஜ்ஜா விஹதா, விஜ்ஜா உப்பன்னா; தமோ விஹதோ, ஆலோகோ உப்பன்னோ –
யதா² தங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ.
‘‘ஸோ ஏவங் ஸமாஹிதே சித்தே
பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே
டி²தே ஆனேஞ்ஜப்பத்தே ஆஸவானங் க²யஞாணாய சித்தங் அபி⁴னின்னாமேஸிங். ஸோ ‘இத³ங்
து³க்க²’ந்தி யதா²பூ⁴தங் அப்³ப⁴ஞ்ஞாஸிங்…பே॰… ‘அயங் து³க்க²னிரோத⁴கா³மினீ
படிபதா³’தி யதா²பூ⁴தங் அப்³ப⁴ஞ்ஞாஸிங்; ‘இமே ஆஸவா’தி யதா²பூ⁴தங்
அப்³ப⁴ஞ்ஞாஸிங்…பே॰… ‘அயங் ஆஸவனிரோத⁴கா³மினீ படிபதா³’தி யதா²பூ⁴தங்
அப்³ப⁴ஞ்ஞாஸிங். தஸ்ஸ மே ஏவங் ஜானதோ ஏவங் பஸ்ஸதோ காமாஸவாபி சித்தங்
விமுச்சித்த², ப⁴வாஸவாபி சித்தங் விமுச்சித்த², அவிஜ்ஜாஸவாபி சித்தங்
விமுச்சித்த². விமுத்தஸ்மிங் விமுத்தமிதி ஞாணங் அஹோஸி. ‘கீ²ணா ஜாதி,
வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி
அப்³ப⁴ஞ்ஞாஸிங். அயங் கோ² மே, ராஜகுமார, ரத்தியா பச்சி²மே யாமே ததியா
விஜ்ஜா அதி⁴க³தா, அவிஜ்ஜா விஹதா, விஜ்ஜா உப்பன்னா; தமோ விஹதோ, ஆலோகோ
உப்பன்னோ – யதா² தங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ.
337.
‘‘தஸ்ஸ மய்ஹங், ராஜகுமார, ஏதத³ஹோஸி – ‘அதி⁴க³தோ கோ² ம்யாயங் த⁴ம்மோ
க³ம்பீ⁴ரோ து³த்³த³ஸோ து³ரனுபோ³தோ⁴ ஸந்தோ பணீதோ அதக்காவசரோ நிபுணோ
பண்டி³தவேத³னீயோ. ஆலயராமா கோ² பனாயங் பஜா ஆலயரதா ஆலயஸம்முதி³தா. ஆலயராமாய
கோ² பன பஜாய ஆலயரதாய ஆலயஸம்முதி³தாய து³த்³த³ஸங்
இத³ங் டா²னங் யதி³த³ங் – இத³ப்பச்சயதாபடிச்சஸமுப்பாதோ³. இத³ம்பி கோ² டா²னங்
து³த்³த³ஸங் – யதி³த³ங் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³
தண்ஹாக்க²யோ விராகோ³ நிரோதோ⁴ நிப்³பா³னங் . அஹஞ்சேவ
கோ² பன த⁴ம்மங் தே³ஸெய்யங், பரே ச மே ந ஆஜானெய்யுங், ஸோ மமஸ்ஸ கிலமதோ², ஸா
மமஸ்ஸ விஹேஸா’தி. அபிஸ்ஸு மங், ராஜகுமார, இமா அனச்ச²ரியா கா³தா²யோ
படிப⁴ங்ஸு புப்³பே³ அஸ்ஸுதபுப்³பா³ –
‘கிச்சே²ன மே அதி⁴க³தங், ஹலங் தா³னி பகாஸிதுங்;
ராக³தோ³ஸபரேதேஹி, நாயங் த⁴ம்மோ ஸுஸம்பு³தோ⁴.
‘படிஸோதகா³மிங் நிபுணங், க³ம்பீ⁴ரங் து³த்³த³ஸங் அணுங்;
ராக³ரத்தா ந த³க்க²ந்தி, தமோக²ந்தே⁴ன ஆவுடா’ [ஆவடா (ஸீ॰), ஆவுதா (ஸ்யா॰ கங்॰)] தி.
‘‘இதிஹ மே, ராஜகுமார, படிஸஞ்சிக்க²தோ அப்பொஸ்ஸுக்கதாய சித்தங் நமதி நோ த⁴ம்மதே³ஸனாய.
338.
‘‘அத² கோ², ராஜகுமார, ப்³ரஹ்முனோ ஸஹம்பதிஸ்ஸ மம சேதஸா சேதோபரிவிதக்கமஞ்ஞாய
ஏதத³ஹோஸி – ‘நஸ்ஸதி வத, போ⁴, லோகோ; வினஸ்ஸதி வத, போ⁴, லோகோ. யத்ர ஹி நாம
ததா²க³தஸ்ஸ அரஹதோ ஸம்மாஸம்பு³த்³த⁴ஸ்ஸ அப்பொஸ்ஸுக்கதாய சித்தங் நமதி [நமிஸ்ஸதி (?)]
நோ த⁴ம்மதே³ஸனாயா’தி. அத² கோ², ராஜகுமார, ப்³ரஹ்மா ஸஹம்பதி – ஸெய்யதா²பி
நாம ப³லவா புரிஸோ ஸமிஞ்ஜிதங் வா பா³ஹங் பஸாரெய்ய பஸாரிதங் வா பா³ஹங்
ஸமிஞ்ஜெய்ய, ஏவமேவ – ப்³ரஹ்மலோகே அந்தரஹிதோ மம புரதோ பாதுரஹோஸி. அத² கோ²,
ராஜகுமார, ப்³ரஹ்மா ஸஹம்பதி ஏகங்ஸங் உத்தராஸங்க³ங் கரித்வா யேனாஹங்
தேனஞ்ஜலிங் பணாமெத்வா மங் ஏதத³வோச – ‘தே³ஸேது, ப⁴ந்தே, ப⁴க³வா த⁴ம்மங்,
தே³ஸேது ஸுக³தோ த⁴ம்மங். ஸந்தி ஸத்தா அப்பரஜக்க²ஜாதிகா அஸ்ஸவனதாய த⁴ம்மஸ்ஸ
பரிஹாயந்தி; ப⁴விஸ்ஸந்தி த⁴ம்மஸ்ஸ அஞ்ஞாதாரோ’தி . இத³மவோச, ராஜகுமார, ப்³ரஹ்மா ஸஹம்பதி; இத³ங் வத்வா அதா²பரங் ஏதத³வோச –
‘பாதுரஹோஸி மக³தே⁴ஸு புப்³பே³,
த⁴ம்மோ அஸுத்³தோ⁴ ஸமலேஹி சிந்திதோ;
அபாபுரேதங் [அவாபுரேதங் (ஸீ॰)] அமதஸ்ஸ த்³வாரங்,
ஸுணந்து த⁴ம்மங் விமலேனானுபு³த்³த⁴ங்.
‘ஸேலே யதா² பப்³ப³தமுத்³த⁴னிட்டி²தோ,
யதா²பி பஸ்ஸே ஜனதங் ஸமந்ததோ;
ததூ²பமங் த⁴ம்மமயங் ஸுமேத⁴,
பாஸாத³மாருய்ஹ ஸமந்தசக்கு².
‘ஸோகாவதிண்ணங் [ஸோகாவகிண்ணங் (ஸ்யா॰)] ஜனதமபேதஸோகோ,
அவெக்க²ஸ்ஸு ஜாதிஜராபி⁴பூ⁴தங்;
உட்டே²ஹி வீர, விஜிதஸங்கா³ம,
ஸத்த²வாஹ அணண [அனண (ஸீ॰ ஸ்யா॰ கங்॰ பீ॰ க॰)], விசர லோகே;
தே³ஸஸ்ஸு [தே³ஸேது (ஸ்யா॰ கங்॰ க॰)] ப⁴க³வா த⁴ம்மங்,
அஞ்ஞாதாரோ ப⁴விஸ்ஸந்தீ’தி.
339. ‘‘அத²
க்²வாஹங், ராஜகுமார, ப்³ரஹ்முனோ ச அஜ்ஜே²ஸனங் விதி³த்வா ஸத்தேஸு ச
காருஞ்ஞதங் படிச்ச பு³த்³த⁴சக்கு²னா லோகங் வோலோகேஸிங். அத்³த³ஸங் கோ² அஹங்,
ராஜகுமார, பு³த்³த⁴சக்கு²னா லோகங் வோலோகெந்தோ ஸத்தே அப்பரஜக்கே²
மஹாரஜக்கே² திக்கி²ந்த்³ரியே முதி³ந்த்³ரியே ஸ்வாகாரே த்³வாகாரே
ஸுவிஞ்ஞாபயே து³விஞ்ஞாபயே அப்பேகச்சே பரலோகவஜ்ஜப⁴யத³ஸ்ஸாவினே [த³ஸ்ஸாவினோ (ஸ்யா॰ கங்॰ க॰)]
விஹரந்தே, அப்பேகச்சே ந பரலோகவஜ்ஜப⁴யத³ஸ்ஸாவினே விஹரந்தே. ஸெய்யதா²பி நாம
உப்பலினியங் வா பது³மினியங் வா புண்ட³ரீகினியங் வா அப்பேகச்சானி உப்பலானி
வா பது³மானி வா புண்ட³ரீகானி வா உத³கே ஜாதானி உத³கே ஸங்வட்³டா⁴னி
உத³கானுக்³க³தானி அந்தோனிமுக்³க³போஸீனி, அப்பேகச்சானி உப்பலானி வா பது³மானி
வா புண்ட³ரீகானி வா உத³கே ஜாதானி உத³கே ஸங்வட்³டா⁴னி உத³கானுக்³க³தானி
ஸமோத³கங் டி²தானி, அப்பேகச்சானி உப்பலானி வா பது³மானி வா புண்ட³ரீகானி வா
உத³கே ஜாதானி உத³கே ஸங்வட்³டா⁴னி உத³கா அச்சுக்³க³ம்ம டி²தானி [திட்ட²ந்தி (ஸீ॰ ஸ்யா॰ கங்॰ பீ॰)]
அனுபலித்தானி உத³கேன, ஏவமேவ கோ² அஹங், ராஜகுமார, பு³த்³த⁴சக்கு²னா லோகங்
வோலோகெந்தோ அத்³த³ஸங் ஸத்தே அப்பரஜக்கே² மஹாரஜக்கே² திக்கி²ந்த்³ரியே
முதி³ந்த்³ரியே ஸ்வாகாரே த்³வாகாரே ஸுவிஞ்ஞாபயே து³விஞ்ஞாபயே, அப்பேகச்சே
பரலோகவஜ்ஜப⁴யத³ஸ்ஸாவினே விஹரந்தே, அப்பேகச்சே ந பரலோகவஜ்ஜப⁴யத³ஸ்ஸாவினே
விஹரந்தே. அத² க்²வாஹங், ராஜகுமார, ப்³ரஹ்மானங் ஸஹம்பதிங் கா³தா²ய
பச்சபா⁴ஸிங் –
‘அபாருதா தேஸங் அமதஸ்ஸ த்³வாரா,
யே ஸோதவந்தோ பமுஞ்சந்து ஸத்³த⁴ங்;
விஹிங்ஸஸஞ்ஞீ பகு³ணங் ந பா⁴ஸிங்,
த⁴ம்மங் பணீதங் மனுஜேஸு ப்³ரஹ்மே’தி.
340. ‘‘அத²
கோ², ராஜகுமார, ப்³ரஹ்மா ஸஹம்பதி ‘கதாவகாஸோ கொ²ம்ஹி ப⁴க³வதா
த⁴ம்மதே³ஸனாயா’தி மங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யி.
‘‘தஸ்ஸ மய்ஹங், ராஜகுமார, ஏதத³ஹோஸி – ‘கஸ்ஸ நு கோ² அஹங் பட²மங்
த⁴ம்மங் தே³ஸெய்யங்? கோ இமங் த⁴ம்மங் கி²ப்பமேவ ஆஜானிஸ்ஸதீ’தி? தஸ்ஸ
மய்ஹங், ராஜகுமார, ஏதத³ஹோஸி – ‘அயங் கோ² ஆளாரோ காலாமோ பண்டி³தோ வியத்தோ
மேதா⁴வீ தீ³க⁴ரத்தங் அப்பரஜக்க²ஜாதிகோ. யங்னூனாஹங் ஆளாரஸ்ஸ காலாமஸ்ஸ
பட²மங் த⁴ம்மங் தே³ஸெய்யங்; ஸோ இமங் த⁴ம்மங் கி²ப்பமேவ ஆஜானிஸ்ஸதீ’தி. அத²
கோ² மங், ராஜகுமார, தே³வதா உபஸங்கமித்வா ஏதத³வோச – ‘ஸத்தாஹகாலங்கதோ,
ப⁴ந்தே, ஆளாரோ காலாமோ’தி. ஞாணஞ்ச பன மே த³ஸ்ஸனங் உத³பாதி³ –
‘ஸத்தாஹகாலங்கதோ ஆளாரோ காலாமோ’தி. தஸ்ஸ மய்ஹங், ராஜகுமார, ஏதத³ஹோஸி –
‘மஹாஜானியோ கோ² ஆளாரோ காலாமோ. ஸசே ஹி ஸோ இமங் த⁴ம்மங் ஸுணெய்ய, கி²ப்பமேவ
ஆஜானெய்யா’தி. தஸ்ஸ மய்ஹங், ராஜகுமார, ஏதத³ஹோஸி – ‘கஸ்ஸ நு கோ² அஹங் பட²மங்
த⁴ம்மங் தே³ஸெய்யங்? கோ இமங் த⁴ம்மங் கி²ப்பமேவ ஆஜானிஸ்ஸதீ’தி? தஸ்ஸ
மய்ஹங், ராஜகுமார, ஏதத³ஹோஸி – ‘அயங் கோ² உத³கோ ராமபுத்தோ பண்டி³தோ வியத்தோ
மேதா⁴வீ தீ³க⁴ரத்தங் அப்பரஜக்க²ஜாதிகோ. யங்னூனாஹங் உத³கஸ்ஸ ராமபுத்தஸ்ஸ
பட²மங் த⁴ம்மங் தே³ஸெய்யங்; ஸோ இமங் த⁴ம்மங் கி²ப்பமேவ ஆஜானிஸ்ஸதீ’தி. அத²
கோ² மங், ராஜகுமார, தே³வதா உபஸங்கமித்வா ஏதத³வோச – ‘அபி⁴தோ³ஸகாலங்கதோ,
ப⁴ந்தே, உத³கோ ராமபுத்தோ’தி. ஞாணஞ்ச பன மே த³ஸ்ஸனங் உத³பாதி³ –
‘அபி⁴தோ³ஸகாலங்கதோ உத³கோ ராமபுத்தோ’தி. தஸ்ஸ மய்ஹங், ராஜகுமார, ஏதத³ஹோஸி –
‘மஹாஜானியோ கோ² உத³கோ ராமபுத்தோ. ஸசே ஹி ஸோ இமங் த⁴ம்மங் ஸுணெய்ய,
கி²ப்பமேவ ஆஜானெய்யா’தி.
341. ‘‘தஸ்ஸ
மய்ஹங், ராஜகுமார, ஏதத³ஹோஸி – ‘கஸ்ஸ நு கோ² அஹங் பட²மங் த⁴ம்மங்
தே³ஸெய்யங்? கோ இமங் த⁴ம்மங் கி²ப்பமேவ ஆஜானிஸ்ஸதீ’தி? தஸ்ஸ மய்ஹங்,
ராஜகுமார, ஏதத³ஹோஸி – ‘ப³ஹுகாரா கோ² மே பஞ்சவக்³கி³யா பி⁴க்கூ² யே மங்
பதா⁴னபஹிதத்தங் உபட்ட²ஹிங்ஸு. யங்னூனாஹங் பஞ்சவக்³கி³யானங் பி⁴க்கூ²னங்
பட²மங் த⁴ம்மங் தே³ஸெய்ய’ந்தி. தஸ்ஸ மய்ஹங், ராஜகுமார, ஏதத³ஹோஸி – ‘கஹங் நு
கோ² ஏதரஹி பஞ்சவக்³கி³யா பி⁴க்கூ² விஹரந்தீ’தி. அத்³த³ஸங் க்²வாஹங்,
ராஜகுமார, தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன
பஞ்சவக்³கி³யே பி⁴க்கூ² பா³ராணஸியங் விஹரந்தே இஸிபதனே மிக³தா³யே. அத²
க்²வாஹங், ராஜகுமார, உருவேலாயங் யதா²பி⁴ரந்தங் விஹரித்வா யேன பா³ராணஸீ தேன
சாரிகங் பக்கமிங்.
‘‘அத்³த³ஸா கோ² மங், ராஜகுமார, உபகோ ஆஜீவகோ அந்தரா ச க³யங் அந்தரா ச போ³தி⁴ங் அத்³தா⁴னமக்³க³ப்படிபன்னங் .
தி³ஸ்வான மங் ஏதத³வோச – ‘விப்பஸன்னானி கோ² தே, ஆவுஸோ, இந்த்³ரியானி,
பரிஸுத்³தோ⁴ ச²விவண்ணோ பரியோதா³தோ. கங்ஸி த்வங், ஆவுஸோ, உத்³தி³ஸ்ஸ
பப்³ப³ஜிதோ? கோ வா தே ஸத்தா²? கஸ்ஸ வா த்வங் த⁴ம்மங் ரோசேஸீ’தி? ஏவங்
வுத்தே, அஹங், ராஜகுமார, உபகங் ஆஜீவகங் கா³தா²ஹி அஜ்ஜ²பா⁴ஸிங் –
‘ஸப்³பா³பி⁴பூ⁴ ஸப்³ப³விதூ³ஹமஸ்மி,
ஸப்³பே³ஸு த⁴ம்மேஸு அனூபலித்தோ;
ஸப்³ப³ஞ்ஜஹோ தண்ஹாக்க²யே விமுத்தோ,
ஸயங் அபி⁴ஞ்ஞாய கமுத்³தி³ஸெய்யங்.
‘ந மே ஆசரியோ அத்தி², ஸதி³ஸோ மே ந விஜ்ஜதி;
ஸதே³வகஸ்மிங் லோகஸ்மிங், நத்தி² மே படிபுக்³க³லோ.
‘அஹஞ்ஹி அரஹா லோகே, அஹங் ஸத்தா² அனுத்தரோ;
ஏகொம்ஹி ஸம்மாஸம்பு³த்³தோ⁴, ஸீதிபூ⁴தொஸ்மி நிப்³பு³தோ.
‘த⁴ம்மசக்கங் பவத்தேதுங், க³ச்சா²மி காஸினங் புரங்;
அந்தீ⁴பூ⁴தஸ்மிங் [அந்த⁴பூ⁴தஸ்மிங் (ஸீ॰ ஸ்யா॰ பீ॰)] லோகஸ்மிங், ஆஹஞ்ச²ங் [ஆஹஞ்ஞிங் (ஸ்யா॰ கங்॰ க॰)] அமதது³ந்து³பி⁴’ந்தி.
‘யதா² கோ² த்வங், ஆவுஸோ, படிஜானாஸி அரஹஸி அனந்தஜினோ’தி.
‘மாதி³ஸா வே ஜினா ஹொந்தி, யே பத்தா ஆஸவக்க²யங்;
ஜிதா மே பாபகா த⁴ம்மா, தஸ்மாஹமுபக [தஸ்மாஹங் உபகா (ஸீ॰ ஸ்யா॰ கங்॰ பீ॰)] ஜினோ’தி.
‘‘ஏவங் வுத்தே, ராஜகுமார, உபகோ ஆஜீவகோ ‘ஹுபெய்யபாவுஸோ’தி [ஹுவெய்யபாவுஸோ (ஸீ॰ பீ॰), ஹுவெய்யாவுஸோ (ஸ்யா॰ கங்॰)] வத்வா ஸீஸங் ஓகம்பெத்வா உம்மக்³க³ங் க³ஹெத்வா பக்காமி.
342.
‘‘அத² க்²வாஹங், ராஜகுமார, அனுபுப்³பே³ன சாரிகங் சரமானோ யேன பா³ராணஸீ
இஸிபதனங் மிக³தா³யோ யேன பஞ்சவக்³கி³யா பி⁴க்கூ² தேனுபஸங்கமிங். அத்³த³ஸங்ஸு
கோ² மங், ராஜகுமார, பஞ்சவக்³கி³யா பி⁴க்கூ² தூ³ரதோவ ஆக³ச்ச²ந்தங்.
தி³ஸ்வான அஞ்ஞமஞ்ஞங் ஸண்ட²பேஸுங் – ‘அயங் கோ², ஆவுஸோ, ஸமணோ கோ³தமோ
ஆக³ச்ச²தி பா³ஹுல்லிகோ பதா⁴னவிப்³ப⁴ந்தோ ஆவத்தோ பா³ஹுல்லாய. ஸோ நேவ
அபி⁴வாதே³தப்³போ³, ந பச்சுட்டா²தப்³போ³, நாஸ்ஸ பத்தசீவரங்
படிக்³க³ஹேதப்³ப³ங்; அபி ச கோ² ஆஸனங் ட²பேதப்³ப³ங் – ஸசே ஸோ ஆகங்கி²ஸ்ஸதி
நிஸீதி³ஸ்ஸதீ’தி. யதா² யதா² கோ² அஹங், ராஜகுமார, பஞ்சவக்³கி³யே பி⁴க்கூ² உபஸங்கமிங் [உபஸங்கமாமி (ஸீ॰ பீ॰)],
ததா² ததா² பஞ்சவக்³கி³யா பி⁴க்கூ² நாஸக்கி²ங்ஸு ஸகாய கதிகாய ஸண்டா²துங்.
அப்பேகச்சே மங் பச்சுக்³க³ந்த்வா பத்தசீவரங் படிக்³க³ஹேஸுங். அப்பேகச்சே
ஆஸனங் பஞ்ஞபேஸுங். அப்பேகச்சே பாதோ³த³கங் உபட்ட²பேஸுங். அபி ச கோ² மங்
நாமேன ச ஆவுஸோவாதே³ன ச ஸமுதா³சரந்தி. ஏவங் வுத்தே,
அஹங், ராஜகுமார, பஞ்சவக்³கி³யே பி⁴க்கூ² ஏதத³வோசங் – ‘மா, பி⁴க்க²வே,
ததா²க³தங் நாமேன ச ஆவுஸோவாதே³ன ச ஸமுதா³சரத² [ஸமுதா³சரித்த² (ஸீ॰ ஸ்யா॰ கங்॰ பீ॰)];
அரஹங், பி⁴க்க²வே, ததா²க³தோ ஸம்மாஸம்பு³த்³தோ⁴. ஓத³ஹத², பி⁴க்க²வே, ஸோதங்.
அமதமதி⁴க³தங். அஹமனுஸாஸாமி, அஹங் த⁴ம்மங் தே³ஸேமி. யதா²னுஸிட்ட²ங் ததா²
படிபஜ்ஜமானா நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா
அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதா²’தி. ஏவங் வுத்தே,
ராஜகுமார, பஞ்சவக்³கி³யா பி⁴க்கூ² மங் ஏதத³வோசுங் – ‘தாயபி கோ² த்வங்,
ஆவுஸோ கோ³தம, இரியாய [சரியாய (ஸ்யா॰ கங்॰)] தாய
படிபதா³ய தாய து³க்கரகாரிகாய நாஜ்ஜ²க³மா உத்தரிமனுஸ்ஸத⁴ம்மா
அலமரியஞாணத³ஸ்ஸனவிஸேஸங்; கிங் பன த்வங் ஏதரஹி பா³ஹுல்லிகோ பதா⁴னவிப்³ப⁴ந்தோ
ஆவத்தோ பா³ஹுல்லாய அதி⁴க³மிஸ்ஸஸி உத்தரிமனுஸ்ஸத⁴ம்மா
அலமரியஞாணத³ஸ்ஸனவிஸேஸ’ந்தி? ஏவங் வுத்தே, அஹங், ராஜகுமார, பஞ்சவக்³கி³யே
பி⁴க்கூ² ஏதத³வோசங் – ‘ந, பி⁴க்க²வே, ததா²க³தோ பா³ஹுல்லிகோ ந
பதா⁴னவிப்³ப⁴ந்தோ ந ஆவத்தோ பா³ஹுல்லாய. அரஹங், பி⁴க்க²வே, ததா²க³தோ
ஸம்மாஸம்பு³த்³தோ⁴. ஓத³ஹத², பி⁴க்க²வே, ஸோதங். அமதமதி⁴க³தங். அஹமனுஸாஸாமி,
அஹங் த⁴ம்மங் தே³ஸேமி. யதா²னுஸிட்ட²ங் ததா² படிபஜ்ஜமானா
நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங்
பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங்
அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதா²’தி. து³தியம்பி கோ², ராஜகுமார,
பஞ்சவக்³கி³யா பி⁴க்கூ² மங் ஏதத³வோசுங் – ‘தாயபி கோ² த்வங், ஆவுஸோ கோ³தம,
இரியாய தாய படிபதா³ய தாய து³க்கரகாரிகாய நாஜ்ஜ²க³மா உத்தரிமனுஸ்ஸத⁴ம்மா
அலமரியஞாணத³ஸ்ஸனவிஸேஸங்; கிங் பன த்வங் ஏதரஹி பா³ஹுல்லிகோ பதா⁴னவிப்³ப⁴ந்தோ
ஆவத்தோ பா³ஹுல்லாய அதி⁴க³மிஸ்ஸஸி உத்தரிமனுஸ்ஸத⁴ம்மா
அலமரியஞாணத³ஸ்ஸனவிஸேஸ’ந்தி? து³தியம்பி கோ² அஹங், ராஜகுமார, பஞ்சவக்³கி³யே
பி⁴க்கூ² ஏதத³வோசங் – ‘ந, பி⁴க்க²வே, ததா²க³தோ பா³ஹுல்லிகோ ந
பதா⁴னவிப்³ப⁴ந்தோ ந ஆவத்தோ பா³ஹுல்லாய. அரஹங், பி⁴க்க²வே, ததா²க³தோ
ஸம்மாஸம்பு³த்³தோ⁴. ஓத³ஹத², பி⁴க்க²வே, ஸோதங். அமதமதி⁴க³தங். அஹமனுஸாஸாமி,
அஹங் த⁴ம்மங் தே³ஸேமி. யதா²னுஸிட்ட²ங் ததா² படிபஜ்ஜமானா நசிரஸ்ஸேவ –
யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி
தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரிஸ்ஸதா²’தி . ததியம்பி கோ², ராஜகுமார, பஞ்சவக்³கி³யா பி⁴க்கூ² மங் ஏதத³வோசுங் – ‘தாயபி கோ² த்வங், ஆவுஸோ
கோ³தம, இரியாய தாய படிபதா³ய தாய து³க்கரகாரிகாய நாஜ்ஜ²க³மா
உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸங்; கிங் பன த்வங் ஏதரஹி
பா³ஹுல்லிகோ பதா⁴னவிப்³ப⁴ந்தோ ஆவத்தோ பா³ஹுல்லாய அதி⁴க³மிஸ்ஸஸி
உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸ’ந்தி? ஏவங் வுத்தே , அஹங், ராஜகுமார, பஞ்சவக்³கி³யே பி⁴க்கூ² ஏதத³வோசங் – ‘அபி⁴ஜானாத² மே நோ தும்ஹே, பி⁴க்க²வே, இதோ புப்³பே³ ஏவரூபங் பபா⁴விதமேத’ந்தி [பா⁴ஸிதமேதந்தி (ஸீ॰ ஸ்யா॰ வினயேபி)]?
‘நோ ஹேதங், ப⁴ந்தே’. ‘அரஹங், பி⁴க்க²வே, ததா²க³தோ ஸம்மாஸம்பு³த்³தோ⁴.
ஓத³ஹத², பி⁴க்க²வே, ஸோதங். அமதமதி⁴க³தங். அஹமனுஸாஸாமி, அஹங் த⁴ம்மங்
தே³ஸேமி. யதா²னுஸிட்ட²ங் ததா² படிபஜ்ஜமானா நசிரஸ்ஸேவ – யஸ்ஸத்தா²ய
குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் –
ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ விஹரிஸ்ஸதா²’தி.
‘‘அஸக்கி²ங் கோ² அஹங், ராஜகுமார, பஞ்சவக்³கி³யே
பி⁴க்கூ² ஸஞ்ஞாபேதுங். த்³வேபி ஸுத³ங், ராஜகுமார, பி⁴க்கூ² ஓவதா³மி. தயோ
பி⁴க்கூ² பிண்டா³ய சரந்தி. யங் தயோ பி⁴க்கூ² பிண்டா³ய சரித்வா ஆஹரந்தி, தேன
ச²ப்³ப³க்³கி³யா [ச²ப்³ப³க்³கா³ (ஸீ॰ ஸ்யா॰ கங்॰), ச²ப்³ப³க்³கோ³ (பீ॰)] யாபேம. தயோபி ஸுத³ங், ராஜகுமார, பி⁴க்கூ² ஓவதா³மி, த்³வே பி⁴க்கூ² பிண்டா³ய சரந்தி. யங் த்³வே பி⁴க்கூ² பிண்டா³ய சரித்வா ஆஹரந்தி தேன ச²ப்³ப³க்³கி³யா யாபேம.
343.
‘‘அத² கோ², ராஜகுமார, பஞ்சவக்³கி³யா பி⁴க்கூ² மயா ஏவங் ஓவதி³யமானா ஏவங்
அனுஸாஸியமானா நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா
அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிங்ஸூ’’தி. ஏவங் வுத்தே,
போ³தி⁴ ராஜகுமாரோ ப⁴க³வந்தங் ஏதத³வோச – ‘‘கீவ சிரேன நு கோ², ப⁴ந்தே,
பி⁴க்கு² ததா²க³தங் வினாயகங் [நாயகங் (?)] லப⁴மானோ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங்
தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்யா’’தி?
‘‘தேன ஹி, ராஜகுமார, தங்யேவெத்த² படிபுச்சி²ஸ்ஸாமி. யதா² தே க²மெய்ய, ததா²
நங் ப்³யாகரெய்யாஸி. தங் கிங் மஞ்ஞஸி, ராஜகுமார, குஸலோ த்வங் ஹத்தா²ரூள்ஹே [ஹத்தா²ரூய்ஹே (ஸீ॰ பீ॰)] அங்குஸக³ய்ஹே [அங்குஸக³ண்ஹே (ஸ்யா॰ கங்॰)] ஸிப்பே’’தி? ‘‘ஏவங், ப⁴ந்தே, குஸலோ அஹங் ஹத்தா²ரூள்ஹே அங்குஸக³ய்ஹே ஸிப்பே’’தி .
‘‘தங் கிங் மஞ்ஞஸி, ராஜகுமார, இத⁴ புரிஸோ ஆக³ச்செ²ய்ய – ‘போ³தி⁴ ராஜகுமாரோ
ஹத்தா²ரூள்ஹங் அங்குஸக³ய்ஹங் ஸிப்பங் ஜானாதி; தஸ்ஸாஹங் ஸந்திகே
ஹத்தா²ரூள்ஹங் அங்குஸக³ய்ஹங் ஸிப்பங் ஸிக்கி²ஸ்ஸாமீ’தி. ஸோ
சஸ்ஸ அஸ்ஸத்³தோ⁴; யாவதகங் ஸத்³தே⁴ன பத்தப்³ப³ங் தங் ந ஸம்பாபுணெய்ய. ஸோ
சஸ்ஸ ப³ஹ்வாபா³தோ⁴; யாவதகங் அப்பாபா³தே⁴ன பத்தப்³ப³ங் தங் ந ஸம்பாபுணெய்ய.
ஸோ சஸ்ஸ ஸடோ² மாயாவீ; யாவதகங் அஸடே²ன அமாயாவினா பத்தப்³ப³ங் தங் ந
ஸம்பாபுணெய்ய. ஸோ சஸ்ஸ குஸீதோ; யாவதகங் ஆரத்³த⁴வீரியேன பத்தப்³ப³ங் தங் ந
ஸம்பாபுணெய்ய. ஸோ சஸ்ஸ து³ப்பஞ்ஞோ; யாவதகங் பஞ்ஞவதா பத்தப்³ப³ங் தங் ந
ஸம்பாபுணெய்ய. தங் கிங் மஞ்ஞஸி, ராஜகுமார, அபி நு ஸோ புரிஸோ தவ ஸந்திகே
ஹத்தா²ரூள்ஹங் அங்குஸக³ய்ஹங் ஸிப்பங் ஸிக்கெ²ய்யா’’தி? ‘‘ஏகமேகேனாபி,
ப⁴ந்தே, அங்கே³ன ஸமன்னாக³தோ ஸோ புரிஸோ ந மம ஸந்திகே ஹத்தா²ரூள்ஹங்
அங்குஸக³ய்ஹங் ஸிப்பங் ஸிக்கெ²ய்ய, கோ பன வாதோ³ பஞ்சஹங்கே³ஹீ’’தி!
344. ‘‘தங் கிங் மஞ்ஞஸி, ராஜகுமார, இத⁴ புரிஸோ ஆக³ச்செ²ய்ய – ‘போ³தி⁴
ராஜகுமாரோ ஹத்தா²ரூள்ஹங் அங்குஸக³ய்ஹங் ஸிப்பங் ஜானாதி; தஸ்ஸாஹங் ஸந்திகே
ஹத்தா²ரூள்ஹங் அங்குஸக³ய்ஹங் ஸிப்பங் ஸிக்கி²ஸ்ஸாமீ’தி. ஸோ சஸ்ஸ ஸத்³தோ⁴;
யாவதகங் ஸத்³தே⁴ன பத்தப்³ப³ங் தங் ஸம்பாபுணெய்ய. ஸோ சஸ்ஸ அப்பாபா³தோ⁴;
யாவதகங் அப்பாபா³தே⁴ன பத்தப்³ப³ங் தங் ஸம்பாபுணெய்ய. ஸோ சஸ்ஸ அஸடோ²
அமாயாவீ; யாவதகங் அஸடே²ன அமாயாவினா பத்தப்³ப³ங் தங் ஸம்பாபுணெய்ய. ஸோ சஸ்ஸ
ஆரத்³த⁴வீரியோ; யாவதகங் ஆரத்³த⁴வீரியேன பத்தப்³ப³ங் தங் ஸம்பாபுணெய்ய. ஸோ
சஸ்ஸ பஞ்ஞவா; யாவதகங் பஞ்ஞவதா பத்தப்³ப³ங் தங் ஸம்பாபுணெய்ய. தங் கிங்
மஞ்ஞஸி, ராஜகுமார, அபி நு ஸோ புரிஸோ தவ ஸந்திகே ஹத்தா²ரூள்ஹங்
அங்குஸக³ய்ஹங் ஸிப்பங் ஸிக்கெ²ய்யா’’தி? ‘‘ஏகமேகேனாபி, ப⁴ந்தே, அங்கே³ன
ஸமன்னாக³தோ ஸோ புரிஸோ மம ஸந்திகே ஹத்தா²ரூள்ஹங் அங்குஸக³ய்ஹங் ஸிப்பங்
ஸிக்கெ²ய்ய, கோ பன வாதோ³ பஞ்சஹங்கே³ஹீ’’தி! ‘‘ஏவமேவ கோ², ராஜகுமார,
பஞ்சிமானி பதா⁴னியங்கா³னி. கதமானி பஞ்ச? இத⁴, ராஜகுமார, பி⁴க்கு² ஸத்³தோ⁴
ஹோதி; ஸத்³த³ஹதி ததா²க³தஸ்ஸ போ³தி⁴ங் – ‘இதிபி ஸோ ப⁴க³வா அரஹங்
ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ
புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி; அப்பாபா³தோ⁴
ஹோதி அப்பாதங்கோ ஸமவேபாகினியா க³ஹணியா ஸமன்னாக³தோ நாதிஸீதாய நாச்சுண்ஹாய
மஜ்ஜி²மாய பதா⁴னக்க²மாய; அஸடோ² ஹோதி அமாயாவீ யதா²பூ⁴தங் அத்தானங் ஆவிகத்தா
ஸத்த²ரி வா விஞ்ஞூஸு வா ஸப்³ரஹ்மசாரீஸு ;
ஆரத்³த⁴வீரியோ விஹரதி அகுஸலானங் த⁴ம்மானங் பஹானாய குஸலானங் த⁴ம்மானங்
உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு;
பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய
ஸம்மாது³க்க²க்க²யகா³மினியா. இமானி கோ², ராஜகுமார, பஞ்ச பதா⁴னியங்கா³னி.
345. ‘‘இமேஹி ,
ராஜகுமார, பஞ்சஹி பதா⁴னியங்கே³ஹி ஸமன்னாக³தோ பி⁴க்கு² ததா²க³தங் வினாயகங்
லப⁴மானோ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி
தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரெய்ய ஸத்த வஸ்ஸானி.
திட்ட²ந்து, ராஜகுமார, ஸத்த வஸ்ஸானி. இமேஹி பஞ்சஹி பதா⁴னியங்கே³ஹி
ஸமன்னாக³தோ பி⁴க்கு² ததா²க³தங் வினாயகங் லப⁴மானோ – யஸ்ஸத்தா²ய குலபுத்தா
ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் –
ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ விஹரெய்ய ச²ப்³ப³ஸ்ஸானி… பஞ்ச வஸ்ஸானி… சத்தாரி வஸ்ஸானி… தீணி
வஸ்ஸானி… த்³வே வஸ்ஸானி… ஏகங் வஸ்ஸங். திட்ட²து, ராஜகுமார, ஏகங் வஸ்ஸங்.
இமேஹி பஞ்சஹி பதா⁴னியங்கே³ஹி ஸமன்னாக³தோ பி⁴க்கு² ததா²க³தங் வினாயகங்
லப⁴மானோ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி
தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரெய்ய ஸத்த மாஸானி. திட்ட²ந்து, ராஜகுமார, ஸத்த
மாஸானி. இமேஹி பஞ்சஹி பதா⁴னியங்கே³ஹி ஸமன்னாக³தோ
பி⁴க்கு² ததா²க³தங் வினாயகங் லப⁴மானோ – யஸ்ஸத்தா²ய குலபுத்தா ஸம்மதே³வ
அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங்
தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்ய ச² மாஸானி…
பஞ்ச மாஸானி… சத்தாரி மாஸானி… தீணி மாஸானி… த்³வே மாஸானி… ஏகங் மாஸங்…
அட்³ட⁴மாஸங். திட்ட²து, ராஜகுமார, அட்³ட⁴மாஸோ. இமேஹி பஞ்சஹி பதா⁴னியங்கே³ஹி
ஸமன்னாக³தோ பி⁴க்கு² ததா²க³தங் வினாயகங் லப⁴மானோ – யஸ்ஸத்தா²ய குலபுத்தா
ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் –
ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ விஹரெய்ய ஸத்த ரத்திந்தி³வானி. திட்ட²ந்து, ராஜகுமார, ஸத்த
ரத்திந்தி³வானி. இமேஹி பஞ்சஹி பதா⁴னியங்கே³ஹி ஸமன்னாக³தோ பி⁴க்கு²
ததா²க³தங் வினாயகங் லப⁴மானோ – யஸ்ஸத்தா²ய குலபுத்தா ஸம்மதே³வ அகா³ரஸ்மா
அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹரெய்ய ச² ரத்திந்தி³வானி… பஞ்ச ரத்திந்தி³வானி… சத்தாரி ரத்திந்தி³வானி…
தீணி ரத்திந்தி³வானி… த்³வே ரத்திந்தி³வானி… ஏகங் ரத்திந்தி³வங்.
திட்ட²து, ராஜகுமார, ஏகோ ரத்திந்தி³வோ. இமேஹி பஞ்சஹி பதா⁴னியங்கே³ஹி
ஸமன்னாக³தோ பி⁴க்கு² ததா²க³தங் வினாயகங் லப⁴மானோ ஸாயமனுஸிட்டோ² பாதோ
விஸேஸங் அதி⁴க³மிஸ்ஸதி, பாதமனுஸிட்டோ² ஸாயங் விஸேஸங் அதி⁴க³மிஸ்ஸதீ’’தி.
ஏவங் வுத்தே, போ³தி⁴ ராஜகுமாரோ ப⁴க³வந்தங் ஏதத³வோச – ‘‘அஹோ பு³த்³தோ⁴, அஹோ
த⁴ம்மோ, அஹோ த⁴ம்மஸ்ஸ ஸ்வாக்கா²ததா! யத்ர ஹி நாம ஸாயமனுஸிட்டோ² பாதோ விஸேஸங் அதி⁴க³மிஸ்ஸதி, பாதமனுஸிட்டோ² ஸாயங் விஸேஸங் அதி⁴க³மிஸ்ஸதீ’’தி!
346. ஏவங்
வுத்தே, ஸஞ்ஜிகாபுத்தோ மாணவோ போ³தி⁴ங் ராஜகுமாரங் ஏதத³வோச – ‘‘ஏவமேவ
பனாயங் ப⁴வங் போ³தி⁴ – ‘அஹோ பு³த்³தோ⁴, அஹோ த⁴ம்மோ, அஹோ த⁴ம்மஸ்ஸ
ஸ்வாக்கா²ததா’தி ச வதே³தி [வதே³ஸி (ஸீ॰), பவேதே³தி (ஸ்யா॰ கங்॰)];
அத² ச பன ந தங் ப⁴வந்தங் கோ³தமங் ஸரணங் க³ச்ச²தி த⁴ம்மஞ்ச
பி⁴க்கு²ஸங்க⁴ஞ்சா’’தி. ‘‘மா ஹேவங், ஸம்ம ஸஞ்ஜிகாபுத்த, அவச; மா ஹேவங்,
ஸம்ம ஸஞ்ஜிகாபுத்த, அவச. ஸம்முகா² மேதங், ஸம்ம ஸஞ்ஜிகாபுத்த, அய்யாய ஸுதங்,
ஸம்முகா² படிக்³க³ஹிதங்’’. ‘‘ஏகமித³ங், ஸம்ம
ஸஞ்ஜிகாபுத்த, ஸமயங் ப⁴க³வா கோஸம்பி³யங் விஹரதி கோ⁴ஸிதாராமே. அத² கோ² மே
அய்யா குச்சி²மதீ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னா கோ² மே அய்யா
ப⁴க³வந்தங் ஏதத³வோச – ‘யோ மே அயங், ப⁴ந்தே, குச்சி²க³தோ குமாரகோ வா
குமாரிகா வா ஸோ ப⁴க³வந்தங் ஸரணங் க³ச்ச²தி த⁴ம்மஞ்ச பி⁴க்கு²ஸங்க⁴ஞ்ச.
உபாஸகங் தங் ப⁴க³வா தா⁴ரேது அஜ்ஜதக்³கே³ பாணுபேதங் ஸரணங் க³த’ந்தி.
ஏகமித³ங், ஸம்ம ஸஞ்ஜிகாபுத்த, ஸமயங் ப⁴க³வா இதே⁴வ ப⁴க்³கே³ஸு விஹரதி
ஸுஸுமாரகி³ரே பே⁴ஸகளாவனே மிக³தா³யே. அத² கோ² மங் தா⁴தி அங்கேன ஹரித்வா யேன
ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
அட்டா²ஸி. ஏகமந்தங் டி²தா கோ² மங் தா⁴தி ப⁴க³வந்தங் ஏதத³வோச – ‘அயங் ,
ப⁴ந்தே, போ³தி⁴ ராஜகுமாரோ ப⁴க³வந்தங் ஸரணங் க³ச்ச²தி த⁴ம்மஞ்ச
பி⁴க்கு²ஸங்க⁴ஞ்ச. உபாஸகங் தங் ப⁴க³வா தா⁴ரேது அஜ்ஜதக்³கே³ பாணுபேதங் ஸரணங்
க³த’ந்தி. ஏஸாஹங், ஸம்ம ஸஞ்ஜிகாபுத்த, ததியகம்பி ப⁴க³வந்தங் ஸரணங்
க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴க³வா தா⁴ரேது
அஜ்ஜதக்³கே³ பாணுபேதங் ஸரணங் க³த’’ந்தி.
போ³தி⁴ராஜகுமாரஸுத்தங் நிட்டி²தங் பஞ்சமங்.
6. அங்கு³லிமாலஸுத்தங்
347. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தேன கோ² பன ஸமயேன ரஞ்ஞோ பஸேனதி³ஸ்ஸ கோஸலஸ்ஸ விஜிதே சோரோ
அங்கு³லிமாலோ நாம ஹோதி லுத்³தோ³ லோஹிதபாணி ஹதபஹதே நிவிட்டோ² அத³யாபன்னோ
பாணபூ⁴தேஸு. தேன கா³மாபி அகா³மா கதா, நிக³மாபி அனிக³மா
கதா, ஜனபதா³பி அஜனபதா³ கதா. ஸோ மனுஸ்ஸே வதி⁴த்வா வதி⁴த்வா அங்கு³லீனங்
மாலங் தா⁴ரேதி. அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய
ஸாவத்தி²ங் பிண்டா³ய பாவிஸி. ஸாவத்தி²யங் பிண்டா³ய சரித்வா பச்சா²ப⁴த்தங்
பிண்ட³பாதபடிக்கந்தோ ஸேனாஸனங் ஸங்ஸாமெத்வா பத்தசீவரமாதா³ய யேன சோரோ
அங்கு³லிமாலோ தேனத்³தா⁴னமக்³க³ங் படிபஜ்ஜி. அத்³த³ஸாஸுங் கோ² கோ³பாலகா
பஸுபாலகா கஸ்ஸகா பதா²வினோ ப⁴க³வந்தங் யேன சோரோ அங்கு³லிமாலோ
தேனத்³தா⁴னமக்³க³படிபன்னங். தி³ஸ்வான ப⁴க³வந்தங் ஏதத³வோசுங் – ‘‘மா, ஸமண,
ஏதங் மக்³க³ங் படிபஜ்ஜி. ஏதஸ்மிங், ஸமண, மக்³கே³ சோரோ அங்கு³லிமாலோ நாம
லுத்³தோ³ லோஹிதபாணி ஹதபஹதே நிவிட்டோ² அத³யாபன்னோ பாணபூ⁴தேஸு. தேன கா³மாபி
அகா³மா கதா, நிக³மாபி அனிக³மா கதா, ஜனபதா³பி அஜனபதா³ கதா. ஸோ மனுஸ்ஸே
வதி⁴த்வா வதி⁴த்வா அங்கு³லீனங் மாலங் தா⁴ரேதி. ஏதஞ்ஹி, ஸமண, மக்³க³ங் த³ஸபி
புரிஸா வீஸம்பி புரிஸா திங்ஸம்பி புரிஸா சத்தாரீஸம்பி புரிஸா பஞ்ஞாஸம்பி
புரிஸா ஸங்கரித்வா ஸங்கரித்வா [ஸங்ஹரித்வா ஸங்ஹரித்வா (ஸீ॰ பீ॰), ஸங்க³ரித்வா (ஸ்யா॰ கங்॰)]
படிபஜ்ஜந்தி. தேபி சோரஸ்ஸ அங்கு³லிமாலஸ்ஸ ஹத்த²த்த²ங் க³ச்ச²ந்தீ’’தி.
ஏவங் வுத்தே, ப⁴க³வா துண்ஹீபூ⁴தோ அக³மாஸி. து³தியம்பி கோ² கோ³பாலகா…பே॰…
ததியம்பி கோ² கோ³பாலகா பஸுபாலகா கஸ்ஸகா பதா²வினோ ப⁴க³வந்தங் ஏதத³வோசுங் –
‘‘மா, ஸமண, ஏதங் மக்³க³ங் படிபஜ்ஜி, ஏதஸ்மிங் ஸமண மக்³கே³ சோரோ
அங்கு³லிமாலோ நாம லுத்³தோ³ லோஹிதபாணி ஹதபஹதே நிவிட்டோ² அத³யாபன்னோ
பாணபூ⁴தேஸு, தேன கா³மாபி அகா³மா கதா, நிக³மாபி அனிக³மா கதா, ஜனபதா³பி
அஜனபதா³ கதா. ஸோ மனுஸ்ஸே வதி⁴த்வா வதி⁴த்வா அங்கு³லீனங் மாலங் தா⁴ரேதி.
ஏதஞ்ஹி ஸமண மக்³க³ங் த³ஸபி புரிஸா வீஸம்பி புரிஸா திங்ஸம்பி புரிஸா
சத்தாரீஸம்பி புரிஸா பஞ்ஞாஸம்பி புரிஸா ஸங்கரித்வா ஸங்கரித்வா படிபஜ்ஜந்தி. தேபி சோரஸ்ஸ அங்கு³லிமாலஸ்ஸ ஹத்த²த்த²ங் க³ச்ச²ந்தீ’’தி.
348. அத²
கோ² ப⁴க³வா துண்ஹீபூ⁴தோ அக³மாஸி. அத்³த³ஸா கோ² சோரோ அங்கு³லிமாலோ
ப⁴க³வந்தங் தூ³ரதோவ ஆக³ச்ச²ந்தங். தி³ஸ்வானஸ்ஸ ஏதத³ஹோஸி – ‘‘அச்ச²ரியங் வத,
போ⁴, அப்³பு⁴தங் வத, போ⁴! இமஞ்ஹி மக்³க³ங் த³ஸபி புரிஸா வீஸம்பி
புரிஸா திங்ஸம்பி புரிஸா சத்தாரீஸம்பி புரிஸா பஞ்ஞாஸம்பி புரிஸா
ஸங்கரித்வா ஸங்கரித்வா படிபஜ்ஜந்தி. தேபி மம ஹத்த²த்த²ங் க³ச்ச²ந்தி. அத² ச
பனாயங் ஸமணோ ஏகோ அது³தியோ பஸய்ஹ மஞ்ஞே ஆக³ச்ச²தி. யங்னூனாஹங் இமங் ஸமணங்
ஜீவிதா வோரோபெய்ய’’ந்தி. அத² கோ² சோரோ அங்கு³லிமாலோ அஸிசம்மங் க³ஹெத்வா
த⁴னுகலாபங் ஸன்னய்ஹித்வா ப⁴க³வந்தங் பிட்டி²தோ பிட்டி²தோ அனுப³ந்தி⁴. அத²
கோ² ப⁴க³வா ததா²ரூபங் இத்³தா⁴பி⁴ஸங்கா²ரங் அபி⁴ஸங்கா²ஸி [அபி⁴ஸங்கா²ரேஸி (ஸ்யா॰ கங்॰ க॰)]
யதா² சோரோ அங்கு³லிமாலோ ப⁴க³வந்தங் பகதியா க³ச்ச²ந்தங் ஸப்³ப³தா²மேன
க³ச்ச²ந்தோ ந ஸக்கோதி ஸம்பாபுணிதுங். அத² கோ² சோரஸ்ஸ அங்கு³லிமாலஸ்ஸ
ஏதத³ஹோஸி – ‘‘அச்ச²ரியங் வத, போ⁴, அப்³பு⁴தங் வத, போ⁴! அஹஞ்ஹி புப்³பே³
ஹத்தி²ம்பி தா⁴வந்தங் அனுபதித்வா க³ண்ஹாமி, அஸ்ஸம்பி தா⁴வந்தங் அனுபதித்வா
க³ண்ஹாமி, ரத²ம்பி தா⁴வந்தங் அனுபதித்வா க³ண்ஹாமி, மிக³ம்பி தா⁴வந்தங்
அனுபதித்வா க³ண்ஹாமி; அத² ச பனாஹங் இமங் ஸமணங் பகதியா க³ச்ச²ந்தங்
ஸப்³ப³தா²மேன க³ச்ச²ந்தோ ந ஸக்கோமி ஸம்பாபுணிது’’ந்தி! டி²தோவ ப⁴க³வந்தங்
ஏதத³வோச – ‘‘திட்ட², திட்ட², ஸமணா’’தி. ‘‘டி²தோ அஹங், அங்கு³லிமால, த்வஞ்ச
திட்டா²’’தி. அத² கோ² சோரஸ்ஸ அங்கு³லிமாலஸ்ஸ
ஏதத³ஹோஸி – ‘‘இமே கோ² ஸமணா ஸக்யபுத்தியா ஸச்சவாதி³னோ ஸச்சபடிஞ்ஞா. அத²
பனாயங் ஸமணோ க³ச்ச²ங் யேவாஹ – ‘டி²தோ அஹங், அங்கு³லிமால, த்வஞ்ச
திட்டா²’தி. யங்னூனாஹங் இமங் ஸமணங் புச்செ²ய்ய’’ந்தி.
349. அத² கோ² சோரோ அங்கு³லிமாலோ ப⁴க³வந்தங் கா³தா²ய அஜ்ஜ²பா⁴ஸி –
‘‘க³ச்ச²ங் வதே³ஸி ஸமண டி²தொம்ஹி,
மமஞ்ச ப்³ரூஸி டி²தமட்டி²தோதி;
புச்சா²மி தங் ஸமண ஏதமத்த²ங்,
கத²ங் டி²தோ த்வங் அஹமட்டி²தொம்ஹீ’’தி.
‘‘டி²தோ அஹங் அங்கு³லிமால ஸப்³ப³தா³,
ஸப்³பே³ஸு பூ⁴தேஸு நிதா⁴ய த³ண்ட³ங்;
தஸ்மா டி²தோஹங் துவமட்டி²தோஸீ’’தி.
மஹாவனங் பாபுணி ஸச்சவாதீ³ [மஹாவனங் ஸமணோயங் பச்சுபாதி³ (ஸீ॰), மஹாவனங் ஸமண பச்சுபாதி³ (ஸ்யா॰ கங்॰)];
ஸோஹங் சரிஸ்ஸாமி பஹாய பாபங் [ஸோஹங் சிரஸ்ஸாபி பஹாஸ்ஸங் பாபங் (ஸீ॰), ஸோஹங் சரிஸ்ஸாமி பஜஹிஸ்ஸங் பாபங் (ஸ்யா॰ கங்॰)],
ஸுத்வான கா³த²ங் தவ த⁴ம்மயுத்தங்’’.
இத்வேவ சோரோ அஸிமாவுத⁴ஞ்ச,
ஸொப்³பே⁴ பபாதே நரகே அகிரி;
தத்தே²வ நங் பப்³ப³ஜ்ஜங் அயாசி.
பு³த்³தோ⁴ ச கோ² காருணிகோ மஹேஸி,
யோ ஸத்தா² லோகஸ்ஸ ஸதே³வகஸ்ஸ;
‘தமேஹி பி⁴க்கூ²’தி ததா³ அவோச,
ஏஸேவ தஸ்ஸ அஹு பி⁴க்கு²பா⁴வோதி.
350.
அத² கோ² ப⁴க³வா ஆயஸ்மதா அங்கு³லிமாலேன பச்சா²ஸமணேன யேன ஸாவத்தி² தேன
சாரிகங் பக்காமி. அனுபுப்³பே³ன சாரிகங் சரமானோ யேன ஸாவத்தி² தத³வஸரி. தத்ர
ஸுத³ங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ²
பன ஸமயேன ரஞ்ஞோ பஸேனதி³ஸ்ஸ கோஸலஸ்ஸ அந்தேபுரத்³வாரே மஹாஜனகாயோ ஸன்னிபதித்வா
உச்சாஸத்³தோ³ மஹாஸத்³தோ³ ஹோதி – ‘‘சோரோ தே, தே³வ, விஜிதே அங்கு³லிமாலோ நாம
லுத்³தோ³ லோஹிதபாணி ஹதபஹதே நிவிட்டோ² அத³யாபன்னோ பாணபூ⁴தேஸு. தேன கா³மாபி
அகா³மா கதா, நிக³மாபி அனிக³மா கதா, ஜனபதா³பி அஜனபதா³ கதா. ஸோ மனுஸ்ஸே
வதி⁴த்வா வதி⁴த்வா அங்கு³லீனங் மாலங் தா⁴ரேதி. தங் தே³வோ படிஸேதே⁴தூ’’தி.
அத²
கோ² ராஜா பஸேனதி³ கோஸலோ பஞ்சமத்தேஹி அஸ்ஸஸதேஹி ஸாவத்தி²யா நிக்க²மி தி³வா
தி³வஸ்ஸ. யேன ஆராமோ தேன பாவிஸி. யாவதிகா யானஸ்ஸ பூ⁴மி யானேன க³ந்த்வா யானா
பச்சோரோஹித்வா பத்திகோவ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ராஜானங்
பஸேனதி³ங் கோஸலங் ப⁴க³வா ஏதத³வோச – ‘‘கிங் நு தே, மஹாராஜ, ராஜா வா மாக³தோ⁴
ஸேனியோ பி³ம்பி³ஸாரோ குபிதோ வேஸாலிகா வா லிச்ச²வீ அஞ்ஞே வா படிராஜானோ’’தி?
‘‘ந கோ² மே, ப⁴ந்தே, ராஜா மாக³தோ⁴ ஸேனியோ பி³ம்பி³ஸாரோ குபிதோ, நாபி
வேஸாலிகா லிச்ச²வீ, நாபி அஞ்ஞே படிராஜானோ. சோரோ மே, ப⁴ந்தே, விஜிதே
அங்கு³லிமாலோ நாம லுத்³தோ³ லோஹிதபாணி ஹதபஹதே நிவிட்டோ² அத³யாபன்னோ
பாணபூ⁴தேஸு. தேன கா³மாபி அகா³மா கதா, நிக³மாபி அனிக³மா கதா, ஜனபதா³பி
அஜனபதா³ கதா. ஸோ மனுஸ்ஸே வதி⁴த்வா வதி⁴த்வா அங்கு³லீனங் மாலங் தா⁴ரேதி.
தாஹங், ப⁴ந்தே, படிஸேதி⁴ஸ்ஸாமீ’’தி. ‘‘ஸசே பன த்வங், மஹாராஜ, அங்கு³லிமாலங்
பஸ்ஸெய்யாஸி கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜிதங், விரதங் பாணாதிபாதா, விரதங்
அதி³ன்னாதா³னா, விரதங் முஸாவாதா³, ஏகப⁴த்திகங், ப்³ரஹ்மசாரிங், ஸீலவந்தங்,
கல்யாணத⁴ம்மங், கிந்தி நங் கரெய்யாஸீ’’தி? ‘‘அபி⁴வாதெ³ய்யாம வா, ப⁴ந்தே,
பச்சுட்டெ²ய்யாம வா ஆஸனேன வா நிமந்தெய்யாம, அபி⁴னிமந்தெய்யாம வா நங்
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி, த⁴ம்மிகங் வா அஸ்ஸ
ரக்கா²வரணகு³த்திங் ஸங்வித³ஹெய்யாம. குதோ பனஸ்ஸ, ப⁴ந்தே, து³ஸ்ஸீலஸ்ஸ
பாபத⁴ம்மஸ்ஸ ஏவரூபோ ஸீலஸங்யமோ ப⁴விஸ்ஸதீ’’தி?
தேன கோ² பன ஸமயேன ஆயஸ்மா அங்கு³லிமாலோ ப⁴க³வதோ அவிதூ³ரே
நிஸின்னோ ஹோதி. அத² கோ² ப⁴க³வா த³க்கி²ணங் பா³ஹுங் பக்³க³ஹெத்வா ராஜானங்
பஸேனதி³ங் கோஸலங் ஏதத³வோச – ‘‘ஏஸோ, மஹாராஜ, அங்கு³லிமாலோ’’தி. அத² கோ²
ரஞ்ஞோ பஸேனதி³ஸ்ஸ கோஸலஸ்ஸ அஹுதே³வ ப⁴யங், அஹு ச²ம்பி⁴தத்தங், அஹு லோமஹங்ஸோ.
அத² கோ² ப⁴க³வா ராஜானங் பஸேனதி³ங் கோஸலங் பீ⁴தங் ஸங்விக்³க³ங்
லோமஹட்ட²ஜாதங் விதி³த்வா ராஜானங் பஸேனதி³ங் கோஸலங் ஏதத³வோச – ‘‘மா பா⁴யி,
மஹாராஜ, நத்தி² தே இதோ ப⁴ய’’ந்தி. அத² கோ² ரஞ்ஞோ பஸேனதி³ஸ்ஸ கோஸலஸ்ஸ யங்
அஹோஸி ப⁴யங் வா ச²ம்பி⁴தத்தங் வா லோமஹங்ஸோ வா ஸோ படிப்பஸ்ஸம்பி⁴. அத² கோ² ராஜா பஸேனதி³ கோஸலோ யேனாயஸ்மா அங்கு³லிமாலோ
தேனுபஸங்கமி; உபஸங்கமித்வா ஆயஸ்மந்தங் அங்கு³லிமாலங் ஏதத³வோச – ‘‘அய்யோ
நோ, ப⁴ந்தே, அங்கு³லிமாலோ’’தி? ‘‘ஏவங், மஹாராஜா’’தி. ‘‘கத²ங்கொ³த்தோ
அய்யஸ்ஸ பிதா, கத²ங்கொ³த்தா மாதா’’தி? ‘‘க³க்³கோ³ கோ², மஹாராஜ, பிதா,
மந்தாணீ மாதா’’தி. ‘‘அபி⁴ரமது, ப⁴ந்தே, அய்யோ க³க்³கோ³ மந்தாணிபுத்தோ.
அஹமய்யஸ்ஸ க³க்³க³ஸ்ஸ மந்தாணிபுத்தஸ்ஸ உஸ்ஸுக்கங் கரிஸ்ஸாமி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரான’’ந்தி.
351.
தேன கோ² பன ஸமயேன ஆயஸ்மா அங்கு³லிமாலோ ஆரஞ்ஞிகோ ஹோதி பிண்ட³பாதிகோ
பங்ஸுகூலிகோ தேசீவரிகோ. அத² கோ² ஆயஸ்மா அங்கு³லிமாலோ ராஜானங் பஸேனதி³ங்
கோஸலங் ஏதத³வோச – ‘‘அலங், மஹாராஜ, பரிபுண்ணங் மே சீவர’’ந்தி. அத² கோ² ராஜா
பஸேனதி³ கோஸலோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ
கோ² ராஜா பஸேனதி³ கோஸலோ ப⁴க³வந்தங் ஏதத³வோச – ‘‘அச்ச²ரியங், ப⁴ந்தே,
அப்³பு⁴தங், ப⁴ந்தே! யாவஞ்சித³ங், ப⁴ந்தே, ப⁴க³வா அத³ந்தானங் த³மேதா,
அஸந்தானங் ஸமேதா, அபரினிப்³பு³தானங் பரினிப்³பா³பேதா. யஞ்ஹி மயங், ப⁴ந்தே,
நாஸக்கி²ம்ஹா த³ண்டே³னபி ஸத்தே²னபி த³மேதுங் ஸோ ப⁴க³வதா அத³ண்டே³ன
அஸத்தே²னேவ [அஸத்தே²ன (ஸ்யா॰ கங்॰)] த³ந்தோ. ஹந்த³ ச தா³னி [ஹந்த³ தா³னி (ஸ்யா॰ கங்॰ பீ॰)]
மயங், ப⁴ந்தே, க³ச்சா²ம; ப³ஹுகிச்சா மயங் ப³ஹுகரணீயா’’தி. ‘‘யஸ்ஸதா³னி,
மஹாராஜ, காலங் மஞ்ஞஸீ’’தி. அத² கோ² ராஜா பஸேனதி³ கோஸலோ உட்டா²யாஸனா
ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி.
அத² கோ² ஆயஸ்மா அங்கு³லிமாலோ புப்³ப³ண்ஹஸமயங்
நிவாஸெத்வா பத்தசீவரமாதா³ய ஸாவத்தி²யங் பிண்டா³ய பாவிஸி. அத்³த³ஸா கோ²
ஆயஸ்மா அங்கு³லிமாலோ ஸாவத்தி²யங் ஸபதா³னங் பிண்டா³ய சரமானோ அஞ்ஞதரங்
இத்தி²ங் மூள்ஹக³ப்³ப⁴ங் விகா⁴தக³ப்³ப⁴ங் [விஸாதக³ப்³ப⁴ங் (ஸ்யா॰ கங்॰ பீ॰ க॰)]. தி³ஸ்வானஸ்ஸ
ஏதத³ஹோஸி – ‘‘கிலிஸ்ஸந்தி வத, போ⁴, ஸத்தா; கிலிஸ்ஸந்தி வத, போ⁴,
ஸத்தா’’தி! அத² கோ² ஆயஸ்மா அங்கு³லிமாலோ ஸாவத்தி²யங் பிண்டா³ய சரித்வா
பச்சா²ப⁴த்தங் பிண்ட³பாதபடிக்கந்தோ யேன ப⁴க³வா தேனுபஸங்கமி; உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா
அங்கு³லிமாலோ ப⁴க³வந்தங் ஏதத³வோச – ‘‘இதா⁴ஹங், ப⁴ந்தே, புப்³ப³ண்ஹஸமயங்
நிவாஸெத்வா பத்தசீவரமாதா³ய ஸாவத்தி²ங் பிண்டா³ய
பாவிஸிங். அத்³த³ஸங் கோ² அஹங், ப⁴ந்தே, ஸாவத்தி²யங் ஸபதா³னங் பிண்டா³ய
சரமானோ அஞ்ஞதரங் இத்தி²ங் மூள்ஹக³ப்³ப⁴ங் விகா⁴தக³ப்³ப⁴ங்’’. தி³ஸ்வான
மய்ஹங் ஏதத³ஹோஸி – ‘‘கிலிஸ்ஸந்தி வத , போ⁴, ஸத்தா; கிலிஸ்ஸந்தி வத, போ⁴, ஸத்தா’’தி!
‘‘தேன ஹி த்வங், அங்கு³லிமால, யேன ஸா இத்தீ² தேனுபஸங்கம; உபஸங்கமித்வா தங் இத்தி²ங் ஏவங் வதே³ஹி – ‘யதோஹங், ப⁴கி³னி, ஜாதோ [ப⁴கி³னி ஜாதியா ஜாதோ (ஸீ॰)] நாபி⁴ஜானாமி ஸஞ்சிச்ச பாணங் ஜீவிதா வோரோபேதா, தேன ஸச்சேன ஸொத்தி² தே ஹோது, ஸொத்தி² க³ப்³ப⁴ஸ்ஸா’’’தி.
‘‘ஸோ ஹி நூன மே, ப⁴ந்தே, ஸம்பஜானமுஸாவாதோ³ ப⁴விஸ்ஸதி.
மயா ஹி, ப⁴ந்தே, ப³ஹூ ஸஞ்சிச்ச பாணா ஜீவிதா வோரோபிதா’’தி. ‘‘தேன ஹி த்வங்,
அங்கு³லிமால, யேன ஸா இத்தீ² தேனுபஸங்கம; உபஸங்கமித்வா தங் இத்தி²ங் ஏவங்
வதே³ஹி – ‘யதோஹங், ப⁴கி³னி, அரியாய ஜாதியா ஜாதோ, நாபி⁴ஜானாமி ஸஞ்சிச்ச
பாணங் ஜீவிதா வோரோபேதா, தேன ஸச்சேன ஸொத்தி² தே ஹோது, ஸொத்தி²
க³ப்³ப⁴ஸ்ஸா’’’தி.
‘‘ஏவங், ப⁴ந்தே’’தி கோ² ஆயஸ்மா அங்கு³லிமாலோ ப⁴க³வதோ
படிஸ்ஸுத்வா யேன ஸா இத்தீ² தேனுபஸங்கமி; உபஸங்கமித்வா தங் இத்தி²ங் ஏதத³வோச
– ‘‘யதோஹங், ப⁴கி³னி, அரியாய ஜாதியா ஜாதோ, நாபி⁴ஜானாமி ஸஞ்சிச்ச பாணங்
ஜீவிதா வோரோபேதா, தேன ஸச்சேன ஸொத்தி² தே ஹோது, ஸொத்தி² க³ப்³ப⁴ஸ்ஸா’’தி.
அத² க்²வாஸ்ஸா இத்தி²யா ஸொத்தி² அஹோஸி, ஸொத்தி² க³ப்³ப⁴ஸ்ஸ.
அத² கோ² ஆயஸ்மா அங்கு³லிமாலோ ஏகோ வூபகட்டோ² அப்பமத்தோ
ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ
அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங்
தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘கீ²ணா ஜாதி வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி அப்³ப⁴ஞ்ஞாஸி. அஞ்ஞதரோ கோ² பனாயஸ்மா அங்கு³லிமாலோ அரஹதங் அஹோஸி.
352.
அத² கோ² ஆயஸ்மா அங்கு³லிமாலோ புப்³ப³ண்ஹஸமயங் நிவாஸெத்வா பத்தசீவரமாதா³ய
ஸாவத்தி²ங் பிண்டா³ய பாவிஸி. தேன கோ² பன ஸமயேன அஞ்ஞேனபி லெட்³டு³ கி²த்தோ
ஆயஸ்மதோ அங்கு³லிமாலஸ்ஸ காயே நிபததி, அஞ்ஞேனபி
த³ண்டோ³ கி²த்தோ ஆயஸ்மதோ அங்கு³லிமாலஸ்ஸ காயே நிபததி, அஞ்ஞேனபி ஸக்க²ரா
கி²த்தா ஆயஸ்மதோ அங்கு³லிமாலஸ்ஸ காயே நிபததி. அத² கோ² ஆயஸ்மா அங்கு³லிமாலோ
பி⁴ன்னேன ஸீஸேன, லோஹிதேன க³ளந்தேன, பி⁴ன்னேன பத்தேன, விப்பா²லிதாய
ஸங்கா⁴டியா யேன ப⁴க³வா தேனுபஸங்கமி. அத்³த³ஸா கோ² ப⁴க³வா ஆயஸ்மந்தங்
அங்கு³லிமாலங் தூ³ரதோவ ஆக³ச்ச²ந்தங். தி³ஸ்வான ஆயஸ்மந்தங் அங்கு³லிமாலங்
ஏதத³வோச – ‘‘அதி⁴வாஸேஹி த்வங், ப்³ராஹ்மண, அதி⁴வாஸேஹி
த்வங், ப்³ராஹ்மண. யஸ்ஸ கோ² த்வங், ப்³ராஹ்மண, கம்மஸ்ஸ விபாகேன ப³ஹூனி
வஸ்ஸானி ப³ஹூனி வஸ்ஸஸதானி ப³ஹூனி வஸ்ஸஸஹஸ்ஸானி நிரயே பச்செய்யாஸி தஸ்ஸ
த்வங், ப்³ராஹ்மண, கம்மஸ்ஸ விபாகங் தி³ட்டே²வ த⁴ம்மே படிஸங்வேதே³ஸீ’’தி.
அத² கோ² ஆயஸ்மா அங்கு³லிமாலோ ரஹோக³தோ படிஸல்லீனோ விமுத்திஸுக²ங்
படிஸங்வேதி³; தாயங் வேலாயங் இமங் உதா³னங் உதா³னேஸி –
‘‘யோ புப்³பே³வ [யோ ச புப்³பே³ (ஸீ॰ ஸ்யா॰ கங்॰ பீ॰)] பமஜ்ஜித்வா, பச்சா² ஸோ நப்பமஜ்ஜதி;
ஸோமங் [ஸோ இமங் (ஸீ॰)] லோகங் பபா⁴ஸேதி, அப்³பா⁴ முத்தோவ சந்தி³மா.
‘‘யஸ்ஸ பாபங் கதங் கம்மங், குஸலேன பிதீ⁴யதி [பிதீ²யதி (ஸீ॰ ஸ்யா॰ கங்॰ பீ॰)];
ஸோமங் லோகங் பபா⁴ஸேதி, அப்³பா⁴ முத்தோவ சந்தி³மா.
‘‘யோ ஹவே த³ஹரோ பி⁴க்கு², யுஞ்ஜதி பு³த்³த⁴ஸாஸனே;
ஸோமங் லோகங் பபா⁴ஸேதி, அப்³பா⁴ முத்தோவ சந்தி³மா.
‘‘தி³ஸா ஹி மே த⁴ம்மகத²ங் ஸுணந்து,
தி³ஸா ஹி மே யுஞ்ஜந்து பு³த்³த⁴ஸாஸனே;
தி³ஸா ஹி மே தே மனுஜா ப⁴ஜந்து,
யே த⁴ம்மமேவாத³பயந்தி ஸந்தோ.
‘‘தி³ஸா ஹி மே க²ந்திவாதா³னங், அவிரோத⁴ப்பஸங்ஸீனங்;
ஸுணந்து த⁴ம்மங் காலேன, தஞ்ச அனுவிதீ⁴யந்து.
‘‘ந ஹி ஜாது ஸோ மமங் ஹிங்ஸே, அஞ்ஞங் வா பன கிஞ்சி நங் [கஞ்சி நங் (ஸீ॰ ஸ்யா॰ கங்॰ பீ॰), கஞ்சனங் (?)];
பப்புய்ய பரமங் ஸந்திங், ரக்கெ²ய்ய தஸதா²வரே.
‘‘உத³கஞ்ஹி நயந்தி நெத்திகா, உஸுகாரா நமயந்தி [த³மயந்தி (க॰)] தேஜனங்;
தா³ருங் நமயந்தி தச்ச²கா, அத்தானங் த³மயந்தி பண்டி³தா.
‘‘த³ண்டே³னேகே த³மயந்தி, அங்குஸேஹி கஸாஹி ச;
அத³ண்டே³ன அஸத்தே²ன, அஹங் த³ந்தொம்ஹி தாதி³னா.
‘‘அஹிங்ஸகோதி மே நாமங், ஹிங்ஸகஸ்ஸ புரே ஸதோ;
அஜ்ஜாஹங் ஸச்சனாமொம்ஹி, ந நங் ஹிங்ஸாமி கிஞ்சி நங் [கஞ்சி நங் (ஸீ॰ ஸ்யா॰ கங்॰ பீ॰), கஞ்சனங் (?)].
‘‘சோரோ அஹங் புரே ஆஸிங், அங்கு³லிமாலோதி விஸ்ஸுதோ;
வுய்ஹமானோ மஹோகே⁴ன, பு³த்³த⁴ங் ஸரணமாக³மங்.
‘‘லோஹிதபாணி புரே ஆஸிங், அங்கு³லிமாலோதி விஸ்ஸுதோ;
ஸரணக³மனங் பஸ்ஸ, ப⁴வனெத்தி ஸமூஹதா.
‘‘தாதி³ஸங் கம்மங் கத்வான, ப³ஹுங் து³க்³க³திகா³மினங்;
பு²ட்டோ² கம்மவிபாகேன, அணணோ பு⁴ஞ்ஜாமி போ⁴ஜனங்.
‘‘பமாத³மனுயுஞ்ஜந்தி, பா³லா து³ம்மேதி⁴னோ ஜனா;
அப்பமாத³ஞ்ச மேதா⁴வீ, த⁴னங் ஸெட்ட²ங்வ ரக்க²தி.
‘‘மா பமாத³மனுயுஞ்ஜேத², மா காமரதி ஸந்த²வங்;
அப்பமத்தோ ஹி ஜா²யந்தோ, பப்போதி விபுலங் [பரமங் (க॰)] ஸுக²ங்.
‘‘ஸ்வாக³தங் [ஸாக³தங் (ஸீ॰ பீ॰)] நாபக³தங் [நாம ஸக³தங் (க॰)], நயித³ங் து³ம்மந்திதங் மம;
ஸங்விப⁴த்தேஸு [ஸுவிப⁴த்தேஸு (ஸ்யா॰ கங்॰), ஸவிப⁴த்தேஸு (ஸீ॰ க॰), படிப⁴த்தேஸு (பீ॰)] த⁴ம்மேஸு, யங் ஸெட்ட²ங் தது³பாக³மங்.
‘‘ஸ்வாக³தங் நாபக³தங், நயித³ங் து³ம்மந்திதங் மம;
திஸ்ஸோ விஜ்ஜா அனுப்பத்தா, கதங் பு³த்³த⁴ஸ்ஸ ஸாஸன’’ந்த்ந்த்தி.
அங்கு³லிமாலஸுத்தங் நிட்டி²தங் ச²ட்ட²ங்.
7. பியஜாதிகஸுத்தங்
353. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தேன கோ² பன ஸமயேன அஞ்ஞதரஸ்ஸ க³ஹபதிஸ்ஸ ஏகபுத்தகோ பியோ மனாபோ
காலங்கதோ ஹோதி. தஸ்ஸ காலங்கிரியாய நேவ கம்மந்தா படிப⁴ந்தி ந ப⁴த்தங்
படிபா⁴தி. ஸோ ஆளாஹனங் க³ந்த்வா கந்த³தி – ‘‘கஹங், ஏகபுத்தக, கஹங்,
ஏகபுத்தகா’’தி! அத² கோ² ஸோ க³ஹபதி யேன ப⁴க³வா தேனுபஸங்கமி; உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² தங்
க³ஹபதிங் ப⁴க³வா ஏதத³வோச – ‘‘ந கோ² தே, க³ஹபதி, ஸகே சித்தே டி²தஸ்ஸ
இந்த்³ரியானி, அத்தி² தே இந்த்³ரியானங் அஞ்ஞத²த்த’’ந்தி. ‘‘கிஞ்ஹி மே,
ப⁴ந்தே, இந்த்³ரியானங் நாஞ்ஞத²த்தங் ப⁴விஸ்ஸதி; மய்ஹஞ்ஹி, ப⁴ந்தே, ஏகபுத்தோ
பியோ மனாபோ காலங்கதோ. தஸ்ஸ காலங்கிரியாய நேவ கம்மந்தா படிப⁴ந்தி, ந
ப⁴த்தங் படிபா⁴தி. ஸோஹங் ஆளாஹனங் க³ந்த்வா கந்தா³மி – ‘கஹங், ஏகபுத்தக,
கஹங், ஏகபுத்தகா’’’தி! ‘‘ஏவமேதங், க³ஹபதி, ஏவமேதங், க³ஹபதி [ஏவமேதங் க³ஹபதி (பீ॰ ஸகிதே³வ), ஏவமேவ (ஸீ॰ ஸகிதே³வ)]! பியஜாதிகா ஹி, க³ஹபதி, ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா’’தி. ‘‘கஸ்ஸ கோ² [கிஸ்ஸ நு கோ² (ஸீ॰)]
நாமேதங், ப⁴ந்தே, ஏவங் ப⁴விஸ்ஸதி – ‘பியஜாதிகா
ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா’தி? பியஜாதிகா ஹி கோ²,
ப⁴ந்தே, ஆனந்த³ஸோமனஸ்ஸா பியப்பப⁴விகா’’தி. அத² கோ² ஸோ க³ஹபதி ப⁴க³வதோ
பா⁴ஸிதங் அனபி⁴னந்தி³த்வா படிக்கோஸித்வா உட்டா²யாஸனா பக்காமி.
354.
தேன கோ² பன ஸமயேன ஸம்ப³ஹுலா அக்க²து⁴த்தா ப⁴க³வதோ அவிதூ³ரே அக்கே²ஹி
தி³ப்³ப³ந்தி. அத² கோ² ஸோ க³ஹபதி யேன தே அக்க²து⁴த்தா தேனுபஸங்கமி;
உபஸங்கமித்வா அக்க²து⁴த்தே ஏதத³வோச – ‘‘இதா⁴ஹங், பொ⁴ந்தோ, யேன ஸமணோ கோ³தமோ
தேனுபஸங்கமிங்; உபஸங்கமித்வா ஸமணங் கோ³தமங் அபி⁴வாதெ³த்வா ஏகமந்தங்
நிஸீதி³ங். ஏகமந்தங் நிஸின்னங் கோ² மங், பொ⁴ந்தோ, ஸமணோ கோ³தமோ ஏதத³வோச – ‘ந
கோ² தே, க³ஹபதி, ஸகே சித்தே டி²தஸ்ஸ இந்த்³ரியானி, அத்தி² தே
இந்த்³ரியானங் அஞ்ஞத²த்த’ந்தி. ஏவங் வுத்தே, அஹங், பொ⁴ந்தோ, ஸமணங் கோ³தமங்
ஏதத³வோசங் – ‘கிஞ்ஹி மே, ப⁴ந்தே, இந்த்³ரியானங் நாஞ்ஞத²த்தங் ப⁴விஸ்ஸதி;
மய்ஹஞ்ஹி, ப⁴ந்தே, ஏகபுத்தகோ பியோ மனாபோ காலங்கதோ. தஸ்ஸ காலங்கிரியாய நேவ கம்மந்தா படிப⁴ந்தி, ந ப⁴த்தங் படிபா⁴தி .
ஸோஹங் ஆளாஹனங் க³ந்த்வா கந்தா³மி – கஹங், ஏகபுத்தக, கஹங், ஏகபுத்தகா’தி!
‘ஏவமேதங், க³ஹபதி, ஏவமேதங், க³ஹபதி! பியஜாதிகா ஹி, க³ஹபதி,
ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா’தி. ‘கஸ்ஸ கோ² நாமேதங்,
ப⁴ந்தே, ஏவங் ப⁴விஸ்ஸதி – பியஜாதிகா ஸோகபரிதே³வது³க்க²தோ³மனஸ்ஸுபாயாஸா
பியப்பப⁴விகா? பியஜாதிகா ஹி கோ², ப⁴ந்தே, ஆனந்த³ஸோமனஸ்ஸா பியப்பப⁴விகா’தி.
அத² க்²வாஹங், பொ⁴ந்தோ, ஸமணஸ்ஸ கோ³தமஸ்ஸ பா⁴ஸிதங் அனபி⁴னந்தி³த்வா
படிக்கோஸித்வா உட்டா²யாஸனா பக்கமி’’ந்தி. ‘‘ஏவமேதங், க³ஹபதி, ஏவமேதங்,
க³ஹபதி! பியஜாதிகா ஹி, க³ஹபதி, ஆனந்த³ஸோமனஸ்ஸா பியப்பப⁴விகா’’தி . அத² கோ² ஸோ க³ஹபதி ‘‘ஸமேதி மே அக்க²து⁴த்தேஹீ’’தி பக்காமி. அத² கோ² இத³ங் கதா²வத்து² அனுபுப்³பே³ன ராஜந்தேபுரங் பாவிஸி.
355.
அத² கோ² ராஜா பஸேனதி³ கோஸலோ மல்லிகங் தே³விங் ஆமந்தேஸி – ‘‘இத³ங் தே,
மல்லிகே, ஸமணேன கோ³தமேன பா⁴ஸிதங் – ‘பியஜாதிகா
ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா’’’தி. ‘‘ஸசேதங், மஹாராஜ,
ப⁴க³வதா பா⁴ஸிதங், ஏவமேத’’ந்தி. ‘‘ஏவமேவ பனாயங் மல்லிகா யஞ்ஞதே³வ ஸமணோ
கோ³தமோ பா⁴ஸதி தங் ததே³வஸ்ஸ அப்³ப⁴னுமோத³தி’’. ‘‘ஸசேதங், மஹாராஜ, ப⁴க³வதா
பா⁴ஸிதங் ஏவமேதந்தி. ஸெய்யதா²பி நாம, யஞ்ஞதே³வ ஆசரியோ அந்தேவாஸிஸ்ஸ பா⁴ஸதி
தங் ததே³வஸ்ஸ அந்தேவாஸீ அப்³ப⁴னுமோத³தி – ‘ஏவமேதங், ஆசரிய, ஏவமேதங்,
ஆசரியா’’’தி. ‘‘ஏவமேவ கோ² த்வங், மல்லிகே, யஞ்ஞதே³வ ஸமணோ கோ³தமோ பா⁴ஸதி தங்
ததே³வஸ்ஸ அப்³ப⁴னுமோத³ஸி’’. ‘‘ஸசேதங், மஹாராஜ ,
ப⁴க³வதா பா⁴ஸிதங் ஏவமேத’’ந்தி. ‘‘சரபி, ரே மல்லிகே, வினஸ்ஸா’’தி. அத² கோ²
மல்லிகா தே³வீ நாளிஜங்க⁴ங் ப்³ராஹ்மணங் ஆமந்தேஸி – ‘‘ஏஹி த்வங், ப்³ராஹ்மண,
யேன ப⁴க³வா தேனுபஸங்கம; உபஸங்கமித்வா மம வசனேன ப⁴க³வதோ பாதே³ ஸிரஸா
வந்தா³ஹி, அப்பாபா³த⁴ங் அப்பாதங்கங் லஹுட்டா²னங் ப³லங் பா²ஸுவிஹாரங் புச்ச²
– ‘மல்லிகா, ப⁴ந்தே, தே³வீ ப⁴க³வதோ பாதே³ ஸிரஸா வந்த³தி, அப்பாபா³த⁴ங்
அப்பாதங்கங் லஹுட்டா²னங் ப³லங் பா²ஸுவிஹாரங் புச்ச²தீ’தி. ஏவஞ்ச வதே³ஹி –
‘பா⁴ஸிதா நு கோ², ப⁴ந்தே, ப⁴க³வதா ஏஸா வாசா – பியஜாதிகா
ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா’தி .
யதா² தே ப⁴க³வா ப்³யாகரோதி தங் ஸாது⁴கங் உக்³க³ஹெத்வா மம ஆரோசெய்யாஸி. ந
ஹி ததா²க³தா விதத²ங் ப⁴ணந்தீ’’தி. ‘‘ஏவங், போ⁴தீ’’தி கோ² நாளிஜங்கோ⁴
ப்³ராஹ்மணோ மல்லிகாய தே³வியா படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங்
நிஸின்னோ கோ² நாளிஜங்கோ⁴ ப்³ராஹ்மணோ ப⁴க³வந்தங் ஏதத³வோச – ‘‘மல்லிகா, போ⁴
கோ³தம, தே³வீ போ⁴தோ கோ³தமஸ்ஸ பாதே³ ஸிரஸா வந்த³தி; அப்பாபா³த⁴ங்
அப்பாதங்கங் லஹுட்டா²னங் ப³லங் பா²ஸுவிஹாரங் புச்ச²தி; ஏவஞ்ச வதே³தி –
‘பா⁴ஸிதா நு கோ², ப⁴ந்தே, ப⁴க³வதா ஏஸா வாசா – பியஜாதிகா
ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா’’’தி.
356.
‘‘ஏவமேதங், ப்³ராஹ்மண, ஏவமேதங், ப்³ராஹ்மண! பியஜாதிகா ஹி, ப்³ராஹ்மண,
ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகாதி. தத³மினாபேதங்,
ப்³ராஹ்மண, பரியாயேன வேதி³தப்³ப³ங் யதா² பியஜாதிகா
ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா. பூ⁴தபுப்³ப³ங், ப்³ராஹ்மண,
இமிஸ்ஸாயேவ ஸாவத்தி²யா அஞ்ஞதரிஸ்ஸா இத்தி²யா மாதா காலமகாஸி. ஸா தஸ்ஸா
காலகிரியாய உம்மத்திகா கி²த்தசித்தா ரதி²காய ரதி²கங் [ரதி²யாய ரதி²யங் (ஸீ॰ ஸ்யா॰ கங்॰ பீ॰)] ஸிங்கா⁴டகேன ஸிங்கா⁴டகங் உபஸங்கமித்வா ஏவமாஹ – ‘அபி மே மாதரங் அத்³த³ஸ்ஸத² [அத்³த³ஸத² (ஸீ॰ பீ॰)], அபி மே மாதரங் அத்³த³ஸ்ஸதா²’தி? இமினாபி கோ² ஏதங், ப்³ராஹ்மண, பரியாயேன வேதி³தப்³ப³ங் யதா² பியஜாதிகா ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகாதி.
‘‘பூ⁴தபுப்³ப³ங் , ப்³ராஹ்மண,
இமிஸ்ஸாயேவ ஸாவத்தி²யா அஞ்ஞதரிஸ்ஸா இத்தி²யா பிதா காலமகாஸி… பா⁴தா
காலமகாஸி… ப⁴கி³னீ காலமகாஸி… புத்தோ காலமகாஸி… தீ⁴தா காலமகாஸி… ஸாமிகோ
காலமகாஸி. ஸா தஸ்ஸ காலகிரியாய உம்மத்திகா கி²த்தசித்தா ரதி²காய ரதி²கங்
ஸிங்கா⁴டகேன ஸிங்கா⁴டகங் உபஸங்கமித்வா ஏவமாஹ – ‘அபி மே ஸாமிகங்
அத்³த³ஸ்ஸத², அபி மே ஸாமிகங் அத்³த³ஸ்ஸதா²’தி? இமினாபி கோ² ஏதங்,
ப்³ராஹ்மண, பரியாயேன வேதி³தப்³ப³ங் யதா² பியஜாதிகா
ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகாதி.
‘‘பூ⁴தபுப்³ப³ங் , ப்³ராஹ்மண,
இமிஸ்ஸாயேவ ஸாவத்தி²யா அஞ்ஞதரஸ்ஸ புரிஸஸ்ஸ மாதா காலமகாஸி. ஸோ தஸ்ஸா
காலகிரியாய உம்மத்தகோ கி²த்தசித்தோ ரதி²காய ரதி²கங் ஸிங்கா⁴டகேன
ஸிங்கா⁴டகங் உபஸங்கமித்வா ஏவமாஹ – ‘அபி மே மாதரங் அத்³த³ஸ்ஸத², அபி மே
மாதரங் அத்³த³ஸ்ஸதா²’தி ? இமினாபி கோ² ஏதங், ப்³ராஹ்மண , பரியாயேன வேதி³தப்³ப³ங் யதா² பியஜாதிகா ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகாதி.
‘‘பூ⁴தபுப்³ப³ங், ப்³ராஹ்மண, இமிஸ்ஸாயேவ ஸாவத்தி²யா
அஞ்ஞதரஸ்ஸ புரிஸஸ்ஸ பிதா காலமகாஸி… பா⁴தா காலமகாஸி… ப⁴கி³னீ காலமகாஸி…
புத்தோ காலமகாஸி… தீ⁴தா காலமகாஸி… பஜாபதி காலமகாஸி. ஸோ தஸ்ஸா காலகிரியாய
உம்மத்தகோ கி²த்தசித்தோ ரதி²காய ரதி²கங் ஸிங்கா⁴டகேன ஸிங்கா⁴டகங்
உபஸங்கமித்வா ஏவமாஹ – ‘அபி மே பஜாபதிங் அத்³த³ஸ்ஸத², அபி மே பஜாபதிங்
அத்³த³ஸ்ஸதா²’தி? இமினாபி கோ² ஏதங், ப்³ராஹ்மண, பரியாயேன வேதி³தப்³ப³ங்
யதா² பியஜாதிகா ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகாதி.
‘‘பூ⁴தபுப்³ப³ங், ப்³ராஹ்மண, இமிஸ்ஸாயேவ ஸாவத்தி²யா அஞ்ஞதரா இத்தீ² ஞாதிகுலங் அக³மாஸி. தஸ்ஸா தே ஞாதகா ஸாமிகங் [ஸாமிகா (ஸீ॰)] அச்சி²ந்தி³த்வா அஞ்ஞஸ்ஸ தா³துகாமா. ஸா ச தங் ந இச்ச²தி. அத² கோ² ஸா இத்தீ² ஸாமிகங் ஏதத³வோச – ‘இமே, மங் [மம (ஸ்யா॰ கங்॰ பீ॰)], அய்யபுத்த, ஞாதகா த்வங் [தயா (ஸீ॰), தங் (ஸ்யா॰ கங்॰ பீ॰)] அச்சி²ந்தி³த்வா அஞ்ஞஸ்ஸ தா³துகாமா. அஹஞ்ச தங் ந இச்சா²மீ’தி. அத² கோ² ஸோ புரிஸோ தங் இத்தி²ங் த்³விதா⁴ செ²த்வா அத்தானங் உப்பா²லேஸி [உப்பாடேஸி (ஸீ॰ பீ॰), ஓபா²ரேஸி (க॰)]
– ‘உபோ⁴ பேச்ச ப⁴விஸ்ஸாமா’தி. இமினாபி கோ² ஏதங், ப்³ராஹ்மண, பரியாயேன
வேதி³தப்³ப³ங் யதா² பியஜாதிகா ஸோகபரிதே³வது³க்க²தோ³மனஸ்ஸுபாயாஸா
பியப்பப⁴விகா’’தி.
357.
அத² கோ² நாளிஜங்கோ⁴ ப்³ராஹ்மணோ ப⁴க³வதோ பா⁴ஸிதங் அபி⁴னந்தி³த்வா
அனுமோதி³த்வா உட்டா²யாஸனா யேன மல்லிகா தே³வீ தேனுபஸங்கமி; உபஸங்கமித்வா
யாவதகோ அஹோஸி ப⁴க³வதா ஸத்³தி⁴ங் கதா²ஸல்லாபோ தங் ஸப்³ப³ங் மல்லிகாய தே³வியா
ஆரோசேஸி. அத² கோ² மல்லிகா தே³வீ யேன ராஜா பஸேனதி³ கோஸலோ தேனுபஸங்கமி;
உபஸங்கமித்வா ராஜானங் பஸேனதி³ங் கோஸலங் ஏதத³வோச – ‘‘தங் கிங் மஞ்ஞஸி,
மஹாராஜ, பியா தே வஜிரீ குமாரீ’’தி? ‘‘ஏவங், மல்லிகே, பியா மே வஜிரீ
குமாரீ’’தி. ‘‘தங் கிங் மஞ்ஞஸி, மஹாராஜ, வஜிரியா தே குமாரியா
விபரிணாமஞ்ஞதா²பா⁴வா உப்பஜ்ஜெய்யுங் ஸோகபரிதே³வது³க்க²தோ³மனஸ்ஸுபாயாஸா’’தி? ‘‘வஜிரியா மே, மல்லிகே, குமாரியா விபரிணாமஞ்ஞதா²பா⁴வா ஜீவிதஸ்ஸபி ஸியா
அஞ்ஞத²த்தங், கிங் பன மே ந உப்பஜ்ஜிஸ்ஸந்தி
ஸோகபரிதே³வது³க்க²தோ³மனஸ்ஸுபாயாஸா’’தி? ‘‘இத³ங் கோ² தங், மஹாராஜ, தேன
ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸந்தா⁴ய பா⁴ஸிதங் –
‘பியஜாதிகா ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா’தி.
‘‘தங் கிங் மஞ்ஞஸி, மஹாராஜ, பியா தே வாஸபா⁴ க²த்தியா’’தி? ‘‘ஏவங், மல்லிகே, பியா
மே வாஸபா⁴ க²த்தியா’’தி. ‘‘தங் கிங் மஞ்ஞஸி, மஹாராஜ, வாஸபா⁴ய தே க²த்தியாய
விபரிணாமஞ்ஞதா²பா⁴வா உப்பஜ்ஜெய்யுங்
ஸோகபரிதே³வது³க்க²தோ³மனஸ்ஸுபாயாஸா’’தி? ‘‘வாஸபா⁴ய மே, மல்லிகே, க²த்தியாய
விபரிணாமஞ்ஞதா²பா⁴வா ஜீவிதஸ்ஸபி ஸியா அஞ்ஞத²த்தங், கிங் பன மே ந
உப்பஜ்ஜிஸ்ஸந்தி ஸோகபரிதே³வது³க்க²தோ³மனஸ்ஸுபாயாஸா’’தி? ‘‘இத³ங் கோ² தங்,
மஹாராஜ, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸந்தா⁴ய
பா⁴ஸிதங் – ‘பியஜாதிகா ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா’தி.
‘‘தங் கிங் மஞ்ஞஸி, மஹாராஜ, பியோ தே விடடூபோ⁴ [விடூ³ட³போ⁴ (ஸீ॰ ஸ்யா॰ கங்॰ பீ॰)] ஸேனாபதீ’’தி? ‘‘ஏவங் ,
மல்லிகே, பியோ மே விடடூபோ⁴ ஸேனாபதீ’’தி. ‘‘தங் கிங் மஞ்ஞஸி, மஹாராஜ,
விடடூப⁴ஸ்ஸ தே ஸேனாபதிஸ்ஸ விபரிணாமஞ்ஞதா²பா⁴வா உப்பஜ்ஜெய்யுங்
ஸோகபரிதே³வது³க்க²தோ³மனஸ்ஸுபாயாஸா’’தி? ‘‘விடடூப⁴ஸ்ஸ மே, மல்லிகே,
ஸேனாபதிஸ்ஸ விபரிணாமஞ்ஞதா²பா⁴வா ஜீவிதஸ்ஸபி ஸியா அஞ்ஞத²த்தங் ,
கிங் பன மே ந உப்பஜ்ஜிஸ்ஸந்தி ஸோகபரிதே³வது³க்க²தோ³மனஸ்ஸுபாயாஸா’’தி?
‘‘இத³ங் கோ² தங், மஹாராஜ, தேன ப⁴க³வதா ஜானதா பஸ்ஸதா அரஹதா
ஸம்மாஸம்பு³த்³தே⁴ன ஸந்தா⁴ய பா⁴ஸிதங் – ‘பியஜாதிகா
ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா’தி.
‘‘தங் கிங் மஞ்ஞஸி, மஹாராஜ, பியா தே அஹ’’ந்தி? ‘‘ஏவங்,
மல்லிகே, பியா மேஸி த்வ’’ந்தி. ‘‘தங் கிங் மஞ்ஞஸி, மஹாராஜ, மய்ஹங் தே
விபரிணாமஞ்ஞதா²பா⁴வா உப்பஜ்ஜெய்யுங் ஸோகபரிதே³வது³க்க²தோ³மனஸ்ஸுபாயாஸா’’தி?
‘‘துய்ஹஞ்ஹி மே, மல்லிகே, விபரிணாமஞ்ஞதா²பா⁴வா ஜீவிதஸ்ஸபி ஸியா
அஞ்ஞத²த்தங், கிங் பன மே ந உப்பஜ்ஜிஸ்ஸந்தி
ஸோகபரிதே³வது³க்க²தோ³மனஸ்ஸுபாயாஸா’’தி? ‘‘இத³ங் கோ² தங், மஹாராஜ, தேன
ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸந்தா⁴ய பா⁴ஸிதங் –
‘பியஜாதிகா ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா’தி.
‘‘தங் கிங் மஞ்ஞஸி, மஹாராஜ,
பியா தே காஸிகோஸலா’’தி? ‘‘ஏவங், மல்லிகே, பியா மே காஸிகோஸலா. காஸிகோஸலானங்,
மல்லிகே, ஆனுபா⁴வேன காஸிகசந்த³னங் பச்சனுபோ⁴ம, மாலாக³ந்த⁴விலேபனங்
தா⁴ரேமா’’தி. ‘‘தங் கிங் மஞ்ஞஸி, மஹாராஜ, காஸிகோஸலானங் தே
விபரிணாமஞ்ஞதா²பா⁴வா உப்பஜ்ஜெய்யுங் ஸோகபரிதே³வது³க்க²தோ³மனஸ்ஸுபாயாஸா’’தி?
‘‘காஸிகோஸலானஞ்ஹி, மல்லிகே , விபரிணாமஞ்ஞதா²பா⁴வா
ஜீவிதஸ்ஸபி ஸியா அஞ்ஞத²த்தங், கிங் பன மே ந உப்பஜ்ஜிஸ்ஸந்தி
ஸோகபரிதே³வது³க்க²தோ³மனஸ்ஸுபாயாஸா’’தி? ‘‘இத³ங் கோ² தங், மஹாராஜ, தேன
ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸந்தா⁴ய பா⁴ஸிதங் – ‘பியஜாதிகா ஸோகபரிதே³வது³க்க²தோ³மனஸ்ஸுபாயாஸா பியப்பப⁴விகா’’’தி.
‘‘அச்ச²ரியங், மல்லிகே, அப்³பு⁴தங், மல்லிகே! யாவஞ்ச ஸோ ப⁴க³வா பஞ்ஞாய அதிவிஜ்ஜ² மஞ்ஞே [படிவிஜ்ஜ² பஞ்ஞாய (க॰)] பஸ்ஸதி. ஏஹி, மல்லிகே, ஆசமேஹீ’’தி [ஆசாமேஹீதி (ஸீ॰ பீ॰)].
அத² கோ² ராஜா பஸேனதி³ கோஸலோ உட்டா²யாஸனா ஏகங்ஸங் உத்தராஸங்க³ங் கரித்வா
யேன ப⁴க³வா தேனஞ்ஜலிங் பணாமெத்வா திக்க²த்துங் உதா³னங் உதா³னேஸி – ‘‘நமோ
தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ, நமோ தஸ்ஸ ப⁴க³வதோ அரஹதோ
ஸம்மாஸம்பு³த்³த⁴ஸ்ஸ, நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸா’’தி.
பியஜாதிகஸுத்தங் நிட்டி²தங் ஸத்தமங்.
8. பா³ஹிதிகஸுத்தங்
358. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. அத² கோ² ஆயஸ்மா ஆனந்தோ³ புப்³ப³ண்ஹஸமயங் நிவாஸெத்வா பத்தசீவரமாதா³ய
ஸாவத்தி²யங் பிண்டா³ய பாவிஸி. ஸாவத்தி²யங் பிண்டா³ய சரித்வா பச்சா²ப⁴த்தங்
பிண்ட³பாதபடிக்கந்தோ யேன புப்³பா³ராமோ மிகா³ரமாதுபாஸாதோ³ தேனுபஸங்கமி
தி³வாவிஹாராய. தேன கோ² பன ஸமயேன ராஜா பஸேனதி³ கோஸலோ ஏகபுண்ட³ரீகங் நாக³ங்
அபி⁴ருஹித்வா ஸாவத்தி²யா நிய்யாதி தி³வா தி³வஸ்ஸ. அத்³த³ஸா கோ² ராஜா
பஸேனதி³ கோஸலோ ஆயஸ்மந்தங் ஆனந்த³ங் தூ³ரதோவ ஆக³ச்ச²ந்தங். தி³ஸ்வான
ஸிரிவட்³ட⁴ங் மஹாமத்தங் ஆமந்தேஸி – ‘‘ஆயஸ்மா நோ ஏஸோ, ஸம்ம ஸிரிவட்³ட⁴,
ஆனந்தோ³’’தி . ‘‘ஏவங், மஹாராஜ, ஆயஸ்மா ஏஸோ
ஆனந்தோ³’’தி. அத² கோ² ராஜா பஸேனதி³ கோஸலோ அஞ்ஞதரங் புரிஸங் ஆமந்தேஸி –
‘‘ஏஹி த்வங், அம்போ⁴ புரிஸ, யேனாயஸ்மா ஆனந்தோ³ தேனுபஸங்கம; உபஸங்கமித்வா மம
வசனேன ஆயஸ்மதோ ஆனந்த³ஸ்ஸ பாதே³ ஸிரஸா வந்தா³ஹி – ‘ராஜா, ப⁴ந்தே, பஸேனதி³
கோஸலோ ஆயஸ்மதோ ஆனந்த³ஸ்ஸ பாதே³ ஸிரஸா வந்த³தீ’தி. ஏவஞ்ச வதே³ஹி – ‘ஸசே கிர,
ப⁴ந்தே, ஆயஸ்மதோ ஆனந்த³ஸ்ஸ ந கிஞ்சி அச்சாயிகங் கரணீயங், ஆக³மேது கிர,
ப⁴ந்தே, ஆயஸ்மா ஆனந்தோ³ முஹுத்தங் அனுகம்பங் உபாதா³யா’’’தி. ‘‘ஏவங், தே³வா’’தி கோ² ஸோ புரிஸோ ரஞ்ஞோ பஸேனதி³ஸ்ஸ கோஸலஸ்ஸ படிஸ்ஸுத்வா யேனாயஸ்மா
ஆனந்தோ³ தேனுபஸங்கமி; உபஸங்கமித்வா ஆயஸ்மந்தங் ஆனந்த³ங் அபி⁴வாதெ³த்வா
ஏகமந்தங் அட்டா²ஸி. ஏகமந்தங் டி²தோ கோ² ஸோ புரிஸோ ஆயஸ்மந்தங் ஆனந்த³ங்
ஏதத³வோச – ‘‘ராஜா, ப⁴ந்தே, பஸேனதி³ கோஸலோ ஆயஸ்மதோ ஆனந்த³ஸ்ஸ பாதே³ ஸிரஸா
வந்த³தி; ஏவஞ்ச வதே³தி – ‘ஸசே கிர, ப⁴ந்தே, ஆயஸ்மதோ ஆனந்த³ஸ்ஸ ந கிஞ்சி
அச்சாயிகங் கரணீயங், ஆக³மேது கிர, ப⁴ந்தே, ஆயஸ்மா ஆனந்தோ³ முஹுத்தங்
அனுகம்பங் உபாதா³யா’’’தி. அதி⁴வாஸேஸி கோ² ஆயஸ்மா ஆனந்தோ³ துண்ஹீபா⁴வேன. அத²
கோ² ராஜா பஸேனதி³ கோஸலோ யாவதிகா நாக³ஸ்ஸ பூ⁴மி நாகே³ன க³ந்த்வா நாகா³
பச்சோரோஹித்வா பத்திகோவ யேனாயஸ்மா ஆனந்தோ³ தேனுபஸங்கமி; உபஸங்கமித்வா
ஆயஸ்மந்தங் ஆனந்த³ங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தோ கோ²
ராஜா பஸேனதி³ கோஸலோ ஆயஸ்மந்தங் ஆனந்த³ங் ஏதத³வோச – ‘‘ஸசே, ப⁴ந்தே, ஆயஸ்மதோ
ஆனந்த³ஸ்ஸ ந கிஞ்சி அச்சாயிகங் கரணீயங் , ஸாது⁴,
ப⁴ந்தே, ஆயஸ்மா ஆனந்தோ³ யேன அசிரவதியா நதி³யா தீரங் தேனுபஸங்கமது அனுகம்பங்
உபாதா³யா’’தி. அதி⁴வாஸேஸி கோ² ஆயஸ்மா ஆனந்தோ³ துண்ஹீபா⁴வேன.
359.
அத² கோ² ஆயஸ்மா ஆனந்தோ³ யேன அசிரவதியா நதி³யா தீரங் தேனுபஸங்கமி;
உபஸங்கமித்வா அஞ்ஞதரஸ்மிங் ருக்க²மூலே பஞ்ஞத்தே ஆஸனே நிஸீதி³. அத² கோ² ராஜா
பஸேனதி³ கோஸலோ யாவதிகா நாக³ஸ்ஸ பூ⁴மி நாகே³ன க³ந்த்வா நாகா³ பச்சோரோஹித்வா
பத்திகோவ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தங்
ஆனந்த³ங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தோ கோ² ராஜா பஸேனதி³ கோஸலோ ஆயஸ்மந்தங் ஆனந்த³ங் ஏதத³வோச – ‘‘இத⁴, ப⁴ந்தே, ஆயஸ்மா
ஆனந்தோ³ ஹத்த²த்த²ரே நிஸீத³தூ’’தி. ‘‘அலங், மஹாராஜ. நிஸீத³ த்வங்;
நிஸின்னோ அஹங் ஸகே ஆஸனே’’தி. நிஸீதி³ கோ² ராஜா பஸேனதி³ கோஸலோ பஞ்ஞத்தே
ஆஸனே. நிஸஜ்ஜ கோ² ராஜா பஸேனதி³ கோஸலோ ஆயஸ்மந்தங் ஆனந்த³ங் ஏதத³வோச – ‘‘கிங்
நு கோ², ப⁴ந்தே ஆனந்த³, ஸோ ப⁴க³வா ததா²ரூபங் காயஸமாசாரங் ஸமாசரெய்ய,
ய்வாஸ்ஸ காயஸமாசாரோ ஓபாரம்போ⁴ ஸமணேஹி ப்³ராஹ்மணேஹீ’’தி [ப்³ராஹ்மணேஹி விஞ்ஞூஹீதி (ஸப்³ப³த்த²) அட்ட²கதா² டீகா ஓலோகேதப்³பா³]? ‘‘ந கோ², மஹாராஜ, ஸோ ப⁴க³வா ததா²ரூபங் காயஸமாசாரங் ஸமாசரெய்ய, ய்வாஸ்ஸ காயஸமாசாரோ ஓபாரம்போ⁴ ஸமணேஹி ப்³ராஹ்மணேஹி விஞ்ஞூஹீ’’தி.
‘‘கிங் பன, ப⁴ந்தே ஆனந்த³, ஸோ
ப⁴க³வா ததா²ரூபங் வசீஸமாசாரங்…பே॰… மனோஸமாசாரங் ஸமாசரெய்ய, ய்வாஸ்ஸ
மனோஸமாசாரோ ஓபாரம்போ⁴ ஸமணேஹி ப்³ராஹ்மணேஹீ’’தி [ப்³ராஹ்மணேஹி விஞ்ஞூஹீதி (ஸப்³ப³த்த²) அட்ட²கதா² டீகா ஓலோகேதப்³பா³]? ‘‘ந கோ², மஹாராஜ, ஸோ ப⁴க³வா ததா²ரூபங் மனோஸமாசாரங் ஸமாசரெய்ய, ய்வாஸ்ஸ மனோஸமாசாரோ ஓபாரம்போ⁴ ஸமணேஹி ப்³ராஹ்மணேஹி விஞ்ஞூஹீ’’தி.
‘‘அச்ச²ரியங், ப⁴ந்தே, அப்³பு⁴தங், ப⁴ந்தே! யஞ்ஹி
மயங், ப⁴ந்தே, நாஸக்கி²ம்ஹா பஞ்ஹேன பரிபூரேதுங் தங், ப⁴ந்தே, ஆயஸ்மதா
ஆனந்தே³ன பஞ்ஹஸ்ஸ வெய்யாகரணேன பரிபூரிதங். யே தே, ப⁴ந்தே, பா³லா அப்³யத்தா
அனநுவிச்ச அபரியோகா³ஹெத்வா பரேஸங் வண்ணங் வா அவண்ணங் வா பா⁴ஸந்தி, ந மயங்
தங் ஸாரதோ பச்சாக³ச்சா²ம; யே பன [யே ச கோ² (ஸீ॰ ஸ்யா॰ கங்॰ பீ॰)] தே, ப⁴ந்தே , பண்டி³தா வியத்தா [ப்³யத்தா (ஸீ॰ ஸ்யா॰ கங்॰ பீ॰)] மேதா⁴வினோ அனுவிச்ச பரியோகா³ஹெத்வா பரேஸங் வண்ணங் வா அவண்ணங் வா பா⁴ஸந்தி, மயங் தங் ஸாரதோ பச்சாக³ச்சா²ம’’.
360. ‘‘கதமோ பன, ப⁴ந்தே ஆனந்த³, காயஸமாசாரோ ஓபாரம்போ⁴ ஸமணேஹி ப்³ராஹ்மணேஹி விஞ்ஞூஹீ’’தி? ‘‘யோ கோ², மஹாராஜ, காயஸமாசாரோ அகுஸலோ’’.
‘‘கதமோ பன, ப⁴ந்தே, காயஸமாசாரோ அகுஸலோ’’? ‘‘யோ கோ², மஹாராஜ, காயஸமாசாரோ ஸாவஜ்ஜோ’’.
‘‘கதமோ பன, ப⁴ந்தே, காயஸமாசாரோ ஸாவஜ்ஜோ’’? ‘‘யோ கோ², மஹாராஜ, காயஸமாசாரோ ஸப்³யாப³ஜ்ஜோ²’’ [ஸப்³யாபஜ்ஜோ² (ஸீ॰ ஸ்யா॰ கங்॰ பீ॰), ஸப்³யாபஜ்ஜோ (க॰)].
‘‘கதமோ பன, ப⁴ந்தே, காயஸமாசாரோ ஸப்³யாப³ஜ்ஜோ²’’? ‘‘யோ கோ², மஹாராஜ, காயஸமாசாரோ து³க்க²விபாகோ’’.
‘‘கதமோ பன, ப⁴ந்தே, காயஸமாசாரோ து³க்க²விபாகோ’’? ‘‘யோ
கோ², மஹாராஜ, காயஸமாசாரோ அத்தப்³யாபா³தா⁴யபி ஸங்வத்ததி, பரப்³யாபா³தா⁴யபி
ஸங்வத்ததி, உப⁴யப்³யாபா³தா⁴யபி ஸங்வத்ததி தஸ்ஸ அகுஸலா த⁴ம்மா
அபி⁴வட்³ட⁴ந்தி, குஸலா த⁴ம்மா பரிஹாயந்தி; ஏவரூபோ கோ², மஹாராஜ, காயஸமாசாரோ
ஓபாரம்போ⁴ ஸமணேஹி ப்³ராஹ்மணேஹி விஞ்ஞூஹீ’’தி.
‘‘கதமோ பன, ப⁴ந்தே ஆனந்த³, வசீஸமாசாரோ…பே॰… மனோஸமாசாரோ
ஓபாரம்போ⁴ ஸமணேஹி ப்³ராஹ்மணேஹி விஞ்ஞூஹீ’’தி? ‘‘யோ கோ², மஹாராஜ,
மனோஸமாசாரோ அகுஸலோ’’.
‘‘கதமோ பன, ப⁴ந்தே, மனோஸமாசாரோ அகுஸலோ’’? ‘‘யோ கோ², மஹாராஜ, மனோஸமாசாரோ ஸாவஜ்ஜோ’’.
‘‘கதமோ பன, ப⁴ந்தே, மனோஸமாசாரோ ஸாவஜ்ஜோ’’? ‘‘யோ கோ², மஹாராஜ, மனோஸமாசாரோ ஸப்³யாப³ஜ்ஜோ²’’.
‘‘கதமோ பன, ப⁴ந்தே, மனோஸமாசாரோ ஸப்³யாப³ஜ்ஜோ²’’? ‘‘யோ கோ², மஹாராஜ, மனோஸமாசாரோ து³க்க²விபாகோ’’.
‘‘கதமோ பன, ப⁴ந்தே, மனோஸமாசாரோ து³க்க²விபாகோ’’? ‘‘யோ கோ², மஹாராஜ, மனோஸமாசாரோ
அத்தப்³யாபா³தா⁴யபி ஸங்வத்ததி, பரப்³யாபா³தா⁴யபி ஸங்வத்ததி,
உப⁴யப்³யாபா³தா⁴யபி ஸங்வத்ததி தஸ்ஸ அகுஸலா த⁴ம்மா அபி⁴வட்³ட⁴ந்தி, குஸலா
த⁴ம்மா பரிஹாயந்தி; ஏவரூபோ கோ², மஹாராஜ, மனோஸமாசாரோ ஓபாரம்போ⁴ ஸமணேஹி
ப்³ராஹ்மணேஹி விஞ்ஞூஹீ’’தி.
‘‘கிங் நு கோ², ப⁴ந்தே ஆனந்த³, ஸோ ப⁴க³வா
ஸப்³பே³ஸங்யேவ அகுஸலானங் த⁴ம்மானங் பஹானங் வண்ணேதீ’’தி?
‘‘ஸப்³பா³குஸலத⁴ம்மபஹீனோ கோ², மஹாராஜ, ததா²க³தோ குஸலத⁴ம்மஸமன்னாக³தோ’’தி.
361. ‘‘கதமோ பன, ப⁴ந்தே ஆனந்த³, காயஸமாசாரோ அனோபாரம்போ⁴ ஸமணேஹி ப்³ராஹ்மணேஹி விஞ்ஞூஹீ’’தி? ‘‘யோ கோ², மஹாராஜ, காயஸமாசாரோ குஸலோ’’.
‘‘கதமோ பன, ப⁴ந்தே, காயஸமாசாரோ குஸலோ’’? ‘‘யோ கோ², மஹாராஜ, காயஸமாசாரோ அனவஜ்ஜோ’’.
‘‘கதமோ பன, ப⁴ந்தே, காயஸமாசாரோ அனவஜ்ஜோ’’? ‘‘யோ கோ², மஹாராஜ, காயஸமாசாரோ அப்³யாப³ஜ்ஜோ²’’.
‘‘கதமோ பன, ப⁴ந்தே, காயஸமாசாரோ அப்³யாப³ஜ்ஜோ²’’? ‘‘யோ கோ², மஹாராஜ, காயஸமாசாரோ ஸுக²விபாகோ’’.
‘‘கதமோ பன, ப⁴ந்தே, காயஸமாசாரோ ஸுக²விபாகோ’’?
‘‘யோ கோ², மஹாராஜ, காயஸமாசாரோ நேவத்தப்³யாபா³தா⁴யபி
ஸங்வத்ததி, ந பரப்³யாபா³தா⁴யபி ஸங்வத்ததி, ந உப⁴யப்³யாபா³தா⁴யபி ஸங்வத்ததி
தஸ்ஸ அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தி; ஏவரூபோ கோ², மஹாராஜ, காயஸமாசாரோ அனோபாரம்போ⁴ ஸமணேஹி ப்³ராஹ்மணேஹி விஞ்ஞூஹீ’’தி.
‘‘கதமோ பன, ப⁴ந்தே ஆனந்த³, வசீஸமாசாரோ…பே॰… மனோஸமாசாரோ
அனோபாரம்போ⁴ ஸமணேஹி ப்³ராஹ்மணேஹி விஞ்ஞூஹீ’’தி? ‘‘யோ கோ², மஹாராஜ,
மனோஸமாசாரோ குஸலோ’’.
‘‘கதமோ பன, ப⁴ந்தே, மனோஸமாசாரோ குஸலோ’’? ‘‘யோ கோ², மஹாராஜ, மனோஸமாசாரோ அனவஜ்ஜோ’’.
‘‘கதமோ பன, ப⁴ந்தே, மனோஸமாசாரோ அனவஜ்ஜோ’’? ‘‘யோ கோ², மஹாராஜ, மனோஸமாசாரோ அப்³யாப³ஜ்ஜோ²’’.
‘‘கதமோ பன, ப⁴ந்தே, மனோஸமாசாரோ அப்³யாப³ஜ்ஜோ²’’? ‘‘யோ கோ², மஹாராஜ, மனோஸமாசாரோ ஸுக²விபாகோ’’.
‘‘கதமோ பன, ப⁴ந்தே, மனோஸமாசாரோ ஸுக²விபாகோ’’? ‘‘யோ
கோ², மஹாராஜ, மனோஸமாசாரோ நேவத்தப்³யாபா³தா⁴யபி ஸங்வத்ததி, ந
பரப்³யாபா³தா⁴யபி ஸங்வத்ததி, ந உப⁴யப்³யாபா³தா⁴யபி ஸங்வத்ததி. தஸ்ஸ அகுஸலா
த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தி. ஏவரூபோ கோ², மஹாராஜ,
மனோஸமாசாரோ அனோபாரம்போ⁴ ஸமணேஹி ப்³ராஹ்மணேஹி விஞ்ஞூஹீ’’தி.
‘‘கிங் பன, ப⁴ந்தே ஆனந்த³, ஸோ ப⁴க³வா ஸப்³பே³ஸங்யேவ
குஸலானங் த⁴ம்மானங் உபஸம்பத³ங் வண்ணேதீ’’தி? ‘‘ஸப்³பா³குஸலத⁴ம்மபஹீனோ கோ²,
மஹாராஜ, ததா²க³தோ குஸலத⁴ம்மஸமன்னாக³தோ’’தி.
362. ‘‘அச்ச²ரியங் , ப⁴ந்தே, அப்³பு⁴தங், ப⁴ந்தே! யாவ ஸுபா⁴ஸிதங் சித³ங் [ஸுபா⁴ஸிதமித³ங் (ஸீ॰)], ப⁴ந்தே, ஆயஸ்மதா ஆனந்தே³ன. இமினா ச மயங், ப⁴ந்தே, ஆயஸ்மதோ ஆனந்த³ஸ்ஸ ஸுபா⁴ஸிதேன அத்தமனாபி⁴ரத்³தா⁴. ஏவங் அத்தமனாபி⁴ரத்³தா⁴ ச மயங் ,
ப⁴ந்தே, ஆயஸ்மதோ ஆனந்த³ஸ்ஸ ஸுபா⁴ஸிதேன. ஸசே, ப⁴ந்தே, ஆயஸ்மதோ ஆனந்த³ஸ்ஸ
ஹத்தி²ரதனங் கப்பெய்ய, ஹத்தி²ரதனம்பி மயங் ஆயஸ்மதோ ஆனந்த³ஸ்ஸ த³தெ³ய்யாம.
ஸசே, ப⁴ந்தே, ஆயஸ்மதோ ஆனந்த³ஸ்ஸ அஸ்ஸரதனங் கப்பெய்ய, அஸ்ஸரதனம்பி மயங்
ஆயஸ்மதோ ஆனந்த³ஸ்ஸ த³தெ³ய்யாம. ஸசே, ப⁴ந்தே, ஆயஸ்மதோ ஆனந்த³ஸ்ஸ கா³மவரங்
கப்பெய்ய, கா³மவரம்பி மயங் ஆயஸ்மதோ ஆனந்த³ஸ்ஸ த³தெ³ய்யாம. அபி ச, ப⁴ந்தே,
மயம்பேதங் [மயமேவ தங் (ஸீ॰), மயம்பனேதங் (ஸ்யா॰ கங்॰)] ஜானாம – ‘நேதங் ஆயஸ்மதோ ஆனந்த³ஸ்ஸ கப்பதீ’தி. அயங் மே, ப⁴ந்தே, பா³ஹிதிகா ரஞ்ஞா மாக³தே⁴ன அஜாதஸத்துனா வேதே³ஹிபுத்தேன வத்த²னாளியா [ச²த்தனாளியா (ஸ்யா॰ கங்॰ பீ॰)] பக்கி²பித்வா பஹிதா ஸோளஸஸமா ஆயாமேன, அட்ட²ஸமா வித்தா²ரேன . தங், ப⁴ந்தே, ஆயஸ்மா ஆனந்தோ³ படிக்³க³ண்ஹாது அனுகம்பங் உபாதா³யா’’தி. ‘‘அலங், மஹாராஜ, பரிபுண்ணங் மே திசீவர’’ந்தி.
‘‘அயங் , ப⁴ந்தே, அசிரவதீ நதீ³
தி³ட்டா² ஆயஸ்மதா சேவ ஆனந்தே³ன அம்ஹேஹி ச. யதா³ உபரிபப்³ப³தே மஹாமேகோ⁴
அபி⁴ப்பவுட்டோ² ஹோதி, அதா²யங் அசிரவதீ நதீ³ உப⁴தோ கூலானி ஸங்விஸ்ஸந்த³ந்தீ
க³ச்ச²தி; ஏவமேவ கோ², ப⁴ந்தே, ஆயஸ்மா ஆனந்தோ³ இமாய பா³ஹிதிகாய அத்தனோ
திசீவரங் கரிஸ்ஸதி. யங் பனாயஸ்மதோ ஆனந்த³ஸ்ஸ புராணங் திசீவரங் தங்
ஸப்³ரஹ்மசாரீஹி ஸங்விப⁴ஜிஸ்ஸதி. ஏவாயங் அம்ஹாகங் த³க்கி²ணா
ஸங்விஸ்ஸந்த³ந்தீ மஞ்ஞே க³மிஸ்ஸதி. படிக்³க³ண்ஹாது, ப⁴ந்தே, ஆயஸ்மா ஆனந்தோ³
பா³ஹிதிக’’ந்தி. படிக்³க³ஹேஸி கோ² ஆயஸ்மா ஆனந்தோ³ பா³ஹிதிகங்.
அத² கோ² ராஜா பஸேனதி³ கோஸலோ ஆயஸ்மந்தங் ஆனந்த³ங்
ஏதத³வோச – ‘‘ஹந்த³ ச தா³னி மயங், ப⁴ந்தே ஆனந்த³, க³ச்சா²ம; ப³ஹுகிச்சா மயங்
ப³ஹுகரணீயா’’தி. ‘‘யஸ்ஸதா³னி த்வங், மஹாராஜ, காலங் மஞ்ஞஸீ’’தி. அத² கோ²
ராஜா பஸேனதி³ கோஸலோ ஆயஸ்மதோ ஆனந்த³ஸ்ஸ பா⁴ஸிதங் அபி⁴னந்தி³த்வா
அனுமோதி³த்வா உட்டா²யாஸனா ஆயஸ்மந்தங் ஆனந்த³ங் அபி⁴வாதெ³த்வா பத³க்கி²ணங்
கத்வா பக்காமி.
363. அத²
கோ² ஆயஸ்மா ஆனந்தோ³ அசிரபக்கந்தஸ்ஸ ரஞ்ஞோ பஸேனதி³ஸ்ஸ கோஸலஸ்ஸ யேன ப⁴க³வா
தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³.
ஏகமந்தங் நிஸின்னோ கோ² ஆயஸ்மா ஆனந்தோ³ யாவதகோ அஹோஸி ரஞ்ஞா பஸேனதி³னா கோஸலேன
ஸத்³தி⁴ங் கதா²ஸல்லாபோ தங் ஸப்³ப³ங் ப⁴க³வதோ ஆரோசேஸி. தஞ்ச பா³ஹிதிகங்
ப⁴க³வதோ பாதா³ஸி. அத² கோ² ப⁴க³வா பி⁴க்கூ² ஆமந்தேஸி – ‘‘லாபா⁴, பி⁴க்க²வே,
ரஞ்ஞோ பஸேனதி³ஸ்ஸ கோஸலஸ்ஸ, ஸுலத்³த⁴லாபா⁴, பி⁴க்க²வே, ரஞ்ஞோ பஸேனதி³ஸ்ஸ
கோஸலஸ்ஸ; யங் ராஜா பஸேனதி³ கோஸலோ லப⁴தி ஆனந்த³ங் த³ஸ்ஸனாய, லப⁴தி
பயிருபாஸனாயா’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
பா³ஹிதிகஸுத்தங் நிட்டி²தங் அட்ட²மங்.
9. த⁴ம்மசேதியஸுத்தங்
364. ஏவங் மே ஸுதங் – ஏகங் ஸமயங் ப⁴க³வா ஸக்கேஸு விஹரதி மேதா³ளுபங் [மேதளூபங் (ஸீ॰), மேத³ளும்பங் (பீ॰)]
நாம ஸக்யானங் நிக³மோ. தேன கோ² பன ஸமயேன ராஜா பஸேனதி³ கோஸலோ நக³ரகங்
அனுப்பத்தோ ஹோதி கேனசிதே³வ கரணீயேன. அத² கோ² ராஜா பஸேனதி³ கோஸலோ தீ³க⁴ங்
காராயனங் ஆமந்தேஸி – ‘‘யோஜேஹி, ஸம்ம காராயன, ப⁴த்³ரானி ப⁴த்³ரானி யானானி,
உய்யானபூ⁴மிங் க³ச்சா²ம ஸுபூ⁴மிங் த³ஸ்ஸனாயா’’தி [ஸுபூ⁴மித³ஸ்ஸனாயாதி (தீ³॰ நி॰ 2.43)].
‘‘ஏவங், தே³வா’’தி கோ² தீ³கோ⁴ காராயனோ ரஞ்ஞோ பஸேனதி³ஸ்ஸ கோஸலஸ்ஸ
படிஸ்ஸுத்வா ப⁴த்³ரானி ப⁴த்³ரானி யானானி யோஜாபெத்வா ரஞ்ஞோ பஸேனதி³ஸ்ஸ
கோஸலஸ்ஸ படிவேதே³ஸி – ‘‘யுத்தானி கோ² தே, தே³வ, ப⁴த்³ரானி ப⁴த்³ரானி
யானானி. யஸ்ஸதா³னி காலங் மஞ்ஞஸீ’’தி. அத² கோ² ராஜா பஸேனதி³ கோஸலோ ப⁴த்³ரங்
யானங் அபி⁴ருஹித்வா ப⁴த்³ரேஹி ப⁴த்³ரேஹி யானேஹி நக³ரகம்ஹா நிய்யாஸி மஹச்சா
ராஜானுபா⁴வேன. யேன ஆராமோ தேன பாயாஸி. யாவதிகா யானஸ்ஸ பூ⁴மி யானேன க³ந்த்வா
யானா பச்சோரோஹித்வா பத்திகோவ ஆராமங் பாவிஸி. அத்³த³ஸா கோ² ராஜா பஸேனதி³
கோஸலோ ஆராமே ஜங்கா⁴விஹாரங் அனுசங்கமமானோ அனுவிசரமானோ ருக்க²மூலானி பாஸாதி³கானி பஸாத³னீயானி அப்பஸத்³தா³னி அப்பனிக்³கோ⁴ஸானி விஜனவாதானி மனுஸ்ஸராஹஸ்ஸெய்யகானி [மனுஸ்ஸராஹஸெய்யகானி (ஸீ॰ பீ॰)]
படிஸல்லானஸாருப்பானி. தி³ஸ்வான ப⁴க³வந்தங்யேவ ஆரப்³ப⁴ ஸதி உத³பாதி³ –
‘‘இமானி கோ² தானி ருக்க²மூலானி பாஸாதி³கானி பஸாத³னீயானி அப்பஸத்³தா³னி
அப்பனிக்³கோ⁴ஸானி விஜனவாதானி மனுஸ்ஸராஹஸ்ஸெய்யகானி படிஸல்லானஸாருப்பானி,
யத்த² ஸுத³ங் மயங் தங் ப⁴க³வந்தங் பயிருபாஸாம அரஹந்தங்
ஸம்மாஸம்பு³த்³த⁴’’ந்தி.
365.
அத² கோ² ராஜா பஸேனதி³ கோஸலோ தீ³க⁴ங் காராயனங் ஆமந்தேஸி – ‘‘இமானி கோ²,
ஸம்ம காராயன, தானி ருக்க²மூலானி பாஸாதி³கானி பஸாத³னீயானி அப்பஸத்³தா³னி
அப்பனிக்³கோ⁴ஸானி விஜனவாதானி மனுஸ்ஸராஹஸ்ஸெய்யகானி படிஸல்லானஸாருப்பானி,
யத்த² ஸுத³ங் மயங் தங் ப⁴க³வந்தங் பயிருபாஸாம அரஹந்தங் ஸம்மாஸம்பு³த்³த⁴ங்.
கஹங் நு கோ², ஸம்ம காராயன, ஏதரஹி ஸோ ப⁴க³வா விஹரதி
அரஹங் ஸம்மாஸம்பு³த்³தோ⁴’’தி? ‘‘அத்தி², மஹாராஜ, மேதா³ளுபங் நாம ஸக்யானங்
நிக³மோ. தத்த² ஸோ ப⁴க³வா ஏதரஹி விஹரதி அரஹங் ஸம்மாஸம்பு³த்³தோ⁴’’தி.
‘‘கீவதூ³ரே [கீவதூ³ரோ (ஸீ॰ ஸ்யா॰ கங்॰ பீ॰)] பன, ஸம்ம காராயன ,
நக³ரகம்ஹா மேதா³ளுபங் நாம ஸக்யானங் நிக³மோ ஹோதீ’’தி? ‘‘ந தூ³ரே, மஹாராஜ;
தீணி யோஜனானி; ஸக்கா தி³வஸாவஸேஸேன க³ந்து’’ந்தி. ‘‘தேன ஹி, ஸம்ம காராயன,
யோஜேஹி ப⁴த்³ரானி ப⁴த்³ரானி யானானி, க³மிஸ்ஸாம மயங் தங் ப⁴க³வந்தங்
த³ஸ்ஸனாய அரஹந்தங் ஸம்மாஸம்பு³த்³த⁴’’ந்தி. ‘‘ஏவங், தே³வா’’தி கோ² தீ³கோ⁴
காராயனோ ரஞ்ஞோ பஸேனதி³ஸ்ஸ கோஸலஸ்ஸ படிஸ்ஸுத்வா ப⁴த்³ரானி ப⁴த்³ரானி யானானி
யோஜாபெத்வா ரஞ்ஞோ பஸேனதி³ஸ்ஸ கோஸலஸ்ஸ படிவேதே³ஸி – ‘‘யுத்தானி கோ² தே,
தே³வ, ப⁴த்³ரானி ப⁴த்³ரானி யானானி. யஸ்ஸதா³னி காலங் மஞ்ஞஸீ’’தி. அத² கோ²
ராஜா பஸேனதி³ கோஸலோ ப⁴த்³ரங் யானங் அபி⁴ருஹித்வா ப⁴த்³ரேஹி ப⁴த்³ரேஹி
யானேஹி நக³ரகம்ஹா யேன மேதா³ளுபங் நாம ஸக்யானங்
நிக³மோ தேன பாயாஸி. தேனேவ தி³வஸாவஸேஸேன மேதா³ளுபங் நாம ஸக்யானங் நிக³மங்
ஸம்பாபுணி. யேன ஆராமோ தேன பாயாஸி. யாவதிகா யானஸ்ஸ பூ⁴மி யானேன க³ந்த்வா
யானா பச்சோரோஹித்வா பத்திகோவ ஆராமங் பாவிஸி.
366.
தேன கோ² பன ஸமயேன ஸம்ப³ஹுலா பி⁴க்கூ² அப்³போ⁴காஸே சங்கமந்தி. அத² கோ² ராஜா
பஸேனதி³ கோஸலோ யேன தே பி⁴க்கூ² தேனுபஸங்கமி; உபஸங்கமித்வா தே பி⁴க்கூ²
ஏதத³வோச – ‘‘கஹங் நு கோ², ப⁴ந்தே, ஏதரஹி ஸோ ப⁴க³வா
விஹரதி அரஹங் ஸம்மாஸம்பு³த்³தோ⁴? த³ஸ்ஸனகாமா ஹி மயங் தங் ப⁴க³வந்தங்
அரஹந்தங் ஸம்மாஸம்பு³த்³த⁴’’ந்தி. ‘‘ஏஸோ, மஹாராஜ, விஹாரோ ஸங்வுதத்³வாரோ.
தேன அப்பஸத்³தோ³ உபஸங்கமித்வா அதரமானோ ஆளிந்த³ங் பவிஸித்வா உக்காஸித்வா
அக்³க³ளங் ஆகோடேஹி. விவரிஸ்ஸதி ப⁴க³வா தே த்³வார’’ந்தி. அத² கோ² ராஜா
பஸேனதி³ கோஸலோ தத்தே²வ க²க்³க³ஞ்ச உண்ஹீஸஞ்ச தீ³க⁴ஸ்ஸ காராயனஸ்ஸ பாதா³ஸி.
அத² கோ² தீ³க⁴ஸ்ஸ காராயனஸ்ஸ ஏதத³ஹோஸி – ‘‘ரஹாயதி கோ² தா³னி ராஜா [மஹாராஜா (ஸீ॰ ஸ்யா॰ கங்॰ பீ॰)], இதே⁴வ [தேனிதே⁴வ (ஸீ॰)]
தா³னி மயா டா²தப்³ப³’’ந்தி. அத² கோ² ராஜா பஸேனதி³ கோஸலோ யேன ஸோ விஹாரோ
ஸங்வுதத்³வாரோ தேன அப்பஸத்³தோ³ உபஸங்கமித்வா அதரமானோ ஆளிந்த³ங் பவிஸித்வா
உக்காஸித்வா அக்³க³ளங் ஆகோடேஸி. விவரி ப⁴க³வா த்³வாரங். அத² கோ² ராஜா
பஸேனதி³ கோஸலோ விஹாரங் பவிஸித்வா ப⁴க³வதோ பாதே³ஸு
ஸிரஸா நிபதித்வா ப⁴க³வதோ பாதா³னி முகே²ன ச பரிசும்ப³தி, பாணீஹி ச
பரிஸம்பா³ஹதி, நாமஞ்ச ஸாவேதி – ‘‘ராஜாஹங், ப⁴ந்தே, பஸேனதி³ கோஸலோ; ராஜாஹங்,
ப⁴ந்தே, பஸேனதி³ கோஸலோ’’தி.
367. ‘‘கிங் பன த்வங், மஹாராஜ, அத்த²வஸங் ஸம்பஸ்ஸமானோ இமஸ்மிங் ஸரீரே ஏவரூபங் பரமனிபச்சகாரங் கரோஸி, மித்தூபஹாரங் [சித்தூபஹாரங் (ஸீ॰)] உபத³ங்ஸேஸீ’’தி? ‘‘அத்தி² கோ² மே, ப⁴ந்தே, ப⁴க³வதி த⁴ம்மன்வயோ
– ‘ஹோதி ஸம்மாஸம்பு³த்³தோ⁴ ப⁴க³வா, ஸ்வாக்கா²தோ ப⁴க³வதா த⁴ம்மோ,
ஸுப்படிபன்னோ ப⁴க³வதோ ஸாவகஸங்கோ⁴’தி. இதா⁴ஹங், ப⁴ந்தே, பஸ்ஸாமி ஏகே
ஸமணப்³ராஹ்மணே பரியந்தகதங் ப்³ரஹ்மசரியங் சரந்தே த³ஸபி வஸ்ஸானி, வீஸம்பி
வஸ்ஸானி, திங்ஸம்பி வஸ்ஸானி, சத்தாரீஸம்பி வஸ்ஸானி. தே அபரேன ஸமயேன
ஸுன்ஹாதா ஸுவிலித்தா கப்பிதகேஸமஸ்ஸூ பஞ்சஹி காமகு³ணேஹி ஸமப்பிதா
ஸமங்கீ³பூ⁴தா பரிசாரெந்தி. இத⁴ பனாஹங், ப⁴ந்தே, பி⁴க்கூ² பஸ்ஸாமி யாவஜீவங்
ஆபாணகோடிகங் பரிபுண்ணங் பரிஸுத்³த⁴ங் ப்³ரஹ்மசரியங் சரந்தே. ந கோ² பனாஹங்,
ப⁴ந்தே, இதோ ப³ஹித்³தா⁴ அஞ்ஞங் ஏவங் பரிபுண்ணங் பரிஸுத்³த⁴ங் ப்³ரஹ்மசரியங்
ஸமனுபஸ்ஸாமி. அயம்பி கோ² மே, ப⁴ந்தே, ப⁴க³வதி த⁴ம்மன்வயோ ஹோதி –
‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ ப⁴க³வதா த⁴ம்மோ, ஸுப்படிபன்னோ
ப⁴க³வதோ ஸாவகஸங்கோ⁴’’தி.
368.
‘‘புன சபரங், ப⁴ந்தே, ராஜானோபி ராஜூஹி விவத³ந்தி, க²த்தியாபி க²த்தியேஹி
விவத³ந்தி, ப்³ராஹ்மணாபி ப்³ராஹ்மணேஹி விவத³ந்தி, க³ஹபதயோபி க³ஹபதீஹி
விவத³ந்தி, மாதாபி புத்தேன விவத³தி, புத்தோபி மாதரா விவத³தி, பிதாபி
புத்தேன விவத³தி, புத்தோபி பிதரா விவத³தி, பா⁴தாபி ப⁴கி³னியா விவத³தி ,
ப⁴கி³னீபி பா⁴தரா விவத³தி, ஸஹாயோபி ஸஹாயேன விவத³தி. இத⁴ பனாஹங், ப⁴ந்தே,
பி⁴க்கூ² பஸ்ஸாமி ஸமக்³கே³ ஸம்மோத³மானே அவிவத³மானே கீ²ரோத³கீபூ⁴தே
அஞ்ஞமஞ்ஞங் பியசக்கூ²ஹி ஸம்பஸ்ஸந்தே விஹரந்தே. ந
கோ² பனாஹங், ப⁴ந்தே, இதோ ப³ஹித்³தா⁴ அஞ்ஞங் ஏவங் ஸமக்³க³ங் பரிஸங்
ஸமனுபஸ்ஸாமி. அயம்பி கோ² மே, ப⁴ந்தே, ப⁴க³வதி த⁴ம்மன்வயோ ஹோதி –
‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ ப⁴க³வதா த⁴ம்மோ, ஸுப்படிபன்னோ
ப⁴க³வதோ ஸாவகஸங்கோ⁴’தி.
369.
‘‘புன சபராஹங், ப⁴ந்தே, ஆராமேன ஆராமங், உய்யானேன உய்யானங் அனுசங்கமாமி
அனுவிசராமி. ஸோஹங் தத்த² பஸ்ஸாமி ஏகே ஸமணப்³ராஹ்மணே கிஸே லூகே²
து³ப்³ப³ண்ணே உப்பண்டு³ப்பண்டு³கஜாதே த⁴மனிஸந்த²தக³த்தே, ந விய மஞ்ஞே
சக்கு²ங் ப³ந்த⁴ந்தே ஜனஸ்ஸ த³ஸ்ஸனாய. தஸ்ஸ மய்ஹங், ப⁴ந்தே, ஏதத³ஹோஸி –
‘அத்³தா⁴ இமே ஆயஸ்மந்தோ அனபி⁴ரதா வா ப்³ரஹ்மசரியங் சரந்தி, அத்தி² வா தேஸங்
கிஞ்சி பாபங் கம்மங் கதங் படிச்ச²ன்னங்; ததா² ஹி இமே ஆயஸ்மந்தோ கிஸா லூகா²
து³ப்³ப³ண்ணா உப்பண்டு³ப்பண்டு³கஜாதா த⁴மனிஸந்த²தக³த்தா, ந விய மஞ்ஞே
சக்கு²ங் ப³ந்த⁴ந்தி ஜனஸ்ஸ த³ஸ்ஸனாயா’தி. த்யாஹங் உபஸங்கமித்வா ஏவங் வதா³மி
– ‘கிங் நு கோ² தும்ஹே ஆயஸ்மந்தோ கிஸா லூகா² து³ப்³ப³ண்ணா
உப்பண்டு³ப்பண்டு³கஜாதா த⁴மனிஸந்த²தக³த்தா, ந விய மஞ்ஞே சக்கு²ங் ப³ந்த⁴த²
ஜனஸ்ஸ த³ஸ்ஸனாயா’தி? தே ஏவமாஹங்ஸு – ‘ப³ந்து⁴கரோகோ³ நோ [பண்டு³கரோகி³னோ (க॰)], மஹாராஜா’தி. இத⁴ பனாஹங், ப⁴ந்தே, பி⁴க்கூ² பஸ்ஸாமி ஹட்ட²பஹட்டே² உத³க்³கு³த³க்³கே³ அபி⁴ரதரூபே பீணிந்த்³ரியே [பீணிதிந்த்³ரியே (ஸீ॰ பீ॰)]
அப்பொஸ்ஸுக்கே பன்னலோமே பரத³த்தவுத்தே மிக³பூ⁴தேன சேதஸா விஹரந்தே. தஸ்ஸ
மய்ஹங், ப⁴ந்தே, ஏதத³ஹோஸி – ‘அத்³தா⁴ இமே ஆயஸ்மந்தோ தஸ்ஸ ப⁴க³வதோ ஸாஸனே
உளாரங் புப்³பே³னாபரங் விஸேஸங் ஜானந்தி; ததா² ஹி இமே ஆயஸ்மந்தோ
ஹட்ட²பஹட்டா² உத³க்³கு³த³க்³கா³ அபி⁴ரதரூபா பீணிந்த்³ரியா அப்பொஸ்ஸுக்கா
பன்னலோமா பரத³த்தவுத்தா மிக³பூ⁴தேன சேதஸா விஹரந்தீ’தி. அயம்பி கோ² மே,
ப⁴ந்தே, ப⁴க³வதி த⁴ம்மன்வயோ ஹோதி – ‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ
ப⁴க³வதா த⁴ம்மோ, ஸுப்படிபன்னோ ப⁴க³வதோ ஸாவகஸங்கோ⁴’தி.
370. ‘‘புன சபராஹங், ப⁴ந்தே, ராஜா க²த்தியோ முத்³தா⁴வஸித்தோ; பஹோமி கா⁴தேதாயங் வா கா⁴தேதுங், ஜாபேதாயங் வா ஜாபேதுங், பப்³பா³ஜேதாயங் வா பப்³பா³ஜேதுங் .
தஸ்ஸ மய்ஹங், ப⁴ந்தே, அட்³ட³கரணே நிஸின்னஸ்ஸ அந்தரந்தரா கத²ங் ஓபாதெந்தி.
ஸோஹங் ந லபா⁴மி – ‘மா மே பொ⁴ந்தோ அட்³ட³கரணே நிஸின்னஸ்ஸ அந்தரந்தரா கத²ங்
ஓபாதேத² [ஓபாதெந்து (ஸீ॰) உபரிஸேலஸுத்தே பன ‘‘ஓபாதேதா²’’தியேவ தி³ஸ்ஸதி],
கதா²பரியோஸானங் மே பொ⁴ந்தோ ஆக³மெந்தூ’தி. தஸ்ஸ மய்ஹங், ப⁴ந்தே, அந்தரந்தரா
கத²ங் ஓபாதெந்தி. இத⁴ பனாஹங், ப⁴ந்தே, பி⁴க்கூ² பஸ்ஸாமி; யஸ்மிங் ஸமயே
ப⁴க³வா அனேகஸதாய பரிஸாய த⁴ம்மங் தே³ஸேதி, நேவ தஸ்மிங் ஸமயே ப⁴க³வதோ
ஸாவகானங் கி²பிதஸத்³தோ³ வா ஹோதி உக்காஸிதஸத்³தோ³ வா. பூ⁴தபுப்³ப³ங்,
ப⁴ந்தே, ப⁴க³வா அனேகஸதாய பரிஸாய த⁴ம்மங் தே³ஸேதி. தத்ரஞ்ஞதரோ ப⁴க³வதோ ஸாவகோ
உக்காஸி. தமேனங் அஞ்ஞதரோ ஸப்³ரஹ்மசாரீ ஜண்ணுகேன
க⁴ட்டேஸி – ‘அப்பஸத்³தோ³ ஆயஸ்மா ஹோது, மாயஸ்மா ஸத்³த³மகாஸி; ஸத்தா² நோ
ப⁴க³வா த⁴ம்மங் தே³ஸேதீ’தி. தஸ்ஸ மய்ஹங், ப⁴ந்தே, ஏதத³ஹோஸி – ‘அச்ச²ரியங்
வத, போ⁴, அப்³பு⁴தங் வத, போ⁴! அத³ண்டே³ன வத கிர, போ⁴, அஸத்தே²ன ஏவங்
ஸுவினீதா பரிஸா ப⁴விஸ்ஸதீ’தி! ந கோ² பனாஹங், ப⁴ந்தே, இதோ ப³ஹித்³தா⁴ அஞ்ஞங்
ஏவங் ஸுவினீதங் பரிஸங் ஸமனுபஸ்ஸாமி. அயம்பி கோ² மே, ப⁴ந்தே, ப⁴க³வதி
த⁴ம்மன்வயோ ஹோதி – ‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ ப⁴க³வதா த⁴ம்மோ,
ஸுப்படிபன்னோ ப⁴க³வதோ ஸாவகஸங்கோ⁴’தி.
371. ‘‘புன சபராஹங், ப⁴ந்தே, பஸ்ஸாமி இதே⁴கச்சே க²த்தியபண்டி³தே நிபுணே கதபரப்பவாதே³ வாலவேதி⁴ரூபே. தே பி⁴ந்த³ந்தா [வோபி⁴ந்த³ந்தா (ஸீ॰)]
மஞ்ஞே சரந்தி பஞ்ஞாக³தேன தி³ட்டி²க³தானி. தே ஸுணந்தி – ‘ஸமணோ க²லு, போ⁴,
கோ³தமோ அமுகங் நாம கா³மங் வா நிக³மங் வா ஓஸரிஸ்ஸதீ’தி. தே பஞ்ஹங்
அபி⁴ஸங்க²ரொந்தி – ‘இமங் மயங் பஞ்ஹங் ஸமணங் கோ³தமங் உபஸங்கமித்வா
புச்சி²ஸ்ஸாம. ஏவங் சே நோ புட்டோ² ஏவங் ப்³யாகரிஸ்ஸதி, ஏவமஸ்ஸ மயங் வாத³ங்
ஆரோபெஸ்ஸாம; ஏவங் சேபி நோ புட்டோ² ஏவங் ப்³யாகரிஸ்ஸதி, ஏவம்பிஸ்ஸ மயங்
வாத³ங் ஆரோபெஸ்ஸாமா’தி. தே ஸுணந்தி – ‘ஸமணோ க²லு,
போ⁴, கோ³தமோ அமுகங் நாம கா³மங் வா நிக³மங் வா ஓஸடோ’தி. தே யேன ப⁴க³வா
தேனுபஸங்கமந்தி. தே ப⁴க³வா த⁴ம்மியா கதா²ய ஸந்த³ஸ்ஸேதி ஸமாத³பேதி
ஸமுத்தேஜேதி ஸம்பஹங்ஸேதி . தே ப⁴க³வதா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹங்ஸிதா ந சேவ ப⁴க³வந்தங் பஞ்ஹங்
புச்ச²ந்தி, குதோ வாத³ங் ஆரோபெஸ்ஸந்தி? அஞ்ஞத³த்து² ப⁴க³வதோ ஸாவகா
ஸம்பஜ்ஜந்தி. அயம்பி கோ² மே, ப⁴ந்தே, ப⁴க³வதி த⁴ம்மன்வயோ ஹோதி –
‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ ப⁴க³வதா த⁴ம்மோ, ஸுப்படிபன்னோ ப⁴க³வதோ ஸாவகஸங்கோ⁴’தி.
372.
‘‘புன சபராஹங், ப⁴ந்தே, பஸ்ஸாமி இதே⁴கச்சே ப்³ராஹ்மணபண்டி³தே…பே॰…
க³ஹபதிபண்டி³தே…பே॰… ஸமணபண்டி³தே நிபுணே கதபரப்பவாதே³ வாலவேதி⁴ரூபே. தே
பி⁴ந்த³ந்தா மஞ்ஞே சரந்தி பஞ்ஞாக³தேன தி³ட்டி²க³தானி. தே ஸுணந்தி – ‘ஸமணோ
க²லு, போ⁴, கோ³தமோ அமுகங் நாம கா³மங் வா நிக³மங் வா ஓஸரிஸ்ஸதீ’தி. தே
பஞ்ஹங் அபி⁴ஸங்க²ரொந்தி – ‘இமங் மயங் பஞ்ஹங் ஸமணங் கோ³தமங் உபஸங்கமித்வா
புச்சி²ஸ்ஸாம. ஏவங் சே நோ புட்டோ² ஏவங் ப்³யாகரிஸ்ஸதி, ஏவமஸ்ஸ மயங் வாத³ங்
ஆரோபெஸ்ஸாம; ஏவங் சேபி நோ புட்டோ² ஏவங் ப்³யாகரிஸ்ஸதி, ஏவம்பிஸ்ஸ மயங்
வாத³ங் ஆரோபெஸ்ஸாமா’தி. தே ஸுணந்தி – ‘ஸமணோ க²லு, போ⁴, கோ³தமோ அமுகங் நாம
கா³மங் வா நிக³மங் வா ஓஸடோ’தி. தே யேன ப⁴க³வா தேனுபஸங்கமந்தி. தே ப⁴க³வா
த⁴ம்மியா கதா²ய ஸந்த³ஸ்ஸேதி ஸமாத³பேதி ஸமுத்தேஜேதி ஸம்பஹங்ஸேதி. தே ப⁴க³வதா
த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹங்ஸிதா ந சேவ
ப⁴க³வந்தங் பஞ்ஹங் புச்ச²ந்தி, குதோ வாத³ங் ஆரோபெஸ்ஸந்தி? அஞ்ஞத³த்து²
ப⁴க³வந்தங்யேவ ஓகாஸங் யாசந்தி அகா³ரஸ்மா அனகா³ரியங் பப்³ப³ஜ்ஜாய. தே ப⁴க³வா
பப்³பா³ஜேதி. தே ததா²பப்³ப³ஜிதா ஸமானா ஏகா
வூபகட்டா² அப்பமத்தா ஆதாபினோ பஹிதத்தா விஹரந்தா நசிரஸ்ஸேவ – யஸ்ஸத்தா²ய
குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் –
ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ விஹரந்தி. தே ஏவமாஹங்ஸு – ‘மனங் வத, போ⁴, அனஸ்ஸாம; மனங் வத, போ⁴,
பனஸ்ஸாம’. மயஞ்ஹி புப்³பே³ அஸ்ஸமணாவ ஸமானா ஸமணாம்ஹாதி படிஜானிம்ஹா,
அப்³ராஹ்மணாவ ஸமானா ப்³ராஹ்மணாம்ஹாதி படிஜானிம்ஹா, அனரஹந்தோவ ஸமானா
அரஹந்தாம்ஹாதி படிஜானிம்ஹா. ‘இதா³னி கொ²ம்ஹ ஸமணா, இதா³னி கொ²ம்ஹ
ப்³ராஹ்மணா, இதா³னி கொ²ம்ஹ அரஹந்தோ’தி. அயம்பி கோ² மே, ப⁴ந்தே, ப⁴க³வதி
த⁴ம்மன்வயோ ஹோதி – ‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ ப⁴க³வதா த⁴ம்மோ,
ஸுப்படிபன்னோ ப⁴க³வதோ ஸாவகஸங்கோ⁴’தி.
373. ‘‘புன சபராஹங், ப⁴ந்தே, இமே இஸித³த்தபுராணா த²பதயோ மமப⁴த்தா மமயானா, அஹங் நேஸங் ஜீவிகாய [ஜீவிதஸ்ஸ (ஸீ॰), ஜீவிகங் (ஸீ॰ அட்ட²॰), ஜீவிதங் (ஸ்யா॰ கங்॰ பீ॰ க॰)] தா³தா, யஸஸ்ஸ ஆஹத்தா; அத² ச பன நோ ததா² மயி நிபச்சகாரங்
கரொந்தி யதா² ப⁴க³வதி. பூ⁴தபுப்³பா³ஹங், ப⁴ந்தே, ஸேனங் அப்³பு⁴ய்யாதோ
ஸமானோ இமே ச இஸித³த்தபுராணா த²பதயோ வீமங்ஸமானோ அஞ்ஞதரஸ்மிங் ஸம்பா³தே⁴
ஆவஸதே² வாஸங் உபக³ச்சி²ங். அத² கோ², ப⁴ந்தே, இமே இஸித³த்தபுராணா த²பதயோ
ப³ஹுதே³வ ரத்திங் த⁴ம்மியா கதா²ய வீதினாமெத்வா, யதோ அஹோஸி ப⁴க³வா [அஸ்ஸோஸுங் கோ² ப⁴க³வந்தங் (ஸீ॰ ஸ்யா॰ கங்॰ பீ॰)]
ததோ ஸீஸங் கத்வா மங் பாத³தோ கரித்வா நிபஜ்ஜிங்ஸு. தஸ்ஸ மய்ஹங், ப⁴ந்தே,
ஏதத³ஹோஸி – ‘அச்ச²ரியங் வத, போ⁴, அப்³பு⁴தங் வத, போ⁴! இமே இஸித³த்தபுராணா
த²பதயோ மமப⁴த்தா மமயானா, அஹங் நேஸங் ஜீவிகாய தா³தா, யஸஸ்ஸ ஆஹத்தா; அத² ச பன
நோ ததா² மயி நிபச்சகாரங் கரொந்தி யதா² ப⁴க³வதி. அத்³தா⁴ இமே ஆயஸ்மந்தோ
தஸ்ஸ ப⁴க³வதோ ஸாஸனே உளாரங் புப்³பே³னாபரங் விஸேஸங் ஜானந்தீ’தி. அயம்பி கோ²
மே, ப⁴ந்தே, ப⁴க³வதி த⁴ம்மன்வயோ ஹோதி – ‘ஸம்மாஸம்பு³த்³தோ⁴ ப⁴க³வா,
ஸ்வாக்கா²தோ ப⁴க³வதா த⁴ம்மோ, ஸுப்படிபன்னோ ப⁴க³வதோ ஸாவகஸங்கோ⁴’தி.
374.
‘‘புன சபரங், ப⁴ந்தே, ப⁴க³வாபி க²த்தியோ, அஹம்பி க²த்தியோ; ப⁴க³வாபி
கோஸலோ, அஹம்பி கோஸலோ; ப⁴க³வாபி ஆஸீதிகோ, அஹம்பி ஆஸீதிகோ. யம்பி, ப⁴ந்தே,
ப⁴க³வாபி க²த்தியோ அஹம்பி க²த்தியோ, ப⁴க³வாபி கோஸலோ அஹம்பி கோஸலோ, ப⁴க³வாபி
ஆஸீதிகோ அஹம்பி ஆஸீதிகோ; இமினாவாரஹாமேவாஹங் [இமினாபாஹங் (க॰)],
ப⁴ந்தே, ப⁴க³வதி பரமனிபச்சகாரங் காதுங், மித்தூபஹாரங் உபத³ங்ஸேதுங்.
ஹந்த³, ச தா³னி மயங், ப⁴ந்தே, க³ச்சா²ம; ப³ஹுகிச்சா மயங் ப³ஹுகரணீயா’’தி.
‘‘யஸ்ஸதா³னி த்வங், மஹாராஜ, காலங் மஞ்ஞஸீ’’தி. அத² கோ² ராஜா பஸேனதி³ கோஸலோ
உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி. அத² கோ²
ப⁴க³வா அசிரபக்கந்தஸ்ஸ ரஞ்ஞோ பஸேனதி³ஸ்ஸ கோஸலஸ்ஸ பி⁴க்கூ² ஆமந்தேஸி –
‘‘ஏஸோ, பி⁴க்க²வே, ராஜா பஸேனதி³ கோஸலோ த⁴ம்மசேதியானி பா⁴ஸித்வா உட்டா²யாஸனா பக்கந்தோ. உக்³க³ண்ஹத², பி⁴க்க²வே, த⁴ம்மசேதியானி; பரியாபுணாத², பி⁴க்க²வே , த⁴ம்மசேதியானி; தா⁴ரேத², பி⁴க்க²வே, த⁴ம்மசேதியானி. அத்த²ஸங்ஹிதானி, பி⁴க்க²வே, த⁴ம்மசேதியானி ஆதி³ப்³ரஹ்மசரியகானீ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
த⁴ம்மசேதியஸுத்தங் நிட்டி²தங் நவமங்.
10. கண்ணகத்த²லஸுத்தங்
375. ஏவங் மே ஸுதங் – ஏகங் ஸமயங் ப⁴க³வா உருஞ்ஞாயங் [உஜுஞ்ஞாயங் (ஸீ॰ பீ॰), உத³ஞ்ஞாயங் (ஸ்யா॰ கங்॰)]
விஹரதி கண்ணகத்த²லே மிக³தா³யே. தேன கோ² பன ஸமயேன ராஜா பஸேனதி³ கோஸலோ
உருஞ்ஞங் அனுப்பத்தோ ஹோதி கேனசிதே³வ கரணீயேன. அத² கோ² ராஜா பஸேனதி³ கோஸலோ
அஞ்ஞதரங் புரிஸங் ஆமந்தேஸி – ‘‘ஏஹி த்வங், அம்போ⁴ புரிஸ, யேன ப⁴க³வா
தேனுபஸங்கம; உபஸங்கமித்வா மம வசனேன ப⁴க³வதோ பாதே³ ஸிரஸா வந்தா³ஹி,
அப்பாபா³த⁴ங் அப்பாதங்கங் லஹுட்டா²னங் ப³லங் பா²ஸுவிஹாரங் புச்ச² – ‘ராஜா,
ப⁴ந்தே, பஸேனதி³ கோஸலோ ப⁴க³வதோ பாதே³ ஸிரஸா வந்த³தி, அப்பாபா³த⁴ங்
அப்பாதங்கங் லஹுட்டா²னங் ப³லங் பா²ஸுவிஹாரங் புச்ச²தீ’தி. ஏவஞ்ச வதே³ஹி –
‘அஜ்ஜ கிர, ப⁴ந்தே, ராஜா பஸேனதி³ கோஸலோ பச்சா²ப⁴த்தங் பு⁴த்தபாதராஸோ
ப⁴க³வந்தங் த³ஸ்ஸனாய உபஸங்கமிஸ்ஸதீ’’’தி. ‘‘ஏவங், தே³வா’’தி கோ² ஸோ புரிஸோ
ரஞ்ஞோ பஸேனதி³ஸ்ஸ கோஸலஸ்ஸ படிஸ்ஸுத்வா யேன ப⁴க³வா தேனுபஸங்கமி;
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங்
நிஸின்னோ கோ² ஸோ புரிஸோ ப⁴க³வந்தங் ஏதத³வோச – ‘‘ராஜா, ப⁴ந்தே, பஸேனதி³
கோஸலோ ப⁴க³வதோ பாதே³ ஸிரஸா வந்த³தி, அப்பாபா³த⁴ங் அப்பாதங்கங் லஹுட்டா²னங்
ப³லங் பா²ஸுவிஹாரங் புச்ச²தி; ஏவஞ்ச வதே³தி – ‘அஜ்ஜ கிர ப⁴ந்தே, ராஜா
பஸேனதி³ கோஸலோ பச்சா²ப⁴த்தங் பு⁴த்தபாதராஸோ ப⁴க³வந்தங் த³ஸ்ஸனாய
உபஸங்கமிஸ்ஸதீ’’’தி. அஸ்ஸோஸுங் கோ² ஸோமா ச ப⁴கி³னீ ஸகுலா ச ப⁴கி³னீ – ‘‘அஜ்ஜ கிர
ராஜா பஸேனதி³ கோஸலோ பச்சா²ப⁴த்தங் பு⁴த்தபாதராஸோ ப⁴க³வந்தங் த³ஸ்ஸனாய
உபஸங்கமிஸ்ஸதீ’’தி. அத² கோ² ஸோமா ச ப⁴கி³னீ ஸகுலா ச ப⁴கி³னீ ராஜானங்
பஸேனதி³ங் கோஸலங் ப⁴த்தாபி⁴ஹாரே உபஸங்கமித்வா ஏதத³வோசுங் – ‘‘தேன ஹி,
மஹாராஜ, அம்ஹாகம்பி வசனேன ப⁴க³வதோ பாதே³ ஸிரஸா வந்தா³ஹி, அப்பாபா³த⁴ங்
அப்பாதங்கங் லஹுட்டா²னங் ப³லங் பா²ஸுவிஹாரங் புச்ச² – ‘ஸோமா ச, ப⁴ந்தே,
ப⁴கி³னீ ஸகுலா ச ப⁴கி³னீ ப⁴க³வதோ பாதே³ ஸிரஸா வந்த³தி, அப்பாபா³த⁴ங்
அப்பாதங்கங் லஹுட்டா²னங் ப³லங் பா²ஸுவிஹாரங் புச்ச²தீ’’’தி.
376.
அத² கோ² ராஜா பஸேனதி³ கோஸலோ பச்சா²ப⁴த்தங் பு⁴த்தபாதராஸோ யேன ப⁴க³வா
தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³.
ஏகமந்தங் நிஸின்னோ கோ² ராஜா பஸேனதி³ கோஸலோ ப⁴க³வந்தங் ஏதத³வோச – ‘‘ஸோமா ச, ப⁴ந்தே, ப⁴கி³னீ ஸகுலா ச ப⁴கி³னீ ப⁴க³வதோ பாதே³ ஸிரஸா வந்த³தி [வந்த³ந்தி (ஸீ॰ ஸ்யா॰ கங்॰ பீ॰)], அப்பாபா³த⁴ங் அப்பாதங்கங் லஹுட்டா²னங் ப³லங் பா²ஸுவிஹாரங் புச்ச²தீ’’தி [புச்ச²ந்தீதி (ஸீ॰ ஸ்யா॰ கங்॰ பீ॰)].
‘‘கிங் பன, மஹாராஜ, ஸோமா ச ப⁴கி³னீ ஸகுலா ச ப⁴கி³னீ அஞ்ஞங் தூ³தங்
நாலத்து²’’ந்தி? ‘‘அஸ்ஸோஸுங் கோ², ப⁴ந்தே, ஸோமா ச ப⁴கி³னீ ஸகுலா ச ப⁴கி³னீ –
‘அஜ்ஜ கிர ராஜா பஸேனதி³ கோஸலோ பச்சா²ப⁴த்தங் பு⁴த்தபாதராஸோ ப⁴க³வந்தங்
த³ஸ்ஸனாய உபஸங்கமிஸ்ஸதீ’தி. அத² கோ², ப⁴ந்தே, ஸோமா ச ப⁴கி³னீ ஸகுலா ச
ப⁴கி³னீ மங் ப⁴த்தாபி⁴ஹாரே உபஸங்கமித்வா ஏதத³வோசுங் – ‘தேன ஹி, மஹாராஜ,
அம்ஹாகம்பி வசனேன ப⁴க³வதோ பாதே³ ஸிரஸா வந்தா³ஹி, அப்பாபா³த⁴ங்
அப்பாதங்கங் லஹுட்டா²னங் ப³லங் பா²ஸுவிஹாரங் புச்ச² – ஸோமா ச ப⁴கி³னீ
ஸகுலா ச ப⁴கி³னீ ப⁴க³வதோ பாதே³ ஸிரஸா வந்த³தி, அப்பாபா³த⁴ங் அப்பாதங்கங்
லஹுட்டா²னங் ப³லங் பா²ஸுவிஹாரங் புச்ச²தீ’’’தி. ‘‘ஸுகி²னியோ ஹொந்து தா,
மஹாராஜ, ஸோமா ச ப⁴கி³னீ ஸகுலா ச ப⁴கி³னீ’’தி.
377.
அத² கோ² ராஜா பஸேனதி³ கோஸலோ ப⁴க³வந்தங் ஏதத³வோச – ‘‘ஸுதங் மேதங், ப⁴ந்தே,
ஸமணோ கோ³தமோ ஏவமாஹ – ‘நத்தி² ஸோ ஸமணோ வா ப்³ராஹ்மணோ வா யோ ஸப்³ப³ஞ்ஞூ
ஸப்³ப³த³ஸ்ஸாவீ அபரிஸேஸங் ஞாணத³ஸ்ஸனங் படிஜானிஸ்ஸதி, நேதங் டா²னங்
விஜ்ஜதீ’தி. யே தே, ப⁴ந்தே, ஏவமாஹங்ஸு – ‘ஸமணோ கோ³தமோ ஏவமாஹ
– நத்தி² ஸோ ஸமணோ வா ப்³ராஹ்மணோ வா யோ ஸப்³ப³ஞ்ஞூ ஸப்³ப³த³ஸ்ஸாவீ
அபரிஸேஸங் ஞாணத³ஸ்ஸனங் படிஜானிஸ்ஸதி, நேதங் டா²னங் விஜ்ஜதீ’தி; கச்சி தே,
ப⁴ந்தே, ப⁴க³வதோ வுத்தவாதி³னோ, ந ச ப⁴க³வந்தங் அபூ⁴தேன அப்³பா⁴சிக்க²ந்தி,
த⁴ம்மஸ்ஸ சானுத⁴ம்மங் ப்³யாகரொந்தி, ந ச கோசி ஸஹத⁴ம்மிகோ வாதா³னுவாதோ³
கா³ரய்ஹங் டா²னங் ஆக³ச்ச²தீ’’தி? ‘‘யே தே, மஹாராஜ, ஏவமாஹங்ஸு – ‘ஸமணோ
கோ³தமோ ஏவமாஹ – நத்தி² ஸோ ஸமணோ வா ப்³ராஹ்மணோ வா யோ ஸப்³ப³ஞ்ஞூ
ஸப்³ப³த³ஸ்ஸாவீ அபரிஸேஸங் ஞாணத³ஸ்ஸனங் படிஜானிஸ்ஸதி, நேதங் டா²னங்
விஜ்ஜதீ’தி; ந மே தே வுத்தவாதி³னோ, அப்³பா⁴சிக்க²ந்தி ச பன மங் தே அஸதா
அபூ⁴தேனா’’தி.
378.
அத² கோ² ராஜா பஸேனதி³ கோஸலோ விடடூப⁴ங் ஸேனாபதிங் ஆமந்தேஸி – ‘‘கோ நு கோ²,
ஸேனாபதி, இமங் கதா²வத்து²ங் ராஜந்தேபுரே அப்³பு⁴தா³ஹாஸீ’’தி? ‘‘ஸஞ்ஜயோ,
மஹாராஜ, ப்³ராஹ்மணோ ஆகாஸகொ³த்தோ’’தி. அத² கோ² ராஜா பஸேனதி³ கோஸலோ அஞ்ஞதரங் புரிஸங் ஆமந்தேஸி – ‘‘ஏஹி த்வங் ,
அம்போ⁴ புரிஸ, மம வசனேன ஸஞ்ஜயங் ப்³ராஹ்மணங் ஆகாஸகொ³த்தங் ஆமந்தேஹி –
‘ராஜா தங், ப⁴ந்தே, பஸேனதி³ கோஸலோ ஆமந்தேதீ’’’தி. ‘‘ஏவங், தே³வா’’தி கோ² ஸோ
புரிஸோ ரஞ்ஞோ பஸேனதி³ஸ்ஸ கோஸலஸ்ஸ படிஸ்ஸுத்வா யேன
ஸஞ்ஜயோ ப்³ராஹ்மணோ ஆகாஸகொ³த்தோ தேனுபஸங்கமி; உபஸங்கமித்வா ஸஞ்ஜயங்
ப்³ராஹ்மணங் ஆகாஸகொ³த்தங் ஏதத³வோச – ‘‘ராஜா தங், ப⁴ந்தே, பஸேனதி³ கோஸலோ
ஆமந்தேதீ’’தி. அத² கோ² ராஜா பஸேனதி³ கோஸலோ ப⁴க³வந்தங் ஏதத³வோச – ‘‘ஸியா நு
கோ², ப⁴ந்தே, ப⁴க³வதா அஞ்ஞதே³வ கிஞ்சி ஸந்தா⁴ய பா⁴ஸிதங், தஞ்ச ஜனோ
அஞ்ஞதா²பி பச்சாக³ச்செ²ய்ய [பச்சாக³ச்செ²ய்யாதி, அபி⁴ஜானாமி மஹாராஜ வாசங் பா⁴ஸிதாதி (ஸீ॰)].
யதா² கத²ங் பன, ப⁴ந்தே, ப⁴க³வா அபி⁴ஜானாதி வாசங் பா⁴ஸிதா’’தி? ‘‘ஏவங் கோ²
அஹங், மஹாராஜ, அபி⁴ஜானாமி வாசங் பா⁴ஸிதா – ‘நத்தி² ஸோ ஸமணோ வா ப்³ராஹ்மணோ
வா யோ ஸகிதே³வ ஸப்³ப³ங் ஞஸ்ஸதி, ஸப்³ப³ங் த³க்கி²தி, நேதங் டா²னங்
விஜ்ஜதீ’’’தி. ‘‘ஹேதுரூபங், ப⁴ந்தே, ப⁴க³வா ஆஹ; ஸஹேதுரூபங், ப⁴ந்தே, ப⁴க³வா
ஆஹ – ‘நத்தி² ஸோ ஸமணோ வா ப்³ராஹ்மணோ வா யோ ஸகிதே³வ
ஸப்³ப³ங் ஞஸ்ஸதி, ஸப்³ப³ங் த³க்கி²தி, நேதங் டா²னங் விஜ்ஜதீ’’’தி.
‘‘சத்தாரோமே, ப⁴ந்தே, வண்ணா – க²த்தியா, ப்³ராஹ்மணா, வெஸ்ஸா, ஸுத்³தா³.
இமேஸங் நு கோ², ப⁴ந்தே, சதுன்னங் வண்ணானங் ஸியா விஸேஸோ ஸியா நானாகரண’’ந்தி?
‘‘சத்தாரோமே, மஹாராஜ, வண்ணா – க²த்தியா, ப்³ராஹ்மணா, வெஸ்ஸா, ஸுத்³தா³.
இமேஸங் கோ², மஹாராஜ, சதுன்னங் வண்ணானங் த்³வே வண்ணா அக்³க³மக்கா²யந்தி – க²த்தியா ச ப்³ராஹ்மணா ச – யதி³த³ங் அபி⁴வாத³னபச்சுட்டா²னஅஞ்ஜலிகம்மஸாமீசிகம்மானீ’’தி [ஸாமிசிகம்மானந்தி (ஸீ॰)].
‘‘நாஹங், ப⁴ந்தே, ப⁴க³வந்தங் தி³ட்ட²த⁴ம்மிகங் புச்சா²மி; ஸம்பராயிகாஹங்,
ப⁴ந்தே, ப⁴க³வந்தங் புச்சா²மி. சத்தாரோமே, ப⁴ந்தே, வண்ணா – க²த்தியா,
ப்³ராஹ்மணா, வெஸ்ஸா, ஸுத்³தா³. இமேஸங் நு கோ², ப⁴ந்தே, சதுன்னங் வண்ணானங்
ஸியா விஸேஸோ ஸியா நானாகரண’’ந்தி?
379.
‘‘பஞ்சிமானி, மஹாராஜ, பதா⁴னியங்கா³னி. கதமானி பஞ்ச? இத⁴, மஹாராஜ, பி⁴க்கு²
ஸத்³தோ⁴ ஹோதி, ஸத்³த³ஹதி ததா²க³தஸ்ஸ போ³தி⁴ங் – ‘இதிபி ஸோ ப⁴க³வா அரஹங்
ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ
புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி; அப்பாபா³தோ⁴
ஹோதி அப்பாதங்கோ ஸமவேபாகினியா க³ஹணியா ஸமன்னாக³தோ நாதிஸீதாய நாச்சுண்ஹாய
மஜ்ஜி²மாய பதா⁴னக்க²மாய; அஸடோ² ஹோதி அமாயாவீ யதா²பூ⁴தங் அத்தானங் ஆவிகத்தா
ஸத்த²ரி வா விஞ்ஞூஸு வா ஸப்³ரஹ்மசாரீஸு; ஆரத்³த⁴வீரியோ விஹரதி அகுஸலானங்
த⁴ம்மானங் பஹானாய, குஸலானங் த⁴ம்மானங் உபஸம்பதா³ய,
தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு; பஞ்ஞவா ஹோதி
உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய
ஸம்மாது³க்க²க்க²யகா³மினியா – இமானி கோ², மஹாராஜ, பஞ்ச பதா⁴னியங்கா³னி.
சத்தாரோமே, மஹாராஜ, வண்ணா – க²த்தியா, ப்³ராஹ்மணா, வெஸ்ஸா, ஸுத்³தா³. தே
சஸ்ஸு இமேஹி பஞ்சஹி பதா⁴னியங்கே³ஹி ஸமன்னாக³தா ; எத்த² பன நேஸங் அஸ்ஸ தீ³க⁴ரத்தங் ஹிதாய ஸுகா²யா’’தி. ‘‘சத்தாரோமே, ப⁴ந்தே, வண்ணா – க²த்தியா, ப்³ராஹ்மணா, வெஸ்ஸா, ஸுத்³தா³ .
தே சஸ்ஸு இமேஹி பஞ்சஹி பதா⁴னியங்கே³ஹி ஸமன்னாக³தா; எத்த² பன நேஸங்,
ப⁴ந்தே, ஸியா விஸேஸோ ஸியா நானாகரண’’ந்தி? ‘‘எத்த² கோ² நேஸாஹங், மஹாராஜ,
பதா⁴னவேமத்ததங் வதா³மி. ஸெய்யதா²பிஸ்ஸு, மஹாராஜ, த்³வே ஹத்தி²த³ம்மா வா
அஸ்ஸத³ம்மா வா கோ³த³ம்மா வா ஸுத³ந்தா ஸுவினீதா, த்³வே ஹத்தி²த³ம்மா வா
அஸ்ஸத³ம்மா வா கோ³த³ம்மா வா அத³ந்தா அவினீதா. தங் கிங் மஞ்ஞஸி, மஹாராஜ, யே
தே த்³வே ஹத்தி²த³ம்மா வா அஸ்ஸத³ம்மா வா கோ³த³ம்மா வா ஸுத³ந்தா ஸுவினீதா,
அபி நு தே த³ந்தாவ த³ந்தகாரணங் க³ச்செ²ய்யுங், த³ந்தாவ த³ந்தபூ⁴மிங்
ஸம்பாபுணெய்யு’’ந்தி? ‘‘ஏவங், ப⁴ந்தே’’. ‘‘யே பன தே த்³வே ஹத்தி²த³ம்மா வா
அஸ்ஸத³ம்மா வா கோ³த³ம்மா வா அத³ந்தா அவினீதா, அபி நு தே அத³ந்தாவ
த³ந்தகாரணங் க³ச்செ²ய்யுங், அத³ந்தாவ த³ந்தபூ⁴மிங் ஸம்பாபுணெய்யுங்,
ஸெய்யதா²பி தே த்³வே ஹத்தி²த³ம்மா வா அஸ்ஸத³ம்மா வா கோ³த³ம்மா வா ஸுத³ந்தா
ஸுவினீதா’’தி? ‘‘நோ ஹேதங், ப⁴ந்தே’’. ‘‘ஏவமேவ கோ², மஹாராஜ, யங் தங்
ஸத்³தே⁴ன பத்தப்³ப³ங் அப்பாபா³தே⁴ன அஸடே²ன அமாயாவினா ஆரத்³த⁴வீரியேன
பஞ்ஞவதா தங் வத [தங் ததா² ஸோ (க॰)] அஸ்ஸத்³தோ⁴ ப³ஹ்வாபா³தோ⁴ ஸடோ² மாயாவீ குஸீதோ து³ப்பஞ்ஞோ பாபுணிஸ்ஸதீதி – நேதங் டா²னங் விஜ்ஜதீ’’தி.
380. ‘‘ஹேதுரூபங், ப⁴ந்தே, ப⁴க³வா ஆஹ; ஸஹேதுரூபங், ப⁴ந்தே, ப⁴க³வா ஆஹ. சத்தாரோமே, ப⁴ந்தே, வண்ணா – க²த்தியா, ப்³ராஹ்மணா, வெஸ்ஸா ,
ஸுத்³தா³. தே சஸ்ஸு இமேஹி பஞ்சஹி பதா⁴னியங்கே³ஹி ஸமன்னாக³தா தே சஸ்ஸு
ஸம்மப்பதா⁴னா; எத்த² பன நேஸங், ப⁴ந்தே, ஸியா விஸேஸோ ஸியா நானாகரண’’ந்தி?
‘‘எத்த² கோ² [எத்த² கோ² பன (ஸீ॰)] நேஸாஹங்,
மஹாராஜ, ந கிஞ்சி நானாகரணங் வதா³மி – யதி³த³ங் விமுத்தியா விமுத்திங்.
ஸெய்யதா²பி, மஹாராஜ, புரிஸோ ஸுக்க²ங் ஸாககட்ட²ங் ஆதா³ய அக்³கி³ங்
அபி⁴னிப்³ப³த்தெய்ய, தேஜோ பாதுகரெய்ய ; அதா²பரோ புரிஸோ ஸுக்க²ங் ஸாலகட்ட²ங் ஆதா³ய
அக்³கி³ங் அபி⁴னிப்³ப³த்தெய்ய, தேஜோ பாதுகரெய்ய; அதா²பரோ புரிஸோ ஸுக்க²ங்
அம்ப³கட்ட²ங் ஆதா³ய அக்³கி³ங் அபி⁴னிப்³ப³த்தெய்ய, தேஜோ பாதுகரெய்ய;
அதா²பரோ புரிஸோ ஸுக்க²ங் உது³ம்ப³ரகட்ட²ங் ஆதா³ய அக்³கி³ங்
அபி⁴னிப்³ப³த்தெய்ய, தேஜோ பாதுகரெய்ய. தங் கிங் மஞ்ஞஸி, மஹாராஜ, ஸியா நு
கோ² தேஸங் அக்³கீ³னங் நானாதா³ருதோ அபி⁴னிப்³ப³த்தானங் கிஞ்சி நானாகரணங்
அச்சியா வா அச்சிங், வண்ணேன வா வண்ணங், ஆபா⁴ய வா ஆப⁴’’ந்தி? ‘‘நோ ஹேதங்,
ப⁴ந்தே’’. ‘‘ஏவமேவ கோ², மஹாராஜ, யங் தங் தேஜங் வீரியா நிம்மதி²தங்
பதா⁴னாபி⁴னிப்³ப³த்தங் [விரியங் நிப்ப²ரதி, தங் பச்சா²பி⁴னிப்³ப³த்தங் (ஸீ॰)],
நாஹங் தத்த² கிஞ்சி நானாகரணங் வதா³மி – யதி³த³ங் விமுத்தியா
விமுத்தி’’ந்தி. ‘‘ஹேதுரூபங், ப⁴ந்தே, ப⁴க³வா ஆஹ; ஸஹேதுரூபங், ப⁴ந்தே,
ப⁴க³வா ஆஹ. கிங் பன, ப⁴ந்தே, அத்தி² தே³வா’’தி?
‘‘கிங் பன த்வங், மஹாராஜ, ஏவங் வதே³ஸி – ‘கிங் பன, ப⁴ந்தே, அத்தி²
தே³வா’’’தி? ‘‘யதி³ வா தே, ப⁴ந்தே, தே³வா ஆக³ந்தாரோ இத்த²த்தங் யதி³ வா
அனாக³ந்தாரோ இத்த²த்தங்’’? ‘‘யே தே, மஹாராஜ, தே³வா ஸப்³யாப³ஜ்ஜா² தே தே³வா
ஆக³ந்தாரோ இத்த²த்தங், யே தே தே³வா அப்³யாப³ஜ்ஜா² தே தே³வா அனாக³ந்தாரோ
இத்த²த்த’’ந்தி.
381. ஏவங்
வுத்தே, விட்டூபோ⁴ ஸேனாபதி ப⁴க³வந்தங் ஏதத³வோச – ‘‘யே தே, ப⁴ந்தே, தே³வா
ஸப்³யாப³ஜ்ஜா² ஆக³ந்தாரோ இத்த²த்தங் தே தே³வா, யே தே தே³வா அப்³யாப³ஜ்ஜா²
அனாக³ந்தாரோ இத்த²த்தங் தே தே³வே தம்ஹா டா²னா சாவெஸ்ஸந்தி வா
பப்³பா³ஜெஸ்ஸந்தி வா’’தி?
அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘அயங் கோ²
விடடூபோ⁴ ஸேனாபதி ரஞ்ஞோ பஸேனதி³ஸ்ஸ கோஸலஸ்ஸ புத்தோ; அஹங் ப⁴க³வதோ புத்தோ.
அயங் கோ² காலோ யங் புத்தோ புத்தேன மந்தெய்யா’’தி. அத² கோ² ஆயஸ்மா ஆனந்தோ³
விடடூப⁴ங் ஸேனாபதிங் ஆமந்தேஸி – ‘‘தேன ஹி, ஸேனாபதி, தங் யேவெத்த²
படிபுச்சி²ஸ்ஸாமி; யதா² தே க²மெய்ய ததா² நங் ப்³யாகரெய்யாஸி. தங் கிங்
மஞ்ஞஸி, ஸேனாபதி, யாவதா ரஞ்ஞோ பஸேனதி³ஸ்ஸ கோஸலஸ்ஸ விஜிதங் யத்த² ச ராஜா
பஸேனதி³ கோஸலோ இஸ்ஸரியாதி⁴பச்சங் ரஜ்ஜங் காரேதி,
பஹோதி தத்த² ராஜா பஸேனதி³ கோஸலோ ஸமணங் வா ப்³ராஹ்மணங் வா புஞ்ஞவந்தங் வா
அபுஞ்ஞவந்தங் வா ப்³ரஹ்மசரியவந்தங் வா அப்³ரஹ்மசரியவந்தங் வா தம்ஹா டா²னா
சாவேதுங் வா பப்³பா³ஜேதுங் வா’’தி? ‘‘யாவதா, போ⁴, ரஞ்ஞோ பஸேனதி³ஸ்ஸ கோஸலஸ்ஸ
விஜிதங் யத்த² ச ராஜா பஸேனதி³ கோஸலோ இஸ்ஸரியாதி⁴பச்சங் ரஜ்ஜங் காரேதி, பஹோதி தத்த² ராஜா பஸேனதி³ கோஸலோ
ஸமணங் வா ப்³ராஹ்மணங் வா புஞ்ஞவந்தங் வா அபுஞ்ஞவந்தங் வா
ப்³ரஹ்மசரியவந்தங் வா அப்³ரஹ்மசரியவந்தங் வா தம்ஹா டா²னா சாவேதுங் வா
பப்³பா³ஜேதுங் வா’’தி.
‘‘தங் கிங் மஞ்ஞஸி, ஸேனாபதி, யாவதா ரஞ்ஞோ பஸேனதி³ஸ்ஸ
கோஸலஸ்ஸ அவிஜிதங் யத்த² ச ராஜா பஸேனதி³ கோஸலோ ந இஸ்ஸரியாதி⁴பச்சங் ரஜ்ஜங்
காரேதி, தத்த² பஹோதி ராஜா பஸேனதி³ கோஸலோ ஸமணங் வா ப்³ராஹ்மணங் வா
புஞ்ஞவந்தங் வா அபுஞ்ஞவந்தங் வா ப்³ரஹ்மசரியவந்தங் வா அப்³ரஹ்மசரியவந்தங்
வா தம்ஹா டா²னா சாவேதுங் வா பப்³பா³ஜேதுங் வா’’தி? ‘‘யாவதா, போ⁴, ரஞ்ஞோ
பஸேனதி³ஸ்ஸ கோஸலஸ்ஸ அவிஜிதங் யத்த² ச ராஜா பஸேனதி³ கோஸலோ ந
இஸ்ஸரியாதி⁴பச்சங் ரஜ்ஜங் காரேதி, ந தத்த² பஹோதி ராஜா
பஸேனதி³ கோஸலோ ஸமணங் வா ப்³ராஹ்மணங் வா புஞ்ஞவந்தங் வா அபுஞ்ஞவந்தங் வா
ப்³ரஹ்மசரியவந்தங் வா அப்³ரஹ்மசரியவந்தங் வா தம்ஹா டா²னா சாவேதுங் வா
பப்³பா³ஜேதுங் வா’’தி.
‘‘தங் கிங் மஞ்ஞஸி, ஸேனாபதி, ஸுதா தே தே³வா
தாவதிங்ஸா’’தி? ‘‘ஏவங், போ⁴. ஸுதா மே தே³வா தாவதிங்ஸா. இதா⁴பி போ⁴தா ரஞ்ஞா
பஸேனதி³னா கோஸலேன ஸுதா தே³வா தாவதிங்ஸா’’தி. ‘‘தங் கிங் மஞ்ஞஸி, ஸேனாபதி,
பஹோதி ராஜா பஸேனதி³ கோஸலோ தே³வே தாவதிங்ஸே தம்ஹா டா²னா சாவேதுங் வா
பப்³பா³ஜேதுங் வா’’தி? ‘‘த³ஸ்ஸனம்பி, போ⁴, ராஜா பஸேனதி³ கோஸலோ தே³வே
தாவதிங்ஸே நப்பஹோதி, குதோ பன தம்ஹா டா²னா சாவெஸ்ஸதி வா பப்³பா³ஜெஸ்ஸதி
வா’’தி? ‘‘ஏவமேவ கோ², ஸேனாபதி, யே தே தே³வா ஸப்³யாப³ஜ்ஜா² ஆக³ந்தாரோ
இத்த²த்தங் தே தே³வா, யே தே தே³வா அப்³யாப³ஜ்ஜா² அனாக³ந்தாரோ இத்த²த்தங் தே
தே³வே த³ஸ்ஸனாயபி நப்பஹொந்தி; குதோ பன தம்ஹா டா²னா சாவெஸ்ஸந்தி வா
பப்³பா³ஜெஸ்ஸந்தி வா’’தி?
382. அத² கோ² ராஜா பஸேனதி³ கோஸலோ ப⁴க³வந்தங் ஏதத³வோச – ‘‘கோனாமோ அயங், ப⁴ந்தே, பி⁴க்கூ²’’தி? ‘‘ஆனந்தோ³ நாம, மஹாராஜா’’தி. ‘‘ஆனந்தோ³ வத, போ⁴, ஆனந்த³ரூபோ வத, போ⁴! ஹேதுரூபங், ப⁴ந்தே ,
ஆயஸ்மா ஆனந்தோ³ ஆஹ; ஸஹேதுரூபங், ப⁴ந்தே, ஆயஸ்மா ஆனந்தோ³ ஆஹ. கிங் பன,
ப⁴ந்தே, அத்தி² ப்³ரஹ்மா’’தி? ‘‘கிங் பன த்வங், மஹாராஜ, ஏவங் வதே³ஸி –
‘கிங் பன, ப⁴ந்தே, அத்தி² ப்³ரஹ்மா’’’தி? ‘‘யதி³ வா ஸோ, ப⁴ந்தே, ப்³ரஹ்மா
ஆக³ந்தா இத்த²த்தங், யதி³ வா அனாக³ந்தா இத்த²த்த’’ந்தி? ‘‘யோ ஸோ, மஹாராஜ,
ப்³ரஹ்மா ஸப்³யாப³ஜ்ஜோ² ஸோ ப்³ரஹ்மா ஆக³ந்தா இத்த²த்தங், யோ ஸோ ப்³ரஹ்மா
அப்³யாப³ஜ்ஜோ² ஸோ ப்³ரஹ்மா அனாக³ந்தா இத்த²த்த’’ந்தி. அத² கோ² அஞ்ஞதரோ
புரிஸோ ராஜானங் பஸேனதி³ங் கோஸலங் ஏதத³வோச –
‘‘ஸஞ்ஜயோ, மஹாராஜ, ப்³ராஹ்மணோ ஆகாஸகொ³த்தோ ஆக³தோ’’தி. அத² கோ² ராஜா பஸேனதி³
கோஸலோ ஸஞ்ஜயங் ப்³ராஹ்மணங் ஆகாஸகொ³த்தங் ஏதத³வோச – ‘‘கோ நு கோ²,
ப்³ராஹ்மண, இமங் கதா²வத்து²ங் ராஜந்தேபுரே அப்³பு⁴தா³ஹாஸீ’’தி? ‘‘விடடூபோ⁴,
மஹாராஜ, ஸேனாபதீ’’தி. விடடூபோ⁴ ஸேனாபதி ஏவமாஹ – ‘‘ஸஞ்ஜயோ, மஹாராஜ,
ப்³ராஹ்மணோ ஆகாஸகொ³த்தோ’’தி. அத² கோ² அஞ்ஞதரோ புரிஸோ ராஜானங் பஸேனதி³ங்
கோஸலங் ஏதத³வோச – ‘‘யானகாலோ, மஹாராஜா’’தி.
அத² கோ² ராஜா பஸேனதி³ கோஸலோ ப⁴க³வந்தங் ஏதத³வோச – ‘‘ஸப்³ப³ஞ்ஞுதங் மயங், ப⁴ந்தே, ப⁴க³வந்தங்
அபுச்சி²ம்ஹா, ஸப்³ப³ஞ்ஞுதங் ப⁴க³வா ப்³யாகாஸி; தஞ்ச பனம்ஹாகங் ருச்சதி
சேவ க²மதி ச, தேன சம்ஹா அத்தமனா. சாதுவண்ணிஸுத்³தி⁴ங் மயங், ப⁴ந்தே,
ப⁴க³வந்தங் அபுச்சி²ம்ஹா, சாதுவண்ணிஸுத்³தி⁴ங்
ப⁴க³வா ப்³யாகாஸி; தஞ்ச பனம்ஹாகங் ருச்சதி சேவ க²மதி ச, தேன சம்ஹா அத்தமனா.
அதி⁴தே³வே மயங், ப⁴ந்தே, ப⁴க³வந்தங் அபுச்சி²ம்ஹா, அதி⁴தே³வே ப⁴க³வா
ப்³யாகாஸி; தஞ்ச பனம்ஹாகங் ருச்சதி சேவ க²மதி ச, தேன சம்ஹா அத்தமனா.
அதி⁴ப்³ரஹ்மானங் மயங், ப⁴ந்தே, ப⁴க³வந்தங் அபுச்சி²ம்ஹா, அதி⁴ப்³ரஹ்மானங்
ப⁴க³வா ப்³யாகாஸி; தஞ்ச பனம்ஹாகங் ருச்சதி சேவ க²மதி ச, தேன சம்ஹா அத்தமனா.
யங் யதே³வ ச மயங் ப⁴க³வந்தங் அபுச்சி²ம்ஹா தங் ததே³வ ப⁴க³வா ப்³யாகாஸி;
தஞ்ச பனம்ஹாகங் ருச்சதி சேவ க²மதி ச, தேன சம்ஹா அத்தமனா. ஹந்த³, ச
தா³னி மயங், ப⁴ந்தே, க³ச்சா²ம; ப³ஹுகிச்சா மயங் ப³ஹுகரணீயா’’தி.
‘‘யஸ்ஸதா³னி த்வங், மஹாராஜ, காலங் மஞ்ஞஸீ’’தி. அத² கோ² ராஜா பஸேனதி³ கோஸலோ
ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தங்
அபி⁴வாதெ³த்வா பத³க்கி²ணங் கத்வா பக்காமீதி.
கண்ணகத்த²லஸுத்தங் நிட்டி²தங் த³ஸமங்.
ராஜவக்³கோ³ நிட்டி²தோ சதுத்தோ².
தஸ்ஸுத்³தா³னங் –
க⁴டிகாரோ ரட்ட²பாலோ, மக⁴தே³வோ மது⁴ரியங்;
போ³தி⁴ அங்கு³லிமாலோ ச, பியஜாதங் பா³ஹிதிகங்;
த⁴ம்மசேதியஸுத்தஞ்ச, த³ஸமங் கண்ணகத்த²லங்.
ஸுத்தபிடக-Part-42-தமிழில் திரபிடக மூன்று தொகுப்புகள்TIPITAKA--42.3. பரிப்பாஜகவக்கோ-1. தேவிஜ்ஜவச்சஸுத்தங்-from FREE ONLINE eNālāndā Research and
Practice UNIVERSITY through http://sarvajan.ambedkar.org
3. பரிப்பாஜகவக்கோ
1. தேவிஜ்ஜவச்சஸுத்தங்
185. ஏவங்
மே ஸுதங் – ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங்.
தேன கோ² பன ஸமயேன வச்ச²கொ³த்தோ பரிப்³பா³ஜகோ ஏகபுண்ட³ரீகே பரிப்³பா³ஜகாராமே
படிவஸதி. அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய
வேஸாலிங் பிண்டா³ய பாவிஸி. அத² கோ² ப⁴க³வதோ ஏதத³ஹோஸி – ‘‘அதிப்பகோ³ கோ² தாவ
வேஸாலியங் பிண்டா³ய சரிதுங்; யங்னூனாஹங் யேன ஏகபுண்ட³ரீகோ
பரிப்³பா³ஜகாராமோ யேன வச்ச²கொ³த்தோ பரிப்³பா³ஜகோ தேனுபஸங்கமெய்ய’’ந்தி. அத²
கோ² ப⁴க³வா யேன ஏகபுண்ட³ரீகோ பரிப்³பா³ஜகாராமோ யேன வச்ச²கொ³த்தோ
பரிப்³பா³ஜகோ தேனுபஸங்கமி. அத்³த³ஸா கோ² வச்ச²கொ³த்தோ பரிப்³பா³ஜகோ
ப⁴க³வந்தங் தூ³ரதோவ ஆக³ச்ச²ந்தங். தி³ஸ்வான ப⁴க³வந்தங் ஏதத³வோச – ‘‘ஏது
கோ², ப⁴ந்தே, ப⁴க³வா. ஸ்வாக³தங் [ஸாக³தங் (ஸீ॰ பீ॰)],
ப⁴ந்தே, ப⁴க³வதோ. சிரஸ்ஸங் கோ², ப⁴ந்தே, ப⁴க³வா இமங் பரியாயமகாஸி யதி³த³ங்
இதா⁴க³மனாய. நிஸீத³து, ப⁴ந்தே, ப⁴க³வா இத³மாஸனங் பஞ்ஞத்த’’ந்தி. நிஸீதி³
ப⁴க³வா பஞ்ஞத்தே ஆஸனே. வச்ச²கொ³த்தோபி கோ² பரிப்³பா³ஜகோ அஞ்ஞதரங் நீசங் ஆஸனங் க³ஹெத்வா ஏகமந்தங் நிஸீதி³. ஏகமந்தங்
நிஸின்னோ கோ² வச்ச²கொ³த்தோ பரிப்³பா³ஜகோ ப⁴க³வந்தங் ஏதத³வோச – ‘‘ஸுதங்
மேதங், ப⁴ந்தே – ‘ஸமணோ கோ³தமோ ஸப்³ப³ஞ்ஞூ ஸப்³ப³த³ஸ்ஸாவீ, அபரிஸே+ஸங்
ஞாணத³ஸ்ஸனங் படிஜானாதி, சரதோ ச மே திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததங்
ஸமிதங் ஞாணத³ஸ்ஸனங் பச்சுபட்டி²த’ந்தி. யே தே, ப⁴ந்தே, ஏவமாஹங்ஸு – ‘ஸமணோ
கோ³தமோ ஸப்³ப³ஞ்ஞூ ஸப்³ப³த³ஸ்ஸாவீ, அபரிஸேஸங் ஞாணத³ஸ்ஸனங் படிஜானாதி, சரதோ ச
மே திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததங் ஸமிதங் ஞாணத³ஸ்ஸனங்
பச்சுபட்டி²த’ந்தி, கச்சி தே, ப⁴ந்தே, ப⁴க³வதோ வுத்தவாதி³னோ, ந ச
ப⁴க³வந்தங் அபூ⁴தேன அப்³பா⁴சிக்க²ந்தி, த⁴ம்மஸ்ஸ சானுத⁴ம்மங் ப்³யாகரொந்தி,
ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங்
டா²னங் ஆக³ச்ச²தீ’’தி? ‘‘யே தே, வச்ச², ஏவமாஹங்ஸு – ‘ஸமணோ கோ³தமோ
ஸப்³ப³ஞ்ஞூ ஸப்³ப³த³ஸ்ஸாவீ, அபரிஸேஸங் ஞாணத³ஸ்ஸனங் படிஜானாதி, சரதோ ச மே
திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததங் ஸமிதங் ஞாணத³ஸ்ஸனங்
பச்சுபட்டி²த’ந்தி, ந மே தே வுத்தவாதி³னோ, அப்³பா⁴சிக்க²ந்தி ச பன மங் அஸதா
அபூ⁴தேனா’’தி.
186. ‘‘கத²ங்
ப்³யாகரமானா பன மயங், ப⁴ந்தே, வுத்தவாதி³னோ சேவ ப⁴க³வதோ அஸ்ஸாம, ந ச
ப⁴க³வந்தங் அபூ⁴தேன அப்³பா⁴சிக்கெ²ய்யாம, த⁴ம்மஸ்ஸ சானுத⁴ம்மங்
ப்³யாகரெய்யாம, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங்
ஆக³ச்செ²ய்யா’’தி?
‘‘‘தேவிஜ்ஜோ ஸமணோ கோ³தமோ’தி கோ², வச்ச², ப்³யாகரமானோ வுத்தவாதீ³ சேவ மே அஸ்ஸ, ந ச மங்
அபூ⁴தேன அப்³பா⁴சிக்கெ²ய்ய, த⁴ம்மஸ்ஸ சானுத⁴ம்மங் ப்³யாகரெய்ய, ந ச கோசி
ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்செ²ய்ய. அஹஞ்ஹி, வச்ச²,
யாவதே³வ ஆகங்கா²மி அனேகவிஹிதங் புப்³பே³னிவாஸங் அனுஸ்ஸராமி, ஸெய்யதி²த³ங் –
ஏகம்பி ஜாதிங் த்³வேபி ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங்
புப்³பே³னிவாஸங் அனுஸ்ஸராமி. அஹஞ்ஹி, வச்ச², யாவதே³வ ஆகங்கா²மி தி³ப்³பே³ன
சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸாமி சவமானே உபபஜ்ஜமானே
ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே…பே॰… யதா²கம்மூபகே³
ஸத்தே பஜானாமி. அஹஞ்ஹி, வச்ச², ஆஸவானங் க²யா அனாஸவங் சேதோவிமுத்திங்
பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹராமி.
‘‘‘தேவிஜ்ஜோ ஸமணோ கோ³தமோ’தி
கோ², வச்ச², ப்³யாகரமானோ வுத்தவாதீ³ சேவ மே அஸ்ஸ, ந ச மங் அபூ⁴தேன
அப்³பா⁴சிக்கெ²ய்ய, த⁴ம்மஸ்ஸ சானுத⁴ம்மங் ப்³யாகரெய்ய, ந ச கோசி ஸஹத⁴ம்மிகோ
வாதா³னுவாதோ³ கா³ரய்ஹங் டா²னங் ஆக³ச்செ²ய்யா’’தி.
ஏவங் வுத்தே, வச்ச²கொ³த்தோ பரிப்³பா³ஜகோ ப⁴க³வந்தங்
ஏதத³வோச – ‘‘அத்தி² நு கோ², போ⁴ கோ³தம, கோசி கி³ஹீ கி³ஹிஸங்யோஜனங் அப்பஹாய
காயஸ்ஸ பே⁴தா³ து³க்க²ஸ்ஸந்தகரோ’’தி? ‘‘நத்தி² கோ², வச்ச², கோசி கி³ஹீ
கி³ஹிஸங்யோஜனங் அப்பஹாய காயஸ்ஸ பே⁴தா³ து³க்க²ஸ்ஸந்தகரோ’’தி.
‘‘அத்தி² பன, போ⁴ கோ³தம, கோசி கி³ஹீ கி³ஹிஸங்யோஜனங் அப்பஹாய காயஸ்ஸ பே⁴தா³ ஸக்³கூ³பகோ³’’தி? ‘‘ந கோ², வச்ச², ஏகங்யேவ ஸதங் ந த்³வே ஸதானி ந தீணி ஸதானி ந சத்தாரி ஸதானி ந பஞ்ச ஸதானி, அத² கோ² பி⁴ய்யோவ யே கி³ஹீ கி³ஹிஸங்யோஜனங் அப்பஹாய காயஸ்ஸ பே⁴தா³ ஸக்³கூ³பகா³’’தி [‘‘அத்தி² கோ² வச்ச² கோசி கி³ஹீ கி³ஹிஸங்யோஜனங் அப்பஹாய காயஸ்ஸ பே⁴தா³ ஸக்³கூ³பகோ³தி’’. (க॰)].
‘‘அத்தி² நு கோ², போ⁴ கோ³தம, கோசி ஆஜீவகோ [ஆஜீவிகோ (க॰)] காயஸ்ஸ பே⁴தா³ து³க்க²ஸ்ஸந்தகரோ’’தி? ‘‘நத்தி² கோ², வச்ச², கோசி ஆஜீவகோ காயஸ்ஸ பே⁴தா³ து³க்க²ஸ்ஸந்தகரோ’’தி.
‘‘அத்தி² பன, போ⁴ கோ³தம, கோசி ஆஜீவகோ காயஸ்ஸ பே⁴தா³ ஸக்³கூ³பகோ³’’தி? ‘‘இதோ கோ² ஸோ, வச்ச², ஏகனவுதோ கப்போ [இதோ கோ வச்ச² ஏகனவுதே கப்பே (க॰)]
யமஹங் அனுஸ்ஸராமி, நாபி⁴ஜானாமி கஞ்சி ஆஜீவகங் ஸக்³கூ³பக³ங் அஞ்ஞத்ர ஏகேன;
ஸோபாஸி கம்மவாதீ³ கிரியவாதீ³’’தி. ‘‘ஏவங் ஸந்தே, போ⁴ கோ³தம, ஸுஞ்ஞங் அது³ங்
தித்தா²யதனங் அந்தமஸோ ஸக்³கூ³பகே³னபீ’’தி? ‘‘ஏவங், வச்ச², ஸுஞ்ஞங் அது³ங்
தித்தா²யதனங் அந்தமஸோ ஸக்³கூ³பகே³னபீ’’தி.
இத³மவோச ப⁴க³வா. அத்தமனோ வச்ச²கொ³த்தோ பரிப்³பா³ஜகோ ப⁴க³வதோ பா⁴ஸிதங் அபி⁴னந்தீ³தி.
தேவிஜ்ஜவச்ச²ஸுத்தங் நிட்டி²தங் பட²மங்.
2. அக்³கி³வச்ச²ஸுத்தங்
187. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. அத² கோ² வச்ச²கொ³த்தோ பரிப்³பா³ஜகோ யேன ப⁴க³வா தேனுபஸங்கமி;
உபஸங்கமித்வா ப⁴க³வதா ஸத்³தி⁴ங் ஸம்மோதி³.
ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங்
நிஸின்னோ கோ² வச்ச²கொ³த்தோ பரிப்³பா³ஜகோ ப⁴க³வந்தங் ஏதத³வோச –
‘‘கிங் நு கோ², போ⁴ கோ³தம, ‘ஸஸ்ஸதோ லோகோ, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² [ஏவங்தி³ட்டீ² (ஸீ॰ ஸ்யா॰ கங்॰ க॰)] ப⁴வங் கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘ஸஸ்ஸதோ லோகோ, இத³மேவ ஸச்சங் மோக⁴மஞ்ஞ’’’ந்தி.
‘‘கிங் பன, போ⁴ கோ³தம, ‘அஸஸ்ஸதோ லோகோ, இத³மேவ ஸச்சங்
மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ² அஹங், வச்ச²,
ஏவங்தி³ட்டி² – ‘அஸஸ்ஸதோ லோகோ, இத³மேவ ஸச்சங் மோக⁴மஞ்ஞ’’’ந்தி.
‘‘கிங் நு கோ², போ⁴ கோ³தம,
‘அந்தவா லோகோ, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங்
கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘அந்தவா லோகோ, இத³மேவ
ஸச்சங் மோக⁴மஞ்ஞ’’’ந்தி.
‘‘கிங் பன, போ⁴ கோ³தம, ‘அனந்தவா லோகோ, இத³மேவ ஸச்சங்
மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ² அஹங், வச்ச²,
ஏவங்தி³ட்டி² – ‘அனந்தவா லோகோ, இத³மேவ ஸச்சங் மோக⁴மஞ்ஞ’’’ந்தி.
‘‘கிங் நு கோ², போ⁴ கோ³தம, ‘தங் ஜீவங் தங் ஸரீரங், இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ² அஹங், வச்ச², ஏவங்தி³ட்டி² – ‘தங் ஜீவங் தங் ஸரீரங், இத³மேவ ஸச்சங் மோக⁴மஞ்ஞ’’’ந்தி.
‘‘கிங் பன, போ⁴ கோ³தம, ‘அஞ்ஞங் ஜீவங் அஞ்ஞங் ஸரீரங்,
இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ²
அஹங், வச்ச², ஏவங்தி³ட்டி² – ‘அஞ்ஞங் ஜீவங் அஞ்ஞங் ஸரீரங், இத³மேவ ஸச்சங்
மோக⁴மஞ்ஞ’’’ந்தி.
‘‘கிங் நு கோ², போ⁴ கோ³தம, ‘ஹோதி ததா²க³தோ பரங் மரணா,
இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ²
அஹங், வச்ச², ஏவங்தி³ட்டி² – ‘ஹோதி ததா²க³தோ பரங் மரணா, இத³மேவ ஸச்சங்
மோக⁴மஞ்ஞ’’’ந்தி.
‘‘கிங் பன, போ⁴ கோ³தம, ‘ந ஹோதி ததா²க³தோ பரங் மரணா,
இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி? ‘‘ந கோ²
அஹங், வச்ச², ஏவங்தி³ட்டி² – ‘ந ஹோதி ததா²க³தோ பரங் மரணா, இத³மேவ ஸச்சங்
மோக⁴மஞ்ஞ’’’ந்தி.
‘‘கிங் நு கோ², போ⁴ கோ³தம, ‘ஹோதி ச ந ச ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி ? ‘‘ந கோ² அஹங், வச்ச², ஏவங்தி³ட்டி² – ‘ஹோதி ச ந ச ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’’’ந்தி.
‘‘கிங் பன, போ⁴ கோ³தம, ‘நேவ ஹோதி ந ந ஹோதி ததா²க³தோ
பரங் மரணா, இத³மேவ ஸச்சங் மோக⁴மஞ்ஞ’ந்தி – ஏவங்தி³ட்டி² ப⁴வங் கோ³தமோ’’தி?
‘‘ந கோ² அஹங், வச்ச², ஏவங்தி³ட்டி² – ‘நேவ ஹோதி ந ந ஹோதி ததா²க³தோ பரங்
மரணா, இத³மேவ ஸச்சங் மோக⁴மஞ்ஞ’’’ந்தி.
188. ‘‘‘கிங் நு கோ², போ⁴ கோ³தம, ஸஸ்ஸதோ லோகோ, இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – ஸஸ்ஸதோ லோகோ, இத³மேவ ஸச்சங் மோக⁴மஞ்ஞ’ந்தி வதே³ஸி [மோக⁴மஞ்ஞந்தீதி வதே³ஸி (ஸீ॰), மோக⁴மஞ்ஞந்தி இதி வதே³ஸி (?)].
‘கிங் பன, போ⁴ கோ³தம, அஸஸ்ஸதோ லோகோ, இத³மேவ ஸச்சங் மோக⁴மஞ்ஞந்தி –
ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச² ,
ஏவங்தி³ட்டி² – அஸஸ்ஸதோ லோகோ, இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங்
நு கோ², போ⁴ கோ³தம, அந்தவா லோகோ, இத³மேவ ஸச்சங் மோக⁴மஞ்ஞந்தி –
ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச²,
ஏவங்தி³ட்டி² – அந்தவா லோகோ, இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங்
பன, போ⁴ கோ³தம, அனந்தவா லோகோ, இத³மேவ ஸச்சங் மோக⁴மஞ்ஞந்தி – ஏவங்தி³ட்டி²
ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² –
அனந்தவா லோகோ, இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங் நு கோ², போ⁴
கோ³தம, தங் ஜீவங் தங் ஸரீரங், இத³மேவ ஸச்சங் மோக⁴மஞ்ஞந்தி – ஏவங்தி³ட்டி²
ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – தங்
ஜீவங் தங் ஸரீரங், இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங் பன, போ⁴
கோ³தம, அஞ்ஞங் ஜீவங் அஞ்ஞங் ஸரீரங், இத³மேவ ஸச்சங் மோக⁴மஞ்ஞந்தி –
ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச²,
ஏவங்தி³ட்டி² – அஞ்ஞங் ஜீவங் அஞ்ஞங் ஸரீரங், இத³மேவ ஸச்சங் மோக⁴மஞ்ஞ’ந்தி
வதே³ஸி. ‘கிங் நு கோ², போ⁴ கோ³தம, ஹோதி ததா²க³தோ பரங் மரணா, இத³மேவ ஸச்சங்
மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ²
அஹங், வச்ச², ஏவங்தி³ட்டி² – ஹோதி ததா²க³தோ பரங் மரணா, இத³மேவ ஸச்சங்
மோக⁴மஞ்ஞ’ந்தி வதே³ஸி.
‘‘‘கிங் பன, போ⁴ கோ³தம, ந ஹோதி ததா²க³தோ பரங்
மரணா, இத³மேவ ஸச்சங் மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி
புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – ந ஹோதி ததா²க³தோ பரங்
மரணா, இத³மேவ ஸச்சங் மோக⁴மஞ்ஞ’ந்தி வதே³ஸி. ‘கிங் நு கோ², போ⁴ கோ³தம, ஹோதி ச
ந ச ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞந்தி – ஏவங்தி³ட்டி²
ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² –
ஹோதி ச ந ச ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி வதே³ஸி.
‘கிங் பன, போ⁴ கோ³தம, நேவ ஹோதி ந ந ஹோதி ததா²க³தோ பரங் மரணா, இத³மேவ ஸச்சங்
மோக⁴மஞ்ஞந்தி – ஏவங்தி³ட்டி² ப⁴வங் கோ³தமோ’தி இதி புட்டோ² ஸமானோ ‘ந கோ² அஹங், வச்ச², ஏவங்தி³ட்டி² – நேவ ஹோதி ந ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி வதே³ஸி.
‘‘கிங் பன போ⁴ கோ³தமோ ஆதீ³னவங் ஸம்பஸ்ஸமானோ ஏவங் இமானி ஸப்³ப³ஸோ தி³ட்டி²க³தானி அனுபக³தோ’’தி?
189. ‘‘‘ஸஸ்ஸதோ லோகோ’தி கோ², வச்ச², தி³ட்டி²க³தமேதங் தி³ட்டி²க³ஹனங் தி³ட்டி²கந்தாரோ [தி³ட்டி²கந்தாரங் (ஸீ॰ பீ॰)] தி³ட்டி²விஸூகங் தி³ட்டி²விப்ப²ந்தி³தங் தி³ட்டி²ஸங்யோஜனங் ஸது³க்க²ங் ஸவிகா⁴தங் ஸஉபாயாஸங் ஸபரிளாஹங், ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி .
‘அஸஸ்ஸதோ லோகோ’தி கோ², வச்ச²…பே॰… ‘அந்தவா லோகோ’தி கோ², வச்ச²…பே॰…
‘அனந்தவா லோகோ’தி கோ², வச்ச²…பே॰… ‘தங் ஜீவங் தங் ஸரீர’ந்தி கோ²,
வச்ச²…பே॰… ‘அஞ்ஞங் ஜீவங் அஞ்ஞங் ஸரீர’ந்தி கோ², வச்ச²…பே॰… ‘ஹோதி ததா²க³தோ
பரங் மரணா’தி கோ², வச்ச² …பே॰… ‘ந ஹோதி ததா²க³தோ
பரங் மரணா’தி கோ², வச்ச²…பே॰… ‘ஹோதி ச ந ச ஹோதி ததா²க³தோ பரங் மரணா’தி கோ²,
வச்ச²…பே॰… ‘நேவ ஹோதி ந ந ஹோதி ததா²க³தோ பரங் மரணா’தி கோ², வச்ச²,
தி³ட்டி²க³தமேதங் தி³ட்டி²க³ஹனங் தி³ட்டி²கந்தாரோ தி³ட்டி²விஸூகங்
தி³ட்டி²விப்ப²ந்தி³தங் தி³ட்டி²ஸங்யோஜனங் ஸது³க்க²ங் ஸவிகா⁴தங் ஸஉபாயாஸங்
ஸபரிளாஹங், ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந
ஸம்போ³தா⁴ய ந நிப்³பா³னாய ஸங்வத்ததி. இமங் கோ² அஹங், வச்ச², ஆதீ³னவங்
ஸம்பஸ்ஸமானோ ஏவங் இமானி ஸப்³ப³ஸோ தி³ட்டி²க³தானி அனுபக³தோ’’தி.
‘‘அத்தி² பன போ⁴தோ கோ³தமஸ்ஸ கிஞ்சி தி³ட்டி²க³த’’ந்தி?
‘‘தி³ட்டி²க³தந்தி கோ², வச்ச², அபனீதமேதங் ததா²க³தஸ்ஸ. தி³ட்ட²ஞ்ஹேதங்,
வச்ச², ததா²க³தேன – ‘இதி ரூபங், இதி ரூபஸ்ஸ ஸமுத³யோ, இதி ரூபஸ்ஸ
அத்த²ங்க³மோ; இதி வேத³னா, இதி வேத³னாய ஸமுத³யோ, இதி வேத³னாய அத்த²ங்க³மோ;
இதி ஸஞ்ஞா, இதி ஸஞ்ஞாய ஸமுத³யோ, இதி ஸஞ்ஞாய அத்த²ங்க³மோ; இதி ஸங்கா²ரா, இதி
ஸங்கா²ரானங் ஸமுத³யோ, இதி ஸங்கா²ரானங் அத்த²ங்க³மோ; இதி விஞ்ஞாணங், இதி
விஞ்ஞாணஸ்ஸ ஸமுத³யோ, இதி விஞ்ஞாணஸ்ஸ அத்த²ங்க³மோ’தி. தஸ்மா ததா²க³தோ
ஸப்³ப³மஞ்ஞிதானங் ஸப்³ப³மதி²தானங் ஸப்³ப³அஹங்காரமமங்காரமானானுஸயானங் க²யா
விராகா³ நிரோதா⁴ சாகா³ படினிஸ்ஸக்³கா³ அனுபாதா³ விமுத்தோதி வதா³மீ’’தி.
190. ‘‘ஏவங்
விமுத்தசித்தோ பன, போ⁴ கோ³தம, பி⁴க்கு² குஹிங் உபபஜ்ஜதீ’’தி? ‘‘உபபஜ்ஜதீதி
கோ², வச்ச², ந உபேதி’’. ‘‘தேன ஹி, போ⁴ கோ³தம, ந உபபஜ்ஜதீ’’தி? ‘‘ந
உபபஜ்ஜதீதி கோ², வச்ச², ந உபேதி’’. ‘‘தேன ஹி, போ⁴ கோ³தம, உபபஜ்ஜதி ச ந ச
உபபஜ்ஜதீ’’தி? ‘‘உபபஜ்ஜதி ச ந ச உபபஜ்ஜதீதி கோ², வச்ச², ந உபேதி’’. ‘‘தேன
ஹி, போ⁴ கோ³தம, நேவ உபபஜ்ஜதி ந ந உபபஜ்ஜதீ’’தி? ‘‘நேவ உபபஜ்ஜதி ந ந
உபபஜ்ஜதீதி கோ², வச்ச², ந உபேதி’’.
‘‘‘ஏவங் விமுத்தசித்தோ பன, போ⁴
கோ³தம, பி⁴க்கு² குஹிங் உபபஜ்ஜதீ’தி இதி புட்டோ² ஸமானோ ‘உபபஜ்ஜதீதி கோ²,
வச்ச², ந உபேதீ’தி வதே³ஸி. ‘தேன ஹி, போ⁴ கோ³தம, ந உபபஜ்ஜதீ’தி இதி புட்டோ²
ஸமானோ ‘ந உபபஜ்ஜதீதி கோ², வச்ச², ந உபேதீ’தி வதே³ஸி. ‘தேன ஹி, போ⁴ கோ³தம,
உபபஜ்ஜதி ச ந ச உபபஜ்ஜதீ’தி இதி புட்டோ² ஸமானோ ‘உபபஜ்ஜதி ச ந ச உபபஜ்ஜதீதி
கோ², வச்ச², ந உபேதீ’தி வதே³ஸி. ‘தேன ஹி, போ⁴ கோ³தம, நேவ உபபஜ்ஜதி ந ந
உபபஜ்ஜதீ’தி இதி புட்டோ² ஸமானோ ‘நேவ உபபஜ்ஜதி ந ந
உபபஜ்ஜதீதி கோ², வச்ச², ந உபேதீ’தி வதே³ஸி. எத்தா²ஹங், போ⁴ கோ³தம,
அஞ்ஞாணமாபாதி³ங், எத்த² ஸம்மோஹமாபாதி³ங். யாபி மே ஏஸா போ⁴தோ கோ³தமஸ்ஸ
புரிமேன கதா²ஸல்லாபேன அஹு பஸாத³மத்தா ஸாபி மே ஏதரஹி
அந்தரஹிதா’’தி. ‘‘அலஞ்ஹி தே, வச்ச², அஞ்ஞாணாய, அலங் ஸம்மோஹாய. க³ம்பீ⁴ரோ
ஹாயங், வச்ச², த⁴ம்மோ து³த்³த³ஸோ து³ரனுபோ³தோ⁴ ஸந்தோ பணீதோ அதக்காவசரோ
நிபுணோ பண்டி³தவேத³னீயோ. ஸோ தயா து³ஜ்ஜானோ அஞ்ஞதி³ட்டி²கேன அஞ்ஞக²ந்திகேன
அஞ்ஞருசிகேன அஞ்ஞத்ரயோகே³ன [அஞ்ஞத்ராயோகே³ன (தீ³॰ நி॰ 1.420)] அஞ்ஞத்ராசரியகேன’’ [அஞ்ஞத்தா²சரியகேன (ஸீ॰ ஸ்யா॰ கங்॰ பீ॰)].
191.
‘‘தேன ஹி, வச்ச², தஞ்ஞேவெத்த² படிபுச்சி²ஸ்ஸாமி; யதா² தே க²மெய்ய ததா² நங்
ப்³யாகரெய்யாஸி. தங் கிங் மஞ்ஞஸி, வச்ச², ஸசே தே புரதோ அக்³கி³ ஜலெய்ய,
ஜானெய்யாஸி த்வங் – ‘அயங் மே புரதோ அக்³கி³ ஜலதீ’’’தி? ‘‘ஸசே மே, போ⁴
கோ³தம, புரதோ அக்³கி³ ஜலெய்ய, ஜானெய்யாஹங் – ‘அயங் மே புரதோ அக்³கி³
ஜலதீ’’’தி.
‘‘ஸசே பன தங், வச்ச², ஏவங் புச்செ²ய்ய – ‘யோ தே அயங்
புரதோ அக்³கி³ ஜலதி அயங் அக்³கி³ கிங் படிச்ச ஜலதீ’தி, ஏவங் புட்டோ² த்வங்,
வச்ச², கிந்தி ப்³யாகரெய்யாஸீ’’தி? ‘‘ஸசே மங், போ⁴ கோ³தம, ஏவங் புச்செ²ய்ய
– ‘யோ தே அயங் புரதோ அக்³கி³ ஜலதி அயங் அக்³கி³ கிங் படிச்ச ஜலதீ’தி, ஏவங்
புட்டோ² அஹங், போ⁴ கோ³தம, ஏவங் ப்³யாகரெய்யங் – ‘யோ மே அயங் புரதோ அக்³கி³ ஜலதி அயங் அக்³கி³ திணகட்டு²பாதா³னங் படிச்ச ஜலதீ’’’தி.
‘‘ஸசே தே, வச்ச², புரதோ ஸோ அக்³கி³ நிப்³பா³யெய்ய,
ஜானெய்யாஸி த்வங் – ‘அயங் மே புரதோ அக்³கி³ நிப்³பு³தோ’’’தி? ‘‘ஸசே மே, போ⁴
கோ³தம, புரதோ ஸோ அக்³கி³ நிப்³பா³யெய்ய, ஜானெய்யாஹங் – ‘அயங் மே புரதோ
அக்³கி³ நிப்³பு³தோ’’’தி.
‘‘ஸசே பன தங், வச்ச², ஏவங் புச்செ²ய்ய – ‘யோ தே அயங் புரதோ அக்³கி³ நிப்³பு³தோ ஸோ அக்³கி³ இதோ கதமங்
தி³ஸங் க³தோ – புரத்தி²மங் வா த³க்கி²ணங் வா பச்சி²மங் வா உத்தரங் வா’தி,
ஏவங் புட்டோ² த்வங், வச்ச², கிந்தி ப்³யாகரெய்யாஸீ’’தி? ‘‘ந உபேதி, போ⁴
கோ³தம, யஞ்ஹி ஸோ, போ⁴ கோ³தம, அக்³கி³ திணகட்டு²பாதா³னங் படிச்ச அஜலி [ஜலதி (ஸ்யா॰ கங்॰ க॰)] தஸ்ஸ ச பரியாதா³னா அஞ்ஞஸ்ஸ ச அனுபஹாரா அனாஹாரோ நிப்³பு³தோ த்வேவ ஸங்க்²யங் க³ச்ச²தீ’’தி.
192.
‘‘ஏவமேவ கோ², வச்ச², யேன ரூபேன ததா²க³தங் பஞ்ஞாபயமானோ பஞ்ஞாபெய்ய தங்
ரூபங் ததா²க³தஸ்ஸ பஹீனங் உச்சி²ன்னமூலங் தாலாவத்து²கதங் அனபா⁴வங்கதங்
ஆயதிங் அனுப்பாத³த⁴ம்மங். ரூபஸங்க²யவிமுத்தோ [ரூபஸங்கா²விமுத்தோ (ஸீ॰ ஸ்யா॰ கங்॰ பீ॰) ஏவங் வேத³னாஸங்க²யாதீ³ஸுபி]
கோ², வச்ச², ததா²க³தோ க³ம்பீ⁴ரோ அப்பமெய்யோ து³ப்பரியோகா³ள்ஹோ –
ஸெய்யதா²பி மஹாஸமுத்³தோ³. உபபஜ்ஜதீதி ந உபேதி, ந உபபஜ்ஜதீதி ந உபேதி,
உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி.
‘‘யாய வேத³னாய ததா²க³தங் பஞ்ஞாபயமானோ பஞ்ஞாபெய்ய ஸா
வேத³னா ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங்
அனுப்பாத³த⁴ம்மா. வேத³னாஸங்க²யவிமுத்தோ கோ², வச்ச², ததா²க³தோ க³ம்பீ⁴ரோ
அப்பமெய்யோ து³ப்பரியோகா³ள்ஹோ – ஸெய்யதா²பி மஹாஸமுத்³தோ³. உபபஜ்ஜதீதி ந
உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ
உபபஜ்ஜதி ந ந உபபஜ்ஜதீதி ந உபேதி.
‘‘யாய ஸஞ்ஞாய ததா²க³தங் பஞ்ஞாபயமானோ பஞ்ஞாபெய்ய ஸா ஸஞ்ஞா ததா²க³தஸ்ஸ பஹீனா
உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா.
ஸஞ்ஞாஸங்க²யவிமுத்தோ கோ², வச்ச², ததா²க³தோ க³ம்பீ⁴ரோ அப்பமெய்யோ
து³ப்பரியோகா³ள்ஹோ – ஸெய்யதா²பி மஹாஸமுத்³தோ³. உபபஜ்ஜதீதி ந உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி.
‘‘யேஹி ஸங்கா²ரேஹி ததா²க³தங் பஞ்ஞாபயமானோ பஞ்ஞாபெய்ய
தே ஸங்கா²ரா ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வங்கதா
ஆயதிங் அனுப்பாத³த⁴ம்மா. ஸங்கா²ரஸங்க²யவிமுத்தோ கோ², வச்ச², ததா²க³தோ
க³ம்பீ⁴ரோ அப்பமெய்யோ து³ப்பரியோகா³ள்ஹோ – ஸெய்யதா²பி மஹாஸமுத்³தோ³.
உபபஜ்ஜதீதி ந உபேதி , ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி.
‘‘யேன விஞ்ஞாணேன ததா²க³தங் பஞ்ஞாபயமானோ பஞ்ஞாபெய்ய தங்
விஞ்ஞாணங் ததா²க³தஸ்ஸ பஹீனங் உச்சி²ன்னமூலங் தாலாவத்து²கதங் அனபா⁴வங்கதங்
ஆயதிங் அனுப்பாத³த⁴ம்மங். விஞ்ஞாணஸங்க²யவிமுத்தோ கோ², வச்ச², ததா²க³தோ
க³ம்பீ⁴ரோ அப்பமெய்யோ து³ப்பரியோகா³ள்ஹோ – ஸெய்யதா²பி மஹாஸமுத்³தோ³.
உபபஜ்ஜதீதி ந உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந
உபேதி, நேவ உபபஜ்ஜதி ந ந உபபஜ்ஜதீதி ந உபேதி’’.
ஏவங் வுத்தே, வச்ச²கொ³த்தோ பரிப்³பா³ஜகோ ப⁴க³வந்தங் ஏதத³வோச – ‘‘ஸெய்யதா²பி, போ⁴ கோ³தம, கா³மஸ்ஸ வா நிக³மஸ்ஸ வா அவிதூ³ரே மஹாஸாலருக்கோ². தஸ்ஸ அனிச்சதா ஸாகா²பலாஸா பலுஜ்ஜெய்யுங் [ஸாகா²பலாஸங் பலுஜ்ஜெய்ய], தசபபடிகா பலுஜ்ஜெய்யுங், பெ²க்³கூ³ பலுஜ்ஜெய்யுங் [பெ²க்³கு³ பலுஜ்ஜெய்ய (ஸீ॰ ஸ்யா॰ கங்॰ பீ॰)];
ஸோ அபரேன ஸமயேன அபக³தஸாகா²பலாஸோ அபக³ததசபபடிகோ அபக³தபெ²க்³கு³கோ ஸுத்³தோ⁴
அஸ்ஸ, ஸாரே பதிட்டி²தோ; ஏவமேவ போ⁴தோ கோ³தமஸ்ஸ பாவசனங் அபக³தஸாகா²பலாஸங்
அபக³ததசபபடிகங் அபக³தபெ²க்³கு³கங் ஸுத்³த⁴ங், ஸாரே பதிட்டி²தங்.
அபி⁴க்கந்தங், போ⁴ கோ³தம…பே॰… உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி.
அக்³கி³வச்ச²ஸுத்தங் நிட்டி²தங் து³தியங்.
3. மஹாவச்ச²ஸுத்தங்
193. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² வச்ச²கொ³த்தோ பரிப்³பா³ஜகோ யேன ப⁴க³வா
தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங்
கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ²
வச்ச²கொ³த்தோ பரிப்³பா³ஜகோ ப⁴க³வந்தங் ஏதத³வோச – ‘‘தீ³க⁴ரத்தாஹங் போ⁴தா
கோ³தமேன ஸஹகதீ². ஸாது⁴ மே ப⁴வங் கோ³தமோ ஸங்கி²த்தேன குஸலாகுஸலங்
தே³ஸேதூ’’தி. ‘‘ஸங்கி²த்தேனபி கோ² தே அஹங், வச்ச², குஸலாகுஸலங் தே³ஸெய்யங்,
வித்தா²ரேனபி கோ² தே அஹங், வச்ச², குஸலாகுஸலங் தே³ஸெய்யங்; அபி ச தே அஹங்,
வச்ச², ஸங்கி²த்தேன குஸலாகுஸலங் தே³ஸெஸ்ஸாமி. தங் ஸுணாஹி, ஸாது⁴கங் மனஸி
கரோஹி, பா⁴ஸிஸ்ஸாமீ’’தி. ‘‘ஏவங், போ⁴’’தி கோ² வச்ச²கொ³த்தோ பரிப்³பா³ஜகோ
ப⁴க³வதோ பச்சஸ்ஸோஸி. ப⁴க³வா ஏதத³வோச –
194.
‘‘லோபோ⁴ கோ², வச்ச², அகுஸலங், அலோபோ⁴ குஸலங்; தோ³ஸோ கோ², வச்ச², அகுஸலங்,
அதோ³ஸோ குஸலங்; மோஹோ கோ², வச்ச², அகுஸலங், அமோஹோ குஸலங். இதி கோ², வச்ச²,
இமே தயோ த⁴ம்மா அகுஸலா, தயோ த⁴ம்மா குஸலா.
‘‘பாணாதிபாதோ கோ², வச்ச², அகுஸலங், பாணாதிபாதா வேரமணீ
குஸலங்; அதி³ன்னாதா³னங் கோ², வச்ச², அகுஸலங், அதி³ன்னாதா³னா வேரமணீ குஸலங்;
காமேஸுமிச்சா²சாரோ கோ², வச்ச², அகுஸலங், காமேஸுமிச்சா²சாரா வேரமணீ குஸலங்;
முஸாவாதோ³ கோ², வச்ச², அகுஸலங், முஸாவாதா³ வேரமணீ குஸலங்; பிஸுணா வாசா கோ², வச்ச², அகுஸலங் ,
பிஸுணாய வாசாய வேரமணீ குஸலங்; ப²ருஸா வாசா கோ², வச்ச², அகுஸலங், ப²ருஸாய
வாசாய வேரமணீ குஸலங்; ஸம்ப²ப்பலாபோ கோ², வச்ச², அகுஸலங், ஸம்ப²ப்பலாபா
வேரமணீ குஸலங்; அபி⁴ஜ்ஜா² கோ², வச்ச², அகுஸலங், அனபி⁴ஜ்ஜா² குஸலங்;
ப்³யாபாதோ³ கோ², வச்ச², அகுஸலங், அப்³யாபாதோ³ குஸலங்; மிச்சா²தி³ட்டி² கோ²,
வச்ச², அகுஸலங் ஸம்மாதி³ட்டி² குஸலங். இதி கோ², வச்ச², இமே த³ஸ த⁴ம்மா
அகுஸலா, த³ஸ த⁴ம்மா குஸலா.
‘‘யதோ கோ², வச்ச², பி⁴க்கு²னோ
தண்ஹா பஹீனா ஹோதி உச்சி²ன்னமூலா தாலாவத்து²கதா அனபா⁴வங்கதா ஆயதிங்
அனுப்பாத³த⁴ம்மா, ஸோ ஹோதி பி⁴க்கு² அரஹங் கீ²ணாஸவோ வுஸிதவா கதகரணீயோ
ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா
விமுத்தோ’’தி.
195. ‘‘திட்ட²து ப⁴வங் கோ³தமோ. அத்தி² பன தே போ⁴தோ கோ³தமஸ்ஸ ஏகபி⁴க்கு²பி ஸாவகோ யோ ஆஸவானங் க²யா [ஸாவகோ ஆஸவானங் க²யா (ஸீ॰ ஸ்யா॰ கங்॰ பீ॰) ஏவமுபரிபி] அனாஸவங் சேதோவிமுத்திங் பஞ்ஞாவிமுத்திங்
தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி? ‘‘ந
கோ², வச்ச², ஏகங்யேவ ஸதங் ந த்³வே ஸதானி ந தீணி ஸதானி ந சத்தாரி ஸதானி ந
பஞ்ச ஸதானி, அத² கோ² பி⁴ய்யோவ யே பி⁴க்கூ² மம ஸாவகா ஆஸவானங் க²யா அனாஸவங்
சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரந்தீ’’தி.
‘‘திட்ட²து ப⁴வங் கோ³தமோ, திட்ட²ந்து பி⁴க்கூ². அத்தி²
பன போ⁴தோ கோ³தமஸ்ஸ ஏகா பி⁴க்கு²னீபி ஸாவிகா யா ஆஸவானங் க²யா அனாஸவங்
சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரதீ’’தி? ‘‘ந கோ², வச்ச²,
ஏகங்யேவ ஸதங் ந த்³வே ஸதானி ந தீணி ஸதானி ந சத்தாரி ஸதானி ந பஞ்ச ஸதானி,
அத² கோ² பி⁴ய்யோவ யா பி⁴க்கு²னியோ மம ஸாவிகா ஆஸவானங் க²யா அனாஸவங்
சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரந்தீ’’தி.
‘‘திட்ட²து ப⁴வங் கோ³தமோ, திட்ட²ந்து பி⁴க்கூ²,
திட்ட²ந்து பி⁴க்கு²னியோ. அத்தி² பன போ⁴தோ கோ³தமஸ்ஸ ஏகுபாஸகோபி ஸாவகோ கி³ஹீ
ஓதா³தவஸனோ ப்³ரஹ்மசாரீ யோ பஞ்சன்னங் ஓரம்பா⁴கி³யானங் ஸங்யோஜனானங்
பரிக்க²யா ஓபபாதிகோ தத்த² பரினிப்³பா³யீ அனாவத்தித⁴ம்மோ தஸ்மா லோகா’’தி?
‘‘ந கோ², வச்ச², ஏகங்யேவ ஸதங் ந த்³வே ஸதானி ந தீணி ஸதானி ந சத்தாரி ஸதானி ந
பஞ்ச ஸதானி, அத² கோ² பி⁴ய்யோவ யே உபாஸகா மம ஸாவகா கி³ஹீ ஓதா³தவஸனா
ப்³ரஹ்மசாரினோ பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகா தத்த² பரினிப்³பா³யினோ அனாவத்தித⁴ம்மா தஸ்மா லோகா’’தி.
‘‘திட்ட²து ப⁴வங் கோ³தமோ,
திட்ட²ந்து பி⁴க்கூ², திட்ட²ந்து பி⁴க்கு²னியோ, திட்ட²ந்து உபாஸகா கி³ஹீ
ஓதா³தவஸனா ப்³ரஹ்மசாரினோ. அத்தி² பன போ⁴தோ கோ³தமஸ்ஸ ஏகுபாஸகோபி ஸாவகோ கி³ஹீ
ஓதா³தவஸனோ காமபோ⁴கீ³ ஸாஸனகரோ ஓவாத³ப்படிகரோ யோ திண்ணவிசிகிச்சோ²
விக³தகத²ங்கதோ² வேஸாரஜ்ஜப்பத்தோ அபரப்பச்சயோ ஸத்து²ஸாஸனே விஹரதீ’’தி? ‘‘ந
கோ², வச்ச², ஏகங்யேவ ஸதங் ந த்³வே ஸதானி ந தீணி ஸதானி ந சத்தாரி ஸதானி ந
பஞ்ச ஸதானி , அத² கோ² பி⁴ய்யோவ யே உபாஸகா மம ஸாவகா
கி³ஹீ ஓதா³தவஸனா காமபோ⁴கி³னோ ஸாஸனகரா ஓவாத³ப்படிகரா திண்ணவிசிகிச்சா²
விக³தகத²ங்கதா² வேஸாரஜ்ஜப்பத்தா அபரப்பச்சயா ஸத்து²ஸாஸனே விஹரந்தீ’’தி.
‘‘திட்ட²து ப⁴வங் கோ³தமோ,
திட்ட²ந்து பி⁴க்கூ², திட்ட²ந்து பி⁴க்கு²னியோ, திட்ட²ந்து உபாஸகா கி³ஹீ
ஓதா³தவஸனா ப்³ரஹ்மசாரினோ, திட்ட²ந்து உபாஸகா கி³ஹீ ஓதா³தவஸனா காமபோ⁴கி³னோ.
அத்தி² பன போ⁴தோ கோ³தமஸ்ஸ ஏகுபாஸிகாபி ஸாவிகா கி³ஹினீ ஓதா³தவஸனா
ப்³ரஹ்மசாரினீ யா பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா
ஓபபாதிகா தத்த² பரினிப்³பா³யினீ அனாவத்தித⁴ம்மா தஸ்மா லோகா’’தி? ‘‘ந கோ²,
வச்ச², ஏகங்யேவ ஸதங் ந த்³வே ஸதானி ந தீணி ஸதானி ந சத்தாரி ஸதானி ந பஞ்ச
ஸதானி, அத² கோ² பி⁴ய்யோவ யா உபாஸிகா மம ஸாவிகா கி³ஹினியோ ஓதா³தவஸனா
ப்³ரஹ்மசாரினியோ பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகா
தத்த² பரினிப்³பா³யினியோ அனாவத்தித⁴ம்மா தஸ்மா லோகா’’தி.
‘‘திட்ட²து ப⁴வங் கோ³தமோ, திட்ட²ந்து பி⁴க்கூ²,
திட்ட²ந்து பி⁴க்கு²னியோ, திட்ட²ந்து உபாஸகா கி³ஹீ ஓதா³தவஸனா
ப்³ரஹ்மசாரினோ, திட்ட²ந்து உபாஸகா கி³ஹீ ஓதா³தவஸனா காமபோ⁴கி³னோ, திட்ட²ந்து
உபாஸிகா கி³ஹினியோ ஓதா³தவஸனா ப்³ரஹ்மசாரினியோ. அத்தி² பன போ⁴தோ கோ³தமஸ்ஸ
ஏகுபாஸிகாபி ஸாவிகா கி³ஹினீ ஓதா³தவஸனா காமபோ⁴கி³னீ ஸாஸனகரா ஓவாத³ப்படிகரா
யா திண்ணவிசிகிச்சா² விக³தகத²ங்கதா² வேஸாரஜ்ஜப்பத்தா அபரப்பச்சயா
ஸத்து²ஸாஸனே விஹரதீ’’தி? ‘‘ந கோ², வச்ச², ஏகங்யேவ ஸதங் ந த்³வே
ஸதானி ந தீணி ஸதானி ந சத்தாரி ஸதானி ந பஞ்ச ஸதானி, அத² கோ² பி⁴ய்யோவ யா
உபாஸிகா மம ஸாவிகா கி³ஹினியோ ஓதா³தவஸனா காமபோ⁴கி³னியோ ஸாஸனகரா
ஓவாத³ப்படிகரா திண்ணவிச்சி²கிச்சா² விக³தகத²ங்கதா² வேஸாரஜ்ஜப்பத்தா
அபரப்பச்சயா ஸத்து²ஸாஸனே விஹரந்தீ’’தி.
196. ‘‘ஸசே ஹி, போ⁴ கோ³தம, இமங் த⁴ம்மங் ப⁴வங்யேவ கோ³தமோ ஆராத⁴கோ அப⁴விஸ்ஸ, நோ ச கோ² பி⁴க்கூ² ஆராத⁴கா அப⁴விஸ்ஸங்ஸு ;
ஏவமித³ங் ப்³ரஹ்மசரியங் அபரிபூரங் அப⁴விஸ்ஸ தேனங்கே³ன. யஸ்மா ச கோ², போ⁴
கோ³தம, இமங் த⁴ம்மங் ப⁴வஞ்சேவ கோ³தமோ ஆராத⁴கோ பி⁴க்கூ² ச ஆராத⁴கா; ஏவமித³ங்
ப்³ரஹ்மசரியங் பரிபூரங் தேனங்கே³ன.
‘‘ஸசே ஹி, போ⁴ கோ³தம, இமங் த⁴ம்மங் ப⁴வஞ்சேவ கோ³தமோ
ஆராத⁴கோ அப⁴விஸ்ஸ, பி⁴க்கூ² ச ஆராத⁴கா அப⁴விஸ்ஸங்ஸு, நோ ச கோ² பி⁴க்கு²னியோ
ஆராதி⁴கா அப⁴விஸ்ஸங்ஸு; ஏவமித³ங் ப்³ரஹ்மசரியங் அபரிபூரங் அப⁴விஸ்ஸ
தேனங்கே³ன. யஸ்மா ச கோ², போ⁴ கோ³தம, இமங் த⁴ம்மங் ப⁴வஞ்சேவ கோ³தமோ ஆராத⁴கோ,
பி⁴க்கூ² ச ஆராத⁴கா, பி⁴க்கு²னியோ ச ஆராதி⁴கா; ஏவமித³ங் ப்³ரஹ்மசரியங் பரிபூரங் தேனங்கே³ன.
‘‘ஸசே ஹி, போ⁴ கோ³தம, இமங் த⁴ம்மங் ப⁴வஞ்சேவ கோ³தமோ
ஆராத⁴கோ அப⁴விஸ்ஸ, பி⁴க்கூ² ச ஆராத⁴கா அப⁴விஸ்ஸங்ஸு, பி⁴க்கு²னியோ ச
ஆராதி⁴கா அப⁴விஸ்ஸங்ஸு, நோ ச கோ² உபாஸகா கி³ஹீ ஓதா³தவஸனா ப்³ரஹ்மசாரினோ
ஆராத⁴கா அப⁴விஸ்ஸங்ஸு; ஏவமித³ங் ப்³ரஹ்மசரியங் அபரிபூரங் அப⁴விஸ்ஸ
தேனங்கே³ன. யஸ்மா ச கோ², போ⁴ கோ³தம, இமங் த⁴ம்மங் ப⁴வஞ்சேவ கோ³தமோ ஆராத⁴கோ,
பி⁴க்கூ² ச ஆராத⁴கா, பி⁴க்கு²னியோ ச ஆராதி⁴கா, உபாஸகா ச கி³ஹீ ஓதா³தவஸனா ப்³ரஹ்மசாரினோ ஆராத⁴கா; ஏவமித³ங் ப்³ரஹ்மசரியங் பரிபூரங் தேனங்கே³ன.
‘‘ஸசே ஹி, போ⁴ கோ³தம, இமங் த⁴ம்மங் ப⁴வஞ்சேவ கோ³தமோ
ஆராத⁴கோ அப⁴விஸ்ஸ, பி⁴க்கூ² ச ஆராத⁴கா அப⁴விஸ்ஸங்ஸு, பி⁴க்கு²னியோ ச
ஆராதி⁴கா அப⁴விஸ்ஸங்ஸு, உபாஸகா ச கி³ஹீ ஓதா³தவஸனா ப்³ரஹ்மசாரினோ ஆராத⁴கா
அப⁴விஸ்ஸங்ஸு, நோ ச கோ² உபாஸகா கி³ஹீ ஓதா³தவஸனா காமபோ⁴கி³னோ ஆராத⁴கா
அப⁴விஸ்ஸங்ஸு; ஏவமித³ங் ப்³ரஹ்மசரியங் அபரிபூரங் அப⁴விஸ்ஸ தேனங்கே³ன. யஸ்மா
ச கோ², போ⁴ கோ³தம, இமங் த⁴ம்மங் ப⁴வஞ்சேவ கோ³தமோ ஆராத⁴கோ, பி⁴க்கூ² ச
ஆராத⁴கா, பி⁴க்கு²னியோ ச ஆராதி⁴கா, உபாஸகா ச கி³ஹீ ஓதா³தவஸனா ப்³ரஹ்மசாரினோ
ஆராத⁴கா, உபாஸகா ச கி³ஹீ ஓதா³தவஸனா காமபோ⁴கி³னோ ஆராத⁴கா; ஏவமித³ங்
ப்³ரஹ்மசரியங் பரிபூரங் தேனங்கே³ன.
‘‘ஸசே ஹி, போ⁴ கோ³தம, இமங்
த⁴ம்மங் ப⁴வஞ்சேவ கோ³தமோ ஆராத⁴கோ அப⁴விஸ்ஸ, பி⁴க்கூ² ச ஆராத⁴கா
அப⁴விஸ்ஸங்ஸு, பி⁴க்கு²னியோ ச ஆராதி⁴கா அப⁴விஸ்ஸங்ஸு, உபாஸகா ச கி³ஹீ
ஓதா³தவஸனா ப்³ரஹ்மசாரினோ ஆராத⁴கா அப⁴விஸ்ஸங்ஸு, உபாஸகா ச கி³ஹீ ஓதா³தவஸனா
காமபோ⁴கி³னோ ஆராத⁴கா அப⁴விஸ்ஸங்ஸு, நோ ச கோ² உபாஸிகா கி³ஹினியோ ஓதா³தவஸனா
ப்³ரஹ்மசாரினியோ ஆராதி⁴கா அப⁴விஸ்ஸங்ஸு; ஏவமித³ங்
ப்³ரஹ்மசரியங் அபரிபூரங் அப⁴விஸ்ஸ தேனங்கே³ன. யஸ்மா ச கோ², போ⁴ கோ³தம, இமங்
த⁴ம்மங் ப⁴வஞ்சேவ கோ³தமோ ஆராத⁴கோ, பி⁴க்கூ² ச ஆராத⁴கா, பி⁴க்கு²னியோ ச
ஆராதி⁴கா, உபாஸகா ச கி³ஹீ ஓதா³தவஸனா ப்³ரஹ்மசாரினோ ஆராத⁴கா, உபாஸகா ச கி³ஹீ
ஓதா³தவஸனா காமபோ⁴கி³னோ ஆராத⁴கா , உபாஸிகா ச கி³ஹினியோ ஓதா³தவஸனா ப்³ரஹ்மசாரினியோ ஆராதி⁴கா; ஏவமித³ங் ப்³ரஹ்மசரியங் பரிபூரங் தேனங்கே³ன.
‘‘ஸசே ஹி, போ⁴ கோ³தம, இமங் த⁴ம்மங் ப⁴வஞ்சேவ கோ³தமோ
ஆராத⁴கோ அப⁴விஸ்ஸ, பி⁴க்கூ² ச ஆராத⁴கா அப⁴விஸ்ஸங்ஸு, பி⁴க்கு²னியோ ச
ஆராதி⁴கா அப⁴விஸ்ஸங்ஸு, உபாஸகா ச கி³ஹீ ஓதா³தவஸனா ப்³ரஹ்மசாரினோ ஆராத⁴கா
அப⁴விஸ்ஸங்ஸு, உபாஸகா ச கி³ஹீ ஓதா³தவஸனா காமபோ⁴கி³னோ ஆராத⁴கா அப⁴விஸ்ஸங்ஸு,
உபாஸிகா ச கி³ஹினியோ ஓதா³தவஸனா ப்³ரஹ்மசாரினியோ ஆராதி⁴கா அப⁴விஸ்ஸங்ஸு, நோ
ச கோ² உபாஸிகா கி³ஹினியோ ஓதா³தவஸனா காமபோ⁴கி³னியோ ஆராதி⁴கா அப⁴விஸ்ஸங்ஸு;
ஏவமித³ங் ப்³ரஹ்மசரியங் அபரிபூரங் அப⁴விஸ்ஸ தேனங்கே³ன. யஸ்மா ச கோ², போ⁴
கோ³தம, இமங் த⁴ம்மங் ப⁴வஞ்சேவ கோ³தமோ ஆராத⁴கோ, பி⁴க்கூ² ச ஆராத⁴கா,
பி⁴க்கு²னியோ ச ஆராதி⁴கா, உபாஸகா ச கி³ஹீ ஓதா³தவஸனா ப்³ரஹ்மசாரினோ ஆராத⁴கா,
உபாஸகா ச கி³ஹீ ஓதா³தவஸனா காமபோ⁴கி³னோ ஆராத⁴கா, உபாஸிகா ச கி³ஹினியோ
ஓதா³தவஸனா ப்³ரஹ்மசாரினியோ ஆராதி⁴கா, உபாஸிகா ச கி³ஹினியோ ஓதா³தவஸனா
காமபோ⁴கி³னியோ ஆராதி⁴கா; ஏவமித³ங் ப்³ரஹ்மசரியங் பரிபூரங் தேனங்கே³ன.
197.
‘‘ஸெய்யதா²பி, போ⁴ கோ³தம, க³ங்கா³ நதீ³ ஸமுத்³த³னின்னா ஸமுத்³த³போணா
ஸமுத்³த³பப்³பா⁴ரா ஸமுத்³த³ங் ஆஹச்ச திட்ட²தி, ஏவமேவாயங் போ⁴தோ கோ³தமஸ்ஸ
பரிஸா ஸக³ஹட்ட²பப்³ப³ஜிதா நிப்³பா³னநின்னா நிப்³பா³னபோணா
நிப்³பா³னபப்³பா⁴ரா நிப்³பா³னங் ஆஹச்ச திட்ட²தி. அபி⁴க்கந்தங், போ⁴
கோ³தம…பே॰… ஏஸாஹங் ப⁴வந்தங் கோ³தமங் ஸரணங்
க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. லபெ⁴ய்யாஹங் போ⁴தோ கோ³தமஸ்ஸ ஸந்திகே
பப்³ப³ஜ்ஜங், லபெ⁴ய்யங் உபஸம்பத³’’ந்தி . ‘‘யோ கோ², வச்ச², அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்க²தி
பப்³ப³ஜ்ஜங், ஆகங்க²தி உபஸம்பத³ங், ஸோ சத்தாரோ மாஸே பரிவஸதி. சதுன்னங்
மாஸானங் அச்சயேன ஆரத்³த⁴சித்தா பி⁴க்கூ² பப்³பா³ஜெந்தி உபஸம்பாதெ³ந்தி
பி⁴க்கு²பா⁴வாய; அபி ச மெத்த² புக்³க³லவேமத்ததா விதி³தா’’தி. ‘‘ஸசே,
ப⁴ந்தே, அஞ்ஞதித்தி²யபுப்³பா³ இமஸ்மிங் த⁴ம்மவினயே ஆகங்க²ந்தா பப்³ப³ஜ்ஜங்,
ஆகங்க²ந்தா உபஸம்பத³ங் சத்தாரோ மாஸே பரிவஸந்தி, சதுன்னங் மாஸானங் அச்சயேன
ஆரத்³த⁴சித்தா பி⁴க்கூ² பப்³பா³ஜெந்தி உபஸம்பாதெ³ந்தி பி⁴க்கு²பா⁴வாய; அஹங்
சத்தாரி வஸ்ஸானி பரிவஸிஸ்ஸாமி. சதுன்னங் வஸ்ஸானங் அச்சயேன ஆரத்³த⁴சித்தா
பி⁴க்கூ² பப்³பா³ஜெந்து உபஸம்பாதெ³ந்து பி⁴க்கு²பா⁴வாயா’’தி. அலத்த² கோ²
வச்ச²கொ³த்தோ பரிப்³பா³ஜகோ ப⁴க³வதோ ஸந்திகே பப்³ப³ஜ்ஜங் அலத்த² உபஸம்பத³ங்.
அசிரூபஸம்பன்னோ கோ² பனாயஸ்மா
வச்ச²கொ³த்தோ அத்³த⁴மாஸூபஸம்பன்னோ யேன ப⁴க³வா தேனுபஸங்கமி; உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா
வச்ச²கொ³த்தோ ப⁴க³வந்தங் ஏதத³வோச – ‘‘யாவதகங், ப⁴ந்தே, ஸேகே²ன ஞாணேன ஸேகா²ய
விஜ்ஜாய பத்தப்³ப³ங், அனுப்பத்தங் தங் மயா; உத்தரி ச மே [உத்தரிங் மே (ஸீ॰ ஸ்யா॰ கங்॰ பீ॰)]
ப⁴க³வா த⁴ம்மங் தே³ஸேதூ’’தி. ‘‘தேன ஹி த்வங், வச்ச², த்³வே த⁴ம்மே உத்தரி
பா⁴வேஹி – ஸமத²ஞ்ச விபஸ்ஸனஞ்ச. இமே கோ² தே, வச்ச², த்³வே த⁴ம்மா உத்தரி
பா⁴விதா – ஸமதோ² ச விபஸ்ஸனா ச – அனேகதா⁴துபடிவேதா⁴ய ஸங்வத்திஸ்ஸந்தி.
198. ‘‘ஸோ த்வங், வச்ச², யாவதே³வ [யாவதே³ (பீ॰)]
ஆகங்கி²ஸ்ஸஸி – ‘அனேகவிஹிதங் இத்³தி⁴வித⁴ங் பச்சனுப⁴வெய்யங் – ஏகோபி
ஹுத்வா ப³ஹுதா⁴ அஸ்ஸங், ப³ஹுதா⁴பி ஹுத்வா ஏகோ அஸ்ஸங்; ஆவிபா⁴வங்,
திரோபா⁴வங்; திரோகுட்டங் திரோபாகாரங் திரோபப்³ப³தங் அஸஜ்ஜமானோ
க³ச்செ²ய்யங், ஸெய்யதா²பி ஆகாஸே; பத²வியாபி உம்முஜ்ஜனிமுஜ்ஜங் கரெய்யங்,
ஸெய்யதா²பி உத³கே; உத³கேபி அபி⁴ஜ்ஜமானே க³ச்செ²ய்யங், ஸெய்யதா²பி பத²வியங்;
ஆகாஸேபி பல்லங்கேன கமெய்யங், ஸெய்யதா²பி பக்கீ² ஸகுணோ; இமேபி
சந்தி³மஸூரியே ஏவங்மஹித்³தி⁴கே ஏவங்மஹானுபா⁴வே பாணினா பரிமஸெய்யங்,
பரிமஜ்ஜெய்யங்; யாவப்³ரஹ்மலோகாபி காயேன வஸங் வத்தெய்ய’ந்தி, தத்ர தத்ரேவ
ஸக்கி²ப⁴ப்³ப³தங் பாபுணிஸ்ஸஸி, ஸதி ஸதிஆயதனே.
‘‘ஸோ த்வங், வச்ச², யாவதே³வ ஆகங்கி²ஸ்ஸஸி – ‘தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³ ஸுணெய்யங் – தி³ப்³பே³ ச மானுஸே ச, யே தூ³ரே ஸந்திகே சா’தி, தத்ர தத்ரேவ ஸக்கி²ப⁴ப்³ப³தங் பாபுணிஸ்ஸஸி, ஸதி ஸதிஆயதனே.
‘‘ஸோ த்வங், வச்ச², யாவதே³வ ஆகங்கி²ஸ்ஸஸி – ‘பரஸத்தானங் பரபுக்³க³லானங் சேதஸா சேதோ பரிச்ச பஜானெய்யங் – ஸராக³ங் வா சித்தங் ஸராக³ங்
சித்தந்தி பஜானெய்யங், வீதராக³ங் வா சித்தங் வீதராக³ங் சித்தந்தி
பஜானெய்யங்; ஸதோ³ஸங் வா சித்தங் ஸதோ³ஸங் சித்தந்தி பஜானெய்யங், வீததோ³ஸங்
வா சித்தங் வீததோ³ஸங் சித்தந்தி பஜானெய்யங்; ஸமோஹங் வா சித்தங் ஸமோஹங்
சித்தந்தி பஜானெய்யங், வீதமோஹங் வா சித்தங் வீதமோஹங் சித்தந்தி பஜானெய்யங்;
ஸங்கி²த்தங் வா சித்தங் ஸங்கி²த்தங் சித்தந்தி பஜானெய்யங், விக்கி²த்தங்
வா சித்தங் விக்கி²த்தங் சித்தந்தி பஜானெய்யங்; மஹக்³க³தங் வா சித்தங்
மஹக்³க³தங் சித்தந்தி பஜானெய்யங், அமஹக்³க³தங் வா
சித்தங் அமஹக்³க³தங் சித்தந்தி பஜானெய்யங்; ஸஉத்தரங் வா சித்தங் ஸஉத்தரங்
சித்தந்தி பஜானெய்யங், அனுத்தரங் வா சித்தங் அனுத்தரங் சித்தந்தி
பஜானெய்யங்; ஸமாஹிதங் வா சித்தங் ஸமாஹிதங் சித்தந்தி பஜானெய்யங், அஸமாஹிதங்
வா சித்தங் அஸமாஹிதங் சித்தந்தி பஜானெய்யங்; விமுத்தங் வா சித்தங்
விமுத்தங் சித்தந்தி பஜானெய்யங், அவிமுத்தங் வா சித்தங் அவிமுத்தங்
சித்தந்தி பஜானெய்ய’ந்தி, தத்ர தத்ரேவ ஸக்கி²ப⁴ப்³ப³தங் பாபுணிஸ்ஸஸி, ஸதி
ஸதிஆயதனே.
‘‘ஸோ த்வங், வச்ச², யாவதே³வ ஆகங்கி²ஸ்ஸஸி –
‘அனேகவிஹிதங் புப்³பே³னிவாஸங் அனுஸ்ஸரெய்யங், ஸெய்யதி²த³ங் – ஏகம்பி ஜாதிங்
த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி
ஜாதியோ வீஸம்பி ஜாதியோ திங்ஸம்பி ஜாதியோ சத்தாலீஸம்பி ஜாதியோ பஞ்ஞாஸம்பி
ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி; அனேகேபி ஸங்வட்டகப்பே
அனேகேபி விவட்டகப்பே அனேகேபி ஸங்வட்டவிவட்டகப்பே – அமுத்ராஸிங்
ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³
ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ
ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³
ஏவமாயுபரியந்தோ, ஸோ ததோ சுதோ இதூ⁴பபன்னோதி; இதி ஸாகாரங் ஸஉத்³தே³ஸங்
அனேகவிஹிதங் புப்³பே³னிவாஸங் அனுஸ்ஸரெய்ய’ந்தி, தத்ர தத்ரேவ
ஸக்கி²ப⁴ப்³ப³தங் பாபுணிஸ்ஸஸி, ஸதி ஸதிஆயதனே.
‘‘ஸோ த்வங், வச்ச², யாவதே³வ
ஆகங்கி²ஸ்ஸஸி – ‘தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே
பஸ்ஸெய்யங் சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே
து³க்³க³தே யதா²கம்மூபகே³ ஸத்தே பஜானெய்யங் – இமே வத பொ⁴ந்தோ ஸத்தா
காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன
ஸமன்னாக³தா அரியானங் உபவாத³கா மிச்சா²தி³ட்டி²கா
மிச்சா²தி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா அபாயங்
து³க்³க³திங் வினிபாதங் நிரயங் உபபன்னா; இமே வா பன பொ⁴ந்தோ ஸத்தா
காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா
அரியானங் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா, தே காயஸ்ஸ
பே⁴தா³ பரங் மரணா ஸுக³திங் ஸக்³க³ங் லோகங் உபபன்னாதி; இதி தி³ப்³பே³ன
சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸெய்யங் சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானெய்ய’ந்தி, தத்ர தத்ரேவ ஸக்கி²ப⁴ப்³ப³தங் பாபுணிஸ்ஸஸி, ஸதி ஸதிஆயதனே.
‘‘ஸோ த்வங், வச்ச², யாவதே³வ ஆகங்கி²ஸ்ஸஸி – ‘ஆஸவானங்
க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங்
அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்ய’ந்தி, தத்ர தத்ரேவ
ஸக்கி²ப⁴ப்³ப³தங் பாபுணிஸ்ஸஸி, ஸதி ஸதிஆயதனே’’தி.
199.
அத² கோ² ஆயஸ்மா வச்ச²கொ³த்தோ ப⁴க³வதோ பா⁴ஸிதங் அபி⁴னந்தி³த்வா
அனுமோதி³த்வா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா
பக்காமி. அத² கோ² ஆயஸ்மா வச்ச²கொ³த்தோ ஏகோ வூபகட்டோ² அப்பமத்தோ ஆதாபீ
பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா
அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘கீ²ணா ஜாதி, வுஸிதங்
ப்³ரஹ்மசரியங், கதங் கரணீயங், நாபரங் இத்த²த்தாயா’தி அப்³ப⁴ஞ்ஞாஸி. அஞ்ஞதரோ
கோ² பனாயஸ்மா வச்ச²கொ³த்தோ அரஹதங் அஹோஸி.
200.
தேன கோ² பன ஸமயேன ஸம்ப³ஹுலா பி⁴க்கூ² ப⁴க³வந்தங் த³ஸ்ஸனாய க³ச்ச²ந்தி.
அத்³த³ஸா கோ² ஆயஸ்மா வச்ச²கொ³த்தோ தே பி⁴க்கூ² தூ³ரதோவ ஆக³ச்ச²ந்தே.
தி³ஸ்வான யேன தே பி⁴க்கூ² தேனுபஸங்கமி; உபஸங்கமித்வா தே பி⁴க்கூ² ஏதத³வோச – ‘‘ஹந்த³! கஹங் பன தும்ஹே ஆயஸ்மந்தோ க³ச்ச²தா²’’தி? ‘‘ப⁴க³வந்தங் கோ² மயங், ஆவுஸோ, த³ஸ்ஸனாய க³ச்சா²மா’’தி .
‘‘தேனஹாயஸ்மந்தோ மம வசனேன ப⁴க³வதோ பாதே³ ஸிரஸா வந்த³த², ஏவஞ்ச வதே³த² –
‘வச்ச²கொ³த்தோ, ப⁴ந்தே, பி⁴க்கு² ப⁴க³வதோ பாதே³ ஸிரஸா வந்த³தி, ஏவஞ்ச
வதே³தி – பரிசிண்ணோ மே ப⁴க³வா, பரிசிண்ணோ மே ஸுக³தோ’’’தி. ‘‘ஏவமாவுஸோ’’தி
கோ² தே பி⁴க்கூ² ஆயஸ்மதோ வச்ச²கொ³த்தஸ்ஸ பச்சஸ்ஸோஸுங். அத² கோ² தே
பி⁴க்கூ² யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ²
ப⁴க³வந்தங் ஏதத³வோசுங் – ‘‘ஆயஸ்மா, ப⁴ந்தே, வச்ச²கொ³த்தோ ப⁴க³வதோ பாதே³
ஸிரஸா வந்த³தி, ஏவஞ்ச வதே³தி – ‘பரிசிண்ணோ மே ப⁴க³வா, பரிசிண்ணோ மே
ஸுக³தோ’’’தி. ‘‘புப்³பே³வ மே, பி⁴க்க²வே, வச்ச²கொ³த்தோ பி⁴க்கு² சேதஸா சேதோ
பரிச்ச விதி³தோ – ‘தேவிஜ்ஜோ வச்ச²கொ³த்தோ பி⁴க்கு²
மஹித்³தி⁴கோ மஹானுபா⁴வோ’தி. தே³வதாபி மே ஏதமத்த²ங் ஆரோசேஸுங் – ‘தேவிஜ்ஜோ,
ப⁴ந்தே, வச்ச²கொ³த்தோ பி⁴க்கு² மஹித்³தி⁴கோ மஹானுபா⁴வோ’’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
மஹாவச்ச²ஸுத்தங் நிட்டி²தங் ததியங்.
4. தீ³க⁴னக²ஸுத்தங்
201. ஏவங்
மே ஸுதங் – ஏகங் ஸமயங் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே
ஸூகரக²தாயங். அத² கோ² தீ³க⁴னகோ² பரிப்³பா³ஜகோ யேன ப⁴க³வா தேனுபஸங்கமி;
உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங்
வீதிஸாரெத்வா ஏகமந்தங் அட்டா²ஸி. ஏகமந்தங் டி²தோ கோ² தீ³க⁴னகோ²
பரிப்³பா³ஜகோ ப⁴க³வந்தங் ஏதத³வோச – ‘‘அஹஞ்ஹி, போ⁴ கோ³தம, ஏவங்வாதீ³
ஏவங்தி³ட்டி² – ‘ஸப்³ப³ங் மே நக்க²மதீ’’’தி. ‘‘யாபி கோ² தே ஏஸா,
அக்³கி³வெஸ்ஸன, தி³ட்டி² – ‘ஸப்³ப³ங் மே நக்க²மதீ’தி, ஏஸாபி தே தி³ட்டி²
நக்க²மதீ’’தி? ‘‘ஏஸா சே [ஏஸாபி (க॰)] மே, போ⁴ கோ³தம, தி³ட்டி² க²மெய்ய, தங்பஸ்ஸ தாதி³ஸமேவ, தங்பஸ்ஸ
தாதி³ஸமேவா’’தி. ‘‘அதோ கோ² தே, அக்³கி³வெஸ்ஸன, ப³ஹூ ஹி ப³ஹுதரா லோகஸ்மிங்
யே ஏவமாஹங்ஸு – ‘தங்பஸ்ஸ தாதி³ஸமேவ, தங்பஸ்ஸ தாதி³ஸமேவா’தி. தே தஞ்சேவ
தி³ட்டி²ங் நப்பஜஹந்தி அஞ்ஞஞ்ச தி³ட்டி²ங் உபாதி³யந்தி. அதோ கோ² தே,
அக்³கி³வெஸ்ஸன, தனூ ஹி தனுதரா லோகஸ்மிங் யே ஏவமாஹங்ஸு – ‘தங்பஸ்ஸ
தாதி³ஸமேவ, தங்பஸ்ஸ தாதி³ஸமேவா’தி. தே தஞ்சேவ தி³ட்டி²ங் பஜஹந்தி அஞ்ஞஞ்ச
தி³ட்டி²ங் ந உபாதி³யந்தி. ஸந்தக்³கி³வெஸ்ஸன, ஏகே ஸமணப்³ராஹ்மணா
ஏவங்வாதி³னோ ஏவங்தி³ட்டி²னோ – ‘ஸப்³ப³ங் மே க²மதீ’தி; ஸந்தக்³கி³வெஸ்ஸன,
ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ஸப்³ப³ங் மே நக்க²மதீ’தி;
ஸந்தக்³கி³வெஸ்ஸன , ஏகே ஸமணப்³ராஹ்மணா ஏவங்வாதி³னோ
ஏவங்தி³ட்டி²னோ – ‘ஏகச்சங் மே க²மதி, ஏகச்சங் மே நக்க²மதீ’தி.
தத்ரக்³கி³வெஸ்ஸன, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ –
‘ஸப்³ப³ங் மே க²மதீ’தி தேஸமயங் தி³ட்டி² ஸாராகா³ய ஸந்திகே, ஸஞ்ஞோகா³ய
ஸந்திகே, அபி⁴னந்த³னாய ஸந்திகே அஜ்ஜோ²ஸானாய ஸந்திகே
உபாதா³னாய ஸந்திகே; தத்ரக்³கி³வெஸ்ஸன யே தே ஸமணப்³ராஹ்மணா ஏவங்வாதி³னோ
ஏவங்தி³ட்டி²னோ – ‘ஸப்³ப³ங் மே நக்க²மதீ’தி தேஸமயங் தி³ட்டி² அஸாராகா³ய
ஸந்திகே, அஸஞ்ஞோகா³ய ஸந்திகே, அனபி⁴னந்த³னாய ஸந்திகே, அனஜ்ஜோ²ஸானாய
ஸந்திகே, அனுபாதா³னாய ஸந்திகே’’தி.
202. ஏவங் வுத்தே, தீ³க⁴னகோ² பரிப்³பா³ஜகோ ப⁴க³வந்தங் ஏதத³வோச – ‘‘உக்கங்ஸேதி [உக்கங்ஸதி (ஸீ॰ பீ॰ க॰)] மே ப⁴வங் கோ³தமோ தி³ட்டி²க³தங், ஸமுக்கங்ஸேதி [ஸம்பஹங்ஸதி (க॰)]
மே ப⁴வங் கோ³தமோ தி³ட்டி²க³த’’ந்தி. ‘‘தத்ரக்³கி³வெஸ்ஸன, யே தே
ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ஏகச்சங் மே க²மதி, ஏகச்சங் மே
நக்க²மதீ’தி. யா ஹி தேஸங் க²மதி ஸாயங் தி³ட்டி²
ஸாராகா³ய ஸந்திகே, ஸஞ்ஞோகா³ய ஸந்திகே, அபி⁴னந்த³னாய ஸந்திகே, அஜ்ஜோ²ஸானாய
ஸந்திகே, உபாதா³னாய ஸந்திகே; யா ஹி தேஸங் நக்க²மதி ஸாயங் தி³ட்டி²
அஸாராகா³ய ஸந்திகே, அஸஞ்ஞோகா³ய ஸந்திகே, அனபி⁴னந்த³னாய ஸந்திகே,
அனஜ்ஜோ²ஸானாய ஸந்திகே, அனுபாதா³னாய ஸந்திகே. தத்ரக்³கி³வெஸ்ஸன, யே தே
ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ஸப்³ப³ங் மே க²மதீ’தி தத்த²
விஞ்ஞூ புரிஸோ இதி படிஸஞ்சிக்க²தி – ‘யா கோ² மே
அயங் தி³ட்டி² – ஸப்³ப³ங் மே க²மதீதி, இமஞ்சே அஹங் தி³ட்டி²ங் தா²மஸா
பராமாஸா அபி⁴னிவிஸ்ஸ வோஹரெய்யங் – இத³மேவ ஸச்சங் மோக⁴மஞ்ஞந்தி; த்³வீஹி மே
அஸ்ஸ விக்³க³ஹோ – யோ சாயங் ஸமணோ வா ப்³ராஹ்மணோ வா ஏவங்வாதீ³
ஏவங்தி³ட்டி² – ஸப்³ப³ங் மே நக்க²மதீதி, யோ சாயங் ஸமணோ வா ப்³ராஹ்மணோ வா
ஏவங்வாதீ³ ஏவங்தி³ட்டி² – ஏகச்சங் மே க²மதி, ஏகச்சங் மே நக்க²மதீதி – இமேஹி
அஸ்ஸ த்³வீஹி விக்³க³ஹோ. இதி விக்³க³ஹே ஸதி விவாதோ³, விவாதே³ ஸதி விகா⁴தோ,
விகா⁴தே ஸதி விஹேஸா’. இதி ஸோ விக்³க³ஹஞ்ச விவாத³ஞ்ச விகா⁴தஞ்ச விஹேஸஞ்ச
அத்தனி ஸம்பஸ்ஸமானோ தஞ்சேவ தி³ட்டி²ங் பஜஹதி அஞ்ஞஞ்ச தி³ட்டி²ங் ந
உபாதி³யதி. ஏவமேதாஸங் தி³ட்டீ²னங் பஹானங் ஹோதி, ஏவமேதாஸங் தி³ட்டீ²னங்
படினிஸ்ஸக்³கோ³ ஹோதி.
203.
‘‘தத்ரக்³கி³வெஸ்ஸன, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ –
‘ஸப்³ப³ங் மே நக்க²மதீ’தி தத்த² விஞ்ஞூ புரிஸோ இதி படிஸஞ்சிக்க²தி – ‘யா
கோ² மே அயங் தி³ட்டி² – ஸப்³ப³ங் மே நக்க²மதீ’தி, இமஞ்சே அஹங் தி³ட்டி²ங்
தா²மஸா பராமாஸா அபி⁴னிவிஸ்ஸ வோஹரெய்யங் – இத³மேவ ஸச்சங் மோக⁴மஞ்ஞந்தி;
த்³வீஹி மே அஸ்ஸ விக்³க³ஹோ – யோ சாயங் ஸமணோ வா ப்³ராஹ்மணோ வா ஏவங்வாதீ³
ஏவங்தி³ட்டி² – ஸப்³ப³ங் மே க²மதீதி, யோ சாயங் ஸமணோ
வா ப்³ராஹ்மணோ வா ஏவங்வாதீ³ ஏவங்தி³ட்டி² – ஏகச்சங் மே க²மதி ஏகச்சங் மே
நக்க²மதீதி – இமேஹி அஸ்ஸ த்³வீஹி விக்³க³ஹோ. இதி விக்³க³ஹே ஸதி விவாதோ³,
விவாதே³ ஸதி விகா⁴தோ, விகா⁴தே ஸதி விஹேஸா’. இதி ஸோ விக்³க³ஹஞ்ச விவாத³ஞ்ச
விகா⁴தஞ்ச விஹேஸஞ்ச அத்தனி ஸம்பஸ்ஸமானோ தஞ்சேவ தி³ட்டி²ங் பஜஹதி அஞ்ஞஞ்ச
தி³ட்டி²ங் ந உபாதி³யதி. ஏவமேதாஸங் தி³ட்டீ²னங் பஹானங் ஹோதி, ஏவமேதாஸங்
தி³ட்டீ²னங் படினிஸ்ஸக்³கோ³ ஹோதி.
204.
‘‘தத்ரக்³கி³வெஸ்ஸன, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ –
‘ஏகச்சங் மே க²மதி, ஏகச்சங் மே நக்க²மதீ’தி தத்த² விஞ்ஞூ புரிஸோ இதி
படிஸஞ்சிக்க²தி – ‘யா கோ² மே அயங் தி³ட்டி² –
ஏகச்சங் மே க²மதி, ஏகச்சங் மே நக்க²மதீதி, இமஞ்சே அஹங் தி³ட்டி²ங் தா²மஸா
பராமாஸா அபி⁴னிவிஸ்ஸ வோஹரெய்யங் – இத³மேவ ஸச்சங் மோக⁴மஞ்ஞந்தி; த்³வீஹி மே
அஸ்ஸ விக்³க³ஹோ – யோ சாயங் ஸமணோ வா ப்³ராஹ்மணோ வா ஏவங்வாதீ³ ஏவங்தி³ட்டி² –
ஸப்³ப³ங் மே க²மதீதி, யோ சாயங் ஸமணோ வா ப்³ராஹ்மணோ வா ஏவங்வாதீ³
ஏவங்தி³ட்டி² – ஸப்³ப³ங் மே நக்க²மதீதி – இமேஹி அஸ்ஸ த்³வீஹி விக்³க³ஹோ.
இதி விக்³க³ஹே ஸதி விவாதோ³, விவாதே³ ஸதி விகா⁴தோ, விகா⁴தே ஸதி விஹேஸா’. இதி
ஸோ விக்³க³ஹஞ்ச விவாத³ஞ்ச விகா⁴தஞ்ச விஹேஸஞ்ச அத்தனி ஸம்பஸ்ஸமானோ தஞ்சேவ
தி³ட்டி²ங் பஜஹதி அஞ்ஞஞ்ச தி³ட்டி²ங் ந உபாதி³யதி. ஏவமேதாஸங் தி³ட்டீ²னங்
பஹானங் ஹோதி, ஏவமேதாஸங் தி³ட்டீ²னங் படினிஸ்ஸக்³கோ³ ஹோதி.
205. ‘‘அயங் கோ² பனக்³கி³வெஸ்ஸன, காயோ ரூபீ சாதுமஹாபூ⁴திகோ [சாதும்மஹாபூ⁴திகோ (ஸீ॰ ஸ்யா॰)]
மாதாபெத்திகஸம்ப⁴வோ ஓத³னகும்மாஸுபசயோ
அனிச்சுச்சா²த³னபரிமத்³த³னபே⁴த³னவித்³த⁴ங்ஸனத⁴ம்மோ, அனிச்சதோ து³க்க²தோ
ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ
ஸமனுபஸ்ஸிதப்³போ³ . தஸ்ஸிமங் காயங் அனிச்சதோ
து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ
அனத்ததோ ஸமனுபஸ்ஸதோ யோ காயஸ்மிங் காயச²ந்தோ³ காயஸ்னேஹோ காயன்வயதா ஸா
பஹீயதி.
‘‘திஸ்ஸோ கோ² இமா, அக்³கி³வெஸ்ஸன, வேத³னா – ஸுகா²
வேத³னா, து³க்கா² வேத³னா, அது³க்க²மஸுகா² வேத³னா. யஸ்மிங், அக்³கி³வெஸ்ஸன,
ஸமயே ஸுக²ங் வேத³னங் வேதே³தி , நேவ தஸ்மிங் ஸமயே
து³க்க²ங் வேத³னங் வேதே³தி, ந அது³க்க²மஸுக²ங் வேத³னங் வேதே³தி; ஸுக²ங்யேவ
தஸ்மிங் ஸமயே வேத³னங் வேதே³தி. யஸ்மிங், அக்³கி³வெஸ்ஸன, ஸமயே து³க்க²ங்
வேத³னங் வேதே³தி, நேவ தஸ்மிங் ஸமயே ஸுக²ங் வேத³னங் வேதே³தி, ந
அது³க்க²மஸுக²ங் வேத³னங் வேதே³தி; து³க்க²ங்யேவ தஸ்மிங் ஸமயே வேத³னங்
வேதே³தி. யஸ்மிங், அக்³கி³வெஸ்ஸன, ஸமயே அது³க்க²மஸுக²ங் வேத³னங் வேதே³தி,
நேவ தஸ்மிங் ஸமயே ஸுக²ங் வேத³னங் வேதே³தி, ந து³க்க²ங் வேத³னங் வேதே³தி;
அது³க்க²மஸுக²ங்யேவ தஸ்மிங் ஸமயே வேத³னங் வேதே³தி. ஸுகா²பி கோ²,
அக்³கி³வெஸ்ஸன, வேத³னா அனிச்சா ஸங்க²தா படிச்சஸமுப்பன்னா க²யத⁴ம்மா
வயத⁴ம்மா விராக³த⁴ம்மா நிரோத⁴த⁴ம்மா; து³க்கா²பி கோ², அக்³கி³வெஸ்ஸன,
வேத³னா அனிச்சா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா
நிரோத⁴த⁴ம்மா; அது³க்க²மஸுகா²பி கோ², அக்³கி³வெஸ்ஸன, வேத³னா அனிச்சா
ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா.
ஏவங் பஸ்ஸங், அக்³கி³வெஸ்ஸன, ஸுதவா அரியஸாவகோ ஸுகா²யபி வேத³னாய
நிப்³பி³ந்த³தி, து³க்கா²யபி வேத³னாய நிப்³பி³ந்த³தி, அது³க்க²மஸுகா²யபி
வேத³னாய நிப்³பி³ந்த³தி ;
நிப்³பி³ந்த³ங் விரஜ்ஜதி, விராகா³ விமுச்சதி. விமுத்தஸ்மிங், விமுத்தமிதி
ஞாணங் ஹோதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங்
இத்த²த்தாயா’தி பஜானாதி. ஏங் விமுத்தசித்தோ கோ², அக்³கி³வெஸ்ஸன, பி⁴க்கு² ந
கேனசி ஸங்வத³தி, ந கேனசி விவத³தி, யஞ்ச லோகே வுத்தங் தேன வோஹரதி,
அபராமஸ’’ந்தி.
206. தேன கோ² பன ஸமயேன ஆயஸ்மா ஸாரிபுத்தோ ப⁴க³வதோ பிட்டி²தோ டி²தோ ஹோதி ப⁴க³வந்தங் பீ³ஜயமானோ [வீஜயமானோ (ஸீ॰ பீ॰)].
அத² கோ² ஆயஸ்மதோ ஸாரிபுத்தஸ்ஸ ஏதத³ஹோஸி – ‘‘தேஸங் தேஸங் கிர நோ ப⁴க³வா
த⁴ம்மானங் அபி⁴ஞ்ஞா பஹானமாஹ, தேஸங் தேஸங் கிர நோ ஸுக³தோ த⁴ம்மானங் அபி⁴ஞ்ஞா
படினிஸ்ஸக்³க³மாஹா’’தி. இதி ஹித³ங் ஆயஸ்மதோ ஸாரிபுத்தஸ்ஸ படிஸஞ்சிக்க²தோ
அனுபாதா³ய ஆஸவேஹி சித்தங் விமுச்சி. தீ³க⁴னக²ஸ்ஸ பன பரிப்³பா³ஜகஸ்ஸ விரஜங்
வீதமலங் த⁴ம்மசக்கு²ங் உத³பாதி³ – ‘‘யங் கிஞ்சி ஸமுத³யத⁴ம்மங் ஸப்³ப³ங் தங்
நிரோத⁴த⁴ம்ம’’ந்தி. அத² கோ² தீ³க⁴னகோ² பரிப்³பா³ஜகோ தி³ட்ட²த⁴ம்மோ
பத்தத⁴ம்மோ விதி³தத⁴ம்மோ பரியோகா³ள்ஹத⁴ம்மோ திண்ணவிசிகிச்சோ²
விக³தகத²ங்கதோ² வேஸாரஜ்ஜப்பத்தோ அபரப்பச்சயோ ஸத்து²ஸாஸனே ப⁴க³வந்தங்
ஏதத³வோச – ‘‘அபி⁴க்கந்தங், போ⁴ கோ³தம, அபி⁴க்கந்தங், போ⁴ கோ³தம!
ஸெய்யதா²பி, போ⁴ கோ³தம, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா
விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய – சக்கு²மந்தோ ரூபானி த³க்க²ந்தீதி – ஏவமேவ கோ² போ⁴தா கோ³தமேன அனேகபரியாயேன
த⁴ம்மோ பகாஸிதோ. ஏஸாஹங் ப⁴வந்தங் கோ³தமங் ஸரணங் க³ச்சா²மி த⁴ம்மஞ்ச
பி⁴க்கு²ஸங்க⁴ஞ்ச. உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³ பாணுபேதங்
ஸரணங் க³த’’ந்தி.
தீ³க⁴னக²ஸுத்தங் நிட்டி²தங் சதுத்த²ங்.
5. மாக³ண்டி³யஸுத்தங்
207. ஏவங்
மே ஸுதங் – ஏகங் ஸமயங் ப⁴க³வா குரூஸு விஹரதி கம்மாஸத⁴ம்மங் நாம குரூனங்
நிக³மோ, பா⁴ரத்³வாஜகொ³த்தஸ்ஸ ப்³ராஹ்மணஸ்ஸ அக்³யாகா³ரே திணஸந்தா²ரகே [திணஸந்த²ரகே (ஸீ॰ ஸ்யா॰ கங்॰ பீ॰)].
அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய கம்மாஸத⁴ம்மங்
பிண்டா³ய பாவிஸி. கம்மாஸத⁴ம்மங் பிண்டா³ய சரித்வா பச்சா²ப⁴த்தங்
பிண்ட³பாதபடிக்கந்தோ யேன அஞ்ஞதரோ வனஸண்டோ³ தேனுபஸங்கமி தி³வாவிஹாராய. தங்
வனஸண்ட³ங் அஜ்ஜோ²கா³ஹெத்வா அஞ்ஞதரஸ்மிங் ருக்க²மூலே தி³வாவிஹாரங் நிஸீதி³.
அத² கோ² மாக³ண்டி³யோ [மாக³ந்தி³யோ (ஸீ॰ பீ॰)]
பரிப்³பா³ஜகோ ஜங்கா⁴விஹாரங் அனுசங்கமமானோ அனுவிசரமானோ யேன
பா⁴ரத்³வாஜகொ³த்தஸ்ஸ ப்³ராஹ்மணஸ்ஸ அக்³யாகா³ரங் தேனுபஸங்கமி. அத்³த³ஸா கோ²
மாக³ண்டி³யோ பரிப்³பா³ஜகோ பா⁴ரத்³வாஜகொ³த்தஸ்ஸ ப்³ராஹ்மணஸ்ஸ அக்³யாகா³ரே
திணஸந்தா²ரகங் பஞ்ஞத்தங். தி³ஸ்வான பா⁴ரத்³வாஜகொ³த்தங் ப்³ராஹ்மணங் ஏதத³வோச
– ‘‘கஸ்ஸ ந்வயங் போ⁴தோ பா⁴ரத்³வாஜஸ்ஸ அக்³யாகா³ரே திணஸந்தா²ரகோ பஞ்ஞத்தோ,
ஸமணஸெய்யானுரூபங் [ஸமணஸெய்யாரூபங் (ஸீ॰ பீ॰)]
மஞ்ஞே’’தி? ‘‘அத்தி², போ⁴ மாக³ண்டி³ய, ஸமணோ கோ³தமோ ஸக்யபுத்தோ ஸக்யகுலா
பப்³ப³ஜிதோ. தங் கோ² பன ப⁴வந்தங் கோ³தமங் ஏவங் கல்யாணோ கித்திஸத்³தோ³
அப்³பு⁴க்³க³தோ – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴
விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி²
ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி. தஸ்ஸேஸா போ⁴தோ கோ³தமஸ்ஸ
ஸெய்யா பஞ்ஞத்தா’’தி. ‘‘து³த்³தி³ட்ட²ங் வத, போ⁴ பா⁴ரத்³வாஜ, அத்³த³ஸாம;
து³த்³தி³ட்ட²ங் வத, போ⁴ பா⁴ரத்³வாஜ, அத்³த³ஸாம! யே மயங் தஸ்ஸ போ⁴தோ
கோ³தமஸ்ஸ பூ⁴னஹுனோ [பூ⁴னஹனஸ்ஸ (ஸ்யா॰ கங்॰)] ஸெய்யங் அத்³த³ஸாமா’’தி. ‘‘ரக்க²ஸ்ஸேதங், மாக³ண்டி³ய, வாசங்; ரக்க²ஸ்ஸேதங் ,
மாக³ண்டி³ய, வாசங். ப³ஹூ ஹி தஸ்ஸ போ⁴தோ கோ³தமஸ்ஸ க²த்தியபண்டி³தாபி
ப்³ராஹ்மணபண்டி³தாபி க³ஹபதிபண்டி³தாபி ஸமணபண்டி³தாபி அபி⁴ப்பஸன்னா வினீதா
அரியே ஞாயே த⁴ம்மே குஸலே’’தி. ‘‘ஸம்முகா² சேபி மயங், போ⁴ பா⁴ரத்³வாஜ, தங்
ப⁴வந்தங் கோ³தமங் பஸ்ஸெய்யாம, ஸம்முகா²பி நங் வதெ³ய்யாம – ‘பூ⁴னஹு [பூ⁴னஹனோ (ஸ்யா॰ கங்॰)] ஸமணோ கோ³தமோ’தி. தங் கிஸ்ஸ ஹேது? ஏவஞ்ஹி நோ ஸுத்தே ஓசரதீ’’தி. ‘‘ஸசே தங் போ⁴தோ மாக³ண்டி³யஸ்ஸ அக³ரு ஆரோசெய்யாமி தங் [ஆரோசெய்யமேதங் (ஸீ॰ பீ॰), ஆரோசெஸ்ஸாமி தஸ்ஸ (ஸ்யா॰ கங்॰)] ஸமணஸ்ஸ கோ³தமஸ்ஸா’’தி. ‘‘அப்பொஸ்ஸுக்கோ ப⁴வங் பா⁴ரத்³வாஜோ வுத்தோவ நங் வதெ³ய்யா’’தி.
208. அஸ்ஸோஸி கோ² ப⁴க³வா தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய பா⁴ரத்³வாஜகொ³த்தஸ்ஸ
ப்³ராஹ்மணஸ்ஸ மாக³ண்டி³யேன பரிப்³பா³ஜகேன ஸத்³தி⁴ங் இமங் கதா²ஸல்லாபங்.
அத² கோ² ப⁴க³வா ஸாயன்ஹஸமயங் படிஸல்லானா வுட்டி²தோ யேன பா⁴ரத்³வாஜகொ³த்தஸ்ஸ
ப்³ராஹ்மணஸ்ஸ அக்³யாகா³ரங் தேனுபஸங்கமி; உபஸங்கமித்வா நிஸீதி³ ப⁴க³வா
பஞ்ஞத்தே திணஸந்தா²ரகே. அத² கோ² பா⁴ரத்³வாஜகொ³த்தோ ப்³ராஹ்மணோ யேன ப⁴க³வா
தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங்
ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங்
நிஸின்னங் கோ² பா⁴ரத்³வாஜகொ³த்தங் ப்³ராஹ்மணங் ப⁴க³வா ஏதத³வோச – ‘‘அஹு பன
தே, பா⁴ரத்³வாஜ, மாக³ண்டி³யேன பரிப்³பா³ஜகேன ஸத்³தி⁴ங்
இமங்யேவ திணஸந்தா²ரகங் ஆரப்³ப⁴ கோசிதே³வ கதா²ஸல்லாபோ’’தி? ஏவங் வுத்தே,
பா⁴ரத்³வாஜகொ³த்தோ ப்³ராஹ்மணோ ஸங்விக்³கோ³ லோமஹட்ட²ஜாதோ ப⁴க³வந்தங் ஏதத³வோச
– ‘‘ஏததே³வ கோ² பன மயங் போ⁴தோ கோ³தமஸ்ஸ ஆரோசேதுகாமா. அத² ச பன ப⁴வங்
கோ³தமோ அனக்கா²தங்யேவ அக்கா²ஸீ’’தி. அயஞ்ச ஹி [அயஞ்ச ஹித³ங் (ஸீ॰ ஸ்யா॰ கங்॰ பீ॰)]
ப⁴க³வதோ பா⁴ரத்³வாஜகொ³த்தேன ப்³ராஹ்மணேன ஸத்³தி⁴ங் அந்தராகதா² விப்பகதா
ஹோதி. அத² கோ² மாக³ண்டி³யோ பரிப்³பா³ஜகோ ஜங்கா⁴விஹாரங் அனுசங்கமமானோ
அனுவிசரமானோ யேன பா⁴ரத்³வாஜகொ³த்தஸ்ஸ ப்³ராஹ்மணஸ்ஸ அக்³யாகா³ரங் யேன ப⁴க³வா
தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங்
கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னங் கோ²
மாக³ண்டி³யங் பரிப்³பா³ஜகங் ப⁴க³வா ஏதத³வோச –
209. ‘‘சக்கு²ங்
கோ², மாக³ண்டி³ய, ரூபாராமங் ரூபரதங் ரூபஸம்முதி³தங். தங் ததா²க³தஸ்ஸ
த³ந்தங் கு³த்தங் ரக்கி²தங் ஸங்வுதங், தஸ்ஸ ச ஸங்வராய த⁴ம்மங் தே³ஸேதி.
இத³ங் நு தே ஏதங், மாக³ண்டி³ய, ஸந்தா⁴ய பா⁴ஸிதங் – ‘பூ⁴னஹு ஸமணோ
கோ³தமோ’’’தி? ‘‘ஏததே³வ கோ² பன மே, போ⁴ கோ³தம, ஸந்தா⁴ய பா⁴ஸிதங் – ‘பூ⁴னஹு
ஸமணோ கோ³தமோ’தி. தங் கிஸ்ஸ ஹேது? ஏவஞ்ஹி நோ ஸுத்தே ஓசரதீ’’தி. ‘‘ஸோதங் கோ²,
மாக³ண்டி³ய, ஸத்³தா³ராமங்…பே॰… கா⁴னங்.20273 கோ², மாக³ண்டி³ய
க³ந்தா⁴ராமங்… ஜிவ்ஹா கோ², மாக³ண்டி³ய, ரஸாராமா ரஸரதா ரஸஸம்முதி³தா. ஸா
ததா²க³தஸ்ஸ த³ந்தா கு³த்தா ரக்கி²தா ஸங்வுதா, தஸ்ஸா ச ஸங்வராய த⁴ம்மங்
தே³ஸேதி. இத³ங் நு தே ஏதங், மாக³ண்டி³ய, ஸந்தா⁴ய பா⁴ஸிதங் – ‘பூ⁴னஹு ஸமணோ
கோ³தமோ’’’தி? ‘‘ஏததே³வ கோ² பன மே, போ⁴ கோ³தம, ஸந்தா⁴ய பா⁴ஸிதங் – ‘பூ⁴னஹு
ஸமணோ கோ³தமோ’தி. தங் கிஸ்ஸ ஹேது? ஏவஞ்ஹி நோ ஸுத்தே ஓசரதீ’’தி. ‘‘காயோ கோ²,
மாக³ண்டி³ய, பொ²ட்ட²ப்³பா³ராமோ பொ²ட்ட²ப்³ப³ரதோ…பே॰… மனோ கோ², மாக³ண்டி³ய,
த⁴ம்மாராமோ த⁴ம்மரதோ த⁴ம்மஸம்முதி³தோ. ஸோ ததா²க³தஸ்ஸ த³ந்தோ கு³த்தோ
ரக்கி²தோ ஸங்வுதோ, தஸ்ஸ ச ஸங்வராய த⁴ம்மங் தே³ஸேதி. இத³ங் நு தே ஏதங்,
மாக³ண்டி³ய, ஸந்தா⁴ய பா⁴ஸிதங் – ‘பூ⁴னஹு ஸமணோ கோ³தமோ’’’தி? ‘‘ஏததே³வ கோ² பன
மே, போ⁴ கோ³தம, ஸந்தா⁴ய பா⁴ஸிதங் – ‘பூ⁴னஹு ஸமணோ கோ³தமோ’தி. தங் கிஸ்ஸ ஹேது? ஏவஞ்ஹி நோ ஸுத்தே ஓசரதீ’’தி.
210. ‘‘தங் கிங் மஞ்ஞஸி, மாக³ண்டி³ய – ‘இதே⁴கச்சோ சக்கு²விஞ்ஞெய்யேஹி
ரூபேஹி பரிசாரிதபுப்³போ³ அஸ்ஸ இட்டே²ஹி கந்தேஹி மனாபேஹி பியரூபேஹி
காமூபஸங்ஹிதேஹி ரஜனீயேஹி, ஸோ அபரேன ஸமயேன ரூபானங்யேவ ஸமுத³யஞ்ச
அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் விதி³த்வா
ரூபதண்ஹங் பஹாய ரூபபரிளாஹங் படிவினோதெ³த்வா விக³தபிபாஸோ அஜ்ஜ²த்தங்
வூபஸந்தசித்தோ விஹரெய்ய. இமஸ்ஸ பன தே, மாக³ண்டி³ய, கிமஸ்ஸ வசனீய’’’ந்தி?
‘‘ந கிஞ்சி, போ⁴ கோ³தம’’. ‘‘தங் கிங் மஞ்ஞஸி, மாக³ண்டி³ய – ‘இதே⁴கச்சோ
ஸோதவிஞ்ஞெய்யேஹி ஸத்³தே³ஹி…பே॰… கா⁴னவிஞ்ஞெய்யேஹி
க³ந்தே⁴ஹி… ஜிவ்ஹாவிஞ்ஞெய்யேஹி ரஸேஹி… காயவிஞ்ஞெய்யேஹி பொ²ட்ட²ப்³பே³ஹி
பரிசாரிதபுப்³போ³ அஸ்ஸ இட்டே²ஹி கந்தேஹி மனாபேஹி பியரூபேஹி காமூபஸங்ஹிதேஹி
ரஜனீயேஹி, ஸோ அபரேன ஸமயேன பொ²ட்ட²ப்³பா³னங்யேவ ஸமுத³யஞ்ச அத்த²ங்க³மஞ்ச
அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் விதி³த்வா பொ²ட்ட²ப்³ப³தண்ஹங்
பஹாய பொ²ட்ட²ப்³ப³பரிளாஹங் படிவினோதெ³த்வா விக³தபிபாஸோ அஜ்ஜ²த்தங்
வூபஸந்தசித்தோ விஹரெய்ய. இமஸ்ஸ பன தே, மாக³ண்டி³ய, கிமஸ்ஸ வசனீய’’’ந்தி?
‘‘ந கிஞ்சி, போ⁴ கோ³தம’’.
211. ‘‘அஹங்
கோ² பன, மாக³ண்டி³ய, புப்³பே³ அகா³ரியபூ⁴தோ ஸமானோ பஞ்சஹி காமகு³ணேஹி
ஸமப்பிதோ ஸமங்கீ³பூ⁴தோ பரிசாரேஸிங் சக்கு²விஞ்ஞெய்யேஹி ரூபேஹி இட்டே²ஹி
கந்தேஹி மனாபேஹி பியரூபேஹி காமூபஸங்ஹிதேஹி ரஜனீயேஹி, ஸோதவிஞ்ஞெய்யேஹி
ஸத்³தே³ஹி…பே॰… கா⁴னவிஞ்ஞெய்யேஹி க³ந்தே⁴ஹி… ஜிவ்ஹாவிஞ்ஞெய்யேஹி ரஸேஹி…
காயவிஞ்ஞெய்யேஹி பொ²ட்ட²ப்³பே³ஹி இட்டே²ஹி கந்தேஹி மனாபேஹி பியரூபேஹி
காமூபஸங்ஹிதேஹி ரஜனீயேஹி. தஸ்ஸ மய்ஹங், மாக³ண்டி³ய, தயோ பாஸாதா³ அஹேஸுங் –
ஏகோ வஸ்ஸிகோ, ஏகோ ஹேமந்திகோ, ஏகோ கி³ம்ஹிகோ. ஸோ கோ² அஹங், மாக³ண்டி³ய,
வஸ்ஸிகே பாஸாதே³ வஸ்ஸிகே சத்தாரோ [வஸ்ஸிகே பாஸாதே³ சத்தாரோ (ஸ்யா॰ கங்॰)] மாஸே நிப்புரிஸேஹி தூரியேஹி [துரியேஹி (ஸீ॰ ஸ்யா॰ கங்॰ பீ॰)] பரிசாரயமானோ [பரிசாரியமானோ (ஸப்³ப³த்த²)]
ந ஹெட்டா²பாஸாத³ங் ஓரோஹாமி. ஸோ அபரேன ஸமயேன காமானங்யேவ ஸமுத³யஞ்ச
அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் விதி³த்வா
காமதண்ஹங் பஹாய காமபரிளாஹங் படிவினோதெ³த்வா விக³தபிபாஸோ
அஜ்ஜ²த்தங் வூபஸந்தசித்தோ விஹராமி. ஸோ அஞ்ஞே ஸத்தே பஸ்ஸாமி காமேஸு
அவீதராகே³ காமதண்ஹாஹி க²ஜ்ஜமானே காமபரிளாஹேன பரிட³ய்ஹமானே காமே படிஸேவந்தே.
ஸோ தேஸங் ந பிஹேமி, ந தத்த² அபி⁴ரமாமி . தங் கிஸ்ஸ ஹேது? யாஹயங், மாக³ண்டி³ய, ரதி, அஞ்ஞத்ரேவ காமேஹி அஞ்ஞத்ர அகுஸலேஹி த⁴ம்மேஹி – அபி தி³ப்³ப³ங் ஸுக²ங் ஸமதி⁴க³ய்ஹ திட்ட²தி – தாய ரதியா ரமமானோ ஹீனஸ்ஸ ந பிஹேமி, ந தத்த² அபி⁴ரமாமி.
212.
‘‘ஸெய்யதா²பி, மாக³ண்டி³ய, க³ஹபதி வா க³ஹபதிபுத்தோ வா அட்³டோ⁴ மஹத்³த⁴னோ
மஹாபோ⁴கோ³ பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரெய்ய
சக்கு²விஞ்ஞெய்யேஹி ரூபேஹி…பே॰… பொ²ட்ட²ப்³பே³ஹி இட்டே²ஹி கந்தேஹி மனாபேஹி
பியரூபேஹி காமூபஸங்ஹிதேஹி ரஜனீயேஹி. ஸோ காயேன ஸுசரிதங் சரித்வா வாசாய
ஸுசரிதங் சரித்வா மனஸா ஸுசரிதங் சரித்வா காயஸ்ஸ பே⁴தா³ பரங் மரணா ஸுக³திங்
ஸக்³க³ங் லோகங் உபபஜ்ஜெய்ய தே³வானங் தாவதிங்ஸானங் ஸஹப்³யதங். ஸோ தத்த²
நந்த³னே வனே அச்ச²ராஸங்க⁴பரிவுதோ தி³ப்³பே³ஹி பஞ்சஹி காமகு³ணேஹி ஸமப்பிதோ
ஸமங்கீ³பூ⁴தோ பரிசாரெய்ய. ஸோ பஸ்ஸெய்ய க³ஹபதிங் வா க³ஹபதிபுத்தங் வா பஞ்சஹி
காமகு³ணேஹி ஸமப்பிதங் ஸமங்கீ³பூ⁴தங் பரிசாரயமானங்.
‘‘தங் கிங் மஞ்ஞஸி, மாக³ண்டி³ய, அபி நு ஸோ தே³வபுத்தோ நந்த³னே வனே அச்ச²ராஸங்க⁴பரிவுதோ தி³ப்³பே³ஹி பஞ்சஹி காமகு³ணேஹி
ஸமப்பிதோ ஸமங்கீ³பூ⁴தோ பரிசாரயமானோ அமுஸ்ஸ க³ஹபதிஸ்ஸ வா க³ஹபதிபுத்தஸ்ஸ வா
பிஹெய்ய, மானுஸகானங் வா பஞ்சன்னங் காமகு³ணானங் மானுஸகேஹி வா காமேஹி
ஆவட்டெய்யா’’தி? ‘‘நோ ஹித³ங், போ⁴ கோ³தம’’. தங் கிஸ்ஸ ஹேது? மானுஸகேஹி, போ⁴
கோ³தம, காமேஹி தி³ப்³ப³காமா அபி⁴க்கந்ததரா ச பணீததரா சா’’தி. ‘‘ஏவமேவ கோ²
அஹங், மாக³ண்டி³ய, புப்³பே³ அகா³ரியபூ⁴தோ ஸமானோ பஞ்சஹி காமகு³ணேஹி ஸமப்பிதோ
ஸமங்கீ³பூ⁴தோ பரிசாரேஸிங் சக்கு²விஞ்ஞெய்யேஹி ரூபேஹி இட்டே²ஹி கந்தேஹி
மனாபேஹி பியரூபேஹி காமூபஸங்ஹிதேஹி ரஜனீயேஹி, ஸோதவிஞ்ஞெய்யேஹி
ஸத்³தே³ஹி…பே॰… கா⁴னவிஞ்ஞெய்யேஹி க³ந்தே⁴ஹி… ஜிவ்ஹாவிஞ்ஞெய்யேஹி ரஸேஹி…
காயவிஞ்ஞெய்யேஹி பொ²ட்ட²ப்³பே³ஹி இட்டே²ஹி கந்தேஹி மனாபேஹி பியரூபேஹி
காமூபஸங்ஹிதேஹி ரஜனீயேஹி. ஸோ அபரேன ஸமயேன காமானங்யேவ ஸமுத³யஞ்ச
அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் விதி³த்வா
காமதண்ஹங் பஹாய காமபரிளாஹங் படிவினோதெ³த்வா விக³தபிபாஸோ அஜ்ஜ²த்தங்
வூபஸந்தசித்தோ விஹராமி. ஸோ அஞ்ஞே ஸத்தே பஸ்ஸாமி காமேஸு அவீதராகே³
காமதண்ஹாஹி க²ஜ்ஜமானே காமபரிளாஹேன பரிட³ய்ஹமானே
காமே படிஸேவந்தே, ஸோ தேஸங் ந பிஹேமி, ந தத்த² அபி⁴ரமாமி. தங் கிஸ்ஸ ஹேது?
யாஹயங், மாக³ண்டி³ய, ரதி அஞ்ஞத்ரேவ காமேஹி அஞ்ஞத்ர அகுஸலேஹி த⁴ம்மேஹி – அபி தி³ப்³ப³ங் ஸுக²ங் ஸமதி⁴க³ய்ஹ திட்ட²தி – தாய ரதியா ரமமானோ ஹீனஸ்ஸ ந பிஹேமி, ந தத்த² அபி⁴ரமாமி.
213. ‘‘ஸெய்யதா²பி ,
மாக³ண்டி³ய, குட்டீ² புரிஸோ அருக³த்தோ பக்கக³த்தோ கிமீஹி க²ஜ்ஜமானோ நகே²ஹி
வணமுகா²னி விப்பதச்ச²மானோ அங்கா³ரகாஸுயா காயங் பரிதாபெய்ய. தஸ்ஸ
மித்தாமச்சா ஞாதிஸாலோஹிதா பி⁴ஸக்கங் ஸல்லகத்தங் உபட்டா²பெய்யுங். தஸ்ஸ ஸோ
பி⁴ஸக்கோ ஸல்லகத்தோ பே⁴ஸஜ்ஜங் கரெய்ய. ஸோ தங் பே⁴ஸஜ்ஜங் ஆக³ம்ம குட்டே²ஹி
பரிமுச்செய்ய, அரோகோ³ அஸ்ஸ ஸுகீ² ஸேரீ ஸயங்வஸீ யேன காமங் க³மோ. ஸோ அஞ்ஞங்
குட்டி²ங் புரிஸங் பஸ்ஸெய்ய அருக³த்தங் பக்கக³த்தங் கிமீஹி க²ஜ்ஜமானங்
நகே²ஹி வணமுகா²னி விப்பதச்ச²மானங் அங்கா³ரகாஸுயா காயங் பரிதாபெந்தங்.
‘‘தங் கிங் மஞ்ஞஸி, மாக³ண்டி³ய, அபி நு ஸோ புரிஸோ
அமுஸ்ஸ குட்டி²ஸ்ஸ புரிஸஸ்ஸ பிஹெய்ய அங்கா³ரகாஸுயா வா பே⁴ஸஜ்ஜங் படிஸேவனாய
வா’’தி? ‘‘நோ ஹித³ங், போ⁴ கோ³தம. தங் கிஸ்ஸ ஹேது?
ரோகே³ ஹி, போ⁴ கோ³தம, ஸதி பே⁴ஸஜ்ஜேன கரணீயங் ஹோதி, ரோகே³ அஸதி ந பே⁴ஸஜ்ஜேன
கரணீயங் ஹோதீ’’தி. ‘‘ஏவமேவ கோ² அஹங், மாக³ண்டி³ய, புப்³பே³ அகா³ரியபூ⁴தோ
ஸமானோ பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேஸிங்,
சக்கு²விஞ்ஞெய்யேஹி ரூபேஹி இட்டே²ஹி கந்தேஹி மனாபேஹி பியரூபேஹி
காமூபஸங்ஹிதேஹி ரஜனீயேஹி, ஸோதவிஞ்ஞெய்யேஹி ஸத்³தே³ஹி…பே॰… கா⁴னவிஞ்ஞெய்யேஹி
க³ந்தே⁴ஹி… ஜிவ்ஹாவிஞ்ஞெய்யேஹி ரஸேஹி… காயவிஞ்ஞெய்யேஹி பொ²ட்ட²ப்³பே³ஹி
இட்டே²ஹி கந்தேஹி மனாபேஹி பியரூபேஹி காமூபஸங்ஹிதேஹி ரஜனீயேஹி. ஸோ அபரேன
ஸமயேன காமானங்யேவ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச
யதா²பூ⁴தங் விதி³த்வா காமதண்ஹங் பஹாய காமபரிளாஹங்
படிவினோதெ³த்வா விக³தபிபாஸோ அஜ்ஜ²த்தங் வூபஸந்தசித்தோ விஹராமி. ஸோ அஞ்ஞே
ஸத்தே பஸ்ஸாமி காமேஸு அவீதராகே³ காமதண்ஹாஹி க²ஜ்ஜமானே காமபரிளாஹேன
பரிட³ய்ஹமானே காமே படிஸேவந்தே. ஸோ தேஸங் ந பிஹேமி, ந தத்த² அபி⁴ரமாமி. தங்
கிஸ்ஸ ஹேது? யாஹயங், மாக³ண்டி³ய, ரதி, அஞ்ஞத்ரேவ காமேஹி அஞ்ஞத்ர அகுஸலேஹி
த⁴ம்மேஹி – அபி தி³ப்³ப³ங் ஸுக²ங் ஸமதி⁴க³ய்ஹ திட்ட²தி – தாய ரதியா ரமமானோ
ஹீனஸ்ஸ ந பிஹேமி, ந தத்த² அபி⁴ரமாமி.
214. ‘‘ஸெய்யதா²பி ,
மாக³ண்டி³ய, குட்டீ² புரிஸோ அருக³த்தோ பக்கக³த்தோ கிமீஹி க²ஜ்ஜமானோ நகே²ஹி
வணமுகா²னி விப்பதச்ச²மானோ அங்கா³ரகாஸுயா காயங் பரிதாபெய்ய. தஸ்ஸ
மித்தாமச்சா ஞாதிஸாலோஹிதா பி⁴ஸக்கங் ஸல்லகத்தங்
உபட்டா²பெய்யுங். தஸ்ஸ ஸோ பி⁴ஸக்கோ ஸல்லகத்தோ பே⁴ஸஜ்ஜங் கரெய்ய. ஸோ தங்
பே⁴ஸஜ்ஜங் ஆக³ம்ம குட்டே²ஹி பரிமுச்செய்ய, அரோகோ³ அஸ்ஸ ஸுகீ² ஸேரீ ஸயங்வஸீ
யேன காமங் க³மோ. தமேனங் த்³வே ப³லவந்தோ புரிஸா நானாபா³ஹாஸு க³ஹெத்வா
அங்கா³ரகாஸுங் உபகட்³டெ⁴ய்யுங்.
‘‘தங் கிங் மஞ்ஞஸி, மாக³ண்டி³ய, அபி நு ஸோ புரிஸோ இதி
சிதிசேவ காயங் ஸன்னாமெய்யா’’தி? ‘‘ஏவங், போ⁴ கோ³தம’’. ‘‘தங் கிஸ்ஸ ஹேது’’?
‘‘அஸு ஹி, போ⁴ கோ³தம, அக்³கி³ து³க்க²ஸம்ப²ஸ்ஸோ சேவ மஹாபி⁴தாபோ ச
மஹாபரிளாஹோ சா’’தி. ‘‘தங் கிங் மஞ்ஞஸி, மாக³ண்டி³ய, இதா³னேவ நு கோ² ஸோ
அக்³கி³ து³க்க²ஸம்ப²ஸ்ஸோ சேவ மஹாபி⁴தாபோ ச மஹாபரிளாஹோ ச உதா³ஹு புப்³பே³பி
ஸோ அக்³கி³ து³க்க²ஸம்ப²ஸ்ஸோ சேவ மஹாபி⁴தாபோ ச மஹாபரிளாஹோ சா’’தி ? ‘‘இதா³னி சேவ, போ⁴ கோ³தம, ஸோ அக்³கி³ து³க்க²ஸம்ப²ஸ்ஸோ சேவ மஹாபி⁴தாபோ ச மஹாபரிளாஹோ ச, புப்³பே³பி ஸோ அக்³கி³ து³க்க²ஸம்ப²ஸ்ஸோ சேவ மஹாபி⁴தாபோ ச மஹாபரிளாஹோ ச. அஸு ச [அஸு ஹி ச (ஸீ॰ பீ॰)],
போ⁴ கோ³தம, குட்டீ² புரிஸோ அருக³த்தோ பக்கக³த்தோ கிமீஹி க²ஜ்ஜமானோ நகே²ஹி
வணமுகா²னி விப்பதச்ச²மானோ உபஹதிந்த்³ரியோ து³க்க²ஸம்ப²ஸ்ஸேயேவ
அக்³கி³ஸ்மிங் ஸுக²மிதி விபரீதஸஞ்ஞங் பச்சலத்தா²’’தி. ‘‘ஏவமேவ கோ²,
மாக³ண்டி³ய, அதீதம்பி அத்³தா⁴னங் காமா து³க்க²ஸம்ப²ஸ்ஸா சேவ மஹாபி⁴தாபா ச
மஹாபரிளாஹா ச, அனாக³தம்பி அத்³தா⁴னங் காமா து³க்க²ஸம்ப²ஸ்ஸா சேவ மஹாபி⁴தாபா
ச மஹாபரிளாஹா ச, ஏதரஹிபி பச்சுப்பன்னங் அத்³தா⁴னங் காமா து³க்க²ஸம்ப²ஸ்ஸா
சேவ மஹாபி⁴தாபா ச மஹாபரிளாஹா ச. இமே ச, மாக³ண்டி³ய, ஸத்தா காமேஸு அவீதராகா³
காமதண்ஹாஹி க²ஜ்ஜமானா காமபரிளாஹேன பரிட³ய்ஹமானா உபஹதிந்த்³ரியா
து³க்க²ஸம்ப²ஸ்ஸேஸுயேவ காமேஸு ஸுக²மிதி விபரீதஸஞ்ஞங் பச்சலத்து²ங்.
215.
‘‘ஸெய்யதா²பி, மாக³ண்டி³ய, குட்டீ² புரிஸோ அருக³த்தோ பக்கக³த்தோ கிமீஹி
க²ஜ்ஜமானோ நகே²ஹி வணமுகா²னி விப்பதச்ச²மானோ அங்கா³ரகாஸுயா காயங் பரிதாபேதி.
யதா² யதா² கோ², மாக³ண்டி³ய, அஸு குட்டீ² புரிஸோ அருக³த்தோ பக்கக³த்தோ
கிமீஹி க²ஜ்ஜமானோ நகே²ஹி வணமுகா²னி விப்பதச்ச²மானோ அங்கா³ரகாஸுயா காயங்
பரிதாபேதி ததா² ததா²’ஸ்ஸ [ததா² ததா² தஸ்ஸேவ (ஸ்யா॰ கங்॰ க॰)] தானி வணமுகா²னி அஸுசிதரானி சேவ ஹொந்தி து³க்³க³ந்த⁴தரானி ச பூதிகதரானி ச , ஹோதி சேவ காசி ஸாதமத்தா அஸ்ஸாத³மத்தா – யதி³த³ங் வணமுகா²னங் கண்டூ³வனஹேது; ஏவமேவ கோ², மாக³ண்டி³ய, ஸத்தா காமேஸு அவீதராகா³
காமதண்ஹாஹி க²ஜ்ஜமானா காமபரிளாஹேன ச பரிட³ய்ஹமானா காமே படிஸேவந்தி. யதா²
யதா² கோ², மாக³ண்டி³ய, ஸத்தா காமேஸு அவீதராகா³ காமதண்ஹாஹி க²ஜ்ஜமானா
காமபரிளாஹேன ச பரிட³ய்ஹமானா காமே படிஸேவந்தி ததா² ததா² தேஸங் தேஸங்
ஸத்தானங் காமதண்ஹா சேவ பவட்³ட⁴தி, காமபரிளாஹேன ச பரிட³ய்ஹந்தி, ஹோதி சேவ
ஸாதமத்தா அஸ்ஸாத³மத்தா – யதி³த³ங் பஞ்சகாமகு³ணே படிச்ச.
‘‘தங் கிங் மஞ்ஞஸி, மாக³ண்டி³ய, அபி நு தே தி³ட்டோ² வா
ஸுதோ வா ராஜா வா ராஜமஹாமத்தோ வா பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ
பரிசாரயமானோ காமதண்ஹங் அப்பஹாய காமபரிளாஹங் அப்படிவினோதெ³த்வா விக³தபிபாஸோ
அஜ்ஜ²த்தங் வூபஸந்தசித்தோ விஹாஸி வா விஹரதி வா விஹரிஸ்ஸதி வா’’தி ?
‘‘நோ ஹித³ங், போ⁴ கோ³தம’’. ‘‘ஸாது⁴, மாக³ண்டி³ய! மயாபி கோ² ஏதங்,
மாக³ண்டி³ய, நேவ தி³ட்ட²ங் ந ஸுதங் ராஜா வா ராஜமஹாமத்தோ வா பஞ்சஹி
காமகு³ணேஹி ஸமப்பிதோ ஸமங்கீ³பூ⁴தோ பரிசாரயமானோ காமதண்ஹங் அப்பஹாய
காமபரிளாஹங் அப்படிவினோதெ³த்வா விக³தபிபாஸோ அஜ்ஜ²த்தங் வூபஸந்தசித்தோ
விஹாஸி வா விஹரதி வா விஹரிஸ்ஸதி வா. அத² கோ², மாக³ண்டி³ய, யே ஹி கேசி ஸமணா
வா ப்³ராஹ்மணா வா விக³தபிபாஸா அஜ்ஜ²த்தங் வூபஸந்தசித்தா விஹாஸுங் வா
விஹரந்தி வா விஹரிஸ்ஸந்தி வா ஸப்³பே³ தே காமானங்யேவ ஸமுத³யஞ்ச
அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் விதி³த்வா
காமதண்ஹங் பஹாய காமபரிளாஹங் படிவினோதெ³த்வா விக³தபிபாஸா அஜ்ஜ²த்தங்
வூபஸந்தசித்தா விஹாஸுங் வா விஹரந்தி வா விஹரிஸ்ஸந்தி வா’’தி. அத² கோ²
ப⁴க³வா தாயங் வேலாயங் இமங் உதா³னங் உதா³னேஸி –
‘‘ஆரொக்³யபரமா லாபா⁴, நிப்³பா³னங் பரமங் ஸுக²ங்;
அட்ட²ங்கி³கோ ச மக்³கா³னங், கே²மங் அமதகா³மின’’ந்தி.
216.
ஏவங் வுத்தே, மாக³ண்டி³யோ பரிப்³பா³ஜகோ ப⁴க³வந்தங் ஏதத³வோச –
‘‘அச்ச²ரியங், போ⁴ கோ³தம, அப்³பு⁴தங், போ⁴ கோ³தம! யாவ ஸுபா⁴ஸிதங் சித³ங்
போ⁴தா கோ³தமேன – ‘ஆரொக்³யபரமா லாபா⁴, நிப்³பா³னங்
பரமங் ஸுக²’ந்தி. மயாபி கோ² ஏதங், போ⁴ கோ³தம, ஸுதங் புப்³ப³கானங்
பரிப்³பா³ஜகானங் ஆசரியபாசரியானங் பா⁴ஸமானானங் – ‘ஆரொக்³யபரமா லாபா⁴,
நிப்³பா³னங் பரமங் ஸுக²’ந்தி; தயித³ங், போ⁴ கோ³தம, ஸமேதீ’’தி. ‘‘யங் பன தே
ஏதங், மாக³ண்டி³ய, ஸுதங் புப்³ப³கானங் பரிப்³பா³ஜகானங்
ஆசரியபாசரியானங் பா⁴ஸமானானங் – ‘ஆரொக்³யபரமா லாபா⁴, நிப்³பா³னங் பரமங்
ஸுக²’ந்தி, கதமங் தங் ஆரொக்³யங், கதமங் தங் நிப்³பா³ன’’ந்தி? ஏவங் வுத்தே,
மாக³ண்டி³யோ பரிப்³பா³ஜகோ ஸகானேவ ஸுத³ங் க³த்தானி பாணினா அனோமஜ்ஜதி –
‘‘இத³ந்தங், போ⁴ கோ³தம, ஆரொக்³யங், இத³ந்தங் நிப்³பா³னங். அஹஞ்ஹி, போ⁴
கோ³தம, ஏதரஹி அரோகோ³ ஸுகீ², ந மங் கிஞ்சி ஆபா³த⁴தீ’’தி.
217. ‘‘ஸெய்யதா²பி, மாக³ண்டி³ய, ஜச்சந்தோ⁴ புரிஸோ; ஸோ ந பஸ்ஸெய்ய
கண்ஹஸுக்கானி ரூபானி, ந பஸ்ஸெய்ய நீலகானி ரூபானி, ந பஸ்ஸெய்ய பீதகானி
ரூபானி, ந பஸ்ஸெய்ய லோஹிதகானி ரூபானி, ந பஸ்ஸெய்ய மஞ்ஜிட்ட²கானி [மஞ்ஜெட்டி²கானி (ஸீ॰ ஸ்யா॰ கங்॰ பீ॰), மஞ்ஜெட்ட²கானி (க॰)]
ரூபானி, ந பஸ்ஸெய்ய ஸமவிஸமங், ந பஸ்ஸெய்ய தாரகரூபானி, ந பஸ்ஸெய்ய
சந்தி³மஸூரியே. ஸோ ஸுணெய்ய சக்கு²மதோ பா⁴ஸமானஸ்ஸ – ‘சே²கங் வத, போ⁴ , ஓதா³தங் வத்த²ங் அபி⁴ரூபங் நிம்மலங் ஸுசீ’தி! ஸோ ஓதா³தபரியேஸனங் சரெய்ய. தமேனங் அஞ்ஞதரோ புரிஸோ தேலமலிகதேன ஸாஹுளிசீரேன [தேலமஸிகதேன ஸாஹுளசீவரேன (ஸீ॰ ஸ்யா॰ கங்॰ பீ॰)]
வஞ்செய்ய – ‘இத³ங் தே, அம்போ⁴ புரிஸ, ஓதா³தங் வத்த²ங் அபி⁴ரூபங் நிம்மலங்
ஸுசீ’தி. ஸோ தங் படிக்³க³ண்ஹெய்ய, படிக்³க³ஹெத்வா பாருபெய்ய, பாருபெத்வா
அத்தமனோ அத்தமனவாசங் நிச்சா²ரெய்ய – ‘சே²கங் வத, போ⁴, ஓதா³தங் வத்த²ங்
அபி⁴ரூபங் நிம்மலங் ஸுசீ’தி!
‘‘தங் கிங் மஞ்ஞஸி, மாக³ண்டி³ய, அபி நு ஸோ ஜச்சந்தோ⁴
புரிஸோ ஜானந்தோ பஸ்ஸந்தோ அமுங் தேலமலிகதங் ஸாஹுளிசீரங் படிக்³க³ண்ஹெய்ய,
படிக்³க³ஹெத்வா பாருபெய்ய, பாருபெத்வா அத்தமனோ அத்தமனவாசங் நிச்சா²ரெய்ய –
‘சே²கங் வத, போ⁴, ஓதா³தங் வத்த²ங் அபி⁴ரூபங் நிம்மலங் ஸுசீ’தி உதா³ஹு
சக்கு²மதோ ஸத்³தா⁴யா’’தி? ‘‘அஜானந்தோ ஹி, போ⁴ கோ³தம, அபஸ்ஸந்தோ ஸோ
ஜச்சந்தோ⁴ புரிஸோ அமுங் தேலமலிகதங் ஸாஹுளிசீரங் படிக்³க³ண்ஹெய்ய,
படிக்³க³ஹெத்வா பாருபெய்ய, பாருபெத்வா அத்தமனோ அத்தமனவாசங் நிச்சா²ரெய்ய –
‘சே²கங் வத, போ⁴, ஓதா³தங் வத்த²ங் அபி⁴ரூபங்
நிம்மலங் ஸுசீ’தி, சக்கு²மதோ ஸத்³தா⁴யா’’தி. ‘‘ஏவமேவ கோ², மாக³ண்டி³ய,
அஞ்ஞதித்தி²யா பரிப்³பா³ஜகா அந்தா⁴ அசக்கு²கா அஜானந்தா ஆரொக்³யங்,
அபஸ்ஸந்தா நிப்³பா³னங் , அத² ச பனிமங் கா³த²ங்
பா⁴ஸந்தி – ‘ஆரொக்³யபரமா லாபா⁴, நிப்³பா³னங் பரமங் ஸுக²’ந்தி.
புப்³ப³கேஹேஸா, மாக³ண்டி³ய, அரஹந்தேஹி ஸம்மாஸம்பு³த்³தே⁴ஹி கா³தா² பா⁴ஸிதா –
‘ஆரொக்³யபரமா லாபா⁴, நிப்³பா³னங் பரமங் ஸுக²ங்;
அட்ட²ங்கி³கோ ச மக்³கா³னங், கே²மங் அமதகா³மின’ந்தி.
218. ‘‘ஸா ஏதரஹி அனுபுப்³பே³ன புது²ஜ்ஜனகா³தா² [புது²ஜ்ஜனக³தா (ஸீ॰ பீ॰)].
அயங் கோ² பன, மாக³ண்டி³ய, காயோ ரோக³பூ⁴தோ க³ண்ட³பூ⁴தோ ஸல்லபூ⁴தோ அக⁴பூ⁴தோ
ஆபா³த⁴பூ⁴தோ, ஸோ த்வங் இமங் காயங் ரோக³பூ⁴தங் க³ண்ட³பூ⁴தங் ஸல்லபூ⁴தங்
அக⁴பூ⁴தங் ஆபா³த⁴பூ⁴தங் – ‘இத³ந்தங், போ⁴ கோ³தம, ஆரொக்³யங், இத³ந்தங்
நிப்³பா³ன’ந்தி வதே³ஸி. தஞ்ஹி தே, மாக³ண்டி³ய, அரியங் சக்கு²ங் நத்தி² யேன
த்வங் அரியேன சக்கு²னா ஆரொக்³யங் ஜானெய்யாஸி, நிப்³பா³னங் பஸ்ஸெய்யாஸீ’’தி.
‘‘ஏவங் பஸன்னோ அஹங் போ⁴தோ கோ³தமஸ்ஸ! பஹோதி மே ப⁴வங் கோ³தமோ ததா² த⁴ம்மங்
தே³ஸேதுங் யதா²ஹங் ஆரொக்³யங் ஜானெய்யங், நிப்³பா³னங் பஸ்ஸெய்ய’’ந்தி.
219. ‘‘ஸெய்யதா²பி ,
மாக³ண்டி³ய, ஜச்சந்தோ⁴ புரிஸோ; ஸோ ந பஸ்ஸெய்ய கண்ஹஸுக்கானி ரூபானி, ந
பஸ்ஸெய்ய நீலகானி ரூபானி, ந பஸ்ஸெய்ய பீதகானி ரூபானி, ந பஸ்ஸெய்ய லோஹிதகானி
ரூபானி, ந பஸ்ஸெய்ய மஞ்ஜிட்ட²கானி ரூபானி, ந பஸ்ஸெய்ய ஸமவிஸமங், ந
பஸ்ஸெய்ய தாரகரூபானி, ந பஸ்ஸெய்ய சந்தி³மஸூரியே. தஸ்ஸ மித்தாமச்சா
ஞாதிஸாலோஹிதா பி⁴ஸக்கங் ஸல்லகத்தங் உபட்டா²பெய்யுங். தஸ்ஸ ஸோ பி⁴ஸக்கோ
ஸல்லகத்தோ பே⁴ஸஜ்ஜங் கரெய்ய. ஸோ தங் பே⁴ஸஜ்ஜங் ஆக³ம்ம ந சக்கூ²னி
உப்பாதெ³ய்ய, ந சக்கூ²னி விஸோதெ⁴ய்ய. தங் கிங்
மஞ்ஞஸி, மாக³ண்டி³ய, நனு ஸோ வேஜ்ஜோ யாவதே³வ கிலமத²ஸ்ஸ விகா⁴தஸ்ஸ பா⁴கீ³
அஸ்ஸா’’தி? ‘‘ஏவங், போ⁴ கோ³தம’’. ‘‘ஏவமேவ கோ², மாக³ண்டி³ய, அஹஞ்சே தே
த⁴ம்மங் தே³ஸெய்யங் – ‘இத³ந்தங் ஆரொக்³யங், இத³ந்தங் நிப்³பா³ன’ந்தி, ஸோ
த்வங் ஆரொக்³யங் ந ஜானெய்யாஸி, நிப்³பா³னங் ந பஸ்ஸெய்யாஸி. ஸோ மமஸ்ஸ
கிலமதோ², ஸா மமஸ்ஸ விஹேஸா’’தி. ‘‘ஏவங் பஸன்னோ அஹங்
போ⁴தோ கோ³தமஸ்ஸ. பஹோதி மே ப⁴வங் கோ³தமோ ததா² த⁴ம்மங் தே³ஸேதுங் யதா²ஹங்
ஆரொக்³யங் ஜானெய்யங், நிப்³பா³னங் பஸ்ஸெய்ய’’ந்தி.
220.
‘‘ஸெய்யதா²பி, மாக³ண்டி³ய, ஜச்சந்தோ⁴ புரிஸோ; ஸோ ந பஸ்ஸெய்ய கண்ஹஸுக்கானி
ரூபானி, ந பஸ்ஸெய்ய நீலகானி ரூபானி, ந பஸ்ஸெய்ய பீதகானி ரூபானி, ந பஸ்ஸெய்ய
லோஹிதகானி ரூபானி, ந பஸ்ஸெய்ய மஞ்ஜிட்ட²கானி ரூபானி, ந பஸ்ஸெய்ய ஸமவிஸமங்,
ந பஸ்ஸெய்ய தாரகரூபானி, ந பஸ்ஸெய்ய சந்தி³மஸூரியே. ஸோ ஸுணெய்ய சக்கு²மதோ
பா⁴ஸமானஸ்ஸ – ‘சே²கங் வத, போ⁴, ஓதா³தங் வத்த²ங் அபி⁴ரூபங் நிம்மலங்
ஸுசீ’தி! ஸோ ஓதா³தபரியேஸனங் சரெய்ய. தமேனங் அஞ்ஞதரோ
புரிஸோ தேலமலிகதேன ஸாஹுளிசீரேன வஞ்செய்ய – ‘இத³ங் தே, அம்போ⁴ புரிஸ,
ஓதா³தங் வத்த²ங் அபி⁴ரூபங் நிம்மலங் ஸுசீ’தி. ஸோ தங் படிக்³க³ண்ஹெய்ய,
படிக்³க³ஹெத்வா பாருபெய்ய. தஸ்ஸ மித்தாமச்சா ஞாதிஸாலோஹிதா பி⁴ஸக்கங்
ஸல்லகத்தங் உபட்டா²பெய்யுங். தஸ்ஸ ஸோ பி⁴ஸக்கோ ஸல்லகத்தோ பே⁴ஸஜ்ஜங் கரெய்ய –
உத்³த⁴ங்விரேசனங் அதோ⁴விரேசனங் அஞ்ஜனங் பச்சஞ்ஜனங் நத்து²கம்மங். ஸோ தங்
பே⁴ஸஜ்ஜங் ஆக³ம்ம சக்கூ²னி உப்பாதெ³ய்ய, சக்கூ²னி
விஸோதெ⁴ய்ய. தஸ்ஸ ஸஹ சக்கு²ப்பாதா³ யோ அமுஸ்மிங் தேலமலிகதே ஸாஹுளிசீரே
ச²ந்த³ராகோ³ ஸோ பஹீயேத². தஞ்ச நங் புரிஸங் அமித்ததோபி த³ஹெய்ய,
பச்சத்தி²கதோபி த³ஹெய்ய, அபி ச ஜீவிதா வோரோபேதப்³ப³ங் மஞ்ஞெய்ய –
‘தீ³க⁴ரத்தங் வத, போ⁴, அஹங் இமினா புரிஸேன தேலமலிகதேன ஸாஹுளிசீரேன நிகதோ
வஞ்சிதோ பலுத்³தோ⁴ – இத³ங் தே, அம்போ⁴ புரிஸ, ஓதா³தங் வத்த²ங்
அபி⁴ரூபங் நிம்மலங் ஸுசீ’தி. ஏவமேவ கோ², மாக³ண்டி³ய, அஹஞ்சே தே த⁴ம்மங்
தே³ஸெய்யங் – ‘இத³ந்தங் ஆரொக்³யங், இத³ந்தங் நிப்³பா³ன’ந்தி. ஸோ த்வங்
ஆரொக்³யங் ஜானெய்யாஸி, நிப்³பா³னங் பஸ்ஸெய்யாஸி. தஸ்ஸ தே ஸஹ சக்கு²ப்பாதா³
யோ பஞ்சஸுபாதா³னக்க²ந்தே⁴ஸு ச²ந்த³ராகோ³ ஸோ பஹீயேத²; அபி ச தே ஏவமஸ்ஸ –
‘தீ³க⁴ரத்தங் வத, போ⁴, அஹங் இமினா சித்தேன நிகதோ வஞ்சிதோ பலுத்³தோ⁴ [பலத்³தோ⁴ (ஸீ॰ பீ॰)].
அஹஞ்ஹி ரூபங்யேவ உபாதி³யமானோ உபாதி³யிங், வேத³னங்யேவ உபாதி³யமானோ
உபாதி³யிங், ஸஞ்ஞங்யேவ உபாதி³யமானோ உபாதி³யிங், ஸங்கா²ரேயேவ உபாதி³யமானோ
உபாதி³யிங், விஞ்ஞாணங்யேவ உபாதி³யமானோ உபாதி³யிங். தஸ்ஸ மே உபாதா³னபச்சயா
ப⁴வோ, ப⁴வபச்சயா ஜாதி, ஜாதிபச்சயா ஜராமரணங்
ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி;
ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ’’’தி. ‘‘ஏவங் பஸன்னோ
அஹங் போ⁴தோ கோ³தமஸ்ஸ! பஹோதி மே ப⁴வங் கோ³தமோ ததா² த⁴ம்மங் தே³ஸேதுங்
யதா²ஹங் இமம்ஹா ஆஸனா அனந்தோ⁴ வுட்ட²ஹெய்ய’’ந்தி.
221. ‘‘தேன ஹி த்வங், மாக³ண்டி³ய, ஸப்புரிஸே ப⁴ஜெய்யாஸி. யதோ கோ²
த்வங், மாக³ண்டி³ய, ஸப்புரிஸே ப⁴ஜிஸ்ஸஸி ததோ த்வங், மாக³ண்டி³ய,
ஸத்³த⁴ம்மங் ஸொஸ்ஸஸி; யதோ கோ² த்வங், மாக³ண்டி³ய, ஸத்³த⁴ம்மங் ஸொஸ்ஸஸி ததோ
த்வங், மாக³ண்டி³ய, த⁴ம்மானுத⁴ம்மங் படிபஜ்ஜிஸ்ஸஸி; யதோ கோ² த்வங்,
மாக³ண்டி³ய, த⁴ம்மானுத⁴ம்மங் படிபஜ்ஜிஸ்ஸஸி ததோ த்வங், மாக³ண்டி³ய,
ஸாமங்யேவ ஞஸ்ஸஸி, ஸாமங் த³க்கி²ஸ்ஸஸி – இமே ரோகா³ க³ண்டா³ ஸல்லா; இத⁴ ரோகா³
க³ண்டா³ ஸல்லா அபரிஸேஸா நிருஜ்ஜ²ந்தி. தஸ்ஸ மே உபாதா³னநிரோதா⁴ ப⁴வனிரோதோ⁴,
ப⁴வனிரோதா⁴ ஜாதினிரோதோ⁴, ஜாதினிரோதா⁴ ஜராமரணங்
ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி; ஏவமேதஸ்ஸ கேவலஸ்ஸ
து³க்க²க்க²ந்த⁴ஸ்ஸ நிரோதோ⁴ ஹோதீ’’தி.
222. ஏவங்
வுத்தே, மாக³ண்டி³யோ பரிப்³பா³ஜகோ ப⁴க³வந்தங் ஏதத³வோச – ‘‘அபி⁴க்கந்தங்,
போ⁴ கோ³தம, அபி⁴க்கந்தங், போ⁴ கோ³தம! ஸெய்யதா²பி, போ⁴ கோ³தம, நிக்குஜ்ஜிதங்
வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங்
ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய – சக்கு²மந்தோ ரூபானி
த³க்க²ந்தீதி; ஏவமேவங் போ⁴தா கோ³தமேன அனேகபரியாயேன த⁴ம்மோ பகாஸிதோ. ஏஸாஹங்
ப⁴வந்தங் கோ³தமங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச .
லபெ⁴ய்யாஹங் போ⁴தோ கோ³தமஸ்ஸ ஸந்திகே பப்³ப³ஜ்ஜங், லபெ⁴ய்யங்
உபஸம்பத³’’ந்தி. ‘‘யோ கோ², மாக³ண்டி³ய, அஞ்ஞதித்தி²யபுப்³போ³ இமஸ்மிங்
த⁴ம்மவினயே ஆகங்க²தி பப்³ப³ஜ்ஜங், ஆகங்க²தி உபஸம்பத³ங், ஸோ சத்தாரோ மாஸே
பரிவஸதி; சதுன்னங் மாஸானங் அச்சயேன ஆரத்³த⁴சித்தா பி⁴க்கூ² பப்³பா³ஜெந்தி ,
உபஸம்பாதெ³ந்தி பி⁴க்கு²பா⁴வாய. அபி ச மெத்த² புக்³க³லவேமத்ததா
விதி³தா’’தி. ‘‘ஸசே, ப⁴ந்தே, அஞ்ஞதித்தி²யபுப்³பா³ இமஸ்மிங் த⁴ம்மவினயே
ஆகங்க²ந்தா பப்³ப³ஜ்ஜங், ஆகங்க²ந்தா உபஸம்பத³ங் சத்தாரோ மாஸே பரிவஸந்தி,
சதுன்னங் மாஸானங் அச்சயேன ஆரத்³த⁴சித்தா பி⁴க்கூ² பப்³பா³ஜெந்தி
உபஸம்பாதெ³ந்தி பி⁴க்கு²பா⁴வாய; அஹங் சத்தாரி வஸ்ஸானி பரிவஸிஸ்ஸாமி,
சதுன்னங் வஸ்ஸானங் அச்சயேன ஆரத்³த⁴சித்தா பி⁴க்கூ² பப்³பா³ஜெந்து,
உபஸம்பாதெ³ந்து பி⁴க்கு²பா⁴வாயா’’தி . அலத்த² கோ²
மாக³ண்டி³யோ பரிப்³பா³ஜகோ ப⁴க³வதோ ஸந்திகே பப்³ப³ஜ்ஜங், அலத்த² உபஸம்பத³ங்.
அசிரூபஸம்பன்னோ கோ² பனாயஸ்மா மாக³ண்டி³யோ ஏகோ வூபகட்டோ² அப்பமத்தோ ஆதாபீ
பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா
அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘கீ²ணா ஜாதி, வுஸிதங்
ப்³ரஹ்மசரியங், கதங் கரணீயங், நாபரங் இத்த²த்தாயா’தி அப்³ப⁴ஞ்ஞாஸி. அஞ்ஞதரோ
கோ² பனாயஸ்மா மாக³ண்டி³யோ அரஹதங் அஹோஸீதி.
மாக³ண்டி³யஸுத்தங் நிட்டி²தங் பஞ்சமங்.
6. ஸந்த³கஸுத்தங்
223. ஏவங்
மே ஸுதங் – ஏகங் ஸமயங் ப⁴க³வா கோஸம்பி³யங் விஹரதி கோ⁴ஸிதாராமே. தேன கோ² பன
ஸமயேன ஸந்த³கோ பரிப்³பா³ஜகோ பிலக்க²கு³ஹாயங் படிவஸதி மஹதியா
பரிப்³பா³ஜகபரிஸாய ஸத்³தி⁴ங் பஞ்சமத்தேஹி பரிப்³பா³ஜகஸதேஹி. அத² கோ² ஆயஸ்மா
ஆனந்தோ³ ஸாயன்ஹஸமயங் படிஸல்லானா வுட்டி²தோ பி⁴க்கூ² ஆமந்தேஸி –
‘‘ஆயாமாவுஸோ, யேன தே³வகதஸொப்³போ⁴ தேனுபஸங்கமிஸ்ஸாம கு³ஹாத³ஸ்ஸனாயா’’தி.
‘‘ஏவமாவுஸோ’’தி கோ² தே பி⁴க்கூ² ஆயஸ்மதோ ஆனந்த³ஸ்ஸ பச்சஸ்ஸோஸுங். அத² கோ²
ஆயஸ்மா ஆனந்தோ³ ஸம்ப³ஹுலேஹி பி⁴க்கூ²ஹி ஸத்³தி⁴ங் யேன தே³வகதஸொப்³போ⁴
தேனுபஸங்கமி. தேன கோ² பன ஸமயேன ஸந்த³கோ பரிப்³பா³ஜகோ மஹதியா
பரிப்³பா³ஜகபரிஸாய ஸத்³தி⁴ங் நிஸின்னோ ஹோதி உன்னாதி³னியா
உச்சாஸத்³த³மஹாஸத்³தா³ய அனேகவிஹிதங் திரச்சா²னகத²ங் கதெ²ந்தியா,
ஸெய்யதி²த³ங் – ராஜகத²ங் சோரகத²ங் மஹாமத்தகத²ங் ஸேனாகத²ங் ப⁴யகத²ங்
யுத்³த⁴கத²ங் அன்னகத²ங் பானகத²ங் வத்த²கத²ங் ஸயனகத²ங் மாலாகத²ங்
க³ந்த⁴கத²ங் ஞாதிகத²ங் யானகத²ங் கா³மகத²ங் நிக³மகத²ங் நக³ரகத²ங் ஜனபத³கத²ங்
இத்தி²கத²ங் ஸூரகத²ங் விஸிகா²கத²ங் கும்ப⁴ட்டா²னகத²ங் புப்³ப³பேதகத²ங்
நானத்தகத²ங் லோகக்கா²யிகங் ஸமுத்³த³க்கா²யிகங்
இதிப⁴வாப⁴வகத²ங் இதி வா. அத்³த³ஸா கோ² ஸந்த³கோ பரிப்³பா³ஜகோ ஆயஸ்மந்தங்
ஆனந்த³ங் தூ³ரதோவ ஆக³ச்ச²ந்தங். தி³ஸ்வான ஸகங் பரிஸங் ஸண்டா²பேஸி
– ‘‘அப்பஸத்³தா³ பொ⁴ந்தோ ஹொந்து, மா பொ⁴ந்தோ ஸத்³த³மகத்த²; அயங் ஸமணஸ்ஸ
கோ³தமஸ்ஸ ஸாவகோ ஆக³ச்ச²தி ஸமணோ ஆனந்தோ³. யாவதா கோ² பன ஸமணஸ்ஸ கோ³தமஸ்ஸ
ஸாவகா கோஸம்பி³யங் படிவஸந்தி, அயங் தேஸங் அஞ்ஞதரோ ஸமணோ ஆனந்தோ³.
அப்பஸத்³த³காமா கோ² பன தே ஆயஸ்மந்தோ அப்பஸத்³த³வினீதா அப்பஸத்³த³ஸ்ஸ
வண்ணவாதி³னோ; அப்பேவ நாம அப்பஸத்³த³ங் பரிஸங் விதி³த்வா உபஸங்கமிதப்³ப³ங்
மஞ்ஞெய்யா’’தி. அத² கோ² தே பரிப்³பா³ஜகா துண்ஹீ அஹேஸுங்.
224.
அத² கோ² ஆயஸ்மா ஆனந்தோ³ யேன ஸந்த³கோ பரிப்³பா³ஜகோ தேனுபஸங்கமி. அத² கோ²
ஸந்த³கோ பரிப்³பா³ஜகோ ஆயஸ்மந்தங் ஆனந்த³ங் ஏதத³வோச – ‘‘ஏது கோ² ப⁴வங்
ஆனந்தோ³, ஸ்வாக³தங் போ⁴தோ ஆனந்த³ஸ்ஸ. சிரஸ்ஸங் கோ² ப⁴வங் ஆனந்தோ³ இமங்
பரியாயமகாஸி யதி³த³ங் இதா⁴க³மனாய. நிஸீத³து ப⁴வங் ஆனந்தோ³, இத³மாஸனங்
பஞ்ஞத்த’’ந்தி. நிஸீதி³ கோ² ஆயஸ்மா ஆனந்தோ³
பஞ்ஞத்தே ஆஸனே. ஸந்த³கோபி கோ² பரிப்³பா³ஜகோ அஞ்ஞதரங் நீசங் ஆஸனங் க³ஹெத்வா
ஏகமந்தங் நிஸீதி³. ஏகமந்தங் நிஸின்னங் கோ² ஸந்த³கங் பரிப்³பா³ஜகங் ஆயஸ்மா
ஆனந்தோ³ ஏதத³வோச – ‘‘காயனுத்த², ஸந்த³க, ஏதரஹி கதா²ய ஸன்னிஸின்னா, கா ச பன
வோ அந்தராகதா² விப்பகதா’’தி? ‘‘திட்ட²தேஸா, போ⁴ ஆனந்த³, கதா² யாய மயங்
ஏதரஹி கதா²ய ஸன்னிஸின்னா. நேஸா போ⁴தோ ஆனந்த³ஸ்ஸ கதா² து³ல்லபா⁴ ப⁴விஸ்ஸதி
பச்சா²பி ஸவனாய. ஸாது⁴ வத ப⁴வந்தங்யேவ ஆனந்த³ங் படிபா⁴து ஸகே ஆசரியகே
த⁴ம்மீகதா²’’தி. ‘‘தேன ஹி, ஸந்த³க, ஸுணாஹி ,
ஸாது⁴கங் மனஸி கரோஹி, பா⁴ஸிஸ்ஸாமீ’’தி. ‘‘ஏவங் போ⁴’’தி கோ² ஸந்த³கோ
பரிப்³பா³ஜகோ ஆயஸ்மதோ ஆனந்த³ஸ்ஸ பச்சஸ்ஸோஸி. ஆயஸ்மா ஆனந்தோ³ ஏதத³வோச –
‘‘சத்தாரோமே , ஸந்த³க, தேன ப⁴க³வதா ஜானதா பஸ்ஸதா
அரஹதா ஸம்மாஸம்பு³த்³தே⁴ன அப்³ரஹ்மசரியவாஸா அக்கா²தா சத்தாரி ச
அனஸ்ஸாஸிகானி ப்³ரஹ்மசரியானி அக்கா²தானி, யத்த² விஞ்ஞூ புரிஸோ ஸஸக்கங்
ப்³ரஹ்மசரியங் ந வஸெய்ய, வஸந்தோ ச [வஸந்தோ வா (ஸீ॰ பீ॰) ஏவமுபரிபி அனாராத⁴னபக்கே²]
நாராதெ⁴ய்ய ஞாயங் த⁴ம்மங் குஸல’’ந்தி. ‘‘கதமே பன தே, போ⁴ ஆனந்த³, தேன
ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரோ அப்³ரஹ்மசரியவாஸா
அக்கா²தா, யத்த² விஞ்ஞூ புரிஸோ ஸஸக்கங் ப்³ரஹ்மசரியங் ந வஸெய்ய, வஸந்தோ ச நாராதெ⁴ய்ய ஞாயங் த⁴ம்மங் குஸல’’ந்தி?
225.
‘‘இத⁴, ஸந்த³க, ஏகச்சோ ஸத்தா² ஏவங்வாதீ³ ஹோதி ஏவங்தி³ட்டி² – ‘நத்தி²
தி³ன்னங், நத்தி² யிட்ட²ங், நத்தி² ஹுதங், நத்தி² ஸுகதது³க்கடானங் கம்மானங்
ப²லங் விபாகோ, நத்தி² அயங் லோகோ, நத்தி² பரோலோகோ, நத்தி² மாதா, நத்தி²
பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா ஸம்மக்³க³தா
ஸம்மாபடிபன்னா யே இமஞ்ச லோகங் பரஞ்ச லோகங் ஸயங் அபி⁴ஞ்ஞா ஸச்சி²கத்வா
பவேதெ³ந்தி. சாதுமஹாபூ⁴திகோ அயங் புரிஸோ யதா³ காலங்கரோதி, பத²வீ பத²வீகாயங்
அனுபேதி அனுபக³ச்ச²தி, ஆபோ ஆபோகாயங் அனுபேதி அனுபக³ச்ச²தி, தேஜோ தேஜோகாயங்
அனுபேதி அனுபக³ச்ச²தி, வாயோ வாயோகாயங் அனுபேதி அனுபக³ச்ச²தி ,
ஆகாஸங் இந்த்³ரியானி ஸங்கமந்தி. ஆஸந்தி³பஞ்சமா புரிஸா மதங் ஆதா³ய
க³ச்ச²ந்தி, யாவாளாஹனா பதா³னி பஞ்ஞாயந்தி. காபோதகானி அட்டீ²னி ப⁴வந்தி.
ப⁴ஸ்ஸந்தா ஆஹுதியோ; த³த்துபஞ்ஞத்தங் யதி³த³ங் தா³னங். தேஸங் துச்சா² முஸா
விலாபோ யே கேசி அத்தி²கவாத³ங் வத³ந்தி. பா³லே ச பண்டி³தே ச காயஸ்ஸ பே⁴தா³
உச்சி²ஜ்ஜந்தி வினஸ்ஸந்தி ந ஹொந்தி பரங் மரணா’தி.
‘‘தத்ர , ஸந்த³க, விஞ்ஞூ புரிஸோ
இதி படிஸஞ்சிக்க²தி – ‘அயங் கோ² ப⁴வங் ஸத்தா² ஏவங்வாதீ³ ஏவங்தி³ட்டி² –
நத்தி² தி³ன்னங், நத்தி² யிட்ட²ங், நத்தி² ஹுதங், நத்தி² ஸுகதது³க்கடானங்
கம்மானங் ப²லங் விபாகோ, நத்தி² அயங் லோகோ, நத்தி² பரோலோகோ, நத்தி² மாதா,
நத்தி² பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா
ஸம்மக்³க³தா ஸம்மாபடிபன்னா யே இமஞ்ச லோகங் பரஞ்ச லோகங் ஸயங் அபி⁴ஞ்ஞா
ஸச்சி²கத்வா பவேதெ³ந்தி. சாதுமஹாபூ⁴திகோ அயங் புரிஸோ யதா³ காலங்கரோதி,
பத²வீ பத²வீகாயங் அனுபேதி அனுபக³ச்ச²தி, ஆபோ ஆபோகாயங்
அனுபேதி அனுபக³ச்ச²தி, தேஜோ தேஜோகாயங் அனுபேதி அனுபக³ச்ச²தி, வாயோ
வாயோகாயங் அனுபேதி அனுபக³ச்ச²தி, ஆகாஸங் இந்த்³ரியானி ஸங்கமந்தி.
ஆஸந்தி³பஞ்சமா புரிஸா மதங் ஆதா³ய க³ச்ச²ந்தி, யாவாளாஹனா பதா³னி பஞ்ஞாயந்தி.
காபோதகானி அட்டீ²னி ப⁴வந்தி. ப⁴ஸ்ஸந்தா ஆஹுதியோ; த³த்துபஞ்ஞத்தங் யதி³த³ங்
தா³னங். தேஸங் துச்சா² முஸா விலாபோ யே கேசி அத்தி²கவாத³ங் வத³ந்தி. பா³லே ச
பண்டி³தே ச காயஸ்ஸ பே⁴தா³ உச்சி²ஜ்ஜந்தி
வினஸ்ஸந்தி ந ஹொந்தி பரங் மரணா’தி. ஸசே இமஸ்ஸ போ⁴தோ ஸத்து²னோ ஸச்சங் வசனங்,
அகதேன மே எத்த² கதங், அவுஸிதேன மே எத்த² வுஸிதங். உபோ⁴பி மயங் எத்த² ஸமஸமா
ஸாமஞ்ஞங் பத்தா, யோ சாஹங் ந வதா³மி ‘உபோ⁴ காயஸ்ஸ பே⁴தா³ உச்சி²ஜ்ஜிஸ்ஸாம,
வினஸ்ஸிஸ்ஸாம, ந ப⁴விஸ்ஸாம பரங் மரணா’தி. அதிரேகங் கோ² பனிமஸ்ஸ போ⁴தோ
ஸத்து²னோ நக்³கி³யங் முண்டி³யங் உக்குடிகப்பதா⁴னங் கேஸமஸ்ஸுலோசனங் யோஹங்
புத்தஸம்பா³த⁴ஸயனங் [புத்தஸம்பா³த⁴வஸனங் (ஸீ॰)]
அஜ்ஜா²வஸந்தோ காஸிகசந்த³னங் பச்சனுபொ⁴ந்தோ மாலாக³ந்த⁴விலேபனங் தா⁴ரெந்தோ
ஜாதரூபரஜதங் ஸாதி³யந்தோ இமினா போ⁴தா ஸத்தா²ரா ஸமஸமக³திகோ ப⁴விஸ்ஸாமி.
அபி⁴ஸம்பராயங் ஸோஹங் கிங் ஜானந்தோ கிங் பஸ்ஸந்தோ இமஸ்மிங் ஸத்த²ரி
ப்³ரஹ்மசரியங் சரிஸ்ஸாமி? ‘ஸோ அப்³ரஹ்மசரியவாஸோ அய’ந்தி – இதி விதி³த்வா
தஸ்மா ப்³ரஹ்மசரியா நிப்³பி³ஜ்ஜ பக்கமதி [நிப்³பி³ஜ்ஜாபக்கமதி (ஸீ॰)].
அயங் கோ², ஸந்த³க, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன
பட²மோ அப்³ரஹ்மசரியவாஸோ அக்கா²தோ யத்த² விஞ்ஞூ புரிஸோ ஸஸக்கங்
ப்³ரஹ்மசரியங் ந வஸெய்ய, வஸந்தோ ச நாராதெ⁴ய்ய ஞாயங் த⁴ம்மங் குஸலங்.
226.
‘‘புன சபரங், ஸந்த³க, இதே⁴கச்சோ ஸத்தா² ஏவங்வாதீ³ ஹோதி ஏவங்தி³ட்டி² –
‘கரோதோ காரயதோ சி²ந்த³தோ சே²தா³பயதோ பசதோ பாசாபயதோ ஸோசயதோ ஸோசாபயதோ கிலமதோ
கிலமாபயதோ ப²ந்த³தோ ப²ந்தா³பயதோ பாணமதிபாதயதோ அதி³ன்னங் ஆதி³யதோ ஸந்தி⁴ங்
சி²ந்த³தோ நில்லோபங் ஹரதோ ஏகாகா³ரிகங் கரோதோ பரிபந்தே² திட்ட²தோ பரதா³ரங்
க³ச்ச²தோ முஸா ப⁴ணதோ கரோதோ ந
கரீயதி பாபங். கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகங்
மங்ஸக²லங் ஏகங் மங்ஸபுஞ்ஜங் கரெய்ய, நத்தி² ததோனிதா³னங் பாபங், நத்தி²
பாபஸ்ஸ ஆக³மோ. த³க்கி²ணஞ்சேபி க³ங்கா³ய தீரங் க³ச்செ²ய்ய ஹனந்தோ கா⁴தெந்தோ
சி²ந்த³ந்தோ சே²தா³பெந்தோ பசந்தோ பசாபெந்தோ, நத்தி² ததோனிதா³னங் பாபங்,
நத்தி² பாபஸ்ஸ ஆக³மோ. உத்தரஞ்சேபி க³ங்கா³ய தீரங்
க³ச்செ²ய்ய த³த³ந்தோ தா³பெந்தோ யஜந்தோ யஜாபெந்தோ, நத்தி² ததோனிதா³னங்
புஞ்ஞங், நத்தி² புஞ்ஞஸ்ஸ ஆக³மோ. தா³னேன த³மேன ஸங்யமேன ஸச்சவஜ்ஜேன நத்தி²
புஞ்ஞங், நத்தி² புஞ்ஞஸ்ஸ ஆக³மோ’தி.
‘‘தத்ர, ஸந்த³க, விஞ்ஞூ புரிஸோ இதி படிஸஞ்சிக்க²தி –
‘அயங் கோ² ப⁴வங் ஸத்தா² ஏவங்வாதீ³ ஏவங்தி³ட்டி² – கரோதோ காரயதோ சி²ந்த³தோ
சே²தா³பயதோ பசதோ பாசாபயதோ ஸோசதோ ஸோசாபயதோ கிலமதோ கிலமாபயதோ ப²ந்த³தோ
ப²ந்தா³பயதோ பாணமதிபாதயதோ அதி³ன்னங் ஆதி³யதோ ஸந்தி⁴ங் சி²ந்த³தோ நில்லோபங்
ஹரதோ ஏகாகா³ரிகங் கரோதோ பரிபந்தே² திட்ட²தோ பரதா³ரங் க³ச்ச²தோ முஸா ப⁴ணதோ
கரோதோ ந கரீயதி பாபங் கு²ரபரியந்தேன சேபி சக்கேன யோ இமிஸ்ஸா பத²வியா பாணே
ஏகங் மங்ஸக²லங் ஏகங் மங்ஸபுஞ்ஜங் கரெய்ய, நத்தி² ததோனிதா³னங் பாபங், நத்தி²
பாபஸ்ஸ ஆக³மோ. த³க்கி²ணஞ்சேபி க³ங்கா³ய தீரங் க³ச்செ²ய்ய ஹனந்தோ கா⁴தெந்தோ
சி²ந்த³ந்தோ சே²தா³பெந்தோ பசந்தோ பசாபெந்தோ, நத்தி² ததோனிதா³னங் பாபங்,
நத்தி² பாபஸ்ஸ ஆக³மோ. உத்தரஞ்சேபி க³ங்கா³ய தீரங்
க³ச்செ²ய்ய த³த³ந்தோ தா³பெந்தோ யஜந்தோ யஜாபெந்தோ, நத்தி² ததோனிதா³னங்
புஞ்ஞங், நத்தி² புஞ்ஞஸ்ஸ ஆக³மோ. தா³னேன த³மேன ஸங்யமேன ஸச்சவஜ்ஜேன நத்தி²
புஞ்ஞங், நத்தி² புஞ்ஞஸ்ஸ ஆக³மோ’தி. ஸசே இமஸ்ஸ போ⁴தோ ஸத்து²னோ ஸச்சங்
வசனங், அகதேன மே எத்த² கதங், அவுஸிதேன மே எத்த² வுஸிதங். உபோ⁴பி மயங் எத்த²
ஸமஸமா ஸாமஞ்ஞங் பத்தா, யோ சாஹங் ந வதா³மி ‘உபி⁴ன்னங் குருதங் ந கரீயதி
பாப’ந்தி. அதிரேகங் கோ² பனிமஸ்ஸ போ⁴தோ ஸத்து²னோ நக்³கி³யங் முண்டி³யங்
உக்குடிகப்பதா⁴னங் கேஸமஸ்ஸுலோசனங் யோஹங் புத்தஸம்பா³த⁴ஸயனங் அஜ்ஜா²வஸந்தோ
காஸிகசந்த³னங் பச்சனுபொ⁴ந்தோ மாலாக³ந்த⁴விலேபனங் தா⁴ரெந்தோ ஜாதரூபரஜதங்
ஸாதி³யந்தோ இமினா போ⁴தா ஸத்தா²ரா ஸமஸமக³திகோ ப⁴விஸ்ஸாமி. அபி⁴ஸம்பராயங்
ஸோஹங் கிங் ஜானந்தோ கிங் பஸ்ஸந்தோ இமஸ்மிங் ஸத்த²ரி ப்³ரஹ்மசரியங்
சரிஸ்ஸாமி? ‘ஸோ அப்³ரஹ்மசரியவாஸோ அய’ந்தி இதி விதி³த்வா தஸ்மா ப்³ரஹ்மசரியா
நிப்³பி³ஜ்ஜ பக்கமதி. அயங் கோ², ஸந்த³க, தேன ப⁴க³வதா ஜானதா பஸ்ஸதா அரஹதா
ஸம்மாஸம்பு³த்³தே⁴ன து³தியோ அப்³ரஹ்மசரியவாஸோ அக்கா²தோ யத்த² விஞ்ஞூ புரிஸோ
ஸஸக்கங் ப்³ரஹ்மசரியங் ந வஸெய்ய, வஸந்தோ ச நாராதெ⁴ய்ய ஞாயங் த⁴ம்மங்
குஸலங்.
227.
‘‘புன சபரங், ஸந்த³க, இதே⁴கச்சோ ஸத்தா² ஏவங்வாதீ³ ஹோதி ஏவங்தி³ட்டி² –
‘நத்தி² ஹேது, நத்தி² பச்சயோ ஸத்தானங் ஸங்கிலேஸாய; அஹேதூ அப்பச்சயா ஸத்தா ஸங்கிலிஸ்ஸந்தி; நத்தி² ஹேது, நத்தி² பச்சயோ ஸத்தானங் விஸுத்³தி⁴யா; அஹேதூ அப்பச்சயா ஸத்தா விஸுஜ்ஜ²ந்தி; நத்தி² ப³லங், நத்தி² வீரியங், நத்தி² புரிஸதா²மோ ,
நத்தி² புரிஸபரக்கமோ; ஸப்³பே³ ஸத்தா ஸப்³பே³ பாணா ஸப்³பே³ பூ⁴தா ஸப்³பே³
ஜீவா அவஸா அப³லா அவீரியா நியதிஸங்க³திபா⁴வபரிணதா ச²ஸ்வேவாபி⁴ஜாதீஸு
ஸுக²து³க்க²ங் படிஸங்வேதெ³ந்தீ’தி.
‘‘தத்ர, ஸந்த³க, விஞ்ஞூ புரிஸோ இதி படிஸஞ்சிக்க²தி –
‘அயங் கோ² ப⁴வங் ஸத்தா² ஏவங்வாதீ³ ஏவங்தி³ட்டி² – நத்தி² ஹேது, நத்தி²
பச்சயோ ஸத்தானங் ஸங்கிலேஸாய, அஹேதூ அப்பச்சயா ஸத்தா ஸங்கிலிஸ்ஸந்தி. நத்தி²
ஹேது நத்தி² பச்சயோ ஸத்தானங் விஸுத்³தி⁴யா, அஹேதூ அப்பச்சயா ஸத்தா
விஸுஜ்ஜ²ந்தி. நத்தி² ப³லங், நத்தி² வீரியங், நத்தி² புரிஸதா²மோ, நத்தி²
புரிஸபரக்கமோ, ஸப்³பே³ ஸத்தா ஸப்³பே³ பாணா ஸப்³பே³ பூ⁴தா ஸப்³பே³ ஜீவா அவஸா
அப³லா அவீரியா நியதிஸங்க³திபா⁴வபரிணதா ச²ஸ்வேவாபி⁴ஜாதீஸு ஸுக²து³க்க²ங்
படிஸங்வேதெ³ந்தீ’தி. ஸசே இமஸ்ஸ போ⁴தோ ஸத்து²னோ ஸச்சங் வசனங், அகதேன மே
எத்த² கதங், அவுஸிதேன மே எத்த² வுஸிதங். உபோ⁴பி மயங் எத்த² ஸமஸமா ஸாமஞ்ஞங்
பத்தா, யோ சாஹங் ந வதா³மி ‘உபோ⁴ அஹேதூ அப்பச்சயா விஸுஜ்ஜி²ஸ்ஸாமா’தி.
அதிரேகங் கோ² பனிமஸ்ஸ போ⁴தோ ஸத்து²னோ நக்³கி³யங் முண்டி³யங்
உக்குடிகப்பதா⁴னங் கேஸமஸ்ஸுலோசனங் யோஹங் புத்தஸம்பா³த⁴ஸயனங் அஜ்ஜா²வஸந்தோ
காஸிகசந்த³னங் பச்சனுபொ⁴ந்தோ மாலாக³ந்த⁴விலேபனங் தா⁴ரெந்தோ ஜாதரூபரஜதங்
ஸாதி³யந்தோ இமினா போ⁴தா ஸத்தா²ரா ஸமஸமக³திகோ ப⁴விஸ்ஸாமி. அபி⁴ஸம்பராயங்
ஸோஹங் கிங் ஜானந்தோ கிங் பஸ்ஸந்தோ இமஸ்மிங் ஸத்த²ரி ப்³ரஹ்மசரியங்
சரிஸ்ஸாமி? ‘ஸோ அப்³ரஹ்மசரியவாஸோ அய’ந்தி – இதி விதி³த்வா தஸ்மா
ப்³ரஹ்மசரியா நிப்³பி³ஜ்ஜ பக்கமதி. அயங் கோ², ஸந்த³க, தேன ப⁴க³வதா ஜானதா
பஸ்ஸதா அரஹதா ஸம்மாஸம்பு³த்³தே⁴ன ததியோ அப்³ரஹ்மசரியவாஸோ அக்கா²தோ யத்த²
விஞ்ஞூ புரிஸோ ஸஸக்கங் ப்³ரஹ்மசரியங் ந வஸெய்ய, வஸந்தோ ச நாராதெ⁴ய்ய ஞாயங்
த⁴ம்மங் குஸலங்.
228.
‘‘புன சபரங், ஸந்த³க, இதே⁴கச்சோ ஸத்தா² ஏவங்வாதீ³ ஹோதி ஏவங்தி³ட்டி² –
‘ஸத்திமே காயா அகடா அகடவிதா⁴ அனிம்மிதா அனிம்மாதா வஞ்ஜா² கூடட்டா²
ஏஸிகட்டா²யிட்டி²தா, தே ந இஞ்ஜந்தி ந விபரிணமந்தி ந அஞ்ஞமஞ்ஞங்
ப்³யாபா³தெ⁴ந்தி நாலங் அஞ்ஞமஞ்ஞஸ்ஸ ஸுகா²ய வா து³க்கா²ய வா ஸுக²து³க்கா²ய
வா. கதமே ஸத்த? பத²வீகாயோ ஆபோகாயோ தேஜோகாயோ வாயோகாயோ ஸுகே² து³க்கே² ஜீவே
ஸத்தமே – இமே ஸத்தகாயா அகடா அகடவிதா⁴ அனிம்மிதா அனிம்மாதா
வஞ்ஜா² கூடட்டா² ஏஸிகட்டா²யிட்டி²தா. தே ந இஞ்ஜந்தி ந விபரிணமந்தி ந
அஞ்ஞமஞ்ஞங் ப்³யாபா³தெ⁴ந்தி. நாலங் அஞ்ஞமஞ்ஞஸ்ஸ ஸுகா²ய வா து³க்கா²ய வா
ஸுக²து³க்கா²ய வா. தத்த² நத்தி² ஹந்தா வா கா⁴தேதா வா ஸோதா வா ஸாவேதா வா
விஞ்ஞாதா வா விஞ்ஞாபேதா வா. யோபி திண்ஹேன ஸத்தே²ன ஸீஸங் சி²ந்த³தி, ந கோசி
கஞ்சி [கிஞ்சி (க॰)] ஜீவிதா வோரோபேதி.
ஸத்தன்னங்த்வேவ காயானமந்தரேன ஸத்த²ங் விவரமனுபததி. சுத்³த³ஸ கோ² பனிமானி
யோனிபமுக²ஸதஸஹஸ்ஸானி ஸட்டி² ச ஸதானி ச² ச ஸதானி பஞ்ச ச கம்முனோ ஸதானி பஞ்ச ச
கம்மானி தீணி ச கம்மானி, கம்மே ச அட்³ட⁴கம்மே ச,
த்³வட்டி²படிபதா³, த்³வட்ட²ந்தரகப்பா, ச²ளாபி⁴ஜாதியோ, அட்ட² புரிஸபூ⁴மியோ,
ஏகூனபஞ்ஞாஸ ஆஜீவகஸதே, ஏகூனபஞ்ஞாஸ பரிப்³பா³ஜகஸதே, ஏகூனபஞ்ஞாஸ
நாகா³வாஸஸதே, வீஸே இந்த்³ரியஸதே, திங்ஸே நிரயஸதே, ச²த்திங்ஸ ரஜோதா⁴துயோ,
ஸத்த ஸஞ்ஞீக³ப்³பா⁴, ஸத்த அஸஞ்ஞீக³ப்³பா⁴, ஸத்த நிக³ண்டி²க³ப்³பா⁴, ஸத்த
தே³வா, ஸத்த மானுஸா, ஸத்த பேஸாசா, ஸத்த ஸரா, ஸத்த பவுடா, ஸத்த பபாதா, ஸத்த
பபாதஸதானி, ஸத்த ஸுபினா, ஸத்த ஸுபினஸதானி, சுல்லாஸீதி [சூளாஸீதி (ஸீ॰ ஸ்யா॰ கங்॰ பீ॰)] மஹாகப்பினோ [மஹாகப்புனோ (ஸீ॰ பீ॰)]
ஸதஸஹஸ்ஸானி, யானி பா³லே ச பண்டி³தே ச ஸந்தா⁴வித்வா ஸங்ஸரித்வா
து³க்க²ஸ்ஸந்தங் கரிஸ்ஸந்தி. தத்த² நத்தி² இமினாஹங் ஸீலேன வா வதேன வா தபேன
வா ப்³ரஹ்மசரியேன வா அபரிபக்கங் வா கம்மங் பரிபாசெஸ்ஸாமி, பரிபக்கங் வா
கம்மங் பு²ஸ்ஸ பு²ஸ்ஸ ப்³யந்திங் கரிஸ்ஸாமீதி. ஹேவங் நத்தி² தோ³ணமிதே
ஸுக²து³க்கே² பரியந்தகதே ஸங்ஸாரே, நத்தி² ஹாயனவட்³ட⁴னே, நத்தி²
உக்கங்ஸாவகங்ஸே. ஸெய்யதா²பி நாம ஸுத்தகு³ளே கி²த்தே நிப்³பே³டி²யமானமேவ
பலேதி, ஏவமேவ பா³லே ச பண்டி³தே ச ஸந்தா⁴வித்வா ஸங்ஸரித்வா து³க்க²ஸ்ஸந்தங்
கரிஸ்ஸந்தீ’தி.
‘‘தத்ர, ஸந்த³க, விஞ்ஞூ புரிஸோ இதி படிஸஞ்சிக்க²தி –
‘அயங் கோ² ப⁴வங் ஸத்தா² ஏவங்வாதீ³ ஏவங்தி³ட்டி² – ஸத்திமே காயா அகடா
அகடவிதா⁴ அனிம்மிதா அனிம்மாதா வஞ்ஜா² கூடட்டா² ஏஸிகட்டா²யிட்டி²தா. தே ந
இஞ்ஜந்தி ந விபரிணமந்தி ந அஞ்ஞமஞ்ஞங் ப்³யாபா³தெ⁴ந்தி. நாலங் அஞ்ஞமஞ்ஞஸ்ஸ
ஸுகா²ய வா து³க்கா²ய வா ஸுக²து³க்கா²ய வா. கதமே ஸத்த ?
பத²வீகாயோ ஆபோகாயோ தேஜோகாயோ வாயோகாயோ ஸுகே² து³க்கே² ஜீவே ஸத்தமே – இமே
ஸத்த காயா அகடா அகடவிதா⁴ அனிம்மிதா அனிம்மாதா வஞ்ஜா² கூடட்டா²
ஏஸிகட்டா²யிட்டி²தா. தே ந இஞ்ஜந்தி ந விபரிணமந்தி ந அஞ்ஞமஞ்ஞங்
ப்³யாபா³தெ⁴ந்தி. நாலங் அஞ்ஞமஞ்ஞஸ்ஸ ஸுகா²ய வா து³க்கா²ய வா ஸுக²து³க்கா²ய
வா. தத்த² நத்தி² ஹந்தா வா கா⁴தேதா வா ஸோதா வா ஸாவேதா வா விஞ்ஞாதா வா விஞ்ஞாபேதா வா. யோபி திண்ஹேன ஸத்தே²ன ஸீஸங் சி²ந்த³தி, ந கோசி கஞ்சி ஜீவிதா வோரோபேதி .
ஸத்தன்னங்த்வேவ காயானமந்தரேன ஸத்த²ங் விவரமனுபததி. சுத்³த³ஸ கோ² பனிமானி
யோனிபமுக²ஸதஸஹஸ்ஸானி ஸட்டி² ச ஸதானி ச² ச ஸதானி பஞ்ச ச கம்முனோ ஸதானி பஞ்ச ச
கம்மானி தீணி ச கம்மானி, கம்மே ச அட்³ட⁴கம்மே ச, த்³வட்டி²படிபதா³,
த்³வட்ட²ந்தரகப்பா, ச²ளாபி⁴ஜாதியோ, அட்ட² புரிஸபூ⁴மியோ, ஏகூனபஞ்ஞாஸ
ஆஜீவகஸதே, ஏகூனபஞ்ஞாஸ பரிப்³பா³ஜகஸதே, ஏகூனபஞ்ஞாஸ நாகா³வாஸஸதே, வீஸே
இந்த்³ரியஸதே, திங்ஸே நிரயஸதே, ச²த்திங்ஸ ரஜோதா⁴துயோ, ஸத்த ஸஞ்ஞீக³ப்³பா⁴,
ஸத்த அஸஞ்ஞீக³ப்³பா⁴, ஸத்த நிக³ண்டி²க³ப்³பா⁴, ஸத்த தே³வா, ஸத்த மானுஸா,
ஸத்த பேஸாசா, ஸத்த ஸரா, ஸத்த பவுடா, ஸத்த பபாதா, ஸத்த பபாதஸதானி, ஸத்த
ஸுபினா, ஸத்த ஸுபினஸதானி, சுல்லாஸீதி மஹாகப்பினோ ஸதஸஹஸ்ஸானி, யானி பா³லே ச
பண்டி³தே ச ஸந்தா⁴வித்வா ஸங்ஸரித்வா து³க்க²ஸ்ஸந்தங் கரிஸ்ஸந்தி. தத்த²
நத்தி² இமினாஹங் ஸீலேன வா வதேன வா தபேன வா ப்³ரஹ்மசரியேன வா அபரிபக்கங்
வா கம்மங் பரிபாசெஸ்ஸாமி, பரிபக்கங் வா கம்மங் பு²ஸ்ஸ பு²ஸ்ஸ ப்³யந்திங்
கரிஸ்ஸாமீதி, ஹேவங் நத்தி² தோ³ணமிதே ஸுக²து³க்கே² பரியந்தகதே ஸங்ஸாரே,
நத்தி² ஹாயனவட்³ட⁴னே, நத்தி² உக்கங்ஸாவகங்ஸே. ஸெய்யதா²பி நாம ஸுத்தகு³ளே
கி²த்தே நிப்³பே³டி²யமானமேவ பலேதி, ஏவமேவ பா³லே ச பண்டி³தே ச ஸந்தா⁴வித்வா
ஸங்ஸரித்வா து³க்க²ஸ்ஸந்தங் கரிஸ்ஸந்தீ’தி. ஸசே பன இமஸ்ஸ போ⁴தோ ஸத்து²னோ
ஸச்சங் வசனங், அகதேன மே எத்த² கதங், அவுஸிதேன மே எத்த² வுஸிதங். உபோ⁴பி
மயங் எத்த² ஸமஸமா ஸாமஞ்ஞங் பத்தா, யோ சாஹங் ந வதா³மி. ‘உபோ⁴ ஸந்தா⁴வித்வா
ஸங்ஸரித்வா து³க்க²ஸ்ஸந்தங் கரிஸ்ஸாமா’தி. அதிரேகங் கோ² பனிமஸ்ஸ போ⁴தோ
ஸத்து²னோ நக்³கி³யங் முண்டி³யங் உக்குடிகப்பதா⁴னங் கேஸமஸ்ஸுலோசனங் யோஹங்
புத்தஸம்பா³த⁴ஸயனங் அஜ்ஜா²வஸந்தோ காஸிகசந்த³னங் பச்சனுபொ⁴ந்தோ
மாலாக³ந்த⁴விலேபனங் தா⁴ரெந்தோ ஜாதரூபரஜதங் ஸாதி³யந்தோ இமினா போ⁴தா ஸத்தா²ரா
ஸமஸமக³திகோ ப⁴விஸ்ஸாமி. அபி⁴ஸம்பராயங் ஸோஹங் கிங் ஜானந்தோ கிங் பஸ்ஸந்தோ
இமஸ்மிங் ஸத்த²ரி ப்³ரஹ்மசரியங் சரிஸ்ஸாமி? ‘ஸோ அப்³ரஹ்மசரியவாஸோ அய’ந்தி –
இதி விதி³த்வா தஸ்மா ப்³ரஹ்மசரியா நிப்³பி³ஜ்ஜ பக்கமதி. அயங் கோ², ஸந்த³க,
தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சதுத்தோ²
அப்³ரஹ்மசரியவாஸோ அக்கா²தோ யத்த² விஞ்ஞூ புரிஸோ ஸஸக்கங் ப்³ரஹ்மசரியங் ந
வஸெய்ய, வஸந்தோ ச நாராதெ⁴ய்ய ஞாயங் த⁴ம்மங் குஸலங்.
‘‘இமே கோ² தே, ஸந்த³க, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரோ அப்³ரஹ்மசரியவாஸா அக்கா²தா யத்த² விஞ்ஞூ புரிஸோ ஸஸக்கங் ப்³ரஹ்மசரியங் ந வஸெய்ய, வஸந்தோ ச நாராதெ⁴ய்ய ஞாயங் த⁴ம்மங் குஸல’’ந்தி.
‘‘அச்ச²ரியங் , போ⁴ ஆனந்த³,
அப்³பு⁴தங், போ⁴ ஆனந்த³! யாவஞ்சித³ங் தேன ப⁴க³வதா ஜானதா பஸ்ஸதா அரஹதா
ஸம்மாஸம்பு³த்³தே⁴ன சத்தாரோ அப்³ரஹ்மசரியவாஸாவ ஸமானா ‘அப்³ரஹ்மசரியவாஸா’தி
அக்கா²தா யத்த² விஞ்ஞூ புரிஸோ ஸஸக்கங் ப்³ரஹ்மசரியங் ந வஸெய்ய, வஸந்தோ ச
நாராதெ⁴ய்ய ஞாயங் த⁴ம்மங் குஸலந்தி. கதமானி பன தானி, போ⁴ ஆனந்த³, தேன
ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரி அனஸ்ஸாஸிகானி
ப்³ரஹ்மசரியானி அக்கா²தானி யத்த² விஞ்ஞூ புரிஸோ ஸஸக்கங் ப்³ரஹ்மசரியங் ந
வஸெய்ய, வஸந்தோ ச நாராதெ⁴ய்ய ஞாயங் த⁴ம்மங் குஸல’’ந்தி?
229.
‘‘இத⁴, ஸந்த³க, ஏகச்சோ ஸத்தா² ஸப்³ப³ஞ்ஞூ ஸப்³ப³த³ஸ்ஸாவீ அபரிஸேஸங்
ஞாணத³ஸ்ஸனங் படிஜானாதி – ‘சரதோ ச மே திட்ட²தோ ச ஸுத்தஸ்ஸ ச ஜாக³ரஸ்ஸ ச
ஸததங் ஸமிதங் ஞாணத³ஸ்ஸனங் பச்சுபட்டி²த’ந்தி. ஸோ ஸுஞ்ஞம்பி அகா³ரங் பவிஸதி,
பிண்ட³ம்பி ந லப⁴தி, குக்குரோபி ட³ங்ஸதி, சண்டே³னபி ஹத்தி²னா ஸமாக³ச்ச²தி,
சண்டே³னபி அஸ்ஸேன ஸமாக³ச்ச²தி, சண்டே³னபி கோ³ணேன ஸமாக³ச்ச²தி, இத்தி²யாபி
புரிஸஸ்ஸபி நாமம்பி கொ³த்தம்பி புச்ச²தி, கா³மஸ்ஸபி நிக³மஸ்ஸபி நாமம்பி
மக்³க³ம்பி புச்ச²தி. ஸோ ‘கிமித³’ந்தி புட்டோ² ஸமானோ ‘ஸுஞ்ஞங் மே அகா³ரங்
பவிஸிதப்³ப³ங் அஹோஸி’, தேன பாவிஸிங்; ‘பிண்ட³ம்பி அலத்³த⁴ப்³ப³ங் அஹோஸி’,
தேன நாலத்த²ங் ; ‘குக்குரேன ட³ங்ஸிதப்³ப³ங் அஹோஸி’, தேனம்ஹி [தேன (க॰), தேனாஸிங் (?)]
த³ட்டோ²; ‘சண்டே³ன ஹத்தி²னா ஸமாக³ந்தப்³ப³ங் அஹோஸி’, தேன ஸமாக³மிங்;
‘சண்டே³ன அஸ்ஸேன ஸமாக³ந்தப்³ப³ங் அஹோஸி’, தேன ஸமாக³மிங்; ‘சண்டே³ன கோ³ணேன
ஸமாக³ந்தப்³ப³ங் அஹோஸி’, தேன ஸமாக³மிங்; ‘இத்தி²யாபி புரிஸஸ்ஸபி நாமம்பி
கொ³த்தம்பி புச்சி²தப்³ப³ங் அஹோஸி’, தேன புச்சி²ங்; ‘கா³மஸ்ஸபி நிக³மஸ்ஸபி
நாமம்பி மக்³க³ம்பி புச்சி²தப்³ப³ங் அஹோஸி’, தேன புச்சி²ந்தி. தத்ர,
ஸந்த³க, விஞ்ஞூ புரிஸோ இதி படிஸஞ்சிக்க²தி – ‘அயங் கோ² ப⁴வங் ஸத்தா²
ஸப்³ப³ஞ்ஞூ ஸப்³ப³த³ஸ்ஸாவீ அபரிஸேஸங் ஞாணத³ஸ்ஸனங் படிஜானாதி…பே॰… ‘கா³மஸ்ஸபி நிக³மஸ்ஸபி நாமம்பி மக்³க³ம்பி புச்சி²தப்³ப³ங் அஹோஸி, தேன புச்சி²’ந்தி .
ஸோ ‘அனஸ்ஸாஸிகங் இத³ங் ப்³ரஹ்மசரிய’ந்தி – இதி விதி³த்வா தஸ்மா
ப்³ரஹ்மசரியா நிப்³பி³ஜ்ஜ பக்கமதி. இத³ங் கோ², ஸந்த³க, தேன ப⁴க³வதா ஜானதா
பஸ்ஸதா அரஹதா ஸம்மாஸம்பு³த்³தே⁴ன பட²மங் அனஸ்ஸாஸிகங் ப்³ரஹ்மசரியங்
அக்கா²தங் யத்த² விஞ்ஞூ புரிஸோ ஸஸக்கங் ப்³ரஹ்மசரியங் ந வஸெய்ய, வஸந்தோ ச நாராதெ⁴ய்ய ஞாயங் த⁴ம்மங் குஸலங்.
230.
‘‘புன சபரங், ஸந்த³க, இதே⁴கச்சோ ஸத்தா² அனுஸ்ஸவிகோ ஹோதி அனுஸ்ஸவஸச்சோ. ஸோ
அனுஸ்ஸவேன இதிஹிதிஹபரம்பராய பிடகஸம்பதா³ய த⁴ம்மங் தே³ஸேதி. அனுஸ்ஸவிகஸ்ஸ
கோ² பன, ஸந்த³க , ஸத்து²னோ அனுஸ்ஸவஸச்சஸ்ஸ
ஸுஸ்ஸுதம்பி ஹோதி து³ஸ்ஸுதம்பி ஹோதி ததா²பி ஹோதி அஞ்ஞதா²பி ஹோதி. தத்ர,
ஸந்த³க, விஞ்ஞூ புரிஸோ இதி படிஸஞ்சிக்க²தி – ‘அயங் கோ² ப⁴வங் ஸத்தா²
அனுஸ்ஸவிகோ அனுஸ்ஸவஸச்சோ ஸோ அனுஸ்ஸவேன இதிஹிதிஹபரம்பராய பிடகஸம்பதா³ய
த⁴ம்மங் தே³ஸேதி. அனுஸ்ஸவிகஸ்ஸ கோ² பன ஸத்து²னோ அனுஸ்ஸவஸச்சஸ்ஸ ஸுஸ்ஸுதம்பி
ஹோதி து³ஸ்ஸுதம்பி ஹோதி ததா²பி ஹோதி அஞ்ஞதா²பி ஹோதி’. ஸோ ‘அனஸ்ஸாஸிகங்
இத³ங் ப்³ரஹ்மசரிய’ந்தி – இதி விதி³த்வா தஸ்மா ப்³ரஹ்மசரியா நிப்³பி³ஜ்ஜ
பக்கமதி. இத³ங் கோ², ஸந்த³க, தேன ப⁴க³வதா ஜானதா பஸ்ஸதா அரஹதா
ஸம்மாஸம்பு³த்³தே⁴ன து³தியங் அனஸ்ஸாஸிகங் ப்³ரஹ்மசரியங் அக்கா²தங் யத்த²
விஞ்ஞூ புரிஸோ ஸஸக்கங் ப்³ரஹ்மசரியங் ந வஸெய்ய, வஸந்தோ ச நாராதெ⁴ய்ய ஞாயங்
த⁴ம்மங் குஸலங்.
231. ‘‘புன
சபரங், ஸந்த³க, இதே⁴கச்சோ ஸத்தா² தக்கீ ஹோதி வீமங்ஸீ. ஸோ தக்கபரியாஹதங்
வீமங்ஸானுசரிதங் ஸயங்படிபா⁴னங் த⁴ம்மங் தே³ஸேதி. தக்கிஸ்ஸ கோ² பன, ஸந்த³க,
ஸத்து²னோ வீமங்ஸிஸ்ஸ ஸுதக்கிதம்பி ஹோதி து³த்தக்கிதம்பி ஹோதி ததா²பி ஹோதி
அஞ்ஞதா²பி ஹோதி. தத்ர, ஸந்த³க, விஞ்ஞூ புரிஸோ இதி படிஸஞ்சிக்க²தி – ‘அயங்
கோ² ப⁴வங் ஸத்தா² தக்கீ வீமங்ஸீ. ஸோ தக்கபரியாஹதங் வீமங்ஸானுசரிதங்
ஸயங்படிபா⁴னங் த⁴ம்மங் தே³ஸேதி. தக்கிஸ்ஸ கோ² பன ஸத்து²னோ வீமங்ஸிஸ்ஸ
ஸுதக்கிதம்பி ஹோதி து³த்தக்கிதம்பி ஹோதி ததா²பி ஹோதி அஞ்ஞதா²பி ஹோதி’. ஸோ
‘அனஸ்ஸாஸிகங் இத³ங் ப்³ரஹ்மசரிய’ந்தி – இதி விதி³த்வா தஸ்மா ப்³ரஹ்மசரியா
நிப்³பி³ஜ்ஜ பக்கமதி. இத³ங் கோ², ஸந்த³க, தேன ப⁴க³வதா ஜானதா பஸ்ஸதா அரஹதா
ஸம்மாஸம்பு³த்³தே⁴ன ததியங் அனஸ்ஸாஸிகங் ப்³ரஹ்மசரியங் அக்கா²தங் யத்த²
விஞ்ஞூ புரிஸோ ஸஸக்கங் ப்³ரஹ்மசரியங் ந வஸெய்ய, வஸந்தோ ச நாராதெ⁴ய்ய ஞாயங்
த⁴ம்மங் குஸலங்.
232. ‘‘புன சபரங், ஸந்த³க, இதே⁴கச்சோ ஸத்தா² மந்தோ³ ஹோதி மோமூஹோ. ஸோ மந்த³த்தா மோமூஹத்தா தத்த² தத்த² [ததா² ததா² (ஸீ॰ ஸ்யா॰ கங்॰ பீ॰)] பஞ்ஹங் புட்டோ² ஸமானோ வாசாவிக்கே²பங் ஆபஜ்ஜதி அமராவிக்கே²பங் – ‘ஏவந்திபி [ஏவம்பி (ஸீ॰ பீ॰)] மே நோ, ததா²திபி [ததா²பி (ஸீ॰ பீ॰)] மே நோ, அஞ்ஞதா²திபி [அஞ்ஞதா²பி (ஸீ॰ பீ॰) ( ) ஸப்³ப³த்த² நத்தி²]
மே நோ, நோதிபி மே நோ, நோ நோதிபி மே நோ’தி. தத்ர, ஸந்த³க, விஞ்ஞூ புரிஸோ
இதி படிஸஞ்சிக்க²தி – ‘அயங் கோ² ப⁴வங் ஸத்தா² மந்தோ³ மோமூஹோ. ஸோ மந்த³த்தா
மோமூஹத்தா தத்த² தத்த² பஞ்ஹங் புட்டோ² ஸமானோ வாசாவிக்கே²பங் ஆபஜ்ஜதி
அமராவிக்கே²பங் – ஏவந்திபி மே நோ, ததா²திபி மே நோ,
அஞ்ஞதா²திபி மே நோ, நோதிபி மே நோ, நோ நோதிபி மே நோ’தி. ஸோ ‘அனஸ்ஸாஸிகங்
இத³ங் ப்³ரஹ்மசரிய’ந்தி – இதி விதி³த்வா தஸ்மா
ப்³ரஹ்மசரியா நிப்³பி³ஜ்ஜ பக்கமதி. இத³ங் கோ², ஸந்த³க, தேன ப⁴க³வதா ஜானதா
பஸ்ஸதா அரஹதா ஸம்மாஸம்பு³த்³தே⁴ன சதுத்த²ங் அனஸ்ஸாஸிகங் ப்³ரஹ்மசரியங்
அக்கா²தங் யத்த² விஞ்ஞூ புரிஸோ ஸஸக்கங் ப்³ரஹ்மசரியங் ந வஸெய்ய, வஸந்தோ ச
நாராதெ⁴ய்ய ஞாயங் த⁴ம்மங் குஸலங்.
‘‘இமானி கோ², (தானி ஸந்த³க, தேன ப⁴க³வதா ஜானதா பஸ்ஸதா
அரஹதா ஸம்மாஸம்பு³த்³தே⁴ன சத்தாரி அனஸ்ஸாஸிகானி ப்³ரஹ்மசரியானி அக்கா²தானி
யத்த² விஞ்ஞூ புரிஸோ ஸஸக்கங் ப்³ரஹ்மசரியங் ந வஸெய்ய, வஸந்தோ ச நாராதெ⁴ய்ய
ஞாயங் த⁴ம்மங் குஸல’’ந்தி.
‘‘அச்ச²ரியங், போ⁴ ஆனந்த³, அப்³பு⁴தங், போ⁴ ஆனந்த³!
யாவஞ்சித³ங் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரி
அனஸ்ஸாஸிகானேவ ப்³ரஹ்மசரியானி அனஸ்ஸாஸிகானி ப்³ரஹ்மசரியானீதி அக்கா²தானி
யத்த² விஞ்ஞூ புரிஸோ ஸஸக்கங் ப்³ரஹ்மசரியங் ந வஸெய்ய, வஸந்தோ ச நாராதெ⁴ய்ய
ஞாயங் த⁴ம்மங் குஸலங். ஸோ பன, போ⁴ ஆனந்த³, ஸத்தா² கிங் வாதீ³ கிங் அக்கா²யீ
யத்த² விஞ்ஞூ புரிஸோ ஸஸக்கங் ப்³ரஹ்மசரியங் வஸெய்ய, வஸந்தோ ச ஆராதெ⁴ய்ய
ஞாயங் த⁴ம்மங் குஸல’’ந்தி.
233.
‘‘இத⁴, ஸந்த³க, ததா²க³தோ லோகே உப்பஜ்ஜதி அரஹங் ஸம்மாஸம்பு³த்³தோ⁴
விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா²
தே³வமனுஸ்ஸானங் பு³த்³தோ⁴ ப⁴க³வா…பே॰… [வித்தா²ரோ ம॰ நி॰ 2.9-10 கந்த³ரகஸுத்தே] ஸோ இமே பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி. யஸ்மிங் கோ² [யஸ்மிங் கோ² பன (ஸ்யா॰ கங்॰ க॰)], ஸந்த³க, ஸத்த²ரி ஸாவகோ ஏவரூபங் உளாரவிஸேஸங் அதி⁴க³ச்ச²தி தத்த² விஞ்ஞூ புரிஸோ ஸஸக்கங் ப்³ரஹ்மசரியங் வஸெய்ய, வஸந்தோ ச ஆராதெ⁴ய்ய ஞாயங் த⁴ம்மங் குஸலங்.
‘‘புன சபரங், ஸந்த³க, பி⁴க்கு² விதக்கவிசாரானங்
வூபஸமா…பே॰.. து³தியங் ஜா²னங் உபஸம்பஜ்ஜ விஹரதி. யஸ்மிங் கோ², ஸந்த³க,
ஸத்த²ரி ஸாவகோ ஏவரூபங் உளாரவிஸேஸங் அதி⁴க³ச்ச²தி தத்த² விஞ்ஞூ புரிஸோ
ஸஸக்கங் ப்³ரஹ்மசரியங் வஸெய்ய, வஸந்தோ ச ஆராதெ⁴ய்ய ஞாயங் த⁴ம்மங் குஸலங்.
‘‘புன சபரங், ஸந்த³க, பி⁴க்கு²
பீதியா ச விராகா³ உபெக்க²கோ ச விஹரதி…பே॰… ததியங் ஜா²னங் உபஸம்பஜ்ஜ
விஹரதி. யஸ்மிங் கோ², ஸந்த³க, ஸத்த²ரி ஸாவகோ ஏவரூபங் உளாரவிஸேஸங்
அதி⁴க³ச்ச²தி தத்த² விஞ்ஞூ புரிஸோ ஸஸக்கங் ப்³ரஹ்மசரியங் வஸெய்ய, வஸந்தோ ச
ஆராதெ⁴ய்ய ஞாயங் த⁴ம்மங் குஸலங்.
‘‘புன சபரங், ஸந்த³க, பி⁴க்கு² ஸுக²ஸ்ஸ ச பஹானா…பே॰…
சதுத்த²ங் ஜா²னங் உபஸம்பஜ்ஜ விஹரதி. யஸ்மிங் கோ², ஸந்த³க, ஸத்த²ரி ஸாவகோ
ஏவரூபங் உளாரவிஸேஸங் அதி⁴க³ச்ச²தி தத்த² விஞ்ஞூ புரிஸோ ஸஸக்கங்
ப்³ரஹ்மசரியங் வஸெய்ய, வஸந்தோ ச ஆராதெ⁴ய்ய ஞாயங் த⁴ம்மங் குஸலங்.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
புப்³பே³னிவாஸானுஸ்ஸதிஞாணாய சித்தங் அபி⁴னின்னாமேதி. ஸோ அனேகவிஹிதங்
புப்³பே³னிவாஸங் அனுஸ்ஸரதி, ஸெய்யதி²த³ங் – ஏகம்பி ஜாதிங் த்³வேபி
ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங்
அனுஸ்ஸரதி. யஸ்மிங் கோ², ஸந்த³க, ஸத்த²ரி ஸாவகோ ஏவரூபங் உளாரவிஸேஸங்
அதி⁴க³ச்ச²தி தத்த² விஞ்ஞூ புரிஸோ ஸஸக்கங் ப்³ரஹ்மசரியங் வஸெய்ய, வஸந்தோ ச
ஆராதெ⁴ய்ய ஞாயங் த⁴ம்மங் குஸலங்.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே
அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
ஸத்தானங் சுதூபபாதஞாணாய சித்தங் அபி⁴னின்னாமேதி. ஸோ தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே
ஸுவண்ணே து³ப்³ப³ண்ணே ஸுக³தே து³க்³க³தே…பே॰… யதா²கம்மூபகே³ ஸத்தே பஜானாதி.
யஸ்மிங் கோ², ஸந்த³க, ஸத்த²ரி ஸாவகோ ஏவரூபங் உளாரவிஸேஸங் அதி⁴க³ச்ச²தி தத்த² விஞ்ஞூ புரிஸோ ஸஸக்கங் ப்³ரஹ்மசரியங் வஸெய்ய, வஸந்தோ ச ஆராதெ⁴ய்ய ஞாயங் த⁴ம்மங் குஸலங்.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே
அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானங்
க²யஞாணாய சித்தங் அபி⁴னின்னாமேதி. ஸோ ‘இத³ங் து³க்க²’ந்தி யதா²பூ⁴தங்
பஜானாதி, ‘அயங் து³க்க²ஸமுத³யோ’தி யதா²பூ⁴தங் பஜானாதி, ‘அயங்
து³க்க²னிரோதோ⁴’தி யதா²பூ⁴தங் பஜானாதி, ‘அயங் து³க்க²னிரோத⁴கா³மினீ
படிபதா³’தி யதா²பூ⁴தங் பஜானாதி; ‘இமே ஆஸவா’தி யதா²பூ⁴தங் பஜானாதி, ‘அயங்
ஆஸவஸமுத³யோ’தி யதா²பூ⁴தங் பஜானாதி, ‘அயங் ஆஸவனிரோதோ⁴’தி யதா²பூ⁴தங் பஜானாதி, ‘அயங் ஆஸவனிரோத⁴கா³மினீ
படிபதா³’தி யதா²பூ⁴தங் பஜானாதி. தஸ்ஸ ஏவங் ஜானதோ ஏவங் பஸ்ஸதோ காமாஸவாபி
சித்தங் விமுச்சதி, ப⁴வாஸவாபி சித்தங் விமுச்சதி, அவிஜ்ஜாஸவாபி சித்தங்
விமுச்சதி. விமுத்தஸ்மிங் விமுத்தமிதி ஞாணங் ஹோதி. ‘கீ²ணா ஜாதி, வுஸிதங்
ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி. யஸ்மிங் கோ²,
ஸந்த³க, ஸத்த²ரி ஸாவகோ ஏவரூபங் உளாரவிஸேஸங் அதி⁴க³ச்ச²தி தத்த² விஞ்ஞூ
புரிஸோ ஸஸக்கங் ப்³ரஹ்மசரியங் வஸெய்ய, வஸந்தோ ச ஆராதெ⁴ய்ய ஞாயங் த⁴ம்மங்
குஸல’’ந்தி.
234.
‘‘யோ பன ஸோ, போ⁴ ஆனந்த³, பி⁴க்கு² அரஹங் கீ²ணாஸவோ வுஸிதவா கதகரணீயோ
ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ
பரிபு⁴ஞ்ஜெய்ய ஸோ காமே’’தி? ‘‘யோ ஸோ, ஸந்த³க,
பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ²
பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ அப⁴ப்³போ³ ஸோ பஞ்சட்டா²னானி
அஜ்ஜா²சரிதுங். அப⁴ப்³போ³ கீ²ணாஸவோ பி⁴க்கு² ஸஞ்சிச்ச பாணங் ஜீவிதா
வோரோபேதுங், அப⁴ப்³போ³ கீ²ணாஸவோ பி⁴க்கு² அதி³ன்னங் தெ²ய்யஸங்கா²தங்
ஆதா³துங், அப⁴ப்³போ³ கீ²ணாஸவோ பி⁴க்கு² மேது²னங் த⁴ம்மங் படிஸேவேதுங்,
அப⁴ப்³போ³ கீ²ணாஸவோ பி⁴க்கு² ஸம்பஜானமுஸா பா⁴ஸிதுங், அப⁴ப்³போ³ கீ²ணாஸவோ
பி⁴க்கு² ஸன்னிதி⁴காரகங் காமே பரிபு⁴ஞ்ஜிதுங், ஸெய்யதா²பி புப்³பே³
அகா³ரியபூ⁴தோ. யோ ஸோ, ஸந்த³க, பி⁴க்கு² அரஹங் கீ²ணாஸவோ வுஸிதவா கதகரணீயோ
ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ
அப⁴ப்³போ³ ஸோ இமானி பஞ்சட்டா²னானி அஜ்ஜா²சரிது’’ந்தி.
235. ‘‘யோ
பன ஸோ, போ⁴ ஆனந்த³, பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ
அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ தஸ்ஸ சரதோ சேவ
திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததங் ஸமிதங் ஞாணத³ஸ்ஸனங்
பச்சுபட்டி²தங் – ‘கீ²ணா மே ஆஸவா’’’தி? ‘‘தேன ஹி, ஸந்த³க, உபமங் தே
கரிஸ்ஸாமி; உபமாயபிதே⁴கச்சே விஞ்ஞூ புரிஸா பா⁴ஸிதஸ்ஸ அத்த²ங் ஆஜானந்தி.
ஸெய்யதா²பி, ஸந்த³க, புரிஸஸ்ஸ ஹத்த²பாதா³ சி²ன்னா; தஸ்ஸ சரதோ சேவ திட்ட²தோ ச
ஸுத்தஸ்ஸ ச ஜாக³ரஸ்ஸ ச ஸததங் ஸமிதங் (ஜானாதி – ‘சி²ன்னா மே ஹத்த²பாதா³’தி,
உதா³ஹு பச்சவெக்க²மானோ ஜானாதி – ‘சி²ன்னா மே ஹத்த²பாதா³’’’தி? ‘‘ந கோ²,
போ⁴ ஆனந்த³, ஸோ புரிஸோ ஸததங் ஸமிதங் ஜானாதி – ‘சி²ன்னா மே ஹத்த²பாதா³’ தி.)
[(சி²ன்னாவ ஹத்த²பாதா³,) (ஸீ॰ ஸ்யா॰ கங்॰ பீ॰)] அபி ச கோ² பன நங் பச்சவெக்க²மானோ ஜானாதி – ‘சி²ன்னா மே ஹத்த²பாதா³’’’தி. ‘‘ஏவமேவ கோ², ஸந்த³க, யோ ஸோ
பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ²
பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ தஸ்ஸ சரதோ சேவ திட்ட²தோ ச
ஸுத்தஸ்ஸ ச ஜாக³ரஸ்ஸ ச ஸததங் ஸமிதங் (ஞாணத³ஸ்ஸனங் ந பச்சுபட்டி²தங் –
‘கீ²ணா மே ஆஸவா’தி;) [(கீ²ணாவ ஆஸவா,) (ஸீ॰ ஸ்யா॰ கங்॰ பீ॰)] அபி ச கோ² பன நங் பச்சவெக்க²மானோ ஜானாதி – ‘கீ²ணா மே ஆஸவா’’’தி.
236.
‘‘கீவப³ஹுகா பன, போ⁴ ஆனந்த³, இமஸ்மிங் த⁴ம்மவினயே நிய்யாதாரோ’’தி? ‘‘ந
கோ², ஸந்த³க, ஏகங்யேவ ஸதங் ந த்³வே ஸதானி ந தீணி ஸதானி ந சத்தாரி ஸதானி ந
பஞ்ச ஸதானி, அத² கோ² பி⁴ய்யோவ யே இமஸ்மிங் த⁴ம்மவினயே நிய்யாதாரோ’’தி.
‘‘அச்ச²ரியங், போ⁴ ஆனந்த³, அப்³பு⁴தங், போ⁴ ஆனந்த³! ந ச நாம
ஸத⁴ம்மோக்கங்ஸனா ப⁴விஸ்ஸதி, ந பரத⁴ம்மவம்ப⁴னா, ஆயதனே ச த⁴ம்மதே³ஸனா தாவ ப³ஹுகா
ச நிய்யாதாரோ பஞ்ஞாயிஸ்ஸந்தி. இமே பனாஜீவகா புத்தமதாய புத்தா அத்தானஞ்சேவ
உக்கங்ஸெந்தி, பரே ச வம்பெ⁴ந்தி தயோ சேவ நிய்யாதாரோ பஞ்ஞபெந்தி,
ஸெய்யதி²த³ங் – நந்த³ங் வச்ச²ங், கிஸங் ஸங்கிச்சங், மக்க²லிங்
கோ³ஸால’’ந்தி. அத² கோ² ஸந்த³கோ பரிப்³பா³ஜகோ ஸகங் பரிஸங் ஆமந்தேஸி –
‘‘சரந்து பொ⁴ந்தோ ஸமணே கோ³தமே ப்³ரஹ்மசரியவாஸோ. ந தா³னி ஸுகரங் அம்ஹேஹி
லாப⁴ஸக்காரஸிலோகே பரிச்சஜிது’’ந்தி. இதி ஹித³ங் ஸந்த³கோ பரிப்³பா³ஜகோ ஸகங்
பரிஸங் உய்யோஜேஸி ப⁴க³வதி ப்³ரஹ்மசரியேதி.
ஸந்த³கஸுத்தங் நிட்டி²தங் ச²ட்ட²ங்.
7. மஹாஸகுலுதா³யிஸுத்தங்
237. ஏவங்
மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன
கோ² பன ஸமயேன ஸம்ப³ஹுலா அபி⁴ஞ்ஞாதா அபி⁴ஞ்ஞாதா பரிப்³பா³ஜகா மோரனிவாபே
பரிப்³பா³ஜகாராமே படிவஸந்தி, ஸெய்யதி²த³ங் – அன்னபா⁴ரோ வரத⁴ரோ ஸகுலுதா³யீ ச
பரிப்³பா³ஜகோ அஞ்ஞே ச அபி⁴ஞ்ஞாதா அபி⁴ஞ்ஞாதா பரிப்³பா³ஜகா. அத² கோ² ப⁴க³வா
புப்³ப³ண்ஹஸமயங் நிவாஸெத்வா பத்தசீவரமாதா³ய ராஜக³ஹங் பிண்டா³ய பாவிஸி. அத²
கோ² ப⁴க³வதோ ஏதத³ஹோஸி – ‘‘அதிப்பகோ³ கோ² தாவ ராஜக³ஹே பிண்டா³ய சரிதுங்.
யங்னூனாஹங் யேன மோரனிவாபோ பரிப்³பா³ஜகாராமோ யேன ஸகுலுதா³யீ பரிப்³பா³ஜகோ
தேனுபஸங்கமெய்ய’’ந்தி. அத² கோ² ப⁴க³வா யேன மோரனிவாபோ பரிப்³பா³ஜகாராமோ
தேனுபஸங்கமி. தேன கோ² பன ஸமயேன ஸகுலுதா³யீ பரிப்³பா³ஜகோ மஹதியா
பரிப்³பா³ஜகபரிஸாய ஸத்³தி⁴ங் நிஸின்னோ ஹோதி உன்னாதி³னியா
உச்சாஸத்³த³மஹாஸத்³தா³ய அனேகவிஹிதங் திரச்சா²னகத²ங் கதெ²ந்தியா,
ஸெய்யதி²த³ங் – ராஜகத²ங் சோரகத²ங் மஹாமத்தகத²ங் ஸேனாகத²ங் ப⁴யகத²ங்
யுத்³த⁴கத²ங் அன்னகத²ங் பானகத²ங் வத்த²கத²ங் ஸயனகத²ங் மாலாகத²ங்
க³ந்த⁴கத²ங் ஞாதிகத²ங் யானகத²ங் கா³மகத²ங் நிக³மகத²ங் நக³ரகத²ங் ஜனபத³கத²ங்
இத்தி²கத²ங் ஸூரகத²ங் விஸிகா²கத²ங் கும்ப⁴ட்டா²னகத²ங் புப்³ப³பேதகத²ங் நானத்தகத²ங் லோகக்கா²யிகங் ஸமுத்³த³க்கா²யிகங் இதிப⁴வாப⁴வகத²ங்
இதி வா. அத்³த³ஸா கோ² ஸகுலுதா³யீ பரிப்³பா³ஜகோ ப⁴க³வந்தங் தூ³ரதோவ
ஆக³ச்ச²ந்தங். தி³ஸ்வான ஸகங் பரிஸங் ஸண்டா²பேதி – ‘‘அப்பஸத்³தா³ பொ⁴ந்தோ
ஹொந்து; மா பொ⁴ந்தோ ஸத்³த³மகத்த². அயங் ஸமணோ கோ³தமோ ஆக³ச்ச²தி;
அப்பஸத்³த³காமோ கோ² பன ஸோ ஆயஸ்மா அப்பஸத்³த³ஸ்ஸ வண்ணவாதீ³. அப்பேவ நாம
அப்பஸத்³த³ங் பரிஸங் விதி³த்வா உபஸங்கமிதப்³ப³ங் மஞ்ஞெய்யா’’தி. அத² கோ² தே
பரிப்³பா³ஜகா துண்ஹீ அஹேஸுங். அத² கோ² ப⁴க³வா யேன ஸகுலுதா³யீ பரிப்³பா³ஜகோ
தேனுபஸங்கமி. அத² கோ² ஸகுலுதா³யீ பரிப்³பா³ஜகோ ப⁴க³வந்தங் ஏதத³வோச – ‘‘ஏது
கோ², ப⁴ந்தே, ப⁴க³வா. ஸ்வாக³தங், ப⁴ந்தே, ப⁴க³வதோ. சிரஸ்ஸங் கோ², ப⁴ந்தே,
ப⁴க³வா இமங் பரியாயமகாஸி யதி³த³ங் இதா⁴க³மனாய. நிஸீத³து, ப⁴ந்தே, ப⁴க³வா;
இத³மாஸனங் பஞ்ஞத்த’’ந்தி. நிஸீதி³ ப⁴க³வா பஞ்ஞத்தே ஆஸனே. ஸகுலுதா³யீபி கோ²
பரிப்³பா³ஜகோ அஞ்ஞதரங் நீசங் ஆஸனங் க³ஹெத்வா ஏகமந்தங் நிஸீதி³. ஏகமந்தங்
நிஸின்னங் கோ² ஸகுலுதா³யிங் பரிப்³பா³ஜகங் ப⁴க³வா ஏதத³வோச –
238. ‘‘காயனுத்த² ,
உதா³யி, ஏதரஹி கதா²ய ஸன்னிஸின்னா, கா ச பன வோ அந்தராகதா² விப்பகதா’’தி?
‘‘திட்ட²தேஸா, ப⁴ந்தே, கதா² யாய மயங் ஏதரஹி கதா²ய ஸன்னிஸின்னா. நேஸா,
ப⁴ந்தே, கதா² ப⁴க³வதோ து³ல்லபா⁴ ப⁴விஸ்ஸதி பச்சா²பி ஸவனாய. புரிமானி,
ப⁴ந்தே, தி³வஸானி புரிமதரானி நானாதித்தி²யானங் ஸமணப்³ராஹ்மணானங்
குதூஹலஸாலாயங் ஸன்னிஸின்னானங் ஸன்னிபதிதானங் அயமந்தராகதா² உத³பாதி³ – ‘லாபா⁴ வத, போ⁴, அங்க³மக³தா⁴னங், ஸுலத்³த⁴லாபா⁴ வத, போ⁴, அங்க³மக³தா⁴னங்! தத்ரிமே [யத்தி²மே (ஸீ॰)]
ஸமணப்³ராஹ்மணா ஸங்கி⁴னோ க³ணினோ க³ணாசரியா ஞாதா யஸஸ்ஸினோ தித்த²கரா
ஸாது⁴ஸம்மதா ப³ஹுஜனஸ்ஸ ராஜக³ஹங் வஸ்ஸாவாஸங் ஓஸடா. அயம்பி கோ² பூரணோ கஸ்ஸபோ
ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ
ப³ஹுஜனஸ்ஸ; ஸோபி ராஜக³ஹங் வஸ்ஸாவாஸங் ஓஸடோ. அயம்பி கோ² மக்க²லி
கோ³ஸாலோ…பே॰… அஜிதோ கேஸகம்ப³லோ… பகுதோ⁴ கச்சாயனோ… ஸஞ்ஜயோ பே³லட்ட²புத்தோ…
நிக³ண்டோ² நாடபுத்தோ ஸங்கீ⁴ சேவ க³ணீ ச க³ணாசரியோ ச ஞாதோ
யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ; ஸோபி ராஜக³ஹங் வஸ்ஸாவாஸங் ஓஸடோ.
அயம்பி கோ² ஸமணோ கோ³தமோ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ
தித்த²கரோ ஸாது⁴ஸம்மதோ ப³ஹுஜனஸ்ஸ; ஸோபி ராஜக³ஹங் வஸ்ஸாவாஸங் ஓஸடோ. கோ நு
கோ² இமேஸங் ப⁴வதங் ஸமணப்³ராஹ்மணானங் ஸங்கீ⁴னங் க³ணீனங் க³ணாசரியானங்
ஞாதானங் யஸஸ்ஸீனங் தித்த²கரானங் ஸாது⁴ஸம்மதானங் ப³ஹுஜனஸ்ஸ ஸாவகானங் ஸக்கதோ
க³ருகதோ மானிதோ பூஜிதோ, கஞ்ச பன ஸாவகா ஸக்கத்வா க³ருங் கத்வா [க³ருகத்வா (ஸீ॰ ஸ்யா॰ கங்॰ பீ॰)] உபனிஸ்ஸாய விஹரந்தீ’’’தி?
239.
‘‘தத்ரேகச்சே ஏவமாஹங்ஸு – ‘அயங் கோ² பூரணோ கஸ்ஸபோ ஸங்கீ⁴ சேவ க³ணீ ச
க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ; ஸோ ச கோ²
ஸாவகானங் ந ஸக்கதோ ந க³ருகதோ ந மானிதோ ந பூஜிதோ, ந ச
பன பூரணங் கஸ்ஸபங் ஸாவகா ஸக்கத்வா க³ருங் கத்வா உபனிஸ்ஸாய விஹரந்தி.
பூ⁴தபுப்³ப³ங் பூரணோ கஸ்ஸபோ அனேகஸதாய பரிஸாய த⁴ம்மங் தே³ஸேதி. தத்ரஞ்ஞதரோ
பூரணஸ்ஸ கஸ்ஸபஸ்ஸ ஸாவகோ ஸத்³த³மகாஸி – ‘‘மா பொ⁴ந்தோ பூரணங் கஸ்ஸபங்
ஏதமத்த²ங் புச்சி²த்த²; நேஸோ ஏதங் ஜானாதி; மயமேதங் ஜானாம, அம்ஹே ஏதமத்த²ங்
புச்ச²த²; மயமேதங் ப⁴வந்தானங் ப்³யாகரிஸ்ஸாமா’’தி. பூ⁴தபுப்³ப³ங் பூரணோ
கஸ்ஸபோ பா³ஹா பக்³க³ய்ஹ கந்த³ந்தோ ந லப⁴தி –
‘‘அப்பஸத்³தா³ பொ⁴ந்தோ ஹொந்து, மா பொ⁴ந்தோ ஸத்³த³மகத்த². நேதே, ப⁴வந்தே,
புச்ச²ந்தி, அம்ஹே ஏதே புச்ச²ந்தி; மயமேதேஸங் ப்³யாகரிஸ்ஸாமா’’தி. ப³ஹூ கோ²
பன பூரணஸ்ஸ கஸ்ஸபஸ்ஸ ஸாவகா வாத³ங் ஆரோபெத்வா அபக்கந்தா – ‘‘ந த்வங் இமங்
த⁴ம்மவினயங் ஆஜானாஸி, அஹங் இமங் த⁴ம்மவினயங் ஆஜானாமி ,
கிங் த்வங் இமங் த⁴ம்மவினயங் ஆஜானிஸ்ஸஸி? மிச்சா²படிபன்னோ த்வமஸி, அஹமஸ்மி
ஸம்மாபடிபன்னோ, ஸஹிதங் மே, அஸஹிதங் தே, புரேவசனீயங் பச்சா² அவச,
பச்சா²வசனீயங் புரே அவச, அதி⁴சிண்ணங் தே விபராவத்தங், ஆரோபிதோ தே வாதோ³,
நிக்³க³ஹிதோஸி, சர வாத³ப்பமொக்கா²ய, நிப்³பே³டே²ஹி வா ஸசே பஹோஸீ’’தி. இதி
பூரணோ கஸ்ஸபோ ஸாவகானங் ந ஸக்கதோ ந க³ருகதோ ந மானிதோ ந பூஜிதோ, ந ச பன
பூரணங் கஸ்ஸபங் ஸாவகா ஸக்கத்வா க³ருங் கத்வா உபனிஸ்ஸாய விஹரந்தி.
அக்குட்டோ² ச பன பூரணோ கஸ்ஸபோ த⁴ம்மக்கோஸேனா’’’தி.
‘‘ஏகச்சே ஏவமாஹங்ஸு – ‘அயம்பி கோ² மக்க²லி கோ³ஸாலோ…பே॰… அஜிதோ கேஸகம்ப³லோ… பகுதோ⁴ கச்சாயனோ… ஸஞ்ஜயோ
பே³லட்ட²புத்தோ… நிக³ண்டோ² நாடபுத்தோ ஸங்கீ⁴ சேவ க³ணீ ச க³ணாசரியோ ச ஞாதோ
யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ; ஸோ ச கோ² ஸாவகானங் ந ஸக்கதோ ந
க³ருகதோ ந மானிதோ ந பூஜிதோ, ந ச பன நிக³ண்ட²ங் நாடபுத்தங் ஸாவகா ஸக்கத்வா
க³ருங் கத்வா உபனிஸ்ஸாய விஹரந்தி. பூ⁴தபுப்³ப³ங் நிக³ண்டோ² நாடபுத்தோ
அனேகஸதாய பரிஸாய த⁴ம்மங் தே³ஸேதி. தத்ரஞ்ஞதரோ நிக³ண்ட²ஸ்ஸ நாடபுத்தஸ்ஸ
ஸாவகோ ஸத்³த³மகாஸி – மா பொ⁴ந்தோ நிக³ண்ட²ங் நாடபுத்தங் ஏதமத்த²ங்
புச்சி²த்த²; நேஸோ ஏதங் ஜானாதி; மயமேதங் ஜானாம, அம்ஹே ஏதமத்த²ங் புச்ச²த²;
மயமேதங் ப⁴வந்தானங் ப்³யாகரிஸ்ஸாமாதி. பூ⁴தபுப்³ப³ங் நிக³ண்டோ² நாடபுத்தோ
பா³ஹா பக்³க³ய்ஹ கந்த³ந்தோ ந லப⁴தி – ‘‘அப்பஸத்³தா³ பொ⁴ந்தோ ஹொந்து, மா
பொ⁴ந்தோ ஸத்³த³மகத்த². நேதே ப⁴வந்தே புச்ச²ந்தி, அம்ஹே ஏதே புச்ச²ந்தி;
மயமேதேஸங் ப்³யாகரிஸ்ஸாமா’’தி. ப³ஹூ கோ² பன நிக³ண்ட²ஸ்ஸ நாடபுத்தஸ்ஸ ஸாவகா
வாத³ங் ஆரோபெத்வா அபக்கந்தா – ‘‘ந த்வங் இமங் த⁴ம்மவினயங் ஆஜானாஸி, அஹங்
இமங் த⁴ம்மவினயங் ஆஜானாமி. கிங் த்வங் இமங் த⁴ம்மவினயங் ஆஜானிஸ்ஸஸி?
மிச்சா²படிபன்னோ த்வமஸி. அஹமஸ்மி ஸம்மாபடிபன்னோ. ஸஹிதங் மே அஸஹிதங் தே,
புரேவசனீயங் பச்சா² அவச, பச்சா²வசனீயங் புரே அவச, அதி⁴சிண்ணங் தே
விபராவத்தங், ஆரோபிதோ தே வாதோ³, நிக்³க³ஹிதோஸி, சர வாத³ப்பமொக்கா²ய,
நிப்³பே³டே²ஹி வா ஸசே பஹோஸீ’’தி. இதி நிக³ண்டோ² நாடபுத்தோ ஸாவகானங் ந ஸக்கதோ ந க³ருகதோ ந மானிதோ ந பூஜிதோ, ந ச பன நிக³ண்ட²ங் நாடபுத்தங் ஸாவகா ஸக்கத்வா க³ருங் கத்வா உபனிஸ்ஸாய விஹரந்தி. அக்குட்டோ² ச பன நிக³ண்டோ² நாடபுத்தோ த⁴ம்மக்கோஸேனா’’’தி.
240. ‘‘ஏகச்சே ஏவமாஹங்ஸு – ‘அயம்பி கோ² ஸமணோ கோ³தமோ ஸங்கீ⁴ சேவ க³ணீ ச க³ணாசரியோ
ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ; ஸோ ச கோ² ஸாவகானங் ஸக்கதோ
க³ருகதோ மானிதோ பூஜிதோ, ஸமணஞ்ச பன கோ³தமங் ஸாவகா ஸக்கத்வா க³ருங் கத்வா
உபனிஸ்ஸாய விஹரந்தி. பூ⁴தபுப்³ப³ங் ஸமணோ கோ³தமோ அனேகஸதாய பரிஸாய த⁴ம்மங்
தே³ஸேஸி. தத்ரஞ்ஞதரோ ஸமணஸ்ஸ கோ³தமஸ்ஸ ஸாவகோ உக்காஸி. தமேனாஞ்ஞதரோ
ஸப்³ரஹ்மசாரீ ஜண்ணுகேன [ஜண்ணுகே (ஸீ॰)] க⁴ட்டேஸி – ‘‘அப்பஸத்³தோ³ ஆயஸ்மா
ஹோது, மாயஸ்மா ஸத்³த³மகாஸி, ஸத்தா² நோ ப⁴க³வா த⁴ம்மங் தே³ஸேஸீ’’தி.
யஸ்மிங் ஸமயே ஸமணோ கோ³தமோ அனேகஸதாய பரிஸாய த⁴ம்மங் தே³ஸேதி, நேவ தஸ்மிங்
ஸமயே ஸமணஸ்ஸ கோ³தமஸ்ஸ ஸாவகானங் கி²பிதஸத்³தோ³ வா ஹோதி உக்காஸிதஸத்³தோ³ வா.
தமேனங் மஹாஜனகாயோ பச்சாஸீஸமானரூபோ [பச்சாஸிங் ஸமானரூபோ (ஸீ॰ ஸ்யா॰ கங்॰ பீ॰)]
பச்சுபட்டி²தோ ஹோதி – ‘‘யங் நோ ப⁴க³வா த⁴ம்மங் பா⁴ஸிஸ்ஸதி தங் நோ
ஸொஸ்ஸாமா’’தி. ஸெய்யதா²பி நாம புரிஸோ சாதும்மஹாபதே² கு²த்³த³மது⁴ங் [கு²த்³த³ங் மது⁴ங் (ஸீ॰ ஸ்யா॰ கங்॰ பீ॰)] அனேலகங் பீளெய்ய [உப்பீளெய்ய (ஸீ॰)].
தமேனங் மஹாஜனகாயோ பச்சாஸீஸமானரூபோ பச்சுபட்டி²தோ அஸ்ஸ. ஏவமேவ யஸ்மிங் ஸமயே
ஸமணோ கோ³தமோ அனேகஸதாய பரிஸாய த⁴ம்மங் தே³ஸேதி, நேவ தஸ்மிங் ஸமயே ஸமணஸ்ஸ
கோ³தமஸ்ஸ ஸாவகானங் கி²பிதஸத்³தோ³ வா ஹோதி உக்காஸிதஸத்³தோ³ வா. தமேனங்
மஹாஜனகாயோ பச்சாஸீஸமானரூபோ பச்சுபட்டி²தோ ஹோதி –
‘‘யங் நோ ப⁴க³வா த⁴ம்மங் பா⁴ஸிஸ்ஸதி தங் நோ ஸொஸ்ஸாமா’’தி. யேபி ஸமணஸ்ஸ
கோ³தமஸ்ஸ ஸாவகா ஸப்³ரஹ்மசாரீஹி ஸம்பயோஜெத்வா ஸிக்க²ங் பச்சக்கா²ய
ஹீனாயாவத்தந்தி தேபி ஸத்து² சேவ வண்ணவாதி³னோ ஹொந்தி, த⁴ம்மஸ்ஸ ச
வண்ணவாதி³னோ ஹொந்தி, ஸங்க⁴ஸ்ஸ ச வண்ணவாதி³னோ ஹொந்தி, அத்தக³ரஹினோயேவ ஹொந்தி
அனஞ்ஞக³ரஹினோ, ‘‘மயமேவம்ஹா அலக்கி²கா மயங் அப்பபுஞ்ஞா தே மயங் ஏவங்
ஸ்வாக்கா²தே த⁴ம்மவினயே பப்³ப³ஜித்வா நாஸக்கி²ம்ஹா யாவஜீவங்
பரிபுண்ணங் பரிஸுத்³த⁴ங் ப்³ரஹ்மசரியங் சரிது’’ந்தி. தே ஆராமிகபூ⁴தா வா
உபாஸகபூ⁴தா வா பஞ்சஸிக்கா²பதே³ ஸமாதா³ய வத்தந்தி. இதி ஸமணோ கோ³தமோ ஸாவகானங்
ஸக்கதோ க³ருகதோ மானிதோ பூஜிதோ, ஸமணஞ்ச பன கோ³தமங் ஸாவகா ஸக்கத்வா க³ருங்
கத்வா உபனிஸ்ஸாய விஹரந்தீ’’’தி.
241. ‘‘கதி பன த்வங், உதா³யி, மயி த⁴ம்மே ஸமனுபஸ்ஸஸி, யேஹி மமங் [மம (ஸப்³ப³த்த²)] ஸாவகா ஸக்கரொந்தி க³ருங் கரொந்தி [க³ருகரொந்தி (ஸீ॰ ஸ்யா॰ கங்॰ பீ॰)]
மானெந்தி பூஜெந்தி, ஸக்கத்வா க³ருங் கத்வா உபனிஸ்ஸாய விஹரந்தீ’’தி? ‘‘பஞ்ச
கோ² அஹங், ப⁴ந்தே, ப⁴க³வதி த⁴ம்மே ஸமனுபஸ்ஸாமி யேஹி ப⁴க³வந்தங் ஸாவகா
ஸக்கரொந்தி க³ருங் கரொந்தி மானெந்தி பூஜெந்தி, ஸக்கத்வா க³ருங் கத்வா
உபனிஸ்ஸாய விஹரந்தி. கதமே பஞ்ச? ப⁴க³வா ஹி, ப⁴ந்தே, அப்பாஹாரோ, அப்பாஹாரதாய
ச வண்ணவாதீ³. யம்பி, ப⁴ந்தே, ப⁴க³வா அப்பாஹாரோ, அப்பாஹாரதாய ச வண்ணவாதீ³
இமங் கோ² அஹங், ப⁴ந்தே, ப⁴க³வதி பட²மங் த⁴ம்மங் ஸமனுபஸ்ஸாமி யேன ப⁴க³வந்தங் ஸாவகா ஸக்கரொந்தி க³ருங் கரொந்தி மானெந்தி பூஜெந்தி, ஸக்கத்வா க³ருங் கத்வா உபனிஸ்ஸாய விஹரந்தி.
‘‘புன சபரங், ப⁴ந்தே, ப⁴க³வா
ஸந்துட்டோ² இதரீதரேன சீவரேன, இதரீதரசீவரஸந்துட்டி²யா ச வண்ணவாதீ³. யம்பி,
ப⁴ந்தே, ப⁴க³வா ஸந்துட்டோ² இதரீதரேன சீவரேன, இதரீதரசீவரஸந்துட்டி²யா ச
வண்ணவாதீ³, இமங் கோ² அஹங், ப⁴ந்தே, ப⁴க³வதி து³தியங் த⁴ம்மங் ஸமனுபஸ்ஸாமி
யேன ப⁴க³வந்தங் ஸாவகா ஸக்கரொந்தி க³ருங் கரொந்தி மானெந்தி பூஜெந்தி,
ஸக்கத்வா க³ருங் கத்வா உபனிஸ்ஸாய விஹரந்தி.
‘‘புன சபரங், ப⁴ந்தே, ப⁴க³வா ஸந்துட்டோ² இதரீதரேன
பிண்ட³பாதேன, இதரீதரபிண்ட³பாதஸந்துட்டி²யா ச வண்ணவாதீ³. யம்பி, ப⁴ந்தே,
ப⁴க³வா ஸந்துட்டோ² இதரீதரேன பிண்ட³பாதேன, இதரீதரபிண்ட³பாதஸந்துட்டி²யா ச
வண்ணவாதீ³, இமங் கோ² அஹங், ப⁴ந்தே, ப⁴க³வதி ததியங் த⁴ம்மங் ஸமனுபஸ்ஸாமி யேன
ப⁴க³வந்தங் ஸாவகா ஸக்கரொந்தி க³ருங் கரொந்தி மானெந்தி பூஜெந்தி, ஸக்கத்வா
க³ருங் கத்வா உபனிஸ்ஸாய விஹரந்தி.
‘‘புன சபரங், ப⁴ந்தே, ப⁴க³வா ஸந்துட்டோ² இதரீதரேன
ஸேனாஸனேன, இதரீதரஸேனாஸனஸந்துட்டி²யா ச வண்ணவாதீ³. யம்பி, ப⁴ந்தே, ப⁴க³வா
ஸந்துட்டோ² இதரீதரேன ஸேனாஸனேன, இதரீதரஸேனாஸனஸந்துட்டி²யா ச வண்ணவாதீ³, இமங்
கோ² அஹங், ப⁴ந்தே, ப⁴க³வதி சதுத்த²ங் த⁴ம்மங்
ஸமனுபஸ்ஸாமி யேன ப⁴க³வந்தங் ஸாவகா ஸக்கரொந்தி க³ருங் கரொந்தி மானெந்தி
பூஜெந்தி, ஸக்கத்வா க³ருங் கத்வா உபனிஸ்ஸாய விஹரந்தி.
‘‘புன சபரங், ப⁴ந்தே, ப⁴க³வா பவிவித்தோ, பவிவேகஸ்ஸ ச வண்ணவாதீ³ .
யம்பி, ப⁴ந்தே, ப⁴க³வா பவிவித்தோ, பவிவேகஸ்ஸ ச வண்ணவாதீ³, இமங் கோ² அஹங்,
ப⁴ந்தே, ப⁴க³வதி பஞ்சமங் த⁴ம்மங் ஸமனுபஸ்ஸாமி யேன ப⁴க³வந்தங் ஸாவகா
ஸக்கரொந்தி க³ருங் கரொந்தி மானெந்தி பூஜெந்தி, ஸக்கத்வா க³ருங் கத்வா
உபனிஸ்ஸாய விஹரந்தி.
‘‘இமே கோ² அஹங், ப⁴ந்தே, ப⁴க³வதி பஞ்ச த⁴ம்மே ஸமனுபஸ்ஸாமி யேஹி ப⁴க³வந்தங் ஸாவகா ஸக்கரொந்தி க³ருங் கரொந்தி மானெந்தி பூஜெந்தி, ஸக்கத்வா க³ருங் கத்வா உபனிஸ்ஸாய விஹரந்தீ’’தி.
242.
‘‘‘அப்பாஹாரோ ஸமணோ கோ³தமோ, அப்பாஹாரதாய ச வண்ணவாதீ³’தி, இதி சே மங்,
உதா³யி, ஸாவகா ஸக்கரெய்யுங் க³ருங் கரெய்யுங் மானெய்யுங் பூஜெய்யுங்,
ஸக்கத்வா க³ருங் கத்வா உபனிஸ்ஸாய விஹரெய்யுங், ஸந்தி கோ² பன மே, உதா³யி,
ஸாவகா கோஸகாஹாராபி அட்³ட⁴கோஸகாஹாராபி பே³லுவாஹாராபி அட்³ட⁴பே³லுவாஹாராபி.
அஹங் கோ² பன, உதா³யி, அப்பேகதா³ இமினா பத்தேன
ஸமதித்திகம்பி பு⁴ஞ்ஜாமி பி⁴ய்யோபி பு⁴ஞ்ஜாமி. ‘அப்பாஹாரோ ஸமணோ கோ³தமோ,
அப்பாஹாரதாய ச வண்ணவாதீ³’தி, இதி சே மங், உதா³யி, ஸாவகா ஸக்கரெய்யுங்
க³ருங் கரெய்யுங் மானெய்யுங் பூஜெய்யுங், ஸக்கத்வா க³ருங் கத்வா உபனிஸ்ஸாய
விஹரெய்யுங், யே தே, உதா³யி, மம ஸாவகா கோஸகாஹாராபி அட்³ட⁴கோஸகாஹாராபி
பே³லுவாஹாராபி அட்³ட⁴பே³லுவாஹாராபி ந மங் தே இமினா த⁴ம்மேன ஸக்கரெய்யுங்
க³ருங் கரெய்யுங் மானெய்யுங் பூஜெய்யுங், ஸக்கத்வா க³ருங் கத்வா உபனிஸ்ஸாய
விஹரெய்யுங்.
‘‘‘ஸந்துட்டோ² ஸமணோ கோ³தமோ இதரீதரேன சீவரேன, இதரீதரசீவரஸந்துட்டி²யா
ச வண்ணவாதீ³’தி, இதி சே மங், உதா³யி, ஸாவகா ஸக்கரெய்யுங் க³ருங் கரெய்யுங்
மானெய்யுங் பூஜெய்யுங், ஸக்கத்வா க³ருங் கத்வா உபனிஸ்ஸாய விஹரெய்யுங்,
ஸந்தி கோ² பன மே, உதா³யி, ஸாவகா பங்ஸுகூலிகா லூக²சீவரத⁴ரா தே ஸுஸானா வா
ஸங்காரகூடா வா பாபணிகா வா நந்தகானி [பாபணிகானி வா நந்தகானி வா (ஸீ॰)] உச்சினித்வா [உச்சி²ந்தி³த்வா (க॰)] ஸங்கா⁴டிங் கரித்வா தா⁴ரெந்தி. அஹங் கோ² பனுதா³யி, அப்பேகதா³ க³ஹபதிசீவரானி தா⁴ரேமி
த³ள்ஹானி ஸத்த²லூகா²னி அலாபு³லோமஸானி. ‘ஸந்துட்டோ² ஸமணோ கோ³தமோ இதரீதரேன
சீவரேன, இதரீதரசீவரஸந்துட்டி²யா ச வண்ணவாதீ³’தி, இதி சே மங், உதா³யி, ஸாவகா
ஸக்கரெய்யுங் க³ருங் கரெய்யுங் மானெய்யுங் பூஜெய்யுங், ஸக்கத்வா க³ருங்
கத்வா உபனிஸ்ஸாய விஹரெய்யுங், யே தே, உதா³யி, மம ஸாவகா பங்ஸுகூலிகா
லூக²சீவரத⁴ரா தே ஸுஸானா வா ஸங்காரகூடா வா பாபணிகா வா நந்தகானி உச்சினித்வா
ஸங்கா⁴டிங் கரித்வா தா⁴ரெந்தி, ந மங் தே இமினா த⁴ம்மேன ஸக்கரெய்யுங் க³ருங்
கரெய்யுங் மானெய்யுங் பூஜெய்யுங், ஸக்கத்வா க³ருங் கத்வா உபனிஸ்ஸாய
விஹரெய்யுங்.
‘‘‘ஸந்துட்டோ² ஸமணோ கோ³தமோ இதரீதரேன பிண்ட³பாதேன,
இதரீதரபிண்ட³பாதஸந்துட்டி²யா ச வண்ணவாதீ³’தி, இதி சே மங், உதா³யி, ஸாவகா
ஸக்கரெய்யுங் க³ருங் கரெய்யுங் மானெய்யுங் பூஜெய்யுங், ஸக்கத்வா
க³ருங் கத்வா உபனிஸ்ஸாய விஹரெய்யுங், ஸந்தி கோ² பன மே, உதா³யி, ஸாவகா
பிண்ட³பாதிகா ஸபதா³னசாரினோ உஞ்சா²ஸகே வதே ரதா, தே அந்தரக⁴ரங் பவிட்டா²
ஸமானா ஆஸனேனபி நிமந்தியமானா ந ஸாதி³யந்தி. அஹங் கோ² பனுதா³யி, அப்பேகதா³
நிமந்தனேபி [நிமந்தனஸ்ஸாபி (க॰)] பு⁴ஞ்ஜாமி ஸாலீனங் ஓத³னங் விசிதகாளகங்
அனேகஸூபங் அனேகப்³யஞ்ஜனங். ‘ஸந்துட்டோ² ஸமணோ கோ³தமோ இதரீதரேன பிண்ட³பாதேன,
இதரீதரபிண்ட³பாதஸந்துட்டி²யா ச வண்ணவாதீ³’தி, இதி சே மங், உதா³யி, ஸாவகா
ஸக்கரெய்யுங் க³ருங் கரெய்யுங் மானெய்யுங் பூஜெய்யுங், ஸக்கத்வா க³ருங்
கத்வா உபனிஸ்ஸாய விஹரெய்யுங், யே தே, உதா³யி, மம ஸாவகா பிண்ட³பாதிகா
ஸபதா³னசாரினோ உஞ்சா²ஸகே வதே ரதா தே அந்தரக⁴ரங் பவிட்டா² ஸமானா ஆஸனேனபி
நிமந்தியமானா ந ஸாதி³யந்தி, ந மங் தே இமினா த⁴ம்மேன ஸக்கரெய்யுங் க³ருங்
கரெய்யுங் மானெய்யுங் பூஜெய்யுங், ஸக்கத்வா க³ருங் கத்வா உபனிஸ்ஸாய
விஹரெய்யுங்.
‘‘‘ஸந்துட்டோ² ஸமணோ கோ³தமோ இதரீதரேன ஸேனாஸனேன,
இதரீதரஸேனாஸனஸந்துட்டி²யா ச வண்ணவாதீ³’தி, இதி சே மங், உதா³யி, ஸாவகா
ஸக்கரெய்யுங் க³ருங் கரெய்யுங் மானெய்யுங் பூஜெய்யுங், ஸக்கத்வா க³ருங்
கத்வா உபனிஸ்ஸாய விஹரெய்யுங், ஸந்தி கோ² பன மே, உதா³யி, ஸாவகா ருக்க²மூலிகா
அப்³போ⁴காஸிகா, தே அட்ட²மாஸே ச²ன்னங் ந உபெந்தி. அஹங் கோ² பனுதா³யி,
அப்பேகதா³ கூடாகா³ரேஸுபி விஹராமி உல்லித்தாவலித்தேஸு நிவாதேஸு
பு²ஸிதக்³க³ளேஸு [பு²ஸ்ஸிதக்³க³ளேஸு (ஸீ॰ பீ॰)] பிஹிதவாதபானேஸு. ‘ஸந்துட்டோ² ஸமணோ கோ³தமோ இதரீதரேன
ஸேனாஸனேன, இதரீதரஸேனாஸனஸந்துட்டி²யா ச வண்ணவாதீ³’தி, இதி சே மங், உதா³யி,
ஸாவகா ஸக்கரெய்யுங் க³ருங் கரெய்யுங் மானெய்யுங் பூஜெய்யுங், ஸக்கத்வா
க³ருங் கத்வா உபனிஸ்ஸாய விஹரெய்யுங், யே தே, உதா³யி, மம ஸாவகா ருக்க²மூலிகா
அப்³போ⁴காஸிகா தே அட்ட²மாஸே ச²ன்னங் ந உபெந்தி, ந மங் தே இமினா த⁴ம்மேன
ஸக்கரெய்யுங் க³ருங் கரெய்யுங் மானெய்யுங் பூஜெய்யுங், ஸக்கத்வா க³ருங் கத்வா உபனிஸ்ஸாய விஹரெய்யுங்.
‘‘‘பவிவித்தோ ஸமணோ கோ³தமோ, பவிவேகஸ்ஸ ச வண்ணவாதீ³’தி,
இதி சே மங், உதா³யி, ஸாவகா ஸக்கரெய்யுங் க³ருங் கரெய்யுங் மானெய்யுங்
பூஜெய்யுங், ஸக்கத்வா க³ருங் கத்வா உபனிஸ்ஸாய விஹரெய்யுங், ஸந்தி கோ² பன
மே, உதா³யி, ஸாவகா ஆரஞ்ஞிகா பந்தஸேனாஸனா அரஞ்ஞவனபத்தா²னி பந்தானி ஸேனாஸனானி
அஜ்ஜோ²கா³ஹெத்வா விஹரந்தி, தே அன்வத்³த⁴மாஸங் ஸங்க⁴மஜ்ஜே² ஓஸரந்தி
பாதிமொக்கு²த்³தே³ஸாய. அஹங் கோ² பனுதா³யி, அப்பேகதா³ ஆகிண்ணோ விஹராமி
பி⁴க்கூ²ஹி பி⁴க்கு²னீஹி உபாஸகேஹி உபாஸிகாஹி ரஞ்ஞா ராஜமஹாமத்தேஹி தித்தி²யேஹி தித்தி²யஸாவகேஹி. ‘பவிவித்தோ ஸமணோ கோ³தமோ, பவிவேகஸ்ஸ ச வண்ணவாதீ³’தி, இதி சே
மங், உதா³யி, ஸாவகா ஸக்கரெய்யுங் க³ருங் கரெய்யுங் மானெய்யுங் பூஜெய்யுங்,
ஸக்கத்வா க³ருங் கத்வா உபனிஸ்ஸாய விஹரெய்யுங், யே தே, உதா³யி, மம ஸாவகா
ஆரஞ்ஞகா பந்தஸேனாஸனா அரஞ்ஞவனபத்தா²னி பந்தானி ஸேனாஸனானி அஜ்ஜோ²கா³ஹெத்வா
விஹரந்தி தே அன்வத்³த⁴மாஸங் ஸங்க⁴மஜ்ஜே² ஓஸரந்தி பாதிமொக்கு²த்³தே³ஸாய, ந
மங் தே இமினா த⁴ம்மேன ஸக்கரெய்யுங் க³ருங் கரெய்யுங் மானெய்யுங்
பூஜெய்யுங், ஸக்கத்வா க³ருங் கத்வா உபனிஸ்ஸாய விஹரெய்யுங்.
‘‘இதி கோ², உதா³யி, ந மமங் ஸாவகா இமேஹி பஞ்சஹி
த⁴ம்மேஹி ஸக்கரொந்தி க³ருங் கரொந்தி மானெந்தி பூஜெந்தி, ஸக்கத்வா க³ருங்
கத்வா உபனிஸ்ஸாய விஹரந்தி.
243. ‘‘அத்தி² கோ², உதா³யி, அஞ்ஞே ச பஞ்ச த⁴ம்மா யேஹி பஞ்சஹி த⁴ம்மேஹி மமங் ஸாவகா ஸக்கரொந்தி க³ருங் கரொந்தி மானெந்தி பூஜெந்தி ,
ஸக்கத்வா க³ருங் கத்வா உபனிஸ்ஸாய விஹரந்தி. கதமே பஞ்ச? இது⁴தா³யி, மமங்
ஸாவகா அதி⁴ஸீலே ஸம்பா⁴வெந்தி – ‘ஸீலவா ஸமணோ கோ³தமோ பரமேன ஸீலக்க²ந்தே⁴ன
ஸமன்னாக³தோ’தி. யம்புதா³யி [யமுதா³யி (ஸ்யா॰ க॰)], மமங் ஸாவகா அதி⁴ஸீலே ஸம்பா⁴வெந்தி – ‘ஸீலவா ஸமணோ கோ³தமோ பரமேன ஸீலக்க²ந்தே⁴ன ஸமன்னாக³தோ’தி, அயங் கோ², உதா³யி , பட²மோ த⁴ம்மோ யேன மமங் ஸாவகா ஸக்கரொந்தி க³ருங் கரொந்தி மானெந்தி பூஜெந்தி, ஸக்கத்வா க³ருங் கத்வா உபனிஸ்ஸாய விஹரந்தி.
244.
‘‘புன சபரங், உதா³யி, மமங் ஸாவகா அபி⁴க்கந்தே ஞாணத³ஸ்ஸனே ஸம்பா⁴வெந்தி –
‘ஜானங்யேவாஹ ஸமணோ கோ³தமோ – ஜானாமீதி, பஸ்ஸங்யேவாஹ ஸமணோ கோ³தமோ – பஸ்ஸாமீதி;
அபி⁴ஞ்ஞாய ஸமணோ கோ³தமோ த⁴ம்மங் தே³ஸேதி நோ அனபி⁴ஞ்ஞாய; ஸனிதா³னங் ஸமணோ
கோ³தமோ த⁴ம்மங் தே³ஸேதி நோ அனிதா³னங்; ஸப்பாடிஹாரியங் ஸமணோ கோ³தமோ த⁴ம்மங்
தே³ஸேதி நோ அப்பாடிஹாரிய’ந்தி. யம்புதா³யி, மமங் ஸாவகா அபி⁴க்கந்தே
ஞாணத³ஸ்ஸனே ஸம்பா⁴வெந்தி – ‘ஜானங்யேவாஹ ஸமணோ கோ³தமோ – ஜானாமீதி,
பஸ்ஸங்யேவாஹ ஸமணோ கோ³தமோ – பஸ்ஸாமீதி; அபி⁴ஞ்ஞாய ஸமணோ கோ³தமோ த⁴ம்மங்
தே³ஸேதி நோ அனபி⁴ஞ்ஞாய; ஸனிதா³னங் ஸமணோ கோ³தமோ த⁴ம்மங் தே³ஸேதி நோ
அனிதா³னங்; ஸப்பாடிஹாரியங் ஸமணோ கோ³தமோ த⁴ம்மங் தே³ஸேதி நோ
அப்பாடிஹாரிய’ந்தி, அயங் கோ², உதா³யி, து³தியோ த⁴ம்மோ யேன மமங் ஸாவகா ஸக்கரொந்தி க³ருங் கரொந்தி மானெந்தி பூஜெந்தி, ஸக்கத்வா க³ருங் கத்வா உபனிஸ்ஸாய விஹரந்தி.
245. ‘‘புன
சபரங், உதா³யி, மமங் ஸாவகா அதி⁴பஞ்ஞாய ஸம்பா⁴வெந்தி – ‘பஞ்ஞவா ஸமணோ கோ³தமோ
பரமேன பஞ்ஞாக்க²ந்தே⁴ன ஸமன்னாக³தோ; தங் வத அனாக³தங் வாத³பத²ங் ந த³க்க²தி,
உப்பன்னங் வா பரப்பவாத³ங் ந ஸஹத⁴ம்மேன ஸுனிக்³க³ஹிதங் நிக்³க³ண்ஹிஸ்ஸதீதி –
நேதங் டா²னங் விஜ்ஜதி’. தங் கிங் மஞ்ஞஸி, உதா³யி, அபி நு மே ஸாவகா ஏவங்
ஜானந்தா ஏவங் பஸ்ஸந்தா அந்தரந்தரா கத²ங் ஓபாதெய்யு’’ந்தி?
‘‘நோ ஹேதங், ப⁴ந்தே’’.
‘‘ந கோ² பனாஹங், உதா³யி, ஸாவகேஸு அனுஸாஸனிங் பச்சாஸீஸாமி [பச்சாஸிங்ஸாமி (ஸீ॰ ஸ்யா॰ கங்॰ பீ॰)]; அஞ்ஞத³த்து² மமயேவ ஸாவகா அனுஸாஸனிங் பச்சாஸீஸந்தி.
‘‘யம்புதா³யி, மமங் ஸாவகா அதி⁴பஞ்ஞாய ஸம்பா⁴வெந்தி –
‘பஞ்ஞவா ஸமணோ கோ³தமோ பரமேன பஞ்ஞாக்க²ந்தே⁴ன ஸமன்னாக³தோ; தங் வத அனாக³தங்
வாத³பத²ங் ந த³க்க²தி, உப்பன்னங் வா பரப்பவாத³ங் ந ஸஹத⁴ம்மேன நிக்³க³ஹிதங்
நிக்³க³ண்ஹிஸ்ஸதீதி – நேதங் டா²னங் விஜ்ஜதி’. அயங் கோ², உதா³யி, ததியோ
த⁴ம்மோ யேன மமங் ஸாவகா ஸக்கரொந்தி க³ருங் கரொந்தி மானெந்தி பூஜெந்தி,
ஸக்கத்வா க³ருங் கத்வா உபனிஸ்ஸாய விஹரந்தி.
246. ‘‘புன
சபரங், உதா³யி, மம ஸாவகா யேன து³க்கே²ன து³க்கோ²திண்ணா து³க்க²பரேதா தே
மங் உபஸங்கமித்வா து³க்க²ங் அரியஸச்சங் புச்ச²ந்தி, தேஸாஹங் து³க்க²ங்
அரியஸச்சங் புட்டோ² ப்³யாகரோமி, தேஸாஹங் சித்தங் ஆராதே⁴மி பஞ்ஹஸ்ஸ
வெய்யாகரணேன; தே மங் து³க்க²ஸமுத³யங்… து³க்க²னிரோத⁴ங்…
து³க்க²னிரோத⁴கா³மினிங் படிபத³ங் அரியஸச்சங் புச்ச²ந்தி, தேஸாஹங்
து³க்க²னிரோத⁴கா³மினிங் படிபத³ங் அரியஸச்சங் புட்டோ² ப்³யாகரோமி ,
தேஸாஹங் சித்தங் ஆராதே⁴மி பஞ்ஹஸ்ஸ வெய்யாகரணேன. யம்புதா³யி, மம ஸாவகா யேன
து³க்கே²ன து³க்கோ²திண்ணா து³க்க²பரேதா தே மங் உபஸங்கமித்வா து³க்க²ங்
அரியஸச்சங் புச்ச²ந்தி, தேஸாஹங் து³க்க²ங் அரியஸச்சங் புட்டோ² ப்³யாகரோமி,
தேஸாஹங் சித்தங் ஆராதே⁴மி பஞ்ஹஸ்ஸ வெய்யாகரணேன. தே மங் து³க்க²ஸமுத³யங் …
து³க்க²னிரோத⁴ங்… து³க்க²னிரோத⁴கா³மினிங் படிபத³ங் அரியஸச்சங் புச்ச²ந்தி.
தேஸாஹங் து³க்க²னிரோத⁴கா³மினிங் படிபத³ங் அரியஸச்சங் புட்டோ² ப்³யாகரோமி.
தேஸாஹங் சித்தங் ஆராதே⁴மி பஞ்ஹஸ்ஸ வெய்யாகரணேன. அயங் கோ², உதா³யி, சதுத்தோ²
த⁴ம்மோ யேன மமங் ஸாவகா ஸக்கரொந்தி க³ருங் கரொந்தி மானெந்தி பூஜெந்தி, ஸக்கத்வா க³ருங் கத்வா உபனிஸ்ஸாய விஹரந்தி.
247.
‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே
ஸாவகா சத்தாரோ ஸதிபட்டா²னே பா⁴வெந்தி. இது⁴தா³யி, பி⁴க்கு² காயே
காயானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே
அபி⁴ஜ்ஜா²தோ³மனஸ்ஸங்; வேத³னாஸு வேத³னானுபஸ்ஸீ விஹரதி… சித்தே சித்தானுபஸ்ஸீ
விஹரதி… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே
அபி⁴ஜ்ஜா²தோ³மனஸ்ஸங். தத்ர ச பன மே ஸாவகா ப³ஹூ அபி⁴ஞ்ஞாவோஸானபாரமிப்பத்தா
விஹரந்தி.
‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே ஸாவகா சத்தாரோ ஸம்மப்பதா⁴னே பா⁴வெந்தி. இது⁴தா³யி ,
பி⁴க்கு² அனுப்பன்னானங் பாபகானங் அகுஸலானங் த⁴ம்மானங் அனுப்பாதா³ய
ச²ந்த³ங் ஜனேதி, வாயமதி, வீரியங் ஆரப⁴தி, சித்தங் பக்³க³ண்ஹாதி, பத³ஹதி;
உப்பன்னானங் பாபகானங் அகுஸலானங் த⁴ம்மானங் பஹானாய ச²ந்த³ங் ஜனேதி, வாயமதி,
வீரியங் ஆரப⁴தி, சித்தங் பக்³க³ண்ஹாதி, பத³ஹதி; அனுப்பன்னானங் குஸலானங்
த⁴ம்மானங் உப்பாதா³ய ச²ந்த³ங் ஜனேதி, வாயமதி, வீரியங் ஆரப⁴தி, சித்தங்
பக்³க³ண்ஹாதி, பத³ஹதி; உப்பன்னானங் குஸலானங் த⁴ம்மானங் டி²தியா அஸம்மோஸாய
பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ங் ஜனேதி, வாயமதி,
வீரியங் ஆரப⁴தி, சித்தங் பக்³க³ண்ஹாதி, பத³ஹதி. தத்ர ச பன மே ஸாவகா ப³ஹூ
அபி⁴ஞ்ஞாவோஸானபாரமிப்பத்தா விஹரந்தி.
‘‘புன சபரங், உதா³யி, அக்கா²தா
மயா ஸாவகானங் படிபதா³, யதா²படிபன்னா மே ஸாவகா சத்தாரோ இத்³தி⁴பாதே³
பா⁴வெந்தி. இது⁴தா³யி, பி⁴க்கு² ச²ந்த³ஸமாதி⁴பதா⁴னஸங்கா²ரஸமன்னாக³தங்
இத்³தி⁴பாத³ங் பா⁴வேதி, வீரியஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங்
பா⁴வேதி, சித்தஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி,
வீமங்ஸாஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி. தத்ர ச பன மே
ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி.
‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே ஸாவகா பஞ்சிந்த்³ரியானி பா⁴வெந்தி. இது⁴தா³யி ,
பி⁴க்கு² ஸத்³தி⁴ந்த்³ரியங் பா⁴வேதி உபஸமகா³மிங் ஸம்போ³த⁴கா³மிங்;
வீரியிந்த்³ரியங் பா⁴வேதி…பே॰… ஸதிந்த்³ரியங் பா⁴வேதி… ஸமாதி⁴ந்த்³ரியங்
பா⁴வேதி… பஞ்ஞிந்த்³ரியங் பா⁴வேதி உபஸமகா³மிங் ஸம்போ³த⁴கா³மிங். தத்ர ச பன மே ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி.
‘‘புன சபரங், உதா³யி, அக்கா²தா மயா ஸாவகானங் படிபதா³,
யதா²படிபன்னா மே ஸாவகா பஞ்ச ப³லானி பா⁴வெந்தி. இது⁴தா³யி, பி⁴க்கு²
ஸத்³தா⁴ப³லங் பா⁴வேதி உபஸமகா³மிங் ஸம்போ³த⁴கா³மிங்; வீரியப³லங்
பா⁴வேதி…பே॰… ஸதிப³லங் பா⁴வேதி… ஸமாதி⁴ப³லங் பா⁴வேதி… பஞ்ஞாப³லங் பா⁴வேதி
உபஸமகா³மிங் ஸம்போ³த⁴கா³மிங். தத்ர ச பன மே ஸாவகா ப³ஹூ
அபி⁴ஞ்ஞாவோஸானபாரமிப்பத்தா விஹரந்தி.
‘‘புன சபரங், உதா³யி, அக்கா²தா மயா ஸாவகானங் படிபதா³,
யதா²படிபன்னா மே ஸாவகா ஸத்தபொ³ஜ்ஜ²ங்கே³ பா⁴வெந்தி. இது⁴தா³யி, பி⁴க்கு²
ஸதிஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங்
நிரோத⁴னிஸ்ஸிதங் வொஸ்ஸக்³க³பரிணாமிங்; த⁴ம்மவிசயஸம்பொ³ஜ்ஜ²ங்க³ங்
பா⁴வேதி…பே॰… வீரியஸம்பொ³ஜ்ஜ²ங்க³ங் பா⁴வேதி… பீதிஸம்பொ³ஜ்ஜ²ங்க³ங்
பா⁴வேதி… பஸ்ஸத்³தி⁴ஸம்பொ³ஜ்ஜ²ங்க³ங் பா⁴வேதி… ஸமாதி⁴ஸம்பொ³ஜ்ஜ²ங்க³ங்
பா⁴வேதி… உபெக்கா²ஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங்
நிரோத⁴னிஸ்ஸிதங் வொஸ்ஸக்³க³பரிணாமிங். தத்ர ச பன மே ஸாவகா ப³ஹூ
அபி⁴ஞ்ஞாவோஸானபாரமிப்பத்தா விஹரந்தி.
‘‘புன சபரங், உதா³யி, அக்கா²தா மயா ஸாவகானங் படிபதா³,
யதா²படிபன்னா மே ஸாவகா அரியங் அட்ட²ங்கி³கங் மக்³க³ங் பா⁴வெந்தி.
இது⁴தா³யி, பி⁴க்கு² ஸம்மாதி³ட்டி²ங் பா⁴வேதி, ஸம்மாஸங்கப்பங் பா⁴வேதி,
ஸம்மாவாசங் பா⁴வேதி , ஸம்மாகம்மந்தங் பா⁴வேதி, ஸம்மாஆஜீவங் பா⁴வேதி, ஸம்மாவாயாமங் பா⁴வேதி, ஸம்மாஸதிங் பா⁴வேதி, ஸம்மாஸமாதி⁴ங் பா⁴வேதி. தத்ர ச பன மே ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி.
248. ‘‘புன
சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே ஸாவகா
அட்ட² விமொக்கே² பா⁴வெந்தி. ரூபீ ரூபானி பஸ்ஸதி, அயங் பட²மோ விமொக்கோ²;
அஜ்ஜ²த்தங் அரூபஸஞ்ஞீ ப³ஹித்³தா⁴ ரூபானி பஸ்ஸதி, அயங் து³தியோ விமொக்கோ²;
ஸுப⁴ந்தேவ அதி⁴முத்தோ ஹோதி, அயங் ததியோ விமொக்கோ²; ஸப்³ப³ஸோ ரூபஸஞ்ஞானங்
ஸமதிக்கமா படிக⁴ஸஞ்ஞானங் அத்த²ங்க³மா நானத்தஸஞ்ஞானங் அமனஸிகாரா ‘அனந்தோ
ஆகாஸோ’தி ஆகாஸானஞ்சாயதனங் உபஸம்பஜ்ஜ விஹரதி, அயங் சதுத்தோ² விமொக்கோ²;
ஸப்³ப³ஸோ ஆகாஸானஞ்சாயதனங் ஸமதிக்கம்ம ‘அனந்தங் விஞ்ஞாண’ந்தி
விஞ்ஞாணஞ்சாயதனங் உபஸம்பஜ்ஜ விஹரதி, அயங் பஞ்சமோ விமொக்கோ²; ஸப்³ப³ஸோ
விஞ்ஞாணஞ்சாயதனங் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனங் உபஸம்பஜ்ஜ
விஹரதி, அயங் ச²ட்டோ² விமொக்கோ²; ஸப்³ப³ஸோ ஆகிஞ்சஞ்ஞாயதனங் ஸமதிக்கம்ம
நேவஸஞ்ஞானாஸஞ்ஞாயதனங் உபஸம்பஜ்ஜ விஹரதி, அயங் ஸத்தமோ விமொக்கோ²; ஸப்³ப³ஸோ
நேவஸஞ்ஞானாஸஞ்ஞாயதனங் ஸமதிக்கம்ம ஸஞ்ஞாவேத³யிதனிரோத⁴ங் உபஸம்பஜ்ஜ விஹரதி,
அயங் அட்ட²மோ விமொக்கோ². தத்ர ச பன மே ஸாவகா ப³ஹூ
அபி⁴ஞ்ஞாவோஸானபாரமிப்பத்தா விஹரந்தி.
249. ‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா
மே ஸாவகா அட்ட² அபி⁴பா⁴யதனானி பா⁴வெந்தி. அஜ்ஜ²த்தங் ரூபஸஞ்ஞீ ஏகோ
ப³ஹித்³தா⁴ ரூபானி பஸ்ஸதி பரித்தானி ஸுவண்ணது³ப்³ப³ண்ணானி. ‘தானி
அபி⁴பு⁴ய்ய ஜானாமி, பஸ்ஸாமீ’தி ஏவங் ஸஞ்ஞீ ஹோதி. இத³ங் பட²மங்
அபி⁴பா⁴யதனங்.
‘‘அஜ்ஜ²த்தங் ரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி
அப்பமாணானி ஸுவண்ணது³ப்³ப³ண்ணானி. ‘தானி அபி⁴பு⁴ய்ய ஜானாமி, பஸ்ஸாமீ’தி
ஏவங் ஸஞ்ஞீ ஹோதி. இத³ங் து³தியங் அபி⁴பா⁴யதனங்.
‘‘அஜ்ஜ²த்தங் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி
பரித்தானி ஸுவண்ணது³ப்³ப³ண்ணானி. ‘தானி அபி⁴பு⁴ய்ய ஜானாமி, பஸ்ஸாமீ’தி ஏவங்
ஸஞ்ஞீ ஹோதி. இத³ங் ததியங் அபி⁴பா⁴யதனங்.
‘‘அஜ்ஜ²த்தங் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி
அப்பமாணானி ஸுவண்ணது³ப்³ப³ண்ணானி. ‘தானி அபி⁴பு⁴ய்ய ஜானாமி, பஸ்ஸாமீ’தி
ஏவங் ஸஞ்ஞீ ஹோதி. இத³ங் சதுத்த²ங் அபி⁴பா⁴யதனங்.
‘‘அஜ்ஜ²த்தங்
அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி நீலானி நீலவண்ணானி நீலனித³ஸ்ஸனானி
நீலனிபா⁴ஸானி. ஸெய்யதா²பி நாம உமாபுப்ப²ங் நீலங் நீலவண்ணங் நீலனித³ஸ்ஸனங்
நீலனிபா⁴ஸங், ஸெய்யதா²பி வா பன தங் வத்த²ங் பா³ராணஸெய்யகங்
உப⁴தோபா⁴க³விமட்ட²ங் நீலங் நீலவண்ணங் நீலனித³ஸ்ஸனங் நீலனிபா⁴ஸங்; ஏவமேவ
அஜ்ஜ²த்தங் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி நீலானி நீலவண்ணானி
நீலனித³ஸ்ஸனானி நீலனிபா⁴ஸானி. ‘தானி அபி⁴பு⁴ய்ய ஜானாமி, பஸ்ஸாமீ’தி ஏவங்
ஸஞ்ஞீ ஹோதி. இத³ங் பஞ்சமங் அபி⁴பா⁴யதனங் .
‘‘அஜ்ஜ²த்தங் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி
பீதானி பீதவண்ணானி பீதனித³ஸ்ஸனானி பீதனிபா⁴ஸானி. ஸெய்யதா²பி நாம
கணிகாரபுப்ப²ங் பீதங் பீதவண்ணங் பீதனித³ஸ்ஸனங்
பீதனிபா⁴ஸங், ஸெய்யதா²பி வா பன தங் வத்த²ங் பா³ராணஸெய்யகங்
உப⁴தோபா⁴க³விமட்ட²ங் பீதங் பீதவண்ணங் பீதனித³ஸ்ஸனங் பீதனிபா⁴ஸங்; ஏவமேவ
அஜ்ஜ²த்தங் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி பீதானி பீதவண்ணானி
பீதனித³ஸ்ஸனானி பீதனிபா⁴ஸானி. ‘தானி அபி⁴பு⁴ய்ய ஜானாமி, பஸ்ஸாமீ’தி ஏவங்
ஸஞ்ஞீ ஹோதி. இத³ங் ச²ட்ட²ங் அபி⁴பா⁴யதனங்.
‘‘அஜ்ஜ²த்தங் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி
லோஹிதகானி லோஹிதகவண்ணானி லோஹிதகனித³ஸ்ஸனானி லோஹிதகனிபா⁴ஸானி. ஸெய்யதா²பி
நாம ப³ந்து⁴ஜீவகபுப்ப²ங் லோஹிதகங் லோஹிதகவண்ணங் லோஹிதகனித³ஸ்ஸனங்
லோஹிதகனிபா⁴ஸங், ஸெய்யதா²பி வா பன தங் வத்த²ங் பா³ராணஸெய்யகங்
உப⁴தோபா⁴க³விமட்ட²ங் லோஹிதகங் லோஹிதகவண்ணங் லோஹிதகனித³ஸ்ஸனங்
லோஹிதகனிபா⁴ஸங்; ஏவமேவ அஜ்ஜ²த்தங் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி
லோஹிதகானி லோஹிதகவண்ணானி லோஹிதகனித³ஸ்ஸனானி லோஹிதகனிபா⁴ஸானி. ‘தானி
அபி⁴பு⁴ய்ய ஜானாமி, பஸ்ஸாமீ’தி ஏவங் ஸஞ்ஞீ ஹோதி. இத³ங் ஸத்தமங்
அபி⁴பா⁴யதனங்.
‘‘அஜ்ஜ²த்தங் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி
ஓதா³தானி ஓதா³தவண்ணானி ஓதா³தனித³ஸ்ஸனானி ஓதா³தனிபா⁴ஸானி. ஸெய்யதா²பி நாம
ஓஸதி⁴தாரகா ஓதா³தா ஓதா³தவண்ணா ஓதா³தனித³ஸ்ஸனா ஓதா³தனிபா⁴ஸா, ஸெய்யதா²பி வா
பன தங் வத்த²ங் பா³ராணஸெய்யகங் உப⁴தோபா⁴க³விமட்ட²ங் ஓதா³தங் ஓதா³தவண்ணங்
ஓதா³தனித³ஸ்ஸனங் ஓதா³தனிபா⁴ஸங்; ஏவமேவ அஜ்ஜ²த்தங் அரூபஸஞ்ஞீ ஏகோ ப³ஹித்³தா⁴
ரூபானி பஸ்ஸதி ஓதா³தானி ஓதா³தவண்ணானி ஓதா³தனித³ஸ்ஸனானி ஓதா³தனிபா⁴ஸானி . ‘தானி அபி⁴பு⁴ய்ய ஜானாமி , பஸ்ஸாமீ’தி ஏவங்ஸஞ்ஞீ ஹோதி. இத³ங் அட்ட²மங் அபி⁴பா⁴யதனங். தத்ர ச பன மே ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி.
250.
‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே
ஸாவகா த³ஸ கஸிணாயதனானி பா⁴வெந்தி. பத²வீகஸிணமேகோ ஸஞ்ஜானாதி உத்³த⁴மதோ⁴
திரியங் அத்³வயங் அப்பமாணங்; ஆபோகஸிணமேகோ ஸஞ்ஜானாதி…பே॰… தேஜோகஸிணமேகோ
ஸஞ்ஜானாதி… வாயோகஸிணமேகோ ஸஞ்ஜானாதி… நீலகஸிணமேகோ ஸஞ்ஜானாதி… பீதகஸிணமேகோ
ஸஞ்ஜானாதி… லோஹிதகஸிணமேகோ ஸஞ்ஜானாதி… ஓதா³தகஸிணமேகோ ஸஞ்ஜானாதி…
ஆகாஸகஸிணமேகோ ஸஞ்ஜானாதி … விஞ்ஞாணகஸிணமேகோ ஸஞ்ஜானாதி உத்³த⁴மதோ⁴ திரியங் அத்³வயங் அப்பமாணங். தத்ர ச பன மே ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி.
251.
‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே
ஸாவகா சத்தாரி ஜா²னானி பா⁴வெந்தி. இது⁴தா³யி, பி⁴க்கு² விவிச்சேவ காமேஹி
விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங்
ஜா²னங் உபஸம்பஜ்ஜ விஹரதி. ஸோ இமமேவ காயங் விவேகஜேன பீதிஸுகே²ன அபி⁴ஸந்தே³தி
பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ
விவேகஜேன பீதிஸுகே²ன அப்பு²டங் ஹோதி. ஸெய்யதா²பி, உதா³யி, த³க்கோ² ந்ஹாபகோ [நஹாபகோ (ஸீ॰ பீ॰)] வா ந்ஹாபகந்தேவாஸீ வா கங்ஸதா²லே ந்ஹானீயசுண்ணானி [நஹானீயசுண்ணானி (ஸீ॰ பீ॰)] ஆகிரித்வா உத³கேன பரிப்போ²ஸகங் பரிப்போ²ஸகங் ஸன்னெய்ய, ஸாயங் ந்ஹானீயபிண்டி³ [ஸாஸ்ஸ நஹானீயபிண்டீ³ (ஸீ॰ ஸ்யா॰ கங்॰)]
ஸ்னேஹானுக³தா ஸ்னேஹபரேதோ ஸந்தரபா³ஹிரா பு²டா ஸ்னேஹேன ந ச பக்³க⁴ரிணீ;
ஏவமேவ கோ², உதா³யி, பி⁴க்கு² இமமேவ காயங் விவேகஜேன பீதிஸுகே²ன அபி⁴ஸந்தே³தி
பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ
விவேகஜேன பீதிஸுகே²ன அப்பு²டங் ஹோதி.
‘‘புன சபரங், உதா³யி, பி⁴க்கு² விதக்கவிசாரானங் வூபஸமா
அஜ்ஜ²த்தங் ஸம்பஸாத³னங்…பே॰… து³தியங் ஜா²னங் உபஸம்பஜ்ஜ விஹரதி. ஸோ இமமேவ
காயங் ஸமாதி⁴ஜேன பீதிஸுகே²ன அபி⁴ஸந்தே³தி பரிஸந்தே³தி பரிபூரேதி
பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ ஸமாதி⁴ஜேன பீதிஸுகே²ன
அப்பு²டங் ஹோதி . ஸெய்யதா²பி, உதா³யி, உத³கரஹதோ³ க³ம்பீ⁴ரோ உப்³பி⁴தோ³த³கோ [உப்³பி⁴தோத³கோ (ஸ்யா॰ கங்॰ க॰)]. தஸ்ஸ நேவஸ்ஸ புரத்தி²மாய தி³ஸாய உத³கஸ்ஸ ஆயமுக²ங் , ந பச்சி²மாய தி³ஸாய உத³கஸ்ஸ ஆயமுக²ங், ந உத்தராய தி³ஸாய உத³கஸ்ஸ ஆயமுக²ங், ந த³க்கி²ணாய தி³ஸாய உத³கஸ்ஸ
ஆயமுக²ங், தே³வோ ச ந காலேன காலங் ஸம்மா தா⁴ரங் அனுப்பவெச்செ²ய்ய; அத² கோ²
தம்ஹாவ உத³கரஹதா³ ஸீதா வாரிதா⁴ரா உப்³பி⁴ஜ்ஜித்வா தமேவ உத³கரஹத³ங் ஸீதேன
வாரினா அபி⁴ஸந்தெ³ய்ய பரிஸந்தெ³ய்ய பரிபூரெய்ய பரிப்ப²ரெய்ய, நாஸ்ஸ [ந நேஸங் (ஸீ॰)]
கிஞ்சி ஸப்³பா³வதோ உத³கரஹத³ஸ்ஸ ஸீதேன வாரினா அப்பு²டங் அஸ்ஸ. ஏவமேவ கோ²,
உதா³யி, பி⁴க்கு² இமமேவ காயங் ஸமாதி⁴ஜேன பீதிஸுகே²ன அபி⁴ஸந்தே³தி
பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ ஸமாதி⁴ஜேன பீதிஸுகே²ன அப்பு²டங் ஹோதி.
‘‘புன சபரங், உதா³யி, பி⁴க்கு² பீதியா ச விராகா³…பே॰…
ததியங் ஜா²னங் உபஸம்பஜ்ஜ விஹரதி. ஸோ இமமேவ காயங் நிப்பீதிகேன ஸுகே²ன
அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ
காயஸ்ஸ நிப்பீதிகேன ஸுகே²ன அப்பு²டங் ஹோதி. ஸெய்யதா²பி, உதா³யி,
உப்பலினியங் வா பது³மினியங் வா புண்ட³ரீகினியங் வா அப்பேகச்சானி உப்பலானி
வா பது³மானி வா புண்ட³ரீகானி வா உத³கே ஜாதானி உத³கே ஸங்வட்³டா⁴னி
உத³கானுக்³க³தானி அந்தோ நிமுக்³க³போஸீனி, தானி யாவ சக்³கா³ யாவ ச மூலா
ஸீதேன வாரினா அபி⁴ஸன்னானி பரிஸன்னானி பரிபூரானி பரிப்பு²டானி, நாஸ்ஸ கிஞ்சி
ஸப்³பா³வதங், உப்பலானங் வா பது³மானங் வா புண்ட³ரீகானங் வா ஸீதேன வாரினா
அப்பு²டங் அஸ்ஸ; ஏவமேவ கோ², உதா³யி, பி⁴க்கு² இமமேவ காயங் நிப்பீதிகேன
ஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி
ஸப்³பா³வதோ காயஸ்ஸ நிப்பீதிகேன ஸுகே²ன அப்பு²டங் ஹோதி.
‘‘புன சபரங், உதா³யி, பி⁴க்கு² ஸுக²ஸ்ஸ ச பஹானா
து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா
அது³க்க²மஸுக²ங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ
விஹரதி. ஸோ இமமேவ காயங் பரிஸுத்³தே⁴ன சேதஸா பரியோதா³தேன ப²ரித்வா நிஸின்னோ
ஹோதி, நாஸ்ஸ கிஞ்சி ஸப்³பா³வதோ காயஸ்ஸ பரிஸுத்³தே⁴ன சேதஸா பரியோதா³தேன
அப்பு²டங் ஹோதி. ஸெய்யதா²பி, உதா³யி, புரிஸோ ஓதா³தேன வத்தே²ன ஸஸீஸங்
பாருபித்வா நிஸின்னோ அஸ்ஸ, நாஸ்ஸ கிஞ்சி ஸப்³பா³வதோ காயஸ்ஸ ஓதா³தேன வத்தே²ன
அப்பு²டங் அஸ்ஸ; ஏவமேவ கோ², உதா³யி, பி⁴க்கு² இமமேவ காயங் பரிஸுத்³தே⁴ன சேதஸா பரியோதா³தேன ப²ரித்வா நிஸின்னோ ஹோதி, நாஸ்ஸ கிஞ்சி ஸப்³பா³வதோ காயஸ்ஸ பரிஸுத்³தே⁴ன சேதஸா பரியோதா³தேன அப்பு²டங் ஹோதி. தத்ர ச பன மே ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி.
252.
‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே
ஸாவகா ஏவங் பஜானந்தி – ‘அயங் கோ² மே காயோ ரூபீ சாதுமஹாபூ⁴திகோ
மாதாபெத்திகஸம்ப⁴வோ ஓத³னகும்மாஸூபசயோ
அனிச்சுச்சா²த³னபரிமத்³த³னபே⁴த³னவித்³த⁴ங்ஸனத⁴ம்மோ; இத³ஞ்ச பன மே விஞ்ஞாணங்
எத்த² ஸிதங் எத்த² படிப³த்³த⁴ங்’. ஸெய்யதா²பி, உதா³யி, மணி வேளுரியோ ஸுபோ⁴
ஜாதிமா அட்ட²ங்ஸோ ஸுபரிகம்மகதோ அச்சோ² விப்பஸன்னோ ஸப்³பா³காரஸம்பன்னோ;
தத்ரித³ங் ஸுத்தங் ஆவுதங் நீலங் வா பீதங் வா லோஹிதங் வா ஓதா³தங் வா
பண்டு³ஸுத்தங் வா. தமேனங் சக்கு²மா புரிஸோ ஹத்தே² கரித்வா பச்சவெக்கெ²ய்ய –
‘அயங் கோ² மணி வேளுரியோ ஸுபோ⁴ ஜாதிமா அட்ட²ங்ஸோ ஸுபரிகம்மகதோ அச்சோ²
விப்பஸன்னோ ஸப்³பா³காரஸம்பன்னோ; தத்ரித³ங் ஸுத்தங் ஆவுதங் நீலங் வா பீதங்
வா லோஹிதங் வா ஓதா³தங் வா பண்டு³ஸுத்தங் வா’தி. ஏவமேவ கோ², உதா³யி,
அக்கா²தா மயா ஸாவகானங் படிபதா³, யதா²படிபன்னா மே ஸாவகா ஏவங் பஜானந்தி –
‘அயங் கோ² மே காயோ ரூபீ சாதுமஹாபூ⁴திகோ மாதாபெத்திகஸம்ப⁴வோ
ஓத³னகும்மாஸூபசயோ அனிச்சுச்சா²த³னபரிமத்³த³னபே⁴த³னவித்³த⁴ங்ஸனத⁴ம்மோ;
இத³ஞ்ச பன மே விஞ்ஞாணங் எத்த² ஸிதங் எத்த² படிப³த்³த⁴’ந்தி. தத்ர ச பன மே ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி.
253.
‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே
ஸாவகா இமம்ஹா காயா அஞ்ஞங் காயங் அபி⁴னிம்மினந்தி ரூபிங் மனோமயங்
ஸப்³ப³ங்க³பச்சங்கி³ங் அஹீனிந்த்³ரியங். ஸெய்யதா²பி, உதா³யி, புரிஸோ
முஞ்ஜம்ஹா ஈஸிகங் பப்³பா³ஹெய்ய; தஸ்ஸ ஏவமஸ்ஸ – ‘அயங் முஞ்ஜோ, அயங் ஈஸிகா;
அஞ்ஞோ முஞ்ஜோ, அஞ்ஞா ஈஸிகா; முஞ்ஜம்ஹாத்வேவ ஈஸிகா பப்³பா³ள்ஹா’தி. ஸெய்யதா²
வா பனுதா³யி, புரிஸோ அஸிங் கோஸியா பப்³பா³ஹெய்ய; தஸ்ஸ ஏவமஸ்ஸ – ‘அயங் அஸி,
அயங் கோஸி; அஞ்ஞோ அஸி அஞ்ஞா கோஸி; கோஸியாத்வேவ அஸி பப்³பா³ள்ஹோ’தி.
ஸெய்யதா² வா, பனுதா³யி , புரிஸோ அஹிங் கரண்டா³ உத்³த⁴ரெய்ய; தஸ்ஸ ஏவமஸ்ஸ – ‘அயங் அஹி, அயங் கரண்டோ³; அஞ்ஞோ
அஹி, அஞ்ஞோ கரண்டோ³; கரண்டா³த்வேவ அஹி உப்³ப⁴தோ’தி. ஏவமேவ கோ², உதா³யி,
அக்கா²தா மயா ஸாவகானங் படிபதா³, யதா²படிபன்னா மே ஸாவகா இமம்ஹா காயா அஞ்ஞங்
காயங் அபி⁴னிம்மினந்தி ரூபிங் மனோமயங்
ஸப்³ப³ங்க³பச்சங்கி³ங் அஹீனிந்த்³ரியங். தத்ர ச பன மே ஸாவகா ப³ஹூ
அபி⁴ஞ்ஞாவோஸானபாரமிப்பத்தா விஹரந்தி.
254. ‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே ஸாவகா அனேகவிஹிதங் இத்³தி⁴வித⁴ங் பச்சனுபொ⁴ந்தி – ஏகோபி
ஹுத்வா ப³ஹுதா⁴ ஹொந்தி, ப³ஹுதா⁴பி ஹுத்வா ஏகோ ஹோதி; ஆவிபா⁴வங்,
திரோபா⁴வங்; திரோகுட்டங் திரோபாகாரங் திரோபப்³ப³தங் அஸஜ்ஜமானா க³ச்ச²ந்தி,
ஸெய்யதா²பி ஆகாஸே; பத²வியாபி உம்முஜ்ஜனிமுஜ்ஜங் கரொந்தி, ஸெய்யதா²பி உத³கே;
உத³கேபி அபி⁴ஜ்ஜமானே [அபி⁴ஜ்ஜமானா (க॰)]
க³ச்ச²ந்தி, ஸெய்யதா²பி பத²வியங்; ஆகாஸேபி பல்லங்கேன கமந்தி, ஸெய்யதா²பி
பக்கீ² ஸகுணோ; இமேபி சந்தி³மஸூரியே ஏவங்மஹித்³தி⁴கே ஏவங்மஹானுபா⁴வே பாணினா
பரிமஸந்தி பரிமஜ்ஜந்தி, யாவ ப்³ரஹ்மலோகாபி காயேன வஸங் வத்தெந்தி.
ஸெய்யதா²பி, உதா³யி, த³க்கோ² கும்ப⁴காரோ வா கும்ப⁴காரந்தேவாஸீ வா
ஸுபரிகம்மகதாய மத்திகாய யங் யதே³வ பா⁴ஜனவிகதிங் ஆகங்கெ²ய்ய தங் ததே³வ
கரெய்ய அபி⁴னிப்பா²தெ³ய்ய; ஸெய்யதா² வா பனுதா³யி, த³க்கோ² த³ந்தகாரோ வா
த³ந்தகாரந்தேவாஸீ வா ஸுபரிகம்மகதஸ்மிங் த³ந்தஸ்மிங் யங் யதே³வ த³ந்தவிகதிங்
ஆகங்கெ²ய்ய தங் ததே³வ கரெய்ய அபி⁴னிப்பா²தெ³ய்ய; ஸெய்யதா² வா பனுதா³யி,
த³க்கோ² ஸுவண்ணகாரோ வா ஸுவண்ணகாரந்தேவாஸீ வா ஸுபரிகம்மகதஸ்மிங்
ஸுவண்ணஸ்மிங் யங் யதே³வ ஸுவண்ணவிகதிங் ஆகங்கெ²ய்ய தங் ததே³வ கரெய்ய
அபி⁴னிப்பா²தெ³ய்ய. ஏவமேவ கோ², உதா³யி, அக்கா²தா மயா ஸாவகானங் படிபதா³,
யதா²படிபன்னா மே ஸாவகா அனேகவிஹிதங் இத்³தி⁴வித⁴ங் பச்சனுபொ⁴ந்தி – ஏகோபி
ஹுத்வா ப³ஹுதா⁴ ஹொந்தி, ப³ஹுதா⁴பி ஹுத்வா ஏகோ ஹோதி; ஆவிபா⁴வங், திரோபா⁴வங்;
திரோகுட்டங் திரோபாகாரங் திரோபப்³ப³தங் அஸஜ்ஜமானா க³ச்ச²ந்தி, ஸெய்யதா²பி
ஆகாஸே; பத²வியாபி உம்முஜ்ஜனிமுஜ்ஜங் கரொந்தி, ஸெய்யதா²பி உத³கே; உத³கேபி
அபி⁴ஜ்ஜமானே க³ச்ச²ந்தி , ஸெய்யதா²பி பத²வியங்; ஆகாஸேபி பல்லங்கேன கமந்தி, ஸெய்யதா²பி பக்கீ² ஸகுணோ; இமேபி சந்தி³மஸூரியே ஏவங்மஹித்³தி⁴கே ஏவங்மஹானுபா⁴வே பாணினா பரிமஸந்தி பரிமஜ்ஜந்தி, யாவ ப்³ரஹ்மலோகாபி காயேன வஸங் வத்தெந்தி. தத்ர ச பன மே ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி.
255.
‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே
ஸாவகா தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³
ஸுணந்தி – தி³ப்³பே³ ச மானுஸே ச, யே தூ³ரே ஸந்திகே ச. ஸெய்யதா²பி, உதா³யி,
ப³லவா ஸங்க²த⁴மோ அப்பகஸிரேனேவ சாதுத்³தி³ஸா விஞ்ஞாபெய்ய; ஏவமேவ கோ²,
உதா³யி, அக்கா²தா மயா ஸாவகானங் படிபதா³, யதா²படிபன்னா
மே ஸாவகா தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴
ஸத்³தே³ ஸுணந்தி – தி³ப்³பே³ ச மானுஸே ச, யே தூ³ரே ஸந்திகே ச. தத்ர ச பன மே
ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி.
256.
‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே
ஸாவகா பரஸத்தானங் பரபுக்³க³லானங் சேதஸா சேதோ பரிச்ச பஜானந்தி – ஸராக³ங் வா
சித்தங் ‘ஸராக³ங் சித்த’ந்தி பஜானந்தி, வீதராக³ங் வா சித்தங் ‘வீதராக³ங்
சித்த’ந்தி பஜானந்தி; ஸதோ³ஸங் வா சித்தங் ‘ஸதோ³ஸங் சித்த’ந்தி பஜானந்தி,
வீததோ³ஸங் வா சித்தங் ‘வீததோ³ஸங் சித்த’ந்தி பஜானந்தி; ஸமோஹங் வா சித்தங்
‘ஸமோஹங் சித்த’ந்தி பஜானந்தி, வீதமோஹங் வா சித்தங்
‘வீதமோஹங் சித்த’ந்தி பஜானந்தி; ஸங்கி²த்தங் வா சித்தங் ‘ஸங்கி²த்தங்
சித்த’ந்தி பஜானந்தி, விக்கி²த்தங் வா சித்தங் ‘விக்கி²த்தங் சித்த’ந்தி
பஜானந்தி; மஹக்³க³தங் வா சித்தங் ‘மஹக்³க³தங் சித்த’ந்தி பஜானந்தி,
அமஹக்³க³தங் வா சித்தங் ‘அமஹக்³க³தங் சித்த’ந்தி பஜானந்தி; ஸஉத்தரங் வா
சித்தங் ‘ஸஉத்தரங் சித்த’ந்தி பஜானந்தி, அனுத்தரங் வா சித்தங் ‘அனுத்தரங்
சித்த’ந்தி பஜானந்தி; ஸமாஹிதங் வா சித்தங் ‘ஸமாஹிதங் சித்த’ந்தி பஜானந்தி,
அஸமாஹிதங் வா சித்தங் ‘அஸமாஹிதங் சித்த’ந்தி பஜானந்தி; விமுத்தங் வா
சித்தங் ‘விமுத்தங் சித்த’ந்தி பஜானந்தி, அவிமுத்தங் வா சித்தங்
‘அவிமுத்தங் சித்த’ந்தி பஜானந்தி. ஸெய்யதா²பி, உதா³யி, இத்தீ² வா புரிஸோ வா
த³ஹரோ யுவா மண்ட³னகஜாதிகோ ஆதா³ஸே வா பரிஸுத்³தே⁴ பரியோதா³தே அச்சே² வா
உத³கபத்தே ஸகங் முக²னிமித்தங் பச்சவெக்க²மானோ ஸகணிகங் வா ‘ஸகணிக’ந்தி [ஸகணிகங்க³ங் வா ஸகணிகங்க³ந்தி (ஸீ॰)] ஜானெய்ய , அகணிகங் வா ‘அகணிக’ந்தி [அகணிகங்க³ங் வா அகணிகங்க³ந்தி (ஸீ॰)]
ஜானெய்ய; ஏவமேவ கோ², உதா³யி, அக்கா²தா மயா ஸாவகானங் படிபதா³, யதா²படிபன்னா
மே ஸாவகா பரஸத்தானங் பரபுக்³க³லானங் சேதஸா சேதோ பரிச்ச பஜானந்தி – ஸராக³ங்
வா சித்தங் ‘ஸராக³ங் சித்த’ந்தி பஜானந்தி,
வீதராக³ங் வா சித்தங்…பே॰… ஸதோ³ஸங் வா சித்தங்… வீததோ³ஸங் வா சித்தங்…
ஸமோஹங் வா சித்தங்… வீதமோஹங் வா சித்தங்… ஸங்கி²த்தங் வா சித்தங்…
விக்கி²த்தங் வா சித்தங்… மஹக்³க³தங் வா சித்தங்…
அமஹக்³க³தங் வா சித்தங்… ஸஉத்தரங் வா சித்தங்… அனுத்தரங் வா சித்தங்…
ஸமாஹிதங் வா சித்தங்… அஸமாஹிதங் வா சித்தங்… விமுத்தங் வா சித்தங்…
அவிமுத்தங் வா சித்தங் ‘அவிமுத்தங் சித்த’ந்தி பஜானந்தி. தத்ர ச பன மே
ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி.
257. ‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே ஸாவகா
அனேகவிஹிதங் புப்³பே³னிவாஸங் அனுஸ்ஸரந்தி, ஸெய்யதி²த³ங் – ஏகம்பி ஜாதிங்
த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி
ஜாதியோ வீஸம்பி ஜாதியோ திங்ஸம்பி ஜாதியோ சத்தாலீஸம்பி ஜாதியோ பஞ்ஞாஸம்பி
ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி, அனேகேபி ஸங்வட்டகப்பே
அனேகேபி விவட்டகப்பே அனேகேபி ஸங்வட்டவிவட்டகப்பே – ‘அமுத்ராஸிங் ஏவங்னாமோ
ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³
ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ
ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³
ஏவமாயுபரியந்தோ, ஸோ ததோ சுதோ இதூ⁴பபன்னோ’தி. இதி ஸாகாரங் ஸஉத்³தே³ஸங்
அனேகவிஹிதங் புப்³பே³னிவாஸங் அனுஸ்ஸரதி. ஸெய்யதா²பி, உதா³யி, புரிஸோ ஸகம்ஹா
கா³மா அஞ்ஞங் கா³மங் க³ச்செ²ய்ய, தம்ஹாபி கா³மா அஞ்ஞங் கா³மங் க³ச்செ²ய்ய;
ஸோ தம்ஹா கா³மா ஸகங்யேவ கா³மங் பச்சாக³ச்செ²ய்ய; தஸ்ஸ ஏவமஸ்ஸ – ‘அஹங் கோ²
ஸகம்ஹா கா³மா அஞ்ஞங் கா³மங் அக³ச்சி²ங், தத்ர ஏவங்
அட்டா²ஸிங் ஏவங் நிஸீதி³ங் ஏவங் அபா⁴ஸிங் ஏவங் துண்ஹீ அஹோஸிங்; தம்ஹாபி
கா³மா அமுங் கா³மங் அக³ச்சி²ங், தத்ராபி ஏவங் அட்டா²ஸிங்
ஏவங் நிஸீதி³ங் ஏவங் அபா⁴ஸிங் ஏவங் துண்ஹீ அஹோஸிங், ஸொம்ஹி தம்ஹா கா³மா
ஸகங்யேவ கா³மங் பச்சாக³தோ’தி. ஏவமேவ கோ², உதா³யி, அக்கா²தா மயா ஸாவகானங்
படிபதா³, யதா²படிபன்னா மே ஸாவகா அனேகவிஹிதங் புப்³பே³னிவாஸங் அனுஸ்ஸரந்தி,
ஸெய்யதி²த³ங் – ஏகம்பி ஜாதிங்…பே॰… இதி ஸாகாரங் ஸஉத்³தே³ஸங் அனேகவிஹிதங்
புப்³பே³னிவாஸங் அனுஸ்ஸரந்தி. தத்ர ச பன மே ஸாவகா ப³ஹூ
அபி⁴ஞ்ஞாவோஸானபாரமிப்பத்தா விஹரந்தி.
258.
‘‘புன சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே
ஸாவகா தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே
பஸ்ஸந்தி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே
து³க்³க³தே யதா²கம்மூபகே³ ஸத்தே பஜானந்தி – ‘இமே வத பொ⁴ந்தோ ஸத்தா
காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன
ஸமன்னாக³தா அரியானங் உபவாத³கா மிச்சா²தி³ட்டி²கா
மிச்சா²தி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா அபாயங்
து³க்³க³திங் வினிபாதங் நிரயங் உபபன்னா; இமே வா பன பொ⁴ந்தோ ஸத்தா
காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா
அரியானங் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா, தே காயஸ்ஸ
பே⁴தா³ பரங் மரணா ஸுக³திங் ஸக்³க³ங் லோகங்
உபபன்னா’தி. இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே
பஸ்ஸந்தி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே
து³க்³க³தே யதா²கம்மூபகே³ ஸத்தே பஜானந்தி. ஸெய்யதா²பி, உதா³யி, த்³வே அகா³ரா ஸத்³வாரா [ஸன்னத்³வாரா (க॰)].
தத்ர சக்கு²மா புரிஸோ மஜ்ஜே² டி²தோ பஸ்ஸெய்ய மனுஸ்ஸே கே³ஹங் பவிஸந்தேபி
நிக்க²மந்தேபி அனுசங்கமந்தேபி அனுவிசரந்தேபி; ஏவமேவ கோ², உதா³யி, அக்கா²தா
மயா ஸாவகானங் படிபதா³, யதா²படிபன்னா மே ஸாவகா தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன ஸத்தே பஸ்ஸந்தி சவமானே உபபஜ்ஜமானே ஹீனே
பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே
பஜானந்தி…பே॰… தத்ர ச ப மே ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி.
259. ‘‘புன
சபரங், உதா³யி, அக்கா²தா மயா ஸாவகானங் படிபதா³, யதா²படிபன்னா மே ஸாவகா
ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே
ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி. ஸெய்யதா²பி, உதா³யி,
பப்³ப³தஸங்கே²பே உத³கரஹதோ³ அச்சோ² விப்பஸன்னோ அனாவிலோ, தத்த² சக்கு²மா
புரிஸோ தீரே டி²தோ பஸ்ஸெய்ய ஸிப்பிஸம்பு³கம்பி [ஸிப்பிகஸம்பு³கம்பி (ஸ்யா॰ கங்॰ க॰)]
ஸக்க²ரகட²லம்பி மச்ச²கு³ம்ப³ம்பி சரந்தம்பி திட்ட²ந்தம்பி. தஸ்ஸ ஏவமஸ்ஸ –
‘அயங் கோ² உத³கரஹதோ³ அச்சோ² விப்பஸன்னோ அனாவிலோ, தத்ரிமே ஸிப்பிஸம்பு³காபி
ஸக்க²ரகட²லாபி மச்ச²கு³ம்பா³பி சரந்திபி திட்ட²ந்திபீ’தி. ஏவமேவ கோ²,
உதா³யி, அக்கா²தா மயா ஸாவகானங் படிபதா³, யதா²படிபன்னா
மே ஸாவகா ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி. தத்ர ச பன மே
ஸாவகா ப³ஹூ அபி⁴ஞ்ஞாவோஸானபாரமிப்பத்தா விஹரந்தி. அயங் கோ², உதா³யி, பஞ்சமோ
த⁴ம்மோ யேன மம ஸாவகா ஸக்கரொந்தி க³ருங் கரொந்தி மானெந்தி பூஜெந்தி,
ஸக்கத்வா க³ருங் கத்வா உபனிஸ்ஸாய விஹரந்தி.
‘‘இமே கோ², உதா³யி, பஞ்ச த⁴ம்மா யேஹி மமங் ஸாவகா
ஸக்கரொந்தி க³ருங் கரொந்தி மானெந்தி பூஜெந்தி, ஸக்கத்வா க³ருங் கத்வா
உபனிஸ்ஸாய விஹரந்தீ’’தி.
இத³மவோச ப⁴க³வா. அத்தமனோ ஸகுலுதா³யீ பரிப்³பா³ஜகோ ப⁴க³வதோ பா⁴ஸிதங் அபி⁴னந்தீ³தி.
மஹாஸகுலுதா³யிஸுத்தங் நிட்டி²தங் ஸத்தமங்.
8. ஸமணமுண்டி³கஸுத்தங்
260. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தேன கோ² பன ஸமயேன உக்³கா³ஹமானோ பரிப்³பா³ஜகோ ஸமணமுண்டி³காபுத்தோ [ஸமணமண்டி³காபுத்தோ (ஸீ॰ பீ॰)] ஸமயப்பவாத³கே திந்து³காசீரே ஏகஸாலகே மல்லிகாய ஆராமே படிவஸதி
மஹதியா பரிப்³பா³ஜகபரிஸாய ஸத்³தி⁴ங் பஞ்சமத்தேஹி பரிப்³பா³ஜகஸதேஹி. அத²
கோ² பஞ்சகங்கோ³ த²பதி ஸாவத்தி²யா நிக்க²மி தி³வா தி³வஸ்ஸ ப⁴க³வந்தங்
த³ஸ்ஸனாய. அத² கோ² பஞ்சகங்க³ஸ்ஸ த²பதிஸ்ஸ ஏதத³ஹோஸி – ‘‘அகாலோ கோ² தாவ
ப⁴க³வந்தங் த³ஸ்ஸனாய; படிஸல்லீனோ ப⁴க³வா. மனோபா⁴வனியானம்பி பி⁴க்கூ²னங்
அஸமயோ த³ஸ்ஸனாய; படிஸல்லீனா மனோபா⁴வனியா பி⁴க்கூ². யங்னூனாஹங் யேன
ஸமயப்பவாத³கோ திந்து³காசீரோ ஏகஸாலகோ மல்லிகாய ஆராமோ யேன உக்³கா³ஹமானோ
பரிப்³பா³ஜகோ ஸமணமுண்டி³காபுத்தோ தேனுபஸங்கமெய்ய’’ந்தி. அத² கோ² பஞ்சகங்கோ³
த²பதி யேன ஸமயப்பவாத³கோ திந்து³காசீரோ ஏகஸாலகோ மல்லிகாய ஆராமோ யேன
உக்³கா³ஹமானோ பரிப்³பா³ஜகோ ஸமணமுண்டி³காபுத்தோ தேனுபஸங்கமி.
தேன கோ² பன ஸமயேன உக்³கா³ஹமானோ பரிப்³பா³ஜகோ
ஸமணமுண்டி³காபுத்தோ மஹதியா பரிப்³பா³ஜகபரிஸாய ஸத்³தி⁴ங் நிஸின்னோ ஹோதி
உன்னாதி³னியா உச்சாஸத்³த³மஹாஸத்³தா³ய அனேகவிஹிதங் திரச்சா²னகத²ங்
கதெ²ந்தியா, ஸெய்யதி²த³ங் – ராஜகத²ங் சோரகத²ங் மஹாமத்தகத²ங் ஸேனாகத²ங்
ப⁴யகத²ங் யுத்³த⁴கத²ங்
அன்னகத²ங் பானகத²ங் வத்த²கத²ங் ஸயனகத²ங் மாலாகத²ங் க³ந்த⁴கத²ங் ஞாதிகத²ங்
யானகத²ங் கா³மகத²ங் நிக³மகத²ங் நக³ரகத²ங் ஜனபத³கத²ங் இத்தி²கத²ங் ஸூரகத²ங்
விஸிகா²கத²ங் கும்ப⁴ட்டா²னகத²ங் புப்³ப³பேதகத²ங் நானத்தகத²ங் லோகக்கா²யிகங்
ஸமுத்³த³க்கா²யிகங் இதிப⁴வாப⁴வகத²ங் இதி வா.
அத்³த³ஸா கோ² உக்³கா³ஹமானோ பரிப்³பா³ஜகோ
ஸமணமுண்டி³காபுத்தோ பஞ்சகங்க³ங் த²பதிங் தூ³ரதோவ ஆக³ச்ச²ந்தங். தி³ஸ்வான
ஸகங் பரிஸங் ஸண்டா²பேஸி – ‘‘அப்பஸத்³தா³ பொ⁴ந்தோ ஹொந்து, மா பொ⁴ந்தோ
ஸத்³த³மகத்த²; அயங் ஸமணஸ்ஸ கோ³தமஸ்ஸ ஸாவகோ ஆக³ச்ச²தி பஞ்சகங்கோ³ த²பதி.
யாவதா கோ² பன ஸமணஸ்ஸ கோ³தமஸ்ஸ ஸாவகா கி³ஹீ ஓதா³தவஸனா ஸாவத்தி²யங் படிவஸந்தி
அயங் தேஸங் அஞ்ஞதரோ பஞ்சகங்கோ³ த²பதி.
அப்பஸத்³த³காமா கோ² பன தே ஆயஸ்மந்தோ அப்பஸத்³த³வினீதா அப்பஸத்³த³ஸ்ஸ
வண்ணவாதி³னோ; அப்பேவ நாம அப்பஸத்³த³ங் பரிஸங் விதி³த்வா உபஸங்கமிதப்³ப³ங்
மஞ்ஞெய்யா’’தி. அத² கோ² தே பரிப்³பா³ஜகா துண்ஹீ அஹேஸுங்.
261.
அத² கோ² பஞ்சகங்கோ³ த²பதி யேன உக்³கா³ஹமானோ பரிப்³பா³ஜகோ
ஸமணமுண்டி³காபுத்தோ தேனுபஸங்கமி; உபஸங்கமித்வா உக்³கா³ஹமானேன பரிப்³பா³ஜகேன
ஸமணமுண்டி³காபுத்தேன ஸத்³தி⁴ங் ஸம்மோதி³ .
ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங்
நிஸின்னங் கோ² பஞ்சகங்க³ங் த²பதிங் உக்³கா³ஹமானோ பரிப்³பா³ஜகோ
ஸமணமுண்டி³காபுத்தோ ஏதத³வோச – ‘‘சதூஹி கோ² அஹங், க³ஹபதி, த⁴ம்மேஹி
ஸமன்னாக³தங் புரிஸபுக்³க³லங் பஞ்ஞபேமி ஸம்பன்னகுஸலங் பரமகுஸலங்
உத்தமபத்திபத்தங் ஸமணங் அயொஜ்ஜ²ங். கதமேஹி சதூஹி? இத⁴, க³ஹபதி, ந காயேன
பாபகம்மங் கரோதி, ந பாபகங் வாசங் பா⁴ஸதி, ந பாபகங் ஸங்கப்பங் ஸங்கப்பேதி, ந
பாபகங் ஆஜீவங் ஆஜீவதி – இமேஹி கோ² அஹங், க³ஹபதி, சதூஹி த⁴ம்மேஹி
ஸமன்னாக³தங் புரிஸபுக்³க³லங் பஞ்ஞபேமி ஸம்பன்னகுஸலங் பரமகுஸலங்
உத்தமபத்திபத்தங் ஸமணங் அயொஜ்ஜ²’’ந்தி.
அத² கோ² பஞ்சகங்கோ³ த²பதி உக்³கா³ஹமானஸ்ஸ
பரிப்³பா³ஜகஸ்ஸ ஸமணமுண்டி³காபுத்தஸ்ஸ பா⁴ஸிதங் நேவ அபி⁴னந்தி³
நப்படிக்கோஸி. அனபி⁴னந்தி³த்வா அப்படிக்கோஸித்வா உட்டா²யாஸனா பக்காமி –
‘‘ப⁴க³வதோ ஸந்திகே ஏதஸ்ஸ பா⁴ஸிதஸ்ஸ அத்த²ங் ஆஜானிஸ்ஸாமீ’’தி. அத² கோ²
பஞ்சகங்கோ³ த²பதி யேன ப⁴க³வா தேனுபஸங்கமி; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² பஞ்சகங்கோ³ த²பதி
யாவதகோ அஹோஸி உக்³கா³ஹமானேன பரிப்³பா³ஜகேன ஸமணமுண்டி³காபுத்தேன ஸத்³தி⁴ங் கதா²ஸல்லாபோ தங் ஸப்³ப³ங் ப⁴க³வதோ ஆரோசேஸி.
262.
ஏவங் வுத்தே, ப⁴க³வா பஞ்சகங்க³ங் த²பதிங் ஏதத³வோச – ‘‘ஏவங் ஸந்தே கோ²,
த²பதி, த³ஹரோ குமாரோ மந்தோ³ உத்தானஸெய்யகோ ஸம்பன்னகுஸலோ ப⁴விஸ்ஸதி பரமகுஸலோ
உத்தமபத்திபத்தோ ஸமணோ அயொஜ்ஜோ², யதா² உக்³கா³ஹமானஸ்ஸ பரிப்³பா³ஜகஸ்ஸ
ஸமணமுண்டி³காபுத்தஸ்ஸ வசனங். த³ஹரஸ்ஸ ஹி, த²பதி, குமாரஸ்ஸ மந்த³ஸ்ஸ
உத்தானஸெய்யகஸ்ஸ காயோதிபி ந ஹோதி, குதோ பன காயேன பாபகம்மங் கரிஸ்ஸதி,
அஞ்ஞத்ர ப²ந்தி³தமத்தா! த³ஹரஸ்ஸ ஹி, த²பதி, குமாரஸ்ஸ மந்த³ஸ்ஸ
உத்தானஸெய்யகஸ்ஸ வாசாதிபி ந ஹோதி, குதோ பன பாபகங் வாசங் பா⁴ஸிஸ்ஸதி, அஞ்ஞத்ர ரோதி³தமத்தா !
த³ஹரஸ்ஸ ஹி, த²பதி, குமாரஸ்ஸ மந்த³ஸ்ஸ உத்தானஸெய்யகஸ்ஸ ஸங்கப்போதிபி ந
ஹோதி, குதோ பன பாபகங் ஸங்கப்பங் ஸங்கப்பிஸ்ஸதி, அஞ்ஞத்ர விகூஜிதமத்தா [விகுஜ்ஜிதமத்தா (ஸீ॰ ஸ்யா॰ கங்॰ பீ॰)]! த³ஹரஸ்ஸ ஹி, த²பதி, குமாரஸ்ஸ மந்த³ஸ்ஸ உத்தானஸெய்யகஸ்ஸ ஆஜீவோதிபி ந ஹோதி, குதோ பன பாபகங்
ஆஜீவங் ஆஜீவிஸ்ஸதி, அஞ்ஞத்ர மாதுத²ஞ்ஞா! ஏவங் ஸந்தே கோ², த²பதி, த³ஹரோ
குமாரோ மந்தோ³ உத்தானஸெய்யகோ ஸம்பன்னகுஸலோ ப⁴விஸ்ஸதி பரமகுஸலோ
உத்தமபத்திபத்தோ ஸமணோ அயொஜ்ஜோ², யதா² உக்³கா³ஹமானஸ்ஸ பரிப்³பா³ஜகஸ்ஸ
ஸமணமுண்டி³காபுத்தஸ்ஸ வசனங்.
263.
‘‘சதூஹி கோ² அஹங், த²பதி, த⁴ம்மேஹி ஸமன்னாக³தங் புரிஸபுக்³க³லங் பஞ்ஞபேமி ந
சேவ ஸம்பன்னகுஸலங் ந பரமகுஸலங் ந உத்தமபத்திபத்தங் ஸமணங் அயொஜ்ஜ²ங், அபி
சிமங் த³ஹரங் குமாரங் மந்த³ங் உத்தானஸெய்யகங் ஸமதி⁴க³ய்ஹ திட்ட²தி. கதமேஹி
சதூஹி? இத⁴, த²பதி, ந காயேன பாபகம்மங் கரோதி, ந பாபகங் வாசங் பா⁴ஸதி, ந
பாபகங் ஸங்கப்பங் ஸங்கப்பேதி, ந பாபகங் ஆஜீவங் ஆஜீவதி – இமேஹி கோ² அஹங்,
த²பதி, சதூஹி த⁴ம்மேஹி ஸமன்னாக³தங் புரிஸபுக்³க³லங் பஞ்ஞபேமி ந சேவ
ஸம்பன்னகுஸலங் ந பரமகுஸலங் ந உத்தமபத்திபத்தங் ஸமணங் அயொஜ்ஜ²ங், அபி சிமங்
த³ஹரங் குமாரங் மந்த³ங் உத்தானஸெய்யகங் ஸமதி⁴க³ய்ஹ திட்ட²தி.
‘‘த³ஸஹி கோ² அஹங், த²பதி,
த⁴ம்மேஹி ஸமன்னாக³தங் புரிஸபுக்³க³லங் பஞ்ஞபேமி ஸம்பன்னகுஸலங் பரமகுஸலங்
உத்தமபத்திபத்தங் ஸமணங் அயொஜ்ஜ²ங். இமே அகுஸலா ஸீலா; தமஹங் [கஹங் (ஸீ॰), தஹங் (பீ॰)], த²பதி, வேதி³தப்³ப³ந்தி வதா³மி. இதோஸமுட்டா²னா அகுஸலா
ஸீலா; தமஹங், த²பதி, வேதி³தப்³ப³ந்தி வதா³மி. இத⁴ அகுஸலா ஸீலா அபரிஸேஸா
நிருஜ்ஜ²ந்தி; தமஹங், த²பதி, வேதி³தப்³ப³ந்தி வதா³மி. ஏவங் படிபன்னோ
அகுஸலானங் ஸீலானங் நிரோதா⁴ய படிபன்னோ ஹோதி; தமஹங், த²பதி, வேதி³தப்³ப³ந்தி
வதா³மி.
‘‘இமே குஸலா ஸீலா; தமஹங், த²பதி, வேதி³தப்³ப³ந்தி
வதா³மி. இதோஸமுட்டா²னா குஸலா ஸீலா; தமஹங், த²பதி, வேதி³தப்³ப³ந்தி வதா³மி.
இத⁴ குஸலா ஸீலா அபரிஸேஸா நிருஜ்ஜ²ந்தி; தமஹங், த²பதி, வேதி³தப்³ப³ந்தி
வதா³மி. ஏவங் படிபன்னோ குஸலானங் ஸீலானங் நிரோதா⁴ய படிபன்னோ ஹோதி; தமஹங்,
த²பதி, வேதி³தப்³ப³ந்தி வதா³மி.
‘‘இமே அகுஸலா ஸங்கப்பா; தமஹங், த²பதி, வேதி³தப்³ப³ந்தி வதா³மி. இதோஸமுட்டா²னா அகுஸலா ஸங்கப்பா ; தமஹங், த²பதி, வேதி³தப்³ப³ந்தி வதா³மி. இத⁴ அகுஸலா
ஸங்கப்பா அபரிஸேஸா நிருஜ்ஜ²ந்தி; தமஹங், த²பதி, வேதி³தப்³ப³ந்தி வதா³மி.
ஏவங் படிபன்னோ அகுஸலானங் ஸங்கப்பானங் நிரோதா⁴ய படிபன்னோ ஹோதி; தமஹங்,
த²பதி, வேதி³தப்³ப³ந்தி வதா³மி.
‘‘இமே குஸலா ஸங்கப்பா; தமஹங், த²பதி, வேதி³தப்³ப³ந்தி வதா³மி. இதோஸமுட்டா²னா குஸலா ஸங்கப்பா ;
தமஹங், த²பதி, வேதி³தப்³ப³ந்தி வதா³மி. இத⁴ குஸலா ஸங்கப்பா அபரிஸேஸா
நிருஜ்ஜ²ந்தி; தமஹங், த²பதி, வேதி³தப்³ப³ந்தி வதா³மி. ஏவங் படிபன்னோ
குஸலானங் ஸங்கப்பானங் நிரோதா⁴ய படிபன்னோ ஹோதி; தமஹங், த²பதி,
வேதி³தப்³ப³ந்தி வதா³மி.
264. ‘‘கதமே ச, த²பதி, அகுஸலா ஸீலா? அகுஸலங் காயகம்மங், அகுஸலங் வசீகம்மங், பாபகோ ஆஜீவோ – இமே வுச்சந்தி, த²பதி, அகுஸலா ஸீலா.
‘‘இமே ச, த²பதி, அகுஸலா ஸீலா கிங்ஸமுட்டா²னா?
ஸமுட்டா²னம்பி நேஸங் வுத்தங். ‘சித்தஸமுட்டா²னா’திஸ்ஸ வசனீயங். கதமங்
சித்தங்? சித்தம்பி ஹி ப³ஹுங் அனேகவித⁴ங் நானப்பகாரகங். யங் சித்தங்
ஸராக³ங் ஸதோ³ஸங் ஸமோஹங், இதோஸமுட்டா²னா அகுஸலா ஸீலா.
‘‘இமே ச, த²பதி, அகுஸலா ஸீலா குஹிங் அபரிஸேஸா
நிருஜ்ஜ²ந்தி? நிரோதோ⁴பி நேஸங் வுத்தோ. இத⁴, த²பதி, பி⁴க்கு²
காயது³ச்சரிதங் பஹாய காயஸுசரிதங் பா⁴வேதி,
வசீது³ச்சரிதங் பஹாய வசீஸுசரிதங் பா⁴வேதி, மனோது³ச்சரிதங் பஹாய மனோஸுசரிதங்
பா⁴வேதி, மிச்சா²ஜீவங் பஹாய ஸம்மாஜீவேன ஜீவிதங் கப்பேதி – எத்தே²தே அகுஸலா
ஸீலா அபரிஸேஸா நிருஜ்ஜ²ந்தி.
‘‘கத²ங் படிபன்னோ, த²பதி, அகுஸலானங் ஸீலானங் நிரோதா⁴ய
படிபன்னோ ஹோதி? இத⁴, த²பதி, பி⁴க்கு² அனுப்பன்னானங் பாபகானங் அகுஸலானங்
த⁴ம்மானங் அனுப்பாதா³ய ச²ந்த³ங் ஜனேதி வாயமதி வீரியங் ஆரப⁴தி சித்தங்
பக்³க³ண்ஹாதி பத³ஹதி; உப்பன்னானங் பாபகானங் அகுஸலானங் த⁴ம்மானங் பஹானாய
ச²ந்த³ங் ஜனேதி வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி;
அனுப்பன்னானங் குஸலானங் த⁴ம்மானங் உப்பாதா³ய ச²ந்த³ங் ஜனேதி வாயமதி வீரியங்
ஆரப⁴தி சித்தங் பக்³க³ண்ஹாதி பத³ஹதி; உப்பன்னானங் குஸலானங் த⁴ம்மானங் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ங் ஜனேதி வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி. ஏவங் படிபன்னோ கோ², த²பதி, அகுஸலானங் ஸீலானங் நிரோதா⁴ய படிபன்னோ ஹோதி.
265.
‘‘கதமே ச, த²பதி, குஸலா ஸீலா? குஸலங் காயகம்மங், குஸலங் வசீகம்மங்,
ஆஜீவபரிஸுத்³த⁴ம்பி கோ² அஹங், த²பதி, ஸீலஸ்மிங் வதா³மி. இமே வுச்சந்தி,
த²பதி, குஸலா ஸீலா.
‘‘இமே ச, த²பதி, குஸலா ஸீலா கிங்ஸமுட்டா²னா?
ஸமுட்டா²னம்பி நேஸங் வுத்தங். ‘சித்தஸமுட்டா²னா’திஸ்ஸ வசனீயங். கதமங்
சித்தங்? சித்தம்பி ஹி ப³ஹுங் அனேகவித⁴ங் நானப்பகாரகங். யங் சித்தங்
வீதராக³ங் வீததோ³ஸங் வீதமோஹங், இதோஸமுட்டா²னா குஸலா ஸீலா.
‘‘இமே ச, த²பதி, குஸலா ஸீலா குஹிங் அபரிஸேஸா
நிருஜ்ஜ²ந்தி? நிரோதோ⁴பி நேஸங் வுத்தோ. இத⁴, த²பதி, பி⁴க்கு² ஸீலவா ஹோதி நோ
ச ஸீலமயோ, தஞ்ச சேதோவிமுத்திங் பஞ்ஞாவிமுத்திங் யதா²பூ⁴தங் பஜானாதி;
யத்த²ஸ்ஸ தே குஸலா ஸீலா அபரிஸேஸா நிருஜ்ஜ²ந்தி.
‘‘கத²ங் படிபன்னோ ச, த²பதி, குஸலானங் ஸீலானங் நிரோதா⁴ய
படிபன்னோ ஹோதி? இத⁴, த²பதி, பி⁴க்கு² அனுப்பன்னானங் பாபகானங் அகுஸலானங்
த⁴ம்மானங் அனுப்பாதா³ய ச²ந்த³ங் ஜனேதி வாயமதி வீரியங் ஆரப⁴தி சித்தங்
பக்³க³ண்ஹாதி பத³ஹதி ; உப்பன்னானங் பாபகானங்
அகுஸலானங் த⁴ம்மானங் பஹானாய…பே॰… அனுப்பன்னானங் குஸலானங் த⁴ம்மானங்
உப்பாதா³ய…பே॰… உப்பன்னானங் குஸலானங் த⁴ம்மானங்
டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ங்
ஜனேதி வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி. ஏவங் படிபன்னோ
கோ², த²பதி, குஸலானங் ஸீலானங் நிரோதா⁴ய படிபன்னோ ஹோதி.
266. ‘‘கதமே ச, த²பதி, அகுஸலா ஸங்கப்பா? காமஸங்கப்போ, ப்³யாபாத³ஸங்கப்போ, விஹிங்ஸாஸங்கப்போ – இமே வுச்சந்தி, த²பதி, அகுஸலா ஸங்கப்பா.
‘‘இமே ச, த²பதி, அகுஸலா ஸங்கப்பா கிங்ஸமுட்டா²னா? ஸமுட்டா²னம்பி நேஸங் வுத்தங். ‘ஸஞ்ஞாஸமுட்டா²னா’திஸ்ஸ
வசனீயங். கதமா ஸஞ்ஞா? ஸஞ்ஞாபி ஹி ப³ஹூ அனேகவிதா⁴ நானப்பகாரகா. காமஸஞ்ஞா,
ப்³யாபாத³ஸஞ்ஞா, விஹிங்ஸாஸஞ்ஞா – இதோஸமுட்டா²னா அகுஸலா ஸங்கப்பா.
‘‘இமே ச, த²பதி, அகுஸலா ஸங்கப்பா குஹிங் அபரிஸேஸா
நிருஜ்ஜ²ந்தி? நிரோதோ⁴பி நேஸங் வுத்தோ. இத⁴, த²பதி, பி⁴க்கு² விவிச்சேவ
காமேஹி…பே॰… பட²மங் ஜா²னங் உபஸம்பஜ்ஜ விஹரதி; எத்தே²தே அகுஸலா ஸங்கப்பா அபரிஸேஸா நிருஜ்ஜ²ந்தி.
‘‘கத²ங் படிபன்னோ ச, த²பதி, அகுஸலானங் ஸங்கப்பானங்
நிரோதா⁴ய படிபன்னோ ஹோதி? இத⁴, த²பதி, பி⁴க்கு² அனுப்பன்னானங் பாபகானங்
அகுஸலானங் த⁴ம்மானங் அனுப்பாதா³ய ச²ந்த³ங் ஜனேதி வாயமதி வீரியங் ஆரப⁴தி
சித்தங் பக்³க³ண்ஹாதி பத³ஹதி; உப்பன்னானங் பாபகானங் அகுஸலானங் த⁴ம்மானங்
பஹானாய…பே॰… அனுப்பன்னானங் குஸலானங் த⁴ம்மானங் உப்பாதா³ய…பே॰… உப்பன்னானங்
குஸலானங் த⁴ம்மானங் டி²தியா அஸம்மோஸாய
பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ங் ஜனேதி வாயமதி வீரியங்
ஆரப⁴தி சித்தங் பக்³க³ண்ஹாதி பத³ஹதி. ஏவங் படிபன்னோ கோ², த²பதி, அகுஸலானங்
ஸங்கப்பானங் நிரோதா⁴ய படிபன்னோ ஹோதி.
267.
‘‘கதமே ச, த²பதி, குஸலா ஸங்கப்பா? நெக்க²ம்மஸங்கப்போ, அப்³யாபாத³ஸங்கப்போ,
அவிஹிங்ஸாஸங்கப்போ – இமே வுச்சந்தி, த²பதி, குஸலா ஸங்கப்பா.
‘‘இமே ச, த²பதி, குஸலா ஸங்கப்பா கிங்ஸமுட்டா²னா?
ஸமுட்டா²னம்பி நேஸங் வுத்தங். ‘ஸஞ்ஞாஸமுட்டா²னா’திஸ்ஸ வசனீயங். கதமா ஸஞ்ஞா?
ஸஞ்ஞாபி ஹி ப³ஹூ அனேகவிதா⁴ நானப்பகாரகா. நெக்க²ம்மஸஞ்ஞா, அப்³யாபாத³ஸஞ்ஞா, அவிஹிங்ஸாஸஞ்ஞா – இதோஸமுட்டா²னா குஸலா ஸங்கப்பா.
‘‘இமே ச, த²பதி, குஸலா ஸங்கப்பா குஹிங் அபரிஸேஸா
நிருஜ்ஜ²ந்தி? நிரோதோ⁴பி நேஸங் வுத்தோ. இத⁴, த²பதி, பி⁴க்கு²
விதக்கவிசாரானங் வூபஸமா…பே॰… து³தியங் ஜா²னங் உபஸம்பஜ்ஜ விஹரதி; எத்தே²தே
குஸலா ஸங்கப்பா அபரிஸேஸா நிருஜ்ஜ²ந்தி.
‘‘கத²ங் படிபன்னோ ச, த²பதி,
குஸலானங் ஸங்கப்பானங் நிரோதா⁴ய படிபன்னோ ஹோதி? இத⁴, த²பதி, பி⁴க்கு²
அனுப்பன்னானங் பாபகானங் அகுஸலானங் த⁴ம்மானங் அனுப்பாதா³ய ச²ந்த³ங் ஜனேதி
வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி; உப்பன்னானங் பாபகானங்
அகுஸலானங் த⁴ம்மானங் பஹானாய…பே॰… அனுப்பன்னானங் குஸலானங் த⁴ம்மானங்
உப்பாதா³ய…பே॰… உப்பன்னானங் குஸலானங் த⁴ம்மானங் டி²தியா அஸம்மோஸாய
பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ங் ஜனேதி வாயமதி வீரியங்
ஆரப⁴தி சித்தங் பக்³க³ண்ஹாதி பத³ஹதி. ஏவங் படிபன்னோ கோ², த²பதி, குஸலானங் ஸங்கப்பானங் நிரோதா⁴ய படிபன்னோ ஹோதி.
268. ‘‘கதமேஹி சாஹங், த²பதி, த³ஸஹி த⁴ம்மேஹி ஸமன்னாக³தங் புரிஸபுக்³க³லங் பஞ்ஞபேமி
ஸம்பன்னகுஸலங் பரமகுஸலங் உத்தமபத்திபத்தங் ஸமணங் அயொஜ்ஜ²ங்? இத⁴, த²பதி,
பி⁴க்கு² அஸேகா²ய ஸம்மாதி³ட்டி²யா ஸமன்னாக³தோ ஹோதி, அஸேகே²ன ஸம்மாஸங்கப்பேன
ஸமன்னாக³தோ ஹோதி, அஸேகா²ய ஸம்மாவாசாய ஸமன்னாக³தோ ஹோதி, அஸேகே²ன
ஸம்மாகம்மந்தேன ஸமன்னாக³தோ ஹோதி, அஸேகே²ன ஸம்மாஆஜீவேன ஸமன்னாக³தோ ஹோதி,
அஸேகே²ன ஸம்மாவாயாமேன ஸமன்னாக³தோ ஹோதி, அஸேகா²ய ஸம்மாஸதியா ஸமன்னாக³தோ
ஹோதி, அஸேகே²ன ஸம்மாஸமாதி⁴னா ஸமன்னாக³தோ ஹோதி, அஸேகே²ன ஸம்மாஞாணேன
ஸமன்னாக³தோ ஹோதி, அஸேகா²ய ஸம்மாவிமுத்தியா ஸமன்னாக³தோ ஹோதி – இமேஹி கோ²
அஹங், த²பதி, த³ஸஹி த⁴ம்மேஹி ஸமன்னாக³தங் புரிஸபுக்³க³லங் பஞ்ஞபேமி
ஸம்பன்னகுஸலங் பரமகுஸலங் உத்தமபத்திபத்தங் ஸமணங் அயொஜ்ஜ²’’ந்தி.
இத³மவோச ப⁴க³வா. அத்தமனோ பஞ்சகங்கோ³ த²பதி ப⁴க³வதோ பா⁴ஸிதங் அபி⁴னந்தீ³தி.
ஸமணமுண்டி³கஸுத்தங் நிட்டி²தங் அட்ட²மங்.
9. சூளஸகுலுதா³யிஸுத்தங்
269. ஏவங்
மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன
கோ² பன ஸமயேன ஸகுலுதா³யீ பரிப்³பா³ஜகோ மோரனிவாபே பரிப்³பா³ஜகாராமே படிவஸதி
மஹதியா பரிப்³பா³ஜகபரிஸாய ஸத்³தி⁴ங். அத² கோ² ப⁴க³வா புப்³ப³ண்ஹஸமயங்
நிவாஸெத்வா பத்தசீவரமாதா³ய ராஜக³ஹங் பிண்டா³ய பாவிஸி. அத² கோ² ப⁴க³வதோ
ஏதத³ஹோஸி – ‘‘அதிப்பகோ³ கோ² தாவ ராஜக³ஹே பிண்டா³ய சரிதுங். யங்னூனாஹங் யேன
மோரனிவாபோ பரிப்³பா³ஜகாராமோ யேன ஸகுலுதா³யீ பரிப்³பா³ஜகோ
தேனுபஸங்கமெய்ய’’ந்தி. அத² கோ² ப⁴க³வா யேன மோரனிவாபோ பரிப்³பா³ஜகாராமோ
தேனுபஸங்கமி.
தேன கோ² பன ஸமயேன ஸகுலுதா³யீ பரிப்³பா³ஜகோ மஹதியா பரிப்³பா³ஜகபரிஸாய ஸத்³தி⁴ங் நிஸின்னோ ஹோதி உன்னாதி³னியா உச்சாஸத்³த³மஹாஸத்³தா³ய
அனேகவிஹிதங் திரச்சா²னகத²ங் கதெ²ந்தியா, ஸெய்யதி²த³ங் – ராஜகத²ங் சோரகத²ங்
மஹாமத்தகத²ங் ஸேனாகத²ங் ப⁴யகத²ங் யுத்³த⁴கத²ங் அன்னகத²ங் பானகத²ங்
வத்த²கத²ங் ஸயனகத²ங் மாலாகத²ங் க³ந்த⁴கத²ங் ஞாதிகத²ங் யானகத²ங் கா³மகத²ங்
நிக³மகத²ங் நக³ரகத²ங் ஜனபத³கத²ங் இத்தி²கத²ங் ஸூரகத²ங் விஸிகா²கத²ங்
கும்ப⁴ட்டா²னகத²ங் புப்³ப³பேதகத²ங் நானத்தகத²ங் லோகக்கா²யிகங்
ஸமுத்³த³க்கா²யிகங் இதிப⁴வாப⁴வகத²ங் இதி வா. அத்³த³ஸா கோ² ஸகுலுதா³யீ
பரிப்³பா³ஜகோ ப⁴க³வந்தங் தூ³ரதோவ ஆக³ச்ச²ந்தங். தி³ஸ்வான ஸகங் பரிஸங்
ஸண்டா²பேஸி – ‘‘அப்பஸத்³தா³ பொ⁴ந்தோ ஹொந்து, மா பொ⁴ந்தோ ஸத்³த³மகத்த². அயங்
ஸமணோ கோ³தமோ ஆக³ச்ச²தி; அப்பஸத்³த³காமோ கோ² பன ஸோ ஆயஸ்மா அப்பஸத்³த³ஸ்ஸ
வண்ணவாதீ³. அப்பேவ நாம அப்பஸத்³த³ங் பரிஸங் விதி³த்வா உபஸங்கமிதப்³ப³ங்
மஞ்ஞெய்யா’’தி. அத² கோ² தே பரிப்³பா³ஜகா துண்ஹீ அஹேஸுங் .
270.
அத² கோ² ப⁴க³வா யேன ஸகுலுதா³யீ பரிப்³பா³ஜகோ தேனுபஸங்கமி. அத² கோ²
ஸகுலுதா³யீ பரிப்³பா³ஜகோ ப⁴க³வந்தங் ஏதத³வோச – ‘‘ஏது கோ², ப⁴ந்தே, ப⁴க³வா.
ஸ்வாக³தங், ப⁴ந்தே, ப⁴க³வதோ. சிரஸ்ஸங் கோ², ப⁴ந்தே, ப⁴க³வா இமங்
பரியாயமகாஸி யதி³த³ங் இதா⁴க³மனாய. நிஸீத³து, ப⁴ந்தே, ப⁴க³வா; இத³மாஸனங்
பஞ்ஞத்த’’ந்தி. நிஸீதி³ ப⁴க³வா பஞ்ஞத்தே ஆஸனே. ஸகுலுதா³யீபி கோ²
பரிப்³பா³ஜகோ அஞ்ஞதரங் நீசங் ஆஸனங் க³ஹெத்வா ஏகமந்தங் நிஸீதி³. ஏகமந்தங்
நிஸின்னங் கோ² ஸகுலுதா³யிங் பரிப்³பா³ஜகங் ப⁴க³வா ஏதத³வோச – ‘‘காய நுத்த²,
உதா³யி, ஏதரஹி கதா²ய ஸன்னிஸின்னா, கா ச பன வோ
அந்தராகதா² விப்பகதா’’தி? ‘‘திட்ட²தேஸா, ப⁴ந்தே, கதா² யாய மயங் ஏதரஹி கதா²ய
ஸன்னிஸின்னா. நேஸா, ப⁴ந்தே, கதா² ப⁴க³வதோ து³ல்லபா⁴ ப⁴விஸ்ஸதி பச்சா²பி
ஸவனாய. யதா³ஹங், ப⁴ந்தே, இமங் பரிஸங் அனுபஸங்கந்தோ ஹோமி அதா²யங் பரிஸா
அனேகவிஹிதங் திரச்சா²னகத²ங் கதெ²ந்தீ நிஸின்னா ஹோதி; யதா³ ச கோ² அஹங்,
ப⁴ந்தே, இமங் பரிஸங் உபஸங்கந்தோ ஹோமி அதா²யங் பரிஸா மமஞ்ஞேவ முக²ங்
உல்லோகெந்தீ நிஸின்னா ஹோதி – ‘யங் நோ ஸமணோ உதா³யீ த⁴ம்மங் பா⁴ஸிஸ்ஸதி தங் [தங் நோ (ஸீ॰ ஸ்யா॰ கங்॰ பீ॰)] ஸொஸ்ஸாமா’தி; யதா³ பன , ப⁴ந்தே, ப⁴க³வா இமங் பரிஸங் உபஸங்கந்தோ ஹோதி அதா²ஹஞ்சேவ அயஞ்ச பரிஸா ப⁴க³வதோ முக²ங் உல்லோகெந்தா [ஓலோகெந்தீ (ஸ்யா॰ கங்॰ க॰)] நிஸின்னா ஹோம – ‘யங் நோ ப⁴க³வா த⁴ம்மங் பா⁴ஸிஸ்ஸதி தங் ஸொஸ்ஸாமா’’’தி.
271. ‘‘தேனஹுதா³யி, தங்யேவெத்த² படிபா⁴து யதா² மங் படிபா⁴ஸெய்யா’’ஸி. ‘‘புரிமானி ,
ப⁴ந்தே, தி³வஸானி புரிமதரானி ஸப்³ப³ஞ்ஞூ ஸப்³ப³த³ஸ்ஸாவீ அபரிஸேஸங்
ஞாணத³ஸ்ஸனங் படிஜானமானோ ‘சரதோ ச மே திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததங்
ஸமிதங் ஞாணத³ஸ்ஸனங் பச்சுபட்டி²த’ந்தி. ஸோ மயா [பச்சுபட்டி²த’’ந்தி மயா (?)]
புப்³ப³ந்தங் ஆரப்³ப⁴ பஞ்ஹங் புட்டோ² ஸமானோ அஞ்ஞேனஞ்ஞங் படிசரி,
ப³ஹித்³தா⁴ கத²ங் அபனாமேஸி, கோபஞ்ச தோ³ஸஞ்ச அப்பச்சயஞ்ச பாத்வாகாஸி. தஸ்ஸ
மய்ஹங், ப⁴ந்தே, ப⁴க³வந்தங்யேவ ஆரப்³ப⁴ ஸதி உத³பாதி³ – ‘அஹோ நூன ப⁴க³வா,
அஹோ நூன ஸுக³தோ! யோ இமேஸங் த⁴ம்மானங் ஸுகுஸலோ’’’தி. ‘‘கோ பன ஸோ, உதா³யி,
ஸப்³ப³ஞ்ஞூ ஸப்³ப³த³ஸ்ஸாவீ அபரிஸேஸங் ஞாணத³ஸ்ஸனங் படிஜானமானோ ‘சரதோ ச மே
திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததங் ஸமிதங் ஞாணத³ஸ்ஸனங்
பச்சுபட்டி²த’ந்தி, யோ தயா புப்³ப³ந்தங் ஆரப்³ப⁴ பஞ்ஹங் புட்டோ² ஸமானோ
அஞ்ஞேனஞ்ஞங் படிசரி, ப³ஹித்³தா⁴ கத²ங் அபனாமேஸி கோபஞ்ச தோ³ஸஞ்ச அப்பச்சயஞ்ச
பாத்வாகாஸீ’’தி? ‘நிக³ண்டோ², ப⁴ந்தே, நாடபுத்தோ’தி.
‘‘யோ கோ², உதா³யி, அனேகவிஹிதங் புப்³பே³னிவாஸங்
அனுஸ்ஸரெய்ய, ஸெய்யதி²த³ங் – ஏகம்பி ஜாதிங் த்³வேபி ஜாதியோ…பே॰… இதி
ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரெய்ய, ஸோ வா மங்
புப்³ப³ந்தங் ஆரப்³ப⁴ பஞ்ஹங் புச்செ²ய்ய, தங் வாஹங் புப்³ப³ந்தங் ஆரப்³ப⁴
பஞ்ஹங் புச்செ²ய்யங்; ஸோ வா மே புப்³ப³ந்தங் ஆரப்³ப⁴ பஞ்ஹஸ்ஸ வெய்யாகரணேன சித்தங் ஆராதெ⁴ய்ய, தஸ்ஸ வாஹங் புப்³ப³ந்தங் ஆரப்³ப⁴ பஞ்ஹஸ்ஸ வெய்யாகரணேன சித்தங் ஆராதெ⁴ய்யங்.
‘‘யோ [ஸோ (ஸீ॰ பீ॰)]
கோ², உதா³யி, தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே
பஸ்ஸெய்ய சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே
து³க்³க³தே யதா²கம்மூபகே³ ஸத்தே பஜானெய்ய, ஸோ வா மங் அபரந்தங் ஆரப்³ப⁴
பஞ்ஹங் புச்செ²ய்ய, தங் வாஹங் அபரந்தங் ஆரப்³ப⁴
பஞ்ஹங் புச்செ²ய்யங்; ஸோ வா மே அபரந்தங் ஆரப்³ப⁴ பஞ்ஹஸ்ஸ வெய்யாகரணேன
சித்தங் ஆராதெ⁴ய்ய, தஸ்ஸ வாஹங் அபரந்தங் ஆரப்³ப⁴ பஞ்ஹஸ்ஸ வெய்யாகரணேன
சித்தங் ஆராதெ⁴ய்யங்.
‘‘அபி ச, உதா³யி, திட்ட²து புப்³ப³ந்தோ, திட்ட²து
அபரந்தோ. த⁴ம்மங் தே தே³ஸெஸ்ஸாமி – இமஸ்மிங் ஸதி இத³ங் ஹோதி, இமஸ்ஸுப்பாதா³
இத³ங் உப்பஜ்ஜதி; இமஸ்மிங் அஸதி இத³ங் ந ஹோதி, இமஸ்ஸ நிரோதா⁴ இத³ங்
நிருஜ்ஜ²தீ’’தி.
‘‘அஹஞ்ஹி, ப⁴ந்தே, யாவதகம்பி மே இமினா அத்தபா⁴வேன
பச்சனுபூ⁴தங் தம்பி நப்பஹோமி ஸாகாரங் ஸஉத்³தே³ஸங் அனுஸ்ஸரிதுங், குதோ
பனாஹங் அனேகவிஹிதங் புப்³பே³னிவாஸங் அனுஸ்ஸரிஸ்ஸாமி, ஸெய்யதி²த³ங் – ஏகம்பி
ஜாதிங் த்³வேபி ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங்
புப்³பே³னிவாஸங் அனுஸ்ஸரிஸ்ஸாமி, ஸெய்யதா²பி ப⁴க³வா? அஹஞ்ஹி, ப⁴ந்தே, ஏதரஹி
பங்ஸுபிஸாசகம்பி ந பஸ்ஸாமி, குதோ பனாஹங் தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன ஸத்தே பஸ்ஸிஸ்ஸாமி சவமானே உபபஜ்ஜமானே ஹீனே பணீதே ஸுவண்ணே
து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானிஸ்ஸாமி,
ஸெய்யதா²பி ப⁴க³வா? யங் பன மங், ப⁴ந்தே, ப⁴க³வா ஏவமாஹ – ‘அபி ச, உதா³யி,
திட்ட²து புப்³ப³ந்தோ, திட்ட²து அபரந்தோ; த⁴ம்மங்
தே தே³ஸெஸ்ஸாமி – இமஸ்மிங் ஸதி இத³ங் ஹோதி, இமஸ்ஸுப்பாதா³ இத³ங் உப்பஜ்ஜதி;
இமஸ்மிங் அஸதி இத³ங் ந ஹோதி, இமஸ்ஸ நிரோதா⁴ இத³ங் நிருஜ்ஜ²தீ’தி தஞ்ச பன
மே பி⁴ய்யோஸோமத்தாய ந பக்கா²யதி. அப்பேவ நாமாஹங், ப⁴ந்தே, ஸகே ஆசரியகே
ப⁴க³வதோ சித்தங் ஆராதெ⁴ய்யங் பஞ்ஹஸ்ஸ வெய்யாகரணேனா’’தி.
272.
‘‘கிந்தி பன தே, உதா³யி, ஸகே ஆசரியகே ஹோதீ’’தி? ‘‘அம்ஹாகங், ப⁴ந்தே, ஸகே
ஆசரியகே ஏவங் ஹோதி – ‘அயங் பரமோ வண்ணோ, அயங் பரமோ வண்ணோ’’’தி.
‘‘யங் பன தே ஏதங், உதா³யி, ஸகே ஆசரியகே ஏவங் ஹோதி – ‘அயங் பரமோ வண்ணோ, அயங் பரமோ வண்ணோ’தி, கதமோ ஸோ பரமோ வண்ணோ’’தி? ‘‘யஸ்மா, ப⁴ந்தே, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’’தி.
‘‘கதமோ பன ஸோ பரமோ வண்ணோ யஸ்மா வண்ணா அஞ்ஞோ வண்ணோ உத்தரிதரோ வா பணீததரோ வா நத்தீ²’’தி? ‘‘யஸ்மா , ப⁴ந்தே, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’’தி.
‘‘தீ³கா⁴பி கோ² தே ஏஸா, உதா³யி, ப²ரெய்ய – ‘யஸ்மா,
ப⁴ந்தே, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ
வண்ணோ’தி வதே³ஸி, தஞ்ச வண்ணங் ந பஞ்ஞபேஸி. ஸெய்யதா²பி, உதா³யி, புரிஸோ ஏவங்
வதெ³ய்ய – ‘அஹங் யா இமஸ்மிங் ஜனபதே³ ஜனபத³கல்யாணீ தங் இச்சா²மி, தங்
காமேமீ’தி. தமேனங் ஏவங் வதெ³ய்யுங் – ‘அம்போ⁴
புரிஸ, யங் த்வங் ஜனபத³கல்யாணிங் இச்ச²ஸி காமேஸி, ஜானாஸி தங்
ஜனபத³கல்யாணிங் – க²த்தியீ வா ப்³ராஹ்மணீ வா வெஸ்ஸீ வா ஸுத்³தீ³ வா’’தி?
இதி புட்டோ² ‘நோ’தி வதெ³ய்ய. தமேனங் ஏவங் வதெ³ய்யுங் – ‘அம்போ⁴ புரிஸ, யங்
த்வங் ஜனபத³கல்யாணிங் இச்ச²ஸி காமேஸி, ஜானாஸி தங் ஜனபத³கல்யாணிங் –
ஏவங்னாமா ஏவங்கொ³த்தாதி வாதி…பே॰… தீ³கா⁴ வா ரஸ்ஸா வா மஜ்ஜி²மா வா காளீ வா
ஸாமா வா மங்கு³ரச்ச²வீ வாதி… அமுகஸ்மிங் கா³மே வா நிக³மே வா நக³ரே வா’தி?
இதி புட்டோ² ‘நோ’தி வதெ³ய்ய. தமேனங் ஏவங் வதெ³ய்யுங் – ‘அம்போ⁴ புரிஸ, யங்
த்வங் ந ஜானாஸி ந பஸ்ஸஸி, தங் த்வங் இச்ச²ஸி காமேஸீ’’’தி? இதி புட்டோ²
‘ஆமா’தி வதெ³ய்ய.
‘‘தங் கிங் மஞ்ஞஸி, உதா³யி – நனு ஏவங் ஸந்தே, தஸ்ஸ
புரிஸஸ்ஸ அப்பாடிஹீரகதங் பா⁴ஸிதங் ஸம்பஜ்ஜதீ’’தி? ‘‘அத்³தா⁴ கோ², ப⁴ந்தே,
ஏவங் ஸந்தே தஸ்ஸ புரிஸஸ்ஸ அப்பாடிஹீரகதங் பா⁴ஸிதங் ஸம்பஜ்ஜதீ’’தி.
‘‘ஏவமேவ கோ² த்வங், உதா³யி, ‘யஸ்மா, ப⁴ந்தே, வண்ணா
அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’தி வதே³ஸி, தஞ்ச
வண்ணங் ந பஞ்ஞபேஸீ’’தி.
‘‘ஸெய்யதா²பி, ப⁴ந்தே, மணி வேளுரியோ ஸுபோ⁴ ஜாதிமா அட்ட²ங்ஸோ ஸுபரிகம்மகதோ பண்டு³கம்ப³லே நிக்கி²த்தோ பா⁴ஸதே ச தபதே ச விரோசதி ச, ஏவங் வண்ணோ அத்தா ஹோதி அரோகோ³ பரங் மரணா’’தி.
273. ‘‘தங் கிங் மஞ்ஞஸி, உதா³யி, யோ வா மணி வேளுரியோ ஸுபோ⁴ ஜாதிமா அட்ட²ங்ஸோ ஸுபரிகம்மகதோ பண்டு³கம்ப³லே நிக்கி²த்தோ பா⁴ஸதே
ச தபதே ச விரோசதி ச, யோ வா ரத்தந்த⁴காரதிமிஸாய கிமி க²ஜ்ஜோபனகோ – இமேஸங்
உபி⁴ன்னங் வண்ணானங் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயங்,
ப⁴ந்தே, ரத்தந்த⁴காரதிமிஸாய கிமி க²ஜ்ஜோபனகோ – அயங் இமேஸங் உபி⁴ன்னங்
வண்ணானங் அபி⁴க்கந்ததரோ ச பணீததரோ சா’’தி.
‘‘தங் கிங் மஞ்ஞஸி, உதா³யி, யோ வா ரத்தந்த⁴காரதிமிஸாய
கிமி க²ஜ்ஜோபனகோ, யோ வா ரத்தந்த⁴காரதிமிஸாய தேலப்பதீ³போ – இமேஸங் உபி⁴ன்னங்
வண்ணானங் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயங், ப⁴ந்தே,
ரத்தந்த⁴காரதிமிஸாய தேலப்பதீ³போ – அயங் இமேஸங் உபி⁴ன்னங் வண்ணானங்
அபி⁴க்கந்ததரோ ச பணீததரோ சா’’தி.
‘‘தங் கிங் மஞ்ஞஸி, உதா³யி, யோ வா ரத்தந்த⁴காரதிமிஸாய
தேலப்பதீ³போ, யோ வா ரத்தந்த⁴காரதிமிஸாய மஹாஅக்³கி³க்க²ந்தோ⁴ – இமேஸங்
உபி⁴ன்னங் வண்ணானங் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயங்,
ப⁴ந்தே, ரத்தந்த⁴காரதிமிஸாய மஹாஅக்³கி³க்க²ந்தோ⁴ – அயங் இமேஸங் உபி⁴ன்னங்
வண்ணானங் அபி⁴க்கந்ததரோ ச பணீததரோ சா’’தி.
‘‘தங் கிங் மஞ்ஞஸி, உதா³யி, யோ வா ரத்தந்த⁴காரதிமிஸாய
மஹாஅக்³கி³க்க²ந்தோ⁴, யா வா ரத்தியா பச்சூஸஸமயங் வித்³தே⁴ விக³தவலாஹகே
தே³வே ஓஸதி⁴தாரகா – இமேஸங் உபி⁴ன்னங் வண்ணானங் கதமோ வண்ணோ அபி⁴க்கந்ததரோ
ச பணீததரோ சா’’தி? ‘‘ய்வாயங், ப⁴ந்தே, ரத்தியா பச்சூஸஸமயங் வித்³தே⁴
விக³தவலாஹகே தே³வே ஓஸதி⁴தாரகா – அயங் இமேஸங் உபி⁴ன்னங் வண்ணானங்
அபி⁴க்கந்ததரோ ச பணீததரோ சா’’தி.
‘‘தங் கிங் மஞ்ஞஸி, உதா³யி, யா வா ரத்தியா பச்சூஸஸமயங்
வித்³தே⁴ விக³தவலாஹகே தே³வே ஓஸதி⁴தாரகா, யோ வா தத³ஹுபோஸதே² பன்னரஸே
வித்³தே⁴ விக³தவலாஹகே தே³வே அபி⁴தோ³ [அபி⁴தே³ (க॰ ஸீ॰), அபி⁴தோ³ஸங் (க॰) அபி⁴தோ³தி அபி⁴ஸத்³தே³ன ஸமானத்த²னிபாதபத³ங் (ச²க்கங்கு³த்தரடீகா மஹாவக்³க³ அட்ட²மஸுத்தவண்ணனா)] அட்³ட⁴ரத்தஸமயங் சந்தோ³
– இமேஸங் உபி⁴ன்னங் வண்ணானங் கதமோ வண்ணோ அபி⁴க்கந்ததரோ ச பணீததரோ சா’’தி?
‘‘ய்வாயங், ப⁴ந்தே, தத³ஹுபோஸதே² பன்னரஸே வித்³தே⁴ விக³தவலாஹகே தே³வே
அபி⁴தோ³ அட்³ட⁴ரத்தஸமயங் சந்தோ³ – அயங் இமேஸங் உபி⁴ன்னங் வண்ணானங் அபி⁴க்கந்ததரோ ச பணீததரோ சா’’தி.
‘‘தங் கிங் மஞ்ஞஸி, உதா³யி, யோ
வா தத³ஹுபோஸதே² பன்னரஸே வித்³தே⁴ விக³தவலாஹகே தே³வே அபி⁴தோ³
அட்³ட⁴ரத்தஸமயங் சந்தோ³, யோ வா வஸ்ஸானங் பச்சி²மே மாஸே ஸரத³ஸமயே வித்³தே⁴
விக³தவலாஹகே தே³வே அபி⁴தோ³ மஜ்ஜ²ன்ஹிகஸமயங் ஸூரியோ – இமேஸங் உபி⁴ன்னங்
வண்ணானங் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயங், ப⁴ந்தே,
வஸ்ஸானங் பச்சி²மே மாஸே ஸரத³ஸமயே வித்³தே⁴ விக³தவலாஹகே தே³வே அபி⁴தோ³
மஜ்ஜ²ன்ஹிகஸமயங் ஸூரியோ – அயங் இமேஸங் உபி⁴ன்னங் வண்ணானங் அபி⁴க்கந்ததரோ ச
பணீததரோ சா’’தி.
‘‘அதோ கோ² தே, உதா³யி, ப³ஹூ ஹி ப³ஹுதரா தே³வா யே இமேஸங் சந்தி³மஸூரியானங் ஆபா⁴ நானுபொ⁴ந்தி, த்யாஹங்
பஜானாமி. அத² ச பனாஹங் ந வதா³மி – ‘யஸ்மா வண்ணா அஞ்ஞோ வண்ணோ உத்தரிதரோ வா
பணீததரோ வா நத்தீ²’தி. அத² ச பன த்வங், உதா³யி, ‘ய்வாயங் வண்ணோ கிமினா
க²ஜ்ஜோபனகேன நிஹீனதரோ [ஹீனதரோ (ஸீ॰ பீ॰)] ச பதிகிட்ட²தரோ ச ஸோ பரமோ வண்ணோ’தி வதே³ஸி, தஞ்ச வண்ணங் ந பஞ்ஞபேஸீ’’தி. ‘‘அச்சி²த³ங் [அச்சி²ர (க॰), அச்சி²த³ (?)] ப⁴க³வா கத²ங், அச்சி²த³ங் ஸுக³தோ கத²’’ந்தி!
‘‘கிங் பன த்வங், உதா³யி, ஏவங் வதே³ஸி – ‘அச்சி²த³ங்
ப⁴க³வா கத²ங், அச்சி²த³ங் ஸுக³தோ கத²ங்’’’தி? ‘‘அம்ஹாகங், ப⁴ந்தே, ஸகே
ஆசரியகே ஏவங் ஹோதி – ‘அயங் பரமோ வண்ணோ, அயங் பரமோ வண்ணோ’தி. தே மயங்,
ப⁴ந்தே, ப⁴க³வதா ஸகே ஆசரியகே ஸமனுயுஞ்ஜியமானா ஸமனுக்³கா³ஹியமானா
ஸமனுபா⁴ஸியமானா ரித்தா துச்சா² அபரத்³தா⁴’’தி.
274.
‘‘கிங் பனுதா³யி, அத்தி² ஏகந்தஸுகோ² லோகோ, அத்தி² ஆகாரவதீ படிபதா³
ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி? ‘‘அம்ஹாகங், ப⁴ந்தே, ஸகே ஆசரியகே
ஏவங் ஹோதி – ‘அத்தி² ஏகந்தஸுகோ² லோகோ, அத்தி² ஆகாரவதீ படிபதா³ ஏகந்தஸுக²ஸ்ஸ
லோகஸ்ஸ ஸச்சி²கிரியாயா’’’தி.
‘‘கதமா பன ஸா, உதா³யி, ஆகாரவதீ
படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி? ‘‘இத⁴, ப⁴ந்தே, ஏகச்சோ
பாணாதிபாதங் பஹாய பாணாதிபாதா படிவிரதோ ஹோதி, அதி³ன்னாதா³னங் பஹாய
அதி³ன்னாதா³னா படிவிரதோ ஹோதி, காமேஸுமிச்சா²சாரங் பஹாய காமேஸுமிச்சா²சாரா படிவிரதோ ஹோதி, முஸாவாத³ங் பஹாய முஸாவாதா³ படிவிரதோ ஹோதி, அஞ்ஞதரங் வா பன தபோகு³ணங் ஸமாதா³ய வத்ததி. அயங் கோ² ஸா, ப⁴ந்தே, ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி.
‘‘தங் கிங் மஞ்ஞஸி, உதா³யி, யஸ்மிங் ஸமயே பாணாதிபாதங்
பஹாய பாணாதிபாதா படிவிரதோ ஹோதி, ஏகந்தஸுகீ² வா தஸ்மிங் ஸமயே அத்தா ஹோதி
ஸுக²து³க்கீ² வா’’தி? ‘‘ஸுக²து³க்கீ², ப⁴ந்தே’’.
‘‘தங் கிங் மஞ்ஞஸி, உதா³யி, யஸ்மிங் ஸமயே
அதி³ன்னாதா³னங் பஹாய அதி³ன்னாதா³னா படிவிரதோ ஹோதி, ஏகந்தஸுகீ² வா தஸ்மிங்
ஸமயே அத்தா ஹோதி ஸுக²து³க்கீ² வா’’தி? ‘‘ஸுக²து³க்கீ², ப⁴ந்தே’’.
‘‘தங் கிங் மஞ்ஞஸி, உதா³யி, யஸ்மிங் ஸமயே
காமேஸுமிச்சா²சாரங் பஹாய காமேஸுமிச்சா²சாரா படிவிரதோ ஹோதி, ஏகந்தஸுகீ² வா
தஸ்மிங் ஸமயே அத்தா ஹோதி ஸுக²து³க்கீ² வா’’தி? ‘‘ஸுக²து³க்கீ², ப⁴ந்தே’’.
‘‘தங் கிங் மஞ்ஞஸி, உதா³யி, யஸ்மிங் ஸமயே முஸாவாத³ங்
பஹாய முஸாவாதா³ படிவிரதோ ஹோதி, ஏகந்தஸுகீ² வா தஸ்மிங் ஸமயே அத்தா ஹோதி
ஸுக²து³க்கீ² வா’’தி? ‘‘ஸுக²து³க்கீ², ப⁴ந்தே’’.
‘‘தங் கிங் மஞ்ஞஸி, உதா³யி, யஸ்மிங் ஸமயே அஞ்ஞதரங்
தபோகு³ணங் ஸமாதா³ய வத்ததி, ஏகந்தஸுகீ² வா தஸ்மிங் ஸமயே அத்தா ஹோதி
ஸுக²து³க்கீ² வா’’தி? ‘‘ஸுக²து³க்கீ², ப⁴ந்தே’’.
‘‘தங் கிங் மஞ்ஞஸி, உதா³யி, அபி நு கோ² வோகிண்ணஸுக²து³க்க²ங் படிபத³ங் ஆக³ம்ம ஏகந்தஸுக²ஸ்ஸ லோகஸ்ஸ ஸச்சி²கிரியா ஹோதீ’’தி [ஸச்சி²கிரியாயாதி (க॰)]? ‘‘அச்சி²த³ங் ப⁴க³வா கத²ங், அச்சி²த³ங் ஸுக³தோ கத²’’ந்தி!
‘‘கிங் பன த்வங், உதா³யி, வதே³ஸி – ‘அச்சி²த³ங் ப⁴க³வா
கத²ங், அச்சி²த³ங் ஸுக³தோ கத²ங்’’’தி? ‘‘அம்ஹாகங், ப⁴ந்தே, ஸகே ஆசரியகே
ஏவங் ஹோதி – ‘அத்தி² ஏகந்தஸுகோ² லோகோ, அத்தி² ஆகாரவதீ படிபதா³ ஏகந்தஸுக²ஸ்ஸ
லோகஸ்ஸ ஸச்சி²கிரியாயா’தி. தே மயங், ப⁴ந்தே,
ப⁴க³வதா ஸகே ஆசரியகே ஸமனுயுஞ்ஜியமானா ஸமனுக்³கா³ஹியமானா ஸமனுபா⁴ஸியமானா
ரித்தா துச்சா² அபரத்³தா⁴’’தி [அபரத்³தா⁴ (ஸீ॰), அபரத்³தா⁴பி (ஸ்யா॰ கங்॰ பீ॰)].
275. ‘‘கிங் பன, ப⁴ந்தே, அத்தி² ஏகந்தஸுகோ² லோகோ, அத்தி² ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி? ‘‘அத்தி² கோ², உதா³யி, ஏகந்தஸுகோ² லோகோ, அத்தி² ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி.
‘‘கதமா பன ஸா, ப⁴ந்தே, ஆகாரவதீ படிபதா³ ஏகந்தஸுக²ஸ்ஸ
லோகஸ்ஸ ஸச்சி²கிரியாயா’’தி? ‘‘இது⁴தா³யி, பி⁴க்கு² விவிச்சேவ காமேஹி…பே॰…
பட²மங் ஜா²னங் உபஸம்பஜ்ஜ விஹரதி; விதக்கவிசாரானங் வூபஸமா… து³தியங் ஜா²னங்
உபஸம்பஜ்ஜ விஹரதி; பீதியா ச விராகா³… ததியங் ஜா²னங் உபஸம்பஜ்ஜ விஹரதி –
அயங் கோ² ஸா, உதா³யி, ஆகாரவதீ படிபதா³ ஏகந்தஸுக²ஸ்ஸ லோகஸ்ஸ
ஸச்சி²கிரியாயா’’தி.
‘‘ந [கிங் நு (ஸ்யா॰ கங்॰ க॰)]
கோ² ஸா, ப⁴ந்தே, ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாய,
ஸச்சி²கதோ ஹிஸ்ஸ, ப⁴ந்தே, எத்தாவதா ஏகந்தஸுகோ² லோகோ ஹோதீ’’தி. ‘‘ந
க்²வாஸ்ஸ, உதா³யி, எத்தாவதா ஏகந்தஸுகோ² லோகோ ஸச்சி²கதோ ஹோதி; ஆகாரவதீத்வேவ
ஸா படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி.
ஏவங் வுத்தே, ஸகுலுதா³யிஸ்ஸ
பரிப்³பா³ஜகஸ்ஸ பரிஸா உன்னாதி³னீ உச்சாஸத்³த³மஹாஸத்³தா³ அஹோஸி – ‘‘எத்த²
மயங் அனஸ்ஸாம ஸாசரியகா, எத்த² மயங் அனஸ்ஸாம [பனஸ்ஸாம (ஸீ॰)] ஸாசரியகா! ந மயங் இதோ பி⁴ய்யோ உத்தரிதரங் பஜானாமா’’தி.
அத² கோ² ஸகுலுதா³யீ பரிப்³பா³ஜகோ தே பரிப்³பா³ஜகே அப்பஸத்³தே³
கத்வா ப⁴க³வந்தங் ஏதத³வோச – ‘‘கித்தாவதா பனாஸ்ஸ, ப⁴ந்தே, ஏகந்தஸுகோ² லோகோ
ஸச்சி²கதோ ஹோதீ’’தி? ‘‘இது⁴தா³யி, பி⁴க்கு² ஸுக²ஸ்ஸ ச பஹானா…பே॰… சதுத்த²ங்
ஜா²னங்… உபஸம்பஜ்ஜ விஹரதி. யா தா தே³வதா ஏகந்தஸுக²ங் லோகங் உபபன்னா தாஹி
தே³வதாஹி ஸத்³தி⁴ங் ஸந்திட்ட²தி ஸல்லபதி ஸாகச்ச²ங் ஸமாபஜ்ஜதி. எத்தாவதா
க்²வாஸ்ஸ, உதா³யி, ஏகந்தஸுகோ² லோகோ ஸச்சி²கதோ ஹோதீ’’தி.
276.
‘‘ஏதஸ்ஸ நூன, ப⁴ந்தே, ஏகந்தஸுக²ஸ்ஸ லோகஸ்ஸ ஸச்சி²கிரியாஹேது பி⁴க்கூ²
ப⁴க³வதி ப்³ரஹ்மசரியங் சரந்தீ’’தி? ‘‘ந கோ², உதா³யி, ஏகந்தஸுக²ஸ்ஸ லோகஸ்ஸ
ஸச்சி²கிரியாஹேது பி⁴க்கூ² மயி ப்³ரஹ்மசரியங் சரந்தி. அத்தி² கோ², உதா³யி , அஞ்ஞேவ த⁴ம்மா உத்தரிதரா ச பணீததரா ச யேஸங் ஸச்சி²கிரியாஹேது பி⁴க்கூ² மயி ப்³ரஹ்மசரியங் சரந்தீ’’தி.
‘‘கதமே பன தே, ப⁴ந்தே, த⁴ம்மா
உத்தரிதரா ச பணீததரா ச யேஸங் ஸச்சி²கிரியாஹேது பி⁴க்கூ² ப⁴க³வதி
ப்³ரஹ்மசரியங் சரந்தீ’’தி? ‘‘இது⁴தா³யி, ததா²க³தோ லோகே உப்பஜ்ஜதி அரஹங்
ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ
புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா…பே॰… ஸோ இமே பஞ்ச
நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே விவிச்சேவ
காமேஹி…பே॰… பட²மங் ஜா²னங் உபஸம்பஜ்ஜ விஹரதி. அயம்பி கோ², உதா³யி, த⁴ம்மோ
உத்தரிதரோ ச பணீததரோ ச யஸ்ஸ ஸச்சி²கிரியாஹேது பி⁴க்கூ² மயி ப்³ரஹ்மசரியங்
சரந்தி’’.
‘‘புன சபரங், உதா³யி, பி⁴க்கு² விதக்கவிசாரானங்
வூபஸமா…பே॰… து³தியங் ஜா²னங்… ததியங் ஜா²னங்… சதுத்த²ங் ஜா²னங் உபஸம்பஜ்ஜ
விஹரதி. அயம்பி கோ², உதா³யி, த⁴ம்மோ உத்தரிதரோ ச பணீததரோ ச யஸ்ஸ
ஸச்சி²கிரியாஹேது பி⁴க்கூ² மயி ப்³ரஹ்மசரியங் சரந்தி.
‘‘ஸோ ஏவங் ஸமாஹிதே சித்தே
பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே
டி²தே ஆனேஞ்ஜப்பத்தே புப்³பே³னிவாஸானுஸ்ஸதிஞாணாய சித்தங் அபி⁴னின்னாமேதி.
ஸோ அனேகவிஹிதங் புப்³பே³னிவாஸங் அனுஸ்ஸரதி, ஸெய்யதி²த³ங் – ஏகம்பி ஜாதிங்
த்³வேபி ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங்
அனுஸ்ஸரதி. அயம்பி கோ², உதா³யி, த⁴ம்மோ உத்தரிதரோ ச பணீததரோ ச யஸ்ஸ
ஸச்சி²கிரியாஹேது பி⁴க்கூ² மயி ப்³ரஹ்மசரியங் சரந்தி.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே
அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
ஸத்தானங் சுதூபபாதஞாணாய சித்தங் அபி⁴னின்னாமேதி. ஸோ தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே
ஸுவண்ணே து³ப்³ப³ண்ணே ஸுக³தே து³க்³க³தே…பே॰… யதா²கம்மூபகே³ ஸத்தே பஜானாதி.
அயம்பி கோ², உதா³யி, த⁴ம்மோ உத்தரிதரோ ச பணீததரோ ச யஸ்ஸ ஸச்சி²கிரியாஹேது
பி⁴க்கூ² மயி ப்³ரஹ்மசரியங் சரந்தி.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே
அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானங்
க²யஞாணாய சித்தங் அபி⁴னின்னாமேதி .
ஸோ ‘இத³ங் து³க்க²’ந்தி யதா²பூ⁴தங் பஜானாதி, ‘அயங் து³க்க²ஸமுத³யோ’தி…பே॰…
‘அயங் து³க்க²னிரோதோ⁴’தி… ‘அயங் து³க்க²னிரோத⁴கா³மினீ படிபதா³’தி… ‘இமே
ஆஸவா’தி யதா²பூ⁴தங் பஜானாதி, ‘அயங் ஆஸவஸமுத³யோ’தி…
‘அயங் ஆஸவனிரோதோ⁴’தி… ‘அயங் ஆஸவனிரோத⁴கா³மினீ படிபதா³’தி யதா²பூ⁴தங்
பஜானாதி. தஸ்ஸ ஏவங் ஜானதோ ஏவங் பஸ்ஸதோ காமாஸவாபி சித்தங் விமுச்சதி,
ப⁴வாஸவாபி சித்தங் விமுச்சதி, அவிஜ்ஜாஸவாபி சித்தங் விமுச்சதி.
விமுத்தஸ்மிங் விமுத்தமிதி ஞாணங் ஹோதி. ‘கீ²ணா ஜாதி, வுஸிதங்
ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி. அயம்பி கோ²,
உதா³யி, த⁴ம்மோ உத்தரிதரோ ச பணீததரோ ச யஸ்ஸ ஸச்சி²கிரியாஹேது பி⁴க்கூ² மயி
ப்³ரஹ்மசரியங் சரந்தி. இமே கோ², உதா³யி, த⁴ம்மா உத்தரிதரா ச பணீததரா ச
யேஸங் ஸச்சி²கிரியாஹேது பி⁴க்கூ² மயி ப்³ரஹ்மசரியங் சரந்தீ’’தி.
277. ஏவங் வுத்தே, ஸகுலுதா³யீ பரிப்³பா³ஜகோ ப⁴க³வந்தங் ஏதத³வோச – ‘‘அபி⁴க்கந்தங், ப⁴ந்தே ,
அபி⁴க்கந்தங், ப⁴ந்தே! ஸெய்யதா²பி, ப⁴ந்தே, நிக்குஜ்ஜிதங் வா
உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங்
ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய – ‘சக்கு²மந்தோ ரூபானி
த³க்க²ந்தீ’தி; ஏவமேவங் ப⁴க³வதா அனேகபரியாயேன த⁴ம்மோ பகாஸிதோ. ஏஸாஹங்,
ப⁴ந்தே, ப⁴க³வந்தங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச.
லபெ⁴ய்யாஹங், ப⁴ந்தே, ப⁴க³வதோ ஸந்திகே பப்³ப³ஜ்ஜங், லபெ⁴ய்யங்
உபஸம்பத³’’ந்தி.
ஏவங் வுத்தே, ஸகுலுதா³யிஸ்ஸ
பரிப்³பா³ஜகஸ்ஸ பரிஸா ஸகுலுதா³யிங் பரிப்³பா³ஜகங் ஏதத³வோசுங் – ‘‘மா ப⁴வங்,
உதா³யி, ஸமணே கோ³தமே ப்³ரஹ்மசரியங் சரி; மா ப⁴வங், உதா³யி, ஆசரியோ ஹுத்வா
அந்தேவாஸீவாஸங் வஸி. ஸெய்யதா²பி நாம உத³கமணிகோ [மணிகோ (ஸீ॰ பீ॰ க॰)] ஹுத்வா உத³ஞ்சனிகோ [உத்³தே³கனிகோ (ஸீ॰ ஸ்யா॰ கங்॰ பீ॰)] அஸ்ஸ, ஏவங் ஸம்பத³மித³ங் [ஏவங் ஸம்பத³மேதங் (ஸீ॰ பீ॰)]
போ⁴தோ உதா³யிஸ்ஸ ப⁴விஸ்ஸதி. மா ப⁴வங், உதா³யி, ஸமணே கோ³தமே ப்³ரஹ்மசரியங்
சரி; மா ப⁴வங், உதா³யி, ஆசரியோ ஹுத்வா அந்தேவாஸீவாஸங் வஸீ’’தி. இதி ஹித³ங்
ஸகுலுதா³யிஸ்ஸ பரிப்³பா³ஜகஸ்ஸ பரிஸா ஸகுலுதா³யிங் பரிப்³பா³ஜகங்
அந்தராயமகாஸி ப⁴க³வதி ப்³ரஹ்மசரியேதி.
சூளஸகுலுதா³யிஸுத்தங் நிட்டி²தங் நவமங்.
10. வேக²னஸஸுத்தங்
278. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² வேக²னஸோ [வேக²னஸ்ஸோ (ஸீ॰ பீ॰)]
பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங்
ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் அட்டா²ஸி.
ஏகமந்தங் டி²தோ கோ² வேக²னஸோ பரிப்³பா³ஜகோ ப⁴க³வதோ ஸந்திகே உதா³னங் உதா³னேஸி
– ‘‘அயங் பரமோ வண்ணோ, அயங் பரமோ வண்ணோ’’தி.
‘‘கிங் பன த்வங், கச்சான, ஏவங் வதே³ஸி – ‘அயங் பரமோ வண்ணோ, அயங் பரமோ வண்ணோ’தி? கதமோ, கச்சான, ஸோ பரமோ வண்ணோ’’தி?
‘‘யஸ்மா, போ⁴ கோ³தம, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’’தி.
‘‘கதமோ பன ஸோ, கச்சான, வண்ணோ யஸ்மா வண்ணா அஞ்ஞோ வண்ணோ உத்தரிதரோ வா பணீததரோ வா நத்தீ²’’தி?
‘‘யஸ்மா, போ⁴ கோ³தம, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’’தி.
‘‘தீ³கா⁴பி கோ² தே ஏஸா, கச்சான, ப²ரெய்ய – ‘யஸ்மா, போ⁴
கோ³தம, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ
வண்ணோ’தி வதே³ஸி, தஞ்ச வண்ணங் ந பஞ்ஞபேஸி. ஸெய்யதா²பி, கச்சான, புரிஸோ ஏவங்
வதெ³ய்ய – ‘அஹங் யா இமஸ்மிங் ஜனபதே³ ஜனபத³கல்யாணீ,
தங் இச்சா²மி தங் காமேமீ’தி. தமேனங் ஏவங் வதெ³ய்யுங் – ‘அம்போ⁴ புரிஸ, யங்
த்வங் ஜனபத³கல்யாணிங் இச்ச²ஸி காமேஸி, ஜானாஸி தங் ஜனபத³கல்யாணிங் –
க²த்தியீ வா ப்³ராஹ்மணீ வா வெஸ்ஸீ வா ஸுத்³தீ³
வா’தி? இதி புட்டோ² ‘நோ’தி வதெ³ய்ய. தமேனங் ஏவங் வதெ³ய்யுங் – ‘அம்போ⁴
புரிஸ, யங் த்வங் ஜனபத³கல்யாணிங் இச்ச²ஸி காமேஸி, ஜானாஸி தங்
ஜனபத³கல்யாணிங் ‘ஏவங்னாமா ஏவங்கொ³த்தாதி வாதி…பே॰… தீ³கா⁴ வா ரஸ்ஸா வா
மஜ்ஜி²மா வா காளீ வா ஸாமா வா மங்கு³ரச்ச²வீ வாதி… அமுகஸ்மிங் கா³மே வா
நிக³மே வா நக³ரே வா’தி? இதி புட்டோ² ‘நோ’தி வதெ³ய்ய. தமேனங் ஏவங்
வதெ³ய்யுங் – ‘அம்போ⁴ புரிஸ, யங் த்வங் ந ஜானாஸி ந பஸ்ஸஸி, தங் த்வங்
இச்ச²ஸி காமேஸீ’’’தி? இதி புட்டோ² ‘ஆமா’தி வதெ³ய்ய.
‘‘தங் கிங் மஞ்ஞஸி, கச்சான,
நனு ஏவங் ஸந்தே தஸ்ஸ புரிஸஸ்ஸ அப்பாடிஹீரகதங் பா⁴ஸிதங் ஸம்பஜ்ஜதீ’’தி?
‘‘அத்³தா⁴ கோ², போ⁴ கோ³தம, ஏவங் ஸந்தே தஸ்ஸ புரிஸஸ்ஸ அப்பாடிஹீரகதங்
பா⁴ஸிதங் ஸம்பஜ்ஜதீ’’தி. ‘‘ஏவமேவ கோ² த்வங், கச்சான, ‘யஸ்மா, போ⁴ கோ³தம,
வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’தி
வதே³ஸி; தஞ்ச வண்ணங் ந பஞ்ஞபேஸீ’’தி. ‘‘ஸெய்யதா²பி, போ⁴ கோ³தம, மணி
வேளுரியோ ஸுபோ⁴ ஜாதிமா அட்ட²ங்ஸோ ஸுபரிகம்மகதோ பண்டு³கம்ப³லே நிக்கி²த்தோ
பா⁴ஸதே ச தபதே ச விரோசதி ச, ஏவங் வண்ணோ அத்தா ஹோதி அரோகோ³ பரங் மரணா’’தி.
279. ‘‘தங் கிங் மஞ்ஞஸி, கச்சான, யோ வா மணி வேளுரியோ ஸுபோ⁴
ஜாதிமா அட்ட²ங்ஸோ ஸுபரிகம்மகதோ பண்டு³கம்ப³லே நிக்கி²த்தோ பா⁴ஸதே ச தபதே ச
விரோசதி ச, யோ வா ரத்தந்த⁴காரதிமிஸாய கிமி க²ஜ்ஜோபனகோ இமேஸங் உபி⁴ன்னங்
வண்ணானங் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயங், போ⁴
கோ³தம, ரத்தந்த⁴காரதிமிஸாய கிமி க²ஜ்ஜோபனகோ, அயங் இமேஸங் உபி⁴ன்னங்
வண்ணானங் அபி⁴க்கந்ததரோ ச பணீததரோ சா’’தி.
‘‘தங் கிங் மஞ்ஞஸி, கச்சான, யோ வா ரத்தந்த⁴காரதிமிஸாய
கிமி க²ஜ்ஜோபனகோ, யோ வா ரத்தந்த⁴காரதிமிஸாய தேலப்பதீ³போ, இமேஸங் உபி⁴ன்னங்
வண்ணானங் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயங், போ⁴
கோ³தம, ரத்தந்த⁴காரதிமிஸாய தேலப்பதீ³போ, அயங் இமேஸங் உபி⁴ன்னங் வண்ணானங்
அபி⁴க்கந்ததரோ ச பணீததரோ சா’’தி.
‘‘தங் கிங் மஞ்ஞஸி, கச்சான, யோ வா ரத்தந்த⁴காரதிமிஸாய தேலப்பதீ³போ, யோ வா ரத்தந்த⁴காரதிமிஸாய
மஹாஅக்³கி³க்க²ந்தோ⁴, இமேஸங் உபி⁴ன்னங் வண்ணானங் கதமோ வண்ணோ அபி⁴க்கந்ததரோ
ச பணீததரோ சா’’தி? ‘‘ய்வாயங், போ⁴ கோ³தம, ரத்தந்த⁴காரதிமிஸாய
மஹாஅக்³கி³க்க²ந்தோ⁴, அயங் இமேஸங் உபி⁴ன்னங் வண்ணானங் அபி⁴க்கந்ததரோ ச
பணீததரோ சா’’தி.
‘‘தங் கிங் மஞ்ஞஸி, கச்சான, யோ வா ரத்தந்த⁴காரதிமிஸாய மஹாஅக்³கி³க்க²ந்தோ⁴, யா வா ரத்தியா பச்சூஸஸமயங் வித்³தே⁴
விக³தவலாஹகே தே³வே ஓஸதி⁴தாரகா, இமேஸங் உபி⁴ன்னங் வண்ணானங் கதமோ வண்ணோ
அபி⁴க்கந்ததரோ ச பணீததரோ சா’’தி? ‘‘ய்வாயங், போ⁴ கோ³தம, ரத்தியா
பச்சூஸஸமயங் வித்³தே⁴ விக³தவலாஹகே தே³வே
ஓஸதி⁴தாரகா, அயங் இமேஸங் உபி⁴ன்னங் வண்ணானங் அபி⁴க்கந்ததரோ ச பணீததரோ
சா’’தி. ‘‘தங் கிங் மஞ்ஞஸி, கச்சான, யா வா ரத்தியா பச்சூஸஸமயங் வித்³தே⁴
விக³தவலாஹகே தே³வே ஓஸதி⁴தாரகா, யோ வா தத³ஹுபோஸதே² பன்னரஸே வித்³தே⁴
விக³தவலாஹகே தே³வே அபி⁴தோ³ அட்³ட⁴ரத்தஸமயங் சந்தோ³,
இமேஸங் உபி⁴ன்னங் வண்ணானங் கதமோ வண்ணோ அபி⁴க்கந்ததரோ ச பணீததரோ சா’’தி?
‘‘ய்வாயங், போ⁴ கோ³தம, தத³ஹுபோஸதே² பன்னரஸே வித்³தே⁴ விக³தவலாஹகே தே³வே
அபி⁴தோ³ அட்³ட⁴ரத்தஸமயங் சந்தோ³, அயங் இமேஸங் உபி⁴ன்னங் வண்ணானங்
அபி⁴க்கந்ததரோ ச பணீததரோ சா’’தி. ‘‘தங் கிங் மஞ்ஞஸி, கச்சான, யோ வா
தத³ஹுபோஸதே² பன்னரஸே வித்³தே⁴ விக³தவலாஹகே தே³வே அபி⁴தோ³ அட்³ட⁴ரத்தஸமயங்
சந்தோ³, யோ வா வஸ்ஸானங் பச்சி²மே மாஸே ஸரத³ஸமயே வித்³தே⁴ விக³தவலாஹகே தே³வே
அபி⁴தோ³ மஜ்ஜ²ன்ஹிகஸமயங் ஸூரியோ, இமேஸங் உபி⁴ன்னங் வண்ணானங் கதமோ வண்ணோ
அபி⁴க்கந்ததரோ ச பணீததரோ சா’’தி? ‘‘ய்வாயங், போ⁴ கோ³தம, வஸ்ஸானங் பச்சி²மே
மாஸே ஸரத³ஸமயே வித்³தே⁴ விக³தவலாஹகே தே³வே அபி⁴தோ³ மஜ்ஜ²ன்ஹிகஸமயங் ஸூரியோ –
அயங் இமேஸங் உபி⁴ன்னங் வண்ணானங் அபி⁴க்கந்ததரோ ச பணீததரோ சா’’தி. ‘‘அதோ
கோ² தே, கச்சான, ப³ஹூ ஹி ப³ஹுதரா தே³வா யே இமேஸங் சந்தி³மஸூரியானங் ஆபா⁴
நானுபொ⁴ந்தி, த்யாஹங் பஜானாமி. அத² ச பனாஹங் ந வதா³மி – ‘யஸ்மா வண்ணா அஞ்ஞோ
வண்ணோ உத்தரிதரோ ச பணீததரோ ச நத்தீ²’தி. அத² ச பன
த்வங், கச்சான, ‘ய்வாயங் வண்ணோ கிமினா க²ஜ்ஜோபனகேன நிஹீனதரோ ச பதிகிட்ட²தரோ
ச ஸோ பரமோ வண்ணோ’தி வதே³ஸி; தஞ்ச வண்ணங் ந பஞ்ஞபேஸி’’.
280.
‘‘பஞ்ச கோ² இமே, கச்சான, காமகு³ணா. கதமே பஞ்ச? சக்கு²விஞ்ஞெய்யா ரூபா
இட்டா² கந்தா மனாபா பியரூபா காமூபஸங்ஹிதா ரஜனீயா, ஸோதவிஞ்ஞெய்யா
ஸத்³தா³…பே॰… கா⁴னவிஞ்ஞெய்யா க³ந்தா⁴… ஜிவ்ஹாவிஞ்ஞெய்யா ரஸா… காயவிஞ்ஞெய்யா
பொ²ட்ட²ப்³பா³ இட்டா² கந்தா மனாபா
பியரூபா காமூபஸங்ஹிதா ரஜனீயா – இமே கோ², கச்சான, பஞ்ச காமகு³ணா. யங் கோ²,
கச்சான, இமே பஞ்ச காமகு³ணே படிச்ச உப்பஜ்ஜதி ஸுக²ங் ஸோமனஸ்ஸங் இத³ங்
வுச்சதி காமஸுக²ங். இதி காமேஹி காமஸுக²ங், காமஸுகா² காமக்³க³ஸுக²ங் தத்த²
அக்³க³மக்கா²யதீ’’தி.
ஏவங் வுத்தே, வேக²னஸோ பரிப்³பா³ஜகோ ப⁴க³வந்தங் ஏதத³வோச
– ‘‘அச்ச²ரியங், போ⁴ கோ³தம, அப்³பு⁴தங், போ⁴ கோ³தம! யாவ ஸுபா⁴ஸிதங் சித³ங்
போ⁴தா கோ³தமேன – ‘காமேஹி காமஸுக²ங், காமஸுகா² காமக்³க³ஸுக²ங் தத்த²
அக்³க³மக்கா²யதீ’தி. (‘காமேஹி, போ⁴ கோ³தம, காமஸுக²ங், காமஸுகா²
காமக்³க³ஸுக²ங், தத்த² அக்³க³மக்கா²யதீ’தி) [( ) ஸீ॰ ஸ்யா॰ கங்॰ பீ॰ பொத்த²கேஸு நத்தி²] – ‘‘து³ஜ்ஜானங் கோ² ஏதங், கச்சான, தயா அஞ்ஞதி³ட்டி²கேன அஞ்ஞக²ந்திகேன அஞ்ஞருசிகேன அஞ்ஞத்ரயோகே³ன அஞ்ஞத்ராசரியகேன – காமா [காமங் (ஸீ॰ ஸ்யா॰ கங்॰ பீ॰)]
வா காமஸுக²ங் வா காமக்³க³ஸுக²ங் வா. யே கோ² தே, கச்சான, பி⁴க்கூ² அரஹந்தோ
கீ²ணாஸவா வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா²
பரிக்கீ²ணப⁴வஸங்யோஜனா ஸம்மத³ஞ்ஞா விமுத்தா தே கோ² ஏதங் ஜானெய்யுங் – காமா வா காமஸுக²ங் வா காமக்³க³ஸுக²ங் வா’’தி.
281.
ஏவங் வுத்தே, வேக²னஸோ பரிப்³பா³ஜகோ குபிதோ அனத்தமனோ ப⁴க³வந்தங்யேவ
கு²ங்ஸெந்தோ ப⁴க³வந்தங்யேவ வம்பெ⁴ந்தோ ப⁴க³வந்தங்யேவ வத³மானோ ‘‘ஸமணோ [ஸமணோ ச (ஸீ॰ பீ॰)] கோ³தமோ பாபிதோ ப⁴விஸ்ஸதீ’’தி ப⁴க³வந்தங் ஏதத³வோச – ‘‘ஏவமேவ பனிதே⁴கச்சே [பனிதே⁴கே (ஸீ॰ பீ॰), பனிமேகே (உபரிஸுப⁴ஸுத்தே)]
ஸமணப்³ராஹ்மணா அஜானந்தா புப்³ப³ந்தங், அபஸ்ஸந்தா அபரந்தங் அத² ச பன ‘கீ²ணா
ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயாதி –
பஜானாமா’தி – படிஜானந்தி [இத்த²த்தாயாதி படிஜானந்தி (பீ॰)].
தேஸமித³ங் பா⁴ஸிதங் ஹஸ்ஸகங்யேவ ஸம்பஜ்ஜதி, நாமகங்யேவ ஸம்பஜ்ஜதி,
ரித்தகங்யேவ ஸம்பஜ்ஜதி, துச்ச²கங்யேவ ஸம்பஜ்ஜதீ’’தி. ‘‘யே கோ² தே, கச்சான,
ஸமணப்³ராஹ்மணா அஜானந்தா புப்³ப³ந்தங் , அபஸ்ஸந்தா
அபரந்தங், ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங்
இத்த²த்தாயாதி – பஜானாமா’தி – படிஜானந்தி; தேஸங் ஸோயேவ [தேஸங் தேஸாயங் (ஸீ॰), தேஸங்யேவ ஸோ (?)]
ஸஹத⁴ம்மிகோ நிக்³க³ஹோ ஹோதி. அபி ச, கச்சான, திட்ட²து புப்³ப³ந்தோ,
திட்ட²து அபரந்தோ. ஏது விஞ்ஞூ புரிஸோ அஸடோ² அமாயாவீ உஜுஜாதிகோ, அஹமனுஸாஸாமி
அஹங் த⁴ம்மங் தே³ஸேமி. யதா²னுஸிட்ட²ங் ததா² படிபஜ்ஜமானோ [யதா²னுஸிட்ட²ங் படிபஜ்ஜமானோ (?)] நசிரஸ்ஸேவ ஸாமஞ்ஞேவ ஞஸ்ஸதி ஸாமங் த³க்கி²தி – ஏவங் கிர ஸம்மா [ஏவங் கிராயஸ்மா (ஸ்யா॰ க॰)]
ப³ந்த⁴னா விப்பமொக்கோ² ஹோதி, யதி³த³ங் அவிஜ்ஜா ப³ந்த⁴னா. ஸெய்யதா²பி,
கச்சான, த³ஹரோ குமாரோ மந்தோ³ உத்தானஸெய்யகோ கண்ட²பஞ்சமேஹி ப³ந்த⁴னேஹி
ப³த்³தோ⁴ அஸ்ஸ ஸுத்தப³ந்த⁴னேஹி; தஸ்ஸ வுத்³தி⁴மன்வாய இந்த்³ரியானங்
பரிபாகமன்வாய தானி ப³ந்த⁴னானி முச்செய்யுங்; ஸோ மொக்கொ²ம்ஹீதி கோ² ஜானெய்ய நோ ச ப³ந்த⁴னங் .
ஏவமேவ கோ², கச்சான, ஏது விஞ்ஞூ புரிஸோ அஸடோ² அமாயாவீ உஜுஜாதிகோ,
அஹமனுஸாஸாமி, அஹங் த⁴ம்மங் தே³ஸேமி; யதா²னுஸிட்ட²ங் ததா² படிபஜ்ஜமானோ
நசிரஸ்ஸேவ ஸாமஞ்ஞே ஞஸ்ஸதி , ஸாமங் த³க்கி²தி – ‘ஏவங் கிர ஸம்மா ப³ந்த⁴னா விப்பமொக்கோ² ஹோதி, யதி³த³ங் அவிஜ்ஜா ப³ந்த⁴னா’’’தி.
ஏவங் வுத்தே, வேக²னஸோ பரிப்³பா³ஜகோ ப⁴க³வந்தங் ஏதத³வோச
– ‘‘அபி⁴க்கந்தங், போ⁴ கோ³தம…பே॰… உபாஸகங் மங் ப⁴வங் கோ³தமோ தா⁴ரேது
அஜ்ஜதக்³கே³ பாணுபேதங் ஸரணங் க³த’’ந்தி.
வேக²னஸஸுத்தங் நிட்டி²தங் த³ஸமங்.
பரிப்³பா³ஜகவக்³கோ³ நிட்டி²தோ ததியோ.
தஸ்ஸுத்³தா³னங் –
புண்ட³ரீ-அக்³கி³ஸஹ-கதி²னாமோ, தீ³க⁴னகோ² புன பா⁴ரத்³வாஜகொ³த்தோ;
ஸந்த³கஉதா³யிமுண்டி³கபுத்தோ, மணிகோ ததா²கச்சானோ வரவக்³கோ³.
ஸுத்தபிடக-Part-41-தமிழில் திரபிடக மூன்று தொகுப்புகள்TIPITAKA--41.2. பிக்குவக்கோ-1. அம்பலட்டிகராஹுலோவாதஸுத்தங்-from FREE ONLINE eNālāndā Research and
Practice UNIVERSITY through http://sarvajan.ambedkar.org
2. பிக்குவக்கோ
1. அம்பலட்டிகராஹுலோவாதஸுத்தங்
107. ஏவங்
மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன
கோ² பன ஸமயேன ஆயஸ்மா ராஹுலோ அம்ப³லட்டி²காயங் விஹரதி. அத² கோ² ப⁴க³வா
ஸாயன்ஹஸமயங் படிஸல்லானா வுட்டி²தோ யேன அம்ப³லட்டி²கா யேனாயஸ்மா ராஹுலோ
தேனுபஸங்கமி. அத்³த³ஸா கோ² ஆயஸ்மா ராஹுலோ ப⁴க³வந்தங் தூ³ரதோவ ஆக³ச்ச²ந்தங்.
தி³ஸ்வான ஆஸனங் பஞ்ஞாபேஸி, உத³கஞ்ச பாதா³னங். நிஸீதி³ ப⁴க³வா பஞ்ஞத்தே
ஆஸனே. நிஸஜ்ஜ பாதே³ பக்கா²லேஸி. ஆயஸ்மாபி கோ² ராஹுலோ ப⁴க³வந்தங்
அபி⁴வாதெ³த்வா ஏகமந்தங் நிஸீதி³.
108.
அத² கோ² ப⁴க³வா பரித்தங் உத³காவஸேஸங் உத³காதா⁴னே ட²பெத்வா ஆயஸ்மந்தங்
ராஹுலங் ஆமந்தேஸி – ‘‘பஸ்ஸஸி நோ த்வங், ராஹுல, இமங் பரித்தங் உத³காவஸேஸங்
உத³காதா⁴னே ட²பித’’ந்தி? ‘‘ஏவங், ப⁴ந்தே’’. ‘‘ஏவங் பரித்தகங் கோ², ராஹுல,
தேஸங் ஸாமஞ்ஞங் யேஸங் நத்தி² ஸம்பஜானமுஸாவாதே³ லஜ்ஜா’’தி. அத² கோ² ப⁴க³வா
பரித்தங் உத³காவஸேஸங் ச²ட்³டெ³த்வா ஆயஸ்மந்தங் ராஹுலங் ஆமந்தேஸி – ‘‘பஸ்ஸஸி
நோ த்வங், ராஹுல, பரித்தங் உத³காவஸேஸங் ச²ட்³டி³த’’ந்தி? ‘‘ஏவங்,
ப⁴ந்தே’’. ‘‘ஏவங் ச²ட்³டி³தங் கோ², ராஹுல, தேஸங் ஸாமஞ்ஞங் யேஸங் நத்தி²
ஸம்பஜானமுஸாவாதே³ லஜ்ஜா’’தி. அத² கோ² ப⁴க³வா தங்
உத³காதா⁴னங் நிக்குஜ்ஜித்வா ஆயஸ்மந்தங் ராஹுலங் ஆமந்தேஸி – ‘‘பஸ்ஸஸி நோ
த்வங், ராஹுல, இமங் உத³காதா⁴னங் நிக்குஜ்ஜித’’ந்தி? ‘‘ஏவங், ப⁴ந்தே’’.
‘‘ஏவங் நிக்குஜ்ஜிதங் கோ², ராஹுல, தேஸங் ஸாமஞ்ஞங் யேஸங் நத்தி²
ஸம்பஜானமுஸாவாதே³ லஜ்ஜா’’தி. அத² கோ² ப⁴க³வா தங் உத³காதா⁴னங் உக்குஜ்ஜித்வா
ஆயஸ்மந்தங் ராஹுலங் ஆமந்தேஸி – ‘‘பஸ்ஸஸி நோ த்வங், ராஹுல, இமங்
உத³காதா⁴னங் ரித்தங் துச்ச²’’ந்தி? ‘‘ஏவங், ப⁴ந்தே’’. ‘‘ஏவங் ரித்தங்
துச்ச²ங் கோ², ராஹுல, தேஸங் ஸாமஞ்ஞங் யேஸங் நத்தி² ஸம்பஜானமுஸாவாதே³ லஜ்ஜாதி. ஸெய்யதா²பி, ராஹுல, ரஞ்ஞோ நாகோ³ ஈஸாத³ந்தோ உரூள்ஹவா [உப்³பூ³ள்ஹவா (ஸீ॰ பீ॰)]
அபி⁴ஜாதோ ஸங்கா³மாவசரோ ஸங்கா³மக³தோ புரிமேஹிபி பாதே³ஹி கம்மங் கரோதி,
பச்சி²மேஹிபி பாதே³ஹி கம்மங் கரோதி, புரிமேனபி காயேன கம்மங் கரோதி,
பச்சி²மேனபி காயேன கம்மங் கரோதி, ஸீஸேனபி கம்மங் கரோதி, கண்ணேஹிபி கம்மங் கரோதி, த³ந்தேஹிபி கம்மங் கரோதி, நங்கு³ட்டே²னபி கம்மங்
கரோதி; ரக்க²தேவ ஸொண்ட³ங். தத்த² ஹத்தா²ரோஹஸ்ஸ ஏவங் ஹோதி – ‘அயங் கோ²
ரஞ்ஞோ நாகோ³ ஈஸாத³ந்தோ உரூள்ஹவா அபி⁴ஜாதோ ஸங்கா³மாவசரோ ஸங்கா³மக³தோ
புரிமேஹிபி பாதே³ஹி கம்மங் கரோதி, பச்சி²மேஹிபி பாதே³ஹி கம்மங் கரோதி…பே॰…
நங்கு³ட்டே²னபி கம்மங் கரோதி; ரக்க²தேவ ஸொண்ட³ங் .
அபரிச்சத்தங் கோ² ரஞ்ஞோ நாக³ஸ்ஸ ஜீவித’ந்தி. யதோ கோ², ராஹுல, ரஞ்ஞோ நாகோ³
ஈஸாத³ந்தோ உரூள்ஹவா அபி⁴ஜாதோ ஸங்கா³மாவசரோ ஸங்கா³மக³தோ புரிமேஹிபி பாதே³ஹி
கம்மங் கரோதி, பச்சி²மேஹிபி பாதே³ஹி கம்மங் கரோதி…பே॰… நங்கு³ட்டே²னபி
கம்மங் கரோதி, ஸொண்டா³யபி கம்மங் கரோதி, தத்த² ஹத்தா²ரோஹஸ்ஸ ஏவங் ஹோதி –
‘அயங் கோ² ரஞ்ஞோ நாகோ³ ஈஸாத³ந்தோ உரூள்ஹவா அபி⁴ஜாதோ ஸங்கா³மாவசரோ
ஸங்கா³மக³தோ புரிமேஹிபி பாதே³ஹி கம்மங் கரோதி, பச்சி²மேஹிபி பாதே³ஹி கம்மங்
கரோதி, புரிமேனபி காயேன கம்மங் கரோதி, பச்சி²மேனபி காயேன கம்மங் கரோதி,
ஸீஸேனபி கம்மங் கரோதி, கண்ணேஹிபி கம்மங் கரோதி, த³ந்தேஹிபி கம்மங் கரோதி,
நங்கு³ட்டே²னபி கம்மங் கரோதி, ஸொண்டா³யபி கம்மங் கரோதி. பரிச்சத்தங் கோ²
ரஞ்ஞோ நாக³ஸ்ஸ ஜீவிதங். நத்தி² தா³னி கிஞ்சி ரஞ்ஞோ நாக³ஸ்ஸ அகரணீய’ந்தி.
ஏவமேவ கோ², ராஹுல, யஸ்ஸ கஸ்ஸசி ஸம்பஜானமுஸாவாதே³ நத்தி² லஜ்ஜா, நாஹங் தஸ்ஸ
கிஞ்சி பாபங் அகரணீயந்தி வதா³மி. தஸ்மாதிஹ தே, ராஹுல, ‘ஹஸ்ஸாபி ந முஸா
ப⁴ணிஸ்ஸாமீ’தி – ஏவஞ்ஹி தே, ராஹுல, ஸிக்கி²தப்³ப³ங்.
109.
‘‘தங் கிங் மஞ்ஞஸி, ராஹுல, கிமத்தி²யோ ஆதா³ஸோ’’தி? ‘‘பச்சவெக்க²ணத்தோ²,
ப⁴ந்தே’’தி. ‘‘ஏவமேவ கோ², ராஹுல, பச்சவெக்கி²த்வா பச்சவெக்கி²த்வா காயேன
கம்மங் கத்தப்³ப³ங், பச்சவெக்கி²த்வா பச்சவெக்கி²த்வா வாசாய கம்மங்
கத்தப்³ப³ங், பச்சவெக்கி²த்வா பச்சவெக்கி²த்வா மனஸா கம்மங் கத்தப்³ப³ங்.
யதே³வ த்வங், ராஹுல, காயேன கம்மங் கத்துகாமோ அஹோஸி,
ததே³வ தே காயகம்மங் பச்சவெக்கி²தப்³ப³ங் – ‘யங் நு கோ² அஹங் இத³ங் காயேன
கம்மங் கத்துகாமோ இத³ங் மே காயகம்மங் அத்தப்³யாபா³தா⁴யபி ஸங்வத்தெய்ய,
பரப்³யாபா³தா⁴யபி ஸங்வத்தெய்ய, உப⁴யப்³யாபா³தா⁴யபி ஸங்வத்தெய்ய – அகுஸலங்
இத³ங் காயகம்மங் து³க்கு²த்³ரயங் [து³க்கு²ந்த்³ரயங், து³க்கு²த³யங் (க॰)]
து³க்க²விபாக’ந்தி? ஸசே த்வங், ராஹுல, பச்சவெக்க²மானோ ஏவங் ஜானெய்யாஸி –
‘யங் கோ² அஹங் இத³ங் காயேன கம்மங் கத்துகாமோ இத³ங் மே காயகம்மங்
அத்தப்³யாபா³தா⁴யபி ஸங்வத்தெய்ய, பரப்³யாபா³தா⁴யபி ஸங்வத்தெய்ய, உப⁴யப்³யாபா³தா⁴யபி ஸங்வத்தெய்ய – அகுஸலங் இத³ங் காயகம்மங் து³க்கு²த்³ரயங் து³க்க²விபாக’ந்தி, ஏவரூபங் தே, ராஹுல, காயேன கம்மங் ஸஸக்கங் ந கரணீயங் [ஸங்ஸக்கங் ந ச கரணீயங் (க॰)]. ஸசே
பன த்வங், ராஹுல, பச்சவெக்க²மானோ ஏவங் ஜானெய்யாஸி – ‘யங் கோ² அஹங் இத³ங்
காயேன கம்மங் கத்துகாமோ இத³ங் மே காயகம்மங் நேவத்தப்³யாபா³தா⁴யபி
ஸங்வத்தெய்ய, ந பரப்³யாபா³தா⁴யபி ஸங்வத்தெய்ய, ந உப⁴யப்³யாபா³தா⁴யபி
ஸங்வத்தெய்ய – குஸலங் இத³ங் காயகம்மங் ஸுகு²த்³ரயங் ஸுக²விபாக’ந்தி,
ஏவரூபங் தே, ராஹுல, காயேன கம்மங் கரணீயங்.
‘‘கரொந்தேனபி தே, ராஹுல, காயேன கம்மங் ததே³வ தே
காயகம்மங் பச்சவெக்கி²தப்³ப³ங் – ‘யங் நு கோ² அஹங் இத³ங் காயேன கம்மங்
கரோமி இத³ங் மே காயகம்மங் அத்தப்³யாபா³தா⁴யபி
ஸங்வத்ததி, பரப்³யாபா³தா⁴யபி ஸங்வத்ததி, உப⁴யப்³யாபா³தா⁴யபி ஸங்வத்ததி –
அகுஸலங் இத³ங் காயகம்மங் து³க்கு²த்³ரயங் து³க்க²விபாக’ந்தி? ஸசே பன த்வங்,
ராஹுல, பச்சவெக்க²மானோ ஏவங் ஜானெய்யாஸி – ‘யங் கோ² அஹங் இத³ங் காயேன
கம்மங் கரோமி இத³ங் மே காயகம்மங் அத்தப்³யாபா³தா⁴யபி ஸங்வத்ததி,
பரப்³யாபா³தா⁴யபி ஸங்வத்ததி, உப⁴யப்³யாபா³தா⁴யபி ஸங்வத்ததி – அகுஸலங் இத³ங்
காயகம்மங் து³க்கு²த்³ரயங் து³க்க²விபாக’ந்தி, படிஸங்ஹரெய்யாஸி த்வங்,
ராஹுல, ஏவரூபங் காயகம்மங். ஸசே பன த்வங், ராஹுல, பச்சவெக்க²மானோ ஏவங்
ஜானெய்யாஸி – ‘யங் கோ² அஹங் இத³ங் காயேன கம்மங் கரோமி இத³ங் மே காயகம்மங்
நேவத்தப்³யாபா³தா⁴யபி ஸங்வத்ததி, ந
பரப்³யாபா³தா⁴யபி ஸங்வத்ததி, ந உப⁴யப்³யாபா³தா⁴யபி ஸங்வத்ததி – குஸலங்
இத³ங் காயகம்மங் ஸுகு²த்³ரயங் ஸுக²விபாக’ந்தி, அனுபத³ஜ்ஜெய்யாஸி த்வங்,
ராஹுல, ஏவரூபங் காயகம்மங்.
‘‘கத்வாபி தே, ராஹுல, காயேன கம்மங் ததே³வ தே காயகம்மங்
பச்சவெக்கி²தப்³ப³ங் – ‘யங் நு கோ² அஹங் இத³ங் காயேன கம்மங் அகாஸிங் இத³ங்
மே காயகம்மங் அத்தப்³யாபா³தா⁴யபி ஸங்வத்ததி [ஸங்வத்தி (பீ॰)],
பரப்³யாபா³தா⁴யபி ஸங்வத்ததி, உப⁴யப்³யாபா³தா⁴யபி ஸங்வத்ததி – அகுஸலங்
இத³ங் காயகம்மங் து³க்கு²த்³ரயங் து³க்க²விபாக’ந்தி? ஸசே கோ² த்வங், ராஹுல,
பச்சவெக்க²மானோ ஏவங் ஜானெய்யாஸி – ‘யங் கோ² அஹங் இத³ங் காயேன கம்மங்
அகாஸிங், இத³ங் மே காயகம்மங் அத்தப்³யாபா³தா⁴யபி ஸங்வத்ததி,
பரப்³யாபா³தா⁴யபி ஸங்வத்ததி, உப⁴யப்³யாபா³தா⁴யபி ஸங்வத்ததி – அகுஸலங் இத³ங்
காயகம்மங் து³க்கு²த்³ரயங் து³க்க²விபாக’ந்தி, ஏவரூபங் தே, ராஹுல,
காயகம்மங் ஸத்த²ரி வா விஞ்ஞூஸு வா ஸப்³ரஹ்மசாரீஸு தே³ஸேதப்³ப³ங், விவரிதப்³ப³ங், உத்தானீகாதப்³ப³ங்; தே³ஸெத்வா விவரித்வா உத்தானீகத்வா ஆயதிங் ஸங்வரங் ஆபஜ்ஜிதப்³ப³ங் .
ஸசே பன த்வங், ராஹுல, பச்சவெக்க²மானோ ஏவங் ஜானெய்யாஸி – ‘யங் கோ² அஹங்
இத³ங் காயேன கம்மங் அகாஸிங் இத³ங் மே காயகம்மங் நேவத்தப்³யாபா³தா⁴யபி
ஸங்வத்ததி, ந பரப்³யாபா³தா⁴யபி ஸங்வத்ததி, ந உப⁴யப்³யாபா³தா⁴யபி ஸங்வத்ததி –
குஸலங் இத³ங் காயகம்மங் ஸுகு²த்³ரயங் ஸுக²விபாக’ந்தி, தேனேவ த்வங், ராஹுல,
பீதிபாமோஜ்ஜேன விஹரெய்யாஸி அஹோரத்தானுஸிக்கீ² குஸலேஸு த⁴ம்மேஸு.
110.
‘‘யதே³வ த்வங், ராஹுல, வாசாய கம்மங் கத்துகாமோ அஹோஸி, ததே³வ தே வசீகம்மங்
பச்சவெக்கி²தப்³ப³ங் – ‘யங் நு கோ² அஹங் இத³ங் வாசாய கம்மங் கத்துகாமோ
இத³ங் மே வசீகம்மங் அத்தப்³யாபா³தா⁴யபி ஸங்வத்தெய்ய, பரப்³யாபா³தா⁴யபி
ஸங்வத்தெய்ய, உப⁴யப்³யாபா³தா⁴யபி ஸங்வத்தெய்ய – அகுஸலங் இத³ங் வசீகம்மங்
து³க்கு²த்³ரயங் து³க்க²விபாக’ந்தி? ஸசே த்வங், ராஹுல, பச்சவெக்க²மானோ ஏவங்
ஜானெய்யாஸி – ‘யங் கோ² அஹங் இத³ங் வாசாய கம்மங் கத்துகாமோ இத³ங் மே
வசீகம்மங் அத்தப்³யாபா³தா⁴யபி ஸங்வத்தெய்ய, பரப்³யாபா³தா⁴யபி ஸங்வத்தெய்ய,
உப⁴யப்³யாபா³தா⁴யபி ஸங்வத்தெய்ய – அகுஸலங் இத³ங் வசீகம்மங் து³க்கு²த்³ரயங்
து³க்க²விபாக’ந்தி, ஏவரூபங் தே, ராஹுல, வாசாய கம்மங் ஸஸக்கங் ந கரணீயங்.
ஸசே பன த்வங், ராஹுல, பச்சவெக்க²மானோ ஏவங் ஜானெய்யாஸி – ‘யங் கோ² அஹங்
இத³ங் வாசாய கம்மங் கத்துகாமோ இத³ங் மே வசீகம்மங் நேவத்தப்³யாபா³தா⁴யபி
ஸங்வத்தெய்ய, ந பரப்³யாபா³தா⁴யபி ஸங்வத்தெய்ய – குஸலங் இத³ங் வசீகம்மங்
ஸுகு²த்³ரயங் ஸுக²விபாக’ந்தி, ஏவரூபங் தே, ராஹுல, வாசாய கம்மங் கரணீயங்.
‘‘கரொந்தேனபி, ராஹுல, வாசாய கம்மங் ததே³வ தே வசீகம்மங்
பச்சவெக்கி²தப்³ப³ங் – ‘யங் நு கோ² அஹங் இத³ங் வாசாய கம்மங் கரோமி இத³ங்
மே வசீகம்மங் அத்தப்³யாபா³தா⁴யபி ஸங்வத்ததி, பரப்³யாபா³தா⁴யபி
ஸங்வத்ததி, உப⁴யப்³யாபா³தா⁴யபி ஸங்வத்ததி – அகுஸலங் இத³ங் வசீகம்மங்
து³க்கு²த்³ரயங் து³க்க²விபாக’ந்தி? ஸசே பன த்வங், ராஹுல, பச்சவெக்க²மானோ
ஏவங் ஜானெய்யாஸி – ‘யங் கோ² அஹங் இத³ங் வாசாய கம்மங் கரோமி இத³ங் மே
வசீகம்மங் அத்தப்³யாபா³தா⁴யபி ஸங்வத்ததி, பரப்³யாபா³தா⁴யபி ஸங்வத்ததி,
உப⁴யப்³யாபா³தா⁴யபி ஸங்வத்ததி – அகுஸலங் இத³ங் வசீகம்மங் து³க்கு²த்³ரயங்
து³க்க²விபாக’ந்தி, படிஸங்ஹரெய்யாஸி த்வங், ராஹுல, ஏவரூபங் வசீகம்மங். ஸசே
பன த்வங், ராஹுல, பச்சவெக்க²மானோ ஏவங் ஜானெய்யாஸி – ‘யங் கோ² அஹங் இத³ங்
வாசாய கம்மங் கரோமி இத³ங் மே வசீகம்மங் நேவத்தப்³யாபா³தா⁴யபி ஸங்வத்ததி, ந பரப்³யாபா³தா⁴யபி ஸங்வத்ததி, ந உப⁴யப்³யாபா³தா⁴யபி ஸங்வத்ததி – குஸலங் இத³ங் வசீகம்மங் ஸுகு²த்³ரயங் ஸுக²விபாக’ந்தி, அனுபத³ஜ்ஜெய்யாஸி, த்வங் ராஹுல, ஏவரூபங் வசீகம்மங்.
‘‘கத்வாபி தே, ராஹுல, வாசாய கம்மங் ததே³வ தே வசீகம்மங்
பச்சவெக்கி²தப்³ப³ங் – ‘யங் நு கோ² அஹங் இத³ங் வாசாய கம்மங் அகாஸிங் இத³ங்
மே வசீகம்மங் அத்தப்³யாபா³தா⁴யபி ஸங்வத்ததி [ஸங்வத்தி (ஸீ॰ பீ॰)],
பரப்³யாபா³தா⁴யபி ஸங்வத்ததி, உப⁴யப்³யாபா³தா⁴யபி ஸங்வத்ததி – அகுஸலங்
இத³ங் வசீகம்மங் து³க்கு²த்³ரயங் து³க்க²விபாக’ந்தி? ஸசே கோ² த்வங், ராஹுல,
பச்சவெக்க²மானோ ஏவங் ஜானெய்யாஸி – ‘யங் கோ² அஹங் இத³ங் வாசாய கம்மங்
அகாஸிங் இத³ங் மே வசீகம்மங் அத்தப்³யாபா³தா⁴யபி ஸங்வத்ததி,
பரப்³யாபா³தா⁴யபி ஸங்வத்ததி, உப⁴யப்³யாபா³தா⁴யபி ஸங்வத்ததி – அகுஸலங் இத³ங்
வசீகம்மங் து³க்கு²த்³ரயங் து³க்க²விபாக’ந்தி, ஏவரூபங் தே, ராஹுல,
வசீகம்மங் ஸத்த²ரி வா விஞ்ஞூஸு வா ஸப்³ரஹ்மசாரீஸு தே³ஸேதப்³ப³ங்,
விவரிதப்³ப³ங், உத்தானீகத்தப்³ப³ங் ; தே³ஸெத்வா
விவரித்வா உத்தானீகத்வா ஆயதிங் ஸங்வரங் ஆபஜ்ஜிதப்³ப³ங். ஸசே பன த்வங்,
ராஹுல, பச்சவெக்க²மானோ ஏவங் ஜானெய்யாஸி – ‘யங் கோ² அஹங் இத³ங் வாசாய கம்மங்
அகாஸிங் இத³ங் மே வசீகம்மங் நேவத்தப்³யாபா³தா⁴யபி ஸங்வத்ததி, ந
பரப்³யாபா³தா⁴யபி ஸங்வத்ததி, ந உப⁴யப்³யாபா³தா⁴யபி ஸங்வத்ததி – குஸலங்
இத³ங் வசீகம்மங் ஸுகு²த்³ரயங் ஸுக²விபாக’ந்தி, தேனேவ த்வங், ராஹுல,
பீதிபாமோஜ்ஜேன விஹரெய்யாஸி அஹோரத்தானுஸிக்கீ² குஸலேஸு த⁴ம்மேஸு.
111.
‘‘யதே³வ த்வங், ராஹுல, மனஸா கம்மங் கத்துகாமோ அஹோஸி, ததே³வ தே மனோகம்மங்
பச்சவெக்கி²தப்³ப³ங் – ‘யங் நு கோ² அஹங் இத³ங் மனஸா கம்மங் கத்துகாமோ இத³ங்
மே மனோகம்மங் அத்தப்³யாபா³தா⁴யபி ஸங்வத்தெய்ய, பரப்³யாபா³தா⁴யபி
ஸங்வத்தெய்ய, உப⁴யப்³யாபா³தா⁴யபி ஸங்வத்தெய்ய – அகுஸலங் இத³ங் மனோகம்மங்
து³க்கு²த்³ரயங் து³க்க²விபாக’ந்தி? ஸசே த்வங், ராஹுல, பச்சவெக்க²மானோ ஏவங்
ஜானெய்யாஸி – ‘யங் கோ² அஹங் இத³ங் மனஸா கம்மங் கத்துகாமோ இத³ங் மே
மனோகம்மங் அத்தப்³யாபா³தா⁴யபி ஸங்வத்தெய்ய, பரப்³யாபா³தா⁴யபி ஸங்வத்தெய்ய,
உப⁴யப்³யாபா³தா⁴யபி ஸங்வத்தெய்ய – அகுஸலங் இத³ங் மனோகம்மங் து³க்கு²த்³ரயங்
து³க்க²விபாக’ந்தி, ஏவரூபங் தே, ராஹுல, மனஸா கம்மங் ஸஸக்கங் ந கரணீயங்.
ஸசே பன த்வங், ராஹுல, பச்சவெக்க²மானோ ஏவங் ஜானெய்யாஸி – ‘யங் கோ² அஹங் இத³ங் மனஸா கம்மங் கத்துகாமோ இத³ங் மே மனோகம்மங் நேவத்தப்³யாபா³தா⁴யபி ஸங்வத்தெய்ய, ந பரப்³யாபா³தா⁴யபி ஸங்வத்தெய்ய, ந உப⁴யப்³யாபா³தா⁴யபி ஸங்வத்தெய்ய – குஸலங் இத³ங் மனோகம்மங் ஸுகு²த்³ரயங் ஸுக²விபாக’ந்தி, ஏவரூபங் தே, ராஹுல, மனஸா கம்மங் கரணீயங்.
‘‘கரொந்தேனபி தே, ராஹுல, மனஸா கம்மங் ததே³வ தே
மனோகம்மங் பச்சவெக்கி²தப்³ப³ங் – ‘யங் நு கோ² அஹங் இத³ங் மனஸா கம்மங் கரோமி
இத³ங் மே மனோகம்மங் அத்தப்³யாபா³தா⁴யபி ஸங்வத்ததி, பரப்³யாபா³தா⁴யபி
ஸங்வத்ததி, உப⁴யப்³யாபா³தா⁴யபி ஸங்வத்ததி – அகுஸலங் இத³ங் மனோகம்மங்
து³க்கு²த்³ரயங் து³க்க²விபாக’ந்தி? ஸசே பன த்வங், ராஹுல, பச்சவெக்க²மானோ
ஏவங் ஜானெய்யாஸி – ‘யங் கோ² அஹங் இத³ங் மனஸா கம்மங் கரோமி இத³ங் மே
மனோகம்மங் அத்தப்³யாபா³தா⁴யபி ஸங்வத்ததி, பரப்³யாபா³தா⁴யபி ஸங்வத்ததி,
உப⁴யப்³யாபா³தா⁴யபி ஸங்வத்ததி – அகுஸலங் இத³ங் மனோகம்மங் து³க்கு²த்³ரயங்
து³க்க²விபாக’ந்தி, படிஸங்ஹரெய்யாஸி த்வங், ராஹுல, ஏவரூபங் மனோகம்மங். ஸசே
பன த்வங், ராஹுல, பச்சவெக்க²மானோ ஏவங் ஜானெய்யாஸி – ‘யங் கோ² அஹங் இத³ங்
மனஸா கம்மங் கரோமி இத³ங் மே மனோகம்மங் நேவத்தப்³யாபா³தா⁴யபி ஸங்வத்ததி, ந
பரப்³யாபா³தா⁴யபி ஸங்வத்ததி, ந உப⁴யப்³யாபா³தா⁴யபி ஸங்வத்ததி – குஸலங்
இத³ங் மனோகம்மங் ஸுகு²த்³ரயங் ஸுக²விபாக’ந்தி, அனுபத³ஜ்ஜெய்யாஸி த்வங்,
ராஹுல, ஏவரூபங் மனோகம்மங்.
‘‘கத்வாபி தே, ராஹுல, மனஸா கம்மங் ததே³வ தே மனோகம்மங்
பச்சவெக்கி²தப்³ப³ங் – ‘யங் நு கோ² அஹங் இத³ங் மனஸா கம்மங் அகாஸிங் இத³ங்
மே மனோகம்மங் அத்தப்³யாபா³தா⁴யபி ஸங்வத்ததி [ஸங்வத்தி (ஸீ॰ பீ॰)],
பரப்³யாபா³தா⁴யபி ஸங்வத்ததி, உப⁴யப்³யாபா³தா⁴யபி ஸங்வத்ததி – அகுஸலங்
இத³ங் மனோகம்மங் து³க்கு²த்³ரயங் து³க்க²விபாக’ந்தி? ஸசே கோ² த்வங், ராஹுல,
பச்சவெக்க²மானோ ஏவங் ஜானெய்யாஸி – ‘யங் கோ² அஹங்
இத³ங் மனஸா கம்மங் அகாஸிங் இத³ங் மே மனோகம்மங் அத்தப்³யாபா³தா⁴யபி
ஸங்வத்ததி, பரப்³யாபா³தா⁴யபி ஸங்வத்ததி, உப⁴யப்³யாபா³தா⁴யபி ஸங்வத்ததி –
அகுஸலங் இத³ங் மனோகம்மங் து³க்கு²த்³ரயங் து³க்க²விபாக’ந்தி, ஏவரூபங் பன [ஏவரூபே (ஸீ॰ பீ॰), ஏவரூபே பன (ஸ்யா॰ கங்॰)] தே, ராஹுல, மனோகம்மங் [மனோகம்மே (ஸீ॰ ஸ்யா॰ கங்॰ பீ॰)]
அட்டீயிதப்³ப³ங் ஹராயிதப்³ப³ங் ஜிகு³ச்சி²தப்³ப³ங்; அட்டீயித்வா ஹராயித்வா
ஜிகு³ச்சி²த்வா ஆயதிங் ஸங்வரங் ஆபஜ்ஜிதப்³ப³ங். ஸசே பன த்வங், ராஹுல,
பச்சவெக்க²மானோ ஏவங் ஜானெய்யாஸி – ‘யங் கோ² அஹங் இத³ங் மனஸா கம்மங் அகாஸிங்
இத³ங் மே மனோகம்மங் நேவத்தப்³யாபா³தா⁴யபி
ஸங்வத்ததி, ந பரப்³யாபா³தா⁴யபி ஸங்வத்ததி, ந உப⁴யப்³யாபா³தா⁴யபி ஸங்வத்ததி –
குஸலங் இத³ங் மனோகம்மங் ஸுகு²த்³ரயங் ஸுக²விபாக’ந்தி, தேனேவ த்வங், ராஹுல,
பீதிபாமோஜ்ஜேன விஹரெய்யாஸி அஹோரத்தானுஸிக்கீ² குஸலேஸு த⁴ம்மேஸு.
112. ‘‘யே
ஹி கேசி, ராஹுல, அதீதமத்³தா⁴னங் ஸமணா வா ப்³ராஹ்மணா வா காயகம்மங்
பரிஸோதே⁴ஸுங், வசீகம்மங் பரிஸோதே⁴ஸுங், மனோகம்மங் பரிஸோதே⁴ஸுங், ஸப்³பே³ தே
ஏவமேவங் பச்சவெக்கி²த்வா பச்சவெக்கி²த்வா காயகம்மங் பரிஸோதே⁴ஸுங்,
பச்சவெக்கி²த்வா பச்சவெக்கி²த்வா வசீகம்மங் பரிஸோதே⁴ஸுங், பச்சவெக்கி²த்வா
பச்சவெக்கி²த்வா மனோகம்மங் பரிஸோதே⁴ஸுங். யேபி ஹி கேசி, ராஹுல,
அனாக³தமத்³தா⁴னங் ஸமணா வா ப்³ராஹ்மணா வா காயகம்மங் பரிஸோதெ⁴ஸ்ஸந்தி,
வசீகம்மங் பரிஸோதெ⁴ஸ்ஸந்தி, மனோகம்மங் பரிஸோதெ⁴ஸ்ஸந்தி, ஸப்³பே³ தே ஏவமேவங்
பச்சவெக்கி²த்வா பச்சவெக்கி²த்வா காயகம்மங் பரிஸோதெ⁴ஸ்ஸந்தி,
பச்சவெக்கி²த்வா பச்சவெக்கி²த்வா வசீகம்மங் பரிஸோதெ⁴ஸ்ஸந்தி ,
பச்சவெக்கி²த்வா பச்சவெக்கி²த்வா மனோகம்மங் பரிஸோதெ⁴ஸ்ஸந்தி. யேபி ஹி
கேசி, ராஹுல, ஏதரஹி ஸமணா வா ப்³ராஹ்மணா வா காயகம்மங் பரிஸோதெ⁴ந்தி,
வசீகம்மங் பரிஸோதெ⁴ந்தி, மனோகம்மங் பரிஸோதெ⁴ந்தி, ஸப்³பே³ தே ஏவமேவங்
பச்சவெக்கி²த்வா பச்சவெக்கி²த்வா காயகம்மங் பரிஸோதெ⁴ந்தி, பச்சவெக்கி²த்வா
பச்சவெக்கி²த்வா வசீகம்மங் பரிஸோதெ⁴ந்தி, பச்சவெக்கி²த்வா பச்சவெக்கி²த்வா
மனோகம்மங் பரிஸோதெ⁴ந்தி. தஸ்மாதிஹ, ராஹுல, ‘பச்சவெக்கி²த்வா
பச்சவெக்கி²த்வா காயகம்மங் பரிஸோதெ⁴ஸ்ஸாமி, பச்சவெக்கி²த்வா
பச்சவெக்கி²த்வா வசீகம்மங் பரிஸோதெ⁴ஸ்ஸாமி, பச்சவெக்கி²த்வா
பச்சவெக்கி²த்வா மனோகம்மங் பரிஸோதெ⁴ஸ்ஸாமீ’தி – ஏவஞ்ஹி தே, ராஹுல,
ஸிக்கி²தப்³ப³’’ந்தி.
இத³மவோச ப⁴க³வா. அத்தமனோ ஆயஸ்மா ராஹுலோ ப⁴க³வதோ பா⁴ஸிதங் அபி⁴னந்தீ³தி.
அம்ப³லட்டி²கராஹுலோவாத³ஸுத்தங் நிட்டி²தங் பட²மங்.
2. மஹாராஹுலோவாத³ஸுத்தங்
113. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய
ஸாவத்தி²ங் பிண்டா³ய பாவிஸி. ஆயஸ்மாபி கோ² ராஹுலோ புப்³ப³ண்ஹஸமயங்
நிவாஸெத்வா பத்தசீவரமாதா³ய ப⁴க³வந்தங் பிட்டி²தோ பிட்டி²தோ அனுப³ந்தி⁴.
அத² கோ² ப⁴க³வா அபலோகெத்வா ஆயஸ்மந்தங் ராஹுலங் ஆமந்தேஸி – ‘‘யங் கிஞ்சி,
ராஹுல, ரூபங் – அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா
ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா –
ஸப்³ப³ங் ரூபங் ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங்
ஸம்மப்பஞ்ஞாய த³ட்ட²ப்³ப³’’ந்தி. ‘‘ரூபமேவ நு கோ², ப⁴க³வா, ரூபமேவ நு கோ²,
ஸுக³தா’’தி? ‘‘ரூபம்பி, ராஹுல, வேத³னாபி, ராஹுல, ஸஞ்ஞாபி, ராஹுல,
ஸங்கா²ராபி, ராஹுல, விஞ்ஞாணம்பி, ராஹுலா’’தி. அத² கோ² ஆயஸ்மா ராஹுலோ ‘‘கோ
நஜ்ஜ [கோ நுஜ்ஜ (ஸ்யா॰ கங்॰)] ப⁴க³வதா ஸம்முகா²
ஓவாதே³ன ஓவதி³தோ கா³மங் பிண்டா³ய பவிஸிஸ்ஸதீ’’தி ததோ படினிவத்தித்வா
அஞ்ஞதரஸ்மிங் ருக்க²மூலே நிஸீதி³ பல்லங்கங் ஆபு⁴ஜித்வா உஜுங் காயங் பணிதா⁴ய
பரிமுக²ங் ஸதிங் உபட்ட²பெத்வா. அத்³த³ஸா கோ² ஆயஸ்மா ஸாரிபுத்தோ ஆயஸ்மந்தங்
ராஹுலங் அஞ்ஞதரஸ்மிங் ருக்க²மூலே நிஸின்னங் பல்லங்கங் ஆபு⁴ஜித்வா உஜுங்
காயங் பணிதா⁴ய பரிமுக²ங் ஸதிங் உபட்ட²பெத்வா .
தி³ஸ்வான ஆயஸ்மந்தங் ராஹுலங் ஆமந்தேஸி – ‘‘ஆனாபானஸ்ஸதிங், ராஹுல, பா⁴வனங்
பா⁴வேஹி. ஆனாபானஸ்ஸதி, ராஹுல, பா⁴வனா பா⁴விதா ப³ஹுலீகதா மஹப்ப²லா ஹோதி
மஹானிஸங்ஸா’’தி.
114.
அத² கோ² ஆயஸ்மா ராஹுலோ ஸாயன்ஹஸமயங் படிஸல்லானா வுட்டி²தோ யேன ப⁴க³வா
தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³.
ஏகமந்தங் நிஸின்னோ கோ² ஆயஸ்மா ராஹுலோ ப⁴க³வந்தங் ஏதத³வோச – ‘‘கத²ங் பா⁴விதா
நு கோ², ப⁴ந்தே, ஆனாபானஸ்ஸதி, கத²ங் ப³ஹுலீகதா மஹப்ப²லா ஹோதி
மஹானிஸங்ஸா’’தி? ‘‘யங் கிஞ்சி, ராஹுல, அஜ்ஜ²த்தங் பச்சத்தங் கக்க²ளங்
க²ரிக³தங் உபாதி³ன்னங், ஸெய்யதி²த³ங் – கேஸா லோமா நகா² த³ந்தா தசோ மங்ஸங்
ந்ஹாரு [நஹாரு (ஸீ॰ ஸ்யா॰ கங்॰ பீ॰)] அட்டி² அட்டி²மிஞ்ஜங் வக்கங் ஹத³யங் யகனங் கிலோமகங் பிஹகங் பப்பா²ஸங் அந்தங் அந்தகு³ணங் உத³ரியங் கரீஸங், யங் வா பனஞ்ஞம்பி கிஞ்சி அஜ்ஜ²த்தங் பச்சத்தங் கக்க²ளங் க²ரிக³தங் உபாதி³ன்னங் – அயங் வுச்சதி, ராஹுல, அஜ்ஜ²த்திகா பத²வீதா⁴து [பட²வீதா⁴து (ஸீ॰ ஸ்யா॰ கங்॰ பீ॰)].
யா சேவ கோ² பன அஜ்ஜ²த்திகா பத²வீதா⁴து யா ச பா³ஹிரா பத²வீதா⁴து,
பத²வீதா⁴துரேவேஸா. தங் ‘நேதங் மம, நேஸோஹமஸ்மி, ந மேஸோ அத்தா’தி – ஏவமேதங்
யதா²பூ⁴தங் ஸம்மப்பஞ்ஞாய த³ட்ட²ப்³ப³ங். ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா பத²வீதா⁴துயா நிப்³பி³ந்த³தி, பத²வீதா⁴துயா சித்தங் விராஜேதி’’.
115. ‘‘கதமா ச, ராஹுல, ஆபோதா⁴து? ஆபோதா⁴து ஸியா அஜ்ஜ²த்திகா, ஸியா பா³ஹிரா. கதமா ச, ராஹுல, அஜ்ஜ²த்திகா ஆபோதா⁴து ?
யங் அஜ்ஜ²த்தங் பச்சத்தங் ஆபோ ஆபோக³தங் உபாதி³ன்னங், ஸெய்யதி²த³ங் –
பித்தங் ஸெம்ஹங் புப்³போ³ லோஹிதங் ஸேதோ³ மேதோ³ அஸ்ஸு வஸா கே²ளோ ஸிங்கா⁴ணிகா
லஸிகா முத்தங், யங் வா பனஞ்ஞம்பி கிஞ்சி அஜ்ஜ²த்தங் பச்சத்தங் ஆபோ
ஆபோக³தங் உபாதி³ன்னங் – அயங் வுச்சதி, ராஹுல, அஜ்ஜ²த்திகா ஆபோதா⁴து. யா சேவ
கோ² பன அஜ்ஜ²த்திகா ஆபோதா⁴து யா ச பா³ஹிரா ஆபோதா⁴து ஆபோதா⁴துரேவேஸா. தங்
‘நேதங் மம, நேஸோஹமஸ்மி, ந மேஸோ அத்தா’தி – ஏவமேதங் யதா²பூ⁴தங் ஸம்மப்பஞ்ஞாய
த³ட்ட²ப்³ப³ங். ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா ஆபோதா⁴துயா
நிப்³பி³ந்த³தி, ஆபோதா⁴துயா சித்தங் விராஜேதி.
116.
‘‘கதமா ச, ராஹுல, தேஜோதா⁴து? தேஜோதா⁴து ஸியா அஜ்ஜ²த்திகா, ஸியா பா³ஹிரா.
கதமா ச, ராஹுல, அஜ்ஜ²த்திகா தேஜோதா⁴து? யங் அஜ்ஜ²த்தங் பச்சத்தங் தேஜோ
தேஜோக³தங் உபாதி³ன்னங், ஸெய்யதி²த³ங் – யேன ச ஸந்தப்பதி யேன ச ஜீரீயதி யேன ச
பரிட³ய்ஹதி யேன ச அஸிதபீதகா²யிதஸாயிதங் ஸம்மா பரிணாமங் க³ச்ச²தி, யங் வா
பனஞ்ஞம்பி கிஞ்சி அஜ்ஜ²த்தங் பச்சத்தங் தேஜோ தேஜோக³தங் உபாதி³ன்னங் – அயங்
வுச்சதி, ராஹுல, அஜ்ஜ²த்திகா தேஜோதா⁴து. யா சேவ கோ² பன அஜ்ஜ²த்திகா
தேஜோதா⁴து யா ச பா³ஹிரா தேஜோதா⁴து தேஜோதா⁴துரேவேஸா. தங் ‘நேதங் மம,
நேஸோஹமஸ்மி, ந மேஸோ அத்தா’தி – ஏவமேதங் யதா²பூ⁴தங் ஸம்மப்பஞ்ஞாய
த³ட்ட²ப்³ப³ங். ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா தேஜோதா⁴துயா
நிப்³பி³ந்த³தி, தேஜோதா⁴துயா சித்தங் விராஜேதி.
117. ‘‘கதமா
ச, ராஹுல, வாயோதா⁴து? வாயோதா⁴து ஸியா அஜ்ஜ²த்திகா, ஸியா பா³ஹிரா. கதமா ச,
ராஹுல, அஜ்ஜ²த்திகா வாயோதா⁴து? யங் அஜ்ஜ²த்தங் பச்சத்தங் வாயோ வாயோக³தங்
உபாதி³ன்னங், ஸெய்யதி²த³ங் – உத்³த⁴ங்க³மா வாதா, அதோ⁴க³மா வாதா, குச்சி²ஸயா
வாதா, கொட்டா²ஸயா [கொட்ட²ஸயா (ஸீ॰ பீ॰)] வாதா ,
அங்க³மங்கா³னுஸாரினோ வாதா, அஸ்ஸாஸோ பஸ்ஸாஸோ, இதி யங் வா பனஞ்ஞம்பி கிஞ்சி
அஜ்ஜ²த்தங் பச்சத்தங் வாயோ வாயோக³தங் உபாதி³ன்னங் – அயங் வுச்சதி, ராஹுல,
அஜ்ஜ²த்திகா வாயோதா⁴து. யா சேவ கோ² பன அஜ்ஜ²த்திகா வாயோதா⁴து யா ச பா³ஹிரா
வாயோதா⁴து வாயோதா⁴துரேவேஸா. தங் ‘நேதங் மம, நேஸோஹமஸ்மி , ந மேஸோ அத்தா’தி – ஏவமேதங் யதா²பூ⁴தங் ஸம்மப்பஞ்ஞாய த³ட்ட²ப்³ப³ங். ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா வாயோதா⁴துயா நிப்³பி³ந்த³தி, வாயோதா⁴துயா சித்தங் விராஜேதி.
118.
‘‘கதமா ச, ராஹுல, ஆகாஸதா⁴து? ஆகாஸதா⁴து ஸியா அஜ்ஜ²த்திகா, ஸியா பா³ஹிரா.
கதமா ச, ராஹுல, அஜ்ஜ²த்திகா ஆகாஸதா⁴து? யங் அஜ்ஜ²த்தங் பச்சத்தங் ஆகாஸங்
ஆகாஸக³தங் உபாதி³ன்னங், ஸெய்யதி²த³ங் – கண்ணச்சி²த்³த³ங் நாஸச்சி²த்³த³ங்
முக²த்³வாரங், யேன ச அஸிதபீதகா²யிதஸாயிதங் அஜ்ஜோ²ஹரதி, யத்த² ச
அஸிதபீதகா²யிதஸாயிதங் ஸந்திட்ட²தி, யேன ச அஸிதபீதகா²யிதஸாயிதங் அதோ⁴பா⁴க³ங்
[அதோ⁴பா⁴கா³ (ஸீ॰ ஸ்யா॰ கங்॰ பீ॰)] நிக்க²மதி,
யங் வா பனஞ்ஞம்பி கிஞ்சி அஜ்ஜ²த்தங் பச்சத்தங் ஆகாஸங் ஆகாஸக³தங், அக⁴ங்
அக⁴க³தங், விவரங் விவரக³தங், அஸம்பு²ட்ட²ங், மங்ஸலோஹிதேஹி உபாதி³ன்னங் [ஆகாஸக³தங் உபாதி³ன்னங் (ஸீ॰ பீ॰)]
– அயங் வுச்சதி, ராஹுல, அஜ்ஜ²த்திகா ஆகாஸதா⁴து. யா சேவ கோ² பன அஜ்ஜ²த்திகா
ஆகாஸதா⁴து யா ச பா³ஹிரா ஆகாஸதா⁴து ஆகாஸதா⁴துரேவேஸா. தங் ‘நேதங் மம,
நேஸோஹமஸ்மி, ந மேஸோ அத்தா’தி – ஏவமேதங் யதா²பூ⁴தங் ஸம்மப்பஞ்ஞாய
த³ட்ட²ப்³ப³ங். ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா ஆகாஸதா⁴துயா
சித்தங் நிப்³பி³ந்த³தி, ஆகாஸதா⁴துயா சித்தங் விராஜேதி.
119.
‘‘பத²வீஸமங், ராஹுல, பா⁴வனங் பா⁴வேஹி. பத²வீஸமஞ்ஹி தே, ராஹுல, பா⁴வனங்
பா⁴வயதோ உப்பன்னா மனாபாமனாபா ப²ஸ்ஸா சித்தங் ந பரியாதா³ய ட²ஸ்ஸந்தி.
ஸெய்யதா²பி, ராஹுல, பத²வியா ஸுசிம்பி நிக்கி²பந்தி, அஸுசிம்பி
நிக்கி²பந்தி, கூ³த²க³தம்பி நிக்கி²பந்தி, முத்தக³தம்பி நிக்கி²பந்தி,
கே²ளக³தம்பி நிக்கி²பந்தி, புப்³ப³க³தம்பி நிக்கி²பந்தி, லோஹிதக³தம்பி
நிக்கி²பந்தி, ந ச தேன பத²வீ அட்டீயதி வா ஹராயதி வா ஜிகு³ச்ச²தி வா; ஏவமேவ
கோ² த்வங், ராஹுல, பத²வீஸமங் பா⁴வனங் பா⁴வேஹி. பத²வீஸமஞ்ஹி தே, ராஹுல,
பா⁴வனங் பா⁴வயதோ உப்பன்னா மனாபாமனாபா ப²ஸ்ஸா சித்தங் ந பரியாதா³ய
ட²ஸ்ஸந்தி.
‘‘ஆபோஸமங், ராஹுல, பா⁴வனங் பா⁴வேஹி. ஆபோஸமஞ்ஹி தே,
ராஹுல, பா⁴வனங் பா⁴வயதோ உப்பன்னா மனாபாமனாபா ப²ஸ்ஸா சித்தங் ந பரியாதா³ய
ட²ஸ்ஸந்தி. ஸெய்யதா²பி, ராஹுல, ஆபஸ்மிங் ஸுசிம்பி
தோ⁴வந்தி, அஸுசிம்பி தோ⁴வந்தி, கூ³த²க³தம்பி தோ⁴வந்தி, முத்தக³தம்பி
தோ⁴வந்தி, கே²ளக³தம்பி தோ⁴வந்தி, புப்³ப³க³தம்பி தோ⁴வந்தி, லோஹிதக³தம்பி
தோ⁴வந்தி, ந ச தேன ஆபோ அட்டீயதி வா ஹராயதி வா ஜிகு³ச்ச²தி வா; ஏவமேவ கோ²
த்வங், ராஹுல, ஆபோஸமங் பா⁴வனங் பா⁴வேஹி. ஆபோஸமஞ்ஹி தே, ராஹுல, பா⁴வனங்
பா⁴வயதோ உப்பன்னா மனாபாமனாபா ப²ஸ்ஸா சித்தங் ந பரியாதா³ய ட²ஸ்ஸந்தி.
‘‘தேஜோஸமங், ராஹுல, பா⁴வனங் பா⁴வேஹி. தேஜோஸமஞ்ஹி தே,
ராஹுல, பா⁴வனங் பா⁴வயதோ உப்பன்னா மனாபாமனாபா ப²ஸ்ஸா சித்தங் ந பரியாதா³ய
ட²ஸ்ஸந்தி. ஸெய்யதா²பி, ராஹுல, தேஜோ ஸுசிம்பி த³ஹதி, அஸுசிம்பி த³ஹதி,
கூ³த²க³தம்பி த³ஹதி, முத்தக³தம்பி த³ஹதி, கே²ளக³தம்பி த³ஹதி,
புப்³ப³க³தம்பி த³ஹதி, லோஹிதக³தம்பி த³ஹதி, ந ச தேன தேஜோ அட்டீயதி வா
ஹராயதி வா ஜிகு³ச்ச²தி வா; ஏவமேவ கோ² த்வங், ராஹுல, தேஜோஸமங் பா⁴வனங்
பா⁴வேஹி. தேஜோஸமஞ்ஹி தே, ராஹுல, பா⁴வனங் பா⁴வயதோ உப்பன்னா மனாபாமனாபா
ப²ஸ்ஸா சித்தங் ந பரியாதா³ய ட²ஸ்ஸந்தி.
‘‘வாயோஸமங், ராஹுல, பா⁴வனங் பா⁴வேஹி. வாயோஸமஞ்ஹி தே,
ராஹுல, பா⁴வனங் பா⁴வயதோ உப்பன்னா மனாபாமனாபா ப²ஸ்ஸா சித்தங் ந பரியாதா³ய
ட²ஸ்ஸந்தி. ஸெய்யதா²பி, ராஹுல, வாயோ ஸுசிம்பி உபவாயதி, அஸுசிம்பி உபவாயதி,
கூ³த²க³தம்பி உபவாயதி, முத்தக³தம்பி உபவாயதி, கே²ளக³தம்பி உபவாயதி,
புப்³ப³க³தம்பி உபவாயதி, லோஹிதக³தம்பி உபவாயதி, ந ச தேன வாயோ அட்டீயதி வா
ஹராயதி வா ஜிகு³ச்ச²தி வா; ஏவமேவ கோ² த்வங், ராஹுல, வாயோஸமங் பா⁴வனங்
பா⁴வேஹி. வாயோஸமஞ்ஹி தே, ராஹுல, பா⁴வனங் பா⁴வயதோ உப்பன்னா மனாபாமனாபா
ப²ஸ்ஸா சித்தங் ந பரியாதா³ய ட²ஸ்ஸந்தி.
‘‘ஆகாஸஸமங், ராஹுல, பா⁴வனங் பா⁴வேஹி. ஆகாஸஸமஞ்ஹி தே,
ராஹுல, பா⁴வனங் பா⁴வயதோ உப்பன்னா மனாபாமனாபா ப²ஸ்ஸா சித்தங் ந பரியாதா³ய
ட²ஸ்ஸந்தி. ஸெய்யதா²பி, ராஹுல, ஆகாஸோ ந கத்த²சி பதிட்டி²தோ; ஏவமேவ கோ²
த்வங், ராஹுல, ஆகாஸஸமங் பா⁴வனங் பா⁴வேஹி. ஆகாஸஸமஞ்ஹி தே, ராஹுல, பா⁴வனங்
பா⁴வயதோ உப்பன்னா மனாபாமனாபா ப²ஸ்ஸா சித்தங் ந பரியாதா³ய ட²ஸ்ஸந்தி.
120. ‘‘மெத்தங், ராஹுல, பா⁴வனங் பா⁴வேஹி. மெத்தஞ்ஹி தே, ராஹுல, பா⁴வனங் பா⁴வயதோ யோ ப்³யாபாதோ³
ஸோ பஹீயிஸ்ஸதி. கருணங், ராஹுல, பா⁴வனங் பா⁴வேஹி. கருணஞ்ஹி தே, ராஹுல,
பா⁴வனங் பா⁴வயதோ யா விஹேஸா ஸா பஹீயிஸ்ஸதி. முதி³தங், ராஹுல, பா⁴வனங்
பா⁴வேஹி. முதி³தஞ்ஹி தே, ராஹுல, பா⁴வனங் பா⁴வயதோ யா அரதி ஸா பஹீயிஸ்ஸதி.
உபெக்க²ங் , ராஹுல, பா⁴வனங் பா⁴வேஹி. உபெக்க²ஞ்ஹி
தே, ராஹுல, பா⁴வனங் பா⁴வயதோ யோ படிகோ⁴ ஸோ பஹீயிஸ்ஸதி. அஸுப⁴ங், ராஹுல,
பா⁴வனங் பா⁴வேஹி. அஸுப⁴ஞ்ஹி தே, ராஹுல, பா⁴வனங் பா⁴வயதோ யோ ராகோ³ ஸோ
பஹீயிஸ்ஸதி. அனிச்சஸஞ்ஞங், ராஹுல, பா⁴வனங் பா⁴வேஹி. அனிச்சஸஞ்ஞஞ்ஹி தே, ராஹுல, பா⁴வனங் பா⁴வயதோ யோ அஸ்மிமானோ ஸோ பஹீயிஸ்ஸதி.
121.
‘‘ஆனாபானஸ்ஸதிங், ராஹுல, பா⁴வனங் பா⁴வேஹி. ஆனாபானஸ்ஸதி ஹி தே, ராஹுல,
பா⁴விதா ப³ஹுலீகதா மஹப்ப²லா ஹோதி மஹானிஸங்ஸா. கத²ங் பா⁴விதா ச, ராஹுல,
ஆனாபானஸ்ஸதி, கத²ங் ப³ஹுலீகதா மஹப்ப²லா ஹோதி மஹானிஸங்ஸா ?
இத⁴, ராஹுல, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா
நிஸீத³தி பல்லங்கங் ஆபு⁴ஜித்வா உஜுங் காயங் பணிதா⁴ய பரிமுக²ங் ஸதிங்
உபட்ட²பெத்வா. ஸோ ஸதோவ அஸ்ஸஸதி ஸதோவ [ஸதோ (ஸீ॰ ஸ்யா॰ கங்॰ பீ॰)] பஸ்ஸஸதி.
‘‘தீ³க⁴ங் வா அஸ்ஸஸந்தோ ‘தீ³க⁴ங் அஸ்ஸஸாமீ’தி பஜானாதி,
தீ³க⁴ங் வா பஸ்ஸஸந்தோ ‘தீ³க⁴ங் பஸ்ஸஸாமீ’தி பஜானாதி; ரஸ்ஸங் வா அஸ்ஸஸந்தோ
‘ரஸ்ஸங் அஸ்ஸஸாமீ’தி பஜானாதி, ரஸ்ஸங் வா பஸ்ஸஸந்தோ ‘ரஸ்ஸங் பஸ்ஸஸாமீ’தி
பஜானாதி. ‘ஸப்³ப³காயப்படிஸங்வேதீ³ அஸ்ஸஸிஸ்ஸாமீ’தி ஸிக்க²தி;
‘ஸப்³ப³காயப்படிஸங்வேதீ³ பஸ்ஸஸிஸ்ஸாமீ’தி ஸிக்க²தி; ‘பஸ்ஸம்ப⁴யங்
காயஸங்கா²ரங் அஸ்ஸஸிஸ்ஸாமீ’தி ஸிக்க²தி; ‘பஸ்ஸம்ப⁴யங் காயஸங்கா²ரங்
பஸ்ஸஸிஸ்ஸாமீ’தி ஸிக்க²தி.
‘‘‘பீதிப்படிஸங்வேதீ³ அஸ்ஸஸிஸ்ஸாமீ’தி ஸிக்க²தி;
‘பீதிப்படிஸங்வேதீ³ பஸ்ஸஸிஸ்ஸாமீ’தி ஸிக்க²தி; ‘ஸுக²ப்படிஸங்வேதீ³
அஸ்ஸஸிஸ்ஸாமீ’தி ஸிக்க²தி; ‘ஸுக²ப்படிஸங்வேதீ³ பஸ்ஸஸிஸ்ஸாமீ’தி ஸிக்க²தி;
‘சித்தஸங்கா²ரப்படிஸங்வேதீ³ அஸ்ஸஸிஸ்ஸாமீ’தி ஸிக்க²தி;
‘சித்தஸங்கா²ரப்படிஸங்வேதீ³ பஸ்ஸஸிஸ்ஸாமீ’தி ஸிக்க²தி; ‘பஸ்ஸம்ப⁴யங்
சித்தஸங்கா²ரங் அஸ்ஸஸிஸ்ஸாமீ’தி ஸிக்க²தி; ‘பஸ்ஸம்ப⁴யங் சித்தஸங்கா²ரங்
பஸ்ஸஸிஸ்ஸாமீ’தி ஸிக்க²தி.
‘‘‘சித்தப்படிஸங்வேதீ³ அஸ்ஸஸிஸ்ஸாமீ’தி ஸிக்க²தி; ‘சித்தப்படிஸங்வேதீ³ பஸ்ஸஸிஸ்ஸாமீ’தி ஸிக்க²தி ;
‘அபி⁴ப்பமோத³யங் சித்தங் அஸ்ஸஸிஸ்ஸாமீ’தி ஸிக்க²தி; ‘அபி⁴ப்பமோத³யங்
சித்தங் பஸ்ஸஸிஸ்ஸாமீ’தி ஸிக்க²தி; ‘ஸமாத³ஹங் சித்தங் அஸ்ஸஸிஸ்ஸாமீ’தி
ஸிக்க²தி; ‘ஸமாத³ஹங் சித்தங் பஸ்ஸஸிஸ்ஸாமீ’தி ஸிக்க²தி; ‘விமோசயங் சித்தங்
அஸ்ஸஸிஸ்ஸாமீ’தி ஸிக்க²தி; ‘விமோசயங் சித்தங் பஸ்ஸஸிஸ்ஸாமீ’தி ஸிக்க²தி.
‘‘‘அனிச்சானுபஸ்ஸீ அஸ்ஸஸிஸ்ஸாமீ’தி
ஸிக்க²தி; ‘அனிச்சானுபஸ்ஸீ பஸ்ஸஸிஸ்ஸாமீ’தி ஸிக்க²தி; ‘விராகா³னுபஸ்ஸீ
அஸ்ஸஸிஸ்ஸாமீ’தி ஸிக்க²தி; ‘விராகா³னுபஸ்ஸீ பஸ்ஸஸிஸ்ஸாமீ’தி ஸிக்க²தி;
‘நிரோதா⁴னுபஸ்ஸீ அஸ்ஸஸிஸ்ஸாமீ’தி ஸிக்க²தி; ‘நிரோதா⁴னுபஸ்ஸீ
பஸ்ஸஸிஸ்ஸாமீ’தி ஸிக்க²தி; ‘படினிஸ்ஸக்³கா³னுபஸ்ஸீ அஸ்ஸஸிஸ்ஸாமீ’தி
ஸிக்க²தி; ‘படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி ஸிக்க²தி.
‘‘ஏவங் பா⁴விதா கோ², ராஹுல, ஆனாபானஸ்ஸதி, ஏவங் ப³ஹுலீகதா மஹப்ப²லா ஹோதி மஹானிஸங்ஸா. ஏவங் பா⁴விதாய, ராஹுல, ஆனாபானஸ்ஸதியா, ஏவங் ப³ஹுலீகதாய யேபி தே சரிமகா அஸ்ஸாஸா தேபி விதி³தாவ நிருஜ்ஜ²ந்தி நோ அவிதி³தா’’தி.
இத³மவோச ப⁴க³வா. அத்தமனோ ஆயஸ்மா ராஹுலோ ப⁴க³வதோ பா⁴ஸிதங் அபி⁴னந்தீ³தி.
மஹாராஹுலோவாத³ஸுத்தங் நிட்டி²தங் து³தியங்.
3. சூளமாலுக்யஸுத்தங்
122. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மதோ மாலுக்யபுத்தஸ்ஸ [மாலுங்க்யபுத்தஸ்ஸ (ஸீ॰ ஸ்யா॰ கங்॰ பீ॰)]
ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘‘யானிமானி
தி³ட்டி²க³தானி ப⁴க³வதா அப்³யாகதானி ட²பிதானி படிக்கி²த்தானி – ‘ஸஸ்ஸதோ
லோகோ’திபி, ‘அஸஸ்ஸதோ லோகோ’திபி, ‘அந்தவா லோகோ’திபி, ‘அனந்தவா லோகோ’திபி,
‘தங் ஜீவங் தங் ஸரீர’ந்திபி, ‘அஞ்ஞங் ஜீவங் அஞ்ஞங் ஸரீர’ந்திபி, ‘ஹோதி
ததா²க³தோ பரங் மரணா’திபி, ‘ந ஹோதி ததா²க³தோ பரங் மரணா’திபி, ‘ஹோதி ச ந ச
ஹோதி ததா²க³தோ பரங் மரணா’திபி, ‘நேவ ஹோதி ந ந ஹோதி ததா²க³தோ பரங் மரணா’திபி
– தானி மே ப⁴க³வா ந ப்³யாகரோதி. யானி மே ப⁴க³வா ந ப்³யாகரோதி தங் மே ந
ருச்சதி, தங் மே நக்க²மதி. ஸோஹங் ப⁴க³வந்தங் உபஸங்கமித்வா ஏதமத்த²ங்
புச்சி²ஸ்ஸாமி. ஸசே மே ப⁴க³வா ப்³யாகரிஸ்ஸதி – ‘ஸஸ்ஸதோ லோகோ’தி வா ‘அஸஸ்ஸதோ
லோகோ’தி வா…பே॰… ‘நேவ ஹோதி ந ந ஹோதி ததா²க³தோ பரங் மரணா’தி வா – ஏவாஹங்
ப⁴க³வதி ப்³ரஹ்மசரியங் சரிஸ்ஸாமி; நோ சே மே ப⁴க³வா ப்³யாகரிஸ்ஸதி – ‘ஸஸ்ஸதோ லோகோ’தி வா ‘அஸஸ்ஸதோ லோகோ’தி வா…பே॰… ‘நேவ ஹோதி ந ந ஹோதி ததா²க³தோ பரங் மரணா’தி வா – ஏவாஹங் ஸிக்க²ங் பச்சக்கா²ய ஹீனாயாவத்திஸ்ஸாமீ’’தி.
123. அத²
கோ² ஆயஸ்மா மாலுக்யபுத்தோ ஸாயன்ஹஸமயங் படிஸல்லானா வுட்டி²தோ யேன ப⁴க³வா
தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³.
ஏகமந்தங் நிஸின்னோ கோ² ஆயஸ்மா மாலுக்யபுத்தோ ப⁴க³வந்தங் ஏதத³வோச –
124.
‘‘இத⁴ மய்ஹங், ப⁴ந்தே, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ
உத³பாதி³ – யானிமானி தி³ட்டி²க³தானி ப⁴க³வதா அப்³யாகதானி ட²பிதானி
படிக்கி²த்தானி – ‘ஸஸ்ஸதோ லோகோ’திபி, ‘அஸஸ்ஸதோ லோகோ’திபி…பே॰… ‘நேவ ஹோதி ந ந
ஹோதி ததா²க³தோ பரங் மரணா’திபி – தானி மே ப⁴க³வா ந ப்³யாகரோதி. யானி மே
ப⁴க³வா ந ப்³யாகரோதி தங் மே ந ருச்சதி, தங் மே
நக்க²மதி. ஸோஹங் ப⁴க³வந்தங் உபஸங்கமித்வா ஏதமத்த²ங் புச்சி²ஸ்ஸாமி. ஸசே மே
ப⁴க³வா ப்³யாகரிஸ்ஸதி – ‘ஸஸ்ஸதோ லோகோ’தி வா, ‘அஸஸ்ஸதோ லோகோ’தி வா…பே॰…
‘நேவ ஹோதி ந ந ஹோதி ததா²க³தோ பரங் மரணா’தி வா – ஏவாஹங் ப⁴க³வதி,
ப்³ரஹ்மசரியங் சரிஸ்ஸாமி. நோ சே மே ப⁴க³வா ப்³யாகரிஸ்ஸதி – ‘ஸஸ்ஸதோ லோகோ’தி
வா, ‘அஸஸ்ஸதோ லோகோ’தி வா…பே॰… ‘நேவ ஹோதி ந ந ஹோதி ததா²க³தோ பரங் மரணா’தி
வா – ஏவாஹங் ஸிக்க²ங் பச்சக்கா²ய ஹீனாயாவத்திஸ்ஸாமீதி. ஸசே ப⁴க³வா ஜானாதி –
‘ஸஸ்ஸதோ லோகோ’தி, ‘ஸஸ்ஸதோ லோகோ’தி மே ப⁴க³வா ப்³யாகரோது; ஸசே ப⁴க³வா
ஜானாதி – ‘அஸஸ்ஸதோ லோகோ’தி, ‘அஸஸ்ஸதோ லோகோ’தி மே ப⁴க³வா ப்³யாகரோது. நோ சே
ப⁴க³வா ஜானாதி – ‘ஸஸ்ஸதோ லோகோ’தி வா, ‘அஸஸ்ஸதோ லோகோ’தி வா, அஜானதோ கோ² பன
அபஸ்ஸதோ ஏததே³வ உஜுகங் ஹோதி யதி³த³ங் – ‘ந ஜானாமி, ந பஸ்ஸாமீ’தி. ஸசே
ப⁴க³வா ஜானாதி – ‘அந்தவா லோகோ’தி, ‘அனந்தவா லோகோ’தி மே ப⁴க³வா ப்³யாகரோது;
ஸசே ப⁴க³வா ஜானாதி – ‘அனந்தவா லோகோ’தி, ‘அனந்தவா லோகோ’தி மே ப⁴க³வா
ப்³யாகரோது. நோ சே ப⁴க³வா ஜானாதி – ‘அந்தவா லோகோ’தி வா, ‘அனந்தவா லோகோ’தி
வா, அஜானதோ கோ² பன அபஸ்ஸதோ ஏததே³வ உஜுகங் ஹோதி
யதி³த³ங் – ‘ந ஜானாமி, ந பஸ்ஸாமீ’தி. ஸசே ப⁴க³வா ஜானாதி – ‘தங் ஜீவங் தங்
ஸரீர’ந்தி, ‘தங் ஜீவங் தங் ஸரீர’ந்தி மே ப⁴க³வா ப்³யாகரோது; ஸசே ப⁴க³வா
ஜானாதி – ‘அஞ்ஞங் ஜீவங் அஞ்ஞங் ஸரீர’ந்தி, ‘அஞ்ஞங் ஜீவங் அஞ்ஞங் ஸரீர’ந்தி
மே ப⁴க³வா ப்³யாகரோது. நோ சே ப⁴க³வா ஜானாதி – ‘தங் ஜீவங் தங் ஸரீர’ந்தி வா,
‘அஞ்ஞங் ஜீவங் அஞ்ஞங் ஸரீர’ந்தி வா, அஜானதோ கோ² பன அபஸ்ஸதோ ஏததே³வ உஜுகங்
ஹோதி யதி³த³ங் – ‘ந ஜானாமி, ந பஸ்ஸாமீ’தி. ஸசே ப⁴க³வா ஜானாதி – ‘ஹோதி ததா²க³தோ பரங் மரணா’தி, ‘ஹோதி ததா²க³தோ பரங் மரணா’தி மே ப⁴க³வா
ப்³யாகரோது; ஸசே ப⁴க³வா ஜானாதி – ‘ந ஹோதி ததா²க³தோ பரங் மரணா’தி, ‘ந ஹோதி
ததா²க³தோ பரங் மரணா’தி மே ப⁴க³வா ப்³யாகரோது. நோ சே ப⁴க³வா ஜானாதி – ‘ஹோதி
ததா²க³தோ பரங் மரணா’தி வா, ‘ந ஹோதி ததா²க³தோ பரங் மரணா’தி வா, அஜானதோ கோ²
பன அபஸ்ஸதோ ஏததே³வ உஜுகங் ஹோதி யதி³த³ங் – ‘ந ஜானாமி ந பஸ்ஸாமீ’தி. ஸசே
ப⁴க³வா ஜானாதி – ‘ஹோதி ச ந ச ஹோதி ததா²க³தோ பரங் மரணா’தி, ‘ஹோதி ச ந ச ஹோதி
ததா²க³தோ பரங் மரணா’தி மே ப⁴க³வா ப்³யாகரோது; ஸசே ப⁴க³வா ஜானாதி – ‘நேவ
ஹோதி ந ந ஹோதி ததா²க³தோ பரங் மரணா’தி, ‘நேவ ஹோதி ந ந ஹோதி ததா²க³தோ பரங்
மரணா’தி மே ப⁴க³வா ப்³யாகரோது. நோ சே ப⁴க³வா ஜானாதி – ‘ஹோதி ச ந ச ஹோதி
ததா²க³தோ பரங் மரணா’தி வா, ‘நேவ ஹோதி ந ந ஹோதி ததா²க³தோ பரங் மரணா’தி வா, அஜானதோ கோ² பன அபஸ்ஸதோ ஏததே³வ உஜுகங் ஹோதி யதி³த³ங் – ‘ந ஜானாமி, ந பஸ்ஸாமீ’’’தி.
125. ‘‘கிங் நு [கிங் நு கோ² (ஸ்யா॰ கங்॰ க॰)]
தாஹங், மாலுக்யபுத்த, ஏவங் அவசங் – ‘ஏஹி த்வங், மாலுக்யபுத்த, மயி
ப்³ரஹ்மசரியங் சர, அஹங் தே ப்³யாகரிஸ்ஸாமி – ‘ஸஸ்ஸதோ லோகோ’தி வா, ‘அஸஸ்ஸதோ
லோகோ’தி வா, ‘அந்தவா லோகோ’தி வா, ‘அனந்தவா லோகோ’தி வா, ‘தங் ஜீவங் தங்
ஸரீர’ந்தி வா, ‘அஞ்ஞங் ஜீவங் அஞ்ஞங் ஸரீர’ந்தி வா, ‘ஹோதி ததா²க³தோ பரங்
மரணா’தி வா, ‘ந ஹோதி ததா²க³தோ பரங் மரணா’தி வா,
‘ஹோதி ச ந ச ஹோதி ததா²க³தோ பரங் மரணா’தி வா, ‘நேவ ஹோதி ந ந ஹோதி ததா²க³தோ
பரங் மரணா’தி வா’’தி? ‘‘நோ ஹேதங், ப⁴ந்தே’’. ‘‘த்வங் வா பன மங் ஏவங் அவச –
அஹங், ப⁴ந்தே, ப⁴க³வதி ப்³ரஹ்மசரியங் சரிஸ்ஸாமி ,
ப⁴க³வா மே ப்³யாகரிஸ்ஸதி – ‘ஸஸ்ஸதோ லோகோ’தி வா, ‘அஸஸ்ஸதோ லோகோ’தி வா,
‘அந்தவா லோகோ’தி வா, ‘அனந்தவா லோகோ’தி வா, ‘தங் ஜீவங் தங் ஸரீர’ந்தி வா,
‘அஞ்ஞங் ஜீவங் அஞ்ஞங் ஸரீர’ந்தி வா, ‘ஹோதி ததா²க³தோ பரங் மரணா’தி வா, ‘ந
ஹோதி ததா²க³தோ பரங் மரணா’தி வா, ‘ஹோதி ச ந ச ஹோதி ததா²க³தோ பரங் மரணா’தி
வா, ‘நேவ ஹோதி ந ந ஹோதி ததா²க³தோ பரங் மரணா’தி வா’’தி? ‘‘நோ ஹேதங்,
ப⁴ந்தே’’. ‘‘இதி கிர, மாலுக்யபுத்த, நேவாஹங் தங் வதா³மி – ஏஹி த்வங்,
மாலுக்யபுத்த, மயி ப்³ரஹ்மசரியங் சர, அஹங் தே ப்³யாகரிஸ்ஸாமி – ‘ஸஸ்ஸதோ
லோகோ’தி வா, ‘அஸஸ்ஸதோ லோகோ’தி வா…பே॰… ‘நேவ ஹோதி ந ந ஹோதி ததா²க³தோ பரங்
மரணாதி வா’தி; நபி கிர மங் த்வங் வதே³ஸி – அஹங், ப⁴ந்தே, ப⁴க³வதி
ப்³ரஹ்மசரியங் சரிஸ்ஸாமி, ப⁴க³வா மே ப்³யாகரிஸ்ஸதி – ‘ஸஸ்ஸதோ லோகோ’தி வா
‘அஸஸ்ஸதோ லோகோ’தி வா…பே॰… ‘நேவ ஹோதி ந ந ஹோதி ததா²க³தோ பரங் மரணா’தி
வா’’தி. ஏவங் ஸந்தே, மோக⁴புரிஸ, கோ ஸந்தோ கங் பச்சாசிக்க²ஸி?
126.
‘‘யோ கோ², மாலுக்யபுத்த, ஏவங் வதெ³ய்ய – ‘ந தாவாஹங் ப⁴க³வதி ப்³ரஹ்மசரியங்
சரிஸ்ஸாமி யாவ மே ப⁴க³வா ந ப்³யாகரிஸ்ஸதி – ‘‘ஸஸ்ஸதோ லோகோ’’தி வா,
‘‘அஸஸ்ஸதோ லோகோ’’தி வா…பே॰… ‘‘நேவ ஹோதி ந ந ஹோதி ததா²க³தோ பரங் மரணா’’தி வாதி, அப்³யாகதமேவ
தங், மாலுக்யபுத்த, ததா²க³தேன அஸ்ஸ, அத² ஸோ புக்³க³லோ காலங் கரெய்ய.
ஸெய்யதா²பி, மாலுக்யபுத்த, புரிஸோ ஸல்லேன வித்³தோ⁴ அஸ்ஸ ஸவிஸேன
கா³ள்ஹபலேபனேன. தஸ்ஸ மித்தாமச்சா ஞாதிஸாலோஹிதா பி⁴ஸக்கங் ஸல்லகத்தங்
உபட்ட²பெய்யுங். ஸோ ஏவங் வதெ³ய்ய – ‘ந தாவாஹங் இமங்
ஸல்லங் ஆஹரிஸ்ஸாமி யாவ ந தங் புரிஸங் ஜானாமி யேனம்ஹி வித்³தோ⁴, க²த்தியோ
வா ப்³ராஹ்மணோ வா வெஸ்ஸோ வா ஸுத்³தோ³ வா’தி; ஸோ ஏவங் வதெ³ய்ய – ‘ந தாவாஹங்
இமங் ஸல்லங் ஆஹரிஸ்ஸாமி யாவ ந தங் புரிஸங் ஜானாமி யேனம்ஹி வித்³தோ⁴,
ஏவங்னாமோ ஏவங்கொ³த்தோ இதி வா’தி; ஸோ ஏவங் வதெ³ய்ய – ‘ந தாவாஹங் இமங் ஸல்லங்
ஆஹரிஸ்ஸாமி யாவ ந தங் புரிஸங் ஜானாமி யேனம்ஹி வித்³தோ⁴, தீ³கோ⁴ வா ரஸ்ஸோ
வா மஜ்ஜி²மோ வா’தி; ஸோ ஏவங் வதெ³ய்ய – ‘ந தாவாஹங் இமங் ஸல்லங் ஆஹரிஸ்ஸாமி
யாவ ந தங் புரிஸங் ஜானாமி யேனம்ஹி வித்³தோ⁴, காளோ வா ஸாமோ வா மங்கு³ரச்ச²வீ
வா’தி; ஸோ ஏவங் வதெ³ய்ய – ‘ந தாவாஹங் இமங் ஸல்லங் ஆஹரிஸ்ஸாமி யாவ ந தங்
புரிஸங் ஜானாமி யேனம்ஹி வித்³தோ⁴, அமுகஸ்மிங் கா³மே
வா நிக³மே வா நக³ரே வா’தி; ஸோ ஏவங் வதெ³ய்ய – ‘ந தாவாஹங் இமங் ஸல்லங்
ஆஹரிஸ்ஸாமி யாவ ந தங் த⁴னுங் ஜானாமி யேனம்ஹி வித்³தோ⁴, யதி³ வா சாபோ யதி³
வா கோத³ண்டோ³’தி; ஸோ ஏவங் வதெ³ய்ய – ‘ந தாவாஹங் இமங் ஸல்லங் ஆஹரிஸ்ஸாமி யாவ
ந தங் ஜியங் ஜானாமி யாயம்ஹி வித்³தோ⁴ , யதி³ வா அக்கஸ்ஸ யதி³ வா ஸண்ஹஸ்ஸ [ஸண்ட²ஸ்ஸ (ஸீ॰ ஸ்யா॰ கங்॰ பீ॰)]
யதி³ வா ந்ஹாருஸ்ஸ யதி³ வா மருவாய யதி³ வா கீ²ரபண்ணினோ’தி; ஸோ ஏவங்
வதெ³ய்ய – ‘ந தாவாஹங் இமங் ஸல்லங் ஆஹரிஸ்ஸாமி யாவ ந தங் கண்ட³ங் ஜானாமி
யேனம்ஹி வித்³தோ⁴, யதி³ வா க³ச்ச²ங் யதி³ வா ரோபிம’ந்தி; ஸோ ஏவங் வதெ³ய்ய –
‘ந தாவாஹங் இமங் ஸல்லங் ஆஹரிஸ்ஸாமி யாவ ந தங் கண்ட³ங் ஜானாமி யேனம்ஹி
வித்³தோ⁴, யஸ்ஸ பத்தேஹி வாஜிதங் [வாகி²த்தங் (க॰)]
யதி³ வா கி³ஜ்ஜ²ஸ்ஸ யதி³ வா கங்கஸ்ஸ யதி³ வா குலலஸ்ஸ யதி³ வா மோரஸ்ஸ யதி³
வா ஸிதி²லஹனுனோ’தி; ஸோ ஏவங் வதெ³ய்ய – ‘ந தாவாஹங் இமங் ஸல்லங் ஆஹரிஸ்ஸாமி
யாவ ந தங் கண்ட³ங் ஜானாமி யேனம்ஹி வித்³தோ⁴, யஸ்ஸ ந்ஹாருனா பரிக்கி²த்தங்
யதி³ வா க³வஸ்ஸ யதி³ வா மஹிங்ஸஸ்ஸ யதி³ வா பே⁴ரவஸ்ஸ [ரோருவஸ்ஸ (ஸீ॰ ஸ்யா॰ கங்॰ பீ॰)]
யதி³ வா ஸெம்ஹாரஸ்ஸா’தி; ஸோ ஏவங் வதெ³ய்ய – ‘ந தாவாஹங் இமங் ஸல்லங்
ஆஹரிஸ்ஸாமி யாவ ந தங் ஸல்லங் ஜானாமி யேனம்ஹி வித்³தோ⁴, யதி³ வா ஸல்லங் யதி³
வா கு²ரப்பங் யதி³ வா வேகண்ட³ங் யதி³ வா நாராசங் யதி³ வா வச்ச²த³ந்தங்
யதி³ வா கரவீரபத்த’ந்தி – அஞ்ஞாதமேவ தங்,
மாலுக்யபுத்த, தேன புரிஸேன அஸ்ஸ, அத² ஸோ புரிஸோ காலங் கரெய்ய. ஏவமேவ கோ²,
மாலுக்யபுத்த, யோ ஏவங் வதெ³ய்ய – ‘ந தாவாஹங் ப⁴க³வதி ப்³ரஹ்மசரியங்
சரிஸ்ஸாமி யாவ மே ப⁴க³வா ந ப்³யாகரிஸ்ஸதி – ‘‘ஸஸ்ஸதோ லோகோ’’தி வா ‘‘அஸஸ்ஸதோ
லோகோ’’தி வா…பே॰… ‘‘நேவ ஹோதி ந ந ஹோதி ததா²க³தோ
பரங் மரணா’’தி வாதி – அப்³யாகதமேவ தங், மாலுக்யபுத்த, ததா²க³தேன அஸ்ஸ, அத²
ஸோ புக்³க³லோ காலங்கரெய்ய.
127. ‘‘‘ஸஸ்ஸதோ லோகோ’தி, மாலுக்யபுத்த, தி³ட்டி²யா ஸதி ப்³ரஹ்மசரியவாஸோ அப⁴விஸ்ஸாதி ,
ஏவங் ‘நோ அஸஸ்ஸதோ லோகோ’தி, மாலுக்யபுத்த, தி³ட்டி²யா ஸதி ப்³ரஹ்மசரியவாஸோ
அப⁴விஸ்ஸாதி, ஏவம்பி ‘நோ ஸஸ்ஸதோ லோகோ’தி வா, மாலுக்யபுத்த, தி³ட்டி²யா ஸதி,
‘அஸஸ்ஸதோ லோகோ’தி வா தி³ட்டி²யா ஸதி அத்தே²வ ஜாதி, அத்தி² ஜரா, அத்தி²
மரணங், ஸந்தி ஸோகபரிதே³வது³க்க²தோ³மனஸ்ஸுபாயாஸா; யேஸாஹங் தி³ட்டே²வ த⁴ம்மே
நிகா⁴தங் பஞ்ஞபேமி . ‘அந்தவா லோகோ’தி, மாலுக்யபுத்த,
தி³ட்டி²யா ஸதி ப்³ரஹ்மசரியவாஸோ அப⁴விஸ்ஸாதி, ஏவங் ‘நோ அனந்தவா லோகோ’தி,
மாலுக்யபுத்த, தி³ட்டி²யா ஸதி ப்³ரஹ்மசரியவாஸோ அப⁴விஸ்ஸாதி, ஏவம்பி ‘நோ
அந்தவா லோகோ’தி வா, மாலுக்யபுத்த, தி³ட்டி²யா ஸதி, ‘அனந்தவா லோகோ’தி வா
தி³ட்டி²யா ஸதி அத்தே²வ ஜாதி, அத்தி² ஜரா, அத்தி² மரணங், ஸந்தி
ஸோகபரிதே³வது³க்க²தோ³மனஸ்ஸுபாயாஸா; யேஸாஹங் தி³ட்டே²வ த⁴ம்மே நிகா⁴தங்
பஞ்ஞபேமி. ‘தங் ஜீவங் தங் ஸரீர’ந்தி, மாலுக்யபுத்த, தி³ட்டி²யா ஸதி
ப்³ரஹ்மசரியவாஸோ அப⁴விஸ்ஸாதி, ஏவங் ‘நோ அஞ்ஞங்
ஜீவங் அஞ்ஞங் ஸரீர’ந்தி, மாலுக்யபுத்த, தி³ட்டி²யா ஸதி ப்³ரஹ்மசரியவாஸோ
அப⁴விஸ்ஸாதி, ஏவம்பி ‘நோ தங் ஜீவங் தங் ஸரீர’ந்தி வா, மாலுக்யபுத்த,
தி³ட்டி²யா ஸதி, ‘அஞ்ஞங் ஜீவங் அஞ்ஞங் ஸரீர’ந்தி வா தி³ட்டி²யா ஸதி அத்தே²வ
ஜாதி…பே॰… நிகா⁴தங் பஞ்ஞபேமி. ‘ஹோதி ததா²க³தோ பரங் மரணா’தி, மாலுக்யபுத்த,
தி³ட்டி²யா ஸதி ப்³ரஹ்மசரியவாஸோ அப⁴விஸ்ஸாதி, ஏவங் ‘நோ ந ஹோதி ததா²க³தோ
பரங் மரணா’தி, மாலுக்யபுத்த, தி³ட்டி²யா ஸதி ப்³ரஹ்மசரியவாஸோ அப⁴விஸ்ஸாதி,
ஏவம்பி ‘நோ ஹோதி ததா²க³தோ பரங் மரணா’தி வா, மாலுக்யபுத்த, தி³ட்டி²யா ஸதி,
‘ந ஹோதி ததா²க³தோ பரங் மரணா’தி வா தி³ட்டி²யா ஸதி அத்தே²வ ஜாதி…பே॰…
யேஸாஹங் தி³ட்டே²வ த⁴ம்மே நிகா⁴தங் பஞ்ஞபேமி. ‘ஹோதி ச ந ச ஹோதி ததா²க³தோ
பரங் மரணா’தி, மாலுக்யபுத்த, தி³ட்டி²யா ஸதி ப்³ரஹ்மசரியவாஸோ அப⁴விஸ்ஸாதி,
ஏவங் ‘நோ நேவ ஹோதி ந ந ஹோதி ததா²க³தோ பரங் மரணா’தி, மாலுக்யபுத்த,
தி³ட்டி²யா ஸதி ப்³ரஹ்மசரியவாஸோ அப⁴விஸ்ஸாதி, ஏவம்பி ‘நோ ஹோதி ச ந ச ஹோதி
ததா²க³தோ பரங் மரணா’தி, மாலுக்யபுத்த, தி³ட்டி²யா ஸதி, ‘நேவ ஹோதி ந ந ஹோதி
ததா²க³தோ பரங் மரணா’தி வா தி³ட்டி²யா ஸதி அத்தே²வ ஜாதி…பே॰… யேஸாஹங்
தி³ட்டே²வ த⁴ம்மே நிகா⁴தங் பஞ்ஞபேமி.
128. ‘‘தஸ்மாதிஹ, மாலுக்யபுத்த, அப்³யாகதஞ்ச மே அப்³யாகததோ
தா⁴ரேத²; ப்³யாகதஞ்ச மே ப்³யாகததோ தா⁴ரேத². கிஞ்ச, மாலுக்யபுத்த, மயா
அப்³யாகதங்? ‘ஸஸ்ஸதோ லோகோ’தி மாலுக்யபுத்த, மயா அப்³யாகதங்; ‘அஸஸ்ஸதோ
லோகோ’தி – மயா அப்³யாகதங்; ‘அந்தவா லோகோ’தி – மயா அப்³யாகதங்; ‘அனந்தவா
லோகோ’தி – மயா அப்³யாகதங்; ‘தங் ஜீவங் தங் ஸரீர’ந்தி
– மயா அப்³யாகதங்; ‘அஞ்ஞங் ஜீவங் அஞ்ஞங் ஸரீர’ந்தி – மயா அப்³யாகதங்;
‘ஹோதி ததா²க³தோ பரங் மரணா’தி – மயா அப்³யாகதங்; ‘ந ஹோதி ததா²க³தோ பரங்
மரணா’தி – மயா அப்³யாகதங்; ‘ஹோதி ச ந ச ஹோதி ததா²க³தோ பரங் மரணா’தி – மயா
அப்³யாகதங்; ‘நேவ ஹோதி ந ந ஹோதி ததா²க³தோ பரங் மரணா’தி – மயா அப்³யாகதங்.
கஸ்மா சேதங், மாலுக்யபுத்த, மயா அப்³யாகதங்? ந ஹேதங், மாலுக்யபுத்த,
அத்த²ஸங்ஹிதங் ந ஆதி³ப்³ரஹ்மசரியகங் ந [நேதங் (ஸீ॰)]
நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந
நிப்³பா³னாய ஸங்வத்ததி. தஸ்மா தங் மயா அப்³யாகதங். கிஞ்ச, மாலுக்யபுத்த,
மயா ப்³யாகதங்? ‘இத³ங் து³க்க²’ந்தி, மாலுக்யபுத்த, மயா ப்³யாகதங்; ‘அயங்
து³க்க²ஸமுத³யோ’தி – மயா ப்³யாகதங்; ‘அயங் து³க்க²னிரோதோ⁴’தி – மயா
ப்³யாகதங்; ‘அயங் து³க்க²னிரோத⁴கா³மினீ படிபதா³’தி – மயா ப்³யாகதங். கஸ்மா
சேதங், மாலுக்யபுத்த, மயா ப்³யாகதங்? ஏதஞ்ஹி, மாலுக்யபுத்த, அத்த²ஸங்ஹிதங்
ஏதங் ஆதி³ப்³ரஹ்மசரியகங் நிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய
ஸம்போ³தா⁴ய நிப்³பா³னாய ஸங்வத்ததி. தஸ்மா தங் மயா ப்³யாகதங். தஸ்மாதிஹ,
மாலுக்யபுத்த , அப்³யாகதஞ்ச மே அப்³யாகததோ தா⁴ரேத²; ப்³யாகதஞ்ச மே ப்³யாகததோ தா⁴ரேதா²’’தி.
இத³மவோச ப⁴க³வா. அத்தமனோ ஆயஸ்மா மாலுக்யபுத்தோ ப⁴க³வதோ பா⁴ஸிதங் அபி⁴னந்தீ³தி.
சூளமாலுக்யஸுத்தங் நிட்டி²தங் ததியங்.
4. மஹாமாலுக்யஸுத்தங்
129. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘தா⁴ரேத² நோ தும்ஹே, பி⁴க்க²வே, மயா தே³ஸிதானி பஞ்சோரம்பா⁴கி³யானி
ஸங்யோஜனானீ’’தி?
ஏவங் வுத்தே, ஆயஸ்மா மாலுக்யபுத்தோ ப⁴க³வந்தங் ஏதத³வோச
– ‘‘அஹங் கோ², ப⁴ந்தே, தா⁴ரேமி ப⁴க³வதா தே³ஸிதானி பஞ்சோரம்பா⁴கி³யானி
ஸங்யோஜனானீ’’தி. ‘‘யதா² கத²ங் பன த்வங், மாலுக்யபுத்த, தா⁴ரேஸி மயா
தே³ஸிதானி பஞ்சோரம்பா⁴கி³யானி ஸங்யோஜனானீ’’தி? ‘‘ஸக்காயதி³ட்டி²ங் கோ²
அஹங், ப⁴ந்தே, ப⁴க³வதா ஓரம்பா⁴கி³யங் ஸங்யோஜனங்
தே³ஸிதங் தா⁴ரேமி; விசிகிச்ச²ங் கோ² அஹங், ப⁴ந்தே, ப⁴க³வதா ஓரம்பா⁴கி³யங்
ஸங்யோஜனங் தே³ஸிதங் தா⁴ரேமி; ஸீலப்³ப³தபராமாஸங் கோ² அஹங், ப⁴ந்தே, ப⁴க³வதா
ஓரம்பா⁴கி³யங் ஸங்யோஜனங் தே³ஸிதங் தா⁴ரேமி; காமச்ச²ந்த³ங் கோ² அஹங்,
ப⁴ந்தே, ப⁴க³வதா ஓரம்பா⁴கி³யங் ஸங்யோஜனங் தே³ஸிதங் தா⁴ரேமி; ப்³யாபாத³ங்
கோ² அஹங், ப⁴ந்தே, ப⁴க³வதா ஓரம்பா⁴கி³யங் ஸங்யோஜனங் தே³ஸிதங் தா⁴ரேமி. ஏவங்
கோ² அஹங், ப⁴ந்தே, தா⁴ரேமி ப⁴க³வதா தே³ஸிதானி பஞ்சோரம்பா⁴கி³யானி
ஸங்யோஜனானீ’’தி.
‘‘கஸ்ஸ கோ² நாம த்வங், மாலுக்யபுத்த, இமானி ஏவங் பஞ்சோரம்பா⁴கி³யானி ஸங்யோஜனானி தே³ஸிதானி தா⁴ரேஸி? நனு, மாலுக்யபுத்த ,
அஞ்ஞதித்தி²யா பரிப்³பா³ஜகா இமினா தருணூபமேன உபாரம்பே⁴ன உபாரம்பி⁴ஸ்ஸந்தி?
த³ஹரஸ்ஸ ஹி, மாலுக்யபுத்த, குமாரஸ்ஸ மந்த³ஸ்ஸ உத்தானஸெய்யகஸ்ஸ ஸக்காயோதிபி
ந ஹோதி, குதோ பனஸ்ஸ உப்பஜ்ஜிஸ்ஸதி ஸக்காயதி³ட்டி²? அனுஸெத்வேவஸ்ஸ [அனுஸேதி த்வேவஸ்ஸ (ஸீ॰ பீ॰)]
ஸக்காயதி³ட்டா²னுஸயோ. த³ஹரஸ்ஸ ஹி, மாலுக்யபுத்த, குமாரஸ்ஸ மந்த³ஸ்ஸ
உத்தானஸெய்யகஸ்ஸ த⁴ம்மாதிபி ந ஹோதி, குதோ பனஸ்ஸ உப்பஜ்ஜிஸ்ஸதி த⁴ம்மேஸு
விசிகிச்சா²? அனுஸெத்வேவஸ்ஸ விசிகிச்சா²னுஸயோ. த³ஹரஸ்ஸ ஹி, மாலுக்யபுத்த,
குமாரஸ்ஸ மந்த³ஸ்ஸ உத்தானஸெய்யகஸ்ஸ ஸீலாதிபி ந ஹோதி, குதோ பனஸ்ஸ
உப்பஜ்ஜிஸ்ஸதி ஸீலேஸு ஸீலப்³ப³தபராமாஸோ? அனுஸெத்வேவஸ்ஸ
ஸீலப்³ப³தபராமாஸானுஸயோ . த³ஹரஸ்ஸ ஹி, மாலுக்யபுத்த,
குமாரஸ்ஸ மந்த³ஸ்ஸ உத்தானஸெய்யகஸ்ஸ காமாதிபி ந ஹோதி, குதோ பனஸ்ஸ
உப்பஜ்ஜிஸ்ஸதி காமேஸு காமச்ச²ந்தோ³? அனுஸெத்வேவஸ்ஸ காமராகா³னுஸயோ. த³ஹரஸ்ஸ
ஹி, மாலுக்யபுத்த, குமாரஸ்ஸ மந்த³ஸ்ஸ உத்தானஸெய்யகஸ்ஸ ஸத்தாதிபி ந ஹோதி,
குதோ பனஸ்ஸ உப்பஜ்ஜிஸ்ஸதி ஸத்தேஸு ப்³யாபாதோ³? அனுஸெத்வேவஸ்ஸ
ப்³யாபாதா³னுஸயோ. நனு, மாலுக்யபுத்த, அஞ்ஞதித்தி²யா பரிப்³பா³ஜகா இமினா
தருணூபமேன உபாரம்பே⁴ன உபாரம்பி⁴ஸ்ஸந்தீ’’தி? ஏவங் வுத்தே, ஆயஸ்மா ஆனந்தோ³
ப⁴க³வந்தங் ஏதத³வோச – ‘‘ஏதஸ்ஸ, ப⁴க³வா, காலோ, ஏதஸ்ஸ, ஸுக³த, காலோ யங்
ப⁴க³வா பஞ்சோரம்பா⁴கி³யானி ஸங்யோஜனானி தே³ஸெய்ய. ப⁴க³வதோ ஸுத்வா பி⁴க்கூ²
தா⁴ரெஸ்ஸந்தீ’’தி. ‘‘தேன ஹானந்த³, ஸுணாஹி, ஸாது⁴கங் மனஸி கரோஹி;
பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ பச்சஸ்ஸோஸி. ப⁴க³வா ஏதத³வோச –
130. ‘‘இதா⁴னந்த³ ,
அஸ்ஸுதவா புது²ஜ்ஜனோ அரியானங் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே
அவினீதோ, ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³
ஸப்புரிஸத⁴ம்மே அவினீதோ ஸக்காயதி³ட்டி²பரியுட்டி²தேன சேதஸா விஹரதி
ஸக்காயதி³ட்டி²பரேதேன; உப்பன்னாய ச ஸக்காயதி³ட்டி²யா நிஸ்ஸரணங் யதா²பூ⁴தங்
நப்பஜானாதி. தஸ்ஸ ஸா ஸக்காயதி³ட்டி² தா²மக³தா அப்படிவினீதா ஓரம்பா⁴கி³யங்
ஸங்யோஜனங். விசிகிச்சா²பரியுட்டி²தேன சேதஸா விஹரதி விசிகிச்சா²பரேதேன;
உப்பன்னாய ச விசிகிச்சா²ய நிஸ்ஸரணங் யதா²பூ⁴தங் நப்பஜானாதி. தஸ்ஸ ஸா
விசிகிச்சா² தா²மக³தா அப்படிவினீதா ஓரம்பா⁴கி³யங் ஸங்யோஜனங்.
ஸீலப்³ப³தபராமாஸபரியுட்டி²தேன சேதஸா விஹரதி ஸீலப்³ப³தபராமாஸபரேதேன;
உப்பன்னஸ்ஸ ச ஸீலப்³ப³தபராமாஸஸ்ஸ நிஸ்ஸரணங் யதா²பூ⁴தங் நப்பஜானாதி. தஸ்ஸ ஸோ
ஸீலப்³ப³தபராமாஸோ தா²மக³தோ அப்படிவினீதோ ஓரம்பா⁴கி³யங் ஸங்யோஜனங்.
காமராக³பரியுட்டி²தேன சேதஸா விஹரதி காமராக³பரேதேன ;
உப்பன்னஸ்ஸ ச காமராக³ஸ்ஸ நிஸ்ஸரணங் யதா²பூ⁴தங் நப்பஜானாதி. தஸ்ஸ ஸோ
காமராகோ³ தா²மக³தோ அப்படிவினீதோ ஓரம்பா⁴கி³யங் ஸங்யோஜனங்.
ப்³யாபாத³பரியுட்டி²தேன சேதஸா விஹரதி ப்³யாபாத³பரேதேன; உப்பன்னஸ்ஸ ச
ப்³யாபாத³ஸ்ஸ நிஸ்ஸரணங் யதா²பூ⁴தங் நப்பஜானாதி. தஸ்ஸ ஸோ ப்³யாபாதோ³
தா²மக³தோ அப்படிவினீதோ ஓரம்பா⁴கி³யங் ஸங்யோஜனங்.
131. ‘‘ஸுதவா ச கோ², ஆனந்த³, அரியஸாவகோ அரியானங் த³ஸ்ஸாவீ அரியத⁴ம்மஸ்ஸ கோவிதோ³
அரியத⁴ம்மே ஸுவினீதோ, ஸப்புரிஸானங் த³ஸ்ஸாவீ ஸப்புரிஸத⁴ம்மஸ்ஸ கோவிதோ³
ஸப்புரிஸத⁴ம்மே ஸுவினீதோ ந ஸக்காயதி³ட்டி²பரியுட்டி²தேன சேதஸா விஹரதி ந
ஸக்காயதி³ட்டி²பரேதேன; உப்பன்னாய ச ஸக்காயதி³ட்டி²யா நிஸ்ஸரணங் யதா²பூ⁴தங்
பஜானாதி. தஸ்ஸ ஸா ஸக்காயதி³ட்டி² ஸானுஸயா பஹீயதி. ந
விசிகிச்சா²பரியுட்டி²தேன சேதஸா விஹரதி ந விசிகிச்சா²பரேதேன; உப்பன்னாய ச
விசிகிச்சா²ய நிஸ்ஸரணங் யதா²பூ⁴தங் பஜானாதி. தஸ்ஸ ஸா விசிகிச்சா² ஸானுஸயா
பஹீயதி. ந ஸீலப்³ப³தபராமாஸபரியுட்டி²தேன சேதஸா விஹரதி ந
ஸீலப்³ப³தபராமாஸபரேதேன; உப்பன்னஸ்ஸ ச ஸீலப்³ப³தபராமாஸஸ்ஸ நிஸ்ஸரணங்
யதா²பூ⁴தங் பஜானாதி. தஸ்ஸ ஸோ ஸீலப்³ப³தபராமாஸோ ஸானுஸயோ பஹீயதி. ந
காமராக³பரியுட்டி²தேன சேதஸா விஹரதி ந காமராக³பரேதேன; உப்பன்னஸ்ஸ ச
காமராக³ஸ்ஸ நிஸ்ஸரணங் யதா²பூ⁴தங் பஜானாதி. தஸ்ஸ ஸோ காமராகோ³ ஸானுஸயோ பஹீயதி
. ந ப்³யாபாத³பரியுட்டி²தேன சேதஸா விஹரதி ந
ப்³யாபாத³பரேதேன; உப்பன்னஸ்ஸ ச ப்³யாபாத³ஸ்ஸ நிஸ்ஸரணங் யதா²பூ⁴தங் பஜானாதி.
தஸ்ஸ ஸோ ப்³யாபாதோ³ ஸானுஸயோ பஹீயதி.
132.
‘‘யோ, ஆனந்த³, மக்³கோ³ யா படிபதா³ பஞ்சன்னங் ஓரம்பா⁴கி³யானங் ஸங்யோஜனானங்
பஹானாய தங் மக்³க³ங் தங் படிபத³ங் அனாக³ம்ம பஞ்சோரம்பா⁴கி³யானி ஸங்யோஜனானி
ஞஸ்ஸதி வா த³க்க²தி வா பஜஹிஸ்ஸதி வாதி – நேதங் டா²னங் விஜ்ஜதி. ஸெய்யதா²பி,
ஆனந்த³, மஹதோ ருக்க²ஸ்ஸ திட்ட²தோ ஸாரவதோ தசங்
அச்செ²த்வா பெ²க்³கு³ங் அச்செ²த்வா ஸாரச்சே²தோ³ ப⁴விஸ்ஸதீதி – நேதங் டா²னங்
விஜ்ஜதி; ஏவமேவ கோ², ஆனந்த³, யோ மக்³கோ³ யா படிபதா³ பஞ்சன்னங்
ஓரம்பா⁴கி³யானங் ஸங்யோஜனானங் பஹானாய தங் மக்³க³ங் தங் படிபத³ங் அனாக³ம்ம
பஞ்சோரம்பா⁴கி³யானி ஸங்யோஜனானி ஞஸ்ஸதி வா த³க்க²தி வா பஜஹிஸ்ஸதி வாதி –
நேதங் டா²னங் விஜ்ஜதி.
‘‘யோ ச கோ², ஆனந்த³, மக்³கோ³ யா படிபதா³ பஞ்சன்னங் ஓரம்பா⁴கி³யானங் ஸங்யோஜனானங் பஹானாய தங்
மக்³க³ங் தங் படிபத³ங் ஆக³ம்ம பஞ்சோரம்பா⁴கி³யானி ஸங்யோஜனானி ஞஸ்ஸதி வா
த³க்க²தி வா பஜஹிஸ்ஸதி வாதி – டா²னமேதங் விஜ்ஜதி. ஸெய்யதா²பி, ஆனந்த³, மஹதோ
ருக்க²ஸ்ஸ திட்ட²தோ ஸாரவதோ தசங் செ²த்வா பெ²க்³கு³ங் செ²த்வா ஸாரச்சே²தோ³
ப⁴விஸ்ஸதீதி – டா²னமேதங் விஜ்ஜதி; ஏவமேவ கோ², ஆனந்த³, யோ மக்³கோ³ யா
படிபதா³ பஞ்சன்னங் ஓரம்பா⁴கி³யானங் ஸங்யோஜனானங் பஹானாய தங் மக்³க³ங் தங்
படிபத³ங் ஆக³ம்ம பஞ்சோரம்பா⁴கி³யானி ஸங்யோஜனானி ஞஸ்ஸதி வா த³க்க²தி வா
பஜஹிஸ்ஸதி வாதி – டா²னமேதங் விஜ்ஜதி. ஸெய்யதா²பி, ஆனந்த³, க³ங்கா³ நதீ³
பூரா உத³கஸ்ஸ ஸமதித்திகா காகபெய்யா. அத²
து³ப்³ப³லகோ புரிஸோ ஆக³ச்செ²ய்ய – ‘அஹங் இமிஸ்ஸா க³ங்கா³ய நதி³யா திரியங்
பா³ஹாய ஸோதங் செ²த்வா ஸொத்தி²னா பாரங் க³ச்சி²ஸ்ஸாமீ’தி [க³ச்சா²மீதி (ஸீ॰ பீ॰)]; ஸோ ந ஸக்குணெய்ய க³ங்கா³ய நதி³யா திரியங் பா³ஹாய ஸோதங் செ²த்வா ஸொத்தி²னா பாரங் க³ந்துங். ஏவமேவ கோ², ஆனந்த³, யேஸங் கேஸஞ்சி [யஸ்ஸ கஸ்ஸசி (ஸப்³ப³த்த²)] ஸக்காயனிரோதா⁴ய த⁴ம்மே தே³ஸியமானே சித்தங் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி; ஸெய்யதா²பி
ஸோ து³ப்³ப³லகோ புரிஸோ ஏவமேதே த³ட்ட²ப்³பா³. ஸெய்யதா²பி, ஆனந்த³, க³ங்கா³
நதீ³ பூரா உத³கஸ்ஸ ஸமதித்திகா காகபெய்யா. அத² ப³லவா புரிஸோ ஆக³ச்செ²ய்ய –
‘அஹங் இமிஸ்ஸா க³ங்கா³ய நதி³யா திரியங் பா³ஹாய
ஸோதங் செ²த்வா ஸொத்தி²னா பாரங் க³ச்சி²ஸ்ஸாமீ’தி; ஸோ ஸக்குணெய்ய க³ங்கா³ய
நதி³யா திரியங் பா³ஹாய ஸோதங் செ²த்வா ஸொத்தி²னா பாரங் க³ந்துங். ஏவமேவ கோ²,
ஆனந்த³, யேஸங் கேஸஞ்சி ஸக்காயனிரோதா⁴ய த⁴ம்மே தே³ஸியமானே சித்தங்
பக்க²ந்த³தி பஸீத³தி ஸந்திட்ட²தி விமுச்சதி; ஸெய்யதா²பி ஸோ ப³லவா புரிஸோ
ஏவமேதே த³ட்ட²ப்³பா³.
133.
‘‘கதமோ சானந்த³, மக்³கோ³, கதமா படிபதா³ பஞ்சன்னங் ஓரம்பா⁴கி³யானங்
ஸங்யோஜனானங் பஹானாய? இதா⁴னந்த³, பி⁴க்கு² உபதி⁴விவேகா அகுஸலானங் த⁴ம்மானங்
பஹானா ஸப்³ப³ஸோ காயது³ட்டு²ல்லானங் படிப்பஸ்ஸத்³தி⁴யா விவிச்சேவ காமேஹி
விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங்
ஜா²னங் உபஸம்பஜ்ஜ விஹரதி. ஸோ யதே³வ தத்த² ஹோதி ரூபக³தங் வேத³னாக³தங்
ஸஞ்ஞாக³தங் ஸங்கா²ரக³தங் விஞ்ஞாணக³தங் தே த⁴ம்மே அனிச்சதோ து³க்க²தோ ரோக³தோ
க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ ஸமனுபஸ்ஸதி.
ஸோ தேஹி த⁴ம்மேஹி சித்தங் படிவாபேதி [படிபாபேதி (ஸ்யா॰), பதிட்டா²பேதி (க॰)]. ஸோ தேஹி த⁴ம்மேஹி சித்தங் படிவாபெத்வா அமதாய தா⁴துயா சித்தங் உபஸங்ஹரதி – ‘ஏதங் ஸந்தங் ஏதங் பணீதங் யதி³த³ங் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³
தண்ஹாக்க²யோ விராகோ³ நிரோதோ⁴ நிப்³பா³ன’ந்தி. ஸோ தத்த² டி²தோ ஆஸவானங்
க²யங் பாபுணாதி; நோ சே ஆஸவானங் க²யங் பாபுணாதி தேனேவ த⁴ம்மராகே³ன தாய
த⁴ம்மனந்தி³யா பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகோ
ஹோதி, தத்த² பரினிப்³பா³யீ, அனாவத்தித⁴ம்மோ தஸ்மா லோகா. அயம்பி கோ²,
ஆனந்த³, மக்³கோ³ அயங் படிபதா³ பஞ்சன்னங் ஓரம்பா⁴கி³யானங் ஸங்யோஜனானங்
பஹானாய.
‘‘புன சபரங், ஆனந்த³, பி⁴க்கு² விதக்கவிசாரானங் வூபஸமா…பே॰… து³தியங் ஜா²னங் உபஸம்பஜ்ஜ விஹரதி…
ததியங் ஜா²னங்… சதுத்த²ங் ஜா²னங் உபஸம்பஜ்ஜ விஹரதி. ஸோ யதே³வ தத்த² ஹோதி
ரூபக³தங் வேத³னாக³தங் ஸஞ்ஞாக³தங் ஸங்கா²ரக³தங் விஞ்ஞாணக³தங்…
அனாவத்தித⁴ம்மோ தஸ்மா லோகா. அயம்பி கோ², ஆனந்த³, மக்³கோ³ அயங் படிபதா³
பஞ்சன்னங் ஓரம்பா⁴கி³யானங் ஸங்யோஜனானங் பஹானாய.
‘‘புன சபரங், ஆனந்த³, பி⁴க்கு² ஸப்³ப³ஸோ ரூபஸஞ்ஞானங்
ஸமதிக்கமா படிக⁴ஸஞ்ஞானங் அத்த²ங்க³மா நானத்தஸஞ்ஞானங் அமனஸிகாரா ‘அனந்தோ
ஆகாஸோ’தி ஆகாஸானஞ்சாயதனங் உபஸம்பஜ்ஜ விஹரதி. ஸோ யதே³வ தத்த² ஹோதி
வேத³னாக³தங் ஸஞ்ஞாக³தங் ஸங்கா²ரக³தங் விஞ்ஞாணக³தங்…பே॰… அனாவத்தித⁴ம்மோ தஸ்மா லோகா. அயம்பி கோ², ஆனந்த³, மக்³கோ³ அயங் படிபதா³ பஞ்சன்னங் ஓரம்பா⁴கி³யானங் ஸங்யோஜனானங் பஹானாய.
‘‘புன சபரங், ஆனந்த³, பி⁴க்கு² ஸப்³ப³ஸோ
ஆகாஸானஞ்சாயதனங் ஸமதிக்கம்ம ‘அனந்தங் விஞ்ஞாண’ந்தி விஞ்ஞாணஞ்சாயதனங்
உபஸம்பஜ்ஜ விஹரதி. ஸோ யதே³வ தத்த² ஹோதி வேத³னாக³தங் ஸஞ்ஞாக³தங்
ஸங்கா²ரக³தங் விஞ்ஞாணக³தங்…பே॰… அனாவத்தித⁴ம்மோ தஸ்மா லோகா. அயம்பி கோ², ஆனந்த³, மக்³கோ³ அயங் படிபதா³ பஞ்சன்னங் ஓரம்பா⁴கி³யானங் ஸங்யோஜனானங் பஹானாய.
‘‘புன சபரங், ஆனந்த³, பி⁴க்கு² ஸப்³ப³ஸோ
விஞ்ஞாணஞ்சாயதனங் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனங் உபஸம்பஜ்ஜ
விஹரதி. ஸோ யதே³வ தத்த² ஹோதி வேத³னாக³தங் ஸஞ்ஞாக³தங் ஸங்கா²ரக³தங்
விஞ்ஞாணக³தங்…பே॰… அனாவத்தித⁴ம்மோ தஸ்மா லோகா. அயம்பி கோ², ஆனந்த³, மக்³கோ³ அயங் படிபதா³ பஞ்சன்னங் ஓரம்பா⁴கி³யானங் ஸங்யோஜனானங் பஹானாயா’’தி.
‘‘ஏஸோ சே, ப⁴ந்தே, மக்³கோ³ ஏஸா படிபதா³ பஞ்சன்னங்
ஓரம்பா⁴கி³யானங் ஸங்யோஜனானங் பஹானாய, அத² கிஞ்சரஹி இதே⁴கச்சே பி⁴க்கூ²
சேதோவிமுத்தினோ ஏகச்சே பி⁴க்கூ² பஞ்ஞாவிமுத்தினோ’’தி? ‘‘எத்த² கோ² பனேஸாஹங்
[எத்த² கோ² தேஸாஹங் (ஸீ॰ ஸ்யா॰ கங்॰ பீ॰)], ஆனந்த³, இந்த்³ரியவேமத்ததங் வதா³மீ’’தி.
இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதங் அபி⁴னந்தீ³தி.
மஹாமாலுக்யஸுத்தங் நிட்டி²தங் சதுத்த²ங்.
5. ப⁴த்³தா³லிஸுத்தங்
134. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘அஹங்
கோ², பி⁴க்க²வே, ஏகாஸனபோ⁴ஜனங் பு⁴ஞ்ஜாமி; ஏகாஸனபோ⁴ஜனங் கோ², அஹங்,
பி⁴க்க²வே, பு⁴ஞ்ஜமானோ அப்பாபா³த⁴தஞ்ச ஸஞ்ஜானாமி
அப்பாதங்கதஞ்ச லஹுட்டா²னஞ்ச ப³லஞ்ச பா²ஸுவிஹாரஞ்ச. ஏத², தும்ஹேபி,
பி⁴க்க²வே, ஏகாஸனபோ⁴ஜனங் பு⁴ஞ்ஜத²; ஏகாஸனபோ⁴ஜனங் கோ², பி⁴க்க²வே, தும்ஹேபி
பு⁴ஞ்ஜமானா அப்பாபா³த⁴தஞ்ச ஸஞ்ஜானிஸ்ஸத² அப்பாதங்கதஞ்ச லஹுட்டா²னஞ்ச ப³லஞ்ச
பா²ஸுவிஹாரஞ்சா’’தி. ஏவங் வுத்தே, ஆயஸ்மா ப⁴த்³தா³லி ப⁴க³வந்தங் ஏதத³வோச –
‘‘அஹங் கோ², ப⁴ந்தே, ந உஸ்ஸஹாமி ஏகாஸனபோ⁴ஜனங் பு⁴ஞ்ஜிதுங்; ஏகாஸனபோ⁴ஜனஞ்ஹி
மே, ப⁴ந்தே, பு⁴ஞ்ஜதோ ஸியா குக்குச்சங், ஸியா விப்படிஸாரோ’’தி. ‘‘தேன ஹி
த்வங், ப⁴த்³தா³லி, யத்த² நிமந்திதோ அஸ்ஸஸி தத்த² ஏகதே³ஸங் பு⁴ஞ்ஜித்வா
ஏகதே³ஸங் நீஹரித்வாபி பு⁴ஞ்ஜெய்யாஸி. ஏவம்பி கோ² த்வங், ப⁴த்³தா³லி, பு⁴ஞ்ஜமானோ ஏகாஸனோ யாபெஸ்ஸஸீ’’தி [பு⁴ஞ்ஜமானோ யாபெஸ்ஸஸீதி (ஸீ॰ ஸ்யா॰ கங்॰ பீ॰)].
‘‘ஏவம்பி கோ² அஹங், ப⁴ந்தே, ந உஸ்ஸஹாமி பு⁴ஞ்ஜிதுங்; ஏவம்பி ஹி மே,
ப⁴ந்தே, பு⁴ஞ்ஜதோ ஸியா குக்குச்சங், ஸியா விப்படிஸாரோ’’தி. அத² கோ² ஆயஸ்மா
ப⁴த்³தா³லி ப⁴க³வதா ஸிக்கா²பதே³ பஞ்ஞாபியமானே பி⁴க்கு²ஸங்கே⁴ ஸிக்க²ங்
ஸமாதி³யமானே அனுஸ்ஸாஹங் பவேதே³ஸி. அத² கோ² ஆயஸ்மா ப⁴த்³தா³லி ஸப்³ப³ங் தங் தேமாஸங் ந ப⁴க³வதோ ஸம்முகீ²பா⁴வங் அதா³ஸி, யதா² தங் ஸத்து²ஸாஸனே ஸிக்கா²ய அபரிபூரகாரீ.
135.
தேன கோ² பன ஸமயேன ஸம்ப³ஹுலா பி⁴க்கூ² ப⁴க³வதோ சீவரகம்மங் கரொந்தி –
நிட்டி²தசீவரோ ப⁴க³வா தேமாஸச்சயேன சாரிகங் பக்கமிஸ்ஸதீதி. அத² கோ² ஆயஸ்மா
ப⁴த்³தா³லி யேன தே பி⁴க்கூ² தேனுபஸங்கமி; உபஸங்கமித்வா தேஹி பி⁴க்கூ²ஹி
ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங்
நிஸீதி³. ஏகமந்தங் நிஸின்னங் கோ² ஆயஸ்மந்தங் ப⁴த்³தா³லிங் தே பி⁴க்கூ²
ஏதத³வோசுங் – ‘‘இத³ங் கோ², ஆவுஸோ ப⁴த்³தா³லி, ப⁴க³வதோ சீவரகம்மங் கரீயதி [கரணீயங் (க॰)].
நிட்டி²தசீவரோ ப⁴க³வா தேமாஸச்சயேன சாரிகங் பக்கமிஸ்ஸதி. இங்கா⁴வுஸோ
ப⁴த்³தா³லி, ஏதங் தோ³ஸகங் ஸாது⁴கங் மனஸி கரோஹி, மா தே பச்சா² து³க்கரதரங்
அஹோஸீ’’தி. ‘‘ஏவமாவுஸோ’’தி கோ² ஆயஸ்மா ப⁴த்³தா³லி
தேஸங் பி⁴க்கூ²னங் படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா
ப⁴த்³தா³லி ப⁴க³வந்தங் ஏதத³வோச – ‘‘அச்சயோ மங், ப⁴ந்தே, அச்சக³மா
யதா²பா³லங் யதா²மூள்ஹங் யதா²அகுஸலங், யோஹங் ப⁴க³வதா ஸிக்கா²பதே³
பஞ்ஞாபியமானே பி⁴க்கு²ஸங்கே⁴ ஸிக்க²ங் ஸமாதி³யமானே அனுஸ்ஸாஹங் பவேதே³ஸிங்.
தஸ்ஸ மே, ப⁴ந்தே, ப⁴க³வா அச்சயங் அச்சயதோ படிக்³க³ண்ஹாது ஆயதிங்
ஸங்வராயா’’தி.
‘‘தக்³க⁴ த்வங், ப⁴த்³தா³லி, அச்சயோ அச்சக³மா யதா²பா³லங் யதா²மூள்ஹங்
யதா²அகுஸலங், யங் த்வங் மயா ஸிக்கா²பதே³ பஞ்ஞாபியமானே பி⁴க்கு²ஸங்கே⁴
ஸிக்க²ங் ஸமாதி³யமானே அனுஸ்ஸாஹங் பவேதே³ஸி. ஸமயோபி கோ² தே, ப⁴த்³தா³லி,
அப்படிவித்³தோ⁴ அஹோஸி – ‘ப⁴க³வா கோ² ஸாவத்தி²யங் விஹரதி, ப⁴க³வாபி மங்
ஜானிஸ்ஸதி – ப⁴த்³தா³லி நாம பி⁴க்கு² ஸத்து²ஸாஸனே ஸிக்கா²ய அபரிபூரகாரீ’தி.
அயம்பி கோ² தே, ப⁴த்³தா³லி, ஸமயோ அப்படிவித்³தோ⁴ அஹோஸி. ஸமயோபி கோ² தே,
ப⁴த்³தா³லி, அப்படிவித்³தோ⁴ அஹோஸி – ‘ஸம்ப³ஹுலா கோ²
பி⁴க்கு² ஸாவத்தி²யங் வஸ்ஸங் உபக³தா, தேபி மங் ஜானிஸ்ஸந்தி – ப⁴த்³தா³லி
நாம பி⁴க்கு² ஸத்து²ஸாஸனே ஸிக்கா²ய அபரிபூரகாரீ’தி. அயம்பி கோ² தே,
ப⁴த்³தா³லி, ஸமயோ அப்படிவித்³தோ⁴ அஹோஸி. ஸமயோபி கோ² தே, ப⁴த்³தா³லி,
அப்படிவித்³தோ⁴ அஹோஸி – ‘ஸம்ப³ஹுலா கோ² பி⁴க்கு²னியோ ஸாவத்தி²யங் வஸ்ஸங்
உபக³தா, தாபி மங் ஜானிஸ்ஸந்தி – ப⁴த்³தா³லி நாம பி⁴க்கு² ஸத்து²ஸாஸனே
ஸிக்கா²ய அபரிபூரகாரீ’தி. அயம்பி கோ² தே, ப⁴த்³தா³லி, ஸமயோ அப்படிவித்³தோ⁴
அஹோஸி. ஸமயோபி கோ² தே, ப⁴த்³தா³லி, அப்படிவித்³தோ⁴ அஹோஸி – ‘ஸம்ப³ஹுலா கோ²
உபாஸகா ஸாவத்தி²யங் படிவஸந்தி, தேபி மங் ஜானிஸ்ஸந்தி – ப⁴த்³தா³லி நாம
பி⁴க்கு² ஸத்து²ஸாஸனே ஸிக்கா²ய அபரிபூரகாரீ’தி. அயம்பி கோ² தே, ப⁴த்³தா³லி,
ஸமயோ அப்படிவித்³தோ⁴ அஹோஸி. ஸமயோபி கோ² தே, ப⁴த்³தா³லி, அப்படிவித்³தோ⁴
அஹோஸி – ‘ஸம்ப³ஹுலா கோ² உபாஸிகா ஸாவத்தி²யங் படிவஸந்தி, தாபி மங்
ஜானிஸ்ஸந்தி – ப⁴த்³தா³லி நாம பி⁴க்கு² ஸத்து²ஸாஸனே ஸிக்கா²ய
அபரிபூரகாரீ’தி. அயம்பி கோ² தே, ப⁴த்³தா³லி , ஸமயோ
அப்படிவித்³தோ⁴ அஹோஸி. ஸமயோபி கோ² தே, ப⁴த்³தா³லி, அப்படிவித்³தோ⁴ அஹோஸி –
‘ஸம்ப³ஹுலா கோ² நானாதித்தி²யா ஸமணப்³ராஹ்மணா ஸாவத்தி²யங் வஸ்ஸங் உபக³தா,
தேபி மங் ஜானிஸ்ஸந்தி – ப⁴த்³தா³லி நாம பி⁴க்கு² ஸமணஸ்ஸ கோ³தமஸ்ஸ ஸாவகோ
தே²ரஞ்ஞதரோ பி⁴க்கு² ஸாஸனே ஸிக்கா²ய அபரிபூரகாரீ’தி. அயம்பி கோ² தே,
ப⁴த்³தா³லி, ஸமயோ அப்படிவித்³தோ⁴ அஹோஸீ’’தி.
‘‘அச்சயோ மங், ப⁴ந்தே,
அச்சக³மா யதா²பா³லங் யதா²மூள்ஹங் யதா²அகுஸலங், யோஹங் ப⁴க³வதா ஸிக்கா²பதே³
பஞ்ஞாபியமானே பி⁴க்கு²ஸங்கே⁴ ஸிக்க²ங் ஸமாதி³யமானே அனுஸ்ஸாஹங் பவேதே³ஸிங்.
தஸ்ஸ மே, ப⁴ந்தே, ப⁴க³வா அச்சயங் அச்சயதோ படிக்³க³ண்ஹாது ஆயதிங்
ஸங்வராயா’’தி. ‘‘தக்³க⁴ த்வங், ப⁴த்³தா³லி, அச்சயோ அச்சக³மா யதா²பா³லங்
யதா²மூள்ஹங் யதா²அகுஸலங், யங் த்வங் மயா ஸிக்கா²பதே³ பஞ்ஞாபியமானே பி⁴க்கு²ஸங்கே⁴ ஸிக்க²ங் ஸமாதி³யமானே அனுஸ்ஸாஹங் பவேதே³ஸி’’.
136.
‘‘தங் கிங் மஞ்ஞஸி, ப⁴த்³தா³லி, இத⁴ஸ்ஸ பி⁴க்கு² உப⁴தோபா⁴க³விமுத்தோ,
தமஹங் ஏவங் வதெ³ய்யங் – ‘ஏஹி மே த்வங், பி⁴க்கு², பங்கே ஸங்கமோ ஹோஹீ’தி,
அபி நு கோ² ஸோ ஸங்கமெய்ய வா அஞ்ஞேன வா காயங் ஸன்னாமெய்ய, ‘நோ’தி வா
வதெ³ய்யா’’தி?
‘‘நோ ஹேதங், ப⁴ந்தே’’.
‘‘தங் கிங் மஞ்ஞஸி, ப⁴த்³தா³லி, இத⁴ஸ்ஸ பி⁴க்கு²
பஞ்ஞாவிமுத்தோ… காயஸக்கி²… தி³ட்டி²ப்பத்தோ… ஸத்³தா⁴விமுத்தோ…
த⁴ம்மானுஸாரீ… ஸத்³தா⁴னுஸாரீ, தமஹங் ஏவங் வதெ³ய்யங் – ‘ஏஹி மே த்வங்,
பி⁴க்கு², பங்கே ஸங்கமோ ஹோஹீ’தி, அபி நு கோ² ஸோ ஸங்கமெய்ய வா அஞ்ஞேன வா
காயங் ஸன்னாமெய்ய, ‘நோ’தி வா வதெ³ய்யா’’தி?
‘‘நோ ஹேதங், ப⁴ந்தே’’.
‘‘தங் கிங் மஞ்ஞஸி, ப⁴த்³தா³லி, அபி நு த்வங், ப⁴த்³தா³லி, தஸ்மிங் ஸமயே உப⁴தோபா⁴க³விமுத்தோ வா ஹோஸி பஞ்ஞாவிமுத்தோ வா காயஸக்கி² வா தி³ட்டி²ப்பத்தோ வா ஸத்³தா⁴விமுத்தோ வா த⁴ம்மானுஸாரீ வா ஸத்³தா⁴னுஸாரீ வா’’தி?
‘‘நோ ஹேதங், ப⁴ந்தே’’.
‘‘நனு த்வங், ப⁴த்³தா³லி, தஸ்மிங் ஸமயே ரித்தோ துச்சோ² அபரத்³தோ⁴’’தி?
‘‘ஏவங் , ப⁴ந்தே. அச்சயோ மங்,
ப⁴ந்தே, அச்சக³மா யதா²பா³லங் யதா²மூள்ஹங் யதா²அகுஸலங், யோஹங் ப⁴க³வதா
ஸிக்கா²பதே³ பஞ்ஞாபியமானே பி⁴க்கு²ஸங்கே⁴ ஸிக்க²ங் ஸமாதி³யமானே அனுஸ்ஸாஹங்
பவேதே³ஸிங். தஸ்ஸ மே, ப⁴ந்தே, ப⁴க³வா அச்சயங் அச்சயதோ படிக்³க³ண்ஹாது
ஆயதிங் ஸங்வராயா’’தி. ‘‘தக்³க⁴ த்வங், ப⁴த்³தா³லி, அச்சயோ அச்சக³மா
யதா²பா³லங் யதா²மூள்ஹங் யதா²அகுஸலங், யங் த்வங் மயா ஸிக்கா²பதே³
பஞ்ஞாபியமானே பி⁴க்கு²ஸங்கே⁴ ஸிக்க²ங் ஸமாதி³யமானே அனுஸ்ஸாஹங் பவேதே³ஸி.
யதோ ச கோ² த்வங், ப⁴த்³தா³லி, அச்சயங் அச்சயதோ தி³ஸ்வா யதா²த⁴ம்மங்
படிகரோஸி, தங் தே மயங் படிக்³க³ண்ஹாம. வுத்³தி⁴ஹேஸா, ப⁴த்³தா³லி, அரியஸ்ஸ
வினயே யோ அச்சயங் அச்சயதோ தி³ஸ்வா யதா²த⁴ம்மங் படிகரோதி, ஆயதிங் ஸங்வரங்
ஆபஜ்ஜதி’’.
137.
‘‘இத⁴, ப⁴த்³தா³லி, ஏகச்சோ பி⁴க்கு² ஸத்து²ஸாஸனே ஸிக்கா²ய அபரிபூரகாரீ
ஹோதி. தஸ்ஸ ஏவங் ஹோதி – ‘யங்னூனாஹங் விவித்தங் ஸேனாஸனங் ப⁴ஜெய்யங் அரஞ்ஞங்
ருக்க²மூலங் பப்³ப³தங் கந்த³ரங் கி³ரிகு³ஹங் ஸுஸானங் வனபத்த²ங்
அப்³போ⁴காஸங் பலாலபுஞ்ஜங். அப்பேவ நாமாஹங் உத்தரி [உத்தரிங் (ஸீ॰ ஸ்யா॰ கங்॰ பீ॰)] மனுஸ்ஸத⁴ம்மா அலமரியஞாணத³ஸ்ஸனவிஸேஸங் ஸச்சி²கரெய்ய’ந்தி. ஸோ விவித்தங் ஸேனாஸனங் ப⁴ஜதி அரஞ்ஞங் ருக்க²மூலங் பப்³ப³தங்
கந்த³ரங் கி³ரிகு³ஹங் ஸுஸானங் வனபத்த²ங் அப்³போ⁴காஸங் பலாலபுஞ்ஜங். தஸ்ஸ
ததா²வூபகட்ட²ஸ்ஸ விஹரதோ ஸத்தா²பி உபவத³தி, அனுவிச்சபி விஞ்ஞூ ஸப்³ரஹ்மசாரீ
உபவத³ந்தி, தே³வதாபி உபவத³ந்தி, அத்தாபி அத்தானங் உபவத³தி. ஸோ ஸத்தா²ராபி
உபவதி³தோ, அனுவிச்சபி விஞ்ஞூஹி ஸப்³ரஹ்மசாரீஹி உபவதி³தோ, தே³வதாஹிபி
உபவதி³தோ, அத்தனாபி அத்தானங் உபவதி³தோ ந உத்தரி மனுஸ்ஸத⁴ம்மா
அலமரியஞாணத³ஸ்ஸனவிஸேஸங் ஸச்சி²கரோதி. தங் கிஸ்ஸ ஹேது? ஏவஞ்ஹி தங்,
ப⁴த்³தா³லி, ஹோதி யதா² தங் ஸத்து²ஸாஸனே ஸிக்கா²ய அபரிபூரகாரிஸ்ஸ.
138.
‘‘இத⁴ பன, ப⁴த்³தா³லி, ஏகச்சோ பி⁴க்கு² ஸத்து²ஸாஸனே ஸிக்கா²ய பரிபூரகாரீ
ஹோதி. தஸ்ஸ ஏவங் ஹோதி – ‘யங்னூனாஹங் விவித்தங் ஸேனாஸனங் ப⁴ஜெய்யங் அரஞ்ஞங்
ருக்க²மூலங் பப்³ப³தங் கந்த³ரங் கி³ரிகு³ஹங் ஸுஸானங் வனபத்த²ங்
அப்³போ⁴காஸங் பலாலபுஞ்ஜங். அப்பேவ நாமாஹங் உத்தரி
மனுஸ்ஸத⁴ம்மா அலமரியஞாணத³ஸ்ஸனவிஸேஸங் ஸச்சி²கரெய்ய’ந்தி. ஸோ விவித்தங்
ஸேனாஸனங் ப⁴ஜதி அரஞ்ஞங் ருக்க²மூலங் பப்³ப³தங் கந்த³ரங் கி³ரிகு³ஹங்
ஸுஸானங் வனபத்த²ங் அப்³போ⁴காஸங் பலாலபுஞ்ஜங். தஸ்ஸ ததா²வூபகட்ட²ஸ்ஸ விஹரதோ
ஸத்தா²பி ந உபவத³தி, அனுவிச்சபி விஞ்ஞூ ஸப்³ரஹ்மசாரீ ந உபவத³ந்தி, தே³வதாபி
ந உபவத³ந்தி, அத்தாபி அத்தானங் ந உபவத³தி. ஸோ ஸத்தா²ராபி அனுபவதி³தோ ,
அனுவிச்சபி விஞ்ஞூஹி ஸப்³ரஹ்மசாரீஹி அனுபவதி³தோ, தே³வதாஹிபி அனுபவதி³தோ,
அத்தனாபி அத்தானங் அனுபவதி³தோ உத்தரி மனுஸ்ஸத⁴ம்மா அலமரியஞாணத³ஸ்ஸனவிஸேஸங்
ஸச்சி²கரோதி. ஸோ விவிச்சேவ காமேஹி விவிச்ச அகுஸலேஹி
த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ
விஹரதி. தங் கிஸ்ஸ ஹேது? ஏவஞ்ஹி தங், ப⁴த்³தா³லி, ஹோதி யதா² தங்
ஸத்து²ஸாஸனே ஸிக்கா²ய பரிபூரகாரிஸ்ஸ.
139.
‘‘புன சபரங், ப⁴த்³தா³லி, பி⁴க்கு² விதக்கவிசாரானங் வூபஸமா அஜ்ஜ²த்தங்
ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங்
து³தியங் ஜா²னங் உபஸம்பஜ்ஜ விஹரதி. தங் கிஸ்ஸ ஹேது? ஏவஞ்ஹி தங்,
ப⁴த்³தா³லி, ஹோதி யதா² தங் ஸத்து²ஸாஸனே ஸிக்கா²ய பரிபூரகாரிஸ்ஸ.
‘‘புன சபரங், ப⁴த்³தா³லி, பி⁴க்கு² பீதியா ச விராகா³
உபெக்க²கோ ச விஹரதி, ஸதோ ச ஸம்பஜானோ ஸுக²ஞ்ச காயேன படிஸங்வேதே³தி, யங் தங்
அரியா ஆசிக்க²ந்தி – ‘உபெக்க²கோ ஸதிமா ஸுக²விஹாரீ’தி ததியங் ஜா²னங் உபஸம்பஜ்ஜ விஹரதி. தங் கிஸ்ஸ ஹேது? ஏவஞ்ஹி தங், ப⁴த்³தா³லி, ஹோதி யதா² தங் ஸத்து²ஸாஸனே ஸிக்கா²ய பரிபூரகாரிஸ்ஸ.
‘‘புன சபரங், ப⁴த்³தா³லி, பி⁴க்கு² ஸுக²ஸ்ஸ ச பஹானா
து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா
அது³க்க²மஸுக²ங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ
விஹரதி. தங் கிஸ்ஸ ஹேது? ஏவஞ்ஹி தங், ப⁴த்³தா³லி, ஹோதி யதா² தங்
ஸத்து²ஸாஸனே ஸிக்கா²ய பரிபூரகாரிஸ்ஸ.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே
அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
புப்³பே³னிவாஸானுஸ்ஸதிஞாணாய சித்தங் அபி⁴னின்னாமேதி. ஸோ அனேகவிஹிதங்
புப்³பே³னிவாஸங் அனுஸ்ஸரதி, ஸெய்யதி²த³ங் – ஏகம்பி ஜாதிங் த்³வேபி
ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங்
அனுஸ்ஸரதி. தங் கிஸ்ஸ ஹேது? ஏவஞ்ஹி தங், ப⁴த்³தா³லி, ஹோதி யதா² தங் ஸத்து²ஸாஸனே ஸிக்கா²ய பரிபூரகாரிஸ்ஸ.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஸத்தானங்
சுதூபபாதஞாணாய சித்தங் அபி⁴னின்னாமேதி. ஸோ தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே
து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானாதி – ‘இமே வத
பொ⁴ந்தோ ஸத்தா காயது³ச்சரிதேன ஸமன்னாக³தா…பே॰… வினிபாதங் நிரயங் உபபன்னா;
இமே வா பன பொ⁴ந்தோ ஸத்தா காயஸுசரிதேன ஸமன்னாக³தா…பே॰… ஸுக³திங் ஸக்³க³ங்
லோகங் உபபன்னா’தி இதி தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன…பே॰… யதா²கம்மூபகே³ ஸத்தே பஜானாதி. தங் கிஸ்ஸ ஹேது?
ஏவஞ்ஹி தங், ப⁴த்³தா³லி, ஹோதி யதா² தங் ஸத்து²ஸாஸனே ஸிக்கா²ய
பரிபூரகாரிஸ்ஸ.
‘‘ஸோ ஏவங் ஸமாஹிதே சித்தே
பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே
டி²தே ஆனேஞ்ஜப்பத்தே ஆஸவானங் க²யஞாணாய சித்தங் அபி⁴னின்னாமேதி. ஸோ ‘இத³ங்
து³க்க²’ந்தி யதா²பூ⁴தங் பஜானாதி, ‘அயங் து³க்க²ஸமுத³யோ’தி யதா²பூ⁴தங்
பஜானாதி, ‘அயங் து³க்க²னிரோதோ⁴’தி யதா²பூ⁴தங் பஜானாதி, ‘அயங்
து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி; ‘இமே ஆஸவா’தி
யதா²பூ⁴தங் பஜானாதி, ‘அயங் ஆஸவஸமுத³யோ’தி
யதா²பூ⁴தங் பஜானாதி, ‘அயங் ஆஸவனிரோதோ⁴’தி யதா²பூ⁴தங் பஜானாதி, ‘அயங்
ஆஸவனிரோத⁴கா³மினீ படிபதா³’தி யதா²பூ⁴தங் பஜானாதி. தஸ்ஸ ஏவங் ஜானதோ ஏவங்
பஸ்ஸதோ காமாஸவாபி சித்தங் விமுச்சதி, ப⁴வாஸவாபி சித்தங் விமுச்சதி,
அவிஜ்ஜாஸவாபி சித்தங் விமுச்சதி. விமுத்தஸ்மிங் விமுத்தமிதி ஞாணங் ஹோதி.
‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங்,
நாபரங் இத்த²த்தாயா’தி பஜானாதி. தங் கிஸ்ஸ ஹேது? ஏவஞ்ஹி தங், ப⁴த்³தா³லி,
ஹோதி யதா² தங் ஸத்து²ஸாஸனே ஸிக்கா²ய பரிபூரகாரிஸ்ஸா’’தி.
140.
ஏவங் வுத்தே, ஆயஸ்மா ப⁴த்³தா³லி ப⁴க³வந்தங் ஏதத³வோச – ‘‘கோ நு கோ²,
ப⁴ந்தே, ஹேது, கோ பச்சயோ யேன மிதே⁴கச்சங் பி⁴க்கு²ங் பஸய்ஹ பஸய்ஹ [பவய்ஹ பவய்ஹ (ஸீ॰ ஸ்யா॰ கங்॰ பீ॰)]
காரணங் கரொந்தி? கோ பன, ப⁴ந்தே, ஹேது, கோ பச்சயோ யேன மிதே⁴கச்சங்
பி⁴க்கு²ங் நோ ததா² பஸய்ஹ பஸய்ஹ காரணங் கரொந்தீ’’தி? ‘‘இத⁴, ப⁴த்³தா³லி,
ஏகச்சோ பி⁴க்கு² அபி⁴ண்ஹாபத்திகோ ஹோதி ஆபத்திப³ஹுலோ. ஸோ பி⁴க்கூ²ஹி
வுச்சமானோ அஞ்ஞேனஞ்ஞங் படிசரதி, ப³ஹித்³தா⁴ கத²ங் அபனாமேதி, கோபஞ்ச தோ³ஸஞ்ச
அப்பச்சயஞ்ச பாதுகரோதி, ந ஸம்மா வத்ததி, ந லோமங் பாதேதி, ந நெத்தா²ரங்
வத்ததி, ‘யேன ஸங்கோ⁴ அத்தமனோ ஹோதி தங் கரோமீ’தி நாஹ. தத்ர, ப⁴த்³தா³லி,
பி⁴க்கூ²னங் ஏவங் ஹோதி – அயங் கோ², ஆவுஸோ, பி⁴க்கு²
அபி⁴ண்ஹாபத்திகோ ஆபத்திப³ஹுலோ. ஸோ பி⁴க்கூ²ஹி வுச்சமானோ அஞ்ஞேனஞ்ஞங்
படிசரதி, ப³ஹித்³தா⁴ கத²ங் அபனாமேதி, கோபஞ்ச தோ³ஸஞ்ச அப்பச்சயஞ்ச
பாதுகரோதி, ந ஸம்மா வத்ததி, ந லோமங் பாதேதி, ந நெத்தா²ரங் வத்ததி, ‘யேன
ஸங்கோ⁴ அத்தமனோ ஹோதி தங் கரோமீ’தி நாஹ. ஸாது⁴ வதாயஸ்மந்தோ இமஸ்ஸ பி⁴க்கு²னோ ததா² ததா² உபபரிக்க²த² யதா²ஸ்ஸித³ங் [யத²யித³ங் (ஸ்யா॰ கங்॰ க॰)] அதி⁴கரணங் ந கி²ப்பமேவ வூபஸமெய்யாதி. தஸ்ஸ கோ² ஏவங், ப⁴த்³தா³லி, பி⁴க்கு²னோ பி⁴க்கூ² ததா² ததா² உபபரிக்க²ந்தி யதா²ஸ்ஸித³ங் அதி⁴கரணங் ந கி²ப்பமேவ வூபஸம்மதி.
141.
‘‘இத⁴ பன, ப⁴த்³தா³லி, ஏகச்சோ பி⁴க்கு² அபி⁴ண்ஹாபத்திகோ ஹோதி
ஆபத்திப³ஹுலோ. ஸோ பி⁴க்கூ²ஹி வுச்சமானோ நாஞ்ஞேனஞ்ஞங் படிசரதி, ப³ஹித்³தா⁴
கத²ங் ந அபனாமேதி, ந கோபஞ்ச தோ³ஸஞ்ச அப்பச்சயஞ்ச பாதுகரோதி, ஸம்மா வத்ததி,
லோமங் பாதேதி, நெத்தா²ரங் வத்ததி, ‘யேன ஸங்கோ⁴ அத்தமனோ
ஹோதி தங் கரோமீ’தி ஆஹ. தத்ர, ப⁴த்³தா³லி, பி⁴க்கூ²னங் ஏவங் ஹோதி – அயங்
கோ², ஆவுஸோ, பி⁴க்கு² அபி⁴ண்ஹாபத்திகோ ஆபத்திப³ஹுலோ. ஸோ பி⁴க்கூ²ஹி
வுச்சமானோ நாஞ்ஞேனஞ்ஞங் படிசரதி, ப³ஹித்³தா⁴ கத²ங் ந அபனாமேதி, ந கோபஞ்ச
தோ³ஸஞ்ச அப்பச்சயஞ்ச பாதுகரோதி, ஸம்மா வத்ததி, லோமங் பாதேதி, நெத்தா²ரங்
வத்ததி, ‘யேன ஸங்கோ⁴ அத்தமனோ ஹோதி தங் கரோமீ’தி ஆஹ. ஸாது⁴ வதாயஸ்மந்தோ,
இமஸ்ஸ பி⁴க்கு²னோ ததா² ததா² உபபரிக்க²த² யதா²ஸ்ஸித³ங் அதி⁴கரணங் கி²ப்பமேவ
வூபஸமெய்யாதி. தஸ்ஸ கோ² ஏவங், ப⁴த்³தா³லி, பி⁴க்கு²னோ பி⁴க்கூ² ததா² ததா²
உபபரிக்க²ந்தி யதா²ஸ்ஸித³ங் அதி⁴கரணங் கி²ப்பமேவ வூபஸம்மதி.
142.
‘‘இத⁴, ப⁴த்³தா³லி, ஏகச்சோ பி⁴க்கு² அதி⁴ச்சாபத்திகோ ஹோதி அனாபத்திப³ஹுலோ.
ஸோ பி⁴க்கூ²ஹி வுச்சமானோ அஞ்ஞேனஞ்ஞங் படிசரதி, ப³ஹித்³தா⁴ கத²ங் அபனாமேதி,
கோபஞ்ச தோ³ஸஞ்ச அப்பச்சயஞ்ச பாதுகரோதி, ந ஸம்மா வத்ததி, ந லோமங் பாதேதி, ந
நெத்தா²ரங் வத்ததி, ‘யேன ஸங்கோ⁴ அத்தமனோ ஹோதி தங் கரோமீ’தி நாஹ. தத்ர,
ப⁴த்³தா³லி, பி⁴க்கூ²னங் ஏவங் ஹோதி – அயங் கோ², ஆவுஸோ, பி⁴க்கு²
அதி⁴ச்சாபத்திகோ அனாபத்திப³ஹுலோ . ஸோ பி⁴க்கூ²ஹி
வுச்சமானோ அஞ்ஞேனஞ்ஞங் படிசரதி, ப³ஹித்³தா⁴ கத²ங் அபனாமேதி, கோபஞ்ச தோ³ஸஞ்ச
அப்பச்சயஞ்ச பாதுகரோதி, ந ஸம்மா வத்ததி, ந லோமங் பாதேதி, ந நெத்தா²ரங்
வத்ததி, ‘யேன ஸங்கோ⁴ அத்தமனோ ஹோதி தங் கரோமீ’தி நாஹ. ஸாது⁴ வதாயஸ்மந்தோ,
இமஸ்ஸ பி⁴க்கு²னோ ததா² ததா² உபபரிக்க²த² யதா²ஸ்ஸித³ங்
அதி⁴கரணங் ந கி²ப்பமேவ வூபஸமெய்யாதி. தஸ்ஸ கோ² ஏவங், ப⁴த்³தா³லி,
பி⁴க்கு²னோ பி⁴க்கூ² ததா² ததா² உபபரிக்க²ந்தி யதா²ஸ்ஸித³ங் அதி⁴கரணங் ந கி²ப்பமேவ வூபஸம்மதி.
143.
‘‘இத⁴ பன, ப⁴த்³தா³லி, ஏகச்சோ பி⁴க்கு² அதி⁴ச்சாபத்திகோ ஹோதி
அனாபத்திப³ஹுலோ. ஸோ பி⁴க்கூ²ஹி வுச்சமானோ நாஞ்ஞேனஞ்ஞங் படிசரதி, ந
ப³ஹித்³தா⁴ கத²ங் அபனாமேதி, ந கோபஞ்ச தோ³ஸஞ்ச அப்பச்சயஞ்ச பாதுகரோதி, ஸம்மா
வத்ததி, லோமங் பாதேதி, நெத்தா²ரங் வத்ததி, ‘யேன ஸங்கோ⁴ அத்தமனோ ஹோதி தங்
கரோமீ’தி ஆஹ. தத்ர, ப⁴த்³தா³லி, பி⁴க்கூ²னங் ஏவங் ஹோதி – அயங் கோ², ஆவுஸோ,
பி⁴க்கு² அதி⁴ச்சாபத்திகோ அனாபத்திப³ஹுலோ. ஸோ பி⁴க்கூ²ஹி வுச்சமானோ
நாஞ்ஞேனஞ்ஞங் படிசரதி, ந ப³ஹித்³தா⁴ கத²ங் அபனாமேதி, ந கோபஞ்ச தோ³ஸஞ்ச
அப்பச்சயஞ்ச பாதுகரோதி, ஸம்மா வத்ததி, லோமங் பாதேதி, நெத்தா²ரங் வத்ததி,
‘யேன ஸங்கோ⁴ அத்தமனோ ஹோதி தங் கரோமீ’தி ஆஹ. ஸாது⁴
வதாயஸ்மந்தோ, இமஸ்ஸ பி⁴க்கு²னோ ததா² ததா² உபபரிக்க²த² யதா²ஸ்ஸித³ங்
அதி⁴கரணங் கி²ப்பமேவ வூபஸமெய்யாதி. தஸ்ஸ கோ² ஏவங், ப⁴த்³தா³லி, பி⁴க்கு²னோ
பி⁴க்கூ² ததா² ததா² உபபரிக்க²ந்தி யதா²ஸ்ஸித³ங் அதி⁴கரணங் கி²ப்பமேவ
வூபஸம்மதி.
144. ‘‘இத⁴ ,
ப⁴த்³தா³லி, ஏகச்சோ பி⁴க்கு² ஸத்³தா⁴மத்தகேன வஹதி பேமமத்தகேன. தத்ர,
ப⁴த்³தா³லி, பி⁴க்கூ²னங் ஏவங் ஹோதி – ‘அயங் கோ², ஆவுஸோ, பி⁴க்கு²
ஸத்³தா⁴மத்தகேன வஹதி பேமமத்தகேன. ஸசே மயங் இமங் பி⁴க்கு²ங் பஸய்ஹ பஸய்ஹ
காரணங் கரிஸ்ஸாம – மா யம்பிஸ்ஸ தங் ஸத்³தா⁴மத்தகங் பேமமத்தகங் தம்ஹாபி
பரிஹாயீ’தி. ஸெய்யதா²பி, ப⁴த்³தா³லி, புரிஸஸ்ஸ ஏகங் சக்கு²ங், தஸ்ஸ
மித்தாமச்சா ஞாதிஸாலோஹிதா தங் ஏகங் சக்கு²ங் ரக்கெ²ய்யுங் – ‘மா யம்பிஸ்ஸ
தங் ஏகங் சக்கு²ங் தம்ஹாபி பரிஹாயீ’தி; ஏவமேவ கோ², ப⁴த்³தா³லி, இதே⁴கச்சோ
பி⁴க்கு² ஸத்³தா⁴மத்தகேன வஹதி பேமமத்தகேன. தத்ர, ப⁴த்³தா³லி, பி⁴க்கூ²னங்
ஏவங் ஹோதி – ‘அயங் கோ², ஆவுஸோ, பி⁴க்கு² ஸத்³தா⁴மத்தகேன வஹதி பேமமத்தகேன.
ஸசே மயங் இமங் பி⁴க்கு²ங் பஸய்ஹ பஸய்ஹ காரணங் கரிஸ்ஸாம – மா யம்பிஸ்ஸ தங்
ஸத்³தா⁴மத்தகங் பேமமத்தகங் தம்ஹாபி பரிஹாயீ’தி. அயங் கோ², ப⁴த்³தா³லி, ஹேது
அயங் பச்சயோ யேன மிதே⁴கச்சங் பி⁴க்கு²ங் பஸய்ஹ பஸய்ஹ காரணங் கரொந்தி. அயங்
பன, ப⁴த்³தா³லி, ஹேது அயங் பச்சயோ, யேன மிதே⁴கச்சங் பி⁴க்கு²ங் நோ ததா²
பஸய்ஹ பஸய்ஹ காரணங் கரொந்தீ’’தி.
145. ‘‘‘கோ நு கோ², ப⁴ந்தே, ஹேது, கோ பச்சயோ யேன புப்³பே³ அப்பதரானி
சேவ ஸிக்கா²பதா³னி அஹேஸுங் ப³ஹுதரா ச பி⁴க்கூ² அஞ்ஞாய ஸண்ட²ஹிங்ஸு? கோ பன,
ப⁴ந்தே, ஹேது, கோ பச்சயோ யேன ஏதரஹி ப³ஹுதரானி சேவ ஸிக்கா²பதா³னி ஹொந்தி
அப்பதரா ச பி⁴க்கூ² அஞ்ஞாய ஸண்ட²ஹந்தீ’தி? ‘‘ஏவமேதங், ப⁴த்³தா³லி, ஹோதி
ஸத்தேஸு ஹாயமானேஸு, ஸத்³த⁴ம்மே அந்தரதா⁴யமானே,
ப³ஹுதரானி சேவ ஸிக்கா²பதா³னி ஹொந்தி அப்பதரா ச பி⁴க்கூ² அஞ்ஞாய
ஸண்ட²ஹந்தீதி. ந தாவ, ப⁴த்³தா³லி, ஸத்தா² ஸாவகானங் ஸிக்கா²பத³ங் பஞ்ஞாபேதி
யாவ ந இதே⁴கச்சே ஆஸவட்டா²னீயா த⁴ம்மா ஸங்கே⁴ பாதுப⁴வந்தி. யதோ ச கோ²,
ப⁴த்³தா³லி, இதே⁴கச்சே ஆஸவட்டா²னீயா த⁴ம்மா ஸங்கே⁴ பாதுப⁴வந்தி, அத² ஸத்தா²
ஸாவகானங் ஸிக்கா²பத³ங் பஞ்ஞாபேதி தேஸங்யேவ ஆஸவட்டா²னீயானங் த⁴ம்மானங்
படிகா⁴தாய. ந தாவ, ப⁴த்³தா³லி, இதே⁴கச்சே ஆஸவட்டா²னீயா த⁴ம்மா ஸங்கே⁴
பாதுப⁴வந்தி யாவ ந ஸங்கோ⁴ மஹத்தங் பத்தோ ஹோதி. யதோ ச கோ², ப⁴த்³தா³லி,
ஸங்கோ⁴ மஹத்தங் பத்தோ ஹோதி, அத² இதே⁴கச்சே
ஆஸவட்டா²னீயா த⁴ம்மா ஸங்கே⁴ பாதுப⁴வந்தி. அத² ஸத்தா² ஸாவகானங் ஸிக்கா²பத³ங்
பஞ்ஞாபேதி தேஸங்யேவ ஆஸவட்டா²னீயானங் த⁴ம்மானங் படிகா⁴தாய. ந தாவ,
ப⁴த்³தா³லி, இதே⁴கச்சே ஆஸவட்டா²னீயா த⁴ம்மா ஸங்கே⁴ பாதுப⁴வந்தி யாவ ந
ஸங்கோ⁴ லாப⁴க்³க³ங் பத்தோ ஹோதி, யஸக்³க³ங் பத்தோ ஹோதி, பா³ஹுஸச்சங் பத்தோ
ஹோதி, ரத்தஞ்ஞுதங் பத்தோ ஹோதி. யதோ ச கோ², ப⁴த்³தா³லி, ஸங்கோ⁴ ரத்தஞ்ஞுதங்
பத்தோ ஹோதி, அத² இதே⁴கச்சே ஆஸவட்டா²னீயா த⁴ம்மா ஸங்கே⁴ பாதுப⁴வந்தி, அத²
ஸத்தா² ஸாவகானங் ஸிக்கா²பத³ங் பஞ்ஞாபேதி தேஸங்யேவ ஆஸவட்டா²னீயானங்
த⁴ம்மானங் படிகா⁴தாய.
146. ‘‘அப்பகா கோ² தும்ஹே, ப⁴த்³தா³லி, தேன ஸமயேன அஹுவத்த² யதா³ வோ அஹங் ஆஜானீயஸுஸூபமங் த⁴ம்மபரியாயங் தே³ஸேஸிங். தங் ஸரஸி [ஸரஸி த்வங் (ஸீ॰ பீ॰), ஸரஸி தங் (?)] ப⁴த்³தா³லீ’’தி ?
‘‘நோ ஹேதங், ப⁴ந்தே’’.
‘‘தத்ர, ப⁴த்³தா³லி, கங் ஹேதுங் பச்சேஸீ’’தி?
‘‘ஸோ ஹி நூனாஹங், ப⁴ந்தே, தீ³க⁴ரத்தங் ஸத்து²ஸாஸனே ஸிக்கா²ய அபரிபூரகாரீ அஹோஸி’’ந்தி.
‘‘ந கோ², ப⁴த்³தா³லி, ஏஸேவ ஹேது, ஏஸ பச்சயோ. அபி ச மே த்வங், ப⁴த்³தா³லி, தீ³க⁴ரத்தங் சேதஸா சேதோபரிச்ச விதி³தோ – ‘ந சாயங் மோக⁴புரிஸோ மயா த⁴ம்மே தே³ஸியமானே அட்டி²ங் கத்வா மனஸி கத்வா ஸப்³ப³சேதஸோ [ஸப்³ப³ங் சேதஸோ (க॰)]
ஸமன்னாஹரித்வா ஓஹிதஸோதோ த⁴ம்மங் ஸுணாதீ’தி. அபி ச தே அஹங், ப⁴த்³தா³லி,
ஆஜானீயஸுஸூபமங் த⁴ம்மபரியாயங் தே³ஸெஸ்ஸாமி. தங் ஸுணாஹி, ஸாது⁴கங் மனஸி
கரோஹி ; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² ஆயஸ்மா ப⁴த்³தா³லி ப⁴க³வதோ பச்சஸ்ஸோஸி. ப⁴க³வா ஏதத³வோச –
147.
‘‘ஸெய்யதா²பி, ப⁴த்³தா³லி, த³க்கோ² அஸ்ஸத³மகோ ப⁴த்³ரங் அஸ்ஸாஜானீயங்
லபி⁴த்வா பட²மேனேவ முகா²தா⁴னே காரணங் காரேதி. தஸ்ஸ முகா²தா⁴னே காரணங்
காரியமானஸ்ஸ ஹொந்தியேவ விஸூகாயிதானி விஸேவிதானி விப்ப²ந்தி³தானி கானிசி
கானிசி, யதா² தங் அகாரிதபுப்³ப³ங் காரணங் காரியமானஸ்ஸ. ஸோ அபி⁴ண்ஹகாரணா
அனுபுப்³ப³காரணா தஸ்மிங் டா²னே பரினிப்³பா³யதி. யதோ கோ², ப⁴த்³தா³லி,
ப⁴த்³ரோ அஸ்ஸாஜானீயோ அபி⁴ண்ஹகாரணா அனுபுப்³ப³காரணா தஸ்மிங் டா²னே
பரினிப்³பு³தோ ஹோதி, தமேனங் அஸ்ஸத³மகோ உத்தரி காரணங் காரேதி யுகா³தா⁴னே.
தஸ்ஸ யுகா³தா⁴னே காரணங் காரியமானஸ்ஸ ஹொந்தியேவ விஸூகாயிதானி விஸேவிதானி
விப்ப²ந்தி³தானி கானிசி கானிசி, யதா² தங் அகாரிதபுப்³ப³ங் காரணங்
காரியமானஸ்ஸ. ஸோ அபி⁴ண்ஹகாரணா அனுபுப்³ப³காரணா தஸ்மிங் டா²னே பரினிப்³பா³யதி .
யதோ கோ², ப⁴த்³தா³லி, ப⁴த்³ரோ அஸ்ஸாஜானீயோ அபி⁴ண்ஹகாரணா அனுபுப்³ப³காரணா
தஸ்மிங் டா²னே பரினிப்³பு³தோ ஹோதி, தமேனங் அஸ்ஸத³மகோ உத்தரி காரணங் காரேதி
அனுக்கமே மண்ட³லே கு²ரகாஸே [கு²ரகாயே (ஸீ॰ பீ॰)] தா⁴வே த³வத்தே [ரவத்தே² (ஸீ॰ ஸ்யா॰ கங்॰ பீ॰)]
ராஜகு³ணே ராஜவங்ஸே உத்தமே ஜவே உத்தமே ஹயே உத்தமே ஸாக²ல்யே. தஸ்ஸ உத்தமே
ஜவே உத்தமே ஹயே உத்தமே ஸாக²ல்யே காரணங் காரியமானஸ்ஸ ஹொந்தியேவ விஸூகாயிதானி
விஸேவிதானி விப்ப²ந்தி³தானி கானிசி கானிசி, யதா² தங் அகாரிதபுப்³ப³ங்
காரணங் காரியமானஸ்ஸ. ஸோ அபி⁴ண்ஹகாரணா அனுபுப்³ப³காரணா தஸ்மிங் டா²னே
பரினிப்³பா³யதி. யதோ கோ², ப⁴த்³தா³லி, ப⁴த்³ரோ அஸ்ஸாஜானீயோ அபி⁴ண்ஹகாரணா
அனுபுப்³ப³காரணா தஸ்மிங் டா²னே பரினிப்³பு³தோ ஹோதி, தமேனங் அஸ்ஸத³மகோ
உத்தரி வண்ணியஞ்ச பாணியஞ்ச [வலியஞ்ச (ஸீ॰ பீ॰), ப³லியஞ்ச (ஸ்யா॰ கங்॰)]
அனுப்பவெச்ச²தி. இமேஹி கோ², ப⁴த்³தா³லி, த³ஸஹங்கே³ஹி ஸமன்னாக³தோ ப⁴த்³ரோ
அஸ்ஸாஜானீயோ ராஜாரஹோ ஹோதி ராஜபொ⁴க்³கோ³ ரஞ்ஞோ அங்க³ந்தேவ ஸங்க்²யங்
க³ச்ச²தி.
‘‘ஏவமேவ கோ², ப⁴த்³தா³லி, த³ஸஹி த⁴ம்மேஹி ஸமன்னாக³தோ
பி⁴க்கு² ஆஹுனெய்யோ ஹோதி பாஹுனெய்யோ த³க்கி²ணெய்யோ அஞ்ஜலிகரணீயோ அனுத்தரங்
புஞ்ஞக்கெ²த்தங் லோகஸ்ஸ. கதமேஹி த³ஸஹி? இத⁴, ப⁴த்³தா³லி, பி⁴க்கு² அஸேகா²ய
ஸம்மாதி³ட்டி²யா ஸமன்னாக³தோ ஹோதி, அஸேகே²ன ஸம்மாஸங்கப்பேன ஸமன்னாக³தோ ஹோதி,
அஸேகா²ய ஸம்மாவாசாய ஸமன்னாக³தோ ஹோதி, அஸேகே²ன
ஸம்மாகம்மந்தேன ஸமன்னாக³தோ ஹோதி, அஸேகே²ன ஸம்மாஆஜீவேன ஸமன்னாக³தோ ஹோதி,
அஸேகே²ன ஸம்மாவாயாமேன ஸமன்னாக³தோ ஹோதி , அஸேகா²ய ஸம்மாஸதியா
ஸமன்னாக³தோ ஹோதி, அஸேகே²ன ஸம்மாஸமாதி⁴னா ஸமன்னாக³தோ ஹோதி, அஸேகே²ன
ஸம்மாஞாணேன ஸமன்னாக³தோ ஹோதி, அஸேகா²ய ஸம்மாவிமுத்தியா ஸமன்னாக³தோ ஹோதி –
இமேஹி கோ², ப⁴த்³தா³லி, த³ஸஹி த⁴ம்மேஹி ஸமன்னாக³தோ பி⁴க்கு² ஆஹுனெய்யோ ஹோதி
பாஹுனெய்யோ த³க்கி²ணெய்யோ அஞ்ஜலிகரணீயோ அனுத்தரங் புஞ்ஞக்கெ²த்தங்
லோகஸ்ஸா’’தி.
இத³மவோச ப⁴க³வா. அத்தமனோ ஆயஸ்மா ப⁴த்³தா³லி ப⁴க³வதோ பா⁴ஸிதங் அபி⁴னந்தீ³தி.
ப⁴த்³தா³லிஸுத்தங் நிட்டி²தங் பஞ்சமங்.
6. லடுகிகோபமஸுத்தங்
148. ஏவங்
மே ஸுதங் – ஏகங் ஸமயங் ப⁴க³வா அங்கு³த்தராபேஸு விஹரதி ஆபணங் நாம
அங்கு³த்தராபானங் நிக³மோ. அத² கோ² ப⁴க³வா புப்³ப³ண்ஹஸமயங் நிவாஸெத்வா
பத்தசீவரமாதா³ய ஆபணங் பிண்டா³ய பாவிஸி. ஆபணே பிண்டா³ய சரித்வா
பச்சா²ப⁴த்தங் பிண்ட³பாதபடிக்கந்தோ யேனஞ்ஞதரோ வனஸண்டோ³ தேனுபஸங்கமி
தி³வாவிஹாராய. தங் வனஸண்ட³ங் அஜ்ஜோ²கா³ஹெத்வா அஞ்ஞதரஸ்மிங் ருக்க²மூலே
தி³வாவிஹாரங் நிஸீதி³. ஆயஸ்மாபி கோ² உதா³யீ புப்³ப³ண்ஹஸமயங் நிவாஸெத்வா
பத்தசீவரமாதா³ய ஆபணங் பிண்டா³ய பாவிஸி. ஆபணே பிண்டா³ய சரித்வா
பச்சா²ப⁴த்தங் பிண்ட³பாதபடிக்கந்தோ யேன ஸோ வனஸண்டோ³ தேனுபஸங்கமி
தி³வாவிஹாராய. தங் வனஸண்ட³ங் அஜ்ஜோ²கா³ஹெத்வா அஞ்ஞதரஸ்மிங் ருக்க²மூலே
தி³வாவிஹாரங் நிஸீதி³. அத² கோ² ஆயஸ்மதோ உதா³யிஸ்ஸ ரஹோக³தஸ்ஸ படிஸல்லீனஸ்ஸ
ஏவங் சேதஸோ பரிவிதக்கோ உத³பாதி³ – ‘‘ப³ஹூனங் [ப³ஹுன்னங் (ஸீ॰ ஸ்யா॰ கங்॰ பீ॰) ஏவமீதி³ஸே அவிஞ்ஞாணகப்பகரணே]
வத நோ ப⁴க³வா து³க்க²த⁴ம்மானங் அபஹத்தா, ப³ஹூனங் வத நோ ப⁴க³வா
ஸுக²த⁴ம்மானங் உபஹத்தா; ப³ஹூனங் வத நோ ப⁴க³வா அகுஸலானங் த⁴ம்மானங் அபஹத்தா,
ப³ஹூனங் வத நோ ப⁴க³வா குஸலானங் த⁴ம்மானங் உபஹத்தா’’தி. அத² கோ² ஆயஸ்மா
உதா³யீ ஸாயன்ஹஸமயங் படிஸல்லானா வுட்டி²தோ யேன ப⁴க³வா தேனுபஸங்கமி;
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ .
149. ஏகமந்தங் நிஸின்னோ கோ² ஆயஸ்மா உதா³யீ ப⁴க³வந்தங் ஏதத³வோச
– ‘‘இத⁴ மய்ஹங், ப⁴ந்தே, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ
உத³பாதி³ – ‘ப³ஹூனங் வத நோ ப⁴க³வா து³க்க²த⁴ம்மானங் அபஹத்தா, ப³ஹூனங் வத நோ
ப⁴க³வா ஸுக²த⁴ம்மானங் உபஹத்தா; ப³ஹூனங் வத நோ ப⁴க³வா அகுஸலானங் த⁴ம்மானங்
அபஹத்தா, ப³ஹூனங் வத நோ ப⁴க³வா குஸலானங் த⁴ம்மானங் உபஹத்தா’தி. மயஞ்ஹி,
ப⁴ந்தே, புப்³பே³ ஸாயஞ்சேவ பு⁴ஞ்ஜாம பாதோ ச தி³வா ச விகாலே. அஹு கோ² ஸோ,
ப⁴ந்தே, ஸமயோ யங் ப⁴க³வா பி⁴க்கூ² ஆமந்தேஸி – ‘இங்க⁴ தும்ஹே, பி⁴க்க²வே,
ஏதங் தி³வாவிகாலபோ⁴ஜனங் பஜஹதா²’தி. தஸ்ஸ மய்ஹங், ப⁴ந்தே, அஹுதே³வ
அஞ்ஞத²த்தங், அஹுதே³வ [அஹு (ஸீ॰ பீ॰)]
தோ³மனஸ்ஸங் – ‘யம்பி நோ ஸத்³தா⁴ க³ஹபதிகா தி³வா விகாலே பணீதங் கா²த³னீயங்
போ⁴ஜனீயங் தெ³ந்தி தஸ்ஸபி நோ ப⁴க³வா பஹானமாஹ, தஸ்ஸபி நோ ஸுக³தோ
படினிஸ்ஸக்³க³மாஹா’தி. தே மயங், ப⁴ந்தே, ப⁴க³வதி பேமஞ்ச கா³ரவஞ்ச ஹிரிஞ்ச ஒத்தப்பஞ்ச ஸம்பஸ்ஸமானா
ஏவங் தங் தி³வாவிகாலபோ⁴ஜனங் பஜஹிம்ஹா. தே மயங், ப⁴ந்தே, ஸாயஞ்சேவ பு⁴ஞ்ஜாம
பாதோ ச. அஹு கோ² ஸோ, ப⁴ந்தே, ஸமயோ யங் ப⁴க³வா பி⁴க்கூ² ஆமந்தேஸி – ‘இங்க⁴
தும்ஹே, பி⁴க்க²வே, ஏதங் ரத்திங்விகாலபோ⁴ஜனங் பஜஹதா²’தி. தஸ்ஸ மய்ஹங்,
ப⁴ந்தே, அஹுதே³வ அஞ்ஞத²த்தங் அஹுதே³வ தோ³மனஸ்ஸங் – ‘யம்பி நோ இமேஸங்
த்³வின்னங் ப⁴த்தானங் பணீதஸங்கா²ததரங் தஸ்ஸபி நோ ப⁴க³வா பஹானமாஹ, தஸ்ஸபி நோ
ஸுக³தோ படினிஸ்ஸக்³க³மாஹா’தி. பூ⁴தபுப்³ப³ங், ப⁴ந்தே, அஞ்ஞதரோ புரிஸோ
தி³வா ஸூபெய்யங் லபி⁴த்வா ஏவமாஹ – ‘ஹந்த³ ச இமங் நிக்கி²பத², ஸாயங்
ஸப்³பே³வ ஸமக்³கா³ பு⁴ஞ்ஜிஸ்ஸாமா’தி. யா காசி,
ப⁴ந்தே, ஸங்க²தியோ ஸப்³பா³ தா ரத்திங், அப்பா தி³வா. தே மயங், ப⁴ந்தே,
ப⁴க³வதி பேமஞ்ச கா³ரவஞ்ச ஹிரிஞ்ச ஒத்தப்பஞ்ச ஸம்பஸ்ஸமானா ஏவங் தங்
ரத்திங்விகாலபோ⁴ஜனங் பஜஹிம்ஹா. பூ⁴தபுப்³ப³ங், ப⁴ந்தே, பி⁴க்கூ²
ரத்தந்த⁴காரதிமிஸாயங் பிண்டா³ய சரந்தா சந்த³னிகம்பி பவிஸந்தி, ஓலிக³ல்லேபி
பபதந்தி, கண்டகாவாடம்பி [கண்டகவத்தம்பி (ஸீ॰ பீ॰), கண்டகராஜிம்பி (ஸ்யா॰ கங்॰)] ஆரோஹந்தி, ஸுத்தம்பி கா³விங் ஆரோஹந்தி, மாணவேஹிபி ஸமாக³ச்ச²ந்தி கதகம்மேஹிபி அகதகம்மேஹிபி, மாதுகா³மோபி தே [தேன (க॰)]
அஸத்³த⁴ம்மேன நிமந்தேதி. பூ⁴தபுப்³பா³ஹங், ப⁴ந்தே, ரத்தந்த⁴காரதிமிஸாயங்
பிண்டா³ய சராமி. அத்³த³ஸா கோ² மங், ப⁴ந்தே, அஞ்ஞதரா இத்தீ² விஜ்ஜந்தரிகாய
பா⁴ஜனங் தோ⁴வந்தீ. தி³ஸ்வா மங் பீ⁴தா விஸ்ஸரமகாஸி – ‘அபு⁴ம்மே [அப்³பு⁴ம்மே (ஸீ॰ பீ॰)] பிஸாசோ வத ம’ந்தி! ஏவங் வுத்தே, அஹங், ப⁴ந்தே, தங் இத்தி²ங் ஏதத³வோசங் – ‘நாஹங், ப⁴கி³னி, பிஸாசோ; பி⁴க்கு² பிண்டா³ய டி²தோ’தி. ‘பி⁴க்கு²ஸ்ஸ ஆதுமாரீ, பி⁴க்கு²ஸ்ஸ மாதுமாரீ [டி²தோ’தி. பி⁴க்கு²ஸ்ஸ ஆதுமாதுமாரீ (க॰)]! வரங் தே, பி⁴க்கு², திண்ஹேன கோ³விகந்தனேன குச்சி² பரிகந்தோ, ந த்வேவ வரங் யங் [ந த்வேவ யா (ஸீ॰ பீ॰)] ரத்தந்த⁴காரதிமிஸாயங் குச்சி²ஹேது பிண்டா³ய சரஸீ’தி [சரஸாதி (ஸீ॰ பீ॰)].
தஸ்ஸ மய்ஹங், ப⁴ந்தே, தத³னுஸ்ஸரதோ ஏவங் ஹோதி – ‘ப³ஹூனங் வத நோ ப⁴க³வா
து³க்க²த⁴ம்மானங் அபஹத்தா, ப³ஹூனங் வத நோ ப⁴க³வா ஸுக²த⁴ம்மானங் உபஹத்தா;
ப³ஹூனங் வத நோ ப⁴க³வா அகுஸலானங் த⁴ம்மானங் அபஹத்தா, ப³ஹூனங் வத நோ ப⁴க³வா
குஸலானங் த⁴ம்மானங் உபஹத்தா’’’தி.
150. ‘‘ஏவமேவ பனுதா³யி, இதே⁴கச்சே மோக⁴புரிஸா ‘இத³ங் பஜஹதா²’தி மயா வுச்சமானா தே ஏவமாஹங்ஸு – ‘கிங் பனிமஸ்ஸ அப்பமத்தகஸ்ஸ ஓரமத்தகஸ்ஸ அதி⁴ஸல்லிக²தேவாயங் ஸமணோ’தி. தே தஞ்சேவ நப்பஜஹந்தி, மயி
ச அப்பச்சயங் உபட்டா²பெந்தி. யே ச பி⁴க்கூ² ஸிக்கா²காமா தேஸங் தங்,
உதா³யி, ஹோதி ப³லவங் ப³ந்த⁴னங், த³ள்ஹங் ப³ந்த⁴னங், தி²ரங் ப³ந்த⁴னங்,
அபூதிகங் ப³ந்த⁴னங், தூ²லோ, கலிங்க³ரோ – ஸெய்யதா²பி, உதா³யி, லடுகிகா
ஸகுணிகா பூதிலதாய ப³ந்த⁴னேன ப³த்³தா⁴ தத்தே²வ வத⁴ங் வா ப³ந்த⁴ங் வா மரணங்
வா ஆக³மேதி. யோ நு கோ², உதா³யி, ஏவங் வதெ³ய்ய – ‘யேன ஸா லடுகிகா ஸகுணிகா
பூதிலதாய ப³ந்த⁴னேன ப³த்³தா⁴ தத்தே²வ வத⁴ங் வா ப³ந்த⁴ங் வா மரணங் வா
ஆக³மேதி, தஞ்ஹி தஸ்ஸா அப³லங் ப³ந்த⁴னங் ,
து³ப்³ப³லங் ப³ந்த⁴னங், பூதிகங் ப³ந்த⁴னங், அஸாரகங் ப³ந்த⁴ன’ந்தி; ஸம்மா நு
கோ² ஸோ, உதா³யி, வத³மானோ வதெ³ய்யா’’தி? ‘‘நோ ஹேதங், ப⁴ந்தே. யேன ஸா,
ப⁴ந்தே, லடுகிகா ஸகுணிகா பூதிலதாய ப³ந்த⁴னேன ப³த்³தா⁴ தத்தே²வ வத⁴ங் வா
ப³ந்த⁴ங் வா மரணங் வா ஆக³மேதி, தஞ்ஹி தஸ்ஸா ப³லவங் ப³ந்த⁴னங், த³ள்ஹங்
ப³ந்த⁴னங், தி²ரங் ப³ந்த⁴னங் அபூதிகங் ப³ந்த⁴னங், தூ²லோ, கலிங்க³ரோ’’தி.
‘‘ஏவமேவ கோ², உதா³யி, இதே⁴கச்சே மோக⁴புரிஸா ‘இத³ங் பஜஹதா²’தி மயா வுச்சமானா
தே ஏவமாஹங்ஸு – ‘கிங் பனிமஸ்ஸ அப்பமத்தகஸ்ஸ ஓரமத்தகஸ்ஸ அதி⁴ஸல்லிக²தேவாயங்
ஸமணோ’தி? தே தஞ்சேவ நப்பஜஹந்தி, மயி ச அப்பச்சயங் உபட்டா²பெந்தி. யே ச
பி⁴க்கூ² ஸிக்கா²காமா தேஸங் தங், உதா³யி, ஹோதி ப³லவங் ப³ந்த⁴னங், த³ள்ஹங்
ப³ந்த⁴னங், தி²ரங் ப³ந்த⁴னங், அபூதிகங் ப³ந்த⁴னங், தூ²லோ, கலிங்க³ரோ’’.
151. ‘‘இத⁴ பனுதா³யி, ஏகச்சே குலபுத்தா ‘இத³ங் பஜஹதா²’தி மயா
வுச்சமானா தே ஏவமாஹங்ஸு – ‘கிங் பனிமஸ்ஸ அப்பமத்தகஸ்ஸ ஓரமத்தகஸ்ஸ
பஹாதப்³ப³ஸ்ஸ யஸ்ஸ நோ ப⁴க³வா பஹானமாஹ, யஸ்ஸ நோ ஸுக³தோ
படினிஸ்ஸக்³க³மாஹா’தி? தே தஞ்சேவ பஜஹந்தி, மயி ச ந அப்பச்சயங்
உபட்டா²பெந்தி. யே ச பி⁴க்கூ² ஸிக்கா²காமா தே தங் பஹாய அப்பொஸ்ஸுக்கா
பன்னலோமா பரத³த்தவுத்தா [பரத³வுத்தா (ஸீ॰ ஸ்யா॰ கங்॰ பீ॰)]
மிக³பூ⁴தேன சேதஸா விஹரந்தி. தேஸங் தங், உதா³யி, ஹோதி அப³லங் ப³ந்த⁴னங்,
து³ப்³ப³லங் ப³ந்த⁴னங், பூதிகங் ப³ந்த⁴னங், அஸாரகங் ப³ந்த⁴னங் –
ஸெய்யதா²பி, உதா³யி, ரஞ்ஞோ நாகோ³ ஈஸாத³ந்தோ உரூள்ஹவா அபி⁴ஜாதோ ஸங்கா³மாவசரோ
த³ள்ஹேஹி வரத்தேஹி ப³ந்த⁴னேஹி ப³த்³தோ⁴ ஈஸகங்யேவ காயங் ஸன்னாமெத்வா தானி
ப³ந்த⁴னானி ஸங்சி²ந்தி³த்வா ஸங்பதா³லெத்வா யேன காமங் பக்கமதி. யோ நு கோ²,
உதா³யி, ஏவங் வதெ³ய்ய – ‘யேஹி ஸோ ரஞ்ஞோ நாகோ³ ஈஸாத³ந்தோ உரூள்ஹவா அபி⁴ஜாதோ
ஸங்கா³மாவசரோ த³ள்ஹேஹி வரத்தேஹி ப³ந்த⁴னேஹி ப³த்³தோ⁴ ஈஸகங்யேவ காயங்
ஸன்னாமெத்வா தானி ப³ந்த⁴னானி ஸங்சி²ந்தி³த்வா ஸங்பதா³லெத்வா யேன காமங்
பக்கமதி, தஞ்ஹி தஸ்ஸ ப³லவங் ப³ந்த⁴னங், த³ள்ஹங் ப³ந்த⁴னங், தி²ரங்
ப³ந்த⁴னங், அபூதிகங் ப³ந்த⁴னங், தூ²லோ,
கலிங்க³ரோ’தி; ஸம்மா நு கோ² ஸோ, உதா³யி, வத³மானோ வதெ³ய்யா’’தி? ‘‘நோ ஹேதங்,
ப⁴ந்தே. யேஹி ஸோ, ப⁴ந்தே, ரஞ்ஞோ நாகோ³ ஈஸாத³ந்தோ உரூள்ஹவா அபி⁴ஜாதோ
ஸங்கா³மாவசரோ த³ள்ஹேஹி வரத்தேஹி ப³ந்த⁴னேஹி ப³த்³தோ⁴ ஈஸகங்யேவ காயங்
ஸன்னாமெத்வா தானி ப³ந்த⁴னானி ஸங்சி²ந்தி³த்வா
ஸங்பதா³லெத்வா யேன காமங் பக்கமதி, தஞ்ஹி தஸ்ஸ அப³லங் ப³ந்த⁴னங்…பே॰…
அஸாரகங் ப³ந்த⁴ன’’ந்தி. ‘‘ஏவமேவ கோ², உதா³யி, இதே⁴கச்சே குலபுத்தா ‘இத³ங்
பஜஹதா²’தி மயா வுச்சமானா தே ஏவமாஹங்ஸு – ‘கிங் பனிமஸ்ஸ அப்பமத்தகஸ்ஸ
ஓரமத்தகஸ்ஸ பஹாதப்³ப³ஸ்ஸ யஸ்ஸ நோ ப⁴க³வா பஹானமாஹ, யஸ்ஸ நோ ஸுக³தோ
படினிஸ்ஸக்³க³மாஹா’தி? தே தஞ்சேவ பஜஹந்தி, மயி ச ந அப்பச்சயங்
உபட்டா²பெந்தி. யே ச பி⁴க்கூ² ஸிக்கா²காமா தே தங்
பஹாய அப்பொஸ்ஸுக்கா பன்னலோமா பரத³த்தவுத்தா மிக³பூ⁴தேன சேதஸா விஹரந்தி.
தேஸங் தங், உதா³யி, ஹோதி அப³லங் ப³ந்த⁴னங், து³ப்³ப³லங் ப³ந்த⁴னங், பூதிகங்
ப³ந்த⁴னங், அஸாரகங் ப³ந்த⁴னங்’’.
152. ‘‘ஸெய்யதா²பி, உதா³யி, புரிஸோ த³லித்³தோ³ அஸ்ஸகோ அனாள்ஹியோ; தஸ்ஸ’ஸ்ஸ ஏகங் அகா³ரகங் ஓலுக்³க³விலுக்³க³ங் காகாதிதா³யிங் [காகாதிடா³யிங் (?)] நபரமரூபங், ஏகா க²டோபிகா [களோபிகா (க॰)] ஓலுக்³க³விலுக்³கா³ நபரமரூபா, ஏகிஸ்ஸா கும்பி⁴யா
த⁴ஞ்ஞஸமவாபகங் நபரமரூபங், ஏகா ஜாயிகா நபரமரூபா. ஸோ ஆராமக³தங் பி⁴க்கு²ங்
பஸ்ஸெய்ய ஸுதோ⁴தஹத்த²பாத³ங் மனுஞ்ஞங் போ⁴ஜனங் பு⁴த்தாவிங் ஸீதாய சா²யாய
நிஸின்னங் அதி⁴சித்தே யுத்தங். தஸ்ஸ ஏவமஸ்ஸ – ‘ஸுக²ங் வத, போ⁴, ஸாமஞ்ஞங்,
ஆரொக்³யங் வத, போ⁴, ஸாமஞ்ஞங்! ஸோ வதஸ்ஸங் [ஸோ வதஸ்ஸ (க॰)]
யோஹங் கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா
அனகா³ரியங் பப்³ப³ஜெய்ய’ந்தி. ஸோ ந ஸக்குணெய்ய ஏகங் அகா³ரகங்
ஓலுக்³க³விலுக்³க³ங் காகாதிதா³யிங் நபரமரூபங் பஹாய, ஏகங் க²டோபிகங்
ஓலுக்³க³விலுக்³க³ங் நபரமரூபங் பஹாய, ஏகிஸ்ஸா கும்பி⁴யா த⁴ஞ்ஞஸமவாபகங்
நபரமரூபங் பஹாய, ஏகங் ஜாயிகங் நபரமரூபங் பஹாய கேஸமஸ்ஸுங் ஓஹாரெத்வா
காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதுங். யோ நு
கோ², உதா³யி, ஏவங் வதெ³ய்ய – ‘யேஹி ஸோ புரிஸோ ப³ந்த⁴னேஹி ப³த்³தோ⁴ ந
ஸக்கோதி ஏகங் அகா³ரகங் ஓலுக்³க³விலுக்³க³ங் காகாதிதா³யிங் நபரமரூபங் பஹாய,
ஏகங் க²டோபிகங் ஓலுக்³க³விலுக்³க³ங் நபரமரூபங் பஹாய, ஏகிஸ்ஸா கும்பி⁴யா
த⁴ஞ்ஞஸமவாபகங் நபரமரூபங் பஹாய, ஏகங் ஜாயிகங் நபரமரூபங் பஹாய கேஸமஸ்ஸுங்
ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங்
பப்³ப³ஜிதுங்; தஞ்ஹி தஸ்ஸ அப³லங் ப³ந்த⁴னங், து³ப்³ப³லங் ப³ந்த⁴னங்,
பூதிகங் ப³ந்த⁴னங், அஸாரகங் ப³ந்த⁴ன’ந்தி; ஸம்மா நு கோ² ஸோ, உதா³யி,
வத³மானோ வதெ³ய்யா’’தி? ‘‘நோ ஹேதங், ப⁴ந்தே. யேஹி ஸோ, ப⁴ந்தே, புரிஸோ
ப³ந்த⁴னேஹி ப³த்³தோ⁴, ந ஸக்கோதி ஏகங் அகா³ரகங் ஓலுக்³க³விலுக்³க³ங்
காகாதிதா³யிங் நபரமரூபங் பஹாய, ஏகங் க²டோபிகங் ஓலுக்³க³விலுக்³க³ங்
நபரமரூபங் பஹாய, ஏகிஸ்ஸா கும்பி⁴யா த⁴ஞ்ஞஸமவாபகங் நபரமரூபங் பஹாய, ஏகங்
ஜாயிகங் நபரமரூபங் பஹாய கேஸமஸ்ஸுங் ஓஹாரெத்வா காஸாயானி வத்தா²னி
அச்சா²தெ³த்வா அகா³ரஸ்மா அனகா³ரியங் பப்³ப³ஜிதுங்; தஞ்ஹி தஸ்ஸ ப³லவங்
ப³ந்த⁴னங், த³ள்ஹங் ப³ந்த⁴னங், தி²ரங் ப³ந்த⁴னங், அபூதிகங் ப³ந்த⁴னங்,
தூ²லோ, கலிங்க³ரோ’’தி. ‘‘ஏவமேவ கோ², உதா³யி, இதே⁴கச்சே மோக⁴புரிஸா ‘இத³ங்
பஜஹதா²’தி மயா வுச்சமானா தே ஏவமாஹங்ஸு – ‘கிங் பனிமஸ்ஸ அப்பமத்தகஸ்ஸ
ஓரமத்தகஸ்ஸ அதி⁴ஸல்லிக²தேவாயங் ஸமணோ’தி? தே தஞ்சேவ
நப்பஜஹந்தி, மயி ச அப்பச்சயங் உபட்டா²பெந்தி. யே ச பி⁴க்கூ² ஸிக்கா²காமா
தேஸங் தங், உதா³யி, ஹோதி ப³லவங் ப³ந்த⁴னங், த³ள்ஹங் ப³ந்த⁴னங், தி²ரங்
ப³ந்த⁴னங், அபூதிகங் ப³ந்த⁴னங், தூ²லோ, கலிங்க³ரோ’’.
153. ‘‘ஸெய்யதா²பி , உதா³யி, க³ஹபதி வா க³ஹபதிபுத்தோ வா அட்³டோ⁴ மஹத்³த⁴னோ
மஹாபோ⁴கோ³, நேகானங் நிக்க²க³ணானங் சயோ, நேகானங் த⁴ஞ்ஞக³ணானங் சயோ, நேகானங்
கெ²த்தக³ணானங் சயோ, நேகானங் வத்து²க³ணானங் சயோ, நேகானங் ப⁴ரியக³ணானங் சயோ,
நேகானங் தா³ஸக³ணானங் சயோ, நேகானங் தா³ஸிக³ணானங் சயோ; ஸோ ஆராமக³தங்
பி⁴க்கு²ங் பஸ்ஸெய்ய ஸுதோ⁴தஹத்த²பாத³ங் மனுஞ்ஞங் போ⁴ஜனங் பு⁴த்தாவிங் ஸீதாய
சா²யாய நிஸின்னங் அதி⁴சித்தே யுத்தங். தஸ்ஸ ஏவமஸ்ஸ – ‘ஸுக²ங் வத, போ⁴,
ஸாமஞ்ஞங், ஆரொக்³யங் வத, போ⁴, ஸாமஞ்ஞங்! ஸோ வதஸ்ஸங் யோஹங் கேஸமஸ்ஸுங்
ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங்
பப்³ப³ஜெய்ய’ந்தி. ஸோ ஸக்குணெய்ய நேகானி நிக்க²க³ணானி பஹாய, நேகானி
த⁴ஞ்ஞக³ணானி பஹாய, நேகானி கெ²த்தக³ணானி பஹாய, நேகானி வத்து²க³ணானி பஹாய,
நேகானி ப⁴ரியக³ணானி பஹாய, நேகானி தா³ஸக³ணானி பஹாய, நேகானி தா³ஸிக³ணானி பஹாய
கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா
அனகா³ரியங் பப்³ப³ஜிதுங். யோ நு கோ², உதா³யி, ஏவங் வதெ³ய்ய – ‘யேஹி ஸோ
க³ஹபதி வா க³ஹபதிபுத்தோ வா ப³ந்த⁴னேஹி ப³த்³தோ⁴, ஸக்கோதி நேகானி
நிக்க²க³ணானி பஹாய, நேகானி த⁴ஞ்ஞக³ணானி பஹாய, நேகானி
கெ²த்தக³ணானி பஹாய, நேகானி வத்து²க³ணானி பஹாய, நேகானி ப⁴ரியக³ணானி பஹாய,
நேகானி தா³ஸக³ணானி பஹாய, நேகானி தா³ஸிக³ணானி பஹாய கேஸமஸ்ஸுங் ஓஹாரெத்வா
காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதுங், தஞ்ஹி
தஸ்ஸ ப³லவங் ப³ந்த⁴னங், த³ள்ஹங் ப³ந்த⁴னங், தி²ரங் ப³ந்த⁴னங், அபூதிகங்
ப³ந்த⁴னங், தூ²லோ, கலிங்க³ரோ’தி; ஸம்மா நு கோ² ஸோ, உதா³யி, வத³மானோ
வதெ³ய்யா’’தி? ‘‘நோ ஹேதங், ப⁴ந்தே. யேஹி ஸோ, ப⁴ந்தே, க³ஹபதி வா
க³ஹபதிபுத்தோ வா ப³ந்த⁴னேஹி ப³த்³தோ⁴, ஸக்கோதி நேகானி நிக்க²க³ணானி பஹாய,
நேகானி த⁴ஞ்ஞக³ணானி பஹாய, நேகானி கெ²த்தக³ணானி
பஹாய, நேகானி வத்து²க³ணானி பஹாய, நேகானி ப⁴ரியக³ணானி பஹாய, நேகானி
தா³ஸக³ணானி பஹாய, நேகானி தா³ஸிக³ணானி பஹாய கேஸமஸ்ஸுங் ஓஹாரெத்வா காஸாயானி
வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதுங்; தஞ்ஹி தஸ்ஸ
அப³லங் ப³ந்த⁴னங், து³ப்³ப³லங் ப³ந்த⁴னங், பூதிகங் ப³ந்த⁴னங், அஸாரகங்
ப³ந்த⁴ன’’ந்தி. ‘‘ஏவமேவ கோ², உதா³யி, இதே⁴கச்சே குலபுத்தா ‘இத³ங் பஜஹதா²’தி
மயா வுச்சமானா தே ஏவமாஹங்ஸு – ‘கிங் பனிமஸ்ஸ அப்பமத்தகஸ்ஸ ஓரமத்தகஸ்ஸ
பஹாதப்³ப³ஸ்ஸ யஸ்ஸ நோ ப⁴க³வா பஹானமாஹ யஸ்ஸ, நோ ஸுக³தோ
படினிஸ்ஸக்³க³மாஹா’தி? தே தஞ்சேவ பஜஹந்தி, மயி ச ந அப்பச்சயங்
உபட்டா²பெந்தி. யே ச பி⁴க்கூ² ஸிக்கா²காமா தே தங் பஹாய
அப்பொஸ்ஸுக்கா பன்னலோமா பரத³த்தவுத்தா மிக³பூ⁴தேன சேதஸா விஹரந்தி. தேஸங்
தங், உதா³யி, ஹோதி அப³லங் ப³ந்த⁴னங், து³ப்³ப³லங் ப³ந்த⁴னங், பூதிகங்
ப³ந்த⁴னங், அஸாரகங் ப³ந்த⁴னங்’’.
154. ‘‘சத்தாரோமே , உதா³யி, புக்³க³லா ஸந்தோ ஸங்விஜ்ஜமானா லோகஸ்மிங். கதமே
சத்தாரோ? இது⁴தா³யி, ஏகச்சோ புக்³க³லோ உபதி⁴பஹானாய படிபன்னோ ஹோதி
உபதி⁴படினிஸ்ஸக்³கா³ய. தமேனங் உபதி⁴பஹானாய படிபன்னங் உபதி⁴படினிஸ்ஸக்³கா³ய
உபதி⁴படிஸங்யுத்தா ஸரஸங்கப்பா ஸமுதா³சரந்தி. ஸோ தே அதி⁴வாஸேதி, நப்பஜஹதி, ந
வினோதே³தி, ந ப்³யந்தீகரோதி, ந அனபா⁴வங் க³மேதி. இமங் கோ² அஹங், உதா³யி,
புக்³க³லங் ‘ஸங்யுத்தோ’தி வதா³மி நோ ‘விஸங்யுத்தோ’. தங் கிஸ்ஸ ஹேது?
இந்த்³ரியவேமத்ததா ஹி மே, உதா³யி, இமஸ்மிங் புக்³க³லே விதி³தா.
‘‘இத⁴ பனுதா³யி, ஏகச்சோ புக்³க³லோ உபதி⁴பஹானாய
படிபன்னோ ஹோதி உபதி⁴படினிஸ்ஸக்³கா³ய. தமேனங் உபதி⁴பஹானாய படிபன்னங்
உபதி⁴படினிஸ்ஸக்³கா³ய உபதி⁴படிஸங்யுத்தா ஸரஸங்கப்பா ஸமுதா³சரந்தி. ஸோ தே
நாதி⁴வாஸேதி, பஜஹதி, வினோதே³தி, ப்³யந்தீகரோதி, அனபா⁴வங் க³மேதி. இமம்பி
கோ² அஹங், உதா³யி , புக்³க³லங் ‘ஸங்யுத்தோ’தி வதா³மி நோ ‘விஸங்யுத்தோ’. தங் கிஸ்ஸ ஹேது? இந்த்³ரியவேமத்ததா ஹி மே, உதா³யி, இமஸ்மிங் புக்³க³லே விதி³தா.
‘‘இத⁴ பனுதா³யி, ஏகச்சோ புக்³க³லோ உபதி⁴பஹானாய
படிபன்னோ ஹோதி உபதி⁴படினிஸ்ஸக்³கா³ய. தமேனங் உபதி⁴பஹானாய படிபன்னங்
உபதி⁴படினிஸ்ஸக்³கா³ய கதா³சி கரஹசி ஸதிஸம்மோஸா உபதி⁴படிஸங்யுத்தா
ஸரஸங்கப்பா ஸமுதா³சரந்தி; த³ந்தோ⁴, உதா³யி, ஸதுப்பாதோ³. அத² கோ² நங்
கி²ப்பமேவ பஜஹதி, வினோதே³தி, ப்³யந்தீகரோதி, அனபா⁴வங் க³மேதி. ஸெய்யதா²பி,
உதா³யி, புரிஸோ தி³வஸங்ஸந்தத்தே [தி³வஸஸந்தத்தே (ஸீ॰ ஸ்யா॰ கங்॰ பீ॰)]
அயோகடாஹே த்³வே வா தீணி வா உத³கபு²ஸிதானி நிபாதெய்ய; த³ந்தோ⁴, உதா³யி,
உத³கபு²ஸிதானங் நிபாதோ. அத² கோ² நங் கி²ப்பமேவ பரிக்க²யங் பரியாதா³னங்
க³ச்செ²ய்ய. ஏவமேவ கோ², உதா³யி, இதே⁴கச்சோ
புக்³க³லோ உபதி⁴பஹானாய படிபன்னோ ஹோதி உபதி⁴படினிஸ்ஸக்³கா³ய. தமேனங்
உபதி⁴பஹானாய படிபன்னங் உபதி⁴படினிஸ்ஸக்³கா³ய கதா³சி கரஹசி ஸதிஸம்மோஸா
உபதி⁴படிஸங்யுத்தா ஸரஸங்கப்பா ஸமுதா³சரந்தி; த³ந்தோ⁴, உதா³யி, ஸதுப்பாதோ³.
அத² கோ² நங் கி²ப்பமேவ பஜஹதி, வினோதே³தி, ப்³யந்தீகரோதி, அனபா⁴வங் க³மேதி.
இமம்பி கோ² அஹங், உதா³யி, புக்³க³லங் ‘ஸங்யுத்தோ’தி வதா³மி நோ
‘விஸங்யுத்தோ’. தங் கிஸ்ஸ ஹேது? இந்த்³ரியவேமத்ததா ஹி மே, உதா³யி, இமஸ்மிங் புக்³க³லே விதி³தா.
‘‘இத⁴ பனுதா³யி, ஏகச்சோ புக்³க³லோ ‘உபதி⁴ து³க்க²ஸ்ஸ
மூல’ந்தி – இதி விதி³த்வா நிருபதி⁴ ஹோதி, உபதி⁴ஸங்க²யே விமுத்தோ. இமங் கோ²
அஹங், உதா³யி, புக்³க³லங் ‘விஸங்யுத்தோ’தி வதா³மி நோ ‘ஸங்யுத்தோ’தி .
தங் கிஸ்ஸ ஹேது? இந்த்³ரியவேமத்ததா ஹி மே, உதா³யி, இமஸ்மிங் புக்³க³லே
விதி³தா. இமே கோ², உதா³யி, சத்தாரோ புக்³க³லா ஸந்தோ ஸங்விஜ்ஜமானா
லோகஸ்மிங்.
155.
‘‘பஞ்ச கோ² இமே, உதா³யி, காமகு³ணா. கதமே பஞ்ச? சக்கு²விஞ்ஞெய்யா ரூபா
இட்டா² கந்தா மனாபா பியரூபா காமூபஸங்ஹிதா ரஜனீயா, ஸோதவிஞ்ஞெய்யா
ஸத்³தா³…பே॰… கா⁴னவிஞ்ஞெய்யா க³ந்தா⁴… ஜிவ்ஹாவிஞ்ஞெய்யா ரஸா… காயவிஞ்ஞெய்யா
பொ²ட்ட²ப்³பா³ இட்டா² கந்தா மனாபா பியரூபா காமூபஸங்ஹிதா ரஜனீயா. இமே கோ²,
உதா³யி, பஞ்ச காமகு³ணா. யங் கோ², உதா³யி, இமே பஞ்ச காமகு³ணே படிச்ச
உப்பஜ்ஜதி ஸுக²ங் ஸோமனஸ்ஸங் இத³ங் வுச்சதி காமஸுக²ங் மிள்ஹஸுக²ங் [மீள்ஹஸுக²ங் (ஸீ॰ பீ॰)] புது²ஜ்ஜனஸுக²ங் அனரியஸுக²ங், ந ஸேவிதப்³ப³ங், ந பா⁴வேதப்³ப³ங், ந ப³ஹுலீகாதப்³ப³ங்; ‘பா⁴யிதப்³ப³ங் ஏதஸ்ஸ ஸுக²ஸ்ஸா’தி வதா³மி.
156. ‘‘இது⁴தா³யி ,
பி⁴க்கு² விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி,
விதக்கவிசாரானங் வூபஸமா… து³தியங் ஜா²னங் உபஸம்பஜ்ஜ விஹரதி, பீதியா ச
விராகா³… ததியங் ஜா²னங் உபஸம்பஜ்ஜ விஹரதி, ஸுக²ஸ்ஸ ச பஹானா… சதுத்த²ங்
ஜா²னங் உபஸம்பஜ்ஜ விஹரதி. இத³ங் வுச்சதி நெக்க²ம்மஸுக²ங் பவிவேகஸுக²ங்
உபஸமஸுக²ங் ஸம்போ³த⁴ஸுக²ங், ஆஸேவிதப்³ப³ங், பா⁴வேதப்³ப³ங்,
ப³ஹுலீகாதப்³ப³ங்; ‘ந பா⁴யிதப்³ப³ங் ஏதஸ்ஸ ஸுக²ஸ்ஸா’தி வதா³மி.
‘‘இது⁴தா³யி, பி⁴க்கு² விவிச்சேவ காமேஹி…பே॰… பட²மங்
ஜா²னங் உபஸம்பஜ்ஜ விஹரதி; இத³ங் கோ² அஹங், உதா³யி, இஞ்ஜிதஸ்மிங் வதா³மி.
கிஞ்ச தத்த² இஞ்ஜிதஸ்மிங்? யதே³வ தத்த² விதக்கவிசாரா அனிருத்³தா⁴ ஹொந்தி
இத³ங் தத்த² இஞ்ஜிதஸ்மிங். இது⁴தா³யி, பி⁴க்கு² விதக்கவிசாரானங்
வூபஸமா…பே॰… து³தியங் ஜா²னங் உபஸம்பஜ்ஜ விஹரதி; இத³ம்பி கோ² அஹங், உதா³யி,
இஞ்ஜிதஸ்மிங் வதா³மி. கிஞ்ச தத்த² இஞ்ஜிதஸ்மிங்? யதே³வ தத்த² பீதிஸுக²ங்
அனிருத்³த⁴ங் ஹோதி இத³ங் தத்த² இஞ்ஜிதஸ்மிங். இது⁴தா³யி, பி⁴க்கு² பீதியா ச
விராகா³…பே॰… ததியங் ஜா²னங் உபஸம்பஜ்ஜ விஹரதி;
இத³ம்பி கோ² அஹங், உதா³யி, இஞ்ஜிதஸ்மிங் வதா³மி. கிஞ்ச தத்த² இஞ்ஜிதஸ்மிங்?
யதே³வ தத்த² உபெக்கா²ஸுக²ங் அனிருத்³த⁴ங் ஹோதி
இத³ங் தத்த² இஞ்ஜிதஸ்மிங். இது⁴தா³யி, பி⁴க்கு² ஸுக²ஸ்ஸ ச பஹானா…பே॰…
சதுத்த²ங் ஜா²னங் உபஸம்பஜ்ஜ விஹரதி; இத³ங் கோ² அஹங், உதா³யி,
அனிஞ்ஜிதஸ்மிங் வதா³மி.
‘‘இது⁴தா³யி , பி⁴க்கு²
விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி; இத³ங் கோ² அஹங்,
உதா³யி, ‘அனல’ந்தி வதா³மி, ‘பஜஹதா²’தி வதா³மி, ‘ஸமதிக்கமதா²’தி வதா³மி. கோ ச
தஸ்ஸ ஸமதிக்கமோ? இது⁴தா³யி, பி⁴க்கு² விதக்கவிசாரானங் வூபஸமா… து³தியங்
ஜா²னங் உபஸம்பஜ்ஜ விஹரதி, அயங் தஸ்ஸ ஸமதிக்கமோ; இத³ம்பி கோ² அஹங், உதா³யி,
‘அனல’ந்தி வதா³மி, ‘பஜஹதா²’தி வதா³மி, ‘ஸமதிக்கமதா²’தி வதா³மி. கோ ச தஸ்ஸ
ஸமதிக்கமோ? இது⁴தா³யி, பி⁴க்கு² பீதியா ச விராகா³… ததியங் ஜா²னங் உபஸம்பஜ்ஜ
விஹரதி, அயங் தஸ்ஸ ஸமதிக்கமோ; இத³ம்பி கோ² அஹங், உதா³யி, ‘அனல’ந்தி
வதா³மி, ‘பஜஹதா²’தி வதா³மி, ‘ஸமதிக்கமதா²’தி வதா³மி. கோ ச தஸ்ஸ ஸமதிக்கமோ?
இது⁴தா³யி, பி⁴க்கு² ஸுக²ஸ்ஸ ச பஹானா… சதுத்த²ங் ஜா²னங் உபஸம்பஜ்ஜ விஹரதி,
அயங் தஸ்ஸ ஸமதிக்கமோ; இத³ம்பி கோ² அஹங், உதா³யி, ‘அனல’ந்தி வதா³மி,
‘பஜஹதா²’தி வதா³மி, ‘ஸமதிக்கமதா²’தி வதா³மி. கோ ச தஸ்ஸ ஸமதிக்கமோ?
இது⁴தா³யி, பி⁴க்கு² ஸப்³ப³ஸோ ரூபஸஞ்ஞானங் ஸமதிக்கமா படிக⁴ஸஞ்ஞானங்
அத்த²ங்க³மா நானத்தஸஞ்ஞானங் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனங்
உபஸம்பஜ்ஜ விஹரதி, அயங் தஸ்ஸ ஸமதிக்கமோ; இத³ம்பி கோ² அஹங், உதா³யி,
‘அனல’ந்தி வதா³மி, ‘பஜஹதா²’தி வதா³மி,
‘ஸமதிக்கமதா²’தி வதா³மி. கோ ச தஸ்ஸ ஸமதிக்கமோ? இது⁴தா³யி, பி⁴க்கு²
ஸப்³ப³ஸோ ஆகாஸானஞ்சாயதனங் ஸமதிக்கம்ம ‘அனந்தங் விஞ்ஞாண’ந்தி
விஞ்ஞாணஞ்சாயதனங் உபஸம்பஜ்ஜ விஹரதி, அயங் தஸ்ஸ ஸமதிக்கமோ ; இத³ம்பி கோ² அஹங், உதா³யி, ‘அனல’ந்தி வதா³மி, ‘பஜஹதா²’தி வதா³மி, ‘ஸமதிக்கமதா²’தி வதா³மி. கோ ச
தஸ்ஸ ஸமதிக்கமோ? இது⁴தா³யி, பி⁴க்கு² ஸப்³ப³ஸோ விஞ்ஞாணஞ்சாயதனங்
ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனங் உபஸம்பஜ்ஜ விஹரதி, அயங் தஸ்ஸ
ஸமதிக்கமோ; இத³ம்பி கோ² அஹங், உதா³யி, ‘அனல’ந்தி வதா³மி, ‘பஜஹதா²’தி
வதா³மி, ‘ஸமதிக்கமதா²’தி வதா³மி. கோ ச தஸ்ஸ ஸமதிக்கமோ? இது⁴தா³யி, பி⁴க்கு²
ஸப்³ப³ஸோ ஆகிஞ்சஞ்ஞாயதனங் ஸமதிக்கம்ம நேவஸஞ்ஞானாஸஞ்ஞாயதனங் உபஸம்பஜ்ஜ
விஹரதி, அயங் தஸ்ஸ ஸமதிக்கமோ; இத³ம்பி கோ² அஹங், உதா³யி, ‘அனல’ந்தி
வதா³மி, ‘பஜஹதா²’தி வதா³மி, ‘ஸமதிக்கமதா²’தி வதா³மி. கோ ச தஸ்ஸ ஸமதிக்கமோ?
இது⁴தா³யி, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனங் ஸமதிக்கம்ம
ஸஞ்ஞாவேத³யிதனிரோத⁴ங் உபஸம்பஜ்ஜ விஹரதி, அயங் தஸ்ஸ ஸமதிக்கமோ; இதி கோ²
அஹங், உதா³யி, நேவஸஞ்ஞானாஸஞ்ஞாயதனஸ்ஸபி பஹானங் வதா³மி. பஸ்ஸஸி நோ த்வங்,
உதா³யி, தங் ஸங்யோஜனங் அணுங் வா தூ²லங் வா யஸ்ஸாஹங் நோ பஹானங் வதா³மீ’’தி?
‘‘நோ ஹேதங், ப⁴ந்தே’’தி.
இத³மவோச ப⁴க³வா. அத்தமனோ ஆயஸ்மா உதா³யீ ப⁴க³வதோ பா⁴ஸிதங் அபி⁴னந்தீ³தி.
லடுகிகோபமஸுத்தங் நிட்டி²தங் ச²ட்ட²ங்.
7. சாதுமஸுத்தங்
157. ஏவங்
மே ஸுதங் – ஏகங் ஸமயங் ப⁴க³வா சாதுமாயங் விஹரதி ஆமலகீவனே. தேன கோ² பன
ஸமயேன ஸாரிபுத்தமொக்³க³ல்லானப்பமுகா²னி பஞ்சமத்தானி பி⁴க்கு²ஸதானி சாதுமங்
அனுப்பத்தானி ஹொந்தி ப⁴க³வந்தங் த³ஸ்ஸனாய. தே ச ஆக³ந்துகா பி⁴க்கூ²
நேவாஸிகேஹி பி⁴க்கூ²ஹி ஸத்³தி⁴ங் படிஸம்மோத³மானா ஸேனாஸனானி பஞ்ஞாபயமானா
பத்தசீவரானி படிஸாமயமானா உச்சாஸத்³தா³ மஹாஸத்³தா³ அஹேஸுங். அத² கோ² ப⁴க³வா
ஆயஸ்மந்தங் ஆனந்த³ங் ஆமந்தேஸி – ‘‘கே பனேதே, ஆனந்த³, உச்சாஸத்³தா³
மஹாஸத்³தா³, கேவட்டா மஞ்ஞே மச்ச²விலோபே’’தி? ‘‘ஏதானி, ப⁴ந்தே,
ஸாரிபுத்தமொக்³க³ல்லானப்பமுகா²னி பஞ்சமத்தானி பி⁴க்கு²ஸதானி சாதுமங்
அனுப்பத்தானி ப⁴க³வந்தங் த³ஸ்ஸனாய. தே ஆக³ந்துகா பி⁴க்கூ² நேவாஸிகேஹி
பி⁴க்கூ²ஹி ஸத்³தி⁴ங் படிஸம்மோத³மானா ஸேனாஸனானி பஞ்ஞாபயமானா பத்தசீவரானி
படிஸாமயமானா உச்சாஸத்³தா³ மஹாஸத்³தா³’’தி. ‘‘தேனஹானந்த³, மம வசனேன தே
பி⁴க்கூ² ஆமந்தேஹி – ‘ஸத்தா² ஆயஸ்மந்தே ஆமந்தேதீ’’’தி. ‘‘ஏவங், ப⁴ந்தே’’தி
கோ² ஆயஸ்மா ஆனந்தோ³ ப⁴க³வதோ படிஸ்ஸுத்வா யேன தே பி⁴க்கூ² தேனுபஸங்கமி;
உபஸங்கமித்வா தே பி⁴க்கூ² ஏதத³வோச – ‘‘ஸத்தா² ஆயஸ்மந்தே ஆமந்தேதீ’’தி.
‘‘ஏவமாவுஸோ’’தி கோ² தே பி⁴க்கூ² ஆயஸ்மதோ ஆனந்த³ஸ்ஸ
படிஸ்ஸுத்வா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னே கோ² தே
பி⁴க்கூ² ப⁴க³வா ஏதத³வோச – ‘‘கிங் நு தும்ஹே, பி⁴க்க²வே, உச்சாஸத்³தா³
மஹாஸத்³தா³, கேவட்டா மஞ்ஞே மச்ச²விலோபே’’தி? ‘‘இமானி, ப⁴ந்தே,
ஸாரிபுத்தமொக்³க³ல்லானப்பமுகா²னி பஞ்சமத்தானி பி⁴க்கு²ஸதானி சாதுமங்
அனுப்பத்தானி ப⁴க³வந்தங் த³ஸ்ஸனாய. தேமே ஆக³ந்துகா பி⁴க்கூ² நேவாஸிகேஹி
பி⁴க்கூ²ஹி ஸத்³தி⁴ங் படிஸம்மோத³மானா ஸேனாஸனானி பஞ்ஞாபயமானா பத்தசீவரானி
படிஸாமயமானா உச்சாஸத்³தா³ மஹாஸத்³தா³’’தி. ‘‘க³ச்ச²த², பி⁴க்க²வே, பணாமேமி
வோ, ந வோ மம ஸந்திகே வத்த²ப்³ப³’’ந்தி. ‘‘ஏவங், ப⁴ந்தே’’தி கோ² தே பி⁴க்கூ²
ப⁴க³வதோ படிஸ்ஸுத்வா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங்
கத்வா ஸேனாஸனங் ஸங்ஸாமெத்வா பத்தசீவரமாதா³ய பக்கமிங்ஸு.
158. தேன கோ² பன ஸமயேன சாதுமெய்யகா ஸக்யா ஸந்தா²கா³ரே [ஸந்தா⁴கா³ரே (க॰)] ஸன்னிபதிதா ஹொந்தி கேனசிதே³வ
கரணீயேன. அத்³த³ஸங்ஸு கோ² சாதுமெய்யகா ஸக்யா தே பி⁴க்கூ² தூ³ரதோவ
ஆக³ச்ச²ந்தே; தி³ஸ்வான யேன தே பி⁴க்கூ² தேனுபஸங்கமிங்ஸு; உபஸங்கமித்வா தே
பி⁴க்கூ² ஏதத³வோசுங் – ‘‘ஹந்த³, கஹங் பன தும்ஹே ஆயஸ்மந்தோ க³ச்ச²தா²’’தி?
‘‘ப⁴க³வதா கோ², ஆவுஸோ, பி⁴க்கு²ஸங்கோ⁴ பணாமிதோ’’தி. ‘‘தேனஹாயஸ்மந்தோ
முஹுத்தங் நிஸீத³த², அப்பேவ நாம மயங் ஸக்குணெய்யாம ப⁴க³வந்தங்
பஸாதே³து’’ந்தி. ‘‘ஏவமாவுஸோ’’தி கோ² தே பி⁴க்கூ² சாதுமெய்யகானங் ஸக்யானங்
பச்சஸ்ஸோஸுங். அத² கோ² சாதுமெய்யகா ஸக்யா யேன ப⁴க³வா தேனுபஸங்கமிங்ஸு;
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³ங்ஸு. ஏகமந்தங் நிஸின்னா கோ² சாதுமெய்யகா ஸக்யா ப⁴க³வந்தங்
ஏதத³வோசுங் – ‘‘அபி⁴னந்த³து, ப⁴ந்தே, ப⁴க³வா பி⁴க்கு²ஸங்க⁴ங்; அபி⁴வத³து,
ப⁴ந்தே, ப⁴க³வா பி⁴க்கு²ஸங்க⁴ங். ஸெய்யதா²பி, ப⁴ந்தே ,
ப⁴க³வதா புப்³பே³ பி⁴க்கு²ஸங்கோ⁴ அனுக்³க³ஹிதோ, ஏவமேவ ப⁴க³வா ஏதரஹி
அனுக்³க³ண்ஹாது பி⁴க்கு²ஸங்க⁴ங். ஸந்தெத்த², ப⁴ந்தே, பி⁴க்கூ² நவா
அசிரபப்³ப³ஜிதா அது⁴னாக³தா இமங் த⁴ம்மவினயங். தேஸங் ப⁴க³வந்தங் த³ஸ்ஸனாய
அலப⁴ந்தானங் ஸியா அஞ்ஞத²த்தங், ஸியா விபரிணாமோ. ஸெய்யதா²பி, ப⁴ந்தே,
பீ³ஜானங் தருணானங் உத³கங் அலப⁴ந்தானங் ஸியா அஞ்ஞத²த்தங் ஸியா விபரிணாமோ;
ஏவமேவ கோ², ப⁴ந்தே, ஸந்தெத்த² பி⁴க்கூ² நவா
அசிரபப்³ப³ஜிதா அது⁴னாக³தா இமங் த⁴ம்மவினயங், தேஸங் ப⁴க³வந்தங் த³ஸ்ஸனாய
அலப⁴ந்தானங் ஸியா அஞ்ஞத²த்தங், ஸியா விபரிணாமோ. ஸெய்யதா²பி, ப⁴ந்தே,
வச்ச²ஸ்ஸ தருணஸ்ஸ மாதரங் அபஸ்ஸந்தஸ்ஸ ஸியா அஞ்ஞத²த்தங், ஸியா விபரிணாமோ;
ஏவமேவ கோ², ப⁴ந்தே, ஸந்தெத்த² பி⁴க்கூ² நவா அசிரபப்³ப³ஜிதா அது⁴னாக³தா இமங்
த⁴ம்மவினயங், தேஸங் ப⁴க³வந்தங் அபஸ்ஸந்தானங் ஸியா அஞ்ஞத²த்தங், ஸியா
விபரிணாமோ. அபி⁴னந்த³து, ப⁴ந்தே, ப⁴க³வா பி⁴க்கு²ஸங்க⁴ங்; அபி⁴வத³து,
ப⁴ந்தே, ப⁴க³வா பி⁴க்கு²ஸங்க⁴ங். ஸெய்யதா²பி, ப⁴ந்தே, ப⁴க³வதா புப்³பே³
பி⁴க்கு²ஸங்கோ⁴ அனுக்³க³ஹிதோ; ஏவமேவ ப⁴க³வா ஏதரஹி அனுக்³க³ண்ஹாது
பி⁴க்கு²ஸங்க⁴’’ந்தி.
159. அத² கோ² ப்³ரஹ்மா ஸஹம்பதி ப⁴க³வதோ சேதஸா சேதோபரிவிதக்கமஞ்ஞாய – ஸெய்யதா²பி நாம ப³லவா புரிஸோ ஸமிஞ்ஜிதங் [ஸம்மிஞ்ஜிதங் (ஸீ॰ ஸ்யா॰ கங்॰ பீ॰)] வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய, ஏவமேவ – ப்³ரஹ்மலோகே
அந்தரஹிதோ ப⁴க³வதோ புரதோ பாதுரஹோஸி. அத² கோ² ப்³ரஹ்மா ஸஹம்பதி ஏகங்ஸங்
உத்தராஸங்க³ங் கரித்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச
– ‘‘அபி⁴னந்த³து, ப⁴ந்தே, ப⁴க³வா பி⁴க்கு²ஸங்க⁴ங்; அபி⁴வத³து, ப⁴ந்தே,
ப⁴க³வா பி⁴க்கு²ஸங்க⁴ங். ஸெய்யதா²பி, ப⁴ந்தே, ப⁴க³வதா புப்³பே³
பி⁴க்கு²ஸங்கோ⁴ அனுக்³க³ஹிதோ; ஏவமேவ ப⁴க³வா ஏதரஹி அனுக்³க³ண்ஹாது
பி⁴க்கு²ஸங்க⁴ங். ஸந்தெத்த², ப⁴ந்தே, பி⁴க்கூ² நவா அசிரபப்³ப³ஜிதா
அது⁴னாக³தா இமங் த⁴ம்மவினயங், தேஸங் ப⁴க³வந்தங்
த³ஸ்ஸனாய அலப⁴ந்தானங் ஸியா அஞ்ஞத²த்தங், ஸியா விபரிணாமோ. ஸெய்யதா²பி,
ப⁴ந்தே, பீ³ஜானங் தருணானங் உத³கங் அலப⁴ந்தானங் ஸியா அஞ்ஞத²த்தங், ஸியா
விபரிணாமோ; ஏவமேவ கோ², ப⁴ந்தே, ஸந்தெத்த² பி⁴க்கூ² நவா அசிரபப்³ப³ஜிதா
அது⁴னாக³தா இமங் த⁴ம்மவினயங், தேஸங் ப⁴க³வந்தங் த³ஸ்ஸனாய அலப⁴ந்தானங் ஸியா
அஞ்ஞத²த்தங், ஸியா விபரிணாமோ. ஸெய்யதா²பி ப⁴ந்தே, வச்ச²ஸ்ஸ தருணஸ்ஸ மாதரங்
அபஸ்ஸந்தஸ்ஸ ஸியா அஞ்ஞத²த்தங், ஸியா விபரிணாமோ; ஏவமேவ கோ², ப⁴ந்தே,
ஸந்தெத்த² பி⁴க்கூ² நவா அசிரபப்³ப³ஜிதா அது⁴னாக³தா
இமங் த⁴ம்மவினயங், தேஸங் ப⁴க³வந்தங் அபஸ்ஸந்தானங் ஸியா அஞ்ஞத²த்தங், ஸியா
விபரிணாமோ. அபி⁴னந்த³து, ப⁴ந்தே, ப⁴க³வா பி⁴க்கு²ஸங்க⁴ங்; அபி⁴வத³து,
ப⁴ந்தே, ப⁴க³வா பி⁴க்கு²ஸங்க⁴ங். ஸெய்யதா²பி, ப⁴ந்தே, ப⁴க³வதா புப்³பே³
பி⁴க்கு²ஸங்கோ⁴ அனுக்³க³ஹிதோ; ஏவமேவ ப⁴க³வா ஏதரஹி அனுக்³க³ண்ஹாது பி⁴க்கு²ஸங்க⁴’’ந்தி.
160. அஸக்கி²ங்ஸு கோ² சாதுமெய்யகா ச ஸக்யா ப்³ரஹ்மா ச ஸஹம்பதி ப⁴க³வந்தங் பஸாதே³துங் பீ³ஜூபமேன ச தருணூபமேன ச. அத²
கோ² ஆயஸ்மா மஹாமொக்³க³ல்லானோ பி⁴க்கூ² ஆமந்தேஸி – ‘‘உட்டே²தா²வுஸோ,
க³ண்ஹத² பத்தசீவரங். பஸாதி³தோ ப⁴க³வா சாதுமெய்யகேஹி ச ஸக்யேஹி ப்³ரஹ்முனா ச
ஸஹம்பதினா பீ³ஜூபமேன ச தருணூபமேன சா’’தி. ‘‘ஏவமாவுஸோ’’தி கோ² தே பி⁴க்கூ²
ஆயஸ்மதோ மஹாமொக்³க³ல்லானஸ்ஸ படிஸ்ஸுத்வா உட்டா²யாஸனா பத்தசீவரமாதா³ய யேன
ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³ங்ஸு. ஏகமந்தங் நிஸின்னங் கோ² ஆயஸ்மந்தங் ஸாரிபுத்தங் ப⁴க³வா
ஏதத³வோச – ‘‘கிந்தி தே, ஸாரிபுத்த, அஹோஸி மயா பி⁴க்கு²ஸங்கே⁴ பணாமிதே’’தி?
‘‘ஏவங் கோ² மே, ப⁴ந்தே, அஹோஸி – ‘ப⁴க³வதா பி⁴க்கு²ஸங்கோ⁴ பணாமிதோ.
அப்பொஸ்ஸுக்கோ தா³னி ப⁴க³வா தி³ட்ட²த⁴ம்மஸுக²விஹாரங் அனுயுத்தோ விஹரிஸ்ஸதி,
மயம்பி தா³னி அப்பொஸ்ஸுக்கா தி³ட்ட²த⁴ம்மஸுக²விஹாரமனுயுத்தா
விஹரிஸ்ஸாமா’’’தி. ‘‘ஆக³மேஹி த்வங், ஸாரிபுத்த, ஆக³மேஹி த்வங், ஸாரிபுத்த,
தி³ட்ட²த⁴ம்மஸுக²விஹார’’ந்தி. அத² கோ² ப⁴க³வா ஆயஸ்மந்தங் மஹாமொக்³க³ல்லானங்
ஆமந்தேஸி – ‘‘கிந்தி தே, மொக்³க³ல்லான, அஹோஸி மயா பி⁴க்கு²ஸங்கே⁴
பணாமிதே’’தி? ‘‘ஏவங் கோ² மே, ப⁴ந்தே, அஹோஸி – ‘ப⁴க³வதா பி⁴க்கு²ஸங்கோ⁴
பணாமிதோ. அப்பொஸ்ஸுக்கோ தா³னி ப⁴க³வா தி³ட்ட²த⁴ம்மஸுக²விஹாரங் அனுயுத்தோ
விஹரிஸ்ஸதி, அஹஞ்ச தா³னி ஆயஸ்மா ச ஸாரிபுத்தோ பி⁴க்கு²ஸங்க⁴ங்
பரிஹரிஸ்ஸாமா’’’தி. ‘‘ஸாது⁴ ஸாது⁴, மொக்³க³ல்லான! அஹங் வா ஹி, மொக்³க³ல்லான
, பி⁴க்கு²ஸங்க⁴ங் பரிஹரெய்யங் ஸாரிபுத்தமொக்³க³ல்லானா வா’’தி.
161. அத² கோ² ப⁴க³வா பி⁴க்கூ² ஆமந்தேஸி – ‘‘சத்தாரிமானி, பி⁴க்க²வே, ப⁴யானி உத³கோரோஹந்தே பாடிகங்கி²தப்³பா³னி. கதமானி சத்தாரி? ஊமிப⁴யங் [உம்மீப⁴யங் (ஸ்யா॰ கங்॰)],
கும்பீ⁴லப⁴யங், ஆவட்டப⁴யங், ஸுஸுகாப⁴யங் – இமானி, பி⁴க்க²வே, சத்தாரி
ப⁴யானி உத³கோரோஹந்தே பாடிகங்கி²தப்³பா³னி. ஏவமேவ கோ², பி⁴க்க²வே,
சத்தாரிமானி ப⁴யானி இதே⁴கச்சே புக்³க³லே இமஸ்மிங் த⁴ம்மவினயே அகா³ரஸ்மா அனகா³ரியங் பப்³ப³ஜிதே பாடிகங்கி²தப்³பா³னி. கதமானி சத்தாரி? ஊமிப⁴யங், கும்பீ⁴லப⁴யங், ஆவட்டப⁴யங், ஸுஸுகாப⁴யங்.
162.
‘‘கதமஞ்ச, பி⁴க்க²வே, ஊமிப⁴யங்? இத⁴, பி⁴க்க²வே, ஏகச்சோ குலபுத்தோ ஸத்³தா⁴
அகா³ரஸ்மா அனகா³ரியங் பப்³ப³ஜிதோ ஹோதி – ‘ஓதிண்ணொம்ஹி ஜாதியா ஜராய மரணேன
ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி து³க்கோ²திண்ணோ
து³க்க²பரேதோ; அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா
பஞ்ஞாயேதா²’தி. தமேனங் ததா² பப்³ப³ஜிதங் ஸமானங் ஸப்³ரஹ்மசாரீ ஓவத³ந்தி,
அனுஸாஸந்தி – ‘ஏவங் தே அபி⁴க்கமிதப்³ப³ங், ஏவங் தே படிக்கமிதப்³ப³ங், ஏவங்
தே ஆலோகிதப்³ப³ங், ஏவங் தே விலோகிதப்³ப³ங், ஏவங் தே ஸமிஞ்ஜிதப்³ப³ங், ஏவங்
தே பஸாரிதப்³ப³ங், ஏவங் தே ஸங்கா⁴டிபத்தசீவரங் தா⁴ரேதப்³ப³’ந்தி. தஸ்ஸ ஏவங்
ஹோதி – ‘மயங் கோ² புப்³பே³ அகா³ரியபூ⁴தா ஸமானா அஞ்ஞே ஓவதா³ம, அனுஸாஸாம [ஓவதா³மபி அனுஸாஸாமபி (ஸீ॰ ஸ்யா॰ கங்॰ பீ॰)]. இமே பனம்ஹாகங் புத்தமத்தா மஞ்ஞே, நத்தமத்தா மஞ்ஞே, அம்ஹே [ஏவங் (க॰)] ஓவதி³தப்³ப³ங்
அனுஸாஸிதப்³ப³ங் மஞ்ஞந்தீ’தி. ஸோ ஸிக்க²ங் பச்சக்கா²ய ஹீனாயாவத்ததி. அயங்
வுச்சதி, பி⁴க்க²வே, ஊமிப⁴யஸ்ஸ பீ⁴தோ ஸிக்க²ங் பச்சக்கா²ய ஹீனாயாவத்தோ.
‘ஊமிப⁴ய’ந்தி கோ², பி⁴க்க²வே, கோது⁴பாயாஸஸ்ஸேதங் அதி⁴வசனங்.
163.
‘‘கதமஞ்ச, பி⁴க்க²வே, கும்பீ⁴லப⁴யங்? இத⁴, பி⁴க்க²வே, ஏகச்சோ குலபுத்தோ
ஸத்³தா⁴ அகா³ரஸ்மா அனகா³ரியங் பப்³ப³ஜிதோ ஹோதி – ‘ஓதிண்ணொம்ஹி ஜாதியா ஜராய
மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி து³க்கோ²திண்ணோ
து³க்க²பரேதோ; அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா
பஞ்ஞாயேதா²’தி. தமேனங் ததா² பப்³ப³ஜிதங் ஸமானங் ஸப்³ரஹ்மசாரீ ஓவத³ந்தி
அனுஸாஸந்தி – ‘இத³ங் தே கா²தி³தப்³ப³ங், இத³ங் தே ந கா²தி³தப்³ப³ங்; இத³ங்
தே பு⁴ஞ்ஜிதப்³ப³ங், இத³ங் தே ந பு⁴ஞ்ஜிதப்³ப³ங்; இத³ங் தே ஸாயிதப்³ப³ங்,
இத³ங் தே ந ஸாயிதப்³ப³ங்; இத³ங் தே பாதப்³ப³ங், இத³ங் தே ந பாதப்³ப³ங்;
கப்பியங் தே கா²தி³தப்³ப³ங், அகப்பியங் தே ந கா²தி³தப்³ப³ங்; கப்பியங் தே
பு⁴ஞ்ஜிதப்³ப³ங், அகப்பியங் தே ந பு⁴ஞ்ஜிதப்³ப³ங்; கப்பியங் தே
ஸாயிதப்³ப³ங், அகப்பியங் தே ந ஸாயிதப்³ப³ங் ;
கப்பியங் தே பாதப்³ப³ங், அகப்பியங் தே ந பாதப்³ப³ங்; காலே தே
கா²தி³தப்³ப³ங், விகாலே தே ந கா²தி³தப்³ப³ங்; காலே தே பு⁴ஞ்ஜிதப்³ப³ங்,
விகாலே தே ந பு⁴ஞ்ஜிதப்³ப³ங்; காலே தே ஸாயிதப்³ப³ங், விகாலே தே ந ஸாயிதப்³ப³ங்; காலே தே பாதப்³ப³ங், விகாலே தே ந பாதப்³ப³’ந்தி. தஸ்ஸ ஏவங்
ஹோதி – ‘மயங் கோ² புப்³பே³ அகா³ரியபூ⁴தா ஸமானா யங் இச்சா²ம தங் கா²தா³ம,
யங் ந இச்சா²ம ந தங் கா²தா³ம; யங் இச்சா²ம தங் பு⁴ஞ்ஜாம, யங் ந இச்சா²ம ந தங் பு⁴ஞ்ஜாம; யங் இச்சா²ம தங் ஸாயாம, யங் ந இச்சா²ம ந தங் ஸாயாம; யங் இச்சா²ம தங் பிவாம [பிபாம (ஸீ॰ பீ॰)],
யங் ந இச்சா²ம ந தங் பிவாம; கப்பியம்பி கா²தா³ம, அகப்பியம்பி கா²தா³ம;
கப்பியம்பி பு⁴ஞ்ஜாம, அகப்பியம்பி பு⁴ஞ்ஜாம; கப்பியம்பி ஸாயாம, அகப்பியம்பி
ஸாயாம; கப்பியம்பி பிவாம, அகப்பியம்பி பிவாம; காலேபி கா²தா³ம, விகாலேபி
கா²தா³ம; காலேபி பு⁴ஞ்ஜாம விகாலேபி பு⁴ஞ்ஜாம; காலேபி ஸாயாம, விகாலேபி
ஸாயாம; காலேபி பிவாம, விகாலேபி பிவாம. யம்பி நோ ஸத்³தா⁴ க³ஹபதிகா தி³வா
விகாலே பணீதங் கா²த³னீயங் போ⁴ஜனீயங் தெ³ந்தி தத்த²பிமே முகா²வரணங் மஞ்ஞே
கரொந்தீ’தி. ஸோ ஸிக்க²ங் பச்சக்கா²ய ஹீனாயாவத்ததி. அயங் வுச்சதி,
பி⁴க்க²வே, கும்பீ⁴லப⁴யஸ்ஸ பீ⁴தோ ஸிக்க²ங் பச்சக்கா²ய ஹீனாயாவத்தோ.
‘கும்பீ⁴லப⁴ய’ந்தி கோ², பி⁴க்க²வே, ஓத³ரிகத்தஸ்ஸேதங் அதி⁴வசனங்.
164.
‘‘கதமஞ்ச, பி⁴க்க²வே, ஆவட்டப⁴யங்? இத⁴, பி⁴க்க²வே, ஏகச்சோ குலபுத்தோ
ஸத்³தா⁴ அகா³ரஸ்மா அனகா³ரியங் பப்³ப³ஜிதோ ஹோதி – ‘ஓதிண்ணொம்ஹி ஜாதியா ஜராய
மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி து³க்கோ²திண்ணோ
து³க்க²பரேதோ; அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா
பஞ்ஞாயேதா²’தி. ஸோ ஏவங் பப்³ப³ஜிதோ ஸமானோ புப்³ப³ண்ஹஸமயங் நிவாஸெத்வா
பத்தசீவரமாதா³ய கா³மங் வா நிக³மங் வா பிண்டா³ய பவிஸதி. அரக்கி²தேனேவ காயேன
அரக்கி²தாய வாசாய அனுபட்டி²தாய ஸதியா அஸங்வுதேஹி
இந்த்³ரியேஹி ஸோ தத்த² பஸ்ஸதி க³ஹபதிங் வா க³ஹபதிபுத்தங் வா பஞ்சஹி
காமகு³ணேஹி ஸமப்பிதங் ஸமங்கீ³பூ⁴தங் பரிசாரயமானங் [பரிசாரியமானங் (ஸ்யா॰ கங்॰ க॰)].
தஸ்ஸ ஏவங் ஹோதி – ‘மயங் கோ² புப்³பே³ அகா³ரியபூ⁴தா ஸமானா பஞ்சஹி
காமகு³ணேஹி ஸமப்பிதா ஸமங்கீ³பூ⁴தா பரிசாரிம்ஹா. ஸங்விஜ்ஜந்தி கோ² பன மே
குலே [ஸங்விஜ்ஜந்தி கோ² குலே (ஸீ॰ ஸ்யா॰ கங்॰ பீ॰)]
போ⁴கா³. ஸக்கா போ⁴கே³ ச பு⁴ஞ்ஜிதுங் புஞ்ஞானி ச காது’ந்தி. ஸோ ஸிக்க²ங்
பச்சக்கா²ய ஹீனாயாவத்ததி. அயங் வுச்சதி, பி⁴க்க²வே, ஆவட்டப⁴யஸ்ஸ பீ⁴தோ
ஸிக்க²ங் பச்சக்கா²ய ஹீனாயாவத்தோ. ‘ஆவட்டப⁴ய’ந்தி கோ², பி⁴க்க²வே,
பஞ்சன்னேதங் காமகு³ணானங் அதி⁴வசனங்.
165. ‘‘கதமஞ்ச , பி⁴க்க²வே, ஸுஸுகாப⁴யங்? இத⁴, பி⁴க்க²வே, ஏகச்சோ
குலபுத்தோ ஸத்³தா⁴ அகா³ரஸ்மா அனகா³ரியங் பப்³ப³ஜிதோ ஹோதி – ‘ஓதிண்ணொம்ஹி
ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி
து³க்கோ²திண்ணோ து³க்க²பரேதோ; அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ
அந்தகிரியா பஞ்ஞாயேதா²’தி. ஸோ ஏவங் பப்³ப³ஜிதோ ஸமானோ புப்³ப³ண்ஹஸமயங்
நிவாஸெத்வா பத்தசீவரமாதா³ய கா³மங் வா நிக³மங் வா பிண்டா³ய பவிஸதி.
அரக்கி²தேனேவ காயேன அரக்கி²தாய வாசாய அனுபட்டி²தாய ஸதியா அஸங்வுதேஹி
இந்த்³ரியேஹி ஸோ தத்த² பஸ்ஸதி மாதுகா³மங் து³ன்னிவத்த²ங் வா து³ப்பாருதங்
வா. தஸ்ஸ மாதுகா³மங் தி³ஸ்வா து³ன்னிவத்த²ங் வா து³ப்பாருதங் வா ராகோ³
சித்தங் அனுத்³த⁴ங்ஸேதி. ஸோ ராகா³னுத்³த⁴ங்ஸேன [அனுத்³த⁴ஸ்தேன (ஸீ॰ பீ॰)] சித்தேன ஸிக்க²ங் பச்சக்கா²ய ஹீனாயாவத்ததி .
அயங் வுச்சதி, பி⁴க்க²வே, ஸுஸுகாப⁴யஸ்ஸ பீ⁴தோ ஸிக்க²ங் பச்சக்கா²ய
ஹீனாயாவத்தோ. ‘ஸுஸுகாப⁴ய’ந்தி கோ², பி⁴க்க²வே, மாதுகா³மஸ்ஸேதங் அதி⁴வசனங்.
இமானி கோ², பி⁴க்க²வே, சத்தாரி ப⁴யானி, இதே⁴கச்சே புக்³க³லே இமஸ்மிங்
த⁴ம்மவினயே அகா³ரஸ்மா அனகா³ரியங் பப்³ப³ஜிதே பாடிகங்கி²தப்³பா³னீ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
சாதுமஸுத்தங் நிட்டி²தங் ஸத்தமங்.
8. நளகபானஸுத்தங்
166. ஏவங்
மே ஸுதங் – ஏகங் ஸமயங் ப⁴க³வா கோஸலேஸு விஹரதி நளகபானே பலாஸவனே. தேன கோ² பன
ஸமயேன ஸம்ப³ஹுலா அபி⁴ஞ்ஞாதா அபி⁴ஞ்ஞாதா குலபுத்தா ப⁴க³வந்தங் உத்³தி³ஸ்ஸ
ஸத்³தா⁴ அகா³ரஸ்மா அனகா³ரியங் பப்³ப³ஜிதா ஹொந்தி – ஆயஸ்மா ச அனுருத்³தோ⁴,
ஆயஸ்மா ச ப⁴த்³தி³யோ [நந்தி³யோ (ஸீ॰ பீ॰) வினயே ச ம॰ நி॰ 1 சூளகோ³ஸிங்கே³ ச], ஆயஸ்மா ச கிமிலோ [கிம்பி³லோ (ஸீ॰ ஸ்யா॰ கங்॰ பீ॰)], ஆயஸ்மா ச ப⁴கு³, ஆயஸ்மா ச கொண்ட³ஞ்ஞோ [குண்ட³தா⁴னோ (ஸீ॰ பீ॰)], ஆயஸ்மா ச ரேவதோ, ஆயஸ்மா ச ஆனந்தோ³, அஞ்ஞே ச அபி⁴ஞ்ஞாதா அபி⁴ஞ்ஞாதா குலபுத்தா. தேன கோ² பன ஸமயேன ப⁴க³வா பி⁴க்கு²ஸங்க⁴பரிவுதோ அப்³போ⁴காஸே நிஸின்னோ ஹோதி. அத² கோ² ப⁴க³வா தே குலபுத்தே
ஆரப்³ப⁴ பி⁴க்கூ² ஆமந்தேஸி – ‘‘யே தே, பி⁴க்க²வே, குலபுத்தா மமங்
உத்³தி³ஸ்ஸ ஸத்³தா⁴ அகா³ரஸ்மா அனகா³ரியங் பப்³ப³ஜிதா, கச்சி தே, பி⁴க்க²வே,
பி⁴க்கூ² அபி⁴ரதா ப்³ரஹ்மசரியே’’தி? ஏவங் வுத்தே, தே பி⁴க்கூ² துண்ஹீ
அஹேஸுங். து³தியம்பி கோ² ப⁴க³வா தே குலபுத்தே ஆரப்³ப⁴ பி⁴க்கூ² ஆமந்தேஸி –
‘‘யே தே, பி⁴க்க²வே, குலபுத்தா மமங் உத்³தி³ஸ்ஸ ஸத்³தா⁴ அகா³ரஸ்மா
அனகா³ரியங் பப்³ப³ஜிதா, கச்சி தே, பி⁴க்க²வே, பி⁴க்கூ² அபி⁴ரதா
ப்³ரஹ்மசரியே’’தி? து³தியம்பி கோ² தே பி⁴க்கூ² துண்ஹீ அஹேஸுங். ததியம்பி
கோ² ப⁴க³வா தே குலபுத்தே ஆரப்³ப⁴ பி⁴க்கூ² ஆமந்தேஸி – ‘‘யே தே, பி⁴க்க²வே,
குலபுத்தா மமங் உத்³தி³ஸ்ஸ ஸத்³தா⁴ அகா³ரஸ்மா அனகா³ரியங் பப்³ப³ஜிதா , கச்சி தே, பி⁴க்க²வே, பி⁴க்கூ² அபி⁴ரதா ப்³ரஹ்மசரியே’’தி? ததியம்பி கோ² தே பி⁴க்கூ² துண்ஹீ அஹேஸுங்.
167.
அத² கோ² ப⁴க³வதோ ஏதத³ஹோஸி – ‘‘யங்னூனாஹங் தே குலபுத்தே புச்செ²ய்ய’’ந்தி!
அத² கோ² ப⁴க³வா ஆயஸ்மந்தங் அனுருத்³த⁴ங் ஆமந்தேஸி – ‘‘கச்சி தும்ஹே,
அனுருத்³தா⁴, அபி⁴ரதா ப்³ரஹ்மசரியே’’தி? ‘‘தக்³க⁴ மயங், ப⁴ந்தே, அபி⁴ரதா
ப்³ரஹ்மசரியே’’தி. ‘‘ஸாது⁴ ஸாது⁴, அனுருத்³தா⁴! ஏதங் கோ², அனுருத்³தா⁴,
தும்ஹாகங் பதிரூபங் குலபுத்தானங் ஸத்³தா⁴ அகா³ரஸ்மா அனகா³ரியங்
பப்³ப³ஜிதானங் யங் தும்ஹே அபி⁴ரமெய்யாத² ப்³ரஹ்மசரியே. யேன தும்ஹே
அனுருத்³தா⁴, ப⁴த்³ரேன யொப்³ப³னேன ஸமன்னாக³தா பட²மேன வயஸா ஸுஸுகாளகேஸா காமே
பரிபு⁴ஞ்ஜெய்யாத² தேன தும்ஹே, அனுருத்³தா⁴, ப⁴த்³ரேனபி யொப்³ப³னேன
ஸமன்னாக³தா பட²மேன வயஸா ஸுஸுகாளகேஸா அகா³ரஸ்மா அனகா³ரியங் பப்³ப³ஜிதா. தே ச
கோ² பன தும்ஹே, அனுருத்³தா⁴, நேவ ராஜாபி⁴னீதா அகா³ரஸ்மா அனகா³ரியங்
பப்³ப³ஜிதா, ந சோராபி⁴னீதா அகா³ரஸ்மா அனகா³ரியங்
பப்³ப³ஜிதா, ந இணட்டா அகா³ரஸ்மா அனகா³ரியங் பப்³ப³ஜிதா, ந ப⁴யட்டா
அகா³ரஸ்மா அனகா³ரியங் பப்³ப³ஜிதா, நாஜீவிகாபகதா அகா³ரஸ்மா அனகா³ரியங்
பப்³ப³ஜிதா. அபி ச கொ²ம்ஹி ஓதிண்ணோ ஜாதியா ஜராய மரணேன ஸோகேஹி பரிதே³வேஹி
து³க்கே²ஹி தோ³மனஸ்ஸேஹி உபாயாஸேஹி, து³க்கோ²திண்ணோ து³க்க²பரேதோ; அப்பேவ
நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா பஞ்ஞாயேதா²தி – நனு
தும்ஹே, அனுருத்³தா⁴, ஏவங் ஸத்³தா⁴ அகா³ரஸ்மா அனகா³ரியங் பப்³ப³ஜிதா’’தி?
‘‘ஏவங், ப⁴ந்தே’’. ‘‘ஏவங் பப்³ப³ஜிதேன ச பன,
அனுருத்³தா⁴, குலபுத்தேன கிமஸ்ஸ கரணீயங்? விவேகங், அனுருத்³தா⁴, காமேஹி
விவேகங் அகுஸலேஹி த⁴ம்மேஹி பீதிஸுக²ங் நாதி⁴க³ச்ச²தி அஞ்ஞங் வா [அஞ்ஞங் ச (க॰)] ததோ ஸந்ததரங், தஸ்ஸ அபி⁴ஜ்ஜா²பி சித்தங் பரியாதா³ய திட்ட²தி, ப்³யாபாதோ³பி சித்தங் பரியாதா³ய திட்ட²தி, தீ²னமித்³த⁴ம்பி [தீ²னமித்³த⁴ம்பி (ஸீ॰ ஸ்யா॰ கங்॰ பீ॰)] சித்தங் பரியாதா³ய திட்ட²தி உத்³த⁴ச்சகுக்குச்சம்பி சித்தங் பரியாதா³ய திட்ட²தி, விசிகிச்சா²பி சித்தங் பரியாதா³ய திட்ட²தி, அரதீபி
சித்தங் பரியாதா³ய திட்ட²தி, தந்தீ³பி சித்தங் பரியாதா³ய திட்ட²தி.
விவேகங், அனுருத்³தா⁴, காமேஹி விவேகங் அகுஸலேஹி த⁴ம்மேஹி பீதிஸுக²ங்
நாதி⁴க³ச்ச²தி அஞ்ஞங் வா ததோ ஸந்ததரங்’’.
‘‘விவேகங், அனுருத்³தா⁴, காமேஹி விவேகங் அகுஸலேஹி
த⁴ம்மேஹி பீதிஸுக²ங் அதி⁴க³ச்ச²தி அஞ்ஞங் வா ததோ ஸந்ததரங், தஸ்ஸ
அபி⁴ஜ்ஜா²பி சித்தங் ந பரியாதா³ய திட்ட²தி, ப்³யாபாதோ³பி சித்தங் ந
பரியாதா³ய திட்ட²தி, தீ²னமித்³த⁴ம்பி சித்தங் ந பரியாதா³ய திட்ட²தி,
உத்³த⁴ச்சகுக்குச்சம்பி சித்தங் ந பரியாதா³ய திட்ட²தி, விசிகிச்சா²பி
சித்தங் ந பரியாதா³ய திட்ட²தி, அரதீபி சித்தங் ந பரியாதா³ய திட்ட²தி,
தந்தீ³பி சித்தங் ந பரியாதா³ய திட்ட²தி. விவேகங், அனுருத்³தா⁴, காமேஹி
விவேகங் அகுஸலேஹி த⁴ம்மேஹி பீதிஸுக²ங் அதி⁴க³ச்ச²தி அஞ்ஞங் வா ததோ
ஸந்ததரங்.
168. ‘‘கிந்தி வோ, அனுருத்³தா⁴, மயி ஹோதி – ‘யே ஆஸவா ஸங்கிலேஸிகா போனொப்³ப⁴விகா [போனோப⁴விகா (ஸீ॰ பீ॰)]
ஸத³ரா து³க்க²விபாகா ஆயதிங் ஜாதிஜராமரணியா, அப்பஹீனா தே ததா²க³தஸ்ஸ; தஸ்மா
ததா²க³தோ ஸங்கா²யேகங் படிஸேவதி, ஸங்கா²யேகங் அதி⁴வாஸேதி, ஸங்கா²யேகங்
பரிவஜ்ஜேதி, ஸங்கா²யேகங் வினோதே³தீ’’’தி? ‘‘ந கோ²
நோ, ப⁴ந்தே, ப⁴க³வதி ஏவங் ஹோதி – ‘யே ஆஸவா ஸங்கிலேஸிகா போனொப்³ப⁴விகா ஸத³ரா
து³க்க²விபாகா ஆயதிங் ஜாதிஜராமரணியா, அப்பஹீனா தே ததா²க³தஸ்ஸ; தஸ்மா
ததா²க³தோ ஸங்கா²யேகங் படிஸேவதி, ஸங்கா²யேகங் அதி⁴வாஸேதி, ஸங்கா²யேகங்
பரிவஜ்ஜேதி, ஸங்கா²யேகங் வினோதே³தீ’தி. ஏவங் கோ² நோ, ப⁴ந்தே, ப⁴க³வதி ஹோதி –
‘யே ஆஸவா ஸங்கிலேஸிகா போனொப்³ப⁴விகா ஸத³ரா
து³க்க²விபாகா ஆயதிங் ஜாதிஜராமரணியா, பஹீனா தே ததா²க³தஸ்ஸ; தஸ்மா ததா²க³தோ
ஸங்கா²யேகங் படிஸேவதி, ஸங்கா²யேகங் அதி⁴வாஸேதி, ஸங்கா²யேகங் பரிவஜ்ஜேதி,
ஸங்கா²யேகங் வினோதே³தீ’’’தி. ‘‘ஸாது⁴ ஸாது⁴, அனுருத்³தா⁴! ததா²க³தஸ்ஸ,
அனுருத்³தா⁴, யே ஆஸவா ஸங்கிலேஸிகா போனொப்³ப⁴விகா ஸத³ரா து³க்க²விபாகா
ஆயதிங் ஜாதிஜராமரணியா, பஹீனா தே உச்சி²ன்னமூலா தாலாவத்து²கதா அனபா⁴வங்கதா
ஆயதிங் அனுப்பாத³த⁴ம்மா. ஸெய்யதா²பி, அனுருத்³தா⁴, தாலோ மத்த²கச்சி²ன்னோ
அப⁴ப்³போ³ புனவிரூள்ஹியா; ஏவமேவ கோ², அனுருத்³தா⁴ ,
ததா²க³தஸ்ஸ யே ஆஸவா ஸங்கிலேஸிகா போனொப்³ப⁴விகா ஸத³ரா து³க்க²விபாகா ஆயதிங்
ஜாதிஜராமரணியா, பஹீனா தே உச்சி²ன்னமூலா தாலாவத்து²கதா அனபா⁴வங்கதா ஆயதிங்
அனுப்பாத³த⁴ம்மா; தஸ்மா ததா²க³தோ ஸங்கா²யேகங் படிஸேவதி, ஸங்கா²யேகங்
அதி⁴வாஸேதி, ஸங்கா²யேகங் பரிவஜ்ஜேதி, ஸங்கா²யேகங் வினோதே³தி’’.
‘‘தங் கிங் மஞ்ஞஸி, அனுருத்³தா⁴, கங் அத்த²வஸங்
ஸம்பஸ்ஸமானோ ததா²க³தோ ஸாவகே அப்³ப⁴தீதே காலங்கதே உபபத்தீஸு ப்³யாகரோதி –
‘அஸு அமுத்ர உபபன்னோ; அஸு அமுத்ர உபபன்னோ’’’தி? ‘‘ப⁴க³வங்மூலகா
நோ, ப⁴ந்தே, த⁴ம்மா ப⁴க³வங்னெத்திகா ப⁴க³வங்படிஸரணா. ஸாது⁴ வத, ப⁴ந்தே,
ப⁴க³வந்தங்யேவ படிபா⁴து ஏதஸ்ஸ பா⁴ஸிதஸ்ஸ அத்தோ². ப⁴க³வதோ ஸுத்வா பி⁴க்கூ²
தா⁴ரெஸ்ஸந்தீ’’தி . ‘‘ந கோ², அனுருத்³தா⁴, ததா²க³தோ
ஜனகுஹனத்த²ங் ந ஜனலபனத்த²ங் ந லாப⁴ஸக்காரஸிலோகானிஸங்ஸத்த²ங் ந ‘இதி மங் ஜனோ
ஜானாதூ’தி ஸாவகே அப்³ப⁴தீதே காலங்கதே உபபத்தீஸு ப்³யாகரோதி – ‘அஸு அமுத்ர
உபபன்னோ, அஸு அமுத்ர உபபன்னோ’தி. ஸந்தி ச கோ², அனுருத்³தா⁴, குலபுத்தா
ஸத்³தா⁴ உளாரவேதா³ உளாரபாமோஜ்ஜா. தே தங் ஸுத்வா தத³த்தா²ய சித்தங்
உபஸங்ஹரந்தி. தேஸங் தங், அனுருத்³தா⁴, ஹோதி தீ³க⁴ரத்தங் ஹிதாய ஸுகா²ய’’.
169. ‘‘இதா⁴னுருத்³தா⁴, பி⁴க்கு² ஸுணாதி – ‘இத்த²ன்னாமோ பி⁴க்கு² காலங்கதோ [காலகதோ (ஸீ॰ ஸ்யா॰ கங்॰ பீ॰)];
ஸோ ப⁴க³வதா ப்³யாகதோ – அஞ்ஞாய ஸண்ட²ஹீ’தி. ஸோ கோ² பனஸ்ஸ ஆயஸ்மா ஸாமங்
தி³ட்டோ² வா ஹோதி அனுஸ்ஸவஸ்ஸுதோ வா – ‘ஏவங்ஸீலோ ஸோ ஆயஸ்மா அஹோஸி இதிபி,
ஏவங்த⁴ம்மோ ஸோ ஆயஸ்மா அஹோஸி இதிபி, ஏவங்பஞ்ஞோ ஸோ ஆயஸ்மா அஹோஸி இதிபி,
ஏவங்விஹாரீ ஸோ ஆயஸ்மா அஹோஸி இதிபி, ஏவங்விமுத்தோ ஸோ ஆயஸ்மா அஹோஸி இதிபீ’தி.
ஸோ தஸ்ஸ ஸத்³த⁴ஞ்ச ஸீலஞ்ச ஸுதஞ்ச சாக³ஞ்ச பஞ்ஞஞ்ச அனுஸ்ஸரந்தோ தத³த்தா²ய
சித்தங் உபஸங்ஹரதி. ஏவம்பி கோ², அனுருத்³தா⁴, பி⁴க்கு²னோ பா²ஸுவிஹாரோ ஹோதி.
‘‘இதா⁴னுருத்³தா⁴ , பி⁴க்கு²
ஸுணாதி – ‘இத்த²ன்னாமோ பி⁴க்கு² காலங்கதோ; ஸோ ப⁴க³வதா ப்³யாகதோ – பஞ்சன்னங்
ஓரம்பா⁴கி³யானங் ஸங்யோஜனானங் பரிக்க²யா ஓபபாதிகோ தத்த² பரினிப்³பா³யீ
அனாவத்தித⁴ம்மோ தஸ்மா லோகா’தி. ஸோ கோ² பனஸ்ஸ ஆயஸ்மா ஸாமங் தி³ட்டோ² வா ஹோதி அனுஸ்ஸவஸ்ஸுதோ வா
– ‘ஏவங்ஸீலோ ஸோ ஆயஸ்மா அஹோஸி இதிபி, ஏவங்த⁴ம்மோ…பே॰… ஏவங்பஞ்ஞோ…
ஏவங்விஹாரீ… ஏவங்விமுத்தோ ஸோ ஆயஸ்மா அஹோஸி இதிபீ’தி. ஸோ தஸ்ஸ ஸத்³த⁴ஞ்ச
ஸீலஞ்ச ஸுதஞ்ச சாக³ஞ்ச பஞ்ஞஞ்ச அனுஸ்ஸரந்தோ தத³த்தா²ய சித்தங் உபஸங்ஹரதி.
ஏவம்பி கோ², அனுருத்³தா⁴, பி⁴க்கு²னோ பா²ஸுவிஹாரோ ஹோதி.
‘‘இதா⁴னுருத்³தா⁴, பி⁴க்கு² ஸுணாதி – ‘இத்த²ன்னாமோ
பி⁴க்கு² காலங்கதோ; ஸோ ப⁴க³வதா ப்³யாகதோ – திண்ணங் ஸங்யோஜனானங் பரிக்க²யா
ராக³தோ³ஸமோஹானங் தனுத்தா ஸகதா³கா³மீ ஸகிதே³வ இமங் லோகங் ஆக³ந்த்வா
து³க்க²ஸ்ஸந்தங் கரிஸ்ஸதீ’தி. ஸோ கோ² பனஸ்ஸ ஆயஸ்மா ஸாமங் தி³ட்டோ² வா ஹோதி
அனுஸ்ஸவஸ்ஸுதோ வா – ‘ஏவங்ஸீலோ ஸோ ஆயஸ்மா அஹோஸி இதிபி, ஏவங்த⁴ம்மோ…பே॰…
ஏவங்பஞ்ஞோ… ஏவங்விஹாரீ… ஏவங்விமுத்தோ ஸோ ஆயஸ்மா அஹோஸி இதிபீ’தி. ஸோ தஸ்ஸ
ஸத்³த⁴ஞ்ச ஸீலஞ்ச ஸுதஞ்ச சாக³ஞ்ச பஞ்ஞஞ்ச அனுஸ்ஸரந்தோ தத³த்தா²ய சித்தங் உபஸங்ஹரதி. ஏவம்பி கோ², அனுருத்³தா⁴, பி⁴க்கு²னோ பா²ஸுவிஹாரோ ஹோதி.
‘‘இதா⁴னுருத்³தா⁴, பி⁴க்கு² ஸுணாதி – ‘இத்த²ன்னாமோ
பி⁴க்கு² காலங்கதோ; ஸோ ப⁴க³வதா ப்³யாகதோ – திண்ணங் ஸங்யோஜனானங் பரிக்க²யா
ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயணோ’தி. ஸோ கோ² பனஸ்ஸ ஆயஸ்மா
ஸாமங் தி³ட்டோ² வா ஹோதி அனுஸ்ஸவஸ்ஸுதோ வா – ‘ஏவங்ஸீலோ ஸோ ஆயஸ்மா அஹோஸி
இதிபி, ஏவங்த⁴ம்மோ…பே॰… ஏவங்பஞ்ஞோ… ஏவங்விஹாரீ… ஏவங்விமுத்தோ ஸோ ஆயஸ்மா
அஹோஸி இதிபீ’தி. ஸோ தஸ்ஸ ஸத்³த⁴ஞ்ச ஸீலஞ்ச ஸுதஞ்ச
சாக³ஞ்ச பஞ்ஞஞ்ச அனுஸ்ஸரந்தோ தத³த்தா²ய சித்தங் உபஸங்ஹரதி. ஏவம்பி கோ²,
அனுருத்³தா⁴, பி⁴க்கு²னோ பா²ஸுவிஹாரோ ஹோதி.
170.
‘‘இதா⁴னுருத்³தா⁴, பி⁴க்கு²னீ ஸுணாதி – ‘இத்த²ன்னாமா பி⁴க்கு²னீ காலங்கதா;
ஸா ப⁴க³வதா ப்³யாகதா – அஞ்ஞாய ஸண்ட²ஹீ’தி. ஸா கோ² பனஸ்ஸா ப⁴கி³னீ ஸாமங்
தி³ட்டா² வா ஹோதி அனுஸ்ஸவஸ்ஸுதா வா – ‘ஏவங்ஸீலா ஸா ப⁴கி³னீ அஹோஸி இதிபி,
ஏவங்த⁴ம்மா ஸா ப⁴கி³னீ அஹோஸி இதிபி , ஏவங்பஞ்ஞா ஸா
ப⁴கி³னீ அஹோஸி இதிபி, ஏவங்விஹாரினீ ஸா ப⁴கி³னீ அஹோஸி இதிபி, ஏவங்விமுத்தா
ஸா ப⁴கி³னீ அஹோஸி இதிபீ’தி. ஸா தஸ்ஸா ஸத்³த⁴ஞ்ச ஸீலஞ்ச ஸுதஞ்ச சாக³ஞ்ச
பஞ்ஞஞ்ச அனுஸ்ஸரந்தீ தத³த்தா²ய சித்தங் உபஸங்ஹரதி. ஏவம்பி கோ²,
அனுருத்³தா⁴, பி⁴க்கு²னியா பா²ஸுவிஹாரோ ஹோதி.
‘‘இதா⁴னுருத்³தா⁴ , பி⁴க்கு²னீ
ஸுணாதி – ‘இத்த²ன்னாமா பி⁴க்கு²னீ காலங்கதா; ஸா ப⁴க³வதா ப்³யாகதா –
பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகா தத்த²
பரினிப்³பா³யினீ அனாவத்தித⁴ம்மா தஸ்மா லோகா’தி. ஸா கோ² பனஸ்ஸா ப⁴கி³னீ
ஸாமங் தி³ட்டா² வா ஹோதி அனுஸ்ஸவஸ்ஸுதா வா – ‘ஏவங்ஸீலா ஸா ப⁴கி³னீ அஹோஸி
இதிபி, ஏவங்த⁴ம்மா…பே॰… ஏவங்பஞ்ஞா… ஏவங்விஹாரினீ… ஏவங்விமுத்தா ஸா ப⁴கி³னீ
அஹோஸி இதிபீ’தி. ஸா தஸ்ஸா ஸத்³த⁴ஞ்ச ஸீலஞ்ச ஸுதஞ்ச சாக³ஞ்ச பஞ்ஞஞ்ச
அனுஸ்ஸரந்தீ தத³த்தா²ய சித்தங் உபஸங்ஹரதி. ஏவம்பி கோ², அனுருத்³தா⁴, பி⁴க்கு²னியா பா²ஸுவிஹாரோ ஹோதி.
‘‘இதா⁴னுருத்³தா⁴, பி⁴க்கு²னீ ஸுணாதி – ‘இத்த²ன்னாமா
பி⁴க்கு²னீ காலங்கதா; ஸா ப⁴க³வதா ப்³யாகதா – திண்ணங் ஸங்யோஜனானங் பரிக்க²யா
ராக³தோ³ஸமோஹானங் தனுத்தா ஸகதா³கா³மினீ ஸகிதே³வ இமங் லோகங் ஆக³ந்த்வா
து³க்க²ஸ்ஸந்தங் கரிஸ்ஸதீ’தி. ஸா கோ² பனஸ்ஸா ப⁴கி³னீ ஸாமங் தி³ட்டா² வா
ஹோதி அனுஸ்ஸவஸ்ஸுதா வா – ‘ஏவங்ஸீலா ஸா ப⁴கி³னீ அஹோஸி இதிபி,
ஏவங்த⁴ம்மா…பே॰… ஏவங்பஞ்ஞா… ஏவங்விஹாரினீ… ஏவங்விமுத்தா ஸா ப⁴கி³னீ அஹோஸி
இதிபீ’தி. ஸா தஸ்ஸா ஸத்³த⁴ஞ்ச ஸீலஞ்ச ஸுதஞ்ச சாக³ஞ்ச பஞ்ஞஞ்ச அனுஸ்ஸரந்தீ
தத³த்தா²ய சித்தங் உபஸங்ஹரதி. ஏவம்பி கோ², அனுருத்³தா⁴, பி⁴க்கு²னியா
பா²ஸுவிஹாரோ ஹோதி.
‘‘இதா⁴னுருத்³தா⁴, பி⁴க்கு²னீ ஸுணாதி – ‘இத்த²ன்னாமா
பி⁴க்கு²னீ காலங்கதா; ஸா ப⁴க³வதா ப்³யாகதா – திண்ணங் ஸங்யோஜனானங் பரிக்க²யா
ஸோதாபன்னா அவினிபாதத⁴ம்மா நியதா ஸம்போ³தி⁴பராயணா’தி .
ஸா கோ² பனஸ்ஸா ப⁴கி³னீ ஸாமங் தி³ட்டா² வா ஹோதி அனுஸ்ஸவஸ்ஸுதா வா –
‘ஏவங்ஸீலா ஸா ப⁴கி³னீ அஹோஸி இதிபி, ஏவங்த⁴ம்மா… ஏவங்பஞ்ஞா… ஏவங்விஹாரினீ…
ஏவங்விமுத்தா ஸா ப⁴கி³னீ அஹோஸி இதிபீ’தி. ஸா தஸ்ஸா ஸத்³த⁴ஞ்ச ஸீலஞ்ச ஸுதஞ்ச
சாக³ஞ்ச பஞ்ஞஞ்ச அனுஸ்ஸரந்தீ தத³த்தா²ய சித்தங் உபஸங்ஹரதி. ஏவம்பி கோ², அனுருத்³தா⁴, பி⁴க்கு²னியா பா²ஸுவிஹாரோ ஹோதி.
171.
‘‘இதா⁴னுருத்³தா⁴, உபாஸகோ ஸுணாதி – ‘இத்த²ன்னாமோ உபாஸகோ காலங்கதோ; ஸோ
ப⁴க³வதா ப்³யாகதோ – பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா
ஓபபாதிகோ தத்த² பரினிப்³பா³யீ அனாவத்தித⁴ம்மோ தஸ்மா லோகா’தி. ஸோ கோ² பனஸ்ஸ ஆயஸ்மா ஸாமங் தி³ட்டோ² வா ஹோதி அனுஸ்ஸவஸ்ஸுதோ வா – ‘ஏவங்ஸீலோ ஸோ ஆயஸ்மா அஹோஸி இதிபி, ஏவங்த⁴ம்மோ
ஸோ ஆயஸ்மா அஹோஸி இதிபி, ஏவங்பஞ்ஞோ ஸோ ஆயஸ்மா அஹோஸி இதிபி, ஏவங்விஹாரீ ஸோ
ஆயஸ்மா அஹோஸி இதிபி, ஏவங்விமுத்தோ ஸோ ஆயஸ்மா அஹோஸி இதிபீ’தி. ஸோ தஸ்ஸ
ஸத்³த⁴ஞ்ச ஸுதஞ்ச சாக³ஞ்ச பஞ்ஞஞ்ச அனுஸ்ஸரந்தோ தத³த்தா²ய சித்தங்
உபஸங்ஹரதி. ஏவம்பி கோ², அனுருத்³தா⁴, உபாஸகஸ்ஸ பா²ஸுவிஹாரோ ஹோதி.
‘‘இதா⁴னுருத்³தா⁴, உபாஸகோ ஸுணாதி – ‘இத்த²ன்னாமோ
உபாஸகோ காலங்கதோ; ஸோ ப⁴க³வதா ப்³யாகதோ – திண்ணங் ஸங்யோஜனானங் பரிக்க²யா
ராக³தோ³ஸமோஹானங் தனுத்தா ஸகதா³கா³மீ ஸகிதே³வ இமங் லோகங் ஆக³ந்த்வா
து³க்க²ஸ்ஸந்தங் கரிஸ்ஸதீ’தி. ஸோ கோ² பனஸ்ஸ ஆயஸ்மா ஸாமங் தி³ட்டோ² வா ஹோதி
அனுஸ்ஸவஸ்ஸுதோ வா – ‘ஏவங்ஸீலோ ஸோ ஆயஸ்மா அஹோஸி இதிபி, ஏவங்த⁴ம்மோ…
ஏவங்பஞ்ஞோ… ஏவங்விஹாரீ… ஏவங்விமுத்தோ ஸோ ஆயஸ்மா அஹோஸி இதிபீ’தி. ஸோ தஸ்ஸ
ஸத்³த⁴ஞ்ச ஸீலஞ்ச ஸுதஞ்ச சாக³ஞ்ச பஞ்ஞஞ்ச அனுஸ்ஸரந்தோ தத³த்தா²ய சித்தங்
உபஸங்ஹரதி. ஏவம்பி கோ², அனுருத்³தா⁴, உபாஸகஸ்ஸ பா²ஸுவிஹாரோ ஹோதி.
‘‘இதா⁴னுருத்³தா⁴, உபாஸகோ ஸுணாதி – ‘இத்த²ன்னாமோ
உபாஸகோ காலங்கதோ; ஸோ ப⁴க³வதா ப்³யாகதோ – திண்ணங் ஸங்யோஜனானங் பரிக்க²யா
ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயணோ’தி. ஸோ கோ² பனஸ்ஸ ஆயஸ்மா
ஸாமங் தி³ட்டோ² வா ஹோதி அனுஸ்ஸவஸ்ஸுதோ வா – ‘ஏவங்ஸீலோ ஸோ ஆயஸ்மா அஹோஸி
இதிபி, ஏவங்த⁴ம்மோ…பே॰… ஏவங்பஞ்ஞோ… ஏவங்விஹாரீ…
ஏவங்விமுத்தோ ஸோ ஆயஸ்மா அஹோஸி இதிபீ’தி. ஸோ தஸ்ஸ ஸத்³த⁴ஞ்ச ஸீலஞ்ச ஸுதஞ்ச
சாக³ஞ்ச பஞ்ஞஞ்ச அனுஸ்ஸரந்தோ தத³த்தா²ய சித்தங் உபஸங்ஹரதி. ஏவம்பி கோ²,
அனுருத்³தா⁴ உபாஸகஸ்ஸ பா²ஸுவிஹாரோ ஹோதி.
172. ‘‘இதா⁴னுருத்³தா⁴ ,
உபாஸிகா ஸுணாதி – ‘இத்த²ன்னாமா உபாஸிகா காலங்கதா; ஸா ப⁴க³வதா ப்³யாகதா –
பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகா தத்த²
பரினிப்³பா³யினீ அனாவத்தித⁴ம்மா தஸ்மா லோகா’தி. ஸா கோ² பனஸ்ஸா ப⁴கி³னீ
ஸாமங் தி³ட்டா² வா ஹோதி அனுஸ்ஸவஸ்ஸுதா வா – ‘ஏவங்ஸீலா ஸா ப⁴கி³னீ அஹோஸி
இதிபி, ஏவங்த⁴ம்மா… ஏவங்பஞ்ஞா… ஏவங்விஹாரினீ… ஏவங்விமுத்தா ஸா ப⁴கி³னீ அஹோஸி இதிபீ’தி. ஸா தஸ்ஸா ஸத்³த⁴ஞ்ச ஸீலஞ்ச ஸுதஞ்ச சாக³ஞ்ச பஞ்ஞஞ்ச அனுஸ்ஸரந்தீ தத³த்தா²ய சித்தங் உபஸங்ஹரதி. ஏவம்பி கோ², அனுருத்³தா⁴, உபாஸிகாய பா²ஸுவிஹாரோ ஹோதி.
‘‘இதா⁴னுருத்³தா⁴, உபாஸிகா ஸுணாதி – ‘இத்த²ன்னாமா
உபாஸிகா காலங்கதா; ஸா ப⁴க³வதா ப்³யாகதா – திண்ணங் ஸங்யோஜனானங் பரிக்க²யா
ராக³தோ³ஸமோஹானங் தனுத்தா ஸகதா³கா³மினீ ஸகிதே³வ இமங் லோகங் ஆக³ந்த்வா
து³க்க²ஸ்ஸந்தங் கரிஸ்ஸதீ’தி. ஸா கோ² பனஸ்ஸா ப⁴கி³னீ ஸாமங் தி³ட்டா² வா
ஹோதி அனுஸ்ஸவஸ்ஸுதா வா – ‘ஏவங்ஸீலா ஸா ப⁴கி³னீ அஹோஸி இதிபி, ஏவங்த⁴ம்மா…
ஏவங்பஞ்ஞா… ஏவங்விஹாரினீ… ஏவங்விமுத்தா ஸா ப⁴கி³னீ அஹோஸி இதிபீ’தி. ஸா
தஸ்ஸா ஸத்³த⁴ஞ்ச ஸீலஞ்ச ஸுதஞ்ச சாக³ஞ்ச பஞ்ஞஞ்ச அனுஸ்ஸரந்தீ தத³த்தா²ய சித்தங் உபஸங்ஹரதி. ஏவம்பி கோ², அனுருத்³தா⁴, உபாஸிகாய பா²ஸுவிஹாரோ ஹோதி.
‘‘இதா⁴னுருத்³தா⁴, உபாஸிகா ஸுணாதி – ‘இத்த²ன்னாமா
உபாஸிகா காலங்கதா; ஸா ப⁴க³வதா ப்³யாகதா – திண்ணங் ஸங்யோஜனானங் பரிக்க²யா
ஸோதாபன்னா அவினிபாதத⁴ம்மா நியதா ஸம்போ³தி⁴பராயணா’தி. ஸா கோ² பனஸ்ஸா ப⁴கி³னீ
ஸாமங் தி³ட்டா² வா ஹோதி அனுஸ்ஸவஸ்ஸுதா வா – ‘ஏவங்ஸீலா ஸா ப⁴கி³னீ அஹோஸி
இதிபி, ஏவங்த⁴ம்மா ஸா ப⁴கி³னீ அஹோஸி இதிபி, ஏவங்பஞ்ஞா ஸா ப⁴கி³னீ அஹோஸி
இதிபி, ஏவங்விஹாரினீ ஸா ப⁴கி³னீ அஹோஸி இதிபி, ஏவங்விமுத்தா ஸா ப⁴கி³னீ
அஹோஸி இதிபீ’தி. ஸா தஸ்ஸா ஸத்³த⁴ஞ்ச ஸீலஞ்ச ஸுதஞ்ச சாக³ஞ்ச பஞ்ஞஞ்ச
அனுஸ்ஸரந்தீ தத³த்தா²ய சித்தங் உபஸங்ஹரதி. ஏவம்பி கோ², அனுருத்³தா⁴,
உபாஸிகாய பா²ஸுவிஹாரோ ஹோதி.
‘‘இதி கோ², அனுருத்³தா⁴,
ததா²க³தோ ந ஜனகுஹனத்த²ங் ந ஜனலபனத்த²ங் ந லாப⁴ஸக்காரஸிலோகானிஸங்ஸத்த²ங் ந
‘இதி மங் ஜனோ ஜானாதூ’தி ஸாவகே அப்³ப⁴தீதே காலங்கதே உபபத்தீஸு ப்³யாகரோதி –
‘அஸு அமுத்ர உபபன்னோ, அஸு அமுத்ர உபபன்னோ’தி. ஸந்தி ச கோ², அனுருத்³தா⁴,
குலபுத்தா ஸத்³தா⁴ உளாரவேதா³ உளாரபாமோஜ்ஜா. தே தங் ஸுத்வா தத³த்தா²ய
சித்தங் உபஸங்ஹரந்தி. தேஸங் தங், அனுருத்³தா⁴, ஹோதி தீ³க⁴ரத்தங் ஹிதாய
ஸுகா²யா’’தி.
இத³மவோச ப⁴க³வா. அத்தமனோ ஆயஸ்மா அனுருத்³தோ⁴ ப⁴க³வதோ பா⁴ஸிதங் அபி⁴னந்தீ³தி.
நளகபானஸுத்தங் நிட்டி²தங் அட்ட²மங்.
9. கோ³லியானிஸுத்தங்
173. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன கோ³லியானி [கு³லிஸ்ஸானி (ஸீ॰ பீ॰), கோ³லிஸ்ஸானி (ஸ்யா॰ கங்॰)] நாம பி⁴க்கு² ஆரஞ்ஞிகோ [ஆரஞ்ஞகோ (ஸப்³ப³த்த²)] பத³ஸமாசாரோ [பத³ரஸமாசாரோ (ஸீ॰ ஸ்யா॰ கங்॰ பீ॰)] ஸங்க⁴மஜ்ஜே² ஓஸடோ ஹோதி கேனசிதே³வ கரணீயேன. தத்ர கோ² ஆயஸ்மா ஸாரிபுத்தோ கோ³லியானிங் பி⁴க்கு²ங் ஆரப்³ப⁴ பி⁴க்கூ² ஆமந்தேஸி –
‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴
விஹரந்தேன ஸப்³ரஹ்மசாரீஸு ஸகா³ரவேன ப⁴விதப்³ப³ங் ஸப்பதிஸ்ஸேன. ஸசே, ஆவுஸோ,
ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ ஸப்³ரஹ்மசாரீஸு அகா³ரவோ ஹோதி
அப்பதிஸ்ஸோ, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ
ஏகஸ்ஸாரஞ்ஞே ஸேரிவிஹாரேன, யோ அயமாயஸ்மா ஸப்³ரஹ்மசாரீஸு அகா³ரவோ ஹோதி
அப்பதிஸ்ஸோ’தி – தஸ்ஸ [அப்பதிஸ்ஸோதிஸ்ஸ (ஸீ॰ பீ॰)] ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ஸப்³ரஹ்மசாரீஸு ஸகா³ரவேன ப⁴விதப்³ப³ங் ஸப்பதிஸ்ஸேன.
‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴
விஹரந்தேன ஆஸனகுஸலேன ப⁴விதப்³ப³ங் – ‘இதி தே²ரே ச பி⁴க்கூ² நானுபக²ஜ்ஜ
நிஸீதி³ஸ்ஸாமி நவே ச பி⁴க்கூ² ந ஆஸனேன படிபா³ஹிஸ்ஸாமீ’தி. ஸசே, ஆவுஸோ,
ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ ந
ஆஸனகுஸலோ ஹோதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ
ஏகஸ்ஸாரஞ்ஞே ஸேரிவிஹாரேன, யோ அயமாயஸ்மா ஆஸனகுஸலோ ந ஹோதீ’தி [யோ அயமாயஸ்மா ஆபி⁴ஸமாசாரிகம்பி த⁴ம்மங் ந ஜானாதீதி (ஸீ॰ ஸ்யா॰ கங்॰ பீ॰)] – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ஆஸனகுஸலேன ப⁴விதப்³ப³ங்.
‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴
விஹரந்தேன ஆபி⁴ஸமாசாரிகோபி த⁴ம்மோ ஜானிதப்³போ³. ஸசே, ஆவுஸோ, ஆரஞ்ஞிகோ
பி⁴க்கு² ஸங்க⁴க³தோ ஸங்கே⁴ விஹரந்தோ ஆபி⁴ஸமாசாரிகம்பி த⁴ம்மங் ந ஜானாதி,
தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே
ஸேரிவிஹாரேன யோ அயமாயஸ்மா ஆபி⁴ஸமாசாரிகம்பி த⁴ம்மங் ந ஜானாதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ஆபி⁴ஸமாசாரிகோபி த⁴ம்மோ ஜானிதப்³போ³ [அயங் ஆபி⁴ஸமாசாரிகததியவாரோ ஸீ॰ ஸ்யா॰ கங்॰ பீ॰ பொத்த²கேஸு ந தி³ஸ்ஸதி].
‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன நாதிகாலேன கா³மோ பவிஸிதப்³போ³ நாதிதி³வா [ந தி³வா (ஸ்யா॰ கங்॰ பீ॰ க॰)]
படிக்கமிதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴
விஹரந்தோ அதிகாலேன கா³மங் பவிஸதி அதிதி³வா படிக்கமதி, தஸ்ஸ ப⁴வந்தி
வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ
அயமாயஸ்மா அதிகாலேன கா³மங் பவிஸதி அதிதி³வா படிக்கமதீ’தி – தஸ்ஸ ப⁴வந்தி
வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன
நாதிகாலேன கா³மோ பவிஸிதப்³போ³, நாதிதி³வா படிக்கமிதப்³ப³ங்.
‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ந புரேப⁴த்தங்
பச்சா²ப⁴த்தங் குலேஸு சாரித்தங் ஆபஜ்ஜிதப்³ப³ங். ஸசே, ஆவுஸோ, ஆரஞ்ஞிகோ
பி⁴க்கு² ஸங்க⁴க³தோ ஸங்கே⁴ விஹரந்தோ புரேப⁴த்தங் பச்சா²ப⁴த்தங் குலேஸு
சாரித்தங் ஆபஜ்ஜதி, தஸ்ஸ ப⁴வந்தி வத்தாரோ. ‘அயங் நூனிமஸ்ஸாயஸ்மதோ
ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன விஹரதோ விகாலசரியா ப³ஹுலீகதா, தமேனங்
ஸங்க⁴க³தம்பி ஸமுதா³சரதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன
பி⁴க்கு²னா ஸங்க⁴க³தேன ஸங்கே⁴ விஹரந்தேன ந புரேப⁴த்தங் பச்சா²ப⁴த்தங்
குலேஸு சாரித்தங் ஆபஜ்ஜிதப்³ப³ங்.
‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴
விஹரந்தேன அனுத்³த⁴தேன ப⁴விதப்³ப³ங் அசபலேன. ஸசே, ஆவுஸோ, ஆரஞ்ஞிகோ பி⁴க்கு²
ஸங்க⁴க³தோ ஸங்கே⁴ விஹரந்தோ உத்³த⁴தோ ஹோதி சபலோ, தஸ்ஸ ப⁴வந்தி வத்தாரோ.
‘இத³ங் நூனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன விஹரதோ
உத்³த⁴ச்சங் சாபல்யங் ப³ஹுலீகதங், தமேனங் ஸங்க⁴க³தம்பி ஸமுதா³சரதீ’தி –
தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴
விஹரந்தேன அனுத்³த⁴தேன ப⁴விதப்³ப³ங் அசபலேன.
‘‘ஆரஞ்ஞிகேனாவுஸோ , பி⁴க்கு²னா
ஸங்க⁴க³தேன ஸங்கே⁴ விஹரந்தேன அமுக²ரேன ப⁴விதப்³ப³ங் அவிகிண்ணவாசேன. ஸசே,
ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ முக²ரோ ஹோதி
விகிண்ணவாசோ, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ
ஏகஸ்ஸாரஞ்ஞே ஸேரிவிஹாரேன யோ அயமாயஸ்மா முக²ரோ விகிண்ணவாசோ’தி – தஸ்ஸ
ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன அமுக²ரேன ப⁴விதப்³ப³ங் அவிகிண்ணவாசேன.
‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ஸுவசேன [ஸுப்³ப³சேன (ஸீ॰ க॰)]
ப⁴விதப்³ப³ங் கல்யாணமித்தேன. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ
ஸங்கே⁴ விஹரந்தோ து³ப்³ப³சோ ஹோதி பாபமித்தோ, தஸ்ஸ ப⁴வந்தி வத்தாரோ. ‘கிங்
பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா
து³ப்³ப³சோ பாபமித்தோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன
பி⁴க்கு²னா ஸங்க⁴க³தேன ஸங்கே⁴ விஹரந்தேன ஸுவசேன ப⁴விதப்³ப³ங்
கல்யாணமித்தேன.
‘‘ஆரஞ்ஞிகேனாவுஸோ, பி⁴க்கு²னா இந்த்³ரியேஸு
கு³த்தத்³வாரேன ப⁴விதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² இந்த்³ரியேஸு
அகு³த்தத்³வாரோ ஹோதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ
ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா இந்த்³ரியேஸு அகு³த்தத்³வாரோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா இந்த்³ரியேஸு கு³த்தத்³வாரேன ப⁴விதப்³ப³ங்.
‘‘ஆரஞ்ஞிகேனாவுஸோ, பி⁴க்கு²னா போ⁴ஜனே மத்தஞ்ஞுனா
ப⁴விதப்³ப³ங். ஸசே, ஆவுஸோ, ஆரஞ்ஞிகோ போ⁴ஜனே அமத்தஞ்ஞூ ஹோதி, தஸ்ஸ ப⁴வந்தி
வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ
அயமாயஸ்மா போ⁴ஜனே அமத்தஞ்ஞூ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன
பி⁴க்கு²னா போ⁴ஜனே மத்தஞ்ஞுனா ப⁴விதப்³ப³ங்.
‘‘ஆரஞ்ஞிகேனாவுஸோ, பி⁴க்கு²னா ஜாக³ரியங் அனுயுத்தேன ப⁴விதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² ஜாக³ரியங் அனநுயுத்தோ ஹோதி, தஸ்ஸ
ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே
ஸேரிவிஹாரேன யோ அயமாயஸ்மா ஜாக³ரியங் அனநுயுத்தோ’தி – தஸ்ஸ ப⁴வந்தி வத்தாரோ.
தஸ்மா ஆரஞ்ஞிகேன பி⁴க்கு²னா ஜாக³ரியங் அனுயுத்தேன ப⁴விதப்³ப³ங்.
‘‘ஆரஞ்ஞிகேனாவுஸோ , பி⁴க்கு²னா
ஆரத்³த⁴வீரியேன ப⁴விதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² குஸீதோ ஹோதி,
தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே
ஸேரிவிஹாரேன யோ அயமாயஸ்மா குஸீதோ’தி – தஸ்ஸ ப⁴வந்தி வத்தாரோ. தஸ்மா
ஆரஞ்ஞிகேன பி⁴க்கு²னா ஆரத்³த⁴வீரியேன ப⁴விதப்³ப³ங்.
‘‘ஆரஞ்ஞிகேனாவுஸோ, பி⁴க்கு²னா உபட்டி²தஸ்ஸதினா
ப⁴விதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² முட்ட²ஸ்ஸதீ ஹோதி, தஸ்ஸ
ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன
யோ அயமாயஸ்மா முட்ட²ஸ்ஸதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன
பி⁴க்கு²னா உபட்டி²தஸ்ஸதினா ப⁴விதப்³ப³ங்.
‘‘ஆரஞ்ஞிகேனாவுஸோ, பி⁴க்கு²னா ஸமாஹிதேன ப⁴விதப்³ப³ங்.
ஸசே, ஆவுஸோ, ஆரஞ்ஞிகோ பி⁴க்கு² அஸமாஹிதோ ஹோதி, தஸ்ஸ ப⁴வந்தி வத்தாரோ. ‘கிங்
பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா அஸமாஹிதோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸமாஹிதேன ப⁴விதப்³ப³ங்.
‘‘ஆரஞ்ஞிகேனாவுஸோ, பி⁴க்கு²னா பஞ்ஞவதா ப⁴விதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² து³ப்பஞ்ஞோ ஹோதி, தஸ்ஸ ப⁴வந்தி வத்தாரோ .
‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா
து³ப்பஞ்ஞோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா பஞ்ஞவதா
ப⁴விதப்³ப³ங்.
‘‘ஆரஞ்ஞிகேனாவுஸோ, பி⁴க்கு²னா அபி⁴த⁴ம்மே அபி⁴வினயே
யோகோ³ கரணீயோ. ஸந்தாவுஸோ, ஆரஞ்ஞிகங் பி⁴க்கு²ங் அபி⁴த⁴ம்மே அபி⁴வினயே
பஞ்ஹங் புச்சி²தாரோ. ஸசே, ஆவுஸோ, ஆரஞ்ஞிகோ பி⁴க்கு² அபி⁴த⁴ம்மே அபி⁴வினயே
பஞ்ஹங் புட்டோ² ந ஸம்பாயதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ
ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா அபி⁴த⁴ம்மே அபி⁴வினயே
பஞ்ஹங் புட்டோ² ந ஸம்பாயதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா அபி⁴த⁴ம்மே அபி⁴வினயே யோகோ³ கரணீயோ.
‘‘ஆரஞ்ஞிகேனாவுஸோ , பி⁴க்கு²னா
யே தே ஸந்தா விமொக்கா² அதிக்கம்ம ரூபே ஆருப்பா தத்த² யோகோ³ கரணீயோ.
ஸந்தாவுஸோ, ஆரஞ்ஞிகங் பி⁴க்கு²ங் யே தே ஸந்தா விமொக்கா² அதிக்கம்ம ரூபே
ஆருப்பா தத்த² பஞ்ஹங் புச்சி²தாரோ. ஸசே, ஆவுஸோ, ஆரஞ்ஞிகோ பி⁴க்கு² யே தே
ஸந்தா விமொக்கா² அதிக்கம்ம ரூபே ஆருப்பா தத்த² பஞ்ஹங் புட்டோ² ந ஸம்பாயதி,
தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே
ஸேரிவிஹாரேன யோ அயமாயஸ்மா யே தே ஸந்தா விமொக்கா² அதிக்கம்ம ரூபே ஆருப்பா
தத்த² பஞ்ஹங் புட்டோ² ந ஸம்பாயதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா யே தே ஸந்தா விமொக்கா² அதிக்கம்ம ரூபே ஆருப்பா தத்த² யோகோ³ கரணீயோ.
‘‘ஆரஞ்ஞிகேனாவுஸோ, பி⁴க்கு²னா உத்தரி மனுஸ்ஸத⁴ம்மே
யோகோ³ கரணீயோ. ஸந்தாவுஸோ, ஆரஞ்ஞிகங் பி⁴க்கு²ங் உத்தரி மனுஸ்ஸத⁴ம்மே பஞ்ஹங்
புச்சி²தாரோ. ஸசே, ஆவுஸோ, ஆரஞ்ஞிகோ பி⁴க்கு² உத்தரி மனுஸ்ஸத⁴ம்மே பஞ்ஹங்
புட்டோ² ந ஸம்பாயதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ
ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா யஸ்ஸத்தா²ய பப்³ப³ஜிதோ
தமத்த²ங் ந ஜானாதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா
உத்தரி மனுஸ்ஸத⁴ம்மே யோகோ³ கரணீயோ’’தி.
ஏவங் வுத்தே, ஆயஸ்மா மஹாமொக்³க³ல்லானோ [மஹாமொக்³க³லானோ (க॰)]
ஆயஸ்மந்தங் ஸாரிபுத்தங் ஏதத³வோச – ‘‘ஆரஞ்ஞிகேனேவ நு கோ², ஆவுஸோ ஸாரிபுத்த,
பி⁴க்கு²னா இமே த⁴ம்மா ஸமாதா³ய வத்திதப்³பா³ உதா³ஹு கா³மந்தவிஹாரினாபீ’’தி
? ‘‘ஆரஞ்ஞிகேனாபி கோ², ஆவுஸோ மொக்³க³ல்லான, பி⁴க்கு²னா இமே த⁴ம்மா ஸமாதா³ய வத்திதப்³பா³ பகே³வ கா³மந்தவிஹாரினா’’தி.
கோ³லியானிஸுத்தங் நிட்டி²தங் நவமங்.
10. கீடாகி³ரிஸுத்தங்
174. ஏவங்
மே ஸுதங் – ஏகங் ஸமயங் ப⁴க³வா காஸீஸு சாரிகங் சரதி மஹதா பி⁴க்கு²ஸங்கே⁴ன
ஸத்³தி⁴ங். தத்ர கோ² ப⁴க³வா பி⁴க்கூ² ஆமந்தேஸி – ‘‘அஹங் கோ², பி⁴க்க²வே,
அஞ்ஞத்ரேவ ரத்திபோ⁴ஜனா [ரத்திபோ⁴ஜனங் (க॰)]
பு⁴ஞ்ஜாமி. அஞ்ஞத்ர கோ² பனாஹங், பி⁴க்க²வே, ரத்திபோ⁴ஜனா பு⁴ஞ்ஜமானோ
அப்பாபா³த⁴தஞ்ச ஸஞ்ஜானாமி அப்பாதங்கதஞ்ச லஹுட்டா²னஞ்ச ப³லஞ்ச
பா²ஸுவிஹாரஞ்ச. ஏத², தும்ஹேபி, பி⁴க்க²வே, அஞ்ஞத்ரேவ ரத்திபோ⁴ஜனா பு⁴ஞ்ஜத².
அஞ்ஞத்ர கோ² பன, பி⁴க்க²வே, தும்ஹேபி ரத்திபோ⁴ஜனா பு⁴ஞ்ஜமானா
அப்பாபா³த⁴தஞ்ச ஸஞ்ஜானிஸ்ஸத² அப்பாதங்கதஞ்ச லஹுட்டா²னஞ்ச ப³லஞ்ச
பா²ஸுவிஹாரஞ்சா’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ
பச்சஸ்ஸோஸுங். அத² கோ² ப⁴க³வா காஸீஸு அனுபுப்³பே³ன சாரிகங் சரமானோ யேன
கீடாகி³ரி நாம காஸீனங் நிக³மோ தத³வஸரி. தத்ர ஸுத³ங் ப⁴க³வா கீடாகி³ரிஸ்மிங்
விஹரதி காஸீனங் நிக³மே.
175.
தேன கோ² பன ஸமயேன அஸ்ஸஜிபுனப்³ப³ஸுகா நாம பி⁴க்கூ² கீடாகி³ரிஸ்மிங்
ஆவாஸிகா ஹொந்தி. அத² கோ² ஸம்ப³ஹுலா பி⁴க்கூ² யேன அஸ்ஸஜிபுனப்³ப³ஸுகா
பி⁴க்கூ² தேனுபஸங்கமிங்ஸு; உபஸங்கமித்வா அஸ்ஸஜிபுனப்³ப³ஸுகே பி⁴க்கூ²
ஏதத³வோசுங் – ‘‘ப⁴க³வா கோ², ஆவுஸோ, அஞ்ஞத்ரேவ ரத்திபோ⁴ஜனா பு⁴ஞ்ஜதி
பி⁴க்கு²ஸங்கோ⁴ ச. அஞ்ஞத்ர கோ² பனாவுஸோ, ரத்திபோ⁴ஜனா பு⁴ஞ்ஜமானா
அப்பாபா³த⁴தஞ்ச ஸஞ்ஜானந்தி அப்பாதங்கதஞ்ச
லஹுட்டா²னஞ்ச ப³லஞ்ச பா²ஸுவிஹாரஞ்ச. ஏத², தும்ஹேபி, ஆவுஸோ, அஞ்ஞத்ரேவ
ரத்திபோ⁴ஜனா பு⁴ஞ்ஜத². அஞ்ஞத்ர கோ² பனாவுஸோ, தும்ஹேபி ரத்திபோ⁴ஜனா
பு⁴ஞ்ஜமானா அப்பாபா³த⁴தஞ்ச ஸஞ்ஜானிஸ்ஸத² அப்பாதங்கதஞ்ச லஹுட்டா²னஞ்ச ப³லஞ்ச
பா²ஸுவிஹாரஞ்சா’’தி . ஏவங் வுத்தே,
அஸ்ஸஜிபுனப்³ப³ஸுகா பி⁴க்கூ² தே பி⁴க்கூ² ஏதத³வோசுங் – ‘‘மயங் கோ², ஆவுஸோ,
ஸாயஞ்சேவ பு⁴ஞ்ஜாம பாதோ ச தி³வா ச விகாலே. தே மயங் ஸாயஞ்சேவ பு⁴ஞ்ஜமானா
பாதோ ச தி³வா ச விகாலே அப்பாபா³த⁴தஞ்ச ஸஞ்ஜானாம அப்பாதங்கதஞ்ச லஹுட்டா²னஞ்ச
ப³லஞ்ச பா²ஸுவிஹாரஞ்ச. தே மயங் கிங் ஸந்தி³ட்டி²கங் ஹித்வா காலிகங்
அனுதா⁴விஸ்ஸாம? ஸாயஞ்சேவ மயங் பு⁴ஞ்ஜிஸ்ஸாம பாதோ ச தி³வா ச விகாலே’’தி.
யதோ கோ² தே பி⁴க்கூ²
நாஸக்கி²ங்ஸு அஸ்ஸஜிபுனப்³ப³ஸுகே பி⁴க்கூ² ஸஞ்ஞாபேதுங், அத² யேன ப⁴க³வா
தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா
ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங்
ஏதத³வோசுங் – ‘‘இத⁴ மயங், ப⁴ந்தே, யேன அஸ்ஸஜிபுனப்³ப³ஸுகா பி⁴க்கூ²
தேனுபஸங்கமிம்ஹ; உபஸங்கமித்வா அஸ்ஸஜிபுனப்³ப³ஸுகே பி⁴க்கூ² ஏதத³வோசும்ஹ –
‘ப⁴க³வா கோ², ஆவுஸோ, அஞ்ஞத்ரேவ ரத்திபோ⁴ஜனா பு⁴ஞ்ஜதி பி⁴க்கு²ஸங்கோ⁴ ச;
அஞ்ஞத்ர கோ² பனாவுஸோ, ரத்திபோ⁴ஜனா பு⁴ஞ்ஜமானா அப்பாபா³த⁴தஞ்ச ஸஞ்ஜானந்தி
அப்பாதங்கதஞ்ச லஹுட்டா²னஞ்ச ப³லஞ்ச பா²ஸுவிஹாரஞ்ச. ஏத², தும்ஹேபி, ஆவுஸோ ,
அஞ்ஞத்ரேவ ரத்திபோ⁴ஜனா பு⁴ஞ்ஜத². அஞ்ஞத்ர கோ² பனாவுஸோ, தும்ஹேபி
ரத்திபோ⁴ஜனா பு⁴ஞ்ஜமானா அப்பாபா³த⁴தஞ்ச ஸஞ்ஜானிஸ்ஸத² அப்பாதங்கதஞ்ச
லஹுட்டா²னஞ்ச ப³லஞ்ச பா²ஸுவிஹாரஞ்சா’தி. ஏவங் வுத்தே, ப⁴ந்தே,
அஸ்ஸஜிபுனப்³ப³ஸுகா பி⁴க்கூ² அம்ஹே ஏதத³வோசுங் – ‘மயங் கோ², ஆவுஸோ,
ஸாயஞ்சேவ பு⁴ஞ்ஜாம பாதோ ச தி³வா ச விகாலே. தே மயங் ஸாயஞ்சேவ பு⁴ஞ்ஜமானா
பாதோ ச தி³வா ச விகாலே அப்பாபா³த⁴தஞ்ச ஸஞ்ஜானாம அப்பாதங்கதஞ்ச லஹுட்டா²னஞ்ச
ப³லஞ்ச பா²ஸுவிஹாரஞ்ச. தே மயங் கிங் ஸந்தி³ட்டி²கங் ஹித்வா காலிகங்
அனுதா⁴விஸ்ஸாம? ஸாயஞ்சேவ மயங் பு⁴ஞ்ஜிஸ்ஸாம பாதோ ச தி³வா ச விகாலே’தி. யதோ
கோ² மயங், ப⁴ந்தே, நாஸக்கி²ம்ஹ அஸ்ஸஜிபுனப்³ப³ஸுகே பி⁴க்கூ² ஸஞ்ஞாபேதுங்,
அத² மயங் ஏதமத்த²ங் ப⁴க³வதோ ஆரோசேமா’’தி.
176.
அத² கோ² ப⁴க³வா அஞ்ஞதரங் பி⁴க்கு²ங் ஆமந்தேஸி – ‘‘ஏஹி த்வங், பி⁴க்கு², மம
வசனேன அஸ்ஸஜிபுனப்³ப³ஸுகே பி⁴க்கூ² ஆமந்தேஹி – ‘ஸத்தா² ஆயஸ்மந்தே
ஆமந்தேதீ’’’தி. ‘‘ஏவங், ப⁴ந்தே’’தி கோ² ஸோ பி⁴க்கு² ப⁴க³வதோ படிஸ்ஸுத்வா
யேன அஸ்ஸஜிபுனப்³ப³ஸுகா பி⁴க்கூ² தேனுபஸங்கமி; உபஸங்கமித்வா
அஸ்ஸஜிபுனப்³ப³ஸுகே பி⁴க்கூ² ஏதத³வோச – ‘‘ஸத்தா² ஆயஸ்மந்தே ஆமந்தேதீ’’தி.
‘‘ஏவமாவுஸோ’’தி கோ² அஸ்ஸஜிபுனப்³ப³ஸுகா பி⁴க்கூ² தஸ்ஸ பி⁴க்கு²னோ
படிஸ்ஸுத்வா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னே கோ²
அஸ்ஸஜிபுனப்³ப³ஸுகே பி⁴க்கூ² ப⁴க³வா ஏதத³வோச – ‘‘ஸச்சங் கிர, பி⁴க்க²வே,
ஸம்ப³ஹுலா பி⁴க்கூ² தும்ஹே உபஸங்கமித்வா ஏதத³வோசுங்
– ‘ப⁴க³வா கோ², ஆவுஸோ, அஞ்ஞத்ரேவ ரத்திபோ⁴ஜனா பு⁴ஞ்ஜதி பி⁴க்கு²ஸங்கோ⁴ ச.
அஞ்ஞத்ர கோ² பனாவுஸோ, ரத்திபோ⁴ஜனா பு⁴ஞ்ஜமானா அப்பாபா³த⁴தஞ்ச ஸஞ்ஜானந்தி
அப்பாதங்கதஞ்ச லஹுட்டா²னஞ்ச ப³லஞ்ச பா²ஸுவிஹாரஞ்ச. ஏத², தும்ஹேபி, ஆவுஸோ,
அஞ்ஞத்ரேவ ரத்திபோ⁴ஜனா பு⁴ஞ்ஜத². அஞ்ஞத்ர கோ² பனாவுஸோ, தும்ஹேபி
ரத்திபோ⁴ஜனா பு⁴ஞ்ஜமானா அப்பாபா³த⁴தஞ்ச ஸஞ்ஜானிஸ்ஸத² அப்பாதங்கதஞ்ச லஹுட்டா²னஞ்ச ப³லஞ்ச பா²ஸுவிஹாரஞ்சா’தி. ஏவங் வுத்தே கிர [கிங் நு (க॰)],
பி⁴க்க²வே, தும்ஹே தே பி⁴க்கூ² ஏவங் அவசுத்த² – ‘மயங் கோ² பனாவுஸோ,
ஸாயஞ்சேவ பு⁴ஞ்ஜாம பாதோ ச தி³வா ச விகாலே. தே மயங் ஸாயஞ்சேவ பு⁴ஞ்ஜமானா
பாதோ ச தி³வா ச விகாலே அப்பாபா³த⁴தஞ்ச ஸஞ்ஜானாம அப்பாதங்கதஞ்ச லஹுட்டா²னஞ்ச
ப³லஞ்ச பா²ஸுவிஹாரஞ்ச. தே மயங் கிங் ஸந்தி³ட்டி²கங் ஹித்வா காலிகங்
அனுதா⁴விஸ்ஸாம? ஸாயஞ்சேவ மயங் பு⁴ஞ்ஜிஸ்ஸாம பாதோ ச தி³வா ச விகாலே’’’தி.
‘‘ஏவங், ப⁴ந்தே’’.
177.
‘‘கிங் நு மே தும்ஹே, பி⁴க்க²வே, ஏவங் த⁴ம்மங் தே³ஸிதங் ஆஜானாத² யங்
கிஞ்சாயங் புரிஸபுக்³க³லோ படிஸங்வேதே³தி ஸுக²ங் வா து³க்க²ங் வா
அது³க்க²மஸுக²ங் வா தஸ்ஸ அகுஸலா த⁴ம்மா பரிஹாயந்தி குஸலா த⁴ம்மா
அபி⁴வட்³ட⁴ந்தீ’’தி? ‘‘நோ ஹேதங், ப⁴ந்தே’’. ‘‘நனு மே தும்ஹே, பி⁴க்க²வே,
ஏவங் த⁴ம்மங் தே³ஸிதங் ஆஜானாத² இதே⁴கச்சஸ்ஸ யங் ஏவரூபங் ஸுக²ங் வேத³னங்
வேத³யதோ அகுஸலா த⁴ம்மா அபி⁴வட்³ட⁴ந்தி குஸலா த⁴ம்மா பரிஹாயந்தி, இத⁴
பனேகச்சஸ்ஸ ஏவரூபங் ஸுக²ங் வேத³னங் வேத³யதோ அகுஸலா த⁴ம்மா பரிஹாயந்தி ,
குஸலா த⁴ம்மா அபி⁴வட்³ட⁴ந்தி, இதே⁴கச்சஸ்ஸ ஏவரூபங் து³க்க²ங் வேத³னங்
வேத³யதோ அகுஸலா த⁴ம்மா அபி⁴வட்³ட⁴ந்தி குஸலா த⁴ம்மா பரிஹாயந்தி, இத⁴
பனேகச்சஸ்ஸ ஏவரூபங் து³க்க²ங் வேத³னங் வேத³யதோ அகுஸலா த⁴ம்மா பரிஹாயந்தி
குஸலா த⁴ம்மா அபி⁴வட்³ட⁴ந்தி, இதே⁴கச்சஸ்ஸ ஏவரூபங் அது³க்க²மஸுக²ங் வேத³னங்
வேத³யதோ அகுஸலா த⁴ம்மா அபி⁴வட்³ட⁴ந்தி குஸலா த⁴ம்மா பரிஹாயந்தி, இத⁴
பனேகச்சஸ்ஸ ஏவரூபங் அது³க்க²மஸுக²ங் வேத³னங் வேத³யதோ அகுஸலா த⁴ம்மா
பரிஹாயந்தி குஸலா த⁴ம்மா அபி⁴வட்³ட⁴ந்தீ’’தி? ‘‘ஏவங், ப⁴ந்தே’’.
178.
‘‘ஸாது⁴, பி⁴க்க²வே! மயா சேதங், பி⁴க்க²வே, அஞ்ஞாதங் அப⁴விஸ்ஸ அதி³ட்ட²ங்
அவிதி³தங் அஸச்சி²கதங் அப²ஸ்ஸிதங் பஞ்ஞாய – ‘இதே⁴கச்சஸ்ஸ ஏவரூபங் ஸுக²ங்
வேத³னங் வேத³யதோ அகுஸலா த⁴ம்மா அபி⁴வட்³ட⁴ந்தி குஸலா த⁴ம்மா பரிஹாயந்தீ’தி,
ஏவாஹங் அஜானந்தோ ‘ஏவரூபங் ஸுக²ங் வேத³னங் பஜஹதா²’தி வதெ³ய்யங்; அபி நு மே
ஏதங், பி⁴க்க²வே, பதிரூபங் அப⁴விஸ்ஸா’’தி? ‘‘நோ ஹேதங், ப⁴ந்தே’’. ‘‘யஸ்மா ச
கோ² ஏதங், பி⁴க்க²வே, மயா ஞாதங் தி³ட்ட²ங் விதி³தங் ஸச்சி²கதங் ப²ஸ்ஸிதங்
பஞ்ஞாய – ‘இதே⁴கச்சஸ்ஸ ஏவரூபங் ஸுக²ங் வேத³னங் வேத³யதோ அகுஸலா த⁴ம்மா
அபி⁴வட்³ட⁴ந்தி குஸலா த⁴ம்மா பரிஹாயந்தீ’தி, தஸ்மாஹங் ‘ஏவரூபங் ஸுக²ங்
வேத³னங் பஜஹதா²’தி வதா³மி. மயா சேதங், பி⁴க்க²வே, அஞ்ஞாதங் அப⁴விஸ்ஸ
அதி³ட்ட²ங் அவிதி³தங் அஸச்சி²கதங் அப²ஸ்ஸிதங் பஞ்ஞாய – ‘இதே⁴கச்சஸ்ஸ ஏவரூபங் ஸுக²ங் வேத³னங் வேத³யதோ அகுஸலா
த⁴ம்மா பரிஹாயந்தி குஸலா த⁴ம்மா அபி⁴வட்³ட⁴ந்தீ’தி, ஏவாஹங் அஜானந்தோ
‘ஏவரூபங் ஸுக²ங் வேத³னங் உபஸம்பஜ்ஜ விஹரதா²’தி வதெ³ய்யங்; அபி நு மே ஏதங்,
பி⁴க்க²வே, பதிரூபங் அப⁴விஸ்ஸா’’தி? ‘‘நோ ஹேதங், ப⁴ந்தே’’. ‘‘யஸ்மா ச கோ²
ஏதங், பி⁴க்க²வே, மயா ஞாதங் தி³ட்ட²ங் விதி³தங் ஸச்சி²கதங் ப²ஸ்ஸிதங்
பஞ்ஞாய – ‘இதே⁴கச்சஸ்ஸ ஏவரூபங் ஸுக²ங் வேத³னங் வேத³யதோ அகுஸலா த⁴ம்மா
பரிஹாயந்தி, குஸலா த⁴ம்மா அபி⁴வட்³ட⁴ந்தீ’தி, தஸ்மாஹங் ‘ஏவரூபங் ஸுக²ங்
வேத³னங் உபஸம்பஜ்ஜ விஹரதா²’தி வதா³மி.
179.
‘‘மயா சேதங், பி⁴க்க²வே, அஞ்ஞாதங் அப⁴விஸ்ஸ அதி³ட்ட²ங் அவிதி³தங்
அஸச்சி²கதங் அப²ஸ்ஸிதங் பஞ்ஞாய – ‘இதே⁴கச்சஸ்ஸ ஏவரூபங் து³க்க²ங் வேத³னங்
வேத³யதோ அகுஸலா த⁴ம்மா அபி⁴வட்³ட⁴ந்தி குஸலா த⁴ம்மா பரிஹாயந்தீ’தி, ஏவாஹங்
அஜானந்தோ ‘ஏவரூபங் து³க்க²ங் வேத³னங் பஜஹதா²’தி வதெ³ய்யங்; அபி நு மே ஏதங்,
பி⁴க்க²வே, பதிரூபங் அப⁴விஸ்ஸா’’தி? ‘‘நோ ஹேதங், ப⁴ந்தே’’. ‘‘யஸ்மா ச கோ²
ஏதங், பி⁴க்க²வே, மயா ஞாதங் தி³ட்ட²ங் விதி³தங் ஸச்சி²கதங் ப²ஸ்ஸிதங்
பஞ்ஞாய – ‘இதே⁴கச்சஸ்ஸ ஏவரூபங் து³க்க²ங் வேத³னங் வேத³யதோ அகுஸலா த⁴ம்மா
அபி⁴வட்³ட⁴ந்தி குஸலா த⁴ம்மா பரிஹாயந்தீ’தி, தஸ்மாஹங் ‘ஏவரூபங் து³க்க²ங்
வேத³னங் பஜஹதா²’தி வதா³மி. மயா சேதங், பி⁴க்க²வே, அஞ்ஞாதங் அப⁴விஸ்ஸ
அதி³ட்ட²ங் அவிதி³தங் அஸச்சி²கதங் அப²ஸ்ஸிதங் பஞ்ஞாய – ‘இதே⁴கச்சஸ்ஸ
ஏவரூபங் து³க்க²ங் வேத³னங் வேத³யதோ அகுஸலா த⁴ம்மா பரிஹாயந்தி குஸலா த⁴ம்மா
அபி⁴வட்³ட⁴ந்தீ’தி, ஏவாஹங் அஜானந்தோ ‘ஏவரூபங் து³க்க²ங் வேத³னங் உபஸம்பஜ்ஜ
விஹரதா²’தி வதெ³ய்யங்; அபி நு மே ஏதங், பி⁴க்க²வே, பதிரூபங் அப⁴விஸ்ஸா’’தி ?
‘‘நோ ஹேதங், ப⁴ந்தே’’. ‘‘யஸ்மா ச கோ² ஏதங், பி⁴க்க²வே, மயா ஞாதங்
தி³ட்ட²ங் விதி³தங் ஸச்சி²கதங் ப²ஸ்ஸிதங் பஞ்ஞாய – ‘இதே⁴கச்சஸ்ஸ ஏவரூபங்
து³க்க²ங் வேத³னங் வேத³யதோ அகுஸலா த⁴ம்மா பரிஹாயந்தி குஸலா த⁴ம்மா
அபி⁴வட்³ட⁴ந்தீ’தி, தஸ்மாஹங் ‘ஏவரூபங் து³க்க²ங் வேத³னங் உபஸம்பஜ்ஜ
விஹரதா²’தி வதா³மி.
180.
‘‘மயா சேதங், பி⁴க்க²வே, அஞ்ஞாதங் அப⁴விஸ்ஸ அதி³ட்ட²ங் அவிதி³தங்
அஸச்சி²கதங் அப²ஸ்ஸிதங் பஞ்ஞாய – ‘இதே⁴கச்சஸ்ஸ ஏவரூபங் அது³க்க²மஸுக²ங்
வேத³னங் வேத³யதோ அகுஸலா த⁴ம்மா அபி⁴வட்³ட⁴ந்தி குஸலா த⁴ம்மா பரிஹாயந்தீ’தி,
ஏவாஹங் அஜானந்தோ ‘ஏவரூபங் அது³க்க²மஸுக²ங் வேத³னங் பஜஹதா²’தி வதெ³ய்யங்;
அபி நு மே ஏதங், பி⁴க்க²வே, பதிரூபங் அப⁴விஸ்ஸா’’தி? ‘‘நோ ஹேதங், ப⁴ந்தே’’.
‘‘யஸ்மா ச கோ² ஏதங், பி⁴க்க²வே, மயா ஞாதங் தி³ட்ட²ங் விதி³தங் ஸச்சி²கதங்
ப²ஸ்ஸிதங் பஞ்ஞாய – ‘இதே⁴கச்சஸ்ஸ ஏவரூபங்
அது³க்க²மஸுக²ங் வேத³னங் வேத³யதோ அகுஸலா த⁴ம்மா அபி⁴வட்³ட⁴ந்தி குஸலா
த⁴ம்மா பரிஹாயந்தீ’தி, தஸ்மாஹங் ‘ஏவரூபங் அது³க்க²மஸுக²ங் வேத³னங்
பஜஹதா²’தி வதா³மி’’. மயா சேதங், பி⁴க்க²வே, அஞ்ஞாதங் அப⁴விஸ்ஸ அதி³ட்ட²ங்
அவிதி³தங் அஸச்சி²கதங் அப²ஸ்ஸிதங் பஞ்ஞாய –
‘இதே⁴கச்சஸ்ஸ ஏவரூபங் அது³க்க²மஸுக²ங் வேத³னங் வேத³யதோ அகுஸலா த⁴ம்மா
பரிஹாயந்தி குஸலா த⁴ம்மா அபி⁴வட்³ட⁴ந்தீ’தி, ஏவாஹங் அஜானந்தோ ‘ஏவரூபங்
அது³க்க²மஸுக²ங் வேத³னங் உபஸம்பஜ்ஜ விஹரதா²’தி வதெ³ய்யங்; அபி நு மே ஏதங்,
பி⁴க்க²வே, பதிரூபங் அப⁴விஸ்ஸா’’தி? ‘‘நோ ஹேதங், ப⁴ந்தே’’. ‘‘யஸ்மா ச கோ²
ஏதங், பி⁴க்க²வே, மயா ஞாதங் தி³ட்ட²ங் விதி³தங்
ஸச்சி²கதங் ப²ஸ்ஸிதங் பஞ்ஞாய – ‘இதே⁴கச்சஸ்ஸ ஏவரூபங் அது³க்க²மஸுக²ங்
வேத³னங் வேத³யதோ அகுஸலா த⁴ம்மா பரிஹாயந்தி குஸலா த⁴ம்மா அபி⁴வட்³ட⁴ந்தீ’தி,
தஸ்மாஹங் ‘ஏவரூபங் அது³க்க²மஸுக²ங் வேத³னங் உபஸம்பஜ்ஜ விஹரதா²’தி வதா³மி.
181.
‘‘நாஹங், பி⁴க்க²வே, ஸப்³பே³ஸங்யேவ பி⁴க்கூ²னங் ‘அப்பமாதே³ன கரணீய’ந்தி
வதா³மி; ந பனாஹங், பி⁴க்க²வே, ஸப்³பே³ஸங்யேவ பி⁴க்கூ²னங் ‘ந அப்பமாதே³ன
கரணீய’ந்தி வதா³மி. யே தே, பி⁴க்க²வே, பி⁴க்கூ² அரஹந்தோ கீ²ணாஸவா
வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா² பரிக்கீ²ணப⁴வஸங்யோஜனா
ஸம்மத³ஞ்ஞா விமுத்தா, ததா²ரூபானாஹங், பி⁴க்க²வே, பி⁴க்கூ²னங் ‘ந அப்பமாதே³ன
கரணீய’ந்தி வதா³மி. தங் கிஸ்ஸ ஹேது? கதங் தேஸங் அப்பமாதே³ன. அப⁴ப்³பா³ தே
பமஜ்ஜிதுங். யே ச கோ² தே, பி⁴க்க²வே, பி⁴க்கூ² ஸெக்கா² அப்பத்தமானஸா
அனுத்தரங் யோக³க்கே²மங் பத்த²யமானா விஹரந்தி, ததா²ரூபானாஹங், பி⁴க்க²வே,
பி⁴க்கூ²னங் ‘அப்பமாதே³ன கரணீய’ந்த்ந்த்தி வதா³மி. தங் கிஸ்ஸ ஹேது? அப்பேவ
நாமிமே ஆயஸ்மந்தோ அனுலோமிகானி ஸேனாஸனானி படிஸேவமானா கல்யாணமித்தே ப⁴ஜமானா
இந்த்³ரியானி ஸமன்னானயமானா – யஸ்ஸத்தா²ய குலபுத்தா ஸம்மதே³வ அகா³ரஸ்மா
அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்யுந்தி! இமங் கோ² அஹங்,
பி⁴க்க²வே, இமேஸங் பி⁴க்கூ²னங் அப்பமாத³ப²லங் ஸம்பஸ்ஸமானோ ‘அப்பமாதே³ன
கரணீய’ந்த்ந்த்தி வதா³மி.
182. ‘‘ஸத்திமே ,
பி⁴க்க²வே, புக்³க³லா ஸந்தோ ஸங்விஜ்ஜமானா லோகஸ்மிங். கதமே ஸத்த?
உப⁴தோபா⁴க³விமுத்தோ, பஞ்ஞாவிமுத்தோ, காயஸக்கி², தி³ட்டி²ப்பத்தோ,
ஸத்³தா⁴விமுத்தோ, த⁴ம்மானுஸாரீ, ஸத்³தா⁴னுஸாரீ.
‘‘கதமோ ச, பி⁴க்க²வே,
புக்³க³லோ உப⁴தோபா⁴க³விமுத்தோ? இத⁴, பி⁴க்க²வே, ஏகச்சோ புக்³க³லோ யே தே
ஸந்தா விமொக்கா² அதிக்கம்ம ரூபே ஆருப்பா தே காயேன பு²ஸித்வா [ப²ஸ்ஸித்வா (ஸீ॰ பீ॰)] விஹரதி பஞ்ஞாய சஸ்ஸ தி³ஸ்வா
ஆஸவா பரிக்கீ²ணா ஹொந்தி. அயங் வுச்சதி, பி⁴க்க²வே, புக்³க³லோ
உப⁴தோபா⁴க³விமுத்தோ இமஸ்ஸ கோ² அஹங், பி⁴க்க²வே, பி⁴க்கு²னோ ‘ந அப்பமாதே³ன
கரணீய’ந்தி வதா³மி. தங் கிஸ்ஸ ஹேது? கதங் தஸ்ஸ அப்பமாதே³ன. அப⁴ப்³போ³ ஸோ
பமஜ்ஜிதுங்.
‘‘கதமோ ச, பி⁴க்க²வே, புக்³க³லோ பஞ்ஞாவிமுத்தோ? இத⁴,
பி⁴க்க²வே, ஏகச்சோ புக்³க³லோ யே தே ஸந்தா விமொக்கா² அதிக்கம்ம ரூபே ஆருப்பா
தே ந காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா
ஹொந்தி. அயங் வுச்சதி, பி⁴க்க²வே, புக்³க³லோ
பஞ்ஞாவிமுத்தோ. இமஸ்ஸபி கோ² அஹங், பி⁴க்க²வே, பி⁴க்கு²னோ ‘ந அப்பமாதே³ன
கரணீய’ந்தி வதா³மி. தங் கிஸ்ஸ ஹேது? கதங் தஸ்ஸ அப்பமாதே³ன. அப⁴ப்³போ³ ஸோ
பமஜ்ஜிதுங்.
‘‘கதமோ ச, பி⁴க்க²வே, புக்³க³லோ காயஸக்கி²? இத⁴, பி⁴க்க²வே, ஏகச்சோ புக்³க³லோ யே தே ஸந்தா விமொக்கா² அதிக்கம்ம ரூபே ஆருப்பா
தே காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா
ஹொந்தி. அயங் வுச்சதி, பி⁴க்க²வே, புக்³க³லோ காயஸக்கி². இமஸ்ஸ கோ² அஹங்,
பி⁴க்க²வே, பி⁴க்கு²னோ ‘அப்பமாதே³ன கரணீய’ந்தி வதா³மி. தங் கிஸ்ஸ ஹேது?
அப்பேவ நாம அயமாயஸ்மா அனுலோமிகானி ஸேனாஸனானி படிஸேவமானோ கல்யாணமித்தே
ப⁴ஜமானோ இந்த்³ரியானி ஸமன்னானயமானோ – யஸ்ஸத்தா²ய குலபுத்தா ஸம்மதே³வ
அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங்
தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்யாதி! இமங்
கோ² அஹங், பி⁴க்க²வே, இமஸ்ஸ பி⁴க்கு²னோ அப்பமாத³ப²லங் ஸம்பஸ்ஸமானோ
‘அப்பமாதே³ன கரணீய’ந்த்ந்த்தி வதா³மி.
‘‘கதமோ ச, பி⁴க்க²வே, புக்³க³லோ தி³ட்டி²ப்பத்தோ? இத⁴,
பி⁴க்க²வே, ஏகச்சோ புக்³க³லோ யே தே ஸந்தா விமொக்கா² அதிக்கம்ம ரூபே
ஆருப்பா தே ந காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஏகச்சே ஆஸவா
பரிக்கீ²ணா ஹொந்தி, ததா²க³தப்பவேதி³தா சஸ்ஸ த⁴ம்மா பஞ்ஞாய வோதி³ட்டா²
ஹொந்தி வோசரிதா. அயங் வுச்சதி, பி⁴க்க²வே, புக்³க³லோ தி³ட்டி²ப்பத்தோ.
இமஸ்ஸபி கோ² அஹங், பி⁴க்க²வே, பி⁴க்கு²னோ ‘அப்பமாதே³ன கரணீய’ந்தி வதா³மி.
தங் கிஸ்ஸ ஹேது? அப்பேவ நாம அயமாயஸ்மா அனுலோமிகானி
ஸேனாஸனானி படிஸேவமானோ கல்யாணமித்தே ப⁴ஜமானோ இந்த்³ரியானி ஸமன்னானயமானோ –
யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி
தத³னுத்தரங் – ப்³ரஹ்மசரியபரியோஸானங்
தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்யாதி! இமங்
கோ² அஹங், பி⁴க்க²வே, இமஸ்ஸ பி⁴க்கு²னோ அப்பமாத³ப²லங் ஸம்பஸ்ஸமானோ
‘அப்பமாதே³ன கரணீய’ந்த்ந்த்தி வதா³மி.
‘‘கதமோ ச, பி⁴க்க²வே, புக்³க³லோ ஸத்³தா⁴விமுத்தோ. இத⁴,
பி⁴க்க²வே, ஏகச்சோ புக்³க³லோ யே தே ஸந்தா விமொக்கா² அதிக்கம்ம ரூபே
ஆருப்பா தே ந காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஏகச்சே ஆஸவா
பரிக்கீ²ணா ஹொந்தி, ததா²க³தே சஸ்ஸ ஸத்³தா⁴ நிவிட்டா² ஹோதி மூலஜாதா
பதிட்டி²தா. அயங் வுச்சதி, பி⁴க்க²வே, புக்³க³லோ ஸத்³தா⁴விமுத்தோ. இமஸ்ஸபி
கோ² அஹங், பி⁴க்க²வே, பி⁴க்கு²னோ ‘அப்பமாதே³ன கரணீய’ந்த்ந்த்தி வதா³மி. தங்
கிஸ்ஸ ஹேது? அப்பேவ நாம அயமாயஸ்மா அனுலோமிகானி ஸேனாஸனானி
படிஸேவமானோ கல்யாணமித்தே ப⁴ஜமானோ இந்த்³ரியானி ஸமன்னானயமானோ – யஸ்ஸத்தா²ய
குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் –
ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ விஹரெய்யாதி! இமங் கோ² அஹங், பி⁴க்க²வே, இமஸ்ஸ பி⁴க்கு²னோ
அப்பமாத³ப²லங் ஸம்பஸ்ஸமானோ ‘அப்பமாதே³ன கரணீய’ந்த்ந்த்தி வதா³மி.
‘‘கதமோ ச, பி⁴க்க²வே, புக்³க³லோ த⁴ம்மானுஸாரீ? இத⁴,
பி⁴க்க²வே, ஏகச்சோ புக்³க³லோ யே தே ஸந்தா விமொக்கா² அதிக்கம்ம ரூபே ஆருப்பா
தே ந காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா
[தி³ஸ்வா ஆஸவா அபரிக்கீ²ணா (ஸீ॰ பீ॰)] ஹொந்தி, ததா²க³தப்பவேதி³தா சஸ்ஸ
த⁴ம்மா பஞ்ஞாய மத்தஸோ நிஜ்ஜா²னங் க²மந்தி, அபி சஸ்ஸ இமே த⁴ம்மா ஹொந்தி,
ஸெய்யதி²த³ங் – ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங்,
ஸமாதி⁴ந்த்³ரியங், பஞ்ஞிந்த்³ரியங். அயங் வுச்சதி, பி⁴க்க²வே, புக்³க³லோ
த⁴ம்மானுஸாரீ. இமஸ்ஸபி கோ² அஹங், பி⁴க்க²வே, பி⁴க்கு²னோ ‘அப்பமாதே³ன
கரணீய’ந்தி வதா³மி. தங் கிஸ்ஸ ஹேது? அப்பேவ நாம அயமாயஸ்மா அனுலோமிகானி
ஸேனாஸனானி படிஸேவமானோ கல்யாணமித்தே ப⁴ஜமானோ இந்த்³ரியானி ஸமன்னானயமானோ –
யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி
தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரெய்யாதி ! இமங் கோ² அஹங், பி⁴க்க²வே, இமஸ்ஸ பி⁴க்கு²னோ அப்பமாத³ப²லங் ஸம்பஸ்ஸமானோ ‘அப்பமாதே³ன கரணீய’ந்தி வதா³மி.
‘‘கதமோ ச, பி⁴க்க²வே,
புக்³க³லோ ஸத்³தா⁴னுஸாரீ? இத⁴, பி⁴க்க²வே, ஏகச்சோ புக்³க³லோ யே தே ஸந்தா
விமொக்கா² அதிக்கம்ம ரூபே ஆருப்பா தே ந காயேன பு²ஸித்வா விஹரதி, பஞ்ஞாய
சஸ்ஸ தி³ஸ்வா ஏகச்சே ஆஸவா பரிக்கீ²ணா [தி³ஸ்வா ஆஸவா அபரிக்கீ²ணா (ஸீ॰ பீ॰)]
ஹொந்தி, ததா²க³தே சஸ்ஸ ஸத்³தா⁴மத்தங் ஹோதி பேமமத்தங், அபி சஸ்ஸ இமே த⁴ம்மா
ஹொந்தி, ஸெய்யதி²த³ங் – ஸத்³தி⁴ந்த்³ரியங், வீரியிந்த்³ரியங்,
ஸதிந்த்³ரியங், ஸமாதி⁴ந்த்³ரியங், பஞ்ஞிந்த்³ரியங். அயங் வுச்சதி,
பி⁴க்க²வே, புக்³க³லோ ஸத்³தா⁴னுஸாரீ. இமஸ்ஸபி கோ² அஹங், பி⁴க்க²வே,
பி⁴க்கு²னோ ‘அப்பமாதே³ன கரணீய’ந்த்ந்த்தி வதா³மி. தங் கிஸ்ஸ ஹேது? அப்பேவ
நாம அயமாயஸ்மா அனுலோமிகானி ஸேனாஸனானி படிஸேவமானோ
கல்யாணமித்தே ப⁴ஜமானோ இந்த்³ரியானி ஸமன்னானயமானோ – யஸ்ஸத்தா²ய குலபுத்தா
ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் –
ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ விஹரெய்யாதி! இமங் கோ² அஹங், பி⁴க்க²வே, இமஸ்ஸ பி⁴க்கு²னோ
அப்பமாத³ப²லங் ஸம்பஸ்ஸமானோ ‘அப்பமாதே³ன கரணீய’ந்த்ந்த்தி வதா³மி.
183. ‘‘நாஹங், பி⁴க்க²வே, ஆதி³கேனேவ அஞ்ஞாராத⁴னங் வதா³மி; அபி ச, பி⁴க்க²வே, அனுபுப்³ப³ஸிக்கா² அனுபுப்³ப³கிரியா அனுபுப்³ப³படிபதா³
அஞ்ஞாராத⁴னா ஹோதி. கத²ஞ்ச, பி⁴க்க²வே, அனுபுப்³ப³ஸிக்கா² அனுபுப்³ப³கிரியா
அனுபுப்³ப³படிபதா³ அஞ்ஞாராத⁴னா ஹோதி? இத⁴, பி⁴க்க²வே, ஸத்³தா⁴ஜாதோ
உபஸங்கமதி, உபஸங்கமந்தோ பயிருபாஸதி, பயிருபாஸந்தோ ஸோதங் ஓத³ஹதி, ஓஹிதஸோதோ
த⁴ம்மங் ஸுணாதி, ஸுத்வா த⁴ம்மங் தா⁴ரேதி, த⁴தானங் [தா⁴தானங் (க॰)]
த⁴ம்மானங் அத்த²ங் உபபரிக்க²தி, அத்த²ங் உபபரிக்க²தோ த⁴ம்மா நிஜ்ஜா²னங்
க²மந்தி, த⁴ம்மனிஜ்ஜா²னக்க²ந்தியா ஸதி ச²ந்தோ³ ஜாயதி, ச²ந்த³ஜாதோ உஸ்ஸஹதி,
உஸ்ஸாஹெத்வா துலேதி, துலயித்வா பத³ஹதி, பஹிதத்தோ ஸமானோ காயேன சேவ பரமஸச்சங்
ஸச்சி²கரோதி, பஞ்ஞாய ச நங் அதிவிஜ்ஜ² பஸ்ஸதி. ஸாபி நாம, பி⁴க்க²வே,
ஸத்³தா⁴ நாஹோஸி; தம்பி நாம, பி⁴க்க²வே, உபஸங்கமனங் நாஹோஸி; ஸாபி நாம,
பி⁴க்க²வே, பயிருபாஸனா நாஹோஸி; தம்பி நாம, பி⁴க்க²வே, ஸோதாவதா⁴னங் நாஹோஸி ;
தம்பி நாம, பி⁴க்க²வே, த⁴ம்மஸ்ஸவனங் நாஹோஸி; ஸாபி நாம, பி⁴க்க²வே,
த⁴ம்மதா⁴ரணா நாஹோஸி; ஸாபி நாம, பி⁴க்க²வே, அத்தூ²பபரிக்கா² நாஹோஸி; ஸாபி
நாம, பி⁴க்க²வே, த⁴ம்மனிஜ்ஜா²னக்க²ந்தி நாஹோஸி;
ஸோபி நாம, பி⁴க்க²வே, ச²ந்தோ³ நாஹோஸி; ஸோபி நாம, பி⁴க்க²வே, உஸ்ஸாஹோ
நாஹோஸி; ஸாபி நாம, பி⁴க்க²வே, துலனா நாஹோஸி; தம்பி நாம, பி⁴க்க²வே, பதா⁴னங்
நாஹோஸி. விப்படிபன்னாத்த², பி⁴க்க²வே, மிச்சா²படிபன்னாத்த², பி⁴க்க²வே.
கீவ தூ³ரேவிமே, பி⁴க்க²வே, மோக⁴புரிஸா அபக்கந்தா இமம்ஹா த⁴ம்மவினயா.
184. ‘‘அத்தி² , பி⁴க்க²வே, சதுப்பத³ங் வெய்யாகரணங் யஸ்ஸுத்³தி³ட்ட²ஸ்ஸ விஞ்ஞூ புரிஸோ நசிரஸ்ஸேவ பஞ்ஞாயத்த²ங் ஆஜானெய்ய. உத்³தி³ஸிஸ்ஸாமி வோ [உத்³தி³ட்ட²ஸ்ஸாபி (க॰)],
பி⁴க்க²வே, ஆஜானிஸ்ஸத² மே த’’ந்தி? ‘‘கே ச மயங், ப⁴ந்தே, கே ச த⁴ம்மஸ்ஸ
அஞ்ஞாதாரோ’’தி? யோபி ஸோ, பி⁴க்க²வே, ஸத்தா² ஆமிஸக³ரு ஆமிஸதா³யாதோ³ ஆமிஸேஹி
ஸங்ஸட்டோ² விஹரதி தஸ்ஸ பாயங் ஏவரூபீ பணோபணவியா ந உபேதி – ‘ஏவஞ்ச நோ அஸ்ஸ
அத² நங் கரெய்யாம, ந ச நோ ஏவமஸ்ஸ ந நங் கரெய்யாமா’தி, கிங் பன, பி⁴க்க²வே,
யங் ததா²க³தோ ஸப்³ப³ஸோ ஆமிஸேஹி விஸங்ஸட்டோ² விஹரதி. ஸத்³த⁴ஸ்ஸ, பி⁴க்க²வே,
ஸாவகஸ்ஸ ஸத்து²ஸாஸனே பரியோகா³ஹிய [பரியோகா³ய (ஸீ॰ பீ॰ க॰), பரியோக³ய்ஹ (ஸ்யா॰ கங்॰)]
வத்ததோ அயமனுத⁴ம்மோ ஹோதி – ‘ஸத்தா² ப⁴க³வா, ஸாவகோஹமஸ்மி; ஜானாதி ப⁴க³வா,
நாஹங் ஜானாமீ’தி. ஸத்³த⁴ஸ்ஸ, பி⁴க்க²வே, ஸாவகஸ்ஸ ஸத்து²ஸாஸனே பரியோகா³ஹிய
வத்ததோ ருள்ஹனீயங் [ரும்ஹனியங் (ஸீ॰ பீ॰)] ஸத்து²ஸாஸனங் ஹோதி ஓஜவந்தங். ஸத்³த⁴ஸ்ஸ, பி⁴க்க²வே, ஸாவகஸ்ஸ ஸத்து²ஸாஸனே பரியோகா³ஹிய வத்ததோ அயமனுத⁴ம்மோ ஹோதி – ‘காமங் தசோ ச ந்ஹாரு ச அட்டி² ச அவஸிஸ்ஸது, ஸரீரே உபஸுஸ்ஸது [உபஸுஸ்ஸது ஸரீரே (ஸீ॰), ஸரீரே அவஸுஸ்ஸது (க॰)] மங்ஸலோஹிதங், யங் தங் புரிஸதா²மேன புரிஸவீரியேன புரிஸபரக்கமேன பத்தப்³ப³ங் ந தங் அபாபுணித்வா வீரியஸ்ஸ ஸண்டா²னங் [ஸந்தா²னங் (ஸீ॰ ஸ்யா॰ பீ॰)]
ப⁴விஸ்ஸதீ’தி. ஸத்³த⁴ஸ்ஸ, பி⁴க்க²வே, ஸாவகஸ்ஸ ஸத்து²ஸாஸனே பரியோகா³ஹிய
வத்ததோ த்³வின்னங் ப²லானங் அஞ்ஞதரங் ப²லங் பாடிகங்க²ங் – தி³ட்டே²வ த⁴ம்மே
அஞ்ஞா, ஸதி வா உபாதி³ஸேஸே அனாகா³மிதா’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
கீடாகி³ரிஸுத்தங் நிட்டி²தங் த³ஸமங்.
பி⁴க்கு²வக்³கோ³ நிட்டி²தோ து³தியோ.
தஸ்ஸுத்³தா³னங் –
குஞ்ஜர-ராஹுல-ஸஸ்ஸதலோகோ, மாலுக்யபுத்தோ ச ப⁴த்³தா³லி-நாமோ;
கு²த்³த³-தி³ஜாத²-ஸஹம்பதியாசங், நாளக-ரஞ்ஞிகிடாகி³ரினாமோ.
ஸுத்தபிடக-Part-40-தமிழில் திரபிடக மூன்று தொகுப்புகள்TIPITAKA--40.மஜ்ஜிமனிகாயே-மஜ்ஜிமபண்ணாஸபாளி-1. க³ஹபதிவக்கோ-1. கந்தரகஸுத்தங்-from FREE ONLINE eNālāndā Research and
Practice UNIVERSITY through http://sarvajan.ambedkar.org
நமோ தஸ்ஸ பகவதோ அரஹதோ ஸம்மாஸம்புத்தஸ்ஸ
மஜ்ஜிமனிகாயே
மஜ்ஜிமபண்ணாஸபாளி
1. க³ஹபதிவக்கோ
1. கந்தரகஸுத்தங்
1. ஏவங் மே ஸுதங் – ஏகங் ஸமயங் ப⁴க³வா சம்பாயங் விஹரதி க³க்³க³ராய பொக்க²ரணியா தீரே மஹதா பி⁴க்கு²ஸங்கே⁴ன ஸத்³தி⁴ங். அத² கோ² பெஸ்ஸோ [பேயோ (க॰)]
ச ஹத்தா²ரோஹபுத்தோ கந்த³ரகோ ச பரிப்³பா³ஜகோ யேன ப⁴க³வா தேனுபஸங்கமிங்ஸு;
உபஸங்கமித்வா பெஸ்ஸோ ஹத்தா²ரோஹபுத்தோ ப⁴க³வந்தங் அபி⁴வாதெ³த்வா ஏகமந்தங்
நிஸீதி³. கந்த³ரகோ பன பரிப்³பா³ஜகோ ப⁴க³வதா ஸத்³தி⁴ங் ஸம்மோதி³.
ஸம்மோத³னீயங் கத²ங் ஸாரணீயங் [ஸாராணீயங் (ஸீ॰ ஸ்யா॰ கங் பீ॰)]
வீதிஸாரெத்வா ஏகமந்தங் அட்டா²ஸி. ஏகமந்தங் டி²தோ கோ² கந்த³ரகோ
பரிப்³பா³ஜகோ துண்ஹீபூ⁴தங் துண்ஹீபூ⁴தங் பி⁴க்கு²ஸங்க⁴ங் அனுவிலோகெத்வா
ப⁴க³வந்தங் ஏதத³வோச – ‘‘அச்ச²ரியங் , போ⁴ கோ³தம, அப்³பு⁴தங், போ⁴ கோ³தம, யாவஞ்சித³ங் போ⁴தா கோ³தமேன
ஸம்மா பி⁴க்கு²ஸங்கோ⁴ படிபாதி³தோ! யேபி தே, போ⁴ கோ³தம, அஹேஸுங்
அதீதமத்³தா⁴னங் அரஹந்தோ ஸம்மாஸம்பு³த்³தா⁴ தேபி ப⁴க³வந்தோ ஏதபரமங்யேவ ஸம்மா
பி⁴க்கு²ஸங்க⁴ங் படிபாதே³ஸுங் – ஸெய்யதா²பி ஏதரஹி போ⁴தா கோ³தமேன ஸம்மா
பி⁴க்கு²ஸங்கோ⁴ படிபாதி³தோ. யேபி தே, போ⁴ கோ³தம, ப⁴விஸ்ஸந்தி
அனாக³தமத்³தா⁴னங் அரஹந்தோ ஸம்மாஸம்பு³த்³தா⁴ தேபி ப⁴க³வந்தோ ஏதபரமங்யேவ
ஸம்மா பி⁴க்கு²ஸங்க⁴ங் படிபாதெ³ஸ்ஸந்தி – ஸெய்யதா²பி ஏதரஹி போ⁴தா கோ³தமேன
ஸம்மா பி⁴க்கு²ஸங்கோ⁴ படிபாதி³தோ’’தி.
2. ‘‘ஏவமேதங் ,
கந்த³ரக, ஏவமேதங், கந்த³ரக. யேபி தே, கந்த³ரக, அஹேஸுங் அதீதமத்³தா⁴னங்
அரஹந்தோ ஸம்மாஸம்பு³த்³தா⁴ தேபி ப⁴க³வந்தோ ஏதபரமங்யேவ ஸம்மா
பி⁴க்கு²ஸங்க⁴ங் படிபாதே³ஸுங் – ஸெய்யதா²பி ஏதரஹி மயா ஸம்மா பி⁴க்கு²ஸங்கோ⁴
படிபாதி³தோ. யேபி தே, கந்த³ரக, ப⁴விஸ்ஸந்தி அனாக³தமத்³தா⁴னங் அரஹந்தோ
ஸம்மாஸம்பு³த்³தா⁴ தேபி ப⁴க³வந்தோ ஏதபரமங்யேவ ஸம்மா பி⁴க்கு²ஸங்க⁴ங்
படிபாதெ³ஸ்ஸந்தி – ஸெய்யதா²பி ஏதரஹி மயா ஸம்மா பி⁴க்கு²ஸங்கோ⁴ படிபாதி³தோ.
‘‘ஸந்தி ஹி, கந்த³ரக, பி⁴க்கூ² இமஸ்மிங்
பி⁴க்கு²ஸங்கே⁴ அரஹந்தோ கீ²ணாஸவா வுஸிதவந்தோ கதகரணீயா ஓஹிதபா⁴ரா
அனுப்பத்தஸத³த்தா² பரிக்கீ²ணப⁴வஸங்யோஜனா ஸம்மத³ஞ்ஞா விமுத்தா. ஸந்தி ஹி,
கந்த³ரக, பி⁴க்கூ² இமஸ்மிங் பி⁴க்கு²ஸங்கே⁴ ஸெக்கா² ஸந்ததஸீலா
ஸந்ததவுத்தினோ நிபகா நிபகவுத்தினோ; தே சதூஸு [நிபகவுத்தினோ சதூஸு (ஸீ॰)] ஸதிபட்டா²னேஸு ஸுப்பதிட்டி²தசித்தா [ஸுபட்டி²தசித்தா (ஸீ॰ பீ॰ க॰)] விஹரந்தி. கதமேஸு சதூஸு? இத⁴, கந்த³ரக, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே
அபி⁴ஜ்ஜா²தோ³மனஸ்ஸங்; வேத³னாஸு வேத³னானுபஸ்ஸீ விஹரதி ஆதாபீ ஸம்பஜானோ
ஸதிமா, வினெய்ய லோகே அபி⁴ஜ்ஜா²தோ³மனஸ்ஸங்; சித்தே சித்தானுபஸ்ஸீ விஹரதி
ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங்; த⁴ம்மேஸு
த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே
அபி⁴ஜ்ஜா²தோ³மனஸ்ஸ’’ந்தி.
3.
ஏவங் வுத்தே, பெஸ்ஸோ ஹத்தா²ரோஹபுத்தோ ப⁴க³வந்தங் ஏதத³வோச – ‘‘அச்ச²ரியங்,
ப⁴ந்தே, அப்³பு⁴தங், ப⁴ந்தே! யாவ ஸுபஞ்ஞத்தா சிமே, ப⁴ந்தே, ப⁴க³வதா சத்தாரோ
ஸதிபட்டா²னா ஸத்தானங் விஸுத்³தி⁴யா ஸோகபரிதே³வானங் [ஸோகபரித்³த³வானங் (ஸீ॰ பீ॰)]
ஸமதிக்கமாய து³க்க²தோ³மனஸ்ஸானங் அத்த²ங்க³மாய ஞாயஸ்ஸ அதி⁴க³மாய
நிப்³பா³னஸ்ஸ ஸச்சி²கிரியாய. மயம்பி ஹி, ப⁴ந்தே, கி³ஹீ ஓதா³தவஸனா காலேன
காலங் இமேஸு சதூஸு ஸதிபட்டா²னேஸு
ஸுப்பதிட்டி²தசித்தா விஹராம. இத⁴ மயங், ப⁴ந்தே, காயே காயானுபஸ்ஸினோ விஹராம
ஆதாபினோ ஸம்பஜானா ஸதிமந்தோ, வினெய்ய லோகே அபி⁴ஜ்ஜா²தோ³மனஸ்ஸங்; வேத³னாஸு
வேத³னானுபஸ்ஸினோ விஹராம ஆதாபினோ ஸம்பஜானா ஸதிமந்தோ, வினெய்ய லோகே
அபி⁴ஜ்ஜா²தோ³மனஸ்ஸங்; சித்தே சித்தானுபஸ்ஸினோ
விஹராம ஆதாபினோ ஸம்பஜானா ஸதிமந்தோ, வினெய்ய லோகே அபி⁴ஜ்ஜா²தோ³மனஸ்ஸங்;
த⁴ம்மேஸு த⁴ம்மானுபஸ்ஸினோ விஹராம ஆதாபினோ ஸம்பஜானா ஸதிமந்தோ, வினெய்ய லோகே
அபி⁴ஜ்ஜா²தோ³மனஸ்ஸங். அச்ச²ரியங், ப⁴ந்தே, அப்³பு⁴தங், ப⁴ந்தே!
யாவஞ்சித³ங், ப⁴ந்தே, ப⁴க³வா ஏவங் மனுஸ்ஸக³ஹனே ஏவங் மனுஸ்ஸகஸடே ஏவங்
மனுஸ்ஸஸாடெ²ய்யே வத்தமானே ஸத்தானங் ஹிதாஹிதங்
ஜானாதி. க³ஹனஞ்ஹேதங், ப⁴ந்தே, யதி³த³ங் மனுஸ்ஸா; உத்தானகஞ்ஹேதங், ப⁴ந்தே,
யதி³த³ங் பஸவோ. அஹஞ்ஹி, ப⁴ந்தே, பஹோமி ஹத்தி²த³ம்மங் ஸாரேதுங். யாவதகேன
அந்தரேன சம்பங் க³தாக³தங் கரிஸ்ஸதி ஸப்³பா³னி தானி ஸாடெ²ய்யானி கூடெய்யானி
வங்கெய்யானி ஜிம்ஹெய்யானி பாதுகரிஸ்ஸதி. அம்ஹாகங் பன, ப⁴ந்தே, தா³ஸாதி வா
பெஸ்ஸாதி வா கம்மகராதி வா அஞ்ஞதா²வ காயேன ஸமுதா³சரந்தி அஞ்ஞதா²வ வாசாய
அஞ்ஞதா²வ நேஸங் சித்தங் ஹோதி. அச்ச²ரியங், ப⁴ந்தே, அப்³பு⁴தங், ப⁴ந்தே!
யாவஞ்சித³ங், ப⁴ந்தே, ப⁴க³வா ஏவங் மனுஸ்ஸக³ஹனே ஏவங் மனுஸ்ஸகஸடே ஏவங்
மனுஸ்ஸஸாடெ²ய்யே வத்தமானே ஸத்தானங் ஹிதாஹிதங் ஜானாதி. க³ஹனஞ்ஹேதங், ப⁴ந்தே,
யதி³த³ங் மனுஸ்ஸா; உத்தானகஞ்ஹேதங், ப⁴ந்தே, யதி³த³ங் பஸவோ’’தி.
4. ‘‘ஏவமேதங், பெஸ்ஸ, ஏவமேதங், பெஸ்ஸ. க³ஹனஞ்ஹேதங் ,
பெஸ்ஸ, யதி³த³ங் மனுஸ்ஸா; உத்தானகஞ்ஹேதங், பெஸ்ஸ, யதி³த³ங் பஸவோ.
சத்தாரோமே, பெஸ்ஸ, புக்³க³லா ஸந்தோ ஸங்விஜ்ஜமானா லோகஸ்மிங். கதமே சத்தாரோ?
இத⁴, பெஸ்ஸ, ஏகச்சோ புக்³க³லோ அத்தந்தபோ ஹோதி அத்தபரிதாபனானுயோக³மனுயுத்தோ;
இத⁴ பன, பெஸ்ஸ, ஏகச்சோ புக்³க³லோ பரந்தபோ ஹோதி பரபரிதாபனானுயோக³மனுயுத்தோ;
இத⁴ பன, பெஸ்ஸ, ஏகச்சோ புக்³க³லோ அத்தந்தபோ ச ஹோதி
அத்தபரிதாபனானுயோக³மனுயுத்தோ, பரந்தபோ ச பரபரிதாபனானுயோக³மனுயுத்தோ ;
இத⁴ பன, பெஸ்ஸ, ஏகச்சோ புக்³க³லோ நேவத்தந்தபோ ஹோதி
நாத்தபரிதாபனானுயோக³மனுயுத்தோ ந பரந்தபோ ந பரபரிதாபனானுயோக³மனுயுத்தோ. ஸோ
அனத்தந்தபோ அபரந்தபோ தி³ட்டே²வ த⁴ம்மே நிச்சா²தோ நிப்³பு³தோ ஸீதீபூ⁴தோ [ஸீதிபூ⁴தோ (ஸீ॰ பீ॰ க॰)] ஸுக²ப்படிஸங்வேதீ³ ப்³ரஹ்மபூ⁴தேன அத்தனா விஹரதி. இமேஸங், பெஸ்ஸ, சதுன்னங் புக்³க³லானங் கதமோ தே புக்³க³லோ சித்தங் ஆராதே⁴தீ’’தி?
‘‘ய்வாயங், ப⁴ந்தே, புக்³க³லோ அத்தந்தபோ அத்தபரிதாபனானுயோக³மனுயுத்தோ, அயங் மே புக்³க³லோ சித்தங் நாராதே⁴தி. யோபாயங், ப⁴ந்தே, புக்³க³லோ பரந்தபோ பரபரிதாபனானுயோக³மனுயுத்தோ ,
அயம்பி மே புக்³க³லோ சித்தங் நாராதே⁴தி. யோபாயங், ப⁴ந்தே, புக்³க³லோ
அத்தந்தபோ ச அத்தபரிதாபனானுயோக³மனுயுத்தோ பரந்தபோ ச
பரபரிதாபனானுயோக³மனுயுத்தோ, அயம்பி மே புக்³க³லோ சித்தங் நாராதே⁴தி. யோ ச
கோ² அயங், ப⁴ந்தே, புக்³க³லோ நேவத்தந்தபோ நாத்தபரிதாபனானுயோக³மனுயுத்தோ ந
பரந்தபோ ந பரபரிதாபனானுயோக³மனுயுத்தோ, ஸோ அனத்தந்தபோ அபரந்தபோ தி³ட்டே²வ
த⁴ம்மே நிச்சா²தோ நிப்³பு³தோ ஸீதீபூ⁴தோ ஸுக²ப்படிஸங்வேதீ³ ப்³ரஹ்மபூ⁴தேன
அத்தனா விஹரதி – அயமேவ [அயங் (ஸீ॰ ஸ்யா॰ கங்॰ பீ॰)] மே புக்³க³லோ சித்தங் ஆராதே⁴தீ’’தி.
5.
‘‘கஸ்மா பன தே, பெஸ்ஸ, இமே தயோ புக்³க³லா சித்தங் நாராதெ⁴ந்தீ’’தி?
‘‘ய்வாயங், ப⁴ந்தே, புக்³க³லோ அத்தந்தபோ அத்தபரிதாபனானுயோக³மனுயுத்தோ ஸோ
அத்தானங் ஸுக²காமங் து³க்க²படிக்கூலங் ஆதாபேதி பரிதாபேதி – இமினா மே அயங்
புக்³க³லோ சித்தங் நாராதே⁴தி. யோபாயங், ப⁴ந்தே,
புக்³க³லோ பரந்தபோ பரபரிதாபனானுயோக³மனுயுத்தோ ஸோ பரங் ஸுக²காமங்
து³க்க²படிக்கூலங் ஆதாபேதி பரிதாபேதி – இமினா மே அயங் புக்³க³லோ சித்தங்
நாராதே⁴தி. யோபாயங், ப⁴ந்தே, புக்³க³லோ அத்தந்தபோ ச
அத்தபரிதாபனானுயோக³மனுயுத்தோ பரந்தபோ ச பரபரிதாபனானுயோக³மனுயுத்தோ ஸோ
அத்தானஞ்ச பரஞ்ச ஸுக²காமங் து³க்க²படிக்கூலங் [ஸுக²காமே து³க்க²படிக்கூலே (ஸீ॰ பீ॰)] ஆதாபேதி பரிதாபேதி – இமினா மே அயங் புக்³க³லோ சித்தங் நாராதே⁴தி. யோ ச
கோ² அயங், ப⁴ந்தே, புக்³க³லோ நேவத்தந்தபோ நாத்தபரிதாபனானுயோக³மனுயுத்தோ ந
பரந்தபோ ந பரபரிதாபனானுயோக³மனுயுத்தோ ஸோ அனத்தந்தபோ அபரந்தபோ தி³ட்டே²வ
த⁴ம்மே நிச்சா²தோ நிப்³பு³தோ ஸீதீபூ⁴தோ ஸுக²ப்படிஸங்வேதீ³ ப்³ரஹ்மபூ⁴தேன
அத்தனா [விஹரதி. இமினா (ஸீ॰ ஸ்யா॰ கங்॰ பீ॰)] விஹரதி; ஸோ அத்தானஞ்ச பரஞ்ச ஸுக²காமங் து³க்க²படிக்கூலங் நேவ ஆதாபேதி ந பரிதாபேதி – இமினா [விஹரதி. இமினா (ஸீ॰ ஸ்யா॰ கங்॰ பீ॰)]
மே அயங் புக்³க³லோ சித்தங் ஆராதே⁴தி. ஹந்த³, ச தா³னி மயங், ப⁴ந்தே,
க³ச்சா²ம; ப³ஹுகிச்சா மயங் ப³ஹுகரணீயா’’தி. ‘‘யஸ்ஸதா³னி த்வங், பெஸ்ஸ,
காலங் மஞ்ஞஸீ’’தி. அத² கோ² பெஸ்ஸோ ஹத்தா²ரோஹபுத்தோ ப⁴க³வதோ பா⁴ஸிதங்
அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தங் அபி⁴வாதெ³த்வா
பத³க்கி²ணங் கத்வா பக்காமி.
6. அத²
கோ² ப⁴க³வா அசிரபக்கந்தே பெஸ்ஸே ஹத்தா²ரோஹபுத்தே பி⁴க்கூ² ஆமந்தேஸி –
‘‘பண்டி³தோ, பி⁴க்க²வே, பெஸ்ஸோ ஹத்தா²ரோஹபுத்தோ; மஹாபஞ்ஞோ, பி⁴க்க²வே,
பெஸ்ஸோ ஹத்தா²ரோஹபுத்தோ. ஸசே, பி⁴க்க²வே, பெஸ்ஸோ ஹத்தா²ரோஹபுத்தோ முஹுத்தங்
நிஸீதெ³ய்ய யாவஸ்ஸாஹங் இமே சத்தாரோ புக்³க³லே வித்தா²ரேன விப⁴ஜிஸ்ஸாமி [விப⁴ஜாமி (ஸீ॰ பீ॰)], மஹதா அத்தே²ன ஸங்யுத்தோ அப⁴விஸ்ஸ. அபி ச, பி⁴க்க²வே, எத்தாவதாபி பெஸ்ஸோ ஹத்தா²ரோஹபுத்தோ மஹதா அத்தே²ன ஸங்யுத்தோ’’தி. ‘‘ஏதஸ்ஸ, ப⁴க³வா, காலோ, ஏதஸ்ஸ, ஸுக³த, காலோ, யங்
ப⁴க³வா இமே சத்தாரோ புக்³க³லே வித்தா²ரேன விப⁴ஜெய்ய. ப⁴க³வதோ ஸுத்வா
பி⁴க்கூ² தா⁴ரெஸ்ஸந்தீ’’தி. ‘‘தேன ஹி, பி⁴க்க²வே, ஸுணாத², ஸாது⁴கங் மனஸி
கரோத², பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ
பச்சஸ்ஸோஸுங். ப⁴க³வா ஏதத³வோச –
7.
‘‘கதமோ ச, பி⁴க்க²வே, புக்³க³லோ அத்தந்தபோ அத்தபரிதாபனானுயோக³மனுயுத்தோ?
இத⁴, பி⁴க்க²வே, ஏகச்சோ புக்³க³லோ அசேலகோ ஹோதி முத்தாசாரோ ஹத்தா²பலேக²னோ [ஹத்தா²வலேக²னோ (ஸ்யா॰ கங்॰)] நஏஹிப⁴த்³த³ந்திகோ நதிட்ட²ப⁴த்³த³ந்திகோ [நஏஹிப⁴த³ந்திகோ, நதிட்ட²ப⁴த³ந்திகோ (ஸீ॰ ஸ்யா॰ கங்॰ பீ॰)]; நாபி⁴ஹடங் ந உத்³தி³ஸ்ஸகதங் ந நிமந்தனங் ஸாதி³யதி; ஸோ ந கும்பி⁴முகா² படிக்³க³ண்ஹாதி ந களோபிமுகா² [க²ளோபிமுகோ² (ஸீ॰)]
படிக்³க³ண்ஹாதி ந ஏளகமந்தரங் ந த³ண்ட³மந்தரங் ந முஸலமந்தரங் ந த்³வின்னங்
பு⁴ஞ்ஜமானானங் ந க³ப்³பி⁴னியா ந பாயமானாய ந புரிஸந்தரக³தாய ந ஸங்கித்தீஸு ந
யத்த² ஸா உபட்டி²தோ ஹோதி ந யத்த² மக்கி²கா ஸண்ட³ஸண்ட³சாரினீ; ந மச்ச²ங் ந
மங்ஸங் ந ஸுரங் ந மேரயங் ந து²ஸோத³கங் பிவதி. ஸோ ஏகாகா³ரிகோ வா ஹோதி
ஏகாலோபிகோ, த்³வாகா³ரிகோ வா ஹோதி த்³வாலோபிகோ…பே॰… ஸத்தாகா³ரிகோ வா ஹோதி
ஸத்தாலோபிகோ; ஏகிஸ்ஸாபி த³த்தியா யாபேதி, த்³வீஹிபி த³த்தீஹி யாபேதி…பே॰…
ஸத்தஹிபி த³த்தீஹி யாபேதி; ஏகாஹிகம்பி ஆஹாரங் ஆஹாரேதி, த்³வீஹிகம்பி ஆஹாரங் ஆஹாரேதி…பே॰… ஸத்தாஹிகம்பி ஆஹாரங் ஆஹாரேதி – இதி ஏவரூபங் அட்³ட⁴மாஸிகங் பரியாயப⁴த்தபோ⁴ஜனானுயோக³மனுயுத்தோ விஹரதி. ஸோ
ஸாகப⁴க்கோ² வா ஹோதி, ஸாமாகப⁴க்கோ² வா ஹோதி, நீவாரப⁴க்கோ² வா ஹோதி,
த³த்³து³லப⁴க்கோ² வா ஹோதி, ஹடப⁴க்கோ² வா ஹோதி, கணப⁴க்கோ² வா ஹோதி,
ஆசாமப⁴க்கோ² வா ஹோதி, பிஞ்ஞாகப⁴க்கோ² வா ஹோதி, திணப⁴க்கோ² வா ஹோதி,
கோ³மயப⁴க்கோ² வா ஹோதி; வனமூலப²லாஹாரோ யாபேதி
பவத்தப²லபோ⁴ஜீ. ஸோ ஸாணானிபி தா⁴ரேதி, மஸாணானிபி தா⁴ரேதி, ச²வது³ஸ்ஸானிபி
தா⁴ரேதி, பங்ஸுகூலானிபி தா⁴ரேதி, திரீடானிபி தா⁴ரேதி, அஜினம்பி தா⁴ரேதி,
அஜினக்கி²பம்பி தா⁴ரேதி, குஸசீரம்பி தா⁴ரேதி, வாகசீரம்பி தா⁴ரேதி,
ப²லகசீரம்பி தா⁴ரேதி, கேஸகம்ப³லம்பி தா⁴ரேதி, வாளகம்ப³லம்பி தா⁴ரேதி,
உலூகபக்க²ம்பி தா⁴ரேதி; கேஸமஸ்ஸுலோசகோபி ஹோதி,
கேஸமஸ்ஸுலோசனானுயோக³மனுயுத்தோ, உப்³ப⁴ட்ட²கோபி ஹோதி ஆஸனபடிக்கி²த்தோ,
உக்குடிகோபி ஹோதி உக்குடிகப்பதா⁴னமனுயுத்தோ, கண்டகாபஸ்ஸயிகோபி ஹோதி
கண்டகாபஸ்ஸயே ஸெய்யங் கப்பேதி [பஸ்ஸ ம॰ நி॰ 1.155 மஹாஸீஹனாத³ஸுத்தே]; ஸாயததியகம்பி உத³கோரோஹனானுயோக³மனுயுத்தோ விஹரதி – இதி
ஏவரூபங் அனேகவிஹிதங் காயஸ்ஸ ஆதாபனபரிதாபனானுயோக³மனுயுத்தோ விஹரதி. அயங்
வுச்சதி, பி⁴க்க²வே, புக்³க³லோ அத்தந்தபோ அத்தபரிதாபனானுயோக³மனுயுத்தோ.
8.
‘‘கதமோ ச, பி⁴க்க²வே, புக்³க³லோ பரந்தபோ பரபரிதாபனானுயோக³மனுயுத்தோ? இத⁴,
பி⁴க்க²வே, ஏகச்சோ புக்³க³லோ ஓரப்³பி⁴கோ ஹோதி ஸூகரிகோ ஸாகுணிகோ மாக³விகோ
லுத்³தோ³ மச்ச²கா⁴தகோ சோரோ சோரகா⁴தகோ கோ³கா⁴தகோ ப³ந்த⁴னாகா³ரிகோ யே வா
பனஞ்ஞேபி கேசி குரூரகம்மந்தா. அயங் வுச்சதி, பி⁴க்க²வே, புக்³க³லோ பரந்தபோ
பரபரிதாபனானுயோக³மனுயுத்தோ.
9. ‘‘கதமோ
ச, பி⁴க்க²வே, புக்³க³லோ அத்தந்தபோ ச அத்தபரிதாபனானுயோக³மனுயுத்தோ பரந்தபோ
ச பரபரிதாபனானுயோக³மனுயுத்தோ? இத⁴, பி⁴க்க²வே, ஏகச்சோ புக்³க³லோ ராஜா வா
ஹோதி க²த்தியோ முத்³தா⁴வஸித்தோ ப்³ராஹ்மணோ வா மஹாஸாலோ. ஸோ புரத்தி²மேன
நக³ரஸ்ஸ நவங் ஸந்தா²கா³ரங் [ஸந்தா⁴கா³ரங் (டீகா)]
காராபெத்வா கேஸமஸ்ஸுங் ஓஹாரெத்வா க²ராஜினங் நிவாஸெத்வா ஸப்பிதேலேன காயங்
அப்³ப⁴ஞ்ஜித்வா மக³விஸாணேன பிட்டி²ங் கண்டு³வமானோ நவங் ஸந்தா²கா³ரங் பவிஸதி
ஸத்³தி⁴ங் மஹேஸியா ப்³ராஹ்மணேன ச புரோஹிதேன. ஸோ தத்த² அனந்தரஹிதாய பூ⁴மியா
ஹரிதுபலித்தாய ஸெய்யங் கப்பேதி. ஏகிஸ்ஸாய கா³வியா ஸரூபவச்சா²ய யங்
ஏகஸ்மிங் த²னே கீ²ரங் ஹோதி தேன ராஜா யாபேதி, யங்
து³தியஸ்மிங் த²னே கீ²ரங் ஹோதி தேன மஹேஸீ யாபேதி, யங் ததியஸ்மிங் த²னே
கீ²ரங் ஹோதி தேன ப்³ராஹ்மணோ புரோஹிதோ யாபேதி , யங்
சதுத்த²ஸ்மிங் த²னே கீ²ரங் ஹோதி தேன அக்³கி³ங் ஜுஹதி, அவஸேஸேன வச்ச²கோ
யாபேதி. ஸோ ஏவமாஹ – ‘எத்தகா உஸபா⁴ ஹஞ்ஞந்து யஞ்ஞத்தா²ய, எத்தகா வச்ச²தரா
ஹஞ்ஞந்து யஞ்ஞத்தா²ய, எத்தகா வச்ச²தரியோ ஹஞ்ஞந்து யஞ்ஞத்தா²ய, எத்தகா அஜா
ஹஞ்ஞந்து யஞ்ஞத்தா²ய, எத்தகா உரப்³பா⁴ ஹஞ்ஞந்து யஞ்ஞத்தா²ய, (எத்தகா அஸ்ஸா
ஹஞ்ஞந்து யஞ்ஞத்தா²ய) [( ) நத்தி² ஸீ॰ பீ॰ பொத்த²கேஸு], எத்தகா ருக்கா² சி²ஜ்ஜந்து யூபத்தா²ய, எத்தகா த³ப்³பா⁴ லூயந்து ப³ரிஹிஸத்தா²யா’தி [பரிஹிங் ஸத்தா²ய (க॰)]. யேபிஸ்ஸ தே ஹொந்தி தா³ஸாதி வா பெஸ்ஸாதி வா கம்மகராதி வா தேபி த³ண்ட³தஜ்ஜிதா
ப⁴யதஜ்ஜிதா அஸ்ஸுமுகா² ருத³மானா பரிகம்மானி கரொந்தி. அயங் வுச்சதி,
பி⁴க்க²வே, புக்³க³லோ அத்தந்தபோ ச அத்தபரிதாபனானுயோக³மனுயுத்தோ பரந்தபோ ச
பரபரிதாபனானுயோக³மனுயுத்தோ.
10.
‘‘கதமோ ச, பி⁴க்க²வே, புக்³க³லோ நேவத்தந்தபோ நாத்தபரிதாபனானுயோக³மனுயுத்தோ
ந பரந்தபோ ந பரபரிதாபனானுயோக³மனுயுத்தோ, ஸோ அனத்தந்தபோ அபரந்தபோ தி³ட்டே²வ
த⁴ம்மே நிச்சா²தோ நிப்³பு³தோ ஸீதீபூ⁴தோ
ஸுக²ப்படிஸங்வேதீ³ ப்³ரஹ்மபூ⁴தேன அத்தனா விஹரதி? இத⁴, பி⁴க்க²வே, ததா²க³தோ
லோகே உப்பஜ்ஜதி அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³
அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா. ஸோ
இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங்
ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங் தே³ஸேதி
ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங்,
கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. தங் த⁴ம்மங் ஸுணாதி
க³ஹபதி வா க³ஹபதிபுத்தோ வா அஞ்ஞதரஸ்மிங் வா குலே பச்சாஜாதோ. ஸோ தங் த⁴ம்மங்
ஸுத்வா ததா²க³தே ஸத்³த⁴ங் படிலப⁴தி. ஸோ தேன ஸத்³தா⁴படிலாபே⁴ன ஸமன்னாக³தோ
இதி படிஸஞ்சிக்க²தி – ‘ஸம்பா³தோ⁴ க⁴ராவாஸோ ரஜாபதோ², அப்³போ⁴காஸோ
பப்³ப³ஜ்ஜா. நயித³ங் ஸுகரங் அகா³ரங் அஜ்ஜா²வஸதா ஏகந்தபரிபுண்ணங்
ஏகந்தபரிஸுத்³த⁴ங் ஸங்க²லிகி²தங் ப்³ரஹ்மசரியங் சரிதுங். யங்னூனாஹங்
கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா
அனகா³ரியங் பப்³ப³ஜெய்ய’ந்தி . ஸோ அபரேன ஸமயேன அப்பங் வா போ⁴க³க்க²ந்த⁴ங் பஹாய, மஹந்தங் வா போ⁴க³க்க²ந்த⁴ங் பஹாய, அப்பங் வா ஞாதிபரிவட்டங் பஹாய , மஹந்தங் வா ஞாதிபரிவட்டங் பஹாய, கேஸமஸ்ஸுங் ஓஹாரெத்வா, காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜதி.
11.
‘‘ஸோ ஏவங் பப்³ப³ஜிதோ ஸமானோ பி⁴க்கூ²னங் ஸிக்கா²ஸாஜீவஸமாபன்னோ பாணாதிபாதங்
பஹாய பாணாதிபாதா படிவிரதோ ஹோதி நிஹிதத³ண்டோ³ நிஹிதஸத்தோ², லஜ்ஜீ த³யாபன்னோ
ஸப்³ப³பாணபூ⁴தஹிதானுகம்பீ விஹரதி. அதி³ன்னாதா³னங் பஹாய அதி³ன்னாதா³னா
படிவிரதோ ஹோதி தி³ன்னாதா³யீ தி³ன்னபாடிகங்கீ², அதே²னேன ஸுசிபூ⁴தேன அத்தனா
விஹரதி. அப்³ரஹ்மசரியங் பஹாய ப்³ரஹ்மசாரீ ஹோதி ஆராசாரீ விரதோ மேது²னா
கா³மத⁴ம்மா. முஸாவாத³ங் பஹாய முஸாவாதா³ படிவிரதோ ஹோதி ஸச்சவாதீ³ ஸச்சஸந்தோ⁴
தே²தோ பச்சயிகோ அவிஸங்வாத³கோ லோகஸ்ஸ. பிஸுணங் வாசங் பஹாய பிஸுணாய வாசாய
படிவிரதோ ஹோதி, இதோ ஸுத்வா ந அமுத்ர அக்கா²தா இமேஸங் பே⁴தா³ய, அமுத்ர வா
ஸுத்வா ந இமேஸங் அக்கா²தா அமூஸங் பே⁴தா³ய – இதி பி⁴ன்னானங் வா ஸந்தா⁴தா
ஸஹிதானங் வா அனுப்பதா³தா ஸமக்³கா³ராமோ ஸமக்³க³ரதோ ஸமக்³க³னந்தீ³
ஸமக்³க³கரணிங் வாசங் பா⁴ஸிதா ஹோதி. ப²ருஸங் வாசங் பஹாய ப²ருஸாய வாசாய
படிவிரதோ ஹோதி, யா ஸா வாசா நேலா கண்ணஸுகா² பேமனீயா ஹத³யங்க³மா போரீ
ப³ஹுஜனகந்தா ப³ஹுஜனமனாபா ததா²ரூபிங் வாசங் பா⁴ஸிதா ஹோதி. ஸம்ப²ப்பலாபங்
பஹாய ஸம்ப²ப்பலாபா படிவிரதோ ஹோதி காலவாதீ³ பூ⁴தவாதீ³ அத்த²வாதீ³ த⁴ம்மவாதீ³
வினயவாதீ³, நிதா⁴னவதிங்
வாசங் பா⁴ஸிதா காலேன ஸாபதே³ஸங் பரியந்தவதிங் அத்த²ஸங்ஹிதங். ஸோ
பீ³ஜகா³மபூ⁴தகா³மஸமாரம்பா⁴ படிவிரதோ ஹோதி, ஏகப⁴த்திகோ ஹோதி ரத்தூபரதோ விரதோ
விகாலபோ⁴ஜனா; நச்சகீ³தவாதி³தவிஸூகத³ஸ்ஸனா படிவிரதோ ஹோதி;
மாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னா படிவிரதோ ஹோதி; உச்சாஸயனமஹாஸயனா
படிவிரதோ ஹோதி; ஜாதரூபரஜதபடிக்³க³ஹணா படிவிரதோ ஹோதி; ஆமகத⁴ஞ்ஞபடிக்³க³ஹணா
படிவிரதோ ஹோதி; ஆமகமங்ஸபடிக்³க³ஹணா படிவிரதோ ஹோதி;
இத்தி²குமாரிகபடிக்³க³ஹணா படிவிரதோ ஹோதி; தா³ஸிதா³ஸபடிக்³க³ஹணா படிவிரதோ
ஹோதி; அஜேளகபடிக்³க³ஹணா படிவிரதோ ஹோதி; குக்குடஸூகரபடிக்³க³ஹணா படிவிரதோ
ஹோதி; ஹத்தி²க³வஸ்ஸவளவபடிக்³க³ஹணா படிவிரதோ ஹோதி; கெ²த்தவத்து²படிக்³க³ஹணா
படிவிரதோ ஹோதி; தூ³தெய்யபஹிணக³மனானுயோகா³ படிவிரதோ ஹோதி; கயவிக்கயா
படிவிரதோ ஹோதி; துலாகூடகங்ஸகூடமானகூடா படிவிரதோ ஹோதி; உக்கோடனவஞ்சனநிகதிஸாசியோகா³ [ஸாவியோகா³ (ஸ்யா॰ கங்॰ க॰) ஸாசி குடிலபரியாயோ] படிவிரதோ ஹோதி; சே²த³னவத⁴ப³ந்த⁴னவிபராமோஸஆலோபஸஹஸாகாரா படிவிரதோ ஹோதி [பஸ்ஸ ம॰ நி॰ 1.293 சூளஹத்தி²பதோ³பமே].
‘‘ஸோ ஸந்துட்டோ² ஹோதி காயபரிஹாரிகேன சீவரேன
குச்சி²பரிஹாரிகேன பிண்ட³பாதேன. ஸோ யேன யேனேவ பக்கமதி, ஸமாதா³யேவ பக்கமதி.
ஸெய்யதா²பி நாம பக்கீ² ஸகுணோ யேன யேனேவ டே³தி, ஸபத்தபா⁴ரோவ டே³தி; ஏவமேவ
பி⁴க்கு² ஸந்துட்டோ² ஹோதி காயபரிஹாரிகேன சீவரேன குச்சி²பரிஹாரிகேன
பிண்ட³பாதேன. ஸோ யேன யேனேவ பக்கமதி, ஸமாதா³யேவ பக்கமதி . ஸோ இமினா அரியேன ஸீலக்க²ந்தே⁴ன ஸமன்னாக³தோ அஜ்ஜ²த்தங் அனவஜ்ஜஸுக²ங் படிஸங்வேதே³தி.
12.
‘‘ஸோ சக்கு²னா ரூபங் தி³ஸ்வா ந நிமித்தக்³கா³ஹீ ஹோதி
நானுப்³யஞ்ஜனக்³கா³ஹீ. யத்வாதி⁴கரணமேனங் சக்கு²ந்த்³ரியங் அஸங்வுதங்
விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங் தஸ்ஸ
ஸங்வராய படிபஜ்ஜதி, ரக்க²தி சக்கு²ந்த்³ரியங், சக்கு²ந்த்³ரியே ஸங்வரங்
ஆபஜ்ஜதி. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…பே॰…
ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங் பு²ஸித்வா…பே॰… மனஸா
த⁴ம்மங் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ.
யத்வாதி⁴கரணமேனங் மனிந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா
பாபகா அகுஸலா த⁴ம்மா அன்வாஸ்ஸவெய்யுங் தஸ்ஸ ஸங்வராய படிபஜ்ஜதி, ரக்க²தி
மனிந்த்³ரியங், மனிந்த்³ரியே ஸங்வரங் ஆபஜ்ஜதி. ஸோ இமினா அரியேன இந்த்³ரியஸங்வரேன ஸமன்னாக³தோ அஜ்ஜ²த்தங் அப்³யாஸேகஸுக²ங் படிஸங்வேதே³தி.
‘‘ஸோ அபி⁴க்கந்தே படிக்கந்தே ஸம்பஜானகாரீ ஹோதி,
ஆலோகிதே விலோகிதே ஸம்பஜானகாரீ ஹோதி, ஸமிஞ்ஜிதே பஸாரிதே ஸம்பஜானகாரீ ஹோதி,
ஸங்கா⁴டிபத்தசீவரதா⁴ரணே ஸம்பஜானகாரீ ஹோதி, அஸிதே பீதே கா²யிதே ஸாயிதே
ஸம்பஜானகாரீ ஹோதி, உச்சாரபஸ்ஸாவகம்மே ஸம்பஜானகாரீ ஹோதி, க³தே டி²தே
நிஸின்னே ஸுத்தே ஜாக³ரிதே பா⁴ஸிதே துண்ஹீபா⁴வே ஸம்பஜானகாரீ ஹோதி.
13. ‘‘ஸோ இமினா ச அரியேன ஸீலக்க²ந்தே⁴ன ஸமன்னாக³தோ, (இமாய ச அரியாய ஸந்துட்டி²யா ஸமன்னாக³தோ,) [பஸ்ஸ ம॰ நி॰ 1.296 சூளஹத்தி²பதோ³பமே] இமினா ச அரியேன இந்த்³ரியஸங்வரேன ஸமன்னாக³தோ, இமினா ச அரியேன ஸதிஸம்பஜஞ்ஞேன
ஸமன்னாக³தோ விவித்தங் ஸேனாஸனங் ப⁴ஜதி அரஞ்ஞங் ருக்க²மூலங் பப்³ப³தங்
கந்த³ரங் கி³ரிகு³ஹங் ஸுஸானங் வனபத்த²ங் அப்³போ⁴காஸங் பலாலபுஞ்ஜங். ஸோ
பச்சா²ப⁴த்தங் பிண்ட³பாதபடிக்கந்தோ நிஸீத³தி பல்லங்கங் ஆபு⁴ஜித்வா உஜுங்
காயங் பணிதா⁴ய பரிமுக²ங் ஸதிங் உபட்ட²பெத்வா. ஸோ
அபி⁴ஜ்ஜ²ங் லோகே பஹாய விக³தாபி⁴ஜ்ஜே²ன சேதஸா விஹரதி, அபி⁴ஜ்ஜா²ய சித்தங்
பரிஸோதே⁴தி, ப்³யாபாத³பதோ³ஸங் பஹாய அப்³யாபன்னசித்தோ விஹரதி
ஸப்³ப³பாணபூ⁴தஹிதானுகம்பீ, ப்³யாபாத³பதோ³ஸா சித்தங் பரிஸோதே⁴தி;
தீ²னமித்³த⁴ங் பஹாய விக³ததீ²னமித்³தோ⁴ விஹரதி ஆலோகஸஞ்ஞீ ஸதோ ஸம்பஜானோ,
தீ²னமித்³தா⁴ சித்தங் பரிஸோதே⁴தி; உத்³த⁴ச்சகுக்குச்சங் பஹாய அனுத்³த⁴தோ
விஹரதி அஜ்ஜ²த்தங் வூபஸந்தசித்தோ, உத்³த⁴ச்சகுக்குச்சா சித்தங் பரிஸோதே⁴தி;
விசிகிச்ச²ங் பஹாய திண்ணவிசிகிச்சோ² விஹரதி அகத²ங்கதீ² குஸலேஸு த⁴ம்மேஸு,
விசிகிச்சா²ய சித்தங் பரிஸோதே⁴தி.
‘‘ஸோ இமே பஞ்ச நீவரணே பஹாய சேதஸோ உபக்கிலேஸே பஞ்ஞாய
து³ப்³ப³லீகரணே, விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங்
ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி;
விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங்
அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங் உபஸம்பஜ்ஜ
விஹரதி; பீதியா ச விராகா³ உபெக்க²கோ ச விஹரதி ஸதோ ச ஸம்பஜானோ ஸுக²ஞ்ச காயேன
படிஸங்வேதே³தி, யங் தங் அரியா ஆசிக்க²ந்தி – ‘உபெக்க²கோ ஸதிமா
ஸுக²விஹாரீ’தி ததியங் ஜா²னங் உபஸம்பஜ்ஜ விஹரதி ; ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா அது³க்க²மஸுக²ங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹரதி.
14.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
புப்³பே³னிவாஸானுஸ்ஸதிஞாணாய சித்தங் அபி⁴னின்னாமேதி. ஸோ அனேகவிஹிதங்
புப்³பே³னிவாஸங் அனுஸ்ஸரதி, ஸெய்யதி²த³ங் – ஏகம்பி ஜாதிங் த்³வேபி ஜாதியோ
திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி
ஜாதியோ திங்ஸம்பி ஜாதியோ சத்தாலீஸம்பி ஜாதியோ பஞ்ஞாஸம்பி ஜாதியோ
ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி அனேகேபி ஸங்வட்டகப்பே அனேகேபி
விவட்டகப்பே அனேகேபி ஸங்வட்டவிவட்டகப்பே – ‘அமுத்ராஸிங் ஏவங்னாமோ
ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³
ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ
ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³
ஏவமாயுபரியந்தோ, ஸோ ததோ சுதோ இதூ⁴பபன்னோ’தி. இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி.
15.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஸத்தானங்
சுதூபபாதஞாணாய சித்தங் அபி⁴னின்னாமேதி. ஸோ தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே
ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே
பஜானாதி – ‘இமே வத பொ⁴ந்தோ ஸத்தா காயது³ச்சரிதேன ஸமன்னாக³தா வசீது³ச்சரிதேன
ஸமன்னாக³தா மனோது³ச்சரிதேன ஸமன்னாக³தா அரியானங் உபவாத³கா
மிச்சா²தி³ட்டி²கா மிச்சா²தி³ட்டி²கம்மஸமாதா³னா, தே காயஸ்ஸ பே⁴தா³ பரங்
மரணா அபாயங் து³க்³க³திங் வினிபாதங் நிரயங் உபபன்னா; இமே வா பன பொ⁴ந்தோ
ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன
ஸமன்னாக³தா அரியானங் அனுபவாத³கா ஸம்மாதி³ட்டி²கா
ஸம்மாதி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா ஸுக³திங் ஸக்³க³ங்
லோகங் உபபன்னா’தி. இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன
ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே
து³க்³க³தே யதா²கம்மூபகே³ ஸத்தே பஜானாதி.
16. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே
டி²தே ஆனேஞ்ஜப்பத்தே ஆஸவானங் க²யஞாணாய சித்தங் அபி⁴னின்னாமேதி. ஸோ ‘இத³ங்
து³க்க²’ந்தி யதா²பூ⁴தங் பஜானாதி. ‘அயங் து³க்க²ஸமுத³யோ’தி யதா²பூ⁴தங்
பஜானாதி. ‘அயங் து³க்க²னிரோதோ⁴’தி யதா²பூ⁴தங் பஜானாதி. ‘அயங்
து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி. ‘இமே ஆஸவா’தி
யதா²பூ⁴தங் பஜானாதி. ‘அயங் ஆஸவஸமுத³யோ’தி யதா²பூ⁴தங் பஜானாதி. ‘அயங்
ஆஸவனிரோதோ⁴’தி யதா²பூ⁴தங் பஜானாதி . ‘அயங் ஆஸவனிரோத⁴கா³மினீ படிபதா³’தி யதா²பூ⁴தங் பஜானாதி. தஸ்ஸ
ஏவங் ஜானதோ ஏவங் பஸ்ஸதோ காமாஸவாபி சித்தங் விமுச்சதி, ப⁴வாஸவாபி சித்தங்
விமுச்சதி, அவிஜ்ஜாஸவாபி சித்தங் விமுச்சதி. விமுத்தஸ்மிங் விமுத்தமிதி
ஞாணங் ஹோதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங்
இத்த²த்தாயா’தி பஜானாதி. அயங் வுச்சதி, பி⁴க்க²வே, புக்³க³லோ நேவத்தந்தபோ
நாத்தபரிதாபனானுயோக³மனுயுத்தோ, ந பரந்தபோ ந பரபரிதாபனானுயோக³மனுயுத்தோ . ஸோ அத்தந்தபோ அபரந்தபோ தி³ட்டே²வ த⁴ம்மே நிச்சா²தோ நிப்³பு³தோ ஸீதீபூ⁴தோ ஸுக²ப்படிஸங்வேதீ³ ப்³ரஹ்மபூ⁴தேன அத்தனா விஹரதீ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
கந்த³ரகஸுத்தங் நிட்டி²தங் பட²மங்.
2. அட்ட²கனாக³ரஸுத்தங்
17. ஏவங் மே ஸுதங் – ஏகங் ஸமயங் ஆயஸ்மா ஆனந்தோ³ வேஸாலியங் விஹரதி பே³லுவகா³மகே [வேளுவகா³மகே (ஸ்யா॰ கங்॰ க॰)].
தேன கோ² பன ஸமயேன த³ஸமோ க³ஹபதி அட்ட²கனாக³ரோ பாடலிபுத்தங் அனுப்பத்தோ ஹோதி
கேனசிதே³வ கரணீயேன. அத² கோ² த³ஸமோ க³ஹபதி அட்ட²கனாக³ரோ யேன குக்குடாராமோ
யேன அஞ்ஞதரோ பி⁴க்கு² தேனுபஸங்கமி; உபஸங்கமித்வா தங் பி⁴க்கு²ங்
அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² த³ஸமோ க³ஹபதி
அட்ட²கனாக³ரோ தங் பி⁴க்கு²ங் ஏதத³வோச – ‘‘கஹங் நு கோ², ப⁴ந்தே, ஆயஸ்மா
ஆனந்தோ³ ஏதரஹி விஹரதி? த³ஸ்ஸனகாமா ஹி மயங் தங் ஆயஸ்மந்தங் ஆனந்த³’’ந்தி.
‘‘ஏஸோ, க³ஹபதி, ஆயஸ்மா ஆனந்தோ³ வேஸாலியங் விஹரதி பே³லுவகா³மகே’’தி. அத² கோ²
த³ஸமோ க³ஹபதி அட்ட²கனாக³ரோ பாடலிபுத்தே தங் கரணீயங் தீரெத்வா யேன வேஸாலீ
யேன பே³லுவகா³மகோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தங்
ஆனந்த³ங் அபி⁴வாதெ³த்வா ஏகமந்தங் நிஸீதி³.
18. ஏகமந்தங் நிஸின்னோ கோ² த³ஸமோ க³ஹபதி அட்ட²கனாக³ரோ ஆயஸ்மந்தங் ஆனந்த³ங் ஏதத³வோச – ‘‘அத்தி² நு கோ², ப⁴ந்தே ஆனந்த³, தேன ப⁴க³வதா
ஜானதா பஸ்ஸதா அரஹதா ஸம்மாஸம்பு³த்³தே⁴ன ஏகத⁴ம்மோ அக்கா²தோ யத்த²
பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ அவிமுத்தஞ்சேவ சித்தங்
விமுச்சதி, அபரிக்கீ²ணா ச ஆஸவா பரிக்க²யங் க³ச்ச²ந்தி , அனநுப்பத்தஞ்ச அனுத்தரங் யோக³க்கே²மங் அனுபாபுணாதீ’’தி?
‘‘அத்தி² கோ², க³ஹபதி, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஏகத⁴ம்மோ அக்கா²தோ யத்த²
பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ அவிமுத்தஞ்சேவ சித்தங்
விமுச்சதி, அபரிக்கீ²ணா ச ஆஸவா பரிக்க²யங் க³ச்ச²ந்தி, அனநுப்பத்தஞ்ச
அனுத்தரங் யோக³க்கே²மங் அனுபாபுணாதீ’’தி.
‘‘கதமோ பன, ப⁴ந்தே ஆனந்த³, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஏகத⁴ம்மோ
அக்கா²தோ யத்த² பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ
அவிமுத்தஞ்சேவ சித்தங் விமுச்சதி, அபரிக்கீ²ணா ச ஆஸவா பரிக்க²யங்
க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங் அனுபாபுணாதீ’’தி?
19.
‘‘இத⁴, க³ஹபதி, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி
ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி.
ஸோ இதி படிஸஞ்சிக்க²தி – ‘இத³ம்பி பட²மங் ஜா²னங் அபி⁴ஸங்க²தங்
அபி⁴ஸஞ்சேதயிதங். யங் கோ² பன கிஞ்சி அபி⁴ஸங்க²தங் அபி⁴ஸஞ்சேதயிதங்
தத³னிச்சங் நிரோத⁴த⁴ம்ம’ந்தி பஜானாதி. ஸோ தத்த² டி²தோ ஆஸவானங் க²யங்
பாபுணாதி. நோ சே ஆஸவானங் க²யங் பாபுணாதி, தேனேவ த⁴ம்மராகே³ன தாய
த⁴ம்மனந்தி³யா பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகோ
ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. அயம்பி கோ², க³ஹபதி,
தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஏகத⁴ம்மோ அக்கா²தோ
யத்த² பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ
விஹரதோ அவிமுத்தஞ்சேவ சித்தங் விமுச்சதி, அபரிக்கீ²ணா ச ஆஸவா பரிக்க²யங்
க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங் அனுபாபுணாதி.
20.
‘‘புன சபரங், க³ஹபதி, பி⁴க்கு² விதக்கவிசாரானங் வூபஸமா அஜ்ஜ²த்தங்
ஸம்பஸாத³னங்…பே॰… து³தியங் ஜா²னங் உபஸம்பஜ்ஜ விஹரதி. ஸோ இதி படிஸஞ்சிக்க²தி
– ‘இத³ம்பி கோ² து³தியங் ஜா²னங் அபி⁴ஸங்க²தங் அபி⁴ஸஞ்சேதயிதங்… அனுத்தரங் யோக³க்கே²மங் அனுபாபுணாதி.
‘‘புன சபரங், க³ஹபதி, பி⁴க்கு² பீதியா ச விராகா³…பே॰…
ததியங் ஜா²னங் உபஸம்பஜ்ஜ விஹரதி. ஸோ இதி படிஸஞ்சிக்க²தி – ‘இத³ம்பி கோ²
ததியங் ஜா²னங் அபி⁴ஸங்க²தங் அபி⁴ஸஞ்சேதயிதங்…பே॰… அனுத்தரங் யோக³க்கே²மங்
அனுபாபுணாதி.
‘‘புன சபரங், க³ஹபதி, பி⁴க்கு² ஸுக²ஸ்ஸ ச பஹானா
…பே॰… சதுத்த²ங் ஜா²னங் உபஸம்பஜ்ஜ விஹரதி. ஸோ இதி படிஸஞ்சிக்க²தி –
‘இத³ம்பி கோ² சதுத்த²ங் ஜா²னங் அபி⁴ஸங்க²தங் அபி⁴ஸஞ்சேதயிதங்… அனுத்தரங்
யோக³க்கே²மங் அனுபாபுணாதி.
‘‘புன சபரங், க³ஹபதி, பி⁴க்கு² மெத்தாஸஹக³தேன சேதஸா ஏகங் தி³ஸங் ப²ரித்வா விஹரதி, ததா² து³தியங், ததா² ததியங், ததா² சதுத்த²ங் [சதுத்தி²ங் (ஸீ॰ பீ॰)].
இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங்
மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாப³ஜ்ஜே²ன [அப்³யாபஜ்ஜே²ன (ஸீ॰ ஸ்யா॰ பீ॰), அப்³யாபஜ்ஜேன (க॰) அங்கு³த்தரதிகனிபாதடீகா ஓலோகேதப்³பா³]
ப²ரித்வா விஹரதி. ஸோ இதி படிஸஞ்சிக்க²தி – ‘அயம்பி கோ² மெத்தாசேதோவிமுத்தி
அபி⁴ஸங்க²தா அபி⁴ஸஞ்சேதயிதா. யங் கோ² பன கிஞ்சி அபி⁴ஸங்க²தங்
அபி⁴ஸஞ்சேதயிதங் தத³னிச்சங் நிரோத⁴த⁴ம்ம’ந்தி பஜானாதி. ஸோ தத்த² டி²தோ…பே॰…
அனுத்தரங் யோக³க்கே²மங் அனுபாபுணாதி.
‘‘புன சபரங், க³ஹபதி, பி⁴க்கு² கருணாஸஹக³தேன
சேதஸா…பே॰… முதி³தாஸஹக³தேன சேதஸா…பே॰… உபெக்கா²ஸஹக³தேன சேதஸா ஏகங் தி³ஸங்
ப²ரித்வா விஹரதி, ததா² து³தியங், ததா² ததியங், ததா² சதுத்த²ங். இதி
உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங்
உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாப³ஜ்ஜே²ன
ப²ரித்வா விஹரதி. ஸோ இதி படிஸஞ்சிக்க²தி – ‘அயம்பி கோ²
உபெக்கா²சேதோவிமுத்தி அபி⁴ஸங்க²தா அபி⁴ஸஞ்சேதயிதா. யங் கோ² பன கிஞ்சி
அபி⁴ஸங்க²தங் அபி⁴ஸஞ்சேதயிதங் தத³னிச்சங் நிரோத⁴த⁴ம்ம’ந்த்ந்த்தி பஜானாதி. ஸோ தத்த² டி²தோ… அனுத்தரங் யோக³க்கே²மங் அனுபாபுணாதி.
‘‘புன சபரங், க³ஹபதி, பி⁴க்கு² ஸப்³ப³ஸோ ரூபஸஞ்ஞானங்
ஸமதிக்கமா படிக⁴ஸஞ்ஞானங் அத்த²ங்க³மா நானத்தஸஞ்ஞானங் அமனஸிகாரா ‘அனந்தோ
ஆகாஸோ’தி ஆகாஸானஞ்சாயதனங் உபஸம்பஜ்ஜ விஹரதி. ஸோ இதி படிஸஞ்சிக்க²தி –
‘அயம்பி கோ² ஆகாஸானஞ்சாயதனஸமாபத்தி அபி⁴ஸங்க²தா அபி⁴ஸஞ்சேதயிதா. யங் கோ² பன
கிஞ்சி அபி⁴ஸங்க²தங் அபி⁴ஸஞ்சேதயிதங் தத³னிச்சங் நிரோத⁴த⁴ம்ம’ந்தி பஜானாதி. ஸோ தத்த² டி²தோ…பே॰… அனுத்தரங் யோக³க்கே²மங் அனுபாபுணாதி.
‘‘புன சபரங், க³ஹபதி, பி⁴க்கு² ஸப்³ப³ஸோ
ஆகாஸானஞ்சாயதனங் ஸமதிக்கம்ம ‘அனந்தங் விஞ்ஞாண’ந்தி விஞ்ஞாணஞ்சாயதனங்
உபஸம்பஜ்ஜ விஹரதி. ஸோ இதி படிஸஞ்சிக்க²தி – ‘அயம்பி கோ²
விஞ்ஞாணஞ்சாயதனஸமாபத்தி அபி⁴ஸங்க²தா அபி⁴ஸஞ்சேதயிதா. யங் கோ² பன கிஞ்சி
அபி⁴ஸங்க²தங் அபி⁴ஸஞ்சேதயிதங் தத³னிச்சங் நிரோத⁴த⁴ம்ம’ந்தி பஜானாதி. ஸோ
தத்த² டி²தோ…பே॰… அனுத்தரங் யோக³க்கே²மங் அனுபாபுணாதி.
‘‘புன சபரங், க³ஹபதி, பி⁴க்கு² ஸப்³ப³ஸோ
விஞ்ஞாணஞ்சாயதனங் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனங் உபஸம்பஜ்ஜ
விஹரதி. ஸோ இதி படிஸஞ்சிக்க²தி – ‘அயம்பி கோ² ஆகிஞ்சஞ்ஞாயதனஸமாபத்தி
அபி⁴ஸங்க²தா அபி⁴ஸஞ்சேதயிதா. யங் கோ² பன கிஞ்சி அபி⁴ஸங்க²தங்
அபி⁴ஸஞ்சேதயிதங் தத³னிச்சங் நிரோத⁴த⁴ம்ம’ந்தி பஜானாதி. ஸோ தத்த² டி²தோ
ஆஸவானங் க²யங் பாபுணாதி. நோ சே ஆஸவானங் க²யங் பாபுணாதி, தேனேவ த⁴ம்மராகே³ன
தாய த⁴ம்மனந்தி³யா பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா
ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. அயம்பி கோ²,
க³ஹபதி, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஏகத⁴ம்மோ
அக்கா²தோ யத்த² பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ
அவிமுத்தஞ்சேவ சித்தங் விமுச்சதி, அபரிக்கீ²ணா ச ஆஸவா பரிக்க²யங் க³ச்ச²ந்தி, அனநுப்பத்தஞ்ச அனுத்தரங் யோக³க்கே²மங் அனுபாபுணாதீ’’தி.
21.
ஏவங் வுத்தே, த³ஸமோ க³ஹபதி அட்ட²கனாக³ரோ ஆயஸ்மந்தங் ஆனந்த³ங் ஏதத³வோச –
‘‘ஸெய்யதா²பி, ப⁴ந்தே ஆனந்த³, புரிஸோ ஏகங்வ நிதி⁴முக²ங் க³வேஸந்தோ ஸகிதே³வ
ஏகாத³ஸ நிதி⁴முகா²னி அதி⁴க³ச்செ²ய்ய; ஏவமேவ கோ² அஹங், ப⁴ந்தே, ஏகங் அமதத்³வாரங் க³வேஸந்தோ ஸகிதே³வ [ஸகிங் தே³வ (க॰)]
ஏகாத³ஸ அமதத்³வாரானி அலத்த²ங் பா⁴வனாய. ஸெய்யதா²பி, ப⁴ந்தே, புரிஸஸ்ஸ
அகா³ரங் ஏகாத³ஸத்³வாரங், ஸோ தஸ்மிங் அகா³ரே ஆதி³த்தே ஏகமேகேனபி த்³வாரேன
ஸக்குணெய்ய அத்தானங் ஸொத்தி²ங் காதுங்; ஏவமேவ கோ²
அஹங், ப⁴ந்தே, இமேஸங் ஏகாத³ஸன்னங் அமதத்³வாரானங் ஏகமேகேனபி அமதத்³வாரேன
ஸக்குணிஸ்ஸாமி அத்தானங் ஸொத்தி²ங் காதுங். இமேஹி நாம, ப⁴ந்தே,
அஞ்ஞதித்தி²யா ஆசரியஸ்ஸ ஆசரியத⁴னங் பரியேஸிஸ்ஸந்தி, கிமங்க³ங் [கிங் (ஸீ॰ பீ॰)] பனாஹங் ஆயஸ்மதோ ஆனந்த³ஸ்ஸ பூஜங் ந கரிஸ்ஸாமீ’’தி !
அத² கோ² த³ஸமோ க³ஹபதி அட்ட²கனாக³ரோ பாடலிபுத்தகஞ்ச வேஸாலிகஞ்ச
பி⁴க்கு²ஸங்க⁴ங் ஸன்னிபாதெத்வா பணீதேன கா²த³னீயேன போ⁴ஜனீயேன ஸஹத்தா²
ஸந்தப்பேஸி ஸம்பவாரேஸி, ஏகமேகஞ்ச பி⁴க்கு²ங் பச்சேகங் து³ஸ்ஸயுகே³ன
அச்சா²தே³ஸி, ஆயஸ்மந்தஞ்ச ஆனந்த³ங் திசீவரேன அச்சா²தே³ஸி, ஆயஸ்மதோ ச
ஆனந்த³ஸ்ஸ பஞ்சஸதவிஹாரங் காராபேஸீதி.
அட்ட²கனாக³ரஸுத்தங் நிட்டி²தங் து³தியங்.
3. ஸேக²ஸுத்தங்
22. ஏவங் மே ஸுதங் – ஏகங் ஸமயங் ப⁴க³வா ஸக்கேஸு விஹரதி கபிலவத்து²ஸ்மிங் நிக்³ரோதா⁴ராமே. தேன கோ² பன ஸமயேன காபிலவத்த²வானங் [கபிலவத்து²வாஸீனங் (க॰)] ஸக்யானங் நவங் ஸந்தா²கா³ரங் அசிரகாரிதங் ஹோதி அனஜ்ஜா²வுட்ட²ங் [அனஜ்ஜா²வுத்த²ங் (ஸீ॰ ஸ்யா॰ கங்॰ பீ॰)]
ஸமணேன வா ப்³ராஹ்மணேன வா கேனசி வா மனுஸ்ஸபூ⁴தேன. அத² கோ² காபிலவத்த²வா
ஸக்யா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா
ஏகமந்தங் நிஸீதி³ங்ஸு. ஏகமந்தங் நிஸின்னா கோ² காபிலவத்த²வா ஸக்யா
ப⁴க³வந்தங் ஏதத³வோசுங் – ‘‘இத⁴, ப⁴ந்தே, காபிலவத்த²வானங் ஸக்யானங் நவங்
ஸந்தா²கா³ரங் அசிரகாரிதங் [அசிரகாரிதங் ஹோதி (ஸ்யா॰ கங்॰ க॰)]
அனஜ்ஜா²வுட்ட²ங் ஸமணேன வா ப்³ராஹ்மணேன வா கேனசி வா மனுஸ்ஸபூ⁴தேன. தங்,
ப⁴ந்தே, ப⁴க³வா பட²மங் பரிபு⁴ஞ்ஜது. ப⁴க³வதா பட²மங் பரிபு⁴த்தங் பச்சா²
காபிலவத்த²வா ஸக்யா பரிபு⁴ஞ்ஜிஸ்ஸந்தி. தத³ஸ்ஸ காபிலவத்த²வானங் ஸக்யானங்
தீ³க⁴ரத்தங் ஹிதாய ஸுகா²யா’’தி . அதி⁴வாஸேஸி ப⁴க³வா
துண்ஹீபா⁴வேன. அத² கோ² காபிலவத்த²வா ஸக்யா ப⁴க³வதோ அதி⁴வாஸனங் விதி³த்வா
உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா யேன நவங்
ஸந்தா²கா³ரங் தேனுபஸங்கமிங்ஸு; உபஸங்கமித்வா ஸப்³ப³ஸந்த²ரிங் ஸந்தா²கா³ரங் [ஸப்³ப³ஸந்த²ரிங் ஸந்த²தங் (க॰)]
ஸந்த²ரித்வா ஆஸனானி பஞ்ஞபெத்வா உத³கமணிகங் உபட்ட²பெத்வா தேலப்பதீ³பங்
ஆரோபெத்வா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் அட்ட²ங்ஸு. ஏகமந்தங் டி²தா கோ² காபிலவத்த²வா ஸக்யா
ப⁴க³வந்தங் ஏதத³வோசுங் – ‘‘ஸப்³ப³ஸந்த²ரிங் ஸந்த²தங், ப⁴ந்தே,
ஸந்தா²கா³ரங், ஆஸனானி பஞ்ஞத்தானி, உத³கமணிகோ உபட்டா²பிதோ, தேலப்பதீ³போ
ஆரோபிதோ. யஸ்ஸதா³னி, ப⁴ந்தே , ப⁴க³வா காலங்
மஞ்ஞதீ’’தி. அத² கோ² ப⁴க³வா நிவாஸெத்வா பத்தசீவரமாதா³ய ஸத்³தி⁴ங்
பி⁴க்கு²ஸங்கே⁴ன யேன ஸந்தா²கா³ரங் தேனுபஸங்கமி; உபஸங்கமித்வா பாதே³
பக்கா²லெத்வா ஸந்தா²கா³ரங் பவிஸித்வா மஜ்ஜி²மங் த²ம்ப⁴ங் நிஸ்ஸாய
புரத்தா²பி⁴முகோ² நிஸீதி³. பி⁴க்கு²ஸங்கோ⁴பி கோ² பாதே³ பக்கா²லெத்வா
ஸந்தா²கா³ரங் பவிஸித்வா பச்சி²மங் பி⁴த்திங் நிஸ்ஸாய புரத்தா²பி⁴முகோ²
நிஸீதி³, ப⁴க³வந்தங்யேவ புரக்க²த்வா. காபிலவத்த²வாபி கோ² ஸக்யா பாதே³
பக்கா²லெத்வா ஸந்தா²கா³ரங் பவிஸித்வா புரத்தி²மங் பி⁴த்திங் நிஸ்ஸாய
பச்சி²மாபி⁴முகா² நிஸீதி³ங்ஸு, ப⁴க³வந்தங்யேவ புரக்க²த்வா. அத² கோ² ப⁴க³வா
காபிலவத்த²வே ஸக்யே ப³ஹுதே³வ ரத்திங் த⁴ம்மியா கதா²ய ஸந்த³ஸ்ஸெத்வா
ஸமாத³பெத்வா ஸமுத்தேஜெத்வா ஸம்பஹங்ஸெத்வா ஆயஸ்மந்தங் ஆனந்த³ங் ஆமந்தேஸி –
‘‘படிபா⁴து தங், ஆனந்த³, காபிலவத்த²வானங் ஸக்யானங் ஸேகோ² பாடிபதோ³ [படிபதோ³ (ஸ்யா॰ கங்॰ க॰)]. பிட்டி²
மே ஆகி³லாயதி; தமஹங் ஆயமிஸ்ஸாமீ’’தி. ‘‘ஏவங், ப⁴ந்தே’’தி கோ² ஆயஸ்மா
ஆனந்தோ³ ப⁴க³வதோ பச்சஸ்ஸோஸி. அத² கோ² ப⁴க³வா சதுக்³கு³ணங் ஸங்கா⁴டிங்
பஞ்ஞாபெத்வா த³க்கி²ணேன பஸ்ஸேன ஸீஹஸெய்யங் கப்பேஸி, பாதே³ பாத³ங்
அச்சாதா⁴ய, ஸதோ ஸம்பஜானோ, உட்டா²னஸஞ்ஞங் மனஸி கரித்வா.
23. அத² கோ² ஆயஸ்மா ஆனந்தோ³ மஹானாமங் ஸக்கங் ஆமந்தேஸி – ‘‘இத⁴ ,
மஹானாம, அரியஸாவகோ ஸீலஸம்பன்னோ ஹோதி, இந்த்³ரியேஸு கு³த்தத்³வாரோ ஹோதி,
போ⁴ஜனே மத்தஞ்ஞூ ஹோதி, ஜாக³ரியங் அனுயுத்தோ ஹோதி, ஸத்தஹி ஸத்³த⁴ம்மேஹி
ஸமன்னாக³தோ ஹோதி, சதுன்னங் ஜா²னானங் ஆபி⁴சேதஸிகானங்
தி³ட்ட²த⁴ம்மஸுக²விஹாரானங் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴.
24. ‘‘கத²ஞ்ச, மஹானாம ,
அரியஸாவகோ ஸீலஸம்பன்னோ ஹோதி? இத⁴, மஹானாம, அரியஸாவகோ ஸீலவா ஹோதி,
பாதிமொக்க²ஸங்வரஸங்வுதோ விஹரதி ஆசாரகோ³சரஸம்பன்னோ அணுமத்தேஸு வஜ்ஜேஸு
ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு. ஏவங் கோ², மஹானாம, அரியஸாவகோ
ஸீலஸம்பன்னோ ஹோதி.
‘‘கத²ஞ்ச, மஹானாம, அரியஸாவகோ இந்த்³ரியேஸு
கு³த்தத்³வாரோ ஹோதி? இத⁴, மஹானாம, அரியஸாவகோ சக்கு²னா ரூபங் தி³ஸ்வா ந
நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனங்
சக்கு²ந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா
பாபகா அகுஸலா த⁴ம்மா அன்வாஸ்ஸவெய்யுங் தஸ்ஸ ஸங்வராய படிபஜ்ஜதி, ரக்க²தி
சக்கு²ந்த்³ரியங், சக்கு²ந்த்³ரியே ஸங்வரங் ஆபஜ்ஜதி. ஸோதேன ஸத்³த³ங்
ஸுத்வா…பே॰… கா⁴னேன க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰…
காயேன பொ²ட்ட²ப்³ப³ங் பு²ஸித்வா…பே॰… மனஸா த⁴ம்மங் விஞ்ஞாய ந
நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனங்
மனிந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா
அன்வாஸ்ஸவெய்யுங் தஸ்ஸ ஸங்வராய படிபஜ்ஜதி, ரக்க²தி மனிந்த்³ரியங்,
மனிந்த்³ரியே ஸங்வரங் ஆபஜ்ஜதி . ஏவங் கோ², மஹானாம, அரியஸாவகோ இந்த்³ரியேஸு கு³த்தத்³வாரோ ஹோதி.
‘‘கத²ஞ்ச, மஹானாம, அரியஸாவகோ போ⁴ஜனே மத்தஞ்ஞூ ஹோதி?
இத⁴, மஹானாம, அரியஸாவகோ படிஸங்கா² யோனிஸோ ஆஹாரங் ஆஹாரேதி – ‘நேவ த³வாய ந
மதா³ய ந மண்ட³னாய ந விபூ⁴ஸனாய; யாவதே³வ இமஸ்ஸ காயஸ்ஸ டி²தியா யாபனாய
விஹிங்ஸூபரதியா ப்³ரஹ்மசரியானுக்³க³ஹாய . இதி
புராணஞ்ச வேத³னங் படிஹங்கா²மி, நவஞ்ச வேத³னங் ந உப்பாதெ³ஸ்ஸாமி, யாத்ரா ச
மே ப⁴விஸ்ஸதி அனவஜ்ஜதா ச பா²ஸுவிஹாரோ சா’தி. ஏவங் கோ², மஹானாம, அரியஸாவகோ
போ⁴ஜனே மத்தஞ்ஞூ ஹோதி.
‘‘கத²ஞ்ச, மஹானாம, அரியஸாவகோ ஜாக³ரியங் அனுயுத்தோ
ஹோதி? இத⁴, மஹானாம, அரியஸாவகோ தி³வஸங் சங்கமேன நிஸஜ்ஜாய ஆவரணீயேஹி த⁴ம்மேஹி
சித்தங் பரிஸோதே⁴தி, ரத்தியா பட²மங் யாமங் சங்கமேன நிஸஜ்ஜாய ஆவரணீயேஹி
த⁴ம்மேஹி சித்தங் பரிஸோதே⁴தி, ரத்தியா மஜ்ஜி²மங் யாமங் த³க்கி²ணேன பஸ்ஸேன
ஸீஹஸெய்யங் கப்பேதி, பாதே³ பாத³ங் அச்சாதா⁴ய, ஸதோ ஸம்பஜானோ, உட்டா²னஸஞ்ஞங்
மனஸி கரித்வா, ரத்தியா பச்சி²மங் யாமங் பச்சுட்டா²ய சங்கமேன நிஸஜ்ஜாய
ஆவரணீயேஹி த⁴ம்மேஹி சித்தங் பரிஸோதே⁴தி. ஏவங் கோ², மஹானாம, அரியஸாவகோ
ஜாக³ரியங் அனுயுத்தோ ஹோதி.
25. ‘‘கத²ஞ்ச, மஹானாம, அரியஸாவகோ
ஸத்தஹி ஸத்³த⁴ம்மேஹி ஸமன்னாக³தோ ஹோதி? இத⁴, மஹானாம, அரியஸாவகோ ஸத்³தோ⁴
ஹோதி, ஸத்³த³ஹதி ததா²க³தஸ்ஸ போ³தி⁴ங் – ‘இதிபி ஸோ ப⁴க³வா அரஹங்
ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ
லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴
ப⁴க³வா’தி. ஹிரிமா ஹோதி, ஹிரீயதி காயது³ச்சரிதேன வசீது³ச்சரிதேன
மனோது³ச்சரிதேன, ஹிரீயதி பாபகானங் அகுஸலானங் த⁴ம்மானங் ஸமாபத்தியா.
ஒத்தப்பீ ஹோதி, ஒத்தப்பதி காயது³ச்சரிதேன
வசீது³ச்சரிதேன மனோது³ச்சரிதேன, ஒத்தப்பதி பாபகானங் அகுஸலானங் த⁴ம்மானங்
ஸமாபத்தியா. ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ. யே தே த⁴ம்மா
ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்தா² ஸப்³யஞ்ஜனா
கேவலபரிபுண்ணங் பரிஸுத்³த⁴ங் ப்³ரஹ்மசரியங் அபி⁴வத³ந்தி ததா²ரூபாஸ்ஸ த⁴ம்மா
ப³ஹுஸ்ஸுதா [ப³ஹூ ஸுதா (?)] ஹொந்தி தா⁴தா [த⁴தா (ஸீ॰ ஸ்யா॰ கங்॰ பீ॰)]
வசஸா பரிசிதா மனஸானுபெக்கி²தா தி³ட்டி²யா ஸுப்படிவித்³தா⁴. ஆரத்³த⁴வீரியோ
விஹரதி அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய, தா²மவா
த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. ஸதிமா ஹோதி, பரமேன
ஸதினேபக்கேன ஸமன்னாக³தோ, சிரகதம்பி சிரபா⁴ஸிதம்பி ஸரிதா அனுஸ்ஸரிதா. பஞ்ஞவா
ஹோதி, உத³யத்த²கா³மினியா பஞ்ஞாய ஸமன்னாக³தோ, அரியாய நிப்³பே³தி⁴காய ஸம்மா
து³க்க²க்க²யகா³மினியா. ஏவங் கோ², மஹானாம, அரியஸாவகோ ஸத்தஹி ஸத்³த⁴ம்மேஹி
ஸமன்னாக³தோ ஹோதி.
26. ‘‘கத²ஞ்ச ,
மஹானாம, அரியஸாவகோ சதுன்னங் ஜா²னானங் ஆபி⁴சேதஸிகானங்
தி³ட்ட²த⁴ம்மஸுக²விஹாரானங் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴? இத⁴,
மஹானாம, அரியஸாவகோ விவிச்சேவ காமேஹி விவிச்ச அகுஸலேஹி த⁴ம்மேஹி, ஸவிதக்கங்
ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ
விஹரதி; விதக்கவிசாரானங் வூபஸமா அஜ்ஜ²த்தங் ஸம்பஸாத³னங்…பே॰… து³தியங்
ஜா²னங் உபஸம்பஜ்ஜ விஹரதி; பீதியா ச விராகா³…பே॰… ததியங் ஜா²னங் உபஸம்பஜ்ஜ
விஹரதி; ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானங்
அத்த²ங்க³மா…பே॰… சதுத்த²ங் ஜா²னங் உபஸம்பஜ்ஜ விஹரதி. ஏவங் கோ², மஹானாம,
அரியஸாவகோ சதுன்னங் ஜா²னானங் ஆபி⁴சேதஸிகானங் தி³ட்ட²த⁴ம்மஸுக²விஹாரானங்
நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴.
27.
‘‘யதோ கோ², மஹானாம, அரியஸாவகோ ஏவங் ஸீலஸம்பன்னோ ஹோதி, ஏவங் இந்த்³ரியேஸு
கு³த்தத்³வாரோ ஹோதி, ஏவங் போ⁴ஜனே மத்தஞ்ஞூ ஹோதி, ஏவங் ஜாக³ரியங் அனுயுத்தோ
ஹோதி, ஏவங் ஸத்தஹி ஸத்³த⁴ம்மேஹி ஸமன்னாக³தோ ஹோதி,
ஏவங் சதுன்னங் ஜா²னானங் ஆபி⁴சேதஸிகானங் தி³ட்ட²த⁴ம்மஸுக²விஹாரானங்
நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴, அயங் வுச்சதி, மஹானாம, அரியஸாவகோ
ஸேகோ² பாடிபதோ³ அபுச்சண்ட³தாய ஸமாபன்னோ, ப⁴ப்³போ³
அபி⁴னிப்³பி⁴தா³ய, ப⁴ப்³போ³ ஸம்போ³தா⁴ய, ப⁴ப்³போ³ அனுத்தரஸ்ஸ யோக³க்கே²மஸ்ஸ
அதி⁴க³மாய. ஸெய்யதா²பி, மஹானாம, குக்குடியா அண்டா³னி அட்ட² வா த³ஸ வா
த்³வாத³ஸ வா தானாஸ்ஸு குக்குடியா ஸம்மா அதி⁴ஸயிதானி ஸம்மா பரிஸேதி³தானி
ஸம்மா பரிபா⁴விதானி, கிஞ்சாபி தஸ்ஸா குக்குடியா ந
ஏவங் இச்சா² உப்பஜ்ஜெய்ய – ‘அஹோ வதிமே குக்குடபோதகா பாத³னக²ஸிகா²ய வா
முக²துண்ட³கேன வா அண்ட³கோஸங் பதா³லெத்வா ஸொத்தி²னா
அபி⁴னிப்³பி⁴ஜ்ஜெய்யு’ந்தி, அத² கோ² ப⁴ப்³பா³வ தே குக்குடபோதகா
பாத³னக²ஸிகா²ய வா முக²துண்ட³கேன வா அண்ட³கோஸங் பதா³லெத்வா ஸொத்தி²னா
அபி⁴னிப்³பி⁴ஜ்ஜிதுங். ஏவமேவ கோ², மஹானாம, யதோ அரியஸாவகோ ஏவங் ஸீலஸம்பன்னோ
ஹோதி, ஏவங் இந்த்³ரியேஸு கு³த்தத்³வாரோ ஹோதி, ஏவங் போ⁴ஜனே மத்தஞ்ஞூ ஹோதி,
ஏவங் ஜாக³ரியங் அனுயுத்தோ ஹோதி, ஏவங் ஸத்தஹி ஸத்³த⁴ம்மேஹி ஸமன்னாக³தோ ஹோதி,
ஏவங் சதுன்னங் ஜா²னானங் ஆபி⁴சேதஸிகானங் தி³ட்ட²த⁴ம்மஸுக²விஹாரானங்
நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴, அயங் வுச்சதி, மஹானாம, அரியஸாவகோ
ஸேகோ² பாடிபதோ³ அபுச்சண்ட³தாய ஸமாபன்னோ , ப⁴ப்³போ³ அபி⁴னிப்³பி⁴தா³ய, ப⁴ப்³போ³ ஸம்போ³தா⁴ய, ப⁴ப்³போ³ அனுத்தரஸ்ஸ யோக³க்கே²மஸ்ஸ அதி⁴க³மாய.
28.
‘‘ஸ கோ² ஸோ, மஹானாம, அரியஸாவகோ இமங்யேவ அனுத்தரங்
உபெக்கா²ஸதிபாரிஸுத்³தி⁴ங் ஆக³ம்ம அனேகவிஹிதங் புப்³பே³னிவாஸங் அனுஸ்ஸரதி,
ஸெய்யதி²த³ங் – ஏகம்பி ஜாதிங் த்³வேபி ஜாதியோ…பே॰… இதி ஸாகாரங் ஸஉத்³தே³ஸங்
அனேகவிஹிதங் புப்³பே³னிவாஸங் அனுஸ்ஸரதி, அயமஸ்ஸ பட²மாபி⁴னிப்³பி⁴தா³ ஹோதி
குக்குடச்சா²பகஸ்ஸேவ அண்ட³கோஸம்ஹா.
‘‘ஸ கோ² ஸோ, மஹானாம, அரியஸாவகோ இமங்யே அனுத்தரங்
உபெக்கா²ஸதிபாரிஸுத்³தி⁴ங் ஆக³ம்ம தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே
து³ப்³ப³ண்ணே ஸுக³தே து³க்³க³தே…பே॰… யதா²கம்மூபகே³ ஸத்தே பஜானாதி, அயமஸ்ஸ
து³தியாபி⁴னிப்³பி⁴தா³ ஹோதி குக்குடச்சா²பகஸ்ஸேவ அண்ட³கோஸம்ஹா.
‘‘ஸ கோ² ஸோ, மஹானாம, அரியஸாவகோ இமங்யேவ அனுத்தரங்
உபெக்கா²ஸதிபாரிஸுத்³தி⁴ங் ஆக³ம்ம ஆஸவானங் க²யா அனாஸவங் சேதோவிமுத்திங்
பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி, அயமஸ்ஸ ததியாபி⁴னிப்³பி⁴தா³ ஹோதி குக்குடச்சா²பகஸ்ஸேவ அண்ட³கோஸம்ஹா.
29. ‘‘யம்பி [யம்பி கோ² (க॰)],
மஹானாம, அரியஸாவகோ ஸீலஸம்பன்னோ ஹோதி, இத³ம்பிஸ்ஸ ஹோதி சரணஸ்மிங்; யம்பி,
மஹானாம, அரியஸாவகோ இந்த்³ரியேஸு கு³த்தத்³வாரோ ஹோதி, இத³ம்பிஸ்ஸ ஹோதி
சரணஸ்மிங்; யம்பி, மஹானாம, அரியஸாவகோ போ⁴ஜனே மத்தஞ்ஞூ ஹோதி, இத³ம்பிஸ்ஸ
ஹோதி சரணஸ்மிங்; யம்பி, மஹானாம, அரியஸாவகோ ஜாக³ரியங் அனுயுத்தோ ஹோதி,
இத³ம்பிஸ்ஸ ஹோதி சரணஸ்மிங்; யம்பி, மஹானாம, அரியஸாவகோ ஸத்தஹி ஸத்³த⁴ம்மேஹி
ஸமன்னாக³தோ ஹோதி, இத³ம்பிஸ்ஸ ஹோதி சரணஸ்மிங்; யம்பி, மஹானாம, அரியஸாவகோ
சதுன்னங் ஜா²னானங் ஆபி⁴சேதஸிகானங் தி³ட்ட²த⁴ம்மஸுக²விஹாரானங் நிகாமலாபீ⁴
ஹோதி அகிச்ச²லாபீ⁴ அகஸிரலாபீ⁴, இத³ம்பிஸ்ஸ ஹோதி சரணஸ்மிங்.
‘‘யஞ்ச கோ², மஹானாம, அரியஸாவகோ அனேகவிஹிதங் புப்³பே³னிவாஸங் அனுஸ்ஸரதி, ஸெய்யதி²த³ங்
– ஏகம்பி ஜாதிங் த்³வேபி ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங்
புப்³பே³னிவாஸங் அனுஸ்ஸரதி, இத³ம்பிஸ்ஸ ஹோதி விஜ்ஜாய; யம்பி, மஹானாம,
அரியஸாவகோ தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி
சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே
து³க்³க³தே…பே॰… யதா²கம்மூபகே³ ஸத்தே பஜானாதி, இத³ம்பிஸ்ஸ ஹோதி விஜ்ஜாய.
யம்பி, மஹானாம, அரியஸாவகோ ஆஸவானங் க²யா அனாஸவங் சேதோவிமுத்திங்
பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹரதி, இத³ம்பிஸ்ஸ ஹோதி விஜ்ஜாய.
‘‘அயங் வுச்சதி, மஹானாம, அரியஸாவகோ விஜ்ஜாஸம்பன்னோ இதிபி சரணஸம்பன்னோ இதிபி விஜ்ஜாசரணஸம்பன்னோ இதிபி.
30. ‘‘ப்³ரஹ்முனாபேஸா, மஹானாம, ஸனங்குமாரேன கா³தா² பா⁴ஸிதா –
‘க²த்தியோ ஸெட்டோ² ஜனேதஸ்மிங், யே கொ³த்தபடிஸாரினோ;
விஜ்ஜாசரணஸம்பன்னோ, ஸோ ஸெட்டோ² தே³வமானுஸே’தி.
‘‘ஸா கோ² பனேஸா, மஹானாம, ப்³ரஹ்முனா ஸனங்குமாரேன
கா³தா² ஸுகீ³தா நோ து³க்³கீ³தா, ஸுபா⁴ஸிதா நோ து³ப்³பா⁴ஸிதா, அத்த²ஸங்ஹிதா
நோ அனத்த²ஸங்ஹிதா, அனுமதா ப⁴க³வதா’’தி.
அத² கோ² ப⁴க³வா உட்ட²ஹித்வா
ஆயஸ்மந்தங் ஆனந்த³ங் ஆமந்தேஸி – ‘‘ஸாது⁴ ஸாது⁴, ஆனந்த³, ஸாது⁴ கோ² த்வங்,
ஆனந்த³, காபிலவத்த²வானங் ஸக்யானங் ஸேக²ங் பாடிபத³ங் அபா⁴ஸீ’’தி.
இத³மவோசாயஸ்மா ஆனந்தோ³. ஸமனுஞ்ஞோ ஸத்தா² அஹோஸி. அத்தமனா காபிலவத்த²வா ஸக்யா ஆயஸ்மதோ ஆனந்த³ஸ்ஸ பா⁴ஸிதங் அபி⁴னந்து³ந்தி.
ஸேக²ஸுத்தங் நிட்டி²தங் ததியங்.
4. போதலியஸுத்தங்
31. ஏவங்
மே ஸுதங் – ஏகங் ஸமயங் ப⁴க³வா அங்கு³த்தராபேஸு விஹரதி ஆபணங் நாம
அங்கு³த்தராபானங் நிக³மோ. அத² கோ² ப⁴க³வா புப்³ப³ண்ஹஸமயங் நிவாஸெத்வா
பத்தசீவரமாதா³ய ஆபணங் பிண்டா³ய பாவிஸி. ஆபணே பிண்டா³ய சரித்வா
பச்சா²ப⁴த்தங் பிண்ட³பாதபடிக்கந்தோ யேனஞ்ஞதரோ வனஸண்டோ³ தேனுபஸங்கமி
தி³வாவிஹாராய. தங் வனஸண்ட³ங் அஜ்ஜோ²கா³ஹெத்வா [அஜ்ஜோ²க³ஹெத்வா (ஸீ॰ ஸ்யா॰ கங்॰), அஜ்ஜோ²கா³ஹித்வா (பீ॰ க॰)] அஞ்ஞதரஸ்மிங் ருக்க²மூலே தி³வாவிஹாரங் நிஸீதி³. போதலியோபி கோ² க³ஹபதி ஸம்பன்னநிவாஸனபாவுரணோ [பாபுரணோ (ஸீ॰ ஸ்யா॰ கங்॰)] ச²த்துபாஹனாஹி [ச²த்துபாஹனோ (க॰)]
ஜங்கா⁴விஹாரங் அனுசங்கமமானோ அனுவிசரமானோ யேன ஸோ வனஸண்டோ³ தேனுபஸங்கமி;
உபஸங்கமித்வா தங் வனஸண்ட³ங் அஜ்ஜோ²கா³ஹெத்வா யேன ப⁴க³வா தேனுபஸங்கமி;
உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங்
வீதிஸாரெத்வா ஏகமந்தங் அட்டா²ஸி. ஏகமந்தங் டி²தங் கோ² போதலியங் க³ஹபதிங்
ப⁴க³வா ஏதத³வோச – ‘‘ஸங்விஜ்ஜந்தி கோ², க³ஹபதி, ஆஸனானி; ஸசே ஆகங்க²ஸி
நிஸீதா³’’தி. ஏவங் வுத்தே, போதலியோ க³ஹபதி ‘‘க³ஹபதிவாதே³ன மங் ஸமணோ கோ³தமோ
ஸமுதா³சரதீ’’தி குபிதோ அனத்தமனோ துண்ஹீ அஹோஸி. து³தியம்பி கோ² ப⁴க³வா…பே॰…
ததியம்பி கோ² ப⁴க³வா போதலியங் க³ஹபதிங் ஏதத³வோச – ‘‘ஸங்விஜ்ஜந்தி கோ²,
க³ஹபதி, ஆஸனானி; ஸசே ஆகங்க²ஸி நிஸீதா³’’தி. ‘‘ஏவங் வுத்தே, போதலியோ க³ஹபதி
க³ஹபதிவாதே³ன மங் ஸமணோ கோ³தமோ ஸமுதா³சரதீ’’தி குபிதோ அனத்தமனோ ப⁴க³வந்தங்
ஏதத³வோச – ‘‘தயித³ங், போ⁴ கோ³தம, நச்ச²ன்னங், தயித³ங் நப்பதிரூபங், யங் மங் த்வங் க³ஹபதிவாதே³ன ஸமுதா³சரஸீ’’தி. ‘‘தே ஹி தே, க³ஹபதி, ஆகாரா, தே லிங்கா³ ,
தே நிமித்தா யதா² தங் க³ஹபதிஸ்ஸா’’தி. ‘‘ததா² ஹி பன மே, போ⁴ கோ³தம,
ஸப்³பே³ கம்மந்தா படிக்கி²த்தா, ஸப்³பே³ வோஹாரா ஸமுச்சி²ன்னா’’தி. ‘‘யதா²
கத²ங் பன தே, க³ஹபதி, ஸப்³பே³ கம்மந்தா படிக்கி²த்தா, ஸப்³பே³ வோஹாரா
ஸமுச்சி²ன்னா’’தி? ‘‘இத⁴ மே, போ⁴ கோ³தம, யங் அஹோஸி த⁴னங் வா த⁴ஞ்ஞங் வா
ரஜதங் வா ஜாதரூபங் வா ஸப்³ப³ங் தங் புத்தானங் தா³யஜ்ஜங் நிய்யாதங்,
தத்தா²ஹங் அனோவாதீ³ அனுபவாதீ³ கா⁴ஸச்சா²த³னபரமோ விஹராமி. ஏவங் கோ² மே [ஏவஞ்ச மே (ஸ்யா॰), ஏவங் மே (க॰)],
போ⁴ கோ³தம, ஸப்³பே³ கம்மந்தா படிக்கி²த்தா, ஸப்³பே³ வோஹாரா
ஸமுச்சி²ன்னா’’தி. ‘‘அஞ்ஞதா² கோ² த்வங், க³ஹபதி, வோஹாரஸமுச்சே²த³ங் வத³ஸி,
அஞ்ஞதா² ச பன அரியஸ்ஸ வினயே வோஹாரஸமுச்சே²தோ³ ஹோதீ’’தி. ‘‘யதா² கத²ங் பன,
ப⁴ந்தே, அரியஸ்ஸ வினயே வோஹாரஸமுச்சே²தோ³ ஹோதி? ஸாது⁴ மே, ப⁴ந்தே , ப⁴க³வா ததா² த⁴ம்மங் தே³ஸேது யதா² அரியஸ்ஸ வினயே வோஹாரஸமுச்சே²தோ³
ஹோதீ’’தி. ‘‘தேன ஹி, க³ஹபதி, ஸுணாஹி, ஸாது⁴கங் மனஸி கரோஹி,
பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² போதலியோ க³ஹபதி ப⁴க³வதோ
பச்சஸ்ஸோஸி.
32.
ப⁴க³வா ஏதத³வோச – ‘‘அட்ட² கோ² இமே, க³ஹபதி, த⁴ம்மா அரியஸ்ஸ வினயே
வோஹாரஸமுச்சே²தா³ய ஸங்வத்தந்தி. கதமே அட்ட²? அபாணாதிபாதங் நிஸ்ஸாய
பாணாதிபாதோ பஹாதப்³போ³; தி³ன்னாதா³னங் நிஸ்ஸாய அதி³ன்னாதா³னங் பஹாதப்³ப³ங்;
ஸச்சவாசங் [ஸச்சங் வாசங் (ஸ்யா॰)] நிஸ்ஸாய
முஸாவாதோ³ பஹாதப்³போ³; அபிஸுணங் வாசங் நிஸ்ஸாய பிஸுணா வாசா பஹாதப்³பா³;
அகி³த்³தி⁴லோப⁴ங் நிஸ்ஸாய கி³த்³தி⁴லோபோ⁴ பஹாதப்³போ³; அனிந்தா³ரோஸங்
நிஸ்ஸாய நிந்தா³ரோஸோ பஹாதப்³போ³; அக்கோதூ⁴பாயாஸங் நிஸ்ஸாய கோதூ⁴பாயாஸோ
பஹாதப்³போ³; அனதிமானங் நிஸ்ஸாய அதிமானோ பஹாதப்³போ³. இமே கோ², க³ஹபதி, அட்ட²
த⁴ம்மா ஸங்கி²த்தேன வுத்தா, வித்தா²ரேன அவிப⁴த்தா, அரியஸ்ஸ வினயே
வோஹாரஸமுச்சே²தா³ய ஸங்வத்தந்தீ’’தி. ‘‘யே மே [யே மே பன (ஸ்யா॰ க॰)],
ப⁴ந்தே, ப⁴க³வதா அட்ட² த⁴ம்மா ஸங்கி²த்தேன வுத்தா, வித்தா²ரேன அவிப⁴த்தா,
அரியஸ்ஸ வினயே வோஹாரஸமுச்சே²தா³ய ஸங்வத்தந்தி, ஸாது⁴ மே, ப⁴ந்தே, ப⁴க³வா
இமே அட்ட² த⁴ம்மே வித்தா²ரேன [வித்தா²ரெத்வா (க॰)]
விப⁴ஜது அனுகம்பங் உபாதா³யா’’தி. ‘‘தேன ஹி, க³ஹபதி, ஸுணாஹி, ஸாது⁴கங் மனஸி
கரோஹி, பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² போதலியோ க³ஹபதி ப⁴க³வதோ
பச்சஸ்ஸோஸி. ப⁴க³வா ஏதத³வோச –
33. ‘‘‘அபாணாதிபாதங் நிஸ்ஸாய பாணாதிபாதோ பஹாதப்³போ³’தி இதி கோ² பனேதங் வுத்தங் கிஞ்சேதங் படிச்ச வுத்தங் ?
இத⁴, க³ஹபதி, அரியஸாவகோ இதி படிஸஞ்சிக்க²தி – ‘யேஸங் கோ² அஹங் ஸங்யோஜனானங்
ஹேது பாணாதிபாதீ அஸ்ஸங், தேஸாஹங் ஸங்யோஜனானங் பஹானாய ஸமுச்சே²தா³ய
படிபன்னோ. அஹஞ்சேவ [அஹஞ்சே (?)] கோ² பன பாணாதிபாதீ அஸ்ஸங், அத்தாபி மங் உபவதெ³ய்ய பாணாதிபாதபச்சயா, அனுவிச்சாபி மங் விஞ்ஞூ [அனுவிச்ச விஞ்ஞூ (ஸீ॰ ஸ்யா॰ பீ॰)]
க³ரஹெய்யுங் பாணாதிபாதபச்சயா, காயஸ்ஸ பே⁴தா³ பரங் மரணா து³க்³க³தி
பாடிகங்கா² பாணாதிபாதபச்சயா. ஏததே³வ கோ² பன ஸங்யோஜனங் ஏதங் நீவரணங்
யதி³த³ங் பாணாதிபாதோ. யே ச பாணாதிபாதபச்சயா உப்பஜ்ஜெய்யுங் ஆஸவா
விகா⁴தபரிளாஹா, பாணாதிபாதா படிவிரதஸ்ஸ ஏவங்ஸ தே ஆஸவா விகா⁴தபரிளாஹா ந
ஹொந்தி’. ‘அபாணாதிபாதங் நிஸ்ஸாய பாணாதிபாதோ பஹாதப்³போ³’தி – இதி யந்தங்
வுத்தங் இத³மேதங் படிச்ச வுத்தங்.
34. ‘‘‘தி³ன்னாதா³னங்
நிஸ்ஸாய அதி³ன்னாதா³னங் பஹாதப்³ப³’ந்தி இதி கோ² பனேதங் வுத்தங், கிஞ்சேதங்
படிச்ச வுத்தங்? இத⁴, க³ஹபதி, அரியஸாவகோ இதி படிஸஞ்சிக்க²தி – ‘யேஸங் கோ²
அஹங் ஸங்யோஜனானங் ஹேது அதி³ன்னாதா³யீ அஸ்ஸங், தேஸாஹங் ஸங்யோஜனானங் பஹானாய
ஸமுச்சே²தா³ய படிபன்னோ. அஹஞ்சேவ கோ² பன அதி³ன்னாதா³யீ அஸ்ஸங், அத்தாபி மங்
உபவதெ³ய்ய அதி³ன்னாதா³னபச்சயா, அனுவிச்சாபி மங் விஞ்ஞூ க³ரஹெய்யுங்
அதி³ன்னாதா³னபச்சயா, காயஸ்ஸ பே⁴தா³ பரங் மரணா து³க்³க³தி பாடிகங்கா²
அதி³ன்னாதா³னபச்சயா. ஏததே³வ கோ² பன ஸங்யோஜனங் ஏதங் நீவரணங் யதி³த³ங்
அதி³ன்னாதா³னங். யே ச அதி³ன்னாதா³னபச்சயா உப்பஜ்ஜெய்யுங் ஆஸவா
விகா⁴தபரிளாஹா அதி³ன்னாதா³னா படிவிரதஸ்ஸ ஏவங்ஸ தே
ஆஸவா விகா⁴தபரிளாஹா ந ஹொந்தி’. ‘தி³ன்னாதா³னங் நிஸ்ஸாய அதி³ன்னாதா³னங்
பஹாதப்³ப³’ந்தி – இதி யந்தங் வுத்தங் இத³மேதங் படிச்ச வுத்தங்.
35.
‘‘‘ஸச்சவாசங் நிஸ்ஸாய முஸாவாதோ³ பஹாதப்³போ³’தி இதி கோ² பனேதங் வுத்தங்
கிஞ்சேதங் படிச்ச வுத்தங்? இத⁴, க³ஹபதி, அரியஸாவகோ இதி படிஸஞ்சிக்க²தி –
‘யேஸங் கோ² அஹங் ஸங்யோஜனானங் ஹேது முஸாவாதீ³ அஸ்ஸங், தேஸாஹங் ஸங்யோஜனானங்
பஹானாய ஸமுச்சே²தா³ய படிபன்னோ. அஹஞ்சேவ கோ² பன முஸாவாதீ³ அஸ்ஸங், அத்தாபி
மங் உபவதெ³ய்ய முஸாவாத³பச்சயா, அனுவிச்சாபி மங் விஞ்ஞூ க³ரஹெய்யுங்
முஸாவாத³பச்சயா, காயஸ்ஸ பே⁴தா³ பரங் மரணா து³க்³க³தி பாடிகங்கா²
முஸாவாத³பச்சயா. ஏததே³வ கோ² பன ஸங்யோஜனங் ஏதங் நீவரணங் யதி³த³ங் முஸாவாதோ³ .
யே ச முஸாவாத³பச்சயா உப்பஜ்ஜெய்யுங் ஆஸவா விகா⁴தபரிளாஹா, முஸாவாதா³
படிவிரதஸ்ஸ ஏவங்ஸ தே ஆஸவா விகா⁴தபரிளாஹா ந ஹொந்தி’. ‘ஸச்சவாசங் நிஸ்ஸாய
முஸாவாதோ³ பஹாதப்³போ³’தி – இதி யந்தங் வுத்தங் இத³மேதங் படிச்ச வுத்தங்.
36.
‘‘‘அபிஸுணங் வாசங் நிஸ்ஸாய பிஸுணா வாசா பஹாதப்³பா³’தி இதி கோ² பனேதங்
வுத்தங் கிஞ்சேதங் படிச்ச வுத்தங்? இத⁴, க³ஹபதி, அரியஸாவகோ இதி
படிஸஞ்சிக்க²தி – ‘யேஸங் கோ² அஹங் ஸங்யோஜனானங் ஹேது பிஸுணவாசோ அஸ்ஸங்,
தேஸாஹங் ஸங்யோஜனானங் பஹானாய ஸமுச்சே²தா³ய படிபன்னோ. அஹஞ்சேவ கோ² பன
பிஸுணவாசோ அஸ்ஸங், அத்தாபி மங் உபவதெ³ய்ய பிஸுணவாசாபச்சயா ,
அனுவிச்சாபி மங் விஞ்ஞூ க³ரஹெய்யுங் பிஸுணவாசாபச்சயா, காயஸ்ஸ பே⁴தா³ பரங்
மரணா து³க்³க³தி பாடிகங்கா² பிஸுணவாசாபச்சயா. ஏததே³வ கோ² பன ஸங்யோஜனங் ஏதங்
நீவரணங் யதி³த³ங் பிஸுணா வாசா. யே ச பிஸுணவாசாபச்சயா உப்பஜ்ஜெய்யுங் ஆஸவா
விகா⁴தபரிளாஹா, பிஸுணாய வாசாய படிவிரதஸ்ஸ ஏவங்ஸ தே
ஆஸவா விகா⁴தபரிளாஹா ந ஹொந்தி’. ‘அபிஸுணங் வாசங் நிஸ்ஸாய பிஸுணா வாசா
பஹாதப்³பா³’தி – இதி யந்தங் வுத்தங் இத³மேதங் படிச்ச வுத்தங்.
37.
‘‘‘அகி³த்³தி⁴லோப⁴ங் நிஸ்ஸாய கி³த்³தி⁴லோபோ⁴ பஹாதப்³போ³’தி இதி கோ² பனேதங்
வுத்தங், கிஞ்சேதங் படிச்ச வுத்தங்? இத⁴, க³ஹபதி, அரியஸாவகோ இதி
படிஸஞ்சிக்க²தி – ‘யேஸங் கோ² அஹங் ஸங்யோஜனானங் ஹேது கி³த்³தி⁴லோபீ⁴ அஸ்ஸங்,
தேஸாஹங் ஸங்யோஜனானங் பஹானாய ஸமுச்சே²தா³ய படிபன்னோ. அஹஞ்சேவ கோ² பன
கி³த்³தி⁴லோபீ⁴ அஸ்ஸங், அத்தாபி மங் உபவதெ³ய்ய கி³த்³தி⁴லோப⁴பச்சயா,
அனுவிச்சாபி மங் விஞ்ஞூ க³ரஹெய்யுங் கி³த்³தி⁴லோப⁴பச்சயா, காயஸ்ஸ பே⁴தா³
பரங் மரணா து³க்³க³தி பாடிகங்கா² கி³த்³தி⁴லோப⁴பச்சயா. ஏததே³வ கோ² பன
ஸங்யோஜனங் ஏதங் நீவரணங் யதி³த³ங் கி³த்³தி⁴லோபோ⁴. யே ச கி³த்³தி⁴லோப⁴பச்சயா
உப்பஜ்ஜெய்யுங் ஆஸவா விகா⁴தபரிளாஹா, கி³த்³தி⁴லோபா⁴ படிவிரதஸ்ஸ ஏவங்ஸ தே
ஆஸவா விகா⁴தபரிளாஹா ந ஹொந்தி’. ‘அகி³த்³தி⁴லோப⁴ங் நிஸ்ஸாய கி³த்³தி⁴லோபோ⁴
பஹாதப்³போ³’தி – இதி யந்தங் வுத்தங் இத³மேதங் படிச்ச வுத்தங்.
38. ‘‘‘அனிந்தா³ரோஸங் நிஸ்ஸாய நிந்தா³ரோஸோ பஹாதப்³போ³’தி இதி கோ²
பனேதங் வுத்தங், கிஞ்சேதங் படிச்ச வுத்தங்? இத⁴, க³ஹபதி, அரியஸாவகோ இதி
படிஸஞ்சிக்க²தி – ‘யேஸங் கோ² அஹங் ஸங்யோஜனானங் ஹேது நிந்தா³ரோஸீ அஸ்ஸங்,
தேஸாஹங் ஸங்யோஜனானங் பஹானாய
ஸமுச்சே²தா³ய படிபன்னோ. அஹஞ்சேவ கோ² பன நிந்தா³ரோஸீ அஸ்ஸங், அத்தாபி மங்
உபவதெ³ய்ய நிந்தா³ரோஸபச்சயா, அனுவிச்சாபி மங் விஞ்ஞூ க³ரஹெய்யுங்
நிந்தா³ரோஸபச்சயா, காயஸ்ஸ பே⁴தா³ பரங் மரணா து³க்³க³தி பாடிகங்கா²
நிந்தா³ரோஸபச்சயா. ஏததே³வ கோ² பன ஸங்யோஜனங் ஏதங் நீவரணங் யதி³த³ங்
நிந்தா³ரோஸோ. யே ச நிந்தா³ரோஸபச்சயா உப்பஜ்ஜெய்யுங் ஆஸவா விகா⁴தபரிளாஹா,
அனிந்தா³ரோஸிஸ்ஸ ஏவங்ஸ தே ஆஸவா விகா⁴தபரிளாஹா ந ஹொந்தி’. ‘அனிந்தா³ரோஸங்
நிஸ்ஸாய நிந்தா³ரோஸோ பஹாதப்³போ³’தி – இதி யந்தங் வுத்தங் இத³மேதங் படிச்ச
வுத்தங்.
39.
‘‘‘அக்கோதூ⁴பாயாஸங் நிஸ்ஸாய கோதூ⁴பாயாஸோ பஹாதப்³போ³’தி இதி கோ² பனேதங்
வுத்தங், கிஞ்சேதங் படிச்ச வுத்தங்? இத⁴, க³ஹபதி, அரியஸாவகோ இதி
படிஸஞ்சிக்க²தி – ‘யேஸங் கோ² அஹங் ஸங்யோஜனானங் ஹேது கோதூ⁴பாயாஸீ அஸ்ஸங்,
தேஸாஹங் ஸங்யோஜனானங் பஹானாய ஸமுச்சே²தா³ய படிபன்னோ. அஹஞ்சேவ கோ² பன
கோதூ⁴பாயாஸீ அஸ்ஸங், அத்தாபி மங் உபவதெ³ய்ய கோதூ⁴பாயாஸபச்சயா ,
அனுவிச்சாபி மங் விஞ்ஞூ க³ரஹெய்யுங் கோதூ⁴பாயாஸபச்சயா, காயஸ்ஸ பே⁴தா³ பரங்
மரணா து³க்³க³தி பாடிகங்கா² கோதூ⁴பாயாஸபச்சயா. ஏததே³வ கோ² பன ஸங்யோஜனங்
ஏதங் நீவரணங் யதி³த³ங் கோதூ⁴பாயாஸோ. யே ச கோதூ⁴பாயாஸபச்சயா உப்பஜ்ஜெய்யுங்
ஆஸவா விகா⁴தபரிளாஹா, அக்கோதூ⁴பாயாஸிஸ்ஸ ஏவங்ஸ தே
ஆஸவா விகா⁴தபரிளாஹா ந ஹொந்தி’. ‘அக்கோதூ⁴பாயாஸங் நிஸ்ஸாய கோதூ⁴பாயாஸோ
பஹாதப்³போ³’தி – இதி யந்தங் வுத்தங் இத³மேதங் படிச்ச வுத்தங்.
40.
‘‘‘அனதிமானங் நிஸ்ஸாய அதிமானோ பஹாதப்³போ³’தி இதி கோ² பனேதங் வுத்தங்,
கிஞ்சேதங் படிச்ச வுத்தங்? இத⁴, க³ஹபதி, அரியஸாவகோ இதி படிஸஞ்சிக்க²தி –
‘யேஸங் கோ² அஹங் ஸங்யோஜனானங் ஹேது அதிமானீ அஸ்ஸங், தேஸாஹங் ஸங்யோஜனானங்
பஹானாய ஸமுச்சே²தா³ய படிபன்னோ. அஹஞ்சேவ கோ² பன அதிமானீ அஸ்ஸங், அத்தாபி மங்
உபவதெ³ய்ய அதிமானபச்சயா, அனுவிச்சாபி மங் விஞ்ஞூ க³ரஹெய்யுங்
அதிமானபச்சயா, காயஸ்ஸ பே⁴தா³ பரங் மரணா து³க்³க³தி பாடிகங்கா²
அதிமானபச்சயா. ஏததே³வ கோ² பன ஸங்யோஜனங் ஏதங் நீவரணங் யதி³த³ங் அதிமானோ. யே ச
அதிமானபச்சயா உப்பஜ்ஜெய்யுங் ஆஸவா விகா⁴தபரிளாஹா, அனதிமானிஸ்ஸ ஏவங்ஸ தே
ஆஸவா விகா⁴தபரிளாஹா ந ஹொந்தி’. ‘அனதிமானங் நிஸ்ஸாய அதிமானோ பஹாதப்³போ³’தி –
இதி யந்தங் வுத்தங் இத³மேதங் படிச்ச வுத்தங்.
41. ‘‘இமே கோ², க³ஹபதி, அட்ட² த⁴ம்மா ஸங்கி²த்தேன வுத்தா, வித்தா²ரேன விப⁴த்தா [அவிப⁴த்தா (ஸ்யா॰ க॰)],
யே அரியஸ்ஸ வினயே வோஹாரஸமுச்சே²தா³ய ஸங்வத்தந்தி; ந த்வேவ தாவ அரியஸ்ஸ
வினயே ஸப்³பே³ன ஸப்³ப³ங் ஸப்³ப³தா² ஸப்³ப³ங் வோஹாரஸமுச்சே²தோ³ ஹோதீ’’தி.
‘‘யதா² கத²ங் பன, ப⁴ந்தே, அரியஸ்ஸ வினயே ஸப்³பே³ன
ஸப்³ப³ங் ஸப்³ப³தா² ஸப்³ப³ங் வோஹாரஸமுச்சே²தோ³ ஹோதி? ஸாது⁴ மே, ப⁴ந்தே,
ப⁴க³வா ததா² த⁴ம்மங் தே³ஸேது யதா² அரியஸ்ஸ வினயே
ஸப்³பே³ன ஸப்³ப³ங் ஸப்³ப³தா² ஸப்³ப³ங் வோஹாரஸமுச்சே²தோ³ ஹோதீ’’தி. ‘‘தேன
ஹி, க³ஹபதி, ஸுணாஹி, ஸாது⁴கங் மனஸி கரோஹி, பா⁴ஸிஸ்ஸாமீ’’தி. ‘‘ஏவங்,
ப⁴ந்தே’’தி கோ² போதலியோ க³ஹபதி ப⁴க³வதோ பச்சஸ்ஸோஸி. ப⁴க³வா ஏதத³வோச –
காமாதீ³னவகதா²
42. ‘‘ஸெய்யதா²பி ,
க³ஹபதி, குக்குரோ ஜிக⁴ச்சா²து³ப்³ப³ல்யபரேதோ கோ³கா⁴தகஸூனங் பச்சுபட்டி²தோ
அஸ்ஸ. தமேனங் த³க்கோ² கோ³கா⁴தகோ வா கோ³கா⁴தகந்தேவாஸீ வா அட்டி²கங்கலங்
ஸுனிக்கந்தங் நிக்கந்தங் நிம்மங்ஸங் லோஹிதமக்கி²தங் உபஸும்பெ⁴ய்ய [உபச்சு²பெ⁴ய்ய (ஸீ॰ பீ॰), உபச்சூ²பெ⁴ய்ய (ஸ்யா॰ கங்॰), உபச்சும்பெ⁴ய்ய (க॰)].
தங் கிங் மஞ்ஞஸி, க³ஹபதி, அபி நு கோ² ஸோ குக்குரோ அமுங் அட்டி²கங்கலங்
ஸுனிக்கந்தங் நிக்கந்தங் நிம்மங்ஸங் லோஹிதமக்கி²தங் பலேஹந்தோ
ஜிக⁴ச்சா²து³ப்³ப³ல்யங் படிவினெய்யா’’தி?
‘‘நோ ஹேதங், ப⁴ந்தே’’.
‘‘தங் கிஸ்ஸ ஹேது’’?
‘‘அது³ஞ்ஹி, ப⁴ந்தே, அட்டி²கங்கலங் ஸுனிக்கந்தங்
நிக்கந்தங் நிம்மங்ஸங் லோஹிதமக்கி²தங். யாவதே³வ பன ஸோ குக்குரோ கிலமத²ஸ்ஸ
விகா⁴தஸ்ஸ பா⁴கீ³ அஸ்ஸாதி. ஏவமேவ கோ², க³ஹபதி, அரியஸாவகோ இதி
படிஸஞ்சிக்க²தி – ‘அட்டி²கங்கலூபமா காமா வுத்தா ப⁴க³வதா ப³ஹுது³க்கா²
ப³ஹுபாயாஸா [ப³ஹூபாயாஸா (ஸீ॰ ஸ்யா॰ கங்॰ பீ॰)],
ஆதீ³னவோ எத்த² பி⁴ய்யோ’தி. ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா யாயங்
உபெக்கா² நானத்தா நானத்தஸிதா தங் அபி⁴னிவஜ்ஜெத்வா, யாயங் உபெக்கா² ஏகத்தா
ஏகத்தஸிதா யத்த² ஸப்³ப³ஸோ லோகாமிஸூபாதா³னா அபரிஸேஸா நிருஜ்ஜ²ந்தி
தமேவூபெக்க²ங் பா⁴வேதி.
43. ‘‘ஸெய்யதா²பி, க³ஹபதி, கி³ஜ்ஜோ² வா கங்கோ வா குலலோ வா மங்ஸபேஸிங் ஆதா³ய உட்³டீ³யெய்ய [உட்³ட³யெய்ய (ஸ்யா॰ பீ॰)]. தமேனங் கி³ஜ்ஜா²பி கங்காபி குலலாபி அனுபதித்வா அனுபதித்வா விதச்செ²ய்யுங் விஸ்ஸஜ்ஜெய்யுங் [விராஜெய்யுங் (ஸீ॰ ஸ்யா॰ கங்॰ பீ॰)].
தங் கிங் மஞ்ஞஸி, க³ஹபதி, ஸசே ஸோ கி³ஜ்ஜோ² வா கங்கோ வா குலலோ வா தங்
மங்ஸபேஸிங் ந கி²ப்பமேவ படினிஸ்ஸஜ்ஜெய்ய, ஸோ ததோனிதா³னங் மரணங் வா
நிக³ச்செ²ய்ய மரணமத்தங் வா து³க்க²’’ந்தி?
‘‘ஏவங், ப⁴ந்தே’’.
‘‘ஏவமேவ கோ², க³ஹபதி,
அரியஸாவகோ இதி படிஸஞ்சிக்க²தி – ‘மங்ஸபேஸூபமா காமா வுத்தா ப⁴க³வதா
ப³ஹுது³க்கா² ப³ஹுபாயாஸா, ஆதீ³னவோ எத்த² பி⁴ய்யோ’தி. ஏவமேதங்
யதா²பூ⁴தங் ஸம்மப்பஞ்ஞாய தி³ஸ்வா யாயங் உபெக்கா² நானத்தா நானத்தஸிதா தங்
அபி⁴னிவஜ்ஜெத்வா யாயங் உபெக்கா² ஏகத்தா ஏகத்தஸிதா யத்த² ஸப்³ப³ஸோ
லோகாமிஸூபாதா³னா அபரிஸேஸா நிருஜ்ஜ²ந்தி தமேவூபெக்க²ங் பா⁴வேதி.
44.
‘‘ஸெய்யதா²பி, க³ஹபதி, புரிஸோ ஆதி³த்தங் திணுக்கங் ஆதா³ய படிவாதங்
க³ச்செ²ய்ய. தங் கிங் மஞ்ஞஸி, க³ஹபதி, ஸசே ஸோ புரிஸோ தங் ஆதி³த்தங்
திணுக்கங் ந கி²ப்பமேவ படினிஸ்ஸஜ்ஜெய்ய தஸ்ஸ ஸா ஆதி³த்தா திணுக்கா ஹத்த²ங்
வா த³ஹெய்ய பா³ஹுங் வா த³ஹெய்ய அஞ்ஞதரங் வா அஞ்ஞதரங் வா அங்க³பச்சங்க³ங் [த³ஹெய்ய. அஞ்ஞதரங் வா அங்க³பச்சங்க³ (ஸீ॰ பீ॰)] த³ஹெய்ய, ஸோ ததோனிதா³னங் மரணங் வா நிக³ச்செ²ய்ய மரணமத்தங் வா து³க்க²’’ந்தி?
‘‘ஏவங், ப⁴ந்தே’’.
‘‘ஏவமேவ கோ², க³ஹபதி, அரியஸாவகோ இதி படிஸஞ்சிக்க²தி –
‘திணுக்கூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ எத்த²
பி⁴ய்யோ’தி. ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா…பே॰… தமேவூபெக்க²ங்
பா⁴வேதி.
45. ‘‘ஸெய்யதா²பி ,
க³ஹபதி, அங்கா³ரகாஸு ஸாதி⁴கபோரிஸா, பூரா அங்கா³ரானங் வீதச்சிகானங்
வீததூ⁴மானங். அத² புரிஸோ ஆக³ச்செ²ய்ய ஜீவிதுகாமோ அமரிதுகாமோ ஸுக²காமோ
து³க்க²ப்படிக்கூலோ. தமேனங் த்³வே ப³லவந்தோ புரிஸா நானாபா³ஹாஸு க³ஹெத்வா
அங்கா³ரகாஸுங் உபகட்³டெ⁴ய்யுங். தங் கிங் மஞ்ஞஸி, க³ஹபதி, அபி நு ஸோ புரிஸோ
இதிசிதிசேவ காயங் ஸன்னாமெய்யா’’தி?
‘‘ஏவங், ப⁴ந்தே’’.
‘‘தங் கிஸ்ஸ ஹேது’’?
‘‘விதி³தஞ்ஹி , ப⁴ந்தே, தஸ்ஸ
புரிஸஸ்ஸ இமஞ்சாஹங் அங்கா³ரகாஸுங் பபதிஸ்ஸாமி, ததோனிதா³னங் மரணங் வா
நிக³ச்சி²ஸ்ஸாமி மரணமத்தங் வா து³க்க²’’ந்தி. ‘‘ஏவமேவ கோ², க³ஹபதி,
அரியஸாவகோ இதி படிஸஞ்சிக்க²தி – ‘அங்கா³ரகாஸூபமா காமா வுத்தா ப⁴க³வதா
ப³ஹுது³க்கா² ப³ஹுபாயாஸா, ஆதீ³னவோ எத்த² பி⁴ய்யோ’தி. ஏவமேதங் யதா²பூ⁴தங்
ஸம்மப்பஞ்ஞாய தி³ஸ்வா…பே॰… தமேவூபெக்க²ங் பா⁴வேதி.
46. ‘‘ஸெய்யதா²பி ,
க³ஹபதி, புரிஸோ ஸுபினகங் பஸ்ஸெய்ய ஆராமராமணெய்யகங் வனராமணெய்யகங்
பூ⁴மிராமணெய்யகங் பொக்க²ரணிராமணெய்யகங். ஸோ படிபு³த்³தோ⁴ ந கிஞ்சி
படிபஸ்ஸெய்ய [பஸ்ஸெய்ய (ஸீ॰ ஸ்யா॰ கங்॰ பீ॰)].
ஏவமேவ கோ², க³ஹபதி, அரியஸாவகோ இதி படிஸஞ்சிக்க²தி – ‘ஸுபினகூபமா காமா
வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ எத்த² பி⁴ய்யோ’தி…பே॰…
தமேவூபெக்க²ங் பா⁴வேதி.
47. ‘‘ஸெய்யதா²பி, க³ஹபதி, புரிஸோ யாசிதகங் போ⁴க³ங் யாசித்வா யானங் வா [யானங் (ஸ்யா॰ கங்॰ பீ॰)] போரிஸெய்யங் [போரோஸெய்யங் (ஸீ॰ பீ॰ க॰), ஓரோபெய்ய (ஸ்யா॰ கங்॰)] பவரமணிகுண்ட³லங். ஸோ தேஹி யாசிதகேஹி போ⁴கே³ஹி புரக்க²தோ பரிவுதோ
அந்தராபணங் படிபஜ்ஜெய்ய. தமேனங் ஜனோ தி³ஸ்வா ஏவங் வதெ³ய்ய – ‘போ⁴கீ³ வத,
போ⁴, புரிஸோ, ஏவங் கிர போ⁴கி³னோ போ⁴கா³னி பு⁴ஞ்ஜந்தீ’தி. தமேனங் ஸாமிகா
யத்த² யத்தே²வ பஸ்ஸெய்யுங் தத்த² தத்தே²வ ஸானி ஹரெய்யுங். தங் கிங் மஞ்ஞஸி,
க³ஹபதி, அலங் நு கோ² தஸ்ஸ புரிஸஸ்ஸ அஞ்ஞத²த்தாயா’’தி?
‘‘ஏவங், ப⁴ந்தே’’.
‘‘தங் கிஸ்ஸ ஹேது’’?
‘‘ஸாமினோ ஹி, ப⁴ந்தே, ஸானி ஹரந்தீ’’தி. ‘‘ஏவமேவ கோ²,
க³ஹபதி, அரியஸாவகோ இதி படிஸஞ்சிக்க²தி – ‘யாசிதகூபமா காமா வுத்தா ப⁴க³வதா
ப³ஹுது³க்கா² ப³ஹுபாயாஸா, ஆதீ³னவோ எத்த² பி⁴ய்யோ’தி…பே॰… தமேவூபெக்க²ங் பா⁴வேதி.
48. ‘‘ஸெய்யதா²பி, க³ஹபதி, கா³மஸ்ஸ வா நிக³மஸ்ஸ வா அவிதூ³ரே திப்³போ³ வனஸண்டோ³. தத்ரஸ்ஸ ருக்கோ² ஸம்பன்னப²லோ ச உபபன்னப²லோ [உப்பன்னப²லோ (ஸ்யா॰)]
ச, ந சஸ்ஸு கானிசி ப²லானி பூ⁴மியங் பதிதானி. அத² புரிஸோ ஆக³ச்செ²ய்ய
ப²லத்தி²கோ ப²லக³வேஸீ ப²லபரியேஸனங் சரமானோ. ஸோ தங் வனஸண்ட³ங்
அஜ்ஜோ²கா³ஹெத்வா தங் ருக்க²ங் பஸ்ஸெய்ய ஸம்பன்னப²லஞ்ச உபபன்னப²லஞ்ச. தஸ்ஸ
ஏவமஸ்ஸ – ‘அயங் கோ² ருக்கோ² ஸம்பன்னப²லோ ச உபபன்னப²லோ ச, நத்தி² ச கானிசி
ப²லானி பூ⁴மியங் பதிதானி. ஜானாமி கோ² பனாஹங் ருக்க²ங் ஆரோஹிதுங் [ஆருஹிதுங் (ஸீ॰)].
யங்னூனாஹங் இமங் ருக்க²ங் ஆரோஹித்வா யாவத³த்த²ஞ்ச கா²தெ³ய்யங்
உச்ச²ங்க³ஞ்ச பூரெய்ய’ந்தி. ஸோ தங் ருக்க²ங் ஆரோஹித்வா யாவத³த்த²ஞ்ச
கா²தெ³ய்ய உச்ச²ங்க³ஞ்ச பூரெய்ய. அத² து³தியோ புரிஸோ ஆக³ச்செ²ய்ய ப²லத்தி²கோ ப²லக³வேஸீ ப²லபரியேஸனங் சரமானோ திண்ஹங் குடா²ரிங் [குதா⁴ரிங் (ஸ்யா॰ கங்॰ க॰)] ஆதா³ய. ஸோ தங் வனஸண்ட³ங் அஜ்ஜோ²கா³ஹெத்வா
தங் ருக்க²ங் பஸ்ஸெய்ய ஸம்பன்னப²லஞ்ச உபபன்னப²லஞ்ச. தஸ்ஸ ஏவமஸ்ஸ – ‘அயங்
கோ² ருக்கோ² ஸம்பன்னப²லோ ச உபபன்னப²லோ ச, நத்தி² ச கானிசி ப²லானி பூ⁴மியங்
பதிதானி. ந கோ² பனாஹங் ஜானாமி ருக்க²ங் ஆரோஹிதுங். யங்னூனாஹங் இமங்
ருக்க²ங் மூலதோ செ²த்வா யாவத³த்த²ஞ்ச கா²தெ³ய்யங் உச்ச²ங்க³ஞ்ச
பூரெய்ய’ந்தி. ஸோ தங் ருக்க²ங் மூலதோவ சி²ந்தெ³ய்ய. தங் கிங் மஞ்ஞஸி,
க³ஹபதி, அமுகோ [அஸு (ஸீ॰ பீ॰)] யோ ஸோ புரிஸோ
பட²மங் ருக்க²ங் ஆரூள்ஹோ ஸசே ஸோ ந கி²ப்பமேவ ஓரோஹெய்ய தஸ்ஸ ஸோ ருக்கோ²
பபதந்தோ ஹத்த²ங் வா ப⁴ஞ்ஜெய்ய பாத³ங் வா ப⁴ஞ்ஜெய்ய அஞ்ஞதரங் வா அஞ்ஞதரங் வா
அங்க³பச்சங்க³ங் ப⁴ஞ்ஜெய்ய, ஸோ ததோனிதா³னங் மரணங் வா நிக³ச்செ²ய்ய மரணமத்தங் வா து³க்க²’’ந்தி?
‘‘ஏவங், ப⁴ந்தே’’.
‘‘ஏவமேவ கோ², க³ஹபதி, அரியஸாவகோ இதி படிஸஞ்சிக்க²தி –
‘ருக்க²ப²லூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ
எத்த² பி⁴ய்யோ’தி. ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா யாயங் உபெக்கா²
நானத்தா நானத்தஸிதா தங் அபி⁴னிவஜ்ஜெத்வா யாயங் உபெக்கா² ஏகத்தா ஏகத்தஸிதா
யத்த² ஸப்³ப³ஸோ லோகாமிஸூபாதா³னா அபரிஸேஸா நிருஜ்ஜ²ந்தி தமேவூபெக்க²ங்
பா⁴வேதி.
49. ‘‘ஸ
கோ² ஸோ, க³ஹபதி, அரியஸாவகோ இமங்யேவ அனுத்தரங் உபெக்கா²ஸதிபாரிஸுத்³தி⁴ங்
ஆக³ம்ம அனேகவிஹிதங் புப்³பே³னிவாஸங் அனுஸ்ஸரதி, ஸெய்யதி²த³ங் – ஏகம்பி ஜாதிங் த்³வேபி ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி.
‘‘ஸ கோ² ஸோ, க³ஹபதி, அரியஸாவகோ இமங்யேவ அனுத்தரங்
உபெக்கா²ஸதிபாரிஸுத்³தி⁴ங் ஆக³ம்ம தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே
து³ப்³ப³ண்ணே ஸுக³தே து³க்³க³தே…பே॰… யதா²கம்மூபகே³ ஸத்தே பஜானாதி.
‘‘ஸ கோ² ஸோ, க³ஹபதி, அரியஸாவகோ இமங்யேவ அனுத்தரங்
உபெக்கா²ஸதிபாரிஸுத்³தி⁴ங் ஆக³ம்ம ஆஸவானங் க²யா அனாஸவங் சேதோவிமுத்திங்
பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹரதி. எத்தாவதா கோ², க³ஹபதி, அரியஸ்ஸ வினயே ஸப்³பே³ன ஸப்³ப³ங் ஸப்³ப³தா²
ஸப்³ப³ங் வோஹாரஸமுச்சே²தோ³ ஹோதி.
50. ‘‘தங்
கிங் மஞ்ஞஸி, க³ஹபதி, யதா² அரியஸ்ஸ வினயே ஸப்³பே³ன ஸப்³ப³ங் ஸப்³ப³தா²
ஸப்³ப³ங் வோஹாரஸமுச்சே²தோ³ ஹோதி, அபி நு த்வங் ஏவரூபங் வோஹாரஸமுச்சே²த³ங்
அத்தனி ஸமனுபஸ்ஸஸீ’’தி? ‘‘கோ சாஹங், ப⁴ந்தே, கோ ச அரியஸ்ஸ வினயே ஸப்³பே³ன
ஸப்³ப³ங் ஸப்³ப³தா² ஸப்³ப³ங் வோஹாரஸமுச்சே²தோ³! ஆரகா அஹங், ப⁴ந்தே, அரியஸ்ஸ
வினயே ஸப்³பே³ன ஸப்³ப³ங் ஸப்³ப³தா² ஸப்³ப³ங் வோஹாரஸமுச்சே²தா³. மயஞ்ஹி,
ப⁴ந்தே, புப்³பே³ அஞ்ஞதித்தி²யே பரிப்³பா³ஜகே அனாஜானீயேவ ஸமானே ஆஜானீயாதி
அமஞ்ஞிம்ஹ, அனாஜானீயேவ ஸமானே ஆஜானீயபோ⁴ஜனங் போ⁴ஜிம்ஹ, அனாஜானீயேவ ஸமானே
ஆஜானீயடா²னே ட²பிம்ஹ; பி⁴க்கூ² பன மயங், ப⁴ந்தே, ஆஜானீயேவ ஸமானே
அனாஜானீயாதி அமஞ்ஞிம்ஹ, ஆஜானீயேவ ஸமானே அனாஜானீயபோ⁴ஜனங் போ⁴ஜிம்ஹ, ஆஜானீயேவ ஸமானே அனாஜானீயடா²னே ட²பிம்ஹ; இதா³னி பன மயங், ப⁴ந்தே, அஞ்ஞதித்தி²யே
பரிப்³பா³ஜகே அனாஜானீயேவ ஸமானே அனாஜானீயாதி ஜானிஸ்ஸாம, அனாஜானீயேவ ஸமானே
அனாஜானீயபோ⁴ஜனங் போ⁴ஜெஸ்ஸாம, அனாஜானீயேவ ஸமானே அனாஜானீயடா²னே ட²பெஸ்ஸாம.
பி⁴க்கூ² பன மயங், ப⁴ந்தே, ஆஜானீயேவ ஸமானே ஆஜானீயாதி ஜானிஸ்ஸாம ஆஜானீயேவ
ஸமானே ஆஜானீயபோ⁴ஜனங் போ⁴ஜெஸ்ஸாம, ஆஜானீயேவ ஸமானே ஆஜானீயடா²னே ட²பெஸ்ஸாம.
அஜனேஸி வத மே, ப⁴ந்தே, ப⁴க³வா ஸமணேஸு ஸமணப்பேமங், ஸமணேஸு ஸமணப்பஸாத³ங்,
ஸமணேஸு ஸமணகா³ரவங். அபி⁴க்கந்தங், ப⁴ந்தே, அபி⁴க்கந்தங், ப⁴ந்தே !
ஸெய்யதா²பி, ப⁴ந்தே, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா
விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங்
தா⁴ரெய்ய, சக்கு²மந்தோ ரூபானி த³க்க²ந்தீதி; ஏவமேவங் கோ², ப⁴ந்தே, ப⁴க³வதா
அனேகபரியாயேன த⁴ம்மோ பகாஸிதோ. ஏஸாஹங், ப⁴ந்தே, ப⁴க³வந்தங் ஸரணங் க³ச்சா²மி
த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴க³வா தா⁴ரேது அஜ்ஜதக்³கே³
பாணுபேதங் ஸரணங் க³த’’ந்தி.
போதலியஸுத்தங் நிட்டி²தங் சதுத்த²ங்.
5. ஜீவகஸுத்தங்
51. ஏவங்
மே ஸுதங் – ஏகங் ஸமயங் ப⁴க³வா ராஜக³ஹே விஹரதி ஜீவகஸ்ஸ கோமாரப⁴ச்சஸ்ஸ
அம்ப³வனே. அத² கோ² ஜீவகோ கோமாரப⁴ச்சோ யேன ப⁴க³வா தேனுபஸங்கமி; உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³ . ஏகமந்தங் நிஸின்னோ கோ² ஜீவகோ கோமாரப⁴ச்சோ ப⁴க³வந்தங் ஏதத³வோச – ‘‘ஸுதங் மேதங், ப⁴ந்தே – ‘ஸமணங் கோ³தமங் உத்³தி³ஸ்ஸ பாணங் ஆரப⁴ந்தி [ஆரம்ப⁴ந்தி (க॰)], தங் ஸமணோ கோ³தமோ ஜானங் உத்³தி³ஸ்ஸகதங் [உத்³தி³ஸ்ஸகடங் (ஸீ॰ பீ॰)]
மங்ஸங் பரிபு⁴ஞ்ஜதி படிச்சகம்ம’ந்தி. யே தே, ப⁴ந்தே, ஏவமாஹங்ஸு – ‘ஸமணங்
கோ³தமங் உத்³தி³ஸ்ஸ பாணங் ஆரப⁴ந்தி, தங் ஸமணோ கோ³தமோ ஜானங் உத்³தி³ஸ்ஸகதங்
மங்ஸங் பரிபு⁴ஞ்ஜதி படிச்சகம்ம’ந்தி, கச்சி தே, ப⁴ந்தே, ப⁴க³வதோ
வுத்தவாதி³னோ, ந ச ப⁴க³வந்தங் அபூ⁴தேன அப்³பா⁴சிக்க²ந்தி, த⁴ம்மஸ்ஸ
சானுத⁴ம்மங் ப்³யாகரொந்தி, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங்
டா²னங் ஆக³ச்ச²தீ’’தி?
52. ‘‘யே
தே, ஜீவக, ஏவமாஹங்ஸு – ‘ஸமணங் கோ³தமங் உத்³தி³ஸ்ஸ பாணங் ஆரப⁴ந்தி, தங்
ஸமணோ கோ³தமோ ஜானங் உத்³தி³ஸ்ஸகதங் மங்ஸங் பரிபு⁴ஞ்ஜதி படிச்சகம்ம’ந்தி ந மே
தே வுத்தவாதி³னோ, அப்³பா⁴சிக்க²ந்தி ச மங் தே அஸதா அபூ⁴தேன. தீஹி கோ²
அஹங், ஜீவக, டா²னேஹி மங்ஸங் அபரிபோ⁴க³ந்தி வதா³மி. தி³ட்ட²ங், ஸுதங்,
பரிஸங்கிதங் – இமேஹி கோ² அஹங், ஜீவக , தீஹி டா²னேஹி
மங்ஸங் அபரிபோ⁴க³ந்தி வதா³மி. தீஹி கோ² அஹங், ஜீவக, டா²னேஹி மங்ஸங்
பரிபோ⁴க³ந்தி வதா³மி. அதி³ட்ட²ங், அஸுதங், அபரிஸங்கிதங் – இமேஹி கோ² அஹங்,
ஜீவக, தீஹி டா²னேஹி மங்ஸங் பரிபோ⁴க³ந்தி வதா³மி.
53.
‘‘இத⁴, ஜீவக, பி⁴க்கு² அஞ்ஞதரங் கா³மங் வா நிக³மங் வா உபனிஸ்ஸாய விஹரதி.
ஸோ மெத்தாஸஹக³தேன சேதஸா ஏகங் தி³ஸங் ப²ரித்வா விஹரதி, ததா² து³தியங், ததா²
ததியங், ததா² சதுத்த²ங். இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய
ஸப்³பா³வந்தங் லோகங் மெத்தாஸஹக³தேன சேதஸா விபுலேன மஹக்³க³தேன அப்பமாணேன
அவேரேன அப்³யாப³ஜ்ஜே²ன ப²ரித்வா விஹரதி. தமேனங் க³ஹபதி வா க³ஹபதிபுத்தோ வா
உபஸங்கமித்வா ஸ்வாதனாய ப⁴த்தேன நிமந்தேதி. ஆகங்க²மானோவ [ஆகங்க²மானோ (ஸ்யா॰ கங்॰)], ஜீவக, பி⁴க்கு² அதி⁴வாஸேதி .
ஸோ தஸ்ஸா ரத்தியா அச்சயேன புப்³ப³ண்ஹஸமயங் நிவாஸெத்வா பத்தசீவரமாதா³ய யேன
தஸ்ஸ க³ஹபதிஸ்ஸ வா க³ஹபதிபுத்தஸ்ஸ வா நிவேஸனங் தேனுபஸங்கமதி; உபஸங்கமித்வா
பஞ்ஞத்தே ஆஸனே நிஸீத³தி. தமேனங் ஸோ க³ஹபதி வா க³ஹபதிபுத்தோ வா பணீதேன
பிண்ட³பாதேன பரிவிஸதி. தஸ்ஸ ந ஏவங் ஹோதி – ‘ஸாது⁴ வத மாயங் [மங் + அயங் = மாயங்] க³ஹபதி வா க³ஹபதிபுத்தோ வா பணீதேன பிண்ட³பாதேன
பரிவிஸெய்யாதி! அஹோ வத மாயங் க³ஹபதி வா க³ஹபதிபுத்தோ வா ஆயதிம்பி ஏவரூபேன
பணீதேன பிண்ட³பாதேன பரிவிஸெய்யா’தி – ஏவம்பிஸ்ஸ ந ஹோதி. ஸோ தங் பிண்ட³பாதங்
அக³தி²தோ [அக³தி⁴தோ (ஸ்யா॰ கங்॰ க॰)] அமுச்சி²தோ அனஜ்ஜோ²பன்னோ [அனஜ்ஜா²பன்னோ (ஸ்யா॰ கங்॰ க॰)] ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதி. தங் கிங் மஞ்ஞஸி, ஜீவக , அபி நு ஸோ பி⁴க்கு² தஸ்மிங் ஸமயே அத்தப்³யாபா³தா⁴ய வா சேதேதி, பரப்³யாபா³தா⁴ய வா சேதேதி, உப⁴யப்³யாபா³தா⁴ய வா சேதேதீ’’தி?
‘‘நோ ஹேதங், ப⁴ந்தே’’.
‘‘நனு ஸோ, ஜீவக, பி⁴க்கு² தஸ்மிங் ஸமயே அனவஜ்ஜங்யேவ ஆஹாரங் ஆஹாரேதீ’’தி?
‘‘ஏவங், ப⁴ந்தே. ஸுதங் மேதங், ப⁴ந்தே – ‘ப்³ரஹ்மா
மெத்தாவிஹாரீ’தி. தங் மே இத³ங், ப⁴ந்தே, ப⁴க³வா ஸக்கி²தி³ட்டோ²; ப⁴க³வா ஹி,
ப⁴ந்தே, மெத்தாவிஹாரீ’’தி. ‘‘யேன கோ², ஜீவக, ராகே³ன யேன தோ³ஸேன யேன மோஹேன ப்³யாபாத³வா அஸ்ஸ ஸோ ராகோ³ ஸோ தோ³ஸோ ஸோ மோஹோ ததா²க³தஸ்ஸ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ [அனபா⁴வகதோ (ஸீ॰ பீ॰), அனபா⁴வங்க³தோ (ஸ்யா॰ கங்॰)]
ஆயதிங் அனுப்பாத³த⁴ம்மோ. ஸசே கோ² தே, ஜீவக, இத³ங் ஸந்தா⁴ய பா⁴ஸிதங்
அனுஜானாமி தே ஏத’’ந்தி. ‘‘ஏததே³வ கோ² பன மே, ப⁴ந்தே, ஸந்தா⁴ய பா⁴ஸிதங்’’ [பா⁴ஸிதந்தி (ஸ்யா॰)].
54.
‘‘இத⁴, ஜீவக, பி⁴க்கு² அஞ்ஞதரங் கா³மங் வா நிக³மங் வா உபனிஸ்ஸாய விஹரதி.
ஸோ கருணாஸஹக³தேன சேதஸா…பே॰… முதி³தாஸஹக³தேன சேதஸா…பே॰… உபெக்கா²ஸஹக³தேன
சேதஸா ஏகங் தி³ஸங் ப²ரித்வா விஹரதி, ததா² து³தியங், ததா² ததியங், ததா²
சதுத்த²ங். இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங்
லோகங் உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன
அப்³யாப³ஜ்ஜே²ன ப²ரித்வா விஹரதி. தமேனங் க³ஹபதி வா க³ஹபதிபுத்தோ வா
உபஸங்கமித்வா ஸ்வாதனாய ப⁴த்தேன நிமந்தேதி. ஆகங்க²மானோவ, ஜீவக, பி⁴க்கு²
அதி⁴வாஸேதி. ஸோ தஸ்ஸா ரத்தியா அச்சயேன புப்³ப³ண்ஹஸமயங் நிவாஸெத்வா பத்தசீவரமாதா³ய
யேன க³ஹபதிஸ்ஸ வா க³ஹபதிபுத்தஸ்ஸ வா நிவேஸனங் தேனுபஸங்கமதி; உபஸங்கமித்வா
பஞ்ஞத்தே ஆஸனே நிஸீத³தி. தமேனங் ஸோ க³ஹபதி வா க³ஹபதிபுத்தோ வா பணீதேன
பிண்ட³பாதேன பரிவிஸதி. தஸ்ஸ ந ஏவங் ஹோதி – ‘ஸாது⁴ வத மாயங் க³ஹபதி வா
க³ஹபதிபுத்தோ வா பணீதேன பிண்ட³பாதேன பரிவிஸெய்யாதி! அஹோ வத மாயங் க³ஹபதி வா
க³ஹபதிபுத்தோ வா ஆயதிம்பி ஏவரூபேன பணீதேன
பிண்ட³பாதேன பரிவிஸெய்யா’தி – ஏவம்பிஸ்ஸ ந ஹோதி. ஸோ தங் பிண்ட³பாதங்
அக³தி²தோ அமுச்சி²தோ அனஜ்ஜோ²பன்னோ ஆதீ³னவத³ஸ்ஸாவீ நிஸ்ஸரணபஞ்ஞோ
பரிபு⁴ஞ்ஜதி. தங் கிங் மஞ்ஞஸி, ஜீவக, அபி நு ஸோ பி⁴க்கு² தஸ்மிங் ஸமயே
அத்தப்³யாபா³தா⁴ய வா சேதேதி, பரப்³யாபா³தா⁴ய வா சேதேதி, உப⁴யப்³யாபா³தா⁴ய
வா சேதேதீ’’தி?
‘‘நோ ஹேதங், ப⁴ந்தே’’.
‘‘நனு ஸோ, ஜீவக, பி⁴க்கு² தஸ்மிங் ஸமயே அனவஜ்ஜங்யேவ ஆஹாரங் ஆஹாரேதீ’’தி?
‘‘ஏவங், ப⁴ந்தே. ஸுதங் மேதங், ப⁴ந்தே – ‘ப்³ரஹ்மா
உபெக்கா²விஹாரீ’தி. தங் மே இத³ங், ப⁴ந்தே, ப⁴க³வா ஸக்கி²தி³ட்டோ²; ப⁴க³வா
ஹி, ப⁴ந்தே, உபெக்கா²விஹாரீ’’தி. ‘‘யேன கோ², ஜீவக, ராகே³ன யேன தோ³ஸேன யேன
மோஹேன விஹேஸவா அஸ்ஸ அரதிவா அஸ்ஸ படிக⁴வா அஸ்ஸ ஸோ ராகோ³ ஸோ தோ³ஸோ ஸோ மோஹோ
ததா²க³தஸ்ஸ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிங்
அனுப்பாத³த⁴ம்மோ. ஸசே கோ² தே, ஜீவக, இத³ங் ஸந்தா⁴ய பா⁴ஸிதங், அனுஜானாமி தே ஏத’’ந்தி. ‘‘ஏததே³வ கோ² பன மே, ப⁴ந்தே, ஸந்தா⁴ய பா⁴ஸிதங்’’.
55. ‘‘யோ
கோ², ஜீவக, ததா²க³தங் வா ததா²க³தஸாவகங் வா உத்³தி³ஸ்ஸ பாணங் ஆரப⁴தி ஸோ
பஞ்சஹி டா²னேஹி ப³ஹுங் அபுஞ்ஞங் பஸவதி. யம்பி ஸோ, க³ஹபதி, ஏவமாஹ –
‘க³ச்ச²த², அமுகங் நாம பாணங் ஆனேதா²’தி, இமினா பட²மேன டா²னேன ப³ஹுங்
அபுஞ்ஞங் பஸவதி. யம்பி ஸோ பாணோ க³லப்பவேட²கேன [க³லப்பவேத⁴கேன (ப³ஹூஸு)]
ஆனீயமானோ து³க்க²ங் தோ³மனஸ்ஸங் படிஸங்வேதே³தி, இமினா து³தியேன டா²னேன
ப³ஹுங் அபுஞ்ஞங் பஸவதி. யம்பி ஸோ ஏவமாஹ – ‘க³ச்ச²த² இமங் பாணங் ஆரப⁴தா²’தி,
இமினா ததியேன டா²னேன ப³ஹுங் அபுஞ்ஞங் பஸவதி. யம்பி ஸோ பாணோ ஆரபி⁴யமானோ
து³க்க²ங் தோ³மனஸ்ஸங் படிஸங்வேதே³தி , இமினா
சதுத்தே²ன டா²னேன ப³ஹுங் அபுஞ்ஞங் பஸவதி. யம்பி ஸோ ததா²க³தங் வா
ததா²க³தஸாவகங் வா அகப்பியேன ஆஸாதே³தி, இமினா பஞ்சமேன டா²னேன ப³ஹுங்
அபுஞ்ஞங் பஸவதி. யோ கோ², ஜீவக, ததா²க³தங் வா ததா²க³தஸாவகங் வா உத்³தி³ஸ்ஸ
பாணங் ஆரப⁴தி ஸோ இமேஹி பஞ்சஹி டா²னேஹி ப³ஹுங் அபுஞ்ஞங் பஸவதீ’’தி.
ஏவங் வுத்தே, ஜீவகோ கோமாரப⁴ச்சோ ப⁴க³வந்தங் ஏதத³வோச –
‘‘அச்ச²ரியங், ப⁴ந்தே, அப்³பு⁴தங், ப⁴ந்தே! கப்பியங் வத, ப⁴ந்தே, பி⁴க்கூ²
ஆஹாரங் ஆஹாரெந்தி ; அனவஜ்ஜங் வத, ப⁴ந்தே, பி⁴க்கூ² ஆஹாரங் ஆஹாரெந்தி. அபி⁴க்கந்தங், ப⁴ந்தே, அபி⁴க்கந்தங், ப⁴ந்தே…பே॰… உபாஸகங் மங் ப⁴க³வா தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி.
ஜீவகஸுத்தங் நிட்டி²தங் பஞ்சமங்.
6. உபாலிஸுத்தங்
56. ஏவங் மே ஸுதங் – ஏகங் ஸமயங் ப⁴க³வா நாளந்தா³யங் விஹரதி பாவாரிகம்ப³வனே. தேன கோ² பன ஸமயேன நிக³ண்டோ² நாடபுத்தோ [நாத²புத்தோ (ஸீ॰), நாதபுத்தோ (பீ॰)]
நாளந்தா³யங் படிவஸதி மஹதியா நிக³ண்ட²பரிஸாய ஸத்³தி⁴ங். அத² கோ²
தீ³க⁴தபஸ்ஸீ நிக³ண்டோ² நாளந்தா³யங் பிண்டா³ய சரித்வா பச்சா²ப⁴த்தங்
பிண்ட³பாதபடிக்கந்தோ யேன பாவாரிகம்ப³வனங் யேன ப⁴க³வா தேனுபஸங்கமி;
உபஸங்கமித்வா ப⁴க³வதா ஸத்³தி⁴ங் ஸம்மோதி³.
ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் அட்டா²ஸி. ஏகமந்தங்
டி²தங் கோ² தீ³க⁴தபஸ்ஸிங் நிக³ண்ட²ங் ப⁴க³வா ஏதத³வோச – ‘‘ஸங்விஜ்ஜந்தி கோ²,
தபஸ்ஸி [தீ³க⁴தபஸ்ஸி (ஸ்யா॰ கங்॰ க॰)], ஆஸனானி;
ஸசே ஆகங்க²ஸி நிஸீதா³’’தி. ஏவங் வுத்தே, தீ³க⁴தபஸ்ஸீ நிக³ண்டோ² அஞ்ஞதரங்
நீசங் ஆஸனங் க³ஹெத்வா ஏகமந்தங் நிஸீதி³. ஏகமந்தங் நிஸின்னங் கோ²
தீ³க⁴தபஸ்ஸிங் நிக³ண்ட²ங் ப⁴க³வா ஏதத³வோச – ‘‘கதி பன, தபஸ்ஸி, நிக³ண்டோ²
நாடபுத்தோ கம்மானி பஞ்ஞபேதி பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ
பவத்தியா’’தி?
‘‘ந கோ², ஆவுஸோ கோ³தம, ஆசிண்ணங் நிக³ண்ட²ஸ்ஸ
நாடபுத்தஸ்ஸ ‘கம்மங், கம்ம’ந்தி பஞ்ஞபேதுங்; ‘த³ண்ட³ங், த³ண்ட³’ந்தி கோ²,
ஆவுஸோ கோ³தம, ஆசிண்ணங் நிக³ண்ட²ஸ்ஸ நாடபுத்தஸ்ஸ பஞ்ஞபேது’’ந்தி.
‘‘கதி பன, தபஸ்ஸி, நிக³ண்டோ² நாடபுத்தோ த³ண்டா³னி பஞ்ஞபேதி பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா’’தி?
‘‘தீணி கோ², ஆவுஸோ கோ³தம, நிக³ண்டோ²
நாடபுத்தோ த³ண்டா³னி பஞ்ஞபேதி பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ
பவத்தியாதி, ஸெய்யதி²த³ங் – காயத³ண்ட³ங், வசீத³ண்ட³ங், மனோத³ண்ட³’’ந்தி.
‘‘கிங் பன, தபஸ்ஸி, அஞ்ஞதே³வ காயத³ண்ட³ங், அஞ்ஞங் வசீத³ண்ட³ங், அஞ்ஞங் மனோத³ண்ட³’’ந்தி?
‘‘அஞ்ஞதே³வ , ஆவுஸோ கோ³தம, காயத³ண்ட³ங், அஞ்ஞங் வசீத³ண்ட³ங், அஞ்ஞங் மனோத³ண்ட³’’ந்தி.
‘‘இமேஸங் பன, தபஸ்ஸி, திண்ணங் த³ண்டா³னங் ஏவங்
படிவிப⁴த்தானங் ஏவங் படிவிஸிட்டா²னங் கதமங் த³ண்ட³ங் நிக³ண்டோ² நாடபுத்தோ
மஹாஸாவஜ்ஜதரங் பஞ்ஞபேதி பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா , யதி³ வா காயத³ண்ட³ங், யதி³ வா வசீத³ண்ட³ங், யதி³ வா மனோத³ண்ட³’’ந்தி?
‘‘இமேஸங் கோ², ஆவுஸோ கோ³தம, திண்ணங் த³ண்டா³னங் ஏவங்
படிவிப⁴த்தானங் ஏவங் படிவிஸிட்டா²னங் காயத³ண்ட³ங் நிக³ண்டோ² நாடபுத்தோ
மஹாஸாவஜ்ஜதரங் பஞ்ஞபேதி பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா,
நோ ததா² வசீத³ண்ட³ங், நோ ததா² மனோத³ண்ட³’’ந்தி.
‘‘காயத³ண்ட³ந்தி, தபஸ்ஸி, வதே³ஸி’’?
‘‘காயத³ண்ட³ந்தி, ஆவுஸோ கோ³தம, வதா³மி’’.
‘‘காயத³ண்ட³ந்தி, தபஸ்ஸி, வதே³ஸி’’?
‘‘காயத³ண்ட³ந்தி, ஆவுஸோ கோ³தம, வதா³மி’’.
‘‘காயத³ண்ட³ந்தி, தபஸ்ஸி, வதே³ஸி’’?
‘‘காயத³ண்ட³ந்தி, ஆவுஸோ கோ³தம, வதா³மீ’’தி.
இதிஹ ப⁴க³வா தீ³க⁴தபஸ்ஸிங் நிக³ண்ட²ங் இமஸ்மிங் கதா²வத்து²ஸ்மிங் யாவததியகங் பதிட்டா²பேஸி.
57. ஏவங் வுத்தே, தீ³க⁴தபஸ்ஸீ நிக³ண்டோ² ப⁴க³வந்தங் ஏதத³வோச – ‘‘த்வங் பனாவுஸோ கோ³தம, கதி த³ண்டா³னி பஞ்ஞபேஸி பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா’’தி?
‘‘ந கோ², தபஸ்ஸி, ஆசிண்ணங்
ததா²க³தஸ்ஸ ‘த³ண்ட³ங், த³ண்ட³’ந்தி பஞ்ஞபேதுங்; ‘கம்மங், கம்ம’ந்தி கோ²,
தபஸ்ஸி, ஆசிண்ணங் ததா²க³தஸ்ஸ பஞ்ஞபேது’’ந்தி?
‘‘த்வங் பனாவுஸோ கோ³தம, கதி கம்மானி பஞ்ஞபேஸி பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா’’தி?
‘‘தீணி கோ² அஹங், தபஸ்ஸி, கம்மானி பஞ்ஞபேமி பாபஸ்ஸ
கம்மஸ்ஸ கிரியாய பாபஸ்ஸ கம்மஸ்ஸ பவத்தியா, ஸெய்யதி²த³ங் – காயகம்மங்,
வசீகம்மங், மனோகம்ம’’ந்தி.
‘‘கிங் பனாவுஸோ கோ³தம, அஞ்ஞதே³வ காயகம்மங், அஞ்ஞங் வசீகம்மங், அஞ்ஞங் மனோகம்ம’’ந்தி?
‘‘அஞ்ஞதே³வ, தபஸ்ஸி, காயகம்மங், அஞ்ஞங் வசீகம்மங், அஞ்ஞங் மனோகம்ம’’ந்தி.
‘‘இமேஸங் பனாவுஸோ கோ³தம, திண்ணங் கம்மானங் ஏவங்
படிவிப⁴த்தானங் ஏவங் படிவிஸிட்டா²னங் கதமங் கம்மங் மஹாஸாவஜ்ஜதரங் பஞ்ஞபேஸி
பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா, யதி³ வா காயகம்மங், யதி³
வா வசீகம்மங், யதி³ வா மனோகம்ம’’ந்தி?
‘‘இமேஸங் கோ² அஹங், தபஸ்ஸி, திண்ணங் கம்மானங் ஏவங்
படிவிப⁴த்தானங் ஏவங் படிவிஸிட்டா²னங் மனோகம்மங் மஹாஸாவஜ்ஜதரங் பஞ்ஞபேமி
பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா, நோ ததா² காயகம்மங், நோ
ததா² வசீகம்ம’’ந்தி.
‘‘மனோகம்மந்தி, ஆவுஸோ கோ³தம, வதே³ஸி’’?
‘‘மனோகம்மந்தி, தபஸ்ஸி, வதா³மி’’.
‘‘மனோகம்மந்தி, ஆவுஸோ கோ³தம, வதே³ஸி’’?
‘‘மனோகம்மந்தி, தபஸ்ஸி, வதா³மி’’.
‘‘மனோகம்மந்தி , ஆவுஸோ கோ³தம, வதே³ஸி’’?
‘‘மனோகம்மந்தி, தபஸ்ஸி, வதா³மீ’’தி.
இதிஹ தீ³க⁴தபஸ்ஸீ நிக³ண்டோ² ப⁴க³வந்தங் இமஸ்மிங் கதா²வத்து²ஸ்மிங் யாவததியகங் பதிட்டா²பெத்வா உட்டா²யாஸனா யேன நிக³ண்டோ² நாடபுத்தோ தேனுபஸங்கமி.
58. தேன
கோ² பன ஸமயேன நிக³ண்டோ² நாடபுத்தோ மஹதியா கி³ஹிபரிஸாய ஸத்³தி⁴ங் நிஸின்னோ
ஹோதி பா³லகினியா பரிஸாய உபாலிபமுகா²ய. அத்³த³ஸா கோ² நிக³ண்டோ² நாடபுத்தோ
தீ³க⁴தபஸ்ஸிங் நிக³ண்ட²ங் தூ³ரதோவ ஆக³ச்ச²ந்தங்; தி³ஸ்வான தீ³க⁴தபஸ்ஸிங்
நிக³ண்ட²ங் ஏதத³வோச – ‘‘ஹந்த³, குதோ நு த்வங், தபஸ்ஸி, ஆக³ச்ச²ஸி தி³வா
தி³வஸ்ஸா’’தி? ‘‘இதோ ஹி கோ² அஹங், ப⁴ந்தே, ஆக³ச்சா²மி ஸமணஸ்ஸ கோ³தமஸ்ஸ
ஸந்திகா’’தி. ‘‘அஹு பன தே, தபஸ்ஸி, ஸமணேன கோ³தமேன ஸத்³தி⁴ங் கோசிதே³வ
கதா²ஸல்லாபோ’’தி ? ‘‘அஹு கோ² மே, ப⁴ந்தே, ஸமணேன
கோ³தமேன ஸத்³தி⁴ங் கோசிதே³வ கதா²ஸல்லாபோ’’தி. ‘‘யதா² கத²ங் பன தே, தபஸ்ஸி,
அஹு ஸமணேன கோ³தமேன ஸத்³தி⁴ங் கோசிதே³வ கதா²ஸல்லாபோ’’தி? அத² கோ²
தீ³க⁴தபஸ்ஸீ நிக³ண்டோ² யாவதகோ அஹோஸி ப⁴க³வதா ஸத்³தி⁴ங் கதா²ஸல்லாபோ தங்
ஸப்³ப³ங் நிக³ண்ட²ஸ்ஸ நாடபுத்தஸ்ஸ ஆரோசேஸி. ஏவங் வுத்தே, நிக³ண்டோ²
நாடபுத்தோ தீ³க⁴தபஸ்ஸிங் நிக³ண்ட²ங் ஏதத³வோச – ‘‘ஸாது⁴ ஸாது⁴, தபஸ்ஸி! யதா²
தங் ஸுதவதா ஸாவகேன ஸம்மதே³வ ஸத்து²ஸாஸனங் ஆஜானந்தேன ஏவமேவ தீ³க⁴தபஸ்ஸினா
நிக³ண்டே²ன ஸமணஸ்ஸ கோ³தமஸ்ஸ ப்³யாகதங். கிஞ்ஹி ஸோப⁴தி ச²வோ மனோத³ண்டோ³
இமஸ்ஸ ஏவங் ஓளாரிகஸ்ஸ காயத³ண்ட³ஸ்ஸ உபனிதா⁴ய! அத² கோ² காயத³ண்டோ³வ
மஹாஸாவஜ்ஜதரோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா, நோ ததா²
வசீத³ண்டோ³, நோ ததா² மனோத³ண்டோ³’’தி.
59. ஏவங் வுத்தே, உபாலி க³ஹபதி நிக³ண்ட²ங் நாடபுத்தங் ஏதத³வோச – ‘‘ஸாது⁴ ஸாது⁴, ப⁴ந்தே தீ³க⁴தபஸ்ஸீ [தபஸ்ஸீ (ஸீ॰ பீ॰)]!
யதா² தங் ஸுதவதா ஸாவகேன ஸம்மதே³வ ஸத்து²ஸாஸனங் ஆஜானந்தேன ஏவமேவங்
ப⁴த³ந்தேன தபஸ்ஸினா ஸமணஸ்ஸ கோ³தமஸ்ஸ ப்³யாகதங். கிஞ்ஹி ஸோப⁴தி ச²வோ
மனோத³ண்டோ³ இமஸ்ஸ ஏவங் ஓளாரிகஸ்ஸ காயத³ண்ட³ஸ்ஸ உபனிதா⁴ய! அத² கோ²
காயத³ண்டோ³வ மஹாஸாவஜ்ஜதரோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா,
நோ ததா² வசீத³ண்டோ³, நோ ததா² மனோத³ண்டோ³. ஹந்த³
சாஹங், ப⁴ந்தே, க³ச்சா²மி ஸமணஸ்ஸ கோ³தமஸ்ஸ இமஸ்மிங் கதா²வத்து²ஸ்மிங்
வாத³ங் ஆரோபெஸ்ஸாமி. ஸசே மே ஸமணோ கோ³தமோ ததா² பதிட்ட²ஹிஸ்ஸதி யதா²
ப⁴த³ந்தேன தபஸ்ஸினா பதிட்டா²பிதங்; ஸெய்யதா²பி நாம ப³லவா புரிஸோ
தீ³க⁴லோமிகங் ஏளகங் லோமேஸு க³ஹெத்வா ஆகட்³டெ⁴ய்ய பரிகட்³டெ⁴ய்ய
ஸம்பரிகட்³டெ⁴ய்ய, ஏவமேவாஹங் ஸமணங் கோ³தமங் வாதே³ன வாத³ங் ஆகட்³டி⁴ஸ்ஸாமி
பரிகட்³டி⁴ஸ்ஸாமி ஸம்பரிகட்³டி⁴ஸ்ஸாமி . ஸெய்யதா²பி
நாம ப³லவா ஸொண்டி³காகம்மகாரோ மஹந்தங் ஸொண்டி³காகிலஞ்ஜங் க³ம்பீ⁴ரே
உத³கரஹதே³ பக்கி²பித்வா கண்ணே க³ஹெத்வா ஆகட்³டெ⁴ய்ய பரிகட்³டெ⁴ய்ய
ஸம்பரிகட்³டெ⁴ய்ய, ஏவமேவாஹங் ஸமணங் கோ³தமங் வாதே³ன வாத³ங் ஆகட்³டி⁴ஸ்ஸாமி
பரிகட்³டி⁴ஸ்ஸாமி ஸம்பரிகட்³டி⁴ஸ்ஸாமி. ஸெய்யதா²பி நாம ப³லவா
ஸொண்டி³காது⁴த்தோ வாலங் [தா²லங் (க॰)] கண்ணே க³ஹெத்வா ஓது⁴னெய்ய நித்³து⁴னெய்ய நிப்போ²டெய்ய [நிச்சா²தெ³ய்ய (ஸீ॰ பீ॰ க॰), நிச்சோடெய்ய (க॰), நிப்போடெ²ய்ய (ஸ்யா॰ கங்॰)], ஏவமேவாஹங் ஸமணங் கோ³தமங் வாதே³ன வாத³ங் ஓது⁴னிஸ்ஸாமி நித்³து⁴னிஸ்ஸாமி நிப்போ²டெஸ்ஸாமி .
ஸெய்யதா²பி நாம குஞ்ஜரோ ஸட்டி²ஹாயனோ க³ம்பீ⁴ரங் பொக்க²ரணிங் ஓகா³ஹெத்வா
ஸாணதோ⁴விகங் நாம கீளிதஜாதங் கீளதி, ஏவமேவாஹங் ஸமணங் கோ³தமங் ஸாணதோ⁴விகங்
மஞ்ஞே கீளிதஜாதங் கீளிஸ்ஸாமி. ஹந்த³ சாஹங், ப⁴ந்தே, க³ச்சா²மி ஸமணஸ்ஸ
கோ³தமஸ்ஸ இமஸ்மிங் கதா²வத்து²ஸ்மிங் வாத³ங் ஆரோபெஸ்ஸாமீ’’தி. ‘‘க³ச்ச²
த்வங், க³ஹபதி, ஸமணஸ்ஸ கோ³தமஸ்ஸ இமஸ்மிங் கதா²வத்து²ஸ்மிங் வாத³ங் ஆரோபேஹி.
அஹங் வா ஹி, க³ஹபதி, ஸமணஸ்ஸ கோ³தமஸ்ஸ வாத³ங் ஆரோபெய்யங், தீ³க⁴தபஸ்ஸீ வா
நிக³ண்டோ², த்வங் வா’’தி.
60.
ஏவங் வுத்தே, தீ³க⁴தபஸ்ஸீ நிக³ண்டோ² நிக³ண்ட²ங் நாடபுத்தங் ஏதத³வோச – ‘‘ந
கோ² மேதங், ப⁴ந்தே, ருச்சதி யங் உபாலி க³ஹபதி ஸமணஸ்ஸ கோ³தமஸ்ஸ வாத³ங்
ஆரோபெய்ய. ஸமணோ ஹி, ப⁴ந்தே, கோ³தமோ மாயாவீ ஆவட்டனிங் மாயங் ஜானாதி யாய
அஞ்ஞதித்தி²யானங் ஸாவகே ஆவட்டேதீ’’தி. ‘‘அட்டா²னங் கோ² ஏதங், தபஸ்ஸி,
அனவகாஸோ யங் உபாலி க³ஹபதி ஸமணஸ்ஸ கோ³தமஸ்ஸ ஸாவகத்தங் உபக³ச்செ²ய்ய. டா²னஞ்ச
கோ² ஏதங் விஜ்ஜதி யங் ஸமணோ கோ³தமோ உபாலிஸ்ஸ க³ஹபதிஸ்ஸ ஸாவகத்தங்
உபக³ச்செ²ய்ய. க³ச்ச², த்வங், க³ஹபதி, ஸமணஸ்ஸ கோ³தமஸ்ஸ இமஸ்மிங்
கதா²வத்து²ஸ்மிங் வாத³ங் ஆரோபேஹி. அஹங் வா ஹி, க³ஹபதி, ஸமணஸ்ஸ கோ³தமஸ்ஸ
வாத³ங் ஆரோபெய்யங், தீ³க⁴தபஸ்ஸீ வா நிக³ண்டோ², த்வங் வா’’தி. து³தியம்பி
கோ² தீ³க⁴தபஸ்ஸீ…பே॰… ததியம்பி கோ² தீ³க⁴தபஸ்ஸீ நிக³ண்டோ² நிக³ண்ட²ங்
நாடபுத்தங் ஏதத³வோச – ‘‘ந கோ² மேதங், ப⁴ந்தே, ருச்சதி யங் உபாலி க³ஹபதி
ஸமணஸ்ஸ கோ³தமஸ்ஸ வாத³ங் ஆரோபெய்ய. ஸமணோ ஹி, ப⁴ந்தே,
கோ³தமோ மாயாவீ ஆவட்டனிங் மாயங் ஜானாதி யாய அஞ்ஞதித்தி²யானங் ஸாவகே
ஆவட்டேதீ’’தி. ‘‘அட்டா²னங் கோ² ஏதங், தபஸ்ஸி , அனவகாஸோ யங் உபாலி க³ஹபதி ஸமணஸ்ஸ கோ³தமஸ்ஸ ஸாவகத்தங்
உபக³ச்செ²ய்ய. டா²னஞ்ச கோ² ஏதங் விஜ்ஜதி யங் ஸமணோ கோ³தமோ உபாலிஸ்ஸ
க³ஹபதிஸ்ஸ ஸாவகத்தங் உபக³ச்செ²ய்ய. க³ச்ச² த்வங், க³ஹபதி, ஸமணஸ்ஸ கோ³தமஸ்ஸ
இமஸ்மிங் கதா²வத்து²ஸ்மிங் வாத³ங் ஆரோபேஹி. அஹங் வா ஹி, க³ஹபதி, ஸமணஸ்ஸ
கோ³தமஸ்ஸ வாத³ங் ஆரோபெய்யங், தீ³க⁴தபஸ்ஸீ வா நிக³ண்டோ², த்வங் வா’’தி.
‘‘ஏவங், ப⁴ந்தே’’தி கோ² உபாலி க³ஹபதி நிக³ண்ட²ஸ்ஸ நாடபுத்தஸ்ஸ படிஸ்ஸுத்வா
உட்டா²யாஸனா நிக³ண்ட²ங் நாடபுத்தங் அபி⁴வாதெ³த்வா பத³க்கி²ணங் கத்வா யேன பாவாரிகம்ப³வனங் யேன
ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³. ஏகமந்தங் நிஸின்னோ கோ² உபாலி க³ஹபதி ப⁴க³வந்தங் ஏதத³வோச – ‘‘ஆக³மா
நு க்²வித⁴, ப⁴ந்தே, தீ³க⁴தபஸ்ஸீ நிக³ண்டோ²’’தி?
‘‘ஆக³மா க்²வித⁴, க³ஹபதி, தீ³க⁴தபஸ்ஸீ நிக³ண்டோ²’’தி.
‘‘அஹு கோ² பன தே, ப⁴ந்தே, தீ³க⁴தபஸ்ஸினா நிக³ண்டே²ன ஸத்³தி⁴ங் கோசிதே³வ கதா²ஸல்லாபோ’’தி?
‘‘அஹு கோ² மே, க³ஹபதி, தீ³க⁴தபஸ்ஸினா நிக³ண்டே²ன ஸத்³தி⁴ங் கோசிதே³வ கதா²ஸல்லாபோ’’தி.
‘‘யதா² கத²ங் பன தே, ப⁴ந்தே, அஹு தீ³க⁴தபஸ்ஸினா நிக³ண்டே²ன ஸத்³தி⁴ங் கோசிதே³வ கதா²ஸல்லாபோ’’தி?
அத² கோ² ப⁴க³வா யாவதகோ அஹோஸி தீ³க⁴தபஸ்ஸினா நிக³ண்டே²ன ஸத்³தி⁴ங் கதா²ஸல்லாபோ தங் ஸப்³ப³ங் உபாலிஸ்ஸ க³ஹபதிஸ்ஸ ஆரோசேஸி.
61.
ஏவங் வுத்தே, உபாலி க³ஹபதி ப⁴க³வந்தங் ஏதத³வோச – ‘‘ஸாது⁴ ஸாது⁴, ப⁴ந்தே
தபஸ்ஸீ! யதா² தங் ஸுதவதா ஸாவகேன ஸம்மதே³வ ஸத்து²ஸாஸனங் ஆஜானந்தேன ஏவமேவங்
தீ³க⁴தபஸ்ஸினா நிக³ண்டே²ன ப⁴க³வதோ ப்³யாகதங். கிஞ்ஹி ஸோப⁴தி ச²வோ
மனோத³ண்டோ³ இமஸ்ஸ ஏவங் ஓளாரிகஸ்ஸ காயத³ண்ட³ஸ்ஸ உபனிதா⁴ய? அத² கோ²
காயத³ண்டோ³வ மஹாஸாவஜ்ஜதரோ பாபஸ்ஸ கம்மஸ்ஸ கிரியாய பாபஸ்ஸ
கம்மஸ்ஸ பவத்தியா, நோ ததா² வசீத³ண்டோ³, நோ ததா² மனோத³ண்டோ³’’தி. ‘‘ஸசே கோ²
த்வங், க³ஹபதி, ஸச்சே பதிட்டா²ய மந்தெய்யாஸி ஸியா நோ எத்த²
கதா²ஸல்லாபோ’’தி. ‘‘ஸச்சே அஹங், ப⁴ந்தே, பதிட்டா²ய மந்தெஸ்ஸாமி; ஹோது நோ
எத்த² கதா²ஸல்லாபோ’’தி.
62. ‘‘தங் கிங் மஞ்ஞஸி, க³ஹபதி, இத⁴ஸ்ஸ நிக³ண்டோ² ஆபா³தி⁴கோ து³க்கி²தோ
பா³ள்ஹகி³லானோ ஸீதோத³கபடிக்கி²த்தோ உண்ஹோத³கபடிஸேவீ. ஸோ ஸீதோத³கங்
அலப⁴மானோ காலங்கரெய்ய. இமஸ்ஸ பன, க³ஹபதி, நிக³ண்டோ² நாடபுத்தோ
கத்தூ²பபத்திங் பஞ்ஞபேதீ’’தி?
‘‘அத்தி², ப⁴ந்தே, மனோஸத்தா நாம தே³வா தத்த² ஸோ உபபஜ்ஜதி’’.
‘‘தங் கிஸ்ஸ ஹேது’’?
‘‘அஸு ஹி, ப⁴ந்தே , மனோபடிப³த்³தோ⁴ காலங்கரோதீ’’தி.
‘‘மனஸி கரோஹி, க³ஹபதி [க³ஹபதி க³ஹபதி மனஸி கரோஹி (ஸீ॰ ஸ்யா॰ கங்॰), க³ஹபதி மனஸி கரோஹி (க॰), க³ஹபதி க³ஹபதி (பீ॰)],
மனஸி கரித்வா கோ², க³ஹபதி, ப்³யாகரோஹி. ந கோ² தே ஸந்தி⁴யதி புரிமேன வா
பச்சி²மங், பச்சி²மேன வா புரிமங். பா⁴ஸிதா கோ² பன தே, க³ஹபதி, ஏஸா வாசா –
‘ஸச்சே அஹங், ப⁴ந்தே, பதிட்டா²ய மந்தெஸ்ஸாமி, ஹோது நோ எத்த²
கதா²ஸல்லாபோ’’’தி. ‘‘கிஞ்சாபி, ப⁴ந்தே, ப⁴க³வா ஏவமாஹ, அத² கோ² காயத³ண்டோ³வ
மஹாஸாவஜ்ஜதரோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா, நோ ததா²
வசீத³ண்டோ³, நோ ததா² மனோத³ண்டோ³’’தி.
63. ‘‘தங் கிங் மஞ்ஞஸி, க³ஹபதி ,
இத⁴ஸ்ஸ நிக³ண்டோ² நாடபுத்தோ சாதுயாமஸங்வரஸங்வுதோ ஸப்³ப³வாரிவாரிதோ
ஸப்³ப³வாரியுத்தோ ஸப்³ப³வாரிது⁴தோ ஸப்³ப³வாரிபு²டோ. ஸோ அபி⁴க்கமந்தோ
படிக்கமந்தோ ப³ஹூ கு²த்³த³கே பாணே ஸங்கா⁴தங் ஆபாதே³தி. இமஸ்ஸ பன, க³ஹபதி,
நிக³ண்டோ² நாடபுத்தோ கங் விபாகங் பஞ்ஞபேதீ’’தி?
‘‘அஸஞ்சேதனிகங், ப⁴ந்தே, நிக³ண்டோ² நாடபுத்தோ நோ மஹாஸாவஜ்ஜங் பஞ்ஞபேதீ’’தி.
‘‘மஹாஸாவஜ்ஜங், ப⁴ந்தே, ஹோதீ’’தி.
‘‘சேதனங் பன, க³ஹபதி, நிக³ண்டோ² நாடபுத்தோ கிஸ்மிங் பஞ்ஞபேதீ’’தி?
‘‘மனோத³ண்ட³ஸ்மிங், ப⁴ந்தே’’தி.
‘‘மனஸி கரோஹி, க³ஹபதி , மனஸி
கரித்வா கோ², க³ஹபதி, ப்³யாகரோஹி. ந கோ² தே ஸந்தி⁴யதி புரிமேன வா
பச்சி²மங், பச்சி²மேன வா புரிமங். பா⁴ஸிதா கோ² பன தே, க³ஹபதி, ஏஸா வாசா –
‘ஸச்சே அஹங், ப⁴ந்தே, பதிட்டா²ய மந்தெஸ்ஸாமி; ஹோது நோ எத்த²
கதா²ஸல்லாபோ’’’தி. ‘‘கிஞ்சாபி, ப⁴ந்தே, ப⁴க³வா ஏவமாஹ, அத² கோ² காயத³ண்டோ³வ
மஹாஸாவஜ்ஜதரோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா, நோ ததா²
வசீத³ண்டோ³, நோ ததா² மனோத³ண்டோ³’’தி.
64. ‘‘தங் கிங் மஞ்ஞஸி, க³ஹபதி, அயங் நாளந்தா³ இத்³தா⁴ சேவ பீ²தா ச ப³ஹுஜனா ஆகிண்ணமனுஸ்ஸா’’தி?
‘‘ஏவங், ப⁴ந்தே, அயங் நாளந்தா³ இத்³தா⁴ சேவ பீ²தா ச ப³ஹுஜனா ஆகிண்ணமனுஸ்ஸா’’தி.
‘‘தங் கிங் மஞ்ஞஸி, க³ஹபதி, இத⁴ புரிஸோ ஆக³ச்செ²ய்ய
உக்கி²த்தாஸிகோ. ஸோ ஏவங் வதெ³ய்ய – ‘அஹங் யாவதிகா இமிஸ்ஸா நாளந்தா³ய பாணா
தே ஏகேன க²ணேன ஏகேன முஹுத்தேன ஏகங் மங்ஸக²லங் ஏகங் மங்ஸபுஞ்ஜங்
கரிஸ்ஸாமீ’தி. தங் கிங் மஞ்ஞஸி, க³ஹபதி, பஹோதி நு கோ² ஸோ புரிஸோ யாவதிகா
இமிஸ்ஸா நாளந்தா³ய பாணா தே ஏகேன க²ணேன ஏகேன முஹுத்தேன ஏகங் மங்ஸக²லங் ஏகங் மங்ஸபுஞ்ஜங் காது’’ந்தி?
‘‘த³ஸபி, ப⁴ந்தே, புரிஸா, வீஸம்பி, ப⁴ந்தே, புரிஸா,
திங்ஸம்பி, ப⁴ந்தே, புரிஸா, சத்தாரீஸம்பி, ப⁴ந்தே, புரிஸா, பஞ்ஞாஸம்பி,
ப⁴ந்தே, புரிஸா நப்பஹொந்தி யாவதிகா இமிஸ்ஸா நாளந்தா³ய பாணா தே ஏகேன க²ணேன
ஏகேன முஹுத்தேன ஏகங் மங்ஸக²லங் ஏகங் மங்ஸபுஞ்ஜங் காதுங். கிஞ்ஹி ஸோப⁴தி ஏகோ
ச²வோ புரிஸோ’’தி!
‘‘தங் கிங் மஞ்ஞஸி, க³ஹபதி ,
இத⁴ ஆக³ச்செ²ய்ய ஸமணோ வா ப்³ராஹ்மணோ வா இத்³தி⁴மா சேதோவஸிப்பத்தோ. ஸோ ஏவங்
வதெ³ய்ய – ‘அஹங் இமங் நாளந்த³ங் ஏகேன மனோபதோ³ஸேன ப⁴ஸ்மங் கரிஸ்ஸாமீ’தி.
தங் கிங் மஞ்ஞஸி, க³ஹபதி, பஹோதி நு கோ² ஸோ ஸமணோ வா ப்³ராஹ்மணோ வா இத்³தி⁴மா
சேதோவஸிப்பத்தோ இமங் நாளந்த³ங் ஏகேன மனோபதோ³ஸேன ப⁴ஸ்மங் காது’’ந்தி ?
‘‘த³ஸபி, ப⁴ந்தே, நாளந்தா³, வீஸம்பி நாளந்தா³,
திங்ஸம்பி நாளந்தா³, சத்தாரீஸம்பி நாளந்தா³, பஞ்ஞாஸம்பி நாளந்தா³ பஹோதி ஸோ
ஸமணோ வா ப்³ராஹ்மணோ வா இத்³தி⁴மா சேதோவஸிப்பத்தோ ஏகேன மனோபதோ³ஸேன ப⁴ஸ்மங்
காதுங். கிஞ்ஹி ஸோப⁴தி ஏகா ச²வா நாளந்தா³’’தி!
‘‘மனஸி கரோஹி, க³ஹபதி, மனஸி கரித்வா கோ², க³ஹபதி,
ப்³யாகரோஹி. ந கோ² தே ஸந்தி⁴யதி புரிமேன வா பச்சி²மங், பச்சி²மேன வா
புரிமங். பா⁴ஸிதா கோ² பன தே, க³ஹபதி, ஏஸா வாசா – ‘ஸச்சே அஹங், ப⁴ந்தே,
பதிட்டா²ய மந்தெஸ்ஸாமி; ஹோது நோ எத்த² கதா²ஸல்லாபோ’’’தி.
‘‘கிஞ்சாபி, ப⁴ந்தே, ப⁴க³வா ஏவமாஹ, அத² கோ²
காயத³ண்டோ³வ மஹாஸாவஜ்ஜதரோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா,
நோ ததா² வசீத³ண்டோ³, நோ ததா² மனோத³ண்டோ³’’தி.
65. ‘‘தங் கிங் மஞ்ஞஸி, க³ஹபதி, ஸுதங் தே த³ண்ட³கீரஞ்ஞங் [த³ண்ட³காரஞ்ஞங் (ஸீ॰ பீ॰)] காலிங்கா³ரஞ்ஞங் மஜ்ஜா²ரஞ்ஞங் [மெஜ்ஜா²ரஞ்ஞங் (ஸீ॰ ஸ்யா॰ கங்॰ பீ॰)] மாதங்கா³ரஞ்ஞங் அரஞ்ஞங் அரஞ்ஞபூ⁴த’’ந்தி?
‘‘ஏவங், ப⁴ந்தே, ஸுதங் மே த³ண்ட³கீரஞ்ஞங் காலிங்கா³ரஞ்ஞங் மஜ்ஜா²ரஞ்ஞங் மாதங்கா³ரஞ்ஞங் அரஞ்ஞங் அரஞ்ஞபூ⁴த’’ந்தி.
‘‘தங் கிங் மஞ்ஞஸி, க³ஹபதி,
கிந்தி தே ஸுதங் கேன தங் த³ண்ட³கீரஞ்ஞங் காலிங்கா³ரஞ்ஞங் மஜ்ஜா²ரஞ்ஞங்
மாதங்கா³ரஞ்ஞங் அரஞ்ஞங் அரஞ்ஞபூ⁴த’’ந்தி?
‘‘ஸுதங் மேதங், ப⁴ந்தே, இஸீனங் மனோபதோ³ஸேன தங் த³ண்ட³கீரஞ்ஞங் காலிங்கா³ரஞ்ஞங் மஜ்ஜா²ரஞ்ஞங் மாதங்கா³ரஞ்ஞங் அரஞ்ஞங் அரஞ்ஞபூ⁴த’’ந்தி.
‘‘மனஸி கரோஹி, க³ஹபதி, மனஸி கரித்வா கோ², க³ஹபதி,
ப்³யாகரோஹி. ந கோ² தே ஸந்தி⁴யதி புரிமேன வா பச்சி²மங், பச்சி²மேன வா
புரிமங். பா⁴ஸிதா கோ² பன தே, க³ஹபதி, ஏஸா வாசா – ‘ஸச்சே அஹங், ப⁴ந்தே,
பதிட்டா²ய மந்தெஸ்ஸாமி; ஹோது நோ எத்த² கதா²ஸல்லாபோ’’’தி.
66. ‘‘புரிமேனேவாஹங் ,
ப⁴ந்தே, ஓபம்மேன ப⁴க³வதோ அத்தமனோ அபி⁴ரத்³தோ⁴. அபி சாஹங் இமானி ப⁴க³வதோ
விசித்ரானி பஞ்ஹபடிபா⁴னானி ஸோதுகாமோ, ஏவாஹங் ப⁴க³வந்தங் பச்சனீகங்
காதப்³ப³ங் அமஞ்ஞிஸ்ஸங். அபி⁴க்கந்தங், ப⁴ந்தே, அபி⁴க்கந்தங், ப⁴ந்தே!
ஸெய்யதா²பி, ப⁴ந்தே, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா
விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங்
தா⁴ரெய்ய – சக்கு²மந்தோ ரூபானி த³க்க²ந்தீதி; ஏவமேவங் ப⁴க³வதா அனேகபரியாயேன
த⁴ம்மோ பகாஸிதோ. ஏஸாஹங், ப⁴ந்தே, ப⁴க³வந்தங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴க³வா தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி.
67. ‘‘அனுவிச்சகாரங் கோ², க³ஹபதி, கரோஹி, அனுவிச்சகாரோ தும்ஹாதி³ஸானங்
ஞாதமனுஸ்ஸானங் ஸாது⁴ ஹோதீ’’தி. ‘‘இமினாபாஹங், ப⁴ந்தே, ப⁴க³வதோ
பி⁴ய்யோஸோமத்தாய அத்தமனோ அபி⁴ரத்³தோ⁴ யங் மங் ப⁴க³வா ஏவமாஹ –
‘அனுவிச்சகாரங் கோ², க³ஹபதி, கரோஹி, அனுவிச்சகாரோ தும்ஹாதி³ஸானங்
ஞாதமனுஸ்ஸானங் ஸாது⁴ ஹோதீ’தி. மஞ்ஹி, ப⁴ந்தே, அஞ்ஞதித்தி²யா ஸாவகங்
லபி⁴த்வா கேவலகப்பங் நாளந்த³ங் படாகங் பரிஹரெய்யுங் – ‘உபாலி அம்ஹாகங்
க³ஹபதி ஸாவகத்தங் உபக³தோ’தி. அத² ச பன மங் ப⁴க³வா ஏவமாஹ – ‘அனுவிச்சகாரங்
கோ², க³ஹபதி, கரோஹி, அனுவிச்சகாரோ தும்ஹாதி³ஸானங் ஞாதமனுஸ்ஸானங் ஸாது⁴
ஹோதீ’தி. ஏஸாஹங், ப⁴ந்தே, து³தியம்பி ப⁴க³வந்தங் ஸரணங் க³ச்சா²மி த⁴ம்மஞ்ச
பி⁴க்கு²ஸங்க⁴ஞ்ச. உபாஸகங் மங் ப⁴க³வா தா⁴ரேது அஜ்ஜதக்³கே³ பாணுபேதங் ஸரணங்
க³த’’ந்தி.
68.
‘‘தீ³க⁴ரத்தங் கோ² தே, க³ஹபதி, நிக³ண்டா²னங் ஓபானபூ⁴தங் குலங் யேன நேஸங்
உபக³தானங் பிண்ட³கங் தா³தப்³ப³ங் மஞ்ஞெய்யாஸீ’’தி. ‘‘இமினாபாஹங், ப⁴ந்தே,
ப⁴க³வதோ பி⁴ய்யோஸோமத்தாய அத்தமனோ அபி⁴ரத்³தோ⁴ யங்
மங் ப⁴க³வா ஏவமாஹ – ‘தீ³க⁴ரத்தங் கோ² தே, க³ஹபதி, நிக³ண்டா²னங் ஓபானபூ⁴தங்
குலங் யேன நேஸங் உபக³தானங் பிண்ட³கங் தா³தப்³ப³ங் மஞ்ஞெய்யாஸீ’தி. ஸுதங்
மேதங், ப⁴ந்தே, ஸமணோ கோ³தமோ ஏவமாஹ – ‘மய்ஹமேவ தா³னங் தா³தப்³ப³ங்,
நாஞ்ஞேஸங் தா³னங் தா³தப்³ப³ங்; மய்ஹமேவ ஸாவகானங் தா³னங் தா³தப்³ப³ங்,
நாஞ்ஞேஸங் ஸாவகானங் தா³னங் தா³தப்³ப³ங்; மய்ஹமேவ தி³ன்னங் மஹப்ப²லங்,
நாஞ்ஞேஸங் தி³ன்னங் மஹப்ப²லங்; மய்ஹமேவ ஸாவகானங்
தி³ன்னங் மஹப்ப²லங், நாஞ்ஞேஸங் ஸாவகானங் தி³ன்னங் மஹப்ப²ல’ந்தி. அத² ச பன
மங் ப⁴க³வா நிக³ண்டே²ஸுபி தா³னே ஸமாத³பேதி. அபி ச, ப⁴ந்தே, மயமெத்த² காலங்
ஜானிஸ்ஸாம. ஏஸாஹங், ப⁴ந்தே, ததியம்பி ப⁴க³வந்தங் ஸரணங் க³ச்சா²மி த⁴ம்மஞ்ச
பி⁴க்கு²ஸங்க⁴ஞ்ச. உபாஸகங் மங் ப⁴க³வா தா⁴ரேது அஜ்ஜதக்³கே³ பாணுபேதங் ஸரணங்
க³த’’ந்தி.
69. அத² கோ² ப⁴க³வா உபாலிஸ்ஸ க³ஹபதிஸ்ஸ அனுபுப்³பி³ங் கத²ங் [ஆனுபுப்³பீ³கத²ங் (ஸீ॰), ஆனுபுப்³பி³கத²ங் (பீ॰), அனுபுப்³பி³கத²ங் (ஸ்யா॰ கங்॰ க॰)]
கதே²ஸி, ஸெய்யதி²த³ங் – தா³னகத²ங் ஸீலகத²ங் ஸக்³க³கத²ங், காமானங் ஆதீ³னவங்
ஓகாரங் ஸங்கிலேஸங், நெக்க²ம்மே ஆனிஸங்ஸங் பகாஸேஸி. யதா³ ப⁴க³வா அஞ்ஞாஸி
உபாலிங் க³ஹபதிங் கல்லசித்தங் முது³சித்தங்
வினீவரணசித்தங் உத³க்³க³சித்தங் பஸன்னசித்தங், அத² யா பு³த்³தா⁴னங்
ஸாமுக்கங்ஸிகா த⁴ம்மதே³ஸனா தங் பகாஸேஸி – து³க்க²ங், ஸமுத³யங், நிரோத⁴ங்,
மக்³க³ங். ஸெய்யதா²பி நாம ஸுத்³த⁴ங் வத்த²ங் அபக³தகாளகங் ஸம்மதே³வ ரஜனங்
படிக்³க³ண்ஹெய்ய, ஏவமேவ உபாலிஸ்ஸ க³ஹபதிஸ்ஸ தஸ்மிங்யேவ ஆஸனே விரஜங் வீதமலங்
த⁴ம்மசக்கு²ங் உத³பாதி³ – ‘யங் கிஞ்சி ஸமுத³யத⁴ம்மங் ஸப்³ப³ங் தங்
நிரோத⁴த⁴ம்ம’ந்தி. அத² கோ² உபாலி க³ஹபதி தி³ட்ட²த⁴ம்மோ பத்தத⁴ம்மோ
விதி³தத⁴ம்மோ பரியோகா³ள்ஹத⁴ம்மோ திண்ணவிசிகிச்சோ² விக³தகத²ங்கதோ²
வேஸாரஜ்ஜப்பத்தோ அபரப்பச்சயோ ஸத்து²ஸாஸனே ப⁴க³வந்தங் ஏதத³வோச – ‘‘ஹந்த³ ச
தா³னி மயங், ப⁴ந்தே, க³ச்சா²ம, ப³ஹுகிச்சா மயங் ப³ஹுகரணீயா’’தி.
‘‘யஸ்ஸதா³னி த்வங், க³ஹபதி, காலங் மஞ்ஞஸீ’’தி.
70. அத² கோ² உபாலி க³ஹபதி ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா
உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா யேன ஸகங்
நிவேஸனங் தேனுபஸங்கமி; உபஸங்கமித்வா தோ³வாரிகங் ஆமந்தேஸி – ‘‘அஜ்ஜதக்³கே³,
ஸம்ம தோ³வாரிக, ஆவராமி த்³வாரங் நிக³ண்டா²னங் நிக³ண்டீ²னங், அனாவடங்
த்³வாரங் ப⁴க³வதோ பி⁴க்கூ²னங் பி⁴க்கு²னீனங் உபாஸகானங் உபாஸிகானங். ஸசே
கோசி நிக³ண்டோ² ஆக³ச்ச²தி தமேனங் த்வங் ஏவங் வதெ³ய்யாஸி – ‘திட்ட², ப⁴ந்தே,
மா பாவிஸி. அஜ்ஜதக்³கே³ உபாலி க³ஹபதி ஸமணஸ்ஸ கோ³தமஸ்ஸ ஸாவகத்தங் உபக³தோ.
ஆவடங் த்³வாரங் நிக³ண்டா²னங் நிக³ண்டீ²னங், அனாவடங் த்³வாரங் ப⁴க³வதோ
பி⁴க்கூ²னங் பி⁴க்கு²னீனங் உபாஸகானங் உபாஸிகானங் .
ஸசே தே, ப⁴ந்தே, பிண்ட³கேன அத்தோ², எத்தே²வ திட்ட², எத்தே²வ தே
ஆஹரிஸ்ஸந்தீ’’’தி. ‘‘ஏவங், ப⁴ந்தே’’தி கோ² தோ³வாரிகோ உபாலிஸ்ஸ க³ஹபதிஸ்ஸ
பச்சஸ்ஸோஸி.
71.
அஸ்ஸோஸி கோ² தீ³க⁴தபஸ்ஸீ நிக³ண்டோ² – ‘‘உபாலி கிர க³ஹபதி ஸமணஸ்ஸ கோ³தமஸ்ஸ
ஸாவகத்தங் உபக³தோ’’தி. அத² கோ² தீ³க⁴தபஸ்ஸீ நிக³ண்டோ² யேன நிக³ண்டோ²
நாடபுத்தோ தேனுபஸங்கமி; உபஸங்கமித்வா நிக³ண்ட²ங் நாடபுத்தங் ஏதத³வோச –
‘‘ஸுதங் மேதங், ப⁴ந்தே, உபாலி கிர க³ஹபதி ஸமணஸ்ஸ கோ³தமஸ்ஸ ஸாவகத்தங்
உபக³தோ’’தி. ‘‘அட்டா²னங் கோ² ஏதங், தபஸ்ஸி , அனவகாஸோ
யங் உபாலி க³ஹபதி ஸமணஸ்ஸ கோ³தமஸ்ஸ ஸாவகத்தங் உபக³ச்செ²ய்ய. டா²னஞ்ச கோ²
ஏதங் விஜ்ஜதி யங் ஸமணோ கோ³தமோ உபாலிஸ்ஸ க³ஹபதிஸ்ஸ ஸாவகத்தங்
உபக³ச்செ²ய்யா’’தி . து³தியம்பி கோ² தீ³க⁴தபஸ்ஸீ
நிக³ண்டோ²…பே॰… ததியம்பி கோ² தீ³க⁴தபஸ்ஸீ நிக³ண்டோ² நிக³ண்ட²ங் நாடபுத்தங்
ஏதத³வோச – ‘‘ஸுதங் மேதங், ப⁴ந்தே …பே॰… உபாலிஸ்ஸ
க³ஹபதிஸ்ஸ ஸாவகத்தங் உபக³ச்செ²ய்யா’’தி. ‘‘ஹந்தா³ஹங், ப⁴ந்தே, க³ச்சா²மி
யாவ ஜானாமி யதி³ வா உபாலி க³ஹபதி ஸமணஸ்ஸ கோ³தமஸ்ஸ ஸாவகத்தங் உபக³தோ யதி³ வா
நோ’’தி. ‘‘க³ச்ச² த்வங், தபஸ்ஸி, ஜானாஹி யதி³ வா உபாலி க³ஹபதி ஸமணஸ்ஸ
கோ³தமஸ்ஸ ஸாவகத்தங் உபக³தோ யதி³ வா நோ’’தி.
72.
அத² கோ² தீ³க⁴தபஸ்ஸீ நிக³ண்டோ² யேன உபாலிஸ்ஸ க³ஹபதிஸ்ஸ நிவேஸனங்
தேனுபஸங்கமி. அத்³த³ஸா கோ² தோ³வாரிகோ தீ³க⁴தபஸ்ஸிங் நிக³ண்ட²ங் தூ³ரதோவ
ஆக³ச்ச²ந்தங். தி³ஸ்வான தீ³க⁴தபஸ்ஸிங் நிக³ண்ட²ங் ஏதத³வோச – ‘‘திட்ட²,
ப⁴ந்தே, மா பாவிஸி. அஜ்ஜதக்³கே³ உபாலி க³ஹபதி ஸமணஸ்ஸ கோ³தமஸ்ஸ ஸாவகத்தங்
உபக³தோ. ஆவடங் த்³வாரங் நிக³ண்டா²னங் நிக³ண்டீ²னங், அனாவடங் த்³வாரங்
ப⁴க³வதோ பி⁴க்கூ²னங் பி⁴க்கு²னீனங் உபாஸகானங் உபாஸிகானங் .
ஸசே தே, ப⁴ந்தே, பிண்ட³கேன அத்தோ², எத்தே²வ திட்ட², எத்தே²வ தே
ஆஹரிஸ்ஸந்தீ’’தி. ‘‘ந மே, ஆவுஸோ, பிண்ட³கேன அத்தோ²’’தி வத்வா ததோ
படினிவத்தித்வா யேன நிக³ண்டோ² நாடபுத்தோ தேனுபஸங்கமி; உபஸங்கமித்வா
நிக³ண்ட²ங் நாடபுத்தங் ஏதத³வோச – ‘‘ஸச்சங்யேவ கோ², ப⁴ந்தே, யங் உபாலி
க³ஹபதி ஸமணஸ்ஸ கோ³தமஸ்ஸ ஸாவகத்தங் உபக³தோ. ஏதங் கோ² தே அஹங், ப⁴ந்தே,
நாலத்த²ங் ந கோ² மே, ப⁴ந்தே, ருச்சதி யங் உபாலி க³ஹபதி ஸமணஸ்ஸ கோ³தமஸ்ஸ
வாத³ங் ஆரோபெய்ய. ஸமணோ ஹி, ப⁴ந்தே, கோ³தமோ மாயாவீ ஆவட்டனிங் மாயங் ஜானாதி
யாய அஞ்ஞதித்தி²யானங் ஸாவகே ஆவட்டேதீதி. ஆவட்டோ கோ² தே, ப⁴ந்தே, உபாலி
க³ஹபதி ஸமணேன கோ³தமேன ஆவட்டனியா மாயாயா’’தி. ‘‘அட்டா²னங் கோ² ஏதங், தபஸ்ஸி,
அனவகாஸோ யங் உபாலி க³ஹபதி ஸமணஸ்ஸ கோ³தமஸ்ஸ
ஸாவகத்தங் உபக³ச்செ²ய்ய. டா²னஞ்ச கோ² ஏதங் விஜ்ஜதி யங் ஸமணோ கோ³தமோ
உபாலிஸ்ஸ க³ஹபதிஸ்ஸ ஸாவகத்தங் உபக³ச்செ²ய்யா’’தி. து³தியம்பி கோ²
தீ³க⁴தபஸ்ஸீ நிக³ண்டோ² நிக³ண்ட²ங் நாடபுத்தங் ஏதத³வோச – ‘‘ஸச்சங்யேவ,
ப⁴ந்தே…பே॰… உபாலிஸ்ஸ க³ஹபதிஸ்ஸ ஸாவகத்தங்
உபக³ச்செ²ய்யா’’தி. ததியம்பி கோ² தீ³க⁴தபஸ்ஸீ நிக³ண்டோ² நிக³ண்ட²ங்
நாடபுத்தங் ஏதத³வோச – ‘‘ஸச்சங்யேவ கோ², ப⁴ந்தே…பே॰… உபாலிஸ்ஸ க³ஹபதிஸ்ஸ ஸாவகத்தங் உபக³ச்செ²ய்யா’’தி. ‘‘ஹந்த³ சாஹங் , தபஸ்ஸி, க³ச்சா²மி யாவ சாஹங் ஸாமங்யேவ ஜானாமி யதி³ வா உபாலி க³ஹபதி ஸமணஸ்ஸ கோ³தமஸ்ஸ ஸாவகத்தங் உபக³தோ யதி³ வா நோ’’தி.
அத² கோ² நிக³ண்டோ² நாடபுத்தோ மஹதியா நிக³ண்ட²பரிஸாய
ஸத்³தி⁴ங் யேன உபாலிஸ்ஸ க³ஹபதிஸ்ஸ நிவேஸனங் தேனுபஸங்கமி. அத்³த³ஸா கோ²
தோ³வாரிகோ நிக³ண்ட²ங் நாடபுத்தங் தூ³ரதோவ ஆக³ச்ச²ந்தங். தி³ஸ்வான
நிக³ண்ட²ங் நாடபுத்தங் ஏதத³வோச – ‘‘திட்ட², ப⁴ந்தே, மா பாவிஸி. அஜ்ஜதக்³கே³
உபாலி க³ஹபதி ஸமணஸ்ஸ கோ³தமஸ்ஸ ஸாவகத்தங் உபக³தோ. ஆவடங் த்³வாரங்
நிக³ண்டா²னங் நிக³ண்டீ²னங், அனாவடங் த்³வாரங் ப⁴க³வதோ பி⁴க்கூ²னங்
பி⁴க்கு²னீனங் உபாஸகானங் உபாஸிகானங். ஸசே தே, ப⁴ந்தே, பிண்ட³கேன அத்தோ²,
எத்தே²வ திட்ட², எத்தே²வ தே ஆஹரிஸ்ஸந்தீ’’தி. ‘‘தேன ஹி, ஸம்ம தோ³வாரிக, யேன
உபாலி க³ஹபதி தேனுபஸங்கம; உபஸங்கமித்வா உபாலிங் க³ஹபதிங் ஏவங் வதே³ஹி –
‘நிக³ண்டோ², ப⁴ந்தே, நாடபுத்தோ மஹதியா நிக³ண்ட²பரிஸாய ஸத்³தி⁴ங்
ப³ஹித்³வாரகொட்ட²கே டி²தோ; ஸோ தே த³ஸ்ஸனகாமோ’’’தி. ‘‘ஏவங், ப⁴ந்தே’’தி கோ²
தோ³வாரிகோ நிக³ண்ட²ஸ்ஸ நாடபுத்தஸ்ஸ படிஸ்ஸுத்வா யேன உபாலி க³ஹபதி
தேனுபஸங்கமி; உபஸங்கமித்வா உபாலிங் க³ஹபதிங் ஏதத³வோச – ‘‘நிக³ண்டோ²,
ப⁴ந்தே, நாடபுத்தோ மஹதியா நிக³ண்ட²பரிஸாய ஸத்³தி⁴ங்
ப³ஹித்³வாரகொட்ட²கே டி²தோ; ஸோ தே த³ஸ்ஸனகாமோ’’தி. ‘‘தேன ஹி, ஸம்ம
தோ³வாரிக, மஜ்ஜி²மாய த்³வாரஸாலாய ஆஸனானி பஞ்ஞபேஹீ’’தி. ‘‘ஏவங், ப⁴ந்தே’’தி
கோ² தோ³வாரிகோ உபாலிஸ்ஸ க³ஹபதிஸ்ஸ படிஸ்ஸுத்வா மஜ்ஜி²மாய த்³வாரஸாலாய
ஆஸனானி பஞ்ஞபெத்வா யேன உபாலி க³ஹபதி தேனுபஸங்கமி; உபஸங்கமித்வா உபாலிங்
க³ஹபதிங் ஏதத³வோச – ‘‘பஞ்ஞத்தானி கோ², ப⁴ந்தே, மஜ்ஜி²மாய த்³வாரஸாலாய
ஆஸனானி. யஸ்ஸதா³னி காலங் மஞ்ஞஸீ’’தி.
73. அத² கோ² உபாலி க³ஹபதி யேன மஜ்ஜி²மா
த்³வாரஸாலா தேனுபஸங்கமி; உபஸங்கமித்வா யங் தத்த² ஆஸனங் அக்³க³ஞ்ச
ஸெட்ட²ஞ்ச உத்தமஞ்ச பணீதஞ்ச தத்த² ஸாமங் நிஸீதி³த்வா தோ³வாரிகங் ஆமந்தேஸி
– ‘‘தேன ஹி, ஸம்ம தோ³வாரிக, யேன நிக³ண்டோ² நாடபுத்தோ தேனுபஸங்கம;
உபஸங்கமித்வா நிக³ண்ட²ங் நாடபுத்தங் ஏவங் வதே³ஹி – ‘உபாலி, ப⁴ந்தே, க³ஹபதி
ஏவமாஹ – பவிஸ கிர, ப⁴ந்தே, ஸசே ஆகங்க²ஸீ’’’தி. ‘‘ஏவங், ப⁴ந்தே’’தி கோ²
தோ³வாரிகோ உபாலிஸ்ஸ க³ஹபதிஸ்ஸ படிஸ்ஸுத்வா யேன நிக³ண்டோ² நாடபுத்தோ
தேனுபஸங்கமி; உபஸங்கமித்வா நிக³ண்ட²ங் நாடபுத்தங் ஏதத³வோச – ‘‘உபாலி,
ப⁴ந்தே, க³ஹபதி ஏவமாஹ – ‘பவிஸ கிர, ப⁴ந்தே, ஸசே ஆகங்க²ஸீ’’’தி. அத²
கோ² நிக³ண்டோ² நாடபுத்தோ மஹதியா நிக³ண்ட²பரிஸாய ஸத்³தி⁴ங் யேன மஜ்ஜி²மா
த்³வாரஸாலா தேனுபஸங்கமி. அத² கோ² உபாலி க³ஹபதி – யங் ஸுத³ங் புப்³பே³ யதோ
பஸ்ஸதி நிக³ண்ட²ங் நாடபுத்தங் தூ³ரதோவ ஆக³ச்ச²ந்தங் தி³ஸ்வான ததோ
பச்சுக்³க³ந்த்வா யங் தத்த² ஆஸனங் அக்³க³ஞ்ச ஸெட்ட²ஞ்ச உத்தமஞ்ச பணீதஞ்ச
தங் உத்தராஸங்கே³ன ஸம்மஜ்ஜித்வா [பமஜ்ஜித்வா (ஸீ॰ பீ॰)]
பரிக்³க³ஹெத்வா நிஸீதா³பேதி ஸோ – தா³னி யங் தத்த² ஆஸனங் அக்³க³ஞ்ச
ஸெட்ட²ஞ்ச உத்தமஞ்ச பணீதஞ்ச தத்த² ஸாமங் நிஸீதி³த்வா நிக³ண்ட²ங் நாடபுத்தங்
ஏதத³வோச – ‘‘ஸங்விஜ்ஜந்தி கோ², ப⁴ந்தே, ஆஸனானி; ஸசே ஆகங்க²ஸி,
நிஸீதா³’’தி. ஏவங் வுத்தே, நிக³ண்டோ² நாடபுத்தோ உபாலிங் க³ஹபதிங் ஏதத³வோச –
‘‘உம்மத்தோஸி த்வங், க³ஹபதி, த³த்தோஸி த்வங், க³ஹபதி! ‘க³ச்சா²மஹங்,
ப⁴ந்தே, ஸமணஸ்ஸ கோ³தமஸ்ஸ வாத³ங் ஆரோபெஸ்ஸாமீ’தி க³ந்த்வா மஹதாஸி
வாத³ஸங்கா⁴டேன படிமுக்கோ ஆக³தோ. ஸெய்யதா²பி, க³ஹபதி, புரிஸோ அண்ட³ஹாரகோ
க³ந்த்வா உப்³ப⁴தேஹி அண்டே³ஹி ஆக³ச்செ²ய்ய, ஸெய்யதா² வா பன க³ஹபதி புரிஸோ
அக்கி²கஹாரகோ க³ந்த்வா உப்³ப⁴தேஹி அக்கீ²ஹி ஆக³ச்செ²ய்ய; ஏவமேவ கோ² த்வங்,
க³ஹபதி, ‘க³ச்சா²மஹங், ப⁴ந்தே, ஸமணஸ்ஸ கோ³தமஸ்ஸ வாத³ங் ஆரோபெஸ்ஸாமீ’தி
க³ந்த்வா மஹதாஸி வாத³ஸங்கா⁴டேன படிமுக்கோ ஆக³தோ. ஆவட்டோஸி கோ² த்வங்,
க³ஹபதி, ஸமணேன கோ³தமேன ஆவட்டனியா மாயாயா’’தி.
74.
‘‘ப⁴த்³தி³கா, ப⁴ந்தே, ஆவட்டனீ மாயா; கல்யாணீ, ப⁴ந்தே, ஆவட்டனீ மாயா; பியா
மே, ப⁴ந்தே, ஞாதிஸாலோஹிதா இமாய ஆவட்டனியா ஆவட்டெய்யுங்; பியானம்பி மே அஸ்ஸ
ஞாதிஸாலோஹிதானங் தீ³க⁴ரத்தங் ஹிதாய ஸுகா²ய; ஸப்³பே³ சேபி, ப⁴ந்தே,
க²த்தியா இமாய ஆவட்டனியா ஆவட்டெய்யுங்; ஸப்³பே³ஸானம்பிஸ்ஸ க²த்தியானங்
தீ³க⁴ரத்தங் ஹிதாய ஸுகா²ய; ஸப்³பே³ சேபி, ப⁴ந்தே, ப்³ராஹ்மணா…பே॰… வெஸ்ஸா…பே॰… ஸுத்³தா³ இமாய ஆவட்டனியா ஆவட்டெய்யுங்; ஸப்³பே³ஸானம்பிஸ்ஸ ஸுத்³தா³னங்
தீ³க⁴ரத்தங் ஹிதாய ஸுகா²ய; ஸதே³வகோ சேபி, ப⁴ந்தே, லோகோ ஸமாரகோ ஸப்³ரஹ்மகோ
ஸஸ்ஸமணப்³ராஹ்மணீ பஜா ஸதே³வமனுஸ்ஸா இமாய ஆவட்டனியா ஆவட்டெய்யுங்;
ஸதே³வகஸ்ஸபிஸ்ஸ லோகஸ்ஸ ஸமாரகஸ்ஸ ஸப்³ரஹ்மகஸ்ஸ ஸஸ்ஸமணப்³ராஹ்மணியா
பஜாய ஸதே³வமனுஸ்ஸாய தீ³க⁴ரத்தங் ஹிதாய ஸுகா²யாதி. தேன ஹி, ப⁴ந்தே, உபமங்
தே கரிஸ்ஸாமி. உபமாய பிதே⁴கச்சே விஞ்ஞூ புரிஸா பா⁴ஸிதஸ்ஸ அத்த²ங் ஆஜானந்தி.
75. ‘‘பூ⁴தபுப்³ப³ங் ,
ப⁴ந்தே, அஞ்ஞதரஸ்ஸ ப்³ராஹ்மணஸ்ஸ ஜிண்ணஸ்ஸ வுட்³ட⁴ஸ்ஸ மஹல்லகஸ்ஸ த³ஹரா
மாணவிகா பஜாபதீ அஹோஸி க³ப்³பி⁴னீ உபவிஜஞ்ஞா. அத² கோ², ப⁴ந்தே, ஸா மாணவிகா
தங் ப்³ராஹ்மணங் ஏதத³வோச – ‘க³ச்ச² த்வங், ப்³ராஹ்மண, ஆபணா மக்கடச்சா²பகங்
கிணித்வா ஆனேஹி, யோ மே குமாரகஸ்ஸ கீளாபனகோ ப⁴விஸ்ஸதீ’தி. ஏவங் வுத்தே, ஸோ
ப்³ராஹ்மணோ தங் மாணவிகங் ஏதத³வோச – ‘ஆக³மேஹி தாவ, போ⁴தி, யாவ விஜாயதி. ஸசே
த்வங், போ⁴தி, குமாரகங் விஜாயிஸ்ஸஸி, தஸ்ஸா தே அஹங் ஆபணா மக்கடச்சா²பகங்
கிணித்வா ஆனெஸ்ஸாமி, யோ தே குமாரகஸ்ஸ கீளாபனகோ ப⁴விஸ்ஸதி. ஸசே பன த்வங்,
போ⁴தி, குமாரிகங் விஜாயிஸ்ஸஸி, தஸ்ஸா தே அஹங் ஆபணா மக்கடச்சா²பிகங்
கிணித்வா ஆனெஸ்ஸாமி, யா தே குமாரிகாய கீளாபனிகா ப⁴விஸ்ஸதீ’தி. து³தியம்பி
கோ², ப⁴ந்தே, ஸா மாணவிகா…பே॰… ததியம்பி கோ²,
ப⁴ந்தே, ஸா மாணவிகா தங் ப்³ராஹ்மணங் ஏதத³வோச – ‘க³ச்ச² த்வங், ப்³ராஹ்மண,
ஆபணா மக்கடச்சா²பகங் கிணித்வா ஆனேஹி, யோ மே குமாரகஸ்ஸ கீளாபனகோ
ப⁴விஸ்ஸதீ’தி. அத² கோ², ப⁴ந்தே, ஸோ ப்³ராஹ்மணோ தஸ்ஸா மாணவிகாய ஸாரத்தோ
படிப³த்³த⁴சித்தோ ஆபணா மக்கடச்சா²பகங் கிணித்வா ஆனெத்வா தங் மாணவிகங்
ஏதத³வோச – ‘அயங் தே, போ⁴தி, ஆபணா மக்கடச்சா²பகோ
கிணித்வா ஆனீதோ, யோ தே குமாரகஸ்ஸ கீளாபனகோ ப⁴விஸ்ஸதீ’தி. ஏவங் வுத்தே,
ப⁴ந்தே, ஸா மாணவிகா தங் ப்³ராஹ்மணங் ஏதத³வோச – ‘க³ச்ச² த்வங், ப்³ராஹ்மண,
இமங் மக்கடச்சா²பகங் ஆதா³ய யேன ரத்தபாணி ரஜதபுத்தோ தேனுபஸங்கம;
உபஸங்கமித்வா ரத்தபாணிங் ரஜகபுத்தங் ஏவங் வதே³ஹி – இச்சா²மஹங், ஸம்ம
ரத்தபாணி, இமங் மக்கடச்சா²பகங் பீதாவலேபனங் நாம ரங்க³ஜாதங் ரஜிதங்
ஆகோடிதபச்சாகோடிதங் உப⁴தோபா⁴க³விமட்ட²’ந்தி.
‘‘அத² கோ², ப⁴ந்தே, ஸோ ப்³ராஹ்மணோ தஸ்ஸா மாணவிகாய ஸாரத்தோ படிப³த்³த⁴சித்தோ தங் மக்கடச்சா²பகங் ஆதா³ய யேன ரத்தபாணி
ரஜகபுத்தோ தேனுபஸங்கமி; உபஸங்கமித்வா ரத்தபாணிங் ரஜகபுத்தங் ஏதத³வோச –
‘இச்சா²மஹங், ஸம்ம ரத்தபாணி, இமங் மக்கடச்சா²பகங் பீதாவலேபனங் நாம
ரங்க³ஜாதங் ரஜிதங் ஆகோடிதபச்சாகோடிதங் உப⁴தோபா⁴க³விமட்ட²’ந்தி. ஏவங்
வுத்தே, ப⁴ந்தே, ரத்தபாணி ரஜகபுத்தோ தங் ப்³ராஹ்மணங் ஏதத³வோச – ‘அயங் கோ²
தே, மக்கடச்சா²பகோ ரங்க³க்க²மோ ஹி கோ², நோ ஆகோடனக்க²மோ , நோ விமஜ்ஜனக்க²மோ’தி. ஏவமேவ கோ², ப⁴ந்தே, பா³லானங் நிக³ண்டா²னங் வாதோ³ ரங்க³க்க²மோ
ஹி கோ² பா³லானங் நோ பண்டி³தானங், நோ அனுயோக³க்க²மோ, நோ விமஜ்ஜனக்க²மோ. அத²
கோ², ப⁴ந்தே, ஸோ ப்³ராஹ்மணோ அபரேன ஸமயேன நவங் து³ஸ்ஸயுக³ங் ஆதா³ய யேன
ரத்தபாணி ரஜகபுத்தோ தேனுபஸங்கமி; உபஸங்கமித்வா ரத்தபாணிங் ரஜகபுத்தங்
ஏதத³வோச – ‘இச்சா²மஹங், ஸம்ம ரத்தபாணி, இமங் நவங் து³ஸ்ஸயுக³ங் பீதாவலேபனங்
நாம ரங்க³ஜாதங் ரஜிதங் ஆகோடிதபச்சாகோடிதங் உப⁴தோபா⁴க³விமட்ட²’ந்தி. ஏவங்
வுத்தே, ப⁴ந்தே, ரத்தபாணி ரஜகபுத்தோ தங் ப்³ராஹ்மணங் ஏதத³வோச – ‘இத³ங் கோ²
தே, ப⁴ந்தே, நவங் து³ஸ்ஸயுக³ங் ரங்க³க்க²மஞ்சேவ ஆகோடனக்க²மஞ்ச
விமஜ்ஜனக்க²மஞ்சா’தி. ஏவமேவ கோ², ப⁴ந்தே, தஸ்ஸ ப⁴க³வதோ வாதோ³ அரஹதோ
ஸம்மாஸம்பு³த்³த⁴ஸ்ஸ ரங்க³க்க²மோ சேவ பண்டி³தானங் நோ பா³லானங்,
அனுயோக³க்க²மோ ச விமஜ்ஜனக்க²மோ சா’’தி.
‘‘ஸராஜிகா கோ², க³ஹபதி, பரிஸா ஏவங் ஜானாதி – ‘உபாலி
க³ஹபதி நிக³ண்ட²ஸ்ஸ நாடபுத்தஸ்ஸ ஸாவகோ’தி. கஸ்ஸ தங், க³ஹபதி, ஸாவகங்
தா⁴ரேமா’’தி? ஏவங் வுத்தே, உபாலி க³ஹபதி உட்டா²யாஸனா ஏகங்ஸங் உத்தராஸங்க³ங் கரித்வா யேன ப⁴க³வா தேனஞ்ஜலிங் பணாமெத்வா நிக³ண்ட²ங் நாடபுத்தங் ஏதத³வோச – ‘‘தேன ஹி, ப⁴ந்தே, ஸுணோஹி யஸ்ஸாஹங் ஸாவகோ’’தி –
‘‘தீ⁴ரஸ்ஸ விக³தமோஹஸ்ஸ, பபி⁴ன்னகீ²லஸ்ஸ விஜிதவிஜயஸ்ஸ;
அனீக⁴ஸ்ஸ ஸுஸமசித்தஸ்ஸ, வுத்³த⁴ஸீலஸ்ஸ ஸாது⁴பஞ்ஞஸ்ஸ;
வேஸமந்தரஸ்ஸ [வெஸ்ஸந்தரஸ்ஸ (ஸீ॰ பீ॰)] விமலஸ்ஸ, ப⁴க³வதோ தஸ்ஸ ஸாவகோஹமஸ்மி.
‘‘அகத²ங்கதி²ஸ்ஸ துஸிதஸ்ஸ, வந்தலோகாமிஸஸ்ஸ முதி³தஸ்ஸ;
கதஸமணஸ்ஸ மனுஜஸ்ஸ, அந்திமஸாரீரஸ்ஸ நரஸ்ஸ;
அனோபமஸ்ஸ விரஜஸ்ஸ, ப⁴க³வதோ தஸ்ஸ ஸாவகோஹமஸ்மி.
‘‘அஸங்ஸயஸ்ஸ குஸலஸ்ஸ, வேனயிகஸ்ஸ ஸாரதி²வரஸ்ஸ;
அனுத்தரஸ்ஸ ருசிரத⁴ம்மஸ்ஸ, நிக்கங்க²ஸ்ஸ பபா⁴ஸகஸ்ஸ [பபா⁴ஸகரஸ்ஸ (ஸீ॰ ஸ்யா॰ பீ॰)];
மானச்சி²த³ஸ்ஸ வீரஸ்ஸ, ப⁴க³வதோ தஸ்ஸ ஸாவகோஹமஸ்மி.
‘‘நிஸப⁴ஸ்ஸ அப்பமெய்யஸ்ஸ, க³ம்பீ⁴ரஸ்ஸ மோனபத்தஸ்ஸ;
கே²மங்கரஸ்ஸ வேத³ஸ்ஸ, த⁴ம்மட்ட²ஸ்ஸ ஸங்வுதத்தஸ்ஸ;
ஸங்கா³திக³ஸ்ஸ முத்தஸ்ஸ, ப⁴க³வதோ தஸ்ஸ ஸாவகோஹமஸ்மி.
‘‘நாக³ஸ்ஸ பந்தஸேனஸ்ஸ, கீ²ணஸங்யோஜனஸ்ஸ முத்தஸ்ஸ;
படிமந்தகஸ்ஸ [படிமந்தஸ்ஸ (க॰)] தோ⁴னஸ்ஸ, பன்னத⁴ஜஸ்ஸ வீதராக³ஸ்ஸ;
த³ந்தஸ்ஸ நிப்பபஞ்சஸ்ஸ, ப⁴க³வதோ தஸ்ஸ ஸாவகோஹமஸ்மி.
‘‘இஸிஸத்தமஸ்ஸ அகுஹஸ்ஸ, தேவிஜ்ஜஸ்ஸ ப்³ரஹ்மபத்தஸ்ஸ;
ந்ஹாதகஸ்ஸ [நஹாதகஸ்ஸ (ஸீ॰ ஸ்யா॰ பீ॰)] பத³கஸ்ஸ, பஸ்ஸத்³த⁴ஸ்ஸ விதி³தவேத³ஸ்ஸ;
புரிந்த³த³ஸ்ஸ ஸக்கஸ்ஸ, ப⁴க³வதோ தஸ்ஸ ஸாவகோஹமஸ்மி.
‘‘அரியஸ்ஸ பா⁴விதத்தஸ்ஸ, பத்திபத்தஸ்ஸ வெய்யாகரணஸ்ஸ;
ஸதிமதோ விபஸ்ஸிஸ்ஸ, அனபி⁴னதஸ்ஸ நோ அபனதஸ்ஸ;
அனேஜஸ்ஸ வஸிப்பத்தஸ்ஸ, ப⁴க³வதோ தஸ்ஸ ஸாவகோஹமஸ்மி .
‘‘ஸமுக்³க³தஸ்ஸ [ஸம்மக்³க³தஸ்ஸ (ஸீ॰ ஸ்யா॰ பீ॰)] ஜா²யிஸ்ஸ, அனநுக³தந்தரஸ்ஸ ஸுத்³த⁴ஸ்ஸ;
அஸிதஸ்ஸ ஹிதஸ்ஸ [அப்பஹீனஸ்ஸ (ஸீ॰ பீ॰), அப்பபீ⁴தஸ்ஸ (ஸ்யா॰)], பவிவித்தஸ்ஸ அக்³க³ப்பத்தஸ்ஸ;
திண்ணஸ்ஸ தாரயந்தஸ்ஸ, ப⁴க³வதோ தஸ்ஸ ஸாவகோஹமஸ்மி.
‘‘ஸந்தஸ்ஸ பூ⁴ரிபஞ்ஞஸ்ஸ, மஹாபஞ்ஞஸ்ஸ வீதலோப⁴ஸ்ஸ;
ததா²க³தஸ்ஸ ஸுக³தஸ்ஸ, அப்படிபுக்³க³லஸ்ஸ அஸமஸ்ஸ;
விஸாரத³ஸ்ஸ நிபுணஸ்ஸ, ப⁴க³வதோ தஸ்ஸ ஸாவகோஹமஸ்மி.
‘‘தண்ஹச்சி²த³ஸ்ஸ பு³த்³த⁴ஸ்ஸ, வீததூ⁴மஸ்ஸ அனுபலித்தஸ்ஸ;
ஆஹுனெய்யஸ்ஸ யக்க²ஸ்ஸ, உத்தமபுக்³க³லஸ்ஸ அதுலஸ்ஸ;
மஹதோ யஸக்³க³பத்தஸ்ஸ, ப⁴க³வதோ தஸ்ஸ ஸாவகோஹமஸ்மீ’’தி.
77. ‘‘கதா³ ஸஞ்ஞூள்ஹா பன தே, க³ஹபதி, இமே ஸமணஸ்ஸ கோ³தமஸ்ஸ வண்ணா’’தி? ‘‘ஸெய்யதா²பி, ப⁴ந்தே, நானாபுப்பா²னங் மஹாபுப்ப²ராஸி ,
தமேனங் த³க்கோ² மாலாகாரோ வா மாலாகாரந்தேவாஸீ வா விசித்தங் மாலங்
க³ந்தெ²ய்ய; ஏவமேவ கோ², ப⁴ந்தே, ஸோ ப⁴க³வா அனேகவண்ணோ அனேகஸதவண்ணோ. கோ ஹி,
ப⁴ந்தே, வண்ணாரஹஸ்ஸ வண்ணங் ந கரிஸ்ஸதீ’’தி? அத² கோ² நிக³ண்ட²ஸ்ஸ
நாடபுத்தஸ்ஸ ப⁴க³வதோ ஸக்காரங் அஸஹமானஸ்ஸ தத்தே²வ உண்ஹங் லோஹிதங் முக²தோ
உக்³க³ச்சீ²தி [உக்³க³ஞ்சி² (ஸீ॰ ஸ்யா॰ பீ॰)].
உபாலிஸுத்தங் நிட்டி²தங் ச²ட்ட²ங்.
7. குக்குரவதிகஸுத்தங்
78. ஏவங்
மே ஸுதங் – ஏகங் ஸமயங் ப⁴க³வா கோலியேஸு விஹரதி ஹலித்³த³வஸனங் நாம
கோலியானங் நிக³மோ. அத² கோ² புண்ணோ ச கோலியபுத்தோ கோ³வதிகோ அசேலோ ச ஸேனியோ
குக்குரவதிகோ யேன ப⁴க³வா தேனுபஸங்கமிங்ஸு; உபஸங்கமித்வா புண்ணோ கோலியபுத்தோ
கோ³வதிகோ ப⁴க³வந்தங் அபி⁴வாதெ³த்வா ஏகமந்தங் நிஸீதி³. அசேலோ பன ஸேனியோ
குக்குரவதிகோ ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங்
வீதிஸாரெத்வா குக்குரோவ பலிகுஜ்ஜித்வா [பலிகுண்டி²த்வா (ஸ்யா॰ கங்॰), பலிகு³ண்டி²த்வா (க॰)] ஏகமந்தங் நிஸீதி³. ஏகமந்தங் நிஸின்னோ கோ² புண்ணோ கோலியபுத்தோ கோ³வதிகோ ப⁴க³வந்தங் ஏதத³வோச – ‘‘அயங் ,
ப⁴ந்தே, அசேலோ ஸேனியோ குக்குரவதிகோ து³க்கரகாரகோ ச²மானிக்கி²த்தங் போ⁴ஜனங்
பு⁴ஞ்ஜதி. தஸ்ஸ தங் குக்குரவதங் தீ³க⁴ரத்தங் ஸமத்தங் ஸமாதி³ன்னங். தஸ்ஸ கா
க³தி, கோ அபி⁴ஸம்பராயோ’’தி? ‘‘அலங், புண்ண, திட்ட²தேதங்; மா மங் ஏதங்
புச்சீ²’’தி. து³தியம்பி கோ² புண்ணோ கோலியபுத்தோ கோ³வதிகோ…பே॰… ததியம்பி
கோ² புண்ணோ கோலியபுத்தோ கோ³வதிகோ ப⁴க³வந்தங் ஏதத³வோச – ‘‘அயங், ப⁴ந்தே,
அசேலோ ஸேனியோ குக்குரவதிகோ து³க்கரகாரகோ ச²மானிக்கி²த்தங் போ⁴ஜனங்
பு⁴ஞ்ஜதி. தஸ்ஸ தங் குக்குரவதங் தீ³க⁴ரத்தங் ஸமத்தங் ஸமாதி³ன்னங். தஸ்ஸ கா
க³தி, கோ அபி⁴ஸம்பராயோ’’தி?
79.
‘‘அத்³தா⁴ கோ² தே அஹங், புண்ண, ந லபா⁴மி. அலங், புண்ண, திட்ட²தேதங்; மா
மங் ஏதங் புச்சீ²தி; அபி ச த்யாஹங் ப்³யாகரிஸ்ஸாமி. இத⁴, புண்ண, ஏகச்சோ
குக்குரவதங் பா⁴வேதி பரிபுண்ணங் அப்³போ³கிண்ணங், குக்குரஸீலங் பா⁴வேதி
பரிபுண்ணங் அப்³போ³கிண்ணங், குக்குரசித்தங் பா⁴வேதி பரிபுண்ணங்
அப்³போ³கிண்ணங் , குக்குராகப்பங் பா⁴வேதி பரிபுண்ணங்
அப்³போ³கிண்ணங். ஸோ குக்குரவதங் பா⁴வெத்வா பரிபுண்ணங் அப்³போ³கிண்ணங்,
குக்குரஸீலங் பா⁴வெத்வா பரிபுண்ணங் அப்³போ³கிண்ணங், குக்குரசித்தங்
பா⁴வெத்வா பரிபுண்ணங் அப்³போ³கிண்ணங், குக்குராகப்பங் பா⁴வெத்வா பரிபுண்ணங்
அப்³போ³கிண்ணங் காயஸ்ஸ பே⁴தா³ பரங் மரணா குக்குரானங் ஸஹப்³யதங் உபபஜ்ஜதி.
ஸசே கோ² பனஸ்ஸ ஏவங்தி³ட்டி² ஹோதி – ‘இமினாஹங் ஸீலேன வா வதேன வா தபேன வா
ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா’தி, ஸாஸ்ஸ [ஸாயங் (க॰)] ஹோதி மிச்சா²தி³ட்டி². மிச்சா²தி³ட்டி²ஸ்ஸ [மிச்சா²தி³ட்டி²கஸ்ஸ (ஸீ॰)] கோ² அஹங், புண்ண, த்³வின்னங் க³தீனங் அஞ்ஞதரங் க³திங் வதா³மி – நிரயங் வா திரச்சா²னயோனிங் வா. இதி கோ², புண்ண, ஸம்பஜ்ஜமானங்
குக்குரவதங் குக்குரானங் ஸஹப்³யதங் உபனேதி, விபஜ்ஜமானங் நிரய’’ந்தி. ஏவங்
வுத்தே, அசேலோ ஸேனியோ குக்குரவதிகோ பரோதி³, அஸ்ஸூனி பவத்தேஸி.
அத² கோ² ப⁴க³வா புண்ணங் கோலியபுத்தங் கோ³வதிகங் ஏதத³வோச – ‘‘ஏதங்
கோ² தே அஹங், புண்ண, நாலத்த²ங். அலங், புண்ண, திட்ட²தேதங்; மா மங் ஏதங்
புச்சீ²’’தி. ‘‘நாஹங், ப⁴ந்தே, ஏதங் ரோதா³மி யங் மங் ப⁴க³வா ஏவமாஹ; அபி ச
மே இத³ங், ப⁴ந்தே, குக்குரவதங் தீ³க⁴ரத்தங் ஸமத்தங் ஸமாதி³ன்னங். அயங்,
ப⁴ந்தே, புண்ணோ கோலியபுத்தோ கோ³வதிகோ. தஸ்ஸ தங் கோ³வதங் தீ³க⁴ரத்தங்
ஸமத்தங் ஸமாதி³ன்னங். தஸ்ஸ கா க³தி, கோ அபி⁴ஸம்பராயோ’’தி? ‘‘அலங், ஸேனிய,
திட்ட²தேதங்; மா மங் ஏதங் புச்சீ²’’தி. து³தியம்பி கோ² அசேலோ ஸேனியோ…பே॰…
ததியம்பி கோ² அசேலோ ஸேனியோ குக்குரவதிகோ ப⁴க³வந்தங் ஏதத³வோச – ‘‘அயங்,
ப⁴ந்தே, புண்ணோ கோலியபுத்தோ கோ³வதிகோ. தஸ்ஸ தங் கோ³வதங் தீ³க⁴ரத்தங்
ஸமத்தங் ஸமாதி³ன்னங். தஸ்ஸ கா க³தி, கோ அபி⁴ஸம்பராயோ’’தி?
80.
‘‘அத்³தா⁴ கோ² தே அஹங், ஸேனிய, ந லபா⁴மி. அலங், ஸேனிய, திட்ட²தேதங்; மா
மங் ஏதங் புச்சீ²தி; அபி ச த்யாஹங் ப்³யாகரிஸ்ஸாமி. இத⁴, ஸேனிய, ஏகச்சோ
கோ³வதங் பா⁴வேதி பரிபுண்ணங் அப்³போ³கிண்ணங், கோ³ஸீலங் பா⁴வேதி பரிபுண்ணங்
அப்³போ³கிண்ணங், கோ³சித்தங் பா⁴வேதி பரிபுண்ணங் அப்³போ³கிண்ணங், க³வாகப்பங்
[க்³வாகப்பங் (க॰)] பா⁴வேதி பரிபுண்ணங்
அப்³போ³கிண்ணங். ஸோ கோ³வதங் பா⁴வெத்வா பரிபுண்ணங் அப்³போ³கிண்ணங், கோ³ஸீலங்
பா⁴வெத்வா பரிபுண்ணங் அப்³போ³கிண்ணங், கோ³சித்தங் பா⁴வெத்வா பரிபுண்ணங்
அப்³போ³கிண்ணங், க³வாகப்பங் பா⁴வெத்வா பரிபுண்ணங் அப்³போ³கிண்ணங் காயஸ்ஸ
பே⁴தா³ பரங் மரணா கு³ன்னங் ஸஹப்³யதங் உபபஜ்ஜதி. ஸசே கோ² பனஸ்ஸ ஏவங்தி³ட்டி² ஹோதி – ‘இமினாஹங் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா’தி ,
ஸாஸ்ஸ ஹோதி மிச்சா²தி³ட்டி². மிச்சா²தி³ட்டி²ஸ்ஸ கோ² அஹங், ஸேனிய,
த்³வின்னங் க³தீனங் அஞ்ஞதரங் க³திங் வதா³மி – நிரயங் வா திரச்சா²னயோனிங்
வா. இதி கோ², ஸேனிய, ஸம்பஜ்ஜமானங் கோ³வதங் கு³ன்னங் ஸஹப்³யதங் உபனேதி,
விபஜ்ஜமானங் நிரய’’ந்தி. ஏவங் வுத்தே, புண்ணோ கோலியபுத்தோ கோ³வதிகோ பரோதி³,
அஸ்ஸூனி பவத்தேஸி.
அத² கோ² ப⁴க³வா அசேலங் ஸேனியங் குக்குரவதிகங் ஏதத³வோச – ‘‘ஏதங் கோ² தே அஹங், ஸேனிய , நாலத்த²ங். அலங், ஸேனிய, திட்ட²தேதங்; மா மங்
ஏதங் புச்சீ²’’தி. ‘‘நாஹங், ப⁴ந்தே, ஏதங் ரோதா³மி யங் மங் ப⁴க³வா ஏவமாஹ;
அபி ச மே இத³ங், ப⁴ந்தே, கோ³வதங் தீ³க⁴ரத்தங் ஸமத்தங் ஸமாதி³ன்னங். ஏவங்
பஸன்னோ அஹங், ப⁴ந்தே, ப⁴க³வதி; பஹோதி ப⁴க³வா ததா² த⁴ம்மங் தே³ஸேதுங் யதா²
அஹங் சேவிமங் கோ³வதங் பஜஹெய்யங், அயஞ்சேவ அசேலோ ஸேனியோ குக்குரவதிகோ தங்
குக்குரவதங் பஜஹெய்யா’’தி. ‘‘தேன ஹி, புண்ண, ஸுணாஹி, ஸாது⁴கங் மனஸி கரோஹி,
பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² புண்ணோ கோலியபுத்தோ கோ³வதிகோ
ப⁴க³வதோ பச்சஸ்ஸோஸி. ப⁴க³வா ஏதத³வோச –
81.
‘‘சத்தாரிமானி, புண்ண, கம்மானி மயா ஸயங் அபி⁴ஞ்ஞா ஸச்சி²கத்வா பவேதி³தானி.
கதமானி சத்தாரி? அத்தி², புண்ண, கம்மங் கண்ஹங் கண்ஹவிபாகங்; அத்தி²,
புண்ண, கம்மங் ஸுக்கங் ஸுக்கவிபாகங்; அத்தி², புண்ண, கம்மங் கண்ஹஸுக்கங்
கண்ஹஸுக்கவிபாகங்; அத்தி², புண்ண, கம்மங் அகண்ஹங் அஸுக்கங்
அகண்ஹஅஸுக்கவிபாகங், கம்மக்க²யாய ஸங்வத்ததி .
‘‘கதமஞ்ச, புண்ண, கம்மங் கண்ஹங் கண்ஹவிபாகங்? இத⁴, புண்ண, ஏகச்சோ ஸப்³யாப³ஜ்ஜ²ங் [ஸப்³யாபஜ்ஜ²ங் (ஸீ॰ ஸ்யா॰ கங்॰)]
காயஸங்கா²ரங் அபி⁴ஸங்க²ரோதி, ஸப்³யாப³ஜ்ஜ²ங் வசீஸங்கா²ரங் அபி⁴ஸங்க²ரோதி,
ஸப்³யாப³ஜ்ஜ²ங் மனோஸங்கா²ரங் அபி⁴ஸங்க²ரோதி. ஸோ ஸப்³யாப³ஜ்ஜ²ங்
காயஸங்கா²ரங் அபி⁴ஸங்க²ரித்வா, ஸப்³யாப³ஜ்ஜ²ங் வசீஸங்கா²ரங்
அபி⁴ஸங்க²ரித்வா, ஸப்³யாப³ஜ்ஜ²ங் மனோஸங்கா²ரங் அபி⁴ஸங்க²ரித்வா,
ஸப்³யாப³ஜ்ஜ²ங் லோகங் உபபஜ்ஜதி. தமேனங் ஸப்³யாப³ஜ்ஜ²ங் லோகங் உபபன்னங்
ஸமானங் ஸப்³யாப³ஜ்ஜா² ப²ஸ்ஸா பு²ஸந்தி. ஸோ ஸப்³யாப³ஜ்ஜே²ஹி ப²ஸ்ஸேஹி
பு²ட்டோ² ஸமானோ ஸப்³யாப³ஜ்ஜ²ங் வேத³னங் வேதே³தி ஏகந்தது³க்க²ங், ஸெய்யதா²பி
ஸத்தா நேரயிகா . இதி கோ², புண்ண, பூ⁴தா பூ⁴தஸ்ஸ
உபபத்தி ஹோதி; யங் கரோதி தேன உபபஜ்ஜதி, உபபன்னமேனங் ப²ஸ்ஸா பு²ஸந்தி.
ஏவங்பாஹங், புண்ண, ‘கம்மதா³யாதா³ ஸத்தா’தி வதா³மி. இத³ங் வுச்சதி, புண்ண,
கம்மங் கண்ஹங் கண்ஹவிபாகங்.
‘‘கதமஞ்ச, புண்ண, கம்மங் ஸுக்கங் ஸுக்கவிபாகங்? இத⁴,
புண்ண, ஏகச்சோ அப்³யாப³ஜ்ஜ²ங் காயஸங்கா²ரங் அபி⁴ஸங்க²ரோதி, அப்³யாப³ஜ்ஜ²ங்
வசீஸங்கா²ரங் அபி⁴ஸங்க²ரோதி, அப்³யாப³ஜ்ஜ²ங் மனோஸங்கா²ரங் அபி⁴ஸங்க²ரோதி.
ஸோ அப்³யாப³ஜ்ஜ²ங் காயஸங்கா²ரங் அபி⁴ஸங்க²ரித்வா, அப்³யாப³ஜ்ஜ²ங்
வசீஸங்கா²ரங் அபி⁴ஸங்க²ரித்வா, அப்³யாப³ஜ்ஜ²ங் மனோஸங்கா²ரங்
அபி⁴ஸங்க²ரித்வா அப்³யாப³ஜ்ஜ²ங் லோகங் உபபஜ்ஜதி. தமேனங் அப்³யாப³ஜ்ஜ²ங்
லோகங் உபபன்னங் ஸமானங் அப்³யாப³ஜ்ஜா² ப²ஸ்ஸா பு²ஸந்தி. ஸோ அப்³யாப³ஜ்ஜே²ஹி ப²ஸ்ஸேஹி பு²ட்டோ² ஸமானோ அப்³யாப³ஜ்ஜ²ங் வேத³னங் வேதே³தி ஏகந்தஸுக²ங், ஸெய்யதா²பி தே³வா ஸுப⁴கிண்ஹா. இதி கோ² ,
புண்ண, பூ⁴தா பூ⁴தஸ்ஸ உபபத்தி ஹோதி; யங் கரோதி தேன உபபஜ்ஜதி, உபபன்னமேனங்
ப²ஸ்ஸா பு²ஸந்தி. ஏவங்பாஹங், புண்ண, ‘கம்மதா³யாதா³ ஸத்தா’தி வதா³மி. இத³ங்
வுச்சதி, புண்ண, கம்மங் ஸுக்கங் ஸுக்கவிபாகங்.
‘‘கதமஞ்ச, புண்ண, கம்மங் கண்ஹஸுக்கங்
கண்ஹஸுக்கவிபாகங்? இத⁴, புண்ண, ஏகச்சோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி
காயஸங்கா²ரங் அபி⁴ஸங்க²ரோதி, ஸப்³யாப³ஜ்ஜ²ம்பி அப்³யாப³ஜ்ஜ²ம்பி
வசீஸங்கா²ரங் அபி⁴ஸங்க²ரோதி, ஸப்³யாப³ஜ்ஜ²ம்பி அப்³யாப³ஜ்ஜ²ம்பி
மனோஸங்கா²ரங் அபி⁴ஸங்க²ரோதி. ஸோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி
காயஸங்கா²ரங் அபி⁴ஸங்க²ரித்வா, ஸப்³யாப³ஜ்ஜ²ம்பி அப்³யாப³ஜ்ஜ²ம்பி
வசீஸங்கா²ரங் அபி⁴ங்க²ரித்வா, ஸப்³யாப³ஜ்ஜ²ம்பி அப்³யாப³ஜ்ஜ²ம்பி
மனோஸங்கா²ரங் அபி⁴ஸங்க²ரித்வா ஸப்³யாப³ஜ்ஜ²ம்பி அப்³யாப³ஜ்ஜ²ம்பி லோகங்
உபபஜ்ஜதி. தமேனங் ஸப்³யாப³ஜ்ஜ²ம்பி அப்³யாப³ஜ்ஜ²ம்பி லோகங் உபபன்னங் ஸமானங்
ஸப்³யாப³ஜ்ஜா²பி அப்³யாப³ஜ்ஜா²பி ப²ஸ்ஸா பு²ஸந்தி. ஸோ ஸப்³யாப³ஜ்ஜே²ஹிபி
அப்³யாப³ஜ்ஜே²ஹிபி ப²ஸ்ஸேஹி பு²ட்டோ² ஸமானோ ஸப்³யாப³ஜ்ஜ²ம்பி
அப்³யாப³ஜ்ஜ²ம்பி வேத³னங் வேதே³தி வோகிண்ணஸுக²து³க்க²ங், ஸெய்யதா²பி
மனுஸ்ஸா ஏகச்சே ச தே³வா ஏகச்சே ச வினிபாதிகா. இதி கோ², புண்ண, பூ⁴தா
பூ⁴தஸ்ஸ உபபத்தி ஹோதி; யங் கரோதி தேன உபபஜ்ஜதி. உபபன்னமேனங் ப²ஸ்ஸா
பு²ஸந்தி. ஏவங்பாஹங், புண்ண, ‘கம்மதா³யாதா³ ஸத்தா’தி வதா³மி. இத³ங்
வுச்சதி, புண்ண, கம்மங் கண்ஹஸுக்கங் கண்ஹஸுக்கவிபாகங்.
‘‘கதமஞ்ச , புண்ண, கம்மங் அகண்ஹங் அஸுக்கங் அகண்ஹஅஸுக்கவிபாகங், கம்மக்க²யாய ஸங்வத்ததி? தத்ர, புண்ண, யமித³ங் கம்மங் கண்ஹங் கண்ஹவிபாகங் தஸ்ஸ பஹானாய யா சேதனா, யமித³ங் [யம்பித³ங் (ஸீ॰ பீ॰)] கம்மங் ஸுக்கங் ஸுக்கவிபாகங் தஸ்ஸ பஹானாய யா சேதனா, யமித³ங் [யம்பித³ங் (ஸீ॰ பீ॰)]
கம்மங் கண்ஹஸுக்கங் கண்ஹஸுக்கவிபாகங் தஸ்ஸ பஹானாய யா சேதனா – இத³ங்
வுச்சதி, புண்ண, கம்மங் அகண்ஹங் அஸுக்கங் அகண்ஹஅஸுக்கவிபாகங், கம்மக்க²யாய
ஸங்வத்ததீதி. இமானி கோ², புண்ண, சத்தாரி கம்மானி மயா ஸயங் அபி⁴ஞ்ஞா
ஸச்சி²கத்வா பவேதி³தானீ’’தி.
82.
ஏவங் வுத்தே, புண்ணோ கோலியபுத்தோ கோ³வதிகோ ப⁴க³வந்தங் ஏதத³வோச –
‘‘அபி⁴க்கந்தங், ப⁴ந்தே, அபி⁴க்கந்தங், ப⁴ந்தே! ஸெய்யதா²பி, ப⁴ந்தே…பே॰…
உபாஸகங் மங் ப⁴க³வா தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி. அசேலோ
பன ஸேனியோ குக்குரவதிகோ ப⁴க³வந்தங் ஏதத³வோச – ‘‘அபி⁴க்கந்தங், ப⁴ந்தே,
அபி⁴க்கந்தங், ப⁴ந்தே! ஸெய்யதா²பி, ப⁴ந்தே…பே॰… பகாஸிதோ. ஏஸாஹங், ப⁴ந்தே,
ப⁴க³வந்தங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. லபெ⁴ய்யாஹங்,
ப⁴ந்தே, ப⁴க³வதோ ஸந்திகே பப்³ப³ஜ்ஜங், லபெ⁴ய்யங் உபஸம்பத³’’ந்தி. ‘‘யோ கோ²,
ஸேனிய , அஞ்ஞதித்தி²யபுப்³போ³ இமஸ்மிங் த⁴ம்மவினயே
ஆகங்க²தி பப்³ப³ஜ்ஜங், ஆகங்க²தி உபஸம்பத³ங் ஸோ சத்தாரோ மாஸே பரிவஸதி.
சதுன்னங் மாஸானங் அச்சயேன ஆரத்³த⁴சித்தா பி⁴க்கூ² பப்³பா³ஜெந்தி,
உபஸம்பாதெ³ந்தி பி⁴க்கு²பா⁴வாய. அபி ச மெத்த² புக்³க³லவேமத்ததா
விதி³தா’’தி.
‘‘ஸசே, ப⁴ந்தே, அஞ்ஞதித்தி²யபுப்³பா³ இமஸ்மிங்
த⁴ம்மவினயே ஆகங்க²ந்தா பப்³ப³ஜ்ஜங் ஆகங்க²ந்தா உபஸம்பத³ங் தே சத்தாரோ மாஸே
பரிவஸந்தி சதுன்னங் மாஸானங் அச்சயேன ஆரத்³த⁴சித்தா பி⁴க்கூ² பப்³பா³ஜெந்தி
உபஸம்பாதெ³ந்தி பி⁴க்கு²பா⁴வாய, அஹங் சத்தாரி வஸ்ஸானி பரிவஸிஸ்ஸாமி.
சதுன்னங் வஸ்ஸானங் அச்சயேன ஆரத்³த⁴சித்தா பி⁴க்கூ² பப்³பா³ஜெந்து,
உபஸம்பாதெ³ந்து பி⁴க்கு²பா⁴வாயா’’தி. அலத்த² கோ² அசேலோ ஸேனியோ குக்குரவதிகோ
ப⁴க³வதோ ஸந்திகே பப்³ப³ஜ்ஜங், அலத்த² உபஸம்பத³ங். அசிரூபஸம்பன்னோ கோ²
பனாயஸ்மா ஸேனியோ ஏகோ வூபகட்டோ² அப்பமத்தோ ஆதாபீ
பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா
அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘கீ²ணா ஜாதி, வுஸிதங்
ப்³ரஹ்மசரியங், கதங் கரணீயங், நாபரங் இத்த²த்தாயா’தி அப்³ப⁴ஞ்ஞாஸி. அஞ்ஞதரோ
கோ² பனாயஸ்மா ஸேனியோ அரஹதங் அஹோஸீதி.
குக்குரவதிகஸுத்தங் நிட்டி²தங் ஸத்தமங்.
8. அப⁴யராஜகுமாரஸுத்தங்
83. ஏவங்
மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அத²
கோ² அப⁴யோ ராஜகுமாரோ யேன நிக³ண்டோ² நாடபுத்தோ தேனுபஸங்கமி; உபஸங்கமித்வா
நிக³ண்ட²ங் நாடபுத்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங்
கோ² அப⁴யங் ராஜகுமாரங் நிக³ண்டோ² நாடபுத்தோ ஏதத³வோச – ‘‘ஏஹி த்வங்,
ராஜகுமார, ஸமணஸ்ஸ கோ³தமஸ்ஸ வாத³ங் ஆரோபேஹி. ஏவங் தே
கல்யாணோ கித்திஸத்³தோ³ அப்³பு⁴க்³க³ச்சி²ஸ்ஸதி – ‘அப⁴யேன ராஜகுமாரேன
ஸமணஸ்ஸ கோ³தமஸ்ஸ ஏவங் மஹித்³தி⁴கஸ்ஸ ஏவங் மஹானுபா⁴வஸ்ஸ வாதோ³ ஆரோபிதோ’’’தி.
‘‘யதா² கத²ங் பனாஹங், ப⁴ந்தே, ஸமணஸ்ஸ கோ³தமஸ்ஸ ஏவங் மஹித்³தி⁴கஸ்ஸ ஏவங்
மஹானுபா⁴வஸ்ஸ வாத³ங் ஆரோபெஸ்ஸாமீ’’தி? ‘‘ஏஹி த்வங், ராஜகுமார, யேன ஸமணோ
கோ³தமோ தேனுபஸங்கம; உபஸங்கமித்வா ஸமணங் கோ³தமங் ஏவங் வதே³ஹி – ‘பா⁴ஸெய்ய நு
கோ², ப⁴ந்தே, ததா²க³தோ தங் வாசங் யா ஸா வாசா பரேஸங் அப்பியா அமனாபா’தி?
ஸசே தே ஸமணோ கோ³தமோ ஏவங் புட்டோ² ஏவங் ப்³யாகரோதி – ‘பா⁴ஸெய்ய, ராஜகுமார,
ததா²க³தோ தங் வாசங் யா ஸா வாசா பரேஸங் அப்பியா அமனாபா’தி, தமேனங் த்வங்
ஏவங் வதெ³ய்யாஸி – ‘அத² கிஞ்சரஹி தே, ப⁴ந்தே, புது²ஜ்ஜனேன நானாகரணங்?
புது²ஜ்ஜனோபி ஹி தங் வாசங் பா⁴ஸெய்ய யா ஸா வாசா பரேஸங் அப்பியா அமனாபா’தி.
ஸசே பன தே ஸமணோ கோ³தமோ ஏவங் புட்டோ² ஏவங் ப்³யாகரோதி – ‘ந, ராஜகுமார, ததா²க³தோ தங் வாசங் பா⁴ஸெய்ய யா ஸா வாசா பரேஸங்
அப்பியா அமனாபா’தி, தமேனங் த்வங் ஏவங் வதெ³ய்யாஸி – ‘அத² கிஞ்சரஹி தே,
ப⁴ந்தே, தே³வத³த்தோ ப்³யாகதோ – ‘‘ஆபாயிகோ தே³வத³த்தோ, நேரயிகோ தே³வத³த்தோ,
கப்பட்டோ² தே³வத³த்தோ, அதேகிச்சோ² தே³வத³த்தோ’’தி? தாய ச பன தே வாசாய
தே³வத³த்தோ குபிதோ அஹோஸி அனத்தமனோ’தி. இமங் கோ² தே, ராஜகுமார, ஸமணோ கோ³தமோ
உப⁴தோகோடிகங் பஞ்ஹங் புட்டோ² ஸமானோ நேவ ஸக்கி²தி உக்³கி³லிதுங் ந ஸக்கி²தி
ஓகி³லிதுங். ஸெய்யதா²பி நாம புரிஸஸ்ஸ அயோஸிங்கா⁴டகங் கண்டே² விலக்³க³ங், ஸோ
நேவ ஸக்குணெய்ய உக்³கி³லிதுங் ந ஸக்குணெய்ய ஓகி³லிதுங்; ஏவமேவ கோ² தே,
ராஜகுமார, ஸமணோ கோ³தமோ இமங் உப⁴தோகோடிகங் பஞ்ஹங் புட்டோ² ஸமானோ நேவ
ஸக்கி²தி உக்³கி³லிதுங் ந ஸக்கி²தி ஓகி³லிது’’ந்தி. ‘‘ஏவங், ப⁴ந்தே’’தி கோ²
அப⁴யோ ராஜகுமாரோ நிக³ண்ட²ஸ்ஸ நாடபுத்தஸ்ஸ படிஸ்ஸுத்வா உட்டா²யாஸனா
நிக³ண்ட²ங் நாடபுத்தங் அபி⁴வாதெ³த்வா பத³க்கி²ணங் கத்வா யேன ப⁴க³வா
தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³.
84. ஏகமந்தங் நிஸின்னஸ்ஸ கோ² அப⁴யஸ்ஸ ராஜகுமாரஸ்ஸ ஸூரியங் [ஸுரியங் (ஸீ॰ ஸ்யா॰ கங்॰ பீ॰)] உல்லோகெத்வா ஏதத³ஹோஸி – ‘‘அகாலோ கோ² அஜ்ஜ ப⁴க³வதோ வாத³ங் ஆரோபேதுங் .
ஸ்வே தா³னாஹங் ஸகே நிவேஸனே ப⁴க³வதோ வாத³ங் ஆரோபெஸ்ஸாமீ’’தி ப⁴க³வந்தங்
ஏதத³வோச – ‘‘அதி⁴வாஸேது மே, ப⁴ந்தே, ப⁴க³வா ஸ்வாதனாய அத்தசதுத்தோ²
ப⁴த்த’’ந்தி. அதி⁴வாஸேஸி ப⁴க³வா துண்ஹீபா⁴வேன. அத²
கோ² அப⁴யோ ராஜகுமாரோ ப⁴க³வதோ அதி⁴வாஸனங் விதி³த்வா உட்டா²யாஸனா ப⁴க³வந்தங்
அபி⁴வாதெ³த்வா பத³க்கி²ணங் கத்வா பக்காமி. அத² கோ² ப⁴க³வா தஸ்ஸா ரத்தியா
அச்சயேன புப்³ப³ண்ஹஸமயங் நிவாஸெத்வா பத்தசீவரமாதா³ய யேன அப⁴யஸ்ஸ
ராஜகுமாரஸ்ஸ நிவேஸனங் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³.
அத² கோ² அப⁴யோ ராஜகுமாரோ ப⁴க³வந்தங் பணீதேன கா²த³னீயேன போ⁴ஜனீயேன ஸஹத்தா²
ஸந்தப்பேஸி ஸம்பவாரேஸி. அத² கோ² அப⁴யோ ராஜகுமாரோ ப⁴க³வந்தங் பு⁴த்தாவிங்
ஓனீதபத்தபாணிங் அஞ்ஞதரங் நீசங் ஆஸனங் க³ஹெத்வா ஏகமந்தங் நிஸீதி³.
85.
ஏகமந்தங் நிஸின்னோ கோ² அப⁴யோ ராஜகுமாரோ ப⁴க³வந்தங் ஏதத³வோச – ‘‘பா⁴ஸெய்ய
நு கோ², ப⁴ந்தே, ததா²க³தோ தங் வாசங் யா ஸா வாசா பரேஸங் அப்பியா அமனாபா’’தி?
‘‘ந க்²வெத்த², ராஜகுமார, ஏகங்ஸேனா’’தி. ‘‘எத்த², ப⁴ந்தே, அனஸ்ஸுங்
நிக³ண்டா²’’தி. ‘‘கிங் பன த்வங், ராஜகுமார, ஏவங் வதே³ஸி – ‘எத்த² ,
ப⁴ந்தே, அனஸ்ஸுங் நிக³ண்டா²’’’தி? ‘‘இதா⁴ஹங், ப⁴ந்தே, யேன நிக³ண்டோ²
நாடபுத்தோ தேனுபஸங்கமி; உபஸங்கமித்வா நிக³ண்ட²ங் நாடபுத்தங் அபி⁴வாதெ³த்வா
ஏகமந்தங் நிஸீதி³ங். ஏகமந்தங் நிஸின்னங் கோ² மங், ப⁴ந்தே, நிக³ண்டோ²
நாடபுத்தோ ஏதத³வோச – ‘ஏஹி த்வங், ராஜகுமார, ஸமணஸ்ஸ கோ³தமஸ்ஸ வாத³ங்
ஆரோபேஹி. ஏவங் தே கல்யாணோ கித்திஸத்³தோ³ அப்³பு⁴க்³க³ச்சி²ஸ்ஸதி – அப⁴யேன
ராஜகுமாரேன ஸமணஸ்ஸ கோ³தமஸ்ஸ ஏவங் மஹித்³தி⁴கஸ்ஸ ஏவங் மஹானுபா⁴வஸ்ஸ வாதோ³
ஆரோபிதோ’தி. ஏவங் வுத்தே, அஹங், ப⁴ந்தே, நிக³ண்ட²ங் நாடபுத்தங் ஏதத³வோசங் –
‘யதா² கத²ங் பனாஹங் , ப⁴ந்தே, ஸமணஸ்ஸ கோ³தமஸ்ஸ ஏவங்
மஹித்³தி⁴கஸ்ஸ ஏவங் மஹானுபா⁴வஸ்ஸ வாத³ங் ஆரோபெஸ்ஸாமீ’தி? ‘ஏஹி த்வங்,
ராஜகுமார, யேன ஸமணோ கோ³தமோ தேனுபஸங்கம; உபஸங்கமித்வா ஸமணங் கோ³தமங் ஏவங்
வதே³ஹி – பா⁴ஸெய்ய நு கோ², ப⁴ந்தே, ததா²க³தோ தங் வாசங் யா ஸா வாசா பரேஸங்
அப்பியா அமனாபாதி? ஸசே தே ஸமணோ கோ³தமோ ஏவங் புட்டோ² ஏவங் ப்³யாகரோதி –
பா⁴ஸெய்ய, ராஜகுமார, ததா²க³தோ தங் வாசங் யா ஸா வாசா பரேஸங் அப்பியா
அமனாபாதி, தமேனங் த்வங் ஏவங் வதெ³ய்யாஸி – அத² கிஞ்சரஹி தே, ப⁴ந்தே,
புது²ஜ்ஜனேன நானாகரணங்? புது²ஜ்ஜனோபி ஹி தங் வாசங் பா⁴ஸெய்ய
யா ஸா வாசா பரேஸங் அப்பியா அமனாபாதி. ஸசே பன தே ஸமணோ கோ³தமோ ஏவங் புட்டோ²
ஏவங் ப்³யாகரோதி – ந, ராஜகுமார, ததா²க³தோ தங் வாசங் பா⁴ஸெய்ய யா ஸா
வாசா பரேஸங் அப்பியா அமனாபாதி, தமேனங் த்வங் ஏவங் வதெ³ய்யாஸி – அத²
கிஞ்சரஹி தே, ப⁴ந்தே, தே³வத³த்தோ ப்³யாகதோ – ஆபாயிகோ தே³வத³த்தோ, நேரயிகோ
தே³வத³த்தோ, கப்பட்டோ² தே³வத³த்தோ, அதேகிச்சோ² தே³வத³த்தோதி? தாய ச பன தே
வாசாய தே³வத³த்தோ குபிதோ அஹோஸி அனத்தமனோதி. இமங் கோ² தே, ராஜகுமார, ஸமணோ
கோ³தமோ உப⁴தோகோடிகங் பஞ்ஹங் புட்டோ² ஸமானோ நேவ
ஸக்கி²தி உக்³கி³லிதுங் ந ஸக்கி²தி ஓகி³லிதுங். ஸெய்யதா²பி நாம புரிஸஸ்ஸ
அயோஸிங்கா⁴டகங் கண்டே² விலக்³க³ங், ஸோ நேவ ஸக்குணெய்ய உக்³கி³லிதுங் ந
ஸக்குணெய்ய ஓகி³லிதுங்; ஏவமேவ கோ² தே, ராஜகுமார, ஸமணோ கோ³தமோ இமங்
உப⁴தோகோடிகங் பஞ்ஹங் புட்டோ² ஸமானோ நேவ ஸக்கி²தி உக்³கி³லிதுங் ந ஸக்கி²தி
ஓகி³லிது’’’ந்தி.
86.
தேன கோ² பன ஸமயேன த³ஹரோ குமாரோ மந்தோ³ உத்தானஸெய்யகோ அப⁴யஸ்ஸ ராஜகுமாரஸ்ஸ
அங்கே நிஸின்னோ ஹோதி. அத² கோ² ப⁴க³வா அப⁴யங் ராஜகுமாரங் ஏதத³வோச – ‘‘தங்
கிங் மஞ்ஞஸி, ராஜகுமார, ஸசாயங் குமாரோ துய்ஹங் வா பமாத³மன்வாய தா⁴தியா வா பமாத³மன்வாய கட்ட²ங் வா கட²லங் [கத²லங் (க॰)] வா முகே² ஆஹரெய்ய, கிந்தி நங் கரெய்யாஸீ’’தி? ‘‘ஆஹரெய்யஸ்ஸாஹங், ப⁴ந்தே. ஸசே, ப⁴ந்தே, ந ஸக்குணெய்யங் ஆதி³கேனேவ ஆஹத்துங் [ஆஹரிதுங் (ஸ்யா॰ கங்॰)], வாமேன ஹத்தே²ன ஸீஸங் பரிக்³க³ஹெத்வா [பக்³க³ஹெத்வா (ஸீ॰)]
த³க்கி²ணேன ஹத்தே²ன வங்கங்கு³லிங் கரித்வா ஸலோஹிதம்பி ஆஹரெய்யங். தங்
கிஸ்ஸ ஹேது? அத்தி² மே, ப⁴ந்தே, குமாரே அனுகம்பா’’தி. ‘‘ஏவமேவ கோ²,
ராஜகுமார, யங் ததா²க³தோ வாசங் ஜானாதி அபூ⁴தங் அதச்ச²ங் அனத்த²ஸங்ஹிதங் ஸா ச
பரேஸங் அப்பியா அமனாபா, ந தங் ததா²க³தோ வாசங் பா⁴ஸதி. யம்பி ததா²க³தோ
வாசங் ஜானாதி பூ⁴தங் தச்ச²ங் அனத்த²ஸங்ஹிதங் ஸா ச பரேஸங் அப்பியா அமனாபா,
தம்பி ததா²க³தோ வாசங் ந பா⁴ஸதி. யஞ்ச கோ² ததா²க³தோ வாசங் ஜானாதி பூ⁴தங்
தச்ச²ங் அத்த²ஸங்ஹிதங் ஸா ச பரேஸங் அப்பியா அமனாபா, தத்ர காலஞ்ஞூ ததா²க³தோ
ஹோதி தஸ்ஸா வாசாய வெய்யாகரணாய. யங் ததா²க³தோ வாசங் ஜானாதி அபூ⁴தங் அதச்ச²ங்
அனத்த²ஸங்ஹிதங் ஸா ச பரேஸங் பியா மனாபா, ந தங்
ததா²க³தோ வாசங் பா⁴ஸதி. யம்பி ததா²க³தோ வாசங் ஜானாதி பூ⁴தங் தச்ச²ங்
அனத்த²ஸங்ஹிதங் ஸா ச பரேஸங் பியா மனாபா தம்பி ததா²க³தோ வாசங் ந பா⁴ஸதி.
யஞ்ச ததா²க³தோ வாசங் ஜானாதி பூ⁴தங் தச்ச²ங் அத்த²ஸங்ஹிதங் ஸா
ச பரேஸங் பியா மனாபா, தத்ர காலஞ்ஞூ ததா²க³தோ ஹோதி தஸ்ஸா வாசாய
வெய்யாகரணாய. தங் கிஸ்ஸ ஹேது? அத்தி², ராஜகுமார, ததா²க³தஸ்ஸ ஸத்தேஸு
அனுகம்பா’’தி.
87.
‘‘யேமே, ப⁴ந்தே, க²த்தியபண்டி³தாபி ப்³ராஹ்மணபண்டி³தாபி க³ஹபதிபண்டி³தாபி
ஸமணபண்டி³தாபி பஞ்ஹங் அபி⁴ஸங்க²ரித்வா ததா²க³தங் உபஸங்கமித்வா புச்ச²ந்தி,
புப்³பே³வ நு கோ², ஏதங், ப⁴ந்தே , ப⁴க³வதோ சேதஸோ
பரிவிதக்கிதங் ஹோதி ‘யே மங் உபஸங்கமித்வா ஏவங் புச்சி²ஸ்ஸந்தி தேஸாஹங் ஏவங்
புட்டோ² ஏவங் ப்³யாகரிஸ்ஸாமீ’தி, உதா³ஹு டா²னஸோவேதங் ததா²க³தங்
படிபா⁴தீ’’தி?
‘‘தேன ஹி, ராஜகுமார, தஞ்ஞேவெத்த² படிபுச்சி²ஸ்ஸாமி,
யதா² தே க²மெய்ய ததா² நங் ப்³யாகரெய்யாஸி. தங் கிங் மஞ்ஞஸி, ராஜகுமார,
குஸலோ த்வங் ரத²ஸ்ஸ அங்க³பச்சங்கா³ன’’ந்தி?
‘‘ஏவங், ப⁴ந்தே, குஸலோ அஹங் ரத²ஸ்ஸ அங்க³பச்சங்கா³ன’’ந்தி.
‘‘தங் கிங் மஞ்ஞஸி, ராஜகுமார, யே தங் உபஸங்கமித்வா
ஏவங் புச்செ²ய்யுங் – ‘கிங் நாமித³ங் ரத²ஸ்ஸ அங்க³பச்சங்க³’ந்தி? புப்³பே³வ
நு கோ² தே ஏதங் சேதஸோ பரிவிதக்கிதங் அஸ்ஸ ‘யே மங் உபஸங்கமித்வா ஏவங் புச்சி²ஸ்ஸந்தி தேஸாஹங் ஏவங் புட்டோ² ஏவங் ப்³யாகரிஸ்ஸாமீ’தி, உதா³ஹு டா²னஸோவேதங் படிபா⁴ஸெய்யா’’தி?
‘‘அஹஞ்ஹி, ப⁴ந்தே, ரதி²கோ ஸஞ்ஞாதோ குஸலோ ரத²ஸ்ஸ
அங்க³பச்சங்கா³னங். ஸப்³பா³னி மே ரத²ஸ்ஸ அங்க³பச்சங்கா³னி ஸுவிதி³தானி.
டா²னஸோவேதங் மங் படிபா⁴ஸெய்யா’’தி .
‘‘ஏவமேவ கோ², ராஜகுமார, யே தே க²த்தியபண்டி³தாபி
ப்³ராஹ்மணபண்டி³தாபி க³ஹபதிபண்டி³தாபி ஸமணபண்டி³தாபி பஞ்ஹங்
அபி⁴ஸங்க²ரித்வா ததா²க³தங் உபஸங்கமித்வா புச்ச²ந்தி, டா²னஸோவேதங் ததா²க³தங்
படிபா⁴தி. தங் கிஸ்ஸ ஹேது? ஸா ஹி, ராஜகுமார, ததா²க³தஸ்ஸ த⁴ம்மதா⁴து
ஸுப்படிவித்³தா⁴ யஸ்ஸா த⁴ம்மதா⁴துயா ஸுப்படிவித்³த⁴த்தா டா²னஸோவேதங்
ததா²க³தங் படிபா⁴தீ’’தி.
ஏவங் வுத்தே, அப⁴யோ ராஜகுமாரோ ப⁴க³வந்தங் ஏதத³வோச –
‘‘அபி⁴க்கந்தங், ப⁴ந்தே, அபி⁴க்கந்தங், ப⁴ந்தே…பே॰… அஜ்ஜதக்³கே³ பாணுபேதங்
ஸரணங் க³த’’ந்தி.
அப⁴யராஜகுமாரஸுத்தங் நிட்டி²தங் அட்ட²மங்.
9. ப³ஹுவேத³னீயஸுத்தங்
88. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. அத² கோ² பஞ்சகங்கோ³ த²பதி யேனாயஸ்மா உதா³யீ தேனுபஸங்கமி;
உபஸங்கமித்வா ஆயஸ்மந்தங் உதா³யிங் அபி⁴வாதெ³த்வா ஏகமந்தங் நிஸீதி³.
ஏகமந்தங் நிஸின்னோ கோ² பஞ்சகங்கோ³ த²பதி ஆயஸ்மந்தங் உதா³யிங் ஏதத³வோச –
‘‘கதி நு கோ², ப⁴ந்தே உதா³யி, வேத³னா வுத்தா ப⁴க³வதா’’தி? ‘‘திஸ்ஸோ கோ²,
த²பதி [க³ஹபதி (ஸ்யா॰ கங்॰ பீ॰)], வேத³னா வுத்தா ப⁴க³வதா. ஸுகா² வேத³னா, து³க்கா² வேத³னா, அது³க்க²மஸுகா² வேத³னா – இமா
கோ², த²பதி, திஸ்ஸோ வேத³னா வுத்தா ப⁴க³வதா’’தி. ஏவங் வுத்தே, பஞ்சகங்கோ³
த²பதி ஆயஸ்மந்தங் உதா³யிங் ஏதத³வோச – ‘‘ந கோ², ப⁴ந்தே உதா³யி, திஸ்ஸோ
வேத³னா வுத்தா ப⁴க³வதா; த்³வே வேத³னா வுத்தா ப⁴க³வதா – ஸுகா² வேத³னா,
து³க்கா² வேத³னா. யாயங், ப⁴ந்தே, அது³க்க²மஸுகா² வேத³னா ஸந்தஸ்மிங் ஏஸா
பணீதே ஸுகே² வுத்தா ப⁴க³வதா’’தி. து³தியம்பி கோ² ஆயஸ்மா உதா³யீ பஞ்சகங்க³ங்
த²பதிங் ஏதத³வோச – ‘‘ந கோ², க³ஹபதி, த்³வே வேத³னா வுத்தா ப⁴க³வதா; திஸ்ஸோ
வேத³னா வுத்தா ப⁴க³வதா. ஸுகா² வேத³னா, து³க்கா² வேத³னா, அது³க்க²மஸுகா²
வேத³னா – இமா கோ², த²பதி, திஸ்ஸோ வேத³னா வுத்தா ப⁴க³வதா’’தி. து³தியம்பி
கோ² பஞ்சகங்கோ³ த²பதி ஆயஸ்மந்தங் உதா³யிங் ஏதத³வோச – ‘‘ந கோ², ப⁴ந்தே
உதா³யி, திஸ்ஸோ வேத³னா வுத்தா ப⁴க³வதா; த்³வே வேத³னா வுத்தா ப⁴க³வதா –
ஸுகா² வேத³னா, து³க்கா² வேத³னா. யாயங், ப⁴ந்தே ,
அது³க்க²மஸுகா² வேத³னா ஸந்தஸ்மிங் ஏஸா பணீதே ஸுகே² வுத்தா ப⁴க³வதா’’தி.
ததியம்பி கோ² ஆயஸ்மா உதா³யீ பஞ்சகங்க³ங் த²பதிங் ஏதத³வோச – ‘‘ந கோ², த²பதி,
த்³வே வேத³னா வுத்தா ப⁴க³வதா; திஸ்ஸோ வேத³னா வுத்தா ப⁴க³வதா. ஸுகா²
வேத³னா, து³க்கா² வேத³னா, அது³க்க²மஸுகா² வேத³னா – இமா கோ², த²பதி, திஸ்ஸோ
வேத³னா வுத்தா ப⁴க³வதா’’தி. ததியம்பி கோ² பஞ்சகங்கோ³ த²பதி ஆயஸ்மந்தங்
உதா³யிங் ஏதத³வோச – ‘‘ந கோ², ப⁴ந்தே உதா³யி, திஸ்ஸோ வேத³னா வுத்தா ப⁴க³வதா,
த்³வே வேத³னா வுத்தா ப⁴க³வதா – ஸுகா² வேத³னா, து³க்கா² வேத³னா. யாயங்,
ப⁴ந்தே, அது³க்க²மஸுகா² வேத³னா ஸந்தஸ்மிங் ஏஸா பணீதே ஸுகே² வுத்தா
ப⁴க³வதா’’தி. நேவ கோ² ஸக்கி² ஆயஸ்மா உதா³யீ பஞ்சகங்க³ங் த²பதிங்
ஸஞ்ஞாபேதுங் ந பனாஸக்கி² பஞ்சகங்கோ³ த²பதி ஆயஸ்மந்தங் உதா³யிங்
ஸஞ்ஞாபேதுங்.
89. அஸ்ஸோஸி கோ² ஆயஸ்மா ஆனந்தோ³ ஆயஸ்மதோ உதா³யிஸ்ஸ பஞ்சகங்கே³ன த²பதினா ஸத்³தி⁴ங் இமங் கதா²ஸல்லாபங். அத² கோ² ஆயஸ்மா ஆனந்தோ³
யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ யாவதகோ அஹோஸி ஆயஸ்மதோ
உதா³யிஸ்ஸ பஞ்சகங்கே³ன த²பதினா ஸத்³தி⁴ங் கதா²ஸல்லாபோ தங் ஸப்³ப³ங் ப⁴க³வதோ
ஆரோசேஸி. ஏவங் வுத்தே, ப⁴க³வா ஆயஸ்மந்தங் ஆனந்த³ங் ஏதத³வோச – ‘‘ஸந்தஞ்ஞேவ
கோ², ஆனந்த³, பரியாயங் பஞ்சகங்கோ³ த²பதி உதா³யிஸ்ஸ நாப்³ப⁴னுமோதி³,
ஸந்தஞ்ஞேவ ச பன பரியாயங் உதா³யீ பஞ்சகங்க³ஸ்ஸ த²பதிஸ்ஸ நாப்³ப⁴னுமோதி³. த்³வேபானந்த³, வேத³னா வுத்தா மயா பரியாயேன ,
திஸ்ஸோபி வேத³னா வுத்தா மயா பரியாயேன, பஞ்சபி வேத³னா வுத்தா மயா பரியாயேன,
ச²பி வேத³னா வுத்தா மயா பரியாயேன, அட்டா²ரஸபி வேத³னா வுத்தா மயா பரியாயேன,
ச²த்திங்ஸபி வேத³னா வுத்தா மயா பரியாயேன, அட்ட²ஸதம்பி வேத³னா வுத்தா மயா
பரியாயேன. ஏவங் பரியாயதே³ஸிதோ கோ², ஆனந்த³, மயா த⁴ம்மோ. ஏவங் பரியாயதே³ஸிதே
கோ², ஆனந்த³, மயா த⁴ம்மே யே அஞ்ஞமஞ்ஞஸ்ஸ ஸுபா⁴ஸிதங் ஸுலபிதங் ந
ஸமனுஜானிஸ்ஸந்தி ந ஸமனுமஞ்ஞிஸ்ஸந்தி ந ஸமனுமோதி³ஸ்ஸந்தி தேஸமேதங்
பாடிகங்க²ங் – ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி
விதுத³ந்தா விஹரிஸ்ஸந்தி. ஏவங் பரியாயதே³ஸிதோ கோ², ஆனந்த³, மயா த⁴ம்மோ.
ஏவங் பரியாயதே³ஸிதே கோ², ஆனந்த³, மயா த⁴ம்மே யே அஞ்ஞமஞ்ஞஸ்ஸ ஸுபா⁴ஸிதங்
ஸுலபிதங் ஸமனுஜானிஸ்ஸந்தி ஸமனுமஞ்ஞிஸ்ஸந்தி ஸமனுமோதி³ஸ்ஸந்தி தேஸமேதங்
பாடிகங்க²ங் – ஸமக்³கா³ ஸம்மோத³மானா அவிவத³மானா கீ²ரோத³கீபூ⁴தா அஞ்ஞமஞ்ஞங்
பியசக்கூ²ஹி ஸம்பஸ்ஸந்தா விஹரிஸ்ஸந்தி’’.
90.
‘‘பஞ்ச கோ² இமே, ஆனந்த³, காமகு³ணா. கதமே பஞ்ச? சக்கு²விஞ்ஞெய்யா ரூபா
இட்டா² கந்தா மனாபா பியரூபா காமூபஸங்ஹிதா ரஜனீயா, ஸோதவிஞ்ஞெய்யா
ஸத்³தா³…பே॰… கா⁴னவிஞ்ஞெய்யா க³ந்தா⁴…பே॰… ஜிவ்ஹாவிஞ்ஞெய்யா ரஸா…பே॰…
காயவிஞ்ஞெய்யா பொ²ட்ட²ப்³பா³ இட்டா² கந்தா மனாபா
பியரூபா காமூபஸங்ஹிதா ரஜனீயா – இமே கோ², ஆனந்த³, பஞ்ச காமகு³ணா. யங் கோ²,
ஆனந்த³, இமே பஞ்ச காமகு³ணே படிச்ச உப்பஜ்ஜதி ஸுக²ங் ஸோமனஸ்ஸங் இத³ங்
வுச்சதி காமஸுக²ங்.
‘‘யோ கோ², ஆனந்த³, ஏவங் வதெ³ய்ய – ‘ஏதபரமங் ஸத்தா
ஸுக²ங் ஸோமனஸ்ஸங் படிஸங்வேதெ³ந்தீ’தி, இத³மஸ்ஸ நானுஜானாமி. தங் கிஸ்ஸ ஹேது?
அத்தா²னந்த³, ஏதம்ஹா ஸுகா² அஞ்ஞங் ஸுக²ங்
அபி⁴க்கந்ததரஞ்ச பணீததரஞ்ச. கதமஞ்சானந்த³, ஏதம்ஹா ஸுகா² அஞ்ஞங் ஸுக²ங்
அபி⁴க்கந்ததரஞ்ச பணீததரஞ்ச? இதா⁴னந்த³, பி⁴க்கு² விவிச்சேவ காமேஹி விவிச்ச
அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங்
உபஸம்பஜ்ஜ விஹரதி . இத³ங் கோ², ஆனந்த³, ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச.
‘‘யோ கோ², ஆனந்த³, ஏவங் வதெ³ய்ய – ‘ஏதபரமங் ஸத்தா ஸுக²ங் ஸோமனஸ்ஸங் படிஸங்வேதெ³ந்தீ’தி, இத³மஸ்ஸ நானுஜானாமி. தங்
கிஸ்ஸ ஹேது? அத்தா²னந்த³, ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச
பணீததரஞ்ச. கதமஞ்சானந்த³, ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச
பணீததரஞ்ச? இதா⁴னந்த³, பி⁴க்கு² விதக்கவிசாரானங் வூபஸமா…பே॰… து³தியங்
ஜா²னங் உபஸம்பஜ்ஜ விஹரதி. இத³ங் கோ², ஆனந்த³, ஏதம்ஹா ஸுகா² அஞ்ஞங் ஸுக²ங்
அபி⁴க்கந்ததரஞ்ச பணீததரஞ்ச.
‘‘யோ கோ², ஆனந்த³, ஏவங் வதெ³ய்ய…பே॰…. கதமஞ்சானந்த³,
ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச? இதா⁴னந்த³,
பி⁴க்கு² பீதியா ச விராகா³…பே॰… ததியங் ஜா²னங் உபஸம்பஜ்ஜ விஹரதி. இத³ங்
கோ², ஆனந்த³, ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச.
‘‘யோ கோ², ஆனந்த³, ஏவங் வதெ³ய்ய…பே॰…. கதமஞ்சானந்த³,
ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச? இதா⁴னந்த³,
பி⁴க்கு² ஸுக²ஸ்ஸ ச பஹானா…பே॰… சதுத்த²ங் ஜா²னங் உபஸம்பஜ்ஜ விஹரதி. இத³ங்
கோ², ஆனந்த³, ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச.
‘‘யோ கோ², ஆனந்த³, ஏவங் வதெ³ய்ய…பே॰…. கதமஞ்சானந்த³, ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச ? இதா⁴னந்த³, பி⁴க்கு² ஸப்³ப³ஸோ ரூபஸஞ்ஞானங் ஸமதிக்கமா, படிக⁴ஸஞ்ஞானங்
அத்த²ங்க³மா, நானத்தஸஞ்ஞானங் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனங்
உபஸம்பஜ்ஜ விஹரதி. இத³ங் கோ², ஆனந்த³, ஏதம்ஹா ஸுகா² அஞ்ஞங் ஸுக²ங்
அபி⁴க்கந்ததரஞ்ச பணீததரஞ்ச.
‘‘யோ கோ², ஆனந்த³, ஏவங் வதெ³ய்ய…பே॰…. கதமஞ்சானந்த³,
ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச? இதா⁴னந்த³,
பி⁴க்கு² ஸப்³ப³ஸோ ஆகாஸானஞ்சாயதனங் ஸமதிக்கம்ம ‘அனந்தங் விஞ்ஞாண’ந்தி
விஞ்ஞாணஞ்சாயதனங் உபஸம்பஜ்ஜ விஹரதி. இத³ங் கோ², ஆனந்த³, ஏதம்ஹா ஸுகா²
அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச.
‘‘யோ கோ², ஆனந்த³, ஏவங் வதெ³ய்ய…பே॰…. கதமஞ்சானந்த³,
ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச? இதா⁴னந்த³,
பி⁴க்கு² ஸப்³ப³ஸோ விஞ்ஞாணஞ்சாயதனங் ஸமதிக்கம்ம ‘நத்தி² கிஞ்சீ’தி
ஆகிஞ்சஞ்ஞாயதனங் உபஸம்பஜ்ஜ விஹரதி. இத³ங் கோ², ஆனந்த³, ஏதம்ஹா ஸுகா² அஞ்ஞங்
ஸுக²ங் அபி⁴க்கந்ததரஞ்ச பணீததரஞ்ச.
‘‘யோ
கோ², ஆனந்த³, ஏவங் வதெ³ய்ய…பே॰…. கதமஞ்சானந்த³, ஏதம்ஹா ஸுகா² அஞ்ஞங் ஸுக²ங்
அபி⁴க்கந்ததரஞ்ச பணீததரஞ்ச? இதா⁴னந்த³, பி⁴க்கு² ஸப்³ப³ஸோ ஆகிஞ்சஞ்ஞாயதனங்
ஸமதிக்கம்ம நேவஸஞ்ஞானாஸஞ்ஞாயதனங் உபஸம்பஜ்ஜ விஹரதி. இத³ங் கோ², ஆனந்த³,
ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச.
‘‘யோ கோ², ஆனந்த³, ஏவங் வதெ³ய்ய – ‘ஏதபரமங் ஸத்தா
ஸுக²ங் ஸோமனஸ்ஸங் படிஸங்வேதெ³ந்தீ’தி, இத³மஸ்ஸ நானுஜானாமி. தங் கிஸ்ஸ ஹேது?
அத்தா²னந்த³, ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச.
கதமஞ்சானந்த³, ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச?
இதா⁴னந்த³, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனங் ஸமதிக்கம்ம ஸஞ்ஞாவேத³யிதனிரோத⁴ங் உபஸம்பஜ்ஜ விஹரதி. இத³ங் கோ², ஆனந்த³, ஏதம்ஹா ஸுகா² அஞ்ஞங் ஸுக²ங் அபி⁴க்கந்ததரஞ்ச பணீததரஞ்ச.
91. ‘‘டா²னங் கோ² பனேதங், ஆனந்த³, விஜ்ஜதி யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங்
– ‘ஸஞ்ஞாவேத³யிதனிரோத⁴ங் ஸமணோ கோ³தமோ ஆஹ; தஞ்ச ஸுக²ஸ்மிங் பஞ்ஞபேதி.
தயித³ங் கிங்ஸு, தயித³ங் கத²ங்ஸூ’தி? ஏவங்வாதி³னோ, ஆனந்த³, அஞ்ஞதித்தி²யா
பரிப்³பா³ஜகா ஏவமஸ்ஸு வசனீயா – ‘ந கோ², ஆவுஸோ, ப⁴க³வா ஸுக²ங்யேவ வேத³னங்
ஸந்தா⁴ய ஸுக²ஸ்மிங் பஞ்ஞபேதி; அபி ச, ஆவுஸோ, யத்த² யத்த² ஸுக²ங் உபலப்³ப⁴தி
யஹிங் யஹிங் தங் தங் ததா²க³தோ ஸுக²ஸ்மிங் பஞ்ஞபேதீ’’’தி.
இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதங் அபி⁴னந்தீ³தி.
ப³ஹுவேத³னீயஸுத்தங் நிட்டி²தங் நவமங்.
10. அபண்ணகஸுத்தங்
92. ஏவங்
மே ஸுதங் – ஏகங் ஸமயங் ப⁴க³வா கோஸலேஸு சாரிகங் சரமானோ மஹதா
பி⁴க்கு²ஸங்கே⁴ன ஸத்³தி⁴ங் யேன ஸாலா நாம கோஸலானங் ப்³ராஹ்மணகா³மோ தத³வஸரி.
அஸ்ஸோஸுங் கோ² ஸாலெய்யகா ப்³ராஹ்மணக³ஹபதிகா – ‘‘ஸமணோ க²லு போ⁴ கோ³தமோ
ஸக்யபுத்தோ ஸக்யகுலா பப்³ப³ஜிதோ கோஸலேஸு சாரிகங் சரமானோ மஹதா பி⁴க்கு²ஸங்கே⁴ன ஸத்³தி⁴ங் ஸாலங்
அனுப்பத்தோ. தங் கோ² பன ப⁴வந்தங் கோ³தமங் ஏவங் கல்யாணோ கித்திஸத்³தோ³
அப்³பு⁴க்³க³தோ – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴
விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா²
தே³வமனுஸ்ஸானங் பு³த்³தோ⁴ ப⁴க³வா’தி. ஸோ இமங் லோகங் ஸதே³வகங் ஸமாரகங்
ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா
ஸச்சி²கத்வா பவேதே³தி. ஸோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங்
பரியோஸானகல்யாணங் ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங்
ப்³ரஹ்மசரியங் பகாஸேதி. ஸாது⁴ கோ² பன ததா²ரூபானங் அரஹதங் த³ஸ்ஸனங்
ஹோதீ’’தி. அத² கோ² ஸாலெய்யகா ப்³ராஹ்மணக³ஹபதிகா யேன ப⁴க³வா
தேனுபஸங்கமிங்ஸு; உபஸங்கமித்வா அப்பேகச்சே ப⁴க³வந்தங் அபி⁴வாதெ³த்வா
ஏகமந்தங் நிஸீதி³ங்ஸு. அப்பேகச்சே ப⁴க³வதா ஸத்³தி⁴ங் ஸம்மோதி³ங்ஸு;
ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங்ஸு.
அப்பேகச்சே யேன ப⁴க³வா தேனஞ்ஜலிங் பணாமெத்வா ஏகமந்தங் நிஸீதி³ங்ஸு.
அப்பேகச்சே ப⁴க³வதோ ஸந்திகே நாமகொ³த்தங் ஸாவெத்வா ஏகமந்தங் நிஸீதி³ங்ஸு. அப்பேகச்சே துண்ஹீபூ⁴தா ஏகமந்தங் நிஸீதி³ங்ஸு.
93.
ஏகமந்தங் நிஸின்னே கோ² ஸாலெய்யகே ப்³ராஹ்மணக³ஹபதிகே ப⁴க³வா ஏதத³வோச –
‘‘அத்தி² பன வோ, க³ஹபதயோ, கோசி மனாபோ ஸத்தா² யஸ்மிங் வோ ஆகாரவதீ ஸத்³தா⁴
படிலத்³தா⁴’’தி? ‘‘நத்தி² கோ² நோ, ப⁴ந்தே, கோசி மனாபோ ஸத்தா² யஸ்மிங் நோ
ஆகாரவதீ ஸத்³தா⁴ படிலத்³தா⁴’’தி. ‘‘மனாபங் வோ, க³ஹபதயோ, ஸத்தா²ரங்
அலப⁴ந்தேஹி அயங் அபண்ணகோ த⁴ம்மோ ஸமாதா³ய வத்திதப்³போ³. அபண்ணகோ ஹி,
க³ஹபதயோ, த⁴ம்மோ ஸமத்தோ ஸமாதி³ன்னோ, ஸோ வோ ப⁴விஸ்ஸதி தீ³க⁴ரத்தங் ஹிதாய
ஸுகா²ய. கதமோ ச, க³ஹபதயோ, அபண்ணகோ த⁴ம்மோ’’?
94. ‘‘ஸந்தி ,
க³ஹபதயோ, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘நத்தி²
தி³ன்னங், நத்தி² யிட்ட²ங், நத்தி² ஹுதங்; நத்தி² ஸுகதது³க்கடானங் [ஸுகடது³க்கடானங் (ஸீ॰ ஸ்யா॰ கங்॰ பீ॰)]
கம்மானங் ப²லங் விபாகோ, நத்தி² அயங் லோகோ, நத்தி² பரோ லோகோ; நத்தி² மாதா,
நத்தி² பிதா; நத்தி² ஸத்தா ஓபபாதிகா; நத்தி² லோகே ஸமணப்³ராஹ்மணா
ஸம்மக்³க³தா [ஸமக்³க³தா (க॰)] ஸம்மா படிபன்னா யே இமஞ்ச லோகங் பரஞ்ச லோகங் ஸயங் அபி⁴ஞ்ஞா ஸச்சி²கத்வா பவேதெ³ந்தீ’தி. தேஸங்யேவ கோ², க³ஹபதயோ, ஸமணப்³ராஹ்மணானங் ஏகே ஸமணப்³ராஹ்மணா
உஜுவிபச்சனீகவாதா³. தே ஏவமாஹங்ஸு – ‘அத்தி² தி³ன்னங், அத்தி² யிட்ட²ங்,
அத்தி² ஹுதங்; அத்தி² ஸுகதது³க்கடானங் கம்மானங் ப²லங் விபாகோ; அத்தி² அயங்
லோகோ, அத்தி² பரோ லோகோ; அத்தி² மாதா, அத்தி² பிதா; அத்தி² ஸத்தா
ஓபபாதிகா; அத்தி² லோகே ஸமணப்³ராஹ்மணா ஸம்மக்³க³தா ஸம்மா படிபன்னா யே இமஞ்ச
லோகங் பரஞ்ச லோகங் ஸயங் அபி⁴ஞ்ஞா ஸச்சி²கத்வா பவேதெ³ந்தீ’தி. தங் கிங்
மஞ்ஞத², க³ஹபதயோ – ‘நனுமே ஸமணப்³ராஹ்மணா அஞ்ஞமஞ்ஞஸ்ஸ
உஜுவிபச்சனீகவாதா³’’’தி? ‘‘ஏவங், ப⁴ந்தே’’.
95.
‘‘தத்ர, க³ஹபதயோ, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ –
‘நத்தி² தி³ன்னங், நத்தி² யிட்ட²ங்…பே॰… யே இமஞ்ச லோகங் பரஞ்ச லோகங் ஸயங்
அபி⁴ஞ்ஞா ஸச்சி²கத்வா பவேதெ³ந்தீ’தி தேஸமேதங் பாடிகங்க²ங்? யமித³ங் [யதி³த³ங் (க॰)] காயஸுசரிதங், வசீஸுசரிதங், மனோஸுசரிதங் – இமே தயோ குஸலே த⁴ம்மே அபி⁴னிவஜ்ஜெத்வா [அபி⁴னிப்³ப³ஜ்ஜெத்வா (ஸ்யா॰ கங்॰), அபி⁴னிப்³பி³ஜ்ஜித்வா (க॰)] யமித³ங் [யதி³த³ங் (க॰)]
காயது³ச்சரிதங், வசீது³ச்சரிதங், மனோது³ச்சரிதங் – இமே தயோ அகுஸலே த⁴ம்மே
ஸமாதா³ய வத்திஸ்ஸந்தி. தங் கிஸ்ஸ ஹேது? ந ஹி தே பொ⁴ந்தோ ஸமணப்³ராஹ்மணா
பஸ்ஸந்தி அகுஸலானங் த⁴ம்மானங் ஆதீ³னவங் ஓகாரங் ஸங்கிலேஸங், குஸலானங்
த⁴ம்மானங் நெக்க²ம்மே ஆனிஸங்ஸங் வோதா³னபக்க²ங். ஸந்தங்யேவ பன பரங் லோகங்
‘நத்தி² பரோ லோகோ’ திஸ்ஸ தி³ட்டி² ஹோதி; ஸாஸ்ஸ ஹோதி மிச்சா²தி³ட்டி².
ஸந்தங்யேவ கோ² பன பரங் லோகங் ‘நத்தி² பரோ லோகோ’தி ஸங்கப்பேதி; ஸ்வாஸ்ஸ ஹோதி
மிச்சா²ஸங்கப்போ. ஸந்தங்யேவ கோ² பன பரங் லோகங் ‘நத்தி² பரோ லோகோ’தி வாசங்
பா⁴ஸதி; ஸாஸ்ஸ ஹோதி மிச்சா²வாசா. ஸந்தங்யேவ கோ² பன பரங் லோகங் ‘நத்தி² பரோ
லோகோ’தி ஆஹ; யே தே அரஹந்தோ பரலோகவிது³னோ தேஸமயங் பச்சனீகங் கரோதி.
ஸந்தங்யேவ கோ² பன பரங் லோகங் ‘நத்தி² பரோ லோகோ’தி பரங் ஸஞ்ஞாபேதி [பஞ்ஞாபேதி (க॰)]; ஸாஸ்ஸ ஹோதி அஸத்³த⁴ம்மஸஞ்ஞத்தி [அஸ்ஸத்³த⁴ம்மபஞ்ஞத்தி (க॰)].
தாய ச பன அஸத்³த⁴ம்மஸஞ்ஞத்தியா அத்தானுக்கங்ஸேதி, பரங் வம்பே⁴தி. இதி
புப்³பே³வ கோ² பனஸ்ஸ ஸுஸீல்யங் பஹீனங் ஹோதி, து³ஸ்ஸீல்யங் பச்சுபட்டி²தங் –
அயஞ்ச மிச்சா²தி³ட்டி² மிச்சா²ஸங்கப்போ மிச்சா²வாசா அரியானங் பச்சனீகதா
அஸத்³த⁴ம்மஸஞ்ஞத்தி அத்துக்கங்ஸனா பரவம்ப⁴னா. ஏவமஸ்ஸிமே [ஏவங்’ஸி’மே’ (ஸீ॰ ஸ்யா॰ கங்॰ பீ॰)] அனேகே பாபகா அகுஸலா த⁴ம்மா ஸம்ப⁴வந்தி மிச்சா²தி³ட்டி²பச்சயா.
‘‘தத்ர ,
க³ஹபதயோ, விஞ்ஞூ புரிஸோ இதி படிஸஞ்சிக்க²தி – ‘ஸசே கோ² நத்தி² பரோ லோகோ
ஏவமயங் ப⁴வங் புரிஸபுக்³க³லோ காயஸ்ஸ பே⁴தா³ ஸொத்தி²மத்தானங் கரிஸ்ஸதி; ஸசே
கோ² அத்தி² பரோ லோகோ ஏவமயங் ப⁴வங் புரிஸபுக்³க³லோ காயஸ்ஸ பே⁴தா³ பரங் மரணா
அபாயங் து³க்³க³திங் வினிபாதங் நிரயங் உபபஜ்ஜிஸ்ஸதி. காமங் கோ² பன மாஹு பரோ
லோகோ, ஹோது நேஸங் ப⁴வதங் ஸமணப்³ராஹ்மணானங் ஸச்சங் வசனங்; அத² ச பனாயங்
ப⁴வங் புரிஸபுக்³க³லோ தி³ட்டே²வ த⁴ம்மே விஞ்ஞூனங் கா³ரய்ஹோ – து³ஸ்ஸீலோ
புரிஸபுக்³க³லோ மிச்சா²தி³ட்டி² நத்தி²கவாதோ³’தி. ஸசே கோ² அத்தே²வ பரோ
லோகோ, ஏவங் இமஸ்ஸ போ⁴தோ புரிஸபுக்³க³லஸ்ஸ உப⁴யத்த² கலிக்³க³ஹோ – யஞ்ச
தி³ட்டே²வ த⁴ம்மே விஞ்ஞூனங் கா³ரய்ஹோ, யஞ்ச காயஸ்ஸ பே⁴தா³ பரங் மரணா அபாயங்
து³க்³க³திங் வினிபாதங் நிரயங் உபபஜ்ஜிஸ்ஸதி. ஏவமஸ்ஸாயங் அபண்ணகோ த⁴ம்மோ
து³ஸ்ஸமத்தோ ஸமாதி³ன்னோ, ஏகங்ஸங் ப²ரித்வா திட்ட²தி, ரிஞ்சதி குஸலங்
டா²னங்.
96. ‘‘தத்ர ,
க³ஹபதயோ, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘அத்தி²
தி³ன்னங்…பே॰… யே இமஞ்ச லோகங் பரஞ்ச லோகங் ஸயங் அபி⁴ஞ்ஞா ஸச்சி²கத்வா
பவேதெ³ந்தீ’தி தேஸமேதங் பாடிகங்க²ங்? யமித³ங் காயது³ச்சரிதங்,
வசீது³ச்சரிதங், மனோது³ச்சரிதங் – இமே தயோ அகுஸலே த⁴ம்மே அபி⁴னிவஜ்ஜெத்வா
யமித³ங் காயஸுசரிதங், வசீஸுசரிதங், மனோஸுசரிதங் – இமே தயோ குஸலே த⁴ம்மே
ஸமாதா³ய வத்திஸ்ஸந்தி. தங் கிஸ்ஸ ஹேது? பஸ்ஸந்தி ஹி தே பொ⁴ந்தோ
ஸமணப்³ராஹ்மணா அகுஸலானங் த⁴ம்மானங் ஆதீ³னவங் ஓகாரங் ஸங்கிலேஸங், குஸலானங்
த⁴ம்மானங் நெக்க²ம்மே ஆனிஸங்ஸங் வோதா³னபக்க²ங். ஸந்தங்யேவ கோ² பன பரங்
லோகங் ‘அத்தி² பரோ லோகோ’ திஸ்ஸ தி³ட்டி² ஹோதி; ஸாஸ்ஸ ஹோதி ஸம்மாதி³ட்டி².
ஸந்தங்யேவ கோ² பன பரங் லோகங் ‘அத்தி² பரோ லோகோ’தி ஸங்கப்பேதி; ஸ்வாஸ்ஸ ஹோதி
ஸம்மாஸங்கப்போ. ஸந்தங்யேவ கோ² பன பரங் லோகங் ‘அத்தி² பரோ லோகோ’தி வாசங்
பா⁴ஸதி; ஸாஸ்ஸ ஹோதி ஸம்மாவாசா. ஸந்தங்யேவ கோ² பன பரங் லோகங் ‘அத்தி² பரோ
லோகோ’தி ஆஹ; யே தே அரஹந்தோ பரலோகவிது³னோ தேஸமயங் ந பச்சனீகங் கரோதி.
ஸந்தங்யேவ கோ² பன பரங் லோகங் ‘அத்தி² பரோ லோகோ’தி பரங்
ஸஞ்ஞாபேதி; ஸாஸ்ஸ ஹோதி ஸத்³த⁴ம்மஸஞ்ஞத்தி. தாய ச பன ஸத்³த⁴ம்மஸஞ்ஞத்தியா
நேவத்தானுக்கங்ஸேதி, ந பரங் வம்பே⁴தி. இதி புப்³பே³வ கோ² பனஸ்ஸ
து³ஸ்ஸீல்யங் பஹீனங் ஹோதி, ஸுஸீல்யங் பச்சுபட்டி²தங் – அயஞ்ச ஸம்மாதி³ட்டி²
ஸம்மாஸங்கப்போ ஸம்மாவாசா அரியானங் அபச்சனீகதா ஸத்³த⁴ம்மஸஞ்ஞத்தி
அனத்துக்கங்ஸனா அபரவம்ப⁴னா. ஏவமஸ்ஸிமே அனேகே குஸலா த⁴ம்மா ஸம்ப⁴வந்தி ஸம்மாதி³ட்டி²பச்சயா.
‘‘தத்ர, க³ஹபதயோ, விஞ்ஞூ புரிஸோ இதி படிஸஞ்சிக்க²தி – ‘ஸசே கோ² அத்தி² பரோ லோகோ ,
ஏவமயங் ப⁴வங் புரிஸபுக்³க³லோ காயஸ்ஸ பே⁴தா³ பரங் மரணா ஸுக³திங் ஸக்³க³ங்
லோகங் உபபஜ்ஜிஸ்ஸதி. காமங் கோ² பன மாஹு பரோ லோகோ, ஹோது நேஸங் ப⁴வதங்
ஸமணப்³ராஹ்மணானங் ஸச்சங் வசனங்; அத² ச பனாயங் ப⁴வங் புரிஸபுக்³க³லோ
தி³ட்டே²வ த⁴ம்மே விஞ்ஞூனங் பாஸங்ஸோ – ஸீலவா புரிஸபுக்³க³லோ ஸம்மாதி³ட்டி²
அத்தி²கவாதோ³’தி. ஸசே கோ² அத்தே²வ பரோ லோகோ, ஏவங் இமஸ்ஸ போ⁴தோ
புரிஸபுக்³க³லஸ்ஸ உப⁴யத்த² கடக்³க³ஹோ – யஞ்ச தி³ட்டே²வ த⁴ம்மே விஞ்ஞூனங்
பாஸங்ஸோ, யஞ்ச காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங்
உபபஜ்ஜிஸ்ஸதி. ஏவமஸ்ஸாயங் அபண்ணகோ த⁴ம்மோ ஸுஸமத்தோ ஸமாதி³ன்னோ, உப⁴யங்ஸங்
ப²ரித்வா திட்ட²தி, ரிஞ்சதி அகுஸலங் டா²னங்.
97.
‘‘ஸந்தி, க³ஹபதயோ, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘கரோதோ
காரயதோ, சி²ந்த³தோ சே²தா³பயதோ, பசதோ பாசாபயதோ, ஸோசயதோ ஸோசாபயதோ, கிலமதோ
கிலமாபயதோ, ப²ந்த³தோ ப²ந்தா³பயதோ, பாணமதிபாதயதோ [பாணமதிமாபயதோ (ஸீ॰ பீ॰), பாணமதிபாதாபயதோ (ஸ்யா॰ கங்॰), பாணமதிபாபயதோ (க॰)], அதி³ன்னங் ஆதி³யதோ, ஸந்தி⁴ங் சி²ந்த³தோ, நில்லோபங் ஹரதோ, ஏகாகா³ரிகங் கரோதோ, பரிபந்தே² திட்ட²தோ, பரதா³ரங் க³ச்ச²தோ, முஸா
ப⁴ணதோ; கரோதோ ந கரீயதி பாபங். கு²ரபரியந்தேன சேபி சக்கேன யோ இமிஸ்ஸா
பத²வியா பாணே ஏகங் மங்ஸக²லங் ஏகங் மங்ஸபுஞ்ஜங் கரெய்ய, நத்தி² ததோனிதா³னங்
பாபங், நத்தி² பாபஸ்ஸ ஆக³மோ. த³க்கி²ணஞ்சேபி க³ங்கா³ய தீரங் க³ச்செ²ய்ய
ஹனந்தோ கா⁴தெந்தோ, சி²ந்த³ந்தோ சே²தா³பெந்தோ, பசந்தோ பாசெந்தோ; நத்தி²
ததோனிதா³னங் பாபங், நத்தி² பாபஸ்ஸ ஆக³மோ. உத்தரஞ்சேபி க³ங்கா³ய தீரங்
க³ச்செ²ய்ய த³த³ந்தோ தா³பெந்தோ, யஜந்தோ யஜாபெந்தோ; நத்தி² ததோனிதா³னங்
புஞ்ஞங், நத்தி² புஞ்ஞஸ்ஸ ஆக³மோ. தா³னேன த³மேன ஸங்யமேன ஸச்சவஜ்ஜேன [ஸச்சவாசேன (க॰)] நத்தி² புஞ்ஞங், நத்தி² புஞ்ஞஸ்ஸ ஆக³மோ’தி. தேஸங்யேவ கோ², க³ஹபதயோ, ஸமணப்³ராஹ்மணானங் ஏகே ஸமணப்³ராஹ்மணா உஜுவிபச்சனீகவாதா³ தே ஏவமாஹங்ஸு – ‘கரோதோ காரயதோ, சி²ந்த³தோ சே²தா³பயதோ, பசதோ பாசாபயதோ, ஸோசயதோ
ஸோசாபயதோ, கிலமதோ கிலமாபயதோ, ப²ந்த³தோ ப²ந்தா³பயதோ, பாணமதிபாதயதோ,
அதி³ன்னங் ஆதி³யதோ, ஸந்தி⁴ங் சி²ந்த³தோ, நில்லோபங் ஹரதோ, ஏகாகா³ரிகங்
கரோதோ, பரிபந்தே² திட்ட²தோ, பரதா³ரங் க³ச்ச²தோ, முஸா ப⁴ணதோ; கரோதோ கரீயதி
பாபங். கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகங் மங்ஸக²லங்
ஏகங் மங்ஸபுஞ்ஜங் கரெய்ய, அத்தி² ததோனிதா³னங் பாபங், அத்தி² பாபஸ்ஸ ஆக³மோ.
த³க்கி²ணஞ்சேபி க³ங்கா³ய தீரங் க³ச்செ²ய்ய ஹனந்தோ கா⁴தெந்தோ, சி²ந்த³ந்தோ
சே²தா³பெந்தோ, பசந்தோ பாசெந்தோ; அத்தி² ததோனிதா³னங் பாபங், அத்தி² பாபஸ்ஸ
ஆக³மோ. உத்தரஞ்சேபி க³ங்கா³ய தீரங் க³ச்செ²ய்ய த³த³ந்தோ தா³பெந்தோ, யஜந்தோ யஜாபெந்தோ; அத்தி² ததோனிதா³னங் புஞ்ஞங், அத்தி² புஞ்ஞஸ்ஸ ஆக³மோ. தா³னேன
த³மேன ஸங்யமேன ஸச்சவஜ்ஜேன அத்தி² புஞ்ஞங், அத்தி² புஞ்ஞஸ்ஸ ஆக³மோ’தி. தங்
கிங் மஞ்ஞத², க³ஹபதயோ, நனுமே ஸமணப்³ராஹ்மணா அஞ்ஞமஞ்ஞஸ்ஸ
உஜுவிபச்சனீகவாதா³’’தி? ‘‘ஏவங், ப⁴ந்தே’’.
98.
‘‘தத்ர, க³ஹபதயோ, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ –
‘கரோதோ காரயதோ, சி²ந்த³தோ சே²தா³பயதோ, பசதோ பாசாபயதோ, ஸோசயதோ ஸோசாபயதோ,
கிலமதோ கிலமாபயதோ, ப²ந்த³தோ ப²ந்தா³பயதோ, பாணமதிபாதயதோ, அதி³ன்னங் ஆதி³யதோ,
ஸந்தி⁴ங் சி²ந்த³தோ, நில்லோபங் ஹரதோ, ஏகாகா³ரிகங் கரோதோ, பரிபந்தே²
திட்ட²தோ, பரதா³ரங் க³ச்ச²தோ, முஸா ப⁴ணதோ; கரோதோ ந கரீயதி பாபங்.
கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகங் மங்ஸக²லங் ஏகங்
மங்ஸபுஞ்ஜங் கரெய்ய, நத்தி² ததோனிதா³னங் பாபங், நத்தி² பாபஸ்ஸ ஆக³மோ.
த³க்கி²ணஞ்சேபி க³ங்கா³ய தீரங் க³ச்செ²ய்ய ஹனந்தோ கா⁴தெந்தோ…பே॰… தா³னேன
த³மேன ஸங்யமேன ஸச்சவஜ்ஜேன நத்தி² புஞ்ஞங், நத்தி² புஞ்ஞஸ்ஸ ஆக³மோ’தி
தேஸமேதங் பாடிகங்க²ங்? யமித³ங் காயஸுசரிதங், வசீஸுசரிதங், மனோஸுசரிதங் –
இமே தயோ குஸலே த⁴ம்மே அபி⁴னிவஜ்ஜெத்வா யமித³ங் காயது³ச்சரிதங்,
வசீது³ச்சரிதங், மனோது³ச்சரிதங் – இமே தயோ அகுஸலே த⁴ம்மே ஸமாதா³ய
வத்திஸ்ஸந்தி. தங் கிஸ்ஸ ஹேது? ந ஹி தே பொ⁴ந்தோ ஸமணப்³ராஹ்மணா பஸ்ஸந்தி
அகுஸலானங் த⁴ம்மானங் ஆதீ³னவங் ஓகாரங் ஸங்கிலேஸங், குஸலானங் த⁴ம்மானங்
நெக்க²ம்மே ஆனிஸங்ஸங் வோதா³னபக்க²ங். ஸந்தங்யேவ கோ²
பன கிரியங் ‘நத்தி² கிரியா’ திஸ்ஸ தி³ட்டி² ஹோதி; ஸாஸ்ஸ ஹோதி
மிச்சா²தி³ட்டி². ஸந்தங்யேவ கோ² பன கிரியங் ‘நத்தி² கிரியா’தி ஸங்கப்பேதி;
ஸ்வாஸ்ஸ ஹோதி மிச்சா²ஸங்கப்போ. ஸந்தங்யேவ கோ² பன
கிரியங் ‘நத்தி² கிரியா’தி வாசங் பா⁴ஸதி; ஸாஸ்ஸ ஹோதி மிச்சா²வாசா.
ஸந்தங்யேவ கோ² பன கிரியங் ‘நத்தி² கிரியா’தி ஆஹ, யே தே அரஹந்தோ கிரியவாதா³
தேஸமயங் பச்சனீகங் கரோதி. ஸந்தங்யேவ கோ² பன கிரியங் ‘நத்தி² கிரியா’தி பரங்
ஸஞ்ஞாபேதி; ஸாஸ்ஸ ஹோதி அஸத்³த⁴ம்மஸஞ்ஞத்தி. தாய ச பன அஸத்³த⁴ம்மஸஞ்ஞத்தியா
அத்தானுக்கங்ஸேதி, பரங் வம்பே⁴தி. இதி புப்³பே³வ கோ² பனஸ்ஸ ஸுஸீல்யங்
பஹீனங் ஹோதி, து³ஸ்ஸீல்யங் பச்சுபட்டி²தங் – அயஞ்ச
மிச்சா²தி³ட்டி² மிச்சா²ஸங்கப்போ மிச்சா²வாசா அரியானங் பச்சனீகதா
அஸத்³த⁴ம்மஸஞ்ஞத்தி அத்துக்கங்ஸனா பரவம்ப⁴னா. ஏவமஸ்ஸிமே அனேகே பாபகா அகுஸலா
த⁴ம்மா ஸம்ப⁴வந்தி மிச்சா²தி³ட்டி²பச்சயா.
‘‘தத்ர, க³ஹபதயோ, விஞ்ஞூ புரிஸோ இதி படிஸஞ்சிக்க²தி –
‘ஸசே கோ² நத்தி² கிரியா, ஏவமயங் ப⁴வங் புரிஸபுக்³க³லோ காயஸ்ஸ பே⁴தா³
ஸொத்தி²மத்தானங் கரிஸ்ஸதி; ஸசே கோ² அத்தி² கிரியா ஏவமயங்
ப⁴வங் புரிஸபுக்³க³லோ காயஸ்ஸ பே⁴தா³ பரங் மரணா அபாயங் து³க்³க³திங்
வினிபாதங் நிரயங் உபபஜ்ஜிஸ்ஸதி. காமங் கோ² பன மாஹு கிரியா, ஹோது நேஸங்
ப⁴வதங் ஸமணப்³ராஹ்மணானங் ஸச்சங் வசனங்; அத² ச பனாயங் ப⁴வங் புரிஸபுக்³க³லோ
தி³ட்டே²வ த⁴ம்மே விஞ்ஞூனங் கா³ரய்ஹோ – து³ஸ்ஸீலோ புரிஸபுக்³க³லோ
மிச்சா²தி³ட்டி² அகிரியவாதோ³’தி. ஸசே கோ² அத்தே²வ கிரியா, ஏவங் இமஸ்ஸ
போ⁴தோ புரிஸபுக்³க³லஸ்ஸ உப⁴யத்த² கலிக்³க³ஹோ – யஞ்ச தி³ட்டே²வ த⁴ம்மே
விஞ்ஞூனங் கா³ரய்ஹோ, யஞ்ச காயஸ்ஸ பே⁴தா³ பரங் மரணா அபாயங் து³க்³க³திங்
வினிபாதங் நிரயங் உபபஜ்ஜிஸ்ஸதி. ஏவமஸ்ஸாயங் அபண்ணகோ த⁴ம்மோ து³ஸ்ஸமத்தோ
ஸமாதி³ன்னோ, ஏகங்ஸங் ப²ரித்வா திட்ட²தி, ரிஞ்சதி குஸலங் டா²னங்.
99.
‘‘தத்ர, க³ஹபதயோ, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ –
‘கரோதோ காரயதோ, சி²ந்த³தோ சே²தா³பயதோ, பசதோ பாசாபயதோ, ஸோசயதோ ஸோசாபயதோ,
கிலமதோ கிலமாபயதோ, ப²ந்த³தோ ப²ந்தா³பயதோ, பாணமதிபாதயதோ, அதி³ன்னங் ஆதி³யதோ,
ஸந்தி⁴ங் சி²ந்த³தோ, நில்லோபங் ஹரதோ, ஏகாகா³ரிகங் கரோதோ, பரிபந்தே²
திட்ட²தோ, பரதா³ரங் க³ச்ச²தோ, முஸா ப⁴ணதோ; கரோதோ கரீயதி பாபங்.
கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகங் மங்ஸக²லங் ஏகங்
மங்ஸபுஞ்ஜங் கரெய்ய, அத்தி² ததோனிதா³னங் பாபங், அத்தி² பாபஸ்ஸ ஆக³மோ.
த³க்கி²ணஞ்சேபி க³ங்கா³ய தீரங் க³ச்செ²ய்ய ஹனந்தோ கா⁴தெந்தோ, சி²ந்த³ந்தோ
சே²தா³பெந்தோ, பசந்தோ பாசெந்தோ, அத்தி² ததோனிதா³னங் பாபங், அத்தி² பாபஸ்ஸ
ஆக³மோ. உத்தரஞ்சேபி க³ங்கா³ய தீரங் க³ச்செ²ய்ய த³த³ந்தோ தா³பெந்தோ, யஜந்தோ
யஜாபெந்தோ, அத்தி² ததோனிதா³னங் புஞ்ஞங், அத்தி² புஞ்ஞஸ்ஸ ஆக³மோ. தா³னேன
த³மேன ஸங்யமேன ஸச்சவஜ்ஜேன அத்தி² புஞ்ஞங், அத்தி² புஞ்ஞஸ்ஸ ஆக³மோ’தி
தேஸமேதங் பாடிகங்க²ங்? யமித³ங் காயது³ச்சரிதங், வசீது³ச்சரிதங் ,
மனோது³ச்சரிதங் – இமே தயோ அகுஸலே த⁴ம்மே அபி⁴னிவஜ்ஜெத்வா யமித³ங்
காயஸுசரிதங், வசீஸுசரிதங், மனோஸுசரிதங் – இமே தயோ குஸலே த⁴ம்மே ஸமாதா³ய
வத்திஸ்ஸந்தி. தங் கிஸ்ஸ ஹேது? பஸ்ஸந்தி ஹி தே பொ⁴ந்தோ ஸமணப்³ராஹ்மணா
அகுஸலானங் த⁴ம்மானங் ஆதீ³னவங் ஓகாரங் ஸங்கிலேஸங், குஸலானங் த⁴ம்மானங்
நெக்க²ம்மே ஆனிஸங்ஸங் வோதா³னபக்க²ங். ஸந்தங்யேவ கோ² பன கிரியங் ‘அத்தி²
கிரியா’ திஸ்ஸ தி³ட்டி² ஹோதி; ஸாஸ்ஸ ஹோதி ஸம்மாதி³ட்டி². ஸந்தங்யேவ கோ² பன
கிரியங் ‘அத்தி² கிரியா’தி ஸங்கப்பேதி; ஸ்வாஸ்ஸ ஹோதி ஸம்மாஸங்கப்போ.
ஸந்தங்யேவ கோ² பன கிரியங் ‘அத்தி² கிரியா’தி வாசங் பா⁴ஸதி; ஸாஸ்ஸ ஹோதி
ஸம்மாவாசா. ஸந்தங்யேவ கோ² பன கிரியங் ‘அத்தி² கிரியா’தி ஆஹ; யே தே அரஹந்தோ
கிரியவாதா³ தேஸமயங் ந பச்சனீகங் கரோதி. ஸந்தங்யேவ கோ² பன கிரியங் ‘அத்தி²
கிரியா’தி பரங் ஸஞ்ஞாபேதி; ஸாஸ்ஸ ஹோதி ஸத்³த⁴ம்மஸஞ்ஞத்தி. தாய
ச பன ஸத்³த⁴ம்மஸஞ்ஞத்தியா நேவத்தானுக்கங்ஸேதி, ந பரங் வம்பே⁴தி. இதி
புப்³பே³வ கோ² பனஸ்ஸ து³ஸ்ஸீல்யங் பஹீனங் ஹோதி, ஸுஸீல்யங் பச்சுபட்டி²தங் –
அயஞ்ச ஸம்மாதி³ட்டி² ஸம்மாஸங்கப்போ ஸம்மாவாசா அரியானங் அபச்சனீகதா
ஸத்³த⁴ம்மஸஞ்ஞத்தி அனத்துக்கங்ஸனா அபரவம்ப⁴னா. ஏவமஸ்ஸிமே அனேகே குஸலா
த⁴ம்மா ஸம்ப⁴வந்தி ஸம்மாதி³ட்டி²பச்சயா.
‘‘தத்ர, க³ஹபதயோ, விஞ்ஞூ புரிஸோ இதி படிஸஞ்சிக்க²தி –
‘ஸசே கோ² அத்தி² கிரியா, ஏவமயங் ப⁴வங் புரிஸபுக்³க³லோ காயஸ்ஸ பே⁴தா³ பரங்
மரணா ஸுக³திங் ஸக்³க³ங் லோகங் உபபஜ்ஜிஸ்ஸதி. காமங் கோ² பன மாஹு
கிரியா, ஹோது நேஸங் ப⁴வதங் ஸமணப்³ராஹ்மணானங் ஸச்சங் வசனங்; அத² ச பனாயங்
ப⁴வங் புரிஸபுக்³க³லோ தி³ட்டே²வ த⁴ம்மே விஞ்ஞூனங் பாஸங்ஸோ – ஸீலவா
புரிஸபுக்³க³லோ ஸம்மாதி³ட்டி² கிரியவாதோ³’தி. ஸசே கோ² அத்தே²வ கிரியா, ஏவங்
இமஸ்ஸ போ⁴தோ புரிஸபுக்³க³லஸ்ஸ உப⁴யத்த² கடக்³க³ஹோ – யஞ்ச தி³ட்டே²வ த⁴ம்மே
விஞ்ஞூனங் பாஸங்ஸோ, யஞ்ச காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங்
உபபஜ்ஜிஸ்ஸதி. ஏவமஸ்ஸாயங் அபண்ணகோ த⁴ம்மோ ஸுஸமத்தோ ஸமாதி³ன்னோ, உப⁴யங்ஸங்
ப²ரித்வா திட்ட²தி, ரிஞ்சதி அகுஸலங் டா²னங்.
100. ‘‘ஸந்தி ,
க³ஹபதயோ, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘நத்தி² ஹேது,
நத்தி² பச்சயோ ஸத்தானங் ஸங்கிலேஸாய; அஹேதூ அப்பச்சயா ஸத்தா ஸங்கிலிஸ்ஸந்தி.
நத்தி² ஹேது, நத்தி² பச்சயோ ஸத்தானங் விஸுத்³தி⁴யா; அஹேதூ அப்பச்சயா ஸத்தா
விஸுஜ்ஜ²ந்தி. நத்தி² ப³லங், நத்தி² வீரியங் [விரியங் (ஸீ॰ ஸ்யா॰ கங்॰ பீ॰)],
நத்தி² புரிஸதா²மோ, நத்தி² புரிஸபரக்கமோ; ஸப்³பே³ ஸத்தா ஸப்³பே³ பாணா
ஸப்³பே³ பூ⁴தா ஸப்³பே³ ஜீவா அவஸா அப³லா அவீரியா நியதிஸங்க³திபா⁴வபரிணதா
ச²ஸ்வேவாபி⁴ஜாதீஸு ஸுக²து³க்க²ங் படிஸங்வேதெ³ந்தீ’தி. தேஸங்யேவ கோ²,
க³ஹபதயோ, ஸமணப்³ராஹ்மணானங் ஏகே ஸமணப்³ராஹ்மணா உஜுவிபச்சனீகவாதா³. தே
ஏவமாஹங்ஸு – ‘அத்தி² ஹேது, அத்தி² பச்சயோ ஸத்தானங் ஸங்கிலேஸாய; ஸஹேதூ
ஸப்பச்சயா ஸத்தா ஸங்கிலிஸ்ஸந்தி. அத்தி² ஹேது, அத்தி² பச்சயோ ஸத்தானங்
விஸுத்³தி⁴யா; ஸஹேதூ ஸப்பச்சயா ஸத்தா விஸுஜ்ஜ²ந்தி. அத்தி² ப³லங், அத்தி²
வீரியங், அத்தி² புரிஸதா²மோ, அத்தி² புரிஸபரக்கமோ; ந ஸப்³பே³ ஸத்தா ஸப்³பே³ பாணா ஸப்³பே³ பூ⁴தா ஸப்³பே³ ஜீவா அவஸா அப³லா அவீரியா [அத்தி² புரிஸபரக்கமோ, ஸப்³பே³ ஸத்தா… ஸவஸா ஸப³லா ஸவீரியா (ஸ்யா॰ கங்॰ க॰)] நியதிஸங்க³திபா⁴வபரிணதா ச²ஸ்வேவாபி⁴ஜாதீஸு ஸுக²து³க்க²ங் படிஸங்வேதெ³ந்தீ’தி. தங் கிங் மஞ்ஞத², க³ஹபதயோ, நனுமே ஸமணப்³ராஹ்மணா அஞ்ஞமஞ்ஞஸ்ஸ உஜுவிபச்சனீகவாதா³’தி? ‘ஏவங், ப⁴ந்தே’.
101. ‘‘தத்ர ,
க³ஹபதயோ, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘நத்தி² ஹேது,
நத்தி² பச்சயோ ஸத்தானங் ஸங்கிலேஸாய; அஹேதூ அப்பச்சயா ஸத்தா
ஸங்கிலிஸ்ஸந்தி. நத்தி² ஹேது, நத்தி² பச்சயோ ஸத்தானங் விஸுத்³தி⁴யா; அஹேதூ
அப்பச்சயா ஸத்தா விஸுஜ்ஜ²ந்தி. நத்தி² ப³லங், நத்தி² வீரியங், நத்தி²
புரிஸதா²மோ, நத்தி² புரிஸபரக்கமோ; ஸப்³பே³ ஸத்தா ஸப்³பே³ பாணா ஸப்³பே³
பூ⁴தா ஸப்³பே³ ஜீவா அவஸா அப³லா அவீரியா நியதிஸங்க³திபா⁴வபரிணதா
ச²ஸ்வேவாபி⁴ஜாதீஸு ஸுக²து³க்க²ங் படிஸங்வேதெ³ந்தீ’தி தேஸமேதங் பாடிகங்க²ங்?
யமித³ங் காயஸுசரிதங், வசீஸுசரிதங், மனோஸுசரிதங் – இமே தயோ குஸலே த⁴ம்மே
அபி⁴னிவஜ்ஜெத்வா யமித³ங் காயது³ச்சரிதங், வசீது³ச்சரிதங், மனோது³ச்சரிதங் –
இமே தயோ அகுஸலே த⁴ம்மே ஸமாதா³ய வத்திஸ்ஸந்தி. தங் கிஸ்ஸ ஹேது? ந ஹி தே
பொ⁴ந்தோ ஸமணப்³ராஹ்மணா பஸ்ஸந்தி அகுஸலானங் த⁴ம்மானங் ஆதீ³னவங் ஓகாரங்
ஸங்கிலேஸங், குஸலானங் த⁴ம்மானங் நெக்க²ம்மே ஆனிஸங்ஸங் வோதா³னபக்க²ங்.
ஸந்தங்யேவ கோ² பன ஹேதுங் ‘நத்தி² ஹேதூ’ திஸ்ஸ தி³ட்டி² ஹோதி; ஸாஸ்ஸ ஹோதி மிச்சா²தி³ட்டி². ஸந்தங்யேவ கோ² பன ஹேதுங் ‘நத்தி² ஹேதூ’தி ஸங்கப்பேதி ;
ஸ்வாஸ்ஸ ஹோதி மிச்சா²ஸங்கப்போ. ஸந்தங்யேவ கோ² பன ஹேதுங் ‘நத்தி² ஹேதூ’தி
வாசங் பா⁴ஸதி; ஸாஸ்ஸ ஹோதி மிச்சா²வாசா. ஸந்தங்யேவ கோ² பன ஹேதுங் ‘நத்தி²
ஹேதூ’தி ஆஹ; யே தே அரஹந்தோ ஹேதுவாதா³ தேஸமயங் பச்சனீகங் கரோதி. ஸந்தங்யேவ
கோ² பன ஹேதுங் ‘நத்தி² ஹேதூ’தி பரங் ஸஞ்ஞாபேதி; ஸாஸ்ஸ ஹோதி
அஸத்³த⁴ம்மஸஞ்ஞத்தி. தாய ச பன அஸத்³த⁴ம்மஸஞ்ஞத்தியா அத்தானுக்கங்ஸேதி, பரங்
வம்பே⁴தி. இதி புப்³பே³வ கோ² பனஸ்ஸ ஸுஸீல்யங் பஹீனங் ஹோதி, து³ஸ்ஸீல்யங்
பச்சுபட்டி²தங் – அயஞ்ச மிச்சா²தி³ட்டி² மிச்சா²ஸங்கப்போ மிச்சா²வாசா
அரியானங் பச்சனீகதா அஸத்³த⁴ம்மஸஞ்ஞத்தி அத்தானுக்கங்ஸனா பரவம்ப⁴னா.
ஏவமஸ்ஸிமே அனேகே பாபகா அகுஸலா த⁴ம்மா ஸம்ப⁴வந்தி மிச்சா²தி³ட்டி²பச்சயா.
‘‘தத்ர, க³ஹபதயோ, விஞ்ஞூ புரிஸோ இதி படிஸஞ்சிக்க²தி –
‘ஸசே கோ² நத்தி² ஹேது, ஏவமயங் ப⁴வங் புரிஸபுக்³க³லோ காயஸ்ஸ பே⁴தா³ பரங்
மரணா ஸொத்தி²மத்தானங் கரிஸ்ஸதி; ஸசே கோ² அத்தி² ஹேது, ஏவமயங் ப⁴வங்
புரிஸபுக்³க³லோ காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜிஸ்ஸதி. காமங் கோ² பன மாஹு ஹேது, ஹோது நேஸங் ப⁴வதங்
ஸமணப்³ராஹ்மணானங் ஸச்சங் வசனங்; அத² ச பனாயங் ப⁴வங் புரிஸபுக்³க³லோ
தி³ட்டே²வ த⁴ம்மே விஞ்ஞூனங் கா³ரய்ஹோ – து³ஸ்ஸீலோ புரிஸபுக்³க³லோ
மிச்சா²தி³ட்டி² அஹேதுகவாதோ³’தி. ஸசே கோ² அத்தே²வ ஹேது, ஏவங் இமஸ்ஸ போ⁴தோ
புரிஸபுக்³க³லஸ்ஸ உப⁴யத்த² கலிக்³க³ஹோ – யஞ்ச தி³ட்டே²வ த⁴ம்மே விஞ்ஞூனங் கா³ரய்ஹோ, யஞ்ச காயஸ்ஸ பே⁴தா³ பரங்
மரணா அபாயங் து³க்³க³திங் வினிபாதங் நிரயங் உபபஜ்ஜிஸ்ஸதி. ஏவமஸ்ஸாயங்
அபண்ணகோ த⁴ம்மோ து³ஸ்ஸமத்தோ ஸமாதி³ன்னோ, ஏகங்ஸங் ப²ரித்வா திட்ட²தி,
ரிஞ்சதி குஸலங் டா²னங்.
102.
‘‘தத்ர, க³ஹபதயோ, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ –
‘அத்தி² ஹேது, அத்தி² பச்சயோ ஸத்தானங் ஸங்கிலேஸாய; ஸஹேதூ ஸப்பச்சயா ஸத்தா
ஸங்கிலிஸ்ஸந்தி. அத்தி² ஹேது, அத்தி² பச்சயோ ஸத்தானங் விஸுத்³தி⁴யா; ஸஹேதூ
ஸப்பச்சயா ஸத்தா விஸுஜ்ஜ²ந்தி. அத்தி² ப³லங், அத்தி² வீரியங், அத்தி²
புரிஸதா²மோ, அத்தி² புரிஸபரக்கமோ; ந ஸப்³பே³ ஸத்தா ஸப்³பே³ பாணா ஸப்³பே³
பூ⁴தா ஸப்³பே³ ஜீவா அவஸா அப³லா அவீரியா நியதிஸங்க³திபா⁴வபரிணதா
ச²ஸ்வேவாபி⁴ஜாதீஸு ஸுக²து³க்க²ங் படிஸங்வேதெ³ந்தீ’தி தேஸமேதங் பாடிகங்க²ங்?
யமித³ங் காயது³ச்சரிதங், வசீது³ச்சரிதங், மனோது³ச்சரிதங் – இமே தயோ
அகுஸலே த⁴ம்மே அபி⁴னிவஜ்ஜெத்வா யமித³ங் காயஸுசரிதங், வசீஸுசரிதங்,
மனோஸுசரிதங் – இமே தயோ குஸலே த⁴ம்மே ஸமாதா³ய வத்திஸ்ஸந்தி. தங் கிஸ்ஸ ஹேது?
பஸ்ஸந்தி ஹி தே பொ⁴ந்தோ ஸமணப்³ராஹ்மணா அகுஸலானங் த⁴ம்மானங் ஆதீ³னவங்
ஓகாரங் ஸங்கிலேஸங், குஸலானங் த⁴ம்மானங் நெக்க²ம்மே ஆனிஸங்ஸங்
வோதா³னபக்க²ங். ஸந்தங்யேவ கோ² பன ஹேதுங் ‘அத்தி² ஹேதூ’ திஸ்ஸ தி³ட்டி²
ஹோதி; ஸாஸ்ஸ ஹோதி ஸம்மாதி³ட்டி². ஸந்தங்யேவ கோ² பன ஹேதுங் ‘அத்தி² ஹேதூ’தி
ஸங்கப்பேதி; ஸ்வாஸ்ஸ ஹோதி ஸம்மாஸங்கப்போ. ஸந்தங்யேவ கோ² பன ஹேதுங் ‘அத்தி²
ஹேதூ’தி வாசங் பா⁴ஸதி; ஸாஸ்ஸ ஹோதி ஸம்மாவாசா. ஸந்தங்யேவ கோ² பன ஹேதுங்
‘அத்தி² ஹேதூ’தி ஆஹ, யே தே அரஹந்தோ ஹேதுவாதா³ தேஸமயங் ந பச்சனீகங் கரோதி.
ஸந்தங்யேவ கோ² பன ஹேதுங் ‘அத்தி² ஹேதூ’தி பரங் ஸஞ்ஞாபேதி; ஸாஸ்ஸ ஹோதி
ஸத்³த⁴ம்மஸஞ்ஞத்தி. தாய ச பன ஸத்³த⁴ம்மஸஞ்ஞத்தியா நேவத்தானுக்கங்ஸேதி, ந
பரங் வம்பே⁴தி. இதி புப்³பே³வ கோ² பனஸ்ஸ து³ஸ்ஸீல்யங் பஹீனங் ஹோதி,
ஸுஸீல்யங் பச்சுபட்டி²தங் – அயஞ்ச ஸம்மாதி³ட்டி² ஸம்மாஸங்கப்போ ஸம்மாவாசா
அரியானங் அபச்சனீகதா ஸத்³த⁴ம்மஸஞ்ஞத்தி அனத்துக்கங்ஸனா அபரவம்ப⁴னா.
ஏவமஸ்ஸிமே அனேகே குஸலா த⁴ம்மா ஸம்ப⁴வந்தி ஸம்மாதி³ட்டி²பச்சயா.
‘‘தத்ர, க³ஹபதயோ, விஞ்ஞூ புரிஸோ இதி படிஸஞ்சிக்க²தி –
‘ஸசே கோ² அத்தி² ஹேது, ஏவமயங் ப⁴வங் புரிஸபுக்³க³லோ காயஸ்ஸ பே⁴தா³ பரங்
மரணா ஸுக³திங் ஸக்³க³ங் லோகங் உபபஜ்ஜிஸ்ஸதி. காமங் கோ² பன மாஹு ஹேது, ஹோது
நேஸங் ப⁴வதங் ஸமணப்³ராஹ்மணானங் ஸச்சங் வசனங்; அத² ச பனாயங் ப⁴வங்
புரிஸபுக்³க³லோ தி³ட்டே²வ த⁴ம்மே விஞ்ஞூனங் பாஸங்ஸோ – ஸீலவா புரிஸபுக்³க³லோ
ஸம்மாதி³ட்டி² ஹேதுவாதோ³’தி. ஸசே கோ² அத்தி² ஹேது , ஏவங் இமஸ்ஸ போ⁴தோ புரிஸபுக்³க³லஸ்ஸ உப⁴யத்த² கடக்³க³ஹோ
– யஞ்ச தி³ட்டே²வ த⁴ம்மே விஞ்ஞூனங் பாஸங்ஸோ, யஞ்ச காயஸ்ஸ பே⁴தா³ பரங் மரணா
ஸுக³திங் ஸக்³க³ங் லோகங் உபபஜ்ஜிஸ்ஸதி. ஏவமஸ்ஸாயங் அபண்ணகோ த⁴ம்மோ
ஸுஸமத்தோ ஸமாதி³ன்னோ, உப⁴யங்ஸங் ப²ரித்வா திட்ட²தி, ரிஞ்சதி அகுஸலங்
டா²னங்.
103. ‘‘ஸந்தி, க³ஹபதயோ, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ
– ‘நத்தி² ஸப்³ப³ஸோ ஆருப்பா’தி. தேஸங்யேவ கோ², க³ஹபதயோ, ஸமணப்³ராஹ்மணானங்
ஏகே ஸமணப்³ராஹ்மணா உஜுவிபச்சனீகவாதா³. தே ஏவமாஹங்ஸு – ‘அத்தி² ஸப்³ப³ஸோ
ஆருப்பா’தி. தங் கிங் மஞ்ஞத², க³ஹபதயோ, நனுமே ஸமணப்³ராஹ்மணா அஞ்ஞமஞ்ஞஸ்ஸ
உஜுவிபச்சனீகவாதா³’’தி? ‘‘ஏவங், ப⁴ந்தே’’. ‘‘தத்ர ,
க³ஹபதயோ, விஞ்ஞூ புரிஸோ இதி படிஸஞ்சிக்க²தி – யே கோ² தே பொ⁴ந்தோ
ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘நத்தி² ஸப்³ப³ஸோ ஆருப்பா’தி,
இத³ங் மே அதி³ட்ட²ங்; யேபி தே பொ⁴ந்தோ ஸமணப்³ராஹ்மணா ஏவங்வாதி³னோ
ஏவங்தி³ட்டி²னோ – ‘அத்தி² ஸப்³ப³ஸோ ஆருப்பா’தி, இத³ங் மே அவிதி³தங்.
அஹஞ்சேவ [அஹஞ்சே (?)] கோ² பன அஜானந்தோ அபஸ்ஸந்தோ
ஏகங்ஸேன ஆதா³ய வோஹரெய்யங் – இத³மேவ ஸச்சங், மோக⁴மஞ்ஞந்தி, ந மேதங் அஸ்ஸ
பதிரூபங். யே கோ² தே பொ⁴ந்தோ ஸமணப்³ராஹ்மணா ஏவங்வாதி³னோ ஏவங்தி³ட்டி²னோ –
‘நத்தி² ஸப்³ப³ஸோ ஆருப்பா’தி, ஸசே தேஸங் ப⁴வதங் ஸமணப்³ராஹ்மணானங் ஸச்சங்
வசனங், டா²னமேதங் விஜ்ஜதி – யே தே தே³வா ரூபினோ மனோமயா, அபண்ணகங் மே
தத்ரூபபத்தி ப⁴விஸ்ஸதி. யே பன தே பொ⁴ந்தோ ஸமணப்³ராஹ்மணா ஏவங்வாதி³னோ
ஏவங்தி³ட்டி²னோ – ‘அத்தி² ஸப்³ப³ஸோ ஆருப்பா’தி, ஸசே தேஸங் ப⁴வதங்
ஸமணப்³ராஹ்மணானங் ஸச்சங் வசனங், டா²னமேதங் விஜ்ஜதி – யே தே தே³வா அரூபினோ
ஸஞ்ஞாமயா, அபண்ணகங் மே தத்ரூபபத்தி ப⁴விஸ்ஸதி. தி³ஸ்ஸந்தி கோ² பன
ரூபாதி⁴கரணங் [ரூபகாரணா (க॰)] த³ண்டா³தா³ன-ஸத்தா²தா³ன-கலஹ-விக்³க³ஹ-விவாத³-துவங்துவங்-பேஸுஞ்ஞ-முஸாவாதா³. ‘நத்தி² கோ² பனேதங் ஸப்³ப³ஸோ அரூபே’’’தி. ஸோ இதி படிஸங்கா²ய ரூபானங்யேவ நிப்³பி³தா³ய விராகா³ய நிரோதா⁴ய படிபன்னோ ஹோதி.
104.
‘‘ஸந்தி, க³ஹபதயோ, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ –
‘நத்தி² ஸப்³ப³ஸோ ப⁴வனிரோதோ⁴’தி. தேஸங்யேவ கோ², க³ஹபதயோ, ஸமணப்³ராஹ்மணானங்
ஏகே ஸமணப்³ராஹ்மணா உஜுவிபச்சனீகவாதா³. தே ஏவமாஹங்ஸு – ‘அத்தி² ஸப்³ப³ஸோ
ப⁴வனிரோதோ⁴’தி. தங் கிங் மஞ்ஞத², க³ஹபதயோ, நனுமே ஸமணப்³ராஹ்மணா
அஞ்ஞமஞ்ஞஸ்ஸ உஜுவிபச்சனீகவாதா³’’தி? ‘‘ஏவங், ப⁴ந்தே’’. ‘‘தத்ர, க³ஹபதயோ,
விஞ்ஞூ புரிஸோ இதி படிஸஞ்சிக்க²தி – யே கோ² தே பொ⁴ந்தோ ஸமணப்³ராஹ்மணா
ஏவங்வாதி³னோ ஏவங்தி³ட்டி²னோ – ‘நத்தி² ஸப்³ப³ஸோ ப⁴வனிரோதோ⁴’தி, இத³ங் மே
அதி³ட்ட²ங்; யேபி தே பொ⁴ந்தோ ஸமணப்³ராஹ்மணா
ஏவங்வாதி³னோ ஏவங்தி³ட்டி²னோ – ‘அத்தி² ஸப்³ப³ஸோ ப⁴வனிரோதோ⁴’தி, இத³ங் மே
அவிதி³தங். அஹஞ்சேவ கோ² பன அஜானந்தோ அபஸ்ஸந்தோ ஏகங்ஸேன ஆதா³ய வோஹரெய்யங் –
இத³மேவ ஸச்சங், மோக⁴மஞ்ஞந்தி, ந மேதங் அஸ்ஸ பதிரூபங். யே கோ² தே பொ⁴ந்தோ
ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘நத்தி² ஸப்³ப³ஸோ
ப⁴வனிரோதோ⁴’தி, ஸசே தேஸங் ப⁴வதங் ஸமணப்³ராஹ்மணானங்
ஸச்சங் வசனங், டா²னமேதங் விஜ்ஜதி – யே தே தே³வா அரூபினோ ஸஞ்ஞாமயா அபண்ணகங்
மே தத்ரூபபத்தி ப⁴விஸ்ஸதி. யே பன தே பொ⁴ந்தோ ஸமணப்³ராஹ்மணா ஏவங்வாதி³னோ
ஏவங்தி³ட்டி²னோ – ‘அத்தி² ஸப்³ப³ஸோ ப⁴வனிரோதோ⁴’தி, ஸசே தேஸங் ப⁴வதங்
ஸமணப்³ராஹ்மணானங் ஸச்சங் வசனங், டா²னமேதங் விஜ்ஜதி – யங் தி³ட்டே²வ த⁴ம்மே
பரினிப்³பா³யிஸ்ஸாமி . யே கோ² தே பொ⁴ந்தோ ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘நத்தி² ஸப்³ப³ஸோ ப⁴வனிரோதோ⁴’தி, தேஸமயங் தி³ட்டி² ஸாராகா³ய [ஸராகா³ய (ஸ்யா॰ கங்॰)]
ஸந்திகே, ஸங்யோகா³ய ஸந்திகே, அபி⁴னந்த³னாய ஸந்திகே, அஜ்ஜோ²ஸானாய ஸந்திகே,
உபாதா³னாய ஸந்திகே. யே பன தே பொ⁴ந்தோ ஸமணப்³ராஹ்மணா ஏவங்வாதி³னோ
ஏவங்தி³ட்டி²னோ – ‘அத்தி² ஸப்³ப³ஸோ ப⁴வனிரோதோ⁴’தி, தேஸமயங் தி³ட்டி²
அஸாராகா³ய ஸந்திகே, அஸங்யோகா³ய ஸந்திகே, அனபி⁴னந்த³னாய ஸந்திகே,
அனஜ்ஜோ²ஸானாய ஸந்திகே, அனுபாதா³னாய ஸந்திகே’’’தி. ஸோ இதி படிஸங்கா²ய
ப⁴வானங்யேவ நிப்³பி³தா³ய விராகா³ய நிரோதா⁴ய படிபன்னோ ஹோதி.
105.
‘‘சத்தாரோமே, க³ஹபதயோ, புக்³க³லா ஸந்தோ ஸங்விஜ்ஜமானா லோகஸ்மிங். கதமே
சத்தாரோ? இத⁴, க³ஹபதயோ, ஏகச்சோ புக்³க³லோ அத்தந்தபோ ஹோதி
அத்தபரிதாபனானுயோக³மனுயுத்தோ. இத⁴, க³ஹபதயோ, ஏகச்சோ புக்³க³லோ பரந்தபோ ஹோதி
பரபரிதாபனானுயோக³மனுயுத்தோ. இத⁴, க³ஹபதயோ, ஏகச்சோ புக்³க³லோ அத்தந்தபோ ச
ஹோதி அத்தபரிதாபனானுயோக³மனுயுத்தோ பரந்தபோ ச பரபரிதாபனானுயோக³மனுயுத்தோ.
இத⁴, க³ஹபதயோ, ஏகச்சோ புக்³க³லோ நேவத்தந்தபோ ஹோதி
நாத்தபரிதாபனானுயோக³மனுயுத்தோ ந பரந்தபோ ந பரபரிதாபனானுயோக³மனுயுத்தோ; ஸோ
அனத்தந்தபோ அபரந்தபோ தி³ட்டே²வ த⁴ம்மே நிச்சா²தோ நிப்³பு³தோ ஸீதீபூ⁴தோ ஸுக²ப்படிஸங்வேதீ³ ப்³ரஹ்மபூ⁴தேன அத்தனா விஹரதி.
106. ‘‘கதமோ ச, க³ஹபதயோ, புக்³க³லோ அத்தந்தபோ அத்தபரிதாபனானுயோக³மனுயுத்தோ ? இத⁴, க³ஹபதயோ, ஏகச்சோ புக்³க³லோ அசேலகோ ஹோதி முத்தாசாரோ ஹத்தா²பலேக²னோ…பே॰… [வித்தா²ரோ ம॰ நி॰ 2.6-7 கந்த³ரகஸுத்தே]
இதி ஏவரூபங் அனேகவிஹிதங் காயஸ்ஸ ஆதாபனபரிதாபனானுயோக³மனுயுத்தோ விஹரதி.
அயங் வுச்சதி, க³ஹபதயோ, புக்³க³லோ அத்தந்தபோ அத்தபரிதாபனானுயோக³மனுயுத்தோ.
‘‘கதமோ
ச, க³ஹபதயோ, புக்³க³லோ பரந்தபோ பரபரிதாபனானுயோக³மனுயுத்தோ? இத⁴, க³ஹபதயோ,
ஏகச்சோ புக்³க³லோ ஓரப்³பி⁴கோ ஹோதி ஸூகரிகோ…பே॰… யே வா பனஞ்ஞேபி கேசி
குரூரகம்மந்தா. அயங் வுச்சதி, க³ஹபதயோ, புக்³க³லோ பரந்தபோ
பரபரிதாபனானுயோக³மனுயுத்தோ.
‘‘கதமோ ச, க³ஹபதயோ, புக்³க³லோ அத்தந்தபோ ச
அத்தபரிதாபனானுயோக³மனுயுத்தோ பரந்தபோ ச பரபரிதாபனானுயோக³மனுயுத்தோ? இத⁴,
க³ஹபதயோ, ஏகச்சோ புக்³க³லோ ராஜா வா ஹோதி க²த்தியோ முத்³தா⁴வஸித்தோ…பே॰…
தேபி த³ண்ட³தஜ்ஜிதா ப⁴யதஜ்ஜிதா அஸ்ஸுமுகா² ருத³மானா பரிகம்மானி கரொந்தி.
அயங் வுச்சதி, க³ஹபதயோ, புக்³க³லோ அத்தந்தபோ ச அத்தபரிதாபனானுயோக³மனுயுத்தோ
பரந்தபோ ச பரபரிதாபனானுயோக³மனுயுத்தோ.
‘‘கதமோ ச, க³ஹபதயோ, புக்³க³லோ நேவத்தந்தபோ
நாத்தபரிதாபனானுயோக³மனுயுத்தோ ந பரந்தபோ ந பரபரிதாபனானுயோக³மனுயுத்தோ; ஸோ
அனத்தந்தபோ அபரந்தபோ தி³ட்டே²வ த⁴ம்மே நிச்சா²தோ நிப்³பு³தோ ஸீதீபூ⁴தோ
ஸுக²ப்படிஸங்வேதீ³ ப்³ரஹ்மபூ⁴தேன அத்தனா விஹரதி? இத⁴, க³ஹபதயோ, ததா²க³தோ
லோகே உப்பஜ்ஜதி அரஹங் ஸம்மாஸம்பு³த்³தோ⁴…பே॰… ஸோ இமே பஞ்ச நீவரணே பஹாய
சேதஸோ உபக்கிலேஸே பஞ்ஞாய து³ப்³ப³லீகரணே விவிச்சேவ
காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங்
பட²மங் ஜா²னங் உபஸம்பஜ்ஜ விஹரதி. விதக்கவிசாரானங் வூபஸமா அஜ்ஜ²த்தங்
ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங்
து³தியங் ஜா²னங்…பே॰… ததியங் ஜா²னங்… சதுத்த²ங் ஜா²னங் உபஸம்பஜ்ஜ விஹரதி.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே
அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
புப்³பே³னிவாஸானுஸ்ஸதிஞாணாய சித்தங் அபி⁴னின்னாமேதி. ஸோ அனேகவிஹிதங்
புப்³பே³னிவாஸங் அனுஸ்ஸரதி ஸெய்யதி²த³ங் – ஏகம்பி ஜாதிங் த்³வேபி
ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங்
அனுஸ்ஸரதி. ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஸத்தானங்
சுதூபபாதஞாணாய சித்தங் அபி⁴னின்னாமேதி. ஸோ தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே
ஸுவண்ணே து³ப்³ப³ண்ணே, ஸுக³தே து³க்³க³தே…பே॰… யதா²கம்மூபகே³ ஸத்தே
பஜானாதி. ஸோ ஏவங் ஸமாஹிதே சித்தே பரிஸுத்³தே⁴
பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே
ஆனேஞ்ஜப்பத்தே ஆஸவானங் க²யஞாணாய சித்தங் அபி⁴னின்னாமேதி. ஸோ ‘இத³ங்
து³க்க²’ந்தி யதா²பூ⁴தங் பஜானாதி…பே॰… ‘அயங் ஆஸவனிரோத⁴கா³மினீ
படிபதா³’தி யதா²பூ⁴தங் பஜானாதி. தஸ்ஸ ஏவங் ஜானதோ ஏவங் பஸ்ஸதோ காமாஸவாபி
சித்தங் விமுச்சதி, ப⁴வாஸவாபி சித்தங் விமுச்சதி, அவிஜ்ஜாஸவாபி சித்தங்
விமுச்சதி. விமுத்தஸ்மிங் விமுத்தமிதி ஞாணங் ஹோதி. ‘கீ²ணா ஜாதி, வுஸிதங்
ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி. அயங்
வுச்சதி, க³ஹபதயோ, புக்³க³லோ நேவத்தந்தபோ நாத்தபரிதாபனானுயோக³மனுயுத்தோ ந
பரந்தபோ ந பரபரிதாபனானுயோக³மனுயுத்தோ; ஸோ அனத்தந்தபோ அபரந்தபோ தி³ட்டே²வ
த⁴ம்மே நிச்சா²தோ நிப்³பு³தோ ஸீதீபூ⁴தோ ஸுக²ப்படிஸங்வேதீ³ ப்³ரஹ்மபூ⁴தேன
அத்தனா விஹரதீ’’தி.
ஏவங் வுத்தே, ஸாலெய்யகா ப்³ராஹ்மணக³ஹபதிகா ப⁴க³வந்தங்
ஏதத³வோசுங் – ‘‘அபி⁴க்கந்தங், போ⁴ கோ³தம, அபி⁴க்கந்தங், போ⁴ கோ³தம!
ஸெய்யதா²பி, போ⁴ கோ³தம, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா
விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங்
தா⁴ரெய்ய ‘சக்கு²மந்தோ ரூபானி த³க்க²ந்தீ’தி; ஏவமேவங் போ⁴தா கோ³தமேன
அனேகபரியாயேன த⁴ம்மோ பகாஸிதோ. ஏதே மயங் ப⁴வந்தங் கோ³தமங் ஸரணங் க³ச்சா²ம
த⁴ம்மஞ்ச பி⁴க்கு²ஸங்க⁴ஞ்ச. உபாஸகே நோ ப⁴வங் கோ³தமோ தா⁴ரேது அஜ்ஜதக்³கே³
பாணுபேதங் ஸரணங் க³தே’’தி.
அபண்ணகஸுத்தங் நிட்டி²தங் த³ஸமங்.
க³ஹபதிவக்³கோ³ நிட்டி²தோ பட²மோ.
தஸ்ஸுத்³தா³னங் –
கந்த³ரனாக³ரஸேக²வதோ ச, போதலியோ புன ஜீவகப⁴ச்சோ;
உபாலித³மதோ² குக்குரஅப⁴யோ, ப³ஹுவேத³னீயாபண்ணகதோ த³ஸமோ.
ஸுத்தபிடக-Part-39-தமிழில் திரபிடக மூன்று தொகுப்புகள்TIPITAKA--39.5. சூளயமகவக்கோ-1. ஸாலெய்யகஸுத்தங்-from FREE ONLINE eNālāndā Research and
Practice UNIVERSITY through http://sarvajan.ambedkar.org
5. சூளயமகவக்கோ
1. ஸாலெய்யகஸுத்தங்
439. ஏவங்
மே ஸுதங் – ஏகங் ஸமயங் ப⁴க³வா கோஸலேஸு சாரிகங் சரமானோ மஹதா
பி⁴க்கு²ஸங்கே⁴ன ஸத்³தி⁴ங் யேன ஸாலா நாம கோஸலானங் ப்³ராஹ்மணகா³மோ தத³வஸரி.
அஸ்ஸோஸுங் கோ² ஸாலெய்யகா ப்³ராஹ்மணக³ஹபதிகா – ‘‘ஸமணோ க²லு, போ⁴, கோ³தமோ
ஸக்யபுத்தோ ஸக்யகுலா பப்³ப³ஜிதோ கோஸலேஸு சாரிகங் சரமானோ மஹதா
பி⁴க்கு²ஸங்கே⁴ன ஸத்³தி⁴ங் ஸாலங் அனுப்பத்தோ. தங் கோ² பன ப⁴வந்தங் கோ³தமங்
ஏவங் கல்யாணோ கித்திஸத்³தோ³ அப்³பு⁴க்³க³தோ – ‘இதிபி ஸோ ப⁴க³வா அரஹங்
ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ
புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா. ஸோ இமங் லோகங்
ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங்
அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங் தே³ஸேதி ஆதி³கல்யாணங்
மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங்; கேவலபரிபுண்ணங்
பரிஸுத்³த⁴ங் ப்³ரஹ்மசரியங் பகாஸேதி’. ஸாது⁴ கோ² பன ததா²ரூபானங் அரஹதங்
த³ஸ்ஸனங் ஹோதீ’’தி.
அத² கோ² ஸாலெய்யகா ப்³ராஹ்மணக³ஹபதிகா யேன ப⁴க³வா
தேனுபஸங்கமிங்ஸு; உபஸங்கமித்வா அப்பேகச்சே ப⁴க³வந்தங் அபி⁴வாதெ³த்வா
ஏகமந்தங் நிஸீதி³ங்ஸு; அப்பேகச்சே ப⁴க³வதா ஸத்³தி⁴ங் ஸம்மோதி³ங்ஸு,
ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங்
நிஸீதி³ங்ஸு; அப்பேகச்சே யேன ப⁴க³வா தேனஞ்ஜலிங் பணாமெத்வா ஏகமந்தங்
நிஸீதி³ங்ஸு; அப்பேகச்சே ப⁴க³வதோ ஸந்திகே நாமகொ³த்தங் ஸாவெத்வா ஏகமந்தங்
நிஸீதி³ங்ஸு; அப்பேகச்சே துண்ஹீபூ⁴தா ஏகமந்தங் நிஸீதி³ங்ஸு. ஏகமந்தங்
நிஸின்னா கோ² ஸாலெய்யகா ப்³ராஹ்மணக³ஹபதிகா ப⁴க³வந்தங் ஏதத³வோசுங் – ‘‘கோ நு
கோ², போ⁴ கோ³தம, ஹேது, கோ பச்சயோ, யேன மிதே⁴கச்சே ஸத்தா காயஸ்ஸ பே⁴தா³
பரங் மரணா அபாயங் து³க்³க³திங் வினிபாதங் நிரயங் உபபஜ்ஜந்தி ? கோ பன, போ⁴ கோ³தம, ஹேது, கோ பச்சயோ, யேன மிதே⁴கச்சே ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தீ’’தி?
‘‘அத⁴ம்மசரியாவிஸமசரியாஹேது கோ², க³ஹபதயோ,
ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜந்தி. த⁴ம்மசரியாஸமசரியாஹேது கோ², க³ஹபதயோ, ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தீ’’தி .
‘‘ந கோ² மயங் இமஸ்ஸ போ⁴தோ கோ³தமஸ்ஸ ஸங்கி²த்தேன
பா⁴ஸிதஸ்ஸ, வித்தா²ரேன அத்த²ங் அவிப⁴த்தஸ்ஸ, வித்தா²ரேன அத்த²ங் ஆஜானாம.
ஸாது⁴ நோ ப⁴வங் கோ³தமோ ததா² த⁴ம்மங் தே³ஸேது, யதா² மயங் இமஸ்ஸ போ⁴தோ
கோ³தமஸ்ஸ ஸங்கி²த்தேன பா⁴ஸிதஸ்ஸ, வித்தா²ரேன அத்த²ங் அவிப⁴த்தஸ்ஸ,
வித்தா²ரேன அத்த²ங் ஆஜானெய்யாமா’’தி. ‘‘தேன ஹி, க³ஹபதயோ, ஸுணாத², ஸாது⁴கங்
மனஸி கரோத², பா⁴ஸிஸ்ஸாமீ’’தி. ‘‘ஏவங், போ⁴’’தி கோ² ஸாலெய்யகா
ப்³ராஹ்மணக³ஹபதிகா ப⁴க³வதோ பச்சஸ்ஸோஸுங். ப⁴க³வா ஏதத³வோச –
440.
‘‘திவித⁴ங் கோ², க³ஹபதயோ, காயேன அத⁴ம்மசரியாவிஸமசரியா ஹோதி, சதுப்³பி³த⁴ங்
வாசாய அத⁴ம்மசரியாவிஸமசரியா ஹோதி, திவித⁴ங் மனஸா அத⁴ம்மசரியாவிஸமசரியா
ஹோதி.
‘‘கத²ஞ்ச, க³ஹபதயோ, திவித⁴ங் காயேன அத⁴ம்மசரியாவிஸமசரியா ஹோதி? இத⁴, க³ஹபதயோ, ஏகச்சோ பாணாதிபாதீ ஹோதி, லுத்³தோ³ [லுத்³தோ³ தா³ருணோ (க॰) டீகா ஓலோகேதப்³பா³] லோஹிதபாணி ஹதப்பஹதே நிவிட்டோ² அத³யாபன்னோ பாணபூ⁴தேஸு [ஸப்³ப³பாணபூ⁴தேஸு (ஸ்யா॰ கங்॰ க॰)].
‘‘அதி³ன்னாதா³யீ கோ² பன ஹோதி. யங் தங் பரஸ்ஸ
பரவித்தூபகரணங், கா³மக³தங் வா அரஞ்ஞக³தங் வா, தங் அதி³ன்னங்
தெ²ய்யஸங்கா²தங் ஆதா³தா ஹோதி.
‘‘காமேஸுமிச்சா²சாரீ கோ² பன ஹோதி. யா தா மாதுரக்கி²தா
பிதுரக்கி²தா மாதாபிதுரக்கி²தா பா⁴துரக்கி²தா ப⁴கி³னிரக்கி²தா ஞாதிரக்கி²தா
கொ³த்தரக்கி²தா த⁴ம்மரக்கி²தா ஸஸ்ஸாமிகா ஸபரித³ண்டா³ அந்தமஸோ
மாலாகு³ளபரிக்கி²த்தாபி, ததா²ரூபாஸு சாரித்தங் ஆபஜ்ஜிதா ஹோதி. ஏவங் கோ²,
க³ஹபதயோ, திவித⁴ங் காயேன அத⁴ம்மசரியாவிஸமசரியா ஹோதி.
‘‘கத²ஞ்ச , க³ஹபதயோ,
சதுப்³பி³த⁴ங் வாசாய அத⁴ம்மசரியாவிஸமசரியா ஹோதி? இத⁴, க³ஹபதயோ, ஏகச்சோ
முஸாவாதீ³ ஹோதி. ஸபா⁴க³தோ வா பரிஸாக³தோ வா, ஞாதிமஜ்ஜ²க³தோ வா பூக³மஜ்ஜ²க³தோ
வா ராஜகுலமஜ்ஜ²க³தோ வா, அபி⁴னீதோ ஸக்கி²புட்டோ² – ‘ஏஹம்போ⁴ புரிஸ, யங்
ஜானாஸி தங் வதே³ஹீ’தி , ஸோ அஜானங் வா ஆஹ – ‘ஜானாமீ’தி, ஜானங் வா ஆஹ – ‘ந ஜானாமீ’தி, அபஸ்ஸங் வா ஆஹ – ‘பஸ்ஸாமீ’தி, பஸ்ஸங் வா ஆஹ – ‘ந பஸ்ஸாமீ’தி [ஸோ ஆஹ அஜானங் வா அஹங் ஜானாமீதி ஜானங் வா அஹங் ந ஜானாமீதி அபஸ்ஸங் வா அஹங் பஸ்ஸாமீதி பஸ்ஸங் வா அஹங் ந பஸ்ஸாமீதி (க॰)]. இதி அத்தஹேது வா பரஹேது வா ஆமிஸகிஞ்சிக்க²ஹேது வா ஸம்பஜானமுஸா பா⁴ஸிதா ஹோதி.
‘‘பிஸுணவாசோ கோ² பன ஹோதி. இதோ ஸுத்வா அமுத்ர அக்கா²தா இமேஸங் பே⁴தா³ய, அமுத்ர வா ஸுத்வா இமேஸங் அக்கா²தா அமூஸங் பே⁴தா³ய. இதி ஸமக்³கா³னங் வா பெ⁴த்தா [பே⁴த³கா (க॰), பே⁴தே³தா (ஸ்யா॰ கங்॰), தத³ட்ட²கதா²யங் பன பெ⁴த்தாதி தி³ஸ்ஸதி], பி⁴ன்னானங் வா அனுப்பதா³தா, வக்³கா³ராமோ வக்³க³ரதோ வக்³க³னந்தீ³ வக்³க³கரணிங் வாசங் பா⁴ஸிதா ஹோதி.
‘‘ப²ருஸவாசோ கோ² பன ஹோதி. யா ஸா வாசா அண்ட³கா [கண்ட³கா (க॰)] கக்கஸா பரகடுகா பராபி⁴ஸஜ்ஜனீ கோத⁴ஸாமந்தா அஸமாதி⁴ஸங்வத்தனிகா , ததா²ரூபிங் வாசங் பா⁴ஸிதா ஹோதி.
‘‘ஸம்ப²ப்பலாபீ கோ² பன ஹோதி. அகாலவாதீ³ அபூ⁴தவாதீ³
அனத்த²வாதீ³ அத⁴ம்மவாதீ³ அவினயவாதீ³. அனிதா⁴னவதிங் வாசங் பா⁴ஸிதா ஹோதி
அகாலேன அனபதே³ஸங் அபரியந்தவதிங் அனத்த²ஸங்ஹிதங். ஏவங் கோ², க³ஹபதயோ,
சதுப்³பி³த⁴ங் வாசாய அத⁴ம்மசரியாவிஸமசரியா ஹோதி.
‘‘கத²ஞ்ச, க³ஹபதயோ, திவித⁴ங் மனஸா
அத⁴ம்மசரியாவிஸமசரியா ஹோதி? இத⁴, க³ஹபதயோ, ஏகச்சோ அபி⁴ஜ்ஜா²லு ஹோதி, யங்
தங் பரஸ்ஸ பரவித்தூபகரணங் தங் அபி⁴ஜ்ஜா²தா ஹோதி – ‘அஹோ வத யங் பரஸ்ஸ தங்
மமஸ்ஸா’’’தி!
‘‘ப்³யாபன்னசித்தோ கோ² பன ஹோதி பது³ட்ட²மனஸங்கப்போ –
‘இமே ஸத்தா ஹஞ்ஞந்து வா வஜ்ஜ²ந்து வா உச்சி²ஜ்ஜந்து வா வினஸ்ஸந்து வா மா வா
அஹேஸு’’’ந்தி [மா வா அஹேஸுங் இதி வாதி (ஸீ॰ பீ॰ க॰)].
‘‘மிச்சா²தி³ட்டி²கோ கோ² பன ஹோதி விபரீதத³ஸ்ஸனோ –
‘நத்தி² தி³ன்னங் நத்தி² யிட்ட²ங் நத்தி² ஹுதங், நத்தி² ஸுகதது³க்கடானங்
கம்மானங் ப²லங் விபாகோ, நத்தி² அயங் லோகோ நத்தி² பரோ லோகோ, நத்தி² மாதா
நத்தி² பிதா, நத்தி² ஸத்தா ஓபபாதிகா , நத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகங் பரஞ்ச லோகங் ஸயங் அபி⁴ஞ்ஞா ஸச்சி²கத்வா பவேதெ³ந்தீ’தி. ஏவங் கோ², க³ஹபதயோ, திவித⁴ங் மனஸா அத⁴ம்மசரியாவிஸமசரியா ஹோதி.
‘‘ஏவங் அத⁴ம்மசரியாவிஸமசரியாஹேது கோ², க³ஹபதயோ,
ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜந்தி.
441.
‘‘திவித⁴ங் கோ², க³ஹபதயோ, காயேன த⁴ம்மசரியாஸமசரியா ஹோதி, சதுப்³பி³த⁴ங்
வாசாய த⁴ம்மசரியாஸமசரியா ஹோதி, திவித⁴ங் மனஸா த⁴ம்மசரியாஸமசரியா ஹோதி.
‘‘கத²ஞ்ச, க³ஹபதயோ, திவித⁴ங் காயேன த⁴ம்மசரியாஸமசரியா
ஹோதி? இத⁴, க³ஹபதயோ, ஏகச்சோ பாணாதிபாதங் பஹாய பாணாதிபாதா படிவிரதோ ஹோதி,
நிஹிதத³ண்டோ³ நிஹிதஸத்தோ² லஜ்ஜீ த³யாபன்னோ ஸப்³ப³பாணபூ⁴தஹிதானுகம்பீ
விஹரதி.
‘‘அதி³ன்னாதா³னங் பஹாய அதி³ன்னாதா³னா படிவிரதோ ஹோதி.
யங் தங் பரஸ்ஸ பரவித்தூபகரணங், கா³மக³தங் வா அரஞ்ஞக³தங் வா, தங் நாதி³ன்னங்
தெ²ய்யஸங்கா²தங் ஆதா³தா ஹோதி.
‘‘காமேஸுமிச்சா²சாரங் பஹாய காமேஸுமிச்சா²சாரா படிவிரதோ
ஹோதி. யா தா மாதுரக்கி²தா பிதுரக்கி²தா மாதாபிதுரக்கி²தா பா⁴துரக்கி²தா
ப⁴கி³னிரக்கி²தா ஞாதிரக்கி²தா கொ³த்தரக்கி²தா த⁴ம்மரக்கி²தா ஸஸ்ஸாமிகா
ஸபரித³ண்டா³ அந்தமஸோ மாலாகு³ளபரிக்கி²த்தாபி, ததா²ரூபாஸு ந சாரித்தங்
ஆபஜ்ஜிதா ஹோதி. ஏவங் கோ², க³ஹபதயோ, திவித⁴ங் காயேன த⁴ம்மசரியாஸமசரியா ஹோதி.
‘‘கத²ஞ்ச, க³ஹபதயோ, சதுப்³பி³த⁴ங் வாசாய
த⁴ம்மசரியாஸமசரியா ஹோதி? இத⁴, க³ஹபதயோ, ஏகச்சோ முஸாவாத³ங் பஹாய முஸாவாதா³
படிவிரதோ ஹோதி. ஸபா⁴க³தோ வா பரிஸாக³தோ வா, ஞாதிமஜ்ஜ²க³தோ வா பூக³மஜ்ஜ²க³தோ
வா ராஜகுலமஜ்ஜ²க³தோ வா, அபி⁴னீதோ ஸக்கி²புட்டோ² – ‘ஏஹம்போ⁴ புரிஸ, யங்
ஜானாஸி தங் வதே³ஹீ’தி, ஸோ அஜானங் வா ஆஹ – ‘ந ஜானாமீ’தி, ஜானங் வா ஆஹ – ‘ஜானாமீ’தி, அபஸ்ஸங் வா ஆஹ – ‘ந பஸ்ஸாமீ’தி, பஸ்ஸங் வா ஆஹ – ‘பஸ்ஸாமீ’தி. இதி அத்தஹேது வா பரஹேது வா ஆமிஸகிஞ்சிக்க²ஹேது வா ந ஸம்பஜானமுஸா பா⁴ஸிதா ஹோதி.
‘‘பிஸுணங் வாசங் பஹாய பிஸுணாய
வாசாய படிவிரதோ ஹோதி, இதோ ஸுத்வா ந அமுத்ர அக்கா²தா இமேஸங் பே⁴தா³ய, அமுத்ர
வா ஸுத்வா ந இமேஸங் அக்கா²தா அமூஸங் பே⁴தா³ய. இதி பி⁴ன்னானங் வா ஸந்தா⁴தா,
ஸஹிதானங் வா அனுப்பதா³தா, ஸமக்³கா³ராமோ ஸமக்³க³ரதோ ஸமக்³க³னந்தீ³
ஸமக்³க³கரணிங் வாசங் பா⁴ஸிதா ஹோதி.
‘‘ப²ருஸங் வாசங் பஹாய ப²ருஸாய வாசாய படிவிரதோ ஹோதி. யா
ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா –
ததா²ரூபிங் வாசங் பா⁴ஸிதா ஹோதி.
‘‘ஸம்ப²ப்பலாபங் பஹாய ஸம்ப²ப்பலாபா படிவிரதோ ஹோதி.
காலவாதீ³ பூ⁴தவாதீ³ அத்த²வாதீ³ த⁴ம்மவாதீ³ வினயவாதீ³ நிதா⁴னவதிங் வாசங்
பா⁴ஸிதா ஹோதி காலேன ஸாபதே³ஸங் பரியந்தவதிங் அத்த²ஸங்ஹிதங். ஏவங் கோ²,
க³ஹபதயோ, சதுப்³பி³த⁴ங் வாசாய த⁴ம்மசரியாஸமசரியா ஹோதி.
‘‘கத²ஞ்ச, க³ஹபதயோ, திவித⁴ங் மனஸா த⁴ம்மசரியாஸமசரியா
ஹோதி? இத⁴, க³ஹபதயோ, ஏகச்சோ அனபி⁴ஜ்ஜா²லு ஹோதி, யங் தங் பரஸ்ஸ
பரவித்தூபகரணங் தங் நாபி⁴ஜ்ஜா²தா ஹோதி – ‘அஹோ வத யங் பரஸ்ஸ தங் மமஸ்ஸா’தி!
‘‘அப்³யாபன்னசித்தோ கோ² பன ஹோதி அப்பது³ட்ட²மனஸங்கப்போ – ‘இமே ஸத்தா அவேரா அப்³யாப³ஜ்ஜா² அனீகா⁴ ஸுகீ² அத்தானங் பரிஹரந்தூ’தி.
‘‘ஸம்மாதி³ட்டி²கோ கோ² பன ஹோதி அவிபரீதத³ஸ்ஸனோ – ‘அத்தி² தி³ன்னங் அத்தி² யிட்ட²ங்
அத்தி² ஹுதங், அத்தி² ஸுகதது³க்கடானங் கம்மானங் ப²லங் விபாகோ, அத்தி² அயங்
லோகோ அத்தி² பரோ லோகோ, அத்தி² மாதா அத்தி² பிதா, அத்தி² ஸத்தா ஓபபாதிகா,
அத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகங் பரஞ்ச
லோகங் ஸயங் அபி⁴ஞ்ஞா ஸச்சி²கத்வா பவேதெ³ந்தீ’தி. ஏவங் கோ², க³ஹபதயோ,
திவித⁴ங் மனஸா த⁴ம்மசரியாஸமசரியா ஹோதி.
‘‘ஏவங் த⁴ம்மசரியாஸமசரியாஹேது கோ², க³ஹபதயோ, ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தி.
442. ‘‘ஆகங்கெ²ய்ய
சே, க³ஹபதயோ, த⁴ம்மசாரீ ஸமசாரீ – ‘அஹோ வதாஹங் காயஸ்ஸ பே⁴தா³ பரங் மரணா
க²த்தியமஹாஸாலானங் ஸஹப்³யதங் உபபஜ்ஜெய்ய’ந்தி; டா²னங் கோ² பனேதங் விஜ்ஜதி,
யங் ஸோ காயஸ்ஸ பே⁴தா³ பரங் மரணா க²த்தியமஹாஸாலானங் ஸஹப்³யதங் உபபஜ்ஜெய்ய.
தங் கிஸ்ஸ ஹேது? ததா² ஹி ஸோ த⁴ம்மசாரீ ஸமசாரீ.
‘‘ஆகங்கெ²ய்ய சே, க³ஹபதயோ, த⁴ம்மசாரீ ஸமசாரீ – ‘அஹோ
வதாஹங் காயஸ்ஸ பே⁴தா³ பரங் மரணா ப்³ராஹ்மணமஹாஸாலானங்…பே॰… க³ஹபதிமஹாஸாலானங்
ஸஹப்³யதங் உபபஜ்ஜெய்ய’ந்தி; டா²னங் கோ² பனேதங் விஜ்ஜதி, யங் ஸோ காயஸ்ஸ
பே⁴தா³ பரங் மரணா க³ஹபதிமஹாஸாலானங் ஸஹப்³யதங் உபபஜ்ஜெய்ய. தங் கிஸ்ஸ ஹேது?
ததா² ஹி ஸோ த⁴ம்மசாரீ ஸமசாரீ.
‘‘ஆகங்கெ²ய்ய சே, க³ஹபதயோ, த⁴ம்மசாரீ ஸமசாரீ – ‘அஹோ
வதாஹங் காயஸ்ஸ பே⁴தா³ பரங் மரணா சாதுமஹாராஜிகானங் தே³வானங் ஸஹப்³யதங்
உபபஜ்ஜேய’ந்தி; டா²னங் கோ² பனேதங் விஜ்ஜதி, யங் ஸோ
காயஸ்ஸ பே⁴தா³ பரங் மரணா சாதுமஹாராஜிகானங் தே³வானங் ஸஹப்³யதங் உபபஜ்ஜெய்ய.
தங் கிஸ்ஸ ஹேது? ததா² ஹி ஸோ த⁴ம்மசாரீ ஸமசாரீ.
‘‘ஆகங்கெ²ய்ய சே, க³ஹபதயோ, த⁴ம்மசாரீ ஸமசாரீ – ‘அஹோ
வதாஹங் காயஸ்ஸ பே⁴தா³ பரங் மரணா தாவதிங்ஸானங் தே³வானங்…பே॰… யாமானங்
தே³வானங்… துஸிதானங் தே³வானங்… நிம்மானரதீனங் தே³வானங்…
பரனிம்மிதவஸவத்தீனங் தே³வானங்… ப்³ரஹ்மகாயிகானங் தே³வானங் ஸஹப்³யதங்
உபபஜ்ஜெய்ய’ந்தி; டா²னங் கோ² பனேதங் விஜ்ஜதி, யங் ஸோ காயஸ்ஸ பே⁴தா³ பரங்
மரணா ப்³ரஹ்மகாயிகானங் தே³வானங் ஸஹப்³யதங் உபபஜ்ஜெய்ய. தங் கிஸ்ஸ ஹேது?
ததா² ஹி ஸோ த⁴ம்மசாரீ ஸமசாரீ.
‘‘ஆகங்கெ²ய்ய சே, க³ஹபதயோ, த⁴ம்மசாரீ ஸமசாரீ – ‘அஹோ
வதாஹங் காயஸ்ஸ பே⁴தா³ பரங் மரணா ஆபா⁴னங் தே³வானங் ஸஹப்³யதங்
உபபஜ்ஜெய்ய’ந்தி; டா²னங் கோ² பனேதங் விஜ்ஜதி, யங் ஸோ காயஸ்ஸ பே⁴தா³ பரங்
மரணா ஆபா⁴னங் தே³வானங் ஸஹப்³யதங் உபபஜ்ஜெய்ய. தங் கிஸ்ஸ ஹேது? ததா² ஹி ஸோ
த⁴ம்மசாரீ ஸமசாரீ.
‘‘ஆகங்கெ²ய்ய சே, க³ஹபதயோ, த⁴ம்மசாரீ ஸமசாரீ – ‘அஹோ
வதாஹங் காயஸ்ஸ பே⁴தா³ பரங் மரணா பரித்தாபா⁴னங் தே³வானங்…பே॰…
அப்பமாணாபா⁴னங் தே³வானங்… ஆப⁴ஸ்ஸரானங் தே³வானங்… பரித்தஸுபா⁴னங் தே³வானங்… அப்பமாணஸுபா⁴னங் தே³வானங்… ஸுப⁴கிண்ஹானங் தே³வானங்… வேஹப்ப²லானங் தே³வானங்… அவிஹானங்
தே³வானங்… அதப்பானங் தே³வானங்… ஸுத³ஸ்ஸானங் தே³வானங்… ஸுத³ஸ்ஸீனங்
தே³வானங்… அகனிட்டா²னங் தே³வானங்… ஆகாஸானஞ்சாயதனூபகா³னங் தே³வானங்…
விஞ்ஞாணஞ்சாயதனூபகா³னங் தே³வானங் …
ஆகிஞ்சஞ்ஞாயதனூபகா³னங் தே³வானங்… நேவஸஞ்ஞானாஸஞ்ஞாயதனூபகா³னங் தே³வானங்
ஸஹப்³யதங் உபபஜ்ஜெய்ய’ந்தி; டா²னங் கோ² பனேதங் விஜ்ஜதி, யங் ஸோ காயஸ்ஸ
பே⁴தா³ பரங் மரணா நேவஸஞ்ஞானாஸஞ்ஞாயதனூபகா³னங் தே³வானங் ஸஹப்³யதங்
உபபஜ்ஜெய்ய. தங் கிஸ்ஸ ஹேது? ததா² ஹி ஸோ த⁴ம்மசாரீ ஸமசாரீ.
‘‘ஆகங்கெ²ய்ய சே, க³ஹபதயோ, த⁴ம்மசாரீ ஸமசாரீ – ‘அஹோ
வதாஹங் ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்ய’ந்தி; டா²னங் கோ²
பனேதங் விஜ்ஜதி, யங் ஸோ ஆஸவானங் க²யா அனாஸவங் சேதோவிமுத்திங்
பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹரெய்ய. தங் கிஸ்ஸ ஹேது? ததா² ஹி ஸோ த⁴ம்மசாரீ ஸமசாரீ’’தி.
443. ஏவங்
வுத்தே, ஸாலெய்யகா ப்³ராஹ்மணக³ஹபதிகா ப⁴க³வந்தங் ஏதத³வோசுங் –
‘‘அபி⁴க்கந்தங், போ⁴ கோ³தம, அபி⁴க்கந்தங், போ⁴ கோ³தம! ஸெய்யதா²பி, போ⁴
கோ³தம, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ
வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய, சக்கு²மந்தோ
ரூபானி த³க்க²ந்தீதி. ஏவமேவங் போ⁴தா கோ³தமேன அனேகபரியாயேன த⁴ம்மோ பகாஸிதோ.
ஏதே மயங் ப⁴வந்தங் கோ³தமங் ஸரணங் க³ச்சா²ம த⁴ம்மஞ்ச பி⁴க்கு²ஸங்க⁴ஞ்ச.
உபாஸகே நோ ப⁴வங் கோ³தமோ தா⁴ரேது அஜ்ஜதக்³கே³ பாணுபேதே [பாணுபேதங் (க॰)] ஸரணங் க³தே’’தி.
ஸாலெய்யகஸுத்தங் நிட்டி²தங் பட²மங்.
2. வேரஞ்ஜகஸுத்தங்
444. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தேன கோ² பன ஸமயேன வேரஞ்ஜகா ப்³ராஹ்மணக³ஹபதிகா ஸாவத்தி²யங்
படிவஸந்தி கேனசிதே³வ கரணீயேன. அஸ்ஸோஸுங் கோ²
வேரஞ்ஜகா ப்³ராஹ்மணக³ஹபதிகா – ‘‘ஸமணோ க²லு, போ⁴, கோ³தமோ ஸக்யபுத்தோ
ஸக்யகுலா பப்³ப³ஜிதோ ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே.
தங் கோ² பன ப⁴வந்தங் கோ³தமங் ஏவங் கல்யாணோ கித்திஸத்³தோ³ அப்³பு⁴க்³க³தோ –
‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ
லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴
ப⁴க³வா. ஸோ இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங்
பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங்
தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங்
ஸப்³யஞ்ஜனங்; கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி’. ஸாது⁴
கோ² பன ததா²ரூபானங் அரஹதங் த³ஸ்ஸனங் ஹோதீ’’தி.
அத² கோ² வேரஞ்ஜகா ப்³ராஹ்மணக³ஹபதிகா யேன ப⁴க³வா
தேனுபஸங்கமிங்ஸு; உபஸங்கமித்வா அப்பேகச்சே ப⁴க³வந்தங் அபி⁴வாதெ³த்வா
ஏகமந்தங் நிஸீதி³ங்ஸு; அப்பேகச்சே ப⁴க³வதா ஸத்³தி⁴ங் ஸம்மோதி³ங்ஸு,
ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங்
நிஸீதி³ங்ஸு; அப்பேகச்சே யேன ப⁴க³வா தேனஞ்ஜலிங் பணாமெத்வா ஏகமந்தங்
நிஸீதி³ங்ஸு; அப்பேகச்சே ப⁴க³வதோ ஸந்திகே
நாமகொ³த்தங் ஸாவெத்வா ஏகமந்தங் நிஸீதி³ங்ஸு; அப்பேகச்சே துண்ஹீபூ⁴தா
ஏகமந்தங் நிஸீதி³ங்ஸு. ஏகமந்தங் நிஸின்னா கோ² வேரஞ்ஜகா ப்³ராஹ்மணக³ஹபதிகா
ப⁴க³வந்தங் ஏதத³வோசுங் – ‘‘கோ நு கோ², போ⁴ கோ³தம, ஹேது, கோ பச்சயோ யேன
மிதே⁴கச்சே ஸத்தா காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜந்தி? கோ பன, போ⁴ கோ³தம, ஹேது, கோ பச்சயோ யேன மிதே⁴கச்சே
ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தீ’’தி?
‘‘அத⁴ம்மசரியாவிஸமசரியாஹேது கோ², க³ஹபதயோ,
ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜந்தி. த⁴ம்மசரியாஸமசரியாஹேது கோ², க³ஹபதயோ , ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தீ’’தி.
‘‘ந கோ² மயங் இமஸ்ஸ போ⁴தோ கோ³தமஸ்ஸ ஸங்கி²த்தேன
பா⁴ஸிதஸ்ஸ, வித்தா²ரேன அத்த²ங் அவிப⁴த்தஸ்ஸ, வித்தா²ரேன அத்த²ங் ஆஜானாம.
ஸாது⁴ நோ ப⁴வங் கோ³தமோ ததா² த⁴ம்மங் தே³ஸேது யதா² மயங் இமஸ்ஸ போ⁴தோ
கோ³தமஸ்ஸ ஸங்கி²த்தேன பா⁴ஸிதஸ்ஸ, வித்தா²ரேன அத்த²ங் அவிப⁴த்தஸ்ஸ,
வித்தா²ரேன அத்த²ங் ஆஜானெய்யாமா’’தி. ‘‘தேன ஹி,
க³ஹபதயோ, ஸுணாத² ஸாது⁴கங் மனஸி கரோத², பா⁴ஸிஸ்ஸாமீ’’தி. ‘‘ஏவங் போ⁴’’தி கோ²
வேரஞ்ஜகா ப்³ராஹ்மணக³ஹபதிகா ப⁴க³வதோ பச்சஸ்ஸோஸுங். ப⁴க³வா ஏதத³வோச –
445.
‘‘திவித⁴ங் கோ², க³ஹபதயோ, காயேன அத⁴ம்மசாரீ விஸமசாரீ ஹோதி, சதுப்³பி³த⁴ங்
வாசாய அத⁴ம்மசாரீ விஸமசாரீ ஹோதி, திவித⁴ங் மனஸா அத⁴ம்மசாரீ விஸமசாரீ ஹோதி.
‘‘கத²ஞ்ச, க³ஹபதயோ , திவித⁴ங்
காயேன அத⁴ம்மசாரீ விஸமசாரீ ஹோதி? இத⁴, க³ஹபதயோ, ஏகச்சோ பாணாதிபாதீ ஹோதி.
லுத்³தோ³ லோஹிதபாணி ஹதப்பஹதே நிவிட்டோ² அத³யாபன்னோ பாணபூ⁴தேஸு.
அதி³ன்னாதா³யீ கோ² பன ஹோதி. யங் தங் பரஸ்ஸ பரவித்தூபகரணங்… தங் அதி³ன்னங்
தெ²ய்யஸங்கா²தங் ஆதா³தா ஹோதி. காமேஸுமிச்சா²சாரீ கோ² பன ஹோதி. யா தா
மாதுரக்கி²தா… ததா²ரூபாஸு சாரித்தங் ஆபஜ்ஜிதா ஹோதி. ஏவங் கோ², க³ஹபதயோ,
திவித⁴ங் காயேன அத⁴ம்மசாரீ விஸமசாரீ ஹோதி.
‘‘கத²ஞ்ச, க³ஹபதயோ, சதுப்³பி³த⁴ங் வாசாய அத⁴ம்மசாரீ
விஸமசாரீ ஹோதி? இத⁴, க³ஹபதயோ, ஏகச்சோ முஸாவாதீ³ ஹோதி. ஸபா⁴க³தோ வா…
ஸம்பஜானமுஸா பா⁴ஸிதா ஹோதி. பிஸுணவாசோ கோ² பன ஹோதி. இதோ ஸுத்வா அமுத்ர
அக்கா²தா… வக்³க³கரணிங் வாசங் பா⁴ஸிதா ஹோதி. ப²ருஸவாசோ கோ² பன ஹோதி. யா ஸா
வாசா அண்ட³கா கக்கஸா… ததா²ரூபிங் வாசங் பா⁴ஸிதா ஹோதி. ஸம்ப²ப்பலாபீ கோ² பன
ஹோதி. அகாலவாதீ³… அபரியந்தவதிங் அனத்த²ஸங்ஹிதங். ஏவங் கோ², க³ஹபதயோ,
சதுப்³பி³த⁴ங் வாசாய அத⁴ம்மசாரீ விஸமசாரீ ஹோதி.
‘‘கத²ஞ்ச, க³ஹபதயோ, திவித⁴ங் மனஸா அத⁴ம்மசாரீ விஸமசாரீ
ஹோதி? இத⁴, க³ஹபதயோ, ஏகச்சோ அபி⁴ஜ்ஜா²லு ஹோதி…பே॰… தங் மமஸ்ஸா’தி.
ப்³யாபன்னசித்தோ கோ² பன ஹோதி பது³ட்ட²மனஸங்கப்போ – இமே ஸத்தா ஹஞ்ஞந்து வா…
மா வா அஹேஸு’ந்தி. மிச்சா²தி³ட்டி²கோ கோ² பன ஹோதி விபரீதத³ஸ்ஸனோ – ‘நத்தி² தி³ன்னங், நத்தி² யிட்ட²ங்… ஸச்சி²கத்வா பவேதெ³ந்தீ’தி. ஏவங் கோ², க³ஹபதயோ, திவித⁴ங் மனஸா அத⁴ம்மசாரீ விஸமசாரீ ஹோதி.
‘‘ஏவங் அத⁴ம்மசரியாவிஸமசரியாஹேது கோ², க³ஹபதயோ,
ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங்
நிரயங் உபபஜ்ஜந்தி.
446. ‘‘திவித⁴ங் கோ², க³ஹபதயோ, காயேன த⁴ம்மசாரீ ஸமசாரீ ஹோதி, சதுப்³பி³த⁴ங் வாசாய த⁴ம்மசாரீ ஸமசாரீ ஹோதி, திவித⁴ங் மனஸா த⁴ம்மசாரீ ஸமசாரீ ஹோதி.
‘‘கத²ஞ்ச, க³ஹபதயோ, திவித⁴ங் காயேன த⁴ம்மசாரீ ஸமசாரீ
ஹோதி? இத⁴, க³ஹபதயோ, ஏகச்சோ பாணாதிபாதங் பஹாய பாணாதிபாதா படிவிரதோ ஹோதி,
நிஹிதத³ண்டோ³ நிஹிதஸத்தோ² லஜ்ஜீ த³யாபன்னோ ஸப்³ப³பாணபூ⁴தஹிதானுகம்பீ
விஹரதி. அதி³ன்னாதா³னங் பஹாய அதி³ன்னாதா³னா படிவிரதோ ஹோதி, யங் தங் பரஸ்ஸ…
தங் நாதி³ன்னங் தெ²ய்யஸங்கா²தங் ஆதா³தா ஹோதி. காமேஸுமிச்சா²சாரங் பஹாய…
ததா²ரூபாஸு ந சாரித்தங் ஆபஜ்ஜிதா ஹோதி. ஏவங் கோ², க³ஹபதயோ, திவித⁴ங் காயேன
த⁴ம்மசாரீ ஸமசாரீ ஹோதி.
‘‘கத²ஞ்ச, க³ஹபதயோ, சதுப்³பி³த⁴ங் வாசாய த⁴ம்மசாரீ
ஸமசாரீ ஹோதி? இத⁴, க³ஹபதயோ, ஏகச்சோ முஸாவாத³ங் பஹாய முஸாவாதா³ படிவிரதோ
ஹோதி. ஸபா⁴க³தோ வா…பே॰… ந ஸம்பஜானமுஸா பா⁴ஸிதா ஹோதி. பிஸுணங் வாசங் பஹாய…
ஸமக்³க³கரணிங் வாசங் பா⁴ஸிதா ஹோதி. ப²ருஸங் வாசங் பஹாய… ததா²ரூபிங் வாசங்
பா⁴ஸிதா ஹோதி. ஸம்ப²ப்பலாபங் பஹாய… காலேன ஸாபதே³ஸங் பரியந்தவதிங்
அத்த²ஸங்ஹிதங் . ஏவங் கோ², க³ஹபதயோ, சதுப்³பி³த⁴ங் வாசாய த⁴ம்மசாரீ ஸமசாரீ ஹோதி.
‘‘கத²ஞ்ச, க³ஹபதயோ, திவித⁴ங் மனஸா த⁴ம்மசாரீ ஸமசாரீ
ஹோதி? இத⁴, க³ஹபதயோ, ஏகச்சோ அனபி⁴ஜ்ஜா²லு ஹோதி. யங் தங் பரஸ்ஸ
பரவித்தூபகரணங் தங் நாபி⁴ஜ்ஜா²தா ஹோதி ‘அஹோ வத யங் பரஸ்ஸ, தங் மமஸ்ஸா’தி.
அப்³யாபன்னசித்தோ கோ² பன ஹோதி அப்பது³ட்ட²மனஸங்கப்போ – ‘இமே ஸத்தா அவேரா
அப்³யாப³ஜ்ஜா² அனீகா⁴ ஸுகீ² அத்தானங் பரிஹரந்தூ’தி. ஸம்மாதி³ட்டி²கோ கோ² பன
ஹோதி அவிபரீதத³ஸ்ஸனோ – ‘அத்தி² தி³ன்னங், அத்தி² யிட்ட²ங்… ஸயங் அபி⁴ஞ்ஞா
ஸச்சி²கத்வா பவேதெ³ந்தீ’தி. ஏவங் கோ², க³ஹபதயோ, திவித⁴ங் மனஸா த⁴ம்மசாரீ
ஸமசாரீ ஹோதி.
‘‘ஏவங் த⁴ம்மசரியாஸமசரியாஹேது கோ², க³ஹபதயோ, ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தி.
447. ‘‘ஆகங்கெ²ய்ய சே, க³ஹபதயோ, த⁴ம்மசாரீ ஸமசாரீ – ‘அஹோ வதாஹங் காயஸ்ஸ பே⁴தா³ பரங் மரணா க²த்தியமஹாஸாலானங் ஸஹப்³யதங் உபபஜ்ஜெய்ய’ந்தி ;
டா²னங் கோ² பனேதங் விஜ்ஜதி, யங் ஸோ காயஸ்ஸ பே⁴தா³ பரங் மரணா
க²த்தியமஹாஸாலானங் ஸஹப்³யதங் உபபஜ்ஜெய்ய. தங் கிஸ்ஸ ஹேது? ததா² ஹி ஸோ
த⁴ம்மசாரீ ஸமசாரீ.
‘‘ஆகங்கெ²ய்ய சே, க³ஹபதயோ, த⁴ம்மசாரீ ஸமசாரீ – ‘அஹோ
வதாஹங் காயஸ்ஸ பே⁴தா³ பரங் மரணா ப்³ராஹ்மணமஹாஸாலானங் க³ஹபதிமஹாஸாலானங்
ஸஹப்³யதங் உபபஜ்ஜெய்ய’ந்தி; டா²னங் கோ² பனேதங் விஜ்ஜதி, யங் ஸோ காயஸ்ஸ
பே⁴தா³ பரங் மரணா க³ஹபதிமஹாஸாலானங் ஸஹப்³யதங் உபபஜ்ஜெய்ய. தங் கிஸ்ஸ ஹேது ? ததா² ஹி ஸோ த⁴ம்மசாரீ ஸமசாரீ.
‘‘ஆகங்கெய்ய சே, க³ஹபதயோ, த⁴ம்மசாரீ ஸமசாரீ – ‘அஹோ
வதாஹங் காயஸ்ஸ பே⁴தா³ பரங் மரணா சாதுமஹாராஜிகானங் தே³வானங் ஸஹப்³யதங்
உபபஜ்ஜெய்ய’ந்தி; டா²னங் கோ² பனேதங் விஜ்ஜதி, யங் ஸோ காயஸ்ஸ பே⁴தா³ பரங்
மரணா சாதுமஹாராஜிகானங் தே³வானங் ஸஹப்³யதங் உபபஜ்ஜெய்ய. தங் கிஸ்ஸ ஹேது?
ததா² ஹி ஸோ த⁴ம்மசாரீ ஸமசாரீ.
‘‘ஆகங்கெ²ய்ய சே, க³ஹபதயோ, த⁴ம்மசாரீ ஸமசாரீ – ‘அஹோ
வதாஹங் காயஸ்ஸ பே⁴தா³ பரங் மரணா தாவதிங்ஸானங் தே³வானங்… யாமானங் தே³வானங்…
துஸிதானங் தே³வானங்… நிம்மானரதீனங் தே³வானங்… பரனிம்மிதவஸவத்தீனங்
தே³வானங்… ப்³ரஹ்மகாயிகானங் தே³வானங் ஸஹப்³யதங் உபபஜ்ஜெய்ய’ந்தி; டா²னங்
கோ² பனேதங் விஜ்ஜதி, யங் ஸோ காயஸ்ஸ பே⁴தா³ பரங் மரணா ப்³ரஹ்மகாயிகானங்
தே³வானங் ஸஹப்³யதங் உபபஜ்ஜெய்ய. தங் கிஸ்ஸ ஹேது? ததா² ஹி ஸோ த⁴ம்மசாரீ
ஸமசாரீ.
‘‘ஆகங்கெ²ய்ய சே, க³ஹபதயோ, த⁴ம்மசாரீ ஸமசாரீ – ‘அஹோ
வதாஹங் காயஸ்ஸ பே⁴தா³ பரங் மரணா ஆபா⁴னங் தே³வானங் ஸஹப்³யதங்
உபபஜ்ஜெய்ய’ந்தி; டா²னங் கோ² பனேதங் விஜ்ஜதி, யங் ஸோ காயஸ்ஸ பே⁴தா³ பரங்
மரணா ஆபா⁴னங் தே³வானங் ஸஹப்³யதங் உபபஜ்ஜெய்ய. தங் கிஸ்ஸ ஹேது? ததா² ஹி ஸோ
த⁴ம்மசாரீ ஸமசாரீ.
‘‘ஆகங்கெ²ய்ய சே, க³ஹபதயோ,
த⁴ம்மசாரீ ஸமசாரீ ‘அஹோ வதாஹங் காயஸ்ஸ பே⁴தா³ பரங் மரணா பரித்தாபா⁴னங்
தே³வானங்…பே॰… அப்பமாணாபா⁴னங் தே³வானங்… ஆப⁴ஸ்ஸரானங் தே³வானங்…
பரித்தஸுபா⁴னங் தே³வானங்… அப்பமாணஸுபா⁴னங் தே³வானங்… ஸுப⁴கிண்ஹானங்
தே³வானங் … வேஹப்ப²லானங் தே³வானங்… அவிஹானங்
தே³வானங்… அதப்பானங் தே³வானங்… ஸுத³ஸ்ஸானங் தே³வானங்… ஸுத³ஸ்ஸீனங்
தே³வானங்… அகனிட்டா²னங் தே³வானங்… ஆகாஸானஞ்சாயதனூபகா³னங் தே³வானங்…
விஞ்ஞாணஞ்சாயதனூபகா³னங் தே³வானங்…
ஆகிஞ்சஞ்ஞாயதனூபகா³னங் தே³வானங்… நேவஸஞ்ஞானாஸஞ்ஞாயதனூபகா³னங் தே³வானங்
ஸஹப்³யதங் உபபஜ்ஜெய்ய’ந்தி; டா²னங் கோ² பனேதங் விஜ்ஜதி, யங் ஸோ காயஸ்ஸ
பே⁴தா³ பரங் மரணா நேவஸஞ்ஞானாஸஞ்ஞாயதனூபகா³னங் தே³வானங் ஸஹப்³யதங்
உபபஜ்ஜெய்ய. தங் கிஸ்ஸ ஹேது? ததா² ஹி ஸோ த⁴ம்மசாரீ ஸமசாரீ.
‘‘ஆகங்கெ²ய்ய சே க³ஹபதயோ த⁴ம்மசாரீ ஸமசாரீ – ‘அஹோ
வதாஹங் ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ
த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்ய’ந்தி; டா²னங் கோ²
பனேதங் விஜ்ஜதி, ‘யங் ஸோ ஆஸவானங் க²யா அனாஸவங் சேதோவிமுத்திங்
பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹரெய்ய. தங் கிஸ்ஸ ஹேது? ததா² ஹி ஸோ த⁴ம்மசாரீ ஸமசாரீ’’’தி.
448.
ஏவங் வுத்தே, வேரஞ்ஜகா ப்³ராஹ்மணக³ஹபதிகா ப⁴க³வந்தங் ஏதத³வோசுங் –
‘‘அபி⁴க்கந்தங், போ⁴ கோ³தம, அபி⁴க்கந்தங் போ⁴ கோ³தம! ஸெய்யதா²பி, போ⁴
கோ³தம, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ
வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய, சக்கு²மந்தோ
ரூபானி த³க்க²ந்தீதி; ஏவமேவங் போ⁴தா கோ³தமேன அனேகபரியாயேன த⁴ம்மோ பகாஸிதோ.
ஏதே மயங் ப⁴வந்தங் கோ³தமங் ஸரணங் க³ச்சா²ம த⁴ம்மஞ்ச பி⁴க்கு²ஸங்க⁴ஞ்ச. உபாஸகே நோ ப⁴வங் கோ³தமோ தா⁴ரேது அஜ்ஜதக்³கே³ பாணுபேதே ஸரணங் க³தே’’தி.
வேரஞ்ஜகஸுத்தங் நிட்டி²தங் து³தியங்.
3. மஹாவேத³ல்லஸுத்தங்
449. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. அத² கோ² ஆயஸ்மா மஹாகொட்டி²கோ ஸாயன்ஹஸமயங் படிஸல்லானா வுட்டி²தோ
யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன
ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங்
நிஸீதி³. ஏகமந்தங் நிஸின்னோ கோ² ஆயஸ்மா மஹாகொட்டி²கோ ஆயஸ்மந்தங்
ஸாரிபுத்தங் ஏதத³வோச –
‘‘‘து³ப்பஞ்ஞோ து³ப்பஞ்ஞோ’தி, ஆவுஸோ, வுச்சதி. கித்தாவதா நு கோ², ஆவுஸோ, து³ப்பஞ்ஞோதி வுச்சதீ’’தி?
‘‘‘நப்பஜானாதி நப்பஜானாதீ’தி கோ², ஆவுஸோ, தஸ்மா து³ப்பஞ்ஞோதி வுச்சதி.
‘‘கிஞ்ச நப்பஜானாதி? ‘இத³ங் து³க்க²’ந்தி நப்பஜானாதி,
‘அயங் து³க்க²ஸமுத³யோ’தி நப்பஜானாதி, ‘அயங் து³க்க²னிரோதோ⁴’தி நப்பஜானாதி,
‘அயங் து³க்க²னிரோத⁴கா³மினீ படிபதா³’தி நப்பஜானாதி. ‘நப்பஜானாதி
நப்பஜானாதீ’தி கோ², ஆவுஸோ, தஸ்மா து³ப்பஞ்ஞோதி வுச்சதீ’’தி.
‘‘‘ஸாதா⁴வுஸோ’தி கோ² ஆயஸ்மா மஹாகொட்டி²கோ ஆயஸ்மதோ
ஸாரிபுத்தஸ்ஸ பா⁴ஸிதங் அபி⁴னந்தி³த்வா அனுமோதி³த்வா ஆயஸ்மந்தங் ஸாரிபுத்தங்
உத்தரிங் பஞ்ஹங் அபுச்சி² –
‘‘‘பஞ்ஞவா பஞ்ஞவா’தி, ஆவுஸோ, வுச்சதி. கித்தாவதா நு கோ², ஆவுஸோ, பஞ்ஞவாதி வுச்சதீ’’தி?
‘‘‘பஜானாதி பஜானாதீ’தி கோ², ஆவுஸோ, தஸ்மா பஞ்ஞவாதி வுச்சதி.
‘‘கிஞ்ச பஜானாதி? ‘இத³ங் து³க்க²’ந்தி பஜானாதி, ‘அயங் து³க்க²ஸமுத³யோ’தி பஜானாதி, ‘அயங் து³க்க²னிரோதோ⁴’தி பஜானாதி, ‘அயங் து³க்க²னிரோத⁴கா³மினீ படிபதா³’தி பஜானாதி. ‘பஜானாதி பஜானாதீ’தி கோ², ஆவுஸோ, தஸ்மா பஞ்ஞவாதி வுச்சதீ’’தி.
‘‘‘விஞ்ஞாணங் விஞ்ஞாண’ந்தி, ஆவுஸோ, வுச்சதி. கித்தாவதா நு கோ², ஆவுஸோ, விஞ்ஞாணந்தி வுச்சதீ’’தி?
‘‘‘விஜானாதி விஜானாதீ’தி கோ², ஆவுஸோ, தஸ்மா விஞ்ஞாணந்தி வுச்சதி.
‘‘கிஞ்ச விஜானாதி? ஸுக²ந்திபி விஜானாதி, து³க்க²ந்திபி
விஜானாதி, அது³க்க²மஸுக²ந்திபி விஜானாதி. ‘விஜானாதி விஜானாதீ’தி கோ²,
ஆவுஸோ, தஸ்மா விஞ்ஞாணந்தி வுச்சதீ’’தி.
‘‘யா சாவுஸோ, பஞ்ஞா யஞ்ச விஞ்ஞாணங் – இமே த⁴ம்மா ஸங்ஸட்டா² உதா³ஹு விஸங்ஸட்டா²? லப்³பா⁴ ச பனிமேஸங் த⁴ம்மானங் வினிப்³பு⁴ஜித்வா [வினிப்³பு⁴ஜ்ஜித்வா வினிப்³பு⁴ஜ்ஜித்வா (க॰)]
வினிப்³பு⁴ஜித்வா நானாகரணங் பஞ்ஞாபேது’’ந்தி? ‘‘யா சாவுஸோ, பஞ்ஞா யஞ்ச
விஞ்ஞாணங் – இமே த⁴ம்மா ஸங்ஸட்டா², நோ விஸங்ஸட்டா². ந ச லப்³பா⁴ இமேஸங்
த⁴ம்மானங் வினிப்³பு⁴ஜித்வா வினிப்³பு⁴ஜித்வா நானாகரணங் பஞ்ஞாபேதுங். யங்
ஹாவுஸோ [யஞ்சாவுஸோ (ஸ்யா॰ கங்॰ க॰)], பஜானாதி தங் விஜானாதி, யங் விஜானாதி தங் பஜானாதி. தஸ்மா இமே த⁴ம்மா ஸங்ஸட்டா², நோ விஸங்ஸட்டா². ந ச லப்³பா⁴ இமேஸங் த⁴ம்மானங் வினிப்³பு⁴ஜித்வா வினிப்³பு⁴ஜித்வா நானாகரணங் பஞ்ஞாபேது’’ந்தி.
‘‘யா சாவுஸோ, பஞ்ஞா யஞ்ச விஞ்ஞாணங் – இமேஸங் த⁴ம்மானங்
ஸங்ஸட்டா²னங் நோ விஸங்ஸட்டா²னங் கிங் நானாகரண’’ந்தி? ‘‘யா சாவுஸோ, பஞ்ஞா
யஞ்ச விஞ்ஞாணங் – இமேஸங் த⁴ம்மானங் ஸங்ஸட்டா²னங் நோ விஸங்ஸட்டா²னங் பஞ்ஞா பா⁴வேதப்³பா³, விஞ்ஞாணங் பரிஞ்ஞெய்யங். இத³ங் நேஸங் நானாகரண’’ந்தி.
450. ‘‘‘வேத³னா வேத³னா’தி, ஆவுஸோ, வுச்சதி. கித்தாவதா நு கோ², ஆவுஸோ , வேத³னாதி வுச்சதீ’’தி?
‘‘‘வேதே³தி வேதே³தீ’தி கோ², ஆவுஸோ, தஸ்மா வேத³னாதி வுச்சதி.
‘‘கிஞ்ச வேதே³தி? ஸுக²ம்பி
வேதே³தி, து³க்க²ம்பி வேதே³தி, அது³க்க²மஸுக²ம்பி வேதே³தி. ‘வேதே³தி
வேதே³தீ’தி கோ², ஆவுஸோ, தஸ்மா வேத³னாதி வுச்சதீ’’தி.
‘‘‘ஸஞ்ஞா ஸஞ்ஞா’தி, ஆவுஸோ, வுச்சதி. கித்தாவதா நு கோ², ஆவுஸோ, ஸஞ்ஞாதி வுச்சதீ’’தி?
‘‘‘ஸஞ்ஜானாதி ஸஞ்ஜானாதீ’தி கோ², ஆவுஸோ, தஸ்மா ஸஞ்ஞாதி வுச்சதி.
‘‘கிஞ்ச ஸஞ்ஜானாதி? நீலகம்பி ஸஞ்ஜானாதி, பீதகம்பி
ஸஞ்ஜானாதி, லோஹிதகம்பி ஸஞ்ஜானாதி, ஓதா³தம்பி ஸஞ்ஜானாதி. ‘ஸஞ்ஜானாதி
ஸஞ்ஜானாதீ’தி கோ², ஆவுஸோ, தஸ்மா ஸஞ்ஞாதி வுச்சதீ’’தி.
‘‘யா சாவுஸோ, வேத³னா யா ச ஸஞ்ஞா யஞ்ச விஞ்ஞாணங் – இமே
த⁴ம்மா ஸங்ஸட்டா² உதா³ஹு விஸங்ஸட்டா²? லப்³பா⁴ ச பனிமேஸங் த⁴ம்மானங்
வினிப்³பு⁴ஜித்வா வினிப்³பு⁴ஜித்வா நானாகரணங் பஞ்ஞாபேது’’ந்தி? ‘‘யா
சாவுஸோ, வேத³னா யா ச ஸஞ்ஞா யஞ்ச விஞ்ஞாணங் – இமே த⁴ம்மா ஸங்ஸட்டா², நோ
விஸங்ஸட்டா². ந ச லப்³பா⁴ இமேஸங் த⁴ம்மானங் வினிப்³பு⁴ஜித்வா
வினிப்³பு⁴ஜித்வா நானாகரணங் பஞ்ஞாபேதுங். யங் ஹாவுஸோ [யஞ்சாவுஸோ (ஸ்யா॰ கங்॰ க॰)],
வேதே³தி தங் ஸஞ்ஜானாதி, யங் ஸஞ்ஜானாதி தங் விஜானாதி. தஸ்மா இமே த⁴ம்மா
ஸங்ஸட்டா² நோ விஸங்ஸட்டா². ந ச லப்³பா⁴ இமேஸங் த⁴ம்மானங் வினிப்³பு⁴ஜித்வா
வினிப்³பு⁴ஜித்வா நானாகரணங் பஞ்ஞாபேது’’ந்தி.
451. ‘‘நிஸ்ஸட்டே²ன ஹாவுஸோ [நிஸ்ஸட்டே²ன பனாவுஸோ (?)], பஞ்சஹி இந்த்³ரியேஹி பரிஸுத்³தே⁴ன மனோவிஞ்ஞாணேன கிங் நெய்ய’’ந்தி?
‘‘நிஸ்ஸட்டே²ன ஆவுஸோ, பஞ்சஹி இந்த்³ரியேஹி பரிஸுத்³தே⁴ன மனோவிஞ்ஞாணேன ‘அனந்தோ ஆகாஸோ’தி ஆகாஸானஞ்சாயதனங் நெய்யங், ‘அனந்தங் விஞ்ஞாண’ந்தி விஞ்ஞாணஞ்சாயதனங் நெய்யங், ‘நத்தி² கிஞ்சீ’தி ஆகிஞ்சஞ்ஞாயதனங் நெய்ய’’ந்தி.
‘‘நெய்யங் பனாவுஸோ, த⁴ம்மங் கேன பஜானாதீ’’தி?
‘‘நெய்யங் கோ², ஆவுஸோ, த⁴ம்மங் பஞ்ஞாசக்கு²னா பஜானாதீ’’தி.
‘‘பஞ்ஞா பனாவுஸோ, கிமத்தி²யா’’தி?
‘‘பஞ்ஞா கோ², ஆவுஸோ, அபி⁴ஞ்ஞத்தா² பரிஞ்ஞத்தா² பஹானத்தா²’’தி.
452. ‘‘கதி பனாவுஸோ, பச்சயா ஸம்மாதி³ட்டி²யா உப்பாதா³யா’’தி?
‘‘த்³வே கோ², ஆவுஸோ, பச்சயா ஸம்மாதி³ட்டி²யா உப்பாதா³ய
– பரதோ ச கோ⁴ஸோ, யோனிஸோ ச மனஸிகாரோ. இமே கோ², ஆவுஸோ, த்³வே பச்சயா
ஸம்மாதி³ட்டி²யா உப்பாதா³யா’’தி.
‘‘கதிஹி பனாவுஸோ, அங்கே³ஹி அனுக்³க³ஹிதா ஸம்மாதி³ட்டி²
சேதோவிமுத்திப²லா ச ஹோதி சேதோவிமுத்திப²லானிஸங்ஸா ச, பஞ்ஞாவிமுத்திப²லா ச
ஹோதி பஞ்ஞாவிமுத்திப²லானிஸங்ஸா சா’’தி?
‘‘பஞ்சஹி கோ², ஆவுஸோ, அங்கே³ஹி அனுக்³க³ஹிதா
ஸம்மாதி³ட்டி² சேதோவிமுத்திப²லா ச ஹோதி சேதோவிமுத்திப²லானிஸங்ஸா ச,
பஞ்ஞாவிமுத்திப²லா ச ஹோதி பஞ்ஞாவிமுத்திப²லானிஸங்ஸா ச. இதா⁴வுஸோ,
ஸம்மாதி³ட்டி² ஸீலானுக்³க³ஹிதா ச ஹோதி, ஸுதானுக்³க³ஹிதா ச ஹோதி,
ஸாகச்சா²னுக்³க³ஹிதா ச ஹோதி, ஸமதா²னுக்³க³ஹிதா ச ஹோதி, விபஸ்ஸனானுக்³க³ஹிதா
ச ஹோதி. இமேஹி கோ², ஆவுஸோ, பஞ்சஹங்கே³ஹி அனுக்³க³ஹிதா ஸம்மாதி³ட்டி²
சேதோவிமுத்திப²லா ச ஹோதி சேதோவிமுத்திப²லானிஸங்ஸா ச, பஞ்ஞாவிமுத்திப²லா ச
ஹோதி பஞ்ஞாவிமுத்திப²லானிஸங்ஸா சா’’தி.
‘‘தயோமே, ஆவுஸோ, ப⁴வா – காமப⁴வோ , ரூபப⁴வோ, அரூபப⁴வோ’’தி.
‘‘கத²ங் பனாவுஸோ, ஆயதிங் புனப்³ப⁴வாபி⁴னிப்³ப³த்தி ஹோதீ’’தி?
‘‘அவிஜ்ஜானீவரணானங் கோ², ஆவுஸோ, ஸத்தானங் தண்ஹாஸங்யோஜனானங் தத்ரதத்ராபி⁴னந்த³னா – ஏவங் ஆயதிங் புனப்³ப⁴வாபி⁴னிப்³ப³த்தி ஹோதீ’’தி.
‘‘கத²ங் பனாவுஸோ, ஆயதிங் புனப்³ப⁴வாபி⁴னிப்³ப³த்தி ந ஹோதீ’’தி?
‘‘அவிஜ்ஜாவிராகா³ கோ², ஆவுஸோ, விஜ்ஜுப்பாதா³ தண்ஹானிரோதா⁴ – ஏவங் ஆயதிங் புனப்³ப⁴வாபி⁴னிப்³ப³த்தி ந ஹோதீ’’தி.
454. ‘‘கதமங் பனாவுஸோ, பட²மங் ஜா²ன’’ந்தி?
‘‘இதா⁴வுஸோ, பி⁴க்கு² விவிச்சேவ காமேஹி விவிச்ச
அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங்
உபஸம்பஜ்ஜ விஹரதி – இத³ங் வுச்சதி, ஆவுஸோ, பட²மங் ஜா²ன’’ந்தி.
‘‘பட²மங் பனாவுஸோ, ஜா²னங் கதிஅங்கி³க’’ந்தி?
‘‘பட²மங் கோ², ஆவுஸோ, ஜா²னங் பஞ்சங்கி³கங். இதா⁴வுஸோ,
பட²மங் ஜா²னங் ஸமாபன்னஸ்ஸ பி⁴க்கு²னோ விதக்கோ ச வத்ததி, விசாரோ ச பீதி ச
ஸுக²ஞ்ச சித்தேகக்³க³தா ச. பட²மங் கோ², ஆவுஸோ, ஜா²னங் ஏவங்
பஞ்சங்கி³க’’ந்தி.
‘‘பட²மங் பனாவுஸோ, ஜா²னங் கதங்க³விப்பஹீனங் கதங்க³ஸமன்னாக³த’’ந்தி?
‘‘பட²மங் கோ², ஆவுஸோ, ஜா²னங் பஞ்சங்க³விப்பஹீனங்,
பஞ்சங்க³ஸமன்னாக³தங். இதா⁴வுஸோ, பட²மங் ஜா²னங் ஸமாபன்னஸ்ஸ பி⁴க்கு²னோ
காமச்ச²ந்தோ³ பஹீனோ ஹோதி, ப்³யாபாதோ³ பஹீனோ ஹோதி, தீ²னமித்³த⁴ங் பஹீனங் ஹோதி, உத்³த⁴ச்சகுக்குச்சங் பஹீனங்
ஹோதி, விசிகிச்சா² பஹீனா ஹோதி; விதக்கோ ச வத்ததி, விசாரோ ச பீதி ச ஸுக²ஞ்ச
சித்தேகக்³க³தா ச. பட²மங் கோ², ஆவுஸோ, ஜா²னங் ஏவங் பஞ்சங்க³விப்பஹீனங்
பஞ்சங்க³ஸமன்னாக³த’’ந்தி.
455. ‘‘பஞ்சிமானி , ஆவுஸோ, இந்த்³ரியானி நானாவிஸயானி நானாகோ³சரானி, ந அஞ்ஞமஞ்ஞஸ்ஸ
கோ³சரவிஸயங் பச்சனுபொ⁴ந்தி, ஸெய்யதி²த³ங் – சக்கு²ந்த்³ரியங்,
ஸோதிந்த்³ரியங், கா⁴னிந்த்³ரியங், ஜிவ்ஹிந்த்³ரியங், காயிந்த்³ரியங்.
இமேஸங் கோ², ஆவுஸோ, பஞ்சன்னங் இந்த்³ரியானங் நானாவிஸயானங் நானாகோ³சரானங், ந
அஞ்ஞமஞ்ஞஸ்ஸ கோ³சரவிஸயங் பச்சனுபொ⁴ந்தானங், கிங் படிஸரணங், கோ ச நேஸங்
கோ³சரவிஸயங் பச்சனுபோ⁴தீ’’தி?
‘‘பஞ்சிமானி, ஆவுஸோ, இந்த்³ரியானி நானாவிஸயானி
நானாகோ³சரானி, ந அஞ்ஞமஞ்ஞஸ்ஸ கோ³சரவிஸயங் பச்சனுபொ⁴ந்தி, ஸெய்யதி²த³ங் –
சக்கு²ந்த்³ரியங், ஸோதிந்த்³ரியங், கா⁴னிந்த்³ரியங், ஜிவ்ஹிந்த்³ரியங்,
காயிந்த்³ரியங். இமேஸங் கோ², ஆவுஸோ, பஞ்சன்னங் இந்த்³ரியானங் நானாவிஸயானங்
நானாகோ³சரானங், ந அஞ்ஞமஞ்ஞஸ்ஸ கோ³சரவிஸயங் பச்சனுபொ⁴ந்தானங், மனோ படிஸரணங்,
மனோ ச நேஸங் கோ³சரவிஸயங் பச்சனுபோ⁴தீ’’தி.
456.
‘‘பஞ்சிமானி, ஆவுஸோ, இந்த்³ரியானி, ஸெய்யதி²த³ங் – சக்கு²ந்த்³ரியங்,
ஸோதிந்த்³ரியங், கா⁴னிந்த்³ரியங், ஜிவ்ஹிந்த்³ரியங், காயிந்த்³ரியங். இமானி
கோ², ஆவுஸோ, பஞ்சிந்த்³ரியானி கிங் படிச்ச திட்ட²ந்தீ’’தி?
‘‘பஞ்சிமானி, ஆவுஸோ, இந்த்³ரியானி, ஸெய்யதி²த³ங் –
சக்கு²ந்த்³ரியங், ஸோதிந்த்³ரியங், கா⁴னிந்த்³ரியங், ஜிவ்ஹிந்த்³ரியங்,
காயிந்த்³ரியங். இமானி கோ², ஆவுஸோ, பஞ்சிந்த்³ரியானி ஆயுங் படிச்ச
திட்ட²ந்தீ’’தி.
‘‘ஆயு பனாவுஸோ, கிங் படிச்ச திட்ட²தீ’’தி?
‘‘ஆயு உஸ்மங் படிச்ச திட்ட²தீ’’தி.
‘‘உஸ்மா பனாவுஸோ, கிங் படிச்ச திட்ட²தீ’’தி?
‘‘உஸ்மா ஆயுங் படிச்ச திட்ட²தீ’’தி.
‘‘இதா³னேவ கோ² மயங், ஆவுஸோ, ஆயஸ்மதோ ஸாரிபுத்தஸ்ஸ பா⁴ஸிதங் ஏவங் ஆஜானாம – ‘ஆயு உஸ்மங் படிச்ச திட்ட²தீ’தி. இதா³னேவ பன மயங், ஆவுஸோ, ஆயஸ்மதோ ஸாரிபுத்தஸ்ஸ பா⁴ஸிதங் ஏவங் ஆஜானாம – ‘உஸ்மா ஆயுங் படிச்ச திட்ட²தீ’தி.
‘‘யதா² கத²ங் பனாவுஸோ, இமஸ்ஸ பா⁴ஸிதஸ்ஸ அத்தோ² த³ட்ட²ப்³போ³’’தி?
‘‘தேன ஹாவுஸோ, உபமங் தே கரிஸ்ஸாமி; உபமாயபிதே⁴கச்சே
விஞ்ஞூ புரிஸா பா⁴ஸிதஸ்ஸ அத்த²ங் ஆஜானந்தி. ஸெய்யதா²பி, ஆவுஸோ,
தேலப்பதீ³பஸ்ஸ ஜா²யதோ அச்சிங் படிச்ச ஆபா⁴ பஞ்ஞாயதி, ஆப⁴ங் படிச்ச அச்சி
பஞ்ஞாயதி; ஏவமேவ கோ², ஆவுஸோ, ஆயு உஸ்மங் படிச்ச திட்ட²தி, உஸ்மா ஆயுங்
படிச்ச திட்ட²தீ’’தி.
457. ‘‘தேவ நு கோ², ஆவுஸோ, ஆயுஸங்கா²ரா, தே வேத³னியா த⁴ம்மா உதா³ஹு அஞ்ஞே ஆயுஸங்கா²ரா அஞ்ஞே வேத³னியா த⁴ம்மா’’தி? ‘‘ந கோ² ,
ஆவுஸோ, தேவ ஆயுஸங்கா²ரா தே வேத³னியா த⁴ம்மா. தே ச ஹாவுஸோ, ஆயுஸங்கா²ரா
அப⁴விங்ஸு தே வேத³னியா த⁴ம்மா, ந யித³ங் ஸஞ்ஞாவேத³யிதனிரோத⁴ங் ஸமாபன்னஸ்ஸ
பி⁴க்கு²னோ வுட்டா²னங் பஞ்ஞாயேத². யஸ்மா ச கோ², ஆவுஸோ, அஞ்ஞே ஆயுஸங்கா²ரா
அஞ்ஞே வேத³னியா த⁴ம்மா, தஸ்மா ஸஞ்ஞாவேத³யிதனிரோத⁴ங் ஸமாபன்னஸ்ஸ பி⁴க்கு²னோ
வுட்டா²னங் பஞ்ஞாயதீ’’தி.
‘‘யதா³ நு கோ², ஆவுஸோ, இமங் காயங் கதி த⁴ம்மா ஜஹந்தி; அதா²யங் காயோ உஜ்ஜி²தோ அவக்கி²த்தோ ஸேதி, யதா² கட்ட²ங் அசேதன’’ந்தி?
‘‘யதா³ கோ², ஆவுஸோ, இமங் காயங் தயோ த⁴ம்மா ஜஹந்தி –
ஆயு உஸ்மா ச விஞ்ஞாணங்; அதா²யங் காயோ உஜ்ஜி²தோ அவக்கி²த்தோ ஸேதி, யதா²
கட்ட²ங் அசேதன’’ந்தி.
‘‘ய்வாயங், ஆவுஸோ, மதோ காலங்கதோ, யோ சாயங் பி⁴க்கு² ஸஞ்ஞாவேத³யிதனிரோத⁴ங் ஸமாபன்னோ – இமேஸங் கிங் நானாகரண’’ந்தி?
‘‘ய்வாயங், ஆவுஸோ, மதோ காலங்கதோ தஸ்ஸ காயஸங்கா²ரா நிருத்³தா⁴ படிப்பஸ்ஸத்³தா⁴ ,
வசீஸங்கா²ரா நிருத்³தா⁴ படிப்பஸ்ஸத்³தா⁴, சித்தஸங்கா²ரா நிருத்³தா⁴
படிப்பஸ்ஸத்³தா⁴, ஆயு பரிக்கீ²ணோ, உஸ்மா வூபஸந்தா, இந்த்³ரியானி
பரிபி⁴ன்னானி. யோ சாயங் பி⁴க்கு² ஸஞ்ஞாவேத³யிதனிரோத⁴ங் ஸமாபன்னோ தஸ்ஸபி
காயஸங்கா²ரா நிருத்³தா⁴ படிப்பஸ்ஸத்³தா⁴, வசீஸங்கா²ரா நிருத்³தா⁴
படிப்பஸ்ஸத்³தா⁴, சித்தஸங்கா²ரா நிருத்³தா⁴ படிப்பஸ்ஸத்³தா⁴, ஆயு ந
பரிக்கீ²ணோ, உஸ்மா அவூபஸந்தா, இந்த்³ரியானி விப்பஸன்னானி. ய்வாயங், ஆவுஸோ,
மதோ காலங்கதோ, யோ சாயங் பி⁴க்கு² ஸஞ்ஞாவேத³யிதனிரோத⁴ங் ஸமாபன்னோ – இத³ங்
நேஸங் நானாகரண’’ந்தி.
458. ‘‘கதி பனாவுஸோ, பச்சயா அது³க்க²மஸுகா²ய சேதோவிமுத்தியா ஸமாபத்தியா’’தி?
‘‘சத்தாரோ கோ², ஆவுஸோ, பச்சயா அது³க்க²மஸுகா²ய
சேதோவிமுத்தியா ஸமாபத்தியா. இதா⁴வுஸோ, பி⁴க்கு² ஸுக²ஸ்ஸ ச பஹானா து³க்க²ஸ்ஸ
ச பஹானா புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா அது³க்க²மஸுக²ங்
உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹரதி. இமே கோ²,
ஆவுஸோ, சத்தாரோ பச்சயா அது³க்க²மஸுகா²ய சேதோவிமுத்தியா ஸமாபத்தியா’’தி.
‘‘கதி பனாவுஸோ, பச்சயா அனிமித்தாய சேதோவிமுத்தியா ஸமாபத்தியா’’தி?
‘‘த்³வே கோ², ஆவுஸோ, பச்சயா அனிமித்தாய சேதோவிமுத்தியா ஸமாபத்தியா
– ஸப்³ப³னிமித்தானஞ்ச அமனஸிகாரோ, அனிமித்தாய ச தா⁴துயா மனஸிகாரோ. இமே கோ²,
ஆவுஸோ, த்³வே பச்சயா அனிமித்தாய சேதோவிமுத்தியா ஸமாபத்தியா’’தி.
‘‘கதி பனாவுஸோ, பச்சயா அனிமித்தாய சேதோவிமுத்தியா டி²தியா’’தி?
‘‘தயோ கோ², ஆவுஸோ, பச்சயா அனிமித்தாய சேதோவிமுத்தியா டி²தியா
– ஸப்³ப³னிமித்தானஞ்ச அமனஸிகாரோ, அனிமித்தாய ச தா⁴துயா மனஸிகாரோ, புப்³பே³
ச அபி⁴ஸங்கா²ரோ. இமே கோ², ஆவுஸோ, தயோ பச்சயா அனிமித்தாய சேதோவிமுத்தியா
டி²தியா’’தி.
‘‘கதி பனாவுஸோ, பச்சயா அனிமித்தாய சேதோவிமுத்தியா வுட்டா²னாயா’’தி?
‘‘த்³வே கோ², ஆவுஸோ, பச்சயா அனிமித்தாய சேதோவிமுத்தியா
வுட்டா²னாய – ஸப்³ப³னிமித்தானஞ்ச மனஸிகாரோ, அனிமித்தாய ச தா⁴துயா
அமனஸிகாரோ. இமே கோ², ஆவுஸோ, த்³வே பச்சயா அனிமித்தாய சேதோவிமுத்தியா
வுட்டா²னாயா’’தி.
459.
‘‘யா சாயங், ஆவுஸோ, அப்பமாணா சேதோவிமுத்தி, யா ச ஆகிஞ்சஞ்ஞா சேதோவிமுத்தி,
யா ச ஸுஞ்ஞதா சேதோவிமுத்தி, யா ச அனிமித்தா சேதோவிமுத்தி – இமே த⁴ம்மா
நானாத்தா² சேவ நானாப்³யஞ்ஜனா ச உதா³ஹு ஏகத்தா² ப்³யஞ்ஜனமேவ நான’’ந்தி?
‘‘யா சாயங், ஆவுஸோ, அப்பமாணா சேதோவிமுத்தி, யா ச
ஆகிஞ்சஞ்ஞா சேதோவிமுத்தி, யா ச ஸுஞ்ஞதா சேதோவிமுத்தி, யா ச அனிமித்தா
சேதோவிமுத்தி – அத்தி² கோ², ஆவுஸோ, பரியாயோ யங் பரியாயங் ஆக³ம்ம இமே த⁴ம்மா
நானாத்தா² சேவ நானாப்³யஞ்ஜனா ச; அத்தி² ச கோ², ஆவுஸோ, பரியாயோ யங்
பரியாயங் ஆக³ம்ம இமே த⁴ம்மா ஏகத்தா², ப்³யஞ்ஜனமேவ நானங்’’.
‘‘கதமோ சாவுஸோ, பரியாயோ யங் பரியாயங் ஆக³ம்ம இமே த⁴ம்மா நானாத்தா² சேவ நானாப்³யஞ்ஜனா ச’’?
‘‘இதா⁴வுஸோ, பி⁴க்கு² மெத்தாஸஹக³தேன சேதஸா ஏகங் தி³ஸங்
ப²ரித்வா விஹரதி, ததா² து³தியங், ததா² ததியங், ததா² சதுத்த²ங். இதி
உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங்
மெத்தாஸஹக³தேன சேதஸா விபுலேன மஹக்³க³தேன அப்பமாணேன
அவேரேன அப்³யாப³ஜ்ஜே²ன ப²ரித்வா விஹரதி. கருணாஸஹக³தேன சேதஸா…பே॰…
முதி³தாஸஹக³தேன சேதஸா… உபெக்கா²ஸஹக³தேன சேதஸா ஏகங் தி³ஸங் ப²ரித்வா விஹரதி,
ததா² து³தியங், ததா² ததியங், ததா² சதுத்த²ங். இதி உத்³த⁴மதோ⁴
திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் உபெக்கா²ஸஹக³தேன
சேதஸா விபுலேன மஹக்³க³தேன அப்பமாணேன அவேரேன அப்³யாப³ஜ்ஜே²ன ப²ரித்வா
விஹரதி. அயங் வுச்சதாவுஸோ, அப்பமாணா சேதோவிமுத்தி’’.
‘‘கதமா சாவுஸோ, ஆகிஞ்சஞ்ஞா சேதோவிமுத்தி’’?
‘‘இதா⁴வுஸோ, பி⁴க்கு² ஸப்³ப³ஸோ விஞ்ஞாணஞ்சாயதனங்
ஸமதிக்கம்ம நத்தி² கிஞ்சீதி ஆகிஞ்சஞ்ஞாயதனங் உபஸம்பஜ்ஜ விஹரதி. அயங்
வுச்சதாவுஸோ, ஆகிஞ்சஞ்ஞா சேதோவிமுத்தி’’.
‘‘கதமா சாவுஸோ, ஸுஞ்ஞதா சேதோவிமுத்தி’’?
‘‘இதா⁴வுஸோ, பி⁴க்கு² அரஞ்ஞக³தோ வா ருக்க²மூலக³தோ வா
ஸுஞ்ஞாகா³ரக³தோ வா இதி படிஸஞ்சிக்க²தி – ‘ஸுஞ்ஞமித³ங் அத்தேன வா அத்தனியேன
வா’தி. அயங் வுச்சதாவுஸோ, ஸுஞ்ஞதா சேதோவிமுத்தி’’.
‘‘கதமா சாவுஸோ, அனிமித்தா சேதோவிமுத்தி’’?
‘‘இதா⁴வுஸோ, பி⁴க்கு² ஸப்³ப³னிமித்தானங் அமனஸிகாரா
அனிமித்தங் சேதோஸமாதி⁴ங் உபஸம்பஜ்ஜ விஹரதி. அயங் வுச்சதாவுஸோ, அனிமித்தா
சேதோவிமுத்தி. அயங் கோ², ஆவுஸோ, பரியாயோ யங் பரியாயங் ஆக³ம்ம இமே த⁴ம்மா
நானாத்தா² சேவ நானாப்³யஞ்ஜனா ச’’.
‘‘கதமோ சாவுஸோ, பரியாயோ யங் பரியாயங் ஆக³ம்ம இமே த⁴ம்மா ஏகத்தா² ப்³யஞ்ஜனமேவ நானங்’’?
‘‘ராகோ³ கோ², ஆவுஸோ, பமாணகரணோ, தோ³ஸோ பமாணகரணோ, மோஹோ பமாணகரணோ. தே கீ²ணாஸவஸ்ஸ பி⁴க்கு²னோ பஹீனா
உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. யாவதா
கோ², ஆவுஸோ, அப்பமாணா சேதோவிமுத்தியோ, அகுப்பா தாஸங் சேதோவிமுத்தி
அக்³க³மக்கா²யதி. ஸா கோ² பனாகுப்பா சேதோவிமுத்தி ஸுஞ்ஞா ராகே³ன, ஸுஞ்ஞா
தோ³ஸேன, ஸுஞ்ஞா மோஹேன. ராகோ³ கோ², ஆவுஸோ, கிஞ்சனோ, தோ³ஸோ கிஞ்சனோ, மோஹோ
கிஞ்சனோ. தே கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா
அனபா⁴வங்கதா ஆயதிங் அனுப்பாத³த⁴ம்மா. யாவதா கோ², ஆவுஸோ, ஆகிஞ்சஞ்ஞா
சேதோவிமுத்தியோ, அகுப்பா தாஸங் சேதோவிமுத்தி அக்³க³மக்கா²யதி. ஸா கோ²
பனாகுப்பா சேதோவிமுத்தி ஸுஞ்ஞா ராகே³ன, ஸுஞ்ஞா தோ³ஸேன , ஸுஞ்ஞா மோஹேன. ராகோ³ கோ², ஆவுஸோ, நிமித்தகரணோ, தோ³ஸோ நிமித்தகரணோ, மோஹோ நிமித்தகரணோ. தே
கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா அனபா⁴வங்கதா
ஆயதிங் அனுப்பாத³த⁴ம்மா. யாவதா கோ², ஆவுஸோ, அனிமித்தா சேதோவிமுத்தியோ,
அகுப்பா தாஸங் சேதோவிமுத்தி அக்³க³மக்கா²யதி. ஸா கோ² பனாகுப்பா
சேதோவிமுத்தி ஸுஞ்ஞா ராகே³ன, ஸுஞ்ஞா தோ³ஸேன, ஸுஞ்ஞா மோஹேன. அயங் கோ²,
ஆவுஸோ, பரியாயோ யங் பரியாயங் ஆக³ம்ம இமே த⁴ம்மா ஏகத்தா² ப்³யஞ்ஜனமேவ
நான’’ந்தி.
இத³மவோசாயஸ்மா ஸாரிபுத்தோ. அத்தமனோ ஆயஸ்மா மஹாகொட்டி²கோ ஆயஸ்மதோ ஸாரிபுத்தஸ்ஸ பா⁴ஸிதங் அபி⁴னந்தீ³தி.
மஹாவேத³ல்லஸுத்தங் நிட்டி²தங் ததியங்.
4. சூளவேத³ல்லஸுத்தங்
460. ஏவங்
மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அத²
கோ² விஸாகோ² உபாஸகோ யேன த⁴ம்மதி³ன்னா பி⁴க்கு²னீ தேனுபஸங்கமி; உபஸங்கமித்வா
த⁴ம்மதி³ன்னங் பி⁴க்கு²னிங் அபி⁴வாதெ³த்வா ஏகமந்தங் நிஸீதி³. ஏகமந்தங்
நிஸின்னோ கோ² விஸாகோ² உபாஸகோ த⁴ம்மதி³ன்னங் பி⁴க்கு²னிங் ஏதத³வோச –
‘‘‘ஸக்காயோ ஸக்காயோ’தி, அய்யே, வுச்சதி. கதமோ நு கோ², அய்யே, ஸக்காயோ
வுத்தோ ப⁴க³வதா’’தி? ‘‘பஞ்ச கோ² இமே, ஆவுஸோ விஸாக², உபாதா³னக்க²ந்தா⁴
ஸக்காயோ வுத்தோ ப⁴க³வதா, ஸெய்யதி²த³ங் – ரூபுபாதா³னக்க²ந்தோ⁴,
வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴,
விஞ்ஞாணுபாதா³னக்க²ந்தோ⁴. இமே கோ², ஆவுஸோ விஸாக², பஞ்சுபாதா³னக்க²ந்தா⁴
ஸக்காயோ வுத்தோ ப⁴க³வதா’’தி.
‘‘ஸாத⁴ய்யே’’தி கோ² விஸாகோ² உபாஸகோ த⁴ம்மதி³ன்னாய
பி⁴க்கு²னியா பா⁴ஸிதங் அபி⁴னந்தி³த்வா அனுமோதி³த்வா த⁴ம்மதி³ன்னங்
பி⁴க்கு²னிங் உத்தரிங் பஞ்ஹங் அபுச்சி² – ‘‘‘ஸக்காயஸமுத³யோ
ஸக்காயஸமுத³யோ’தி, அய்யே, வுச்சதி. கதமோ நு கோ², அய்யே, ஸக்காயஸமுத³யோ
வுத்தோ ப⁴க³வதா’’தி? ‘‘யாயங், ஆவுஸோ விஸாக², தண்ஹா போனொப்³ப⁴விகா
நந்தீ³ராக³ஸஹக³தா தத்ரதத்ராபி⁴னந்தி³னீ, ஸெய்யதி²த³ங் – காமதண்ஹா ப⁴வதண்ஹா
விப⁴வதண்ஹா; அயங் கோ², ஆவுஸோ விஸாக², ஸக்காயஸமுத³யோ வுத்தோ ப⁴க³வதா’’தி.
‘‘‘ஸக்காயனிரோதோ⁴ ஸக்காயனிரோதோ⁴’தி, அய்யே, வுச்சதி. கதமோ நு கோ², அய்யே, ஸக்காயனிரோதோ⁴ வுத்தோ ப⁴க³வதா’’தி?
‘‘யோ கோ², ஆவுஸோ விஸாக²,
தஸ்ஸாயேவ தண்ஹாய அஸேஸவிராக³னிரோதோ⁴ சாகோ³ படினிஸ்ஸக்³கோ³ முத்தி அனாலயோ;
அயங் கோ², ஆவுஸோ விஸாக², ஸக்காயனிரோதோ⁴ வுத்தோ ப⁴க³வதா’’தி.
‘‘‘ஸக்காயனிரோத⁴கா³மினீ படிபதா³ ஸக்காயனிரோத⁴கா³மினீ
படிபதா³’தி, அய்யே, வுச்சதி. கதமா நு கோ², அய்யே, ஸக்காயனிரோத⁴கா³மினீ
படிபதா³ வுத்தா ப⁴க³வதா’’தி?
‘‘அயமேவ கோ², ஆவுஸோ விஸாக², அரியோ அட்ட²ங்கி³கோ மக்³கோ³ ஸக்காயனிரோத⁴கா³மினீ படிபதா³ வுத்தா ப⁴க³வதா, ஸெய்யதி²த³ங் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதீ⁴’’தி.
‘‘தஞ்ஞேவ நு கோ², அய்யே, உபாதா³னங் தே [தேவ (ஸீ॰)]
பஞ்சுபாதா³னக்க²ந்தா⁴ உதா³ஹு அஞ்ஞத்ர பஞ்சஹுபாதா³னக்க²ந்தே⁴ஹி
உபாதா³ன’’ந்தி? ‘‘ந கோ², ஆவுஸோ விஸாக², தஞ்ஞேவ உபாதா³னங் தே
பஞ்சுபாதா³னக்க²ந்தா⁴, நாபி அஞ்ஞத்ர பஞ்சஹுபாதா³னக்க²ந்தே⁴ஹி உபாதா³னங். யோ கோ², ஆவுஸோ விஸாக², பஞ்சஸு உபாதா³னக்க²ந்தே⁴ஸு ச²ந்த³ராகோ³ தங் தத்த² உபாதா³ன’’ந்தி.
461.
‘‘கத²ங் பனாய்யே, ஸக்காயதி³ட்டி² ஹோதீ’’தி? ‘‘இதா⁴வுஸோ விஸாக², அஸ்ஸுதவா
புது²ஜ்ஜனோ, அரியானங் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ,
ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே
அவினீதோ, ரூபங் அத்ததோ ஸமனுபஸ்ஸதி, ரூபவந்தங் வா அத்தானங், அத்தனி வா
ரூபங், ரூபஸ்மிங் வா அத்தானங். வேத³னங்…பே॰… ஸஞ்ஞங்… ஸங்கா²ரே… விஞ்ஞாணங்
அத்ததோ ஸமனுபஸ்ஸதி, விஞ்ஞாணவந்தங் வா அத்தானங், அத்தனி வா விஞ்ஞாணங்,
விஞ்ஞாணஸ்மிங் வா அத்தானங். ஏவங் கோ² , ஆவுஸோ விஸாக², ஸக்காயதி³ட்டி² ஹோதீ’’தி.
‘‘கத²ங் பனாய்யே, ஸக்காயதி³ட்டி² ந ஹோதீ’’தி?
‘‘இதா⁴வுஸோ விஸாக², ஸுதவா அரியஸாவகோ, அரியானங்
த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ, ஸப்புரிஸானங் த³ஸ்ஸாவீ
ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே ஸுவினீதோ, ந ரூபங் அத்ததோ
ஸமனுபஸ்ஸதி, ந ரூபவந்தங் வா அத்தானங், ந அத்தனி வா ரூபங், ந ரூபஸ்மிங் வா
அத்தானங். ந வேத³னங்…பே॰… ந ஸஞ்ஞங்… ந ஸங்கா²ரே…பே॰… ந விஞ்ஞாணங் அத்ததோ
ஸமனுபஸ்ஸதி, ந விஞ்ஞாணவந்தங் வா அத்தானங் , ந அத்தனி வா விஞ்ஞாணங், ந விஞ்ஞாணஸ்மிங் வா அத்தானங். ஏவங் கோ², ஆவுஸோ விஸாக², ஸக்காயதி³ட்டி² ந ஹோதீ’’தி.
462. ‘‘கதமோ பனாய்யே, அரியோ அட்ட²ங்கி³கோ மக்³கோ³’’தி?
‘‘அயமேவ கோ², ஆவுஸோ விஸாக², அரியோ அட்ட²ங்கி³கோ மக்³கோ³, ஸெய்யதி²த³ங் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதீ⁴’’தி. ‘‘அரியோ பனாய்யே, அட்ட²ங்கி³கோ மக்³கோ³ ஸங்க²தோ உதா³ஹு அஸங்க²தோ’’தி?
‘‘அரியோ கோ², ஆவுஸோ விஸாக², அட்ட²ங்கி³கோ மக்³கோ³ ஸங்க²தோ’’தி .
‘‘அரியேன நு கோ², அய்யே, அட்ட²ங்கி³கேன மக்³கே³ன தயோ
க²ந்தா⁴ ஸங்க³ஹிதா உதா³ஹு தீஹி க²ந்தே⁴ஹி அரியோ அட்ட²ங்கி³கோ மக்³கோ³
ஸங்க³ஹிதோ’’தி?
‘‘ந கோ², ஆவுஸோ விஸாக², அரியேன அட்ட²ங்கி³கேன மக்³கே³ன
தயோ க²ந்தா⁴ ஸங்க³ஹிதா; தீஹி ச கோ², ஆவுஸோ விஸாக², க²ந்தே⁴ஹி அரியோ
அட்ட²ங்கி³கோ மக்³கோ³ ஸங்க³ஹிதோ. யா சாவுஸோ விஸாக², ஸம்மாவாசா யோ ச
ஸம்மாகம்மந்தோ யோ ச ஸம்மாஆஜீவோ இமே த⁴ம்மா
ஸீலக்க²ந்தே⁴ ஸங்க³ஹிதா. யோ ச ஸம்மாவாயாமோ யா ச ஸம்மாஸதி யோ ச ஸம்மாஸமாதி⁴
இமே த⁴ம்மா ஸமாதி⁴க்க²ந்தே⁴ ஸங்க³ஹிதா. யா ச ஸம்மாதி³ட்டி² யோ ச
ஸம்மாஸங்கப்போ, இமே த⁴ம்மா பஞ்ஞாக்க²ந்தே⁴ ஸங்க³ஹிதா’’தி.
‘‘கதமோ பனாய்யே, ஸமாதி⁴, கதமே த⁴ம்மா ஸமாதி⁴னிமித்தா, கதமே த⁴ம்மா ஸமாதி⁴பரிக்கா²ரா, கதமா ஸமாதி⁴பா⁴வனா’’தி?
‘‘யா கோ², ஆவுஸோ விஸாக², சித்தஸ்ஸ ஏகக்³க³தா அயங்
ஸமாதி⁴; சத்தாரோ ஸதிபட்டா²னா ஸமாதி⁴னிமித்தா; சத்தாரோ ஸம்மப்பதா⁴னா
ஸமாதி⁴பரிக்கா²ரா. யா தேஸங்யேவ த⁴ம்மானங் ஆஸேவனா பா⁴வனா ப³ஹுலீகம்மங், அயங்
எத்த² ஸமாதி⁴பா⁴வனா’’தி.
463. ‘‘கதி பனாய்யே, ஸங்கா²ரா’’தி?
‘‘தயோமே, ஆவுஸோ விஸாக², ஸங்கா²ரா – காயஸங்கா²ரோ, வசீஸங்கா²ரோ, சித்தஸங்கா²ரோ’’தி.
‘‘கதமோ பனாய்யே, காயஸங்கா²ரோ, கதமோ வசீஸங்கா²ரோ, கதமோ சித்தஸங்கா²ரோ’’தி?
‘‘அஸ்ஸாஸபஸ்ஸாஸா கோ², ஆவுஸோ விஸாக², காயஸங்கா²ரோ, விதக்கவிசாரா வசீஸங்கா²ரோ, ஸஞ்ஞா ச வேத³னா ச சித்தஸங்கா²ரோ’’தி.
‘‘கஸ்மா பனாய்யே, அஸ்ஸாஸபஸ்ஸாஸா காயஸங்கா²ரோ, கஸ்மா விதக்கவிசாரா வசீஸங்கா²ரோ, கஸ்மா ஸஞ்ஞா ச வேத³னா ச சித்தஸங்கா²ரோ’’தி?
‘‘அஸ்ஸாஸபஸ்ஸாஸா கோ², ஆவுஸோ
விஸாக², காயிகா ஏதே த⁴ம்மா காயப்படிப³த்³தா⁴, தஸ்மா அஸ்ஸாஸபஸ்ஸாஸா
காயஸங்கா²ரோ. புப்³பே³ கோ², ஆவுஸோ விஸாக², விதக்கெத்வா விசாரெத்வா பச்சா²
வாசங் பி⁴ந்த³தி, தஸ்மா விதக்கவிசாரா வசீஸங்கா²ரோ. ஸஞ்ஞா ச வேத³னா ச
சேதஸிகா ஏதே த⁴ம்மா சித்தப்படிப³த்³தா⁴, தஸ்மா ஸஞ்ஞா ச வேத³னா ச சித்தஸங்கா²ரோ’’தி.
464. ‘‘கத²ங் பனாய்யே, ஸஞ்ஞாவேத³யிதனிரோத⁴ஸமாபத்தி ஹோதீ’’தி?
‘‘ந கோ², ஆவுஸோ விஸாக², ஸஞ்ஞாவேத³யிதனிரோத⁴ங்
ஸமாபஜ்ஜந்தஸ்ஸ பி⁴க்கு²னோ ஏவங் ஹோதி – ‘அஹங் ஸஞ்ஞாவேத³யிதனிரோத⁴ங்
ஸமாபஜ்ஜிஸ்ஸ’ந்தி வா, ‘அஹங் ஸஞ்ஞாவேத³யிதனிரோத⁴ங் ஸமாபஜ்ஜாமீ’தி வா, ‘அஹங்
ஸஞ்ஞாவேத³யிதனிரோத⁴ங் ஸமாபன்னோ’தி வா. அத² க்²வாஸ்ஸ புப்³பே³வ ததா² சித்தங்
பா⁴விதங் ஹோதி யங் தங் தத²த்தாய உபனேதீ’’தி.
‘‘ஸஞ்ஞாவேத³யிதனிரோத⁴ங் ஸமாபஜ்ஜந்தஸ்ஸ
பனாய்யே, பி⁴க்கு²னோ கதமே த⁴ம்மா பட²மங் நிருஜ்ஜ²ந்தி – யதி³ வா
காயஸங்கா²ரோ, யதி³ வா வசீஸங்கா²ரோ, யதி³ வா சித்தஸங்கா²ரோ’’தி?
‘‘ஸஞ்ஞாவேத³யிதனிரோத⁴ங் ஸமாபஜ்ஜந்தஸ்ஸ கோ², ஆவுஸோ விஸாக², பி⁴க்கு²னோ
பட²மங் நிருஜ்ஜ²தி வசீஸங்கா²ரோ, ததோ காயஸங்கா²ரோ, ததோ சித்தஸங்கா²ரோ’’தி.
‘‘கத²ங் பனாய்யே, ஸஞ்ஞாவேத³யிதனிரோத⁴ஸமாபத்தியா வுட்டா²னங் ஹோதீ’’தி?
‘‘ந கோ², ஆவுஸோ விஸாக², ஸஞ்ஞாவேத³யிதனிரோத⁴ஸமாபத்தியா
வுட்ட²ஹந்தஸ்ஸ பி⁴க்கு²னோ ஏவங் ஹோதி – ‘அஹங் ஸஞ்ஞாவேத³யிதனிரோத⁴ஸமாபத்தியா
வுட்ட²ஹிஸ்ஸ’ந்தி வா, ‘அஹங் ஸஞ்ஞாவேத³யிதனிரோத⁴ஸமாபத்தியா வுட்ட²ஹாமீ’தி
வா, ‘அஹங் ஸஞ்ஞாவேத³யிதனிரோத⁴ஸமாபத்தியா வுட்டி²தோ’தி வா. அத² க்²வாஸ்ஸ
புப்³பே³வ ததா² சித்தங் பா⁴விதங் ஹோதி யங் தங் தத²த்தாய உபனேதீ’’தி.
‘‘ஸஞ்ஞாவேத³யிதனிரோத⁴ஸமாபத்தியா வுட்ட²ஹந்தஸ்ஸ
பனாய்யே, பி⁴க்கு²னோ கதமே த⁴ம்மா பட²மங் உப்பஜ்ஜந்தி – யதி³ வா
காயஸங்கா²ரோ, யதி³ வா வசீஸங்கா²ரோ, யதி³ வா
சித்தஸங்கா²ரோ’’தி? ‘‘ஸஞ்ஞாவேத³யிதனிரோத⁴ஸமாபத்தியா வுட்ட²ஹந்தஸ்ஸ கோ²,
ஆவுஸோ விஸாக², பி⁴க்கு²னோ பட²மங் உப்பஜ்ஜதி சித்தஸங்கா²ரோ, ததோ
காயஸங்கா²ரோ, ததோ வசீஸங்கா²ரோ’’தி.
‘‘ஸஞ்ஞாவேத³யிதனிரோத⁴ஸமாபத்தியா வுட்டி²தங் பனாய்யே,
பி⁴க்கு²ங் கதி ப²ஸ்ஸா பு²ஸந்தீ’’தி? ‘‘ஸஞ்ஞாவேத³யிதனிரோத⁴ஸமாபத்தியா
வுட்டி²தங் கோ², ஆவுஸோ விஸாக², பி⁴க்கு²ங் தயோ ப²ஸ்ஸா பு²ஸந்தி – ஸுஞ்ஞதோ ப²ஸ்ஸோ, அனிமித்தோ ப²ஸ்ஸோ, அப்பணிஹிதோ ப²ஸ்ஸோ’’தி.
‘‘ஸஞ்ஞாவேத³யிதனிரோத⁴ஸமாபத்தியா வுட்டி²தஸ்ஸ பனாய்யே,
பி⁴க்கு²னோ கிங்னின்னங் சித்தங் ஹோதி கிங்போணங் கிங்பப்³பா⁴ர’’ந்தி?
‘‘ஸஞ்ஞாவேத³யிதனிரோத⁴ஸமாபத்தியா வுட்டி²தஸ்ஸ கோ², ஆவுஸோ விஸாக², பி⁴க்கு²னோ
விவேகனின்னங் சித்தங் ஹோதி, விவேகபோணங் விவேகபப்³பா⁴ர’’ந்தி.
465. ‘‘கதி பனாய்யே, வேத³னா’’தி?
‘‘திஸ்ஸோ கோ² இமா, ஆவுஸோ விஸாக², வேத³னா – ஸுகா² வேத³னா, து³க்கா² வேத³னா, அது³க்க²மஸுகா² வேத³னா’’தி.
‘‘கதமா பனாய்யே, ஸுகா² வேத³னா, கதமா து³க்கா² வேத³னா, கதமா அது³க்க²மஸுகா² வேத³னா’’தி?
‘‘யங் கோ², ஆவுஸோ விஸாக², காயிகங் வா சேதஸிகங் வா
ஸுக²ங் ஸாதங் வேத³யிதங் – அயங் ஸுகா² வேத³னா. யங் கோ², ஆவுஸோ விஸாக²,
காயிகங் வா சேதஸிகங் வா து³க்க²ங் அஸாதங் வேத³யிதங் – அயங் து³க்கா²
வேத³னா. யங் கோ², ஆவுஸோ விஸாக², காயிகங் வா சேதஸிகங் வா நேவ ஸாதங் நாஸாதங்
வேத³யிதங் – அயங் அது³க்க²மஸுகா² வேத³னா’’தி.
‘‘ஸுகா² பனாய்யே, வேத³னா கிங்ஸுகா² கிங்து³க்கா²,
து³க்கா² வேத³னா கிங்ஸுகா² கிங்து³க்கா², அது³க்க²மஸுகா² வேத³னா கிங்ஸுகா²
கிங்து³க்கா²’’தி?
‘‘ஸுகா² கோ², ஆவுஸோ விஸாக², வேத³னா டி²திஸுகா² விபரிணாமது³க்கா²; து³க்கா² வேத³னா டி²திது³க்கா² விபரிணாமஸுகா² ; அது³க்க²மஸுகா² வேத³னா ஞாணஸுகா² அஞ்ஞாணது³க்கா²’’தி.
‘‘ஸுகா²ய பனாய்யே, வேத³னாய கிங் அனுஸயோ அனுஸேதி,
து³க்கா²ய வேத³னாய கிங் அனுஸயோ அனுஸேதி, அது³க்க²மஸுகா²ய வேத³னாய கிங்
அனுஸயோ அனுஸேதீ’’தி?
‘‘ஸுகா²ய கோ², ஆவுஸோ விஸாக², வேத³னாய ராகா³னுஸயோ
அனுஸேதி, து³க்கா²ய வேத³னாய படிகா⁴னுஸயோ அனுஸேதி, அது³க்க²மஸுகா²ய வேத³னாய
அவிஜ்ஜானுஸயோ அனுஸேதீ’’தி.
‘‘ஸப்³பா³ய நு கோ², அய்யே, ஸுகா²ய வேத³னாய ராகா³னுஸயோ
அனுஸேதி, ஸப்³பா³ய து³க்கா²ய வேத³னாய படிகா⁴னுஸயோ அனுஸேதி, ஸப்³பா³ய
அது³க்க²மஸுகா²ய வேத³னாய அவிஜ்ஜானுஸயோ அனுஸேதீ’’தி?
‘‘ந கோ², ஆவுஸோ விஸாக², ஸப்³பா³ய ஸுகா²ய வேத³னாய
ராகா³னுஸயோ அனுஸேதி, ந ஸப்³பா³ய து³க்கா²ய வேத³னாய படிகா⁴னுஸயோ அனுஸேதி, ந
ஸப்³பா³ய அது³க்க²மஸுகா²ய வேத³னாய அவிஜ்ஜானுஸயோ அனுஸேதீ’’தி.
‘‘ஸுகா²ய பனாய்யே, வேத³னாய கிங் பஹாதப்³ப³ங், து³க்கா²ய வேத³னாய கிங் பஹாதப்³ப³ங், அது³க்க²மஸுகா²ய வேத³னாய கிங் பஹாதப்³ப³’’ந்தி?
‘‘ஸுகா²ய கோ², ஆவுஸோ விஸாக², வேத³னாய ராகா³னுஸயோ
பஹாதப்³போ³, து³க்கா²ய வேத³னாய படிகா⁴னுஸயோ பஹாதப்³போ³, அது³க்க²மஸுகா²ய
வேத³னாய அவிஜ்ஜானுஸயோ பஹாதப்³போ³’’தி.
‘‘ஸப்³பா³ய நு கோ², அய்யே,
ஸுகா²ய வேத³னாய ராகா³னுஸயோ பஹாதப்³போ³, ஸப்³பா³ய து³க்கா²ய வேத³னாய
படிகா⁴னுஸயோ பஹாதப்³போ³, ஸப்³பா³ய அது³க்க²மஸுகா²ய வேத³னாய அவிஜ்ஜானுஸயோ
பஹாதப்³போ³’’தி?
‘‘ந கோ², ஆவுஸோ விஸாக², ஸப்³பா³ய ஸுகா²ய வேத³னாய ராகா³னுஸயோ பஹாதப்³போ³, ந ஸப்³பா³ய து³க்கா²ய வேத³னாய படிகா⁴னுஸயோ பஹாதப்³போ³ ,
ந ஸப்³பா³ய அது³க்க²மஸுகா²ய வேத³னாய அவிஜ்ஜானுஸயோ பஹாதப்³போ³. இதா⁴வுஸோ
விஸாக², பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங்
ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி. ராக³ங் தேன
பஜஹதி, ந தத்த² ராகா³னுஸயோ அனுஸேதி. இதா⁴வுஸோ விஸாக², பி⁴க்கு² இதி
படிஸஞ்சிக்க²தி – ‘குதா³ஸ்ஸு நாமாஹங் ததா³யதனங் உபஸம்பஜ்ஜ விஹரிஸ்ஸாமி
யத³ரியா ஏதரஹி ஆயதனங் உபஸம்பஜ்ஜ விஹரந்தீ’தி? இதி அனுத்தரேஸு விமொக்கே²ஸு
பிஹங் உபட்டா²பயதோ உப்பஜ்ஜதி பிஹாப்பச்சயா
தோ³மனஸ்ஸங். படிக⁴ங் தேன பஜஹதி, ந தத்த² படிகா⁴னுஸயோ அனுஸேதி. இதா⁴வுஸோ
விஸாக², பி⁴க்கு² ஸுக²ஸ்ஸ ச பஹானா, து³க்க²ஸ்ஸ ச பஹானா, புப்³பே³வ
ஸோமனஸ்ஸதோ³மனஸ்ஸானங் அத்த²ங்க³மா, அது³க்க²மஸுக²ங்
உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹரதி. அவிஜ்ஜங்
தேன பஜஹதி, ந தத்த² அவிஜ்ஜானுஸயோ அனுஸேதீ’’தி.
466. ‘‘ஸுகா²ய பனாய்யே, வேத³னாய கிங் படிபா⁴கோ³’’தி?
‘‘ஸுகா²ய கோ², ஆவுஸோ விஸாக², வேத³னாய து³க்கா² வேத³னா படிபா⁴கோ³’’தி.
‘‘து³க்கா²ய பன்னாய்யே, வேத³னாய கிங் படிபா⁴கோ³’’தி?
‘‘து³க்கா²ய கோ², ஆவுஸோ விஸாக², வேத³னாய ஸுகா² வேத³னா படிபா⁴கோ³’’தி.
‘‘அது³க்க²மஸுகா²ய பனாய்யே, வேத³னாய கிங் படிபா⁴கோ³’’தி?
‘‘அது³க்க²மஸுகா²ய கோ², ஆவுஸோ விஸாக², வேத³னாய அவிஜ்ஜா படிபா⁴கோ³’’தி.
‘‘அவிஜ்ஜாய பனாய்யே, கிங் படிபா⁴கோ³’’தி?
‘‘அவிஜ்ஜாய கோ², ஆவுஸோ விஸாக², விஜ்ஜா படிபா⁴கோ³’’தி.
‘‘விஜ்ஜாய பனாய்யே, கிங் படிபா⁴கோ³’’தி?
‘‘விஜ்ஜாய கோ², ஆவுஸோ விஸாக², விமுத்தி படிபா⁴கோ³’’தி.
‘‘விமுத்தியா பனாய்யே , கிங் படிபா⁴கோ³’’தி?
‘‘விமுத்தியா கோ², ஆவுஸோ விஸாக², நிப்³பா³னங் படிபா⁴கோ³’’தி.
‘‘நிப்³பா³னஸ்ஸ பனாய்யே, கிங் படிபா⁴கோ³’’தி? ‘‘அச்சயாஸி, ஆவுஸோ [அச்சஸராவுஸோ (ஸீ॰ பீ॰), அச்சஸ்ஸராவுஸோ (ஸ்யா॰ கங்॰)]
விஸாக², பஞ்ஹங், நாஸக்கி² பஞ்ஹானங் பரியந்தங் க³ஹேதுங்.
நிப்³பா³னோக³த⁴ஞ்ஹி, ஆவுஸோ விஸாக², ப்³ரஹ்மசரியங், நிப்³பா³னபராயனங்
நிப்³பா³னபரியோஸானங். ஆகங்க²மானோ ச த்வங், ஆவுஸோ விஸாக², ப⁴க³வந்தங்
உபஸங்கமித்வா ஏதமத்த²ங் புச்செ²ய்யாஸி, யதா² ச தே ப⁴க³வா ப்³யாகரோதி ததா²
நங் தா⁴ரெய்யாஸீ’’தி.
467.
அத² கோ² விஸாகோ² உபாஸகோ த⁴ம்மதி³ன்னாய பி⁴க்கு²னியா பா⁴ஸிதங்
அபி⁴னந்தி³த்வா அனுமோதி³த்வா உட்டா²யாஸனா த⁴ம்மதி³ன்னங் பி⁴க்கு²னிங்
அபி⁴வாதெ³த்வா பத³க்கி²ணங் கத்வா யேன ப⁴க³வா தேனுபஸங்கமி; உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² விஸாகோ²
உபாஸகோ யாவதகோ அஹோஸி த⁴ம்மதி³ன்னாய பி⁴க்கு²னியா ஸத்³தி⁴ங் கதா²ஸல்லாபோ
தங் ஸப்³ப³ங் ப⁴க³வதோ ஆரோசேஸி. ஏவங் வுத்தே, ப⁴க³வா விஸாக²ங் உபாஸகங்
ஏதத³வோச – ‘‘பண்டி³தா, விஸாக², த⁴ம்மதி³ன்னா பி⁴க்கு²னீ, மஹாபஞ்ஞா, விஸாக²,
த⁴ம்மதி³ன்னா பி⁴க்கு²னீ. மங் சேபி த்வங், விஸாக², ஏதமத்த²ங்
புச்செ²ய்யாஸி, அஹம்பி தங் ஏவமேவங் ப்³யாகரெய்யங், யதா² தங் த⁴ம்மதி³ன்னாய பி⁴க்கு²னியா ப்³யாகதங். ஏஸோ சேவேதஸ்ஸ [ஏஸோவேதஸ்ஸ (ஸ்யா॰ கங்॰)] அத்தோ². ஏவஞ்ச நங் [ஏவமேதங் (ஸீ॰ ஸ்யா॰ கங்॰)] தா⁴ரேஹீ’’தி.
இத³மவோச ப⁴க³வா. அத்தமனோ விஸாகோ² உபாஸகோ ப⁴க³வதோ பா⁴ஸிதங் அபி⁴னந்தீ³தி.
சூளவேத³ல்லஸுத்தங் நிட்டி²தங் சதுத்த²ங்.
5. சூளத⁴ம்மஸமாதா³னஸுத்தங்
468. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘சத்தாரிமானி, பி⁴க்க²வே, த⁴ம்மஸமாதா³னானி. கதமானி சத்தாரி? அத்தி²,
பி⁴க்க²வே, த⁴ம்மஸமாதா³னங் பச்சுப்பன்னஸுக²ங் ஆயதிங் து³க்க²விபாகங்;
அத்தி², பி⁴க்க²வே , த⁴ம்மஸமாதா³னங்
பச்சுப்பன்னது³க்க²ஞ்சேவ ஆயதிஞ்ச து³க்க²விபாகங்; அத்தி², பி⁴க்க²வே,
த⁴ம்மஸமாதா³னங் பச்சுப்பன்னது³க்க²ங் ஆயதிங் ஸுக²விபாகங்; அத்தி²,
பி⁴க்க²வே, த⁴ம்மஸமாதா³னங் பச்சுப்பன்னஸுக²ஞ்சேவ ஆயதிஞ்ச ஸுக²விபாகங்’’.
469.
‘‘கதமஞ்ச, பி⁴க்க²வே, த⁴ம்மஸமாதா³னங் பச்சுப்பன்னஸுக²ங் ஆயதிங்
து³க்க²விபாகங்? ஸந்தி, பி⁴க்க²வே, ஏகே ஸமணப்³ராஹ்மணா ஏவங்வாதி³னோ
ஏவங்தி³ட்டி²னோ – ‘நத்தி² காமேஸு தோ³ஸோ’தி. தே காமேஸு பாதப்³யதங்
ஆபஜ்ஜந்தி. தே கோ² மோளிப³த்³தா⁴ஹி [மோளிப³ந்தா⁴ஹி (ஸ்யா॰ கங்॰ க॰)]
பரிப்³பா³ஜிகாஹி பரிசாரெந்தி. தே ஏவமாஹங்ஸு – ‘கிங்ஸு நாம தே பொ⁴ந்தோ
ஸமணப்³ராஹ்மணா காமேஸு அனாக³தப⁴யங் ஸம்பஸ்ஸமானா காமானங் பஹானமாஹங்ஸு,
காமானங் பரிஞ்ஞங் பஞ்ஞபெந்தி? ஸுகோ² இமிஸ்ஸா பரிப்³பா³ஜிகாய தருணாய
முது³காய லோமஸாய பா³ஹாய ஸம்ப²ஸ்ஸோ’தி தே காமேஸு பாதப்³யதங் ஆபஜ்ஜந்தி. தே
காமேஸு பாதப்³யதங் ஆபஜ்ஜித்வா காயஸ்ஸ பே⁴தா³ பரங் மரணா அபாயங்
து³க்³க³திங் வினிபாதங் நிரயங் உபபஜ்ஜந்தி. தே தத்த² து³க்கா² திப்³பா³
க²ரா கடுகா வேத³னா வேத³யந்தி. தே ஏவமாஹங்ஸு – ‘இத³ங் கோ² தே பொ⁴ந்தோ
ஸமணப்³ராஹ்மணா காமேஸு அனாக³தப⁴யங் ஸம்பஸ்ஸமானா காமானங் பஹானமாஹங்ஸு,
காமானங் பரிஞ்ஞங் பஞ்ஞபெந்தி, இமே ஹி மயங் காமஹேது காமனிதா³னங்
து³க்கா² திப்³பா³ க²ரா கடுகா வேத³னா வேத³யாமா’தி. ஸெய்யதா²பி, பி⁴க்க²வே,
கி³ம்ஹானங் பச்சி²மே மாஸே மாலுவாஸிபாடிகா ப²லெய்ய. அத² கோ² தங்,
பி⁴க்க²வே, மாலுவாபீ³ஜங் அஞ்ஞதரஸ்மிங் ஸாலமூலே நிபதெய்ய. அத² கோ²,
பி⁴க்க²வே, யா தஸ்மிங் ஸாலே அதி⁴வத்தா² தே³வதா ஸா பீ⁴தா ஸங்விக்³கா³
ஸந்தாஸங் ஆபஜ்ஜெய்ய. அத² கோ², பி⁴க்க²வே, தஸ்மிங் ஸாலே அதி⁴வத்தா²ய தே³வதாய
மித்தாமச்சா ஞாதிஸாலோஹிதா ஆராமதே³வதா வனதே³வதா ருக்க²தே³வதா
ஓஸதி⁴திணவனப்பதீஸு அதி⁴வத்தா² தே³வதா ஸங்க³ம்ம ஸமாக³ம்ம ஏவங்
ஸமஸ்ஸாஸெய்யுங் – ‘மா ப⁴வங் பா⁴யி, மா ப⁴வங் பா⁴யி; அப்பேவ நாமேதங்
மாலுவாபீ³ஜங் மோரோ வா கி³லெய்ய [மோரோ வா கி³லெய்ய, கோ³தா⁴ வா கா²தெ³ய்ய (க॰)], மகோ³ வா கா²தெ³ய்ய, த³வடா³ஹோ [வனதா³ஹோ (க॰)] வா ட³ஹெய்ய, வனகம்மிகா வா உத்³த⁴ரெய்யுங், உபசிகா வா உட்ட²ஹெய்யுங் [உத்³ரபெ⁴ய்யுங் (ஸீ॰ பீ॰ க॰)],
அபீ³ஜங் வா பனஸ்ஸா’தி. அத² கோ² தங், பி⁴க்க²வே, மாலுவாபீ³ஜங் நேவ மோரோ
கி³லெய்ய, ந மகோ³ கா²தெ³ய்ய, ந த³வடா³ஹோ ட³ஹெய்ய, ந வனகம்மிகா
உத்³த⁴ரெய்யுங், ந உபசிகா உட்ட²ஹெய்யுங், பீ³ஜஞ்ச பனஸ்ஸ தங் பாவுஸ்ஸகேன
மேகே⁴ன அபி⁴ப்பவுட்ட²ங் ஸம்மதே³வ விருஹெய்ய. ஸாஸ்ஸ
மாலுவாலதா தருணா முது³கா லோமஸா விலம்பி³னீ, ஸா தங் ஸாலங் உபனிஸேவெய்ய. அத²
கோ², பி⁴க்க²வே, தஸ்மிங் ஸாலே அதி⁴வத்தா²ய தே³வதாய ஏவமஸ்ஸ – ‘கிங்ஸு நாம தே
பொ⁴ந்தோ மித்தாமச்சா ஞாதிஸாலோஹிதா ஆராமதே³வதா
வனதே³வதா ருக்க²தே³வதா ஓஸதி⁴திணவனப்பதீஸு அதி⁴வத்தா² தே³வதா மாலுவாபீ³ஜே
அனாக³தப⁴யங் ஸம்பஸ்ஸமானா ஸங்க³ம்ம ஸமாக³ம்ம ஏவங் ஸமஸ்ஸாஸேஸுங் [ஸமஸ்ஸாஸெய்யுங் (க॰)]
– ‘‘மா ப⁴வங் பா⁴யி மா ப⁴வங் பா⁴யி, அப்பேவ நாமேதங் மாலுவாபீ³ஜங் மோரோ வா
கி³லெய்ய, மகோ³ வா கா²தெ³ய்ய, த³வடா³ஹோ வா ட³ஹெய்ய, வனகம்மிகா வா
உத்³த⁴ரெய்யுங், உபசிகா வா உட்ட²ஹெய்யுங், அபீ³ஜங் வா பனஸ்ஸா’’தி; ஸுகோ²
இமிஸ்ஸா மாலுவாலதாய தருணாய முது³காய லோமஸாய விலம்பி³னியா ஸம்ப²ஸ்ஸோ’தி. ஸா
தங் ஸாலங் அனுபரிஹரெய்ய. ஸா தங் ஸாலங் அனுபரிஹரித்வா உபரி விடபி⁴ங் [விடபங் (ஸ்யா॰ ட்ட²॰)]
கரெய்ய. உபரி விடபி⁴ங் கரித்வா ஓக⁴னங் ஜனெய்ய. ஓக⁴னங் ஜனெத்வா யே தஸ்ஸ
ஸாலஸ்ஸ மஹந்தா மஹந்தா க²ந்தா⁴ தே பதா³லெய்ய. அத² கோ², பி⁴க்க²வே, தஸ்மிங்
ஸாலே அதி⁴வத்தா²ய தே³வதாய ஏவமஸ்ஸ – ‘இத³ங் கோ² தே பொ⁴ந்தோ மித்தாமச்சா
ஞாதிஸாலோஹிதா ஆராமதே³வதா வனதே³வதா ருக்க²தே³வதா ஓஸதி⁴திணவனப்பதீஸு
அதி⁴வத்தா² தே³வதா மாலுவாபீ³ஜே அனாக³தப⁴யங் ஸம்பஸ்ஸமானா ஸங்க³ம்ம ஸமாக³ம்ம
ஏவங் ஸமஸ்ஸாஸேஸுங் [ஸமஸ்ஸாஸெய்யுங் (க॰)] – ‘‘மா ப⁴வங் பா⁴யி மா ப⁴வங் பா⁴யி, அப்பேவ நாமேதங் மாலுவாபீ³ஜங் மோரோ வா கி³லெய்ய, மகோ³ வா கா²தெ³ய்ய, த³வடா³ஹோ வா ட³ஹெய்ய, வனகம்மிகா வா உத்³த⁴ரெய்யுங், உபசிகா வா உட்ட²ஹெய்யுங் அபீ³ஜங் வா பனஸ்ஸா’’தி. யஞ்சாஹங் [யங் வாஹங் (க॰), ஸ்வாஹங் (ஸ்யா॰ கங்॰)]
மாலுவாபீ³ஜஹேது து³க்கா² திப்³பா³ க²ரா கடுகா வேத³னா வேத³யாமீ’தி. ஏவமேவ
கோ², பி⁴க்க²வே, ஸந்தி ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ
‘நத்தி² காமேஸு தோ³ஸோ’தி . தே காமேஸு பாதப்³யதங்
ஆபஜ்ஜந்தி. தே மோளிப³த்³தா⁴ஹி பரிப்³பா³ஜிகாஹி பரிசாரெந்தி. தே ஏவமாஹங்ஸு –
‘கிங்ஸு நாம தே பொ⁴ந்தோ ஸமணப்³ராஹ்மணா காமேஸு அனாக³தப⁴யங் ஸம்பஸ்ஸமானா
காமானங் பஹானமாஹங்ஸு, காமானங் பரிஞ்ஞங் பஞ்ஞபெந்தி? ஸுகோ² இமிஸ்ஸா
பரிப்³பா³ஜிகாய தருணாய முது³காய லோமஸாய பா³ஹாய ஸம்ப²ஸ்ஸோ’தி. தே காமேஸு
பாதப்³யதங் ஆபஜ்ஜந்தி. தே காமேஸு பாதப்³யதங் ஆபஜ்ஜித்வா காயஸ்ஸ பே⁴தா³ பரங்
மரணா அபாயங் து³க்³க³திங் வினிபாதங் நிரயங் உபபஜ்ஜந்தி. தே தத்த² து³க்கா²
திப்³பா³ க²ரா கடுகா வேத³னா வேத³யந்தி. தே
ஏவமாஹங்ஸு – ‘இத³ங் கோ² தே பொ⁴ந்தோ ஸமணப்³ராஹ்மணா காமேஸு அனாக³தப⁴யங்
ஸம்பஸ்ஸமானா காமானங் பஹானமாஹங்ஸு, காமானங் பரிஞ்ஞங் பஞ்ஞபெந்தி. இமே ஹி
மயங் காமஹேது காமனிதா³னங் து³க்கா² திப்³பா³ க²ரா கடுகா வேத³னா
வேத³யாமா’தி. இத³ங் வுச்சதி, பி⁴க்க²வே, த⁴ம்மஸமாதா³னங் பச்சுப்பன்னஸுக²ங்
ஆயதிங் து³க்க²விபாகங்.
470.
‘‘கதமஞ்ச, பி⁴க்க²வே, த⁴ம்மஸமாதா³னங் பச்சுப்பன்னது³க்க²ஞ்சேவ ஆயதிஞ்ச
து³க்க²விபாகங்? இத⁴, பி⁴க்க²வே, ஏகச்சோ அசேலகோ ஹோதி முத்தாசாரோ
ஹத்தா²பலேக²னோ, நஏஹிப⁴த்³த³ந்திகோ, நதிட்ட²ப⁴த்³த³ந்திகோ, நாபி⁴ஹடங், ந
உத்³தி³ஸ்ஸகதங், ந நிமந்தனங் ஸாதி³யதி, ஸோ ந கும்பி⁴முகா² படிக்³க³ண்ஹாதி, ந
களோபிமுகா² படிக்³க³ண்ஹாதி, ந ஏளகமந்தரங், ந த³ண்ட³மந்தரங், ந
முஸலமந்தரங், ந த்³வின்னங் பு⁴ஞ்ஜமானானங், ந க³ப்³பி⁴னியா, ந பாயமானாய, ந
புரிஸந்தரக³தாய, ந ஸங்கித்தீஸு, ந யத்த² ஸா உபட்டி²தோ
ஹோதி, ந யத்த² மக்கி²கா ஸண்ட³ஸண்ட³சாரினீ, ந மச்ச²ங், ந மங்ஸங், ந ஸுரங், ந
மேரயங், ந து²ஸோத³கங் பிவதி. ஸோ ஏகாகா³ரிகோ வா ஹோதி ஏகாலோபிகோ,
த்³வாகா³ரிகோ வா ஹோதி த்³வாலோபிகோ…பே॰… ஸத்தாகா³ரிகோ வா ஹோதி ஸத்தாலோபிகோ.
ஏகிஸ்ஸாபி த³த்தியா யாபேதி, த்³வீஹிபி த³த்தீஹி யாபேதி… ஸத்தஹிபி த³த்தீஹி
யாபேதி. ஏகாஹிகம்பி ஆஹாரங் ஆஹாரேதி, த்³வீஹிகம்பி ஆஹாரங் ஆஹாரேதி…
ஸத்தாஹிகம்பி ஆஹாரங் ஆஹாரேதி. இதி ஏவரூபங் அத்³த⁴மாஸிகம்பி
பரியாயப⁴த்தபோ⁴ஜனானுயோக³மனுயுத்தோ விஹரதி. ஸோ ஸாகப⁴க்கோ² வா ஹோதி ,
ஸாமாகப⁴க்கோ² வா ஹோதி, நீவாரப⁴க்கோ² வா ஹோதி, த³த்³து³லப⁴க்கோ² வா ஹோதி,
ஹடப⁴க்கோ² வா ஹோதி, கணப⁴க்கோ² வா ஹோதி, ஆசாமப⁴க்கோ² வா ஹோதி,
பிஞ்ஞாகப⁴க்கோ² வா ஹோதி, திணப⁴க்கோ² வா ஹோதி, கோ³மயப⁴க்கோ² வா ஹோதி,
வனமூலப²லாஹாரோ யாபேதி பவத்தப²லபோ⁴ஜீ. ஸோ ஸாணானிபி தா⁴ரேதி, மஸாணானிபி
தா⁴ரேதி, ச²வது³ஸ்ஸானிபி தா⁴ரேதி, பங்ஸுகூலானிபி தா⁴ரேதி, திரீடானிபி
தா⁴ரேதி, அஜினம்பி தா⁴ரேதி, அஜினக்கி²பம்பி தா⁴ரேதி, குஸசீரம்பி தா⁴ரேதி,
வாகசீரம்பி தா⁴ரேதி, ப²லகசீரம்பி தா⁴ரேதி, கேஸகம்ப³லம்பி தா⁴ரேதி,
வாளகம்ப³லம்பி தா⁴ரேதி, உலூகபக்க²ம்பி தா⁴ரேதி, கேஸமஸ்ஸுலோசகோபி ஹோதி,
கேஸமஸ்ஸுலோசனானுயோக³மனுயுத்தோ, உப்³ப⁴ட்ட²கோபி ஹோதி, ஆஸனபடிக்கி²த்தோ,
உக்குடிகோபி ஹோதி உக்குடிகப்பதா⁴னமனுயுத்தோ, கண்டகாபஸ்ஸயிகோபி ஹோதி,
கண்டகாபஸ்ஸயே ஸெய்யங் கப்பேதி [பஸ்ஸ ம॰ நி॰ 1.155 மஹாஸீஹனாத³ஸுத்தே], ஸாயததியகம்பி உத³கோரோஹனானுயோக³மனுயுத்தோ விஹரதி. இதி ஏவரூபங் அனேகவிஹிதங் காயஸ்ஸ ஆதாபனபரிதாபனானுயோக³மனுயுத்தோ விஹரதி .
ஸோ காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங்
உபபஜ்ஜதி. இத³ங் வுச்சதி, பி⁴க்க²வே, த⁴ம்மஸமாதா³னங்
பச்சுப்பன்னது³க்க²ஞ்சேவ ஆயதிஞ்ச து³க்க²விபாகங்.
471. ‘‘கதமஞ்ச, பி⁴க்க²வே, த⁴ம்மஸமாதா³னங் பச்சுப்பன்னது³க்க²ங் ஆயதிங் ஸுக²விபாகங்? இத⁴ ,
பி⁴க்க²வே, ஏகச்சோ பகதியா திப்³ப³ராக³ஜாதிகோ ஹோதி, ஸோ அபி⁴க்க²ணங் ராக³ஜங்
து³க்க²ங் தோ³மனஸ்ஸங் படிஸங்வேதே³தி; பகதியா திப்³ப³தோ³ஸஜாதிகோ ஹோதி, ஸோ
அபி⁴க்க²ணங் தோ³ஸஜங் து³க்க²ங் தோ³மனஸ்ஸங் படிஸங்வேதே³தி; பகதியா
திப்³ப³மோஹஜாதிகோ ஹோதி, ஸோ அபி⁴க்க²ணங் மோஹஜங் து³க்க²ங் தோ³மனஸ்ஸங்
படிஸங்வேதே³தி. ஸோ ஸஹாபி து³க்கே²ன, ஸஹாபி தோ³மனஸ்ஸேன, அஸ்ஸுமுகோ²பி
ருத³மானோ பரிபுண்ணங் பரிஸுத்³த⁴ங் ப்³ரஹ்மசரியங் சரதி. ஸோ காயஸ்ஸ பே⁴தா³
பரங் மரணா ஸுக³திங் ஸக்³க³ங் லோகங் உபபஜ்ஜதி. இத³ங் வுச்சதி, பி⁴க்க²வே,
த⁴ம்மஸமாதா³னங் பச்சுப்பன்னது³க்க²ங் ஆயதிங் ஸுக²விபாகங்.
472.
‘‘கதமஞ்ச, பி⁴க்க²வே, த⁴ம்மஸமாதா³னங் பச்சுப்பன்னஸுக²ஞ்சேவ ஆயதிஞ்ச
ஸுக²விபாகங்? இத⁴, பி⁴க்க²வே, ஏகச்சோ பகதியா ந திப்³ப³ராக³ஜாதிகோ ஹோதி, ஸோ ந
அபி⁴க்க²ணங் ராக³ஜங் து³க்க²ங் தோ³மனஸ்ஸங் படிஸங்வேதே³தி; பகதியா ந
திப்³ப³தோ³ஸஜாதிகோ ஹோதி, ஸோ ந அபி⁴க்க²ணங் தோ³ஸஜங் து³க்க²ங் தோ³மனஸ்ஸங்
படிஸங்வேதே³தி; பகதியா ந திப்³ப³மோஹஜாதிகோ ஹோதி , ஸோ
ந அபி⁴க்க²ணங் மோஹஜங் து³க்க²ங் தோ³மனஸ்ஸங் படிஸங்வேதே³தி. ஸோ விவிச்சேவ
காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங்
பீதிஸுக²ங் பட²மங் ஜா²னங் உபஸம்பஜ்ஜ விஹரதி. விதக்கவிசாரானங் வூபஸமா
அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங்
பீதிஸுக²ங் து³தியங் ஜா²னங்…பே॰… ததியங் ஜா²னங்… சதுத்த²ங் ஜா²னங்
உபஸம்பஜ்ஜ விஹரதி. ஸோ காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங்
உபபஜ்ஜதி. இத³ங் வுச்சதி, பி⁴க்க²வே, த⁴ம்மஸமாதா³னங் பச்சுப்பன்னஸுக²ஞ்சேவ
ஆயதிஞ்ச ஸுக²விபாகங். இமானி கோ², பி⁴க்க²வே, சத்தாரி த⁴ம்மஸமாதா³னானீ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
சூளத⁴ம்மஸமாதா³னஸுத்தங் நிட்டி²தங் பஞ்சமங்.
6. மஹாத⁴ம்மஸமாதா³னஸுத்தங்
473. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘யேபு⁴ய்யேன, பி⁴க்க²வே, ஸத்தா ஏவங்காமா ஏவங்ச²ந்தா³ ஏவங்அதி⁴ப்பாயா –
‘அஹோ வத அனிட்டா² அகந்தா அமனாபா த⁴ம்மா பரிஹாயெய்யுங், இட்டா² கந்தா மனாபா
த⁴ம்மா அபி⁴வட்³டெ⁴ய்யு’ந்தி. தேஸங், பி⁴க்க²வே, ஸத்தானங் ஏவங்காமானங்
ஏவங்ச²ந்தா³னங் ஏவங்அதி⁴ப்பாயானங் அனிட்டா² அகந்தா அமனாபா த⁴ம்மா
அபி⁴வட்³ட⁴ந்தி, இட்டா² கந்தா மனாபா த⁴ம்மா பரிஹாயந்தி. தத்ர தும்ஹே,
பி⁴க்க²வே, கங் ஹேதுங் பச்சேதா²’’தி? ‘‘ப⁴க³வங்மூலகா
நோ, ப⁴ந்தே, த⁴ம்மா, ப⁴க³வங்னெத்திகா, ப⁴க³வங்படிஸரணா. ஸாது⁴ வத, ப⁴ந்தே,
ப⁴க³வந்தஞ்ஞேவ படிபா⁴து ஏதஸ்ஸ பா⁴ஸிதஸ்ஸ அத்தோ²; ப⁴க³வதோ ஸுத்வா பி⁴க்கூ²
தா⁴ரெஸ்ஸந்தீ’’தி. ‘‘தேன ஹி, பி⁴க்க²வே, ஸுணாத², ஸாது⁴கங் மனஸி கரோத²,
பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ
பச்சஸ்ஸோஸுங். ப⁴க³வா ஏதத³வோச –
474.
‘‘இத⁴, பி⁴க்க²வே, அஸ்ஸுதவா புது²ஜ்ஜனோ, அரியானங் அத³ஸ்ஸாவீ அரியத⁴ம்மஸ்ஸ
அகோவிதோ³ அரியத⁴ம்மே அவினீதோ, ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ
அகோவிதோ³ ஸப்புரிஸத⁴ம்மே அவினீதோ, ஸேவிதப்³பே³ த⁴ம்மே ந ஜானாதி
அஸேவிதப்³பே³ த⁴ம்மே ந ஜானாதி, ப⁴ஜிதப்³பே³ த⁴ம்மே ந
ஜானாதி அப⁴ஜிதப்³பே³ த⁴ம்மே ந ஜானாதி. ஸோ ஸேவிதப்³பே³ த⁴ம்மே அஜானந்தோ
அஸேவிதப்³பே³ த⁴ம்மே அஜானந்தோ, ப⁴ஜிதப்³பே³ த⁴ம்மே அஜானந்தோ அப⁴ஜிதப்³பே³
த⁴ம்மே அஜானந்தோ, அஸேவிதப்³பே³ த⁴ம்மே ஸேவதி ஸேவிதப்³பே³ த⁴ம்மே ந ஸேவதி,
அப⁴ஜிதப்³பே³ த⁴ம்மே ப⁴ஜதி ப⁴ஜிதப்³பே³ த⁴ம்மே ந ப⁴ஜதி. தஸ்ஸ அஸேவிதப்³பே³
த⁴ம்மே ஸேவதோ ஸேவிதப்³பே³ த⁴ம்மே அஸேவதோ, அப⁴ஜிதப்³பே³ த⁴ம்மே ப⁴ஜதோ
ப⁴ஜிதப்³பே³ த⁴ம்மே அப⁴ஜதோ அனிட்டா² அகந்தா அமனாபா த⁴ம்மா அபி⁴வட்³ட⁴ந்தி, இட்டா² கந்தா மனாபா த⁴ம்மா பரிஹாயந்தி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி யதா² தங் அவித்³த³ஸுனோ.
‘‘ஸுதவா ச கோ², பி⁴க்க²வே, அரியஸாவகோ, அரியானங் த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே
ஸுவினீதோ, ஸப்புரிஸானங் த³ஸ்ஸாவீ ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே
ஸுவினீதோ, ஸேவிதப்³பே³ த⁴ம்மே ஜானாதி அஸேவிதப்³பே³ த⁴ம்மே ஜானாதி,
ப⁴ஜிதப்³பே³ த⁴ம்மே ஜானாதி அப⁴ஜிதப்³பே³ த⁴ம்மே ஜானாதி. ஸோ ஸேவிதப்³பே³
த⁴ம்மே ஜானந்தோ அஸேவிதப்³பே³ த⁴ம்மே ஜானந்தோ, ப⁴ஜிதப்³பே³ த⁴ம்மே ஜானந்தோ
அப⁴ஜிதப்³பே³ த⁴ம்மே ஜானந்தோ, அஸேவிதப்³பே³ த⁴ம்மே ந ஸேவதி ஸேவிதப்³பே³
த⁴ம்மே ஸேவதி, அப⁴ஜிதப்³பே³ த⁴ம்மே ந ப⁴ஜதி ப⁴ஜிதப்³பே³ த⁴ம்மே ப⁴ஜதி. தஸ்ஸ
அஸேவிதப்³பே³ த⁴ம்மே அஸேவதோ ஸேவிதப்³பே³ த⁴ம்மே ஸேவதோ, அப⁴ஜிதப்³பே³
த⁴ம்மே அப⁴ஜதோ ப⁴ஜிதப்³பே³ த⁴ம்மே ப⁴ஜதோ, அனிட்டா² அகந்தா அமனாபா த⁴ம்மா
பரிஹாயந்தி, இட்டா² கந்தா மனாபா த⁴ம்மா அபி⁴வட்³ட⁴ந்தி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி யதா² தங் வித்³த³ஸுனோ.
475.
‘‘சத்தாரிமானி, பி⁴க்க²வே, த⁴ம்மஸமாதா³னானி. கதமானி சத்தாரி? அத்தி²,
பி⁴க்க²வே, த⁴ம்மஸமாதா³னங் பச்சுப்பன்னது³க்க²ஞ்சேவ ஆயதிஞ்ச
து³க்க²விபாகங்; அத்தி², பி⁴க்க²வே, த⁴ம்மஸமாதா³னங்
பச்சுப்பன்னஸுக²ங் ஆயதிங் து³க்க²விபாகங்; அத்தி², பி⁴க்க²வே,
த⁴ம்மஸமாதா³னங் பச்சுப்பன்னது³க்க²ங் ஆயதிங் ஸுக²விபாகங்; அத்தி²,
பி⁴க்க²வே, த⁴ம்மஸமாதா³னங் பச்சுப்பன்னஸுக²ஞ்சேவ ஆயதிஞ்ச ஸுக²விபாகங்.
476. ‘‘தத்ர, பி⁴க்க²வே, யமித³ங் [யதி³த³ங் (ஸீ॰)]
த⁴ம்மஸமாதா³னங் பச்சுப்பன்னது³க்க²ஞ்சேவ ஆயதிஞ்ச து³க்க²விபாகங், தங்
அவித்³வா அவிஜ்ஜாக³தோ யதா²பூ⁴தங் நப்பஜானாதி – ‘இத³ங் கோ² த⁴ம்மஸமாதா³னங்
பச்சுப்பன்னது³க்க²ஞ்சேவ ஆயதிஞ்ச து³க்க²விபாக’ந்தி. தங் அவித்³வா
அவிஜ்ஜாக³தோ யதா²பூ⁴தங் அப்பஜானந்தோ தங் ஸேவதி, தங் ந பரிவஜ்ஜேதி. தஸ்ஸ தங்
ஸேவதோ, தங் அபரிவஜ்ஜயதோ, அனிட்டா² அகந்தா அமனாபா த⁴ம்மா அபி⁴வட்³ட⁴ந்தி,
இட்டா² கந்தா மனாபா த⁴ம்மா பரிஹாயந்தி. தங் கிஸ்ஸ ஹேது? ஏவஞ்ஹேதங்,
பி⁴க்க²வே, ஹோதி யதா² தங் அவித்³த³ஸுனோ.
‘‘தத்ர, பி⁴க்க²வே, யமித³ங் த⁴ம்மஸமாதா³னங்
பச்சுப்பன்னஸுக²ங் ஆயதிங் து³க்க²விபாகங் தங் அவித்³வா அவிஜ்ஜாக³தோ
யதா²பூ⁴தங் நப்பஜானாதி – ‘இத³ங் கோ² த⁴ம்மஸமாதா³னங் பச்சுப்பன்னஸுக²ங் ஆயதிங் து³க்க²விபாக’ந்தி. தங் அவித்³வா அவிஜ்ஜாக³தோ யதா²பூ⁴தங் அப்பஜானந்தோ தங் ஸேவதி, தங் ந பரிவஜ்ஜேதி. தஸ்ஸ தங் ஸேவதோ, தங்
அபரிவஜ்ஜயதோ, அனிட்டா² அகந்தா அமனாபா த⁴ம்மா அபி⁴வட்³ட⁴ந்தி, இட்டா² கந்தா
மனாபா த⁴ம்மா பரிஹாயந்தி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி
யதா² தங் அவித்³த³ஸுனோ.
‘‘தத்ர , பி⁴க்க²வே, யமித³ங்
த⁴ம்மஸமாதா³னங் பச்சுப்பன்னது³க்க²ங் ஆயதிங் ஸுக²விபாகங், தங் அவித்³வா
அவிஜ்ஜாக³தோ யதா²பூ⁴தங் நப்பஜானாதி – ‘இத³ங் கோ² த⁴ம்மஸமாதா³னங்
பச்சுப்பன்னது³க்க²ங் ஆயதிங் ஸுக²விபாக’ந்தி. தங் அவித்³வா அவிஜ்ஜாக³தோ
யதா²பூ⁴தங் அப்பஜானந்தோ தங் ந ஸேவதி, தங் பரிவஜ்ஜேதி. தஸ்ஸ தங் அஸேவதோ, தங்
பரிவஜ்ஜயதோ, அனிட்டா² அகந்தா அமனாபா த⁴ம்மா
அபி⁴வட்³ட⁴ந்தி, இட்டா² கந்தா மனாபா த⁴ம்மா பரிஹாயந்தி. தங் கிஸ்ஸ ஹேது?
ஏவஞ்ஹேதங், பி⁴க்க²வே, ஹோதி யதா² தங் அவித்³த³ஸுனோ.
‘‘தத்ர, பி⁴க்க²வே, யமித³ங் த⁴ம்மஸமாதா³னங்
பச்சுப்பன்னஸுக²ஞ்சேவ ஆயதிஞ்ச ஸுக²விபாகங், தங் அவித்³வா அவிஜ்ஜாக³தோ
யதா²பூ⁴தங் நப்பஜானாதி – ‘இத³ங் கோ² த⁴ம்மஸமாதா³னங் பச்சுப்பன்னஸுக²ஞ்சேவ
ஆயதிஞ்ச ஸுக²விபாக’ந்தி. தங் அவித்³வா அவிஜ்ஜாக³தோ யதா²பூ⁴தங் அப்பஜானந்தோ
தங் ந ஸேவதி, தங் பரிவஜ்ஜேதி. தஸ்ஸ தங் அஸேவதோ, தங் பரிவஜ்ஜயதோ, அனிட்டா²
அகந்தா அமனாபா த⁴ம்மா அபி⁴வட்³ட⁴ந்தி, இட்டா² கந்தா மனாபா த⁴ம்மா
பரிஹாயந்தி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி யதா² தங்
அவித்³த³ஸுனோ.
477.
‘‘தத்ர, பி⁴க்க²வே, யமித³ங் த⁴ம்மஸமாதா³னங் பச்சுப்பன்னது³க்க²ஞ்சேவ
ஆயதிஞ்ச து³க்க²விபாகங் தங் வித்³வா விஜ்ஜாக³தோ யதா²பூ⁴தங் பஜானாதி –
‘இத³ங் கோ² த⁴ம்மஸமாதா³னங் பச்சுப்பன்னது³க்க²ஞ்சேவ
ஆயதிஞ்ச து³க்க²விபாக’ந்தி. தங் வித்³வா விஜ்ஜாக³தோ யதா²பூ⁴தங் பஜானந்தோ
தங் ந ஸேவதி, தங் பரிவஜ்ஜேதி. தஸ்ஸ தங் அஸேவதோ, தங் பரிவஜ்ஜயதோ, அனிட்டா²
அகந்தா அமனாபா த⁴ம்மா பரிஹாயந்தி, இட்டா² கந்தா மனாபா த⁴ம்மா
அபி⁴வட்³ட⁴ந்தி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி யதா² தங்
வித்³த³ஸுனோ.
‘‘தத்ர, பி⁴க்க²வே, யமித³ங் த⁴ம்மஸமாதா³னங்
பச்சுப்பன்னஸுக²ங் ஆயதிங் து³க்க²விபாகங் தங் வித்³வா விஜ்ஜாக³தோ
யதா²பூ⁴தங் பஜானாதி – ‘இத³ங் கோ² த⁴ம்மஸமாதா³னங் பச்சுப்பன்னஸுக²ங் ஆயதிங்
து³க்க²விபாக’ந்தி. தங் வித்³வா விஜ்ஜாக³தோ யதா²பூ⁴தங் பஜானந்தோ தங் ந
ஸேவதி, தங் பரிவஜ்ஜேதி. தஸ்ஸ தங் அஸேவதோ, தங் பரிவஜ்ஜயதோ ,
அனிட்டா² அகந்தா அமனாபா த⁴ம்மா பரிஹாயந்தி, இட்டா² கந்தா மனாபா த⁴ம்மா
அபி⁴வட்³ட⁴ந்தி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி யதா² தங்
வித்³த³ஸுனோ.
‘‘தத்ர , பி⁴க்க²வே, யமித³ங்
த⁴ம்மஸமாதா³னங் பச்சுப்பன்னது³க்க²ங் ஆயதிங் ஸுக²விபாகங் தங் வித்³வா
விஜ்ஜாக³தோ யதா²பூ⁴தங் பஜானாதி – ‘இத³ங் கோ² த⁴ம்மஸமாதா³னங்
பச்சுப்பன்னது³க்க²ங் ஆயதிங் ஸுக²விபாக’ந்தி. தங் வித்³வா விஜ்ஜாக³தோ
யதா²பூ⁴தங் பஜானந்தோ தங் ஸேவதி, தங் ந பரிவஜ்ஜேதி. தஸ்ஸ தங் ஸேவதோ, தங்
அபரிவஜ்ஜயதோ, அனிட்டா² அகந்தா அமனாபா த⁴ம்மா பரிஹாயந்தி, இட்டா² கந்தா
மனாபா த⁴ம்மா அபி⁴வட்³ட⁴ந்தி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி
யதா² தங் வித்³த³ஸுனோ.
‘‘தத்ர, பி⁴க்க²வே, யமித³ங் த⁴ம்மஸமாதா³னங் பச்சுப்பன்னஸுக²ஞ்சேவ ஆயதிஞ்ச ஸுக²விபாகங்
தங் வித்³வா விஜ்ஜாக³தோ யதா²பூ⁴தங் பஜானாதி – ‘இத³ங் கோ² த⁴ம்மஸமாதா³னங்
பச்சுப்பன்னஸுக²ஞ்சேவ ஆயதிஞ்ச ஸுக²விபாக’ந்தி. தங் வித்³வா விஜ்ஜாக³தோ
யதா²பூ⁴தங் பஜானந்தோ தங் ஸேவதி, தங் ந பரிவஜ்ஜேதி. தஸ்ஸ தங் ஸேவதோ, தங்
அபரிவஜ்ஜயதோ, அனிட்டா² அகந்தா அமனாபா த⁴ம்மா பரிஹாயந்தி, இட்டா² கந்தா
மனாபா த⁴ம்மா அபி⁴வட்³ட⁴ந்தி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி
யதா² தங் வித்³த³ஸுனோ.
478. ‘‘கதமஞ்ச ,
பி⁴க்க²வே, த⁴ம்மஸமாதா³னங் பச்சுப்பன்னது³க்க²ஞ்சேவ ஆயதிஞ்ச
து³க்க²விபாகங்? இத⁴, பி⁴க்க²வே, ஏகச்சோ ஸஹாபி து³க்கே²ன ஸஹாபி தோ³மனஸ்ஸேன
பாணாதிபாதீ ஹோதி, பாணாதிபாதபச்சயா ச து³க்க²ங் தோ³மனஸ்ஸங் படிஸங்வேதே³தி;
ஸஹாபி து³க்கே²ன ஸஹாபி தோ³மனஸ்ஸேன அதி³ன்னாதா³யீ ஹோதி, அதி³ன்னாதா³னபச்சயா ச
து³க்க²ங் தோ³மனஸ்ஸங் படிஸங்வேதே³தி; ஸஹாபி து³க்கே²ன ஸஹாபி தோ³மனஸ்ஸேன
காமேஸு மிச்சா²சாரீ ஹோதி, காமேஸு மிச்சா²சாரபச்சயா ச து³க்க²ங் தோ³மனஸ்ஸங்
படிஸங்வேதே³தி; ஸஹாபி து³க்கே²ன ஸஹாபி தோ³மனஸ்ஸேன முஸாவாதீ³ ஹோதி,
முஸாவாத³பச்சயா ச து³க்க²ங் தோ³மனஸ்ஸங் படிஸங்வேதே³தி; ஸஹாபி து³க்கே²ன
ஸஹாபி தோ³மனஸ்ஸேன பிஸுணவாசோ ஹோதி, பிஸுணவாசாபச்சயா ச து³க்க²ங் தோ³மனஸ்ஸங்
படிஸங்வேதே³தி; ஸஹாபி து³க்கே²ன ஸஹாபி தோ³மனஸ்ஸேன ப²ருஸவாசோ ஹோதி,
ப²ருஸவாசாபச்சயா ச து³க்க²ங் தோ³மனஸ்ஸங் படிஸங்வேதே³தி; ஸஹாபி து³க்கே²ன
ஸஹாபி தோ³மனஸ்ஸேன ஸம்ப²ப்பலாபீ ஹோதி, ஸம்ப²ப்பலாபபச்சயா ச து³க்க²ங்
தோ³மனஸ்ஸங் படிஸங்வேதே³தி; ஸஹாபி து³க்கே²ன ஸஹாபி தோ³மனஸ்ஸேன அபி⁴ஜ்ஜா²லு
ஹோதி, அபி⁴ஜ்ஜா²பச்சயா ச து³க்க²ங் தோ³மனஸ்ஸங் படிஸங்வேதே³தி; ஸஹாபி
து³க்கே²ன ஸஹாபி தோ³மனஸ்ஸேன ப்³யாபன்னசித்தோ ஹோதி, ப்³யாபாத³பச்சயா ச
து³க்க²ங் தோ³மனஸ்ஸங் படிஸங்வேதே³தி; ஸஹாபி து³க்கே²ன ஸஹாபி தோ³மனஸ்ஸேன
மிச்சா²தி³ட்டி² ஹோதி, மிச்சா²தி³ட்டி²பச்சயா ச து³க்க²ங் தோ³மனஸ்ஸங்
படிஸங்வேதே³தி. ஸோ காயஸ்ஸ பே⁴தா³ பரங் மரணா அபாயங்
து³க்³க³திங் வினிபாதங் நிரயங் உபபஜ்ஜதி. இத³ங் வுச்சதி, பி⁴க்க²வே,
த⁴ம்மஸமாதா³னங் பச்சுப்பன்னது³க்க²ஞ்சேவ ஆயதிஞ்ச து³க்க²விபாகங்.
479.
‘‘கதமஞ்ச, பி⁴க்க²வே, த⁴ம்மஸமாதா³னங் பச்சுப்பன்னஸுக²ங் ஆயதிங்
து³க்க²விபாகங்? இத⁴, பி⁴க்க²வே, ஏகச்சோ ஸஹாபி ஸுகே²ன ஸஹாபி ஸோமனஸ்ஸேன
பாணாதிபாதீ ஹோதி, பாணாதிபாதபச்சயா ச ஸுக²ங் ஸோமனஸ்ஸங் படிஸங்வேதே³தி; ஸஹாபி
ஸுகே²ன ஸஹாபி ஸோமனஸ்ஸேன அதி³ன்னாதா³யீ ஹோதி, அதி³ன்னாதா³னபச்சயா ச ஸுக²ங்
ஸோமனஸ்ஸங் படிஸங்வேதே³தி; ஸஹாபி ஸுகே²ன ஸஹாபி ஸோமனஸ்ஸேன காமேஸுமிச்சா²சாரீ
ஹோதி, காமேஸுமிச்சா²சாரபச்சயா ச ஸுக²ங் ஸோமனஸ்ஸங் படிஸங்வேதே³தி; ஸஹாபி
ஸுகே²ன ஸஹாபி ஸோமனஸ்ஸேன முஸாவாதீ³ ஹோதி, முஸாவாத³பச்சயா ச ஸுக²ங் ஸோமனஸ்ஸங்
படிஸங்வேதே³தி; ஸஹாபி ஸுகே²ன ஸஹாபி ஸோமனஸ்ஸேன பிஸுணவாசோ ஹோதி,
பிஸுணவாசாபச்சயா ச ஸுக²ங் ஸோமனஸ்ஸங் படிஸங்வேதே³தி;
ஸஹாபி ஸுகே²ன ஸஹாபி ஸோமனஸ்ஸேன ப²ருஸவாசோ ஹோதி, ப²ருஸவாசாபச்சயா ச ஸுக²ங்
ஸோமனஸ்ஸங் படிஸங்வேதே³தி; ஸஹாபி ஸுகே²ன ஸஹாபி ஸோமனஸ்ஸேன ஸம்ப²ப்பலாபீ ஹோதி,
ஸம்ப²ப்பலாபபச்சயா ச ஸுக²ங் ஸோமனஸ்ஸங் படிஸங்வேதே³தி; ஸஹாபி
ஸுகே²ன ஸஹாபி ஸோமனஸ்ஸேன அபி⁴ஜ்ஜா²லு ஹோதி, அபி⁴ஜ்ஜா²பச்சயா ச ஸுக²ங்
ஸோமனஸ்ஸங் படிஸங்வேதே³தி; ஸஹாபி ஸுகே²ன ஸஹாபி ஸோமனஸ்ஸேன ப்³யாபன்னசித்தோ
ஹோதி, ப்³யாபாத³பச்சயா ச ஸுக²ங் ஸோமனஸ்ஸங் படிஸங்வேதே³தி; ஸஹாபி ஸுகே²ன
ஸஹாபி ஸோமனஸ்ஸேன மிச்சா²தி³ட்டி² ஹோதி, மிச்சா²தி³ட்டி²பச்சயா ச ஸுக²ங்
ஸோமனஸ்ஸங் படிஸங்வேதே³தி. ஸோ காயஸ்ஸ பே⁴தா³ பரங் மரணா அபாயங் து³க்³க³திங்
வினிபாதங் நிரயங் உபபஜ்ஜதி. இத³ங் வுச்சதி, பி⁴க்க²வே, த⁴ம்மஸமாதா³னங்
பச்சுப்பன்னஸுக²ங் ஆயதிங் து³க்க²விபாகங்.
480.
‘‘கதமஞ்ச, பி⁴க்க²வே, த⁴ம்மஸமாதா³னங் பச்சுப்பன்னது³க்க²ங் ஆயதிங்
ஸுக²விபாகங்? இத⁴, பி⁴க்க²வே, ஏகச்சோ ஸஹாபி து³க்கே²ன ஸஹாபி தோ³மனஸ்ஸேன
பாணாதிபாதா படிவிரதோ ஹோதி, பாணாதிபாதா வேரமணீபச்சயா ச து³க்க²ங் தோ³மனஸ்ஸங்
படிஸங்வேதே³தி ; ஸஹாபி து³க்கே²ன ஸஹாபி தோ³மனஸ்ஸேன
அதி³ன்னாதா³னா படிவிரதோ ஹோதி, அதி³ன்னாதா³னா வேரமணீபச்சயா ச து³க்க²ங்
தோ³மனஸ்ஸங் படிஸங்வேதே³தி; ஸஹாபி து³க்கே²ன ஸஹாபி தோ³மனஸ்ஸேன
காமேஸுமிச்சா²சாரா படிவிரதோ ஹோதி, காமேஸுமிச்சா²சாரா வேரமணீபச்சயா ச
து³க்க²ங் தோ³மனஸ்ஸங் படிஸங்வேதே³தி; ஸஹாபி து³க்கே²ன ஸஹாபி தோ³மனஸ்ஸேன
முஸாவாதா³ படிவிரதோ ஹோதி, முஸாவாதா³ வேரமணீபச்சயா ச து³க்க²ங் தோ³மனஸ்ஸங்
படிஸங்வேதே³தி; ஸஹாபி து³க்கே²ன ஸஹாபி தோ³மனஸ்ஸேன பிஸுணாய வாசாய படிவிரதோ
ஹோதி , பிஸுணாய வாசாய வேரமணீபச்சயா ச து³க்க²ங் தோ³மனஸ்ஸங் படிஸங்வேதே³தி ;
ஸஹாபி து³க்கே²ன ஸஹாபி தோ³மனஸ்ஸேன ப²ருஸாய வாசாய படிவிரதோ ஹோதி, ப²ருஸாய
வாசாய வேரமணீபச்சயா ச து³க்க²ங் தோ³மனஸ்ஸங் படிஸங்வேதே³தி; ஸஹாபி து³க்கே²ன
ஸஹாபி தோ³மனஸ்ஸேன ஸம்ப²ப்பலாபா படிவிரதோ ஹோதி, ஸம்ப²ப்பலாபா வேரமணீபச்சயா ச
து³க்க²ங் தோ³மனஸ்ஸங் படிஸங்வேதே³தி; ஸஹாபி து³க்கே²ன ஸஹாபி தோ³மனஸ்ஸேன
அனபி⁴ஜ்ஜா²லு ஹோதி, அனபி⁴ஜ்ஜா²பச்சயா ச து³க்க²ங் தோ³மனஸ்ஸங்
படிஸங்வேதே³தி; ஸஹாபி து³க்கே²ன ஸஹாபி தோ³மனஸ்ஸேன அப்³யாபன்னசித்தோ ஹோதி,
அப்³யாபாத³பச்சயா ச து³க்க²ங் தோ³மனஸ்ஸங் படிஸங்வேதே³தி; ஸஹாபி து³க்கே²ன
ஸஹாபி தோ³மனஸ்ஸேன ஸம்மாதி³ட்டி² ஹோதி, ஸம்மாதி³ட்டி²பச்சயா ச து³க்க²ங்
தோ³மனஸ்ஸங் படிஸங்வேதே³தி. ஸோ காயஸ்ஸ பே⁴தா³ பரங் மரணா ஸுக³திங் ஸக்³க³ங்
லோகங் உபபஜ்ஜதி. இத³ங் வுச்சதி, பி⁴க்க²வே, த⁴ம்மஸமாதா³னங்
பச்சுப்பன்னது³க்க²ங் ஆயதிங் ஸுக²விபாகங்.
481.
‘‘கதமஞ்ச, பி⁴க்க²வே, த⁴ம்மஸமாதா³னங் பச்சுப்பன்னஸுக²ஞ்சேவ ஆயதிஞ்ச
ஸுக²விபாகங்? இத⁴, பி⁴க்க²வே, ஏகச்சோ ஸஹாபி ஸுகே²ன ஸஹாபி ஸோமனஸ்ஸேன
பாணாதிபாதா படிவிரதோ ஹோதி, பாணாதிபாதா வேரமணீபச்சயா ச ஸுக²ங் ஸோமனஸ்ஸங்
படிஸங்வேதே³தி; ஸஹாபி ஸுகே²ன ஸஹாபி ஸோமனஸ்ஸேன அதி³ன்னாதா³னா படிவிரதோ ஹோதி,
அதி³ன்னாதா³னா வேரமணீபச்சயா ச ஸுக²ங் ஸோமனஸ்ஸங் படிஸங்வேதே³தி; ஸஹாபி
ஸுகே²ன ஸஹாபி ஸோமனஸ்ஸேன காமேஸுமிச்சா²சாரா படிவிரதோ ஹோதி,
காமேஸுமிச்சா²சாரா வேரமணீபச்சயா ச ஸுக²ங் ஸோமனஸ்ஸங் படிஸங்வேதே³தி; ஸஹாபி
ஸுகே²ன ஸஹாபி ஸோமனஸ்ஸேன முஸாவாதா³ படிவிரதோ ஹோதி,
முஸாவாதா³ வேரமணீபச்சயா ச ஸுக²ங் ஸோமனஸ்ஸங் படிஸங்வேதே³தி; ஸஹாபி ஸுகே²ன
ஸஹாபி ஸோமனஸ்ஸேன பிஸுணாய வாசாய படிவிரதோ ஹோதி, பிஸுணாய வாசாய
வேரமணீபச்சயா ச ஸுக²ங் ஸோமனஸ்ஸங் படிஸங்வேதே³தி; ஸஹாபி ஸுகே²ன ஸஹாபி
ஸோமனஸ்ஸேன ப²ருஸாய வாசாய படிவிரதோ ஹோதி, ப²ருஸாய வாசாய வேரமணீபச்சயா ச
ஸுக²ங் ஸோமனஸ்ஸங் படிஸங்வேதே³தி; ஸஹாபி ஸுகே²ன ஸஹாபி ஸோமனஸ்ஸேன
ஸம்ப²ப்பலாபா படிவிரதோ ஹோதி, ஸம்ப²ப்பலாபா வேரமணீபச்சயா ச ஸுக²ங் ஸோமனஸ்ஸங்
படிஸங்வேதே³தி; ஸஹாபி ஸுகே²ன ஸஹாபி ஸோமனஸ்ஸேன அனபி⁴ஜ்ஜா²லு ஹோதி,
அனபி⁴ஜ்ஜா²பச்சயா ச ஸுக²ங் ஸோமனஸ்ஸங் படிஸங்வேதே³தி; ஸஹாபி ஸுகே²ன ஸஹாபி
ஸோமனஸ்ஸேன அப்³யாபன்னசித்தோ ஹோதி, அப்³யாபாத³பச்சயா ச ஸுக²ங் ஸோமனஸ்ஸங்
படிஸங்வேதே³தி; ஸஹாபி ஸுகே²ன ஸஹாபி ஸோமனஸ்ஸேன ஸம்மாதி³ட்டி² ஹோதி,
ஸம்மாதி³ட்டி²பச்சயா ச ஸுக²ங் ஸோமனஸ்ஸங் படிஸங்வேதே³தி. ஸோ காயஸ்ஸ பே⁴தா³
பரங் மரணா ஸுக³திங் ஸக்³க³ங் லோகங் உபபஜ்ஜதி. இத³ங், வுச்சதி, பி⁴க்க²வே,
த⁴ம்மஸமாதா³னங் பச்சுப்பன்னஸுக²ஞ்சேவ ஆயதிஞ்ச ஸுக²விபாகங். இமானி கோ², பி⁴க்க²வே, சத்தாரி த⁴ம்மஸமாதா³னானி.
482.
‘‘ஸெய்யதா²பி, பி⁴க்க²வே, தித்தகாலாபு³ விஸேன ஸங்ஸட்டோ². அத² புரிஸோ
ஆக³ச்செ²ய்ய ஜீவிதுகாமோ அமரிதுகாமோ ஸுக²காமோ து³க்க²ப்படிகூலோ. தமேனங் ஏவங்
வதெ³ய்யுங் – ‘அம்போ⁴ புரிஸ, அயங் தித்தகாலாபு³ விஸேன ஸங்ஸட்டோ², ஸசே
ஆகங்க²ஸி பிவ [பிப (ஸீ॰ பீ॰)]. தஸ்ஸ தே பிவதோ [பிபதோ (ஸீ॰ பீ॰)] சேவ நச்சா²தெ³ஸ்ஸதி வண்ணேனபி க³ந்தே⁴னபி ரஸேனபி, பிவித்வா [பீத்வா (ஸீ॰)]
ச பன மரணங் வா நிக³ச்ச²ஸி மரணமத்தங் வா து³க்க²’ந்தி. ஸோ தங்
அப்படிஸங்கா²ய பிவெய்ய, நப்படினிஸ்ஸஜ்ஜெய்ய. தஸ்ஸ தங் பிவதோ சேவ
நச்சா²தெ³ய்ய வண்ணேனபி க³ந்தே⁴னபி ரஸேனபி, பிவித்வா ச பன மரணங் வா
நிக³ச்செ²ய்ய மரணமத்தங் வா து³க்க²ங். ததூ²பமாஹங், பி⁴க்க²வே, இமங்
த⁴ம்மஸமாதா³னங் வதா³மி, யமித³ங் த⁴ம்மஸமாதா³னங் பச்சுப்பன்னது³க்க²ஞ்சேவ
ஆயதிஞ்ச து³க்க²விபாகங்.
483.
‘‘ஸெய்யதா²பி, பி⁴க்க²வே, ஆபானீயகங்ஸோ வண்ணஸம்பன்னோ க³ந்த⁴ஸம்பன்னோ
ரஸஸம்பன்னோ. ஸோ ச கோ² விஸேன ஸங்ஸட்டோ². அத² புரிஸோ ஆக³ச்செ²ய்ய ஜீவிதுகாமோ
அமரிதுகாமோ ஸுக²காமோ து³க்க²ப்படிகூலோ. தமேனங் ஏவங் வதெ³ய்யுங் – ‘அம்போ⁴
புரிஸ, அயங் ஆபானீயகங்ஸோ வண்ணஸம்பன்னோ க³ந்த⁴ஸம்பன்னோ ரஸஸம்பன்னோ. ஸோ ச கோ²
விஸேன ஸங்ஸட்டோ², ஸசே ஆகங்க²ஸி பிவ. தஸ்ஸ தே பிவதோஹி [பிவதோபி (க॰)] கோ² சா²தெ³ஸ்ஸதி வண்ணேனபி க³ந்தே⁴னபி ரஸேனபி, பிவித்வா ச பன மரணங் வா நிக³ச்ச²ஸி மரணமத்தங் வா து³க்க²’ந்தி. ஸோ தங் அப்படிஸங்கா²ய
பிவெய்ய, நப்படினிஸ்ஸஜ்ஜெய்ய. தஸ்ஸ தங் பிவதோஹி கோ² சா²தெ³ய்ய வண்ணேனபி
க³ந்தே⁴னபி ரஸேனபி, பிவித்வா ச பன மரணங் வா நிக³ச்செ²ய்ய மரணமத்தங் வா
து³க்க²ங். ததூ²பமாஹங், பி⁴க்க²வே, இமங் த⁴ம்மஸமாதா³னங் வதா³மி, யமித³ங்
த⁴ம்மஸமாதா³னங் பச்சுப்பன்னஸுக²ங் ஆயதிங் து³க்க²விபாகங்.
484. ‘‘ஸெய்யதா²பி, பி⁴க்க²வே, பூதிமுத்தங் நானாபே⁴ஸஜ்ஜேஹி ஸங்ஸட்ட²ங். அத²
புரிஸோ ஆக³ச்செ²ய்ய பண்டு³கரோகீ³. தமேனங் ஏவங் வதெ³ய்யுங் – ‘அம்போ⁴
புரிஸ, இத³ங் பூதிமுத்தங் நானாபே⁴ஸஜ்ஜேஹி ஸங்ஸட்ட²ங், ஸசே ஆகங்க²ஸி பிவ.
தஸ்ஸ தே பிவதோஹி கோ² நச்சா²தெ³ஸ்ஸதி வண்ணேனபி க³ந்தே⁴னபி ரஸேனபி, பிவித்வா ச
பன ஸுகீ² ப⁴விஸ்ஸஸீ’தி. ஸோ தங் படிஸங்கா²ய பிவெய்ய, நப்படினிஸ்ஸஜ்ஜெய்ய.
தஸ்ஸ தங் பிவதோஹி கோ² நச்சா²தெ³ய்ய வண்ணேனபி க³ந்தே⁴னபி ரஸேனபி, பிவித்வா
ச பன ஸுகீ² அஸ்ஸ. ததூ²பமாஹங், பி⁴க்க²வே, இமங் த⁴ம்மஸமாதா³னங் வதா³மி,
யமித³ங் த⁴ம்மஸமாதா³னங் பச்சுப்பன்னது³க்க²ங் ஆயதிங் ஸுக²விபாகங்.
485.
‘‘ஸெய்யதா²பி, பி⁴க்க²வே, த³தி⁴ ச மது⁴ ச ஸப்பி ச பா²ணிதஞ்ச ஏகஜ்ஜ²ங்
ஸங்ஸட்ட²ங். அத² புரிஸோ ஆக³ச்செ²ய்ய லோஹிதபக்க²ந்தி³கோ. தமேனங் ஏவங்
வதெ³ய்யுங் – ‘அம்போ⁴ புரிஸ, இத³ங் த³தி⁴ங் ச
மது⁴ங் ச ஸப்பிங் ச பா²ணிதஞ்ச ஏகஜ்ஜ²ங் ஸங்ஸட்ட²ங், ஸசே ஆகங்க²ஸி பிவ. தஸ்ஸ
தே பிவதோ சேவ சா²தெ³ஸ்ஸதி வண்ணேனபி க³ந்தே⁴னபி ரஸேனபி, பிவித்வா ச பன
ஸுகீ² ப⁴விஸ்ஸஸீ’தி. ஸோ தங் படிஸங்கா²ய பிவெய்ய, நப்படினிஸ்ஸஜ்ஜெய்ய. தஸ்ஸ
தங் பிவதோ சேவ சா²தெ³ய்ய வண்ணேனபி க³ந்தே⁴னபி ரஸேனபி, பிவித்வா ச பன ஸுகீ²
அஸ்ஸ. ததூ²பமாஹங், பி⁴க்க²வே, இமங் த⁴ம்மஸமாதா³னங் வதா³மி, யமித³ங்
த⁴ம்மஸமாதா³னங் பச்சுப்பன்னஸுக²ஞ்சேவ ஆயதிஞ்ச ஸுக²விபாகங்.
486.
‘‘ஸெய்யதா²பி, பி⁴க்க²வே, வஸ்ஸானங் பச்சி²மே மாஸே ஸரத³ஸமயே வித்³தே⁴
விக³தவலாஹகே தே³வே ஆதி³ச்சோ நப⁴ங் அப்³பு⁴ஸ்ஸக்கமானோ ஸப்³ப³ங் ஆகாஸக³தங்
தமக³தங் அபி⁴விஹச்ச பா⁴ஸதே ச தபதே ச விரோசதே ச; ஏவமேவ
கோ², பி⁴க்க²வே, யமித³ங் த⁴ம்மஸமாதா³னங் பச்சுப்பன்னஸுக²ஞ்சேவ ஆயதிஞ்ச
ஸுக²விபாகங் தத³ஞ்ஞே புது²ஸமணப்³ராஹ்மணபரப்பவாதே³ அபி⁴விஹச்ச பா⁴ஸதே ச தபதே
ச விரோசதே சா’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
மஹாத⁴ம்மஸமாதா³னஸுத்தங் நிட்டி²தங் ச²ட்ட²ங்.
7. வீமங்ஸகஸுத்தங்
487. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘வீமங்ஸகேன, பி⁴க்க²வே, பி⁴க்கு²னா பரஸ்ஸ சேதோபரியாயங் அஜானந்தேன [ஆஜானந்தேன (பீ॰ க॰), அஜானந்தேன கிந்தி (?)]
ததா²க³தே ஸமன்னேஸனா காதப்³பா³ ‘ஸம்மாஸம்பு³த்³தோ⁴ வா நோ வா’ இதி
விஞ்ஞாணாயா’’தி. ‘‘ப⁴க³வங்மூலகா நோ, ப⁴ந்தே, த⁴ம்மா, ப⁴க³வங்னெத்திகா
ப⁴க³வங்படிஸரணா; ஸாது⁴ வத, ப⁴ந்தே, ப⁴க³வந்தங்யேவ படிபா⁴து ஏதஸ்ஸ பா⁴ஸிதஸ்ஸ
அத்தோ²; ப⁴க³வதோ ஸுத்வா பி⁴க்கூ² தா⁴ரெஸ்ஸந்தீ’’தி. ‘‘தேன ஹி, பி⁴க்க²வே,
ஸுணாத², ஸாது⁴கங் மனஸி கரோத², பா⁴ஸிஸ்ஸாமீ’’தி . ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
488.
‘‘வீமங்ஸகேன, பி⁴க்க²வே, பி⁴க்கு²னா பரஸ்ஸ சேதோபரியாயங் அஜானந்தேன த்³வீஸு
த⁴ம்மேஸு ததா²க³தோ ஸமன்னேஸிதப்³போ³ சக்கு²ஸோதவிஞ்ஞெய்யேஸு த⁴ம்மேஸு – ‘யே
ஸங்கிலிட்டா² சக்கு²ஸோதவிஞ்ஞெய்யா த⁴ம்மா, ஸங்விஜ்ஜந்தி வா தே ததா²க³தஸ்ஸ
நோ வா’தி? தமேனங் ஸமன்னேஸமானோ ஏவங் ஜானாதி – ‘யே ஸங்கிலிட்டா²
சக்கு²ஸோதவிஞ்ஞெய்யா த⁴ம்மா, ந தே ததா²க³தஸ்ஸ ஸங்விஜ்ஜந்தீ’தி.
‘‘யதோ நங் ஸமன்னேஸமானோ ஏவங் ஜானாதி – ‘யே ஸங்கிலிட்டா²
சக்கு²ஸோதவிஞ்ஞெய்யா த⁴ம்மா, ந தே ததா²க³தஸ்ஸ ஸங்விஜ்ஜந்தீ’தி, ததோ நங்
உத்தரிங் ஸமன்னேஸதி – ‘யே வீதிமிஸ்ஸா சக்கு²ஸோதவிஞ்ஞெய்யா த⁴ம்மா,
ஸங்விஜ்ஜந்தி வா தே ததா²க³தஸ்ஸ நோ வா’தி? தமேனங் ஸமன்னேஸமானோ ஏவங் ஜானாதி – ‘யே வீதிமிஸ்ஸா சக்கு²ஸோதவிஞ்ஞெய்யா த⁴ம்மா, ந தே ததா²க³தஸ்ஸ ஸங்விஜ்ஜந்தீ’தி.
‘‘யதோ நங் ஸமன்னேஸமானோ ஏவங் ஜானாதி – ‘யே வீதிமிஸ்ஸா
சக்கு²ஸோதவிஞ்ஞெய்யா த⁴ம்மா, ந தே ததா²க³தஸ்ஸ ஸங்விஜ்ஜந்தீ’தி, ததோ நங்
உத்தரிங் ஸமன்னேஸதி – ‘யே வோதா³தா சக்கு²ஸோதவிஞ்ஞெய்யா த⁴ம்மா, ஸங்விஜ்ஜந்தி வா தே ததா²க³தஸ்ஸ நோ வா’தி? தமேனங் ஸமன்னேஸமானோ ஏவங் ஜானாதி – ‘யே வோதா³தா சக்கு²ஸோதவிஞ்ஞெய்யா த⁴ம்மா, ஸங்விஜ்ஜந்தி தே ததா²க³தஸ்ஸா’தி.
‘‘யதோ நங் ஸமன்னேஸமானோ ஏவங் ஜானாதி – ‘யே வோதா³தா
சக்கு²ஸோதவிஞ்ஞெய்யா த⁴ம்மா, ஸங்விஜ்ஜந்தி தே ததா²க³தஸ்ஸா’தி, ததோ நங்
உத்தரிங் ஸமன்னேஸதி – ‘தீ³க⁴ரத்தங் ஸமாபன்னோ அயமாயஸ்மா இமங் குஸலங்
த⁴ம்மங், உதா³ஹு இத்தரஸமாபன்னோ’தி? தமேனங் ஸமன்னேஸமானோ ஏவங் ஜானாதி –
‘தீ³க⁴ரத்தங் ஸமாபன்னோ அயமாயஸ்மா இமங் குஸலங் த⁴ம்மங், நாயமாயஸ்மா
இத்தரஸமாபன்னோ’தி.
‘‘யதோ நங் ஸமன்னேஸமானோ ஏவங் ஜானாதி – ‘தீ³க⁴ரத்தங்
ஸமாபன்னோ அயமாயஸ்மா இமங் குஸலங் த⁴ம்மங், நாயமாயஸ்மா இத்தரஸமாபன்னோ’தி, ததோ
நங் உத்தரிங் ஸமன்னேஸதி – ‘ஞத்தஜ்ஜா²பன்னோ அயமாயஸ்மா பி⁴க்கு² யஸப்பத்தோ,
ஸங்விஜ்ஜந்தஸ்ஸ இதே⁴கச்சே ஆதீ³னவா’தி? ந தாவ, பி⁴க்க²வே, பி⁴க்கு²னோ
இதே⁴கச்சே ஆதீ³னவா ஸங்விஜ்ஜந்தி யாவ ந ஞத்தஜ்ஜா²பன்னோ ஹோதி யஸப்பத்தோ. யதோ ச
கோ², பி⁴க்க²வே, பி⁴க்கு² ஞத்தஜ்ஜா²பன்னோ ஹோதி யஸப்பத்தோ ,
அத²ஸ்ஸ இதே⁴கச்சே ஆதீ³னவா ஸங்விஜ்ஜந்தி. தமேனங் ஸமன்னேஸமானோ ஏவங் ஜானாதி –
‘ஞத்தஜ்ஜா²பன்னோ அயமாயஸ்மா பி⁴க்கு² யஸப்பத்தோ, நாஸ்ஸ இதே⁴கச்சே ஆதீ³னவா
ஸங்விஜ்ஜந்தீ’தி.
‘‘யதோ நங் ஸமன்னேஸமானோ ஏவங் ஜானாதி – ‘ஞத்தஜ்ஜா²பன்னோ அயமாயஸ்மா
பி⁴க்கு² யஸப்பத்தோ, நாஸ்ஸ இதே⁴கச்சே ஆதீ³னவா ஸங்விஜ்ஜந்தீ’தி, ததோ நங்
உத்தரிங் ஸமன்னேஸதி – ‘அப⁴யூபரதோ அயமாயஸ்மா, நாயமாயஸ்மா ப⁴யூபரதோ;
வீதராக³த்தா காமே ந ஸேவதி க²யா ராக³ஸ்ஸா’தி? தமேனங் ஸமன்னேஸமானோ ஏவங்
ஜானாதி – ‘அப⁴யூபரதோ அயமாயஸ்மா, நாயமாயஸ்மா ப⁴யூபரதோ; வீதராக³த்தா காமே ந
ஸேவதி க²யா ராக³ஸ்ஸா’தி. தஞ்சே, பி⁴க்க²வே, பி⁴க்கு²ங் பரே ஏவங்
புச்செ²ய்யுங் – ‘கே பனாயஸ்மதோ ஆகாரா, கே அன்வயா, யேனாயஸ்மா ஏவங் வதே³ஸி –
அப⁴யூபரதோ அயமாயஸ்மா, நாயமாயஸ்மா ப⁴யூபரதோ; வீதராக³த்தா காமே ந ஸேவதி க²யா
ராக³ஸ்ஸா’தி. ஸம்மா ப்³யாகரமானோ, பி⁴க்க²வே, பி⁴க்கு² ஏவங் ப்³யாகரெய்ய –
‘ததா² ஹி பன அயமாயஸ்மா ஸங்கே⁴ வா விஹரந்தோ ஏகோ வா விஹரந்தோ, யே ச தத்த²
ஸுக³தா யே ச தத்த² து³க்³க³தா, யே ச தத்த² க³ணமனுஸாஸந்தி, யே ச இதே⁴கச்சே
ஆமிஸேஸு ஸங்தி³ஸ்ஸந்தி, யே ச இதே⁴கச்சே ஆமிஸேன அனுபலித்தா, நாயமாயஸ்மா தங்
தேன அவஜானாதி . ஸம்முகா² கோ² பன மேதங் ப⁴க³வதோ ஸுதங் ஸம்முகா² படிக்³க³ஹிதங் – அப⁴யூபரதோஹமஸ்மி, நாஹமஸ்மி ப⁴யூபரதோ, வீதராக³த்தா காமே ந ஸேவாமி க²யா ராக³ஸ்ஸா’தி.
489. ‘‘தத்ர ,
பி⁴க்க²வே, ததா²க³தோவ உத்தரிங் படிபுச்சி²தப்³போ³ – ‘யே ஸங்கிலிட்டா²
சக்கு²ஸோதவிஞ்ஞெய்யா த⁴ம்மா, ஸங்விஜ்ஜந்தி வா தே ததா²க³தஸ்ஸ நோ வா’தி?
ப்³யாகரமானோ, பி⁴க்க²வே, ததா²க³தோ ஏவங் ப்³யாகரெய்ய – ‘யே ஸங்கிலிட்டா²
சக்கு²ஸோதவிஞ்ஞெய்யா த⁴ம்மா, ந தே ததா²க³தஸ்ஸ ஸங்விஜ்ஜந்தீ’’’தி.
‘‘யே வீதிமிஸ்ஸா சக்கு²ஸோதவிஞ்ஞெய்யா த⁴ம்மா,
ஸங்விஜ்ஜந்தி வா தே ததா²க³தஸ்ஸ நோ வாதி? ப்³யாகரமானோ, பி⁴க்க²வே, ததா²க³தோ
ஏவங் ப்³யாகரெய்ய – ‘யே வீதிமிஸ்ஸா சக்கு²ஸோதவிஞ்ஞெய்யா த⁴ம்மா, ந தே
ததா²க³தஸ்ஸ ஸங்விஜ்ஜந்தீ’தி.
‘‘யே வோதா³தா சக்கு²ஸோதவிஞ்ஞெய்யா த⁴ம்மா,
ஸங்விஜ்ஜந்தி வா தே ததா²க³தஸ்ஸ நோ வாதி? ப்³யாகரமானோ, பி⁴க்க²வே, ததா²க³தோ
ஏவங் ப்³யாகரெய்ய – ‘யே வோதா³தா சக்கு²ஸோதவிஞ்ஞெய்யா த⁴ம்மா, ஸங்விஜ்ஜந்தி
தே ததா²க³தஸ்ஸ; ஏதங்பதோ²ஹமஸ்மி, ஏதங்கோ³சரோ [ஏதபதோ²ஹமஸ்மி ஏதகோ³சரோ (ஸீ॰ ஸ்யா॰ கங்॰ பீ॰)], நோ ச தேன தம்மயோ’தி.
‘‘ஏவங்வாதி³ங் கோ², பி⁴க்க²வே, ஸத்தா²ரங் அரஹதி ஸாவகோ
உபஸங்கமிதுங் த⁴ம்மஸ்ஸவனாய. தஸ்ஸ ஸத்தா² த⁴ம்மங் தே³ஸேதி உத்தருத்தரிங்
பணீதபணீதங் கண்ஹஸுக்கஸப்படிபா⁴க³ங். யதா² யதா² கோ², பி⁴க்க²வே, பி⁴க்கு²னோ
ஸத்தா² த⁴ம்மங் தே³ஸேதி உத்தருத்தரிங் பணீதபணீதங் கண்ஹஸுக்கஸப்படிபா⁴க³ங்
ததா² ததா² ஸோ தஸ்மிங் த⁴ம்மே அபி⁴ஞ்ஞாய இதே⁴கச்சங் த⁴ம்மங் த⁴ம்மேஸு
நிட்ட²ங் க³ச்ச²தி, ஸத்த²ரி பஸீத³தி – ‘ஸம்மாஸம்பு³த்³தோ⁴ ப⁴க³வா,
ஸ்வாக்கா²தோ ப⁴க³வதா த⁴ம்மோ, ஸுப்படிபன்னோ ஸங்கோ⁴’தி. தஞ்சே, பி⁴க்க²வே,
பி⁴க்கு²ங் பரே ஏவங் புச்செ²ய்யுங் – ‘கே பனாயஸ்மதோ ஆகாரா, கே அன்வயா,
யேனாயஸ்மா ஏவங் வதே³ஸி – ஸம்மாஸம்பு³த்³தோ⁴ ப⁴க³வா ,
ஸ்வாக்கா²தோ ப⁴க³வதா த⁴ம்மோ, ஸுப்படிபன்னோ ஸங்கோ⁴’தி? ஸம்மா ப்³யாகரமானோ,
பி⁴க்க²வே, பி⁴க்கு² ஏவங் ப்³யாகரெய்ய – ‘இதா⁴ஹங், ஆவுஸோ, யேன ப⁴க³வா
தேனுபஸங்கமிங் த⁴ம்மஸ்ஸவனாய. தஸ்ஸ மே ப⁴க³வா த⁴ம்மங் தே³ஸேதி உத்தருத்தரிங்
பணீதபணீதங் கண்ஹஸுக்கஸப்படிபா⁴க³ங். யதா² யதா² மே, ஆவுஸோ ,
ப⁴க³வா த⁴ம்மங் தே³ஸேதி உத்தருத்தரிங் பணீதபணீதங் கண்ஹஸுக்கஸப்படிபா⁴க³ங்
ததா² ததா²ஹங் தஸ்மிங் த⁴ம்மே அபி⁴ஞ்ஞாய இதே⁴கச்சங் த⁴ம்மங் த⁴ம்மேஸு
நிட்ட²மக³மங், ஸத்த²ரி பஸீதி³ங் – ஸம்மாஸம்பு³த்³தோ⁴ ப⁴க³வா, ஸ்வாக்கா²தோ
ப⁴க³வதா, த⁴ம்மோ, ஸுப்படிபன்னோ ஸங்கோ⁴’தி.
490. ‘‘யஸ்ஸ
கஸ்ஸசி, பி⁴க்க²வே, இமேஹி ஆகாரேஹி இமேஹி பதே³ஹி இமேஹி ப்³யஞ்ஜனேஹி
ததா²க³தே ஸத்³தா⁴ நிவிட்டா² ஹோதி மூலஜாதா பதிட்டி²தா, அயங் வுச்சதி,
பி⁴க்க²வே, ஆகாரவதீ ஸத்³தா⁴ த³ஸ்ஸனமூலிகா, த³ள்ஹா; அஸங்ஹாரியா ஸமணேன வா
ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிங். ஏவங்
கோ², பி⁴க்க²வே, ததா²க³தே த⁴ம்மஸமன்னேஸனா ஹோதி. ஏவஞ்ச பன ததா²க³தோ
த⁴ம்மதாஸுஸமன்னிட்டோ² ஹோதீ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
வீமங்ஸகஸுத்தங் நிட்டி²தங் ஸத்தமங்.
8. கோஸம்பி³யஸுத்தங்
491. ஏவங்
மே ஸுதங் – ஏகங் ஸமயங் ப⁴க³வா கோஸம்பி³யங் விஹரதி கோ⁴ஸிதாராமே. தேன கோ² பன
ஸமயேன கோஸம்பி³யங் பி⁴க்கூ² ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங்
முக²ஸத்தீஹி விதுத³ந்தா விஹரந்தி. தே ந சேவ அஞ்ஞமஞ்ஞங் ஸஞ்ஞாபெந்தி ந ச
ஸஞ்ஞத்திங் உபெந்தி, ந ச அஞ்ஞமஞ்ஞங் நிஜ்ஜா²பெந்தி, ந ச நிஜ்ஜ²த்திங்
உபெந்தி. அத² கோ² அஞ்ஞதரோ பி⁴க்கு² யேன ப⁴க³வா
தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³.
ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘இத⁴, ப⁴ந்தே,
கோஸம்பி³யங் பி⁴க்கூ² ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங்
முக²ஸத்தீஹி விதுத³ந்தா விஹரந்தி, தே ந சேவ அஞ்ஞமஞ்ஞங் ஸஞ்ஞாபெந்தி, ந ச
ஸஞ்ஞத்திங் உபெந்தி, ந ச அஞ்ஞமஞ்ஞங் நிஜ்ஜா²பெந்தி, ந ச நிஜ்ஜ²த்திங்
உபெந்தீ’’தி.
அத² கோ² ப⁴க³வா அஞ்ஞதரங் பி⁴க்கு²ங் ஆமந்தேஸி – ‘‘ஏஹி
த்வங், பி⁴க்கு², மம வசனேன தே பி⁴க்கூ² ஆமந்தேஹி – ‘ஸத்தா² வோ ஆயஸ்மந்தே
ஆமந்தேதீ’’’தி. ‘‘ஏவங் , ப⁴ந்தே’’தி கோ² ஸோ பி⁴க்கு²
ப⁴க³வதோ படிஸ்ஸுத்வா யேன தே பி⁴க்கூ² தேனுபஸங்கமி; உபஸங்கமித்வா தே
பி⁴க்கூ² ஏதத³வோச – ‘‘ஸத்தா² ஆயஸ்மந்தே ஆமந்தேதீ’’தி. ‘‘ஏவமாவுஸோ’’தி கோ²
தே பி⁴க்கூ² தஸ்ஸ பி⁴க்கு²னோ படிஸ்ஸுத்வா யேன ப⁴க³வா தேனுபஸங்கமிங்ஸு;
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங்
நிஸின்னே கோ² தே பி⁴க்கூ² ப⁴க³வா ஏதத³வோச – ‘‘ஸச்சங் கிர தும்ஹே,
பி⁴க்க²வே, ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி
விதுத³ந்தா விஹரத², தே ந சேவ அஞ்ஞமஞ்ஞங் ஸஞ்ஞாபேத², ந ச ஸஞ்ஞத்திங் உபேத², ந
ச அஞ்ஞமஞ்ஞங் நிஜ்ஜா²பேத², ந ச நிஜ்ஜ²த்திங் உபேதா²’’தி? ‘‘ஏவங்,
ப⁴ந்தே’’. ‘‘தங் கிங் மஞ்ஞத², பி⁴க்க²வே, யஸ்மிங் தும்ஹே ஸமயே ப⁴ண்ட³னஜாதா
கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி
விதுத³ந்தா விஹரத², அபி நு தும்ஹாகங் தஸ்மிங் ஸமயே மெத்தங் காயகம்மங்
பச்சுபட்டி²தங் ஹோதி ஸப்³ரஹ்மசாரீஸு ஆவி சேவ ரஹோ ச, மெத்தங் வசீகம்மங்…பே॰…
மெத்தங் மனோகம்மங் பச்சுபட்டி²தங் ஹோதி ஸப்³ரஹ்மசாரீஸு ஆவி சேவ ரஹோ
சா’’தி? ‘‘நோ ஹேதங், ப⁴ந்தே’’. ‘‘இதி கிர, பி⁴க்க²வே, யஸ்மிங் தும்ஹே ஸமயே
ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா
விஹரத², நேவ தும்ஹாகங் தஸ்மிங் ஸமயே மெத்தங்
காயகம்மங் பச்சுபட்டி²தங் ஹோதி ஸப்³ரஹ்மசாரீஸு ஆவி சேவ ரஹோ ச, ந மெத்தங்
வசீகம்மங்…பே॰… ந மெத்தங் மனோகம்மங் பச்சுபட்டி²தங் ஹோதி ஸப்³ரஹ்மசாரீஸு
ஆவி சேவ ரஹோ ச. அத² கிஞ்சரஹி தும்ஹே, மோக⁴புரிஸா, கிங் ஜானந்தா கிங்
பஸ்ஸந்தா ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி
விதுத³ந்தா விஹரத², தே ந சேவ அஞ்ஞமஞ்ஞங் ஸஞ்ஞாபேத², ந ச ஸஞ்ஞத்திங் உபேத², ந
ச அஞ்ஞமஞ்ஞங் நிஜ்ஜா²பேத², ந ச நிஜ்ஜ²த்திங் உபேத² ? தஞ்ஹி தும்ஹாகங், மோக⁴புரிஸா, ப⁴விஸ்ஸதி தீ³க⁴ரத்தங் அஹிதாய து³க்கா²யா’’தி.
492.
அத² கோ² ப⁴க³வா பி⁴க்கூ² ஆமந்தேஸி – ‘‘ச²யிமே, பி⁴க்க²வே, த⁴ம்மா ஸாரணீயா
பியகரணா க³ருகரணா ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்தந்தி.
கதமே ச²? இத⁴, பி⁴க்க²வே, பி⁴க்கு²னோ மெத்தங் காயகம்மங் பச்சுபட்டி²தங்
ஹோதி ஸப்³ரஹ்மசாரீஸு ஆவி சேவ ரஹோ ச. அயம்பி த⁴ம்மோ ஸாரணீயோ பியகரணோ
க³ருகரணோ ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு²னோ மெத்தங் வசீகம்மங்
பச்சுபட்டி²தங் ஹோதி ஸப்³ரஹ்மசாரீஸு ஆவி சேவ ரஹோ ச. அயம்பி த⁴ம்மோ ஸாரணீயோ
பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா ஏகிபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு²னோ மெத்தங் மனோகம்மங்
பச்சுபட்டி²தங் ஹோதி ஸப்³ரஹ்மசாரீஸு ஆவி சேவ ரஹோ ச. அயம்பி த⁴ம்மோ ஸாரணீயோ
பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு² யே தே லாபா⁴
த⁴ம்மிகா த⁴ம்மலத்³தா⁴ அந்தமஸோ பத்தபரியாபன்னமத்தம்பி, ததா²ரூபேஹி லாபே⁴ஹி
அப்படிவிப⁴த்தபோ⁴கீ³ ஹோதி ஸீலவந்தேஹி ஸப்³ரஹ்மசாரீஹி ஸாதா⁴ரணபோ⁴கீ³. அயம்பி
த⁴ம்மோ ஸாரணீயோ பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா
ஏகீபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு² யானி தானி ஸீலானி அக²ண்டா³னி அச்சி²த்³தா³னி அஸப³லானி அகம்மாஸானி பு⁴ஜிஸ்ஸானி விஞ்ஞுப்பஸத்தா²னி அபராமட்டா²னி ஸமாதி⁴ஸங்வத்தனிகானி ததா²ரூபேஸு ஸீலேஸு ஸீலஸாமஞ்ஞக³தோ விஹரதி ஸப்³ரஹ்மசாரீஹி ஆவி சேவ ரஹோ ச. அயம்பி த⁴ம்மோ ஸாரணீயோ பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு² யாயங் தி³ட்டி²
அரியா நிய்யானிகா நிய்யாதி தக்கரஸ்ஸ ஸம்மா து³க்க²க்க²யாய ததா²ரூபாய
தி³ட்டி²யா தி³ட்டி²ஸாமஞ்ஞக³தோ விஹரதி ஸப்³ரஹ்மசாரீஹி ஆவி சேவ ரஹோ ச.
அயம்பி த⁴ம்மோ ஸாரணீயோ பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா
ஏகீபா⁴வாய ஸங்வத்ததி.
‘‘இமே கோ², பி⁴க்க²வே, ச² ஸாரணீயா த⁴ம்மா பியகரணா
க³ருகரணா ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்தந்தி. இமேஸங்
கோ², பி⁴க்க²வே, ச²ன்னங் ஸாரணீயானங் த⁴ம்மானங் ஏதங் அக்³க³ங் ஏதங்
ஸங்கா³ஹிகங் [ஸங்கா³ஹகங் (?)] ஏதங் ஸங்கா⁴டனிகங்
– யதி³த³ங் யாயங் தி³ட்டி² அரியா நிய்யானிகா நிய்யாதி தக்கரஸ்ஸ ஸம்மா
து³க்க²க்க²யாய. ஸெய்யதா²பி, பி⁴க்க²வே, கூடாகா³ரஸ்ஸ ஏதங் அக்³க³ங் ஏதங்
ஸங்கா³ஹிகங் ஏதங் ஸங்கா⁴டனிகங் யதி³த³ங் கூடங்; ஏவமேவ கோ², பி⁴க்க²வே , இமேஸங் ச²ன்னங் ஸாரணீயானங் த⁴ம்மானங் ஏதங் அக்³க³ங் ஏதங் ஸங்கா³ஹிகங் ஏதங் ஸங்கா⁴டனிகங் யதி³த³ங் யாயங் தி³ட்டி² அரியா நிய்யானிகா நிய்யாதி தக்கரஸ்ஸ ஸம்மா து³க்க²க்க²யாய.
493.
‘‘கத²ஞ்ச, பி⁴க்க²வே, யாயங் தி³ட்டி² அரியா நிய்யானிகா நிய்யாதி தக்கரஸ்ஸ
ஸம்மா து³க்க²க்க²யாய? இத⁴, பி⁴க்க²வே, பி⁴க்கு² அரஞ்ஞக³தோ வா
ருக்க²மூலக³தோ வா ஸுஞ்ஞாகா³ரக³தோ வா இதி படிஸஞ்சிக்க²தி – ‘அத்தி² நு
கோ² மே தங் பரியுட்டா²னங் அஜ்ஜ²த்தங் அப்பஹீனங், யேனாஹங் பரியுட்டா²னேன
பரியுட்டி²தசித்தோ யதா²பூ⁴தங் நப்பஜானெய்யங் ந பஸ்ஸெய்ய’ந்தி? ஸசே,
பி⁴க்க²வே, பி⁴க்கு² காமராக³பரியுட்டி²தோ ஹோதி, பரியுட்டி²தசித்தோவ ஹோதி.
ஸசே, பி⁴க்க²வே, பி⁴க்கு² ப்³யாபாத³பரியுட்டி²தோ ஹோதி, பரியுட்டி²தசித்தோவ
ஹோதி. ஸசே, பி⁴க்க²வே, பி⁴க்கு² தீ²னமித்³த⁴பரியுட்டி²தோ ஹோதி,
பரியுட்டி²தசித்தோவ ஹோதி. ஸசே, பி⁴க்க²வே, பி⁴க்கு²
உத்³த⁴ச்சகுக்குச்சபரியுட்டி²தோ ஹோதி, பரியுட்டி²தசித்தோவ ஹோதி. ஸசே,
பி⁴க்க²வே, பி⁴க்கு² விசிகிச்சா²பரியுட்டி²தோ ஹோதி, பரியுட்டி²தசித்தோவ
ஹோதி. ஸசே, பி⁴க்க²வே, பி⁴க்கு² இத⁴லோகசிந்தாய பஸுதோ ஹோதி,
பரியுட்டி²தசித்தோவ ஹோதி. ஸசே, பி⁴க்க²வே, பி⁴க்கு² பரலோகசிந்தாய பஸுதோ
ஹோதி, பரியுட்டி²தசித்தோவ ஹோதி. ஸசே, பி⁴க்க²வே, பி⁴க்கு² ப⁴ண்ட³னஜாதோ
கலஹஜாதோ விவாதா³பன்னோ அஞ்ஞமஞ்ஞங் முக²ஸத்தீஹி விதுத³ந்தோ விஹரதி,
பரியுட்டி²தசித்தோவ ஹோதி . ஸோ ஏவங் பஜானாதி –
‘நத்தி² கோ² மே தங் பரியுட்டா²னங் அஜ்ஜ²த்தங் அப்பஹீனங், யேனாஹங்
பரியுட்டா²னேன பரியுட்டி²தசித்தோ யதா²பூ⁴தங் நப்பஜானெய்யங் ந பஸ்ஸெய்யங்.
ஸுப்பணிஹிதங் மே மானஸங் ஸச்சானங் போ³தா⁴யா’தி. இத³மஸ்ஸ பட²மங் ஞாணங்
அதி⁴க³தங் ஹோதி அரியங் லோகுத்தரங் அஸாதா⁴ரணங் புது²ஜ்ஜனேஹி.
494.
‘‘புன சபரங், பி⁴க்க²வே, அரியஸாவகோ இதி படிஸஞ்சிக்க²தி – ‘இமங் நு கோ²
அஹங் தி³ட்டி²ங் ஆஸேவந்தோ பா⁴வெந்தோ ப³ஹுலீகரொந்தோ லபா⁴மி பச்சத்தங்
ஸமத²ங், லபா⁴மி பச்சத்தங் நிப்³பு³தி’ந்தி? ஸோ ஏவங் பஜானாதி – ‘இமங் கோ²
அஹங் தி³ட்டி²ங் ஆஸேவந்தோ பா⁴வெந்தோ ப³ஹுலீகரொந்தோ லபா⁴மி பச்சத்தங் ஸமத²ங், லபா⁴மி பச்சத்தங் நிப்³பு³தி’ந்தி. இத³மஸ்ஸ து³தியங் ஞாணங் அதி⁴க³தங் ஹோதி அரியங் லோகுத்தரங் அஸாதா⁴ரணங் புது²ஜ்ஜனேஹி.
495.
‘‘புன சபரங், பி⁴க்க²வே, அரியஸாவகோ இதி படிஸஞ்சிக்க²தி – ‘யதா² ரூபாயாஹங்
தி³ட்டி²யா ஸமன்னாக³தோ, அத்தி² நு கோ² இதோ ப³ஹித்³தா⁴ அஞ்ஞோ ஸமணோ வா ப்³ராஹ்மணோ வா
ததா²ரூபாய தி³ட்டி²யா ஸமன்னாக³தோ’தி? ஸோ ஏவங் பஜானாதி – ‘யதா²ரூபாயாஹங்
தி³ட்டி²யா ஸமன்னாக³தோ, நத்தி² இதோ ப³ஹித்³தா⁴ அஞ்ஞோ ஸமணோ வா ப்³ராஹ்மணோ வா
ததா²ரூபாய தி³ட்டி²யா ஸமன்னாக³தோ’தி. இத³மஸ்ஸ ததியங் ஞாணங் அதி⁴க³தங் ஹோதி
அரியங் லோகுத்தரங் அஸாதா⁴ரணங் புது²ஜ்ஜனேஹி.
496.
‘‘புன சபரங், பி⁴க்க²வே, அரியஸாவகோ இதி படிஸஞ்சிக்க²தி – ‘யதா²ரூபாய
த⁴ம்மதாய தி³ட்டி²ஸம்பன்னோ புக்³க³லோ ஸமன்னாக³தோ, அஹம்பி ததா²ரூபாய
த⁴ம்மதாய ஸமன்னாக³தோ’தி. கத²ங்ரூபாய ச, பி⁴க்க²வே, த⁴ம்மதாய
தி³ட்டி²ஸம்பன்னோ புக்³க³லோ ஸமன்னாக³தோ? த⁴ம்மதா ஏஸா, பி⁴க்க²வே,
தி³ட்டி²ஸம்பன்னஸ்ஸ புக்³க³லஸ்ஸ – ‘கிஞ்சாபி ததா²ரூபிங் ஆபத்திங் ஆபஜ்ஜதி,
யதா²ரூபாய ஆபத்தியா வுட்டா²னங் பஞ்ஞாயதி, அத² கோ² நங் கி²ப்பமேவ ஸத்த²ரி வா
விஞ்ஞூஸு வா ஸப்³ரஹ்மசாரீஸு தே³ஸேதி விவரதி உத்தானீகரோதி; தே³ஸெத்வா
விவரித்வா உத்தானீகத்வா ஆயதிங் ஸங்வரங் ஆபஜ்ஜதி’. ஸெய்யதா²பி, பி⁴க்க²வே,
த³ஹரோ குமாரோ மந்தோ³ உத்தானஸெய்யகோ ஹத்தே²ன வா பாதே³ன வா அங்கா³ரங்
அக்கமித்வா கி²ப்பமேவ படிஸங்ஹரதி; ஏவமேவ கோ², பி⁴க்க²வே, த⁴ம்மதா ஏஸா
தி³ட்டி²ஸம்பன்னஸ்ஸ புக்³க³லஸ்ஸ – ‘கிஞ்சாபி ததா²ரூபிங்
ஆபத்திங் ஆபஜ்ஜதி யதா²ரூபாய ஆபத்தியா வுட்டா²னங் பஞ்ஞாயதி, அத² கோ² நங்
கி²ப்பமேவ ஸத்த²ரி வா விஞ்ஞூஸு வா ஸப்³ரஹ்மசாரீஸு தே³ஸேதி விவரதி
உத்தானீகரோதி; தே³ஸெத்வா விவரித்வா உத்தானீகத்வா ஆயதிங் ஸங்வரங் ஆபஜ்ஜதி’.
ஸோ ஏவங் பஜானாதி – ‘யதா²ரூபாய த⁴ம்மதாய தி³ட்டி²ஸம்பன்னோ புக்³க³லோ
ஸமன்னாக³தோ, அஹம்பி ததா²ரூபாய த⁴ம்மதாய ஸமன்னாக³தோ’தி. இத³மஸ்ஸ சதுத்த²ங்
ஞாணங் அதி⁴க³தங் ஹோதி அரியங் லோகுத்தரங் அஸாதா⁴ரணங் புது²ஜ்ஜனேஹி.
497.
‘‘புன சபரங், பி⁴க்க²வே, அரியஸாவகோ இதி படிஸஞ்சிக்க²தி – ‘யதா²ரூபாய
த⁴ம்மதாய தி³ட்டி²ஸம்பன்னோ புக்³க³லோ ஸமன்னாக³தோ, அஹம்பி ததா²ரூபாய
த⁴ம்மதாய ஸமன்னாக³தோ’தி. கத²ங்ரூபாய ச, பி⁴க்க²வே, த⁴ம்மதாய
தி³ட்டி²ஸம்பன்னோ புக்³க³லோ ஸமன்னாக³தோ? த⁴ம்மதா ஏஸா, பி⁴க்க²வே,
தி³ட்டி²ஸம்பன்னஸ்ஸ புக்³க³லஸ்ஸ – ‘கிஞ்சாபி யானி தானி ஸப்³ரஹ்மசாரீனங்
உச்சாவசானி கிங்கரணீயானி தத்த² உஸ்ஸுக்கங் ஆபன்னோ ஹோதி, அத² க்²வாஸ்ஸ
திப்³பா³பெக்கா² ஹோதி அதி⁴ஸீலஸிக்கா²ய அதி⁴சித்தஸிக்கா²ய
அதி⁴பஞ்ஞாஸிக்கா²ய’. ஸெய்யதா²பி, பி⁴க்க²வே, கா³வீ தருணவச்சா² த²ம்ப³ஞ்ச
ஆலும்பதி வச்ச²கஞ்ச அபசினதி; ஏவமேவ கோ², பி⁴க்க²வே ,
த⁴ம்மதா ஏஸா தி³ட்டி²ஸம்பன்னஸ்ஸ புக்³க³லஸ்ஸ – ‘கிஞ்சாபி யானி தானி
ஸப்³ரஹ்மசாரீனங் உச்சாவசானி கிங்கரணீயானி தத்த² உஸ்ஸுக்கங் ஆபன்னோ ஹோதி,
அத² க்²வாஸ்ஸ திப்³பா³பெக்கா² ஹோதி அதி⁴ஸீலஸிக்கா²ய அதி⁴சித்தஸிக்கா²ய
அதி⁴பஞ்ஞாஸிக்கா²ய’. ஸோ ஏவங் பஜானாதி – ‘யதா²ரூபாய த⁴ம்மதாய
தி³ட்டி²ஸம்பன்னோ புக்³க³லோ ஸமன்னாக³தோ, அஹம்பி
ததா²ரூபாய த⁴ம்மதாய ஸமன்னாக³தோ’தி. இத³மஸ்ஸ பஞ்சமங் ஞாணங் அதி⁴க³தங் ஹோதி
அரியங் லோகுத்தரங் அஸாதா⁴ரணங் புது²ஜ்ஜனேஹி.
498. ‘‘புன
சபரங், பி⁴க்க²வே, அரியஸாவகோ இதி படிஸஞ்சிக்க²தி – ‘யதா²ரூபாய ப³லதாய
தி³ட்டி²ஸம்பன்னோ புக்³க³லோ ஸமன்னாக³தோ, அஹம்பி ததா²ரூபாய ப³லதாய
ஸமன்னாக³தோ’தி. கத²ங்ரூபாய ச, பி⁴க்க²வே, ப³லதாய தி³ட்டி²ஸம்பன்னோ
புக்³க³லோ ஸமன்னாக³தோ? ப³லதா ஏஸா, பி⁴க்க²வே, தி³ட்டி²ஸம்பன்னஸ்ஸ
புக்³க³லஸ்ஸ யங் ததா²க³தப்பவேதி³தே த⁴ம்மவினயே தே³ஸியமானே அட்டி²ங்கத்வா
மனஸிகத்வா ஸப்³ப³சேதஸா [ஸப்³ப³சேதஸோ (ஸீ॰ ஸ்யா॰ கங்॰ பீ॰), ஸப்³ப³ங் சேதஸா (க॰)]
ஸமன்னாஹரித்வா ஓஹிதஸோதோ த⁴ம்மங் ஸுணாதி. ஸோ ஏவங் பஜானாதி – ‘யதா²ரூபாய
ப³லதாய தி³ட்டி²ஸம்பன்னோ புக்³க³லோ ஸமன்னாக³தோ, அஹம்பி ததா²ரூபாய ப³லதாய
ஸமன்னாக³தோ’தி. இத³மஸ்ஸ ச²ட்ட²ங் ஞாணங் அதி⁴க³தங் ஹோதி அரியங் லோகுத்தரங்
அஸாதா⁴ரணங் புது²ஜ்ஜனேஹி.
499. ‘‘புன சபரங், பி⁴க்க²வே, அரியஸாவகோ இதி படிஸஞ்சிக்க²தி – ‘யதா²ரூபாய ப³லதாய
தி³ட்டி²ஸம்பன்னோ புக்³க³லோ ஸமன்னாக³தோ, அஹம்பி ததா²ரூபாய ப³லதாய
ஸமன்னாக³தோ’தி. கத²ங்ரூபாய ச, பி⁴க்க²வே, ப³லதாய தி³ட்டி²ஸம்பன்னோ
புக்³க³லோ ஸமன்னாக³தோ? ப³லதா ஏஸா, பி⁴க்க²வே, தி³ட்டி²ஸம்பன்னஸ்ஸ
புக்³க³லஸ்ஸ யங் ததா²க³தப்பவேதி³தே த⁴ம்மவினயே தே³ஸியமானே லப⁴தி
அத்த²வேத³ங், லப⁴தி த⁴ம்மவேத³ங், லப⁴தி த⁴ம்மூபஸங்ஹிதங் பாமோஜ்ஜங். ஸோ ஏவங்
பஜானாதி – ‘யதா²ரூபாய ப³லதாய தி³ட்டி²ஸம்பன்னோ புக்³க³லோ
ஸமன்னாக³தோ, அஹம்பி ததா²ரூபாய ப³லதாய ஸமன்னாக³தோ’தி. இத³மஸ்ஸ ஸத்தமங்
ஞாணங் அதி⁴க³தங் ஹோதி அரியங் லோகுத்தரங் அஸாதா⁴ரணங் புது²ஜ்ஜனேஹி.
500.
‘‘ஏவங் ஸத்தங்க³ஸமன்னாக³தஸ்ஸ கோ², பி⁴க்க²வே, அரியஸாவகஸ்ஸ த⁴ம்மதா
ஸுஸமன்னிட்டா² ஹோதி ஸோதாபத்திப²லஸச்சி²கிரியாய. ஏவங் ஸத்தங்க³ஸமன்னாக³தோ கோ², பி⁴க்க²வே, அரியஸாவகோ ஸோதாபத்திப²லஸமன்னாக³தோ ஹோதீ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
கோஸம்பி³யஸுத்தங் நிட்டி²தங் அட்ட²மங்.
9. ப்³ரஹ்மனிமந்தனிகஸுத்தங்
501. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘ஏகமிதா³ஹங், பி⁴க்க²வே, ஸமயங் உக்கட்டா²யங் விஹராமி
ஸுப⁴க³வனே ஸாலராஜமூலே. தேன கோ² பன, பி⁴க்க²வே, ஸமயேன ப³கஸ்ஸ ப்³ரஹ்முனோ
ஏவரூபங் பாபகங் தி³ட்டி²க³தங் உப்பன்னங் ஹோதி – ‘இத³ங் நிச்சங், இத³ங்
து⁴வங், இத³ங் ஸஸ்ஸதங், இத³ங் கேவலங், இத³ங் அசவனத⁴ம்மங், இத³ஞ்ஹி ந ஜாயதி ந
ஜீயதி ந மீயதி ந சவதி ந உபபஜ்ஜதி, இதோ ச பனஞ்ஞங் உத்தரி நிஸ்ஸரணங்
நத்தீ²’தி. அத² க்²வாஹங், பி⁴க்க²வே, ப³கஸ்ஸ ப்³ரஹ்முனோ சேதஸா
சேதோபரிவிதக்கமஞ்ஞாய – ஸெய்யதா²பி நாம ப³லவா புரிஸோ ஸமிஞ்ஜிதங் வா பா³ஹங்
பஸாரெய்ய, பஸாரிதங் வா பா³ஹங் ஸமிஞ்ஜெய்ய, ஏவமேவ – உக்கட்டா²யங் ஸுப⁴க³வனே
ஸாலராஜமூலே அந்தரஹிதோ தஸ்மிங் ப்³ரஹ்மலோகே பாதுரஹோஸிங். அத்³த³ஸா கோ² மங்,
பி⁴க்க²வே, ப³கோ ப்³ரஹ்மா தூ³ரதோவ ஆக³ச்ச²ந்தங்; தி³ஸ்வான மங் ஏதத³வோச –
‘ஏஹி கோ², மாரிஸ, ஸ்வாக³தங், மாரிஸ! சிரஸ்ஸங் கோ², மாரிஸ, இமங் பரியாயமகாஸி
யதி³த³ங் இதா⁴க³மனாய. இத³ஞ்ஹி, மாரிஸ, நிச்சங், இத³ங் து⁴வங், இத³ங்
ஸஸ்ஸதங், இத³ங் கேவலங், இத³ங் அசவனத⁴ம்மங், இத³ஞ்ஹி ந ஜாயதி ந ஜீயதி ந
மீயதி ந சவதி ந உபபஜ்ஜதி. இதோ ச பனஞ்ஞங் உத்தரி நிஸ்ஸரணங் நத்தீ²’’’தி.
ஏவங் வுத்தே, அஹங், பி⁴க்க²வே, ப³கங் ப்³ரஹ்மானங் ஏதத³வோசங்
– ‘‘அவிஜ்ஜாக³தோ வத, போ⁴, ப³கோ ப்³ரஹ்மா; அவிஜ்ஜாக³தோ வத, போ⁴, ப³கோ
ப்³ரஹ்மா; யத்ர ஹி நாம அனிச்சங்யேவ ஸமானங் நிச்சந்தி வக்க²தி,
அத்³து⁴வங்யேவ ஸமானங் து⁴வந்தி வக்க²தி, அஸஸ்ஸதங்யேவ ஸமானங் ஸஸ்ஸதந்தி
வக்க²தி, அகேவலங்யேவ ஸமானங் கேவலந்தி வக்க²தி,
சவனத⁴ம்மங்யேவ ஸமானங் அசவனத⁴ம்மந்தி வக்க²தி; யத்த² ச பன ஜாயதி ஜீயதி மீயதி
சவதி உபபஜ்ஜதி தஞ்ச வக்க²தி – ‘இத³ஞ்ஹி ந ஜாயதி ந ஜீயதி ந மீயதி ந சவதி ந
உபபஜ்ஜதீ’தி; ஸந்தஞ்ச பனஞ்ஞங் உத்தரி நிஸ்ஸரணங் ‘நத்த²ஞ்ஞங் உத்தரி
நிஸ்ஸரண’ந்தி வக்க²தீ’’தி.
502. ‘‘அத²
கோ², பி⁴க்க²வே, மாரோ பாபிமா அஞ்ஞதரங் ப்³ரஹ்மபாரிஸஜ்ஜங் அன்வாவிஸித்வா
மங் ஏதத³வோச – ‘பி⁴க்கு², பி⁴க்கு², மேதமாஸதோ³ மேதமாஸதோ³, ஏஸோ ஹி,
பி⁴க்கு², ப்³ரஹ்மா மஹாப்³ரஹ்மா அபி⁴பூ⁴ அனபி⁴பூ⁴தோ அஞ்ஞத³த்து²த³ஸோ வஸவத்தீ இஸ்ஸரோ கத்தா நிம்மாதா ஸெட்டோ² ஸஜிதா [ஸஜ்ஜிதா (ஸ்யா॰ கங்॰ க॰), ஸஞ்ஜிதா (ஸீ॰ பீ॰)]
வஸீ பிதா பூ⁴தப⁴ப்³யானங். அஹேஸுங் கோ² யே, பி⁴க்கு², தயா புப்³பே³
ஸமணப்³ராஹ்மணா லோகஸ்மிங் பத²வீக³ரஹகா பத²வீஜிகு³ச்ச²கா, ஆபக³ரஹகா
ஆபஜிகு³ச்ச²கா, தேஜக³ரஹகா தேஜஜிகு³ச்ச²கா, வாயக³ரஹகா வாயஜிகு³ச்ச²கா,
பூ⁴தக³ரஹகா பூ⁴தஜிகு³ச்ச²கா, தே³வக³ரஹகா தே³வஜிகு³ச்ச²கா, பஜாபதிக³ரஹகா
பஜாபதிஜிகு³ச்ச²கா, ப்³ரஹ்மக³ரஹகா ப்³ரஹ்மஜிகு³ச்ச²கா – தே காயஸ்ஸ பே⁴தா³
பாணுபச்சே²தா³ ஹீனே காயே பதிட்டி²தா அஹேஸுங். யே பன, பி⁴க்கு², தயா
புப்³பே³ ஸமணப்³ராஹ்மணா லோகஸ்மிங் பத²வீபஸங்ஸகா பத²வாபி⁴னந்தி³னோ,
ஆபபஸங்ஸகா ஆபாபி⁴னந்தி³னோ, தேஜபஸங்ஸகா தேஜாபி⁴னந்தி³னோ, வாயபஸங்ஸகா
வாயாபி⁴னந்தி³னோ, பூ⁴தபஸங்ஸகா பூ⁴தாபி⁴னந்தி³னோ, தே³வபஸங்ஸகா
தே³வாபி⁴னந்தி³னோ, பஜாபதிபஸங்ஸகா பஜாபதாபி⁴னந்தி³னோ, ப்³ரஹ்மபஸங்ஸகா
ப்³ரஹ்மாபி⁴னந்தி³னோ – தே காயஸ்ஸ பே⁴தா³ பாணுபச்சே²தா³ பணீதே காயே
பதிட்டி²தா. தங் தாஹங், பி⁴க்கு², ஏவங் வதா³மி – ‘இங்க⁴ த்வங், மாரிஸ,
யதே³வ தே ப்³ரஹ்மா ஆஹ ததே³வ த்வங் கரோஹி, மா த்வங் ப்³ரஹ்முனோ வசனங்
உபாதிவத்தித்தோ²’. ஸசே கோ² த்வங், பி⁴க்கு², ப்³ரஹ்முனோ வசனங்
உபாதிவத்திஸ்ஸஸி, ஸெய்யதா²பி நாம புரிஸோ ஸிரிங் ஆக³ச்ச²ந்திங் த³ண்டே³ன
படிப்பணாமெய்ய, ஸெய்யதா²பி வா பன, பி⁴க்கு², புரிஸோ நரகப்பபாதே பபதந்தோ
ஹத்தே²ஹி ச பாதே³ஹி ச பத²விங் விராதெ⁴ய்ய, ஏவங் ஸம்பத³மித³ங், பி⁴க்கு²,
துய்ஹங் ப⁴விஸ்ஸதி. ‘இங்க⁴ங் த்வங், மாரிஸ, யதே³வ தே ப்³ரஹ்மா ஆஹ ததே³வ
த்வங் கரோஹி, மா த்வங் ப்³ரஹ்முனோ வசனங் உபாதிவத்தித்தோ². நனு த்வங்,
பி⁴க்கு², பஸ்ஸஸி ப்³ரஹ்மபரிஸங் ஸன்னிபதித’ந்தி? இதி கோ² மங், பி⁴க்க²வே,
மாரோ பாபிமா ப்³ரஹ்மபரிஸங் உபனேஸி.
‘‘ஏவங் வுத்தே, அஹங்,
பி⁴க்க²வே, மாரங் பாபிமந்தங் ஏதத³வோசங் – ‘ஜானாமி கோ² தாஹங், பாபிம; மா
த்வங் மஞ்ஞித்தோ² – ந மங் ஜானாதீ’தி. மாரோ த்வமஸி, பாபிம. யோ சேவ, பாபிம,
ப்³ரஹ்மா, யா ச ப்³ரஹ்மபரிஸா, யே ச ப்³ரஹ்மபாரிஸஜ்ஜா, ஸப்³பே³வ தவ
ஹத்த²க³தா ஸப்³பே³வ தவ வஸங்க³தா. துய்ஹஞ்ஹி, பாபிம, ஏவங் ஹோதி – ‘ஏஸோபி மே
அஸ்ஸ ஹத்த²க³தோ, ஏஸோபி மே அஸ்ஸ வஸங்க³தோ’தி. அஹங் கோ² பன, பாபிம, நேவ தவ
ஹத்த²க³தோ நேவ தவ வஸங்க³தோ’’தி.
503. ‘‘ஏவங் வுத்தே, பி⁴க்க²வே, ப³கோ ப்³ரஹ்மா மங் ஏதத³வோச – ‘அஹஞ்ஹி, மாரிஸ, நிச்சங்யேவ ஸமானங் நிச்சந்தி வதா³மி, து⁴வங்யேவ
ஸமானங் து⁴வந்தி வதா³மி, ஸஸ்ஸதங்யேவ ஸமானங் ஸஸ்ஸதந்தி வதா³மி, கேவலங்யேவ
ஸமானங் கேவலந்தி வதா³மி, அசவனத⁴ம்மங்யேவ ஸமானங் அசவனத⁴ம்ம’ந்தி வதா³மி,
யத்த² ச பன ந ஜாயதி ந ஜீயதி ந மீயதி ந சவதி ந உபபஜ்ஜதி ததே³வாஹங் வதா³மி –
‘இத³ஞ்ஹி ந ஜாயதி ந ஜீயதி ந மீயதி ந சவதி ந உபபஜ்ஜதீ’தி. அஸந்தஞ்ச பனஞ்ஞங்
உத்தரி நிஸ்ஸரணங் ‘நத்த²ஞ்ஞங் உத்தரி நிஸ்ஸரண’ந்தி வதா³மி. அஹேஸுங் கோ²,
பி⁴க்கு², தயா புப்³பே³ ஸமணப்³ராஹ்மணா லோகஸ்மிங் யாவதகங் துய்ஹங் கஸிணங்
ஆயு தாவதகங் தேஸங் தபோகம்மமேவ அஹோஸி. தே கோ² ஏவங் ஜானெய்யுங் – ‘ஸந்தஞ்ச
பனஞ்ஞங் உத்தரி நிஸ்ஸரணங் அத்த²ஞ்ஞங் உத்தரி நிஸ்ஸரணந்தி, அஸந்தங் வா
அஞ்ஞங் உத்தரி நிஸ்ஸரணங் நத்த²ஞ்ஞங் உத்தரி நிஸ்ஸரண’ந்தி. தங் தாஹங்,
பி⁴க்கு², ஏவங் வதா³மி – ‘ந சேவஞ்ஞங் உத்தரி நிஸ்ஸரணங் த³க்கி²ஸ்ஸஸி,
யாவதே³வ ச பன கிலமத²ஸ்ஸ விகா⁴தஸ்ஸ பா⁴கீ³ ப⁴விஸ்ஸஸி. ஸசே கோ² த்வங்,
பி⁴க்கு², பத²விங் அஜ்ஜோ²ஸிஸ்ஸஸி, ஓபஸாயிகோ மே ப⁴விஸ்ஸஸி வத்து²ஸாயிகோ,
யதா²காமகரணீயோ பா³ஹிதெய்யோ. ஸசே ஆபங்… தேஜங்… வாயங்… பூ⁴தே… தே³வே…
பஜாபதிங்… ப்³ரஹ்மங் அஜ்ஜோ²ஸிஸ்ஸஸி, ஓபஸாயிகோ மே ப⁴விஸ்ஸஸி வத்து²ஸாயிகோ,
யதா²காமகரணீயோ பா³ஹிதெய்யோ’தி.
‘‘அஹம்பி கோ² ஏவங், ப்³ரஹ்மே, ஜானாமி – ஸசே பத²விங் அஜ்ஜோ²ஸிஸ்ஸாமி, ஓபஸாயிகோ தே ப⁴விஸ்ஸாமி வத்து²ஸாயிகோ, யதா²காமகரணீயோ
பா³ஹிதெய்யோ. ‘ஸசே ஆபங்… தேஜங்… வாயங்… பூ⁴தே… தே³வே… பஜாபதிங்… ப்³ரஹ்மங்
அஜ்ஜோ²ஸிஸ்ஸாமி, ஓபஸாயிகோ தே ப⁴விஸ்ஸாமி வத்து²ஸாயிகோ, யதா²காமகரணீயோ
பா³ஹிதெய்யோ’தி அபி ச தே அஹங், ப்³ரஹ்மே, க³திஞ்ச பஜானாமி, ஜுதிஞ்ச பஜானாமி
– ஏவங் மஹித்³தி⁴கோ ப³கோ ப்³ரஹ்மா, ஏவங் மஹானுபா⁴வோ ப³கோ ப்³ரஹ்மா, ஏவங்
மஹேஸக்கோ² ப³கோ ப்³ரஹ்மா’’தி.
‘‘யதா²கத²ங் பன மே த்வங்,
மாரிஸ, க³திஞ்ச பஜானாஸி, ஜுதிஞ்ச பஜானாஸி – ‘ஏவங் மஹித்³தி⁴கோ ப³கோ
ப்³ரஹ்மா, ஏவங் மஹானுபா⁴வோ ப³கோ ப்³ரஹ்மா, ஏவங் மஹேஸக்கோ² ப³கோ
ப்³ரஹ்மா’தி?
‘‘யாவதா சந்தி³மஸூரியா, பரிஹரந்தி தி³ஸா ப⁴ந்தி விரோசனா;
தாவ ஸஹஸ்ஸதா⁴ லோகோ, எத்த² தே வத்ததே [வத்ததீ (ஸீ॰ ஸ்யா॰ கங்॰ பீ॰)] வஸோ.
‘‘பரோபரஞ்ச [பரோவரஞ்ச (ஸீ॰ பீ॰)] ஜானாஸி, அதோ² ராக³விராகி³னங்;
இத்த²பா⁴வஞ்ஞதா²பா⁴வங், ஸத்தானங் ஆக³திங் க³தி’’ந்தி.
‘‘ஏவங் கோ² தே அஹங், ப்³ரஹ்மே, க³திஞ்ச பஜானாமி ஜுதிஞ்ச பஜானாமி – ‘ஏவங் மஹித்³தி⁴கோ ப³கோ ப்³ரஹ்மா, ஏவங் மஹானுபா⁴வோ ப³கோ ப்³ரஹ்மா, ஏவங் மஹேஸக்கோ² ப³கோ ப்³ரஹ்மா’தி.
504.
‘‘அத்தி² கோ², ப்³ரஹ்மே, அஞ்ஞோ காயோ, தங் த்வங் ந ஜானாஸி ந பஸ்ஸஸி; தமஹங்
ஜானாமி பஸ்ஸாமி. அத்தி² கோ², ப்³ரஹ்மே, ஆப⁴ஸ்ஸரா நாம காயோ யதோ த்வங் சுதோ
இதூ⁴பபன்னோ. தஸ்ஸ தே அதிசிரனிவாஸேன ஸா ஸதி பமுட்டா², தேன தங் த்வங் ந
ஜானாஸி ந பஸ்ஸஸி; தமஹங் ஜானாமி பஸ்ஸாமி. ஏவம்பி கோ² அஹங், ப்³ரஹ்மே, நேவ தே
ஸமஸமோ அபி⁴ஞ்ஞாய, குதோ நீசெய்யங்? அத² கோ² அஹமேவ
தயா பி⁴ய்யோ. அத்தி² கோ², ப்³ரஹ்மே, ஸுப⁴கிண்ஹோ நாம காயோ, வேஹப்ப²லோ நாம
காயோ, அபி⁴பூ⁴ நாம காயோ, தங் த்வங் ந ஜானாஸி ந பஸ்ஸஸி; தமஹங் ஜானாமி
பஸ்ஸாமி. ஏவம்பி கோ² அஹங், ப்³ரஹ்மே, நேவ தே ஸமஸமோ அபி⁴ஞ்ஞாய, குதோ
நீசெய்யங்? அத² கோ² அஹமேவ தயா பி⁴ய்யோ. பத²விங் கோ² அஹங், ப்³ரஹ்மே,
பத²விதோ அபி⁴ஞ்ஞாய யாவதா பத²வியா பத²வத்தேன அனநுபூ⁴தங் தத³பி⁴ஞ்ஞாய பத²விங்
நாபஹோஸிங், பத²வியா நாபஹோஸிங், பத²விதோ நாபஹோஸிங், பத²விங் மேதி
நாபஹோஸிங், பத²விங் நாபி⁴வதி³ங். ஏவம்பி கோ² அஹங், ப்³ரஹ்மே, நேவ தே ஸமஸமோ
அபி⁴ஞ்ஞாய, குதோ நீசெய்யங்? அத² கோ² அஹமேவ தயா பி⁴ய்யோ. ஆபங் கோ² அஹங்,
ப்³ரஹ்மே…பே॰… தேஜங் கோ² அஹங், ப்³ரஹ்மே…பே॰… வாயங் கோ² அஹங்,
ப்³ரஹ்மே…பே॰… பூ⁴தே கோ² அஹங், ப்³ரஹ்மே…பே॰… தே³வே கோ² அஹங்,
ப்³ரஹ்மே…பே॰… பஜாபதிங் கோ² அஹங், ப்³ரஹ்மே…பே॰… ப்³ரஹ்மங் கோ² அஹங்,
ப்³ரஹ்மே…பே॰… ஆப⁴ஸ்ஸரே கோ² அஹங், ப்³ரஹ்மே…பே॰… ஸுப⁴கிண்ஹே கோ² அஹங்,
ப்³ரஹ்மே… …பே॰… வேஹப்ப²லே கோ² அஹங், ப்³ரஹ்மே…பே॰…
அபி⁴பு⁴ங் கோ² அஹங், ப்³ரஹ்மே…பே॰… ஸப்³ப³ங் கோ² அஹங், ப்³ரஹ்மே, ஸப்³ப³தோ
அபி⁴ஞ்ஞாய யாவதா ஸப்³ப³ஸ்ஸ ஸப்³ப³த்தேன அனநுபூ⁴தங் தத³பி⁴ஞ்ஞாய ஸப்³ப³ங்
நாபஹோஸிங் ஸப்³ப³ஸ்மிங் நாபஹோஸிங் ஸப்³ப³தோ நாபஹோஸிங் ஸப்³ப³ங் மேதி
நாபஹோஸிங், ஸப்³ப³ங் நாபி⁴வதி³ங். ஏவம்பி கோ² அஹங், ப்³ரஹ்மே, நேவ தே ஸமஸமோ
அபி⁴ஞ்ஞாய, குதோ நீசெய்யங்? அத² கோ² அஹமேவ தயா பி⁴ய்யோ’’தி.
‘‘ஸசே கோ², மாரிஸ, ஸப்³ப³ஸ்ஸ ஸப்³ப³த்தேன அனநுபூ⁴தங், தத³பி⁴ஞ்ஞாய மா ஹேவ தே ரித்தகமேவ அஹோஸி, துச்ச²கமேவ அஹோஸீ’’தி .
‘‘‘விஞ்ஞாணங் அனித³ஸ்ஸனங் அனந்தங் ஸப்³ப³தோ பப⁴ங்’,
தங் பத²வியா பத²வத்தேன அனநுபூ⁴தங், ஆபஸ்ஸ ஆபத்தேன அனநுபூ⁴தங், தேஜஸ்ஸ
தேஜத்தேன அனநுபூ⁴தங், வாயஸ்ஸ வாயத்தேன அனநுபூ⁴தங், பூ⁴தானங் பூ⁴தத்தேன
அனநுபூ⁴தங், தே³வானங் தே³வத்தேன அனநுபூ⁴தங், பஜாபதிஸ்ஸ பஜாபதித்தேன
அனநுபூ⁴தங், ப்³ரஹ்மானங் ப்³ரஹ்மத்தேன அனநுபூ⁴தங், ஆப⁴ஸ்ஸரானங்
ஆப⁴ஸ்ஸரத்தேன அனநுபூ⁴தங், ஸுப⁴கிண்ஹானங் ஸுப⁴கிண்ஹத்தேன அனநுபூ⁴தங்,
வேஹப்ப²லானங் வேஹப்ப²லத்தே அனநுபூ⁴தங், அபி⁴பு⁴ஸ்ஸ அபி⁴பு⁴த்தேன அனநுபூ⁴தங், ஸப்³ப³ஸ்ஸ ஸப்³ப³த்தேன அனநுபூ⁴தங்’’.
‘‘ஹந்த³ சரஹி [ஹந்த³ ச ஹி (ஸீ॰ பீ॰)]
தே, மாரிஸ, பஸ்ஸ அந்தரதா⁴யாமீ’’தி. ‘ஹந்த³ சரஹி மே த்வங், ப்³ரஹ்மே,
அந்தரதா⁴யஸ்ஸு, ஸசே விஸஹஸீ’தி. அத² கோ², பி⁴க்க²வே, ப³கோ ப்³ரஹ்மா
‘அந்தரதா⁴யிஸ்ஸாமி ஸமணஸ்ஸ கோ³தமஸ்ஸ, அந்தரதா⁴யிஸ்ஸாமி ஸமணஸ்ஸ கோ³தமஸ்ஸா’தி
நேவஸ்ஸு மே ஸக்கோதி அந்தரதா⁴யிதுங்.
‘‘ஏவங் வுத்தே, அஹங், பி⁴க்க²வே, ப³கங் ப்³ரஹ்மானங்
ஏதத³வோசங் – ‘ஹந்த³ சரஹி தே ப்³ரஹ்மே அந்தரதா⁴யாமீ’தி. ‘ஹந்த³ சரஹி மே
த்வங், மாரிஸ, அந்தரதா⁴யஸ்ஸு ஸசே விஸஹஸீ’தி. அத² கோ² அஹங், பி⁴க்க²வே,
ததா²ரூபங் இத்³தா⁴பி⁴ஸங்கா²ரங் அபி⁴ஸங்கா²ஸிங் – ‘எத்தாவதா ப்³ரஹ்மா ச
ப்³ரஹ்மபரிஸா ச ப்³ரஹ்மபாரிஸஜ்ஜா ச ஸத்³த³ஞ்ச மே ஸொஸ்ஸந்தி [ஸத்³த³மேவ ஸுய்யந்தி (க॰)], ந ச மங் த³க்க²ந்தீ’தி. அந்தரஹிதோ இமங் கா³த²ங் அபா⁴ஸிங் –
‘‘ப⁴வேவாஹங் ப⁴யங் தி³ஸ்வா, ப⁴வஞ்ச விப⁴வேஸினங்;
ப⁴வங் நாபி⁴வதி³ங் கிஞ்சி, நந்தி³ஞ்ச ந உபாதி³யி’’ந்தி.
‘‘அத²
கோ², பி⁴க்க²வே, ப்³ரஹ்மா ச ப்³ரஹ்மபரிஸா ச ப்³ரஹ்மபாரிஸஜ்ஜா ச
அச்ச²ரியப்³பு⁴தசித்தஜாதா அஹேஸுங் – ‘அச்ச²ரியங் வத போ⁴, அப்³பு⁴தங் வத
போ⁴! ஸமணஸ்ஸ கோ³தமஸ்ஸ மஹித்³தி⁴கதா மஹானுபா⁴வதா, ந ச வத நோ இதோ புப்³பே³
தி³ட்டோ² வா, ஸுதோ வா, அஞ்ஞோ ஸமணோ வா ப்³ராஹ்மணோ வா
ஏவங் மஹித்³தி⁴கோ ஏவங் மஹானுபா⁴வோ யதா²யங் ஸமணோ கோ³தமோ ஸக்யபுத்தோ
ஸக்யகுலா பப்³ப³ஜிதோ. ப⁴வராமாய வத, போ⁴, பஜாய ப⁴வரதாய ப⁴வஸம்முதி³தாய
ஸமூலங் ப⁴வங் உத³ப்³ப³ஹீ’தி.
505.
‘‘அத² கோ², பி⁴க்க²வே, மாரோ பாபிமா அஞ்ஞதரங் ப்³ரஹ்மபாரிஸஜ்ஜங்
அன்வாவிஸித்வா மங் ஏதத³வோச – ‘ஸசே கோ² த்வங், மாரிஸ, ஏவங் பஜானாஸி, ஸசே
த்வங் ஏவங் அனுபு³த்³தோ⁴, மா ஸாவகே உபனேஸி, மா பப்³ப³ஜிதே; மா ஸாவகானங்
த⁴ம்மங் தே³ஸேஸி, மா பப்³ப³ஜிதானங்; மா ஸாவகேஸு கே³தி⁴மகாஸி, மா
பப்³ப³ஜிதேஸு. அஹேஸுங் கோ², பி⁴க்கு², தயா புப்³பே³ ஸமணப்³ராஹ்மணா
லோகஸ்மிங் அரஹந்தோ ஸம்மாஸம்பு³த்³தா⁴ படிஜானமானா .
தே ஸாவகே உபனேஸுங் பப்³ப³ஜிதே, ஸாவகானங் த⁴ம்மங் தே³ஸேஸுங் பப்³ப³ஜிதானங்,
ஸாவகேஸு கே³தி⁴மகங்ஸு பப்³ப³ஜிதேஸு, தே ஸாவகே உபனெத்வா பப்³ப³ஜிதே,
ஸாவகானங் த⁴ம்மங் தே³ஸெத்வா பப்³ப³ஜிதானங், ஸாவகேஸு கே³தி⁴தசித்தா
பப்³ப³ஜிதேஸு, காயஸ்ஸ பே⁴தா³ பாணுபச்சே²தா³ ஹீனே காயே பதிட்டி²தா. அஹேஸுங்
யே பன, பி⁴க்கு², தயா புப்³பே³ ஸமணப்³ராஹ்மணா லோகஸ்மிங் அரஹந்தோ
ஸம்மாஸம்பு³த்³தா⁴ படிஜானமானா. தே ந ஸாவகே உபனேஸுங் ந பப்³ப³ஜிதே, ந
ஸாவகானங் த⁴ம்மங் தே³ஸேஸுங் ந பப்³ப³ஜிதானங், ந ஸாவகேஸு
கே³தி⁴மகங்ஸு ந பப்³ப³ஜிதேஸு, தே ந ஸாவகே உபனெத்வா ந பப்³ப³ஜிதே, ந
ஸாவகானங் த⁴ம்மங் தே³ஸெத்வா ந பப்³ப³ஜிதானங், ந ஸாவகேஸு கே³தி⁴தசித்தா ந
பப்³ப³ஜிதேஸு, காயஸ்ஸ பே⁴தா³ பாணுபச்சே²தா³ பணீதே காயே பதிட்டி²தா. தங்
தாஹங், பி⁴க்கு², ஏவங் வதா³மி – இங்க⁴ த்வங், மாரிஸ, அப்பொஸ்ஸுக்கோ
தி³ட்ட²த⁴ம்மஸுக²விஹாரமனுயுத்தோ விஹரஸ்ஸு, அனக்கா²தங் குஸலஞ்ஹி, மாரிஸ, மா
பரங் ஓவதா³ஹீ’தி.
‘‘ஏவங் வுத்தே, அஹங், பி⁴க்க²வே, மாரங் பாபிமந்தங்
ஏதத³வோசங் – ‘ஜானாமி கோ² தாஹங், பாபிம, மா த்வங் மஞ்ஞித்தோ² – ந மங்
ஜானாதீ’தி. மாரோ த்வமஸி, பாபிம. ந மங் த்வங், பாபிம, ஹிதானுகம்பீ ஏவங்
வதே³ஸி; அஹிதானுகம்பீ மங் த்வங், பாபிம, ஏவங் வதே³ஸி. துய்ஹஞ்ஹி, பாபிம,
ஏவங் ஹோதி – ‘யேஸங் ஸமணோ கோ³தமோ த⁴ம்மங் தே³ஸெஸ்ஸதி, தே மே விஸயங்
உபாதிவத்திஸ்ஸந்தீ’தி. அஸம்மாஸம்பு³த்³தா⁴வ பன தே ,
பாபிம, ஸமானா ஸம்மாஸம்பு³த்³தா⁴ம்ஹாதி படிஜானிங்ஸு. அஹங் கோ² பன, பாபிம,
ஸம்மாஸம்பு³த்³தோ⁴வ ஸமானோ ஸம்மாஸம்பு³த்³தொ⁴ம்ஹீதி படிஜானாமி. தே³ஸெந்தோபி
ஹி, பாபிம, ததா²க³தோ ஸாவகானங் த⁴ம்மங் தாதி³ஸோவ அதே³ஸெந்தோபி ஹி, பாபிம,
ததா²க³தோ ஸாவகானங் த⁴ம்மங் தாதி³ஸோவ. உபனெந்தோபி ஹி, பாபிம, ததா²க³தோ ஸாவகே
தாதி³ஸோவ, அனுபனெந்தோபி ஹி, பாபிம, ததா²க³தோ ஸாவகே
தாதி³ஸோவ. தங் கிஸ்ஸ ஹேது? ததா²க³தஸ்ஸ, பாபிம, யே ஆஸவா ஸங்கிலேஸிகா
போனொப்³ப⁴விகா ஸத³ரா து³க்க²விபாகா ஆயதிங் ஜாதிஜராமரணியா – தே பஹீனா
உச்சி²ன்னமூலா தாலாவத்து²கதா அனபா⁴வங்கதா ஆயதிங்
அனுப்பாத³த⁴ம்மா. ஸெய்யதா²பி, பாபிம, தாலோ மத்த²கச்சி²ன்னோ அப⁴ப்³போ³ புன
விரூள்ஹியா; ஏவமேவ கோ², பாபிம, ததா²க³தஸ்ஸ யே ஆஸவா ஸங்கிலேஸிகா
போனொப்³ப⁴விகா ஸத³ரா து³க்க²விபாகா ஆயதிங் ஜாதிஜராமரணியா – தே பஹீனா
உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மாதி.
‘‘இதி ஹித³ங் மாரஸ்ஸ ச அனாலபனதாய ப்³ரஹ்முனோ ச அபி⁴னிமந்தனதாய, தஸ்மா இமஸ்ஸ வெய்யாகரணஸ்ஸ ப்³ரஹ்மனிமந்தனிகங்தேவ அதி⁴வசன’’ந்தி.
ப்³ரஹ்மனிமந்தனிகஸுத்தங் நிட்டி²தங் நவமங்.
10. மாரதஜ்ஜனீயஸுத்தங்
506. ஏவங்
மே ஸுதங் – ஏகங் ஸமயங் ஆயஸ்மா மஹாமொக்³க³ல்லானோ ப⁴க்³கே³ஸு விஹரதி
ஸுஸுமாரகி³ரே பே⁴ஸகளாவனே மிக³தா³யே. தேன கோ² பன ஸமயேன ஆயஸ்மா
மஹாமொக்³க³ல்லானோ அப்³போ⁴காஸே சங்கமதி. தேன கோ² பன ஸமயேன மாரோ பாபிமா
ஆயஸ்மதோ மஹாமொக்³க³ல்லானஸ்ஸ குச்சி²க³தோ ஹோதி கொட்ட²மனுபவிட்டோ². அத² கோ²
ஆயஸ்மதோ மஹாமொக்³க³ல்லானஸ்ஸ ஏதத³ஹோஸி – ‘‘கிங் நு கோ² மே குச்சி² க³ருக³ரோ
விய [க³ரு க³ரு விய (ஸீ॰ பீ॰ டீகாயங் பாட²ந்தரங்)]?
மாஸாசிதங் மஞ்ஞே’’தி. அத² கோ² ஆயஸ்மா மஹாமொக்³க³ல்லானோ சங்கமா ஓரோஹித்வா
விஹாரங் பவிஸித்வா பஞ்ஞத்தே ஆஸனே நிஸீதி³. நிஸஜ்ஜ கோ² ஆயஸ்மா
மஹாமொக்³க³ல்லானோ பச்சத்தங் யோனிஸோ மனஸாகாஸி. அத்³த³ஸா கோ² ஆயஸ்மா
மஹாமொக்³க³ல்லானோ மாரங் பாபிமந்தங் குச்சி²க³தங் கொட்ட²மனுபவிட்ட²ங்.
தி³ஸ்வான மாரங் பாபிமந்தங் ஏதத³வோச – ‘‘நிக்க²ம,
பாபிம; நிக்க²ம, பாபிம! மா ததா²க³தங் விஹேஸேஸி, மா ததா²க³தஸாவகங். மா தே
அஹோஸி தீ³க⁴ரத்தங் அஹிதாய து³க்கா²யா’’தி. அத² கோ² மாரஸ்ஸ பாபிமதோ ஏதத³ஹோஸி
– ‘‘அஜானமேவ கோ² மங் அயங் ஸமணோ அபஸ்ஸங் ஏவமாஹ – ‘நிக்க²ம, பாபிம; நிக்க²ம,
பாபிம! மா ததா²க³தங் விஹேஸேஸி, மா ததா²க³தஸாவகங். மா தே அஹோஸி தீ³க⁴ரத்தங்
அஹிதாய து³க்கா²யா’தி. யோபிஸ்ஸ ஸோ ஸத்தா² ஸோபி மங் நேவ கி²ப்பங் ஜானெய்ய,
குதோ பன [குதோ ச பன (ஸ்யா॰)] மங் அயங் ஸாவகோ ஜானிஸ்ஸதீ’’தி? அத² கோ² ஆயஸ்மா மஹாமொக்³க³ல்லானோ
மாரங் பாபிமந்தங் ஏதத³வோச – ‘‘ஏவம்பி கோ² தாஹங், பாபிம, ஜானாமி, மா த்வங்
மஞ்ஞித்தோ² – ‘ந மங் ஜானாதீ’தி. மாரோ த்வமஸி, பாபிம; துய்ஹஞ்ஹி, பாபிம,
ஏவங் ஹோதி – ‘அஜானமேவ கோ² மங் அயங் ஸமணோ அபஸ்ஸங் ஏவமாஹ – நிக்க²ம, பாபிம;
நிக்க²ம, பாபிம! மா ததா²க³தங் விஹேஸேஸி, மா ததா²க³தஸாவகங். மா தே அஹோஸி
தீ³க⁴ரத்தங் அஹிதாய து³க்கா²யாதி. யோபிஸ்ஸ ஸோ ஸத்தா² ஸோபி மங் நேவ கி²ப்பங்
ஜானெய்ய, குதோ பன மங் அயங் ஸாவகோ ஜானிஸ்ஸதீ’’’தி?
அத² கோ² மாரஸ்ஸ பாபிமதோ ஏதத³ஹோஸி – ‘‘ஜானமே கோ² மங்
அயங் ஸமணோ பஸ்ஸங் ஏவமாஹ – ‘நிக்க²ம, பாபிம; நிக்க²ம, பாபிம! மா ததா²க³தங்
விஹேஸேஸி, மா ததா²க³தஸாவகங். மா தே அஹோஸி தீ³க⁴ரத்தங் அஹிதாய
து³க்கா²யா’’’தி. அத² கோ² மாரோ பாபிமா ஆயஸ்மதோ மஹாமொக்³க³ல்லானஸ்ஸ முக²தோ உக்³க³ந்த்வா பச்சக்³க³ளே அட்டா²ஸி.
507. அத்³த³ஸா
கோ² ஆயஸ்மா மஹாமொக்³க³ல்லானோ மாரங் பாபிமந்தங் பச்சக்³க³ளே டி²தங்;
தி³ஸ்வான மாரங் பாபிமந்தங் ஏதத³வோச – ‘எத்தா²பி கோ² தாஹங், பாபிம, பஸ்ஸாமி;
மா த்வங் மஞ்ஞித்தோ² ‘‘ந மங் பஸ்ஸதீ’’தி. ஏஸோ த்வங், பாபிம, பச்சக்³க³ளே
டி²தோ. பூ⁴தபுப்³பா³ஹங், பாபிம, தூ³ஸீ நாம மாரோ அஹோஸிங், தஸ்ஸ மே காளீ நாம
ப⁴கி³னீ. தஸ்ஸா த்வங் புத்தோ. ஸோ மே த்வங் பா⁴கி³னெய்யோ அஹோஸி. தேன கோ² பன,
பாபிம, ஸமயேன ககுஸந்தோ⁴ ப⁴க³வா அரஹங் ஸம்மாஸம்பு³த்³தோ⁴ லோகே உப்பன்னோ
ஹோதி. ககுஸந்த⁴ஸ்ஸ கோ² பன, பாபிம, ப⁴க³வதோ அரஹதோ ஸம்மாஸம்பு³த்³த⁴ஸ்ஸ விது⁴ரஸஞ்ஜீவங் நாம ஸாவகயுக³ங் அஹோஸி அக்³க³ங் ப⁴த்³த³யுக³ங். யாவதா கோ² பன, பாபிம, ககுஸந்த⁴ஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ ஸாவகா. தேஸு ந ச கோசி ஆயஸ்மதா விது⁴ரேன ஸமஸமோ ஹோதி யதி³த³ங் த⁴ம்மதே³ஸனாய. இமினா கோ² ஏவங் [ஏதங் (ஸீ॰ ஸ்யா॰ பீ॰)], பாபிம, பரியாயேன ஆயஸ்மதோ விது⁴ரஸ்ஸ விது⁴ரோதேவ [விது⁴ரஸ்ஸ விது⁴ரோ விது⁴ரொத்வேவ (ஸீ॰ ஸ்யா॰ கங்॰ பீ॰)] ஸமஞ்ஞா உத³பாதி³.
‘‘ஆயஸ்மா பன, பாபிம, ஸஞ்ஜீவோ அரஞ்ஞக³தோபி
ருக்க²மூலக³தோபி ஸுஞ்ஞாகா³ரக³தோபி அப்பகஸிரேனேவ ஸஞ்ஞாவேத³யிதனிரோத⁴ங்
ஸமாபஜ்ஜதி. பூ⁴தபுப்³ப³ங், பாபிம, ஆயஸ்மா ஸஞ்ஜீவோ அஞ்ஞதரஸ்மிங் ருக்க²மூலே
ஸஞ்ஞாவேத³யிதனிரோத⁴ங் ஸமாபன்னோ நிஸின்னோ ஹோதி. அத்³த³ஸங்ஸு கோ², பாபிம,
கோ³பாலகா பஸுபாலகா கஸ்ஸகா பதா²வினோ ஆயஸ்மந்தங் ஸஞ்ஜீவங் அஞ்ஞதரஸ்மிங்
ருக்க²மூலே ஸஞ்ஞாவேத³யிதனிரோத⁴ங் ஸமாபன்னங் நிஸின்னங்; தி³ஸ்வான தேஸங்
ஏதத³ஹோஸி – ‘அச்ச²ரியங் வத, போ⁴, அப்³பு⁴தங் வத, போ⁴! அயங் ஸமணோ நிஸின்னகோவ
காலங்கதோ! ஹந்த³ நங் த³ஹாமா’தி. அத² கோ² தே, பாபிம, கோ³பாலகா பஸுபாலகா
கஸ்ஸகா பதா²வினோ திணஞ்ச கட்ட²ஞ்ச கோ³மயஞ்ச ஸங்கட்³டி⁴த்வா ஆயஸ்மதோ
ஸஞ்ஜீவஸ்ஸ காயே உபசினித்வா அக்³கி³ங் த³த்வா பக்கமிங்ஸு. அத² கோ², பாபிம,
ஆயஸ்மா ஸஞ்ஜீவோ தஸ்ஸா ரத்தியா அச்சயேன தாய ஸமாபத்தியா வுட்ட²ஹித்வா சீவரானி
பப்போ²டெத்வா புப்³ப³ண்ஹஸமயங் நிவாஸெத்வா பத்தசீவரமாதா³ய கா³மங் பிண்டா³ய
பாவிஸி. அத்³த³ஸங்ஸு கோ² தே, பாபிம, கோ³பாலகா பஸுபாலகா கஸ்ஸகா பதா²வினோ
ஆயஸ்மந்தங் ஸஞ்ஜீவங் பிண்டா³ய சரந்தங்; தி³ஸ்வான நேஸங் ஏதத³ஹோஸி – ‘அச்ச²ரியங் வத, போ⁴, அப்³பு⁴தங் வத, போ⁴! அயங் ஸமணோ நிஸின்னகோவ காலங்கதோ, ஸ்வாயங் படிஸஞ்ஜீவிதோ’தி . இமினா கோ² ஏவங், பாபிம, பரியாயேன ஆயஸ்மதோ ஸஞ்ஜீவஸ்ஸ ஸஞ்ஜீவோதேவ [ஸஞ்ஜீவோ ஸஞ்ஜீவொத்வேவ (ஸீ॰ ஸ்யா॰ கங்॰ பீ॰)] ஸமஞ்ஞா உத³பாதி³.
508.
‘‘அத² கோ², பாபிம, தூ³ஸிஸ்ஸ மாரஸ்ஸ ஏதத³ஹோஸி – ‘இமேஸங் கோ² அஹங்
பி⁴க்கூ²னங் ஸீலவந்தானங் கல்யாணத⁴ம்மானங் நேவ ஜானாமி ஆக³திங் வா க³திங் வா.
யங்னூனாஹங் ப்³ராஹ்மணக³ஹபதிகே அன்வாவிஸெய்யங் –
ஏத², தும்ஹே பி⁴க்கூ² ஸீலவந்தே கல்யாணத⁴ம்மே அக்கோஸத² பரிபா⁴ஸத² ரோஸேத²
விஹேஸேத². அப்பேவ நாம தும்ஹேஹி அக்கோஸியமானானங் பரிபா⁴ஸியமானானங்
ரோஸியமானானங் விஹேஸியமானானங் ஸியா சித்தஸ்ஸ அஞ்ஞத²த்தங், யதா² தங் தூ³ஸீ
மாரோ லபே⁴த² ஓதார’ந்தி. அத² கோ² தே, பாபிம, தூ³ஸீ மாரோ ப்³ராஹ்மணக³ஹபதிகே
அன்வாவிஸி – ‘ஏத², தும்ஹே பி⁴க்கூ² ஸீலவந்தே கல்யாணத⁴ம்மே அக்கோஸத²
பரிபா⁴ஸத² ரோஸேத² விஹேஸேத². அப்பேவ நாம தும்ஹேஹி அக்கோஸியமானானங்
பரிபா⁴ஸியமானானங் ரோஸியமானானங் விஹேஸியமானானங் ஸியா சித்தஸ்ஸ அஞ்ஞத²த்தங்,
யதா² தங் தூ³ஸீ மாரோ லபே⁴த² ஓதார’ந்தி.
‘‘அத² கோ² தே, பாபிம, ப்³ராஹ்மணக³ஹபதிகா
அன்வாவிஸிட்டா² தூ³ஸினா மாரேன பி⁴க்கூ² ஸீலவந்தே கல்யாணத⁴ம்மே அக்கோஸந்தி
பரிபா⁴ஸந்தி ரோஸெந்தி விஹேஸெந்தி – ‘இமே பன முண்ட³கா ஸமணகா இப்³பா⁴ கிண்ஹா [கண்ஹா (ஸ்யா॰ கங்॰ க॰)]
ப³ந்து⁴பாதா³பச்சா ‘‘ஜா²யினொஸ்மா ஜா²யினொஸ்மா’’தி பத்தக்க²ந்தா⁴ அதோ⁴முகா²
மது⁴ரகஜாதா ஜா²யந்தி பஜ்ஜா²யந்தி நிஜ்ஜா²யந்தி அபஜ்ஜா²யந்தி. ஸெய்யதா²பி
நாம உலூகோ ருக்க²ஸாகா²யங் மூஸிகங் மக்³க³யமானோ
ஜா²யதி பஜ்ஜா²யதி நிஜ்ஜா²யதி அபஜ்ஜா²யதி; ஏவமேவிமே முண்ட³கா ஸமணகா இப்³பா⁴
கிண்ஹா ப³ந்து⁴பாதா³பச்சா ‘‘ஜா²யினொஸ்மா ஜா²யினொஸ்மா’’தி பத்தக்க²ந்தா⁴
அதோ⁴முகா² மது⁴ரகஜாதா ஜா²யந்தி பஜ்ஜா²யந்தி நிஜ்ஜா²யந்தி அபஜ்ஜா²யந்தி.
ஸெய்யதா²பி நாம கொத்து² நதீ³தீரே மச்சே² மக்³க³யமானோ ஜா²யதி பஜ்ஜா²யதி
நிஜ்ஜா²யதி அபஜ்ஜா²யதி; ஏவமேவிமே முண்ட³கா ஸமணகா இப்³பா⁴ கிண்ஹா
ப³ந்து⁴பாதா³பச்சா ‘‘ஜா²யினொஸ்மா ஜா²யினொஸ்மா’’தி பத்தக்க²ந்தா⁴ அதோ⁴முகா²
மது⁴ரகஜாதா ஜா²யந்தி பஜ்ஜா²யந்தி நிஜ்ஜா²யந்தி அபஜ்ஜா²யந்தி. ஸெய்யதா²பி
நாம பி³ளாரோ ஸந்தி⁴ஸமலஸங்கடீரே மூஸிகங் மக்³க³யமானோ ஜா²யதி பஜ்ஜா²யதி
நிஜ்ஜா²யதி அபஜ்ஜா²யதி; ஏவமேவிமே முண்ட³கா ஸமணகா இப்³பா⁴ கிண்ஹா
ப³ந்து⁴பாதா³பச்சா ‘‘ஜா²யினொஸ்மா ஜா²யினொஸ்மா’’தி பத்தக்க²ந்தா⁴ அதோ⁴முகா²
மது⁴ரகஜாதா ஜா²யந்தி பஜ்ஜா²யந்தி நிஜ்ஜா²யந்தி அபஜ்ஜா²யந்தி. ஸெய்யதா²பி
நாம க³த்³ரபோ⁴ வஹச்சி²ன்னோ ஸந்தி⁴ஸமலஸங்கடீரே ஜா²யதி பஜ்ஜா²யதி நிஜ்ஜா²யதி
அபஜ்ஜா²யதி, ஏவமேவிமே முண்ட³கா ஸமணகா இப்³பா⁴ கிண்ஹா ப³ந்து⁴பாதா³பச்சா
‘‘ஜா²யினொஸ்மா ஜா²யினொஸ்மா’’தி பத்தக்க²ந்தா⁴ அதோ⁴முகா² மது⁴ரகஜாதா
ஜா²யந்தி பஜ்ஜா²யந்தி நிஜ்ஜா²யந்தி அபஜ்ஜா²யந்தீ’’தி.
‘‘யே கோ² பன, பாபிம, தேன ஸமயேன மனுஸ்ஸா காலங்கரொந்தி
யேபு⁴ய்யேன காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங்
உபபஜ்ஜந்தி.
509. ‘‘அத² கோ², பாபிம, ககுஸந்தோ⁴ ப⁴க³வா அரஹங் ஸம்மாஸம்பு³த்³தோ⁴ பி⁴க்கூ²
ஆமந்தேஸி – ‘அன்வாவிட்டா² கோ², பி⁴க்க²வே, ப்³ராஹ்மணக³ஹபதிகா தூ³ஸினா
மாரேன – ஏத², தும்ஹே பி⁴க்கூ² ஸீலவந்தே கல்யாணத⁴ம்மே அக்கோஸத² பரிபா⁴ஸத²
ரோஸேத² விஹேஸேத², அப்பேவ நாம தும்ஹேஹி அக்கோஸியமானானங் பரிபா⁴ஸியமானானங்
ரோஸியமானானங் விஹேஸியமானானங் ஸியா சித்தஸ்ஸ அஞ்ஞத²த்தங், யதா² தங் தூ³ஸீ
மாரோ லபே⁴த² ஓதார’ந்தி. ஏத², தும்ஹே, பி⁴க்க²வே, மெத்தாஸஹக³தேன சேதஸா ஏகங்
தி³ஸங் ப²ரித்வா விஹரத², ததா² து³தியங், ததா² ததியங், ததா² சதுத்த²ங். இதி
உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங்
மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாப³ஜ்ஜே²ன
ப²ரித்வா விஹரத². கருணாஸஹக³தேன சேதஸா…பே॰… முதி³தாஸஹக³தேன சேதஸா…பே॰…
உபெக்கா²ஸஹக³தேன சேதஸா ஏகங் தி³ஸங் ப²ரித்வா விஹரத², ததா² து³தியங், ததா²
ததியங், ததா² சதுத்த²ங். இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய
ஸப்³பா³வந்தங் லோகங் உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன
அவேரேன அப்³யாப³ஜ்ஜே²ன ப²ரித்வா விஹரதா²’தி.
‘‘அத² கோ² தே, பாபிம, பி⁴க்கூ² ககுஸந்தே⁴ன ப⁴க³வதா
அரஹதா ஸம்மாஸம்பு³த்³தே⁴ன ஏவங் ஓவதி³யமானா ஏவங் அனுஸாஸியமானா அரஞ்ஞக³தாபி
ருக்க²மூலக³தாபி ஸுஞ்ஞாகா³ரக³தாபி மெத்தாஸஹக³தேன சேதஸா ஏகங் தி³ஸங்
ப²ரித்வா விஹரிங்ஸு, ததா² து³தியங், ததா² ததியங், ததா² சதுத்த²ங். இதி
உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங்
மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாப³ஜ்ஜே²ன
ப²ரித்வா விஹரிங்ஸு. கருணாஸஹக³தேன சேதஸா…பே॰… முதி³தாஸஹக³தேன சேதஸா…பே॰…
உபெக்கா²ஸஹக³தேன சேதஸா ஏகங் தி³ஸங் ப²ரித்வா விஹரிங்ஸு, ததா² து³தியங்,
ததா² ததியங், ததா² சதுத்த²ங். இதி உத்³த⁴மதோ⁴ திரியங் ஸப்³ப³தி⁴
ஸப்³ப³த்ததாய ஸப்³பா³வந்தங் லோகங் உபெக்கா²ஸஹக³தேன சேதஸா விபுலேன
மஹக்³க³தேன அப்பமாணேன அவேரேன அப்³யாப³ஜ்ஜே²ன ப²ரித்வா விஹரிங்ஸு .
510.
‘‘அத² கோ², பாபிம, தூ³ஸிஸ்ஸ மாரஸ்ஸ ஏதத³ஹோஸி – ‘ஏவம்பி கோ² அஹங் கரொந்தோ
இமேஸங் பி⁴க்கூ²னங் ஸீலவந்தானங் கல்யாணத⁴ம்மானங் நேவ ஜானாமி ஆக³திங் வா
க³திங் வா, யங்னூனாஹங் ப்³ராஹ்மணக³ஹபதிகே அன்வாவிஸெய்யங் – ஏத², தும்ஹே
பி⁴க்கூ² ஸீலவந்தே கல்யாணத⁴ம்மே ஸக்கரோத² க³ருங் கரோத² மானேத² பூஜேத² ,
அப்பேவ நாம தும்ஹேஹி ஸக்கரியமானானங் க³ருகரியமானானங் மானியமானானங்
பூஜியமானானங் ஸியா சித்தஸ்ஸ அஞ்ஞத²த்தங், யதா² தங் தூ³ஸீ மாரோ லபே⁴த²
ஓதார’ந்தி . அத² கோ² தே, பாபிம, தூ³ஸீ மாரோ
ப்³ராஹ்மணக³ஹபதிகே அன்வாவிஸி – ‘ஏத², தும்ஹே பி⁴க்கூ² ஸீலவந்தே
கல்யாணத⁴ம்மே ஸக்கரோத² க³ருங் கரோத² மானேத² பூஜேத², அப்பேவ நாம தும்ஹேஹி
ஸக்கரியமானானங் க³ருகரியமானானங் மானியமானானங் பூஜியமானானங் ஸியா சித்தஸ்ஸ
அஞ்ஞத²த்தங், யதா² தங் தூ³ஸீ மாரோ லபே⁴த² ஓதார’ந்தி. அத² கோ² தே, பாபிம,
ப்³ராஹ்மணக³ஹபதிகா அன்வாவிட்டா² தூ³ஸினா மாரேன பி⁴க்கூ² ஸீலவந்தே
கல்யாணத⁴ம்மே ஸக்கரொந்தி க³ருங் கரொந்தி மானெந்தி பூஜெந்தி.
‘‘யே கோ² பன, பாபிம, தேன ஸமயேன மனுஸ்ஸா காலங்கரொந்தி யேபு⁴ய்யேன காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தி.
511. ‘‘அத²
கோ², பாபிம, ககுஸந்தோ⁴ ப⁴க³வா அரஹங் ஸம்மாஸம்பு³த்³தோ⁴ பி⁴க்கூ² ஆமந்தேஸி –
‘அன்வாவிட்டா² கோ², பி⁴க்க²வே, ப்³ராஹ்மணக³ஹபதிகா தூ³ஸினா மாரேன – ஏத²,
தும்ஹே பி⁴க்கூ² ஸீலவந்தே கல்யாணத⁴ம்மே ஸக்கரோத² க³ருங் கரோத² மானேத²
பூஜேத², அப்பேவ நாம தும்ஹேஹி ஸக்கரியமானானங் க³ருகரியமானானங் மானியமானானங்
பூஜியமானானங் ஸியா சித்தஸ்ஸ அஞ்ஞத²த்தங், யதா² தங் தூ³ஸீ மாரோ லபே⁴த²
ஓதாரந்தி. ஏத², தும்ஹே, பி⁴க்க²வே, அஸுபா⁴னுபஸ்ஸினோ காயே விஹரத², ஆஹாரே
படிகூலஸஞ்ஞினோ, ஸப்³ப³லோகே அனபி⁴ரதிஸஞ்ஞினோ [அனபி⁴ரதஸஞ்ஞீனோ (ஸீ॰ ஸ்யா॰ கங்॰ பீ॰)], ஸப்³ப³ஸங்கா²ரேஸு அனிச்சானுபஸ்ஸினோ’தி.
‘‘அத² கோ² தே, பாபிம, பி⁴க்கூ² ககுஸந்தே⁴ன ப⁴க³வதா
அரஹதா ஸம்மாஸம்பு³த்³தே⁴ன ஏவங் ஓவதி³யமானா ஏவங் அனுஸாஸியமானா அரஞ்ஞக³தாபி
ருக்க²மூலக³தாபி ஸுஞ்ஞாகா³ரக³தாபி அஸுபா⁴னுபஸ்ஸினோ காயே விஹரிங்ஸு, ஆஹாரே
படிகூலஸஞ்ஞினோ, ஸப்³ப³லோகே அனபி⁴ரதிஸஞ்ஞினோ, ஸப்³ப³ஸங்கா²ரேஸு
அனிச்சானுபஸ்ஸினோ.
512.
‘‘அத² கோ², பாபிம, ககுஸந்தோ⁴ ப⁴க³வா அரஹங் ஸம்மாஸம்பு³த்³தோ⁴
புப்³ப³ண்ஹஸமயங் நிவாஸெத்வா பத்தசீவரமாதா³ய ஆயஸ்மதா விது⁴ரேன பச்சா²ஸமணேன
கா³மங் பிண்டா³ய பாவிஸி. அத² கோ², பாபிம, தூ³ஸீ மாரோ அஞ்ஞதரங் குமாரகங் [குமாரங் (ஸீ॰ பீ॰)] அன்வாவிஸித்வா ஸக்க²ரங் க³ஹெத்வா ஆயஸ்மதோ விது⁴ரஸ்ஸ ஸீஸே பஹாரமதா³ஸி; ஸீஸங் வோபி⁴ந்தி³ [ஸீஸங் தே பி⁴ந்தி³ஸ்ஸாமீதி (க॰)]. அத² கோ², பாபிம, ஆயஸ்மா விது⁴ரோ பி⁴ன்னேன ஸீஸேன லோஹிதேன க³ளந்தேன ககுஸந்த⁴ங்யேவ ப⁴க³வந்தங் அரஹந்தங் ஸம்மாஸம்பு³த்³த⁴ங் பிட்டி²தோ பிட்டி²தோ அனுப³ந்தி⁴. அத² கோ² , பாபிம, ககுஸந்தோ⁴ ப⁴க³வா அரஹங் ஸம்மாஸம்பு³த்³தோ⁴ நாகா³பலோகிதங் அபலோகேஸி – ‘ந வாயங் தூ³ஸீ மாரோ மத்தமஞ்ஞாஸீ’தி. ஸஹாபலோகனாய ச பன, பாபிம, தூ³ஸீ மாரோ தம்ஹா ச டா²னா சவி மஹானிரயஞ்ச உபபஜ்ஜி.
‘‘தஸ்ஸ கோ² பன, பாபிம, மஹானிரயஸ்ஸ தயோ நாமதெ⁴ய்யா
ஹொந்தி – ச²ப²ஸ்ஸாயதனிகோ இதிபி, ஸங்குஸமாஹதோ இதிபி, பச்சத்தவேத³னியோ இதிபி.
அத² கோ² மங், பாபிம, நிரயபாலா உபஸங்கமித்வா ஏதத³வோசுங் – யதா³ கோ² தே [யதோ தே (க॰)],
மாரிஸ, ஸங்குனா ஸங்கு ஹத³யே ஸமாக³ச்செ²ய்ய. அத² நங் த்வங் ஜானெய்யாஸி –
‘வஸ்ஸஸஹஸ்ஸங் மே நிரயே பச்சமானஸ்ஸா’தி. ஸோ கோ² அஹங், பாபிம, ப³ஹூனி வஸ்ஸானி
ப³ஹூனி வஸ்ஸஸதானி ப³ஹூனி வஸ்ஸஸஹஸ்ஸானி தஸ்மிங் மஹானிரயே அபச்சிங்.
த³ஸவஸ்ஸஸஹஸ்ஸானி தஸ்ஸேவ மஹானிரயஸ்ஸ உஸ்ஸதே³ அபச்சிங் வுட்டா²னிமங் நாம
வேத³னங் வேதி³யமானோ. தஸ்ஸ மய்ஹங், பாபிம, ஏவரூபோ காயோ ஹோதி, ஸெய்யதா²பி
மனுஸ்ஸஸ்ஸ. ஏவரூபங் ஸீஸங் ஹோதி, ஸெய்யதா²பி மச்ச²ஸ்ஸ.
‘‘கீதி³ஸோ நிரயோ ஆஸி, யத்த² தூ³ஸீ அபச்சத²;
விது⁴ரங் ஸாவகமாஸஜ்ஜ, ககுஸந்த⁴ஞ்ச ப்³ராஹ்மணங்.
‘‘ஸதங் ஆஸி அயோஸங்கூ, ஸப்³பே³ பச்சத்தவேத³னா;
ஈதி³ஸோ நிரயோ ஆஸி, யத்த² தூ³ஸீ அபச்சத²;
விது⁴ரங் ஸாவகமாஸஜ்ஜ, ககுஸந்த⁴ஞ்ச ப்³ராஹ்மணங்.
‘‘யோ ஏதமபி⁴ஜானாதி, பி⁴க்கு² பு³த்³த⁴ஸ்ஸ ஸாவகோ;
தாதி³ஸங் பி⁴க்கு²மாஸஜ்ஜ, கண்ஹ து³க்க²ங் நிக³ச்ச²ஸி.
‘‘மஜ்ஜே² ஸரஸ்ஸ திட்ட²ந்தி, விமானா கப்பட்டா²யினோ;
வேளுரியவண்ணா ருசிரா, அச்சிமந்தோ பப⁴ஸ்ஸரா;
அச்ச²ரா தத்த² நச்சந்தி, புது² நானத்தவண்ணியோ.
‘‘யோ ஏதமபி⁴ஜானாதி, பி⁴க்கு² பு³த்³த⁴ஸ்ஸ ஸாவகோ;
தாதி³ஸங் பி⁴க்கு²மாஸஜ்ஜ, கண்ஹ து³க்க²ங் நிக³ச்ச²ஸி.
‘‘யோ வே பு³த்³தே⁴ன சோதி³தோ, பி⁴க்கு² ஸங்க⁴ஸ்ஸ பெக்க²தோ;
மிகா³ரமாதுபாஸாத³ங், பாத³ங்கு³ட்டே²ன கம்பயி.
‘‘யோ ஏதமபி⁴ஜானாதி, பி⁴க்கு² பு³த்³த⁴ஸ்ஸ ஸாவகோ;
தாதி³ஸங் பி⁴க்கு²மாஸஜ்ஜ, கண்ஹ து³க்க²ங் நிக³ச்ச²ஸி.
‘‘யோ வேஜயந்தங் பாஸாத³ங், பாத³ங்கு³ட்டே²ன கம்பயி;
இத்³தி⁴ப³லேனுபத்த²த்³தோ⁴, ஸங்வேஜேஸி ச தே³வதா.
‘‘யோ ஏதமபி⁴ஜானாதி, பி⁴க்கு² பு³த்³த⁴ஸ்ஸ ஸாவகோ;
தாதி³ஸங் பி⁴க்கு²மாஸஜ்ஜ, கண்ஹ து³க்க²ங் நிக³ச்ச²ஸி.
‘‘யோ வேஜயந்தபாஸாதே³, ஸக்கங் ஸோ பரிபுச்ச²தி;
அபி வாஸவ ஜானாஸி, தண்ஹாக்க²யவிமுத்தியோ;
தஸ்ஸ ஸக்கோ வியாகாஸி, பஞ்ஹங் புட்டோ² யதா²தத²ங்.
‘‘யோ ஏதமபி⁴ஜானாதி, பி⁴க்கு² பு³த்³த⁴ஸ்ஸ ஸாவகோ;
தாதி³ஸங் பி⁴க்கு²மாஸஜ்ஜ, கண்ஹ து³க்க²ங் நிக³ச்ச²ஸி.
‘‘யோ ப்³ரஹ்மங் பரிபுச்ச²தி, ஸுத⁴ம்மாயாபி⁴தோ ஸப⁴ங்;
அஜ்ஜாபி த்யாவுஸோ தி³ட்டி², யா தே தி³ட்டி² புரே அஹு;
பஸ்ஸஸி வீதிவத்தந்தங், ப்³ரஹ்மலோகே பப⁴ஸ்ஸரங்.
‘‘தஸ்ஸ ப்³ரஹ்மா வியாகாஸி, அனுபுப்³ப³ங் யதா²தத²ங்;
ந மே மாரிஸ ஸா தி³ட்டி², யா மே தி³ட்டி² புரே அஹு.
‘‘பஸ்ஸாமி வீதிவத்தந்தங், ப்³ரஹ்மலோகே பப⁴ஸ்ஸரங்;
ஸோஹங் அஜ்ஜ கத²ங் வஜ்ஜங், அஹங் நிச்சொம்ஹி ஸஸ்ஸதோ.
‘‘யோ ஏதமபி⁴ஜானாதி, பி⁴க்கு² பு³த்³த⁴ஸ்ஸ ஸாவகோ;
தாதி³ஸங் பி⁴க்கு²மாஸஜ்ஜ, கண்ஹ து³க்க²ங் நிக³ச்ச²ஸி.
‘‘யோ மஹாமேருனோ கூடங், விமொக்கே²ன அப²ஸ்ஸயி;
வனங் புப்³ப³விதே³ஹானங், யே ச பூ⁴மிஸயா நரா.
‘‘யோ ஏதமபி⁴ஜானாதி, பி⁴க்கு² பு³த்³த⁴ஸ்ஸ ஸாவகோ;
தாதி³ஸங் பி⁴க்கு²மாஸஜ்ஜ, கண்ஹ து³க்க²ங் நிக³ச்ச²ஸி.
‘‘ந வே அக்³கி³ சேதயதி [வேட²யதி (ஸீ॰)], ‘அஹங் பா³லங் ட³ஹாமீ’தி;
பா³லோ ச ஜலிதங் அக்³கி³ங், ஆஸஜ்ஜ நங் ஸ ட³ய்ஹதி.
‘‘ஏவமேவ துவங் மார, ஆஸஜ்ஜ நங் ததா²க³தங்;
ஸயங் ட³ஹிஸ்ஸஸி அத்தானங், பா³லோ அக்³கி³ங்வ ஸங்பு²ஸங்.
‘‘அபுஞ்ஞங் பஸவீ மாரோ, ஆஸஜ்ஜ நங் ததா²க³தங்;
கின்னு மஞ்ஞஸி பாபிம, ந மே பாபங் விபச்சதி.
‘‘கரோதோ சீயதி பாபங், சிரரத்தாய அந்தக;
மார நிப்³பி³ந்த³ பு³த்³த⁴ம்ஹா, ஆஸங் மாகாஸி பி⁴க்கு²ஸு.
‘‘இதி மாரங் அதஜ்ஜேஸி, பி⁴க்கு² பே⁴ஸகளாவனே;
ததோ ஸோ து³ம்மனோ யக்கோ², நதத்தே²வந்தரதா⁴யதா²’’தி.
மாரதஜ்ஜனீயஸுத்தங் நிட்டி²தங் த³ஸமங்.
சூளயமகவக்³கோ³ நிட்டி²தோ பஞ்சமோ.
ஸாலெய்ய வேரஞ்ஜது³வே ச துட்டி², சூளமஹாத⁴ம்மஸமாதா³னஞ்ச;
வீமங்ஸகா கோஸம்பி³ ச ப்³ராஹ்மணோ, தூ³ஸீ ச மாரோ த³ஸமோ ச வக்³கோ³.
ஸாலெய்யவக்³கோ³ நிட்டி²தோ பஞ்சமோ.
இத³ங் வக்³கா³னமுத்³தா³னங் –
மூலபரியாயோ சேவ, ஸீஹனாதோ³ ச உத்தமோ;
ககசோ சேவ கோ³ஸிங்கோ³, ஸாலெய்யோ ச இமே பஞ்ச.
மூலபண்ணாஸகங் ஸமத்தங்.
ஸுத்தபிடக-Part-38-தமிழில் திரபிடக மூன்று தொகுப்புகள்TIPITAKA--38.4. மஹாயமகவக்கோ-1. சூளகோஸிங்கஸுத்தங்-from FREE ONLINE eNālāndā Research and
Practice UNIVERSITY through http://sarvajan.ambedkar.org
4. மஹாயமகவக்கோ
1. சூளகோஸிங்கஸுத்தங்
325. ஏவங் மே ஸுதங் – ஏகங் ஸமயங் ப⁴க³வா நாதிகே [நாதி³கே (ஸீ॰ ஸ்யா॰ பீ॰), ஞாதிகே (க॰)] விஹரதி கி³ஞ்ஜகாவஸதே². தேன கோ² பன ஸமயேன ஆயஸ்மா ச அனுருத்³தோ⁴ ஆயஸ்மா ச நந்தி³யோ ஆயஸ்மா ச கிமிலோ [கிம்பி³லோ (ஸீ॰ பீ॰ க॰)]
கோ³ஸிங்க³ஸாலவனதா³யே விஹரந்தி. அத² கோ² ப⁴க³வா ஸாயன்ஹஸமயங் படிஸல்லானா
வுட்டி²தோ யேன கோ³ஸிங்க³ஸாலவனதா³யோ தேனுபஸங்கமி. அத்³த³ஸா கோ² தா³யபாலோ
ப⁴க³வந்தங் தூ³ரதோவ ஆக³ச்ச²ந்தங். தி³ஸ்வான ப⁴க³வந்தங் ஏதத³வோச – ‘‘மா,
ஸமண, ஏதங் தா³யங் பாவிஸி. ஸந்தெத்த² தயோ குலபுத்தா அத்தகாமரூபா விஹரந்தி.
மா தேஸங் அபா²ஸுமகாஸீ’’தி.
அஸ்ஸோஸி கோ² ஆயஸ்மா அனுருத்³தோ⁴ தா³யபாலஸ்ஸ ப⁴க³வதா
ஸத்³தி⁴ங் மந்தயமானஸ்ஸ. ஸுத்வான தா³யபாலங் ஏதத³வோச – ‘‘மா, ஆவுஸோ தா³யபால,
ப⁴க³வந்தங் வாரேஸி. ஸத்தா² நோ ப⁴க³வா அனுப்பத்தோ’’தி. அத² கோ² ஆயஸ்மா
அனுருத்³தோ⁴ யேனாயஸ்மா ச நந்தி³யோ ஆயஸ்மா ச கிமிலோ தேனுபஸங்கமி;
உபஸங்கமித்வா ஆயஸ்மந்தஞ்ச நந்தி³யங் ஆயஸ்மந்தஞ்ச கிமிலங் ஏதத³வோச –
‘‘அபி⁴க்கமதா²யஸ்மந்தோ, அபி⁴க்கமதா²யஸ்மந்தோ, ஸத்தா² நோ ப⁴க³வா அனுப்பத்தோ’’தி. அத²
கோ² ஆயஸ்மா ச அனுருத்³தோ⁴ ஆயஸ்மா ச நந்தி³யோ ஆயஸ்மா ச கிமிலோ ப⁴க³வந்தங்
பச்சுக்³க³ந்த்வா – ஏகோ ப⁴க³வதோ பத்தசீவரங் படிக்³க³ஹேஸி, ஏகோ ஆஸனங்
பஞ்ஞபேஸி, ஏகோ பாதோ³த³கங் உபட்டா²பேஸி. நிஸீதி³ ப⁴க³வா பஞ்ஞத்தே ஆஸனே.
நிஸஜ்ஜ கோ² ப⁴க³வா பாதே³ பக்கா²லேஸி. தேபி கோ² ஆயஸ்மந்தோ ப⁴க³வந்தங்
அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னங் கோ² ஆயஸ்மந்தங்
அனுருத்³த⁴ங் ப⁴க³வா ஏதத³வோச –
326. ‘‘கச்சி வோ, அனுருத்³தா⁴, க²மனீயங், கச்சி யாபனீயங், கச்சி பிண்ட³கேன ந கிலமதா²’’தி ?
‘‘க²மனீயங், ப⁴க³வா, யாபனீயங், ப⁴க³வா; ந ச மயங், ப⁴ந்தே, பிண்ட³கேன
கிலமாமா’’தி. ‘‘கச்சி பன வோ, அனுருத்³தா⁴, ஸமக்³கா³ ஸம்மோத³மானா அவிவத³மானா
கீ²ரோத³கீபூ⁴தா அஞ்ஞமஞ்ஞங் பியசக்கூ²ஹி ஸம்பஸ்ஸந்தா விஹரதா²’’தி? ‘‘தக்³க⁴
மயங் , ப⁴ந்தே, ஸமக்³கா³ ஸம்மோத³மானா அவிவத³மானா
கீ²ரோத³கீபூ⁴தா அஞ்ஞமஞ்ஞங் பியசக்கூ²ஹி ஸம்பஸ்ஸந்தா விஹராமா’’தி. ‘‘யதா²
கத²ங் பன தும்ஹே, அனுருத்³தா⁴, ஸமக்³கா³ ஸம்மோத³மானா அவிவத³மானா
கீ²ரோத³கீபூ⁴தா அஞ்ஞமஞ்ஞங் பியசக்கூ²ஹி ஸம்பஸ்ஸந்தா விஹரதா²’’தி? ‘‘இத⁴
மய்ஹங், ப⁴ந்தே, ஏவங் ஹோதி – ‘லாபா⁴ வத மே, ஸுலத்³த⁴ங் வத மே, யோஹங்
ஏவரூபேஹி ஸப்³ரஹ்மசாரீஹி ஸத்³தி⁴ங் விஹராமீ’தி. தஸ்ஸ மய்ஹங், ப⁴ந்தே, இமேஸு
ஆயஸ்மந்தேஸு மெத்தங் காயகம்மங் பச்சுபட்டி²தங் ஆவி சேவ ரஹோ ச; மெத்தங்
வசீகம்மங் பச்சுபட்டி²தங் ஆவி சேவ ரஹோ ச; மெத்தங் மனோகம்மங் பச்சுபட்டி²தங்
ஆவி சேவ ரஹோ ச. தஸ்ஸ மய்ஹங், ப⁴ந்தே, ஏவங் ஹோதி – ‘யங்னூனாஹங் ஸகங்
சித்தங் நிக்கி²பித்வா இமேஸங்யேவ ஆயஸ்மந்தானங்
சித்தஸ்ஸ வஸேன வத்தெய்ய’ந்தி. ஸோ கோ² அஹங், ப⁴ந்தே, ஸகங் சித்தங்
நிக்கி²பித்வா இமேஸங்யேவ ஆயஸ்மந்தானங் சித்தஸ்ஸ வஸேன வத்தாமி. நானா ஹி கோ²
நோ, ப⁴ந்தே, காயா ஏகஞ்ச பன மஞ்ஞே சித்த’’ந்தி.
ஆயஸ்மாபி கோ² நந்தி³யோ…பே॰… ஆயஸ்மாபி கோ² கிமிலோ
ப⁴க³வந்தங் ஏதத³வோச – ‘‘மய்ஹம்பி, ப⁴ந்தே, ஏவங் ஹோதி – ‘லாபா⁴ வத மே,
ஸுலத்³த⁴ங் வத மே, யோஹங் ஏவரூபேஹி ஸப்³ரஹ்மசாரீஹி ஸத்³தி⁴ங் விஹராமீ’தி.
தஸ்ஸ மய்ஹங், ப⁴ந்தே, இமேஸு ஆயஸ்மந்தேஸு மெத்தங் காயகம்மங் பச்சுபட்டி²தங்
ஆவி சேவ ரஹோ ச, மெத்தங் வசீகம்மங் பச்சுபட்டி²தங் ஆவி சேவ ரஹோ ச, மெத்தங்
மனோகம்மங் பச்சுபட்டி²தங் ஆவி சேவ ரஹோ ச. தஸ்ஸ மய்ஹங், ப⁴ந்தே, ஏவங் ஹோதி –
‘யங்னூனாஹங் ஸகங் சித்தங் நிக்கி²பித்வா இமேஸங்யேவ
ஆயஸ்மந்தானங் சித்தஸ்ஸ வஸேன வத்தெய்ய’ந்தி. ஸோ கோ² அஹங், ப⁴ந்தே, ஸகங்
சித்தங் நிக்கி²பித்வா இமேஸங்யேவ ஆயஸ்மந்தானங் சித்தஸ்ஸ வஸேன வத்தாமி. நானா
ஹி கோ² நோ, ப⁴ந்தே, காயா ஏகஞ்ச பன மஞ்ஞே சித்தந்தி.
‘‘ஏவங் கோ² மயங், ப⁴ந்தே, ஸமக்³கா³ ஸம்மோத³மானா அவிவத³மானா கீ²ரோத³கீபூ⁴தா அஞ்ஞமஞ்ஞங் பியசக்கூ²ஹி ஸம்பஸ்ஸந்தா விஹராமா’’தி.
327.
‘‘ஸாது⁴ ஸாது⁴, அனுருத்³தா⁴! கச்சி பன வோ, அனுருத்³தா⁴, அப்பமத்தா ஆதாபினோ
பஹிதத்தா விஹரதா²’’தி? ‘‘தக்³க⁴ மயங், ப⁴ந்தே, அப்பமத்தா ஆதாபினோ பஹிதத்தா
விஹராமா’’தி. ‘‘யதா² கத²ங் பன தும்ஹே,
அனுருத்³தா⁴, அப்பமத்தா ஆதாபினோ பஹிதத்தா விஹரதா²’’தி? ‘‘இத⁴, ப⁴ந்தே,
அம்ஹாகங் யோ பட²மங் கா³மதோ பிண்டா³ய படிக்கமதி ஸோ ஆஸனானி பஞ்ஞபேதி, பானீயங் பரிபோ⁴ஜனீயங் உபட்டா²பேதி, அவக்காரபாதிங் உபட்டா²பேதி. யோ பச்சா² கா³மதோ
பிண்டா³ய படிக்கமதி, ஸசே ஹோதி பு⁴த்தாவஸேஸோ ஸசே ஆகங்க²தி பு⁴ஞ்ஜதி, நோ சே
ஆகங்க²தி அப்பஹரிதே வா ச²ட்³டே³தி, அப்பாணகே வா உத³கே ஓபிலாபேதி. ஸோ ஆஸனானி
படிஸாமேதி, பானீயங் பரிபோ⁴ஜனீயங் படிஸாமேதி, அவக்காரபாதிங் படிஸாமேதி,
ப⁴த்தக்³க³ங் ஸம்மஜ்ஜதி. யோ பஸ்ஸதி பானீயக⁴டங் வா பரிபோ⁴ஜனீயக⁴டங் வா
வச்சக⁴டங் வா ரித்தங் துச்ச²ங் ஸோ உபட்டா²பேதி. ஸசஸ்ஸ ஹோதி அவிஸய்ஹங்,
ஹத்த²விகாரேன து³தியங் ஆமந்தெத்வா ஹத்த²விலங்க⁴கேன உபட்டா²பேம, ந த்வேவ
மயங், ப⁴ந்தே, தப்பச்சயா வாசங் பி⁴ந்தா³ம. பஞ்சாஹிகங் கோ² பன மயங், ப⁴ந்தே,
ஸப்³ப³ரத்திகங் த⁴ம்மியா கதா²ய ஸன்னிஸீதா³ம. ஏவங் கோ² மயங், ப⁴ந்தே,
அப்பமத்தா ஆதாபினோ பஹிதத்தா விஹராமா’’தி.
328.
‘‘ஸாது⁴ ஸாது⁴, அனுருத்³தா⁴! அத்தி² பன வோ, அனுருத்³தா⁴, ஏவங்
அப்பமத்தானங் ஆதாபீனங் பஹிதத்தானங் விஹரந்தானங் உத்தரிமனுஸ்ஸத⁴ம்மா
அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி? ‘‘கிஞ்ஹி நோ ஸியா,
ப⁴ந்தே! இத⁴ மயங், ப⁴ந்தே, யாவதே³வ ஆகங்கா²ம விவிச்சேவ காமேஹி விவிச்ச
அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங்
உபஸம்பஜ்ஜ விஹராம. அயங் கோ² நோ, ப⁴ந்தே, அம்ஹாகங் அப்பமத்தானங் ஆதாபீனங்
பஹிதத்தானங் விஹரந்தானங் உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ
அதி⁴க³தோ பா²ஸுவிஹாரோ’’தி.
‘‘ஸாது⁴ ஸாது⁴, அனுருத்³தா⁴! ஏதஸ்ஸ பன வோ, அனுருத்³தா⁴, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ
படிப்பஸ்ஸத்³தி⁴யா அத்த²ஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ
அதி⁴க³தோ பா²ஸுவிஹாரோ’’தி? ‘‘கிஞ்ஹி நோ ஸியா, ப⁴ந்தே! இத⁴ மயங், ப⁴ந்தே,
யாவதே³வ ஆகங்கா²ம விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ
ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங்
உபஸம்பஜ்ஜ விஹராம. ஏதஸ்ஸ, ப⁴ந்தே, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ
படிப்பஸ்ஸத்³தி⁴யா அயமஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ
அதி⁴க³தோ பா²ஸுவிஹாரோ’’தி.
‘‘ஸாது⁴ ஸாது⁴, அனுருத்³தா⁴!
ஏதஸ்ஸ பன வோ, அனுருத்³தா⁴, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ
படிப்பஸ்ஸத்³தி⁴யா அத்த²ஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ
அதி⁴க³தோ பா²ஸுவிஹாரோ’’தி? ‘‘கிஞ்ஹி நோ ஸியா,
ப⁴ந்தே! இத⁴ மயங், ப⁴ந்தே, யாவதே³வ ஆகங்கா²ம பீதியா ச விராகா³ உபெக்க²கா ச
விஹராம, ஸதா ச ஸம்பஜானா, ஸுக²ஞ்ச காயேன படிஸங்வேதே³ம, யங் தங் அரியா
ஆசிக்க²ந்தி – ‘உபெக்க²கோ ஸதிமா ஸுக²விஹாரீ’தி ததியங் ஜா²னங் உபஸம்பஜ்ஜ
விஹராம. ஏதஸ்ஸ, ப⁴ந்தே, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ
படிப்பஸ்ஸத்³தி⁴யா அயமஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ
அதி⁴க³தோ பா²ஸுவிஹாரோ’’தி.
‘‘ஸாது⁴ ஸாது⁴, அனுருத்³தா⁴! ஏதஸ்ஸ பன வோ,
அனுருத்³தா⁴, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா
அத்த²ஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ
பா²ஸுவிஹாரோ’’தி ? ‘‘கிஞ்ஹி நோ ஸியா, ப⁴ந்தே! இத⁴
மயங், ப⁴ந்தே, யாவதே³வ ஆகங்கா²ம ஸுக²ஸ்ஸ ச பஹானா து³க்க²ஸ்ஸ ச பஹானா,
புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா, அது³க்க²மஸுக²ங்
உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹராம. ஏதஸ்ஸ,
ப⁴ந்தே, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அயமஞ்ஞோ
உத்தரி மனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி.
‘‘ஸாது⁴ ஸாது⁴, அனுருத்³தா⁴! ஏதஸ்ஸ பன வோ,
அனுருத்³தா⁴, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா
அத்த²ஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ
பா²ஸுவிஹாரோ’’தி? ‘‘கிஞ்ஹி நோ ஸியா, ப⁴ந்தே! இத⁴ மயங், ப⁴ந்தே, யாவதே³வ
ஆகங்கா²ம ஸப்³ப³ஸோ ரூபஸஞ்ஞானங் ஸமதிக்கமா படிக⁴ஸஞ்ஞானங் அத்த²ங்க³மா
நானத்தஸஞ்ஞானங் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனங்
உபஸம்பஜ்ஜ விஹராம. ஏதஸ்ஸ, ப⁴ந்தே, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ
படிப்பஸ்ஸத்³தி⁴யா அயமஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ
அதி⁴க³தோ பா²ஸுவிஹாரோ’’தி.
‘‘ஸாது⁴ ஸாது⁴, அனுருத்³தா⁴! ஏதஸ்ஸ பன வோ,
அனுருத்³தா⁴, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா
அத்த²ஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ
பா²ஸுவிஹாரோ’’தி? ‘‘கிஞ்ஹி நோ ஸியா, ப⁴ந்தே! இத⁴ மயங், ப⁴ந்தே, யாவதே³வ
ஆகங்கா²ம ஸப்³ப³ஸோ ஆகாஸானஞ்சாயதனங் ஸமதிக்கம்ம ‘அனந்தங் விஞ்ஞாண’ந்தி விஞ்ஞாணஞ்சாயதனங் உபஸம்பஜ்ஜ விஹராம…பே॰… ஸப்³ப³ஸோ விஞ்ஞாணஞ்சாயதனங் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனங் உபஸம்பஜ்ஜ விஹராம…பே॰… ஸப்³ப³ஸோ ஆகிஞ்சஞ்ஞாயதனங் ஸமதிக்கம்ம
நேவஸஞ்ஞானாஸஞ்ஞாயதனங் உபஸம்பஜ்ஜ விஹராம. ஏதஸ்ஸ, ப⁴ந்தே, விஹாரஸ்ஸ
ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அயமஞ்ஞோ உத்தரிமனுஸ்ஸத⁴ம்மா
அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி.
329.
‘‘ஸாது⁴ ஸாது⁴, அனுருத்³தா⁴! ஏதஸ்ஸ பன வோ, அனுருத்³தா⁴, விஹாரஸ்ஸ
ஸமதிக்கமாய ஏதஸ்ஸ விஹாரஸ்ஸ படிப்பஸ்ஸத்³தி⁴யா அத்த²ஞ்ஞோ உத்தரிமனுஸ்ஸத⁴ம்மா
அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி? ‘‘கிஞ்ஹி நோ ஸியா,
ப⁴ந்தே! இத⁴ மயங், ப⁴ந்தே, யாவதே³வ ஆகங்கா²ம ஸப்³ப³ஸோ நேவஸஞ்ஞானாஸஞ்ஞாயதனங்
ஸமதிக்கம்ம ஸஞ்ஞாவேத³யிதனிரோத⁴ங் உபஸம்பஜ்ஜ விஹராம, பஞ்ஞாய ச நோ தி³ஸ்வா
ஆஸவா பரிக்கீ²ணா. ஏதஸ்ஸ, ப⁴ந்தே, விஹாரஸ்ஸ ஸமதிக்கமாய ஏதஸ்ஸ விஹாரஸ்ஸ
படிப்பஸ்ஸத்³தி⁴யா அயமஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ
அதி⁴க³தோ பா²ஸுவிஹாரோ. இமம்ஹா ச மயங், ப⁴ந்தே, பா²ஸுவிஹாரா அஞ்ஞங்
பா²ஸுவிஹாரங் உத்தரிதரங் வா பணீததரங் வா ந ஸமனுபஸ்ஸாமா’’தி. ‘‘ஸாது⁴ ஸாது⁴,
அனுருத்³தா⁴! இமம்ஹா பா²ஸுவிஹாரா உத்தரிதரோ வா பணீததரோ வா பா²ஸுவிஹாரோ
நத்தீ²’’தி.
330. அத² கோ² ப⁴க³வா ஆயஸ்மந்தஞ்ச அனுருத்³த⁴ங் ஆயஸ்மந்தஞ்ச நந்தி³யங் ஆயஸ்மந்தஞ்ச கிமிலங் த⁴ம்மியா கதா²ய ஸந்த³ஸ்ஸெத்வா ஸமாத³பெத்வா
ஸமுத்தேஜெத்வா ஸம்பஹங்ஸெத்வா உட்டா²யாஸனா பக்காமி. அத² கோ² ஆயஸ்மா ச
அனுருத்³தோ⁴ ஆயஸ்மா ச நந்தி³யோ ஆயஸ்மா ச கிமிலோ ப⁴க³வந்தங் அனுஸங்யாயித்வா [அனுஸங்ஸாவெத்வா (ஸீ॰), அனுஸாவெத்வா (டீகா)] ததோ படினிவத்தித்வா ஆயஸ்மா ச நந்தி³யோ
ஆயஸ்மா ச கிமிலோ ஆயஸ்மந்தங் அனுருத்³த⁴ங் ஏதத³வோசுங் – ‘‘கிங் நு கோ² மயங்
ஆயஸ்மதோ அனுருத்³த⁴ஸ்ஸ ஏவமாரோசிம்ஹ – ‘இமாஸஞ்ச இமாஸஞ்ச விஹாரஸமாபத்தீனங்
மயங் லாபி⁴னோ’தி, யங் நோ ஆயஸ்மா அனுருத்³தோ⁴ ப⁴க³வதோ ஸம்முகா² யாவ ஆஸவானங்
க²யா பகாஸேதீ’’தி? ‘‘ந கோ² மே ஆயஸ்மந்தோ ஏவமாரோசேஸுங் – ‘இமாஸஞ்ச இமாஸஞ்ச
விஹாரஸமாபத்தீனங் மயங் லாபி⁴னோ’தி, அபி ச மே ஆயஸ்மந்தானங் சேதஸா சேதோ
பரிச்ச விதி³தோ – ‘இமாஸஞ்ச இமாஸஞ்ச விஹாரஸமாபத்தீனங் இமே ஆயஸ்மந்தோ
லாபி⁴னோ’தி. தே³வதாபி மே ஏதமத்த²ங் ஆரோசேஸுங் –
‘இமாஸஞ்ச இமாஸஞ்ச விஹாரஸமாபத்தீனங் இமே ஆயஸ்மந்தோ லாபி⁴னோ’தி. தமேனங்
ப⁴க³வதா பஞ்ஹாபி⁴புட்டே²ன ப்³யாகத’’ந்தி.
331. அத²
கோ² தீ³கோ⁴ பரஜனோ யக்கோ² யேன ப⁴க³வா தேனுபஸங்கமி; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தோ கோ² தீ³கோ⁴ பரஜனோ யக்கோ²
ப⁴க³வந்தங் ஏதத³வோச – ‘‘லாபா⁴ வத, ப⁴ந்தே, வஜ்ஜீனங், ஸுலத்³த⁴லாபா⁴
வஜ்ஜிபஜாய, யத்த² ததா²க³தோ விஹரதி அரஹங் ஸம்மாஸம்பு³த்³தோ⁴, இமே ச தயோ
குலபுத்தா – ஆயஸ்மா ச அனுருத்³தோ⁴, ஆயஸ்மா ச நந்தி³யோ, ஆயஸ்மா ச
கிமிலோ’’தி. தீ³க⁴ஸ்ஸ பரஜனஸ்ஸ யக்க²ஸ்ஸ ஸத்³த³ங் ஸுத்வா பு⁴ம்மா தே³வா
ஸத்³த³மனுஸ்ஸாவேஸுங் – ‘லாபா⁴ வத, போ⁴, வஜ்ஜீனங்,
ஸுலத்³த⁴லாபா⁴ வஜ்ஜிபஜாய, யத்த² ததா²க³தோ விஹரதி அரஹங் ஸம்மாஸம்பு³த்³தோ⁴,
இமே ச தயோ குலபுத்தா – ஆயஸ்மா ச அனுருத்³தோ⁴, ஆயஸ்மா ச நந்தி³யோ, ஆயஸ்மா ச
கிமிலோ’தி. பு⁴ம்மானங் தே³வானங் ஸத்³த³ங் ஸுத்வா சாதுமஹாராஜிகா தே³வா…பே॰…
தாவதிங்ஸா தே³வா…பே॰… யாமா தே³வா…பே॰… துஸிதா தே³வா…பே॰… நிம்மானரதீ
தே³வா…பே॰… பரனிம்மிதவஸவத்தீ தே³வா…பே॰… ப்³ரஹ்மகாயிகா தே³வா
ஸத்³த³மனுஸ்ஸாவேஸுங் – ‘‘லாபா⁴ வத, போ⁴, வஜ்ஜீனங், ஸுலத்³த⁴லாபா⁴
வஜ்ஜிபஜாய, யத்த² ததா²க³தோ விஹரதி அரஹங் ஸம்மாஸம்பு³த்³தோ⁴, இமே ச தயோ
குலபுத்தா – ஆயஸ்மா ச அனுருத்³தோ⁴, ஆயஸ்மா ச நந்தி³யோ, ஆயஸ்மா ச
கிமிலோ’’தி. இதிஹ தே ஆயஸ்மந்தோ தேன க²ணேன (தேன லயேன) [( ) ஸீ॰ ஸ்யா॰ பீ॰ பொத்த²கேஸு நத்தி²] தேன முஹுத்தேன யாவப்³ரஹ்மலோகா விதி³தா [ஸங்விதி³தா (க॰)] அஹேஸுங்.
‘‘ஏவமேதங், தீ³க⁴, ஏவமேதங், தீ³க⁴! யஸ்மாபி, தீ³க⁴,
குலா ஏதே தயோ குலபுத்தா அகா³ரஸ்மா அனகா³ரியங் பப்³ப³ஜிதா, தஞ்சேபி குலங்
ஏதே தயோ குலபுத்தே பஸன்னசித்தங் அனுஸ்ஸரெய்ய, தஸ்ஸபாஸ்ஸ குலஸ்ஸ தீ³க⁴ரத்தங்
ஹிதாய ஸுகா²ய. யஸ்மாபி, தீ³க⁴, குலபரிவட்டா ஏதே தயோ குலபுத்தா அகா³ரஸ்மா
அனகா³ரியங் பப்³ப³ஜிதா, ஸோ சேபி குலபரிவட்டோ ஏதே
தயோ குலபுத்தே பஸன்னசித்தோ அனுஸ்ஸரெய்ய, தஸ்ஸபாஸ்ஸ குலபரிவட்டஸ்ஸ
தீ³க⁴ரத்தங் ஹிதாய ஸுகா²ய. யஸ்மாபி, தீ³க⁴, கா³மா ஏதே தயோ குலபுத்தா
அகா³ரஸ்மா அனகா³ரியங் பப்³ப³ஜிதா, ஸோ சேபி கா³மோ ஏதே தயோ குலபுத்தே பஸன்னசித்தோ அனுஸ்ஸரெய்ய, தஸ்ஸபாஸ்ஸ கா³மஸ்ஸ
தீ³க⁴ரத்தங் ஹிதாய ஸுகா²ய. யஸ்மாபி, தீ³க⁴, நிக³மா ஏதே தயோ குலபுத்தா
அகா³ரஸ்மா அனகா³ரியங் பப்³ப³ஜிதா, ஸோ சேபி நிக³மோ ஏதே தயோ குலபுத்தே
பஸன்னசித்தோ அனுஸ்ஸரெய்ய, தஸ்ஸபாஸ்ஸ நிக³மஸ்ஸ தீ³க⁴ரத்தங் ஹிதாய ஸுகா²ய.
யஸ்மாபி, தீ³க⁴, நக³ரா ஏதே தயோ குலபுத்தா அகா³ரஸ்மா அனகா³ரியங் பப்³ப³ஜிதா,
தஞ்சேபி நக³ரங் ஏதே தயோ குலபுத்தே பஸன்னசித்தங் அனுஸ்ஸரெய்ய, தஸ்ஸபாஸ்ஸ
நக³ரஸ்ஸ தீ³க⁴ரத்தங் ஹிதாய ஸுகா²ய. யஸ்மாபி, தீ³க⁴, ஜனபதா³ ஏதே தயோ
குலபுத்தா அகா³ரஸ்மா அனகா³ரியங் பப்³ப³ஜிதா, ஸோ சேபி ஜனபதோ³ ஏதே தயோ
குலபுத்தே பஸன்னசித்தோ அனுஸ்ஸரெய்ய, தஸ்ஸபாஸ்ஸ ஜனபத³ஸ்ஸ தீ³க⁴ரத்தங் ஹிதாய
ஸுகா²ய. ஸப்³பே³ சேபி, தீ³க⁴, க²த்தியா ஏதே தயோ குலபுத்தே பஸன்னசித்தா
அனுஸ்ஸரெய்யுங், ஸப்³பே³ஸானங்பாஸ்ஸ க²த்தியானங் தீ³க⁴ரத்தங் ஹிதாய ஸுகா²ய.
ஸப்³பே³ சேபி, தீ³க⁴, ப்³ராஹ்மணா…பே॰… ஸப்³பே³ சேபி, தீ³க⁴, வெஸ்ஸா…பே॰…
ஸப்³பே³ சேபி, தீ³க⁴, ஸுத்³தா³ ஏதே தயோ குலபுத்தே பஸன்னசித்தா
அனுஸ்ஸரெய்யுங், ஸப்³பே³ஸானங்பாஸ்ஸ ஸுத்³தா³னங் தீ³க⁴ரத்தங் ஹிதாய ஸுகா²ய.
ஸதே³வகோ சேபி, தீ³க⁴, லோகோ ஸமாரகோ ஸப்³ரஹ்மகோ ஸஸ்ஸமணப்³ராஹ்மணீ பஜா
ஸதே³வமனுஸ்ஸா ஏதே தயோ குலபுத்தே பஸன்னசித்தா அனுஸ்ஸரெய்ய, ஸதே³வகஸ்ஸபாஸ்ஸ
லோகஸ்ஸ ஸமாரகஸ்ஸ ஸப்³ரஹ்மகஸ்ஸ ஸஸ்ஸமணப்³ராஹ்மணியா பஜாய ஸதே³வமனுஸ்ஸாய
தீ³க⁴ரத்தங் ஹிதாய ஸுகா²ய. பஸ்ஸ, தீ³க⁴, யாவ ஏதே தயோ குலபுத்தா ப³ஹுஜனஹிதாய
படிபன்னா ப³ஹுஜனஸுகா²ய லோகானுகம்பாய, அத்தா²ய ஹிதாய ஸுகா²ய
தே³வமனுஸ்ஸான’’ந்தி.
இத³மவோச ப⁴க³வா. அத்தமனோ தீ³கோ⁴ பரஜனோ யக்கோ² ப⁴க³வதோ பா⁴ஸிதங் அபி⁴னந்தீ³தி.
சூளகோ³ஸிங்க³ஸுத்தங் நிட்டி²தங் பட²மங்.
2. மஹாகோ³ஸிங்க³ஸுத்தங்
332. ஏவங்
மே ஸுதங் – ஏகங் ஸமயங் ப⁴க³வா கோ³ஸிங்க³ஸாலவனதா³யே விஹரதி ஸம்ப³ஹுலேஹி
அபி⁴ஞ்ஞாதேஹி அபி⁴ஞ்ஞாதேஹி தே²ரேஹி ஸாவகேஹி ஸத்³தி⁴ங் – ஆயஸ்மதா ச
ஸாரிபுத்தேன ஆயஸ்மதா ச மஹாமொக்³க³ல்லானேன ஆயஸ்மதா ச
மஹாகஸ்ஸபேன ஆயஸ்மதா ச அனுருத்³தே⁴ன ஆயஸ்மதா ச ரேவதேன ஆயஸ்மதா ச ஆனந்தே³ன,
அஞ்ஞேஹி ச அபி⁴ஞ்ஞாதேஹி அபி⁴ஞ்ஞாதேஹி தே²ரேஹி ஸாவகேஹி ஸத்³தி⁴ங். அத² கோ²
ஆயஸ்மா மஹாமொக்³க³ல்லானோ ஸாயன்ஹஸமயங் படிஸல்லானா வுட்டி²தோ யேனாயஸ்மா
மஹாகஸ்ஸபோ தேனுபஸங்கமி; உபஸங்கமித்வா ஆயஸ்மந்தங் மஹாகஸ்ஸபங் ஏதத³வோச –
‘‘ஆயாமாவுஸோ, கஸ்ஸப, யேனாயஸ்மா ஸாரிபுத்தோ தேனுபஸங்கமிஸ்ஸாம
த⁴ம்மஸ்ஸவனாயா’’தி. ‘‘ஏவமாவுஸோ’’தி கோ² ஆயஸ்மா மஹாகஸ்ஸபோ ஆயஸ்மதோ
மஹாமொக்³க³ல்லானஸ்ஸ பச்சஸ்ஸோஸி. அத² கோ² ஆயஸ்மா ச மஹாமொக்³க³ல்லானோ ஆயஸ்மா ச
மஹாகஸ்ஸபோ ஆயஸ்மா ச அனுருத்³தோ⁴ யேனாயஸ்மா ஸாரிபுத்தோ தேனுபஸங்கமிங்ஸு
த⁴ம்மஸ்ஸவனாய. அத்³த³ஸா கோ² ஆயஸ்மா ஆனந்தோ³ ஆயஸ்மந்தஞ்ச மஹாமொக்³க³ல்லானங்
ஆயஸ்மந்தஞ்ச மஹாகஸ்ஸபங் ஆயஸ்மந்தஞ்ச அனுருத்³த⁴ங் யேனாயஸ்மா ஸாரிபுத்தோ
தேனுபஸங்கமந்தே த⁴ம்மஸ்ஸவனாய. தி³ஸ்வான யேனாயஸ்மா ரேவதோ தேனுபஸங்கமி;
உபஸங்கமித்வா ஆயஸ்மந்தங் ரேவதங் ஏதத³வோச – ‘‘உபஸங்கமந்தா கோ² அமூ, ஆவுஸோ [ஆயஸ்மந்தாவுஸோ (க॰)] ரேவத, ஸப்புரிஸா யேனாயஸ்மா ஸாரிபுத்தோ
தேன த⁴ம்மஸ்ஸவனாய. ஆயாமாவுஸோ ரேவத, யேனாயஸ்மா ஸாரிபுத்தோ தேனுபஸங்கமிஸ்ஸாம
த⁴ம்மஸ்ஸவனாயா’’தி. ‘‘ஏவமாவுஸோ’’தி கோ² ஆயஸ்மா ரேவதோ ஆயஸ்மதோ ஆனந்த³ஸ்ஸ
பச்சஸ்ஸோஸி. அத² கோ² ஆயஸ்மா ச ரேவதோ ஆயஸ்மா ச ஆனந்தோ³ யேனாயஸ்மா ஸாரிபுத்தோ
தேனுபஸங்கமிங்ஸு த⁴ம்மஸ்ஸவனாய.
333.
அத்³த³ஸா கோ² ஆயஸ்மா ஸாரிபுத்தோ ஆயஸ்மந்தஞ்ச ரேவதங் ஆயஸ்மந்தஞ்ச ஆனந்த³ங்
தூ³ரதோவ ஆக³ச்ச²ந்தே. தி³ஸ்வான ஆயஸ்மந்தங் ஆனந்த³ங் ஏதத³வோச – ‘‘ஏது கோ²
ஆயஸ்மா ஆனந்தோ³! ஸ்வாக³தங் ஆயஸ்மதோ ஆனந்த³ஸ்ஸ ப⁴க³வதோ உபட்டா²கஸ்ஸ ப⁴க³வதோ
ஸந்திகாவசரஸ்ஸ! ரமணீயங், ஆவுஸோ ஆனந்த³, கோ³ஸிங்க³ஸாலவனங், தோ³ஸினா ரத்தி,
ஸப்³ப³பா²லிபு²ல்லா [ஸப்³ப³பாலிபு²ல்லா (ஸீ॰)]
ஸாலா, தி³ப்³பா³, மஞ்ஞே, க³ந்தா⁴ ஸம்பவந்தி; கத²ங்ரூபேன, ஆவுஸோ ஆனந்த³,
பி⁴க்கு²னா கோ³ஸிங்க³ஸாலவனங் ஸோபெ⁴ய்யா’’தி? ‘‘இதா⁴வுஸோ ஸாரிபுத்த , பி⁴க்கு² ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ. யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்தா² ஸப்³யஞ்ஜனா; கேவலபரிபுண்ணங் பரிஸுத்³த⁴ங் ப்³ரஹ்மசரியங் அபி⁴வத³ந்தி, ததா²ரூபாஸ்ஸ த⁴ம்மா ப³ஹுஸ்ஸுதா ஹொந்தி, தா⁴தா [த⁴தா (ஸீ॰ ஸ்யா॰ கங்॰ பீ॰)],
வசஸா பரிசிதா, மனஸானுபெக்கி²தா, தி³ட்டி²யா ஸுப்படிவித்³தா⁴. ஸோ
சதஸ்ஸன்னங் பரிஸானங் த⁴ம்மங் தே³ஸேதி பரிமண்ட³லேஹி பத³ப்³யஞ்ஜனேஹி
அனுப்பப³ந்தே⁴ஹி [அப்பப³த்³தே⁴ஹி (ஸீ॰ பீ॰)] அனுஸயஸமுக்³கா⁴தாய. ஏவரூபேன கோ², ஆவுஸோ ஸாரிபுத்த, பி⁴க்கு²னா கோ³ஸிங்க³ஸாலவனங் ஸோபெ⁴ய்யா’’தி.
334. ஏவங் வுத்தே, ஆயஸ்மா ஸாரிபுத்தோ ஆயஸ்மந்தங் ரேவதங் ஏதத³வோச
– ‘‘ப்³யாகதங் கோ², ஆவுஸோ ரேவத, ஆயஸ்மதா ஆனந்தே³ன யதா²ஸகங் படிபா⁴னங்.
தத்த² தா³னி மயங் ஆயஸ்மந்தங் ரேவதங் புச்சா²ம – ‘ரமணீயங், ஆவுஸோ ரேவத,
கோ³ஸிங்க³ஸாலவனங், தோ³ஸினா ரத்தி, ஸப்³ப³பா²லிபு²ல்லா ஸாலா, தி³ப்³பா³,
மஞ்ஞே, க³ந்தா⁴ ஸம்பவந்தி; கத²ங்ரூபேன, ஆவுஸோ ரேவத, பி⁴க்கு²னா
கோ³ஸிங்க³ஸாலவனங் ஸோபெ⁴ய்யா’’’தி? ‘‘இதா⁴வுஸோ ஸாரிபுத்த, பி⁴க்கு²
படிஸல்லானாராமோ ஹோதி படிஸல்லானரதோ, அஜ்ஜ²த்தங் சேதோஸமத²மனுயுத்தோ
அனிராகதஜ்ஜா²னோ, விபஸ்ஸனாய ஸமன்னாக³தோ, ப்³ரூஹேதா ஸுஞ்ஞாகா³ரானங். ஏவரூபேன
கோ², ஆவுஸோ ஸாரிபுத்த, பி⁴க்கு²னா கோ³ஸிங்க³ஸாலவனங் ஸோபெ⁴ய்யா’’தி.
335.
ஏவங் வுத்தே, ஆயஸ்மா ஸாரிபுத்தோ ஆயஸ்மந்தங் அனுருத்³த⁴ங் ஏதத³வோச –
‘‘ப்³யாகதங் கோ², ஆவுஸோ அனுருத்³த⁴, ஆயஸ்மதா ரேவதேன யதா²ஸகங் படிபா⁴னங்.
தத்த² தா³னி மயங் ஆயஸ்மந்தங் அனுருத்³த⁴ங் புச்சா²ம – ‘ரமணீயங், ஆவுஸோ
அனுருத்³த⁴, கோ³ஸிங்க³ஸாலவனங், தோ³ஸினா ரத்தி, ஸப்³ப³பா²லிபு²ல்லா ஸாலா,
தி³ப்³பா³, மஞ்ஞே, க³ந்தா⁴ ஸம்பவந்தி; கத²ங்ரூபேன, ஆவுஸோ அனுருத்³த⁴,
பி⁴க்கு²னா கோ³ஸிங்க³ஸாலவனங் ஸோபெ⁴ய்யா’’’தி? ‘‘இதா⁴வுஸோ ஸாரிபுத்த,
பி⁴க்கு² தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸஹஸ்ஸங்
லோகானங் வோலோகேதி. ஸெய்யதா²பி, ஆவுஸோ ஸாரிபுத்த, சக்கு²மா புரிஸோ
உபரிபாஸாத³வரக³தோ ஸஹஸ்ஸங் நேமிமண்ட³லானங் வோலோகெய்ய; ஏவமேவ கோ², ஆவுஸோ
ஸாரிபுத்த, பி⁴க்கு² தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன
ஸஹஸ்ஸங் லோகானங் வோலோகேதி. ஏவரூபேன கோ², ஆவுஸோ ஸாரிபுத்த, பி⁴க்கு²னா
கோ³ஸிங்க³ஸாலவனங் ஸோபெ⁴ய்யா’’தி.
336. ஏவங்
வுத்தே, ஆயஸ்மா ஸாரிபுத்தோ ஆயஸ்மந்தங் மஹாகஸ்ஸபங் ஏதத³வோச – ‘‘ப்³யாகதங்
கோ², ஆவுஸோ கஸ்ஸப, ஆயஸ்மதா அனுருத்³தே⁴ன யதா²ஸகங் படிபா⁴னங். தத்த² தா³னி
மயங் ஆயஸ்மந்தங் மஹாகஸ்ஸபங் புச்சா²ம – ‘ரமணீயங், ஆவுஸோ கஸ்ஸப,
கோ³ஸிங்க³ஸாலவனங், தோ³ஸினா ரத்தி, ஸப்³ப³பா²லிபு²ல்லா ஸாலா, தி³ப்³பா³,
மஞ்ஞே, க³ந்தா⁴ ஸம்பவந்தி; கத²ங்ரூபேன, ஆவுஸோ கஸ்ஸப, பி⁴க்கு²னா கோ³ஸிங்க³ஸாலவனங் ஸோபெ⁴ய்யா’’’தி? ‘‘இதா⁴வுஸோ ஸாரிபுத்த, பி⁴க்கு² அத்தனா ச ஆரஞ்ஞிகோ
ஹோதி ஆரஞ்ஞிகத்தஸ்ஸ ச வண்ணவாதீ³, அத்தனா ச பிண்ட³பாதிகோ ஹோதி
பிண்ட³பாதிகத்தஸ்ஸ ச வண்ணவாதீ³, அத்தனா ச பங்ஸுகூலிகோ ஹோதி
பங்ஸுகூலிகத்தஸ்ஸ ச வண்ணவாதீ³, அத்தனா ச தேசீவரிகோ ஹோதி தேசீவரிகத்தஸ்ஸ ச
வண்ணவாதீ³, அத்தனா ச அப்பிச்சோ² ஹோதி அப்பிச்ச²தாய ச வண்ணவாதீ³, அத்தனா ச
ஸந்துட்டோ² ஹோதி ஸந்துட்டி²யா ச வண்ணவாதீ³, அத்தனா ச பவிவித்தோ ஹோதி
பவிவேகஸ்ஸ ச வண்ணவாதீ³, அத்தனா ச அஸங்ஸட்டோ² ஹோதி அஸங்ஸக்³க³ஸ்ஸ ச
வண்ணவாதீ³, அத்தனா ச ஆரத்³த⁴வீரியோ ஹோதி வீரியாரம்ப⁴ஸ்ஸ ச வண்ணவாதீ³,
அத்தனா ச ஸீலஸம்பன்னோ ஹோதி ஸீலஸம்பதா³ய ச வண்ணவாதீ³, அத்தனா ச
ஸமாதி⁴ஸம்பன்னோ ஹோதி ஸமாதி⁴ஸம்பதா³ய ச வண்ணவாதீ³, அத்தனா ச பஞ்ஞாஸம்பன்னோ
ஹோதி பஞ்ஞாஸம்பதா³ய ச வண்ணவாதீ³, அத்தனா ச விமுத்திஸம்பன்னோ ஹோதி
விமுத்திஸம்பதா³ய ச வண்ணவாதீ³, அத்தனா ச விமுத்திஞாணத³ஸ்ஸனஸம்பன்னோ ஹோதி
விமுத்திஞாணத³ஸ்ஸனஸம்பதா³ய ச வண்ணவாதீ³. ஏவரூபேன கோ², ஆவுஸோ ஸாரிபுத்த , பி⁴க்கு²னா கோ³ஸிங்க³ஸாலவனங் ஸோபெ⁴ய்யா’’தி.
337.
ஏவங் வுத்தே, ஆயஸ்மா ஸாரிபுத்தோ ஆயஸ்மந்தங் மஹாமொக்³க³ல்லானங் ஏதத³வோச –
‘‘ப்³யாகதங் கோ², ஆவுஸோ மொக்³க³ல்லான, ஆயஸ்மதா மஹாகஸ்ஸபேன யதா²ஸகங்
படிபா⁴னங். தத்த² தா³னி மயங் ஆயஸ்மந்தங் மஹாமொக்³க³ல்லானங் புச்சா²ம –
‘ரமணீயங், ஆவுஸோ மொக்³க³ல்லான, கோ³ஸிங்க³ஸாலவனங், தோ³ஸினா ரத்தி,
ஸப்³ப³பா²லிபு²ல்லா ஸாலா, தி³ப்³பா³, மஞ்ஞே, க³ந்தா⁴ ஸம்பவந்தி;
கத²ங்ரூபேன, ஆவுஸோ மொக்³க³ல்லான, பி⁴க்கு²னா கோ³ஸிங்க³ஸாலவனங்
ஸோபெ⁴ய்யா’’’தி? ‘‘இதா⁴வுஸோ ஸாரிபுத்த, த்³வே பி⁴க்கூ² அபி⁴த⁴ம்மகத²ங்
கதெ²ந்தி, தே அஞ்ஞமஞ்ஞங் பஞ்ஹங் புச்ச²ந்தி, அஞ்ஞமஞ்ஞஸ்ஸ பஞ்ஹங் புட்டா²
விஸ்ஸஜ்ஜெந்தி, நோ ச ஸங்ஸாதெ³ந்தி [ஸங்ஸாரெந்தி (க॰)], த⁴ம்மீ ச நேஸங் கதா² பவத்தினீ ஹோதி. ஏவரூபேன கோ², ஆவுஸோ ஸாரிபுத்த, பி⁴க்கு²னா கோ³ஸிங்க³ஸாலவனங் ஸோபெ⁴ய்யா’’தி.
338. அத²
கோ² ஆயஸ்மா மஹாமொக்³க³ல்லானோ ஆயஸ்மந்தங் ஸாரிபுத்தங் ஏதத³வோச –
‘‘ப்³யாகதங் கோ², ஆவுஸோ ஸாரிபுத்த, அம்ஹேஹி ஸப்³பே³ஹேவ யதா²ஸகங் படிபா⁴னங்.
தத்த² தா³னி மயங் ஆயஸ்மந்தங் ஸாரிபுத்தங் புச்சா²ம – ‘ரமணீயங், ஆவுஸோ
ஸாரிபுத்த, கோ³ஸிங்க³ஸாலவனங், தோ³ஸினா ரத்தி, ஸப்³ப³பா²லிபு²ல்லா ஸாலா,
தி³ப்³பா³, மஞ்ஞே, க³ந்தா⁴ ஸம்பவந்தி; கத²ங்ரூபேன, ஆவுஸோ ஸாரிபுத்த,
பி⁴க்கு²னா கோ³ஸிங்க³ஸாலவனங் ஸோபெ⁴ய்யா’’’தி? ‘‘இதா⁴வுஸோ மொக்³க³ல்லான,
பி⁴க்கு² சித்தங் வஸங் வத்தேதி, நோ ச பி⁴க்கு² சித்தஸ்ஸ வஸேன வத்ததி. ஸோ
யாய விஹாரஸமாபத்தியா ஆகங்க²தி புப்³ப³ண்ஹஸமயங் விஹரிதுங், தாய விஹாரஸமாபத்தியா புப்³ப³ண்ஹஸமயங் விஹரதி; யாய விஹாரஸமாபத்தியா ஆகங்க²தி மஜ்ஜ²ன்ஹிகஸமயங் [மஜ்ஜ²ந்திகஸமயங் (ஸீ॰ ஸ்யா॰ கங்॰ பீ॰ க॰)] விஹரிதுங், தாய விஹாரஸமாபத்தியா மஜ்ஜ²ன்ஹிகஸமயங்
விஹரதி; யாய விஹாரஸமாபத்தியா ஆகங்க²தி ஸாயன்ஹஸமயங் விஹரிதுங், தாய
விஹாரஸமாபத்தியா ஸாயன்ஹஸமயங் விஹரதி. ஸெய்யதா²பி, ஆவுஸோ மொக்³க³ல்லான,
ரஞ்ஞோ வா ராஜமஹாமத்தஸ்ஸ வா நானாரத்தானங் து³ஸ்ஸானங் து³ஸ்ஸகரண்ட³கோ பூரோ
அஸ்ஸ. ஸோ யஞ்ஞதே³வ து³ஸ்ஸயுக³ங் ஆகங்கெ²ய்ய புப்³ப³ண்ஹஸமயங் பாருபிதுங்,
தங் ததே³வ து³ஸ்ஸயுக³ங் புப்³ப³ண்ஹஸமயங் பாருபெய்ய; யஞ்ஞதே³வ து³ஸ்ஸயுக³ங்
ஆகங்கெ²ய்ய மஜ்ஜ²ன்ஹிகஸமயங் பாருபிதுங், தங் ததே³வ து³ஸ்ஸயுக³ங்
மஜ்ஜ²ன்ஹிகஸமயங் பாருபெய்ய; யஞ்ஞதே³வ து³ஸ்ஸயுக³ங் ஆகங்கெ²ய்ய ஸாயன்ஹஸமயங்
பாருபிதுங், தங் ததே³வ து³ஸ்ஸயுக³ங் ஸாயன்ஹஸமயங் பாருபெய்ய. ஏவமேவ கோ²,
ஆவுஸோ மொக்³க³ல்லான, பி⁴க்கு² சித்தங் வஸங் வத்தேதி, நோ ச பி⁴க்கு²
சித்தஸ்ஸ வஸேன வத்ததி. ஸோ யாய விஹாரஸமாபத்தியா ஆகங்க²தி புப்³ப³ண்ஹஸமயங்
விஹரிதுங், தாய விஹாரஸமாபத்தியா புப்³ப³ண்ஹஸமயங் விஹரதி; யாய
விஹாரஸமாபத்தியா ஆகங்க²தி மஜ்ஜ²ன்ஹிகஸமயங் விஹரிதுங், தாய விஹாரஸமாபத்தியா
மஜ்ஜ²ன்ஹிகஸமயங் விஹரதி; யாய விஹாரஸமாபத்தியா ஆகங்க²தி ஸாயன்ஹஸமயங்
விஹரிதுங், தாய விஹாரஸமாபத்தியா ஸாயன்ஹஸமயங் விஹரதி. ஏவரூபேன கோ², ஆவுஸோ
மொக்³க³ல்லான, பி⁴க்கு²னா கோ³ஸிங்க³ஸாலவனங் ஸோபெ⁴ய்யா’’தி.
339.
அத² கோ² ஆயஸ்மா ஸாரிபுத்தோ தே ஆயஸ்மந்தே ஏதத³வோச – ‘‘ப்³யாகதங் கோ²,
ஆவுஸோ, அம்ஹேஹி ஸப்³பே³ஹேவ யதா²ஸகங் படிபா⁴னங். ஆயாமாவுஸோ, யேன ப⁴க³வா
தேனுபஸங்கமிஸ்ஸாம; உபஸங்கமித்வா ஏதமத்த²ங் ப⁴க³வதோ
ஆரோசெஸ்ஸாம. யதா² நோ ப⁴க³வா ப்³யாகரிஸ்ஸதி ததா² நங் தா⁴ரெஸ்ஸாமா’’தி.
‘‘ஏவமாவுஸோ’’தி கோ² தே ஆயஸ்மந்தோ ஆயஸ்மதோ ஸாரிபுத்தஸ்ஸ பச்சஸ்ஸோஸுங். அத²
கோ² தே ஆயஸ்மந்தோ யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னோ கோ² ஆயஸ்மா
ஸாரிபுத்தோ ப⁴க³வந்தங் ஏதத³வோச – ‘‘அத்³த³ஸங் கோ² அஹங், ப⁴ந்தே,
ஆயஸ்மந்தஞ்ச ரேவதங் ஆயஸ்மந்தஞ்ச ஆனந்த³ங் தூ³ரதோவ ஆக³ச்ச²ந்தே. தி³ஸ்வான
ஆயஸ்மந்தங் ஆனந்த³ங் ஏதத³வோசங் – ‘ஏது கோ² ஆயஸ்மா
ஆனந்தோ³! ஸ்வாக³தங் ஆயஸ்மதோ ஆனந்த³ஸ்ஸ ப⁴க³வதோ உபட்டா²கஸ்ஸ ப⁴க³வதோ
ஸந்திகாவசரஸ்ஸ! ரமணீயங், ஆவுஸோ ஆனந்த³, கோ³ஸிங்க³ஸாலவனங், தோ³ஸினா ரத்தி,
ஸப்³ப³பா²லிபு²ல்லா ஸாலா, தி³ப்³பா³, மஞ்ஞே, க³ந்தா⁴ ஸம்பவந்தி;
கத²ங்ரூபேன, ஆவுஸோ ஆனந்த³, பி⁴க்கு²னா கோ³ஸிங்க³ஸாலவனங் ஸோபெ⁴ய்யா’தி? ஏவங்
வுத்தே, ப⁴ந்தே, ஆயஸ்மா ஆனந்தோ³ மங் ஏதத³வோச – ‘இதா⁴வுஸோ, ஸாரிபுத்த,
பி⁴க்கு² ப³ஹுஸ்ஸுதோ ஹோதி ஸுதத⁴ரோ…பே॰… அனுஸயஸமுக்³கா⁴தாய. ஏவரூபேன கோ²,
ஆவுஸோ ஸாரிபுத்த, பி⁴க்கு²னா கோ³ஸிங்க³ஸாலவனங்
ஸோபெ⁴ய்யா’’’தி. ‘‘ஸாது⁴ ஸாது⁴, ஸாரிபுத்த! யதா² தங் ஆனந்தோ³வ ஸம்மா
ப்³யாகரமானோ ப்³யாகரெய்ய. ஆனந்தோ³ ஹி, ஸாரிபுத்த, ப³ஹுஸ்ஸுதோ ஸுதத⁴ரோ
ஸுதஸன்னிசயோ. யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா
ஸாத்தா² ஸப்³யஞ்ஜனா; கேவலபரிபுண்ணங் பரிஸுத்³த⁴ங்
ப்³ரஹ்மசரியங் அபி⁴வத³ந்தி, ததா²ரூபாஸ்ஸ த⁴ம்மா ப³ஹுஸ்ஸுதா ஹொந்தி, தா⁴தா,
வசஸா பரிசிதா, மனஸானுபெக்கி²தா, தி³ட்டி²யா ஸுப்படிவித்³தா⁴. ஸோ சதஸ்ஸன்னங்
பரிஸானங் த⁴ம்மங் தே³ஸேதி பரிமண்ட³லேஹி பத³ப்³யஞ்ஜனேஹி அனுப்பப³ந்தே⁴ஹி
அனுஸயஸமுக்³கா⁴தாயா’’தி.
340.
‘‘ஏவங் வுத்தே, அஹங், ப⁴ந்தே, ஆயஸ்மந்தங் ரேவதங் ஏதத³வோசங் – ‘ப்³யாகதங்
கோ², ஆவுஸோ ரேவத ஆயஸ்மதா ஆனந்தே³ன யதா²ஸகங் படிபா⁴னங். தத்த² தா³னி மயங்
ஆயஸ்மந்தங் ரேவதங் புச்சா²ம – ரமணீயங், ஆவுஸோ ரேவத, கோ³ஸிங்க³ஸாலவனங்,
தோ³ஸினா ரத்தி, ஸப்³ப³பா²லிபு²ல்லா ஸாலா, தி³ப்³பா³ மஞ்ஞே க³ந்தா⁴
ஸம்பவந்தி. கத²ங்ரூபேன, ஆவுஸோ ரேவத, பி⁴க்கு²னா கோ³ஸிங்க³ஸாலவனங்
ஸோபெ⁴ய்யா’தி? ஏவங் வுத்தே, ப⁴ந்தே, ஆயஸ்மா ரேவதோ மங் ஏதத³வோச – ‘இதா⁴வுஸோ
ஸாரிபுத்த பி⁴க்கு² படிஸல்லானாராமோ ஹோதி படிஸல்லானரதோ ,
அஜ்ஜ²த்தங் சேதோஸமத²மனுயுத்தோ, அனிராகதஜ்ஜா²னோ, விபஸ்ஸனாய ஸமன்னாக³தோ,
ப்³ரூஹேதா ஸுஞ்ஞாகா³ரானங். ஏவரூபேன கோ², ஆவுஸோ ஸாரிபுத்த, பி⁴க்கு²னா
கோ³ஸிங்க³ஸாலவனங் ஸோபெ⁴ய்யா’’’தி. ‘‘ஸாது⁴ ஸாது⁴, ஸாரிபுத்த! யதா² தங்
ரேவதோவ ஸம்மா ப்³யாகரமானோ ப்³யாகரெய்ய. ரேவதோ ஹி, ஸாரிபுத்த,
படிஸல்லானாராமோ படிஸல்லானரதோ, அஜ்ஜ²த்தங் சேதோஸமத²மனுயுத்தோ
அனிராகதஜ்ஜா²னோ, விபஸ்ஸனாய ஸமன்னாக³தோ ப்³ரூஹேதா ஸுஞ்ஞாகா³ரான’’ந்தி.
341. ‘‘ஏவங்
வுத்தே, அஹங், ப⁴ந்தே, ஆயஸ்மந்தங் அனுருத்³த⁴ங் ஏதத³வோசங் – ‘ப்³யாகதங்
கோ² ஆவுஸோ அனுருத்³த⁴ ஆயஸ்மதா ரேவதேன…பே॰… கத²ங்ரூபேன, ஆவுஸோ
அனுருத்³த⁴, பி⁴க்கு²னா கோ³ஸிங்க³ஸாலவனங் ஸோபெ⁴ய்யா’தி. ஏவங் வுத்தே,
ப⁴ந்தே, ஆயஸ்மா அனுருத்³தோ⁴ மங் ஏதத³வோச – ‘இதா⁴வுஸோ ஸாரிபுத்த, பி⁴க்கு²
தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸஹஸ்ஸங் லோகானங்
வோலோகேதி. ஸெய்யதா²பி, ஆவுஸோ ஸாரிபுத்த, சக்கு²மா புரிஸோ…பே॰… ஏவரூபேன கோ²
ஆவுஸோ ஸாரிபுத்த பி⁴க்கு²னா கோ³ஸிங்க³ஸாலவனங் ஸோபெ⁴ய்யா’’’தி. ‘‘ஸாது⁴
ஸாது⁴, ஸாரிபுத்த, யதா² தங் அனுருத்³தோ⁴வ ஸம்மா ப்³யாகரமானோ ப்³யாகரெய்ய.
அனுருத்³தோ⁴ ஹி, ஸாரிபுத்த, தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன ஸஹஸ்ஸங் லோகானங் வோலோகேதீ’’தி.
342. ‘‘ஏவங் வுத்தே, அஹங், ப⁴ந்தே, ஆயஸ்மந்தங் மஹாகஸ்ஸபங் ஏதத³வோசங் – ‘ப்³யாகதங் கோ², ஆவுஸோ
கஸ்ஸப ஆயஸ்மதா அனுருத்³தே⁴ன யதா²ஸகங் படிபா⁴னங். தத்த² தா³னி மயங்
ஆயஸ்மந்தங் மஹாகஸ்ஸபங் புச்சா²ம…பே॰… கத²ங் ரூபேன கோ², ஆவுஸோ கஸ்ஸப,
பி⁴க்கு²னா கோ³ஸிங்க³ஸாலவனங் ஸோபெ⁴ய்யா’தி? ஏவங் வுத்தே ப⁴ந்தே, ஆயஸ்மா
மஹாகஸ்ஸபோ மங் ஏதத³வோச – ‘இதா⁴வுஸோ ஸாரிபுத்த, பி⁴க்கு² அத்தனா ச ஆரஞ்ஞிகோ
ஹோதி ஆரஞ்ஞிகத்தஸ்ஸ ச வண்ணவாதீ³, அத்தனா ச பிண்ட³பாதிகோ ஹோதி…பே॰… அத்தனா ச
பங்ஸுகூலிகோ ஹோதி…பே॰… அத்தனா ச தேசீவரிகோ ஹோதி…பே॰… அத்தனா ச அப்பிச்சோ²
ஹோதி…பே॰… அத்தனா ச ஸந்துட்டோ² ஹோதி…பே॰… அத்தனா ச பவிவித்தோ ஹோதி…பே॰…
அத்தனா ச அஸங்ஸட்டோ² ஹோதி…பே॰… அத்தனா ச ஆரத்³த⁴வீரியோ ஹோதி…பே॰… அத்தனா ச
ஸீலஸம்பன்னோ ஹோதி…பே॰… அத்தனா ச ஸமாதி⁴ஸம்பன்னோ ஹோதி…பே॰… அத்தனா ச
பஞ்ஞாஸம்பன்னோ ஹோதி… அத்தனா ச விமுத்திஸம்பன்னோ ஹோதி…
அத்தனா ச விமுத்திஞாணத³ஸ்ஸனஸம்பன்னோ ஹோதி விமுத்திஞாணத³ஸ்ஸனஸம்பதா³ய ச
வண்ணவாதீ³. ஏவரூபேன கோ², ஆவுஸோ ஸாரிபுத்த, பி⁴க்கு²னா கோ³ஸிங்க³ஸாலவனங்
ஸோபெ⁴ய்யா’’’தி . ‘‘ஸாது⁴ ஸாது⁴, ஸாரிபுத்த! யதா²
தங் கஸ்ஸபோவ ஸம்மா ப்³யாகரமானோ ப்³யாகரெய்ய. கஸ்ஸபோ ஹி, ஸாரிபுத்த, அத்தனா ச
ஆரஞ்ஞிகோ ஆரஞ்ஞிகத்தஸ்ஸ ச வண்ணவாதீ³, அத்தனா ச பிண்ட³பாதிகோ
பிண்ட³பாதிகத்தஸ்ஸ ச வண்ணவாதீ³, அத்தனா ச பங்ஸுகூலிகோ பங்ஸுகூலிகத்தஸ்ஸ ச
வண்ணவாதீ³, அத்தனா ச தேசீவரிகோ தேசீவரிகத்தஸ்ஸ ச வண்ணவாதீ³, அத்தனா ச
அப்பிச்சோ² அப்பிச்ச²தாய ச வண்ணவாதீ³, அத்தனா ச ஸந்துட்டோ² ஸந்துட்டி²யா ச
வண்ணவாதீ³, அத்தனா ச பவிவித்தோ பவிவேகஸ்ஸ ச வண்ணவாதீ³, அத்தனா ச அஸங்ஸட்டோ²
அஸங்ஸக்³க³ஸ்ஸ ச வண்ணவாதீ³, அத்தனா ச ஆரத்³த⁴வீரியோ வீரியாரம்ப⁴ஸ்ஸ ச
வண்ணவாதீ³, அத்தனா ச ஸீலஸம்பன்னோ ஸீலஸம்பதா³ய ச வண்ணவாதீ³, அத்தனா ச
ஸமாதி⁴ஸம்பன்னோ ஸமாதி⁴ஸம்பதா³ய ச வண்ணவாதீ³, அத்தனா ச பஞ்ஞாஸம்பன்னோ
பஞ்ஞாஸம்பதா³ய ச வண்ணவாதீ³, அத்தனா ச விமுத்திஸம்பன்னோ விமுத்திஸம்பதா³ய ச
வண்ணவாதீ³, அத்தனா ச விமுத்திஞாணத³ஸ்ஸனஸம்பன்னோ விமுத்திஞாணத³ஸ்ஸனஸம்பதா³ய ச
வண்ணவாதீ³’’தி.
343. ‘‘ஏவங் வுத்தே, அஹங் ப⁴ந்தே ஆயஸ்மந்தங் மஹாமொக்³க³ல்லானங் ஏதத³வோசங் – ‘ப்³யாகதங் கோ², ஆவுஸோ மொக்³க³ல்லான, ஆயஸ்மதா மஹாகஸ்ஸபேன
யதா²ஸகங் படிபா⁴னங். தத்த² தா³னி மயங் ஆயஸ்மந்தங் மஹாமொக்³க³ல்லானங்
புச்சா²ம…பே॰… கத²ங்ரூபேன, ஆவுஸோ மொக்³க³ல்லான, பி⁴க்கு²னா
கோ³ஸிங்க³ஸாலவனங் ஸோபெ⁴ய்யா’தி? ஏவங் வுத்தே, ப⁴ந்தே, ஆயஸ்மா
மஹாமொக்³க³ல்லானோ மங் ஏதத³வோச – ‘இதா⁴வுஸோ ஸாரிபுத்த, த்³வே பி⁴க்கூ²
அபி⁴த⁴ம்மகத²ங் கதெ²ந்தி. தே அஞ்ஞமஞ்ஞங் பஞ்ஹங் புச்ச²ந்தி, அஞ்ஞமஞ்ஞஸ்ஸ
பஞ்ஹங் புட்டா² விஸ்ஸஜ்ஜெந்தி, நோ ச ஸங்ஸாதெ³ந்தி, த⁴ம்மீ ச நேஸங் கதா²
பவத்தினீ ஹோதி. ஏவரூபேன கோ², ஆவுஸோ ஸாரிபுத்த, பி⁴க்கு²னா கோ³ஸிங்க³ஸாலவனங்
ஸோபெ⁴ய்யா’’’தி. ‘‘ஸாது⁴ ஸாது⁴, ஸாரிபுத்த, யதா² தங் மொக்³க³ல்லானோவ ஸம்மா
ப்³யாகரமானோ ப்³யாகரெய்ய. மொக்³க³ல்லானோ ஹி, ஸாரிபுத்த, த⁴ம்மகதி²கோ’’தி.
344.
ஏவங் வுத்தே, ஆயஸ்மா மஹாமொக்³க³ல்லானோ ப⁴க³வந்தங் ஏதத³வோச – ‘‘அத²
க்²வாஹங், ப⁴ந்தே, ஆயஸ்மந்தங் ஸாரிபுத்தங் ஏதத³வோசங் – ‘ப்³யாகதங் கோ²,
ஆவுஸோ ஸாரிபுத்த, அம்ஹேஹி ஸப்³பே³ஹேவ யதா²ஸகங் படிபா⁴னங். தத்த² தா³னி
மயங் ஆயஸ்மந்தங் ஸாரிபுத்தங் புச்சா²ம – ரமணீயங், ஆவுஸோ ஸாரிபுத்த,
கோ³ஸிங்க³ஸாலவனங், தோ³ஸினா ரத்தி, ஸப்³ப³பா²லிபு²ல்லா ஸாலா, தி³ப்³பா³,
மஞ்ஞே, க³ந்தா⁴ ஸம்பவந்தி. கத²ங்ரூபேன, ஆவுஸோ ஸாரிபுத்த, பி⁴க்கு²னா
கோ³ஸிங்க³ஸாலவனங் ஸோபெ⁴ய்யா’தி? ஏவங் வுத்தே, ப⁴ந்தே, ஆயஸ்மா ஸாரிபுத்தோ
மங் ஏதத³வோச – ‘இதா⁴வுஸோ, மொக்³க³ல்லான, பி⁴க்கு² சித்தங் வஸங் வத்தேதி நோ ச
பி⁴க்கு² சித்தஸ்ஸ வஸேன வத்ததி. ஸோ யாய விஹாரஸமாபத்தியா ஆகங்க²தி
புப்³ப³ண்ஹஸமயங் விஹரிதுங், தாய விஹாரஸமாபத்தியா புப்³ப³ண்ஹஸமயங்
விஹரதி; யாய விஹாரஸமாபத்தியா ஆகங்க²தி மஜ்ஜ²ன்ஹிகஸமயங் விஹரிதுங், தாய
விஹாரஸமாபத்தியா மஜ்ஜ²ன்ஹிகஸமயங் விஹரதி; யாய விஹாரஸமாபத்தியா ஆகங்க²தி
ஸாயன்ஹஸமயங் விஹரிதுங், தாய விஹாரஸமாபத்தியா ஸாயன்ஹஸமயங் விஹரதி.
ஸெய்யதா²பி, ஆவுஸோ மொக்³க³ல்லான, ரஞ்ஞோ வா ராஜமஹாமத்தஸ்ஸ வா நானாரத்தானங்
து³ஸ்ஸானங் து³ஸ்ஸகரண்ட³கோ பூரோ அஸ்ஸ. ஸோ யஞ்ஞதே³வ து³ஸ்ஸயுக³ங் ஆகங்கெ²ய்ய
புப்³ப³ண்ஹஸமயங் பாருபிதுங் , தங் ததே³வ
து³ஸ்ஸயுக³ங் புப்³ப³ண்ஹஸமயங் பாருபெய்ய; யஞ்ஞதே³வ து³ஸ்ஸயுக³ங் ஆகங்கெ²ய்ய
மஜ்ஜ²ன்ஹிகஸமயங் பாருபிதுங், தங் ததே³வ து³ஸ்ஸயுக³ங் மஜ்ஜ²ன்ஹிகஸமயங்
பாருபெய்ய; யஞ்ஞதே³வ து³ஸ்ஸயுக³ங் ஆகங்கெ²ய்ய ஸாயன்ஹஸமயங் பாருபிதுங், தங்
ததே³வ து³ஸ்ஸயுக³ங் ஸாயன்ஹஸமயங் பாருபெய்ய. ஏவமேவ கோ², ஆவுஸோ மொக்³க³ல்லான,
பி⁴க்கு² சித்தங் வஸங் வத்தேதி, நோ ச பி⁴க்கு² சித்தஸ்ஸ வஸேன வத்ததி. ஸோ
யாய விஹாரஸமாபத்தியா ஆகங்க²தி புப்³ப³ண்ஹஸமயங் விஹரிதுங், தாய
விஹாரஸமாபத்தியா புப்³ப³ண்ஹஸமயங் விஹரதி; யாய விஹாரஸமாபத்தியா ஆகங்க²தி
மஜ்ஜ²ன்ஹிகஸமயங் விஹரிதுங், தாய விஹாரஸமாபத்தியா மஜ்ஜ²ன்ஹிகஸமயங் விஹரதி;
யாய விஹாரஸமாபத்தியா ஆகங்க²தி ஸாயன்ஹஸமயங் விஹரிதுங், தாய விஹாரஸமாபத்தியா
ஸாயன்ஹஸமயங் விஹரதி. ஏவரூபேன கோ², ஆவுஸோ மொக்³க³ல்லான, பி⁴க்கு²னா
கோ³ஸிங்க³ஸாலவனங் ஸோபெ⁴ய்யா’’’தி. ‘‘ஸாது⁴ ஸாது⁴, மொக்³க³ல்லான! யதா² தங்
ஸாரிபுத்தோவ ஸம்மா ப்³யாகரமானோ ப்³யாகரெய்ய. ஸாரிபுத்தோ ஹி, மொக்³க³ல்லான,
சித்தங் வஸங் வத்தேதி நோ ச ஸாரிபுத்தோ சித்தஸ்ஸ வஸேன வத்ததி. ஸோ யாய
விஹாரஸமாபத்தியா ஆகங்க²தி
புப்³ப³ண்ஹஸமயங் விஹரிதுங், தாய விஹாரஸமாபத்தியா புப்³ப³ண்ஹஸமயங் விஹரதி;
யாய விஹாரஸமாபத்தியா ஆகங்க²தி மஜ்ஜ²ன்ஹிகஸமயங் விஹரிதுங், தாய
விஹாரஸமாபத்தியா மஜ்ஜ²ன்ஹிகஸமயங் விஹரதி; யாய விஹாரஸமாபத்தியா ஆகங்க²தி
ஸாயன்ஹஸமயங் விஹரிதுங், தாய விஹாரஸமாபத்தியா ஸாயன்ஹஸமயங் விஹரதீ’’தி.
345. ஏவங்
வுத்தே, ஆயஸ்மா ஸாரிபுத்தோ ப⁴க³வந்தங் ஏதத³வோச – ‘‘கஸ்ஸ நு கோ², ப⁴ந்தே,
ஸுபா⁴ஸித’’ந்தி? ‘‘ஸப்³பே³ஸங் வோ, ஸாரிபுத்த, ஸுபா⁴ஸிதங் பரியாயேன. அபி ச
மமபி ஸுணாத² யதா²ரூபேன பி⁴க்கு²னா கோ³ஸிங்க³ஸாலவனங் ஸோபெ⁴ய்ய. இத⁴,
ஸாரிபுத்த, பி⁴க்கு² பச்சா²ப⁴த்தங் பிண்ட³பாதபடிக்கந்தோ நிஸீத³தி பல்லங்கங்
ஆபு⁴ஜித்வா உஜுங் காயங் பணிதா⁴ய பரிமுக²ங் ஸதிங் உபட்ட²பெத்வா – ‘ந
தாவாஹங் இமங் பல்லங்கங் பி⁴ந்தி³ஸ்ஸாமி யாவ மே நானுபாதா³ய ஆஸவேஹி சித்தங்
விமுச்சிஸ்ஸதீ’தி. ஏவரூபேன கோ², ஸாரிபுத்த, பி⁴க்கு²னா கோ³ஸிங்க³ஸாலவனங்
ஸோபெ⁴ய்யா’’தி.
இத³மவோச ப⁴க³வா. அத்தமனா தே ஆயஸ்மந்தோ [தே பி⁴க்கூ² (க॰)] ப⁴க³வதோ பா⁴ஸிதங் அபி⁴னந்து³ந்தி.
மஹாகோ³ஸிங்க³ஸுத்தங் நிட்டி²தங் து³தியங்.
3. மஹாகோ³பாலகஸுத்தங்
346. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘ஏகாத³ஸஹி, பி⁴க்க²வே, அங்கே³ஹி ஸமன்னாக³தோ கோ³பாலகோ அப⁴ப்³போ³ கோ³க³ணங் பரிஹரிதுங் பா²திங் காதுங் [பா²திகத்துங் (ஸீ॰ பீ॰), பா²திகாதுங் (ஸ்யா॰ கங்॰)]. கதமேஹி ஏகாத³ஸஹி? இத⁴, பி⁴க்க²வே, கோ³பாலகோ ந ரூபஞ்ஞூ ஹோதி, ந லக்க²ணகுஸலோ ஹோதி, ந ஆஸாடிகங் ஹாரேதா [ஸாடேதா (ஸீ॰ ஸ்யா॰ கங்॰ பீ॰)]
ஹோதி, ந வணங் படிச்சா²தே³தா ஹோதி, ந தூ⁴மங் கத்தா ஹோதி, ந தித்த²ங்
ஜானாதி, ந பீதங் ஜானாதி, ந வீதி²ங் ஜானாதி, ந கோ³சரகுஸலோ ஹோதி அனவஸேஸதோ³ஹீ ச
ஹோதி. யே தே உஸபா⁴ கோ³பிதரோ கோ³பரிணாயகா தே ந அதிரேகபூஜாய பூஜேதா ஹோதி.
இமேஹி கோ², பி⁴க்க²வே, ஏகாத³ஸஹி அங்கே³ஹி ஸமன்னாக³தோ கோ³பாலகோ அப⁴ப்³போ³
கோ³க³ணங் பரிஹரிதுங் பா²திங் காதுங். ஏவமேவ கோ², பி⁴க்க²வே, ஏகாத³ஸஹி
த⁴ம்மேஹி ஸமன்னாக³தோ பி⁴க்கு² அப⁴ப்³போ³ இமஸ்மிங் த⁴ம்மவினயே
வுத்³தி⁴ங் விரூள்ஹிங் வேபுல்லங் ஆபஜ்ஜிதுங். கதமேஹி ஏகாத³ஸஹி? இத⁴,
பி⁴க்க²வே, பி⁴க்கு² ந ரூபஞ்ஞூ ஹோதி, ந லக்க²ணகுஸலோ ஹோதி, ந ஆஸாடிகங்
ஹாரேதா ஹோதி, ந வணங் படிச்சா²தே³தா ஹோதி, ந தூ⁴மங் கத்தா ஹோதி, ந தித்த²ங்
ஜானாதி, ந பீதங் ஜானாதி, ந வீதி²ங் ஜானாதி, ந கோ³சரகுஸலோ ஹோதி, அனவஸேஸதோ³ஹீ
ச ஹோதி. யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா தே ந அதிரேகபூஜாய பூஜேதா ஹோதி.
347.
‘‘கத²ஞ்ச, பி⁴க்க²வே, பி⁴க்கு² ந ரூபஞ்ஞூ ஹோதி? இத⁴, பி⁴க்க²வே, பி⁴க்கு²
யங் கிஞ்சி ரூபங் ஸப்³ப³ங் ரூபங் ‘சத்தாரி மஹாபூ⁴தானி, சதுன்னஞ்ச
மஹாபூ⁴தானங் உபாதா³யரூப’ந்தி யதா²பூ⁴தங் நப்பஜானாதி. ஏவங் கோ², பி⁴க்க²வே,
பி⁴க்கு² ந ரூபஞ்ஞூ ஹோதி.
‘‘கத²ஞ்ச, பி⁴க்க²வே, பி⁴க்கு² ந லக்க²ணகுஸலோ ஹோதி? இத⁴, பி⁴க்க²வே, பி⁴க்கு² ‘கம்மலக்க²ணோ பா³லோ, கம்மலக்க²ணோ பண்டி³தோ’தி யதா²பூ⁴தங் நப்பஜானாதி. ஏவங் கோ², பி⁴க்க²வே, பி⁴க்கு² ந லக்க²ணகுஸலோ ஹோதி.
‘‘கத²ஞ்ச, பி⁴க்க²வே, பி⁴க்கு² ந ஆஸாடிகங் ஹாரேதா
ஹோதி? இத⁴, பி⁴க்க²வே, பி⁴க்கு² உப்பன்னங் காமவிதக்கங் அதி⁴வாஸேதி,
நப்பஜஹதி ந வினோதே³தி ந ப்³யந்தீ கரோதி ந அனபா⁴வங் க³மேதி. உப்பன்னங்
ப்³யாபாத³விதக்கங்…பே॰… உப்பன்னங் விஹிங்ஸாவிதக்கங்…பே॰… உப்பன்னுப்பன்னே
பாபகே அகுஸலே த⁴ம்மே அதி⁴வாஸேதி, நப்பஜஹதி ந வினோதே³தி ந ப்³யந்தீ கரோதி ந அனபா⁴வங் க³மேதி. ஏவங் கோ², பி⁴க்க²வே, பி⁴க்கு² ந ஆஸாடிகங் ஹாரேதா ஹோதி.
‘‘கத²ஞ்ச, பி⁴க்க²வே, பி⁴க்கு² ந வணங் படிச்சா²தே³தா
ஹோதி? இத⁴, பி⁴க்க²வே, பி⁴க்கு² சக்கு²னா ரூபங் தி³ஸ்வா நிமித்தக்³கா³ஹீ
ஹோதி அனுப்³யஞ்ஜனக்³கா³ஹீ. யத்வாதி⁴கரணமேனங் சக்கு²ந்த்³ரியங் அஸங்வுதங்
விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ
ஸங்வராய ந படிபஜ்ஜதி, ந ரக்க²தி சக்கு²ந்த்³ரியங்,
சக்கு²ந்த்³ரியே ந ஸங்வரங் ஆபஜ்ஜதி. ஸோதேன ஸத்³த³ங் ஸுத்வா…பே॰… கா⁴னேன
க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங்
பு²ஸித்வா…பே॰… மனஸா த⁴ம்மங் விஞ்ஞாய நிமித்தக்³கா³ஹீ ஹோதி
அனுப்³யஞ்ஜனக்³கா³ஹீ. யத்வாதி⁴கரணமேனங் மனிந்த்³ரியங் அஸங்வுதங் விஹரந்தங்
அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய ந
படிபஜ்ஜதி, ந ரக்க²தி மனிந்த்³ரியங், மனிந்த்³ரியே ந ஸங்வரங் ஆபஜ்ஜதி. ஏவங் கோ², பி⁴க்க²வே, பி⁴க்கு² ந வணங் படிச்சா²தே³தா ஹோதி.
‘‘கத²ஞ்ச, பி⁴க்க²வே, பி⁴க்கு² ந தூ⁴மங் கத்தா ஹோதி?
இத⁴, பி⁴க்க²வே, பி⁴க்கு² யதா²ஸுதங் யதா²பரியத்தங் த⁴ம்மங் ந வித்தா²ரேன
பரேஸங் தே³ஸேதா ஹோதி. ஏவங் கோ², பி⁴க்க²வே, பி⁴க்கு² ந தூ⁴மங் கத்தா ஹோதி.
‘‘கத²ஞ்ச, பி⁴க்க²வே, பி⁴க்கு² ந தித்த²ங் ஜானாதி?
இத⁴, பி⁴க்க²வே, பி⁴க்கு² யே தே பி⁴க்கூ² ப³ஹுஸ்ஸுதா ஆக³தாக³மா த⁴ம்மத⁴ரா
வினயத⁴ரா மாதிகாத⁴ரா, தே காலேன காலங் உபஸங்கமித்வா ந பரிபுச்ச²தி, ந
பரிபஞ்ஹதி – ‘இத³ங், ப⁴ந்தே, கத²ங்? இமஸ்ஸ கோ அத்தோ²’தி? தஸ்ஸ தே ஆயஸ்மந்தோ
அவிவடஞ்சேவ ந விவரந்தி, அனுத்தானீகதஞ்ச ந உத்தானீ கரொந்தி, அனேகவிஹிதேஸு ச கங்கா²டா²னீயேஸு த⁴ம்மேஸு கங்க²ங் ந படிவினோதெ³ந்தி. ஏவங் கோ², பி⁴க்க²வே, பி⁴க்கு² ந தித்த²ங் ஜானாதி.
‘‘கத²ஞ்ச, பி⁴க்க²வே, பி⁴க்கு² ந பீதங் ஜானாதி? இத⁴,
பி⁴க்க²வே, பி⁴க்கு² ததா²க³தப்பவேதி³தே த⁴ம்மவினயே தே³ஸியமானே ந லப⁴தி
அத்த²வேத³ங், ந லப⁴தி த⁴ம்மவேத³ங், ந லப⁴தி த⁴ம்மூபஸங்ஹிதங் பாமோஜ்ஜங்.
ஏவங் கோ², பி⁴க்க²வே, பி⁴க்கு² ந பீதங் ஜானாதி.
‘‘கத²ஞ்ச, பி⁴க்க²வே, பி⁴க்கு² ந
வீதி²ங் ஜானாதி? இத⁴, பி⁴க்க²வே, பி⁴க்கு² அரியங் அட்ட²ங்கி³கங் மக்³க³ங்
யதா²பூ⁴தங் நப்பஜானாதி. ஏவங் கோ², பி⁴க்க²வே, பி⁴க்கு² ந வீதி²ங் ஜானாதி.
‘‘கத²ஞ்ச, பி⁴க்க²வே, பி⁴க்கு² ந கோ³சரகுஸலோ ஹோதி?
இத⁴, பி⁴க்க²வே, பி⁴க்கு² சத்தாரோ ஸதிபட்டா²னே யதா²பூ⁴தங் நப்பஜானாதி. ஏவங்
கோ², பி⁴க்க²வே , பி⁴க்கு² ந கோ³சரகுஸலோ ஹோதி.
‘‘கத²ஞ்ச, பி⁴க்க²வே, பி⁴க்கு² அனவஸேஸதோ³ஹீ ஹோதி? இத⁴,
பி⁴க்க²வே, பி⁴க்கு²ங் ஸத்³தா⁴ க³ஹபதிகா அபி⁴ஹட்டு²ங் பவாரெந்தி
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி, தத்ர பி⁴க்கு²
மத்தங் ந ஜானாதி படிக்³க³ஹணாய. ஏவங் கோ², பி⁴க்க²வே, பி⁴க்கு² அனவஸேஸதோ³ஹீ
ஹோதி.
‘‘கத²ஞ்ச, பி⁴க்க²வே, பி⁴க்கு² யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா தே ந அதிரேகபூஜாய பூஜேதா ஹோதி ?
இத⁴, பி⁴க்க²வே, பி⁴க்கு² யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா
ஸங்க⁴பிதரோ ஸங்க⁴பரிணாயகா, தேஸு ந மெத்தங் காயகம்மங் பச்சுபட்டா²பேதி ஆவி
சேவ ரஹோ ச; ந மெத்தங் வசீகம்மங் பச்சுபட்டா²பேதி ஆவி சேவ ரஹோ ச; ந மெத்தங்
மனோகம்மங் பச்சுபட்டா²பேதி ஆவி சேவ ரஹோ ச. ஏவங் கோ², பி⁴க்க²வே, பி⁴க்கு²
யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா தே ந
அதிரேகபூஜாய பூஜேதா ஹோதி.
‘‘இமேஹி கோ² பி⁴க்க²வே ஏகாத³ஸஹி த⁴ம்மேஹி ஸமன்னாக³தோ
பி⁴க்கு² அப⁴ப்³போ³ இமஸ்மிங் த⁴ம்மவினயே வுத்³தி⁴ங் விரூள்ஹிங் வேபுல்லங்
ஆபஜ்ஜிதுங்.
348. ‘‘ஏகாத³ஸஹி , பி⁴க்க²வே, அங்கே³ஹி ஸமன்னாக³தோ கோ³பாலகோ ப⁴ப்³போ³ கோ³க³ணங் பரிஹரிதுங் பா²திங் காதுங். கதமேஹி ஏகாத³ஸஹி? இத⁴, பி⁴க்க²வே ,
கோ³பாலகோ ரூபஞ்ஞூ ஹோதி, லக்க²ணகுஸலோ ஹோதி, ஆஸாடிகங் ஹாரேதா ஹோதி, வணங்
படிச்சா²தே³தா ஹோதி, தூ⁴மங் கத்தா ஹோதி, தித்த²ங் ஜானாதி, பீதங் ஜானாதி,
வீதி²ங் ஜானாதி, கோ³சரகுஸலோ ஹோதி, ஸாவஸேஸதோ³ஹீ ச ஹோதி. யே தே உஸபா⁴
கோ³பிதரோ கோ³பரிணாயகா தே அதிரேகபூஜாய பூஜேதா ஹோதி. இமேஹி கோ², பி⁴க்க²வே,
ஏகாத³ஸஹி அங்கே³ஹி ஸமன்னாக³தோ கோ³பாலகோ ப⁴ப்³போ³ கோ³க³ணங் பரிஹரிதுங்
பா²திங் காதுங். ஏவமேவ கோ², பி⁴க்க²வே, ஏகாத³ஸஹி த⁴ம்மேஹி ஸமன்னாக³தோ
பி⁴க்கு² ப⁴ப்³போ³ இமஸ்மிங் த⁴ம்மவினயே வுத்³தி⁴ங் விரூள்ஹிங் வேபுல்லங்
ஆபஜ்ஜிதுங். கதமேஹி ஏகாத³ஸஹி? இத⁴, பி⁴க்க²வே, பி⁴க்கு² ரூபஞ்ஞூ ஹோதி,
லக்க²ணகுஸலோ ஹோதி, ஆஸாடிகங் ஹாரேதா ஹோதி, வணங் படிச்சா²தே³தா ஹோதி, தூ⁴மங்
கத்தா ஹோதி, தித்த²ங் ஜானாதி, பீதங் ஜானாதி, வீதி²ங் ஜானாதி, கோ³சரகுஸலோ
ஹோதி, ஸாவஸேஸதோ³ஹீ ச ஹோதி. யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா
ஸங்க⁴பிதரோ ஸங்க⁴பரிணாயகா தே அதிரேகபூஜாய பூஜேதா ஹோதி.
349. ‘‘கத²ஞ்ச, பி⁴க்க²வே, பி⁴க்கு² ரூபஞ்ஞூ ஹோதி? இத⁴, பி⁴க்க²வே, பி⁴க்கு² யங் கிஞ்சி ரூபங் ஸப்³ப³ங் ரூபங் ‘சத்தாரி மஹாபூ⁴தானி , சதுன்னஞ்ச மஹாபூ⁴தானங் உபாதா³யரூப’ந்தி யதா²பூ⁴தங் பஜானாதி. ஏவங் கோ², பி⁴க்க²வே, பி⁴க்கு² ரூபஞ்ஞூ ஹோதி.
‘‘கத²ஞ்ச, பி⁴க்க²வே, பி⁴க்கு² லக்க²ணகுஸலோ ஹோதி? இத⁴,
பி⁴க்க²வே, பி⁴க்கு² கம்மலக்க²ணோ பா³லோ, கம்மலக்க²ணோ பண்டி³தோதி
யதா²பூ⁴தங் பஜானாதி. ஏவங் கோ², பி⁴க்க²வே, பி⁴க்கு² லக்க²ணகுஸலோ ஹோதி.
‘‘கத²ஞ்ச , பி⁴க்க²வே, பி⁴க்கு² ஆஸாடிகங் ஹாரேதா ஹோதி? இத⁴, பி⁴க்க²வே, பி⁴க்கு² உப்பன்னங்
காமவிதக்கங் நாதி⁴வாஸேதி, பஜஹதி வினோதே³தி ப்³யந்தீ கரோதி அனபா⁴வங்
க³மேதி. உப்பன்னங் ப்³யாபாத³விதக்கங்…பே॰… உப்பன்னங் விஹிங்ஸாவிதக்கங்…பே॰…
உப்பன்னுப்பன்னே பாபகே அகுஸலே த⁴ம்மே நாதி⁴வாஸேதி, பஜஹதி வினோதே³தி
ப்³யந்தீ கரோதி அனபா⁴வங் க³மேதி. ஏவங் கோ², பி⁴க்க²வே, பி⁴க்கு² ஆஸாடிகங்
ஹாரேதா ஹோதி.
‘‘கத²ஞ்ச, பி⁴க்க²வே, பி⁴க்கு² வணங் படிச்சா²தே³தா ஹோதி? இத⁴, பி⁴க்க²வே, பி⁴க்கு² சக்கு²னா
ரூபங் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ.
யத்வாதி⁴கரணமேனங் சக்கு²ந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா
பாபகா அகுஸலா த⁴ம்மா அன்வாஸ்ஸவெய்யுங் தஸ்ஸ ஸங்வராய படிபஜ்ஜதி, ரக்க²தி
சக்கு²ந்த்³ரியங், சக்கு²ந்த்³ரியே ஸங்வரங் ஆபஜ்ஜதி. ஸோதேன ஸத்³த³ங்
ஸுத்வா…பே॰… கா⁴னேன க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰…
காயேன பொ²ட்ட²ப்³ப³ங் பு²ஸித்வா…பே॰… மனஸா த⁴ம்மங் விஞ்ஞாய ந
நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனங்
மனிந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா
அன்வாஸ்ஸவெய்யுங் தஸ்ஸ ஸங்வராய படிபஜ்ஜதி, ரக்க²தி மனிந்த்³ரியங்,
மனிந்த்³ரியே ஸங்வரங் ஆபஜ்ஜதி. ஏவங் கோ², பி⁴க்க²வே, பி⁴க்கு² வணங்
படிச்சா²தே³தா ஹோதி.
‘‘கத²ஞ்ச, பி⁴க்க²வே, பி⁴க்கு² தூ⁴மங் கத்தா ஹோதி?
இத⁴, பி⁴க்க²வே, பி⁴க்கு² யதா²ஸுதங் யதா²பரியத்தங் த⁴ம்மங் வித்தா²ரேன
பரேஸங் தே³ஸேதா ஹோதி. ஏவங் கோ², பி⁴க்க²வே, பி⁴க்கு² தூ⁴மங் கத்தா ஹோதி.
‘‘கத²ஞ்ச, பி⁴க்க²வே, பி⁴க்கு² தித்த²ங் ஜானாதி? இத⁴,
பி⁴க்க²வே, பி⁴க்கு² யே தே பி⁴க்கூ² ப³ஹுஸ்ஸுதா ஆக³தாக³மா த⁴ம்மத⁴ரா
வினயத⁴ரா மாதிகாத⁴ரா தே காலேன காலங் உபஸங்கமித்வா
பரிபுச்ச²தி, பரிபஞ்ஹதி – ‘இத³ங், ப⁴ந்தே, கத²ங்? இமஸ்ஸ கோ அத்தோ²’தி? தஸ்ஸ
தே ஆயஸ்மந்தோ அவிவடஞ்சேவ விவரந்தி, அனுத்தானீகதஞ்ச உத்தானீ கரொந்தி,
அனேகவிஹிதேஸு ச கங்கா²டா²னீயேஸு த⁴ம்மேஸு கங்க²ங் படிவினோதெ³ந்தி. ஏவங்
கோ², பி⁴க்க²வே, பி⁴க்கு² தித்த²ங் ஜானாதி.
‘‘கத²ஞ்ச பி⁴க்க²வே, பி⁴க்கு²
பீதங் ஜானாதி? இத⁴, பி⁴க்க²வே, பி⁴க்கு² ததா²க³தப்பவேதி³தே த⁴ம்மவினயே
தே³ஸியமானே லப⁴தி அத்த²வேத³ங், லப⁴தி த⁴ம்மவேத³ங், லப⁴தி த⁴ம்மூபஸங்ஹிதங்
பாமோஜ்ஜங். ஏவங் கோ², பி⁴க்க²வே, பி⁴க்கு² பீதங் ஜானாதி.
‘‘கத²ஞ்ச , பி⁴க்க²வே, பி⁴க்கு²
வீதி²ங் ஜானாதி? இத⁴, பி⁴க்க²வே, பி⁴க்கு² அரியங் அட்ட²ங்கி³கங் மக்³க³ங்
யதா²பூ⁴தங் பஜானாதி. ஏவங் கோ², பி⁴க்க²வே, பி⁴க்கு² வீதி²ங் ஜானாதி.
‘‘கத²ஞ்ச, பி⁴க்க²வே, பி⁴க்கு² கோ³சரகுஸலோ ஹோதி? இத⁴,
பி⁴க்க²வே, பி⁴க்கு² சத்தாரோ ஸதிபட்டா²னே யதா²பூ⁴தங் பஜானாதி. ஏவங் கோ²,
பி⁴க்க²வே, பி⁴க்கு² கோ³சரகுஸலோ ஹோதி.
‘‘கத²ஞ்ச பி⁴க்க²வே, பி⁴க்கு²
ஸாவஸேஸதோ³ஹீ ஹோதி? இத⁴, பி⁴க்க²வே, பி⁴க்கு²ங் ஸத்³தா⁴ க³ஹபதிகா
அபி⁴ஹட்டு²ங் பவாரெந்தி
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி. தத்ர பி⁴க்கு²
மத்தங் ஜானாதி படிக்³க³ஹணாய. ஏவங் கோ², பி⁴க்க²வே, பி⁴க்கு² ஸாவஸேஸதோ³ஹீ
ஹோதி.
‘‘கத²ஞ்ச, பி⁴க்க²வே, பி⁴க்கு² யே தே பி⁴க்கூ² தே²ரா
ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா, தே அதிரேகபூஜாய பூஜேதா
ஹோதி? இத⁴, பி⁴க்க²வே, பி⁴க்கு² யே தே பி⁴க்கூ² தே²ரா ரத்தஞ்ஞூ
சிரபப்³ப³ஜிதா ஸங்க⁴பிதரோ ஸங்க⁴பரிணாயகா தேஸு மெத்தங் காயகம்மங்
பச்சுபட்டா²பேதி ஆவி சேவ ரஹோ ச; மெத்தங் வசீகம்மங்
பச்சுபட்டா²பேதி ஆவி சேவ ரஹோ ச; மெத்தங் மனோகம்மங் பச்சுபட்டா²பேதி ஆவி சேவ
ரஹோ ச. ஏவங் கோ², பி⁴க்க²வே, பி⁴க்கு² யே தே பி⁴க்கூ² தே²ரா ரத்தஞ்ஞூ
சிரபப்³ப³ஜிதா ஸங்க⁴பிதரோ ஸங்க⁴பரிணாயகா தே அதிரேகபூஜாய பூஜேதா ஹோதி.
‘‘இமேஹி கோ², பி⁴க்க²வே, ஏகாத³ஸஹி த⁴ம்மேஹி ஸமன்னாக³தோ
பி⁴க்கு² ப⁴ப்³போ³ இமஸ்மிங் த⁴ம்மவினயே வுத்³தி⁴ங் விரூள்ஹிங் வேபுல்லங்
ஆபஜ்ஜிது’’ந்தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
மஹாகோ³பாலகஸுத்தங் நிட்டி²தங் ததியங்.
4. சூளகோ³பாலகஸுத்தங்
350. ஏவங்
மே ஸுதங் – ஏகங் ஸமயங் ப⁴க³வா வஜ்ஜீஸு விஹரதி உக்கசேலாயங் க³ங்கா³ய நதி³யா
தீரே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘பூ⁴தபுப்³ப³ங் , பி⁴க்க²வே,
மாக³த⁴கோ கோ³பாலகோ து³ப்பஞ்ஞஜாதிகோ, வஸ்ஸானங் பச்சி²மே மாஸே ஸரத³ஸமயே,
அஸமவெக்கி²த்வா க³ங்கா³ய நதி³யா ஓரிமங் தீரங், அஸமவெக்கி²த்வா பாரிமங்
தீரங், அதித்தே²னேவ கா³வோ பதாரேஸி உத்தரங் தீரங் ஸுவிதே³ஹானங். அத² கோ²,
பி⁴க்க²வே, கா³வோ மஜ்ஜே²க³ங்கா³ய நதி³யா ஸோதே ஆமண்ட³லியங் கரித்வா தத்தே²வ
அனயப்³யஸனங் ஆபஜ்ஜிங்ஸு. தங் கிஸ்ஸ ஹேது? ததா² ஹி ஸோ, பி⁴க்க²வே, மாக³த⁴கோ
கோ³பாலகோ து³ப்பஞ்ஞஜாதிகோ, வஸ்ஸானங் பச்சி²மே மாஸே ஸரத³ஸமயே,
அஸமவெக்கி²த்வா க³ங்கா³ய நதி³யா ஓரிமங் தீரங், அஸமவெக்கி²த்வா பாரிமங்
தீரங், அதித்தே²னேவ கா³வோ பதாரேஸி உத்தரங் தீரங் ஸுவிதே³ஹானங். ஏவமேவ கோ²,
பி⁴க்க²வே, யே ஹி கேசி [யே கேசி (ஸ்யா॰ கங்॰)]
ஸமணா வா ப்³ராஹ்மணா வா அகுஸலா இமஸ்ஸ லோகஸ்ஸ அகுஸலா பரஸ்ஸ லோகஸ்ஸ, அகுஸலா
மாரதெ⁴ய்யஸ்ஸ அகுஸலா அமாரதெ⁴ய்யஸ்ஸ, அகுஸலா மச்சுதெ⁴ய்யஸ்ஸ அகுஸலா
அமச்சுதெ⁴ய்யஸ்ஸ, தேஸங் யே ஸோதப்³ப³ங் ஸத்³த³ஹாதப்³ப³ங் மஞ்ஞிஸ்ஸந்தி,
தேஸங் தங் ப⁴விஸ்ஸதி தீ³க⁴ரத்தங் அஹிதாய து³க்கா²ய.
351. ‘‘பூ⁴தபுப்³ப³ங், பி⁴க்க²வே, மாக³த⁴கோ கோ³பாலகோ ஸப்பஞ்ஞஜாதிகோ, வஸ்ஸானங்
பச்சி²மே மாஸே ஸரத³ஸமயே, ஸமவெக்கி²த்வா க³ங்கா³ய நதி³யா ஓரிமங் தீரங்,
ஸமவெக்கி²த்வா பாரிமங் தீரங், தித்தே²னேவ கா³வோ பதாரேஸி உத்தரங் தீரங்
ஸுவிதே³ஹானங். ஸோ பட²மங் பதாரேஸி யே தே உஸபா⁴ கோ³பிதரோ கோ³பரிணாயகா. தே
திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு. அதா²பரே பதாரேஸி
ப³லவகா³வோ த³ம்மகா³வோ. தேபி திரியங் க³ங்கா³ய ஸோதங் செ²த்வா ஸொத்தி²னா
பாரங் அக³மங்ஸு. அதா²பரே பதாரேஸி வச்ச²தரே வச்ச²தரியோ. தேபி திரியங்
க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு. அதா²பரே பதாரேஸி வச்ச²கே
கிஸாப³லகே [கிஸப³லகே (ஸீ॰ ஸ்யா॰ பீ॰)]. தேபி
திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு. பூ⁴தபுப்³ப³ங்,
பி⁴க்க²வே, வச்ச²கோ தருணகோ தாவதே³வ ஜாதகோ மாதுகோ³ரவகேன வுய்ஹமானோ, ஸோபி
திரியங் க³ங்கா³ய ஸோதங் செ²த்வா ஸொத்தி²னா பாரங் அக³மாஸி. தங் கிஸ்ஸ ஹேது?
ததா² ஹி ஸோ, பி⁴க்க²வே, மாக³த⁴கோ கோ³பாலகோ ஸப்பஞ்ஞஜாதிகோ , வஸ்ஸானங் பச்சி²மே மாஸே ஸரத³ஸமயே, ஸமவெக்கி²த்வா க³ங்கா³ய நதி³யா ஓரிமங்
தீரங், ஸமவெக்கி²த்வா பாரிமங் தீரங், தித்தே²னேவ கா³வோ பதாரேஸி உத்தரங்
தீரங் ஸுவிதே³ஹானங். ஏவமேவ கோ², பி⁴க்க²வே, யே ஹி கேசி ஸமணா வா ப்³ராஹ்மணா
வா குஸலா இமஸ்ஸ லோகஸ்ஸ குஸலா பரஸ்ஸ லோகஸ்ஸ, குஸலா மாரதெ⁴ய்யஸ்ஸ குஸலா
அமாரதெ⁴ய்யஸ்ஸ, குஸலா மச்சுதெ⁴ய்யஸ்ஸ குஸலா அமச்சுதெ⁴ய்யஸ்ஸ, தேஸங் யே
ஸோதப்³ப³ங் ஸத்³த³ஹாதப்³ப³ங் மஞ்ஞிஸ்ஸந்தி, தேஸங் தங் ப⁴விஸ்ஸதி
தீ³க⁴ரத்தங் ஹிதாய ஸுகா²ய.
352. ‘‘ஸெய்யதா²பி ,
பி⁴க்க²வே, யே தே உஸபா⁴ கோ³பிதரோ கோ³பரிணாயகா தே திரியங் க³ங்கா³ய ஸோதங்
செ²த்வா ஸொத்தி²னா பாரங் அக³மங்ஸு, ஏவமேவ கோ², பி⁴க்க²வே, யே தே பி⁴க்கூ²
அரஹந்தோ கீ²ணாஸவா வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா²
பரிக்கீ²ணப⁴வஸங்யோஜனா ஸம்மத³ஞ்ஞா விமுத்தா, தே திரியங் மாரஸ்ஸ ஸோதங்
செ²த்வா ஸொத்தி²னா பாரங் க³தா.
‘‘ஸெய்யதா²பி தே, பி⁴க்க²வே, ப³லவகா³வோ த³ம்மகா³வோ
திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு, ஏவமேவ கோ²,
பி⁴க்க²வே, யே தே பி⁴க்கூ² பஞ்சன்னங் ஓரம்பா⁴கி³யானங் ஸங்யோஜனானங்
பரிக்க²யா ஓபபாதிகா தத்த² பரினிப்³பா³யினோ அனாவத்தித⁴ம்மா தஸ்மா லோகா, தேபி
திரியங் மாரஸ்ஸ ஸோதங் செ²த்வா ஸொத்தி²னா பாரங் க³மிஸ்ஸந்தி.
‘‘ஸெய்யதா²பி தே, பி⁴க்க²வே, வச்ச²தரா வச்ச²தரியோ
திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு, ஏவமேவ கோ²,
பி⁴க்க²வே, யே தே பி⁴க்கூ² திண்ணங் ஸங்யோஜனானங் பரிக்க²யா ராக³தோ³ஸமோஹானங்
தனுத்தா ஸகதா³கா³மினோ ஸகிங்தே³வ இமங் லோகங் ஆக³ந்த்வா து³க்க²ஸ்ஸந்தங்
கரிஸ்ஸந்தி, தேபி திரியங் மாரஸ்ஸ ஸோதங் செ²த்வா ஸொத்தி²னா பாரங்
க³மிஸ்ஸந்தி.
‘‘ஸெய்யதா²பி தே, பி⁴க்க²வே, வச்ச²கா கிஸாப³லகா
திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு, ஏவமேவ கோ²,
பி⁴க்க²வே, யே தே பி⁴க்கூ² திண்ணங் ஸங்யோஜனானங் பரிக்க²யா ஸோதாபன்னா
அவினிபாதத⁴ம்மா நியதா ஸம்போ³தி⁴பராயனா, தேபி திரியங் மாரஸ்ஸ ஸோதங் செ²த்வா
ஸொத்தி²னா பாரங் க³மிஸ்ஸந்தி.
‘‘ஸெய்யதா²பி ஸோ, பி⁴க்க²வே, வச்ச²கோ தருணகோ தாவதே³வ ஜாதகோ மாதுகோ³ரவகேன வுய்ஹமானோ திரியங் க³ங்கா³ய ஸோதங் செ²த்வா ஸொத்தி²னா
பாரங் அக³மாஸி, ஏவமேவ கோ², பி⁴க்க²வே, யே தே பி⁴க்கூ² த⁴ம்மானுஸாரினோ
ஸத்³தா⁴னுஸாரினோ, தேபி திரியங் மாரஸ்ஸ ஸோதங் செ²த்வா ஸொத்தி²னா பாரங்
க³மிஸ்ஸந்தி.
‘‘அஹங் கோ² பன, பி⁴க்க²வே, குஸலோ
இமஸ்ஸ லோகஸ்ஸ குஸலோ பரஸ்ஸ லோகஸ்ஸ, குஸலோ மாரதெ⁴ய்யஸ்ஸ குஸலோ
அமாரதெ⁴ய்யஸ்ஸ, குஸலோ மச்சுதெ⁴ய்யஸ்ஸ குஸலோ அமச்சுதெ⁴ய்யஸ்ஸ. தஸ்ஸ மய்ஹங்,
பி⁴க்க²வே, யே ஸோதப்³ப³ங் ஸத்³த³ஹாதப்³ப³ங் மஞ்ஞிஸ்ஸந்தி, தேஸங் தங்
ப⁴விஸ்ஸதி தீ³க⁴ரத்தங் ஹிதாய ஸுகா²யா’’தி.
இத³மவோச ப⁴க³வா. இத³ங் வத்வா ஸுக³தோ அதா²பரங் ஏதத³வோச ஸத்தா² –
‘‘அயங் லோகோ பரோ லோகோ, ஜானதா ஸுப்பகாஸிதோ;
யஞ்ச மாரேன ஸம்பத்தங், அப்பத்தங் யஞ்ச மச்சுனா.
‘‘ஸப்³ப³ங் லோகங் அபி⁴ஞ்ஞாய, ஸம்பு³த்³தே⁴ன பஜானதா;
விவடங் அமதத்³வாரங், கே²மங் நிப்³பா³னபத்தியா.
‘‘சி²ன்னங் பாபிமதோ ஸோதங், வித்³த⁴ஸ்தங் வினளீகதங்;
பாமோஜ்ஜப³ஹுலா ஹோத², கே²மங் பத்தத்த² [பத்தே²த² (ஸ்யா॰ கங்॰ க॰ அட்ட²கதா²யங் ஸங்வண்ணேதப்³ப³பாடோ²)] பி⁴க்க²வோ’’தி.
சூளகோ³பாலகஸுத்தங் நிட்டி²தங் சதுத்த²ங்.
5. சூளஸச்சகஸுத்தங்
353. ஏவங்
மே ஸுதங் – ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங்.
தேன கோ² பன ஸமயேன ஸச்சகோ நிக³ண்ட²புத்தோ வேஸாலியங் படிவஸதி ப⁴ஸ்ஸப்பவாத³கோ
பண்டி³தவாதோ³ ஸாது⁴ஸம்மதோ ப³ஹுஜனஸ்ஸ. ஸோ வேஸாலியங் பரிஸதி ஏவங் வாசங்
பா⁴ஸதி – ‘‘நாஹங் தங் பஸ்ஸாமி ஸமணங் வா ப்³ராஹ்மணங் வா, ஸங்கி⁴ங் க³ணிங்
க³ணாசரியங், அபி அரஹந்தங் ஸம்மாஸம்பு³த்³த⁴ங் படிஜானமானங், யோ மயா வாதே³ன
வாத³ங் ஸமாரத்³தோ⁴ ந ஸங்கம்பெய்ய ந ஸம்பகம்பெய்ய ந ஸம்பவேதெ⁴ய்ய, யஸ்ஸ ந
கச்சே²ஹி ஸேதா³ முச்செய்யுங். தூ²ணங் சேபாஹங் அசேதனங் வாதே³ன வாத³ங்
ஸமாரபெ⁴ய்யங், ஸாபி மயா வாதே³ன வாத³ங் ஸமாரத்³தா⁴ ஸங்கம்பெய்ய ஸம்பகம்பெய்ய ஸம்பவேதெ⁴ய்ய. கோ பன வாதோ³ மனுஸ்ஸபூ⁴தஸ்ஸா’’தி?
அத² கோ² ஆயஸ்மா அஸ்ஸஜி புப்³ப³ண்ஹஸமயங் நிவாஸெத்வா
பத்தசீவரமாதா³ய வேஸாலிங் பிண்டா³ய பாவிஸி. அத்³த³ஸா கோ² ஸச்சகோ
நிக³ண்ட²புத்தோ வேஸாலியங் ஜங்கா⁴விஹாரங் அனுசங்கமமானோ அனுவிசரமானோ
ஆயஸ்மந்தங் அஸ்ஸஜிங் தூ³ரதோவ ஆக³ச்ச²ந்தங். தி³ஸ்வான யேனாயஸ்மா அஸ்ஸஜி
தேனுபஸங்கமி; உபஸங்கமித்வா ஆயஸ்மதா அஸ்ஸஜினா ஸத்³தி⁴ங் ஸம்மோதி³.
ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் அட்டா²ஸி. ஏகமந்தங்
டி²தோ கோ² ஸச்சகோ நிக³ண்ட²புத்தோ ஆயஸ்மந்தங் அஸ்ஸஜிங் ஏதத³வோச – ‘‘கத²ங்
பன, போ⁴ அஸ்ஸஜி, ஸமணோ கோ³தமோ ஸாவகே வினேதி, கத²ங்பா⁴கா³
ச பன ஸமணஸ்ஸ கோ³தமஸ்ஸ ஸாவகேஸு அனுஸாஸனீ ப³ஹுலா பவத்ததீ’’தி? ‘‘ஏவங் கோ²,
அக்³கி³வெஸ்ஸன, ப⁴க³வா ஸாவகே வினேதி, ஏவங்பா⁴கா³ ச பன ப⁴க³வதோ ஸாவகேஸு
அனுஸாஸனீ ப³ஹுலா பவத்ததி – ‘ரூபங், பி⁴க்க²வே, அனிச்சங், வேத³னா அனிச்சா,
ஸஞ்ஞா அனிச்சா, ஸங்கா²ரா அனிச்சா, விஞ்ஞாணங் அனிச்சங். ரூபங், பி⁴க்க²வே,
அனத்தா, வேத³னா அனத்தா, ஸஞ்ஞா அனத்தா, ஸங்கா²ரா அனத்தா, விஞ்ஞாணங் அனத்தா.
ஸப்³பே³ ஸங்கா²ரா அனிச்சா, ஸப்³பே³ த⁴ம்மா அனத்தா’தி. ஏவங் கோ²,
அக்³கி³வெஸ்ஸன, ப⁴க³வா ஸாவகே வினேதி, ஏவங்பா⁴கா³ ச பன ப⁴க³வதோ ஸாவகேஸு
அனுஸாஸனீ ப³ஹுலா பவத்ததீ’’தி. ‘‘து³ஸ்ஸுதங் வத, போ⁴ அஸ்ஸஜி, அஸ்ஸும்ஹ யே
மயங் ஏவங்வாதி³ங் ஸமணங் கோ³தமங் அஸ்ஸும்ஹ. அப்பேவ நாம மயங் கதா³சி கரஹசி
தேன போ⁴தா கோ³தமேன ஸத்³தி⁴ங் ஸமாக³ச்செ²ய்யாம , அப்பேவ நாம ஸியா கோசிதே³வ கதா²ஸல்லாபோ, அப்பேவ நாம தஸ்மா பாபகா தி³ட்டி²க³தா விவேசெய்யாமா’’தி.
354. தேன கோ² பன ஸமயேன பஞ்சமத்தானி லிச்ச²விஸதானி ஸந்தா²கா³ரே [ஸந்தா⁴கா³ரே (க॰)]
ஸன்னிபதிதானி ஹொந்தி கேனசிதே³வ கரணீயேன. அத² கோ² ஸச்சகோ நிக³ண்ட²புத்தோ
யேன தே லிச்ச²வீ தேனுபஸங்கமி; உபஸங்கமித்வா தே லிச்ச²வீ ஏதத³வோச –
‘‘அபி⁴க்கமந்து பொ⁴ந்தோ லிச்ச²வீ, அபி⁴க்கமந்து பொ⁴ந்தோ லிச்ச²வீ, அஜ்ஜ மே
ஸமணேன கோ³தமேன ஸத்³தி⁴ங் கதா²ஸல்லாபோ ப⁴விஸ்ஸதி. ஸசே மே ஸமணோ கோ³தமோ ததா²
பதிட்டி²ஸ்ஸதி யதா² ச மே [யதா²ஸ்ஸ மே (ஸீ॰ பீ॰)] ஞாதஞ்ஞதரேன ஸாவகேன அஸ்ஸஜினா நாம பி⁴க்கு²னா பதிட்டி²தங், ஸெய்யதா²பி நாம ப³லவா புரிஸோ தீ³க⁴லோமிகங் ஏளகங் லோமேஸு க³ஹெத்வா ஆகட்³டெ⁴ய்ய பரிகட்³டெ⁴ய்ய ஸம்பரிகட்³டெ⁴ய்ய ,
ஏவமேவாஹங் ஸமணங் கோ³தமங் வாதே³ன வாத³ங் ஆகட்³டி⁴ஸ்ஸாமி பரிகட்³டி⁴ஸ்ஸாமி
ஸம்பரிகட்³டி⁴ஸ்ஸாமி. ஸெய்யதா²பி நாம ப³லவா ஸொண்டி³காகம்மகாரோ மஹந்தங்
ஸொண்டி³காகிளஞ்ஜங் க³ம்பீ⁴ரே உத³கரஹதே³ பக்கி²பித்வா கண்ணே க³ஹெத்வா
ஆகட்³டெ⁴ய்ய பரிகட்³டெ⁴ய்ய ஸம்பரிகட்³டெ⁴ய்ய, ஏவமேவாஹங் ஸமணங் கோ³தமங்
வாதே³ன வாத³ங் ஆகட்³டி⁴ஸ்ஸாமி பரிகட்³டி⁴ஸ்ஸாமி ஸம்பரிகட்³டி⁴ஸ்ஸாமி.
ஸெய்யதா²பி நாம ப³லவா ஸொண்டி³காது⁴த்தோ வாலங் [தா²லங் (க॰)] கண்ணே க³ஹெத்வா ஓது⁴னெய்ய நித்³து⁴னெய்ய நிப்போ²டெய்ய [நிச்சா²தெ³ய்ய (ஸீ॰ பீ॰ க॰), நிச்சோ²டெய்ய (க॰), நிப்போடெ²ய்ய (ஸ்யா॰ கங்॰)]
ஏவமேவாஹங் ஸமணங் கோ³தமங் வாதே³ன வாத³ங் ஓது⁴னிஸ்ஸாமி நித்³து⁴னிஸ்ஸாமி
நிப்போ²டெஸ்ஸாமி. ஸெய்யதா²பி நாம குஞ்ஜரோ ஸட்டி²ஹாயனோ க³ம்பீ⁴ரங்
பொக்க²ரணிங் ஓகா³ஹெத்வா ஸாணதோ⁴விகங் நாம கீளிதஜாதங் கீளதி, ஏவமேவாஹங் ஸமணங்
கோ³தமங் ஸாணதோ⁴விகங் மஞ்ஞே கீளிதஜாதங் கீளிஸ்ஸாமி. அபி⁴க்கமந்து பொ⁴ந்தோ
லிச்ச²வீ, அபி⁴க்கமந்து பொ⁴ந்தோ லிச்ச²வீ, அஜ்ஜ மே ஸமணேன கோ³தமேன ஸத்³தி⁴ங்
கதா²ஸல்லாபோ ப⁴விஸ்ஸதீ’’தி. தத்ரேகச்சே லிச்ச²வீ ஏவமாஹங்ஸு – ‘‘கிங் ஸமணோ
கோ³தமோ ஸச்சகஸ்ஸ நிக³ண்ட²புத்தஸ்ஸ வாத³ங் ஆரோபெஸ்ஸதி, அத² கோ² ஸச்சகோ
நிக³ண்ட²புத்தோ ஸமணஸ்ஸ கோ³தமஸ்ஸ வாத³ங் ஆரோபெஸ்ஸதீ’’தி? ஏகச்சே லிச்ச²வீ
ஏவமாஹங்ஸு – ‘‘கிங் ஸோ ப⁴வமானோ ஸச்சகோ நிக³ண்ட²புத்தோ யோ ப⁴க³வதோ வாத³ங்
ஆரோபெஸ்ஸதி, அத² கோ² ப⁴க³வா ஸச்சகஸ்ஸ நிக³ண்ட²புத்தஸ்ஸ வாத³ங்
ஆரோபெஸ்ஸதீ’’தி? அத² கோ² ஸச்சகோ நிக³ண்ட²புத்தோ பஞ்சமத்தேஹி லிச்ச²விஸதேஹி பரிவுதோ யேன மஹாவனங் கூடாகா³ரஸாலா தேனுபஸங்கமி.
355.
தேன கோ² பன ஸமயேன ஸம்ப³ஹுலா பி⁴க்கூ² அப்³போ⁴காஸே சங்கமந்தி. அத² கோ²
ஸச்சகோ நிக³ண்ட²புத்தோ யேன தே பி⁴க்கூ² தேனுபஸங்கமி; உபஸங்கமித்வா தே
பி⁴க்கூ² ஏதத³வோச – ‘‘கஹங் நு கோ², போ⁴, ஏதரஹி ஸோ ப⁴வங் கோ³தமோ விஹரதி?
த³ஸ்ஸனகாமா ஹி மயங் தங் ப⁴வந்தங் கோ³தம’’ந்தி .
‘‘ஏஸ, அக்³கி³வெஸ்ஸன, ப⁴க³வா மஹாவனங் அஜ்ஜோ²கா³ஹெத்வா அஞ்ஞதரஸ்மிங்
ருக்க²மூலே தி³வாவிஹாரங் நிஸின்னோ’’தி. அத² கோ² ஸச்சகோ நிக³ண்ட²புத்தோ
மஹதியா லிச்ச²விபரிஸாய ஸத்³தி⁴ங் மஹாவனங் அஜ்ஜோ²கா³ஹெத்வா யேன ப⁴க³வா
தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங்
ஸாரணீயங் வீதிஸாரெத்வா ஏகமந்தங் நிஸீதி³. தேபி கோ² லிச்ச²வீ அப்பேகச்சே
ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு, அப்பேகச்சே ப⁴க³வதா
ஸத்³தி⁴ங் ஸம்மோதி³ங்ஸு, ஸம்மோத³னீயங் கத²ங் ஸாரணீயங் வீதிஸாரெத்வா
ஏகமந்தங் நிஸீதி³ங்ஸு. அப்பேகச்சே யேன ப⁴க³வா தேனஞ்ஜலிங் பணாமெத்வா
ஏகமந்தங் நிஸீதி³ங்ஸு, அப்பேகச்சே ப⁴க³வதோ ஸந்திகே நாமகொ³த்தங் ஸாவெத்வா
ஏகமந்தங் நிஸீதி³ங்ஸு, அப்பேகச்சே துண்ஹீபூ⁴தா ஏகமந்தங் நிஸீதி³ங்ஸு.
356.
ஏகமந்தங் நிஸின்னோ கோ² ஸச்சகோ நிக³ண்ட²புத்தோ ப⁴க³வந்தங் ஏதத³வோச –
‘‘புச்செ²ய்யாஹங் ப⁴வந்தங் கோ³தமங் கிஞ்சிதே³வ தே³ஸங், ஸசே மே ப⁴வங் கோ³தமோ
ஓகாஸங் கரோதி பஞ்ஹஸ்ஸ வெய்யாகரணாயா’’தி. ‘‘புச்ச², அக்³கி³வெஸ்ஸன , யதா³கங்க²ஸீ’’தி .
‘‘கத²ங் பன ப⁴வங் கோ³தமோ ஸாவகே வினேதி, கத²ங்பா⁴கா³ ச பன போ⁴தோ கோ³தமஸ்ஸ
ஸாவகேஸு அனுஸாஸனீ ப³ஹுலா பவத்ததீ’’தி? ‘‘ஏவங் கோ² அஹங், அக்³கி³வெஸ்ஸன,
ஸாவகே வினேமி, ஏவங்பா⁴கா³ ச பன மே ஸாவகேஸு அனுஸாஸனீ ப³ஹுலா பவத்ததி –
‘ரூபங், பி⁴க்க²வே, அனிச்சங், வேத³னா அனிச்சா, ஸஞ்ஞா அனிச்சா, ஸங்கா²ரா
அனிச்சா, விஞ்ஞாணங் அனிச்சங். ரூபங், பி⁴க்க²வே, அனத்தா, வேத³னா அனத்தா,
ஸஞ்ஞா அனத்தா, ஸங்கா²ரா அனத்தா, விஞ்ஞாணங் அனத்தா. ஸப்³பே³ ஸங்கா²ரா
அனிச்சா, ஸப்³பே³ த⁴ம்மா அனத்தா’தி. ஏவங் கோ² அஹங், அக்³கி³வெஸ்ஸன, ஸாவகே
வினேமி, ஏவங்பா⁴கா³ ச பன மே ஸாவகேஸு அனுஸாஸனீ ப³ஹுலா பவத்ததீ’’தி.
‘‘உபமா மங், போ⁴ கோ³தம, படிபா⁴தீ’’தி. ‘‘படிபா⁴து தங், அக்³கி³வெஸ்ஸனா’’தி ப⁴க³வா அவோச.
‘‘ஸெய்யதா²பி, போ⁴ கோ³தம, யே கேசிமே பீ³ஜகா³மபூ⁴தகா³மா
வுத்³தி⁴ங் விரூள்ஹிங் வேபுல்லங் ஆபஜ்ஜந்தி, ஸப்³பே³ தே பத²விங் நிஸ்ஸாய
பத²வியங் பதிட்டா²ய. ஏவமேதே பீ³ஜகா³மபூ⁴தகா³மா வுத்³தி⁴ங் விரூள்ஹிங்
வேபுல்லங் ஆபஜ்ஜந்தி. ஸெய்யதா²பி வா பன, போ⁴ கோ³தம, யே கேசிமே ப³லகரணீயா
கம்மந்தா கரீயந்தி, ஸப்³பே³ தே பத²விங் நிஸ்ஸாய பத²வியங் பதிட்டா²ய. ஏவமேதே
ப³லகரணீயா கம்மந்தா கரீயந்தி. ஏவமேவ கோ², போ⁴ கோ³தம, ரூபத்தாயங்
புரிஸபுக்³க³லோ ரூபே பதிட்டா²ய புஞ்ஞங் வா அபுஞ்ஞங் வா பஸவதி, வேத³னத்தாயங்
புரிஸபுக்³க³லோ வேத³னாயங் பதிட்டா²ய புஞ்ஞங் வா
அபுஞ்ஞங் வா பஸவதி, ஸஞ்ஞத்தாயங் புரிஸபுக்³க³லோ ஸஞ்ஞாயங் பதிட்டா²ய புஞ்ஞங்
வா அபுஞ்ஞங் வா பஸவதி, ஸங்கா²ரத்தாயங் புரிஸபுக்³க³லோ ஸங்கா²ரேஸு பதிட்டா²ய புஞ்ஞங் வா அபுஞ்ஞங் வா பஸவதி, விஞ்ஞாணத்தாயங் புரிஸபுக்³க³லோ விஞ்ஞாணே பதிட்டா²ய புஞ்ஞங் வா அபுஞ்ஞங் வா பஸவதீ’’தி.
‘‘நனு த்வங், அக்³கி³வெஸ்ஸன, ஏவங் வதே³ஸி – ‘ரூபங் மே
அத்தா, வேத³னா மே அத்தா, ஸஞ்ஞா மே அத்தா, ஸங்கா²ரா மே அத்தா, விஞ்ஞாணங் மே
அத்தா’’’தி? ‘‘அஹஞ்ஹி, போ⁴ கோ³தம , ஏவங் வதா³மி – ‘ரூபங் மே அத்தா, வேத³னா மே அத்தா, ஸஞ்ஞா மே அத்தா, ஸங்கா²ரா மே அத்தா, விஞ்ஞாணங் மே அத்தா’தி, அயஞ்ச மஹதீ ஜனதா’’தி.
‘‘கிஞ்ஹி தே, அக்³கி³வெஸ்ஸன, மஹதீ ஜனதா கரிஸ்ஸதி?
இங்க⁴ த்வங், அக்³கி³வெஸ்ஸன, ஸகஞ்ஞேவ வாத³ங் நிப்³பே³டே²ஹீ’’தி. ‘‘அஹஞ்ஹி,
போ⁴ கோ³தம, ஏவங் வதா³மி – ‘ரூபங் மே அத்தா, வேத³னா மே அத்தா, ஸஞ்ஞா மே
அத்தா, ஸங்கா²ரா மே அத்தா, விஞ்ஞாணங் மே அத்தா’’’தி.
357. ‘‘தேன ஹி, அக்³கி³வெஸ்ஸன, தஞ்ஞேவெத்த² படிபுச்சி²ஸ்ஸாமி, யதா² தே க²மெய்ய ததா² நங் [ததா² தங் (க॰)] ப்³யாகரெய்யாஸி. தங் கிங் மஞ்ஞஸி ,
அக்³கி³வெஸ்ஸன, வத்தெய்ய ரஞ்ஞோ க²த்தியஸ்ஸ முத்³தா⁴வஸித்தஸ்ஸ ஸகஸ்மிங்
விஜிதே வஸோ – கா⁴தேதாயங் வா கா⁴தேதுங், ஜாபேதாயங் வா ஜாபேதுங்,
பப்³பா³ஜேதாயங் வா பப்³பா³ஜேதுங், ஸெய்யதா²பி ரஞ்ஞோ பஸேனதி³ஸ்ஸ கோஸலஸ்ஸ,
ஸெய்யதா²பி வா பன ரஞ்ஞோ மாக³த⁴ஸ்ஸ அஜாதஸத்துஸ்ஸ வேதே³ஹிபுத்தஸ்ஸா’’தி?
‘‘வத்தெய்ய, போ⁴ கோ³தம, ரஞ்ஞோ க²த்தியஸ்ஸ முத்³தா⁴வஸித்தஸ்ஸ ஸகஸ்மிங்
விஜிதே வஸோ – கா⁴தேதாயங் வா கா⁴தேதுங், ஜாபேதாயங் வா ஜாபேதுங்,
பப்³பா³ஜேதாயங் வா பப்³பா³ஜேதுங், ஸெய்யதா²பி ரஞ்ஞோ பஸேனதி³ஸ்ஸ கோஸலஸ்ஸ,
ஸெய்யதா²பி வா பன ரஞ்ஞோ மாக³த⁴ஸ்ஸ அஜாதஸத்துஸ்ஸ வேதே³ஹிபுத்தஸ்ஸ. இமேஸம்பி
ஹி, போ⁴ கோ³தம, ஸங்கா⁴னங் க³ணானங் – ஸெய்யதி²த³ங், வஜ்ஜீனங் மல்லானங் –
வத்ததி ஸகஸ்மிங் விஜிதே வஸோ – கா⁴தேதாயங் வா கா⁴தேதுங், ஜாபேதாயங் வா
ஜாபேதுங், பப்³பா³ஜேதாயங் வா பப்³பா³ஜேதுங். கிங் பன ரஞ்ஞோ க²த்தியஸ்ஸ
முத்³தா⁴வஸித்தஸ்ஸ, ஸெய்யதா²பி ரஞ்ஞோ பஸேனதி³ஸ்ஸ கோஸலஸ்ஸ , ஸெய்யதா²பி வா பன ரஞ்ஞோ மாக³த⁴ஸ்ஸ அஜாதஸத்துஸ்ஸ வேதே³ஹிபுத்தஸ்ஸ? வத்தெய்ய, போ⁴ கோ³தம, வத்திதுஞ்ச மரஹதீ’’தி.
‘‘தங் கிங் மஞ்ஞஸி, அக்³கி³வெஸ்ஸன, யங் த்வங் ஏவங் வதே³ஸி – ‘ரூபங் மே அத்தா’தி, வத்ததி தே
தஸ்மிங் ரூபே வஸோ – ஏவங் மே ரூபங் ஹோது, ஏவங் மே ரூபங் மா அஹோஸீ’’தி? ஏவங்
வுத்தே, ஸச்சகோ நிக³ண்ட²புத்தோ துண்ஹீ அஹோஸி. து³தியம்பி கோ² ப⁴க³வா
ஸச்சகங் நிக³ண்ட²புத்தங் ஏதத³வோச – ‘‘தங் கிங் மஞ்ஞஸி, அக்³கி³வெஸ்ஸன, யங்
த்வங் ஏவங் வதே³ஸி – ‘ரூபங் மே அத்தா’தி, வத்ததி தே தஸ்மிங் ரூபே வஸோ –
ஏவங் மே ரூபங் ஹோது, ஏவங் மே ரூபங் மா அஹோஸீ’’தி? து³தியம்பி
கோ² ஸச்சகோ நிக³ண்ட²புத்தோ துண்ஹீ அஹோஸி. அத² கோ² ப⁴க³வா ஸச்சகங்
நிக³ண்ட²புத்தங் ஏதத³வோச – ‘‘ப்³யாகரோஹி தா³னி, அக்³கி³வெஸ்ஸன, ந தா³னி தே
துண்ஹீபா⁴வஸ்ஸ காலோ. யோ கோசி, அக்³கி³வெஸ்ஸன ததா²க³தேன யாவததியங்
ஸஹத⁴ம்மிகங் பஞ்ஹங் புட்டோ² ந ப்³யாகரோதி, எத்தே²வஸ்ஸ ஸத்ததா⁴ முத்³தா⁴
ப²லதீ’’தி.
தேன கோ² பன ஸமயேன வஜிரபாணி யக்கோ² ஆயஸங் வஜிரங் ஆதா³ய
ஆதி³த்தங் ஸம்பஜ்ஜலிதங் ஸஜோதிபூ⁴தங் ஸச்சகஸ்ஸ நிக³ண்ட²புத்தஸ்ஸ உபரிவேஹாஸங்
டி²தோ ஹோதி – ‘ஸசாயங் ஸச்சகோ நிக³ண்ட²புத்தோ
ப⁴க³வதா யாவததியங் ஸஹத⁴ம்மிகங் பஞ்ஹங் புட்டோ² ந ப்³யாகரிஸ்ஸதி எத்தே²வஸ்ஸ
ஸத்ததா⁴ முத்³த⁴ங் பா²லெஸ்ஸாமீ’தி. தங் கோ² பன வஜிரபாணிங் யக்க²ங் ப⁴க³வா
சேவ பஸ்ஸதி ஸச்சகோ ச நிக³ண்ட²புத்தோ. அத² கோ² ஸச்சகோ நிக³ண்ட²புத்தோ பீ⁴தோ
ஸங்விக்³கோ³ லோமஹட்ட²ஜாதோ ப⁴க³வந்தங்யேவ தாணங்
க³வேஸீ ப⁴க³வந்தங்யேவ லேணங் க³வேஸீ ப⁴க³வந்தங்யேவ ஸரணங் க³வேஸீ ப⁴க³வந்தங்
ஏதத³வோச – ‘‘புச்ச²து மங் ப⁴வங் கோ³தமோ, ப்³யாகரிஸ்ஸாமீ’’தி.
358.
‘‘தங் கிங் மஞ்ஞஸி, அக்³கி³வெஸ்ஸன, யங் த்வங் ஏவங் வதே³ஸி – ‘ரூபங் மே
அத்தா’தி, வத்ததி தே தஸ்மிங் ரூபே வஸோ – ஏவங் மே ரூபங் ஹோது, ஏவங் மே ரூபங்
மா அஹோஸீ’’தி? ‘‘நோ ஹித³ங், போ⁴ கோ³தம’’.
‘‘மனஸி கரோஹி, அக்³கி³வெஸ்ஸன; மனஸி கரித்வா கோ²,
அக்³கி³வெஸ்ஸன, ப்³யாகரோஹி. ந கோ² தே ஸந்தி⁴யதி புரிமேன வா பச்சி²மங்
பச்சி²மேன வா புரிமங். தங் கிங் மஞ்ஞஸி, அக்³கி³வெஸ்ஸன, யங் த்வங் ஏவங்
வதே³ஸி – ‘வேத³னா மே அத்தா’தி, வத்ததி தே திஸ்ஸங் வேத³னாயங் [தாயங் வேத³னாயங் (ஸீ॰ ஸ்யா॰)] வஸோ – ஏவங் மே வேத³னா ஹோது, ஏவங் மே வேத³னா மா அஹோஸீ’’தி? ‘‘நோ ஹித³ங், போ⁴ கோ³தம’’.
‘‘மனஸி கரோஹி, அக்³கி³வெஸ்ஸன; மனஸி கரித்வா கோ²,
அக்³கி³வெஸ்ஸன, ப்³யாகரோஹி. ந கோ² தே ஸந்தி⁴யதி புரிமேன வா பச்சி²மங்,
பச்சி²மேன வா புரிமங். தங் கிங் மஞ்ஞஸி, அக்³கி³வெஸ்ஸன ,
யங் த்வங் ஏவங் வதே³ஸி – ‘ஸஞ்ஞா மே அத்தா’தி, வத்ததி தே திஸ்ஸங் ஸஞ்ஞாயங்
வஸோ – ஏவங் மே ஸஞ்ஞா ஹோது, ஏவங் மே ஸஞ்ஞா மா அஹோஸீ’’தி? ‘‘நோ ஹித³ங், போ⁴
கோ³தம’’.
‘‘மனஸி கரோஹி, அக்³கி³வெஸ்ஸன ;
மனஸி கரித்வா கோ², அக்³கி³வெஸ்ஸன, ப்³யாகரோஹி. ந கோ² தே ஸந்தி⁴யதி புரிமேன
வா பச்சி²மங், பச்சி²மேன வா புரிமங். தங் கிங் மஞ்ஞஸி, அக்³கி³வெஸ்ஸன, யங்
த்வங் ஏவங் வதே³ஸி – ‘ஸங்கா²ரா மே அத்தா’தி, வத்ததி தே தேஸு ஸங்கா²ரேஸு
வஸோ – ஏவங் மே ஸங்கா²ரா ஹொந்து, ஏவங் மே ஸங்கா²ரா மா அஹேஸு’’ந்தி? ‘‘நோ
ஹித³ங், போ⁴ கோ³தம’’.
‘‘மனஸி கரோஹி, அக்³கி³வெஸ்ஸன; மனஸி கரித்வா கோ²,
அக்³கி³வெஸ்ஸன, ப்³யாகரோஹி. ந கோ² தே ஸந்தி⁴யதி புரிமேன வா பச்சி²மங்,
பச்சி²மேன வா புரிமங். தங் கிங் மஞ்ஞஸி, அக்³கி³வெஸ்ஸன, யங் த்வங் ஏவங்
வதே³ஸி – ‘விஞ்ஞாணங் மே அத்தா’தி, வத்ததி தே தஸ்மிங் விஞ்ஞாணே வஸோ – ஏவங்
மே விஞ்ஞாணங் ஹோது, ஏவங் மே விஞ்ஞாணங் மா அஹோஸீ’’தி? ‘‘நோ ஹித³ங், போ⁴
கோ³தம’’.
‘‘மனஸி கரோஹி, அக்³கி³வெஸ்ஸன; மனஸி கரித்வா கோ²,
அக்³கி³வெஸ்ஸன, ப்³யாகரோஹி. ந கோ² தே ஸந்தி⁴யதி புரிமேன வா பச்சி²மங்,
பச்சி²மேன வா புரிமங். தங் கிங் மஞ்ஞஸி, அக்³கி³வெஸ்ஸன, ரூபங் நிச்சங் வா
அனிச்சங் வா’’தி? ‘‘அனிச்சங், போ⁴ கோ³தம’’. ‘‘யங் பனானிச்சங் து³க்க²ங் வா
தங் ஸுக²ங் வா’’தி? ‘‘து³க்க²ங், போ⁴ கோ³தம’’. ‘‘யங் பனானிச்சங் து³க்க²ங்
விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹித³ங், போ⁴ கோ³தம’’.
‘‘தங் கிங் மஞ்ஞஸி, அக்³கி³வெஸ்ஸன, வேத³னா…பே॰…
ஸஞ்ஞா…பே॰… ஸங்கா²ரா…பே॰… தங் கிங் மஞ்ஞஸி, அக்³கி³வெஸ்ஸன, விஞ்ஞாணங்
நிச்சங் வா அனிச்சங் வா’’தி? ‘‘அனிச்சங், போ⁴ கோ³தம’’. ‘‘யங் பனானிச்சங்
து³க்க²ங் வா தங் ஸுக²ங் வா’’தி? ‘‘து³க்க²ங், போ⁴ கோ³தம’’. ‘‘யங்
பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹித³ங், போ⁴ கோ³தம’’.
‘‘தங் கிங் மஞ்ஞஸி, அக்³கி³வெஸ்ஸன, யோ நு கோ² து³க்க²ங் அல்லீனோ து³க்க²ங் உபக³தோ து³க்க²ங் அஜ்ஜோ²ஸிதோ ,
து³க்க²ங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி, அபி நு கோ²
ஸோ ஸாமங் வா து³க்க²ங் பரிஜானெய்ய, து³க்க²ங் வா பரிக்கே²பெத்வா
விஹரெய்யா’’தி? ‘‘கிஞ்ஹி ஸியா, போ⁴ கோ³தம? நோ ஹித³ங், போ⁴ கோ³தமா’’தி.
‘‘தங் கிங் மஞ்ஞஸி, அக்³கி³வெஸ்ஸன, நனு த்வங் ஏவங்
ஸந்தே து³க்க²ங் அல்லீனோ து³க்க²ங் உபக³தோ து³க்க²ங் அஜ்ஜோ²ஸிதோ, து³க்க²ங்
– ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸஸீ’’தி? ‘‘கிஞ்ஹி நோ
ஸியா, போ⁴ கோ³தம? ஏவமேதங் போ⁴ கோ³தமா’’தி.
359. ‘‘ஸெய்யதா²பி , அக்³கி³வெஸ்ஸன, புரிஸோ ஸாரத்தி²கோ ஸாரக³வேஸீ ஸாரபரியேஸனங் சரமானோ திண்ஹங் குடா²ரிங் [குதா⁴ரிங் (ஸ்யா॰ கங்॰ க॰)] ஆதா³ய வனங் பவிஸெய்ய. ஸோ தத்த² பஸ்ஸெய்ய மஹந்தங் கத³லிக்க²ந்த⁴ங் உஜுங் நவங் அகுக்குகஜாதங் [அகுக்குடஜாதங் (ஸ்யா॰ கங்॰)]. தமேனங் மூலே சி²ந்தெ³ய்ய, மூலே செ²த்வா அக்³கே³ சி²ந்தெ³ய்ய, அக்³கே³ செ²த்வா பத்தவட்டிங் வினிப்³பு⁴ஜெய்ய [வினிப்³பு⁴ஜ்ஜெய்ய (க॰)].
ஸோ தத்த² பத்தவட்டிங் வினிப்³பு⁴ஜந்தோ பெ²க்³கு³ம்பி நாதி⁴க³ச்செ²ய்ய,
குதோ ஸாரங்? ஏவமேவ கோ² த்வங், அக்³கி³வெஸ்ஸன, மயா ஸகஸ்மிங் வாதே³
ஸமனுயுஞ்ஜியமானோ ஸமனுகா³ஹியமானோ ஸமனுபா⁴ஸியமானோ ரித்தோ துச்சோ² அபரத்³தோ⁴.
பா⁴ஸிதா கோ² பன தே ஏஸா, அக்³கி³வெஸ்ஸன, வேஸாலியங் பரிஸதி வாசா – ‘நாஹங் தங்
பஸ்ஸாமி ஸமணங் வா ப்³ராஹ்மணங் வா, ஸங்கி⁴ங் க³ணிங் க³ணாசரியங், அபி
அரஹந்தங் ஸம்மாஸம்பு³த்³த⁴ங் படிஜானமானங், யோ மயா வாதே³ன வாத³ங் ஸமாரத்³தோ⁴
ந ஸங்கம்பெய்ய ந ஸம்பகம்பெய்ய ந ஸம்பவேதெ⁴ய்ய,
யஸ்ஸ ந கச்சே²ஹி ஸேதா³ முச்செய்யுங். தூ²ணங் சேபாஹங் அசேதனங் வாதே³ன வாத³ங்
ஸமாரபெ⁴ய்யங் ஸாபி மயா வாதே³ன வாத³ங் ஸமாரத்³தா⁴ ஸங்கம்பெய்ய ஸம்பகம்பெய்ய
ஸம்பவேதெ⁴ய்ய. கோ பன வாதோ³ மனுஸ்ஸபூ⁴தஸ்ஸா’தி? துய்ஹங் கோ² பன,
அக்³கி³வெஸ்ஸன, அப்பேகச்சானி ஸேத³பு²ஸிதானி நலாடா முத்தானி, உத்தராஸங்க³ங்
வினிபி⁴ந்தி³த்வா பூ⁴மியங் பதிட்டி²தானி. மய்ஹங் கோ² பன, அக்³கி³வெஸ்ஸன,
நத்தி² ஏதரஹி காயஸ்மிங் ஸேதோ³’’தி. இதி ப⁴க³வா தஸ்மிங் [தஸ்ஸங் (?)] பரிஸதி ஸுவண்ணவண்ணங் காயங் விவரி. ஏவங் வுத்தே, ஸச்சகோ நிக³ண்ட²புத்தோ துண்ஹீபூ⁴தோ மங்குபூ⁴தோ பத்தக்க²ந்தோ⁴ அதோ⁴முகோ² பஜ்ஜா²யந்தோ அப்படிபா⁴னோ நிஸீதி³.
360.
அத² கோ² து³ம்முகோ² லிச்ச²விபுத்தோ ஸச்சகங் நிக³ண்ட²புத்தங் துண்ஹீபூ⁴தங்
மங்குபூ⁴தங் பத்தக்க²ந்த⁴ங் அதோ⁴முக²ங் பஜ்ஜா²யந்தங் அப்படிபா⁴னங்
விதி³த்வா ப⁴க³வந்தங் ஏதத³வோச – ‘‘உபமா மங், ப⁴க³வா, படிபா⁴தீ’’தி.
‘‘படிபா⁴து தங், து³ம்முகா²’’தி ப⁴க³வா அவோச. ‘‘ஸெய்யதா²பி, ப⁴ந்தே,
கா³மஸ்ஸ வா நிக³மஸ்ஸ வா அவிதூ³ரே பொக்க²ரணீ. தத்ராஸ்ஸ கக்கடகோ. அத² கோ²,
ப⁴ந்தே, ஸம்ப³ஹுலா குமாரகா வா குமாரிகா வா தம்ஹா
கா³மா வா நிக³மா வா நிக்க²மித்வா யேன ஸா பொக்க²ரணீ தேனுபஸங்கமெய்யுங்;
உபஸங்கமித்வா தங் பொக்க²ரணிங் ஓகா³ஹெத்வா தங் கக்கடகங் உத³கா உத்³த⁴ரித்வா
த²லே பதிட்டா²பெய்யுங். யஞ்ஞதே³வ ஹி ஸோ, ப⁴ந்தே, கக்கடகோ அளங்
அபி⁴னின்னாமெய்ய தங் ததே³வ தே குமாரகா வா குமாரிகா வா கட்டே²ன வா கத²லேன வா
ஸஞ்சி²ந்தெ³ய்யுங் ஸம்ப⁴ஞ்ஜெய்யுங் ஸம்பலிப⁴ஞ்ஜெய்யுங். ஏவஞ்ஹி
ஸோ, ப⁴ந்தே, கக்கடகோ ஸப்³பே³ஹி அளேஹி ஸஞ்சி²ன்னேஹி ஸம்ப⁴க்³கே³ஹி
ஸம்பலிப⁴க்³கே³ஹி அப⁴ப்³போ³ தங் பொக்க²ரணிங் புன ஓதரிதுங், ஸெய்யதா²பி
புப்³பே³. ஏவமேவ கோ², ப⁴ந்தே, யானி ஸச்சகஸ்ஸ நிக³ண்ட²புத்தஸ்ஸ விஸூகாயிதானி
விஸேவிதானி விப்ப²ந்தி³தானி தானிபி ஸப்³பா³னி [விப்ப²ந்தி³தானி கானிசி கானிசி தானி (ஸீ॰ ஸ்யா॰ கங்॰ பீ॰)]
ப⁴க³வதா ஸஞ்சி²ன்னானி ஸம்ப⁴க்³கா³னி ஸம்பலிப⁴க்³கா³னி; அப⁴ப்³போ³ ச தா³னி,
ப⁴ந்தே, ஸச்சகோ நிக³ண்ட²புத்தோ புன ப⁴க³வந்தங் உபஸங்கமிதுங் யதி³த³ங்
வாதா³தி⁴ப்பாயோ’’தி. ஏவங் வுத்தே, ஸச்சகோ நிக³ண்ட²புத்தோ து³ம்முக²ங்
லிச்ச²விபுத்தங் ஏதத³வோச – ‘‘ஆக³மேஹி த்வங், து³ம்முக², ஆக³மேஹி த்வங்,
து³ம்முக² ( ) [(முக²ரோஸி த்வங் து³ம்முக²) (ஸ்யா॰ கங்॰)] ந மயங் தயா ஸத்³தி⁴ங் மந்தேம, இத⁴ மயங் போ⁴தா கோ³தமேன ஸத்³தி⁴ங் மந்தேம.
361.
‘‘திட்ட²தேஸா, போ⁴ கோ³தம, அம்ஹாகஞ்சேவ அஞ்ஞேஸஞ்ச புது²ஸமணப்³ராஹ்மணானங்
வாசா. விலாபங் விலபிதங் மஞ்ஞே. கித்தாவதா ச நு கோ² போ⁴தோ கோ³தமஸ்ஸ ஸாவகோ
ஸாஸனகரோ ஹோதி ஓவாத³பதிகரோ திண்ணவிசிகிச்சோ² விக³தகத²ங்கதோ² வேஸாரஜ்ஜப்பத்தோ
அபரப்பச்சயோ ஸத்து²ஸாஸனே விஹரதீ’’தி? ‘‘இத⁴, அக்³கி³வெஸ்ஸன, மம ஸாவகோ யங்
கிஞ்சி ரூபங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா
ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா,
ஸப்³ப³ங் ரூபங் ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங்
யதா²பூ⁴தங் ஸம்மப்பஞ்ஞாய பஸ்ஸதி; யா காசி வேத³னா…பே॰… யா காசி ஸஞ்ஞா…பே॰…
யே கேசி ஸங்கா²ரா…பே॰… யங் கிஞ்சி விஞ்ஞாணங் அதீதானாக³தபச்சுப்பன்னங்
அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா,
யங் தூ³ரே ஸந்திகே வா, ஸப்³ப³ங் விஞ்ஞாணங் ‘நேதங் மம, நேஸோஹமஸ்மி, ந மேஸோ
அத்தா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதி. எத்தாவதா கோ²,
அக்³கி³வெஸ்ஸன, மம ஸாவகோ ஸாஸனகரோ ஹோதி ஓவாத³பதிகரோ திண்ணவிசிகிச்சோ²
விக³தகத²ங்கதோ² வேஸாரஜ்ஜப்பத்தோ அபரப்பச்சயோ ஸத்து²ஸாஸனே விஹரதீ’’தி.
‘‘கித்தாவதா பன, போ⁴ கோ³தம,
பி⁴க்கு² அரஹங் ஹோதி கீ²ணாஸவோ வுஸிதவா கதகரணீயோ ஓஹிதபா⁴ரோ
அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ’’தி? ‘‘இத⁴,
அக்³கி³வெஸ்ஸன, பி⁴க்கு² யங் கிஞ்சி ரூபங் அதீதானாக³தபச்சுப்பன்னங்
அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா
யங் தூ³ரே ஸந்திகே வா ஸப்³ப³ங் ரூபங் ‘நேதங் மம, நேஸோஹமஸ்மி, ந
மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா அனுபாதா³ விமுத்தோ
ஹோதி; யா காசி வேத³னா…பே॰… யா காசி ஸஞ்ஞா…பே॰… யே கேசி ஸங்கா²ரா…பே॰… யங்
கிஞ்சி விஞ்ஞாணங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா
ஓளாரிகங் வா ஸுகு²மங் வா ஹீனங் வா பணீதங் வா யங்
தூ³ரே ஸந்திகே வா ஸப்³ப³ங் விஞ்ஞாணங் ‘நேதங் மம, நேஸோஹமஸ்மி, ந மேஸோ
அத்தா’தி ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா அனுபாதா³ விமுத்தோ ஹோதி.
எத்தாவதா கோ², அக்³கி³வெஸ்ஸன, பி⁴க்கு² அரஹங் ஹோதி கீ²ணாஸவோ வுஸிதவா
கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா
விமுத்தோ. ஏவங் விமுத்தசித்தோ கோ², அக்³கி³வெஸ்ஸன, பி⁴க்கு² தீஹி
அனுத்தரியேஹி ஸமன்னாக³தோ ஹோதி – த³ஸ்ஸனானுத்தரியேன,
படிபதா³னுத்தரியேன, விமுத்தானுத்தரியேன. ஏவங் விமுத்தசித்தோ கோ²,
அக்³கி³வெஸ்ஸன, பி⁴க்கு² ததா²க³தஞ்ஞேவ ஸக்கரோதி க³ருங் கரோதி மானேதி பூஜேதி
– பு³த்³தோ⁴ ஸோ ப⁴க³வா போ³தா⁴ய த⁴ம்மங் தே³ஸேதி, த³ந்தோ ஸோ ப⁴க³வா த³மதா²ய
த⁴ம்மங் தே³ஸேதி, ஸந்தோ ஸோ ப⁴க³வா ஸமதா²ய த⁴ம்மங் தே³ஸேதி, திண்ணோ ஸோ
ப⁴க³வா தரணாய த⁴ம்மங் தே³ஸேதி, பரினிப்³பு³தோ ஸோ ப⁴க³வா பரினிப்³பா³னாய
த⁴ம்மங் தே³ஸேதீ’’தி.
362. ஏவங் வுத்தே, ஸச்சகோ நிக³ண்ட²புத்தோ ப⁴க³வந்தங் ஏதத³வோச
– ‘‘மயமேவ, போ⁴ கோ³தம, த⁴ங்ஸீ, மயங் பக³ப்³பா³, யே மயங் ப⁴வந்தங் கோ³தமங்
வாதே³ன வாத³ங் ஆஸாதே³தப்³ப³ங் அமஞ்ஞிம்ஹ. ஸியா ஹி, போ⁴ கோ³தம, ஹத்தி²ங்
பபி⁴ன்னங் ஆஸஜ்ஜ புரிஸஸ்ஸ ஸொத்தி²பா⁴வோ, ந த்வேவ ப⁴வந்தங் கோ³தமங் ஆஸஜ்ஜ
ஸியா புரிஸஸ்ஸ ஸொத்தி²பா⁴வோ. ஸியா ஹி, போ⁴ கோ³தம, பஜ்ஜலிதங் [ஜலந்தங் (ஸீ॰ பீ॰)] அக்³கி³க்க²ந்த⁴ங் ஆஸஜ்ஜ புரிஸஸ்ஸ ஸொத்தி²பா⁴வோ ,
ந த்வேவ ப⁴வந்தங் கோ³தமங் ஆஸஜ்ஜ ஸியா புரிஸஸ்ஸ ஸொத்தி²பா⁴வோ. ஸியா ஹி, போ⁴
கோ³தம, ஆஸீவிஸங் கோ⁴ரவிஸங் ஆஸஜ்ஜ புரிஸஸ்ஸ ஸொத்தி²பா⁴வோ, ந த்வேவ ப⁴வந்தங்
கோ³தமங் ஆஸஜ்ஜ ஸியா புரிஸஸ்ஸ ஸொத்தி²பா⁴வோ. மயமேவ, போ⁴ கோ³தம, த⁴ங்ஸீ,
மயங் பக³ப்³பா³, யே மயங் ப⁴வந்தங் கோ³தமங் வாதே³ன வாத³ங் ஆஸாதே³தப்³ப³ங்
அமஞ்ஞிம்ஹ. அதி⁴வாஸேது [அதி⁴வாஸேது ச (பீ॰ க॰)] மே ப⁴வங் கோ³தமோ ஸ்வாதனாய ப⁴த்தங் ஸத்³தி⁴ங் பி⁴க்கு²ஸங்கே⁴னா’’தி. அதி⁴வாஸேஸி ப⁴க³வா துண்ஹீபா⁴வேன.
363. அத² கோ² ஸச்சகோ நிக³ண்ட²புத்தோ ப⁴க³வதோ அதி⁴வாஸனங் விதி³த்வா தே லிச்ச²வீ ஆமந்தேஸி – ‘‘ஸுணந்து மே பொ⁴ந்தோ லிச்ச²வீ, ஸமணோ மே கோ³தமோ நிமந்திதோ ஸ்வாதனாய ஸத்³தி⁴ங்
பி⁴க்கு²ஸங்கே⁴ன. தேன மே அபி⁴ஹரெய்யாத² யமஸ்ஸ பதிரூபங் மஞ்ஞெய்யாதா²’’தி.
அத² கோ² தே லிச்ச²வீ தஸ்ஸா ரத்தியா அச்சயேன ஸச்சகஸ்ஸ நிக³ண்ட²புத்தஸ்ஸ
பஞ்சமத்தானி தா²லிபாகஸதானி ப⁴த்தாபி⁴ஹாரங் அபி⁴ஹரிங்ஸு. அத² கோ²
நிக³ண்ட²புத்தோ ஸகே ஆராமே பணீதங் கா²த³னீயங் போ⁴ஜனீயங் படியாதா³பெத்வா
ப⁴க³வதோ காலங் ஆரோசாபேஸி – ‘‘காலோ, போ⁴ கோ³தம, நிட்டி²தங் ப⁴த்த’’ந்தி. அத²
கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய யேன ஸச்சகஸ்ஸ
நிக³ண்ட²புத்தஸ்ஸ ஆராமோ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³
ஸத்³தி⁴ங் பி⁴க்கு²ஸங்கே⁴ன. அத² கோ² ஸச்சகோ நிக³ண்ட²புத்தோ
பு³த்³த⁴ப்பமுக²ங் பி⁴க்கு²ஸங்க⁴ங் பணீதேன கா²த³னீயேன போ⁴ஜனீயேன ஸஹத்தா²
ஸந்தப்பேஸி ஸம்பவாரேஸி. அத² கோ² ஸச்சகோ நிக³ண்ட²புத்தோ ப⁴க³வந்தங்
பு⁴த்தாவிங் ஓனீதபத்தபாணிங் அஞ்ஞதரங் நீசங் ஆஸனங் க³ஹெத்வா ஏகமந்தங்
நிஸீதி³. ஏகமந்தங் நிஸின்னோ கோ² ஸச்சகோ நிக³ண்ட²புத்தோ ப⁴க³வந்தங் ஏதத³வோச –
‘‘யமித³ங், போ⁴ கோ³தம, தா³னே புஞ்ஞஞ்ச புஞ்ஞமஹீ ச தங் தா³யகானங் ஸுகா²ய
ஹோதூ’’தி. ‘‘யங் கோ², அக்³கி³வெஸ்ஸன, தாதி³ஸங் த³க்கி²ணெய்யங் ஆக³ம்ம
அவீதராக³ங் அவீததோ³ஸங் அவீதமோஹங், தங் தா³யகானங்
ப⁴விஸ்ஸதி. யங் கோ², அக்³கி³வெஸ்ஸன, மாதி³ஸங் த³க்கி²ணெய்யங் ஆக³ம்ம
வீதராக³ங் வீததோ³ஸங் வீதமோஹங், தங் துய்ஹங் ப⁴விஸ்ஸதீ’’தி.
சூளஸச்சகஸுத்தங் நிட்டி²தங் பஞ்சமங்.
6. மஹாஸச்சகஸுத்தங்
364. ஏவங்
மே ஸுதங் – ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங்.
தேன கோ² பன ஸமயேன ப⁴க³வா புப்³ப³ண்ஹஸமயங் ஸுனிவத்தோ² ஹோதி பத்தசீவரமாதா³ய
வேஸாலிங் பிண்டா³ய பவிஸிதுகாமோ [புப்³ப³ண்ஹஸமயங் நிவாஸெத்வா பத்தசீவரமாதா³ய… பவிஸிதுகாமோ ஹோதி (ஸீ॰)].
அத² கோ² ஸச்சகோ நிக³ண்ட²புத்தோ ஜங்கா⁴விஹாரங் அனுசங்கமமானோ அனுவிசரமானோ
யேன மஹாவனங் கூடாகா³ரஸாலா தேனுபஸங்கமி. அத்³த³ஸா கோ² ஆயஸ்மா ஆனந்தோ³
ஸச்சகங் நிக³ண்ட²புத்தங் தூ³ரதோவ ஆக³ச்ச²ந்தங். தி³ஸ்வான ப⁴க³வந்தங்
ஏதத³வோச – ‘‘அயங், ப⁴ந்தே, ஸச்சகோ நிக³ண்ட²புத்தோ
ஆக³ச்ச²தி ப⁴ஸ்ஸப்பவாத³கோ பண்டி³தவாதோ³ ஸாது⁴ஸம்மதோ ப³ஹுஜனஸ்ஸ. ஏஸோ கோ²,
ப⁴ந்தே, அவண்ணகாமோ பு³த்³த⁴ஸ்ஸ, அவண்ணகாமோ த⁴ம்மஸ்ஸ, அவண்ணகாமோ ஸங்க⁴ஸ்ஸ.
ஸாது⁴, ப⁴ந்தே, ப⁴க³வா முஹுத்தங் நிஸீத³து அனுகம்பங் உபாதா³யா’’தி. நிஸீதி³
ப⁴க³வா பஞ்ஞத்தே ஆஸனே. அத² கோ² ஸச்சகோ நிக³ண்ட²புத்தோ யேன ப⁴க³வா
தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³, ஸம்மோத³னீயங் கத²ங்
ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஸச்சகோ
நிக³ண்ட²புத்தோ ப⁴க³வந்தங் ஏதத³வோச –
365.
‘‘ஸந்தி, போ⁴ கோ³தம, ஏகே ஸமணப்³ராஹ்மணா காயபா⁴வனானுயோக³மனுயுத்தா
விஹரந்தி, நோ சித்தபா⁴வனங். பு²ஸந்தி ஹி தே, போ⁴ கோ³தம, ஸாரீரிகங்
து³க்க²ங் வேத³னங். பூ⁴தபுப்³ப³ங், போ⁴ கோ³தம, ஸாரீரிகாய து³க்கா²ய வேத³னாய
பு²ட்ட²ஸ்ஸ ஸதோ ஊருக்க²ம்போ⁴பி நாம ப⁴விஸ்ஸதி, ஹத³யம்பி நாம ப²லிஸ்ஸதி, உண்ஹம்பி லோஹிதங் முக²தோ உக்³க³மிஸ்ஸதி, உம்மாத³ம்பி பாபுணிஸ்ஸதி [பாபுணிஸ்ஸந்தி (ஸ்யா॰ கங்॰)] சித்தக்கே²பங். தஸ்ஸ கோ² ஏதங், போ⁴ கோ³தம, காயன்வயங் சித்தங் ஹோதி, காயஸ்ஸ வஸேன வத்ததி. தங் கிஸ்ஸ ஹேது? அபா⁴விதத்தா
சித்தஸ்ஸ. ஸந்தி பன, போ⁴ கோ³தம, ஏகே ஸமணப்³ராஹ்மணா
சித்தபா⁴வனானுயோக³மனுயுத்தா விஹரந்தி, நோ காயபா⁴வனங். பு²ஸந்தி ஹி தே, போ⁴
கோ³தம, சேதஸிகங் து³க்க²ங் வேத³னங். பூ⁴தபுப்³ப³ங், போ⁴ கோ³தம, சேதஸிகாய
து³க்கா²ய வேத³னாய பு²ட்ட²ஸ்ஸ ஸதோ ஊருக்க²ம்போ⁴பி நாம ப⁴விஸ்ஸதி, ஹத³யம்பி
நாம ப²லிஸ்ஸதி, உண்ஹம்பி லோஹிதங் முக²தோ உக்³க³மிஸ்ஸதி, உம்மாத³ம்பி
பாபுணிஸ்ஸதி சித்தக்கே²பங். தஸ்ஸ கோ² ஏஸோ, போ⁴ கோ³தம, சித்தன்வயோ காயோ
ஹோதி, சித்தஸ்ஸ வஸேன வத்ததி. தங் கிஸ்ஸ ஹேது? அபா⁴விதத்தா காயஸ்ஸ . தஸ்ஸ மய்ஹங், போ⁴ கோ³தம, ஏவங் ஹோதி – ‘அத்³தா⁴ போ⁴தோ கோ³தமஸ்ஸ ஸாவகா சித்தபா⁴வனானுயோக³மனுயுத்தா விஹரந்தி, நோ காயபா⁴வன’’’ந்தி.
366.
‘‘கிந்தி பன தே, அக்³கி³வெஸ்ஸன, காயபா⁴வனா ஸுதா’’தி? ‘‘ஸெய்யதி²த³ங் –
நந்தோ³ வச்சோ², கிஸோ ஸங்கிச்சோ, மக்க²லி கோ³ஸாலோ – ஏதேஹி, போ⁴ கோ³தம,
அசேலகா முத்தாசாரா ஹத்தா²பலேக²னா நஏஹிப⁴த்³த³ந்திகா நதிட்ட²ப⁴த்³த³ந்திகா [நஏஹிப⁴த³ந்திகா, நதிட்ட²ப⁴த³ந்திகா (ஸீ॰ ஸ்யா॰ கங்॰ பீ॰ க॰)] ந அபி⁴ஹடங் ந உத்³தி³ஸ்ஸகதங் ந நிமந்தனங் ஸாதி³யந்தி, தே ந கும்பி⁴முகா²
படிக்³க³ண்ஹந்தி ந களோபிமுகா² படிக்³க³ண்ஹந்தி ந ஏளகமந்தரங் ந
த³ண்ட³மந்தரங் ந முஸலமந்தரங் ந த்³வின்னங் பு⁴ஞ்ஜமானானங் ந க³ப்³பி⁴னியா ந
பாயமானாய ந புரிஸந்தரக³தாய ந ஸங்கித்தீஸு ந யத்த² ஸா உபட்டி²தோ ஹோதி ந
யத்த² மக்கி²கா ஸண்ட³ஸண்ட³சாரினீ , ந மச்ச²ங் ந
மங்ஸங் ந ஸுரங் ந மேரயங் ந து²ஸோத³கங் பிவந்தி. தே ஏகாகா³ரிகா வா ஹொந்தி
ஏகாலோபிகா, த்³வாகா³ரிகா வா ஹொந்தி த்³வாலோபிகா…பே॰… ஸத்தாகா³ரிகா வா
ஹொந்தி ஸத்தாலோபிகா. ஏகிஸ்ஸாபி த³த்தியா யாபெந்தி, த்³வீஹிபி த³த்தீஹி
யாபெந்தி…பே॰… ஸத்தஹிபி த³த்தீஹி யாபெந்தி. ஏகாஹிகம்பி ஆஹாரங் ஆஹாரெந்தி,
த்³வீஹிகம்பி ஆஹாரங் ஆஹாரெந்தி…பே॰… ஸத்தாஹிகம்பி ஆஹாரங் ஆஹாரெந்தி. இதி
ஏவரூபங் அத்³த⁴மாஸிகம்பி பரியாயப⁴த்தபோ⁴ஜனானுயோக³மனுயுத்தா விஹரந்தீ’’தி.
‘‘கிங் பன தே, அக்³கி³வெஸ்ஸன, தாவதகேனேவ யாபெந்தீ’’தி?
‘‘நோ ஹித³ங், போ⁴ கோ³தம. அப்பேகதா³, போ⁴ கோ³தம, உளாரானி உளாரானி
கா²த³னீயானி கா²த³ந்தி, உளாரானி உளாரானி போ⁴ஜனானி பு⁴ஞ்ஜந்தி, உளாரானி
உளாரானி ஸாயனீயானி ஸாயந்தி, உளாரானி உளாரானி பானானி பிவந்தி. தே இமங் காயங்
ப³லங் கா³ஹெந்தி நாம, ப்³ரூஹெந்தி நாம, மேதெ³ந்தி நாமா’’தி.
‘‘யங் கோ² தே, அக்³கி³வெஸ்ஸன, புரிமங் பஹாய பச்சா²
உபசினந்தி, ஏவங் இமஸ்ஸ காயஸ்ஸ ஆசயாபசயோ ஹோதி. கிந்தி பன தே, அக்³கி³வெஸ்ஸன,
சித்தபா⁴வனா ஸுதா’’தி? சித்தபா⁴வனாய கோ² ஸச்சகோ நிக³ண்ட²புத்தோ ப⁴க³வதா புட்டோ² ஸமானோ ந ஸம்பாயாஸி.
367.
அத² கோ² ப⁴க³வா ஸச்சகங் நிக³ண்ட²புத்தங் ஏதத³வோச – ‘‘யாபி கோ² தே ஏஸா,
அக்³கி³வெஸ்ஸன, புரிமா காயபா⁴வனா பா⁴ஸிதா ஸாபி அரியஸ்ஸ வினயே நோ த⁴ம்மிகா
காயபா⁴வனா. காயபா⁴வனம்பி [காயபா⁴வனங் ஹி (ஸீ॰ பீ॰ க॰)] கோ² த்வங், அக்³கி³வெஸ்ஸன, ந அஞ்ஞாஸி, குதோ பன த்வங் சித்தபா⁴வனங் ஜானிஸ்ஸஸி ?
அபி ச, அக்³கி³வெஸ்ஸன, யதா² அபா⁴விதகாயோ ச ஹோதி அபா⁴விதசித்தோ ச,
பா⁴விதகாயோ ச ஹோதி பா⁴விதசித்தோ ச. தங் ஸுணாஹி, ஸாது⁴கங் மனஸி கரோஹி,
பா⁴ஸிஸ்ஸாமீ’’தி. ‘‘ஏவங், போ⁴’’தி கோ² ஸச்சகோ நிக³ண்ட²புத்தோ ப⁴க³வதோ
பச்சஸ்ஸோஸி. ப⁴க³வா ஏதத³வோச –
368. ‘‘கத²ஞ்ச ,
அக்³கி³வெஸ்ஸன, அபா⁴விதகாயோ ச ஹோதி அபா⁴விதசித்தோ ச? இத⁴, அக்³கி³வெஸ்ஸன,
அஸ்ஸுதவதோ புது²ஜ்ஜனஸ்ஸ உப்பஜ்ஜதி ஸுகா² வேத³னா. ஸோ ஸுகா²ய வேத³னாய
பு²ட்டோ² ஸமானோ ஸுக²ஸாராகீ³ ச ஹோதி ஸுக²ஸாராகி³தஞ்ச ஆபஜ்ஜதி. தஸ்ஸ ஸா ஸுகா²
வேத³னா நிருஜ்ஜ²தி. ஸுகா²ய வேத³னாய நிரோதா⁴ உப்பஜ்ஜதி து³க்கா² வேத³னா. ஸோ
து³க்கா²ய வேத³னாய பு²ட்டோ² ஸமானோ ஸோசதி கிலமதி பரிதே³வதி உரத்தாளிங்
கந்த³தி ஸம்மோஹங் ஆபஜ்ஜதி. தஸ்ஸ கோ² ஏஸா, அக்³கி³வெஸ்ஸன, உப்பன்னாபி ஸுகா²
வேத³னா சித்தங் பரியாதா³ய திட்ட²தி அபா⁴விதத்தா காயஸ்ஸ, உப்பன்னாபி
து³க்கா² வேத³னா சித்தங் பரியாதா³ய திட்ட²தி அபா⁴விதத்தா சித்தஸ்ஸ. யஸ்ஸ
கஸ்ஸசி, அக்³கி³வெஸ்ஸன, ஏவங் உப⁴தோபக்க²ங் உப்பன்னாபி ஸுகா² வேத³னா சித்தங்
பரியாதா³ய திட்ட²தி அபா⁴விதத்தா காயஸ்ஸ, உப்பன்னாபி து³க்கா² வேத³னா
சித்தங் பரியாதா³ய திட்ட²தி அபா⁴விதத்தா சித்தஸ்ஸ, ஏவங் கோ²,
அக்³கி³வெஸ்ஸன, அபா⁴விதகாயோ ச ஹோதி அபா⁴விதசித்தோ ச.
369.
‘‘கத²ஞ்ச, அக்³கி³வெஸ்ஸன, பா⁴விதகாயோ ச ஹோதி பா⁴விதசித்தோ ச? இத⁴,
அக்³கி³வெஸ்ஸன, ஸுதவதோ அரியஸாவகஸ்ஸ உப்பஜ்ஜதி ஸுகா² வேத³னா. ஸோ ஸுகா²ய
வேத³னாய பு²ட்டோ² ஸமானோ ந ஸுக²ஸாராகீ³ ச ஹோதி, ந
ஸுக²ஸாராகி³தஞ்ச ஆபஜ்ஜதி. தஸ்ஸ ஸா ஸுகா² வேத³னா நிருஜ்ஜ²தி. ஸுகா²ய வேத³னாய
நிரோதா⁴ உப்பஜ்ஜதி து³க்கா² வேத³னா. ஸோ து³க்கா²ய வேத³னாய பு²ட்டோ² ஸமானோ ந
ஸோசதி ந கிலமதி ந பரிதே³வதி ந உரத்தாளிங் கந்த³தி ந ஸம்மோஹங் ஆபஜ்ஜதி.
தஸ்ஸ கோ² ஏஸா, அக்³கி³வெஸ்ஸன, உப்பன்னாபி ஸுகா² வேத³னா சித்தங் ந பரியாதா³ய
திட்ட²தி பா⁴விதத்தா காயஸ்ஸ, உப்பன்னாபி து³க்கா² வேத³னா சித்தங் ந
பரியாதா³ய திட்ட²தி பா⁴விதத்தா சித்தஸ்ஸ. யஸ்ஸ கஸ்ஸசி, அக்³கி³வெஸ்ஸன, ஏவங்
உப⁴தோபக்க²ங் உப்பன்னாபி ஸுகா² வேத³னா சித்தங் ந
பரியாதா³ய திட்ட²தி பா⁴விதத்தா காயஸ்ஸ, உப்பன்னாபி து³க்கா² வேத³னா சித்தங்
ந பரியாதா³ய திட்ட²தி பா⁴விதத்தா சித்தஸ்ஸ. ஏவங் கோ², அக்³கி³வெஸ்ஸன,
பா⁴விதகாயோ ச ஹோதி பா⁴விதசித்தோ சா’’தி.
370. ‘‘ஏவங் பஸன்னோ அஹங் போ⁴தோ கோ³தமஸ்ஸ! ப⁴வஞ்ஹி கோ³தமோ பா⁴விதகாயோ ச ஹோதி பா⁴விதசித்தோ சா’’தி . ‘‘அத்³தா⁴ கோ² தே அயங், அக்³கி³வெஸ்ஸன, ஆஸஜ்ஜ உபனீய வாசா பா⁴ஸிதா, அபி ச தே அஹங் ப்³யாகரிஸ்ஸாமி .
யதோ கோ² அஹங், அக்³கி³வெஸ்ஸன, கேஸமஸ்ஸுங் ஓஹாரெத்வா காஸாயானி வத்தா²னி
அச்சா²தெ³த்வா அகா³ரஸ்மா அனகா³ரியங் பப்³ப³ஜிதோ, தங் வத மே உப்பன்னா வா
ஸுகா² வேத³னா சித்தங் பரியாதா³ய ட²ஸ்ஸதி, உப்பன்னா வா து³க்கா² வேத³னா
சித்தங் பரியாதா³ய ட²ஸ்ஸதீதி நேதங் டா²னங் [நேதங் கோ²டா²னங் (ஸீ॰ பீ॰)] விஜ்ஜதீ’’தி.
‘‘ந ஹி நூன [ந ஹனூன (ஸீ॰ ஸ்யா॰ கங்॰ பீ॰)]
போ⁴தோ கோ³தமஸ்ஸ உப்பஜ்ஜதி ததா²ரூபா ஸுகா² வேத³னா யதா²ரூபா உப்பன்னா ஸுகா²
வேத³னா சித்தங் பரியாதா³ய திட்டெ²ய்ய; ந ஹி நூன போ⁴தோ கோ³தமஸ்ஸ உப்பஜ்ஜதி ததா²ரூபா து³க்கா² வேத³னா யதா²ரூபா உப்பன்னா து³க்கா² வேத³னா சித்தங் பரியாதா³ய திட்டெ²ய்யா’’தி.
371.
‘‘கிஞ்ஹி நோ ஸியா, அக்³கி³வெஸ்ஸன? இத⁴ மே, அக்³கி³வெஸ்ஸன, புப்³பே³வ
ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ ஏதத³ஹோஸி – ‘ஸம்பா³தோ⁴
க⁴ராவாஸோ ரஜாபதோ², அப்³போ⁴காஸோ பப்³ப³ஜ்ஜா. நயித³ங் ஸுகரங் அகா³ரங்
அஜ்ஜா²வஸதா ஏகந்தபரிபுண்ணங் ஏகந்தபரிஸுத்³த⁴ங் ஸங்க²லிகி²தங் ப்³ரஹ்மசரியங்
சரிதுங். யங்னூனாஹங் கேஸமஸ்ஸுங் ஓஹாரெத்வா காஸாயானி வத்தா²னி
அச்சா²தெ³த்வா அகா³ரஸ்மா அனகா³ரியங் பப்³ப³ஜெய்ய’ந்தி. ஸோ கோ² அஹங்,
அக்³கி³வெஸ்ஸன, அபரேன ஸமயேன த³ஹரோவ ஸமானோ, ஸுஸுகாளகேஸோ ப⁴த்³ரேன யொப்³ப³னேன
ஸமன்னாக³தோ பட²மேன வயஸா, அகாமகானங் மாதாபிதூனங் அஸ்ஸுமுகா²னங்
ருத³ந்தானங், கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா
அகா³ரஸ்மா அனகா³ரியங் பப்³ப³ஜிங். ஸோ ஏவங் பப்³ப³ஜிதோ ஸமானோ கிங்குஸலக³வேஸீ
அனுத்தரங் ஸந்திவரபத³ங் பரியேஸமானோ யேன ஆளாரோ காலாமோ தேனுபஸங்கமிங்;
உபஸங்கமித்வா ஆளாரங் காலாமங் ஏதத³வோசங் – ‘இச்சா²மஹங், ஆவுஸோ காலாம,
இமஸ்மிங் த⁴ம்மவினயே ப்³ரஹ்மசரியங் சரிது’ந்தி. ஏவங் வுத்தே,
அக்³கி³வெஸ்ஸன, ஆளாரோ காலாமோ மங் ஏதத³வோச – ‘விஹரதாயஸ்மா, தாதி³ஸோ அயங்
த⁴ம்மோ யத்த² விஞ்ஞூ புரிஸோ நசிரஸ்ஸேவ ஸகங் ஆசரியகங் ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரெய்யா’தி. ஸோ கோ² அஹங், அக்³கி³வெஸ்ஸன,
நசிரஸ்ஸேவ கி²ப்பமேவ தங் த⁴ம்மங் பரியாபுணிங். ஸோ கோ² அஹங், அக்³கி³வெஸ்ஸன,
தாவதகேனேவ ஒட்ட²பஹதமத்தேன லபிதலாபனமத்தேன ஞாணவாத³ஞ்ச
வதா³மி தே²ரவாத³ஞ்ச, ‘ஜானாமி பஸ்ஸாமீ’தி ச படிஜானாமி, அஹஞ்சேவ அஞ்ஞே ச.
தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘ந கோ² ஆளாரோ காலாமோ இமங் த⁴ம்மங்
கேவலங் ஸத்³தா⁴மத்தகேன ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³தி, அத்³தா⁴ ஆளாரோ காலாமோ இமங் த⁴ம்மங் ஜானங் பஸ்ஸங் விஹரதீ’’’தி.
‘‘அத² க்²வாஹங், அக்³கி³வெஸ்ஸன, யேன ஆளாரோ காலாமோ தேனுபஸங்கமிங்; உபஸங்கமித்வா ஆளாரங்
காலாமங் ஏதத³வோசங் – ‘கித்தாவதா நோ, ஆவுஸோ காலாம, இமங் த⁴ம்மங் ஸயங்
அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³ஸீ’தி? ஏவங் வுத்தே,
அக்³கி³வெஸ்ஸன, ஆளாரோ காலாமோ ஆகிஞ்சஞ்ஞாயதனங் பவேதே³ஸி. தஸ்ஸ மய்ஹங்,
அக்³கி³வெஸ்ஸன, ஏதத³ஹோஸி – ‘ந கோ² ஆளாரஸ்ஸேவ காலாமஸ்ஸ அத்தி² ஸத்³தா⁴,
மய்ஹங்பத்தி² ஸத்³தா⁴; ந கோ² ஆளாரஸ்ஸேவ காலாமஸ்ஸ அத்தி² வீரியங்,
மய்ஹங்பத்தி² வீரியங்; ந கோ² ஆளாரஸ்ஸேவ காலாமஸ்ஸ அத்தி² ஸதி, மய்ஹங்பத்தி²
ஸதி; ந கோ² ஆளாரஸ்ஸேவ காலாமஸ்ஸ அத்தி² ஸமாதி⁴, மய்ஹங்பத்தி² ஸமாதி⁴; ந கோ²
ஆளாரஸ்ஸேவ காலாமஸ்ஸ அத்தி² பஞ்ஞா, மய்ஹங்பத்தி² பஞ்ஞா; யங்னூனாஹங் யங்
த⁴ம்மங் ஆளாரோ காலாமோ ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி
பவேதே³தி தஸ்ஸ த⁴ம்மஸ்ஸ ஸச்சி²கிரியாய பத³ஹெய்ய’ந்தி. ஸோ கோ² அஹங்,
அக்³கி³வெஸ்ஸன, நசிரஸ்ஸேவ கி²ப்பமேவ தங் த⁴ம்மங் ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ விஹாஸிங்.
‘‘அத² க்²வாஹங், அக்³கி³வெஸ்ஸன, யேன ஆளாரோ காலாமோ
தேனுபஸங்கமிங்; உபஸங்கமித்வா ஆளாரங் காலாமங் ஏதத³வோசங் – ‘எத்தாவதா நோ,
ஆவுஸோ காலாம , இமங் த⁴ம்மங் ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ பவேதே³ஸீ’தி? ‘எத்தாவதா கோ² அஹங், ஆவுஸோ, இமங்
த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³மீ’தி. ‘அஹம்பி கோ²,
ஆவுஸோ, எத்தாவதா இமங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹராமீ’தி. ‘லாபா⁴ நோ, ஆவுஸோ, ஸுலத்³த⁴ங் நோ, ஆவுஸோ, யே மயங் ஆயஸ்மந்தங்
தாதி³ஸங் ஸப்³ரஹ்மசாரிங் பஸ்ஸாம. இதி யாஹங் த⁴ம்மங் ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ பவேதே³மி தங் த்வங் த⁴ம்மங் ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரஸி; யங் த்வங் த⁴ம்மங் ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரஸி தமஹங் த⁴ம்மங் ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ பவேதே³மி. இதி யாஹங் த⁴ம்மங் ஜானாமி தங் த்வங் த⁴ம்மங் ஜானாஸி;
யங் த்வங் த⁴ம்மங் ஜானாஸி தமஹங் த⁴ம்மங் ஜானாமி. இதி யாதி³ஸோ அஹங் தாதி³ஸோ
துவங், யாதி³ஸோ துவங் தாதி³ஸோ அஹங். ஏஹி தா³னி, ஆவுஸோ, உபோ⁴வ ஸந்தா இமங்
க³ணங் பரிஹராமா’தி. இதி கோ², அக்³கி³வெஸ்ஸன, ஆளாரோ காலாமோ ஆசரியோ மே ஸமானோ (அத்தனோ) [( ) நத்தி² (ஸீ॰ பீ॰)]
அந்தேவாஸிங் மங் ஸமானங் அத்தனா ஸமஸமங் ட²பேஸி, உளாராய ச மங் பூஜாய பூஜேஸி.
தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘நாயங் த⁴ம்மோ நிப்³பி³தா³ய ந
விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய
ஸங்வத்ததி, யாவதே³வ ஆகிஞ்சஞ்ஞாயதனூபபத்தியா’தி. ஸோ கோ² அஹங்,
அக்³கி³வெஸ்ஸன, தங் த⁴ம்மங் அனலங்கரித்வா தஸ்மா த⁴ம்மா நிப்³பி³ஜ்ஜ
அபக்கமிங்.
372. ‘‘ஸோ கோ² அஹங், அக்³கி³வெஸ்ஸன, கிங்குஸலக³வேஸீ அனுத்தரங் ஸந்திவரபத³ங் பரியேஸமானோ யேன உத³கோ ராமபுத்தோ தேனுபஸங்கமிங்; உபஸங்கமித்வா உத³கங் ராமபுத்தங் ஏதத³வோசங் – ‘இச்சா²மஹங், ஆவுஸோ [பஸ்ஸ ம॰ நி॰ 1.278 பாஸராஸிஸுத்தே]
இமஸ்மிங் த⁴ம்மவினயே ப்³ரஹ்மசரியங் சரிது’ந்தி. ஏவங் வுத்தே,
அக்³கி³வெஸ்ஸன, உத³கோ ராமபுத்தோ மங் ஏதத³வோச – ‘விஹரதாயஸ்மா, தாதி³ஸோ அயங்
த⁴ம்மோ யத்த² விஞ்ஞூ புரிஸோ நசிரஸ்ஸேவ ஸகங் ஆசரியகங் ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ விஹரெய்யா’தி. ஸோ கோ² அஹங், அக்³கி³வெஸ்ஸன,
நசிரஸ்ஸேவ கி²ப்பமேவ தங் த⁴ம்மங் பரியாபுணிங். ஸோ கோ² அஹங், அக்³கி³வெஸ்ஸன,
தாவதகேனேவ ஒட்ட²பஹதமத்தேன லபிதலாபனமத்தேன ஞாணவாத³ஞ்ச வதா³மி தே²ரவாத³ஞ்ச,
‘ஜானாமி பஸ்ஸாமீ’தி ச படிஜானாமி, அஹஞ்சேவ அஞ்ஞே ச. தஸ்ஸ மய்ஹங்,
அக்³கி³வெஸ்ஸன, ஏதத³ஹோஸி – ‘ந கோ² ராமோ இமங் த⁴ம்மங் கேவலங் ஸத்³தா⁴மத்தகேன
ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³ஸி. அத்³தா⁴ ராமோ
இமங் த⁴ம்மங் ஜானங் பஸ்ஸங் விஹாஸீ’தி. அத² க்²வாஹங், அக்³கி³வெஸ்ஸன, யேன
உத³கோ ராமபுத்தோ தேனுபஸங்கமிங்; உபஸங்கமித்வா உத³கங் ராமபுத்தங் ஏதத³வோசங் –
‘கித்தாவதா நோ, ஆவுஸோ ராமோ, இமங் த⁴ம்மங் ஸயங் அபி⁴ஞ்ஞா ஸச்சி²கத்வா
உபஸம்பஜ்ஜ விஹராமீதி பவேதே³ஸீ’தி? ஏவங் வுத்தே, அக்³கி³வெஸ்ஸன, உத³கோ
ராமபுத்தோ நேவஸஞ்ஞானாஸஞ்ஞாயதனங் பவேதே³ஸி. தஸ்ஸ மய்ஹங், அக்³கி³வெஸ்ஸன,
ஏதத³ஹோஸி – ‘ந கோ² ராமஸ்ஸேவ அஹோஸி ஸத்³தா⁴, மய்ஹங்பத்தி² ஸத்³தா⁴; ந கோ²
ராமஸ்ஸேவ அஹோஸி வீரியங், மய்ஹங்பத்தி² வீரியங்; ந கோ² ராமஸ்ஸேவ அஹோஸி ஸதி,
மய்ஹங்பத்தி² ஸதி; ந கோ² ராமஸ்ஸேவ அஹோஸி ஸமாதி⁴, மய்ஹங்பத்தி²
ஸமாதி⁴; ந கோ² ராமஸ்ஸேவ அஹோஸி பஞ்ஞா, மய்ஹங்பத்தி² பஞ்ஞா; யங்னூனாஹங் யங்
த⁴ம்மங் ராமோ ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீதி பவேதே³ஸி தஸ்ஸ
த⁴ம்மஸ்ஸ ஸச்சி²கிரியாய பத³ஹெய்ய’ந்தி. ஸோ கோ² அஹங், அக்³கி³வெஸ்ஸன, நசிரஸ்ஸேவ கி²ப்பமேவ தங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸிங்.
‘‘அத² க்²வாஹங், அக்³கி³வெஸ்ஸன, யேன உத³கோ ராமபுத்தோ
தேனுபஸங்கமிங்; உபஸங்கமித்வா உத³கங் ராமபுத்தங் ஏதத³வோசங் – ‘எத்தாவதா நோ,
ஆவுஸோ, ராமோ இமங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
பவேதே³ஸீ’தி? ‘எத்தாவதா கோ², ஆவுஸோ, ராமோ இமங் த⁴ம்மங் ஸயங் அபி⁴ஞ்ஞா
ஸச்சி²கத்வா உபஸம்பஜ்ஜ பவேதே³ஸீ’தி. ‘அஹம்பி கோ², ஆவுஸோ, எத்தாவதா இமங்
த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீ’தி. ‘லாபா⁴ நோ,
ஆவுஸோ, ஸுலத்³த⁴ங் நோ, ஆவுஸோ, யே மயங் ஆயஸ்மந்தங் தாதி³ஸங் ஸப்³ரஹ்மசாரிங்
பஸ்ஸாம. இதி யங் த⁴ம்மங் ராமோ ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
பவேதே³ஸி, தங் த்வங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரஸி;
யங் த்வங் த⁴ம்மங் ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரஸி, தங்
த⁴ம்மங் ராமோ ஸயங் அபி⁴ஞ்ஞா ஸச்சி²கத்வா உபஸம்பஜ்ஜ பவேதே³ஸி. இதி யங்
த⁴ம்மங் ராமோ அபி⁴ஞ்ஞாஸி தங் த்வங் த⁴ம்மங் ஜானாஸி; யங் த்வங் த⁴ம்மங்
ஜானாஸி தங் த⁴ம்மங் ராமோ அபி⁴ஞ்ஞாஸி. இதி யாதி³ஸோ
ராமோ அஹோஸி தாதி³ஸோ துவங்; யாதி³ஸோ துவங் தாதி³ஸோ ராமோ அஹோஸி. ஏஹி தா³னி,
ஆவுஸோ, துவங் இமங் க³ணங் பரிஹரா’தி. இதி கோ², அக்³கி³வெஸ்ஸன, உத³கோ
ராமபுத்தோ ஸப்³ரஹ்மசாரீ மே ஸமானோ ஆசரியட்டா²னே ச மங் ட²பேஸி, உளாராய ச மங்
பூஜாய பூஜேஸி. தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘நாயங் த⁴ம்மோ
நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந
நிப்³பா³னாய ஸங்வத்ததி, யாவதே³வ நேவஸஞ்ஞானாஸஞ்ஞாயதனூபபத்தியா’தி. ஸோ கோ²
அஹங், அக்³கி³வெஸ்ஸன, தங் த⁴ம்மங் அனலங்கரித்வா தஸ்மா த⁴ம்மா நிப்³பி³ஜ்ஜ
அபக்கமிங்.
373.
‘‘ஸோ கோ² அஹங், அக்³கி³வெஸ்ஸன, கிங்குஸலக³வேஸீ அனுத்தரங் ஸந்திவரபத³ங்
பரியேஸமானோ மக³தே⁴ஸு அனுபுப்³பே³ன சாரிகங் சரமானோ யேன உருவேலா ஸேனானிக³மோ
தத³வஸரிங். தத்த²த்³த³ஸங் ரமணீயங் பூ⁴மிபா⁴க³ங், பாஸாதி³கஞ்ச வனஸண்ட³ங்,
நதி³ஞ்ச ஸந்த³ந்திங் ஸேதகங் ஸுபதித்த²ங் ரமணீயங், ஸமந்தா ச கோ³சரகா³மங்.
தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘ரமணீயோ வத, போ⁴, பூ⁴மிபா⁴கோ³,
பாஸாதி³கோ ச வனஸண்டோ³, நதீ³ ச ஸந்த³தி ஸேதகா ஸுபதித்தா² ரமணீயா, ஸமந்தா ச
கோ³சரகா³மோ. அலங் வதித³ங் குலபுத்தஸ்ஸ பதா⁴னத்தி²கஸ்ஸ பதா⁴னாயா’தி. ஸோ கோ² அஹங், அக்³கி³வெஸ்ஸன, தத்தே²வ நிஸீதி³ங் ‘அலமித³ங் பதா⁴னாயா’தி.
374.
‘‘அபிஸ்ஸுமங், அக்³கி³வெஸ்ஸன, திஸ்ஸோ உபமா படிப⁴ங்ஸு அனச்ச²ரியா புப்³பே³
அஸ்ஸுதபுப்³பா³. ஸெய்யதா²பி, அக்³கி³வெஸ்ஸன, அல்லங் கட்ட²ங் ஸஸ்னேஹங் உத³கே
நிக்கி²த்தங். அத² புரிஸோ ஆக³ச்செ²ய்ய உத்தராரணிங் ஆதா³ய – ‘அக்³கி³ங்
அபி⁴னிப்³ப³த்தெஸ்ஸாமி, தேஜோ பாதுகரிஸ்ஸாமீ’தி. தங் கிங் மஞ்ஞஸி,
அக்³கி³வெஸ்ஸன, அபி நு ஸோ புரிஸோ அமுங் அல்லங் கட்ட²ங் ஸஸ்னேஹங், உத³கே
நிக்கி²த்தங் , உத்தராரணிங் ஆதா³ய அபி⁴மந்தெ²ந்தோ
அக்³கி³ங் அபி⁴னிப்³ப³த்தெய்ய, தேஜோ பாதுகரெய்யா’’தி? ‘‘நோ ஹித³ங், போ⁴
கோ³தம’’. ‘‘தங் கிஸ்ஸ ஹேது’’? ‘‘அது³ஞ்ஹி, போ⁴ கோ³தம, அல்லங் கட்ட²ங்
ஸஸ்னேஹங், தஞ்ச பன உத³கே நிக்கி²த்தங். யாவதே³வ ச
பன ஸோ புரிஸோ கிலமத²ஸ்ஸ விகா⁴தஸ்ஸ பா⁴கீ³ அஸ்ஸா’’தி. ‘‘ஏவமேவ கோ²,
அக்³கி³வெஸ்ஸன, யே ஹி கேசி ஸமணா வா ப்³ராஹ்மணா வா காயேன சேவ சித்தேன ச
காமேஹி அவூபகட்டா² விஹரந்தி, யோ ச நேஸங் காமேஸு காமச்ச²ந்தோ³ காமஸ்னேஹோ
காமமுச்சா² காமபிபாஸா காமபரிளாஹோ, ஸோ ச அஜ்ஜ²த்தங் ந ஸுப்பஹீனோ ஹோதி, ந
ஸுப்படிப்பஸ்ஸத்³தோ⁴, ஓபக்கமிகா சேபி தே பொ⁴ந்தோ ஸமணப்³ராஹ்மணா து³க்கா²
திப்³பா³ க²ரா கடுகா வேத³னா வேத³யந்தி, அப⁴ப்³பா³வ தே ஞாணாய த³ஸ்ஸனாய
அனுத்தராய ஸம்போ³தா⁴ய. நோ சேபி தே பொ⁴ந்தோ
ஸமணப்³ராஹ்மணா ஓபக்கமிகா து³க்கா² திப்³பா³ க²ரா கடுகா வேத³னா வேத³யந்தி,
அப⁴ப்³பா³வ தே ஞாணாய த³ஸ்ஸனாய அனுத்தராய ஸம்போ³தா⁴ய. அயங் கோ² மங்,
அக்³கி³வெஸ்ஸன, பட²மா உபமா படிபா⁴ஸி அனச்ச²ரியா புப்³பே³ அஸ்ஸுதபுப்³பா³.
375.
‘‘அபராபி கோ² மங், அக்³கி³வெஸ்ஸன, து³தியா உபமா படிபா⁴ஸி அனச்ச²ரியா
புப்³பே³ அஸ்ஸுதபுப்³பா³. ஸெய்யதா²பி, அக்³கி³வெஸ்ஸன, அல்லங் கட்ட²ங்
ஸஸ்னேஹங், ஆரகா உத³கா த²லே நிக்கி²த்தங். அத² புரிஸோ ஆக³ச்செ²ய்ய
உத்தராரணிங் ஆதா³ய – ‘அக்³கி³ங் அபி⁴னிப்³ப³த்தெஸ்ஸாமி, தேஜோ
பாதுகரிஸ்ஸாமீ’தி. தங் கிங் மஞ்ஞஸி, அக்³கி³வெஸ்ஸன, அபி நு ஸோ புரிஸோ அமுங்
அல்லங் கட்ட²ங் ஸஸ்னேஹங், ஆரகா உத³கா த²லே நிக்கி²த்தங், உத்தராரணிங்
ஆதா³ய அபி⁴மந்தெ²ந்தோ அக்³கி³ங் அபி⁴னிப்³ப³த்தெய்ய
தேஜோ பாதுகரெய்யா’’தி? ‘‘நோ ஹித³ங், போ⁴ கோ³தம’’. ‘‘தங் கிஸ்ஸ ஹேது’’?
‘‘அது³ஞ்ஹி, போ⁴ கோ³தம, அல்லங் கட்ட²ங் ஸஸ்னேஹங், கிஞ்சாபி ஆரகா உத³கா த²லே
நிக்கி²த்தங். யாவதே³வ ச பன ஸோ புரிஸோ கிலமத²ஸ்ஸ விகா⁴தஸ்ஸ
பா⁴கீ³ அஸ்ஸாதி. ஏவமேவ கோ², அக்³கி³வெஸ்ஸன, யே ஹி கேசி ஸமணா வா ப்³ராஹ்மணா
வா காயேன சேவ சித்தேன ச காமேஹி வூபகட்டா² விஹரந்தி, யோ ச நேஸங் காமேஸு
காமச்ச²ந்தோ³ காமஸ்னேஹோ காமமுச்சா² காமபிபாஸா காமபரிளாஹோ ஸோ ச அஜ்ஜ²த்தங் ந
ஸுப்பஹீனோ ஹோதி, ந ஸுப்படிப்பஸ்ஸத்³தோ⁴, ஓபக்கமிகா சேபி தே பொ⁴ந்தோ
ஸமணப்³ராஹ்மணா து³க்கா² திப்³பா³ க²ரா கடுகா வேத³னா வேத³யந்தி, அப⁴ப்³பா³வ
தே ஞாணாய த³ஸ்ஸனாய அனுத்தராய ஸம்போ³தா⁴ய. நோ சேபி தே பொ⁴ந்தோ ஸமணப்³ராஹ்மணா
ஓபக்கமிகா து³க்கா² திப்³பா³ க²ரா கடுகா வேத³னா வேத³யந்தி, அப⁴ப்³பா³வ தே
ஞாணாய த³ஸ்ஸனாய அனுத்தராய ஸம்போ³தா⁴ய. அயங் கோ² மங், அக்³கி³வெஸ்ஸன,
து³தியா உபமா படிபா⁴ஸி அனச்ச²ரியா புப்³பே³ அஸ்ஸுதபுப்³பா³’’.
376. ‘‘அபராபி கோ² மங், அக்³கி³வெஸ்ஸன, ததியா உபமா படிபா⁴ஸி அனச்ச²ரியா
புப்³பே³ அஸ்ஸுதபுப்³பா³. ஸெய்யதா²பி, அக்³கி³வெஸ்ஸன, ஸுக்க²ங் கட்ட²ங்
கோளாபங், ஆரகா உத³கா த²லே நிக்கி²த்தங். அத² புரிஸோ ஆக³ச்செ²ய்ய
உத்தராரணிங் ஆதா³ய – ‘அக்³கி³ங் அபி⁴னிப்³ப³த்தெஸ்ஸாமி, தேஜோ
பாதுகரிஸ்ஸாமீ’தி. தங் கிங் மஞ்ஞஸி, அக்³கி³வெஸ்ஸன, அபி நு ஸோ புரிஸோ அமுங்
ஸுக்க²ங் கட்ட²ங் கோளாபங், ஆரகா உத³கா த²லே நிக்கி²த்தங், உத்தராரணிங்
ஆதா³ய அபி⁴மந்தெ²ந்தோ அக்³கி³ங்
அபி⁴னிப்³ப³த்தெய்ய, தேஜோ பாதுகரெய்யா’’தி? ‘‘ஏவங், போ⁴ கோ³தம’’. ‘‘தங்
கிஸ்ஸ ஹேது’’? ‘‘அது³ஞ்ஹி, போ⁴ கோ³தம, ஸுக்க²ங் கட்ட²ங் கோளாபங், தஞ்ச பன
ஆரகா உத³கா த²லே நிக்கி²த்த’’ந்தி . ‘‘ஏவமேவ கோ²,
அக்³கி³வெஸ்ஸன, யே ஹி கேசி ஸமணா வா ப்³ராஹ்மணா வா காயேன சேவ சித்தேன ச
காமேஹி வூபகட்டா² விஹரந்தி, யோ ச நேஸங் காமேஸு காமச்ச²ந்தோ³ காமஸ்னேஹோ
காமமுச்சா² காமபிபாஸா காமபரிளாஹோ, ஸோ ச அஜ்ஜ²த்தங் ஸுப்பஹீனோ ஹோதி
ஸுப்படிப்பஸ்ஸத்³தோ⁴, ஓபக்கமிகா சேபி தே பொ⁴ந்தோ ஸமணப்³ராஹ்மணா து³க்கா²
திப்³பா³ க²ரா கடுகா வேத³னா வேத³யந்தி, ப⁴ப்³பா³வ தே ஞாணாய த³ஸ்ஸனாய
அனுத்தராய ஸம்போ³தா⁴ய. நோ சேபி தே பொ⁴ந்தோ ஸமணப்³ராஹ்மணா ஓபக்கமிகா
து³க்கா² திப்³பா³ க²ரா கடுகா வேத³னா வேத³யந்தி, ப⁴ப்³பா³வ தே ஞாணாய
த³ஸ்ஸனாய அனுத்தராய ஸம்போ³தா⁴ய. அயங் கோ² மங், அக்³கி³வெஸ்ஸன, ததியா உபமா
படிபா⁴ஸி அனச்ச²ரியா புப்³பே³ அஸ்ஸுதபுப்³பா³. இமா கோ² மங், அக்³கி³வெஸ்ஸன,
திஸ்ஸோ உபமா படிப⁴ங்ஸு அனச்ச²ரியா புப்³பே³ அஸ்ஸுதபுப்³பா³.’’
377. ‘‘தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘யங்னூனாஹங் த³ந்தேபி⁴ த³ந்தமாதா⁴ய [பஸ்ஸ ம॰ நி॰ 1.221 விதக்கஸண்டா²னஸுத்தே],
ஜிவ்ஹாய தாலுங் ஆஹச்ச, சேதஸா சித்தங் அபி⁴னிக்³க³ண்ஹெய்யங்
அபி⁴னிப்பீளெய்யங் அபி⁴ஸந்தாபெய்ய’ந்தி. ஸோ கோ² அஹங், அக்³கி³வெஸ்ஸன,
த³ந்தேபி⁴ த³ந்தமாதா⁴ய, ஜிவ்ஹாய தாலுங் ஆஹச்ச, சேதஸா சித்தங்
அபி⁴னிக்³க³ண்ஹாமி அபி⁴னிப்பீளேமி அபி⁴ஸந்தாபேமி. தஸ்ஸ மய்ஹங்,
அக்³கி³வெஸ்ஸன, த³ந்தேபி⁴ த³ந்தமாதா⁴ய ஜிவ்ஹாய தாலுங் ஆஹச்ச சேதஸா சித்தங்
அபி⁴னிக்³க³ண்ஹதோ அபி⁴னிப்பீளயதோ அபி⁴ஸந்தாபயதோ
கச்சே²ஹி ஸேதா³ முச்சந்தி. ஸெய்யதா²பி, அக்³கி³வெஸ்ஸன, ப³லவா புரிஸோ
து³ப்³ப³லதரங் புரிஸங் ஸீஸே வா க³ஹெத்வா க²ந்தே⁴ வா க³ஹெத்வா
அபி⁴னிக்³க³ண்ஹெய்ய அபி⁴னிப்பீளெய்ய அபி⁴ஸந்தாபெய்ய, ஏவமேவ கோ² மே,
அக்³கி³வெஸ்ஸன, த³ந்தேபி⁴ த³ந்தமாதா⁴ய, ஜிவ்ஹாய தாலுங் ஆஹச்ச, சேதஸா
சித்தங் அபி⁴னிக்³க³ண்ஹதோ அபி⁴னிப்பீளயதோ அபி⁴ஸந்தாபயதோ கச்சே²ஹி ஸேதா³
முச்சந்தி. ஆரத்³த⁴ங் கோ² பன மே, அக்³கி³வெஸ்ஸன, வீரியங் ஹோதி அஸல்லீனங்,
உபட்டி²தா ஸதி அஸம்முட்டா², ஸாரத்³தோ⁴ ச பன மே காயோ
ஹோதி அப்படிப்பஸ்ஸத்³தோ⁴ தேனேவ து³க்க²ப்பதா⁴னேன பதா⁴னாபி⁴துன்னஸ்ஸ ஸதோ.
ஏவரூபாபி கோ² மே, அக்³கி³வெஸ்ஸன, உப்பன்னா து³க்கா² வேத³னா சித்தங் ந
பரியாதா³ய திட்ட²தி.
378.
‘‘தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘யங்னூனாஹங் அப்பாணகங்யேவ
ஜா²னங் ஜா²யெய்ய’ந்தி. ஸோ கோ² அஹங், அக்³கி³வெஸ்ஸன, முக²தோ ச நாஸதோ ச
அஸ்ஸாஸபஸ்ஸாஸே உபருந்தி⁴ங். தஸ்ஸ மய்ஹங், அக்³கி³வெஸ்ஸன, முக²தோ ச நாஸதோ ச
அஸ்ஸாஸபஸ்ஸாஸேஸு உபருத்³தே⁴ஸு கண்ணஸோதேஹி வாதானங் நிக்க²மந்தானங் அதி⁴மத்தோ
ஸத்³தோ³ ஹோதி. ஸெய்யதா²பி நாம கம்மாரக³க்³க³ரியா த⁴மமானாய அதி⁴மத்தோ
ஸத்³தோ³ ஹோதி, ஏவமேவ கோ² மே, அக்³கி³வெஸ்ஸன, முக²தோ ச நாஸதோ ச
அஸ்ஸாஸபஸ்ஸாஸேஸு உபருத்³தே⁴ஸு கண்ணஸோதேஹி வாதானங்
நிக்க²மந்தானங் அதி⁴மத்தோ ஸத்³தோ³ ஹோதி. ஆரத்³த⁴ங் கோ² பன மே,
அக்³கி³வெஸ்ஸன, வீரியங் ஹோதி அஸல்லீனங் உபட்டி²தா ஸதி அஸம்முட்டா².
ஸாரத்³தோ⁴ ச பன மே காயோ ஹோதி அப்படிப்பஸ்ஸத்³தோ⁴
தேனேவ து³க்க²ப்பதா⁴னேன பதா⁴னாபி⁴துன்னஸ்ஸ ஸதோ. ஏவரூபாபி கோ² மே,
அக்³கி³வெஸ்ஸன, உப்பன்னா து³க்கா² வேத³னா சித்தங் ந பரியாதா³ய திட்ட²தி.
‘‘தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘யங்னூனாஹங்
அப்பாணகங்யேவ ஜா²னங் ஜா²யெய்ய’ந்தி. ஸோ கோ² அஹங், அக்³கி³வெஸ்ஸன, முக²தோ ச
நாஸதோ ச கண்ணதோ ச அஸ்ஸாஸபஸ்ஸாஸே உபருந்தி⁴ங். தஸ்ஸ
மய்ஹங், அக்³கி³வெஸ்ஸன, முக²தோ ச நாஸதோ ச கண்ணதோ ச அஸ்ஸாஸபஸ்ஸாஸேஸு
உபருத்³தே⁴ஸு அதி⁴மத்தா வாதா முத்³த⁴னி ஊஹனந்தி [ஊஹந்தி (ஸீ॰), ஓஹனந்தி (ஸ்யா॰ கங்॰), உஹனந்தி (க॰)]. ஸெய்யதா²பி, அக்³கி³வெஸ்ஸன, ப³லவா புரிஸோ திண்ஹேன ஸிக²ரேன முத்³த⁴னி அபி⁴மத்தெ²ய்ய [முத்³தா⁴னங் அபி⁴மந்தெ²ய்ய (ஸீ॰ பீ॰), முத்³தா⁴னங் அபி⁴மத்தெ²ய்ய (ஸ்யா॰ கங்॰)],
ஏவமேவ கோ² மே, அக்³கி³வெஸ்ஸன, முக²தோ ச நாஸதோ ச கண்ணதோ ச அஸ்ஸாஸபஸ்ஸாஸேஸு
உபருத்³தே⁴ஸு அதி⁴மத்தா வாதா முத்³த⁴னி ஊஹனந்தி. ஆரத்³த⁴ங் கோ² பன மே,
அக்³கி³வெஸ்ஸன, வீரியங் ஹோதி அஸல்லீனங் உபட்டி²தா ஸதி அஸம்முட்டா².
ஸாரத்³தோ⁴ ச பன மே காயோ ஹோதி அப்படிப்பஸ்ஸத்³தோ⁴ தேனேவ து³க்க²ப்பதா⁴னேன
பதா⁴னாபி⁴துன்னஸ்ஸ ஸதோ. ஏவரூபாபி கோ² மே, அக்³கி³வெஸ்ஸன, உப்பன்னா து³க்கா²
வேத³னா சித்தங் ந பரியாதா³ய திட்ட²தி.
‘‘தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘யங்னூனாஹங்
அப்பாணகங்யேவ ஜா²னங் ஜா²யெய்ய’ந்தி. ஸோ கோ² அஹங், அக்³கி³வெஸ்ஸன, முக²தோ ச
நாஸதோ ச கண்ணதோ ச அஸ்ஸாஸபஸ்ஸாஸே உபருந்தி⁴ங். தஸ்ஸ மய்ஹங், அக்³கி³வெஸ்ஸன,
முக²தோ ச நாஸதோ ச கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு அதி⁴மத்தா ஸீஸே ஸீஸவேத³னா ஹொந்தி. ஸெய்யதா²பி, அக்³கி³வெஸ்ஸன, ப³லவா புரிஸோ த³ள்ஹேன வரத்தக்க²ண்டே³ன [வரத்தகப³ந்த⁴னேன (ஸீ॰)]
ஸீஸே ஸீஸவேட²ங் த³தெ³ய்ய, ஏவமேவ கோ² மே, அக்³கி³வெஸ்ஸன, முக²தோ ச நாஸதோ ச
கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு அதி⁴மத்தா ஸீஸே ஸீஸவேத³னா ஹொந்தி.
ஆரத்³த⁴ங் கோ² பன மே, அக்³கி³வெஸ்ஸன, வீரியங் ஹோதி அஸல்லீனங் உபட்டி²தா ஸதி
அஸம்முட்டா². ஸாரத்³தோ⁴ ச பன மே காயோ ஹோதி அப்படிப்பஸ்ஸத்³தோ⁴ தேனேவ
து³க்க²ப்பதா⁴னேன பதா⁴னாபி⁴துன்னஸ்ஸ ஸதோ. ஏவரூபாபி கோ² மே, அக்³கி³வெஸ்ஸன,
உப்பன்னா து³க்கா² வேத³னா சித்தங் ந பரியாதா³ய திட்ட²தி.
‘‘தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘யங்னூனாஹங்
அப்பாணகங்யேவ ஜா²னங் ஜா²யெய்ய’ந்தி. ஸோ கோ² அஹங், அக்³கி³வெஸ்ஸன, முக²தோ ச
நாஸதோ ச கண்ணதோ ச அஸ்ஸாஸபஸ்ஸாஸே உபருந்தி⁴ங். தஸ்ஸ மய்ஹங், அக்³கி³வெஸ்ஸன,
முக²தோ ச நாஸதோ ச கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு அதி⁴மத்தா வாதா குச்சி²ங் பரிகந்தந்தி. ஸெய்யதா²பி, அக்³கி³வெஸ்ஸன, த³க்கோ² கோ³கா⁴தகோ வா கோ³கா⁴தகந்தேவாஸீ வா திண்ஹேன
கோ³விகந்தனேன குச்சி²ங் பரிகந்தெய்ய, ஏவமேவ கோ² மே, அக்³கி³வெஸ்ஸன, முக²தோ
ச நாஸதோ ச கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு அதி⁴மத்தா வாதா
குச்சி²ங் பரிகந்தந்தி. ஆரத்³த⁴ங் கோ² பன மே, அக்³கி³வெஸ்ஸன, வீரியங் ஹோதி
அஸல்லீனங் உபட்டி²தா ஸதி அஸம்முட்டா². ஸாரத்³தோ⁴ ச பன மே காயோ ஹோதி
அப்படிப்பஸ்ஸத்³தோ⁴ தேனேவ து³க்க²ப்பதா⁴னேன பதா⁴னாபி⁴துன்னஸ்ஸ ஸதோ. ஏவரூபாபி கோ² மே, அக்³கி³வெஸ்ஸன, உப்பன்னா து³க்கா² வேத³னா சித்தங் ந பரியாதா³ய திட்ட²தி.
‘‘தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘யங்னூனாஹங்
அப்பாணகங்யேவ ஜா²னங் ஜா²யெய்ய’ந்தி. ஸோ கோ² அஹங், அக்³கி³வெஸ்ஸன, முக²தோ ச
நாஸதோ ச கண்ணதோ ச அஸ்ஸாஸபஸ்ஸாஸே உபருந்தி⁴ங். தஸ்ஸ மய்ஹங், அக்³கி³வெஸ்ஸன,
முக²தோ ச நாஸதோ ச கண்ணதோ ச அஸ்ஸாஸபஸ்ஸாஸேஸு உபருத்³தே⁴ஸு அதி⁴மத்தோ
காயஸ்மிங் டா³ஹோ ஹோதி. ஸெய்யதா²பி, அக்³கி³வெஸ்ஸன, த்³வே ப³லவந்தோ புரிஸா
து³ப்³ப³லதரங் புரிஸங் நானாபா³ஹாஸு க³ஹெத்வா அங்கா³ரகாஸுயா ஸந்தாபெய்யுங்
ஸம்பரிதாபெய்யுங், ஏவமேவ கோ² மே, அக்³கி³வெஸ்ஸன, முக²தோ ச நாஸதோ ச கண்ணதோ ச
அஸ்ஸாஸபஸ்ஸாஸேஸு உபருத்³தே⁴ஸு அதி⁴மத்தோ காயஸ்மிங் டா³ஹோ ஹோதி. ஆரத்³த⁴ங்
கோ² பன மே, அக்³கி³வெஸ்ஸன, வீரியங் ஹோதி அஸல்லீனங் உபட்டி²தா ஸதி
அஸம்முட்டா². ஸாரத்³தோ⁴ ச பன மே காயோ ஹோதி அப்படிப்பஸ்ஸத்³தோ⁴ தேனேவ
து³க்க²ப்பதா⁴னேன பதா⁴னாபி⁴துன்னஸ்ஸ ஸதோ. ஏவரூபாபி கோ² மே, அக்³கி³வெஸ்ஸன,
உப்பன்னா து³க்கா² வேத³னா சித்தங் ந பரியாதா³ய திட்ட²தி. அபிஸ்ஸு மங்,
அக்³கி³வெஸ்ஸன, தே³வதா தி³ஸ்வா ஏவமாஹங்ஸு –
‘காலங்கதோ ஸமணோ கோ³தமோ’தி. ஏகச்சா தே³வதா ஏவமாஹங்ஸு – ‘ந காலங்கதோ ஸமணோ
கோ³தமோ, அபி ச காலங்கரோதீ’தி. ஏகச்சா தே³வதா ஏவமாஹங்ஸு – ‘ந காலங்கதோ ஸமணோ
கோ³தமோ, நபி காலங்கரோதி, அரஹங் ஸமணோ கோ³தமோ, விஹாரொத்வேவ ஸோ [விஹாரொத்வேவேஸோ (ஸீ॰)] அரஹதோ ஏவரூபோ ஹோதீ’தி [விஹாரொத்வேவேஸோ அரஹதோ’’தி (?)].
379. ‘‘தஸ்ஸ
மய்ஹங், அக்³கி³வெஸ்ஸன, ஏதத³ஹோஸி – ‘யங்னூனாஹங் ஸப்³ப³ஸோ ஆஹாருபச்சே²தா³ய
படிபஜ்ஜெய்ய’ந்தி. அத² கோ² மங், அக்³கி³வெஸ்ஸன, தே³வதா உபஸங்கமித்வா
ஏதத³வோசுங் – ‘மா கோ² த்வங், மாரிஸ, ஸப்³ப³ஸோ ஆஹாருபச்சே²தா³ய படிபஜ்ஜி.
ஸசே கோ² த்வங், மாரிஸ, ஸப்³ப³ஸோ ஆஹாருபச்சே²தா³ய படிபஜ்ஜிஸ்ஸஸி, தஸ்ஸ தே
மயங் தி³ப்³ப³ங் ஓஜங் லோமகூபேஹி அஜ்ஜோ²ஹாரெஸ்ஸாம [அஜ்ஜோ²ஹரிஸ்ஸாம (ஸ்யா॰ கங்॰ பீ॰ க॰)], தாய த்வங் யாபெஸ்ஸஸீ’தி. தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘அஹஞ்சேவ கோ² பன ஸப்³ப³ஸோ அஜஜ்ஜிதங் [அஜத்³து⁴கங் (ஸீ॰ பீ॰), ஜத்³து⁴கங் (ஸ்யா॰ கங்॰)] படிஜானெய்யங், இமா ச மே தே³வதா தி³ப்³ப³ங் ஓஜங் லோமகூபேஹி அஜ்ஜோ²ஹாரெய்யுங் [அஜ்ஜோ²ஹரெய்யுங் (ஸ்யா॰ கங்॰ பீ॰ க॰)], தாய சாஹங் யாபெய்யங், தங் மமஸ்ஸ முஸா’தி. ஸோ கோ² அஹங், அக்³கி³வெஸ்ஸன, தா தே³வதா பச்சாசிக்கா²மி, ‘ஹல’ந்தி வதா³மி.
380.
‘‘தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘யங்னூனாஹங் தோ²கங் தோ²கங்
ஆஹாரங் ஆஹாரெய்யங், பஸதங் பஸதங், யதி³ வா முக்³க³யூஸங், யதி³ வா
குலத்த²யூஸங், யதி³ வா களாயயூஸங், யதி³ வா ஹரேணுகயூஸ’ந்தி. ஸோ கோ² அஹங்,
அக்³கி³வெஸ்ஸன, தோ²கங் தோ²கங் ஆஹாரங் ஆஹாரேஸிங், பஸதங் பஸதங், யதி³ வா
முக்³க³யூஸங், யதி³ வா குலத்த²யூஸங், யதி³ வா களாயயூஸங், யதி³ வா
ஹரேணுகயூஸங். தஸ்ஸ மய்ஹங், அக்³கி³வெஸ்ஸன, தோ²கங் தோ²கங் ஆஹாரங் ஆஹாரயதோ,
பஸதங் பஸதங், யதி³ வா முக்³க³யூஸங், யதி³ வா குலத்த²யூஸங், யதி³ வா
களாயயூஸங், யதி³ வா ஹரேணுகயூஸங், அதி⁴மத்தகஸிமானங் பத்தோ காயோ ஹோதி.
ஸெய்யதா²பி நாம ஆஸீதிகபப்³பா³னி வா காளபப்³பா³னி வா, ஏவமேவஸ்ஸு
மே அங்க³பச்சங்கா³னி ப⁴வந்தி தாயேவப்பாஹாரதாய. ஸெய்யதா²பி நாம ஒட்ட²பத³ங்,
ஏவமேவஸ்ஸு மே ஆனிஸத³ங் ஹோதி தாயேவப்பாஹாரதாய. ஸெய்யதா²பி நாம வட்டனாவளீ,
ஏவமேவஸ்ஸு மே பிட்டி²கண்டகோ உண்ணதாவனதோ ஹோதி தாயேவப்பாஹாரதாய. ஸெய்யதா²பி
நாம ஜரஸாலாய கோ³பாணஸியோ ஓலுக்³க³விலுக்³கா³ ப⁴வந்தி, ஏவமேவஸ்ஸு மே
பா²ஸுளியோ ஓலுக்³க³விலுக்³கா³ ப⁴வந்தி தாயேவப்பாஹாரதாய. ஸெய்யதா²பி நாம
க³ம்பீ⁴ரே உத³பானே உத³கதாரகா க³ம்பீ⁴ரக³தா ஒக்கா²யிகா தி³ஸ்ஸந்தி,
ஏவமேவஸ்ஸு மே அக்கி²கூபேஸு அக்கி²தாரகா க³ம்பீ⁴ரக³தா ஒக்கா²யிகா தி³ஸ்ஸந்தி
தாயேவப்பாஹாரதாய. ஸெய்யதா²பி நாம தித்தகாலாபு³ ஆமகச்சி²ன்னோ வாதாதபேன ஸங்பு²டிதோ ஹோதி ஸம்மிலாதோ, ஏவமேவஸ்ஸு மே ஸீஸச்ச²வி ஸங்பு²டிதா ஹோதி ஸம்மிலாதா தாயேவப்பாஹாரதாய.
‘‘ஸோ கோ² அஹங், அக்³கி³வெஸ்ஸன, உத³ரச்ச²விங்
பரிமஸிஸ்ஸாமீதி பிட்டி²கண்டகங்யேவ பரிக்³க³ண்ஹாமி, பிட்டி²கண்டகங்
பரிமஸிஸ்ஸாமீதி உத³ரச்ச²விங்யேவ பரிக்³க³ண்ஹாமி, யாவஸ்ஸு மே,
அக்³கி³வெஸ்ஸன, உத³ரச்ச²வி பிட்டி²கண்டகங் அல்லீனா ஹோதி தாயேவப்பாஹாரதாய.
ஸோ கோ² அஹங், அக்³கி³வெஸ்ஸன, வச்சங் வா முத்தங் வா கரிஸ்ஸாமீதி தத்தே²வ
அவகுஜ்ஜோ பபதாமி தாயேவப்பாஹாரதாய. ஸோ கோ² அஹங், அக்³கி³வெஸ்ஸன, இமமேவ காயங்
அஸ்ஸாஸெந்தோ பாணினா க³த்தானி அனுமஜ்ஜாமி. தஸ்ஸ மய்ஹங், அக்³கி³வெஸ்ஸன,
பாணினா க³த்தானி அனுமஜ்ஜதோ பூதிமூலானி லோமானி காயஸ்மா பபதந்தி
தாயேவப்பாஹாரதாய. அபிஸ்ஸு மங், அக்³கி³வெஸ்ஸன, மனுஸ்ஸா
தி³ஸ்வா ஏவமாஹங்ஸு – ‘காளோ ஸமணோ கோ³தமோ’தி. ஏகச்சே மனுஸ்ஸா ஏவமாஹங்ஸு – ‘ந
காளோ ஸமணோ கோ³தமோ, ஸாமோ ஸமணோ கோ³தமோ’தி. ஏகச்சே மனுஸ்ஸா ஏவமாஹங்ஸு – ‘ந
காளோ ஸமணோ கோ³தமோ , நபி ஸாமோ, மங்கு³ரச்ச²வி ஸமணோ
கோ³தமோ’தி. யாவஸ்ஸு மே, அக்³கி³வெஸ்ஸன, தாவ பரிஸுத்³தோ⁴ ச²விவண்ணோ
பரியோதா³தோ உபஹதோ ஹோதி தாயேவப்பாஹாரதாய.
381.
‘‘தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘யே கோ² கேசி அதீதமத்³தா⁴னங்
ஸமணா வா ப்³ராஹ்மணா வா ஓபக்கமிகா து³க்கா² திப்³பா³ க²ரா கடுகா வேத³னா
வேத³யிங்ஸு, ஏதாவபரமங், நயிதோ பி⁴ய்யோ. யேபி ஹி கேசி அனாக³தமத்³தா⁴னங் ஸமணா
வா ப்³ராஹ்மணா வா ஓபக்கமிகா து³க்கா² திப்³பா³ க²ரா கடுகா வேத³னா
வேத³யிஸ்ஸந்தி, ஏதாவபரமங், நயிதோ பி⁴ய்யோ. யேபி ஹி கேசி ஏதரஹி ஸமணா வா
ப்³ராஹ்மணா வா ஓபக்கமிகா து³க்கா² திப்³பா³ க²ரா கடுகா வேத³னா வேத³யந்தி,
ஏதாவபரமங், நயிதோ பி⁴ய்யோ. ந கோ² பனாஹங் இமாய கடுகாய து³க்கரகாரிகாய
அதி⁴க³ச்சா²மி உத்தரி மனுஸ்ஸத⁴ம்மா அலமரியஞாணத³ஸ்ஸனவிஸேஸங். ஸியா நு கோ²
அஞ்ஞோ மக்³கோ³ போ³தா⁴யா’தி? தஸ்ஸ மய்ஹங், அக்³கி³வெஸ்ஸன, ஏதத³ஹோஸி –
‘அபி⁴ஜானாமி கோ² பனாஹங் பிது ஸக்கஸ்ஸ கம்மந்தே ஸீதாய ஜம்பு³ச்சா²யாய
நிஸின்னோ விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங்
விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரிதா. ஸியா நு கோ² ஏஸோ
மக்³கோ³ போ³தா⁴யா’தி? தஸ்ஸ மய்ஹங், அக்³கி³வெஸ்ஸன, ஸதானுஸாரி விஞ்ஞாணங் அஹோஸி – ‘ஏஸேவ மக்³கோ³ போ³தா⁴யா’தி. தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘கிங் நு கோ² அஹங் தஸ்ஸ ஸுக²ஸ்ஸ பா⁴யாமி, யங் தங் ஸுக²ங் அஞ்ஞத்ரேவ காமேஹி அஞ்ஞத்ர
அகுஸலேஹி த⁴ம்மேஹீ’தி? தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘ந கோ²
அஹங் தஸ்ஸ ஸுக²ஸ்ஸ பா⁴யாமி, யங் தங் ஸுக²ங் அஞ்ஞத்ரேவ காமேஹி அஞ்ஞத்ர
அகுஸலேஹி த⁴ம்மேஹீ’தி.
382.
‘‘தஸ்ஸ மய்ஹங், அக்³கி³வெஸ்ஸன, ஏதத³ஹோஸி – ‘ந கோ² தங் ஸுகரங் ஸுக²ங்
அதி⁴க³ந்துங் ஏவங் அதி⁴மத்தகஸிமானங் பத்தகாயேன, யங்னூனாஹங் ஓளாரிகங் ஆஹாரங்
ஆஹாரெய்யங் ஓத³னகும்மாஸ’ந்தி. ஸோ கோ² அஹங், அக்³கி³வெஸ்ஸன, ஓளாரிகங்
ஆஹாரங் ஆஹாரேஸிங் ஓத³னகும்மாஸங். தேன கோ² பன மங், அக்³கி³வெஸ்ஸன, ஸமயேன
பஞ்ச [பஞ்சவக்³கி³யா (அஞ்ஞஸுத்தேஸு)] பி⁴க்கூ²
பச்சுபட்டி²தா ஹொந்தி – ‘யங் கோ² ஸமணோ கோ³தமோ த⁴ம்மங் அதி⁴க³மிஸ்ஸதி, தங்
நோ ஆரோசெஸ்ஸதீ’தி. யதோ கோ² அஹங், அக்³கி³வெஸ்ஸன, ஓளாரிகங் ஆஹாரங் ஆஹாரேஸிங்
ஓத³னகும்மாஸங், அத² மே தே பஞ்ச பி⁴க்கூ² நிப்³பி³ஜ்ஜ பக்கமிங்ஸு –
‘பா³ஹுல்லிகோ [பா³ஹுலிகோ (ஸீ॰ பீ॰) ஸங்க⁴பே⁴த³ஸிக்கா²பத³டீகாய ஸமேதி] ஸமணோ கோ³தமோ, பதா⁴னவிப்³ப⁴ந்தோ, ஆவத்தோ பா³ஹுல்லாயா’தி.
383. ‘‘ஸோ
கோ² அஹங், அக்³கி³வெஸ்ஸன, ஓளாரிகங் ஆஹாரங் ஆஹாரெத்வா, ப³லங் க³ஹெத்வா,
விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங்
பீதிஸுக²ங் பட²மங் ஜா²னங் உபஸம்பஜ்ஜ விஹாஸிங். ஏவரூபாபி கோ² மே,
அக்³கி³வெஸ்ஸன, உப்பன்னா ஸுகா² வேத³னா சித்தங் ந பரியாதா³ய திட்ட²தி.
விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங்
அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங் உபஸம்பஜ்ஜ
விஹாஸிங். ஏவரூபாபி கோ² மே, அக்³கி³வெஸ்ஸன, உப்பன்னா ஸுகா² வேத³னா சித்தங் ந
பரியாதா³ய திட்ட²தி. பீதியா ச விராகா³ உபெக்க²கோ ச விஹாஸிங், ஸதோ ச
ஸம்பஜானோ. ஸுக²ஞ்ச காயேன படிஸங்வேதே³ஸிங் யங் தங் அரியா ஆசிக்க²ந்தி –
‘உபெக்க²கோ ஸதிமா ஸுக²விஹாரீ’தி ததியங் ஜா²னங்
உபஸம்பஜ்ஜ விஹாஸிங். ஏவரூபாபி கோ² மே, அக்³கி³வெஸ்ஸன, உப்பன்னா ஸுகா²
வேத³னா சித்தங் ந பரியாதா³ய திட்ட²தி. ஸுக²ஸ்ஸ ச பஹானா து³க்க²ஸ்ஸ ச பஹானா,
புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா, அது³க்க²மஸுக²ங்
உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹாஸிங். ஏவரூபாபி
கோ² மே, அக்³கி³வெஸ்ஸன, உப்பன்னா ஸுகா² வேத³னா சித்தங் ந பரியாதா³ய
திட்ட²தி.
384.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
புப்³பே³னிவாஸானுஸ்ஸதிஞாணாய சித்தங் அபி⁴னின்னாமேஸிங். ஸோ அனேகவிஹிதங் புப்³பே³னிவாஸங் அனுஸ்ஸராமி ,
ஸெய்யதி²த³ங் – ஏகம்பி ஜாதிங்…பே॰… இதி ஸாகாரங் ஸஉத்³தே³ஸங் அனேகவிஹிதங்
புப்³பே³னிவாஸங் அனுஸ்ஸராமி. அயங் கோ² மே, அக்³கி³வெஸ்ஸன, ரத்தியா பட²மே
யாமே பட²மா விஜ்ஜா அதி⁴க³தா; அவிஜ்ஜா விஹதா, விஜ்ஜா உப்பன்னா; தமோ விஹதோ,
ஆலோகோ உப்பன்னோ; யதா² தங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ. ஏவரூபாபி
கோ² மே, அக்³கி³வெஸ்ஸன, உப்பன்னா ஸுகா² வேத³னா சித்தங் ந பரியாதா³ய
திட்ட²தி.
385.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஸத்தானங்
சுதூபபாதஞாணாய சித்தங் அபி⁴னின்னாமேஸிங். ஸோ தி³ப்³பே³ன சக்கு²னா
விஸுத்³தே⁴ன அதிக்கந்தமானுஸகேன ஸத்தே பஸ்ஸாமி சவமானே உபபஜ்ஜமானே ஹீனே பணீதே
ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானாமி…பே॰…
அயங் கோ² மே, அக்³கி³வெஸ்ஸன, ரத்தியா மஜ்ஜி²மே யாமே து³தியா விஜ்ஜா
அதி⁴க³தா; அவிஜ்ஜா விஹதா, விஜ்ஜா உப்பன்னா; தமோ விஹதோ, ஆலோகோ உப்பன்னோ; யதா² தங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ . ஏவரூபாபி கோ² மே, அக்³கி³வெஸ்ஸன , உப்பன்னா ஸுகா² வேத³னா சித்தங் ந பரியாதா³ய திட்ட²தி.
386.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானங் க²யஞாணாய
சித்தங் அபி⁴னின்னாமேஸிங். ஸோ ‘இத³ங் து³க்க²’ந்தி யதா²பூ⁴தங்
அப்³ப⁴ஞ்ஞாஸிங், ‘அயங் து³க்க²ஸமுத³யோ’தி யதா²பூ⁴தங் அப்³ப⁴ஞ்ஞாஸிங், ‘அயங்
து³க்க²னிரோதோ⁴’தி யதா²பூ⁴தங் அப்³ப⁴ஞ்ஞாஸிங், ‘அயங் து³க்க²னிரோத⁴கா³மினீ
படிபதா³’தி யதா²பூ⁴தங் அப்³ப⁴ஞ்ஞாஸிங். ‘இமே ஆஸவா’தி யதா²பூ⁴தங்
அப்³ப⁴ஞ்ஞாஸிங், ‘அயங் ஆஸவஸமுத³யோ’தி யதா²பூ⁴தங் அப்³ப⁴ஞ்ஞாஸிங், ‘அயங்
ஆஸவனிரோதோ⁴’தி யதா²பூ⁴தங் அப்³ப⁴ஞ்ஞாஸிங், ‘அயங் ஆஸவனிரோத⁴கா³மினீ
படிபதா³’தி யதா²பூ⁴தங் அப்³ப⁴ஞ்ஞாஸிங். தஸ்ஸ மே ஏவங் ஜானதோ ஏவங் பஸ்ஸதோ
காமாஸவாபி சித்தங் விமுச்சித்த², ப⁴வாஸவாபி சித்தங் விமுச்சித்த²,
அவிஜ்ஜாஸவாபி சித்தங் விமுச்சித்த². விமுத்தஸ்மிங் விமுத்தமிதி ஞாணங்
அஹோஸி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங்
இத்த²த்தாயா’தி அப்³ப⁴ஞ்ஞாஸிங். அயங் கோ² மே, அக்³கி³வெஸ்ஸன, ரத்தியா
பச்சி²மே யாமே ததியா விஜ்ஜா அதி⁴க³தா; அவிஜ்ஜா விஹதா, விஜ்ஜா உப்பன்னா; தமோ
விஹதோ, ஆலோகோ உப்பன்னோ; யதா² தங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ. ஏவரூபாபி கோ² மே, அக்³கி³வெஸ்ஸன, உப்பன்னா ஸுகா² வேத³னா சித்தங் ந பரியாதா³ய திட்ட²தி.
387.
‘‘அபி⁴ஜானாமி கோ² பனாஹங், அக்³கி³வெஸ்ஸன, அனேகஸதாய பரிஸாய த⁴ம்மங்
தே³ஸேதா. அபிஸ்ஸு மங் ஏகமேகோ ஏவங் மஞ்ஞதி – ‘மமேவாரப்³ப⁴ ஸமணோ கோ³தமோ
த⁴ம்மங் தே³ஸேதீ’தி. ‘ந கோ² பனேதங், அக்³கி³வெஸ்ஸன, ஏவங் த³ட்ட²ப்³ப³ங்;
யாவதே³வ விஞ்ஞாபனத்தா²ய ததா²க³தோ பரேஸங் த⁴ம்மங்
தே³ஸேதி. ஸோ கோ² அஹங், அக்³கி³வெஸ்ஸன, தஸ்ஸாயேவ கதா²ய பரியோஸானே,
தஸ்மிங்யேவ புரிமஸ்மிங் ஸமாதி⁴னிமித்தே அஜ்ஜ²த்தமேவ சித்தங் ஸண்ட²பேமி
ஸன்னிஸாதே³மி ஏகோதி³ங் கரோமி ஸமாத³ஹாமி, யேன ஸுத³ங் நிச்சகப்பங்
விஹராமீ’’’தி.
‘‘ஓகப்பனியமேதங் போ⁴தோ கோ³தமஸ்ஸ யதா² தங் அரஹதோ
ஸம்மாஸம்பு³த்³த⁴ஸ்ஸ. அபி⁴ஜானாதி கோ² பன ப⁴வங் கோ³தமோ தி³வா ஸுபிதா’’தி?
‘‘அபி⁴ஜானாமஹங், அக்³கி³வெஸ்ஸன, கி³ம்ஹானங் பச்சி²மே மாஸே பச்சா²ப⁴த்தங்
பிண்ட³பாதபடிக்கந்தோ சதுக்³கு³ணங் ஸங்கா⁴டிங் பஞ்ஞபெத்வா த³க்கி²ணேன பஸ்ஸேன
ஸதோ ஸம்பஜானோ நித்³த³ங் ஓக்கமிதா’’தி. ‘‘ஏதங் கோ², போ⁴ கோ³தம, ஏகே
ஸமணப்³ராஹ்மணா ஸம்மோஹவிஹாரஸ்மிங் வத³ந்தீ’’தி ?
‘‘ந கோ², அக்³கி³வெஸ்ஸன, எத்தாவதா ஸம்மூள்ஹோ வா ஹோதி அஸம்மூள்ஹோ வா. அபி
ச, அக்³கி³வெஸ்ஸன, யதா² ஸம்மூள்ஹோ ச ஹோதி அஸம்மூள்ஹோ ச, தங் ஸுணாஹி,
ஸாது⁴கங் மனஸி கரோஹி, பா⁴ஸிஸ்ஸாமீ’’தி. ‘‘ஏவங், போ⁴’’தி கோ² ஸச்சகோ
நிக³ண்ட²புத்தோ ப⁴க³வதோ பச்சஸ்ஸோஸி. ப⁴க³வா ஏதத³வோச –
388.
‘‘யஸ்ஸ கஸ்ஸசி, அக்³கி³வெஸ்ஸன, யே ஆஸவா ஸங்கிலேஸிகா போனொப்³ப⁴விகா ஸத³ரா
து³க்க²விபாகா ஆயதிங் ஜாதிஜராமரணியா அப்பஹீனா, தமஹங் ‘ஸம்மூள்ஹோ’தி வதா³மி.
ஆஸவானஞ்ஹி, அக்³கி³வெஸ்ஸன, அப்பஹானா ஸம்மூள்ஹோ ஹோதி. யஸ்ஸ கஸ்ஸசி,
அக்³கி³வெஸ்ஸன, யே ஆஸவா ஸங்கிலேஸிகா போனொப்³ப⁴விகா ஸத³ரா து³க்க²விபாகா
ஆயதிங் ஜாதிஜராமரணியா பஹீனா, தமஹங் ‘அஸம்மூள்ஹோ’தி வதா³மி. ஆஸவானஞ்ஹி,
அக்³கி³வெஸ்ஸன, பஹானா அஸம்மூள்ஹோ ஹோதி.
‘‘ததா²க³தஸ்ஸ கோ²,
அக்³கி³வெஸ்ஸன, யே ஆஸவா ஸங்கிலேஸிகா போனொப்³ப⁴விகா ஸத³ரா து³க்க²விபாகா
ஆயதிங் ஜாதிஜராமரணியா பஹீனா உச்சி²ன்னமூலா தாலாவத்து²கதா அனபா⁴வங்கதா
ஆயதிங் அனுப்பாத³த⁴ம்மா . ஸெய்யதா²பி,
அக்³கி³வெஸ்ஸன, தாலோ மத்த²கச்சி²ன்னோ அப⁴ப்³போ³ புன விரூள்ஹியா, ஏவமேவ கோ²,
அக்³கி³வெஸ்ஸன, ததா²க³தஸ்ஸ யே ஆஸவா ஸங்கிலேஸிகா போனொப்³ப⁴விகா ஸத³ரா
து³க்க²விபாகா ஆயதிங் ஜாதிஜராமரணியா பஹீனா உச்சி²ன்னமூலா தாலாவத்து²கதா
அனபா⁴வங்கதா ஆயதிங் அனுப்பாத³த⁴ம்மா’’தி.
389.
ஏவங் வுத்தே, ஸச்சகோ நிக³ண்ட²புத்தோ ப⁴க³வந்தங் ஏதத³வோச – ‘‘அச்ச²ரியங்,
போ⁴ கோ³தம, அப்³பு⁴தங், போ⁴ கோ³தம! யாவஞ்சித³ங் போ⁴தோ கோ³தமஸ்ஸ ஏவங் ஆஸஜ்ஜ
ஆஸஜ்ஜ வுச்சமானஸ்ஸ, உபனீதேஹி வசனப்பதே²ஹி ஸமுதா³சரியமானஸ்ஸ, ச²விவண்ணோ சேவ
பரியோதா³யதி, முக²வண்ணோ ச விப்பஸீத³தி, யதா² தங் அரஹதோ
ஸம்மாஸம்பு³த்³த⁴ஸ்ஸ. அபி⁴ஜானாமஹங், போ⁴ கோ³தம, பூரணங் கஸ்ஸபங் வாதே³ன
வாத³ங் ஸமாரபி⁴தா. ஸோபி மயா வாதே³ன வாத³ங் ஸமாரத்³தோ⁴ அஞ்ஞேனஞ்ஞங் படிசரி,
ப³ஹித்³தா⁴ கத²ங் அபனாமேஸி, கோபஞ்ச தோ³ஸஞ்ச அப்பச்சயஞ்ச பாத்வாகாஸி. போ⁴தோ
பன [போ⁴தோ கோ² பன (ஸீ॰)] கோ³தமஸ்ஸ ஏவங் ஆஸஜ்ஜ
ஆஸஜ்ஜ வுச்சமானஸ்ஸ, உபனீதேஹி வசனப்பதே²ஹி ஸமுதா³சரியமானஸ்ஸ, ச²விவண்ணோ சேவ
பரியோதா³யதி, முக²வண்ணோ ச விப்பஸீத³தி, யதா² தங் அரஹதோ
ஸம்மாஸம்பு³த்³த⁴ஸ்ஸ. அபி⁴ஜானாமஹங், போ⁴ கோ³தம, மக்க²லிங் கோ³ஸாலங்…பே॰…
அஜிதங் கேஸகம்ப³லங்… பகுத⁴ங் கச்சாயனங்… ஸஞ்ஜயங் பே³லட்ட²புத்தங்…
நிக³ண்ட²ங் நாடபுத்தங் வாதே³ன வாத³ங் ஸமாரபி⁴தா . ஸோபி மயா வாதே³ன வாத³ங் ஸமாரத்³தோ⁴ அஞ்ஞேனஞ்ஞங்
படிசரி, ப³ஹித்³தா⁴ கத²ங் அபனாமேஸி, கோபஞ்ச தோ³ஸஞ்ச அப்பச்சயஞ்ச
பாத்வாகாஸி. போ⁴தோ பன கோ³தமஸ்ஸ ஏவங் ஆஸஜ்ஜ ஆஸஜ்ஜ வுச்சமானஸ்ஸ, உபனீதேஹி
வசனப்பதே²ஹி ஸமுதா³சரியமானஸ்ஸ, ச²விவண்ணோ சேவ பரியோதா³யதி, முக²வண்ணோ ச
விப்பஸீத³தி, யதா² தங் அரஹதோ ஸம்மாஸம்பு³த்³த⁴ஸ்ஸ. ஹந்த³ ச தா³னி மயங், போ⁴
கோ³தம, க³ச்சா²ம. ப³ஹுகிச்சா மயங், ப³ஹுகரணீயா’’தி. ‘‘யஸ்ஸதா³னி த்வங்,
அக்³கி³வெஸ்ஸன, காலங் மஞ்ஞஸீ’’தி.
அத² கோ² ஸச்சகோ நிக³ண்ட²புத்தோ ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா பக்காமீதி.
மஹாஸச்சகஸுத்தங் நிட்டி²தங் ச²ட்ட²ங்.
7. சூளதண்ஹாஸங்க²யஸுத்தங்
390. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி புப்³பா³ராமே
மிகா³ரமாதுபாஸாதே³. அத² கோ² ஸக்கோ தே³வானமிந்தோ³ யேன ப⁴க³வா தேனுபஸங்கமி;
உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தோ
கோ² ஸக்கோ தே³வானமிந்தோ³ ப⁴க³வந்தங் ஏதத³வோச – ‘‘கித்தாவதா நு கோ², ப⁴ந்தே,
பி⁴க்கு² ஸங்கி²த்தேன தண்ஹாஸங்க²யவிமுத்தோ ஹோதி அச்சந்தனிட்டோ²
அச்சந்தயோக³க்கே²மீ அச்சந்தப்³ரஹ்மசாரீ அச்சந்தபரியோஸானோ ஸெட்டோ²
தே³வமனுஸ்ஸான’’ந்தி?
‘‘இத⁴, தே³வானமிந்த³, பி⁴க்கு²னோ ஸுதங் ஹோதி –
‘ஸப்³பே³ த⁴ம்மா நாலங் அபி⁴னிவேஸாயா’தி. ஏவஞ்சேதங், தே³வானமிந்த³,
பி⁴க்கு²னோ ஸுதங் ஹோதி – ‘ஸப்³பே³ த⁴ம்மா நாலங் அபி⁴னிவேஸாயா’தி. ஸோ
ஸப்³ப³ங் த⁴ம்மங் அபி⁴ஜானாதி; ஸப்³ப³ங் த⁴ம்மங் அபி⁴ஞ்ஞாய ஸப்³ப³ங் த⁴ம்மங்
பரிஜானாதி; ஸப்³ப³ங் த⁴ம்மங் பரிஞ்ஞாய யங் கிஞ்சி வேத³னங் வேதே³தி –
ஸுக²ங் வா து³க்க²ங் வா அது³க்க²மஸுக²ங் வா, ஸோ தாஸு வேத³னாஸு
அனிச்சானுபஸ்ஸீ விஹரதி, விராகா³னுபஸ்ஸீ விஹரதி, நிரோதா⁴னுபஸ்ஸீ விஹரதி,
படினிஸ்ஸக்³கா³னுபஸ்ஸீ விஹரதி. ஸோ தாஸு வேத³னாஸு அனிச்சானுபஸ்ஸீ விஹரந்தோ,
விராகா³னுபஸ்ஸீ விஹரந்தோ, நிரோதா⁴னுபஸ்ஸீ விஹரந்தோ, படினிஸ்ஸக்³கா³னுபஸ்ஸீ
விஹரந்தோ ந கிஞ்சி லோகே உபாதி³யதி. அனுபாதி³யங் ந பரிதஸ்ஸதி, அபரிதஸ்ஸங்
பச்சத்தஞ்ஞேவ பரினிப்³பா³யதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி
பஜானாதி. எத்தாவதா கோ², தே³வானமிந்த³, பி⁴க்கு² ஸங்கி²த்தேன
தண்ஹாஸங்க²யவிமுத்தோ ஹோதி அச்சந்தனிட்டோ² அச்சந்தயோக³க்கே²மீ
அச்சந்தப்³ரஹ்மசாரீ அச்சந்தபரியோஸானோ ஸெட்டோ² தே³வமனுஸ்ஸான’’ந்தி.
அத² கோ² ஸக்கோ தே³வானமிந்தோ³ ப⁴க³வதோ பா⁴ஸிதங்
அபி⁴னந்தி³த்வா அனுமோதி³த்வா ப⁴க³வந்தங் அபி⁴வாதெ³த்வா பத³க்கி²ணங் கத்வா
தத்தே²வந்தரதா⁴யி.
391.
தேன கோ² பன ஸமயேன ஆயஸ்மா மஹாமொக்³க³ல்லானோ ப⁴க³வதோ அவிதூ³ரே நிஸின்னோ
ஹோதி. அத² கோ² ஆயஸ்மதோ மஹாமொக்³க³ல்லானஸ்ஸ ஏதத³ஹோஸி – ‘‘கிங் நு கோ² ஸோ
யக்கோ² ப⁴க³வதோ பா⁴ஸிதங் அபி⁴ஸமேச்ச அனுமோதி³ உதா³ஹு நோ; யங்னூனாஹங் தங் யக்க²ங் ஜானெய்யங் – யதி³ வா ஸோ யக்கோ² ப⁴க³வதோ பா⁴ஸிதங் அபி⁴ஸமேச்ச
அனுமோதி³ யதி³ வா நோ’’தி? அத² கோ² ஆயஸ்மா மஹாமொக்³க³ல்லானோ – ஸெய்யதா²பி
நாம ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங்
ஸமிஞ்ஜெய்ய, ஏவமேவ – புப்³பா³ராமே மிகா³ரமாதுபாஸாதே³ அந்தரஹிதோ தே³வேஸு
தாவதிங்ஸேஸு பாதுரஹோஸி. தேன கோ² பன ஸமயேன ஸக்கோ தே³வானமிந்தோ³ ஏகபுண்ட³ரீகே
உய்யானே தி³ப்³பே³ஹி பஞ்சஹி தூரியஸதேஹி [துரியஸதேஹி (ஸீ॰ ஸ்யா॰ கங்॰ பீ॰)]
ஸமப்பிதோ ஸமங்கீ³பூ⁴தோ பரிசாரேதி. அத்³த³ஸா கோ² ஸக்கோ தே³வானமிந்தோ³
ஆயஸ்மந்தங் மஹாமொக்³க³ல்லானங் தூ³ரதோவ ஆக³ச்ச²ந்தங். தி³ஸ்வான தானி
தி³ப்³பா³னி பஞ்ச தூரியஸதானி படிப்பணாமெத்வா யேனாயஸ்மா மஹாமொக்³க³ல்லானோ
தேனுபஸங்கமி; உபஸங்கமித்வா ஆயஸ்மந்தங் மஹாமொக்³க³ல்லானங்
ஏதத³வோச – ‘‘ஏஹி கோ², மாரிஸ மொக்³க³ல்லான, ஸ்வாக³தங், மாரிஸ மொக்³க³ல்லான!
சிரஸ்ஸங் கோ², மாரிஸ மொக்³க³ல்லான, இமங் பரியாயங் அகாஸி யதி³த³ங்
இதா⁴க³மனாய. நிஸீத³, மாரிஸ மொக்³க³ல்லான, இத³மாஸனங் பஞ்ஞத்த’’ந்தி. நிஸீதி³
கோ² ஆயஸ்மா மஹாமொக்³க³ல்லானோ பஞ்ஞத்தே ஆஸனே. ஸக்கோபி கோ² தே³வானமிந்தோ³
அஞ்ஞதரங் நீசங் ஆஸனங் க³ஹெத்வா ஏகமந்தங் நிஸீதி³. ஏகமந்தங் நிஸின்னங் கோ²
ஸக்கங் தே³வானமிந்த³ங் ஆயஸ்மா மஹாமொக்³க³ல்லானோ ஏதத³வோச – ‘‘யதா² கத²ங் பன
கோ², கோஸிய, ப⁴க³வா ஸங்கி²த்தேன தண்ஹாஸங்க²யவிமுத்திங் அபா⁴ஸி? ஸாது⁴
மயம்பி ஏதிஸ்ஸா கதா²ய பா⁴கி³னோ அஸ்ஸாம ஸவனாயா’’தி.
392.
‘‘மயங் கோ², மாரிஸ மொக்³க³ல்லான, ப³ஹுகிச்சா ப³ஹுகரணீயா – அப்பேவ ஸகேன
கரணீயேன, அபி ச தே³வானங்யேவ தாவதிங்ஸானங் கரணீயேன. அபி ச, மாரிஸ
மொக்³க³ல்லான, ஸுஸ்ஸுதங்யேவ ஹோதி ஸுக்³க³ஹிதங் ஸுமனஸிகதங் ஸூபதா⁴ரிதங், யங் நோ கி²ப்பமேவ அந்தரதா⁴யதி. பூ⁴தபுப்³ப³ங், மாரிஸ மொக்³க³ல்லான, தே³வாஸுரஸங்கா³மோ ஸமுபப்³யூள்ஹோ [ஸமூபப்³யுள்ஹோ (ஸ்யா॰ கங்॰), ஸமூபப்³பூ³ள்ஹோ (ஸீ॰)]
அஹோஸி. தஸ்மிங் கோ² பன, மாரிஸ மொக்³க³ல்லான, ஸங்கா³மே தே³வா ஜினிங்ஸு,
அஸுரா பராஜினிங்ஸு. ஸோ கோ² அஹங், மாரிஸ மொக்³க³ல்லான, தங் ஸங்கா³மங்
அபி⁴விஜினித்வா விஜிதஸங்கா³மோ ததோ படினிவத்தித்வா வேஜயந்தங் நாம பாஸாத³ங்
மாபேஸிங். வேஜயந்தஸ்ஸ கோ², மாரிஸ மொக்³க³ல்லான, பாஸாத³ஸ்ஸ ஏகஸதங்
நிய்யூஹங். ஏகேகஸ்மிங் நிய்யூஹே ஸத்த ஸத்த கூடாகா³ரஸதானி. ஏகமேகஸ்மிங்
கூடாகா³ரே ஸத்த ஸத்த அச்ச²ராயோ . ஏகமேகிஸ்ஸா அச்ச²ராய ஸத்த ஸத்த பரிசாரிகாயோ. இச்செ²ய்யாஸி நோ த்வங் , மாரிஸ மொக்³க³ல்லான, வேஜயந்தஸ்ஸ பாஸாத³ஸ்ஸ ராமணெய்யகங் த³ட்டு²’’ந்தி? அதி⁴வாஸேஸி கோ² ஆயஸ்மா மஹாமொக்³க³ல்லானோ துண்ஹீபா⁴வேன.
393. அத²
கோ² ஸக்கோ ச தே³வானமிந்தோ³ வெஸ்ஸவணோ ச மஹாராஜா ஆயஸ்மந்தங்
மஹாமொக்³க³ல்லானங் புரக்க²த்வா யேன வேஜயந்தோ பாஸாதோ³ தேனுபஸங்கமிங்ஸு.
அத்³த³ஸங்ஸு கோ² ஸக்கஸ்ஸ தே³வானமிந்த³ஸ்ஸ பரிசாரிகாயோ ஆயஸ்மந்தங்
மஹாமொக்³க³ல்லானங் தூ³ரதோவ ஆக³ச்ச²ந்தங்; தி³ஸ்வா ஒத்தப்பமானா ஹிரீயமானா
ஸகங் ஸகங் ஓவரகங் பவிஸிங்ஸு. ஸெய்யதா²பி நாம ஸுணிஸா ஸஸுரங் தி³ஸ்வா
ஒத்தப்பதி ஹிரீயதி, ஏவமேவ ஸக்கஸ்ஸ தே³வானமிந்த³ஸ்ஸ பரிசாரிகாயோ ஆயஸ்மந்தங்
மஹாமொக்³க³ல்லானங் தி³ஸ்வா ஒத்தப்பமானா ஹிரீயமானா ஸகங் ஸகங் ஓவரகங்
பவிஸிங்ஸு. அத² கோ² ஸக்கோ ச தே³வானமிந்தோ³ வெஸ்ஸவணோ ச மஹாராஜா ஆயஸ்மந்தங்
மஹாமொக்³க³ல்லானங் வேஜயந்தே பாஸாதே³ அனுசங்கமாபெந்தி அனுவிசராபெந்தி –
‘‘இத³ம்பி, மாரிஸ மொக்³க³ல்லான, பஸ்ஸ வேஜயந்தஸ்ஸ பாஸாத³ஸ்ஸ ராமணெய்யகங்;
இத³ம்பி, மாரிஸ மொக்³க³ல்லான, பஸ்ஸ வேஜயந்தஸ்ஸ பாஸாத³ஸ்ஸ ராமணெய்யக’’ந்தி.
‘‘ஸோப⁴தி இத³ங் ஆயஸ்மதோ கோஸியஸ்ஸ, யதா² தங் புப்³பே³ கதபுஞ்ஞஸ்ஸ. மனுஸ்ஸாபி
கிஞ்சிதே³வ ராமணெய்யகங் தி³ஸ்வா [தி³ட்டா² (ஸீ॰ பீ॰ க॰)]
ஏவமாஹங்ஸு – ‘ஸோப⁴தி வத போ⁴ யதா² தே³வானங் தாவதிங்ஸான’ந்தி. தயித³ங்
ஆயஸ்மதோ கோஸியஸ்ஸ ஸோப⁴தி, யதா² தங் புப்³பே³ கதபுஞ்ஞஸ்ஸா’’தி. அத² கோ²
ஆயஸ்மதோ மஹாமொக்³க³ல்லானஸ்ஸ ஏதத³ஹோஸி –
‘‘அதிபா³ள்ஹங் கோ² அயங் யக்கோ² பமத்தோ விஹரதி. யங்னூனாஹங் இமங் யக்க²ங்
ஸங்வேஜெய்ய’’ந்தி. அத² கோ² ஆயஸ்மா மஹாமொக்³க³ல்லானோ ததா²ரூபங்
இத்³தா⁴பி⁴ஸங்கா²ரங் அபி⁴ஸங்கா²ஸி [அபி⁴ஸங்கா²ரேஸி (க॰), அபி⁴ஸங்கா²ரேதி (ஸ்யா॰ கங்॰)] யதா² வேஜயந்தங் பாஸாத³ங் பாத³ங்கு³ட்ட²கேன ஸங்கம்பேஸி ஸம்பகம்பேஸி ஸம்பவேதே⁴ஸி .
அத² கோ² ஸக்கோ ச தே³வானமிந்தோ³, வெஸ்ஸவணோ ச மஹாராஜா, தே³வா ச தாவதிங்ஸா
அச்ச²ரியப்³பு⁴தசித்தஜாதா அஹேஸுங் – ‘‘அச்ச²ரியங் வத, போ⁴, அப்³பு⁴தங் வத,
போ⁴, ஸமணஸ்ஸ மஹித்³தி⁴கதா மஹானுபா⁴வதா, யத்ர ஹி நாம தி³ப்³ப³ப⁴வனங்
பாத³ங்கு³ட்ட²கேன ஸங்கம்பெஸ்ஸதி ஸம்பகம்பெஸ்ஸதி ஸம்பவேதெ⁴ஸ்ஸதீ’’தி! அத²
கோ² ஆயஸ்மா மஹாமொக்³க³ல்லானோ ஸக்கங் தே³வானமிந்த³ங் ஸங்விக்³க³ங்
லோமஹட்ட²ஜாதங் விதி³த்வா ஸக்கங் தே³வானமிந்த³ங் ஏதத³வோச – ‘‘யதா² கத²ங் பன
கோ², கோஸிய, ப⁴க³வா ஸங்கி²த்தேன தண்ஹாஸங்க²யவிமுத்திங் அபா⁴ஸி? ஸாது⁴
மயம்பி ஏதிஸ்ஸா கதா²ய பா⁴கி³னோ அஸ்ஸாம ஸவனாயா’’தி.
394. ‘‘இதா⁴ஹங் ,
மாரிஸ மொக்³க³ல்லான, யேன ப⁴க³வா தேனுபஸங்கமிங்; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் அட்டா²ஸிங். ஏகமந்தங் டி²தோ கோ² அஹங், மாரிஸ
மொக்³க³ல்லான, ப⁴க³வந்தங் ஏதத³வோசங் – ‘கித்தாவதா நு கோ², ப⁴ந்தே, பி⁴க்கு²
ஸங்கி²த்தேன தண்ஹாஸங்க²யவிமுத்தோ ஹோதி அச்சந்தனிட்டோ² அச்சந்தயோக³க்கே²மீ
அச்சந்தப்³ரஹ்மசாரீ அச்சந்தபரியோஸானோ ஸெட்டோ² தே³வமனுஸ்ஸான’’’ந்தி?
‘‘ஏவங் வுத்தே, மாரிஸ மொக்³க³ல்லான, ப⁴க³வா மங் ஏதத³வோச – ‘இத⁴, தே³வானமிந்த³, பி⁴க்கு²னோ ஸுதங் ஹோதி – ஸப்³பே³ த⁴ம்மா நாலங்
அபி⁴னிவேஸாயா’தி. ஏவங் சேதங் தே³வானமிந்த³ பி⁴க்கு²னோ ஸுதங் ஹோதி ‘ஸப்³பே³
த⁴ம்மா நாலங் அபி⁴னிவேஸாயா’தி. ஸோ ஸப்³ப³ங் த⁴ம்மங் அபி⁴ஜானாதி, ஸப்³ப³ங்
த⁴ம்மங் அபி⁴ஞ்ஞாய ஸப்³ப³ங் த⁴ம்மங் பரிஜானாதி, ஸப்³ப³ங் த⁴ம்மங் பரிஞ்ஞாய
யங் கிஞ்சி வேத³னங் வேதே³தி ஸுக²ங் வா து³க்க²ங் வா அது³க்க²மஸுக²ங் வா. ஸோ
தாஸு வேத³னாஸு அனிச்சானுபஸ்ஸீ விஹரதி, விராகா³னுபஸ்ஸீ விஹரதி,
நிரோதா⁴னுபஸ்ஸீ விஹரதி, படினிஸ்ஸக்³கா³னுபஸ்ஸீ விஹரதி. ஸோ தாஸு வேத³னாஸு
அனிச்சானுபஸ்ஸீ விஹரந்தோ, விராகா³னுபஸ்ஸீ விஹரந்தோ, நிரோதா⁴னுபஸ்ஸீ
விஹரந்தோ, படினிஸ்ஸக்³கா³னுபஸ்ஸீ விஹரந்தோ ந கிஞ்சி லோகே உபாதி³யதி,
அனுபாதி³யங் ந பரிதஸ்ஸதி, அபரிதஸ்ஸங் பச்சத்தஞ்ஞேவ பரினிப்³பா³யதி – ‘கீ²ணா
ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி
பஜானாதி. எத்தாவதா கோ², தே³வானமிந்த³, பி⁴க்கு² ஸங்கி²த்தேன
தண்ஹாஸங்க²யவிமுத்தோ ஹோதி அச்சந்தனிட்டோ² அச்சந்தயோக³க்கே²மீ
அச்சந்தப்³ரஹ்மசாரீ அச்சந்தபரியோஸானோ ஸெட்டோ² தே³வமனுஸ்ஸானந்தி. ஏவங் கோ²
மே, மாரிஸ மொக்³க³ல்லான, ப⁴க³வா ஸங்கி²த்தேன தண்ஹாஸங்க²யவிமுத்திங்
அபா⁴ஸீ’’தி.
அத² கோ² ஆயஸ்மா மஹாமொக்³க³ல்லானோ ஸக்கஸ்ஸ தே³வானமிந்த³ஸ்ஸ பா⁴ஸிதங்
அபி⁴னந்தி³த்வா அனுமோதி³த்வா – ஸெய்யதா²பி நாம ப³லவா புரிஸோ ஸமிஞ்ஜிதங் வா
பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய ஏவமேவ – தே³வேஸு
தாவதிங்ஸேஸு அந்தரஹிதோ புப்³பா³ராமே மிகா³ரமாதுபாஸாதே³ பாதுரஹோஸி. அத² கோ²
ஸக்கஸ்ஸ தே³வானமிந்த³ஸ்ஸ பரிசாரிகாயோ அசிரபக்கந்தே ஆயஸ்மந்தே
மஹாமொக்³க³ல்லானே ஸக்கங் தே³வானமிந்த³ங் ஏதத³வோசுங்
– ‘‘ஏஸோ நு தே, மாரிஸ, ஸோ ப⁴க³வா ஸத்தா²’’தி? ‘‘ந கோ² மே, மாரிஸ, ஸோ
ப⁴க³வா ஸத்தா². ஸப்³ரஹ்மசாரீ மே ஏஸோ ஆயஸ்மா மஹாமொக்³க³ல்லானோ’’தி. ‘‘லாபா⁴
தே, மாரிஸ, (ஸுலத்³த⁴ங் தே, மாரிஸ) [( ) நத்தி² (ஸீ॰ பீ॰)] யஸ்ஸ தே ஸப்³ரஹ்மசாரீ ஏவங்மஹித்³தி⁴கோ ஏவங்மஹானுபா⁴வோ! அஹோ நூன தே ஸோ ப⁴க³வா ஸத்தா²’’தி.
395. அத²
கோ² ஆயஸ்மா மஹாமொக்³க³ல்லானோ யேன ப⁴க³வா தேனுபஸங்கமி; உபஸங்கமித்வா
ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா
மஹாமொக்³க³ல்லானோ ப⁴க³வந்தங் ஏதத³வோச – ‘‘அபி⁴ஜானாதி நோ, ப⁴ந்தே, ப⁴க³வா
அஹு [அஹுனஞ்ஞேவ (ஸீ॰ ஸ்யா॰ கங்॰)] ஞாதஞ்ஞதரஸ்ஸ மஹேஸக்க²ஸ்ஸ யக்க²ஸ்ஸ ஸங்கி²த்தேன தண்ஹாஸங்க²யவிமுத்திங் பா⁴ஸிதா’’தி [அபா⁴ஸித்தா²தி (க॰)]?
‘‘அபி⁴ஜானாமஹங், மொக்³க³ல்லான, இத⁴ ஸக்கோ தே³வானமிந்தோ³ யேனாஹங்
தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் அட்டா²ஸி. ஏகமந்தங்
டி²தோ கோ², மொக்³க³ல்லான, ஸக்கோ தே³வானமிந்தோ³ மங் ஏதத³வோச – ‘கித்தாவதா நு
கோ², ப⁴ந்தே , பி⁴க்கு² ஸங்கி²த்தேன
தண்ஹாஸங்க²யவிமுத்தோ ஹோதி அச்சந்தனிட்டோ² அச்சந்தயோக³க்கே²மீ
அச்சந்தப்³ரஹ்மசாரீ அச்சந்தபரியோஸானோ ஸெட்டோ² தே³வமனுஸ்ஸான’’ந்தி.
ஏவங் வுத்தே அஹங், மொக்³க³ல்லான, ஸக்கங்
தே³வானமிந்த³ங் ஏதத³வோசங் ‘‘இத⁴ தே³வானமிந்த³ பி⁴க்கு²னோ ஸுதங் ஹோதி
‘ஸப்³பே³ த⁴ம்மா நாலங் அபி⁴னிவேஸாயா’தி. ஏவங் சேதங் தே³வானமிந்த³
பி⁴க்கு²னோ ஸுதங் ஹோதி ‘ஸப்³பே³ த⁴ம்மா நாலங் அபி⁴னிவேஸாயா’தி. ஸோ ஸப்³ப³ங்
த⁴ம்மங் அபி⁴ஜானாதி, ஸப்³ப³ங் த⁴ம்மங் அபி⁴ஞ்ஞாய ஸப்³ப³ங் த⁴ம்மங்
பரிஜானாதி , ஸப்³ப³ங் த⁴ம்மங் பரிஞ்ஞாய யங் கிஞ்சி
வேத³னங் வேதே³தி ஸுக²ங் வா து³க்க²ங் வா அது³க்க²மஸுக²ங் வா. ஸோ தாஸு
வேத³னாஸு அனிச்சானுபஸ்ஸீ விஹரதி, விராகா³னுபஸ்ஸீ விஹரதி, நிரோதா⁴னுபஸ்ஸீ
விஹரதி, படினிஸ்ஸக்³கா³னுபஸ்ஸீ விஹரதி. ஸோ தாஸு வேத³னாஸு அனிச்சானுபஸ்ஸீ
விஹரந்தோ, விராகா³னுபஸ்ஸீ விஹரந்தோ, நிரோதா⁴னுபஸ்ஸீ விஹரந்தோ,
படினிஸ்ஸக்³கா³னுபஸ்ஸீ விஹரந்தோ ந கிஞ்சி லோகே உபாதி³யதி, அனுபாதி³யங் ந
பரிதஸ்ஸதி, அபரிதஸ்ஸங் பச்சத்தஞ்ஞேவ பரினிப்³பா³யதி – ‘கீ²ணா ஜாதி, வுஸிதங்
ப்³ரஹ்மசரியங் , கதங் கரணீயங், நாபரங்
இத்த²த்தாயா’தி பஜானாதி. எத்தாவதா கோ², தே³வானமிந்த³, பி⁴க்கு² ஸங்கி²த்தேன
தண்ஹாஸங்க²யவிமுத்தோ ஹோதி அச்சந்தனிட்டோ² அச்சந்தயோக³க்கே²மீ
அச்சந்தப்³ரஹ்மசாரீ அச்சந்தபரியோஸானோ ஸெட்டோ² தே³வமனுஸ்ஸானந்தி. ஏவங் கோ²
அஹங், மொக்³க³ல்லான, அபி⁴ஜானாமி ஸக்கஸ்ஸ தே³வானமிந்த³ஸ்ஸ ஸங்கி²த்தேன
தண்ஹாஸங்க²யவிமுத்திங் பா⁴ஸிதா’’தி.
இத³மவோச ப⁴க³வா. அத்தமனோ ஆயஸ்மா மஹாமொக்³க³ல்லானோ ப⁴க³வதோ பா⁴ஸிதங் அபி⁴னந்தீ³தி.
சூளதண்ஹாஸங்க²யஸுத்தங் நிட்டி²தங் ஸத்தமங்.
8. மஹாதண்ஹாஸங்க²யஸுத்தங்
396. ஏவங்
மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ
ஆராமே. தேன கோ² பன ஸமயேன ஸாதிஸ்ஸ நாம பி⁴க்கு²னோ கேவட்டபுத்தஸ்ஸ ஏவரூபங்
பாபகங் தி³ட்டி²க³தங் உப்பன்னங் ஹோதி – ‘‘ததா²ஹங் ப⁴க³வதா த⁴ம்மங் தே³ஸிதங்
ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி அனஞ்ஞ’’ந்தி.
அஸ்ஸோஸுங் கோ² ஸம்ப³ஹுலா பி⁴க்கூ² – ‘‘ஸாதிஸ்ஸ கிர நாம பி⁴க்கு²னோ
கேவட்டபுத்தஸ்ஸ ஏவரூபங் பாபகங் தி³ட்டி²க³தங் உப்பன்னங் – ‘ததா²ஹங் ப⁴க³வதா
த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி,
அனஞ்ஞ’’’ந்தி. அத² கோ² தே பி⁴க்கூ² யேன ஸாதி பி⁴க்கு² கேவட்டபுத்தோ
தேனுபஸங்கமிங்ஸு; உபஸங்கமித்வா ஸாதிங் பி⁴க்கு²ங் கேவட்டபுத்தங் ஏதத³வோசுங்
– ‘‘ஸச்சங் கிர தே, ஆவுஸோ ஸாதி, ஏவரூபங் பாபகங் தி³ட்டி²க³தங் உப்பன்னங் –
‘ததா²ஹங் ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங்
ஸந்தா⁴வதி ஸங்ஸரதி, அனஞ்ஞ’’’ந்தி? ‘‘ஏவங் ப்³யா கோ² அஹங், ஆவுஸோ, ப⁴க³வதா
த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி,
அனஞ்ஞ’’ந்தி. அத² கோ² தே பி⁴க்கூ² ஸாதிங் பி⁴க்கு²ங் கேவட்டபுத்தங் ஏதஸ்மா
பாபகா தி³ட்டி²க³தா விவேசேதுகாமா ஸமனுயுஞ்ஜந்தி ஸமனுகா³ஹந்தி ஸமனுபா⁴ஸந்தி –
‘‘மா ஏவங், ஆவுஸோ ஸாதி, அவச, மா ப⁴க³வந்தங் அப்³பா⁴சிக்கி², ந ஹி ஸாது⁴
ப⁴க³வதோ அப்³ப⁴க்கா²னங், ந ஹி ப⁴க³வா ஏவங் வதெ³ய்ய. அனேகபரியாயேனாவுஸோ ஸாதி, படிச்சஸமுப்பன்னங் விஞ்ஞாணங் வுத்தங்
ப⁴க³வதா, அஞ்ஞத்ர பச்சயா நத்தி² விஞ்ஞாணஸ்ஸ ஸம்ப⁴வோ’’தி. ஏவம்பி கோ² ஸாதி
பி⁴க்கு² கேவட்டபுத்தோ தேஹி பி⁴க்கூ²ஹி ஸமனுயுஞ்ஜியமானோ ஸமனுகா³ஹியமானோ
ஸமனுபா⁴ஸியமானோ ததே³வ பாபகங் தி³ட்டி²க³தங் தா²மஸா பராமாஸா அபி⁴னிவிஸ்ஸ
வோஹரதி – ‘‘ஏவங் ப்³யா கோ² அஹங், ஆவுஸோ, ப⁴க³வதா த⁴ம்மங் தே³ஸிதங் ஆஜானாமி
யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி அனஞ்ஞ’’ந்தி.
397.
யதோ கோ² தே பி⁴க்கூ² நாஸக்கி²ங்ஸு ஸாதிங் பி⁴க்கு²ங் கேவட்டபுத்தங் ஏதஸ்மா
பாபகா தி³ட்டி²க³தா விவேசேதுங், அத² கோ² தே பி⁴க்கூ² யேன ப⁴க³வா
தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங்
நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் –
‘‘ஸாதிஸ்ஸ நாம, ப⁴ந்தே, பி⁴க்கு²னோ கேவட்டபுத்தஸ்ஸ ஏவரூபங் பாபகங்
தி³ட்டி²க³தங் உப்பன்னங் – ‘ததா²ஹங் ப⁴க³வதா
த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி,
அனஞ்ஞ’ந்தி. அஸ்ஸும்ஹ கோ² மயங், ப⁴ந்தே, ஸாதிஸ்ஸ கிர நாம பி⁴க்கு²னோ
கேவட்டபுத்தஸ்ஸ ஏவரூபங் பாபகங் தி³ட்டி²க³தங் உப்பன்னங் – ‘ததா²ஹங் ப⁴க³வதா
த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி,
அனஞ்ஞ’ந்தி. அத² கோ² மயங், ப⁴ந்தே, யேன ஸாதி பி⁴க்கு² கேவட்டபுத்தோ
தேனுபஸங்கமிம்ஹ; உபஸங்கமித்வா ஸாதிங் பி⁴க்கு²ங் கேவட்டபுத்தங் ஏதத³வோசும்ஹ
– ‘ஸச்சங் கிர தே, ஆவுஸோ ஸாதி, ஏவரூபங் பாபகங் தி³ட்டி²க³தங் உப்பன்னங் –
‘‘ததா²ஹங் ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங்
ஸந்தா⁴வதி ஸங்ஸரதி, அனஞ்ஞ’’ந்தி? ஏவங் வுத்தே, ப⁴ந்தே, ஸாதி பி⁴க்கு²
கேவட்டபுத்தோ அம்ஹே ஏதத³வோச – ‘ஏவங் ப்³யா கோ² அஹங், ஆவுஸோ, ப⁴க³வதா
த⁴ம்மங் தே³ஸிதங் ஆஜானாமி யதா² ததே³வித³ங்
விஞ்ஞாணங் ஸந்தா⁴வதி ஸங்ஸரதி, அனஞ்ஞ’ந்தி. அத² கோ² மயங், ப⁴ந்தே, ஸாதிங்
பி⁴க்கு²ங் கேவட்டபுத்தங் ஏதஸ்மா பாபகா தி³ட்டி²க³தா விவேசேதுகாமா
ஸமனுயுஞ்ஜிம்ஹ ஸமனுகா³ஹிம்ஹ ஸமனுபா⁴ஸிம்ஹ – ‘மா ஏவங், ஆவுஸோ ஸாதி, அவச, மா
ப⁴க³வந்தங் அப்³பா⁴சிக்கி², ந ஹி ஸாது⁴ ப⁴க³வதோ அப்³ப⁴க்கா²னங், ந ஹி
ப⁴க³வா ஏவங் வதெ³ய்ய. அனேகபரியாயேனாவுஸோ ஸாதி, படிச்சஸமுப்பன்னங் விஞ்ஞாணங்
வுத்தங் ப⁴க³வதா, அஞ்ஞத்ர பச்சயா நத்தி² விஞ்ஞாணஸ்ஸ ஸம்ப⁴வோ’தி. ஏவம்பி
கோ², ப⁴ந்தே, ஸாதி பி⁴க்கு² கேவட்டபுத்தோ அம்ஹேஹி ஸமனுயுஞ்ஜியமானோ
ஸமனுகா³ஹியமானோ ஸமனுபா⁴ஸியமானோ ததே³வ பாபகங் தி³ட்டி²க³தங் தா²மஸா பராமஸா
அபி⁴னிவிஸ்ஸ வோஹரதி – ‘ஏவங் ப்³யா கோ² அஹங், ஆவுஸோ, ப⁴க³வதா த⁴ம்மங்
தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி,
அனஞ்ஞ’ந்தி. யதோ கோ² மயங், ப⁴ந்தே, நாஸக்கி²ம்ஹ ஸாதிங் பி⁴க்கு²ங்
கேவட்டபுத்தங் ஏதஸ்மா பாபகா தி³ட்டி²க³தா விவேசேதுங், அத² மயங் ஏதமத்த²ங்
ப⁴க³வதோ ஆரோசேமா’’தி.
398. அத² கோ² ப⁴க³வா அஞ்ஞதரங் பி⁴க்கு²ங் ஆமந்தேஸி – ‘‘ஏஹி த்வங்
பி⁴க்கு², மம வசனேன ஸாதிங் பி⁴க்கு²ங் கேவட்டபுத்தங் ஆமந்தேஹி – ‘ஸத்தா²
தங், ஆவுஸோ ஸாதி, ஆமந்தேதீ’’’தி. ‘‘ஏவங், ப⁴ந்தே’’தி கோ² ஸோ பி⁴க்கு²
ப⁴க³வதோ படிஸ்ஸுத்வா யேன ஸாதி பி⁴க்கு² கேவட்டபுத்தோ தேனுபஸங்கமி;
உபஸங்கமித்வா ஸாதிங் பி⁴க்கு²ங் கேவட்டபுத்தங் ஏதத³வோச – ‘‘ஸத்தா² தங்,
ஆவுஸோ ஸாதி, ஆமந்தேதீ’’தி. ‘‘ஏவமாவுஸோ’’தி கோ² ஸாதி பி⁴க்கு² கேவட்டபுத்தோ தஸ்ஸ பி⁴க்கு²னோ படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங்
அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஸாதிங்
பி⁴க்கு²ங் கேவட்டபுத்தங் ப⁴க³வா ஏதத³வோச – ‘‘ஸச்சங் கிர, தே, ஸாதி,
ஏவரூபங் பாபகங் தி³ட்டி²க³தங் உப்பன்னங் – ‘ததா²ஹங் ப⁴க³வதா த⁴ம்மங்
தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி,
அனஞ்ஞ’’’ந்தி? ‘‘ஏவங் ப்³யா கோ² அஹங், ப⁴ந்தே, ப⁴க³வதா த⁴ம்மங் தே³ஸிதங்
ஆஜானாமி யதா² ததே³வித³ங் விஞ்ஞாணங் ஸந்தா⁴வதி
ஸங்ஸரதி, அனஞ்ஞ’’ந்தி. ‘‘கதமங் தங், ஸாதி, விஞ்ஞாண’’ந்தி? ‘‘ய்வாயங்,
ப⁴ந்தே, வதோ³ வேதெ³ய்யோ தத்ர தத்ர கல்யாணபாபகானங் கம்மானங் விபாகங்
படிஸங்வேதே³தீ’’தி. ‘‘கஸ்ஸ நு கோ² நாம த்வங், மோக⁴புரிஸ, மயா ஏவங் த⁴ம்மங்
தே³ஸிதங் ஆஜானாஸி? நனு மயா, மோக⁴புரிஸ, அனேகபரியாயேன படிச்சஸமுப்பன்னங்
விஞ்ஞாணங் வுத்தங், அஞ்ஞத்ர பச்சயா நத்தி² விஞ்ஞாணஸ்ஸ ஸம்ப⁴வோதி? அத² ச பன
த்வங், மோக⁴புரிஸ, அத்தனா து³க்³க³ஹிதேன அம்ஹே சேவ அப்³பா⁴சிக்க²ஸி,
அத்தானஞ்ச க²ணஸி, ப³ஹுஞ்ச அபுஞ்ஞங் பஸவஸி. தஞ்ஹி தே, மோக⁴புரிஸ, ப⁴விஸ்ஸதி
தீ³க⁴ரத்தங் அஹிதாய து³க்கா²யா’’தி.
399.
அத² கோ² ப⁴க³வா பி⁴க்கூ² ஆமந்தேஸி – ‘‘தங் கிங் மஞ்ஞத², பி⁴க்க²வே, அபி
நாயங் ஸாதி பி⁴க்கு² கேவட்டபுத்தோ உஸ்மீகதோபி இமஸ்மிங் த⁴ம்மவினயே’’தி?
‘‘கிஞ்ஹி ஸியா ப⁴ந்தே? நோ ஹேதங், ப⁴ந்தே’’தி. ஏவங் வுத்தே, ஸாதி பி⁴க்கு²
கேவட்டபுத்தோ துண்ஹீபூ⁴தோ மங்குபூ⁴தோ பத்தக்க²ந்தோ⁴ அதோ⁴முகோ² பஜ்ஜா²யந்தோ
அப்படிபா⁴னோ நிஸீதி³. அத² கோ² ப⁴க³வா ஸாதிங்
பி⁴க்கு²ங் கேவட்டபுத்தங் துண்ஹீபூ⁴தங் மங்குபூ⁴தங் பத்தக்க²ந்த⁴ங்
அதோ⁴முக²ங் பஜ்ஜா²யந்தங் அப்படிபா⁴னங் விதி³த்வா ஸாதிங் பி⁴க்கு²ங்
கேவட்டபுத்தங் ஏதத³வோச – ‘‘பஞ்ஞாயிஸ்ஸஸி கோ² த்வங், மோக⁴புரிஸ, ஏதேன ஸகேன
பாபகேன தி³ட்டி²க³தேன. இதா⁴ஹங் பி⁴க்கூ² படிபுச்சி²ஸ்ஸாமீ’’தி. அத² கோ²
ப⁴க³வா பி⁴க்கூ² ஆமந்தேஸி – ‘‘தும்ஹேபி மே, பி⁴க்க²வே, ஏவங் த⁴ம்மங்
தே³ஸிதங் ஆஜானாத² யதா²யங் ஸாதி பி⁴க்கு² கேவட்டபுத்தோ
அத்தனா து³க்³க³ஹிதேன அம்ஹே சேவ அப்³பா⁴சிக்க²தி, அத்தானஞ்ச க²ணதி,
ப³ஹுஞ்ச அபுஞ்ஞங் பஸவதீ’’தி? ‘‘நோ ஹேதங், ப⁴ந்தே! அனேகபரியாயேன ஹி நோ,
ப⁴ந்தே, படிச்சஸமுப்பன்னங் விஞ்ஞாணங் வுத்தங் ப⁴க³வதா, அஞ்ஞத்ர பச்சயா
நத்தி² விஞ்ஞாணஸ்ஸ ஸம்ப⁴வோ’’தி. ‘‘ஸாது⁴ ஸாது⁴, பி⁴க்க²வே! ஸாது⁴ கோ² மே
தும்ஹே, பி⁴க்க²வே, ஏவங் த⁴ம்மங் தே³ஸிதங் ஆஜானாத². அனேகபரியாயேன ஹி வோ,
பி⁴க்க²வே, படிச்சஸமுப்பன்னங் விஞ்ஞாணங் வுத்தங் மயா, அஞ்ஞத்ர பச்சயா
நத்தி² விஞ்ஞாணஸ்ஸ ஸம்ப⁴வோதி. அத² ச பனாயங் ஸாதி பி⁴க்கு² கேவட்டபுத்தோ
அத்தனா து³க்³க³ஹிதேன அம்ஹே சேவ அப்³பா⁴சிக்க²தி, அத்தானஞ்ச க²ணதி, ப³ஹுஞ்ச
அபுஞ்ஞங் பஸவதி பஸவதி. தஞ்ஹி தஸ்ஸ மோக⁴புரிஸஸ்ஸ ப⁴விஸ்ஸதி தீ³க⁴ரத்தங் அஹிதாய து³க்கா²ய.
400. ‘‘யங் யதே³வ, பி⁴க்க²வே, பச்சயங் படிச்ச உப்பஜ்ஜதி விஞ்ஞாணங், தேன தேனேவ விஞ்ஞாணங்த்வேவ ஸங்க்²யங் க³ச்ச²தி [ஸங்க²ங் க³ச்ச²தி (ஸீ॰ பீ॰)]. சக்கு²ஞ்ச படிச்ச ரூபே ச உப்பஜ்ஜதி விஞ்ஞாணங், சக்கு²விஞ்ஞாணங்த்வேவ
ஸங்க்²யங் க³ச்ச²தி; ஸோதஞ்ச படிச்ச ஸத்³தே³ ச உப்பஜ்ஜதி விஞ்ஞாணங்,
ஸோதவிஞ்ஞாணங்த்வேவ ஸங்க்²யங் க³ச்ச²தி; கா⁴னஞ்ச படிச்ச க³ந்தே⁴ ச உப்பஜ்ஜதி
விஞ்ஞாணங், கா⁴னவிஞ்ஞாணங்த்வேவ ஸங்க்²யங்
க³ச்ச²தி; ஜிவ்ஹஞ்ச படிச்ச ரஸே ச உப்பஜ்ஜதி விஞ்ஞாணங்,
ஜிவ்ஹாவிஞ்ஞாணங்த்வேவ ஸங்க்²யங் க³ச்ச²தி; காயஞ்ச படிச்ச பொ²ட்ட²ப்³பே³ ச
உப்பஜ்ஜதி விஞ்ஞாணங், காயவிஞ்ஞாணங்த்வேவ ஸங்க்²யங் க³ச்ச²தி; மனஞ்ச படிச்ச
த⁴ம்மே ச உப்பஜ்ஜதி விஞ்ஞாணங், மனோவிஞ்ஞாணங்த்வேவ ஸங்க்²யங் க³ச்ச²தி.
‘‘ஸெய்யதா²பி, பி⁴க்க²வே, யங் யதே³வ பச்சயங் படிச்ச
அக்³கி³ ஜலதி தேன தேனேவ ஸங்க்²யங் க³ச்ச²தி. கட்ட²ஞ்ச படிச்ச அக்³கி³ ஜலதி,
கட்ட²க்³கி³த்வேவ ஸங்க்²யங் க³ச்ச²தி; ஸகலிகஞ்ச படிச்ச அக்³கி³ ஜலதி,
ஸகலிகக்³கி³த்வேவ ஸங்க்²யங் க³ச்ச²தி; திணஞ்ச படிச்ச அக்³கி³ ஜலதி,
திணக்³கி³த்வேவ ஸங்க்²யங் க³ச்ச²தி; கோ³மயஞ்ச படிச்ச அக்³கி³ ஜலதி,
கோ³மயக்³கி³த்வேவ ஸங்க்²யங் க³ச்ச²தி; து²ஸஞ்ச படிச்ச அக்³கி³ ஜலதி,
து²ஸக்³கி³த்வேவ ஸங்க்²யங் க³ச்ச²தி; ஸங்காரஞ்ச படிச்ச அக்³கி³ ஜலதி,
ஸங்காரக்³கி³த்வேவ ஸங்க்²யங் க³ச்ச²தி. ஏவமேவ கோ², பி⁴க்க²வே, யங் யதே³வ
பச்சயங் படிச்ச உப்பஜ்ஜதி விஞ்ஞாணங், தேன தேனேவ ஸங்க்²யங் க³ச்ச²தி.
சக்கு²ஞ்ச படிச்ச ரூபே ச உப்பஜ்ஜதி விஞ்ஞாணங், சக்கு²விஞ்ஞாணங்த்வேவ
ஸங்க்²யங் க³ச்ச²தி; ஸோதஞ்ச படிச்ச ஸத்³தே³ ச உப்பஜ்ஜதி விஞ்ஞாணங்,
ஸோதவிஞ்ஞாணங்த்வேவ ஸங்க்²யங் க³ச்ச²தி, கா⁴னஞ்ச படிச்ச க³ந்தே⁴ ச உப்பஜ்ஜதி
விஞ்ஞாணங் , கா⁴ணவிஞ்ஞாணங்த்வேவ ஸங்க்²யங்
க³ச்ச²தி, ஜிவ்ஹஞ்ச படிச்ச ரஸே ச உப்பஜ்ஜதி விஞ்ஞாணங்,
ஜிவ்ஹாவிஞ்ஞாணங்த்வேவ ஸங்க்²யங் க³ச்ச²தி. காயஞ்ச படிச்ச பொ²ட்ட²ப்³பே³ ச
உப்பஜ்ஜதி விஞ்ஞாணங், காயவிஞ்ஞாணங்த்வேவ ஸங்க்²யங் க³ச்ச²தி. மனஞ்ச படிச்ச
த⁴ம்மே ச உப்பஜ்ஜதி விஞ்ஞாணங், மனோவிஞ்ஞாணங்த்வேவ ஸங்க்²யங் க³ச்ச²தி.
401. ‘‘பூ⁴தமித³ந்தி , பி⁴க்க²வே, பஸ்ஸதா²’’தி?
‘‘ஏவங், ப⁴ந்தே’’.
‘‘ததா³ஹாரஸம்ப⁴வந்தி, பி⁴க்க²வே, பஸ்ஸதா²’’தி?
‘‘ஏவங், ப⁴ந்தே’’.
‘‘ததா³ஹாரனிரோதா⁴ யங் பூ⁴தங், தங் நிரோத⁴த⁴ம்மந்தி, பி⁴க்க²வே, பஸ்ஸதா²’’தி?
‘‘ஏவங், ப⁴ந்தே’’.
‘‘பூ⁴தமித³ங் நொஸ்ஸூதி, பி⁴க்க²வே, கங்க²தோ உப்பஜ்ஜதி விசிகிச்சா²’’தி?
‘‘ஏவங், ப⁴ந்தே’’.
‘‘ததா³ஹாரஸம்ப⁴வங் நொஸ்ஸூதி, பி⁴க்க²வே , கங்க²தோ உப்பஜ்ஜதி விசிகிச்சா²’’தி?
‘‘ஏவங், ப⁴ந்தே’’.
‘‘ததா³ஹாரனிரோதா⁴ யங் பூ⁴தங், தங் நிரோத⁴த⁴ம்மங் நொஸ்ஸூதி, பி⁴க்க²வே, கங்க²தோ உப்பஜ்ஜதி விசிகிச்சா²’’தி?
‘‘ஏவங், ப⁴ந்தே’’.
‘‘பூ⁴தமித³ந்தி, பி⁴க்க²வே, யதா²பூ⁴தங் ஸம்மப்பஞ்ஞாய பஸ்ஸதோ யா விசிகிச்சா² ஸா பஹீயதீ’’தி?
‘‘ஏவங், ப⁴ந்தே’’.
‘‘ததா³ஹாரஸம்ப⁴வந்தி, பி⁴க்க²வே, யதா²பூ⁴தங் ஸம்மப்பஞ்ஞாய பஸ்ஸதாஏ யா விசிகிச்சா² ஸா பஹீயதீ’’தி?
‘‘ஏவங், ப⁴ந்தே’’.
‘‘ததா³ஹாரனிரோதா⁴ யங் பூ⁴தங், தங் நிரோத⁴த⁴ம்மந்தி, பி⁴க்க²வே, யதா²பூ⁴தங் ஸம்மப்பஞ்ஞாய பஸ்ஸதாஏ யா விசிகிச்சா² ஸா பஹீயதீ’’தி?
‘‘பூ⁴தமித³ந்தி, பி⁴க்க²வே, இதிபி வோ எத்த² நிப்³பி³சிகிச்சா²’’தி?
‘‘ஏவங், ப⁴ந்தே’’.
‘‘ததா³ஹாரஸம்ப⁴வந்தி, பி⁴க்க²வே, இதிபி வோ எத்த² நிப்³பி³சிகிச்சா²’’தி?
‘‘ஏவங், ப⁴ந்தே’’.
‘‘ததா³ஹாரனிரோதா⁴ யங் பூ⁴தங் தங் நிரோத⁴த⁴ம்மந்தி, பி⁴க்க²வே, இதிபி வோ எத்த² நிப்³பி³சிகிச்சா²’’தி?
‘‘ஏவங், ப⁴ந்தே’’.
‘‘பூ⁴தமித³ந்தி, பி⁴க்க²வே, யதா²பூ⁴தங் ஸம்மப்பஞ்ஞாய ஸுதி³ட்ட²’’ந்தி?
‘‘ஏவங், ப⁴ந்தே’’.
‘‘ததா³ஹாரஸம்ப⁴வந்தி, பி⁴க்க²வே, யதா²பூ⁴தங் ஸம்மப்பஞ்ஞாய ஸுதி³ட்ட²’’ந்தி?
‘‘ஏவங், ப⁴ந்தே’’.
‘‘ததா³ஹாரனிரோதா⁴ யங் பூ⁴தங் தங் நிரோத⁴த⁴ம்மந்தி, பி⁴க்க²வே, யதா²பூ⁴தங் ஸம்மப்பஞ்ஞாய ஸுதி³ட்ட²’’ந்தி?
‘‘ஏவங், ப⁴ந்தே’’.
‘‘இமங் சே தும்ஹே, பி⁴க்க²வே, தி³ட்டி²ங் ஏவங் பரிஸுத்³த⁴ங் ஏவங் பரியோதா³தங் அல்லீயேத² கேலாயேத² த⁴னாயேத² மமாயேத², அபி நு மே தும்ஹே, பி⁴க்க²வே, குல்லூபமங் த⁴ம்மங் தே³ஸிதங் ஆஜானெய்யாத² நித்த²ரணத்தா²ய நோ க³ஹணத்தா²யா’’தி?
‘‘நோ ஹேதங், ப⁴ந்தே’’.
‘‘இமங் சே தும்ஹே, பி⁴க்க²வே, தி³ட்டி²ங் ஏவங் பரிஸுத்³த⁴ங் ஏவங் பரியோதா³தங்
ந அல்லீயேத² ந கேலாயேத² ந த⁴னாயேத² ந மமாயேத², அபி நு மே தும்ஹே,
பி⁴க்க²வே, குல்லூபமங் த⁴ம்மங் தே³ஸிதங் ஆஜானெய்யாத² நித்த²ரணத்தா²ய நோ
க³ஹணத்தா²யா’’தி?
‘‘ஏவங், ப⁴ந்தே’’.
402.
‘‘சத்தாரோமே, பி⁴க்க²வே, ஆஹாரா பூ⁴தானங் வா ஸத்தானங் டி²தியா,
ஸம்ப⁴வேஸீனங் வா அனுக்³க³ஹாய. கதமே சத்தாரோ? கப³ளீகாரோ ஆஹாரோ ஓளாரிகோ வா
ஸுகு²மோ வா, ப²ஸ்ஸோ து³தியோ, மனோஸஞ்சேதனா ததியா, விஞ்ஞாணங் சதுத்த²ங்.
‘‘இமே ச, பி⁴க்க²வே, சத்தாரோ ஆஹாரா கிங்னிதா³னா கிங்ஸமுத³யா கிங்ஜாதிகா கிங்பப⁴வா?
‘‘இமே சத்தாரோ ஆஹாரா தண்ஹானிதா³னா தண்ஹாஸமுத³யா தண்ஹாஜாதிகா தண்ஹாபப⁴வா.
‘‘தண்ஹா சாயங், பி⁴க்க²வே, கிங்னிதா³னா கிங்ஸமுத³யா கிங்ஜாதிகா கிங்பப⁴வா?
‘‘தண்ஹா வேத³னானிதா³னா வேத³னாஸமுத³யா வேத³னாஜாதிகா வேத³னாபப⁴வா.
‘‘வேத³னா சாயங், பி⁴க்க²வே, கிங்னிதா³னா கிங்ஸமுத³யா கிங்ஜாதிகா கிங்பப⁴வா?
‘‘வேத³னா ப²ஸ்ஸனிதா³னா ப²ஸ்ஸஸமுத³யா ப²ஸ்ஸஜாதிகா ப²ஸ்ஸபப⁴வா .
‘‘ப²ஸ்ஸோ சாயங், பி⁴க்க²வே, கிங்னிதா³னோ கிங்ஸமுத³யோ கிங்ஜாதிகோ கிங்பப⁴வோ?
‘‘ப²ஸ்ஸோ ஸளாயதனநிதா³னோ ஸளாயதனஸமுத³யோ ஸளாயதனஜாதிகோ ஸளாயதனபப⁴வோ.
‘‘ஸளாயதனங் சித³ங், பி⁴க்க²வே, கிங்னிதா³னங் கிங்ஸமுத³யங் கிங்ஜாதிகங் கிங்பப⁴வங்?
‘‘ஸளாயதனங் நாமரூபனிதா³னங் நாமரூபஸமுத³யங் நாமரூபஜாதிகங் நாமரூபபப⁴வங்.
‘‘நாமரூபங் சித³ங், பி⁴க்க²வே, கிங்னிதா³னங் கிங்ஸமுத³யங் கிங்ஜாதிகங் கிங்பப⁴வங்?
‘‘நாமரூபங் விஞ்ஞாணனிதா³னங் விஞ்ஞாணஸமுத³யங் விஞ்ஞாணஜாதிகங் விஞ்ஞாணபப⁴வங்.
‘‘விஞ்ஞாணங் சித³ங், பி⁴க்க²வே, கிங்னிதா³னங் கிங்ஸமுத³யங் கிங்ஜாதிகங் கிங்பப⁴வங்?
‘‘விஞ்ஞாணங் ஸங்கா²ரனிதா³னங் ஸங்கா²ரஸமுத³யங் ஸங்கா²ரஜாதிகங் ஸங்கா²ரபப⁴வங்.
‘‘ஸங்கா²ரா சிமே, பி⁴க்க²வே, கிங்னிதா³னா கிங்ஸமுத³யா கிங்ஜாதிகா கிங்பப⁴வா?
‘‘ஸங்கா²ரா அவிஜ்ஜானிதா³னா அவிஜ்ஜாஸமுத³யா அவிஜ்ஜாஜாதிகா அவிஜ்ஜாபப⁴வா.
‘‘இதி கோ², பி⁴க்க²வே, அவிஜ்ஜாபச்சயா ஸங்கா²ரா,
ஸங்கா²ரபச்சயா விஞ்ஞாணங், விஞ்ஞாணபச்சயா நாமரூபங், நாமரூபபச்சயா ஸளாயதனங்,
ஸளாயதனபச்சயா ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா, தண்ஹாபச்சயா
உபாதா³னங், உபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணங்
ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ
து³க்க²க்க²ந்த⁴ஸ்ஸ ஸமுத³யோ ஹோதி.’’’
403. ‘‘ஜாதிபச்சயா ஜராமரணந்தி இதி கோ² பனேதங் வுத்தங்; ஜாதிபச்சயா நு கோ², பி⁴க்க²வே, ஜராமரணங், நோ வா, கத²ங் வா எத்த² [கத²ங் வா வோ எத்த² (?)] ஹோதீ’’தி? ‘‘ஜாதிபச்சயா, ப⁴ந்தே, ஜராமரணங்; ஏவங் நோ எத்த² ஹோதி [ஏவங் நோ எத்த² ஹோதீதி (க॰)]
– ஜாதிபச்சயா ஜராமரண’’ந்தி. ‘‘ப⁴வபச்சயா ஜாதீதி இதி கோ² பனேதங் வுத்தங்;
ப⁴வபச்சயா நு கோ², பி⁴க்க²வே, ஜாதி, நோ வா, கத²ங் வா எத்த² ஹோதீ’’தி?
‘‘ப⁴வபச்சயா, ப⁴ந்தே , ஜாதி; ஏவங் நோ எத்த² ஹோதி – ப⁴வபச்சயா ஜாதீ’’தி . ‘‘உபாதா³னபச்சயா
ப⁴வோதி இதி கோ² பனேதங் வுத்தங்; உபாதா³னபச்சயா நு கோ², பி⁴க்க²வே, ப⁴வோ,
நோ வா, கத²ங் வா எத்த² ஹோதீ’’தி? ‘‘உபாதா³னபச்சயா, ப⁴ந்தே, ப⁴வோ; ஏவங் நோ
எத்த² ஹோதி – உபாதா³னபச்சயா ப⁴வோ’’தி. ‘‘தண்ஹாபச்சயா உபாதா³னந்தி இதி கோ²
பனேதங் வுத்தங், தண்ஹாபச்சயா நு கோ², பி⁴க்க²வே, உபாதா³னங், நோ வா, கத²ங்
வா எத்த² ஹோதீ’’தி? ‘‘தண்ஹாபச்சயா, ப⁴ந்தே, உபாதா³னங்; ஏவங் நோ எத்த² ஹோதி –
தண்ஹாபச்சயா உபாதா³ன’’ந்தி. ‘‘வேத³னாபச்சயா
தண்ஹாதி இதி கோ² பனேதங் வுத்தங்; வேத³னாபச்சயா நு கோ², பி⁴க்க²வே, தண்ஹா,
நோ வா, கத²ங் வா எத்த² ஹோதீ’’தி? ‘‘வேத³னாபச்சயா, ப⁴ந்தே, தண்ஹா; ஏவங் நோ
எத்த² ஹோதி – வேத³னாபச்சயா தண்ஹா’’தி. ‘‘ப²ஸ்ஸபச்சயா வேத³னாதி இதி கோ²
பனேதங் வுத்தங்; ப²ஸ்ஸபச்சயா நு கோ², பி⁴க்க²வே, வேத³னா, நோ வா, கத²ங் வா
எத்த² ஹோதீ’’தி? ‘‘ப²ஸ்ஸபச்சயா, ப⁴ந்தே, வேத³னா; ஏவங் நோ எத்த² ஹோதி –
ப²ஸ்ஸபச்சயா வேத³னா’’தி. ‘‘ஸளாயதனபச்சயா ப²ஸ்ஸோதி இதி கோ² பனேதங் வுத்தங்;
ஸளாயதனபச்சயா நு கோ², பி⁴க்க²வே, ப²ஸ்ஸோ, நோ வா, கத²ங் வா எத்த² ஹோதீ’’தி?
‘‘ஸளாயதனபச்சயா, ப⁴ந்தே, ப²ஸ்ஸோ; ஏவங் நோ எத்த² ஹோதி – ஸளாயதனபச்சயா
ப²ஸ்ஸோ’’தி. ‘‘நாமரூபபச்சயா ஸளாயதனந்தி இதி கோ² பனேதங் வுத்தங்;
நாமரூபபச்சயா நு கோ², பி⁴க்க²வே, ஸளாயதனங், நோ வா, கத²ங் வா எத்த²
ஹோதீ’’தி? ‘‘நாமரூபபச்சயா, ப⁴ந்தே, ஸளாயதனங்; ஏவங் நோ எத்த² ஹோதி –
நாமரூபபச்சயா ஸளாயதன’’ந்தி. ‘‘விஞ்ஞாணபச்சயா நாமரூபந்தி
இதி கோ² பனேதங் வுத்தங்; விஞ்ஞாணபச்சயா நு கோ², பி⁴க்க²வே, நாமரூபங், நோ
வா, கத²ங் வா எத்த² ஹோதீ’’தி? ‘‘விஞ்ஞாணபச்சயா, ப⁴ந்தே, நாமரூபங்; ஏவங் நோ
எத்த² ஹோதி – விஞ்ஞாணபச்சயா நாமரூப’’ந்தி. ‘‘ஸங்கா²ரபச்சயா விஞ்ஞாணந்தி இதி
கோ² பனேதங் வுத்தங்; ஸங்கா²ரபச்சயா நு கோ², பி⁴க்க²வே, விஞ்ஞாணங், நோ வா,
கத²ங் வா எத்த² ஹோதீ’’தி? ‘‘ஸங்கா²ரபச்சயா, ப⁴ந்தே, விஞ்ஞாணங்; ஏவங் நோ
எத்த² ஹோதி – ஸங்கா²ரபச்சயா விஞ்ஞாண’’ந்தி. ‘‘அவிஜ்ஜாபச்சயா ஸங்கா²ராதி இதி
கோ² பனேதங் வுத்தங்; அவிஜ்ஜாபச்சயா நு கோ², பி⁴க்க²வே, ஸங்கா²ரா, நோ வா,
கத²ங் வா எத்த² ஹோதீ’’தி? ‘‘அவிஜ்ஜாபச்சயா, ப⁴ந்தே, ஸங்கா²ரா; ஏவங் நோ
எத்த² ஹோதி – அவிஜ்ஜாபச்சயா ஸங்கா²ரா’’தி.
404. ‘‘ஸாது⁴, பி⁴க்க²வே. இதி கோ², பி⁴க்க²வே, தும்ஹேபி ஏவங் வதே³த², அஹம்பி ஏவங் வதா³மி – இமஸ்மிங் ஸதி இத³ங் ஹோதி, இமஸ்ஸுப்பாதா³
இத³ங் உப்பஜ்ஜதி, யதி³த³ங் – அவிஜ்ஜாபச்சயா ஸங்கா²ரா, ஸங்கா²ரபச்சயா
விஞ்ஞாணங், விஞ்ஞாணபச்சயா நாமரூபங், நாமரூபபச்சயா ஸளாயதனங், ஸளாயதனபச்சயா
ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா, தண்ஹாபச்சயா உபாதா³னங்,
உபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா
ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ
து³க்க²க்க²ந்த⁴ஸ்ஸ ஸமுத³யோ ஹோதி.
‘‘அவிஜ்ஜாயத்வேவ அஸேஸவிராக³னிரோதா⁴ ஸங்கா²ரனிரோதோ⁴, ஸங்கா²ரனிரோதா⁴ விஞ்ஞாணனிரோதோ⁴, விஞ்ஞாணனிரோதா⁴ நாமரூபனிரோதோ⁴, நாமரூபனிரோதா⁴ ஸளாயதனநிரோதோ⁴ ,
ஸளாயதனநிரோதா⁴ ப²ஸ்ஸனிரோதோ⁴, ப²ஸ்ஸனிரோதா⁴ வேத³னானிரோதோ⁴, வேத³னானிரோதா⁴
தண்ஹானிரோதோ⁴, தண்ஹானிரோதா⁴ உபாதா³னநிரோதோ⁴, உபாதா³னநிரோதா⁴ ப⁴வனிரோதோ⁴,
ப⁴வனிரோதா⁴ ஜாதினிரோதோ⁴, ஜாதினிரோதா⁴ ஜராமரணங்
ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ
து³க்க²க்க²ந்த⁴ஸ்ஸ நிரோதோ⁴ ஹோதி.
405.
‘‘ஜாதினிரோதா⁴ ஜராமரணனிரோதோ⁴தி இதி கோ² பனேதங் வுத்தங்; ஜாதினிரோதா⁴ நு
கோ², பி⁴க்க²வே, ஜராமரணனிரோதோ⁴, நோ வா, கத²ங் வா எத்த² ஹோதீ’’தி?
‘‘ஜாதினிரோதா⁴, ப⁴ந்தே, ஜராமரணனிரோதோ⁴; ஏவங் நோ எத்த² ஹோதி – ஜாதினிரோதா⁴
ஜராமரணனிரோதோ⁴’’தி. ‘‘ப⁴வனிரோதா⁴ ஜாதினிரோதோ⁴தி இதி கோ² பனேதங் வுத்தங்;
ப⁴வனிரோதா⁴ நு கோ², பி⁴க்க²வே, ஜாதினிரோதோ⁴, நோ வா, கத²ங் வா எத்த²
ஹோதீ’’தி? ‘‘ப⁴வனிரோதா⁴, ப⁴ந்தே, ஜாதினிரோதோ⁴; ஏவங் நோ எத்த² ஹோதி –
ப⁴வனிரோதா⁴ ஜாதினிரோதோ⁴’’தி. ‘‘உபாதா³னநிரோதா⁴ ப⁴வனிரோதோ⁴தி இதி கோ² பனேதங்
வுத்தங்; உபாதா³னநிரோதா⁴ நு கோ², பி⁴க்க²வே, ப⁴வனிரோதோ⁴, நோ வா, கத²ங் வா
எத்த² ஹோதீ’’தி? ‘‘உபாதா³னநிரோதா⁴, ப⁴ந்தே, ப⁴வனிரோதோ⁴; ஏவங் நோ எத்த² ஹோதி
– உபாதா³னநிரோதா⁴ ப⁴வனிரோதோ⁴’’தி. ‘‘தண்ஹானிரோதா⁴ உபாதா³னநிரோதோ⁴தி இதி
கோ² பனேதங் வுத்தங்; தண்ஹானிரோதா⁴ நு கோ², பி⁴க்க²வே, உபாதா³னநிரோதோ⁴, நோ
வா, கத²ங் வா எத்த² ஹோதீ’’தி? ‘‘தண்ஹானிரோதா⁴, ப⁴ந்தே, உபாதா³னநிரோதோ⁴;
ஏவங் நோ எத்த² ஹோதி – தண்ஹானிரோதா⁴ உபாதா³னநிரோதோ⁴’’தி. ‘‘வேத³னானிரோதா⁴
தண்ஹானிரோதோ⁴தி இதி கோ² பனேதங் வுத்தங்; வேத³னானிரோதா⁴ நு கோ², பி⁴க்க²வே,
தண்ஹானிரோதோ⁴, நோ வா, கத²ங் வா எத்த² ஹோதீ’’தி? ‘‘வேத³னானிரோதா⁴, ப⁴ந்தே,
தண்ஹானிரோதோ⁴; ஏவங் நோ எத்த² ஹோதி – வேத³னானிரோதா⁴ தண்ஹானிரோதோ⁴’’தி.
‘‘ப²ஸ்ஸனிரோதா⁴ வேத³னானிரோதோ⁴தி இதி கோ² பனேதங் வுத்தங்; ப²ஸ்ஸனிரோதா⁴
நு கோ², பி⁴க்க²வே, வேத³னானிரோதோ⁴, நோ வா, கத²ங் வா எத்த² ஹோதீ’’தி?
‘‘ப²ஸ்ஸனிரோதா⁴, ப⁴ந்தே, வேத³னானிரோதோ⁴; ஏவங் நோ எத்த² ஹோதி – ப²ஸ்ஸனிரோதா⁴
வேத³னானிரோதோ⁴’’தி. ‘‘ஸளாயதனநிரோதா⁴ ப²ஸ்ஸனிரோதோ⁴தி இதி கோ² பனேதங்
வுத்தங்; ஸளாயதனநிரோதா⁴ நு கோ², பி⁴க்க²வே, ப²ஸ்ஸனிரோதோ⁴, நோ வா , கத²ங் வா எத்த² ஹோதீதி? ஸளாயதனநிரோதா⁴, ப⁴ந்தே, ப²ஸ்ஸனிரோதோ⁴; ஏவங் நோ எத்த² ஹோதி – ஸளாயதனநிரோதா⁴
ப²ஸ்ஸனிரோதோ⁴’’தி. ‘‘நாமரூபனிரோதா⁴ ஸளாயதனநிரோதோ⁴தி இதி கோ² பனேதங்
வுத்தங்; நாமரூபனிரோதா⁴ நு கோ², பி⁴க்க²வே, ஸளாயதனநிரோதோ⁴, நோ வா, கத²ங் வா
எத்த² ஹோதீ’’தி? ‘‘நாமரூபனிரோதா⁴, ப⁴ந்தே, ஸளாயதனநிரோதோ⁴; ஏவங் நோ எத்த²
ஹோதி – நாமரூபனிரோதா⁴ ஸளாயதனநிரோதோ⁴’’தி. ‘‘விஞ்ஞாணனிரோதா⁴ நாமரூபனிரோதோ⁴தி
இதி கோ² பனேதங் வுத்தங்; விஞ்ஞாணனிரோதா⁴ நு கோ², பி⁴க்க²வே,
நாமரூபனிரோதோ⁴, நோ வா, கத²ங் வா எத்த² ஹோதீ’’தி? ‘‘விஞ்ஞாணனிரோதா⁴, ப⁴ந்தே,
நாமரூபனிரோதோ⁴; ஏவங் நோ எத்த² ஹோதி – விஞ்ஞாணனிரோதா⁴ நாமரூபனிரோதோ⁴’’தி.
‘‘ஸங்கா²ரனிரோதா⁴ விஞ்ஞாணனிரோதோ⁴தி இதி கோ² பனேதங் வுத்தங்; ஸங்கா²ரனிரோதா⁴
நு கோ², பி⁴க்க²வே, விஞ்ஞாணனிரோதோ⁴, நோ வா, கத²ங் வா எத்த² ஹோதீ’’தி?
‘‘ஸங்கா²ரனிரோதா⁴, ப⁴ந்தே , விஞ்ஞாணனிரோதோ⁴; ஏவங் நோ
எத்த² ஹோதி – ஸங்கா²ரனிரோதா⁴ விஞ்ஞாணனிரோதோ⁴’’தி. ‘‘அவிஜ்ஜானிரோதா⁴
ஸங்கா²ரனிரோதோ⁴தி இதி கோ² பனேதங் வுத்தங்; அவிஜ்ஜானிரோதா⁴ நு கோ²,
பி⁴க்க²வே, ஸங்கா²ரனிரோதோ⁴, நோ வா, கத²ங் வா எத்த² ஹோதீ’’தி?
‘‘அவிஜ்ஜானிரோதா⁴, ப⁴ந்தே, ஸங்கா²ரனிரோதோ⁴; ஏவங் நோ எத்த² ஹோதி –
அவிஜ்ஜானிரோதா⁴ ஸங்கா²ரனிரோதோ⁴’’தி.
406.
‘‘ஸாது⁴, பி⁴க்க²வே. இதி கோ², பி⁴க்க²வே, தும்ஹேபி ஏவங் வதே³த², அஹம்பி
ஏவங் வதா³மி – இமஸ்மிங் அஸதி இத³ங் ந ஹோதி, இமஸ்ஸ நிரோதா⁴ இத³ங்
நிருஜ்ஜ²தி, யதி³த³ங் – அவிஜ்ஜானிரோதா⁴ ஸங்கா²ரனிரோதோ⁴, ஸங்கா²ரனிரோதா⁴
விஞ்ஞாணனிரோதோ⁴, விஞ்ஞாணனிரோதா⁴ நாமரூபனிரோதோ⁴, நாமரூபனிரோதா⁴
ஸளாயதனநிரோதோ⁴, ஸளாயதனநிரோதா⁴ ப²ஸ்ஸனிரோதோ⁴, ப²ஸ்ஸனிரோதா⁴ வேத³னானிரோதோ⁴,
வேத³னானிரோதா⁴ தண்ஹானிரோதோ⁴, தண்ஹானிரோதா⁴ உபாதா³னநிரோதோ⁴, உபாதா³னநிரோதா⁴
ப⁴வனிரோதோ⁴, ப⁴வனிரோதா⁴ ஜாதினிரோதோ⁴, ஜாதினிரோதா⁴ ஜராமரணங்
ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ
து³க்க²க்க²ந்த⁴ஸ்ஸ நிரோதோ⁴ ஹோதி.
407. ‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா புப்³ப³ந்தங்
வா படிதா⁴வெய்யாத² – ‘அஹேஸும்ஹ நு கோ² மயங் அதீதமத்³தா⁴னங், நனு கோ²
அஹேஸும்ஹ அதீதமத்³தா⁴னங், கிங் நு கோ² அஹேஸும்ஹ அதீதமத்³தா⁴னங், கத²ங் நு
கோ² அஹேஸும்ஹ அதீதமத்³தா⁴னங், கிங் ஹுத்வா கிங் அஹேஸும்ஹ நு கோ² மயங்
அதீதமத்³தா⁴ன’’’ந்தி?
‘‘நோ ஹேதங், ப⁴ந்தே’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா அபரந்தங்
வா படிதா⁴வெய்யாத² – ப⁴விஸ்ஸாம நு கோ² மயங் அனாக³தமத்³தா⁴னங், நனு கோ²
ப⁴விஸ்ஸாம அனாக³தமத்³தா⁴னங், கிங் நு கோ² ப⁴விஸ்ஸாம அனாக³தமத்³தா⁴னங்,
கத²ங் நு கோ² ப⁴விஸ்ஸாம அனாக³தமத்³தா⁴னங், கிங் ஹுத்வா கிங் ப⁴விஸ்ஸாம நு
கோ² மயங் அனாக³தமத்³தா⁴ன’’ந்தி?
‘‘நோ ஹேதங், ப⁴ந்தே’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங்
பஸ்ஸந்தா ஏதரஹி வா பச்சுப்பன்னமத்³தா⁴னங் அஜ்ஜ²த்தங் கத²ங்கதீ² அஸ்ஸத² –
அஹங் நு கொ²ஸ்மி, நோ நு கொ²ஸ்மி, கிங் நு கொ²ஸ்மி, கத²ங் நு கொ²ஸ்மி, அயங்
நு கோ² ஸத்தோ குதோ ஆக³தோ, ஸோ குஹிங்கா³மீ ப⁴விஸ்ஸதீ’’தி?
‘‘நோ ஹேதங், ப⁴ந்தே’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா ஏவங் வதெ³ய்யாத² – ஸத்தா² நோ க³ரு, ஸத்து²கா³ரவேன ச மயங் ஏவங் வதே³மா’’தி?
‘‘நோ ஹேதங், ப⁴ந்தே’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா ஏவங் வதெ³ய்யாத² – ஸமணோ ஏவமாஹ, ஸமணா ச நாம மயங் ஏவங் வதே³மா’’தி?
‘‘நோ ஹேதங், ப⁴ந்தே’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா அஞ்ஞங் ஸத்தா²ரங் உத்³தி³ஸெய்யாதா²’’தி?
‘‘நோ ஹேதங், ப⁴ந்தே’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங்
பஸ்ஸந்தா யானி தானி புது²ஸமணப்³ராஹ்மணானங் வத கோதூஹலமங்க³லானி தானி ஸாரதோ
பச்சாக³ச்செ²ய்யாதா²’’தி?
‘‘நனு, பி⁴க்க²வே, யதே³வ தும்ஹாகங் ஸாமங் ஞாதங் ஸாமங் தி³ட்ட²ங் ஸாமங் விதி³தங், ததே³வ தும்ஹே வதே³தா²’’தி.
‘‘ஏவங், ப⁴ந்தே’’.
‘‘ஸாது⁴, பி⁴க்க²வே, உபனீதா கோ² மே தும்ஹே, பி⁴க்க²வே,
இமினா ஸந்தி³ட்டி²கேன த⁴ம்மேன அகாலிகேன ஏஹிபஸ்ஸிகேன ஓபனெய்யிகேன பச்சத்தங்
வேதி³தப்³பே³ன விஞ்ஞூஹி. ஸந்தி³ட்டி²கோ அயங், பி⁴க்க²வே, த⁴ம்மோ அகாலிகோ
ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹி – இதி யந்தங்
வுத்தங், இத³மேதங் படிச்ச வுத்த’’ந்தி.
408.
‘‘திண்ணங் கோ² பன, பி⁴க்க²வே, ஸன்னிபாதா க³ப்³ப⁴ஸ்ஸாவக்கந்தி ஹோதி. இத⁴
மாதாபிதரோ ச ஸன்னிபதிதா ஹொந்தி, மாதா ச ந உதுனீ ஹோதி, க³ந்த⁴ப்³போ³ ச ந
பச்சுபட்டி²தோ ஹோதி, நேவ தாவ க³ப்³ப⁴ஸ்ஸாவக்கந்தி
ஹோதி. இத⁴ மாதாபிதரோ ச ஸன்னிபதிதா ஹொந்தி, மாதா ச உதுனீ ஹோதி, க³ந்த⁴ப்³போ³
ச ந பச்சுபட்டி²தோ ஹோதி, நேவ தாவ க³ப்³ப⁴ஸ்ஸாவக்கந்தி ஹோதி. யதோ ச கோ²,
பி⁴க்க²வே, மாதாபிதரோ ச ஸன்னிபதிதா ஹொந்தி, மாதா ச உதுனீ ஹோதி,
க³ந்த⁴ப்³போ³ ச பச்சுபட்டி²தோ ஹோதி – ஏவங் திண்ணங் ஸன்னிபாதா
க³ப்³ப⁴ஸ்ஸாவக்கந்தி ஹோதி. தமேனங், பி⁴க்க²வே, மாதா நவ வா த³ஸ வா மாஸே
க³ப்³ப⁴ங் குச்சி²னா பரிஹரதி மஹதா ஸங்ஸயேன க³ருபா⁴ரங் [க³ரும்பா⁴ரங் (ஸீ॰ பீ॰)]. தமேனங், பி⁴க்க²வே, மாதா நவன்னங் வா
த³ஸன்னங் வா மாஸானங் அச்சயேன விஜாயதி மஹதா ஸங்ஸயேன க³ருபா⁴ரங். தமேனங்
ஜாதங் ஸமானங் ஸகேன லோஹிதேன போஸேதி. லோஹிதஞ்ஹேதங், பி⁴க்க²வே, அரியஸ்ஸ வினயே
யதி³த³ங் மாதுத²ஞ்ஞங். ஸ கோ² ஸோ, பி⁴க்க²வே, குமாரோ வுத்³தி⁴மன்வாய
இந்த்³ரியானங் பரிபாகமன்வாய யானி தானி குமாரகானங் கீளாபனகானி தேஹி கீளதி,
ஸெய்யதி²த³ங் – வங்ககங் க⁴டிகங் மொக்க²சிகங் சிங்கு³லகங் பத்தாள்ஹகங்
ரத²கங் த⁴னுகங். ஸ கோ² ஸோ, பி⁴க்க²வே, குமாரோ வுத்³தி⁴மன்வாய இந்த்³ரியானங்
பரிபாகமன்வாய பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேதி –
சக்கு²விஞ்ஞெய்யேஹி ரூபேஹி இட்டே²ஹி கந்தேஹி மனாபேஹி பியரூபேஹி
காமூபஸங்ஹிதேஹி ரஜனீயேஹி, ஸோதவிஞ்ஞெய்யேஹி ஸத்³தே³ஹி… கா⁴னவிஞ்ஞெய்யேஹி
க³ந்தே⁴ஹி… ஜிவ்ஹாவிஞ்ஞெய்யேஹி ரஸேஹி… காயவிஞ்ஞெய்யேஹி பொ²ட்ட²ப்³பே³ஹி
இட்டே²ஹி கந்தேஹி மனாபேஹி பியரூபேஹி காமூபஸங்ஹிதேஹி ரஜனீயேஹி.
409. ‘‘ஸோ
சக்கு²னா ரூபங் தி³ஸ்வா பியரூபே ரூபே ஸாரஜ்ஜதி, அப்பியரூபே ரூபே
ப்³யாபஜ்ஜதி, அனுபட்டி²தகாயஸதி ச விஹரதி பரித்தசேதஸோ. தஞ்ச சேதோவிமுத்திங்
பஞ்ஞாவிமுத்திங் யதா²பூ⁴தங் நப்பஜானாதி – யத்த²ஸ்ஸ தே பாபகா அகுஸலா த⁴ம்மா
அபரிஸேஸா நிருஜ்ஜ²ந்தி. ஸோ ஏவங் அனுரோத⁴விரோத⁴ங் ஸமாபன்னோ யங் கிஞ்சி
வேத³னங் வேதே³தி ஸுக²ங் வா து³க்க²ங் வா அது³க்க²மஸுக²ங் வா, ஸோ தங்
வேத³னங் அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ தங் வேத³னங்
அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ உப்பஜ்ஜதி நந்தீ³ .
யா வேத³னாஸு நந்தீ³ தது³பாதா³னங், தஸ்ஸுபாதா³னபச்சயா ப⁴வோ, ப⁴வபச்சயா
ஜாதி, ஜாதிபச்சயா ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி.
ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. ஸோதேன ஸத்³த³ங்
ஸுத்வா…பே॰… கா⁴னேன க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰…
காயேன பொ²ட்ட²ப்³ப³ங் பு²ஸித்வா…பே॰… மனஸா த⁴ம்மங் விஞ்ஞாய பியரூபே த⁴ம்மே
ஸாரஜ்ஜதி, அப்பியரூபே த⁴ம்மே ப்³யாபஜ்ஜதி, அனுபட்டி²தகாயஸதி ச விஹரதி
பரித்தசேதஸோ. தஞ்ச சேதோவிமுத்திங் பஞ்ஞாவிமுத்திங் யதா²பூ⁴தங் நப்பஜானாதி –
யத்த²ஸ்ஸ தே பாபகா அகுஸலா த⁴ம்மா அபரிஸேஸா நிருஜ்ஜ²ந்தி. ஸோ ஏவங்
அனுரோத⁴விரோத⁴ங் ஸமாபன்னோ யங் கிஞ்சி வேத³னங் வேதே³தி ஸுக²ங் வா து³க்க²ங்
வா அது³க்க²மஸுக²ங் வா, ஸோ தங் வேத³னங் அபி⁴னந்த³தி அபி⁴வத³தி அஜ்ஜோ²ஸாய
திட்ட²தி. தஸ்ஸ தங் வேத³னங் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ
உப்பஜ்ஜதி நந்தீ³. யா வேத³னாஸு நந்தீ³ தது³பாதா³னங், தஸ்ஸுபாதா³னபச்சயா
ப⁴வோ, ப⁴வபச்சயா ஜாதி, ஜாதிபச்சயா ஜராமரணங்
ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ
து³க்க²க்க²ந்த⁴ஸ்ஸ ஸமுத³யோ ஹோதி.
410.
‘‘இத⁴, பி⁴க்க²வே, ததா²க³தோ லோகே உப்பஜ்ஜதி அரஹங் ஸம்மாஸம்பு³த்³தோ⁴
விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா²
தே³வமனுஸ்ஸானங் பு³த்³தோ⁴ ப⁴க³வா. ஸோ இமங் லோகங் ஸதே³வகங் ஸமாரகங்
ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா
ஸச்சி²கத்வா பவேதே³தி. ஸோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங்
பரியோஸானகல்யாணங் ஸாத்த²ங் ஸப்³யஞ்ஜனங்; கேவலபரிபுண்ணங் பரிஸுத்³த⁴ங்
ப்³ரஹ்மசரியங் பகாஸேதி. தங் த⁴ம்மங் ஸுணாதி க³ஹபதி வா க³ஹபதிபுத்தோ வா
அஞ்ஞதரஸ்மிங் வா குலே பச்சாஜாதோ. ஸோ தங் த⁴ம்மங் ஸுத்வா ததா²க³தே ஸத்³த⁴ங்
படிலப⁴தி. ஸோ தேன ஸத்³தா⁴படிலாபே⁴ன ஸமன்னாக³தோ இதி படிஸஞ்சிக்க²தி –
‘ஸம்பா³தோ⁴ க⁴ராவாஸோ ரஜாபதோ², அப்³போ⁴காஸோ பப்³ப³ஜ்ஜா. நயித³ங் ஸுகரங்
அகா³ரங் அஜ்ஜா²வஸதா ஏகந்தபரிபுண்ணங் ஏகந்தபரிஸுத்³த⁴ங் ஸங்க²லிகி²தங்
ப்³ரஹ்மசரியங் சரிதுங். யங்னூனாஹங் கேஸமஸ்ஸுங்
ஓஹாரெத்வா, காஸாயானி வத்தா²னி அச்சா²தெ³த்வா, அகா³ரஸ்மா அனகா³ரியங்
பப்³ப³ஜெய்ய’’’ந்தி. ஸோ அபரேன ஸமயேன அப்பங் வா போ⁴க³க்க²ந்த⁴ங் பஹாய,
மஹந்தங் வா போ⁴க³க்க²ந்த⁴ங் பஹாய, அப்பங் வா ஞாதிபரிவட்டங் பஹாய, மஹந்தங்
வா ஞாதிபரிவட்டங் பஹாய, கேஸமஸ்ஸுங் ஓஹாரெத்வா, காஸாயானி வத்தா²னி
அச்சா²தெ³த்வா, அகா³ரஸ்மா அனகா³ரியங் பப்³ப³ஜதி.
411.
‘‘ஸோ ஏவங் பப்³ப³ஜிதோ ஸமானோ பி⁴க்கூ²னங் ஸிக்கா²ஸாஜீவஸமாபன்னோ பாணாதிபாதங்
பஹாய பாணாதிபாதா படிவிரதோ ஹோதி, நிஹிதத³ண்டோ³ நிஹிதஸத்தோ² லஜ்ஜீ த³யாபன்னோ
ஸப்³ப³பாணபூ⁴தஹிதானுகம்பீ விஹரதி.
‘‘அதி³ன்னாதா³னங் பஹாய அதி³ன்னாதா³னா படிவிரதோ ஹோதி, தி³ன்னாதா³யீ தி³ன்னபாடிகங்கீ² அதே²னேன ஸுசிபூ⁴தேன அத்தனா விஹரதி.
‘‘அப்³ரஹ்மசரியங் பஹாய ப்³ரஹ்மசாரீ ஹோதி, ஆராசாரீ விரதோ மேது²னா கா³மத⁴ம்மா.
‘‘முஸாவாத³ங் பஹாய முஸாவாதா³ படிவிரதோ ஹோதி, ஸச்சவாதீ³ ஸச்சஸந்தோ⁴ தே²தோ பச்சயிகோ அவிஸங்வாத³கோ லோகஸ்ஸ.
‘‘பிஸுணங் வாசங் பஹாய பிஸுணாய வாசாய படிவிரதோ ஹோதி –
இதோ ஸுத்வா ந அமுத்ர அக்கா²தா இமேஸங் பே⁴தா³ய, அமுத்ர வா ஸுத்வா ந இமேஸங்
அக்கா²தா அமூஸங் பே⁴தா³ய. இதி பி⁴ன்னானங் வா ஸந்தா⁴தா, ஸஹிதானங் வா
அனுப்பதா³தா ஸமக்³கா³ராமோ ஸமக்³க³ரதோ ஸமக்³க³னந்தீ³, ஸமக்³க³கரணிங் வாசங்
பா⁴ஸிதா ஹோதி.
‘‘ப²ருஸங் வாசங் பஹாய ப²ருஸாய வாசாய படிவிரதோ ஹோதி –
யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா
ப³ஹுஜனமனாபா ததா²ரூபிங் வாசங் பா⁴ஸிதா ஹோதி.
‘‘ஸம்ப²ப்பலாபங் பஹாய ஸம்ப²ப்பலாபா படிவிரதோ ஹோதி,
காலவாதீ³ பூ⁴தவாதீ³ அத்த²வாதீ³ த⁴ம்மவாதீ³ வினயவாதீ³, நிதா⁴னவதிங் வாசங்
பா⁴ஸிதா காலேன, ஸாபதே³ஸங் பரியந்தவதிங் அத்த²ஸங்ஹிதங்.
‘‘ஸோ
பீ³ஜகா³மபூ⁴தகா³மஸமாரம்பா⁴ படிவிரதோ ஹோதி, ஏகப⁴த்திகோ ஹோதி ரத்தூபரதோ,
விரதோ விகாலபோ⁴ஜனா. நச்சகீ³தவாதி³தவிஸூகத³ஸ்ஸனா படிவிரதோ ஹோதி,
மாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னா படிவிரதோ ஹோதி, உச்சாஸயனமஹாஸயனா
படிவிரதோ ஹோதி, ஜாதரூபரஜதபடிக்³க³ஹணா படிவிரதோ ஹோதி, ஆமகத⁴ஞ்ஞபடிக்³க³ஹணா
படிவிரதோ ஹோதி, ஆமகமங்ஸபடிக்³க³ஹணா படிவிரதோ ஹோதி,
இத்தி²குமாரிகபடிக்³க³ஹணா படிவிரதோ ஹோதி, தா³ஸிதா³ஸபடிக்³க³ஹணா படிவிரதோ
ஹோதி, அஜேளகபடிக்³க³ஹணா படிவிரதோ ஹோதி, குக்குடஸூகரபடிக்³க³ஹணா படிவிரதோ
ஹோதி, ஹத்தி²க³வாஸ்ஸவளவபடிக்³க³ஹணா படிவிரதோ ஹோதி,
கெ²த்தவத்து²படிக்³க³ஹணா படிவிரதோ ஹோதி, தூ³தெய்யபஹிணக³மனானுயோகா³ படிவிரதோ
ஹோதி, கயவிக்கயா படிவிரதோ ஹோதி, துலாகூடகங்ஸகூடமானகூடா படிவிரதோ ஹோதி,
உக்கோடனவஞ்சன-நிகதி-ஸாசியோகா³ படிவிரதோ ஹோதி,
சே²த³ன-வத⁴ப³ந்த⁴னவிபராமோஸ-ஆலோப-ஸஹஸாகாரா படிவிரதோ ஹோதி [பஸ்ஸ ம॰ நி॰ 1.293 சூளஹத்தி²பதோ³பமே].
‘‘ஸோ ஸந்துட்டோ² ஹோதி காயபரிஹாரிகேன சீவரேன குச்சி²பரிஹாரிகேன பிண்ட³பாதேன. ஸோ யேன யேனேவ பக்கமதி ஸமாதா³யேவ பக்கமதி .
ஸெய்யதா²பி நாம பக்கீ² ஸகுணோ யேன யேனேவ டே³தி ஸபத்தபா⁴ரோவ டே³தி, ஏவமேவ
பி⁴க்கு² ஸந்துட்டோ² ஹோதி காயபரிஹாரிகேன சீவரேன, குச்சி²பரிஹாரிகேன
பிண்ட³பாதேன. ஸோ யேன யேனேவ பக்கமதி ஸமாதா³யேவ பக்கமதி. ஸோ இமினா அரியேன ஸீலக்க²ந்தே⁴ன ஸமன்னாக³தோ அஜ்ஜ²த்தங் அனவஜ்ஜஸுக²ங் படிஸங்வேதே³தி.
‘‘ஸோ சக்கு²னா ரூபங் தி³ஸ்வா ந நிமித்தக்³கா³ஹீ ஹோதி
நானுப்³யஞ்ஜனக்³கா³ஹீ. யத்வாதி⁴கரணமேனங் சக்கு²ந்த்³ரியங் அஸங்வுதங்
விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங் தஸ்ஸ
ஸங்வராய படிபஜ்ஜதி, ரக்க²தி சக்கு²ந்த்³ரியங், சக்கு²ந்த்³ரியே ஸங்வரங்
ஆபஜ்ஜதி. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…பே॰…
ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங் பு²ஸித்வா…பே॰… மனஸா
த⁴ம்மங் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ.
யத்வாதி⁴கரணமேனங் மனிந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா
பாபகா அகுஸலா த⁴ம்மா அன்வாஸ்ஸவெய்யுங் தஸ்ஸ ஸங்வராய படிபஜ்ஜதி, ரக்க²தி
மனிந்த்³ரியங் மனிந்த்³ரியே ஸங்வரங் ஆபஜ்ஜதி. ஸோ இமினா அரியேன
இந்த்³ரியஸங்வரேன ஸமன்னாக³தோ அஜ்ஜ²த்தங் அப்³யாஸேகஸுக²ங் படிஸங்வேதே³தி.
‘‘ஸோ அபி⁴க்கந்தே படிக்கந்தே ஸம்பஜானகாரீ ஹோதி, ஆலோகிதே விலோகிதே ஸம்பஜானகாரீ ஹோதி ,
ஸமிஞ்ஜிதே பஸாரிதே ஸம்பஜானகாரீ ஹோதி, ஸங்கா⁴டிபத்தசீவரதா⁴ரணே ஸம்பஜானகாரீ
ஹோதி, அஸிதே பீதே கா²யிதே ஸாயிதே ஸம்பஜானகாரீ ஹோதி, உச்சாரபஸ்ஸாவகம்மே
ஸம்பஜானகாரீ ஹோதி, க³தே டி²தே நிஸின்னே ஸுத்தே ஜாக³ரிதே பா⁴ஸிதே
துண்ஹீபா⁴வே ஸம்பஜானகாரீ ஹோதி.
412. ‘‘ஸோ இமினா ச அரியேன ஸீலக்க²ந்தே⁴ன ஸமன்னாக³தோ, (இமாய ச அரியாய ஸந்துட்டி²யா ஸமன்னாக³தோ) [பஸ்ஸ ம॰ நி॰ 1.296 சூளஹத்தி²பதோ³பமே],
இமினா ச அரியேன இந்த்³ரியஸங்வரேன ஸமன்னாக³தோ, இமினா ச அரியேன
ஸதிஸம்பஜஞ்ஞேன ஸமன்னாக³தோ, விவித்தங் ஸேனாஸனங் ப⁴ஜதி – அரஞ்ஞங் ருக்க²மூலங்
பப்³ப³தங் கந்த³ரங் கி³ரிகு³ஹங் ஸுஸானங் வனபத்த²ங் அப்³போ⁴காஸங்
பலாலபுஞ்ஜங். ஸோ பச்சா²ப⁴த்தங் பிண்ட³பாதபடிக்கந்தோ நிஸீத³தி பல்லங்கங்
ஆபு⁴ஜித்வா, உஜுங் காயங் பணிதா⁴ய, பரிமுக²ங் ஸதிங் உபட்ட²பெத்வா. ஸோ
அபி⁴ஜ்ஜ²ங் லோகே பஹாய விக³தாபி⁴ஜ்ஜே²ன சேதஸா விஹரதி, அபி⁴ஜ்ஜா²ய சித்தங்
பரிஸோதே⁴தி; ப்³யாபாத³பதோ³ஸங் பஹாய
அப்³யாபன்னசித்தோ விஹரதி, ஸப்³ப³பாணபூ⁴தஹிதானுகம்பீ, ப்³யாபாத³பதோ³ஸா
சித்தங் பரிஸோதே⁴தி; தீ²னமித்³த⁴ங் பஹாய விக³ததீ²னமித்³தோ⁴ விஹரதி
ஆலோகஸஞ்ஞீ, ஸதோ ஸம்பஜானோ, தீ²னமித்³தா⁴ சித்தங் பரிஸோதே⁴தி;
உத்³த⁴ச்சகுக்குச்சங் பஹாய அனுத்³த⁴தோ விஹரதி அஜ்ஜ²த்தங் வூபஸந்தசித்தோ,
உத்³த⁴ச்சகுக்குச்சா சித்தங் பரிஸோதே⁴தி; விசிகிச்ச²ங் பஹாய
திண்ணவிசிகிச்சோ² விஹரதி அகத²ங்கதீ² குஸலேஸு த⁴ம்மேஸு, விசிகிச்சா²ய
சித்தங் பரிஸோதே⁴தி.
413. ‘‘ஸோ
இமே பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே, விவிச்சேவ
காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங்
பட²மங் ஜா²னங் உபஸம்பஜ்ஜ விஹரதி. புன சபரங், பி⁴க்க²வே, பி⁴க்கு²
விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங்
அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங்…பே॰… ததியங்
ஜா²னங்…பே॰… சதுத்த²ங் ஜா²னங் உபஸம்பஜ்ஜ விஹரதி.
414.
‘‘ஸோ சக்கு²னா ரூபங் தி³ஸ்வா பியரூபே ரூபே ந ஸாரஜ்ஜதி, அப்பியரூபே ரூபே ந
ப்³யாபஜ்ஜதி, உபட்டி²தகாயஸதி ச விஹரதி அப்பமாணசேதஸோ. தஞ்ச சேதோவிமுத்திங்
பஞ்ஞாவிமுத்திங் யதா²பூ⁴தங் பஜானாதி – யத்த²ஸ்ஸ தே பாபகா அகுஸலா த⁴ம்மா
அபரிஸேஸா நிருஜ்ஜ²ந்தி. ஸோ ஏவங் அனுரோத⁴விரோத⁴விப்பஹீனோ
யங் கிஞ்சி வேத³னங் வேதே³தி, ஸுக²ங் வா து³க்க²ங் வா அது³க்க²மஸுக²ங் வா,
ஸோ தங் வேத³னங் நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ தங்
வேத³னங் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ யா வேத³னாஸு நந்தீ³
ஸா நிருஜ்ஜ²தி. தஸ்ஸ நந்தீ³னிரோதா⁴ உபாதா³னநிரோதோ⁴, உபாதா³னநிரோதா⁴
ப⁴வனிரோதோ⁴, ப⁴வனிரோதா⁴ ஜாதினிரோதோ⁴, ஜாதினிரோதா⁴ ஜராமரணங்
ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ
து³க்க²க்க²ந்த⁴ஸ்ஸ நிரோதோ⁴ ஹோதி. ஸோதேன ஸத்³த³ங் ஸுத்வா…பே॰… கா⁴னேன
க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங்
பு²ஸித்வா…பே॰… மனஸா த⁴ம்மங் விஞ்ஞாய பியரூபே
த⁴ம்மே ந ஸாரஜ்ஜதி, அப்பியரூபே த⁴ம்மே ந ப்³யாபஜ்ஜதி, உபட்டி²தகாயஸதி ச
விஹரதி அப்பமாணசேதஸோ, தஞ்ச சேதோவிமுத்திங் பஞ்ஞாவிமுத்திங் யதா²பூ⁴தங்
பஜானாதி – யத்த²ஸ்ஸ தே பாபகா அகுஸலா த⁴ம்மா அபரிஸேஸா நிருஜ்ஜ²ந்தி. ஸோ ஏவங்
அனுரோத⁴விரோத⁴விப்பஹீனோ யங் கிஞ்சி வேத³னங் வேதே³தி, ஸுக²ங் வா து³க்க²ங்
வா அது³க்க²மஸுக²ங் வா, ஸோ தங் வேத³னங் நாபி⁴னந்த³தி நாபி⁴வத³தி
நாஜ்ஜோ²ஸாய திட்ட²தி. தஸ்ஸ தங் வேத³னங் அனபி⁴னந்த³தோ அனபி⁴வத³தோ
அனஜ்ஜோ²ஸாய திட்ட²தோ யா வேத³னாஸு நந்தீ³ ஸா நிருஜ்ஜ²தி. தஸ்ஸ நந்தீ³னிரோதா⁴
உபாதா³னநிரோதோ⁴, உபாதா³னநிரோதா⁴ ப⁴வனிரோதோ⁴, ப⁴வனிரோதா⁴ ஜாதினிரோதோ⁴,
ஜாதினிரோதா⁴ ஜராமரணங் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி.
ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி. இமங் கோ² மே தும்ஹே,
பி⁴க்க²வே, ஸங்கி²த்தேன தண்ஹாஸங்க²யவிமுத்திங் தா⁴ரேத², ஸாதிங் பன
பி⁴க்கு²ங் கேவட்டபுத்தங் மஹாதண்ஹாஜாலதண்ஹாஸங்கா⁴டப்படிமுக்க’’ந்தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
மஹாதண்ஹாஸங்க²யஸுத்தங் நிட்டி²தங் அட்ட²மங்.
9. மஹாஅஸ்ஸபுரஸுத்தங்
415. ஏவங்
மே ஸுதங் – ஏகங் ஸமயங் ப⁴க³வா அங்கே³ஸு விஹரதி அஸ்ஸபுரங் நாம அங்கா³னங்
நிக³மோ. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘ஸமணா ஸமணாதி வோ, பி⁴க்க²வே, ஜனோ ஸஞ்ஜானாதி. தும்ஹே ச
பன ‘கே தும்ஹே’தி புட்டா² ஸமானா ‘ஸமணாம்ஹா’தி படிஜானாத²; தேஸங் வோ,
பி⁴க்க²வே, ஏவங்ஸமஞ்ஞானங் ஸதங் ஏவங்படிஞ்ஞானங் ஸதங் ‘யே த⁴ம்மா ஸமணகரணா ச
ப்³ராஹ்மணகரணா ச தே த⁴ம்மே ஸமாதா³ய வத்திஸ்ஸாம, ஏவங் நோ அயங் அம்ஹாகங்
ஸமஞ்ஞா ச ஸச்சா ப⁴விஸ்ஸதி படிஞ்ஞா ச பூ⁴தா. யேஸஞ்ச மயங்
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரங் பரிபு⁴ஞ்ஜாம, தேஸங் தே
காரா அம்ஹேஸு மஹப்ப²லா ப⁴விஸ்ஸந்தி மஹானிஸங்ஸா, அம்ஹாகஞ்சேவாயங்
பப்³ப³ஜ்ஜா அவஞ்ஜா² ப⁴விஸ்ஸதி ஸப²லா ஸஉத்³ரயா’தி. ஏவஞ்ஹி வோ, பி⁴க்க²வே,
ஸிக்கி²தப்³ப³ங்.
416.
‘‘கதமே ச, பி⁴க்க²வே, த⁴ம்மா ஸமணகரணா ச ப்³ராஹ்மணகரணா ச? ‘ஹிரொத்தப்பேன
ஸமன்னாக³தா ப⁴விஸ்ஸாமா’தி ஏவஞ்ஹி வோ, பி⁴க்க²வே, ஸிக்கி²தப்³ப³ங். ஸியா கோ²
பன, பி⁴க்க²வே, தும்ஹாகங் ஏவமஸ்ஸ – ‘ஹிரொத்தப்பேனம்ஹ ஸமன்னாக³தா ,
அலமெத்தாவதா கதமெத்தாவதா, அனுப்பத்தோ நோ ஸாமஞ்ஞத்தோ², நத்தி² நோ கிஞ்சி
உத்தரிங் கரணீய’ந்தி தாவதகேனேவ துட்டி²ங் ஆபஜ்ஜெய்யாத². ஆரோசயாமி வோ,
பி⁴க்க²வே , படிவேத³யாமி வோ, பி⁴க்க²வே – ‘மா வோ ஸாமஞ்ஞத்தி²கானங் ஸதங் ஸாமஞ்ஞத்தோ² பரிஹாயி, ஸதி உத்தரிங் கரணீயே’.
417. ‘‘கிஞ்ச, பி⁴க்க²வே, உத்தரிங் கரணீயங்? ‘பரிஸுத்³தோ⁴ நோ காயஸமாசாரோ ப⁴விஸ்ஸதி உத்தானோ விவடோ ந ச சி²த்³த³வா ஸங்வுதோ ச. தாய ச பன பரிஸுத்³த⁴காயஸமாசாரதாய நேவத்தானுக்கங்ஸெஸ்ஸாம ந பரங் வம்பெ⁴ஸ்ஸாமா’தி [நேவத்தானுக்கங்ஸிஸ்ஸாம ந பரங் வம்பி⁴ஸ்ஸாமாதி (ஸப்³ப³த்த²)]
ஏவஞ்ஹி வோ, பி⁴க்க²வே, ஸிக்கி²தப்³ப³ங். ஸியா கோ² பன, பி⁴க்க²வே,
தும்ஹாகங் ஏவமஸ்ஸ – ‘ஹிரொத்தப்பேனம்ஹ ஸமன்னாக³தா, பரிஸுத்³தோ⁴ நோ
காயஸமாசாரோ; அலமெத்தாவதா கதமெத்தாவதா, அனுப்பத்தோ நோ ஸாமஞ்ஞத்தோ², நத்தி²
நோ கிஞ்சி உத்தரிங் கரணீய’ந்தி தாவதகேனேவ துட்டி²ங்
ஆபஜ்ஜெய்யாத². ஆரோசயாமி வோ, பி⁴க்க²வே, படிவேத³யாமி வோ, பி⁴க்க²வே – ‘மா
வோ ஸாமஞ்ஞத்தி²கானங் ஸதங் ஸாமஞ்ஞத்தோ² பரிஹாயி, ஸதி உத்தரிங் கரணீயே’.
418.
‘‘கிஞ்ச, பி⁴க்க²வே, உத்தரிங் கரணீயங்? ‘பரிஸுத்³தோ⁴ நோ வசீஸமாசாரோ
ப⁴விஸ்ஸதி உத்தானோ விவடோ ந ச சி²த்³த³வா ஸங்வுதோ ச. தாய ச பன
பரிஸுத்³த⁴வசீஸமாசாரதாய நேவத்தானுக்கங்ஸெஸ்ஸாம ந பரங் வம்பெ⁴ஸ்ஸாமா’தி
ஏவஞ்ஹி வோ, பி⁴க்க²வே, ஸிக்கி²தப்³ப³ங். ஸியா கோ² பன, பி⁴க்க²வே, தும்ஹாகங்
ஏவமஸ்ஸ – ‘ஹிரொத்தப்பேனம்ஹ ஸமன்னாக³தா, பரிஸுத்³தோ⁴ நோ காயஸமாசாரோ,
பரிஸுத்³தோ⁴ வசீஸமாசாரோ; அலமெத்தாவதா கதமெத்தாவதா, அனுப்பத்தோ நோ
ஸாமஞ்ஞத்தோ², நத்தி² நோ கிஞ்சி உத்தரிங் கரணீய’ந்தி தாவதகேனேவ துட்டி²ங்
ஆபஜ்ஜெய்யாத². ஆரோசயாமி வோ , பி⁴க்க²வே, படிவேத³யாமி வோ, பி⁴க்க²வே – ‘மா வோ ஸாமஞ்ஞத்தி²கானங் ஸதங் ஸாமஞ்ஞத்தோ² பரிஹாயி, ஸதி உத்தரிங் கரணீயே’.
419. ‘‘கிஞ்ச, பி⁴க்க²வே, உத்தரிங் கரணீயங்? ‘பரிஸுத்³தோ⁴ நோ மனோஸமாசாரோ ப⁴விஸ்ஸதி உத்தானோ விவடோ ந ச சி²த்³த³வா ஸங்வுதோ ச. தாய ச பன
பரிஸுத்³த⁴மனோஸமாசாரதாய நேவத்தானுக்கங்ஸெஸ்ஸாம ந பரங் வம்பெ⁴ஸ்ஸாமா’தி
ஏவஞ்ஹி வோ, பி⁴க்க²வே, ஸிக்கி²தப்³ப³ங். ஸியா கோ² பன, பி⁴க்க²வே, தும்ஹாகங்
ஏவமஸ்ஸ – ‘ஹிரொத்தப்பேனம்ஹ ஸமன்னாக³தா, பரிஸுத்³தோ⁴ நோ காயஸமாசாரோ,
பரிஸுத்³தோ⁴ வசீஸமாசாரோ, பரிஸுத்³தோ⁴ மனோஸமாசாரோ; அலமெத்தாவதா கதமெத்தாவதா,
அனுப்பத்தோ நோ ஸாமஞ்ஞத்தோ², நத்தி² நோ கிஞ்சி உத்தரிங் கரணீய’ந்தி
தாவதகேனேவ துட்டி²ங் ஆபஜ்ஜெய்யாத². ஆரோசயாமி வோ, பி⁴க்க²வே, படிவேத³யாமி
வோ, பி⁴க்க²வே – ‘மா வோ ஸாமஞ்ஞத்தி²கானங் ஸதங் ஸாமஞ்ஞத்தோ² பரிஹாயி, ஸதி
உத்தரிங் கரணீயே’.
420.
‘‘கிஞ்ச, பி⁴க்க²வே, உத்தரிங் கரணீயங்? ‘பரிஸுத்³தோ⁴ நோ ஆஜீவோ ப⁴விஸ்ஸதி
உத்தானோ விவடோ ந ச சி²த்³த³வா ஸங்வுதோ ச. தாய ச பன பரிஸுத்³தா⁴ஜீவதாய
நேவத்தானுக்கங்ஸெஸ்ஸாம ந பரங் வம்பெ⁴ஸ்ஸாமா’தி ஏவஞ்ஹி வோ, பி⁴க்க²வே,
ஸிக்கி²தப்³ப³ங். ஸியா கோ² பன, பி⁴க்க²வே, தும்ஹாகங் ஏவமஸ்ஸ –
‘ஹிரொத்தப்பேனம்ஹ ஸமன்னாக³தா, பரிஸுத்³தோ⁴ நோ காயஸமாசாரோ, பரிஸுத்³தோ⁴
வசீஸமாசாரோ, பரிஸுத்³தோ⁴ மனோஸமாசாரோ, பரிஸுத்³தோ⁴ ஆஜீவோ; அலமெத்தாவதா கதமெத்தாவதா, அனுப்பத்தோ நோ ஸாமஞ்ஞத்தோ² , நத்தி² நோ கிஞ்சி உத்தரிங் கரணீய’ந்தி
தாவதகேனேவ துட்டி²ங் ஆபஜ்ஜெய்யாத². ஆரோசயாமி வோ, பி⁴க்க²வே, படிவேத³யாமி
வோ, பி⁴க்க²வே – ‘மா வோ ஸாமஞ்ஞத்தி²கானங் ஸதங் ஸாமஞ்ஞத்தோ² பரிஹாயி, ஸதி
உத்தரிங் கரணீயே’.
421.
‘‘கிஞ்ச, பி⁴க்க²வே, உத்தரிங் கரணீயங்? ‘இந்த்³ரியேஸு கு³த்தத்³வாரா
ப⁴விஸ்ஸாம; சக்கு²னா ரூபங் தி³ஸ்வா ந நிமித்தக்³கா³ஹீ
நானுப்³யஞ்ஜனக்³கா³ஹீ. யத்வாதி⁴கரணமேனங் சக்கு²ந்த்³ரியங் அஸங்வுதங்
விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ
ஸங்வராய படிபஜ்ஜிஸ்ஸாம, ரக்கி²ஸ்ஸாம சக்கு²ந்த்³ரியங், சக்கு²ந்த்³ரியே
ஸங்வரங் ஆபஜ்ஜிஸ்ஸாம. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங்
கா⁴யித்வா…பே॰… ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங்
பு²ஸித்வா…பே॰… மனஸா த⁴ம்மங் விஞ்ஞாய ந நிமித்தக்³கா³ஹீ
நானுப்³யஞ்ஜனக்³கா³ஹீ. யத்வாதி⁴கரணமேனங் மனிந்த்³ரியங் அஸங்வுதங் விஹரந்தங்
அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய
படிபஜ்ஜிஸ்ஸாம, ரக்கி²ஸ்ஸாம மனிந்த்³ரியங், மனிந்த்³ரியே ஸங்வரங்
ஆபஜ்ஜிஸ்ஸாமா’தி ஏவஞ்ஹி வோ, பி⁴க்க²வே, ஸிக்கி²தப்³ப³ங். ஸியா கோ² பன,
பி⁴க்க²வே, தும்ஹாகங் ஏவமஸ்ஸ – ‘ஹிரொத்தப்பேனம்ஹ
ஸமன்னாக³தா, பரிஸுத்³தோ⁴ நோ காயஸமாசாரோ, பரிஸுத்³தோ⁴ வசீஸமாசாரோ,
பரிஸுத்³தோ⁴ மனோஸமாசாரோ, பரிஸுத்³தோ⁴ ஆஜீவோ, இந்த்³ரியேஸும்ஹ
கு³த்தத்³வாரா; அலமெத்தாவதா கதமெத்தாவதா, அனுப்பத்தோ நோ ஸாமஞ்ஞத்தோ²,
நத்தி² நோ கிஞ்சி உத்தரிங் கரணீய’ந்தி தாவதகேனேவ துட்டி²ங்
ஆபஜ்ஜெய்யாத². ஆரோசயாமி வோ, பி⁴க்க²வே, படிவேத³யாமி வோ, பி⁴க்க²வே – ‘மா
வோ ஸாமஞ்ஞத்தி²கானங் ஸதங் ஸாமஞ்ஞத்தோ² பரிஹாயி, ஸதி உத்தரிங் கரணீயே’.
422.
‘‘கிஞ்ச, பி⁴க்க²வே, உத்தரிங் கரணீயங்? ‘போ⁴ஜனே மத்தஞ்ஞுனோ ப⁴விஸ்ஸாம,
படிஸங்கா² யோனிஸோ ஆஹாரங் ஆஹரிஸ்ஸாம, நேவ த³வாய ந மதா³ய ந மண்ட³னாய ந
விபூ⁴ஸனாய யாவதே³வ இமஸ்ஸ காயஸ்ஸ டி²தியா யாபனாய, விஹிங்ஸூபரதியா,
ப்³ரஹ்மசரியானுக்³க³ஹாய, இதி புராணஞ்ச வேத³னங் படிஹங்கா²ம நவஞ்ச வேத³னங் ந
உப்பாதெ³ஸ்ஸாம, யாத்ரா ச நோ ப⁴விஸ்ஸதி, அனவஜ்ஜதா ச, பா²ஸு விஹாரோ சா’தி
ஏவஞ்ஹி வோ, பி⁴க்க²வே, ஸிக்கி²தப்³ப³ங். ஸியா கோ² பன, பி⁴க்க²வே, தும்ஹாகங்
ஏவமஸ்ஸ – ‘ஹிரொத்தப்பேனம்ஹ ஸமன்னாக³தா, பரிஸுத்³தோ⁴ நோ காயஸமாசாரோ,
பரிஸுத்³தோ⁴ வசீஸமாசாரோ, பரிஸுத்³தோ⁴ மனோஸமாசாரோ, பரிஸுத்³தோ⁴ ஆஜீவோ,
இந்த்³ரியேஸும்ஹ கு³த்தத்³வாரா, போ⁴ஜனே மத்தஞ்ஞுனோ; அலமெத்தாவதா
கதமெத்தாவதா, அனுப்பத்தோ நோ ஸாமஞ்ஞத்தோ², நத்தி² நோ கிஞ்சி உத்தரிங்
கரணீய’ந்தி தாவதகேனேவ துட்டி²ங் ஆபஜ்ஜெய்யாத². ஆரோசயாமி வோ, பி⁴க்க²வே,
படிவேத³யாமி வோ, பி⁴க்க²வே – ‘மா வோ, ஸாமஞ்ஞத்தி²கானங் ஸதங் ஸாமஞ்ஞத்தோ²
பரிஹாயி ஸதி உத்தரிங் கரணீயே’.
423. ‘‘கிஞ்ச ,
பி⁴க்க²வே, உத்தரிங் கரணீயங்? ‘ஜாக³ரியங் அனுயுத்தா ப⁴விஸ்ஸாம, தி³வஸங்
சங்கமேன நிஸஜ்ஜாய ஆவரணீயேஹி த⁴ம்மேஹி சித்தங் பரிஸோதெ⁴ஸ்ஸாம. ரத்தியா
பட²மங் யாமங் சங்கமேன நிஸஜ்ஜாய ஆவரணீயேஹி த⁴ம்மேஹி
சித்தங் பரிஸோதெ⁴ஸ்ஸாம. ரத்தியா மஜ்ஜி²மங் யாமங் த³க்கி²ணேன பஸ்ஸேன
ஸீஹஸெய்யங் கப்பெஸ்ஸாம பாதே³ பாத³ங் அச்சாதா⁴ய, ஸதோ ஸம்பஜானோ உட்டா²னஸஞ்ஞங்
மனஸி கரித்வா. ரத்தியா பச்சி²மங் யாமங் பச்சுட்டா²ய சங்கமேன நிஸஜ்ஜாய
ஆவரணீயேஹி த⁴ம்மேஹி சித்தங் பரிஸோதெ⁴ஸ்ஸாமா’தி, ஏவஞ்ஹி வோ, பி⁴க்க²வே,
ஸிக்கி²தப்³ப³ங். ஸியா கோ² பன, பி⁴க்க²வே, தும்ஹாகங் ஏவமஸ்ஸ –
‘ஹிரொத்தப்பேனம்ஹ ஸமன்னாக³தா, பரிஸுத்³தோ⁴ நோ காயஸமாசாரோ, பரிஸுத்³தோ⁴
வசீஸமாசாரோ, பரிஸுத்³தோ⁴ மனோஸமாசாரோ, பரிஸுத்³தோ⁴
ஆஜீவோ, இந்த்³ரியேஸும்ஹ கு³த்தத்³வாரா, போ⁴ஜனே மத்தஞ்ஞுனோ, ஜாக³ரியங்
அனுயுத்தா; அலமெத்தாவதா கதமெத்தாவதா, அனுப்பத்தோ நோ ஸாமஞ்ஞத்தோ², நத்தி² நோ
கிஞ்சி உத்தரிங் கரணீய’ந்தி, தாவதகேனேவ துட்டி²ங் ஆபஜ்ஜெய்யாத². ஆரோசயாமி
வோ, பி⁴க்க²வே, படிவேத³யாமி வோ, பி⁴க்க²வே – ‘மா வோ, ஸாமஞ்ஞத்தி²கானங் ஸதங்
ஸாமஞ்ஞத்தோ² பரிஹாயி ஸதி உத்தரிங் கரணீயே’.
424.
‘‘கிஞ்ச, பி⁴க்க²வே, உத்தரிங் கரணீயங்? ‘ஸதிஸம்பஜஞ்ஞேன ஸமன்னாக³தா
ப⁴விஸ்ஸாம, அபி⁴க்கந்தே படிக்கந்தே ஸம்பஜானகாரீ, ஆலோகிதே விலோகிதே
ஸம்பஜானகாரீ, ஸமிஞ்ஜிதே பஸாரிதே ஸம்பஜானகாரீ, ஸங்கா⁴டிபத்தசீவரதா⁴ரணே
ஸம்பஜானகாரீ, அஸிதே பீதே கா²யிதே ஸாயிதே ஸம்பஜானகாரீ, உச்சாரபஸ்ஸாவகம்மே
ஸம்பஜானகாரீ, க³தே டி²தே நிஸின்னே ஸுத்தே ஜாக³ரிதே பா⁴ஸிதே துண்ஹீபா⁴வே
ஸம்பஜானகாரீ’தி, ஏவஞ்ஹி வோ, பி⁴க்க²வே, ஸிக்கி²தப்³ப³ங். ஸியா கோ² பன,
பி⁴க்க²வே, தும்ஹாகங் ஏவமஸ்ஸ – ‘ஹிரொத்தப்பேனம்ஹ
ஸமன்னாக³தா, பரிஸுத்³தோ⁴ நோ காயஸமாசாரோ, பரிஸுத்³தோ⁴ வசீஸமாசாரோ,
பரிஸுத்³தோ⁴ மனோஸமாசாரோ, பரிஸுத்³தோ⁴ ஆஜீவோ, இந்த்³ரியேஸும்ஹ
கு³த்தத்³வாரா, போ⁴ஜனே மத்தஞ்ஞுனோ, ஜாக³ரியங் அனுயுத்தா, ஸதிஸம்பஜஞ்ஞேன
ஸமன்னாக³தா; அலமெத்தாவதா கதமெத்தாவதா, அனுப்பத்தோ நோ ஸாமஞ்ஞத்தோ², நத்தி²
நோ கிஞ்சி உத்தரிங் கரணீய’ந்தி தாவதகேனேவ துட்டி²ங் ஆபஜ்ஜெய்யாத². ஆரோசயாமி
வோ, பி⁴க்க²வே, படிவேத³யாமி வோ, பி⁴க்க²வே – ‘மா வோ, ஸாமஞ்ஞத்தி²கானங்
ஸதங் ஸாமஞ்ஞத்தோ² பரிஹாயி ஸதி உத்தரிங் கரணீயே’.
425.
‘‘கிஞ்ச, பி⁴க்க²வே, உத்தரிங் கரணீயங்? இத⁴, பி⁴க்க²வே, பி⁴க்கு²
விவித்தங் ஸேனாஸனங் ப⁴ஜதி – அரஞ்ஞங் ருக்க²மூலங் பப்³ப³தங் கந்த³ரங்
கி³ரிகு³ஹங் ஸுஸானங் வனப்பத்த²ங் அப்³போ⁴காஸங் பலாலபுஞ்ஜங். ஸோ
பச்சா²ப⁴த்தங் பிண்ட³பாதபடிக்கந்தோ நிஸீத³தி பல்லங்கங் ஆபு⁴ஜித்வா, உஜுங்
காயங் பணிதா⁴ய பரிமுக²ங் ஸதிங் உபட்ட²பெத்வா. ஸோ
அபி⁴ஜ்ஜ²ங் லோகே பஹாய விக³தாபி⁴ஜ்ஜே²ன சேதஸா விஹரதி, அபி⁴ஜ்ஜா²ய சித்தங்
பரிஸோதே⁴தி; ப்³யாபாத³பதோ³ஸங் பஹாய அப்³யாபன்னசித்தோ விஹரதி,
ஸப்³ப³பாணபூ⁴தஹிதானுகம்பீ , ப்³யாபாத³பதோ³ஸா சித்தங்
பரிஸோதே⁴தி; தீ²னமித்³த⁴ங் பஹாய விக³ததீ²னமித்³தோ⁴ விஹரதி, ஆலோகஸஞ்ஞீ ஸதோ
ஸம்பஜானோ, தீ²னமித்³தா⁴ சித்தங் பரிஸோதே⁴தி; உத்³த⁴ச்சகுக்குச்சங் பஹாய
அனுத்³த⁴தோ விஹரதி , அஜ்ஜ²த்தங் வூபஸந்தசித்தோ,
உத்³த⁴ச்சகுக்குச்சா சித்தங் பரிஸோதே⁴தி; விசிகிச்ச²ங் பஹாய
திண்ணவிசிகிச்சோ² விஹரதி, அகத²ங்கதீ² குஸலேஸு த⁴ம்மேஸு, விசிகிச்சா²ய
சித்தங் பரிஸோதே⁴தி.
426. ‘‘ஸெய்யதா²பி , பி⁴க்க²வே, புரிஸோ இணங் ஆதா³ய கம்மந்தே பயோஜெய்ய. தஸ்ஸ தே கம்மந்தா ஸமிஜ்ஜெ²ய்யுங் [ஸம்பஜ்ஜெய்யுங் (ஸ்யா॰ கங்॰ க॰)]. ஸோ யானி ச போராணானி இணமூலானி தானி ச ப்³யந்தீ [ப்³யந்திங் (க॰), ப்³யந்தி (பீ॰)]
கரெய்ய, ஸியா சஸ்ஸ உத்தரிங் அவஸிட்ட²ங் தா³ரப⁴ரணாய. தஸ்ஸ ஏவமஸ்ஸ – ‘அஹங்
கோ² புப்³பே³ இணங் ஆதா³ய கம்மந்தே பயோஜேஸிங், தஸ்ஸ மே தே கம்மந்தா
ஸமிஜ்ஜி²ங்ஸு. ஸோஹங் யானி ச போராணானி இணமூலானி தானி ச ப்³யந்தீ அகாஸிங்,
அத்தி² ச மே உத்தரிங் அவஸிட்ட²ங் தா³ரப⁴ரணாயா’தி. ஸோ ததோனிதா³னங் லபே⁴த²
பாமோஜ்ஜங், அதி⁴க³ச்செ²ய்ய ஸோமனஸ்ஸங்.
‘‘ஸெய்யதா²பி, பி⁴க்க²வே, புரிஸோ ஆபா³தி⁴கோ அஸ்ஸ
து³க்கி²தோ பா³ள்ஹகி³லானோ, ப⁴த்தஞ்சஸ்ஸ நச்சா²தெ³ய்ய, ந சஸ்ஸ காயே
ப³லமத்தா. ஸோ அபரேன ஸமயேன தம்ஹா ஆபா³தா⁴ முச்செய்ய, ப⁴த்தஞ்சஸ்ஸ சா²தெ³ய்ய,
ஸியா சஸ்ஸ காயே ப³லமத்தா. தஸ்ஸ ஏவமஸ்ஸ – ‘அஹங் கோ² புப்³பே³ ஆபா³தி⁴கோ
அஹோஸிங் து³க்கி²தோ பா³ள்ஹகி³லானோ, ப⁴த்தஞ்ச மே நச்சா²தே³ஸி, ந ச மே ஆஸி
காயே ப³லமத்தா, ஸொம்ஹி ஏதரஹி தம்ஹா ஆபா³தா⁴ முத்தோ, ப⁴த்தஞ்ச மே சா²தே³தி,
அத்தி² ச மே காயே ப³லமத்தா’தி. ஸோ ததோனிதா³னங் லபே⁴த² பாமோஜ்ஜங்,
அதி⁴க³ச்செ²ய்ய ஸோமனஸ்ஸங்.
‘‘ஸெய்யதா²பி, பி⁴க்க²வே, புரிஸோ ப³ந்த⁴னாகா³ரே ப³த்³தோ⁴ அஸ்ஸ. ஸோ அபரேன ஸமயேன தம்ஹா ப³ந்த⁴னா முச்செய்ய ஸொத்தி²னா அப்³ப⁴யேன [அப்³யயேன (ஸீ॰ பீ॰)], ந சஸ்ஸ கிஞ்சி போ⁴கா³னங் வயோ. தஸ்ஸ ஏவமஸ்ஸ – ‘அஹங் கோ² புப்³பே³ ப³ந்த⁴னாகா³ரே ப³த்³தோ⁴ அஹோஸிங், ஸொம்ஹி ஏதரஹி
தம்ஹா ப³ந்த⁴னா முத்தோ, ஸொத்தி²னா அப்³ப⁴யேன, நத்தி² ச மே கிஞ்சி
போ⁴கா³னங் வயோ’தி. ஸோ ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய
ஸோமனஸ்ஸங்.
‘‘ஸெய்யதா²பி , பி⁴க்க²வே,
புரிஸோ தா³ஸோ அஸ்ஸ அனத்தாதீ⁴னோ பராதீ⁴னோ ந யேனகாமங்க³மோ. ஸோ அபரேன ஸமயேன
தம்ஹா தா³ஸப்³யா முச்செய்ய அத்தாதீ⁴னோ அபராதீ⁴னோ பு⁴ஜிஸ்ஸோ யேனகாமங்க³மோ.
தஸ்ஸ ஏவமஸ்ஸ – ‘அஹங் கோ² புப்³பே³ தா³ஸோ அஹோஸிங் அனத்தாதீ⁴னோ பராதீ⁴னோ ந யேனகாமங்க³மோ, ஸொம்ஹி ஏதரஹி தம்ஹா தா³ஸப்³யா முத்தோ அத்தாதீ⁴னோ அபராதீ⁴னோ பு⁴ஜிஸ்ஸோ யேனகாமங்க³மோ’தி. ஸோ ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸங்.
‘‘ஸெய்யதா²பி, பி⁴க்க²வே, புரிஸோ ஸத⁴னோ ஸபோ⁴கோ³ கந்தாரத்³தா⁴னமக்³க³ங் படிபஜ்ஜெய்ய [ஸீலக்க²ந்த⁴வக்³க³பாளியா கிஞ்சி விஸதி³ஸங்].
ஸோ அபரேன ஸமயேன தம்ஹா கந்தாரா நித்த²ரெய்ய ஸொத்தி²னா அப்³ப⁴யேன, ந சஸ்ஸ
கிஞ்சி போ⁴கா³னங் வயோ. தஸ்ஸ ஏவமஸ்ஸ – ‘அஹங் கோ² புப்³பே³ ஸத⁴னோ ஸபோ⁴கோ³
கந்தாரத்³தா⁴னமக்³க³ங் படிபஜ்ஜிங். ஸொம்ஹி ஏதரஹி தம்ஹா கந்தாரா நித்தி²ண்ணோ
ஸொத்தி²னா அப்³ப⁴யேன, நத்தி² ச மே கிஞ்சி போ⁴கா³னங் வயோ’தி. ஸோ
ததோனிதா³னங் லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸங்.
‘‘ஏவமேவ கோ², பி⁴க்க²வே, பி⁴க்கு² யதா² இணங் யதா²
ரோக³ங் யதா² ப³ந்த⁴னாகா³ரங் யதா² தா³ஸப்³யங் யதா² கந்தாரத்³தா⁴னமக்³க³ங்,
இமே பஞ்ச நீவரணே அப்பஹீனே அத்தனி ஸமனுபஸ்ஸதி. ஸெய்யதா²பி, பி⁴க்க²வே,
ஆணண்யங் யதா² ஆரொக்³யங் யதா² ப³ந்த⁴னாமொக்க²ங் யதா² பு⁴ஜிஸ்ஸங் யதா²
கே²மந்தபூ⁴மிங்; ஏவமேவ பி⁴க்கு² இமே பஞ்ச நீவரணே பஹீனே அத்தனி ஸமனுபஸ்ஸதி.
427.
‘‘ஸோ இமே பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே,
விவிச்சேவ காமேஹி விவிச்ச அகுஸலேஹி த⁴ம்மேஹி, ஸவிதக்கங் ஸவிசாரங் விவேகஜங்
பீதிஸுக²ங் பட²மங் ஜா²னங் உபஸம்பஜ்ஜ விஹரதி. ஸோ இமமேவ காயங் விவேகஜேன
பீதிஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி
ஸப்³பா³வதோ காயஸ்ஸ விவேகஜேன பீதிஸுகே²ன அப்பு²டங் ஹோதி. ஸெய்யதா²பி,
பி⁴க்க²வே, த³க்கோ² ந்ஹாபகோ [நஹாபகோ (ஸீ॰ ஸ்யா॰ கங்॰ பீ॰)] வா ந்ஹாபகந்தேவாஸீ வா கங்ஸதா²லே ந்ஹானீயசுண்ணானி [நஹானீயசுண்ணானி (ஸீ॰ ஸ்யா॰ கங்॰ பீ॰)]
ஆகிரித்வா உத³கேன பரிப்போ²ஸகங் பரிப்போ²ஸகங் ஸன்னெய்ய. ஸாயங்
ந்ஹானீயபிண்டி³ ஸ்னேஹானுக³தா ஸ்னேஹபரேதா ஸந்தரபா³ஹிரா, பு²டா ஸ்னேஹேன ந ச
பக்³க⁴ரிணீ. ஏவமேவ கோ², பி⁴க்க²வே, பி⁴க்கு² இமமேவ காயங் விவேகஜேன
பீதிஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி
ஸப்³பா³வதோ காயஸ்ஸ விவேகஜேன பீதிஸுகே²ன அப்பு²டங் ஹோதி.
428. ‘‘புன சபரங், பி⁴க்க²வே, பி⁴க்கு² விதக்கவிசாரானங் வூபஸமா அஜ்ஜ²த்தங் ஸம்பஸாத³னங்
சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங் து³தியங்
ஜா²னங் உபஸம்பஜ்ஜ விஹரதி. ஸோ இமமேவ காயங் ஸமாதி⁴ஜேன பீதிஸுகே²ன
அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ
காயஸ்ஸ ஸமாதி⁴ஜேன பீதிஸுகே²ன அப்பு²டங் ஹோதி. ஸெய்யதா²பி, பி⁴க்க²வே,
உத³கரஹதோ³ உப்³பி⁴தோ³த³கோ [உப்³பி⁴தோத³கோ (க॰)]. தஸ்ஸ
நேவஸ்ஸ புரத்தி²மாய தி³ஸாய உத³கஸ்ஸ ஆயமுக²ங், ந பச்சி²மாய தி³ஸாய உத³கஸ்ஸ
ஆயமுக²ங், ந உத்தராய தி³ஸாய உத³கஸ்ஸ ஆயமுக²ங், ந த³க்கி²ணாய தி³ஸாய உத³கஸ்ஸ
ஆயமுக²ங், தே³வோ ச ந காலேன காலங் ஸம்மாதா⁴ரங் அனுப்பவெச்செ²ய்ய. அத² கோ²
தம்ஹாவ உத³கரஹதா³ ஸீதா வாரிதா⁴ரா உப்³பி⁴ஜ்ஜித்வா தமேவ உத³கரஹத³ங் ஸீதேன
வாரினா அபி⁴ஸந்தெ³ய்ய பரிஸந்தெ³ய்ய பரிபூரெய்ய பரிப்ப²ரெய்ய, நாஸ்ஸ கிஞ்சி
ஸப்³பா³வதோ உத³கரஹத³ஸ்ஸ ஸீதேன வாரினா அப்பு²டங் அஸ்ஸ. ஏவமேவ கோ²,
பி⁴க்க²வே, பி⁴க்கு² இமமேவ காயங் ஸமாதி⁴ஜேன பீதிஸுகே²ன அபி⁴ஸந்தே³தி
பரிஸந்தே³தி பரிபூரேதி பரிப்ப²ரதி, நாஸ்ஸ கிஞ்சி ஸப்³பா³வதோ காயஸ்ஸ
ஸமாதி⁴ஜேன பீதிஸுகே²ன அப்பு²டங் ஹோதி.
429.
‘‘புன சபரங், பி⁴க்க²வே, பி⁴க்கு² பீதியா ச விராகா³ உபெக்க²கோ ச விஹரதி,
ஸதோ ச ஸம்பஜானோ, ஸுக²ஞ்ச காயேன படிஸங்வேதே³தி, யங் தங் அரியா ஆசிக்க²ந்தி –
‘உபெக்க²கோ ஸதிமா ஸுக²விஹாரீ’தி ததியங் ஜா²னங் உபஸம்பஜ்ஜ விஹரதி. ஸோ இமமேவ
காயங் நிப்பீதிகேன ஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி,
நாஸ்ஸ கிஞ்சி ஸப்³பா³வதோ காயஸ்ஸ நிப்பீதிகேன ஸுகே²ன அப்பு²டங் ஹோதி.
ஸெய்யதா²பி, பி⁴க்க²வே, உப்பலினியங் வா பது³மினியங் வா புண்ட³ரீகினியங் வா
அப்பேகச்சானி உப்பலானி வா பது³மானி வா புண்ட³ரீகானி வா உத³கே ஜாதானி உத³கே
ஸங்வட்³டா⁴னி உத³கானுக்³க³தானி அந்தோனிமுக்³க³போஸீனி, தானி யாவ சக்³கா³ யாவ
ச மூலா ஸீதேன வாரினா அபி⁴ஸன்னானி பரிஸன்னானி பரிபூரானி பரிப்பு²டானி, நாஸ்ஸ [ந நேஸங் (ஸீ॰)]
கிஞ்சி ஸப்³பா³வதங் உப்பலானங் வா பது³மானங் வா புண்ட³ரீகானங் வா ஸீதேன
வாரினா அப்பு²டங் அஸ்ஸ. ஏவமேவ கோ², பி⁴க்க²வே, பி⁴க்கு² இமமேவ காயங்
நிப்பீதிகேன ஸுகே²ன அபி⁴ஸந்தே³தி பரிஸந்தே³தி பரிபூரேதி பரிப்ப²ரதி, நாஸ்ஸ
கிஞ்சி ஸப்³பா³வதோ காயஸ்ஸ நிப்பீதிகேன ஸுகே²ன அப்பு²டங் ஹோதி.
430. ‘‘புன
சபரங், பி⁴க்க²வே, பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா,
புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா, அது³க்க²மஸுக²ங்
உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹரதி. ஸோ இமமேவ
காயங் பரிஸுத்³தே⁴ன சேதஸா பரியோதா³தேன ப²ரித்வா நிஸின்னோ ஹோதி ,
நாஸ்ஸ கிஞ்சி ஸப்³பா³வதோ காயஸ்ஸ பரிஸுத்³தே⁴ன சேதஸா பரியோதா³தேன அப்பு²டங்
ஹோதி. ஸெய்யதா²பி, பி⁴க்க²வே, புரிஸோ ஓதா³தேன வத்தே²ன ஸஸீஸங் பாருபெத்வா
நிஸின்னோ அஸ்ஸ, நாஸ்ஸ கிஞ்சி ஸப்³பா³வதோ காயஸ்ஸ
ஓதா³தேன வத்தே²ன அப்பு²டங் அஸ்ஸ. ஏவமேவ கோ², பி⁴க்க²வே, பி⁴க்கு² இமமேவ
காயங் பரிஸுத்³தே⁴ன சேதஸா பரியோதா³தேன ப²ரித்வா நிஸின்னோ ஹோதி, நாஸ்ஸ
கிஞ்சி ஸப்³பா³வதோ காயஸ்ஸ பரிஸுத்³தே⁴ன சேதஸா பரியோதா³தேன அப்பு²டங் ஹோதி.
431.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே
புப்³பே³னிவாஸானுஸ்ஸதிஞாணாய சித்தங் அபி⁴னின்னாமேதி. ஸோ அனேகவிஹிதங்
புப்³பே³னிவாஸங் அனுஸ்ஸரதி, ஸெய்யதி²த³ங் – ஏகம்பி
ஜாதிங், த்³வேபி ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங்
புப்³பே³னிவாஸங் அனுஸ்ஸரதி. ஸெய்யதா²பி, பி⁴க்க²வே, புரிஸோ ஸகம்ஹா கா³மா
அஞ்ஞங் கா³மங் க³ச்செ²ய்ய, தம்ஹாபி கா³மா அஞ்ஞங் கா³மங் க³ச்செ²ய்ய, ஸோ
தம்ஹா கா³மா ஸகங்யேவ கா³மங் பச்சாக³ச்செ²ய்ய. தஸ்ஸ ஏவமஸ்ஸ – ‘அஹங் கோ²
ஸகம்ஹா கா³மா அமுங் கா³மங் அக³ச்சி²ங் [அக³ச்சி²ங் (ஸீ॰ ஸ்யா॰ கங்॰ பீ॰)],
தத்ரபி ஏவங் அட்டா²ஸிங் ஏவங் நிஸீதி³ங் ஏவங் அபா⁴ஸிங் ஏவங் துண்ஹீ
அஹோஸிங்; தம்ஹாபி கா³மா அமுங் கா³மங் அக³ச்சி²ங், தத்ரபி ஏவங் அட்டா²ஸிங்
ஏவங் நிஸீதி³ங் ஏவங் அபா⁴ஸிங் ஏவங் துண்ஹீ அஹோஸிங்; ஸொம்ஹி தம்ஹா கா³மா
ஸகங்யேவ கா³மங் பச்சாக³தோ’தி. ஏவமேவ கோ², பி⁴க்க²வே, பி⁴க்கு² அனேகவிஹிதங்
புப்³பே³னிவாஸங் அனுஸ்ஸரதி, ஸெய்யதி²த³ங் – ஏகம்பி ஜாதிங் த்³வேபி
ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங்
அனுஸ்ஸரதி.
432.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே
விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஸத்தானங்
சுதூபபாதஞாணாய சித்தங் அபி⁴னின்னாமேதி. ஸோ தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே, ஸுக³தே து³க்³க³தே, யதா²கம்மூபகே³ ஸத்தே பஜானாதி…பே॰… ஸெய்யதா²பி, பி⁴க்க²வே, த்³வே அகா³ரா ஸத்³வாரா [ஸன்னத்³வாரா (க॰)]. தத்த² சக்கு²மா புரிஸோ மஜ்ஜே² டி²தோ பஸ்ஸெய்ய மனுஸ்ஸே கே³ஹங் பவிஸந்தேபி நிக்க²மந்தேபி, அனுசங்கமந்தேபி அனுவிசரந்தேபி .
ஏவமேவ கோ², பி⁴க்க²வே, பி⁴க்கு² தி³ப்³பே³ன சக்கு²னா விஸுத்³தே⁴ன
அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே
து³ப்³ப³ண்ணே, ஸுக³தே து³க்³க³தே யதா²கம்மூபகே³ ஸத்தே பஜானாதி…பே॰….
433. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே
டி²தே ஆனேஞ்ஜப்பத்தே ஆஸவானங் க²யஞாணாய சித்தங் அபி⁴னின்னாமேதி. ஸோ ‘இத³ங்
து³க்க²’ந்தி யதா²பூ⁴தங் பஜானாதி, ‘அயங் து³க்க²ஸமுத³யோ’தி யதா²பூ⁴தங்
பஜானாதி, ‘அயங் து³க்க²னிரோதோ⁴’தி யதா²பூ⁴தங் பஜானாதி, ‘அயங்
து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி. ‘இமே ஆஸவா’தி
யதா²பூ⁴தங் பஜானாதி, ‘அயங் ஆஸவஸமுத³யோ’தி யதா²பூ⁴தங் பஜானாதி, ‘அயங்
ஆஸவனிரோதோ⁴’தி யதா²பூ⁴தங் பஜானாதி, ‘அயங் ஆஸவனிரோத⁴கா³மினீ படிபதா³’தி
யதா²பூ⁴தங் பஜானாதி. தஸ்ஸ ஏவங் ஜானதோ ஏவங் பஸ்ஸதோ காமாஸவாபி சித்தங்
விமுச்சதி, ப⁴வாஸவாபி சித்தங் விமுச்சதி, அவிஜ்ஜாஸவாபி சித்தங் விமுச்சதி.
விமுத்தஸ்மிங் விமுத்தமிதி ஞாணங் ஹோதி – ‘கீ²ணா ஜாதி, வுஸிதங்
ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி.
‘‘ஸெய்யதா²பி, பி⁴க்க²வே, பப்³ப³தஸங்கே²பே உத³கரஹதோ³
அச்சோ² விப்பஸன்னோ அனாவிலோ. தத்த² சக்கு²மா புரிஸோ தீரே டி²தோ பஸ்ஸெய்ய
ஸிப்பிஸம்பு³கம்பி [ஸிப்பிகஸம்பு³கம்பி (ஸ்யா॰ கங்॰ க॰)]
ஸக்க²ரகத²லம்பி மச்ச²கு³ம்ப³ம்பி, சரந்தம்பி திட்ட²ந்தம்பி. தஸ்ஸ ஏவமஸ்ஸ –
‘அயங் கோ² உத³கரஹதோ³ அச்சோ² விப்பஸன்னோ அனாவிலோ. தத்ரிமே ஸிப்பிஸம்பு³காபி
ஸக்க²ரகத²லாபி மச்ச²கு³ம்பா³பி சரந்திபி திட்ட²ந்திபீதி . ஏவமேவ கோ², பி⁴க்க²வே, பி⁴க்கு² ‘இத³ங் து³க்க²’ந்தி யதா²பூ⁴தங் பஜானாதி…பே॰… நாபரங் இத்த²த்தாயாதி பஜானாதி.
434.
‘‘அயங் வுச்சதி, பி⁴க்க²வே, பி⁴க்கு² ‘ஸமணோ’ இதிபி ‘ப்³ராஹ்மணோ’இதிபி
‘ந்ஹாதகோ’இதிபி ‘வேத³கூ³’இதிபி ‘ஸொத்தியோ’இதிபி ‘அரியோ’இதிபி ‘அரஹங்’இதிபி.
கத²ஞ்ச, பி⁴க்க²வே, பி⁴க்கு² ஸமணோ ஹோதி? ஸமிதாஸ்ஸ ஹொந்தி பாபகா அகுஸலா
த⁴ம்மா, ஸங்கிலேஸிகா, போனொப்³ப⁴விகா, ஸத³ரா, து³க்க²விபாகா , ஆயதிங், ஜாதிஜராமரணியா. ஏவங் கோ², பி⁴க்க²வே, பி⁴க்கு² ஸமணோ ஹோதி.
‘‘கத²ஞ்ச, பி⁴க்க²வே, பி⁴க்கு² ப்³ராஹ்மணோ ஹோதி? பா³ஹிதாஸ்ஸ ஹொந்தி பாபகா அகுஸலா த⁴ம்மா , ஸங்கிலேஸிகா, போனொப்³ப⁴விகா, ஸத³ரா, து³க்க²விபாகா, ஆயதிங், ஜாதிஜராமரணியா. ஏவங் கோ², பி⁴க்க²வே, பி⁴க்கு² ப்³ராஹ்மணோ ஹோதி.
‘‘கத²ஞ்ச, பி⁴க்க²வே, பி⁴க்கு² ந்ஹாதகோ [நஹாதகோ (ஸீ॰ ஸ்யா॰ கங்॰ பீ॰)]
ஹோதி? ந்ஹாதாஸ்ஸ ஹொந்தி பாபகா அகுஸலா த⁴ம்மா, ஸங்கிலேஸிகா, போனொப்³ப⁴விகா,
ஸத³ரா, து³க்க²விபாகா, ஆயதிங், ஜாதிஜராமரணியா. ஏவங் கோ², பி⁴க்க²வே,
பி⁴க்கு² ந்ஹாதகோ ஹோதி.
‘‘கத²ஞ்ச, பி⁴க்க²வே, பி⁴க்கு² வேத³கூ³ ஹோதி?
விதி³தாஸ்ஸ ஹொந்தி பாபகா அகுஸலா த⁴ம்மா, ஸங்கிலேஸிகா, போனொப்³ப⁴விகா,
ஸத³ரா, து³க்க²விபாகா, ஆயதிங், ஜாதிஜராமரணியா. ஏவங் கோ², பி⁴க்க²வே,
பி⁴க்கு² வேத³கூ³ ஹோதி.
‘‘கத²ஞ்ச, பி⁴க்க²வே, பி⁴க்கு² ஸொத்தியோ ஹோதி?
நிஸ்ஸுதாஸ்ஸ ஹொந்தி பாபகா அகுஸலா த⁴ம்மா, ஸங்கிலேஸிகா, போனொப்³ப⁴விகா,
ஸத³ரா, து³க்க²விபாகா, ஆயதிங், ஜாதிஜராமரணியா. ஏவங் கோ², பி⁴க்க²வே,
பி⁴க்கு² ஸொத்தியோ ஹோதி.
‘‘கத²ஞ்ச, பி⁴க்க²வே, பி⁴க்கு² அரியோ ஹோதி ?
ஆரகாஸ்ஸ ஹொந்தி பாபகா அகுஸலா த⁴ம்மா, ஸங்கிலேஸிகா, போனொப்³ப⁴விகா, ஸத³ரா,
து³க்க²விபாகா, ஆயதிங், ஜாதிஜராமரணியா. ஏவங் கோ², பி⁴க்க²வே, பி⁴க்கு²
அரியோ ஹோதி.
‘‘கத²ஞ்ச, பி⁴க்க²வே, பி⁴க்கு² அரஹங் ஹோதி? ஆரகாஸ்ஸ
ஹொந்தி பாபகா அகுஸலா த⁴ம்மா, ஸங்கிலேஸிகா, போனொப்³ப⁴விகா, ஸத³ரா,
து³க்க²விபாகா, ஆயதிங், ஜாதிஜராமரணியா. ஏவங் கோ², பி⁴க்க²வே, பி⁴க்கு²
அரஹங் ஹோதீ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
மஹாஅஸ்ஸபுரஸுத்தங் நிட்டி²தங் நவமங்.
10. சூளஅஸ்ஸபுரஸுத்தங்
435. ஏவங்
மே ஸுதங் – ஏகங் ஸமயங் ப⁴க³வா அங்கே³ஸு விஹரதி அஸ்ஸபுரங் நாம அங்கா³னங்
நிக³மோ. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி.
‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘ஸமணா
ஸமணாதி வோ, பி⁴க்க²வே, ஜனோ ஸஞ்ஜானாதி. தும்ஹே ச பன ‘கே தும்ஹே’தி புட்டா²
ஸமானா ‘ஸமணாம்ஹா’தி படிஜானாத². தேஸங் வோ, பி⁴க்க²வே, ஏவங்ஸமஞ்ஞானங் ஸதங்
ஏவங்படிஞ்ஞானங் ஸதங் – ‘யா ஸமணஸாமீசிப்படிபதா³ தங் படிபஜ்ஜிஸ்ஸாம; ஏவங் நோ
அயங் அம்ஹாகங் ஸமஞ்ஞா ச ஸச்சா ப⁴விஸ்ஸதி படிஞ்ஞா ச பூ⁴தா; யேஸஞ்ச மயங்
சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரங் பரிபு⁴ஞ்ஜாம, தேஸங் தே
காரா அம்ஹேஸு மஹப்ப²லா ப⁴விஸ்ஸந்தி மஹானிஸங்ஸா, அம்ஹாகஞ்சேவாயங்
பப்³ப³ஜ்ஜா அவஞ்ஜா² ப⁴விஸ்ஸதி ஸப²லா ஸஉத்³ரயா’தி. ஏவஞ்ஹி வோ, பி⁴க்க²வே,
ஸிக்கி²தப்³ப³ங்.
436.
‘‘கத²ஞ்ச, பி⁴க்க²வே, பி⁴க்கு² ந ஸமணஸாமீசிப்படிபத³ங் படிபன்னோ ஹோதி? யஸ்ஸ
கஸ்ஸசி, பி⁴க்க²வே, பி⁴க்கு²னோ அபி⁴ஜ்ஜா²லுஸ்ஸ அபி⁴ஜ்ஜா² அப்பஹீனா ஹோதி,
ப்³யாபன்னசித்தஸ்ஸ ப்³யாபாதோ³ அப்பஹீனோ ஹோதி, கோத⁴னஸ்ஸ கோதோ⁴ அப்பஹீனோ
ஹோதி, உபனாஹிஸ்ஸ உபனாஹோ அப்பஹீனோ ஹோதி, மக்கி²ஸ்ஸ மக்கோ² அப்பஹீனோ ஹோதி,
பளாஸிஸ்ஸ பளாஸோ அப்பஹீனோ ஹோதி, இஸ்ஸுகிஸ்ஸ இஸ்ஸா அப்பஹீனா ஹோதி, மச்ச²ரிஸ்ஸ
மச்ச²ரியங் அப்பஹீனங் ஹோதி , ஸட²ஸ்ஸ ஸாடெ²ய்யங்
அப்பஹீனங் ஹோதி, மாயாவிஸ்ஸ மாயா அப்பஹீனா ஹோதி, பாபிச்ச²ஸ்ஸ பாபிகா இச்சா²
அப்பஹீனா ஹோதி, மிச்சா²தி³ட்டி²கஸ்ஸ மிச்சா²தி³ட்டி² அப்பஹீனா ஹோதி –
இமேஸங் கோ² அஹங், பி⁴க்க²வே, ஸமணமலானங் ஸமணதோ³ஸானங் ஸமணகஸடானங் ஆபாயிகானங்
டா²னானங் து³க்³க³திவேத³னியானங் அப்பஹானா ‘ந ஸமணஸாமீசிப்படிபத³ங்
படிபன்னோ’தி வதா³மி. ஸெய்யதா²பி, பி⁴க்க²வே, மதஜங் நாம ஆவுத⁴ஜாதங்
உப⁴தோதா⁴ரங் பீதனிஸிதங். தத³ஸ்ஸ ஸங்கா⁴டியா ஸம்பாருதங் ஸம்பலிவேடி²தங்.
ததூ²பமாஹங், பி⁴க்க²வே, இமஸ்ஸ பி⁴க்கு²னோ பப்³ப³ஜ்ஜங் வதா³மி.
437.
‘‘நாஹங், பி⁴க்க²வே, ஸங்கா⁴டிகஸ்ஸ ஸங்கா⁴டிதா⁴ரணமத்தேன ஸாமஞ்ஞங் வதா³மி.
நாஹங், பி⁴க்க²வே, அசேலகஸ்ஸ அசேலகமத்தேன ஸாமஞ்ஞங் வதா³மி. நாஹங்,
பி⁴க்க²வே, ரஜோஜல்லிகஸ்ஸ ரஜோஜல்லிகமத்தேன ஸாமஞ்ஞங் வதா³மி. நாஹங்,
பி⁴க்க²வே , உத³கோரோஹகஸ்ஸ உத³கோரோஹணமத்தேன [உத³கோரோஹகமத்தேன (ஸீ॰ பீ॰)] ஸாமஞ்ஞங் வதா³மி. நாஹங், பி⁴க்க²வே, ருக்க²மூலிகஸ்ஸ ருக்க²மூலிகமத்தேன
ஸாமஞ்ஞங் வதா³மி. நாஹங், பி⁴க்க²வே, அப்³போ⁴காஸிகஸ்ஸ அப்³போ⁴காஸிகமத்தேன
ஸாமஞ்ஞங் வதா³மி. நாஹங், பி⁴க்க²வே, உப்³ப⁴ட்ட²கஸ்ஸ உப்³ப⁴ட்ட²கமத்தேன
ஸாமஞ்ஞங் வதா³மி. நாஹங், பி⁴க்க²வே, பரியாயப⁴த்திகஸ்ஸ பரியாயப⁴த்திகமத்தேன
ஸாமஞ்ஞங் வதா³மி. நாஹங், பி⁴க்க²வே, மந்தஜ்ஜா²யகஸ்ஸ மந்தஜ்ஜா²யகமத்தேன
ஸாமஞ்ஞங் வதா³மி. நாஹங், பி⁴க்க²வே, ஜடிலகஸ்ஸ ஜடாதா⁴ரணமத்தேன ஸாமஞ்ஞங்
வதா³மி.
‘‘ஸங்கா⁴டிகஸ்ஸ சே, பி⁴க்க²வே, ஸங்கா⁴டிதா⁴ரணமத்தேன அபி⁴ஜ்ஜா²லுஸ்ஸ
அபி⁴ஜ்ஜா² பஹீயேத², ப்³யாபன்னசித்தஸ்ஸ ப்³யாபாதோ³ பஹீயேத², கோத⁴னஸ்ஸ கோதோ⁴
பஹீயேத², உபனாஹிஸ்ஸ உபனாஹோ பஹீயேத², மக்கி²ஸ்ஸ மக்கோ² பஹீயேத², பளாஸிஸ்ஸ
பளாஸோ பஹீயேத², இஸ்ஸுகிஸ்ஸ இஸ்ஸா பஹீயேத², மச்ச²ரிஸ்ஸ மச்ச²ரியங் பஹீயேத²,
ஸட²ஸ்ஸ ஸாடெ²ய்யங் பஹீயேத², மாயாவிஸ்ஸ மாயா பஹீயேத², பாபிச்ச²ஸ்ஸ பாபிகா
இச்சா² பஹீயேத², மிச்சா²தி³ட்டி²கஸ்ஸ மிச்சா²தி³ட்டி² பஹீயேத², தமேனங்
மித்தாமச்சா ஞாதிஸாலோஹிதா ஜாதமேவ நங் ஸங்கா⁴டிகங் கரெய்யுங்,
ஸங்கா⁴டிகத்தமேவ [ஸங்கா⁴டீகத்தே சேவ (க॰)]
ஸமாத³பெய்யுங் – ‘ஏஹி த்வங், ப⁴த்³ரமுக², ஸங்கா⁴டிகோ ஹோஹி, ஸங்கா⁴டிகஸ்ஸ தே
ஸதோ ஸங்கா⁴டிதா⁴ரணமத்தேன அபி⁴ஜ்ஜா²லுஸ்ஸ அபி⁴ஜ்ஜா² பஹீயிஸ்ஸதி,
ப்³யாபன்னசித்தஸ்ஸ ப்³யாபாதோ³ பஹீயிஸ்ஸதி, கோத⁴னஸ்ஸ கோதோ⁴ பஹீயிஸ்ஸதி,
உபனாஹிஸ்ஸ உபனாஹோ பஹீயிஸ்ஸதி, மக்கி²ஸ்ஸ மக்கோ² பஹீயிஸ்ஸதி, பளாஸிஸ்ஸ பளாஸோ
பஹீயிஸ்ஸதி, இஸ்ஸுகிஸ்ஸ இஸ்ஸா பஹீயிஸ்ஸதி, மச்ச²ரிஸ்ஸ மச்ச²ரியங்
பஹீயிஸ்ஸதி, ஸட²ஸ்ஸ ஸாடெ²ய்யங் பஹீயிஸ்ஸதி, மாயாவிஸ்ஸ மாயா பஹீயிஸ்ஸதி,
பாபிச்ச²ஸ்ஸ பாபிகா இச்சா² பஹீயிஸ்ஸதி, மிச்சா²தி³ட்டி²கஸ்ஸ
மிச்சா²தி³ட்டி² பஹீயிஸ்ஸதீ’தி. யஸ்மா ச கோ² அஹங், பி⁴க்க²வே,
ஸங்கா⁴டிகம்பி இதே⁴கச்சங் பஸ்ஸாமி அபி⁴ஜ்ஜா²லுங் ப்³யாபன்னசித்தங் கோத⁴னங்
உபனாஹிங் மக்கி²ங் பளாஸிங் இஸ்ஸுகிங் மச்ச²ரிங் ஸட²ங் மாயாவிங் பாபிச்ச²ங்
மிச்சா²தி³ட்டி²கங், தஸ்மா ந ஸங்கா⁴டிகஸ்ஸ ஸங்கா⁴டிதா⁴ரணமத்தேன ஸாமஞ்ஞங்
வதா³மி.
‘‘அசேலகஸ்ஸ சே, பி⁴க்க²வே…பே॰… ரஜோஜல்லிகஸ்ஸ சே, பி⁴க்க²வே…பே॰… உத³கோரோஹகஸ்ஸ சே, பி⁴க்க²வே…பே॰… ருக்க²மூலிகஸ்ஸ
சே, பி⁴க்க²வே…பே॰… அப்³போ⁴காஸிகஸ்ஸ சே, பி⁴க்க²வே…பே॰… உப்³ப⁴ட்ட²கஸ்ஸ
சே, பி⁴க்க²வே…பே॰… பரியாயப⁴த்திகஸ்ஸ சே, பி⁴க்க²வே…பே॰… மந்தஜ்ஜா²யகஸ்ஸ
சே, பி⁴க்க²வே…பே॰… ஜடிலகஸ்ஸ சே, பி⁴க்க²வே, ஜடாதா⁴ரணமத்தேன அபி⁴ஜ்ஜா²லுஸ்ஸ அபி⁴ஜ்ஜா² பஹீயேத², ப்³யாபன்னசித்தஸ்ஸ ப்³யாபாதோ³ பஹீயேத² ,
கோத⁴னஸ்ஸ கோதோ⁴ பஹீயேத², உபனாஹிஸ்ஸ உபனாஹோ பஹீயேத², மக்கி²ஸ்ஸ மக்கோ²
பஹீயேத², பளாஸிஸ்ஸ பளாஸோ பஹீயேத², இஸ்ஸுகிஸ்ஸ இஸ்ஸா பஹீயேத², மச்ச²ரிஸ்ஸ
மச்ச²ரியங் பஹீயேத², ஸட²ஸ்ஸ ஸாடெ²ய்யங் பஹீயேத², மாயாவிஸ்ஸ மாயா பஹீயேத²,
பாபிச்ச²ஸ்ஸ பாபிகா இச்சா² பஹீயேத², மிச்சா²தி³ட்டி²கஸ்ஸ மிச்சா²தி³ட்டி²
பஹீயேத², தமேனங் மித்தாமச்சா ஞாதிஸாலோஹிதா ஜாதமேவ நங் ஜடிலகங் கரெய்யுங்,
ஜடிலகத்தமேவ [ஜடிலகத்தே சேவ (க॰)] ஸமாத³பெய்யுங்
– ‘ஏஹி த்வங், ப⁴த்³ரமுக², ஜடிலகோ ஹோஹி, ஜடிலகஸ்ஸ தே ஸதோ ஜடாதா⁴ரணமத்தேன
அபி⁴ஜ்ஜா²லுஸ்ஸ அபி⁴ஜ்ஜா² பஹீயிஸ்ஸதி ப்³யாபன்னசித்தஸ்ஸ
ப்³யாபாதோ³ பஹீயிஸ்ஸதி, கோத⁴னஸ்ஸ கோதோ⁴ பஹீயிஸ்ஸதி…பே॰… பாபிச்ச²ஸ்ஸ
பாபிகா இச்சா² பஹீயிஸ்ஸதி மிச்சா²தி³ட்டி²கஸ்ஸ மிச்சா²தி³ட்டி²
பஹீயிஸ்ஸதீ’தி. யஸ்மா ச கோ² அஹங், பி⁴க்க²வே, ஜடிலகம்பி இதே⁴கச்சங் பஸ்ஸாமி
அபி⁴ஜ்ஜா²லுங் ப்³யாபன்னசித்தங் கோத⁴னங் உபனாஹிங் மக்கி²ங் பலாஸிங்
இஸ்ஸுகிங் மச்ச²ரிங் ஸட²ங் மாயாவிங் பாபிச்ச²ங் மிச்சா²தி³ட்டி²ங், தஸ்மா ந ஜடிலகஸ்ஸ ஜடாதா⁴ரணமத்தேன ஸாமஞ்ஞங் வதா³மி.
438.
‘‘கத²ஞ்ச, பி⁴க்க²வே, பி⁴க்கு² ஸமணஸாமீசிப்படிபத³ங் படிபன்னோ ஹோதி? யஸ்ஸ
கஸ்ஸசி, பி⁴க்க²வே, பி⁴க்கு²னோ அபி⁴ஜ்ஜா²லுஸ்ஸ அபி⁴ஜ்ஜா² பஹீனா ஹோதி,
ப்³யாபன்னசித்தஸ்ஸ ப்³யாபாதோ³ பஹீனோ ஹோதி, கோத⁴னஸ்ஸ கோதோ⁴ பஹீனோ ஹோதி,
உபனாஹிஸ்ஸ உபனாஹோ பஹீனோ ஹோதி, மக்கி²ஸ்ஸ மக்கோ² பஹீனோ ஹோதி, பளாஸிஸ்ஸ பளாஸோ
பஹீனோ ஹோதி, இஸ்ஸுகிஸ்ஸ இஸ்ஸா பஹீனா ஹோதி, மச்ச²ரிஸ்ஸ மச்ச²ரியங் பஹீனங்
ஹோதி, ஸட²ஸ்ஸ ஸாடெ²ய்யங் பஹீனங் ஹோதி, மாயாவிஸ்ஸ மாயா பஹீனா ஹோதி,
பாபிச்ச²ஸ்ஸ பாபிகா இச்சா² பஹீனா ஹோதி, மிச்சா²தி³ட்டி²கஸ்ஸ
மிச்சா²தி³ட்டி² பஹீனா ஹோதி – இமேஸங் கோ² அஹங், பி⁴க்க²வே, ஸமணமலானங்
ஸமணதோ³ஸானங் ஸமணகஸடானங் ஆபாயிகானங் டா²னானங் து³க்³க³திவேத³னியானங் பஹானா
‘ஸமணஸாமீசிப்படிபத³ங் படிபன்னோ’தி வதா³மி. ஸோ ஸப்³பே³ஹி இமேஹி பாபகேஹி
அகுஸலேஹி த⁴ம்மேஹி விஸுத்³த⁴மத்தானங் ஸமனுபஸ்ஸதி ( ) [(விமுத்தமத்தானங் ஸமனுபஸ்ஸதி) (ஸீ॰ ஸ்யா॰ கங்॰ பீ॰)]. தஸ்ஸ ஸப்³பே³ஹி இமேஹி பாபகேஹி அகுஸலேஹி த⁴ம்மேஹி விஸுத்³த⁴மத்தானங் ஸமனுபஸ்ஸதோ ( ) [(விமுத்தமத்தானங் ஸமனுபஸ்ஸதோ) (ஸீ॰ ஸ்யா॰ கங்॰ பீ॰)] பாமோஜ்ஜங் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதி.
‘‘ஸோ மெத்தாஸஹக³தேன சேதஸா ஏகங் தி³ஸங் ப²ரித்வா
விஹரதி, ததா² து³தியங், ததா² ததியங், ததா² சதுத்த²ங். இதி உத்³த⁴மதோ⁴
திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் மெத்தாஸஹக³தேன சேதஸா
விபுலேன மஹக்³க³தேன அப்பமாணேன அவேரேன அப்³யாப³ஜ்ஜே²ன ப²ரித்வா விஹரதி. கருணாஸஹக³தேன
சேதஸா…பே॰… முதி³தாஸஹக³தேன சேதஸா…பே॰… உபெக்கா²ஸஹக³தேன சேதஸா ஏகங் தி³ஸங்
ப²ரித்வா விஹரதி, ததா² து³தியங், ததா² ததியங், ததா² சதுத்த²ங். இதி
உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங்
உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாப³ஜ்ஜே²ன
ப²ரித்வா விஹரதி. ஸெய்யதா²பி, பி⁴க்க²வே, பொக்க²ரணீ அச்சோ²த³கா ஸாதோத³கா
ஸீதோத³கா ஸேதகா ஸுபதித்தா² ரமணீயா. புரத்தி²மாய
சேபி தி³ஸாய புரிஸோ ஆக³ச்செ²ய்ய க⁴ம்மாபி⁴தத்தோ க⁴ம்மபரேதோ கிலந்தோ தஸிதோ
பிபாஸிதோ. ஸோ தங் பொக்க²ரணிங் ஆக³ம்ம வினெய்ய உத³கபிபாஸங் வினெய்ய
க⁴ம்மபரிளாஹங்…பே॰… பச்சி²மாய சேபி தி³ஸாய புரிஸோ ஆக³ச்செ²ய்ய…பே॰… உத்தராய
சேபி தி³ஸாய புரிஸோ ஆக³ச்செ²ய்ய…பே॰… த³க்கி²ணாய சேபி தி³ஸாய புரிஸோ
ஆக³ச்செ²ய்ய. யதோ குதோ சேபி நங் புரிஸோ ஆக³ச்செ²ய்ய க⁴ம்மாபி⁴தத்தோ
க⁴ம்மபரேதோ, கிலந்தோ தஸிதோ பிபாஸிதோ. ஸோ தங் பொக்க²ரணிங் ஆக³ம்ம வினெய்ய
உத³கபிபாஸங், வினெய்ய க⁴ம்மபரிளாஹங். ஏவமேவ கோ², பி⁴க்க²வே, க²த்தியகுலா
சேபி அகா³ரஸ்மா அனகா³ரியங் பப்³ப³ஜிதோ ஹோதி, ஸோ ச ததா²க³தப்பவேதி³தங்
த⁴ம்மவினயங் ஆக³ம்ம, ஏவங் மெத்தங் கருணங் முதி³தங் உபெக்க²ங் பா⁴வெத்வா
லப⁴தி அஜ்ஜ²த்தங் [தமஹங் (க॰)] வூபஸமங் [தமஹங் (க॰)].
அஜ்ஜ²த்தங் வூபஸமா ‘ஸமணஸாமீசிப்படிபத³ங் படிபன்னோ’தி வதா³மி.
ப்³ராஹ்மணகுலா சேபி…பே॰… வெஸ்ஸகுலா சேபி…பே॰… ஸுத்³த³குலா சேபி…பே॰… யஸ்மா
கஸ்மா சேபி குலா அகா³ரஸ்மா அனகா³ரியங் பப்³ப³ஜிதோ ஹோதி ,
ஸோ ச ததா²க³தப்பவேதி³தங் த⁴ம்மவினயங் ஆக³ம்ம, ஏவங் மெத்தங் கருணங்
முதி³தங் உபெக்க²ங் பா⁴வெத்வா லப⁴தி அஜ்ஜ²த்தங் வூபஸமங். அஜ்ஜ²த்தங் வூபஸமா
‘ஸமணஸாமீசிப்படிபத³ங் படிபன்னோ’தி வதா³மி.
‘‘க²த்தியகுலா சேபி அகா³ரஸ்மா
அனகா³ரியங் பப்³ப³ஜிதோ ஹோதி. ஸோ ச ஆஸவானங் க²யா அனாஸவங் சேதோவிமுத்திங்
பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ
விஹரதி. ஆஸவானங் க²யா ஸமணோ ஹோதி. ப்³ராஹ்மணகுலா சேபி…பே॰… வெஸ்ஸகுலா சேபி…
ஸுத்³த³குலா சேபி… யஸ்மா கஸ்மா சேபி குலா அகா³ரஸ்மா அனகா³ரியங் பப்³ப³ஜிதோ
ஹோதி, ஸோ ச ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஆஸவானங் க²யா ஸமணோ ஹோதீ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
சூளஅஸ்ஸபுரஸுத்தங் நிட்டி²தங் த³ஸமங்.
மஹாயமகவக்³கோ³ நிட்டி²தோ சதுத்தோ².
தஸ்ஸுத்³தா³னங் –
கி³ஞ்ஜகஸாலவனங் பரிஹரிதுங், பஞ்ஞவதோ புன ஸச்சகனிஸேதோ⁴;
முக²வண்ணபஸீத³னதாபிந்தோ³, கேவட்டஅஸ்ஸபுரஜடிலேன.